JKCL-KABUM-02-KHA-017

🚧 This website is under continued development. We appreciate your patience!

Previous Text Back to Volume PageNext Text

Wylie title	rje btsun 'jam dpal dbyangs la bstod pa 'jam mgon dgyes pa'i tam+bu ra
Location	chos kyi blo gros bka' 'bum Volume 2, Text 17, Pages 377-381 (Folios 1a1 to 3a5)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. rje btsun 'jam dpal dbyangs la bstod pa 'jam mgon dgyes pa'i tam+bu ra. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 2: 377-381. Bir, H.P.: Khyentse Labrang, 2012.
Genre	Verses of Praise - bstod pa
Deity	'jam dpal dbyangs
Colophon	།ཅེས་མགོན་པོ་འཇམ་དཔལ་ལ་བསྟོད་པ་འདི་ཡང་འཇམ་དབྱངས་ཆོས་ཀྱི་བློ་གྲོས་པས་ཆུ་བྱ་ཟླ་༧ཚེས་༥ལ་རྨི་ལམ་དུ་འཇམ་དཔལ་ལ་བསྟོད་པ་ཚིག་རིང་ཞིག་དྲུམ་གདན་སེར་ཁྲའི་ངོས་ལ་འབྲི་བ་ཞིག་བྱུང་བས་ཀཿཐོག་རྡོ་རྗེ་གདན་གྱི་རྒྱུད་སྡེ་ལྷ་ཁང་གི་གཟིམ་སྐྱིལ་མི་ཕམ་འཇམ་དབྱངས་ངོ་མཚར་རྒྱན་གྱིས་བཀོད་པའི་དགའ་ཚལ་དུ་གསོལ་བ་བཏབ་པ་འཇམ་དབྱངས་བླ་མས་རྗེས་སུ་འཛིན་པའི་རྒྱུར་གྱུར་ཅིག །སརྦ་དཱ་མངྒ་ལཾ། །
	ces mgon po 'jam dpal la bstod pa 'di yang 'jam dbyangs chos kyi blo gros pas chu bya zla 7tshes 5la rmi lam du 'jam dpal la bstod pa tshig ring zhig drum gdan ser khra'i ngos la 'bri ba zhig byung bas kaHthog rdo rje gdan gyi rgyud sde lha khang gi gzim skyil mi pham 'jam dbyangs ngo mtshar rgyan gyis bkod pa'i dga' tshal du gsol ba btab pa 'jam dbyangs bla mas rjes su 'dzin pa'i rgyur gyur cig__/sarba dA mang+ga laM/

1 Texts in this Section (sde tshan or chos tshan)

377-381	རྗེ་བཙུན་འཇམ་དཔལ་དབྱངས་ལ་བསྟོད་པ་འཇམ་མགོན་དགྱེས་པའི་ཏམྦུ་ར། rje btsun 'jam dpal dbyangs la bstod pa 'jam mgon dgyes pa'i tam+bu ra Verses of Praise - bstod pa	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

རྗེ་བཙུན་འཇམ་དཔལ་དབྱངས་ལ་བསྟོད་པ་འཇམ་མགོན་དགྱེས་པའི་ཏམྦུ་ར་ཞེས་བྱ་བ་བཞུགས་སོ། །ན་མོ་གུ་རུ་མཉྫུ་ཤྲཱི་ཡེ། གང་ཡང་ཕྱོགས་བཅུའི་འཇིག་རྟེན་ཁམས་ཀྱི་རྒྱལ་བ་རྒྱ་མཚོའི་ཚོགས་རྣམས་ཀྱི། །ཉིན་བཞིན་བསྔགས་པའི་པདྨ་དཀར་པོ་གང་གི་དབུ་ལ་རབ་མཛེས་པ། །འཇམ་པའི་དཔལ་ཞེས་རྒྱལ་སྲས་ཐུ་བོ་དེ་བཞིན་གཤེགས་པའི་མཁྱེན་རབ་བདག །དེ་ཡི་ཞབས་ཀྱི་པདྨའི་གདན་ལ་མགོ་བོས་རབ་ཏུ་བཏུད་བྱས་ནས། ༡། དད་གསུམ་གུས་པའི་ཡིད་ཀྱི་པདྨོ་མོས་གུས་བུང་བས་འབྱེད་པ་ལས། །སྙན་ངག་སྦྲང་རྩིའི་ཟེགས་མ་འདི་ཉིད་པདྨ་རཱ་གའི་མཆུ་སྒྲོས་ཀྱི། །རྩེ་མོར་བཟུང་ནས་མགོན་པོ་ལྷ་གཅིག་དེ་ཡི་སྤྱན་སྔར་གུས་པས་མཆོད། །དེ་ཡི་མཐུ་ལས་སླར་ཡང་བསྔགས་པའི་དྲི་བསུང་མངར་པོ་ཕྱོགས་བརྒྱར་སྤྲོ། ༢། རྒྱལ་བའི་ཡབ་གཅིག་བཟོད་ནས་རབ་ཞི་སྐྱེ་མེད་སྤྲོས་བྲལ་ཆོས་དབྱིངས་མཁར། །འགགས་མེད་སྙིང་རྗེའི་སྤྲིན་དཀར་འཛུམ་པས་མཁྱེན་དང་བརྩེ་བའི་གྲུ་ཆར་འབེབས། །གང་ཡང་མི་གནས་སྤྲུལ་པའི་རོལ་གར་སྨྲ་བའི་སེངྒེ་མཚུངས་པ་མེད། །འཁོར་བའི་རྒྱ་མཚོའི་ཕ་མཐར་རབ་སོན་ཡེ་ཤེས་ཆེན་པོའི་ཅོད་པཎ་འཆང་། ༣། སྔོན་ཚེ་ཐུགས་བསྐྱེད་དམ་བཅའ་རབ་བརླིང་འབྲུག་སྒྲའི་དབྱངས་སོགས་བདེ་བར་གཤེགས། །གངྒཱའི་བྱེ་སྙེད་མཉེས་པར་བྱས་ཤིང་རྫོགས་སྨིན་སྦྱངས་པ་མཐར་སོན་པས། །སྤངས་རྟོགས་མཐར་ཕྱིན་དོན་གཉིས་ལྷུན་གྲུབ་བཅོམ་ལྡན་འཇམ་པའི་རྡོ་རྗེ་ནི། །དེ་བཞིན་གཤེགས་དང་སྤྱོད་ཡུལ་རོ་མཉམ་དགོངས་ཟབ་རྒྱ་མཚོ་གཅིག་ཏུ་འདྲེས། ༤། ཀུན་ནས་མཛེས་པའི་གཙུག་ཏོར་རབ་མཛེས་གཟི་བརྗིད་ཕྲེང་བས་ཀུན་ནས་མཛེས། །ཤེས་རབ་རལ་གྲིའི་མཚོན་སྔོན་འབར་ལ་ཡེ་ཤེས་མེ་ཡི་ཞུགས་འཕྲོ་བས། །ཀུན་རྨོངས་གཉིས་འཐུང་མུན་པ་རབ་འཇོམས་བདག་ལྟའི་མགོ་བོ་དྲུངས་ནས་འབྱིན། །ངེས་དོན་གསུང་རབ་གླེག་བམ་རབ་མཛེས་ཆོས་ཀྱི་ཕུང་པོ་ཆེན་པོའོ། ༥། ཡན་ལག་དྲུག་ཅུའི་གསུང་དབྱངས་འབྲུག་སྒྲས་གཏི་མུག་གཉིད་ལས་སྐྲོག་པར་མཛད། །གང་གང་དེ་ལ་དེར་དེར་སྣང་བས་འགྲོ་དོན་མཐའ་ཡས་སྒྲུབ་པ་ལ། །མིག་འཛུམ་ཙམ་གྱི་ཡུན་དེ་ལའང་བསྐལ་མང་བྱེ་བ་རང་རྫོགས་པ། །ཁྱོད་འདྲའི་རྒྱལ་སྲས་ཕྲིན་ལས་བརླབ་ཆེན་སེམས་དཔའ་གཞན་མཆོག་སུ་ལའང་མེད། ༦། ཐབས་ལ་མཁས་པའི་ཐུགས་རྗེས་སྒོ་ལ་རབ་མཆོག་རྣམས་ཀྱང་ཁེངས་པ་བསྐྱུངས། །པད་དཀར་འཆང་དང་ལག་ན་རྡོ་རྗེ་ཐུགས་ནི་ཞུམ་པ་ལྟར་གྱུར་པས། །ཡོན་ཏན་དཔག་ཡས་གཞན་གྱི་ཟླ་མེད་ས་བཅུའི་དབང་ཕྱུག་མགོན་པོ་ཆེ། །དཔལ་གྱི་འབྱུང་གནས་འོད་བཟང་འབར་བ་རྒྱལ་ཀུན་མཁྱེན་རབ་དཔལ་བེའུར་འཁྱིལ། ༧། སྐྱེ་འཆིའི་འཇིག་བྲལ་བསྒྲེས་རྒུད་གཞོམ་མེད་བཅུ་དྲུག་རྒྱས་པའི་སྐུ་དཀྱིལ་ལ། །མཚན་དཔེས་རབ་བརྒྱན་ལོངས་སྤྱོད་ཡོངས་རྫོགས་དར་དང་རིན་ཆེན་རྒྱན་གྱིས་བརྒྱན། །གཞོན་ནུ་ཟུར་ཕུད་ཚོམ་བུ་ལྔ་ལྡན་ཆུ་སྐྱེས་ཟླ་བའི་དཀྱིལ་འཁོར་སྟེང་། །སྐུ་དང་ཕྱག་གི་རྣམ་འགྱུར་མཐའ་ཡས་གསེར་དང་ཟླ་བ་བཻཌཱུའི་མདོག༨། བུང་བ་ལྟར་གནག་ཁ་དོག་མ་ངེས་སྒྱུ་མའི་རོལ་པ་སྟོན་པ་ལ། །འདི་ཞེས་མི་མཚོན་གཏིང་དཔག་དཀའ་ཞིང་མཚན་མའི་རྟོག་པ་ཉེ་བར་དབེན། །གཉིས་ཆོས་མཚན་བྲལ་བཞིན་ལག་སྒྱུ་མའི་ངོ་མཚར་ཡིད་འོང་ལྟ་ན་སྡུག །དྲན་པའི་མཁའ་དབྱིངས་འཆར་ཙམ་མོད་ལ་ཡེ་ཤེས་ཉི་མའི་སྣང་བ་སྦྱིན། ༩། རེས་འགའ་སྣ་ཚོགས་པདྨའི་ལྟེ་བར་ཚ་ཟེར་རྒྱས་པའི་གདན་གྱི་སྟེང་། །ཕྱོགས་བདག་ཞིང་སྐྱོངས་ལྷ་ཀླུ་འབྱུང་པོ་གཅལ་དུ་བཀྲམ་པའི་དབུས་སུ་ནི། །དྲག་པོ་ཆེན་པོ་མི་བཟད་དྲག་ཆེན་དུག་ཆེན་ཧ་ལའི་མདོག་འདྲ་བའི། །གཤིན་རྗེ་གཤེད་པོ་དྲག་པོ་ཆེ་ཡང་རེས་འགའ་ཟངས་བསྲེག་འཕྲོ་བའི་འོད། །དེ་བཞིན་སེར་ལ་ནག་པོའི་མདོངས་ཀྱི་ཁྲོ་བོ་ཆེན་པོ་དེ་རྣམས་ཀྱང་། །བདུད་ཀྱི་སྙིང་ཁྲག་ཞལ་དུ་རྔུབ་ཅིང་གཤིན་རྗེ་ཀུན་གྱི་རྒྱལ་པོ་ཆེ། །ཧ་ལ་ཧ་ལའི་གད་མོ་སྒྲོགས་ཤིང་གདོང་བརྒྱ་པ་དང་ལག་བརྒྱར་སྟོན། །རྔམས་པའི་མཚོན་ཆ་སྣ་ཚོགས་ཕྱག་བསྣམས་དུས་ཀྱི་དགྲ་སྟེ་ཁྲོ་བོ་རྗེ། ༡༡། ཁམས་གསུམ་མ་ལུས་སྐྲག་པར་བྱེད་ཅིང་དངོས་གྲུབ་ཀུན་གྱི་བདག་པོ་ཆེ། །ཡོན་ཏན་ཀུན་འབྱུང་འཇིགས་བྱེད་ཆེན་པོ་དེ་ཡི་སྐུ་ནི་མཐོང་བའི་མོད། །ཁྲོ་ཆེན་གཞན་རྣམས་ལག་ཆ་ལྷུངས་ཤིང་སྤྱན་ནི་རིད་རིད་གྱུར་བྱེད་ན། །བགེགས་རྣམས་མ་ལུས་ལྟ་ཅི་སྨོས་ཏེ་མཐུ་སྟོབས་སྲིད་ཞིའི་དཔལ་ཆེན་པོ། ༡༢། དེ་ལྟར་འཇམ་དབྱངས་ཞི་ཁྲོའི་རོལ་གར་རྒྱ་མཚོའི་རྡུལ་གྱིས་བགྲངས་གྱུར་ན། །དེ་ཡང་ཉུང་ཞིང་ཟད་པར་གྱུར་པའི་གསང་གསུམ་ནམ་མཁའི་མཐའ་མཉམ་པ། །དེ་དག་མ་ལུས་རྒྱལ་བའི་ལྗགས་ཀྱིས་བརྗོད་པར་དཀའ་ན་བདག་འདྲའི་ངལ་བས་ཅི་ཞིག་བྱེད། །དེ་ལྟ་ན་ཡང་དད་པའི་སེམས་ཀྱིས་ཉེ་བར་བླངས་ནས་ཅུང་ཟད་བསྟོད། །འདི་ནས་སྐྱེ་དང་སྐྱེ་བ་ཀུན་ཏུ་འཇམ་དབྱངས་བླ་མ་མགོན་དེ་ལ། །དད་པས་བསྙེན་པའི་དྭངས་པའི་ཆུ་གཏེར་སྲིད་པའི་ཉི་མས་སྐེམ་མི་ནུས། །ཚེ་འདིར་ཡང་ནི་མགོན་དེའི་ཐུགས་རྗེའི་ཟླ་བ་བདུད་རྩིའི་བྲན་པའི་མོད། །ལྷག་པར་འཕྱུར་བས་མཆོག་ཏུ་བསྟོད་པའི་རབ་བསྔགས་ཏམྦུ་ར་འདི་སྒྲེངས། ༡༤། བསྟོད་པའི་དབྱངས་འདི་ལགས་པར་འབུལ་བས་འཇམ་དཔལ་ཡེ་ཤེས་སེམས་དཔའ་ཡི། །ཟག་མེད་དབང་པོ་དགྱེས་པར་མཉེས་ལས་ཐུགས་རྗེའི་འོད་ཟེར་ལྕགས་ཀྱུ་ཡིས། །བདག་གི་སྙིང་གའི་དབུས་སུ་ཐེབས་ན་ཐུགས་གསང་མཁྱེན་པའི་སྒོ་ཆེན་དེར། །མྱུར་དུ་འཛུད་ནས་གསང་གསུམ་ཡོན་ཏན་ཕྲིན་ལས་དབྱེར་མེད་འགྱུར་བར་ཤོག །བྱང་ཆུབ་རྡོ་རྗེ་བདག་འདྲ་དེ་བཞིན་སྐྱེ་རྒུ་ཀུན་ཀྱང་འདྲོངས་བ་དང་། །ཐམས་ཅད་ཐམས་ཅད་འཇམ་དཔལ་རབ་བརྙེས་ཀུན་ཏུ་བཟང་པོའི་སྨོན་ལམ་རྫོགས། །རླབས་ཆེན་ཕྲིན་ལས་རོལ་མོ་འབུམ་བརྒྱས་ས་གསུམ་ཀུན་ན་ཡོངས་སུ་ཁྱབ། །གསང་བ་འདུས་པ་འཇམ་པའི་རྡོ་རྗེས་དཀྱིལ་འཁོར་ཆེན་པོར་བྱང་ཆུབ་ཤོག །དེ་ལྟར་བསྟོད་པའི་ཚིག་ཕྲེང་འདི། །དོན་ལྡན་བྱིན་རླབས་གཟུང་སྤོབས་དང་། །བློ་གྲོས་སྒོ་བརྒྱ་འབྱེད་ནུས་པའི། །བདེན་ཚིག་མཉྫུ་ཤྲཱི་དེས་མཛོད། །ཅེས་མགོན་པོ་འཇམ་དཔལ་ལ་བསྟོད་པ་འདི་ཡང་འཇམ་དབྱངས་ཆོས་ཀྱི་བློ་གྲོས་པས་ཆུ་བྱ་ཟླ་༧ཚེས་༥ལ་རྨི་ལམ་དུ་འཇམ་དཔལ་ལ་བསྟོད་པ་ཚིག་རིང་ཞིག་དྲུམ་གདན་སེར་ཁྲའི་ངོས་ལ་འབྲི་བ་ཞིག་བྱུང་བས་ཀཿཐོག་རྡོ་རྗེ་གདན་གྱི་རྒྱུད་སྡེ་ལྷ་ཁང་གི་གཟིམ་སྐྱིལ་མི་ཕམ་འཇམ་དབྱངས་ངོ་མཚར་རྒྱན་གྱིས་བཀོད་པའི་དགའ་ཚལ་དུ་གསོལ་བ་བཏབ་པ་འཇམ་དབྱངས་བླ་མས་རྗེས་སུ་འཛིན་པའི་རྒྱུར་གྱུར་ཅིག །སརྦ་དཱ་མངྒ་ལཾ། ། །།

