4DKYD-KABUM-03-GA-053

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma drag po'i bsnyen yig dngos grub kyi gter mdzod ma DAk+ki'i gces nor bka' rgya can
Location	mdo mkhyen brtse bka' 'bum Volume 3, Text 53, Pages (Folios to )
Author	མདོ་མཁྱེན་བརྩེ་
Less details More details
Citation
Genre	Recitation Manual - bsnyen yig

Tibetan Text

[edit]

༄༅། །བླ་མ་དྲག་པོའི་བསྙེན་ཡིག་དངོས་གྲུབ་ཀྱི་གཏེར་མཛོད་མ་ཌཱཀྐིའི་གཅེས་ནོར་བཀའ་རྒྱ་ཅན་བཞུགས། །རྩུ་གསུམ་རྒྱལ་ཀུན་འདུས་པའི་ཞལ། །མགོན་མེད་འགྲོ་བའི་གཉེན་གཅིག་པུ། །བླ་མ་ཨོ་རྒྱན་ཆོས་རྗེའི་ཞབས། །སྒོ་གསུམ་གུས་པས་ཕྱག་བགྱིའོ། །བླ་མ་དྲག་པོའི་བསྙེན་པ་རྒྱས་པར་འདོད་པས། གནས་ཁང་དང་དུས་ཚོད་ཡོ་བྱད་ལ་སོགས་སྤྲོས་པ་ཅན་ནི་མི་དགོས་ཏེ་ཐེག་པའི་རྩེ་རྒྱལ་ཨ་ཏི་ཨོ་གའི་ཁྱད་ཆོས་ཐུན་མོང་མ་ཡིན་པ་དབང་རབ་གཅིག་ཆར་བའི་ནོར་སྐལ་བླ་ན་མེད་པ་ཡིན་ནོ། །དེ་ཡང་གཞུང་དུ། གནས་དུས་ཡོ་བྱད་སྤྲོས་པ་བྲལ། །ཞེས་སོགས་དང༌། དེ་ཉིད་ལས། དང་པོ་ལས་ཅན་དག་གིས་འདི་མི་རྟོགས། །སེང་གེའི་འོ་མ་སྣོད་མིན་མི་ཆུམ་བཞིན། །ཡོངས་སུ་གྲགས་ན་ཕོངས་པའི་རྒྱུ་ལས་གང༌། །གསུངས་པ་ལྟར་རོ། །འོན་ཀྱང་རང་མཚམས་སྒྲུབ་དང་པོ་ལ་འཇུག་སྐབས་ཡིན་ན་དུས་ཚོད་ལ་ངེས་བཟུང་དང༌། ཡོ་བྱད་ཀྱི་སྤྲོས་པ་དབེན་ཀྱང་སྤྱི་ཆིངས་ཆོ་གའི་འགྲོས་ཙམ་ནི་དཔལ་ཆེན་སྐབས་ལྟར་བྱ་ཆོག་ལ། དེ་ཡང་དང་པོ་བདེ་བའི་གདན་ལ་བག་ཕེབས་པར་འཁོད་ལ་ཐུན་མོང་གི་སྔོན་འགྲོས་རྒྱུད་སྤྱངས་རྗེས་བླ་མའི་རྣལ་འབྱོར་དབང་བཞི་བླང་བ་དང་བཅས་མན་ངག་དམིགས་གནད་ལྡན་པས་གསོལ་བ་བཏབ་ཅིང་ཐུགས་ཡིད་བསྲེས་པར་བྱས་པས་ཉམས་ཆགས་དག་ཅིང་སྒྲུབ་པ་མཐར་ཕྱིན་པ་ཡིན་ནོ་གསུངས། དེ་ནས་སྐྱངས་སེམས་ཡན་ལག་བདུན་པ་ཚར་གསུམ་བྱ། སྡེ་བརྒྱད་གསེར་སྐྱེམས་མཆོད། མཚམས་ཐོ་འཛུགས་ཤིང་བསྐྱེད་བསྟིམ་ཕྲིན་ལས་བཅོལ་བ་སོགས་བྱ། གཉིས་པ་བགེགས་བསྐྲད་ནི་ཆོ་ག་གཞན་ལྟར་གཉིས་འཛིན་གྱི་བློས་ཁྲོ་བོ་ཡེ་ཤེས་པའི་དམག་ཚོགས་ཀྱིས་འདྲེར་འཛིན་འཁྲུལ་གཟུང་དམིགས་བྱར་བྱེད་པའི་རྒྱ་མཚོའི་ཕ་མཐར་བསད་པ་ལྟ་བུ་མིན་པ། །ང་ནི་ཡེ་ནས་རང་བྱུང་བཿ ཞེས་པའི་དོན་གདོད་ནས་ཁྲོ་བོ་འཆོལ་བའི་རང་བཞིན་དུ་དེ་ལྟར་ཡིན་པ་ལ་ཡིན་པའི་གནས་ལུགས་ཀྱི་དོན་དྲན་པར་བྱས་ནས་གློ་བུར་གཞུང་དུ། གཟུང་དང་འཛིན་པའི་རྒྱུ་རྐྱེན་ལསཿ མ་རིག་རྣམ་རྟོག་བགེགས་ཤར་བཿ དམིགས་མེད་བརྗོད་བྲལ་ངང་དུ་བསྐྲདཿ གསུངས་པ་ལྟར་སེམས་ཀྱི་དྲི་མ་སྦྱོང་བའི་རྟེན་འབྲེལ་ཙམ་དུ་དཔལ་ཆེན་ཕྱག་རྒྱ་རྒྱས་པའམ། ཡང་ན་ཕྱག་རྒྱ་གཅིག་པ་ལྟར་སྒོམས་ལ་སྣོད་དང་བཅུད་དུ་འཛིན་པའི་རྣམ་རྟོག་གི་བགེགས་བསྐྲད་པའོ། །གསུམ་པ་སྲུང་གུར་ནི་དག་པ་རབ་འབྱམས་ཀྱི་རོལ་བར་ཤེས་པར་བྱའོ། །བཞི་བ་བྱིན་འབེབས་ནི་སྣང་སྲིད་བླ་མར་ཤེས་པས་བྱིན་ཕབ་པའོ། །ལྔ་པ་མཆོད་པ་བྱིན་བརླབ་པ་ནི། ཕྱི་སྣོད་དག་པ་རབ་འབྱམས། ནང་བཅུད་དཔའ་བོ་མཁའ་འགྲོ། ཡུལ་དྲུག་འདོད་ཡོན་མཆོད་རྫས། དེ་ལས་འོད་ཟེར་སྤྲོ་བསྡུས་མཆོད་པའོ། །དངོས་གཞིའི་བསྐྱེད་རིམ་ཏིང་འཛིན་གསུམ་གྱི་གོ་དོན་བླང་བ་ནི། ཕྱི་རྟེན་གཞལ་ཡས་ཁང་དང༌། ནང་བརྟེན་པ་ཁྲོ་རྒྱལ་ཆེན་པོའི་ཞལ་ཕྱག་གི་ངེས་པ། སྐུའི་རྣམ་འགྱུར་ཕྱག་མཚན། གོ་ཆའི་ལྷ་ལྔ། སྲས་མཆོག་རིགས་བཞི། མཚམས་བཞིའི་ལྷ། དེའི་ཕྱི་རོལ་དྲེགས་པ་སྡེ་བརྒྱད། དེའི་རྒྱབ་ཏུ་ཁྲོ་བཅུ། གཞན་ཡང་རྩ་གསུམ་གྱི་ལྷ་ཚོགས། གིང་ལང་འབར་མ་སོགས་ཀྱི་དེ་ཉིད་སླར་བསྐྱེད་རིམ་རྒྱས་སྤྲོས་སྐབས་དང༌། དག་རྫོགས་སྨིན་གསུམ་སྦྱར་ཐོགས་རང་ཕྱོགས་གཏེར་རྙིང་དང་མཐུན་པར་གསུངས། དེ་ནས་རིགས་བདག་སྤྱན་དྲངས་དབང་བསྐུར་བ། སྤྱན་འདྲེན་མཆོད་བསྟོད་བཞུགས་གསོལ་གདབ་པ་ནི་གཞུང་གི་ཚིག་གསལ་ལྟར་རོ། །དེ་ནས་ཐུགས་དམ་བསྐུལ་ཞིང་བསྙེན་སྒྲུབ་ཆིག་དྲིལ་བཟླས་པ་བྱ་བ་ནི། རང་ཉིད་གུ་རུ་དྲག་པོ་ཡབ་ཡུམ་དུ་གསལ་བའི་སྐུ་ལུས་འཇའ་ཚོན་ནམ་དྭངས་ཤེལ་གྱི་མེ་ལོང་སྒྲིབ་གཡོགས་དང་བྲལ་བ་ལྟ་བུའི་ཐུགས་ཀར་ཡེ་ཤེས་སེམས་དཔའ་ཀུན་བཟང་མཐིང་གསལ་སྐུ་གཅེར་བུ་རྒྱན་ཐམས་ཅད་སྤངས་པ། ཞབས་སྐྱིལ་མོ་ཀྲུང༌། ཕྱག་དམ་རྒྱ་མཛད་པ་གསལ་བའི་ཐུགས་ཀའི་ཐད་དབུས་དྲང་པོར་ལུས་ཀྱི་བག་ཆགས་སྦྱང་ཕྱིར་སྐུའི་རྟེན་རིན་ཆེན་ཟུར་བརྒྱད་གསེར་བཙོ་མའི་མདོག་ལྟར་འོད་ཟེར་འཚེར་བ། དེའི་དབུས་སུ་ཉི་གདན། སེམས་ཀྱི་བག་ཆགས་སྦྱང་ཕྱིར་ཐུགས་ཀྱི་རྟེན་ཧཱུྃ་མཐིང་ཀ་གནམ་སྔོན་བཞུས་པའི་ཁུ་བས་བྲིས་པ་ལྟ་བུའི་རི་མོ་ཅན་ཧ་ཁོག་དཔུང་པ་མདུན་གཏད་པ། དེའི་མཐར་ངག་གི་བག་ཆགས་སྦྱང་ཕྱིར་གསུང་གི་རྟེན་སྔགས་ཀྱི་ཕྲེང་བ་དམར་པོ་བྱུ་རུའི་ཕྲེང་བ་ལ་ཏིལ་མར་བསྐུས་པའི་དཔེར་འོས་པ་ཡིག་ངོ་ནང་བསྟན་གཡས་བསྐོར་དུ་འཁྱིལ་བ་ལ་དམིགས་པ་གཏད། སྔགས་ཕྲེང་ལས་ཐུགས་རྗེ་བསྐུལ་བའི་འོད་ཟེར་ཁ་དོགས་ལྔ་ལྡན་ཐུགས་སྲོག་ལ་ཕོག་པ་ཙམ་གྱིས་ཐུགས་སྲོག་གཟི་བྱིན་འབར་ཏེ། དེ་ལས་འོད་ཟེར་མུ་མཐའ་མེད་པར་འཕྲོས། ཡེ་ཤེས་སེམས་དཔའི་ཞལ་ནས་ཐོན་དྲག་པོའི་རྔམ་སྐད་འཚར་བའི་ཞལ་ནས་ཐོན། འོད་ཟེར་གྱི་རྩེ་མོ་རེ་རེ་བཞིན་འདོད་པའི་ཡོན་ཏན་ལྔ་ལྡན་གྱི་མཆོད་རྫས་ཐོགས་པའི་ལྷ་མོ་མཛེས་ཤིང་ཡིད་དུ་འོང་བ་གྲངས་དང་མཐས་མི་གཏུགས་པ་ཉི་མའི་ཟེར་ལ་རྡུལ་འཁྲིགས་པ་བཞིན་སྤྲོས་ཏེ། སྟེང་ཕྱོགས་ནང་གསལ་ཐིམ་ལ་མ་རྨུགས་པའི་གདོད་མའི་སངས་རྒྱས་ཀུན་ཏུ་བཟང་པོའི་ཞིང་ཁམས་བསམ་བརྗོད་ཡུལ་ལས་འདས་པ། དེ་འོག་ངེས་པ་ལྔ་ལྡན་རང་སྣང་ལོངས་སྐུ་ཆེན་པོའི་ཞིང་ཁམས། དེ་འོག་སྒྱུ་འཕྲུལ་མེ་རི་འབར་བའི་ཞིང་ཁམས། དེ་འོག་ཤར་ན་མངོན་པར་དགའ་བ། ལྷོ་རུ་དཔལ་དང་ལྡན་པ། ནུབ་ཏུ་པདྨ་བརྩེགས་པ། བྱང་དུ་ལས་རབ་གྲུབ་པ། དབུས་སུ་སྟུག་པོ་བཀོད་པ་སྟེ་ཕྱེད་སྤྲུལ་ལོངས་སྐུའི་ཞིང་ཁམས་ལྔ། གཞན་ཡང་རྔ་ཡབ་བདེ་བ་ཆེན་པོའི་ཕོ་བྲང༌། ནུབ་ཕྱོགས་དྷུ་མ་ཐ་ལ་མཁའ་འགྲོའི་གྲོང་ཁྱེར། མཁའ་སྤྱོད་དང་ས་སྤྱོད་སྤྲུལ་པ་སྐུའི་ཞིང་ཁམས་ན་བཞུགས་པའི་རྩ་གསུམ་རྒྱལ་པ་རབ་འབྱམས་ཀྱི་ལྷ་ཚོགས་ཞི་དང་ཁྲོ་བོའི་རྣམ་འགྱུར་མ་ངེས་པ་སྣ་ཚོགས་སྟོན་པའི་བྱང་སེམས་ཆོས་ཀྱི་དབྱིངས་དང་མཉམ་ཞིང་བསམ་གྱིས་མི་ཁྱབ་པ་དཔེར་ན་ཏིལ་གྱི་གོང་བུ་ཁ་ཕྱེ་བ་ལྟར་བཞུགས་པ་ལ་བདེ་སྟོང་བདུད་རྩིས་མཆོད་པ་དེ་ཉིད་ཀྱི་གྲངས་དང་མཉམ་པའི་བསམ་བརྗོད་གཉིས་ཀའི་ཕ་མཐའ་མི་དཔོགས་པ་ཕུལ་བས། ལྷ་ཚོགས་དེ་དག་གི་ཐུགས་བདེ་སྟོང་གི་རོས་ཚིམ་ཞིང་ཡབ་ཡུམ་བདེ་བ་ཆེན་པོས་མྱོས་པའི་མཁྲིལ་སྤྱོར་མཛད། སླར་ཡང་སྐུ་དགྱེས་པའི་གར་བསྒྱུར། གསུང་དགྱེས་པའི་མགུར་གླུ་སྒྲོགས། ཐུགས་བདེ་ཆེན་གྱི་ཉམས་སྣང་འུར་ནས་སྤྲུལ་པའི་དཀྱིལ་འཁོར་རྟེན་དང་བརྟེན་པ་བཅས་སྐད་ཅིག་གིས་མདུན་གྱི་ནམ་མཁར་སྤྱན་དྲངས་འོད་དུ་ཞུ་ནས་གསང་བ་གསུམ་བླ་མ་དྲག་པོའི་རྡོ་རྗེ་གསུམ་ལ་འདྲེས། ཞིང་ཁམས་ཀྱི་བཀོད་པ་གཞལ་ཡས་ཁང་ལ་འདྲེས། དེ་དག་གི་ཐུགས་རྒྱུད་ན་བཞུགས་པའི་སྟོང་ཉིད་བདེ་བའི་ཡེ་ཤེས་ཀྱི་ངོ་བོ། མཁྱེན་བརྩེ་ནུས་གསུམ་གྱི་དཔལ་ཡོན་དང་བྱིན་རླབས་དངོས་གྲུབ་ཐམས་ཅད་ཐུགས་སྲོག་གི་ས་བོན་ལ་ཐིམ་པར་མོས་སོ། །དེའི་རྐྱེན་གྱིས་ཐུགས་སྲོག་གཟི་བྱིན་ལྷག་པར་རྒྱས་ཏེ་ཉི་མ་འཆར་ཀའི་ཟེར་ལྟར་བཀྲག་མདངས་གཟི་བརྗིད་མིག་གིས་མི་བཟོད་པ་ཙམ་དུ་གྱུར་པར་བསྒོམས་ལ་མཆོག་ཐུན་མོང་གི་དངོས་གྲུབ་ཐོབ་བྱུང་བར་མོས་སོ། །ཡང་སྔགས་ཕྲེང་ལས་འོད་ཟེར་འཕྲོས། གུ་རུ་དྲག་ཕོའི་ཞལ་དགུ་ལས་དམིགས་གསལ་མན་ངག་གི་ཞལ་ནས་ཐོན། ཁམས་གསུམ་རྒྱུད་དྲུག་ལམ་ལྔས་བསྡུས་པའི་ནང་བཅུད་ཀྱི་སེམས་ཅན་ཐམས་ཅད་ལ་ཕོག་པ་ཙམ་གྱིས་ལས་དང་ཉོན་མོངས་པ་ན་ཚ་སྡུག་བསྔལ་ཉེས་ལྟུང་དྲི་མའི་ཚོགས་བག་ཆགས་དང་བཅས་པ་ལྷག་མེད་དུ་