DKR-KABUM-02-KHA-045

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma'i rnal 'byor ye shes mchog sbyin
Location	dil mgo mkhyen brtse bka' 'bum Volume 2, Text 45, Pages 229-231 (Folios 1a1 to 3a4)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Associated People	བློ་གྲོས་རབ་གསལ་ (blo gros rab gsal)
Citation	Khyentse, Dilgo. Bla ma'i rnal 'byor ye shes mchog sbyin. In Skyabs rje dil mgo mkhyen brtse rin po che'i bka' 'bum, Vol. 2: 229-231. Delhi: Shechen Publications, 1994.
Genre	Guru Yoga Texts - bla ma'i rnal 'byor
Colophon	།ཅེས་པའང་རྙིང་བཙུན་ཐེག་མཆོག་སྙིང་པོའི་བསྟན་དང་དེ་འཛིན་ལ་མི་འཕྲོག་པའི་མོས་པ་བརྟན་པ་འགྱུར་མེད་ངག་དབང་ཤེས་རབ་ནས་རྟེན་དང་བཅས་བསྐུལ་ངོར་སྔ་འགྱུར་རྡོ་རྗེ་སྙིང་པོའི་ཆོས་ཀྱི་ཆུ་གཏེར་མདོ་ཁམས་ཞེ་ཆེན་པའི་བཀའ་འབངས་སུ་སྐྱེས་པའི་སྔགས་བཙུན་འགྱུར་མེད་བསླབ་གསུམ་རྒྱལ་མཚན་གྱིས་འབྲས་ལྗོངས་སྒང་ཏོག་གི་གཙུག་ལག་ཁང་གི་བ་གམ་གསུམ་པར་བྲིས་པ་རྗེ་བཙུན་བླ་མའི་ཡེ་ཤེས་གཟིགས་པའི་བྱིན་རླབས་འཇུག་པའི་རྒྱུ་ཁོ་ནར་གྱུར་ཅིག །སརྦ་མངྒ་ལཾ། དགེའོ།།
	/ces pa'ang rnying btsun theg mchog snying po'i bstan dang de 'dzin la mi 'phrog pa'i mos pa brtan pa 'gyur med ngag dbang shes rab nas rten dang bcas bskul ngor snga 'gyur rdo rje snying po'i chos kyi chu gter mdo khams zhe chen pa'i bka' 'bangs su skyes pa'i sngags btsun 'gyur med bslab gsum rgyal mtshan gyis 'bras ljongs sgang tog gi gtsug lag khang gi ba gam gsum par bris pa rje btsun bla ma'i ye shes gzigs pa'i byin rlabs 'jug pa'i rgyu kho nar gyur cig__/sarba mang+ga laM/__dge'o//

Tibetan Text

Wylie

[edit]

༄༅། །བླ་མའི་རྣལ་འབྱོར་ཡེ་ཤེས་མཆོག་སྦྱིན་བཞུགས། ན་མོ། སྐྱབས་འགྲོའི་མཐར་ཐུག་རང་རིག་བླ་མར་རྟོགས། །སེམས་བསྐྱེད་འབྲས་བུས་བདག་འཛིན་བློ་ཡིས་བཏང༌། །འཁོར་འདས་མཉམ་ཉིད་ཕྱམ་བརྡལ་ཆོས་སྐུའི་ཀློང༌། །རྟག་ཏུ་འདུ་འབྲལ་མེད་པའི་ངང་ལ་གནས། ཨ། སྣང་སྲིད་ཐམས་ཅད་ཀུན་བཟང་རྒྱན་གྱི་སྤྲིན། །དག་ཆེན་ཡེ་ཤེས་རོལ་པའི་ཞིང་གི་དབུས། །རང་སྣང་མཆོད་སྤྲིན་རྒྱ་མཚོ་འཁྲིགས་པའི་དབུས། །རྒྱལ་ཀུན་ཡེ་ཤེས་སྙིང་པོ་བླ་མ་ནི། །རྣམ་པ་བཀའ་དྲིན་མཉམ་མེད་མཁན་ཆེན་རྗེ། །འཇིགས་མེད་གཟུངས་སྤོབས་བློ་གྲོས་རབ་གསལ་མགོན། །དཀར་གསལ་མཚན་དཔེའི་གཟི་བྱིན་འོད་དུ་འབར། །ངུར་སྨྲིག་ཆོས་གོས་གསུམ་གྱིས་མཛེས་པར་ཀླུབས། །ཕྱག་གཡས་ཆོས་འཆད་ཨུཏྤལ་སྡོང་བུའི་རྩེར། །རལ་གྲི་གླེགས་བམ་མཛེས་ཤིང་གཡོན་མཉམ་བཞག །ཞབས་གཉིས་རྡོ་རྗེའི་སྐྱིལ་ཀྲུང་དྲང་པོར་བཞུགས། །དབུ་ལ་སྡེ་སྣོད་འཛིན་པའི་པཎ་ཞུས་མཛེས། །ཡེ་ཤེས་འོད་ཟེར་སྣང་བ་བསམ་ཡས་འཕྲོ། །དཀོན་མཆོག་རྩ་གསུམ་སྐུ་བཞི་དབྱེར་མེད་པ། །དྲན་པས་སྲིད་ཞིའི་འཇིགས་འཕྲོག་ཚུལ་དུ་གསལ། །དོན་གྱི་སྤངས་རྟོགས་སངས་རྒྱས་ཀུན་དང་མཉམ། །རྣམ་པའི་བཀའ་དྲིན་རྒྱལ་བ་རྣམས་ལས་ལྷག །ངེས་པའི་དགོངས་པ་ཆོས་སྐུ་གདོད་མའི་གཤིས། །ཁྱོད་ལ་རང་ངོ་ཤེས་པའི་ཕྱག་གིས་འདུད། །ཅིར་སྣང་རྒྱན་དུ་ཤར་བའི་མཆོད་པ་འབུལ། །བློས་བྱས་འཁྲུལ་པའི་ཉེས་ལྟུང་དབྱིངས་སུ་བཤགས། །ཟག་མེད་འོད་གསལ་ཆེན་པོར་རྗེས་ཡི་རང༌། །ཟབ་གསལ་མཉམ་རྗེས་བྲལ་བའི་ཆོས་འཁོར་བསྐོར། །སྐྱེ་འཆི་ཀ་ནས་དག་པའི་ཀློང་བཞུགས་གསོལ། །ཆོས་དབྱིངས་ཀུན་ཁྱབ་ཆེན་པོའི་ཀློང་དུ་བསྔོ། །གཞི་འབྲས་གཉིས་མེད་གོ་འཕང་མངོན་གྱུར་ཤོག །ཆོས་རབ་རྣམ་འབྱེད་བློ་གྲོས་སྤོབས་པའི་རྩལ། །ངེས་འབྱུང་སྙིང་རྗེའི་སྣང་བ་རབ་གསལ་བས། །སྙིགས་མའི་མུན་སེལ་ངེས་དོན་དགེ་བའི་བཤེས། །མཁན་ཆེན་བླ་མའི་ཞབས་ལ་གསོལ་བ་འདེབས། །གསན་བསམ་སྒོམ་པའི་ཡོན་ཏན་ཡོངས་སུ་རྫོགས། །འཆད་རྩོད་རྩོམ་པས་ཐུབ་བསྟན་རྒྱལ་མཚན་བསྒྲེངས། །མཁས་བཙུན་བཟང་པོའི་དམ་པའི་རྣམ་ཐར་འཆང༌། །ཐེག་མཆོག་བསྟན་པའི་རྒྱན་གཅིག་གསོལ་བ་འདེབས། །མཐའ་བརྒྱད་སྤྲོས་བྲལ་སྟོང་པ་ཆེན་པོ་དང༌། །འོད་གསལ་ཡེ་ཤེས་རྟག་བརྟན་ཆོས་སྐུའི་དབྱིངས། །ཟུང་འཇུག་བྱམས་འཇམ་དགོངས་པ་གཅིག་དྲིལ་གྱིས། །ཤིང་རྟའི་སྲོལ་འབྱེད་ཆེན་པོར་གསོལ་བ་འདེབས། །ངེས་འབྱུང་མཐར་ཕྱིན་ཉན་ཐོས་དགྲ་བཅོམ་པ། །སྙིང་རྗེའི་གོ་ཆ་བརྟན་འཆང་སེམས་དཔའ་ཆེ། །འཁྲུལ་པ་དབྱིངས་ཞིག་དོན་གྱི་བྱ་བྲལ་བ། །མཚུངས་མེད་དགེ་བའི་བཤེས་ལ་གསོལ་བ་འདེབས། །འདིར་སྣང་ཆོས་བརྒྱད་འཆིང་བའི་བྱ་བ་བྲལ། །ཉམས་རྟོགས་ཡོན་ཏན་འཕགས་པའི་ནོར་གྱིས་ཕྱུག །བཤད་སྒྲུབ་སྙིང་པོའི་བསྟན་པའི་སྲོག་རྩ་འཛིན། །ཆོས་ཀྱི་རྒྱལ་མཚན་ཆེན་པོར་གསོལ་བ་འདེབས། །རྣམ་དཔྱོད་རིག་པས་རྒྱལ་བའི་དགོངས་པ་རྟོགས། །ཡང་དག་ལྟ་བའི་སྤྱན་རས་དྲི་མ་མེད། །འཁྲུལ་བྲལ་རྒྱལ་བ་དགྱེས་པའི་སྲོག་འཛིན་པ། །མཁན་ཆེན་བླ་མ་མཆོག་ལ་གསོལ་བ་འདེབས། །རྨད་བྱུང་བཀའ་དྲིན་ཆེན་པོ་རྗེས་དྲན་པའི། །གདུང་ཤུགས་མཆི་མ་འཁྲུགས་པས་ཁྱེད་འབོད་སྟེ། །རེ་ས་གཞན་ནས་མི་ཚོལ་བློ་གཏད་ཀྱིས། །བླ་མ་ཆོས་སྐུའི་རང་ཞལ་མངོན་གྱུར་ཤོག །ཁྱད་པར་དགོངས་བརྒྱུད་བྱིན་ཆེན་སྙིང་ལ་བབས། །རྟོགས་གྲོལ་དུས་མཉམ་ལྟ་བ་ཀློང་དུ་གྱུར། །འཁོར་འདས་རེ་དོགས་བྲལ་བ་ཆོས་ཀྱི་དབྱིངས། །མཐར་ཐུག་ཟབ་མོའི་དེ་ཉིད་མངོན་གྱུར་ཤོག །ཡེ་ཤེས་ཉི་མས་འཁྲུལ་པའི་མུན་པ་སངས། །ཟབ་ལམ་ཡོན་ཏན་དབྱར་གྱི་མཚོ་ལྟར་རྒྱས། །མགོན་པོ་ཁྱོད་དང་གཉིས་སུ་མ་མཆིས་པའི། །རྗེ་བཙུན་བླ་མའི་གོ་འཕང་མངོན་གྱུར་མཛོད། །ཨོཾ་ཨཱཿཧཱུྃ་བཛྲ་མ་ཧཱ་གུ་རུ་མ་ཏི་པྲ་དཱི་པ་ཨ་ར་པ་ཙ་ན་དྷཱིཿདྷཱིཿདྷཱིཿསྭཱ་ཧཱ། བླ་མའི་སྐུ་ནི་སྣང་སྟོང་མཁའ་ལྟར་ཁྱབ། །ཡེ་ཤེས་རྡོ་རྗེ་རྡུལ་བྲལ་ནམ་མཁའི་དབྱིངས། །རབ་འབྱམས་རྒྱལ་བའི་སྐུ་དང་ཡེ་ཤེས་དལ། །རྫོགས་པ་བདག་གི་ལུས་དང་གཉིས་སུ་མེད། །བླ་མའི་གསུང་ནི་གྲགས་སྟོང་སྐྱེ་འགག་བྲལ། །གཞོམ་མེད་རྡོ་རྗེའི་སྔགས་ཀྱི་རྒྱུད་དུ་རྫོགས། །ཟབ་རྒྱས་ཆོས་ཀྱི་སྙིང་པོ་དེ་ཁོ་ན། །རྡོ་རྗེའི་གསུང་དབྱངས་བདག་གི་ངག་ལ་ཤར། །བླ་མའི་ཐུགས་ནི་བསམ་གྱི་མི་ཁྱབ་པའི། །ཡེ་ཤེས་ཆེན་པོ་སྲིད་ཞི་མཉམ་པ་ཉིད། །ཟབ་གསལ་རྡོ་རྗེ་དབྱིངས་ཀྱི་དགོངས་པའི་དབང༌། །ཐོབ་པས་བདག་ཡིད་ཆོས་ཉིད་དགོངས་ཀློང་སད། །སྣང་གྲགས་རིག་པ་རྡོ་རྗེའི་གསང་བ་གསུམ། །གདོད་ནས་རྣམ་པར་དག་པའི་དཀྱིལ་འཁོར་དུ། །རང་ངོ་ཤེས་པ་དོན་གྱི་དབང་བཞི་ཐོབ། །ལམ་བཞི་འབྲས་བུ་སྐུ་ལྔ་ལྷུན་གྱིས་གྲུབ། །ཀུན་རྫོབ་ཕྱི་ཡི་བླ་མར་དད་གདུང་གིས། །དོན་དམ་ནང་གི་བླ་མའི་དགོངས་ཀློང་རྟོགས། །ཟུང་འཇུག་ཡེ་ཤེས་བླ་མའི་ཞལ་མཇལ་ནས། །སྐུ་བཞི་དབྱེར་མེད་བླ་མའི་ས་ཐོབ་ཤོག །དད་དང་ངེས་འབྱུང་ཡང་དག་བློ་གྲོས་ཀྱིས། །ཚུལ་གནས་ཐོས་བསམ་སྒོམ་པ་མཐར་ཕྱིན་ཏེ། །སྐྱེ་འཆི་བར་དོའི་གནས་སྐབས་ཐམས་ཅད་དུ། །འབྲལ་མེད་བླ་མས་རྗེས་སུ་འཛིན་གྱུར་ཅིག །ཅེས་པའང་རྙིང་བཙུན་ཐེག་མཆོག་སྙིང་པོའི་བསྟན་དང་དེ་འཛིན་ལ་མི་འཕྲོག་པའི་མོས་པ་བརྟན་པ་འགྱུར་མེད་ངག་དབང་ཤེས་རབ་ནས་རྟེན་དང་བཅས་བསྐུལ་ངོར་སྔ་འགྱུར་རྡོ་རྗེ་སྙིང་པོའི་ཆོས་ཀྱི་ཆུ་གཏེར་མདོ་ཁམས་ཞེ་ཆེན་པའི་བཀའ་འབངས་སུ་སྐྱེས་པའི་སྔགས་བཙུན་འགྱུར་མེད་བསླབ་གསུམ་རྒྱལ་མཚན་གྱིས་འབྲས་ལྗོངས་སྒང་ཏོག་གི་གཙུག་ལག་ཁང་གི་བ་གམ་གསུམ་པར་བྲིས་པ་རྗེ་བཙུན་བླ་མའི་ཡེ་ཤེས་གཟིགས་པའི་བྱིན་རླབས་འཇུག་པའི་རྒྱུ་ཁོ་ནར་གྱུར་ཅིག །སརྦ་མངྒ་ལཾ། དགེའོ།། །།

[edit]

@#/__/bla ma'i rnal 'byor ye shes mchog sbyin bzhugs/__na mo/__skyabs 'gro'i mthar thug rang rig bla mar rtogs/__/sems bskyed 'bras bus bdag 'dzin blo yis btang*/__/'khor 'das mnyam nyid phyam brdal chos sku'i klong*/__/rtag tu 'du 'bral med pa'i ngang la gnas/__a/__snang srid thams cad kun bzang rgyan gyi sprin/__/dag chen ye shes rol pa'i zhing gi dbus/__/rang snang mchod sprin rgya mtsho 'khrigs pa'i dbus/__/rgyal kun ye shes snying po bla ma ni/__/rnam pa bka' drin mnyam med mkhan chen rje/__/'jigs med gzungs spobs blo gros rab gsal mgon/__/dkar gsal mtshan dpe'i gzi byin 'od du 'bar/__/ngur smrig chos gos gsum gyis mdzes par klubs/__/phyag g.yas chos 'chad ut+pal sdong bu'i rtser/__/ral gri glegs bam mdzes shing g.yon mnyam