[edit]

rje btsun 'jam dpal dbyangs la bstod pa 'jam mgon dgyes pa'i tam+bu ra zhes bya ba bzhugs so/____/na mo gu ru many+dzu shrI ye/__gang yang phyogs bcu'i 'jig rten khams kyi rgyal ba rgya mtsho'i tshogs rnams kyi/____/nyin bzhin bsngags pa'i pad+ma dkar po gang gi dbu la rab mdzes pa/____/'jam pa'i dpal zhes rgyal sras thu bo de bzhin gshegs pa'i mkhyen rab bdag__/de yi zhabs kyi pad+ma'i gdan la mgo bos rab tu btud byas nas/__1/__dad gsum gus pa'i yid kyi pad+mo mos gus bung bas 'byed pa las/____/snyan ngag sbrang rtsi'i zegs ma 'di nyid pad+ma rA ga'i mchu sgros kyi/____/rtse mor bzung nas mgon po lha gcig de yi spyan sngar gus pas mchod/____/de yi mthu las slar yang bsngags pa'i dri bsung mngar po phyogs brgyar spro/__2/__rgyal ba'i yab gcig bzod nas rab zhi skye med spros bral chos dbyings mkhar/____/'gags med snying rje'i sprin dkar 'dzum pas mkhyen dang brtse ba'i gru char 'bebs/____/gang yang mi gnas sprul pa'i rol gar smra ba'i seng+ge mtshungs pa med/____/'khor ba'i rgya mtsho'i pha mthar rab son ye shes chen po'i cod paN 'chang /__3/__sngon tshe thugs bskyed dam bca' rab brling 'brug sgra'i dbyangs sogs bde bar gshegs/____/gang+gA'i bye snyed mnyes par byas shing rdzogs smin sbyangs pa mthar son pas/____/spangs rtogs mthar phyin don gnyis lhun grub bcom ldan 'jam pa'i rdo rje ni/____/de bzhin gshegs dang spyod yul ro mnyam dgongs zab rgya mtsho gcig tu 'dres/__4/__kun nas mdzes pa'i gtsug tor rab mdzes gzi brjid phreng bas kun nas mdzes/____/shes rab ral gri'i mtshon sngon 'bar la ye shes me yi zhugs 'phro bas/____/kun rmongs gnyis 'thung mun pa rab 'joms bdag lta'i mgo bo drungs nas 'byin/____/nges don gsung rab gleg bam rab mdzes chos kyi phung po chen po'o/__5/__yan