གཞོབ་ཐུལ་གྱིས་བསྲེགས་ཤིང་སྣོད་དང་བཅུད་དུ་འཛིན་པའི་ཞེན་རྟོག་ཉི་མས་བ་མོར་བཞུ་བ་ལྕགས་བསྲེགས་ལ་མར་གྱིས་རེག་པ་ལྟར་འོད་དུ་ལྟེམ་གྱིས་ཞུ་ནས་ཕྱི་རྟེན་པ་གུ་རུ་དྲག་པོའི་གཞལ་ཡས་ཁང་དང་འདྲེས། ནང་བཅུད་བླ་མ་དྲག་པོའི་ལྷ་ཚོགས་སུ་གྱུར་པར་བསམས་ལ། སླར་འོད་ཟེར་ཚུར་འདུས་སྔགས་ཕྲེང་ལ་ཐིམ་པར་བསམ་མོ། །སྡེ་བརྒྱད་གནད་ལ་འབེབས་པ་ནི། ཡང་སྔགས་ཕྲེང་ལས་འོད་ཟེར་འཕྲོས། སྐུའི་དབྱིབས་བརྒྱུད་བདེ་བའི་མན་ངག་དང་ལྡན་པའི་ཞལ་ནས་ཐོན། སྣང་སྲིད་ཀྱི་དྲེགས་པ་སྡེ་བརྒྱད་ཐམས་ཅད་དང་ཁྱད་པར་སྙིགས་དུས་སེམས་ཅན་བསོད་ནམས་དམན་ཞིང་སྨོན་ལམ་ལོག་པའི་གདུག་འདྲེ། གཞན་ཡང་ཚེ་ཆོས་ལ་བར་དུ་གཅོད་པའི་དགྲ་གདོན་དགེགས་སྤྱི་དང་བྱེ་བྲག་ལ་ཕོག་པས། དེ་ཐམས་ཅད་ཀྱི་འཁོར་སྡེ་རིས་དང་བཅས་སྐྱོབ་བྱེད་རྒྱབ་རྟེན་དང་བཅས་ལ་སྤུ་རྡུལ་ལ་ལྕགས་སྲོག་འཕྲད་པའམ། དུས་མཐའི་བསྐལ་པའི་མེ་ལྕེས་རྩ་སྤུར་ཕྲ་མོ་ལ་རེག་པ་འཇི་བཞིན་མིང་མཐར་གཞོབ་ཐུལ་གྱི་ལྷག་མེད་དུ་བསྲེགས་ཤིང་འོད་དུ་བཞུས་ཤིང་ལུས་ངག་ཡིད་གསུམ། ཚེ་བསོད་དཔལ་འབྱོར་མཐུ་སྟོབས་ནུས་པ་གཟི་བརྗིད་བཀྲག་མདངས་ཐམས་ཅད་འུབ་ཀྱིས་བསྡུས་ཤིང་དྲངས་ཏེ་ཐུགས་སྲོག་སྔགས་ཕྲེང་དང་བཅས་པ་ལ་ཐིམ། དེ་དག་གི་རྣམ་ཤེས་དབྱིངས་ཀྱི་ཡུམ་ཆེན་མོའི་ཐུགས་ཀློང་དུ་འདྲེས། དེའི་རྐྱེན་གྱིས་གཙོ་འཁོར་གྱི་ལྷ་ཚོགས་ཐམས་ཅད་ཀྱང་སྐུའི་བཀྲག་མདངས་པདྨ་རཱ་གའི་ལྷུན་པོ་ལ་ཉི་འོད་འབུམ་གྱིས་འཁྱུད་པ་ལྟ་བུར་གྱུར། གསུང་གི་བཀྲག་མདངས་འབྲུག་སྟོང་དུས་གཅིག་ལྡིར་བའི་རང་སྒྲ་བཞིན་དུ་གྱུར། གཞན་ཡང་མཐུ་སྟོབས་ནུས་པ་རྫུ་འཕྲུལ་སོགས་བསམ་གྱིས་མི་ཁྱབ་པ་རྒྱས་ཏེ་ཁམས་གསུམ་ལས་རྣམ་པར་རྒྱལ་བའི་བདག་ཉིད་ཅན་དུ་གྱུར་པར་བསམ་ལ། རབ་ཆོས་ཉིད་ལྟ་བ་རྟོགས་པའི་རྣལ་འབྱོར་པ་ཡིན་ན་གདོད་ནས་མ་བསྐྱེད་ཡོངས་གྲུབ་ལྷ་ཡིན་དུས་དེ་ལ་དམིགས་པའི་ཁྱེར་སོ་གསར་སྤྲོས་མི་དགོས་ཏེ། གཞུང་ནས། ཡེ་ནས་དག་པ་སྐུ་གསུམ་ལྷཿ གསུངས་པ་ལྟར་རོ། །དེ་མིན་སྒོ་གསུམ་པོ་ཐ་མལ་དུ་མ་སོང་རྩེ་གཅིག་ཏིང་འཛིན་ཡེངས་མེད་དགོངས་པ་ནི། དེ་ཉིད་ལས། སྒྲར་གྲགས་སྔགས་དང་དྲན་རྟོག་ཐུགསཿ ཁྱེར་སོ་གསུམ་དང་མ་བྲལ་ནཿ འཁོར་བ་མ་སྤངས་གནས་སུ་དགཿ གསུངས་དོན་དྲན་བཞིན་པའི་ངང་དུ་བཟླ་བ་ལ་འབད། སྐབས་རེ་དམིགས་པའི་འཕྲོ་འདུ་མི་གསལ་ཞིང་བྱིང་རྨུགས་འཐིབ་པ་སོགས་བྱུང་ན། གཞུང་ལས། ཏིང་འཛིན་སེམས་དཔའི་མཐའ་བསྐོར་དུཿ སྔགས་ཕྲེང་འགལ་མེའི་འཁོར་ལོ་བཞིནཿ སྒྲ་དང་བཅས་ཏེ་འཁོར་བ་ལསཿ སེམས་བཟུང་སྣང་བ་ཧུར་བསྐྱེད་དོཿ ཞེས་པའི་དོན་ནམ་མཁའི་ཀླ྄ོང་ནས་སྤྲིན་གྱི་རྔ་གསང་འབུམ་དུས་གཅིག་ཏུ་ལྡིར་བ་དང༌། བུང་བ་ཚང་ཞིག་པ་ལྟར་རང་སྒྲ་དང་བཅས་འཁོར་བ་ལ་སེམས་གཏད་པའོ། །གནས་སྐབས་འདི་ཚོར། ཡེ་ཤེས་ལྷ་ཡི་ལུང་བསྟན་དང༌། བར་ཆོད་བགེགས་ཀྱི་མཚན་ལྟས་སོགས། ཆོསའཕྲུལ་སྣ་ཚོགས་གང་ལྟར་ཡང༌། །བཟང་ངན་རེ་དོགས་མི་བྱ་བར། །གནས་ལུགས་གཉུག་མའི་ཞལ་ལ་ལྟོས། །དེ་ཚེ་གཞུང་ལས། སྲིད་གསུམ་འཇིག་ཀྱང་མི་སྐྲག་པའིཿ འཇིགས་མེད་རྡོ་རྗེའི་དཔའ་ངར་བཟུངཿ གསུངས་བཞིན་ཐམས་ཅད་འཁྲུལ་སྣང་ཤ་སྟག་ཡིན་པ་ཐག་ཆོད་དགོས་ཞེས་བཀའ་གནང་འདུག །སྐབས་རེར་སྣང་བ་གཏད་མེད་རིག་པ་ཕྱད་ཕྱོད་ཀྱི་བརྗོད་བྲལ་ཉམས་ཤར་ཚེ་འདི་ནི་ཟབ་མོ་ཐུགས་ཀྱི་སྒྲུབ་པའི་ཐུགས་སྲོག་གི་ཧཱུྃ་གླུ་ཀྱུར་ཀྱུར་ལེན། དེ་ཁོ་ན་བཟླས་པས་ཆོག་པར་གསུངས་སོ། །གྲུབ་པའི་མཚན་མ་ནི་གཞུང་དུ་གསུངས་པ་ལྟར་རོ། །གཉིས་པ་སྒྲུབ་ཆེན་མདོ་ལིའི་བཟླས་པ་ནི། ཡེ་ཤེས་སེམས་དཔའི་ཐུགས་སྲོག་མཐར་སྔགས་ཕྲེང་མར་མེ་གཅིག་ལས་གཉིས་མཆེད་དང༌། ཆུ་ལས་ཆུ་བུར་ཐོལ་ཐོལ་རྡོལ་བའི་མཚུངས་དཔེར་འོས་པ་ལུ་གུ་རྒྱུད་དུ་བྱུང༌། ཡབ་ཀྱི་ཞལ་ནས་ཐོན། ཡུམ་གྱི་ཞལ་དུ་ཞུགས། ཐུགས་སྲོག་བྃ་ཡིག་ལ་སྔགས་ཕྲེང་གཡོན་བསྐོར་དུ་འཁོར། དེའི་འོད་ཀྱིས་ཐུགས་སྲོག་བསྐུལ་ལ་བ་ཙམ་གྱིས་དེ་ལས་འོད་ཟེར་ཁ་དོགས་ལྔ་ལྡན་འཕྲོས། སྟེང་ཞལ་ནས་ཐོན། དེ་ལས་འོད་ཟེར་མུ་དང་མཐའ་མེད་ཅིང་བསམ་བརྗོད་གཉིས་ཀའི་ཕ་རོལ་དུ་འདས་པ་ཕྱོགས་བཅུར་འཕྲོས། འོད་ཟེར་དེ་དག་རེ་རེའི་སྣེ་མོར་ཕྱི་སྒེག་བཞི། ནང་སྒེག་བཞི། གསང་བའི་རིག་པ་མ་ལྔ། འདོད་ཡོན་གྱི་ལྷ་མོ་གསུམ་ལ་སོགས་གཞོན་དུ་མ་བཅུ་དྲུག །གཞན་ཡང་མཆོད་རྫས་རྣམ་གྲངས་སྣ་ཚོགས་ཐོགས་པའི་ལྷ་མོ། བླ་མས་རྗེས་སུ་བཟུང་བའི་རྟེན་འབྲེལ་དུ་མཛེས་ཤིང་ཡིད་དུ་འོང་བ་མཐོང་ན་མི་མཐུན་པ་མེད༌། དཔེར་ན་དབྱིངས་ཕྱུག་མའི་ཀློང་དུ་གཟའ་སྐར་ཤར་བ་ལྟ་བུ། སངས་རྒྱས་སྤྱན་མའི་ཀློང་དུ་མེ་ཏོག་སྣ་ཚོགས་འགྲེམ་པ་ལྟ་བུ། མཁའ་ཁྱབ་རྒྱལ་བའི་ཞིང་ཁམས་ཀྱི་རྡུལ་གྲངས་མཉམ་པ་སྤྲོས། ཕྱོགས་བཅུ་དུས་བཞིའི་རྩ་གསུམ་རྒྱལ་བ་རབ་འབྱམས་ལ་བདེ་སྟོང་བདུད་རྩིས་མཆོད་པ་ཕུལ་བས་དགྱེས་པ། ཡབ་ཡུམ་བདེ་བའི་མཉམ་སྦྱོར་མཛད། སླར་ཡང་ཐུགས་རྗེས་ཆགས་བརྩེ་བ་ཆེན་པོས་དགོངས་བཞིན་དུ་དཀྱིལ་དང་འཁོར་གྱི་ལྷ་ཚོགས་ཐམས་ཅད་སྐད་ཅིག་གིས་མདུན་གྱི་ནམ་མཁར་ཁ་བ་བུ་ཡུག་འཚུབ་པ་ལྟར་བྱོན་འོད་དུ་ཞུ། ཐུགས་སྲོག་སྔགས་ཕྲེང་དང་བཅས་པ་ལ་ཐིམ་པས་གཟི་བྱིན་ལྷག་པར་འབར་ཞིང་ཟབ་མོ་སྔགས་ཀྱི་རང