bzhag__/zhabs gnyis rdo rje'i skyil krung drang por bzhugs/__/dbu la sde snod 'dzin pa'i paN zhus mdzes/__/ye shes 'od zer snang ba bsam yas 'phro/__/dkon mchog rtsa gsum sku bzhi dbyer med pa/__/dran pas srid zhi'i 'jigs 'phrog tshul du gsal/__/don gyi spangs rtogs sangs rgyas kun dang mnyam/__/rnam pa'i bka' drin rgyal ba rnams las lhag__/nges pa'i dgongs pa chos sku gdod ma'i gshis/__/khyod la rang ngo shes pa'i phyag gis 'dud/__/cir snang rgyan du shar ba'i mchod pa 'bul/__/blos byas 'khrul pa'i nyes ltung dbyings su bshags/__/zag med 'od gsal chen por rjes yi rang*/__/zab gsal mnyam rjes bral ba'i chos 'khor bskor/__/skye 'chi ka nas dag pa'i klong bzhugs gsol/__/chos dbyings kun khyab chen po'i klong du bsngo/__/gzhi 'bras gnyis med go 'phang mngon gyur shog__/chos rab rnam 'byed blo gros spobs pa'i rtsal/__/nges 'byung snying rje'i snang ba rab gsal bas/__/snyigs ma'i mun sel nges don dge ba'i bshes/__/mkhan chen bla ma'i zhabs la gsol ba 'debs/__/gsan bsam sgom pa'i yon tan yongs su rdzogs/__/'chad rtsod rtsom pas thub bstan rgyal mtshan bsgrengs/__/mkhas btsun bzang po'i dam pa'i rnam thar 'chang*/__/theg mchog bstan pa'i rgyan gcig gsol ba 'debs/__/mtha' brgyad spros bral stong pa chen po dang*/__/'od gsal ye shes rtag brtan chos sku'i dbyings/__/zung 'jug byams 'jam dgongs pa gcig dril gyis/__/shing rta'i srol 'byed chen por gsol ba 'debs/__/nges 'byung mthar phyin nyan thos dgra bcom pa/__/snying rje'i go cha brtan 'chang sems dpa' che/__/'khrul pa dbyings zhig don gyi bya bral ba/__/mtshungs med dge ba'i bshes la gsol ba 'debs/__/'dir snang chos brgyad 'ching ba'i bya ba bral/__/nyams rtogs yon tan 'phags pa'i nor gyis phyug__/bshad sgrub snying po'i bstan pa'i srog rtsa 'dzin/__/chos kyi rgyal mtshan chen por gsol ba 'debs/__/rnam dpyod rig pas rgyal ba'i dgongs pa rtogs/__/yang dag lta ba'i spyan ras dri ma med/__/'khrul bral rgyal ba dgyes pa'i srog 'dzin pa/__/mkhan chen bla ma mchog la gsol ba 'debs/__/rmad byung bka' drin chen po rjes dran pa'i/__/gdung shugs mchi ma 'khrugs pas khyed 'bod ste/__/re sa gzhan nas mi tshol blo gtad kyis/__/bla ma chos sku'i rang zhal mngon gyur shog__/khyad par dgongs brgyud byin chen snying la babs/__/rtogs grol dus mnyam lta ba klong du gyur/__/'khor 'das re dogs bral ba chos kyi dbyings/__/mthar thug zab mo'i de nyid mngon gyur shog__/ye shes nyi mas 'khrul pa'i mun pa sangs/__/zab lam yon tan dbyar gyi mtsho ltar rgyas/__/mgon po khyod dang gnyis su ma mchis pa'i/__/rje btsun bla ma'i go 'phang mngon gyur mdzod/__/oM AHhU~M badz+ra ma hA gu ru ma ti pra dI pa a ra pa tsa na d+hIHd+hIHd+hIHswA hA/__bla ma'i sku ni snang stong mkha' ltar khyab/__/ye shes rdo rje rdul bral nam mkha'i dbyings/__/rab 'byams rgyal ba'i sku dang ye shes dal/__/rdzogs pa bdag gi lus dang gnyis su med/__/bla ma'i gsung ni grags stong skye 'gag bral/__/gzhom med rdo rje'i sngags kyi rgyud du rdzogs/__/zab rgyas chos kyi snying po de kho na/__/rdo rje'i gsung dbyangs bdag gi ngag la shar/__/bla ma'i thugs ni bsam gyi mi khyab pa'i/__/ye shes chen po srid zhi mnyam pa nyid/__/zab gsal rdo rje dbyings kyi dgongs pa'i dbang*/__/thob pas bdag yid chos nyid dgongs klong sad/__/snang grags rig pa rdo rje'i gsang ba gsum/__/gdod nas rnam par dag pa'i dkyil 'khor du/__/rang ngo shes pa don gyi dbang bzhi thob/__/lam bzhi 'bras bu sku lnga lhun gyis grub/__/kun rdzob phyi yi bla mar dad gdung gis/__/don dam nang gi bla ma'i dgongs klong rtogs/__/zung 'jug ye shes bla ma'i zhal mjal nas/__/sku bzhi dbyer med bla ma'i sa thob shog__/dad dang nges 'byung yang dag blo gros kyis/__/tshul gnas thos bsam sgom pa mthar phyin te/__/skye 'chi bar do'i gnas skabs thams cad du/__/'bral med bla mas rjes su 'dzin gyur cig__/ces pa'ang rnying btsun theg mchog snying po'i bstan dang de 'dzin la mi 'phrog pa'i mos pa brtan pa 'gyur med ngag dbang shes rab nas rten dang bcas bskul ngor snga 'gyur rdo rje snying po'i chos kyi chu gter mdo khams zhe chen pa'i bka' 'bangs su skyes pa'i sngags btsun 'gyur med bslab gsum rgyal mtshan gyis 'bras ljongs sgang tog gi gtsug lag khang gi ba gam gsum par bris pa rje btsun bla ma'i ye shes gzigs pa'i byin rlabs 'jug pa'i rgyu kho nar gyur cig__/sarba mang+ga laM/__dge'o//___//