DKR-KABUM-11-DA-027

🚧 This website is under continued development. We appreciate your patience!

Previous Text Back to Volume PageNext Text

རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་རྩ་གསུམ་སྤྱི་དང་བྱེ་བྲག་གི་དབང་བསྐུར་གྱི་ཕྲེང་བ་བཀླག་ཆོག་ཏུ་བཀོད་པ་ཟབ་གསང་བདུད་རྩིའི་སྒོ་འབྱེད་སྐལ་བཟང་ཀུན་དགའི་རོལ་སྟོན།

Wylie title	rdzogs pa chen po klong chen snying gi thig le'i rtsa gsum spyi dang bye brag gi dbang bskur gyi phreng ba bklag chog tu bkod pa zab gsang bdud rtsi'i sgo 'byed skal bzang kun dga'i rol ston
Location	dil mgo mkhyen brtse bka' 'bum Volume 11, Text 27, Pages 158-325 (Folios 1a to 168b3)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	འཇིགས་མེད་གླིང་པ་ ('jigs med gling pa)
Citation	Khyentse, Dilgo. Rdzogs pa chen po klong chen snying gi thig le'i rtsa gsum spyi dang bye brag gi dbang bskur gyi phreng ba bklag chog tu bkod pa zab gsang bdud rtsi'i sgo 'byed skal bzang kun dga'i rol ston. In Skyabs rje dil mgo mkhyen brtse rin po che'i bka' 'bum, Vol. 11: 158-325. Delhi: Shechen Publications, 1994.
Genre	Empowerment Ritual - dbang chog - dbang skur
Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)
Colophon	།དེ་ལྟར་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྐོར་གྱི་དབང་འདི་དག་ལ་དབང་གི་སྤྱི་དོན་སྙིང་པོ་དོན་གསལ་ལས། དེའང་རང་བཞིན་བརྒྱད་ལྡན་གྱི་རྡོ་རྗེ་སློབ་དཔོན་དག་ལ་ནི་ཡི་གེ་འདི་ཙམ་གྱིས་མཚོན་ལ། གཞན་དུ་ལྷོངས་སུ་མ་གྱུར་པའི་གང་ཟག་རྣམས་ལ་ནི་མདོ་སྔགས་ཀྱི་ལམ་སྤྱི་དང་བྱེ་བྲག་དབང་གི་སྒྲོམ་ནས་ཁོང་དུ་ཆུད་པའི་སྐལ་པ་ཅན་ཉུང་བས་རང་དང་སློབ་མའི་དངོས་གྲུབ་ཀྱི་གེགས་སུ་འགྱུར་ཕྱིར་མདོ་སྒྱུ་སེམས་གསུམ་གྱི་རྒྱུད་སྡེའི་གནད་ལ་ངེས་པ་རྙེད་པར་མ་ནུས་ཀྱང༌། ཁོ་བོས་བྱས་པའི་གྲོལ་ཏིག་གི་དབང་ཆོག་མཁྱེན་བརྩེའི་དགོངས་རྒྱན་ལས་སྤྱི་དོན་ཤེས་པར་བྱ་བ་ཁོ་ནའོ། །ཞེས་རྗེས་སུ་བརྩེ་བས་བཀའ་བསྩལ་པ་བཞིན་ལགས་ཀྱང་རང་བཞིན་བརྒྱད་ལྡན་གྱི་དྲི་ཙམ་ཡང་མི་བྲོ་བ་བདག་ལྟ་བུ་ལས་ངན་གྱིས་དབང་བསྐུར་བྱེད་པའི་སློབ་དཔོན་བྱ་བའི་དུས་ཀྱི་མཐར་སླེབས་པའི་ཚེ། ཌཱ་ཀིའི་ཞལ་རླངས་འཐུལ་ཞིང་གསེར་ཞུན་མ་ལྟ་བུའི་ཟབ་ཆོས་འདི་དག་ལ་གཟུ་ལུམ་གྱིས་སྤྱོད་པའི་ཉེས་པས་རང་གཞན་ལ་ཕན་པ་ལས་གནོད་ཚབས་ཆེ་བ་འབྱུང་བར་རིག་ནས་གཏེར་གཞུང་རྡོ་རྗེའི་ཚིག་རྐང་ཧ་ཅང་བསྡུས་དྲགས། ཆོས་ཀྱི་སྤྱན་ལྡན་མཁས་གྲུབ་གོང་མ་རྣམས་ཀྱི་གསུང་ཡིད་རྟོན་འོས་དག་དཔེ་ཐོབ་པའི་སྐལ་བ་མ་བྱུང་བས་འདི་ལྟ་བུ་ཞིག་མི་བྲི་ཀ་མེད་དུ་གྱུར་པ་སྟེ། སྔར་མདོ་ཁམས་སུ་རང་གནས་ལ་འཁོད་པའི་སྐབས་ཀུན་མཁྱེན་འཇམ་པའི་དབྱངས་ཆོས་ཀྱི་བློ་གྲོས་རིན་པོ་ཆེས་ཡང་གསང་བླ་མའི་སྒྲུབ་ཐབས་ཐིག་ལེའི་རྒྱ་ཅན་དང༌། ཡུམ་ཀའི་ནང་སྒྲུབ་བདེ་ཆེན་གཏེར་བུམ་གྱི་དབང༌། ཁྲག་འཐུང་རིགས་བཞིའི་སྒོས་དབང་རྣམས་བཀླག་ཆོག་ཏུ་བྲི་དགོས་པར་རྟེན་དང་བཅས་ཆེད་དུ་བཀའ་བསྩལ་ཞིང༌། ཁྲག་འཐུང་རིགས་བཞིའི་དབང་གི་སྤྱི་ཆིངས་ཐམས་ཅད་མཁྱེན་གཟིགས་མཁྱེན་བརྩེའི་དབང་པོས་མཛད་པ་བཅས་གནང་བ་བཞིན་བྲིས་ཏེ་སྤྱན་བསྟར་ཞུས་པས་དགྱེས་པའི་དབྱུག་དབྱུང་ཐོབ་ནའང་དེ་དག་ཀྱང་དཔེ་བརླག་པས་ཡིད་ཡུལ་དུ་གང་མཆིས་ལ་ཞིབ་དཔྱོད་དང༌། གཙོ་བོ་སྙིང་ཐིག་རང་གཞུང་དང་གྲོལ་ཏིག་དབང་ཆེན་རྣམས་གོ་བསྡུར་གྱིས་དོན་ཚང་འཇུག་བདེའི་ཁུལ་དུ་བྲིས་པ་འདི་ཡང་སྔ་འགྱུར་རྡོ་རྗེ་སྙིང་པོའི་རིང་ལུགས་ལ་རྒྱུ་མཚན་ཤེས་པའི་མཁྱེན་དཔྱོད་ཀྱི་ཆོས་སྤྱན་ཡངས་པ་རྡོ་རྗེའི་མཆེད་པོ་དར་ཐང་སྤྲུལ་པའི་སྐུ་ཀུན་དགའམ། མཚན་གཞན་ཡེ་ཤེས་རྡོ་རྗེར་གྲགས་པས་རིང་མོ་ནས་བསྐུལ་བ་བཞིན་སྙིགས་མའི་སྔགས་བན་ཧྲུལ་པོ་འཁོས་ཆུང་གྱི་ན་བ་འཇིགས་མེད་མཁྱེན་བརྩེའི་འོད་ཟེར་རབ་གསལ་ཟླ་བར་འབོད་པའི་རྒྱལ་ཁམས་པ་དེས་རབ་བྱུང་བཅུ་དྲུག་པའི་བྱེ་བྲག་ཟིལ་གནོན་ཞེས་པ་མེ་རྟ་ལོའི་ས་ཟླའི་དམར་ཕྱོགས་ཀྱི་ཚེས་བཅུ། ཐེག་མཆོག་ཆོས་ཀྱི་རྒྱལ་རྔ་སྒྲོགས་པའི་འཇིགས་བྲལ་གྱི་པཎྜི་ཏ་ཆེན་པོ་མི་ཕམ་འཇམ་དབྱངས་རྣམ་རྒྱལ་རྒྱ་མཚོའི་དུས་ཀྱི་མཆོད་པའི་ཉིན་དབུ་བརྩམས་ཏེ་རིམ་གྱིས་རྫོགས་པར་བྱས་པའི་གནས་རང་བྱུང་པདྨའི་སྒྲུབ་གནས་སྤ་གྲོ་སྟག་ཚང་སེང་གེ་བསམ་གྲུབ་ཀྱི་རྡོ་རྗེའི་ཀེའུ་ཚང་དང་འདབས་འབྱོར་ཞིང༌། ཆོས་རྒྱལ་བྱང་ཆུབ་སེམས་དཔའ་སྲོང་བཙན་སྒམ་པོའི་སྐུའི་རིང་ལ་བཞེངས་པའི་མཐའ་འདུལ་གྱི་གཙུག་ལག་ཁང༌། བོད་ཡུལ་ཕན་བདེའི་བཙས་གྱུར་གྱི་ས་གནད། ལྷོ་ལྗོངས་ཆོས་ཀྱི་རྒྱལ་ཁབ་འབྲུག་སྤ་གྲོ་སྐྱེར་ཆུའི་ལྷ་ཁང་དུ་སངས་རྒྱས་གཉིས་པ་མཁན་སློབ་ཆོས་གསུམ་གྱི་སྣང་བརྙན་གསར་བསྐྲུན་གྱི་ཞབས་ཏོག་བགྱིས་པའི་སྐབས་གསེང་རྣམས་སུ་བྲིས་ཤིང༌། སྙིང་པོའི་བསྟན་དང་བསྟན་འཛིན་ལ་དད་མོས་མཆོག་ཏུ་གྱུར་པ་བླ་མ་ཀུན་བཟང་རིག་འཛིན་རྡོ་རྗེས་ཀྱང་བསྐུལ་བ་བཞིན་སླར་ཡང་ཞིབ་དཔྱོད་དང་བཅས་ཡི་གེ་གཉིས་པར་འདུ་བར་མཛད་པ་པོ་ངེས་དོན་སྙིང་པོའི་རྣལ་འབྱོར་དབྱིངས་རིག་བྱང་ཆུབ་དབང་པོས་མཛད་པ་འདིས་ཀྱང༌། འོད་གསལ་རྡོ་རྗེ་སྙིང་པོའི་བསྟན་པ་གཞིར་བཞེངས་སུ་བསླང་ནས་འབྲེལ་ཚད་ཀུན་བཟང་གདོད་མའི་གྲོལ་གཞིར་དབུགས་དབྱུང་ཞིང་གྲོལ་བ་དྲུག་ལྡན་གྱི་ཕྲིན་ལས་རྟག་ཁྱབ་ལྷུན་གྲུབ་ཏུ་འབྱུང་བའི་རྒྱུ་ཁོ་ནར་གྱུར་ཅིག།
	/de ltar rdzogs pa chen po klong chen snying gi thig le'i chos skor gyi dbang 'di dag la dbang gi spyi don snying po don gsal las/_de'ang rang bzhin brgyad ldan gyi rdo rje slob dpon dag la ni yi ge 'di tsam gyis mtshon la/_gzhan du lhongs su ma gyur pa'i gang zag rnams la ni mdo sngags kyi lam spyi dang bye brag dbang gi sgrom nas khong du chud pa'i skal pa can nyung bas rang dang slob ma'i dngos grub kyi gegs su 'gyur phyir mdo sgyu sems gsum gyi rgyud sde'i gnad la nges pa rnyed par ma nus kyang*/_kho bos byas pa'i grol tig gi dbang chog mkhyen brtse'i dgongs rgyan las spyi don shes par bya ba kho na'o/_/zhes rjes su brtse bas bka' bstsal pa bzhin lags kyang rang bzhin brgyad ldan gyi dri tsam yang mi bro ba bdag lta bu las ngan gyis dbang bskur byed pa'i slob dpon bya ba'i dus kyi mthar slebs pa'i tshe/_DA ki'i zhal rlangs 'thul zhing gser zhun ma lta bu'i zab chos 'di dag la gzu lum gyis spyod pa'i nyes pas rang gzhan la phan pa las gnod tshabs che ba 'byung bar rig nas gter gzhung rdo rje'i tshig rkang ha cang bsdus drags/_chos kyi spyan ldan mkhas grub gong ma rnams kyi gsung yid rton 'os dag dpe thob pa'i skal ba ma byung bas 'di lta bu zhig mi bri ka med du gyur pa ste/_sngar mdo khams su rang gnas la 'khod pa'i skabs kun mkhyen 'jam pa'i dbyangs chos kyi blo gros rin po ches yang gsang bla ma'i sgrub thabs thig le'i rgya can dang*/_yum ka'i nang sgrub bde chen gter bum gyi dbang*/_khrag 'thung rigs bzhi'i sgos dbang rnams bklag chog tu bri dgos par rten dang bcas ched du bka' bstsal zhing*/_khrag 'thung rigs bzhi'i dbang gi spyi chings thams cad mkhyen gzigs mkhyen brtse'i dbang pos mdzad pa bcas gnang ba bzhin bris te spyan bstar zhus pas dgyes pa'i dbyug dbyung thob na'ang de dag kyang dpe brlag pas yid yul du gang mchis la zhib dpyod dang*/_gtso bo snying thig rang gzhung dang grol tig dbang chen rnams go bsdur gyis don tshang 'jug bde'i khul du bris pa 'di yang snga 'gyur rdo rje snying po'i ring lugs la rgyu mtshan shes pa'i mkhyen dpyod kyi chos spyan yangs pa rdo rje'i mched po dar thang sprul pa'i sku kun dga'am/_mtshan gzhan ye shes rdo rjer grags pas ring mo nas bskul ba bzhin snyigs ma'i sngags ban hrul po 'khos chung gyi na ba 'jigs med mkhyen brtse'i 'od zer rab gsal zla bar 'bod pa'i rgyal khams pa des rab byung bcu drug pa'i bye brag zil gnon zhes pa me rta lo'i sa zla'i dmar phyogs kyi tshes bcu/_theg mchog chos kyi rgyal rnga sgrogs pa'i 'jigs bral gyi paN+Di ta chen po mi pham 'jam dbyangs rnam rgyal rgya mtsho'i dus kyi mchod pa'i nyin dbu brtsams te rim gyis rdzogs par byas pa'i gnas rang byung pad+ma'i sgrub gnas spa gro stag tshang seng ge bsam grub kyi rdo rje'i ke'u tshang dang 'dabs 'byor zhing*/_chos rgyal byang chub sems dpa' srong btsan sgam po'i sku'i ring la bzhengs pa'i mtha' 'dul gyi gtsug lag khang*/_bod yul phan bde'i btsas gyur gyi sa gnad/_lho ljongs chos kyi rgyal khab 'brug spa gro skyer chu'i lha khang du sangs rgyas gnyis pa mkhan slob chos gsum gyi snang brnyan gsar bskrun gyi zhabs tog bgyis pa'i skabs gseng rnams su bris shing*/_snying po'i bstan dang bstan 'dzin la dad mos mchog tu gyur pa bla ma kun bzang rig 'dzin rdo rjes kyang bskul ba bzhin slar yang zhib dpyod dang bcas yi ge gnyis par 'du bar mdzad pa po nges don snying po'i rnal 'byor dbyings rig byang chub dbang pos mdzad pa 'dis kyang*/_'od gsal rdo rje snying po'i bstan pa gzhir bzhengs su bslang nas 'brel tshad kun bzang gdod ma'i grol gzhir dbugs dbyung zhing grol ba drug ldan gyi phrin las rtag khyab lhun grub tu 'byung ba'i rgyu kho nar gyur cig/_

Tibetan Text

Wylie

[edit]

༄༅། །རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་རྩ་གསུམ་སྤྱི་དང་བྱེ་བྲག་གི་དབང་བསྐུར་གྱི་ཕྲེང་བ་བཀླག་ཆོག་ཏུ་བཀོད་པ་ཟབ་གསང་བདུད་རྩིའི་སྒོ་འབྱེད་སྐལ་བཟང་ཀུན་དགའི་རོལ་སྟོན་ཞེས་བྱ་བ་བཞུགས་སོ། །།