་སྒྲ་དང་བཅས་ཐུགས་སྲོག་ལ་གཡོན་བསྐོར་དུ་གདན་ལས་འཕགས་ཏེ་ལན་གསུམ་འཁོར་ནས་སྐུའི་དབྱིབས་བརྒྱུད་རྣལ་འབྱོར་མའི་མཁའ་ཀློང་ནས་ཐོན། ཡབ་ཀྱི་རྡོ་རྗེ་ནོར་བུ་ཞུགས་ཐུགས་སྲོག་གི་ས་བོན་ལ་འཁོར་ཞིང་སྔགས་ཕྲེང་རྣམས་རང་རང་ལ་ཐིམ་པར་བསམ། དེའི་རྐྱེན་གྱིས་དགའ་བ། མཆོག་དགའ། ཁྱད་པར་གྱི་དགའ་བ། བསམ་གྱིས་མི་ཁྱབ་པའི་དགའ་བ་སྟེ་བདེ་ཆེན་དགའ་བ་རྣམ་བཞིའི་རྩལ་དྲག་པོར་འབར་ཞིང་བསམ་གྱིས་མི་ཁྱབ་པའི་བདེ་བས་མྱོས་པའི་དོན་གྱི་ལུས་ཀྱི་རྔུལ་ཆུ་རྡོལ་བ་ལྟར་ཐུགས་ཀ་སོགས་སྐུ་ལུས་ཀྱི་ཆ་ཐམས་ཅད་བནས་བྱིན་རླབས་ཡེ་ཤེས་ཀྱི་འོད་ཟེར་མུ་མཐའ་མེད་པར་ཐོན་ནས་འཁོར་ལ་ཕོག །དེ་ཀུན་ཀྱང་བཀྲག་མདངས་གཟི་བརྗིད་པདྨ་རཱ་གའི་ལྷུན་པོར་ཉི་འོད་འབུམ་གྱིས་འཁྱུད་པ་ལྟར་དུ་གྱུར་ནས་ཞི་རྒྱས་དབང་དྲག་བཞི་ཡིས་ཕྲིན་ལས་རབ་འབྱམས་ཐོགས་མེད་དུ་སྒྲུབ་པར་བསམ་པ་དང༌། འཁོར་གྱི་ལྷ་ཚོགས་ཐམས་ཅད་ཀྱིས་འོད་ཟེར་བཀྱེས་པས་ཕྱི་སྣོད་འབྱུང་བ་ལྔ་ནང་བཅུད་སྐྱེ་འགྲོའི་ཚེ་བསོད་དཔལ་འབྱོར་ཏེ་མདོར་ན་སྣང་ཞིང་སྲིད་པའི་ཆོས་སོ་ཅོག་འོད་ཞུ་ནས་བཀྲག་མདངས་མཐུ་སྟོབས་ནུས་པ་སོགས་ཚོགས་ཀྱི་དཔལ་ཡོན་ཇི་སྙེད་མཆིས་པ། དེ་ཀུན་འོད་ཟེར་སྣེ་མོར་བསྡུས་ཏེ་རང་དང་འཁོར་གྱི་ལྷ་ཚོགས་ལ་ཐིམ་པས་དབང་དང་བྱིན་རླབས་དངོས་གྲུབ་ཐམས་ཅད་ཐོབ་བྱུང་བར་བསམ་པ་ནི་འཁོར་བྱིན་གྱིས་རློབས་པ་ཡིན། དེ་དག་གི་རིག་པ་ཡུམ་མཁར་འདྲེས་ནས་སྣོད་བཅུད་ཡོངས་བསྒྲལ་དག་ཞིང་དུ་བསྒྱུར་བར་བསམ་ལ་བཟླས་པ་ལ་འབད། ལས་སྦྱོར་དྲག་པོ་ཐོག་རྒོད་ནི། ཡང་བདག་ཉིད་པདྨ་དྲག་ཁྲོས་གསལ་བའི་ཐུགས་སྲོག་ལས་དྲག་པོའི་འོད་ཟེར་ཚ་ལ་རྩུབ་པ། རྣོ་ལ་མྱུར་བ་རྔམ་ལ་འབར་བ་གློག་ལྟར་འཁྱུགས་པ་ཞིག་འཕྲོས། སྐུའི་དབྱིབས་བརྒྱུད་གོ་ཆ་གསང་བའི་ལྷ་ལྔ་བསྐུལ། ལྷ་ལྔའི་སྐུའི་ཆ་ཐམས་ཅད་ལས་འོད་ཟེར་འཕྲོས། དྲག་རྩལ་རིགས་བཞི། རྟ་ནག་སེང་གདོང་ཀཱ་ལ་ཡ་བསྐུལ། དེ་ནས་འོད་འཕྲོས་འཁོར་ལྷ་ཚོགས་ཐམས་ཅད་བསྐུལ་བས། དེ་རྣམས་ཀྱང་སྙིགས་མའི་དུས་ཀྱི་རྒྱལ་འགོང་དམ་སྲི་ལོག་འདྲེན་གདུག་པ་ཅན་ཐམས་ཅད་ཚར་བཅད་པའི་ཕྱིར་དུ་མངོན་སྤྱོད་དྲག་པོའི་ལས་ལ་རྔམས་བཞིན་དུ་སྐུ་མི་སྡུག་སྲིན་པོ་ཁྲོས་པའི་ཟིལ་ཕྱུང༌། གསུང་མི་སྙན་ཛ་བྷྱོ་ཕཊཿགསུམ་གྱི་ངར་སྐད་སྒྲོགས། ཐུགས་དྲག་གཏུམ་སྙིང་རྗེ་ཁྲོས་པའི་ཞེ་སྡང་གི་ཤུགས་བསྐྱེད། དཀྱིལ་འཁོར་གྱི་བདག་པོའི་སྤྱི་གཙུག་ནས་བྱ་ཁྱུང་གི་དམག་ཚོགས། མེ་དབལ་རང་འདྲའི་དམག་ཚོགས། ཕྱག་མཚན་སྡིག་པ་དམར་ནག་ལས་སྡིག་པའི་དམག་ཚོགས། གཞན་ཡང་ཁྲོ་བོ་དང་ཁྲོ་མོ་སོགས་ལས་གཤིན་གྱི་ཕོ་ཉ་བསམ་གྱིས་མི་ཁྱབ་གླག་ནག་གཟན་ལ་འཇུམ་པ་ལྟར་མྱུར་བའི་ཤུགས་ཀྱིས་བསྐྱོད་པ་སྤྲོས་པས། སྲིད་པ་གསུམ་པོ་འདི་བསྐལ་པ་འཇིག་པའི་འུར་སྒྲ་བཞིན། གཡོ་རབ་ཏུ་གཡོ། འགུལ་རབ་ཏུ་འགུལ། ལྡེག་རབ་ཏུ་ལྡེག །ཤིག་ཤིག་ཡོམ་ཡོམ་དུ་གྱུར། དམིགས་བྱའི་བསོད་ནམས་དབང་ཐང་རླུང་རྟ་སྤུབ་པའི་མན་ངག་གི་གནད་ནི། སྟོན་པ་ཉན་ཐོས་རང་རྒྱལ་ནས་མྱ་ངན་ལས་འདས་པ་ཐམས་ཅད། མནར་མེད་དམྱལ་ཁམས་ཡན་ཆོད་རིགས་དྲུག་གི་སེམས་ཅན་འགྲོ་དང་མི་འགྲོ་ཐམས་ཅད་མདུན་དུ་བཀུག །མེ་དབལ་ཁྱུང་དང་སྡིག་པའི་དམག་ཚོགས་བསམ་གྱིས་མི་ཁྱབ་པས་བསད་བཅད་གཏུབ་ཅིང་རྡུལ་དུ་བརླགས་ནས་ཤ་ཁྲག་རུས་གསུམ་ལྷག་མ་མེད་པར་རོལ། ཁྱད་པར་ལོག་འདྲེན་གདོན་བགེགས་ཀྱི་ཚོགས་སྤྱི་དང༌། བྱེ་བྲག་རྒྱལ་བའི་བསྟན་པ་སེམས་ཅན་གྱི་བདེ་སྐྱིད་ཚེ་ཆོས་ལ་བར་དུ་གཅོད་པར་བྱེད་པའི་ལས་ངན་སྡིག་པོ་ཆེ་སྔར་བཀའ་དང་དམ་འོག་ཏུ་མ་འདུས་པའི་རིགས་གང་ཡིན་པ་ནི་བྱེའུ་ཕྲུག་ཁྲ་ཡིས་བམ་པ་དང༌། ཉ་མོ་ལྕགས་ཀྱུས་དྲངས་པ་བཞིན་དུ་བྲོས་ཤིང་འཁྱར་དབང་མེད་པར་མདུན་དུ་བཀུག །འཁྲུལ་གཟུགས་ཀྱི་ཕུང་ལྔ་རྡུལ་དུ་བརླག་ཕྱིར་ཁྲོ་རྒྱལ་ཆེན་པོའི་རྩ་ཕྱག་འོག་མ་གཉིས་ཀྱིས་སྒྲོལ་ཕུར་ཐུགས་ཀར་བསྒྲིལ། ཕྱག་མཚན་གྱི་སྡིག་པ་དམར་ནག་གཉིས་ཞབས་གཡས་ཟུར་ལ་བབ་ནས་རང་འདྲའི་སྤྲུལ་པའི་དམག་ཚོགས། ས་ཆེན་པོའི་རྡུལ་གྲངས་མཉམ་པར་སྤྲུལ། དེ་ནས་བསྒྲལ་བའི་ཞིང་དུ་གྱུར་པའི་ལུས་ལ་སྡིག་ཕྲུག་མ་ལ་རུབ་པ་ཇི་བཞིན་ལ་ལ་སྙིང་དུ་ཞུགས། ལ་ལ་གློ་བ། ལ་ལ་མཆིན་པ་སོགས་གནམ་ལྕགས་ཀྱི་ཐོག་ཕོག་པ་བཞིན་ཐལ་མར་ཕུག སྦུ་གུས་བཅུད་དྲངས་པ་བཞིན་དུ་ཤ་ཁྲག་རུས་གསུམ་དོན་ལྔ་སྣོད་དྲུག་དང་བཅས་པ་ལྷག་མེད་དུ་ཟོས་ཤིང༌། རྣམ་ཤེས་ནམ་ཞིག་བདག་ལྟ་མ་ཞིག་བར་དུ་ཧོམ་ཁུང་དུ་བྲུབ་བོ། །དེ་སྐབས་སུ་སྡིག་ཅན་དེ་ཉིད་ཀྱི་སྐད་ངན་གྱི་ཙིར་སྒྲ་གནམ་ས་ཁེངས་པར་བསྒྲགས་པའི་རྒྱུ་མཚན་དེས། དེ་ན་གནས་པའི་འཁོར་གྱི་སྡེ་བརྒྱད་གཙོ་བོ་དང༌། ཁམས་གསུམ་གྱི་དྲེགས་ཚོགས་མ་ལུས་ཤིང་ལུས་པ་མེད་པ་ཐམས་ཅད་སྔངས་སྐྲག་འདར་གསུམ་གྱི་ངང་ནས་དར་ཅིག་བརྒྱལ་ནས། སླར་ཡང་བཀའ་དམ་ལ་གནས་པའི་ཁས་བླངས་བྲོ་བོར་སྲོག་སྙིང་ཕུལ་ཏེ་ཞབས་འོག་ཏུ་ཚུད་པར་གྱུར། དེ་ནས་འོད་ཟེར་ཚུར་འདུས་པའི་སྣེ་མོར་དེ་དག་གི་བཀྲག་འོད་མདངས་གསུམ་ཚེ་དཔལ་ནུས་སྟོབས་ཡོད་ཚད་རྡོ་ཁབ་ལེན་གྱིས་ལྕགས་ཕྱེ་བླངས་བ་བཞིན་བླ་མ་ཁྲོས་པའི་རྡོ་རྗེ་གསུམ་ལ་འདྲེས། འོད་ཟེར་སྔགས་ཕྲེང་ལ་ཐིམ། ཡེ་ནས་ཆོས་ཀྱི་སྐུ་འདུ་མ་བྱས་པའི་རང་བཞིན་བསམ་གྱིས་མི་ཁྱབ་པའི་གནས་ལུགས་རྫོགས་པ་ཆེན་པོའི་ངང་མདངས་སྐྱོང་བཞིན་པར་བཟླས་པ་ལ་འབད་དོ། །འཆི་མེད་ཚེ་ཡི་སྒྲུབ་པ་ནི། རང་གཞུང་དུ་གསལ་ཆེ་བས་དེས་འཐུས་ལ་འོད་ཟེར་སྤྲོ་བསྡུས་དམིགས་གནད་ནི་གོང་དང་འདྲ། རྗེས་ཀྱི་རིམ་པ་ནི། འཛབ་མཇུག་བསྡུ་ཞིང་གསོལ་གདབ་མཆོད་བསྟོད་ནི་གཞུང་གི་ཚིག་གསལ་ཆེ་བས་དེ་ལྟར་ཆོག་པར་གསུངས། དེ་ཕན་འདི་ལ་བདག་དོན་དངོས་གྲུབ་ལེན་པ་སོགས་ནི་སྔར་འོད་ཟེར་སྤྲོ་བསྡུའི་སྐབས་དོན་གཉིས་སྒྲུབ་ཚར་བ་དེས་འཐུས་ལ་གསར་དུ་བསྐྱར་མི་དགོས་གསུངས། བསྡུ་རིམ་ནི། བསྐྱེད་རིམ་བསྒོམ་པས་ཆད་མཐའ་བསལ་ཞིང༌། ཆོས་ཉིད་ཀྱི་ངང་མདངས་དང་མི་འབྲལ་བས་རྟག་པའི་མཐའ་བསལ་བ་ཡིན་ཏེ། གཞུང་ལས། ཆད་མཐའ་བསལ་བ་བསྐྱེད་རིམ་ལྷ་བསྒོམས་ཏེཿ རྟག་མཐའ་བསལ་བ་ངང་མདངས་སྐྱོང་བའོ། །ཞེས་གསུངས་པ་ལྟར་ཡིན་གསུངས་སོ། །འདི་ལྟར་ཉམས་སུ་ལེན་པའི་གང་ཟག་དེ་གྲོལ་བའི་དུས་ཚད་ནམ་ཡིན་ན། དེ་ཉིད་ལས། ཉིན་གྱི་རྣལ་འབྱོར་ལྷ་དང་མ་བྲལ་ཞིངཿ མཚན་གྱི་རྣལ་འབྱོར་འོད་དང་མ་བྲལ་ནཿ ཆོས་ཉིད་བར་དོའི་སྣང་བ་ཤར་བའི་ཚེ༔ ང་དང་ལོངས་སྐུའི་ཞིང་དུ་མངོན་འཚང་རྒྱཿ ཞེས་གསུངས་ཏེ། དེ་ལྟར་ཡིན་པའི་རྒྱུ་མཚན་ཡང་དབང་རབ་ཚེ་འདིར་གྲོལ་ཚུལ་ནི་ཉིན་སྣང་སྣང་གྲགས་རིག་གསུམ་དཀྱིལ་འཁོར་གསུམ་ལས་གཡོ་བ་མེད་པ་དང༌། མཚན་སྣང་ལྷུན་གྲུབ་འོད་ལྔའི་ཟེར་མདངས་དང་མི་འབྲལ་བའི་གནས་སྐབས་རང་སྣང་ལོངས་སྐུའི་ཞིང་དུ་མངོན་འཚང་རྒྱ་བ་དོན་གྱི་དགོངས་པ་དང༌། དེ་བཞིན་དུ་དབང་པོ་འབྲིང་རྣམས་འཆི་ཁ། དབང་རྟུལ་བར་དོ་གྲོལ་བའི་ཚུལ་ཟབ་མོ་འདིའི་ཁྱད་ཆོས་ཐུན་མོང་མ་ཡིན་པ་བཀའ་ལུང་མན་ངག་བྱིན་རླབས་ཚན་ཆེ་བ་རྒྱ་མཚོ་ཙམ་གསུངས་པའི་ནང་ནས་རྟེན་འབྲེལ་ས་བཅད་བསྡུས་ཚིག་ཏུ་བྲིས་པ་ལགས་སོ། །རྡོ་རྗེ་སློབ་དཔོན་ཇི་གསུང་ཚད་མར་འཛིན། །དབང་ཐོབ་དམ་ཚིག་ལ་གནས་སྐལ་བ་ཅན། །ཚེ་གཅིག་བྱང་ཆུབ་འདོད་པའི་རྣལ་འབྱོར་རྣམས། །སྔོན་མེད་ཨོ་རྒྱན་གསང་ལམ་འདིར་ཞུགས་མཛོད། །འདི་ལྟར་ཞབས་འགྱུར་གྱིས་ཡི་གེ་བྲི་བ་པོ་བགྱིས་པའི་ལེགས་ཚོགས་གཙོ་བོར་སྨོན་པ་ནི། བདག་གིས་དུས་གསུམ་བསགས་དགེའི་མཐུ་སྟོབས་ཀྱིས་ཀུན་མཁྱེན་བླ་མའི་སྐུ་ཚེ་མཛད་ཕྲིན་རྟེན་འབྲེལ་ཕྱོགས་བཅུར་རྒྱས་པ་དང༌། དེ་ནས་བཟུང་སྒྲུབ་བརྒྱུད་ཀྱི་བསྟན་པའི་གདུགས་དཀར་བོ་སྲིད་པ་གསུམ་གྱི་བླ་རུ་འཁོར་ཞིང་དར་རྒྱས་འབྱུང་བའི་སྨོན་ལམ་ཞུ་ན། མཐུན་འགྱུར་རྒྱལ་བ་སྲས་དང་བཅས་པས་མཛད་པར་ཞུ། འགྲུབ་པར་ཤོག །དགེའོ། །དགེའོ། །དགེའོ།། །།