lag drug cu'i gsung dbyangs 'brug sgras gti mug gnyid las skrog par mdzad/____/gang gang de la der der snang bas 'gro don mtha' yas sgrub pa la/____/mig 'dzum tsam gyi yun de la'ang bskal mang bye ba rang rdzogs pa/____/khyod 'dra'i rgyal sras phrin las brlab chen sems dpa' gzhan mchog su la'ang med/__6/__thabs la mkhas pa'i thugs rjes sgo la rab mchog rnams kyang khengs pa bskyungs/____/pad dkar 'chang dang lag na rdo rje thugs ni zhum pa ltar gyur pas/____/yon tan dpag yas gzhan gyi zla med sa bcu'i dbang phyug mgon po che/____/dpal gyi 'byung gnas 'od bzang 'bar ba rgyal kun mkhyen rab dpal be'ur 'khyil/__7/__skye 'chi'i 'jig bral bsgres rgud gzhom med bcu drug rgyas pa'i sku dkyil la/____/mtshan dpes rab brgyan longs spyod yongs rdzogs dar dang rin chen rgyan gyis brgyan/____/gzhon nu zur phud tshom bu lnga ldan chu skyes zla ba'i dkyil 'khor steng /____/sku dang phyag gi rnam 'gyur mtha' yas gser dang zla ba baiDU'i mdog8/__bung ba ltar gnag kha dog ma nges sgyu ma'i rol pa ston pa la/____/'di zhes mi mtshon gting dpag dka' zhing mtshan ma'i rtog pa nye bar dben/____/gnyis chos mtshan bral bzhin lag sgyu ma'i ngo mtshar yid 'ong lta na sdug__/dran pa'i mkha' dbyings 'char tsam mod la ye shes nyi ma'i snang ba sbyin/__9/__res 'ga' sna tshogs pad+ma'i lte bar tsha zer rgyas pa'i gdan gyi steng /____/phyogs bdag zhing skyongs lha klu 'byung po gcal du bkram pa'i dbus su ni/____/drag po chen po mi bzad drag chen dug chen ha la'i mdog 'dra ba'i/____/gshin rje gshed po drag po che yang res 'ga' zangs bsreg 'phro ba'i 'od/____/de bzhin ser la nag po'i mdongs kyi khro bo chen po de rnams kyang /____/bdud kyi snying khrag zhal du rngub cing gshin rje kun gyi rgyal po che/____/ha la ha la'i gad mo sgrogs shing gdong brgya pa dang lag brgyar ston/____/rngams pa'i mtshon cha sna tshogs phyag bsnams dus kyi dgra ste khro bo rje/__11/__khams gsum ma lus skrag par byed cing dngos grub kun gyi bdag po che/____/yon tan kun 'byung 'jigs byed chen po de yi sku ni mthong ba'i