༄༅། །གུ་རུ་ཏྲི་མཱུ་ལ་བྷྱཿན་མ་མི། བྱིན་རླབས་བདུད་རྩིའི་སྤྲིན་གྱིས་རབ་སྒེག་སྐུ་གསུམ་སྟོན་མཆོག་པདྨ་སྐྱེས། །གྲུབ་གཉིས་འདོད་རྒུའི་ཆར་བཟང་རྟག་འཇོ་ཞི་ཁྲོ་རབ་འབྱམས་དཀྱིལ་འཁོར་ལྷ། །བདེ་སྟོང་གློག་གི་རྩེ་གར་དང་བཅས་ཕྲིན་ལས་རབ་མྱུར་མཁའ་འགྲོའི་ཚོགས། །མི་ཕྱེད་དད་བརྒྱའི་མཁའ་ལ་རྟག་བཞུགས་བྱང་ཆུབ་བར་དུ་རྗེས་འཛིན་མཛོད། །གསང་བ་ཟབ་མོའི་དགོངས་དོན་མ་ཉམས་ཤིང༌། །མཁས་གྲུབ་ཚད་མའི་ཕྱག་བཞེས་ཀྱིས་བརྒྱན་པ། །མཆོག་གསང་རྡོ་རྗེ་བཞི་ཡི་འཁོར་ལོ་རུ། །སྨིན་བྱེད་ཐབས་ཚུལ་སྐལ་བཟང་དགའ་སྟོན་སྤེལ། །འོད་གསལ་རྫོགས་པ་ཆེན་པོ་ཀློང་ཆེན་སྙིང་གི་ཐེག་ལེའི་རྩ་གསུམ་བཀའ་སྲུང་དང་བཅས་པའི་དབང་གི་ཕྱག་བཞེས་འདུས་གསལ་དུ་འགོད་པ་ལ། རྩ་དབང་རྒྱལ་ཐབས་སྤྱི་བླུགས་ལས། གསང་ཆེན་རྡོ་རྗེ་ཐེག་པ་ནི༔ འཇུག་སྒོ་དབང་ལ་དམ་ཚིག་སྲོག༔ རང་བཞིན་གནས་ལུགས་བརྗོད་བྲལ་ཏེ༔ ཞེས་གསུངས་པ་ལྟར་སྔགས་ལམ་ལ་ཐོག་མར་འཇུག་པའི་སྒོ་འབྱེད་མེད་དུ་མི་རུང་བ་འཆད་བྱ་དབང་གི་རྣལ་འབྱོར་ཏེ། དབང་སྐུར་བྱེད་པ་པོ་རྡོ་རྗེ་སློབ་དཔོན་མཚན་ཉིད་དང་ལྡན་པ། ལྷ་དང༌། བདག་དང༌། གསང་སྔགས་དང༌། བཟླས་བརྗོད་དང༌། འཕྲོ་འདུའི་དེ་ཁོ་ན་ཉིད་དེ་སྔགས་ཀྱི་ཡན་ལག་ལྔ་ལ་རང་བྱན་ཚུད་པའི་ནུས་པ་རྙེད་པས་སློབ་མའི་རྒྱུད་བྱིན་གྱིས་རློབ་ནུས་པ་བདག་པོའི་རྐྱེན། བྱ་བའི་ལས་བཅུད་བཟང་པོ་བླུག་པ་ལ་སྣོད་གཙང་མ་བྱ་བ་བཞིན་རྒྱུ་ཡི་རྐྱེན་དད་བརྩོན་ཤེས་རབ་ཀྱི་སྣོད་དང་ལྡན་པའི་སློབ་མ་ལ། སའི་ཆོ་ག་སྔོན་དུ་འགྲོ་བས་ལྷ་དང༌། བུམ་པ་དང༌། སློབ་མ་ལྷག་པར་གནས་པ། ཐིག་ཚོན་རྒྱན་བཀོད་དཀྱིལ་འཁོར་སྒྲུབ་ཅིང་མཆོད་དེ་བདག་ཉིད་འཇུག་པའམ། རིག་པའི་མེ་ཏོག་དོར་ཞིང་གནང་བ་ནོད་པ་བཅས་བྱས་ནས་ཕྱི་མཚན་མ་དང༌། ནང་ཡེ་ཤེས་ཀྱི་དཀྱིལ་འཁོར་དུ་འཇུག་པས་རྒྱུད་སྦྱང་བ་ལ། བྱེད་པ་བུམ་པ་བདུད་རྩི་ཕྱག་རྒྱ་བརྡ་ཚིག་སོགས་ལྷན་ཅིག་བྱེད་པ་རྒྱུ་ཡི་རྫས་དང༌། སྔགས་དང་ཏིང་ངེ་འཛིན་གསུམ་ཚོགས་པའི་ཆོ་ག་ཁྱད་པར་ཅན་གྱིས་རབ་ཏུ་གནས་པའམ། རབ་གནས་ཀྱི་བྱ་བ་ཟིན་པའི་བྱིན་རླབས་དང་ནུས་པའི་ཁྱད་པར་དང་ལྡན་པ་དམིགས་པའི་རྐྱེན་གྱིས་དབང་བསྐུར་བས། བྱ་བ་ཤིན་ཏུ་རྟོགས་པར་དཀའ་བ་དག་མཉམ་བདེན་པ་དབྱེར་མེད་གཞི་ཡི་དཀྱིལ་འཁོར་ཡེ་ནས་རང་ལ་གནས་པའི་ཆོས་ཉིད་ཀྱིས་ཁྱབ་པའི་རྩ་རླུང་ཐིག་ལེ་སེམས་དང་བཅས་པ་མཚུངས་ལྡན་དུ་གནས་པའི་རྒྱུ་གདོད་ནས་གདན་གསུམ་ཚང་བའི་ལྷའི་སྐུ་གསུང་ཐུགས་ཡེ་ཤེས་རྡོ་རྗེའི་ངོ་བོར་དག་པ་ཉིད་ངོ་འཕྲོད་པར་བྱས་པ་ལས་རང་སྐལ་གྱི་སྦྱང་བྱ་གློ་བུར་གྱི་དྲི་མ་ཅི་རིགས་དག་པའི་ཉམས་སད་པར་བྱས་ཤིང༌། ཕར་ཕྱིན་དང་རྒྱུད་སྡེ་འོག་མར་མ་གྲགས་པའི་དབང་དང་ཆོ་ག་སྔ་མ་སྔ་མས་གོ་ཕྱེ་ནས་ཕྱི་མ་ཕྱི་མ་འབྱུང་བས་ན་སྔ་མ་སྔ་མ་དེ་མ་ཐག་པའི་རྐྱེན་ཏེ། དེ་ལྟར་རྒྱུ་གཉིས་དང་རྐྱེན་བཞི་སྟེ་དྲུག་ཚོགས་པའི་མཐུ་ལས། ཐོབ་བྱ་རང་གནས་ཀྱི་ཡེ་ཤེས་ཅི་རིགས་གསོས་ཐེབས་པའི་མཐུས་ལམ་རིམ་པ་གཉིས་ཀྱི་ཡེ་ཤེས་མངོན་དུ་སྐྱེས་སམ། ཆུ་ལུད་དྲོད་གཤེར་འཛོམ་པ་ལ་ས་བོན་ཐེབས་པ་ལྟར་ཡེ་ཤེས་བཙན་ཐབས་སུ་སྐྱེ་ངེས་ཀྱི་ནུས་རུང་དུ་སྨིན་པར་བྱས་པས་རྒྱུད་འགྱུར་བའི་ཁྱད་པར་ནི་ཐོབ་པ་སྟེ། དེ་དག་ཀྱང་ཆོས་ཉིད་བདེ་བ་ཆེན་པོ་དང་ཆོས་ཅན་རྟེན་འབྲེལ་བསླུ་མེད་ཀྱི་སྟོབས་བསམ་གྱིས་མི་ཁྱབ་པ་དང༌། དེ་བཞིན་གཤེགས་པའི་བྱིན་གྱིས་བརླབས་པའི་མཐུ་བསམ་གྱིས་མི་ཁྱབ་པ་དང༌། ཐབས་ལ་མཁས་པ་གསང་སྔགས་ཀྱི་སྤྱོད་པ་ཁྱད་པར་ཅན་སྔགས་དང་ཕྱག་རྒྱའི་ནུས་པ་བསམ་གྱིས་མི་ཁྱབ་པ་ལས་བྱུང་བས་ན། རྡོ་རྗེ་བཞིའི་ཡེ་ཤེས་ལ་གོ་མྱོང་རྟོགས་པ་ཅི་རིགས་སྐྱེས་པ་དེ་ཉིད་གོང་ནས་གོང་དུ་སྤེལ་བའི་ལམ་ལ་ཚུལ་བཞིན་འབད་ན་སྙིགས་དུས་ཀྱི་ཚེ་ཐུང་གཅིག་ལ་རྡོ་རྗེ་འཆང་གི་གོ་འཕང་ཐོབ་ནུས་ལ། ཚེ་འདིར་ལམ་ལ་ཆེད་དུ་མ་འབད་ཀྱང་དམ་ཚིག་མ་ཉམས་ན་རིང་པོར་མི་ཐོགས་པར་འཚང་རྒྱ་ནུས་པར་གསུངས་པས། མཐར་འབྲས་བུ་སངས་རྒྱས་སྐུ་བཞིའི་གོ་འཕང་བདེ་མྱུར་དུ་ཐོབ་བྱེད་སྔགས་ལམ་གྱི་རྩ་བ་དབང་ལ་རག་ལས་པས་ཤིན་ཏུ་གནད་ཟབ་པའི་མཐར་ཐུག་རྡོ་རྗེ་ཐེག་པའི་ལམ་གྱི་ཐོག་མའི་འཇུག་སྒོ་གཅིག་པུར་གྱུར་པ་སྟེ། དེ་དག་གི་རྣམ་གཞག་ཤེས་པ་ནི་ཤིན་ཏུ་གལ་ཆེ་བས་ན་དཔལ་སྒྱུ་འཕྲུལ་དྲྭ་བ་རྩ་རྒྱུད་གསང་བ་སྙིང་པོའི་མན་ངག་གི་དགོངས་པ་ལྟར་བཀྲལ་བ་ལེགས་བཤད་ཕྱོགས་བཅུའི་མུན་སེལ། སྤྱི་དོན་རྣམ་པ་གཉིས་དང༌། ཡོན་ཏན་རིན་པོ་ཆེའི་མཛོད་ཀྱི་ལེའུ་བཅུ་པའི་རྩ་འགྲེལ་གྱི་གཞུང་ལ་བརྟེན་ནས་གཏན་ལ་དབབ་པར་བྱ་དགོས་ལ། སྐབས་འདིར་འཆད་བྱའི་གཙོ་བོ་ཀུན་མཁྱེན་ཆོས་ཀྱི་རྒྱལ་པོ་རིག་འཛིན་འཇིགས་མེད་གླིང་པ་ཉིད་ཀྱིས་ཤིང་རྟའི་ལམ་སྲོལ་གསར་དུ་ཕྱེ་བའི་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེ་ཞེས་རྒྱལ་བའི་བསྟན་པ་རིན་པོ་ཆེ་ཡོངས་རྫོགས་ཉམས་ལེན་གྱི་ལུས་གཅིག་ལ་རྫོགས་ཤིང་མཐར་ཐུག་གཏན་ལ་དབབ་བྱ་སྔ་འགྱུར་འོད་གསལ་རྡོ་རྗེ་སྙིང་པོ་ཐེག་མཆོག་རྫོགས་པ་ཆེན་པོ་ཐུན་མིན་མན་ངག་སྡེའི་ཟབ་དོན་ཐང་མར་བརྡལ་བས་བཀའ་གཏེར་དག་སྣང་གི་ཆོས་ཚུལ་རྒྱ་མཚོའི་སྲོག་སྙིང་གཅིག་པུར་གྲུབ་པ་ལ། རྒྱ་ཆེ་བ་རྒྱུད་སྡེའི་དགོངས་པ་གཙོ་བོར་བཏོན་པ་རྒྱུད་ལུགས་ཕུར་པ་རྒྱལ་པོའི་ལུགས་དང༌། ཟབ་པ་ཀློང་ཆེན་དགོངས་པའི་གསང་མཛོད་ལས་བྱོན་པའི་ཀློང་ཆེན་སྙིང་གི་ཐིག་ལེའི་རྩ་གསུམ་ཆོས་སྲུང་དང་བཅས་པའི་སྨིན་གྲོལ་ཡོངས་རྫོགས་སྒྲུབ་སྡེའི་རིང་ལུགས་ཅན་དུ་བཞུགས་པ་ལས་སྐབས་འདིར་འཆད་བྱ་ཕྱི་མ་ཉིད་ཡིན་ལ། འདི་ཉིད་ཁོ་ན་ལའང་སྒྲུབ་བྱའི་ལྷའི་སྒོ་ནས་དབྱེ་ན། བྱིན་རླབས་ཀྱི་རྩ་བ་བླ་མ་རིག་འཛིན་འདུས་པ། བླ་མ་དྲག་པོ་རྟ་ཁྱུང་འབར་བ། དངོས་གྲུབ་ཀྱི་རྩ་བ་ཡི་དམ་བཀའ་བརྒྱད་དཔལ་ཆེན་འདུས་པ། དེའི་ཡན་ལག་གཤིན་རྗེ་འཆི་བདག་ཟིལ་གནོན། རྟ་མགྲིན་ཁམས་གསུམ་རོལ་པ། ཡང་དག་སངས་རྒྱས་མཉམ་སྦྱོར། ཕུར་པ་བདུད་དཔུང་ཟིལ་གནོན་ཏེ་ཁྲག་འཐུང་རིགས་བཞི། གསང་སྒྲུབ་ཐུགས་རྗེ་ཆེན་པོ་སྡུག་བསྔལ་རང་གྲོལ། ཁྲོ་བོ་རྟ་མགྲིན། ཡང་གསང་བླ་སྒྲུབ་ཐིག་ལེའི་རྒྱ་ཅན། ཞི་ཁྲོ་ཁྲོམ་དཀྲུགས་ངན་སོང་སྦྱོང་བ། ཕྲིན་ལས་ཀྱི་རྩ་བ་མཁའ་འགྲོ་ཡུམ་ཀ་བདེ་ཆེན་རྒྱལ་མོ། དེའི་ནང་སྒྲུབ་སྒྲོལ་མ་ཉེར་གཅིག །གསང་སྒྲུབ་མཁའ་འགྲོ་སེང་གདོང༌། བཀའ་སྲུང་མ་མགོན་ལྕམ་དྲལ། ཚེ་རིང་མ་བཅས་དང༌། སྒྲུབ་བྱེད་ཐབས་ཀྱི་གསེང་ལམ་ནང་རྒྱུད་ཡོ་ག་གསུམ་གྱི་དགོངས་པ་དང་འབྲེལ་བས། སྒྱུ་འཕྲུལ་དྲྭ་བ་མ་ཧཱའི་དགོངས་པ་དང་འབྲེལ་བའི་དཔལ་ཆེན་རྩ་བ་ཡན་ལག །ཨ་ནུའི་མདོ་ལུང་གི་སྙིང་པོ་རིགས་བརྒྱ་དང་རིག་འཛིན། ཨ་ཏིའི་དགོངས་དོན་གྱི་བསྐྱེད་རྫོགས་ཡུམ་ཀ་དང༌། ཡང་གསང་བླ་སྒྲུབ་ཀྱིས་མཚོན་པའི་དབྱེ་བསྡུའི་གོ་རིམ་དང་རྣམ་གཞག་དུ་མ་ཡོད་ཀྱང༌། སྐབས་འདིར་དབང་གི་སྤྱི་དོན་སྙིང་པོ་དོན་གསལ་ལས། འདིར་དང་པོ་སྨིན་བྱེད་གདན་གསུམ་ཚང་བའི་དཀྱིལ་འཁོར་ཞི་ཁྲོ་ལ་བརྟེན་པ་ཡིན་པས། ཅེས་གསུངས་པ་ལྟར་ཐུན་མོང་གི་སློབ་མ་ལ་སྟ་གོན་དང་ཕྱི་ནང་གི་འཇུག་པ་ཕན་ནུས་ཟབ་མོའི་དབང་གི་ཆོ་ག་རྒྱས་པ། རྒྱུ་སྨིན་བྱེད་ཀྱིས་སྒོ་འབྱེད་དགོས་པའི་ཕྱིར་རྒྱུད་སྡེའི་དགོངས་པ་དང་འབྲེལ་ཆེ་བ་ཞི་ཁྲོ་ངན་སོང་སྦྱོང་བའི་དབང་གི་རིམ་པ་ཐོག་མར་འགོད་པ་ལ། གསང་བ་ཡོངས་རྫོགས་འདུས་པའི་རྒྱུད་ལས། མདོར་ན་དབང་གི་སྔོན་འགྲོ་རྗེས། །སྒྲུབ་ཆེན་བསྙེན་སྒྲུབ་ཁོག་དབུབ་ལ། །ལས་ལ་དབང་གིས་སྦྱོར་བ་སྟེ། །ཞེས་པ་ལྟར་སྔོན་འགྲོ། དངོས་གཞི། རྗེས་གསུམ་མོ། །དང་པོ་ལ་གསུམ། ལྷ། བུམ་པ། སློབ་མ་ལྷག་གནས་སོ། །དང་པོ་ལའང་ས་སློང་བ་དང་ལྷ་སྟ་གོན་དངོས་གཉིས་ལས། དང་པོ་ནི། སྤྱིར་ཀུན་མཁྱེན་འཇིགས་བྲལ་གྱི་སློབ་དཔོན་ཆེན་པོ་ཉིད་ཀྱིས་ཕུར་པ་རྒྱུད་ལུགས་དང༌། གྲོལ་ཐིག་དབང་ཆོག་སོགས་སུ་ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང༌། བསྙེན་སྒྲུབ་ཡན་ལག་བཞིས་ཁོག་དབུབ། རྗེས་རང་གཞན་སྨིན་གྲོལ་ལ་སྦྱོར་ཚུལ་གྱི་རྣམ་གཞག་ཞིབ་མོ་ལྟར་གསུངས་ཀྱང༌། སྐབས་འདིར་དེང་དུས་ཀྱི་ཕྱག་བཞེས་དཀྱུས་ལྟར་འཆད་པ་ལ། རང་བཞིན་བརྒྱད་ལྡན་གྱི་རྡོ་རྗེ་སློབ་དཔོན་མཚན་ཉིད་དང་ལྡན་པས་གསང་བའི་དཀྱིལ་འཁོར་འདི་ཉིད་ཀྱི་བསྙེན་སྒྲུབ་མཐར་སོན་པས། སྣོད་ཀྱི་སྐལ་པ་བཟང་པོས་ཟབ་མོའི་བཅུད་འཛིན་ནུས་པའི་སློབ་མ་དཀྱིལ་འཁོར་དུ་འཇུག་ཅིང་སྨིན་པར་བྱ་བའི་ཕྱིར་བཀྲ་ཤིས་བྱིན་ཆགས་པ་མཚན་ཉིད་དང་ལྡན་པའི་གནས་སུ། གཟའ་སྐར་ཚེས་གྲངས་དགེ་ཞིང་ཤིས་པ་ལ་གཞུང་མཐུན་གྱི་རྟེན་དང་རྒྱན་གྱི་ཡོ་བྱད་དུ་མས་སྤྲས་པའི་གུང་དུ་བདག་བསྐྱེད་ཞི་ཁྲོའི་གཏོར་མ་སྨན་རཀ །ཆུ་གཉིས་ཉེར་སྤྱོད་དང༌། དཀྱིལ་འཁོར་གང་དུ་བྱ་བར་སྟེགས་བུ་ཁེབས་ལྡན་གྱི་དབུས་སུ་རིན་པོ་ཆེའི་མཎྜལ་དྲིའི་ཐིག་ལེ་བཀོད་པ་ལ་མེ་ཏོག་གམ་འབྲུ་དཀར་གྱི་ཚོམ་བུ་དབུས་སུ་གཅིག །དེ་རྒྱབ་བཞི། དེ་རྒྱབ་བརྒྱད། དེ་རྒྱབ་བཅུ་དྲུག །དེ་རྒྱབ་སུམ་ཅུ་རྩ་གཉིས། དེ་རྒྱབ་བཞི་བཅུ་རྣམས་རིམ་གྱིས་ཇེ་ཆུང་དུ་བཀོད། ཆུ་གཉིས་ཉེར་སྤྱོད་དང་བཅས་པས་བསྐོར། དེའི་མདུན་དུ་སྟེགས་ཅུང་དམའ་བར་མཎྜལ་ལ་བ་བྱུང་དང་དྲིས་བྱུགས་པར་མེ་ཏོག་གི་ཚོམ་བུ་དང༌། མདུན་དུ་ཆུ་གཅིག་སྔོན་འགྲོའི་མཆོད་པ་ལྔ་ས་ལྷ་དང༌། གཉུག་མར་གནས་པ་ལ་དཀར་གཏོར་གསེར་སྐྱེམས་བཅས་བཤམས། གཞན་ཉེར་མཁོའི་ཡོ་བྱད་ཚོགས་པར་བྱས་ལ། ཞི་ཁྲོ་རང་གཞུང་གི་སྐྱབས་སེམས་ནས་བརྩམས་བདག་བསྐྱེད་ཚང་བར་བཏང༌། རྣམ་སྣང་ཐུགས་ཀྱི་དཀྱིལ་འཁོར་སོགས་ཞི་བ་དང༌། བདག་ཉིད་རྣམ་སྣང་གསལ་བའི་ལྗགས། །རྡོ་རྗེ་རྩེ་གསུམ་དམར་པོ་ཡི་སོགས་ཀྱིས་ཁྲོ་བོ་བཅས་ཅུང་ཟད་བཟླ། ལས་སྦྱོར་རྩ་རིག་སྐབས་འདིར་མ་སྦྱར་ཡང་རུང་སྙམ། ས་ལྷའི་གཏོར་མ་བསང་སྦྱངས། ཨོཾ་ཨཱཿཧཱུྃ་འབྲུ་གསུམ་གྱིས་བྱིན་གྱིས་བརླབས། བསྡུ་རྒྱ་སེ་གོལ་གཏོགས་པ་དང་བཅས། པྲི་ཐཱི་དེ་ཝི་ས་མཱ་ཛཿ ཞེས་བརྗོད་པས། སའི་ལྷ་མོ་སེར་མོ་བུམ་པ་འཛིན་པ་དོ་ཤལ་དང་རྐང་གདུབ་ཀྱི་སྒྲ་སྒྲོགས་པ་ས་བདག་གིས་འཁོར་དང་བཅས་པ་སྤྱན་དྲངས་པར་གྱུར། ཨོཾ་པྲི་ཐཱི་དེ་ཝི་ཨརྒྷཾ་པུཥྤེ་སོགས་ནས། ཤབྡ་པཱུ་ཛ་ཧོཿས་མཆོད། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང༌། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱ་ཕྱིར་དཀྱིལ་འཁོར་བྲི། །བདག་རྡོ་རྗེ་འཛིན་པས་སེམས་ཅན་ཐམས་ཅད་ཀྱི་དོན་དུ་ས་ཕྱོགས་འདིར་དཀྱིལ་འཁོར་ཆེན་པོ་བཞེངས་ཀྱི། སའི་ཕྱོགས་འདི་བདག་ལ་གནང་བར་མཛོད་ཅིག །ཅེས་བརྗོད་པས། དེས་ཀྱང་རིག་པ་འཛིན་པ་ཁྱོད་ཅི་དགའ་བར་བྱོས་ཤིག །ཅེས་གནང་བ་བྱིན་པར་བསམ། གཉུག་མར་གནས་པ་ལ། ཨ་ཀཱ་རོ་མུ་སོགས་ལན་གསུམ་གྱིས་བསྔོས་ལ། གང་དག་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །ས་འདི་བདག་གིས་བསླང་བར་བགྱི། །དཀྱིལ་འཁོར་དོན་དུ་བསྩལ་དུ་གསོལ། །ཞེས་དང༌། མཆོད་སྦྱིན་གཏོར་མ་འདི་བཞེས་སོགས་ཀྱང་བརྗོད། བཛྲ་མུས་མགྲོན་རྣམས་རང་གནས་སུ་བཏང༌། ཨོཾ་མེ་དི་ནི་བཛྲ་བྷནྡྷ་བྷནྡྷ་ཧཱུྃ་ཕཊ་ཀྱིས་རྡོ་རྗེའི་གཞིར་གྱུར། ཨོཾ་བཛྲ་རཀྵ་རཀྵ་ཧཱུྃ་ཕཊ་ཀྱིས་བསྲུང་བར་བྱས་པས་སྒྲུབ་ཁང་རྙིང་པ་དང་རས་བྲིས་ལ་བརྟེན་པས་རུང་ཞིང༌། རྡུལ་ཚོན་ལ་སྦྱང་བ་བཅས་དགོས་པར་གསུངས། དེ་དག་གིས་ས་སློང་གི་དོན་ཚང་བའོ། །དཀྱིལ་འཁོར་རྡུལ་ཚོན་ལ་བརྟེན་པ་ཡིན་ན་སྐབས་འདིར་ཐིག་ལས་འབྱུང་ཡང་དེང་སང་རས་བྲིས་ལ་བརྟེན་པ་མང་བས་མ་སྤྲོས་སོ། །གཉིས་པ་ལྷ་སྟ་གོན་དངོས་ནི། ཨོཾ་བཛྲ་ཀྲོ་ཏ་ཧྱ་གྲཱྀ་ཝ་ཧུ་ལུ་ཧུ་ལུ་ཧཱུྃ་ཕཊ། ཨརྒྷཾ་པདྱཾ་སོགས། ཤབྡ་ཨཱཿཧཱུྃ། ཡོངས་སུ་གྱུར་པ་ལས་ཕྱི་ནང་གི་མཆོད་པ་རྣམས་དྭངས་ཤིང་ཐོགས་པ་མེད་པ་ས་དང་བར་སྣང་ཀུན་ཏུ་བཟང་པོའི་མཆོད་སྤྲིན་གྱིས་གང་བར་གྱུར། སྨན་གཏོར་རཀྟའི་སྔགས་ཀྱང་བརྗོད་པས་བྱིན་གྱིས་བརླབས་ལ། དབང་གི་སྤྱི་དོན་སྙིང་པོ་དོན་གསལ་ལས། བདག་བསྐྱེད་ལྡན་པས་ལྷ་ཚོགས་རྣམས། །ཆོ་གས་སྒྲུབ་ཅིང་མ་ནུས་ན། །སྔགས་ཀྱིས་བསྐྱེད་ལ་མཆོད་བསྟོད་འབུལ། །བཟླས་པ་ཅི་རིགས་བགྱིས་པའི་རྗེས། །ཞེས་གསུངས་པས། རྒྱས་པར་སྤྲོ་ན། སྟོང་པའི་ངང་ལས་མདུན་གྱི་ཚོམ་བུའི་དཀྱིལ་འཁོར་ཉིད་ཡོངས་སུ་གྱུར་པ་ལས། ཨེ་ཡཾ་བཾ་ལཾ་སུཾ་རཾ་རྣམས་ཆད། །སྥ་ར་ཎ་ཕཊ་སོགས་ནས་དམ་ཚིག་པ་བསྐྱེད། ཡེ་ཤེས་པ་སྤྱན་དྲངས་བསྟིམས། ཕྱག་མཆོད་བསྟོད་པའི་བར་ཞི་ཁྲོའི་ལས་བྱང་ལྟར་མཐར་ཆགས་སུ་བྱ། བསྡུས་པའི་སྐབས། ཧཱུྃ་བཛྲ་སཏྭ། མཱུཾ་དྷ་ཏི་ཤྭ་རི། ཧཱུྃ་བཛྲ་དྷྲྀཀ྄་སོགས་བསྐྱེད་སྔགས་ཚང་བར་བརྗོད་ལ། བདག་ཉིད་ལྷ་ཡི་སྐུར་གསལ་བའི༔ ཐུགས་ནས་འཕྲོས་པའི་འོད་ཟེར་གྱིས༔ ཞི་ཁྲོ་རབ་འབྱམས་དཀྱིལ་འཁོར་ལྷ༔ མདུན་གྱི་ནམ་མཁར་སྤྱན་དྲངས་གྱུར༔ ཞེས་བརྗོད་ཅིང་བསམ་ལ། ཨོཾ། མ་ལུས་སེམས་ཅན་སོགས་སྤྱན་འདྲེན་ནས་བསྟོད་པའི་བར་ཞི་ཁྲོའི་ལས་བྱང་ལྟར་བཏང་རྗེས། བོ་དྷི་ཙིཏྟ་དང་རུ་ལུ་ཡིག་བརྒྱ་བཅས་ཅུང་ཟད་བཟླས་མཐར། རྡོར་དྲིལ་དང་སྤོས་ཐོགས། པུས་བཙུགས་ཐལ་མོ་སྦྱར་ལ། རང་གི་ལྕེ་ཧཱུྃ་ལས་སྐྱེས་པའི་རྡོ་རྗེའི་རང་བཞིན་དུ་གྱུར། རྒྱལ་བ་སྲས་བཅས་དགོངས་སུ་གསོལ། །ཁྱེད་རྣམས་མཆོད་དང་སེམས་ཅན་དོན། །ནངས་པར་དཀྱིལ་འཁོར་འབྲི་འཚལ་བས། །ཐུགས་ཀྱིས་དགོངས་ཏེ་གནང་བ་མཛོད། །ལན་གསུམ། ཞེས་གསོལ་བ་བཏབ་པས་ལྷ་ཚོགས་རྣམས་དགྱེས་པ་ཆེན་པོས། རིག་པ་འཛིན་པ་ཁྱོད་ཀྱིས་དཀྱིལ་འཁོར་གྱི་ལས་ཇི་ལྟར་འོས་པ་གྱིས་ཤིག་ཅེས་བཀའི་གནང་བ་བསྩལ་ནས་ཡེ་ཤེས་ཀྱི་དཀྱིལ་འཁོར་སྟེང་གི་བར་སྣང་འོད་ཀྱི་དྲྭ་བའི་ཀློང་དུ་བཞུགས་པར་བསམ། རྡོ་རྗེ་ཁུ་ཚུར་གཉིས་གཤིབས་པའི་མཛུབ་མོ་བརྐྱང་བ་རྩེ་གཏུགས་ནས་འོག་ཏུ་ཕྱོགས་པ་སྤྱི་བོར་གཏོད་པ་བཅས། ཨོཾ་བཛྲོད་ཏིཥྛ་ལྷན་ཞེས་བརྗོད། དམ་ཚིག་གི་འཁོར་ལོ་རྣམས་རང་ལ་ཐིམ་པར་བསམ་ལ་མཎྜལ་ཚོམ་བུ་དང་བཅས་པ་བསྡུ། ཡིག་བརྒྱ་བརྗོད། གཉིས་པ་བུམ་པ་སྟ་གོན་ནི། རིན་པོ་ཆེའི་བུམ་པ་སུམྦྷ་ནིའི་སྔགས་དང་ཡུངས་ཀར་གྱིས་བྲབ། གུ་གུལ་བདུག །བཀྲ་ཤིས་པའི་ཁྱེའུས་རྒྱུན་འབབ་ཀྱི་ཆུ་ནས་བླང་བའི་ཆུ་གཙང་དང་དྲིའི་ཆབ་དང་སོ་ལྔའི་བཅུད་ལྡན་རྣམ་བུམ་མགུལ་ཆིངས་སྔོན་པོའམ་ཡེ་ཤེས་ལྔ་མཚོན་ཕྱིར་དར་སྣ་ལྔས་བྱ་བར་གྲོལ་ཐིག་དབང་ཆོག་ལས་གསུངས། ལས་བུམ་མགུལ་ཆིངས་ལྗང་གུ། བུམ་མཚན་གཙོ་བུམ་ལ་རིགས་ལྔའི་ཕྱག་མཚན། ལས་བུམ་ལ་རྒྱ་གྲམ་ཅན་གདགས། དུང་ཞལ། གཟུངས་ཐག་བཅས་འདུ་བྱས་ལ། མཆོད་པ་གསར་དུ་བཤམས་པའམ་ཁ་གསོས་ལ་བྱིན་རླབས་ལྷ་སྟ་གོན་སྐབས་ལྟར་བྱ། བུམ་པ་རྣམས། ཨ་མྲྀ་ཏས་བསང༌། སྭ་བྷཱ་ཝས་སྦྱངས། སྟོང་པའི་ངང་ལས་པྃ་ལས་པདྨ་དང༌། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ཞབས་ཞུམ་པ། ལྟོ་བ་ལྡིར་བ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ལྷ་རྫས་གོས་ཀྱི་མགུལ་ཆིངས་དང་དཔག་བསམ་ཤིང་གིས་ཁ་བརྒྱན་པ། ཕྱི་བུམ་པའི་དབྱིབས་ལ་ནང་གཞལ་ཡས་ཁང་བཅུད་ཀྱིས་ཡོངས་སུ་གང་བའི་དབུས་སུ་པདྨ་འདབ་བཞི། བརྒྱད། བཅུ་དྲུག །སོ་གཉིས། བཞི་བཅུ་རྣམས་ཀྱི་སྟེང་དུ་རིན་ཆེན་སེང་གེ་གླང་ཆེན་རྟ་མཆོག་རྨ་བྱ་ཤང་ཤང་ཉི་ཟླ་པདྨའི་གདན་ལ། ཆོས་སྐུ་ཀུན་བཟང་རྡོ་རྗེ་སེམས་དཔའ་དང་རིགས་ལྔ་ཡབ་ཡུམ་ལ་རང་རང་གི་སེམས་དཔའ་དང་སེམས་མ། ཐུབ་པ་དྲུག །སྒོ་བ་ཡབ་ཡུམ་སྟེ་ཞི་བའི་ལྷ་ཚོགས། དྲེགས་པ་ཅན་དང་བྱོལ་སོང་པད་ཉིའི་གདན་ལ་ཆེ་མཆོག་ཡབ་ཡུམ། ཧེ་རུ་ཀ་རིགས་ལྔ། ཀེའུ་རི་མ་བརྒྱད། སིང་ཧ་མ་བརྒྱད། སྒོ་མ་བཞི། དབང་ཕྱུག་ཉི་ཤུ་རྩ་བརྒྱད་རྣམས་མ་འདྲེས་གསལ་རྫོགས་སུ་བཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་དེ་ལས་འོད་ཟེར་འཕྲོས་བསྒོམ་པ་དང་འདྲ་བའི་ཡེ་ཤེས་པ་བཛྲ་ས་མཱ་ཛཿ ཨོཾ། ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི། །ཟླ་རྒྱས་བཞིན་དུ་སྤྲོས་པ་མི་མངའ་ཡང༌། །ཐུགས་རྗེ་ཉི་གསལ་འོད་བཞིན་སྙོམ་མཛད་པ། །འདིར་གཤེགས་བདག་ལ་དགོངས་ཤིང་བཞུགས་སུ་གསོལ། །ཨོཾ་བཛྲ་ས་མ་ཡ་ཛཿ ཛཿཧཱུྃ་བྃ་ཧོཿ ས་མ་ཡ་ཏིཥྛ་ལྷན། ཨ་ཏི་པཱུ་ཧོཿ པྲ་ཏཱིཙྪ་ཧོཿ ཨོཾ་བཛྲ་ཨརྒྷཾ་ནས། ཤབྡ་ཨ་མྲྀ་ཏ་རཀྟ་བ་ལིཾ་ཏ་མ་ཧཱ་སརྦ་པཱུ་ཛ་ས་མ་ཡ་ཁཱ་ཧི་ཁཱ་ཧི། བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེ་རོལ་པའི་ལྷ། །ཞི་ཁྲོ་སྐུ་གསུམ་ལྷ་ལ་ཕྱག་འཚལ་བསྟོད། །གཟུངས་ཐག་བླངས་ཏེ། རང་གི་ཐུགས་ཀ་ནས་སྔགས་ཀྱི་ཕྲེང་བ་འཕྲོས། གཟུངས་ཐག་ལ་འཁྲིལ་ཏེ་བུམ་པའི་ནང་དུ་སོང་བས་ལྷ་ཚོགས་རྣམས་ཀྱི་ཐུགས་རྒྱུད་བསྐུལ་འོད་ཟེར་སྤྲོ་བསྡུས་དོན་གཉིས་མཛད། སྐུའི་ཆ་ཐམས་ཅད་ནས་བྱང་སེམས་བདུད་རྩིའི་རྒྱུན་བབ་པས་བུམ་པ་གང་བར་བསམ་ལ། ཞི་ཁྲོའི་སྔགས་སུམ་བརྒྱ་ལས་མི་ཉུང་བ་དང༌། ཡིག་བརྒྱ་ཅི་ནུས་བཟླ། ལས་བུམ་བསང་སྦྱངས། ལས་ཀྱི་བུམ་པའི་དབུས་སུ་པད་ཉི་དང༌། །རྒྱ་གྲམ་སྟེང་དུ་ཧཱུྃ་ལས་སྣ་ཚོགས་ཀྱི། །རྡོ་རྗེ་ཧཱུྃ་གིས་མཚན་པ་ཡོངས་གྱུར་ལས། །བདུད་རྩི་འཁྱིལ་བ་ཞལ་གཅིག་ཕྱག་གཉིས་པ། །སྐུ་མདོག་ལྗང་གུ་ཞབས་གཉིས་དོར་སྟབས་ཅན། །ཕྱག་གཡས་སྣ་ཚོགས་རྡོ་རྗེ་བསྡིག་པའི་ཚུལ། །གཡོན་པས་དེ་ཡི་ཡུ་བའི་དྲིལ་བུ་འཛིན། །ཁྲོ་ཚུལ་གར་དགུའི་ཉམས་ལྡན་སྦྲུལ་ལ་སོགས། །མི་སྡུག་རྒྱན་གྱིས་སྤྲས་པའི་སྐུ་རུ་གསལ། །སྐུ་ལས་བྱུང་བའི་ཡེ་ཤེས་བདུད་རྩིའི་སྤྲིན། །བབས་པས་བུམ་པ་ཡོངས་སུ་གང་བར་གྱུར། །ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། བརྒྱ་རྩ་བརྒྱད་བཟླ། བུམ་ལྷ་གཉིས་ལ་དམིགས་ནས། ཨརྒྷཾ་སོགས་ཀྱིས་མཆོད། བསྟོད་པར་འོས་པས་བསྟོད། ཨོཾ་ཨཱཿཧཱུྃ་གིས་བདུད་རྩིའི་མཆོད་ཡོན་ཕུལ་བས་ལྷ་ཚོགས་བདེ་སྟོང་ཆེན་པོའི་རྣམ་རོལ་དུ་འོད་དུ་ཞུ་ནས་བུམ་པའི་ཆུ་དང་རོ་གཅིག་ཏུ་འདྲེས་པས་རང་རང་གི་བྱེད་ལས་འགྲུབ་པའི་ནུས་པ་ཅན་དུ་གྱུར། ཞེས་བརྗོད་ཅིང་བསམ། འདིར་དབང་གི་སྤྱི་དོན་ལས། གཉིས་པ་བུམ་པ་བཅུད་ལྡན་ལ། །ཆོ་ག་སྔ་མ་ཇི་བཞིན་ལས། །བུམ་ལྷ་འོད་དུ་ཞུ་བ་ཙམ། །བུམ་པ་སྟ་གོན་ཁྱད་པར་རོ། །ཞེས་གསུངས་པ་ཙམ་ལས་ཞི་ཁྲོ་ལ་བུམ་སྒྲུབ་དམིགས་བསལ་མ་བྱུང་བས་བུམ་པ་སྒྲུབ་ཚུལ་འདི་གསང་བ་སྤྱི་ལྟར་བཀོད་པའོ། །སྐུ་རྟེན་ཙཀླི་དབུ་རྒྱན་རྡོར་དྲིལ་སོགས་དབང་རྫས་རྣམས་ཚོགས་པར་བྱས་ལ། དབང་རྫས་རྣམས་ངོ་བོ་རྣམ་པར་དག་པ་ཆོས་ཀྱི་དབྱིངས་རང་བཞིན་ཡེ་ཤེས་ཀྱི་སྣང་བ་ཅིར་ཡང་འཆར་བའི་བྱིན་རླབས་དངོས་གྲུབ་འབྱུང་བའི་དབྱིག་ཏུ་གྱུར་པར་མོས། འདི་ནི་རྒྱུད་ལས་དབང་རྫས་རབ་གནས་དང་ལྡན་པ་ཞེས་གསུངས་པའི་དགོངས་དོན་སྔ་འགྱུར་བཀའ་མའི་དབང་གི་སྟ་གོན་སྐབས་དབང་རྫས་རབ་གནས་ཀྱི་ཆོ་ག་རེ་འབྱུང་བ་ལྟར་བྱིན་རླབས་བསྡུས་པ་འདི་ཙམ་བྱ་བ་ཐམས་ཅད་མཁྱེན་པ་མཉྫུ་གྷོ་ཥའི་ཕྱག་བཞེས་ལས་བྱུང་བ་ལྟར་འདིར་ཡང་བཀོད་པའོ། །གསུམ་པ་སློབ་མ་ལྷག་གནས་ལ་གཉིས་ལས། དང་པོ་སྔོན་དུ་བྱ་བའི་ལས་རིམ་ནི། སོ་ཤིང་སོགས་རྫས་བཞི་དང༌། མཎྜལ་ཚོམ་བུའི་ར་བ། སློབ་མ་མཆོད་པ་བཅས་འདུ་བྱ། དཀྱིལ་འཁོར་གྱི་གཞི་ཡོལ་བས་བསྒྲིབས། སྣོད་དུ་གྱུར་པའི་སློབ་མ་ཟུང་དུ་མ་གྱུར་པའི་གྲངས་ལྡན་རྣམས་སྒོ་དྲུང་དུ་འཁོད་པ་ལ་ཁྲུས་བྱ། གྲལ་དུ་འཁོད་ནས་བགེགས་ལ་གཏོར་མ་བྱིན་ཏེ་བདེན་སྟོབས་ཀྱིས་བསྐྲད། ཡུངས་ཐུན་བྲབ། གུ་གུལ་བདུག །སྲུང་འཁོར་བསྒོམ་ལ་མེ་ཏོག་བཀྱེ་བསྡུ་བྱ། འོ་ཁྱེད་ཅག་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྡེ་ལས་བྱོན་པའི་ཞི་ཁྲོ་ངན་སོང་སྦྱོང་བའི་སྔོན་འགྲོ་སྟ་གོན་གྱི་རིམ་པ་གསན་སྙམ་པའི་ཐུགས་བསྐྱེད་དེ་གསན་འཚལ། དེ་ཡང་ཇི་སྐད་དུ། གསང་སྔགས་དངོས་གྲུབ་དོན་གཉེར་ན། །འཇིག་རྟེན་ཚེ་འདིའི་ཞེན་པ་དོར། །ཕ་རོལ་ལ་ནི་འདུན་པ་བསྐྱེད། །འདི་འབྲས་གཉེར་ན་ཕྱི་མ་འཇིག །ཕྱི་མ་གཉེར་ན་འདི་འབྲས་འགྲུབ། །དེ་བས་རང་གཞན་དོན་བྱའི་ཕྱིར། །སེམས་དཔའ་བཟང་པོ་མཆོག་ལ་སྦྱོར། །ཞེས་གསུངས་པ་ལྟར་གང་ཞིག་མཆོག་གི་དོན་སྒྲུབ་པའི་མི་སློབ་པའི་ཟུང་འཇུག་གི་འབྲས་བུ་དོན་དུ་གཉེར་བ་དག་གིས་འཁོར་བའི་བདེ་སྐྱིད་མངོན་མཐོའི་གོ་འཕང་དང༌། ངེས་འབྱུང་གི་བློ་དང་ལྡན་ཡང་རང་ཉིད་ཞི་བདེ་ཙམ་ལས་སེམས་ཅན་གཞན་དོན་རླབས་པོ་ཆེ་སྒྲུབ་པའི་ནུས་པ་དང་བྲལ་བ་ཉན་རང་གི་འབྲས་བུ་ཙམ་དོན་དུ་གཉེར་བྱ་མ་ཡིན་ཏེ། འདིར་ནམ་མཁས་གར་ཁྱབ་ཀྱི་སེམས་ཅན་ཐམས་ཅད་ཕ་མར་མ་གྱུར་པ་ནི་གཅིག་ཀྱང་མེད་ལ། ཕ་མ་དེ་དག་རང་གི་རང་བཞིན་མ་རིག་པའི་ངོ་བོ་བདག་ཉིད་གཅིག་པས་རྒྱུ་བྱས། ཀུན་ཏུ་བཏགས་པའི་མ་རིག་པས་རྐྱེན་སྦྱར་ཏེ་འཁོར་བ་སྡུག་བསྔལ་གྱི་རྒྱ་མཚོ་ལ་བདེ་འདོད་སྡུག་བསྔལ་སྒྲུབ་པའི་ཞེ་འདོད་ཕྱིན་ཅི་ལོག་ལ་རྣམ་པར་འཕྱན་ཞིང༌། བཟོད་དུ་མེད་པའི་སྡུག་བསྔལ་གྱི་རང་བཞིན་ལ་མཐོང་ཆོས་སུ་སྤྱོད་པས་ཤིན་ཏུ་ཉམ་ཐག་པ་འདི་རྣམས་ལ་སྙིང་རྗེ་དྲག་པོས་ཀུན་ནས་བསླངས་ཏེ་འདི་དག་གི་དོན་བྱ་བའི་ཕྱིར་མཁྱེན་བརྩེ་ནུས་གསུམ་གྱི་ཕྲིན་ལས་ཚད་མེད་ཅིང་དོན་གཉིས་ལྷུན་གྲུབ་ཀྱི་བརྟུལ་ཞུགས་བླ་ན་མེད་པས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རྡོ་རྗེ་ཐེག་པའི་མྱུར་ལམ་རྨད་དུ་བྱུང་བའི་དཀྱིལ་འཁོར་ཟབ་མོ་འདིར་འཇུག་ཅིང་སྨིན་པར་བྱ་སྙམ་པའི་སེམས་བསྐྱེད་ཀྱི་འཕེན་པ་སྔོན་དུ་འགྲོ་བས། ཀུན་འབྱུང་སྲིད་པའི་རྒྱུ་འབྲས་ལ་ངེས་འབྱུང་གི་ཀུན་སློང་དྲག་པོས་འཇིག་རྟེན་ཚེ་འདིའི་སྣང་ཞེན་ལ་བློ་ལྡོག་དགོས་ཏེ། དེ་ལ་རང་ཅག་རྣམས་མི་ལུས་ཀྱི་རྟེན་ཁྱད་པར་ཅན་ཐོབ་པ་ནི་ད་རེས་ཙམ་ཡིན་ཏེ། ད་རེས་ཀྱི་རྟེན་སྟོང་ལོག་ཏུ་སོང་ན་སླད་ནས་འདི་འདྲ་བའི་ལུས་རྟེན་རྙེད་པ་མ་ཡིན་པའི་ཚུལ་འདུལ་བ་རྣམ་འབྱེད་ལས། དགེ་སློང་དག་ངན་སོང་བའི་འགྲོ་བར་ལྟོས། ཕྱི་ཕྱིར་མི་ཉིད་ཀྱི་དངོས་པོ་ཐོབ་པ་ཡང་ཤིན་ཏུ་དཀའོ། །ལོག་པར་ལྟ་བའི་སྟོན་པ་འདི་དག་ལ་ལྟོས། ཡང་དག་པའི་དགེ་བའི་བཤེས་གཉེན་དང་ཤིན་ཏུ་འཕྲད་པར་དཀའོ། །ཞེས་གསུངས་པ་ཡིན་ལ། དེ་ཙམ་དུ་རྙེད་པར་དཀའ་བའི་རྒྱུ་མཚན་གང་ཡིན་ན། སྤྱིར་ངན་སོང་གསུམ་གྱི་འགྲོ་བ་ལ་ལྟོས་ན་མིའི་ལུས་རྟེན་ཐོབ་པ་མི་སྲིད་པའི་ཚོད་ཡིན་པས་མཐོང་ཆོས་སུ་མི་དང་སྲོག་ཆགས་གཞན་གྱི་མང་ཉུང་ཁོ་ནས་ཀྱང་ཤེས་ལ། མི་ཡང་ཆོས་ལྡན་གྱི་བྱ་བ་ལ་ཞུགས་པ་ནི་ཉིན་མོའི་སྐར་མ་ཙམ་ལས་མི་འདུག་ན། གནས་སྐབས་ཀྱི་བདེ་འབྱོར་ནི་རྟག་པ་མ་ཡིན་པར་འགྱུར་བའི་རང་བཞིན་ཅན་དང༌། དེའི་སྟེང་དུ་སྡུག་བསྔལ་གྱི་སྡུག་བསྔལ་དང༌། ཁྱབ་པ་འདུ་བྱེད་ཀྱི་སྡུག་བསྔལ་གྱིས་རྟག་ཏུ་མནར་བས་རི་དྭགས་མཐའ་ལ་གཅུར་པ་ལྟ་བུའི་ངང་ནས་ད་ལྟའི་སྡུག་བསྔལ་ལ་སྤྱོད་ཅིང་ཕྱི་མའི་སྡུག་བསྔལ་གྱི་རྒྱུ་སྒྲུབ་པ་ནི་མཚང་ཤིན་ཏུ་ཆེ། དེ་བས་ན་འཁོར་བའི་རང་བཞིན་ནི་སྡུག་བསྔལ་གྱི་བཙོན་ར། འཕྲལ་ཉམས་དགའ་ཡང་ཕུགས་མཐའ་སྐྱོ་བ། བྱས་ཚད་སྡིག་པ། བསགས་ཚད་གཞན་དབང༌། བྱ་བ་མང་བ། དོན་ཉུང་བ། བསོད་ནམས་མ་ཡིན་པ་ཁོ་ན་དང་འབྲེལ་ཆེ་བས་འདི་ལས་ཐར་པའི་ཐབས་ལ་མ་འབད་ན་ཤི་འཕོས་ནས་ངན་སོང་དུ་འཁྱམས་པ་ལས་འོས་མེད། ངན་སོང་དུ་སྐྱེས་ན་དམྱལ་བ་ནི་ལྕགས་བསྲེགས་ཀྱི་ས་གཞི་མེ་འབར་བའི་ཀློང་དུ་སོག་ལེ་དང་སྤུ་གྲི་ལ་སོགས་པའི་མཚོན་ཆ་རྣོན་པོའི་དབལ་གྱིས་ལུས་གཤགས། རིའི་བར་དུ་བཅིར། མགོ་ལུས་དབྲལ། ཁྲོ་ཆུར་འཚོད། མཚོན་ཆའི་དབལ་ལ་འདྲེད། གློ་སྙིང་ཡན་ཆད་མེ་འབར་བ་ལ་སོགས་པའི་ཚ་དམྱལ་བརྒྱད། ཁ་ཆར་བུ་ཡུག་རླུང་དང་བཅས་པའི་དཀྱིལ་ན་ལུས་སྦྲེབས་ཤིང་གྲང་ངད་ཀྱིས་ཤ་པགས་དུམ་བུར་གས་པའི་གྲང་དམྱལ་བརྒྱད། སྡུག་བསྔལ་གྱི་རྣམ་གྲངས་འདི་མི་འབྱུང་བྱ་བ་མེད་པའི་ཉི་ཚེ་ཉེ་འཁོར་བ་གཉིས་ཏེ་དམྱལ་ཁམས་བཅོ་བརྒྱད། ལོ་ཟླ་མང་པོར་ཡང་ཟས་སྐོམ་གྱི་མིང་ཡང་མི་ཐོས་ཤིང་ཚ་གྲང་ཁོད་མི་སྙོམས་པའི་ཡི་དྭགས་སྡེ་ཚན་གསུམ། དུད་འགྲོ་ནི་མཐུ་ཆེ་བ་གང་ཡིན་པ་དེས་ཉམ་ཆུང་བ་དེ་ཟ་ཞིང༌། གཞན་ཡང་ལས་ཀྱི་དབང་གིས་གཅིག་ལ་གཅིག་གིས་ཟ་བ་དང༌། མིས་བཀོལ་བ་དང༌། ཤ་དང་པགས་པའི་དོན་དུ་གསོད་པ་དང༌། གསོད་ལུགས་མི་འདྲ་བས་སྡུག་བསྔལ་དང་འཇིགས་སྐྲག་དཔག་ཏུ་མེད་པ་དེ་རང་ཐོག་ཏུ་འབབ་ངེས་ཡིན་ན་དེའི་སྡུག་བསྔལ་ཇི་ལྟར་བཟོད་ནུས། གལ་ཏེ་བདེ་འགྲོ་ཐོབ་ཀྱང་མི་ལ་སྐྱེ་རྒ་ན་འཆི། ཡོད་པ་བྲི་ཡི་དོགས་པ་དང༌། མེད་པ་བཙལ་ཡང་མི་རྙེད་པ་དང༌། དགྲ་དང་འཕྲད་པ་དང༌། གཉེན་དང་འབྲལ་བ་དང༌། དཔྱ་ཁྲལ་གྱིས་གདུང་བ་ལ་སོགས་པ་རང་རེས་མཐོང་ཞིང་མྱོང་བ་འདི་ལགས་མོད། དེ་བཞིན་དུ་འདོད་ཁམས་ཀྱི་ལྷ་རྣམས་ནི་རེ་ཞིག་བདེ་བ་ལྟར་སྣང་ཡང༌། ཧ་ཅང་བག་མེད་པས་གཡེངས་ནས་ཕྱི་མའི་དོན་སྒྲུབ་པ་ལ་གཡེལ་བས། རེ་ཞིག་ན་སྔ་མའི་ལས་ཟད་དེ་སྟན་ལ་མི་དགའ་བ་དང༌། མེ་ཏོག་གི་ཕྲེང་བ་རྙིང་པ་དང༌། ལུས་ལ་རྔུལ་འབྱུང་བ་དང༌། ལྷ་ཟླ་བོས་སྤངས་ཤིང་འདུ་ཤེས་འཁྲུལ་པ་དང༌། ཕྱི་མ་སྐྱེ་འགྱུར་གྱི་གནས་རིས་ངན་པ་མཐོང་ནས་འཇིགས་པ་ལ་སོགས་པའི་འཆི་བའི་ལྟས་ཚང་ནས་སྡུག་བསྔལ་ཤིན་ཏུ་མི་བཟོད་པ་ཡོད་ལ། ཁམས་གོང་མ་དག་ཀྱང་བསམ་གཏན་གྱི་བདེ་བས་འཚོ་བའི་ལས་ཟད་དེ་སྲིད་པ་འོག་མར་ལྟུང་བ་མང་བས་འགྱུར་བའི་སྡུག་བསྔལ་གྱིས་གདུངས་ཤིང༌། སྲིད་པ་ཕྱི་མར་འདུ་བྱེད་ཀྱི་སྡུག་བསྔལ་གྱིས་ཉམ་ཐག་ལ། ཁྱད་པར་ལྷ་མ་ཡིན་རྣམས་ནི་ལྷའི་དཔལ་ལ་མི་བཟོད་པའི་ཕྲག་དོག་གིས་སེམས་རྣལ་དུ་མི་གནས་པས་རྟག་ཏུ་འཁྲུག་རྩོད་འབའ་ཞིག་གིས་གདུངས་ཤིང་གཡུལ་ངོར་ཡན་ལག་ཆད་པ་དང༌། མཚོན་ཆས་བསྣད་པ་ལ་སོགས་པས་ཤིན་ཏུ་སྡུག་བསྔལ་བའི་ཕྱིར་ན་འཁོར་བ་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ཡིན་པའི་ཚུལ་དྲན་པ་ཉེར་བཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །དུད་འགྲོ་གཅིག་ལ་གཅིག་ཟས་ཉམས། །མི་རྣམས་འཚོ་བ་ཐུང་བས་ཉམས། །ལྷ་རྣམས་བག་མེད་པ་ཡིས་ཉམས། །ལྷ་མིན་འཐབ་ཅིང་རྩོད་པས་ཉམས། །འཁོར་བ་ཁབ་ཀྱི་རྩེ་མོ་ལ། །བདེ་བ་ནམ་ཡང་ཡོད་མ་ཡིན། །ཞེས་སོ། །དེ་ལྟ་བུའི་འཁོར་བ་ལས་ཐར་པའི་ཐབས་ནི་དམ་པའི་ཆོས་ཁོ་ན་ལས་གཞན་གང་ཡང་མེད་ཀྱང་རང་ཅག་རྣམས་ནི་ལས་ངན་ལ་གོམས་པས་མི་རྟག་པ་ལ་རྟག་པར་འཛིན། སྡུག་བསྔལ་ལ་བདེ་བར་འཛིན་པས་དགེ་བའི་ཕྱོགས་སུ་ནི་བློ་འཇུག་པར་ཤིན་ཏུ་དཀའ། སྡིག་པའི་ལས་རྣམས་རྩེད་མོའི་ཞོར་ཙམ་དུའང་འདུ་བྱེད་ཅིང༌། ཁྱད་པར་ཚེ་འདི་དོན་དུ་གཉེར་བའི་ལས་ཐམས་ཅད་ནི་དངོས་སམ་བརྒྱུད་ནས་སྡིག་པའི་གཡོ་བཀོལ་འབའ་ཞིག་ལས་མ་འདས་པར་ཡིན་པའི་ཚུལ། ཁྱིམ་པ་རང་བཞིན་པ་གཅིག་ལ་ལྟོས་ཀྱང་ཤ་ཁྲག་ལ་ཆགས་ནས་སྲོག་གཅོད། ཚོང་དང་གཡོ་སྒྱུ་ལ་བརྟེན་ནས་མ་བྱིན་པ་ལེན་པས་མཚོན་མི་དགེ་བ་བཅུ་ལ་རྟག་ཏུ་སྤྱོད་པ་ཡིན་ན་དེའི་འབྲས་བུ་ངན་སོང་དུ་འགྲོ་བ་ལས་འོས་ཅི་ཡོད། དེ་བས་ན་ད་ལྟ་རང་དབང་ཡོད་དུས་སྡིག་པ་སྤང་ཞིང་དགེ་བའི་ལས་སྒྲུབ་པ་ལ་བརྩོན་དགོས་ཏེ། སློབ་དཔོན་ཆེན་པོས། འདི་ནི་འཇིག་རྟེན་སྐྱོ་བའི་ཡུལ་ཡིན་པས། །སྐྱེ་བོའི་བདེ་སྐྱིད་ཕུན་སུམ་ཚོགས་འདྲ་བ། །དབྱར་གྱི་ཆུ་དང་རྨི་ལམ་ནོར་རྫས་ལྟར། །བདེན་པ་མེད་ཅིང་ཡུན་རིང་མི་རྟག་པས། །སྐྱོ་བའི་འདུ་ཤེས་རྟག་ཏུ་བསྐྱེད་འཚལ་ལོ། །འདི་ཉིད་ལམ་ལོག་བག་ཆགས་ཆགས་པ་དང༌། །སྐྱེས་བུའི་དཔལ་ལ་ངོ་མཚར་ཆེར་བྱེད་པ། །དེ་ནི་བསོད་ནམས་དམན་པའི་རིགས་ཅན་ཏེ། །ཁྱེད་ཀྱི་སྙིང་ནི་ཤིང་སྡོང་ཁོང་རུལ་ལྟར། །ཕྱིས་ནས་ཐར་པའི་ལོ་འབྲས་མི་འབྱུང་ངོ༌། །ཀྱེ་མ་ཀྱེ་ཧུད་ཚེ་འདིའི་དཔལ་འབྱོར་ལ། །རྟག་ཅིང་ཕུན་སུམ་ཚོགས་ལྟར་ཤེས་པའི་བློ། །བྱིས་པའི་ནང་ནས་ཐ་ཤལ་སྐྱེས་བུ་སྟེ། །འཇིག་རྟེན་འདི་ན་དེ་བས་བླུན་པ་སུ། །སྔར་ཡང་མ་བྱུང་ཕྱིས་ཀྱང་མི་འབྱུང་ངོ༌། །ཞེས་སོ། །དེ་བས་ན་འཆི་བ་ནམ་འོང་མི་ཤེས་ཤིང༌། དེའི་ཚེ་ད་ལྟའི་ནོར་རྫས་དང༌། དབང་ཐང་དང༌། ཉེ་འབྲེལ་དང༌། མཛའ་བཤེས་དང་འགྲོགས་དབང་ནི་མེད། རང་གི་ལུས་འདི་ཡང་དུར་ཁྲོད་འཇིགས་པར་འདོར་ཞིང་འབྲལ་དགོས། ད་ལྟ་གཏན་དུ་སྡོད་དབང་ཡོད་པ་ལྟ་བུའི་སེམས་ཀྱིས་རང་ཕྱོགས་ལ་ཆགས། གཞན་ཕྱོགས་ལ་སྡང༌། ལོངས་སྤྱོད་དང་ཁ་དྲག་ལ་སོགས་པ་སྒྲུབ་ཀྱང་དེ་རིང་ཡོད་པ་སང་ཉིན་ནས་མེད་པའི་གནས་སྐབས་ཉམས་སུ་མྱོང་ནས་སྲིད་པ་བར་དོའི་འཕྲང་ལ་གཤར་དགོས། དེའི་ཚེ་དབང་ཡོད་དང༌། ནོར་རྫས་དང༌། གཉེན་བཤེས་ཀྱིས་ཕན་པ་ཏིལ་འབྲུ་ཙམ་མེད་པས། སྐྱབས་དང་རེ་ལྟོས་སུ་གྱུར་པ་ནི་དམ་པའི་ཆོས་ལས་གཞན་སུ་ཡང་མེད་པའི་ཕྱིར་ད་ལྟ་ནས་བླ་མ་དང་དཀོན་མཆོག་ལ་བློ་གཏད་དེ་བློ་གདེང་ཐུབ་པའི་ཆོས་ལ་འབད་དགོས། དེ་ལས་ཀྱང་ཐར་པ་བླ་ན་མེད་པ་སངས་རྒྱས་ཀྱི་གོ་འཕང་བསྒྲུབ་པ་ལ་ཐེག་པ་ཆེན་པོའི་སྒོར་ཞུགས་དགོས། དེ་ལའང་རྒྱུ་ལམ་དུ་བྱེད་པ་མཚན་ཉིད་ཀྱི་ཐེག་པ་ལས་ཁྱད་པར་དུ་འཕགས་པ་འབྲས་བུ་ལམ་བྱེད་རྡོ་རྗེ་ཐེག་པ་རྣལ་འབྱོར་བླ་མེད་ཀྱི་རྒྱུད་སྡེ་ནི་ཚེ་གཅིག་ལུས་གཅིག་ལ་རྡོ་རྗེ་འཆང་ཆེན་པོའི་གོ་འཕང་ངེས་པར་སྒྲུབ་པར་བྱེད་པ་ཡིན་ཅིང༌། དེ་ལའང་ལྷག་པའི་ལྷ་རབ་འབྱམས་ཀྱི་རྒྱུད་ལུང་མན་ངག་བསམ་གྱིས་མི་ཁྱབ་པ་ཞིག་བཞུགས་པ་ལས་ཁྱད་པར་དུ་འཕགས་པ་སྔ་འགྱུར་འོད་གསལ་རྡོ་རྗེ་སྙིང་པོའི་རྒྱུད་སྡེ་ཀུན་གྱི་རྒྱལ་པོ་ཞི་ཁྲོ་ན་རཀ་དོང་སྤྲུག་རྣལ་འབྱོར་གྱི་སྤྱི་ཁྲུས་ཆེན་པོ་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྡེ་ལས་བྱོན་པ། ཞི་ཁྲོ་ངན་སོང་སྦྱོང་བ་བཀའ་གཏེར་ཟུང་འཇུག་གི་དབང་བསྐུར་སྦྱིན་པའི་སྐབས་སུ་བབས་པ་ཡིན་ཏེ། དེ་ལའང་སྔོན་འགྲོ་སློབ་མ་ལྷག་པར་གནས་པ་དང༌། དངོས་གཞི་དབང་བསྐུར་བ་གཉིས་སུ་ཡོད་པ་ལས་ཐོག་མར་ལྷག་གནས་ཀྱི་ཆོས་རྣམས་ཞུ་བའི་ཡོན་དུ་མཎྜལ་ཕུལ། ཁྱེད་རྣམས་དཀྱིལ་འཁོར་ཆེན་པོར་སྨིན་པའི་སྣོད་དུ་བསྒྲུབ་ཕྱིར་ཐུན་མོང་དང་ཁྱད་པར་གྱི་སྡོམ་པའི་གཞི་རྟེན་དཀོན་མཆོག་རྩ་བ་གསུམ་ལ་སྐྱབས་སུ་འགྲོ་བ་དང༌། སྡོམ་པ་གསུམ་གྱི་བསླབ་པ་དང་དམ་ཚིག་བཟུང་དགོས་པའི་ཕྱིར་དེ་དག་སྦྱིན་པར་གསོལ་བ་གདབ་པ་འདིའི་རྗེས་ཟློས་མཛོད། ཨེ་མ་དུས་གསུམ་རྒྱལ་བ་ཀུན་ཏུ་བཟང༌། །རིགས་ལྔའི་སངས་རྒྱས་དགོངས་སུ་གསོལ། །དཀོན་མཆོག་གསུམ་ལ་སྐྱབས་འགྲོ་དང༌། །སོ་ཐར་བྱང་སེམས་སྔགས་སྡོམ་རྣམས། །མགོན་པོས་བདག་ལ་གནང་དུ་གསོལ། ལན་གསུམ། དེ་ལྟར་ན་དུས་གསུམ་གྱི་རྒྱལ་བ་སྲས་དང་བཅས་པ་ཀུན་ཀྱང་རྡོ་རྗེ་ཐེག་པ་བླ་མེད་ཀྱི་གསེང་ལམ་ལ་བརྟེན་ནས་སོ་བྱང་སྔགས་ཀྱི་བསླབ་པ་ཀུན་རྫོགས་པར་བཞེས་པས་མི་གནས་པའི་བྱང་ཆུབ་མངོན་དུ་མཛད་དེ་དོན་གཉིས་ལྷུན་གྱིས་གྲུབ་པའི་ཕྱིར་སྲས་བཅས་རྒྱལ་བ་དགྱེས་པའི་ལམ་བཟང་པོར་གཞུག་པའི་ཕྱིར་འདི་ལ་གསན་པས་ཁྱབ་པར་གདའ། ཨེ་མ་སྣོད་དང་ལྡན་པའི་བུ། །གསང་སྔགས་ཆོ་ག་ཁྱེད་ལ་བསྟན། །འདས་དང་མ་བྱོན་ད་ལྟ་ཡི། །སངས་རྒྱས་མ་ལུས་ཐམས་ཅད་ཀྱང༌། །གསང་སྔགས་ཆོ་ག་འདི་མཁྱེན་ནས། །རྫོགས་པའི་བྱང་ཆུབ་བརྙེས་པ་ཡིན། །བདུད་ཀྱི་དཔུང་ཡང་འདི་ཡིས་བཅོམ། །དེ་ལྟར་ཁྱེད་ཀྱང་རྗེས་སུ་ཞུགས། ཞེས་གདམས་ཏེ། མདུན་གྱི་ནམ་མཁར་ཐུན་མོང་དང་ཁྱད་པར་གྱི་སྡོམ་པ་བཟུང་བའི་རྟེན་དཀོན་མཆོག་རྩ་གསུམ་སྐྱབས་ཡུལ་རྒྱ་མཚོ་སྤྲིན་གཏིབས་པ་ལྟར་བཞུགས་པའི་སྤྱན་སྔར་ལམ་ལོག་པ་ལས་ཁྱད་པར་དུ་གྱུར་པ་སོ་ཐར་རིགས་བདུན། ལམ་དམན་པ་ལས་ཁྱད་པར་དུ་གྱུར་པ་བྱང་སེམས་ཀྱི་བསླབ་པ་དང༌། ལམ་རྫོགས་པ་ལས་བྱེ་བྲག་ཏུ་འཕགས་པ་སྔགས་ཀྱི་སྡོམ་པ་དང་དམ་ཚིག་རྣམས་ཚུལ་བཞིན་དུ་བཟུང་ཞིང་སློབ་སྙམ་པས་ཐུན་མོང་གི་སྡོམ་པ་བཟུང་བ་འདིའི་རྗེས་ཟློས་མཛོད། སྐྱེས་བུ་གསུམ་གྱི་བློ་རྩལ་རྣམས། །གོང་ནས་གོང་དུ་སྤར་བའི་བློས། །ཀུན་བཟང་རིགས་ལྔའི་ལྷ་ཚོགས་ལ། །འདི་བཟུང་བླ་མེད་བྱང་ཆུབ་བར། །གུས་པ་ཡིས་ནི་སྐྱབས་སུ་མཆི། །བླ་མ་ཀུན་བཟང་སྤྱན་སྔ་རུ། །ལུས་ངག་ཡིད་ཀྱིས་གཞན་རྣམས་ལ། །གནོད་པའི་ལས་ལྡོག་དགེ་བ་སྒྲུབ། །དགེ་ཚུལ་དགེ་སློང་བྱང་ཆུབ་སེམས། །སོ་སོར་ཐར་པའི་སྡོམ་པ་ལ། །བདག་ནི་རྒྱུན་དུ་གནས་ཤིང་བསྲུང༌། །ལན་གསུམ། དེ་ལས་ཀྱང་ཆེས་འཕགས་པ་ཐེག་པ་ཆེན་པོ་རིག་པ་འཛིན་པའི་སྡེ་སྣོད་ཀྱི་སྒོ་གསུམ་ཐ་མལ་གྱི་སྣང་ཞེན་ལས་ལྡོག་པའི་ཉེས་སྤྱོད་སྡོམ་པ། བསྐྱེད་རྫོགས་ཀྱི་ལམ་ཟབ་མོ་ལ་བསླབ་པའི་དགེ་བ་ཆོས་སྡུད། གཞན་དོན་རླབས་པོ་ཆེའི་ཕྲིན་ལས་བཞི་སྒྲུབ་པའི་སེམས་ཅན་དོན་བྱེད་ཀྱི་སྡོམ་པའི་ཚུལ་ཁྲིམས། བྱེ་བྲག་པ་ཁྱད་པར་གྱི་དམ་ཚིག་དང་སྡོམ་པ་བླང་བ་འདིའི་རྗེས་ཟློས་མཛོད། ཧོཿ བླ་མ་ཀུན་བཟང་དགོངས་སུ་གསོལ། །འདི་བཟུང་བྱང་ཆུབ་མ་ཐོབ་བར། །འགྲོ་དྲུག་སེམས་ཅན་ཐམས་ཅད་ལ། །མ་དང་བུ་ཡི་འདུ་ཤེས་ཀྱིས། །མ་བསྒྲལ་བ་རྣམས་བསྒྲལ་བ་དང༌། །མ་གྲོལ་དགྲོལ་དང་དབུགས་དབྱུང་ཕྱིར། །སྨོན་པའི་བྱང་ཆུབ་སེམས་བསྐྱེད་དོ། །སྔོན་གྱི་རྒྱལ་བ་ཐམས་ཅད་ཀྱང༌། །སྡོམ་པ་ལ་ནི་གནས་པ་ལྟར། །འདི་བཟུང་འཁོར་བ་མ་སྟོང་བར། །བླ་མེད་འཇུག་པའི་བྱང་ཆུབ་སེམས། །ཕ་རོལ་ཕྱིན་དྲུག་སློབ་ཅིང་སྒྲུབ། །ཀུན་དོན་ཚུལ་ཁྲིམས་གསུམ་གྱི་དངོས། །ཐ་མལ་སྣང་ཞེན་ཉེས་སྤྱོད་སྡོམ། །བསྐྱེད་རྫོགས་ཟབ་མོའི་དགེ་ཆོས་སྡུད། །རྣམ་བཞིའི་ཕྲིན་ལས་གཞན་ཕན་སྤྱོད། །སྔགས་ཀྱི་ཆོ་གས་སྡོམ་པར་བགྱི། །ལན་གསུམ། དེ་དག་གིས་དབང་གི་གཞི་འཛིན་པའི་སྡོམ་པ་རྒྱ་མཚོ་མཐའ་ཡས་པ་རྒྱུད་ལ་སྐྱེས་པ་ལ་དགའ་སྤྲོ་བསྐྱེད་དེ་སྡོམ་སེམས་བརྟན་པོ་བཟུང་བས་སྔར་སྡོམ་པ་མ་ཐོབ་པ་ལ་གསར་དུ་ཐོབ། ཐོབ་ཟིན་ཉམས་པ་རྣམས་སོར་ཆུད། གནས་པ་རྣམས་གོང་དུ་འཕེལ་ཞིང་དབང་གི་སྡོམ་པའི་རྒྱུན་འཛིན་པ་ཡིན་ནོ། །གཉིས་པ་སྟ་གོན་དངོས་ལ། དང་པོ་སྐྱེ་མཆེད་བྱིན་གྱིས་བརླབ་པ་ནི། ལས་བུམ་གྱི་ཆུས་བསང་གཏོར་བྱས་ཏེ། དེ་ནས་སྒོ་གསུམ་དཀྱིལ་འཁོར་གྱི་ལྷའི་རྡོ་རྗེ་གསུམ་གྱི་ངོ་བོར་བྱིན་གྱིས་བརླབ་པའི་ཕྱིར་ཁྱེད་རང་རྣམས་སྐད་ཅིག་གིས་བཅོམ་ལྡན་འདས་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་ཅིང་དར་དང་རིན་ཆེའི་རྒྱན་གྱིས་བརྒྱན་པ། ཞབས་སྐྱིལ་མོ་ཀྲུང་གིས་པདྨ་དང་ཟླ་བའི་གདན་ལ་བཞུགས་པའི་སྐུར་གསལ་བའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་མཐིང་གས་མཚན་པར་སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རང་བཞིན་དུ་བྱིན་གྱིས་བརླབས་ཤིང་བརྟན་པར་བྱས་པའི་མོས་པ་མཛོད། གནས་གསུམ་དུ་དྲི་ཡི་ཐིག་ལེ་བྱས་པ་དང་ལྷན་ཅིག ཨོཾ་ཨཱཿཧཱུྃ། སླར་ཡང་མས་ནས་རིམ་བཞིན། ཧཱུྃ་ཨཱཿཨོཾ། ཞེས་རྒྱས་གདབ། དེང་ནས་བཟུང་སྟེ་མཆོད་པའི་གནས་སུ་གྱུར་ཅིང་འདོད་ཡོན་ལ་སྲེད་པས་སྤྱད་མི་དགོས་པར་དབང་ཡུལ་ལྷ་ཡི་རང་བཞིན་བདེ་སྟོང་ཡེ་ཤེས་འབར་བའི་གྲོགས་སུ་ཉེ་བར་སྤྱོད་པ་མཚོན་ཕྱིར་མཆོད་པའི་ཡོ་བྱད་རྣམས་ཀྱིས་མཆོད་ཅིང་མངའ་དབུལ་བར་མོས་མཛོད། ཨོཾ་བཛྲ་པུཥྤེ་པྲ་ཏཱིཙྪ་ཡེ་སྭཱ་ཧཱ། སོགས་ཉེར་སྤྱོད་ལྔས་མཆོད། འདི་ལྟར་འདོད་པའི་ཡོན་ཏན་ལྔ་ལ་ལོངས་སྤྱོད་པའི་དབང་ཤེས་རྣམས་ཀྱང་རིགས་ལྔའི་རང་བཞིན་དུ་ཤེས་པས་གཟུང་འཛིན་ཐ་མལ་གྱི་ཞེན་རྟོག་དབྱིངས་སུ་དག་པའི་ཕྱིར་དབང་པོའི་སྒོ་ལྔར་དྲི་ཡི་ཐིག་ལེ་བགོས་ཏེ་རིགས་ལྔའི་ས་བོན་གྱིས་རྒྱས་གདབ་པར་མོས་མཛོད། རྣ་བར་ཏྲཱྃ་ལས་རྣ་བའི་དབང་ཤེས་རིན་ཆེན་འབྱུང་ལྡན་དང༌། ལྕེ་ལ་ཧྲཱིཿལས་ལྕེའི་དབང་ཤེས་སྣང་བ་མཐའ་ཡས། སྙིང་ལ་ཧཱུྃ་ལས་ཡིད་ཀྱི་དབང་ཤེས་རྡོ་རྗེ་མི་བསྐྱོད་པ། ཡན་ལག་བཞི་ལ་ཧྲཱིཿལས་ལས་ཀྱི་དབང་པོ་དོན་ཡོད་གྲུབ་པ། སྙིང་གར་ཧཱ་ལས་ གྲོལ་ཐིག་དབང་ཆོག་ཏུ་ཡན་ལག་བཞིར་ཧཱ། སྙིང་གར་ཨོཾ་འབྱུང་བས་དཔྱད་དགོས། མཆན། རྣམ་ཤེས་ཀྱི་དབང་པོ་རྣམ་པར་སྣང་མཛད་དུ་གསལ་བར་མོས་པས་ས་བོན་རྣམས་བརྗོད་ཅིང་དྲིའི་ཐིག་ལེ་བྱས་པས། སྐྱེ་མཆེད་ཐམས་ཅད་དེ་བཞིན་གཤེགས་པ་རིགས་ལྔའི་བདག་ཉིད་དུ་བྱིན་གྱིས་བརླབས་པར་མོས་མཛོད། གཉིས་པ་སོ་ཤིང་སྦྱིན་པ་ནི། འོ་མ་ཅན་གྱི་སོ་ཤིང་སོར་བཅུ་གཉིས་སམ་བརྒྱད་པ་དྲི་བཟང་གིས་བྱུགས་རྩེ་མོར་མེ་ཏོག་གི་ཕྲེང་བ་སྲད་བུ་དམར་པོས་བཅིངས་པ་ལ་སྔགས་དང་ལས་ཆུས་བསང་བ་སློབ་མའི་གྲངས་དང་མཉམ་པ་དང༌། མཎྜལ་གྱི་ར་བ་པདྨ་འདབ་བརྒྱད་མུ་ཁྱུད་ཀྱིས་བསྐོར་བ་རེ་ཁཱ་དཀར་པོས་བྲིས་པར་ཚོམ་བུ་ལྔ་བཀོད་པ་ཉེར་བསྡོགས་བྱས་ཏེ། ལས་སྔགས་བདུན་བརྗོད་པས། ཧཱུྃ་ལས་བྱུང་བའི་སོ་ཤིང་སློབ་མའི་ལག་གཉིས་མཁའ་དབྱིངས་ཀྱི་རྒྱས་བཟུང་ཞིང༌། རྩེ་མོས་ལྗགས་བཞར་རྩ་བས་སོ་དྲུད་པས་ཚེ་རབས་སུ་བསགས་པའི་སྡིག་སྒྲིབ་ཐམས་ཅད་དག་པ་དང་རང་གི་དངོས་གྲུབ་ཇི་ལྟར་ཐོབ་པའི་མཚན་མ་གསལ་བར་བསྟན་དུ་གསོལ་སྙམ་པས་འདིའི་རྗེས་ཟློས་དང་བཅས་ཏེ་མིག་བཙུམས་ལ་དོར་མཛོད། བཛྲ་ཧ་ས་ཧ། དེ་ལྟར་དོར་བས། ཕྱོགས་བཞི་དབུས་དང་ལྔར་བབ་ན། །རིགས་ལྔ་གང་ཡིན་དངོས་གྲུབ་ཐོབ། །མཚམས་སུ་ཕྲན་ཚེགས་སྟེང་མཁའ་སྤྱོད། །འོག་ཏུ་རྩེ་བསྟན་ས་སྤྱོད་དང༌། །རྩ་བ་རང་ལ་བསྟན་པ་ན། །ལན་གསུམ་སླར་ཡང་བསྐྱར་ཞིང་འཕང༌། །གཡས་སུ་ཡོ་ན་ཚེ་ཐར་གཏོང༌། །གཡོན་དུ་ཡོ་ན་སྦྱིན་པ་བཀྱེ། །ཕྲེད་གསགས་མར་མེ་བརྒྱ་རྩ་སྦར། །ཀུན་ངན་སྒྲུབ་ལ་བར་གཅོད་འབྱུང༌། །བསགས་སྦྱང་དགེ་བ་རླབས་ཆེན་བྱ། །ཞེས་གསུངས་སོ། །གསུམ་པ་ཁྱོར་ཆུ་སྦྱིན་པ་ནི། དུང་ཞལ་གྱི་ཆུ་བྃ་ལས་བདུད་རྩིའི་རྒྱ་མཚོར་བསམ་ལ། ཨོཾ་ཨཱཿཧཱུྃ། ཞེས་འབྲུ་གསུམ་གྱིས་བྱིན་བརླབས་ལ། དྲི་བཟང་དང་སྦྱར་བའི་ཁྱོར་ཆུ་ལག་གཡས་སུ་ལན་གསུམ་བྱིན་ཏེ་འཐུང་དུ་བཅུག་པས་ལུས་ཀྱི་ནང་ཐམས་ཅད་ཡེ་ཤེས་ཀྱི་བདུད་རྩིས་གང༌། ལྷག་མ་དཔུང་པ་གཡས་ཕྱོགས་ནས་རྒྱབ་ཏུ་དོར་བས་སྒོ་གསུམ་འཁྲུལ་པའི་བག་ཆགས་དང་བཅས་པ་དག་པར་མོས། ཨོཾ་ཧྲཱིཿབི་ཤུདྡྷ་སརྦ་དྷརྨ་པཱ་པཾ་བི་ཤུདྡྷ་ནི་ཙ་སྱ་བི་ཤྭ་དྷ་ཡ་སརྦ་བི་ཀལྤནྡ་ཨ་པ་ན་ཡ་ཧཱུྃ། ཞེས་སྔགས་བརྗོད་པས་སྦྱིན། བཞི་པ་སྲུང་སྐུད་བཅིང་བ་ནི། སློབ་བུའི་ལུས་ཚད་དང་མཉམ་པའི་སྲད་བུ་དམར་པོའམ་ཁ་དོག་ལྔ་ལྡན་སུམ་ལྟེབ་ཏུ་བྱས་པ་རྡོ་རྗེའི་མདུད་པ་གསུམ་བོར་བར་ལས་ཆུས་བསང་ཞིང་རྩ་སྔགས་ཀྱིས་བྱིན་གྱིས་བརླབས། ཧཱུྃ་ལས་སྐྱེས་པའི་རྡོ་རྗེའི་མདུད་པ་འདི་ཉིད་སྐྱེས་པའི་དཔུང་པ་གཡོན་དང་བུད་མེད་ཀྱི་གཡས་སུ་ཉིས་རིམ་གྱིས་བཅིངས་པས་སྒོ་གསུམ་ལ་བར་དུ་གཅོད་པའི་ཚོགས་སྤྱི་དང་ཁྱད་པར་ཁམས་འཕོ་བའི་གེགས་ལས་སྲུང་བར་མོས་ཤིག །ཨོཾ་སརྦ་བུདྡྷ་མཻ་ཏྲི་རཀྵ་རཀྵ་སརྦ་སྭཱ་ཧཱ། ཞེས་བཟླས་ལ་བཅིངས་པ་ལ། རྡོ་རྗེ་དང་བཅས་པའི་དྲི་ཆུས་མདུད་པ་ལ་རྒྱ་གྲམ་དུ་རེག་ནས། ཨོཾ་བཛྲ་རཀྵ་རཀྵ་སྭཱ་ཧཱ། ཞེས་བརྗོད་པས་ལུས་རྡོ་རྗེའི་གོ་ཆས་ཞུ་ལུགས་སུ་གཡོགས་པ་ལ་རྡོ་རྗེ་རྒྱ་གྲམ་གྱི་མདོ་འཛིན་རེས་མཚན་པར་སྒོམ་མོ། །ལྔ་པ་ཀུ་ཤ་སྦྱིན་པ་ནི། ཀུ་ཤའི་ཕོན་པོ་ཆེ་ཆུང་ལ་བསང་ཆུ་འཐོར་ཞིང༌། ཨོཾ་བཛྲ་ཏཱིཀྵྞ་དྷཱི། ཨོཾ་བཛྲ་རཀྵ་ཧཱུྃ། ཀུ་ཤ་མི་དམིགས་པའི་ངང་ལས་ཆེ་བ་ཧཱུྃ་དང་ཆུང་བ་དྷཱི་ལས་བྱུང་བའི་ཀུ་ཤའི་ཆུན་པོ་སྔོ་ལྗང་རྩ་རྩེ་མ་ཉམས་པ་རྨི་ལམ་མི་འཁྲུགས་པའི་ནུས་པ་ཅན་ཆེ་བ་སྟན་གྱི་དོན་དུ་ལག་གཡོན། ཆུང་བ་སྔས་ཀྱི་དོན་དུ་ལག་གཡས་པར་བསྣོལ་ནས་གཏད་པར་མོས། དྷཱི་ཧཱུྃ། ཞེས་ས་བོན་གཉིས་ལན་བདུན་བརྗོད་ལ། ཨོཾ་བཛྲ་ཏཱིཀྵྞ་དྷཱི། ཞེས་གཏད་པས། ཧཱུྃ་བཛྲ་ཏཱིཀྵྞ་སིདྡྷི་ཧཱུྃ། ཞེས་སློབ་མས་བླངས་ཏེ། འོ་དོ་ནུབ་རྨི་ལམ་མི་འཁྲུགས་པའི་ནུས་པ་ཅན་གྱི་ཀུ་ཤ་ཆེ་བ་སྟན་དང་ཆུང་བ་སྔས་སུ་གྱིས་ལ་བླ་མ་དང་དཀྱིལ་འཁོར་གྱི་ལྷ་ཚོགས་ལ་མོས་པ་རྩེ་གཅིག་པས་གློ་གཡས་སར་ཕོབ་ལ་ཉོལ། ནངས་པར་དགེ་མི་དགེའི་རྨི་ལམ་ང་ལ་སྨྲོས་ཤིག །རྗེས་ཕྱིར་མི་ལྡོག་པའི་སླད་དུ་ཟབ་མོའི་ཆོས་བཤད་དེ་སྤྲོ་བ་བསྐྱེད་ཅིང་གདམས་ངག་བརྗོད་པ་ལགས་པས་འདི་ལ་གསན་འཚལ། འཇིག་རྟེན་ན་རྙེད་པར་དཀའ་བ་མེ་ཏོག་ཨུ་དུམ་ཝ་ར། དེ་བས་ཀྱང་སངས་རྒྱས་རྙེད་པར་དཀའ། དེ་བས་ཀྱང་གསང་སྔགས་ཀྱི་ཆོས་རྙེད་པར་དཀའ་སྟེ། རྒྱུའི་ཐེག་པར་བསྐལ་པ་གྲངས་མེད་གསུམ་དུ་ངལ་དུབ་ཀྱི་མཐའ་དང༌། རྨོངས་པའི་སྒྲིབ་པ་ཕྱོགས་གཅིག་པ་ཉིད་གསང་སྔགས་ཐབས་མང་བ་དང༌། དཀའ་བ་མེད་པ་དང༌། བྱིན་རླབས་མྱུར་བ་དང༌། དབང་པོ་རྣོན་པོས་ཡེ་ཤེས་ལ་སྤྱོད་པས་ཚེ་གཅིག་ལ་སོགས་པར་མིག་འཕྲུལ་ལྟར་གྲོལ་བའི་ལམ་ཡིན་ཏེ། འདི་ལྟར་དཀྱིལ་འཁོར་གྱི་ཚོན་རྩི་མཐོང་བས་ཀྱང་སྡིག་པའི་ལས་ཇི་སྙེད་པ་ཟད་པར་འགྱུར་ན་སང་ནངས་པར་དཀྱིལ་འཁོར་ཆེན་པོར་ཞུགས་ནས་སྨིན་ཅིང་གྲོལ་བའི་ནུས་པ་རྒྱུད་ལ་འཇོག་པ་འོག་མིན་དུ་མཐར་ལམ་ལ་ཞུགས་པ་དང་སྐལ་པ་མཉམ་པ་ཡིན་པས་སྤྲོ་བ་ཁྱད་པར་ཅན་སྐྱེད་ཅིག །དེ་དག་གིས་སྔོན་འགྲོ་སྟ་གོན་གྱི་བྱ་བ་རྣམས་གྲུབ་པ་ལགས་པས་དགེ་བ་གཞན་དོན་དུ་བསྔོ་བ་དང༌། དངོས་གཞིའི་དབང་བསྐུར་སང་ཉིན་འབྱུང་བ་ལགས་སོ། །ཞེས་དགེ་བ་བསྔོས་ལ་སློབ་མ་རྣམས་གྱེས། སློབ་དཔོན་གྱིས། ཛཿཧཱུྃ་བྃ་ཧོཿས་སྟ་གོན་གྱི་ཡེ་ཤེས་པ་ནམ་མཁར་བཞུགས་པ་རྣམས་དལ་ལ་བསྟིམས་པས་བྱིན་གྱིས་བརླབས་པར་བསམ། བདག་བསྐྱེད་བསྡུ་ལྡང་བསྔོ་སྨོན་བྱས་པས་གྲུབ་པོ། །སྟ་གོན་འདི་ནི་ལྷ་སྔགས་སོགས་ཁ་སྒྱུར་ཅུང་ཟད་བྱས་པས་དཔལ་ཆེན་འདུས་པ་དང༌། ཁྲག་འཐུང་རིགས་བཞིའི་སྒོས་བཀའ་ལ་སྟ་གོན་སྦྱོར་ན་ཚུལ་འདི་དེ་དག་ཐམས་ཅད་ཀྱི་ཁྱབ་བྱེད་དུ་འགྱུར་བའང་ཞར་ལ་འཕྲོས་པའོ། །གཉིས་པ་དངོས་གཞིའི་ལས་རིམ་ལ། དཀྱིལ་འཁོར་དང་དབང་རྫས་འགོད་པ། དབང་དོན་དུ་སྒྲུབ་ཅིང་མཆོད་པ། བདག་ཉིད་འཇུག་ཅིང་སློབ་མ་གཞུག་པའོ། །དང་པོ་ནི། སྟེགས་བུའི་སྟེང་རས་བྲིས་ཀྱི་དཀྱིལ་འཁོར་མཚན་ཉིད་དང་ལྡན་པ་བཀྲམ། ཅིས་ཀྱང་མ་འབྱོར་ན་གོང་སྨོས་ལྟར་འབྲུའི་ཚོམ་བུ་ལྷ་གྲངས་ཅན་བཀོད་པའི་དབུས་མཉྫིའི་ཁར་སྟ་གོན་བྱས་པའི་རྣམ་བུམ་བཞག །ཤར་དུ་རྡོར་དྲིལ་ལྷན་ཅིག་པ། ལྷོར་དབུ་རྒྱན། ནུབ་ཏུ་རྡོ་རྗེ། བྱང་དུ་དྲིལ་བུ། དབུས་སུ་ཞི་ཁྲོ་ཡོངས་རྫོགས་ཀྱི་ལྷ་ཙཀ །གཡས་སུ་སྙིང་ཐིག་གི་གླེགས་བམ། གཡོན་དུ་གསང་དབང་གི་རྟེན་ཐོད་པ་རྫས་ལྡན་མ་དཱ་ན་དང་ག་པུར་བདུད་རྩིའི་ཕུར་མ་སོགས་ཀྱིས་གཏམས་པ་དར་དམར་བརྒྱད་ལྟེབ་ཀྱིས་བཀབ་པ། ནུབ་ཏུ་རིག་ཙཀ་མེ་ལོང་ཤེལ་རྡོ་རྣམས་དང༌། ཕྱོགས་གང་བདེར་རྗེས་གནང་གི་ཆས་གདུགས། གླེགས་བམ། དུང་དཀར། དྲིལ་བུ། འཁོར་ལོ་རྣམས་དང༌། གཞུང་མཐུན་སྨན་རཀ་གཏོར་མ། ཆུ་གཉིས་ཉེར་སྤྱོད་བཅས་བསྐོར་བཤམ་བྱ། ལས་བུམ། སྔོན་འགྲོའི་དཀར་བགེགས། ཚོགས་ཀྱི་ཡོ་བྱད། བཀའ་སྲུང་དང་ཆད་བརྟན་གྱི་གཏོར་མ། མིག་དར། མེ་ཏོག །དོར་ར་པདྨ་འདབ་བཞི་དབུས་དང་བཅས་ལ་རིགས་ལྔའི་ཕྱག་མཚན་བྲིས་པ། ཕྱག་ཤིང༌། གུལ་ཡུངས། བྱིན་འབེབས་ཀྱི་བདུག་རྫས་དང༌། རོལ་མོའི་རིགས་བཅས་སྤྱི་ལྟར་ཚོགས་པར་བྱའོ། །གཉིས་པ་ནི། གསོལ་འདེབས་སྔོན་དུ་འགྲོ་བས་ཞི་ཁྲོ་ངན་སོང་སྦྱོང་བའི་ལས་བྱང་བཞིན་བདག་མདུན་དམ་ཚིག་གི་འཁོར་ལོ་བསྒོམ། ཡེ་ཤེས་པ་སྤྱན་དྲངས་བསྟིམས་ཕྱག་མཆོད་བསྟོད་པ་བཅས་གཞུང་ལྟར་དང༌། ཞི་བ་དང་ཁྲོ་བོའི་བསྙེན་པ་ཅི་མང་དང༌། ལས་སྦྱོར་རྩ་རིག་དེའི་བཅུ་ཆ་བཅས་བཟླ། བུམ་བཟླས་ལ་གྲུབ་ན་ལྷ་གསལ་འདེབས་བུམ་པ་སྟ་གོན་གྱི་སྐབས་བཞིན་དང༌། ཡང་ན་མདུན་བསྐྱེད་ཀྱི་སྣང་ཆ་མེ་ལོང་དུ་གཟུགས་བརྙན་ཤར་བ་བཞིན་བུམ་པར་སྐད་ཅིག་གིས་བསྐྱེད་དེ། བདག་གི་ཐུགས་ཀ་ནས་སྤྲོས་པའི་འོད་ཟེར་གཟུངས་ཐག་ལ་འཁྲིལ་ཏེ་སོང༌། རྣམ་རྒྱལ་བུམ་པ་མཚན་ཉིད་ཚང་བའི་ནང་གཞལ་མེད་ཁང་གི་རྣམ་པར་རྫོགས་པའི་བརྟེན་པའི་ལྷ་ཚོགས་ཐམས་ཅད་ཀྱི་ཐུགས་རྒྱུད་བསྐུལ་སོ་སོའི་ཐུགས་ཀར་ཨ་ཡིག་རེ་རེ་དང༌། གཙོ་བོ་རྣམ་སྣང་གི་ཐུགས་ཀར་ཟླ་གདན་ལ་ཨཱ་ལི་ཀཱ་ལིའི་ཕྲེང་བ་གཡས་སུ་འཁོར་བ་ལས་འཕྲོས་པའི་འོད་ཟེར་གྱིས་ལྷ་ཚོགས་རྣམས་བསྐུལ། བདེ་བའི་སྒྲ་དང་བཅས་སྙོམས་པར་ཞུགས་པའི་སྦྱོར་མཚམས་ནས་བདུད་རྩིའི་རྒྱུན་བབ་བུམ་པའི་ཆུ་དང་འདྲེས་པས་སློབ་མའི་སྡིག་སྒྲིབ་སྦྱོང་བའི་ནུས་ལྡན་དུ་གྱུར་པར་བསམ་ལ། ཨོཾ་ཧཱུྃ་ཏྲཱྃ་ཧྲཱིཿཨཱཿས་འགོ་དྲངས་པའི་དབྱངས་གསལ་མཐར། སརྦ་པཱ་པཾ་ཤིནྟཾ་ཀུ་རུ་སྭཱ་ཧཱ། ཞེས་བཏགས་པ་ཅི་ནུས་དང༌། ལས་བུམ་ལ་དམིགས་པའི་སྔགས་དང༌། ཨ་བྷི་ཥེ་ཀའང་ཅུང་ཟད་བཟླ། མདུན་བསྐྱེད་ལ་ཡིག་བརྒྱའི་བཟླས་པ་བརྒྱ་རྩ་བརྒྱད་ལས་མི་ཉུང་བར་གྲུབ་ནས། ལས་བྱང་ལྟར་མཆོད་བསྟོད་དང༌། ཨོཾ་ཨཱཿཧཱུྃ་གིས་མཆོད་ཡོན་ཕུལ་ཏེ་འོད་ཞུ་བྱ་བ་དབང་གི་སྤྱི་དོན་དང༌། ཞི་ཁྲོའི་ཆོ་ག་གཉིས་ཀ་ལས་གསུངས་པས་གང་འགྲུབ་བྱ། ཚོགས་བསགས། སྐོང་བཤགས། ཚོགས་མཆོད། བསྒྲལ་བསྟབ་བཅས་མཐར་ཆགས་སུ་བཏང་ངོ༌། །གསུམ་པ་ལ་གཉིས་ལས་དང་པོ་བདག་ཉིད་འཇུག་པ་ནི། བདག་འཇུག་གི་ཆོ་ག་ནི་ཚོགས་གཉིས་སྤེལ་བ་དང༌། དམ་ཚིག་ཉམས་ཆག་གསོ་ཞིང་རྒྱུད་དག་པས། ལམ་འབྲས་ཀྱི་ཐོབ་བྱའི་རྟེན་འབྲེལ་རྣམས་རྒྱུད་ལ་འཇོག་པའི་དགོས་པ་དུ་མ་དང་ལྡན་པས་དབང་གི་ཆོ་ག་ལས་བྱུང་བ་ལྟར་གྲུབ་ན་ཤིན་ཏུ་ལེགས་ཤིང༌། མི་ནུས་ན་ལྷ་བདག་རང་བཞིན་དབྱེར་མེད་དུ་ཤེས་པས་རིག་པའི་མེ་ཏོག་དོར་བས་ཀྱང་རུང་བ་སྔ་འགྱུར་གྱི་རྒྱུད་སྡེ་སྒྱུ་འཕྲུལ་དྲྭ་བ་ནས་བྱུང་བ་ལྟར་རིག་འཛིན་བརྒྱུད་པའི་ཕྱག་བཞེས་སུའང་མཛད་པས་ན། ཨོཾ་བཛྲ་ས་མ་ཡ་ཨོཾ། ཨཱཿབཛྲ་ས་མ་ཡ་ཨཱཿ ཧཱུྃ་བཛྲ་ས་མ་ཡ་ཧཱུྃ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ཞེས་དང༌། ཨོཾ་བཛྲ་ཀྲོ་དྷ་ས་མ་ཡ་སྟྭཾ། ཞེས་རིག་པའི་མེ་ཏོག་དོར་བས། བདག་དང་དཀྱིལ་འཁོར་པའི་སྐུ་གསུང་ཐུགས་ཡོན་ཏན་ཕྲིན་ལས་རྣམས་གཉིས་སུ་མེད་པར་གྱུར་པར་བསམ་ལ། ཨོཾ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བའི། །ཕྱག་རྒྱ་ཆེན་པོར་བདག་སྦྱོར་ཅིག །ཨོཾ་བཛྲ་ས་མ་ཡ་ཧཱུྃ། ཨོཾ་བཛྲ་ས་མ་ཡ་སྟྭཾ། ཨོཾ་བཛྲ་ས་མ་ཡ་ཧོཿ ཞེས་དང༌། ཨོཾ། ཁྲོ་ལ་ཁྲོས་པས་ཞི་མཛད་པ། །ཐུགས་རྗེ་ཁྲོ་དཔལ་རྔམས་པའི་ཚོགས། །འབར་བའི་བྱིན་རླབས་རྨད་པོ་ཆེ། །ད་ལྟ་ཉིད་དུ་བདག་ལ་སྩོལ། །ཨོཾ་བཛྲ་ཀྲོ་དྷ་ས་མ་ཡ་སྟྭཾ། ཨོཾ་བཛྲ་ཀྲོ་དྷ་ས་མ་ཡ་ཕཊ། ཨོཾ་ཀྲོ་དྷ་ས་མ་ཡ་ཧོཿ ཞེས་དངོས་གྲུབ་བསྐུལ་ཞིང་བསྟིམ་མོ། །གཞན་རྗེས་སུ་འཛིན་པ་དང་འབྲེལ་ན། དཀྱིལ་འཁོར་གྱི་ལྷ་ལ་ཐལ་མོ་སྦྱར་བས་བཏུད་དེ། ཨོཾ། རྡོ་རྗེའི་ཡེ་ཤེས་ཐོབ་བྱེད་པ། །དེ་བཞིན་གཤེགས་པ་ཐམས་ཅད་ཀྱི། །སྙིང་པོའི་དཀྱིལ་འཁོར་ཆེན་པོ་འདིར། །བདག་གིས་སློབ་མ་འཇུག་པར་འཚལ། །ཞེས་གསོལ་ནས་སློབ་མ་འཇུག་པར་གནང་བ་ཞུ། གཉིས་པ་སློབ་མ་རྗེས་འཛིན་ལ་དཀྱིལ་འཁོར་དུ་འཇུག་པ་དང༌། དབང་གིས་སྨིན་པར་བྱ་བ་གཉིས་ལས། དང་པོ་དཀྱིལ་འཁོར་དུ་འཇུག་པ་ལའང་ཕྱི་ནང་གི་འཇུག་པ་གཉིས་ལས་སྔ་མ་ལ་བདུན་ལས། དང་པོ་སྒོ་སྲུང་ཞུ་བསྐུལ་ནི། དཀྱིལ་འཁོར་ཡོལ་བས་བསྒྲིབས། སྟ་གོན་བྱས་པའི་སློབ་མ་རྣམས་སྒོའི་ཕྱི་རོལ་དུ་ལས་བུམ་གྱི་ཆུས་ཁྲུས་བྱས། སྔོན་ཆད་གཉིས་འཛིན་མ་རིག་པས་ལྡོང་སྟེ་དཀྱིལ་འཁོར་མ་མཇལ་བའི་བརྡར་མིག་དར་འཆིང་མཛོད། ཙཀྵུ་བྷནྡྷ་ཝ་ར་མ་ན་ཡེ་སྭཱ་ཧཱ། སྔགས་དོན་ཡིད་ལ་མཆོག་ཏུ་བྱ་བའི་ཕྱིར་མིག་དར་འཆིང༌། ཞེས་སོ། མཆན། དཀྱིལ་འཁོར་གྱི་ལྷ་དང་ཕྱག་སྟོང་པར་མཇལ་དུ་མི་རུང་བས་ཕྱག་རྟེན་དུ་ཨུ་དུམ་ཝ་རའི་མེ་ཏོག་གི་ཕྲེང་བ་ཁ་དོག་དམར་པོ་རེ་བྱིན་པར་མོས། ཨ་སྣང་མཐའ། ཁཾ་དོན་གྲུབ། ཝི་རྣམ་སྣང༌། ར་རིན་འབྱུང༌། ཧཱུྃ་མི་བསྐྱོད་པ་སྟེ་སྔགས་དོན་ནམ་མཁའི་དཔའ་བོ། མཆན། མེ་ཏོག་ལག་ཏུ་གཏད། དེ་ཡང་ཁྱེད་རང་རྣམས་མཚན་མའི་དཀྱིལ་འཁོར་གྱི་ཁང་པའི་ཕྱི་རོལ་ནས་འཇུག་པ་ཡིན་ཀྱང་འདིར་དཀྱིལ་འཁོར་ཡོལ་བས་ཆོད་པ་རྒྱུ་མཐུན་དུ་བྱ་བ་ཡིན་པས་ཕྱག་ཐལ་མོ་སྦྱར་ཏེ་སྒོ་སྲུང་ཕོ་ཉའི་ཚོགས་ལ་དཀྱིལ་འཁོར་དུ་འཇུག་པར་གསོལ་བ་འདེབས་པ་འདིའི་རྗེས་ཟློས་མཛོད། ཀྱཻ། ཁྲོ་བོ་མི་བཟད་འཇིགས་པའི་སྐུ། །མཚོན་ཆ་སྣ་ཚོགས་ཕྱག་ན་བསྣམས། །བདག་ཅག་འཁོར་བ་ལས་གྲོལ་ཕྱིར། །ཁྱེད་ཀྱིས་གནང་སྟེ་བཏང་དུ་གསོལ། ཞེས་གསོལ་བ་བཏབ་པ་ལ་དཀྱིལ་འཁོར་ཆེན་པོ་འདིར་སྐལ་མེད་རྣམས་ལྟ་བར་མི་རུང་བས། རིགས་དང་སྐལ་པ་འདྲི་བ་འདི་ལ་གསན་པས་ཁྱབ་པར་གདའ། ཁྱེད་རྣམས་སུ་ཡིན་ཅི་ལ་དགའ། །ལས་དང་སྐལ་པ་ལྡན་ནམ་ཅི། །ཞེས་དྲིས་པ་ལ་དེ་ལྟ་བུའི་སྣོད་ཀྱི་སྐྱོན་དང་ལྡན་པ་མ་ལགས་ཤིང་རིགས་དང་སྐལ་པ་ལྡན་པ་ཡིན་པས་ཐུགས་བརྩེ་བས་དགོངས་ནས་འཇུག་པར་གསོལ་བ་འདེབས་པ་འདིའི་རྗེས་ཟློས་མཛོད། བླ་མ་རྡོ་རྗེ་འཛིན་པ་དང༌། །དཀྱིལ་འཁོར་ལྷ་ཚོགས་སྤངས་ནས་ནི། །སྐྱོབ་པ་གཞན་ན་མ་མཆིས་པས། །སྒོ་ཕྱེ་ཐར་པའི་གྲོང་བསྟན་འཚལ། །ལན་གསུམ། ཞེས་གསོལ་བ་ལ། ཁྱེད་ནི་སྣོད་མཆོག་དམ་པ་སྟེ། །ཁྱེད་འདོད་པ་ནི་བདག་གིས་སྦྱིན། །སྤྲོ་བ་བསྐྱེད་ལ་ནང་དུ་ཤོག །དེ་ལྟར་གནང་བ་ནོད་པས་ལྷག་པའི་བསམ་པ་བརྟན་པོས་འཁོད་པའི་མོས་པ་མཛོད། ཅེས་བརྗོད་ཅིང་ནང་དུ་བཏང༌། གཉིས་པ་བགེགས་བསལ་ལོ་རྒྱུས་ཆོས་བཤད་ནི། བགེགས་གཏོར་བཏང་ལ་བཀའ་སྒོ་དྲག་སྔགས་གུལ་ཡུངས་རོལ་མོ་བཅས་པས་བགེགས་བསྐྲད། སྲུང་འཁོར་བསྒོམ། གྲལ་དུ་འཁོད་ནས་མེ་ཏོག་བཀྱེ་བསྡུ་བྱ། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་སེམས་བསྐྱེད་དེ་གསན་འཚལ། དེ་ལ་རང་ཅག་རྣམས་ཀྱི་མི་ལུས་ཁྱད་པར་ཅན་འདི་ལྟ་བུ་སླན་ཆད་རྙེད་པར་དཀའ་ཞིང༌། ཆོས་སྒྲུབ་པའི་རྟེན་དལ་འབྱོར་ཚང་བ་འབའ་ཞིག་ལ་ལྟོས་དགོས་པའང༌། འཕྲལ་འབྱུང་གི་རྐྱེན་བརྒྱད་དང༌། རིས་ཆད་ཀྱི་བློ་བརྒྱད་ཀྱིས་ཡུད་ཙམ་ཡང་མི་ཁོམ་པར་འགྱུར་ཞིང༌། ལས་མཐའ་ལོག་པའི་རིགས་ལ་ལྟོས་ན་འབྱོར་པ་བཅུ་ཡང་འདུ་འབྲལ་དང་བཅས་པས་ཡོན་ཏན་ཐམས་ཅད་ཚོགས་པའི་མི་ལུས་རིན་པོ་ཆེ་ཡིན་པར་དཀའ་ཞིང༌། སྤྱི་མཐུན་དུ་སྐྱེས་པའི་ནངས་པར་ནས་འཆི་བའི་ཕོ་ཉ་དང་འགྲོགས་པ། འབྱོར་རྒུད་དང་བདེ་སྡུག་སྣ་ཚོགས་པའི་རྟེན་འབྲེལ་ཚོགས་པ་ལས་གཞན་དབང་ཅན་དུ་འགྱུར་བ་དང༌། ཁྱབ་པ་འདུ་བྱེད་ཀྱི་སྡུག་བསྔལ་བལྟར་མི་མངོན་པ་དང་འགྲོགས་པས་མཐོ་རིས་ཀྱི་བདེ་འབྲས་ནི། རྩྭ་རྩེའི་ཟིལ་པ་ལྟ་བུ་ཤིན་ཏུ་ཡིད་བརྟན་མི་རུང་བ་ཡིན་པས། ངེས་འབྱུང་གི་བློ་ཁྱད་པར་ཅན་གྱིས་བསྐུལ་ཏེ་ཐར་པ་དང་ཐམས་ཅད་མཁྱེན་པ་སྒྲུབ་པའི་ཐབས་ལ་འབད་དགོས། དེ་ལ་སངས་རྒྱས་རྣམས་ནི་ཐུགས་རྗེ་ཚད་མེད་པས་སེམས་ཅན་ཡལ་བར་མི་འདོར་ཞིང༌། ཕྲིན་ལས་ཚད་མེད་པས་གདུལ་བྱའི་ཁམས་དང་དབང་པོ་དང་བསམ་པ་ལ་འཚམ་པའི་ཆོས་སྒོ་ཇི་སྙེད་གསུངས་པ་རྣམས་ཀྱི་ནང་ནས་མཆོག་ཏུ་གྱུར་པ་ནི་འབྲས་བུའི་ཐེག་པ་ཡིན་ཏེ། དེའི་ཆོས་འཁོར་གྱི་གྲངས་ངེས་དང་རྣམ་དབྱེ་བསམ་པར་མི་ནུས་ཀྱང༌། གངས་ཅན་པ་རྣམས་ཀྱིས་འགྱུར་གྱི་བྱེ་བྲག་ལས་གསར་རྙིང་དུ་སྒྲོ་བཏགས་པའི་རྡོ་རྗེ་ཐེག་པ་སྔ་འགྱུར་ལ་མདོ་སྒྱུ་སེམས་གསུམ་གྱི་གྲུབ་པའི་མཐའ་ཆེན་པོ་གསུམ་དུ་ཡོད་པ་ལས། འདི་ནི་སེམས་ཕྱོགས་ཀྱི་གྲུབ་མཐའ་གཙོ་བོར་བཏོན་པས་རྫོགས་པ་ཆེན་པོ་ཀློང་ཆེན་སྙིང་ཐིག་ཅེས་གྲགས་པ། ནང་གསེས་ཀྱི་དབང་དུ་ན། སྔགས་འོག་མ་ལྟར་ཁམས་ཀྱི་དྲི་མ་བླང་དོར་དང་བཅས་པའི་ངལ་དུབ་ཀྱིས་སྦྱོང་བ་མ་ཡིན་ཡང་སྣང་གྲགས་རིག་པའི་ཆོ་འཕྲུལ་དུ་མངོན་པར་བྱང་ཆུབ་པ་དཔལ་ལྡན་སྒྱུ་འཕྲུལ་དྲྭ་བའི་སྙིང་པོ་དཔལ་ཆེན་ཞལ་ལུང་དང་ཧེ་རུ་ཀ་འདུས་པའི་བསྐྱེད་རིམ། དག་པའི་སྣོད་བཅུད་ཀྱང་འཕོ་མེད་བདེ་བ་ཆེན་པོའི་ཡེ་ཤེས་གཞན་དུ་མི་འགྱུར་བ་ཨ་ནུའི་མདོ་ལུང་གི་སྙིང་པོ་རིགས་བརྒྱ་རིག་འཛིན་གྱི་བསྐྱེད་རྫོགས་རྒྱུད་ལུང་གབ་བྱང་དང་བཅས་པ། རྒྱུ་རྐྱེན་དང་རྩོལ་སྒྲུབ་ལ་མི་ལྟོས་པ་ཕྱི་སེམས་སྡེ། སྐུ་གསུམ་རང་ཆས་ཀྱི་དབྱིངས་ལས་མི་འགྱུར་བ་ནང་ཀློང་སྡེ། མངོན་སུམ་རང་གནས་སུ་སྟོན་པ་གསང་བ་མན་ངག་གི་སྡེ། གནད་ལས་གནད་དུ་བསྡུས་པ་ཡིད་དཔྱོད་དང་འབྲས་བུ་ཕྱི་དུས་ལ་ལྟོས་མི་འཆའ་བ་ཡང་གསང་བླ་ན་མེད་པའི་སྡེ་སྟེ་སེམས་ཕྱོགས་རྒྱ་མཚོའི་སྙིང་པོ་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལ་སོགས་པའི་མན་ངག་གི་ཐུས་ཀ་ཚང་ལ་མ་ནོར་བར་སྟོན་པ། དེ་ཉིད་ཀྱང་རྒྱུད་དོན་དང་འབྲེལ་བས་བདེ་བར་གཤེགས་པའི་བཀའ་ཚད་མ། རྡོ་རྗེ་འཛིན་པ་བརྒྱུད་ལྡན་ལས་ཐོས་པས་མན་ངག་ཚད་མ། རྣལ་འབྱོར་དབང་ཕྱུག་གི་ཉམས་མྱོང་ཚད་མ། རྟེན་ཅིང་འབྲེལ་འབྱུང་གི་ལོ་རྒྱུས་ཚད་མ། བཀའ་མ་དང་འབྲེལ་བས་དབང་གི་ཆུ་བོ་མ་ནུབ་པ། བྱིན་རླབས་ཀྱི་བརྒྱུད་པ་མ་ཉམས་པ། མན་ངག་གི་སྣ་ཁ་མ་ལོག་པ་དག་ལ་མ་བརྟེན་ན། ཟབ་མོར་བཏགས་པ་ཙམ་ལས་ཡང་དག་དང་ལྟར་སྣང་གང་ཡིན་མ་འཚལ་བའི་རྨོངས་པ་ལམ་ནོར་བས་ངལ་བ་འབྲས་མེད་དུ་འགྱུར་ལ། དེའི་ཕྱིར་གཏེར་ལུང་ལས། རྒྱལ་བ་དགོངས་པ་ཉིད་ཀྱི་ཚུལ། །དགོངས་པ་བབ་པ་དབང་གི་མཆོག །ཅེས་གདོད་མའི་མགོན་པོ་སྲས་དང་བཅས་པས་ཆོས་ཀྱི་བདག་པོ་ལ་དགོངས་པས་གནས་ལུགས་ཆོས་སྐུར་རྟོགས་པའི་དབང་ཐོབ། བརྡ་དང་བརྡ་མཚོན་གོ་བ་ནི། །དབང་གི་ནང་ནས་དབང་བཀའོ། །ཞེས་པ་ལྟར་ཡེ་ཤེས་ཀྱི་མཁའ་འགྲོ་མས་བརྡ་བསྒྱུར་གྱི་ཤོག་སེར་དབྱིབས་དང་རྣམ་པ་ཐམས་ཅད་པ་བྱིན། རྫོགས་པའི་སངས་རྒྱས་དྲི་མེད་འོད་ཟེར་དངོས་དང་ཞལ་མཇལ་ཏེ་སྙན་བརྒྱུད་ཀྱི་ཕ་ཕོག་བསྩལ་བའི་བརྒྱུད་པ་གསུམ་ལྡན་གྱི་སྟེང༌། གོང་འོག་གི་བདག་པོ་རྣམ་གཉིས་ལ་སོགས་ཏེ། སྔོན་གྱི་དུས་ན་བྱོན་པའི་ལམ་སྟོན་ཆེན་པོ་རྣམས་ཀྱིས་བཞེད་པ་བཞིན་རྒྱུད་སྡེ་བཀའ་མ་དང༌། སྒྲུབ་སྡེ་བཀའ་བརྒྱད་ལ་སོགས་པའི་དབང་གི་ཆུ་བོ་མ་ནུབ་པའང་གསན་ཅིང་བྱིན་རླབས་ཀྱི་བརྒྱུད་པ་འདྲེས་པར་མཛད་ནས། ཇི་སྐད་དུ་སྡུད་པ་ལས། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང༌། །འཆད་དང་རིག་པ་དག་དང་ལྡན་པར་བརྗོད་པ་དང༌། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། །ཞེས་པ་ལ་སོགས་པ་དང་གཞན་དུ་བྱང་ཆུབ་སེམས་དཔའ་བསམ་པ་རྣམ་པར་དག་པ་ལ་ནི་རང་ཉིད་ཀྱི་སྤྱོད་པ་ཉིད་ལས། མན་ངག་དང་རྗེས་སུ་བསྟན་པ་ཐམས་ཅད་འབྱུང་ངོ༌། ཞེས་པ་ལྟར་རྒྱལ་བའི་ཡེ་ཤེས་རྣམ་པ་ཐམས་ཅད་པས་དགོངས་ཤིང་མཁའ་འགྲོའི་གསང་མཛོད་ལ་མངའ་དབང་བསྒྱུར་བར་བྱིན་གྱིས་བརླབས་པ་དང་རྗེས་སུ་གནང་བས་བཀའ་རྩོད་པ་མེད་ཅིང༌། སངས་རྒྱས་གཉིས་པ་སློབ་དཔོན་ཆེན་པོའི་ཞལ་ནས་གསུངས་པའི་བཀར་བསྙོན་མེད་དུ་གྲུབ་པ་ལ་ཟབ་མོ་གཏེར་གྱི་རིང་ལུགས་མ་ནོར་བ་ཞེས་བྱ་སྟེ། མཆོག་གཟིགས་ཀྱི་བརྒྱུད་པ་མ་ཆད་པ་དང༌། ཉམས་པ་དང་འདྲེས་ཁྱེར་གྱིས་བར་མ་ཆོད་པ་དང༌། ཚིག་ལ་གྲིམ་པའི་སློབ་པ་སོ་སོའི་སྐྱེ་བོས་བསླད་པ་མ་སོང་བས་བྱིན་རླབས་ཆེ་ཞིང་སྒྲུབ་ཐག་ཉེ་བ་ཡིན་ནོ། །དེ་ལྟ་བུའི་སྔགས་ཀྱི་མྱུར་ལམ་ལའང་དབང༌། བསྐྱེད་རིམ། རྫོགས་རིམ། བཤད་པ་སྟེ་སྔ་འགྱུར་བཀའ་བབ་ཆུ་བོ་བཞིའི་ཞལ་ལུང་དང་ལྡན་པ་ལས་དེང་རིམ་པ་དབང་གི་ཆོ་ག་ལས། སྤྱིར་འདི་ཡན་ཆད་སྙིང་ཐིག་སྤྱིའི་དབང་བཤད་ལ་འཇུག་པས་སྐབས་སུ་གང་བབ་འཕྲུལ་ཤེས་པར་བྱ། དམིགས་བསལ། འདིར་ཞི་ཁྲོའི་དཀྱིལ་འཁོར་ཆེན་པོར་སྨིན་པར་བྱ་བ་སྐབས་སུ་བབ་པ་ཡིན་ལ། འདི་ནི་སྤྱི་སྒོས་སྔགས་ཀྱི་སྒོར་ཞུགས་པའི་རྣལ་འབྱོར་པ་རྣམས་ཀྱི་ཉམས་ཆག་སྐོང་ཞིང་རྟོག་སྒྲིབ་སྦྱོང་བ་དང༌། སེམས་ཅན་ཐམས་ཅད་ངན་སོང་གི་སྡུག་བསྔལ་ལས་དྲངས་ནས་བླ་ན་མེད་པའི་དངོས་གྲུབ་ཀྱི་སྐལ་པ་ཅན་དུ་བྱེད་པའི་ཐབས་མཆོག་རྨད་དུ་བྱུང་བ་རྣལ་འབྱོར་གྱི་སྤྱི་ཁྲུས་ཞི་ཁྲོ་ན་རཀ་དོང་སྤྲུགས་མཚམས་མེད་ལྔ་སྦྱོང་བ་ཞེས་གྲགས་པ་སྟེ། འགྱོད་ཚངས་ཀྱི་རྒྱལ་པོ་འདི་སྔོན་འདོད་ཁམས་ཀྱི་གནས་འདིར་བྲམ་ཟེ་དུང་གི་ཕྲེང་བ་ཅན་ཞེས་བྱ་བ་རིག་པའི་གནས་ལྔ་ལ་བྱང་བ་ཞིག་ལ་སློབ་མ་རྒྱལ་པོའི་བུ་ཞིག་ཡོད་པ་དེས་སློབ་སྦྱོང་རྣམས་མཐར་ཕྱིན་པ་ན། ད་ངའི་གོང་ན་སློབ་དཔོན་འདི་ཙམ་དུ་ཟད་པས་མེད་པར་བྱ་སྙམ་ནས་ཐོ་བརྩམས་པ་སློབ་དཔོན་གྱིས་ཀྱང་ཤེས་ནས་ཞེ་སྡང་གིས་དམོད་བོར་ཏེ། གྲོངས་ནས་གཉིས་ཀ་ངན་སོང་དུ་སྐྱེས་པ་ལ། རྒྱལ་བ་རྣམས་ཀྱིས་ཞི་ཁྲོ་ན་རཀ་དོང་སྤྲུགས་ཀྱི་ལྷ་སྔགས་བསྟན་པས་གྲོལ་ཏེ་རིམ་གྱིས་རིག་འཛིན་གྱི་ས་ལ་བཀོད་པ་ཉིད་ལ་བཀའ་གཏེར་དག་སྣང་གི་བབས་སོ་རྒྱས་བསྡུས་མི་འདྲ་བ་དུ་མ་ཞིག་བཞུགས་པ་ལས་འདི་ནི་ཀུན་མཁྱེན་རིག་འཛིན་འཇིགས་མེད་གླིང་པའི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལས་བྱོན་པ་སྟེ། གཞུང་རྩ་བ་ལས། བི་མ་ལ་དང་གསང་ཞབས་སོགས༔ པཎ་གྲུབ་རྣམས་ལ་གྲགས་པ་ཡི༔ ཞི་ཁྲོ་ཁྲོམ་དཀྲུག་ཅེས་བྱ་བའི༔ སྔ་འགྱུར་བཀའ་མའི་གཞུང་བཟང་པོ༔ དངོས་ལ་མིང་བཏགས་མཐུ་ཆེ་བ༔ ནུབ་ལ་ཉེ་བ་མ་བཟོད་དེ༔ ན་རཀ་དོང་སྤྲུགས་གང་ཡིན་པའི༔ དངོས་དོན་འཁྲུལ་པ་མེད་པར་བསྡེབས༔ བཀའ་གཏེར་ཟུང་དུ་འཇུག་པ་ལ༔ པདྨའི་རིང་ལུགས་ཞེས་སུ་གྲགས༔ འགྲོ་ཀུན་ཆོས་ཀྱི་མིག་ལྡན་པས༔ ཡང་དག་ལམ་ལ་འཇུག་པར་ཤོག༔ ཅེས་གསུངས་པ་ལྟར་བསྐྱེད་པ་མ་ཧཱ་ཡོ་ག་ལ་རྒྱ་ཆེ་བ་རྒྱུད་སྡེ་དང༌། ཟབ་པ་སྒྲུབ་སྡེ་གཉིས་ལས་སྔ་མ་ལ་སྐུ་གསུང་ཐུགས་ཡོན་ཏན་ཕྲིན་ལས་ལྔའི་རྩ་བར་གྱུར་པའི་རྒྱུད་སྡེ་ལྔ། སྒྲུབ་པ་ལག་ལེན་དུ་སྟོན་པ་རོལ་པའི་རྒྱུད་སྡེ་ལ་སོགས་ལྔ། སྤྱོད་པ་ཡན་ལག་ཏུ་འགྲོ་བའི་རྒྱུད་སྡེ་ལྔ། མ་ཚང་བ་ཁ་སྐོང་བའི་རྒྱུད་སྡེ་གཉིས། དེ་ཐམས་ཅད་ཀྱི་ཁྱབ་བྱེད་རྩ་བའི་སྤྱི་རྒྱུད་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་གསང་བའི་སྙིང་པོ་སྟེ་ཏནྟྲ་ཆེན་པོ་སྡེ་བཅོ་བརྒྱད་དུ་གྲགས་པ་ལས། དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞི་ཁྲོ་སོ་སོའི་དབང༌། རྒྱུད་བཤད་སྐུའི་རྒྱུད་སངས་རྒྱས་མཉམ་སྦྱོར་སོགས་རིགས་བསྡུས་པའི་དབང༌། སྤྱོད་པ་ཡན་ལག་ཏུ་འགྲོ་བའི་རྒྱུད་སྡེའི་ནང་ཚན་གླང་ཆེན་རབ་འབོག་གི་དུམ་བུ་དྲི་མེད་བཤགས་པའི་རྒྱུད་ཀྱི་རྗེས་སུ་འབྲང་བའི་ཞི་ཁྲོ་ཁྲོམ་དཀྲུག་དང༌། ཆ་མཐུན་ཡི་གེ་བརྒྱ་པ་དབང་ཆོག་རྒྱལ་པོའི་རྒྱུད་སོགས་ལ་བརྟེན་པའི་ཞི་ཁྲོ་རིགས་འདུས་ཀྱི་དབང་སོགས་བཞུགས་པ་ལས་འདི་ནི་སྔོན་མ་ཡོ་ག་རྣམ་པ་གསུམ་ཀ་ལ་འཇུག་ཅིང་ཨ་ནུ་ཡོ་ག་དང་རྗེས་སུ་འབྲེལ་བ་སྟེ། དབང་གཞུང་ལས། དག་པའི་སྣོད་བཅུད་ཀྱང་འཕོ་མེད་བདེ་བ་ཆེན་པོའི་ཡེ་ཤེས་གཞན་དུ་མི་འགྱུར་བ་ཨ་ནུའི་མདོ་ལུང་གི་སྙིང་པོ་རིགས་བརྒྱ་དང་རིག་འཛིན་གྱི་བསྐྱེད་རྫོགས་རྒྱུད་ལུང་གབ་བྱང་དང་བཅས་པ། ཞེས་གསུངས་པའི་སྔ་མ་ཞི་ཁྲོ་ཁྲོམ་དཀྲུག་ངན་སོང་སྦྱོང་བའི་ཆོ་གའི་དངོས་གཞིའི་དབང་བསྐུར་བ་སྦྱིན་པ་སྟེ། དེ་ལ་བདག་ཉིད་སློབ་དཔོན་གྱི་བགྱི་འོས་རྣམས་གྲུབ། ཁྱེད་རང་སློབ་མའི་ངོ་སྐལ་ལ་དཀྱིལ་འཁོར་དུ་འཇུག་པའི་རིམ་པ་དང༌། ཞུགས་ནས་མངོན་པར་དབང་བསྐུར་བ་གཉིས་ལས་ཐོག་མར་འཇུག་པའི་ཆོས་རྣམས་ཞུ་བའི་ཡོན་དུ་མཎྜལ་ཕུལ། གསུམ་པ་སྐྱབས་སེམས་སྡོམ་པ་བཟུང་བ་ནི། རྡོ་རྗེ་ཐེག་པའི་དཀྱིལ་འཁོར་དུ་འཇུག་ཅིང་དབང་བཞི་རྫོགས་པར་ནོད་པ་ལ་ཐུན་མོང་དང་ཁྱད་པར་གྱི་སྡོམ་པ་སྔོན་དུ་བཟུང་བ་གལ་ཆེ་བས་ཉན་རང་དང་ཐུན་མོང་གི་ལམ་གྱི་རྨང་རྡོ་སྐྱབས་འགྲོ། ཐེག་ཆེན་དང་གསང་སྔགས་ཀྱི་ཁྱད་ཆོས་བྱང་ཆུབ་སེམས་བསྐྱེད་པ་སྟེ། དེ་དག་གི་སྡོམ་པ་ཐུན་མོང་དུ་བཟུང་བའི་ཕྱིར་མདུན་གྱི་ནམ་མཁར་དུས་གསུམ་རྒྱལ་བ་སྲས་བཅས་སྐྱབས་གསུམ་ཀུན་འདུས་སུ་བཞུགས་པ་ལ། འཁོར་བ་ལ་འཇིགས་པ། དཀོན་མཆོག་ལ་དད་པ། སེམས་ཅན་ལ་སྙིང་རྗེའི་ཀུན་སློང་གསུམ་དང་ལྡན་པས་སྐྱབས་ཡུལ་རྣམས་དཔང་པོར་བཅོལ་ཏེ་རྒྱལ་བ་སྲས་བཅས་ཀྱི་མཛད་པའི་རྗེས་སུ་སློབ་སྙམ་པས་རྗེས་ཟློས་ལན་གསུམ་མཛོད། ཨེ་མ་དུས་གསུམ་རྒྱལ་བ་ཀུན་ཏུ་བཟང༌། །རིགས་ལྔའི་སངས་རྒྱས་དགོངས་སུ་གསོལ། །འདི་བཟུང་བྱང་ཆུབ་མ་ཐོབ་བར། །སོགས་ནས། སྔགས་ཀྱི་ཆོ་གས་བསྡམ་པར་བགྱི། །ཞེས་པའི་བར་སྟ་གོན་བཞིན་བྱ། བཞི་པ་རྡོ་རྗེའི་རྣལ་འབྱོར་དུ་སེམས་བསྐྱེད་པ་ནི། གསང་སྔགས་ཀྱི་ཐམས་ཅད་རྣལ་འབྱོར་དུ་སེམས་བསྐྱེད་པ་སྟེ། ཁྱེད་རང་རྣམས་ཀྱི་སྙིང་གར་སེམས་ཅན་ཐམས་ཅད་ཀྱི་དོན་དུ་སངས་རྒྱས་སྒྲུབ་པའི་བློ་བཅོས་མིན་དེ་ཉིད་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་གྱི་སྟེང་དུ། དོན་དམ་བྱང་ཆུབ་སེམས་ཀྱི་རང་བཞིན་རྡོ་རྗེ་དཀར་པོ་རྩེ་ལྔ་པ་འོད་དང་འོད་ཟེར་འབར་བ་རེས་མཚན་པར་མོས་ལ་བདེན་གཉིས་དབྱེར་མེད་དུ་སེམས་བསྐྱེད་པ་འདིའི་རྗེས་ཟློས་ཀྱིས། ཨོཾ་སརྦ་ཡོ་ག་ཙིཏྟ་ཨུ་པ་ད་ཡ་མི། ལན་གསུམ། ལྔ་པ་དམ་ལ་བཞག་པ་ནི། རིགས་ཀྱི་བུ་ཁྱོད་སྔགས་བླ་མེད་ཀྱི་དཀྱིལ་འཁོར་དུ་ཞུགས་ནས་མཆོག་ཏུ་གསང་བའི་རང་བྱུང་གི་ཡེ་ཤེས་བསྐྱེད་པར་བྱ་ལ། དེའི་སྲོག་ཏུ་གྱུར་པ་དམ་ཚིག་སྲུང་དགོས་པས་རྡོ་རྗེ་བདུད་རྩིའི་མནའ་ཆུ་འདི་ཉིད་བྱིན་པས་དམ་ཚིག་ཉམས་ན་དངོས་གྲུབ་ཐོབ་པའི་སྐབས་མེད་ཅིང་སྡིག་པ་མགོ་དགུར་གྱུར་ནས་སྙིང་ཁྲག་འཇིབས་ཏེ། འདི་དང་ཕྱི་མར་སྡུག་བསྔལ་དུ་མས་ཚར་གཅོད་པས་དམྱལ་བའི་ཆུ་ཞེས་བྱ་ཞིང༌། བསྲུངས་ན་ཡེ་ཤེས་སེམས་དཔར་གྱུར་ནས་འདི་ཕྱིའི་ཕན་བདེ་མ་ལུས་པའི་འབྱུང་གནས་སུ་འགྱུར་བས་བདུད་རྩི་སྟེ། དམ་ཚིག་དང་སྡོམ་པ་རྒྱ་མཚོ་སྲུང་བའི་ཕན་ཡོན། འདས་པའི་ཉེས་དམིགས། དེ་ལེན་པའི་ཡུལ་སློབ་དཔོན་དང་བཅས་བཀའ་གཉན་པའི་ཁེ་ཉེན་ཆེན་པོ་གཉིས་སུ་ཡོད་པར་ཤེས་པས་བདུད་རྩི་འདི་ཉིད་ལྕེ་ལ་བཞག་ཀྱང་འབབ་པ་སྙིང་དབུས་སུ་ཐིམ་པར་མོས་ལ། ནང་མཆོད་བྱིན་ལ། འདི་ནི་ཁྱོད་ཀྱི་དམ་ཚིག་ཆུ། །དམ་ཚིག་ཉམས་ན་སྲེག་པར་བྱེད། །བསྲུངས་ན་དངོས་གྲུབ་ཐམས་ཅད་ཐོབ། །དམ་ཚིག་བདུད་རྩིའི་ཆུ་འདི་འཐུངས། །ས་མ་ཡ་ཨི་དན་ན་ར་ཀན། དྲུག་པ་རིགས་ལྔའི་སྡོམ་བཟུང་ནི། དབང་འདི་ཐོབ་པ་དཀྱིལ་འཁོར་གྱི་བྱ་བས་ཐོབ་ཀྱང༌། དབང་སྲོག་འཛིན་པ་དམ་ཚིག་དང་སྡོམ་པས་འཛིན་དགོས་པས་རྡོ་རྗེ་ཐེག་པའི་དམ་ཚིག་དབྱེ་བསྡུ་ཐམས་ཅད་རིགས་ལྔའི་དམ་ཚིག་ལ་འདུ་བས་ན་ཐུན་མིན་སྔགས་ཀྱི་རིགས་ལྔའི་སྡོམ་པ་དང་དམ་ཚིག་རྩ་བ་སྐུ་གསུང་ཐུགས། སྤྱི་དང་ཁྱད་པར་ལྷག་པའི་དམ་ཚིག་རྣམས་སྲོག་ལ་བབ་ཀྱང་མི་གཏོང་སྙམ་པས་འདིའི་རྗེས་ཟློས་མཛོད། སངས་རྒྱས་རིགས་ཀྱི་དམ་ཚིག་ཏུ། །རྒྱལ་སྲས་སངས་རྒྱས་ཐམས་ཅད་དང༌། །དཔའ་བོ་རྣལ་འབྱོར་མ་རྣམས་བསྙེན། །རྡོ་རྗེ་རིགས་ཀྱི་དམ་ཚིག་ཏུ། །རྡོ་རྗེ་དྲིལ་བུའི་ཕྱག་རྒྱ་དང༌། །བྱང་ཆུབ་སེམས་ནི་སྤང་མི་བྱ། །རིན་ཆེན་རིགས་ཀྱི་དམ་ཚིག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། པདྨ་རིགས་ཀྱི་དམ་ཚིག་ཏུ། །ཐེག་པ་གསུམ་དང་ཆོས་རྣམས་བཤད། །ལས་ཀྱི་རིགས་ཀྱི་དམ་ཚིག་ཏུ། །འགྲོ་བའི་དོན་ལ་བརྩོན་པར་བྱ། །ལྷ་ཡི་ཕྱག་རྒྱ་བླ་མའི་སྟན། །བཞོན་པ་ལ་སོགས་མི་སྨད་ཅིང༌། །བསྟན་པ་སྐྱོང་རྣམས་བརྙས་མི་བྱ། །བླ་མ་སངས་རྒྱས་དྲན་བྱེད་ཅིང༌། །བརྟན་གཡོ་ལྷ་དང་མཉམ་པར་སྦྱོར། །མདོར་ན་རྒྱལ་བས་གང་བསྒྲགས་པ། །དེ་དག་ཐམས་ཅད་བདག་གིས་བཟུང༌། །ལན་གསུམ། སྤྱིར་སྟ་གོན་གྱི་སྡོམ་བཟུང་ནས་དམ་ཚིག་སྲུང་བར་དབང་ཞིང༌། དངོས་བསྟན་བསྐྱེད་རྫོགས་ཐུན་མོང་བའི་བྱེ་བྲག་གི་དམ་ཚིག་རྣམས་རིགས་ངེས་པར་ཁས་བླང་བའི་ཆོ་གས་ཐོབ་པ་ཞེས་བརྗོད་ལ། ཁྱད་པར་རིམ་གཉིས་སོ་སོའི་སྔགས་སྡོམ་རྣམས་དབང་བཞི་རང་རང་གི་རྗེས་ཐོག་ཏུ་སོ་སོའི་ས་བོན་རྒྱུད་ལ་ཐེབས་པ་དང༌། ལྷན་ཅིག་ཐོབ་པའི་ཕྱིར་སྔགས་སྡོམ་རྫོགས་པར་ཐོབ་དུས་ནི་དབང་བཞི་པའི་མཐར་ཐུག་ཁོ་ན་ལ་ལྟོས་དགོས་ཤིང༌། མཚུངས་ལྡན་གྱི་སྡོམ་པ་ལ་གནས་དགོས་པའི་ཕྱིར་སྐྱེ་བོ་རང་ག་དང་ནད་གདོན་གྱིས་མནར་བའི་རྐྱེན་སེལ་དང་སྒྲིབ་སྦྱོང་ལ་སྡོམ་པ་ཁྱད་པར་བ་དག་མི་འབོག་ཅིང༌། མཆོག་དབང་གོང་མ་རྣམས་མི་བསྐུར་བ་གསར་རྙིང་གི་རྒྱུད་དང་མཁས་གྲུབ་ཆེན་པོ་རྣམས་ཀྱིས་དགོངས་པ་ཡིན་པས་སོ་མཚམས་འབྱེད་པ་གལ་ཆེ་གསུངས་སོ། །བདུན་པ་དཀྱིལ་འཁོར་དུ་འཇུག་པ་ནི། དེ་ནས་ལྷ་དང་སྐལ་པ་མཉམ་པའི་ཕྱིར་དཀྱིལ་འཁོར་དུ་འཇུག་པ་ཡིན་པས་འདིའི་རྗེས་ཟློས་མཛོད། ཀྱཻ། རིགས་ལྔ་བདེ་བར་གཤེགས་པ་དང༌། །བླ་མ་ཡི་དམ་མཁའ་འགྲོ་དགོངས། །སྒོ་བ་ཆེན་པོ་ཁྱེད་རྣམས་ཀྱིས། །སྒོ་ཕྱེ་ཐར་པའི་གྲོང་བསྟན་འཚལ། །ལན་གསུམ། ཞེས་གསོལ་བས་དཀྱིལ་འཁོར་གྱི་སྒོ་ཤག་གིས་ཕྱེས་པར་མོས་ཤིག །བླ་མས། ཨ་ཁཾ་ཝི་ར་ཧཱུྃ་དང་དབྱེ་རྒྱ་བཅས་ཡོལ་བ་བསལ། འདུས་པ་དཀྱིལ་འཁོར་ཆེན་པོར་འཇུག་པའི་ཚེ་བླ་མས་བརྗོད་པའི་སྔགས་སུ་གསུངས། མཆན། གཙོ་བོའི་ཐུགས་ཀ་ནས་བྱུང་བའི་ལས་ཀྱི་རྡོ་རྗེའི་ཕྱག་ལ་འཇུས་ཏེ་ཤར་སྒོ་ནས་བཟུང་རིམ་པར་གཡས་བསྐོར་གྱིས་སྒོ་བཞིར་ཞུགས་ཤིང་ལྷ་ཚོགས་རྣམས་ཀྱི་སྐུ་གསུང་ཐུགས་ལ་ཕྱག་འཚལ་བའི་མོས་པས་ཐལ་མོ་གནས་གསུམ་དུ་སྦྱོར་ལ་སྔགས་འདིའི་རྗེས་ཟློས་མཛོད། ཨོཾ་ན་མ་ཏེ་ཧཱུྃ། ཨོཾ་ན་མ་མེ་ཧཱུྃ། ཨོཾ་ན་མོ་ན་མ་ཧཱུྃ། ལན་བཞི་བརྗོད་དོ། །གཉིས་པ་ནང་འཇུག་ལ་བཞི་ལས། དང་པོ་ཡེ་ཤེས་པ་དབབ་པ་ནི། དེ་ནས་དབང་གི་གཞི་འགོད་ཅིང་ཡེ་ཤེས་ལྷའི་གཟི་བྱིན་དབབ་པའི་སླད་དུ་སློབ་དཔོན་དང་དཀྱིལ་འཁོར་གྱི་བདག་པོ་གཉིས་སུ་མེད་པའི་སྲས་སུ་བྱ་བའི་ཕྱིར། ཁྱེད་རང་རྣམས་ལུས་གནད་དྲང་པོར་བསྲང༌། ངག་གི་རླུང་ཁ་སྦྱོར་དུ་འཆིང༌། ཡིད་རྣམ་པར་མི་རྟོག་པའི་ངང་ནས་དམིགས་པ་འདི་བཞིན་དུ་མཛོད། ཁྱེད་རང་རྣམས་སླར་ཡང་གཙོ་བོའི་མདུན་ཐད་ཤར་སྒོའི་དབང་སྟེགས་ལ་འཁོད་པས་དཀྱིལ་འཁོར་གྱི་བདག་པོའི་ཐུགས་ཀ་ནས་འོད་ཟེར་བྱུང༌། སློབ་མའི་རྣམ་སྨིན་གྱི་ཕུང་པོ་སྦྱངས། རྣམ་པར་ཤེས་པ་ཧཱུྃ་དུ་གྱུར་པ་ཡབ་ཀྱི་ཞལ་དུ་དྲངས། རྗེས་སུ་ཆགས་པའི་ཡེ་ཤེས་ཀྱིས་བསྐུལ་ཏེ་ཡུམ་གྱི་པདྨོར་ལྷུང༌། སྲས་ཀྱི་ཚུལ་དུ་གཙོ་བོའི་རྣམ་པ་གཉིས་པ་ཞིག་བྱུང་བ་སྔར་གྱི་དབང་སྟེགས་སུ་ ལུགས་འདིའི་དབང་ཆོག་ཕལ་ཆེར་དུ་སློབ་མ་ལྷར་བསྐྱེད་རྒྱས་པ་མི་འབྱུང་ཡང་གསང་བ་སྤྱིའི་འགྲོས་ལྟར་ལེགས་སྙམ་བཀོད་པ་མཁྱེན་ལྡན་རྣམས་ཀྱིས་འོས་མིན་དཔྱད་པར་ཞུ། མཆན། སེང་ཁྲི་པད་ཟླའི་གདན་ལ་འཁོད་པ། དབང་བཞིའི་སྣོད་དུ་རུང་ཕྱིར་སྣོད་རྣམ་པར་དག་པ་འོག་མིན་རྡོ་རྗེ་དབྱིངས་ཀྱི་དཀྱིལ་འཁོར་གྱི་འཁོར་ལོར་རྫོགས་པ་ལ། བཅུད་རྣམ་པར་དག་པ་ཁྱེད་རང་གི་ཐ་མལ་གྱི་ཕུང་ཁམས་སྐྱེ་མཆེད་སྐད་ཅིག་གིས་རང་བཞིན་གཞིའི་ཀུན་ཏུ་བཟང་པོ་མཐིང་ག་ཡབ་ཡུམ་མཉམ་སྦྱོར་རྡོ་རྗེའི་སྐྱིལ་ཀྲུང་མཉམ་གཞག་གིས་མཚན་པའི་ཐུགས་ཡེ་ཤེས་ཆེན་པོའི་ཀློང་དུ་ཞི་བ་བཞི་བཅུ་རྩ་གཉིས། དེ་དག་གི་སྐུའི་གསལ་སྣང་ལས་སྤྱི་བོའི་དུང་ཁང་དུ་ཡེ་ཤེས་བསྐལ་པའི་མེ་དཔུང་རབ་ཏུ་འཁྲུགས་པའི་ཀློང་ན་འབར་བ་ཁྲག་འཐུང་ལྔ་བཅུ་རྩ་བརྒྱད་ཀྱི་ཚོམ་བུའི་དཀྱིལ་འཁོར་སྣང་ལ་རང་བཞིན་མེད་པ་མེ་ལོང་གི་གཟུགས་བརྙན་ལྟར་གསལ་བའི་གནས་གསུམ་དུ་ཕྱག་མཚན་གསུམ་དང༌། ཡི་གེ་གསུམ་གྱིས་མཚན་པ་ལས་འོད་ཟེར་འཕྲོས་པས་རྒྱུད་རྣམ་པར་དག་པ་ཡེ་ཤེས་ལྷའི་གཟི་བྱིན་དབབ་པའི་སླད་དུ་ཕྱོགས་བཅུ་དུས་བཞིའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བཅོམ་ལྡན་འདས་ཞི་ཁྲོ་རབ་འབྱམས་ཀྱི་དཀྱིལ་འཁོར་ལྷའི་སྐུ་ཕྱག་རྒྱ་གསུང་ཡིག་འབྲུ་ཐུགས་ཕྱག་མཚན་གྱི་རྣམ་པར་བྱོན་ནས་རང་ཉིད་དམ་ཚིག་སེམས་དཔར་གསལ་བ་ལ་ཡེ་ཤེས་ཀྱི་འཁོར་ལོ་བྱེ་ཚན་ལ་ཁ་བ་བབ་པ་ལྟར་སྙིང་ནང་དུ་སིབ་སིབ་ཐིམ་པར་བསམ་ལ། བདུད་རྩི་ལྔས་སྦགས་པའི་གཞོན་ནུ་མའི་རཀྟ། ཤ་ཆེན། གུ་གུལ། བྱི་ལ་ནག་པོའི་བྲུན། ཀླད་ཆེན། རའི་ཉྭ་བཞིའི་ཤ། རང་གི་སྐྲ་རྣམས་ཐོད་པའི་སྣོད་དུ་སོལ་ཆེན་གྱི་མེ་ལ་བསྲེགས་པའི་འབེབས་རྫས་བདུག །ཐོད་རྔ་དང་དྲིལ་བུ་མྱུར་དལ་སྤེལ་བ་སོགས་རོལ་མོའི་སྒྲ་དང་དབྱངས་ཀྱིས་བསྐུལ་ཏེ། ཧཱུྃ། འཕགས་མཆོག་ཐུགས་རྗེས་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་རློབས་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། ཨོཾ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿཧཱུྃ། །ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ། ཛྙཱ་ན་ཨ་བེ་ཤ་ཡ་ཨ་བེ་ཤ་ཡ། སྟྭམྦྷ་ཡ་སྟྭམྦྷ་ཡ། ར་ར་ར་ར། ཙ་ལ་ཡ་ཙ་ལ་ཡ། ཧཱུྃ་ཨ་ཧ་ཛྷཻཾ། ཞེས་དྲག་ཏུ་བཟླས་ལ་དབབ་པས། ལུས་ངག་ཡིད་ལ་ཕེབས་པའི་རྟགས། །འདར་ཞིང་འཕར་གཡོ་སཾ་སྐྲྀ་ཏའི། །བརྡ་སྐད་གླུ་ལེན་ངུ་བ་དང༌། །བདེ་གསལ་མི་རྟོག་ལྷག་པའི་ལྟས། །ཞེས་གསུངས། དེས་མ་ཕེབས་ན་སྤོག་པའི་ཆོ་ག་ནི། ཁྱེད་རང་རྣམས་ལུས་རྡོ་རྗེ་རྩེ་གསུམ་པའི་འདུག་སྟངས་ཀྱིས་རླུང་ལྟེ་བར་བསྐྱིལ་ལ་སླར་ཡང་དམིགས་པ་འདི་ལྟར་བསྒོམ། རང་གི་སྙིང་གར་ཟླ་བའི་དཀྱིལ་འཁོར་ལ་གནས་པའི་གཡུང་དྲུང་དམར་པོའི་ལྟེ་བར་བྃ་དང༌། ཡན་ལག་བཞི་ལ་ཧ་རི་ནི་ས་ལས་མཁའ་འགྲོ་སྡེ་ལྔར་གསལ་བ་ཆི་ལི་ལི་འཁོར་བ་ལ་ཤེས་པ་དྲག་ཏུ་གཏོད་ལ་དབྱིངས་རིག་དབྱེར་མེད་ཀྱི་ངང་དུ་མཉམ་པར་ཞོག་ཅིག །ཧཱུྃ་ཨ་རལླི་ཕཻཾ་གྱི་གླུ་དང་ལྟ་བས་གཅུན། ཕེབས་རྟགས་བྱུང་ན་རྩོལ་མེད་དུ་བསྐྱང་དུ་གཞུག །དེ་ནི་དབང་དོན་རྒྱུད་ལ་འཇོག་པའི་རྟེན་འབྲེལ་གྱི་རྩ་བ་ལྟ་བུ་ཡིན་པས་ནན་ཏན་དུ་གཅེས་པར་གསུངས། བྱིན་དབབ་པའི་ཡེ་ཤེས་པ་རྣམས་རྡོ་རྗེའི་ཆོས་བདུན་གྱི་རྣམ་རོལ་དུ་བརྟན་པར་གྱུར་ཅིག །ཏིཥྛ་བཛྲས་སྤྱི་བོར་རྡོ་རྗེ་རྒྱ་གྲམ་དུ་བཞག །གཉིས་པ་མེ་ཏོག་འདོར་བ་ནི། མེ་ཏོག་འདོར་རའི་དཀྱིལ་འཁོར་འདུ་བྱས་ལ། ཁྱེད་རྣམས་ལ་སྔར་བྱིན་པའི་མེ་ཏོག་དེ་ཉིད་རིགས་ལྔ་ལ་གཙོ་འཁོར་རང་རྒྱུད་པའི་བཟང་ངན་གྱི་དབྱེ་བསལ་མ་མཆིས་ནའང་རང་དང་ལས་ཀྱི་འབྲེལ་པ་གང་ལ་ཡོད་པའི་ལྷག་པའི་ལྷ་མཆོག་དེས་བདག་གི་རིགས་ཀྱི་མེ་ཏོག་འདི་བཞེས་སུ་གསོལ་སྙམ་པས་འདིའི་རྗེས་ཟློས་དང་ལྷན་ཅིག་འདོར་བར་ཞུ། ཀྱཻ། བདེ་གཤེགས་རིགས་ལྔའི་ཕོ་བྲང་འདིར། །འབྲེལ་བའི་མེ་ཏོག་འདི་དོར་བས། །ལས་འཕྲོ་གང་ཡོད་ལྷ་དང་མཇལ་བར་ཤོག །ཨོཾ་པུཥྤེ་སིདྡྷི་ཧཱུྃ། ཞེས་དོར་བས་གང་ལ་བབ་པའི་རིགས་ངོས་བཟུང༌། ཕྱི་རོལ་དུ་ལྷུང་ན་སླར་ཡང་བསྐྱར་ཏེ་བརྟགས་པར་གསུངས། དེ་ལྟར་དོར་བའི་མེ་ཏོག་དབུས་སུ་བབ་ན་བདེ་བར་གཤེགས་པའི་རིགས་ཀྱི་གཙོ་བོ་རྣམ་སྣང༌། ཤར་དུ་རྡོ་རྗེ་མི་བསྐྱོད་པ། ལྷོ་རུ་རིན་ཆེན་འབྱུང་ལྡན། ནུབ་ཏུ་པདྨ་སྣང་མཐའ། བྱང་དུ་ལས་ཀྱི་རིགས་དོན་ཡོད་གྲུབ་པའི་རིགས་ཡིན་པས་གང་ལ་བབ་པ་ཉིད་ལྷག་པའི་ལྷར་ཟུངས་ཤིག །ཐོག་མར་དཔལ་དང༌། ཐ་མར་རྡོ་རྗེ་ཡོད་པའི་རིགས་དང་མཐུན་པའི་གསང་མཚན་སོ་སོའམ། གཙོ་བོའི་མཚན་ལས་བྱུང་བའི་སྤྱི་ལ་གདགས། མེ་ཏོག་གང་ལ་ཕོག་པའི་ལྷ་དེ་སློབ་མ་ལ་གཏད་པའི་དོན་དུ་མེ་ཏོག་གི་ཕྲེང་བ་དབང་རྟགས་ཅོད་པན་གྱི་ཚུལ་དུ་སྤྱི་བོར་བཅིངས་བས་བདེ་སྟོང་གི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པར་མོས་མཛོད། པྲ་ཏཱི་གྷྲཱི་ཧ་ན་ཨི་མཾ་སཏྭ་མ་ཧཱ་བ་ལ། གསུམ་པ་མིག་དབྱེ་བ་ནི། རིགས་ཀྱི་བུ་མཚོན་པ་བརྡའི་སྒོ་ནས་མིག་དབྱེ་བས་མ་རིག་པའི་ལིང་ཏོག་བསལ་ཏེ་དག་པ་ཡེ་ཤེས་ཀྱི་སྤྱན་གསར་དུ་ཐོབ་པས་ཡེ་ཤེས་རང་སྣང་གི་ལྷ་དང་དཀྱིལ་འཁོར་མངོན་སུམ་དུ་མཇལ་བའི་མོས་པ་མཛོད། སྟོན་པ་རིགས་ལྔའི་སངས་རྒྱས་ཀྱིས། །ཁྱེད་ཀྱི་མ་རིག་འཁོར་བའི་མིག །ཡེ་ཤེས་སྤྱན་དུ་དབྱེ་བ་ལྟར། །དེ་བཞིན་ཁྱེད་ཀྱིས་འགྲོ་བ་རྣམས། །ཡེ་ཤེས་སྤྱན་དུ་འབྱེད་པར་ཤོག །ཙཀྵུ་པྲ་ཝེ་ཤ་ཡ་ཕཊ། ཞེས་གདོང་གཡོགས་བསལ། བཞི་པ་དཀྱིལ་འཁོར་བསྟན་པ་ནི། ཕྱག་ཤིང་གིས་མཚོན་ལ། དེ་ལྟར་རྣམ་དག་ཡེ་ཤེས་ཀྱི་སྤྱན་གསར་དུ་ཐོབ་པ་ལ་དཀྱིལ་འཁོར་བསྟན་ཅིང་སྤྲོ་བ་བསྐྱེད་པ་ལགས་ཏེ། ཨེ་མ་སྐལ་ལྡན་རིགས་ཀྱི་བུ། །ཁྱེད་ནི་སྡིག་པ་ཀུན་ལས་གྲོལ། །དཀྱིལ་འཁོར་ཆེན་པོ་འདི་ལ་ལྟོས། །ལུས་ངག་ཡིད་ཀྱིས་དད་པ་བསྐྱེད། །དངོས་གྲུབ་མཐའ་དག་ཁྱེད་ཀྱིས་ཐོབ། །དམ་ཚིག་སྔགས་ལ་བརྩོན་པར་གྱིས། །ཀྱེ་རིགས་ཀྱི་བུ་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ལ་སོགས་པའི་སངས་རྒྱས་ཀྱི་སྐུ་དང་ཡེ་ཤེས། བརྡ་དོན་རྟགས་ཀྱིས་མཚོན་པའི་མཚོན་བྱེད་དཔེ་ཡི་དཀྱིལ་འཁོར་ཕྱི་ལྟར་རྡུལ་ཚོན་ནམ། རས་བྲིས་འདི་ནི་འབྱུང་བ་རིམ་ལྔ་བརྩེགས་པའི་སྟེང་དུ་འོག་མིན་ལྷུན་གྱིས་གྲུབ་པའི་གཞལ་མེད་ཁང་ཤིན་ཏུ་ཉམས་དགའ་བ། ཕྱི་མཆོད་རྟེན་གྱི་རང་བཞིན་རྩེ་ལྔ་པ་ནང་རང་བྱུང་རྡོ་རྗེའི་གཞལ་ཡས་ཁང་ཕྱི་གསལ་ནང་གསལ། རྒྱ་ཁྱོན་དང་བཀོད་པ་བསམ་གྱིས་མི་ཁྱབ་པའི་མཐའ་བསྐོར་དུ་མཆོད་རྟེན་ཤིང་མེ་ཆུ་སྤྲིན་གྲུབ་པའི་རིག་འཛིན་ཞིང་སྐྱོང་གི་མཁའ་འགྲོ་མ་ལ་སོགས་པ་རྣམ་པ་བརྒྱད་ཀྱིས་མཚན་པའི་དུར་ཁྲོད་བརྒྱད། མཐའ་བསྐོར་དུ་རྡོ་རྗེའི་རྭ་བ་ཡེ་ཤེས་ཀྱི་མེ་དཔུང༌། དབུས་སུ་དག་ཆེན་ཡེ་ཤེས་ཀྱི་རོལ་པ་ཐར་པ་ཆེན་པོའི་གཞལ་མེད་ཁང་གྲུ་བཞི་སྒོ་བཞི་གློ་འབུར་དང་བཅས་པ། རྒྱུ་འབྲས་ཀྱི་རྟ་བབ་བརྒྱད་དང་ལྡན་ཞིང༌། གཞལ་ཡས་ཁང་གི་དབུས་སུ་འཁོར་ལོ་རྩིབས་བཞི་པའི་ལྟེ་བར་པདྨ་འདབ་བཞི། འདབ་བརྒྱད། བཅུ་དྲུག །སུམ་ཅུ་རྩ་གཉིས། བཞི་བཅུ་རྣམས་ཀྱི་དབུས་སུ་སེང་གེའི་ཁྲི་དང་པད་ཟླ་ཉི་མའི་གདན་ལ་དཀྱིལ་འཁོར་འཁོར་ལོའི་དབང་ཕྱུག་བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་མཐིང་ག་མཐིང་དཀར་དམར་བའི་ཞལ་གསུམ། ཕྱག་དྲུག་གིས་རྡོ་རྗེ་འཁོར་ལོ། རིན་པོ་ཆེ། དྲིལ་བུ། པདྨ། རལ་གྲི་འཛིན་པ། ཡུམ་དབྱིངས་ཕྱུག་མ་གཡས་དྲིལ་བུ་དང་གཡོན་རྡོ་རྗེ་ཐུགས་ཀར་འཛིན་པ་དང་སྦྱོར་བ། དེའི་ཕྱི་རོལ་གྱི་རྩིབས་བཞི་ལ་མི་བསྐྱོད་པ་དང༌། རྡོ་རྗེ་དབྱིངས་ཀྱི་དབང་ཕྱུག་མ་སྔོན་མོ། ཀུན་ཏུ་བཟང་པོ་དང་བཟང་མོ་མཐིང་ག །དེའི་ཕྱི་རོལ་གྱི་པད་འདབ་བརྒྱད་ལ་རྣམ་སྣང་དང་སྤྱན་མ་དཀར་མོ། རིན་འབྱུང་དང་མཱ་ཀི་སེར་མོ། སྣང་མཐའ་དང་གོས་དཀར་དམར་མོ། དོན་གྲུབ་དང་སྒྲོལ་མ་ལྗང་གུ་རྣམས་རང་རྟགས་ཀྱི་ཁྲི་ལྔ་བརྩེགས་པ་དང་རིགས་ཀྱི་ཕྱག་མཚན་ཅན། དེའི་ཕྱི་རོལ་པད་འདབ་བཅུ་དྲུག་ལ་སེམས་དཔའ་བརྒྱད་དང་སེམས་མ་བརྒྱད། དེའི་ཕྱི་རོལ་འདབ་མ་སོ་གཉིས་ལ་སྒོ་བ་ཁྲོ་བོ་ཡབ་ཡུམ། ཐུབ་པ་དྲུག །ཆེ་མཆོག་རིགས་ལྔ་ཡབ་ཡུམ། གནས་ཀྱི་མ་མོ་བརྒྱད། དེའི་ཕྱི་རོལ་གྱི་པད་འདབ་བཞི་བཅུ་ལ་ཡུལ་གྱི་མ་མོ་བརྒྱད། གདོང་ཅན་བཞི། དབང་ཕྱུག་མ་ཉི་ཤུ་རྩ་བརྒྱད་དེ་ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་རང་རིགས་ཀྱི་སྐུ་མདོག་ཕྱག་མཚན་རྒྱན་ཆ་ལུགས་རྣམ་འགྱུར་མ་འདྲེས་པ་ཡོངས་སུ་རྫོགས་པ། བར་མཚམས་རྣམས་སུ་རྩ་གསུམ་ཆོས་སྲུང་རྒྱ་མཚོའི་ཚོགས་རྣམས་ཉི་མ་དང་འོད་ཟེར་གྱི་ཚུལ་དུ་སྒྱུ་འཕྲུལ་དྲྭ་བའི་ཡེ་ཤེས་ཀྱི་རོལ་པ་ཚད་མེད་པར་བཞུགས་པར་ཡང་མཚོན་བྱ་ཡེ་ཤེས་ཀྱི་དཀྱིལ་འཁོར། ནང་དུ་ཕུང་པོ་ཁམས་དང་སྐྱེ་མཆེད་ལས་དབང་དང་བཅས་པ་གདོད་ནས་དག་པའི་གདན་གསུམ་རྡོ་རྗེའི་གྲོང་ཁྱེར་དུ་ལྷུན་གྱིས་གྲུབ་པར་རང་ལ་ཡེ་ནས་རང་བྱུང་དུ་བཞུགས་པ་མཚོན་ལ། བཞུགས་ཚུལ་དོན་གྱི་དཀྱིལ་འཁོར་རང་གི་སེམས་རྣམ་ཤེས་ཚོགས་བརྒྱད་སེམས་བྱུང་དང་བཅས་པ་དམ་པ་རིགས་བརྒྱའི་ལྷ་ཚོགས་སུ་བཞུགས་པའི་གནས་ལུགས་མཐར་ཐུག་པ་འདི་ངོ་སྤྲད་པས། ཡིན་ཚུལ་གཤིས་ཀྱི་དཀྱིལ་འཁོར་ཕྱི་ནང་གསང་བ་གཉིས་མེད་རང་བྱུང་གདོད་མའི་གནས་ལུགས་དབྱིངས་རིག་ཟུང་འཇུག་ནང་གསལ་ཐིམ་ལ་མ་རྨུགས་པ་དོན་དམ་དཀོར་བདུན་གྱི་བདག་ཉིད་དུ་ལ་ཟླ་དགོས་པས། རྣམ་པ་དབང་བཞིའི་རྫས་ལ་བསྐྱེད་པའི་བདེ་གཤེགས་རྒྱལ་བ་རབ་འབྱམས་ཞི་ཁྲོ་སྤྲུལ་པའི་འཁོར་ལོ་གཅིག་ཏུ་རྫོགས་པའི་རྟེན་བརྟེན་པར་བཅས་པ་མངོན་སུམ་དུ་མཇལ་བར་མོས་ལ་དད་གུས་སྤྲོ་བ་རྒྱ་ཆེན་པོ་སྐྱེད་ཅིག །དེ་དག་གིས་ལྷ་དང་སྐལ་པ་མཉམ་པའི་ཕྱིར་དུ་དཀྱིལ་འཁོར་ཕྱི་ནང་དུ་འཇུག་པའི་ཆོས་རྣམས་ལེགས་པར་གྲུབ་སྟེ་ཡེ་ཤེས་སྨིན་པའི་སྣོད་དུ་གྱུར་པ་ལ། ཞུགས་ནས་མངོན་པར་དབང་བསྐུར་ཞུ་བའི་ཡོན་དུ་མཎྜལ་ཕུལ། སྐབས་འདིར་དཔོན་སློབ་དད་སྤྲོ་བློ་གྲོས་དང་ལྡན་ན་དབང་བཞིའི་རྣམ་དབྱེ། ངོ་བོ། ངེས་ཚིག །དགོས་པ་སོགས་རྒྱས་བསྡུས་སྐབས་ཕྱེད་པར་འཆད་ན་ལེགས་ཤིང༌། འདིར་སྤྱི་ལྟར། དབང་དངོས་ཞུ་བའི་ཕྱིར་གསོལ་བ་འདེབས་པ་འདིའི་རྗེས་ཟློས་མཛོད། ནམ་མཁའི་རྡོ་རྗེས་རྒྱལ་བ་ལྔར། །དགོངས་ཤིང་ཇི་ལྟར་དབང་བསྐུར་ལྟར། །མཆོད་པ་ཆེན་པོ་བརྡ་ཡི་དབང༌། །རིག་པ་འཛིན་པ་བདག་ལ་སྩོལ། །ལན་གསུམ། དེ་ལྟར་གསོལ་བ་བཏབ་པ་ལ་བུམ་གསང་ཤེས་རབ་ཡེ་ཤེས་བཞི་པ་དང་འབྲེལ་བའི་ཕན་ནུས་ཟབ་མོའི་དབང་རྣམས་རིམ་པར་བསྐུར་བའི་དང་པོ་བུམ་པའི་དབང་ལ་ཕྱི་ཕན་པ་དང་ནང་ནུས་པ་འཇུག་པའི་དབང་གཉིས་ལས། དང་པོ་ཕྱི་ཕན་པ་རྡོ་རྗེ་སློབ་མའི་དབང་ལ་རིག་པའི་དབང་ལྔ་རིམ་པར་བསྐུར་བའི་སླད་དུ་དམིགས་པ་འདི་ལྟར་མཛོད། བདག་མདུན་གྱི་ཐུགས་ཀ་ནས་འཕྲོས་པའི་འོད་ཟེར་གྱིས་ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་གདན་གསུམ་ཚང་བའི་དཀྱིལ་འཁོར་གྱི་འཁོར་ལོའི་རྣམ་པར་སྤྱན་དྲངས། བཛྲ་ས་མཱ་ཛཿ ཐུགས་ཀ་ནས་སྤྲུལ་པའི་ལྷ་མོ་རྣམས་ཀྱིས་མཆོད་ཅིང་བསྟོད་པར་གྱུར། ཨོཾ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། དེས་འགྲེས་ཏེ། པདྱཾ་ནས། ཤབྡའི་བར་བརྗོད། ཕུང་ཁམས་དག་པ་གཤེགས་པ་གཤེགས་མའི་གདན༔ དབང་ཤེས་དག་པ་སེམས་དཔའ་སེམས་མ་སྟེ༔ ལས་ཀྱི་བདག་པོ་ཁྲོ་བོ་ཁྲོ་མོའི་ཚོགས༔ གདན་གསུམ་ཡོངས་རྫོགས་ལྷ་ལ་ཕྱག་འཚལ་བསྟོད༔ གསོལ་བ་གདབ་པ་ནི། རྡོ་རྗེ་ཅན་གྱི་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང༌། །ཡོན་ཏན་འབྱུང་གནས་ཇི་ལྟར་བསྩལ། །དེ་ལྟར་འདི་ལའང་བསྩལ་དུ་གསོལ། །ཞེས་གསོལ་བ་བཏབ་པས་དེ་བཞིན་གཤེགས་པ་རྣམས་ཀྱིས་དགོངས་པ་མཛད། གཤེགས་མ་རྣམས་ཀྱིས་དབང་བསྐུར། སེམས་དཔའ་རྣམས་ཀྱིས་ཤིས་པ་བརྗོད། སེམས་མ་རྣམས་ཀྱིས་གླུ་གར་བསྒྱུར། ཁྲོ་བོ་རྣམས་ཀྱིས་བགེགས་བསྐྲད་དེ། ཀུན་ཀྱང་དབང་གི་བྱ་བ་ལ་དགྱེས་པར་གྱུར། སློབ་བུ་སེང་ཁྲི་པད་ཉི་ཟླ་བའི་གདན་ལ་སྐད་ཅིག་གིས་རྡོ་རྗེ་མི་བསྐྱོད་པར་གནས་གྱུར་པ་ལ་རིག་པའི་ལྷ་མོ་རྣམས་དང་སློབ་དཔོན་ལྷན་ཅིག་པས་རྣམ་རྒྱལ་བུམ་པའི་ཆུ་མི་བསྐྱོད་པའི་བདག་ཉིད་ཅན་གྱིས་དབང་བསྐུར་བར་མོས་ཤིག །རྣམ་བུམ་ཐོགས་ལ། ཧཱུྃ། རྣམ་ཤེས་ཕུང་པོ་རྣམ་དག་ཅིང༌། །ཉོན་མོངས་ཞེ་སྡང་སྦྱོང་བྱེད་པའི། །ཆོས་ཀྱི་དབྱིངས་ཀྱི་ཡེ་ཤེས་ཀྱི། །དཔལ་ལྡན་ཐུགས་ཀྱི་དབང་བསྐུར་རོ། །ཨོཾ་བཛྲ་ཨ་བྷི་ཥིཉྩ་ཧཱུྃ། ཞེས་དབང་བསྐུར་ཞིང་བུམ་ཆུ་སྦྱིན། རིགས་ཀྱི་བུ་ཁྱོད་ལ་མི་བསྐྱོད་པ་ཆུ་ཡི་དབང་བསྐུར་བས་ཡིད་ཀྱི་སྒྲིབ་པ་དག །སངས་རྒྱས་ཐམས་ཅད་ཀྱི་ཐུགས་ཀྱི་དབང་ཐོབ། རྣམ་པར་ཤེས་པ་རྡོ་རྗེ་མི་བསྐྱོད་པ་དང་ཆུའི་ཁམས་མཱ་མ་ཀིར་སངས་རྒྱས། ཞེ་སྡང་ཆོས་དབྱིངས་ཡེ་ཤེས་སུ་གྲོལ་ཏེ། སངས་རྒྱས་རྡོ་རྗེའི་རིགས་ཀྱི་ཐུགས་འཁྲུལ་པ་མེད་པས་འགྲོ་བའི་དོན་བྱེད་པར་འགྱུར་རོ། །སློབ་མ་རིན་ཆེན་འབྱུང་ལྡན་དུ་གསལ་བ་ལ་རིག་པའི་ལྷ་མོ་རྣམས་དང་སློབ་དཔོན་ལྷན་ཅིག་པས་རིན་འབྱུང་གི་བདག་ཉིད་ཅན་གྱི་དབུ་རྒྱན་སྤྱི་བོར་བཅིངས་ཏེ་དབང་བསྐུར་བར་མོས་ཤིག །དབུ་རྒྱན་བཅིང་ལ། ཧཱུྃ། ཚོར་བའི་ཕུང་པོ་རྣམ་དག་ཅིང༌། །ཉོན་མོངས་ང་རྒྱལ་སྦྱོང་བྱེད་པའི། །མཉམ་པ་ཉིད་ཀྱི་ཡེ་ཤེས་ཀྱི། །དཔལ་ལྡན་ཡོན་ཏན་དབང་བསྐུར་རོ། །ཨོཾ་རཏྣ་ཨ་བྷི་ཥིཉྩ་ཏྲཱྃ། རིགས་ཀྱི་བུ་ཁྱོད་ལ་རིན་འབྱུང་གི་ངོ་བོ་དབུ་རྒྱན་འདི་བསྐོན་པ་ཙམ་གྱིས་ཤེས་བྱའི་སྒྲིབ་པ་སྦྱངས། སངས་རྒྱས་ཐམས་ཅད་ཀྱི་ཡོན་ཏན་གྱི་དབང་ཐོབ། ཚོར་བའི་ཕུང་པོ་རིན་ཆེན་འབྱུང་ལྡན་དང་སའི་ཁམས་སངས་རྒྱས་སྤྱན་དུ་དག །ང་རྒྱལ་མཉམ་པ་ཉིད་ཀྱི་ཡེ་ཤེས་སུ་གྲོལ་ཏེ། སངས་རྒྱས་རིན་ཆེན་རིགས་ཀྱི་ཡོན་ཏན་ཐམས་ཅད་མཁྱེན་ནས་འགྲོ་བའི་དོན་བྱེད་པར་འགྱུར་རོ། །སློབ་མ་སྣང་བ་མཐའ་ཡས་སུ་གསལ་བ་ལ་རིག་པའི་ལྷ་མོ་རྣམས་དང་སློབ་དཔོན་ལྷན་ཅིག་པས་སྣང་བ་མཐའ་ཡས་ཀྱི་ངོ་བོ་རྡོ་རྗེ་ཕྱག་གཡས་སུ་གཏད་དེ་དབང་བསྐུར་བར་མོས་ཤིག །རྡོ་རྗེས་དབང་བསྐུར་ལ། ཧཱུྃ། འདུ་ཤེས་ཕུང་པོ་རྣམ་དག་ཅིང༌། །ཉོན་མོངས་འདོད་ཆགས་སྦྱོང་བྱེད་པའི། །སོ་སོར་རྟོགས་པའི་ཡེ་ཤེས་ཀྱི། །དཔལ་ལྡན་གསུང་གི་དབང་བསྐུར་རོ། །ཨོཾ་པདྨ་ཨ་བྷི་ཥིཉྩ་ཧྲཱིཿ རིགས་ཀྱི་བུ་ཁྱོད་ལ་རྡོ་རྗེས་དབང་བསྐུར་བས་ངག་གི་སྒྲིབ་པ་ཐམས་ཅད་དག །སངས་རྒྱས་ཐམས་ཅད་ཀྱི་གསུང་གི་དབང་ཐོབ། འདུ་ཤེས་ཀྱི་ཕུང་པོ་སྣང་བ་མཐའ་ཡས་དང་མེའི་ཁམས་གོས་དཀར་མོར་སངས་རྒྱས། འདོད་ཆགས་སོ་སོར་རྟོགས་པའི་ཡེ་ཤེས་སུ་གྲོལ་ཏེ། སངས་རྒྱས་པདྨའི་རིགས་ཀྱི་གསུང་འགག་པ་མེད་པའི་ཆོས་ཀྱི་སྒྲ་དབྱངས་ཀྱིས་འགྲོ་བའི་དོན་བྱེད་པར་འགྱུར་རོ། །སློབ་མ་དོན་ཡོད་གྲུབ་པར་གསལ་བ་ལ་རིག་པའི་ལྷ་མོ་རྣམས་དང་སློབ་དཔོན་ལྷན་ཅིག་པས་དོན་ཡོད་གྲུབ་པའི་ངོ་བོ་དྲིལ་བུ་ཐོགས་ཏེ་དབང་བསྐུར་བར་མོས་ཤིག །དྲིལ་བུ་ལག་གཡོན་དུ་གཏད་ལ། ཧཱུྃ། འདུ་བྱེད་ཕུང་པོ་རྣམ་དག་ཅིང༌། །ཉོན་མོངས་ཕྲག་དོག་སྦྱོང་བྱེད་པའི། །བྱ་བ་གྲུབ་པའི་ཡེ་ཤེས་ཀྱི། །དཔལ་ལྡན་ཕྲིན་ལས་དབང་བསྐུར་རོ། །ཨོཾ་ཀརྨ་ཨ་བྷི་ཥིཉྩ་ཨཱཿ རིགས་ཀྱི་བུ་ཁྱོད་ལ་དྲིལ་བུ་འདི་གཏད་པ་ཙམ་གྱིས་ཀུན་གཞིའི་སྒྲིབ་པ་དག །སངས་རྒྱས་ཐམས་ཅད་ཀྱི་ཕྲིན་ལས་ཀྱི་དབང་ཐོབ། འདུ་བྱེད་ཀྱི་ཕུང་པོ་དོན་ཡོད་གྲུབ་པ་དང་རླུང་གི་ཁམས་དམ་ཚིག་སྒྲོལ་མར་སངས་རྒྱས། ཕྲག་དོག་བྱ་བ་གྲུབ་པའི་ཡེ་ཤེས་སུ་གྲོལ་ཏེ། ལས་ཀྱི་རིགས་ཀྱི་ཕྲིན་ལས་ཐོགས་པ་མེད་པར་གྲུབ་ནས་འགྲོ་བའི་དོན་བྱེད་པར་འགྱུར་རོ། །སློབ་མ་རྣམ་སྣང་དུ་གསལ་བ་ལ་རིག་པའི་ལྷ་མོ་རྣམས་དང་སློབ་དཔོན་ལྷན་ཅིག་པས་རྣམ་སྣང་གི་ངོ་བོ་རྡོ་རྗེའི་མིང་གི་དབང་བསྐུར་བར་མོས་ཤིག །རྡོར་དྲིལ་ལྷན་ཅིག་སྤྱི་བོར་དཀྲོལ་ལ། ཧཱུྃ། གཟུགས་ཀྱི་ཕུང་པོ་རྣམ་དག་ཅིང༌། །ཉོན་མོངས་གཏི་མུག་སྦྱོང་བྱེད་པའི། །མེ་ལོང་ལྟ་བུའི་ཡེ་ཤེས་ཀྱི། །དཔལ་ལྡན་སྐུ་ཡི་དབང་བསྐུར་རོ། །ཨོཾ་བུདྡྷ་ཆེ་གེ་མོ་ཨ་བྷི་ཥིཉྩ་མི། མིང་དབང་དངོས་མེ་ཏོག་དོར་བའི་སྐབས་གདགས་ཟིན་ཡང་སྦྱང་གཞི་སྦྱོང་བྱེད་ངོ་སྤྲོད་བདེ་བ་དང་དཀྱིལ་འཁོར་དུ་ཞུགས་ཟིན་ཡང་དབང་བསྐུར་བའི་ངེས་པ་སྟོན་པའི་དགོས་པས་འདིར་ཡང་འབྱུང་བར་གསུངས། མཆན། རིགས་ཀྱི་བུ་ཁྱོད་ལ་རྣམ་པར་སྣང་མཛད་མིང་གི་དབང་བསྐུར་བས་ལུས་ཀྱི་སྒྲིབ་པ་དག་ནས། སངས་རྒྱས་ཐམས་ཅད་ཀྱི་སྐུའི་དབང་ཐོབ། གཟུགས་ཀྱི་ཕུང་པོ་རྣམ་པར་སྣང་མཛད་དང་ནམ་མཁའི་ཁམས་དབྱིངས་ཕྱུག་མར་སངས་རྒྱས། གཏི་མུག་མེ་ལོང་ཡེ་ཤེས་སུ་གྲོལ་ཏེ། དེ་བཞིན་གཤེགས་པའི་རིགས་ཀྱི་སྐུ་འགྱུར་བ་མེད་པ་ཐོབ་ནས་འགྲོ་བའི་དོན་བྱེད་པར་འགྱུར་རོ། །དེ་དག་གིས་མ་རིག་པ་ལྔ་སྦྱངས་ནས་རིག་པ་ཡེ་ཤེས་ལྔ་ཐོབ་པར་བྱེད་པ་ཡིན་པས་སམ། རིག་མ་སྤྱན་ལ་སོགས་པའི་ཐབས་རིག་པ་ཡབ་ལྔའི་ལས་ཡིན་པས་དང༌། རྒྱུད་སྡེ་བཞི་ཐུན་མོང་དུ་གྱུར་པའི་དབང་ཡིན་པའི་ཕྱིར་ཐུན་མོང་རིག་པའི་དབང་ལྔ་ཞེས་གྲགས་པ་སྟེ་དབང་རྫས་ལྔ་གནས་རྣམས་སུ་གཏུགས་པ་ནི་དབང་གི་རྒྱུ་ཡིན་ལ། སློབ་དཔོན་གྱི་དམིགས་པ་དང་སློབ་མའི་མོས་པས་དངོས་གྲུབ་སྒྲུབ་པའི་ནུས་པ་རྒྱུད་ལ་བཞག་པ་ནི་དབང་གི་ངོ་བོ་གསང་སྔགས་ལམ་གྱི་ཕྱི་ནང་གི་རྟེན་འབྲེལ་ཐམས་ཅད་དབང་གི་སྒོ་ནས་བསྒྲིགས་པ་སྟེ། ཡེ་ཤེས་ཐིག་ལེ་ལས། ཆུ་ཡི་དབང་བསྐུར་དབུ་རྒྱན་དག །བྱ་བའི་རྒྱུད་ལ་རབ་ཏུ་གྲགས། །རྡོ་རྗེ་དྲིལ་བུ་དེ་བཞིན་མིང༌། །སྤྱོད་པའི་རྒྱུད་ལ་རབ་ཏུ་གསལ། །ཕྱིར་མི་ལྡོག་པ་ཡི་ནི་དབང༌། །རྣལ་འབྱོར་རྒྱུད་ལ་གསལ་བར་བྱས། །ཞེས་པ་ལྟར་གསང་སྔགས་ཕྱི་པའི་དབང་ཡང་བླ་མེད་ཀྱི་སྤྲོས་བཅས་བུམ་དབང་གི་ཞར་བྱུང་དུ་རྫོགས་པས་འདི་ཁོ་ན་ཙམ་གྱིས་ཀྱང་ཕྱི་དཀྱིལ་དུ་དྲང་དོན་གྱི་བསྐྱེད་རིམ་རྣམས་ཉན་དུ་རུང་བའོ། །གཉིས་པ་ནང་ནུས་པ་འཇུག་པའི་དབང་ལ་སྤྱི་དང་བྱེ་བྲག་ཁྱད་པར་གསུམ་ལས། དང་པོ་ཆོས་ཅན་ཕུང་ཁམས་ལྔའི་སྣང་བ་ཐམས་ཅད་ལྷར་བྱིན་གྱིས་བརླབས་ནས། ཆོས་ཉིད་དྲུག་པ་རྡོ་རྗེ་སེམས་དཔར་ངོ་སྤྲད་དེ་སྐུ་གསུང་ཐུགས་བྱིན་གྱིས་རློབ་པར་བྱེད་པ་བརྟུལ་ཞུགས་ཀྱི་དབང་ངམ་ཕྱིར་མི་ལྡོག་པ་རྡོ་རྗེ་སློབ་དཔོན་བདག་པོ་ཆེན་པོར་དབང་བསྐུར་ཞིང་དབུགས་དབྱུང་བ་ལ་དམིགས་པ་འདི་ལྟར་མཛོད། ཁྱེད་རང་རྣམས་སྐད་ཅིག་གིས་དཀྱིལ་འཁོར་འཁོར་ལོའི་དབང་ཕྱུག་སངས་རྒྱས་ཀུན་གྱི་སྤྱི་མེས་བཅོམ་ལྡན་འདས་དཔལ་ཀུན་ཏུ་བཟང་པོ་ཡབ་ཡུམ་དུ་གསལ་བ་ལ། ཐབས་བདེ་བ་ཆེན་པོ་རྡོ་རྗེ་ཐུགས་ཀྱི་དམ་ཚིག་ལག་གཡས་སུ་གཏད་དེ་གསོར་བ་དང༌། ཤེས་རབ་སྟོང་པ་ཉིད་ཀྱི་དྲིལ་བུ་གསུང་གི་དམ་ཚིག་ལག་གཡོན་དུ་གཏད་དེ་འཁྲོལ་བ་དང༌། བདེ་སྟོང་ཟུང་འཇུག་ཕྱག་རྒྱ་སྐུའི་དམ་ཚིག་འཁྱུད་རྒྱ་བྱས་ལ། ཨོཾ་ཨཱཿཧཱུྃ། ཐབས་དང་ཤེས་རབ་གཉིས་མེད་ཅིང༌། །སྣང་སྟོང་དབྱེར་མེད་འདི་བཟུང་ནས། །སྟོང་ཉིད་སྙིང་རྗེའི་སྙིང་པོ་ཡི། །ཀུན་བཟང་རྡོ་རྗེ་འཛིན་ཁྱོད་ཀྱིས། །འགྲོ་ཀུན་རྗེས་སུ་བཟུང་བར་མཛོད། །རིགས་ཀྱི་བུ་ཁྱོད་ལ་གསང་སྔགས་ཀྱི་ཕྱག་རྒྱའི་དམ་ཚིག་གི་ནང་ནས་མཆོག་ཏུ་གྱུར་པ་རྡོ་རྗེ་དང་དྲིལ་བུ་དཀྱིལ་འཁོར་ཐམས་ཅད་པའི་བདག་ཉིད་འདི་ལག་ཏུ་གཏད་པ་ཙམ་གྱིས། རྣམ་པ་ཐམས་ཅད་མཁྱེན་པའི་ས་བོན་ཐེབས། སངས་རྒྱས་ཐམས་ཅད་ཀྱི་མེས་པོ་གདོད་མའི་མགོན་པོ་ཀུན་ཏུ་བཟང་པོ་དང་གཉིས་སུ་མེད་པར་སངས་རྒྱས་ཏེ་སེམས་ཅན་ཐམས་ཅད་ཀྱི་དོན་དཔག་ཏུ་མེད་པ་བྱེད་ནུས་པར་གྱུར་ཅིག །གཉིས་པ་བྱེ་བྲག་རྗེས་སུ་གནང་བ་ལ། རྒྱལ་ཚབ་ཏུ་འོས་པའི་སློབ་བུ་ཡིན་ན། པུསྟི། དུང་དཀར། ཕྱག་ཤིང༌། འཁོར་ལོ་ལ་སོགས་པ་སྤྲད་ཅིང་ཁྲི་ལ་མངའ་གསོལ་བ་གཞན་དང་མཐུན། དེ་ལྟར་ཐུན་མོང་གི་དབང་དྲུག་གིས་རགས་པ་ཕུང་ཁམས་སྐྱེ་མཆེད་དེ་བཞིན་ཉིད་དང་བཅས་པ་བྱིན་གྱིས་བརླབས་ནས། ཕྲ་བ་དཀྱིལ་འཁོར་བཞིར་སྐུ་བཞིར་བྱིན་གྱིས་རློབ་པར་བྱེད་པ་ཐུན་མོང་མ་ཡིན་པའི་དབང་བཞིའི་དང་པོ་ཕྱིར་མི་ལྡོག་པ་འཁོར་ལོའི་དབང་གི་སླད་དུ། སླར་ཡང་དབང་གི་ལྷ་རྣམས་ཀྱིས་བཀྲ་ཤིས་པའི་རྣམ་པ་དུ་མ་དང་ལྡན་པས་རྣམ་པར་རྒྱལ་བའི་བུམ་པ་བདུད་རྩིའི་ཆུ་རྒྱུན་གྱིས་གང་བས་དབང་བསྐུར་བར་མོས་ཤིག །རྣམ་རྒྱལ་བུམ་པས་དབང་བསྐུར་ལ། ཧཱུྃ། བཀྲ་ཤིས་བུམ་པ་ལྷའི་གཞལ་ཡས། །ལྷ་དང་གཉིས་མེད་བདུད་རྩིའི་ཆུས། །སྐལ་ལྡན་བུ་ལ་དབང་བསྐུར་བས། །སྣང་ཞེན་ལྷ་སྐུའི་ཕྱག་རྒྱར་རྫོགས། །རྣམ་སྨིན་རིག་འཛིན་ཉེར་ཐོབ་ཅིང༌། །ཀུན་ཏུ་འོད་ཀྱི་ས་ནོན་ཤོག །ཞི་ཁྲོའི་རྩ་སྔགས་དང༌། ཀཱ་ཡ་ཨ་བྷི་ཥིཉྩ་ཨོཾ། རིགས་ཀྱི་བུ་ཁྱོད་ལ་ཐམས་ཅད་བརྟན་པར་བྱེད་པ་རྣམ་རྒྱལ་བུམ་པས་དབང་བསྐུར་བས། སྣོད་བཅུད་ལྷ་དང་གཞལ་ཡས། ཕུང་པོ་ཁམས་དང་སྐྱེ་མཆེད་ཀྱང་ལྷ་དང་ལྷ་མོར་གནས་དག་པ་ཡིན་པས། ཕྱི་ནང་ཐམས་ཅད་ལ་བརྙས་པར་བྱས་ན་ལྟུང་བར་འགྱུར་བ་ཡིན་པས་དག་སྣང་དང་མོས་པ་གྱིས་ཤིག །རྗེས་གནང་གི་ཆས་རྣམས་གཏད་ན་འདི་ཡང་བརྗོད་དོ། །དེ་ལྟར་དབང་བསྐུར་བས་བྱེད་ལས་སུ་གཞན་དོན་སྒྲུབ་པར་རྗེས་སུ་གནང་བའི་རྟེན་འབྲེལ་དུ་སྐྱེ་འགྲོ་ཐམས་ཅད་ཆོས་ཀྱི་མངའ་འོག་ཏུ་འདུ་བའི་བརྡར་རྐང་འོག་ཏུ་འཁོར་ལོ། ཆོས་སྒྲ་རྒྱུན་མི་འཆད་པར་སྒྲོགས་པའི་ཕྱིར་ལག་གཡས་སུ་དུང༌། བསྡུ་བ་བཞིའི་ཕྲིན་ལས་མཚོན་པའི་ཆོས་ཀྱི་རྔ་བོ་ཆེ་གཎྜིའམ་ཕྱག་ཤིང༌། དེ་ཉིད་བཅུ་ལ་སོགས་པའི་རྡོ་རྗེ་སློབ་དཔོན་གྱི་ཕྲིན་ལས་རབ་འབྱམས་སྒྲུབ་པར་བཀས་གནང་བའི་རྟགས་སུ་རྡོར་དྲིལ་དང་རྒྱུད་ཀྱི་གླེགས་བམ་རྣམས་གཏད་པར་མོས་ཤིག །རྟེན་སྙིང་བརྗོད་ལ་མེ་ཏོག་འཐོར། ཁྱད་པར་བུམ་དབང་དང་རྗེས་སུ་འབྲེལ་བར་སྐུ་ཕྱག་རྒྱའི་དབང་བསྐུར་བ་སྟེ། མདུན་བསྐྱེད་ལྷ་ཚོགས་གཙོ་འཁོར་རྣམས་ལས་ཡེ་ཤེས་ཀྱི་སྐུ་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱོན་ནས་ཁྱེད་རང་ལ་ཐིམ་པས། ཁྱེད་རང་གི་ཕུང་ཁམས་སྐྱེ་མཆེད་ཐམས་ཅད་གདན་གསུམ་ཡོངས་རྫོགས་དམ་པ་རིགས་བརྒྱའི་ཡེ་ཤེས་ལྷའི་སྐུ་དང་གཉིས་མེད་དུ་བྱིན་གྱིས་བརླབས་པའི་ནུས་པ་རྒྱུད་ལ་འཇོག་པར་མོས་ཤིག །སོ་སོའི་ཙཀླིས་དབང་བསྐུར་ཏེ། ཧཱུྃ། ཆོས་རྣམས་རྣམ་དག་ཡེ་ནས་ལྷུན་གྲུབ་ཅིང༌། །བྱ་བ་བྱེད་དང་ཡིད་ཆོས་རྣམ་པར་དག །ནམ་མཁའི་མཐའ་བཞིན་ཀུན་ལ་སྙོམས་མཛད་པ། །དབང་གི་སྤྱི་དོན་དུ་འདི་མེད། མཆན། ཀུན་བཟང་ཡབ་ཡུམ་གཉིས་ཀྱིས་དབང་བསྐུར་རོ། །ཧཱུྃ་ཧཱུྃ་ཧཱུྃ་བཛྲ་ཙིཏྟ་ཨོཾ། ཨ་ཨ་ཨ་བཛྲི་བྷ་དྲ་ས་མནྟ་ཨ། ཨ་བྷི་ཥིཉྩ་མཾ། ཞེས་སོགས་དམ་པ་རིགས་བརྒྱའི་ལྷ་དབང་ཡོངས་རྫོགས་སྦྱར་མཐར། འདི་ལྟར་ཆོས་ཐམས་ཅད་དམ་པ་རིགས་བརྒྱའི་ངོ་བོར་དག་ཅིང༌། དེ་ཡང་རང་སེམས་ལྷག་པའི་བདེན་གཉིས་དབྱེར་མེད་གསང་ཆེན་རིགས་གཅིག་ཏུ་རྣམ་པར་དག་པ་ཡིན་ནོ། །ཞེས་རྟོག་པ་བསྐྱེད། དེ་ལྟར་བུམ་པའི་དབང་གིས་ལུས་དང་རྩའི་སྒྲིབ་པ་དག །བསྐྱེད་རིམ་བསྒོམ་པ་ལ་དབང༌། ཕུང་ཁམས་སྐྱེ་མཆེད་ཚོགས་བརྒྱད་དབང་ཡུལ་དང་བཅས་པ་སྐུ་དང་ཡེ་ཤེས་སུ་འགྱུར་བའི་ས་བོན་ཐེབས། སྤྲུལ་པའི་སྐུ་འགྲུབ་པའི་སྐལ་པ་རྒྱུད་ལ་བཞག་གོ །གསུམ་པ་གསང་བ་ཟབ་མོའི་དབང་ལ་སྦྱོར་དངོས་རྗེས་གསུམ་དུ་ཡོད་པའི་དང་པོ་སྦྱོར་བ་རྩ་ཁམས་བྱིན་གྱིས་བརླབ་པ་གསང་དབང་གི་སླད་དུ། བླ་མ་ཡབ་ཡུམ་དང་གཉིས་སུ་མེད་པའི་ནམ་མཁར་བཞུགས་པའི་ལྷ་ཚོགས་རྣམས་བདེ་བ་ཆེན་པོའི་ངང་དུ་སྙོམས་པར་ཞུགས་པའི་བྱང་ཆུབ་སེམས་རྗེས་སུ་ཆགས་པའི་མེས་ཞུ་བ་སོ་སོའི་མཁའ་གསང་ནས་ཐོན་ཐོད་པའི་བདུད་རྩི་དང་རོ་གཅིག་ཏུ་གྱུར་པ་འདི་ཉིད་ཁྱེད་རང་སློབ་མ་རྣམས་ལ་བྱིན་པའི་མོས་པ་མཛོད། གསང་རྫས་མགྲིན་པར་བཞག་སྟེ། ཧཱུྃ། ཡབ་ཡུམ་སྦྱོར་བའི་བྱང་ཆུབ་སེམས༔ དཀར་དམར་བྷཉྫའི་ནང་དུ་བསྐྱིལ༔ སྐལ་ལྡན་བུ་ལ་དབང་བསྐུར་བས༔ རྩ་ཁམས་ཡི་གེའི་རྣམ་པར་སྨིན༔ ཚེ་ལ་དབང་བའི་རིག་འཛིན་ཐོབ༔ པདྨ་ཅན་གྱི་ས་ནོན་ཤོག༔ རྩ་སྔགས་དང༌། ཝཱཀྐ་ཨ་བྷི་ཥིཉྩ་ཨཱཿ བདུད་རྩི་སྦྱིན། དེ་ལྟར་མྱངས་བས་བྱང་སེམས་ཀྱིས་རྩ་ཁམས་ཐམས་ཅད་ལ་ཁྱབ། གསལ་སྟོང་རྣམ་པར་མི་རྟོག་པའི་ཡེ་ཤེས་རྒྱུད་ལ་སྐྱེས་པར་མོས་ཤིག །དེ་དང་རྗེས་སུ་འབྲེལ་བར་གསུང་བཟླས་པའི་ལུང་སྦྱིན་པ་ལ། སློབ་དཔོན་གྱི་ཐུགས་ཀ་ནས་རྩ་བའི་སྔགས་ཕྲེང་ལུ་གུ་རྒྱུད་དུ་བྱུང༌། སློབ་མའི་མགྲིན་པ་ནས་ཞུགས་སྙིང་གར་འཁོར་བ་དང་འགྱུ་བའི་རླུང་ཁམས་མཐའ་དག་གྲགས་སྟོང་སྔགས་ཀྱི་འཁོར་ལོར་རྫོགས་པར་མོས་ལ་ཞི་བར་བསྙེན་པའི་སྔགས་འདིའི་རྗེས་ཟློས་མཛོད། ཨོཾ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ ལན་གསུམ། ཁྲོ་བོར་སྒྲུབ་པའི་སྔགས་འདིའི་རྗེས་ཟློས་མཛོད། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ། ལན་གསུམ། ལས་སྦྱོར་རྩ་རིག་དང་ཞི་ཁྲོ་ཆིག་དྲིལ་ཡི་གེ་བརྒྱ་པའི་སྔགས་འདིའི་རྗེས་ཟློས་ལན་གསུམ་མཛོད། ཨོཾ་ན་མོ་བྷ་ག་ཝ་ཏེ་སརྦ་དུརྒ་ཏེ་པཱ་རི་ཤྭ་དྷ་ནི་རཱ་ཛ་ཡ། ཏ་ཐཱ་ག་ཏ་ཡ། ཨརྷ་ཏེ་སཾ་མྱག་སཾ་བུདྡྷ་ཡ། ཏདྱ་ཐཱ། ཨོཾ་ཤྭ་དྷ་ནི་ཤྭ་དྷ་ནི། སརྦ་པཱ་པཾ་བི་ཤྭ་དྷ་ནི་སྭཱ་ཧཱ། ལན་གསུམ། ཨོཾ་བཛྲ་སཏྭ་ས་མ་ཡ་སོགས། ས་མ་ཡ་སཏྭ་ཨཱ་ཧཱུྃ་ཕཊ། ལན་གསུམ། དེ་ལྟར་གསང་བའི་དབང་གིས་ངག་གི་ལས་དང་རླུང་གི་སྒྲིབ་པ་དག །བླ་མེད་ཀྱི་དམ་རྫས་ཁྱད་པར་ཅན་སྤྱོད་ཅིང་བཟླས་བརྗོད་དང་གཏུམ་མོའི་རྣལ་འབྱོར་ལ་དབང༌། རླུང་བཅུ་ལས་སུ་རུང་བའི་ཡོན་ཏན་ཐམས་ཅད་ཐོབ། ལོངས་སྤྱོད་རྫོགས་པའི་སྐུ་འགྲུབ་པའི་སྐལ་པ་རྒྱུད་ལ་བཞག་གོ །གཉིས་པ་དངོས་གཞི་དཔེའི་ཡེ་ཤེས་མཚོན་པའི་སླད་དུ། གཟུགས་དང་ལང་ཚོ་མཛེས་སྡུག་ཕུལ་དུ་བྱུང་ཞིང་མཚན་ཉིད་མཆོག་དང་ལྡན་པའི་རིག་མ་ལག་གཡོན་དུ་བྱིན་པར་མོས་ཤིག །རིག་ཙཀ་གཏད་ལ། ཧོཿ ཆོས་རྣམས་ཀུན་གྱི་འབྱུང་གནས་ཏེ། །བདེ་བ་ཆེན་པོ་གསང་བའི་ཡུམ། །རིགས་ཀྱི་བུ་ལ་བྱིན་པ་ཡིས། །དགའ་བཞིའི་ཡེ་ཤེས་མངོན་དུ་གྱུར། །ཕྱག་རྒྱ་ཆེན་པོའི་རིག་འཛིན་ཐོབ། །འཁོར་ལོ་ཚོགས་ཆེན་ས་ནོན་ཤོག །རྩ་སྔགས་དང༌། ཙིཏྟ་ཨ་བྷི་ཥིཉྩ་ཧཱུྃ། ཞེས་གཏད་པས། རིག་མ་དེས་པདྨ་བྷཉྫ་མོ་ཀྵ་ཧོཿ ཞེས་པའི་སྒྲས་ཐར་པ་བསྟན་པ་ལ་བསྐུལ། རྗེས་སུ་ཆགས་པའི་རོལ་མོས་དགའ་བཞིའི་ཡེ་ཤེས་ཉམས་སུ་མྱོང༌། རྡོ་རྗེ་ནོར་བུའི་རྩེ་མོར་ལྷན་ཅིག་སྐྱེས་པའི་དཔེ་ཡི་ཡེ་ཤེས་མངོན་དུ་བྱས། སླར་གྱེན་དུ་ལྡོག་པས་མས་བརྟན་འབྲས་བུའི་དགའ་བཞི་དང་ཟུང་དུ་འཇུག་པའི་སྟོང་བཞིའི་འོད་གསལ་མཐར་ཐུག་བརྗོད་བྲལ་ཡེ་ཤེས་མངོན་དུ་མཐོང་བར་མོས་ཤིག །དེས་ཤེས་རབ་ཡེ་ཤེས་ཀྱི་དབང་གིས་ཡིད་དང་ཐིག་ལེའི་སྒྲིབ་པ་དག །རང་བཞིན་བརྒྱད་ཅུའི་རྟོག་ཚོགས་འགགས། ཆོས་སྐུའི་གོ་འཕང་ཐོབ་པའི་སྐལ་པ་རྒྱུད་ལ་བཞག་གོ །གསུམ་པ་རྗེས་དོན་གྱི་ངོ་སྤྲད་པ་བཞི་པ་ཚིག་གི་དབང་ལ་དངོས་དང་བཀའ་གཏད་རིག་པ་རྩལ་གྱི་དབང་གསུམ་ལས་དང་པོ་ནི། དེའང་བསྐུར་མ་ཐག་པའི་དབང་གསུམ་པའི་ཡེ་ཤེས་ཀྱི་དཔེས་ཆོས་དབྱིངས་སྤང་བླང་ལས་འདས་པའི་བརྡལ་བ་ཆེན་པོའི་ཡེ་ཤེས་ཀྱི་ཉམས་མྱོང་དྲན་པར་བྱས་ཏེ་ཐབས་ལ་བརྟེན་པའི་ཤེས་རབ་ཀྱིས་ངོ་སྤྲད་དེ། དབྱིངས་རིག་གཉིས་མེད་ཤེལ་དང་མེ་ལོང་གི་བརྡས་མཚོན་པར་བྱས་ནས་ཉམས་སུ་མྱོང་བར་མོས་ལ། མེ་ལོང་དང་ཤེལ་རྡོ་བསྟན་ལ། ཧོཿ ཀ་དག་མེ་ལོང་གཙང་མའི་ངོགས། །ལྷུན་གྲུབ་དྭངས་ཤེལ་དྲི་མེད་གསལ། །བརྡ་རྟགས་རྫོགས་པའི་དབང་བསྐུར་བས། །དྲི་མེད་རིག་པའི་གནས་ལུགས་རྟོགས། །ལྷུན་གྲུབ་རིག་འཛིན་ཉེར་ཐོབ་ནས། །བདེ་བ་ཆེན་པོའི་ས་ནོན་ཤོག །རྩ་སྔགས་དང༌། དྷརྨ་དྷཱ་ཏུ་ཨ་བྷི་ཥིཉྩ་ཨཱཿ ཞེས་བརྗོད་དེ་མཉམ་པར་བཞག །དཔེ་ལས་ཐོབ་པའི་གསུམ་པའི་ཉམས་མྱོང༌། མྱོང་ཞེན་ཤེས་བྱའི་སྒྲིབ་པ་སེམས་རིག་ཤན་མ་ཕྱེ་བ་ཞིག་འཆར་ཉེ་བ་ན། ཕཊ། དྲག་པོ་ཞིག་བརྗོད་འཕྲལ། སེམས་གང་ཡིན། ཞེས་རྟབ་རྟབ་ཏུ་དྲིས་པས། སྣང་བ་ཧད་དེ། ཕྱད་དེ། ཅི་ཟེར་ཆ་མེད་པའི་འབྱུང་ཚོར་གྱི་སྤྲོས་པ་ཞི་བའི་རིག་པ་གུ་ཡངས་བསམ་ལས་འདས་པ་ཞིག་མི་འཆར་བའི་དབང་མེད་པས་དེ་ག་སེམས་ལས་འདས་པའི་རིག་པར་ངོ་སྤྲད་པ་ནི་ལྟ་བ་སྤྱི་འབྱམས་ཀྱི་དབང་ཞེས་བྱ་ཞིང༌། དེ་ལྟར་ངོ་སྤྲད་པའི་ལྟ་བ་ལུང་རིག་དང་འབྲེལ་པ་ཞེས་བྱ་བ་ཡིན་པས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་གྱུར་རྫོགས་པ་ཆེ། །ཞེས་གསུངས་པའི་དོན་ལགས་སོ། །སློབ་དཔོན་ལྟ་དགོངས་དང་ལྡན་པ་ཡིན་ན། ཐུགས་ཀར་ཨ་གཅིག་བསམ་ལ་སློབ་མས་རིག་པ་གཏད་དེ་མཉམ་པར་བཞག་པའི་ངང་ནས་ཨ་ཉི་ཤུ་རྩ་གཅིག་བརྩེགས་མར་བརྗོད། དེ་ནི་སྒོམ་པ་ཉམས་མྱོང་དང་འབྲེལ་བར་དགོས་པས་བྱིན་རླབས་འཕོ་བའི་དབང་ཞེས་བྱའོ། །དེས་དབང་བཞི་པ་ཐོབ་པས་ཀུན་གཞིའི་ལས་དང་ཤེས་བྱའི་སྒྲིབ་པ་དག །རྫོགས་པ་ཆེན་པོ་བསམ་གྱིས་མི་ཁྱབ་པའི་ཡེ་ཤེས་བསྒོམ་པ་ལ་དབང༌། ངོ་བོ་ཉིད་སྐུ་ཐོབ་པའི་སྐལ་པ་རྒྱུད་ལ་བཞག་པ་ཡིན་ནོ། །གཉིས་པ་བཀའ་གཏད་ནི། བཀའ་རྫོགས་ལུང་རྫོགས་བྱ་བའི་ཕྱིར་སྙིང་ཐིག་གི་གླེགས་བམ་སྤྱི་བོར་བཀོད་ལ། ཧོཿ ཆོས་སྐུ་ཀུན་ཏུ་བཟང་པོ། ལོངས་སྐུ་རྒྱལ་བ་རིགས་ལྔ། སྤྲུལ་སྐུ་དགའ་རབ་རྡོ་རྗེ། སློབ་དཔོན་འཇམ་དཔལ་བཤེས་གཉེན། རིག་འཛིན་ཤྲཱི་སིངྷ། པཎ་ཆེན་བི་མ་མི་ཏྲ། ཨོ་རྒྱན་པདྨ་ཐོད་ཕྲེང༌། མཁའ་འགྲོ་ཡེ་ཤེས་མཚོ་རྒྱལ། མངའ་བདག་ཁྲི་སྲོང་ལྡེའུ་བཙན། རྒྱལ་སྲས་དྲི་མེད་འོད་ཟེར། ཀློང་ཆེན་ནམ་མཁའི་རྣལ་འབྱོར་ལ་སོགས་པ། རང་བཞིན་རྫོགས་པ་ཆེན་པོའི་རྩ་བ་དང་བརྒྱུད་པར་བཅས་པའི་དཔལ་མགོན་རིག་འཛིན་བླ་མ། ཡི་དམ་མཁའ་འགྲོ་རྒྱ་མཚོ། ཆོས་སྲུང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱིས་དེང་འདིར་རྡོ་རྗེའི་སློབ་མ་རྣམས་ལ་དབང་བསྐུར་དུ་གསོལ། བྱིན་གྱིས་བརླབ་ཏུ་གསོལ། རྟོགས་པ་སྤར་དུ་གསོལ། བརྟུལ་ཞུགས་བསྐྱེད་དུ་གསོལ། བྱ་རྩོལ་བློ་འདས་རྫོགས་པ་ཆེན་པོའི་ཀློང་དུ་དགོངས་པའི་བཙན་ས་ཟིན་ཏེ། ཚེ་གཅིག་ལུས་གཅིག་ལ་འཇའ་ལུས་འཕོ་བ་ཆེན་པོའི་སྐུ་མཆོག་བརྙེས་ནས་དཔལ་ཀུན་ཏུ་བཟང་པོའི་གོ་འཕང་ལ་འགོད་པར་མཛད་དུ་གསོལ། ཞེས་ལན་གསུམ་བྱ། གསུམ་པ་རིག་པ་རྩལ་གྱི་དབང་ནི། བཤད་སྒྲུབ་ཀྱི་བརྒྱུད་པ་འཛིན་པ་དག་ལ་ཐོད་རྒལ་རིག་པའི་རྩལ་དབང་བསྐུར་བ་ཡེ་ཤེས་བླ་མ་ལས་ཤེས་སོ། །ཞེས་གསུངས་པས་སྐབས་དང་འབྲེལ་ན་དེར་བལྟའོ། །འདིར་སྤྲོ་ཞིང་ནུས་ན་དབང་ཐོབ་པའི་ཕན་ཡོན། མ་ཐོབ་པའི་ཉེས་དམིགས། དམ་ཚིག་གི་རྣམ་བཞག་རྒྱས་པར་བཤད། འོ་དེས་ཞི་ཁྲོ་ངན་སོང་སྦྱོང་བའི་དཀྱིལ་འཁོར་ཆེན་པོར་དབང་བཞི་རྫོགས་པར་ཐོབ་པ་ཡིན་པས། གསང་སྔགས་ཀྱི་དངོས་གྲུབ་ཐམས་ཅད་དབང་ལས་འབྱུང་བས་ཡོན་ཏན་བསམ་གྱིས་མི་ཁྱབ། དབང་མ་ཐོབ་ན་ཆོས་འདིའི་དཔེ་ཙམ་བལྟ་བ་ལ་མི་དབང་ཞིང་དབང་མ་ཐོབ་པའི་ཉེས་དམིགས་ཀྱང་ཤིན་ཏུ་ལྕི། ཁེ་ཉེན་གྱི་ནུས་པ་དེ་ལྟ་བུ་བསྐྱེད་པའི་དབང་སྲོག་དམ་ཚིག་དང་སྡོམ་པ་ཁོ་ན་ལ་རག་ལས་པས། དེའི་བསྲུང་བྱའི་རྣམ་གྲངས་ཀྱང་ཐུན་མོང༌། སྤྱི། ཁྱད་པར་དང༌། སྒྲུབ་པ། ལྷག་པ། རྩ་བ། ཡན་ལག་གི་བསྲུང་བྱ་མཐའ་དག་ཚུལ་བཞིན་སྲུང་སྙམ་པས་དམ་ཚིག་ཁས་བླང་བ་འདིའི་རྗེས་ཟློས་མཛོད། རྩ་བ་སྐུ་གསུང་ཐུགས་མཆོག་དང༌། །ཡན་ལག་དམ་ཚིག་ཉི་ཤུ་ལྔ། །མེད་དང་གཅིག་པུ་ཕྱལ་བ་སོགས། །ཆོ་ག་བཞིན་དུ་སྲུང་བར་བགྱི། །ལན་གསུམ། དབང་བཞི་རྫོགས་པར་ཐོབ་པའི་སྐུ་དྲིན་གཏང་རག་གི་ཡོན་དུ་མཎྜལ་ཕུལ། སླར་ཡང་ལུས་དང་ལོངས་སྤྱོད་ཐམས་ཅད་བླ་མའི་ཕྱོགས་སུ་བསྔོ་བ་ནི་དམ་ཚིག་གི་ཐ་ཚིག་ཡིན་པས་འདིའི་རྗེས་ཟློས་ལན་གསུམ་མཛོད། གཙོ་བོས་ཇི་ལྟར་བཀའ་བསྩལ་པ། །དེ་དག་ཐམས་ཅད་བདག་གིས་བགྱི། །ཁྱོད་ལ་བདག་ཀྱང་ཡོངས་སུ་འབུལ། །སློབ་མར་བཟུང་ནས་སྤྱད་དུ་གསོལ། །དེ་ལྟར་རིམ་པ་དབང་གི་ཆོ་ག་གསན་པའི་དགེ་བ་ཡང་རྗེས་ཐོབ་བསོད་ནམས་ཀྱི་ཚོགས་སྤེལ་བའི་ཕྱིར་བསྔོ་སྨོན་ཟུང་འབྲེལ་གྱི་རྒྱས་འདེབས་འདི་ཆབས་ཅིག་གནང་བར་ཞུ། བསོད་ནམས་འདི་ཡིས་སོགས་བརྗོད་ཅིང་སློབ་མ་རྣམས་གྲོལ། གསུམ་པ་རྗེས་ཀྱི་ལས་ཁྲིགས་ནི། ཚོགས་ལ་རོལ། རྡོ་རྗེའི་གླུ་གར་བྱ། གཏོར་མ་བཏང༌། གཏང་རག་དང་དངོས་གྲུབ་བླང་བ་སོགས་གསང་བ་སྤྱིའི་འགྲོས་ལྟར་བྱའོ། །མཁྱེན་བརྩེའི་ཡེ་ཤེས་དགོངས་བཅུད་ཆེ། །བཀའ་གཏེར་ཟུང་འཇུག་ཞི་ཁྲོ་ཡི། །སྨིན་ལམ་འོད་ཟེར་སྤྲོས་འདིས་ཀྱང༌། །ངེས་གསང་པད་ཚལ་གཉེན་དུ་ངེས། ཅེས་རྒྱུད་སྡེའི་དགོངས་པ་གཙོར་བཏོན་ཞི་ཁྲོ་ངན་སོང་སྦྱོང་བའི་དབང་བསྐུར་གྱི་ལེའུ་ཚན་དང་པོ་སྟེ་འོད་གསལ་ཐུགས་མཆོག་རྡོ་རྗེས་སྦྱར་བའོ། ༈ རིགས་ཀུན་ཁྱབ་བདག་ཀུན་བཟང་འོད་མཐའ་ཡས། །སྒྱུ་འཕྲུལ་དྲྭ་བའི་དཀྱིལ་འཁོར་གཅིག་བསྡུས་པ། །རིག་འཛིན་བླ་མའི་ཕྱག་རྒྱར་བཞེངས་པ་དེ། །རབ་དྭངས་ཡིད་ཀྱི་ཆུ་མཚོར་རྟག་པར་མཆོད། །དེ་ལ་འདིར་དབང་གི་སྤྱི་དོན་ལས། འདི་ལྟར་ཞི་ཁྲོ་དང་དཔལ་ཆེན་ཅི་རིགས་པའི་དཀྱིལ་འཁོར་གཅིག་ཏུ་འཇུག་པའི་ཆོ་ག་རྫོགས་པ་དག་ལ། རིག་འཛིན་དང༌། ཐུགས་རྗེ་ཆེན་པོ་ལ་སོགས་པའི་སྒོས་དབང་ནི། སོ་སོའི་ལས་གཞུང་གི་བདག་མདུན་བུམ་གསུམ་སྒྲུབ་ཅིང༌། རྩ་དབང་རྒྱལ་ཐབས་སྤྱི་བླུགས་ལྟར་ནང་ནུས་པ་འཇུག་པའི་དབང་གི་ཆོག་པ་ཡིན་ནོ། །ཞེས་རྒྱུད་དང་སྒྲུབ་སྡེའི་རིང་ལུགས་ལ་གདམས་ཕྲན་གྱི་ས་ཆོད་ཆུང་བས་ཁོག་ཆེ་ཤོས་ཞི་ཁྲོ་དང་བཀའ་བརྒྱད་གང་རུང་གིས་འཛིན་དགོས་པར་དགོངས་ནས་དེ་ལྟར་གསུངས་ཀྱང་ཀུན་མཁྱེན་ཉིད་རིག་འཛིན་བླ་མའི་སྒྲུབ་སྐོར་གྱི་བཀའ་བབ་ཡིན་པས་རྩ་གསུམ་ཐམས་ཅད་བླ་མའི་ཕྱི་ནང་གསང་བའི་སྒྲུབ་ཚུལ་དུ་གཙོ་བོར་གསུངས་ཕྱིར་སྙིང་ཐིག་གི་ཆོས་སྡེ་ཆེན་པོ་འདིའི་འཕྲོ་གཞི་ལྟ་བུ་བླ་མ་རིག་འཛིན་འདུས་པ་ཉིད་ཡིན་པའི་དབང་གིས་ཕྱི་ནང་གི་འཇུག་པ་གཉིས་དང༌། སློབ་མའི་དབང་ལྔ་སོགས་དབང་གི་སྤྱི་དོན་སྙིང་པོ་དོན་གསལ་ལྟར་མན་ངག་གི་དགོངས་པས་ཁ་བཀང་སྟེ་བསྐུར་བས་ལམ་ཀུན་གྱི་ཐོག་མའི་སྨིན་བྱེད་དུ་རུང་བར་མཁྱེན་ནས་རྩ་བའི་ཆོས་བདག་རྡོ་གྲུབ་རིན་པོ་ཆེ་འཇིགས་མེད་ཕྲིན་ལས་འོད་ཟེར་གྱིས་མཛད་པ་ཁམས་ཕྱོགས་སུ་དར་སྲོལ་ཤིན་ཏུ་ཆེ་རུང་དེའི་དཔེ་དངོས་མ་རྙེད་པས་དགོངས་དོན་མ་ཉམས་པར་འཆད་ན་དབང་དང་ཕྱག་བཞེས་ཀྱི་རྒྱུན་མི་འཆད་པར་ལེགས་པར་མཐོང་ནས་དོན་གྱི་དགོངས་པ་ནོར་འཁྲུལ་མེད་པར་འཆད་པ་ལ་སྦྱོར་དངོས་རྗེས་གསུམ་ལས། དང་པོ་སྦྱོར་བ་ཡོ་བྱད་ཀྱི་གཤོམ་ནི། འདི་ལ་སྔོན་འགྲོ་སྟ་གོན་མཛད་སྲོལ་མི་འདུག་པས་དངོས་གཞིའི་དབང་བསྐུར་གྱི་རིམ་པ་སྟེ། གང་དུ་བྱ་བའི་གནས་སུ་གཞུང་མཐུན་རས་བྲིས་ཀྱི་དཀྱིལ་འཁོར་དང༌། མ་འབྱོར་ན་མཎྜལ་ལ་ཚོམ་བུ་གཙོ་འཁོར་དགུ་བཀོད་པས་ཀྱང་རུང་ཞིང༌། དལ་དབུས་མཉྫི་ལ་རིན་པོ་ཆེའི་བུམ་པ་བཅུད་ལྡན་ཁ་རྒྱན་མགུལ་ཆིངས་དང་བཅས་པ། གཡས་སུ་འདི་ཉིད་ཀྱི་གཞུང་པོད་གླེགས་བམ། མ་འཛོམས་ན་སྒྲུབ་ཐབས་སོགས་ཆོས་ཚན་དར་གྱིས་དྲིལ་བ། གཡོན་དུ་གསང་དབང་རྟེན་ཐོད་པ་བདུད་རྩིས་བཀང་བའི་ཁར་མེ་ལོང་སིནྡྷུ་རའི་ཐིག་ལེ་ཅན་གྱི་སྟེང་དུ་ཤེལ་རྡོ། ཤར་དུ་རྡོར་དྲིལ་བསྣོལ་མ། ལྷོར་དབུ་རྒྱན། ནུབ་ཏུ་རྡོ་རྗེ། བྱང་དུ་དྲིལ་བུ། དཀྱིལ་འཁོར་པའི་ལྷ་ཙཀ་ཡོངས་རྫོགས། རིག་ཙཀ །མཐའ་རྟེན་ཚེ་དབང་བྱེད་ན་ཚེ་བུམ། ཚེ་རིལ། ཚེ་ཆང༌། མདའ་དར་བཅས་གང་བདེར་བཤམས། །མིག་དར། མེ་ཏོག །རིག་འདུས་རྩ་གཏོར་དར་གདུགས་སྐུ་ཙཀ་གིས་བརྒྱན་པ། སྨན་རཀ །གཏོར་འབུལ། ཚོགས་མཆོད་སོགས་འོག་ཏུ་དགོས་པ་རྣམས་ཚང་བར་འདུ་བྱ། གཉིས་པ་ལ་ཐོག་མར་དབང་དོན་སྒྲུབ་མཆོད་ནི། སྤྱི་དང་བྱེ་བྲག་གི་བརྒྱུད་འདེབས་ནས་བརྩམས་ལས་བྱང་མཐར་ཆགས་སུ་བཏང་ལ་བདག་མདུན་དབྱེར་མེད་དུ་བསྒོམ། རྟོགས་པ་དམན་ན་ཛབ་ཁང་དབྱེ། བཟླས་པའི་སྐབས་གབ་བྱང་ལྟར་ཏིང་ངེ་འཛིན་གསལ་བཏབ་ལ་བསྙེན་སྒྲུབ་ཀྱི་བཟླས་པ་བྱ། བུམ་པ་རང་བྱུང་གི་གཞལ་ཡས་ཁང་དུ་རིག་འཛིན་འདུས་པའི་དཀྱིལ་འཁོར་དྭངས་པའི་མཚོ་ལ་གཟའ་སྐར་ཤར་བ་བཞིན་སྐད་ཅིག་གིས་གསལ་བར་གྱུར། རང་སྲོག་སྔགས་ཀྱི་འོད་ཟེར་གཟུངས་ཐག་ལ། །འཁྲིལ་ཏེ་བུམ་པའི་ལྷ་ཚོགས་ཐུགས་ཀར་ཞུགས། །དེ་དག་སྐུ་ལས་བྱང་སེམས་བདུད་རྩིའི་རྒྱུན། །བབས་པས་བུམ་ཆུར་དབྱེར་མེད་རོ་གཅིག་གྱུར། །ཞེས་གསལ་བཏབ་ནས་གཟུངས་ཐག་བླང༌། བསྙེན་སྒྲུབ་ཀྱི་བཟླས་པ་བརྒྱ་རྩ་ལས་མི་ཉུང་བར་བྱ། ལས་བུམ་ནང་དུ་པད་ཉིའི་སྟེང༌། །པདྨ་དབང་ཆེན་སྐུ་མདོག་དམར། །པདྨའི་དབྱུག་ཐོ་ཞགས་པ་འཛིན། །དོར་སྟབས་ཡེ་ཤེས་མེ་ཀློང་འགྱིང༌། །སྐུ་ལས་རྡོ་རྗེ་བདུད་རྩིའི་རྒྱུན། བབས་པས་བུམ་པ་གང་བར་གྱུར། །ཨོཾ་བཛྲ་ཀྲོ་དྷ་ཧྱ་གྲཱྀ་ཝ་ཧཱུྃ་ཕཊ། ཞེས་བརྒྱ་རྩ་ཙམ་བཟླ། མཐར་མཆོད་བསྟོད་བྱ། ཡིག་བརྒྱ་བརྗོད། ཨོཾ་ཨཱཿཧཱུྃ་གིས་དུང་ཆུ་ཕུལ། རྣམ་རྒྱལ་བུམ་པའི་ལྷ་རྣམས་བདེ་བ་ཆེན་པོའི་ངོ་བོར་ཞུ་ནས་བུམ་ཆུ་དང་རོ་གཅིག་ཏུ་གྱུར་པར་མོས། བཀའ་སྲུང་གཏོར་འབུལ་བྱ། རིག་པའི་མེ་ཏོག་དོར་ལ་གནང་བ་ནོད་དེ། དབང་དངོས་ལ། དང་པོ་ཕྱི་འཇུག་གི་ཐོག་མ་སློབ་མ་གཞུག་པ་ནི། ཁྲུས་དང་བགེགས་གཏོར་བསྔོ་བ་སྲུང་འཁོར་རྣམས་ལས་བྱང་ལྟར་བྱ། སེམས་བསྐྱེད་གསལ་བཏབ་ལ། ལོ་རྒྱུས་ཀྱི་ཁྱད་པར། དེ་ཡང་མཚོན་བྱ་དོན་གྱི་མན་ངག་རང་བྱུང་གི་གསང་བ་ཆེན་པོ་ལ་མཚོན་བྱེད་བརྡ་དང་ཚིག་ཏུ་ཤར་བའི་རྒྱུད་ལུང་མན་ངག་ཐམས་ཅད་རྒྱལ་བ་རྣམས་ཀྱིས་ཐུགས་ནས་ཐུགས་ཀྱི་གཏེར་དུ་སྦས་པ་དང༌། མཁའ་འགྲོ་མས་དགོངས་པའི་རྩལ་གྱིས་ནམ་མཁའི་གཏེར་དུ་སྦས་པ་དང༌། རིག་འཛིན་རྣམས་ཀྱིས་འབྱུང་བས་མི་ཤིགས་པའི་སྒྲོམ་བུ་ལ་བརྟེན་ནས་སའི་གཏེར་དུ་སྦས་ཤིང༌། གདུལ་བྱ་འདུལ་བའི་དུས་སུ་སོན་པ་ན་ལས་ཅན་རྣམས་ཀྱིས་རྡོ་རྗེའི་རྒྱ་བཀྲོལ་ནས་མངོན་དུ་སྣང་བར་མཛད་པ་ལས། འདི་ནི་བླ་མ་དགོངས་པ་འདུས་པའི་ལུང་བསྟན་བཀའ་རྒྱ་མ་ལས། ལྷོ་ཕྱོགས་འོད་ཟེར་མིང་ཅན་སྤྲུལ་པའི་སྐུ༔ ཟབ་དོན་སྙིང་ཐིག་ཆོས་ཀྱིས་འགྲོ་བ་འདྲེན༔ འབྲེལ་ཚད་རིག་འཛིན་ཞིང་དུ་འཕེན་པར་འབྱུང༔ ཞེས་དང༌། ཨོ་རྒྱན་ཆོས་རྗེ་གླིང་པའི་ལུང་བྱང་ལས། དབུས་གཡོར་གཞུང་དུ་བྱང་སེམས་པདྨའི་མིང༔ བཀའ་རྙིང་བསྟན་སྐྱོང་ཐབས་མཁས་འགྲོ་བ་འདུལ༔ ཞེས་སྙིང་ཐིག་གི་རྫོགས་རིམ་དང༌། རིག་འཛིན་གྱི་བསྐྱེད་རིམ་ལ་བརྟེན་ནས་རིམ་པ་བཞིའི་རྣལ་འབྱོར་ལ་སྦྱོར་བའི་ལམ་སྟོན་དུ་གཏེར་ཁ་གསར་རྙིང་མང་པོ་ནས་རྡོ་རྗེའི་ལུང་གིས་བསྔགས་ཤིང༌། སྐུ་ཚེ་རིལ་པོར་དབེན་པར་སྒྲུབ་པའི་རྒྱལ་མཚན་བཙུགས་པས་འཕགས་ལམ་ཆོས་ཉིད་ཀྱི་བདེན་པ་མངོན་སུམ་གཟིགས་པའི་གྲུབ་པ་ཆེན་པོའི་སར་བཞུགས་པ་ལ་རྩོད་པ་མེད་པའི་ཚུལ་རྟོགས་བརྗོད་ཆུ་ཟླའི་གར་མཁན་ལས། མནལ་ལམ་དུ་ལྷོ་མོན་ཁའི་བྲག་གི་གུ་རུའི་ཞབས་རྗེས་ལས་དབང་བཞི་བླངས་པའི་རྐྱེན་གྱིས་ནང་དབྱིངས་ཁྱད་ཆོས་དྲུག་ལྡན་གྱི་གྲོལ་ས་མཐོང་བ་དང༌། རྔ་ཡབ་གླིང་དུ་གུ་རུ་བདེ་བ་ཆེན་པོ་དང་ཐུགས་ཡིད་འདྲེས་ནས་འོད་གསལ་གཞོན་ནུ་བུམ་སྐུའི་ཞིང་ཁམས་གཟིགས་པ་སོགས་ལ་བརྟེན་ནས་རྩ་ཁམས་ཀྱི་ཡི་གེ་ཡེ་ཤེས་ཀྱི་རླུང་གིས་བསྐུལ་བས་དམ་པའི་ཆོས་སྒོ་འཛད་མེད་ཀྱི་རོལ་མོ་འཁྲོལ་བར་གསུངས་པས། འོད་གསལ་བསམ་གྱིས་མི་ཁྱབ་པའི་དགོངས་པ་ལ་དབང་ཐོབ་པས་དོན་བརྒྱུད་རྫོགས་པར་བརྙེས་པ་དང་ཆབས་ཅིག་དེའི་རང་རྩལ་མཁའ་འགྲོའི་བརྡ་ཡིག་གསང་མཛོད་རང་ཤར་དུ་རྙེད་པས་དཔེ་དང་སྙན་བརྒྱུད་ཞར་བྱུང་དུ་རྫོགས་པས་ཐུན་མོང་མ་ཡིན་པའི་དགོངས་ཀློང་གི་གཏེར་རྒྱ་ནམ་མཁའ་མཛོད་ཀྱི་བརྡ་གྲོལ་བ་སྟེ་རང་གཏེར་གནད་བྱང་ཐུགས་ཀྱི་སྒྲོམ་བུ་ལས། དེ་དུས་ད་ལྟའི་རྗེ་འབངས་གྲོགས༔ བི་མ་རྒྱལ་སྲས་ལྷ་རྗེ་རྣམས༔ སྨོན་ལམ་ཐུགས་རྗེས་སྤྲུལ་པའི་སྲས༔ རང་བྱུང་རྡོ་རྗེ་པདྨ་དབང༔ གསང་མཚན་གར་དབང་འཇིགས་མེད་གླིང༔ རྟོགས་གྲོལ་དུས་མཉམ་ཐུགས་གཏེར་བདག༔ འཕགས་པས་རྗེས་སུ་བཟུང་བའི་རྟགས༔ ལག་གཡས་མཐིལ་ན་པདྨའི་སྤྱན༔ དབང་ཆེན་གསུང་གི་རིག་འཛིན་ཆེར༔ མཐེ་བོང་ཐུགས་སྲོག་ཧྱ་ཡིས་མཚན༔ རྟོགས་པ་ཀློང་དུ་གྱུར་པའི་རྟགས༔ ཚེམས་ལ་སྐྱེ་མེད་ཡི་གེ་ཨཿ སྙིང་རྗེ་ཆེ་ཞིང་རིག་པ་ཧུར༔ ཤེས་རབ་ཆེ་ཞིང་འཛིན་ཆགས་ཆུང༔ ཐུགས་སྒམ་ཚིག་བཙུན་བློ་གྲོས་ཟབ༔ ངེས་མེད་སྤྱོད་པ་ཅིར་ཡང་སྟོན༔ འཇིགས་པ་མེད་པའི་བརྟུལ་ཞུགས་ཅན༔ ཞུམ་མེད་སྣང་བ་ཟིལ་གྱིས་གནོན༔ དེ་ལ་ཐུགས་རྒྱུད་དངོས་གཏེར་རམ༔ ཡང་ན་དགོངས་གཏེར་ཚུལ་དུ་འབེབས༔ དངོས་ཉམས་རྨི་ལམ་མ་ངེས་པར༔ ང་དང་ཞལ་མཇལ་དོན་དབང་བསྐུར༔ ཐུགས་རྒྱུད་དགོངས་པའི་བྱིན་རླབས་འཕོ༔ པད་འབྱུང་ང་དང་རིག་འཛིན་ཉིད༔ དགོངས་པ་གཅིག་དང་དབྱངས་གཅིག་འགྱུར༔ ཐེག་ཀུན་དགོངས་པའི་ཀློང་ནས་ཤར༔ རིག་འཛིན་དཔའ་བོ་མཁའ་འགྲོ་ཡིས༔ བསྐུལ་མ་ཐེང་གསུམ་དག་ཏུ་འོང༔ དེ་ཚེ་མི་བརྗེད་དྲན་པའི་གཟུངས༔ གཟེར་དྲུག་གནད་ཀྱི་ལྡེའུ་མིག་གིས༔ ཀློང་གསལ་དགོངས་པའི་གཏེར་ཁ་འབྱེད༔ ཅེས་རྡོ་རྗེའི་གསུང་གིས་ཇི་ལྟར་བསྔགས་པ་བཞིན་འོད་གསལ་དག་པའི་སྣང་ཆར་བལ་ཡུལ་གྱི་མཆོད་རྟེན་བྱ་རུང་ཁ་ཤོར་གྱི་གམ་དུ། ཆོས་སྐུ་ཡེ་ཤེས་ཀྱི་མཁའ་འགྲོ་མས་ཀློང་བྱང་ཡེ་ཤེས་ཀྱི་བརྡ་རིས་མངོན་སུམ་དུ་སྤྲད་པ་ལས་འོད་གསལ་རྡོ་རྗེ་སྙིང་པོ་ཀློང་ཆེན་སྙིང་གི་ཐིག་ལེ། ཟབ་དོན་མན་ངག་གི་བཅུད་མཛོད་འཛད་མེད་ནམ་མཁའ་མཛོད་ཀྱི་ཐུགས་གཏེར་ཆེན་པོ་གཏན་ལ་ཕབ། ཀུན་མཁྱེན་ཆོས་ཀྱི་རྒྱལ་པོ་རྒྱལ་བ་ཀློང་ཆེན་རབ་འབྱམས་ཀྱི་ཡེ་ཤེས་ཀྱི་སྐུས་ལན་གསུམ་རྗེས་སུ་བཟུང་སྟེ་གསང་བ་གསུམ་གྱི་བྱིན་རླབས་རྫོགས་པར་ཐོབ་པས་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་ཀློང་དུ་མངོན་པར་བྱང་ཆུབ་པའི་རིག་འཛིན་ཆེན་པོ་འཇིགས་མེད་མཁྱེན་བརྩེའི་འོད་ཟེར་རམ། པདྨ་དབང་ཆེན་ཡེ་ཤེས་རོལ་པའི་རྡོ་རྗེ་ཞེས་འབྲེལ་ཚད་དོན་ལྡན་གྱི་བདག་ཉིད་ཆེན་པོ་གང་ལ་རིག་འཛིན་གྱིས་བསྐུལ་མ་ཀུན་མཁྱེན་ཆོས་རྗེའི་ཞལ་གཟིགས་བར་པ་ལ་གསུང་གིས་བྱིན་གྱིས་བརླབས་ཏེ་བརྡ་གྲོལ་མཛད་པ་དང༌། དཔའ་བོས་བསྐུལ་མ་དང་མཁའ་འགྲོས་བསྐུལ་མ་མཆིམས་ཕུ་ནགས་ཀྱི་དུར་ཁྲོད་ནས་སྨན་བཙུན་མཆེད་ལྔས་རང་གཟུགས་མངོན་སུམ་དུ་བསྟན་ཏེ་ཆོས་སྒོ་འབྱེད་བར་བསྐུལ་བས་སྤྲེལ་ལོ་སྤྲེལ་ཟླའི་ཚེས་བཅུ་ལ་སློབ་དཔོན་ཆེན་པོས་དགྱེས་ཞལ་བསྟན་ཏེ་བར་ཆད་བསལ་བ་དང༌། སྔགས་ཀྱི་སྲུང་མས་སྙོམས་འཇུག་གི་བདེ་ཆེན་བསྟབས་ནས་སྐུ་ཚེ་དང་ཕྲིན་ལས་ཀྱི་རྟེན་འབྲེལ་གསོས་བཏབ་པ་ལ་བརྟེན་ནས། ཆོས་བདག་ལས་ཅན་གྱི་སྐྱེས་བུ་ནི། ཁྱད་པར་ད་ལྟའི་སྨོན་ལམ་མཐུས༔ ནམ་སྙིང་ཉང་བན་མཆོག་དབྱངས་དང༔ ལྷ་སྲས་སྤྲུལ་པས་ཆོས་སྒོ་འབྱེད༔ ཅེས་གསུངས་པས་ནམ་སྙིང་པྲ་ཏིའི་སྔགས་འཆང༌། ཉང་བན་འཇིགས་མེད་ཀུན་གྲོལ། མཆོག་དབྱངས་ཐེག་ཆེན་གླིང་པ། ལྷ་སྲས་མུ་རུབ་བཙད་པོ་རྡོ་གྲུབ་འཇིགས་མེད་ཕྲིན་ལས་འོད་ཟེར་རྣམས་ལ་རིམ་གྱིས་ཆོས་གཏེར་ཆེན་པོ་འདི་ཉིད་འཆད་སྤེལ་གྱིས་སྒོ་ཕྱེ་ཏེ་རྒྱ་ཆེ་ལ་བྱིན་རླབས་ཆགས་པའི་ཕྲིན་ལས་ཀྱི་སྣང་བས་བོད་ཁམས་མཐའ་དབུས་རྒྱ་དཀར་ནག་སོགས་འཛམ་གླིང་གི་ཐ་གྲུར་བརྡལ་པས་སྔོན་ཆད་མ་གྲོལ་བའི་ལུས་ཅན་གྲངས་ལས་འདས་པ་གདོད་མའི་གྲོལ་གཞིར་དབུགས་དབྱུང་བའི་ཟབ་ཆོས་འདི་ཉིད་ལ་བྱིན་རླབས་ཀྱི་རྩ་བ་དཔལ་འདུས་རྩ་གཞུང་ལས། ཕྱི་ལྟར་བྱང་སེམས་ནང་རིག་འཛིན༔ གསང་བ་ལྟར་དུ་སྒྲུབ་སྡེ་བརྒྱད༔ ཅེས་གསུངས་པའི་ནང་སྒྲུབ་རིག་འཛིན་འདུས་པ་བླ་མ་ཞི་བའི་ཐུགས་ཏིག་སྟེ། དེ་ནི་རྩ་བ་གསུམ་ལས་འཁོར་ལོའི་དབང་ཕྱུག་རིག་འཛིན་བླ་མའི་གསང་གསུམ་རྡོ་རྗེའི་དབྱིངས་སུ་སྣང་གྲགས་རིག་པའི་ཆོས་ཉིད་དག་པ་ཆེན་པོར་ལམ་དུ་ཁྱེར་བའི་རིག་འཛིན་ཡབ་ཀའི་སྒྲུབ་སྡེ་འདི་ལའང་བསྐྱེད་རྫོགས་ལས་སྦྱོར་དང་བཅས་པ་ཟབ་རྒྱས་སུ་བཞུགས་པ་ལ། ཕྱི་སྒྲུབ་བླ་མའི་རྣལ་འབྱོར། ནང་སྒྲུབ་རིག་འཛིན་ཞི་དྲག་གསུམ། །གསང་སྒྲུབ་ཐུགས་རྗེ་ཆེན་པོ། ཡང་གསང་ཀུན་མཁྱེན་བླ་མའི་སྒྲུབ་པ། ཞི་ཁྲོ་ངན་སོང་སྦྱོང་བ་བཅས་བཞུགས་པ་ལས། སྐབས་སུ་བབ་པ་བྱིན་རླབས་ཀྱི་རྩ་བ་བླ་མ་ཞི་བར་སྒྲུབ་པ་རིག་འཛིན་འདུས་པ་སྟེ། དེ་ནི་རྩ་རྒྱུད་ཐོད་པའི་དུམ་བུ་ལས། ཡེ་ཤེས་ལྟར་དུ་ཀློང་དགུའི་རྩལ༔ ཡི་དམ་ལྟར་དུ་སྒྲུབ་སྡེ་བརྒྱད༔ བྱང་སེམས་ལྟར་དུ་ཉེ་བའི་སྲས༔ རིག་འཛིན་ལྟར་དུ་འདི་ལྟར་ཏེ༔ ཨོ་རྒྱན་རང་བྱུང་མཁའ་འགྲོའི་གླིང༔ རོ་གླིང་བསིལ་བའི་ཚལ་ཆེན་དུ༔ གདན་འཛོམས་གདུལ་བྱ་དུས་བབ་ཚེ༔ འོག་མིན་གནས་སུ་ཧེ་རུ་ཀས༔ ལེགས་གསུངས་བདེ་གཤེགས་ཡོངས་རྫོགས་རྒྱུད༔ མཆོད་རྟེན་བདེ་བྱེད་བརྩེགས་པ་རུ༔ བསྩལ་པ་ལས་ཀྱི་དབང་མོ་ཆེས༔ ཕྱུང་སྟེ་རིག་འཛིན་བརྒྱད་ལ་གཏད༔ ཅེས་དང༌། ཀུན་ཀྱང་རང་རྒྱུད་མ་ཡིན་ཏེ༔ ལྷ་དང་བཀའ་བབ་ལྟར་བསྟན་ཡང༔ བསྒྲུབ་བྱ་སྒྲུབ་བྱེད་རོ་གཅིག་སྟེ༔ གདུལ་བྱའི་ངོ་རུ་སྣང་བ་ཙམ༔ དེ་བཞིན་ཡོངས་རྫོགས་རིན་ཆེན་སྒྲོམ༔ དྷ་ན་ཀོ་ཤའི་མཚོ་གླིང་དུ༔ རྫུས་ཏེ་བྱོན་པའི་རིག་འཛིན་ལ༔ ལས་ཀྱི་དབང་མོ་ཆེ་ཡིས་གཏད༔ འདི་ནི་རིག་འཛིན་རྡོ་རྗེ་ཆོས༔ སྟོན་པ་རང་ཉིད་སྡུད་བྱེད་ཀྱི༔ ཚུལ་བཟུང་ཟབ་མོའི་གསང་བ་འཛིན༔ གཙོ་དང་འཁོར་གྱི་ཚོམ་བུའི་ཚུལ༔ ལྟར་དུ་བསྟན་པའི་མན་ངག་བཅུད༔ གསང་སྔགས་ཀུན་གྱི་འབྲས་བུ་སྟེ༔ མངའ་བདག་རྒྱལ་པོའི་ཆོས་སྐལ་ཡིན༔ ཞེས་གསུངས་པ་ལྟར་སྒྲུབ་སྡེ་ཆེན་པོ་བརྒྱད་ཀྱི་བྱེ་བྲག་ནི། སྤྱི་དཔལ་རྣམ་དགུ་རྡོ་རྗེ་སློབ་དཔོན་གྱི་གཟུགས་ཅན་དུ་བྱོན་པ་ལས་སློབ་དཔོན་ཆེན་པོ་སངས་རྒྱས་གཉིས་པ་འདི་ནི་ཆོས་སྐུ་འོད་གསལ་རྡོ་རྗེ་སྙིང་པོའི་ཞིང་དུ་ཐོག་མའི་མགོན་པོ་འོད་མི་འགྱུར་བ། ལོངས་སྐུ་ཚངས་པ་རྔ་སྒྲ་ཡེ་ཤེས་རིགས་ལྔ་གངས་ཆེན་མཚོ་ངེས་པ་ལྔ་ལྡན་གྱི་ཁྱབ་བདག་པདྨ་ཀུན་ཏུ་འཆང༌། འགྲོ་འདུལ་སྤྲུལ་པའི་ཆོ་འཕྲུལ་ཕྱོགས་བཅུའི་ཞིང་ཀུན་ན་ཚད་མེད་པའི་ཚུལ། མི་མཇེད་ཀྱི་ཞིང་གཅིག་ཁོ་ན་ལའང་བླ་མ་སྐུ་གསུམ། ཐོད་ཕྲེང་སྡེ་ལྔ། སྤྲུལ་སྐུ་མཚན་བརྒྱད། འཕྲུལ་མཚན་བཞི་བཅུ། མདོ་སྔགས་ཀྱི་སྟོན་པ་བརྒྱ་རྩ་སོགས་སྤྱི་དང་བྱེ་བྲག་གཙོ་དང་འཁོར་སྣ་ཚོགས་སུ་ཤར་བའི་ཆོ་འཕྲུལ་བཀོད་པ་བསམ་ལས་འདས་པའི་གཙོ་བོ་གདུལ་དཀའི་འགྲོ་བ་སྤྱི་དང་གངས་ཅན་གྱི་བླ་མའི་སྐལ་པ་གུ་རུ་རིན་པོ་ཆེ། རིགས་བདག་ཐེག་མཆོག་རྫོགས་པ་ཆེན་པོའི་སྟོན་པ་རྣམ་གཉིས་དང༌། རྡོ་རྗེའི་རིག་འཛིན་དགུ་སོགས་ཟུང་འཇུག་གི་ལམ་ནས་རྡོ་རྗེ་འཆང་གི་གྲལ་བརྙེས་སོ་ཅོག་གི་འཕགས་བོད་རིག་འཛིན་རྩལ་འཆང་ཐམས་ཅད་ཆིག་དྲིལ་གྱི་ཐུགས་སྒྲུབ་ཟབ་མོའི་མཐར་ཐུག་ཆོས་འདིའི་སྲོག་བཅུད་རྩ་སྒྲུབ་རིག་འཛིན་འདུས་པ་ཞེས་བསམ་ཡས་བར་ཁང་གཡུ་ཞལ་ཅན་དུ་མངའ་བདག་ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱིས་གཙོས་རྗེ་འབངས་གྲོགས་གསུམ་གྱི་ཆོས་སྐལ་དུ་གདམས་པའི་གནད་ཀྱི་ཞུན་ཐིག །སླར་ཡང་བོད་ཡུལ་ཕྱི་མའི་གདུལ་བྱའི་བགོ་སྐལ་དུ་སྣང་བར་མཛད་པ་སྟེ་འདི་ལའང་རྩ་དབང་རྒྱལ་ཐབས་སྤྱི་བླུགས་དང༌། དེ་ཉིད་མན་ངག་གིས་ཁ་བསྐང་སྟེ་ཆོས་ཀྱི་བདག་པོ་འཇིགས་མེད་ཕྲིན་ལས་འོད་ཟེར་གྱི་ཕྱག་བཞེས་ལྟར་རྒྱས་པར་སྤྲོས་པ་ཕྱི་ནང་གི་འཇུག་པ་དང་ཕན་ནུས་ཟབ་མོའི་དབང་དང་བཅས་པ་གཉིས་སུ་ཡོད་པ་ལས་ཕྱི་མ་ཉིད་སྒྲུབ་པ་ལ་མཎྜལ་ཕུལ། སྔོན་ཆད་དཀྱིལ་འཁོར་འདིར་མ་ཞུགས་པས་དོན་གྱི་ཡེ་ཤེས་མ་མཐོང་བའི་བརྡར་གདོང་གཡོགས་འཆིང་མཛོད། ཨོཾ་ཙཀྵ⁽11e2⁾་བྷནྡྷཝ་ར་མ་ཎ་ཡ་ཧཱུྃ། མིག་དར་འཆིང༌། དཀྱིལ་འཁོར་གྱི་ལྷ་དང་མཇལ་བའི་ཕྱག་རྟེན་དུ་མེ་ཏོག་གི་ཆུན་པོ་ཁ་དོག་ལྔ་པ་ཕྱག་ཏུ་ཐོགས་མཛོད། ཨ་ཁཾ་བི་ར་ཧཱུྃ་གིས་མེ་ཏོག་གཏད། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ་མི་ཕྱེད་གུས་པའི་ཡིད་ཀྱིས་གསོལ་བ་འདེབས་པ་འདིའི་རྗེས་ཟློས་མཛོད། ཧོཿ བདག་ནི་སྐལ་ལྡན་རིགས་ཀྱི་བུ༔ ཐུགས་རྗེ་ཆེན་པོས་རྗེས་བཟུང་ལ༔ དམ་ཚིག་ཆེན་པོའི་དཀྱིལ་འཁོར་དུ༔ འཇུག་ཅིང་སྨིན་པར་མཛད་དུ་གསོལ༔ ལན་གསུམ། དམ་ཚིག་སྲུང་བར་བཀའ་བསྒོ་ཞིང་སྣོད་ལྡན་དཀྱིལ་འཁོར་དུ་འཇུག་པར་གནང་བ་སྦྱིན་པ་ནི་འདི་ལ་གསན་པས་ཁྱབ་པར་གདའ། ཧོཿ གསང་བ་མཆོག་གི་དཀྱིལ་འཁོར་དུ༔ འཇུག་པར་དཀའ་ལ་ཁེ་ཉེན་ཆེ༔ དམ་ཚིག་ཉམས་ན་བརླག་འགྱུར་བས༔ དམ་སྲུང་དབང་བསྐུར་སྦྱིན་པར་བྱ༔ བླ་མ་རིག་འཛིན་འདུས་པའི་དཀྱིལ་འཁོར་རྩ་གསུམ་དམ་ཅན་སྲུང་མའི་ཚོགས་དང་བཅས་པ་མངོན་སུམ་བཞིན་དུ་བཞུགས་པའི་སྤྱན་སྔར་བདག་གཞན་ནམ་མཁའ་དང་མཉམ་པའི་འགྲོ་བ་ཐམས་ཅད་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་སྙམ་པའི་བློས་འདིའི་རྗེས་ཟློས། ན་མོ༔ བདག་དང་མཐའ་ཡས་སོགས་ལན་གསུམ། ཕ་མར་གྱུར་པའི་སེམས་ཅན་ནམ་མཁའི་མཐའ་དང་མཉམ་པའི་འགྲོ་བ་མ་ལུས་སངས་རྒྱས་ཀྱི་ས་ལ་འགོད་པར་འདོད་པའི་སྨོན་སེམས་དང༌། དེའི་ཆེད་དུ་བླ་མ་རིག་འཛིན་འདུས་པའི་དཀྱིལ་འཁོར་དུ་ཞུགས་ནས་རྡོ་རྗེ་རྩེ་མོའི་མྱུར་ལམ་བགྲོད་པར་བགྱིའོ་སྙམ་པའི་འཇུག་པ་སེམས་བསྐྱེད་འདིའི་རྗེས་ཟློས། ཧོ༔ རིག་འཛིན་དཀྱིལ་འཁོར་སོགས་ལན་གསུམ། དེ་ནས་ཐུན་མོང་མ་ཡིན་པའི་ཡན་ལག་བདུན་པས་བསགས་སྦྱང་སྤེལ་གསུམ་བགྱི་བ་ལ། སྐྱེ་བ་མེད་པའི་ངང་ལས་སྐྱེ་བའི་ཆོ་འཕྲུལ་ཆུ་ལས་ཆུ་བུར་རྡོལ་བ་བཞིན་དུ་ཤེས་རབ་རང་བྱུང་གི་སྒྲོན་མ་འོད་གསལ་བསམ་བརྗོད་ལས་འདས་པའི་ཡེ་ཤེས་དབྱིངས་གདོད་ནས་རྣམ་དག་རང་བྱུང་སྐུ་གསུམ་ལྷའི་དཀྱིལ་འཁོར་དུ་བཞུགས་པ་ལས། རྒྱང་ཞགས་ཆུ་ཡི་སྒྲོན་མས་མཚམས་སྦྱར་ཏེ་རྟེན་ཐིག་ལེ་སྟོང་པའི་སྒྲོན་མས་མཚོན་པའི་དག་པ་དབྱིངས་ཀྱི་སྒྲོན་མའི་ཀློང་དུ་བརྟེན་པ་རིག་གདངས་སྤྲུལ་པའི་རྡོ་རྗེ་ལུ་གུ་རྒྱུད་དབང་པོས་མངོན་སུམ་མཐོང་བས་ལྷ་དང་ལྟ་བ་མཇལ་བའི་ཕྱག་འཚལ་ཞིང༌། དེ་ལས་འཇའ་ཚོན་ཟེར་ཐིག་ཉམས་སྣང་གོང་དུ་འཕེལ་པའི་མཆོད་སྤྲིན་རྒྱ་མཚོ་འབུལ་བ་དང༌། སྣང་བ་ཐམས་ཅད་སྐུ་དང་ཡེ་ཤེས་སུ་རང་ཤར་བའི་རིག་པ་ཚད་ཕེབས་ཆེན་པོའི་ངང་དུ་འཁོར་གསུམ་གཟུང་འཛིན་གྱི་སྡིག་ལྟུང་བཤགས་ཤིང༌། ཆོས་ཅན་གྱི་སྣང་བ་ཆོས་ཉིད་ཀྱི་ཀློང་དུ་ཟད་པའི་དག་པ་གཉིས་ལྡན་གྱི་འབྲས་བུ་ཟག་མེད་ཡེ་ཤེས་ཀྱི་ཚོགས་ཆེན་ཡོངས་སུ་རྫོགས་པ་ལ་རྗེས་སུ་ཡི་རང་བ་དང༌། ཕྱིར་གསལ་འཕོ་ཆེན་ཡེ་ཤེས་ཀྱི་སྐུའི་གསུང་རྡོ་རྗེ་རྒྱུན་གྱི་རྟག་པའི་ཀློང་དུ་རྫོགས་པ་ཆེན་པོའི་ཆོས་འཁོར་རྒྱུན་ཆད་མེད་པར་བསྐོར་ཞིང་འཇའ་ལུས་རྡོ་རྗེའི་སྣང་བརྙན་ཆེན་པོ་ཇི་སྲིད་དུ་བཞུགས་པར་གསོལ་བ་འདེབས་པ་དང༌། དེ་ལྟ་བུའི་ཟག་མེད་ཡེ་ཤེས་ཀྱི་དགེ་ཚོགས་སྒྲིབ་གཉིས་རྩད་ནས་དག་པ་གཞོན་ནུ་བུམ་པ་སྐུའི་ཀློང་དུ། ཆོས་ཀྱི་དབྱིངས་ལ་མི་བསྔོ་བར་ཤེས་པའི་ཚུལ་གྱིས་ཡོངས་སུ་བསྔོ་བ་སྟེ་ཁྱད་པར་ཅན་གྱི་ལྟ་སྒོམ་གྱི་གནད་དྲན་པས་འདིའི་རྗེས་ཟློས། ཧོ༔ ཆུ་ལས་ཆུ་བུར་སོགས་ལན་གསུམ། དེ་ཡང་དབང་ཐོབ་པ་དཀྱིལ་འཁོར་གྱི་བྱ་བས་ཐོབ་ཀྱང་དབང་སྲོག་རྒྱུད་ལ་འཛིན་པ་དམ་ཚིག་ལ་རག་ལས་པས་ཚོགས་ཞིང་དཀྱིལ་འཁོར་གྱི་ལྷ་དབྱེར་མེད་པ་དཔང་པོའི་ཚུལ་དུ་བཞུགས་པའི་སྤྱན་སྔར་མཁའ་ཁྱབ་ཀྱི་ཡིད་ཅན་སྲིད་ཞིའི་མཐའ་ལ་མི་གནས་པའི་ཟུང་འཇུག་ཆེན་པོའི་གོ་འཕང་ལ་འགོད་པའི་ལྷག་པའི་ཀུན་སློང་བྱང་ཆུབ་སེམས་དང་མ་བྲལ་བས་དམ་ཚིག་དང་སྡོམ་པའི་བསླབ་པ་རྒྱ་མཚོ་མཐའ་ཡས་བཟུང་ནས་རྒྱལ་བ་སྲས་དང་བཅས་པའི་སྤྱོད་ཡུལ་ལ་བསླབ་པར་དམ་བཅའ་བ་འདིའི་རྗེས་ཟློས། བླ་མ་རིག་འཛིན་སྐྱབས་ཀྱི་མཆོག་ཏུ་འཛིན། །འགྲོ་བའི་དོན་དུ་སྨོན་འཇུག་སེམས་བསྐྱེད་ཅིང༌། །སྐུ་གསུང་ཐུགས་དང་མཉམ་སྦྱོར་གསང་སྔགས་ཀྱི། །དམ་ཚིག་སྡོམ་པ་རྟག་ཏུ་སྲུང་བར་བགྱི། །ལན་གསུམ། དེ་ནས་ལྷ་དང་སྐལ་པ་མཉམ་པའི་ཕྱིར་དཀྱིལ་འཁོར་དུ་འཇུག་པའི་ཐོག་མར་སྒོ་དབྱེ་བར་གསོལ་བ་འདེབས་པ་འདིའི་རྗེས་ཟློས་མཛོད། ཀྱཻ། རིགས་ལྔ་བདེ་བར་གཤེགས་པ་དང༌། །བླ་མ་ཡི་དམ་མཁའ་འགྲོ་དགོངས། །སྒོ་བ་ཆེན་པོ་ཁྱེད་རྣམས་ཀྱིས། །སྒོ་ཕྱེ་ཐར་པའི་གྲོང་བསྟན་འཚལ། ཞེས་གསོལ་བ་བཏབ་པས། སྒོ་བ་གིང་ཆེན་སྡེ་བཞིས་དཀྱིལ་འཁོར་གྱི་སྒོ་བཞི་ཤག་གིས་ཕྱེ་པར་མོས་ཤིག །ས་མ་ཡ་པྲ་ཝེ་ཤ་ཡ་ཧཱུྃ། དབྱེ་རྒྱ་བཅས་བརྗོད། ཡོལ་བ་བསལ། ཁྱེད་རྣམས་ཀྱིས་དཀྱིལ་འཁོར་ཆེན་པོའི་ཤར་སྒོ་ནས་བརྩམས་རིམ་པར་གཡས་བསྐོར་དུ་ཕྱིན་ཏེ་ལྷ་ཚོགས་རྣམས་ཀྱི་སྐུ་གསུང་ཐུགས་ལ་ཕྱག་བྱ་བའི་མོས་པས་ཐལ་མོ་གནས་གསུམ་དུ་སྦྱར་ལ་འདིའི་རྗེས་ཟློས། ཨོཾ་ན་མ་ཏེ་ཧཱུྃ། ཨོཾ་ན་མ་མེ་ཧཱུྃ། ཨོཾ་ན་མོ་ན་མ་ཧཱུྃ། ལན་བཞི་བརྗོད། ཁྱེད་རང་རྣམས་དཀྱིལ་འཁོར་གྱི་ཤར་སྒོར་དབང་སྟེགས་པདྨ་འདབ་བརྒྱད་ལ་འཁོད་པར་མོས་ལ་ནང་འཇུག་གི་ཐོག་མ་དབང་གི་གཞི་འགོད་པ་ཡེ་ཤེས་དབབ་པ་ཡིན་པས་སྒོ་གསུམ་གྱི་གནད་གཅུན་ལ་དམིགས་པ་འདི་བཞིན་དུ་མཛོད། ཆོས་ཐམས་ཅད་རང་བཞིན་གྱིས་སྤྲོས་བྲལ་འོད་གསལ་སྟོང་པ་ཉིད་ཀྱི་རང་མདངས་ལྷུན་གྲུབ་དག་པ་རབ་འབྱམས་ཀྱི་དཀྱིལ་འཁོར་ཆེན་པོའི་དབུས་སུ་པདྨ་ཉི་ཟླ་བརྩེགས་པའི་གདན་གྱི་སྟེང་དུ། ཁྱེད་རང་རྣམས་སྐད་ཅིག་གིས་རིག་འདུས་རྗེ་བཙུན་མ་ཧཱ་གུ་རུ་སྣང་སྲིད་ཟིལ་གནོན་གྱི་ཆ་བྱད་ཅན་དཀར་ལ་དམར་བའི་མདངས་ཅན་ཕྱག་གཡས་སྡིགས་མཛུབ་དང་བཅས་པས་གསེར་གྱི་རྡོ་རྗེ་རྩེ་ལྔ་ནམ་མཁར་འཕྱར་བ། གཡོན་མཉམ་གཞག་གི་ཕྱག་རྒྱས་བྷནྡྷ་དང་ཚེ་བུམ་བཅུད་ལྡན་བསྣམས་པ། དབུ་ལ་པདྨའི་མཉེན་ཞུ་དང་སྐུ་ལ་ཕོད་ཀ་ཆོས་གོས་བེར་ཕྱམ་བརྩེགས་མར་གསོལ་བ། མཆན་ཁུང་གཡོན་དུ་རང་འོད་ཡེ་ཤེས་མཁའ་འགྲོས་འཁྱུད་ཅིང་ཞབས་རྒྱལ་པོ་རོལ་སྟབས་ཀྱིས་འཇའ་འོད་ཟེར་ཐིག་གི་ཀློང་ན་འགྱིང་ཞིང་བཞུགས་པའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོས་མཚན་པར་གསལ་ཐོབ། བླ་མ་དཀྱིལ་འཁོར་པའི་ཐུགས་ཀ་དང་ཁྱེད་རང་རྣམས་ཀྱི་གནས་གསུམ་ཡིག་འབྲུ་གསུམ་ལས་འོད་ཟེར་མུ་མེད་པ་འཕྲོས། ཕྱོགས་བཅུའི་སངས་རྒྱས་ཀྱི་ཞིང་དང་ཁྱད་པར་བླ་མ་སྐུ་གསུམ་གྱི་ཞིང་ཁམས་ན་བཞུགས་པའི་རྩ་གསུམ་རྒྱལ་བ་སྲས་དང་བཅས་པའི་ཐུགས་རྒྱུད་བསྐུལ། ཐམས་ཅད་ཀྱང་མ་ཧཱ་གུ་རུ་པདྨ་ཐོད་ཕྲེང་རྩལ་གྱི་རྣམ་པར་ནམ་མཁའ་གང་བར་བྱོན་ཏེ་ཁྱེད་རང་རྣམས་ལ་ཐིམ་པས་བྱིན་གྱིས་བརླབས་པའི་མོས་པ་བརྟན་པོ་མཛོད། སྦྱར་བའི་སྤོས་བསྲེགས། ཌཱ་དྲིལ་དང་དབྱངས་ཀྱིས་བསྐུལ་ལ་ལས་བྱང་ལྟར། སྔོན་བསྐལ་མར་ཐོད་ཕྲེང་རྩལ་གྱི་ཛབ་མཐར། ཧཱུྃ་ཧཱུྃ་ཧཱུྃ་ཨཱ་རལླི་ཕེཾ་ཕེཾ་བཏགས་པ་བརྗོད། ཡེ་ཤེས་པའི་བྱིན་རླབས་ཀྱི་རྒྱུན་སྒོ་གསུམ་ལ་བརྟན་པར་གྱུར་ཅིག །ཏིཥྛ་བཛྲ་ཧཱུྃ་དང་རྡོ་རྗེས་རྒྱས་གདབ། སྔར་བྱིན་པའི་མེ་ཏོག་དེ་ཉིད་རིགས་ཀྱི་ལྷ་ལ་འབུལ་བའི་མོས་པས་འདིའི་རྗེས་ཟློས་དང་བཅས་ཏེ་དོར་བར་ཞུ། ཀྱཻ། རིག་འཛིན་འདུས་པའི་དཀྱིལ་འཁོར་དུ། །འབྲེལ་བའི་མེ་ཏོག་འདི་དོར་བས། །ལས་འཕྲོ་གང་ཡོད་ལྷ་ལ་དབབ་པར་ཤོག །ཨོཾ་པུཥྤེ་སིདྡྷི་ཧཱུྃ། ཞེས་དོར་དུ་གཞུག །མེ་ཏོག་གང་ལ་ཕོག་པའི་རིགས་ཀྱི་ལྷས་སླར་ཡང་དབང་རྟགས་ཅོད་པན་དུ་བྱིན་པར་མོས་ཤིག །པྲ་ཏི་གྷྲྀ་ཧ་ན་ཨི་མཾ་སཏྭ་མ་ཧཱ་བཱ་ལ། རིགས་དང་མཐུན་པའི་གསང་མཚན་གདགས། མེ་ཏོག་སྤྱི་བོར་བཅིངས། དག་པ་ཡེ་ཤེས་ཀྱི་སྤྱན་གྱིས་ལྷ་དང་དཀྱིལ་འཁོར་མངོན་སུམ་དུ་མཇལ་བའི་རྟེན་འབྱུང་དུ་མིག་དབྱེ་བར་མོས་མཛོད། མིག་ཐུར་ཐོགས་ལ། སྟོན་པ་རིགས་ལྔའི་སངས་རྒྱས་ཀྱིས། །ཁྱེད་ཀྱི་མ་རིག་འཁོར་བའི་མིག །ཡེ་ཤེས་སྤྱན་དུ་དབྱེ་བ་ལྟར། །དེ་བཞིན་ཁྱེད་ཀྱིས་འགྲོ་བ་རྣམས། །ཡེ་ཤེས་སྤྱན་དུ་འབྱེད་པར་ཤོག །ཙཀྵུ་པྲ་བེ་ཤ་ཡ་ཕཊ། ཅེས་གདོང་གཡོགས་བསལ། ཕྱག་ཤིང་གིས་མཐོང་བ་བསྟན་ཏེ། ཀྱཻ། རིགས་ཀྱི་བུ་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ལ་སོགས་པའི་སངས་རྒྱས་ཀྱི་ཡེ་ཤེས་བརྡའི་དོན་རྟགས་ཀྱིས་མཚོན་པའི་མཚོན་བྱེད་ལྷག་པ་གཟུགས་བརྙན་གྱི་དཀྱིལ་འཁོར་དངོས་སུ་བཤམས་པ་དང་གཉིས་སུ་མེད་པའི་ལྷག་པའི་ཏིང་ངེ་འཛིན་གྱི་དཀྱིལ་འཁོར་ཡེ་ཤེས་རྡོ་རྗེ་སྲུང་བའི་འཁོར་ལོའི་ནང་དུ་འབྱུང་བ་རིམ་བརྩེགས་རི་རབ་དང་བཅས་པའི་གཞལ་མེད་ཁང་གྲུ་བཞི་སྒོ་བཞི་རྟ་བབ་ཆོས་འཁོར་རི་དྭགས་གདུགས་དང་བཅས་པ་པདྨ་ཉི་མ་སྣ་ཚོགས་རྡོ་རྗེའི་རྭ་བཅུ་གཉིས་པའི་ལྟེ་བར་གནས་པ། རིན་པོ་ཆེའི་རྩིག་པ་ལྔའི་སྟེང་དུ་ཕ་གུ་དྲྭ་བ་དྲྭ་ཕྱེད་ཤར་བུ་མདའ་ཡབ་དང་བཅས་པ། ནང་ཀ་བ་བརྒྱད་ཀྱིས་བཏེགས་ཅིང་རྡོ་རྗེའི་གདུང་གིས་ཕུབ་པའི་ཡ་ཕུབ་ཕྱུར་བུའི་རྩེར་རྡོ་རྗེ་རིན་པོ་ཆེའི་ཏོག་གིས་སྤྲས་པ། ཚད་དང་མཚན་ཉིད་ཐམས་ཅད་རྫོགས་ཤིང་རྒྱན་ཐམས་ཅད་ཀྱིས་བརྒྱན་པ། དེའི་ནང་དུ་སྣ་ཚོགས་པདྨ་ཉི་མ་ཟླ་བའི་སྟེང་དུ་རྩ་གསུམ་རྒྱལ་བ་རབ་འབྱམས་ཀྱི་རིགས་ཀུན་འདུས་པའི་སྤྱི་གཟུགས་དཀྱིལ་འཁོར་རྒྱ་མཚོའི་གཙོ་མཆོག་སྣང་སྲིད་ཟིལ་གནོན་མ་ཧཱ་གུ་རུ་ཞལ་གཅིག་ཕྱག་གཉིས་མཚན་དཔེའི་གཟི་བརྗིད་དཔལ་དུ་འབར་བ། རྡོ་རྗེའི་གསང་གོས་དཀར་པོ། ཆོས་གོས་དམར་པོ། བེར་མདུང་སྔོན་པོ། ཕོད་ཆེན་མཐིང་ག་རྣམས་བརྩེགས་མར་གསོལ་བ། ཕྱག་གཡས་རྡོ་རྗེ་རྩེ་ལྔ་འཕྱར་སྟབས་སུ་སྡིགས་མཛུབ་ཀྱིས་བསྣམས་ཤིང༌། གཡོན་མཉམ་བཞག་གིས་བྷནྡྷ་ཚེ་བུམ་བསྣམས་པ། ཞབས་རྒྱལ་པོ་རོལ་སྟབས་ཀྱིས་ལྷ་ལྕམ་མནྡྷཱ་ར་བ་གཅེར་བུ་གཞོན་མཛེས་ཅན་དང་གཉིས་མེད་དུ་འཁྲིལ་བ། རིགས་ལྔའི་དབང་རྟགས་རྫོགས་པས་དབུ་ལ་པདྨའི་མཉེན་ཞུ་ཅན། དབུ་གཙུག་ཏུ་དཔལ་ལྡན་རྡོ་རྗེ་སེམས་དཔའ་དང་གཉིས་སུ་མེད་པའི་རིག་འཛིན་དགའ་རབ་རྡོ་རྗེ། དེའི་དབུ་གཙུག་ཏུ་ཆོས་སྐུ་ཀུན་ཏུ་བཟང་པོ་བཅས་ཐེག་པ་མཆོག་གི་སྟོན་པ་རྣམ་གཉིས་ཐོ་བརྩེགས་སུ་བཞུགས་པ། ཕྱོགས་མཚམས་ཀྱི་འདབ་མ་བརྒྱད་ལ་བྱང་ཆུབ་སེམས་དཔའ་ཉེ་བའི་སྲས་བརྒྱད་དང་དཔལ་ཆེན་སྒྲུབ་སྡེ་བརྒྱད་ཀྱི་ངོ་བོ་བཀའ་བབ་རིག་འཛིན་ཆེན་པོ་བརྒྱད་བརྟུལ་ཞུགས་གྲུབ་པའི་ཧེ་རུ་ཀའི་ཆས་ཀྱིས་ཌཱ་དྲིལ་དང་བཅས་རྡོ་རྗེའི་གར་སྟབས་བསྒྱུར་བ། སྟེང་ཕྱོགས་སུ་གསང་སྔགས་ཕྱི་ནང་གི་རྒྱུད་སྡེ་དྲུག་གི་ཡི་དམ། སྤྲུལ་པའི་རྗེ་འབངས་ཉི་ཤུ་རྩ་ལྔ་སོགས་རྩ་གསུམ་རྒྱལ་བ་རབ་འབྱམས་ཐམས་ཅད་དང༌། གཞལ་ཡས་ཁང་གི་སྒོ་བཞིར་རིགས་ཀྱི་གིང་ཆེན་བཞི་དང༌། དཀྱིལ་འཁོར་ཕྱིའི་ཁོར་ཡུག་ལ་དཔལ་མགོན་བདུན་ཅུ་རྩ་ལྔ་དབང་ཕྱུག་ཉི་ཤུ་རྩ་བརྒྱད་ལ་སོགས་པས་མཚོན་ཕྱོགས་དུས་སྐྱབས་ཡུལ་རབ་འབྱམས་མཐའ་དག་བླ་མ་རིག་འཛིན་འདུས་པའི་དཀྱིལ་འཁོར་གཅིག་གི་ཡེ་ཤེས་ཀྱི་ཀློང་དུ་རྫོགས་པ་འདིས་མཚོན་བྱེད་དུ་བྱས་ཏེ་དབང་གིས་སྨིན་ཅིང་རིམ་པ་གཉིས་ཀྱི་ལམ་ལ་བརྩོན་པས་མཚོན་བྱ་དོན་གྱི་དཀྱིལ་འཁོར་རྡོ་རྗེའི་ཕུང་ཁམས་སྐྱེ་མཆེད་ཀྱི་རྩ་རླུང་ཐིག་ལེའི་རྣམ་པར་དག་པའི་རང་བཞིན་དུ་རང་ལ་བཞུགས་པར་ཤེས་པས། ཡིན་ཚུལ་གཤིས་ཀྱི་དཀྱིལ་འཁོར་རང་རིག་གདོད་ནས་དག་པའི་བདག་ཉིད་དུ་ངོ་འཕྲོད་དེ་ཟུང་འཇུག་རྡོ་རྗེའི་གོ་འཕང་མྱུར་དུ་ཐོབ་པའི་ཕྱི་ནང་གཞན་གསུམ་གཉིས་མེད་དུ་ངོ་སྤྲད་པ་ཡིན་པས་དད་གུས་སྤྲོ་བ་རྒྱ་ཆེན་པོ་མཛོད་ཅིག །དེ་དག་གིས་ལྷ་དང་སྐལ་པ་མཉམ་པའི་ཕྱིར་དཀྱིལ་འཁོར་ཕྱི་ནང་དུ་འཇུག་པའི་ཆོས་རྣམས་ལེགས་པར་གྲུབ་ནས། ད་དངོས་གཞི་དབང་བསྐུར་ཞུ་བའི་ཕྱིར་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་མཛོད། །ནམ་མཁའ་རྡོ་རྗེས་རྒྱལ་བ་ལྔར། །སོགས་ནས་བརྩམས་ཐུན་མོང་རིགས་དབང་ལྔ་དང༌། ནང་ནུས་འཇུག་གི་དབང་དམ་ཚིག་གསུམ་སྦྱིན་པ། བུམ་དབང་རྗེས་གནང་དང་བཅས་པ་དང༌། བུམ་དབང་སྐབས་རྩ་སྔགས་མ་ཧཱ་གུ་རུ་སྦྱར་བའི་ཁྱད་པར་ལས་གཞན་ཞི་ཁྲོའི་སྐབས་ལྟར་མཐར་ཆགས་སུ་བཏང༌། དབང་གི་སྐབས་ཀུན་གཟིགས་འཇམ་མགོན་ཆོས་ཀྱི་བློ་གྲོས་རིན་པོ་ཆེས་རྩ་སྔགས་མ་ཧཱ་གུ་རུ་སྦྱར་བར་མཛད་པ་རིག་འཛིན་སྣ་ཚོགས་རང་གྲོལ་ནས་དེ་ལྟར་མཛད་གསུངས་པས་སྒྲུབ་སྔགས་གཙོ་བོར་སྦྱར་ན་ལེགས་དགོངས་པ་དང༌། ཚེ་སྒྲུབ་ཀྱང་སྒྲུབ་སྔགས་ལ་སྦྱར་བའི་དགོངས་པ་ཡིན་ནམ་སྙམ། མཆན། རྗེས་འབྲེལ་སྐུ་ཕྱག་རྒྱའི་དབང་ལ། ཁྱད་པར་དུ་བུམ་དབང་དང་རྗེས་སུ་འབྲེལ་བར་སྐུ་ཕྱག་རྒྱའི་དབང་བསྐུར་བ་ལ། དཀྱིལ་འཁོར་གྱི་ལྷ་ཚོགས་རྣམས་ལས་རང་འདྲའི་སྐུ་གཉིས་པ་སྤྲོས་ནས་ཁྱེད་རང་རྣམས་ཀྱི་སྤྱི་བོར་བཞག་ནས་དབང་བསྐུར་བས་རིག་འཛིན་བླ་མ་རྣམས་ཀྱི་བྱིན་རླབས་དང་གསང་བ་གསུམ་གྱི་ཡོན་ཏན་ཆིག་རྫོགས་སུ་རྒྱུད་ལ་འཕོས་པར་མོས་ཤིག །ལྷ་དབང་པདྨ་རཱ་གའི་ཕྲེང་བ་ལྟར་ཡོངས་རྫོགས་སྦྱར་ཏེ་སོ་སོའི་ཙཀླིས་དབང་བསྐུར་མཐར། དེང་ནས་བཟུང་སྟེ་རང་ལུས་སྣང་སྟོང་ལྷའི་སྐུ་བསྒོམ་པ་དང་མ་བྲལ་བས་སྣང་སྲིད་གཞིར་བཞེངས་རིག་འཛིན་བླ་མ་སྒྱུ་འཕྲུལ་དྲྭ་བའི་དག་ཆེན་ཡེ་ཤེས་ཀྱི་འཁོར་ལོར་ཤེས་པའི་བསྐྱེད་རིམ་དང་མ་བྲལ་བར་མཛོད་ཅིག །དེ་རྣམས་ཀྱིས་བླ་མ་སྐུ་རྡོ་རྗེ་སྤྲུལ་པའི་སྐུའི་ཕྱི་མཚན་མའི་དཀྱིལ་འཁོར་དུ་བུམ་པའི་དབང་ཐོབ། ལུས་ཀྱི་ལས་དང་རྩ་ཡི་སྒྲིབ་པ་དག །སྐུ་རྡོ་རྗེའི་བྱིན་རླབས་ཞུགས། བསྐྱེད་རིམ་གྱི་སྣོད་དུ་གྱུར། རྣམ་སྨིན་རིག་འཛིན་གྱི་ས་བོན་ཐེབས། སྤྲུལ་སྐུའི་གོ་འཕང་གི་སྐལ་པ་རྒྱུད་ལ་བཞག་པ་ཡིན་ནོ། །གསུམ་པ་གསང་བ་ཟབ་མོའི་དབང་གསུམ་མཐའ་རྟེན་དང་ཡོངས་རྫོགས་གཏོར་མའི་དབང་བཅས་ལྔ་ལས། དང་པོ་གསང་དབང་གི་སླད་དུ་སློབ་དཔོན་རིགས་འདུས་ཐོད་ཕྲེང་རྩལ་རང་འོད་ཡེ་ཤེས་ཀྱི་མཁའ་འགྲོ་དང་སྙོམས་པར་ཞུགས་པའི་དཀར་དམར་བྱང་ཆུབ་ཀྱི་སེམས་སངས་རྒྱས་ཐམས་ཅད་འདུས་པའི་བཅུད་བྷནྡྷའི་བདུད་རྩི་དང་རོ་གཅིག་ཏུ་བྱས་པ་མགྲིན་པར་བཞག་ཅིང་མྱང་བར་མོས་ཤིག །གསང་རྫས་བྱིན་ལ། ཧཱུྃ༔ ཡབ་ཡུམ་སྦྱོར་བའི་བྱང་ཆུབ་སེམས༔ དཀར་དམར་བྷནྡྷའི་ནང་དུ་བསྐྱིལ༔ སྐལ་ལྡན་བུ་ལ་དབང་བསྐུར་བས༔ རྩ་ཁམས་ཡི་གེའི་རྣམ་པར་དག༔ ཚེ་ལ་དབང་བའི་རིག་འཛིན་ཐོབ༔ པདྨ་ཅན་གྱི་ས་ནོན་ཤོག༔ མ་ཧཱ་གུ་རུའི་མཐར། ཝཱཀྐ་ཨ་བྷི་ཥིཉྩ་ཨཱཿ རྗེས་འབྲེལ་དུ་བཟླས་ལུང་སྦྱིན་པ་ལ་དམིགས་པ་འདི་ལྟར་མཛོད། སློབ་དཔོན་གྱི་ཐུགས་ཀ་ནས་རྩ་བའི་སྔགས་ཕྲེང་ལུ་གུ་རྒྱུད་དུ་བྱུང༌། སློབ་མའི་མགྲིན་པ་ནས་ཞུགས་སྙིང་གར་འཁོར་བས་འགྱུ་བའི་རླུང་ཁམས་མཐའ་དག་གྲགས་སྟོང་སྔགས་ཀྱི་འཁོར་ལོར་རྫོགས་པར་མོས་ལ་འདིའི་རྗེས་ཟློས་མཛོད། བསྙེན་སྒྲུབ་ཀྱི་སྔགས་ལན་གསུམ་རྗེས་ཟློས་བྱར་གཞུག །དེ་ལྟར་བླ་མ་གསུང་རྡོ་རྗེ་ལོངས་སྐུའི་ནང་ལུས་ཀྱི་དཀྱིལ་འཁོར་དུ་གསང་བའི་དབང་ཐོབ། ངག་གི་ལས་དང་རླུང་གི་སྒྲིབ་པ་དག །གསུང་རྡོ་རྗེའི་བྱིན་རླབས་ཞུགས། བཟླས་བརྗོད་ཀྱི་སྣོད་དུ་གྱུར། ཚེ་དབང་རིག་འཛིན་གྱི་ས་བོན་ཐེབས། ལོངས་སྤྱོད་རྫོགས་པའི་གོ་འཕང་གི་སྐལ་པ་རྒྱུད་ལ་བཞག་པ་ཡིན་ནོ། །གཉིས་པ་ཤེས་རབ་ཡེ་ཤེས་ཀྱི་དབང་གི་སླད་དུ་གཟུགས་དང་ལང་ཚོ་མཛེས་པ་ཕུལ་དུ་ཕྱིན་ཞིང་རིགས་དང་སྐལ་པ་མཆོག་དང་ལྡན་པའི་ཤེས་རབ་མ་ལག་ཏུ་བྱིན་པར་མོས་ཤིག །རིག་ཙཀ་གཏད་ལ། ཧཱུྃ༔ ཆོས་རྣམས་ཀུན་གྱི་འབྱུང་གནས་ནི༔ བདེ་བ་ཆེན་པོ་གསང་བའི་ཡུམ༔ རིགས་ཀྱི་བུ་ལ་བྱིན་པ་ཡིས༔ དགའ་བཞིའི་ཡེ་ཤེས་མངོན་དུ་གྱུར༔ ཕྱག་རྒྱ་ཆེན་པོའི་རིག་འཛིན་ཐོབ༔ འཁོར་ལོ་ཚོགས་ཆེན་ས་ནོན་ཤོག༔ སྔགས་མཐར། ཙིཏྟ་ཨ་བྷི་ཥིཉྩ་ཧཱུྃ། དེ་ལྟར་བྱིན་པའི་རིག་མ་དེས། པདྨ་བྷཉྫ་མོ་ཀྵ་ཧོ། ཞེས་ཐར་པ་བསྟན་པར་བསྐུལ་ཏེ་པང་དུ་བྱོན་པ་དང་འདུ་ཤེས་གསུམ་ལྡན་གྱི་རྗེས་སུ་ཆགས་པའི་རོལ་མོས་དགའ་བཞིའི་ཡེ་ཤེས་ཉམས་སུ་མྱོང་བར་མོས་ཤིག །དེ་ལྟར་བླ་མ་ཐུགས་རྡོ་རྗེ་ཆོས་ཀྱི་སྐུའི་གསང་བ་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་ལས་དང་ཐིག་ལེའི་སྒྲིབ་པ་དག །ཐུགས་རྡོ་རྗེས་བྱིན་རླབས་ཞུགས། བདེ་སྟོང་ཙཎྜ་ལིའི་སྣོད་དུ་གྱུར། ཕྱག་རྒྱའི་རིག་འཛིན་གྱི་ས་བོན་ཐེབས། ཆོས་སྐུའི་གོ་འཕང་ཐོབ་པའི་སྐལ་པ་རྒྱུད་ལ་བཞག་པ་ཡིན་ནོ། །གསུམ་པ་བརྡ་ཚིག་གི་དབང་ལ། གཞི་ཀ་དག་གི་ལྟ་བ་མཚོན་པའི་མེ་ལོང་དྭངས་གསལ། ལམ་ལྷུན་གྲུབ་ཀྱི་སྒོམ་པ་མཚོན་པའི་འཇའ་ཚོན་ལ་བརྟེན་ནས་དཔེ་དོན་འབྲེལ་བའི་འོད་གསལ་གྱི་རང་ངོ་ལ་མཉམ་པར་ཞོག་ཅིག །ཤེལ་རྡོ་དང་མེ་ལོང་བསྟན་ལ། ཧོ༔ ཀ་དག་མེ་ལོང་གཙང་མའི་ངོགས༔ ལྷུན་གྲུབ་དྭངས་ཤེལ་དྲི་མེད་གསལ༔ བརྡ་རྟགས་རྫོགས་པས་དབང་བསྐུར་བས༔ དྲི་མེད་རིག་པའི་གནས་ལུགས་རྟོགས༔ ལྷུན་གྲུབ་རིག་འཛིན་ཉེར་ཐོབ་ནས༔ བདེ་བ་ཆེན་པོའི་ས་ནོན་ཤོག༔ སྔགས་མཐར། དྷརྨ་དྷཱ་ཏུ་ཨ་བྷི་ཥིཉྩ་ཨཱཿ ཁྱེད་རང་རྣམས་ལུས་གནད་བསྲང་ལ་ཀ་དག་སྤྲོས་མཐའ་བྲལ་བའི་ངང་དུ་མཉམ་པར་འཇོག་འཚལ། ཞེས་རེ་ཞིག་བཞག་དེའི་ངང་ལ། ཕཊ། དྲག་པོ་ཞིག་བརྗོད། སེམས་གང་ཡིན། རྟབ་རྟབ་ཏུ་དྲིས་པས། སྣང་བ་ཧད་དེ་ཕྱད་དེ་ཅི་ཟེར་ཆ་མེད་པ་བྱུང་ཚོར་གྱི་སྤྲོས་པ་འགགས་པ་དེ་ཉིད་རང་གནས་ཀྱི་ཡེ་ཤེས་སུ་ངོ་ཤེས་པར་གྱིས་ཤིག །དེའང་ལྟ་བ་ལུང་རིག་དང་འབྲེལ་བ་ཞེས་བྱ་བ་ཡིན་པས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་གྱུར་རྫོགས་པ་ཆེ། །ཞེས་གསུངས་པའི་དོན་ལགས་སོ། །དེ་ནས་སློབ་དཔོན་ལྟ་དགོངས་ཅན་ཡིན་ན། ཐུགས་ཀར་ཨ་ཡིག་ཞིག་གསལ་བ་ལ་སློབ་མའི་རིག་པ་གཏད་དུ་གཞུག་ལ་དཔོན་སློབ་གཉིས་ཀ་མཉམ་པར་བཞག །སྒོམ་པ་ཉམས་མྱོང་དང་འབྲེལ་བའི་གཤིས་ནས་ཨ་ཉི་ཤུ་རྩ་གཅིག་བརྩེགས་མར་བརྗོད་དོ། །དེ་ལྟར་བླ་མ་ཡེ་ཤེས་རྡོ་རྗེ་ངོ་བོ་ཉིད་སྐུའི་དེ་ཁོ་ན་ཉིད་དོན་དམ་བདེ་བ་ཆེན་པོའི་དཀྱིལ་འཁོར་དུ་དབང་བཞི་པ་ཐོབ། ཀུན་གཞིའི་ལས་དང་ཤེས་བྱའི་སྒྲིབ་པ་དག །ཡེ་ཤེས་རྡོ་རྗེའི་བྱིན་རླབས་ཞུགས། ཀ་དག་རྫོགས་པ་ཆེན་པོའི་སྣོད་དུ་གྱུར། ལྷུན་གྲུབ་རིག་འཛིན་གྱི་ས་བོན་ཐེབས། ངོ་བོ་ཉིད་སྐུའི་གོ་འཕང་གི་སྐལ་པ་རྒྱུད་ལ་བཞག་པ་ཡིན་ནོ། །བཞི་པ་མཐའ་རྟེན་བཀའ་ལུང་ཡོངས་རྫོགས་གཏད་པ་ཡིན་པས། རྩ་བརྒྱུད་ཀྱི་བླ་མ་རྣམས་ལ་མོས་གུས་གདུང་ཤུགས་དྲག་ཏུ་བསྐྱེད་པས་དེ་དག་གི་དགོངས་རྒྱུད་བྱིན་རླབས་མཐའ་དག་ཁྱེད་རང་གི་རྒྱུད་ལ་འཕོས། རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཚིག་དང་དོན་གྱི་གསང་བ་མཐའ་དག་གི་དབང་ཆེན་ཐོབ་པར་མོས་ཤིག །གླེགས་བམ་མགོ་བོར་བཞག་ལ། ཧོཿ ཆོས་སྐུ་ཀུན་ཏུ་བཟང་པོ། ལོངས་སྐུ་རྒྱལ་བ་རིགས་ལྔ། སྤྲུལ་སྐུ་དགའ་རབ་རྡོ་རྗེ། སློབ་དཔོན་འཇམ་དཔལ་བཤེས་གཉེན། རིག་འཛིན་ཤྲཱི་སིངྷ། པཎ་ཆེན་བི་མ་མི་ཏྲ། ཨོ་རྒྱན་པདྨ་ཐོད་ཕྲེང༌། མཁའ་འགྲོ་ཡེ་ཤེས་མཚོ་རྒྱལ། མངའ་བདག་ཁྲི་སྲོང་ལྡེའུ་བཙན། རྒྱལ་སྲས་དྲི་མེད་འོད་ཟེར། ཀློང་ཆེན་ནམ་མཁའི་རྣལ་འབྱོར་ལ་སོགས་པ་རང་བཞིན་རྫོགས་པ་ཆེན་པོའི་རྩ་བ་དང་བརྒྱུད་པར་བཅས་པའི་དཔལ་མགོན་རིག་འཛིན་བླ་མ། ཡི་དམ་མཁའ་འགྲོ་རྒྱ་མཚོ། ཆོས་སྲུང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱིས། དེང་འདིར་རྡོ་རྗེའི་སློབ་མ་རྣམས་ལ་དབང་བསྐུར་དུ་གསོལ། བྱིན་གྱིས་བརླབ་ཏུ་གསོལ། རྟོགས་པ་སྤར་དུ་གསོལ། བརྟུལ་ཞུགས་བསྐྱེད་དུ་གསོལ། བྱ་རྩོལ་བློ་འདས་རྫོགས་པ་ཆེན་པོའི་ཀློང་དུ་དགོངས་པའི་བཙན་ས་ཟིན་ཏེ་ཚེ་གཅིག་ལུས་གཅིག་ལ་འཇའ་ལུས་འཕོ་བ་ཆེན་པོའི་སྐུ་མཆོག་བརྙེས་ནས་དཔལ་ཀུན་ཏུ་བཟང་པོའི་གོ་འཕང་ལ་འགོད་པར་མཛད་དུ་གསོལ། ཞེས་ལན་གསུམ་བརྗོད་ཅིང་རིག་པ་གཏད་མེད་ངང་དུ་བཞག་ལ་དོན་བརྒྱུད་འཕོ། ལྔ་པ་ཡོངས་རྫོགས་གཏོར་མའི་དབང་བསྐུར་བ་ལ། སྤྱིར་གཏོར་མ་ལ་བསྙེན་སྒྲུབ་ཀྱི་དུས་སུ་དཀྱིལ་འཁོར་དུ་ཤེས་པ་དང༌། མཆོད་པའི་དུས་སུ་འདོད་ཡོན་དུ་ཤེས་པ། དབང་གི་དུས་སུ་ལྷར་ཤེས་པ། རྗེས་དངོས་གྲུབ་ཏུ་ཤེས་པ་རྣམས་སུ་ཡོད་པ་ལས། འདིར་དབང་དུས་ལྷར་ཤེས་པར་བྱ་བ་ཡིན་པས་ཐུགས་དམིགས་འདི་བཞིན་དུ་མཛོད། རིག་འཛིན་བླ་མའི་གཏོར་ཆེན་འདི་ཉིད་ཕྱི་ལྟར་རིན་ཆེན་འབར་བའི་གཞལ་ཡས་ཁང་ཡངས་ཤིང་རྒྱ་ཆེ་བ་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ། ནང་ལྟར་ཐེག་མཆོག་རྫོགས་པ་ཆེན་པོའི་བླ་མ་སྐུ་གསུམ་ཐོ་བརྩེགས་སུ་བཞུགས་ཤིང༌། འཁོར་བཀའ་བབ་རིག་འཛིན་བརྒྱད་དང་རྩ་བ་གསུམ་གྱི་ལྷ་ཚོགས་སྤྲིན་ལྟར་གཏིབས་པ། ཆོས་སྐྱོང་སྲུང་མ་རྣམས་ཀྱིས་ལས་མཛད་པའི་བླ་མ་རིག་འཛིན་རྩ་གསུམ་སྒྱུ་འཕྲུལ་དྲྭ་བ་ཆེན་པོའི་རྟེན་དང་བརྟེན་པའི་དཀྱིལ་འཁོར་ཡོངས་རྫོགས་སུ་ཤར་བ་ཁྱེད་རང་རྣམས་ཀྱི་སྤྱི་བོར་སྤྱན་དྲངས་ཤིང་བྱིན་གྱིས་བརླབས་པ་ལ་བརྟེན་ནས། གཙོ་འཁོར་ཐམས་ཅད་ཀྱི་གནས་བཞིར་ཨོཾ་ཨཱཿཧཱུྃ་དང་ཧྲཱིཿཡིག་གིས་མཚན་པ་ལས་འོད་ཟེར་དཀར་དམར་མཐིང་ག་སྣ་ཚོགས་པའི་མདོག་ཅན་དཔག་ཏུ་མེད་པ་བྱུང༌། ཁྱེད་རང་རྣམས་ཀྱི་གནས་བཞིར་ཐིམ་པ་ལ་བརྟེན་ནས་ཕྱི་ནང་གསང་བ་དེ་ཁོ་ན་ཉིད་ཀྱི་དབང་བཞི་སྟན་ཐོག་གཅིག་ཏུ་ཐོབ། ལུས་ངག་ཡིད་གསུམ་ཆ་མཉམ་གྱི་སྒོ་ནས་བསགས་པའི་འགལ་རྐྱེན་སྡིག་སྒྲིབ་བར་དུ་གཅོད་པ་ཐམས་ཅད་ཉེ་བར་ཞི་ཞིང༌། གནས་སྐབས་སུ་དབང་བཞིའི་ལམ་བསྒོམ་པ་དང༌། མཐར་ཐུག་སྐུ་བཞིའི་གོ་འཕང་ཐོབ་པའི་སྐལ་པ་ཅན་དུ་བྱས་པའི་མོས་པ་དུང་དུང་མཛོད་ཅིག །ཅེས་བརྡ་སྦྱར་ལ། ཧཱུྃ། དཀྱིལ་འཁོར་གཙོ་བོ་པད་འབྱུང་ཡབ་ཡུམ་དང༌། འདི་རྡོ་གྲུབ་རིན་པོ་ཆེ་འཇིགས་མེད་ཕྲིན་ལས་འོད་ཟེར་གྱི་རྡོ་རྗེའི་གསུང༌། མཆན། རིགས་བདག་དགའ་རབ་རྡོ་རྗེ་སེམས་དཔའ་ཆེ། །ཀུན་བཟང་ཡབ་ཡུམ་རྒྱ་གར་རིག་འཛིན་བརྒྱད། །རྗེ་རྒྱལ་འབངས་རིགས་ཉེར་ལྔ་ཡི་དམ་ལྷ། །རྒྱུད་སྡེ་བཞི་དྲུག་དཔའ་བོ་མཁའ་འགྲོའི་ཚོགས། །དཔལ་མགོན་བདུན་ཅུ་རྩ་ལྔ་དབང་ཕྱུག་མ། །ཉེར་བརྒྱད་སྒོ་སྐྱོང་གིང་ཆེན་བཞི་བཅས་ཀྱི། །སྐུ་གསུང་ཐུགས་ཡོན་ཕྲིན་ལས་དབང་རྣམས་ཀུན། །སྐལ་ལྡན་ལས་ཅན་རྣམས་ལ་བསྐུར་བ་ཡིས། །ལུས་ངག་ཡིད་གསུམ་སྒོ་གསུམ་ཆ་མཉམ་བཞིའི། །སྒྲིབ་བཞི་ཡོངས་དག་རིག་འཛིན་རྣམ་བཞིའི་ལམ། །སྐུ་བཞིའི་གོ་འཕང་ཐོབ་པའི་རྟེན་འབྲེལ་བསྒྲིགས། །མཐར་ཐུག་གཞོན་ནུ་བུམ་སྐུ་མངོན་གྱུར་ཤོག །ཨོཾ་ཨཱཿཧཱུྃ་བཛྲ་མ་ཧཱ་གུ་རུ་སརྦ་སིདྡྷི་ཧཱུྃ༔ ཀཱ་ཡ་སིདྡྷི་ཨོཾ། ཝཱཀྐ་སིདྡྷི་ཨཱཿ ཙིཏྟ་སིདྡྷི་ཧཱུྃ། གུ་ཎ་སིདྡྷི་ཏྲཱཾ། སརྦ་སིདྡྷི་ཧྲཱིཿ གཏོར་མ་གནས་སོ་སོར་བཞག རྗེས་དངོས་གྲུབ་ཏུ་ཤེས་པའི་ཕྱིར་གཏོར་མའི་ལྷ་འོད་དུ་ཞུ་བའི་གཏོར་ཟན་དངོས་གྲུབ་ཀྱི་རང་བཞིན་བདུད་རྩིའི་དྭངས་བཅུད་དུ་འཁྱིལ་བ་མྱངས་བས་རྩ་ཁམས་ཐམས་ཅད་ལ་ཁྱབ། ཟག་མེད་ཀྱི་བདེ་བས་རྒྱུད་གང༌། མཆོག་དང་ཐུན་མོང་གི་དངོས་གྲུབ་མ་ལུས་པ་ཐོབ་པའི་མོས་པ་མཛོད། ཅེས་བརྡ་སྦྱར་ལ་གཏོར་ཟན་དངོས་སམ། མཐའ་སྐོར་གྱི་མཐེབ་ཀྱུ་ལྟ་བུ་བདུད་རྩི་དང་སྦྱར་ནས་སྦྱིན། དེ་དག་གིས་དབང་བསྐུར་གྱི་རིམ་པ་ཡོངས་སུ་རྫོགས་པས་སྒོ་གསུམ་བྱ་བ་དང་བཅས་པ་དཀྱིལ་འཁོར་གྱི་ལྷ་ཚོགས་རྣམས་ཀྱི་གསང་གསུམ་ཕྲིན་ལས་དང་བཅས་པ་གཉིས་སུ་མེད་པར་གྱུར་ནས་ཁམས་གསུམ་ཆོས་ཀྱི་རྒྱལ་པོ་ཕྱོགས་ལས་རྣམ་པར་རྒྱལ་བའི་གོ་འཕང་ཐོབ་པར་གྱུར་པ་ལ། རྒྱལ་སྲིད་བདུན་གཏད་ལ། ཕྱིའི་རྟེན་འབྲེལ་བསྐལ་པ་རྫོགས་ལྡན་གྱི་དགའ་སྟོན་ལ་སྤྱོད་པའི་འཁོར་ལོས་བསྒྱུར་རྒྱལ་རྣམས་ལ་སྔོན་གྱི་རྣམ་དཀར་གྱི་མཐུ་ལས་སྣང་བའི་རྒྱལ་སྲིད་རིན་པོ་ཆེ་སྣ་བདུན་གྱིས་ས་གསུམ་འཇིག་རྟེན་ཀུན་ཏུ་དབང་བསྒྱུར་བ་དང༌། ནང་དུ་འཕགས་པའི་ནོར་བདུན་གྱི་འབྱོར་པས་ལམ་ལྔའི་ཡོན་ཏན་ལ་དབང་བསྒྱུར་བའི་བརྡར་རྒྱལ་སྲིད་རིན་ཆེན་བདུན་གྱི་འབྱོར་པས་མངའ་གསོལ་བར་མོས་ཤིག །བཀྲ་ཤིས་རྟགས་བརྒྱད་གཏད་ལ། བསོད་ནམས་བརྒྱ་ལས་གྲུབ་པའི་སངས་རྒྱས་རྣམས་ཀྱི་མཚན་དཔེའི་དཔལ་ལས་སྣང་བའི་བཀྲ་ཤིས་པའི་རྟགས་མཆོག་བརྒྱད་ཀྱིས་དབང་བསྐུར་བས་བདུད་དང་མུ་སྟེགས་སོགས་ཕས་རྒོལ་གྱི་གཡུལ་ལས་རྒྱལ་ཞིང་འགྲོ་ཀུན་དེ་བཞིན་གཤེགས་པའི་མཚན་རྟགས་སོགས་སྤྱོད་ཡུལ་རླབས་པོ་ཆེ་ལ་འཇུག་པའི་དབང་ཐོབ་པར་མོས་ཤིག །བཀྲ་ཤིས་རྫས་བརྒྱད་གཏད་ལ། སྟོན་མཆོག་རྫོགས་པའི་སངས་རྒྱས་འཇིག་རྟེན་གྱི་འདྲེན་པར་བྱོན་ནས་འདུལ་བ་བཞི་ཡི་ཕྲིན་ལས་དང༌། མཛད་པ་བཅུ་གཉིས་ཀྱིས་འགྲོ་བའི་འདྲེན་པར་བྱོན་པའི་ཚེ་ལྷ་མིའི་དབང་པོ་དག་གིས་རྟེན་འབྲེལ་གྱི་རྫས་ཕུལ་བ་རྣམས་དུས་ཀུན་ཤིས་པ་སྤེལ་བའི་བཀྲ་ཤིས་གྲུབ་པའི་རྫས་མཆོག་བརྒྱད་དུ་བྱིན་གྱིས་བརླབས་པས་དབང་བསྐུར་བས་ཕྱོགས་དུས་གནས་སྐབས་ཀུན་ཏུ་དགེ་ལེགས་རྟགས་ཀྱི་ཉི་མ་ཁོར་ཡུག་ཏུ་འཆར་བའི་དབང་ཐོབ་པར་མོས་མཛོད། དེ་དག་ནི་སྤྲོས་པ་མཚམས་པའི་དབང་དུ་བྱས་ཀྱི་རྒྱས་པར་གྲུབ་ཆེན་ཕྲིན་ལས་འོད་ཟེར་གྱི་གསུང་ལྟར་སྦྱར་དགོས་སོ། །ལས་བྱང་ནས་འབྱུང་བ་ལྟར་ཤིས་པ་བརྗོད། དེ་དག་རྣམས་ཀྱིས་རིག་འཛིན་ཆེན་པོ་འཇིགས་མེད་གླིང་པའི་དགོངས་གཏེར་ཀློང་ཆེན་སྙིང་གི་ཐིག་ལེའི་ནང་སྒྲུབ་རིག་འཛིན་འདུས་པའི་དབང་བསྐུར་རྒྱས་པ་གྲུབ་ཆེན་རིན་པོ་འཇིགས་མེད་ཕྲིན་ལས་འོད་ཟེར་གྱི་མན་ངག་ལུགས་ལྟར་ལེགས་པར་གྲུབ་པ་ལགས་པས་རྩ་བ་དང་ཡན་ལག་གི་དམ་ཚིག་མཐའ་དག་ཅི་ནུས་སུ་འབད་པས་བསྲུང་སྙམ་པས་འདིའི་རྗེས་ཟློས། རྩ་བ་སྐུ་གསུང་ཐུགས་མཆོག་དང༔ ཡན་ལག་དམ་ཚིག་ཉི་ཤུ་ལྔ༔ མེད་དང་གཅིག་པུ་ཕྱལ་བ་སོགས༔ ཆོ་ག་བཞིན་དུ་སྲུང་བར་བགྱི༔ ལན་གསུམ། གཏང་རག་གི་མཎྜལ་ཕུལ། སླར་ཡང་ལུས་ལོངས་སྤྱོད་ཐམས་ཅད་ལྟོས་པ་མེད་པར་ཁྱབ་བདག་བླ་མ་ཉིད་ལ་འབུལ་བའི་བློས་འདིའི་རྗེས་ཟློས། གཙོ་བོས་ཇི་ལྟར་བཀའ་བསྩལ་པ། །དེ་དག་ཐམས་ཅད་བདག་གིས་བགྱི། །ཁྱེད་ལ་བདག་ཀྱང་ཡོངས་སུ་འབུལ། །སློབ་མར་བཟུང་ནས་སྤྱད་དུ་གསོལ། །ལན་གསུམ། དགེ་བསྔོ་བྱས་ལ་སློབ་མ་རྣམས་གྲོལ། སློབ་དཔོན་གྱིས་ཚོགས་མཆོད། སྤྲོ་ན་བསྐང་བཤགས་རྡོ་རྗེའི་ཐོལ་གླུ་དང༌། རིག་འདུས་རང་གི་བསྐང་བ་ཀུན་གཟིགས་མཁྱེན་བརྩེ་རིན་པོ་ཆེའི་གསུང་སོགས་སྦྱར་ཞིང་ཚོགས་ལ་རོལ། ལྷག་མ་ནས་ཤིས་བརྗོད་བར་གསང་བ་སྤྱི་ལྟར་མཐར་དབྱུང་བས་གྲུབ་བོ། །དེ་དག་གིས་འོད་གསལ་སྙིང་ཐིག་གི་རྩ་བའི་ཆོས་བདག་གྲུབ་ཆེན་རིན་པོ་ཆེ་ཀུན་བཟང་གཞན་ཕན་གྱི་གསུང་གི་དགོངས་པ་ལྟར་ཡིད་རྟོན་འོས་པ་ཡིན་ལ། གྲུབ་རྗེས་གསུང་དངོས་རྙེད་ན་དེ་ཉིད་གཙོ་བོར་བྱ་བ་ལས་ཡན་ལག་བརྒྱད་པའི་མཚོ་འགྲམ་དུ་བ་ཚྭའི་ཁྲོན་པ་ལ་ཡིད་གདུང་བར་མི་བྱའོ། །འདི་ལ་གཏེར་གཞུང་རྩ་བའི་དགོངས་པ་དངོས་བསྟན་རྒྱལ་ཐབས་སྤྱི་བླུགས་ལྟར་འབོག་ན་འཇམ་མགོན་པདྨ་གར་དབང་གི་གསུང་པདྨའི་དོ་ཤལ་ལྟར་ཤེས་པར་བྱའོ། །ཀུན་མཁྱེན་ཡེ་ཤེས་ཀློང་ལྔའི་མཛོད། །བརྩེ་ཆེན་ཐུགས་ཀྱི་ཐིག་ལེའི་བཅུད། །བྱིན་རླབས་རྩ་བ་བླ་མ་ཡི། །ཐུགས་སྒྲུབ་སྨིན་བྱེད་འོད་ཟེར་རྨད། །ཅེས་སྒྲུབ་སྡེའི་ཐོག་མ་བྱིན་རླབས་ཀྱི་རྩ་བ་བླ་མ་རིག་འཛིན་འདུས་པའི་དབང་བསྐུར་རྒྱས་པར་སྤྲོས་པའི་ལེའུ་ཚན་གཉིས་པ་སྟེ་པདྨ་དབང་ཆེན་དགྱེས་པ་རྩལ་གྱིས་སྦྱར་བའོ། ༈ བླ་མ་དྲག་པོ་དམར་ཆེན་རྟ་ཁྱུང་འབར་བའི་དབང་ལ་གྲུབ་ཆེན་རིན་པོ་ཆེ་ཀུན་བཟང་གཞན་ཕན་གསུང་དང༌། འཇམ་མགོན་ཀོང་སྤྲུལ་རིན་པོ་ཆེའི་གསུང་རྡོ་རྗེའི་དོ་ཤལ། མཁྱེན་བརྩེ་རིན་པོ་ཆེའི་དབང་བསྡུས་གྲངས་བསགས་བཅས་རྡོ་རྗེའི་གསུང་དུ་མ་བཞུགས་བཞིན་པའོ། ༈ བདེ་ཆེན་སྣང་བ་རྒྱས་པའི་གཟི་འོད་ཀྱིས། །ས་གསུམ་ནང་གི་མུན་པ་སེལ་མ་ཐག །གྲུབ་གཉིས་ཀུན་དགའི་དགའ་སྟོན་རབ་གསལ་གཉེན། །བླ་མ་རྡོ་རྗེ་སེམས་དཔའ་རྒྱལ་གྱུར་ཅིག །རྡོ་རྗེ་སེམས་དཔའ་ལ་བརྟེན་པའི་བླ་མཆོད་བདེ་ཆེན་ལམ་བཟང་གི་ཁྱད་པར་གྱི་ཕྲིན་ལས་བདེ་ཆེན་སྙིང་པོའི་བྱེ་བྲག་རྡོ་རྗེའི་ཚེ་སྒྲུབ་པའི་ཆོ་ག་དང་འབྲེལ་བར་སློབ་མ་རྗེས་སུ་འཛིན་པའི་ཚུལ་ལ། ཁྱད་པར་གྱི་ཕྲིན་ལས་ལྟར་གཞུང་བསྲང༌། ཚེ་རྫས་ལ་ཚེ་འགུགས་བསྟིམ། ལས་བུམ་སྒྲུབ་པ། ཚོགས་བསགས་བཅས་གྲུབ་པ་དང་སློབ་མ་ལ་ཁྲུས་བྱ། བགེགས་བསྐྲད། སྲུང་འཁོར་བསྒོམས་ནས། དེ་ལ་འདིར་ཐེག་མཆོག་རྫོགས་པ་ཆེན་པོ་ཤིན་ཏུ་རྣལ་འབྱོར་གྱི་གསེང་ལམ ལས་སྐུ་ཚེ་གཅིག་ལ་བདེ་ཆེན་རྡོ་རྗེ་སེམས་དཔའི་གསང་གསུམ་ཡེ་ཤེས་ཀྱི་ཕྱག་རྒྱ་ལ་དབང་འབྱོར་བའི་ཀུན་མཁྱེན་གྲུབ་བརྒྱའི་དཔྱིད་རང་བྱུང་རྡོ་རྗེ་འཇིགས་མེད་གླིང་པ་ལ་དབྱིངས་ཀྱི་མཁའ་འགྲོས་ཟབ་རྒྱས་ཆོས་ཀྱི་གསང་མཛོད་གཏད་པའི་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྐོར་ཟབ་རྒྱས་བཞུགས་པའི་ཡང་སྙིང་རྡོར་སེམས་མངོན་དགའི་ཞིང་སྦྱོང་གི་བླ་སྒྲུབ་རྩ་བ་ཙམ་རྒྱལ་བའི་དགོངས་བཅུད་མངོན་དུ་ཕྱུངས་པ། སླར་ཡང་རྗེ་དེ་ཉིད་ཀྱི་སྨོན་ལམ་ཐུགས་རྗེའི་ཆོ་འཕྲུལ་ཟད་མི་ཤེས་པའི་རོལ་རྩེད་གངས་ཅན་མཁས་གྲུབ་ཡོངས་ཀྱི་དད་དཔོན་ཀུན་གཟིགས་འཇམ་དབྱངས་མཁྱེན་བརྩེའི་དབང་པོའི་དག་སྣང་དུ་ཀུན་མཁྱེན་ཉིད་ཀྱི་ཡེ་ཤེས་ཀྱི་སྐུས་རྗེས་སུ་བཟུང་སྟེ་ཉེ་བརྒྱུད་དུ་བསྩལ་ནས་བླ་མ་མཆོད་པའི་གཞུང་རྩ་བ་ཡན་ལག་དང་བཅས་པའི་ཆོས་བཀའ་ཟབ་རྒྱས་ངོ་མཚར་རྨད་བྱུང་གི་ཚུལ་དུ་བཞུགས་པ་ལས་འདིར་ནི་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་རྒྱུད་རྒྱས་པ་ལས། བུམ་པ་མཆོག་ནི་བཟང་པོ་ཉིད། །ཚེ་བཞག་གནས་ནི་འདི་ཡིན་ཏེ། །ཡང་ནས་ཡང་དུ་འགུགས་བྱ་ཞིང༌། །མངོན་སུམ་སྨིན་པར་གྱུར་པ་དང༌། །དབྱིངས་སུ་ཡང་ནི་སྦ་བར་བྱ། །རྡོ་རྗེའི་གོ་ཆ་སྲུང་བ་ཡིས། །བརྟན་ཅིང་འཁོར་ལོས་དགག་པར་བྱ། །ཞེས་རྡོ་རྗེའི་ཚེ་སྒྲུབ་པའི་རྟེན་དང༌། འགུགས་པ་དང༌། བསྟིམ་པ་དང༌། སྦ་བ་དང༌། སྲུང་བའི་ཚུལ་སོགས་རྒྱུད་ལས་རྒྱ་ཆེར་བྱུང་བ་མན་ངག་གིས་ལུང་དུ་བསྡེབས་ནས་བྱིན་རླབས་ཉེ་བརྒྱུད་ཀྱི་གཟི་བྱིན་འབར་བ་རྡོ་རྗེ་སེམས་དཔའི་ཚེ་དང་ལང་ཚོ་སྒྲུབ་པའི་ཐོག་མར་དབང་གི་ཆོ་ག་ཟབ་མོས་རྒྱུད་སྨིན་དགོས་པའི་ཕྱིར་དེ་ཉིད་གསན་པའི་ཡོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་མཛོད། རྡོ་རྗེ་སེམས་དཔའ་བདེ་བ་ཆེ། །སྒྱུ་འཕྲུལ་གཙོ་བོ་དགོངས་སུ་གསོལ། །རྡོ་རྗེའི་ཚེ་དང་ཡེ་ཤེས་ཀྱི། །དབང་དང་དངོས་གྲུབ་བསྩལ་དུ་གསོལ། །ལན་གསུམ། ཡན་ལག་བརྒྱད་པས་རྒྱུད་སྦྱང་བ། བླ་མ་རྡོ་རྗེ་སེམས་དཔའ་སོགས། དེ་ནས་ནང་འཇུག་གི་དངོས་གཞི་ཡེ་ཤེས་དབབ་སོགས་ནས། ཏིཥྛ་བཛྲས་བརྟན་པར་བྱས་པའི་མོས་པ་མཛོད། བར་དབང་གཞུང་ལྟར་དང༌། ཚེ་འགུགས་ལ། བདག་མདུན་ལྷར་གསལ་བའི་ཐུགས་སྲོག་ས་བོན་ལས་འོད་ཟེར་ལྕགས་ཀྱུའི་རྣམ་པ་ཅན་ཉི་ཟེར་གྱི་རྡུལ་ལྟར་འཕྲོས་བརྟན་གཡོ་འཁོར་འདས་ཀྱི་ཆོས་ཐམས་ཅད་ལ་ཕོག་པས་རྒྱལ་བ་སྲས་དང་བཅས་པའི་ཐུགས་རྗེ་བྱིན་རླབས་ཀྱི་མཐུ་དང༌། སྟོང་ཁམས་འཇིག་རྟེན་ཐམས་ཅད་ཀྱི་འབྱུང་ལྔའི་དྭངས་མ་རྩི་བཅུད་སྐྱེ་འགྲོ་མཐའ་དག་གི་ཚེ་དཔལ་ནུས་སྟོབས་ལས་དང་བསོད་ནམས། ཁྱད་པར་ལྷ་ཀླུ་གནོད་སྦྱིན་རིག་འཛིན་གྲུབ་པ་སོགས་ཚེ་བསྐལ་པ་དང་མཉམ་པར་གནས་པ་རྣམས་ཀྱི་ཚེ་བཅུད་བཀྲག་དང་གཟི་མདངས། བན་བོན་མཐུ་བོ་ཆེས་རིག་སྔགས་ཀྱི་སྦྱོར་བ་དང༌། སྡེ་བརྒྱད་མ་རུང་པས་བླ་དང་ཚེ་སྲོག་ཁྱེར་བ་ལ་སོགས་པ་ཐམས་ཅད་ཁབ་ལེན་གྱིས་ལྕགས་ཕྱེ་བསྡུས་པ་ལྟར་འུབ་ཀྱིས་བསྡུས་ནས་བསྒྲུབ་བྱའི་སྙིང་གར་ཐིམ་པས་དྭངས་མའི་འོད་ཀྱིས་ལུས་ཀྱི་ནང་ཐམས་ཅད་གང་བས་སྔོན་ལས་འཕྲལ་རྐྱེན་ལས་བྱུང་བའི་ཚེ་ཐུང་བའི་མཚན་མ་ཐམས་ཅད་རབ་ཏུ་ཞི་ནས། ཚེ་མི་ཤིགས་པ་རྡོ་རྗེ། མི་འགྱུར་བ་གཡུང་དྲུང༌། མི་ནུབ་པའི་རྒྱལ་མཚན་དུ་བྱས་ཏེ་འཆི་བ་མེད་པ་ཚེ་ཡི་དངོས་གྲུབ་ཐོབ་པའི་མོས་པ་མཛོད། ཚེ་མདའ་གཡབ་ལ། ཨོཾ། མགོན་པོ་སངས་རྒྱས་ཀུན་གྱི་བདག །སོགས་ཚེ་འགུགས་བྱ། དེ་ལྟར་ཚེ་འགུགས་ཤིང་བཅུད་བསྡུས་ཏེ་ཚེ་ཡི་དབང་བསྐུར་དངོས་སྦྱིན་པ་ལ། ཚེ་འབྲང་བཀྲ་ཤིས་གཞལ་མེད་ཁང་གི་དབུས་སུ་རྡོ་རྗེ་སེམས་དཔའ་ཚེ་དཔག་ཏུ་མེད་པའི་ལྷ་ཚོགས་རྣམས་བཞུགས་པའི་སྐུ་ལས་འོད་ཟེར་འཆི་མེད་བདུད་རྩིའི་ཟིལ་མངར་གྱི་རྒྱུན་ཆར་བབ་པ་ལྟར་བྲུལ། ཁྱེད་རང་རྣམས་ཀྱི་སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང༌། དྭངས་མ་འཕོ་མེད་དུ་རྒྱས་བཏབ་པས། སྐུ་རྡོ་རྗེ་སྐྱེ་འཆི་མེད་པ་ཚེ་ཡི་དབང་ཐོབ་པར་མོས་མཛོད། ཚེ་འབྲང་སྤྱི་བོར་བཞག་ལ། ཨོཾ། དཔལ་ལྡན་རིགས་རྣམས་ཀུན་གྱི་བདག །རྡོ་རྗེ་མི་ཕྱེད་གསུམ་གྱི་སྐུ། །དེང་འདིར་སངས་རྒྱས་ཐམས་ཅད་ཀྱི། །མི་འགྱུར་རྟག་པའི་དབང་བསྐུར་རོ། །རྩ་སྔགས་ལ་ཚེ་ཤམ་སྦྲེལ་མཐར། ཀཱ་ཡ་ཨ་བྷི་ཥིཉྩ་ཨོཾ། བདེ་ཆེན་བྱང་ཆུབ་སེམས་ཀྱི་བདུད་རྩིའི་དྭངས་མ་མྱངས་བས་མགྲིན་པའི་ལམ་བརྒྱུད་རྩ་གནས་ཐམས་ཅད་གང༌། བདེ་བའི་ཟིལ་གྱིས་ལས་རླུང་གི་འགྲོ་འོང་འཕོ་བའི་རྒྱུ་བ་འཛག་མེད་དུ་བཅིངས། གཞོམ་མེད་གསང་བའི་སྲོག་གྲུབ། གསུང་རྡོ་རྗེ་གཞོམ་གཞིག་མེད་པའི་ཚེ་ཡི་དབང་ཐོབ་པར་མོས་མཛོད། བདུད་རྩི་མགྲིན་པར་བཞག་ལ་མྱངས་ཏེ། ཨཱཿ དཔལ་ལྡན་རིགས་རྣམས་ཀུན་གྱི་བདག །རྡོ་རྗེ་མི་ཕྱེད་གསུམ་གྱི་གསུང༌། །དེང་འདིར་སངས་རྒྱས་ཐམས་ཅད་ཀྱི། །འགག་མེད་དབྱངས་ཀྱི་དབང་བསྐུར་རོ། །སྔགས་མཐར། ཝཱཀྐ་ཨ་བྷི་ཥིཉྩ་ཨཱཿ དྭངས་མ་མི་ཤིགས་པའི་རྡོ་རྗེ་ཚེ་ཡི་རིལ་བུ་ལྕེ་རྡོ་རྗེ་རྩེ་གསུམ་པའི་ལམ་བརྒྱུད། སྙིང་གའི་ཉི་ཟླའི་གའུའི་དབུས་རླུང་རིག་སེམས་གསུམ་དབྱེར་མེད་པའི་ཐུགས་སྲོག་ཧཱུྃ་དང་ནྲྀ་ཨ་ཡིག་བཅས་ལ་ཐིམ། དྭངས་མ་གཡོ་རྩོལ་དང་བྲལ་བའི་བདེ་ཆེན་རྡོ་རྗེར་བརྟན། འཕོ་མེད་ཡེ་ཤེས་ཀྱི་སྲོག་གྲུབ། ཐུགས་རྡོ་རྗེ་གཡོ་འཁྲུལ་མེད་པའི་ཚེ་ཡི་དབང་ཐོབ་པར་མོས་མཛོད། རིལ་བུ་སྙིང་གར་བཞག་ཅིང་ཁར་བྱིན་ལ། ཧཱུྃ། དཔལ་ལྡན་རིགས་རྣམས་ཀུན་གྱི་བདག །རྡོ་རྗེ་མི་ཕྱེད་གསུམ་གྱི་ཐུགས། །དེང་འདིར་སངས་རྒྱས་ཐམས་ཅད་ཀྱི། །འཁྲུལ་མེད་ཡེ་ཤེས་དབང་བསྐུར་རོ། །སྔགས་མཐར། ཙིཏྟ་ཨ་བྷི་ཥིཉྩ་ཧཱུྃ། མཐར། ཚེ་ཡི་དྭངས་བཅུད་ཐམས་ཅད་སྙིང་གའི་ཚེ་རྟེན་ལ་འདུས་སོགས་ནས། ཨ་དྷི་ཏིཥྛ་བཛྲ་ཡེ་སྭཱ་ཧཱ། ཞེས་བརྟན་པར་བྱ་བའི་བར་ཚེ་འགུགས་མཐའ་བཞིན་སྦྱར་ལ་རྒྱས་གདབ། ཤིས་བརྗོད་ནས་དམ་ཚིག་ཁས་བླང༌། གཏང་རག །ཡོན་འབུལ། དགེ་བསྔོ་བཅས་བྱས་པས་གྲུབ་པོ། །ཀུན་མཁྱེན་དགྱེས་པའི་འཛུམ་འོད་ལས། །ཟབ་གསང་བཀའ་གཏེར་གདམས་པའི་དཔྱིད། །བརྩེ་ཆེན་འོད་ཟེར་མ་སྨད་མཐུས། །འདོད་རྒུའི་དཔལ་དུ་ཅི་དགར་འཇོ། །ཞེས་ཡི་དམ་ཞི་བ་རིགས་ཀུན་ཁྱབ་བདག་རྡོ་རྗེ་སེམས་དཔའི་བླ་མ་མཆོད་པ་ལ་བརྟེན་པའི་ཚེ་དབང་གི་མཛེས་རྒྱན་ལེའུ་ཚན་གསུམ་པ་སྟེ་རྡོ་རྗེ་ཚེ་དབང་གྲུབ་པ་རྩལ་གྱིས་སྦྱར་བའོ། ༈ ཡེ་ཤེས་བདུད་རྩིའི་ཟེགས་མ་རེག་ཙམ་གྱིས། །འཁྲུལ་རྟོག་སྲིད་པའི་ཟུག་རྔུ་དཔྱིས་འབྱིན་ཏེ། །བདེ་ཆེན་ལང་ཚོའི་བརྟན་པ་རྒྱས་པའི་གཉེན། །རྡོ་རྗེ་སེམས་དངོས་དཔལ་ལྡན་བླ་མ་རྒྱལ། །རྡོར་སེམས་བླ་མཆོད་དེ་ཉིད་ཀྱི་བདུད་རྩི་སྨན་དབང་སྦྱིན་པ་ལ་དངོས་དང་ཞར་བྱུང་ངོ༌། དང་པོ་ནི་ཁྱད་པར་གྱི་ཕྲིན་ལས་ནས་ཇི་ལྟར་འབྱུང་བ་ལྟར་རམ། དབང་རྐྱང་གི་སྐབས་སུ་ཁྲོལ་སྒྲུབ་མ་བྱས་ཀྱང་རུང༌། གང་ལྟར་ཡང་དངོས་གྲུབ་བླང་ཞིང་ཛཔ྄་བཟླ་རིག་པའི་མེ་ཏོག་དོར་བའི་བར་དཀྱུས་ལྟར་གྲུབ་པའི་རྗེས། རྩ་བའི་དབང་གི་མཐའ་རྟེན་ནམ་བདུད་རྩི་སྒྲུབ་པའི་མཇུག་ཏུ་བྱ་བ་སྟེ། དེ་ཡང་རྒྱུད་ལས། བདུད་རྩིའི་མཆོག་ནི་མཉམ་པའི་དབྱིངས། །བདུད་རྩིའི་དོན་ནི་སྐྱེ་འཆི་མེད། །བདུད་རྩིའི་གནས་ནི་བྱང་ཆུབ་སེམས། །བདུད་རྩིའི་ལས་ནི་རྣམ་རྟོག་སྦྱོང༌། །བདག་དཔལ་ཚོགས་ཤིང་འགྲོ་དོན་མཛད། །སྨན་གྱི་བྱིན་རླབས་བསམ་མི་ཁྱབ། །ཅེས་གསུངས་པ་ལྟར་སྔ་འགྱུར་རྡོ་རྗེ་སྙིང་པོའི་རིང་ལུགས་ལ་སྒྲུབ་སྡེ་ཆེན་པོ་བརྒྱད་ཀྱི་གཙོ་བོ་རྡོ་རྗེ་ཉི་མའི་རིགས་ཆེ་མཆོག་བདུད་རྩི་ཡོན་ཏན་གྱི་སྒྲུབ་སྡེའི་མན་ངག་ལ་ངེས་པ་དང་དྲང་བའི་དོན་གྱི་བདུད་རྩི་སྣང་སྲིད་དག་མཉམ་བདེ་ཆེན་ཡེ་ཤེས་ཀྱི་ཕྱག་རྒྱར་གཏད་ལ་བླངས་ཏེ་མཆོག་དང་ཐུན་མོང་གི་དངོས་གྲུབ་སྒྲུབ་པའི་གསེང་ལམ་རྨད་དུ་བྱུང་བ་སྟེ། གཟུང་འཛིན་གཉིས་སྣང་གི་ལས་ཉོན་གྱི་བདུད་ཚོགས་གདོད་ནས་རྣམ་པར་དག་པའི་གནས་ལུགས་ཀྱི་ལྟ་བ་ཆོས་ཀྱི་རྩི་མཆོག་ཏུ་དག་པའི་དབང་གིས། དུག་ལྔའི་གཅོང་ནད་ཡེ་ཤེས་ལྔ་ཡི་བཅུད་ཀྱིས་ལེན་པའི་སྨན་གྱི་མཆོག་ཏུ་བསྒྱུར་བའི་ཕྱིར་ཕུང་ཁམས་རིགས་ལྔ་ཡབ་ཡུམ་གྱི་དཀྱིལ་འཁོར་དུ་ཤར་བའི་རྟགས་ཀྱི་བདུད་ལ་དེ་དང་རྣམ་པ་མཐུན་པའི་ལྷ་སྔགས་ཏིང་འཛིན་གྱི་གཟེར་གདབ་པ་དོན་གྱི་བདུད་རྩིའི་རྣལ་འབྱོར་ཆེན་པོས། རྫས་ཀྱི་བདུད་རྩི་ཤ་ལྔ་བདུད་རྩི་ལྔ་རྩ་བ་བརྒྱད་དང་ཡན་ལག་སྟོང་གི་རྩི་སྨན་གྱི་སྦྱོར་བས་བདེ་བ་ཆེན་པོའི་དངོས་གྲུབ་ཀྱི་དམ་རྫས་ལ་བརྟེན་ནས་དོན་གཉིས་ལྷུན་གྲུབ་ཀྱི་ཕྲིན་ལས་རྨད་དུ་བྱུང་བའི་ཚུལ་བཀའ་གཏེར་དག་སྣང་གི་ཆོས་སྒོ་དུ་མར་བྱོན་པ་ལས། སྐབས་སུ་བབ་པ་ཆེ་མཆོག་བདུད་རྩི་གྲུབ་པའི་སློབ་དཔོན་པཎ་ཆེན་བི་མ་ལ་མི་ཏྲ་དང༌། མངའ་བདག་ཁྲི་ལྡེ་ཁུ་དབོན་ཟུང་གི་ཡེ་ཤེས་སྒྱུ་འཕྲུལ་དྲྭ་བའི་འཁོར་ལོར་རྡོ་རྗེའི་ལུང་གིས་ཡང་ཡང་བསྔགས་ཤིང་ཚད་མས་གྲུབ་པ་འབྲེལ་ཚད་དོན་ལྡན་གྱི་རིག་འཛིན་ཆེན་པོ་ཀུན་མཁྱེན་འཇིགས་མེད་གླིང་པ་དང་འཇམ་དབྱངས་མཁྱེན་བརྩེའི་དབང་པོ་རྣམ་གཉིས་ལ་དབང་དང་སྒྲུབ་ཕྲིན་གྱི་རིམ་པ་ཉེ་བརྒྱུད་བྱིན་རླབས་ཀྱི་བཀའ་བབ་ཆུ་བོ་གཅིག་འདྲེས་རྡོ་རྗེ་སེམས་དཔའི་བླ་མཆོད་བདེ་ཆེན་ལམ་བཟང་ལ་བརྟེན་པའི་མྱོང་གྲོལ་བདུད་རྩི་སྨན་གྱི་དབང་བསྐུར་བགྱི་བ་ལ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་མཛོད། ཨོཾ་ཨཱཿཧཱུྃ། བདག་གཞན་བླ་མེད་བསྙེན་སྒྲུབ་འདི་དག་གིས། །སྡིག་སྒྲིབ་ཉམས་ཆག་མ་ལུས་ཀུན་བྱང་ནས། །ཚེ་འདི་ཉིད་ལ་རིག་འཛིན་མཆོག་འགྲུབ་ཅིང༌། །བྱིན་རླབས་རྩལ་དབང་གཟི་བརྗིད་ནུས་མཐུ་ལྡན། །སྐུ་གསུང་ཐུགས་ཀྱི་དངོས་གྲུབ་བསྩལ་དུ་གསོལ། །ལན་གསུམ། བཅུད་ལྡན་སྨན་གྱི་ཕོ་བྲང་འདི་ཉིད་བླ་མ་དཔལ་རྡོ་རྗེ་སེམས་དཔའ་ཡབ་ཡུམ་རིགས་ཀུན་འདུས་པའི་བདག་ཉིད་ཆེན་པོའི་ཡེ་ཤེས་ཀྱི་འཁོར་ལོ་ཡན་ལག་བདུན་དང་ཁ་སྦྱོར་བརྒྱད་ལྡན་ལུས་དཀྱིལ་གྱི་ལྷ་དང་བཅས་པ་དངོས་སུ་གསལ་བ་ཁྱེད་རང་རྣམས་ཀྱི་གནས་གསུམ་དུ་བཞག་ཅིང་གསང་བ་གསུམ་གྱི་རྡོ་རྗེའི་བྱིན་གྱིས་བརླབས་ཤིང་དབང་བསྐུར་བས་ཆོས་ཀྱི་བདུད་རྩིས་སྣང་སྲིད་བདེ་ཆེན་དུ་ཤར། གསུང་རྫས་ཀྱི་བདུད་རྩིས་ཕུང་ཁམས་དྭངས་མར་སྨིན། ཐུགས་རྟགས་ཀྱི་བདུད་རྩིས་དུག་ལྔ་ཡེ་ཤེས་སུ་དག །ཡེ་ཤེས་དོན་གྱི་བདུད་རྩིས་ལྷན་སྐྱེས་རྣམ་པར་མི་རྟོག་རང་བྱུང་རྡོ་རྗེ་སེམས་དཔའི་མཁའ་ཁྱབ་ནམ་མཁའི་རྡོ་རྗེའི་དབྱིངས་སུ་མངོན་པར་བྱང་ཆུབ་པའི་དབང་དང་དངོས་གྲུབ་མ་ལུས་པ་ཐོབ་པར་མོས་ཤིག ཧཱུྃ། རྟོག་འདུལ་དམ་ཚིག་བླ་ན་མེད། །དངོས་གྲུབ་ཀུན་གྱི་དབྱིག་ཆེན་པོ། །རྡོ་རྗེ་སེམས་དཔའི་ཡེ་ཤེས་ཀྱི། །སྐུ་གསུང་ཐུགས་ཀྱི་དབང་བསྐུ་ར་རོ། །ཞེས་དང༌། སྔགས་མཐར། ཀཱ་ཡ་ཝཱཀྐ་ཙིཏྟ་ཨ་བྷི་ཥིཉྩ་ཧཱུྃ། ཞེས་གནས་གསུམ་དུ་རེག བདུད་རྩི་སྤྲུལ་པའི་དཀྱིལ་འཁོར་འོད་དུ་ཞུ་ནས་ཁྱེད་རང་རྣམས་ལ་ཐིམ་པས་བྱིན་རླབས་ཡོངས་རྫོགས་རྒྱུད་ལ་བརྟན་པར་མོས་ཤིག །འཆི་མེད་ཀྱི་ཚེ་སྟེར་བ། ཉམས་ཆག་སྐོང་བ་སོགས་མཆོག་ཐུན་གྱི་དངོས་གྲུབ་མཐའ་དག་བདུད་རྩིའི་མཐུས་གྲུབ་པ་ལ་ངོ་མཚར་བའི་ཆེ་བ་བརྗོད་པ་འདིའི་རྗེས་ཟློས་མཛོད། ཨ་ཧོ་མ་ཧཱ་སུ་ཁ་ཧོ། ཞེས་རྟོགས་པ་བརྗོད། བདུད་རྩི་བསྡུ་བ་པོ་འཇམ་དཔལ་རྣོན་པོ་ཡིན་པས་དཀྱིལ་འཁོར་བ་རྣམས་ཀྱིས་འཇམ་དཔལ་རྣོན་པོ་ལ་གཏད་ནས་གནང་བ་བྱིན་པར་བསམ་ལ་སློབ་དཔོན་གྱིས། བཛྲ་པྲ་བེ་ཤ་ཡ་ཕཊ། ཞེས་བརྗོད་དེ་སྨན་ཐོད་ལ་དཀྲིས་པའི་སྲད་བུ་བཀྲོལ་ནས་སྨན་ཁ་ཕྱེ་ལ། སརྦ་པཉྩ་ཨ་མྲྀ་ཏ་ཨ་བེ་ཤ་ཡ་ཨཱཿ ཞེས་བརྗོད་པས། བདུད་རྩིའི་དྭངས་མ་དཀར་དམར་མཐིང་གའི་འོད་ཀྱི་རྣམ་པར་བསམ། ནང་མཆོད་དང་སྦྱར་ལ་གཞུང་ལྟར་སྨན་མཆོད་དང༌། བརྒྱུད་པའི་མཚན་དོན་སྦྱར་ན་བརྒྱུད་འདེབས་ལྟར་ལ། ཚིག་རྐང་བཞི་པ། སྨན་མཆོད་འབུལ་ལོ་ཆོས་སྐུའི་ཡེ་ཤེས་སྐྱེད། སོགས་དང༌། ཨོཾ་མ་ཧཱ་སརྦ་པཉྩ་ཨ་མྲྀ་ཏ་ཁཱ་ཧི། ཞེས་སྔགས་བཅས་སྦྱར། རྫོགས་པར་གྲུབ་རྗེས། བདུད་རྩི་སྙིང་པོ་ཅན་གྱི་དབུས། །སངས་རྒྱས་ཀུན་གྱི་སྐུ་གསུང་ཐུགས། །ཡི་གེ་གསུམ་གྱི་རྣམ་པ་ཅན། །དམ་ཚིག་ཕྱག་རྒྱ་གཉན་པོས་བླངས། །སྔགས་མཐར། ཀཱ་ཡ་སིདྡྷི་ཨོཾ། ཝཱཀྐ་སིདྡྷི་ཨཱཿ ཙིཏྟ་སིདྡྷི་ཧཱུྃ། ཞེས་བརྗོད་ཅིང་གནས་གསུམ་དུ་ཐིག་ལེ་བྱས་ལ་མྱང༌། སློབ་མ་ལའང་སྦྱིན། དེ་དག་གིས་བདུད་རྩི་སྨན་གྱི་དབང་བསྐུར་གྲུབ་པ་སྟེ་ཕན་ཡོན་གྱི་རིམ་པའང་རྒྱུད་ལས། འཐུང་ན་ངན་སོང་སྒྲིབ་པ་འབྱང༌། །རྟག་བསྟེན་དངོས་གྲུབ་མཆོག་ཀྱང་འགྲུབ། །བཞི་བརྒྱ་རྩ་བཞིའི་ནད་སེལ་ཞིང༌། །ལྷ་ལ་རྟག་ཏུ་མཆོད་བྱས་ན། །བདག་དང་གཉིས་སུ་མེད་པར་འགྱུར། །མི་མཐུན་ཕྱོགས་ལ་གཏོར་བྱས་ན། །དྲག་པོ་གཏུམ་པོའང་ལྷན་ནེར་འགྱུར། །གཞན་ཡང་དངོས་གྲུབ་ཐམས་ཅད་ནི། །ཇི་ལྟར་དམིགས་པ་བཞིན་དུ་འགྲུབ། །ཅེས་སོགས་རྒྱ་ཆེར་བསྔགས་པའི་ཕན་ཡོན་ལ་སྤྲོ་བས་ཚུལ་བཞིན་སྒྲུབ་པའི་བདུད་རྩིའི་དམ་རྫས་ཀྱི་ཕུད་ཀྱིས་དཀྱིལ་འཁོར་གྱི་ལྷ་ལ་བདུད་རྩི་དང༌། སྲེག་རྫས་སུ་འབུལ། རིན་པོ་ཆེའི་གྭའུ་ལ་སོགས་པར་དངོས་གྲུབ་ཀྱི་རྟེན་སྤྱི་བོའམ་མགུལ་དུ་བཅངས་ནས་ཐུན་བཞིར་ཆག་མེད་དུ་རྣལ་འབྱོར་དང་ལྡན་པས་བསྟེན། མཁའ་འགྲོ་དང་ཆོས་སྐྱོང་ལ་གཏོར་མ་དང་མཉམ་དུ་འབུལ། སྒྲུབ་པ་པོ་དང་དོན་དུ་གཉེར་བ་གཞན་ལའང་ཅི་ནུས་སུ་སྦྱིན། སྒྲུབ་པའི་གནས་སོགས་ས་ཡི་དཔལ་དུ་མི་འཛད་པའི་གཏེར་དུ་སྦ་བ་དང༌། རྒྱ་མཚོ་དང་ཆུ་ཀླུང་དུ་འདོར་བ། བཟང་ཤིང་གི་བསང་སྤྲིན་རླུང་དང་སྦྱར་བས་སྣོད་བཅུད་ཀུན་ལ་ཁྱབ་པར་སྤེལ་བ་སོགས་འབྱུང་ལྔ་དང་སྦྱར་བའི་ཕྲིན་ལས་རྒྱས་པར་སྤེལ་ཞིང་མཐོང་ཐོས་དྲན་རེག་གྲོལ་བ་དྲུག་གི་ཕྲིན་ལས་རྒྱ་ཆེར་སྐྱོང་བའི་གཡར་དམ་བཟུང་དགོས་པའོ། །གཉིས་པ་ཞར་བྱུང་རིལ་བུའི་དབང་བསྐུར་སྐབས། རྩ་གཞུང་གི་བུམ་དབང་གྲུབ་པའི་རྗེས། རིན་པོ་ཆེའི་བུམ་པ་གཞལ་མེད་ཁང་གི་དབུས་སུ་རིལ་བུ་རྣམས་བླ་མ་དང་གཉིས་སུ་མེད་པའི་དཔལ་རྡོ་རྗེ་སེམས་དཔའ་ཞི་ཁྲོ་རབ་འབྱམས་རྒྱལ་བའི་སྤྱི་གཟུགས་ཆེན་པོར་བཞུགས་པའི་སྐུ་ལས་ཡེ་ཤེས་ཀྱི་འོད་ཟེར་དཔག་ཏུ་མེད་པ་བྱུང༌། སློབ་མའི་སྒོ་གསུམ་ལ་ཐིམ་པས་ལས་དང་ཉོན་མོངས་པའི་སྒྲིབ་པ་སྦྱངས། རྟོག་སྒྲིབ་ཉམས་ཆག་ཐམས་ཅད་དག །བྱིན་རླབས་དང་དངོས་གྲུབ་མཐའ་དག་ཐོབ་པར་མོས་ཤིག །རིལ་བུ་སྤྱི་བོར་བཟུང་སྟེ། དབྱིངས་ཀྱི་བུམ་པར་རིག་པའི་ལྷ་ཚོགས་རྣམས། །ཡེ་ཤེས་ཐུགས་རྗེའི་གཟི་བྱིན་རབ་འབར་བས། །སྒོ་གསུམ་རྡོ་རྗེ་གསུམ་དུ་བྱིན་བརླབས་ནས། །དངོས་གྲུབ་སྩོལ་ཞིང་བརྟན་པར་བཞུགས་སུ་གསོལ། །སྔགས་མཐར། ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕ་ལ་ཧཱུྃ། ཞེས་བརྗོད་ཅིང་གནས་གསུམ་དུ་གཏུག། རིལ་བུ་ལྷར་གསལ་བ་རྡོ་རྗེ་ལྕེ་ཡི་ལམ་ནས་བརྒྱུད་དེ་སྙིང་དབུས་མི་ཤིགས་པའི་ཐིག་ལེ་དང་དབྱེར་མེད་པར་ཡེ་ཤེས་སེམས་དཔའི་ཚུལ་གྱིས་བྱང་ཆུབ་བར་དུ་བཞུགས་ཤིང་དབང་དང་དངོས་གྲུབ་སྩོལ་བར་མོས་ལ་ཡི་གེ་བརྒྱ་པ་བཟླ་བཞིན་དུ་རིལ་བུ་མིད། དེ་ལྟར་ཚུལ་བཞིན་བསྒྲུབས་པའི་དམ་རྫས་དེ་ཉིད་མྱང་བའི་ཕན་ཡོན་ཡང༌། རྡོར་སེམས་ཐུགས་ཀྱི་སྒྲུབ་པའི་གཞུང་ལས། དེ་ལྟ་བུ་ཡི་དམ་རྫས་དེ༔ གང་གིས་ཟོས་པས་ཉམས་ཆག་སྦྱངས༔ དམ་ཚིག་དངོས་གྲུབ་ཀུན་ཐོབ་ནས༔ འཕོ་མེད་བདེ་ཆེན་འགྲུབ་པར་འགྱུར༔ ཞེས་གནས་སྐབས་སུ་དམ་ཚིག་ཉམས་ཆག་གཙོ་བོར་གྱུར་པའི་སྡིག་སྒྲིབ་ཐམས་ཅད་ལྷག་མེད་དུ་བྱང་ཞིང༌། ཕྲིན་ལས་བཞི་དང་གྲུབ་པ་ཆེན་པོ་བརྒྱད་ལ་སོགས་པའི་ཐུན་མོང་གི་དངོས་གྲུབ་ཐམས་ཅད་ཐོབ་པ་དང༌། མཐར་ཐུག་བདེ་བ་ཆེན་པོ་ཁ་སྦྱོར་ཡན་ལག་བདུན་ལྡན་དཔལ་རྡོ་རྗེ་སེམས་དཔའི་གོ་འཕང་དཀའ་བ་མེད་པར་འགྲུབ་པའི་མ་བསྒོམས་སངས་རྒྱས་ཆོས་ཀྱི་གྲོལ་ལམ་ཕན་ཡོན་བསམ་མི་ཁྱབ་པའི་བདག་ཉིད་ཅན་གྱི་དབང་བསྐུར་གྲུབ་པའོ། །དབང་གཞུང་གི་གསང་དབང་ལ་འཇུག་དགོས་སོ། །ཐམས་ཅད་མཁྱེན་པའི་ཡེ་ཤེས་ཀྱི། །སྤྱོད་ཡུལ་ཟབ་རྒྱས་ཆོས་ཀྱི་སྙིང༌། །རྗེས་བརྩེའི་འཆར་ཀའི་འོད་ཟེར་གྱིས། །སྣང་འདི་སྐལ་བཟང་ཀུན་དགའི་དཔྱིད། །དཔལ་རྡོ་རྗེ་སེམས་དཔའི་བླ་མཆོད་དང་འབྲེལ་བའི་བདུད་རྩི་སྨན་གྱི་དབང་ཞར་བྱུང་དང་བཅས་པའི་ལེའུ་ཚན་བཞི་པ་སྟེ་ཕྲིན་ལས་རོལ་པའི་རྡོ་རྗེས་སྦྱར་བའོ།

༈ རྒྱུད་དང་སྒྲུབ་སྡེའི་ཆོས་ཚུལ་རྒྱ་མཚོ་ཀུན། །ཀུན་འདུས་སྒྲུབ་ཆེན་སྡེ་བརྒྱད་ཆིག་དྲིལ་ཆོས། །ཆོས་ཀུན་ཉིང་ཁུ་བླ་མ་ཡི་དམ་མཆོག །མཆོག་སྒྲུབ་རིག་འཛིན་ཐུགས་ཀྱི་ཐིག་ལེར་གུས། །དེ་ལ་འདིར་དངོས་གྲུབ་ཀྱི་རྩ་བ་ཡི་དམ་སྤྱི་དྲིལ། བླ་མ་ཤིན་ཏུ་དྲག་པོ་མཐིང་གའི་ཐུགས་སྒྲུབ། སྒྲུབ་ཆེན་བཀའ་བརྒྱད་དྲག་པོ་དཔལ་ཆེན་འདུས་པ་རྩ་བའི་དཀྱིལ་འཁོར་གྱི་སྨིན་བྱེད་རྒྱས་པར་འགོད་པ་ལ། སྔོན་འགྲོ་སྟ་གོན། དངོས་གཞིའི་དབང་བསྐུར་གཉིས་ཀྱི། དང་པོ་ནི། སྤྱི་ཆིངས་ཞི་ཁྲོའི་དཀྱིལ་འཁོར་གྱི་སྟ་གོན་ལྟར་ལ། ཁྱད་པར་ལྷ་སྟ་གོན་སྐབས་མཎྜལ་སྟེང་ཚོམ་བུ་གཙོ་འཁོར་དགུ །དེ་རྒྱབ་བཞི་བཅས་བཀོད། བདག་བསྐྱེད་དཔལ་ཆེན་ཕྱག་རྒྱ་གཅིག་པ་རྒྱུན་གྱི་རྣལ་འབྱོར་ཀུན་མཁྱེན་བླ་མ་མཁྱེན་བརྩེའི་གསུང་ལྟར་འཐུས། ས་ལྷ་དང་གཉུག་མར་གནས་པ་ལ་དཀར་གཏོར་བཏང༌། མཆོད་པ་བྱིན་བརླབས། ཧཱུྃ༔ དབྱིངས་ནས་ཡི་གེ་འབྲུ་གསུམ་སོགས། སྨན་རཀ་གཏོར་མ་བྱིན་རླབས་བཅས་དཔལ་ཆེན་གཞུང་ལྟར་ལ། ཚོམ་བུ་ལས་སྔགས་ཀྱིས་བསང༌། སྭ་བྷཱས་སྦྱངས། སྟོང་པའི་ངང་ལས་མདུན་གྱི་རྟེན༔ འབྱུང་བ་རིམ་བརྩེགས་རི་རབ་སྟེང༔ ཕྱི་རོལ་རྡོ་རྗེའི་སྲུང་འཁོར་དང༔ དྲག་པོའི་གཞལ་ཡས་མཚན་རྫོགས་དབུས༔ དེ་སྟེང་ཧཱུྃ་བབ་ཡོངས་གྱུར་ལས༔ རྡོ་རྗེ་སྔོན་པོ་རྩེ་ལྔ་པ༔ ཡོངས་གྱུར་འབྲས་བུའི་ཧེ་རུ་ཀ༔ སོགས་ལས་བྱང་རྒྱས་པ་ལྟར་དམ་ཚིག་པ་བསྐྱེད། ཡེ་ཤེས་པ་བསྟིམ། ཕྱག་མཆོད་བསྟོད་པའི་བར་དཀྱུས་ལྟར་རམ། མཆོད་པའི་ལས་རིམ་འཇམ་མགོན་མཁྱེན་བརྩེ་རིན་པོ་ཆེའི་མངོན་རྟོགས་འབྲིང་པོ་ལྟར་བཏང་ཡང་རུང༌། འབྲུ་གསུམ། གུ་རུ་ཤྲཱི། བཛྲ་ཙཎྜ་ཅུང་ཟད་རེ་བཟླས་ལ། རྡོར་དྲིལ་དང་སྤོས་ཐོགས་ཏེ། རང་གི་ལྕེ་ཧཱུྃ་ལས་སྐྱེས་སོགས་ཞི་ཁྲོའི་སྟ་གོན་ལྟར་དང༌། བུམ་པ་སྟ་གོན་ལ་རྣམ་རྒྱལ་བུམ་པ་མགུལ་ཆིངས་སྔོན་པོ་ཁ་རྒྱན་གཟུངས་རྡོར་སོགས་ཆས་ལྡན་ལ་མཆོད་པས་བསྐོར་བ་བཤམས། མཆོད་པ་བྱིན་རླབས་ལས་བྱང་ལྟར་སྔོན་དུ་འགྲོ་བས། ཤཱུ་ནྱ་ཏཱས་བསང་སྦྱངས། སྟོང་པའི་ངང་ལས་བུམ་གདན་པདྨ་འདབ་བརྒྱད་ཀྱི་སྟེང་དུ་བྷྲཱུྃ་ཡིག་ཡོངས་སུ་གྱུར་པ་ལས་འོད་སྣང་རིན་པོ་ཆེ་ལས་གྲུབ་པའི་བཀྲ་ཤིས་རྣམ་རྒྱལ་གྱི་བུམ་པ་ལྟོ་བ་ཟླུམ་ལ་ཞབས་ཞུམ་པ། མགྲིན་པ་རིང་ལ་ཁ་གཡེལ་བའི་མདུན་ངོས་མཆུ་འཕྱང་བ། ལྷ་རྫས་ལས་གྲུབ་པའི་པཉྩ་ལི་ཀའི་མགུལ་ཆིངས་པྲོག་གསུམ་དང་ལྡན་པ། བྱང་ཆུབ་ལྗོན་པའི་ཁ་རྒྱན་ཅན། ནང་ཆོས་སྐུའི་རང་བཞིན་ཡངས་ཤིང་མཐའ་མི་མངོན་པར་གཟུགས་སྐུ་གཉིས་ཀྱི་ཆ་བཅུད་སོ་ལྔས་གཏམས་པ། ཕྱི་བུམ་པའི་རྣམ་པ་ལ་ནང་ཡེ་ཤེས་ཀྱི་གཞལ་མེད་ཁང་རྣམ་པར་ཐར་པའི་སྒོ་གསུམ་གྱི་བདག་ཉིད་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་བརྡ་དོན་རྟགས་གསུམ་ཡོངས་སུ་རྫོགས་པའི་ཕོ་བྲང་ཆེན་པོའི་དབུས་སུ་སྤྱི་དཔལ་ཆེན་པོ། ཤར་དུ་ཡང་དག །ལྷོར་གཤིན་རྗེ། ནུབ་ཏུ་རྟ་མགྲིན། བྱང་དུ་ཕུར་པ། ཤར་ལྷོར་མ་མོ། ལྷོ་ནུབ་ཏུ་རིག་འཛིན། ནུབ་བྱང་དུ་དྲག་སྔགས། བྱང་ཤར་དུ་མཆོད་བསྟོད་བདེ་གཤེགས་སྒྲུབ་པ་བཀའ་བརྒྱད་དྲག་པོ་དཔལ་ཆེན་འདུས་པ་བདུན་བརྒྱ་ཉེར་ལྔའི་ལྷ་ཚོགས་གསལ་ལ་མ་འདྲེས་ཤིང༌། སྣང་ལ་རང་བཞིན་མ་གྲུབ་པར་བཞུགས་པའི་གནས་གསུམ་དུ་ཡི་གེ་གསུམ་གྱིས་མཚན་པ་ལས་འོད་ཟེར་འཕྲོས་པས་རང་བཞིན་གྱི་གནས་ནས་སྒོམ་པ་དང་འདྲ་བའི་ཡེ་ཤེས་པ་བཛྲ་ས་མཱ་ཛཿ སྤྱན་འདྲེན་ནི། ཧཱུྃ༔ དམིགས་མེད་མཁའ་ལྟར་དག་ཅིང་ཁྱབ་པའི་སྐུ༔ སྤྱན་འདྲེན་གཤེགས་སུ་གསོལ་བར་མི་དམིགས་ཀྱང༔ ཐུགས་རྗེའི་ངང་ཉིད་ཆོས་སྐུའི་རོལ་པ་ལས༔ ཡེ་ཤེས་སྒྱུ་མར་རོལ་ཞིང་གཤེགས་སུ་གསོལ༔ ཨེ་ཧྱ་ཧི་བྷ་ག་ཝན་མ་ཧཱ་ཀ་རུ་ཎི་ཀ་དྲྀ་ཤྱ་ཧོ༔ ཛཿཧཱུྃ་བྃ་ཧོཿས་བསྟིམ༔ མཆོད་པ་ནི༔ ཧཱུྃ༔ དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི༔ སོགས་མཐར། རཱུ་པ་ནས་སྤརྴེའི་བར་དང༌། སརྦ་པཉྩ་རཀྟ་བ་ལིངྟ་མ་ཧཱ་སུ་ཁ་དྷརྨ་དྷཱ་ཏུ་པཱུ་ཛ་ཧོཿ བསྟོད་པ་ནི༔ ཧཱུྃ༔ རྡོ་རྗེ་གླུ་མ་ལས་ཀྱི་ཕྱག་རྒྱ་ཡིས༔ དབྱངས་ཀྱི་ཡན་ལག་ཆོས་ཀྱི་ཕྱག་རྒྱའི་སྤྲིན༔ རིགས་ལྔའི་དམ་ཚིག་ཕྱག་རྒྱ་ལ་སྦྱར་ནས༔ ལྷར་སྣང་ཕྱག་རྒྱ་ཆེན་པོར་བསྟོད་པར་བགྱི༔ བཟླས་པ་ནི། གཟུངས་ཐག་ལ་འཇུས་ནས། བདག་བསྐྱེད་ཀྱི་ཐུགས་ཀ་ནས་སྔགས་ཀྱི་འོད་ཟེར་གཟུངས་ཐག་འོད་ཀྱི་སྦུ་གུ་ཅན་ལ་འཁྲིལ་ཏེ་སོང་བས་བུམ་ལྷའི་ཐུགས་རྒྱུད་བསྐུལ། བདེ་སྟོང་གི་ཡེ་ཤེས་བདུད་རྩིའི་རང་བཞིན་ཅན་དུ་བབ་པས་བུམ་པ་གང་བར་བསམ་ཞིང༌། རྩ་སྔགས་དབྱངས་གསལ་སྦྲེལ་བ་བཟླ། མཐར་གོང་ལྟར་མཆོད་བསྟོད་ཡིག་བརྒྱ་བཟླ། དུང་ཆོས་ཕུལ་ལ། ཨོཾ་ཨཱཿཧཱུྃ་བུམ་པའི་ལྷ་ཚོགས་རྟེན་དང་བརྟེན་པར་བཅས་པ་འོད་དུ་ཞུ་ནས་བུམ་ཆུ་དང་རོ་གཅིག་ཏུ་གྱུར། ཞེས་བརྗོད། ལས་བུམ་ལ། སྭ་བྷཱ་ཝས་སྦྱངས། སྟོང་པའི་ངང་ལས་རིན་པོ་ཆེའི་བུམ་པ་ཚད་དང་མཚན་ཉིད་རྫོགས་པ་བཅུད་ཀྱིས་གཏམས་པའི་དབུས་སུ་པྃ་ལས་པདྨ་དང་རྃ་ལས་ཉི་མའི་གདན་ལ་ཧཱུྃ་ལས་ཁྲོ་ཆེན་བདུད་རྩི་འཁྱིལ་བ་སྐུ་མདོག་ལྗང་ནག་མི་བཟད་པའི་ཉམས་ཅན། ཕྱག་གཡས་སྣ་ཚོགས་རྡོ་རྗེ་དང་གཡོན་སྡིགས་མཛུབ། ཞབས་གཉིས་དོར་སྟབས་སུ་བཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པ་ལས་འོད་ཟེར་འཕྲོས་པས་རང་འདྲའི་ཡེ་ཤེས་པ་སྤྱན་དྲངས། བཛྲ་ས་མ་ཛཿ ཛཿཧཱུྃ་བྃ་ཧོཿ གཉིས་སུ་མེད་པར་གྱུར། ཨརྒྷཾ་སོགས་ཀྱིས་མཆོད། བསྟོད་པར་འོས་པས་བསྟོད། ཐུགས་ཀར་ཉི་དཀྱིལ་ཧཱུྃ་གི་མཐར་སྔགས་ཕྲེང་འཁོར་བ་ལས་འོད་ཟེར་མེ་སྟག་ལྟ་བུ་འཕྲོས་པས་གདོན་བགེགས་དང་སྡིག་སྒྲིབ་ཐམས་ཅད་བསྲེགས། བདུད་རྩིའི་རྒྱུན་བབ་པས་བུམ་པ་གང་བར་གྱུར། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ༔ ཅི་ནུས་བཟླ། མཐར་དུང་ཆོས་ཕུལ་ལ། ཨོཾ་ཨཱཿཧཱུྃ་བུམ་ལྷ་བདེ་སྟོང་གི་ངོ་བོར་ཞུ་བ་ཁྲོ་བོའི་རྡུལ་ཕྲ་རབ་ཏུ་གྱུར་པར་བསམ་མོ། །སློབ་མ་སྟ་གོན་གྱི་སྔོན་འགྲོའི་ཆོས་བཤད་ཅུང་ཟད་བསྡུ་ན། དེ་ཡང་ངོ་བོ་མི་ཁོམ་པ་བརྒྱད་ཀྱི་ལྡོག་ཆ་བརྒྱད་དང༌། དེའི་ཁྱད་པར་གྱི་ཆོས་འབྱོར་པ་བཅུ་སྟེ་དལ་འབྱོར་གྱི་ཆོས་བཅོ་བརྒྱད་དང་ལྡན་པའི་མི་ལུས་རིན་པོ་ཆེ་རྒྱུ་དང་དཔེ་དང་གྲངས་སོགས་གང་གི་སྒོ་ནས་བསམས་ཀྱང་ཤིན་ཏུ་རྙེད་པར་དཀའ་ཞིང༌། ཕན་འདོགས་བསམ་གྱི་མི་ཁྱབ་པ་དང་ལྡན་པ་འདི་ལྟ་བུ་རྙེད་དུ་ཟིན་ནའང༌། ཕྱི་སྣོད་ཀྱི་འཇིག་རྟེན་སྲ་ཞིང་འཐས་པ་ལྟར་སྣང་བ་རྣམས་ཀྱང་མཐར་མེ་བདུན་ཆུ་གཅིག་གིས་འཇིག་པའི་ཚེ་ཐལ་བ་ཙམ་ཡང་ལུས་པར་མི་འགྱུར། ནང་བཅུད་ཀྱི་སེམས་ཅན་ཐམས་ཅད་ཀྱང་སྐྱེས་ནས་ཚེ་ཐར་དུ་སོང་བ་གཅིག་ཀྱང་མེད་པས། རང་ཉིད་ཀྱང་ངེས་པར་འཆི་བར་མ་ཟད། དོ་ནུབ་ཙམ་ཡང་མི་འཆི་བའི་གདེང་ནི་མེད། འཆི་བའི་ཚེ་ཆོས་རྣམ་པར་དག་པ་ཁོ་ན་མ་གཏོགས་གང་གིས་ཀྱང་མི་ཕན། ཤི་ནས་ཅང་མེད་དུ་མི་འགྲོ་བར་ལས་འབའ་ཞིག་གི་རྗེས་སུ་འབྲང་སྟེ། སྡིག་པའི་ལས་ཀྱིས་ངན་སོང་གསུམ་དུ་སྐྱེས་ན་སྡུག་བསྔལ་གྱི་སྡུག་བསྔལ་བཟོད་པའི་བླག་མེད། ཟག་བཅས་ཀྱི་དགེ་བས་མཐོ་རིས་གསུམ་དུ་སྐྱེས་ཀྱང་འགྱུར་བའི་སྡུག་བསྔལ་དང༌། ཁྱབ་པ་འདུ་བྱེད་ཀྱི་སྡུག་བསྔལ་ཁོ་ན་ལས་མ་འདས་པས། ད་རེས་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་འདི་ལས་ཅིས་ཀྱང་ཐར་བ་ཞིག་བྱ་དགོས། དེའི་ཆེད་དུ་ཐེག་པ་ཆེན་པོའི་དགེ་བའི་བཤེས་གཉེན་མཚན་ཉིད་དང་ལྡན་པ་མཉེས་པ་གསུམ་གྱིས་བསྟེན་ནས། བླང་དོར་གྱི་གནས་ཇི་ལྟར་གསུངས་པའི་དོན་རྣམས་བྱིས་པ་དང་སྡིག་པའི་གྲོགས་ཀྱི་དབང་དུ་མ་སོང་བར་ལག་ལེན་དུ་ཐེབས་ངེས་པའི་འཆི་ཆོས་གཤའ་མ་ཞིག་མ་བྱས་པའི་ཐབས་མེད་དེ། ཆོས་དེའི་འབྲས་བུ་ཐར་པ་བླ་ན་མེད་པ་སངས་རྒྱས་ཀྱི་གོ་འཕང་སྒྲུབ་དགོས་པས་དེའི་ཕྱིར་ཐེག་པ་ཆེན་པོའི་སྒོར་ཞུགས་དགོས། དེ་ལའང་རྒྱུ་ལམ་དུ་བྱེད་པ་མཚན་ཉིད་ཐེག་པ་ལས་ཁྱད་པར་དུ་འཕགས་པ་འབྲས་བུ་ལམ་བྱེད་རྡོ་རྗེ་ཐེག་པ་རྣལ་འབྱོར་བླ་མེད་ཀྱི་རྒྱུད་སྡེ་ཚེ་གཅིག་ལུས་གཅིག་ལ་རྡོ་རྗེ་འཆང་ཆེན་པོའི་གོ་འཕང་ངེས་པར་འགྲུབ་པར་བྱེད་པ་ཡིན་ཞིང༌། དེ་ལའང་གསང་སྔགས་ཀྱི་རྒྱུད་དང་སྒྲུབ་སྡེའི་ཆོས་སྐོར་དཔག་ཏུ་མེད་པ་བཞུགས་པ་ལས། གསང་སྔགས་མ་ཧཱ་ཡོ་ག་སྒྲུབ་སྡེ་རྒྱ་མཚོའི་ཕྱི་མོ་སངས་རྒྱས་གཉིས་པ་སློབ་དཔོན་ཆེན་པོ་ལ་བཀའ་བབ་པའི་བདེ་གཤེགས་སྒྲུབ་པ་བཀའ་བརྒྱད་དེ། འོག་མིན་གྱི་གནས་སུ་ཀུན་ཏུ་བཟང་པོས་ཞི་ཁྲོའི་དཀྱིལ་འཁོར་རབ་འབྱམས་བཀོད་དེ་བཀའ་བརྒྱད་སྤྱི་རྒྱུད་ལྔ། སྒོས་རྒྱུད་བཅུ་ལ་སོགས་པ་བསྟན། རིག་འཛིན་གཙོ་བོ་རྡོ་རྗེ་ཆོས་ཀྱིས་བསྡུས་ནས་དགོངས་འགྲེལ་ལུང་ལྔ་མཛད་ནས་མཁའ་འགྲོ་ལས་ཀྱི་དབང་མོ་ཆེ་ལ་གཉེར་དུ་གཏད་དེ། བསིལ་བའི་ཚལ་གྱི་མཆོད་རྟེན་བདེ་བྱེད་བརྩེགས་པར་གཏེར་དུ་སྦས་པའི་སྒོས་བཀའ་རིག་འཛིན་བརྒྱད་སོ་སོ་དང༌། སྤྱི་རྒྱུད་སློབ་དཔོན་ཆེན་པོ་ལ་བཀའ་བབ་སྟེ་འཕགས་བོད་གཉིས་སུ་འབྲེལ་ཚད་རྡོ་རྗེའི་རིག་འཛིན་གྱི་ས་ལ་སྦྱར་བར་མཛད་པའི་གདུལ་བྱའི་གཙོ་བོ་བོད་ཡུལ་ཆོས་ཀྱི་རྒྱལ་པོ་མངའ་བདག་ཚངས་པ་ལྷ་ཡི་མེ་ཏོག་ལ་བཀའ་བརྒྱད་བདེ་གཤེགས་འདུས་པའི་རྒྱུད་ལུང་མན་ངག་གི་མཛོད་གཏད་དེ་བོད་ཡུལ་མཐའ་དབུས་ཀུན་ཏུ་གཏེར་དུ་སྦས་པ་ལས་གཏེར་ཁ་གོང་འོག་སོགས་གཏེར་སྟོན་གྲུབ་པའི་སྐྱེས་ཆེན་རྣམས་ཀྱིས་རིམ་པར་སྤྱན་དྲངས་ནས་འགྲོ་དོན་རྒྱ་ཆེར་མཛད་པ་ལས་འདི་ནི། དཔལ་ཆེན་ཞལ་ལུང་ལས། འཇམ་དཔལ་ཆོས་ཀྱི་བཤེས་གཉེན་གྱིས༔ བྱིན་གྱིས་བརླབས་པའི་རིག་པ་འཛིན༔ སྨིན་མཚམས་དཔའ་བོའི་རྒྱ་རྟགས་ཅན༔ དེ་ལ་ལས་ཀྱི་དབང་མོ་ཆེས༔ དགོངས་པའི་བརྡ་རིས་སྤྲད་པའི་ཚེ༔ མཁའ་འགྲོའི་གསང་མཛོད་ཆེན་མོ་ལ༔ དབང་བསྒྱུར་ང་ཡི་དགོངས་པའི་མཐིལ༔ དེ་ཡི་སྙིང་ལ་ཡང་དག་ཞུགས༔ སྣང་བ་ཚིག་དང་དཔེ་ཆར་ཤར༔ གཏེར་གྱི་ནང་ནས་ཡང་བཅུད་ཡིན༔ ཞེས་དང༌། རིག་འཛིན་རྩ་རྒྱུད་ཐོད་པའི་དུམ་བུ་ལས། རང་རྒྱུད་སྦས་ཚུལ་ལྟར་བཞུགས་པའི༔ གསུང་སྤྲུལ་བདུན་གྱི་གཅིག་ཤོས་ལ༔ སྨོན་ལམ་གཏད་རྒྱའི་དབང་བསྐུར་བས༔ ནམ་ཞིག་འགྲོ་དོན་དུས་བབ་ཚེ༔ རིག་འཛིན་ཁྱོད་ཀྱིས་བལྟར་ཡོད་ལ༔ ཕལ་གྱིས་བཟུང་དུ་མེད་པ་ཡི༔ མཁའ་འགྲོའི་ཡི་གེ་རྫུ་འཕྲུལ་ཅན༔ སྐུ་གདུང་འབར་བའི་བརྡ་རིས་འདི༔ དབྱིངས་ཀྱི་མཁའ་འགྲོས་སྤྲད་པའི་མོད༔ སོ་སོ་ཡང་དག་རིག་པ་བཞི༔ དག་པ་ཆེན་པོའི་བརྟུལ་ཞུགས་ལ༔ དབང་བསྒྱུར་ཆོས་ཀྱི་གཏེར་ལ་དབང༔ ཞེས་རྡོ་རྗེའི་ལུང་གིས་ཇི་ལྟར་བསྟན་པའི་བདེན་དོན་མངོན་སུམ་དུ་གྱུར་པ་མངའ་བདག་ཆོས་ཀྱི་རྒྱལ་པོ་དང༌། དེའི་སྐྱེ་བ་དེ་མ་ཐག་པ་རྒྱལ་སྲས་ལྷ་རྗེ་ཁུ་དབོན་ཟུང་གིས་མི་སློབ་འབྲས་བུ་མངོན་གྱུར་གྱི་རང་གཟུགས། གཏེར་སྟོན་རྐྱང་པའི་སྐྱེ་བ་བཞེས་པའི་བཅུ་གསུམ་པ་མཁས་ཤིང་གྲུབ་པའི་གཙུག་རྒྱན་ཀུན་མཁྱེན་ཆོས་ཀྱི་རྒྱལ་པོ་གར་དབང་འཇིགས་མེད་གླིང་པ་ལ་བཀའ་བབ་པའི་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྐོར་ལ་རིག་འཛིན་བླ་མ་ཉིད་ཀྱི་ཕྱི་ནང་གསང་བ་ཡང་གསང་གི་སྒྲུབ་ཚུལ་དུ་མ་ཡོད་པ་ལས་གསང་བ་སྒྲུབ་སྡེ་བརྒྱད་ཀུན་འདུས་ཡི་དམ་སྤྱི་སྒྲུབ་བླ་མ་དྲག་པོ་དཔལ་ཆེན་འདུས་པའི་རྩ་བའི་དཀྱིལ་འཁོར་ཆེན་པོར་སྨིན་པར་བྱེད་པ་ལ་སྔོན་འགྲོ་སློབ་མ་སྟ་གོན་དང༌། དངོས་གཞིའི་དབང་བསྐུར་གཉིས་སུ་ཡོད་པ་ལས་ཐོག་མར་གྱུར་པ་སློབ་མ་ལྷག་པར་གནས་པའི་རིམ་པ་ཞུ་བའི་དོན་དུ་མཎྜལ་ཕུལ། སྦྱར་བ་ལས་གཞན་ཞི་ཁྲོ་ལྟར་ལས་དམིགས་བསལ་མ་མཆིས། དངོས་གཞིའི་དཀྱིལ་འཁོར་བཤམ་བཀོད་ལ་དཔལ་ཆེན་གཞུང་མཐུན་གྱི་དཀྱིལ་འཁོར་བཀྲམ་པའི་སྟེང༌། རིགས་དབང་ལྔ། དཔལ་ཆེན་གཙོ་དགུ་ཁྱུང་དང་བཅས་པའི་ཙཀླི། གསང་ཐོད། རིག་ཙཀ །མེ་ལོང་ཤེལ་རྡོ། རྗེས་གནང་ཆས། མིག་དར། མེ་ཏོག །དོར་ར། མིག་ཐུར་སོགས་གཞུང་ལྟར་ཚོགས་པར་བྱས་ལ། བསྐྱེད་རིམ་གྱི་གོ་དོན་ལྷོངས་སུ་གྱུར་པ་དག་གིས་བདག་མདུན་བུམ་གསུམ་ཆོ་ག་གཅིག་གིས་བསྒྲུབས་ཀྱང་རུང་བ་སྔོན་གྱི་བླ་མ་དངོས་གྲུབ་བརྙེས་པ་དག་གིས་ཕྱག་བཞེས་ཀྱང་ཡིན་ལ། ན་ཚོད་ཡོལ་ཡང་བྱིས་པའི་རྣམ་རིག་ཅན་རྣམས་ནི་ལས་དང་པོ་པ་ཡིན་པས་བདག་མདུན་བུམ་གསུམ་གྱི་རྣམ་དབྱེ་ཕྱེད་པའང་མེད་ན་བསྐྱེད་རིམ་གོམས་བརྟན་གྱི་དངོས་དོན་ལ་ཇི་ལྟར་འབྱེད། དེ་བས་ན་ཆོས་ལ་དབང་ཟ་བ་སྤངས་ཏེ། སྒྲུབ་གཞུང་བཞིན་དུ་བདག་བསྐྱེད་བཟླས་པ་དང་བཅས་པའི་མཐར་མཆོད་བསྟོད་དང༌། དེ་ནས་མདུན་བསྐྱེད་སྒྲུབ་པའི་མཆོད་པ་ཁ་གསོས་ལ། རྡོ་རྗེ་སློབ་དཔོན་སངས་རྒྱས་དཔལ་སོགས་ཀྱི་རྒྱུན་བཤགས་ལན་གསུམ། བྱིན་འབེབས་དང་མཆོད་པ་བྱིན་རླབས་གཞུང་ལྟར་ལ། མདུན་རྟེན། ཤཱུ་ནྱ་ཏཱས་བསང་སྦྱངས། རང་བྱུང་རིག་པ་བདག་མེད་དེ་བཞིན་ཉིད་སོགས་ནས་བཟླས་པ་ཅི་ནུས་བྱའོ། །ཞེས་བདག་འཇུག་དབང་དོན་རྒྱ་མཚོ་ལས་གསུངས་པས་ན། བརྒྱུད་འདེབས་དང༌། སྐྱབས་སེམས་ནས་མཆོད་པ་བྱིན་རླབས་བར་ལས་བྱང་ལྟར་ལ། བདག་བསྐྱེད། ཧཱུྃ༔ རང་བྱུང་རིག་པ་བདག་མེད་དེ་བཞིན་ཉིད་སོགས་དེ་བཞིན་ཉིད་ཀྱི་ཏིང་ངེ་འཛིན་ནས། ཨོཾ་ཧཱུྃ་སྭཱ་ཧྲཱིཿཨཱཿ ཧཱུྃ༔ འོག་མིན་ཆོས་དབྱིངས་བདེ་ཆེན་སོགས་སྤྱན་འདྲེན། བཞུགས་གསོལ་ཕྱག་འཚལ་རྣམས་རང་གཞུང་ལྟར་དང༌། བླ་མེད་མཆོག་གི་མཆོད་པ་དམ་པ་ནི༔ ཡེ་ཤེས་ལྔ་ཡིས་འོད་ཟེར་རྣམ་པར་འཕྲོ༔ འདོད་པའི་ཡོན་ཏན་ལྔ་ཡི་རབ་བརྒྱན་ཏེ༔ དམ་ཚིག་བཞིན་དུ་ཅི་བདེར་བཞེས་སུ་གསོལ༔ མ་ཧཱ་མུ་དྲ་པཱུ་ཛ་ཧོཿ མ་ཧཱ་ཛྙཱ་ན་ཏེ་ཏེ་ཧཱུྃ༔ ཏེ་ན་ཏེ་ཏེ་ཧཱུྃ༔ ཨོཾ་ཤྲཱི་བཛྲ་ས་པ་རི་ཝཱ་ར་དྷཱུ་པེ་ཧཱུྃ༔ པུཥྤེ་ཏྲཱྃ༔ ཨ་ལོ་ཀེ་ཧྲཱི༔ གནྡྷེ་ཧོ༔ ནཻ་ཝི་ཏེ་ཨཱཿ ཤབྡ་ཧཱུྃ༔ སརྦ་པཱུ་ཛ་ས་མ་ཡ་ཧོཿ ཧ་ལ་པཉྩ་པཱུ་ཛ་ཧོཿ མ་ཧཱ་ཨ་མྲྀ་ཏ་ཁཱ་ཧི༔ མ་ཧཱ་བ་ལིཾ་ཏ་ཁཱ་ཧི༔ མ་ཧཱ་རཀྟ་ཁཱ་ཧི༔ མ་ཧཱ་བཛྲ་ཨ་མྲྀ་ཏ་ཛ་གད་པཱུ་ཛ་ཧོ༔ ཛཿཧཱུྃ་བྃ་ཧོཿ ཏ་ན་ག་ན་པཱུ་ཛ་ཧོཿ ཞེས་མཆོད་པའི་རིམ་པ་བསྡུས་ཏེ་བྱ་བ་དང༌། ཧཱུྃ༔ མི་སྡུག་སྲིན་པོ་སོགས་བསྟོད་པ། བསྙེན་སྒྲུབ་སྒྲུབ་ཆེན་གྱི་བཟླས་པ་ཁྱུག་ཙམ་རྗེས། ཡེ་ཤེས་ལྷ་ཚོགས་སོགས་སྟོང་ཚིག་མཆོད་བསྟོད་ཙམ་སྦྱར་ན་ལེགས་སྙམ། རྡོ་རྗེ་སློབ་དཔོན་སངས་རྒྱས་སོགས་ཡན་ལག་བརྒྱད་པའི་ཚོགས་བསགས་ནས། བྱིན་འབེབས། མཆོད་པ་བྱིན་རླབས་དང༌། མདུན་རྟེན། ཤཱུ་ནྱ་ཏཱས་སྦྱངས། རང་བྱུང་རིག་པ་སོགས་ནས་ལས་བྱང་དཀྱུས་ལྟར་དབང་བསྐུར་རྒྱས་གདབ། སྤྱན་འདྲེན་བསྟིམ་པ། ཕྱག་མཆོད་བསྟོད་པ་བཟླས་པ་བཅས་གཞུང་བཞིན་ལ། གཙོ་བོ་གུ་རུ་ཤྲཱི་དང་སྤྱི་དྲིལ་བཛྲ་ཙཎྜ་གཉིས་མང་ཙམ་དང༌། ཞི་བསྙེན། ཧཱུྃ་བཟླས་དང་ལས་སྦྱོར་ཁྱུག་ཙམ་བཏང་བས་འཐུས། བུམ་སྒྲུབ་སྟ་གོན་སྐབས་ལྟར་བྱས་པས་འབྲེལ་ཆགས་སུ་འགྱུར་ལ། མཐར་མཆོད་ཕྲེང་རྒྱས་བསྡུས་གཉིས་གང་འོས། བསྟོད་པ། ནོངས་བཤགས་བཅས་དང༌། བཀའ་སྲུང་གཏོར་བསྔོས། ཚོགས་བསྐང་བཤགས་རྣམས་གཞུང་ལྟར་གྲུབ་རྗེས། བདག་འཇུག་ལ། གཞི་བདེ་གཤེགས་སྙིང་པོ་གདོད་ནས་དཀྱིལ་འཁོར་གྱི་འཁོར་ལོར་རྫོགས་པ་འཇུག་ཅིང་དབང་བླང་བའི་ཡུལ་དང༌། རྣམ་སྨིན་གྱི་རྟེན་ཕུང་ཁམས་ཚོགས་བརྒྱད་ཀྱིས་བསྡུས་པའི་བག་ཆགས་བློ་བུར་བ་སྦྱང་གཞི་སློབ་བུའི་ཚུལ་དུ་ཤེས་པར་བྱས་ནས། སློབ་མ་ལ་དབང་བསྐུར་བའི་སྐབས་ཀྱི་ཆོ་ག་བཞིན་ཚང་བས་དབང་བླངས་ཏེ་བདག་ཉིད་ནུས་ལྡན་དུ་བྱས་ལ། སློབ་མ་འཇུག་པར་གནང་བ་ཞུ། ཅིས་ཀྱང་མ་གྲུབ་ན་རིག་པའི་མེ་ཏོག་དོར་བ་དང་གནང་ཞུ་བཅས་ངེས་པར་བྱ། སྔར་སྟ་གོན་བྱས་པའི་སློབ་མ་རྣམས་སྒོའི་ཕྱི་རོལ་ནས་ཁྲུས་བྱ། བགེགས་བསྐྲད། སྲུང་འཁོར་བསྒོམ། མཚམས་སྦྱོར་སྤྱི་འགྲོས། ཙཀྵུ་བྷནྡྷ་ཝ་ར་མ་ན་ཡེ་སྭཱ་ཧཱཿས་མིག་དར། ཨ་ཁཾ་ཝི་ར་ཧཱུྃ་གིས་མེ་ཏོག་གཏད། ལོ་རྒྱུས་ཀྱི་ཁྱད་པར། དེ་ཡང་འོ་སྐོལ་གྱི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པས་གདུལ་བྱ་སེམས་ཅན་གྱི་ཁམས་དབང་བསམ་པ་མོས་པའི་རིམ་པ་དང་རྗེས་སུ་མཐུན་པའི་ཆོས་འཁོར་བསམ་གྱིས་མི་ཁྱབ་པར་བསྟན་པ་ཐམས་ཅད་བསྡུ་ན་རྒྱུ་འབྲས་ཀྱི་ཐེག་པ་གཉིས་སུ་འདུས་པ་ལས། ཁྱད་པར་དུ་མས་འཕགས་པ་འབྲས་བུ་གསང་སྔགས་རྡོ་རྗེ་ཐེག་པ་སྟེ། དེའང་ཕྱི་ཐུབ་པ་རྒྱུད་ཀྱི་ཐེག་པར་ཀྲི་ཡོག་སྡེ་གསུམ། ནང་ཐབས་རྒྱུད་ཀྱི་ཐེག་པར་བསྐྱེད་རྫོགས་རྫོགས་ཆེན་གསུམ་དུ་ཕྱེ་བ་ལས་ནང་པ་ཐབས་ཀྱི་རྒྱུད། དེ་ལའང་རྒྱུད་སྡེ་དང་སྒྲུབ་སྡེ་གཉིས་ལས་ཕྱི་མ་སྒྲུབ་པའི་སྡེ་སྟེ། དེ་ལའང་རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ལས། བསྐྱེད་པ་མ་ཧཱ་ཡོ་ག་ནི་ཆོས་ཐམས་ཅད་ཀྱི་གཞི་ལྟ་བུའོ། །རྫོགས་པ་ཨ་ནུ་ཡོ་ག་ནི་ཆོས་ཐམས་ཅད་ཀྱི་ལམ་ལྟ་བུའོ། །རྫོགས་པ་ཆེན་པོ་ཨ་ཏི་ཡོ་ག་ནི་ཆོས་ཐམས་ཅད་ཀྱི་འབྲས་བུ་ལྟ་བུའོ། །ཞེས་གསུངས་པས་མ་ཧཱ་ཡོ་ག་ནི་སྔགས་ཀྱི་ཐེག་པའི་གཞི་ལམ་འབྲས་བུའི་དོན་ཐམས་ཅད་སྟོན་པས་ཐེག་པའི་ཕྱི་མོ་ལྟ་བུ་ཡིན་ལ། ཟབ་ཆོས་དེ་ཉིད་ཀྱི་རྩ་བ་སྒྲུབ་ཆེན་བཀའ་བརྒྱད་ཅེས་བདེ་གཤེགས་རྒྱལ་བ་ཞི་ཁྲོའི་སྤྱི་སྒྲུབ་འདི་ཉིད་འོག་མིན་གྱི་གནས་སུ་ཀུན་བཟང་ཆེ་མཆོག་ཧེ་རུ་ཀ་ཞི་ཁྲོའི་ཚོམ་བུར་སྣང་བས་སྤྱི་རྒྱུད་ལྔ་དང་སྒོས་རྒྱུད་བཅུ། བྱེ་བྲག་སོ་སོའི་སྒོས་རྒྱུད་དཔག་ཏུ་མེད་པ་ཆོས་ཉིད་ཀྱི་རང་སྒྲས་གསུངས། མི་མངོན་རིག་པ་འཛིན་པའི་གནས་སུ་གསང་བདག་རྡོ་རྗེ་ཆོས་ཀྱིས་བསྡུས་ནས་འཁོར་གྱི་རིག་འཛིན་ལ་བསྟན་ཏེ་དགོངས་འགྲེལ་ལུང་ལྔ་མཛད་ནས་མཁའ་འགྲོ་ལས་ཀྱི་དབང་མོ་ཆེ་ལ་གཏད། བསིལ་བའི་ཚལ་གྱི་མཆོད་རྟེན་བདེ་བྱེད་བརྩེགས་པར་མཁའ་འགྲོ་མ་བདེ་བའི་དངོས་གྲུབ་ཀྱིས་རི་རབ་ཀྱི་སྲོག་ཤིང་དཔག་བསམ་ལྗོན་པ་ལ་དཔེ་བྱས་ནས་གཏེར་དུ་སྦས་པ། ཟུག་པ་རྩ་བ་ལྟ་བུའི་ཚུལ་དུ་རྒྱུད་སྒྱུ་འཕྲུལ་སྡེ་བརྒྱད་སོགས་མཆོད་རྟེན་གྱི་སེང་ཁྲི། འདྲིལ་བ་སྡོང་པོའི་ཚུལ་དུ་བདེ་གཤེགས་འདུས་པའི་རྒྱུད་སྐོར་བུམ་པའི་དབུས། གྱེས་པ་ཡལ་གའི་ཚུལ་དུ་སྒོས་རྒྱུད་རྣམས་བུམ་པའི་ཕྱོགས་མཚམས། གསལ་བ་མེ་ཏོག་གི་ཚུལ་དུ་གསང་བ་ཡོངས་རྫོགས་བྲེ། སྨིན་པ་འབྲས་བུའི་ཚུལ་དུ་རང་བྱུང་རང་ཤར་ཆོས་འཁོར། འབྲས་བུའི་བཅུད་ཀྱི་ཚུལ་དུ་སངས་རྒྱས་མཉམ་སྦྱོར་གདུགས་ཀྱི་དབུས། ཡང་གསང་བླ་མེད་ཨ་ཏི་ནག་པོ་སོགས་རྫོགས་ཆེན་སྙིང་པོའི་སྐོར་རྣམས་རྩེ་མོའི་ཏོག་ལ་རྒྱས་བཏབ་ནས་དཔའ་བོ་ཌཱ་ཀིར་གཉེར་དུ་གཏད། དེ་ནས་མི་ཡུལ་གྱི་གདུལ་བྱ་འདུལ་བའི་དུས་ལ་བབ་པ་ན། དཔལ་ཆེན་པོ་དང་གཉིས་སུ་མེད་པའི་རིག་འཛིན་གྱི་རྒྱལ་པོ་ཀུཉྫ་རའི་ཐུགས་ཡེ་ཤེས་ཀློང་དགུའི་རང་རྩལ་བཀའ་བབ་རིག་འཛིན་བརྒྱད་དང༌། རྒྱལ་དབང་པདྨ་ཐོད་ཕྲེང་རྩལ་དང་དགུར་སྣང་སྟེ། སྨུག་ནག་དབང་གི་མཁའ་འགྲོས་སྒྲུབ་ཆེན་བརྒྱད་ཀྱི་གཏེར་སྒྲོམ་སློབ་དཔོན་སོ་སོ་ལ་གཏད་དེ་དུར་ཁྲོད་ཆེན་པོ་བརྒྱད་དུ་བསྒྲུབས་པས་དཔལ་ཧེ་རུ་ཀ་དང་གཉིས་སུ་མེད་པའི་གོ་འཕང་བརྙེས། རྒྱལ་དབང་པདྨཱ་ཀ་རས་སློབ་དཔོན་དེ་དག་ལས་སྒྲུབ་ཐབས་བྱེ་བྲག་པའི་རྒྱུད་ལུང་མན་ངག་གསན་ནས་དེ་རྣམས་ལས་ཀྱང་གོ་འཕང་མཐོན་པོར་གཤེགས་པའི་ཚུལ་བསྟན་ཏེ། མཆོད་རྟེན་བདེ་བྱེད་བརྩེགས་པ་ནས་སྔར་རྒྱ་མ་ཁྲོལ་བའི་སྒྲུབ་སྡེ་སྤྱི་དང༌། རྫོགས་ཆེན་སོགས་ལྷག་མ་མ་ལུས་པར་སྤྱན་དྲངས། དཀྱིལ་འཁོར་གྱི་བདག་པོ་རྣམས་ཀྱིས་གསང་སྔགས་ཀྱི་རྒྱུད་སྡེ་རྣམས་ལ་དབང་བསྒྱུར་བར་མངའ་གསོལ་ཏེ། གསང་སྔགས་ཆུ་བོ་བཞིའི་དབང་གི་བཀའ་བབ་བརྙེས། སྔོན་གྱི་སློབ་དཔོན་བརྒྱད་ལ་ཆོས་ཀྱི་སྐྱེས་ཕུལ་ཏེ་སྐུ་ལྔ་ལྷུན་གྲུབ་རྡོ་རྗེ་འཆང་གི་གོ་འཕང་མངོན་སུམ་དུ་མཛད། འཇམ་དཔལ་སྤྲུལ་པའི་རྒྱལ་པོས་བོད་དུ་སྤྱན་དྲངས་ནས་སངས་རྒྱས་ཀྱི་བསྟན་པ་དཀར་འཇམ་ཡུག་གཅིག་ཏུ་བརྡལ་བ་ལ། སངས་རྒྱས་ལས་ཀྱང་དཀོན་པའི་གསང་ཆེན་འབྲས་བུའི་ཆོས་འཁོར་བསྐོར་བར་གསོལ་བ་བཏབ་པས་བསམ་ཡས་མཆིམས་ཕུའི་བྲག་དམར་ཀེའུ་ཚང་དུ་ལས་ཅན་སྙིང་གི་བུ་དགུ་ལ་བདེ་གཤེགས་འདུས་པའི་དཀྱིལ་འཁོར་དུ་དབང་བསྐུར་ནས། མེ་ཏོག་གང་ལ་ཕོག་པའི་དཀྱིལ་འཁོར་སྤྱི་བྱེ་བྲག་ཏུ་བསྒྲུབས་པས་གྲུབ་རྟགས་མངོན་དུ་གྱུར་ཅིང༌། འབངས་རིགས་ཉེར་ལྔ་ལ་སོགས་པ་དུ་མ་ཡང་རྗེས་སུ་བཟུང་ཞིང་གྲོལ་བར་མཛད། བདེ་གཤེགས་འདུས་པ་ཡོངས་རྫོགས་ཀྱི་བཀའ་མངའ་བདག་ཚངས་པ་ལྷ་ཡི་མེ་ཏོག་ཉིད་ལ་བབས་ཏེ་རྒྱུད་ལུང་མན་ངག་ཐམས་ཅད་ཀྱི་བདག་པོར་གྱུར། གུ་རུ་རིན་པོ་ཆེ་དང༌། རྗེ་འབངས་གྲོགས་གསུམ་སོགས་ཀྱིས་ཕྱི་རབས་ཀྱི་གདུལ་བྱ་ལ། གཏེར་གྱི་རིགས་བྱེད་བཅོ་བརྒྱད་དུ་ཕྱེས་ནས་བོད་ཡུལ་མཐའ་དབུས་ཀུན་ཏུ་སྦས་པའི་ཟབ་ཆོས་ཀྱི་གཙོ་བོ་སངས་རྒྱས་གཉིས་པ་ཨོ་རྒྱན་ཆོས་ཀྱི་རྒྱལ་པོའི་ཐུགས་དམ་མཐར་ཐུག་བདེ་གཤེགས་སྒྲུབ་པ་བཀའ་བརྒྱད་ལ། སྐུ་གསུང་ཐུགས་ཡོན་ཏན་ཕྲིན་ལས་ཀྱི་གཏེར་ཆེན་ལྔའམ་བཀའ་མ་མཁས་པ་མི་བཞིའི་ཐུགས་བཅུད་བཀའ་བརྒྱད་རྫོང་འཕྲང༌། གཏེར་མའི་ཕྱོགས་ལ་སྙིང་དང་འདྲ་བ་ཉང་གཏེར་སྒྲུབ་པ་བཀའ་བརྒྱད། སྙིང་ཁྲག་དང་འདྲ་བ་ཆོས་དབང་གསང་རྫོགས། སྙིང་ཁྲག་དྭངས་མ་དང་འདྲ་བ་བྱང་གཏེར་རང་ཤར་རང་གྲོལ་བཅས་བཀའ་བརྒྱད་རྣམ་གསུམ་དང༌། སྲོག་དང་འདྲ་བ་པད་གླིང་ཐུགས་ཀྱི་མེ་ལོང༌། ལུས་དང་འདྲ་བ་བསམ་གཏན་གླིང་པའི་དྲེགས་འདུལ། རྡོར་གླིང་གསང་བ་ཡོངས་རྫོགས། མངའ་རིས་པཎ་ཆེན་རིན་པོ་ཆེའི་བླ་མ་བཀའ་བརྒྱད་རིག་འཛིན་ཡོངས་འདུས་སོགས་དང༌། འཇའ་ཚོན་པའི་བཀའ་བརྒྱད་དངོས་གྲུབ་སྙིང་པོ། ཀློང་གསལ་བཀའ་བརྒྱད་བདེ་གཤེགས་ཡོངས་འདུས། ཡོངས་དྲིལ་བཀའ་འདུས་ཆོས་ཀྱི་རྒྱ་མཚོ་བཅས་སྔ་ཕྱི་བར་གསུམ་རྣམས་སུ་གྲགས་ཆེ་བས་མཚོན་བརྒྱུད་པ་དྲུག་ལྡན་གྱི་བཀའ་སྲོལ་ལས་བྱུང་བའི་སྒྲུབ་སྡེ་བཀའ་བརྒྱད་རྒྱས་བསྡུས། རྒྱུད། སྒྲུབ་ཐབས། མན་ངག་སོགས་མི་འདྲ་བ་དུ་མ་ཞིག་བྱོན་པ། རྒྱུད་ལས། ཞི་ཁྲོ་བཀའ་བརྒྱད་ལྷ་ཚོགས་ནི༔ ཤེས་པ་ཙམ་གྱིས་ཆོག་པ་ཡིན༔ དྲན་པ་ཙམ་གྱིས་ལམ་སྣ་འདྲེན༔ ཡེ་ཤེས་ནང་ནས་ཁྱད་པར་ཆེ༔ ལྷ་ཡི་ནང་ནས་ལྷ་མཆོག་ཡིན༔ དེ་ལ་བརྟེན་དང་སྒྲུབ་པ་དང༔ མཆོད་དང་བསྟོད་པ་ཐམས་ཅད་ཀུན༔ ཆོས་ཀྱི་དབྱིངས་སུ་མངོན་འཚང་རྒྱ༔ ཞེས་གསུངས་པ་དང༌། བྱེ་བྲག་ཏུ་སྤྱིར་ཐར་པ་དང་ཐམས་ཅད་མཁྱེན་པའི་ལམ་གྱི་ཡོན་ཏན་ཐམས་ཅད་དགེ་བའི་བཤེས་གཉེན་གྱི་བཀའ་དྲིན་ལས་འབྱུང་ཞིང༌། ཁྱད་པར་གསང་སྔགས་རྡོ་རྗེ་ཐེག་པའི་ལམ་གྱི་མཆོག་ཐུན་དངོས་གྲུབ་ཐམས་ཅད་བླ་མའི་རྡོ་རྗེའི་གསུམ་གྱི་བྱིན་རླབས་ཁོ་ནར་རག་ལས་པ་རྒྱུད་ལུང་མན་ངག་ཀུན་ལས་ཆེ་ཐང་དུ་བསྔགས་པའི་རྒྱུ་མཚན་གྱིས་བསྐྱེད་རྫོགས་དབང་བསྐུར་ཐམས་ཅད་བླ་མའི་ཡེ་ཤེས་ཀྱི་རོལ་པར་བལྟ་བའི་ལམ་བྱེད་ནི་བྱིན་རླབས་ཀྱི་ཚན་ཁ་ཆེ་ཞིང་དངོས་གྲུབ་མྱུར་བའི་ཉེ་ལམ་ཁྱད་པར་དུ་འཕགས་ཤིང༌། དེ་ཡང་གདུལ་བྱ་འདུལ་བྱེད་ཀྱི་གནས་དུས་དང་མཐུན་པར། དེང་སང་རྩོད་དུས་སྙིགས་མའི་སེམས་ཅན་དམུ་རྒོད་མི་ཐུབ་པ་ལྔ་བདོ་བས། ནང་དུ་རྒྱུ་ཉོན་མོངས་དུག་ལྔ་ཆེས་རགས་པར་བརྡོལ་བའི་རྒྱུས། ཕྱི་རུ་འབྲས་བུ་ནད་མུག་མཚོན་གྱི་བསྐལ་པ་ངན་པ་བདོ་ཞིང༌། བར་དུ་རྒྱལ་བསེན་དམ་སྲིའི་བར་ཆད་རླུང་ལྟར་འཚུབས་པས་ཆོས་བཞིན་སྤྱོད་པའི་སྐྱེས་བུ་ལ་རྣམ་གྲོལ་གྱི་ལམ་སྒྲུབ་ཏུ་མི་སྟེར་བ་ལ་ཆེད་དུ་དགོངས་པས་ཐུགས་རྗེ་མྱུར་ཞིང་བྱིན་རླབས་ཤུགས་དྲག་པ་སྙིགས་མའི་སྐྱབས་གཅིག་རྡོ་རྗེ་ཐོད་ཕྲེང་རྩལ་ཆེན་པོ་ཉིད་བླ་མ་དྲག་པོ་མཐིང་གའི་སྐུར་བཞེངས་པ་དང༌། གསང་སྔགས་སྒྲུབ་སྡེའི་བདེ་གཤེགས་ཞི་ཁྲོ་ཆིག་དྲིལ་དཔལ་ཆེན་སྒྲུབ་པ་བཀའ་བརྒྱད་ཅེས་མཐུ་སྟོབས་ནུས་པའི་གཟི་བྱིན་ཚན་ཁ་ཆེ་བ་གཉིས་དབྱེར་མེད་དུ་སྒྲུབ་པའི་ཆོས་བཀའ་ཟབ་གཉན་བྱིན་རླབས་ནུས་རྩལ་འགྲན་ཟླ་དང་བྲལ་བ་བླ་མ་བཀའ་བརྒྱད་ཀྱི་བབས་སོ་ཆེ་ཤོས་ཡོངས་སུ་གྲགས་པ་ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱི་ཐུགས་ཀྱི་སྤྲུལ་པ་མངའ་རིས་པཎ་ཆེན་རིན་པོ་ཆེས་གཏེར་དུ་བཞེས་པ་རིག་འཛིན་ཡོངས་འདུས་དང་ལོ་ཆེན་བཻ་རོའི་རྣམ་འཕྲུལ་ཀུན་མཁྱེན་པྲཛྙཱ་རསྨིའི་ཟབ་གཏེར་གྲོལ་ཐིག་ལམ་རྒྱས་པ་རྣམས་ཀྱི་སྙིང་པོའི་ཡང་ཞུན་གྱི་བཅུད་ཐིག་ཀློང་ཆེན་དགོངས་པའི་གསང་མཛོད་ལས་བྱོན་པའི་ཆོས་སྐོར་གྱི་རྩ་བ་ལྟ་བུར་གྲོལ་ཐིག་དགོངས་པ་རང་གྲོལ་ལས། གསང་བའི་ལུང་བསྟན་མ་གཏོགས་ཞུ་དག་ཕེར༔ གཅིག་ལ་གཅིག་ཡིད་ཆེས་པས་འཁྲུལ་པ་བྲལ༔ ཞེས་གསུངས་པ་ལྟར་ཨོ་རྒྱན་རྗེ་འབངས་དང་བཅས་པ་ཡེ་ཤེས་ཀྱི་དབྱིངས་སུ་གཅིག་པར་མ་ཟད་གསང་སྔགས་བླ་མེད་ཀྱི་རྒྱུད་ཐམས་ཅད་སྟོན་འཁོར་དགོངས་པ་གཅིག་པའི་ཡེ་ཤེས་ཀྱི་ཆོ་འཕྲུལ་དུ་ངེས་པས་ན་རྩ་བཤད་མན་ངག་གི་རྒྱུད་ཀུན་གྱི་ཡང་སྙིང་བཅུད་དྲིལ་ལྟ་བུ་སྟེ། རང་གཞུང་ལས། མ་འོངས་ལྔ་བརྒྱ་ཐ་མའི་ཚེ༔ མཐའ་ཡི་རྒྱ་འདྲེ་འབྱུང་པོ་དང༔ དབུས་ཀྱི་དམ་སྲི་གློ་བུར་བསྡོངས༔ ཆོས་པའི་སྙིང་ཞུགས་མི་དགེ་སྤྱོད༔ སྐྱེ་བོའི་སྙིང་ཞུགས་སྡིག་རྒྱུན་སྤེལ༔ རྨི་ལམ་བཙུན་པ་བྱ་སྤྲེལ་རྨི༔ བག་མི་ཕེབས་ཤིང་སྙིང་རླུང་ལྡང༔ དེ་ཚེ་གཉེན་པོ་སྟོབས་ཀྱི་ལྷ༔ ཕལ་གྱིས་ཐུལ་བར་མི་འགྱུར་བས༔ ཕྱི་ལྟར་བྱང་སེམས་ནང་རིག་འཛིན༔ གསང་བ་དྲག་གཏུམ་འབར་བའི་ལྷ༔ བདེ་གཤེགས་ཡོངས་རྫོགས་སྒྲུབ་སྡེ་བརྒྱད༔ དཔལ་ཆེན་འདུས་པའི་སྒྲུབ་པ་འདིས༔ ལོག་འདྲེན་འདུལ་བར་ཐེ་ཚོམ་མེད༔ ཤིན་ཏུ་གསང་ཞིང་རང་ཉམས་ལོངས༔ བསྟན་འགྲོའི་དོན་དུ་སྙིང་སྟོབས་བསྐྱེད༔ ཅེས་དང༌། འདི་ནི་བླ་མ་ཡི་དམ་གྱི༔ རྣམ་པར་སྒྲུབ་པས་བྱིན་རླབས་མྱུར༔ གལྤོ་ལ་སོགས་ཧེ་རུ་ཀའི༔ ཏནྟྲ་ཀུན་གྱི་བཅུད་ཀྱང་འདྲིལ༔ ལས་ལ་མི་ལྟོས་དཔལ་ཆེན་པོའི༔ སྲོག་ནས་འཕྲོག་པས་རྣོ་ལ་མྱུར༔ དབང་གི་ཆུ་བོ་མ་ཉམས་སྟེང༔ བརྒྱུད་པ་བདུན་ལྡན་སྒྲུབ་ཐག་ཉེ༔ གསང་ཆེན་རྒྱུད་སྡེ་རྒྱ་མཚོ་ཀུན༔ སྒྲུབ་སྡེ་ཆེན་པོ་བརྒྱད་ལ་འདུ༔ རིག་འཛིན་བརྒྱད་དང་མཁས་པ་བཞི༔ གོང་འོག་རྒྱ་མཚོ་ལྟ་བུའི་འཇིང༔ བརྒལ་བར་མི་ནུས་བློ་ཅན་ལ༔ བཅུད་དྲིལ་འདི་ལས་གཞན་མ་གསུངས༔ ཞེས་གསུངས་པ་ལྟར་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཡི་དམ་རྩ་བ་རིག་འཛིན་ཐུགས་སྒྲུབ་དྲག་པོ་དཔལ་ཆེན་འདུས་པ་གང༌། གནད་བྱང་ཐུགས་ཀྱི་སྒྲོམ་བུ་ལས། དེང་དུས་ད་ལྟའི་རྗེ་འབངས་གྲོགས༔ བི་མ་རྒྱལ་སྲས་ལྷ་རྗེ་རྣམས༔ སྨོན་ལམ་ཐུགས་རྗེས་སྤྲུལ་པའི་སྲས༔ རང་བྱུང་རྡོ་རྗེ་པདྨ་དབང༔ གསང་མཚན་གར་དབང་འཇིགས་མེད་གླིང༔ རྟོགས་གྲོལ་དུས་མཉམ་ཐུགས་གཏེར་བདག༔ འཕགས་པས་རྗེས་སུ་བཟུང་བའི་རྟགས༔ ལག་གཡས་མཐིལ་ན་པདྨའི་སྤྱན༔ དབང་ཆེན་གསུང་གི་རིག་འཛིན་ཕྱིར༔ མཐེ་བོང་ཐུགས་སྲོག་ཧྱ་ཡིས་མཚན༔ རྟོགས་པ་ཀློང་དུ་གྱུར་པའི་རྟགས༔ ཚེམས་ལ་སྐྱེ་མེད་ཡི་གེ་ཨ༔ སྙིང་རྗེ་ཆེ་ལ་རིག་པ་ཧུར༔ ཤེས་རབ་ཆེ་ཞིང་འཛིན་ཆགས་ཆུང༔ ཐུགས་སྒམ་ཚིག་བཙན་བློ་གྲོས་ཟབ༔ ངེས་མེད་སྤྱོད་པ་ཅིར་ཡང་སྟོན༔ འཇིགས་པ་མེད་པའི་བརྟུལ་ཞུགས་ཅན༔ ཞུམ་མེད་སྣང་བ་ཟིལ་གྱིས་གནོན༔ དེ་ལ་ཐུགས་རྒྱུད་དངོས་གཏེར་རམ༔ ཡང་ན་དགོངས་གཏེར་ཚུལ་དུ་འབེབས༔ དངོས་ཉམས་རྨི་ལམ་མ་ངེས་པར༔ ང་དང་ཞལ་མཇལ་དོན་དབང་བསྐུར༔ ཐུགས་རྒྱུད་དགོངས་པའི་བྱིན་རླབས་འཕོ༔ པད་འབྱུང་ང་དང་རིག་འཛིན་ཉིད༔ དགོངས་པ་གཅིག་དང་དབྱངས་གཅིག་འགྱུར༔ ཞེས་པ་ལྟར་ཆེ་མཆོག་བདུད་རྩིའི་བཀའ་བབས་པཎ་ཆེན་བི་མ་ལ་མི་ཏྲ་དང༌། བདེ་གཤེགས་འདུས་པའི་བཀའ་བབས་ཆོས་རྒྱལ་ཁྲི་ལྡེ། བཀའ་འདུས་ཆོས་ཀྱི་རྒྱ་མཚོའི་རྒྱུད་ལུང་མན་ངག་གི་མངའ་བདག་རྒྱལ་སྲས་ལྷ་རྗེ་ཁུ་དབོན་རྣམས་ཀྱི་སྨོན་ལམ་དང་ཐུགས་རྗེའི་རང་གཟུགས་གཅིག་ཏུ་བསྡུས་པ། ནང་དུ་མཁྱེན་བརྩེ་ནུས་གསུམ་གྱི་སྤངས་རྟོགས་ཀྱི་ཡེ་ཤེས། ཕྱི་རུ་སྐུ་དང་གསུང་ལ་མི་འགྱུར་བའི་བརྡ་རྟགས་གསུམ་གྱི་གཟེར། གསང་བ་དག་ཆེན་ཡེ་ཤེས་ཀྱི་རང་རྩལ་མཁའ་འགྲོའི་གསང་མཛོད་ལ་དབང་བསྒྱུར་བའི་བརྡ་རྟགས་གསུམ་ཀ་ལ་ནོར་འཁྲུལ་གྱི་དྲི་མ་མེད་པས་རྩོད་བྲལ་ཉི་ཟླ་ལྟ་བུར་འཛམ་གླིང་ཀུན་ལ་གྲགས་ཤིང༌། རྟོགས་པ་དོན་རྒྱུད་ཀྱི་དགོངས་པ་ཕྱག་མཐིལ་དུ་ཟིན་པས་དཔེ་རྒྱུད་འཛད་མེད་ནམ་མཁའ་མཛོད་ལ་དབང་ཐོབ་པའི་སྐྱེས་བུ་ཕྲིན་ལས་ནམ་མཁའི་མུ་ཁྱུད་བརྡོལ་ཏེ་གྲུབ་ཐོབ་ཀྱི་ཚང་བརྡོལ་བར་མཛད་པའི་སྨིན་གྲོལ་རྒྱ་མཚོའི་ཤིང་རྟ་བདག་ཉིད་ཆེན་པོ་ཀུན་མཁྱེན་རིག་འཛིན་འཇིགས་བྲལ་གླིང་པ་པདྨ་དབང་ཆེན་ཡེ་ཤེས་རོལ་པའི་རྡོ་རྗེ་ཉིད་ཀྱིས་རྗེས་འཇུག་གདུལ་བྱའི་སྐལ་བར་སྔ་འགྱུར་བཀའ་གཏེར་རྒྱ་མཚོའི་སྲོག་གི་ཟུངས་ཁྲག་བསྟན་པའི་བཙས་ཆེན་པོ་རུ་བཞག་པ་རྒྱུད་སྡེའི་དབང་དུ་བྱས་ན་སྣང་གྲགས་རིག་པའི་ཆོ་འཕྲུལ་དུ་མངོན་པར་བྱང་ཆུབ་པ་དཔལ་ལྡན་སྒྱུ་འཕྲུལ་དྲྭ་བའི་སྙིང་པོ་དཔལ་ཆེན་ཞལ་ལུང༌། ནང་ཧེ་རུ་ཀ་འདུས་པའི་བསྐྱེད་རིམ་ཞེས་དཔལ་སྒྱུ་འཕྲུལ་དྲྭ་བའི་རྒྱུད་སྡེའི་བཅུད་ཕུར་དུ་གསུངས། སྒྲུབ་སྡེ་བརྒྱད་དེ་དག་ཏུ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྒྲུབ་བཀའ་ཆེན་པོ་བརྒྱད་ཆིག་དྲིལ་བླ་མ་དྲག་མཐིང་གི་ཐུགས་སྒྲུབ་གསང་བའི་བཅུད་ཕུར་ཏེ། འདི་ལ་རྩ་བ་སྒྲུབ་པ་བཀའ་བརྒྱད་ཆིག་དྲིལ་དུ་སྒྲུབ་པ། ཡན་ལག་ཁྲག་འཐུང་རིགས་བཞིའི་སྒོས་བཀའི་སྒྲུབ་པ་གཉིས་ལས་སྔ་མའི་དབང་བསྐུར་བགྱི་བ་སྐབས་སུ་བབ་པ་སྟེ། དེ་ལའང་སྟ་གོན་གྱི་རིམ་པ་སྔོན་དུ་སོང་ཟིན་ནས་དངོས་གཞིའི་དབང་བསྐུར་བ་ཡིན་ལ། དེ་ལའང་ཐོག་མར་དཀྱིལ་འཁོར་སྒྲུབ་ཅིང་བདག་ཉིད་འཇུག་པ། དངོས་གཞིའི་ཕན་ནུས་ཟབ་མོའི་དབང་རྣམས་བསྐུར་བ། རྗེས་སྨིན་ཟིན་གྲོལ་བར་བྱེད་པ་ཁྲིད་འབོག་པ་དང་གསུམ་ལས། སྔོན་འགྲོ་བདག་མདུན་བུམ་པ་སྒྲུབ་ཅིང་དབང་ལེན་རྣམས་ཁོ་བོས་ལེགས་པར་བགྱིས་ཟིན་ཅིང༌། ད་དབང་དངོས་བསྐུར་བ་ལ་ཡང་སྔོན་འགྲོ་ཕྱི་ནང་གི་འཇུག་པ། དངོས་གཞིའི་དབང་རྣམས་འབོག་པ། རྗེས་དམ་ཚིག་ཁས་བླང་ཡོན་འབུལ་བཅས་གསུམ་གྱི་དང་པོ་དཀྱིལ་འཁོར་གཉན་པོར་ཕྱི་ནང་གི་འཇུག་པའི་ཆོས་རྣམས་ཞུ་བའི་དོན་དུ་མཎྜལ་ཕུལ། བླ་མ་དང་དཀྱིལ་འཁོར་གྱི་གཙོ་བོ་དབྱེར་མ་མཆིས་པའི་སྤྱན་སྔར་ཐལ་མོ་མེ་ཏོག་དང་ལྡན་པས་གསོལ་བ་འདེབས་པ་འདིའི་རྗེས་ཟློས། ཨེ་མ་ཧོ་བདེ་གཤེགས་སྙིང་པོ་ལས༔ གློ་བུར་འཁྲུལ་པས་བཅིངས་པ་དག༔ ཚོགས་བརྒྱད་སྲིད་མཚོ་ལས་བསྒྲལ་ཕྱིར༔ རང་བྱུང་དཀྱིལ་འཁོར་བསྟན་དུ་གསོལ༔ ལན་གསུམ། དམ་ཚིག་གི་གནས་ཁེ་ཉེན་ཆེ་བས་དཀྱིལ་འཁོར་དུ་ཞུགས་ཏེ་དབང་ཐོབ་ནས་ཚུལ་བཞིན་བསྲུང་དགོས་ཕྱིར་བཀའ་གཉན་པའི་ཐ་ཚིག་བསྒྲག་པ་ནི། བླ་ན་མེད་པའི་དཀྱིལ་འཁོར་ནི༔ དམ་ཚིག་རྒྱ་མཚོའི་གནས་ཡིན་ཏེ༔ བསྲུངས་ན་ཚེ་འདིར་དངོས་གྲུབ་ཐོབ༔ ཉམས་ན་རྡོ་རྗེ་དམྱལ་བར་བསྲེག༔ ཅེས་དྲིས་པར་དམ་ཚིག་བསྲུང་བར་ཁས་བླང་བ་འདིའི་རྗེས་ཟློས། ལྷ་དང་བླ་མར་གུས་པས་བདག༔ སྲོག་ལ་བབ་ཀྱང་དམ་ཚིག་བསྲུང༔ སོར་ཐར་བྱང་སེམས་རིག་འཛིན་གྱི༔ སྡོམ་པས་བདག་རྒྱུད་དག་པར་སྩོལ༔ ལན་གསུམ། ཐུན་མོང་གི་ལམ་གྱི་གཞི་རྟེན་སྐྱབས་འགྲོ། ཐེག་ཆེན་ཐུན་མིན་ལམ་གྱི་གཞུང་ཤིང་སེམས་བསྐྱེད། རྒྱུད་དག་པར་བྱ་བའི་སླད་དུ་རྒྱུན་བཤགས་ཡན་ལག་བརྒྱད་པ་ཚུལ་བཞིན་དུ་བྱ་བའི་བློས་དཀྱིལ་འཁོར་ཆེན་པོ་ སྒོས་བཀའ་སོ་སོར་ཁ་བསྒྱུར་དགོས། མཆན། བདུན་བརྒྱ་ཉེར་ལྔའི་ལྷ་ཚོགས་རྣམས་དང་སྐྱབས་གནས་རྩ་གསུམ་དམ་ཅན་རྒྱ་མཚོའི་སྤྱན་སྔར་བསགས་སྦྱང་གི་ཚིག་རྣམས་ཀྱི་སྒོམ་དོན་རེ་རེ་བཞིན་གསལ་ཐོབ་ལ་འདིའི་རྗེས་ཟློས། རྡོ་རྗེ་སློབ་དཔོན་སངས་རྒྱས་དཔལ་སོགས་ལན་གསུམ། རྡོ་རྗེ་ཐེག་པའི་ཐུན་མོང་མ་ཡིན་པའི་སྡོམ་པ་རིགས་ལྔ་སྤྱི་དང་བྱེ་བྲག་ཁྱད་པར་གྱིས་བསྡུས་པའི་དམ་ཚིག་རྣམས་ལེགས་པར་བླངས་ཏེ་སྲུང་སྙམ་པས་འདིའི་རྗེས་ཟློས། དུས་གསུམ་དུས་མེད་སྟོན་པ་ཀུན༔ རྡོ་རྗེའི་ཆོ་ག་འདི་མཁྱེན་ནས༔ གོ་འཕང་མཆོག་ལ་གཞུག་པའི་ཕྱིར༔ སྐྱབས་ཀྱི་མཆོག་ཏུ་དཀོན་མཆོག་འཛིན༔ རང་གི་ཉེས་སྤྱོད་སྡོམ་བྱེད་ཅིང༔ གཞན་གནོད་གཞི་དང་བཅས་པ་སྤོངས༔ སྨོན་དང་འཇུག་པའི་སེམས་གཉིས་བསྐྱེད༔ ཕྱིན་དྲུག་ལ་སྤྱོད་དགེ་ཆོས་སྡུད༔ རྟག་ཏུ་གཞན་ལ་ཕན་པ་སྒྲུབ༔ མ་བསྒྲལ་སྒྲོལ་ཞིང་མ་གྲོལ་དགྲོལ༔ དབུགས་མ་ཕྱིན་པ་དབུགས་དབྱུང་ཞིང༔ སེམས་ཅན་བྱང་གྲོལ་གནས་ལ་འགོད༔ ལྷ་ཡི་ཕྱག་རྒྱ་འགོང་པ་དང༔ བླ་མའི་བཞོན་པ་བརྙས་སོགས་སྤོངས༔ ལྷ་དང་ལྷ་མིན་གསང་བ་པ༔ བསྟན་པ་སྐྱོང་ལ་མཆོད་བྱེད་ཅིང༔ བྱང་ཆུབ་རྡོ་རྗེ་འབྲལ་མི་བྱ༔ མདོར་ན་དེ་ཡིས་གང་བསྒྲགས་པ༔ བྱང་ཆུབ་བར་དུ་གཅེས་པར་གཟུང༔ ལན་གསུམ། དེ་ནས་ཐམས་ཅད་རྡོ་རྗེའི་རྣལ་འབྱོར་དུ་སེམས་བསྐྱེད་པའི་ཕྱིར་བདག་གིས་སེམས་ཅན་ཐམས་ཅད་ཀྱི་དོན་དུ་རྫོགས་པའི་བྱང་ཆུབ་ཐོབ་པར་བྱའོ་སྙམ་པའི་ཀུན་རྫོབ་བྱང་ཆུབ་ཀྱི་སེམས་དེ་ཉིད་སྙིང་གར་ཟླ་བ་ཉ་གང་བར་གྱུར་པའི་སྟེང༌། དོན་དམ་པའི་བྱང་ཆུབ་ཀྱི་སེམས་རྡོ་རྗེ་རྩེ་ལྔ་པའི་རྣམ་པར་ཤར་བ་ལས་འོད་ཟེར་མཁའ་ཁྱབ་ཏུ་འཕྲོས་པར་བསམ་ལ། རྡོ་རྗེ་མེ་ཏོག་དང་བཅས་པ་སྙིང་གར་བཞག་པས་དེ་ཉིད་བརྟན་པར་མོས་མཛོད། ཨོཾ་སརྦ་ཡོ་ག་ཙིཏྟ་ཨུ་པ་ད་ཡ་མི༔ ལན་གསུམ་བརྗོད། དམ་ཚིག་གི་དཔང་པོ་རྡོ་རྗེའི་མནའ་ཆུ་བྱིན་པས་ཁེ་ཉེན་གྱི་གནས་ལ་བླང་དོར་བརྟན་པོར་མཛད་པའི་ངེས་ཤེས་ཀྱིས་ཤིག །ནང་མཆོད་ལྕེ་ཐོག་ཏུ་བཞག་ལ། འདི་ནི་རྡོ་རྗེའི་དམ་ཚིག་ཆུ༔ ཉམས་ན་སྙིང་ཁྲག་སྡིག་པས་འཐུང༔ བདེ་ལེགས་ཡོན་ཏན་ཐམས་ཅད་འགྲིབ༔ བསྲུངས་ན་ཡེ་ཤེས་སེམས་དཔར་འགྱུར༔ ཚེ་འདིར་མཆོག་གི་དངོས་གྲུབ་སྟེར༔ ས་མ་ཡ་ཨི་དན་ན་ར་ཀན༔ ཕྱི་འཇུག་གི་ཐོག་མ་དཀྱིལ་འཁོར་དུ་འཇུག་པར་གསོལ་བ་འདེབས་པ་འདིའི་རྗེས་ཟློས། ཧོ༔ སྲིད་ཞིར་མི་གནས་ཕོ་བྲང་ཆེར༔ འཇུག་པའི་སྒོ་ནི་ཚད་མེད་བཞི༔ རྣམ་པར་ཕྱེ་ལ་ཡེ་ཤེས་ཀྱི༔ དཀྱིལ་འཁོར་བདག་པོར་བདག་འཇུག་འཚལ༔ ལན་གསུམ། ཞེས་གསོལ་བ་བཏབ་པས་བྱང་ཆུབ་རྡོ་རྗེའི་ཐུགས་ཀའི་འོད་ཀྱིས་སྒོ་བ་བཞི་རྣམས་བསྐུལ་ཏེ་གཞལ་ཡས་ཁང་གི་སྒོ་བཞི་ཤག་གིས་ཕྱེ་བར་མོས། སློབ་དཔོན་གྱིས་དབྱེ་རྒྱ་དང་བཅས། ཨ་ཁཾ་བི་ར་ཧཱུྃ༔ དཀྱིལ་འཁོར་གྱི་ཤར་སྒོ་ནས་རིམ་པར་གཡས་བསྐོར་དུ་ལས་ཀྱི་རྡོ་རྗེས་ཁྲིད་ནས་ལྷ་རྣམས་ཀྱི་སྐུ་གསུང་ཐུགས་ལ་ཕྱག་བྱས་པར་མོས་ལ་ཐལ་མོ་གནས་གསུམ་དུ་སྦྱར་བས་འདིའི་རྗེས་ཟློས་མཛོད། ཨོཾ་ན་མ་ཏེ་ཧཱུྃ༔ ཨོཾ་ན་མ་མེ་ཧཱུྃ༔ ཨོཾ་ན་མོ་ན་མ་ཧཱུྃ༔ ལན་བཞི། ནང་འཇུག་གི་དང་པོ་ཡེ་ཤེས་པ་དབབ་པ་ཡིན་པས་སྒོ་གསུམ་གྱི་གནད་གཅུན་ལ་དམིགས་པ་འདི་ལྟར་མཛོད། དཀྱིལ་འཁོར་གྱི་ཤར་སྒོར་དབང་སྟེགས་པདྨ་འདབ་བརྒྱད་ལ་འཁོད་པས། གཙོ་བོའི་ཐུགས་ཀ་ནས་འོད་ཟེར་བྱུང༌། རང་གི་རྣམ་སྨིན་གྱི་ལུས་རྟེན་སྦྱངས། རྣམ་པར་ཤེས་པ་ཧཱུྃ་ཡིག་ཏུ་གྱུར་པ་ཡབ་ཀྱི་ཞལ་ནས་དྲངས། ཡབ་ཡུམ་མཉམ་པར་རོལ་པའི་རྗེས་ཆགས་ཞུ་བདེའི་ཐིག་ལེར་གྱུར་པ་ཡུམ་གྱི་མཁའ་གསང་དུ་བབས་པས་གཙོ་བོའི་རྣམ་པ་གཉིས་པའི་སྲས་སུ་སྨིན་པ་སྔར་གྱི་དབང་སྟེགས་ལ་འཁོད་པ་ཁྱབ་བདག་རྡོ་རྗེ་ཐོད་ཕྲེང་རྩལ་དང་གཉིས་སུ་མེད་པའི་སྤྱི་དཔལ་ཆེན་པོ་ཆེ་མཆོག་ཧེ་རུ་ཀ་མཐིང་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་རྡོ་རྗེ་དང་དུང་ཁྲག་ཐུགས་ཀར་སྟེང་འོག་ཏུ་འཛིན་པ། བར་པ་གཉིས་ཁཊྭཱཾ་ག་དང་ཐོང་གཤོལ། ཐ་མ་གཉིས་མེ་དཔུང་དང་ལྕགས་སྡིག་བསྣམས་པ། དཔལ་དང་དུར་ཁྲོད་ཀྱི་ཆས་ཐམས་ཅད་ཀྱིས་བརྒྱན་ཅིང༌། ཞབས་བཞི་གཡས་བརྐྱང་གཡོན་བསྐུམ་པའི་དོར་སྟབས་སུ་བགྲད་པས་རྒྱལ་འགོང་བདུད་བཞི་བསྣོལ་སྟབས་སུ་བརྫིས་པ། པང་དུ་ཡུམ་དབྱིངས་ཕྱུག་མ་སྔོན་མོ་ཁཊྭཱཾ་དང་དུང་དམར་འཛིན་པས་འཁྱུད་པ། གཉིས་ཀའང་གར་གྱི་ཉམས་དགུ་དང་ལྡན་ཞིང་ཡེ་ཤེས་ཀྱི་མེ་ཕུང་འབར་བའི་ཀློང་ན་བཞུགས་པའི་གནས་གསུམ་དུ་ཕྱག་མཚན་གསུམ་ལ་གནས་པའི་ཡི་གེ་གསུམ་ལས་འོད་ཟེར་འཕྲོས་པས་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་བསྒྲུབ་བྱའི་དཀྱིལ་འཁོར་ལྷ་ཡི་རྣམ་པས་རང་དང་རོ་གཅིག་ཏུ་འདྲེས་པར་བསམ་ལ༔ ཧཱུྃ༔ འཕགས་མཆོག་ཐུགས་རྗེས་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་རློབ་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། བདག་ཅག་ལས་འབྲས་མཆིས་པར་མཛོད། །འབྲུ་གསུམ། གུ་རུ་ཤྲཱི། བཛྲ་ཙཎྜའི་མཐར། ཧཱུྃ་ཧཱུྃ་ཧཱུྃ་ཨ་བེ་ཤ་ཡ་ཨ་བེ་ཤ་ཡ་ཕེཾ་ཕེཾ༔ ཞེས་བྱིན་དབབ་ཚེ་ལུས་འཕར་གཡོ། ངག་བརྡ་སྐད། སེམས་བདེ་གསལ་མི་རྟོག་པ་ཕེབས་པའི་རྟགས་སོ། །ཏིཥྛ་བཛྲ་བརྟན་པར་བྱ། མེ་ཏོག་དོར་བའི་ཚོམ་བུའི་དཀྱིལ་འཁོར་འདུ་བྱས་ཏེ། ཁྱེད་རང་རྣམས་ལ་སྔར་བྱིན་པའི་མེ་ཏོག་དེ་ཉིད་ཚེ་རབས་ནས་ལས་ཀྱིས་འབྲེལ་བའི་རིགས་ཀྱི་ལྷ་ལ་ཕོག་པར་གྱུར་ཅིག་སྙམ་པས་ཚིག་འདིའི་རྗེས་ཟློས་དང་བཅས་ལྷན་ཅིག་འདོར་བར་ཞུ། ཧོ༔ སྨོན་པའི་ཡིད་ཀྱིས་རབ་བཟུང་བའི༔ འཇུག་པའི་མེ་ཏོག་ཨུ་དུམ་ཝཱར༔ ལྷག་པའི་ལྷ་ལ་དེང་འབུལ་ན༔ བྱང་ཆུབ་བར་དུ་མི་འབྲལ་ཤོག༔ པུཥྤེ་སིདྡྷི་ཧོ༔ ཞེས་ཕུལ་བས་ཚོམ་བུ་དགུ་གང་དུ་བབ་པའི་རིགས་དང་མཐུན་པའི་མིང༌། རྡོ་རྗེ་ཆེ་མཆོག་རྩལ་སོགས་གདགས། མེ་ཏོག་གང་ལ་བབས་པའི་གཙོ་བོ་རིགས་ཀྱི་བདག་པོའི་ཚུལ་དུ་སྤྱི་བོར་བྱོན་པར་བསམ་ལ་མེ་ཏོག་སྤྱི་བོར་བཞག པྲ་ཏི་གྷྲྀ་ཧ་ན་ཨི་མཾ་སཏྭ་མ་ཧཱ་བ་ལ༔ མ་རིག་པའི་སྒྲིབ་གཡོགས་མིག་དར་དང་ལྷན་ཅིག་བསལ་བར་མོས་མཛོད། མིག་ཐུར་ཐོགས་ལ། ཨེ་མ་ཧོ་བདེ་གཤེགས་སྙིང་པོའི་ཁམས༔ སྒྲིབ་བྱེད་གློ་བུར་ལིང་ཏོག་ནི༔ ཡེ་ཤེས་ཐུར་མས་དབྱེ་བགྱིས་ན༔ དཀྱིལ་འཁོར་འདིར་ལྟོས་དད་པ་བསྐྱེད༔ ཛྙཱ་ན་ཙཀྵུ་པྲ་བེ་ཤ་ཡ་ཕཊ༔ མིག་དར་བཀྲོལ། འདི་ལྟར་མཚོན་བྱེད་དཔེ་ཡི་དཀྱིལ་འཁོར་ལས། མཚོན་བྱ་དོན་གྱི་དཀྱིལ་འཁོར་རྡོ་རྗེ་སྲུང་བའི་འཁོར་ལོའི་དབུས་སུ་འབྱུང་བ་རིམ་བརྩེགས་རི་རབ་དང་བཅས་པའི་སྟེང་དུ་རྡོ་རྗེའི་རྡུལ་གྱིས་འཐས་པར་གདལ་བ་ལ་ཕྱི་རོལ་ཏུ་དུར་ཁྲོད་བརྒྱད་པདྨ་ཉི་མ་སྣ་ཚོགས་རྡོ་རྗེ་རྭ་བཅུ་གཉིས་པའི་ལྟེ་བར་ཡེ་ཤེས་རང་སྣང་ལས་གྲུབ་པ་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་རང་བཞིན། ཕྱི་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི་པ་རྟ་བབ་དང་བཅས་པ། ནང་ཐོད་པ་སྐམ་རློན་རྙིད་གསུམ་གྱི་རྩིག་པའི་མཁར་དུར་ཁྲོད་དྲག་པོའི་གཞལ་ཡས་ཁང་ཚད་དང་མཚན་ཉིད་ཡོངས་སུ་རྫོགས་པའི་ལྟེ་བར་རབ་ཏུ་འཇིགས་པའི་གནམ་ལྕགས་ཀྱི་ཙཀྲ་རྩིབས་བརྒྱད་པའི་དབུས་ཀྱི་ལྟེ་བ་གྲུ་གསུམ་མཐིང་ནག་ཆོས་དབྱིངས་རྡོ་རྗེ་བཙུན་མོའི་ཨེ་ཀློང་དུ་རྡོ་རྗེའི་བྲག་ཆེན། པད་ཉི་དྲེགས་པ་བྱོལ་སོང་གཙོ་དགུ་རྒྱལ་བསེན་བདུད་བཞིའི་སྟེང་ན་འགྱིང་བའི་བླ་མ་དྲག་པོ་དཔལ་ཆེན་ཆེ་མཆོག་རྡོ་རྗེ་སྲིན་པོ་འཇིགས་མཛད་ཧེ་རུ་ཀ་གཏུམ་རྔམས་ཉི་མ་འབུམ་གྱི་གཟི་བརྗིད་ཅན་རྩ་ཞལ་མཐིང་ག་གཡས་དཀར་གཡོན་དམར་ཕྱག་དྲུག་དང་པོ་གཉིས་ཀྱིས་རྡོ་རྗེ་དང་དུང་ཁྲག་ཐུགས་ཀར་བསྣམས་པས་ཡུམ་ལ་འཁྱུད་པ། གཡས་གཉིས་ཀྱིས་ཁཊྭཱཾ་དང་མེ་དཔུང༌། གཡོན་གཉིས་ཀྱིས་ཐོང་གཤོལ་དང་ལྕགས་སྡིག་བསྣམས་པ། ཞབས་བརྐྱང་བསྐུམ་གྱད་ཀྱི་དོར་སྟབས་སུ་བགྲད་ཅིང་གར་དགུའི་རྣམ་འགྱུར་ཡོངས་སུ་རྫོགས་པའི་སྐུ་ལ་དཔལ་དང་དུར་ཁྲོད་ཀྱི་ཆས་ཐམས་ཅད་གསོལ་བའི་ཡུམ་གནམ་ཞལ་དབྱིངས་ཕྱུག་མ་སྔོན་མོ་གཅེར་བུ་གཟིག་ཤམ་དང་ཕྱག་རྒྱ་ལྔས་བརྒྱན་པ། ཁཊྭཱཾ་དང་དུང་ཁྲག་བསྣམས་ཤིང་ཞབས་གཡོན་བརྐྱང་གཡས་བསྐུམ་གྱིས་ཡབ་དང་གཉིས་མེད་དུ་སྦྱོར་བ་ལ་བདུད་རྩི་ཡོན་ཏན་གྱི་ལྷ་ཚོགས་ཀྱིས་བསྐོར་བ། ཤར་དུ་དཔལ་ཆེན་བཛྲ་ཧེ་རུ་ཀ་མཐིང་ནག་ཡུམ་ཀྲོ་ཏི་ཤྭ་རི་མ་དང་སྦྱོར་བ་ལ་ཡང་དག་ཐུགས་ཀྱི་ལྷ་ཚོགས་ཀྱིས་བསྐོར་བ། ལྷོར་འཇམ་དཔལ་གཤིན་རྗེ་གཤེད་སེར་ནག་ཡུམ་བེ་ཏ་ཟ་བྱེད་མ་དང་སྦྱོར་བ་ལ་འཇམ་དཔལ་སྐུ་ཡི་ལྷ་ཚོགས་ཀྱིས་བསྐོར་བ། ནུབ་ཏུ་དབང་ཆེན་རྟ་མགྲིན་དམར་ནག་ཡུམ་པདྨ་གཟི་ལྡན་མ་དང་སྦྱོར་བ་ལ་པདྨ་གསུང་གི་ལྷ་ཚོགས་ཀྱིས་བསྐོར་བ། བྱང་དུ་དཔལ་ཆེན་རྡོ་རྗེ་གཞོན་ནུ་ལྗང་ནག་ཡུམ་འཁོར་ལོ་རྒྱས་འདེབས་མ་དང་སྦྱོར་བ་ལ་ཕྲིན་ལས་ཕུར་པའི་ལྷ་ཚོགས་ཀྱིས་བསྐོར་བ། ཤར་ལྷོར་མངོན་རྫོགས་རྒྱལ་པོ་མཐིང་ནག་ཡུམ་ཉིད་ཞི་བདེ་མཆོག་མ་དང་སྦྱོར་བ་ལ་རྦོད་གཏོང་མ་མོའི་ལྷ་ཚོགས་ཀྱིས་བསྐོར་བ། ལྷོ་ནུབ་ཏུ་རིག་འཛིན་རྡོ་རྗེ་ཆོས་རབ་དཀར་པོ་ཡུམ་རྡོ་རྗེ་རྣལ་འབྱོར་མ་དང་སྦྱོར་བ་ལ་རིག་འཛིན་སློབ་དཔོན་གྱི་ལྷ་ཚོགས་ཀྱིས་བསྐོར་བ། ནུབ་བྱང་དུ་བཅོམ་ལྡན་དྲེགས་པ་ཀུན་འདུལ་མཐིང་ནག་ཡུམ་ཁམས་གསུམ་སྲིད་པ་སྤྱི་འདུལ་མ་དང་སྦྱོར་བ་ལ་འཇིག་རྟེན་མཆོད་བསྟོད་ཀྱི་ལྷ་ཚོགས་ཀྱིས་བསྐོར་བ། བྱང་ཤར་དུ་དཔལ་ཆེན་སྟོབས་ལྡན་ནག་པོ་ཡུམ་འབྱུང་ལྔའི་བདག་མོ་དང་སྦྱོར་བ་ལ་དམོད་པ་དྲག་སྔགས་ཀྱི་ལྷ་ཚོགས་ཀྱིས་བསྐོར་བ། སྒོ་བཞིར་སྒོ་སྐྱོང་གདོང་མོ་བཞི། ཕྱིའི་ཁོར་ཡུག་ལ་མཁའ་འགྲོ་གིང་ལང་མ་སྲིང་འབར་མ་སོགས་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ་བདེ་གཤེགས་སྒྲུབ་པ་བཀའ་བརྒྱད་ཡེ་ཤེས་ཀློང་དགུའི་འཁོར་ལོ་བདུན་བརྒྱ་ཉེར་ལྔའི་ལྷ་ཚོགས་འོག་མིན་གསང་ཆེན་རོལ་པའི་ཕོ་བྲང་མངོན་སུམ་དུ་མཇལ་བ་ལ་དད་སྤྲོ་རྒྱ་ཆེན་པོ་བསྐྱེད་པ་དང༌། ལྷ་དང་དཀྱིལ་འཁོར་དེ་དག་ཀྱང་རང་གི་རྡོ་རྗེ་ཕུང་པོའི་གྲོང་ཁྱེར་ལ་བཞུགས་ཤིང་གཉུག་མའི་རྡོ་རྗེ་གསུམ་དང་འདུ་འབྲལ་མེད་པར་ངོ་སྤྲད་པ་ནི། ཧོ༔ ཕུང་པོ་ཁམས་དང་སྐྱེ་མཆེད་ནི༔ གདན་གསུམ་དཀྱིལ་འཁོར་ཉིད་ཡིན་ཀྱང༔ རྩ་རླུང་ཐིག་ལེའི་སྒྲིབ་པས་བཅིངས༔ དག་བྱེད་ལྷག་པ་གཟུགས་བརྙན་གྱིས༔ མཚོན་པའི་ཏིང་འཛིན་དཀྱིལ་འཁོར་ནི༔ རྣམ་བྱང་ཆེན་པོའི་བརྡ་དོན་རྟགས༔ འདིར་ལྟོས་འདིར་ཞུགས་འདི་བསྒོམས་པས༔ རྩ་དག་བསྐྱེད་རིམ་སྤྲུལ་སྐུར་འབྱོངས༔ རླུང་དག་ཁ་སྦྱོར་ཡན་ལག་བདུན༔ ཁམས་དག་རྣམ་ཀུན་མཆོག་ལྡན་གྱི༔ བདེ་ཆེན་ཡེ་ཤེས་ཁྱོད་ཀྱིས་མཐོང༔ ཞེས་གསུངས་པ་ལྟར་ཕྱི་ནང་གསང་བའི་དབང་གིས་སྨིན་པར་བྱས་ཏེ་ལམ་རིམ་པ་གཉིས་ལ་བསླབ་པས་ཕྱི་ནང་གཞན་གསུམ་གཉིས་མེད་རྡོ་རྗེའི་གྲོང་ཁྱེར་ཟུང་འཇུག་གི་རྒྱལ་ཐབས་ལ་དབང་བསྒྱུར་བར་ངེས་པའོ། །དེ་དག་གིས་འཇུག་པའི་ཆོས་རྣམས་སོང་ནས་དངོས་གཞི་དབང་བསྐུར་ཞུ་བའི་ཕྱིར་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་མཛོད། བྱང་ཆུབ་རྡོ་རྗེ་སངས་རྒྱས་ལ༔ ཇི་ལྟར་མཆོད་ཅིང་བསྟེན་པ་ལྟར༔ བདག་ཀྱང་སྐྱོབ་པའི་དོན་གྱི་ཕྱིར༔ ནམ་མཁའི་རྡོ་རྗེ་བདག་ལ་སྩོལ༔ ཞེས་ལན་གསུམ། དབང་དངོས་ལ་ཕྱི་ནང་གསང་བ་དེ་ཁོ་ན་ཉིད་མཐའ་རྟེན་གྱི་དབང་དང་ལྔ་ལས། དང་པོ་ཕྱི་དབང་རྫས་ལ་བརྟེན་ནས་བསྐུར་བ་ལ་ཐུགས་སྨོན་འདི་ལྟར་གནང་འཚལ། བདག་མདུན་གྱི་ཐུགས་ཀའི་འོད་ཟེར་གྱིས་ཕྱོགས་བཅུའི་རྒྱལ་བ་སྲས་དང་བཅས་པ་གདན་གསུམ་ཚང་བའི་དཀྱིལ་འཁོར་གྱི་རྣམ་པར་སྤྱན་དྲངས༔ བཛྲ་ས་མ་ཡ་ཛཿ ཨོཾ་བཛྲ་ཨརྒྷཾ་ནས། ཤབྡ་པྲ་ཏཱིཙྪ་སྭཱ་ཧཱ། ཉེར་སྤྱོད་བཏེགས་ཏེ་མཆོད། ཕུང་ཁམས་དག་པ་གཤེགས་པ་གཤེགས་མའི་གདན༔ དབང་ཤེས་དག་པ་སེམས་དཔའ་སེམས་མ་སྟེ༔ ལས་ཀྱི་བདག་པོ་ཁྲོ་བོ་ཁྲོ་མོའི་ཚོགས༔ གདན་གསུམ་ཡོངས་རྫོགས་ལྷ་ལ་ཕྱག་འཚལ་བསྟོད༔ ཅེས་བསྟོད་ལ། སློབ་དཔོན་གྱིས། ནམ་མཁའི་རྡོ་རྗེས་རྒྱལ་བ་ལྔར༔ དགོངས་ཤིང་ཇི་ལྟར་བསྩལ་བ་ལྟར༔ མཆོད་པ་ཆེན་པོ་བརྡ་ཡི་དབང༔ རིག་པ་འཛིན་པ་བདག་ལ་སྩོལ༔ ལན་གསུམ། ཞེས་གསོལ་བ་བཏབ་པས་དེ་བཞིན་གཤེགས་པ་རྣམས་ཀྱིས་དགོངས་པ་མཛད། གཤེགས་མ་རྣམས་ཀྱིས་དབང་བསྐུར། སེམས་དཔའ་རྣམས་ཀྱིས་བཀྲ་ཤིས་བརྗོད། སེམས་མ་རྣམས་ཀྱིས་གླུ་གར་བསྒྱུར། ཁྲོ་བོ་རྣམས་ཀྱིས་བགེགས་བསྐྲད་དེ་དབང་གི་བྱ་བ་མཛད་པར་གྱུར། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །མ་ལུས་སེམས་ཅན་བསྐྱེད་མཛད་བདེ་བ་ཆེན་པོ་སྟེ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །དེ་ནས་རིགས་ལྔའི་སྐུ་གསུང་ཐུགས་ཡོན་ཏན་ཕྲིན་ལས་ལྔ་མཐའ་རྟེན་དང་བཅས་པའི་དབང་བསྐུར་བ་ལས་དང་པོ་མི་བསྐྱོད་པ་ཐུགས་ཀྱི་དབང་བསྐུར་བ་ལ། སློབ་མ་རྣམས་ཀྱི་རྣམ་ཤེས་ཀྱི་ཕུང་པོ་རྡོ་རྗེ་མི་བསྐྱོད་པ་མཐིང་ག་གཡས་རྡོ་རྗེ་རྩེ་ལྔ་པ་གཏོད་དེ་ཐུགས་ཀར་འཛིན་ཅིང༌། གཡོན་དེས་ཡུ་བ་བྱས་པའི་དྲིལ་བུ་དཀུར་བརྟེན་པའི་སྤྱི་མགྲིན་སྙིང་ག་གསུམ་དུ་ཕྱག་མཚན་ འཁོར་ལོ། པདྨ། རྡོ་རྗེ། མཆན། གསུམ་ལ་གནས་པའི་ཡི་གེ་གསུམ་ ཨོཾ་དཀར། ཨཱཿདམར། ཧཱུྃ་མཐིང༌། པད་ཟླ་ཉི་མ་ལ་གནས་པ། མཆན། གྱིས་མཚན་པ་ལ་བླ་མའི་ཐུགས་ཀ་ནས་འོད་ཟེར་འཕྲོས་པས་བླ་མ་དང་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་སྤྲིན་གཏིབས་པ་ཙམ་རྡོ་རྗེ་མི་བསྐྱོད་པའི་རང་བཞིན་དུ་བྱོན་ནས་བཀྲ་ཤིས་བརྗོད་ཅིང༌། མི་བསྐྱོད་པའི་རང་བཞིན་ཆུའི་དབང་བསྐུར་བས་བླ་མ་དང་རྡོ་རྗེ་མི་བསྐྱོད་པ་དབྱེར་མེད་པ་སློབ་མའི་སྤྱི་བོར་བཞུགས་པར་སྒོམས་ཤིག །རྣམ་བུམ་ཐོགས་ལ། ཧཱུྃ༔ རྣམ་ཤེས་ཕུང་པོ་ནམ་མཁའི་ཁམས༔ ཞེ་སྡང་འཇོམས་མཛད་བཅོམ་ལྡན་འདས༔ ཆོས་དབྱིངས་ཡེ་ཤེས་མི་བསྐྱོད་པའི༔ བཀྲ་ཤིས་བུམ་པས་དབང་བསྐུར་རོ༔ ཧཱུྃ་བཛྲ་དྷྲྀཀ྄་མཱུཾ་དྷ་ཏུ་ཤྭ་རི་ཨ་བྷི་ཥིཉྩ་ཧཱུྃ༔ བུམ་ཆུ་འཐུང་བ་དང་ཁྲུས་བྱ། རིགས་ཀྱི་བུ་ཁྱོད་ལ་རྡོ་རྗེ་མི་བསྐྱོད་པའི་ངོ་བོ་ཆུའི་དབང་བསྐུར་བས་ཡིད་ཀྱི་སྒྲིབ་པ་དག༔ སངས་རྒྱས་ཐམས་ཅད་ཀྱི་ཐུགས་ཀྱི་དབང་ཐོབ༔ རྣམ་པར་ཤེས་པ་རྡོ་རྗེ་མི་བསྐྱོད་པ་དང་ནམ་མཁའི་ཁམས་དབྱིངས་ཕྱུག་མར་སངས་རྒྱས༔ ཞེ་སྡང་ཆོས་དབྱིངས་ཡེ་ཤེས་སུ་གྲོལ་ཏེ་སངས་རྒྱས་རྡོ་རྗེའི་རིགས་མཆོག་གི་ཐུགས་རྣམ་པར་མི་རྟོག་པས་འགྲོ་བའི་དོན་བྱེད་ནུས་པར་གྱུར་ཅིག༔ གཉིས་པ་རིན་ཆེན་འབྱུང་ལྡན་ཡོན་ཏན་གྱི་དབང་བསྐུར་བ་ལ། སློབ་མ་རྣམས་ཀྱི་ཚོར་བའི་ཕུང་པོ་རིན་ཆེན་འབྱུང་ལྡན་སེར་པོ་ཕྱག་ན་རིན་པོ་ཆེ་དང་དྲིལ་བུ་བསྣམས་པའི་སྤྱི་མགྲིན་སྙིང་ག་གསུམ་དུ་ཕྱག་མཚན་གསུམ་ལ་གནས་པའི་ཡི་གེ་གསུམ་གྱིས་མཚན་པ་ལ་བླ་མའི་ཐུགས་ཀ་ནས་འོད་ཟེར་འཕྲོས་པས་བླ་མ་དང་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་སྤྲིན་གཏིབས་པ་ཙམ་རིན་ཆེན་འབྱུང་ལྡན་གྱི་རང་བཞིན་དུ་བྱོན་ནས་བཀྲ་ཤིས་བརྗོད་ཅིང༌། རིན་ཆེན་འབྱུང་ལྡན་གྱི་རང་བཞིན་དབུ་རྒྱན་གྱིས་དབང་བསྐུར་བས་བླ་མ་དང་རིན་ཆེན་འབྱུང་ལྡན་དབྱེར་མེད་པ་སློབ་མའི་སྤྱི་བོར་བཞུགས་པར་སྒོམས་ཤིག །དབུ་རྒྱན་སྤྱི་བོར་བཅིངས་ཏེ། ཧཱུྃ༔ ཚོར་བའི་ཕུང་པོ་མཉེན་པའི་དབྱིངས༔ ང་རྒྱལ་འཇོམས་མཛད་བཅོམ་ལྡན་འདས༔ མཉམ་ཉིད་ཡེ་ཤེས་རིན་ཆེན་འབྱུང༔ དབུ་རྒྱན་རིགས་ལྔས་དབང་བསྐུར་རོ༔ སྭཱ་རཏྣ་དྷྲྀཀ྄་མཱཾ་མོ་ཧ་ར་ཏི་ཨ་བྷི་ཥིཉྩ་ཧཱུྃ༔ རྒྱས་པར་སྤྲོ་ན་མཐའ་རྟེན་བུམ་པའི་ཆུ་དབང་འདི་མི་བསྐྱོད་པ་མ་གཏོགས་རིགས་དབང་བཞི་ཀ་ལ་སྦྱར་བར་གསུངས་པས། རྣམ་བུམ་བཏེགས་ཅིང་ཆུ་འཐོར་ཏེ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡེ་ཤྲཱི་ཧཱུྃ༔ རིགས་ཀྱི་བུ་ཁྱོད་ལ་རིན་འབྱུང་གི་ངོ་བོ་གོ་འཕང་ཆེན་པོའི་དབུ་རྒྱན་འདི་བསྐོན་པ་ཙམ་གྱིས་ཤེས་བྱའི་སྒྲིབ་པ་སྦྱངས༔ སངས་རྒྱས་ཐམས་ཅད་ཀྱི་ཡོན་ཏན་གྱི་དབང་ཐོབ༔ ཚོར་བའི་ཕུང་པོ་རིན་ཆེན་འབྱུང་ལྡན་དང་ཆུའི་ཁམས་མཱ་མ་ཀཱིར་སངས་རྒྱས༔ ང་རྒྱལ་མཉམ་པ་ཉིད་ཀྱི་ཡེ་ཤེས་སུ་གྲོལ་ཏེ་སངས་རྒྱས་རིན་ཆེན་རིགས་ཀྱི་ཡོན་ཏན་བསམ་མི་ཁྱབ་པའི་གོ་འཕང་ཆེན་པོ་ལྔས་འགྲོ་བའི་དོན་བྱེད་ནུས་པར་གྱུར་ཅིག༔ གསུམ་པ་སྣང་བ་མཐའ་ཡས་གསུང་གི་དབང་བསྐུར་བ་ལ། སློབ་མ་རྣམས་ཀྱི་འདུ་ཤེས་ཀྱི་ཕུང་པོ་སྣང་བ་མཐའ་ཡས་དམར་པོ་ཕྱག་ན་པདྨ་དང་དྲིལ་བུ་འཛིན་པའི་སྤྱི་མགྲིན་སྙིང་ག་གསུམ་དུ་ཕྱག་མཚན་གསུམ་ལ་གནས་པའི་ཡི་གེ་གསུམ་གྱིས་མཚན་པ་ལ་བླ་མའི་ཐུགས་ཀ་ནས་འོད་ཟེར་འཕྲོས་པས་བླ་མ་དང་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་སྤྲིན་གཏིབས་པ་ཙམ་སྣང་བ་མཐའ་ཡས་ཀྱི་རང་བཞིན་དུ་བྱོན་ནས་བཀྲ་ཤིས་བརྗོད་ཅིང༌། སྣང་བ་མཐའ་ཡས་ཀྱི་རང་བཞིན་རྡོ་རྗེས་དབང་བསྐུར་བས་བླ་མ་དང་སྣང་བ་མཐའ་ཡས་དབྱེར་མེད་པ་སློབ་མའི་སྤྱི་བོར་བཞུགས་པར་སྒོམས་ཤིག །རྡོ་རྗེ་ལག་གཡས་སུ་གཏད་ཅིང་མགྲིན་པར་གསོར་ལ། ཧཱུྃ༔ འདུ་ཤེས་ཕུང་པོ་དྲོ་བའི་ཁམས༔ འདོད་ཆགས་འཇོམས་མཛད་བཅོམ་ལྡན་འདས༔ སོར་རྟོག་ཡེ་ཤེས་སྣང་མཐའ་ཡས༔ ཐབས་ཀྱི་རྡོ་རྗེས་དབང་བསྐུར་རོ༔ ཨཱཾ་ཨ་རོ་ལྀཀ་པཱྃ་རཱ་ག་ར་ཏི་སྟྭཾ་ཨ་བྷི་ཥིཉྩ་ཧཱུྃ༔ རྣམ་བུམ་གྱི་ཆུ་འཐོར། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡེ་ཤྲཱི་ཧཱུྃ༔ རིགས་ཀྱི་བུ་ཁྱོད་ལ་སྣང་བ་མཐའ་ཡས་ཀྱི་ངོ་བོ་རྡོ་རྗེས་དབང་བསྐུར་བས་ངག་དང་རླུང་གི་སྒྲིབ་པ་དག༔ སངས་རྒྱས་ཐམས་ཅད་ཀྱི་གསུང་གི་དབང་ཐོབ༔ འདུ་ཤེས་ཀྱི་ཕུང་པོ་སྣང་བ་མཐའ་ཡས་དང་མེ་ཁམས་གོས་དཀར་མོར་སངས་རྒྱས༔ འདོད་ཆགས་སོ་སོར་རྟོག་པའི་ཡེ་ཤེས་སུ་གྲོལ་ཏེ་སངས་རྒྱས་པདྨའི་རིགས་ཀྱི་གསུང་རྣམ་པ་ཐམས་ཅད་པས་འགྲོ་བའི་དོན་བྱེད་ནུས་པར་གྱུར་ཅིག༔ བཞི་པ་དོན་ཡོད་གྲུབ་པ་ཕྲིན་ལས་ཀྱི་དབང་བསྐུར་བ་ལ། སློབ་མ་རྣམས་ཀྱི་འདུ་བྱེད་ཀྱི་ཕུང་པོ་དོན་ཡོད་གྲུབ་པ་ལྗང་གུ་ཕྱག་ན་རལ་གྲི་དང་དྲིལ་བུ་འཛིན་པའི་སྤྱི་མགྲིན་སྙིང་ག་གསུམ་དུ་ཕྱག་མཚན་གསུམ་ལ་གནས་པའི་ཡི་གེ་གསུམ་གྱིས་མཚན་པ་ལ་བླ་མའི་ཐུགས་ཀ་ནས་འོད་ཟེར་འཕྲོས་པས་བླ་མ་དང་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་སྤྲིན་གཏིབས་པ་ཙམ་དོན་ཡོད་གྲུབ་པའི་རང་བཞིན་དུ་བྱོན་ནས་བཀྲ་ཤིས་བརྗོད་ཅིང༌། དོན་ཡོད་གྲུབ་པའི་རང་བཞིན་དྲིལ་བུ་ལག་གཡོན་དུ་གཏད་པ་དཀྲོལ་ཞིང་དཀུ་ལ་བརྟེན་ཏེ་དབང་བསྐུར་བས་བླ་མ་དང་དོན་ཡོད་གྲུབ་པ་དབྱེར་མེད་པ་སློབ་མའི་སྤྱི་བོར་བཞུགས་པར་སྒོམས་ཤིག །དྲིལ་བུ་ལག་གཡོན་དུ་གཏད་ལ། ཧཱུྃ༔ འདུ་བྱེད་ཕུང་པོ་བསྐྱོད་པའི་ཁམས༔ ཕྲག་དོག་འཇོམས་མཛད་བཅོམ་ལྡན་འདས༔ བྱ་གྲུབ་ཡེ་ཤེས་དོན་ཡོད་གྲུབ༔ ཤེས་རབ་དབྱིངས་ཀྱི་དབང་བསྐུར་རོ༔ ཧཱ་པྲ་ཛྙཱ་དྷྲྀཀ྄་ཏཱྃ་བཛྲ་ར་ཏི་ཨ་བྷི་ཥིཉྩ་ཧཱུྃ༔ རྣམ་བུམ་གྱི་ཆུ་འཐོར་ལ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡེ་ཤྲཱི་ཧཱུྃ༔ རིགས་ཀྱི་བུ་ཁྱོད་ལ་དོན་གྲུབ་ཀྱི་ངོ་བོ་དྲིལ་བུས་དབང་བསྐུར་བས་ཀུན་གཞིའི་སྒྲིབ་པ་དག༔ སངས་རྒྱས་ཐམས་ཅད་ཀྱི་ཕྲིན་ལས་ཀྱི་དབང་ཐོབ༔ འདུ་བྱེད་ཀྱི་ཕུང་པོ་དོན་ཡོད་གྲུབ་པ་དང་རླུང་གི་ཁམས་དམ་ཚིག་སྒྲོལ་མར་སངས་རྒྱས༔ ཕྲག་དོག་བྱ་བ་གྲུབ་པའི་ཡེ་ཤེས་སུ་གྲོལ་ཏེ་སངས་རྒྱས་ལས་ཀྱི་རིགས་ཀྱི་ཕྲིན་ལས་ཐོགས་པ་མེད་པས་འགྲོ་བའི་དོན་བྱེད་ནུས་པར་གྱུར་ཅིག༔ ལྔ་པ་སྐུ་རྣམ་པར་སྣང་མཛད་མིང་གི་དབང་བསྐུར་བ་ལ། སློབ་མ་རྣམས་ཀྱི་གཟུགས་ཀྱི་ཕུང་པོ་རྣམ་པར་སྣང་མཛད་དཀར་པོ་ཕྱག་ན་འཁོར་ལོ་དང་དྲིལ་བུ་འཛིན་པའི་སྤྱི་མགྲིན་སྙིང་ག་གསུམ་དུ་ཕྱག་མཚན་གསུམ་ལ་གནས་པའི་ཡི་གེ་གསུམ་གྱིས་མཚན་པ་ལ་བླ་མའི་ཐུགས་ཀ་ནས་འོད་ཟེར་འཕྲོས་པས་བླ་མ་དང་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་སྤྲིན་གཏིབས་པ་ཙམ་རྣམ་པར་སྣང་མཛད་ཀྱི་རང་བཞིན་དུ་བྱོན་ནས་བཀྲ་ཤིས་བརྗོད་ཅིང༌། རྣམ་པར་སྣང་མཛད་ཀྱི་རང་བཞིན་མིང་གི་དབང་བསྐུར་བས་བླ་མ་དང་རྣམ་པར་སྣང་མཛད་དབྱེར་མེད་པ་སློབ་མའི་སྤྱི་བོར་བཞུགས་པར་སྒོམས་ཤིག །རྡོར་དྲིལ་བསྣོལ་མ་བཟུང་སྟེ་མགོ་ཐོག་ཏུ་དཀྲོལ་ལ། ཧཱུྃ༔ མིང་གཟུགས་ཕུང་པོ་སྲ་བའི་ཁམས༔ གཏི་མུག་འཇོམས་མཛད་བཅོམ་ལྡན་འདས༔ མེ་ལོང་ཡེ་ཤེས་དེ་བཞིན་གཤེགས༔ རྡོ་རྗེ་མིང་གི་དབང་བསྐུར་རོ༔ ཨོཾ་ཛཱི་ན་ཛྀཀ྄་ལཱྃ་དེ་ཥ་ར་ཏི་བཛྲ་མ་ཧཱ་ཤྲཱི་ཨ་བྷི་ཥིཉྩ་ཧཱུྃ༔ རྣམ་བུམ་གྱི་ཆུ་འཐོར་ལ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡེ་ཤྲཱི་ཧཱུྃ༔ རིགས་ཀྱི་བུ་ཁྱོད་ལ་རྣམ་པར་སྣང་མཛད་མིང་གིས་དབང་བསྐུར་བས་གཟུགས་ཀྱི་ཕུང་པོར་འཛིན་པའི་སྒྲིབ་པ་དག༔ སངས་རྒྱས་ཐམས་ཅད་ཀྱི་སྐུའི་དབང་ཐོབ༔ མིང་གཟུགས་ཀྱི་ཕུང་པོ་རྣམ་པར་སྣང་མཛད་དང་སའི་ཁམས་སངས་རྒྱས་སྤྱན་མར་སངས་རྒྱས༔ གཏི་མུག་མེ་ལོང་ལྟ་བུའི་ཡེ་ཤེས་སུ་གྲོལ་ཏེ༔ སངས་རྒྱས་དེ་བཞིན་གཤེགས་པའི་རིགས་ཀྱི་རྡོ་རྗེ་ལྟ་བུའི་སྐུས་འགྲོ་བའི་དོན་བྱེད་ནུས་པར་གྱུར་ཅིག༔ དྲུག་པ་ཁྱབ་བྱ་རིགས་ལྔ་ལ་ཁྱབ་བྱེད་དྲུག་པའི་རིགས་ཀྱི་བདག་ཉིད་མཐའ་རྟེན་རྣམ་པར་རྒྱལ་བའི་བུམ་པ་དཀྱིལ་འཁོར་ཡོངས་རྫོགས་ཀྱི་ངོ་བོས་དབང་བསྐུར་བ་ལ། སློབ་མ་རྣམས་དཀྱིལ་འཁོར་གྱི་གཙོ་བོ་སྤྱི་དཔལ་ཆེན་པོ་ཧེ་རུ་ཀ་ཡུམ་གནམ་ཞལ་དབྱིངས་ཕྱུག་མ་དང་གཉིས་སུ་མེད་པར་སྦྱོར་ཞིང་རང་རྟགས་ཕྱག་མཚན་དང་རྒྱན་ཆ་ལུགས་ཡོངས་སུ་རྫོགས་པ་མཚན་དཔེའི་གཟི་བྱིན་འབར་བའི་སྐུར་གྱུར་པ་ལ་ནམ་མཁའ་གང་བའི་དབང་གི་ལྷ་རྣམས་ཀྱིས་རིན་པོ་ཆེའི་བུམ་པ་བདུད་རྩིའི་ཆུ་རྒྱུན་ཅན་གྱིས་དབང་བསྐུར་བར་མོས་ཤིག །རྣམ་རྒྱལ་བུམ་པ་བཟུང་ལ། ཧཱུྃ༔ བཀྲ་ཤིས་བུམ་པ་ལྷའི་གཞལ་ཡས༔ ལྷ་དང་གཉིས་མེད་བདུད་རྩིའི་ཆུས༔ སྐལ་ལྡན་བུ་ལ་དབང་བསྐུར་བས༔ སྣང་ཞེན་ལྷ་སྐུའི་ཕྱག་རྒྱར་རྫོགས༔ རྣམ་སྨིན་རིག་འཛིན་ཉེར་ཐོབ་ཅིང༔ ཀུན་ཏུ་འོད་ཀྱི་ས་ནོན་ཤོག༔ ཨོཾ་གུ་རུ་ཤྲཱི་བཛྲ་ཡཀྴ་ཀྲོ་ཏ་ཙིཏྟ་ཧཱུྃ༔ བཛྲ་ཀ་ལ་ཤ་ཨ་བྷི་ཥིཉྩ་ཧཱུྃ༔ བུམ་པ་སྤྱི་བོར་བཞག་ཅིང་བུམ་ཆུ་སྦྱིན། དེ་ལྟར་དབང་བསྐུར་བའི་ཆུ་རྒྱུན་གྱིས་ལུས་ཀྱི་ནང་གང་སྒྲིབ་པ་བཞིའི་ས་བོན་དང་བཅས་པ་དག །ཆུ་ཡི་ལྷག་མ་སྤྱི་བོར་འཁྱིལ་བ་ལས་རིགས་ཀྱི་བདག་པོ་གསུང་རྡོ་རྗེ་སྣང་བ་མཐའ་ཡས་ སྒོས་བཀའ་གཞན་ལ་རིགས་བདག་གཤིན་རྗེ་ལ་རྣམ་སྣང༌། རྟ་མགྲིན་ལ་སྣང་མཐའ། ཡང་དག་ལ་མི་བསྐྱོད་པ། ཕུར་པ་ལ་དོན་གྲུབ། མཆན། ཀྱིས་དབུར་བརྒྱན་པས་རྒྱས་གདབ་པར་མོས་ཤིག །གཉིས་པ་བུམ་དབང་གི་རྗེས་འབྲེལ་ནང་དབང་ལུས་ལ་བརྟེན་ཏེ་ཡེ་ཤེས་ཀློང་དགུའི་དཀྱིལ་འཁོར་གྱི་གཙོ་བོ་རྣམས་ཀྱི་དབང་བསྐུར་བ་ལ། ལྷ་ཚོགས་རྣམས་ལས་རང་འདྲའི་སྐུ་གཉིས་པ་རེ་བྱོན་ནས་ཁྱེད་རང་རྣམས་དཔལ་ཆེན་པོར་གསལ་བའི་སྤྱི་བོ་ལ་སོགས་ལུས་གནས་རྩ་འཁོར་རྣམས་སུ་བཞུགས་པས་ལྷ་དེ་དང་དེའི་ཡོན་ཏན་དང་ནུས་པ་ཐམས་ཅད་ཐོབ་པར་མོས་ཤིག །སྤྱི་བོར། ཆེ་མཆོག་ལྷ་ཚོགས་དབང་བསྐུར་བས། །ཆོས་དབྱིངས་ཡེ་ཤེས་རྟོགས་པར་ཤོག །ཨོཾ་གུ་རུ་ཤྲཱི་བཛྲ་ཡཀྴ་ཀྲོ་ཏ་ཙིཏྟ་ཧཱུྃ་ཨ་བྷི་ཥིཉྩཧཱུྃ། དཔྲལ་བར། འཇམ་དཔལ་སྐུ་ཡི་དབང་བསྐུར་བས། །མཉམ་ཉིད་ཡེ་ཤེས་རྟོགས་པར་ཤོག །ཨོཾ་ཧྲཱིཿཥྚི་ཝི་ཀྲི་ཏཱ་ན་ན་ཨ་བྷི་ཥིཉྩ་ཧཱུྃ། མགྲིན་པར། པདྨ་གསུང་གི་དབང་བསྐུར་བས། །སོར་རྟོག་ཡེ་ཤེས་རྟོགས་པར་ཤོག །ཨོཾ་པདྨཱནྟ་ཀྲྀཏ་ཧྱ་གྲཱྀ་ཝ་ཨ་བྷི་ཥིཉྩ་ཧཱུྃ། སྙིང་གར། ཡང་དག་ཐུགས་ཀྱི་དབང་བསྐུར་བས། །མེ་ལོང་ཡེ་ཤེས་རྟོགས་པར་ཤོག །ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཨ་བྷི་ཥིཉྩ་ཧཱུྃ། ལྟེ་བར། ཕུར་པ་ཕྲིན་ལས་དབང་བསྐུར་བས། །བྱ་གྲུབ་ཡེ་ཤེས་རྟོགས་པར་ཤོག །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བྃ་ཧཱུྃ་ཕཊ་ཨ་བྷི་ཥིཉྩ་ཧཱུྃ། གསང་གནས། མ་མོ་རྦོད་གཏོང་དབང་བསྐུར་བས། །དབྱིངས་གྲོལ་ཡེ་ཤེས་རྟོགས་པར་ཤོག །ཨོཾ་གུ་ཧྱ་ཛྙཱན་ཤྲཱི་ཧེ་རུ་ཀ་སརྦ་ས་མ་ཡ་ཨ་བྷི་ཥིཉྩ་ཧཱུྃ། བརླ་གཡས། འཇིག་རྟེན་མཆོད་བསྟོད་དབང་བསྐུར་བས། །ཀློང་གྱུར་ཡེ་ཤེས་རྟོགས་པར་ཤོག །ཨོཾ་བཛྲ་ཙཎྜ་སརྦ་དུཥྚཾ་ཨ་བྷི་ཥིཉྩཧཱུྃ། བརླ་གཡོན། དམོད་པ་དྲག་སྔགས་དབང་བསྐུར་བས། །ལྷུན་གྲུབ་ཡེ་ཤེས་རྟོགས་པར་ཤོག །ཨོཾ་བཛྲ་སརྦ་དུཥྚན་ཨ་བྷི་ཥིཉྩ་ཧཱུྃ། སྤྱི་བོར། རིག་འཛིན་སློབ་དཔོན་དབང་བསྐུར་བས། །འདའ་ཀ་ཡེ་ཤེས་རྟོགས་པར་ཤོག །ཨོཾ་བཛྲ་མ་ཧཱ་གུ་རུ་ཨ་བྷི་ཥིཉྩ་ཧཱུྃ། དཔུང་པ་གཉིས། ཚོགས་བརྒྱད་གདུག་པ་ཀླུ་ཡི་གདོན། །ཟ་བྱེད་ཁྱུང་གི་དབང་བསྐུར་རོ། །ཁྲོཾ་ག་རུ་ཌ་ཨ་བྷི་ཥིཉྩ་ཧཱུྃ། དེ་ལྟར་ལྷ་ཚོགས་རྣམས་གནས་སོར་སོར་ཐིམ་པས་སྒྲུབ་སྡེ་དགུའི་སྐུའི་རྣམ་པ་གང་དང་གང་གིས་འདུལ་བ་དེ་དང་དེའི་རྣམ་རོལ་འགག་མེད་སྣང་སྟོང་ཆུ་ཟླའི་གར་བཞིན་སྤྱོད་པའི་མཐུ་ཐོབ་པ་ཡིན་ནོ། །བུམ་དབང་གི་དག་པ་བརྗོད་པ་ནི། དེས་རྡུལ་ཚོན་སྤྲུལ་པའི་དཀྱིལ་འཁོར་དུ་བུམ་པའི་དབང་ཐོབ་ལུས་ཀྱི་ལས་གསུམ་དག༔ གཟུགས་སུ་རྣམ་པར་རྟོག་པ་དང་རྩའི་ཁམས་སྟོང་ཕྲག་བདུན་ཅུ་རྩ་གཉིས་སྦྱངས༔ དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེའི་བྱིན་རླབས་ཞུགས༔ བསྐྱེད་རིམ་དམ་ཚིག་གི་ཕྱག་རྒྱ་བསྒོམ་པ་ལ་དབང༔ ཞི་བའི་ལས་དང་རྣམ་པར་སྨིན་པའི་རིག་འཛིན་འགྲུབ༔ བཅུ་གཅིག་ཀུན་ཏུ་འོད་ཀྱི་ས་ནོན༔ འབྲས་བུ་སྤྲུལ་པའི་སྐུ་མངོན་དུ་བྱས་པའོ༔ གསུམ་པ་གསང་དབང་ཡུམ་ལ་བརྟེན་ཏེ་བསྐུར་བ་ལ་གཉིས་ཡོད་པ་ལས་དང་པོ་གསང་དབང་དངོས་ཞུ་བའི་དོན་དུ་མཎྜལ་ཕུལ། དེ་ཡང་དག་བྱ་སློབ་མའི་ངག་གི་རྟེན་རླུང་ལ་གསང་རྫས་ཁྱད་པར་ཅན་བསྲེས་པའི་སྒོ་ནས་དག་འབྲས་གསུང་རྡོ་རྗེ་ལོངས་སྐུའི་བདག་ཉིད་ལ་གསོལ་བ་འདེབས་པ་འདིའི་རྗེས་ཟློས་མཛོད། ཧོ༔ སྟངས་དཔྱལ་མཉམ་པར་རོལ་པ་ཡི༔ གདན་གསུམ་སྐུ་ཡི་དཀྱིལ་འཁོར་ནས༔ ཞུ་བདེས་དྲངས་པའི་བྱང་ཆུབ་སེམས༔ སྐལ་པ་ཅན་ལ་བསྩལ་དུ་གསོལ༔ ལན་གསུམ། བླ་མ་ཧེ་རུ་ཀ་ཡབ་ཡུམ་སྙོམས་པར་ཞུགས་པའི་དགའ་བའི་སྒྲ་དང་འོད་ཟེར་གྱིས་དེ་བཞིན་གཤེགས་པ་ཐམས་ཅད་སྤྱན་དྲངས། སྤྱི་བོ་ནས་ཞུགས་པ་འདོད་ཆགས་ཆེན་པོའི་ཆོས་བྱང་ཆུབ་སེམས་སུ་ཞུ་བ་མཁའ་གསང་ནས་ཕྱུང་སྟེ་ཐོད་པའི་ཛ་གད་དང་ལྷན་ཅིག་པ་ལྕེ་ཐོག་ཏུ་བཞག་པའི་མོས་པས་དམིགས་པ་གསུམ་དྲན་པར་བྱས་ལ། ཧཱུྃ༔ ཡབ་ཡུམ་སྦྱོར་བའི་བྱང་ཆུབ་སེམས༔ དཀར་དམར་བྷནྡྷའི་ནང་དུ་བསྐྱིལ༔ སྐལ་ལྡན་བུ་ལ་བྱིན་པ་ཡིས༔ རྩ་ཁམས་ཡི་གེའི་རྣམ་པར་སྨིན༔ ཚེ་ལ་དབང་བའི་རིག་འཛིན་ཐོབ༔ པདྨ་ཅན་གྱི་ས་ནོན་ཤོག༔ ཨོཾ་བོ་དྷི་ཙིཏྟ་ཝཱཀྐ་ཨ་བྷི་ཥིཉྩ་ཨཱཿ ཞེས་བྱིན་པ་དེ་ཉིད་སངས་རྒྱས་ཐམས་ཅད་འདུས་པའི་ཡེ་ཤེས་ཀྱི་ངོ་བོར་མོས་ལ་སྔགས་འདིའི་རྗེས་ཟློས་མཛོད། ཨ་ཧོ་མ་ཧཱ་སུ་ཁ༔ ཞེས་མྱངས་བས་ཡེ་ཤེས་ཀྱི་བདུད་རྩི་ཤེལ་ལྟར་དྭངས་ཤིང་བདེ་བ་དང་མི་ཕྱེད་པས་ལུས་ཐམས་ཅད་གང༌། གསལ་སྟོང་ནམ་མཁའ་དང་མཉམ་པའི་ཏིང་ངེ་འཛིན་རྒྱུད་ལ་སྐྱེས་པར་མོས། རྗེས་འབྲེལ་བཟླས་པའི་ལུང་སྦྱིན་པ་ལ་མདུན་བསྐྱེད་དཔལ་ཆེན་པོའི་ཐུགས་ཀ་ནས་སྔགས་ཕྲེང་ལུ་གུ་རྒྱུད་དུ་བྱུང༌། སློབ་མའི་མགྲིན་པ་བརྒྱུད་སྙིང་གར་འཁོར་བར་མོས་ལ། རྩ་སྔགས་འབྲུ་གསུམ། གུ་རུ་ཤྲཱི། བཛྲ་ཙཎྜ་རྣམས་སོ་སོར་ལན་གསུམ་བཟླ། དེས་གདན་གསུམ་གསུང་གི་དཀྱིལ་འཁོར་དུ་གསང་བའི་དབང་ཐོབ༔ ངག་གི་ལས་རྣམ་པ་བཞི་དག༔ སྒྲ་ཚིག་རང་མཚན་དུ་འཛིན་པ་དང་རླུང་བཅུ་དག་པར་སྦྱངས༔ གསུང་རྡོ་རྗེའི་བྱིན་རླབས་ཞུགས༔ བཟླས་བརྗོད་དང་རྫོགས་རིམ་ཆོས་ཀྱི་ཕྱག་རྒྱ་སྒོམ་པ་ལ་དབང༔ རྒྱས་པའི་ལས་དང་ཚེ་ལ་དབང་བའི་རིག་འཛིན་འགྲུབ༔ མ་ཆགས་པདྨ་ཅན་གྱི་ས་ནོན༔ འབྲས་བུ་ལོངས་སྤྱོད་རྫོགས་པའི་སྐུ་མངོན་དུ་བྱས་པའོ༔ སྲོག་ཐུར་སྦྱར་ལ་སྲོག་རྩོལ་བཅིངས༔ ཉི་ཁྲི་ཆིག་སྟོང་དྲུག་བརྒྱའི་དབུགས༔ ཡི་གེ་གསུམ་དུ་དག་པར་བསམ༔ གཉིས་པ་ཤེས་རབ་ཡེ་ཤེས་ཀྱི་དབང་ཞུ་བའི་དོན་དུ་མཎྜལ་ཕུལ། མཚན་ཉིད་དང་ལྡན་པའི་ལས་རྒྱ་སློབ་མའི་ལག་གཡས་སུ་གཏད་པར་མོས་ཤིག །རིག་ཙཀ་གཏད་ལ། ཧོ༔ ཆོས་རྣམས་ཀུན་གྱི་འབྱུང་གནས་ཆེ༔ བདེ་བ་ཆེན་པོ་གསང་བའི་ཡུམ༔ རིགས་ཀྱི་བུ་ལ་བྱིན་པ་ཡིས༔ དགའ་བཞིའི་ཡེ་ཤེས་མངོན་དུ་གྱུར༔ ཕྱག་རྒྱ་ཆེན་པོའི་རིག་འཛིན་ཐོབ༔ འཁོར་ལོ་ཚོགས་ཆེན་ས་ནོན་ཤོག༔ པྲཛྙཱ་ཛྙཱ་ན་དྷརྨ་དྷཱ་ཏུ་ཧོ༔ དེ་ལྟར་གཏད་པའི་གཟུངས་མ་དེས་ལུས་གཅེར་བུར་ཕྱུང༌། དྲི་བཟང་པོས་བགོས། རྒྱན་གྱིས་བརྒྱན་ཏེ་ལང་ཚོ་ཤིན་ཏུ་བདོ་བའི་རྣམ་འགྱུར་གྱིས་བདེ་བ་ཆེན་པོའི་དཀྱིལ་འཁོར་ངོམས་པ་དང་བཅས་འདི་སྐད་གསུངས་པར་མོས་ཤིག །དུས་སྦྱོར་བཅུ་གཉིས་རླུང་གི་ཁམས༔ ཟ་བྱེད་རྡོ་རྗེའི་ཕོ་ཉ་མོ༔ དགའ་བ་བཞི་ཡི་འབྱུང་གནས་ང༔ ཆོ་ག་བཞིན་དུ་བསྟེན་ནུས་སམ༔ ཞེས་དྲིས་པ་ལ་སློབ་མས་ཕྱག་འཚལ་ཞིང་མེ་ཏོག་འཐོར་བ་དང་བཅས། འདུལ་བ་མདོ་སྡེ་ཆོས་མངོན་ནས༔ རྣམ་བཅས་ལྷ་མོ་དགག་མཛད་པ༔ ཐབས་ལ་རྨོངས་པ་དག་ལ་དགོངས༔ ལྷན་ཅིག་སྐྱེས་པའི་ཡེ་ཤེས་ནི༔ ཁྱོད་ལས་འབྱུང་ཕྱིར་བདག་འཚལ་ལོ༔ ཞེས་གསང་བའི་སྤྱོད་པའི་དམ་ཚིག་རྣམས་ཆོ་ག་བཞིན་དུ་བསྟེན་པར་སྤྲོ་བའི་ལན་བཏབ་པས། རྡོ་རྗེའི་རིགས་ཅན་ཐ་མལ་གྱི་རྟོག་པ་བྲལ་བར་མཐོང་ནས་དགྱེས་ཏེ་དངོས་གྲུབ་ཆེན་པོའི་འབྱུང་གནས་ཡིན་པར་ངོ་སྤྲད་པ་ནི། རྡོ་རྗེ་བཙུན་མོའི་ཆུ་སྐྱེས་ནི༔ རྣམ་ཐར་གསུམ་གྱི་བདག་ཉིད་ཅན༔ འདི་སྤང་མཆོག་གི་དངོས་གྲུབ་མེད༔ ཐར་པ་བསྟེན་ཅིག་དཔའ་བོ་ཆེ༔ ཛཿཧཱུྃ་བྃ་ཧོཿའི་དམ་ཚིག་ལས༔ ཨེ་ཝཾ་མཉམ་པར་རོལ་པ་ཡིས༔ འཁོར་ལོ་བཞིར་བབས་ལྡོག་དང་ཁྱབ༔ དགའ་མཆོག་ཁྱད་པར་ལྷན་སྐྱེས་ལས༔ བཅུ་དྲུག་ཕྱེད་ཕྱེད་ཐིག་ལེའི་ཁམས༔ སྲིད་པ་ཟ་བྱེད་ཆེན་པོར་སྨིན༔ མས་བརྟན་ལུགས་ལྡོག་ལྷན་ཅིག་སྐྱེས༔ བདེ་ཆེན་འཁོར་ལོར་མཉམ་པར་བཞག༔ ཅེས་རང་གི་རྟོགས་པ་བརྗོད་པས་པདྨ་བྷཉྫ་མོ་ཀྵ་ལ་སོགས་པའི་སྒྲས་ཐར་པ་བསྟེན་པར་བསྐུལ་ནས་པང་དུ་བྱོན་ཏེ་ཛཿཧཱུྃ་བྃ་ཧོཿལ་སོགས་པའི་དོན་གྱིས་འཁྱུད་སྡོམ་སྤྲད་ཅིང་སྤྱོད་ནས། སློབ་མ་ཆེ་མཆོག་དང༌། ལས་རྒྱ་གནམ་ཞལ་མ། མཁའ་གསང་ཧཱུྃ་ལས་རྡོ་རྗེ་ཨོཾ་གྱིས་མཚན་པ་དང༌། པྃ་ལས་པདྨ་མཱུྃ་གྱིས་མཚན་པར་བསམ་ནས་འདོད་ཡོན་ལྔ་ཡི་བདེ་བ་དང་རོ་མཉམ་གྱིས་བསྲུབས་པས་བྱང་ཆུབ་ཀྱི་སེམས་གཡོས། འཁོར་ལོ་བཞིའི་གནས་སུ་དགའ་བཞིའི་ཡེ་ཤེས་ཉམས་སུ་མྱོང་བར་མོས་ལ་སྔགས་འདིའི་རྗེས་ཟློས་དང་འཁྱུད་རྒྱ་མཛོད། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ༔ སླར་ཡང་ཧཱུྃ་གི་སྦྱོར་བས་ཡུམ་གྱི་དྭངས་མ་དང་ལྷན་ཅིག་གྱེན་དུ་དྲངས། ལུགས་ལྡོག་གི་དགའ་བཞི་རིམ་གྱིས་སྤྱི་བོར་བརྟན་པ་ལས་སོ་སོ་རང་རིག་བདེ་སྟོང་སྤྲོས་པ་དང་བྲལ་བའི་ངང་ལ་མཉམ་པར་ཞོག་མཛོད། དེས་རྡོ་རྗེ་བཙུན་མོའི་མཁའ་དབྱིངས་སུ་ཤེས་རབ་ཡེ་ཤེས་ཀྱི་དབང་ཐོབ༔ ཡིད་ཀྱི་ལས་གསུམ་དག༔ ཡིད་དང་ཆོས་སུ་རྟོགས་པ་ལས་བྱུང་བའི་རྣམ་ཤེས་ཚོགས་བདུན་དང༔ རང་བཞིན་བརྒྱད་ཅུའི་རྟོག་པ་སྦྱངས༔ ཐུགས་རྡོ་རྗེའི་བྱིན་རླབས་ཞུགས༔ ཟུང་འཇུག་ལས་ཀྱི་ཕྱག་རྒྱ་བསྟེན་པ་ལ་དབང༔ དབང་གི་ལས་དང་ཕྱག་རྒྱ་ཆེན་པོའི་རིག་འཛིན་འགྲུབ༔ ཡི་གེ་འཁོར་ལོ་ཚོགས་ཆེན་གྱི་ས་ནོན༔ འབྲས་བུ་ཆོས་ཀྱི་སྐུ་མངོན་དུ་བྱས་པའོ༔ བཞི་པ་དེ་ཁོ་ན་ཉིད་ཀྱི་དབང་སེམས་ལ་བརྟེན་ནས་བསྐུར་བ་ཞུ་བའི་དོན་དུ་མཎྜལ་ཕུལ། ཁྱེད་རང་རྣམས་སྔར་ཤེར་དབང་གི་དུས་སུ་དཔེ་ཡི་ལྷན་སྐྱེས་ལ་བརྟེན་ནས་ཉམས་སུ་མྱོང་བའི་བདེ་བ་ཆེན་པོ་བཞི་པའི་ཡེ་ཤེས་ངོ་སྤྲོད་པ་མཚོན་པའི་ཕྱིར་མེ་ལོང་དང་མན་ཤེལ་གྱི་བརྡ་ཡིས་དབྱིངས་ཀ་དག་དང་འོད་གསལ་ལྷུན་གྲུབ་ཀྱི་གནས་ཚུལ་བརྡ་དང་ཚིག་གིས་བསྟན་པའི་དོན་ཤེས་པར་གྱིས་ལ་རང་རིག་སྤྲོས་པ་བྲལ་བའི་ངང་དུ་མཉམ་པར་ཞོག་མཛོད། ཤེལ་རྡོ་དང་མེ་ལོང་བསྟན་ཏེ། ཧཱུྃ༔ ཀ་དག་མེ་ལོང་གཙང་མའི་ངོགས༔ ལྷུན་གྲུབ་དྭངས་ཤེལ་དྲི་མེད་གསལ༔ བརྡ་རྟགས་རྫོགས་པའི་དབང་བསྐུར་བས༔ དྲི་མེད་རིག་པའི་གནས་ལུགས་རྟོགས༔ ལྷུན་གྲུབ་རིག་འཛིན་ཉེར་ཐོབ་ནས༔ བདེ་བ་ཆེན་པོའི་ས་ནོན་ཤོག༔ ཨ་ཨ་ཨ༔ ཞེས་ངོ་སྤྲད་པས་སེམས་ཀྱི་གཤིས་གང་དུའང་མ་གྲུབ་པའི་སྟོང་པ་ཀ་དག་དང༌། མདངས་མ་འགག་པ་ལྷུན་གྲུབ་བདེ་བ་ཆེན་པོའི་སྐུ་དང་ཡེ་ཤེས་ཀྱི་བདག་ཉིད། ཟུང་འཇུག་རང་རིག་གདོད་མའི་གནས་ལུགས་སོ་སོ་རང་རིག་པའི་སྤྱོད་ཡུལ་ནམ་མཁའ་དང་མཉམ་པའི་ཏིང་ངེ་འཛིན་གྱི་ངང་བསྐྱང་བ་ནི་དེ་ཁོ་ན་ཉིད་ཀྱི་དབང་ངོ༌། དེས་རྣམ་ཐར་སྒོ་གསུམ་གྱི་དཀྱིལ་འཁོར་དུ་རང་བཞིན་འོད་གསལ་རྫོགས་པ་ཆེན་པོའི་དབང་ཐོབ༔ དཔེ་དོན་འབྲེལ་བའི་ཆོས་ཉིད་ཉམས་སུ་མྱོང༔ ཀུན་གཞི་དང་ཤེས་བྱའི་སྒྲིབ་པ་དག༔ ལམ་ཕྱག་རྒྱ་ཆེན་པོ་སྒོམ་པ་ལ་དབང༌། དྲག་ཤུལ་གྱི་ལས་དང་ལྷུན་གྱིས་གྲུབ་པའི་རིག་འཛིན་འགྲུབ༔ ཡེ་ཤེས་བླ་མའི་ས་ནོན༔ འབྲས་བུ་ངོ་བོ་ཉིད་སྐུ་མངོན་དུ་བྱས་པའོ༔ ལྔ་པ་མཐའ་རྟེན་རྡོ་རྗེ་སློབ་དཔོན་བདག་པོའི་དབང་སྦྱིན་པ་ནི། རྒྱལ་ཚབ་ཏུ་འོས་པ་ཡིན་ན་ཁྲི་ལ་བཞག །གླེགས་བམ། དུང༌། ཕྱག་ཤིང༌། འཁོར་ལོ་རྣམས་གཏད། སླར་ཡང་ཁྱེད་རང་རྣམས་རིགས་ཀུན་ཁྱབ་བདག་དཀྱིལ་འཁོར་གྱི་གཙོ་བོའི་ང་རྒྱལ་ལ་གནས་པས་དེའི་སྐུ་གསུང་ཐུགས་ཀྱི་ངོ་བོ་རྡོར་དྲིལ་སློབ་མའི་ལག་ཏུ་གཏད་པས་རྡོ་རྗེ་ཐུགས་ཀྱི་དམ་ཚིག་ཕྱག་གཡས་ཀྱིས་ལན་གསུམ་གསོར་ཏེ་ཐུགས་ཀར་གཏོད་མཛོད། རྡོ་རྗེ་ལག་གཡས་སུ་གཏད་དེ། ཧོ༔ སོ་ཐར་བྱང་སེམས་རིག་པ་འཛིན་པ་ཡི༔ དགག་དགོས་ཡོངས་རྫོགས་སྔགས་ཀྱི་དཀྱིལ་འཁོར་དུ༔ ཡོན་ཏན་ཡར་འཕེལ་ཐབས་ལ་མཁས་པ་ཡི༔ རྡོ་རྗེའི་དམ་ཚིག་ཁྱོད་ཀྱིས་གསོར་བར་གྱིས༔ མ་ཧཱ་བཛྲ་ཧཱུྃ༔ ཞེས་སྔགས་ལན་གསུམ། དྲིལ་བུ་གསུང་གི་དམ་ཚིག་ལན་གསུམ་དཀྲོལ་ཏེ་དཀུ་གཡོན་པར་བརྟེན་མཛོད། དྲིལ་བུ་ལག་གཡོན་དུ་གཏད། ཧོ༔ ཆོས་རྣམ་ཐམས་ཅད་བློ་ཡིས་བཏགས་པ་ཙམ༔ རྣམ་ཐར་གསུམ་དང་ལྡན་པའི་ཤེས་རབ་ནི༔ ངོ་བོ་ཉིད་མེད་གྲགས་སྟོང་སྒྲས་མཚོན་ཕྱིར༔ དྲིལ་བུའི་དམ་ཚིག་འཁྲོལ་ཞིང་དཀུ་ལ་བརྟེན༔ མ་ཧཱ་གཎྜེ་ཧཱུྃ༔ ཞེས་སྔགས་ལན་གསུམ། དེ་ལྟར་གཏད་པའི་རྡོར་དྲིལ་ཐབས་ཤེས་གཉིས་སུ་མེད་པ་མཚོན་ཕྱིར་ལག་གཉིས་ཐུགས་ཀར་འཁྱུད་རྒྱ་བྱས་པས་ཕྱག་རྒྱ་སྐུ་ཡི་དམ་ཚིག་མཚོན་པ་སྟེ། མདོར་ན་རྡོ་རྗེའི་སྐུ་གསུང་ཐུགས་དང་གཉིས་སུ་མི་ཕྱེད་པ་རྣམ་པ་ཐམས་ཅད་མཁྱེན་པའི་ཡེ་ཤེས་ངོ་སྤྲད་པར་མོས་ཤིག །ཐབས་དང་ཤེས་རབ་འདུ་འབྲལ་མེད་པ་ཡི༔ སྟོང་ཉིད་སྙིང་རྗེའི་བདག་ཉིད་ཆེན་པོ་ནི༔ གཉིས་མེད་དམ་ཚིག་རྡོ་རྗེ་སློབ་དཔོན་དབང༔ བསྡུ་བ་རྣམ་བཞིས་རྒྱལ་བའི་མཛད་པ་སྒྲུབས༔ ཞེས་ཐུགས་ཀར་འཁྱུད་རྒྱ་བྱ། འོ་རིགས་ཀྱི་བུ་ཁྱོད་ལ་རྡོ་རྗེ་སློབ་དཔོན་གྱི་དབང་དམ་ཚིག་གསུམ་བྱིན་པས་དཀྱིལ་འཁོར་གྱི་ཁྱབ་བདག་དཔལ་རྡོ་རྗེ་སེམས་དཔའ་ཡབ་ཡུམ་གྱི་ང་རྒྱལ་ལ་གནས་པས་འཛག་མེད་བདེ་སྟོང་གི་ཡེ་ཤེས་རྒྱུད་ལ་སྐྱེས་པར་བསམ་ཞིང༌། ཐབས་ལ་བརྟེན་པའི་རྒྱུ་དུས་ཀྱི་ཡན་ལག་བདུན་ལ་གོམས་པས། འབྲས་བུའི་དུས་སུ་སྐུ་གསུམ་ཡན་ལག་བདུན་ལྡན་ཁ་སྦྱོར་ལོངས་སྤྱོད་རྫོགས་སྐུའི་གོ་འཕང་མངོན་དུ་བསྒྲིགས་པ་ནི་རྡོ་རྗེ་སློབ་དཔོན་གྱི་དབང་སྟེ་དབང་དེ་བསྐུར་བས་བྱེད་ལས་སུ་གཞན་དོན་སློབ་མ་བསྡུ་བ་དང༌། ཟབ་མོའི་ཆོས་འཆད་པ་ལ་སོགས་པ་བགྱིད་པར་རྗེས་སུ་གནང་ཞིང་རྟེན་འབྲེལ་འགྲིག་པ་ཡིན་ནོ། །དེ་ལྟར་ཕྱི་ནང་གསང་བའི་དབང་དེ་དག་ཐོབ་པའི་ཕན་ཡོན་ནི། རྒྱུད་ལས། དེ་ལྟར་དབང་རྣམས་ཡོངས་རྫོགས་པར༔ བསྐུར་བའི་ཡོན་ཏན་བསམ་མི་ཁྱབ༔ གསང་སྔགས་དངོས་གྲུབ་དབང་ལས་འབྱུང༔ ཞེས་དང༌། བླ་མ་རྒྱལ་བ་མ་ལུས་པའི༔ སྐུ་གསུང་ཐུགས་དང་ཡོན་ཏན་དང༔ ཕྲིན་ལས་བདག་ཉིད་ཆེན་པོར་འགྱུར༔ ཞེས་སོགས་མཐའ་ཡས་པ་གསུངས་པ་ལྟར་གནས་སྐབས་མངོན་མཐོ་དང་མཐར་ཐུག་ངེས་ལེགས་ཀྱི་ཡོན་ཏན་ཐམས་ཅད་དབང་གིས་བསྐྱེད་ནུས་པའི་ཕན་ཡོན་བསམ་མི་ཁྱབ་པ་གསུངས་པས་སྤྲོ་དགའ་རྒྱ་ཆེན་པོ་བསྐྱེད་པ་དང༌། ནུས་པ་དེ་ལྡན་གྱི་དབང་སྲོག་རྒྱུད་ལ་འཛིན་པ་དམ་ཚིག་ལ་རག་ལས་པས་ཐུན་མོང་དང་ཐུན་མོང་མ་ཡིན་པའི་དམ་ཚིག་དང་སྡོམ་པ་རྩ་བ་ཡན་ལག་ཁྱད་པར་གྱིས་བསྡུས་པ་རྣམས་ཇི་ལྟར་ཁས་བླངས་པ་བཞིན་བསྲུང་སྙམ་པའི་འདའ་དཀའི་དམ་ཚིག་སྙིང་ལ་བཀོད་པའི་བློས་འདིའི་རྗེས་ཟློས་མཛོད། རྩ་བ་སྐུ་གསུང་ཐུགས་མཆོག་དང༔ ཡན་ལག་དམ་ཚིག་ཉི་ཤུ་ལྔ༔ མེད་དང་གཅིག་པུ་ཕྱལ་བ་ཆེ༔ ལྷུན་གྲུབ་བཞིན་དུ་སྲུང་བར་བགྱི༔ ལན་གསུམ་བྱ། དེ་དག་གིས་སྒྲུབ་ཆེན་བཀའ་བརྒྱད་ཀྱི་དཀྱིལ་འཁོར་དུ་དབང་བསྐུར་ལེགས་པར་ཐོབ་པའི་བཀའ་དྲིན་གཏང་རག་གི་དོན་དུ་མཎྜལ་ཕུལ། དབང་གི་སྐབས་འདིར་ཕྱོགས་བཅུའི་སངས་རྒྱས་ཐམས་ཅད་རྡོ་རྗེ་སློབ་དཔོན་གྱི་སྐུ་ལ་དབང་གི་བྱ་བ་མཛད་ཕྱིར་འདུས་ཤིང་དཔའ་བོ་ཌཱ་ཀི་རྣམས་ཀྱང་དབང་གྲལ་དུ་དམ་ཚིག་དང་ཐུགས་རྗེས་འཁོད་པས་ན་དུས་གཞན་ལས་ཚོགས་གཉིས་ཀྱི་སྒོ་འབུམ་འགྱུར་གྱིས་འཕེལ་ཆེ་བས་བདག་ལུས་ལོངས་སྤྱོད་དང་བཅས་པ་ལྟོས་མེད་དུ་འབུལ་ཞིང་བསྲུང་བྱའི་དམ་ཚིག་རྣམས་ལུས་དང་སྲོག་གི་ཕྱིར་ཡང་མི་གཏོང་སྙམ་པས་འདིའི་རྗེས་ཟློས་མཛོད། བདག་ལུས་ལོངས་སྤྱོད་ཁྱེད་ལ་འབུལ༔ ཇི་ལྟར་བཀའ་བསྩལ་བཞིན་དུ་བགྱིད༔ སྲོག་ལ་བབ་ཀྱང་དེ་བསྒྲུབ་ན༔ དངོས་གྲུབ་མཐོང་བའི་ཆོས་ལ་སྩོལ༔ བླ་མ་མཆོག་དང་ལྷག་པའི་ལྷ༔ བྱང་ཆུབ་བར་དུ་མི་འབྲལ་ན༔ ཆ་ཡིས་ཀྱང་ནི་སྤྱད་དུ་གསོལ༔ ལན་གསུམ། ནམ་མཁར་བཞུགས་པའི་དབང་གི་ལྷ་རྣམས་སློབ་མ་ལ་ཐིམ་པས་དབང་གི་ཡེ་ཤེས་མ་སྐྱེས་པ་སྐྱེས་སྐྱེས་པ་རྣམས་གོང་འཕེལ་དུ་གྱུར་ཏེ་བརྟན་པའི་མོས་པ་གནང་མཛོད། སྤྲོ་ན་ལས་བྱང་གི་ཤིས་བརྗོད་བྱ། ཛཿཧཱུྃ་བྃ་ཧོཿ སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་མེ་ཏོག་འཐོར་ལ་རབ་ཏུ་གནས་པར་བྱ། དེ་ལྟ་བུའི་དགེ་བ་མ་གྱུར་འགྲོ་བ་སེམས་ཅན་ཐམས་ཅད་ཀྱི་དོན་དུ་བསྔོ་བ་དང་ལམ་འདིས་རང་གཞན་གྱི་དོན་རྒྱ་ཆེར་འགྲུབ་པའི་སྨོན་ལམ་རྣམས་ཚོགས་གཉིས་ཟུང་འབྲེལ་གོང་འཕེལ་གྱི་དོན་དུ་གནང་བར་ཞུ། བསོད་ནམས་འདི་ཡིས་སོགས་བརྗོད་པར་བྱའོ། །རྗེས་རིམ་ཚོགས་ལ་རོལ་བ། ལྷག་མ་དང་བཀའ་སྲུང་ཆད་བརྟན་གཏོར་མ་བཏང་བ་ནས་སྨོན་ལམ་ཤིས་བརྗོད་ཀྱི་བར་ལས་བྱང་དཀྱུས་ལ་བརྟེན་པས་གྲུབ་པའོ། །ཀུན་མཁྱེན་ཡེ་ཤེས་མེ་ལོང་ངོགས། །རྣམ་བཀྲའི་ཟབ་རྒྱས་ཆོས་ཀྱི་ཚུལ། །རྗེས་བརྩེའི་འོད་ཟེར་མ་སྨད་པས། །མངོན་སུམ་སྤྱོད་པའི་སྐལ་བཟང་སྙམ། །ཞེས་སྒྲུབ་པ་ལག་ལེན་དུ་འདྲིལ་བའི་ཟབ་པའི་ཆོས་སྡེའི་ཡི་དམ་སྤྱི་སྒྲུབ་དྲག་པོ་དཔལ་ཆེན་འདུས་པའི་དབང་དོན་རྒྱ་མཚོའི་དགོངས་པ་ལེགས་པར་བཀྲལ་ནས་བཀླག་ཆོག་གི་ལེའུ་ཚན་ལྔ་པ་སྟེ་གཟི་བརྗིད་རབ་ཏུ་དགའ་བའི་དཔལ་གྱིས་སྦྱར་བའོ། ༈ སངས་རྒྱས་ཀུན་གྱི་གཉིས་མེད་ཡེ་ཤེས་སྐུ། །ཤིན་ཏུ་ཞི་བ་གཞོན་ནུའི་མཚན་དཔེ་ཡང༌། །སྣང་སྲིད་ཕྱག་རྒྱས་ཟིལ་གནོན་ཧེ་རུ་ཀ །རྒྱལ་བ་རྟག་པའི་རིགས་གཙོར་བཞེངས་གང་རྒྱལ། །རྩ་བ་ཐུགས་སྒྲུབ་དཔལ་ཆེན་འདུས་པ་ལས་གྱེས་པའི་ཡན་ལག་སྐུ་གསུང་ཐུགས་ཕྲིན་ལས་ཀྱི་རིགས་བཞིའི་ཧེ་རུ་ཀའི་སྒོས་བཀའ་སོ་སོའི་དབང་གི་རིམ་པ་འཆད་པ་སྟེ། གཞུང་ལས། དབང་བསྐུར་མ་རྫོགས་དོན་ལ་གཡེལ༔ རྒྱལ་བུ་རྒྱལ་སར་མ་ཕྱིན་བར༔ དེ་སྲིད་རྒྱལ་པོའི་མིང་མི་ཐོབ༔ དེ་ལ་སྒོས་དབང་ཁྱད་པར་ནི༔ ཞེས་གསུངས་པའི་ཐོག་མ་སྐུ་དེ་བཞིན་གཤེགས་པའི་རིགས་འཇམ་དཔལ་གཤིན་རྗེ་འཆི་བདག་ཟིལ་གནོན་གྱི་དབང་གི་ཆོ་ག་འཆད་པ་ལ། སོ་སོའི་དཀྱིལ་འཁོར་དབང་རྫས་རྣམས༔ འདུ་བྱས་རང་གཞུང་བཞིན་དུ་སྒྲུབ༔ ཅེས་གསུངས་པ་ལྟར་དབང་དོན་སྒྲུབ་མཆོད་དང༌། དབང་སྤྱི་རྩ་སྒྲུབ་དཔལ་ཆེན་གྱི་སྐབས་སུ་བཤད་པ་ལྟར་ཁོག་ཕུབ་ནས། བྱེ་བྲག་གི་སྒོས་ཆོས་སོ་སོ་བ་རྣམས་འཆད་འགྱུར་ལྟར་བྱ་དགོས་པ་གཞིར་བཟུང་ནས། གཤིན་རྗེར་གཞུང་མཐུན་གྱི་དཀྱིལ་འཁོར་རས་བྲིས་བཀྲམ་པའི་དབུས་སུ། ཕྱེ་མར་བུ་རམ་ཤ་ཆེན་དང་ཆོས་སྨན་བསྲེས་པའི་བམ་གྱི་དབྱིབས་ཀྱི་མགོ་བོར་གཏོར་མ། ལག་གཡས་གཡོན་བསྣོལ་བའི་སྟེང་དུ་སྨན་རཀ་གི་སྣོད་ཀ་པཱ་ལ་དང་བཅས་པ་བཀོད། མར་ཐག་དཀར་དམར་བསྒྲིལ་བས་མགོ་དང་ཡན་ལག་བཅིང་ཚུལ་བྱ། དེང་སང་བམ་འདི་ཙཀླི་བྱེད་འདུག་ཀྱང་བཅོས་པའི་བམ་རྫས་ལྡན་འདི་གཤིན་རྗེའི་དབང་དང་སྒྲུབ་པ་ཐམས་ཅད་ཀྱི་སྒོས་ཆོས་སུ་གསུངས་པས་བཅོས་པའི་བམ་རྫས་ལྡན་བྱེད་པ་གལ་ཆེ་བར་ངེས། དེ་སྟེང་ལྡིང་ཁྲི་ལ་རྣམ་བུམ་རྒྱན་ལྡན། ཐུན་མོང་རིགས་དབང་ལྔ་ཀའི་རྫས། རྡོ་རྗེ་སློབ་དཔོན་གྱི་དབང་རྫས། དུར་ཁྲོད་ཆས་བརྒྱད། རྡོ་རྗེ་བེ་ཅོན་འཁོར་ལོ་གཏུན་ཤིང་རལ་གྲི་སྡིག་མཛུབ་སྟེ་ཕྱག་མཚན་དྲུག་གི་ཙཀླི་ཕྱོགས་བསྡུས། ཀ་པཱ་ལར་ཆང་དང་འོ་མ་ཆོས་སྨན་མངར་གསུམ་སྦྱར་བའི་གསང་རྫས། སྨན་སྤོད་སྦྱར་བའི་ཕྱེ་མར་མངར་གསུམ་དང་ལྡན་པས་བཅོས་པའི་ཚེ་འབྲང་པདྨ་འདབ་བརྒྱད་དམར་པོའི་ཚེ་རིལ་གྱིས་བསྐོར་བའི་འོག་ཉི་མ་དང་སྟེང་ཟླ་བ་དཀར་པོ་ཁ་སྦྱོར་རྡོ་རྗེ་རྩེ་ལྔའི་ཏོག་དང་ཁ་ཆོད་ཅན། རིག་ཙཀ །ཤེལ་རྡོ་མེ་ལོང་རྣམས་དང༌། གཤིན་རྗེའི་གཏོར་མ། སྨན་རཀ །ཞི་དྲག་གི་མཆོད་པ་ཚོགས་མཆོད་སོགས་འོག་ཏུ་དགོས་པ་རྣམས་འདུ་བྱས་ལ། དབང་སྒྲུབ་དངོས་ལ། གཞུང་ལས། སྣང་སྲིད་ཐམས་ཅད་འཇམ་དཔལ་གཤིན་རྗེའི་རྟེན་དང་བརྟེན་པར་བསྐྱེད་པ་ལ་བདག་མདུན་གཉིས་རྟོག་མི་དགོས། ཅེས་ཀུན་མཁྱེན་ཉིད་ཀྱིས་གསུངས་ཤིང༌། པད་གནུབས་ཀྱི་གཤིན་རྗེའི་གཞུང་ལས། འདི་ནི་གཞལ་ཡས་ཁང་ལྷུན་གྲུབ། ལྷ་ལྐོག་བཞེངས། སྔགས་ཐུག་ཕྲད་དུ་ཡིན་པས་རང་བཞིན་ལྷུན་གྱིས་གྲུབ་པའི་ལྷའི་འཁོར་ལོ་དྲན་པ་ཙམ་གྱིས་རྫོགས་པར་བྱེད་དོ་ཞེས་གསང་སྐོར་གནམ་ཐིག་ཆེན་པོ་ལས་གསུངས་པ་ལྟར་ངེས་ཀྱང་དེང་སང་ལྟ་དགོངས་དེ་ལྟ་བུའི་གདེང་ཚད་ཅན་དཀོན་པ་དང༌། དཔལ་ཆེན་འདུས་པའི་བདག་འཇུག་དབང་དོན་རྒྱ་མཚོར་བདག་མདུན་སོ་སོར་བསྒྲུབ་པར་གསུངས་པའི་དགོངས་པ་ལྟར་བྱ་བ་གལ་ཆེ་བ་དང༌། དཔལ་འདུས་དང་གཤིན་རྗེའི་ལས་བྱང་གབ་སྤྲད་ཀྱིས་ཛཔ་བཟླས་བར་བཏང༌། ཛཔ་དགོངས་ནི། ཡ་མའི་ཐུགས་ཀར་ཉི་སྟེང་ཧཱུྃ༔ སྐྱེ་བ་མེད་པའི་ཡེ་ཤེས་ཀྱི༔ རྣམ་པའི་གཟུགས་བརྙན་ཡི་གེས་བསྐོར༔ ངོ་བོ་ལྷ་ཡི་སྐུ་རུ་བཤད༔ ཨེ་ཀ་ཡ་མ་ཧེ་དུན་སྙིང་ཁྲག་ར་མ་ཙ་ཡ་ཧཱུྃ་ཕཊ༔ ཞེས་སྔགས་ཕྲེང་གཡོན་བསྐོར་དུ་བཀོད་ལ་སེམས་ཟིན་པ་དང༌། རང་རང་སྔགས་ཀྱི་ཡིག་འབྲུ་ལས༔ སྔགས་ཕྲེང་ལུ་གུ་རྒྱུད་དུ་ཐོན༔ ཡབ་ཡུམ་ཞལ་ནས་ཞལ་དུ་ཞུགས༔ སྐུ་ཡི་དབྱིབས་བརྒྱུད་མཁའ་གསང་ནས༔ རྡོ་རྗེ་ནོར་བུའི་ལམ་ཞུགས་ཏེ༔ བདེ་བ་ཆེན་པོའི་འོད་ཟེར་གྱིས༔ རྒྱལ་བ་མཆོད་ཅིང་ཐུགས་དམ་བསྐུལ༔ དངོས་གྲུབ་གྲུབ་པས་བདག་བྱིན་བརླབས༔ ཡང་འཕྲོས་བརྟན་གཡོ་ཐ་མལ་པའི༔ སྣང་ཞེན་དག་པའི་སྣོད་དང་བཅུད༔ ལྷ་དང་གཞལ་ཡས་རོལ་པར་ཤར༔ ཞེས་སྤྲོ་བསྡུའི་ཏིང་ངེ་འཛིན་བཅས་སྔགས་བཟླས་མཐར། སླར་ཡང་ཡན་ལག་བརྒྱད་པའི་ཚོགས་བསགས་དང་བྱིན་འབེབས་ནས་བརྩམས་ལ། རང་བཞིན་མི་གནས་མཉམ་པའི་ངང་སོགས་གཤིན་རྗེའི་མངོན་རྟོགས་ལས་རིམ་དང་བཅས་པ་བཏང་ལ། ཐུགས་ཀའི་སྔགས་ཕྲེང་ལས་རང་འདྲ་གཉིས་པ་ཆད་དེ་ལུ་གུ་རྒྱུད་དུ་འབྲེལ་བ་བདག་མདུན་གྱི་ཞལ་དང་སྦྱོར་མཚམས་བརྒྱུད་ཡེ་ཤེས་སེམས་དཔའ་ལ་བསྐོར་ནས་འོད་ཟེར་སྤྲོ་བསྡུས་དོན་གཉིས་སྒྲུབ་པའི་དམིགས་པ་གཙོ་བོར་བྱ་གསུངས། བམ་དང་ཚེ་འབྲང་ལའང་དཀྱིལ་འཁོར་ཡོངས་རྫོགས་གསལ་བས་སྤྲོ་བསྡུ་དང་བཟླས་པ་ཡང་ཅུང་ཟད་བྱ། རྣམ་བུམ་ལ་དཔལ་འདུས་སྐབས་ལྟར་རམ་ཅུང་ཟད་བསྡུ་ན། སྟོང་པའི་ངང་ལས་རྣམ་རྒྱལ་བུམ་པ་ནི། །བྷྲཱུཾ་ཡིག་ཡོངས་གྱུར་རིན་ཆེན་སྣ་ཚོགས་ལས། །ཡོངས་གྲུབ་ཕྱི་ནི་བུམ་གཟུགས་ནང་གཞལ་ཡས། །ཚད་དང་མཚན་ཉིད་ཐམས་ཅད་རྫོགས་པ་ཡི། །ཕོ་བྲང་དབུས་སུ་འཇམ་དཔལ་གཤིན་རྗེ་གཤེད། བཅོམ་ལྡན་རྟ་མཆོག་དཔལ། ཡང་དག་ཧེ་རུ་ཀ །བཛྲ་ཀཱི་ལ་ཡ། རིགས་བཞི་སོ་སོར་བསྒྱུར། མཆན། གཙོ་འཁོར་ཡོངས་རྫོགས་མ་འདྲེས་ཆུ་ཟླ་ལྟར། །གསལ་ལ་ཡེ་ཤེས་སྤྱན་དྲངས་དབྱེར་མེད་བསྟིམ། ཧཱུྃ། ཡེ་ཤེས་ལྷ་ཚོགས་སྤྱན་འདྲེན་གཤེགས། །ཕྱི་ནང་གསང་བའི་མཆོད་པ་འབུལ། །སྐུ་གསུང་ཐུགས་ཡོན་ཕྲིན་ལས་བསྟོད། །བག་མེད་འགལ་འཁྲུལ་ཉམས་ཆག་བཤགས། །མཆོག་དང་ཐུན་མོང་དངོས་གྲུབ་སྩོལ། །ཨོཾ་བཛྲ་ཨརྒྷཾ་སོགས་ནས། ཤབྡ་པཉྩ་རཀྟ་བ་ལིཾ་ཏ་པཱུ་ཛ་ཧོ༔ རང་གི་ཐུགས་ཀ་ནས་སྔགས་ཀྱི་འོད་ཟེར་འཕྲོས་བུམ་པའི་ལྷ་རྣམས་ལ་ཕོག །སྐུ་ལས་བྱང་ཆུབ་ཀྱི་སེམས་ཡེ་ཤེས་ཀྱི་བཅུད་དུ་འཁྱིལ། རྩ་སྔགས་བཟླ། ལས་བུམ་ཡང་བདུད་རྩི་འཁྱིལ་བའི་བསྐྱེད་བཟླས་དང་འོད་ཞུ་བཅས་བྱ། བདག་འཇུག་གམ་རིག་པའི་མེ་ཏོག་དོར་ཞིང་སློབ་མ་འཇུག་པར་གནང་བ་ཞུ། སྣོད་རུང་གི་སློབ་མར་ཁྲུས་བྱ། བགེགས་གཏོར་བཏང༌། མཚམས་བཅད་སྲུང་འཁོར་བསྒོམ། སེམས་བསྐྱེད་གསལ་བཏབ་ལ་ཆོས་བཤད་ཀྱི་ཁྱད་པར། དེ་ལ་རྒྱལ་བ་སྲས་དང་བཅས་པ་ཐམས་ཅད་དང་གཉིས་སུ་མེད་པའི་ཡེ་ཤེས་ཀྱི་སྐུ་ཡི་བདག་ཉིད་འཇམ་དཔལ་ཡེ་ཤེས་སེམས་དཔའ་དྲག་པོའི་སྐུར་བཞེངས་པ་དང༌། སྐུ་དེ་བཞིན་གཤེགས་པའི་རིགས་ཀྱི་ཁྱབ་བདག་ཆེན་པོ་བཅོམ་ལྡན་འདས་གཤིན་རྗེ་གཤེད་ལ་རྩ་བཤད་མན་ངག་གི་རྒྱུད་དང༌། གྲུབ་བརྙེས་སློབ་དཔོན་སོ་སོས་བཀྲལ་ཞིང་བཀའ་བབ་པའི་མན་ངག་གི་བཀའ་སྲོལ་མཐའ་ཡས་པ་བཞུགས་ཤིང༌། གངས་ཅན་འདིར་ཡང་སྔ་འགྱུར་རྙིང་མའི་ཕྱོགས་ལ་ངོ་བོའི་དབྱེ་བས་གཤེད་སྐོར་རིགས་ལྔ། རྣམ་པའི་ཚུལ་ལས་ཡེ་ཤེས་ལས་དང་འཇིག་རྟེན་པའི་ཚུལ་བཟུང༌། ཕྲིན་ལས་ཀྱི་བྱེ་བྲག་རྣ་ཆ་བརྒྱད་ཡོངས་སུ་གྲགས་པ་དང༌། ཕྱི་འགྱུར་གསར་མའི་ཕྱོགས་ལ་དམར་ནག་འཇིགས་གསུམ་ནང་གསེས་དང་བཅས་པ་བྱོན་པ་ལས། འདིར་ཡེ་ཤེས་ཀྱི་གཤིན་རྗེ་གཤེད་པོ་ཀུན་ཁྱབ་དེ་བཞིན་གཤེགས་པའི་རིགས་འཁོར་འདས་ཀུན་གྱི་ཕྱག་རྒྱ་ཟིལ་གྱིས་གནོན་པའི་དཀྱིལ་འཁོར་གྱི་སྒྲུབ་པ་གཤེད་སྐོར་རྒྱ་མཚོའི་བཅུད་དང་སྙིང་པོར་གྱུར་པ་སྟེ། སྤྱིར་འཇམ་དཔལ་གྱི་རྒྱུད་རྣམས་སྐུའི་རིག་འཛིན་ཆེན་པོ་འཇམ་དཔལ་བཤེས་གཉེན་ཞབས་ཀྱིས་འཇམ་དཔལ་ཁྲི་དྲུག་སྟོང་དུ་གྲགས་པ་སོགས་རྒྱུད་སྡེ་བསམ་མི་ཁྱབ་པའི་རྩ་རྒྱུད་ཟླ་གསང་ནག་པོ་དང༌། སྡིག་པ་སྙིང་འཛིན་སོགས་ཀྱི་རྒྱུད་དོན་མན་ངག་ཏུ་བསྡེབས་ཏེ་གྲུབ་པའི་རིག་འཛིན་རྣམས་ལ་རིམ་པར་བརྒྱུད། སློབ་དཔོན་ཆེན་པོ་པདྨ་ཀཱ་ར། རྒྱ་གར་ཁྲག་འཐུང་ནག་པོ། ཕུང་བྱེད་ཤིནྟཾ་གརྦྷ་དང༌། གནུབས་ཆེན་སངས་རྒྱས་ཡེ་ཤེས་རིན་པོ་ཆེས་རྒྱ་བལ་བྲུ་ཤའི་སློབ་དཔོན་རྣམས་ལས་གསན་པ་རྣམས་ཀྱི་ལུགས་སྲོལ་ཅི་རིགས་པ་གསལ་བར་མཛད་པ་ལས། འདི་ནི་གསང་བ་ཆེན་པོའི་རྟོགས་བརྗོད་ལས། དེའི་ཐོ་རེངས་ལྡང་བའི་རྣལ་འབྱོར་ཚེ། །གཞི་སྣང་བའི་འོད་གསལ་དྭངས་པའི་ངོར། །རང་གནས་པའི་སྨིན་མཚམས་ནམ་མཁའི་ཐད། །འཇའ་ཚོན་སྣ་ལྔ་པའི་གུར་ཁྱིམ་ནང༌། །སྐྱབས་ཀུན་འདུས་མཚོ་སྐྱེས་རྡོ་རྗེ་མཇལ། །ངོ་བལྟ་བྱ་དང་ལྟ་མཁན་དབྱེར་མེད་པས། །རེ་དོགས་ཀྱི་འཆིང་བ་གང་ཡང་མེད། །དེའི་ངང་ལས་དེ་ཉིད་གནས་གྱུར་ཏེ། །ཡུལ་སིངྒ་ལ་ཡི་ཨཱ་ཙརྻ། །འཇམ་དཔལ་བཤེས་གཉེན་དུ་ལམ་གྱིས་སོང༌། །སྐུ་དམར་སྨུག་མཆོང་ལྟར་དྭངས་པ་ཡི། །ཕྱག་གཡས་ན་བེ་ཅོན་ཁྱད་འཕགས་བསྣམས། །གཡོན་བདག་གི་སྙིང་གར་སྡིགས་མཛུབ་ཀྱི། །ཕྱག་རྒྱས་བརྡ་ཐབས་བསྟན་པའི་མོད། །ཕྱག་མཚན་གྱི་བེ་ཅོན་བདག་ཉིད་ལ། །བྱིན་ཏེ་རང་ལ་དབྱེར་མེད་ཐིམ། །སྐུ་སྒྱུ་མ་ལྟ་བུའི་གསལ་སྣང་དེ། །ཀ་དག་གི་དབྱིངས་སུ་གཏད་མེད་ཡལ། །དུས་འདི་ནས་དགོངས་པའི་གསང་མཛོད་བརྡོལ། །གསུང་རབ་ཀུན་གྱི་དགོངས་པ་ཁྲོལ། །ཀློང་ཆེན་རིག་པའི་རྩལ་ཆེན་རྫོགས། །སྣང་ཡུལ་བརྡ་དང་དཔེ་ཆར་ཤར། །མཆོག་གི་དངོས་གྲུབ་རྒྱུད་ལ་བཞག །ཅེས་དང༌། ཌཱ་ཀིའི་གསང་གཏམ་ཆེན་མོ་ལས། དེ་དང་མཚུངས་པར་གསུངས་པ་བཞིན་ནང་རང་བྱུང་ཆོས་ཉིད་ཀྱི་བདེན་པ་ཇི་ལྟ་བ་བཞིན་མངོན་སུམ་དུ་གཟིགས་ནས་འཕགས་ལམ་གྱིས་མཐོང་བའི་ཆོས་ལ་བརྙེས་པས། །རིག་རྩལ་ཤེས་རབ་རང་བྱུང་གི་དགོངས་པའི་གསང་མཛོད་བརྡོལ་ཏེ་ཤེས་བྱ་ཇི་སྙེད་མཁྱེན་པའི་ཡེ་ཤེས་ལ་དབང་ཐོབ་པས། །སྐུ་ཚེ་འདིའི་སྦྱངས་སྟོབས་ལ་མ་ལྟོས་པར་སྐྱེས་སྟོབས་ཀྱི་མཁྱེན་རབ་ཟབ་མོས་ཆོས་ཀྱི་དགོངས་པ་ཐུགས་སུ་ཆུད་ནས་འཇིགས་མེད་སྤོབས་པའི་གཏེར་མཛོད་ཡོངས་སུ་གྲོལ་བས་ལམ་དེའི་ཤིང་རྟའི་སྲོལ་འབྱེད་ཐམས་ཅད་མཁྱེན་གཉིས་ཀྱི་གཏེར་མཛོད་གྲོལ་བ་ཤ་སྟག་ཏུ་བྱོན་པའི་ངོ་མཚར་རྨད་དུ་བྱུང་བ་ཀུན་མཁྱེན་བླ་མ་རིག་འཛིན་འཇིགས་མེད་གླིང་པ་གང་ལ་བཀའ་བབ་པའི་ཀློང་ཆེན་སྙིང་གི་ཐིག་ལེའི་ཆོས་སྐོར་རྩ་བ་གསུམ་གྱི་སྒྲུབ་ཐབས་ཟབ་རྒྱས་སུ་བཞུགས་པ་ལས། དངོས་གྲུབ་ཀུན་གྱི་རྩ་བ་ཡི་དམ་གྱི་སྒྲུབ་སྐོར་ཏེ། དེ་ལའང་སྤྱི་དང་བྱེ་བྲག་གི་སྒྲུབ་པའི་ཐབས་མང་དུ་བཞུགས་པ་ལས། འདི་ནི་དྲག་པོ་དཔལ་ཆེན་འདུས་པའི་སྒོས་བཀའ། སྐུ་གསུང་ཐུགས་ཡོན་ཏན་ཕྲིན་ལས་ཀྱི་བདག་ཉིད་འཇིག་རྟེན་ལས་འདས་པའི་གྲུབ་ཚུལ་ལྔའི་ཡ་གྱལ། སྐུ་འཇམ་དཔལ་གཤིན་རྗེ་གཤེད་འཆི་བདག་ཟིལ་གནོན་གྱི་སྒོས་བཀའི་དབང་གི་ཆོ་ག་སྟེ། གཏེར་གཞུང་ལས། འདི་ནི་འཇམ་དཔལ་བཤེས་གཉེན་གྱིས༔ ཨོ་རྒྱན་རང་བྱུང་མཆོད་རྟེན་ནས༔ དབྱིངས་ཀྱི་ཌཱ་ཀིའི་གསང་མཛོད་བརྟོལ༔ རྒྱུད་ལས་ལུང་དང་སྒྲུབ་ཐབས་སུ༔ བསྡུས་འདི་པདྨའི་རིང་ལུགས་ཡིན༔ ཞེས་དང༌། རིག་འཛིན་རྩ་རྒྱུད་ཐོད་པའི་དུམ་བུ་ལས། མ་ལ་ཡར་འཁྲུངས་བྲམ་ཟེའི་བུ༔ མི་ཏྲ་མཉྫུ་ཤྲཱི་ལ༔ སྐུ་མཆོག་འཇམ་དཔལ་སྒྲོམ་བུ་གཏད༔ ཅེས་པ་ལྟར་ཨོ་རྒྱན་རང་བྱུང་གི་དུར་ཁྲོད་བསིལ་བ་ཚལ་གྱི་མཆོད་རྟེན་ཆེན་པོ་བདེ་བྱེད་བརྩེགས་པ་ནས་གྲུབ་པ་བརྙེས་པའི་རིག་འཛིན་མཆོག་བརྒྱད་ལ་བཀའ་བརྒྱད་སོ་སོའི་རྒྱུད་ལུང་མན་ངག་གི་སྒྲོམ་བུ་མཁའ་འགྲོ་ལས་ཀྱི་དབང་མོས་གཏད་པ་ལས་སྐུ་འཇམ་དཔལ་གཤིན་རྗེའི་ལྕགས་སྒྲོམ་སློབ་དཔོན་འཇམ་དཔལ་བཤེས་གཉེན་ལ་གཏད་དེ། ཤར་ཕྱོགས་ཁུ་བྱུག་ཚལ་ཀྱི་དུར་ཁྲོད་དུ་བསྒྲུབས་པས་དཀྱིལ་འཁོར་ཁྱབ་བདག་འཇམ་དཔལ་ཕྱག་རྒྱ་ཟིལ་གནོན་དང་གཉིས་སུ་མེད་པའི་གོ་འཕང་བརྙེས་པའི་སློབ་དཔོན་ཆེན་པོ་དེ་ཉིད་ལས་སངས་རྒྱས་གཉིས་པ་པདྨ་འབྱུང་གནས་དང༌། གནུབས་ཆེན་སངས་རྒྱས་ཡེ་ཤེས་སོགས་ཀྱིས་ཀྱང་གཤེད་སྐོར་གྱི་རྒྱུད་དང་མན་ངག་དུ་མ་གསན་པའི་བཀའ་སྲོལ་ཡོངས་སུ་གྲགས་པ་ལས་སྐབས་སུ་བབ་པ་འདི་ནི་སློབ་དཔོན་ཆེན་པོ་འཇམ་དཔལ་བཤེས་གཉེན་དང་གུ་རུ་པདྨའི་བཀའ་སྲོལ་ཟུང་འབྲེལ་མན་ངག་གི་བཅུད་དུ་དྲིལ་བ་སྟེ། སྤྱིར་རྩོད་དུས་སྙིགས་མར་ལྷ་སྔགས་གཞན་གྱི་ནུས་པ་རྡུགས་པའི་ཚེ་འཇམ་དཔལ་དབྱངས་དང་ལྷ་མོ་འོད་ཟེར་ཅན་གཉིས་འགྲུབ་པར་སངས་རྒྱས་ཀྱིས་འཇམ་དཔལ་རྩ་བའི་རྒྱུད་ལས་བསྔགས་པས་མཚོན་བྱིན་རླབས་ཁྱད་པར་དང་ལྡན་པའི་དབང་བསྐུར་སྦྱིན་པ་ཉིད་སྐབས་སུ་བབ་པས་དཀྱིལ་འཁོར་གཉན་པོར་ཕྱི་ནང་གི་འཇུག་པའི་ཆོས་རྣམས་ཞུ་བའི་དོན་དུ་མཎྜལ་ཕུལ། བསགས་སྦྱངས་ཀྱིས་རྒྱུད་སྦྱང་བ་ནས་བརྩམས་ཡེ་ཤེས་དབབ་པའི་བར་དཔལ་ཆེན་ལྟར་ལ་སློབ་མ་ལྷར་བསྐྱེད་ཀྱི་ཁྱད་པར། སྔར་གྱི་དབང་སྟེགས་ལ་འཁོད་པ་ཁྱེད་རང་རྣམས་འཇམ་དཔལ་ཕྱག་རྒྱ་ཟིལ་གནོན་སྐུ་མདོག་མཐིང་ནག་ཞལ་གསུམ་གཡས་དཀར་གཡོན་དམར་བ། དབུས་མཐིང༌། ཕྱག་དྲུག་གཡས་གསུམ་རྡོ་རྗེ་འཁོར་ལོ་རལ་གྲི། གཡོན་གསུམ་བེ་ཅོན་གཏུན་ཤིང་སྡིགས་མཛུབ་མཛད་པ། ཤིན་ཏུ་ཁྲོས་པའི་ཉམས་ཅན་དཔལ་དང་དུར་ཁྲོད་ཀྱི་ཆས་ཀྱིས་བརྒྱན་པ། ཞབས་བཞི་དོར་སྟབས་ཀྱིས་ཀླུ་འབུམ། གཉན་ཁྲི། ས་བདག་སྟོང་དང་ཕྱོགས་སྐྱོང་མ་ཧེ་ཉི་ཟླའི་སྟེང་ན་འགྱིང་བ། སྐུ་ལས་ཡེ་ཤེས་ཀྱི་མེ་དཔུང་འཕྲོ་བ། ཡུམ་བཻ་ཏ་ལི་མཐིང་ནག་སྙིང་དང་གྲི་ཐོད་འཛིན་པ་གཅེར་བུ་ཕྱག་རྒྱ་ལྔ་དང་གཟིག་ཤམ་ཐོད་སྐམ་གྱི་ཕྲེང་བ་ཅན་དང་རོལ་པའི་གནས་གསུམ་དུ་ཕྱག་མཚན་གསུམ་སོགས་དཀྱུས་ལྟར་དང༌། འབེབས་སྔགས་གཤིན་རྗེའི་སྔགས་སྦྱར་དགོས། དཀྱིལ་འཁོར་མཐོང་བ་བསྟན་པའི་སྐབས། ཡོངས་སུ་རྫོགས་པ། གྲུ་གསུམ་མཐིང་ནག་ཟླ་གམ་དམར་པོ་གསུམ་ལྡན་གྱི་ལྟེ་བར་ཨེ་ཀློང་ཆོས་དབྱིངས་རྡོ་རྗེ་བཙུན་མོའི་མཁའ་ལ་ཀླུ་འབུམ་གཉན་ཁྲི་ས་བདག་སྟོང་སྡེ་བརྒྱད་ཕྱོགས་སྐྱོང་རུ་ཏྲ་ཕོ་མོ་མ་ཧེ་གླང་རྒོད་བརྒྱད་དང་པད་ཉིའི་སྟེང་དུ་རྒྱལ་ཀུན་སྤྱི་གཟུགས་སྐུ་རྡོ་རྗེ་འཇམ་དཔལ་དབྱངས་དྲག་པོར་ཁྲོས་པ་ཟིལ་གནོན་ཕྱག་རྒྱ་ཆེན་པོ་གཡས་དཀར་པོས་ཀླུ་འབུམ་མཐོང་བའི་དུག་ཅན་སྦྲུལ་འབུམ། གཡོན་དམར་པོས་གཉན་རྭ་ཡི་དུག་ཅན་ལྕང་མོ་ཁྲི། དབུས་མཐིང་ནག་གིས་ས་བདག་མཆེ་བའི་དུག་ཅན་སྦལ་པ་མགོ་སྟོང་རྣམས་ཟ་བ། གཡས་གསུམ་རྡོ་རྗེ་འཁོར་ལོ་རལ་གྲི། གཡོན་གསུམ་བེ་ཅོན་གཏུན་ཤིང་སྡིགས་མཛུབ། ཞབས་བརྐྱང་བསྐུམ་དུ་བགྲད་པས་དྲེགས་པ་ཅན་ཐམས་ཅད་མནན་པ། དཔལ་དང་དུར་ཁྲོད་ཀྱི་ཆས་ཀྱིས་བརྒྱན་ཞིང༌། ཁྲོ་གཏུམ་གར་དགུའི་ཟི་བྱིན་འབར་བ། ཡུམ་བཻ་ཏ་ལི་སྙིང་དང་གྲི་ཐོད་འཛིན་པར་གཉིས་མེད་དུ་སྦྱོར་བ། གཙོ་བོའི་ཐུགས་ཀར་ཡ་མ་རཱ་ཛ་འཁོར་ལོ་དང་ཙིཏྟ། དེའི་ཐུགས་ཀར་དྲེགས་པ་ཕྱག་ན་རྡོ་རྗེ་རྡོ་རྗེ་དང་སྙིང་ཕྲེང༌། དེའི་ཐུགས་ཀར་རུ་སྦལ་རྔམ་པ་མི་ཟན། སྤྱི་བོར་ཤེལ་གྱི་བྱ་ཁྱུང༌། ཕྲག་གོང་དུ་ཁྱུང་མོ་སྔོ་ནག་གཉིས། དཔུང་པར་སྟག་མོ་མི་ཟན། ནུ་མར་སེང་གེ །སྟ་ཟུར་དུ་དུག་སྦྲུལ་དང་ལྕེ་སྤྱང་སྟེ་རྒྱན་གྱི་ལྷ་བརྒྱད་ཁྲོ་བཅུའི་གོ་ཆ་དང་བཅས་པ། ལྷག་པའི་བདེ་ཆེན་ཡེ་ཤེས་བཞིའི་ཐོད་མཁར་གྱི་གློ་འབུར་བཞི་ལ་ཤར་དུ་ཡ་མ་རཱ་ཛ། ལྷོར་ཡ་བ་ཏི། ནུབ་ཏུ་ཨ་བ་གླང་མགོ །བྱང་དུ་རལ་པ་ཚལ་དགུ་སྟེ་ཡེ་ཤེས་ལྔའི་རང་བཞིན་རྩ་བའི་ལྷ་ལྔ། ཚད་མེད་བཞིའི་བདག་ཉིད་གྲུ་ཆད་བཞི་རུ་ཕྱལ་པ། ཏིལ་པ། འཕྱར་ཀ་གྭ་དམར། མ་རུ་རྩེ་ལྔ་ལ་གཤེད་ཆེན་བཅུ་གཉིས་ཀྱིས་བསྐོར་བ། དེའི་ཕྱིར་སྐྱེ་མཆེད་བཅུ་གཉིས་དག་པའི་ལྕགས་མཁར་དུ་ཟླ་གཤེད་འཆི་བདག་བཅུ་གཉིས། འོབས་ཆེན་བཅུ་དྲུག་ཏུ་ཞག་གཤེད་སོ་གཉིས། ཕྲིན་ལས་བཞིའི་ཁམས་ལ་ཕོ་གཤེད་མོ་གཤེད་བདུན་དང་མོན་པ་ཀིང་ཀང་མ་མོའི་འཁོར་ཚོགས། བདག་ཏུ་ལྟ་བ་དག་པའི་ལྷ་མགོན་བདུད་དང་གནོད་སྦྱིན་གྱི་སྒོ་བ་བཞི་སྟེ་གཙོ་འཁོར་དུ་སྣང་བ་དེ་དག་ཀྱང་རྣམ་འགྱུར་སྲིད་ཞི་དབྱིངས་སུ་ཟ་བའི་དུས་ཀྱི་དགྲ་ཆེན་པོ་ཁམས་གསུམ་སྐྱེ་འཆི་སྲོག་གི་བདག་པོ་འཇིགས་བྱེད་གཤིན་རྗེ་རོལ་པའི་ཆོ་འཕྲུལ་དུ་རྔམས་པར་སྟོན་ཀྱང་དོན་ལ་འཇམ་དཔལ་ཡེ་ཤེས་སེམས་དཔའ་གཅིག་གི་ཡེ་ཤེས་སྒྱུ་མའི་རྣམ་རོལ་གཞི་ལམ་འབྲས་བུའི་ཡོན་ཏན་མ་ལུས་པ་ལྷུན་གྱིས་རྫོགས་པའི་བདག་ཉིད་ཆེན་པོ་གང༌། ཕྱི་རས་བྲིས་ཀྱི་དཀྱིལ་འཁོར་འདི་ནི་དཔེས་མཚོན་པ་ཡིན་གྱི་དོན་རང་གི་ཕུང་ཁམས་སྐྱེ་མཆེད་ཐམས་ཅད་ལྷའི་ངོ་བོར་ལྷུན་གྲུབ་ཏུ་གནས་པ་ཡིན་ཏེ། ཧོ༔ ཕུང་པོ་ཁམས་དང་སྐྱེ་མཆེད་སོགས། དབང་ཆོག་དཀྱུས་ལ་འཇུག་པས་རིགས་དབང་ལྔ་བསྐུར་ལ། མཐའ་རྟེན་རྣམ་རྒྱལ་བུམ་པ་ལ། ཧོ༔ ཡེ་ཤེས་ལྷུན་གྲུབ་བུམ་པ་ཡི༔ བརྟུལ་ཞུགས་དག་པའི་དབང་བསྐུར་བས༔ འཁོར་བ་རྣམ་དག་ཆོས་སྐུར་གསལ༔ རང་བྱུང་ཡེ་ཤེས་དབང་ཐོབ་ཤོག༔ ཨེ་ཀ་ཡ་མ་གུ་ཧྱ་བྷ་ག་བོ་དྷི་ཙིཏྟ་ཧོ༔ དེ་ལྟར་དབང་བསྐུར་བའི་ཆུ་རྒྱུན་སོགས། བུམ་དབང་རྫོགས་པ་དང༌། དེ་ནས་ནང་ནུས་པ་འཇུག་པའི་དབང་རྣམས་རྗེས་འབྲེལ་དུ་སྦྱིན་པ་ལ་གཏེར་གཞུང་ལས། ཁམས་དྲུག་ལྡན་པ་ལུས་ཀྱི་རྟེན༔ རྡོ་རྗེ་བཞི་ཡི་གོ་འཕང་ལ༔ སྦྱོར་བ་རྡོ་རྗེ་ཏནྟྲ་ལས༔ རྒྱུ་འབྲས་དག་གྲོལ་ལམ་གྱིས་མིན༔ ཞེས་པ་ལྟར་ཁྱེད་རང་རྣམས་ཀྱི་ཕུང་ཁམས་སྐྱེ་མཆེད་ཐམས་ཅད་འཇམ་དཔལ་ཡེ་ཤེས་སྐུ་ཅན་གྱི་གདན་གསུམ་ཕྱག་རྒྱའི་རོལ་པར་དག་ཅིང་སད་པར་བྱས་པའི་ནུས་པ་བརྟན་ཕྱིར་གདུག་པ་ཟིལ་གནོན་རབ་འཇིགས་དུར་ཁྲོད་དྲག་པོའི་རྒྱན་ཆས་རྣམས་གནས་སོ་སོར་བགོས་ཏེ་མངའ་གསོལ་བས་འཁོར་འདས་ཟིལ་གྱིས་གནོན་པའི་སྟོབས་དང་གཟི་བརྗིད་ཀྱི་རྩལ་ཆེན་རྫོགས་པར་མོས་ཤིག །དུར་ཁྲོད་ཆས་བརྒྱད་གཏད་ལ། ཧོ༔ གླང་ཆེན་སྟག་ཤམ་ཞིང་ལྤགས་སྦྲུལ༔ ཐོད་པ་སྙིང་ཕྲེང་ཀེང་རུས་རྒྱན༔ མེ་རི་དུར་ཁྲོད་དབང་བསྐུར་བས༔ དྲེགས་པའི་སྟོབས་དང་ལྡན་པར་ཤོག༔ ཨེ་ཀ་ཡ་མ་ཧསྟི་མ་ཧཱ་ནཱ་ཀ་པཱ་ལི་ཙིཏྟ་ཛྭ་ལ་ནི་རི་ཧོ༔ ཐུགས་ཀྱི་ནུས་པ་སྟེར་བ་འབར་བའི་ཕྱག་མཚན་རྣམས་སོ་སོར་བྱིན་པས་འཇིགས་པའི་བདུད་བཞི་དང་གསང་བའི་དགྲ་གསུམ་རྩད་ནས་གཅོད་པའི་མཐུ་སྟོབས་ནུས་པ་ཐོགས་མེད་དུ་ཐོབ་པར་མོས་ཤིག །ཕྱག་མཚན་དྲུག་གཏད་དེ། ཧོ༔ རྡོ་རྗེ་བེ་ཅོན་དུག་ལྔ་ཟིལ་གྱིས་གནོན༔ འཁོར་ལོ་གཏུན་ཤིང་གདུག་པ་གནས་སུ་འཇོམས༔ རལ་གྲི་སྡིགས་མཛུབ་དུག་གསུམ་སྐུ་གསུམ་རྫོགས༔ རིག་པ་སྟོབས་ཀྱི་སྒོ་གསུམ་དབང་ཐོབ་ཤོག༔ ཨེ་ཀ་ཡ་མ་བྷི་ཧ་ཧུ་སྟིབ་པ་ར་ཧོ༔ དངོས་གྲུབ་མྱུར་དུ་ཐོབ་བྱེད་དཔའ་བོའི་རྫས་ཀྱི་དབང་བཞི་སྦྱིན་པ་ལ། རྒྱུད་དྲུག་དབྱིངས་སུ་སྒྲོལ་བ་དམར་ཆེན་རཀྟའི་དབང་བསྐུར་བས་ཁམས་གསུམ་ཐུགས་རྗེས་སྒྲོལ་བའི་མཐུ་ཐོབ་པར་མོས་ཤིག །རཀྟ་ལག་གཡོན་དུ་གཏད་ལ། ཧོ༔ རྡོ་རྗེ་པདྨ་མཉམ་སྦྱོར་ནས༔ པདྨ་རཀྟ་བྱང་ཆུབ་སེམས༔ བམ་ཆེན་དམེ་བའི་དོན་དང་སྦྱར༔ བརྟུལ་ཞུགས་རོལ་པའི་དབང་བསྐུར་བས༔ མི་ཟད་རྒྱན་གྱི་དབང་ཐོབ་ཤོག༔ ཨེ་ཀ་ཡ་མ་གུ་ཧྱེ་རཀྟ་བོ་དྷི་ཙིཏྟ་ཧོ༔ ཅུང་ཟད་མྱང་དུ་གཞུག བམ་ཆེན་ཙིཏྟ་གྲུ་གསུམ་གྱི་གདན་དུ་འཇམ་དཔལ་ཕྱག་རྒྱ་ཟིལ་གནོན་སེམས་བྱུང་དག་པ་རྩ་བའི་ལྷ་དྲུག་རྒྱན་ལྷ་བརྒྱད། རྩ་བ་ཟླུམ་པོའི་ཚུལ་གྱི་ཟླ་གམ་ལ་སྤྲུལ་པ་རྣམ་གསུམ། མདུན་ཡེ་ཤེས་ཀྱི་རྩ་ལ་ཡ་མ་རཱ་ཛ། གཡས་ཆོས་ཉིད་ཀྱི་རྩ་ལ་ཡ་བ་ཏི། རྒྱབ་ཡོན་ཏན་གྱི་རྩ་ལ་ཨ་བ་གླང་མགོ །གཡོན་རང་རྒྱུད་ཀྱི་རྩ་ལ་རལ་པ་ཚལ་དགུ། རྣམ་ཤེས་ཚོགས་བརྒྱད་ཡུལ་དུས་དག་པ་མོན་བདུད་ཡབ་ཡུམ། ལྟེ་བར་འཕོ་བ་བཅུ་གཉིས་ཀྱི་རྩ་ལ་ཁམས་བཅུ་གཉིས་དག་པའི་འཆི་བདག་བཅུ་གཉིས། །ལྟོ་བར་ཁྲག་ཁྱམས་འོབས་སྲུང་ཤ་ཟ་ཀིང་ཀང༌། བམ་གྱི་ཕྱི་རྒྱུད་ཕུང་པོ་ལྔ་ཡ་མཱནྟ་ཀ་དང་གཤེད་ཆེན་བཞི། འབྱུང་བ་ཡུམ་ལྔ། རྣམ་ཤེས་མཐར་བྱེད་བརྒྱད། ཡན་ལག་སྒོ་བ་སྟེ་དཀྱིལ་འཁོར་ཡོངས་རྫོགས་གསལ་བར་བྱིན་གྱིས་བརླབས་པས་ཡོན་ཏན་གྱི་དབང་དང་དངོས་གྲུབ་མ་ལུས་པ་ཐོབ་པར་མོས་ཤིག །བམ་ཆེན་སྤྱི་བོར་བཞག་ལ། དཔའ་བརྟུལ་སྔགས་ཀྱིས་གཟི་བྱིན་བསྐྱེད༔ མ་ཕྱིར་འདི་བཞིན་འདུག་ཀྱང་འདི་དབང་ཚིག་ཡིན་འདྲ། མཆན། ཧོ༔ བམ་ཆེན་རོ་ལ་མཉམ་པར་རོལ༔ རྡོ་རྗེ་བརྗིད་པའི་དབང་ཐོབ་ནས༔ བདེ་ཆེན་མཉམ་ཉིད་ཐོབ་པར་ཤོག༔ ཨེ་ཀ་ཡ་མ་ཨ་ཏི་པ་ཏི་སིདྡྷི་ཧོ༔ བམ་གྱི་ཕྱི་རྒྱུད་ཀྱི་ལྷ་ཐམས་ཅད་ཙིཏྟའི་དཀྱིལ་འཁོར་ལ་འདུས། དེ་ཡང་དྭངས་མ་ལྔ་ཡི་ཐིག་ལེར་འདུས། དེ་སློབ་མའི་སྙིང་གར་ཐིམ་པར་མོས། བམ་ཡེ་ཤེས་ལྔའི་ངོ་བོ་བྱིན་རླབས་དང་དངོས་གྲུབ་དཔག་ཏུ་མེད་པར་བསམ་ལ། གདོང༌། ཁ། མིག མགོ་བོ། ལུས་ཀྱི་ཆ་ཤས་ཏེ་དམེ་བ་ལྔ་བསལ་བ་གསང་རྫས་དང་བསྲེ། བམ་སིལ་བུར་བསིལ་ཏེ་ཡུལ་དང་དབང་པོ་རོ་གཅིག་པས་ཚོགས་དྲུག་གི་དངོས་པོ་ཐམས་ཅད་ལ་གཙང་དམེ་མེད་པ་དེ་ཁོ་ན་ཉིད་མཉམ་པའི་རྣལ་འབྱོར་གྱིས་རོལ་པས་བདག་མེད་པའི་དོན་ཁོང་དུ་ཆུད་དེ་ཕྲིན་ལས་བཞི་དང་གྲུབ་པ་བརྒྱད་ཕྱག་རྒྱ་ཆེན་པོ་མཆོག་གི་དངོས་གྲུབ་མངོན་དུ་གྱུར་ནས་འགྲོ་ཀུན་ཕན་བདེའི་དཔལ་ལ་སྦྱོར་ནུས་པར་གྱུར་ཅིག །སྣོད་བཅུད་བདེ་ཆེན་དུ་དག་པར་སྦྱངས་པའི་བདུད་རྩི་ར་ས་ཡཱ་ནས་དབང་བསྐུར་བས་བདེ་ཆེན་འཕོ་འགྱུར་མེད་པའི་ཡེ་ཤེས་རྟག་པ་དམ་པའི་བཅུད་ལ་ལོངས་སྤྱོད་པར་མོས་ཤིག ཧཱུྃ༔ འཆི་མེད་རང་བྱུང་ར་ས་ཡན༔ བཀྲ་ཤིས་མཚན་ལྡན་ལྷག་པའི་རྫས༔ འཕེལ་འགྲིབ་མེད་པའི་དབང་བསྐུར་བས༔ རིགས་ལྔ་ཡེ་ཤེས་ལྔ་ཐོབ་ཤོག༔ ཨེ་ཀ་ཡ་མ་སརྦ་པཉྩ་ཨ་མྲྀ་ཏ་ཛྙཱ་ན་བུདྡྷ་ཧོ༔ ཚེ་འབྲང་རྒྱ་གྲམ་གྱི་ལྟེ་བར་བུམ་པ་གཞལ་ཡས་ཁང་དུ་ཚེ་དཔག་མེད་ཡབ་ཡུམ་བཞིས་བསྐོར་བའི་དབང་བསྐུར་བས་རྡོ་རྗེ་ཚེ་ཡི་དབང་ཐོབ་པར་མོས་ཤིག །ཚེ་འབྲང་སྤྱི་བོར་བཞག་སྟེ། ཧོཿ བཀྲ་ཤིས་དངོས་གྲུབ་གྭའུ་རུ༔ མི་འགྱུར་བརྟན་པའི་ཚེ་བསྐྱིལ་ནས༔ རང་རྟགས་ཚེ་ཡི་དབང་བསྐུར་བས༔ འཆི་མེད་བརྟན་པའི་དབང་ཐོབ་ཤོག༔ ཨེ་ཀ་ཡ་མ་ཨཱ་ཡུརྫྙཱ་ན་སིདྡྷི་ཧོ༔ དཔལ་གྱི་གཏོར་མ་འདི་ཉིད་དཀྱིལ་འཁོར་གྱི་ལྷ་ཚོགས་སུ་གསལ་བ་དེ་དག་གི་སྐུ་ཡི་འོད་ཟེར་གྱིས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་རབ་འབྱམས་ཐོབ་པར་མོས་ཤིག །སྒྲུབ་གཏོར་སྤྱི་བོར་བཀོད་ལ། ཧོ༔ སྣོད་ཀྱི་འཇིག་རྟེན་གཏོར་གཞོང་དུ༔ བཅུད་ཀྱི་སེམས་ཅན་གཏོར་མར་གསལ༔ འབྱུང་བ་རྣམ་ལྔ་གཏོར་མའི་རྒྱུ༔ ལྷུན་གྲུབ་ཀུན་འབྱུང་གཏོར་མའི་རྒྱན༔ འཛིན་ཆགས་མེད་པའི་སྟོབས་ཀྱིས་རོལ༔ ཨེ་ཀ་ཡ་མ་མ་ཧཱ་བ་ལིཾ་ཏ་པཱུ་ཛ་ཧོ༔ དེས་རྡུལ་ཚོན་སྤྲུལ་པའི་དཀྱིལ་འཁོར་དུ་སོགས་བུམ་དབང་གི་དག་པ་བརྗོད་ནས། ཟབ་དབང་གསུམ་ཡོངས་རྫོགས་མཐར་དམ་ཚིག་ཁས་བླང་བ་དཔལ་ཆེན་སྐབས་ལྟར་ལ། ནུས་པ་དེ་ལྡན་དབང་སྲོག་རྒྱུད་ལ་འཛིན་པ་དམ་ཚིག་ལ་རག་ལས་པས་དམ་ཚིག་བརྟན་པའི་ཐོག་མར་མན་ངག་སྣོད་མེད་ལ་མི་སྤེལ་ཞིང་སློབ་དཔོན་གྱི་བཀའ་ལས་མི་འགལ་བར་གདམས་པ་འདི་ལ་གསན་པས་ཁྱབ་པར་གདའ། ཧོ༔ སྣོད་མེད་བརྟུལ་ཞུགས་ཞན་པ་ལ༔ སྤེལ་ཞིང་བསྒྲགས་ན་རྡོ་རྗེ་ཁྲོ་བོ་དང༔ གཏུམ་པོ་གནོད་སྦྱིན་མཁའ་འགྲོ་དབང་ཆེན་གྱིས༔ ལུས་འདྲལ་མགོ་གཤགས་ཙིཏྟ་ཁྲག་ཏུ་འཐུང༔ ཁྱོད་ཀྱི་རྡོ་རྗེ་འཆང་ཆེན་ང་ཡིན་པས༔ བཀའ་ཡི་ཟུར་ཡང་བཅག་པར་བྱ་བ་མིན༔ བསྒོ་བ་བྱོས་ལ་དམ་ཚིག་སྲོག་ལྟར་སྲུངས༔ གལ་ཏེ་འདས་ན་རྡོ་རྗེ་དམྱལ་བར་ལྟུང༔ ཨེ་ཀ་ཡ་མ་དུ་ན་རཀྟཾ་ཧོ༔ དམ་ཆུ་བདུད་རྩི་སྦྱིན་ལ། འདི་ནི་རྡོ་རྗེ་དམྱལ་བའི་ཆུ༔ ཚུལ་འདི་བསྲུངས་ན་དངོས་གྲུབ་ཐོབ༔ ཉམས་ན་ཙིཏྟ་གཤགས་ཏེ་འཕོ༔ རྡོ་རྗེའི་ཆུ་འདི་ཁྱོད་ཀྱིས་ལོངས༔ བཛྲོད་ཀ་ཨ་ཨི་དཾ་ཧོ༔ དེ་སྐད་ཇི་ལྟར་བསྒོས་པའི་དོན་བཞིན་ཐུན་མོང་དང་ཐུན་མོང་མ་ཡིན་པ་སོགས་དཀྱུས་ལྟར་དབང་དང་ཆོ་གའི་རྗེས་རིམ་མཐའ་རྒྱས་སུ་བྱས་པས་གྲུབ་པའོ། །མཁྱེན་གཉིས་ཡེ་ཤེས་གཏེར་མཛོད་ཆེ། །བརྩེ་ཆེན་བདུད་རྩིས་གྲོལ་བའི་བཅུད། །བམ་ཆེན་གསང་བའི་དབང་བསྐུར་གྱི། །འོད་ཟེར་མཛེས་འཕྲོ་འདི་རྨད་བྱུང༌། །ཐུགས་སྒྲུབ་དཔལ་ཆེན་འདུས་པའི་སྒོས་བཀའ་ཁྲག་འཐུང་རིགས་བཞི་ལས། སྐུ་རྡོ་རྗེ་འཇམ་དཔལ་གཤིན་རྗེ་འཆི་བདག་ཟིལ་གནོན་གྱི་བམ་ཆེན་གསང་བའི་དབང་བསྐུར་བའི་ལེའུ་ཚན་དྲུག་པ་སྟེ་འཇམ་དཔལ་དགའ་བའི་བཤེས་གཉེན་གྱིས་སྦྱར་བའོ། ༈ ཐུན་མཚམས་སྤྲིན་གྱི་སྟངས་འཛིན་བདེ་ཆེན་གཟིས། །རྒྱལ་ཀུན་གསུང་གི་དཔྱིད་དུ་སྒེག་པའི་དཔལ། །དབང་ཆེན་རྟ་ཡི་རྒྱལ་པོའི་དཀྱིལ་འཁོར་གྱི། །བདག་ཉིད་པདྨ་གར་གྱི་དབང་ཕྱུག་འདུད། །གསུང་པདྨའི་རིགས་ཀྱི་ཧེ་རུ་ཀ་རྟ་མགྲིན་ཁམས་གསུམ་རོལ་པའི་དབང་ལ། གཞུང་མཐུན་དཀྱིལ་འཁོར་དབུས་སུ་རྣམ་བུམ་མགུལ་ཆིངས་དམར་པོ་སོགས་རིགས་དབང་ལྔ། རྡོ་རྗེ་སློབ་དཔོན་དབང་རྫས་རྡོར་དྲིལ། རྗེས་གནང་ཆས། རྟ་མགྲིན་གཙོ་འཁོར་ཡོངས་རྫོགས་ཀྱི་སྐུ་ཙཀ །རྟ་མགོ་ལྔའི་ཙཀླི། རྡོ་རྗེ་རིན་ཆེན་གྱི་ཁྱུང་གཤོག །དུར་ཁྲོད་ཆས་བརྒྱད། དཔལ་གྱི་ཆས་བརྒྱད། ཕྱག་མཚན་ཕྱོགས་སྡོམ། ཡེ་ཤེས་སེམས་དཔའ་པདྨ་གཟི་ལྡན་གྱི་སྐུ། རིགས་ལྔའི་ས་བོན་ཨོཾ་ཨཱཿཧཱུྃ་སྭཱ་ཧཱ། སྒྲོལ་དབང་ཆས་ལྕགས་ཧོམ་དུ་ལིངྒ། གདབ་ཕུར། གཡབ་དར། རིག་ཙཀ ཤེལ་རྡོ། མེ་ལོང་སོགས་སྔ་མ་ལྟར་འདུ་བྱས་ལ། དབང་སྒྲུབ་བདག་མདུན་གཉིས་སུ་དབྱེ་ཚུལ་སོགས་གཤིན་རྗེ་ལྟར་ལ། བཟླས་དམིགས། ཐུགས་ཀར་རྒྱལ་བ་ཀུན་གྱི་ཡུམ༔ པདྨ་གཟི་ལྡན་ཞི་མ་ཁྲོ༔ ཕྱག་མཚན་མེད་དེ་འཛིན་འཛིན་འདྲའི༔ སྙིང་གར་རིན་ཆེན་ཟུར་བརྒྱད་སྟེང༔ ཉི་མའི་གདན་ལ་ཧྲཱིཿཡིག་མཐར༔ རྣམ་པའི་གཟུགས་བརྙན་ཡི་གེས་བསྐོར༔ ངོ་བོ་ལྷ་ཡི་སྐུ་རུ་བཤད༔ ཡབ་ཡུམ་ཞལ་དང་མཁའ་གསང་བརྒྱུད༔ བདེ་བ་ཆེན་པོའི་འོད་ཟེར་གྱིས༔ རྒྱལ་བ་མཆོད་ཅིང་ཐུགས་དམ་བསྐུལ༔ མ་མོ་མཁའ་འགྲོ་ལས་ལ་འགྱེད༔ དངོས་གྲུབ་གྲུབ་པས་བདག་བྱིན་བརླབས༔ ཡང་འཕྲོས་བརྟན་གཡོ་ཐ་མལ་པའི༔ སྣང་ཞེན་དག་པའི་སྣོད་དང་བཅུད༔ ལྷ་དང་གཞལ་ཡས་རོལ་པར་ཤར༔ ཨོཾ་ཧུ་ལུ་ཧུ་ལུ་ཕཊ༔ ཨེ་ཨ་རལླི་ཧཱུྃ་ཧྲཱིཿཛཿ ཞེས་བཟླ་ལ་སྤྲོ་བསྡུ་སོགས་གཤིན་རྗེ་ལྟར་བྱ་བར་གསུངས། བུམ་སྒྲུབ་ནས་བདག་འཇུག་དང་མེ་ཏོག་དོར་བ་གང་རུང་གིས་གནང་བ་ཞུས་ཏེ། སློབ་མར་ཁྲུས་བྱ། བགེགས་བསྐྲད། སྲུང་འཁོར་སེམས་བསྐྱེད་གསལ་བཏབ་ལ། དེ་ལ་འདིར་མཁའ་ཀློང་རྣམ་པར་དག་པ་འོག་མིན་ཆོས་དབྱིངས་འོད་ཀྱིས་ཁེངས་པར་གདོད་མའི་མགོན་པོ་འོད་སྣང་མཐའ་ཡས་རྟག་ཏུ་འོད་གསལ་གྱི་དགོངས་པར་བཞུགས་པ་ལས། རང་བྱུང་བརྩེ་བའི་ཐུགས་རྗེ་གར་གྱི་དབང་ཕྱུག་བདེ་ཆེན་དགྱེས་པའི་མཚན་དཔེར་བཞེངས་ཏེ་སྐུ་དང་ཡེ་ཤེས་འདུ་འབྲལ་མེད་པ་ཁ་སྦྱོར་ཡན་ལག་བདུན་རྫོགས་འཇིག་རྟེན་དབང་ཕྱུག་པདྨའི་སྣང་བ་རབ་ཏུ་རྒྱས་པ་གང༌། གདུལ་བྱ་མི་སྲུན་པ་རྣམས་འདུལ་བའི་གཉེན་པོར་པདྨ་ཧེ་རུ་ཀ་རྟ་མཆོག་རོལ་པའི་རྣམ་པར་སྣང་བས་རྔོག་མ་ལེ་བརྒན་གྱི་རྒྱུད། དབང་ཆེན་འདུས་པའི་རྒྱུད་སོགས་ཤིན་ཏུ་མང་པོ་དག་གསུངས་པ་རྡོ་རྗེ་ཆོས་ཀྱིས་བསྡུས་ཏེ་གླེགས་བམ་དུ་བྱས་ནས་ཟངས་ཀྱི་སྒྲོམ་བུར་རྒྱས་བཏབ་ནས་སྨུག་ནག་དབང་གི་མཁའ་འགྲོས་མཆོད་རྟེན་བདེ་བྱེད་བརྩེགས་པར་སྦས་པ། བཀའ་བབ་གྲུབ་པའི་རིག་འཛིན་མཆོག་བརྒྱད་ཀྱི་ཡ་གྱལ་སློབ་དཔོན་སངས་རྒྱས་གཉིས་པ་འཕགས་པ་ཀླུ་སྒྲུབ་ལ་གཏད་དེ་འཛམ་བུའི་གླིང་དུ་སྣང་བར་མཛད་པ་དང༌། གཞན་ཡང་གསུང་རྡོ་རྗེ་རིག་འཛིན་གྲུབ་པའི་དབང་ཕྱུག་གི་ཚུལ་བསྟན་པ་སློབ་དཔོན་ཆེན་པོ་པདྨ་འབྱུང་གནས་ལ་དབང་ཆེན་འདུས་པ་སྐུའི་རྒྱུད། རྟ་མཆོག་རོལ་པ་གསུང་གི་རྒྱུད། རྡོ་རྗེ་པད་དྲ་ཐུགས་ཀྱི་རྒྱུད་སོགས་སྐུ་གསུང་ཐུགས་ཡོན་ཏན་ཕྲིན་ལས། ཕྱི་མ། ཕྱི་མའི་ཕྱི་མ། མན་ངག་གི་རྒྱུད་ལ་སོག་པ་ཨོ་རྒྱན་ཧེ་རུ་ཀའི་འདུ་ཁང་དུ་རྡོ་རྗེ་རྣལ་འབྱོར་མས་གཏད་པ་དང༌། གྲུབ་ཆེན་མི་ཏྲ་ཛོ་ཀི་ལ་སོགས་པ་ནས་བརྒྱུད་པའི་ཐུགས་རྗེ་ཆེན་པོ་ཞི་ཁྲོའི་ལམ་སྐོར་གསར་རྙིང་ཀུན་ལ་རྒྱ་ཆེར་བཞུགས་པ་ལས། སྐབས་སུ་བབ་པ་འདི་ནི་དུས་གསུམ་རྒྱལ་བའི་ཞིང་དུ་མཚན་ཙམ་འབྱོན་པར་དཀའ་བ། སངས་རྒྱས་ལས་ཀྱང་དཀོན་པ་རྒྱལ་བ་རྡོ་རྗེ་འཆང་ཉིད་ཀྱིས་བསྔགས་པའི་གསང་སྔགས་བླ་མེད་ནང་རྒྱུད་ཡོ་ག་གསུམ་གྱི་དབང་རྒྱུད་མན་ངག་གི་བཀའ་སྲོལ་ལ་འགྲན་ཟླ་དང་བྲལ་བ་གསང་སྔགས་རྡོ་རྗེ་ཐེག་པའི་ཤིང་རྟ་ཆེན་པོ་སྔ་འགྱུར་རྙིང་མའི་ཕྱོགས་སུ་བཀའ་གཏེར་གྱི་རིང་ལུགས་གཉིས་ལས་ཕྱི་མ་སྟེ། དེ་ལའང་ཟབ་གཏེར་སྔ་ཕྱིའི་སྲོལ་འབྱེད་རིག་འཛིན་གྲུབ་པའི་སྐྱེས་བུའི་ཆོས་སྐལ་ཟབ་རྒྱས་དུ་མ་ཞིག་བཞུགས་པ་ལས་སྐབས་སུ་བབ་པ་འདི་ནི་གཏེར་ཆེན་ཆོས་རྗེ་གླིང་པའི་གཏེར་ལུང་ལས། དབུས་གཡོར་གཞུང་དུ་བྱང་སེམས་པདྨའི་མིང༔ བཀའ་རྙིང་བསྟན་སྐྱོང་ཐབས་མཁས་འགྲོ་བ་འདུལ༔ ཞེས་བསྔགས་པ་ལྟར་གནད་བྱང་ཐུགས་ཀྱི་སྒྲོམ་བུ་ལས། རང་བྱུང་རྡོ་རྗེ་པདྨ་དབང༔ གསང་མཚན་གར་དབང་འཇིགས་མེད་གླིང༔ རྟོགས་གྲོལ་དུས་མཉམ་ཐུགས་གཏེར་བདག༔ འཕགས་པས་རྗེས་སུ་བཟུང་བའི་རྟགས༔ ལག་མཐིལ་གཡས་ན་པདྨའི་སྤྱན༔ དབང་ཆེན་གསུང་གི་རིག་འཛིན་ཕྱིར༔ མཐེ་བོང་ཐུགས་སྲོག་ཧྱཱརྵྞིས་མཚན༔ ཞེས་གསུངས་པ་ལྟར་དགོངས་པ་ཕྱོགས་ཡན་དུ་གྲོལ་ནས་སྣང་སྲིད་དཔེ་ཆར་ཤར་བའི་རང་འབྲས་བླ་མ་དགོངས་འདུས་ཀྱི་རྣམ་བཤད་མཁྱེན་བརྩེའི་མེ་ལོང་རྩོམ་པའི་སྒང་ཡོལ་ཐོ་རེངས་ཀྱི་ཆར་ཤེས་རིག་སྤྲོས་བྲལ་གྱི་ངང་དུ་ལ་ཟློ་བའི་ཚེ་སྨིན་མཚམས་ཀྱི་ནམ་མཁའ་ནས་རྟ་སྐད་མངོན་སུམ་དུ་འཚེར་བ་དང༌། ཨེ་མ། འདི་ཡི་བསྟན་པ་འཛིན་པར་ལུང་བསྟན་པའི། ཁོང་པདྨའི་ལྗགས་ལྡན་མཆེད་དྲུག་ལས། །རྗེ་མ་ཧཱ་གུ་རུས་མིང་གི་དབང༌། །པདྨ་དབང་ཆེན་དུ་བྱིན་གྱིས་བརླབས། །དབྱིངས་ལྷན་ཅིག་སྐྱེས་པའི་ཌཱ་ཀི་མས། །ལྷ་པདྨ་དབང་ཆེན་སྲོག་གི་སྙིང༌། །མངོན་སུམ་དུ་ལག་པའི་རི་མོ་ལ། །རྩོད་པ་མེད་པར་བཞུགས་ཅེས་བཤད། །ཅེས་སོགས་གསུངས་པ་བཞིན་ཐུགས་རྗེ་ཆེན་པོ་ཞི་ཁྲོ་དང༌། ནཱ་གརྫུ་ན་པདྨ་འབྱུང་གནས་རྣམས་ཀྱིས་རྗེས་སུ་བཟུང་ཞིང་མཁའ་ཁྱབ་ཐུགས་རྗེས་སྣང་བས་རྩོད་དུས་གདུལ་དཀའ་འདུལ་བ་ལ་འབྲེལ་ཚད་དོན་ལྡན་ཆེན་པོ་རྒྱལ་བའི་མྱུ་གུ་མཁྱེན་བརྩེའི་ལྷ་ཞེས་འཕགས་མཆོག་སེམས་ཉིད་ངལ་གསོ་དངོས་སུ་བྱོན་པས་ན། ཟབ་གསང་ཕྲིན་ལས་ཀྱི་མུ་ཁྱུད་ཀྱང་ཤར་ནུབ་རྒྱ་མཚོའི་མཐའ་ཚུན་ཆད་ཁྱབ་པའི་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་བཀའ་འདུས་ཆོས་ཀྱི་རྒྱ་མཚོ་དཔལ་ཆེན་འདུས་པའི་སྒོས་བཀའ། གསུང་པདྨའི་རིགས་རྟ་མགྲིན་ཁམས་གསུམ་རོལ་པ་སྟེ་སྤྱིར་དུས་གསུམ་གྱི་རྒྱལ་བ་ཐམས་ཅད་བླ་མ་ཡི་དམ་དབྱེར་མེད་ལ་འདུ། ཡི་དམ་དཀྱིལ་འཁོར་གྱི་ལྷ་ཐམས་ཅད་པདྨ་དབང་ཆེན་ལ་འདུས་པས་དོན་ལ་སློབ་དཔོན་ཆེན་པོ་ཉིད་གསུང་རྡོ་རྗེ་པདྨ་ཧེ་རུ་ཀའི་ཚུལ་དུ་སྒྲུབ་པའི་དབང་བསྐུར་བ་སྐབས་སུ་བབ་པ་སྟེ་དེ་ཉིད་ཞུ་བའི་དོན་དུ་མཎྜལ་ཕུལ། སོགས་ནས་ཡེ་ཤེས་དབབ་པའི་སྐབས། སྔར་གྱི་དབང་སྟེགས་ལ་འཁོད་པ་སྣོད་རྣམ་པར་དག་པ་ཟླ་གམ་དབང་ཆེན་རོལ་པའི་གཞལ་ཡས་ཁང་དུ་པདྨ་ཉི་མ་ཀླུ་སྲིན་ཕོ་མོ་བསྣོལ་བའི་གདན་ལ། བཅུད་རྣམ་པར་དག་པ་ཁྱེད་རང་རྣམས་རེ་རེ་ནས་དབང་ཆེན་རྟ་མཆོག་རོལ་པ་སྐུ་མདོག་དམར་ནག་སྒེག་ཅིང་དཔའ་བ་ལ་འཇིགས་སུ་རུང་བའི་ཞལ་ལྔ་གཡས་སྔོ་གཡོན་སེར་ལྷག་མ་རྣམ་གཉིས་རྩ་ཞལ་དང་མཚུངས་པ། སྤྱི་གཙུག་རལ་པའི་གསེབ་ཏུ་རྟ་ཞལ་ལྔ་འཚེར་བ། ཕྱག་བཅུ་དྲུག་གི་གཡས་བརྒྱད་ཀྱིས་རྡོ་རྗེ། ཁཊྭཱཾ། དྲིལ་བུ། ལྕགས་ཀྱུ། སྦྲུལ་ཞགས། འཁོར་ལོ། རལ་གྲི། རྡོ་རྗེའི་ཕྲེང་བ། གཡོན་བརྒྱད་ཀྱིས་ཐོད་ཁྲག པདྨ། སྙིང༌། དབྱུག་པ། རྒྱ་གྲམ། བེ་ཅོན། མེ་དཔུང༌། ཏྲི་ཤུ་ལ། ཁྱུང་ཁྲ་རྣམས་བསྣམས་པ། དཔལ་གྱི་ཆས་བཅུ་དང་དུར་ཁྲོད་ཀྱི་ཆས་བརྒྱད་ཀྱིས་བརྗིད་པའི་པང་དུ་པདྨ་གཟི་ལྡན་སྔོ་ནག་གཡས་རིན་པོ་ཆེ་དང་གཡོན་རིན་པོ་ཆེའི་ཟ་མ་ཏོག་འཛིན་པས་འཁྱུད་པ། ཞབས་བརྒྱད་བརྐྱང་བསྐུམ་དོར་སྟབས་ཀྱིས་ཀླུ་བརྒྱད་རྒྱལ་བསེན་བརྫིས་པས་བདེ་བ་ཆེན་པོའི་ཡེ་ཤེས་མེ་དཔུང་དམར་ནག་ཏུ་འབར་བའི་ཀློང་ན་འགྱིང་བའི་གནས་གསུམ་དུ་ཕྱག་མཚན་གསུམ་སོགས་དང་འབེབས་སྔགས་ལ་རྟ་སྔགས་སྦྱར། དཀྱིལ་འཁོར་མཐོང་བ་བསྟན་པའི་སྐབས། ཡོངས་སུ་རྫོགས་པའི་ལྟེ་བར་འཁོར་ལོ་རྩིབས་བཅུ་དྲུག །པད་འདབ་སོ་གཉིས་ཀྱིས་བསྐོར་བའི་ལྟེ་བར་དབང་གི་ཕོ་བྲང་ཟླ་གམ་སྒོ་གཅིག་པའི་དབུས་སུ་པདྨ་ཉི་མ་ཀླུ་བསེན་རྒྱལ་བསེན་བསྣོལ་བའི་སྟེང་དུ་དབང་ཆེན་རྟ་མཆོག་རོལ་པ་སྐུ་མདོག་དམར་ནག་དུས་མཐའི་མེ་དཔུང་ལྟར་འབར་བའི་མཐིང་སེར་དམར་བའི་ཞལ་ལྔ། དབུ་གཙུག་ཏུ་རྟ་གདོང་ལྔ་དང་བཅས་པ། ཕྱག་བཅུ་དྲུག་གིས་རྡོ་རྗེ་ཁཊྭཱཾ་དྲིལ་བུ་ལྕགས་ཀྱུ་སྦྲུལ་ཞགས་འཁོར་ལོ་རལ་གྲི་རྡོ་རྗེའི་ཕྲེང་བ། ཐོད་ཁྲག་པདྨ་སྙིང་དབྱུག་པ་རྒྱ་གྲམ་བེ་ཅོན་མེ་དཔུང་ཏྲི་ཤུལ་ཁྱུང་ཁྲ་རྣམས་དང༌། ཞབས་བརྒྱད་དོར་སྟབས་ཀྱིས་འགྱིང་ཞིང་ཡུམ་པདྨ་གཟི་ལྡན་སྔོན་མོ་དང་སྦྱོར་བ། སྐུ་ལ་དཔལ་དང་དུར་ཁྲོད་ཀྱི་ཆས་ཡོངས་སུ་རྫོགས་ཤིང༌། རྡོ་རྗེའི་ཁྱུང་གཤོག་གདེངས་པའི་རྩེ་མོར་ཉི་ཟླ་དང་བྱ་ཁྱུང་གིས་བརྒྱན་པ། འཁོར་ལོའི་རྩིབས་བཅུ་དྲུག་ལ་གོ་ལ་མ་དྲུག །གསང་བའི་ཡུམ་བཞི། ཁམས་རྒྱ་མོ་དྲུག་དང༌། པད་འདབ་སོ་གཉིས་ལ་མཁའ་འགྲོ་སོ་གཉིས་ཀྱི་སྤྲུལ་པ་ལོང་བ་རྒྱབ་འབྲེལ་སོ་གཉིས། གྲུ་ཆད་ཕྱི་ནང་གཉིས་ལ་དཔལ་གྱི་ཕོ་ཉ་ཁྱི་བརྒྱད་སྤྱང་བརྒྱད། བར་ཁྱམས་སུ་ཕོ་ཉ་སུམ་བརྒྱ་དྲུག་ཅུ། སྒོ་བཞིར་མཁའ་འགྲོ་བཞི་དང་བཅས་པ་བདེ་ཆེན་སྒྱུ་མའི་ཆོ་འཕྲུལ་མ་འགག་ཅིར་སྣང་ཡང་དོན་ལ་ཡེ་ཤེས་ཉག་གཅིག་གི་བདག་ཉིད་དུ་རྣམ་པར་དག་པ་དང་ལྷག་པ་གཟུགས་བརྙན་གྱི་དཀྱིལ་འཁོར་འདིས་མཚོན་བྱེད་དུ་བྱས་ཏེ་དབང་བསྐུར་ཞིང་ངོ་སྤྲད་ནས་ལམ་སྦྱང་བས་གཉུག་མའི་རྡོ་རྗེ་གསུམ་གྱི་ཆོ་འཕྲུལ་གདན་གསུམ་རྡོ་རྗེ་བཀོད་པའི་གྲོང་ཁྱེར་རང་ལ་ལྷུན་གྲུབ་ཏུ་བཞུགས་པ་ཡང༌། ཧོ༔ ཕུང་པོ་ཁམས་དང་སོགས། དབང་ཆོག་དཀྱུས་ལ་འཇུག་པས་རིགས་དབང་ལྔ་བསྐུར་ལ། གཉིས་པ་བུམ་དབང་གི་རྗེས་འབྲེལ་ནུས་འཇུག་གི་དབང་སྦྱིན་པ་ལ། མདུན་བསྐྱེད་གཙོ་བོའི་སྐུ་ལས་ཡེ་ཤེས་ཀྱི་སྐུ་མར་མེ་གཅིག་ལས་གཉིས་མཆེད་ཀྱི་ཚུལ་དུ་འཕྲོས། ཁྱེད་རང་གི་སྤྱི་བོ་ནས་ཞུགས་ཏེ་ཐིམ་པས་ཕུང་ཁམས་སྐྱེ་མཆེད་ལྷ་སྐུ་ཕྱག་རྒྱ་ཆེན་པོར་གནས་གྱུར་པའི་མོས་པ་མཛོད། གཙོ་བོའི་སྐུ་སྤྱི་བོར་བཞག་ལ། ཨེ་མ་གསང་མཆོག་གསང་བའི་བདག༔ རིག་པ་བདེ་ཆེན་རྒྱལ་བའི་ཡབ༔ སངས་རྒྱས་ཀུན་འདུས་རྒྱལ་པོ་ཡི༔ སྐུ་གསུང་ཐུགས་ཀྱི་དབང་བསྐུར་བས༔ རིགས་ཀྱི་དབང་མཆོག་ཐོབ་པར་ཤོག༔ ཀྲོ་དྷ་དེ་བ་ཨ་ཨཱཿ ཨ་བྷི་ཥིཉྩ་ཧཱུྃ༔ དཔལ་གྱི་རྟ་སྐད་ཐེང་གསུམ་གྱིས་དྲང་དོན་དུ་སྣང་སྲིད་དབང་གི་དཀྱིལ་འཁོར་དུ་སད་ནས་མ་མོ་མཁའ་འགྲོ་དབང་དུ་སྡུད་ཅིང་དགྱེས་པ་དང༌། ངེས་དོན་དུ་གཞི་ལམ་འབྲས་བུའི་བདེ་ཆེན་ཡེ་ཤེས་ལྔ་ཡི་ཆོ་འཕྲུལ་དུ་ངོ་སྤྲད་པའི་ཕྱིར་རྟ་ཞལ་གྱིས་དབང་བསྐུར་བར་མོས་ཤིག རྟ་མགོ་ལྔ་སྤྱི་གཙུག་ཏུ་བཀོད་ལ། ཧཱུྃ༔ དཔའ་བོ་ཡེ་ཤེས་སྒོ་སྲུང་ནི༔ ཟླ་གམ་འོད་ཀྱི་ཐིག་ལེ་ཆེ༔ འབར་བའི་ཡེ་ཤེས་རྟ་མགོ་ལྔས༔ རྟ་མགྲིན་དབང་གི་སྐུ་ཐོབ་ཤོག༔ ཧྱ་གྲཱྀ་ཝ་ཛྙཱ་ན་ཧྲཱིཿཧྲཱིཿཧྲཱིཿཧྲཱིཿཧྲཱིཿ ཨ་བྷི་ཥིཉྩ་ཧཱུྃ༔ ཐུགས་སྟོང་དང་སྙིང་རྗེ་ཐབས་ཤེས་གཉིས་མེད་རྡོ་རྗེ་རིན་ཆེན་གྱི་གཤོག་པས་སྲིད་ཞིའི་གཡང་ས་གཅོད་ཅིང་གཏི་མུག་ཀླུ་གདོན་འདུལ་བ་རྡོ་རྗེ་ཁྱུང་གི་དབང་ཐོབ་པར་མོས་ཤིག ཁྱུང་གཤོག་དཔུང་པ་གཡས་གཡོན་དུ་བཞག་སྟེ། ཧཱུྃ༔ གཡས་པ་རྡོ་རྗེའི་གཤོག་པ་བརྒྱད་དུ་གདེངས༔ གཡོན་པ་རིན་ཆེན་གཤོག་པ་བརྒྱད་དུ་གདེངས༔ སྟེང་དང་འོག་དང་བར་བར་ན༔ རྡོ་རྗེའི་ཐེའུ་གཤོག་རེ་རེས་བརྒྱན༔ གཤོག་པའི་དང་རུ་རྩེ་མཆན་ལ༔ དབང་གི་སྤྲུལ་པ་ཆེན་པོ་ནི༔ བྱ་ཁྱུང་འབར་བའི་སྐུར་བསྟན་འདིས༔ དེ་རིང་ཁྱོད་ལ་དབང་བསྐུར་བས༔ ཀླུ་གཉན་འདུལ་བའི་དབང་ཐོབ་ཤོག༔ ཙིཏྟ་བཛྲ་ག་རུ་ཌ་ཨ་བྷི་ཥིཉྩ་ཧཱུྃ༔ སྣང་སྲིད་མ་མོ་མཁའ་འགྲོའི་ཚོགས་རྗེ་རྡོ་རྗེ་གསང་བའི་སྤྱོད་པས་ནང་གི་ས་ལམ་གྱི་ཡོན་ཏན་རྫོགས་པ་ལྷ་དང་སྐལ་པ་མཉམ་པར་བྱིན་གྱིས་བརླབ་པའི་ཕྱིར་དུར་ཁྲོད་ཆས་བརྒྱད་ཀྱིས་དབང་བསྐུར་བར་མོས་ཤིག དུར་ཁྲོད་ཆས་བརྒྱད་གཏད་ལ། ཧཱུྃ༔ དཔལ་གྱི་སྐུ་མཆོག་གཉིས་མེད་རོལ་པའི་སྟབས༔ དུར་ཁྲོད་ཆས་བརྒྱད་གསང་བའི་ངང་དུ་རོལ༔ དུར་ཁྲོད་ཆེན་པོའི་དབང་མཆོག་འདི་བསྐུར་བས༔ ཏན་གན་རོལ་པ་རྟགས་ཆེན་དབང་ཐོབ་ཤོག༔ ཧཱུྃ་ཀྲོ་དྷ་ཧུ་ལུ་ཧཱུྃ་ཕཊ༔ ཨ་བྷི་ཥིཉྩ་ཧཱུྃ༔ ཐུགས་རྗེ་ཐབས་ཀྱིས་རྔམས་པས་རུ་ཏྲ་སྡེ་གསུམ་སྒྲོལ་ཕྱིར་དཔལ་གྱི་ཆས་བརྒྱད་ཀྱིས་དབང་བསྐུར་བས་དྲེགས་ཚོགས་ཟིལ་གནོན་སྒྲོལ་བའི་ལས་ལ་མངའ་བརྙེས་པར་མོས་ཤིག །དཔལ་གྱི་ཆས་བརྒྱད་གཏད་ལ། ཧཱུྃ༔ དཔའ་བོ་ཏིང་འཛིན་རྣོན་པོ་སྟག་གི་ཆས༔ རྣོ་གདུག་ཟློག་བྱེད་རྒྱ་གྲམ་ལྕགས་ཀྱི་ཆས༔ ཤེས་རབ་ཏིང་འཛིན་རྡོ་རྗེ་འཆོལ་བའི་ཆས༔ དབང་གི་བསེ་ཁྲབ་དམར་པོ་གཟི་བརྗིད་ཆས༔ དཔའ་བརྗིད་མཉེན་ལྕུག་སྦྲུལ་ནག་རྒྱན་གྱི་ཆས༔ དབང་ཕྱུག་ཟ་བྱེད་ཏིང་འཛིན་མཆེ་བའི་ཆས༔ རྡོ་རྗེའི་སློག་པ་མཐིང་ག་ལེ་བརྒན་ཆས༔ སྡུད་བྱེད་གཅན་གཟན་གཏུམ་པ་གཟིག་གི་ཆས༔ བསྐུར་བས་རྣམ་ཐར་བརྒྱད་དང་ལྡན་པར་ཤོག༔ རྩ་སྔགས་མཐར། ཀརྨ་ཨ་བྷི་ཥིཉྩ་ཧཱུྃ༔ རྡོ་རྗེའི་ཕྱག་མཚན་རྣམས་གཏད་པས་སྟོང་ཉིད་བཅུ་དྲུག་གི་དགོངས་པས་སྲིད་རྩ་དབྱིངས་སུ་སྒྲོལ་བའི་དབང་ཐོབ་པར་མོས་ཤིག །ཕྱག་མཚན་རྣམས་གཏད་དེ། ཧཱུྃ༔ རྡོ་རྗེ་ཁཊྭཱཾ་དྲིལ་བུ་ལྕགས་ཀྱུ་དང༔ སྦྲུལ་ཞགས་འཁོར་ལོ་མཚོན་ཆ་རལ་གྲི་འབར༔ རྡོ་རྗེའི་ཕྲེང་བ་ཐོད་ཁྲག་པདྨ་སྙིང༔ དབྱུག་པ་རྒྱ་གྲམ་བེ་ཅོན་མེ་དཔུང་འབར༔ ཏྲི་ཤུ་ལ་དང་ཁྱུང་ཁྲ་འབར་བ་ཡིས༔ རྒྱུད་དྲུག་རྩད་ནས་འབྱིན་པའི་དབང་ཐོབ་ཤོག༔ རྩ་སྔགས་མཐར། མ་ཧཱ་མུ་དྲ་ཨ་བྷི་ཥིཉྩ་ཧཱུྃ༔ ཡེ་ཤེས་སེམས་དཔའ་དབྱིངས་ཡུམ་པདྨ་གཟི་ལྡན་སྙིང་གར་བསྟིམ་པས་རྣམ་ཀུན་མཆོག་ལྡན་ཤེས་རབ་སྟོང་ཉིད་ཀྱི་དོན་རྟོགས་པར་མོས་མཛོད། ཡུམ་པདྨ་གཟི་ལྡན་གྱི་སྐུ་སྙིང་གར་བཞག་སྟེ། ཧཱུྃ༔ ཐུགས་ཀར་སྦས་པ་གསང་བའི་ཡུམ༔ རྒྱལ་བས་བསྔགས་པའི་གཟི་ལྡན་པདྨ་ཅན༔ གསང་མཛོད་ཡུམ་གྱིས་དབང་བསྐུར་བས༔ ཤེས་རབ་ཕ་རོལ་ཕྱིན་པའི་དབང་ཐོབ་ཤོག༔ པདྨ་རཱ་ག་ཀྲོ་དྷ་མ་ཨ་བྷི་ཥིཉྩ་ཧཱུྃ༔ དཔལ་གྱི་འཁོར་ཚོགས་གོ་ལ་མ་དྲུག་དང་ཡུམ་བཞིས་དབང་བསྐུར་བས་ཚོགས་དྲུག་གནས་སུ་དག་སྟེ་བདེ་སྟོང་དགའ་བ་བཞི་ལ་ལོངས་སྤྱོད་པར་མོས་ཤིག །གོ་ལ་མ་དྲུག་དང་ཡུམ་བཞིའི་སྐུ་གཏད་ལ། ཧཱུྃ༔ སྲིད་གསུམ་སྒྲོལ་ཞིང་ལས་མཛད་དམ་སྲུང་མ༔ གདུལ་བྱ་དྲག་པོ་འདུལ་བའི་དབང་མོ་ཆེ༔ གོ་ལ་མ་དང་ཡུམ་བཞིར་སྟོན་པ་སྟེ༔ གསང་བའི་ལས་མཛད་མ་སྲིང་དབང་ཐོབ་ཤོག༔ མ་མ་རུ་ཙ་ཨ་བྷི་ཥིཉྩ་ཧཱུྃ༔ མཁའ་འགྲོ་སོ་གཉིས་ཀྱི་སྤྲུལ་པ་དམུས་ལོང་རྒྱབ་འབྲེལ་སོ་གཉིས་ཀྱིས་དབང་བསྐུར་བས་ཁམས་སོ་གཉིས་གནས་སུ་དག་པར་མོས་ཤིག །ལོང་བ་རྒྱབ་འབྲེལ་གཏད་ལ། ཧཱུྃ༔ ཉོན་མོངས་དུག་གསུམ་ནད་ཀྱིས་གདུང་བ་ཡི༔ བདུད་དང་སྲིན་པོ་མ་ལུས་འདུལ་བ་དང༔ ལས་ཀྱི་མཐའ་རྣམས་གྲུབ་པར་བྱ་བའི་ཕྱིར༔ མཁའ་འགྲོ་དམུས་ལོང་ཚོགས་ཀྱིས་དབང་བསྐུར་བས༔ རྒྱབ་འབྲེལ་སུམ་ཅུ་རྩ་གཉིས་ལས་འཁོལ་ཤོག༔ དཔལ་གྱི་ཕོ་ཉ་ལྕེ་སྤྱང་རྣམས་ཀྱིས་དབང་བསྐུར་བས་ཉོན་མོངས་བཅུ་དྲུག་དབྱིངས་སུ་དག་པར་མོས་ཤིག །ཁྱི་སྤྱང་རྣམས་གཏད་ལ། ཧཱུྃ༔ ཡུལ་བརྒྱད་གནས་སུ་དག་པའི་ཁྱི་སྤྱང་ཚུལ༔ འགུགས་འདྲེན་ལས་ཀྱིས་དཔལ་གྱི་ཐུགས་དམ་སྐོང༔ ཐོགས་མེད་སྒྲོལ་བའི་མཐུ་ལྡན་དབང་ཐོབ་ཤོག༔ ཀུ་ཛཿ ཀུ་ཛཿ ཀུ་ཛཿ ཀུ་ཛཿ ཀུ་ཛཿ ཀུ་ཛཿ ཀུ་ཛཿ ཀུ་ཛཿ ཨ་བྷི་ཥིཉྩ་ཧཱུྃཿ སྒོ་མ་བཞི་ཡི་དབང་བསྐུར་བས་མཐའ་བཞིའི་ལྟ་བ་དག་པའི་ཡེ་ཤེས་མངོན་དུ་གྱུར་པར་མོས་ཤིག །སྒོ་མ་བཞི་གཏད་དེ། ཧཱུྃ༔ ཡེ་ཤེས་དགུ་ཡི་དོན་ལྡན་ཞིང༔ ཐེག་པ་དགུ་ཡི་བྱེ་བྲག་ཚུལ༔ མགོ་དགུ་ལ་སོགས་རྐང་གཅིག་ལྡན༔ སྒོ་བ་བཞི་ཡི་དབང་ཐོབ་ཤོག༔ ཛཿཧཱུྃ་བྃ་ཧོ༔ ཨ་བྷི་ཥིཉྩ་ཧཱུྃ༔ རིགས་ཀྱི་སྙིང་པོ་ལྔ་གནས་ལྔར་བསྟིམ་པས་སྤྱན་དང་མངོན་ཤེས་སོགས་འཕགས་པའི་སྤང་རྟོགས་ལ་དབང་ཐོབ་པར་མོས་ཤིག །ཡིག་འབྲུ་ལྔ་གནས་ལྔར་བཞག་སྟེ། ཧཱུྃ༔ ལྷ་ཡི་སྙན་དང་ལྷ་ཡི་སྤྱན༔ དེ་བཞིན་སྔོན་གནས་རྗེས་དྲན་སོགས༔ མངོན་ཤེས་ལྔ་ཡི་དབང་ཐོབ་ཤོག༔ ཨོཾ་ཨཱཿཧཱུྃ་སྭཱ་ཧཱ༔ ཨ་བྷི་ཥིཉྩ་ཧཱུྃ༔ དེ་ནས་དྲག་པོ་སྒྲོལ་བའི་དབང༔ རཱུ་པར་དགྲ་བགེགས་དགུག་ཅིང་གཞུག༔ ཅེས་གསུངས་པས་དེ་དག་གིས་ལྷ་དང་སྐལ་བ་མཉམ་པའི་ཕྱིར་བུམ་དབང་མཐའ་རྟེན་དང་བཅས་པ་བསྐུར་བས་ཏིང་འཛིན་ལྷ་ཡི་གཟེར་གྱིས་གཟུགས་སྣང་ལྷར་དག །སྙིང་པོ་སྔགས་ཀྱི་གཟེར་གྱིས་ནུས་པའི་རྩལ་བྱིན། འཕྲོ་འདུ་ཕྲིན་ལས་ཀྱི་གཟེར་གྱིས་ལས་བཞི་ཐོགས་མེད་དུ་འགྲུབ་པའི་མཐུ་ཐོབ་ཕྱིར་སྒོ་གསུམ་ལྷ་སྔགས་ཡེ་ཤེས་ཀྱི་ཏིང་ངེ་འཛིན་གྱི་རྫོང་ལས་མི་འདའ་བས་སྣང་སྤྱོད་ཡེ་ཤེས་ཀྱི་རོལ་པར་ཤར་ནས་ཆགས་སྡང་རང་མཚན་གྱི་འཕྲང་ལས་བརྒལ་ཏེ་དགོངས་པ་མི་འགྱུར་བའི་གཟེར་ཆོས་ཉིད་ཀྱི་ལྟ་བས་འཁོར་འདས་ཀྱི་སྲོག་འཕྲོག་པ་རྟོགས་པས་བདག་བསྒྲལ་ནས། ཞི་བའི་ཕྲིན་ལས་ཀྱི་སྤྱོད་ཡུལ་དུ་མ་གྱུར་པའི་གདུལ་དཀའ་དྲག་པོས་ཚར་གཅོད་པའི་ཐུགས་རྗེས་གཞན་སྒྲོལ་བའི་རྗེས་སུ་གནང་བ་སྦྱིན་པ་ལ་ཐུགས་དམིགས་འདི་བཞིན་གནང་མཛོད། སྣོད་བཅུད་དཔལ་ཆེན་ཁྲག་འཐུང་རོལ་པའི་དུར་ཁྲོད་ཆེན་པོར་རྫོགས་པའི་དབུས་སུ་ཕྱིར་མི་ལྡོག་པའི་ཕྱིར་སློབ་མ་རྣམས་རང་རང་དབང་ཆེན་རྟ་མཆོག་རོལ་པར་དངོས་སུ་གསལ་བས། མི་རྡུགས་པའི་ཕྱིར་སྒྲོལ་ཕུར་སྲས་མཆོག་ཡཀྴ་ཀྲོ་དྷ་དང༌། མི་འབྱམས་པའི་ཕྱིར་ལིངྒ་དགྲ་བགེགས་དངོས་སུ་གསལ་བ་སྟེ་གསལ་བ་གསུམ་ལྡན་གྱི་ཏིང་ངེ་འཛིན་དང་མ་བྲལ་བས་ཐུགས་རྗེ་ཐབས་ཀྱིས་སྒྲོལ་བའི་ཏིང་འཛིན་ལ་འཇུག་པར་ཞུ། ཐུགས་དམ་བསྐུལ་བ་ནི། ཧཱུྃ༔ མི་གནས་ཡེ་ཤེས་ཆོས་སྐུའི་ཕོ་བྲང་ནས༔ ལོངས་སྤྱོད་རྫོགས་པ་ཞི་དང་ཁྲོ་བོའི་ལྷ༔ ཐུགས་དམ་བསྐུལ་ལོ་འགྲོ་བའི་དོན་ལ་དགོངས༔ རིག་པའི་རང་བཞིན་བདེ་གཤེགས་སྙིང་པོ་ཡང༔ མ་རིག་འཛིན་པའི་ཀུན་གཞི་ལུང་མ་བསྟན༔ སྒོ་ལྔའི་ཡུལ་དང་རྟེན་ཅིང་འབྲེལ་པ་ལས༔ རིགས་དྲུག་རྒྱུད་ལྔའི་གནས་སུ་འཁྱམས་པ་རྣམས༔ ལས་དང་ཉོན་མོངས་མཐུ་ཡིས་གཟིར་བའི་མཐུས༔ ཕྱི་རོལ་ཡུལ་ལ་སྨིན་པའི་སྡུག་བསྔལ་དང༔ ནད་མཚོན་མུ་གེ་དགྲ་བགེགས་འབྱུང་པོའི་གདོན༔ འཇིགས་པ་ཆེན་པོ་བརྒྱད་དང་བཅུ་དྲུག་ཀུན༔ མངོན་སྤྱོད་དྲག་པོའི་རོལ་པས་ཚར་བཅད་ནས༔ ལོག་རྟོག་དངོས་པོར་ཞེན་པའི་སེམས་ཅན་རྣམས༔ རྒྱུ་འབྲས་ཐེག་པ་གཞན་གྱིས་གདུལ་དཀའ་བས༔ རང་བྱུང་ཡེ་ཤེས་རྟོགས་པའི་ཕྲིན་ལས་མཛོད༔ གསེར་སྐྱེམས་གཟུ་དཔང་དང་བཅས་པ་ནི། རྃ་ཡྃ་ཁྃ། ཨོཾ་ཨཱཿཧཱུྃ། གསེར་སྐྱེམས་ཟག་པ་མེད་པ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཧཱུྃ༔ ཁྱབ་བདག་གདོད་མའི་མགོན་པོ་མན་ཆད་ནས༔ མངོན་པར་བྱང་ཆུབ་དཔལ་མགོན་བླ་མའི་བར༔ དགོངས་བརྡ་སྙན་བརྒྱུད་རྡོ་རྗེ་སློབ་དཔོན་དང༔ དབང་ཆེན་རྟ་མཆོག་ལྷ་ཚོགས་གཟུ་དང་དཔང༔ འགྲོ་ཀུན་བདེ་གཤེགས་སྙིང་པོའི་རང་བཞིན་ལ༔ དགྲ་གཉེན་ཕྱོགས་ཆའི་སྡང་ཞེན་མ་དམིགས་ཀྱང༔ གཟུང་འཛིན་གདོན་གྱིས་བརླམས་པའི་ཉམས་པ་བདུན༔ བྱང་ཆུབ་སེམས་གཉིས་སྒོམ་པའི་དགྲ་རུ་ལངས༔ དམ་ལས་ཉམས་པས་སློབ་དཔོན་མཆེད་ལ་བརྙས༔ བཀའ་ལས་ཉམས་པས་ལས་འབྲས་ཁྱད་དུ་བསད༔ དོན་ལས་ཉམས་པས་བདེན་གཉིས་ཆད་པར་བལྟ༔ ལས་ཀྱིས་ཉམས་པས་ཉེས་མེད་རྣམས་ལ་འཛུགས༔ མཚན་མས་ཉམས་པས་ཆོས་ལ་ཕྱོགས་རིས་བཟུང༔ འདོད་པས་ཉམས་པས་ཁྲེལ་མེད་འཕྲོག་བཅོམ་བྱེད༔ ལོག་པས་ཉམས་པས་སེམས་ཅན་སྡུག་ལ་སྦྱོར༔ འདི་ལ་མངོན་སྤྱོད་ཕྲིན་ལས་མི་མཛད་ན༔ མཐར་གྱིས་འཆི་བ་སེམས་ཅན་ཀུན་ལ་ཡོད༔ དུས་ལ་བབ་ན་དཔག་བསམ་ཤིང་ཡང་འགྱེལ༔ བསམ་སྦྱོར་ངན་པའི་འབྲས་བུ་མཐར་ཕྱིན་ན༔ ཚར་གཅོད་རྗེས་འཛིན་མཐུ་སྟོབས་རྫུན་དུ་ཟད༔ ཆོས་ཉིད་བདེན་པ་བསླུ་བ་མེད་པ་དང༔ སྔགས་ཀྱིས་སྒྲོལ་བ་སངས་རྒྱས་རྣམས་ཀྱི་མཐུས༔ ཨ་བྷི་ཙརྻའི་དུས་ལ་ད་བབ་ན༔ བརྣག་པའི་ལས་ལ་བཏང་སྙོམས་མ་མཛད་ཅིག༔ དུས་གསུམ་སངས་རྒྱས་རྣམས་ཀྱིས་དབྱིངས་ནས་གཟིགས༔ བདེན་གཉིས་རྒྱུ་འབྲས་བསླུ་མེད་གཟུ་དང་དཔང༔ དཔལ་མགོན་ཆོས་སྐྱོང་རྣམས་ནི་མཐུ་རྩལ་བསྐྱེད༔ ཉེས་ཆེན་འདི་ལ་མངོན་སྤྱོད་ཕྲིན་ལས་མཛོད༔ ཅེས་བརྗོད་ཅིང་གསེར་སྐྱེམས་ཕྱོགས་བཅུར་འཐོར། དམིགས་བྱ་བསྐྱེད་པ་ནི། སྟོང་པའི་ངང་ལས་མདུན་དུ་བྲུབ་ཁུང་ཁ་དོག་ཅིང་གཏིང་ཟབ་པ་སྒོ་མེད་ཟུར་གསུམ་པ༔ ལས་བྱེད་གཤེད་མ་དང་གཅན་གཟན་མང་པོས་གསོད་གཅོད་ཀྱི་ལས་ལ་བརྩོན་པ༔ མུན་ནག་འཐིབས་པ༔ མེ་འབར་ཞིང་རླུང་འཚུབ་པ༔ འཇིགས་ཤིང་སྐྱི་གཡའ་བ༔ དེའི་ནང་དུ་ནྲྀ་ལས་ཡིད་ལ་བརྣག་པའི་དགྲ་བགེགས་གང་ཡིན་པ༔ རིད་ཅིང་ཉམ་ང་བའི་ཚུལ་ཅན༔ མགོན་སྐྱབས་དང་བྲལ་བར་བསམ་མོ༔ རྣམ་ཤེས་འགུགས་པ་ནི། གཡབ་དྲིལ་བཅས་ཧཱུྃ་མཛད་ཀྱི་རྒྱ་བཅིངས་ལ། ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༌། སངས་རྒྱས་ཀྱི་བཀའ་བདེན་པ་དང༌། ཆོས་ཀྱི་བཀའ་བདེན་པ་དང༌། དགེ་འདུན་གྱི་བཀའ་བདེན་པ་དང༌། གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བདེན་པ་དང༌། ཆོས་ཉིད་གདོད་ནས་སྟོང་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང༌། ཁྱད་པར་དབང་ཆེན་རྟ་མཆོག་རོལ་པའི་དཀྱིལ་འཁོར་གྱི་ལྷ་ཚོགས་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང༌། བདེན་པ་ཆེན་པོའི་མཐུ་ལ་བརྟེན་ནས་བསྟན་དང་འགྲོ་བའི་སྤྱི་དགྲ། ཁྱད་པར་རིག་པ་འཛིན་པ་བདག་ཅག་ཡོན་མཆོད་འཁོར་དང་བཅས་པ་རྣམས་ལ་སྔ་དགྲ་ལག་གིས་བདར་བ། ཕྱི་དགྲ་ཡིད་ལ་སེམས་པ། ད་དགྲ་ཐད་དུ་འཛུགས་པའི་གཟུགས་ཅན་སྡང་བའི་དགྲ་དང་གཟུགས་མེད་གནོད་བྱེད་བགེགས་ཀྱི་ཚོགས་དང་བཅས་པ་ཐམས་ཅད་སྲིད་པ་གསུམ་གྱི་ཁོང་གར་གནས་གར་བྲོས་ཀྱང་སྐད་ཅིག་ཡུད་ཙམ་ལ་དམིགས་པའི་རྟེན་འདི་ལ་ཁུག་ཅིག །ཨོཾ་ཧུ་ལུ་ཧུ་ལུ་ཕཊ༔ ཨེ་ཨ་ར་ལི་ཧཱུྃ་ཧྲཱིཿཛཿ སརྦ་བིགྷྣཱན་ཤ་ཏྲཱུཾ་ཨ་ཀརྵ་ཡ་ཛཿ ནྲྀ་ཡཾ་ཛཿ ཏྲི་ཡཾ་ཛཿ ཛཿཧཱུྃ་བྃ་ཧོ༔ བཛྲ་ཨ་བེ་ཤ་ཡ་ཨ༔ པྲ་བེ་ཤ་ཡ་ཕཊ༔ ཞེས་ལན་གསུམ་གྱིས་དགུག་གཞུག་བཅིང་བསྟིམ་དབབ་དབྱེ་བསྒྲལ་བས་སྐལ་ལྡན་དུ་བྱ། ཁྱེད་རང་རྣམས་དབང་ཆེན་རྟ་མཆོག་རོལ་པར་གསལ་བའི་ལག་གཉིས་རིགས་ལྔ་ཡབ་ཡུམ་གྱི་སྦྱོར་མཚམས་སུ་ཧཱུྃ་ལས་སྐྱེས་པའི་སྒྲོལ་བྱེད་ཡཀྴ་ཀྲོ་དྷ་སྐུ་སྟོད་ཁྲོ་བོ་སྐུ་སྨད་རྣོ་དབལ་ཕུར་པའི་མཚོན་ལྡན་འདྲིལ་ཞིང་དགྲ་བགེགས་ཀྱི་སྙིང་གར་བཏབ་པས་ཕུར་རྩེའི་འོད་ལས་དཔའ་བོ་འབྲུ་ལྔ་རླུང་རྟའི་ཟེར་ལས་འཕྲོས་པས་བསྒྲལ་བྱའི་རིགས་དྲུག་གི་ས་བོན་བག་ཆགས་དང་བཅས་པ་བསྲེགས་ནས་རྣམ་ཤེས་ནྲྀ་དུད་ཁའི་རྣམ་པ་ནག་ཀེམ་གྱིས་བསད། སླར་ཡང་རྡོ་རྗེས་བརྡུངས་ནས་བཏབ་ཅིང་ཕུར་རྩེ་རང་ལ་བསྟན་པས་གཟས་པོའི་ཚེ་བསོད་ཀྱི་དྭངས་མ་ཁབ་ལེན་གྱིས་ལྕགས་བསྡུས་པ་བཞིན་བསྡུས་ཏེ་རང་ལ་ཐིམ་པས་གཟི་བྱིན་ལྷག་པར་འབར། དགྲ་བགེགས་ཀྱི་རྣམ་ཤེས་ཨ་དཀར་པོའི་རྣམ་པར་ཕུར་པས་རྩེན་གྱིས་བླངས་ནས་ཕུར་རྩེ་གྱེན་ལ་བསྟན་པས་སྐར་མདའ་འཕང་བ་བཞིན་འོག་མིན་གྱི་གནས་སུ་དཔལ་ཆེན་པོའི་སྦྱོར་མཚམས་སུ་ཐིམ་པར་བསམ་ལ་བདག་ཕུར་འབེན་གསུམ་དབྱེར་མེད་ཆོས་ཉིད་ཀྱི་དགོངས་པ་ལས་མི་འདའ་བས་སྒྲོལ་བའི་ལས་རིམ་ལ་འཇུག་པར་མཛོད། སྒྲོལ་ཕུར་གཏད་ལ། ཧཱུྃ༔ དབྱིངས་དང་ཡེ་ཤེས་དོན་གྱི་ཕོ་ཉ་དང༔ ཐབས་དང་ཤེས་རབ་རྟགས་ཀྱི་ཕོ་ཉ་མོ༔ རྡོ་རྗེ་དབང་གི་ཕུར་པ་འདི་བྱིན་པས༔ ཡེ་ཤེས་དབྱིངས་ལ་ཕུར་པ་འདེབས་པར་ཤོག༔ ཨོཾ་ཧུ་ལུ་ཧུ་ལུ་ཕཊ༔ ཨེ་ཨ་རལླི་ཧྲཱིཿཧཱུྃ་ཛཿ ནྲྀ་ཏྲི་ཤ་ཏྲཱུན་མཱ་ར་ཡ་ཕཊ༔ ཞེས་ཚེ་ཁྲུས་གནས་ལུང་གི་དགོངས་པ་དང་ལྡན་པས་ཕུར་པ་བཏབ་ཅིང་སྒྲོལ་གྲིས་བཏུབ། ལིང་རོ་སྨན་གྱིས་བྲན་ལ། མཱཾ་ས་རཀྟ་ཙིཏྟ་གོ་རོ་ཙ་ན་བ་སུ་ཏ་ཀེཾ་ནི་རི་ཏི་ཏ་ན་ཙཀྲ་པཱུ་ཛ་ཁཱ་ཧི་ཁཱ་ཧི༔ ཞེས་ཞལ་དུ་བསྟབ་ལ་གཏོར་མར་འབུལ། དེས་དྲག་པོ་སྒྲོལ་བའི་ཕྲིན་ལས་ཀྱི་དབང་ཐོབ་པས་དེང་ཕྱིན་ཆད་བར་ཆད་བདུད་སྡེའི་གཡུལ་ལས་རྣམ་པར་རྒྱལ་ཞིང་ཞིང་བཅུའི་དགྲ་བགེགས་སྒྲོལ་བ་ལ་ཐོགས་པ་མེད་པས་འཇིགས་པའི་བདུད་བཞི་བཅོམ། བར་ཆད་ཀྱི་འཕྲང་གསུམ་བསལ། གསང་བའི་དགྲ་གསུམ་བསད་ནས་ཕྱོགས་ལས་རྣམ་རྒྱལ་ཧེ་རུ་ཀའི་གོ་འཕང་མངོན་དུ་བྱེད་ནུས་པ་ཡིན་ནོ། །དེས་རྡུལ་ཚོན་སྤྲུལ་པའི་དཀྱིལ་འཁོར་དུ་སོགས་བུམ་དབང་གི་དག་བརྗོད་དང༌། གསང་དབང༌། ཤེར་ཡེ། ཚིག་དབང་གིས་མཚོན་དམ་ཚིག་ཁས་བླངས། གཏང་རག་ཡོན་འབུལ། དགེ་བསྔོ། ལས་བྱང་གི་རྗེས་རིམ་བཅས་མཐར་ཆགས་སུ་བཏང་བས་གྲུབ་པའོ། །མཁྱེྃན་བཟང་སྣང་བའི་ཁྱིམ་གྱི་དཔལ། །བརྩེྃ་ཆེན་འོདྃ་བརྒྱའི་འཛུམ་ཕྲེང་དཔྱིད། །ཀུན་ཏུ་གདུལ་བྱའི་ཁམས་ཁྱབ་པའི། །ཟེརྃ་ལས་ཟབ་གསང་དྲོད་བཅུད་འབེབས། །ཐུགས་སྒྲུབ་དཔལ་ཆེན་འདུས་པའི་སྒོས་བཀའ་ཁྲག་འཐུང་རིགས་བཞི་ལས། གསུང་རྡོ་རྗེ་དབང་ཆེན་རྟ་མགྲིན་ཁམས་གསུམ་རོལ་པའི་སྨིན་བྱེད་ཀྱི་ལེའུ་ཚན་བདུན་པ་སྟེ་པདྨ་དྲི་མེད་ཤིན་ཏུ་དགའ་བའི་རྡོ་རྗེས་སྦྱར་བའོ། ༈ ཡང་དག་གྲུབ་པ་གཅིག་པུའི་ཆོ་འཕྲུལ་ལས། །སྲིད་ཞིའི་སྒྱུ་མའི་ཉམས་འགྱུར་འབུམ་འཆར་ཡང༌། །བདེ་ཆེན་མཁའ་འགྲོའི་དབང་ཕྱུག་ཧེ་རུ་ཀའི། །རྣམ་གྲོལ་གསང་མཆོག་དགྱེས་པར་རོལ་ལ་གུས། །ཐུགས་རྡོ་རྗེའི་རིགས་ཀྱི་ཧེ་རུ་ཀ་ཡང་དག་སངས་རྒྱས་མཉམ་སྦྱོར་གྱི་དབང་གི་ལས་རིམ་ལ། གཞུང་མཐུན་དཀྱིལ་འཁོར་སྟེང་ལྡིང་ཁྲི་བཀོད་པར་རྣམ་བུམ་སོགས་རིགས་དབང་ལྔ། བྷནྡྷ་དུམ་བུ་གཅིག་པར་ཐོད་སྐུ། ཕྱག་མཚན་རྡོར་དྲིལ། ཁཊྭཱཾ་དང་གསང་བའི་རྔེའུ་ཆུང༌། ཐོད་པའི་ནང་དུ་ཞུན་གྱི་མར་མེ་སྡོང་བུ་དགུ་ཅན། གསང་རྫས། རིག་ཙཀ ཤེལ་རྡོ། མེ་ལོང༌། མཆོད་པ། སྨན་རཀ་གཏོར་མ། ཚོགས་མཆོད། ལས་བུམ་སོགས་སྔ་མ་ལྟར་འདུ་བྱས་ལ། བདག་མདུན་སྒྲུབ་ཚུལ་སྔར་བཞིན་ལ། བསྙེན་དམིགས་གཙོ་བོ་དུང་ཁང་དུ་ཟླ་གདན་ལ་ཨོཾ་དཀར་པོའི་མཐར་རུ་ལུ་གསེར་གྱི་ཕྲེང་བ་ལྟ་བུ། མགྲིན་པར་པདྨ་འདབ་བརྒྱད་སྟེང་དུ་ཨཱཿདམར་པོའི་མཐར་རུ་ལུ་དམར་སེར་མགལ་མེ་ཀླད་བསྐོར་ལྟ་བུ། སྙིང་གར་ཉི་གདན་ལ་ཧཱུྃ་སྔོན་མཐར་རུ་ལུ་སྔོ་ནག་ལྕགས་ཞུན་ལྟ་བུ། ལྷ་མོ་བརྒྱད་ཀྱི་ཐུགས་ཀར་རིན་པོ་ཆེ་ཟུར་བརྒྱད་ལ་རུ་ལུའི་ཡི་གེ་མདུན་ནས་བརྩམས་ཏེ་འབྲུ་རེ། དབུས་སུ་སོ་སོའི་མིང་ཡིག་ཐིག་ལེས་མཚན་པ་རྣམས་ལ་སེམས་འཛིན་དང་འོད་ཟེར་སྤྲོ་བསྡུ་བྱ་བར་གསུངས། བུམ་བཟླས། བདག་འཇུག །དབང་གི་སྔོན་འགྲོ་ཁྲུས་དང་བགེགས་གཏོར་བཏང༌། སྲུང་འཁོར་བཅིངས་ལ། དེ་ལ་འདིར་དེ་བཞིན་གཤེགས་པ་ཀུན་གྱི་ཐུགས་གཉིས་སུ་མེད་པའི་ཡེ་ཤེས་ཀྱི་རྡོ་རྗེ་དཔལ་ཧེ་རུ་ཀའི་དཀྱིལ་འཁོར་གྱི་ཁྱབ་བདག་ཏུ་བཞེངས་པ་ནི་ཡང་དག་ཐུགས་ཀྱི་སྒྲུབ་པ་ཞེས་བྱ་སྟེ། དེ་ལའང་གསང་སྔགས་རྡོ་རྗེ་ཐེག་པ་སྔ་འགྱུར་གྱི་རིང་ལུགས་ལ་ཐེག་པ་རིམ་དགུར་གྲགས་པ་ལས། མཐར་ཐུག་བླ་མེད་ནང་རྒྱུད་སྡེ་གསུམ་ཞེས་རྒྱུད་ལུང་མན་ངག་གི་སྙིང་པོ་བསྟན་པའི་ཡ་གྱལ་རྒྱུད་མ་ཧཱ་ཡོ་ག་ལ་རྒྱུད་སྡེ་དང་སྒྲུབ་སྡེ་གཉིས་སུ་ཡོད་པ་ལས། འདིར་རྒྱུད་ལྟར་ན་ཏནྟྲ་སྡེ་བཅོ་བརྒྱད་ཀྱི་ནང་ཚན་སྒྲུབ་པ་ལག་ལེན་དུ་སྟོན་པ་རོལ་པའི་རྒྱུད་སྡེ་ལྔ་ལས་ཐུགས་ཀྱི་ཏནྟྲ་ཧེ་རུ་ཀ་རོལ་པའི་རྒྱུད་གལྤོ་ཆེ་ཆུང་སོགས་ལ་བརྟེན་ཅིང༌། སྒྲུབ་སྡེ་ལྟར་ན་ཡང་དག་ཐུགས་ཀྱི་སྒྲུབ་ལུགས་ཧེ་རུ་ཀའི་སྤྱི་རྒྱུད་སོགས་ལས་འབྱུང་བ་དང༌། གཞན་ཡང་འཇིག་རྟེན་ལས་འདས་པའི་མདོ་སོགས་ཨ་ནུ་ལུང་གི་དགོངས་རྒྱུད་ཀྱང་འདྲིལ་བས་རྒྱུད་ལུང་གཉིས་ཀའི་བཅུད་འདུས་པ་སྟེ། སྔགས་གསར་མ་ལ་ཡོངས་སུ་གྲགས་པའི་མ་རྒྱུད་རིགས་དྲུག་གི་ནང་ཚན་དཔལ་ཧེ་རུ་ཀའི་རིགས་འཁོར་ལོ་སྡོམ་པ་དང་དགྱེས་མཛད་རྡོ་རྗེ་དུས་ཀྱི་འཁོར་ལོ་སོགས་དང་ངོ་བོ་གཅིག་པ་སྟེ་མཁའ་འགྲོ་སྒྱུ་མ་བདེ་མཆོག་དང༌། སངས་རྒྱས་མཉམ་སྦྱོར་ལ་སོགས་པ་མཚན་གྱི་རྣམ་གྲངས་དུ་མས་བསྟན་པ་སྟེ། འདི་ཉིད་སློབ་དཔོན་རྡོ་རྗེ་ཧཱུྃ་མཛད་དང༌། ཨོ་རྒྱན་གྱི་སློབ་དཔོན་པདྨ་སོགས་ལ་བཀའ་བབ་སྟེ་ཟུང་འཇུག་ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་པའི་གྲུབ་པ་ཆེན་པོ་ས་ཡི་རྡུལ་ཙམ་བྱོན་ཅིང༌། སྒྲུབ་པ་བཀའ་བརྒྱད་སོགས་ཞི་ཁྲོ་རབ་འབྱམས་ཀྱི་དཀྱིལ་འཁོར་ཐམས་ཅད་ཐུགས་རྡོ་རྗེའི་རིགས་སུ་འདུས་ཤིང་སྐྱེས་བུའི་ལུས་ལ་རྣམ་ཤེས་བཞིན་སངས་རྒྱས་ཐམས་ཅད་ཀྱང་གཉིས་མེད་རྡོ་རྗེ་སེམས་དཔའ་གཅིག་གི་བདག་ཉིད་ལས་གཞན་དུ་མ་གྱུར་པས། བཀའ་བརྒྱད་སྙིང་པོ་ཡང་དག་ཐུགས་སྒྲུབ་བསྡུས༔ ཞེས་སོགས་གསུངས་ཤིང༌། ཁྱད་པར་སངས་རྒྱས་གཉིས་པ་སློབ་དཔོན་ཆེན་པོས་འཕགས་བོད་གཉིས་སུ་སྨིན་གྲོལ་གྱི་བདུད་རྩིས་སྐལ་བཟང་བྱེ་སྙེད་ཞིག་རིག་འཛིན་གྱི་ས་ལ་བསྐྱལ་ཞིང༌། གུ་རུའི་ཐུགས་དམ་ལྷ་མཆོག་རྣམ་གསུམ་གྱི་ཡ་གྱལ་དུ་གྱུར་པ་དང༌། བོད་ཡུལ་ཕྱི་མའི་གདུལ་བྱ་ལ་དགོངས་པའི་གཏེར་ཁ་མི་འདྲ་བ་དུ་མ་སྦས་ནས་དུས་སྐབས་དང་འཚམས་པར་བྱོན་པ་ལས། འདི་ནི་ཇི་སྐད་དུ། དུས་རེ་ཞིག་བསྙེན་བསྒྲུབ་དམ་པོའི་ཚེ། །རང་གཉུག་མའི་བསྟི་གནས་ཡིན་སྙམ་པའི། །ཁང་པ་བཀོད་མཛེས་ཞིག་གི་ནང༌། །རྗེ་རིག་འཛིན་ཧཱུྃ་ཆེན་ཀཱ་ར་དེ། །ཞལ་ཁྱིམ་ཟླ་བ་ལྟ་བུ་ལ། །སྐུ་ཤ་ཡང་རྒྱགས་པ་ལྟར་སྣང་བའི། །གཟི་བྱིན་མཚུངས་པ་མེད་པ་ཞིག །སྒྱུ་མ་ལྟ་བུའི་སྣང་ཆར་མཇལ། །ཉམས་རྟོགས་ཀྱི་གླེང་མོ་མང་ཞུས་མཐར། །ད་ངེད་ཀྱི་སྒྲུབ་ཁང་འདི་ཉིད་དུ། །བློས་བསླངས་ཀྱི་དཀྱིལ་འཁོར་ཞིག་བཞེངས་ཞུས་པར། །ད་བློས་བསླངས་གསར་དུ་བཞེངས་པ་ལས། །ཆུང་ངུ་ཞིག་གསོ་དགོས་པ་ཞིག །གནས་གཞན་དུ་འདུག་པ་ངས་བླངས་ཏེ། །བུ་ཁྱོད་ལ་སྤྲད་ཀྱི་ཞིག་གསོ་གྱིས། ཞེས་གསུངས་ཏེ་མི་སྣང་གཞན་དུ་ཐལ། །ཞེས་གསུངས་པས་མཚོན་རིག་འཛིན་ཧཱུྃ་ཆེན་ཀཱ་ར་དང་སྐུ་ལྔ་ལྷུན་གྲུབ་རིག་འཛིན་པདྨ་སམ་བྷ་ཝ་ཆེན་པོ་དང་དོན་གྱི་སྤང་རྟོགས་ལ་རྣམ་དབྱེར་མེད་པ་ཐེག་མཆོག་རྫོགས་པ་ཆེན་པོའི་རྟོགས་པ་དོན་བརྒྱུད་ལ་དབང་ཐོབ་པས་རང་བྱུང་གདོད་མའི་གཞི་དབྱིངས་སུ་མཉམ་རྗེས་རིས་མེད་ཆེན་པོར་བཙན་ས་ཟིན་ཏེ་གཞི་སྣང་ཡེ་ཤེས་ཀྱི་རོལ་པས་འགྲོ་ཀུན་གདོད་མའི་དབྱིངས་སུ་འཁྲིད་པའི་རིག་རྩལ་ཐུགས་རྗེ་མཁའ་ཁྱབ་ཏུ་ཤར་ཞིང་སྨིན་གྲོལ་གྱི་གསང་མཛོད་ཐང་མར་བརྡལ་ནས་སྙིགས་དུས་ཐེག་མཆོག་བསྟན་པའི་ཤིང་རྟ་གཅིག་པུར་བྱོན་པའི་བཀའ་དྲིན་གྱིས་དགོངས་པ་གཞི་གྲོལ་གྱི་གྲོལ་ཚད་ཅན་ད་ལྟའི་བར་ཟམ་མ་ཆད་པས་མཆོག་གི་དངོས་གྲུབ་བརྙེས་པའི་གསེང་ལམ་གྱི་སྟོན་པ་གྲུབ་བརྒྱའི་དེད་དཔོན་ཀུན་མཁྱེན་བླ་མ་འཇིགས་བྲལ་གླིང་པ་ལ་ཀློང་གསལ་དགོངས་པའི་གསང་མཛོད་ལས་བྱོན་པའི་བླ་མ་རྩ་བ་གསུམ་གྱི་སྒྲུབ་སྐོར་ལས་ཡི་དམ། དེ་ལའང་སྤྱི་དང་བྱེ་བྲག་གི་སྒྲུབ་ཚུལ་གཉིས་ལས་བྱེ་བྲག །སྐུ་གསུང་ཐུགས་ཕྲིན་ལས་རྡོ་རྗེ་བཞི་ཡི་སྒྲུབ་ཐབས་ལས་ཐུགས་རྡོ་རྗེ་ཡང་དག་ཧེ་རུ་ཀ་སངས་རྒྱས་ཐམས་ཅད་མཉམ་པར་སྦྱོར་བའི་གསེང་ལམ་རྨད་དུ་བྱུང་བ་སྟེ། འདི་ལའང་ནང་གསེས་ཟླ་གམ་དྲུག་ཅུ་རྩ་བརྒྱད་པ། ལྔ་བཅུ་ང་བརྒྱད་པ། བཅོ་བརྒྱད། དགུ་མ། གཅིག་མ་སོགས་བཀའ་སྲོལ་མང་དུ་མཆིས་ཀྱང་རང་གཞུང་ལས། ཡིད་ཀྱི་ཡེ་ཤེས་ལ་སྦྱོར་བ༔ ཡང་དག་ཐུགས་ཀྱི་སྒོས་སྒྲུབ་ནི༔ ཁྲག་འཐུང་གལྤོའི་ཏནྟྲའོ༔ ཞེས་དང༌། འདི་ནི་ཐུགས་ཀྱི་སྒྲུབ་པ་སྟེ༔ དག་པ་ཐམས་ཅད་ཆོས་སྐུ་ལ༔ སྦྱོར་བས་མཆོག་གི་དངོས་གྲུབ་མྱུར༔ ཁྲག་འཐུང་གལྤོའི་བཅུད་དུམ་ཡིན༔ ཞེས་དང༌། དབང་གཞུང་ལས། ཆོས་དབྱིངས་ཡང་དག་ཐུགས་རྡོ་རྗེ༔ ཟླ་གམ་དགུ་པའི་སྒོས་དབང་ནི༔ ཞེས་སོགས་ཀྱིས་མཚོན་མདོར་ན་རྒྱུད་ཧེ་རུ་ཀ་གལྤོའི་དགོངས་པ་ཟླ་གམ་དགུ་མ་ཡང་དག་སངས་རྒྱས་མཉམ་སྦྱོར་གྱི་རིམ་པ་དབང་གི་ཆོ་ག་སོགས། སློབ་མ་ལྷར་བསྐྱེད་སྐབས། སྔར་གྱི་དབང་སྟེགས་ལ་འཁོད་པ་ཁྱེད་རང་རྣམས་དཔལ་ཆེན་བཛྲ་ཧེ་རུ་ཀ་མཐིང་ནག་ཞལ་གསུམ་གཡས་དཀར་འཛུམ་པ། གཡོན་དམར་གཤེ་བ། དབུས་མཐིང་རྔམས་པ་ལ་ཉི་ཟླ་འབར་བའི་སྤྱན་གསུམ་མཆེ་བ་གཙིགས་ཤིང་ལྗགས་འདྲིལ་བ། ཉི་མ་བྱེ་བའི་གཟི་བྱིན་འབར་བའི་གར་དགུས་བརྗིད་པ། རྩ་ཕྱག་གཉིས་ཀྱིས་རྡོ་རྗེ་དང་དུང་ཁྲག་བསྣམས་ནས་ཐུགས་ཀར་དཀྲུག་པ། བར་པས་ཁཊྭཱཾ་དང་རྒྱུ་ཞགས། ཐ་མས་གསང་བའི་རྔེའུ་ཆུང་དང་ཁྱུང་གི་ཕྲ་ཐབས་འགྱེད་པ། ཞབས་བཞིས་ལྷ་ཆེན་ཁྱོ་ཤུག་པད་ཟླ་ཉི་མ་ལ་འགྱིང་བ། ཁྲག་ཞག་ཐལ་བས་མཚན་མ་སོགས་དཔལ་དང་དུར་ཁྲོད་ཆས་ཀྱིས་བརྒྱན་པ། ཡུམ་ཀྲོ་དྷི་ཤྭ་རི་གཡས་ཡབ་ལ་འཁྱུད་ཅིང་གཡོན་དུང་ཁྲག་སྟོབ་པ། གཅེར་བུ་ལང་ཚོ་རྒྱས་པ་དང་གཉིས་མེད་དུ་སྦྱོར་བའི་གནས་གསུམ་དུ་ཕྱག་མཚན་གསུམ་སོགས་དང༌། འབེབས་སྔགས་ལ་རུ་ལུ་སྦྱར། དཀྱིལ་འཁོར་མཐོང་བ་བསྟན་པའི་སྐབས། ཡོངས་སུ་རྫོགས་པའི་ནང་དུ་ཟླ་གམ་དབང་གི་ཕོ་བྲང་སྒོ་གཅིག་པའི་ལྟེ་བར་གསེར་འཁོར་རྩིབས་བརྒྱད་པ་སོ་སོའི་ལྟེ་བར་ཟླ་གམ་སྒོ་གཅིག་པ་ནང་བསྟན་གྱིས་བསྐོར་བའི་དབུས་སུ་པདྨ་ཉི་མ་དྲེགས་པ་ཁྱོ་ཤུག་བསྣོལ་བའི་སྟེང་དུ་དཔལ་ཆེན་བཛྲ་ཧེ་རུ་ཀ་སྐུ་མདོག་མཐིང་ནག་འབར་བ་ཆེན་པོའི་འོད་ཟེར་ཅན་ཞལ་གསུམ་ཕྱག་དྲུག་ཞབས་བཞི། གཡས་དཀར་གཡོན་དམར་དབུས་མཐིང་གར་གྱི་ཉམས་དགུས་བརྗིད་པ། ཕྱག་དྲུག་གིས་རྡོ་རྗེ་ཐོད་ཁྲག་ཁཊྭཱཾ་རྒྱུ་ཞགས་གསང་བའི་རྔེའུ་ཆུང་ཁྱུང་ཕྲ་བསྣམས་པ། ཞབས་བཞི་གཡོན་བརྐྱང་པས་ལྷ་ཆེན་ཕོ་མོ་ཉི་ཟླའི་གདན་ལ་རོལ་ཞིང༌། དཔལ་དང་དུར་ཁྲོད་ཀྱི་ཆས་རྣམས་རྫོགས་པས་ཡུམ་ཀྲོ་དྷི་ཤྭ་རི་མ་དང་སྦྱོར་བ། ཕྱོགས་མཚམས་ཀྱི་ཟླ་གམ་བརྒྱད་ཀྱི་དབུས་སུ། ཀཽ་རི་སྔོན་མོ་ཞིང་དབྱུག་དང་ཐོད་པ། ཙཽ་རི་སེར་མོ་མདའ་གཞུ། པྲ་མོ་དམར་མོ་རྡོ་རྗེ་དང་དུང་ཁྲག །བཻ་ཏ་ལི་ནག་མོ་རྡོ་རྗེ་དང་བ་དན། པུཀྐ་སི་དམར་སེར་ཞིང་གི་རྒྱུ་མ་འདྲེན་པ། གྷསྨ་རི་སེར་ནག་རྡོ་རྗེས་ཐོད་ཁྲག་དཀྲུག་པ། སྨེ་ཤ་ནི་མཐིང་ནག་བམ་གྱི་སྙིང་ཕྱུང་ནས་ཟ་བ། ཙཎྜ་ལི་སེར་སྐྱ་རྩེ་གསུམ་དང་བམ་ཆེན་བསྣམས་པ། ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་དབུ་སྐྲ་དམར་སེར་འབར་བ། དུར་ཁྲོད་རོལ་པའི་ཆས་ཅན་གཡོན་བརྐྱང་བའི་སྟབས་ཀྱིས་མེ་དཔུང་འབར་བའི་དབུས་ན་ཞིང་གི་གདན་ལ་རོལ་པ། ཕྱི་ལྟར་ན་གཟུགས་བརྙན་གྱི་དཀྱིལ་འཁོར་གྱི་མཚོན་བྱེད་བྱས་ནས་གཞལ་ཡས་ཁང་ཡེ་ཤེས་ཀྱི་ལྷ་དང་བཅས་པ། བརྟེན་པ་ཡང་ནང་ལྟར་ན་རང་ལུས་ཁོག་པ་དུར་ཁྲོད་ཀྱི་གཞལ་ཡས་ཁང༌། གསང་བ་ཙིཏྟ་རིན་ཆེན་ཟུར་བརྒྱད་པ། དེ་ཁོ་ན་ཉིད་ཚོགས་བརྒྱད་ཡེ་ཤེས་སུ་དག་པའི་དབྱིངས་ཡེ་གཉིས་མེད་དོན་དམ་པའི་བདེན་པ་མཐོང་བའི་རྟགས་ཐབས་ཤེས་ཧེ་རུ་ཀ་ཡབ་ཡུམ་དུ་ཤེས་པས་ཏིང་ངེ་འཛིན་གྱི་དཀྱིལ་འཁོར་བསྒོམས་པས་འབྲས་བུ་ཡེ་ཤེས་ཤིན་ཏུ་རྣམ་པར་དག་པའི་དཀྱིལ་འཁོར་ལ་སྦྱོར་བར་བྱེད་ནུས་པའི་ཚུལ། ཧོ༔ ཕུང་པོ་ཁམས་དང་སོགས། དབང་ཆོག་དཀྱུས་ལ་འཇུག་པས་རིགས་དབང་ལྔ་བསྐུར་ལ། མཐའ་རྟེན་རྣམ་རྒྱལ་བུམ་དབང་ལ། ཧཱུྃ༔ སངས་རྒྱས་རྣམས་ནི་ཐམས་ཅད་ཀྱི༔ ཆོས་དབྱིངས་ཡུམ་གྱི་བུམ་པ་ནས༔ འདི་ཉིད་ལ་ནི་དབང་བསྐུར་བས༔ བག་ཆགས་མ་ལུས་དག་གྱུར་ཅིག༔ ཨོཾ་བཛྲ་ཨ་བྷི་ཥིཉྩ་ཧཱུྃ༔ དེ་ལྟར་དབང་བསྐུར་བའི་ཆུ་རྒྱུན་སོགས། བུམ་དབང་མཐར། རྗེས་འབྲེལ་ནང་ནུས་པ་འཇུག་པ་གསང་བ་མི་ཟད་རྒྱན་གྱི་འཁོར་ལོའི་དབང་ལ། བྷནྡྷ་དཔལ་ཆེན་པོའི་སྐུར་གསལ་བ་སྤྱི་བོར་བཞག་པས་ཡེ་ཤེས་ཀྱི་སྐུ་གཉིས་པ་འཕྲོས་ཏེ་ཁྱེད་རང་གི་ལུས་ལ་ཐིམ་པས་ཡེ་ཤེས་སྒྱུ་མའི་སྐུ་སྣང་ལ་རང་བཞིན་མེད་པ་མངོན་དུ་གྱུར་པའི་མོས་པ་མཛོད། ཐོད་སྐུ་སྤྱི་བོར་བཞག་ལ། ཧཱུྃ༔ སངས་རྒྱས་ཀུན་གྱི་སྐུ་ཡི་དབང༔ ཕྱག་མཚན་རྡོ་རྗེ་ཀ་པཱ་ལ༔ སྐུ་ཡི་དངོས་གྲུབ་ཐོབ་བྱེད་པ༔ ཁྲག་འཐུང་ཡབ་ཡུམ་དབང་བསྐུར་རོ༔ ཨོཾ་ཀ་པཱ་ལ་སིདྡྷི་ཧེ་རུ་ཀ་ཀ་པཱ་ལ་ཨདྷིཥྛ་ཧཱུྃ༔ གསུང་གསང་བ་སྔགས་ཀྱི་དབང་བསྐུར་བ་ལ། གྲགས་སྟོང་སྐྱེ་འགག་གནས་བྲལ་གཞོམ་མེད་ནཱ་དའི་དེ་ཉིད་མཚོན་པའི་ཤེས་རབ་དབྱིངས་ཕྱུག་གི་ཕྱག་རྒྱ་དྲིལ་བུ་འཁྲོལ་ཞིང་གཏད་པས་བརྗོད་མེད་ཀྱི་དོན་ཤེས་པར་གྱིས་ཤིག །དྲིལ་བུ་དཀྲོལ་ཞིང་གཏད་ལ། ཧཱུྃ༔ སངས་རྒྱས་ཀུན་གྱི་གསུང་གི་དབང༔ ཤེས་རབ་དབྱངས་ཀྱི་རྗེས་འགྲོ་བ༔ མཁའ་འགྲོ་སྒྱུ་མའི་སྙིང་པོ་འདིས༔ གྲགས་སྟོང་གསུང་གི་དངོས་གྲུབ་ཐོབ༔ ཝཱཀྐ་ཨ་བྷི་ཥིཉྩཱཨཱཿ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཐུགས་ཡེ་ཤེས་ཀྱི་དགོངས་པ་དོན་དམ་བྱང་ཆུབ་ཀྱི་སེམས་ངོ་སྤྲད་པ་ལ། སྐྱེ་མེད་དབྱིངས་ཀྱི་ཀློང་དུ་འགག་མེད་རིག་པའི་རང་བཞིན་སྟོང་གསལ་སྒྲིབ་གཡོགས་དང་བྲལ་བའི་ངོ་བོར་སངས་རྒྱས་ཐམས་ཅད་གཉིས་སུ་མེད་པའི་ཐིག་ལེར་མཉམ་པར་སྦྱོར་བའི་གནས་ལུགས་རྡོ་རྗེ་མི་ཕྱེད་པའི་ཆོས་བདུན་གྱི་ཕྱག་རྒྱས་ངོ་སྤྲད་པར་མོས་ཤིག །རྡོ་རྗེ་སྙིང་གར་བཞག་ལ། ཧཱུྃ༔ སངས་རྒྱས་ཀུན་གྱི་ཐུགས་ཀྱི་དབང༔ གཉིས་མེད་ཡེ་ཤེས་སྐྱེད་པ་པོ༔ རྡོ་རྗེ་ལྟ་བུའི་ཏིང་འཛིན་ནི༔ ཆོས་ཀྱི་རྒྱལ་པོར་དབང་བསྐུར་རོ༔ ཙིཏྟ་སིདྡྷི་བཛྲ་ཨ་བྷི་ཥིཉྩ་ཧཱུྃ༔ གཉིས་པ་བདེ་བ་ཆེན་པོ་ནི་ཟག་མེད་སྐུ་དང་ཡེ་ཤེས་ཀྱི་ཆོས་ཁམས་རྒྱ་མཚོ་དང་འབྲལ་མི་ཤེས་པ་མཚོན་པའི་ཕྱིར་རྡོར་དྲིལ་ལག་གཉིས་སུ་གཏད་དེ་བསྣོལ་ཞིང་བཟུང་བས་དཔལ་ཆེན་པོའི་ཡོན་ཏན་དང་ཕྲིན་ལས་ལ་དབང་བསྒྱུར་བར་མོས་ཤིག །རྡོར་དྲིལ་གཏད་ནས་འཁྱུད་རྒྱ་བྱར་གཞུག ཧཱུྃ༔ ཐབས་དང་ཤེས་རབ་གཉིས་མེད་པའི༔ དམ་ཚིག་རྡོ་རྗེ་དྲིལ་བུ་འདི༔ ཡོན་ཏན་ཕྲིན་ལས་བསྒྲུབ་པའི་ཕྱིར༔ ཕྲིན་ལས་རྫོགས་བྱེད་དབང་བསྐུར་རོ༔ ཨོཾ་བཛྲ་གཎྜེ་ཨ་བྷི་ཥིཉྩ་མཾ༔ བདེ་སྟོང་རྡོ་རྗེ་མཉམ་པའི་བརྟུལ་ཞུགས་ཀྱིས་དུར་ཁྲོད་ལ་གནས་པའི་མ་སྲིང་མཁའ་འགྲོ་དགྱེས་དགུར་རོལ་ཞིང་དབང་དུ་བསྡུས། གདུག་པ་ཅན་ཚར་གཅོད་པའི་བརྡ་རྟགས་སུ་དཔལ་གྱི་ཕྱག་མཚན་གཉིས་གཏད་པར་མོས་ཤིག ཁཊྭཱཾ་དང་གསང་བའི་རྔེའུ་ཆུང་གཏད་ལ། ཧཱུྃ༔ ཧེ་རུ་ཀ་དཔལ་ཁཊྭཱཾ་ག༔ མཁའ་འགྲོ་འབོད་པའི་རྔེའུ་ཆུང༔ དཔའ་བོ་ཆེན་པོས་བླང་བར་བགྱི༔ ཁྱོད་ཀྱིས་ཀྱང་ནི་རྟག་ཏུ་ཟུངས༔ སྣང་སྟོང་གཉིས་མེད་སེམས་ཀྱི་གཤིས་ལུགས་རིག་པ་ཡུལ་མེད་རང་གསལ་རང་རྩལ་རང་གྲོལ་གྱི་ཡེ་ཤེས་འབར་བ་ཀློང་དགུའི་ཚོགས་བརྒྱད་འཁྲུལ་སྣང་གི་མུན་པ་བསལ་ནས་འོད་གསལ་ལྟ་སྒོམ་སྤྱོད་པའི་འབྲས་བུ་བློ་བྲལ་དུ་དབུགས་དབྱུང་བར་མོས་ཤིག །བྷནྡྷའི་ཞུན་གྱི་མར་མེ་སྦར་ཏེ་གཏད་ལ། ཧཱུྃ༔ སྐྱེ་མེད་དབྱིངས་ལས་ཡེ་ཤེས་ཆེ༔ སེམས་ཅན་མ་རིག་མུན་པ་སེལ༔ སེམས་ཉིད་འོད་གསལ་ཆོས་ཀྱི་དབྱིངས༔ གསལ་བྱེད་མར་མེས་དབང་བསྐུར་རོ༔ ཨོཾ་བཛྲ་ཨཱ་ལོ་ཀེ་ཛྙཱ་ན་ཨ་བྷི་ཥིཉྩ་མཾ༔ དེ་ལྟར་དབང་དྲུག་གིས་བྱིན་རླབས་ལས་དབང་པོ་དྲུག་དང་སྐྱེ་མཆེད་བྱེད་པའི་རྣམ་པར་ཤེས་པ་ཚོགས་དྲུག་འགགས་ནས་ཡེ་ཤེས་དྲུག་མངོན་དུ་གསལ་བ་ཡིན་ནོ༔ ཞེས་རྟོགས་པ་བསྐྱེད། དེ་ལྟར་གཞི་ལམ་འབྲས་བུའི་དཀྱིལ་འཁོར་བསམ་ཡས་ཀྱི་རོལ་པ་གང་ལྟར་བཀོད་ཀྱང་དོན་དམ་ལ་འཇིགས་མེད་ཀུན་ཏུ་བཟང་པོ་ཆེ་མཆོག་ཧེ་རུ་ཀ་གཅིག་གི་ཡེ་ཤེས་ལས་གཞན་དུ་མ་གྱུར་པས་མཐར་ཕྱིན་འབྲས་བུའི་ཚུལ་ནི། གལྤོ་ལས༔ གཞལ་ཡས་ཁང་ཆེན་ཡེ་ཤེས་ཏེ༔ འཁོར་འདས་མཉམ་པ་གྲུ་བཞི་ལ༔ སྒོ་བཞི་དྲན་པ་ཉེར་བཞག་བཞི༔ རྣམ་ཐར་བརྒྱད་ལྡན་རྟ་བབས་སོ༔ རིན་ཆེན་སྒོ་སྟེ་ཐུགས་རྗེའི་ངང་༔ ཡང་དག་སྤོང་བཞི་ཏྭ་ར་ཎ༔ དྲན་པ་ཉེར་བཞག་སྒོ་ཁྱུད་དང༔ རྫུ་འཕྲུལ་རྐང་བཞི་སྒོ་ཡི་ཁྱམས༔ ཕྲེང་བ་བྱང་ཆུབ་ཡན་ལག་བདུན༔ འཕགས་ལམ་བརྒྱད་ཀྱི་ཀ་བ་མཛེས༔ ལམ་གྱི་ཡེ་ཤེས་རྔ་ཡབ་དང༔ ཉོན་མོངས་ཚོགས་འཇོམས་མུ་ཏིག་ཕྲེང༔ དྲིལ་བུ་བ་དན་རླུང་བསྐྱོད་པ༔ ཤེས་རབ་ཆོས་ཀྱི་སྒྲ་སྒྲོགས་དང༔ ཆེ་བའི་ཡོན་ཏན་འདུས་པའི་རྟགས༔ བདུད་བཞི་འཇོམས་པའི་རྒྱལ་མཚན་དང༔ ཐོད་ཕྲེང་སྐུ་གསུམ་ཐོབ་པའི་རྟགས༔ གཞལ་ཡས་ཁང་མཆོག་དམ་པའོ༔ བཅུ་ལྡན་ཡེ་ཤེས་དཔལ་ཡང་དག༔ གཉིས་ལྡན་ཟག་མེད་ཡུམ་གྱི་སྐུ༔ རྣམ་ཤེས་གནས་དག་མཁའ་འགྲོ་བརྒྱད༔ སྣོད་བཅུད་ལྷ་དང་གཞལ་ཡས་ཁང༔ ཕུང་པོ་ལྔ་ལ་སོགས་པའི་ཆོས༔ དེ་ནི་སྤང་བར་བྱ་བ་མིན༔ ཐེག་པ་གསུམ་ནི་སྤང་བ་མིན༔ ཀ་ཏི་ལི་བཞིན་ཡོངས་སུ་བཟུང༔ ཞེས་གསུངས་པ་ལྟར་ཤེས་པར་བྱ་བ་ནི་གནད་ཀྱི་བཅུད་ཕུར་དམ་པའོ། །དེ་ལྟར་རྡུལ་ཚོན་སྤྲུལ་པའི་དཀྱིལ་འཁོར་སོགས་བུམ་དབང་གི་དག་བརྗོད་ནས་བཟུང་དབང་གོང་མ་གསུམ་ནས་དམ་ཚིག་བསྒྲགས་བཟུང་ཡོན་འབུལ་དགེ་བསྔོ་རྣམས་དང༌། ལས་བྱང་གི་རྗེས་རིམ་བཅས་མཐར་དབྱུང་བའོ། །མཁྱེྃན་གཉིས་ཡེ་ཤེས་སྙིང་པོའི་སྲོག །བརྩེྃ་བའི་མཛེས་སྤྲིན་བརྡལ་བ་ལས། །བདེ་ཆེན་འོདྃ་ཟེརྃ་འབུམ་འཕྲོ་བའི། །དཔལ་འདི་བདག་གི་སྐལ་པར་ཐོབ། །ཐུགས་སྒྲུབ་དཔལ་ཆེན་འདུས་པའི་སྒོས་བཀའ་ཁྲག་འཐུང་རིགས་བཞི་ལས། ཐུགས་རྡོ་རྗེ་ཡང་དག་ཧེ་རུ་ཀ་སངས་རྒྱས་མཉམ་སྦྱོར་ཟླ་གམ་དགུ་པའི་དབང་བསྐུར་བའི་ལེའུ་ཚན་བརྒྱད་པ་སྟེ་རྡོ་རྗེ་ཐུགས་མཆོག་རྩལ་གྱིས་སྦྱར་བའོ། ༈ རྡོ་རྗེ་ཁྲོས་པའི་དབྱིངས་རིག་མཚོན་ཆེན་པོས། །གཟུང་འཛིན་ལྷ་མིན་ཕྱེ་མར་འཐག་པའི་དབལ། །སྙིང་རྗེ་རྔམས་ལ་སངས་རྒྱས་ཐམས་ཅད་ཀྱི། །ཕྲིན་ལས་དབང་བསྐུར་རྫོགས་པའི་དཀྱིལ་འཁོར་རྒྱལ། །ཕྲིན་ལས་རིགས་ཀྱི་ཁྲག་འཐུང་གི་རྗེ་བཙན་རྡོ་རྗེ་ཕུར་པ་བདུད་དཔུང་ཟིལ་གནོན་གྱི་དབང་གི་ཆོ་གས་སྨིན་པར་བྱེད་ན་གང་དུ་བྱ་བའི་གནས་སུ་གཞུང་མཐུན་བཅོས་མའི་དཀྱིལ་འཁོར་གཉིས་གང་རུང་དང༌། ཐུན་མོང་རིགས་དབང་ལྔ། རྗེས་གནང་ཆས། ཐོད་པའི་བདུད་རྩི། རིག་ཙཀ ཤེལ་རྡོ། མེ་ལོང༌། གཙོ་བོའི་སྐུ། དར་དམར་ལ་བྲིས་པའི་སྔགས་བྱང༌། ཕུར་པ། ཡེ་ཤེས་སེམས་དཔའ་རྡོར་སེམས་ཙཀླི། དུར་ཁྲོད་དཔལ་ཆས། རྡོར་དྲིལ། སྒྲོལ་དབང་གི་ཆས་ལྕགས་ཧོམ་དུ་ལིངྒ། སྒྲོལ་ཕུར། རལ་གྲི། ཐུན་རྫས་བཅས་འདུ་བྱ། དངོས་གཞི་བདག་མདུན་གྱི་སྒྲུབ་ཚུལ་སྔ་མ་ལྟར་ལས། བཟླས་པ་ལ། ཧཱུྃ༔ ཐུགས་ཀ་དཔལ་གྱི་བེའུའི་དཀྱིལ་འཁོར་ནས༔ སྒོ་གཅིག་རིན་ཆེན་གཞལ་ཡས་ཁང༔ བདེ་སྟོང་དབྱེར་མེད་ངང་ཉིད་ལས༔ ཆོས་ཀྱི་སྐུ་ལས་ལོངས་སྐུར་ཤར༔ པདྨ་ཟླ་བའི་གདན་ལ་བཞུགས༔ སྐྱོན་གྱི་མ་གོས་གཏི་མུག་སེལ༔ ཡབ་ཡུམ་གཉིས་མེད་ཟག་མེད་སྐུ༔ སྐུ་མདོག་དཀར་གསལ་རྣམ་དག་དབྱིངས༔ རྡོ་རྗེ་དྲིལ་བུ་ཕྱག་ན་བསྣམས༔ ཤེས་རབ་བྱང་ཆུབ་སེམས་དང་ལྡན༔ རྟོག་མེད་མི་འགྱུར་སྐྱིལ་ཀྲུང་བཞུགས༔ མཁའ་དབྱིངས་བདེ་ཆེན་སྐུ་ལ་བསྟོད༔ བདེ་བ་ཆེན་པོའི་འོད་ཟེར་གྱིས༔ རྒྱལ་བ་མཆོད་ཅིང་ཐུགས་དམ་བསྐུལ༔ དངོས་གྲུབ་གྲུབ་པས་བདག་བྱིན་བརླབས༔ ཡང་འཕྲོས་བརྟན་གཡོ་ཐ་མལ་པའི༔ སྣང་ཞེན་དག་པས་སྣོད་དང་བཅུད༔ ལྷ་དང་གཞལ་ཡས་རོལ་པར་ཤར༔ ཞེས་སེམས་དཔའ་སུམ་བརྩེགས་ལ་སེམས་འཛིན་དང་སྤྲོ་བསྡུའི་དམིགས་པའང་བྱ། དོ་ལིའི་ཁྱད་པར་སྔགས་ཕྲེང་དབུས་རྭ་ནས་ཐོན་དམ་ཚིག་སེམས་དཔའི་ཤངས་བུག་གཡས་པ་བརྒྱུད། མདུན་བསྐྱེད་ཀྱི་ཤངས་བུག་གཡོན་པ་ནས་ཐུགས་ཀར་ཐིམ། སླར་བྱུང་བ་ཤངས་གཡས་ནས་རང་གི་སྣ་བུག་གཡོན་ནས་ཞུགས། སྙིང་དབུས་སུ་ཐིམ་པར་བསམ་གསུངས། བུམ་སྒྲུབ། བདག་འཇུག་སོགས་ཚང་བར་གྲུབ་རྗེས། སློབ་མ་རྣམས་ལ་ཁྲུས་བྱ། གྲལ་དུ་འཁོད་ནས་བགེགས་གཏོར་བཏང༌། སྲུང་འཁོར་བསྒོམ་ལ། ཆོས་བཤད་ནི། སྤྱིར་བདག་ཅག་གི་སྟོན་པ་ཐབས་ལ་མཁས་ཤིང་ཐུགས་རྗེ་ཆེན་པོ་དང་ལྡན་པ་ཉིད་ཀྱིས་གདུལ་བྱ་སེམས་ཅན་གྱི་ཁམས་དང་བསམ་པའི་རྗེས་སུ་འགྲོ་བའི་ཆོས་སྒོ་དཔག་ཏུ་མེད་པ་ཞིག་དབྱེ་གནང་བར་མཛད་པ་ཐམས་ཅད་སྤང་གཉེན་གྱི་སྒོ་ནས་བསྡུ་ན་ཉོན་མོངས་དུག་གསུམ་ཆ་མཉམ་དང་བཅས་པའི་གཉེན་པོར་སྡེ་སྣོད་གསུམ་མམ་བཞི། དེ་ལའང་གཞུང་དང་མན་ངག་ཙམ་གྱིས་བསྡུ་ན་གཞུང་མཚན་ཉིད་ཕར་ཕྱིན་ཐེག་པ། མན་ངག་གསང་ཆེན་རྡོ་རྗེ་ཐེག་པ་གཉིས་སུ་འདུ་བ་ལས་སྐབས་སུ་བབ་པ་སྔ་མ་ལས་ཁྱད་པར་བཞིས་འཕགས་པ་རྡོ་རྗེ་ཐེག་པ། དེ་ལའང་ཤེས་བྱེད་རྒྱུད་སྡེའི་རྣམ་གྲངས་བསམ་པའི་སྤྱོད་ཡུལ་ལས་འདས་ཀྱང་ལྟ་སྤྱོད་ཙམ་གྱིས་བསྡུ་ན། སྤྱོད་པ་གཙོ་བོར་སྟོན་པ་བྱ་རྒྱུད། ལྟ་བ་གཙོ་བོར་སྟོན་པ་རྣལ་འབྱོར་རྒྱུད་གཉིས་སུ་འདུ་བ་ལས་འདིར་ཕྱི་མ། དེ་ལའང་རྣལ་འབྱོར་གྱི་རྒྱུད་ཙམ་དང་བླ་མེད་གཉིས་ལས། འདི་ནི་རྣལ་འབྱོར་བླ་ན་མེད་པའི་རྒྱུད་ཡིན་ལ། ནང་གསེས་སུ་བསྐྱེད་རྫོགས་རྫོགས་ཆེན་གསུམ་དུ་སྟོན་པའི་གཞུང་རྒྱུད་ལུང་མན་ངག་གི་ཤིང་རྟ་ཆེན་པོ་གསུམ་ལས་རྒྱུད་མ་ཧཱ་ཡོ་ག །དེ་ལའང་རྒྱུད་སྡེ་དང་སྒྲུབ་སྡེ་གཉིས་ལས་འདིར་སྒྲུབ་སྡེ། དེ་ལའང་ཡེ་ཤེས་ལྷའི་སྒྲུབ་པ་ལྔ། འཇིག་རྟེན་པའི་གསུམ་སྟེ་བརྒྱད་ལས། འདིར་ནི་གདུག་པ་ཅན་འདུལ་བའི་ཐབས་གཙོ་བོར་སྟོན་ཅིང་ཡེ་ཤེས་ལྷ་རིགས་ལྔ་ལས་ཕྲིན་ལས་ཀྱི་རིགས་རྡོ་རྗེ་ཕུར་པའི་སྒྲུབ་སྡེ་སྟེ། བསྒྲུབ་པར་བྱ་བའི་ལྷ་ནི་སྤྱིར་རིགས་ལྔ་ཁྲག་འཐུང་འདུས་པའི་སྤྱི་དཔལ་ཡིན་ཀྱང༌། ཁྱད་པར་དུ་ཀརྨ་ཧེ་རུ་ཀ་ནི། ཞི་བའི་དུས་ན་རིགས་འདུས་རྡོ་རྗེ་སེམས་དཔའ། ཕྱི་ཀྲི་ཡོག་གི་དུས་སུ་རྡོ་རྗེ་རྣམ་པར་འཇོམས་པ། བྱང་ཆུབ་སེམས་དཔའི་ཚུལ་དུ་གསང་བའི་བདག་པོ། ཁྲོ་བོའི་སྐུར་བསྟན་པ་རྡོ་རྗེ་གཙུག་ཏོར། ཡང་དག་ཧེ་རུ་ཀ་བདུད་རྩི་འཁྱིལ་བ་ལ་སོགས་པ་དུ་མའི་ཚུལ་སྟོན་ཅིང༌། སྒྲུབ་བྱེད་རྒྱུད་སྡེས་དབྱེ་ན་ལྷ་དེ་དག་རྒྱུད་སྡེ་ཆེན་པོ་བཞི་ཀ་ལ་འཇུག་པ་དང༌། བྱེ་བྲག་ཕུར་པ་ཁོ་ནའི་རྒྱུད་ལའང་དཔག་བསམ་ཤིང་ལ་དཔེ་བྱས་ནས་རྩ་བ་ལྟ་བུ་སྐུའི་རྒྱུད་སྡེ་བཞི། སྡོང་པོ་ལྟ་བུ་བརྒྱད། ཡལ་ག་ལྟ་བུའི་རྒྱུད་བཅུ། ལོ་མ་ལྟ་བུ་གསུམ། མཛེས་བྱེད་མེ་ཏོག་ལྟ་བུ་བཞི། སྨིན་པ་འབྲས་བུ་ལྟ་བུ་བཞི། མ་ཚང་བ་ཁ་སྐོང་བའི་རྒྱུད་གསུམ་སྟེ་རྒྱུད་སྡེ་སུམ་ཅུ་རྩ་དྲུག་དང༌། མན་ངག་གི་དོན་རྒྱས་པར་སྟོན་པ་རྩ་རྒྱུད་རྡོ་རྗེ་ཁྲོས་པ་དང་རྒྱུད་བཅུ་བདུན་སོགས་གྲུབ་པ་དང་མཁའ་འགྲོས་དབྱེ་བསྡུ་མཐའ་ཡས་པ་ཐམས་ཅད་མཁའ་འགྲོ་ལས་ཀྱི་དབང་མོས་རིག་འཛིན་པྲ་བྷ་ཧསྟི་ལ་གཏད། ཕྱིས་སངས་རྒྱས་ཀུན་གྱི་ཕྲིན་ལས་ཀྱི་སྤྱི་གཟུགས་སློབ་དཔོན་ཆེན་པོ་པདྨས་བལ་ཡུལ་ཡང་ལེ་ཤོད་ཀྱི་བྲག་ཕུག་ཏུ་ཡང་དག་ཧེ་རུ་ཀ་ཕྱག་རྒྱ་ཆེན་པོའི་མཆོག་གི་དངོས་གྲུབ་བསྒྲུབ་པའི་ཚེ་མི་སྲུན་ནག་པོའི་ཕྱོགས་ཀྱིས་བར་ཆད་བརྩམས་པ་ན་སློབ་དཔོན་ཆེན་པོ་པྲ་བྷ་ཧསྟིས་བི་ཏོ་ཏ་མ་འབུམ་སྡེ་ལས་ཕུར་པའི་རྒྱུད་མི་ཁུར་གཉིས་སྐྱེས་སུ་ཕུལ་བའི་གླེགས་བམ་ཕེབས་པ་ཙམ་གྱིས་བར་ཆད་ཞི་ནས་དངོས་གྲུབ་འབད་མེད་དུ་བརྙེས་པའི་ལྷ་མཆོག་འདི་ཉིད་ལ་བཀའ་མ་རྒྱལ་པོ་ལུགས་དང༌། ཇོ་མོ་ལུགས། ལྕམ་ལུགས། འཁོན་ལུགས། སོ་ཟུར་གནུབས་གསུམ། རམ་འགོས་ཁྱུང་གསུམ། དམ་པ་རྒྱ་གར་དང༌། པཎ་ཆེན་ཤཱཀྱ་ཤྲཱིའི་ཕུར་པ་དཔའ་བོ་གཅིག་པ་སོགས་དང༌། གཏེར་མ་སྤུ་གྲི་རྣམ་གསུམ་གཙོ་བོར་གྱུར་པའི་བཀའ་སྲོལ་རྒྱས་བསྡུས་མཐའ་ཀླས་པ་གསར་རྙིང་མཁས་གྲུབ་ཀུན་གྱི་ཐུགས་དམ་གསང་བའི་ལྷ་མཆོག་ཏུ་གྱུར་པས་ད་ལྟའི་བར་མཚན་རྟགས་མངོན་གྱུར་གྱི་ངོ་མཚར་ཅན་དུ་མ་བཞུགས་པ་ལས། ད་ལམ་སྐབས་སུ་བབས་པ་འདི་ནི་རྭ་སྟོན་སྟོབས་ལྡན་རྡོ་རྗེས་འོན་ཕུ་སྟག་ཚང་ནས་སྤྱན་དྲངས་པའི་ཕུར་པའི་ལུང་བསྟན་ལས། བི་མའི་སྤྲུལ་པ་པདྨའི་མིང་འཛིན་ལ༔ ཡེ་ཤེས་རྩལ་བརྡོལ་དག་སྣང་གནས་སྒོ་འབྱེད༔ ཅེས་གསུངས་པ་ལྟར་ཀུན་མཁྱེན་རིག་འཛིན་ཆེན་པོ་དཔལ་པདྨ་དབང་ཆེན་ཡེ་ཤེས་རོལ་པ་རྩལ་ལ་སློབ་དཔོན་ཆེན་པོ་དང་བི་མ་བཻ་རོ་གསུམ་གཙོ་འཁོར་དུ་བཞུགས་པས་ཞལ་གཟིགས་ཏེ་རིག་རྩལ་གྱི་དབང་བསྐུར་བའི་རྗེས་ཐོག་ཏུ། དེ་སད་པའི་ཤེས་པ་སྐད་ཅིག་མར། །གསུང་མཆོག་བདེ་བ་ཆེན་པོ་ནི། །ཡུམ་ཡེ་ཤེས་ཌཱ་ཀི་མཚོ་རྒྱལ་མ། །བུ་མོ་མཛེས་པའི་ཆ་བྱད་ཅན། །དེས་མཚན་ལྡན་གྱི་བྷནྡྷ་སྲུབ་མེད་ཅིག །བདག་ཉིད་ཀྱི་ལག་ཏུ་སྤྲད་པ་དང༌། །འདི་ཆོས་རྒྱལ་ཁྲི་སྲོང་ལྡེའུ་བཙན་གྱི། །དབུ་ཐོད་ངོ་མ་ཡིན་ནོ་གསུངས། །ཡང་ཅུང་ཞིག་དགོངས་ནས་ཐོད་པ་དེ། །རེ་ཞིག་ཕར་ལ་བླངས་པའི་མོད། །མིག་འཕྲུལ་ལྟ་བུའི་སྣང་ཆ་ལ། །སྔ་མ་དང་དབྱེ་བར་མི་བཟོད་པའི། །ཐོད་པ་ཞིག་དེ་ཡི་ཟླ་ལ་སྦྱར། །གཉིས་ཀ་ལྷན་ཅིག་སྩོལ་བ་དང༌། །ད་འདི་གཉིས་དབྱེ་བ་ཨི་ཕྱེད་གསུངས། །དེ་དཔྱད་དུ་མ་བཟོད་ནེམ་ནུར་ངང༌། །གསལ་སྣང་དེ་ནམ་མཁའི་འཇའ་ལྟར་ཡལ། །རྗེ་ཡབ་ཡུམ་དེ་སྙིང་ལ་དྲན་དྲགས་ནས། །སྐྱོ་ཤས་ཀྱི་གདུང་བ་བཟོད་ཐབས་བྲལ། །རིག་པ་འདུན་པའི་ཏནྟྲ་ལས། བརྡ་དང་བརྡ་མཚོན་གོ་བ་ནི། །དབང་གི་ནང་ནས་དབང་བཀའོ། །ཞེས་པའི་དོན་ལ་ངེས་ཤེས་རྙེད། །ཅེས་དང༌། དེ་ཚེ་རླངས་ཆེན་དཔལ་སེང་གི །ཡང་སྲིད་པདྨ་ཚེ་དབང་རྩལ། །མཇལ་ཏེ་རང་གཏེར་སྟག་ཚང་གི །རྡོ་རྗེ་ཕུར་པའི་དབང་བསྐུར་རྨིས། །ཅེས་མོན་སྤ་གྲོ་སྟག་ཚང་གི་གུ་རུ་ཡབ་ཡུམ་གྱི་སྒྲུབ་ཕུག་ཏུ་རླངས་ཆེན་དཔལ་གྱི་སེང་གེ་དངོས་ལས་རྡོ་རྗེ་ཕུར་པ་རྒྱལ་པོ་ལུགས་ཀྱི་དབང་བསྐུར་གསན་ནས་ཕུར་པའི་རྒྱུད་ལས་བཀའ་བསྡུ་གནང་ཞིང་དངོས་གྲུབ་བརྙེས་པས་གངས་ཅན་བསྟན་འགྲོའི་གཤེད་མ་དབྱིངས་སུ་བསྒྲལ་བ་སོགས་ཕྲིན་ལས་ཐོགས་མེད་ཀྱི་སྟོབས་རྩལ་མངོན་དུ་མཛད་པ་ཀུན་མཁྱེན་འཇིགས་མེད་གླིང་པ་ལ་བཀའ་བབ་ཉེ་བརྒྱུད་དུ་གྱུར་པ་ཀློང་ཆེན་སྙིང་གི་ཐིག་ལེའི་ཆོས་སྡེ་དྲག་པོ་དཔལ་ཆེན་འདུས་པའི་ཕྲིན་ལས་ཀྱི་རིགས་ཀྱི་སྒོས་བཀའ་རྡོ་རྗེ་ཕུར་པ་བདུད་དཔུང་ཟིལ་གནོན་གྱི་དབང་བསྐུར་བ་སྟེ། སྤྱིར་སློབ་དཔོན་སངས་རྒྱས་གཉིས་པས་འདི་ཉིད་ཐུགས་དམ་གྱི་ལྷར་མཛད་པའི་རྟེན་འབྱུང་གིས་བོད་ཡུལ་གསར་རྙིང་མཁས་གྲུབ་ཕལ་ཆེར་ལྷག་པའི་ལྷ་འདི་གྲུབ་པའི་མཚན་མ་མངོན་དུ་གྱུར་པ་དང༌། རྣལ་འབྱོར་པས་བྱང་ཆུབ་སྒྲུབ་པའི་བར་ཆད་སེལ་བ་ལ་ཆེས་ཟབ་པས་ལྷ་གཞན་བསྒྲུབས་ཀྱང་རྡོ་རྗེ་གཞོན་ནུ་སྲུང་མའི་ཚུལ་དུ་བསྟེན་དགོས་པར་གསུངས་ཤིང༌། ཕུར་པ་མཁན་པོ་དཔལ་གྱི་ཡོན་ཏན་བརྒྱད་དང་ལྡན་པར་གྲགས་པ་སོགས་ཕྲིན་ལས་ཀྱི་རྣོ་མྱུར་བྱིན་རླབས་དང་ལྡན་པ་ཐུན་མོང་མ་ཡིན་པར་ངེས་པས་དབང་བསྐུར་ཐོབ་པ་ཙམ་ལའང་དགོས་པ་དུ་མ་དང་ལྡན་པ་ལགས་ཏེ། དེ་ལའང་ཐོག་མར་ཕྱི་ནང་གི་འཇུག་པའི་ཆོས་རྣམས་ཞུ་བའི་དོན་དུ་སོགས་ནས་བྱིན་འབེབས་ཀྱི་སློབ་མ་ལྷར་བསྐྱེད་པ་དཔལ་ཆེན་དབང་སྐབས་བཞིན་ལ། སྔར་གྱི་དབང་སྟེགས་ལ་འཁོད་པ་དཔལ་ཆེན་རྡོ་རྗེ་གཞོན་ནུའི་སྐུར་གྱུར་པ་ནི། སྐུ་མདོག་མཐིང་ནག་གཡས་དཀར་གཡོན་དམར་བའི་དབུ་གསུམ་ཕྱག་དྲུག་ཞབས་བཞི་པ། ཕྱག་དང་པོ་གཉིས་ཀྱིས་རྡོ་རྗེ་རྩེ་དགུ་དང་མེ་དཔུང༌། བར་པ་གཉིས་ཀྱིས་རྩེ་ལྔ་དང་ཁཊྭཱཾ་ག །ཐ་མ་གཉིས་ཀྱིས་རི་རབ་ཀྱི་ཕུར་བུ་འདྲིལ་བ། ཞབས་བཞི་གཡས་བསྐུམ་གཡོན་བརྐྱང་བའི་སྟབས་ཅན། ཡུམ་འཁོར་ལོ་རྒྱས་འདེབས་མ་དྲིལ་བུ་དང་ཐོད་ཁྲག་འཛིན་པ་དང་མཉམ་པར་སྦྱོར་བ། དུར་ཁྲོད་རོལ་པའི་ཆས་བརྒྱད་དང་དཔལ་གྱི་ཆས་བཅུ་ཡོངས་སུ་རྫོགས་པའི་བདག་ཉིད་ཅན་པད་ཟླ་ཉི་མ་ལྷ་ཆེན་ཕོ་མོ་བསྣོལ་བའི་གདན་ལ་བཞུགས་པའི་གནས་གསུམ་དུ་ཕྱག་མཚན་གསུམ་སོགས་དང་འབེབས་སྔགས་ལ་ཀཱི་ལ་ཡ་སྦྱར། དཀྱིལ་འཁོར་མཐོང་བ་བསྟན་པའི་སྐབས། ཡོངས་སུ་རྫོགས་པའི་ལྟེ་བར་གནམ་ལྕགས་ཀྱི་འཁོར་ལོ་རྩིབས་བཅུ་པ་མུ་ཁྱུད་དང་བཅས་པའི་ལྟེ་བའི་དབུས་སུ་གྲུ་གསུམ་མཐིང་ནག་འབར་བ་རྡོ་རྗེའི་བྲག་ཆེན་པདྨ་ཉི་ཟླ་རུ་ཏྲ་ཕོ་མོ་བྱི་ཆིངས་སུ་བསྣོལ་བའི་སྟེང་དུ་སངས་རྒྱས་ཀུན་གྱི་ཕྲིན་ལས་ཀྱི་སྤྱི་དཔལ་འཇིགས་མཛད་ཀརྨ་ཀཱི་ལ་ཡ་དཔལ་ཆེན་རྡོ་རྗེ་གཞོན་ནུ་སྐུ་མདོག་མཐིང་ནག་ཞལ་གསུམ་ཕྱག་དྲུག་པ། གཡས་དཀར་གཡོན་དམར་དབུས་མཐིང་ནག །ཕྱག་དྲུག་གིས་རྡོ་རྗེ་རྩེ་དགུ་རྩེ་ལྔ། མེ་དཔུང་ཁཊྭཱཾ། ཐ་མ་གཉིས་ཕུར་བུ་འདྲིལ་བ། དཔལ་དང་དུར་ཁྲོད་རོལ་པའི་ཆས་ཅན། ཡུམ་འཁོར་ལོ་རྒྱས་འདེབས་དྲིལ་བུ་དང་དུང་དམར་འཛིན་པ། ཡེ་ཤེས་ཀྱི་མེ་དཔུང་འབར་བའི་ཀློང་ན་འགྱིང་བའི་གཡོན་ཕྱོགས་སུ་སྒྲོལ་ཡུམ་ཨེ་ཀ་ཙ་ཏི་གྲི་གུག་དང་ཐོད་ཁྲག་བསྣམས་པ། ཕྱི་རོལ་གྱི་རྩིབས་བཅུ་ལ་སྟེང་དུ་ཧཱུྃ་ཀཱ་ར། ཤར་དུ་རྣམ་རྒྱལ། ཤར་ལྷོར་དབྱུག་སྔོན། ལྷོ་རུ་གཤིན་རྗེ། ལྷོ་ནུབ་ཏུ་མི་གཡོ་བ། ནུབ་ཏུ་རྟ་མགྲིན། ནུབ་བྱང་དུ་འདོད་རྒྱལ། བྱང་དུ་བདུད་རྩི་འཁྱིལ་བ། བྱང་ཤར་དུ་ཁམས་གསུམ་རྣམ་རྒྱལ། འོག་ཏུ་སྟོབས་པོ་ཆེ་སྟེ་ཁྲོ་བོ་བཅུ་ཡབ་ཡུམ་ཕྲ་ཕྱག་དང་བཅས་པ། སྒོ་བཞིར་སྒོ་མ་བཞི། མུ་རན་ལ་ཕུར་སྲུང་དམ་ཅན་བཅུ་གཉིས་དང་བཅས་དཀྱིལ་འཁོར་གསུམ་གྱི་ལྷ་ཚོགས་རྣམ་འགྱུར་མ་འདྲེས་ཅིར་ཡང་སྟོན་པ་ཐམས་ཅད་ངོ་བོ་དཔལ་ཆེན་པོ་གཅིག་གི་བདེ་སྟོང་ཡེ་ཤེས་སྒྱུ་འཕྲུལ་དྲྭ་བའི་ཐིག་ལེར་གཉིས་སུ་མེད་པར་ལྷུན་གྱིས་གྲུབ་པའི་དོན། བརྡ་རྟགས་བཅོས་མའི་དཀྱིལ་འཁོར་འདིས་མཚོན་ཏེ་ངོ་འཕྲོད་པ་ཉིད་རང་བྱུང་རྡོ་རྗེའི་ལུས་ལ་གདོད་ནས་བཞུགས་པའི་ཚུལ། ཧོ༔ ཕུང་པོ་ཁམས་དང་སྐྱེ་མཆེད་སོགས། དབང་ཆོག་དཀྱུས་ལ་འཇུག་པས་རིགས་དབང་ལྔ་བསྐུར་ལ། མཐའ་རྟེན་རྣམ་རྒྱལ་བུམ་པའི་དབང་ལ། ཧཱུྃ༔ དཔལ་ཆེན་རྡོ་རྗེ་གཞོན་ནུ་དང༔ ཡུམ་ཆེན་འཁོར་ལོ་རྒྱས་འདེབས་གཉིས༔ གཡོན་ནས་ཡུམ་གྱིས་ཡབ་ལ་འཁྱུད༔ ཕྱག་གིས་བུམ་པ་རབ་ཏུ་བླང༔ ཡེ་ཤེས་དབང་གི་ཆུ་བོ་འདི༔ ཉོན་མོངས་མ་གོས་དཀར་ལ་འཚེར༔ སྐལ་ལྡན་རིགས་ཀྱི་བུ་ཁྱོད་ལ༔ སྤྱི་བོར་བུམ་པས་དབང་བསྐུར་བས༔ ཉོན་མོངས་གསུམ་དང་དུག་གསུམ་སྦྱངས༔ དབང་གི་ཆུ་བོ་རྒྱུན་བཞིན་བབ༔ ཨོཾ་བཛྲ་ཀཱི་ལི་ཀཱི་ལ་ཡ་དིཔྟ་ཙཀྲ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཀ་ལ་ཤ་ཨ་བྷི་ཥིཉྩ་ཧཱུྃ༔ དེ་ལྟར་དབང་བསྐུར་བའི་ཆུ་རྒྱུན་སོགས། དེ་ནས་ནང་ནུས་པ་འཇུག་པའི་དབང་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་རྒྱན་གྱི་འཁོར་ལོར་བྱིན་གྱིས་བརླབས་ཏེ་དབང་བསྐུར་བའི་ཕྱིར། དཀྱིལ་འཁོར་གྱི་ལྷ་ཡི་ཐུགས་རྗེའི་དབྱིངས་ལས་ཡེ་ཤེས་ཕྱག་རྒྱའི་རོལ་པ་གཉིས་པ་སྤྲོས་ཏེ་ཁྱེད་རང་རྣམས་ལ་ཐིམ་པས་ལུས་ཡེ་ཤེས་སྒྱུ་མའི་སྐུ་མངོན་དུ་བྱས་པས་ལྷ་དབང་ལུས་ལ་ཐོབ་པར་མོས་ཤིག །གཙོ་བོའི་སྐུ་སྤྱི་བོར་བཞག་ལ། ཧཱུྃ༔ ཀུན་ཏུ་བཟང་པོའི་རོལ་པ་ལས༔ ཐུགས་རྗེས་ཁམས་གསུམ་གདུག་པ་འདུལ༔ གཉན་པོས་ལས་སུ་རུང་མཛད་པའི༔ འཇིགས་བྱེད་གཉན་པོས་དབང་བསྐུར་རོ༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཀཱ་ཡ་ཨ་བྷི་ཥིཉྩ་ཧཱུྃ༔ གསུང་རིག་པ་རྡོ་རྗེའི་སྔགས་བྱང་དར་དམར་ལ་བྲིས་པ་མགྲིན་པར་བཞག་པས་ནུས་པ་སྔགས་ཀྱི་དབང་ངག་ལ་ཐོབ་པར་མོས་ཤིག །དར་དམར་ལ་བྲིས་པའི་སྔགས་བྱང་མགྲིན་པར་གཏད་ལ། ཧཱུྃ༔ གསུང་གི་རང་བཞིན་མཚོན་བྱེད་པ༔ ལེ་བརྒན་འབར་བའི་ཁ་དོག་ལ༔ སྙིང་པོ་ནུས་པའི་དོན་དང་ལྡན༔ ནུས་པ་ཅན་གྱི་དབང་ཐོབ་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཝཱཀྐ་ཨ་བྷི་ཥིཉྩཧཱུྃ༔ ཐུགས་དབྱིངས་རིག་དབྱེར་མེད་ཀྱི་ཕུར་བུས་སྲིད་ཞིའི་སྲོག་ནས་ཐལ་མར་འབྱིན་པས་འཁོར་བ་དབྱིངས་སུ་སྒྲོལ། ཡེ་ཤེས་རྒྱུན་དུ་འཆར་བའི་ཐུགས་ཀྱི་དབང་སེམས་ལ་ཐོབ་པར་མོས་ཤིག །ཕུར་པ་སྙིང་གར་བཞག་ལ། ཧཱུྃ༔ ཙིཏྟ་དམར་པོའི་གཞལ་ཡས་ན༔ ཁམས་གསུམ་དབང་གི་བདག་པོ་སྟེ༔ བརྐྱང་བསྐུམ་རབ་ཏུ་གདེངས་པ་ཡིས༔ གདུག་པ་འཇོམས་པའི་དབང་ཐོབ་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཙིཏྟ་ཨ་བྷི་ཥིཉྩ་ཧཱུྃ༔ སྐུ་འབར་ཁྲོ་རྔམས་པའི་ཚུལ་དུ་བཞུགས་ཀྱང་ཐུགས་ཞི་བ་ཆེན་པོ་གཉིས་མེད་ཡེ་ཤེས་ཀྱི་སྲོག་དང་ལྡན་པ་མཚོན་ཕྱིར་ཡེ་ཤེས་སེམས་དཔའ་རྡོར་སེམས་ཀྱི་དབང་བསྐུར་བས་ཟག་མེད་འབྲས་བུའི་ཡོན་ཏན་ཐམས་ཅད་སྐུ་གསུང་ཐུགས་ལ་རྫོགས་པས་རྩོལ་མེད་ཕྲིན་ལས་ཀྱི་སྣང་བས་དོན་གཉིས་འབད་མེད་དུ་སྩོལ་བར་མོས་ཤིག །རྡོར་སེམས་ཀྱི་སྐུ་སྙིང་གར་བཞག་ལ། ཧཱུྃ༔ ཐུགས་ཀ་རིན་ཆེན་ཟུར་བརྒྱད་ལ༔ ཕྲིན་ལས་སྣ་ཚོགས་ལྷུན་གྱིས་གྲུབ༔ ཐམས་ཅད་ཀུན་ལ་རང་བཞིན་གནས༔ ཡེ་ཤེས་སེམས་དཔའི་དབང་ཐོབ་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ གུ་ཎ་ཤ་ཡ་ཨ་བྷི་ཥིཉྩཧཱུྃ༔ དེ་དག་གིས་དྲེགས་པ་ཅན་བདུད་དང་རུ་ཏྲ་བསྒྲལ་བའི་ཁྲག་འཐུང་རྒྱ་མཚོའི་རྗེ་བཙན་དུ་ཆེ་ཞིང༌། མ་མོ་མཁའ་འགྲོའི་ཚོགས་རྗེ་རུ་བརྗིད་པའི་རྟགས་སུ་གོས་རྒྱན་བྱུག་པའི་རྩི་སོགས་དཔལ་གྱི་ཆས་དང་དུར་ཁྲོད་ཀྱི་རྫས་ཀྱིས་མངའ་གསོལ་བར་མོས་ཤིག །དུར་ཁྲོད་རྒྱན་རྣམས་གཏད་དེ། ཧཱུྃ༔ གླང་ཆེན་སྟག་ཤམ་ཞིང་ལྤགས་སྦྲུལ༔ ཐོད་པ་ཚར་གསུམ་བྱུགས་རྫས་གསུམ༔ རྡོ་རྗེའི་ཁྱུང་གཤོག་ལ་སོགས་པ༔ དུར་ཁྲོད་དཔལ་ཆས་དབང་ཐོབ་ཤོག༔ དེ་ལྟར་དབང་བསྐུར་བའི་ནུས་པས་ཐ་མལ་གྱི་བསམ་བརྗོད་བཏུལ་ནས་ཅིར་སྣང་ཡེ་ཤེས་ཀྱི་རོལ་པར་འཆར་བའི་གསེང་ལམ་ལ་ཞུགས་ཏེ་སངས་རྒྱས་ཐམས་ཅད་དང་གཉིས་སུ་མེད་པ་རྡོ་རྗེ་སེམས་དཔའི་བརྟུལ་ཞུགས་དམ་ཚིག་གསུམ་བྱིན་པར་མོས་ལ་རྡོ་རྗེ་གསོར་ཞིང་དྲིལ་བུ་འཁྲོལ་ཏེ་ཐུགས་ཀར་བསྣོལ་མར་ཟུངས་ཤིག །རྡོར་དྲིལ་གཏད་དེ། ཧཱུྃ༔ ཐབས་ཀྱི་སྤྱོད་པས་གཞན་དོན་དུ༔ བྱམས་དང་སྙིང་རྗེས་གང་འདུལ་བ༔ སངས་རྒྱས་ཕྲིན་ལས་རྫོགས་མཛད་པའི༔ དབང་དང་བྱིན་རླབས་འདིར་སྩོལ་ཅིག༔ ཨོཾ་བོ་དྷི་ཙིཏྟ་ས་མ་ཡ་སྟྭཾ་ཨ་བྷི་ཥིཉྩ་མཾ༔ ཞེས་རྟོགས་པ་བསྐྱེད། དེས་རྡུལ་ཚོན་སྤྲུལ་པའི་དཀྱིལ་འཁོར་སོགས་ནས། མཆོག་དབང་གོང་མ་གསུམ་བསྐུར། མཐའ་རྟེན་རྡོ་རྗེ་སློབ་དཔོན་གྱི་དབང་མི་དགོས། དེ་དག་གིས་སྟོད་ལས་བྱང་ཆུབ་སྒྲུབ་པའི་དབང་གིས་རྒྱུད་སྨིན་པར་བྱས་ནས། ད་སྨད་ལས་དགྲ་བགེགས་སྒྲོལ་བའི་རྗེས་སུ་གནང་བ་སྦྱིན་པ་ལ། མངོན་སྤྱོད་རྩོམ་པ་པོ་རིག་པ་ཡེ་ཤེས་ཀྱི་ཕུར་བུའི་དགོངས་པ་མངོན་དུ་གྱུར་པའི་ལྟ་བ་ཆོས་ཉིད་ཀྱི་རྫོང་ལ་ཞུགས་ཤིང༌། བསྐྱེད་རིམ་སྲིད་པ་ཕུར་བུ་དང་རྫོགས་རིམ་བྱང་ཆུབ་སེམས་ཀྱི་ཕུར་བུས་སྒོམ་པ་ཏིང་ངེ་འཛིན་གྱི་འཕྲང་ལ་འགྲིམས་ཏེ། སྤྱོད་པ་སྙིང་རྗེའི་སྲོག་དང་ལྡན་པས་མཚན་མ་རྫས་ཀྱི་ཕུར་བུས་དགྲ་བགེགས་བསྒྲལ་བ་མངོན་སྤྱོད་ཀྱི་ལས་རྩོམ་པར་བྱ་སྟེ། ཇི་སྐད་དུ། ཕུར་པ་གྲུབ་ནས་གདབ་ལས་བྱ། །ཞེས་གསུངས་པས་ཕྲིན་ལས་རྩོམ་པའི་ཡུལ་ཉམས་པ་བདུན་ལྡན་གྱི་དགྲ་བགེགས་ལ། ཇི་ལྟར་རྩོམ་པའི་ཕྲིན་ལས་དམིགས་པའི་རིམ་པ་གསལ་འདེབས་གནང་བར་ཞུ། ཕྱི་སྣོད་ཀྱི་འཇིག་རྟེན་ཐམས་ཅད་ཨེ་ཁྲོམ་འབར་བའི་རང་བཞིན། ནང་བཅུད་རྣམས་རྡོ་རྗེ་ཕུར་པ་རིག་འཛིན་དང་བཅས་པའི་ལྷ་ཚོགས་ཐམས་ཅད་འབར་བའི་སྐུར་བཞེངས་ཏེ་རྔམས་པའི་ཧཱུྃ་སྒྲ་སྒྲོགས་ཤིང་ལས་ལ་ཆས་པར་གྱུར། ཨེ་ཡཾ་ཛྭ་ལ་རཾ། མདུན་དུ་བྲུབ་ཁུང་ཡངས་ཤིང་གཏིང་ཟབ་པའི་ནང་དུ་དགྲ་བགེགས་དམ་སྲི་ཕོ་མོ་རྣམས་རིད་ཅིང་ཉམ་ཐག་པའི་ལུས་ཅན་དུ་གྱུར། གཡབ་དྲིལ་འགུགས་རྒྱ་བཅས། ན་མོ། དཀོན་མཆོག་གསུམ་ལ་ཕྱག་འཚལ་ལོ། དཀོན་མཆོག་གསུམ་གྱི་བཀའ་བདེན་པ་དང༌། ཆོས་ཉིད་རྣམ་པར་དག་པའི་བདེན་པ་དང༌། ཆོས་ཅད་རྒྱུ་འབྲས་བསླུ་བ་མེད་པའི་བདེན་པ་དང༌། ཕྲིན་ལས་ཕུར་པ་རོལ་པའི་ལྷ་ཚོགས་རྣམས་ཀྱི་བདེན་དང༌། སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་རྣམས་ཀྱི་བདེན་པ་དང༌། བདེན་པ་ཆེན་པོའི་མཐུ་ལ་བརྟེན་ནས་མ་རུང་པའི་སེམས་ཅན་བསྒྲལ་བའི་ཞིང་དུ་གྱུར་པ་ཐམས་ཅད་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག །ཨོཾ་བཛྲ་ཀཱི་ལི་ཀཱི་ལ་ཡ་ཤྲཱི་གྷྲཾ་ཨཱ་ན་ཡ་ཛཿཧཱུྃ་བྃ་ཧོཿ ལན་གསུམ། དེ་ནས་གདབ་པའི་སྔགས་དྲུག་སྤུ་གྲིའི་དགོངས་པས་བསྒྲལ་བ་ལ་རིག་པ་མཆོག་གི་རྒྱུད་ལས། ལྷ་དབྲལ་གཟུགས་ལ་དབབ་པ་དང༌། །བྱད་དུ་གཞུག་དང་སྨྱོ་རུ་གཞུག །རྡུལ་དུ་བརླག་དང་ཞལ་དུ་བསྟབ། །དེ་ལའང་ཕོ་ཉ་འཕྱོང་སྔགས་རྫས། །ཏིང་འཛིན་དམོད་པས་ལས་རྫོགས་བྱ། །ཞེས་པ་ལྟར་གདབ་ཁ་རྒྱས་པ་ལ་ལས་དྲུག་སོ་སོར་བྱ་དགོས་ཀྱང་འདིར་གྲུབ་པའི་མན་ངག་གི་དགོངས་པས་དྲག་པོའི་ཕྲིན་ལས་དུས་གཅིག་ལ་རྫོགས་པ་སྔགས་དྲུག་སུར་ཕུག་ ཐོལ་བྱུང་དུ་བསྟན་པའི་དོན། མཆན། ཏུ་བསྟན་པ་ལ་དང་པོ་ཐུགས་དམ་བསྐུལ་བ་ནི། ཧཱུྃ། དམ་ཚིག་ཆེན་པོའི་དུས་ལ་བབ། །སྤྲུལ་པ་ཆེན་པོའི་དུས་ལ་བབ། །ཕྱག་བརྙན་ཆེན་པོའི་དུས་ལ་བབ། །ཤྭ་ན་མུ་ཁའི་དུས་ལ་བབ། །ས་བདག་ཆེན་མོའི་དུས་ལ་བབ། །བདག་ཉིད་ཆེན་མོའི་དུས་ལ་བབ། །ཁྱེད་ཀྱི་དམ་ཚིག་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །གདབ་ཕུར་སོགས་མདུན་དུ་བཀོད་ལ། བདག་ཉིད་དཔལ་ཆེན་པོ། ཕུར་པ་སྲས་མཆོག །ལིངྒ་དགྲ་བགེགས་ཀྱི་སྙིང་གར་ཚེ་སྲོག་གི་རྟེན་ཨ་ནྲྀ་ཏྲི་དང་བཅས་པ་དངོས་སུ་གསལ་བ། ཕུར་བུའི་དབལ་རྩེ་ལས་ཨ་ཡིག་དཀར་པོའི་འོད་ཀྱིས་སྒྲིབ་གཉིས་སྦྱངས། སྲོག་རྟེན་ལ་རེག་པ་ཙམ་གྱིས་སྒོ་ལྔའི་རྣམ་ཤེས་དབལ་རྩེར་བསྡུས། ཉོན་ཡིད་ཀྱི་རྩད་བཅད། ལྔ་འདུས་དྭངས་མ་ཚེ་བསོད་ཐམས་ཅད་འོད་དཀར་པོའི་རྣམ་པར་བསྡུས་ནས་རང་ལ་ཐིམ། ཀུན་གཞིའི་རྣམ་ཤེས་ཨ་ཡིག་དཀར་པོར་གྱུར་པ་ཕུར་རྩེས་ལིང་གིས་བཏེགས་ཏེ་དཔལ་ཆེན་པོའི་ཐུགས་ཀར་ཐིམ། ཕུར་བུའི་དབལ་ལས་འཕྲོས་པའི་མཚོན་ཆའི་ཆར་པས་བག་ཆགས་ཀྱི་གཟུགས་བརྙན་དུམ་བུར་གཏུབས་པར་གྱུར། མཚོན་ཆ་རྣམས་ཀྱིས་བསྒྲལ་ཏེ། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བྃ་ཧོཿ ཆེ་གེ་མོ། ཧ་ས་ཡར་ཧྲཱི་ཏ་ན། ཨ་བེ་ཤ་ཡ་ཨ་བེ་ཤ་ཡ། ཡུངས་ཀར་གྱིས་བྲབ། ཤི་ཀྲི་ཨ་ན་ཡ་ཤི་ཀྲི་ཨ་ན་ཡ། བྱད་ཐག་གིས་བཅིང༌། ཛྭ་ལ་པ་ཡ་ཛྭ་ལ་པ་ཡ། དུག་ཁྲག་གིས་གཏིགས། ཏ་ཐ་ཡ་ཏ་ཐ་ཡ། ཐོ་བས་བརྡུང༌། བྷནྡྷ་ཡ་བྷནྡྷ་ཡ་སརྦ་བིགྷྣཱན་བཾ་ཧཱུྃ་ཕཊ། སྒྲོལ་ཕུར་གདབ་ལ། ཧཱུྃ། སྙིང་རྗེས་བསྒྲལ་བའི་དམ་ཚིག་ནི། །བསད་ཅིང་མནན་པ་མ་ཡིན་ཏེ། །ཕུང་པོ་རྡོ་རྗེས་གཏམས་བྱས་ནས། །རྣམ་པར་ཤེས་པ་རྡོ་རྗེར་བསྒོམ། །ཨོཾ་ལཾ་ཧཱུྃ་ལཾ་སྟྭཾ་བྷ་ཡ་ནན། མོ་ཧ་གྷ་ཡ་བྷ་ག་ཝན། ཤི་གྲི་དི་ཀྲི་ཤྲཱི་བཛྲ་ཧཱུྃ་ཀ་ར་ཧཱུྃ་ཕཊ། ཞེས་ཚེ་ཁྲུས་གནས་གསུམ་གྱི་དགོངས་པ་དང་ལྡན་པས་ལག་ལེན་ལྟར་བརྡེག །ཐུན་གྱིས་བྲབ་ཅིང་སྒྲོལ་གྲིས་གཏུབས་ལ། ལིང་རོ་རཀྟས་བྲན་པ་གཏོར་མར་བསྟབ་སྟེ། ཧཱུྃ༔ དངོས་གྲུབ་བར་ཆད་བྱེད་པའི་བགེགས༔ སོགས་ལས་བྱང་ལྟར་རཀྟ་ཚར་གསུམ་ཕུལ་བས་ཞལ་དུ་བསྟབ། དེ་རྣམས་ཀྱིས་མངོན་སྤྱོད་དྲག་པོའི་རྗེས་གནང་གྲུབ་པ་ལགས་པས། དེང་ནས་བརྩམས་ཏེ་སྣང་སྲིད་ཐལ་འབྱིན་གྱི་དགོངས་པས་ཕུར་བུ་རྣམ་བཞི་ཡུལ་སོ་སོར་འདེབས་པའི་ལས་ལ་བརྩོན་པར་མཛོད་ཅིག །ཤིས་བརྗོད་བཅས་དམ་ཚིག་ཁས་བླང་ནས་དབང་དང་ཆོ་གའི་ལས་རིམ་མཐའ་རྒྱས་སུ་བྱའོ། །མཁྱེྃན་གཉིས་མཁའ་དབྱིངས་བརྩེྃ་ཆེན་གྱི། །འོདྃ་ཟེརྃ་འབུམ་ཕྲག་གིས་འཁྱུད་པའི། །མཐུ་ལས་ཟབ་གསང་ནོར་བུའི་དབྱིག །ཐང་མར་བརྡལ་འདི་ཨེ་མ་རྨད། །ཐུགས་སྒྲུབ་དཔལ་ཆེན་འདུས་པའི་སྒོས་བཀའ་ཁྲག་འཐུང་རིགས་བཞི་ལས། ཕྲིན་ལས་རྡོ་རྗེ་ཕུར་པ་བདུད་དཔུང་ཟིལ་གནོན་གྱི་དབང་བསྐུར་རྩ་དུམ་རྒྱུད་ཀྱི་དགོངས་པའི་ལེའུ་ཚན་དགུ་པ་སྟེ་བདུད་འདུལ་ཕྲིན་ལས་དྲག་པོ་རྩལ་གྱིས་སྦྱར་བའོ། ༈ ན་མོ་མ་ཧཱ་གུ་རུ་བྷྱ། ཁྲག་འཐུང་རིགས་བཞིའི་སྒོས་དབང་གི་གཏེར་གཞུང་ལས། དེ་ནི་སོ་སོའི་སྒོས་དབང་གིས༔ སྨིན་པར་བྱེད་པའི་ལུགས་ཡིན་ཏེ༔ དོན་ཚང་འཇུག་པ་བདེ་བའི་ཕྱིར༔ རྒྱལ་ཐབས་སྤྱི་བླུགས་ལྟར་བསྐུར་ན༔ ས་ཆོག་སྟ་གོན་ནས་བཟུང་སྟེ༔ དཀྱིལ་འཁོར་ཆེན་པོར་འཇུག་པ་དང༔ རིགས་པའི་དབང་ལྔས་སྨིན་པའི་བར༔ གདན་གསུམ་ཚང་བའི་དཀྱིལ་འཁོར་ནི༔ ཞི་ཁྲོའམ་དཔལ་ཆེན་འདུས་པ་ལ༔ བརྟེན་རྗེས་སོ་སོའི་དབང་སྒྲུབ་དང༔ འབྲེལ་བར་བུམ་དབང་རྗེས་འབྲང་དང༔ ཁོལ་བུར་བཏོན་ནས་བསྐུར་བའི་མཐར༔ སྤྱོད་པ་དང་ནི་རིག་པ་དང༔ མཉམ་པའི་བརྟུལ་ཞུགས་ཅན་གསུམ་ལ༔ མཆོག་དབང་གོང་མ་གསུམ་པོའི་དོན༔ བློ་དང་འཚམས་པར་བཀྲལ་ནས་སྟེར༔ ཞེས་གསུངས་པ་ལྟར་གོང་གི་སོ་སོའི་སྒོས་དབང་དང་དཔལ་ཆེན་དབང་གཞུང་གུང་བསྡེབས་ཀྱིས་བསྐུར་ཚུལ་ཉིད་ཁོ་བོས་འཁོར་ལོའི་མགོན་པོ་མཆོག་གཉིས་ལས་བཀའ་དྲིན་ཇི་ལྟར་ཐོབ་ཚུལ་ལྟར་བཀོད་པ་ཡིན་ལ། སྒོས་བཀའ་རེ་རེ་བཞིན་སྟ་གོན་སྦྱར་ཡང་རུང་བར་དབང་གཞུང་དུ་གསལ་ཡང་རྩ་བར་སྟ་གོན་སྦྱར་བས་ཡན་ལག་རིགས་བཞི་དེའི་རྗེས་འབྲེལ་དུ་བསྐུར་ན་སོ་སོར་སྟ་གོན་མ་བྱས་ཀྱང་ཆད་སྐྱོན་དུ་མི་འགྱུར་ཞིང༌། ཕྱག་ལེན་བསྡུས་པའི་ཕྱོགས་ལ་མོས་ན་ཐོག་མར་དཔལ་ཆེན་ལ་སྟ་གོན་སྔོན་དུ་འགྲོ་བས་དབང་གི་སྤྱི་དོན་དང་བདག་འཇུག་དབང་དོན་རྒྱ་མཚོ་གཉིས་དགོངས་འདྲིལ་གྱིས་བསྐུར་ཞིང༌། དེའི་ཚེ་དཀྱིལ་འཁོར་ཕྱི་ནང་གི་འཇུག་པ་བུམ་དབང་གི་བྱེ་བྲག་ཐུན་མོང་རིགས་དབང་ལྔ། ནང་ནུས་པ་འཇུག་བྱེད་སྐུ་ཕྱག་རྒྱའི་དབང༌། ཟབ་དབང་གསུམ། མཐའ་རྟེན་རྡོ་རྗེ་སློབ་དཔོན་གྱི་དབང་དང་རྗེས་གནང་བཅས་ལེགས་པར་བསྐུར། གཤིན་རྗེ་སོགས་རིགས་བཞི་གཞན་རྣམས་རྩ་དབང་རྒྱལ་ཐབས་སྤྱི་བླུགས་དངོས་བསྟན་གྱིས་ཁོག་ཕུབ་ནས་སོ་སོའི་བུམ་དབང་དང་སྐུ་ཕྱག་མཚན་སོགས་སྒོས་ཆོས་རྣམས་རང་རང་གི་གཞུང་ལྟར་དང༌། རྟ་མགྲིན་ལ་བུམ་དབང་རྗེས་སུ་སྒྲོལ་དབང༌། ཕུར་པ་ལ་དབང་བཞིའི་རྗེས་འབྲེལ་དུ་སྒྲོལ་དབང་སྦྱར། ཐམས་ཅད་ལ་གསང་དབང༌། ཤེར་དབང༌། ཚིག་དབང་རྣམས་རྩ་དབང་རྒྱལ་ཐབས་སྤྱི་བླུགས་ལྟར་དང༌། རིགས་བཞི་ཀར་བཀའ་ལུང་ཡོངས་རྫོགས་གཏད་རྒྱའི་དབང་མི་དགོས་ཀྱང་བྱས་ནའང་རུང་བར་གཏེར་གཞུང་རྡོ་རྗེའི་ཚིག་གིས་དངོས་བསྟན་ལྟར་དབྱེ་བསྡུ་ཆོག་པར་མངོན་ཞིང༌། སྐབས་འགའ་ཞིག་ཏུ་གཤིན་རྗེ་ལྟ་བུ་གཅིག་ལས་རིགས་གཞན་གྱི་དབང་མི་བསྐུར་བ་དང༌། རྩ་བའི་ཡི་དམ་བྱེད་པ་ལྟ་བུའི་དགོས་པ་དང་འབྲེལ་ན་དེ་ལ་ནི་སྟ་གོན་ཡང་ངེས་པར་དགོས་ཤིང༌། དབང་དངོས་ཀྱང་དཔལ་ཆེན་ལྟར་རྒྱས་པར་བསྐུར་བ་ལེགས་པ་བཅས་ཞིབ་ཏུ་དཔྱད་པས་གཞུང་གི་དངོས་བསྟན་དང༌། རིག་འཛིན་བརྒྱུད་པའི་ཕྱག་བཞེས་གུང་བསྟུན་གྱིས་ཡིད་རྟོན་རུང་བ་ཞིག་གནང་བ་གལ་ཆེ་བའི་ཚུལ་གཞུང་ལས། དབང་ལ་རྡོ་རྗེ་ཐེག་པ་ཡི༔ གཞི་ལམ་འབྲས་གསུམ་རྫོགས་པའི་ཕྱིར༔ རྒྱུད་ཀྱི་དངོས་པོ་བཅུ་ཤེས་ཤིང༔ བསྙེན་རྫོགས་རྟོགས་པས་རྒྱུད་གྲོལ་བའི༔ རྡོ་རྗེ་སློབ་དཔོན་ཁོ་ན་ལས༔ གཟུ་ལུམ་རང་གར་སྤྱད་པ་ན༔ སློབ་མ་སྨིན་པ་ལྟ་ཅི་སྨོས༔ རང་གི་སྲོག་ལའང་ཧུར་ཐུམ་བྱེད༔ དེ་ཕྱིར་མཁས་པས་འཚོ་ཤེས་སྤྱོད༔ ཅེས་གསུངས་པས་ན་ཞར་ལ་འཕྲོས་དོན་དུ་བརྗོད་པའོ།