mod/____/khro chen gzhan rnams lag cha lhungs shing spyan ni rid rid gyur byed na/____/bgegs rnams ma lus lta ci smos te mthu stobs srid zhi'i dpal chen po/__12/__de ltar 'jam dbyangs zhi khro'i rol gar rgya mtsho'i rdul gyis bgrangs gyur na/____/de yang nyung zhing zad par gyur pa'i gsang gsum nam mkha'i mtha' mnyam pa/____/de dag ma lus rgyal ba'i ljags kyis brjod par dka' na bdag 'dra'i ngal bas ci zhig byed/____/de lta na yang dad pa'i sems kyis nye bar blangs nas cung zad bstod/____/'di nas skye dang skye ba kun tu 'jam dbyangs bla ma mgon de la/____/dad pas bsnyen pa'i dwangs pa'i chu gter srid pa'i nyi mas skem mi nus/____/tshe 'dir yang ni mgon de'i thugs rje'i zla ba bdud rtsi'i bran pa'i mod/____/lhag par 'phyur bas mchog tu bstod pa'i rab bsngags tam+bu ra 'di sgrengs/__14/__bstod pa'i dbyangs 'di lags par 'bul bas 'jam dpal ye shes sems dpa' yi/____/zag med dbang po dgyes par mnyes las thugs rje'i 'od zer lcags kyu yis/____/bdag gi snying ga'i dbus su thebs na thugs gsang mkhyen pa'i sgo chen der/____/myur du 'dzud nas gsang gsum yon tan phrin las dbyer med 'gyur bar shog__/byang chub rdo rje bdag 'dra de bzhin skye rgu kun kyang 'drongs ba dang /____/thams cad thams cad 'jam dpal rab brnyes kun tu bzang po'i smon lam rdzogs/____/rlabs chen phrin las rol mo 'bum brgyas sa gsum kun na yongs su khyab/____/gsang ba 'dus pa 'jam pa'i rdo rjes dkyil 'khor chen por byang chub shog__/de ltar bstod pa'i tshig phreng 'di/____/don ldan byin rlabs gzung spobs dang /____/blo gros sgo brgya 'byed nus pa'i/____/bden tshig many+dzu shrI des mdzod/____/ces mgon po 'jam dpal la bstod pa 'di yang 'jam dbyangs chos kyi blo gros pas chu bya zla 7tshes 5la rmi lam du 'jam dpal la bstod pa tshig ring zhig drum gdan ser khra'i ngos la 'bri ba zhig byung bas kaHthog rdo rje gdan gyi rgyud sde lha khang gi gzim skyil mi pham 'jam dbyangs ngo mtshar rgyan gyis bkod pa'i dga' tshal du gsol ba btab pa 'jam dbyangs bla mas rjes su 'dzin pa'i rgyur gyur cig__/sarba dA mang+ga laM/__/____//__