༈ ཡི་དམ་གྱི་སྐོར་གསང་སྒྲུབ་ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་དབང་ཆོག་འོད་དཀར་མཐའ་ཡས་རྡོ་གྲུབ་རིན་པོ་ཆེ་འཇིགས་མེད་ཕྲིན་ལས་འོད་ཟེར་གྱི་རྡོ་རྗེའི་གསུང་དངོས་དཔེ་རྒྱུན་བཞུགས་བཞིན་པ་ལྟར་ཤེས་པར་བྱ་ཞིང༌། དེ་ལ་དབང་རྒྱས་པའི་སྐབས་གཏེར་ཁ་གཞན་ལས་འབྱུང་བའི་སངས་རྒྱས་སྟོང་དབང་སྦྱར་ན་རཏ་གླིང་ཐུགས་རྗེ་གསང་འདུས་ཀྱི་སངས་རྒྱས་སྟོང་དབང་གཏེར་མཛོད་དུ་བཞུགས་པ་ཉིད་ཀྱིས་དོན་གྲུབ་པའོ། ༈ ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་དབང་དང་འབྲེལ་བར་མྱོང་གྲོལ་རིལ་བུའི་དབང་བསྐུར་བར་འདོད་ན། དབང་དངོས་གཞིའི་བུམ་དབང་རྫོགས་པའི་རྗེས་སུ། དེ་ལྟར་བུམ་དབང་གི་ཁྲུས་ཀྱིས་གདུལ་བྱ་སྐལ་ལྡན་རྣམས་ཀྱི་རྒྱུད་སྣོད་གསེར་གྱི་གཞོང་པ་ལྟ་བུར་ཡོངས་སུ་དག་པར་བྱས་པ་དེར། བཅུད་སེང་གེའི་འོ་མ་ལྟ་བུ་མྱོང་གྲོལ་བདུད་རྩིའི་དྭངས་མས་དབང་བསྐུར་བ་སྟེ། བུམ་པ་རང་བྱུང་གི་ཕོ་བྲང་ཡེ་ཤེས་ཀྱི་གཞལ་ཡས་ཁང་དུ་གསལ་བ་ལ་བུམ་བཅུད་འཁོར་བ་དོང་སྤྲུགས་འཇིག་རྟེན་དབང་ཕྱུག་འཕགས་པ་ཐུགས་རྗེ་ཆེན་པོའི་ལྷ་ཚོགས་སུ་ཤར་བའི་དབང་བསྐུར་བས་རྒྱུད་སྨིན་ཅིང་གྲོལ་བའི་མོས་པ་མཛོད། རིལ་བུམ་སྤྱི་བོར་བཞག་ལ། ཧྲཱིཿ ཕྱི་ནི་རང་བྱུང་བདེ་ཆེན་གཞལ་ཡས་ཁང༔ ནང་ན་ཐུགས་རྗེ་ཆེན་པོའི་ལྷ་ཚོགས་བཞུགས༔ སྒྲིབ་གསུམ་དག་ནས་སྐུ་གསུམ་མངོན་གྱུར་དབང༔ དེང་འདིར་སྦྱིན་ནོ་འགྲོ་ཀུན་ཡོངས་གྲོལ་ཤོག༔ ཨོཾ་མ་ཎི་པདྨེ་ཧཱུྃ་ཧྲཱིཿ སརྦ་ཏ་ཐཱ་ག་ཏ་ཨ་བྷི་ཥིཉྩ་ཨ༔ ཞེས་དབང་བསྐུར། དེ་ནས། ཁྱེད་རང་རྣམས་ཀྱིས་རིལ་བུ་ཐུགས་རྗེ་ཆེན་པོར་གསལ་བ་ལྕེ་ཐོག་ཏུ་མྱངས་བས་ལུས་གཞལ་ཡས་ཁང་དུ་གསལ་བའི་སྙིང་པདྨ་འདབ་མ་དྲུག་པའི་ལྟེ་བར་ཟླ་བའི་སྟེང་དུ་མགྲིན་པའི་ལམ་བརྒྱུད་ཧྲིལ་གྱིས་བྱོན་ནས་བྱང་ཆུབ་སྙིང་པོ་མ་ཐོབ་བར་དུ་མི་འབྲལ་བར་ཡུན་གྱི་ལྷར་བཞུགས་པའི་མོས་པ་མཛོད། ཨོཾ་མ་ཎི་པདྨེ་ཧཱུྃ་ཧྲཱིཿ སརྦ་སིདྡྷི་ཨ༔ ཞེས་བཟླ་བཞིན་བཀྱེས་པའི་རིལ་བུ་གསུམ་རེ་མིད་དུ་གཞུག་གོ །དེ་ལྟར་དབང་རྫོགས་པའི་རིལ་བུ་ལྟོར་སོང་ཕན་ཆད་མི་ཞེས་བྱ་བ་ཐུགས་རྗེ་ཆེན་པོ་སྤྱན་རས་གཟིགས་སུ་གནས་གྱུར་པ་ཡིན་པས་རྒྱལ་བུ་རྒྱལ་སར་ཕྱུང་པ་དང་འདྲ་ཞིང༌། བསླབ་པའི་དམ་ཚིག་ཀྱང་བདག་ལས་གཞན་གཅེས་འཛིན་གྱི་སེམས་བསྐྱེད་དང་ལྡན་པས་འགྲོ་བའི་དོན་ལ་ཅི་ནུས་འབད་པ་དང༌། དུས་རྟག་ཏུ་ཐུགས་རྗེ་ཆེན་པོའི་བཟླས་སྒོམ་ལ་བརྩོན་པར་གྱིས་ཤིག །དེ་ལྟར་ཐོབ་པའི་ཕན་ཡོན་ཀྱང་རྒྱུད་ལས། རིལ་བུ་སུ་ཡི་ལྟོར་སོང་བ༔ ཚེ་རབས་གང་དང་གར་སྐྱེས་ཀྱང༔ སྤྱན་རས་གཟིགས་དང་འབྲལ་མི་སྲིད༔ རྫས་མཆོག་རེག་ཆོག་ངོ་མཚར་ཆེ༔ ཞེས་དང༌། གཞན་ཡང༌། བོད་ཁམས་ཀུན་ལ་ཁྱབ་པར་དགྲམ༔ དེ་ཡིས་ཐུགས་རྗེས་བསྟན་པ་རྒྱས༔ སྙིགས་དུས་སེམས་ཅན་བདེ་ལ་བཀོད༔ ངན་སོང་འཁོར་བ་དོང་ནས་སྤྲུགས༔ ཐུགས་རྗེའི་ཕྲིན་ལས་ངོ་མཚར་ཆེ༔ ཞེས་གསུངས་པ་ལྟར་དད་པ་དང་ངེས་ཤེས་ཁྱད་པར་ཅན་སྐྱེད་འཚལ། དེ་ནས་སླར་ཡང་མདུན་བསྐྱེད་ཀྱི་སོགས་ལྷ་དབང་མན་གཞུང་ལྟར་རོ། །ཞེས་གུ་རུ་ཆོས་ཀྱི་དབང་ཕྱུག་གི་ཟབ་གཏེར་ཐུགས་རྗེ་ཆེན་པོ་ཡང་སྙིང་འདུས་པའི་དབང་ཆོག་ལས་ཁོལ་དུ་ཕྱུང་བ་དགེ །ཞེས་འཇམ་མགོན་མཁྱེན་བརྩེའི་རྡོ་རྗེའི་གསུང་སྙིང་ཐིག་ཁ་སྐོང་ལས་བྱུང་བ་ལྟར་རྒྱུན་མི་ཉམས་པའི་ཕྱིར་དབང་ཟིན་དཀྱུས་སུ་བཅུག་པའོ། ༈ དངོས་ཀུན་དེ་ཉིད་གཟིགས་པའི་ཡེ་ཤེས་སྤྱན། །མཐའ་ཀླས་འགྲོ་ཁམས་བརྡལ་བའི་ཕྲིན་ལས་དབྱིག །དྲི་མེད་ཆོས་ཀྱི་བཤེས་གཉེན་དགྱེས་པའི་འོད། །དད་བརྒྱའི་འཆར་ཀའི་འཛུམ་ཟེར་སོར་མོས་ལེན། །ཡང་གསང་བླ་མའི་སྒྲུབ་པ་ཐིག་ལེའི་རྒྱ་ཅན་གྱི་སྨིན་བྱེད་འབོག་པ་ལ། ཐོག་མར་སྦྱོར་བ་ཡོ་བྱད་ཀྱི་གཤོམ་ནི། གཞུང་ལས། མཎྜལ་ཚོམ་བུ་ལྔ་པའི་སྟེང༔ ཞེས་གསུངས་པ་འདིའི་བསྙེན་ཡིག་ཀུན་གཟིགས་རྡོ་རྗེ་གཟི་བརྗིད་ཀྱིས་གསུང་ལས། སྟེགས་ཀྱི་ཁར་འོད་ལྔའི་ཐིག་ལེའི་དཀྱིལ་འཁོར་རྡུལ་ཚོན་ནམ་རས་བྲིས་སྐབས་དང་སྦྱར། ཞེས་གསུངས་པ་ལྟར་ཕྱི་མ་ཉིད་ཕྱག་ལེན་དུ་མཛད་པས་འོད་ལྔའི་ཐིག་ལེའི་དཀྱིལ་འཁོར་དབུས་སུ་བྷནྡྷ་དུམ་དུ་གསུམ་པར་སྨན་འབྲུ་རིན་ཆེན་དང༌། ཁྱད་པར་སེལ་མེད་ཀྱི་ཨ་མྲྀ་ཏས་བཀང་བའི་ཁར་རིག་འཛིན་སྲོག་འཁོར་དཔལ་གྱི་གདུ་བུའི་ཙཀྲ་རབ་གནས་ཅན། དར་དམར་གྱི་ལྡིང་གུར་ཕུབ་པ་དང༌། རིལ་བུའི་དབང་བསྐུར་སྦྱར་ན་བྷནྡྷ་རིལ་བུས་བཀང་བ་དར་དམར་གྱིས་གཡོགས་པའང་བཞག །བཏགས་གྲོལ་གྱི་དབང་བྱེད་ན་རིག་འཛིན་སྲོག་འཁོར་བཅའ་སྒྲུབ་ཚད་ལྡན་བྱས་པའང་འདུ་བྱ། གཡས་སུ་རྣམ་བུམ་མགུལ་ཆིངས་དཀར། མདུན་དུ་ཀུན་མཁྱེན་བླ་མའི་སྐུ། རྒྱབ་ཏུ་གསང་ཐོད། གཡོན་དུ་རིག་ཙཀ ཌཱ་མ་རུ། ཁཊྭཱཾ། རུས་རྒྱན། བྷནྡྷ། ཚངས་སྐུད་སོགས་ཧེ་རུ་ཀའི་ཆས་ཀྱི་ཙཀླི། ཤེལ་རྡོ་རྣམས་བཀོད་མཛེས་སུ་བཤམས། མཆོད་པ་དང་སྨན་རཀ་གཏོར་གསུམ། བཀའ་སྲུང་དང་ཆད་བརྟན་གྱི་གཏོར་མ། དཀར་བགེགས། ལས་བུམ་བཅས་འདུ་བྱ། གཉིས་པ་ཀུན་བཟང་དོན་གྱི་ཕྲིན་ལས་དང་འབྲེལ་བའི་དབང་བསྐུར་ལ། བརྒྱུད་པའི་གསོལ་འདེབས་སྔོན་དུ་འགྲོ་བས་ལས་བྱང་མཐར་ཆགས་སུ་བཏང༌། སྣང་སྲིད་ཁྱབ་བརྡལ་ཡེ་ཤེས་སུ་ཤེས་པའི་རྟོགས་དགོངས་མེད་ན་བདག་མདུན་ཛཔ་ཁང་སོ་སོར་དབྱེ་ཞིང་སྤྲོ་བསྡུའི་དམིགས་གནད་དང༌། རིལ་སྒྲུབ་སྦྱོར་ན། བདག་གི་ཐུགས་སྲོག་སྔགས་ཕྲེང་སོགས་བཟླས་དམིགས་སྦྱར་ཞིང་ཛཔ་བཟླས་བྱ། བཏགས་གྲོལ་གྱི་སྔགས་རྣམས་ཀྱང་བཀླག །བུམ་པ་རང་བྱུང་གི་གཞལ་ཡས་ཁང་དུ་དཔལ་མགོན་རིག་འཛིན་བླ་མའི་དཀྱིལ་འཁོར་དྭངས་པའི་མཚོ་ལ་གཟའ་སྐར་ཤར་བ་བཞིན་སྐད་ཅིག་གིས་གསལ་བའི་སྐུ་ལས་བྱིན་རླབས་ཡེ་ཤེས་ཀྱི་ཆུ་རྒྱུན་བབས་པས་བུམ་ཆུ་བདེ་སྟོང་བདུད་རྩིའི་རང་བཞིན་དུ་གྱུར་པར་བསམ་ལ། བསྙེན་བཟླས་དང་དབྱངས་གསལ་རྟེན་སྙིང་བཟླ། ལས་བུམ་དུ་སྐད་ཅིག་གིས་ཁྲོ་བོ་རྟ་མགྲིན་དམར་པོ་གཡས་པདྨའི་དབྱུག་ཐོ་དང༌། གཡོན་མེའི་ཞགས་པ་ཐོགས་པར་གསལ་བའི་སྐུ་ལས་རྡོ་རྗེ་བདུད་རྩིའི་རྡུལ་ཕྲ་རབ་བབས་པས་བུམ་པ་གང་བར་བསམ་ལ། ཨོཾ་ཧྱ་གྲཱྀ་བ་ཧཱུྃ་ཕཊ། ཞེས་བཟླས་ལ་ཐུན་མཐར་དབྱངས་གསལ་རྟེན་སྙིང་དང༌། མཆོད་ཕྲེང་རྡོ་རྗེ་སྒྲ་མའི་མཆོད་སྤྲིན་དང་ལས་བྱང་གི་བསྟོད་པ་དང་ཡིག་བརྒྱ་བཟླས་མཐར། ཨོཾ་ཨཱཿཧཱུྃ་བུམ་པའི་ལྷ་ཚོགས་བདེ་བ་ཆེན་པོར་རྗེས་སུ་ཆགས་པས་རྡོ་རྗེ་བདུད་རྩིའི་རང་བཞིན་དུ་ལྟེམས་ཀྱིས་ཞུ་བར་གྱུར། ཞེས་དང༌། བཀའ་སྲུང་གཏོར་འབུལ། སྐོང་བཤགས། ཚོགས་མཆོད། བསྐང་བ། གྲུབ་ན་ལམ་དབང་གི་ཚུལ་དུ་བདག་འཇུག་རྒྱས་པ་དང༌། བསྡུ་ན་རིག་པའི་མེ་ཏོག་དོར་བས་ཡེ་ཤེས་ཀྱི་དཀྱིལ་འཁོར་དུ་འཇུག་པའི་རྗེས། དད་ལྡན་དམ་ཚིག་སྲུང་ནུས་པའི་སློབ་མ་སྒོ་དྲུང་དུ་ཁྲུས་བྱས། གྲལ་ལ་འཁོད་ནས་བགེགས་གཏོར་བཏང༌། སྲུང་འཁོར་བསྒོམ། ལས་རྡོར་གྱིས་མེ་ཏོག་བཀྱེ་བསྡུ་བྱ། སེམས་བསྐྱེད་གསལ་གདབ་དང་བཅས། དེ་ཡང་འོ་སྐོལ་རྣམས་དལ་འབྱོར་གྱི་རྟེན་འདི་ཉིད་རྙེད་དཀའ་ཞིང་ནམ་འཆི་བའི་ཆ་མེད་པ་དང༌། འཆི་བའི་འོག་ཏུ་ལས་འབའ་ཞིག་གིས་རྗེས་སུ་འབྲང་སྟེ་ཁམས་གསུམ་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མ་འདས་པས། ད་རེས་སྡུག་བསྔལ་ཅན་གྱི་འཁོར་བ་འདི་ལས་བདག་གཞན་སེམས་ཅན་ཐམས་ཅད་ཐར་པ་ཞིག་ཅི་ནས་ཀྱང་བགྱིའོ་སྙམ་པའི་སྐྱེས་བུ་ཆེན་པོའི་བློས་ཡང་དག་པའི་ལམ་དུ་ཞུགས་ནས་འབྲས་བུའི་མཐར་ཐུག་གི་རྟོགས་བྱ་རིག་སྟོང་འོད་གསལ་རྡོ་རྗེ་སྙིང་པོའི་གནས་ལུགས་ཀྱི་དོན་མངོན་དུ་བྱེད་པའི་ཐབས་ཀྱི་གསེང་ལམ་རྨད་དུ་བྱུང་བ་ནི་ཟབ་ལམ་བླ་མ་སྒྲུབ་པ་ཁོ་ནར་བྱ་བ། གསར་རྙིང་གི་མདོ་རྒྱུད་བསྟན་བཅོས་ཀུན་ལས་དབྱངས་གཅིག་མགྲིན་གཅིག་གིས་ཡང་ཡང་བསྔགས་པ་ལྟར་ལ། དེའི་ཚུལ་ལའང་མཁས་ཤིང་དངོས་གྲུབ་བརྙེས་པའི་བདག་ཉིད་ཆེན་པོ་རྣམས་ཀྱིས་བཀྲལ་བའི་ཚུལ་མཐའ་ཀླས་པ་ལས། སྐབས་སུ་བབ་པ་འདི་ནི་ཀློང་ཆེན་སྙིང་གི་ཐིག་ལེའི་ཡང་གསང་བླ་མའི་སྒྲུབ་པའི་རིམ་པ་དབང་གི་ཆོ་ག་སྟེ། དེ་ནི་འོད་གསལ་གསང་བ་ཆེན་པོའི་ལམ་ནས་འཕོ་ཆེན་རྡོ་རྗེའི་འོད་སྐུ་མངོན་དུ་མཛད་དེ་འཕགས་བོད་གཉིས་སུ་རྩོལ་མེད་ཐེག་མཆོག་རྒྱལ་པོའི་ཟབ་གསང་གི་བདུད་རྩིས་སྐལ་ལྡན་ཇི་སྙེད་གདོད་མའི་གྲོལ་གཞིར་དབུགས་དབྱུང་སྟེ་ད་ལྟའི་བར་སྤྲུལ་པའི་རྣམ་རོལ་རྒྱུད་མ་ཆད་པས་ཕྱི་མའི་གདུལ་བྱ་རྗེས་སུ་འཛིན་པའི་ཐུགས་བསྐྱེད་དང་ཕྲིན་ལས་མཚུངས་པ་མེད་པ་པཎ་ཆེན་ལྔ་བརྒྱའི་གཙུག་རྒྱན་འོད་གསལ་འཕོ་བ་ཆེན་པོའི་སྐུ་བརྙེས་པ་བི་མ་ལ་མི་ཏྲ་དང་དེའི་སྤྲུལ་པ་ཀུན་གྱི་མཆོག་གྱུར་ཀུན་མཁྱེན་ཆོས་ཀྱི་རྒྱལ་པོ་རྒྱལ་བ་གཉིས་པ་ཀློང་ཆེན་རབ་འབྱམས་དབྱེར་མེད་པའི་བླ་སྒྲུབ་སྟེ། ཀུན་མཁྱེན་བླ་མ་འདི་དང་མཉམ་པའི་སྡེ་གསུམ་རྫོགས་པ་ཆེན་པོའི་སེང་གེའི་སྒྲ་བསྒྲགས་པ་ནི་གངས་ཅན་བོད་དུ་མ་བྱུང་ཞིང༌། སྔ་འགྱུར་རྡོ་རྗེ་སྙིང་པོའི་བསྟན་པའི་མིག་དང་སྙིང་ལྟ་བུའི་ལེགས་བཤད་ཆོས་སྐུའི་མཆོད་སྡོང་ཆེན་པོ་ཕྱི་རབས་གདུལ་བྱའི་སྐལ་པར་སྨོན་ལམ་གཏད་རྒྱ་དང་བཅས་པས་བཞག་པར་མཛད་པ་དང༌། ཕྱི་མའི་དུས་འདིར་ཡང་མཆོག་གི་གཏེར་ཆེན་རཏྣ་གླིང་པ། ལྷ་བཙུན་ནམ་མཁའི་རྣལ་འབྱོར། རྩེ་ལེ་མཁས་མཆོག་པདྨ་ལེགས་གྲུབ། ཆོས་ཀྱི་རྒྱལ་པོ་གཏེར་བདག་གླིང་པ་སོགས་མཁས་གྲུབ་དུ་མ་ཡེ་ཤེས་ཀྱི་སྐུས་རྗེས་སུ་བཟུང་ཞིང༌། རྫོགས་པ་ཆེན་པོའི་བསྟན་པའི་བདག་པོར་བྱིན་གྱིས་བརླབས་པ་ལས། འདིར་ཡང་ཀུན་མཁྱེན་རིག་འཛིན་ཆེན་པོ་འཇིགས་མེད་གླིང་པ་གང་གིས་རྟོགས་བརྗོད་ཌཱ་ཀིའི་གསང་གཏམ་ཆེན་མོ་ལས། གཏེར་ཁ་གོང་འོག་གི་བཀའ་ཡི་ཆུ་བོ་གཅིག་ཏུ་འདྲེས་པའི་གསང་བདག་དཔའ་བོ་དྲང་སྲོང་དྲི་མེད་ཞི་ཁྲོའི་བསྙེན་སྒྲུབ་ལ་གཞོལ་བའི་དུས་ཀྱི་ཐོ་རེངས་ཤིག་གི་ཆར། སྐྱོ་ཤས་དང་ངེས་འབྱུང་དྲག་པོས་རྐྱེན་བྱས་ཏེ། མདུན་གྱི་ནམ་མཁར་ཨོ་རྒྱན་ཆོས་ཀྱི་རྒྱལ་པོ། རིག་འཛིན་འཇམ་དཔལ་བཤེས་གཉེན་སོགས་འོད་གསལ་གྱི་ངང་དུ་མཇལ་ཏེ་བརྡ་དོན་སྤྲོས་པ་མེད་པའི་དབང་མང་པོ་བསྐུར་བའི་མཐར་རང་ལ་ཐིམ་པ་ཞིག་པ་བྱུང་བས་རང་བྱུང་གི་རྟོགས་པ་བྱུང་རྒྱལ་དུ་སྐྱེས། ཉམས་ཀྱི་འཛིན་སྟངས་བུད། ལས་རླུང་དབང་དུ་འདུས། སྣང་བའི་རྫུན་ཕུག་རྡིབ། ཤེས་པ་ལ་བརྟུལ་ཞུགས་ཀྱི་ངར་ཐོན་ཏེ་ཚེ་འདིའི་སྣང་བ་ཕལ་ཆེར་བརྗེད་ནས་སྐྱེ་བ་འཕོས་པ་ལྟ་བུ་བྱུང༌། ཞེས་སོགས་གསུངས་པ་ལྟར་དང་པོར་མནལ་ལམ་དུ་གུ་རུའི་ཞབས་རྗེས་ལས་དབང་བཞི་བླངས་བའི་རྐྱེན་གྱིས་ནང་དབྱིངས་ཁྱད་ཆོས་དྲུག་ལྡན་གྱི་གྲོལ་ས་མཐོང་ཞིང་དེའི་རྗེས་སུ་འཇམ་དཔལ་བཤེས་གཉེན་གྱིས་བྱིན་གྱིས་བརླབས་པའི་རྐྱེན་ལས་དགོངས་པའི་གསང་མཛོད་བརྡོལ་ཞིང༌། རྔ་ཡབ་གླིང་དུ་གུ་རུ་བདེ་བ་ཆེན་པོ་དང་ཐུགས་ཡིད་འདྲེས་ནས་འོད་གསལ་གཞོན་ནུ་བུམ་སྐུའི་ཞིང་ཁམས་གཟིགས་པར་གསུངས་པས་མཚོན། སྐུ་ཚེ་འདི་ཉིད་ལ་གདོད་མའི་གཞི་ཀློང་དུ་ཁྱད་པར་དྲུག་གི་བཙན་ས་ཟིན་པས་དཔལ་ཀུན་ཏུ་བཟང་པོ་དངོས་དང་དབྱེར་མེད་པ་ཉིད་འོད་གསལ་འགྲོ་འོང་མེད་པའི་ངང་དུ་མནལ་བ་ན། ལྷག་མཐོང་གསལ་བའི་ཡེ་ཤེས་ཀྱི་སྣང་བའི་འོད་གསལ་ཤིན་ཏུ་དྭངས་པར་ཀུན་མཁྱེན་ཀློང་ཆེན་རབ་འབྱམས་བཟང་པོ་སྐུ་གཟུགས་བཟང་ལ་ན་བཟའ་ཆོས་གོས་རྣམ་གསུམ་གྱིས་མཛེས་ཤིང༌། སྐུ་ན་ཅུང་ཟད་སྨིན་པ། དེ་བཞིན་གཤེགས་པ་ལྟར་མཐོང་ན་མི་མཐུན་པ་མེད་པ་ཞིག་དང་མིག་འཕྲུལ་ལྟར་མཇལ་ཞིང༌། བརྗོད་བྱ་དོན་གྱི་ཐུགས་རྒྱུད་འཕོ་བར་གྱུར་ཅིག །འཕོ་བར་གྱུར་ཅིག །རྗོད་བྱེད་ཚིག་གི་བརྒྱུད་པ་རྫོགས་པར་གྱུར་ཅིག །རྫོགས་པར་གྱུར་ཅིག །ཅེས་གསུང་སྒྲ་ལྷང་ལྷང་ཞལ་འདོན་མཛད་པ་ཐོས། དེར་དྲན་པ་འཐོར་འགྲོ་བ་ལྟ་བུའི་དད་པ་དང་མོས་གུས་བཟོད་བླག་མེད་པ་ཞིག་སྐྱེས། ཕྱག་འཚལ་ལོང་མེད་པར་ཀུན་མཁྱེན་བླ་མའི་ཕྱག་གཉིས་ནས་འུབ་ཀྱིས་འཇུས། སྤྱི་བོར་བཀོད་ནས་ཀུན་མཁྱེན་ཆོས་ཀྱི་རྒྱལ་པོ་མཁྱེན་ཞེས་ལན་གསུམ་དུ་མོས་གུས་ཀྱིས་བརྒྱལ་བ་ཙམ་དུ་གསོལ་བ་བཏབ་པས་སྤྱན་ཧུར་གྱིས་གཟིགས། རིགས་ཀྱི་བུ་ཁྱོད་ལ་ད་ཅི་སྨོན་ལམ་གཏད་རྒྱའི་སྒོ་ནས་དོན་བརྒྱུད་ཀྱི་དགོངས་པ་འཕོས་པ་ཡིན་པས། སྒྲུབ་པའི་སྲོག་མཁར་ཚུགས་ལ་སྐལ་ལྡན་ལ་རྒྱ་ཆེར་སྟོན་ཅིག །ཅེས་སྐུ་ཡིས་བྱིན་གྱིས་བརླབས་པ་དང༌། ཞལ་གཟིགས་བར་པ་ལ་དཔེ་ཆ་བམ་པོ་ཞིག་གནང་ནས་གསང་མཛོད་ཆེན་པོ་བརྡ་འགྲོལ་མཛད་པ་སོགས་གསུང་གིས་བྱིན་གྱིས་བརླབས་པ་དང༌། ཞལ་གཟིགས་ཕྱི་མ་ལ་རྡོ་རྗེའི་ལྟ་སྟངས་ཀྱིས་འོད་གསལ་དག་པ་རབ་འབྱམས་ཀྱི་དབང་བསྐུར་ཏེ་ཐུགས་ཀྱིས་བྱིན་གྱིས་བརླབས་ནས་མཉམ་རྗེས་རིས་མེད་དུ་དག་པའི་ཚུལ་གསུངས་ལས་ཀྱང༌། ཕྱི་ལྟར་ཧཱུྃ་ཆེན་འགྲོ་འདུལ་དྲི་མེད་རྗེ། །ནང་ལྟར་སིང་གའི་སློབ་དཔོན་མཉྫུ་ཤྲཱི། །གསང་བ་ཡེ་ཤེས་སྐུ་ཅན་ཀློང་ཆེན་པས། །བརྡ་ཐབས་རྟེན་འབྲེལ་དུ་མས་དོན་བརྒྱུད་བྱིན། །ཞེས་སོགས་གསུངས་པ་ལྟར་འོད་གསལ་བསམ་མི་ཁྱབ་པའི་དགོངས་པ་ལ་དབང་ཐོབ་ནས། དེའི་རང་རྩལ་རྩ་ཁམས་ཀྱི་ཡི་གེ་ཡེ་ཤེས་ཀྱི་རླུང་གིས་བསྐུལ་བས་མཁའ་འགྲོའི་བརྡ་མཛོད་རང་ཤར་དུ་རྙེད་ནས་དམ་པའི་ཆོས་ཀྱི་རོལ་མོ་ཟད་མེད་དུ་འཁྲོལ་བའི་སྙིང་བཅུད་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་རིག་འཛིན་བླ་མ་ཕྱི་ནང་གསང་བ་ཡང་གསང་དུ་སྒྲུབ་ཚུལ་བཞི་ལས་སྐབས་སུ་བབ་པ་ཡང་གསང་ཀུན་མཁྱེན་ཆེན་པོའི་ཐུགས་སྒྲུབ་འོད་གསལ་ཐིག་ལེའི་རྒྱ་ཅན་ཏེ། འཇམ་དཔལ་རྩ་རྒྱུད་ལས། གང་ཕྱིར་སངས་རྒྱས་ཐམས་ཅད་ནི། །འདས་དང་མ་བྱོན་ད་ལྟར་གྱི། །ཐམས་ཅད་མི་ཡི་འཇིག་རྟེན་དུ། །མི་ཡི་ལུས་སུ་ཡང་དག་འབྱུང༌། །ཞེས་དང༌། གུར་ལས། གང་ཞིག་རྡོ་རྗེ་སེམས་དཔའ་ཞེས། །རྡོ་རྗེ་སློབ་དཔོན་གཟུགས་སུ་གནས། །སེམས་ཅན་ཕན་གདགས་དམིགས་ནས་ནི། ཐ་མལ་པ་ཡི་གཟུགས་སུ་སྤྲུལ། །ཞེས་གསུངས་པ་ལྟར་ཐེག་མཆོག་རྫོགས་པ་ཆེན་པོའི་ཤིང་རྟ་ཀུན་མཁྱེན་བླ་མ་ཆོས་ཀྱི་རྒྱལ་པོ་ཉིད་ཀྱི་བླ་མའི་སྒྲུབ་པ་ཟབ་པའི་མཐར་ཐུག་ཏུ་གྱུར་པ་སྟེ། གཞུང་ལས། ཨེ་མ་ཤིན་ཏུ་ཡང་ཟབ་དགོངས་པའི་གཏེར༔ ཡང་གསང་ཐིག་ལེའི་རྒྱ་རྟགས་ཅན༔ གདོད་མའི་མགོན་པོ་ཀློང་ཆེན་པས༔ དཔལ་གྱི་བསམ་ཡས་མཆིམས་ཕུ་རུ༔ ཁོ་བོའི་སྙིང་གི་དཀྱིལ་དུ་སྦས༔ ལོ་ལྔའི་བར་དུ་གསང་རྒྱ་བྱས༔ ད་ལྟ་དུས་ངན་སྙིགས་མའི་ཚེ༔ ཟབ་རྒྱ་སྤེལ་བའི་སྣོད་དཀོན་ཡང༔ གདུག་པ་ཞེ་སྡང་སྦྲུལ་གྱི་ལོར༔ ལྭ་བ་དཀར་པོའི་ལྡིང་གུར་ནང༔ ཡེ་ཤེས་དབྱིངས་ཀྱི་མཁའ་འགྲོ་མས༔ འདི་ནས་ལོ་གསུམ་འདས་པ་ན༔ ཐུགས་ཀྱི་སྲས་མཆོག་གསུམ་ཡང་འབྱུང༔ བཛྲ་མིང་ཅན་སྙིང་སྟོབས་ཆེ༔ ཛྙཱ་ནའི་མིང་ཅན་གྲུབ་པའི་གཙོ༔ རིགས་ལྔའི་མིང་འཛིན་སྙན་ངག་མཁན༔ དེ་དག་རྣམས་ལ་ཆོས་སྒོ་འབྱེད༔ ཅེས་པའི་ལུང་བསྟན་ཇི་བཞིན་དུ༔ བརྒྱུད་འཛིན་སྙིང་གི་བུ་རྣམས་དང༔ ཀོང་སྨྱོན་སྦས་པའི་རྣལ་འབྱོར་གྱིས༔ བསྐུལ་ངོར་ཟབ་དོན་གཏད་རྒྱ་བཀྲོལ༔ སྨན་བཙུན་ཚེ་རིང་མཆེད་ལྔ་དང༔ གཟའ་རྒོད་སྲོག་གི་སྤུ་གྲི་ཡིས༔ ཐུབ་པར་སྲུངས་ཤིག་དམ་ཚིག་རྒྱ༔ ལས་ཅན་རྣམས་ཀྱི་དཔལ་དུ་ཤོག༔ ཅེས་གསུངས་པ་ལྟར་ཡང་གསང་བླ་མེད་རྫོགས་པ་ཆེན་པོའི་མན་ངག་གི་སྡེའི་ལྟ་སྒོམ་སྤྱོད་པའི་གནད་སྟོན་པ་ཀུན་བཟང་ཡེ་ཤེས་ཀློང་གི་རྒྱུད། དེའི་རྒྱུད་ཕྱི་མ་གཉིས། ལུང་ཀུན་བཟང་དགོངས་མཉམ། མན་ངག་གནད་གསུམ་ཤན་འབྱེད། གནས་ལུགས་རྡོ་རྗེ་ཚིག་རྐང་རྩ་འགྲེལ། ཁྲིད་ཡིག་ཡེ་ཤེས་བླ་མ་རྩ་བ་རྒྱབ་ཆོས་དང་བཅས་པས་མཚོན་པད་འབྱུང་བི་མའི་དགོངས་ཉམས་ཀྱི་ཤིང་རྟ་ཆེན་པོ་གཉིས་ཀྱི་བྱིན་རླབས་མན་ངག་སྨིན་གྲོལ་ཆུ་རྒྱུན་གཅིག་ཏུ་བསྡུས་པའི་གནད་ཀྱི་ཞུན་ཐིག་ཏུ་གྱུར་པའི་ཀློང་ཆེན་སྙིང་གི་ཐིག་ལེ་ཟབ་གསང་རྫོགས་པ་ཆེན་པོའི་བྱིན་རླབས་ཀྱི་སྒོ་འབྱེད་པཎ་ཆེན་བི་མ་ལ་དང་ཀུན་མཁྱེན་ཆེན་པོ་གཉིས་སུ་མེད་པའི་ཟབ་ལམ་བླ་མའི་སྒྲུབ་པ་འདི་ཀུན་མཁྱེན་འཇིགས་མེད་གླིང་པ་ཉིད་ཀྱིས་བླ་སྒྲུབ་རྩ་བ་ཙམ་གཏན་ལ་ཕབ་ནས། གསང་བའི་ལུང་ཟིན་ཆོས་ཀྱི་བདག་པོ་རྣམ་གསུམ་གྱི་གཙོས་ལས་ཅན་རྡོ་རྗེའི་སློབ་ཚོགས་ལ་བསྩལ་བ་ལས། སངས་རྒྱས་ཀྱི་ཕྲིན་ལས་སྨོན་ལམ་གྱི་རང་འབྲས་ནམ་ཡང་དུས་ལས་ཡོལ་བ་མེད་པས་ཀུན་མཁྱེན་བླ་མ་ཉིད་སླར་ཡང་གངས་ཅན་བསྟན་པ་ཡོངས་རྫོགས་ཀྱི་ཤིང་རྟར་བྱོན་པ་འཇམ་དབྱངས་མཁྱེན་བརྩེའི་དབང་པོའམ། འཇིགས་མེད་མཁྱེན་བརྩེའི་ཟློས་གར་དུ་གྲགས་པ་ཉིད་དགུང་གྲངས་ཉེར་དྲུག་ཏུ་ཕེབས་པ་ན་དབུས་གཙང་ལོངས་སྤྱོད་རྫོགས་པའི་རྡོ་རྗེའི་གནས་ཆེན་རྣམས་སུ་དཔའ་བོ་དང་རྣལ་འབྱོར་མའི་ཚོགས་ཀྱི་འདུ་བ་ལ་དགྱེས་དགུར་སྤྱོད་པས། རྡོ་རྗེའི་ནང་གི་ས་ལམ་ལ་བོགས་འབྱིན་པ་དང༌། བོད་ཁམས་བསྟན་འགྲོའི་ཕན་བདེའི་བཙས་སུ་ཕྱི་ནང་གསང་བའི་རྟེན་འབྲེལ་ལེགས་ཚོགས་དུ་མ་བདག་གིར་མཛད་པ་ལས། གངས་རི་ཐོད་དཀར་འོད་ཟེར་སྤྲིན་གྱི་སྐྱེད་མོས་ཚལ་དུ་ཕེབས་པ་ན། ཀུན་མཁྱེན་ངག་གི་དབང་པོའི་ཡེ་ཤེས་ཀྱི་སྐུས་རྗེས་སུ་བཟུང་སྟེ་བུ་ཞེས་དགྱེས་པས་དབུགས་དབྱུང་མཛད་པ་ལས། བླ་སྒྲུབ་འདི་ཉིད་ཀྱི་སྨིན་བྱེད་ཡེ་ཤེས་མཆོག་སྦྱིན་དང༌། རྗེས་རིམ་ཚོགས་མཆོད་སྐོང་བཤགས། རིལ་སྒྲུབ་དང་བཅས་པ་གཏན་ལ་ཕབ་ཅིང༌། པདྨ་དང་བི་མ་ལའི་བཀའ་སྲོལ་གཙོ་བོར་གྱུར་པའི་རྫོགས་ཆེན་སྡེ་གསུམ། བཀའ་གཏེར་ཡོངས་རྫོགས་ཀྱི་དོན་གྱི་བསྟན་པའི་བདག་པོར་གྱུར་ནས་ཀུན་བཟང་ཐུགས་ཀྱི་བསྟན་པས་ནམ་མཁའི་དབྱིངས་ཀུན་ཏུ་ཁྱབ་པར་བརྡལ་བར་མཛད་པས་ཞལ་གཟིགས་བྱིན་རླབས་ཀྱི་ཉེ་བརྒྱུད་ཟམ་མ་ཆད་པའི་སྨིན་གྲོལ་ཆིག་རྫོགས་སུ་སྒྲུབ་པ་ལ་མཎྜལ་ཕུལ། རྒྱལ་བ་སྲས་དང་བཅས་པའི་ཡེ་ཤེས་ཀྱི་སྐུ་གཅིག་པུ་ཀུན་མཁྱེན་བླ་མ་དང་གཉིས་སུ་མེད་པའི་བདག་ཉིད་ལ་ཡིད་ཆེས་དད་པས་གསོལ་བ་འདེབས་པ་འདིའི་རྗེས་ཟློས་མཛོད། སངས་རྒྱས་ཀུན་གྱི་ཡེ་ཤེས་སྐུ། །རྡོ་རྗེ་སློབ་དཔོན་བདག་ལ་དགོངས། །རིག་འཛིན་བླ་མའི་དཀྱིལ་འཁོར་དུ། །འཇུག་ཅིང་སྨིན་པའི་བཀའ་དྲིན་སྩོལ། །ལན་གསུམ། མདུན་གྱི་ནམ་མཁར་སྐྱབས་གནས་ཀུན་འདུས་རྩ་བའི་བླ་མ་དང་དབྱེར་མེད་པའི་ཀུན་མཁྱེན་ཆོས་ཀྱི་རྒྱལ་པོ་ཕྱོགས་དུས་རྩ་གསུམ་རྒྱལ་བ་སྲས་དང་བཅས་པའི་ཡེ་ཤེས་ཀྱི་ཕུང་པོ་གཅིག་ཏུ་བསྡུས་པའི་བདག་ཉིད་ཆེན་པོ་ལ། བདག་གཞན་སེམས་ཅན་ཐམས་ཅད་སྒོ་གསུམ་འཇུག་པ་གཅིག་པས་སྐྱབས་སུ་འགྲོ་བ་ཀུན་རྫོབ་རྒྱུའི་སྐྱབས་འགྲོ་དང༌། སྐྱབས་ཡུལ་དང་རང་སེམས་དབྱེར་མེད་པའི་ཆོས་ཉིད་ངོ་བོ་རང་བཞིན་ཐུགས་རྗེའི་བདག་ཉིད་སྐུ་གསུམ་རང་ཆས་སུ་བཞུགས་པ་དོན་དམ་འབྲས་བུའི་སྐྱབས་འགྲོ་ལ་དྲན་པ་ཉེ་བར་བཞག་པས་འདིའི་རྗེས་ཟློས་མཛོད། ཧཱུྃ༔ ངོ་བོ་རང་བཞིན་སོགས་ལན་གསུམ། རང་གཞན་སེམས་ཅན་ཐམས་ཅད་འཁོར་བ་ལས་བསྒྲལ་འདོད་ཀུན་རྫོབ་བྱང་ཆུབ་ཀྱི་སེམས་དེ་ཉིད། དོན་དམ་པར་ཅི་ཡང་མ་གྲུབ་ཅིང་ཀུན་རྫོབ་ཏུ་ཅིར་ཡང་འཆར་བའི་སྟོང་དང་རྟེན་འབྱུང་དབྱེར་མེད་པའི་ངང་དུ་མཉམ་པར་འཇོག་པ་དོན་དམ་གྱི་སེམས་བསྐྱེད་ལ་བློ་གཞོལ་བས་འདིའི་རྗེས་ཟློས་མཛོད། ཧོ༔ སངས་རྒྱས་མེད་ལ་སེམས་ཅན་སོགས་ལན་གསུམ། སླར་ཡང་རྒྱལ་བ་སྲས་དང་བཅས་པའི་བགྲོད་པ་གཅིག་པའི་ལམ་སྡོམ་པ་གསུམ་གྱི་གནང་བཀག་རྣམས་ཚུལ་བཞིན་དུ་བཟུང་ཞིང་བསྲུངས་ནས་དེ་བཞིན་གཤེགས་པའི་སྤྱོད་ཡུལ་རླབས་པོ་ཆེ་ལ་འཇུག་པར་བགྱིའོ་སྙམ་པས་དམ་བཅའ་བ་འདིའི་རྗེས་ཟློས་མཛོད། བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང༌། །སྐུ་གསུང་ཐུགས་ཀྱི་ཕྱག་རྒྱ་ནི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་རླབས་མཛོད། །ལན་གསུམ། དེ་དག་གིས་དབང་གི་སྔོན་དུ་འགྲོ་བ་རྣམས་གྲུབ་ནས། དབང་དངོས་ལ་བུམ་གསང་ཤེར་ཡེ་བཞི་དང་གཏད་རྒྱའི་དབང་དང་བཅས་རྣམ་པ་ལྔར་ཡོད་པ་ལས། དང་པོ་བུམ་དབང་གི་གཞི་འགོད་པ་ལ་ཡེ་ཤེས་པ་དབབ་པ་ཡིན་པས་སྒོ་གསུམ་གྱི་གནད་གཅུན་ལ་དམིགས་པ་འདི་ལྟར་དུ་སྒོམས་ཤིག །འདི་ལྟར་རང་ངོར་ཉམས་སུ་མྱོང་ཡང་བསམ་བརྗོད་ཀྱི་སྤྲོས་པ་ལས་འདས་པའི་རིག་སྟོང་རྗེན་པ་སྐད་ཅིག་མའི་རང་རྩལ་འོད་གསལ་སྒྲོན་མ་དྲུག་ལྡན་གྱི་སྣང་བའི་ཉམས་ཀྱི་འཕེལ་ཁ་ཡོངས་སུ་རྫོགས་པས། ནང་དབྱིངས་ཀྱི་རང་གདངས་རིག་པ་འོད་སྐུའི་ཕྱག་རྒྱ་དཀྱིལ་འཁོར་རྒྱ་མཚོའི་ཁྱབ་བདག་ཏུ་སྨིན་ནས་འཁྲུལ་སྣང་སྡུག་ཀུན་གྱི་ཆོས་ཀུན་རྫོབ་ཀྱི་ཆ་ཀུན་ཆོས་ཉིད་ཀྱི་ནང་དབྱིངས་སུ་རང་ཟད་དེ་སྐུ་གསུམ་ལམ་སྣང་དུ་རྫོགས་པའི་འཕོ་ཆེན་ཡེ་ཤེས་རྡོ་རྗེའི་སྐུ་ཅན་དྲི་མེད་ཆོས་ཀྱི་བཤེས་གཉེན་དང་གཉིས་སུ་མེད་པའི་རྒྱལ་བའི་དབང་པོ་ཀློང་ཆེན་རབ་འབྱམས་བཅུ་ཕྲག་རིག་པའི་གནས་ཀུན་མཐར་སོན་པའི་པཎྜི་ཏ་ཡི་ཆ་བྱད་ཅན་ཞི་འཛུམ་མཚན་དཔེའི་ཉམས་འགྱུར་ཡོངས་སུ་རྫོགས་པ། གསང་གསུམ་མི་ཟད་རྒྱན་གྱི་འཁོར་ལོར་རྒྱལ་བ་ཀུན་དང་གཉིས་སུ་མེད་པའི་བདག་ཉིད་ཆེན་པོར་གསལ་བའི་གནས་གསུམ་དུ་རྡོ་རྗེ་གསུམ་གྱི་ངོ་བོར་ཡི་གེ་འབྲུ་གསུམ་གྱིས་མཚན་པ་དང༌། སློབ་དཔོན་གྱི་ཐུགས་ཀ་ནས་ཀྱང་འོད་ཟེར་བསམ་གྱིས་མི་ཁྱབ་པ་འཕྲོས། དག་པའི་ཞིང་རབ་འབྱམས་ཐམས་ཅད་དུ་ཁྱབ། དེ་དག་ན་བཞུགས་པའི་དུས་གསུམ་གྱི་བདེ་བར་གཤེགས་པ་སྲས་དང་བཅས་པ་དང༌། རབ་འབྱམས་རྩ་བ་གསུམ་གྱི་ལྷ་ཚོགས། ཁྱད་པར་འོད་གསལ་རྫོགས་པ་ཆེན་པོའི་བརྒྱུད་གསུམ་རིག་འཛིན་མཁའ་འགྲོ་རྒྱ་མཚོའི་ཐུགས་རྒྱུད་རང་དབང་མེད་པར་བསྐུལ་ནས། རྡོ་རྗེའི་གསང་བ་གསུམ་གྱི་བྱིན་རླབས་ཐམས་ཅད་སྐུ་དང་ཡིག་འབྲུ་ཕྱག་མཚན་གྱི་རྣམ་པ་ཆར་དྲག་ཏུ་བབ་པ་ཙམ་སྤྱན་དྲངས་ནས་ཁྱེད་རང་རྣམས་ཀྱི་སྒོ་གསུམ་ལ་ཐིམ་པས་གཉིས་སུ་མེད་པར་བྱིན་གྱིས་བརླབ་པར་མོས་ཤིག །སྤོས་རོལ་ཌཱ་དྲིལ་གདུང་དབྱངས་དང་བཅས། ཧཱུྃ༔ རྣམ་རྟོག་བྲལ་བའི་ཕོ་བྲང་སོགས་ལས་བྱང་གི་སྤྱན་འདྲེན་དང་སྔགས་མཐར། ཛྙཱ་ན་ཨ་བེ་ཤ་ཡ་ཨ་ཨཿ ཞེས་སྔགས་བཟླ་ཞིང་བྱིན་དབབ། དེ་ལྟར་དབང་གི་ཡེ་ཤེས་པའི་བྱིན་རླབས་ཀྱི་རྒྱུན་གཉུག་མའི་རྡོ་རྗེ་གསུམ་དང་དབྱེར་མེད་དུ་བརྟན་པར་བྱས་པའི་མོས་པ་མཛོད། ཏིཥྛ་བཛྲ་ཞེས་རྡོ་རྗེ་མགོ་བོར་བཞག །སླར་ཡང་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། དབང་གི་ལྷ་ནམ་མཁའ་གང་བར་སྤྱན་དྲངས་པ་རྣམས་དང་སློབ་དཔོན་ལྷན་ཅིག་པས་བཀྲ་ཤིས་པའི་རྣམ་པ་དུ་མ་ལྡན་པས་རིན་པོ་ཆེའི་བུམ་པ་ཡེ་ཤེས་བདུད་རྩིའི་ཆུ་རྒྱུན་གྱིས་གང་བས་སྤྱི་བོ་ནས་མངོན་པར་དབང་བསྐུར་བའི་ཆོ་ག་སྩོལ་བར་མོས་ཤིག །རྣམ་བུམ་སྤྱི་བོར་བཞག་ལ། ཧྲཱིཿ ཀ་དག་གཞོན་ནུ་བུམ་སྐུའི་གྲོང་ཁྱེར་དུ། །ལྷུན་གྲུབ་སྣང་སྟོང་བླ་མའི་དཀྱིལ་འཁོར་ཤར། །ཟུང་འཇུག་བདུད་རྩིའི་རྒྱུན་གྱིས་དབང་བསྐུར་བས། །ཕུང་ཁམས་སྐྱེ་མཆེད་ལྷ་སྐུར་དག་པར་ཤོག །ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སིདྡྷི་ཧཱུྃ༔ ནིརྨ་ཀཱ་ཡ་ཨ་བྷི་ཥིཉྩ་ཨོཾ། གཞུང་ལས། རྗེས་འབྲེལ་བསྐྱེད་པའི་རིམ་པ་དང༌། །བཞུགས་སྟངས་རྣམ་པ་གསུམ་ལ་བསླབ། །ཅེས་གསུངས་པ་ལྟར། འདི་ལྟར་བུམ་པའི་དབང་དང་སྐུའི་བྱིན་རླབས་ཐོབ་ཕྱིན་ཆད་སྣོད་བཅུད་ཐ་མལ་དུ་ལྟ་བའི་འཛིན་ཞེན་སྤངས་ཏེ་ཅིར་སྣང་ལྷའི་འཁོར་ལོར་ཤེས་པས་སྣང་སྟོང་འོད་གསལ་སྒྱུ་མ་བསྐྱེད་པའི་ལམ་ཁྱེར་ལ་བརྩོན་དགོས། དེའང་སྐབས་འདིར་ནི་དབང་རབ་ཨ་ཏི་ཡོ་ག་དང་མཐུན་པའི་བསྐྱེད་ཚུལ་གསུངས་པས་འདི་ལྟར་ཉམས་སུ་བླང་བར་བྱ་སྟེ། ཆོས་ཅན་སྤྲོས་པའི་མཚན་མ་མཐའ་དག་ཀ་དག་སྤྲོས་བྲལ་གྱི་ནང་དབྱིངས་སུ་ཐིམ། དེའི་ངང་ལས་ལྷུན་གྲུབ་འོད་གསལ་གྱི་རིག་གདངས་ཅིར་སྣང་དག་ཆེན་ཡེ་ཤེས་རོལ་པའི་སྒྲོན་མེའི་སྤྲིན་ཕུང་འབྱམས་ཀླས་པར་བཀོད་དེ་སྣང་སྲིད་སྣོད་བཅུད་ཐམས་ཅད་དཔལ་མགོན་རིག་འཛིན་བླ་མའི་རྡོ་རྗེ་གསུམ་གྱི་དཀྱིལ་འཁོར་དུ་སྐུ་དང་ཐིག་ལེ་ལུ་གུ་རྒྱུད་འཇའ་འོད་ཟེར་སྤྲིན་འཁྲིགས་པའི་དབུས་སུ་རིག་སྟོང་སྐད་ཅིག་མ་དྲན་རིག་འཛིན་མེད་ཁྱབ་བརྡལ་དུ་གྲོལ་ཏེ་འཕོ་ཆེན་རྡོ་རྗེའི་བཙན་ས་ཟིན་པས་འོད་གསལ་སྣང་བ་བཞིའི་ཕ་མཐར་སོན་པའི་རྟེན་འབྱུང་གི་སྣང་ཆ་མ་འགག་རང་ཤར་ཡོངས་གྲུབ་དག་མཉམ་ཆེན་པོའི་བསྐྱེད་རིམ་རང་གི་གཉུག་མའི་ཕུང་ཁམས་སྐྱེ་མཆེད་ཐམས་ཅད་དཔལ་མགོན་རིག་འཛིན་བླ་མ་ཀུན་མཁྱེན་རྒྱལ་བ་ཀློང་ཆེན་པ་ཆེན་པོ་འཕོ་མེད་རྡོ་རྗེའི་ལང་ཚོ་གྲུབ་པས་སྐུ་མདོག་དཀར་དམར་གཞོན་མཛེས་ཀྱི་མཚན་དཔེ་ཅན། ཐེག་པ་རིམ་དགུའི་ས་ལམ་གྱི་ཡོན་ཏན་ཡོངས་སུ་རྫོགས་པས་པཎྜི་ཏའི་ཆ་བྱད། མདོ་སྔགས་ཀྱི་སྡེ་སྣོད་རབ་འབྱམས་འཛིན་པས་དབུ་ལ་པཎ་ཞུ་གསོལ་བ། རང་ངོར་འཁོར་འདས་ཀྱི་མཚན་འཛིན་དབྱིངས་སུ་དག་པས་ཞབས་རྡོ་རྗེའི་སྐྱིལ་ཀྲུང༌། སྟོང་དང་སྙིང་རྗེ་དབྱེར་མེད་ཀྱི་དགོངས་པ་མངོན་དུ་གྱུར་པས་པད་ཟླའི་སྟེང་དུ་བཞུགས་པ། འགྲོ་ཀུན་གདོད་མའི་འབྲས་བུའི་སར་སྦྱོར་བས་ཕྱག་གཉིས་སེམས་ཉིད་ངལ་གསོའི་ཕྱག་རྒྱ་ཅན། རྡོ་རྗེ་ནམ་མཁའི་ཡེ་ཤེས་ཀྱིས་ཞིང་ཁམས་རབ་འབྱམས་སུ་ཁྱབ་པ་ཅན་དུ་གསལ་ཐོབ་ལ་སེམས་འཛིན་གནང་མཛོད། ཅེས་དར་ཅིག་སེམས་གཟུང་དུ་གཞུག དེ་ལྟ་བུའི་བསྐྱེད་རིམ་གསལ་བརྟན་དག་གསུམ་དང་ལྡན་པས་རིམ་པ་དང་པོའི་ཏིང་ངེ་འཛིན་མཐར་ཕྱིན་པར་བྱ་དགོས་ཤིང༌། སྦྱང་གཞི་སྒྱུ་འཕྲུལ་དྲྭ་བ་སྣང་སྟོང་སྐུ་རྡོ་རྗེའི་དཀྱིལ་འཁོར་ཉིད། སྦྱོང་བྱེད་ཐུན་མོང་ཡོངས་གྲུབ་ཆེན་པོའི་བསྐྱེད་རིམ་དང༌། ཁྱད་པར་ལུས་བཞུགས་སྟངས་གསུམ་གྱི་གནད་ཀྱིས་གཅུན་པས་རྩ་དང་དེར་རྒྱུ་བའི་རླུང་རིག་གནད་དུ་ཆུན་ནས། སྦྱངས་འབྲས་འོད་གསལ་ཐིག་ལེ་ཆེན་པོའི་སྐུ་དང་ཞིང་ཁམས་མངོན་དུ་འཆར་ནུབ་བྲལ་བར་སྣང་བའི་ཕྱིར་ཆོས་སྐུའི་བཞུགས་སྟངས་སེང་གེ་ལྟ་བུ་མཛོད་ཅིག །ལོངས་སྐུའི་བཞུགས་སྟངས་གླང་ཆེན་ཉལ་བ་ལྟ་བུ་མཛོད་ཅིག །སྤྲུལ་སྐུའི་བཞུགས་སྟངས་དྲང་སྲོང་ཙོག་པུ་ལྟ་བུ་མཛོད་ཅིག །ལུས་གནད་གཅུན་བཞུགས་སྟངས་སོ་སོར་བྱར་བཅུག དེ་དག་གི་ཕན་ཡོན་ཀྱང་གསང་བ་སྤྱོད་པ་ས་བོན་གྱི་རྒྱུད་ལས། ལུས་ནི་སེང་གེ་ལྟ་བུ་དང༌། །དྲང་སྲོང་དང་ནི་གླང་ཆེན་ཚུལ། །འདི་ལས་གཡོ་བར་མ་བྱས་ན། །སངས་རྒྱས་སུམ་སྟོང་ཉིད་དང་ཡང༌། །སྐལ་པ་དག་ནི་མཉམ་པའོ། །ཞེས་སོ། དེའི་རྗེས་སུ་འབྲེལ་བ་སྐུའི་བྱིན་རླབས་བྱ་བའི་སླད་དུ། མདུན་གྱི་ཀུན་མཁྱེན་བླ་མའི་སྐུ་ལས་སྐུ་གཉིས་པ་ཞིག་ཡེར་གྱིས་བྱོན། ཁྱེད་རང་རྣམས་ཀྱི་དཔྲལ་བ་ནས་ཞུགས་ཏེ་ལུས་ལ་ཐིམ་པས་འཕོ་ཆེན་ཡེ་ཤེས་རྡོ་རྗེའི་སྐུ་དང་དབྱེར་མེད་དུ་གྱུར་པར་མོས་མཛོད། སྐུ་བརྙན་སྤྱི་བོར་བཀོད་དེ། ཨོཾ། རིག་གདངས་ཆོས་ཉིད་མངོན་སུམ་གཞལ་ཡས་སུ། །ཉམས་སྣང་གོང་འཕེལ་འཇའ་ཟེར་ཐིག་ལེའི་ཀློང༌། །རིག་པ་ཚད་ཕེབས་དོན་གྱི་བླ་མའི་སྐུས། །ཆོས་ཟད་བློ་འདས་ཆེན་པོར་དབང་བསྐུར་རོ། །བཛྲ་ཀཱ་ཡ་ཨ་བྷི་ཥིཉྩ་མི། དེས་སྤྲོས་བཅས་བུམ་པའི་དབང་བསྐུར་མཐའ་རྟེན་དང་བཅས་པས་ལུས་ངག་ཡིད་གསུམ་གྱི་གཟུང་འཛིན་བག་ཆགས་དང་བཅས་པ་སྦྱངས་ཤིང་ཤེས་བྱ་ལ་རྨོངས་པའི་སྒྲིབ་པ་དག་ནས་སྣང་སྲིད་གཞིར་བཞེངས་རང་བྱུང་ལྷའི་འཁོར་ལོ་མངོན་སུམ་མཐོང་བའི་རྟེན་འབྲེལ་འགྲིགས་པ་ཡིན་ནོ། །གཉིས་པ་གསང་བའི་དབང་གི་སླད་དུ་བླ་མ་ཧེ་རུ་ཀ་དཔལ་དུ་གནས་གྱུར་པའི་རང་འོད་དབྱིངས་ཀྱི་ཕྱག་རྒྱ་དང་མཉམ་པར་སྦྱོར་བའི་བྱང་སེམས་སངས་རྒྱས་ཐམས་ཅད་འདུས་པའི་ངོ་བོ་ཐོད་པའི་བདུད་རྩི་དང་རོ་གཅིག་ཏུ་འདྲེས་པ་མྱོང་བ་ཙམ་གྱིས་རང་བཞིན་བརྒྱད་ཅུའི་རྟོག་ཚོགས་དབྱིངས་སུ་ཐིམ། གསལ་སྟོང་གི་ཡེ་ཤེས་ཉམས་སུ་མྱོང་བར་མོས་ཤིག བྷནྡྷའི་བདུད་རྩི་མྱང་དུ་གཞུག་ལ། ཧྲཱིཿ ཕྱི་སྣོད་རྩ་གསུམ་འཁོར་ལོའི་བྷནྡྷ་རུ། །ནང་བཅུད་བདེ་ཆེན་བྱང་སེམས་བདུད་རྩིར་བསྐྱིལ། །དེང་འདིར་སྐལ་ལྡན་ཁྱོད་ལ་སྦྱིན་པ་ཡིས། །སྲོག་རྩོལ་དབུ་མའི་དབྱིངས་སུ་རྫོགས་པར་ཤོག །ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སིདྡྷི་ཧཱུྃ༔ སཾ་བྷོ་ཀཱ་ཡ་ཨ་བྷི་ཥིཉྩ་ཨཱཿ རྗེས་འབྲེལ་གཟིགས་སྟངས་རྣམ་གསུམ་དང༌། །རླུང་རིག་གནད་ལ་བསླབ་པའི་རྗེས། །ཞེས་གསུངས་པས། འདི་ལྟར་གསང་བའི་དབང་དང་གསུང་གི་བྱིན་རླབས་ཐོབ་ཕྱིན་ཆད་རླུང་གནད་དུ་གཅུན་པའི་རྡོ་རྗེའི་རྣལ་འབྱོར་ལ་བསླབ་དགོས། སྦྱང་གཞི་བདེ་སྟོང་དྲྭ་བ་སྡོམ་པའི་གསུང་རྡོ་རྗེའི་དཀྱིལ་འཁོར་ཉིད། སྦྱོང་བྱེད་ཐུན་མོང་དང་ཁྱད་པར་བླ་མེད་ཀྱི་ཐབས་ཟབ་མོས་གཅུན་པས། སྦྱངས་འབྲས་རྩ་ཁམས་ཀྱི་ཡི་གེ་ཡེ་ཤེས་རླུང་གིས་བསྐུལ་བས་ཆོས་ཕུང་བརྒྱད་ཁྲིའི་རོལ་མོ་འདོད་རྒུར་འཁྲོལ་བའི་ཕྱིར་སྲོག་རྩོལ་རྡོ་རྗེའི་བཟླས་པ་ལ་འབད་དགོས་ཏེ། སྣོད་བཅུད་ཀྱི་འཇིག་རྟེན་ཐམས་ཅད་ཆགས་འཇིག་གནས་སྟོང་མཐའ་དག་རླུང་གིས་བྱེད་པ་གཙོ་ཆེ་ཞིང༌། སྒོ་ལྔའི་རྣམ་ཤེས་ཡུལ་ལ་ཤར་ནས་ལས་ཉོན་གྱི་བྱེད་ལས་ཀྱང་སེམས་ཉིད་ཀྱི་རང་བཞིན་ཆོས་ཉིད་ཀྱི་གདངས་རླུང་ལ་ཞོན་ནས་གཡོ་བར་བྱེད་ཅིང༌། ཡེ་ཤེས་ཀྱི་རླུང་ལས་སྒྲོན་མ་བཞིར་སྨིན་ནས་སྣང་བཞི་རྩལ་རྫོགས་ཏེ། རིག་པ་གཞི་ཀློང་དུ་དག་པ་ཡང་ལས་རླུང་གི་གཡོ་སྡུད་ཟད་ནས་འཕོ་མེད་དུ་བཙན་ས་ཟིན་དགོས་པའི་ཕྱིར་རླུང་ལ་བསླབ་དགོས། དེ་ལའང་ཁྱད་པར། ཐུན་མིན། ཐུན་མོང་གི་བསླབ་ཚུལ་གསུམ་ལས་དང་པོ་རྡོ་རྗེའི་གསང་ལམ་གྱི་ཐབས་ཀུན་གྱི་རྩེ་མོ་རྩོལ་བ་དང་བཅས་པའི་བསྐྱེད་རྫོགས་ལས་ཁྱད་པར་དུ་འཕགས་པ་བྱར་མེད་ཀྱི་ངང་ནས་འབྱུང་བ་རང་མལ་དུ་དག་པའི་ཐབས་ཐེག་མཆོག་རྫོགས་པ་ཆེན་པོ་ལ་བརྟེན་པ་སྒོ་ཡི་གནད་ལ་བརྟེན་ནས་འབྲས་བུ་ལམ་སྣང་དུ་བྱེད་པའི་གནད་ཟབ་མོ་སྟེ་ཆོས་སྐུ་ལ་ཆོས་ཉིད་ཀྱི་སྤྱན་ཡོད་པས་མིག་གཉིས་གཟིགས་སྟངས་གྱེན་ལ་ལྡོག་པས་གཙུག་ཏོར་རྣམ་པར་བལྟ་བའི་ཚུལ་གྱིས་ལྟོས་ཤིག །ལོངས་སྐུ་ལ་ཡེ་ཤེས་ཀྱི་སྤྱན་ཡོད་པས་གཟིགས་སྟངས་ཟུར་ལ་གཏད་པས་མདའ་མཁན་གྱིས་སྙུག་མ་བསྲངས་བ་བཞིན་དུ་ལྟོས་ཤིག །སྤྲུལ་སྐུ་ལ་ཤེས་རབ་ཀྱི་སྤྱན་ཡོད་པས་གཟིགས་སྟངས་ཐུར་ལ་ཕབ་ནས་དྲང་སྲོང་བསམ་གཏན་སྒོམ་པ་བཞིན་དུ་ལྟོས་ཤིག །ཅེས་ལྟ་སྟངས་བྱར་གཞུག གཉིས་པ་ཐུན་མོང་མ་ཡིན་པ་རྡོ་རྗེའི་བཟླས་པ་ལ། རང་ཉིད་ཀུན་མཁྱེན་བླ་མ་འོད་གསལ་དྭངས་མའི་སྐུ་འཇའ་ཚོན་སྒྲིབ་གཡོགས་དང་བྲལ་བ་ལྟ་བུའི་ཐུགས་ཀར་ཡེ་ཤེས་སེམས་དཔའ་ཀུན་བཟང་ཡབ་ཡུམ་གསལ་བའི་ཐུགས་ཙིཏྟ་རིན་པོ་ཆེའི་སྦུབས་སུ་པདྨ་ཉི་ཟླའི་སྟེང་དུ་རྡོ་རྗེ་གསུམ་གྱི་ས་བོན་ཡི་གེ་གསུམ་གསལ་ལ་རིག་པ་གཡོ་མེད་དུ་གཏད་དེ་རླུང་རོ་སུམ་ཕྲུག་ཏུ་བསལ་བའི་རྗེས་འབྲུ་གསུམ་རྡོ་རྗེའི་བཟླས་པ་མཛོད་ཅིག །འབྱུང་འཇུག་གནས་གསུམ་དང་སྦྱར་བ་བུམ་ཅན་དང་སྦྲགས་པའམ། གང་ཤེས་ལན་བདུན་ནམ། གསུམ་བྱར་གཞུག གསུམ་པ་ཐུན་མོང་གི་བཟླས་ལུང་སྦྱིན་པ་ལ། དང་པོ་སློབ་དཔོན་དང་ཁྱེད་རང་གཉིས་ཀའི་སྙིང་དབུས་སུ་འོད་ལྔའི་ཐིག་ལེ་ཟླུམ་འཁྱིལ་མཐིང་ག་ཁྱབ་པ་ཆེན་པོའི་འོད་ཀློང་དུ་ཡེ་ཤེས་སེམས་དཔའ་ཀུན་བཟང་ཡབ་ཡུམ་གྱི་ཐུགས་དབུས་པདྨ་ཉི་ཟླའི་གདན་ལ་གཉུག་མའི་སེམས་ཉིད་ཧཱུྃ་མཐིང་གསལ་མཐར་རིག་པ་རྡོ་རྗེ་ལུ་གུ་རྒྱུད་ཡི་གེའི་གཟུགས་སུ་ཤར་བའི་སྔགས་ཕྲེང་མཐིང་གསལ་འོད་ཁ་དོག་ལྔ་ལྡན་གཡས་བསྐོར་དུ་གནས་པར་གསལ། སློབ་དཔོན་གྱི་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་རེ་འཕྲོས། ཞལ་ནས་ཐོན། ཁྱེད་རང་རྣམས་ཀྱི་ཞལ་ནས་རིམ་པར་བརྒྱུད་དེ་ཐུགས་ཀའི་ཧཱུྃ་གི་མཐར་འཁོད་པ་ལ་ཐིམ་པས་འོད་ཟེར་བུན་བུན་གིས་འཕྲོས། རྒྱལ་བ་སྲས་བཅས་དང་འོད་གསལ་སྙིང་ཐིག་གི་བརྒྱུད་པའི་བླ་མ་རྣམས་མཆོད། འོད་ཟེར་མར་འཕྲོས་སེམས་ཅན་ཐམས་ཅད་ལ་ཕོག་པས་སྡིག་སྒྲིབ་བག་ཆགས་དང་བཅས་པ་སྦྱངས་ཏེ་ཕྱི་སྣོད་འོག་མིན། ནང་བཅུད་རིག་འཛིན་བླ་མའི་སྐུར་སད། འོད་ཟེར་ཚུར་འདུས་པས་སྒོ་གསུམ་རྡོ་རྗེ་གསུམ་གྱི་ངོ་བོར་བྱིན་གྱིས་བརླབས་པས་དངོས་གྲུབ་གཉིས་ཐོབ་ཅིང་འོད་གསལ་འགྲོ་འོང་བྲལ་བའི་གཤིས་ལ་མཉམ་པར་འཇོག་པ་བསྙེན་སྒྲུབ་ཡན་ལག་བཞི་ལྡན་གྱི་དགོངས་པས་རྩ་བའི་སྔགས་འདིའི་རྗེས་ཟློས་ལན་གསུམ་མཛོད། ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སིདྡྷི་ཧཱུྃ༔ དེ་དང་རྗེས་སུ་འབྲེལ་བ་གསུང་གི་བྱིན་རླབས་བྱ་བའི་སླད་དུ། རྒྱལ་བ་རིག་འཛིན་སྲོག་འཁོར་དཔལ་གྱི་གདུ་བུའི་བྱིན་རླབས་འབོག་པ་ལ། ཐོག་མར་ཆོས་ཉིད་རྡོ་རྗེའི་རང་སྒྲ་སྔགས་འདི་དག་ལེགས་པར་གསན་འཚལ། རིག་འཛིན་སྲོག་འཁོར་དཔལ་གྱི་གདུ་བུ་ཚར་གཅིག་བཀླག དེ་ལྟར་སྡེ་གསུམ་རྒྱུད་ལུང་མན་ངག་གི་རྒྱལ་བ་ཡོངས་སུ་རྫོགས་པའི་ཐུགས་ཡེ་ཤེས་ཆེན་པོ་ཡི་གེའི་གཟུགས་སུ་ཤར་བ་གསུང་ཙཀྲའི་ཚུལ་དུ་ཆོས་སྐུའི་རིང་བསྲེལ་གྱི་དབང་བསྐུར་བར་མོས་མཛོད། རིག་འཛིན་སྲོག་འཁོར་སྤྱི་བོར་བཀོད་དེ། ཨཱཿ སྲས་བཅས་རྒྱལ་བ་ཀུན་གྱི་རྡོ་རྗེའི་གསུང༌། །ཡི་གེའི་འཁོར་ལོར་ཤར་བས་དབང་བསྐུར་བས། །ལས་རླུང་ཡེ་ཤེས་ཁམས་སུ་རྣམ་དག་པའི། །ཆོས་ཀྱི་རྒྱལ་སྲིད་མཆོག་ལ་དབང་བསྒྱུར་ཤོག །བཛྲ་ཝཱཀ་ཨ་བྷི་ཥིཉྩ་མི། དེས་སྤྲོས་མེད་གསང་བའི་དབང་མཐའ་རྟེན་དང་བཅས་པས་སྐུ་གསུང་ཐུགས་ཡེ་ཤེས་ཆེན་པོའི་བྱིན་རླབས་དང་རང་བྱུང་ཟག་མེད་བདེ་ཆེན་གྱི་ནུས་པ་རྒྱུད་ལ་ཞུགས་ཏེ་མཚན་མའི་རྟོག་པ་མཐའ་དག་འོད་གསལ་གྱི་དབྱིངས་སུ་ཟད་པའི་རྟེན་འབྲེལ་འགྲིགས་པ་ཡིན་ནོ། །གསུམ་པ་ཤེས་རབ་ཡེ་ཤེས་ཀྱི་དབང་གི་སླད་དུ། མཚན་ལྡན་རིགས་ཀྱི་ཕྱག་རྒྱ་རྡོ་རྗེ་སྙེམས་མའི་ངོ་བོར་སྤྲོས་ཏེ་གསང་བའི་བརྟུལ་ཞུགས་ཀྱི་དོན་དུ་བྱིན་པར་མོས་ཤིག །རིག་ཙཀ་གཏད་ལ། ཧྲཱིཿ བཅུ་དྲུག་དགའ་བ་སྟེར་བའི་ཕོ་ཉ་མོ། །ཡིད་འོང་སྣ་ཚོགས་གཟུགས་ཅན་འདི་གཏད་ཅིང༌། །ལྷན་སྐྱེས་ཐར་པ་བསྟེན་པའི་དབང་བསྐུར་བས། །རྟོག་ཚོགས་བདེ་སྟོང་ཆེན་པོར་སྨིན་པར་ཤོག །ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སིདྡྷི་ཧཱུྃ༔ དྷརྨ་ཀཱ་ཡ་ཨ་བྷི་ཥིཉྩ་ཧཱུྃ། ཤེས་རབ་ཡེ་ཤེས་ཀྱི་དབང་དང་ཐུགས་ཀྱི་བྱིན་རླབས་ཐོབ་ཕྱིན་ཆད་སྣང་སྤྱོད་བདེ་སྟོང་གི་རོལ་པར་འཆར་ཕྱིར་བོགས་འབྱིན་ལས་ཀྱི་ཕྱག་རྒྱའི་ལམ་ལ་བསླབ་དགོས་པས་ཁྱེད་རང་རྣམས་རྡོ་རྗེ་སེམས་དཔའ་དང་རིག་མ་རྡོ་རྗེ་སྙེམས་མར་གསལ། མཁའ་གསང་བྱིན་གྱིས་བརླབས་ཏེ་འདུ་ཤེས་གསུམ་ལྡན་གྱིས་སྙོམས་པར་ཞུགས་པས་འདོད་ཆགས་ཆེན་པོའི་འགྲོས་ལས་སྐྱེས་པའི་ཡས་བབ་རྒྱུ་དང་མས་བརྟན་འབྲས་བུ་སྟེ་ལུགས་འབྱུང་ལྡོག་གི་དགའ་བ་བཅུ་དྲུག་ཉམས་སུ་མྱོང༌། ལྷན་ཅིག་སྐྱེས་པ་འཕོ་མེད་དོན་གྱི་ཡེ་ཤེས་མངོན་དུ་གྱུར་པར་མོས་ཤིག །ཅེས་བདེ་སྟོང་གི་དོན་ལ་མཉམ་པར་བཞག །དེ་ལྟར་ཤེས་རབ་ཡེ་ཤེས་ཀྱི་དབང་གི་ནུས་པས་སྦྱང་གཞི་དྲ་བ་བདེ་སྟོང་ཐུགས་རྡོ་རྗེའི་དཀྱིལ་འཁོར་ཉིད། སྦྱོང་བྱེད་ཕོ་ཉའི་མྱུར་ལམ་གྱི་སྤྱོད་པ་རྨད་དུ་བྱུང་བ་སྤྱད་པས། སྦྱངས་འབྲས་བདེ་སྟོང་འཕོ་འགྱུར་མེད་པའི་མཁའ་འགྲོའི་ཚོགས་རྗེ་དཔལ་ཧེ་རུ་ཀའི་བརྟུལ་ཞུགས་རྣལ་འབྱོར་སྤྱོད་པས་རྩ་རླུང་ཐིག་ལེའི་འགྲོ་འོང་ཐམས་ཅད་ཨ་ཝ་དྷུ་ཏིའི་སྲོག་ཏུ་ངལ་འཚོས་པ་ལ་ཕྱི་རྡོ་རྗེའི་གནས་ཡུལ་དུ་དཔའ་བོ་ཌཱ་ཀིའི་ཚོགས་ཀྱི་འདུ་བ་ལ་སྤྱོད་པ་གསུམ་གྱི་རྟེན་འབྲེལ་གྱིས་ནང་ས་བཅུའི་སྤངས་རྟོགས་རྫོགས་པའི་བདེན་དོན་དག་པའི་འདུ་བ་གསུམ་དང༌། འབར་བ་གསུམ་གྱི་ཡེ་ཤེས་ཀྱིས་བོགས་འབྱིན་པ་སྤྱོད་པའི་བརྟུལ་ཞུགས་ཀྱི་དབང་རྗེས་འབྲེལ་དུ་སྦྱིན་པའི་ཕྱིར། ཌཱ་ཀི་དབང་སྡུད་ཕེཾ་ཧཱུྃ་གི་སྒྲ་སྒྲོགས་པའི་ཌཱ་མ་རུ། བདེ་སྟོང་ཀ་པཱ་ལ། སྐུ་གསུམ་མཚོན་པའི་ཁཊྭཱཾ་ག །ཕ་རོལ་ཕྱིན་དྲུག་མཚོན་པའི་རུས་པའི་ཕྱག་རྒྱ་རྣམས་གཏད་དེ་ཐུགས་ཡེ་ཤེས་ཀྱི་དགོངས་པས་བྱིན་གྱིས་བརླབས་པར་མོས་ཤིག །རྣལ་འབྱོར་བརྟུལ་ཞུགས་སྤྱོད་པའི་ཡོ་བྱད་རྣམས་གཏད་ལ། ཧཱུྃ། ཕྱི་དང་ནང་གི་གནས་ཡུལ་དུར་ཁྲོད་ཀུན། །རྡོ་རྗེའི་བརྟུལ་ཞུགས་གཅིག་གིས་བགྲོད་པའི་སླད། །དཔའ་བོ་ཌཱ་ཀིའི་ཕྱག་རྒྱས་དབང་བསྐུར་བས། །ཉེ་རྒྱུའི་སྤྱོད་པའི་འབྲས་བུ་མཐར་ཕྱིན་ཤོག །བཛྲ་ཙིཏྟ་ཨ་བྷི་ཥིཉྩ་ཧཱུྃ། དེས་དབང་གསུམ་པ་ལས་སྐྱེས་པའི་དཔེ་ཡི་ཡེ་ཤེས་ཀྱིས་དོན་གྱི་ཡེ་ཤེས་སེམས་ཉིད་གཞི་མེད་རྩ་བྲལ་དུ་ངོ་སྤྲད་ཅིང་བསྒོམས་པས་ཀ་དག་དབྱིངས་ཀྱི་ཡེ་ཤེས་མངོན་སུམ་དུ་རྟོགས་ཏེ་ཆོས་ཉིད་ཟད་སར་འཁྱོལ་བའི་རྟེན་འབྲེལ་འགྲིགས་པ་ཡིན་ནོ། །བཞི་པ་ཚིག་དབང་རིན་པོ་ཆེའི་སླད་དུ། དབྱིངས་ཀ་དག་ཤེལ་ལྟ་བུ་ལ་འོད་གསལ་ལྷུན་གྲུབ་ཀྱི་རང་གདངས་འཇའ་ཟེར་གྱིས་མཚོན་པའི་བརྡ་རྡོ་རྗེ་སེམས་དཔའི་མེ་ལོང་དང་རྡོ་རྗེའི་ཚིག་གིས་ཆོས་ཉིད་གཤིས་ཀྱི་བཞུགས་ཚུལ་ངོ་སྤྲད་པར་མོས་ཤིག །ཤེལ་རྡོ་བསྟན་ལ། ཧྲཱིཿ གཞི་དབྱིངས་ཀ་དག་གཉུག་མའི་དྭངས་ཤེལ་ལས། །གཞི་སྣང་ལྷུན་གྲུབ་རིག་པའི་འཇའ་ཟེར་ཤར། །ཟུང་འཇུག་དཔེ་དོན་འབྲེལ་བའི་དབང་བསྐུར་བས། །སྐུ་དང་ཡེ་ཤེས་དབྱེར་མེད་མངོན་གྱུར་ཤོག །ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སིདྡྷི་ཧཱུྃ༔ ཛྙཱ་ན་ཀཱ་ཡ་ཨ་བྷི་ཥིཉྩ་ཧྲཱིཿ དེ་ལྟར་བཞི་པ་ཚིག་དབང་རིན་པོ་ཆེ་ཡེ་ཤེས་རྡོ་རྗེའི་བྱིན་རླབས་ཐོབ་ཕྱིན་ཆད་གནས་ལུགས་ཁྱབ་བརྡལ་ཆེན་པོའི་དོན་ལ་མཉམ་པར་བཞག་དགོས་པས། ཁྱེད་རང་རྣམས་ལུས་གནད་སྐྱིལ་ཀྲུང་དྲང་པོར་བསྲང༌། ངག་གནད་མ་བཅོས་རང་བབ་ཏུ་བཞག །སེམས་གནད་རིག་པ་སྐད་ཅིག་མ་རང་ངོ་ཤེས་ཙམ་བཅོས་བསྒྱུར་གྱིས་མ་བསླད་པར། གདོད་མ་ཉིད་ནས་ཆོས་སྐུ་ཁྱབ་བརྡལ་ཆེན་པོ་རང་ལ་ལྷུན་རྫོགས་སུ་བཞུགས་པ་མངོན་སུམ་དུ་མཐོང་བ་ལ་ངེས་ཤེས་སྐྱེད་ལ་མཉམ་པར་ཞོག་ཅིག །རྗེས་འབྲེལ་གཉིས་ཀས་མཉམ་པར་བཞག་ངང་ཨ་ཞེས་དགོངས་པའི་དྲོད་གཏད་ཅིང༌། །ཕཊ་ཀྱིས་རིག་པ་གོང་དུ་སྤར། །ཞེས་གསུངས་པ་ལྟར་བྱ། དེའང་དབང་རྣོན་ངོ་སྤྲད་པ་སྒོམ་པས་ཉམས་སུ་བླངས་ཏེ་སྦྱང་གཞི་འོད་གསལ་དྲྭ་བ་བླ་མ་ཡེ་ཤེས་རྡོ་རྗེའི་དཀྱིལ་འཁོར་ཉིད། སྦྱོང་བྱེད་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་ཟུང་འཇུག་གི་གསེང་ལམ་ཆེན་པོ་གནད་དུ་བསྣུན་པས། སྦྱངས་འབྲས་སྐུ་གསུམ་ལྷུན་རྫོགས་གདོད་མའི་གཞི་ཀློང་དུ་སྐད་ཅིག་གིས་བྱེ་བྲག་ཕྱེད་དེ་སངས་རྒྱས་པའི་ཕྱིར། དེ་ཡང་ཇི་སྐད་དུ། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་གྱུར་རྫོགས་པ་ཆེ། །ཞེས་གསུངས་པ་ལྟར་རྟོག་གེ་དང་སོ་སྐྱེའི་བློས་ཡིད་དཔྱོད་ཀྱི་ཡུལ་ལས་འདས་པའི་ཆོས་ཀུན་གྱི་གཤིས་ལུགས་དབྱིངས་རིག་ཟུང་འཇུག་གི་ལྟ་བ་ལུང་རིགས་དང་འབྲེལ་བས་གཏན་ལ་ཕབ་སྟེ་རང་ཐོག་ཏུ་ངོ་སྤྲད་པའི་དོན་སྒོམ་པ་མ་བཅོས་ཅོག་བཞག་བཞིས་ངང་བསྐྱངས་ནས་བཟོ་བཅོས་བྲལ་བ་ཆོས་ཉིད་འོད་གསལ་ཆེན་པོའི་ལྷུམས་སུ་ཞུགས་ཏེ་གྲོགས་སྤྱོད་པས་བོགས་འབྱིན་ཚོགས་དྲུག་གང་ཤར་འཛིན་མེད་རང་གྲོལ་ལམ་དུ་ཁྱེར་བས། འབྲས་བུ་སྐུ་དང་ཡེ་ཤེས་ལྷུན་འབྱམས་ཆེན་པོར་མངོན་པར་བྱང་ཆུབ་པའི་ཕྱིར་ལུས་བཞུགས་སྟངས་གསུམ། མིག་གཟིག་སྟངས་གསུམ་ལས་མི་གཡོ་བ་སྒོ་ཡུལ་རླུང་རིག་གི་གནད་ཀྱིས་གཅུན་ཏེ་སྒྲོན་མ་དྲུག་ལྡན་འོད་གསལ་ཡེ་ཤེས་རིན་པོ་ཆེའི་གསང་མཛོད་ལ་སྤྱོད་པས་ཆོས་ཉིད་མངོན་སུམ་མཐོང༌། ཉམས་གོང་དུ་འཕེལ། རིག་པ་ཚད་ལ་ཕེབས། ཆོས་ཉིད་ཟད་སར་ཕྱིན་ནས་སྐུ་གསུམ་ལམ་སྣང་དུ་རྫོགས་ཏེ་ཕྱི་ནང་གསང་བའི་ཟག་པ་དབྱིངས་སུ་ཟད། འབྱུང་བཞི་འོད་དུ་དེངས། དྲན་རིག་གཞི་གྲོལ་ཁྱད་པར་དྲུག་ལྡན་སྣང་བཞི་མཐར་ཕྱིན་འཕོ་ཆེན་འཇའ་ལུས་རྡོ་རྗེའི་སྲོག་གྲུབ་པར་མཛོད་ཅིག །དེས་ལྷུན་གྲུབ་མངོན་སུམ་གྱི་དོན་ཉམས་སུ་ལེན་པ་ལ་དབང་ཞིང༌། སྣང་བཞི་མཐར་ཕྱིན་ནས་འཇའ་ལུས་འཕོ་ཆེན་གཞོན་ནུ་བུམ་པ་སྐུར་བྱང་ཆུབ་པའི་རྟེན་འབྲེལ་འགྲིགས་པ་ཡིན་ནོ། །ལྔ་པ་དབང་བཞི་ཡོངས་སུ་རྫོགས་པའི་མཐའ་རྟེན་དུ་བཀའ་ལུང་ཡོངས་རྫོགས་གཏད་རྒྱའི་དབང་བསྐུར་བ་སྟེ། སློབ་དཔོན་ཀུན་མཁྱེན་ཆོས་ཀྱི་རྒྱལ་པོ་དངོས་སུ་གསལ་བས་སྙིང་ཐིག་གི་གླེགས་བམ་སྤྱི་བོར་བཀོད་ཅིང་དགོངས་བརྒྱུད་བྱིན་རླབས་འཕོ་བའི་དབང་བསྐུར་བས། མདུན་གྱི་ནམ་མཁར་ཕྱོགས་དུས་རྩ་བརྒྱུད་བླ་མ་ཡི་དམ་རྒྱལ་བ་ཞི་ཁྲོ་མཁའ་འགྲོ་ཆོས་སྐྱོང་སྲུང་མ་རྒྱ་མཚོ་རྣམས་མངོན་སུམ་དུ་བཞུགས་པའི་གནས་གསུམ་ནས་སྐུ་དང་སྔགས་ཕྲེང་ཕྱག་མཚན་འོད་ཟེར་ཐིག་ལེ་ཡིག་འབྲུ་དཀར་དམར་མཐིང་གསུམ་ཆར་བབས་པ་ལྟར་བྱོན་ནས་ཁྱེད་རང་རྣམས་ཀྱི་གནས་གསུམ་དུ་ཐིམ་པས་བརྒྱུད་གསུམ་རིག་འཛིན་ཌཱ་ཀིའི་སྐུ་གསུང་ཐུགས་ཡེ་ཤེས་རྡོ་རྗེའི་གསང་བ་མི་ཟད་རྒྱན་གྱི་འཁོར་ལོ་དང་གཉིས་སུ་མེད་པའི་དབང་དང་བྱིན་རླབས་དངོས་གྲུབ་མ་ལུས་པ་ཐོབ་པར་མོས་ཤིག །སྙིང་ཐིག་གི་གླེགས་བམ་སྤྱི་བོར་བཀོད་ལ། ཨོཾ་ཨཱཿཧཱུྃ། ཀུན་བཟང་རྡོ་རྗེ་སེམས་དཔའ་དགའ་རབ་རྗེ། །འཇམ་དཔལ་བཤེས་གཉེན་ཤྲཱི་སིང་ཧ་དང༌། །ཛྙཱ་ན་སཱུ་ཏྲ་འཆི་མེད་པདྨ་འབྱུང༌། །འོད་གསལ་སྙིང་པོའི་ཤིང་རྟ་བི་མ་ལ། །དབྱེར་མེད་ཀུན་མཁྱེན་ཆོས་ཀྱི་རྒྱལ་པོ་ཡི། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི། དེང་འདིར་སྐལ་ལྡན་ཁྱོད་ལ་བྱིན་བརླབས་པས། །ཅིར་སྣང་སྒྱུ་འཕྲུལ་དྲྭ་བའི་འཁོར་ལོར་ཤར། །སྒྲ་གྲགས་མི་ཤིགས་རྡོ་རྗེའི་དབྱིངས་སུ་སྨིན། །ཀ་དག་རིག་པ་གདོད་མའི་ལྷུམས་སུ་ཞུགས། །ལྷུན་གྲུབ་སྣང་བ་རྣམ་བཞིའི་རྩལ་རྫོགས་ནས། །ཚེ་གཅིག་འཇའ་ལུས་རྡོ་རྗེའི་སྲོག་འགྲུབ་ཤོག །ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སིདྡྷི་ཧཱུྃ༔ བཛྲ་ཀཱ་ཡ་ཝཱཀ་ཙིཏྟ་གུ་ཎ་ཀརྨ་སིདྡྷི་ཨ་བྷི་ཥིཉྩ་མི། དེ་ལྟར་དབང་གི་ཡེ་ཤེས་སྐྱེད་བརྟན་གོང་འཕེལ་དུ་བྱ་བའི་ཕྱིར་མཁའ་དབྱིངས་གང་བའི་རྒྱལ་བ་སྲས་དང་བཅས་པས་ལྷའི་མེ་ཏོག་གི་ཆར་དང་ཤིས་པའི་ཚིག་གི་གླུ་དབྱངས་དི་རི་རི་སྒྲོགས་པས་ཕྱོགས་དུས་གནས་སྐབས་ཀུན་ཏུ་དགེ་ལེགས་ཀྱི་སྣང་བས་ཁྱབ་པར་མོས་ཤིག །ལས་བྱང་གི་ཤིས་བརྗོད་སོགས་བརྗོད་ལ། མེ་ཏོག་འཐོར་ཞིང་རོལ་མོའི་སྒྲ་རྒྱུན་རིང་དུ་བྱའོ། ༈ ཞར་བྱུང་མྱོང་གྲོལ་རིལ་བུའི་དབང་སྦྱིན་པར་འདོད་ན་གཞུང་ལས། དེ་སོགས་སྒྲུབ་པའི་རྟགས་ཐོན་ནས། །རིལ་བུ་རིགས་འདུས་བླ་མར་བསྐྱེད། །བདག་འཇུག་ཚུལ་གྱིས་དངོས་གྲུབ་བླང༌། །གཞན་ལ་སྨིན་བྱེད་ཆོ་གས་སྦྱིན། །ཞེས་གསུངས་པས་བུམ་དབང་བསྐུར་ཟིན་པ་དང༌། མཐའ་རྟེན་མྱོང་གྲོལ་དམ་རྫས་རིལ་བུའི་དབང་སྦྱིན་པ་ལ། བུམ་པ་རང་བྱུང་གི་གཞལ་མེད་ཁང་ལྷུན་གྱིས་རྫོགས་པའི་ནང་དུ་རིག་འཛིན་དཔལ་མགོན་བླ་མའི་ལྷ་ཚོགས་རྣམས་བཞུགས་པའི་སྐུ་ལས་རྡོ་རྗེའི་གསང་བ་གསུམ་གྱི་བྱིན་རླབས་ཐམས་ཅད་འོད་ཟེར་བདུད་རྩིའི་རྒྱུན་གྱི་རྣམ་པས་དབང་བསྐུར་བར་མོས་ཤིག །རིལ་བུའི་བུམ་པ་སྤྱི་བོར་བཀོད་དེ། དབྱིངས་ཀྱི་བུམ་པར་རིག་པའི་ལྷ་ཚོགས་རྣམས། །ཡེ་ཤེས་ཐུགས་རྗེའི་གཟི་བྱིན་རབ་འབར་བས། །སྒོ་གསུམ་རྡོ་རྗེ་གསུམ་དུ་བྱིན་བརླབས་ནས། །དངོས་གྲུབ་སྩོལ་ཞིང་བརྟན་པར་མཛད་དུ་གསོལ། ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སིདྡྷི་ཧཱུྃ། ཀཱ་ཡ་ཝཱཀ་ཙིཏྟ་སརྦ་སིདྡྷི་ཕ་ལ་ཧཱུྃ། ཞེས་བརྗོད་ཅིང་གནས་གསུམ་དུ་གཏུག །རིལ་བུ་ལྷར་གསལ་བ་རྡོ་རྗེ་ལྕེའི་ལམ་ནས་བརྒྱུད་དེ་སྙིང་དབུས་མི་ཤིགས་པའི་ཐིག་ལེ་དང་དབྱེར་མེད་པ་ཡེ་ཤེས་སེམས་དཔའི་ཚུལ་གྱིས་བྱང་ཆུབ་བར་དུ་བཞུགས་ཤིང་དངོས་གྲུབ་སྩོལ་བར་གྱུར་པའི་མོས་པས་མྱོང་དུ་གཞུག ༈ རིག་འཛིན་སྲོག་འཁོར་དཔལ་གྱི་གདུ་བུའི་དབང་བསྐུར་ན། གཞུང་ལས། དབང་བསྐུར་བྱེད་ན་སྡོམ་པ་གསུམ། །ཆོ་ག་བཞིན་དུ་བཟུང་བྱས་ལ། །བསྟན་བུར་བརྒྱ་ཕྱག་མཎྜལ་ཕུལ། །ཚར་གཅིག་བཀླག་ལ་སྤྱི་བོར་བཞག །ཅེས་གསུངས་པ་ལྟར་བླ་སྒྲུབ་འདི་དང་རྗེས་འབྲེལ་དུ་བསྐུར་ན་ལེགས་པས་དབང་བཞི་པ་གྲུབ་པ་དང༌། ན་རཀ་སྐོང་བཤགས་སམ་བརྗོད་མེད་དོན་བཤགས་གང་རུང་སྔོན་དུ་འགྲོ་བས་ཡིག་བརྒྱ་བཟླ་བ་དང་བཅས་ཕྱག་བརྒྱ་ཕྲག་འཚལ་ལ། དེ་ཡང་སངས་རྒྱས་ཐམས་ཅད་ཐབས་མཁས་ཐུགས་རྗེའི་རྣམ་རོལ་ཚད་མེད་པས་སེམས་ཅན་རྣམས་རང་བཞིན་གྱིས་གྲོལ་བར་མཛད་པའི་ཕྲིན་ལས་ཀྱི་བྱེ་བྲག །གདུལ་དཀའ་ཤིན་ཏུ་རྨོངས་ཤིང་དམུ་རྒོད་སེམས་ཅན་རྣམས་རྒྱུ་འབྲས་རྩོལ་བཅས་ཀྱི་ཐེག་པས་འདུལ་བའི་ཞིང་དུ་མ་གྱུར་པ་ལ་ཕྲིན་ལས་ཀྱི་འཇུག་ཚུལ་བསམ་གྱིས་མི་ཁྱབ་པས་གྲོལ་བའི་ཚུལ་སོ་སོར་འབྲང་མའི་འཁོར་ལོ་གདགས་པས་སྦྱོར་ལམ་ཟིན་པ་དང༌། སྐྱེ་བདུན་གྱི་ཤས་མཁའ་སྤྱོད་གྲུབ་པ་དང༌། པདྨ་གཙུག་ཏོར་གྱི་རིག་སྔགས་བཏབ་པའི་བདུག་སྤོས་ཀྱི་དྲི་ཚོར་བས་ངན་སོང་གི་སྒོ་གཅོད་པ་སོགས་གསར་རྙིང་གི་མདོ་རྒྱུད་དུ་མ་དང༌། ཁྱད་པར་རྙིང་མ་བཀའ་གཏེར་གྱི་རྒྱུད་དང་མན་ངག་ནས་གསུངས་པའི་གྲོལ་བ་དྲུག་ལྡན་མ་བསྒོམས་སངས་རྒྱས་ཆོས་ལྔའི་གསེང་ལམ་དུ་གྲགས། ཐུགས་རྗེ་ཕྱོགས་སུ་མ་ཆད་པས་དུད་འགྲོ་ཡན་ཆད་ཀྱི་རྒྱུད་ལ་ཐར་པའི་ས་བོན་འདེབས་པའི་ངོ་མཚར་རྨད་དུ་བྱུང་བའི་ཕྲིན་ལས་ཀྱི་ཡ་གྱལ་འོད་གསལ་རྫོགས་པ་ཆེན་པོའི་རྒྱུད་དང་མན་ངག་དུ་མ་ནས་ཡང་ཡང་བསྟན་པའི་བཏགས་གྲོལ་ཙཀྲའི་དབང་སྦྱིན་པ་སྟེ། དེ་ལའང་བཀའ་གཏེར་མན་ངག་གི་དགོངས་པས་རྣམ་གྲངས་མི་འདྲ་བ་དུ་མ་ལས་སྐབས་འདིར་ཀློང་ཆེན་སྙིང་གི་ཐིག་ལེའི་ཆོས་སྡེ་ལས་བྱོན་པའི་རྒྱལ་བ་རིག་འཛིན་སྲོག་འཁོར་དཔལ་གྱི་གདུ་བུའི་དབང་བསྐུར་ཞུ་བའི་དོན་དུ་མཎྜལ་ཕུལ། འདི་ཉིད་ཁོ་ན་སྒེར་དུ་བྱེད་ན། སྐྱབས་སེམས། སློབ་མ་ལྷར་བསྐྱེད། བྱིན་འབེབས་བཅས་དགོས་པས་རིགས་མཐུན་གྱི་ཆོ་ག་ཞི་ཁྲོ་སོགས་གང་རུང་ལྟར་བྱས་ཀྱང་རུང་བར་མངོན་མོད། འདིར་བླ་སྒྲུབ་ཐིག་ལེའི་རྒྱ་ཅན་གྱི་གཞུང་དང་འབྲེལ་བའི་དབང་བསྐུར་སྔོན་དུ་གྲུབ་པའི་དབང་དུ་བྱས་ཏེ། བཏགས་གྲོལ་གྱི་འཁོར་ལོ་འདི་ཉིད་སངས་རྒྱས་ཀུན་གྱི་སྤྱི་མེས་ཀུན་མཁྱེན་ཆོས་ཀྱི་རྒྱལ་པོའི་འོད་གསལ་ཡེ་ཤེས་ཀྱི་སྐུ་ཡི་ཐུགས་ཆོས་དབྱིངས་ཁྱབ་བརྡལ་ཆེན་པོའི་ཀློང་དུ་བདེ་གཤེགས་ཞི་བ་བཞི་བཅུ་རྩ་གཉིས་དང༌། དེའི་རང་རྩལ་སྤྱི་བོ་བདེ་ཆེན་གྱི་འཁོར་ལོའི་དབུས་སུ་ཁྲག་འཐུང་ལྔ་ཅུ་རྩ་བརྒྱད་ཀྱི་ཚོམ་བུ་དང༌། གཞན་ཡང་ཕུང་ཁམས་སྐྱེ་མཆེད་ཐམས་ཅད་གདོད་ནས་རྣམ་པར་དག་པ་ཞི་ཁྲོ་རབ་འབྱམས་རྒྱལ་བའི་སྤྱི་གཟུགས་ཆེན་པོར་ལམ་གྱིས་གསལ་བའི་འཁོར་དུ་བླ་མ་ཡི་དམ་མཁའ་འགྲོ། སངས་རྒྱས་བྱང་སེམས་སོགས་ཕྱོགས་དུས་སྐྱབས་ཡུལ་རྒྱ་མཚོས་བསྐོར་བ་གཙོ་འཁོར་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་དང་བྱིན་རླབས་དངོས་གྲུབ་ཐམས་ཅད་སྐུ་སྔགས་ཕྱག་མཚན་འོད་ཟེར་སྣ་ལྔའི་རྣམ་པར་བྱུང་བ་ཁྱེད་རྣམས་ཀྱི་གནས་ལྔར་རིམ་དང་ཅིག་ཅར་དུ་ཐིམ་པས་ཉོན་མོངས་པ་དུག་ལྔའི་འཁྲུལ་རྟོག་སངས་ཀྱིས་དག །འོད་གསལ་ཁྱབ་བརྡལ་ཆེན་པོ་རང་རིག་སྐུ་བཞི་ཡེ་ཤེས་ལྔ་ལྡན་གྱི་གོ་འཕང་མངོན་དུ་གྱུར་ཏེ་བཅོམ་ལྡན་འདས་ཞི་ཁྲོ་རབ་འབྱམས་རྒྱལ་བའི་སྤྱི་གཟུགས་ཆོས་སྐུ་ཀུན་ཏུ་བཟང་པོ་དང་སྐལ་པ་མཉམ་པས་མཐོང་ཐོས་དྲན་རེག་གི་སེམས་ཅན་ཐམས་ཅད་ཆོས་ཉིད་གདོད་མའི་ཀློང་དུ་སྐད་ཅིག་གིས་སྒྲོལ་ནུས་པའི་མཁྱེན་བརྩེ་ནུས་པའི་ཡེ་ཤེས་བསམ་མི་ཁྱབ་པའི་དབང་ཐམས་ཅད་སྐད་ཅིག་གིས་ཐོབ་པར་མོས་ཤིག །འཁོར་ལོའི་གཏེར་གཞུང་ཉིད་ཚར་གཅིག་དག་པར་བཀླག་ལ། ཧོ༔ རྒྱལ་བ་རིག་འཛིན་ཞི་ཁྲོའི་ལྷ༔ བཏགས་གྲོལ་སྲོག་གི་འཁོར་ལོ་འདིས༔ སྐལ་ལྡན་སློབ་མ་འདི་རྣམས་ཀྱི༔ སྒོ་གསུམ་སྨིན་པར་མཛད་དུ་གསོལ༔ གྲོལ་ཞིང་གང་བར་མཛད་དུ་གསོལ༔ རྒྱས་དང་འཕེལ་བར་མཛད་དུ་གསོལ༔ ཀཱ་ཡ་ཝཱཀ་ཙིཏྟ་རཏྣ་ཀརྨ་ཨ་བྷི་ཥིཉྩ་སྭཱ་ཧཱ༔ ཞེས་བརྗོད་དེ་གནས་ལྔར་གཏུགས། སྤོས་བསྲེགས། རོལ་མོ་བསྒྲགས་མཐར། དཔོན་སློབ་ཀུན་གྱིས་སམ་སློབ་དཔོན་གྱིས་བརྗོད་དེ་འདུན་པ་རྩེ་གཅིག་པས། ཨོཾ་ཧཱུྃ་ཏྲཱྃ་ཧྲཱིཿཨཱཿ སངས་རྒྱས་ཐམས་ཅད་ཀྱི་སྲས་གཅིག་པོ༔ གསེར་གྱི་ཉི་མ་རབ་ཏུ་སྣང་བྱེད༔ གསང་བ་སྤྱོད་པ་ས་བོན་གྱི་དགོངས་པ་ཆེན་པོ་ཡོངས་རྫོགས་ཀྱིས༔ སྐལ་ལྡན་སྐྱེས་བུ་འདུས་ཤིང་ཚོགས་པ་རྣམས་ཀྱི་ལུས་ངག་ཡིད་གསུམ༔ ཕུང་པོ་ཁམས་དང་སྐྱེ་མཆེད་ཐམས་ཅད་བྱིན་གྱིས་བརླབ་ཏུ་གསོལ༔ ལུས་ངག་ཡིད་གསུམ་ཕུང་པོ་ཁམས་དང་སྐྱེ་མཆེད་རང་སར་གྲོལ་ནས༔ ཡོངས་སུ་སྨིན་པར་མཛད་དུ་གསོལ༔ རྒྱལ་བའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ཀློང་དུ་གྲོལ་བར་མཛད་དུ་གསོལ༔ ཉོན་མོངས་པ་ཐམས་ཅད་རང་སར་གྲོལ་ཞིང༔ རྒྱུད་ཡེ་ཤེས་ཀྱི་གང་བར་མཛད་དུ་གསོལ༔ འཁྲུལ་པའི་བག་ཆགས་རང་སར་དག་ནས༔ སྐུ་དང་ཡེ་ཤེས་ཀྱི་ཐིག་ལེ་ཆེར་འཕེལ་བར་མཛད་དུ་གསོལ༔ རྒྱལ་བའི་དཀྱིལ་འཁོར་ཞིང་རབ་འབྱམས་མཐའ་ཡས་པར་མྱུར་དུ་སངས་རྒྱས་པར་མཛད་དུ་གསོལ༔ སངས་རྒྱས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པས་བྱིན་གྱིས་བརླབ་ཏུ་གསོལ༔ ཨོཾ་ཨཱཿཧཱུྃ་ཀཱ་ཡ་ཝཱཀ་ཙིཏྟ་བུདྡྷབཛྲ་རཏྣ་པདྨ་ཀརྨ་སརྦ་དྷརྨ་སྭ་བྷ་ཝ་ཨ་བྷི་ཥིཉྩ་སྭཱ་ཧཱ༔ དེ་ལྟར་ཇི་སྐད་བརྗོད་པ་ཐམས་ཅད་ངེས་པར་འགྲུབ་པར་གདོན་མི་ཟ་སྟེ་གཏེར་གཞུང་རྡོ་རྗེའི་ཚིག་རྐང་དངོས་ལས། འདི་ནི་ཆོས་སྐུའི་རིང་བསྲེལ་དངོས༔ སྡེ་སྣོད་རྒྱུད་ལུང་མན་ངག་དང༔ རྒྱལ་བ་ཡོངས་རྫོགས་སྲོག་འཁོར་ཡིན༔ སྤྱི་བོ་མགྲིན་པ་མཆན་ཁུང་དུ༔ སུས་བཅང་སྡིག་པ་ཀུན་ལས་གྲོལ༔ དུས་གསུམ་རྒྱལ་བ་བསྙེན་དང་མཚུངས༔ འདས་དུས་གདུང་དང་རིང་བསྲེལ་དང༔ ས་གཡོ་སྒྲ་འོད་འཇའ་ཚོན་འབྱུང༔ ཞེས་གསུངས་པའི་དོན་ལ་ངེས་ཤེས་སྐྱེད་དེ་མཉམ་པར་ཞོག་ཅིག །དེ་ལྟར་དབང་ཐོབ་ཕྱིན་ཆད་རྡོ་རྗེ་འཆང་གི་དུས་གནད་ངེས་པ་ལས་ཇི་ལྟར་གསུངས་པ་ལྟར་འཁོར་ལོ་དྲོད་དང་མ་བྲལ་བར་བཅངས་ཤིང་རིག་སྟོང་འོད་གསལ་ཆེན་པོའི་ལྟ་དགོངས་ཀྱི་ཏིང་ངེ་འཛིན་དང་མ་བྲལ་བས་བཀླག་པ་སོགས་མཛོད་ཅིག །ཤིས་བརྗོད་སོགས་སྤྱི་ལྟར་བྱའོ། །དེ་དག་ནི་བརྒྱུད་པ་མི་འཆད་པའི་ཕྱིར་བཀོད་པ་ཡིན་གྱི་བླ་སྒྲུབ་དཀྱུས་ཀྱི་དབང་ལ་རིལ་བུ་དང༌། བཏགས་གྲོལ་མ་བསྐུར་ཡང་ཆད་སྐྱོན་དུ་མི་འགྱུར་རོ། །དེ་དག་གིས་ཀློང་ཆེན་སྙིང་གི་ཐིག་ལེའི་ཟབ་ཆོས་མཐར་ཐུག་ཡང་གསང་བླ་མའི་སྒྲུབ་པ་འོད་གསལ་ཐིག་ལེའི་རྒྱ་ཅན་གྱི་ཐུན་མོང་མ་ཡིན་པའི་དབང་བསྐུར་ཚང་སྤྲུགས་སུ་ཕུལ་གྲུབ་པ་ལགས་པས་སྣང་གྲགས་རིག་པ་བླ་མའི་རྡོ་རྗེ་གསུམ་གྱི་དཀྱིལ་འཁོར་དུ་གདོད་ནས་ལྷུན་རྫོགས་ཆེན་པོར་བཞུགས་པའི་གནས་ལུགས་དང་མཐུན་པར་ལམ་དུ་བྱེད་པས་ཡེ་སྲུང་ཐིག་ལེ་ཆེན་པོའི་དམ་ཚིག་རྡོ་རྗེ་བཞི་རུ་ལ་བཟླ་བའི་འདུན་པས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་དམ་ཚིག་ཁས་བླང༌། གཏང་རག་ཡོན་འབུལ་གྱི་རྗེས་དཔོན་སློབ་ཐམས་ཅད་དགའ་སྟོན་ཚོགས་འཁོར་དང༌། རྡོ་རྗེའི་གླུ་གར་ཡང་བྱས་རྗེས་སྨོན་ལམ་དང་བཅས་ཏེ་གྲོལ། སློབ་དཔོན་གྱིས་ལྷག་མ་ནས་བརྩམས་ཆོ་གའི་ལས་རིམ་མཐར་དབྱུང་དགོས་སོ། །ཀུན་མཁྱེྃན་དགོངས་བཅུད་ཟབ་གསང་ཆོས། །བྃརྩེ་བས་འགྲོ་ལ་སྣང་མཛད་ལམ། །སྨིན་གྲོལ་འོདྃ་ཟེརྃ་འབུམ་ཕྲག་དཔལ། །དུས་མཐར་གསལ་ཞིང་རྒྱས་ལ་ལྟོས། །པཎ་ཆེན་བི་མ་ལ་དང་ཀུན་མཁྱེན་ཆེན་པོ་དབྱེར་མེད་པའི་ཡང་གསང་བླ་མའི་སྒྲུབ་པ་འོད་གསལ་ཐིག་ལེའི་རྒྱ་ཅན་གྱི་སྨིན་བྱེད་རྒྱས་པར་སྤྲོས་པ་འཕྲོས་དོན་དང་བཅས་པའི་ལེའུ་ཚན་བཅུ་པ་སྟེ་འོད་གསལ་སྣ་ཚོགས་རང་གྲོལ་གྱིས་སྦྱར་བའོ། ༈ ཕྲིན་ལས་ཀྱི་རྩ་བ་རིག་འཛིན་ཡུམ་ཀ་བདེ་ཆེན་རྒྱལ་མོ་ལའང་ཕྱི་ནང་གསང་བའི་སྒྲུབ་ཚུལ་གསུམ་ལས་ཀུན་གྱི་རྩ་བ་ཕྱི་སྒྲུབ་བདེ་ཆེན་དཔལ་ཕྲེང་གི་བྱིན་རླབས་དབང་གི་ཆོ་ག་ནི་འཇམ་མགོན་པདྨ་གར་དབང་གི་གསུང་བདེ་ཆེན་བཅུད་འབེབས་དང༌། རྡོ་གྲུབ་ཐམས་ཅད་མཁྱེན་པ་བསྟན་པའི་ཉི་མའི་གསུང་དབང་གི་མཚམས་སྦྱོར་མུ་ཏིག་ཆུན་པོ་བཞུགས་བཞིན་དང༌། ནང་སྒྲུབ་སྒྲོལ་མ་ཉེར་གཅིག་གི་རྗེས་གནང་ཀུན་མཁྱེན་གཉིས་པ་མཁྱེན་བརྩེའི་དབང་པོས་སྔོན་གནས་རྗེས་དྲན་གྱིས་གཏན་ལ་ཕབ་པ་ཁྱབ་བདག་དཔལ་མགོན་བླ་མ་པདྨ་ཡེ་ཤེས་རྡོ་རྗེའམ་ཀུན་མཁྱེན་ཆོས་ཀྱི་བློ་གྲོས་རིན་པོ་ཆེའི་བཀའ་དྲིན་གྱིས་དཔྱིད་ལས་སྙིང་གི་བུམ་པར་སིམ་པའི་སྐལ་བཟང་མངོན་དུ་གྱུར་པའི་དཔེ་རྒྱུན་ཐོབ་ན་འདིར་བཞུགས་སུ་གསོལ་དགོས་ལ། ནང་སྒྲུབ་ལས་ཚོགས་བཞི་བ་ཚེ་དབང་དང༌། བཅོ་བརྒྱད་པ་སྒྲོལ་མ་རྣལ་འབྱོར་མའི་དུག་དབྱུང་བྱབ་ཁྲུས་རྣམས་ཀུན་མཁྱེན་ཉིད་དང༌། རིགས་བདག་འོད་དཔག་མེད་པའི་དབང་ཆོག་རྡོ་གྲུབ་འཇིགས་མེད་ཕྲིན་ལས་འོད་ཟེར་དང༌། ཚེ་དབང་ཁོལ་བྱུང་མཁྱེན་བརྩེ་རིན་པོ་ཆེའི་གསུངས་རྣམས་དཔེ་རྒྱུན་བཞུགས་བཞིན་པའོ། ༈ སྟོང་ཆེན་དབྱིངས་ཀྱི་སྲོག་ཏུ་ཡེ་ཤེས་རྩལ། །སྟོབས་བཅུའི་དབང་པོའི་མཚོན་གྱིས་བདུད་སྡེའི་གྲོང༌། །འཇོམས་མཛད་དྲག་མོ་བདུད་འདུལ་སེང་གེའི་ཞལ། །རང་རིག་གཉུག་མའི་ཐིག་ལེར་དགྱེས་རྩེན་མཛོད། །རིག་འཛིན་ཡུམ་ཀའི་གསང་སྒྲུབ་སེང་གེའི་གདོང་ཅན་གྱི་དབང་ཆོག་བྱིན་རླབས་ཆུན་པོ་ལ། གཞུང་མཐུན་གྱི་དཀྱིལ་འཁོར་དབུས་སུ་ཆོས་འབྱུང་བསྣོལ་མའི་སྟེང་མཁའ་འགྲོའི་དཔལ་གཏོར། ཆོས་འབྱུང་གི་ཟུར་དྲུག་ལ་འཁོར་རང་འདྲ་དྲུག །རྩ་བར་མཐེབ་ཀྱུ་སུམ་ཅུ་རྩ་གཉིས་ཀྱིས་བསྐོར་བ་རྒྱན་སྤྲོས་སྐུ་ཙཀ་དར་གདུགས་ཀྱིས་སྤྲས་པ་དང༌། རཀྴའི་ཕྲེང་བ། ཕྱག་མཚན་ཁཊྭཱཾ་ག །གྲི་ཐོད་བཅས་དངོས་སམ་ཙཀླི་དང༌། ཕྱི་ནང་གི་མཆོད་པ་དང་ལས་བུམ་སོགས་སྤྱི་ལྟར་ཚོགས་པར་བྱས་ལ། བརྒྱུད་འདེབས་ནས་བརྩམས་ལས་བྱང་བསྙེན་པའི་བར་གཞུང་བསྲང༌། བདག་མདུན་དབྱེར་མེད་དུ་གསུངས་ཀྱང་རྟོགས་དགོངས་དམན་ན་ཛཔ་ཁང་དབྱེ་ལ་བསྙེན་སྒྲུབ་ཀྱི་བཟླས་པ་བྱ། ལས་བུམ་སྒྲུབ་པ་དང་ཚོགས་སྐོང་སོགས་དང་རིག་པའི་མེ་ཏོག་དོར་ཏེ་གནང་བ་ཞུས་རྗེས། སློབ་མ་རྣམས་ཁྲུས་ནས་དབྱུང༌། བགེགས་བསལ། སྲུང་འཁོར་བསྒོམ་རྗེས་ལོ་རྒྱུས་དངོས་ལ། དེའང་ཆོས་ཀྱི་དབྱིངས་ལས་གདོད་ནས་རྣམ་པར་དག་པའི་རང་རྩལ་བདེ་ཆེན་བྱང་ཆུབ་ཀྱི་སེམས་ཀྱི་རོལ་པ་ཤིན་ཏུ་ཕྲ་བའི་རྩ་རླུང་ཐིག་ལེ་ནས་རགས་པར་ཁམས་གསུམ་གྱི་སྣོད་དང་བཅུད་དུ་སྣང་བ་ཐམས་ཅད་ཀུན་བཟང་མུ་ཁ་ལེའི་མཁའ་ཀློང་དབྱིངས་གསུམ་གྱི་རང་བཞིན་དུ་ཡེ་ནས་ཤར་བ་རང་བྱུང་རིག་པ་རང་ས་ཟིན་ནས་ཡེ་ཤེས་ཆེན་པོའི་རྩལ་རྫོགས་པ་བླ་ན་མེད་པའི་ཧེ་རུ་ཀ་མངོན་རྫོགས་རྒྱལ་པོས་ཡེ་ཤེས་ཀྱི་མ་མོ་རྣམས་སྐུ་ལས་སྤྲུལ། ལས་ཀྱི་མ་མོ་རྣམས་དམ་ལ་བཞག་སྟེ་སྣང་སྲིད་འཁོར་འདས་ཀྱི་བདེ་སྡུག་ཐམས་ཅད་མ་མོའི་ཆོ་འཕྲུལ་ལས་བྱུང་ཞིང༌། ལེགས་ཉེས་ཀྱི་སྟངས་འཛིན་པའི་མཐུ་སྟོབས་དང་རྩལ་ཆེ་བ་ལ་དགོངས་ནས་མ་མོའི་རྒྱུད་སྡེ་མཐའ་ཡས་པ་གསུངས་པ་ལས། དུར་ཁྲོད་ཆེན་པོ་བསིལ་བའི་ཚལ་དུ་མུ་སྟེགས་ཕྲ་མེན་གྱི་མཁའ་འགྲོ་མ་འཇིག་རྟེན་ཀུན་ཏུ་མི་བདེ་ཞིང་སྡུག་བསྔལ་བར་བྱེད་པ་ཞིག་བྱུང་བ་འདུལ་བའི་དོན་དུ་དབྱིངས་ཀྱི་ཡུམ་ཆེན་རྡོ་རྗེ་ཕག་མོས་རྣམ་པ་དེ་དང་མཚུངས་པའི་མཁའ་འགྲོ་མ་སེང་གེའི་གདོང་པ་ཅན་ཞེས་བྱ་བར་སྤྲུལ་པས་མུ་སྟེགས་ཀྱི་ཕྲ་མེན་མ་བསྒྲལ། དེ་ཡི་སྲོག་སྔགས་ཀྱང་ཡེ་ཤེས་ཀྱི་སྔགས་སུ་བྱིན་གྱིས་བརླབས་ཏེ། ཡེ་ཤེས་ལས་དང་འཇིག་རྟེན་པའི་རིག་སྔགས་ཐམས་ཅད་ཀྱི་ནུས་སྟོབས་གཅིག་ཏུ་དྲིལ་བ། ཕྱི་ནང་གི་བྱད་དགྲ་བདུད་བགེགས་མུ་སྟེགས་གདུག་པ་ཅན་ཐམས་ཅད་རིག་སྔགས་བཟླས་པ་ཙམ་གྱིས་འཇོམས་པའི་གཤེད་མ། འཇིག་རྟེན་པ་དང་འཇིག་རྟེན་ལས་འདས་པ་སུས་ཀྱང་བཟློག་མེད་བསྐལ་པའི་མེ་ཆེན་བདུད་འདུལ་དྲག་མོ་སེང་གེའི་གདོང་པ་ཅན་ཞེས་གྲགས་པ་འདི་ལ་གསར་རྙིང་གི་བཀའ་སྲོལ་མི་འདྲ་བ་དུ་མ་ཞིག་བཞུགས་པ་ལས་ད་ལམ་སྐབས་སུ་བབ་པ་འདི་ནི་རིག་པ་འཛིན་ཐམས་ཅད་ཀྱི་རྒྱལ་པོ་སློབ་དཔོན་ཆེན་པོ་པདྨ་འབྱུང་གནས་རྒྱལ་པོའི་ཁབ་དང་ཉེ་བའི་རི་མ་ལ་ཡ་གནམ་ལྕགས་འབར་བ་སེང་གེའི་ཟ་འགྲམ་ལྟ་བུར་མཁའ་འགྲོའི་ཚོགས་དཔོན་མཛད་ཅིང་བཞུགས་པའི་ཚེ་མུ་སྟེགས་ཀྱི་སྟོན་པ་བྷ་ན་བ་ཏི་ལ་སོགས་པ་ལྔ་བརྒྱས་སློབ་དཔོན་ལ་རྩོད་པ་བྱས་པས་མ་ཐུབ་སྟེ། སླར་ཁྲོས་ནས་རི་སུལ་ཞིག་ཏུ་མུ་སྟེགས་ཀྱི་ངན་སྔགས་བཅས་ཆོག་ནག་པོ་ཞེས་བྱ་བ་བསྒྲུབས་པས་མཐུ་རྟགས་ཆེན་པོ་བྱུང་བས་སློབ་དཔོན་ཉིད་ལག་ན་རྡོ་རྗེ་སེང་གེའི་ང་རོ་ཅན་ཞེས་བྱ་བར་སྐུར་བཞེངས་ཏེ། རིག་སྔགས་ཀྱི་སྦྱོར་བ་བཤིག་པའི་ཏིང་ངེ་འཛིན་ལ་སྙོམས་པར་ཞུགས་པའི་ཚེ། མཁའ་འགྲོ་བདུད་འདུལ་སེང་གེའི་གདོང་ཅན་གྱི་ཞལ་བསྟན་ནས་རིག་སྔགས་ཀྱི་དངོས་གྲུབ་བྱིན་པས་དེ་ཉིད་དུ་མུ་སྟེགས་ཀྱི་སྟོན་པ་ངན་སྔགས་མཁན་གནམ་ལྕགས་ཐོག་གིས་བསྒྲལ། ཕྱི་རབས་ཀྱི་འགྲོ་བའི་དོན་དུ་གདམས་པ་ཟབ་མོ་འདི་མཁའ་ལྡིང་འབར་བའི་བརྡ་རིས་ལ་བྲིས་ཏེ་ཀློང་ལྔ་འདུས་པའི་གཏེར་སྒྲོམ་དུ་རྒྱས་བཏབ་པས་སྙིགས་མའི་དུས་དམག་འཁྲུག་དང་བྱད་ཕུར་དར་བའི་ཚེ་ཆོས་འདིས་སྐྱོབ་པའི་དུས་སུ་བབ་པ་ན་ཀུན་མཁྱེན་རིག་འཛིན་འཇིགས་མེད་གླིང་པ་ལ་དུས་གསུམ་མཁྱེན་པ་ཨོ་རྒྱན་ཆེན་པོས་མངོན་སུམ་དུ་དགོངས་པ་གཏད་ཅིང༌། བརྡ་རྒྱུད་ཤོག་སེར་བྱ་ཁྲའི་གཟུགས་ཀྱི་ལྟོ་བ་ལ་སྙན་བརྒྱུད་མཁའ་འགྲོའི་བརྡ་ཡིག་ཏུ་ཤར་བ་ལས་བསྒྱུར་བ་རིག་འཛིན་ཡུམ་ཀའི་གསང་སྒྲུབ་མཁའ་འགྲོ་སེང་གེའི་གདོང་ཅན་གྱི་སྒྲུབ་ཐབས་ཏེ། གཏེར་གཞུང་ལས། ཚོགས་བརྒྱད་བསྒྲལ་བའི་དུར་ཁྲོད་དུ༔ ཆོས་ཉིད་རང་སྒྲ་ཆོས་ཉིད་ཟེར༔ ཆོས་ཉིད་འོད་ཀྱི་ཀློང་དཀྱིལ་ནས༔ དབྱིངས་ཀྱི་མཁའ་འགྲོའི་ཆོས་འདི་གཏད༔ ཅེས་དང༌། གསང་སྒྲུབ་སེང་གེའི་གདོང་ཅན་འདི༔ ཤིན་ཏུ་ཟབ་ཕྱིར་གུད་དུ་སྦས༔ རྣམ་བཅས་འཕུར་འགྲོའི་བརྡ་རིས་ལས༔ རྒྱལ་རིགས་གང་ཟག་བརྒྱུད་པ་རྫོགས༔ ཞེས་དང༌། ལྔ་བརྒྱ་ཕྲག་བཅུའི་མཐར་གནས་ཚེ༔ དམ་ཆོས་རྣམ་གཉིས་མི་ཤེས་པར༔ དམ་པར་ཁས་འཆེ་སྟོབས་འབྱོར་འགྲན༔ རྟགས་ཙམ་འཛིན་ལ་དགེ་འདུན་རེ༔ ཁྱིམ་རྐུན་བྱེད་ཅིང་ཁྱིམ་སུན་འབྱིན༔ བསྐྱེད་རྫོགས་གདེང་མེད་སྔགས་པར་རློམས༔ དཀོན་མཆོག་ལས་ཀྱང་འབྱུང་པོར་དད༔ དེ་ཚེ་མུ་སྟེགས་ཧིན་དུ་ཡིས༔ ཀླ་ཀློ་གཡོབ་ཅིང་བསྟན་ཞབས་སྡུད༔ ང་སྤྲུལ་བྱང་ཆུབ་སེམས་ལྡན་རྣམས༔ མཐའ་དམག་བྱད་ཕུར་བཟློག་ལ་བརྩོན༔ ཞེས་སོགས་སྨོན་ལམ་གཏད་རྒྱས་ཕྱི་མའི་གདུལ་བྱ་ལ་ཆེད་དུ་དགོངས་ཤིང་བསྔགས་པ་འདི་ཉིད་ཀྱི་དབང་བསྐུར་ཞུ་བའི་དོན་དུ་མཎྜལ་ཕུལ། བླ་མ་ཡེ་ཤེས་ཀྱི་མཁའ་འགྲོ་མ་དངོས་སུ་གསལ་བ་ལ་མི་ཕྱེད་དད་པས་གསོལ་བ་འདེབས་པ་འདིའི་རྗེས་ཟློས་མཛོད། ཀུན་མཁྱེན་ཡེ་ཤེས་ཕུང་པོ་ཅན༔ སྲིད་པའི་འཁོར་ལོ་རྣམ་སྦྱངས་པ༔ དེ་རིང་བཤད་པའི་རིན་ཆེན་གཏེར༔ གཙོ་བོས་བདག་ལ་བཀའ་དྲིན་སྩོལ༔ ལན་གསུམ། རྒྱལ་བ་ཐམས་ཅད་བསྐྱེད་པའི་ཡུམ་ཀུན་བཟང་ཤེས་རབ་ཀྱི་ཕ་རོལ་ཏུ་ཕྱིན་མ་ཡེ་ཤེས་མཁའ་འགྲོ་སེང་གེའི་གདོང་པ་ཅན་ལ་རྩ་གསུམ་ཆོས་སྲུང་རྒྱ་མཚོས་བསྐོར་ཏེ་བཞུགས་པ་ལ་འདི་ནས་བྱང་ཆུབ་བར་ཡིད་ཆེས་དད་པས་སྐྱབས་སུ་འགྲོ་བ་དང༌། གདུལ་དཀའ་དམུ་རྒོད་མ་རུང་པའི་གདུལ་བྱ་གཙོ་བོར་གྱུར་པའི་ཡིད་ཅན་ཐམས་ཅད་དཔལ་ཧེ་རུ་ཀའི་གོ་འཕང་ལ་སྦྱོར་བའི་ཕྱིར་བྱང་ཆུབ་སེམས་དཔའི་གཡར་དམ་ལྷུར་ལེན་པར་བགྱིའོ་སྙམ་པས་འདིའི་རྗེས་ཟློས་མཛོད། ཧོ༔ ཡིད་ཆོས་རྣམ་དག་ཀུན་བཟང་ཡབ་ཡུམ་ལ༔ སྣང་སྟོང་གཉིས་སུ་མེད་པར་སྐྱབས་སུ་མཆི༔ འགྲོ་ལ་དམིགས་པའི་སྙིང་རྗེ་ཆེན་པོ་དང༔ ཆོས་ཉིད་དེ་བཞིན་ཉིད་དུ་སེམས་བསྐྱེད་དོ༔ ལན་གསུམ། ཚོགས་ཞིང་དེ་དག་གི་སྤྱན་སྔར་རྒྱུན་བཤགས་ཡན་ལག་བརྒྱད་པ་ཚུལ་བཞིན་བྱ་བའི་མོས་པས་སོ་སོའི་སྒོམ་དོན་གསལ་ཐོབ་ལ་འདིའི་རྗེས་ཟློས་མཛོད། རྡོ་རྗེ་སློབ་དཔོན་སངས་རྒྱས་དཔལ། སོགས་ལན་གསུམ། རྒྱུད་སྡོམ་པ་དང་མི་ལྡན་ན་དབང་གི་སྣོད་དུ་མི་རུང་བས། བདེ་བར་གཤེགས་པ་སྲས་དང་བཅས་པའི་བསླབ་གཞི་མཐའ་དག་ལ་རྗེས་སུ་སློབ་ཅིང་བྱང་ཆུབ་སྤྱོད་པ་རྒྱ་མཚོ་ཅི་ནུས་སུ་སྤྱད་པར་བགྱིའོ་སྙམ་དུ་དམ་བཅའ་རྣམ་གསུམ་བརྟན་པོར་བཟུང་བའི་འདུན་པ་དྲག་པོ་དང་ལྡན་པས་འདིའི་རྗེས་ཟློས་མཛོད། བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང༌། །སྐུ་གསུང་ཐུགས་ཀྱི་ཕྱག་རྒྱ་ནི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་བརླབ་མཛོད། །ལན་གསུམ། དེ་ནས་ཡེ་ཤེས་པ་དབབ་པའི་སླད་དུ་དམིགས་འདུན་འདི་ལྟར་མཛོད། ཁྱེད་རང་གཞི་ལུས་ཐ་མལ་དུ་གནས་པའི་མིག་གཉིས་ལ་ལཾ་ལཾ༔ རྣ་བ་གཉིས་ལ་ཀཾ་ཀཾ༔ སྣ་བུག་གཉིས་ལ་རཾ་རཾ༔ ལྕེ་ལ་མཾ༔ ལྟེ་བར་སཾ༔ སྙིང་གར་གཾ༔ ཡིག་འབྲུ་དེ་རྣམས་ལས་འབར་བའི་འོད་ཟེར་གྱིས་རྣམ་སྨིན་གྱི་ལུས་རྟེན་དབང་ཡུལ་ཚོགས་བརྒྱད་རྣམས་བསྲེགས་ཤིང་སྦྱངས༔ སྟོང་པའི་ངང་ལས་པད་ཉི་བདུད་བཞིའི་གདན་ལ་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་ཅན་སྐུ་མདོག་མཐིང་ནག །ཕྱག་གཡས་གྲི་གུག་འཕྱར་ཞིང་གཡོན་ཐོད་ཁྲག་ཐུགས་ཀར་བཟུང་བ། །མཆན་གཡོན་དུ་རྡོ་རྗེའི་ཁཊྭཱཾ་ག་འཆང་ཞིང་ཞབས་གཡས་བསྐུམ་གཡོན་བརྐྱང་དུ་བཞུགས་པ། དབུ་ལ་ཐོད་སྐམ་ལྔའི་དབུ་རྒྱན་དང་སྐུ་ལ་རུས་པའི་ཕྱག་རྒྱ་ལྔ་དང་མི་མགོའི་ཕྲེང་བའི་དོ་ཤལ་དང་སེང་གེའི་གཡང་གཞི་གསོལ་བར་གསལ་བའི་གནས་གསུམ་དུ་ཨོཾ་ཨཱཿཧཱུྃ་གིས་མཚན་པ་ལས་འོད་ཟེར་འཕྲོས་པས་རང་བཞིན་ཆོས་ཀྱི་གནས་ནས་ཡེ་ཤེས་སེམས་དཔའ་སྤྱན་དྲངས་ནས་སློབ་མ་དམ་ཚིག་སེམས་དཔར་གསལ་བ་དང་གཉིས་སུ་མེད་པར་གྱུར། ཞེས་དམིགས་ལ་སྤྲོ་ན་ལས་བྱང་གི་སྤྱན་འདྲེན་མཐར། ཨོཾ་བཛྲ་སིང་ཧ་མུ་ཁ་ཧཱུྃ་ཧ་ཧེ་ཕཊ༔ ཛྙཱ་ན་ཨ་བེ་ཤ་ཡ་ཨ་ཨཱཿ ཞེས་བཏགས་པ་བརྗོད་ཅིང་རོལ་མོ་དང་བཅས་པས་བྱིན་དབབ། ཏིཥྛ་བཛྲས་བརྟན་པར་བྱ། དེ་ནས་དབང་དངོས་ལ་གཏོར་མ་འདི་ཉིད་མཁའ་འགྲོ་སེང་གེའི་གདོང་པ་ཅན་དངོས་སུ་གསལ་བ་ཁྱེད་རང་གི་སྤྱི་བོར་བྱོན་ནས་འོད་དུ་ཞུ་སྟེ་ཐིམ་པས་ཕུང་ཁམས་སྐྱེ་མཆེད་གདན་གསུམ་ཚང་བའི་ངོ་བོར་སྨིན། སེང་གེའི་གདོང་ཅན་དངོས་སུ་གྱུར་པའི་མོས་པ་མཛོད། གཏོར་མ་སྤྱི་བོར་བཞག་ལ། ཧོ༔ སྐྱེ་བ་མེད་ལས་གཟུགས་སུ་སྐྱེས༔ སྣང་སྟོང་དབྱེར་མེད་ལྷ་ཡི་སྐུ༔ བུམ་པའི་དབང་གི་ངོ་བོ་ཉིད༔ སྐུ་ལྔ་ཡེ་ཤེས་ལྔ་རྫོགས་ཤོག༔ ཨོཾ་བཛྲ་སིང་ཧ་མུ་ཁ་ཧཱུྃ་ཧ་ཧེ་ཕཊ༔ ཀ་ལ་ཤ་ཨ་བྷི་ཥིཉྩཧཱུྃ༔ དེས་སྐུ་ཡི་བྱིན་རླབས་ལུས་ལ་ཞུགས། ལུས་ཀྱི་སྡིག་སྒྲིབ་ནད་གདོན་བར་ཆད་བྱད་ཕུར་ཐམས་ཅད་ཞི་བར་བྱས། སྣང་སྟོང་བུམ་པའི་དབང་ཐོབ། སྐུ་གཟི་བརྗིད་སྟོབས་ཀྱི་དངོས་གྲུབ་ཐོབ་པར་མོས་ཤིག །གསུང་རྡོ་རྗེ་ཕྲེང་བའི་རྣམ་པར་ཤར་བ་མགྲིན་པར་བཞག་པས་རྡོ་རྗེ་སྔགས་ཀྱི་ནུས་པ་ཡོངས་སུ་རྫོགས་པར་མོས་ཤིག །བགྲང་ཕྲེང་མགྲིན་པར་བཞག་ལ། ཨཱ་ལི་ཐབས་ཀྱི་ངོ་བོ་ཉིད༔ ཀཱ་ལི་ཤེས་རབ་རང་བཞིན་ལས༔ ཟུང་འཇུག་ཡིག་འབྲུ་བཅུ་གཉིས་བྱུང༔ རྟེན་འབྲེལ་དུས་སྦྱོར་ལས་སྐྱེས་པའི༔ ལས་རླུང་སྔགས་སུ་སྨིན་པར་ཤོག༔ ཨོཾ་བཛྲ་སིང་ཧ་མུ་ཁ་ཧཱུྃ་ཧ་ཧེ་ཕཊ༔ ཝཱཀ་ཨ་བྷི་ཥིཉྩ་ཨཱཿ དེ་དང་རྗེས་སུ་འབྲེལ་བ་བཟླས་ལུང་སྦྱིན་པ་ལ། མདུན་བསྐྱེད་བདུད་འདུལ་དྲག་མོའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་མཐིང་ནག་གི་མཐར་སྔགས་ཀྱིས་བསྐོར་བ་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱུང༌། རིག་སྔགས་ཀྱི་ཕྲེང་བར་གྱུར་པ་མགལ་མེ་བཞིན་དུ་ཐོན་ཏེ་ཞལ་ནས་བརྒྱུད། ཁྱེད་རང་ལྷར་གསལ་བའི་ཞལ་དུ་ཞུགས། ཐུགས་ཀར་ཉི་དཀྱིལ་ལ་ཧཱུྃ་གི་མཐར་འཁོད་པར་མོས་ལ་བསྙེན་སྒྲུབ་ཀྱི་སྔགས་འདིའི་རྗེས་ཟློས་ལན་གསུམ་མཛོད། ཨོཾ་བཛྲ་སིང་ཧ་མུ་ཁ་ཧཱུྃ་ཧ་ཧེ་ཕཊ༔ ལན་གསུམ། ཨཿཀཿསཿམཿརཿཙཿཤཿདཿརཿསཿམཿརཿཡཿཕཊཿ ལན་གསུམ་མཐར། དབྱངས་གསལ་རྟེན་སྙིང་བརྗོད་ཅིང༌། བཅོམ་ལྡན་འདས་བདུད་འདུལ་དྲག་མོ་སེང་གེའི་གདོང་པ་ཅན་གྱི་རིག་སྔགས་ཀྱི་ནུས་པ་ཐམས་ཅད་སློབ་མ་འདི་རྣམས་ཀྱི་རྒྱུད་ལ་འཇུག་ཅིང་བརྟན་པར་གྱུར་ཅིག །ཅེས་བརྗོད་ལ་མེ་ཏོག་འཐོར། དེས་གསུང་གི་བྱིན་རླབས་ངག་ལ་ཞུགས། ངག་གི་སྡིག་སྒྲིབ་ནད་གདོན་བར་ཆད་བྱད་ཕུར་ཐམས་ཅད་ཞི་བར་བྱས། གསལ་སྟོང་གསང་བའི་དབང་ཐོབ། གསུང་དྲག་སྔགས་ནུས་པའི་དངོས་གྲུབ་ཐོབ་པར་མོས་ཤིག །ཐུགས་ཕྱག་མཚན་ཁཊྭཱཾ་ག་ཡབ་ཧེ་རུ་ཀའི་ངོ་བོ་སྙིང་གར་གཏད་ཅིང་བཞག་པས་ཁྱེད་རང་ཡུམ་གནམ་ཞལ་སིང་ཧ་མུ་ཁ་དང་གཉིས་མེད་མཉམ་པར་སྦྱོར་བའི་བདེ་སྟོང་དགའ་བཞིའི་ཡེ་ཤེས་རྒྱུད་ལ་སྐྱེས་པར་མོས་ཤིག ཁཊྭཱཾ་ག་སྙིང་གར་གཏད་དེ། ཧཱུྃ༔ ཕྱག་མཚན་ཐབས་མཆོག་བདེ་བ་ཆེ༔ གསུམ་པའི་དབང་གི་ངོ་བོ་ཉིད༔ དགའ་བཞིས་སྦྱངས་པའི་དཔེའི་ཡེ་ཤེས༔ རྣམ་ཐར་གསུམ་ལྡན་ལ་གནས་ཤོག༔ ཨོཾ་བཛྲ་སིང་ཧ་མུ་ཁ་ཧཱུྃ་ཧ་ཧེ་ཕཊ༔ ཛཿཧཱུྃ་བྃ་ཧོཿ དྷརྨ་དྷཱ་ཏུ་ཨ༔ ཙིཏྟ་ཨ་བྷི་ཥིཉྩ་ཧཱུྃ༔ དེས་ཐུགས་ཀྱི་བྱིན་རླབས་ཡིད་ལ་ཞུགས། ཡིད་ཀྱི་སྡིག་སྒྲིབ་ནད་གདོན་བར་ཆད་བྱད་ཕུར་ཐམས་ཅད་ཞི་བར་བྱས། བདེ་སྟོང་གསུམ་པའི་དབང་ཐོབ། ཐུགས་བདེ་ཆེན་ཕྱག་རྒྱ་ཆེན་པོའི་དངོས་གྲུབ་ཐོབ་པར་མོས་ཤིག །ཡོན་ཏན་གྱི་ནུས་པ་དང་ཕྲིན་ལས་ཀྱི་རྩལ་གྱིས་དོན་གཉིས་ལྷུན་གྲུབ་ཡེ་ཤེས་རྡོ་རྗེའི་བྱིན་རླབས་ཡོངས་སུ་རྫོགས་ཏེ་ཚར་གཅོད་རྗེས་འཛིན་གྱི་ནུས་པ་མཐར་ཕྱིན་པའི་རྟགས་སུ་གྲི་གུག་དང་ཐོད་ཁྲག་གིས་དབང་བསྐུར་བར་མོས་ཤིག །གྲི་ཐོད་ལག་གཡས་གཡོན་དུ་གཏད་ལ། ཧཱུྃ༔ གྲི་གུག་གཟུང་འཛིན་རྩ་བ་གཅོད༔ ཐོད་ཁྲག་ཞི་རྒྱས་ཆགས་པའི་ཉམས༔ ལས་བཞི་ལྷུན་གྲུབ་ཕྱག་མཚན་འདིས༔ ཕྲིན་ལས་རྣམ་བཞི་འགྲུབ་པར་ཤོག༔ ཨོཾ་བཛྲ་སིང་ཧ་མུ་ཁ་ཧཱུྃ་ཧ་ཧེ་ཕཊ༔ ཤཱིནྟཾ་པུཥྚིཾ་ཝཱ་ཤཾ་མཱ་ར་ཡ་ཕཊ༔ དེས་ཡེ་ཤེས་ཀྱི་བྱིན་རླབས་རྒྱུད་ལ་ཞུགས། སྒོ་གསུམ་ཆར་ལ་བརྟེན་པའི་སྡིག་སྒྲིབ་ནད་གདོན་བར་ཆད་བྱད་ཕུར་ཐམས་ཅད་ཞི་བར་བྱས། སྣང་གསུམ་འཕོ་བའི་སྒྲིབ་པ་དག །བཞི་པ་ཚིག་དབང་རིན་པོ་ཆེ་ཐོབ། ཡེ་ཤེས་རྡོ་རྗེ་མཆོག་ཏུ་མི་འགྱུར་བདེ་བ་ཆེན་པོའི་གོ་འཕང་མངོན་དུ་བྱས་པར་མོས་ཤིག །དེ་དག་གིས་རིག་སྔགས་སྟོང་གི་ནུས་པ་དང་བྱད་མ་འབུམ་གྱི་མཐུ་སྟོབས་ཀྱང་དྲན་པ་ཙམ་གྱིས་འཇོམས་པའི་བདུད་འདུལ་དྲག་མོ་སེང་གེའི་གདོང་ཅན་གྱི་དབང་བཞི་ལེགས་པར་ཐོབ་པ་ཡིན་པས་དམ་ཚིག་ཁས་བླང་བ་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་དམ་ཚིག་ཁས་བླང༌། མཎྜལ་ཡོན་འབུལ་དགེ་བསྔོ་སོགས་ཆོ་གའི་རྗེས་རིམ་བཅས་སྤྱི་ལྟར་བྱའོ། །མཁྱེྃན་གཉིས་རྗེས་བྃརྩེའི་འཛུམ་པ་ལས། །ཟབ་གསང་འོདྃ་བརྒྱའི་ཟེརྃ་ཕྲེང་ཅན། །གྲུབ་གཉིས་པདྨོའི་ནགས་ཀློང་གི །ལང་ཚོ་ཅིར་ཡང་རྒྱས་དེ་རྨད། །ཡུམ་ཀ་བདེ་ཆེན་རྒྱལ་མོའི་གསང་སྒྲུབ་སེང་གེའི་གདོང་ཅན་གྱི་དབང་ཆོག་བྱིན་རླབས་ཆུན་པོ་བཀླག་ཆོག་ཏུ་བཀོད་པའི་ལེའུ་ཚན་བཅུ་གཅིག་པ་སྟེ་ལྷན་སྐྱེས་དགའ་བའི་རྡོ་རྗེས་སྦྱར་བའོ། ༈ རིག་སྟོང་ཧེ་རུ་ཀ་དཔལ་ཡབ་ཡུམ་གྱིས། །ཡིད་ཆོས་འཁྲུལ་རྟོག་གཟུང་འཛིན་རུ་ཏྲའི་སྡེ། །བསྒྲལ་ལས་འཁོར་འདས་རྗེ་བཙན་བཀའ་སྲུང་ཚུལ། །ལྕམ་དྲལ་སྡེ་ལྔའི་ཚུལ་དུ་བཞེངས་ལ་འདུད། །ཆོས་བཀའ་འདི་ཉིད་ཀྱི་བླ་རྫོགས་ཐུགས་གསུམ་ཡོངས་རྫོགས་ཀྱི་ཐུན་མོང་མ་ཡིན་པའི་བཀའ་སྲུང་མ་མགོན་ལྕམ་དྲལ་གྱི་སྲོག་དབང་ཐུན་མོང་མ་ཡིན་པའི་ཆིག་བརྒྱུད་བཀའ་རྒྱ་མ་བྱ་བ་ལ། གནས་ཁང་རྒྱན་གྱིས་སྤྲས་པའི་གུང་དུ་གཞུང་མཐུན་གྱི་སྐུ་རྟེན་བཀྲམ་པའི་སྤྱན་སྔར་སྟེགས་བུར་ཁྲག་ཆང་གིས་སྦགས་པའི་སྟེང༌། རྡོར་རྭ་མེ་རིའི་དབུས་སུ་ཁྲག་མཚོའི་ནང་དུ་ཐོད་མཁར་གྲུ་གསུམ་གྱི་ལྟེ་བར་ཉི་གདན་ལ་ཏྲག་མཐིང་ག །མདུན་དུ་བྷྱོ་དམར་པོ། གཡས་སུ་ཧཱུྃ་མཐིང་ག །རྒྱབ་ཏུ་ཀྵ་དུད་ཁ། གཡོན་དུ་ཏྲིཿདམར་ནག་གིས་མཚན་པའི་དབུས་སུ་མཉྫིའི་སྟེང་གོང་གནོན་དཔལ་ཆེན་འདུས་པའི་གཏོར་མ། མདུན་དུ་དེ་ལས་ཅུང་དམའ་བར་མ་མགོན་ལྕམ་དྲལ་གྱི་གཏོར་མ་དར་གདུགས་སྐུ་ཙཀ་ཅན་བཤམས། མཐའ་བསྐོར་དུ་སྐུའི་རྟེན་སྦ་ལྕགས་ཚིགས་གསུམ་པ། མེ་ལོང་ལ་དངུལ་ལམ་སིནྡྷུ་རས། ཏྲག་རཀྴ་མུ་ཏྲ་མུ༔ རུ་ལུ་རུ་ལུ་ཧཱུྃ་བྷྱོ་ཧཱུྃ༔ རགྨོ་ཏེ་ཀེཾ་ཙ་ཙ༔ རུ་ལུ་རུ་ལུ་མ་ཧིཾ་བྷྱོ༔ མ་ཧཱ་ཀཱ་ལ་ཤཱ་ས་ན་ཧཱུྃ༔ བཛྲ་སཱ་དྷུ་ཏྲི༔བྲིས་པ། མ་མོའི་སྐུ་ཙཀ །སྙིང་དང་ལྕགས་སྤྱང༌། ནལ་བུའི་ཐོད་པར་ཐུན་རྫས་དུག་ཁྲག་གིས་བཀང་བ། གསང་ཐོད། གཡས་སུ་མགོན་པོའི་ཕྱག་མཚན་ཙནྡན་གྱི་བིང་དངོས་སམ་ཙཀླི། རུ་མཚོན་ནག་པོ་དང་སྙིང་ཞགས། གཡོན་དུ་ཕ་ཝཾ་ལོང་བུ་ལ་གསེར་གྱིས་སྲོག་སྔགས་བཛྲ་སཱ་དྷུ་ཏྲི༔བྲིས་པ་རྣམས་དང༌། མཐའ་བསྐོར་དུ་དྲག་པོའི་ཉེར་སྤྱོད། སྨན་རཀ །འབུལ་གཏོར། ཤ་ཁྲག །ཟས་སྣ། ཇ་ཆང་གི་སྐྱེམས་སོགས་དང༌། ཚོགས་མཆོད། ཆད་བརྟན་བཅས་གཙང་ལ་དག་པར་འདུ་བྱས་ལ། བདག་བསྐྱེད་དཔལ་ཆེན་འདུས་པའི་ལས་བྱང་རྒྱས་འབྲིང་བསྡུས་པ་གང་རུང་གི་བསྐྱེད་བཟླས་བསྡུ་ལྡང་བཅས་སྔོན་དུ་འགྲོ་བས་མ་མགོན་ལྕམ་དྲལ་གྱི་བསྟོད་པའི་རྗེས། བཟླས་པ་བྱ་བ་ནི། མདུན་བསྐྱེད་ཀྱི་ཐུགས་ཀར་ཉི་མ་ལ་གནས་པའི་ཏྲག་ཡིག་གི་མཐར་སྔགས་ཀྱི་ཕྲེང་བ་མཐིང་ནག་གཡོན་བསྐོར་དུ་འཁོར་བར་བདག་ཉིད་དཔལ་ཆེན་པོར་གསལ་བའི་ཐུགས་ཀའི་ས་བོན་ལས་བྱུང་བའི་འོད་ཟེར་ཕོག་པས་ཐུགས་རྒྱུད་རབ་ཏུ་བསྐུལ་ནས་ཅི་འདོད་པའི་ཕྲིན་ལས་རབ་འབྱམས་ཐོགས་མེད་དུ་སྒྲུབ་པར་གྱུར། ཞེས་བརྗོད་ལ་ཧེ་རུ་ཀའི་ཡིག་བརྒྱ་ཉེར་གཅིག་དང༌། གོང་གནོན་གྱི་བཟླས་པ་སྔོན་དུ་འགྲོ་བས། ཏྲག་རཀྴ་མུ་ཏྲ་མུ༔ རུ་ལུ་རུ་ལུ་ཧཱུྃ་བྷྱོ་ཧཱུྃ༔ རགྨོ་ཏེ་ཀེཾ་ཙ་ཙ༔ རུ་ལུ་རུ་ལུ་མ་ཧིཾ་བྷྱོ༔ མ་ཧཱ་ཀཱ་ལ་ཤཱ་ས་ན་ཧཱུྃ༔ བཛྲ་སཱ་དྷུ་ཏྲི༔ ཞེས་ཅི་ནུས་བཟླས་མཐར། ཧཱུྃ། དངོས་སུ་འབྱོར་པའི་མཆོད་པ་སྣ་ཚོགས་དང༌། །ཡིད་སྤྲུལ་ཟག་མེད་ཀུན་ཏུ་བཟང་པོའི་སྤྲིན། །བདེ་སྟོང་ཟུང་འཇུག་ཆེན་པོར་མཉམ་སྦྱོར་བས། །ལྕམ་དྲལ་བཀའ་སྡོད་འཁོར་བཅས་མཉེས་གྱུར་ཅིག །ཤྲཱི་བཛྲ་དྷརྨ་པཱ་ལ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། ཧཱུྃ། དྲག་ཤུལ་རྡོ་རྗེའི་ལང་ཚོར་འབར་བའི་སྐུ། །མི་ཤིགས་བརྗོད་བྲལ་ནཱ་དའི་རང་བཞིན་ཅན། །འགྱུར་མེད་རྣམ་པ་ཀུན་གྱི་མཆོག་ལྡན་ཐུགས། །ལྕམ་དྲལ་བཀའ་སྡོད་འཁོར་དང་བཅས་ལ་བསྟོད། །ཅེས་བསྟོད། སྲོག་གཏད་དངོས་ལ། དམ་ཚིག་ཐུབ་ངེས་པ་དང་བརྒྱུད་པ་ཟིན་ངེས་ཀྱི་སློབ་མ་བོས་ལ། ཁྲུས་བྱ། བགེགས་གཏོར་བསྔོས་ཤིང་བསྐྲད། སྲུང་འཁོར་བསྒོམ་ལ་མཚམས་སྦྱོར་གྱི་ཁྱད་པར། འོ་སྐོལ་རྣམས་རྟེན་ཁྱད་པར་ཅན་རྙེད་པ་དོན་ཡོད་པར་བྱ་བའི་ཕྱིར་སངས་རྒྱས་ཀྱི་བསྟན་པའི་སྒོར་ཞུགས་ཤིང༌། བྱང་ཆུབ་ཀྱི་ལམ་སྒྲུབ་པའི་བར་ཆད་ཀྱི་རྐྱེན་ལས་སྐྱོབ་བྱེད་ཐེག་པ་ཆེན་པོའི་དགེ་འདུན་གྱི་བྱེ་བྲག་སྲུང་མ་མཐུ་དང་ལྡན་པ་ཞིག་བསྟེན་པ་གལ་ཆེ། སྲུང་མ་དེ་ལའང་འཇིག་རྟེན་པ་བསྟེན་ན་རང་ཉིད་འཁོར་བ་ལས་མ་ཐར་བས་གཞན་སྐྱོབ་མི་ནུས་པ་མ་ཟད། གནས་སྐབས་ཕན་པ་ཆུང་ངུ་ཙམ་འགྲུབ་ཏུ་སྲིད་ཀྱང་མཐར་ལོག་པའི་ལམ་ལ་སྦྱོར་བ་དང༌། འཁུ་ལྡོག་ཕྲ་མོ་ཙམ་གྱིས་ཀྱང་ལུས་སྲོག་ལ་བར་དུ་གཅོད་པ་སོགས་ཉེས་དམིགས་ཆེ་ཞིང་ཕན་ཡོན་ཆུང་བས་ན། འཇིག་རྟེན་ལས་འདས་པའི་སྲུང་མ་ཁྱད་པར་ཅན་བསྟེན་དགོས། དེ་ཡང་རྒྱུད་སྡེ་རིན་པོ་ཆེ་རྣམས་ལས་རིགས་བསམ་གྱིས་མི་ཁྱབ་ཞིག་གསུངས་པ་ལས། འཁོར་འདས་ཀྱི་སྟོང་སྲོག་རྣམ་ཐར་སྒོ་གསུམ་གྱི་རང་བཞིན་རྡོ་རྗེ་བཙུན་མོ་སྟེ། དོན་དམ་ལྷག་པའི་བདེན་པ་དབྱེར་མེད་ཆོས་སྐུ་ཡུམ་ཆེན་མོ་ཉིད། རྣམ་པ་བསྟན་སྲུང་དབྱིངས་ཀྱི་རྒྱལ་མོའི་ཚུལ་བསྟན་པ་འདི་གཙོ་བོ་ཁྲོས་མ་གསང་བའི་རྒྱུད་དང༌། ཨ་ཏི་དང་མ་ཧཱ་ཡོ་གའི་རྒྱུད་དུ་མ་ནས་བསྟན་ཅིང༌། རྡོ་རྗེ་ཐེག་པའི་གསང་སྔགས་སྤྱི་དང་ཁྱད་པར་རྫོགས་པ་ཆེན་པོའི་རྒྱུད་དང་སྒྲུབ་ཐབས་མན་ངག་ཐམས་ཅད་ཀྱི་བཀའ་སྲུང་གི་གཙོ་བོ་སྟེ། ངོ་བོ་ཆོས་དབྱིངས་བདེ་བ་ཆེན་པོའི་ཀློང་ན་འཁོར་འདས་ཐམས་ཅད་བསྐྱེད་བསྡུའི་བདག་ཉིད་དཔལ་ཀུན་ཏུ་བཟང་མོ། རང་བཞིན་སྤྲུལ་པའི་ཞིང་དུར་ཁྲོད་མེ་རི་འབར་བ་ན་ཡེ་ཤེས་ཀྱི་མཁའ་འགྲོ་མ་ཨེ་ཀ་ཙ་ཊི་སྤུན་དྲུག །བྲན་མོ་བཅུ་བཞི། གཡོག་མོ་ལྔ་ཅུ་རྩ་བརྒྱད། ཡང་གཡོག་འབུམ་ཁྲི་འབུམ་སྟོང་ལ་སོགས་པ་དང༌། ཉི་ཤུ་རྩ་བཞི་སྤྲུལ་པའི་ཡུལ་ན་མ་མོ་མཁའ་འགྲོ་ཀུན་གྱི་རྗེ་མོ་སོགས་སྤྱི་དང་བྱེ་བྲག་གི་མཚན་དང་སྐུ་ཡི་བཀོད་པའི་ཆོ་འཕྲུལ། སྔོན་བསྐལ་པ་མང་པོའི་གོང་རོལ་ཏུ་བྱང་ཆུབ་མཆོག་ཏུ་ཐུགས་བསྐྱེད་ནས་རིམ་བཞིན་ལས་དང་སྨོན་ལམ་གྱི་རྣམ་པར་སྨིན་པའི་འབྲས་བུ་དུས་སུ་སད་པ་ལས། དེང་འདིར་འདོད་པ་ཁམས་ཀྱི་དབང་ཕྱུག་མ་གཙོ་འཁོར་ཅན་དུ་གྱུར་ཅིང་སྟོན་པ་ཐུབ་པའི་དབང་པོའི་བསྟན་སྲུང་ཡོངས་ཀྱི་གཙོ་བོར་དབང་བསྐུར་བ་འདི་ཉིད་ཀྱི་སྔོན་གྱི་རབས་དང་སྐྱེ་རྒྱུད། ད་ལྟ་གང་ལ་བསྟན་པའི་ཕྲིན་ལས་ཀྱི་མཛད་ཚུལ། མ་འོངས་པ་ན་ཞིང་གང་དུ་འཚང་རྒྱ་བར་འགྱུར་བ་སོགས་འཕགས་པ་ལྷ་མོ་དཔལ་ཆེན་མོ་ལུང་བསྟན་པའི་མདོ་དང་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་དང༌། གསེར་འོད་མཆོག་ཏུ་རྒྱས་པ་རྣམ་པར་རྒྱལ་བ་གཉིས་ཀྱི་ལེའུ་བཅུ་དྲུག་པ་དང་བཅུ་བདུན་པ་གཉིས་དང་བསྡུས་པའི་ལེའུ་ཉེར་གཅིག་པ་དང༌། ཁྱད་པར་ལྷ་མོ་འདི་ཉིད་ཀྱི་སྒོས་རྒྱུད་མཁའ་འགྲོ་མ་མེ་ལྕེ་འབར་བའི་རྒྱུད་སོགས་དུ་མ་ནས་གསལ་བར་བསྟན་པ་ཁུངས་དང་ཟིན་སོ་ཆེ་ཞིང༌། སློབ་དཔོན་པདྨས་མཛད་པའི་མ་མོའི་སྲོག་སྒྲུབ་རྩ་བ་དང༌། ལས་མཛད་སྐོར་གྱི་སྒྲུབ་པ། ཡང་སྙིང་གནུབས་ཀྱི་མན་ངག་སོགས་གཏེར་མ་དང༌། ཕུར་སྲུང་བདག་ཉིད་རེ་མ་ཏིའི་སྒྲུབ་ཐབས་ལང་ལབ་མ་སོགས་བཀའ་མ་ནས་བྱུང་ཞིང༌། རྒྱུད་ལས། ལྷ་མོ་ཀླུ་མོ་གནོད་སྦྱིན་མོ། །དྲི་ཟ་གྲུལ་བུམ་འབྱུང་པོ་དང༌། །ཅིར་ཡང་སྤྲུལ་པའི་རྫུ་འཕྲུལ་ཅན། །མིང་བརྒྱ་མ་ལ་མཚན་སྟོང་མ། །ཞེས་གསུངས་པས་ནམ་གྲུ་རེ་མ་ཏི་ཞེས་ཡེ་ཤེས་ཀྱི་མ་མོ་ཐམས་ཅད་ཀྱི་ཁྱབ་བདག་ཏུ་གྱུར་པ་སྟེ། སྐབས་འདིར་ཡེ་ཤེས་ཀྱི་མ་མོ་ཨེ་ཀ་ཙ་ཏི་ལྟར་སྒྲུབ་པ་འདི་ལ་ཡི་དམ་ལྟར་སྒྲུབ་པ་དང༌། ཆོས་སྐྱོང་ལྟར་སྒྲུབ་ཚུལ་ཇི་སྙེད་ཅིག་ཡོད་པ་ལས། འདིར་ཆོས་སྐྱོང་ལྟར་སྒྲུབ་པ་ཡིན། དེ་ལ་ཡང་མ་མོ་རང་རྐྱང་དུ་སྒྲུབ་པ་དང༌། དྲེགས་པ་གཞན་གྱི་འཁོར་ཅན་སྒྲུབ་པ་གཉིས་ལས། ཕྱི་མ་ལྟར་སྒྲུབ་པ་སྟེ། དེ་ཡང་འཁོར་གྱི་གིང་ཆེན་གསུམ་ཕོ་ཉ་དང་བཅས་པ་རྣམས་ཀྱང་དྲེགས་པ་རང་རྒྱུད་པ་མ་ཡིན་ཏེ། ཐབས་མཆོག་སྦྱོར་བའི་གིང་ཆེན་དཔལ་མགོན་མ་ནིང་ནག་པོ་བཅོམ་ལྡན་འདས་ཀུན་བཟང་ཆེ་མཆོག་ཧེ་རུ་ཀ་ཉིད་གདུལ་བྱ་གདུག་པ་ཅན་འདུལ་བའི་ཆེད་དུ་དཔལ་ཡེ་ཤེས་ཀྱི་མགོན་པོའི་སྐུར་བཞེངས་ནས། འཇིག་རྟེན་དང་འཇིག་རྟེན་ལས་འདས་པའི་དྲེགས་པ་ཕོ་རྒྱུད་ཐམས་ཅད་ཀྱི་རྗེ་བཙན། མཐུ་སྟོབས་ནུས་པའི་བྱིན་རླབས་འགྲན་དུ་མེད་པའི་བསྟན་སྲུང་ཐམས་ཅད་ཀྱི་གཙོ་བོ་དང༌། ཤེས་རབ་སྦྱོར་བའི་གིང་ཆེན་དམ་ཅན་རྡོ་རྗེ་ལེགས་པ་འདི་ནི། རྣམ་རོལ་ཡེ་ཤེས་དང་ལས་དང་འཇིག་རྟེན་གྱི་རྡོ་རྗེ་ལེགས་པ་སོགས་སྐུ་དང་མཚན་གྱི་རྣམ་འགྱུར་དུ་མ་བསྟན་ཀྱང་དོན་དུ་ཡེ་ཤེས་ཀྱི་དབྱིངས་སུ་འཕགས་པ་འཇིག་རྟེན་དབང་ཕྱུག་དང་གཉིས་སུ་མེད་ཀྱང༌། རྣམ་པ་ནུབ་ཕྱོགས་ཕ་ཝཾ་ལོང་བུའི་སྐུ་མཁར་དུ་དཔལ་རྟ་མགྲིན་གྱི་སྤྲུལ་པ། སངས་རྒྱས་ཀྱི་བསྟན་པ་སྲུང་ཕྱིར་དྲེགས་པ་རང་རྒྱུད་པ་ལྟར་བསྟན་ནས་དཔལ་གསང་བའི་བདག་པོས་དབང་བསྐུར་བསྟན་པ་སྲུང་བར་བཀའ་བསྒོས་པ་བཞིན་ཁས་བླང་དམ་ལ་གནས་པས་བཀྲ་ཤིས་ལ་བྱིན་ཆགས། རྒྱུད་འཇམ་ལ་སྙིང་བརྩེ། དཔའ་ཞིང་བརྟུལ་ཕོད་མཐུ་རྩལ་ཆེ་ཞིང༌། ཁྱད་པར་རྫོགས་པ་ཆེན་པོའི་བཀའ་སྲུང་ཐུན་མོང་མ་ཡིན་པ་དང༌། གསང་བའི་སྒྲོལ་གིང་གཟའ་བདུད་ཆེན་པོ་ནི་ཀླུ་སྲིན་བཤོས་པའི་སྲས་མཆོག་མཐུ་ནུས་ལྷག་པར་ཆེ་ཞིང་དྲག་རྩལ་མྱུར་མགྱོགས་ཀྱི་ཕྲིན་ལས་དང་ལྡན་པས་འཇིག་རྟེན་དྲེགས་པ་སྡེ་བརྒྱད་ཐམས་ཅད་ཀྱི་རྗེ་བོ། རིག་འཛིན་ཤྲཱི་སིང་ཧ་དང་སློབ་དཔོན་ཆེན་པོ་པདྨའི་བཀའ་སྲུང་མཆོག་ཏུ་བསྔགས་པ་དང༌། སྦས་པའི་དཀོར་སྲུང་དུར་ཁྲོད་ལྷ་མོ་ནི་རྣལ་འབྱོར་གསང་མཐའི་རྒྱུད་ལས་གསུངས་པའི་ཡུལ་ཉེར་བཞིའི་ནང་ཚན་དེ་ཝི་ཀོ་ཊའི་ཞིང་སྐྱོང་ལངྐའི་དབང་ཕྱུག་ཉིད་དཀོར་ནོར་སྲུང་བའི་མ་མོ་དུར་ཁྲོད་ཀྱི་འདྲེ་མོའི་ཚུལ་དུ་བསྟན་པ་རྡོ་རྗེ་རྣལ་འབྱོར་མས་སྐྱེ་བརྒྱུད་སྒྲུབ་ཐབས་དང་བཅས་པ་བསྟན་ནས་མིང་སྲིང་བརྒྱད་ཀྱི་མཚན་དང་སྤྲུལ་པས་ཕྱི་རུ་རྣོ་མྱུར་ཆེ། ནང་དུ་སྙིང་ཉེ་བ་སོགས་ཏེ་རྣམ་པ་ཐབས་ཤེས་དང་གཙོ་འཁོར་གྱི་རོལ་པས་ཕྲིན་ལས་གང་འདུལ་རྣམ་འགྱུར་ཅན་དུ་སྟོན་ཡང་ངོ་བོ་གདོད་མའི་མགོན་པོའི་ཡེ་ཤེས་ལས་གཉིས་སུ་མེད་པས་ན། མདོར་ན་ཐེག་མཆོག་རྫོགས་པ་ཆེན་པོའི་ཐུན་མོང་མ་ཡིན་པའི་བཀའ་སྲུང༌། ཀུན་མཁྱེན་ཆོས་ཀྱི་རྒྱལ་པོ་ཡབ་སྲས་ཀྱི་ཕྲིན་ལས་ཀྱི་ཕོ་ཉ་བ་ཐམས་ཅད་གཅིག་དྲིལ་དུ་སྒྲུབ་པ་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་བླ་རྫོགས་ཐུགས་གསུམ་གྱི་བཀའ་སྲུང་ཐུན་མོང་མ་ཡིན་པ་དཔལ་ལྡན་མ་མགོན་ལྕམ་དྲལ་གྱི་སྲོག་དབང་ཆིག་བརྒྱུད་མ་སྦྱིན་པ་ལ་སློབ་མའི་བྱ་བ་མཎྜལ་ཕུལ། བླ་མ་དཔལ་ཆེན་ཧེ་རུ་ཀ་དངོས་སུ་གསལ་བ་ལ་གསོལ་བ་འདེབས་པ་འདིའི་རྗེས་ཟློས་མཛོད། དོན་དམ་དབྱིངས་ལས་མ་གཡོས་ཀྱང༔ འགྲོ་བ་འདུལ་ཕྱིར་སྤྲུལ་པའི་སྐུ༔ བཀའ་སྲུང་མ་མགོན་ལྕམ་དྲལ་གྱི༔ སྲོག་དབང་བདག་ལ་བསྩལ་དུ་གསོལ༔ ལན་གསུམ། འོ་རིགས་ཀྱི་བུ་ཁྱོད་དེ་ལྟར་འདོད་ན་གསང་བའི་བཀའ་སྲུང་ཆེས་གཉན་ལ་བསྟན་དུ་འཕང་པའི་བཀའ་གཏད་ཡིན་པས་བདག་གི་གཅེས་ནོར་ཐེག་མཆོག་རྫོགས་པ་ཆེན་པོའི་བསྟན་པའི་སྲོག་འཛིན་ཞིང་གཅིག་ཏུ་གཞན་དོན་བྱེད་ནུས་ན་སྦྱིན་གྱི་རང་བཞིན་ཐོད་རྒལ་དུ་བསྟན་བྱ་མ་ཡིན་ཞིང༌། དབང་བྱིན་ནས་རྡོ་རྗེའི་དམ་ཚིག་ལས་ནམ་ཡང་འདའ་རུང་བ་མ་ཡིན་པས་ཁེ་ཉེན་ཤེས་པར་གྱིས་ལ་དཔལ་ཆེན་ཧེ་རུ་ཀའི་འདའ་དཀའ་སྲོག་གི་མནའ་ཆུ་འདི་འཐུངས་ལ་བག་ཡོད་པར་གྱིས་ཤིག །ཐེག་མཆོག་རྫོགས་པ་ཆེན་པོ་ཡི༔ ལམ་ནས་རང་གཞན་དོན་ནུས་ན༔ དབང་བསྐུར་སྦྱིན་གྱི་གཞན་དུ་མིན༔ མནའ་ཆུ་འདི་འཐུངས་དམ་ཚིག་སྲུངས༔ འགལ་ན་སྲོག་ལ་ཧུར་ཐུམ་བྱེད༔ ས་མ་ཡ་ཨི་དན་ན་ར་ཀན༔ ཞེས་ནང་མཆོད་སྦྱིན། བླ་མ་དཔལ་ཆེན་པོ་སྐྱབས་ཡུལ་རྒྱ་མཚོ་མངོན་སུམ་བཞུགས་པའི་སྤྱན་སྔར་བསགས་སྦྱང་གི་སྙིང་པོ་ཡན་ལག་བརྒྱད་པའི་རྒྱུན་བཤགས་འདིའི་རྗེས་ཟློས་མཛོད། རྡོ་རྗེ་སློབ་དཔོན་སངས་རྒྱས་དཔལ་སོགས་ལན་གསུམ། དེ་ནས་སྲོག་དབང་གི་གཞི་འགོད་པའི་སླད་དུ་ཡེ་ཤེས་པ་དབབ་པ་ལ། ཁྱེད་རང་གང་དུ་གནས་པའི་ཁང་པ་འདི་ཉིད་རང་བཞིན་སྤྲུལ་པའི་སྐུའི་ཞིང་ཁམས་དབུས་ཕྱོགས་མེ་རི་འབར་བ་དྲག་པོའི་ཞིང་གི་བཀོད་པ་ཚད་མེད་པས་བརྒྱན་པ་འཇིགས་སུ་རུང་ཞིང་སྐྱི་གཡའ་བའི་དབུས་སུ་ཁྱེད་རང་སློབ་མ་རྣམས་པད་ཉིའི་སྟེང་དུ་ཨེ་ལས་སྔགས་ཀྱི་བདག་མོ་ཀུན་ཏུ་བཟང་མོ་མཐིང་ནག་མཆེ་བ་གཙིགས་ཤིང་བརྐྱང་བསྐུམ་དུ་བཞུགས་པའི་ཕྱག་ན་དམ་ཚིག་གི་གཎྜེ་འཕྲེད་ལ་འཛིན་ཅིང༌། མི་ལྤགས་ཀྱི་གཡང་གཞི་གསོལ་བའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གའི་སྟོད་དུ་ཧཱུྃ་སྔོན་པོ། སྨད་དུ་ཉི་གདན་ལ་ཏྲག་ཡིག་སྨུག་ནག་གིས་མཚན་པ་ལ་སློབ་དཔོན་དཔལ་ཆེན་པོར་གསལ་བའི་གསང་བ་གསུམ་གྱི་ཟིལ་དང༌། ཐུགས་སྲོག་ཧཱུྃ་གི་འོད་ཟེར་གྱིས་ཕོག་པས་དེ་ལས་འོད་ཟེར་དཔག་ཏུ་མེད་པ་འཕྲོས། རང་བཞིན་གྱི་གནས་ཆོས་དབྱིངས་ཡུམ་གྱི་མཁའ། དུར་ཁྲོད་མེ་རི་འབར་བ་ནས་དཔལ་ལྡན་མ་མགོན་ལྕམ་དྲལ་ཡེ་ཤེས་ལས་དང་འཇིག་རྟེན་གྱི་འཁོར་དང་བཅས་པ་བྱོན་ནས་ཡེ་ཤེས་པ་རྣམས་སློབ་མ་ལ་ཐིམ་པས་རྡོ་རྗེའི་གཟི་བྱིན་མཆོག་ཏུ་འབར། འཇིག་རྟེན་པ་རྣམས་མཐའ་བསྐོར་དུ་བཀའ་སྡོད་ཀྱི་ཚུལ་དུ་འཁོད་པར་བསམ། གུ་གུལ་དང་ཚིལ་ཆེན་ལ་ཁྱད་པར་གྱི་སྤོས་སྦྱར་བ་བསྲེགས། ཐོད་རྔ་དང་རོལ་མོ། ཞིང་དང་རོ་རས་དར་ནག་གི་གཡབ་མོས་བསྐུལ་ཏེ། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཏྲག་རཀྴ་མུ་ཏྲ་མུ༔ རུ་ལུ་རུ་ལུ་ཧཱུྃ་བྷྱོ་ཧཱུྃ༔ རགྨོ་ཏེ་ཀེཾ་ཙ་ཙ༔ རུ་ལུ་རུ་ལུ་མ་ཧིཾ་བྷྱོ༔ མ་ཧཱ་ཀཱ་ལ་ཤཱ་ས་ན་ཧཱུྃ༔ བཛྲ་སཱ་དྷུ་ཏྲི༔ ཨ་བེ་ཤ་ཡ་ཨ་ཨ་ཨ༔ ཞེས་བརྗོད་པས་དབབ། ཏིཥྛ་བཛྲ་ས་བརྟན་པར་བྱ། དེ་ནས་སྲོག་དབང་དངོས་ལ་གསུམ་ལས། དང་པོ་གཙོ་མོ་དབྱིངས་ཀྱི་རྒྱལ་མོའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བཀའ་གཏད་ནས་སྲོག་སྙིང་གཅིག་ཏུ་བསྲེ་བ་ལ། མ་མོའི་སྐུ་ཡི་རྟེན་སྦ་འཁར་ཚིགས་གསུམ་པ་འདི་སྙིང་གར་གཏད་པས་ཚོགས་བརྒྱད་སྐྱེ་འགག་གནས་གསུམ་དང་བྲལ་བའི་མཁའ་ཀློང་དབྱིངས་གསུམ་གྱི་དགོངས་པས་སྐུ་ཡི་སྲོག་ལ་དབང་ཐོབ་པར་མོས་ཤིག །སྦ་འཁར་གཏད་ལ། ཧཱུྃ༔ རྣམ་པ་ཀུན་གྱི་མཆོག་ལྡན་ནི༔ ཚོགས་བརྒྱད་དག་པའི་མ་མོའི་ཚུལ༔ ཀུན་ཏུ་བཟང་མོའི་དམ་ཤིང་འདི༔ སྐུ་ཡི་རྟེན་དུ་ཁྱོད་ལ་གཏད༔ ཏྲག་རཀྴ་མུ་ཏྲ་མུ༔ རུ་ལུ་རུ་ལུ་ཧཱུྃ་བྷྱོ་ཧཱུྃ༔ རགྨོ་ཏེ་ཀེཾ་ཙ་ཙ༔ རུ་ལུ་རུ་ལུ་མ་ཧིཾ་བྷྱོ༔ ཀཱ་ཡ་ཨ་བྷི་ཥིཉྩཨོཾ༔ གསུང་གི་རྟེན་སྔགས་བྱང་མགྲིན་པར་བཞག་ཅིང་གཏད་པས་གྲགས་སྟོང་སྐྱེ་འགག་གནས་བྲལ་གཞོམ་མེད་རྡོ་རྗེའི་གསུང་གི་ནུས་པས་ཕྲིན་ལས་རྣམ་བཞི་ཐོགས་མེད་དུ་འགྲུབ་ནུས་པའི་གདིང་ཐོབ་པར་མོས་ཤིག །མེ་ལོང་སྔགས་བྱང་ཅན་གཏད་ལ། སྲོག་གི་སྙིང་པོ་རླུང་ཡིན་ཏེ༔ སྒྲ་ནི་ཡི་གེ་འཁོར་ལོའི་སྤྲིན༔ གྲགས་སྟོང་གསུང་གི་དབང་བསྐུར་བས༔ ཕྲིན་ལས་རྣམ་བཞི་འགྲུབ་པར་ཤོག༔ རྩ་སྔགས་མཐར། ཝཱཀ་ཨ་བྷི་ཥིཉྩ་ཨཱཿ རྗེས་འབྲེལ་དུ་བཟླས་པའི་ལུང་སྦྱིན་པ་ལ། སློབ་དཔོན་ལ་མོས་གུས་དྲག་ཏུ་བྱས་པས་དེ་ཡི་ཐུགས་ཀ་ནས་འོད་ཟེར་ཚ་ཞིང་རྩུབ་པ་སྤྲོས། མདུན་གྱི་མ་མོའི་ཐུགས་ཀར་ཕོག་པས་སྔོན་གྱི་དམ་བཅའ་དྲན་ཏེ་སྒྲུབ་པ་པོ་ལ་རྗེས་སུ་བརྩེ་བས་ཐུགས་ཀར་ཉི་མ་ལ་སྲོག་ཡིག་སྔགས་ཕྲེང་གིས་བསྐོར་བ་ལས་སྔགས་ཀྱི་ཕྲེང་བ་བྱུང༌། ཞལ་ནས་ཐོན། ཁྱེད་རང་སྔགས་ཀྱི་མ་མོར་གསལ་བའི་སྙིང་གར་ཐིམ་པས་སྲོག་སྙིང་གཅིག་ཏུ་འདྲེས་པར་བསམ་ལ་སྔགས་འདིའི་རྗེས་ཟློས་མཛོད། ཏྲག་རཀྴ་མུ་ཏྲ་མུ༔ རུ་ལུ་རུ་ལུ་ཧཱུྃ་བྷྱོ་ཧཱུྃ༔ རགྨོ་ཏེ་ཀེཾ་ཙ་ཙ༔ རུ་ལུ་རུ་ལུ་མ་ཧིཾ་བྷྱོ༔ ཏྲག་རཀྴ་ཨེ་ཀ་ཙ་ཊི་སརྦ་ཤཱིནྟཾཀུ་རུ་སྭཱ་ཧཱ༔ ཏྲག་རཀྴ་ཨེ་ཀ་ཙ་ཊི་སརྦ་པུཥྚིཾ་ཀུ་རུ་སྭཱ་ཧཱ༔ ཏྲག་རཀྴ་ཨེ་ཀ་ཙ་ཊི་སརྦ་ཝཱ་ཤཾ་ཀུ་རུ་སྭཱ་ཧཱ༔ ཏྲག་རཀྴ་ཨེ་ཀ་ཙ་ཊི་དགྲ་བགེགས་འབྱུང་པོ་མཱ་ར་ཡ་ཕཊ༔ ལས་བཞིའི་སྔགས་ཤམ་བཏགས་པ་ལན་གསུམ་བཟླ་བཞིན་མེ་ལོང་གི་སྔགས་བྱང་བཀྲུས་ལ་སློབ་མར་སྦྱིན། ཐུགས་ཡེ་ཤེས་ཀྱི་དགོངས་པ་རིག་སྟོང་ཟུང་འཇུག་མཚོན་པའི་ཕྱིར་མེ་ལོང་དུ་མ་མོའི་སྐུ་འཆར་བ་བསྟན་ཏེ་ངོ་སྤྲད་པས་ཐུགས་ཀྱི་བཀའ་གཏད་པར་མོས་ཤིག །མེ་ལོང་དུ་མ་མོའི་སྐུ་འཆར་བ་བསྟན་ཏེ། ཨ༔ སྣང་ཞིང་སྲིད་པའི་ཆོས་སོ་ཅོག༔ ཐམས་ཅད་མ་མོ་མཁའ་འགྲོའི་དལ༔ དྲན་པ་རང་བྱུང་ཡེ་ཤེས་ཀྱི༔ ཡུལ་དང་དབང་པོ་གཉིས་མེད་སྦྱོར༔ མ་མོ་འབུམ་སྡེའི་སྟོང་སྲོག་ཡིན༔ ཞེས་བརྗོད་ལ་དགོངས་པ་གཏད། བདེ་སྟོང་ཡེ་ཤེས་ཆེན་པོར་གདོད་ནས་བྲལ་སྨིན་གྱི་ཡོན་ཏན་མངོན་པར་རྫོགས་པའི་དགོངས་པ་ལ་དབང་ཐོབ་པས་སྲིད་པའི་གཡུལ་ལས་རྒྱལ་བའི་བརྡར་བདག་འཛིན་རུ་ཏྲའི་དོན་སྙིང་དང༌། ཚོགས་བརྒྱད་དག་པའི་དུར་ཁྲོད་ཉུལ་བའི་ལྕགས་སྤྱང་གི་ཕྲ་ཐབས་གཏད་པས་ཡོན་ཏན་གྱི་བཀའ་གཏད་པར་མོས་ཤིག །ཕྱག་མཚན་གཉིས་གཏད་ལ། ཕུང་པོ་ལྔ་ལ་བདག་འཛིན་གྱི༔ རུ་ཏྲའི་དོན་སྙིང་ཟ་བ་དང༔ ལྷན་ཅིག་ཚོགས་བརྒྱད་ཚར་གཅོད་པའི༔ ལྕགས་སྤྱང་ཕྲ་ཐབས་ཁྱོད་ཀྱིས་ཟུངས༔ རྩ་སྔགས་མཐར། གུ་ཎ་ཨ་བྷི་ཥིཉྩ་ཧཱུྃ༔ དབྱིངས་རིག་གཉིས་མེད་རང་བྱུང་ཐུགས་རྗེ་ཀུན་ཏུ་ཁྱབ་པས་ཚར་གཅོད་རྗེས་འཛིན་གྱི་ཕྲིན་ལས་བཞི་མཐར་ཕྱིན་པས་བྱང་ཆུབ་ཀྱི་སྤྱོད་པ་ཡོངས་སུ་རྫོགས་པས་ཞི་བའི་མཐའ་ལས་འདས་པའི་ཕྲིན་ལས་ཀྱི་བཀའ་གཏད་པར་མོས་ཤིག །ནལ་བུའི་ཐོད་པར་དུག་ཁྲག་གིས་སྦགས་པའི་ཐུན་རྫས་གཏད་ལ། ཧཱུྃ༔ མ་ནི་སྙིང་པོ་བྱང་ཆུབ་སེམས༔ མོ་ནི་རང་བྱུང་ཡེ་ཤེས་དཔལ༔ གང་ནས་བོས་ཀྱང་ཁྱོད་ཀྱི་མཚན༔ འདོད་ཁམས་བདག་མོས་ཕྲིན་ལས་ཀུན༔ ཐོགས་པ་མེད་པར་སྒྲུབ་པར་ཤོག༔ ཏྲག་རཀྴ་ཨེ་ཀ་ཙ་ཊི་སརྦ་ཤཱིནྟཾཀུ་རུ་སྭཱ་ཧཱ༔ ཏྲག་རཀྴ་ཨེ་ཀ་ཙ་ཊི་སརྦ་པུཥྚིཾ་ཀུ་རུ་སྭཱ་ཧཱ༔ ཏྲག་རཀྴ་ཨེ་ཀ་ཙ་ཊི་སརྦ་ཝཱ་ཤཾ་ཀུ་རུ་སྭཱ་ཧཱ༔ ཏྲག་རཀྴ་ཨེ་ཀ་ཙ་ཊི་དགྲ་བགེགས་འབྱུང་པོ་མཱ་ར་ཡ་ཕཊ༔ ཞེས་ལས་བཞིའི་ཤམ་ཅན་བཟླ། དཔལ་ཡེ་ཤེས་ཀྱི་མ་མོ་སྔགས་སྲུང་རྡོ་རྗེ་རག་གདོང་མ་འཁོར་དང་བཅས་པས་བརྒྱུད་གསུམ་རིག་འཛིན་བླ་མས་རྡོ་རྗེའི་ཐ་ཚིག་ཇི་ལྟར་བསྒོས་པ་བཞིན་རྡོ་རྗེའི་སློབ་མ་འདིའི་ཕྲིན་ལས་རྣམ་པ་བཞི་ཇི་ལྟར་འདོད་པ་བཞིན་མཛོད་ཅིག །ཅེས་དམ་ཚིག་གི་དམོད་པ་བརྡར། དེ་ལྟར་ན་ཁྱེད་རང་གི་སྒོ་གསུམ་བྱ་བྱེད་དང་བཅས་པ་ཡེ་ཤེས་དབྱིངས་ཀྱི་རྒྱལ་མོའི་སྐུ་གསུང་ཐུགས་ཡོན་ཏན་ཕྲིན་ལས་དང་དབྱེར་མེད་དུ་བྱིན་གྱིས་བརླབས་པས་ཡེ་ཤེས་ཀྱི་མ་མོ་དང་ཐབས་མཆོག་རྡོ་རྗེ་སྲིན་པོ་དཔལ་ཆེན་ཧེ་རུ་ཀ་རྗེས་སུ་ཆགས་པའི་སྦྱོར་བས་སྙོམ་པར་ཞུགས་པའི་བྱང་ཆུབ་ཀྱི་སེམས་བདུད་རྩི་ལྕེ་ལ་བྱིན་པ་རོལ་པས་ལུས་གནས་ཐམས་ཅད་ལ་ཁྱབ། འཁྲུལ་རྟོག་དབྱིངས་སུ་ནུབ་པས་བདེ་སྟོང་མི་ཤིགས་པའི་དགོངས་ཀློང་མངོན་སུམ་དུ་སད་ནས་ཡིད་ཆོས་འཁྲུལ་པའི་རྟོག་པ་ཀ་དག་སྟོང་དབྱིངས་ཉིད་དུ་ཐིམ་པའི་མོས་པ་མཛོད། གསང་རྫས་བདུད་རྩི་བྱིན་ལ། ཧཱུྃ༔ བྱ་བྱེད་ཡིད་ཆོས་རྣམ་དག་པའི༔ ཡབ་ཡུམ་མཉམ་པར་རོལ་པའི་སྤྲིན༔ རྒྱུ་དྲུག་རྐྱེན་བཞི་ལས་བྱུང་བའི༔ བྱང་ཆུབ་སེམས་ལ་རྟག་ཏུ་རོལ༔ ཨ་ཧོ་མ་ཧཱ་སུ་ཁ་དྷརྨ་དྷཱ་ཏུ་ཧོ༔ དེ་ནས་ངེས་དོན་སྲིད་ཞིའི་སྤྱི་དཔལ་ཆེན་པོ་ཐབས་མཆོག་རྡོ་རྗེ་སྲིན་པོ་དཔལ་ལྡན་ཡེ་ཤེས་ཀྱི་མགོན་པོ་མ་ནིང་ནག་པོའི་རྗེས་སུ་གནང་བ་སྦྱིན་པ་ལ། ཐོག་མར་སྐུ་ཡི་རྗེས་གནང་གི་སླད་དུ་རྣམ་པ་དཀར་ཕྱོགས་དགྲ་ལྷའི་དམག་དཔོན་གྱི་ཚུལ་བསྟན་པའི་ཕྱག་མཚན་ཙནྡན་གྱི་བིང་ཆེན་སྤྲུལ་པའི་དམག་དཔུང་འབུམ་གྱི་རྫོང་ཆེན་གཏད་པས་སྡེ་གསུམ་རུ་ཏྲའི་གཡུལ་ལས་རྣམ་པར་རྒྱལ་བའི་ཧེ་རུ་ཀ་དཔལ་ཆེན་པོའི་སྐུ་ཡི་རྗེས་གནང་ཐོབ་པར་མོས་ཤིག །ཙནྡན་གྱི་བིང་ཆེན་གཡས་སུ་གཏད་ལ། ཧཱུྃ༔ ལྷ་ཆེན་དཔལ་འབར་ཆེན་པོ་ཡི༔ སྤྲུལ་པའི་དམག་དཔུང་འབུམ་སྡེའི་མཛོད༔ གཡུལ་ལས་རྣམ་རྒྱལ་བིང་ཆེན་འདི༔ སྐུ་དང་གཉིས་སུ་མེད་པར་ཟུངས༔ མ་ཧཱ་ཀཱ་ལ་ཤཱ་ས་ན་ཀཱ་ཡ་བཛྲ་ཨོཾ༔ གསུང་གི་རྗེས་གནང་གི་སླད་དུ་སློབ་དཔོན་ཧེ་རུ་ཀའི་ཐུགས་སྲོག་གི་འོད་ཟེར་གྱིས་བསྐུལ་བས་དཔལ་མགོན་གྱི་ཐུགས་སྲོག་ཧཱུྃ་ལས་སྔགས་ཕྲེང་བྱུང་ཞལ་ནས་ཐོན། སློབ་མའི་ཁར་བརྒྱུད་སྙིང་གའི་ཧཱུྃ་ལ་ཐིམ་པས་གསུང་གི་རྗེས་གནང་ཐོབ་པར་མོས་ལ་སྔགས་འདིའི་རྗེས་ཟློས་མཛོད། མ་ཧཱ་ཀཱ་ལ་ཤཱ་ས་ན་ཧཱུྃ༔ ལན་གསུམ་བཟླ། ཐུགས་ཀྱི་རྗེས་གནང་གི་སླད་དུ་དཔལ་ལྡན་ཡེ་ཤེས་ཀྱི་མགོན་པོའི་ཐུགས་སྲོག་ཡེ་ཤེས་ཀྱི་ངོ་བོ་མཚོན་པའི་རུ་མཚོན་དང་སྲིད་ཞིའི་སྟོང་སྲོག་ལ་དབང་བསྒྱུར་བའི་སྙིང་ཞགས་ཕྱག་གཡས་གཡོན་དུ་གཏད་པས་འཁོར་འདས་ཐམས་ཅད་ཀྱི་སྟོང་སྲོག་ལ་དབང་ཐོབ་པར་མོས་ཤིག །རུ་མཚོན་དང་སྙིང་ཞགས་གཏད་ལ། ཧཱུྃ༔ ཀུན་ཏུ་བཟང་པོའི་རོལ་པ་ལས༔ བྱང་ཆུབ་སེམས་ཀྱི་རུ་མཚོན་ནི༔ བདག་འཛིན་རུ་ཏྲའི་གཤེད་པོ་སྟེ༔ ཐུགས་ཀྱི་རྟེན་དུ་གཅེས་པར་ཟུངས༔ རྩ་སྔགས་མཐར། ཙིཏྟ་བཛྲ་ཧཱུྃ༔ དེ་ནས་སྒྲོལ་གིང་བཀའ་ཡི་ལས་བྱེད་སྡེ་བརྒྱད་དྲེགས་པའི་ཚོགས་རྗེ་སྐྱེས་མཆོག་བཛྲ་སཱ་དྷུའི་སྐུ་རྟེན་ཕ་ཝཾ་ལོང་བུ། གསུང་རྟེན་གསེར་གྱི་སྔགས་བྱང༌། ཐུགས་རྟེན་རྡོ་རྗེ་དང་ཙིཏྟ་གཏད་པས་ལས་ཀྱི་ཤན་པ་ཆེན་པོའི་སྐུ་གསུང་ཐུགས་ཀྱི་བཀའ་གཏད་ཐོབ་པར་མོས་ཤིག །ཕ་ཝཾ་ལོང་བུ། གསེར་གྱི་སྔགས་བྱང༌། རྡོ་རྗེ་དང་ཙིཏྟ་གཏད་དེ། ཧཱུྃ༔ ཕ་ཝཾ་ལོང་བུ་སྐུ་ཡི་རྟེན༔ སྔགས་བྱང་གསུང་ལ་རྡོ་རྗེ་ཐུགས༔ དམ་ཉམས་བསྒྲལ་བའི་དཔའ་རྟགས་སྙིང༔ གཏད་པས་དམ་ཅན་འཁོར་དང་བཅས༔ ལུས་དང་གྲིབ་བཞིན་འགྲོགས་གྱུར་ཅིག༔ བཛྲ་སཱ་དྷུ་ཏྲི་ཛཿ ས་མ་ཡ་ཧཱུྃ༔ དེ་ནས་གཙོ་འཁོར་ཡོངས་རྫོགས་ཀྱི་བཀའ་གཏད་པ་ལ། གཏོར་མ་འདི་དག་དཔལ་ཡེ་ཤེས་ཀྱི་མ་མོ་སྔགས་ཀྱི་སྲུང་མ། འཁོར་སྐུ་གསུང་ཐུགས་ལས་སྤྲུལ་པའི་མ་མོ་གསུམ། ཡེ་ཤེས་ཀྱི་མ་མོ་ལྔ། རྗེ་མོ་བཅུ་བཞི། དམན་མོ་ལྔ་ཅུ་རྩ་བརྒྱད་སོགས་སྣང་སྲིད་མ་མོའི་འཁོར་ཚོགས་བསམ་གྱིས་མི་ཁྱབ་པས་བསྐོར་བ། གཡས་སུ་སྦྱོར་གིང་དཔལ་མགོན་མ་ནིང་ནག་པོ་སྤྲུལ་པའི་མགོན་ཆེན་སྡེ་ལྔ། དཔལ་མགོན་བདུན་ཅུའི་དམག་ཚོགས་དང་བཅས་པ། གཡོན་དུ་སྒྲོལ་བའི་གིང་ཆེན་སྐྱེས་མཆོག་རྡོ་རྗེ་ལེགས་པ་ཐེའུ་རང་སྟོང་སྡེ་དང་བཅས་པ། རྒྱབ་ཏུ་གསང་བའི་སྒྲོལ་གིང་གཟའ་བདུད་སྲོག་གི་སྤུ་གྲི་གཟའ་བརྒྱད་གདོང་མོ་བཞི་དང་བཅས་པ། མདུན་དུ་སྦས་པའི་དཀོར་སྲུང་དུར་ཁྲོད་ལྷ་མོ་མིང་སྲིང་བརྒྱད་དང་བཅས་པ་མདོར་ན་སྲིད་པ་མ་མོའི་དཀྱིལ་འཁོར་དུ་དམ་ཚིག་དང་ཐུགས་རྗེས་འཁོད་པའི་སྔགས་སྲུང་དྲེགས་པའི་ཚོགས་དང་བཅས་པར་གསལ་བའི་སྟེང་གི་ཆ་ལ་རྩ་བརྒྱུད་ཀྱི་བླ་མ་སངས་རྒྱས་བྱང་སེམས་ཡི་དམ་དཀྱིལ་འཁོར་གྱི་ལྷ་ཚོགས་དང་བཅས་པ་སྤྲིན་བཞིན་དུ་གཏིབས་པ་ལ་སློབ་དཔོན་སྤྱི་དཔལ་ཆེན་པོའི་ང་རྒྱལ་གྱིས་བཀའ་བསྒོས་ཏེ་ཕྲིན་ལས་བཅོལ་བར་མོས་ཤིག བྷྱོ༔ སུམ་ཅུ་རྩ་གསུམ་ལྷ་ཡུལ་ན་ཞེས་སོགས་མཐར། དཔལ་ཡེ་ཤེས་ཀྱི་མ་མོ་སྔགས་སྲུང་ཁྲོས་པའི་རྒྱལ་མོ། དཔལ་མགོན་མ་ནིང་ནག་པོ། དམ་ཅན་རྡོ་རྗེ་ལེགས་པ། དྲང་སྲོང་གཟའ་བདུད་ཆེན་པོ། དཀོར་སྲུང་དུར་ཁྲོད་ཀྱི་ལྷ་མོ་རྣམས་སོ་སོའི་འཁོར་གཡོག་ཕོ་ཉ་ལས་མཁན་དང་བཅས་པ་རྣམས་ཀྱིས་ཆོས་སྐུ་ཀུན་ཏུ་བཟང་པོ། ལོངས་སྐུ་རྡོ་རྗེ་སེམས་དཔའ། སྤྲུལ་སྐུ་དགའ་རབ་རྡོ་རྗེ། སློབ་དཔོན་འཇམ་དཔལ་བཤེས་གཉེན། རིག་འཛིན་ཤྲཱི་སིང་ཧ། མཁས་པ་ཛྙཱ་ན་སཱུ་ཏྲ། པཎ་ཆེན་བི་མ་མི་ཏྲ། སློབ་དཔོན་པདྨ་ཐོད་ཕྲེང༌། མཁའ་འགྲོ་ཡེ་ཤེས་མཚོ་རྒྱལ། ལོ་ཆེན་བཻ་རོ་ཙཱ་ན། མངའ་བདག་ཁྲི་སྲོང་ལྡེའུ་བཙན། ཀུན་མཁྱེན་ཀློང་ཆེན་རབ་འབྱམས། རིག་འཛིན་འཇིགས་མེད་གླིང་པ། འཇིགས་མེད་ཕྲིན་ལས་འོད་ཟེར། འཇིགས་མེད་རྒྱལ་བའི་མྱུ་གུ། འཇམ་མགོན་རྡོ་རྗེ་གཟི་བརྗིད། མཁན་ཆེན་དཀོན་མཆོག་གྲགས་པ། འགྲོ་འདུལ་དཔའ་བོ་རྡོ་རྗེ། ཁྱབ་བདག་པདྨ་ཡེ་ཤེས་རྡོ་རྗེའི་བར་དུ་བྱོན་པའི་བརྒྱུད་གསུམ་རིག་འཛིན་བླ་མ་རྣམས་ཀྱི་བཀའ་དང་དམ་ལས་མ་འདའ་བར་རྡོ་རྗེའི་སློབ་མ་འདི་རྣམས་ལ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྒོ་ནས་དབང་དང་དངོས་གྲུབ་སྩོལ་བ་དང༌། སངས་རྒྱས་ཀྱི་བསྟན་པ་སྲུང་བ་ལ་ནུས་མཐུ་དང་ལྡན་པར་མཛད་དུ་གསོལ། སློབ་མ་རྣམས་ཀྱི་སྲུང་མ་ཆེན་པོ་མཛད་ནས། ལུས་དང་གྲིབ་མ་བཞིན་དུ་འགྲོགས་ཏེ། འགལ་རྐྱེན་སོལ། མཐུན་རྐྱེན་སྒྲུབས། མཐུ་དང་དཔུང་བསྐྱེད། བསམ་པ་སྒྲུབས། རེ་བ་སྐོངས། ཡིད་ལ་བསམ་པའི་དོན་ཐམས་ཅད་བདེ་བླག་ཏུ་སྒྲུབས། མཐར་ཐུག་ཕྱག་རྒྱ་ཆེན་པོ་མཆོག་གི་དངོས་གྲུབ་ལ་ཡང་དག་པར་སྦྱོར་ཅིག །ཅེས་གསོལ་བས་གཏོར་མའི་ལྷ་ཚོགས་ལས་ལྕམ་དྲལ་གཉིས་འོད་དུ་ཞུ་ནས་སློབ་མ་ལ་ཐིམ། རང་རྒྱུད་ཅན་དུ་སྟོན་པ་རྣམས་ལུས་དང་གྲིབ་མ་བཞིན་དུ་འགྲོགས་པའི་དམ་ཚིག་ནོས་པར་བསམ་ལ། གཏོར་མའི་ཕུད་ཅུང་ཟད་དངོས་གྲུབ་ཀྱི་ཚུལ་དུ་བྱིན། ནང་མཆོད་ཀྱི་བདུད་རྩི་བྱིན་ནས་དམ་ཚིག་གཅིག་ཏུ་འདྲེས་པར་བསམ་ལ། གདོད་མའི་མགོན་པོ་ཡབ་ཡུམ་ཀྱང༔ ཁྱོད་ལས་གཞན་དུ་མེད་པའི་ཕྱིར༔ རྟག་ཏུ་རྫོགས་པ་ཆེན་པོ་སྒོམ༔ གཏོར་ཚོགས་མཆོད་པ་རྒྱུན་མི་གཅོད༔ ལྕམ་དྲལ་སྒྲུབ་པའི་དམ་ཚིག་ཀུན༔ དེང་ནས་ཚུལ་བཞིན་གཟུང་བར་གྱིས༔ ལན་གསུམ་རྗེས་ཟློས་བྱ། དེ་ལྟ་བུའི་ཐུན་མོང་མ་ཡིན་པའི་བཀའ་གཏད་ཆིག་བརྒྱུད་ཅན་ལེགས་པར་ཐོབ་པས་སྲུང་མ་རྣམས་རྟག་ཏུ་མི་འབྲལ་བར་འགྲོགས་པ་ཆོས་ཉིད་ཡིན་པས། ཁྱེད་རྣམས་ཀྱིས་ཀྱང་དམ་ཚིག་རྣམ་པར་དག་པར་བསྲུང་དགོས་ཏེ། སྤྱིར་མཆོད་གཏོར་གསོལ་བསྐང་མ་ཆག་པར་བརྩོན་པ་དང༌། ལྕམ་དྲལ་རྒྱུ་བའི་དུས་གཉན་ལ་ཕུད་སྐོང་དང་བཤགས་ཕྲིན་ནན་ཏན་དུ་བྱ་བ་དང༌། སྣོད་དུ་མ་གྱུར་པ་རྣམས་ལ་ལྷ་སྔགས་དམ་རྫས་རྣམས་སྦ་བ་དང༌། བྱ་ནག་དང་ཁྱི་ནག་བོང་དྲེལ་ལ་མི་རྡེག་པ་དང༌། མགར་ཡུགས་ཀྱི་གྲིབ་ལ་འཛེམ་བག་བྱ། ཤ་རྐྱང་ལ་རྔོན་དང་ཀུ་ཅོ་བྱ་བ་དང༌། བྱ་ནག་རྨ་བྱ་བསྐྲད་པ་དང་ཁྱོ་ཤུག་དབྲལ་བ་དང༌། བྱི་ནལ་ལ་ཁྲོས་པ། ཐབ་གཞོབ་ཤོར་བ་དང༌། རྡོ་རྗེ་ཐེག་པ་སྤྱི་དང་ཁྱད་པར་གྱི་དམ་ཚིག་རྣམས་སྲུང་སྙམ་པས་དམ་ཚིག་ཁས་བླང་བ་འདིའི་རྗེས་ཟློས་མཛོད། གཙོ་བོས་ཇི་ལྟར་བཀའ་བསྩལ་སོགས་དང༌། གཏང་རག་ལུས་འབུལ་དགེ་བསྔོ་བྱས་ལ་སློབ་མ་རྣམས་གྲོལ། སློབ་དཔོན་གྱིས་ཕུད་སྐོང་ཚོགས་དང་མངའ་གསོལ་སོགས་རྒྱས་པར་བྱས་ལ་ཕྲིན་ལས་ཀྱི་གཉེར་གཏད་པ་རྣམས་བྱའོ། །ཡང་ཐུན་མོང་གི་སློབ་མ་ལ་གཏོར་མའི་བཀའ་གཏད་ཙམ་བྱེད་ན། ལོ་རྒྱུས་ནས་བརྩམས་ཡེ་ཤེས་དབབ་པ་ཡན་སོང་ནས། གཙོ་འཁོར་ཡོངས་རྫོགས་གཏོར་མའི་བཀའ་གཏད་ཙམ་བྱས་ནས། དཔལ་ལྡན་མ་མགོན་ལྕམ་དྲལ་འཁོར་དང་བཅས་པ་རྣམས་ཀྱིས་སྒྲུབ་པ་པོའི་སྡོང་གྲོགས་མཛད་པར་ཞལ་གྱིས་བཞེས་པར་མོས་ཤིག །ཅེས་བརྗོད་ལ་བདུད་རྩི་མི་སྦྱིན་པར་དམ་ཚིག་ཁས་བླང་ནས་མཐར་དབྱུང་བས་གསང་བ་གཞན་དང་སྒོ་བསྟུན་ན་རུང་ངམ་སྙམ་པ་ནི་ཁོ་བོའི་རྣམ་རྟོག་གོ །ཕྲིན་ལས་རྩ་བ་བཀའ་གཉན་སྲུང་མའི་ཟིལ། །འཇིགས་ཀྱང་སྣང་བ་ཧོལ་རྒྱུག་སློབ་དཔོན་གྱི། །འགལ་འཁྲུལ་ནོངས་པ་བསལ་ཕྱིར་མངྒ་ལ། །བདུད་འདུལ་དྲག་པོ་རྩལ་གྱིས་སུག་ལས་སོ། །སྙིང་ཐིག་གཉན་པོའི་བཀའ་སྲུང་ལྕམ་དྲལ་གྱི་བཀའ་གཏད་ཆིག་བརྒྱུད་ཀྱི་ལེའུ་ཚན་བཅུ་གཉིས་པ་སྟེ་སྔགས་བན་རྒན་པོས་སྦྱར་བའོ། ༈ བདེ་སྟོང་སྒྱུ་མ་ཆེན་པོའི་ལང་ཚོའི་དཔྱིད། །སྲིད་ཞིའི་མཚར་སྡུག་རྫོགས་པའི་རི་དྭགས་འཛིན། །འདོད་དགུའི་ཕྲིན་ལས་བདུད་རྩིའི་ཟེར་འཛག་པས། །སྒྲུབ་མཆོག་རྗེས་སྐྱོང་དཔའ་མོ་དེས་སྐྱོངས་ཤིག །རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཐུན་མོང་མ་ཡིན་པའི་བཀའ་སྲུང་སྨན་བཙུན་ཆེན་མོ་ཚེ་རིང་མཆེད་ལྔའི་སྲོག་དབང་སྦྱིན་པར་འདོད་པས། གྲོང་ཡུལ་མ་ཡིན་པ་གཙང་མ་དགེ་བའི་གནས་ཁང་བྱི་དོར་རྒྱན་གྱིས་སྤྲས་པའི་གུང་དུ་གཞུང་མཐུན་སྐུ་ཡི་མདུན་སྟེགས་མཐོ་བར་རྡུལ་ཚོན་ནམ་རས་བྲིས་ཀྱི་པདྨ་འདབ་བཞིའམ། དར་རས་ཀྱིས་གཡོགས་པའི་དབུས་སུ་འབྲུ་དཀར་གྱི་ཚོམ་བུ་གཙོ་འཁོར་ལྔ་བཀོད་པའི་དབུས་སུ་མཉྫིའི་སྟེང་རིགས་འདུས་ཀྱི་གཏོར་མ་དར་གདུགས་ཙཀླིས་བརྒྱན་པའི་མདུན་དུ་སྨན་བཙུན་མའི་གཏོར་མ་བུམ་པས་བཏེགས་པའི་འབྲང་རྒྱས་གཙོ་འཁོར་ལྔ་ལ་ཚེ་རིང་མཆེད་ལྔའི་སྐུ་ཙཀ་སོ་སོ་དང༌། རྨ་བྱའི་སྒྲོ་མདོངས་དང༌། རང་མདོག་གི་དར་སྣས་བརྒྱན་པའི་སྡེར་ཁ་སོ་སོར་དབུས་དང་ཕྱོགས་བཞིར་བཀོད། མདའ་དར་ཁ་དོག་ལྔ་དུང་དཀར་མེ་ལོང་གིས་བརྒྱན་པ་དང༌། འབྱོར་ན་བླ་རྡོ། མུ་ཏིག མུ་མེན། གསེར་ཐིག པད་རཱག །གཡུ་གོང་སྐྱོན་མེད་ཀྱི་བླ་རྡོའང་མདའ་དར་སོ་སོར་གདགས། མཆོད་གཏོར་བཟང་པོ་ཁ་ཟས་སྣ་ཚོགས་དང་ཤིང་ཏོག་གིས་བསྐོར་བ་དང༌། གཡས་གཡོན་དུ་སྨན་རཀ །མཐའ་སྐོར་དུ་ཉེར་སྤྱོད། གཞན་ཡང་ཕྱེ་མར། རྒྱ་ཕོར་དང་དངུལ་ཕོར་དུ་གསེར་སྐྱེམས་དང་གཡུ་སྐྱེམས། དཀར་གསུམ། འོ་ཆོལ། སྨན་སྣ་སྤྱན་གཟིགས་དཀོར་ཆ་མཐུན་རྫས་རྒྱས་པར་འདུ་བྱས་ན་སློབ་བུའི་ལོངས་སྤྱོད་ཀྱི་རྟེན་འབྲེལ་ཡིན་པར་གསུངས། ཆོ་ག་དངོས་ལ་བདག་བསྐྱེད་རིག་འཛིན་འདུས་པའི་ལས་གཞུང་བསྲང་ལ་བཟླས་པ་བསྡུ་ལྡང་བཅས་བྱ། རྃ་ཡྃ་ཁྃ། སྟོང་པའི་ངང་ལས་གནས་ཁང་ཐར་པ་ཆེན་པོའི་གཞལ་མེད་ཕུན་སུམ་ཚོགས་པར་ཨ་ལས་བྷཉྫ་འབར་བའི་སྣོད་བཟང་ཞིང་རྒྱ་ཆེ་བ་རྣམས་སུ་ཧཱུྃ་ཡིག་ལས་བྱུང་བའི་མཆོད་ཡོན། ཞབས་བསིལ། མེ་ཏོག བདུག་སྤོས། མར་མེ། དྲི་ཆབ། ཞལ་ཟས། རོལ་མོ་ལ་སོགས་པ་མཆོད་པའི་དངོས་པོ་རྣམས་འདོད་ཡོན་གྱི་རྣམ་པ་མ་ཚང་བ་མེད་པ་འཕགས་པ་ཀུན་ཏུ་བཟང་པོའི་མཆོད་པའི་སྤྲིན་གྱི་ཕུང་པོ་ལྟ་བུས་ནམ་མཁའི་མཐའ་ཀླས་པ་གང་བར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ་ནས། ཤབྡའི་བར་གྱིས་བྱིན་གྱིས་བརླབ། ཨོཾ་ཨཱཿཧཱུྃ། ན་མཿསརྦ་ཏ་ཐཱ་ག་ཏ་སོགས་ནམ་མཁའ་མཛོད་སྔགས་ལན་གསུམ་དང༌། རྃ་ཡྃ་ཁྃ། སྟོང་པའི་ངང་ལས་ཡྃ་ལས་རླུང༌། རྃ་ལས་མེ། ཀཾ་ལས་མི་མགོའི་སྒྱེད་པུ་གསུམ་ལ་བརྟེན་པའི་ཨ་ཡིག་ལས་བྱུང་བའི་ཐོད་པའི་སྣོད་དུ་བཅུད་ཐམས་ཅད་ཧཱུྃ་ཨོཾ་སྭཱ་ཨཱཾ་ཧཱ་མཱུཾ་ལཱཾ་མཱཾ་པཱཾ་ཏཱཾ་ལས་བདུད་རྩི་ལྔ་དང་སྒྲོན་མ་ལྔར་གྱུར་པ་སོ་སོའི་ས་བོན་གྱིས་མཚན་པ་དང་བཅས་པའི་འོག་གི་རླུང་གཡོས་མེ་སྦར་རྫས་ཐམས་ཅད་ཞུ་ཞིང་འདྲེས་པའི་སྟེང་གི་ནམ་མཁའ་ལ་ཨོཾ་ཨཱཿཧཱུྃ་གི་ཡི་གེ་གསུམ་གནས་པ་ལས་འཕྲོས་པའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བཀུག་ཡི་གེ་གསུམ་ལ་ཐིམ་སྟེ་རིམ་པར་ཞུ་བ་ལས་དམ་ཚིག་གི་རྫས་དང་རོ་གཅིག་ཏུ་གྱུར། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋ། ཨོཾ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྜལ་ཧཱུྃ་ཧྲཱིཿཋ། ཨོཾ་ཨཱཿཧཱུྃ་མ་ཧཱ་བ་ལིཾ་ཏ་ཏེ་ཛོ་བ་ལིཾ་ཏ་བ་ལ་བ་ཏེ་གུ་ཧྲ་ས་མ་ཡ་ཧཱུྃ་ཧྲཱིཿཋ། སྨན་གཏོར་རཀྟའི་སྔགས་སོ་སོར་ལན་གསུམ་རེ་བརྗོད་ནས། ཀྱཻ༔ རང་སྣང་འོད་གསལ་སྤྲུལ་སོགས་ནས། བདག་བསྟོད་དོ༔ བཟླས་པ་ནི། མདུན་བསྐྱེད་ཐུགས་ཀར་ཟླ་བའི་སྟེང༔ བཾ་ཡིག་སྲོག་གི་སྔགས་ཀྱིས་མཚན༔ བདག་ཉིད་རྡོ་རྗེ་ཁྲག་འཐུང་གི༔ ཐུགས་སྲོག་འབར་བའི་འོད་ཟེར་གྱིས༔ རབ་ཏུ་བསྐུལ་ཞིང་དྲྭ་བས་བཅིངས༔ ཆགས་དང་སྡང་བའི་སྟོབས་བསྐྱེད་པས༔ མ་མོ་འཁོར་བཅས་དམ་ལ་གཟིར༔ གང་འདོད་ལས་ཀུན་སྒྲུབ་པར་བསམ༔ གོང་ནོན་རུ་ལུ་ཅུང་ཟད་བཟླ་བ་སྔོན་དུ་འགྲོ་བས། བཾ་ཧ་རི་ནི་ས་བཛྲ་པྲ་མོ་ཧ་ཙིཏྟ་ཧྲཱིཾ་ཧྲཱིཾ་ཛཿཛཿ ཞེས་ཇི་ལྟར་འོས་པ་བཟླས་མཐར། ཚོགས་མཆོད་ཕན་བདེའི་རྣ་ཆ་བཞིན་བསྐང་བཤགས་ཀྱི་བར་རྒྱས་པར་བྱས་ལ། སྣོད་ལྡན་གྱི་སློབ་མ་ཁྲུས་ནས་དབྱུང༌། བགེགས་བསྐྲད་སྲུང་འཁོར་བཅས་གྲུབ་རྗེས། ལོ་རྒྱུས་མཚམས་སྦྱོར། འདིར་སངས་རྒྱས་ཀྱི་བསྟན་པ་གཉན་པོ་སྲུང་ཞིང༌། དེ་འཛིན་གྱི་སྡོང་གྲོགས་མཛད་པའི་ཕྱིར། འོག་མིན་གསང་བ་ཆེན་པོ་ན་དབྱིངས་ཀྱི་ཡུམ་ཆེན་མོ། རང་བཞིན་སྤྲུལ་པའི་ཞིང་ཁམས་ན་གཙོ་དང་འཁོར་གྱི་རྣམ་པར་བསྟན་པ་མཁའ་འགྲོ་མ་ཨེ་ཀ་ཙ་ཊི་སྤུན་དྲུག་དང༌། དེའི་བྲན་མོ་བཅུ་བཞི། གཡོག་མོ་ལྔ་བཅུ་རྩ་བརྒྱད། ཡང་གཡོག་འབུམ་ཁྲི་བདུན་སྟོང་ལ་སོགས་པ། འཇིག་རྟེན་གྱི་ཁམས་སུ་རྟེན་འབྲེལ་བཅུ་གཉིས་གནས་སུ་དག་པའི་བརྡ་ལས་དམ་ཅན་བརྟན་མ་བཅུ་གཉིས་སུ་བཞེངས་པ་ནི། སྔོན་གྱི་ཚེ་དུར་ཁྲོད་ཆེན་པོ་བསིལ་བའི་ཚལ་དུ་མཁའ་འགྲོ་མ་སེང་གེའི་གདོང་ཅན་གྱི་སྤྱན་སྔར་དབང་ནོད་དེ་བསྟན་པ་སྲུང་བར་བསྒོས། བོད་དུ་བསྟན་པ་སྔ་དར་གྱི་ཚེ་སློབ་དཔོན་ཆེན་པོ་པདྨའི་ཞབས་ལ་བལ་བོད་ཀྱི་མཚམས་ཁ་ལ་རོང་སྒོར་མཐོ་བརྩམས་པས་ཕྱག་རྒྱ་གཉན་པོའི་ཟིལ་འོག་ཏུ་སྤ་བཀོང་པར་མཛད་ནས་གངས་ཅན་བོད་ཀྱི་ཡུལ་ལྷར་མངའ་གསོལ། གསང་ཆེན་རྒྱ་མཚོའི་བསྟན་པ་སྐྱོང་བར་རྩིས་སུ་ཕབ་པའི་ནང་ཚན་ལས། འདིར་ཞིང་སྐྱོང་མཁའ་འགྲོའི་དབང་མོ་ཚེ་རིང་མཆེད་ལྔར་གྲགས་པ་ནི། ནང་དུ་རྣལ་འབྱོར་སྒྲུབ་པ་པོ་ལ་སྙིང་ཉེ་ལ་བཀྲ་ཤིས། འཆི་མེད་ཀྱི་བཅུད་ལེན་སྟེར་བས་ཚེ་རིང༌། རྣམ་བཞིའི་ཕྲིན་ལས་ལ་མངའ་མཛད་པས་ཅི་བཅོལ་གྱི་ལས་རྣོ་ལ་མྱུར། ཕྱི་ལྟར་དུ་སྣོད་བཅུད་ཀུན་ལ་དབང་བསྒྱུར་བས་ཚན་ཆེ། མདོར་ན་བསམ་དོན་གྱི་རེ་བ་སྐོང་བ་ལ་ཡིད་བཞིན་གྱི་ནོར་བུ་གཅིག་ཏུ་ལྷུན་གྱིས་གྲུབ་པའི་སྲུང་མ་ཁྱད་པར་ཅན་འདི་ནི་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྡེ་ལས་ཕེབས་པ་ཡིན་ལ། དེ་ཡང་འདི་ཉིད་ཤིན་ཏུ་བཀའ་གཉན་ཞིང་ཁྱབ་གདལ་དུ་སྟེར་བྱ་མ་ཡིན་པས་ཆོས་སྡེ་བྱིངས་གཏན་ལ་ཕེབས་ནས་ཀྱང་བགྲང་བྱའི་འཁོར་ལོ་བཅུ་ཕྲག་ཙམ་དུ་བཀའ་རྒྱ་མ་ཁྲོལ། ཁྲིད་ཡིག་ཆེན་མོ་གཏན་ལ་ཕེབས་པ་ཙམ་ན་འོད་གསལ་གྱི་དབྱིངས་ནས་སྒྱུ་མ་སྤྲུལ་པའི་སྐྱེད་མོའི་ཚལ་མཆོག་ཏུ་ཉམས་དགའ་བར། ཟངས་གཞོང་གི་རྣམ་པར་བརྟེན་པའི་རྫིང་བུ་དྭངས་གསལ་གྱི་ཆུས་མེར་གྱིས་ཁེངས་པའི་ནང་ན། ལྷ་མོའི་སྲོག་གི་ཁམས་བྱང་སེམས་དཀར་དམར་གྱི་གོང་བུ་འདར་བ་དང་འཕྲིགས་པའི་རྣམ་འགྱུར་ཅན་གཉིས་ཀུན་ཏུ་རྒྱུ་བ་ཞིག་རྨ་བྱ་གཞོན་ནུ་སྐྱེས་བུའི་ལུས་ཚད་ཙམ་པ་ལྔར་གྱུར་ནས་གཙུག་ཕུད་ནམ་མཁའ་ལ་གཡེངས་པའི་ཟློས་གར་རྩེས། སླར་ཡང་དེ་ཡོངས་སུ་གྱུར་པ་ལས་སྨན་བཙུན་མཆེད་ལྔའི་སྣང་ཆར་བསྟན་ནས་ཧི་ཧིའི་བཞད་སྒྲ་ཆེན་པོ་དང་བཅས་ལྐོག་གྱུར་གྱི་རྣམ་པ་རྡོ་རྗེའི་གླུ་བླངས། དངོས་སུ་གཟུགས་མེད་པའི་སྒྲ་སྒྲོག་པ་དང་ཕྱི་ནང་གསང་གསུམ་གྱི་བླ་རྡོའི་རྣམ་པར་རང་དབང་དུ་གྱུར་པའི་རྟེན་འབྲེལ་ཟབ་མོས་གོ་ཕྱེ་ནས་ལྷ་མོའི་སྟོང་སྲོག་མཁའ་འགྲོ་སྙི་ལ་ཟིན་པ་ལྟ་བུ་སྦྱིན་པ་སྐབས་སུ་བབ་པ་ཡིན་པས། སློབ་དཔོན་གྱི་བྱ་བ་སྔོན་དུ་སོང༌། སློབ་མའི་བྱ་བ་མཎྜལ་ཕུལ། བླ་མ་སྣང་སྲིད་ཟིལ་གནོན་མ་ཧཱ་གུ་རུ་དངོས་སུ་གསལ་བར་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། བདེ་གཤེགས་དཔལ་གྱི་བཀའ་སྡོད་ཆེ༔ མཐུ་ལྡན་ཞིང་སྐྱོང་མཁའ་འགྲོ་མའི༔ སྲོག་དབང་བདག་ལ་བསྩལ་དུ་གསོལ༔ སློབ་དཔོན་གྱི་བཀའ་གཉན་པའི་ཐ་ཚིག་བསྒྲགས་པ་ནི། འདི་ནི་ཤིན་ཏུ་བཀའ་གཉན་པས༔ སྲོག་དང་དམ་ཚིག་བསྲེ་ནུས་སམ༔ རྟག་ཏུ་གསོལ་ཀར་བརྩོན་ནུས་སམ༔ སློབ་མས་དམ་ལས་མི་འདའ་བར་ཁས་ལེན་པ་འདིའི་རྗེས་ཟློས་མཛོད། དམ་ཚིག་གཉན་པོ་གང་ཡིན་པ༔ ནམ་ཡང་བཏང་བར་མི་བགྱིད་དོ༔ དེ་ལྟར་ན་མཐུ་ལྡན་སྲུང་མའི་དབང་པོ་དང་སྲོག་སྙིང་གཅིག་ཏུ་བསྲེ་བའི་ཕྱིར། སྲུང་མའི་ཕུད་སྐྱེམས་ནས་སློབ་མའི་ཁར་བྱིན་ལ། མ་མོ་ཁྱོད་ལ་གཏད་པར་བྱ༔ ད་ལྟ་རྗེ་མོའི་ཚུལ་དུ་སྒྲུབ༔ རྟག་ཏུ་གྲོགས་ཀྱི་དམ་ཚིག་སྲུངས༔ ནམ་ཞིག་བྲན་དུ་ཁོལ་གྱུར་ཅིག༔ ས་མ་ཡ༔ བཛྲརཀྵནྟུ༔ ཞེས་དམ་ཚིག་གཅིག་ཏུ་བསྲེ། ཞིང་མཆོག་ཁྱད་པར་ཅན་མཆོག་གསུམ་རྩ་གསུམ་རྒྱ་མཚོ་སྤྲིན་གཏིབས་པ་ལྟར་བཞུགས་པའི་སྤྱན་སྔར་སྐྱབས་སེམས་ཚོགས་བསགས་སྡོམ་པ་བཟུང་བ་འདིའི་རྗེས་ཟློས་ལན་གསུམ་མཛོད། དཀོན་མཆོག་གསུམ་སོགས་ལན་གསུམ། དེ་ནས་སློབ་མ་རྣམས་གཉེན་པོ་སྟོབས་ཀྱི་ལྷའི་ཡེ་ཤེས་པ་དབབ་པས་དབང་གི་གཞི་འགོད་ཅིང་ཡེ་ཤེས་པ་དབབ་པ་ལ་དམིགས་པ་འདི་ལྟར་མཛོད། དེ་ཡང་གནས་ཁང་རང་བཞིན་ལྷུན་གྱིས་གྲུབ་པའི་ཞིང་ཁམས་པདྨ་འོད་ཀྱི་གཞལ་ཡས་ཁང་ཆེན་པོ་ཟག་པ་མེད་པ་ཡེ་ཤེས་ཀྱི་འབྱོར་པས་ཁྱད་པར་དུ་བྱས་པའི་སློབ་དཔོན་གུ་རུ་རིན་པོ་ཆེ་པདྨ་འབྱུང་གནས་སྐུ་མདོག་དཀར་གསལ་ཁྲོ་འཛུམ་ཆགས་པའི་ཉམས་ཅན། རྡོ་རྗེ་གདེངས་ཤིང་ཐོད་བུམ་བསྣམས་པ་སྙན་ཞུ་ཆོས་གོས་གསང་ཕོད་སོགས་རྒྱན་དང་ཆ་ལུགས་རྫོགས་པ། གཟི་བརྗིད་ཉི་མ་འབུམ་གྱི་རང་བཞིན་ལྟར་འབར་བ་ལ་མོས་གུས་དུང་དུང་བྱས་པའི་རྐྱེན་གྱིས་ཐུགས་ཀ་ནས་འོད་ཟེར་མེ་འོད་ལྟ་བུ་བྱུང༌། སློབ་མ་ལ་ཕོག །ཐ་མལ་གྱི་སྒོ་གསུམ་སྦྱངས། འོད་ཀྱི་རྣམ་པར་གྱུར། དེ་ཡོངས་སུ་གྱུར་པ་ལས་སློབ་མ་དཔལ་ཆེན་པོ་བདེ་གཤེགས་འདུས་པ་ཁྲག་འཐུང་ཡོངས་ཀྱི་རྗེ་བཙན་ཆེན་པོ་སྐུ་མདོག་སྟོན་ཀའི་ནམ་མཁའ་ལྟར་དག་པ། ཞལ་གསུམ་གཡས་དཀར་གཡོན་དམར། ཕྱག་དྲུག་གིས་གཡས་གསུམ་རྡོ་རྗེ་ཁཊྭཱཾ་མེ་དཔུང༌། གཡོན་གསུམ་ཐོད་ཁྲག་ཐོང་གཤོལ་ལྕགས་ཀྱི་སྡིག་པ་བསྣམས་པ། དཔལ་དང་དུར་ཁྲོད་རོལ་པའི་ཆས་ཀྱིས་བརྗིད་ཅིང༌། པད་ཉི་རྒྱལ་བསེན་ཕོ་མོའི་སྟེང་ན་འགྱིང་ཞིང་བསྐལ་པའི་མེ་དཔུང་འབར་བའི་ཀློང་ན་བཞུགས་པ། གནམ་ཞལ་དབྱིངས་ཀྱི་དབང་ཕྱུག་ཁཊྭཱཾ་དུང་ཁྲག་འཛིན་པ་དང་གཉིས་མེད་དུ་སྦྱོར་བའི་གཟི་བྱིན་བཟོད་པར་དཀའ་བ། རུ་ལུའི་གད་རྒྱངས་སྒྲོགས་པའི་རྣམ་པར་གྱུར་པའི་གནས་གསུམ་གྱི་འོད་ཀྱིས་བསྒོམས་པ་ལྟ་བུའི་ཡེ་ཤེས་སེམས་དཔའ་སྲིད་ཞིའི་སྤྱི་དཔལ་ཧེ་རུ་ཀའི་རྣམ་པ་ཆར་དྲག་ཏུ་བབ་པ་བཞིན་བྱོན་ནས་སྒོ་གསུམ་ལ་གཉིས་མེད་དུ་ཐིམ་པར་བསམ་ལ། སྤོས་རོལ་ཌཱ་དྲིལ་དང་བཅས་ཏེ་རུ་ལུའི་ཛཔ་ལ་ཛྙཱ་ན་ཨ་བེ་ཤ་ཡ་ཨ་ཨཿ བཏགས་པས་བྱིན་དབབ་སྟེ། ཏིཥྛ་བཛྲས་བརྟན་པར་བྱས་ལ་རབ་ཏུ་གནས། དེ་ནས་གཉན་པོ་སྟོབས་ཀྱི་ལྷའི་སྐུ་གསུང་ཐུགས་ཀྱི་བྱིན་རླབས་ཀྱི་ནུས་པའི་སྟོབས་བསྐྱེད་པ་ལ། དཔལ་གྱི་གཏོར་མ་འདི་ཉིད་ཁྲོ་བོ་ཡོངས་ཀྱི་རྗེ་བཙན་སྲིད་ཞིའི་སྤྱི་དཔལ་ཆེན་པོར་དངོས་སུ་གསལ་བ་སྤྱི་བོར་བཞག་པས་སྐུ་ཡི་གནས་ཐམས་ཅད་ནས་འོད་ཟེར་གྱི་ཕྲེང་བ་དཔག་ཏུ་མེད་པ་སྤྲོས་ཏེ་སློབ་མའི་སྒོ་གསུམ་ལ་ཐིམ་པས་སྐུ་གསུང་ཐུགས་ཡེ་ཤེས་རྡོ་རྗེའི་བྱིན་རླབས་ཞུགས་ཏེ་ཁྲག་འཐུང་ཧེ་རུ་ཀ་དང་གཉིས་སུ་མེད་པར་བྱིན་གྱིས་བརླབ་པར་མོས་ཤིག །གོང་གནོན་གྱི་དཔལ་གཏོར་སློབ་མའི་སྤྱི་བོར་བཞག་ལ། རིགས་འདུས་ཁྲག་འཐུང་དཔལ་ཆེན་པོ༔ གཉེན་པོ་སྟོབས་ཀྱི་དབང་བསྐུར་རོ༔ ཅི་བཅོལ་བཀའ་བཞིན་ཉན་པར་ཤོག༔ ལྟ་བ་གྱད་ཀྱི་དབང་བསྐུར་རོ༔ སྟོང་པའི་སྲོག་ལ་དབང་ཐོབ་ཤོག༔ རུ་ལུའི་རྩ་སྔགས་མཐར། དྷརྨ་དྷཱ་ཏུ་ཨ་བྷི་ཥིཉྩ་ཧཱུྃ༔ ཞེས་དབང་བསྐུར་བས་གཏོར་མ་ལྷར་གསལ་བ་སློབ་མར་ཐིམ་པས་འཁོར་འདས་ཀུན་གྱི་དབང་ཕྱུག་ཆེ་བཙན་འགྲན་ཟླ་མེད་པའི་དཔལ་ཧེ་རུ་ཀའི་དབང་ཐོབ་པར་མོས་ཤིག །དེ་ནས་བཀའ་སྲུང་སྨན་བཙུན་གྱི་བཀའ་གཏད་དངོས་ལ། སློབ་དཔོན་གྱི་ཐུགས་ཀའི་ཧཱུྃ་ཡིག་ལས་འོད་ཟེར་འཕྲོས། མཁའ་འགྲོ་ལྔའི་སྙིང་གར་བཾ་དང་ཧ་རི་ནི་ས་གནས་པ་ལ་རེག་པས་རྒྱུད་བསྐུལ། སློབ་མའི་བྱ་བ་སྒྲུབ་པ་ལ་མ་བུའི་འདུ་ཤེས་ཀྱིས་གདུང་བ་དྲག་པོ་སྐྱེས་པའི་མོས་པ་མཛོད། གཙོ་མོའི་གཏོར་མ་དང་ཕྱག་མཚན་མདའ་དར་ལག་ཏུ་གཏད་ལ། སྨན་བཙུན་བཀྲ་ཤིས་ཚེ་རིང་མ༔ རྡོ་རྗེ་ཀུན་ཏུ་བཟང་མོ་ནི༔ དཀར་དམར་མཛེས་པའི་ལང་ཚོ་ཅན༔ ཕྱག་གཡས་ཡིད་བཞིན་ནོར་བུ་དབང༔ གཡོན་པ་མདའ་དར་དུང་ཤོ་ཅན༔ སྲིད་གསུམ་གསལ་བའི་མེ་ལོང་འཛིན༔ དར་དཀར་ན་བཟའ་གསར་པའི་སྟེང༔ རྨ་བྱའི་སྒྲོ་ཐུལ་གཡང་ལུགས་གསོལ༔ རཏྣའི་སྲོག་ཞུ་དར་ཐོད་ཅན༔ མཛེས་སྡུག་མཉམ་པའི་སྟབས་ཀྱིས་བཞེངས༔ སྐལ་ལྡན་བུ་ལ་དབང་བསྐུར་རོ༔ ཨོཾ་བཛྲ་ར་སི་ཧཱུྃ༔ པྲ་མོ་ཧ༔ ཏིང་ཏིང་ཤག༔ ཙིཏྟ་ཨ་བྷི་ཥིཉྩཧཱུྃ༔ མདུན་གྱི་འབྲང་རྒྱས་དང་མེ་ལོང་གཏད་ལ། དཔའ་བོ་ཡོངས་ཀྱི་སྲིང་གཅིག་མ༔ རིག་འཛིན་ཡོངས་ཀྱི་སྒྲུབ་སྡེ་མོ༔ མཐིང་གི་ཞལ་བཟང་པྲའི་ལྷ་མོས༔ བུ་ལ་ཉེ་བར་མཛད་དུ་གསོལ༔ ཨོཾ་བཛྲ་ར་སི་ཧཱུྃ༔ པྲ་མོ་ཧཿ ཏིང་ཏིང་ཤག༔ ཙིཏྟ་ཨ་བྷི་ཥིཉྩཧཱུྃ༔ གཡས་ཀྱི་འབྲང་རྒྱས་དང་གཏེར་བུམ་གཏད་ལ། དཔའ་བོ་ཡོངས་ཀྱི་སྲིང་གཅིག་མ༔ རིག་འཛིན་ཡོངས་ཀྱི་སྒྲུབ་སྡེ་མོ༔ ཅོད་པཎ་མགྲིན་བཟང་ནོར་གྱི་ལྷས༔ བུ་ལ་ཉེ་བར་མཛད་དུ་གསོལ༔ ཨོཾ་བཛྲ་ར་སི་ཧཱུྃ༔ པྲ་མོ་ཧ༔ ཏིང་ཏིང་ཤག༔ ཙིཏྟ་ཨ་བྷི་ཥིཉྩཧཱུྃ༔ རྒྱབ་ཀྱི་འབྲང་རྒྱས་དང་ནོར་གཞོང་གཏད་ལ། དཔའ་བོ་ཡོངས་ཀྱི་སྲིང་གཅིག་མ༔ རིག་འཛིན་ཡོངས་ཀྱི་སྒྲུབ་སྡེ་མོ༔ མི་གཡོ་གླང་བཟང་ཟས་ཀྱི་ལྷས༔ བུ་ལ་ཉེ་བར་མཛད་དུ་གསོལ༔ ཨོཾ་བཛྲ་ར་སི་ཧཱུྃ༔ པྲ་མོ་ཧ༔ ཏིང་ཏིང་ཤག༔ ཙིཏྟ་ཨ་བྷི་ཥིཉྩཧཱུྃ༔ གཡོན་གྱི་འབྲང་རྒྱས་དང་དངུལ་ཕོར་འོ་མས་གང་བ་གཏད་ལ། དཔའ་བོ་ཡོངས་ཀྱི་སྲིང་གཅིག་མ༔ རིག་འཛིན་ཡོངས་ཀྱི་སྒྲུབ་སྡེ་མོ༔ གཏད་དཀར་འགྲོ་བཟང་ཕྱུགས་ཀྱི་ལྷས༔ བུ་ལ་ཉེ་བར་མཛད་དུ་གསོལ༔ ཨོཾ་བཛྲ་ར་སི་ཧཱུྃ༔ པྲ་མོ་ཧ༔ ཏིང་ཏིང་ཤག༔ ཙིཏྟ་ཨ་བྷི་ཥིཉྩཧཱུྃ༔ དེ་ནས་སྲོག་སྙིང་སྦྱིན་པ་ནི། སློབ་དཔོན་ལ་མོས་གུས་དུང་བ་དང་དམ་ཚིག་ལ་སྲོག་ཏུ་ལྟ་བའི་འདུ་ཤེས་ཀྱིས་རྐྱེན་བྱས་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མཁའ་འགྲོ་ལྔའི་སྙིང་གར་བཾ་དང་ཧ་རི་ནི་ས་གནས་པ་ལྕགས་ཀྱུས་དྲངས་པ་བཞིན་འུབ་ཀྱིས་བསྡུས་པས་བརྟན་པ་བྲལ་ཏེ་སྲོག་སྙིང་དམར་ནར་གྱིས་སྐྱུགས་པ་སློབ་མའི་ཞལ་དུ་ཞུགས། སྙིང་གར་ཐིམ་པས་ཅི་བཅོལ་གྱི་ལས་ཐོགས་མེད་དུ་སྒྲུབ་པར་མོས་ལ། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ གོང་ནོན་གྱི་སྙིང་པོས་སྣ་དྲངས་པའི། ཨོཾ་བཛྲ་ར་སི་ཧཱུྃ༔ པྲ་མོ་ཧ༔ ཏིང་ཏིང་ཤག༔ སྦྲེལ་བ་རྗེས་ཟློས་ལན་གསུམ་བྱར་གཞུག གཏེར་གཞུང་རྡོ་རྗེའི་ཚིག་རྐང་ལས། འདི་ནི་ཤིན་ཏུ་བཀའ་གཉན་པས༔ བརྒྱུད་འཛིན་སློབ་བུ་དམ་ཚིག་ཅན༔ གཅིག་ལ་ཆིག་བརྒྱུད་ལས་མ་སྤེལ༔ ས་མ་ཡ༔ ཞེས་གསུངས་པ་ཉིད་གྲུབ་པ་ལགས། དེ་ནས་གཙོ་འཁོར་ཡོངས་རྫོགས་ཀྱི་བཀའ་གཏད་པ་ལ། གཏོར་མ་ཕྱག་མཚན་དང་བཅས་པ་སྣོད་གཅིག་ཏུ་བསྡུས་པ་སློབ་མའི་ལག་ཏུ་གཏད་ལ། ཧཱུྃ༔ བཞེངས་ཤིག་ཆོས་སྐུའི་ཀློང་ཡང་ལས༔ སྐྱོད་ཅིག་ལོངས་སྤྱོད་རྫོགས་པའི་མ༔ དགོངས་ཤིང་སྤྲུལ་པའི་གནས་མཆོག་འདིར༔ དམ་ཚིག་གཉན་པོ་གཅིག་ཏུ་བསྲེ༔ འདའ་དཀའི་ཆད་ཐོ་གཉེར་དུ་ལོངས༔ རྒྱལ་དབང་པདྨ་ཐོད་ཕྲེང་དང༔ ལྷ་སྲས་ཁྲི་སྲོང་ལྡེའུ་བཙན་གྱི༔ ཆོས་བརྒྱུད་ཆགས་པའི་རྣལ་འབྱོར་ལ༔ གྲོགས་པོར་གཏད་དོ་གཞུང་མ་ངན༔ གཏོར་མ་ལག་ཏུ་གཏད། མཛའ་མོར་གཏད་དོ་ཁྲེལ་མ་ཆུང༔ ཞེས་རྐང་པའི་ཐད་དུ་བཞག བྲན་དུ་གཏད་དོ་རྐང་མ་ངན༔ སྲུང་མར་གཏད་དོ་མཐུ་མ་ཆུང༔ ཅི་ལྟར་བཅོལ་བའི་ལས་རྣམས་སྒྲུབས༔ བཛྲ་ས་མ་ཡ་རཀྵནྟུ་ཧཱུྃ་ཛཿ ཞེས་བརྗོད་པས་སྨན་བཙུན་འཁོར་དང་བཅས་པས་ཇི་ལྟར་བསྒོས་པ་བཞིན་བགྱིའོ་ཞེས་ཞལ་གྱིས་བཞེས་པར་བསམ་ལ། གཏོར་མ་དང་ནང་མཆོད་བསྲེས་པའི་ཆ་ཤས་སློབ་མར་བྱིན། སྲུང་མ་དང་དམ་ཚིག་གཅིག་ཏུ་འདྲེས་པའི་ངེས་ཤེས་དང་བཅས་རྡོ་རྗེའི་ཐ་ཚིག་འདིའི་རྗེས་ཟློས་མཛོད། མཁའ་འགྲོ་སྲོག་ཏུ་བཙའ་བར་བགྱི༔ འབར་བ་གསུམ་གྱི་དངོས་གྲུབ་སྩོལ༔ སྨན་མོ་གྲོགས་སུ་སྒྲུབ་པར་བགྱི༔ འདུ་བ་གསུམ་གྱི་དངོས་གྲུབ་སྩོལ༔ རྟག་ཏུ་གསོལ་ཀར་བརྩོན་པར་བགྱི༔ གཡེལ་དང་ཞུད་དང་ཆད་པའི་ལས༔ ནམ་ཡང་བདག་གིས་མི་བགྱིད་དོ༔ ཞེས་བརྗོད་པས་སྨན་བཙུན་མཆེད་ལྔ་ཡང་དགྱེས་ཤིང་ཆགས་པས་འོད་དུ་ཞུ་སྟེ་སློབ་མར་ཐིམ་པས་བདག་དང་བཀའ་སྲུང་ཆོས་ཉིད་ཀྱི་ཀློང་ན་གཉིས་སུ་མེད་པར་ཤེས་པས་ཆོས་ཉིད་ཀྱི་ལྟ་བའི་ངང་བསྐྱང༌། དེ་ལྟར་ན་གཞུང་ལས། གངས་ཅན་བོད་ཀྱི་ཡུལ་ལྷ་ཡིན༔ སུས་བསྟེན་དངོས་གྲུབ་སྣ་རེ་ཐོབ༔ རྡོ་རྗེ་ཐེག་པའི་བཀའ་སྲུང་ཡིན༔ རྣལ་འབྱོར་ཡོངས་ལ་སྙིང་ཡང་ཉེ༔ སྙིང་ཏིག་གཉན་པོའི་སྲུང་མ་སྟེ༔ ཚར་གཅོད་རྗེས་འཛིན་རྣོ་ལ་མྱུར༔ པདྨ་ང་ཡི་བཀའ་སྲུང་འདི༔ ཆོས་བརྒྱུད་འཛིན་པའི་སློབ་བུ་ལས༔ གཞན་དུ་སྤེལ་ན་མགོ་བོ་ཁོས༔ ཞེས་གསུངས་པ་ལྟར་གཏེར་ཁ་གོང་འོག་གི་བརྟན་མའི་སྲོག་དབང་དང༌། རྣལ་འབྱོར་དབང་ཕྱུག་རྗེ་བཙུན་བཞད་པ་རྡོ་རྗེ་ལས་བརྒྱུད་པའི་སྲོག་དབང་རྣམས་ཆུ་བོ་གཅིག་འདྲེས་ཟབ་གཉན་བྱིན་རླབས་ཀྱི་ཚན་ཀ་དང་ལྡན་པ་ལེགས་པར་ཕུལ་གྲུབ་པས་དམ་ཚིག་ཁས་བླང་བ་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་དང༌། མཎྜལ། ལུས་འབུལ་དགེ་བསྔོ་བཅས་བྱས་ལ་སློབ་མ་གྲོལ། སློབ་དཔོན་གྱིས་བསྐང་བ་བྱིན་བརླབ་ནས་བརྩམས། ཧཱུྃ༔ བདེ་ཆེན་ཆོས་སྐུའི་སོགས་ཀྱིས་བསྐང་བཤགས་བསྐྱར་ཞིང་ཚོགས་ལ་རོལ། ལྷག་མ་ནས་བརྩམས་རྗེས་ཀྱི་ལས་རིམ་མཐར་དབྱུང་བས་གྲུབ་པའོ། །འགྱུརྃ་མེདྃ་ཐེགྃ་མཆོྃག་ཨ་ཏིའི་ཐུན་མིན་གྱི། །བཀའ་སྲུང་བཀྲ་ཤིས་ཚེ་རིང་མཆེད་སྡེ་ལྔའི། །སྲོག་དབང་ཟབ་གཉན་ལྷུག་པར་བཀྲོལ་འདིས་ཀྱང༌། །བཤད་སྒྲུབ་བསྟནྃ་པའི་རྒྱལྃ་མཚྃན་ཛ་ཡནྟུ། །བཀའ་སྲུང་བཀྲ་ཤིས་ཚེ་རིང་མའི་སྲོག་དབང་གི་ལེའུ་ཚན་བཅུ་གསུམ་པ་སྟེ་བཀྲ་ཤིས་དཔལ་འབྱོར་དོན་ཐམས་ཅད་གྲུབ་པའི་སྡེས་སྦྱར་བ་ལེགས་པར་རྫོགས་སོ། །ལམ་སྟེགས་སྐྱེས་བུ་གསུམ་གྱིས་གཞུང་བསྲངས་ནས། །སྦས་དོན་རྡོ་རྗེ་ཐེག་པའི་སྨིན་གྲོལ་རྫོགས། །གསང་ལམ་ཐེག་མཆོག་རྒྱལ་པོའི་ཁྱད་ཆོས་ཅན། །བསྟན་པ་ཡོངས་རྫོགས་འདི་མིན་གཞན་སུ་ཞིག །དེ་ཕྱིར་གང་ལ་གུས་དང་ཉེར་ལེན་གྱིས། །ཟབ་གསང་ཡོངས་རྫོགས་སྙིང་གི་ཟེའུ་འབྲུ་རུ། །རིང་ནས་སིམ་ལས་དབྱིག་མཆོག་ཀུན་གྱི་རྒྱལ། །རིན་ཆེན་ཕ་ལམ་བཞིན་དུ་གཅེས་པར་བཟུང༌། །རྨད་བྱུང་ཆོས་འདིས་དོན་མཐུན་རྡོ་རྗེའི་མཆེད། །སྐལ་མཉམ་ཀུན་ལ་གཅིག་ཏུ་སྨན་པའི་བློས། །ཇི་ལྟར་དཔོག་བཞིན་སྨིན་ལམ་དབང་གི་ཕྲེང༌། །ལྷག་བསམ་གུས་དང་འབད་པས་ལེགས་པར་བསྟར། །བདག་བློ་ཤིན་ཏུ་མ་སྦྱངས་མུ་ཅོར་སྨྲ། །གསང་བ་ཟབ་མོའི་དོན་བཞིན་མ་རྟོགས་པས། །ཉེས་པར་གྱུར་ཀུན་ལྷ་དང་མཁའ་འགྲོར་བཤགས། །གཟུར་གནས་མཁས་པར་ཉེས་བཤད་བསལ་བར་བསྐུལ། །གསང་ཆེན་ལམ་ཀུན་དབང་ལ་རྫོགས་པ་ཡི། །དཔལ་དེ་སྣང་བའི་འཆར་ཀའི་བྱ་མ་རྟས། །ཀུན་བཟང་ཐུགས་ཀྱི་བསྟན་པ་ཉིན་མོར་བྱེད། །སྙིགས་མའི་མུན་སེལ་གཉེན་དུ་འདི་གྱུར་ཅིག །བཀའ་གཏེར་ཟུང་འཇུག་བསྟན་པའི་ཆུ་གཏེར་གསེར་གྱི་ས་གཞིར་གཡས་སུ་འཁྱིལ། །བཤད་སྒྲུབ་ལས་ཀྱི་རི་གླིང་བཀོད་པ་ལུང་རྟོགས་དཔལ་འབྱོར་རྒྱས་ཤིང་དར། །མཁས་གྲུབ་སྐྱེས་བུ་ལྷ་དང་ཀླུ་དབང་མི་ཡི་ཁྱུ་མཆོག་གིས་རྩེན་པས། །གྲོལ་བ་དྲུག་གི་ཕྲིན་ལས་རྨད་བྱུང་རྟག་ཁྱབ་ལྷུན་གྲུབ་འཕེལ་གྱུར་ཅིག །དེ་ལྟར་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་སྐོར་གྱི་དབང་འདི་དག་ལ་དབང་གི་སྤྱི་དོན་སྙིང་པོ་དོན་གསལ་ལས། དེའང་རང་བཞིན་བརྒྱད་ལྡན་གྱི་རྡོ་རྗེ་སློབ་དཔོན་དག་ལ་ནི་ཡི་གེ་འདི་ཙམ་གྱིས་མཚོན་ལ། གཞན་དུ་ལྷོངས་སུ་མ་གྱུར་པའི་གང་ཟག་རྣམས་ལ་ནི་མདོ་སྔགས་ཀྱི་ལམ་སྤྱི་དང་བྱེ་བྲག་དབང་གི་སྒྲོམ་ནས་ཁོང་དུ་ཆུད་པའི་སྐལ་པ་ཅན་ཉུང་བས་རང་དང་སློབ་མའི་དངོས་གྲུབ་ཀྱི་གེགས་སུ་འགྱུར་ཕྱིར་མདོ་སྒྱུ་སེམས་གསུམ་གྱི་རྒྱུད་སྡེའི་གནད་ལ་ངེས་པ་རྙེད་པར་མ་ནུས་ཀྱང༌། ཁོ་བོས་བྱས་པའི་གྲོལ་ཏིག་གི་དབང་ཆོག་མཁྱེན་བརྩེའི་དགོངས་རྒྱན་ལས་སྤྱི་དོན་ཤེས་པར་བྱ་བ་ཁོ་ནའོ། །ཞེས་རྗེས་སུ་བརྩེ་བས་བཀའ་བསྩལ་པ་བཞིན་ལགས་ཀྱང་རང་བཞིན་བརྒྱད་ལྡན་གྱི་དྲི་ཙམ་ཡང་མི་བྲོ་བ་བདག་ལྟ་བུ་ལས་ངན་གྱིས་དབང་བསྐུར་བྱེད་པའི་སློབ་དཔོན་བྱ་བའི་དུས་ཀྱི་མཐར་སླེབས་པའི་ཚེ། ཌཱ་ཀིའི་ཞལ་རླངས་འཐུལ་ཞིང་གསེར་ཞུན་མ་ལྟ་བུའི་ཟབ་ཆོས་འདི་དག་ལ་གཟུ་ལུམ་གྱིས་སྤྱོད་པའི་ཉེས་པས་རང་གཞན་ལ་ཕན་པ་ལས་གནོད་ཚབས་ཆེ་བ་འབྱུང་བར་རིག་ནས་གཏེར་གཞུང་རྡོ་རྗེའི་ཚིག་རྐང་ཧ་ཅང་བསྡུས་དྲགས། ཆོས་ཀྱི་སྤྱན་ལྡན་མཁས་གྲུབ་གོང་མ་རྣམས་ཀྱི་གསུང་ཡིད་རྟོན་འོས་དག་དཔེ་ཐོབ་པའི་སྐལ་བ་མ་བྱུང་བས་འདི་ལྟ་བུ་ཞིག་མི་བྲི་ཀ་མེད་དུ་གྱུར་པ་སྟེ། སྔར་མདོ་ཁམས་སུ་རང་གནས་ལ་འཁོད་པའི་སྐབས་ཀུན་མཁྱེན་འཇམ་པའི་དབྱངས་ཆོས་ཀྱི་བློ་གྲོས་རིན་པོ་ཆེས་ཡང་གསང་བླ་མའི་སྒྲུབ་ཐབས་ཐིག་ལེའི་རྒྱ་ཅན་དང༌། ཡུམ་ཀའི་ནང་སྒྲུབ་བདེ་ཆེན་གཏེར་བུམ་གྱི་དབང༌། ཁྲག་འཐུང་རིགས་བཞིའི་སྒོས་དབང་རྣམས་བཀླག་ཆོག་ཏུ་བྲི་དགོས་པར་རྟེན་དང་བཅས་ཆེད་དུ་བཀའ་བསྩལ་ཞིང༌། ཁྲག་འཐུང་རིགས་བཞིའི་དབང་གི་སྤྱི་ཆིངས་ཐམས་ཅད་མཁྱེན་གཟིགས་མཁྱེན་བརྩེའི་དབང་པོས་མཛད་པ་བཅས་གནང་བ་བཞིན་བྲིས་ཏེ་སྤྱན་བསྟར་ཞུས་པས་དགྱེས་པའི་དབྱུག་དབྱུང་ཐོབ་ནའང་དེ་དག་ཀྱང་དཔེ་བརླག་པས་ཡིད་ཡུལ་དུ་གང་མཆིས་ལ་ཞིབ་དཔྱོད་དང༌། གཙོ་བོ་སྙིང་ཐིག་རང་གཞུང་དང་གྲོལ་ཏིག་དབང་ཆེན་རྣམས་གོ་བསྡུར་གྱིས་དོན་ཚང་འཇུག་བདེའི་ཁུལ་དུ་བྲིས་པ་འདི་ཡང་སྔ་འགྱུར་རྡོ་རྗེ་སྙིང་པོའི་རིང་ལུགས་ལ་རྒྱུ་མཚན་ཤེས་པའི་མཁྱེན་དཔྱོད་ཀྱི་ཆོས་སྤྱན་ཡངས་པ་རྡོ་རྗེའི་མཆེད་པོ་དར་ཐང་སྤྲུལ་པའི་སྐུ་ཀུན་དགའམ། མཚན་གཞན་ཡེ་ཤེས་རྡོ་རྗེར་གྲགས་པས་རིང་མོ་ནས་བསྐུལ་བ་བཞིན་སྙིགས་མའི་སྔགས་བན་ཧྲུལ་པོ་འཁོས་ཆུང་གྱི་ན་བ་འཇིགས་མེད་མཁྱེན་བརྩེའི་འོད་ཟེར་རབ་གསལ་ཟླ་བར་འབོད་པའི་རྒྱལ་ཁམས་པ་དེས་རབ་བྱུང་བཅུ་དྲུག་པའི་བྱེ་བྲག་ཟིལ་གནོན་ཞེས་པ་མེ་རྟ་ལོའི་ས་ཟླའི་དམར་ཕྱོགས་ཀྱི་ཚེས་བཅུ། ཐེག་མཆོག་ཆོས་ཀྱི་རྒྱལ་རྔ་སྒྲོགས་པའི་འཇིགས་བྲལ་གྱི་པཎྜི་ཏ་ཆེན་པོ་མི་ཕམ་འཇམ་དབྱངས་རྣམ་རྒྱལ་རྒྱ་མཚོའི་དུས་ཀྱི་མཆོད་པའི་ཉིན་དབུ་བརྩམས་ཏེ་རིམ་གྱིས་རྫོགས་པར་བྱས་པའི་གནས་རང་བྱུང་པདྨའི་སྒྲུབ་གནས་སྤ་གྲོ་སྟག་ཚང་སེང་གེ་བསམ་གྲུབ་ཀྱི་རྡོ་རྗེའི་ཀེའུ་ཚང་དང་འདབས་འབྱོར་ཞིང༌། ཆོས་རྒྱལ་བྱང་ཆུབ་སེམས་དཔའ་སྲོང་བཙན་སྒམ་པོའི་སྐུའི་རིང་ལ་བཞེངས་པའི་མཐའ་འདུལ་གྱི་གཙུག་ལག་ཁང༌། བོད་ཡུལ་ཕན་བདེའི་བཙས་གྱུར་གྱི་ས་གནད། ལྷོ་ལྗོངས་ཆོས་ཀྱི་རྒྱལ་ཁབ་འབྲུག་སྤ་གྲོ་སྐྱེར་ཆུའི་ལྷ་ཁང་དུ་སངས་རྒྱས་གཉིས་པ་མཁན་སློབ་ཆོས་གསུམ་གྱི་སྣང་བརྙན་གསར་བསྐྲུན་གྱི་ཞབས་ཏོག་བགྱིས་པའི་སྐབས་གསེང་རྣམས་སུ་བྲིས་ཤིང༌། སྙིང་པོའི་བསྟན་དང་བསྟན་འཛིན་ལ་དད་མོས་མཆོག་ཏུ་གྱུར་པ་བླ་མ་ཀུན་བཟང་རིག་འཛིན་རྡོ་རྗེས་ཀྱང་བསྐུལ་བ་བཞིན་སླར་ཡང་ཞིབ་དཔྱོད་དང་བཅས་ཡི་གེ་གཉིས་པར་འདུ་བར་མཛད་པ་པོ་ངེས་དོན་སྙིང་པོའི་རྣལ་འབྱོར་དབྱིངས་རིག་བྱང་ཆུབ་དབང་པོས་མཛད་པ་འདིས་ཀྱང༌། འོད་གསལ་རྡོ་རྗེ་སྙིང་པོའི་བསྟན་པ་གཞིར་བཞེངས་སུ་བསླང་ནས་འབྲེལ་ཚད་ཀུན་བཟང་གདོད་མའི་གྲོལ་གཞིར་དབུགས་དབྱུང་ཞིང་གྲོལ་བ་དྲུག་ལྡན་གྱི་ཕྲིན་ལས་རྟག་ཁྱབ་ལྷུན་གྲུབ་ཏུ་འབྱུང་བའི་རྒྱུ་ཁོ་ནར་གྱུར་ཅིག། །།

[edit]

@#/___/rdzogs pa chen po klong chen snying gi thig le'i rtsa gsum spyi dang bye brag gi dbang bskur gyi phreng ba bklag chog tu bkod pa zab gsang bdud rtsi'i sgo 'byed skal bzang kun dga'i rol ston zhes bya ba bzhugs so/_//

@#/__/gu ru tri mU la b+h+yaHna ma mi/_byin rlabs bdud rtsi'i sprin gyis rab sgeg sku gsum ston mchog pad+ma skyes/_/grub gnyis 'dod rgu'i char bzang rtag 'jo zhi khro rab 'byams dkyil 'khor lha/_/bde stong glog gi rtse gar dang bcas phrin las rab myur mkha' 'gro'i tshogs/_/mi phyed dad brgya'i mkha' la rtag bzhugs byang chub bar du rjes 'dzin mdzod/_/gsang ba zab mo'i dgongs don ma nyams shing*/_/mkhas grub tshad ma'i phyag bzhes kyis brgyan pa/_/mchog gsang rdo rje bzhi yi 'khor lo ru/_/smin byed thabs tshul skal bzang dga' ston spel/_/'od gsal rdzogs pa chen po klong chen snying gi theg le'i rtsa gsum bka' srung dang bcas pa'i dbang gi phyag bzhes 'dus gsal du 'god pa la/_rtsa dbang rgyal thabs spyi blugs las/_gsang chen rdo rje theg pa ni:_'jug sgo dbang la dam tshig srog:_rang bzhin gnas lugs brjod bral te:_zhes gsungs pa ltar sngags lam la thog mar 'jug pa'i sgo 'byed med du mi rung ba 'chad bya dbang gi rnal 'byor te/_dbang skur byed pa po rdo rje slob dpon mtshan nyid dang ldan pa/_lha dang*/_bdag dang*/_gsang sngags dang*/_bzlas brjod dang*/_'phro 'du'i de kho na nyid de sngags kyi yan lag lnga la rang byan tshud pa'i nus pa rnyed pas slob ma'i rgyud byin gyis rlob nus pa bdag po'i rkyen/_bya ba'i las bcud bzang po blug pa la snod gtsang ma bya ba bzhin rgyu yi rkyen dad brtson shes rab kyi snod dang ldan pa'i slob ma la/_sa'i cho ga sngon du 'gro bas lha dang*/_bum pa dang*/_slob ma lhag par gnas pa/_thig tshon rgyan bkod dkyil 'khor sgrub cing mchod de bdag nyid 'jug pa'am/_rig pa'i me tog dor zhing gnang ba nod pa bcas byas nas phyi mtshan ma dang*/_nang ye shes kyi dkyil 'khor du 'jug pas rgyud sbyang ba la/_byed pa bum pa bdud rtsi phyag rgya brda tshig sogs lhan cig byed pa rgyu yi rdzas dang*/_sngags dang ting nge 'dzin gsum tshogs pa'i cho ga khyad par can gyis rab tu gnas pa'am/_rab gnas kyi bya ba zin pa'i byin rlabs dang nus pa'i khyad par dang ldan pa dmigs pa'i rkyen gyis dbang bskur bas/_bya ba shin tu rtogs par dka' ba dag mnyam bden pa dbyer med gzhi yi dkyil 'khor ye nas rang la gnas pa'i chos nyid kyis khyab pa'i rtsa rlung thig le sems dang bcas pa mtshungs ldan du gnas pa'i rgyu gdod nas gdan gsum tshang ba'i lha'i sku gsung thugs ye shes rdo rje'i ngo bor dag pa nyid ngo 'phrod par byas pa las rang skal gyi sbyang bya glo bur gyi dri ma ci rigs dag pa'i nyams sad par byas shing*/_phar phyin dang rgyud sde 'og mar ma grags pa'i dbang dang cho ga snga ma snga mas go phye nas phyi ma phyi ma 'byung bas na snga ma snga ma de ma thag pa'i rkyen te/_de ltar rgyu gnyis dang rkyen bzhi ste drug tshogs pa'i mthu las/_thob bya rang gnas kyi ye shes ci rigs gsos thebs pa'i mthus lam rim pa gnyis kyi ye shes mngon du skyes sam/_chu lud drod gsher 'dzom pa la sa bon thebs pa ltar ye shes btsan thabs su skye nges kyi nus rung du smin par byas pas rgyud 'gyur ba'i khyad par ni thob pa ste/_de dag kyang chos nyid bde ba chen po dang chos can rten 'brel bslu med kyi stobs bsam gyis mi khyab pa dang*/_de bzhin gshegs pa'i byin gyis brlabs pa'i mthu bsam gyis mi khyab pa dang*/_thabs la mkhas pa gsang sngags kyi spyod pa khyad par can sngags dang phyag rgya'i nus pa bsam gyis mi khyab pa las byung bas na/_rdo rje bzhi'i ye shes la go myong rtogs pa ci rigs skyes pa de nyid gong nas gong du spel ba'i lam la tshul bzhin 'bad na snyigs dus kyi tshe thung gcig la rdo rje 'chang gi go 'phang thob nus la/_tshe 'dir lam la ched du ma 'bad kyang dam tshig ma nyams na ring por mi thogs par 'tshang rgya nus par gsungs pas/_mthar 'bras bu sangs rgyas sku bzhi'i go 'phang bde myur du thob byed sngags lam gyi rtsa ba dbang la rag las pas shin tu gnad zab pa'i mthar thug rdo rje theg pa'i lam gyi thog ma'i 'jug sgo gcig pur gyur pa ste/_de dag gi rnam gzhag shes pa ni shin tu gal che bas na dpal sgyu 'phrul drwa ba rtsa rgyud gsang ba snying po'i man ngag gi dgongs pa ltar bkral ba legs bshad phyogs bcu'i mun sel/_spyi don rnam pa gnyis dang*/_yon tan rin po che'i mdzod kyi le'u bcu pa'i rtsa 'grel gyi gzhung la brten nas gtan la dbab par bya dgos la/_skabs 'dir 'chad bya'i gtso bo kun mkhyen chos kyi rgyal po rig 'dzin 'jigs med gling pa nyid kyis shing rta'i lam srol gsar du phye ba'i rdzogs pa chen po klong chen snying gi thig le zhes rgyal ba'i bstan pa rin po che yongs rdzogs nyams len gyi lus gcig la rdzogs shing mthar thug gtan la dbab bya snga 'gyur 'od gsal rdo rje snying po theg mchog rdzogs pa chen po thun min man ngag sde'i zab don thang mar brdal bas bka' gter dag snang gi chos tshul rgya mtsho'i srog snying gcig pur grub pa la/_rgya che ba rgyud sde'i dgongs pa gtso bor bton pa rgyud lugs phur pa rgyal po'i lugs dang*/_zab pa klong chen dgongs pa'i gsang mdzod las byon pa'i klong chen snying gi thig le'i rtsa gsum chos srung dang bcas pa'i smin grol yongs rdzogs sgrub sde'i ring lugs can du bzhugs pa las skabs 'dir 'chad bya phyi ma nyid yin la/_'di nyid kho na la'ang sgrub bya'i lha'i sgo nas dbye na/_byin rlabs kyi rtsa ba bla ma rig 'dzin 'dus pa/_bla ma drag po rta khyung 'bar ba/_dngos grub kyi rtsa ba yi dam bka' brgyad dpal chen 'dus pa/_de'i yan lag gshin rje 'chi bdag zil gnon/_rta mgrin khams gsum rol pa/_yang dag sangs rgyas mnyam sbyor/_phur pa bdud dpung zil gnon te khrag 'thung rigs bzhi/_gsang sgrub thugs rje chen po sdug bsngal rang grol/_khro bo rta mgrin/_yang gsang bla sgrub thig le'i rgya can/_zhi khro khrom dkrugs ngan song sbyong ba/_phrin las kyi rtsa ba mkha' 'gro yum ka bde chen rgyal mo/_de'i nang sgrub sgrol ma nyer gcig_/gsang sgrub mkha' 'gro seng gdong*/_bka' srung ma mgon lcam dral/_tshe ring ma bcas dang*/_sgrub byed thabs kyi gseng lam nang rgyud yo ga gsum gyi dgongs pa dang 'brel bas/_sgyu 'phrul drwa ba ma hA'i dgongs pa dang 'brel ba'i dpal chen rtsa ba yan lag_/a nu'i mdo lung gi snying po rigs brgya dang rig 'dzin/_a ti'i dgongs don gyi bskyed rdzogs yum ka dang*/_yang gsang bla sgrub kyis mtshon pa'i dbye bsdu'i go rim dang rnam gzhag du ma yod kyang*/_skabs 'dir dbang gi spyi don snying po don gsal las/_'dir dang po smin byed gdan gsum tshang ba'i dkyil 'khor zhi khro la brten pa yin pas/_ces gsungs pa ltar thun mong gi slob ma la sta gon dang phyi nang gi 'jug pa phan nus zab mo'i dbang gi cho ga rgyas pa/_rgyu smin byed kyis sgo 'byed dgos pa'i phyir rgyud sde'i dgongs pa dang 'brel che ba zhi khro ngan song sbyong ba'i dbang gi rim pa thog mar 'god pa la/_gsang ba yongs rdzogs 'dus pa'i rgyud las/_mdor na dbang gi sngon 'gro rjes/_/sgrub chen bsnyen sgrub khog dbub la/_/las la dbang gis sbyor ba ste/_/zhes pa ltar sngon 'gro/_dngos gzhi/_rjes gsum mo/_/dang po la gsum/_lha/_bum pa/_slob ma lhag gnas so/__/dang po la'ang sa slong ba dang lha sta gon dngos gnyis las/_dang po ni/_spyir kun mkhyen 'jigs bral gyi slob dpon chen po nyid kyis phur pa rgyud lugs dang*/_grol thig dbang chog sogs su phun sum tshogs pa lngas sgrub pa'i gzhi bzung*/_bsnyen sgrub yan lag bzhis khog dbub/_rjes rang gzhan smin grol la sbyor tshul gyi rnam gzhag zhib mo ltar gsungs kyang*/_skabs 'dir deng dus kyi phyag bzhes dkyus ltar 'chad pa la/_rang bzhin brgyad ldan gyi rdo rje slob dpon mtshan nyid dang ldan pas gsang ba'i dkyil 'khor 'di nyid kyi bsnyen sgrub mthar son pas/_snod kyi skal pa bzang pos zab mo'i bcud 'dzin nus pa'i slob ma dkyil 'khor du 'jug cing smin par bya ba'i phyir bkra shis byin chags pa mtshan nyid dang ldan pa'i gnas su/_gza' skar tshes grangs dge zhing shis pa la gzhung mthun gyi rten dang rgyan gyi yo byad du mas spras pa'i gung du bdag bskyed zhi khro'i gtor ma sman raka_/chu gnyis nyer spyod dang*/_dkyil 'khor gang du bya bar stegs bu khebs ldan gyi dbus su rin po che'i maN+Dal dri'i thig le bkod pa la me tog gam 'bru dkar gyi tshom bu dbus su gcig_/de rgyab bzhi/_de rgyab brgyad/_de rgyab bcu drug_/de rgyab sum cu rtsa gnyis/_de rgyab bzhi bcu rnams rim gyis je chung du bkod/_chu gnyis nyer spyod dang bcas pas bskor/_de'i mdun du stegs cung dma' bar maN+Dal la ba byung dang dris byugs par me tog gi tshom bu dang*/_mdun du chu gcig sngon 'gro'i mchod pa lnga sa lha dang*/_gnyug mar gnas pa la dkar gtor gser skyems bcas bshams/_gzhan nyer mkho'i yo byad tshogs par byas la/_zhi khro rang gzhung gi skyabs sems nas brtsams bdag bskyed tshang bar btang*/_rnam snang thugs kyi dkyil 'khor sogs zhi ba dang*/_bdag nyid rnam snang gsal ba'i ljags/_/rdo rje rtse gsum dmar po yi sogs kyis khro bo bcas cung zad bzla/_las sbyor rtsa rig skabs 'dir ma sbyar yang rung snyam/_sa lha'i gtor ma bsang sbyangs/_oM AHhU~M 'bru gsum gyis byin gyis brlabs/_bsdu rgya se gol gtogs pa dang bcas/_pri thI de wi sa mA dzaH_zhes brjod pas/_sa'i lha mo ser mo bum pa 'dzin pa do shal dang rkang gdub kyi sgra sgrogs pa sa bdag gis 'khor dang bcas pa spyan drangs par gyur/_oM pri thI de wi ar+g+haM puSh+pe sogs nas/_shab+da pU dza hoHsa mchod/_skyob pa sangs rgyas thams cad kyi/_/spyod pa'i tshul dang khyad par dang*/_/sa dang pha rol phyin pa la/_/lha mo khyod ni dpang du gyur/_/shAkya seng ge skyob pa yis/_/ji ltar bdud kyi sde bcom pa/_/de bzhin bdag gis bdud sde las/_/rgyal bar bya phyir dkyil 'khor bri/_/bdag rdo rje 'dzin pas sems can thams cad kyi don du sa phyogs 'dir dkyil 'khor chen po bzhengs kyi/_sa'i phyogs 'di bdag la gnang bar mdzod cig_/ces brjod pas/_des kyang rig pa 'dzin pa khyod ci dga' bar byos shig_/ces gnang ba byin par bsam/_gnyug mar gnas pa la/_a kA ro mu sogs lan gsum gyis bsngos la/_gang dag 'dir gnas lha dang klu/_/gnod sbyin srin po'am gzhan dag la/_/sa 'di bdag gis bslang bar bgyi/_/dkyil 'khor don du bstsal du gsol/_/zhes dang*/_mchod sbyin gtor ma 'di bzhes sogs kyang brjod/_badz+ra mus mgron rnams rang gnas su btang*/_oM me di ni badz+ra b+han+d+ha b+han+d+ha hU~M phaT kyis rdo rje'i gzhir gyur/_oM badz+ra rak+Sha rak+Sha hU~M phaT kyis bsrung bar byas pas sgrub khang rnying pa dang ras bris la brten pas rung zhing*/_rdul tshon la sbyang ba bcas dgos par gsungs/_de dag gis sa slong gi don tshang ba'o/__/dkyil 'khor rdul tshon la brten pa yin na skabs 'dir thig las 'byung yang deng sang ras bris la brten pa mang bas ma spros so/__/gnyis pa lha sta gon dngos ni/_oM badz+ra kro ta h+ya gr-I wa hu lu hu lu hU~M phaT/_ar+g+haM pad+yaM sogs/_shab+da AHhU~M/_yongs su gyur pa las phyi nang gi mchod pa rnams dwangs shing thogs pa med pa sa dang bar snang kun tu bzang po'i mchod sprin gyis gang bar gyur/_sman gtor rak+ta'i sngags kyang brjod pas byin gyis brlabs la/_dbang gi spyi don snying po don gsal las/_bdag bskyed ldan pas lha tshogs rnams/_/cho gas sgrub cing ma nus na/_/sngags kyis bskyed la mchod bstod 'bul/_/bzlas pa ci rigs bgyis pa'i rjes/_/zhes gsungs pas/_rgyas par spro na/_stong pa'i ngang las mdun gyi tshom bu'i dkyil 'khor nyid yongs su gyur pa las/_e yaM baM laM suM raM rnams chad/_/s+pha ra Na phaT sogs nas dam tshig pa bskyed/_ye shes pa spyan drangs bstims/_phyag mchod bstod pa'i bar zhi khro'i las byang ltar mthar chags su bya/_bsdus pa'i skabs/_hU~M badz+ra satwa/_mUM d+ha ti shwa ri/_hU~M badz+ra d+hr-ika? sogs bskyed sngags tshang bar brjod la/_bdag nyid lha yi skur gsal ba'i:_thugs nas 'phros pa'i 'od zer gyis:_zhi khro rab 'byams dkyil 'khor lha:_mdun gyi nam mkhar spyan drangs gyur:_zhes brjod cing bsam la/_oM/_ma lus sems can sogs spyan 'dren nas bstod pa'i bar zhi khro'i las byang ltar btang rjes/_bo d+hi tsit+ta dang ru lu yig brgya bcas cung zad bzlas mthar/_rdor dril dang spos thogs/_pus btsugs thal mo sbyar la/_rang gi lce hU~M las skyes pa'i rdo rje'i rang bzhin du gyur/_rgyal ba sras bcas dgongs su gsol/_/khyed rnams mchod dang sems can don/_/nangs par dkyil 'khor 'bri 'tshal bas/_/thugs kyis dgongs te gnang ba mdzod/_/lan gsum/_zhes gsol ba btab pas lha tshogs rnams dgyes pa chen pos/_rig pa 'dzin pa khyod kyis dkyil 'khor gyi las ji ltar 'os pa gyis shig ces bka'i gnang ba bstsal nas ye shes kyi dkyil 'khor steng gi bar snang 'od kyi drwa ba'i klong du bzhugs par bsam/_rdo rje khu tshur gnyis gshibs pa'i mdzub mo brkyang ba rtse gtugs nas 'og tu phyogs pa spyi bor gtod pa bcas/_oM badz+rod tiSh+Tha lhan zhes brjod/_dam tshig gi 'khor lo rnams rang la thim par bsam la maN+Dal tshom bu dang bcas pa bsdu/_yig brgya brjod/_gnyis pa bum pa sta gon ni/_rin po che'i bum pa sum+b+ha ni'i sngags dang yungs kar gyis brab/_gu gul bdug_/bkra shis pa'i khye'us rgyun 'bab kyi chu nas blang ba'i chu gtsang dang dri'i chab dang so lnga'i bcud ldan rnam bum mgul chings sngon po'am ye shes lnga mtshon phyir dar sna lngas bya bar grol thig dbang chog las gsungs/_las bum mgul chings ljang gu/_bum mtshan gtso bum la rigs lnga'i phyag mtshan/_las bum la rgya gram can gdags/_dung zhal/_gzungs thag bcas 'du byas la/_mchod pa gsar du bshams pa'am kha gsos la byin rlabs lha sta gon skabs ltar bya/_bum pa rnams/_a mr-i tas bsang*/_swa b+hA was sbyangs/_stong pa'i ngang las pa~M las pad+ma dang*/_a las zla ba'i dkyil 'khor gyi steng du b+h+rU~M las rin po che'i bum pa yangs shing rgya che ba/_zhabs zhum pa/_lto ba ldir ba/_mgrin pa phra ba/_kha g.yel ba/_mchu 'phyang ba/_lha rdzas gos kyi mgul chings dang dpag bsam shing gis kha brgyan pa/_phyi bum pa'i dbyibs la nang gzhal yas khang bcud kyis yongs su gang ba'i dbus su pad+ma 'dab bzhi/_brgyad/_bcu drug_/so gnyis/_bzhi bcu rnams kyi steng du rin chen seng ge glang chen rta mchog rma bya shang shang nyi zla pad+ma'i gdan la/_chos sku kun bzang rdo rje sems dpa' dang rigs lnga yab yum la rang rang gi sems dpa' dang sems ma/_thub pa drug_/sgo ba yab yum ste zhi ba'i lha tshogs/_dregs pa can dang byol song pad nyi'i gdan la che mchog yab yum/_he ru ka rigs lnga/_ke'u ri ma brgyad/_sing ha ma brgyad/_sgo ma bzhi/_dbang phyug nyi shu rtsa brgyad rnams ma 'dres gsal rdzogs su bzhugs pa'i spyi bor oM/_mgrin par AH_thugs kar hU~M de las 'od zer 'phros bsgom pa dang 'dra ba'i ye shes pa badz+ra sa mA dzaH_oM/_ye shes sku mchog rang bzhin dkyil 'khor ni/_/zla rgyas bzhin du spros pa mi mnga' yang*/_/thugs rje nyi gsal 'od bzhin snyom mdzad pa/_/'dir gshegs bdag la dgongs shing bzhugs su gsol/_/oM badz+ra sa ma ya dzaH_dzaHhU~M ba~M hoH_sa ma ya tiSh+Tha lhan/_a ti pU hoH_pra tIts+tsha hoH_oM badz+ra ar+g+haM nas/_shab+da a mr-i ta rak+ta ba liM ta ma hA sarba pU dza sa ma ya khA hi khA hi/_brjod med shes rab mi g.yo chos kyi sku/_/bde chen longs spyod rdzogs sku rigs lnga'i gtso/_/thugs rje thabs mkhas rgya che rol pa'i lha/_/zhi khro sku gsum lha la phyag 'tshal bstod/_/gzungs thag blangs te/_rang gi thugs ka nas sngags kyi phreng ba 'phros/_gzungs thag la 'khril te bum pa'i nang du song bas lha tshogs rnams kyi thugs rgyud bskul 'od zer spro bsdus don gnyis mdzad/_sku'i cha thams cad nas byang sems bdud rtsi'i rgyun bab pas bum pa gang bar bsam la/_zhi khro'i sngags sum brgya las mi nyung ba dang*/_yig brgya ci nus bzla/_las bum bsang sbyangs/_las kyi bum pa'i dbus su pad nyi dang*/_/rgya gram steng du hU~M las sna tshogs kyi/_/rdo rje hU~M gis mtshan pa yongs gyur las/_/bdud rtsi 'khyil ba zhal gcig phyag gnyis pa/_/sku mdog ljang gu zhabs gnyis dor stabs can/_/phyag g.yas sna tshogs rdo rje bsdig pa'i tshul/_/g.yon pas de yi yu ba'i dril bu 'dzin/_/khro tshul gar dgu'i nyams ldan sbrul la sogs/_/mi sdug rgyan gyis spras pa'i sku ru gsal/_/sku las byung ba'i ye shes bdud rtsi'i sprin/_/babs pas bum pa yongs su gang bar gyur/_/oM badz+ra a mr-i ta kuN+Da li ha na ha na hU~M phaT/_brgya rtsa brgyad bzla/_bum lha gnyis la dmigs nas/_ar+g+haM sogs kyis mchod/_bstod par 'os pas bstod/_oM AHhU~M gis bdud rtsi'i mchod yon phul bas lha tshogs bde stong chen po'i rnam rol du 'od du zhu nas bum pa'i chu dang ro gcig tu 'dres pas rang rang gi byed las 'grub pa'i nus pa can du gyur/_zhes brjod cing bsam/_'dir dbang gi spyi don las/_gnyis pa bum pa bcud ldan la/_/cho ga snga ma ji bzhin las/_/bum lha 'od du zhu ba tsam/_/bum pa sta gon khyad par ro/_/zhes gsungs pa tsam las zhi khro la bum sgrub dmigs bsal ma byung bas bum pa sgrub tshul 'di gsang ba spyi ltar bkod pa'o/__/sku rten tsakli dbu rgyan rdor dril sogs dbang rdzas rnams tshogs par byas la/_dbang rdzas rnams ngo bo rnam par dag pa chos kyi dbyings rang bzhin ye shes kyi snang ba cir yang 'char ba'i byin rlabs dngos grub 'byung ba'i dbyig tu gyur par mos/_'di ni rgyud las dbang rdzas rab gnas dang ldan pa zhes gsungs pa'i dgongs don snga 'gyur bka' ma'i dbang gi sta gon skabs dbang rdzas rab gnas kyi cho ga re 'byung ba ltar byin rlabs bsdus pa 'di tsam bya ba thams cad mkhyen pa many+dzu g+ho Sha'i phyag bzhes las byung ba ltar 'dir yang bkod pa'o/__/gsum pa slob ma lhag gnas la gnyis las/_dang po sngon du bya ba'i las rim ni/_so shing sogs rdzas bzhi dang*/_maN+Dal tshom bu'i ra ba/_slob ma mchod pa bcas 'du bya/_dkyil 'khor gyi gzhi yol bas bsgribs/_snod du gyur pa'i slob ma zung du ma gyur pa'i grangs ldan rnams sgo drung du 'khod pa la khrus bya/_gral du 'khod nas bgegs la gtor ma byin te bden stobs kyis bskrad/_yungs thun brab/_gu gul bdug_/srung 'khor bsgom la me tog bkye bsdu bya/_'o khyed cag rdzogs pa chen po klong chen snying gi thig le'i chos sde las byon pa'i zhi khro ngan song sbyong ba'i sngon 'gro sta gon gyi rim pa gsan snyam pa'i thugs bskyed de gsan 'tshal/_de yang ji skad du/_gsang sngags dngos grub don gnyer na/_/'jig rten tshe 'di'i zhen pa dor/_/pha rol la ni 'dun pa bskyed/_/'di 'bras gnyer na phyi ma 'jig_/phyi ma gnyer na 'di 'bras 'grub/_/de bas rang gzhan don bya'i phyir/_/sems dpa' bzang po mchog la sbyor/_/zhes gsungs pa ltar gang zhig mchog gi don sgrub pa'i mi slob pa'i zung 'jug gi 'bras bu don du gnyer ba dag gis 'khor ba'i bde skyid mngon mtho'i go 'phang dang*/_nges 'byung gi blo dang ldan yang rang nyid zhi bde tsam las sems can gzhan don rlabs po che sgrub pa'i nus pa dang bral ba nyan rang gi 'bras bu tsam don du gnyer bya ma yin te/_'dir nam mkhas gar khyab kyi sems can thams cad pha mar ma gyur pa ni gcig kyang med la/_pha ma de dag rang gi rang bzhin ma rig pa'i ngo bo bdag nyid gcig pas rgyu byas/_kun tu btags pa'i ma rig pas rkyen sbyar te 'khor ba sdug bsngal gyi rgya mtsho la bde 'dod sdug bsngal sgrub pa'i zhe 'dod phyin ci log la rnam par 'phyan zhing*/_bzod du med pa'i sdug bsngal gyi rang bzhin la mthong chos su spyod pas shin tu nyam thag pa 'di rnams la snying rje drag pos kun nas bslangs te 'di dag gi don bya ba'i phyir mkhyen brtse nus gsum gyi phrin las tshad med cing don gnyis lhun grub kyi brtul zhugs bla na med pas rdzogs pa'i sangs rgyas kyi go 'phang thob par bya/_de'i ched du rdo rje theg pa'i myur lam rmad du byung ba'i dkyil 'khor zab mo 'dir 'jug cing smin par bya snyam pa'i sems bskyed kyi 'phen pa sngon du 'gro bas/_kun 'byung srid pa'i rgyu 'bras la nges 'byung gi kun slong drag pos 'jig rten tshe 'di'i snang zhen la blo ldog dgos te/_de la rang cag rnams mi lus kyi rten khyad par can thob pa ni da res tsam yin te/_da res kyi rten stong log tu song na slad nas 'di 'dra ba'i lus rten rnyed pa ma yin pa'i tshul 'dul ba rnam 'byed las/_dge slong dag ngan song ba'i 'gro bar ltos/_phyi phyir mi nyid kyi dngos po thob pa yang shin tu dka'o/__/log par lta ba'i ston pa 'di dag la ltos/_yang dag pa'i dge ba'i bshes gnyen dang shin tu 'phrad par dka'o/_/zhes gsungs pa yin la/_de tsam du rnyed par dka' ba'i rgyu mtshan gang yin na/_spyir ngan song gsum gyi 'gro ba la ltos na mi'i lus rten thob pa mi srid pa'i tshod yin pas mthong chos su mi dang srog chags gzhan gyi mang nyung kho nas kyang shes la/_mi yang chos ldan gyi bya ba la zhugs pa ni nyin mo'i skar ma tsam las mi 'dug na/_gnas skabs kyi bde 'byor ni rtag pa ma yin par 'gyur ba'i rang bzhin can dang*/_de'i steng du sdug bsngal gyi sdug bsngal dang*/_khyab pa 'du byed kyi sdug bsngal gyis rtag tu mnar bas ri dwags mtha' la gcur pa lta bu'i ngang nas da lta'i sdug bsngal la spyod cing phyi ma'i sdug bsngal gyi rgyu sgrub pa ni mtshang shin tu che/_de bas na 'khor ba'i rang bzhin ni sdug bsngal gyi btson ra/_'phral nyams dga' yang phugs mtha' skyo ba/_byas tshad sdig pa/_bsags tshad gzhan dbang*/_bya ba mang ba/_don nyung ba/_bsod nams ma yin pa kho na dang 'brel che bas 'di las thar pa'i thabs la ma 'bad na shi 'phos nas ngan song du 'khyams pa las 'os med/_ngan song du skyes na dmyal ba ni lcags bsregs kyi sa gzhi me 'bar ba'i klong du sog le dang spu gri la sogs pa'i mtshon cha rnon po'i dbal gyis lus gshags/_ri'i bar du bcir/_mgo lus dbral/_khro chur 'tshod/_mtshon cha'i dbal la 'dred/_glo snying yan chad me 'bar ba la sogs pa'i tsha dmyal brgyad/_kha char bu yug rlung dang bcas pa'i dkyil na lus sbrebs shing grang ngad kyis sha pags dum bur gas pa'i grang dmyal brgyad/_sdug bsngal gyi rnam grangs 'di mi 'byung bya ba med pa'i nyi tshe nye 'khor ba gnyis te dmyal khams bco brgyad/_lo zla mang por yang zas skom gyi ming yang mi thos shing tsha grang khod mi snyoms pa'i yi dwags sde tshan gsum/_dud 'gro ni mthu che ba gang yin pa des nyam chung ba de za zhing*/_gzhan yang las kyi dbang gis gcig la gcig gis za ba dang*/_mis bkol ba dang*/_sha dang pags pa'i don du gsod pa dang*/_gsod lugs mi 'dra bas sdug bsngal dang 'jigs skrag dpag tu med pa de rang thog tu 'bab nges yin na de'i sdug bsngal ji ltar bzod nus/_gal te bde 'gro thob kyang mi la skye rga na 'chi/_yod pa bri yi dogs pa dang*/_med pa btsal yang mi rnyed pa dang*/_dgra dang 'phrad pa dang*/_gnyen dang 'bral ba dang*/_dpya khral gyis gdung ba la sogs pa rang res mthong zhing myong ba 'di lags mod/_de bzhin du 'dod khams kyi lha rnams ni re zhig bde ba ltar snang yang*/_ha cang bag med pas g.yengs nas phyi ma'i don sgrub pa la g.yel bas/_re zhig na snga ma'i las zad de stan la mi dga' ba dang*/_me tog gi phreng ba rnying pa dang*/_lus la rngul 'byung ba dang*/_lha zla bos spangs shing 'du shes 'khrul pa dang*/_phyi ma skye 'gyur gyi gnas ris ngan pa mthong nas 'jigs pa la sogs pa'i 'chi ba'i ltas tshang nas sdug bsngal shin tu mi bzod pa yod la/_khams gong ma dag kyang bsam gtan gyi bde bas 'tsho ba'i las zad de srid pa 'og mar ltung ba mang bas 'gyur ba'i sdug bsngal gyis gdungs shing*/_srid pa phyi mar 'du byed kyi sdug bsngal gyis nyam thag la/_khyad par lha ma yin rnams ni lha'i dpal la mi bzod pa'i phrag dog gis sems rnal du mi gnas pas rtag tu 'khrug rtsod 'ba' zhig gis gdungs shing g.yul ngor yan lag chad pa dang*/_mtshon chas bsnad pa la sogs pas shin tu sdug bsngal ba'i phyir na 'khor ba gang du skyes kyang sdug bsngal gyi rang bzhin yin pa'i tshul dran pa nyer bzhag las/_sems can dmyal ba dmyal mes nyams/_/yi dwags bkres shing skom pas nyams/_/dud 'gro gcig la gcig zas nyams/_/mi rnams 'tsho ba thung bas nyams/_/lha rnams bag med pa yis nyams/_/lha min 'thab cing rtsod pas nyams/_/'khor ba khab kyi rtse mo la/_/bde ba nam yang yod ma yin/_/zhes so/__/de lta bu'i 'khor ba las thar pa'i thabs ni dam pa'i chos kho na las gzhan gang yang med kyang rang cag rnams ni las ngan la goms pas mi rtag pa la rtag par 'dzin/_sdug bsngal la bde bar 'dzin pas dge ba'i phyogs su ni blo 'jug par shin tu dka'/_sdig pa'i las rnams rtsed mo'i zhor tsam du'ang 'du byed cing*/_khyad par tshe 'di don du gnyer ba'i las thams cad ni dngos sam brgyud nas sdig pa'i g.yo bkol 'ba' zhig las ma 'das par yin pa'i tshul/_khyim pa rang bzhin pa gcig la ltos kyang sha khrag la chags nas srog gcod/_tshong dang g.yo sgyu la brten nas ma byin pa len pas mtshon mi dge ba bcu la rtag tu spyod pa yin na de'i 'bras bu ngan song du 'gro ba las 'os ci yod/_de bas na da lta rang dbang yod dus sdig pa spang zhing dge ba'i las sgrub pa la brtson dgos te/_slob dpon chen pos/_'di ni 'jig rten skyo ba'i yul yin pas/_/skye bo'i bde skyid phun sum tshogs 'dra ba/_/dbyar gyi chu dang rmi lam nor rdzas ltar/_/bden pa med cing yun ring mi rtag pas/_/skyo ba'i 'du shes rtag tu bskyed 'tshal lo/_/'di nyid lam log bag chags chags pa dang*/_/skyes bu'i dpal la ngo mtshar cher byed pa/_/de ni bsod nams dman pa'i rigs can te/_/khyed kyi snying ni shing sdong khong rul ltar/_/phyis nas thar pa'i lo 'bras mi 'byung ngo*/__/kye ma kye hud tshe 'di'i dpal 'byor la/_/rtag cing phun sum tshogs ltar shes pa'i blo/_/byis pa'i nang nas tha shal skyes bu ste/_/'jig rten 'di na de bas blun pa su/_/sngar yang ma byung phyis kyang mi 'byung ngo*/_/zhes so/_/de bas na 'chi ba nam 'ong mi shes shing*/_de'i tshe da lta'i nor rdzas dang*/_dbang thang dang*/_nye 'brel dang*/_mdza' bshes dang 'grogs dbang ni med/_rang gi lus 'di yang dur khrod 'jigs par 'dor zhing 'bral dgos/_da lta gtan du sdod dbang yod pa lta bu'i sems kyis rang phyogs la chags/_gzhan phyogs la sdang*/_longs spyod dang kha drag la sogs pa sgrub kyang de ring yod pa sang nyin nas med pa'i gnas skabs nyams su myong nas srid pa bar do'i 'phrang la gshar dgos/_de'i tshe dbang yod dang*/_nor rdzas dang*/_gnyen bshes kyis phan pa til 'bru tsam med pas/_skyabs dang re ltos su gyur pa ni dam pa'i chos las gzhan su yang med pa'i phyir da lta nas bla ma dang dkon mchog la blo gtad de blo gdeng thub pa'i chos la 'bad dgos/_de las kyang thar pa bla na med pa sangs rgyas kyi go 'phang bsgrub pa la theg pa chen po'i sgor zhugs dgos/_de la'ang rgyu lam du byed pa mtshan nyid kyi theg pa las khyad par du 'phags pa 'bras bu lam byed rdo rje theg pa rnal 'byor bla med kyi rgyud sde ni tshe gcig lus gcig la rdo rje 'chang chen po'i go 'phang nges par sgrub par byed pa yin cing*/_de la'ang lhag pa'i lha rab 'byams kyi rgyud lung man ngag bsam gyis mi khyab pa zhig bzhugs pa las khyad par du 'phags pa snga 'gyur 'od gsal rdo rje snying po'i rgyud sde kun gyi rgyal po zhi khro na raka dong sprug rnal 'byor gyi spyi khrus chen po rdzogs pa chen po klong chen snying gi thig le'i chos sde las byon pa/_zhi khro ngan song sbyong ba bka' gter zung 'jug gi dbang bskur sbyin pa'i skabs su babs pa yin te/_de la'ang sngon 'gro slob ma lhag par gnas pa dang*/_dngos gzhi dbang bskur ba gnyis su yod pa las thog mar lhag gnas kyi chos rnams zhu ba'i yon du maN+Dal phul/_khyed rnams dkyil 'khor chen por smin pa'i snod du bsgrub phyir thun mong dang khyad par gyi sdom pa'i gzhi rten dkon mchog rtsa ba gsum la skyabs su 'gro ba dang*/_sdom pa gsum gyi bslab pa dang dam tshig bzung dgos pa'i phyir de dag sbyin par gsol ba gdab pa 'di'i rjes zlos mdzod/_e ma dus gsum rgyal ba kun tu bzang*/_/rigs lnga'i sangs rgyas dgongs su gsol/_/dkon mchog gsum la skyabs 'gro dang*/_/so thar byang sems sngags sdom rnams/_/mgon pos bdag la gnang du gsol/_lan gsum/_de ltar na dus gsum gyi rgyal ba sras dang bcas pa kun kyang rdo rje theg pa bla med kyi gseng lam la brten nas so byang sngags kyi bslab pa kun rdzogs par bzhes pas mi gnas pa'i byang chub mngon du mdzad de don gnyis lhun gyis grub pa'i phyir sras bcas rgyal ba dgyes pa'i lam bzang por gzhug pa'i phyir 'di la gsan pas khyab par gda'/_e ma snod dang ldan pa'i bu/_/gsang sngags cho ga khyed la bstan/_/'das dang ma byon da lta yi/_/sangs rgyas ma lus thams cad kyang*/_/gsang sngags cho ga 'di mkhyen nas/_/rdzogs pa'i byang chub brnyes pa yin/_/bdud kyi dpung yang 'di yis bcom/_/de ltar khyed kyang rjes su zhugs/_zhes gdams te/_mdun gyi nam mkhar thun mong dang khyad par gyi sdom pa bzung ba'i rten dkon mchog rtsa gsum skyabs yul rgya mtsho sprin gtibs pa ltar bzhugs pa'i spyan sngar lam log pa las khyad par du gyur pa so thar rigs bdun/_lam dman pa las khyad par du gyur pa byang sems kyi bslab pa dang*/_lam rdzogs pa las bye brag tu 'phags pa sngags kyi sdom pa dang dam tshig rnams tshul bzhin du bzung zhing slob snyam pas thun mong gi sdom pa bzung ba 'di'i rjes zlos mdzod/_skyes bu gsum gyi blo rtsal rnams/_/gong nas gong du spar ba'i blos/_/kun bzang rigs lnga'i lha tshogs la/_/'di bzung bla med byang chub bar/_/gus pa yis ni skyabs su mchi/_/bla ma kun bzang spyan snga ru/_/lus ngag yid kyis gzhan rnams la/_/gnod pa'i las ldog dge ba sgrub/_/dge tshul dge slong byang chub sems/_/so sor thar pa'i sdom pa la/_/bdag ni rgyun du gnas shing bsrung*/_/lan gsum/_de las kyang ches 'phags pa theg pa chen po rig pa 'dzin pa'i sde snod kyi sgo gsum tha mal gyi snang zhen las ldog pa'i nyes spyod sdom pa/_bskyed rdzogs kyi lam zab mo la bslab pa'i dge ba chos sdud/_gzhan don rlabs po che'i phrin las bzhi sgrub pa'i sems can don byed kyi sdom pa'i tshul khrims/_bye brag pa khyad par gyi dam tshig dang sdom pa blang ba 'di'i rjes zlos mdzod/_hoH_bla ma kun bzang dgongs su gsol/_/'di bzung byang chub ma thob bar/_/'gro drug sems can thams cad la/_/ma dang bu yi 'du shes kyis/_/ma bsgral ba rnams bsgral ba dang*/_/ma grol dgrol dang dbugs dbyung phyir/_/smon pa'i byang chub sems bskyed do/_/sngon gyi rgyal ba thams cad kyang*/_/sdom pa la ni gnas pa ltar/_/'di bzung 'khor ba ma stong bar/_/bla med 'jug pa'i byang chub sems/_/pha rol phyin drug slob cing sgrub/_/kun don tshul khrims gsum gyi dngos/_/tha mal snang zhen nyes spyod sdom/_/bskyed rdzogs zab mo'i dge chos sdud/_/rnam bzhi'i phrin las gzhan phan spyod/_/sngags kyi cho gas sdom par bgyi/_/lan gsum/_de dag gis dbang gi gzhi 'dzin pa'i sdom pa rgya mtsho mtha' yas pa rgyud la skyes pa la dga' spro bskyed de sdom sems brtan po bzung bas sngar sdom pa ma thob pa la gsar du thob/_thob zin nyams pa rnams sor chud/_gnas pa rnams gong du 'phel zhing dbang gi sdom pa'i rgyun 'dzin pa yin no/__/gnyis pa sta gon dngos la/_dang po skye mched byin gyis brlab pa ni/_las bum gyi chus bsang gtor byas te/_de nas sgo gsum dkyil 'khor gyi lha'i rdo rje gsum gyi ngo bor byin gyis brlab pa'i phyir khyed rang rnams skad cig gis bcom ldan 'das rdo rje sems dpa' dkar po rdo rje dang dril bu 'dzin cing dar dang rin che'i rgyan gyis brgyan pa/_zhabs skyil mo krung gis pad+ma dang zla ba'i gdan la bzhugs pa'i skur gsal ba'i dpral bar oM dkar po/_mgrin par AHdmar po/_thugs kar hU~M mthing gas mtshan par sangs rgyas thams cad kyi sku gsung thugs rdo rje'i rang bzhin du byin gyis brlabs shing brtan par byas pa'i mos pa mdzod/_gnas gsum du dri yi thig le byas pa dang lhan cig_oM AHhU~M/_slar yang mas nas rim bzhin/_hU~M AHoM/_zhes rgyas gdab/_deng nas bzung ste mchod pa'i gnas su gyur cing 'dod yon la sred pas spyad mi dgos par dbang yul lha yi rang bzhin bde stong ye shes 'bar ba'i grogs su nye bar spyod pa mtshon phyir mchod pa'i yo byad rnams kyis mchod cing mnga' dbul bar mos mdzod/_oM badz+ra puSh+pe pra tIts+tsha ye swA hA/_sogs nyer spyod lngas mchod/_'di ltar 'dod pa'i yon tan lnga la longs spyod pa'i dbang shes rnams kyang rigs lnga'i rang bzhin du shes pas gzung 'dzin tha mal gyi zhen rtog dbyings su dag pa'i phyir dbang po'i sgo lngar dri yi thig le bgos te rigs lnga'i sa bon gyis rgyas gdab par mos mdzod/_rna bar trA~M las rna ba'i dbang shes rin chen 'byung ldan dang*/_lce la hrIHlas lce'i dbang shes snang ba mtha' yas/_snying la hU~M las yid kyi dbang shes rdo rje mi bskyod pa/_yan lag bzhi la hrIHlas las kyi dbang po don yod grub pa/_snying gar hA las _grol thig dbang chog tu yan lag bzhir hA/_snying gar oM 'byung bas dpyad dgos/_mchan/_rnam shes kyi dbang po rnam par snang mdzad du gsal bar mos pas sa bon rnams brjod cing dri'i thig le byas pas/_skye mched thams cad de bzhin gshegs pa rigs lnga'i bdag nyid du byin gyis brlabs par mos mdzod/_gnyis pa so shing sbyin pa ni/_'o ma can gyi so shing sor bcu gnyis sam brgyad pa dri bzang gis byugs rtse mor me tog gi phreng ba srad bu dmar pos bcings pa la sngags dang las chus bsang ba slob ma'i grangs dang mnyam pa dang*/_maN+Dal gyi ra ba pad+ma 'dab brgyad mu khyud kyis bskor ba re khA dkar pos bris par tshom bu lnga bkod pa nyer bsdogs byas te/_las sngags bdun brjod pas/_hU~M las byung ba'i so shing slob ma'i lag gnyis mkha' dbyings kyi rgyas bzung zhing*/_rtse mos ljags bzhar rtsa bas so drud pas tshe rabs su bsags pa'i sdig sgrib thams cad dag pa dang rang gi dngos grub ji ltar thob pa'i mtshan ma gsal bar bstan du gsol snyam pas 'di'i rjes zlos dang bcas te mig btsums la dor mdzod/_badz+ra ha sa ha/_de ltar dor bas/_phyogs bzhi dbus dang lngar bab na/_/rigs lnga gang yin dngos grub thob/_/mtshams su phran tshegs steng mkha' spyod/_/'og tu rtse bstan sa spyod dang*/_/rtsa ba rang la bstan pa na/_/lan gsum slar yang bskyar zhing 'phang*/_/g.yas su yo na tshe thar gtong*/_/g.yon du yo na sbyin pa bkye/_/phred gsags mar me brgya rtsa sbar/_/kun ngan sgrub la bar gcod 'byung*/_/bsags sbyang dge ba rlabs chen bya/_/zhes gsungs so/__/gsum pa khyor chu sbyin pa ni/_dung zhal gyi chu ba~M las bdud rtsi'i rgya mtshor bsam la/_oM AHhU~M/_zhes 'bru gsum gyis byin brlabs la/_dri bzang dang sbyar ba'i khyor chu lag g.yas su lan gsum byin te 'thung du bcug pas lus kyi nang thams cad ye shes kyi bdud rtsis gang*/_lhag ma dpung pa g.yas phyogs nas rgyab tu dor bas sgo gsum 'khrul pa'i bag chags dang bcas pa dag par mos/_oM hrIHbi shud+d+ha sarba d+harma pA paM bi shud+d+ha ni tsa s+ya bi shwa d+ha ya sarba bi kalpan+da a pa na ya hU~M/_zhes sngags brjod pas sbyin/_bzhi pa srung skud bcing ba ni/_slob bu'i lus tshad dang mnyam pa'i srad bu dmar po'am kha dog lnga ldan sum lteb tu byas pa rdo rje'i mdud pa gsum bor bar las chus bsang zhing rtsa sngags kyis byin gyis brlabs/_hU~M las skyes pa'i rdo rje'i mdud pa 'di nyid skyes pa'i dpung pa g.yon dang bud med kyi g.yas su nyis rim gyis bcings pas sgo gsum la bar du gcod pa'i tshogs spyi dang khyad par khams 'pho ba'i gegs las srung bar mos shig_/oM sarba bud+d+ha mai tri rak+Sha rak+Sha sarba swA hA/_zhes bzlas la bcings pa la/_rdo rje dang bcas pa'i dri chus mdud pa la rgya gram du reg nas/_oM badz+ra rak+Sha rak+Sha swA hA/_zhes brjod pas lus rdo rje'i go chas zhu lugs su g.yogs pa la rdo rje rgya gram gyi mdo 'dzin res mtshan par sgom mo/__/lnga pa ku sha sbyin pa ni/_ku sha'i phon po che chung la bsang chu 'thor zhing*/_oM badz+ra tIk+Sh+Na d+hI/_oM badz+ra rak+Sha hU~M/_ku sha mi dmigs pa'i ngang las che ba hU~M dang chung ba d+hI las byung ba'i ku sha'i chun po sngo ljang rtsa rtse ma nyams pa rmi lam mi 'khrugs pa'i nus pa can che ba stan gyi don du lag g.yon/_chung ba sngas kyi don du lag g.yas par bsnol nas gtad par mos/_d+hI hU~M/_zhes sa bon gnyis lan bdun brjod la/_oM badz+ra tIk+Sh+Na d+hI/_zhes gtad pas/_hU~M badz+ra tIk+Sh+Na sid+d+hi hU~M/_zhes slob mas blangs te/_'o do nub rmi lam mi 'khrugs pa'i nus pa can gyi ku sha che ba stan dang chung ba sngas su gyis la bla ma dang dkyil 'khor gyi lha tshogs la mos pa rtse gcig pas glo g.yas sar phob la nyol/_nangs par dge mi dge'i rmi lam nga la smros shig_/rjes phyir mi ldog pa'i slad du zab mo'i chos bshad de spro ba bskyed cing gdams ngag brjod pa lags pas 'di la gsan 'tshal/_'jig rten na rnyed par dka' ba me tog u dum wa ra/_de bas kyang sangs rgyas rnyed par dka'/_de bas kyang gsang sngags kyi chos rnyed par dka' ste/_rgyu'i theg par bskal pa grangs med gsum du ngal dub kyi mtha' dang*/_rmongs pa'i sgrib pa phyogs gcig pa nyid gsang sngags thabs mang ba dang*/_dka' ba med pa dang*/_byin rlabs myur ba dang*/_dbang po rnon pos ye shes la spyod pas tshe gcig la sogs par mig 'phrul ltar grol ba'i lam yin te/_'di ltar dkyil 'khor gyi tshon rtsi mthong bas kyang sdig pa'i las ji snyed pa zad par 'gyur na sang nangs par dkyil 'khor chen por zhugs nas smin cing grol ba'i nus pa rgyud la 'jog pa 'og min du mthar lam la zhugs pa dang skal pa mnyam pa yin pas spro ba khyad par can skyed cig_/de dag gis sngon 'gro sta gon gyi bya ba rnams grub pa lags pas dge ba gzhan don du bsngo ba dang*/_dngos gzhi'i dbang bskur sang nyin 'byung ba lags so/__/zhes dge ba bsngos la slob ma rnams gyes/_slob dpon gyis/_dzaHhU~M ba~M hoHsa sta gon gyi ye shes pa nam mkhar bzhugs pa rnams dal la bstims pas byin gyis brlabs par bsam/_bdag bskyed bsdu ldang bsngo smon byas pas grub po/__/sta gon 'di ni lha sngags sogs kha sgyur cung zad byas pas dpal chen 'dus pa dang*/_khrag 'thung rigs bzhi'i sgos bka' la sta gon sbyor na tshul 'di de dag thams cad kyi khyab byed du 'gyur ba'ang zhar la 'phros pa'o/__/gnyis pa dngos gzhi'i las rim la/_dkyil 'khor dang dbang rdzas 'god pa/_dbang don du sgrub cing mchod pa/_bdag nyid 'jug cing slob ma gzhug pa'o/__/dang po ni/_stegs bu'i steng ras bris kyi dkyil 'khor mtshan nyid dang ldan pa bkram/_cis kyang ma 'byor na gong smos ltar 'bru'i tshom bu lha grangs can bkod pa'i dbus many+dzi'i khar sta gon byas pa'i rnam bum bzhag_/shar du rdor dril lhan cig pa/_lhor dbu rgyan/_nub tu rdo rje/_byang du dril bu/_dbus su zhi khro yongs rdzogs kyi lha tsaka_/g.yas su snying thig gi glegs bam/_g.yon du gsang dbang gi rten thod pa rdzas ldan ma dA na dang ga pur bdud rtsi'i phur ma sogs kyis gtams pa dar dmar brgyad lteb kyis bkab pa/_nub tu rig tsaka me long shel rdo rnams dang*/_phyogs gang bder rjes gnang gi chas gdugs/_glegs bam/_dung dkar/_dril bu/_'khor lo rnams dang*/_gzhung mthun sman raka gtor ma/_chu gnyis nyer spyod bcas bskor bsham bya/_las bum/_sngon 'gro'i dkar bgegs/_tshogs kyi yo byad/_bka' srung dang chad brtan gyi gtor ma/_mig dar/_me tog_/dor ra pad+ma 'dab bzhi dbus dang bcas la rigs lnga'i phyag mtshan bris pa/_phyag shing*/_gul yungs/_byin 'bebs kyi bdug rdzas dang*/_rol mo'i rigs bcas spyi ltar tshogs par bya'o/__/gnyis pa ni/_gsol 'debs sngon du 'gro bas zhi khro ngan song sbyong ba'i las byang bzhin bdag mdun dam tshig gi 'khor lo bsgom/_ye shes pa spyan drangs bstims phyag mchod bstod pa bcas gzhung ltar dang*/_zhi ba dang khro bo'i bsnyen pa ci mang dang*/_las sbyor rtsa rig de'i bcu cha bcas bzla/_bum bzlas la grub na lha gsal 'debs bum pa sta gon gyi skabs bzhin dang*/_yang na mdun bskyed kyi snang cha me long du gzugs brnyan shar ba bzhin bum par skad cig gis bskyed de/_bdag gi thugs ka nas spros pa'i 'od zer gzungs thag la 'khril te song*/_rnam rgyal bum pa mtshan nyid tshang ba'i nang gzhal med khang gi rnam par rdzogs pa'i brten pa'i lha tshogs thams cad kyi thugs rgyud bskul so so'i thugs kar a yig re re dang*/_gtso bo rnam snang gi thugs kar zla gdan la A li kA li'i phreng ba g.yas su 'khor ba las 'phros pa'i 'od zer gyis lha tshogs rnams bskul/_bde ba'i sgra dang bcas snyoms par zhugs pa'i sbyor mtshams nas bdud rtsi'i rgyun bab bum pa'i chu dang 'dres pas slob ma'i sdig sgrib sbyong ba'i nus ldan du gyur par bsam la/_oM hU~M trA~M hrIHAHsa 'go drangs pa'i dbyangs gsal mthar/_sarba pA paM shin+taM ku ru swA hA/_zhes btags pa ci nus dang*/_las bum la dmigs pa'i sngags dang*/_a b+hi She ka'ang cung zad bzla/_mdun bskyed la yig brgya'i bzlas pa brgya rtsa brgyad las mi nyung bar grub nas/_las byang ltar mchod bstod dang*/_oM AHhU~M gis mchod yon phul te 'od zhu bya ba dbang gi spyi don dang*/_zhi khro'i cho ga gnyis ka las gsungs pas gang 'grub bya/_tshogs bsags/_skong bshags/_tshogs mchod/_bsgral bstab bcas mthar chags su btang ngo*/__/gsum pa la gnyis las dang po bdag nyid 'jug pa ni/_bdag 'jug gi cho ga ni tshogs gnyis spel ba dang*/_dam tshig nyams chag gso zhing rgyud dag pas/_lam 'bras kyi thob bya'i rten 'brel rnams rgyud la 'jog pa'i dgos pa du ma dang ldan pas dbang gi cho ga las byung ba ltar grub na shin tu legs shing*/_mi nus na lha bdag rang bzhin dbyer med du shes pas rig pa'i me tog dor bas kyang rung ba snga 'gyur gyi rgyud sde sgyu 'phrul drwa ba nas byung ba ltar rig 'dzin brgyud pa'i phyag bzhes su'ang mdzad pas na/_oM badz+ra sa ma ya oM/_AHbadz+ra sa ma ya AH_hU~M badz+ra sa ma ya hU~M/_swA badz+ra sa ma ya swA/_hA badz+ra sa ma ya hA/_zhes dang*/_oM badz+ra kro d+ha sa ma ya s+t+waM/_zhes rig pa'i me tog dor bas/_bdag dang dkyil 'khor pa'i sku gsung thugs yon tan phrin las rnams gnyis su med par gyur par bsam la/_oM/_ye shes rgyal po sku gsung thugs/_/yon tan phrin las rmad po che/_/de nyid du ni mnyam sbyor ba'i/_/phyag rgya chen por bdag sbyor cig_/oM badz+ra sa ma ya hU~M/_oM badz+ra sa ma ya s+t+waM/_oM badz+ra sa ma ya hoH_zhes dang*/_oM/_khro la khros pas zhi mdzad pa/_/thugs rje khro dpal rngams pa'i tshogs/_/'bar ba'i byin rlabs rmad po che/_/da lta nyid du bdag la stsol/_/oM badz+ra kro d+ha sa ma ya s+t+waM/_oM badz+ra kro d+ha sa ma ya phaT/_oM kro d+ha sa ma ya hoH_zhes dngos grub bskul zhing bstim mo/__/gzhan rjes su 'dzin pa dang 'brel na/_dkyil 'khor gyi lha la thal mo sbyar bas btud de/_oM/_rdo rje'i ye shes thob byed pa/_/de bzhin gshegs pa thams cad kyi/_/snying po'i dkyil 'khor chen po 'dir/_/bdag gis slob ma 'jug par 'tshal/_/zhes gsol nas slob ma 'jug par gnang ba zhu/_gnyis pa slob ma rjes 'dzin la dkyil 'khor du 'jug pa dang*/_dbang gis smin par bya ba gnyis las/_dang po dkyil 'khor du 'jug pa la'ang phyi nang gi 'jug pa gnyis las snga ma la bdun las/_dang po sgo srung zhu bskul ni/_dkyil 'khor yol bas bsgribs/_sta gon byas pa'i slob ma rnams sgo'i phyi rol du las bum gyi chus khrus byas/_sngon chad gnyis 'dzin ma rig pas ldong ste dkyil 'khor ma mjal ba'i brdar mig dar 'ching mdzod/_tsak+Shu b+han+d+ha wa ra ma na ye swA hA/_sngags don yid la mchog tu bya ba'i phyir mig dar 'ching*/_zhes so/_mchan/_dkyil 'khor gyi lha dang phyag stong par mjal du mi rung bas phyag rten du u dum wa ra'i me tog gi phreng ba kha dog dmar po re byin par mos/_a snang mtha'/_khaM don grub/_wi rnam snang*/_ra rin 'byung*/_hU~M mi bskyod pa ste sngags don nam mkha'i dpa' bo/_mchan/_me tog lag tu gtad/_de yang khyed rang rnams mtshan ma'i dkyil 'khor gyi khang pa'i phyi rol nas 'jug pa yin kyang 'dir dkyil 'khor yol bas chod pa rgyu mthun du bya ba yin pas phyag thal mo sbyar te sgo srung pho nya'i tshogs la dkyil 'khor du 'jug par gsol ba 'debs pa 'di'i rjes zlos mdzod/_kyai/_khro bo mi bzad 'jigs pa'i sku/_/mtshon cha sna tshogs phyag na bsnams/_/bdag cag 'khor ba las grol phyir/_/khyed kyis gnang ste btang du gsol/_zhes gsol ba btab pa la dkyil 'khor chen po 'dir skal med rnams lta bar mi rung bas/_rigs dang skal pa 'dri ba 'di la gsan pas khyab par gda'/_khyed rnams su yin ci la dga'/_/las dang skal pa ldan nam ci/_/zhes dris pa la de lta bu'i snod kyi skyon dang ldan pa ma lags shing rigs dang skal pa ldan pa yin pas thugs brtse bas dgongs nas 'jug par gsol ba 'debs pa 'di'i rjes zlos mdzod/_bla ma rdo rje 'dzin pa dang*/_/dkyil 'khor lha tshogs spangs nas ni/_/skyob pa gzhan na ma mchis pas/_/sgo phye thar pa'i grong bstan 'tshal/_/lan gsum/_zhes gsol ba la/_khyed ni snod mchog dam pa ste/_/khyed 'dod pa ni bdag gis sbyin/_/spro ba bskyed la nang du shog_/de ltar gnang ba nod pas lhag pa'i bsam pa brtan pos 'khod pa'i mos pa mdzod/_ces brjod cing nang du btang*/_gnyis pa bgegs bsal lo rgyus chos bshad ni/_bgegs gtor btang la bka' sgo drag sngags gul yungs rol mo bcas pas bgegs bskrad/_srung 'khor bsgom/_gral du 'khod nas me tog bkye bsdu bya/_nam mkha' dang mnyam pa'i sems can thams cad kyi don du sems bskyed de gsan 'tshal/_de la rang cag rnams kyi mi lus khyad par can 'di lta bu slan chad rnyed par dka' zhing*/_chos sgrub pa'i rten dal 'byor tshang ba 'ba' zhig la ltos dgos pa'ang*/_'phral 'byung gi rkyen brgyad dang*/_ris chad kyi blo brgyad kyis yud tsam yang mi khom par 'gyur zhing*/_las mtha' log pa'i rigs la ltos na 'byor pa bcu yang 'du 'bral dang bcas pas yon tan thams cad tshogs pa'i mi lus rin po che yin par dka' zhing*/_spyi mthun du skyes pa'i nangs par nas 'chi ba'i pho nya dang 'grogs pa/_'byor rgud dang bde sdug sna tshogs pa'i rten 'brel tshogs pa las gzhan dbang can du 'gyur ba dang*/_khyab pa 'du byed kyi sdug bsngal bltar mi mngon pa dang 'grogs pas mtho ris kyi bde 'bras ni/_rtswa rtse'i zil pa lta bu shin tu yid brtan mi rung ba yin pas/_nges 'byung gi blo khyad par can gyis bskul te thar pa dang thams cad mkhyen pa sgrub pa'i thabs la 'bad dgos/_de la sangs rgyas rnams ni thugs rje tshad med pas sems can yal bar mi 'dor zhing*/_phrin las tshad med pas gdul bya'i khams dang dbang po dang bsam pa la 'tsham pa'i chos sgo ji snyed gsungs pa rnams kyi nang nas mchog tu gyur pa ni 'bras bu'i theg pa yin te/_de'i chos 'khor gyi grangs nges dang rnam dbye bsam par mi nus kyang*/_gangs can pa rnams kyis 'gyur gyi bye brag las gsar rnying du sgro btags pa'i rdo rje theg pa snga 'gyur la mdo sgyu sems gsum gyi grub pa'i mtha' chen po gsum du yod pa las/_'di ni sems phyogs kyi grub mtha' gtso bor bton pas rdzogs pa chen po klong chen snying thig ces grags pa/_nang gses kyi dbang du na/_sngags 'og ma ltar khams kyi dri ma blang dor dang bcas pa'i ngal dub kyis sbyong ba ma yin yang snang grags rig pa'i cho 'phrul du mngon par byang chub pa dpal ldan sgyu 'phrul drwa ba'i snying po dpal chen zhal lung dang he ru ka 'dus pa'i bskyed rim/_dag pa'i snod bcud kyang 'pho med bde ba chen po'i ye shes gzhan du mi 'gyur ba a nu'i mdo lung gi snying po rigs brgya rig 'dzin gyi bskyed rdzogs rgyud lung gab byang dang bcas pa/_rgyu rkyen dang rtsol sgrub la mi ltos pa phyi sems sde/_sku gsum rang chas kyi dbyings las mi 'gyur ba nang klong sde/_mngon sum rang gnas su ston pa gsang ba man ngag gi sde/_gnad las gnad du bsdus pa yid dpyod dang 'bras bu phyi dus la ltos mi 'cha' ba yang gsang bla na med pa'i sde ste sems phyogs rgya mtsho'i snying po kun tu bzang po ye shes klong gi rgyud la sogs pa'i man ngag gi thus ka tshang la ma nor bar ston pa/_de nyid kyang rgyud don dang 'brel bas bde bar gshegs pa'i bka' tshad ma/_rdo rje 'dzin pa brgyud ldan las thos pas man ngag tshad ma/_rnal 'byor dbang phyug gi nyams myong tshad ma/_rten cing 'brel 'byung gi lo rgyus tshad ma/_bka' ma dang 'brel bas dbang gi chu bo ma nub pa/_byin rlabs kyi brgyud pa ma nyams pa/_man ngag gi sna kha ma log pa dag la ma brten na/_zab mor btags pa tsam las yang dag dang ltar snang gang yin ma 'tshal ba'i rmongs pa lam nor bas ngal ba 'bras med du 'gyur la/_de'i phyir gter lung las/_rgyal ba dgongs pa nyid kyi tshul/_/dgongs pa bab pa dbang gi mchog_/ces gdod ma'i mgon po sras dang bcas pas chos kyi bdag po la dgongs pas gnas lugs chos skur rtogs pa'i dbang thob/_brda dang brda mtshon go ba ni/_/dbang gi nang nas dbang bka'o/_/zhes pa ltar ye shes kyi mkha' 'gro mas brda bsgyur gyi shog ser dbyibs dang rnam pa thams cad pa byin/_rdzogs pa'i sangs rgyas dri med 'od zer dngos dang zhal mjal te snyan brgyud kyi pha phog bstsal ba'i brgyud pa gsum ldan gyi steng*/_gong 'og gi bdag po rnam gnyis la sogs te/_sngon gyi dus na byon pa'i lam ston chen po rnams kyis bzhed pa bzhin rgyud sde bka' ma dang*/_sgrub sde bka' brgyad la sogs pa'i dbang gi chu bo ma nub pa'ang gsan cing byin rlabs kyi brgyud pa 'dres par mdzad nas/_ji skad du sdud pa las/_rgyal ba'i nyan thos pa dag ji snyed chos ston dang*/_/'chad dang rig pa dag dang ldan par brjod pa dang*/_/mchog 'phags bde ba byed dang de yi 'bras thob pa/_/de dag kun kyang de bzhin gshegs pa'i skyes bu'i mthu/_/zhes pa la sogs pa dang gzhan du byang chub sems dpa' bsam pa rnam par dag pa la ni rang nyid kyi spyod pa nyid las/_man ngag dang rjes su bstan pa thams cad 'byung ngo*/_zhes pa ltar rgyal ba'i ye shes rnam pa thams cad pas dgongs shing mkha' 'gro'i gsang mdzod la mnga' dbang bsgyur bar byin gyis brlabs pa dang rjes su gnang bas bka' rtsod pa med cing*/_sangs rgyas gnyis pa slob dpon chen po'i zhal nas gsungs pa'i bkar bsnyon med du grub pa la zab mo gter gyi ring lugs ma nor ba zhes bya ste/_mchog gzigs kyi brgyud pa ma chad pa dang*/_nyams pa dang 'dres khyer gyis bar ma chod pa dang*/_tshig la grim pa'i slob pa so so'i skye bos bslad pa ma song bas byin rlabs che zhing sgrub thag nye ba yin no/__/de lta bu'i sngags kyi myur lam la'ang dbang*/_bskyed rim/_rdzogs rim/_bshad pa ste snga 'gyur bka' bab chu bo bzhi'i zhal lung dang ldan pa las deng rim pa dbang gi cho ga las/_spyir 'di yan chad snying thig spyi'i dbang bshad la 'jug pas skabs su gang bab 'phrul shes par bya/_dmigs bsal/_'dir zhi khro'i dkyil 'khor chen por smin par bya ba skabs su bab pa yin la/_'di ni spyi sgos sngags kyi sgor zhugs pa'i rnal 'byor pa rnams kyi nyams chag skong zhing rtog sgrib sbyong ba dang*/_sems can thams cad ngan song gi sdug bsngal las drangs nas bla na med pa'i dngos grub kyi skal pa can du byed pa'i thabs mchog rmad du byung ba rnal 'byor gyi spyi khrus zhi khro na raka dong sprugs mtshams med lnga sbyong ba zhes grags pa ste/_'gyod tshangs kyi rgyal po 'di sngon 'dod khams kyi gnas 'dir bram ze dung gi phreng ba can zhes bya ba rig pa'i gnas lnga la byang ba zhig la slob ma rgyal po'i bu zhig yod pa des slob sbyong rnams mthar phyin pa na/_da nga'i gong na slob dpon 'di tsam du zad pas med par bya snyam nas tho brtsams pa slob dpon gyis kyang shes nas zhe sdang gis dmod bor te/_grongs nas gnyis ka ngan song du skyes pa la/_rgyal ba rnams kyis zhi khro na raka dong sprugs kyi lha sngags bstan pas grol te rim gyis rig 'dzin gyi sa la bkod pa nyid la bka' gter dag snang gi babs so rgyas bsdus mi 'dra ba du ma zhig bzhugs pa las 'di ni kun mkhyen rig 'dzin 'jigs med gling pa'i dgongs gter nam mkha' mdzod kyi chos sde las byon pa ste/_gzhung rtsa ba las/_bi ma la dang gsang zhabs sogs:_paN grub rnams la grags pa yi:_zhi khro khrom dkrug ces bya ba'i:_snga 'gyur bka' ma'i gzhung bzang po:_dngos la ming btags mthu che ba:_nub la nye ba ma bzod de:_na raka dong sprugs gang yin pa'i:_dngos don 'khrul pa med par bsdebs:_bka' gter zung du 'jug pa la:_pad+ma'i ring lugs zhes su grags:_'gro kun chos kyi mig ldan pas:_yang dag lam la 'jug par shog:_ces gsungs pa ltar bskyed pa ma hA yo ga la rgya che ba rgyud sde dang*/_zab pa sgrub sde gnyis las snga ma la sku gsung thugs yon tan phrin las lnga'i rtsa bar gyur pa'i rgyud sde lnga/_sgrub pa lag len du ston pa rol pa'i rgyud sde la sogs lnga/_spyod pa yan lag tu 'gro ba'i rgyud sde lnga/_ma tshang ba kha skong ba'i rgyud sde gnyis/_de thams cad kyi khyab byed rtsa ba'i spyi rgyud rdo rje sems dpa' sgyu 'phrul drwa ba gsang ba'i snying po ste tan+t+ra chen po sde bco brgyad du grags pa las/_dpal rdo rje sems dpa' sgyu 'phrul drwa ba zhi khro so so'i dbang*/_rgyud bshad sku'i rgyud sangs rgyas mnyam sbyor sogs rigs bsdus pa'i dbang*/_spyod pa yan lag tu 'gro ba'i rgyud sde'i nang tshan glang chen rab 'bog gi dum bu dri med bshags pa'i rgyud kyi rjes su 'brang ba'i zhi khro khrom dkrug dang*/_cha mthun yi ge brgya pa dbang chog rgyal po'i rgyud sogs la brten pa'i zhi khro rigs 'dus kyi dbang sogs bzhugs pa las 'di ni sngon ma yo ga rnam pa gsum ka la 'jug cing a nu yo ga dang rjes su 'brel ba ste/_dbang gzhung las/_dag pa'i snod bcud kyang 'pho med bde ba chen po'i ye shes gzhan du mi 'gyur ba a nu'i mdo lung gi snying po rigs brgya dang rig 'dzin gyi bskyed rdzogs rgyud lung gab byang dang bcas pa/_zhes gsungs pa'i snga ma zhi khro khrom dkrug ngan song sbyong ba'i cho ga'i dngos gzhi'i dbang bskur ba sbyin pa ste/_de la bdag nyid slob dpon gyi bgyi 'os rnams grub/_khyed rang slob ma'i ngo skal la dkyil 'khor du 'jug pa'i rim pa dang*/_zhugs nas mngon par dbang bskur ba gnyis las thog mar 'jug pa'i chos rnams zhu ba'i yon du maN+Dal phul/_gsum pa skyabs sems sdom pa bzung ba ni/_rdo rje theg pa'i dkyil 'khor du 'jug cing dbang bzhi rdzogs par nod pa la thun mong dang khyad par gyi sdom pa sngon du bzung ba gal che bas nyan rang dang thun mong gi lam gyi rmang rdo skyabs 'gro/_theg chen dang gsang sngags kyi khyad chos byang chub sems bskyed pa ste/_de dag gi sdom pa thun mong du bzung ba'i phyir mdun gyi nam mkhar dus gsum rgyal ba sras bcas skyabs gsum kun 'dus su bzhugs pa la/_'khor ba la 'jigs pa/_dkon mchog la dad pa/_sems can la snying rje'i kun slong gsum dang ldan pas skyabs yul rnams dpang por bcol te rgyal ba sras bcas kyi mdzad pa'i rjes su slob snyam pas rjes zlos lan gsum mdzod/_e ma dus gsum rgyal ba kun tu bzang*/_/rigs lnga'i sangs rgyas dgongs su gsol/_/'di bzung byang chub ma thob bar/_/sogs nas/_sngags kyi cho gas bsdam par bgyi/_/zhes pa'i bar sta gon bzhin bya/_bzhi pa rdo rje'i rnal 'byor du sems bskyed pa ni/_gsang sngags kyi thams cad rnal 'byor du sems bskyed pa ste/_khyed rang rnams kyi snying gar sems can thams cad kyi don du sangs rgyas sgrub pa'i blo bcos min de nyid kun rdzob byang chub sems kyi ngo bo zla ba'i dkyil 'khor gyi steng du/_don dam byang chub sems kyi rang bzhin rdo rje dkar po rtse lnga pa 'od dang 'od zer 'bar ba res mtshan par mos la bden gnyis dbyer med du sems bskyed pa 'di'i rjes zlos kyis/_oM sarba yo ga tsit+ta u pa da ya mi/_lan gsum/_lnga pa dam la bzhag pa ni/_rigs kyi bu khyod sngags bla med kyi dkyil 'khor du zhugs nas mchog tu gsang ba'i rang byung gi ye shes bskyed par bya la/_de'i srog tu gyur pa dam tshig srung dgos pas rdo rje bdud rtsi'i mna' chu 'di nyid byin pas dam tshig nyams na dngos grub thob pa'i skabs med cing sdig pa mgo dgur gyur nas snying khrag 'jibs te/_'di dang phyi mar sdug bsngal du mas tshar gcod pas dmyal ba'i chu zhes bya zhing*/_bsrungs na ye shes sems dpar gyur nas 'di phyi'i phan bde ma lus pa'i 'byung gnas su 'gyur bas bdud rtsi ste/_dam tshig dang sdom pa rgya mtsho srung ba'i phan yon/_'das pa'i nyes dmigs/_de len pa'i yul slob dpon dang bcas bka' gnyan pa'i khe nyen chen po gnyis su yod par shes pas bdud rtsi 'di nyid lce la bzhag kyang 'bab pa snying dbus su thim par mos la/_nang mchod byin la/_'di ni khyod kyi dam tshig chu/_/dam tshig nyams na sreg par byed/_/bsrungs na dngos grub thams cad thob/_/dam tshig bdud rtsi'i chu 'di 'thungs/_/sa ma ya i dan na ra kan/_drug pa rigs lnga'i sdom bzung ni/_dbang 'di thob pa dkyil 'khor gyi bya bas thob kyang*/_dbang srog 'dzin pa dam tshig dang sdom pas 'dzin dgos pas rdo rje theg pa'i dam tshig dbye bsdu thams cad rigs lnga'i dam tshig la 'du bas na thun min sngags kyi rigs lnga'i sdom pa dang dam tshig rtsa ba sku gsung thugs/_spyi dang khyad par lhag pa'i dam tshig rnams srog la bab kyang mi gtong snyam pas 'di'i rjes zlos mdzod/_sangs rgyas rigs kyi dam tshig tu/_/rgyal sras sangs rgyas thams cad dang*/_/dpa' bo rnal 'byor ma rnams bsnyen/_/rdo rje rigs kyi dam tshig tu/_/rdo rje dril bu'i phyag rgya dang*/_/byang chub sems ni spang mi bya/_/rin chen rigs kyi dam tshig tu/_/sbyin pa rnam bzhi rtag tu sbyin/_pad+ma rigs kyi dam tshig tu/_/theg pa gsum dang chos rnams bshad/_/las kyi rigs kyi dam tshig tu/_/'gro ba'i don la brtson par bya/_/lha yi phyag rgya bla ma'i stan/_/bzhon pa la sogs mi smad cing*/_/bstan pa skyong rnams brnyas mi bya/_/bla ma sangs rgyas dran byed cing*/_/brtan g.yo lha dang mnyam par sbyor/_/mdor na rgyal bas gang bsgrags pa/_/de dag thams cad bdag gis bzung*/_/lan gsum/_spyir sta gon gyi sdom bzung nas dam tshig srung bar dbang zhing*/_dngos bstan bskyed rdzogs thun mong ba'i bye brag gi dam tshig rnams rigs nges par khas blang ba'i cho gas thob pa zhes brjod la/_khyad par rim gnyis so so'i sngags sdom rnams dbang bzhi rang rang gi rjes thog tu so so'i sa bon rgyud la thebs pa dang*/_lhan cig thob pa'i phyir sngags sdom rdzogs par thob dus ni dbang bzhi pa'i mthar thug kho na la ltos dgos shing*/_mtshungs ldan gyi sdom pa la gnas dgos pa'i phyir skye bo rang ga dang nad gdon gyis mnar ba'i rkyen sel dang sgrib sbyong la sdom pa khyad par ba dag mi 'bog cing*/_mchog dbang gong ma rnams mi bskur ba gsar rnying gi rgyud dang mkhas grub chen po rnams kyis dgongs pa yin pas so mtshams 'byed pa gal che gsungs so/__/bdun pa dkyil 'khor du 'jug pa ni/_de nas lha dang skal pa mnyam pa'i phyir dkyil 'khor du 'jug pa yin pas 'di'i rjes zlos mdzod/_kyai/_rigs lnga bde bar gshegs pa dang*/_/bla ma yi dam mkha' 'gro dgongs/_/sgo ba chen po khyed rnams kyis/_/sgo phye thar pa'i grong bstan 'tshal/_/lan gsum/_zhes gsol bas dkyil 'khor gyi sgo shag gis phyes par mos shig_/bla mas/_a khaM wi ra hU~M dang dbye rgya bcas yol ba bsal/_'dus pa dkyil 'khor chen por 'jug pa'i tshe bla mas brjod pa'i sngags su gsungs/_mchan/_gtso bo'i thugs ka nas byung ba'i las kyi rdo rje'i phyag la 'jus te shar sgo nas bzung rim par g.yas bskor gyis sgo bzhir zhugs shing lha tshogs rnams kyi sku gsung thugs la phyag 'tshal ba'i mos pas thal mo gnas gsum du sbyor la sngags 'di'i rjes zlos mdzod/_oM na ma te hU~M/_oM na ma me hU~M/_oM na mo na ma hU~M/_lan bzhi brjod do/__/gnyis pa nang 'jug la bzhi las/_dang po ye shes pa dbab pa ni/_de nas dbang gi gzhi 'god cing ye shes lha'i gzi byin dbab pa'i slad du slob dpon dang dkyil 'khor gyi bdag po gnyis su med pa'i sras su bya ba'i phyir/_khyed rang rnams lus gnad drang por bsrang*/_ngag gi rlung kha sbyor du 'ching*/_yid rnam par mi rtog pa'i ngang nas dmigs pa 'di bzhin du mdzod/_khyed rang rnams slar yang gtso bo'i mdun thad shar sgo'i dbang stegs la 'khod pas dkyil 'khor gyi bdag po'i thugs ka nas 'od zer byung*/_slob ma'i rnam smin gyi phung po sbyangs/_rnam par shes pa hU~M du gyur pa yab kyi zhal du drangs/_rjes su chags pa'i ye shes kyis bskul te yum gyi pad+mor lhung*/_sras kyi tshul du gtso bo'i rnam pa gnyis pa zhig byung ba sngar gyi dbang stegs su _lugs 'di'i dbang chog phal cher du slob ma lhar bskyed rgyas pa mi 'byung yang gsang ba spyi'i 'gros ltar legs snyam bkod pa mkhyen ldan rnams kyis 'os min dpyad par zhu/_mchan/_seng khri pad zla'i gdan la 'khod pa/_dbang bzhi'i snod du rung phyir snod rnam par dag pa 'og min rdo rje dbyings kyi dkyil 'khor gyi 'khor lor rdzogs pa la/_bcud rnam par dag pa khyed rang gi tha mal gyi phung khams skye mched skad cig gis rang bzhin gzhi'i kun tu bzang po mthing ga yab yum mnyam sbyor rdo rje'i skyil krung mnyam gzhag gis mtshan pa'i thugs ye shes chen po'i klong du zhi ba bzhi bcu rtsa gnyis/_de dag gi sku'i gsal snang las spyi bo'i dung khang du ye shes bskal pa'i me dpung rab tu 'khrugs pa'i klong na 'bar ba khrag 'thung lnga bcu rtsa brgyad kyi tshom bu'i dkyil 'khor snang la rang bzhin med pa me long gi gzugs brnyan ltar gsal ba'i gnas gsum du phyag mtshan gsum dang*/_yi ge gsum gyis mtshan pa las 'od zer 'phros pas rgyud rnam par dag pa ye shes lha'i gzi byin dbab pa'i slad du phyogs bcu dus bzhi'i sangs rgyas dang byang chub sems dpa' thams cad bcom ldan 'das zhi khro rab 'byams kyi dkyil 'khor lha'i sku phyag rgya gsung yig 'bru thugs phyag mtshan gyi rnam par byon nas rang nyid dam tshig sems dpar gsal ba la ye shes kyi 'khor lo bye tshan la kha ba bab pa ltar snying nang du sib sib thim par bsam la/_bdud rtsi lngas sbags pa'i gzhon nu ma'i rak+ta/_sha chen/_gu gul/_byi la nag po'i brun/_klad chen/_ra'i nywa bzhi'i sha/_rang gi skra rnams thod pa'i snod du sol chen gyi me la bsregs pa'i 'bebs rdzas bdug_/thod rnga dang dril bu myur dal spel ba sogs rol mo'i sgra dang dbyangs kyis bskul te/_hU~M/_'phags mchog thugs rjes dus la bab/_/khyad par bstan pa'i dus la bab/_/mthu rtsal dbyung ba'i dus la bab/_/byin gyis rlobs pa'i dus la bab/_/dbang mchog bskur ba'i dus la bab/_/dngos grub stsol ba'i dus la bab/_/mthu chen bdud 'dul bcom ldan 'das/_/byin chen byin phob bcom ldan 'das/_/dbang chen dbang bskur bcom ldan 'das/_/dngos grub mchog stsol bcom ldan 'das/_/bdag cag las 'bras mchis par mdzod/_oM bo d+hi tsit+ta ma hA su kha dz+nyA na d+hA tu AHhU~M/_/oM ru lu ru lu hU~M b+h+yo hU~M phaT/_dz+nyA na a be sha ya a be sha ya/_s+t+wam+b+ha ya s+t+wam+b+ha ya/_ra ra ra ra/_tsa la ya tsa la ya/_hU~M a ha dz+haiM/_zhes drag tu bzlas la dbab pas/_lus ngag yid la phebs pa'i rtags/_/'dar zhing 'phar g.yo saM skr-i ta'i/_/brda skad glu len ngu ba dang*/_/bde gsal mi rtog lhag pa'i ltas/_/zhes gsungs/_des ma phebs na spog pa'i cho ga ni/_khyed rang rnams lus rdo rje rtse gsum pa'i 'dug stangs kyis rlung lte bar bskyil la slar yang dmigs pa 'di ltar bsgom/_rang gi snying gar zla ba'i dkyil 'khor la gnas pa'i g.yung drung dmar po'i lte bar ba~M dang*/_yan lag bzhi la ha ri ni sa las mkha' 'gro sde lngar gsal ba chi li li 'khor ba la shes pa drag tu gtod la dbyings rig dbyer med kyi ngang du mnyam par zhog cig_/hU~M a ral+li phaiM gyi glu dang lta bas gcun/_phebs rtags byung na rtsol med du bskyang du gzhug_/de ni dbang don rgyud la 'jog pa'i rten 'brel gyi rtsa ba lta bu yin pas nan tan du gces par gsungs/_byin dbab pa'i ye shes pa rnams rdo rje'i chos bdun gyi rnam rol du brtan par gyur cig_/tiSh+Tha badz+ras spyi bor rdo rje rgya gram du bzhag_/gnyis pa me tog 'dor ba ni/_me tog 'dor ra'i dkyil 'khor 'du byas la/_khyed rnams la sngar byin pa'i me tog de nyid rigs lnga la gtso 'khor rang rgyud pa'i bzang ngan gyi dbye bsal ma mchis na'ang rang dang las kyi 'brel pa gang la yod pa'i lhag pa'i lha mchog des bdag gi rigs kyi me tog 'di bzhes su gsol snyam pas 'di'i rjes zlos dang lhan cig 'dor bar zhu/_kyai/_bde gshegs rigs lnga'i pho brang 'dir/_/'brel ba'i me tog 'di dor bas/_/las 'phro gang yod lha dang mjal bar shog_/oM puSh+pe sid+d+hi hU~M/_zhes dor bas gang la bab pa'i rigs ngos bzung*/_phyi rol du lhung na slar yang bskyar te brtags par gsungs/_de ltar dor ba'i me tog dbus su bab na bde bar gshegs pa'i rigs kyi gtso bo rnam snang*/_shar du rdo rje mi bskyod pa/_lho ru rin chen 'byung ldan/_nub tu pad+ma snang mtha'/_byang du las kyi rigs don yod grub pa'i rigs yin pas gang la bab pa nyid lhag pa'i lhar zungs shig_/thog mar dpal dang*/_tha mar rdo rje yod pa'i rigs dang mthun pa'i gsang mtshan so so'am/_gtso bo'i mtshan las byung ba'i spyi la gdags/_me tog gang la phog pa'i lha de slob ma la gtad pa'i don du me tog gi phreng ba dbang rtags cod pan gyi tshul du spyi bor bcings bas bde stong gi ye shes khyad par can rgyud la skyes par mos mdzod/_pra tI g+h+rI ha na i maM satwa ma hA ba la/_gsum pa mig dbye ba ni/_rigs kyi bu mtshon pa brda'i sgo nas mig dbye bas ma rig pa'i ling tog bsal te dag pa ye shes kyi spyan gsar du thob pas ye shes rang snang gi lha dang dkyil 'khor mngon sum du mjal ba'i mos pa mdzod/_ston pa rigs lnga'i sangs rgyas kyis/_/khyed kyi ma rig 'khor ba'i mig_/ye shes spyan du dbye ba ltar/_/de bzhin khyed kyis 'gro ba rnams/_/ye shes spyan du 'byed par shog_/tsak+Shu pra we sha ya phaT/_zhes gdong g.yogs bsal/_bzhi pa dkyil 'khor bstan pa ni/_phyag shing gis mtshon la/_de ltar rnam dag ye shes kyi spyan gsar du thob pa la dkyil 'khor bstan cing spro ba bskyed pa lags te/_e ma skal ldan rigs kyi bu/_/khyed ni sdig pa kun las grol/_/dkyil 'khor chen po 'di la ltos/_/lus ngag yid kyis dad pa bskyed/_/dngos grub mtha' dag khyed kyis thob/_/dam tshig sngags la brtson par gyis/_/kye rigs kyi bu byang chub phyogs kyi chos sum cu rtsa bdun la sogs pa'i sangs rgyas kyi sku dang ye shes/_brda don rtags kyis mtshon pa'i mtshon byed dpe yi dkyil 'khor phyi ltar rdul tshon nam/_ras bris 'di ni 'byung ba rim lnga brtsegs pa'i steng du 'og min lhun gyis grub pa'i gzhal med khang shin tu nyams dga' ba/_phyi mchod rten gyi rang bzhin rtse lnga pa nang rang byung rdo rje'i gzhal yas khang phyi gsal nang gsal/_rgya khyon dang bkod pa bsam gyis mi khyab pa'i mtha' bskor du mchod rten shing me chu sprin grub pa'i rig 'dzin zhing skyong gi mkha' 'gro ma la sogs pa rnam pa brgyad kyis mtshan pa'i dur khrod brgyad/_mtha' bskor du rdo rje'i rwa ba ye shes kyi me dpung*/_dbus su dag chen ye shes kyi rol pa thar pa chen po'i gzhal med khang gru bzhi sgo bzhi glo 'bur dang bcas pa/_rgyu 'bras kyi rta bab brgyad dang ldan zhing*/_gzhal yas khang gi dbus su 'khor lo rtsibs bzhi pa'i lte bar pad+ma 'dab bzhi/_'dab brgyad/_bcu drug_/sum cu rtsa gnyis/_bzhi bcu rnams kyi dbus su seng ge'i khri dang pad zla nyi ma'i gdan la dkyil 'khor 'khor lo'i dbang phyug bcom ldan 'das rdo rje sems dpa' sku mdog mthing ga mthing dkar dmar ba'i zhal gsum/_phyag drug gis rdo rje 'khor lo/_rin po che/_dril bu/_pad+ma/_ral gri 'dzin pa/_yum dbyings phyug ma g.yas dril bu dang g.yon rdo rje thugs kar 'dzin pa dang sbyor ba/_de'i phyi rol gyi rtsibs bzhi la mi bskyod pa dang*/_rdo rje dbyings kyi dbang phyug ma sngon mo/_kun tu bzang po dang bzang mo mthing ga_/de'i phyi rol gyi pad 'dab brgyad la rnam snang dang spyan ma dkar mo/_rin 'byung dang mA ki ser mo/_snang mtha' dang gos dkar dmar mo/_don grub dang sgrol ma ljang gu rnams rang rtags kyi khri lnga brtsegs pa dang rigs kyi phyag mtshan can/_de'i phyi rol pad 'dab bcu drug la sems dpa' brgyad dang sems ma brgyad/_de'i phyi rol 'dab ma so gnyis la sgo ba khro bo yab yum/_thub pa drug_/che mchog rigs lnga yab yum/_gnas kyi ma mo brgyad/_de'i phyi rol gyi pad 'dab bzhi bcu la yul gyi ma mo brgyad/_gdong can bzhi/_dbang phyug ma nyi shu rtsa brgyad de zhi khro rab 'byams rgyal ba'i dkyil 'khor rang rigs kyi sku mdog phyag mtshan rgyan cha lugs rnam 'gyur ma 'dres pa yongs su rdzogs pa/_bar mtshams rnams su rtsa gsum chos srung rgya mtsho'i tshogs rnams nyi ma dang 'od zer gyi tshul du sgyu 'phrul drwa ba'i ye shes kyi rol pa tshad med par bzhugs par yang mtshon bya ye shes kyi dkyil 'khor/_nang du phung po khams dang skye mched las dbang dang bcas pa gdod nas dag pa'i gdan gsum rdo rje'i grong khyer du lhun gyis grub par rang la ye nas rang byung du bzhugs pa mtshon la/_bzhugs tshul don gyi dkyil 'khor rang gi sems rnam shes tshogs brgyad sems byung dang bcas pa dam pa rigs brgya'i lha tshogs su bzhugs pa'i gnas lugs mthar thug pa 'di ngo sprad pas/_yin tshul gshis kyi dkyil 'khor phyi nang gsang ba gnyis med rang byung gdod ma'i gnas lugs dbyings rig zung 'jug nang gsal thim la ma rmugs pa don dam dkor bdun gyi bdag nyid du la zla dgos pas/_rnam pa dbang bzhi'i rdzas la bskyed pa'i bde gshegs rgyal ba rab 'byams zhi khro sprul pa'i 'khor lo gcig tu rdzogs pa'i rten brten par bcas pa mngon sum du mjal bar mos la dad gus spro ba rgya chen po skyed cig_/de dag gis lha dang skal pa mnyam pa'i phyir du dkyil 'khor phyi nang du 'jug pa'i chos rnams legs par grub ste ye shes smin pa'i snod du gyur pa la/_zhugs nas mngon par dbang bskur zhu ba'i yon du maN+Dal phul/_skabs 'dir dpon slob dad spro blo gros dang ldan na dbang bzhi'i rnam dbye/_ngo bo/_nges tshig_/dgos pa sogs rgyas bsdus skabs phyed par 'chad na legs shing*/_'dir spyi ltar/_dbang dngos zhu ba'i phyir gsol ba 'debs pa 'di'i rjes zlos mdzod/_nam mkha'i rdo rjes rgyal ba lngar/_/dgongs shing ji ltar dbang bskur ltar/_/mchod pa chen po brda yi dbang*/_/rig pa 'dzin pa bdag la stsol/_/lan gsum/_de ltar gsol ba btab pa la bum gsang shes rab ye shes bzhi pa dang 'brel ba'i phan nus zab mo'i dbang rnams rim par bskur ba'i dang po bum pa'i dbang la phyi phan pa dang nang nus pa 'jug pa'i dbang gnyis las/_dang po phyi phan pa rdo rje slob ma'i dbang la rig pa'i dbang lnga rim par bskur ba'i slad du dmigs pa 'di ltar mdzod/_bdag mdun gyi thugs ka nas 'phros pa'i 'od zer gyis phyogs bcu'i rgyal ba sras dang bcas pa thams cad gdan gsum tshang ba'i dkyil 'khor gyi 'khor lo'i rnam par spyan drangs/_badz+ra sa mA dzaH_thugs ka nas sprul pa'i lha mo rnams kyis mchod cing bstod par gyur/_oM badz+ra ar+g+haM pra tIts+tsha swA hA/_des 'gres te/_pad+yaM nas/_shab+da'i bar brjod/_phung khams dag pa gshegs pa gshegs ma'i gdan:_dbang shes dag pa sems dpa' sems ma ste:_las kyi bdag po khro bo khro mo'i tshogs:_gdan gsum yongs rdzogs lha la phyag 'tshal bstod:_gsol ba gdab pa ni/_rdo rje can gyi sangs rgyas la/_/'gro ba skyob pa'i ched du dbang*/_/yon tan 'byung gnas ji ltar bstsal/_/de ltar 'di la'ang bstsal du gsol/_/zhes gsol ba btab pas de bzhin gshegs pa rnams kyis dgongs pa mdzad/_gshegs ma rnams kyis dbang bskur/_sems dpa' rnams kyis shis pa brjod/_sems ma rnams kyis glu gar bsgyur/_khro bo rnams kyis bgegs bskrad de/_kun kyang dbang gi bya ba la dgyes par gyur/_slob bu seng khri pad nyi zla ba'i gdan la skad cig gis rdo rje mi bskyod par gnas gyur pa la rig pa'i lha mo rnams dang slob dpon lhan cig pas rnam rgyal bum pa'i chu mi bskyod pa'i bdag nyid can gyis dbang bskur bar mos shig_/rnam bum thogs la/_hU~M/_rnam shes phung po rnam dag cing*/_/nyon mongs zhe sdang sbyong byed pa'i/_/chos kyi dbyings kyi ye shes kyi/_/dpal ldan thugs kyi dbang bskur ro/_/oM badz+ra a b+hi Shiny+tsa hU~M/_zhes dbang bskur zhing bum chu sbyin/_rigs kyi bu khyod la mi bskyod pa chu yi dbang bskur bas yid kyi sgrib pa dag_/sangs rgyas thams cad kyi thugs kyi dbang thob/_rnam par shes pa rdo rje mi bskyod pa dang chu'i khams mA ma kir sangs rgyas/_zhe sdang chos dbyings ye shes su grol te/_sangs rgyas rdo rje'i rigs kyi thugs 'khrul pa med pas 'gro ba'i don byed par 'gyur ro/_/slob ma rin chen 'byung ldan du gsal ba la rig pa'i lha mo rnams dang slob dpon lhan cig pas rin 'byung gi bdag nyid can gyi dbu rgyan spyi bor bcings te dbang bskur bar mos shig_/dbu rgyan bcing la/_hU~M/_tshor ba'i phung po rnam dag cing*/_/nyon mongs nga rgyal sbyong byed pa'i/_/mnyam pa nyid kyi ye shes kyi/_/dpal ldan yon tan dbang bskur ro/_/oM rat+na a b+hi Shiny+tsa trA~M/_rigs kyi bu khyod la rin 'byung gi ngo bo dbu rgyan 'di bskon pa tsam gyis shes bya'i sgrib pa sbyangs/_sangs rgyas thams cad kyi yon tan gyi dbang thob/_tshor ba'i phung po rin chen 'byung ldan dang sa'i khams sangs rgyas spyan du dag_/nga rgyal mnyam pa nyid kyi ye shes su grol te/_sangs rgyas rin chen rigs kyi yon tan thams cad mkhyen nas 'gro ba'i don byed par 'gyur ro/_/slob ma snang ba mtha' yas su gsal ba la rig pa'i lha mo rnams dang slob dpon lhan cig pas snang ba mtha' yas kyi ngo bo rdo rje phyag g.yas su gtad de dbang bskur bar mos shig_/rdo rjes dbang bskur la/_hU~M/_'du shes phung po rnam dag cing*/_/nyon mongs 'dod chags sbyong byed pa'i/_/so sor rtogs pa'i ye shes kyi/_/dpal ldan gsung gi dbang bskur ro/_/oM pad+ma a b+hi Shiny+tsa hrIH_rigs kyi bu khyod la rdo rjes dbang bskur bas ngag gi sgrib pa thams cad dag_/sangs rgyas thams cad kyi gsung gi dbang thob/_'du shes kyi phung po snang ba mtha' yas dang me'i khams gos dkar mor sangs rgyas/_'dod chags so sor rtogs pa'i ye shes su grol te/_sangs rgyas pad+ma'i rigs kyi gsung 'gag pa med pa'i chos kyi sgra dbyangs kyis 'gro ba'i don byed par 'gyur ro/_/slob ma don yod grub par gsal ba la rig pa'i lha mo rnams dang slob dpon lhan cig pas don yod grub pa'i ngo bo dril bu thogs te dbang bskur bar mos shig_/dril bu lag g.yon du gtad la/_hU~M/_'du byed phung po rnam dag cing*/_/nyon mongs phrag dog sbyong byed pa'i/_/bya ba grub pa'i ye shes kyi/_/dpal ldan phrin las dbang bskur ro/_/oM karma a b+hi Shiny+tsa AH_rigs kyi bu khyod la dril bu 'di gtad pa tsam gyis kun gzhi'i sgrib pa dag_/sangs rgyas thams cad kyi phrin las kyi dbang thob/_'du byed kyi phung po don yod grub pa dang rlung gi khams dam tshig sgrol mar sangs rgyas/_phrag dog bya ba grub pa'i ye shes su grol te/_las kyi rigs kyi phrin las thogs pa med par grub nas 'gro ba'i don byed par 'gyur ro/_/slob ma rnam snang du gsal ba la rig pa'i lha mo rnams dang slob dpon lhan cig pas rnam snang gi ngo bo rdo rje'i ming gi dbang bskur bar mos shig_/rdor dril lhan cig spyi bor dkrol la/_hU~M/_gzugs kyi phung po rnam dag cing*/_/nyon mongs gti mug sbyong byed pa'i/_/me long lta bu'i ye shes kyi/_/dpal ldan sku yi dbang bskur ro/_/oM bud+d+ha che ge mo a b+hi Shiny+tsa mi/_ming dbang dngos me tog dor ba'i skabs gdags zin yang sbyang gzhi sbyong byed ngo sprod bde ba dang dkyil 'khor du zhugs zin yang dbang bskur ba'i nges pa ston pa'i dgos pas 'dir yang 'byung bar gsungs/_mchan/_rigs kyi bu khyod la rnam par snang mdzad ming gi dbang bskur bas lus kyi sgrib pa dag nas/_sangs rgyas thams cad kyi sku'i dbang thob/_gzugs kyi phung po rnam par snang mdzad dang nam mkha'i khams dbyings phyug mar sangs rgyas/_gti mug me long ye shes su grol te/_de bzhin gshegs pa'i rigs kyi sku 'gyur ba med pa thob nas 'gro ba'i don byed par 'gyur ro/__/de dag gis ma rig pa lnga sbyangs nas rig pa ye shes lnga thob par byed pa yin pas sam/_rig ma spyan la sogs pa'i thabs rig pa yab lnga'i las yin pas dang*/_rgyud sde bzhi thun mong du gyur pa'i dbang yin pa'i phyir thun mong rig pa'i dbang lnga zhes grags pa ste dbang rdzas lnga gnas rnams su gtugs pa ni dbang gi rgyu yin la/_slob dpon gyi dmigs pa dang slob ma'i mos pas dngos grub sgrub pa'i nus pa rgyud la bzhag pa ni dbang gi ngo bo gsang sngags lam gyi phyi nang gi rten 'brel thams cad dbang gi sgo nas bsgrigs pa ste/_ye shes thig le las/_chu yi dbang bskur dbu rgyan dag_/bya ba'i rgyud la rab tu grags/_/rdo rje dril bu de bzhin ming*/_/spyod pa'i rgyud la rab tu gsal/_/phyir mi ldog pa yi ni dbang*/_/rnal 'byor rgyud la gsal bar byas/_/zhes pa ltar gsang sngags phyi pa'i dbang yang bla med kyi spros bcas bum dbang gi zhar byung du rdzogs pas 'di kho na tsam gyis kyang phyi dkyil du drang don gyi bskyed rim rnams nyan du rung ba'o/__/gnyis pa nang nus pa 'jug pa'i dbang la spyi dang bye brag khyad par gsum las/_dang po chos can phung khams lnga'i snang ba thams cad lhar byin gyis brlabs nas/_chos nyid drug pa rdo rje sems dpar ngo sprad de sku gsung thugs byin gyis rlob par byed pa brtul zhugs kyi dbang ngam phyir mi ldog pa rdo rje slob dpon bdag po chen por dbang bskur zhing dbugs dbyung ba la dmigs pa 'di ltar mdzod/_khyed rang rnams skad cig gis dkyil 'khor 'khor lo'i dbang phyug sangs rgyas kun gyi spyi mes bcom ldan 'das dpal kun tu bzang po yab yum du gsal ba la/_thabs bde ba chen po rdo rje thugs kyi dam tshig lag g.yas su gtad de gsor ba dang*/_shes rab stong pa nyid kyi dril bu gsung gi dam tshig lag g.yon du gtad de 'khrol ba dang*/_bde stong zung 'jug phyag rgya sku'i dam tshig 'khyud rgya byas la/_oM AHhU~M/_thabs dang shes rab gnyis med cing*/_/snang stong dbyer med 'di bzung nas/_/stong nyid snying rje'i snying po yi/_/kun bzang rdo rje 'dzin khyod kyis/_/'gro kun rjes su bzung bar mdzod/_/rigs kyi bu khyod la gsang sngags kyi phyag rgya'i dam tshig gi nang nas mchog tu gyur pa rdo rje dang dril bu dkyil 'khor thams cad pa'i bdag nyid 'di lag tu gtad pa tsam gyis/_rnam pa thams cad mkhyen pa'i sa bon thebs/_sangs rgyas thams cad kyi mes po gdod ma'i mgon po kun tu bzang po dang gnyis su med par sangs rgyas te sems can thams cad kyi don dpag tu med pa byed nus par gyur cig_/gnyis pa bye brag rjes su gnang ba la/_rgyal tshab tu 'os pa'i slob bu yin na/_pusti/_dung dkar/_phyag shing*/_'khor lo la sogs pa sprad cing khri la mnga' gsol ba gzhan dang mthun/_de ltar thun mong gi dbang drug gis rags pa phung khams skye mched de bzhin nyid dang bcas pa byin gyis brlabs nas/_phra ba dkyil 'khor bzhir sku bzhir byin gyis rlob par byed pa thun mong ma yin pa'i dbang bzhi'i dang po phyir mi ldog pa 'khor lo'i dbang gi slad du/_slar yang dbang gi lha rnams kyis bkra shis pa'i rnam pa du ma dang ldan pas rnam par rgyal ba'i bum pa bdud rtsi'i chu rgyun gyis gang bas dbang bskur bar mos shig_/rnam rgyal bum pas dbang bskur la/_hU~M/_bkra shis bum pa lha'i gzhal yas/_/lha dang gnyis med bdud rtsi'i chus/_/skal ldan bu la dbang bskur bas/_/snang zhen lha sku'i phyag rgyar rdzogs/_/rnam smin rig 'dzin nyer thob cing*/_/kun tu 'od kyi sa non shog_/zhi khro'i rtsa sngags dang*/_kA ya a b+hi Shiny+tsa oM/_rigs kyi bu khyod la thams cad brtan par byed pa rnam rgyal bum pas dbang bskur bas/_snod bcud lha dang gzhal yas/_phung po khams dang skye mched kyang lha dang lha mor gnas dag pa yin pas/_phyi nang thams cad la brnyas par byas na ltung bar 'gyur ba yin pas dag snang dang mos pa gyis shig_/rjes gnang gi chas rnams gtad na 'di yang brjod do/_/de ltar dbang bskur bas byed las su gzhan don sgrub par rjes su gnang ba'i rten 'brel du skye 'gro thams cad chos kyi mnga' 'og tu 'du ba'i brdar rkang 'og tu 'khor lo/_chos sgra rgyun mi 'chad par sgrogs pa'i phyir lag g.yas su dung*/_bsdu ba bzhi'i phrin las mtshon pa'i chos kyi rnga bo che gaN+Di'am phyag shing*/_de nyid bcu la sogs pa'i rdo rje slob dpon gyi phrin las rab 'byams sgrub par bkas gnang ba'i rtags su rdor dril dang rgyud kyi glegs bam rnams gtad par mos shig_/rten snying brjod la me tog 'thor/_khyad par bum dbang dang rjes su 'brel bar sku phyag rgya'i dbang bskur ba ste/_mdun bskyed lha tshogs gtso 'khor rnams las ye shes kyi sku mar me gcig las gnyis mched kyi tshul du byon nas khyed rang la thim pas/_khyed rang gi phung khams skye mched thams cad gdan gsum yongs rdzogs dam pa rigs brgya'i ye shes lha'i sku dang gnyis med du byin gyis brlabs pa'i nus pa rgyud la 'jog par mos shig_/so so'i tsaklis dbang bskur te/_hU~M/_chos rnams rnam dag ye nas lhun grub cing*/_/bya ba byed dang yid chos rnam par dag_/nam mkha'i mtha' bzhin kun la snyoms mdzad pa/_/dbang gi spyi don du 'di med/_mchan/_kun bzang yab yum gnyis kyis dbang bskur ro/_/hU~M hU~M hU~M badz+ra tsit+ta oM/_a a a badz+ri b+ha dra sa man+ta a/_a b+hi Shiny+tsa maM/_zhes sogs dam pa rigs brgya'i lha dbang yongs rdzogs sbyar mthar/_'di ltar chos thams cad dam pa rigs brgya'i ngo bor dag cing*/_de yang rang sems lhag pa'i bden gnyis dbyer med gsang chen rigs gcig tu rnam par dag pa yin no/__/zhes rtog pa bskyed/_de ltar bum pa'i dbang gis lus dang rtsa'i sgrib pa dag_/bskyed rim bsgom pa la dbang*/_phung khams skye mched tshogs brgyad dbang yul dang bcas pa sku dang ye shes su 'gyur ba'i sa bon thebs/_sprul pa'i sku 'grub pa'i skal pa rgyud la bzhag go_/gsum pa gsang ba zab mo'i dbang la sbyor dngos rjes gsum du yod pa'i dang po sbyor ba rtsa khams byin gyis brlab pa gsang dbang gi slad du/_bla ma yab yum dang gnyis su med pa'i nam mkhar bzhugs pa'i lha tshogs rnams bde ba chen po'i ngang du snyoms par zhugs pa'i byang chub sems rjes su chags pa'i mes zhu ba so so'i mkha' gsang nas thon thod pa'i bdud rtsi dang ro gcig tu gyur pa 'di nyid khyed rang slob ma rnams la byin pa'i mos pa mdzod/_gsang rdzas mgrin par bzhag ste/_hU~M/_yab yum sbyor ba'i byang chub sems:_dkar dmar b+hany+dza'i nang du bskyil:_skal ldan bu la dbang bskur bas:_rtsa khams yi ge'i rnam par smin:_tshe la dbang ba'i rig 'dzin thob:_pad+ma can gyi sa non shog:_rtsa sngags dang*/_wAk+ka a b+hi Shiny+tsa AH_bdud rtsi sbyin/_de ltar myangs bas byang sems kyis rtsa khams thams cad la khyab/_gsal stong rnam par mi rtog pa'i ye shes rgyud la skyes par mos shig_/de dang rjes su 'brel bar gsung bzlas pa'i lung sbyin pa la/_slob dpon gyi thugs ka nas rtsa ba'i sngags phreng lu gu rgyud du byung*/_slob ma'i mgrin pa nas zhugs snying gar 'khor ba dang 'gyu ba'i rlung khams mtha' dag grags stong sngags kyi 'khor lor rdzogs par mos la zhi bar bsnyen pa'i sngags 'di'i rjes zlos mdzod/_oM bo d+hi tsit+ta ma hA su kha dz+nyA na d+hA tu AH_lan gsum/_khro bor sgrub pa'i sngags 'di'i rjes zlos mdzod/_oM ru lu ru lu hU~M b+h+yo hU~M phaT/_lan gsum/_las sbyor rtsa rig dang zhi khro chig dril yi ge brgya pa'i sngags 'di'i rjes zlos lan gsum mdzod/_oM na mo b+ha ga wa te sarba durga te pA ri shwa d+ha ni rA dza ya/_ta thA ga ta ya/_ar+ha te saM myag saM bud+d+ha ya/_tad+ya thA/_oM shwa d+ha ni shwa d+ha ni/_sarba pA paM bi shwa d+ha ni swA hA/_lan gsum/_oM badz+ra satwa sa ma ya sogs/_sa ma ya satwa A hU~M phaT/_lan gsum/_de ltar gsang ba'i dbang gis ngag gi las dang rlung gi sgrib pa dag_/bla med kyi dam rdzas khyad par can spyod cing bzlas brjod dang gtum mo'i rnal 'byor la dbang*/_rlung bcu las su rung ba'i yon tan thams cad thob/_longs spyod rdzogs pa'i sku 'grub pa'i skal pa rgyud la bzhag go__/gnyis pa dngos gzhi dpe'i ye shes mtshon pa'i slad du/_gzugs dang lang tsho mdzes sdug phul du byung zhing mtshan nyid mchog dang ldan pa'i rig ma lag g.yon du byin par mos shig_/rig tsaka gtad la/_hoH_chos rnams kun gyi 'byung gnas te/_/bde ba chen po gsang ba'i yum/_/rigs kyi bu la byin pa yis/_/dga' bzhi'i ye shes mngon du gyur/_/phyag rgya chen po'i rig 'dzin thob/_/'khor lo tshogs chen sa non shog_/rtsa sngags dang*/_tsit+ta a b+hi Shiny+tsa hU~M/_zhes gtad pas/_rig ma des pad+ma b+hany+dza mo k+Sha hoH_zhes pa'i sgras thar pa bstan pa la bskul/_rjes su chags pa'i rol mos dga' bzhi'i ye shes nyams su myong*/_rdo rje nor bu'i rtse mor lhan cig skyes pa'i dpe yi ye shes mngon du byas/_slar gyen du ldog pas mas brtan 'bras bu'i dga' bzhi dang zung du 'jug pa'i stong bzhi'i 'od gsal mthar thug brjod bral ye shes mngon du mthong bar mos shig_/des shes rab ye shes kyi dbang gis yid dang thig le'i sgrib pa dag_/rang bzhin brgyad cu'i rtog tshogs 'gags/_chos sku'i go 'phang thob pa'i skal pa rgyud la bzhag go__/gsum pa rjes don gyi ngo sprad pa bzhi pa tshig gi dbang la dngos dang bka' gtad rig pa rtsal gyi dbang gsum las dang po ni/_de'ang bskur ma thag pa'i dbang gsum pa'i ye shes kyi dpes chos dbyings spang blang las 'das pa'i brdal ba chen po'i ye shes kyi nyams myong dran par byas te thabs la brten pa'i shes rab kyis ngo sprad de/_dbyings rig gnyis med shel dang me long gi brdas mtshon par byas nas nyams su myong bar mos la/_me long dang shel rdo bstan la/_hoH_ka dag me long gtsang ma'i ngogs/_/lhun grub dwangs shel dri med gsal/_/brda rtags rdzogs pa'i dbang bskur bas/_/dri med rig pa'i gnas lugs rtogs/_/lhun grub rig 'dzin nyer thob nas/_/bde ba chen po'i sa non shog_/rtsa sngags dang*/_d+harma d+hA tu a b+hi Shiny+tsa AH_zhes brjod de mnyam par bzhag_/dpe las thob pa'i gsum pa'i nyams myong*/_myong zhen shes bya'i sgrib pa sems rig shan ma phye ba zhig 'char nye ba na/_phaT/_drag po zhig brjod 'phral/_sems gang yin/_zhes rtab rtab tu dris pas/_snang ba had de/_phyad de/_ci zer cha med pa'i 'byung tshor gyi spros pa zhi ba'i rig pa gu yangs bsam las 'das pa zhig mi 'char ba'i dbang med pas de ga sems las 'das pa'i rig par ngo sprad pa ni lta ba spyi 'byams kyi dbang zhes bya zhing*/_de ltar ngo sprad pa'i lta ba lung rig dang 'brel pa zhes bya ba yin pas/_smra bsam brjod med shes rab pha rol phyin/_/ma skyes mi 'gag nam mkha'i ngo bo nyid/_/so so rang rig ye shes spyod yul ba/_/dus gsum rgyal ba'i yum gyur rdzogs pa che/_/zhes gsungs pa'i don lags so/__/slob dpon lta dgongs dang ldan pa yin na/_thugs kar a gcig bsam la slob mas rig pa gtad de mnyam par bzhag pa'i ngang nas a nyi shu rtsa gcig brtsegs mar brjod/_de ni sgom pa nyams myong dang 'brel bar dgos pas byin rlabs 'pho ba'i dbang zhes bya'o/__/des dbang bzhi pa thob pas kun gzhi'i las dang shes bya'i sgrib pa dag_/rdzogs pa chen po bsam gyis mi khyab pa'i ye shes bsgom pa la dbang*/_ngo bo nyid sku thob pa'i skal pa rgyud la bzhag pa yin no/__/gnyis pa bka' gtad ni/_bka' rdzogs lung rdzogs bya ba'i phyir snying thig gi glegs bam spyi bor bkod la/_hoH_chos sku kun tu bzang po/_longs sku rgyal ba rigs lnga/_sprul sku dga' rab rdo rje/_slob dpon 'jam dpal bshes gnyen/_rig 'dzin shrI sing+ha/_paN chen bi ma mi tra/_o rgyan pad+ma thod phreng*/_mkha' 'gro ye shes mtsho rgyal/_mnga' bdag khri srong lde'u btsan/_rgyal sras dri med 'od zer/_klong chen nam mkha'i rnal 'byor la sogs pa/_rang bzhin rdzogs pa chen po'i rtsa ba dang brgyud par bcas pa'i dpal mgon rig 'dzin bla ma/_yi dam mkha' 'gro rgya mtsho/_chos srung dam can rgya mtsho'i tshogs dang bcas pa rnams kyis deng 'dir rdo rje'i slob ma rnams la dbang bskur du gsol/_byin gyis brlab tu gsol/_rtogs pa spar du gsol/_brtul zhugs bskyed du gsol/_bya rtsol blo 'das rdzogs pa chen po'i klong du dgongs pa'i btsan sa zin te/_tshe gcig lus gcig la 'ja' lus 'pho ba chen po'i sku mchog brnyes nas dpal kun tu bzang po'i go 'phang la 'god par mdzad du gsol/_zhes lan gsum bya/__gsum pa rig pa rtsal gyi dbang ni/_bshad sgrub kyi brgyud pa 'dzin pa dag la thod rgal rig pa'i rtsal dbang bskur ba ye shes bla ma las shes so/_/zhes gsungs pas skabs dang 'brel na der blta'o/__/'dir spro zhing nus na dbang thob pa'i phan yon/_ma thob pa'i nyes dmigs/_dam tshig gi rnam bzhag rgyas par bshad/_'o des zhi khro ngan song sbyong ba'i dkyil 'khor chen por dbang bzhi rdzogs par thob pa yin pas/_gsang sngags kyi dngos grub thams cad dbang las 'byung bas yon tan bsam gyis mi khyab/_dbang ma thob na chos 'di'i dpe tsam blta ba la mi dbang zhing dbang ma thob pa'i nyes dmigs kyang shin tu lci/_khe nyen gyi nus pa de lta bu bskyed pa'i dbang srog dam tshig dang sdom pa kho na la rag las pas/_de'i bsrung bya'i rnam grangs kyang thun mong*/_spyi/_khyad par dang*/_sgrub pa/_lhag pa/_rtsa ba/_yan lag gi bsrung bya mtha' dag tshul bzhin srung snyam pas dam tshig khas blang ba 'di'i rjes zlos mdzod/_rtsa ba sku gsung thugs mchog dang*/_/yan lag dam tshig nyi shu lnga/_/med dang gcig pu phyal ba sogs/_/cho ga bzhin du srung bar bgyi/_/lan gsum/_dbang bzhi rdzogs par thob pa'i sku drin gtang rag gi yon du maN+Dal phul/_slar yang lus dang longs spyod thams cad bla ma'i phyogs su bsngo ba ni dam tshig gi tha tshig yin pas 'di'i rjes zlos lan gsum mdzod/_gtso bos ji ltar bka' bstsal pa/_/de dag thams cad bdag gis bgyi/_/khyod la bdag kyang yongs su 'bul/_/slob mar bzung nas spyad du gsol/_/de ltar rim pa dbang gi cho ga gsan pa'i dge ba yang rjes thob bsod nams kyi tshogs spel ba'i phyir bsngo smon zung 'brel gyi rgyas 'debs 'di chabs cig gnang bar zhu/_bsod nams 'di yis sogs brjod cing slob ma rnams grol/_gsum pa rjes kyi las khrigs ni/_tshogs la rol/_rdo rje'i glu gar bya/_gtor ma btang*/_gtang rag dang dngos grub blang ba sogs gsang ba spyi'i 'gros ltar bya'o/__/mkhyen brtse'i ye shes dgongs bcud che/_/bka' gter zung 'jug zhi khro yi/_/smin lam 'od zer spros 'dis kyang*/_/nges gsang pad tshal gnyen du nges/_ces rgyud sde'i dgongs pa gtsor bton zhi khro ngan song sbyong ba'i dbang bskur gyi le'u tshan dang po ste 'od gsal thugs mchog rdo rjes sbyar ba'o/__!__rigs kun khyab bdag kun bzang 'od mtha' yas/_/sgyu 'phrul drwa ba'i dkyil 'khor gcig bsdus pa/_/rig 'dzin bla ma'i phyag rgyar bzhengs pa de/_/rab dwangs yid kyi chu mtshor rtag par mchod/_/de la 'dir dbang gi spyi don las/_'di ltar zhi khro dang dpal chen ci rigs pa'i dkyil 'khor gcig tu 'jug pa'i cho ga rdzogs pa dag la/_rig 'dzin dang*/_thugs rje chen po la sogs pa'i sgos dbang ni/_so so'i las gzhung gi bdag mdun bum gsum sgrub cing*/_rtsa dbang rgyal thabs spyi blugs ltar nang nus pa 'jug pa'i dbang gi chog pa yin no/_/zhes rgyud dang sgrub sde'i ring lugs la gdams phran gyi sa chod chung bas khog che shos zhi khro dang bka' brgyad gang rung gis 'dzin dgos par dgongs nas de ltar gsungs kyang kun mkhyen nyid rig 'dzin bla ma'i sgrub skor gyi bka' bab yin pas rtsa gsum thams cad bla ma'i phyi nang gsang ba'i sgrub tshul du gtso bor gsungs phyir snying thig gi chos sde chen po 'di'i 'phro gzhi lta bu bla ma rig 'dzin 'dus pa nyid yin pa'i dbang gis phyi nang gi 'jug pa gnyis dang*/_slob ma'i dbang lnga sogs dbang gi spyi don snying po don gsal ltar man ngag gi dgongs pas kha bkang ste bskur bas lam kun gyi thog ma'i smin byed du rung bar mkhyen nas rtsa ba'i chos bdag rdo grub rin po che 'jigs med phrin las 'od zer gyis mdzad pa khams phyogs su dar srol shin tu che rung de'i dpe dngos ma rnyed pas dgongs don ma nyams par 'chad na dbang dang phyag bzhes kyi rgyun mi 'chad par legs par mthong nas don gyi dgongs pa nor 'khrul med par 'chad pa la sbyor dngos rjes gsum las/_dang po sbyor ba yo byad kyi gshom ni/_'di la sngon 'gro sta gon mdzad srol mi 'dug pas dngos gzhi'i dbang bskur gyi rim pa ste/_gang du bya ba'i gnas su gzhung mthun ras bris kyi dkyil 'khor dang*/_ma 'byor na maN+Dal la tshom bu gtso 'khor dgu bkod pas kyang rung zhing*/_dal dbus many+dzi la rin po che'i bum pa bcud ldan kha rgyan mgul chings dang bcas pa/_g.yas su 'di nyid kyi gzhung pod glegs bam/_ma 'dzoms na sgrub thabs sogs chos tshan dar gyis dril ba/_g.yon du gsang dbang rten thod pa bdud rtsis bkang ba'i khar me long sin+d+hu ra'i thig le can gyi steng du shel rdo/_shar du rdor dril bsnol ma/_lhor dbu rgyan/_nub tu rdo rje/_byang du dril bu/_dkyil 'khor pa'i lha tsaka yongs rdzogs/_rig tsaka_/mtha' rten tshe dbang byed na tshe bum/_tshe ril/_tshe chang*/_mda' dar bcas gang bder bshams/_/mig dar/_me tog_/rig 'dus rtsa gtor dar gdugs sku tsaka gis brgyan pa/_sman raka_/gtor 'bul/_tshogs mchod sogs 'og tu dgos pa rnams tshang bar 'du bya/__gnyis pa la thog mar dbang don sgrub mchod ni/_spyi dang bye brag gi brgyud 'debs nas brtsams las byang mthar chags su btang la bdag mdun dbyer med du bsgom/_rtogs pa dman na dzab khang dbye/_bzlas pa'i skabs gab byang ltar ting nge 'dzin gsal btab la bsnyen sgrub kyi bzlas pa bya/_bum pa rang byung gi gzhal yas khang du rig 'dzin 'dus pa'i dkyil 'khor dwangs pa'i mtsho la gza' skar shar ba bzhin skad cig gis gsal bar gyur/_rang srog sngags kyi 'od zer gzungs thag la/_/'khril te bum pa'i lha tshogs thugs kar zhugs/_/de dag sku las byang sems bdud rtsi'i rgyun/_/babs pas bum chur dbyer med ro gcig gyur/_/zhes gsal btab nas gzungs thag blang*/_bsnyen sgrub kyi bzlas pa brgya rtsa las mi nyung bar bya/_las bum nang du pad nyi'i steng*/_/pad+ma dbang chen sku mdog dmar/_/pad+ma'i dbyug tho zhags pa 'dzin/_/dor stabs ye shes me klong 'gying*/_/sku las rdo rje bdud rtsi'i rgyun/_babs pas bum pa gang bar gyur/_/oM badz+ra kro d+ha h+ya gr-I wa hU~M phaT/_zhes brgya rtsa tsam bzla/_mthar mchod bstod bya/_yig brgya brjod/_oM AHhU~M gis dung chu phul/_rnam rgyal bum pa'i lha rnams bde ba chen po'i ngo bor zhu nas bum chu dang ro gcig tu gyur par mos/_bka' srung gtor 'bul bya/_rig pa'i me tog dor la gnang ba nod de/_dbang dngos la/_dang po phyi 'jug gi thog ma slob ma gzhug pa ni/_khrus dang bgegs gtor bsngo ba srung 'khor rnams las byang ltar bya/_sems bskyed gsal btab la/_lo rgyus kyi khyad par/_de yang mtshon bya don gyi man ngag rang byung gi gsang ba chen po la mtshon byed brda dang tshig tu shar ba'i rgyud lung man ngag thams cad rgyal ba rnams kyis thugs nas thugs kyi gter du sbas pa dang*/_mkha' 'gro mas dgongs pa'i rtsal gyis nam mkha'i gter du sbas pa dang*/_rig 'dzin rnams kyis 'byung bas mi shigs pa'i sgrom bu la brten nas sa'i gter du sbas shing*/_gdul bya 'dul ba'i dus su son pa na las can rnams kyis rdo rje'i rgya bkrol nas mngon du snang bar mdzad pa las/_'di ni bla ma dgongs pa 'dus pa'i lung bstan bka' rgya ma las/_lho phyogs 'od zer ming can sprul pa'i sku:_zab don snying thig chos kyis 'gro ba 'dren:_'brel tshad rig 'dzin zhing du 'phen par 'byung:_zhes dang*/_o rgyan chos rje gling pa'i lung byang las/_dbus g.yor gzhung du byang sems pad+ma'i ming:_bka' rnying bstan skyong thabs mkhas 'gro ba 'dul:_zhes snying thig gi rdzogs rim dang*/_rig 'dzin gyi bskyed rim la brten nas rim pa bzhi'i rnal 'byor la sbyor ba'i lam ston du gter kha gsar rnying mang po nas rdo rje'i lung gis bsngags shing*/_sku tshe ril por dben par sgrub pa'i rgyal mtshan btsugs pas 'phags lam chos nyid kyi bden pa mngon sum gzigs pa'i grub pa chen po'i sar bzhugs pa la rtsod pa med pa'i tshul rtogs brjod chu zla'i gar mkhan las/_mnal lam du lho mon kha'i brag gi gu ru'i zhabs rjes las dbang bzhi blangs pa'i rkyen gyis nang dbyings khyad chos drug ldan gyi grol sa mthong ba dang*/_rnga yab gling du gu ru bde ba chen po dang thugs yid 'dres nas 'od gsal gzhon nu bum sku'i zhing khams gzigs pa sogs la brten nas rtsa khams kyi yi ge ye shes kyi rlung gis bskul bas dam pa'i chos sgo 'dzad med kyi rol mo 'khrol bar gsungs pas/_'od gsal bsam gyis mi khyab pa'i dgongs pa la dbang thob pas don brgyud rdzogs par brnyes pa dang chabs cig de'i rang rtsal mkha' 'gro'i brda yig gsang mdzod rang shar du rnyed pas dpe dang snyan brgyud zhar byung du rdzogs pas thun mong ma yin pa'i dgongs klong gi gter rgya nam mkha' mdzod kyi brda grol ba ste rang gter gnad byang thugs kyi sgrom bu las/_de dus da lta'i rje 'bangs grogs:_bi ma rgyal sras lha rje rnams:_smon lam thugs rjes sprul pa'i sras:_rang byung rdo rje pad+ma dbang:_gsang mtshan gar dbang 'jigs med gling:_rtogs grol dus mnyam thugs gter bdag:_'phags pas rjes su bzung ba'i rtags:_lag g.yas mthil na pad+ma'i spyan:_dbang chen gsung gi rig 'dzin cher:_mthe bong thugs srog h+ya yis mtshan:_rtogs pa klong du gyur pa'i rtags:_tshems la skye med yi ge aH_snying rje che zhing rig pa hur:_shes rab che zhing 'dzin chags chung:_thugs sgam tshig btsun blo gros zab:_nges med spyod pa cir yang ston:_'jigs pa med pa'i brtul zhugs can:_zhum med snang ba zil gyis gnon:_de la thugs rgyud dngos gter ram:_yang na dgongs gter tshul du 'bebs:_dngos nyams rmi lam ma nges par:_nga dang zhal mjal don dbang bskur:_thugs rgyud dgongs pa'i byin rlabs 'pho:_pad 'byung nga dang rig 'dzin nyid:_dgongs pa gcig dang dbyangs gcig 'gyur:_theg kun dgongs pa'i klong nas shar:_rig 'dzin dpa' bo mkha' 'gro yis:_bskul ma theng gsum dag tu 'ong:_de tshe mi brjed dran pa'i gzungs:_gzer drug gnad kyi lde'u mig gis:_klong gsal dgongs pa'i gter kha 'byed:_ces rdo rje'i gsung gis ji ltar bsngags pa bzhin 'od gsal dag pa'i snang char bal yul gyi mchod rten bya rung kha shor gyi gam du/_chos sku ye shes kyi mkha' 'gro mas klong byang ye shes kyi brda ris mngon sum du sprad pa las 'od gsal rdo rje snying po klong chen snying gi thig le/_zab don man ngag gi bcud mdzod 'dzad med nam mkha' mdzod kyi thugs gter chen po gtan la phab/_kun mkhyen chos kyi rgyal po rgyal ba klong chen rab 'byams kyi ye shes kyi skus lan gsum rjes su bzung ste gsang ba gsum gyi byin rlabs rdzogs par thob pas rdzogs pa chen po rang snang ris med kyi dgongs klong du mngon par byang chub pa'i rig 'dzin chen po 'jigs med mkhyen brtse'i 'od zer ram/_pad+ma dbang chen ye shes rol pa'i rdo rje zhes 'brel tshad don ldan gyi bdag nyid chen po gang la rig 'dzin gyis bskul ma kun mkhyen chos rje'i zhal gzigs bar pa la gsung gis byin gyis brlabs te brda grol mdzad pa dang*/_dpa' bos bskul ma dang mkha' 'gros bskul ma mchims phu nags kyi dur khrod nas sman btsun mched lngas rang gzugs mngon sum du bstan te chos sgo 'byed bar bskul bas sprel lo sprel zla'i tshes bcu la slob dpon chen pos dgyes zhal bstan te bar chad bsal ba dang*/_sngags kyi srung mas snyoms 'jug gi bde chen bstabs nas sku tshe dang phrin las kyi rten 'brel gsos btab pa la brten nas/_chos bdag las can gyi skyes bu ni/_khyad par da lta'i smon lam mthus:_nam snying nyang ban mchog dbyangs dang:_lha sras sprul pas chos sgo 'byed:_ces gsungs pas nam snying pra ti'i sngags 'chang*/_nyang ban 'jigs med kun grol/_mchog dbyangs theg chen gling pa/_lha sras mu rub btsad po rdo grub 'jigs med phrin las 'od zer rnams la rim gyis chos gter chen po 'di nyid 'chad spel gyis sgo phye te rgya che la byin rlabs chags pa'i phrin las kyi snang bas bod khams mtha' dbus rgya dkar nag sogs 'dzam gling gi tha grur brdal pas sngon chad ma grol ba'i lus can grangs las 'das pa gdod ma'i grol gzhir dbugs dbyung ba'i zab chos 'di nyid la byin rlabs kyi rtsa ba dpal 'dus rtsa gzhung las/_phyi ltar byang sems nang rig 'dzin:_gsang ba ltar du sgrub sde brgyad:_ces gsungs pa'i nang sgrub rig 'dzin 'dus pa bla ma zhi ba'i thugs tig ste/_de ni rtsa ba gsum las 'khor lo'i dbang phyug rig 'dzin bla ma'i gsang gsum rdo rje'i dbyings su snang grags rig pa'i chos nyid dag pa chen por lam du khyer ba'i rig 'dzin yab ka'i sgrub sde 'di la'ang bskyed rdzogs las sbyor dang bcas pa zab rgyas su bzhugs pa la/_phyi sgrub bla ma'i rnal 'byor/_nang sgrub rig 'dzin zhi drag gsum/_/gsang sgrub thugs rje chen po/_yang gsang kun mkhyen bla ma'i sgrub pa/_zhi khro ngan song sbyong ba bcas bzhugs pa las/_skabs su bab pa byin rlabs kyi rtsa ba bla ma zhi bar sgrub pa rig 'dzin 'dus pa ste/_de ni rtsa rgyud thod pa'i dum bu las/_ye shes ltar du klong dgu'i rtsal:_yi dam ltar du sgrub sde brgyad:_byang sems ltar du nye ba'i sras:_rig 'dzin ltar du 'di ltar te:_o rgyan rang byung mkha' 'gro'i gling:_ro gling bsil ba'i tshal chen du:_gdan 'dzoms gdul bya dus bab tshe:_'og min gnas su he ru kas:_legs gsungs bde gshegs yongs rdzogs rgyud:_mchod rten bde byed brtsegs pa ru:_bstsal pa las kyi dbang mo ches:_phyung ste rig 'dzin brgyad la gtad:_ces dang*/_kun kyang rang rgyud ma yin te:_lha dang bka' bab ltar bstan yang:_bsgrub bya sgrub byed ro gcig ste:_gdul bya'i ngo ru snang ba tsam:_de bzhin yongs rdzogs rin chen sgrom:_d+ha na ko sha'i mtsho gling du:_rdzus te byon pa'i rig 'dzin la:_las kyi dbang mo che yis gtad:_'di ni rig 'dzin rdo rje chos:_ston pa rang nyid sdud byed kyi:_tshul bzung zab mo'i gsang ba 'dzin:_gtso dang 'khor gyi tshom bu'i tshul:_ltar du bstan pa'i man ngag bcud:_gsang sngags kun gyi 'bras bu ste:_mnga' bdag rgyal po'i chos skal yin:_zhes gsungs pa ltar sgrub sde chen po brgyad kyi bye brag ni/_spyi dpal rnam dgu rdo rje slob dpon gyi gzugs can du byon pa las slob dpon chen po sangs rgyas gnyis pa 'di ni chos sku 'od gsal rdo rje snying po'i zhing du thog ma'i mgon po 'od mi 'gyur ba/_longs sku tshangs pa rnga sgra ye shes rigs lnga gangs chen mtsho nges pa lnga ldan gyi khyab bdag pad+ma kun tu 'chang*/_'gro 'dul sprul pa'i cho 'phrul phyogs bcu'i zhing kun na tshad med pa'i tshul/_mi mjed kyi zhing gcig kho na la'ang bla ma sku gsum/_thod phreng sde lnga/_sprul sku mtshan brgyad/_'phrul mtshan bzhi bcu/_mdo sngags kyi ston pa brgya rtsa sogs spyi dang bye brag gtso dang 'khor sna tshogs su shar ba'i cho 'phrul bkod pa bsam las 'das pa'i gtso bo gdul dka'i 'gro ba spyi dang gangs can gyi bla ma'i skal pa gu ru rin po che/_rigs bdag theg mchog rdzogs pa chen po'i ston pa rnam gnyis dang*/_rdo rje'i rig 'dzin dgu sogs zung 'jug gi lam nas rdo rje 'chang gi gral brnyes so cog gi 'phags bod rig 'dzin rtsal 'chang thams cad chig dril gyi thugs sgrub zab mo'i mthar thug chos 'di'i srog bcud rtsa sgrub rig 'dzin 'dus pa zhes bsam yas bar khang g.yu zhal can du mnga' bdag chos kyi rgyal po khri srong lde'u btsan gyis gtsos rje 'bangs grogs gsum gyi chos skal du gdams pa'i gnad kyi zhun thig_/slar yang bod yul phyi ma'i gdul bya'i bgo skal du snang bar mdzad pa ste 'di la'ang rtsa dbang rgyal thabs spyi blugs dang*/_de nyid man ngag gis kha bskang ste chos kyi bdag po 'jigs med phrin las 'od zer gyi phyag bzhes ltar rgyas par spros pa phyi nang gi 'jug pa dang phan nus zab mo'i dbang dang bcas pa gnyis su yod pa las phyi ma nyid sgrub pa la maN+Dal phul/_sngon chad dkyil 'khor 'dir ma zhugs pas don gyi ye shes ma mthong ba'i brdar gdong g.yogs 'ching mdzod/_oM tsak+Sha[⁽11e2⁾] b+han+d+hawa ra ma Na ya hU~M/_mig dar 'ching*/_dkyil 'khor gyi lha dang mjal ba'i phyag rten du me tog gi chun po kha dog lnga pa phyag tu thogs mdzod/_a khaM bi ra hU~M gis me tog gtad/_bla ma dang dkyil 'khor gyi gtso bo tha mi dad pa la mi phyed gus pa'i yid kyis gsol ba 'debs pa 'di'i rjes zlos mdzod/_hoH_bdag ni skal ldan rigs kyi bu:_thugs rje chen pos rjes bzung la:_dam tshig chen po'i dkyil 'khor du:_'jug cing smin par mdzad du gsol:_lan gsum/_dam tshig srung bar bka' bsgo zhing snod ldan dkyil 'khor du 'jug par gnang ba sbyin pa ni 'di la gsan pas khyab par gda'/_hoH_gsang ba mchog gi dkyil 'khor du:_'jug par dka' la khe nyen che:_dam tshig nyams na brlag 'gyur bas:_dam srung dbang bskur sbyin par bya:_bla ma rig 'dzin 'dus pa'i dkyil 'khor rtsa gsum dam can srung ma'i tshogs dang bcas pa mngon sum bzhin du bzhugs pa'i spyan sngar bdag gzhan nam mkha' dang mnyam pa'i 'gro ba thams cad byang chub ma thob kyi bar du skyabs su 'gro snyam pa'i blos 'di'i rjes zlos/_na mo:_bdag dang mtha' yas sogs lan gsum/_pha mar gyur pa'i sems can nam mkha'i mtha' dang mnyam pa'i 'gro ba ma lus sangs rgyas kyi sa la 'god par 'dod pa'i smon sems dang*/_de'i ched du bla ma rig 'dzin 'dus pa'i dkyil 'khor du zhugs nas rdo rje rtse mo'i myur lam bgrod par bgyi'o snyam pa'i 'jug pa sems bskyed 'di'i rjes zlos/_ho:_rig 'dzin dkyil 'khor sogs lan gsum/_de nas thun mong ma yin pa'i yan lag bdun pas bsags sbyang spel gsum bgyi ba la/_skye ba med pa'i ngang las skye ba'i cho 'phrul chu las chu bur rdol ba bzhin du shes rab rang byung gi sgron ma 'od gsal bsam brjod las 'das pa'i ye shes dbyings gdod nas rnam dag rang byung sku gsum lha'i dkyil 'khor du bzhugs pa las/_rgyang zhags chu yi sgron mas mtshams sbyar te rten thig le stong pa'i sgron mas mtshon pa'i dag pa dbyings kyi sgron ma'i klong du brten pa rig gdangs sprul pa'i rdo rje lu gu rgyud dbang pos mngon sum mthong bas lha dang lta ba mjal ba'i phyag 'tshal zhing*/_de las 'ja' tshon zer thig nyams snang gong du 'phel pa'i mchod sprin rgya mtsho 'bul ba dang*/_snang ba thams cad sku dang ye shes su rang shar ba'i rig pa tshad phebs chen po'i ngang du 'khor gsum gzung 'dzin gyi sdig ltung bshags shing*/_chos can gyi snang ba chos nyid kyi klong du zad pa'i dag pa gnyis ldan gyi 'bras bu zag med ye shes kyi tshogs chen yongs su rdzogs pa la rjes su yi rang ba dang*/_phyir gsal 'pho chen ye shes kyi sku'i gsung rdo rje rgyun gyi rtag pa'i klong du rdzogs pa chen po'i chos 'khor rgyun chad med par bskor zhing 'ja' lus rdo rje'i snang brnyan chen po ji srid du bzhugs par gsol ba 'debs pa dang*/_de lta bu'i zag med ye shes kyi dge tshogs sgrib gnyis rtsad nas dag pa gzhon nu bum pa sku'i klong du/_chos kyi dbyings la mi bsngo bar shes pa'i tshul gyis yongs su bsngo ba ste khyad par can gyi lta sgom gyi gnad dran pas 'di'i rjes zlos/_ho:_chu las chu bur sogs lan gsum/_de yang dbang thob pa dkyil 'khor gyi bya bas thob kyang dbang srog rgyud la 'dzin pa dam tshig la rag las pas tshogs zhing dkyil 'khor gyi lha dbyer med pa dpang po'i tshul du bzhugs pa'i spyan sngar mkha' khyab kyi yid can srid zhi'i mtha' la mi gnas pa'i zung 'jug chen po'i go 'phang la 'god pa'i lhag pa'i kun slong byang chub sems dang ma bral bas dam tshig dang sdom pa'i bslab pa rgya mtsho mtha' yas bzung nas rgyal ba sras dang bcas pa'i spyod yul la bslab par dam bca' ba 'di'i rjes zlos/_bla ma rig 'dzin skyabs kyi mchog tu 'dzin/_/'gro ba'i don du smon 'jug sems bskyed cing*/_/sku gsung thugs dang mnyam sbyor gsang sngags kyi/_/dam tshig sdom pa rtag tu srung bar bgyi/_/lan gsum/_de nas lha dang skal pa mnyam pa'i phyir dkyil 'khor du 'jug pa'i thog mar sgo dbye bar gsol ba 'debs pa 'di'i rjes zlos mdzod/_kyai/_rigs lnga bde bar gshegs pa dang*/_/bla ma yi dam mkha' 'gro dgongs/_/sgo ba chen po khyed rnams kyis/_/sgo phye thar pa'i grong bstan 'tshal/_zhes gsol ba btab pas/_sgo ba ging chen sde bzhis dkyil 'khor gyi sgo bzhi shag gis phye par mos shig_/sa ma ya pra we sha ya hU~M/_dbye rgya bcas brjod/_yol ba bsal/_khyed rnams kyis dkyil 'khor chen po'i shar sgo nas brtsams rim par g.yas bskor du phyin te lha tshogs rnams kyi sku gsung thugs la phyag bya ba'i mos pas thal mo gnas gsum du sbyar la 'di'i rjes zlos/_oM na ma te hU~M/_oM na ma me hU~M/_oM na mo na ma hU~M/_lan bzhi brjod/_khyed rang rnams dkyil 'khor gyi shar sgor dbang stegs pad+ma 'dab brgyad la 'khod par mos la nang 'jug gi thog ma dbang gi gzhi 'god pa ye shes dbab pa yin pas sgo gsum gyi gnad gcun la dmigs pa 'di bzhin du mdzod/_chos thams cad rang bzhin gyis spros bral 'od gsal stong pa nyid kyi rang mdangs lhun grub dag pa rab 'byams kyi dkyil 'khor chen po'i dbus su pad+ma nyi zla brtsegs pa'i gdan gyi steng du/_khyed rang rnams skad cig gis rig 'dus rje btsun ma hA gu ru snang srid zil gnon gyi cha byad can dkar la dmar ba'i mdangs can phyag g.yas sdigs mdzub dang bcas pas gser gyi rdo rje rtse lnga nam mkhar 'phyar ba/_g.yon mnyam gzhag gi phyag rgyas b+han+d+ha dang tshe bum bcud ldan bsnams pa/_dbu la pad+ma'i mnyen zhu dang sku la phod ka chos gos ber phyam brtsegs mar gsol ba/_mchan khung g.yon du rang 'od ye shes mkha' 'gros 'khyud cing zhabs rgyal po rol stabs kyis 'ja' 'od zer thig gi klong na 'gying zhing bzhugs pa'i spyi bor oM dkar po/_mgrin par AHdmar po/_thugs kar hU~M sngon pos mtshan par gsal thob/_bla ma dkyil 'khor pa'i thugs ka dang khyed rang rnams kyi gnas gsum yig 'bru gsum las 'od zer mu med pa 'phros/_phyogs bcu'i sangs rgyas kyi zhing dang khyad par bla ma sku gsum gyi zhing khams na bzhugs pa'i rtsa gsum rgyal ba sras dang bcas pa'i thugs rgyud bskul/_thams cad kyang ma hA gu ru pad+ma thod phreng rtsal gyi rnam par nam mkha' gang bar byon te khyed rang rnams la thim pas byin gyis brlabs pa'i mos pa brtan po mdzod/_sbyar ba'i spos bsregs/_DA dril dang dbyangs kyis bskul la las byang ltar/_sngon bskal mar thod phreng rtsal gyi dzab mthar/_hU~M hU~M hU~M A ral+li pheM pheM btags pa brjod/_ye shes pa'i byin rlabs kyi rgyun sgo gsum la brtan par gyur cig_/tiSh+Tha badz+ra hU~M dang rdo rjes rgyas gdab/_sngar byin pa'i me tog de nyid rigs kyi lha la 'bul ba'i mos pas 'di'i rjes zlos dang bcas te dor bar zhu/_kyai/_rig 'dzin 'dus pa'i dkyil 'khor du/_/'brel ba'i me tog 'di dor bas/_/las 'phro gang yod lha la dbab par shog_/oM puSh+pe sid+d+hi hU~M/_zhes dor du gzhug_/me tog gang la phog pa'i rigs kyi lhas slar yang dbang rtags cod pan du byin par mos shig_/pra ti g+hr-i ha na i maM satwa ma hA bA la/_rigs dang mthun pa'i gsang mtshan gdags/_me tog spyi bor bcings/_dag pa ye shes kyi spyan gyis lha dang dkyil 'khor mngon sum du mjal ba'i rten 'byung du mig dbye bar mos mdzod/_mig thur thogs la/_ston pa rigs lnga'i sangs rgyas kyis/_/khyed kyi ma rig 'khor ba'i mig_/ye shes spyan du dbye ba ltar/_/de bzhin khyed kyis 'gro ba rnams/_/ye shes spyan du 'byed par shog_/tsak+Shu pra be sha ya phaT/_ces gdong g.yogs bsal/_phyag shing gis mthong ba bstan te/_kyai/_rigs kyi bu byang chub phyogs kyi chos sum cu rtsa bdun la sogs pa'i sangs rgyas kyi ye shes brda'i don rtags kyis mtshon pa'i mtshon byed lhag pa gzugs brnyan gyi dkyil 'khor dngos su bshams pa dang gnyis su med pa'i lhag pa'i ting nge 'dzin gyi dkyil 'khor ye shes rdo rje srung ba'i 'khor lo'i nang du 'byung ba rim brtsegs ri rab dang bcas pa'i gzhal med khang gru bzhi sgo bzhi rta bab chos 'khor ri dwags gdugs dang bcas pa pad+ma nyi ma sna tshogs rdo rje'i rwa bcu gnyis pa'i lte bar gnas pa/_rin po che'i rtsig pa lnga'i steng du pha gu drwa ba drwa phyed shar bu mda' yab dang bcas pa/_nang ka ba brgyad kyis btegs cing rdo rje'i gdung gis phub pa'i ya phub phyur bu'i rtser rdo rje rin po che'i tog gis spras pa/_tshad dang mtshan nyid thams cad rdzogs shing rgyan thams cad kyis brgyan pa/_de'i nang du sna tshogs pad+ma nyi ma zla ba'i steng du rtsa gsum rgyal ba rab 'byams kyi rigs kun 'dus pa'i spyi gzugs dkyil 'khor rgya mtsho'i gtso mchog snang srid zil gnon ma hA gu ru zhal gcig phyag gnyis mtshan dpe'i gzi brjid dpal du 'bar ba/_rdo rje'i gsang gos dkar po/_chos gos dmar po/_ber mdung sngon po/_phod chen mthing ga rnams brtsegs mar gsol ba/_phyag g.yas rdo rje rtse lnga 'phyar stabs su sdigs mdzub kyis bsnams shing*/_g.yon mnyam bzhag gis b+han+d+ha tshe bum bsnams pa/_zhabs rgyal po rol stabs kyis lha lcam man+d+hA ra ba gcer bu gzhon mdzes can dang gnyis med du 'khril ba/_rigs lnga'i dbang rtags rdzogs pas dbu la pad+ma'i mnyen zhu can/_dbu gtsug tu dpal ldan rdo rje sems dpa' dang gnyis su med pa'i rig 'dzin dga' rab rdo rje/_de'i dbu gtsug tu chos sku kun tu bzang po bcas theg pa mchog gi ston pa rnam gnyis tho brtsegs su bzhugs pa/_phyogs mtshams kyi 'dab ma brgyad la byang chub sems dpa' nye ba'i sras brgyad dang dpal chen sgrub sde brgyad kyi ngo bo bka' bab rig 'dzin chen po brgyad brtul zhugs grub pa'i he ru ka'i chas kyis DA dril dang bcas rdo rje'i gar stabs bsgyur ba/_steng phyogs su gsang sngags phyi nang gi rgyud sde drug gi yi dam/_sprul pa'i rje 'bangs nyi shu rtsa lnga sogs rtsa gsum rgyal ba rab 'byams thams cad dang*/_gzhal yas khang gi sgo bzhir rigs kyi ging chen bzhi dang*/_dkyil 'khor phyi'i khor yug la dpal mgon bdun cu rtsa lnga dbang phyug nyi shu rtsa brgyad la sogs pas mtshon phyogs dus skyabs yul rab 'byams mtha' dag bla ma rig 'dzin 'dus pa'i dkyil 'khor gcig gi ye shes kyi klong du rdzogs pa 'dis mtshon byed du byas te dbang gis smin cing rim pa gnyis kyi lam la brtson pas mtshon bya don gyi dkyil 'khor rdo rje'i phung khams skye mched kyi rtsa rlung thig le'i rnam par dag pa'i rang bzhin du rang la bzhugs par shes pas/_yin tshul gshis kyi dkyil 'khor rang rig gdod nas dag pa'i bdag nyid du ngo 'phrod de zung 'jug rdo rje'i go 'phang myur du thob pa'i phyi nang gzhan gsum gnyis med du ngo sprad pa yin pas dad gus spro ba rgya chen po mdzod cig_/de dag gis lha dang skal pa mnyam pa'i phyir dkyil 'khor phyi nang du 'jug pa'i chos rnams legs par grub nas/_da dngos gzhi dbang bskur zhu ba'i phyir maN+Dal phul/_gsol ba 'debs pa 'di'i rjes zlos mdzod/_/nam mkha' rdo rjes rgyal ba lngar/_/sogs nas brtsams thun mong rigs dbang lnga dang*/_nang nus 'jug gi dbang dam tshig gsum sbyin pa/_bum dbang rjes gnang dang bcas pa dang*/_bum dbang skabs rtsa sngags ma hA gu ru sbyar ba'i khyad par las gzhan zhi khro'i skabs ltar mthar chags su btang*/_dbang gi skabs kun gzigs 'jam mgon chos kyi blo gros rin po ches rtsa sngags ma hA gu ru sbyar bar mdzad pa rig 'dzin sna tshogs rang grol nas de ltar mdzad gsungs pas sgrub sngags gtso bor sbyar na legs dgongs pa dang*/_tshe sgrub kyang sgrub sngags la sbyar ba'i dgongs pa yin nam snyam/_mchan/_rjes 'brel sku phyag rgya'i dbang la/_khyad par du bum dbang dang rjes su 'brel bar sku phyag rgya'i dbang bskur ba la/_dkyil 'khor gyi lha tshogs rnams las rang 'dra'i sku gnyis pa spros nas khyed rang rnams kyi spyi bor bzhag nas dbang bskur bas rig 'dzin bla ma rnams kyi byin rlabs dang gsang ba gsum gyi yon tan chig rdzogs su rgyud la 'phos par mos shig_/lha dbang pad+ma rA ga'i phreng ba ltar yongs rdzogs sbyar te so so'i tsaklis dbang bskur mthar/_deng nas bzung ste rang lus snang stong lha'i sku bsgom pa dang ma bral bas snang srid gzhir bzhengs rig 'dzin bla ma sgyu 'phrul drwa ba'i dag chen ye shes kyi 'khor lor shes pa'i bskyed rim dang ma bral bar mdzod cig_/de rnams kyis bla ma sku rdo rje sprul pa'i sku'i phyi mtshan ma'i dkyil 'khor du bum pa'i dbang thob/_lus kyi las dang rtsa yi sgrib pa dag_/sku rdo rje'i byin rlabs zhugs/_bskyed rim gyi snod du gyur/_rnam smin rig 'dzin gyi sa bon thebs/_sprul sku'i go 'phang gi skal pa rgyud la bzhag pa yin no/__/gsum pa gsang ba zab mo'i dbang gsum mtha' rten dang yongs rdzogs gtor ma'i dbang bcas lnga las/_dang po gsang dbang gi slad du slob dpon rigs 'dus thod phreng rtsal rang 'od ye shes kyi mkha' 'gro dang snyoms par zhugs pa'i dkar dmar byang chub kyi sems sangs rgyas thams cad 'dus pa'i bcud b+han+d+ha'i bdud rtsi dang ro gcig tu byas pa mgrin par bzhag cing myang bar mos shig_/gsang rdzas byin la/_hU~M:_yab yum sbyor ba'i byang chub sems:_dkar dmar b+han+d+ha'i nang du bskyil:_skal ldan bu la dbang bskur bas:_rtsa khams yi ge'i rnam par dag:_tshe la dbang ba'i rig 'dzin thob:_pad+ma can gyi sa non shog:_ma hA gu ru'i mthar/_wAk+ka a b+hi Shiny+tsa AH_rjes 'brel du bzlas lung sbyin pa la dmigs pa 'di ltar mdzod/_slob dpon gyi thugs ka nas rtsa ba'i sngags phreng lu gu rgyud du byung*/_slob ma'i mgrin pa nas zhugs snying gar 'khor bas 'gyu ba'i rlung khams mtha' dag grags stong sngags kyi 'khor lor rdzogs par mos la 'di'i rjes zlos mdzod/_bsnyen sgrub kyi sngags lan gsum rjes zlos byar gzhug_/de ltar bla ma gsung rdo rje longs sku'i nang lus kyi dkyil 'khor du gsang ba'i dbang thob/_ngag gi las dang rlung gi sgrib pa dag_/gsung rdo rje'i byin rlabs zhugs/_bzlas brjod kyi snod du gyur/_tshe dbang rig 'dzin gyi sa bon thebs/_longs spyod rdzogs pa'i go 'phang gi skal pa rgyud la bzhag pa yin no/__/gnyis pa shes rab ye shes kyi dbang gi slad du gzugs dang lang tsho mdzes pa phul du phyin zhing rigs dang skal pa mchog dang ldan pa'i shes rab ma lag tu byin par mos shig_/rig tsaka gtad la/_hU~M:_chos rnams kun gyi 'byung gnas ni:_bde ba chen po gsang ba'i yum:_rigs kyi bu la byin pa yis:_dga' bzhi'i ye shes mngon du gyur:_phyag rgya chen po'i rig 'dzin thob:_'khor lo tshogs chen sa non shog:_sngags mthar/_tsit+ta a b+hi Shiny+tsa hU~M/_de ltar byin pa'i rig ma des/_pad+ma b+hany+dza mo k+Sha ho/_zhes thar pa bstan par bskul te pang du byon pa dang 'du shes gsum ldan gyi rjes su chags pa'i rol mos dga' bzhi'i ye shes nyams su myong bar mos shig_/de ltar bla ma thugs rdo rje chos kyi sku'i gsang ba b+ha ga'i dkyil 'khor du shes rab ye shes kyi dbang thob/_yid kyi las dang thig le'i sgrib pa dag_/thugs rdo rjes byin rlabs zhugs/_bde stong tsaN+Da li'i snod du gyur/_phyag rgya'i rig 'dzin gyi sa bon thebs/_chos sku'i go 'phang thob pa'i skal pa rgyud la bzhag pa yin no/__/gsum pa brda tshig gi dbang la/_gzhi ka dag gi lta ba mtshon pa'i me long dwangs gsal/_lam lhun grub kyi sgom pa mtshon pa'i 'ja' tshon la brten nas dpe don 'brel ba'i 'od gsal gyi rang ngo la mnyam par zhog cig_/shel rdo dang me long bstan la/_ho:_ka dag me long gtsang ma'i ngogs:_lhun grub dwangs shel dri med gsal:_brda rtags rdzogs pas dbang bskur bas:_dri med rig pa'i gnas lugs rtogs:_lhun grub rig 'dzin nyer thob nas:_bde ba chen po'i sa non shog:_sngags mthar/_d+harma d+hA tu a b+hi Shiny+tsa AH_khyed rang rnams lus gnad bsrang la ka dag spros mtha' bral ba'i ngang du mnyam par 'jog 'tshal/_zhes re zhig bzhag de'i ngang la/_phaT/_drag po zhig brjod/_sems gang yin/_rtab rtab tu dris pas/_snang ba had de phyad de ci zer cha med pa byung tshor gyi spros pa 'gags pa de nyid rang gnas kyi ye shes su ngo shes par gyis shig_/de'ang lta ba lung rig dang 'brel ba zhes bya ba yin pas/_smra bsam brjod med shes rab pha rol phyin/_/ma skyes mi 'gag nam mkha'i ngo bo nyid/_/so so rang rig ye shes spyod yul ba/_/dus gsum rgyal ba'i yum gyur rdzogs pa che/_/zhes gsungs pa'i don lags so/__/de nas slob dpon lta dgongs can yin na/_thugs kar a yig zhig gsal ba la slob ma'i rig pa gtad du gzhug la dpon slob gnyis ka mnyam par bzhag_/sgom pa nyams myong dang 'brel ba'i gshis nas a nyi shu rtsa gcig brtsegs mar brjod do/__/de ltar bla ma ye shes rdo rje ngo bo nyid sku'i de kho na nyid don dam bde ba chen po'i dkyil 'khor du dbang bzhi pa thob/_kun gzhi'i las dang shes bya'i sgrib pa dag_/ye shes rdo rje'i byin rlabs zhugs/_ka dag rdzogs pa chen po'i snod du gyur/_lhun grub rig 'dzin gyi sa bon thebs/_ngo bo nyid sku'i go 'phang gi skal pa rgyud la bzhag pa yin no/__/bzhi pa mtha' rten bka' lung yongs rdzogs gtad pa yin pas/_rtsa brgyud kyi bla ma rnams la mos gus gdung shugs drag tu bskyed pas de dag gi dgongs rgyud byin rlabs mtha' dag khyed rang gi rgyud la 'phos/_rdzogs pa chen po klong chen snying gi thig le'i tshig dang don gyi gsang ba mtha' dag gi dbang chen thob par mos shig_/glegs bam mgo bor bzhag la/_hoH_chos sku kun tu bzang po/_longs sku rgyal ba rigs lnga/_sprul sku dga' rab rdo rje/_slob dpon 'jam dpal bshes gnyen/_rig 'dzin shrI sing+ha/_paN chen bi ma mi tra/_o rgyan pad+ma thod phreng*/_mkha' 'gro ye shes mtsho rgyal/_mnga' bdag khri srong lde'u btsan/_rgyal sras dri med 'od zer/_klong chen nam mkha'i rnal 'byor la sogs pa rang bzhin rdzogs pa chen po'i rtsa ba dang brgyud par bcas pa'i dpal mgon rig 'dzin bla ma/_yi dam mkha' 'gro rgya mtsho/_chos srung dam can rgya mtsho'i tshogs dang bcas pa rnams kyis/_deng 'dir rdo rje'i slob ma rnams la dbang bskur du gsol/_byin gyis brlab tu gsol/_rtogs pa spar du gsol/_brtul zhugs bskyed du gsol/_bya rtsol blo 'das rdzogs pa chen po'i klong du dgongs pa'i btsan sa zin te tshe gcig lus gcig la 'ja' lus 'pho ba chen po'i sku mchog brnyes nas dpal kun tu bzang po'i go 'phang la 'god par mdzad du gsol/_zhes lan gsum brjod cing rig pa gtad med ngang du bzhag la don brgyud 'pho/__lnga pa yongs rdzogs gtor ma'i dbang bskur ba la/_spyir gtor ma la bsnyen sgrub kyi dus su dkyil 'khor du shes pa dang*/_mchod pa'i dus su 'dod yon du shes pa/_dbang gi dus su lhar shes pa/_rjes dngos grub tu shes pa rnams su yod pa las/_'dir dbang dus lhar shes par bya ba yin pas thugs dmigs 'di bzhin du mdzod/_rig 'dzin bla ma'i gtor chen 'di nyid phyi ltar rin chen 'bar ba'i gzhal yas khang yangs shing rgya che ba tshad dang mtshan nyid thams cad yongs su rdzogs pa'i dbus su/_nang ltar theg mchog rdzogs pa chen po'i bla ma sku gsum tho brtsegs su bzhugs shing*/_'khor bka' bab rig 'dzin brgyad dang rtsa ba gsum gyi lha tshogs sprin ltar gtibs pa/_chos skyong srung ma rnams kyis las mdzad pa'i bla ma rig 'dzin rtsa gsum sgyu 'phrul drwa ba chen po'i rten dang brten pa'i dkyil 'khor yongs rdzogs su shar ba khyed rang rnams kyi spyi bor spyan drangs shing byin gyis brlabs pa la brten nas/_gtso 'khor thams cad kyi gnas bzhir oM AHhU~M dang hrIHyig gis mtshan pa las 'od zer dkar dmar mthing ga sna tshogs pa'i mdog can dpag tu med pa byung*/_khyed rang rnams kyi gnas bzhir thim pa la brten nas phyi nang gsang ba de kho na nyid kyi dbang bzhi stan thog gcig tu thob/_lus ngag yid gsum cha mnyam gyi sgo nas bsags pa'i 'gal rkyen sdig sgrib bar du gcod pa thams cad nye bar zhi zhing*/_gnas skabs su dbang bzhi'i lam bsgom pa dang*/_mthar thug sku bzhi'i go 'phang thob pa'i skal pa can du byas pa'i mos pa dung dung mdzod cig_/ces brda sbyar la/_hU~M/_dkyil 'khor gtso bo pad 'byung yab yum dang*/_'di rdo grub rin po che 'jigs med phrin las 'od zer gyi rdo rje'i gsung*/_mchan/_rigs bdag dga' rab rdo rje sems dpa' che/_/kun bzang yab yum rgya gar rig 'dzin brgyad/_/rje rgyal 'bangs rigs nyer lnga yi dam lha/_/rgyud sde bzhi drug dpa' bo mkha' 'gro'i tshogs/_/dpal mgon bdun cu rtsa lnga dbang phyug ma/_/nyer brgyad sgo skyong ging chen bzhi bcas kyi/_/sku gsung thugs yon phrin las dbang rnams kun/_/skal ldan las can rnams la bskur ba yis/_/lus ngag yid gsum sgo gsum cha mnyam bzhi'i/_/sgrib bzhi yongs dag rig 'dzin rnam bzhi'i lam/_/sku bzhi'i go 'phang thob pa'i rten 'brel bsgrigs/_/mthar thug gzhon nu bum sku mngon gyur shog_/oM AHhU~M badz+ra ma hA gu ru sarba sid+d+hi hU~M:_kA ya sid+d+hi oM/_wAk+ka sid+d+hi AH_tsit+ta sid+d+hi hU~M/_gu Na sid+d+hi trAM/_sarba sid+d+hi hrIH_gtor ma gnas so sor bzhag_rjes dngos grub tu shes pa'i phyir gtor ma'i lha 'od du zhu ba'i gtor zan dngos grub kyi rang bzhin bdud rtsi'i dwangs bcud du 'khyil ba myangs bas rtsa khams thams cad la khyab/_zag med kyi bde bas rgyud gang*/_mchog dang thun mong gi dngos grub ma lus pa thob pa'i mos pa mdzod/_ces brda sbyar la gtor zan dngos sam/_mtha' skor gyi mtheb kyu lta bu bdud rtsi dang sbyar nas sbyin/_de dag gis dbang bskur gyi rim pa yongs su rdzogs pas sgo gsum bya ba dang bcas pa dkyil 'khor gyi lha tshogs rnams kyi gsang gsum phrin las dang bcas pa gnyis su med par gyur nas khams gsum chos kyi rgyal po phyogs las rnam par rgyal ba'i go 'phang thob par gyur pa la/_rgyal srid bdun gtad la/_phyi'i rten 'brel bskal pa rdzogs ldan gyi dga' ston la spyod pa'i 'khor los bsgyur rgyal rnams la sngon gyi rnam dkar gyi mthu las snang ba'i rgyal srid rin po che sna bdun gyis sa gsum 'jig rten kun tu dbang bsgyur ba dang*/_nang du 'phags pa'i nor bdun gyi 'byor pas lam lnga'i yon tan la dbang bsgyur ba'i brdar rgyal srid rin chen bdun gyi 'byor pas mnga' gsol bar mos shig_/bkra shis rtags brgyad gtad la/_bsod nams brgya las grub pa'i sangs rgyas rnams kyi mtshan dpe'i dpal las snang ba'i bkra shis pa'i rtags mchog brgyad kyis dbang bskur bas bdud dang mu stegs sogs phas rgol gyi g.yul las rgyal zhing 'gro kun de bzhin gshegs pa'i mtshan rtags sogs spyod yul rlabs po che la 'jug pa'i dbang thob par mos shig_/bkra shis rdzas brgyad gtad la/_ston mchog rdzogs pa'i sangs rgyas 'jig rten gyi 'dren par byon nas 'dul ba bzhi yi phrin las dang*/_mdzad pa bcu gnyis kyis 'gro ba'i 'dren par byon pa'i tshe lha mi'i dbang po dag gis rten 'brel gyi rdzas phul ba rnams dus kun shis pa spel ba'i bkra shis grub pa'i rdzas mchog brgyad du byin gyis brlabs pas dbang bskur bas phyogs dus gnas skabs kun tu dge legs rtags kyi nyi ma khor yug tu 'char ba'i dbang thob par mos mdzod/_de dag ni spros pa mtshams pa'i dbang du byas kyi rgyas par grub chen phrin las 'od zer gyi gsung ltar sbyar dgos so/__/las byang nas 'byung ba ltar shis pa brjod/_de dag rnams kyis rig 'dzin chen po 'jigs med gling pa'i dgongs gter klong chen snying gi thig le'i nang sgrub rig 'dzin 'dus pa'i dbang bskur rgyas pa grub chen rin po 'jigs med phrin las 'od zer gyi man ngag lugs ltar legs par grub pa lags pas rtsa ba dang yan lag gi dam tshig mtha' dag ci nus su 'bad pas bsrung snyam pas 'di'i rjes zlos/_rtsa ba sku gsung thugs mchog dang:_yan lag dam tshig nyi shu lnga:_med dang gcig pu phyal ba sogs:_cho ga bzhin du srung bar bgyi:_lan gsum/_gtang rag gi maN+Dal phul/_slar yang lus longs spyod thams cad ltos pa med par khyab bdag bla ma nyid la 'bul ba'i blos 'di'i rjes zlos/_gtso bos ji ltar bka' bstsal pa/_/de dag thams cad bdag gis bgyi/_/khyed la bdag kyang yongs su 'bul/_/slob mar bzung nas spyad du gsol/_/lan gsum/_dge bsngo byas la slob ma rnams grol/_slob dpon gyis tshogs mchod/_spro na bskang bshags rdo rje'i thol glu dang*/_rig 'dus rang gi bskang ba kun gzigs mkhyen brtse rin po che'i gsung sogs sbyar zhing tshogs la rol/_lhag ma nas shis brjod bar gsang ba spyi ltar mthar dbyung bas grub bo/__/de dag gis 'od gsal snying thig gi rtsa ba'i chos bdag grub chen rin po che kun bzang gzhan phan gyi gsung gi dgongs pa ltar yid rton 'os pa yin la/_grub rjes gsung dngos rnyed na de nyid gtso bor bya ba las yan lag brgyad pa'i mtsho 'gram du ba tshwa'i khron pa la yid gdung bar mi bya'o/__/'di la gter gzhung rtsa ba'i dgongs pa dngos bstan rgyal thabs spyi blugs ltar 'bog na 'jam mgon pad+ma gar dbang gi gsung pad+ma'i do shal ltar shes par bya'o/_/kun mkhyen ye shes klong lnga'i mdzod/_/brtse chen thugs kyi thig le'i bcud/_/byin rlabs rtsa ba bla ma yi/_/thugs sgrub smin byed 'od zer rmad/_/ces sgrub sde'i thog ma byin rlabs kyi rtsa ba bla ma rig 'dzin 'dus pa'i dbang bskur rgyas par spros pa'i le'u tshan gnyis pa ste pad+ma dbang chen dgyes pa rtsal gyis sbyar ba'o/__!__bla ma drag po dmar chen rta khyung 'bar ba'i dbang la grub chen rin po che kun bzang gzhan phan gsung dang*/_'jam mgon kong sprul rin po che'i gsung rdo rje'i do shal/_mkhyen brtse rin po che'i dbang bsdus grangs bsags bcas rdo rje'i gsung du ma bzhugs bzhin pa'o/__!__bde chen snang ba rgyas pa'i gzi 'od kyis/_/sa gsum nang gi mun pa sel ma thag_/grub gnyis kun dga'i dga' ston rab gsal gnyen/_/bla ma rdo rje sems dpa' rgyal gyur cig_/rdo rje sems dpa' la brten pa'i bla mchod bde chen lam bzang gi khyad par gyi phrin las bde chen snying po'i bye brag rdo rje'i tshe sgrub pa'i cho ga dang 'brel bar slob ma rjes su 'dzin pa'i tshul la/_khyad par gyi phrin las ltar gzhung bsrang*/_tshe rdzas la tshe 'gugs bstim/_las bum sgrub pa/_tshogs bsags bcas grub pa dang slob ma la khrus bya/_bgegs bskrad/_srung 'khor bsgoms nas/_de la 'dir theg mchog rdzogs pa chen po shin tu rnal 'byor gyi gseng lam_las sku tshe gcig la bde chen rdo rje sems dpa'i gsang gsum ye shes kyi phyag rgya la dbang 'byor ba'i kun mkhyen grub brgya'i dpyid rang byung rdo rje 'jigs med gling pa la dbyings kyi mkha' 'gros zab rgyas chos kyi gsang mdzod gtad pa'i rdzogs pa chen po klong chen snying gi thig le'i chos skor zab rgyas bzhugs pa'i yang snying rdor sems mngon dga'i zhing sbyong gi bla sgrub rtsa ba tsam rgyal ba'i dgongs bcud mngon du phyungs pa/_slar yang rje de nyid kyi smon lam thugs rje'i cho 'phrul zad mi shes pa'i rol rtsed gangs can mkhas grub yongs kyi dad dpon kun gzigs 'jam dbyangs mkhyen brtse'i dbang po'i dag snang du kun mkhyen nyid kyi ye shes kyi skus rjes su bzung ste nye brgyud du bstsal nas bla ma mchod pa'i gzhung rtsa ba yan lag dang bcas pa'i chos bka' zab rgyas ngo mtshar rmad byung gi tshul du bzhugs pa las 'dir ni rdo rje sems dpa' sgyu 'phrul drwa ba'i rgyud rgyas pa las/_bum pa mchog ni bzang po nyid/_/tshe bzhag gnas ni 'di yin te/_/yang nas yang du 'gugs bya zhing*/_/mngon sum smin par gyur pa dang*/_/dbyings su yang ni sba bar bya/_/rdo rje'i go cha srung ba yis/_/brtan cing 'khor los dgag par bya/_/zhes rdo rje'i tshe sgrub pa'i rten dang*/_'gugs pa dang*/_bstim pa dang*/_sba ba dang*/_srung ba'i tshul sogs rgyud las rgya cher byung ba man ngag gis lung du bsdebs nas byin rlabs nye brgyud kyi gzi byin 'bar ba rdo rje sems dpa'i tshe dang lang tsho sgrub pa'i thog mar dbang gi cho ga zab mos rgyud smin dgos pa'i phyir de nyid gsan pa'i yon du maN+Dal phul/_gsol ba 'debs pa 'di'i rjes zlos mdzod/_rdo rje sems dpa' bde ba che/_/sgyu 'phrul gtso bo dgongs su gsol/_/rdo rje'i tshe dang ye shes kyi/_/dbang dang dngos grub bstsal du gsol/_/lan gsum/_yan lag brgyad pas rgyud sbyang ba/_bla ma rdo rje sems dpa' sogs/_de nas nang 'jug gi dngos gzhi ye shes dbab sogs nas/_tiSh+Tha badz+ras brtan par byas pa'i mos pa mdzod/_bar dbang gzhung ltar dang*/_tshe 'gugs la/_bdag mdun lhar gsal ba'i thugs srog sa bon las 'od zer lcags kyu'i rnam pa can nyi zer gyi rdul ltar 'phros brtan g.yo 'khor 'das kyi chos thams cad la phog pas rgyal ba sras dang bcas pa'i thugs rje byin rlabs kyi mthu dang*/_stong khams 'jig rten thams cad kyi 'byung lnga'i dwangs ma rtsi bcud skye 'gro mtha' dag gi tshe dpal nus stobs las dang bsod nams/_khyad par lha klu gnod sbyin rig 'dzin grub pa sogs tshe bskal pa dang mnyam par gnas pa rnams kyi tshe bcud bkrag dang gzi mdangs/_ban bon mthu bo ches rig sngags kyi sbyor ba dang*/_sde brgyad ma rung pas bla dang tshe srog khyer ba la sogs pa thams cad khab len gyis lcags phye bsdus pa ltar 'ub kyis bsdus nas bsgrub bya'i snying gar thim pas dwangs ma'i 'od kyis lus kyi nang thams cad gang bas sngon las 'phral rkyen las byung ba'i tshe thung ba'i mtshan ma thams cad rab tu zhi nas/_tshe mi shigs pa rdo rje/_mi 'gyur ba g.yung drung*/_mi nub pa'i rgyal mtshan du byas te 'chi ba med pa tshe yi dngos grub thob pa'i mos pa mdzod/_tshe mda' g.yab la/_oM/_mgon po sangs rgyas kun gyi bdag_/sogs tshe 'gugs bya/_de ltar tshe 'gugs shing bcud bsdus te tshe yi dbang bskur dngos sbyin pa la/_tshe 'brang bkra shis gzhal med khang gi dbus su rdo rje sems dpa' tshe dpag tu med pa'i lha tshogs rnams bzhugs pa'i sku las 'od zer 'chi med bdud rtsi'i zil mngar gyi rgyun char bab pa ltar brul/_khyed rang rnams kyi spyi bo nas zhugs/_lus kyi nang thams cad gang*/_dwangs ma 'pho med du rgyas btab pas/_sku rdo rje skye 'chi med pa tshe yi dbang thob par mos mdzod/_tshe 'brang spyi bor bzhag la/_oM/_dpal ldan rigs rnams kun gyi bdag_/rdo rje mi phyed gsum gyi sku/_/deng 'dir sangs rgyas thams cad kyi/_/mi 'gyur rtag pa'i dbang bskur ro/_/rtsa sngags la tshe sham sbrel mthar/_kA ya a b+hi Shiny+tsa oM/_bde chen byang chub sems kyi bdud rtsi'i dwangs ma myangs bas mgrin pa'i lam brgyud rtsa gnas thams cad gang*/_bde ba'i zil gyis las rlung gi 'gro 'ong 'pho ba'i rgyu ba 'dzag med du bcings/_gzhom med gsang ba'i srog grub/_gsung rdo rje gzhom gzhig med pa'i tshe yi dbang thob par mos mdzod/_bdud rtsi mgrin par bzhag la myangs te/_AH_dpal ldan rigs rnams kun gyi bdag_/rdo rje mi phyed gsum gyi gsung*/_/deng 'dir sangs rgyas thams cad kyi/_/'gag med dbyangs kyi dbang bskur ro/_/sngags mthar/_wAk+ka a b+hi Shiny+tsa AH_dwangs ma mi shigs pa'i rdo rje tshe yi ril bu lce rdo rje rtse gsum pa'i lam brgyud/_snying ga'i nyi zla'i ga'u'i dbus rlung rig sems gsum dbyer med pa'i thugs srog hU~M dang nr-i a yig bcas la thim/_dwangs ma g.yo rtsol dang bral ba'i bde chen rdo rjer brtan/_'pho med ye shes kyi srog grub/_thugs rdo rje g.yo 'khrul med pa'i tshe yi dbang thob par mos mdzod/_ril bu snying gar bzhag cing khar byin la/_hU~M/_dpal ldan rigs rnams kun gyi bdag_/rdo rje mi phyed gsum gyi thugs/_/deng 'dir sangs rgyas thams cad kyi/_/'khrul med ye shes dbang bskur ro/__/sngags mthar/_tsit+ta a b+hi Shiny+tsa hU~M/_mthar/_tshe yi dwangs bcud thams cad snying ga'i tshe rten la 'dus sogs nas/_a d+hi tiSh+Tha badz+ra ye swA hA/_zhes brtan par bya ba'i bar tshe 'gugs mtha' bzhin sbyar la rgyas gdab/_shis brjod nas dam tshig khas blang*/_gtang rag_/yon 'bul/_dge bsngo bcas byas pas grub po/__/kun mkhyen dgyes pa'i 'dzum 'od las/_/zab gsang bka' gter gdams pa'i dpyid/_/brtse chen 'od zer ma smad mthus/_/'dod rgu'i dpal du ci dgar 'jo/_/zhes yi dam zhi ba rigs kun khyab bdag rdo rje sems dpa'i bla ma mchod pa la brten pa'i tshe dbang gi mdzes rgyan le'u tshan gsum pa ste rdo rje tshe dbang grub pa rtsal gyis sbyar ba'o/__!__ye shes bdud rtsi'i zegs ma reg tsam gyis/_/'khrul rtog srid pa'i zug rngu dpyis 'byin te/_/bde chen lang tsho'i brtan pa rgyas pa'i gnyen/_/rdo rje sems dngos dpal ldan bla ma rgyal/_/rdor sems bla mchod de nyid kyi bdud rtsi sman dbang sbyin pa la dngos dang zhar byung ngo*/_dang po ni khyad par gyi phrin las nas ji ltar 'byung ba ltar ram/_dbang rkyang gi skabs su khrol sgrub ma byas kyang rung*/_gang ltar yang dngos grub blang zhing dzapa? bzla rig pa'i me tog dor ba'i bar dkyus ltar grub pa'i rjes/_rtsa ba'i dbang gi mtha' rten nam bdud rtsi sgrub pa'i mjug tu bya ba ste/_de yang rgyud las/_bdud rtsi'i mchog ni mnyam pa'i dbyings/_/bdud rtsi'i don ni skye 'chi med/_/bdud rtsi'i gnas ni byang chub sems/_/bdud rtsi'i las ni rnam rtog sbyong*/_/bdag dpal tshogs shing 'gro don mdzad/_/sman gyi byin rlabs bsam mi khyab/_/ces gsungs pa ltar snga 'gyur rdo rje snying po'i ring lugs la sgrub sde chen po brgyad kyi gtso bo rdo rje nyi ma'i rigs che mchog bdud rtsi yon tan gyi sgrub sde'i man ngag la nges pa dang drang ba'i don gyi bdud rtsi snang srid dag mnyam bde chen ye shes kyi phyag rgyar gtad la blangs te mchog dang thun mong gi dngos grub sgrub pa'i gseng lam rmad du byung ba ste/_gzung 'dzin gnyis snang gi las nyon gyi bdud tshogs gdod nas rnam par dag pa'i gnas lugs kyi lta ba chos kyi rtsi mchog tu dag pa'i dbang gis/_dug lnga'i gcong nad ye shes lnga yi bcud kyis len pa'i sman gyi mchog tu bsgyur ba'i phyir phung khams rigs lnga yab yum gyi dkyil 'khor du shar ba'i rtags kyi bdud la de dang rnam pa mthun pa'i lha sngags ting 'dzin gyi gzer gdab pa don gyi bdud rtsi'i rnal 'byor chen pos/_rdzas kyi bdud rtsi sha lnga bdud rtsi lnga rtsa ba brgyad dang yan lag stong gi rtsi sman gyi sbyor bas bde ba chen po'i dngos grub kyi dam rdzas la brten nas don gnyis lhun grub kyi phrin las rmad du byung ba'i tshul bka' gter dag snang gi chos sgo du mar byon pa las/_skabs su bab pa che mchog bdud rtsi grub pa'i slob dpon paN chen bi ma la mi tra dang*/_mnga' bdag khri lde khu dbon zung gi ye shes sgyu 'phrul drwa ba'i 'khor lor rdo rje'i lung gis yang yang bsngags shing tshad mas grub pa 'brel tshad don ldan gyi rig 'dzin chen po kun mkhyen 'jigs med gling pa dang 'jam dbyangs mkhyen brtse'i dbang po rnam gnyis la dbang dang sgrub phrin gyi rim pa nye brgyud byin rlabs kyi bka' bab chu bo gcig 'dres rdo rje sems dpa'i bla mchod bde chen lam bzang la brten pa'i myong grol bdud rtsi sman gyi dbang bskur bgyi ba la maN+Dal phul/_gsol ba 'debs pa 'di'i rjes zlos mdzod/_oM AHhU~M/_bdag gzhan bla med bsnyen sgrub 'di dag gis/_/sdig sgrib nyams chag ma lus kun byang nas/_/tshe 'di nyid la rig 'dzin mchog 'grub cing*/_/byin rlabs rtsal dbang gzi brjid nus mthu ldan/_/sku gsung thugs kyi dngos grub bstsal du gsol/_/lan gsum/_bcud ldan sman gyi pho brang 'di nyid bla ma dpal rdo rje sems dpa' yab yum rigs kun 'dus pa'i bdag nyid chen po'i ye shes kyi 'khor lo yan lag bdun dang kha sbyor brgyad ldan lus dkyil gyi lha dang bcas pa dngos su gsal ba khyed rang rnams kyi gnas gsum du bzhag cing gsang ba gsum gyi rdo rje'i byin gyis brlabs shing dbang bskur bas chos kyi bdud rtsis snang srid bde chen du shar/_gsung rdzas kyi bdud rtsis phung khams dwangs mar smin/_thugs rtags kyi bdud rtsis dug lnga ye shes su dag_/ye shes don gyi bdud rtsis lhan skyes rnam par mi rtog rang byung rdo rje sems dpa'i mkha' khyab nam mkha'i rdo rje'i dbyings su mngon par byang chub pa'i dbang dang dngos grub ma lus pa thob par mos shig_hU~M/_rtog 'dul dam tshig bla na med/_/dngos grub kun gyi dbyig chen po/_/rdo rje sems dpa'i ye shes kyi/_/sku gsung thugs kyi dbang bsku ra ro/__/zhes dang*/_sngags mthar/_kA ya wAk+ka tsit+ta a b+hi Shiny+tsa hU~M/_zhes gnas gsum du reg_bdud rtsi sprul pa'i dkyil 'khor 'od du zhu nas khyed rang rnams la thim pas byin rlabs yongs rdzogs rgyud la brtan par mos shig_/'chi med kyi tshe ster ba/_nyams chag skong ba sogs mchog thun gyi dngos grub mtha' dag bdud rtsi'i mthus grub pa la ngo mtshar ba'i che ba brjod pa 'di'i rjes zlos mdzod/_a ho ma hA su kha ho/_zhes rtogs pa brjod/_bdud rtsi bsdu ba po 'jam dpal rnon po yin pas dkyil 'khor ba rnams kyis 'jam dpal rnon po la gtad nas gnang ba byin par bsam la slob dpon gyis/_badz+ra pra be sha ya phaT/_zhes brjod de sman thod la dkris pa'i srad bu bkrol nas sman kha phye la/_sarba pany+tsa a mr-i ta a be sha ya AH_zhes brjod pas/_bdud rtsi'i dwangs ma dkar dmar mthing ga'i 'od kyi rnam par bsam/_nang mchod dang sbyar la gzhung ltar sman mchod dang*/_brgyud pa'i mtshan don sbyar na brgyud 'debs ltar la/_tshig rkang bzhi pa/_sman mchod 'bul lo chos sku'i ye shes skyed/_sogs dang*/_oM ma hA sarba pany+tsa a mr-i ta khA hi/_zhes sngags bcas sbyar/_rdzogs par grub rjes/_bdud rtsi snying po can gyi dbus/_/sangs rgyas kun gyi sku gsung thugs/_/yi ge gsum gyi rnam pa can/_/dam tshig phyag rgya gnyan pos blangs/_/sngags mthar/_kA ya sid+d+hi oM/_wAk+ka sid+d+hi AH_tsit+ta sid+d+hi hU~M/_zhes brjod cing gnas gsum du thig le byas la myang*/_slob ma la'ang sbyin/_de dag gis bdud rtsi sman gyi dbang bskur grub pa ste phan yon gyi rim pa'ang rgyud las/_'thung na ngan song sgrib pa 'byang*/_/rtag bsten dngos grub mchog kyang 'grub/_/bzhi brgya rtsa bzhi'i nad sel zhing*/_/lha la rtag tu mchod byas na/_/bdag dang gnyis su med par 'gyur/_/mi mthun phyogs la gtor byas na/_/drag po gtum po'ang lhan ner 'gyur/_/gzhan yang dngos grub thams cad ni/_/ji ltar dmigs pa bzhin du 'grub/_/ces sogs rgya cher bsngags pa'i phan yon la spro bas tshul bzhin sgrub pa'i bdud rtsi'i dam rdzas kyi phud kyis dkyil 'khor gyi lha la bdud rtsi dang*/_sreg rdzas su 'bul/_rin po che'i gwa'u la sogs par dngos grub kyi rten spyi bo'am mgul du bcangs nas thun bzhir chag med du rnal 'byor dang ldan pas bsten/_mkha' 'gro dang chos skyong la gtor ma dang mnyam du 'bul/_sgrub pa po dang don du gnyer ba gzhan la'ang ci nus su sbyin/_sgrub pa'i gnas sogs sa yi dpal du mi 'dzad pa'i gter du sba ba dang*/_rgya mtsho dang chu klung du 'dor ba/_bzang shing gi bsang sprin rlung dang sbyar bas snod bcud kun la khyab par spel ba sogs 'byung lnga dang sbyar ba'i phrin las rgyas par spel zhing mthong thos dran reg grol ba drug gi phrin las rgya cher skyong ba'i g.yar dam bzung dgos pa'o/__/gnyis pa zhar byung ril bu'i dbang bskur skabs/_rtsa gzhung gi bum dbang grub pa'i rjes/_rin po che'i bum pa gzhal med khang gi dbus su ril bu rnams bla ma dang gnyis su med pa'i dpal rdo rje sems dpa' zhi khro rab 'byams rgyal ba'i spyi gzugs chen por bzhugs pa'i sku las ye shes kyi 'od zer dpag tu med pa byung*/_slob ma'i sgo gsum la thim pas las dang nyon mongs pa'i sgrib pa sbyangs/_rtog sgrib nyams chag thams cad dag_/byin rlabs dang dngos grub mtha' dag thob par mos shig_/ril bu spyi bor bzung ste/_dbyings kyi bum par rig pa'i lha tshogs rnams/_/ye shes thugs rje'i gzi byin rab 'bar bas/_/sgo gsum rdo rje gsum du byin brlabs nas/_/dngos grub stsol zhing brtan par bzhugs su gsol/_/sngags mthar/_kA ya wAk+ka tsit+ta sarba sid+d+hi pha la hU~M/_zhes brjod cing gnas gsum du gtug/_ril bu lhar gsal ba rdo rje lce yi lam nas brgyud de snying dbus mi shigs pa'i thig le dang dbyer med par ye shes sems dpa'i tshul gyis byang chub bar du bzhugs shing dbang dang dngos grub stsol bar mos la yi ge brgya pa bzla bzhin du ril bu mid/_de ltar tshul bzhin bsgrubs pa'i dam rdzas de nyid myang ba'i phan yon yang*/_rdor sems thugs kyi sgrub pa'i gzhung las/_de lta bu yi dam rdzas de:_gang gis zos pas nyams chag sbyangs:_dam tshig dngos grub kun thob nas:_'pho med bde chen 'grub par 'gyur:_zhes gnas skabs su dam tshig nyams chag gtso bor gyur pa'i sdig sgrib thams cad lhag med du byang zhing*/_phrin las bzhi dang grub pa chen po brgyad la sogs pa'i thun mong gi dngos grub thams cad thob pa dang*/_mthar thug bde ba chen po kha sbyor yan lag bdun ldan dpal rdo rje sems dpa'i go 'phang dka' ba med par 'grub pa'i ma bsgoms sangs rgyas chos kyi grol lam phan yon bsam mi khyab pa'i bdag nyid can gyi dbang bskur grub pa'o/__/dbang gzhung gi gsang dbang la 'jug dgos so/__/thams cad mkhyen pa'i ye shes kyi/_/spyod yul zab rgyas chos kyi snying*/_/rjes brtse'i 'char ka'i 'od zer gyis/_/snang 'di skal bzang kun dga'i dpyid/_/dpal rdo rje sems dpa'i bla mchod dang 'brel ba'i bdud rtsi sman gyi dbang zhar byung dang bcas pa'i le'u tshan bzhi pa ste phrin las rol pa'i rdo rjes sbyar ba'o/

!__rgyud dang sgrub sde'i chos tshul rgya mtsho kun/_/kun 'dus sgrub chen sde brgyad chig dril chos/_/chos kun nying khu bla ma yi dam mchog_/mchog sgrub rig 'dzin thugs kyi thig ler gus/__/de la 'dir dngos grub kyi rtsa ba yi dam spyi dril/_bla ma shin tu drag po mthing ga'i thugs sgrub/_sgrub chen bka' brgyad drag po dpal chen 'dus pa rtsa ba'i dkyil 'khor gyi smin byed rgyas par 'god pa la/_sngon 'gro sta gon/_dngos gzhi'i dbang bskur gnyis kyi/_dang po ni/_spyi chings zhi khro'i dkyil 'khor gyi sta gon ltar la/_khyad par lha sta gon skabs maN+Dal steng tshom bu gtso 'khor dgu_/de rgyab bzhi bcas bkod/_bdag bskyed dpal chen phyag rgya gcig pa rgyun gyi rnal 'byor kun mkhyen bla ma mkhyen brtse'i gsung ltar 'thus/_sa lha dang gnyug mar gnas pa la dkar gtor btang*/_mchod pa byin brlabs/_hU~M:_dbyings nas yi ge 'bru gsum sogs/_sman raka gtor ma byin rlabs bcas dpal chen gzhung ltar la/_tshom bu las sngags kyis bsang*/_swa b+hAs sbyangs/_stong pa'i ngang las mdun gyi rten:_'byung ba rim brtsegs ri rab steng:_phyi rol rdo rje'i srung 'khor dang:_drag po'i gzhal yas mtshan rdzogs dbus:_de steng hU~M bab yongs gyur las:_rdo rje sngon po rtse lnga pa:_yongs gyur 'bras bu'i he ru ka:_sogs las byang rgyas pa ltar dam tshig pa bskyed/_ye shes pa bstim/_phyag mchod bstod pa'i bar dkyus ltar ram/_mchod pa'i las rim 'jam mgon mkhyen brtse rin po che'i mngon rtogs 'bring po ltar btang yang rung*/_'bru gsum/_gu ru shrI/_badz+ra tsaN+Da cung zad re bzlas la/_rdor dril dang spos thogs te/_rang gi lce hU~M las skyes sogs zhi khro'i sta gon ltar dang*/_bum pa sta gon la rnam rgyal bum pa mgul chings sngon po kha rgyan gzungs rdor sogs chas ldan la mchod pas bskor ba bshams/_mchod pa byin rlabs las byang ltar sngon du 'gro bas/_shU n+ya tAs bsang sbyangs/_stong pa'i ngang las bum gdan pad+ma 'dab brgyad kyi steng du b+h+rU~M yig yongs su gyur pa las 'od snang rin po che las grub pa'i bkra shis rnam rgyal gyi bum pa lto ba zlum la zhabs zhum pa/_mgrin pa ring la kha g.yel ba'i mdun ngos mchu 'phyang ba/_lha rdzas las grub pa'i pany+tsa li ka'i mgul chings prog gsum dang ldan pa/_byang chub ljon pa'i kha rgyan can/_nang chos sku'i rang bzhin yangs shing mtha' mi mngon par gzugs sku gnyis kyi cha bcud so lngas gtams pa/_phyi bum pa'i rnam pa la nang ye shes kyi gzhal med khang rnam par thar pa'i sgo gsum gyi bdag nyid byang chub phyogs kyi chos sum cu rtsa bdun gyi brda don rtags gsum yongs su rdzogs pa'i pho brang chen po'i dbus su spyi dpal chen po/_shar du yang dag_/lhor gshin rje/_nub tu rta mgrin/_byang du phur pa/_shar lhor ma mo/_lho nub tu rig 'dzin/_nub byang du drag sngags/_byang shar du mchod bstod bde gshegs sgrub pa bka' brgyad drag po dpal chen 'dus pa bdun brgya nyer lnga'i lha tshogs gsal la ma 'dres shing*/_snang la rang bzhin ma grub par bzhugs pa'i gnas gsum du yi ge gsum gyis mtshan pa las 'od zer 'phros pas rang bzhin gyi gnas nas sgom pa dang 'dra ba'i ye shes pa badz+ra sa mA dzaH_spyan 'dren ni/_hU~M:_dmigs med mkha' ltar dag cing khyab pa'i sku:_spyan 'dren gshegs su gsol bar mi dmigs kyang:_thugs rje'i ngang nyid chos sku'i rol pa las:_ye shes sgyu mar rol zhing gshegs su gsol:_e h+ya hi b+ha ga wan ma hA ka ru Ni ka dr-i sh+ya ho:_dzaHhU~M ba~M hoHsa bstim:_mchod pa ni:_hU~M:_dngos su 'byor dang yid kyis rnam sprul pa'i:_sogs mthar/_rU pa nas spar+she'i bar dang*/_sarba pany+tsa rak+ta ba ling+ta ma hA su kha d+harma d+hA tu pU dza hoH_bstod pa ni:_hU~M:_rdo rje glu ma las kyi phyag rgya yis:_dbyangs kyi yan lag chos kyi phyag rgya'i sprin:_rigs lnga'i dam tshig phyag rgya la sbyar nas:_lhar snang phyag rgya chen por bstod par bgyi:_bzlas pa ni/_gzungs thag la 'jus nas/_bdag bskyed kyi thugs ka nas sngags kyi 'od zer gzungs thag 'od kyi sbu gu can la 'khril te song bas bum lha'i thugs rgyud bskul/_bde stong gi ye shes bdud rtsi'i rang bzhin can du bab pas bum pa gang bar bsam zhing*/_rtsa sngags dbyangs gsal sbrel ba bzla/_mthar gong ltar mchod bstod yig brgya bzla/_dung chos phul la/_oM AHhU~M bum pa'i lha tshogs rten dang brten par bcas pa 'od du zhu nas bum chu dang ro gcig tu gyur/_zhes brjod/_las bum la/_swa b+hA was sbyangs/_stong pa'i ngang las rin po che'i bum pa tshad dang mtshan nyid rdzogs pa bcud kyis gtams pa'i dbus su pa~M las pad+ma dang ra~M las nyi ma'i gdan la hU~M las khro chen bdud rtsi 'khyil ba sku mdog ljang nag mi bzad pa'i nyams can/_phyag g.yas sna tshogs rdo rje dang g.yon sdigs mdzub/_zhabs gnyis dor stabs su bzhugs pa'i spyi bor oM/_mgrin par AH_thugs kar hU~M gis mtshan pa las 'od zer 'phros pas rang 'dra'i ye shes pa spyan drangs/_badz+ra sa ma dzaH_dzaHhU~M ba~M hoH_gnyis su med par gyur/_ar+g+haM sogs kyis mchod/_bstod par 'os pas bstod/_thugs kar nyi dkyil hU~M gi mthar sngags phreng 'khor ba las 'od zer me stag lta bu 'phros pas gdon bgegs dang sdig sgrib thams cad bsregs/_bdud rtsi'i rgyun bab pas bum pa gang bar gyur/_oM badz+ra a mr-i ta kuN+Da li ha na ha na hU~M phaT:_ci nus bzla/_mthar dung chos phul la/_oM AHhU~M bum lha bde stong gi ngo bor zhu ba khro bo'i rdul phra rab tu gyur par bsam mo/__/slob ma sta gon gyi sngon 'gro'i chos bshad cung zad bsdu na/_de yang ngo bo mi khom pa brgyad kyi ldog cha brgyad dang*/_de'i khyad par gyi chos 'byor pa bcu ste dal 'byor gyi chos bco brgyad dang ldan pa'i mi lus rin po che rgyu dang dpe dang grangs sogs gang gi sgo nas bsams kyang shin tu rnyed par dka' zhing*/_phan 'dogs bsam gyi mi khyab pa dang ldan pa 'di lta bu rnyed du zin na'ang*/_phyi snod kyi 'jig rten sra zhing 'thas pa ltar snang ba rnams kyang mthar me bdun chu gcig gis 'jig pa'i tshe thal ba tsam yang lus par mi 'gyur/_nang bcud kyi sems can thams cad kyang skyes nas tshe thar du song ba gcig kyang med pas/_rang nyid kyang nges par 'chi bar ma zad/_do nub tsam yang mi 'chi ba'i gdeng ni med/_'chi ba'i tshe chos rnam par dag pa kho na ma gtogs gang gis kyang mi phan/_shi nas cang med du mi 'gro bar las 'ba' zhig gi rjes su 'brang ste/_sdig pa'i las kyis ngan song gsum du skyes na sdug bsngal gyi sdug bsngal bzod pa'i blag med/_zag bcas kyi dge bas mtho ris gsum du skyes kyang 'gyur ba'i sdug bsngal dang*/_khyab pa 'du byed kyi sdug bsngal kho na las ma 'das pas/_da res 'khor ba sdug bsngal gyi rgya mtsho chen po 'di las cis kyang thar ba zhig bya dgos/_de'i ched du theg pa chen po'i dge ba'i bshes gnyen mtshan nyid dang ldan pa mnyes pa gsum gyis bsten nas/_blang dor gyi gnas ji ltar gsungs pa'i don rnams byis pa dang sdig pa'i grogs kyi dbang du ma song bar lag len du thebs nges pa'i 'chi chos gsha' ma zhig ma byas pa'i thabs med de/_chos de'i 'bras bu thar pa bla na med pa sangs rgyas kyi go 'phang sgrub dgos pas de'i phyir theg pa chen po'i sgor zhugs dgos/_de la'ang rgyu lam du byed pa mtshan nyid theg pa las khyad par du 'phags pa 'bras bu lam byed rdo rje theg pa rnal 'byor bla med kyi rgyud sde tshe gcig lus gcig la rdo rje 'chang chen po'i go 'phang nges par 'grub par byed pa yin zhing*/_de la'ang gsang sngags kyi rgyud dang sgrub sde'i chos skor dpag tu med pa bzhugs pa las/_gsang sngags ma hA yo ga sgrub sde rgya mtsho'i phyi mo sangs rgyas gnyis pa slob dpon chen po la bka' bab pa'i bde gshegs sgrub pa bka' brgyad de/_'og min gyi gnas su kun tu bzang pos zhi khro'i dkyil 'khor rab 'byams bkod de bka' brgyad spyi rgyud lnga/_sgos rgyud bcu la sogs pa bstan/_rig 'dzin gtso bo rdo rje chos kyis bsdus nas dgongs 'grel lung lnga mdzad nas mkha' 'gro las kyi dbang mo che la gnyer du gtad de/_bsil ba'i tshal gyi mchod rten bde byed brtsegs par gter du sbas pa'i sgos bka' rig 'dzin brgyad so so dang*/_spyi rgyud slob dpon chen po la bka' bab ste 'phags bod gnyis su 'brel tshad rdo rje'i rig 'dzin gyi sa la sbyar bar mdzad pa'i gdul bya'i gtso bo bod yul chos kyi rgyal po mnga' bdag tshangs pa lha yi me tog la bka' brgyad bde gshegs 'dus pa'i rgyud lung man ngag gi mdzod gtad de bod yul mtha' dbus kun tu gter du sbas pa las gter kha gong 'og sogs gter ston grub pa'i skyes chen rnams kyis rim par spyan drangs nas 'gro don rgya cher mdzad pa las 'di ni/_dpal chen zhal lung las/_'jam dpal chos kyi bshes gnyen gyis:_byin gyis brlabs pa'i rig pa 'dzin:_smin mtshams dpa' bo'i rgya rtags can:_de la las kyi dbang mo ches:_dgongs pa'i brda ris sprad pa'i tshe:_mkha' 'gro'i gsang mdzod chen mo la:_dbang bsgyur nga yi dgongs pa'i mthil:_de yi snying la yang dag zhugs:_snang ba tshig dang dpe char shar:_gter gyi nang nas yang bcud yin:_zhes dang*/_rig 'dzin rtsa rgyud thod pa'i dum bu las/_rang rgyud sbas tshul ltar bzhugs pa'i:_gsung sprul bdun gyi gcig shos la:_smon lam gtad rgya'i dbang bskur bas:_nam zhig 'gro don dus bab tshe:_rig 'dzin khyod kyis bltar yod la:_phal gyis bzung du med pa yi:_mkha' 'gro'i yi ge rdzu 'phrul can:_sku gdung 'bar ba'i brda ris 'di:_dbyings kyi mkha' 'gros sprad pa'i mod:_so so yang dag rig pa bzhi:_dag pa chen po'i brtul zhugs la:_dbang bsgyur chos kyi gter la dbang:_zhes rdo rje'i lung gis ji ltar bstan pa'i bden don mngon sum du gyur pa mnga' bdag chos kyi rgyal po dang*/_de'i skye ba de ma thag pa rgyal sras lha rje khu dbon zung gis mi slob 'bras bu mngon gyur gyi rang gzugs/_gter ston rkyang pa'i skye ba bzhes pa'i bcu gsum pa mkhas shing grub pa'i gtsug rgyan kun mkhyen chos kyi rgyal po gar dbang 'jigs med gling pa la bka' bab pa'i rdzogs pa chen po klong chen snying gi thig le'i chos skor la rig 'dzin bla ma nyid kyi phyi nang gsang ba yang gsang gi sgrub tshul du ma yod pa las gsang ba sgrub sde brgyad kun 'dus yi dam spyi sgrub bla ma drag po dpal chen 'dus pa'i rtsa ba'i dkyil 'khor chen por smin par byed pa la sngon 'gro slob ma sta gon dang*/_dngos gzhi'i dbang bskur gnyis su yod pa las thog mar gyur pa slob ma lhag par gnas pa'i rim pa zhu ba'i don du maN+Dal phul/_sbyar ba las gzhan zhi khro ltar las dmigs bsal ma mchis/_dngos gzhi'i dkyil 'khor bsham bkod la dpal chen gzhung mthun gyi dkyil 'khor bkram pa'i steng*/_rigs dbang lnga/_dpal chen gtso dgu khyung dang bcas pa'i tsakli/_gsang thod/_rig tsaka_/me long shel rdo/_rjes gnang chas/_mig dar/_me tog_/dor ra/_mig thur sogs gzhung ltar tshogs par byas la/_bskyed rim gyi go don lhongs su gyur pa dag gis bdag mdun bum gsum cho ga gcig gis bsgrubs kyang rung ba sngon gyi bla ma dngos grub brnyes pa dag gis phyag bzhes kyang yin la/_na tshod yol yang byis pa'i rnam rig can rnams ni las dang po pa yin pas bdag mdun bum gsum gyi rnam dbye phyed pa'ang med na bskyed rim goms brtan gyi dngos don la ji ltar 'byed/_de bas na chos la dbang za ba spangs te/_sgrub gzhung bzhin du bdag bskyed bzlas pa dang bcas pa'i mthar mchod bstod dang*/_de nas mdun bskyed sgrub pa'i mchod pa kha gsos la/_rdo rje slob dpon sangs rgyas dpal sogs kyi rgyun bshags lan gsum/_byin 'bebs dang mchod pa byin rlabs gzhung ltar la/_mdun rten/_shU n+ya tAs bsang sbyangs/_rang byung rig pa bdag med de bzhin nyid sogs nas bzlas pa ci nus bya'o/__/zhes bdag 'jug dbang don rgya mtsho las gsungs pas na/_brgyud 'debs dang*/_skyabs sems nas mchod pa byin rlabs bar las byang ltar la/_bdag bskyed/_hU~M:_rang byung rig pa bdag med de bzhin nyid sogs de bzhin nyid kyi ting nge 'dzin nas/_oM hU~M swA hrIHAH_hU~M:_'og min chos dbyings bde chen sogs spyan 'dren/_bzhugs gsol phyag 'tshal rnams rang gzhung ltar dang*/_bla med mchog gi mchod pa dam pa ni:_ye shes lnga yis 'od zer rnam par 'phro:_'dod pa'i yon tan lnga yi rab brgyan te:_dam tshig bzhin du ci bder bzhes su gsol:_ma hA mu dra pU dza hoH_ma hA dz+nyA na te te hU~M:_te na te te hU~M:_oM shrI badz+ra sa pa ri wA ra d+hU pe hU~M:_puSh+pe trA~M:_a lo ke hrI:_gan+d+he ho:_nai wi te AH_shab+da hU~M:_sarba pU dza sa ma ya hoH_ha la pany+tsa pU dza hoH_ma hA a mr-i ta khA hi:_ma hA ba liM ta khA hi:_ma hA rak+ta khA hi:_ma hA badz+ra a mr-i ta dza gad pU dza ho:_dzaHhU~M ba~M hoH_ta na ga na pU dza hoH_zhes mchod pa'i rim pa bsdus te bya ba dang*/_hU~M:_mi sdug srin po sogs bstod pa/_bsnyen sgrub sgrub chen gyi bzlas pa khyug tsam rjes/_ye shes lha tshogs sogs stong tshig mchod bstod tsam sbyar na legs snyam/_rdo rje slob dpon sangs rgyas sogs yan lag brgyad pa'i tshogs bsags nas/_byin 'bebs/_mchod pa byin rlabs dang*/_mdun rten/_shU n+ya tAs sbyangs/_rang byung rig pa sogs nas las byang dkyus ltar dbang bskur rgyas gdab/_spyan 'dren bstim pa/_phyag mchod bstod pa bzlas pa bcas gzhung bzhin la/_gtso bo gu ru shrI dang spyi dril badz+ra tsaN+Da gnyis mang tsam dang*/_zhi bsnyen/_hU~M bzlas dang las sbyor khyug tsam btang bas 'thus/_bum sgrub sta gon skabs ltar byas pas 'brel chags su 'gyur la/_mthar mchod phreng rgyas bsdus gnyis gang 'os/_bstod pa/_nongs bshags bcas dang*/_bka' srung gtor bsngos/_tshogs bskang bshags rnams gzhung ltar grub rjes/_bdag 'jug la/_gzhi bde gshegs snying po gdod nas dkyil 'khor gyi 'khor lor rdzogs pa 'jug cing dbang blang ba'i yul dang*/_rnam smin gyi rten phung khams tshogs brgyad kyis bsdus pa'i bag chags blo bur ba sbyang gzhi slob bu'i tshul du shes par byas nas/_slob ma la dbang bskur ba'i skabs kyi cho ga bzhin tshang bas dbang blangs te bdag nyid nus ldan du byas la/_slob ma 'jug par gnang ba zhu/_cis kyang ma grub na rig pa'i me tog dor ba dang gnang zhu bcas nges par bya/_sngar sta gon byas pa'i slob ma rnams sgo'i phyi rol nas khrus bya/_bgegs bskrad/_srung 'khor bsgom/_mtshams sbyor spyi 'gros/_tsak+Shu b+han+d+ha wa ra ma na ye swA hAHsa mig dar/_a khaM wi ra hU~M gis me tog gtad/_lo rgyus kyi khyad par/_de yang 'o skol gyi ston pa thabs mkhas la thugs rje chen po dang ldan pas gdul bya sems can gyi khams dbang bsam pa mos pa'i rim pa dang rjes su mthun pa'i chos 'khor bsam gyis mi khyab par bstan pa thams cad bsdu na rgyu 'bras kyi theg pa gnyis su 'dus pa las/_khyad par du mas 'phags pa 'bras bu gsang sngags rdo rje theg pa ste/_de'ang phyi thub pa rgyud kyi theg par kri yog sde gsum/_nang thabs rgyud kyi theg par bskyed rdzogs rdzogs chen gsum du phye ba las nang pa thabs kyi rgyud/_de la'ang rgyud sde dang sgrub sde gnyis las phyi ma sgrub pa'i sde ste/_de la'ang rdo rje sems dpa' snying gi me long gi rgyud las/_bskyed pa ma hA yo ga ni chos thams cad kyi gzhi lta bu'o/_/rdzogs pa a nu yo ga ni chos thams cad kyi lam lta bu'o/__/rdzogs pa chen po a ti yo ga ni chos thams cad kyi 'bras bu lta bu'o/__/zhes gsungs pas ma hA yo ga ni sngags kyi theg pa'i gzhi lam 'bras bu'i don thams cad ston pas theg pa'i phyi mo lta bu yin la/_zab chos de nyid kyi rtsa ba sgrub chen bka' brgyad ces bde gshegs rgyal ba zhi khro'i spyi sgrub 'di nyid 'og min gyi gnas su kun bzang che mchog he ru ka zhi khro'i tshom bur snang bas spyi rgyud lnga dang sgos rgyud bcu/_bye brag so so'i sgos rgyud dpag tu med pa chos nyid kyi rang sgras gsungs/_mi mngon rig pa 'dzin pa'i gnas su gsang bdag rdo rje chos kyis bsdus nas 'khor gyi rig 'dzin la bstan te dgongs 'grel lung lnga mdzad nas mkha' 'gro las kyi dbang mo che la gtad/_bsil ba'i tshal gyi mchod rten bde byed brtsegs par mkha' 'gro ma bde ba'i dngos grub kyis ri rab kyi srog shing dpag bsam ljon pa la dpe byas nas gter du sbas pa/_zug pa rtsa ba lta bu'i tshul du rgyud sgyu 'phrul sde brgyad sogs mchod rten gyi seng khri/_'dril ba sdong po'i tshul du bde gshegs 'dus pa'i rgyud skor bum pa'i dbus/_gyes pa yal ga'i tshul du sgos rgyud rnams bum pa'i phyogs mtshams/_gsal ba me tog gi tshul du gsang ba yongs rdzogs bre/_smin pa 'bras bu'i tshul du rang byung rang shar chos 'khor/_'bras bu'i bcud kyi tshul du sangs rgyas mnyam sbyor gdugs kyi dbus/_yang gsang bla med a ti nag po sogs rdzogs chen snying po'i skor rnams rtse mo'i tog la rgyas btab nas dpa' bo DA kir gnyer du gtad/_de nas mi yul gyi gdul bya 'dul ba'i dus la bab pa na/_dpal chen po dang gnyis su med pa'i rig 'dzin gyi rgyal po kuny+dza ra'i thugs ye shes klong dgu'i rang rtsal bka' bab rig 'dzin brgyad dang*/_rgyal dbang pad+ma thod phreng rtsal dang dgur snang ste/_smug nag dbang gi mkha' 'gros sgrub chen brgyad kyi gter sgrom slob dpon so so la gtad de dur khrod chen po brgyad du bsgrubs pas dpal he ru ka dang gnyis su med pa'i go 'phang brnyes/_rgyal dbang pad+mA ka ras slob dpon de dag las sgrub thabs bye brag pa'i rgyud lung man ngag gsan nas de rnams las kyang go 'phang mthon por gshegs pa'i tshul bstan te/_mchod rten bde byed brtsegs pa nas sngar rgya ma khrol ba'i sgrub sde spyi dang*/_rdzogs chen sogs lhag ma ma lus par spyan drangs/_dkyil 'khor gyi bdag po rnams kyis gsang sngags kyi rgyud sde rnams la dbang bsgyur bar mnga' gsol te/_gsang sngags chu bo bzhi'i dbang gi bka' bab brnyes/_sngon gyi slob dpon brgyad la chos kyi skyes phul te sku lnga lhun grub rdo rje 'chang gi go 'phang mngon sum du mdzad/_'jam dpal sprul pa'i rgyal pos bod du spyan drangs nas sangs rgyas kyi bstan pa dkar 'jam yug gcig tu brdal ba la/_sangs rgyas las kyang dkon pa'i gsang chen 'bras bu'i chos 'khor bskor bar gsol ba btab pas bsam yas mchims phu'i brag dmar ke'u tshang du las can snying gi bu dgu la bde gshegs 'dus pa'i dkyil 'khor du dbang bskur nas/_me tog gang la phog pa'i dkyil 'khor spyi bye brag tu bsgrubs pas grub rtags mngon du gyur cing*/_'bangs rigs nyer lnga la sogs pa du ma yang rjes su bzung zhing grol bar mdzad/_bde gshegs 'dus pa yongs rdzogs kyi bka' mnga' bdag tshangs pa lha yi me tog nyid la babs te rgyud lung man ngag thams cad kyi bdag por gyur/_gu ru rin po che dang*/_rje 'bangs grogs gsum sogs kyis phyi rabs kyi gdul bya la/_gter gyi rigs byed bco brgyad du phyes nas bod yul mtha' dbus kun tu sbas pa'i zab chos kyi gtso bo sangs rgyas gnyis pa o rgyan chos kyi rgyal po'i thugs dam mthar thug bde gshegs sgrub pa bka' brgyad la/_sku gsung thugs yon tan phrin las kyi gter chen lnga'am bka' ma mkhas pa mi bzhi'i thugs bcud bka' brgyad rdzong 'phrang*/_gter ma'i phyogs la snying dang 'dra ba nyang gter sgrub pa bka' brgyad/_snying khrag dang 'dra ba chos dbang gsang rdzogs/_snying khrag dwangs ma dang 'dra ba byang gter rang shar rang grol bcas bka' brgyad rnam gsum dang*/_srog dang 'dra ba pad gling thugs kyi me long*/_lus dang 'dra ba bsam gtan gling pa'i dregs 'dul/_rdor gling gsang ba yongs rdzogs/_mnga' ris paN chen rin po che'i bla ma bka' brgyad rig 'dzin yongs 'dus sogs dang*/_'ja' tshon pa'i bka' brgyad dngos grub snying po/_klong gsal bka' brgyad bde gshegs yongs 'dus/_yongs dril bka' 'dus chos kyi rgya mtsho bcas snga phyi bar gsum rnams su grags che bas mtshon brgyud pa drug ldan gyi bka' srol las byung ba'i sgrub sde bka' brgyad rgyas bsdus/_rgyud/_sgrub thabs/_man ngag sogs mi 'dra ba du ma zhig byon pa/_rgyud las/_zhi khro bka' brgyad lha tshogs ni:_shes pa tsam gyis chog pa yin:_dran pa tsam gyis lam sna 'dren:_ye shes nang nas khyad par che:_lha yi nang nas lha mchog yin:_de la brten dang sgrub pa dang:_mchod dang bstod pa thams cad kun:_chos kyi dbyings su mngon 'tshang rgya:_zhes gsungs pa dang*/_bye brag tu spyir thar pa dang thams cad mkhyen pa'i lam gyi yon tan thams cad dge ba'i bshes gnyen gyi bka' drin las 'byung zhing*/_khyad par gsang sngags rdo rje theg pa'i lam gyi mchog thun dngos grub thams cad bla ma'i rdo rje'i gsum gyi byin rlabs kho nar rag las pa rgyud lung man ngag kun las che thang du bsngags pa'i rgyu mtshan gyis bskyed rdzogs dbang bskur thams cad bla ma'i ye shes kyi rol par blta ba'i lam byed ni byin rlabs kyi tshan kha che zhing dngos grub myur ba'i nye lam khyad par du 'phags shing*/_de yang gdul bya 'dul byed kyi gnas dus dang mthun par/_deng sang rtsod dus snyigs ma'i sems can dmu rgod mi thub pa lnga bdo bas/_nang du rgyu nyon mongs dug lnga ches rags par brdol ba'i rgyus/_phyi ru 'bras bu nad mug mtshon gyi bskal pa ngan pa bdo zhing*/_bar du rgyal bsen dam sri'i bar chad rlung ltar 'tshubs pas chos bzhin spyod pa'i skyes bu la rnam grol gyi lam sgrub tu mi ster ba la ched du dgongs pas thugs rje myur zhing byin rlabs shugs drag pa snyigs ma'i skyabs gcig rdo rje thod phreng rtsal chen po nyid bla ma drag po mthing ga'i skur bzhengs pa dang*/_gsang sngags sgrub sde'i bde gshegs zhi khro chig dril dpal chen sgrub pa bka' brgyad ces mthu stobs nus pa'i gzi byin tshan kha che ba gnyis dbyer med du sgrub pa'i chos bka' zab gnyan byin rlabs nus rtsal 'gran zla dang bral ba bla ma bka' brgyad kyi babs so che shos yongs su grags pa chos kyi rgyal po khri srong lde'u btsan gyi thugs kyi sprul pa mnga' ris paN chen rin po ches gter du bzhes pa rig 'dzin yongs 'dus dang lo chen bai ro'i rnam 'phrul kun mkhyen pradz+nyA rasmi'i zab gter grol thig lam rgyas pa rnams kyi snying po'i yang zhun gyi bcud thig klong chen dgongs pa'i gsang mdzod las byon pa'i chos skor gyi rtsa ba lta bur grol thig dgongs pa rang grol las/_gsang ba'i lung bstan ma gtogs zhu dag pher:_gcig la gcig yid ches pas 'khrul pa bral:_zhes gsungs pa ltar o rgyan rje 'bangs dang bcas pa ye shes kyi dbyings su gcig par ma zad gsang sngags bla med kyi rgyud thams cad ston 'khor dgongs pa gcig pa'i ye shes kyi cho 'phrul du nges pas na rtsa bshad man ngag gi rgyud kun gyi yang snying bcud dril lta bu ste/_rang gzhung las/_ma 'ongs lnga brgya tha ma'i tshe:_mtha' yi rgya 'dre 'byung po dang:_dbus kyi dam sri glo bur bsdongs:_chos pa'i snying zhugs mi dge spyod:_skye bo'i snying zhugs sdig rgyun spel:_rmi lam btsun pa bya sprel rmi:_bag mi phebs shing snying rlung ldang:_de tshe gnyen po stobs kyi lha:_phal gyis thul bar mi 'gyur bas:_phyi ltar byang sems nang rig 'dzin:_gsang ba drag gtum 'bar ba'i lha:_bde gshegs yongs rdzogs sgrub sde brgyad:_dpal chen 'dus pa'i sgrub pa 'dis:_log 'dren 'dul bar the tshom med:_shin tu gsang zhing rang nyams longs:_bstan 'gro'i don du snying stobs bskyed:_ces dang*/_'di ni bla ma yi dam gyi:_rnam par sgrub pas byin rlabs myur:_galpo la sogs he ru ka'i:_tan+t+ra kun gyi bcud kyang 'dril:_las la mi ltos dpal chen po'i:_srog nas 'phrog pas rno la myur:_dbang gi chu bo ma nyams steng:_brgyud pa bdun ldan sgrub thag nye:_gsang chen rgyud sde rgya mtsho kun:_sgrub sde chen po brgyad la 'du:_rig 'dzin brgyad dang mkhas pa bzhi:_gong 'og rgya mtsho lta bu'i 'jing:_brgal bar mi nus blo can la:_bcud dril 'di las gzhan ma gsungs:_zhes gsungs pa ltar rdzogs pa chen po klong chen snying gi thig le'i yi dam rtsa ba rig 'dzin thugs sgrub drag po dpal chen 'dus pa gang*/_gnad byang thugs kyi sgrom bu las/_deng dus da lta'i rje 'bangs grogs:_bi ma rgyal sras lha rje rnams:_smon lam thugs rjes sprul pa'i sras:_rang byung rdo rje pad+ma dbang:_gsang mtshan gar dbang 'jigs med gling:_rtogs grol dus mnyam thugs gter bdag:_'phags pas rjes su bzung ba'i rtags:_lag g.yas mthil na pad+ma'i spyan:_dbang chen gsung gi rig 'dzin phyir:_mthe bong thugs srog h+ya yis mtshan:_rtogs pa klong du gyur pa'i rtags:_tshems la skye med yi ge a:_snying rje che la rig pa hur:_shes rab che zhing 'dzin chags chung:_thugs sgam tshig btsan blo gros zab:_nges med spyod pa cir yang ston:_'jigs pa med pa'i brtul zhugs can:_zhum med snang ba zil gyis gnon:_de la thugs rgyud dngos gter ram:_yang na dgongs gter tshul du 'bebs:_dngos nyams rmi lam ma nges par:_nga dang zhal mjal don dbang bskur:_thugs rgyud dgongs pa'i byin rlabs 'pho:_pad 'byung nga dang rig 'dzin nyid:_dgongs pa gcig dang dbyangs gcig 'gyur:_zhes pa ltar che mchog bdud rtsi'i bka' babs paN chen bi ma la mi tra dang*/_bde gshegs 'dus pa'i bka' babs chos rgyal khri lde/_bka' 'dus chos kyi rgya mtsho'i rgyud lung man ngag gi mnga' bdag rgyal sras lha rje khu dbon rnams kyi smon lam dang thugs rje'i rang gzugs gcig tu bsdus pa/_nang du mkhyen brtse nus gsum gyi spangs rtogs kyi ye shes/_phyi ru sku dang gsung la mi 'gyur ba'i brda rtags gsum gyi gzer/_gsang ba dag chen ye shes kyi rang rtsal mkha' 'gro'i gsang mdzod la dbang bsgyur ba'i brda rtags gsum ka la nor 'khrul gyi dri ma med pas rtsod bral nyi zla lta bur 'dzam gling kun la grags shing*/_rtogs pa don rgyud kyi dgongs pa phyag mthil du zin pas dpe rgyud 'dzad med nam mkha' mdzod la dbang thob pa'i skyes bu phrin las nam mkha'i mu khyud brdol te grub thob kyi tshang brdol bar mdzad pa'i smin grol rgya mtsho'i shing rta bdag nyid chen po kun mkhyen rig 'dzin 'jigs bral gling pa pad+ma dbang chen ye shes rol pa'i rdo rje nyid kyis rjes 'jug gdul bya'i skal bar snga 'gyur bka' gter rgya mtsho'i srog gi zungs khrag bstan pa'i btsas chen po ru bzhag pa rgyud sde'i dbang du byas na snang grags rig pa'i cho 'phrul du mngon par byang chub pa dpal ldan sgyu 'phrul drwa ba'i snying po dpal chen zhal lung*/_nang he ru ka 'dus pa'i bskyed rim zhes dpal sgyu 'phrul drwa ba'i rgyud sde'i bcud phur du gsungs/_sgrub sde brgyad de dag tu sku gsung thugs yon tan phrin las kyi sgrub bka' chen po brgyad chig dril bla ma drag mthing gi thugs sgrub gsang ba'i bcud phur te/_'di la rtsa ba sgrub pa bka' brgyad chig dril du sgrub pa/_yan lag khrag 'thung rigs bzhi'i sgos bka'i sgrub pa gnyis las snga ma'i dbang bskur bgyi ba skabs su bab pa ste/_de la'ang sta gon gyi rim pa sngon du song zin nas dngos gzhi'i dbang bskur ba yin la/_de la'ang thog mar dkyil 'khor sgrub cing bdag nyid 'jug pa/_dngos gzhi'i phan nus zab mo'i dbang rnams bskur ba/_rjes smin zin grol bar byed pa khrid 'bog pa dang gsum las/_sngon 'gro bdag mdun bum pa sgrub cing dbang len rnams kho bos legs par bgyis zin cing*/_da dbang dngos bskur ba la yang sngon 'gro phyi nang gi 'jug pa/_dngos gzhi'i dbang rnams 'bog pa/_rjes dam tshig khas blang yon 'bul bcas gsum gyi dang po dkyil 'khor gnyan por phyi nang gi 'jug pa'i chos rnams zhu ba'i don du maN+Dal phul/_bla ma dang dkyil 'khor gyi gtso bo dbyer ma mchis pa'i spyan sngar thal mo me tog dang ldan pas gsol ba 'debs pa 'di'i rjes zlos/_e ma ho bde gshegs snying po las:_glo bur 'khrul pas bcings pa dag:_tshogs brgyad srid mtsho las bsgral phyir:_rang byung dkyil 'khor bstan du gsol:_lan gsum/_dam tshig gi gnas khe nyen che bas dkyil 'khor du zhugs te dbang thob nas tshul bzhin bsrung dgos phyir bka' gnyan pa'i tha tshig bsgrag pa ni/_bla na med pa'i dkyil 'khor ni:_dam tshig rgya mtsho'i gnas yin te:_bsrungs na tshe 'dir dngos grub thob:_nyams na rdo rje dmyal bar bsreg:_ces dris par dam tshig bsrung bar khas blang ba 'di'i rjes zlos/_lha dang bla mar gus pas bdag:_srog la bab kyang dam tshig bsrung:_sor thar byang sems rig 'dzin gyi:_sdom pas bdag rgyud dag par stsol:_lan gsum/_thun mong gi lam gyi gzhi rten skyabs 'gro/_theg chen thun min lam gyi gzhung shing sems bskyed/_rgyud dag par bya ba'i slad du rgyun bshags yan lag brgyad pa tshul bzhin du bya ba'i blos dkyil 'khor chen po _sgos bka' so sor kha bsgyur dgos/_mchan/_bdun brgya nyer lnga'i lha tshogs rnams dang skyabs gnas rtsa gsum dam can rgya mtsho'i spyan sngar bsags sbyang gi tshig rnams kyi sgom don re re bzhin gsal thob la 'di'i rjes zlos/_rdo rje slob dpon sangs rgyas dpal sogs lan gsum/_rdo rje theg pa'i thun mong ma yin pa'i sdom pa rigs lnga spyi dang bye brag khyad par gyis bsdus pa'i dam tshig rnams legs par blangs te srung snyam pas 'di'i rjes zlos/_dus gsum dus med ston pa kun:_rdo rje'i cho ga 'di mkhyen nas:_go 'phang mchog la gzhug pa'i phyir:_skyabs kyi mchog tu dkon mchog 'dzin:_rang gi nyes spyod sdom byed cing:_gzhan gnod gzhi dang bcas pa spongs:_smon dang 'jug pa'i sems gnyis bskyed:_phyin drug la spyod dge chos sdud:_rtag tu gzhan la phan pa sgrub:_ma bsgral sgrol zhing ma grol dgrol:_dbugs ma phyin pa dbugs dbyung zhing:_sems can byang grol gnas la 'god:_lha yi phyag rgya 'gong pa dang:_bla ma'i bzhon pa brnyas sogs spongs:_lha dang lha min gsang ba pa:_bstan pa skyong la mchod byed cing:_byang chub rdo rje 'bral mi bya:_mdor na de yis gang bsgrags pa:_byang chub bar du gces par gzung:_lan gsum/_de nas thams cad rdo rje'i rnal 'byor du sems bskyed pa'i phyir bdag gis sems can thams cad kyi don du rdzogs pa'i byang chub thob par bya'o snyam pa'i kun rdzob byang chub kyi sems de nyid snying gar zla ba nya gang bar gyur pa'i steng*/_don dam pa'i byang chub kyi sems rdo rje rtse lnga pa'i rnam par shar ba las 'od zer mkha' khyab tu 'phros par bsam la/_rdo rje me tog dang bcas pa snying gar bzhag pas de nyid brtan par mos mdzod/_oM sarba yo ga tsit+ta u pa da ya mi:_lan gsum brjod/_dam tshig gi dpang po rdo rje'i mna' chu byin pas khe nyen gyi gnas la blang dor brtan por mdzad pa'i nges shes kyis shig_/nang mchod lce thog tu bzhag la/_'di ni rdo rje'i dam tshig chu:_nyams na snying khrag sdig pas 'thung:_bde legs yon tan thams cad 'grib:_bsrungs na ye shes sems dpar 'gyur:_tshe 'dir mchog gi dngos grub ster:_sa ma ya i dan na ra kan:_phyi 'jug gi thog ma dkyil 'khor du 'jug par gsol ba 'debs pa 'di'i rjes zlos/_ho:_srid zhir mi gnas pho brang cher:_'jug pa'i sgo ni tshad med bzhi:_rnam par phye la ye shes kyi:_dkyil 'khor bdag por bdag 'jug 'tshal:_lan gsum/_zhes gsol ba btab pas byang chub rdo rje'i thugs ka'i 'od kyis sgo ba bzhi rnams bskul te gzhal yas khang gi sgo bzhi shag gis phye bar mos/_slob dpon gyis dbye rgya dang bcas/_a khaM bi ra hU~M:_dkyil 'khor gyi shar sgo nas rim par g.yas bskor du las kyi rdo rjes khrid nas lha rnams kyi sku gsung thugs la phyag byas par mos la thal mo gnas gsum du sbyar bas 'di'i rjes zlos mdzod/_oM na ma te hU~M:_oM na ma me hU~M:_oM na mo na ma hU~M:_lan bzhi/_nang 'jug gi dang po ye shes pa dbab pa yin pas sgo gsum gyi gnad gcun la dmigs pa 'di ltar mdzod/_dkyil 'khor gyi shar sgor dbang stegs pad+ma 'dab brgyad la 'khod pas/_gtso bo'i thugs ka nas 'od zer byung*/_rang gi rnam smin gyi lus rten sbyangs/_rnam par shes pa hU~M yig tu gyur pa yab kyi zhal nas drangs/_yab yum mnyam par rol pa'i rjes chags zhu bde'i thig ler gyur pa yum gyi mkha' gsang du babs pas gtso bo'i rnam pa gnyis pa'i sras su smin pa sngar gyi dbang stegs la 'khod pa khyab bdag rdo rje thod phreng rtsal dang gnyis su med pa'i spyi dpal chen po che mchog he ru ka mthing dkar dmar ba'i zhal gsum phyag drug gi dang po gnyis rdo rje dang dung khrag thugs kar steng 'og tu 'dzin pa/_bar pa gnyis khaT+wAM ga dang thong gshol/_tha ma gnyis me dpung dang lcags sdig bsnams pa/_dpal dang dur khrod kyi chas thams cad kyis brgyan cing*/_zhabs bzhi g.yas brkyang g.yon bskum pa'i dor stabs su bgrad pas rgyal 'gong bdud bzhi bsnol stabs su brdzis pa/_pang du yum dbyings phyug ma sngon mo khaT+wAM dang dung dmar 'dzin pas 'khyud pa/_gnyis ka'ang gar gyi nyams dgu dang ldan zhing ye shes kyi me phung 'bar ba'i klong na bzhugs pa'i gnas gsum du phyag mtshan gsum la gnas pa'i yi ge gsum las 'od zer 'phros pas phyogs bcu dus bzhi'i de bzhin gshegs pa thams cad bsgrub bya'i dkyil 'khor lha yi rnam pas rang dang ro gcig tu 'dres par bsam la:_hU~M:_'phags mchog thugs rjes dus la bab/_/khyad par bstan pa'i dus la bab/_/mthu rtsal dbyung ba'i dus la bab/_/byin gyis rlob pa'i dus la bab/_/dbang mchog bskur ba'i dus la bab/_/dngos grub stsol ba'i dus la bab/_/mthu chen bdud 'dul bcom ldan 'das/_/byin chen byin phob bcom ldan 'das/_/dbang chen dbang bskur bcom ldan 'das/_/dngos grub mchog stsol bcom ldan 'das/_bdag cag las 'bras mchis par mdzod/_/'bru gsum/_gu ru shrI/_badz+ra tsaN+Da'i mthar/_hU~M hU~M hU~M a be sha ya a be sha ya pheM pheM:_zhes byin dbab tshe lus 'phar g.yo/_ngag brda skad/_sems bde gsal mi rtog pa phebs pa'i rtags so/__/tiSh+Tha badz+ra brtan par bya/_me tog dor ba'i tshom bu'i dkyil 'khor 'du byas te/_khyed rang rnams la sngar byin pa'i me tog de nyid tshe rabs nas las kyis 'brel ba'i rigs kyi lha la phog par gyur cig snyam pas tshig 'di'i rjes zlos dang bcas lhan cig 'dor bar zhu/_ho:_smon pa'i yid kyis rab bzung ba'i:_'jug pa'i me tog u dum wAr:_lhag pa'i lha la deng 'bul na:_byang chub bar du mi 'bral shog:_puSh+pe sid+d+hi ho:_zhes phul bas tshom bu dgu gang du bab pa'i rigs dang mthun pa'i ming*/_rdo rje che mchog rtsal sogs gdags/_me tog gang la babs pa'i gtso bo rigs kyi bdag po'i tshul du spyi bor byon par bsam la me tog spyi bor bzhag_pra ti g+hr-i ha na i maM satwa ma hA ba la:_ma rig pa'i sgrib g.yogs mig dar dang lhan cig bsal bar mos mdzod/_mig thur thogs la/_e ma ho bde gshegs snying po'i khams:_sgrib byed glo bur ling tog ni:_ye shes thur mas dbye bgyis na:_dkyil 'khor 'dir ltos dad pa bskyed:_dz+nyA na tsak+Shu pra be sha ya phaT:_mig dar bkrol/_'di ltar mtshon byed dpe yi dkyil 'khor las/_mtshon bya don gyi dkyil 'khor rdo rje srung ba'i 'khor lo'i dbus su 'byung ba rim brtsegs ri rab dang bcas pa'i steng du rdo rje'i rdul gyis 'thas par gdal ba la phyi rol tu dur khrod brgyad pad+ma nyi ma sna tshogs rdo rje rwa bcu gnyis pa'i lte bar ye shes rang snang las grub pa byang chub phyogs kyi chos sum cu rtsa bdun gyi rang bzhin/_phyi rin po che sna tshogs las grub pa'i gzhal yas khang gru bzhi sgo bzhi pa rta bab dang bcas pa/_nang thod pa skam rlon rnyid gsum gyi rtsig pa'i mkhar dur khrod drag po'i gzhal yas khang tshad dang mtshan nyid yongs su rdzogs pa'i lte bar rab tu 'jigs pa'i gnam lcags kyi tsakra rtsibs brgyad pa'i dbus kyi lte ba gru gsum mthing nag chos dbyings rdo rje btsun mo'i e klong du rdo rje'i brag chen/_pad nyi dregs pa byol song gtso dgu rgyal bsen bdud bzhi'i steng na 'gying ba'i bla ma drag po dpal chen che mchog rdo rje srin po 'jigs mdzad he ru ka gtum rngams nyi ma 'bum gyi gzi brjid can rtsa zhal mthing ga g.yas dkar g.yon dmar phyag drug dang po gnyis kyis rdo rje dang dung khrag thugs kar bsnams pas yum la 'khyud pa/_g.yas gnyis kyis khaT+wAM dang me dpung*/_g.yon gnyis kyis thong gshol dang lcags sdig bsnams pa/_zhabs brkyang bskum gyad kyi dor stabs su bgrad cing gar dgu'i rnam 'gyur yongs su rdzogs pa'i sku la dpal dang dur khrod kyi chas thams cad gsol ba'i yum gnam zhal dbyings phyug ma sngon mo gcer bu gzig sham dang phyag rgya lngas brgyan pa/_khaT+wAM dang dung khrag bsnams shing zhabs g.yon brkyang g.yas bskum gyis yab dang gnyis med du sbyor ba la bdud rtsi yon tan gyi lha tshogs kyis bskor ba/_shar du dpal chen badz+ra he ru ka mthing nag yum kro ti shwa ri ma dang sbyor ba la yang dag thugs kyi lha tshogs kyis bskor ba/_lhor 'jam dpal gshin rje gshed ser nag yum be ta za byed ma dang sbyor ba la 'jam dpal sku yi lha tshogs kyis bskor ba/_nub tu dbang chen rta mgrin dmar nag yum pad+ma gzi ldan ma dang sbyor ba la pad+ma gsung gi lha tshogs kyis bskor ba/_byang du dpal chen rdo rje gzhon nu ljang nag yum 'khor lo rgyas 'debs ma dang sbyor ba la phrin las phur pa'i lha tshogs kyis bskor ba/_shar lhor mngon rdzogs rgyal po mthing nag yum nyid zhi bde mchog ma dang sbyor ba la rbod gtong ma mo'i lha tshogs kyis bskor ba/_lho nub tu rig 'dzin rdo rje chos rab dkar po yum rdo rje rnal 'byor ma dang sbyor ba la rig 'dzin slob dpon gyi lha tshogs kyis bskor ba/_nub byang du bcom ldan dregs pa kun 'dul mthing nag yum khams gsum srid pa spyi 'dul ma dang sbyor ba la 'jig rten mchod bstod kyi lha tshogs kyis bskor ba/_byang shar du dpal chen stobs ldan nag po yum 'byung lnga'i bdag mo dang sbyor ba la dmod pa drag sngags kyi lha tshogs kyis bskor ba/_sgo bzhir sgo skyong gdong mo bzhi/_phyi'i khor yug la mkha' 'gro ging lang ma sring 'bar ma sogs bka' sdod dam can rgya mtsho'i tshogs dang bcas pa bde gshegs sgrub pa bka' brgyad ye shes klong dgu'i 'khor lo bdun brgya nyer lnga'i lha tshogs 'og min gsang chen rol pa'i pho brang mngon sum du mjal ba la dad spro rgya chen po bskyed pa dang*/_lha dang dkyil 'khor de dag kyang rang gi rdo rje phung po'i grong khyer la bzhugs shing gnyug ma'i rdo rje gsum dang 'du 'bral med par ngo sprad pa ni/_ho:_phung po khams dang skye mched ni:_gdan gsum dkyil 'khor nyid yin kyang:_rtsa rlung thig le'i sgrib pas bcings:_dag byed lhag pa gzugs brnyan gyis:_mtshon pa'i ting 'dzin dkyil 'khor ni:_rnam byang chen po'i brda don rtags:_'dir ltos 'dir zhugs 'di bsgoms pas:_rtsa dag bskyed rim sprul skur 'byongs:_rlung dag kha sbyor yan lag bdun:_khams dag rnam kun mchog ldan gyi:_bde chen ye shes khyod kyis mthong:_zhes gsungs pa ltar phyi nang gsang ba'i dbang gis smin par byas te lam rim pa gnyis la bslab pas phyi nang gzhan gsum gnyis med rdo rje'i grong khyer zung 'jug gi rgyal thabs la dbang bsgyur bar nges pa'o/__/de dag gis 'jug pa'i chos rnams song nas dngos gzhi dbang bskur zhu ba'i phyir maN+Dal phul/_gsol ba 'debs pa 'di'i rjes zlos mdzod/_byang chub rdo rje sangs rgyas la:_ji ltar mchod cing bsten pa ltar:_bdag kyang skyob pa'i don gyi phyir:_nam mkha'i rdo rje bdag la stsol:_zhes lan gsum/_dbang dngos la phyi nang gsang ba de kho na nyid mtha' rten gyi dbang dang lnga las/_dang po phyi dbang rdzas la brten nas bskur ba la thugs smon 'di ltar gnang 'tshal/_bdag mdun gyi thugs ka'i 'od zer gyis phyogs bcu'i rgyal ba sras dang bcas pa gdan gsum tshang ba'i dkyil 'khor gyi rnam par spyan drangs:_badz+ra sa ma ya dzaH_oM badz+ra ar+g+haM nas/_shab+da pra tIts+tsha swA hA/_nyer spyod btegs te mchod/_phung khams dag pa gshegs pa gshegs ma'i gdan:_dbang shes dag pa sems dpa' sems ma ste:_las kyi bdag po khro bo khro mo'i tshogs:_gdan gsum yongs rdzogs lha la phyag 'tshal bstod:_ces bstod la/_slob dpon gyis/_nam mkha'i rdo rjes rgyal ba lngar:_dgongs shing ji ltar bstsal ba ltar:_mchod pa chen po brda yi dbang:_rig pa 'dzin pa bdag la stsol:_lan gsum/_zhes gsol ba btab pas de bzhin gshegs pa rnams kyis dgongs pa mdzad/_gshegs ma rnams kyis dbang bskur/_sems dpa' rnams kyis bkra shis brjod/_sems ma rnams kyis glu gar bsgyur/_khro bo rnams kyis bgegs bskrad de dbang gi bya ba mdzad par gyur/_bkra shis gang zhig sems can kun gyi snying la gnas/_/kun gyi bdag nyid rigs kun gyi ni bdag po mchog_/ma lus sems can bskyed mdzad bde ba chen po ste/_/des ni deng khyod dbang bskur mchog la bkra shis shog_/de nas rigs lnga'i sku gsung thugs yon tan phrin las lnga mtha' rten dang bcas pa'i dbang bskur ba las dang po mi bskyod pa thugs kyi dbang bskur ba la/_slob ma rnams kyi rnam shes kyi phung po rdo rje mi bskyod pa mthing ga g.yas rdo rje rtse lnga pa gtod de thugs kar 'dzin cing*/_g.yon des yu ba byas pa'i dril bu dkur brten pa'i spyi mgrin snying ga gsum du phyag mtshan _'khor lo/_pad+ma/_rdo rje/_mchan/_gsum la gnas pa'i yi ge gsum _oM dkar/_AHdmar/_hU~M mthing*/_pad zla nyi ma la gnas pa/_mchan/_gyis mtshan pa la bla ma'i thugs ka nas 'od zer 'phros pas bla ma dang sangs rgyas byang chub sems dpa' dpa' bo mkha' 'gro sprin gtibs pa tsam rdo rje mi bskyod pa'i rang bzhin du byon nas bkra shis brjod cing*/_mi bskyod pa'i rang bzhin chu'i dbang bskur bas bla ma dang rdo rje mi bskyod pa dbyer med pa slob ma'i spyi bor bzhugs par sgoms shig_/rnam bum thogs la/_hU~M:_rnam shes phung po nam mkha'i khams:_zhe sdang 'joms mdzad bcom ldan 'das:_chos dbyings ye shes mi bskyod pa'i:_bkra shis bum pas dbang bskur ro:_hU~M badz+ra d+hr-ika? mUM d+ha tu shwa ri a b+hi Shiny+tsa hU~M:_bum chu 'thung ba dang khrus bya/_rigs kyi bu khyod la rdo rje mi bskyod pa'i ngo bo chu'i dbang bskur bas yid kyi sgrib pa dag:_sangs rgyas thams cad kyi thugs kyi dbang thob:_rnam par shes pa rdo rje mi bskyod pa dang nam mkha'i khams dbyings phyug mar sangs rgyas:_zhe sdang chos dbyings ye shes su grol te sangs rgyas rdo rje'i rigs mchog gi thugs rnam par mi rtog pas 'gro ba'i don byed nus par gyur cig:__gnyis pa rin chen 'byung ldan yon tan gyi dbang bskur ba la/_slob ma rnams kyi tshor ba'i phung po rin chen 'byung ldan ser po phyag na rin po che dang dril bu bsnams pa'i spyi mgrin snying ga gsum du phyag mtshan gsum la gnas pa'i yi ge gsum gyis mtshan pa la bla ma'i thugs ka nas 'od zer 'phros pas bla ma dang sangs rgyas byang chub sems dpa' dpa' bo mkha' 'gro sprin gtibs pa tsam rin chen 'byung ldan gyi rang bzhin du byon nas bkra shis brjod cing*/_rin chen 'byung ldan gyi rang bzhin dbu rgyan gyis dbang bskur bas bla ma dang rin chen 'byung ldan dbyer med pa slob ma'i spyi bor bzhugs par sgoms shig_/dbu rgyan spyi bor bcings te/_hU~M:_tshor ba'i phung po mnyen pa'i dbyings:_nga rgyal 'joms mdzad bcom ldan 'das:_mnyam nyid ye shes rin chen 'byung:_dbu rgyan rigs lngas dbang bskur ro:_swA rat+na d+hr-ika? mAM mo ha ra ti a b+hi Shiny+tsa hU~M:_rgyas par spro na mtha' rten bum pa'i chu dbang 'di mi bskyod pa ma gtogs rigs dbang bzhi ka la sbyar bar gsungs pas/_rnam bum btegs cing chu 'thor te/_oM sarba ta thA ga ta a b+hi She ka te sa ma ye shrI hU~M:_rigs kyi bu khyod la rin 'byung gi ngo bo go 'phang chen po'i dbu rgyan 'di bskon pa tsam gyis shes bya'i sgrib pa sbyangs:_sangs rgyas thams cad kyi yon tan gyi dbang thob:_tshor ba'i phung po rin chen 'byung ldan dang chu'i khams mA ma kIr sangs rgyas:_nga rgyal mnyam pa nyid kyi ye shes su grol te sangs rgyas rin chen rigs kyi yon tan bsam mi khyab pa'i go 'phang chen po lngas 'gro ba'i don byed nus par gyur cig:__gsum pa snang ba mtha' yas gsung gi dbang bskur ba la/_slob ma rnams kyi 'du shes kyi phung po snang ba mtha' yas dmar po phyag na pad+ma dang dril bu 'dzin pa'i spyi mgrin snying ga gsum du phyag mtshan gsum la gnas pa'i yi ge gsum gyis mtshan pa la bla ma'i thugs ka nas 'od zer 'phros pas bla ma dang sangs rgyas byang chub sems dpa' dpa' bo mkha' 'gro sprin gtibs pa tsam snang ba mtha' yas kyi rang bzhin du byon nas bkra shis brjod cing*/_snang ba mtha' yas kyi rang bzhin rdo rjes dbang bskur bas bla ma dang snang ba mtha' yas dbyer med pa slob ma'i spyi bor bzhugs par sgoms shig_/rdo rje lag g.yas su gtad cing mgrin par gsor la/_hU~M:_'du shes phung po dro ba'i khams:_'dod chags 'joms mdzad bcom ldan 'das:_sor rtog ye shes snang mtha' yas:_thabs kyi rdo rjes dbang bskur ro:_AM a ro l-ika pA~M rA ga ra ti s+t+waM a b+hi Shiny+tsa hU~M:_rnam bum gyi chu 'thor/_oM sarba ta thA ga ta a b+hi She ka te sa ma ye shrI hU~M:_rigs kyi bu khyod la snang ba mtha' yas kyi ngo bo rdo rjes dbang bskur bas ngag dang rlung gi sgrib pa dag:_sangs rgyas thams cad kyi gsung gi dbang thob:_'du shes kyi phung po snang ba mtha' yas dang me khams gos dkar mor sangs rgyas:_'dod chags so sor rtog pa'i ye shes su grol te sangs rgyas pad+ma'i rigs kyi gsung rnam pa thams cad pas 'gro ba'i don byed nus par gyur cig:__bzhi pa don yod grub pa phrin las kyi dbang bskur ba la/_slob ma rnams kyi 'du byed kyi phung po don yod grub pa ljang gu phyag na ral gri dang dril bu 'dzin pa'i spyi mgrin snying ga gsum du phyag mtshan gsum la gnas pa'i yi ge gsum gyis mtshan pa la bla ma'i thugs ka nas 'od zer 'phros pas bla ma dang sangs rgyas byang chub sems dpa' dpa' bo mkha' 'gro sprin gtibs pa tsam don yod grub pa'i rang bzhin du byon nas bkra shis brjod cing*/_don yod grub pa'i rang bzhin dril bu lag g.yon du gtad pa dkrol zhing dku la brten te dbang bskur bas bla ma dang don yod grub pa dbyer med pa slob ma'i spyi bor bzhugs par sgoms shig_/dril bu lag g.yon du gtad la/_hU~M:_'du byed phung po bskyod pa'i khams:_phrag dog 'joms mdzad bcom ldan 'das:_bya grub ye shes don yod grub:_shes rab dbyings kyi dbang bskur ro:_hA pra dz+nyA d+hr-ika? tA~M badz+ra ra ti a b+hi Shiny+tsa hU~M:_rnam bum gyi chu 'thor la/_oM sarba ta thA ga ta a b+hi She ka te sa ma ye shrI hU~M:_rigs kyi bu khyod la don grub kyi ngo bo dril bus dbang bskur bas kun gzhi'i sgrib pa dag:_sangs rgyas thams cad kyi phrin las kyi dbang thob:_'du byed kyi phung po don yod grub pa dang rlung gi khams dam tshig sgrol mar sangs rgyas:_phrag dog bya ba grub pa'i ye shes su grol te sangs rgyas las kyi rigs kyi phrin las thogs pa med pas 'gro ba'i don byed nus par gyur cig:__lnga pa sku rnam par snang mdzad ming gi dbang bskur ba la/_slob ma rnams kyi gzugs kyi phung po rnam par snang mdzad dkar po phyag na 'khor lo dang dril bu 'dzin pa'i spyi mgrin snying ga gsum du phyag mtshan gsum la gnas pa'i yi ge gsum gyis mtshan pa la bla ma'i thugs ka nas 'od zer 'phros pas bla ma dang sangs rgyas byang chub sems dpa' dpa' bo mkha' 'gro sprin gtibs pa tsam rnam par snang mdzad kyi rang bzhin du byon nas bkra shis brjod cing*/_rnam par snang mdzad kyi rang bzhin ming gi dbang bskur bas bla ma dang rnam par snang mdzad dbyer med pa slob ma'i spyi bor bzhugs par sgoms shig_/rdor dril bsnol ma bzung ste mgo thog tu dkrol la/_hU~M:_ming gzugs phung po sra ba'i khams:_gti mug 'joms mdzad bcom ldan 'das:_me long ye shes de bzhin gshegs:_rdo rje ming gi dbang bskur ro:_oM dzI na dz-ika? lA~M de Sha ra ti badz+ra ma hA shrI a b+hi Shiny+tsa hU~M:_rnam bum gyi chu 'thor la/_oM sarba ta thA ga ta a b+hi She ka te sa ma ye shrI hU~M:_rigs kyi bu khyod la rnam par snang mdzad ming gis dbang bskur bas gzugs kyi phung por 'dzin pa'i sgrib pa dag:_sangs rgyas thams cad kyi sku'i dbang thob:_ming gzugs kyi phung po rnam par snang mdzad dang sa'i khams sangs rgyas spyan mar sangs rgyas:_gti mug me long lta bu'i ye shes su grol te:_sangs rgyas de bzhin gshegs pa'i rigs kyi rdo rje lta bu'i skus 'gro ba'i don byed nus par gyur cig:__drug pa khyab bya rigs lnga la khyab byed drug pa'i rigs kyi bdag nyid mtha' rten rnam par rgyal ba'i bum pa dkyil 'khor yongs rdzogs kyi ngo bos dbang bskur ba la/_slob ma rnams dkyil 'khor gyi gtso bo spyi dpal chen po he ru ka yum gnam zhal dbyings phyug ma dang gnyis su med par sbyor zhing rang rtags phyag mtshan dang rgyan cha lugs yongs su rdzogs pa mtshan dpe'i gzi byin 'bar ba'i skur gyur pa la nam mkha' gang ba'i dbang gi lha rnams kyis rin po che'i bum pa bdud rtsi'i chu rgyun can gyis dbang bskur bar mos shig_/rnam rgyal bum pa bzung la/_hU~M:_bkra shis bum pa lha'i gzhal yas:_lha dang gnyis med bdud rtsi'i chus:_skal ldan bu la dbang bskur bas:_snang zhen lha sku'i phyag rgyar rdzogs:_rnam smin rig 'dzin nyer thob cing:_kun tu 'od kyi sa non shog:_oM gu ru shrI badz+ra yak+sha kro ta tsit+ta hU~M:_badz+ra ka la sha a b+hi Shiny+tsa hU~M:_bum pa spyi bor bzhag cing bum chu sbyin/_de ltar dbang bskur ba'i chu rgyun gyis lus kyi nang gang sgrib pa bzhi'i sa bon dang bcas pa dag_/chu yi lhag ma spyi bor 'khyil ba las rigs kyi bdag po gsung rdo rje snang ba mtha' yas _sgos bka' gzhan la rigs bdag gshin rje la rnam snang*/_rta mgrin la snang mtha'/_yang dag la mi bskyod pa/_phur pa la don grub/_mchan/_kyis dbur brgyan pas rgyas gdab par mos shig__/gnyis pa bum dbang gi rjes 'brel nang dbang lus la brten te ye shes klong dgu'i dkyil 'khor gyi gtso bo rnams kyi dbang bskur ba la/_lha tshogs rnams las rang 'dra'i sku gnyis pa re byon nas khyed rang rnams dpal chen por gsal ba'i spyi bo la sogs lus gnas rtsa 'khor rnams su bzhugs pas lha de dang de'i yon tan dang nus pa thams cad thob par mos shig_/spyi bor/_che mchog lha tshogs dbang bskur bas/_/chos dbyings ye shes rtogs par shog_/oM gu ru shrI badz+ra yak+sha kro ta tsit+ta hU~M a b+hi Shiny+tsahU~M/_dpral bar/_'jam dpal sku yi dbang bskur bas/_/mnyam nyid ye shes rtogs par shog_/oM hrIHSh+Ti wi kri tA na na a b+hi Shiny+tsa hU~M/_mgrin par/_pad+ma gsung gi dbang bskur bas/_/sor rtog ye shes rtogs par shog_/oM pad+mAn+ta kr-ita h+ya gr-I wa a b+hi Shiny+tsa hU~M/_snying gar/_yang dag thugs kyi dbang bskur bas/_/me long ye shes rtogs par shog_/oM ru lu ru lu hU~M b+h+yo hU~M a b+hi Shiny+tsa hU~M/_lte bar/_phur pa phrin las dbang bskur bas/_/bya grub ye shes rtogs par shog_/oM badz+ra kI li kI la ya sarba big+h+nAn ba~M hU~M phaT a b+hi Shiny+tsa hU~M/_gsang gnas/_ma mo rbod gtong dbang bskur bas/_/dbyings grol ye shes rtogs par shog_/oM gu h+ya dz+nyAn shrI he ru ka sarba sa ma ya a b+hi Shiny+tsa hU~M/_brla g.yas/_'jig rten mchod bstod dbang bskur bas/_/klong gyur ye shes rtogs par shog_/oM badz+ra tsaN+Da sarba duSh+TaM a b+hi Shiny+tsahU~M/_brla g.yon/_dmod pa drag sngags dbang bskur bas/_/lhun grub ye shes rtogs par shog_/oM badz+ra sarba duSh+Tan a b+hi Shiny+tsa hU~M/_spyi bor/_rig 'dzin slob dpon dbang bskur bas/_/'da' ka ye shes rtogs par shog_/oM badz+ra ma hA gu ru a b+hi Shiny+tsa hU~M/_dpung pa gnyis/_tshogs brgyad gdug pa klu yi gdon/_/za byed khyung gi dbang bskur ro/_/khroM ga ru Da a b+hi Shiny+tsa hU~M/_de ltar lha tshogs rnams gnas sor sor thim pas sgrub sde dgu'i sku'i rnam pa gang dang gang gis 'dul ba de dang de'i rnam rol 'gag med snang stong chu zla'i gar bzhin spyod pa'i mthu thob pa yin no/__/bum dbang gi dag pa brjod pa ni/_des rdul tshon sprul pa'i dkyil 'khor du bum pa'i dbang thob lus kyi las gsum dag:_gzugs su rnam par rtog pa dang rtsa'i khams stong phrag bdun cu rtsa gnyis sbyangs:_de bzhin gshegs pa thams cad kyi sku rdo rje'i byin rlabs zhugs:_bskyed rim dam tshig gi phyag rgya bsgom pa la dbang:_zhi ba'i las dang rnam par smin pa'i rig 'dzin 'grub:_bcu gcig kun tu 'od kyi sa non:_'bras bu sprul pa'i sku mngon du byas pa'o:__gsum pa gsang dbang yum la brten te bskur ba la gnyis yod pa las dang po gsang dbang dngos zhu ba'i don du maN+Dal phul/_de yang dag bya slob ma'i ngag gi rten rlung la gsang rdzas khyad par can bsres pa'i sgo nas dag 'bras gsung rdo rje longs sku'i bdag nyid la gsol ba 'debs pa 'di'i rjes zlos mdzod/_ho:_stangs dpyal mnyam par rol pa yi:_gdan gsum sku yi dkyil 'khor nas:_zhu bdes drangs pa'i byang chub sems:_skal pa can la bstsal du gsol:_lan gsum/_bla ma he ru ka yab yum snyoms par zhugs pa'i dga' ba'i sgra dang 'od zer gyis de bzhin gshegs pa thams cad spyan drangs/_spyi bo nas zhugs pa 'dod chags chen po'i chos byang chub sems su zhu ba mkha' gsang nas phyung ste thod pa'i dza gad dang lhan cig pa lce thog tu bzhag pa'i mos pas dmigs pa gsum dran par byas la/_hU~M:_yab yum sbyor ba'i byang chub sems:_dkar dmar b+han+d+ha'i nang du bskyil:_skal ldan bu la byin pa yis:_rtsa khams yi ge'i rnam par smin:_tshe la dbang ba'i rig 'dzin thob:_pad+ma can gyi sa non shog:_oM bo d+hi tsit+ta wAk+ka a b+hi Shiny+tsa AH_zhes byin pa de nyid sangs rgyas thams cad 'dus pa'i ye shes kyi ngo bor mos la sngags 'di'i rjes zlos mdzod/_a ho ma hA su kha:_zhes myangs bas ye shes kyi bdud rtsi shel ltar dwangs shing bde ba dang mi phyed pas lus thams cad gang*/_gsal stong nam mkha' dang mnyam pa'i ting nge 'dzin rgyud la skyes par mos/_rjes 'brel bzlas pa'i lung sbyin pa la mdun bskyed dpal chen po'i thugs ka nas sngags phreng lu gu rgyud du byung*/_slob ma'i mgrin pa brgyud snying gar 'khor bar mos la/_rtsa sngags 'bru gsum/_gu ru shrI/_badz+ra tsaN+Da rnams so sor lan gsum bzla/_des gdan gsum gsung gi dkyil 'khor du gsang ba'i dbang thob:_ngag gi las rnam pa bzhi dag:_sgra tshig rang mtshan du 'dzin pa dang rlung bcu dag par sbyangs:_gsung rdo rje'i byin rlabs zhugs:_bzlas brjod dang rdzogs rim chos kyi phyag rgya sgom pa la dbang:_rgyas pa'i las dang tshe la dbang ba'i rig 'dzin 'grub:_ma chags pad+ma can gyi sa non:_'bras bu longs spyod rdzogs pa'i sku mngon du byas pa'o:_srog thur sbyar la srog rtsol bcings:_nyi khri chig stong drug brgya'i dbugs:_yi ge gsum du dag par bsam:__gnyis pa shes rab ye shes kyi dbang zhu ba'i don du maN+Dal phul/_mtshan nyid dang ldan pa'i las rgya slob ma'i lag g.yas su gtad par mos shig_/rig tsaka gtad la/_ho:_chos rnams kun gyi 'byung gnas che:_bde ba chen po gsang ba'i yum:_rigs kyi bu la byin pa yis:_dga' bzhi'i ye shes mngon du gyur:_phyag rgya chen po'i rig 'dzin thob:_'khor lo tshogs chen sa non shog:_pradz+nyA dz+nyA na d+harma d+hA tu ho:_de ltar gtad pa'i gzungs ma des lus gcer bur phyung*/_dri bzang pos bgos/_rgyan gyis brgyan te lang tsho shin tu bdo ba'i rnam 'gyur gyis bde ba chen po'i dkyil 'khor ngoms pa dang bcas 'di skad gsungs par mos shig_/dus sbyor bcu gnyis rlung gi khams:_za byed rdo rje'i pho nya mo:_dga' ba bzhi yi 'byung gnas nga:_cho ga bzhin du bsten nus sam:_zhes dris pa la slob mas phyag 'tshal zhing me tog 'thor ba dang bcas/_'dul ba mdo sde chos mngon nas:_rnam bcas lha mo dgag mdzad pa:_thabs la rmongs pa dag la dgongs:_lhan cig skyes pa'i ye shes ni:_khyod las 'byung phyir bdag 'tshal lo:_zhes gsang ba'i spyod pa'i dam tshig rnams cho ga bzhin du bsten par spro ba'i lan btab pas/_rdo rje'i rigs can tha mal gyi rtog pa bral bar mthong nas dgyes te dngos grub chen po'i 'byung gnas yin par ngo sprad pa ni/_rdo rje btsun mo'i chu skyes ni:_rnam thar gsum gyi bdag nyid can:_'di spang mchog gi dngos grub med:_thar pa bsten cig dpa' bo che:_dzaHhU~M ba~M hoH'i dam tshig las:_e waM mnyam par rol pa yis:_'khor lo bzhir babs ldog dang khyab:_dga' mchog khyad par lhan skyes las:_bcu drug phyed phyed thig le'i khams:_srid pa za byed chen por smin:_mas brtan lugs ldog lhan cig skyes:_bde chen 'khor lor mnyam par bzhag:_ces rang gi rtogs pa brjod pas pad+ma b+hany+dza mo k+Sha la sogs pa'i sgras thar pa bsten par bskul nas pang du byon te dzaHhU~M ba~M hoHla sogs pa'i don gyis 'khyud sdom sprad cing spyod nas/_slob ma che mchog dang*/_las rgya gnam zhal ma/_mkha' gsang hU~M las rdo rje oM gyis mtshan pa dang*/_pa~M las pad+ma mU~M gyis mtshan par bsam nas 'dod yon lnga yi bde ba dang ro mnyam gyis bsrubs pas byang chub kyi sems g.yos/_'khor lo bzhi'i gnas su dga' bzhi'i ye shes nyams su myong bar mos la sngags 'di'i rjes zlos dang 'khyud rgya mdzod/_oM sarba ta thA ga ta ma hA a nu rA ga Na dz+nyA na badz+ra swa b+hA wa at+ma ko\u0f85haM:_slar yang hU~M gi sbyor bas yum gyi dwangs ma dang lhan cig gyen du drangs/_lugs ldog gi dga' bzhi rim gyis spyi bor brtan pa las so so rang rig bde stong spros pa dang bral ba'i ngang la mnyam par zhog mdzod/_des rdo rje btsun mo'i mkha' dbyings su shes rab ye shes kyi dbang thob:_yid kyi las gsum dag:_yid dang chos su rtogs pa las byung ba'i rnam shes tshogs bdun dang:_rang bzhin brgyad cu'i rtog pa sbyangs:_thugs rdo rje'i byin rlabs zhugs:_zung 'jug las kyi phyag rgya bsten pa la dbang:_dbang gi las dang phyag rgya chen po'i rig 'dzin 'grub:_yi ge 'khor lo tshogs chen gyi sa non:_'bras bu chos kyi sku mngon du byas pa'o:__bzhi pa de kho na nyid kyi dbang sems la brten nas bskur ba zhu ba'i don du maN+Dal phul/_khyed rang rnams sngar sher dbang gi dus su dpe yi lhan skyes la brten nas nyams su myong ba'i bde ba chen po bzhi pa'i ye shes ngo sprod pa mtshon pa'i phyir me long dang man shel gyi brda yis dbyings ka dag dang 'od gsal lhun grub kyi gnas tshul brda dang tshig gis bstan pa'i don shes par gyis la rang rig spros pa bral ba'i ngang du mnyam par zhog mdzod/_shel rdo dang me long bstan te/_hU~M:_ka dag me long gtsang ma'i ngogs:_lhun grub dwangs shel dri med gsal:_brda rtags rdzogs pa'i dbang bskur bas:_dri med rig pa'i gnas lugs rtogs:_lhun grub rig 'dzin nyer thob nas:_bde ba chen po'i sa non shog:_a a a:_zhes ngo sprad pas sems kyi gshis gang du'ang ma grub pa'i stong pa ka dag dang*/_mdangs ma 'gag pa lhun grub bde ba chen po'i sku dang ye shes kyi bdag nyid/_zung 'jug rang rig gdod ma'i gnas lugs so so rang rig pa'i spyod yul nam mkha' dang mnyam pa'i ting nge 'dzin gyi ngang bskyang ba ni de kho na nyid kyi dbang ngo*/_des rnam thar sgo gsum gyi dkyil 'khor du rang bzhin 'od gsal rdzogs pa chen po'i dbang thob:_dpe don 'brel ba'i chos nyid nyams su myong:_kun gzhi dang shes bya'i sgrib pa dag:_lam phyag rgya chen po sgom pa la dbang*/_drag shul gyi las dang lhun gyis grub pa'i rig 'dzin 'grub:_ye shes bla ma'i sa non:_'bras bu ngo bo nyid sku mngon du byas pa'o:__lnga pa mtha' rten rdo rje slob dpon bdag po'i dbang sbyin pa ni/_rgyal tshab tu 'os pa yin na khri la bzhag_/glegs bam/_dung*/_phyag shing*/_'khor lo rnams gtad/_slar yang khyed rang rnams rigs kun khyab bdag dkyil 'khor gyi gtso bo'i nga rgyal la gnas pas de'i sku gsung thugs kyi ngo bo rdor dril slob ma'i lag tu gtad pas rdo rje thugs kyi dam tshig phyag g.yas kyis lan gsum gsor te thugs kar gtod mdzod/_rdo rje lag g.yas su gtad de/_ho:_so thar byang sems rig pa 'dzin pa yi:_dgag dgos yongs rdzogs sngags kyi dkyil 'khor du:_yon tan yar 'phel thabs la mkhas pa yi:_rdo rje'i dam tshig khyod kyis gsor bar gyis:_ma hA badz+ra hU~M:_zhes sngags lan gsum/_dril bu gsung gi dam tshig lan gsum dkrol te dku g.yon par brten mdzod/_dril bu lag g.yon du gtad/_ho:_chos rnam thams cad blo yis btags pa tsam:_rnam thar gsum dang ldan pa'i shes rab ni:_ngo bo nyid med grags stong sgras mtshon phyir:_dril bu'i dam tshig 'khrol zhing dku la brten:_ma hA gaN+De hU~M:_zhes sngags lan gsum/_de ltar gtad pa'i rdor dril thabs shes gnyis su med pa mtshon phyir lag gnyis thugs kar 'khyud rgya byas pas phyag rgya sku yi dam tshig mtshon pa ste/_mdor na rdo rje'i sku gsung thugs dang gnyis su mi phyed pa rnam pa thams cad mkhyen pa'i ye shes ngo sprad par mos shig_/thabs dang shes rab 'du 'bral med pa yi:_stong nyid snying rje'i bdag nyid chen po ni:_gnyis med dam tshig rdo rje slob dpon dbang:_bsdu ba rnam bzhis rgyal ba'i mdzad pa sgrubs:_zhes thugs kar 'khyud rgya bya/_'o rigs kyi bu khyod la rdo rje slob dpon gyi dbang dam tshig gsum byin pas dkyil 'khor gyi khyab bdag dpal rdo rje sems dpa' yab yum gyi nga rgyal la gnas pas 'dzag med bde stong gi ye shes rgyud la skyes par bsam zhing*/_thabs la brten pa'i rgyu dus kyi yan lag bdun la goms pas/_'bras bu'i dus su sku gsum yan lag bdun ldan kha sbyor longs spyod rdzogs sku'i go 'phang mngon du bsgrigs pa ni rdo rje slob dpon gyi dbang ste dbang de bskur bas byed las su gzhan don slob ma bsdu ba dang*/_zab mo'i chos 'chad pa la sogs pa bgyid par rjes su gnang zhing rten 'brel 'grig pa yin no/__/de ltar phyi nang gsang ba'i dbang de dag thob pa'i phan yon ni/_rgyud las/_de ltar dbang rnams yongs rdzogs par:_bskur ba'i yon tan bsam mi khyab:_gsang sngags dngos grub dbang las 'byung:_zhes dang*/_bla ma rgyal ba ma lus pa'i:_sku gsung thugs dang yon tan dang:_phrin las bdag nyid chen por 'gyur:_zhes sogs mtha' yas pa gsungs pa ltar gnas skabs mngon mtho dang mthar thug nges legs kyi yon tan thams cad dbang gis bskyed nus pa'i phan yon bsam mi khyab pa gsungs pas spro dga' rgya chen po bskyed pa dang*/_nus pa de ldan gyi dbang srog rgyud la 'dzin pa dam tshig la rag las pas thun mong dang thun mong ma yin pa'i dam tshig dang sdom pa rtsa ba yan lag khyad par gyis bsdus pa rnams ji ltar khas blangs pa bzhin bsrung snyam pa'i 'da' dka'i dam tshig snying la bkod pa'i blos 'di'i rjes zlos mdzod/_rtsa ba sku gsung thugs mchog dang:_yan lag dam tshig nyi shu lnga:_med dang gcig pu phyal ba che:_lhun grub bzhin du srung bar bgyi:_lan gsum bya/_de dag gis sgrub chen bka' brgyad kyi dkyil 'khor du dbang bskur legs par thob pa'i bka' drin gtang rag gi don du maN+Dal phul/_dbang gi skabs 'dir phyogs bcu'i sangs rgyas thams cad rdo rje slob dpon gyi sku la dbang gi bya ba mdzad phyir 'dus shing dpa' bo DA ki rnams kyang dbang gral du dam tshig dang thugs rjes 'khod pas na dus gzhan las tshogs gnyis kyi sgo 'bum 'gyur gyis 'phel che bas bdag lus longs spyod dang bcas pa ltos med du 'bul zhing bsrung bya'i dam tshig rnams lus dang srog gi phyir yang mi gtong snyam pas 'di'i rjes zlos mdzod/_bdag lus longs spyod khyed la 'bul:_ji ltar bka' bstsal bzhin du bgyid:_srog la bab kyang de bsgrub na:_dngos grub mthong ba'i chos la stsol:_bla ma mchog dang lhag pa'i lha:_byang chub bar du mi 'bral na:_cha yis kyang ni spyad du gsol:_lan gsum/_nam mkhar bzhugs pa'i dbang gi lha rnams slob ma la thim pas dbang gi ye shes ma skyes pa skyes skyes pa rnams gong 'phel du gyur te brtan pa'i mos pa gnang mdzod/_spro na las byang gi shis brjod bya/_dzaHhU~M ba~M hoH_su pra tiSh+Tha badz+ra ye swA hA/_zhes me tog 'thor la rab tu gnas par bya/_de lta bu'i dge ba ma gyur 'gro ba sems can thams cad kyi don du bsngo ba dang lam 'dis rang gzhan gyi don rgya cher 'grub pa'i smon lam rnams tshogs gnyis zung 'brel gong 'phel gyi don du gnang bar zhu/_bsod nams 'di yis sogs brjod par bya'o/__/rjes rim tshogs la rol ba/_lhag ma dang bka' srung chad brtan gtor ma btang ba nas smon lam shis brjod kyi bar las byang dkyus la brten pas grub pa'o/__/kun mkhyen ye shes me long ngogs/_/rnam bkra'i zab rgyas chos kyi tshul/_/rjes brtse'i 'od zer ma smad pas/_/mngon sum spyod pa'i skal bzang snyam/_/zhes sgrub pa lag len du 'dril ba'i zab pa'i chos sde'i yi dam spyi sgrub drag po dpal chen 'dus pa'i dbang don rgya mtsho'i dgongs pa legs par bkral nas bklag chog gi le'u tshan lnga pa ste gzi brjid rab tu dga' ba'i dpal gyis sbyar ba'o/__!__sangs rgyas kun gyi gnyis med ye shes sku/_/shin tu zhi ba gzhon nu'i mtshan dpe yang*/_/snang srid phyag rgyas zil gnon he ru ka_/rgyal ba rtag pa'i rigs gtsor bzhengs gang rgyal/_/rtsa ba thugs sgrub dpal chen 'dus pa las gyes pa'i yan lag sku gsung thugs phrin las kyi rigs bzhi'i he ru ka'i sgos bka' so so'i dbang gi rim pa 'chad pa ste/_gzhung las/_dbang bskur ma rdzogs don la g.yel:_rgyal bu rgyal sar ma phyin bar:_de srid rgyal po'i ming mi thob:_de la sgos dbang khyad par ni:_zhes gsungs pa'i thog ma sku de bzhin gshegs pa'i rigs 'jam dpal gshin rje 'chi bdag zil gnon gyi dbang gi cho ga 'chad pa la/_so so'i dkyil 'khor dbang rdzas rnams:_'du byas rang gzhung bzhin du sgrub:_ces gsungs pa ltar dbang don sgrub mchod dang*/_dbang spyi rtsa sgrub dpal chen gyi skabs su bshad pa ltar khog phub nas/_bye brag gi sgos chos so so ba rnams 'chad 'gyur ltar bya dgos pa gzhir bzung nas/_gshin rjer gzhung mthun gyi dkyil 'khor ras bris bkram pa'i dbus su/_phye mar bu ram sha chen dang chos sman bsres pa'i bam gyi dbyibs kyi mgo bor gtor ma/_lag g.yas g.yon bsnol ba'i steng du sman raka gi snod ka pA la dang bcas pa bkod/_mar thag dkar dmar bsgril bas mgo dang yan lag bcing tshul bya/_deng sang bam 'di tsakli byed 'dug kyang bcos pa'i bam rdzas ldan 'di gshin rje'i dbang dang sgrub pa thams cad kyi sgos chos su gsungs pas bcos pa'i bam rdzas ldan byed pa gal che bar nges/_de steng lding khri la rnam bum rgyan ldan/_thun mong rigs dbang lnga ka'i rdzas/_rdo rje slob dpon gyi dbang rdzas/_dur khrod chas brgyad/_rdo rje be con 'khor lo gtun shing ral gri sdig mdzub ste phyag mtshan drug gi tsakli phyogs bsdus/_ka pA lar chang dang 'o ma chos sman mngar gsum sbyar ba'i gsang rdzas/_sman spod sbyar ba'i phye mar mngar gsum dang ldan pas bcos pa'i tshe 'brang pad+ma 'dab brgyad dmar po'i tshe ril gyis bskor ba'i 'og nyi ma dang steng zla ba dkar po kha sbyor rdo rje rtse lnga'i tog dang kha chod can/_rig tsaka_/shel rdo me long rnams dang*/_gshin rje'i gtor ma/_sman raka_/zhi drag gi mchod pa tshogs mchod sogs 'og tu dgos pa rnams 'du byas la/_dbang sgrub dngos la/_gzhung las/_snang srid thams cad 'jam dpal gshin rje'i rten dang brten par bskyed pa la bdag mdun gnyis rtog mi dgos/_ces kun mkhyen nyid kyis gsungs shing*/_pad gnubs kyi gshin rje'i gzhung las/_'di ni gzhal yas khang lhun grub/_lha lkog bzhengs/_sngags thug phrad du yin pas rang bzhin lhun gyis grub pa'i lha'i 'khor lo dran pa tsam gyis rdzogs par byed do zhes gsang skor gnam thig chen po las gsungs pa ltar nges kyang deng sang lta dgongs de lta bu'i gdeng tshad can dkon pa dang*/_dpal chen 'dus pa'i bdag 'jug dbang don rgya mtshor bdag mdun so sor bsgrub par gsungs pa'i dgongs pa ltar bya ba gal che ba dang*/_dpal 'dus dang gshin rje'i las byang gab sprad kyis dzapa bzlas bar btang*/_dzapa dgongs ni/_ya ma'i thugs kar nyi steng hU~M:_skye ba med pa'i ye shes kyi:_rnam pa'i gzugs brnyan yi ges bskor:_ngo bo lha yi sku ru bshad:_e ka ya ma he dun snying khrag ra ma tsa ya hU~M phaT:_zhes sngags phreng g.yon bskor du bkod la sems zin pa dang*/_rang rang sngags kyi yig 'bru las:_sngags phreng lu gu rgyud du thon:_yab yum zhal nas zhal du zhugs:_sku yi dbyibs brgyud mkha' gsang nas:_rdo rje nor bu'i lam zhugs te:_bde ba chen po'i 'od zer gyis:_rgyal ba mchod cing thugs dam bskul:_dngos grub grub pas bdag byin brlabs:_yang 'phros brtan g.yo tha mal pa'i:_snang zhen dag pa'i snod dang bcud:_lha dang gzhal yas rol par shar:_zhes spro bsdu'i ting nge 'dzin bcas sngags bzlas mthar/_slar yang yan lag brgyad pa'i tshogs bsags dang byin 'bebs nas brtsams la/_rang bzhin mi gnas mnyam pa'i ngang sogs gshin rje'i mngon rtogs las rim dang bcas pa btang la/_thugs ka'i sngags phreng las rang 'dra gnyis pa chad de lu gu rgyud du 'brel ba bdag mdun gyi zhal dang sbyor mtshams brgyud ye shes sems dpa' la bskor nas 'od zer spro bsdus don gnyis sgrub pa'i dmigs pa gtso bor bya gsungs/_bam dang tshe 'brang la'ang dkyil 'khor yongs rdzogs gsal bas spro bsdu dang bzlas pa yang cung zad bya/_rnam bum la dpal 'dus skabs ltar ram cung zad bsdu na/_stong pa'i ngang las rnam rgyal bum pa ni/_/b+h+rUM yig yongs gyur rin chen sna tshogs las/_/yongs grub phyi ni bum gzugs nang gzhal yas/_/tshad dang mtshan nyid thams cad rdzogs pa yi/_/pho brang dbus su 'jam dpal gshin rje gshed/_bcom ldan rta mchog dpal/_yang dag he ru ka_/badz+ra kI la ya/_rigs bzhi so sor bsgyur/_mchan/_gtso 'khor yongs rdzogs ma 'dres chu zla ltar/_/gsal la ye shes spyan drangs dbyer med bstim/_hU~M/_ye shes lha tshogs spyan 'dren gshegs/_/phyi nang gsang ba'i mchod pa 'bul/_/sku gsung thugs yon phrin las bstod/_/bag med 'gal 'khrul nyams chag bshags/_/mchog dang thun mong dngos grub stsol/_/oM badz+ra ar+g+haM sogs nas/_shab+da pany+tsa rak+ta ba liM ta pU dza ho:_rang gi thugs ka nas sngags kyi 'od zer 'phros bum pa'i lha rnams la phog_/sku las byang chub kyi sems ye shes kyi bcud du 'khyil/_rtsa sngags bzla/_las bum yang bdud rtsi 'khyil ba'i bskyed bzlas dang 'od zhu bcas bya/_bdag 'jug gam rig pa'i me tog dor zhing slob ma 'jug par gnang ba zhu/_snod rung gi slob mar khrus bya/_bgegs gtor btang*/_mtshams bcad srung 'khor bsgom/_sems bskyed gsal btab la chos bshad kyi khyad par/_de la rgyal ba sras dang bcas pa thams cad dang gnyis su med pa'i ye shes kyi sku yi bdag nyid 'jam dpal ye shes sems dpa' drag po'i skur bzhengs pa dang*/_sku de bzhin gshegs pa'i rigs kyi khyab bdag chen po bcom ldan 'das gshin rje gshed la rtsa bshad man ngag gi rgyud dang*/_grub brnyes slob dpon so sos bkral zhing bka' bab pa'i man ngag gi bka' srol mtha' yas pa bzhugs shing*/_gangs can 'dir yang snga 'gyur rnying ma'i phyogs la ngo bo'i dbye bas gshed skor rigs lnga/_rnam pa'i tshul las ye shes las dang 'jig rten pa'i tshul bzung*/_phrin las kyi bye brag rna cha brgyad yongs su grags pa dang*/_phyi 'gyur gsar ma'i phyogs la dmar nag 'jigs gsum nang gses dang bcas pa byon pa las/_'dir ye shes kyi gshin rje gshed po kun khyab de bzhin gshegs pa'i rigs 'khor 'das kun gyi phyag rgya zil gyis gnon pa'i dkyil 'khor gyi sgrub pa gshed skor rgya mtsho'i bcud dang snying por gyur pa ste/_spyir 'jam dpal gyi rgyud rnams sku'i rig 'dzin chen po 'jam dpal bshes gnyen zhabs kyis 'jam dpal khri drug stong du grags pa sogs rgyud sde bsam mi khyab pa'i rtsa rgyud zla gsang nag po dang*/_sdig pa snying 'dzin sogs kyi rgyud don man ngag tu bsdebs te grub pa'i rig 'dzin rnams la rim par brgyud/_slob dpon chen po pad+ma kA ra/_rgya gar khrag 'thung nag po/_phung byed shin+taM gar+b+ha dang*/_gnubs chen sangs rgyas ye shes rin po ches rgya bal bru sha'i slob dpon rnams las gsan pa rnams kyi lugs srol ci rigs pa gsal bar mdzad pa las/_'di ni gsang ba chen po'i rtogs brjod las/_de'i tho rengs ldang ba'i rnal 'byor tshe/_/gzhi snang ba'i 'od gsal dwangs pa'i ngor/_/rang gnas pa'i smin mtshams nam mkha'i thad/_/'ja' tshon sna lnga pa'i gur khyim nang*/_/skyabs kun 'dus mtsho skyes rdo rje mjal/_/ngo blta bya dang lta mkhan dbyer med pas/_/re dogs kyi 'ching ba gang yang med/_/de'i ngang las de nyid gnas gyur te/_/yul sing+ga la yi A tsar+Ya/_/'jam dpal bshes gnyen du lam gyis song*/_/sku dmar smug mchong ltar dwangs pa yi/_/phyag g.yas na be con khyad 'phags bsnams/_/g.yon bdag gi snying gar sdigs mdzub kyi/_/phyag rgyas brda thabs bstan pa'i mod/_/phyag mtshan gyi be con bdag nyid la/_/byin te rang la dbyer med thim/_/sku sgyu ma lta bu'i gsal snang de/_/ka dag gi dbyings su gtad med yal/_/dus 'di nas dgongs pa'i gsang mdzod brdol/_/gsung rab kun gyi dgongs pa khrol/_/klong chen rig pa'i rtsal chen rdzogs/_/snang yul brda dang dpe char shar/_/mchog gi dngos grub rgyud la bzhag_/ces dang*/_DA ki'i gsang gtam chen mo las/_de dang mtshungs par gsungs pa bzhin nang rang byung chos nyid kyi bden pa ji lta ba bzhin mngon sum du gzigs nas 'phags lam gyis mthong ba'i chos la brnyes pas/_/rig rtsal shes rab rang byung gi dgongs pa'i gsang mdzod brdol te shes bya ji snyed mkhyen pa'i ye shes la dbang thob pas/_/sku tshe 'di'i sbyangs stobs la ma ltos par skyes stobs kyi mkhyen rab zab mos chos kyi dgongs pa thugs su chud nas 'jigs med spobs pa'i gter mdzod yongs su grol bas lam de'i shing rta'i srol 'byed thams cad mkhyen gnyis kyi gter mdzod grol ba sha stag tu byon pa'i ngo mtshar rmad du byung ba kun mkhyen bla ma rig 'dzin 'jigs med gling pa gang la bka' bab pa'i klong chen snying gi thig le'i chos skor rtsa ba gsum gyi sgrub thabs zab rgyas su bzhugs pa las/_dngos grub kun gyi rtsa ba yi dam gyi sgrub skor te/_de la'ang spyi dang bye brag gi sgrub pa'i thabs mang du bzhugs pa las/_'di ni drag po dpal chen 'dus pa'i sgos bka'/_sku gsung thugs yon tan phrin las kyi bdag nyid 'jig rten las 'das pa'i grub tshul lnga'i ya gyal/_sku 'jam dpal gshin rje gshed 'chi bdag zil gnon gyi sgos bka'i dbang gi cho ga ste/_gter gzhung las/_'di ni 'jam dpal bshes gnyen gyis:_o rgyan rang byung mchod rten nas:_dbyings kyi DA ki'i gsang mdzod brtol:_rgyud las lung dang sgrub thabs su:_bsdus 'di pad+ma'i ring lugs yin:_zhes dang*/_rig 'dzin rtsa rgyud thod pa'i dum bu las/_ma la yar 'khrungs bram ze'i bu:_mi tra many+dzu shrI la:_sku mchog 'jam dpal sgrom bu gtad:_ces pa ltar o rgyan rang byung gi dur khrod bsil ba tshal gyi mchod rten chen po bde byed brtsegs pa nas grub pa brnyes pa'i rig 'dzin mchog brgyad la bka' brgyad so so'i rgyud lung man ngag gi sgrom bu mkha' 'gro las kyi dbang mos gtad pa las sku 'jam dpal gshin rje'i lcags sgrom slob dpon 'jam dpal bshes gnyen la gtad de/_shar phyogs khu byug tshal kyi dur khrod du bsgrubs pas dkyil 'khor khyab bdag 'jam dpal phyag rgya zil gnon dang gnyis su med pa'i go 'phang brnyes pa'i slob dpon chen po de nyid las sangs rgyas gnyis pa pad+ma 'byung gnas dang*/_gnubs chen sangs rgyas ye shes sogs kyis kyang gshed skor gyi rgyud dang man ngag du ma gsan pa'i bka' srol yongs su grags pa las skabs su bab pa 'di ni slob dpon chen po 'jam dpal bshes gnyen dang gu ru pad+ma'i bka' srol zung 'brel man ngag gi bcud du dril ba ste/_spyir rtsod dus snyigs mar lha sngags gzhan gyi nus pa rdugs pa'i tshe 'jam dpal dbyangs dang lha mo 'od zer can gnyis 'grub par sangs rgyas kyis 'jam dpal rtsa ba'i rgyud las bsngags pas mtshon byin rlabs khyad par dang ldan pa'i dbang bskur sbyin pa nyid skabs su bab pas dkyil 'khor gnyan por phyi nang gi 'jug pa'i chos rnams zhu ba'i don du maN+Dal phul/_bsags sbyangs kyis rgyud sbyang ba nas brtsams ye shes dbab pa'i bar dpal chen ltar la slob ma lhar bskyed kyi khyad par/_sngar gyi dbang stegs la 'khod pa khyed rang rnams 'jam dpal phyag rgya zil gnon sku mdog mthing nag zhal gsum g.yas dkar g.yon dmar ba/_dbus mthing*/_phyag drug g.yas gsum rdo rje 'khor lo ral gri/_g.yon gsum be con gtun shing sdigs mdzub mdzad pa/_shin tu khros pa'i nyams can dpal dang dur khrod kyi chas kyis brgyan pa/_zhabs bzhi dor stabs kyis klu 'bum/_gnyan khri/_sa bdag stong dang phyogs skyong ma he nyi zla'i steng na 'gying ba/_sku las ye shes kyi me dpung 'phro ba/_yum bai ta li mthing nag snying dang gri thod 'dzin pa gcer bu phyag rgya lnga dang gzig sham thod skam gyi phreng ba can dang rol pa'i gnas gsum du phyag mtshan gsum sogs dkyus ltar dang*/_'bebs sngags gshin rje'i sngags sbyar dgos/_dkyil 'khor mthong ba bstan pa'i skabs/_yongs su rdzogs pa/_gru gsum mthing nag zla gam dmar po gsum ldan gyi lte bar e klong chos dbyings rdo rje btsun mo'i mkha' la klu 'bum gnyan khri sa bdag stong sde brgyad phyogs skyong ru tra pho mo ma he glang rgod brgyad dang pad nyi'i steng du rgyal kun spyi gzugs sku rdo rje 'jam dpal dbyangs drag por khros pa zil gnon phyag rgya chen po g.yas dkar pos klu 'bum mthong ba'i dug can sbrul 'bum/_g.yon dmar pos gnyan rwa yi dug can lcang mo khri/_dbus mthing nag gis sa bdag mche ba'i dug can sbal pa mgo stong rnams za ba/_g.yas gsum rdo rje 'khor lo ral gri/_g.yon gsum be con gtun shing sdigs mdzub/_zhabs brkyang bskum du bgrad pas dregs pa can thams cad mnan pa/_dpal dang dur khrod kyi chas kyis brgyan zhing*/_khro gtum gar dgu'i zi byin 'bar ba/_yum bai ta li snying dang gri thod 'dzin par gnyis med du sbyor ba/_gtso bo'i thugs kar ya ma rA dza 'khor lo dang tsit+ta/_de'i thugs kar dregs pa phyag na rdo rje rdo rje dang snying phreng*/_de'i thugs kar ru sbal rngam pa mi zan/_spyi bor shel gyi bya khyung*/_phrag gong du khyung mo sngo nag gnyis/_dpung par stag mo mi zan/_nu mar seng ge_/sta zur du dug sbrul dang lce spyang ste rgyan gyi lha brgyad khro bcu'i go cha dang bcas pa/_lhag pa'i bde chen ye shes bzhi'i thod mkhar gyi glo 'bur bzhi la shar du ya ma rA dza/_lhor ya ba ti/_nub tu a ba glang mgo_/byang du ral pa tshal dgu ste ye shes lnga'i rang bzhin rtsa ba'i lha lnga/_tshad med bzhi'i bdag nyid gru chad bzhi ru phyal pa/_til pa/_'phyar ka gwa dmar/_ma ru rtse lnga la gshed chen bcu gnyis kyis bskor ba/_de'i phyir skye mched bcu gnyis dag pa'i lcags mkhar du zla gshed 'chi bdag bcu gnyis/_'obs chen bcu drug tu zhag gshed so gnyis/_phrin las bzhi'i khams la pho gshed mo gshed bdun dang mon pa king kang ma mo'i 'khor tshogs/_bdag tu lta ba dag pa'i lha mgon bdud dang gnod sbyin gyi sgo ba bzhi ste gtso 'khor du snang ba de dag kyang rnam 'gyur srid zhi dbyings su za ba'i dus kyi dgra chen po khams gsum skye 'chi srog gi bdag po 'jigs byed gshin rje rol pa'i cho 'phrul du rngams par ston kyang don la 'jam dpal ye shes sems dpa' gcig gi ye shes sgyu ma'i rnam rol gzhi lam 'bras bu'i yon tan ma lus pa lhun gyis rdzogs pa'i bdag nyid chen po gang*/_phyi ras bris kyi dkyil 'khor 'di ni dpes mtshon pa yin gyi don rang gi phung khams skye mched thams cad lha'i ngo bor lhun grub tu gnas pa yin te/_ho:_phung po khams dang skye mched sogs/_dbang chog dkyus la 'jug pas rigs dbang lnga bskur la/_mtha' rten rnam rgyal bum pa la/_ho:_ye shes lhun grub bum pa yi:_brtul zhugs dag pa'i dbang bskur bas:_'khor ba rnam dag chos skur gsal:_rang byung ye shes dbang thob shog:_e ka ya ma gu h+ya b+ha ga bo d+hi tsit+ta ho:_de ltar dbang bskur ba'i chu rgyun sogs/_bum dbang rdzogs pa dang*/_de nas nang nus pa 'jug pa'i dbang rnams rjes 'brel du sbyin pa la gter gzhung las/_khams drug ldan pa lus kyi rten:_rdo rje bzhi yi go 'phang la:_sbyor ba rdo rje tan+t+ra las:_rgyu 'bras dag grol lam gyis min:_zhes pa ltar khyed rang rnams kyi phung khams skye mched thams cad 'jam dpal ye shes sku can gyi gdan gsum phyag rgya'i rol par dag cing sad par byas pa'i nus pa brtan phyir gdug pa zil gnon rab 'jigs dur khrod drag po'i rgyan chas rnams gnas so sor bgos te mnga' gsol bas 'khor 'das zil gyis gnon pa'i stobs dang gzi brjid kyi rtsal chen rdzogs par mos shig_/dur khrod chas brgyad gtad la/_ho:_glang chen stag sham zhing lpags sbrul:_thod pa snying phreng keng rus rgyan:_me ri dur khrod dbang bskur bas:_dregs pa'i stobs dang ldan par shog:_e ka ya ma hasti ma hA nA ka pA li tsit+ta dz+wa la ni ri ho:_thugs kyi nus pa ster ba 'bar ba'i phyag mtshan rnams so sor byin pas 'jigs pa'i bdud bzhi dang gsang ba'i dgra gsum rtsad nas gcod pa'i mthu stobs nus pa thogs med du thob par mos shig_/phyag mtshan drug gtad de/_ho:_rdo rje be con dug lnga zil gyis gnon:_'khor lo gtun shing gdug pa gnas su 'joms:_ral gri sdigs mdzub dug gsum sku gsum rdzogs:_rig pa stobs kyi sgo gsum dbang thob shog:_e ka ya ma b+hi ha hu stib pa ra ho:_dngos grub myur du thob byed dpa' bo'i rdzas kyi dbang bzhi sbyin pa la/_rgyud drug dbyings su sgrol ba dmar chen rak+ta'i dbang bskur bas khams gsum thugs rjes sgrol ba'i mthu thob par mos shig_/rak+ta lag g.yon du gtad la/_ho:_rdo rje pad+ma mnyam sbyor nas:_pad+ma rak+ta byang chub sems:_bam chen dme ba'i don dang sbyar:_brtul zhugs rol pa'i dbang bskur bas:_mi zad rgyan gyi dbang thob shog:_e ka ya ma gu h+ye rak+ta bo d+hi tsit+ta ho:_cung zad myang du gzhug_bam chen tsit+ta gru gsum gyi gdan du 'jam dpal phyag rgya zil gnon sems byung dag pa rtsa ba'i lha drug rgyan lha brgyad/_rtsa ba zlum po'i tshul gyi zla gam la sprul pa rnam gsum/_mdun ye shes kyi rtsa la ya ma rA dza/_g.yas chos nyid kyi rtsa la ya ba ti/_rgyab yon tan gyi rtsa la a ba glang mgo_/g.yon rang rgyud kyi rtsa la ral pa tshal dgu/_rnam shes tshogs brgyad yul dus dag pa mon bdud yab yum/_lte bar 'pho ba bcu gnyis kyi rtsa la khams bcu gnyis dag pa'i 'chi bdag bcu gnyis/_/lto bar khrag khyams 'obs srung sha za king kang*/_bam gyi phyi rgyud phung po lnga ya mAn+ta ka dang gshed chen bzhi/_'byung ba yum lnga/_rnam shes mthar byed brgyad/_yan lag sgo ba ste dkyil 'khor yongs rdzogs gsal bar byin gyis brlabs pas yon tan gyi dbang dang dngos grub ma lus pa thob par mos shig_/bam chen spyi bor bzhag la/_dpa' brtul sngags kyis gzi byin bskyed:_ma phyir 'di bzhin 'dug kyang 'di dbang tshig yin 'dra/_mchan/_ho:_bam chen ro la mnyam par rol:_rdo rje brjid pa'i dbang thob nas:_bde chen mnyam nyid thob par shog:_e ka ya ma a ti pa ti sid+d+hi ho:_bam gyi phyi rgyud kyi lha thams cad tsit+ta'i dkyil 'khor la 'dus/_de yang dwangs ma lnga yi thig ler 'dus/_de slob ma'i snying gar thim par mos/_bam ye shes lnga'i ngo bo byin rlabs dang dngos grub dpag tu med par bsam la/_gdong*/_kha/_mig_mgo bo/_lus kyi cha shas te dme ba lnga bsal ba gsang rdzas dang bsre/_bam sil bur bsil te yul dang dbang po ro gcig pas tshogs drug gi dngos po thams cad la gtsang dme med pa de kho na nyid mnyam pa'i rnal 'byor gyis rol pas bdag med pa'i don khong du chud de phrin las bzhi dang grub pa brgyad phyag rgya chen po mchog gi dngos grub mngon du gyur nas 'gro kun phan bde'i dpal la sbyor nus par gyur cig_/snod bcud bde chen du dag par sbyangs pa'i bdud rtsi ra sa yA nas dbang bskur bas bde chen 'pho 'gyur med pa'i ye shes rtag pa dam pa'i bcud la longs spyod par mos shig_hU~M:_'chi med rang byung ra sa yan:_bkra shis mtshan ldan lhag pa'i rdzas:_'phel 'grib med pa'i dbang bskur bas:_rigs lnga ye shes lnga thob shog:_e ka ya ma sarba pany+tsa a mr-i ta dz+nyA na bud+d+ha ho:_tshe 'brang rgya gram gyi lte bar bum pa gzhal yas khang du tshe dpag med yab yum bzhis bskor ba'i dbang bskur bas rdo rje tshe yi dbang thob par mos shig_/tshe 'brang spyi bor bzhag ste/_hoH_bkra shis dngos grub gwa'u ru:_mi 'gyur brtan pa'i tshe bskyil nas:_rang rtags tshe yi dbang bskur bas:_'chi med brtan pa'i dbang thob shog:_e ka ya ma A yur+dz+nyA na sid+d+hi ho:_dpal gyi gtor ma 'di nyid dkyil 'khor gyi lha tshogs su gsal ba de dag gi sku yi 'od zer gyis sku gsung thugs yon tan phrin las kyi dngos grub rab 'byams thob par mos shig_/sgrub gtor spyi bor bkod la/_ho:_snod kyi 'jig rten gtor gzhong du:_bcud kyi sems can gtor mar gsal:_'byung ba rnam lnga gtor ma'i rgyu:_lhun grub kun 'byung gtor ma'i rgyan:_'dzin chags med pa'i stobs kyis rol:_e ka ya ma ma hA ba liM ta pU dza ho:_des rdul tshon sprul pa'i dkyil 'khor du sogs bum dbang gi dag pa brjod nas/_zab dbang gsum yongs rdzogs mthar dam tshig khas blang ba dpal chen skabs ltar la/_nus pa de ldan dbang srog rgyud la 'dzin pa dam tshig la rag las pas dam tshig brtan pa'i thog mar man ngag snod med la mi spel zhing slob dpon gyi bka' las mi 'gal bar gdams pa 'di la gsan pas khyab par gda'/_ho:_snod med brtul zhugs zhan pa la:_spel zhing bsgrags na rdo rje khro bo dang:_gtum po gnod sbyin mkha' 'gro dbang chen gyis:_lus 'dral mgo gshags tsit+ta khrag tu 'thung:_khyod kyi rdo rje 'chang chen nga yin pas:_bka' yi zur yang bcag par bya ba min:_bsgo ba byos la dam tshig srog ltar srungs:_gal te 'das na rdo rje dmyal bar ltung:_e ka ya ma du na rak+taM ho:_dam chu bdud rtsi sbyin la/_'di ni rdo rje dmyal ba'i chu:_tshul 'di bsrungs na dngos grub thob:_nyams na tsit+ta gshags te 'pho:_rdo rje'i chu 'di khyod kyis longs:_badz+rod ka a i daM ho:_de skad ji ltar bsgos pa'i don bzhin thun mong dang thun mong ma yin pa sogs dkyus ltar dbang dang cho ga'i rjes rim mtha' rgyas su byas pas grub pa'o/__/mkhyen gnyis ye shes gter mdzod che/_/brtse chen bdud rtsis grol ba'i bcud/_/bam chen gsang ba'i dbang bskur gyi/_/'od zer mdzes 'phro 'di rmad byung*/_/thugs sgrub dpal chen 'dus pa'i sgos bka' khrag 'thung rigs bzhi las/_sku rdo rje 'jam dpal gshin rje 'chi bdag zil gnon gyi bam chen gsang ba'i dbang bskur ba'i le'u tshan drug pa ste 'jam dpal dga' ba'i bshes gnyen gyis sbyar ba'o/__!__thun mtshams sprin gyi stangs 'dzin bde chen gzis/_/rgyal kun gsung gi dpyid du sgeg pa'i dpal/_/dbang chen rta yi rgyal po'i dkyil 'khor gyi/_/bdag nyid pad+ma gar gyi dbang phyug 'dud/_/gsung pad+ma'i rigs kyi he ru ka rta mgrin khams gsum rol pa'i dbang la/_gzhung mthun dkyil 'khor dbus su rnam bum mgul chings dmar po sogs rigs dbang lnga/_rdo rje slob dpon dbang rdzas rdor dril/_rjes gnang chas/_rta mgrin gtso 'khor yongs rdzogs kyi sku tsaka_/rta mgo lnga'i tsakli/_rdo rje rin chen gyi khyung gshog_/dur khrod chas brgyad/_dpal gyi chas brgyad/_phyag mtshan phyogs sdom/_ye shes sems dpa' pad+ma gzi ldan gyi sku/_rigs lnga'i sa bon oM AHhU~M swA hA/_sgrol dbang chas lcags hom du ling+ga/_gdab phur/_g.yab dar/_rig tsaka_shel rdo/_me long sogs snga ma ltar 'du byas la/_dbang sgrub bdag mdun gnyis su dbye tshul sogs gshin rje ltar la/_bzlas dmigs/_thugs kar rgyal ba kun gyi yum:_pad+ma gzi ldan zhi ma khro:_phyag mtshan med de 'dzin 'dzin 'dra'i:_snying gar rin chen zur brgyad steng:_nyi ma'i gdan la hrIHyig mthar:_rnam pa'i gzugs brnyan yi ges bskor:_ngo bo lha yi sku ru bshad:_yab yum zhal dang mkha' gsang brgyud:_bde ba chen po'i 'od zer gyis:_rgyal ba mchod cing thugs dam bskul:_ma mo mkha' 'gro las la 'gyed:_dngos grub grub pas bdag byin brlabs:_yang 'phros brtan g.yo tha mal pa'i:_snang zhen dag pa'i snod dang bcud:_lha dang gzhal yas rol par shar:_oM hu lu hu lu phaT:_e a ral+li hU~M hrIHdzaH_zhes bzla la spro bsdu sogs gshin rje ltar bya bar gsungs/_bum sgrub nas bdag 'jug dang me tog dor ba gang rung gis gnang ba zhus te/_slob mar khrus bya/_bgegs bskrad/_srung 'khor sems bskyed gsal btab la/_de la 'dir mkha' klong rnam par dag pa 'og min chos dbyings 'od kyis khengs par gdod ma'i mgon po 'od snang mtha' yas rtag tu 'od gsal gyi dgongs par bzhugs pa las/_rang byung brtse ba'i thugs rje gar gyi dbang phyug bde chen dgyes pa'i mtshan dper bzhengs te sku dang ye shes 'du 'bral med pa kha sbyor yan lag bdun rdzogs 'jig rten dbang phyug pad+ma'i snang ba rab tu rgyas pa gang*/_gdul bya mi srun pa rnams 'dul ba'i gnyen por pad+ma he ru ka rta mchog rol pa'i rnam par snang bas rngog ma le brgan gyi rgyud/_dbang chen 'dus pa'i rgyud sogs shin tu mang po dag gsungs pa rdo rje chos kyis bsdus te glegs bam du byas nas zangs kyi sgrom bur rgyas btab nas smug nag dbang gi mkha' 'gros mchod rten bde byed brtsegs par sbas pa/_bka' bab grub pa'i rig 'dzin mchog brgyad kyi ya gyal slob dpon sangs rgyas gnyis pa 'phags pa klu sgrub la gtad de 'dzam bu'i gling du snang bar mdzad pa dang*/_gzhan yang gsung rdo rje rig 'dzin grub pa'i dbang phyug gi tshul bstan pa slob dpon chen po pad+ma 'byung gnas la dbang chen 'dus pa sku'i rgyud/_rta mchog rol pa gsung gi rgyud/_rdo rje pad dra thugs kyi rgyud sogs sku gsung thugs yon tan phrin las/_phyi ma/_phyi ma'i phyi ma/_man ngag gi rgyud la sog pa o rgyan he ru ka'i 'du khang du rdo rje rnal 'byor mas gtad pa dang*/_grub chen mi tra dzo ki la sogs pa nas brgyud pa'i thugs rje chen po zhi khro'i lam skor gsar rnying kun la rgya cher bzhugs pa las/_skabs su bab pa 'di ni dus gsum rgyal ba'i zhing du mtshan tsam 'byon par dka' ba/_sangs rgyas las kyang dkon pa rgyal ba rdo rje 'chang nyid kyis bsngags pa'i gsang sngags bla med nang rgyud yo ga gsum gyi dbang rgyud man ngag gi bka' srol la 'gran zla dang bral ba gsang sngags rdo rje theg pa'i shing rta chen po snga 'gyur rnying ma'i phyogs su bka' gter gyi ring lugs gnyis las phyi ma ste/_de la'ang zab gter snga phyi'i srol 'byed rig 'dzin grub pa'i skyes bu'i chos skal zab rgyas du ma zhig bzhugs pa las skabs su bab pa 'di ni gter chen chos rje gling pa'i gter lung las/_dbus g.yor gzhung du byang sems pad+ma'i ming:_bka' rnying bstan skyong thabs mkhas 'gro ba 'dul:_zhes bsngags pa ltar gnad byang thugs kyi sgrom bu las/_rang byung rdo rje pad+ma dbang:_gsang mtshan gar dbang 'jigs med gling:_rtogs grol dus mnyam thugs gter bdag:_'phags pas rjes su bzung ba'i rtags:_lag mthil g.yas na pad+ma'i spyan:_dbang chen gsung gi rig 'dzin phyir:_mthe bong thugs srog h+yAr+Sh+Nis mtshan:_zhes gsungs pa ltar dgongs pa phyogs yan du grol nas snang srid dpe char shar ba'i rang 'bras bla ma dgongs 'dus kyi rnam bshad mkhyen brtse'i me long rtsom pa'i sgang yol tho rengs kyi char shes rig spros bral gyi ngang du la zlo ba'i tshe smin mtshams kyi nam mkha' nas rta skad mngon sum du 'tsher ba dang*/_e ma/_'di yi bstan pa 'dzin par lung bstan pa'i/_khong pad+ma'i ljags ldan mched drug las/_/rje ma hA gu rus ming gi dbang*/_/pad+ma dbang chen du byin gyis brlabs/_/dbyings lhan cig skyes pa'i DA ki mas/_/lha pad+ma dbang chen srog gi snying*/_/mngon sum du lag pa'i ri mo la/_/rtsod pa med par bzhugs ces bshad/_/ces sogs gsungs pa bzhin thugs rje chen po zhi khro dang*/_nA gardzu na pad+ma 'byung gnas rnams kyis rjes su bzung zhing mkha' khyab thugs rjes snang bas rtsod dus gdul dka' 'dul ba la 'brel tshad don ldan chen po rgyal ba'i myu gu mkhyen brtse'i lha zhes 'phags mchog sems nyid ngal gso dngos su byon pas na/_zab gsang phrin las kyi mu khyud kyang shar nub rgya mtsho'i mtha' tshun chad khyab pa'i rdzogs pa chen po klong chen snying gi thig le'i bka' 'dus chos kyi rgya mtsho dpal chen 'dus pa'i sgos bka'/_gsung pad+ma'i rigs rta mgrin khams gsum rol pa ste spyir dus gsum gyi rgyal ba thams cad bla ma yi dam dbyer med la 'du/_yi dam dkyil 'khor gyi lha thams cad pad+ma dbang chen la 'dus pas don la slob dpon chen po nyid gsung rdo rje pad+ma he ru ka'i tshul du sgrub pa'i dbang bskur ba skabs su bab pa ste de nyid zhu ba'i don du maN+Dal phul/_sogs nas ye shes dbab pa'i skabs/_sngar gyi dbang stegs la 'khod pa snod rnam par dag pa zla gam dbang chen rol pa'i gzhal yas khang du pad+ma nyi ma klu srin pho mo bsnol ba'i gdan la/_bcud rnam par dag pa khyed rang rnams re re nas dbang chen rta mchog rol pa sku mdog dmar nag sgeg cing dpa' ba la 'jigs su rung ba'i zhal lnga g.yas sngo g.yon ser lhag ma rnam gnyis rtsa zhal dang mtshungs pa/_spyi gtsug ral pa'i gseb tu rta zhal lnga 'tsher ba/_phyag bcu drug gi g.yas brgyad kyis rdo rje/_khaT+wAM/_dril bu/_lcags kyu/_sbrul zhags/_'khor lo/_ral gri/_rdo rje'i phreng ba/_g.yon brgyad kyis thod khrag_pad+ma/_snying*/_dbyug pa/_rgya gram/_be con/_me dpung*/_tri shu la/_khyung khra rnams bsnams pa/_dpal gyi chas bcu dang dur khrod kyi chas brgyad kyis brjid pa'i pang du pad+ma gzi ldan sngo nag g.yas rin po che dang g.yon rin po che'i za ma tog 'dzin pas 'khyud pa/_zhabs brgyad brkyang bskum dor stabs kyis klu brgyad rgyal bsen brdzis pas bde ba chen po'i ye shes me dpung dmar nag tu 'bar ba'i klong na 'gying ba'i gnas gsum du phyag mtshan gsum sogs dang 'bebs sngags la rta sngags sbyar/_dkyil 'khor mthong ba bstan pa'i skabs/_yongs su rdzogs pa'i lte bar 'khor lo rtsibs bcu drug_/pad 'dab so gnyis kyis bskor ba'i lte bar dbang gi pho brang zla gam sgo gcig pa'i dbus su pad+ma nyi ma klu bsen rgyal bsen bsnol ba'i steng du dbang chen rta mchog rol pa sku mdog dmar nag dus mtha'i me dpung ltar 'bar ba'i mthing ser dmar ba'i zhal lnga/_dbu gtsug tu rta gdong lnga dang bcas pa/_phyag bcu drug gis rdo rje khaT+wAM dril bu lcags kyu sbrul zhags 'khor lo ral gri rdo rje'i phreng ba/_thod khrag pad+ma snying dbyug pa rgya gram be con me dpung tri shul khyung khra rnams dang*/_zhabs brgyad dor stabs kyis 'gying zhing yum pad+ma gzi ldan sngon mo dang sbyor ba/_sku la dpal dang dur khrod kyi chas yongs su rdzogs shing*/_rdo rje'i khyung gshog gdengs pa'i rtse mor nyi zla dang bya khyung gis brgyan pa/_'khor lo'i rtsibs bcu drug la go la ma drug_/gsang ba'i yum bzhi/_khams rgya mo drug dang*/_pad 'dab so gnyis la mkha' 'gro so gnyis kyi sprul pa long ba rgyab 'brel so gnyis/_gru chad phyi nang gnyis la dpal gyi pho nya khyi brgyad spyang brgyad/_bar khyams su pho nya sum brgya drug cu/_sgo bzhir mkha' 'gro bzhi dang bcas pa bde chen sgyu ma'i cho 'phrul ma 'gag cir snang yang don la ye shes nyag gcig gi bdag nyid du rnam par dag pa dang lhag pa gzugs brnyan gyi dkyil 'khor 'dis mtshon byed du byas te dbang bskur zhing ngo sprad nas lam sbyang bas gnyug ma'i rdo rje gsum gyi cho 'phrul gdan gsum rdo rje bkod pa'i grong khyer rang la lhun grub tu bzhugs pa yang*/_ho:_phung po khams dang sogs/_dbang chog dkyus la 'jug pas rigs dbang lnga bskur la/_gnyis pa bum dbang gi rjes 'brel nus 'jug gi dbang sbyin pa la/_mdun bskyed gtso bo'i sku las ye shes kyi sku mar me gcig las gnyis mched kyi tshul du 'phros/_khyed rang gi spyi bo nas zhugs te thim pas phung khams skye mched lha sku phyag rgya chen por gnas gyur pa'i mos pa mdzod/_gtso bo'i sku spyi bor bzhag la/_e ma gsang mchog gsang ba'i bdag:_rig pa bde chen rgyal ba'i yab:_sangs rgyas kun 'dus rgyal po yi:_sku gsung thugs kyi dbang bskur bas:_rigs kyi dbang mchog thob par shog:_kro d+ha de ba a AH_a b+hi Shiny+tsa hU~M:_dpal gyi rta skad theng gsum gyis drang don du snang srid dbang gi dkyil 'khor du sad nas ma mo mkha' 'gro dbang du sdud cing dgyes pa dang*/_nges don du gzhi lam 'bras bu'i bde chen ye shes lnga yi cho 'phrul du ngo sprad pa'i phyir rta zhal gyis dbang bskur bar mos shig_rta mgo lnga spyi gtsug tu bkod la/_hU~M:_dpa' bo ye shes sgo srung ni:_zla gam 'od kyi thig le che:_'bar ba'i ye shes rta mgo lngas:_rta mgrin dbang gi sku thob shog:_h+ya gr-I wa dz+nyA na hrIHhrIHhrIHhrIHhrIH_a b+hi Shiny+tsa hU~M:_thugs stong dang snying rje thabs shes gnyis med rdo rje rin chen gyi gshog pas srid zhi'i g.yang sa gcod cing gti mug klu gdon 'dul ba rdo rje khyung gi dbang thob par mos shig_khyung gshog dpung pa g.yas g.yon du bzhag ste/_hU~M:_g.yas pa rdo rje'i gshog pa brgyad du gdengs:_g.yon pa rin chen gshog pa brgyad du gdengs:_steng dang 'og dang bar bar na:_rdo rje'i the'u gshog re res brgyan:_gshog pa'i dang ru rtse mchan la:_dbang gi sprul pa chen po ni:_bya khyung 'bar ba'i skur bstan 'dis:_de ring khyod la dbang bskur bas:_klu gnyan 'dul ba'i dbang thob shog:_tsit+ta badz+ra ga ru Da a b+hi Shiny+tsa hU~M:_snang srid ma mo mkha' 'gro'i tshogs rje rdo rje gsang ba'i spyod pas nang gi sa lam gyi yon tan rdzogs pa lha dang skal pa mnyam par byin gyis brlab pa'i phyir dur khrod chas brgyad kyis dbang bskur bar mos shig_dur khrod chas brgyad gtad la/_hU~M:_dpal gyi sku mchog gnyis med rol pa'i stabs:_dur khrod chas brgyad gsang ba'i ngang du rol:_dur khrod chen po'i dbang mchog 'di bskur bas:_tan gan rol pa rtags chen dbang thob shog:_hU~M kro d+ha hu lu hU~M phaT:_a b+hi Shiny+tsa hU~M:_thugs rje thabs kyis rngams pas ru tra sde gsum sgrol phyir dpal gyi chas brgyad kyis dbang bskur bas dregs tshogs zil gnon sgrol ba'i las la mnga' brnyes par mos shig_/dpal gyi chas brgyad gtad la/_hU~M:_dpa' bo ting 'dzin rnon po stag gi chas:_rno gdug zlog byed rgya gram lcags kyi chas:_shes rab ting 'dzin rdo rje 'chol ba'i chas:_dbang gi bse khrab dmar po gzi brjid chas:_dpa' brjid mnyen lcug sbrul nag rgyan gyi chas:_dbang phyug za byed ting 'dzin mche ba'i chas:_rdo rje'i slog pa mthing ga le brgan chas:_sdud byed gcan gzan gtum pa gzig gi chas:_bskur bas rnam thar brgyad dang ldan par shog:_rtsa sngags mthar/_karma a b+hi Shiny+tsa hU~M:_rdo rje'i phyag mtshan rnams gtad pas stong nyid bcu drug gi dgongs pas srid rtsa dbyings su sgrol ba'i dbang thob par mos shig_/phyag mtshan rnams gtad de/_hU~M:_rdo rje khaT+wAM dril bu lcags kyu dang:_sbrul zhags 'khor lo mtshon cha ral gri 'bar:_rdo rje'i phreng ba thod khrag pad+ma snying:_dbyug pa rgya gram be con me dpung 'bar:_tri shu la dang khyung khra 'bar ba yis:_rgyud drug rtsad nas 'byin pa'i dbang thob shog:_rtsa sngags mthar/_ma hA mu dra a b+hi Shiny+tsa hU~M:_ye shes sems dpa' dbyings yum pad+ma gzi ldan snying gar bstim pas rnam kun mchog ldan shes rab stong nyid kyi don rtogs par mos mdzod/_yum pad+ma gzi ldan gyi sku snying gar bzhag ste/_hU~M:_thugs kar sbas pa gsang ba'i yum:_rgyal bas bsngags pa'i gzi ldan pad+ma can:_gsang mdzod yum gyis dbang bskur bas:_shes rab pha rol phyin pa'i dbang thob shog:_pad+ma rA ga kro d+ha ma a b+hi Shiny+tsa hU~M:_dpal gyi 'khor tshogs go la ma drug dang yum bzhis dbang bskur bas tshogs drug gnas su dag ste bde stong dga' ba bzhi la longs spyod par mos shig_/go la ma drug dang yum bzhi'i sku gtad la/_hU~M:_srid gsum sgrol zhing las mdzad dam srung ma:_gdul bya drag po 'dul ba'i dbang mo che:_go la ma dang yum bzhir ston pa ste:_gsang ba'i las mdzad ma sring dbang thob shog:_ma ma ru tsa a b+hi Shiny+tsa hU~M:_mkha' 'gro so gnyis kyi sprul pa dmus long rgyab 'brel so gnyis kyis dbang bskur bas khams so gnyis gnas su dag par mos shig_/long ba rgyab 'brel gtad la/_hU~M:_nyon mongs dug gsum nad kyis gdung ba yi:_bdud dang srin po ma lus 'dul ba dang:_las kyi mtha' rnams grub par bya ba'i phyir:_mkha' 'gro dmus long tshogs kyis dbang bskur bas:_rgyab 'brel sum cu rtsa gnyis las 'khol shog:_dpal gyi pho nya lce spyang rnams kyis dbang bskur bas nyon mongs bcu drug dbyings su dag par mos shig_/khyi spyang rnams gtad la/_hU~M:_yul brgyad gnas su dag pa'i khyi spyang tshul:_'gugs 'dren las kyis dpal gyi thugs dam skong:_thogs med sgrol ba'i mthu ldan dbang thob shog:_ku dzaH_ku dzaH_ku dzaH_ku dzaH_ku dzaH_ku dzaH_ku dzaH_ku dzaH_a b+hi Shiny+tsa hU~MH_sgo ma bzhi yi dbang bskur bas mtha' bzhi'i lta ba dag pa'i ye shes mngon du gyur par mos shig_/sgo ma bzhi gtad de/_hU~M:_ye shes dgu yi don ldan zhing:_theg pa dgu yi bye brag tshul:_mgo dgu la sogs rkang gcig ldan:_sgo ba bzhi yi dbang thob shog:_dzaHhU~M ba~M ho:_a b+hi Shiny+tsa hU~M:_rigs kyi snying po lnga gnas lngar bstim pas spyan dang mngon shes sogs 'phags pa'i spang rtogs la dbang thob par mos shig_/yig 'bru lnga gnas lngar bzhag ste/_hU~M:_lha yi snyan dang lha yi spyan:_de bzhin sngon gnas rjes dran sogs:_mngon shes lnga yi dbang thob shog:_oM AHhU~M swA hA:_a b+hi Shiny+tsa hU~M:_de nas drag po sgrol ba'i dbang:_rU par dgra bgegs dgug cing gzhug:_ces gsungs pas de dag gis lha dang skal ba mnyam pa'i phyir bum dbang mtha' rten dang bcas pa bskur bas ting 'dzin lha yi gzer gyis gzugs snang lhar dag_/snying po sngags kyi gzer gyis nus pa'i rtsal byin/_'phro 'du phrin las kyi gzer gyis las bzhi thogs med du 'grub pa'i mthu thob phyir sgo gsum lha sngags ye shes kyi ting nge 'dzin gyi rdzong las mi 'da' bas snang spyod ye shes kyi rol par shar nas chags sdang rang mtshan gyi 'phrang las brgal te dgongs pa mi 'gyur ba'i gzer chos nyid kyi lta bas 'khor 'das kyi srog 'phrog pa rtogs pas bdag bsgral nas/_zhi ba'i phrin las kyi spyod yul du ma gyur pa'i gdul dka' drag pos tshar gcod pa'i thugs rjes gzhan sgrol ba'i rjes su gnang ba sbyin pa la thugs dmigs 'di bzhin gnang mdzod/_snod bcud dpal chen khrag 'thung rol pa'i dur khrod chen por rdzogs pa'i dbus su phyir mi ldog pa'i phyir slob ma rnams rang rang dbang chen rta mchog rol par dngos su gsal bas/_mi rdugs pa'i phyir sgrol phur sras mchog yak+sha kro d+ha dang*/_mi 'byams pa'i phyir ling+ga dgra bgegs dngos su gsal ba ste gsal ba gsum ldan gyi ting nge 'dzin dang ma bral bas thugs rje thabs kyis sgrol ba'i ting 'dzin la 'jug par zhu/_thugs dam bskul ba ni/_hU~M:_mi gnas ye shes chos sku'i pho brang nas:_longs spyod rdzogs pa zhi dang khro bo'i lha:_thugs dam bskul lo 'gro ba'i don la dgongs:_rig pa'i rang bzhin bde gshegs snying po yang:_ma rig 'dzin pa'i kun gzhi lung ma bstan:_sgo lnga'i yul dang rten cing 'brel pa las:_rigs drug rgyud lnga'i gnas su 'khyams pa rnams:_las dang nyon mongs mthu yis gzir ba'i mthus:_phyi rol yul la smin pa'i sdug bsngal dang:_nad mtshon mu ge dgra bgegs 'byung po'i gdon:_'jigs pa chen po brgyad dang bcu drug kun:_mngon spyod drag po'i rol pas tshar bcad nas:_log rtog dngos por zhen pa'i sems can rnams:_rgyu 'bras theg pa gzhan gyis gdul dka' bas:_rang byung ye shes rtogs pa'i phrin las mdzod:_gser skyems gzu dpang dang bcas pa ni/_ra~M ya~M kha~M/_oM AHhU~M/_gser skyems zag pa med pa ye shes kyi bdud rtsi'i rgya mtsho chen por gyur/_hU~M:_khyab bdag gdod ma'i mgon po man chad nas:_mngon par byang chub dpal mgon bla ma'i bar:_dgongs brda snyan brgyud rdo rje slob dpon dang:_dbang chen rta mchog lha tshogs gzu dang dpang:_'gro kun bde gshegs snying po'i rang bzhin la:_dgra gnyen phyogs cha'i sdang zhen ma dmigs kyang:_gzung 'dzin gdon gyis brlams pa'i nyams pa bdun:_byang chub sems gnyis sgom pa'i dgra ru langs:_dam las nyams pas slob dpon mched la brnyas:_bka' las nyams pas las 'bras khyad du bsad:_don las nyams pas bden gnyis chad par blta:_las kyis nyams pas nyes med rnams la 'dzugs:_mtshan mas nyams pas chos la phyogs ris bzung:_'dod pas nyams pas khrel med 'phrog bcom byed:_log pas nyams pas sems can sdug la sbyor:_'di la mngon spyod phrin las mi mdzad na:_mthar gyis 'chi ba sems can kun la yod:_dus la bab na dpag bsam shing yang 'gyel:_bsam sbyor ngan pa'i 'bras bu mthar phyin na:_tshar gcod rjes 'dzin mthu stobs rdzun du zad:_chos nyid bden pa bslu ba med pa dang:_sngags kyis sgrol ba sangs rgyas rnams kyi mthus:_a b+hi tsar+Ya'i dus la da bab na:_brnag pa'i las la btang snyoms ma mdzad cig:_dus gsum sangs rgyas rnams kyis dbyings nas gzigs:_bden gnyis rgyu 'bras bslu med gzu dang dpang:_dpal mgon chos skyong rnams ni mthu rtsal bskyed:_nyes chen 'di la mngon spyod phrin las mdzod:_ces brjod cing gser skyems phyogs bcur 'thor/_dmigs bya bskyed pa ni/_stong pa'i ngang las mdun du brub khung kha dog cing gting zab pa sgo med zur gsum pa:_las byed gshed ma dang gcan gzan mang pos gsod gcod kyi las la brtson pa:_mun nag 'thibs pa:_me 'bar zhing rlung 'tshub pa:_'jigs shing skyi g.ya' ba:_de'i nang du nr-i las yid la brnag pa'i dgra bgegs gang yin pa:_rid cing nyam nga ba'i tshul can:_mgon skyabs dang bral bar bsam mo:_rnam shes 'gugs pa ni/_g.yab dril bcas hU~M mdzad kyi rgya bcings la/_na mo/_rig 'dzin rtsa brgyud kyi dpal ldan bla ma dam pa rnams kyi bka' bden pa dang*/_sangs rgyas kyi bka' bden pa dang*/_chos kyi bka' bden pa dang*/_dge 'dun gyi bka' bden pa dang*/_gsang sngags dang rig sngags dang gzungs sngags dang snying po dang phyag rgya dang ting nge 'dzin gyi bden pa dang*/_chos nyid gdod nas stong kyang chos can rgyu 'bras bslu ba med pa'i bden pa dang*/_khyad par dbang chen rta mchog rol pa'i dkyil 'khor gyi lha tshogs bka' sdod dam can rgya mtsho'i tshogs dang bcas pa rnams kyi bka' bden pa dang*/_bden pa chen po'i mthu la brten nas bstan dang 'gro ba'i spyi dgra/_khyad par rig pa 'dzin pa bdag cag yon mchod 'khor dang bcas pa rnams la snga dgra lag gis bdar ba/_phyi dgra yid la sems pa/_da dgra thad du 'dzugs pa'i gzugs can sdang ba'i dgra dang gzugs med gnod byed bgegs kyi tshogs dang bcas pa thams cad srid pa gsum gyi khong gar gnas gar bros kyang skad cig yud tsam la dmigs pa'i rten 'di la khug cig_/oM hu lu hu lu phaT:_e a ra li hU~M hrIHdzaH_sarba big+h+nAn sha trUM a kar+Sha ya dzaH_nr-i yaM dzaH_tri yaM dzaH_dzaHhU~M ba~M ho:_badz+ra a be sha ya a:_pra be sha ya phaT:_zhes lan gsum gyis dgug gzhug bcing bstim dbab dbye bsgral bas skal ldan du bya/_khyed rang rnams dbang chen rta mchog rol par gsal ba'i lag gnyis rigs lnga yab yum gyi sbyor mtshams su hU~M las skyes pa'i sgrol byed yak+sha kro d+ha sku stod khro bo sku smad rno dbal phur pa'i mtshon ldan 'dril zhing dgra bgegs kyi snying gar btab pas phur rtse'i 'od las dpa' bo 'bru lnga rlung rta'i zer las 'phros pas bsgral bya'i rigs drug gi sa bon bag chags dang bcas pa bsregs nas rnam shes nr-i dud kha'i rnam pa nag kem gyis bsad/_slar yang rdo rjes brdungs nas btab cing phur rtse rang la bstan pas gzas po'i tshe bsod kyi dwangs ma khab len gyis lcags bsdus pa bzhin bsdus te rang la thim pas gzi byin lhag par 'bar/_dgra bgegs kyi rnam shes a dkar po'i rnam par phur pas rtsen gyis blangs nas phur rtse gyen la bstan pas skar mda' 'phang ba bzhin 'og min gyi gnas su dpal chen po'i sbyor mtshams su thim par bsam la bdag phur 'ben gsum dbyer med chos nyid kyi dgongs pa las mi 'da' bas sgrol ba'i las rim la 'jug par mdzod/_sgrol phur gtad la/_hU~M:_dbyings dang ye shes don gyi pho nya dang:_thabs dang shes rab rtags kyi pho nya mo:_rdo rje dbang gi phur pa 'di byin pas:_ye shes dbyings la phur pa 'debs par shog:_oM hu lu hu lu phaT:_e a ral+li hrIHhU~M dzaH_nr-i tri sha trUn mA ra ya phaT:_zhes tshe khrus gnas lung gi dgongs pa dang ldan pas phur pa btab cing sgrol gris btub/_ling ro sman gyis bran la/_mAM sa rak+ta tsit+ta go ro tsa na ba su ta keM ni ri ti ta na tsakra pU dza khA hi khA hi:_zhes zhal du bstab la gtor mar 'bul/_des drag po sgrol ba'i phrin las kyi dbang thob pas deng phyin chad bar chad bdud sde'i g.yul las rnam par rgyal zhing zhing bcu'i dgra bgegs sgrol ba la thogs pa med pas 'jigs pa'i bdud bzhi bcom/_bar chad kyi 'phrang gsum bsal/_gsang ba'i dgra gsum bsad nas phyogs las rnam rgyal he ru ka'i go 'phang mngon du byed nus pa yin no/__/des rdul tshon sprul pa'i dkyil 'khor du sogs bum dbang gi dag brjod dang*/_gsang dbang*/_sher ye/_tshig dbang gis mtshon dam tshig khas blangs/_gtang rag yon 'bul/_dge bsngo/_las byang gi rjes rim bcas mthar chags su btang bas grub pa'o/__/mkhye~Mn bzang snang ba'i khyim gyi dpal/_/brtse~M chen 'oda~M brgya'i 'dzum phreng dpyid/_/kun tu gdul bya'i khams khyab pa'i/_/zera~M las zab gsang drod bcud 'bebs/_/thugs sgrub dpal chen 'dus pa'i sgos bka' khrag 'thung rigs bzhi las/_gsung rdo rje dbang chen rta mgrin khams gsum rol pa'i smin byed kyi le'u tshan bdun pa ste pad+ma dri med shin tu dga' ba'i rdo rjes sbyar ba'o/__!__yang dag grub pa gcig pu'i cho 'phrul las/_/srid zhi'i sgyu ma'i nyams 'gyur 'bum 'char yang*/_/bde chen mkha' 'gro'i dbang phyug he ru ka'i/_/rnam grol gsang mchog dgyes par rol la gus/_/thugs rdo rje'i rigs kyi he ru ka yang dag sangs rgyas mnyam sbyor gyi dbang gi las rim la/_gzhung mthun dkyil 'khor steng lding khri bkod par rnam bum sogs rigs dbang lnga/_b+han+d+ha dum bu gcig par thod sku/_phyag mtshan rdor dril/_khaT+wAM dang gsang ba'i rnge'u chung*/_thod pa'i nang du zhun gyi mar me sdong bu dgu can/_gsang rdzas/_rig tsaka_shel rdo/_me long*/_mchod pa/_sman raka gtor ma/_tshogs mchod/_las bum sogs snga ma ltar 'du byas la/_bdag mdun sgrub tshul sngar bzhin la/_bsnyen dmigs gtso bo dung khang du zla gdan la oM dkar po'i mthar ru lu gser gyi phreng ba lta bu/_mgrin par pad+ma 'dab brgyad steng du AHdmar po'i mthar ru lu dmar ser mgal me klad bskor lta bu/_snying gar nyi gdan la hU~M sngon mthar ru lu sngo nag lcags zhun lta bu/_lha mo brgyad kyi thugs kar rin po che zur brgyad la ru lu'i yi ge mdun nas brtsams te 'bru re/_dbus su so so'i ming yig thig les mtshan pa rnams la sems 'dzin dang 'od zer spro bsdu bya bar gsungs/_bum bzlas/_bdag 'jug_/dbang gi sngon 'gro khrus dang bgegs gtor btang*/_srung 'khor bcings la/_de la 'dir de bzhin gshegs pa kun gyi thugs gnyis su med pa'i ye shes kyi rdo rje dpal he ru ka'i dkyil 'khor gyi khyab bdag tu bzhengs pa ni yang dag thugs kyi sgrub pa zhes bya ste/_de la'ang gsang sngags rdo rje theg pa snga 'gyur gyi ring lugs la theg pa rim dgur grags pa las/_mthar thug bla med nang rgyud sde gsum zhes rgyud lung man ngag gi snying po bstan pa'i ya gyal rgyud ma hA yo ga la rgyud sde dang sgrub sde gnyis su yod pa las/_'dir rgyud ltar na tan+t+ra sde bco brgyad kyi nang tshan sgrub pa lag len du ston pa rol pa'i rgyud sde lnga las thugs kyi tan+t+ra he ru ka rol pa'i rgyud galpo che chung sogs la brten cing*/_sgrub sde ltar na yang dag thugs kyi sgrub lugs he ru ka'i spyi rgyud sogs las 'byung ba dang*/_gzhan yang 'jig rten las 'das pa'i mdo sogs a nu lung gi dgongs rgyud kyang 'dril bas rgyud lung gnyis ka'i bcud 'dus pa ste/_sngags gsar ma la yongs su grags pa'i ma rgyud rigs drug gi nang tshan dpal he ru ka'i rigs 'khor lo sdom pa dang dgyes mdzad rdo rje dus kyi 'khor lo sogs dang ngo bo gcig pa ste mkha' 'gro sgyu ma bde mchog dang*/_sangs rgyas mnyam sbyor la sogs pa mtshan gyi rnam grangs du mas bstan pa ste/_'di nyid slob dpon rdo rje hU~M mdzad dang*/_o rgyan gyi slob dpon pad+ma sogs la bka' bab ste zung 'jug phyag rgya chen po mchog gi dngos grub brnyes pa'i grub pa chen po sa yi rdul tsam byon cing*/_sgrub pa bka' brgyad sogs zhi khro rab 'byams kyi dkyil 'khor thams cad thugs rdo rje'i rigs su 'dus shing skyes bu'i lus la rnam shes bzhin sangs rgyas thams cad kyang gnyis med rdo rje sems dpa' gcig gi bdag nyid las gzhan du ma gyur pas/_bka' brgyad snying po yang dag thugs sgrub bsdus:_zhes sogs gsungs shing*/_khyad par sangs rgyas gnyis pa slob dpon chen pos 'phags bod gnyis su smin grol gyi bdud rtsis skal bzang bye snyed zhig rig 'dzin gyi sa la bskyal zhing*/_gu ru'i thugs dam lha mchog rnam gsum gyi ya gyal du gyur pa dang*/_bod yul phyi ma'i gdul bya la dgongs pa'i gter kha mi 'dra ba du ma sbas nas dus skabs dang 'tshams par byon pa las/_'di ni ji skad du/_dus re zhig bsnyen bsgrub dam po'i tshe/_/rang gnyug ma'i bsti gnas yin snyam pa'i/_/khang pa bkod mdzes zhig gi nang*/_/rje rig 'dzin hU~M chen kA ra de/_/zhal khyim zla ba lta bu la/_/sku sha yang rgyags pa ltar snang ba'i/_/gzi byin mtshungs pa med pa zhig_/sgyu ma lta bu'i snang char mjal/_/nyams rtogs kyi gleng mo mang zhus mthar/_/da nged kyi sgrub khang 'di nyid du/_/blos bslangs kyi dkyil 'khor zhig bzhengs zhus par/_/da blos bslangs gsar du bzhengs pa las/_/chung ngu zhig gso dgos pa zhig_/gnas gzhan du 'dug pa ngas blangs te/_/bu khyod la sprad kyi zhig gso gyis/_zhes gsungs te mi snang gzhan du thal/_/zhes gsungs pas mtshon rig 'dzin hU~M chen kA ra dang sku lnga lhun grub rig 'dzin pad+ma sam b+ha wa chen po dang don gyi spang rtogs la rnam dbyer med pa theg mchog rdzogs pa chen po'i rtogs pa don brgyud la dbang thob pas rang byung gdod ma'i gzhi dbyings su mnyam rjes ris med chen por btsan sa zin te gzhi snang ye shes kyi rol pas 'gro kun gdod ma'i dbyings su 'khrid pa'i rig rtsal thugs rje mkha' khyab tu shar zhing smin grol gyi gsang mdzod thang mar brdal nas snyigs dus theg mchog bstan pa'i shing rta gcig pur byon pa'i bka' drin gyis dgongs pa gzhi grol gyi grol tshad can da lta'i bar zam ma chad pas mchog gi dngos grub brnyes pa'i gseng lam gyi ston pa grub brgya'i ded dpon kun mkhyen bla ma 'jigs bral gling pa la klong gsal dgongs pa'i gsang mdzod las byon pa'i bla ma rtsa ba gsum gyi sgrub skor las yi dam/_de la'ang spyi dang bye brag gi sgrub tshul gnyis las bye brag_/sku gsung thugs phrin las rdo rje bzhi yi sgrub thabs las thugs rdo rje yang dag he ru ka sangs rgyas thams cad mnyam par sbyor ba'i gseng lam rmad du byung ba ste/_'di la'ang nang gses zla gam drug cu rtsa brgyad pa/_lnga bcu nga brgyad pa/_bco brgyad/_dgu ma/_gcig ma sogs bka' srol mang du mchis kyang rang gzhung las/_yid kyi ye shes la sbyor ba:_yang dag thugs kyi sgos sgrub ni:_khrag 'thung galpo'i tan+t+ra'o:_zhes dang*/_'di ni thugs kyi sgrub pa ste:_dag pa thams cad chos sku la:_sbyor bas mchog gi dngos grub myur:_khrag 'thung galpo'i bcud dum yin:_zhes dang*/_dbang gzhung las/_chos dbyings yang dag thugs rdo rje:_zla gam dgu pa'i sgos dbang ni:_zhes sogs kyis mtshon mdor na rgyud he ru ka galpo'i dgongs pa zla gam dgu ma yang dag sangs rgyas mnyam sbyor gyi rim pa dbang gi cho ga sogs/_slob ma lhar bskyed skabs/_sngar gyi dbang stegs la 'khod pa khyed rang rnams dpal chen badz+ra he ru ka mthing nag zhal gsum g.yas dkar 'dzum pa/_g.yon dmar gshe ba/_dbus mthing rngams pa la nyi zla 'bar ba'i spyan gsum mche ba gtsigs shing ljags 'dril ba/_nyi ma bye ba'i gzi byin 'bar ba'i gar dgus brjid pa/_rtsa phyag gnyis kyis rdo rje dang dung khrag bsnams nas thugs kar dkrug pa/_bar pas khaT+wAM dang rgyu zhags/_tha mas gsang ba'i rnge'u chung dang khyung gi phra thabs 'gyed pa/_zhabs bzhis lha chen khyo shug pad zla nyi ma la 'gying ba/_khrag zhag thal bas mtshan ma sogs dpal dang dur khrod chas kyis brgyan pa/_yum kro d+hi shwa ri g.yas yab la 'khyud cing g.yon dung khrag stob pa/_gcer bu lang tsho rgyas pa dang gnyis med du sbyor ba'i gnas gsum du phyag mtshan gsum sogs dang*/_'bebs sngags la ru lu sbyar/_dkyil 'khor mthong ba bstan pa'i skabs/_yongs su rdzogs pa'i nang du zla gam dbang gi pho brang sgo gcig pa'i lte bar gser 'khor rtsibs brgyad pa so so'i lte bar zla gam sgo gcig pa nang bstan gyis bskor ba'i dbus su pad+ma nyi ma dregs pa khyo shug bsnol ba'i steng du dpal chen badz+ra he ru ka sku mdog mthing nag 'bar ba chen po'i 'od zer can zhal gsum phyag drug zhabs bzhi/_g.yas dkar g.yon dmar dbus mthing gar gyi nyams dgus brjid pa/_phyag drug gis rdo rje thod khrag khaT+wAM rgyu zhags gsang ba'i rnge'u chung khyung phra bsnams pa/_zhabs bzhi g.yon brkyang pas lha chen pho mo nyi zla'i gdan la rol zhing*/_dpal dang dur khrod kyi chas rnams rdzogs pas yum kro d+hi shwa ri ma dang sbyor ba/_phyogs mtshams kyi zla gam brgyad kyi dbus su/_kau ri sngon mo zhing dbyug dang thod pa/_tsau ri ser mo mda' gzhu/_pra mo dmar mo rdo rje dang dung khrag_/bai ta li nag mo rdo rje dang ba dan/_puk+ka si dmar ser zhing gi rgyu ma 'dren pa/_g+hasma ri ser nag rdo rjes thod khrag dkrug pa/_sme sha ni mthing nag bam gyi snying phyung nas za ba/_tsaN+Da li ser skya rtse gsum dang bam chen bsnams pa/_thams cad kyang zhal gcig phyag gnyis spyan gsum dbu skra dmar ser 'bar ba/_dur khrod rol pa'i chas can g.yon brkyang ba'i stabs kyis me dpung 'bar ba'i dbus na zhing gi gdan la rol pa/_phyi ltar na gzugs brnyan gyi dkyil 'khor gyi mtshon byed byas nas gzhal yas khang ye shes kyi lha dang bcas pa/_brten pa yang nang ltar na rang lus khog pa dur khrod kyi gzhal yas khang*/_gsang ba tsit+ta rin chen zur brgyad pa/_de kho na nyid tshogs brgyad ye shes su dag pa'i dbyings ye gnyis med don dam pa'i bden pa mthong ba'i rtags thabs shes he ru ka yab yum du shes pas ting nge 'dzin gyi dkyil 'khor bsgoms pas 'bras bu ye shes shin tu rnam par dag pa'i dkyil 'khor la sbyor bar byed nus pa'i tshul/_ho:_phung po khams dang sogs/_dbang chog dkyus la 'jug pas rigs dbang lnga bskur la/_mtha' rten rnam rgyal bum dbang la/_hU~M:_sangs rgyas rnams ni thams cad kyi:_chos dbyings yum gyi bum pa nas:_'di nyid la ni dbang bskur bas:_bag chags ma lus dag gyur cig:_oM badz+ra a b+hi Shiny+tsa hU~M:_de ltar dbang bskur ba'i chu rgyun sogs/_bum dbang mthar/_rjes 'brel nang nus pa 'jug pa gsang ba mi zad rgyan gyi 'khor lo'i dbang la/_b+han+d+ha dpal chen po'i skur gsal ba spyi bor bzhag pas ye shes kyi sku gnyis pa 'phros te khyed rang gi lus la thim pas ye shes sgyu ma'i sku snang la rang bzhin med pa mngon du gyur pa'i mos pa mdzod/_thod sku spyi bor bzhag la/_hU~M:_sangs rgyas kun gyi sku yi dbang:_phyag mtshan rdo rje ka pA la:_sku yi dngos grub thob byed pa:_khrag 'thung yab yum dbang bskur ro:_oM ka pA la sid+d+hi he ru ka ka pA la ad+hiSh+Tha hU~M:_gsung gsang ba sngags kyi dbang bskur ba la/_grags stong skye 'gag gnas bral gzhom med nA da'i de nyid mtshon pa'i shes rab dbyings phyug gi phyag rgya dril bu 'khrol zhing gtad pas brjod med kyi don shes par gyis shig_/dril bu dkrol zhing gtad la/_hU~M:_sangs rgyas kun gyi gsung gi dbang:_shes rab dbyangs kyi rjes 'gro ba:_mkha' 'gro sgyu ma'i snying po 'dis:_grags stong gsung gi dngos grub thob:_wAk+ka a b+hi Shiny+tsA.AH_oM ru lu ru lu hU~M b+h+yo hU~M:_thugs ye shes kyi dgongs pa don dam byang chub kyi sems ngo sprad pa la/_skye med dbyings kyi klong du 'gag med rig pa'i rang bzhin stong gsal sgrib g.yogs dang bral ba'i ngo bor sangs rgyas thams cad gnyis su med pa'i thig ler mnyam par sbyor ba'i gnas lugs rdo rje mi phyed pa'i chos bdun gyi phyag rgyas ngo sprad par mos shig_/rdo rje snying gar bzhag la/_hU~M:_sangs rgyas kun gyi thugs kyi dbang:_gnyis med ye shes skyed pa po:_rdo rje lta bu'i ting 'dzin ni:_chos kyi rgyal por dbang bskur ro:_tsit+ta sid+d+hi badz+ra a b+hi Shiny+tsa hU~M:_gnyis pa bde ba chen po ni zag med sku dang ye shes kyi chos khams rgya mtsho dang 'bral mi shes pa mtshon pa'i phyir rdor dril lag gnyis su gtad de bsnol zhing bzung bas dpal chen po'i yon tan dang phrin las la dbang bsgyur bar mos shig_/rdor dril gtad nas 'khyud rgya byar gzhug_hU~M:_thabs dang shes rab gnyis med pa'i:_dam tshig rdo rje dril bu 'di:_yon tan phrin las bsgrub pa'i phyir:_phrin las rdzogs byed dbang bskur ro:_oM badz+ra gaN+De a b+hi Shiny+tsa maM:_bde stong rdo rje mnyam pa'i brtul zhugs kyis dur khrod la gnas pa'i ma sring mkha' 'gro dgyes dgur rol zhing dbang du bsdus/_gdug pa can tshar gcod pa'i brda rtags su dpal gyi phyag mtshan gnyis gtad par mos shig_khaT+wAM dang gsang ba'i rnge'u chung gtad la/_hU~M:_he ru ka dpal khaT+wAM ga:_mkha' 'gro 'bod pa'i rnge'u chung:_dpa' bo chen pos blang bar bgyi:_khyod kyis kyang ni rtag tu zungs:_snang stong gnyis med sems kyi gshis lugs rig pa yul med rang gsal rang rtsal rang grol gyi ye shes 'bar ba klong dgu'i tshogs brgyad 'khrul snang gi mun pa bsal nas 'od gsal lta sgom spyod pa'i 'bras bu blo bral du dbugs dbyung bar mos shig_/b+han+d+ha'i zhun gyi mar me sbar te gtad la/_hU~M:_skye med dbyings las ye shes che:_sems can ma rig mun pa sel:_sems nyid 'od gsal chos kyi dbyings:_gsal byed mar mes dbang bskur ro:_oM badz+ra A lo ke dz+nyA na a b+hi Shiny+tsa maM:_de ltar dbang drug gis byin rlabs las dbang po drug dang skye mched byed pa'i rnam par shes pa tshogs drug 'gags nas ye shes drug mngon du gsal ba yin no:_zhes rtogs pa bskyed/_de ltar gzhi lam 'bras bu'i dkyil 'khor bsam yas kyi rol pa gang ltar bkod kyang don dam la 'jigs med kun tu bzang po che mchog he ru ka gcig gi ye shes las gzhan du ma gyur pas mthar phyin 'bras bu'i tshul ni/_galpo las:_gzhal yas khang chen ye shes te:_'khor 'das mnyam pa gru bzhi la:_sgo bzhi dran pa nyer bzhag bzhi:_rnam thar brgyad ldan rta babs so:_rin chen sgo ste thugs rje'i ngang :_yang dag spong bzhi twa ra Na:_dran pa nyer bzhag sgo khyud dang:_rdzu 'phrul rkang bzhi sgo yi khyams:_phreng ba byang chub yan lag bdun:_'phags lam brgyad kyi ka ba mdzes:_lam gyi ye shes rnga yab dang:_nyon mongs tshogs 'joms mu tig phreng:_dril bu ba dan rlung bskyod pa:_shes rab chos kyi sgra sgrogs dang:_che ba'i yon tan 'dus pa'i rtags:_bdud bzhi 'joms pa'i rgyal mtshan dang:_thod phreng sku gsum thob pa'i rtags:_gzhal yas khang mchog dam pa'o:_bcu ldan ye shes dpal yang dag:_gnyis ldan zag med yum gyi sku:_rnam shes gnas dag mkha' 'gro brgyad:_snod bcud lha dang gzhal yas khang:_phung po lnga la sogs pa'i chos:_de ni spang bar bya ba min:_theg pa gsum ni spang ba min:_ka ti li bzhin yongs su bzung:_zhes gsungs pa ltar shes par bya ba ni gnad kyi bcud phur dam pa'o/__/de ltar rdul tshon sprul pa'i dkyil 'khor sogs bum dbang gi dag brjod nas bzung dbang gong ma gsum nas dam tshig bsgrags bzung yon 'bul dge bsngo rnams dang*/_las byang gi rjes rim bcas mthar dbyung ba'o/__/mkhye~Mn gnyis ye shes snying po'i srog_/brtse~M ba'i mdzes sprin brdal ba las/_/bde chen 'oda~M zera~M 'bum 'phro ba'i/_/dpal 'di bdag gi skal par thob/_/thugs sgrub dpal chen 'dus pa'i sgos bka' khrag 'thung rigs bzhi las/_thugs rdo rje yang dag he ru ka sangs rgyas mnyam sbyor zla gam dgu pa'i dbang bskur ba'i le'u tshan brgyad pa ste rdo rje thugs mchog rtsal gyis sbyar ba'o/__!__rdo rje khros pa'i dbyings rig mtshon chen pos/_/gzung 'dzin lha min phye mar 'thag pa'i dbal/_/snying rje rngams la sangs rgyas thams cad kyi/_/phrin las dbang bskur rdzogs pa'i dkyil 'khor rgyal/_/phrin las rigs kyi khrag 'thung gi rje btsan rdo rje phur pa bdud dpung zil gnon gyi dbang gi cho gas smin par byed na gang du bya ba'i gnas su gzhung mthun bcos ma'i dkyil 'khor gnyis gang rung dang*/_thun mong rigs dbang lnga/_rjes gnang chas/_thod pa'i bdud rtsi/_rig tsaka_shel rdo/_me long*/_gtso bo'i sku/_dar dmar la bris pa'i sngags byang*/_phur pa/_ye shes sems dpa' rdor sems tsakli/_dur khrod dpal chas/_rdor dril/_sgrol dbang gi chas lcags hom du ling+ga/_sgrol phur/_ral gri/_thun rdzas bcas 'du bya/_dngos gzhi bdag mdun gyi sgrub tshul snga ma ltar las/_bzlas pa la/_hU~M:_thugs ka dpal gyi be'u'i dkyil 'khor nas:_sgo gcig rin chen gzhal yas khang:_bde stong dbyer med ngang nyid las:_chos kyi sku las longs skur shar:_pad+ma zla ba'i gdan la bzhugs:_skyon gyi ma gos gti mug sel:_yab yum gnyis med zag med sku:_sku mdog dkar gsal rnam dag dbyings:_rdo rje dril bu phyag na bsnams:_shes rab byang chub sems dang ldan:_rtog med mi 'gyur skyil krung bzhugs:_mkha' dbyings bde chen sku la bstod:_bde ba chen po'i 'od zer gyis:_rgyal ba mchod cing thugs dam bskul:_dngos grub grub pas bdag byin brlabs:_yang 'phros brtan g.yo tha mal pa'i:_snang zhen dag pas snod dang bcud:_lha dang gzhal yas rol par shar:_zhes sems dpa' sum brtsegs la sems 'dzin dang spro bsdu'i dmigs pa'ang bya/_do li'i khyad par sngags phreng dbus rwa nas thon dam tshig sems dpa'i shangs bug g.yas pa brgyud/_mdun bskyed kyi shangs bug g.yon pa nas thugs kar thim/_slar byung ba shangs g.yas nas rang gi sna bug g.yon nas zhugs/_snying dbus su thim par bsam gsungs/_bum sgrub/_bdag 'jug sogs tshang bar grub rjes/_slob ma rnams la khrus bya/_gral du 'khod nas bgegs gtor btang*/_srung 'khor bsgom la/_chos bshad ni/_spyir bdag cag gi ston pa thabs la mkhas shing thugs rje chen po dang ldan pa nyid kyis gdul bya sems can gyi khams dang bsam pa'i rjes su 'gro ba'i chos sgo dpag tu med pa zhig dbye gnang bar mdzad pa thams cad spang gnyen gyi sgo nas bsdu na nyon mongs dug gsum cha mnyam dang bcas pa'i gnyen por sde snod gsum mam bzhi/_de la'ang gzhung dang man ngag tsam gyis bsdu na gzhung mtshan nyid phar phyin theg pa/_man ngag gsang chen rdo rje theg pa gnyis su 'du ba las skabs su bab pa snga ma las khyad par bzhis 'phags pa rdo rje theg pa/_de la'ang shes byed rgyud sde'i rnam grangs bsam pa'i spyod yul las 'das kyang lta spyod tsam gyis bsdu na/_spyod pa gtso bor ston pa bya rgyud/_lta ba gtso bor ston pa rnal 'byor rgyud gnyis su 'du ba las 'dir phyi ma/_de la'ang rnal 'byor gyi rgyud tsam dang bla med gnyis las/_'di ni rnal 'byor bla na med pa'i rgyud yin la/_nang gses su bskyed rdzogs rdzogs chen gsum du ston pa'i gzhung rgyud lung man ngag gi shing rta chen po gsum las rgyud ma hA yo ga_/de la'ang rgyud sde dang sgrub sde gnyis las 'dir sgrub sde/_de la'ang ye shes lha'i sgrub pa lnga/_'jig rten pa'i gsum ste brgyad las/_'dir ni gdug pa can 'dul ba'i thabs gtso bor ston cing ye shes lha rigs lnga las phrin las kyi rigs rdo rje phur pa'i sgrub sde ste/_bsgrub par bya ba'i lha ni spyir rigs lnga khrag 'thung 'dus pa'i spyi dpal yin kyang*/_khyad par du karma he ru ka ni/_zhi ba'i dus na rigs 'dus rdo rje sems dpa'/_phyi kri yog gi dus su rdo rje rnam par 'joms pa/_byang chub sems dpa'i tshul du gsang ba'i bdag po/_khro bo'i skur bstan pa rdo rje gtsug tor/_yang dag he ru ka bdud rtsi 'khyil ba la sogs pa du ma'i tshul ston cing*/_sgrub byed rgyud sdes dbye na lha de dag rgyud sde chen po bzhi ka la 'jug pa dang*/_bye brag phur pa kho na'i rgyud la'ang dpag bsam shing la dpe byas nas rtsa ba lta bu sku'i rgyud sde bzhi/_sdong po lta bu brgyad/_yal ga lta bu'i rgyud bcu/_lo ma lta bu gsum/_mdzes byed me tog lta bu bzhi/_smin pa 'bras bu lta bu bzhi/_ma tshang ba kha skong ba'i rgyud gsum ste rgyud sde sum cu rtsa drug dang*/_man ngag gi don rgyas par ston pa rtsa rgyud rdo rje khros pa dang rgyud bcu bdun sogs grub pa dang mkha' 'gros dbye bsdu mtha' yas pa thams cad mkha' 'gro las kyi dbang mos rig 'dzin pra b+ha hasti la gtad/_phyis sangs rgyas kun gyi phrin las kyi spyi gzugs slob dpon chen po pad+mas bal yul yang le shod kyi brag phug tu yang dag he ru ka phyag rgya chen po'i mchog gi dngos grub bsgrub pa'i tshe mi srun nag po'i phyogs kyis bar chad brtsams pa na slob dpon chen po pra b+ha hastis bi to ta ma 'bum sde las phur pa'i rgyud mi khur gnyis skyes su phul ba'i glegs bam phebs pa tsam gyis bar chad zhi nas dngos grub 'bad med du brnyes pa'i lha mchog 'di nyid la bka' ma rgyal po lugs dang*/_jo mo lugs/_lcam lugs/_'khon lugs/_so zur gnubs gsum/_ram 'gos khyung gsum/_dam pa rgya gar dang*/_paN chen shAkya shrI'i phur pa dpa' bo gcig pa sogs dang*/_gter ma spu gri rnam gsum gtso bor gyur pa'i bka' srol rgyas bsdus mtha' klas pa gsar rnying mkhas grub kun gyi thugs dam gsang ba'i lha mchog tu gyur pas da lta'i bar mtshan rtags mngon gyur gyi ngo mtshar can du ma bzhugs pa las/_da lam skabs su babs pa 'di ni rwa ston stobs ldan rdo rjes 'on phu stag tshang nas spyan drangs pa'i phur pa'i lung bstan las/_bi ma'i sprul pa pad+ma'i ming 'dzin la:_ye shes rtsal brdol dag snang gnas sgo 'byed:_ces gsungs pa ltar kun mkhyen rig 'dzin chen po dpal pad+ma dbang chen ye shes rol pa rtsal la slob dpon chen po dang bi ma bai ro gsum gtso 'khor du bzhugs pas zhal gzigs te rig rtsal gyi dbang bskur ba'i rjes thog tu/_de sad pa'i shes pa skad cig mar/_/gsung mchog bde ba chen po ni/_/yum ye shes DA ki mtsho rgyal ma/_/bu mo mdzes pa'i cha byad can/_/des mtshan ldan gyi b+han+d+ha srub med cig_/bdag nyid kyi lag tu sprad pa dang*/_/'di chos rgyal khri srong lde'u btsan gyi/_/dbu thod ngo ma yin no gsungs/_/yang cung zhig dgongs nas thod pa de/_/re zhig phar la blangs pa'i mod/_/mig 'phrul lta bu'i snang cha la/_/snga ma dang dbye bar mi bzod pa'i/_/thod pa zhig de yi zla la sbyar/_/gnyis ka lhan cig stsol ba dang*/_/da 'di gnyis dbye ba i phyed gsungs/_/de dpyad du ma bzod nem nur ngang*/_/gsal snang de nam mkha'i 'ja' ltar yal/_/rje yab yum de snying la dran drags nas/_/skyo shas kyi gdung ba bzod thabs bral/_/rig pa 'dun pa'i tan+t+ra las/_brda dang brda mtshon go ba ni/_/dbang gi nang nas dbang bka'o/_/zhes pa'i don la nges shes rnyed/_/ces dang*/_de tshe rlangs chen dpal seng gi_/yang srid pad+ma tshe dbang rtsal/_/mjal te rang gter stag tshang gi_/rdo rje phur pa'i dbang bskur rmis/_/ces mon spa gro stag tshang gi gu ru yab yum gyi sgrub phug tu rlangs chen dpal gyi seng ge dngos las rdo rje phur pa rgyal po lugs kyi dbang bskur gsan nas phur pa'i rgyud las bka' bsdu gnang zhing dngos grub brnyes pas gangs can bstan 'gro'i gshed ma dbyings su bsgral ba sogs phrin las thogs med kyi stobs rtsal mngon du mdzad pa kun mkhyen 'jigs med gling pa la bka' bab nye brgyud du gyur pa klong chen snying gi thig le'i chos sde drag po dpal chen 'dus pa'i phrin las kyi rigs kyi sgos bka' rdo rje phur pa bdud dpung zil gnon gyi dbang bskur ba ste/_spyir slob dpon sangs rgyas gnyis pas 'di nyid thugs dam gyi lhar mdzad pa'i rten 'byung gis bod yul gsar rnying mkhas grub phal cher lhag pa'i lha 'di grub pa'i mtshan ma mngon du gyur pa dang*/_rnal 'byor pas byang chub sgrub pa'i bar chad sel ba la ches zab pas lha gzhan bsgrubs kyang rdo rje gzhon nu srung ma'i tshul du bsten dgos par gsungs shing*/_phur pa mkhan po dpal gyi yon tan brgyad dang ldan par grags pa sogs phrin las kyi rno myur byin rlabs dang ldan pa thun mong ma yin par nges pas dbang bskur thob pa tsam la'ang dgos pa du ma dang ldan pa lags te/_de la'ang thog mar phyi nang gi 'jug pa'i chos rnams zhu ba'i don du sogs nas byin 'bebs kyi slob ma lhar bskyed pa dpal chen dbang skabs bzhin la/_sngar gyi dbang stegs la 'khod pa dpal chen rdo rje gzhon nu'i skur gyur pa ni/_sku mdog mthing nag g.yas dkar g.yon dmar ba'i dbu gsum phyag drug zhabs bzhi pa/_phyag dang po gnyis kyis rdo rje rtse dgu dang me dpung*/_bar pa gnyis kyis rtse lnga dang khaT+wAM ga_/tha ma gnyis kyis ri rab kyi phur bu 'dril ba/_zhabs bzhi g.yas bskum g.yon brkyang ba'i stabs can/_yum 'khor lo rgyas 'debs ma dril bu dang thod khrag 'dzin pa dang mnyam par sbyor ba/_dur khrod rol pa'i chas brgyad dang dpal gyi chas bcu yongs su rdzogs pa'i bdag nyid can pad zla nyi ma lha chen pho mo bsnol ba'i gdan la bzhugs pa'i gnas gsum du phyag mtshan gsum sogs dang 'bebs sngags la kI la ya sbyar/_dkyil 'khor mthong ba bstan pa'i skabs/_yongs su rdzogs pa'i lte bar gnam lcags kyi 'khor lo rtsibs bcu pa mu khyud dang bcas pa'i lte ba'i dbus su gru gsum mthing nag 'bar ba rdo rje'i brag chen pad+ma nyi zla ru tra pho mo byi chings su bsnol ba'i steng du sangs rgyas kun gyi phrin las kyi spyi dpal 'jigs mdzad karma kI la ya dpal chen rdo rje gzhon nu sku mdog mthing nag zhal gsum phyag drug pa/_g.yas dkar g.yon dmar dbus mthing nag_/phyag drug gis rdo rje rtse dgu rtse lnga/_me dpung khaT+wAM/_tha ma gnyis phur bu 'dril ba/_dpal dang dur khrod rol pa'i chas can/_yum 'khor lo rgyas 'debs dril bu dang dung dmar 'dzin pa/_ye shes kyi me dpung 'bar ba'i klong na 'gying ba'i g.yon phyogs su sgrol yum e ka tsa ti gri gug dang thod khrag bsnams pa/_phyi rol gyi rtsibs bcu la steng du hU~M kA ra/_shar du rnam rgyal/_shar lhor dbyug sngon/_lho ru gshin rje/_lho nub tu mi g.yo ba/_nub tu rta mgrin/_nub byang du 'dod rgyal/_byang du bdud rtsi 'khyil ba/_byang shar du khams gsum rnam rgyal/_'og tu stobs po che ste khro bo bcu yab yum phra phyag dang bcas pa/_sgo bzhir sgo ma bzhi/_mu ran la phur srung dam can bcu gnyis dang bcas dkyil 'khor gsum gyi lha tshogs rnam 'gyur ma 'dres cir yang ston pa thams cad ngo bo dpal chen po gcig gi bde stong ye shes sgyu 'phrul drwa ba'i thig ler gnyis su med par lhun gyis grub pa'i don/_brda rtags bcos ma'i dkyil 'khor 'dis mtshon te ngo 'phrod pa nyid rang byung rdo rje'i lus la gdod nas bzhugs pa'i tshul/_ho:_phung po khams dang skye mched sogs/_dbang chog dkyus la 'jug pas rigs dbang lnga bskur la/_mtha' rten rnam rgyal bum pa'i dbang la/_hU~M:_dpal chen rdo rje gzhon nu dang:_yum chen 'khor lo rgyas 'debs gnyis:_g.yon nas yum gyis yab la 'khyud:_phyag gis bum pa rab tu blang:_ye shes dbang gi chu bo 'di:_nyon mongs ma gos dkar la 'tsher:_skal ldan rigs kyi bu khyod la:_spyi bor bum pas dbang bskur bas:_nyon mongs gsum dang dug gsum sbyangs:_dbang gi chu bo rgyun bzhin bab:_oM badz+ra kI li kI la ya dip+ta tsakra ru lu ru lu hU~M b+h+yo hU~M ka la sha a b+hi Shiny+tsa hU~M:_de ltar dbang bskur ba'i chu rgyun sogs/_de nas nang nus pa 'jug pa'i dbang sku gsung thugs yon tan phrin las mi zad rgyan gyi 'khor lor byin gyis brlabs te dbang bskur ba'i phyir/_dkyil 'khor gyi lha yi thugs rje'i dbyings las ye shes phyag rgya'i rol pa gnyis pa spros te khyed rang rnams la thim pas lus ye shes sgyu ma'i sku mngon du byas pas lha dbang lus la thob par mos shig_/gtso bo'i sku spyi bor bzhag la/_hU~M:_kun tu bzang po'i rol pa las:_thugs rjes khams gsum gdug pa 'dul:_gnyan pos las su rung mdzad pa'i:_'jigs byed gnyan pos dbang bskur ro:_oM badz+ra kI li kI la ya hU~M phaT:_kA ya a b+hi Shiny+tsa hU~M:_gsung rig pa rdo rje'i sngags byang dar dmar la bris pa mgrin par bzhag pas nus pa sngags kyi dbang ngag la thob par mos shig_/dar dmar la bris pa'i sngags byang mgrin par gtad la/_hU~M:_gsung gi rang bzhin mtshon byed pa:_le brgan 'bar ba'i kha dog la:_snying po nus pa'i don dang ldan:_nus pa can gyi dbang thob shog:_oM badz+ra kI li kI la ya hU~M phaT:_wAk+ka a b+hi Shiny+tsahU~M:_thugs dbyings rig dbyer med kyi phur bus srid zhi'i srog nas thal mar 'byin pas 'khor ba dbyings su sgrol/_ye shes rgyun du 'char ba'i thugs kyi dbang sems la thob par mos shig_/phur pa snying gar bzhag la/_hU~M:_tsit+ta dmar po'i gzhal yas na:_khams gsum dbang gi bdag po ste:_brkyang bskum rab tu gdengs pa yis:_gdug pa 'joms pa'i dbang thob shog:_oM badz+ra kI li kI la ya hU~M phaT:_tsit+ta a b+hi Shiny+tsa hU~M:_sku 'bar khro rngams pa'i tshul du bzhugs kyang thugs zhi ba chen po gnyis med ye shes kyi srog dang ldan pa mtshon phyir ye shes sems dpa' rdor sems kyi dbang bskur bas zag med 'bras bu'i yon tan thams cad sku gsung thugs la rdzogs pas rtsol med phrin las kyi snang bas don gnyis 'bad med du stsol bar mos shig_/rdor sems kyi sku snying gar bzhag la/_hU~M:_thugs ka rin chen zur brgyad la:_phrin las sna tshogs lhun gyis grub:_thams cad kun la rang bzhin gnas:_ye shes sems dpa'i dbang thob shog:_oM badz+ra kI li kI la ya hU~M phaT:_gu Na sha ya a b+hi Shiny+tsahU~M:_de dag gis dregs pa can bdud dang ru tra bsgral ba'i khrag 'thung rgya mtsho'i rje btsan du che zhing*/_ma mo mkha' 'gro'i tshogs rje ru brjid pa'i rtags su gos rgyan byug pa'i rtsi sogs dpal gyi chas dang dur khrod kyi rdzas kyis mnga' gsol bar mos shig_/dur khrod rgyan rnams gtad de/_hU~M:_glang chen stag sham zhing lpags sbrul:_thod pa tshar gsum byugs rdzas gsum:_rdo rje'i khyung gshog la sogs pa:_dur khrod dpal chas dbang thob shog:_de ltar dbang bskur ba'i nus pas tha mal gyi bsam brjod btul nas cir snang ye shes kyi rol par 'char ba'i gseng lam la zhugs te sangs rgyas thams cad dang gnyis su med pa rdo rje sems dpa'i brtul zhugs dam tshig gsum byin par mos la rdo rje gsor zhing dril bu 'khrol te thugs kar bsnol mar zungs shig_/rdor dril gtad de/_hU~M:_thabs kyi spyod pas gzhan don du:_byams dang snying rjes gang 'dul ba:_sangs rgyas phrin las rdzogs mdzad pa'i:_dbang dang byin rlabs 'dir stsol cig:_oM bo d+hi tsit+ta sa ma ya s+t+waM a b+hi Shiny+tsa maM:_zhes rtogs pa bskyed/_des rdul tshon sprul pa'i dkyil 'khor sogs nas/_mchog dbang gong ma gsum bskur/_mtha' rten rdo rje slob dpon gyi dbang mi dgos/_de dag gis stod las byang chub sgrub pa'i dbang gis rgyud smin par byas nas/_da smad las dgra bgegs sgrol ba'i rjes su gnang ba sbyin pa la/_mngon spyod rtsom pa po rig pa ye shes kyi phur bu'i dgongs pa mngon du gyur pa'i lta ba chos nyid kyi rdzong la zhugs shing*/_bskyed rim srid pa phur bu dang rdzogs rim byang chub sems kyi phur bus sgom pa ting nge 'dzin gyi 'phrang la 'grims te/_spyod pa snying rje'i srog dang ldan pas mtshan ma rdzas kyi phur bus dgra bgegs bsgral ba mngon spyod kyi las rtsom par bya ste/_ji skad du/_phur pa grub nas gdab las bya/_/zhes gsungs pas phrin las rtsom pa'i yul nyams pa bdun ldan gyi dgra bgegs la/_ji ltar rtsom pa'i phrin las dmigs pa'i rim pa gsal 'debs gnang bar zhu/_phyi snod kyi 'jig rten thams cad e khrom 'bar ba'i rang bzhin/_nang bcud rnams rdo rje phur pa rig 'dzin dang bcas pa'i lha tshogs thams cad 'bar ba'i skur bzhengs te rngams pa'i hU~M sgra sgrogs shing las la chas par gyur/_e yaM dz+wa la raM/_mdun du brub khung yangs shing gting zab pa'i nang du dgra bgegs dam sri pho mo rnams rid cing nyam thag pa'i lus can du gyur/_g.yab dril 'gugs rgya bcas/_na mo/_dkon mchog gsum la phyag 'tshal lo/_dkon mchog gsum gyi bka' bden pa dang*/_chos nyid rnam par dag pa'i bden pa dang*/_chos cad rgyu 'bras bslu ba med pa'i bden pa dang*/_phrin las phur pa rol pa'i lha tshogs rnams kyi bden dang*/_sprul pa yang sprul phyag brnyan dang bcas pa rnams kyi bden pa dang*/_bden pa chen po'i mthu la brten nas ma rung pa'i sems can bsgral ba'i zhing du gyur pa thams cad mtshan ma rdzas kyi rten 'di la mchis par gyur cig_/oM badz+ra kI li kI la ya shrI g+h+raM A na ya dzaHhU~M ba~M hoH_lan gsum/_de nas gdab pa'i sngags drug spu gri'i dgongs pas bsgral ba la rig pa mchog gi rgyud las/_lha dbral gzugs la dbab pa dang*/_/byad du gzhug dang smyo ru gzhug_/rdul du brlag dang zhal du bstab/_/de la'ang pho nya 'phyong sngags rdzas/_/ting 'dzin dmod pas las rdzogs bya/_/zhes pa ltar gdab kha rgyas pa la las drug so sor bya dgos kyang 'dir grub pa'i man ngag gi dgongs pas drag po'i phrin las dus gcig la rdzogs pa sngags drug sur phug _thol byung du bstan pa'i don/_mchan/_tu bstan pa la dang po thugs dam bskul ba ni/_hU~M/_dam tshig chen po'i dus la bab/_/sprul pa chen po'i dus la bab/_/phyag brnyan chen po'i dus la bab/_/shwa na mu kha'i dus la bab/_/sa bdag chen mo'i dus la bab/_/bdag nyid chen mo'i dus la bab/_/khyed kyi dam tshig dus la bab/_/mthu rtsal dbyung ba'i dus la bab/_/gdab phur sogs mdun du bkod la/_bdag nyid dpal chen po/_phur pa sras mchog_/ling+ga dgra bgegs kyi snying gar tshe srog gi rten a nr-i tri dang bcas pa dngos su gsal ba/_phur bu'i dbal rtse las a yig dkar po'i 'od kyis sgrib gnyis sbyangs/_srog rten la reg pa tsam gyis sgo lnga'i rnam shes dbal rtser bsdus/_nyon yid kyi rtsad bcad/_lnga 'dus dwangs ma tshe bsod thams cad 'od dkar po'i rnam par bsdus nas rang la thim/_kun gzhi'i rnam shes a yig dkar por gyur pa phur rtses ling gis btegs te dpal chen po'i thugs kar thim/_phur bu'i dbal las 'phros pa'i mtshon cha'i char pas bag chags kyi gzugs brnyan dum bur gtubs par gyur/_mtshon cha rnams kyis bsgral te/_oM badz+ra kI li kI la ya dzaHhU~M ba~M hoH_che ge mo/_ha sa yar hrI ta na/_a be sha ya a be sha ya/_yungs kar gyis brab/_shi kri a na ya shi kri a na ya/_byad thag gis bcing*/_dz+wa la pa ya dz+wa la pa ya/_dug khrag gis gtigs/_ta tha ya ta tha ya/_tho bas brdung*/_b+han+d+ha ya b+han+d+ha ya sarba big+h+nAn baM hU~M phaT/_sgrol phur gdab la/_hU~M/_snying rjes bsgral ba'i dam tshig ni/_/bsad cing mnan pa ma yin te/_/phung po rdo rjes gtams byas nas/_/rnam par shes pa rdo rjer bsgom/_/oM laM hU~M laM s+t+waM b+ha ya nan/_mo ha g+ha ya b+ha ga wan/_shi gri di kri shrI badz+ra hU~M ka ra hU~M phaT/_zhes tshe khrus gnas gsum gyi dgongs pa dang ldan pas lag len ltar brdeg_/thun gyis brab cing sgrol gris gtubs la/_ling ro rak+tas bran pa gtor mar bstab ste/_hU~M:_dngos grub bar chad byed pa'i bgegs:_sogs las byang ltar rak+ta tshar gsum phul bas zhal du bstab/_de rnams kyis mngon spyod drag po'i rjes gnang grub pa lags pas/_deng nas brtsams te snang srid thal 'byin gyi dgongs pas phur bu rnam bzhi yul so sor 'debs pa'i las la brtson par mdzod cig_/shis brjod bcas dam tshig khas blang nas dbang dang cho ga'i las rim mtha' rgyas su bya'o/__/mkhye~Mn gnyis mkha' dbyings brtse~M chen gyi/_/'oda~M zera~M 'bum phrag gis 'khyud pa'i/_/mthu las zab gsang nor bu'i dbyig_/thang mar brdal 'di e ma rmad/_/thugs sgrub dpal chen 'dus pa'i sgos bka' khrag 'thung rigs bzhi las/_phrin las rdo rje phur pa bdud dpung zil gnon gyi dbang bskur rtsa dum rgyud kyi dgongs pa'i le'u tshan dgu pa ste bdud 'dul phrin las drag po rtsal gyis sbyar ba'o/__!__na mo ma hA gu ru b+h+ya/_khrag 'thung rigs bzhi'i sgos dbang gi gter gzhung las/_de ni so so'i sgos dbang gis:_smin par byed pa'i lugs yin te:_don tshang 'jug pa bde ba'i phyir:_rgyal thabs spyi blugs ltar bskur na:_sa chog sta gon nas bzung ste:_dkyil 'khor chen por 'jug pa dang:_rigs pa'i dbang lngas smin pa'i bar:_gdan gsum tshang ba'i dkyil 'khor ni:_zhi khro'am dpal chen 'dus pa la:_brten rjes so so'i dbang sgrub dang:_'brel bar bum dbang rjes 'brang dang:_khol bur bton nas bskur ba'i mthar:_spyod pa dang ni rig pa dang:_mnyam pa'i brtul zhugs can gsum la:_mchog dbang gong ma gsum po'i don:_blo dang 'tshams par bkral nas ster:_zhes gsungs pa ltar gong gi so so'i sgos dbang dang dpal chen dbang gzhung gung bsdebs kyis bskur tshul nyid kho bos 'khor lo'i mgon po mchog gnyis las bka' drin ji ltar thob tshul ltar bkod pa yin la/_sgos bka' re re bzhin sta gon sbyar yang rung bar dbang gzhung du gsal yang rtsa bar sta gon sbyar bas yan lag rigs bzhi de'i rjes 'brel du bskur na so sor sta gon ma byas kyang chad skyon du mi 'gyur zhing*/_phyag len bsdus pa'i phyogs la mos na thog mar dpal chen la sta gon sngon du 'gro bas dbang gi spyi don dang bdag 'jug dbang don rgya mtsho gnyis dgongs 'dril gyis bskur zhing*/_de'i tshe dkyil 'khor phyi nang gi 'jug pa bum dbang gi bye brag thun mong rigs dbang lnga/_nang nus pa 'jug byed sku phyag rgya'i dbang*/_zab dbang gsum/_mtha' rten rdo rje slob dpon gyi dbang dang rjes gnang bcas legs par bskur/_gshin rje sogs rigs bzhi gzhan rnams rtsa dbang rgyal thabs spyi blugs dngos bstan gyis khog phub nas so so'i bum dbang dang sku phyag mtshan sogs sgos chos rnams rang rang gi gzhung ltar dang*/_rta mgrin la bum dbang rjes su sgrol dbang*/_phur pa la dbang bzhi'i rjes 'brel du sgrol dbang sbyar/_thams cad la gsang dbang*/_sher dbang*/_tshig dbang rnams rtsa dbang rgyal thabs spyi blugs ltar dang*/_rigs bzhi kar bka' lung yongs rdzogs gtad rgya'i dbang mi dgos kyang byas na'ang rung bar gter gzhung rdo rje'i tshig gis dngos bstan ltar dbye bsdu chog par mngon zhing*/_skabs 'ga' zhig tu gshin rje lta bu gcig las rigs gzhan gyi dbang mi bskur ba dang*/_rtsa ba'i yi dam byed pa lta bu'i dgos pa dang 'brel na de la ni sta gon yang nges par dgos shing*/_dbang dngos kyang dpal chen ltar rgyas par bskur ba legs pa bcas zhib tu dpyad pas gzhung gi dngos bstan dang*/_rig 'dzin brgyud pa'i phyag bzhes gung bstun gyis yid rton rung ba zhig gnang ba gal che ba'i tshul gzhung las/_dbang la rdo rje theg pa yi:_gzhi lam 'bras gsum rdzogs pa'i phyir:_rgyud kyi dngos po bcu shes shing:_bsnyen rdzogs rtogs pas rgyud grol ba'i:_rdo rje slob dpon kho na las:_gzu lum rang gar spyad pa na:_slob ma smin pa lta ci smos:_rang gi srog la'ang hur thum byed:_de phyir mkhas pas 'tsho shes spyod:_ces gsungs pas na zhar la 'phros don du brjod pa'o/

!__yi dam gyi skor gsang sgrub thugs rje chen po sdug bsngal rang grol gyi dbang chog 'od dkar mtha' yas rdo grub rin po che 'jigs med phrin las 'od zer gyi rdo rje'i gsung dngos dpe rgyun bzhugs bzhin pa ltar shes par bya zhing*/_de la dbang rgyas pa'i skabs gter kha gzhan las 'byung ba'i sangs rgyas stong dbang sbyar na rata gling thugs rje gsang 'dus kyi sangs rgyas stong dbang gter mdzod du bzhugs pa nyid kyis don grub pa'o/__!__thugs rje chen po sdug bsngal rang grol gyi dbang dang 'brel bar myong grol ril bu'i dbang bskur bar 'dod na/_dbang dngos gzhi'i bum dbang rdzogs pa'i rjes su/_de ltar bum dbang gi khrus kyis gdul bya skal ldan rnams kyi rgyud snod gser gyi gzhong pa lta bur yongs su dag par byas pa der/_bcud seng ge'i 'o ma lta bu myong grol bdud rtsi'i dwangs mas dbang bskur ba ste/_bum pa rang byung gi pho brang ye shes kyi gzhal yas khang du gsal ba la bum bcud 'khor ba dong sprugs 'jig rten dbang phyug 'phags pa thugs rje chen po'i lha tshogs su shar ba'i dbang bskur bas rgyud smin cing grol ba'i mos pa mdzod/_ril bum spyi bor bzhag la/_hrIH_phyi ni rang byung bde chen gzhal yas khang:_nang na thugs rje chen po'i lha tshogs bzhugs:_sgrib gsum dag nas sku gsum mngon gyur dbang:_deng 'dir sbyin no 'gro kun yongs grol shog:_oM ma Ni pad+me hU~M hrIH_sarba ta thA ga ta a b+hi Shiny+tsa a:_zhes dbang bskur/_de nas/_khyed rang rnams kyis ril bu thugs rje chen por gsal ba lce thog tu myangs bas lus gzhal yas khang du gsal ba'i snying pad+ma 'dab ma drug pa'i lte bar zla ba'i steng du mgrin pa'i lam brgyud hril gyis byon nas byang chub snying po ma thob bar du mi 'bral bar yun gyi lhar bzhugs pa'i mos pa mdzod/_oM ma Ni pad+me hU~M hrIH_sarba sid+d+hi a:_zhes bzla bzhin bkyes pa'i ril bu gsum re mid du gzhug go_/de ltar dbang rdzogs pa'i ril bu ltor song phan chad mi zhes bya ba thugs rje chen po spyan ras gzigs su gnas gyur pa yin pas rgyal bu rgyal sar phyung pa dang 'dra zhing*/_bslab pa'i dam tshig kyang bdag las gzhan gces 'dzin gyi sems bskyed dang ldan pas 'gro ba'i don la ci nus 'bad pa dang*/_dus rtag tu thugs rje chen po'i bzlas sgom la brtson par gyis shig_/de ltar thob pa'i phan yon kyang rgyud las/_ril bu su yi ltor song ba:_tshe rabs gang dang gar skyes kyang:_spyan ras gzigs dang 'bral mi srid:_rdzas mchog reg chog ngo mtshar che:_zhes dang*/_gzhan yang*/_bod khams kun la khyab par dgram:_de yis thugs rjes bstan pa rgyas:_snyigs dus sems can bde la bkod:_ngan song 'khor ba dong nas sprugs:_thugs rje'i phrin las ngo mtshar che:_zhes gsungs pa ltar dad pa dang nges shes khyad par can skyed 'tshal/_de nas slar yang mdun bskyed kyi sogs lha dbang man gzhung ltar ro/_/zhes gu ru chos kyi dbang phyug gi zab gter thugs rje chen po yang snying 'dus pa'i dbang chog las khol du phyung ba dge_/zhes 'jam mgon mkhyen brtse'i rdo rje'i gsung snying thig kha skong las byung ba ltar rgyun mi nyams pa'i phyir dbang zin dkyus su bcug pa'o/__!__dngos kun de nyid gzigs pa'i ye shes spyan/_/mtha' klas 'gro khams brdal ba'i phrin las dbyig_/dri med chos kyi bshes gnyen dgyes pa'i 'od/_/dad brgya'i 'char ka'i 'dzum zer sor mos len/_/yang gsang bla ma'i sgrub pa thig le'i rgya can gyi smin byed 'bog pa la/_thog mar sbyor ba yo byad kyi gshom ni/_gzhung las/_maN+Dal tshom bu lnga pa'i steng:_zhes gsungs pa 'di'i bsnyen yig kun gzigs rdo rje gzi brjid kyis gsung las/_stegs kyi khar 'od lnga'i thig le'i dkyil 'khor rdul tshon nam ras bris skabs dang sbyar/_zhes gsungs pa ltar phyi ma nyid phyag len du mdzad pas 'od lnga'i thig le'i dkyil 'khor dbus su b+han+d+ha dum du gsum par sman 'bru rin chen dang*/_khyad par sel med kyi a mr-i tas bkang ba'i khar rig 'dzin srog 'khor dpal gyi gdu bu'i tsakra rab gnas can/_dar dmar gyi lding gur phub pa dang*/_ril bu'i dbang bskur sbyar na b+han+d+ha ril bus bkang ba dar dmar gyis g.yogs pa'ang bzhag_/btags grol gyi dbang byed na rig 'dzin srog 'khor bca' sgrub tshad ldan byas pa'ang 'du bya/_g.yas su rnam bum mgul chings dkar/_mdun du kun mkhyen bla ma'i sku/_rgyab tu gsang thod/_g.yon du rig tsaka_DA ma ru/_khaT+wAM/_rus rgyan/_b+han+d+ha/_tshangs skud sogs he ru ka'i chas kyi tsakli/_shel rdo rnams bkod mdzes su bshams/_mchod pa dang sman raka gtor gsum/_bka' srung dang chad brtan gyi gtor ma/_dkar bgegs/_las bum bcas 'du bya/__gnyis pa kun bzang don gyi phrin las dang 'brel ba'i dbang bskur la/_brgyud pa'i gsol 'debs sngon du 'gro bas las byang mthar chags su btang*/_snang srid khyab brdal ye shes su shes pa'i rtogs dgongs med na bdag mdun dzapa khang so sor dbye zhing spro bsdu'i dmigs gnad dang*/_ril sgrub sbyor na/_bdag gi thugs srog sngags phreng sogs bzlas dmigs sbyar zhing dzapa bzlas bya/_btags grol gyi sngags rnams kyang bklag_/bum pa rang byung gi gzhal yas khang du dpal mgon rig 'dzin bla ma'i dkyil 'khor dwangs pa'i mtsho la gza' skar shar ba bzhin skad cig gis gsal ba'i sku las byin rlabs ye shes kyi chu rgyun babs pas bum chu bde stong bdud rtsi'i rang bzhin du gyur par bsam la/_bsnyen bzlas dang dbyangs gsal rten snying bzla/_las bum du skad cig gis khro bo rta mgrin dmar po g.yas pad+ma'i dbyug tho dang*/_g.yon me'i zhags pa thogs par gsal ba'i sku las rdo rje bdud rtsi'i rdul phra rab babs pas bum pa gang bar bsam la/_oM h+ya gr-I ba hU~M phaT/_zhes bzlas la thun mthar dbyangs gsal rten snying dang*/_mchod phreng rdo rje sgra ma'i mchod sprin dang las byang gi bstod pa dang yig brgya bzlas mthar/_oM AHhU~M bum pa'i lha tshogs bde ba chen por rjes su chags pas rdo rje bdud rtsi'i rang bzhin du ltems kyis zhu bar gyur/_zhes dang*/_bka' srung gtor 'bul/_skong bshags/_tshogs mchod/_bskang ba/_grub na lam dbang gi tshul du bdag 'jug rgyas pa dang*/_bsdu na rig pa'i me tog dor bas ye shes kyi dkyil 'khor du 'jug pa'i rjes/_dad ldan dam tshig srung nus pa'i slob ma sgo drung du khrus byas/_gral la 'khod nas bgegs gtor btang*/_srung 'khor bsgom/_las rdor gyis me tog bkye bsdu bya/_sems bskyed gsal gdab dang bcas/_de yang 'o skol rnams dal 'byor gyi rten 'di nyid rnyed dka' zhing nam 'chi ba'i cha med pa dang*/_'chi ba'i 'og tu las 'ba' zhig gis rjes su 'brang ste khams gsum gang du skyes kyang sdug bsngal gyi rang bzhin las ma 'das pas/_da res sdug bsngal can gyi 'khor ba 'di las bdag gzhan sems can thams cad thar pa zhig ci nas kyang bgyi'o snyam pa'i skyes bu chen po'i blos yang dag pa'i lam du zhugs nas 'bras bu'i mthar thug gi rtogs bya rig stong 'od gsal rdo rje snying po'i gnas lugs kyi don mngon du byed pa'i thabs kyi gseng lam rmad du byung ba ni zab lam bla ma sgrub pa kho nar bya ba/_gsar rnying gi mdo rgyud bstan bcos kun las dbyangs gcig mgrin gcig gis yang yang bsngags pa ltar la/_de'i tshul la'ang mkhas shing dngos grub brnyes pa'i bdag nyid chen po rnams kyis bkral ba'i tshul mtha' klas pa las/_skabs su bab pa 'di ni klong chen snying gi thig le'i yang gsang bla ma'i sgrub pa'i rim pa dbang gi cho ga ste/_de ni 'od gsal gsang ba chen po'i lam nas 'pho chen rdo rje'i 'od sku mngon du mdzad de 'phags bod gnyis su rtsol med theg mchog rgyal po'i zab gsang gi bdud rtsis skal ldan ji snyed gdod ma'i grol gzhir dbugs dbyung ste da lta'i bar sprul pa'i rnam rol rgyud ma chad pas phyi ma'i gdul bya rjes su 'dzin pa'i thugs bskyed dang phrin las mtshungs pa med pa paN chen lnga brgya'i gtsug rgyan 'od gsal 'pho ba chen po'i sku brnyes pa bi ma la mi tra dang de'i sprul pa kun gyi mchog gyur kun mkhyen chos kyi rgyal po rgyal ba gnyis pa klong chen rab 'byams dbyer med pa'i bla sgrub ste/_kun mkhyen bla ma 'di dang mnyam pa'i sde gsum rdzogs pa chen po'i seng ge'i sgra bsgrags pa ni gangs can bod du ma byung zhing*/_snga 'gyur rdo rje snying po'i bstan pa'i mig dang snying lta bu'i legs bshad chos sku'i mchod sdong chen po phyi rabs gdul bya'i skal par smon lam gtad rgya dang bcas pas bzhag par mdzad pa dang*/_phyi ma'i dus 'dir yang mchog gi gter chen rat+na gling pa/_lha btsun nam mkha'i rnal 'byor/_rtse le mkhas mchog pad+ma legs grub/_chos kyi rgyal po gter bdag gling pa sogs mkhas grub du ma ye shes kyi skus rjes su bzung zhing*/_rdzogs pa chen po'i bstan pa'i bdag por byin gyis brlabs pa las/_'dir yang kun mkhyen rig 'dzin chen po 'jigs med gling pa gang gis rtogs brjod DA ki'i gsang gtam chen mo las/_gter kha gong 'og gi bka' yi chu bo gcig tu 'dres pa'i gsang bdag dpa' bo drang srong dri med zhi khro'i bsnyen sgrub la gzhol ba'i dus kyi tho rengs shig gi char/_skyo shas dang nges 'byung drag pos rkyen byas te/_mdun gyi nam mkhar o rgyan chos kyi rgyal po/_rig 'dzin 'jam dpal bshes gnyen sogs 'od gsal gyi ngang du mjal te brda don spros pa med pa'i dbang mang po bskur ba'i mthar rang la thim pa zhig pa byung bas rang byung gi rtogs pa byung rgyal du skyes/_nyams kyi 'dzin stangs bud/_las rlung dbang du 'dus/_snang ba'i rdzun phug rdib/_shes pa la brtul zhugs kyi ngar thon te tshe 'di'i snang ba phal cher brjed nas skye ba 'phos pa lta bu byung*/_zhes sogs gsungs pa ltar dang por mnal lam du gu ru'i zhabs rjes las dbang bzhi blangs ba'i rkyen gyis nang dbyings khyad chos drug ldan gyi grol sa mthong zhing de'i rjes su 'jam dpal bshes gnyen gyis byin gyis brlabs pa'i rkyen las dgongs pa'i gsang mdzod brdol zhing*/_rnga yab gling du gu ru bde ba chen po dang thugs yid 'dres nas 'od gsal gzhon nu bum sku'i zhing khams gzigs par gsungs pas mtshon/_sku tshe 'di nyid la gdod ma'i gzhi klong du khyad par drug gi btsan sa zin pas dpal kun tu bzang po dngos dang dbyer med pa nyid 'od gsal 'gro 'ong med pa'i ngang du mnal ba na/_lhag mthong gsal ba'i ye shes kyi snang ba'i 'od gsal shin tu dwangs par kun mkhyen klong chen rab 'byams bzang po sku gzugs bzang la na bza' chos gos rnam gsum gyis mdzes shing*/_sku na cung zad smin pa/_de bzhin gshegs pa ltar mthong na mi mthun pa med pa zhig dang mig 'phrul ltar mjal zhing*/_brjod bya don gyi thugs rgyud 'pho bar gyur cig_/'pho bar gyur cig_/rjod byed tshig gi brgyud pa rdzogs par gyur cig_/rdzogs par gyur cig_/ces gsung sgra lhang lhang zhal 'don mdzad pa thos/_der dran pa 'thor 'gro ba lta bu'i dad pa dang mos gus bzod blag med pa zhig skyes/_phyag 'tshal long med par kun mkhyen bla ma'i phyag gnyis nas 'ub kyis 'jus/_spyi bor bkod nas kun mkhyen chos kyi rgyal po mkhyen zhes lan gsum du mos gus kyis brgyal ba tsam du gsol ba btab pas spyan hur gyis gzigs/_rigs kyi bu khyod la da ci smon lam gtad rgya'i sgo nas don brgyud kyi dgongs pa 'phos pa yin pas/_sgrub pa'i srog mkhar tshugs la skal ldan la rgya cher ston cig_/ces sku yis byin gyis brlabs pa dang*/_zhal gzigs bar pa la dpe cha bam po zhig gnang nas gsang mdzod chen po brda 'grol mdzad pa sogs gsung gis byin gyis brlabs pa dang*/_zhal gzigs phyi ma la rdo rje'i lta stangs kyis 'od gsal dag pa rab 'byams kyi dbang bskur te thugs kyis byin gyis brlabs nas mnyam rjes ris med du dag pa'i tshul gsungs las kyang*/_phyi ltar hU~M chen 'gro 'dul dri med rje/_/nang ltar sing ga'i slob dpon many+dzu shrI/_/gsang ba ye shes sku can klong chen pas/_/brda thabs rten 'brel du mas don brgyud byin/_/zhes sogs gsungs pa ltar 'od gsal bsam mi khyab pa'i dgongs pa la dbang thob nas/_de'i rang rtsal rtsa khams kyi yi ge ye shes kyi rlung gis bskul bas mkha' 'gro'i brda mdzod rang shar du rnyed nas dam pa'i chos kyi rol mo zad med du 'khrol ba'i snying bcud rdzogs pa chen po klong chen snying gi thig le'i rig 'dzin bla ma phyi nang gsang ba yang gsang du sgrub tshul bzhi las skabs su bab pa yang gsang kun mkhyen chen po'i thugs sgrub 'od gsal thig le'i rgya can te/_'jam dpal rtsa rgyud las/_gang phyir sangs rgyas thams cad ni/_/'das dang ma byon da ltar gyi/_/thams cad mi yi 'jig rten du/_/mi yi lus su yang dag 'byung*/_/zhes dang*/_gur las/_gang zhig rdo rje sems dpa' zhes/_/rdo rje slob dpon gzugs su gnas/_/sems can phan gdags dmigs nas ni/_tha mal pa yi gzugs su sprul/_/zhes gsungs pa ltar theg mchog rdzogs pa chen po'i shing rta kun mkhyen bla ma chos kyi rgyal po nyid kyi bla ma'i sgrub pa zab pa'i mthar thug tu gyur pa ste/_gzhung las/_e ma shin tu yang zab dgongs pa'i gter:_yang gsang thig le'i rgya rtags can:_gdod ma'i mgon po klong chen pas:_dpal gyi bsam yas mchims phu ru:_kho bo'i snying gi dkyil du sbas:_lo lnga'i bar du gsang rgya byas:_da lta dus ngan snyigs ma'i tshe:_zab rgya spel ba'i snod dkon yang:_gdug pa zhe sdang sbrul gyi lor:_l+wa ba dkar po'i lding gur nang:_ye shes dbyings kyi mkha' 'gro mas:_'di nas lo gsum 'das pa na:_thugs kyi sras mchog gsum yang 'byung:_badz+ra ming can snying stobs che:_dz+nyA na'i ming can grub pa'i gtso:_rigs lnga'i ming 'dzin snyan ngag mkhan:_de dag rnams la chos sgo 'byed:_ces pa'i lung bstan ji bzhin du:_brgyud 'dzin snying gi bu rnams dang:_kong smyon sbas pa'i rnal 'byor gyis:_bskul ngor zab don gtad rgya bkrol:_sman btsun tshe ring mched lnga dang:_gza' rgod srog gi spu gri yis:_thub par srungs shig dam tshig rgya:_las can rnams kyi dpal du shog:_ces gsungs pa ltar yang gsang bla med rdzogs pa chen po'i man ngag gi sde'i lta sgom spyod pa'i gnad ston pa kun bzang ye shes klong gi rgyud/_de'i rgyud phyi ma gnyis/_lung kun bzang dgongs mnyam/_man ngag gnad gsum shan 'byed/_gnas lugs rdo rje tshig rkang rtsa 'grel/_khrid yig ye shes bla ma rtsa ba rgyab chos dang bcas pas mtshon pad 'byung bi ma'i dgongs nyams kyi shing rta chen po gnyis kyi byin rlabs man ngag smin grol chu rgyun gcig tu bsdus pa'i gnad kyi zhun thig tu gyur pa'i klong chen snying gi thig le zab gsang rdzogs pa chen po'i byin rlabs kyi sgo 'byed paN chen bi ma la dang kun mkhyen chen po gnyis su med pa'i zab lam bla ma'i sgrub pa 'di kun mkhyen 'jigs med gling pa nyid kyis bla sgrub rtsa ba tsam gtan la phab nas/_gsang ba'i lung zin chos kyi bdag po rnam gsum gyi gtsos las can rdo rje'i slob tshogs la bstsal ba las/_sangs rgyas kyi phrin las smon lam gyi rang 'bras nam yang dus las yol ba med pas kun mkhyen bla ma nyid slar yang gangs can bstan pa yongs rdzogs kyi shing rtar byon pa 'jam dbyangs mkhyen brtse'i dbang po'am/_'jigs med mkhyen brtse'i zlos gar du grags pa nyid dgung grangs nyer drug tu phebs pa na dbus gtsang longs spyod rdzogs pa'i rdo rje'i gnas chen rnams su dpa' bo dang rnal 'byor ma'i tshogs kyi 'du ba la dgyes dgur spyod pas/_rdo rje'i nang gi sa lam la bogs 'byin pa dang*/_bod khams bstan 'gro'i phan bde'i btsas su phyi nang gsang ba'i rten 'brel legs tshogs du ma bdag gir mdzad pa las/_gangs ri thod dkar 'od zer sprin gyi skyed mos tshal du phebs pa na/_kun mkhyen ngag gi dbang po'i ye shes kyi skus rjes su bzung ste bu zhes dgyes pas dbugs dbyung mdzad pa las/_bla sgrub 'di nyid kyi smin byed ye shes mchog sbyin dang*/_rjes rim tshogs mchod skong bshags/_ril sgrub dang bcas pa gtan la phab cing*/_pad+ma dang bi ma la'i bka' srol gtso bor gyur pa'i rdzogs chen sde gsum/_bka' gter yongs rdzogs kyi don gyi bstan pa'i bdag por gyur nas kun bzang thugs kyi bstan pas nam mkha'i dbyings kun tu khyab par brdal bar mdzad pas zhal gzigs byin rlabs kyi nye brgyud zam ma chad pa'i smin grol chig rdzogs su sgrub pa la maN+Dal phul/_rgyal ba sras dang bcas pa'i ye shes kyi sku gcig pu kun mkhyen bla ma dang gnyis su med pa'i bdag nyid la yid ches dad pas gsol ba 'debs pa 'di'i rjes zlos mdzod/_sangs rgyas kun gyi ye shes sku/_/rdo rje slob dpon bdag la dgongs/_/rig 'dzin bla ma'i dkyil 'khor du/_/'jug cing smin pa'i bka' drin stsol/_/lan gsum/_mdun gyi nam mkhar skyabs gnas kun 'dus rtsa ba'i bla ma dang dbyer med pa'i kun mkhyen chos kyi rgyal po phyogs dus rtsa gsum rgyal ba sras dang bcas pa'i ye shes kyi phung po gcig tu bsdus pa'i bdag nyid chen po la/_bdag gzhan sems can thams cad sgo gsum 'jug pa gcig pas skyabs su 'gro ba kun rdzob rgyu'i skyabs 'gro dang*/_skyabs yul dang rang sems dbyer med pa'i chos nyid ngo bo rang bzhin thugs rje'i bdag nyid sku gsum rang chas su bzhugs pa don dam 'bras bu'i skyabs 'gro la dran pa nye bar bzhag pas 'di'i rjes zlos mdzod/_hU~M:_ngo bo rang bzhin sogs lan gsum/_rang gzhan sems can thams cad 'khor ba las bsgral 'dod kun rdzob byang chub kyi sems de nyid/_don dam par ci yang ma grub cing kun rdzob tu cir yang 'char ba'i stong dang rten 'byung dbyer med pa'i ngang du mnyam par 'jog pa don dam gyi sems bskyed la blo gzhol bas 'di'i rjes zlos mdzod/_ho:_sangs rgyas med la sems can sogs lan gsum/_slar yang rgyal ba sras dang bcas pa'i bgrod pa gcig pa'i lam sdom pa gsum gyi gnang bkag rnams tshul bzhin du bzung zhing bsrungs nas de bzhin gshegs pa'i spyod yul rlabs po che la 'jug par bgyi'o snyam pas dam bca' ba 'di'i rjes zlos mdzod/_bde bar gshegs pa khyed ci 'dra/_/de 'dra kho nar bdag gyur cig_/spyod pa rmad byung bsam yas pa/_/'gro la phan phyir bdag gis spyad/_/byang chub sems mchog dam pa dang*/_/sku gsung thugs kyi phyag rgya ni/_/srog gi phyir yang mi gtong na/_/rdo rje rgyal pos byin rlabs mdzod/_/lan gsum/_de dag gis dbang gi sngon du 'gro ba rnams grub nas/_dbang dngos la bum gsang sher ye bzhi dang gtad rgya'i dbang dang bcas rnam pa lngar yod pa las/_dang po bum dbang gi gzhi 'god pa la ye shes pa dbab pa yin pas sgo gsum gyi gnad gcun la dmigs pa 'di ltar du sgoms shig_/'di ltar rang ngor nyams su myong yang bsam brjod kyi spros pa las 'das pa'i rig stong rjen pa skad cig ma'i rang rtsal 'od gsal sgron ma drug ldan gyi snang ba'i nyams kyi 'phel kha yongs su rdzogs pas/_nang dbyings kyi rang gdangs rig pa 'od sku'i phyag rgya dkyil 'khor rgya mtsho'i khyab bdag tu smin nas 'khrul snang sdug kun gyi chos kun rdzob kyi cha kun chos nyid kyi nang dbyings su rang zad de sku gsum lam snang du rdzogs pa'i 'pho chen ye shes rdo rje'i sku can dri med chos kyi bshes gnyen dang gnyis su med pa'i rgyal ba'i dbang po klong chen rab 'byams bcu phrag rig pa'i gnas kun mthar son pa'i paN+Di ta yi cha byad can zhi 'dzum mtshan dpe'i nyams 'gyur yongs su rdzogs pa/_gsang gsum mi zad rgyan gyi 'khor lor rgyal ba kun dang gnyis su med pa'i bdag nyid chen por gsal ba'i gnas gsum du rdo rje gsum gyi ngo bor yi ge 'bru gsum gyis mtshan pa dang*/_slob dpon gyi thugs ka nas kyang 'od zer bsam gyis mi khyab pa 'phros/_dag pa'i zhing rab 'byams thams cad du khyab/_de dag na bzhugs pa'i dus gsum gyi bde bar gshegs pa sras dang bcas pa dang*/_rab 'byams rtsa ba gsum gyi lha tshogs/_khyad par 'od gsal rdzogs pa chen po'i brgyud gsum rig 'dzin mkha' 'gro rgya mtsho'i thugs rgyud rang dbang med par bskul nas/_rdo rje'i gsang ba gsum gyi byin rlabs thams cad sku dang yig 'bru phyag mtshan gyi rnam pa char drag tu bab pa tsam spyan drangs nas khyed rang rnams kyi sgo gsum la thim pas gnyis su med par byin gyis brlab par mos shig_/spos rol DA dril gdung dbyangs dang bcas/_hU~M:_rnam rtog bral ba'i pho brang sogs las byang gi spyan 'dren dang sngags mthar/_dz+nyA na a be sha ya a aH_zhes sngags bzla zhing byin dbab/_de ltar dbang gi ye shes pa'i byin rlabs kyi rgyun gnyug ma'i rdo rje gsum dang dbyer med du brtan par byas pa'i mos pa mdzod/_tiSh+Tha badz+ra zhes rdo rje mgo bor bzhag_/slar yang slob dpon gyi thugs ka nas 'od zer 'phros/_dbang gi lha nam mkha' gang bar spyan drangs pa rnams dang slob dpon lhan cig pas bkra shis pa'i rnam pa du ma ldan pas rin po che'i bum pa ye shes bdud rtsi'i chu rgyun gyis gang bas spyi bo nas mngon par dbang bskur ba'i cho ga stsol bar mos shig_/rnam bum spyi bor bzhag la/_hrIH_ka dag gzhon nu bum sku'i grong khyer du/_/lhun grub snang stong bla ma'i dkyil 'khor shar/_/zung 'jug bdud rtsi'i rgyun gyis dbang bskur bas/_/phung khams skye mched lha skur dag par shog_/oM AHhU~M ma hA gu ru dz+nyA na sid+d+hi hU~M:_nirma kA ya a b+hi Shiny+tsa oM/_gzhung las/_rjes 'brel bskyed pa'i rim pa dang*/_/bzhugs stangs rnam pa gsum la bslab/_/ces gsungs pa ltar/_'di ltar bum pa'i dbang dang sku'i byin rlabs thob phyin chad snod bcud tha mal du lta ba'i 'dzin zhen spangs te cir snang lha'i 'khor lor shes pas snang stong 'od gsal sgyu ma bskyed pa'i lam khyer la brtson dgos/_de'ang skabs 'dir ni dbang rab a ti yo ga dang mthun pa'i bskyed tshul gsungs pas 'di ltar nyams su blang bar bya ste/_chos can spros pa'i mtshan ma mtha' dag ka dag spros bral gyi nang dbyings su thim/_de'i ngang las lhun grub 'od gsal gyi rig gdangs cir snang dag chen ye shes rol pa'i sgron me'i sprin phung 'byams klas par bkod de snang srid snod bcud thams cad dpal mgon rig 'dzin bla ma'i rdo rje gsum gyi dkyil 'khor du sku dang thig le lu gu rgyud 'ja' 'od zer sprin 'khrigs pa'i dbus su rig stong skad cig ma dran rig 'dzin med khyab brdal du grol te 'pho chen rdo rje'i btsan sa zin pas 'od gsal snang ba bzhi'i pha mthar son pa'i rten 'byung gi snang cha ma 'gag rang shar yongs grub dag mnyam chen po'i bskyed rim rang gi gnyug ma'i phung khams skye mched thams cad dpal mgon rig 'dzin bla ma kun mkhyen rgyal ba klong chen pa chen po 'pho med rdo rje'i lang tsho grub pas sku mdog dkar dmar gzhon mdzes kyi mtshan dpe can/_theg pa rim dgu'i sa lam gyi yon tan yongs su rdzogs pas paN+Di ta'i cha byad/_mdo sngags kyi sde snod rab 'byams 'dzin pas dbu la paN zhu gsol ba/_rang ngor 'khor 'das kyi mtshan 'dzin dbyings su dag pas zhabs rdo rje'i skyil krung*/_stong dang snying rje dbyer med kyi dgongs pa mngon du gyur pas pad zla'i steng du bzhugs pa/_'gro kun gdod ma'i 'bras bu'i sar sbyor bas phyag gnyis sems nyid ngal gso'i phyag rgya can/_rdo rje nam mkha'i ye shes kyis zhing khams rab 'byams su khyab pa can du gsal thob la sems 'dzin gnang mdzod/_ces dar cig sems gzung du gzhug_de lta bu'i bskyed rim gsal brtan dag gsum dang ldan pas rim pa dang po'i ting nge 'dzin mthar phyin par bya dgos shing*/_sbyang gzhi sgyu 'phrul drwa ba snang stong sku rdo rje'i dkyil 'khor nyid/_sbyong byed thun mong yongs grub chen po'i bskyed rim dang*/_khyad par lus bzhugs stangs gsum gyi gnad kyis gcun pas rtsa dang der rgyu ba'i rlung rig gnad du chun nas/_sbyangs 'bras 'od gsal thig le chen po'i sku dang zhing khams mngon du 'char nub bral bar snang ba'i phyir chos sku'i bzhugs stangs seng ge lta bu mdzod cig_/longs sku'i bzhugs stangs glang chen nyal ba lta bu mdzod cig_/sprul sku'i bzhugs stangs drang srong tsog pu lta bu mdzod cig_/lus gnad gcun bzhugs stangs so sor byar bcug_de dag gi phan yon kyang gsang ba spyod pa sa bon gyi rgyud las/_lus ni seng ge lta bu dang*/_/drang srong dang ni glang chen tshul/_/'di las g.yo bar ma byas na/_/sangs rgyas sum stong nyid dang yang*/_/skal pa dag ni mnyam pa'o/_/zhes so/_de'i rjes su 'brel ba sku'i byin rlabs bya ba'i slad du/_mdun gyi kun mkhyen bla ma'i sku las sku gnyis pa zhig yer gyis byon/_khyed rang rnams kyi dpral ba nas zhugs te lus la thim pas 'pho chen ye shes rdo rje'i sku dang dbyer med du gyur par mos mdzod/_sku brnyan spyi bor bkod de/_oM/_rig gdangs chos nyid mngon sum gzhal yas su/_/nyams snang gong 'phel 'ja' zer thig le'i klong*/_/rig pa tshad phebs don gyi bla ma'i skus/_/chos zad blo 'das chen por dbang bskur ro/_/badz+ra kA ya a b+hi Shiny+tsa mi/_des spros bcas bum pa'i dbang bskur mtha' rten dang bcas pas lus ngag yid gsum gyi gzung 'dzin bag chags dang bcas pa sbyangs shing shes bya la rmongs pa'i sgrib pa dag nas snang srid gzhir bzhengs rang byung lha'i 'khor lo mngon sum mthong ba'i rten 'brel 'grigs pa yin no/__/gnyis pa gsang ba'i dbang gi slad du bla ma he ru ka dpal du gnas gyur pa'i rang 'od dbyings kyi phyag rgya dang mnyam par sbyor ba'i byang sems sangs rgyas thams cad 'dus pa'i ngo bo thod pa'i bdud rtsi dang ro gcig tu 'dres pa myong ba tsam gyis rang bzhin brgyad cu'i rtog tshogs dbyings su thim/_gsal stong gi ye shes nyams su myong bar mos shig_b+han+d+ha'i bdud rtsi myang du gzhug la/_hrIH_phyi snod rtsa gsum 'khor lo'i b+han+d+ha ru/_/nang bcud bde chen byang sems bdud rtsir bskyil/_/deng 'dir skal ldan khyod la sbyin pa yis/_/srog rtsol dbu ma'i dbyings su rdzogs par shog_/oM AHhU~M ma hA gu ru dz+nyA na sid+d+hi hU~M:_saM b+ho kA ya a b+hi Shiny+tsa AH_rjes 'brel gzigs stangs rnam gsum dang*/_/rlung rig gnad la bslab pa'i rjes/_/zhes gsungs pas/_'di ltar gsang ba'i dbang dang gsung gi byin rlabs thob phyin chad rlung gnad du gcun pa'i rdo rje'i rnal 'byor la bslab dgos/_sbyang gzhi bde stong drwa ba sdom pa'i gsung rdo rje'i dkyil 'khor nyid/_sbyong byed thun mong dang khyad par bla med kyi thabs zab mos gcun pas/_sbyangs 'bras rtsa khams kyi yi ge ye shes rlung gis bskul bas chos phung brgyad khri'i rol mo 'dod rgur 'khrol ba'i phyir srog rtsol rdo rje'i bzlas pa la 'bad dgos te/_snod bcud kyi 'jig rten thams cad chags 'jig gnas stong mtha' dag rlung gis byed pa gtso che zhing*/_sgo lnga'i rnam shes yul la shar nas las nyon gyi byed las kyang sems nyid kyi rang bzhin chos nyid kyi gdangs rlung la zhon nas g.yo bar byed cing*/_ye shes kyi rlung las sgron ma bzhir smin nas snang bzhi rtsal rdzogs te/_rig pa gzhi klong du dag pa yang las rlung gi g.yo sdud zad nas 'pho med du btsan sa zin dgos pa'i phyir rlung la bslab dgos/_de la'ang khyad par/_thun min/_thun mong gi bslab tshul gsum las dang po rdo rje'i gsang lam gyi thabs kun gyi rtse mo rtsol ba dang bcas pa'i bskyed rdzogs las khyad par du 'phags pa byar med kyi ngang nas 'byung ba rang mal du dag pa'i thabs theg mchog rdzogs pa chen po la brten pa sgo yi gnad la brten nas 'bras bu lam snang du byed pa'i gnad zab mo ste chos sku la chos nyid kyi spyan yod pas mig gnyis gzigs stangs gyen la ldog pas gtsug tor rnam par blta ba'i tshul gyis ltos shig_/longs sku la ye shes kyi spyan yod pas gzigs stangs zur la gtad pas mda' mkhan gyis snyug ma bsrangs ba bzhin du ltos shig_/sprul sku la shes rab kyi spyan yod pas gzigs stangs thur la phab nas drang srong bsam gtan sgom pa bzhin du ltos shig_/ces lta stangs byar gzhug__gnyis pa thun mong ma yin pa rdo rje'i bzlas pa la/_rang nyid kun mkhyen bla ma 'od gsal dwangs ma'i sku 'ja' tshon sgrib g.yogs dang bral ba lta bu'i thugs kar ye shes sems dpa' kun bzang yab yum gsal ba'i thugs tsit+ta rin po che'i sbubs su pad+ma nyi zla'i steng du rdo rje gsum gyi sa bon yi ge gsum gsal la rig pa g.yo med du gtad de rlung ro sum phrug tu bsal ba'i rjes 'bru gsum rdo rje'i bzlas pa mdzod cig_/'byung 'jug gnas gsum dang sbyar ba bum can dang sbrags pa'am/_gang shes lan bdun nam/_gsum byar gzhug__gsum pa thun mong gi bzlas lung sbyin pa la/_dang po slob dpon dang khyed rang gnyis ka'i snying dbus su 'od lnga'i thig le zlum 'khyil mthing ga khyab pa chen po'i 'od klong du ye shes sems dpa' kun bzang yab yum gyi thugs dbus pad+ma nyi zla'i gdan la gnyug ma'i sems nyid hU~M mthing gsal mthar rig pa rdo rje lu gu rgyud yi ge'i gzugs su shar ba'i sngags phreng mthing gsal 'od kha dog lnga ldan g.yas bskor du gnas par gsal/_slob dpon gyi thugs ka'i sngags phreng las sngags phreng gnyis pa re 'phros/_zhal nas thon/_khyed rang rnams kyi zhal nas rim par brgyud de thugs ka'i hU~M gi mthar 'khod pa la thim pas 'od zer bun bun gis 'phros/_rgyal ba sras bcas dang 'od gsal snying thig gi brgyud pa'i bla ma rnams mchod/_'od zer mar 'phros sems can thams cad la phog pas sdig sgrib bag chags dang bcas pa sbyangs te phyi snod 'og min/_nang bcud rig 'dzin bla ma'i skur sad/_'od zer tshur 'dus pas sgo gsum rdo rje gsum gyi ngo bor byin gyis brlabs pas dngos grub gnyis thob cing 'od gsal 'gro 'ong bral ba'i gshis la mnyam par 'jog pa bsnyen sgrub yan lag bzhi ldan gyi dgongs pas rtsa ba'i sngags 'di'i rjes zlos lan gsum mdzod/_oM AHhU~M ma hA gu ru dz+nyA na sid+d+hi hU~M:_de dang rjes su 'brel ba gsung gi byin rlabs bya ba'i slad du/_rgyal ba rig 'dzin srog 'khor dpal gyi gdu bu'i byin rlabs 'bog pa la/_thog mar chos nyid rdo rje'i rang sgra sngags 'di dag legs par gsan 'tshal/_rig 'dzin srog 'khor dpal gyi gdu bu tshar gcig bklag_de ltar sde gsum rgyud lung man ngag gi rgyal ba yongs su rdzogs pa'i thugs ye shes chen po yi ge'i gzugs su shar ba gsung tsakra'i tshul du chos sku'i ring bsrel gyi dbang bskur bar mos mdzod/_rig 'dzin srog 'khor spyi bor bkod de/_AH_sras bcas rgyal ba kun gyi rdo rje'i gsung*/_/yi ge'i 'khor lor shar bas dbang bskur bas/_/las rlung ye shes khams su rnam dag pa'i/_/chos kyi rgyal srid mchog la dbang bsgyur shog_/badz+ra wAka a b+hi Shiny+tsa mi/_des spros med gsang ba'i dbang mtha' rten dang bcas pas sku gsung thugs ye shes chen po'i byin rlabs dang rang byung zag med bde chen gyi nus pa rgyud la zhugs te mtshan ma'i rtog pa mtha' dag 'od gsal gyi dbyings su zad pa'i rten 'brel 'grigs pa yin no/__/gsum pa shes rab ye shes kyi dbang gi slad du/_mtshan ldan rigs kyi phyag rgya rdo rje snyems ma'i ngo bor spros te gsang ba'i brtul zhugs kyi don du byin par mos shig_/rig tsaka gtad la/_hrIH_bcu drug dga' ba ster ba'i pho nya mo/_/yid 'ong sna tshogs gzugs can 'di gtad cing*/_/lhan skyes thar pa bsten pa'i dbang bskur bas/_/rtog tshogs bde stong chen por smin par shog_/oM AHhU~M ma hA gu ru dz+nyA na sid+d+hi hU~M:_d+harma kA ya a b+hi Shiny+tsa hU~M/_shes rab ye shes kyi dbang dang thugs kyi byin rlabs thob phyin chad snang spyod bde stong gi rol par 'char phyir bogs 'byin las kyi phyag rgya'i lam la bslab dgos pas khyed rang rnams rdo rje sems dpa' dang rig ma rdo rje snyems mar gsal/_mkha' gsang byin gyis brlabs te 'du shes gsum ldan gyis snyoms par zhugs pas 'dod chags chen po'i 'gros las skyes pa'i yas bab rgyu dang mas brtan 'bras bu ste lugs 'byung ldog gi dga' ba bcu drug nyams su myong*/_lhan cig skyes pa 'pho med don gyi ye shes mngon du gyur par mos shig_/ces bde stong gi don la mnyam par bzhag_/de ltar shes rab ye shes kyi dbang gi nus pas sbyang gzhi dra ba bde stong thugs rdo rje'i dkyil 'khor nyid/_sbyong byed pho nya'i myur lam gyi spyod pa rmad du byung ba spyad pas/_sbyangs 'bras bde stong 'pho 'gyur med pa'i mkha' 'gro'i tshogs rje dpal he ru ka'i brtul zhugs rnal 'byor spyod pas rtsa rlung thig le'i 'gro 'ong thams cad a wa d+hu ti'i srog tu ngal 'tshos pa la phyi rdo rje'i gnas yul du dpa' bo DA ki'i tshogs kyi 'du ba la spyod pa gsum gyi rten 'brel gyis nang sa bcu'i spangs rtogs rdzogs pa'i bden don dag pa'i 'du ba gsum dang*/_'bar ba gsum gyi ye shes kyis bogs 'byin pa spyod pa'i brtul zhugs kyi dbang rjes 'brel du sbyin pa'i phyir/_DA ki dbang sdud pheM hU~M gi sgra sgrogs pa'i DA ma ru/_bde stong ka pA la/_sku gsum mtshon pa'i khaT+wAM ga_/pha rol phyin drug mtshon pa'i rus pa'i phyag rgya rnams gtad de thugs ye shes kyi dgongs pas byin gyis brlabs par mos shig_/rnal 'byor brtul zhugs spyod pa'i yo byad rnams gtad la/_hU~M/_phyi dang nang gi gnas yul dur khrod kun/_/rdo rje'i brtul zhugs gcig gis bgrod pa'i slad/_/dpa' bo DA ki'i phyag rgyas dbang bskur bas/_/nye rgyu'i spyod pa'i 'bras bu mthar phyin shog_/badz+ra tsit+ta a b+hi Shiny+tsa hU~M/_des dbang gsum pa las skyes pa'i dpe yi ye shes kyis don gyi ye shes sems nyid gzhi med rtsa bral du ngo sprad cing bsgoms pas ka dag dbyings kyi ye shes mngon sum du rtogs te chos nyid zad sar 'khyol ba'i rten 'brel 'grigs pa yin no/__/bzhi pa tshig dbang rin po che'i slad du/_dbyings ka dag shel lta bu la 'od gsal lhun grub kyi rang gdangs 'ja' zer gyis mtshon pa'i brda rdo rje sems dpa'i me long dang rdo rje'i tshig gis chos nyid gshis kyi bzhugs tshul ngo sprad par mos shig_/shel rdo bstan la/_hrIH_gzhi dbyings ka dag gnyug ma'i dwangs shel las/_/gzhi snang lhun grub rig pa'i 'ja' zer shar/_/zung 'jug dpe don 'brel ba'i dbang bskur bas/_/sku dang ye shes dbyer med mngon gyur shog_/oM AHhU~M ma hA gu ru dz+nyA na sid+d+hi hU~M:_dz+nyA na kA ya a b+hi Shiny+tsa hrIH_de ltar bzhi pa tshig dbang rin po che ye shes rdo rje'i byin rlabs thob phyin chad gnas lugs khyab brdal chen po'i don la mnyam par bzhag dgos pas/_khyed rang rnams lus gnad skyil krung drang por bsrang*/_ngag gnad ma bcos rang bab tu bzhag_/sems gnad rig pa skad cig ma rang ngo shes tsam bcos bsgyur gyis ma bslad par/_gdod ma nyid nas chos sku khyab brdal chen po rang la lhun rdzogs su bzhugs pa mngon sum du mthong ba la nges shes skyed la mnyam par zhog cig_/rjes 'brel gnyis kas mnyam par bzhag ngang a zhes dgongs pa'i drod gtad cing*/_/phaT kyis rig pa gong du spar/_/zhes gsungs pa ltar bya/_de'ang dbang rnon ngo sprad pa sgom pas nyams su blangs te sbyang gzhi 'od gsal drwa ba bla ma ye shes rdo rje'i dkyil 'khor nyid/_sbyong byed ka dag khregs chod dang lhun grub thod rgal zung 'jug gi gseng lam chen po gnad du bsnun pas/_sbyangs 'bras sku gsum lhun rdzogs gdod ma'i gzhi klong du skad cig gis bye brag phyed de sangs rgyas pa'i phyir/_de yang ji skad du/_smra bsam brjod med shes rab pha rol phyin/_/ma skyes mi 'gag nam mkha'i ngo bo nyid/_/so so rang rig ye shes spyod yul ba/_/dus gsum rgyal ba'i yum gyur rdzogs pa che/_/zhes gsungs pa ltar rtog ge dang so skye'i blos yid dpyod kyi yul las 'das pa'i chos kun gyi gshis lugs dbyings rig zung 'jug gi lta ba lung rigs dang 'brel bas gtan la phab ste rang thog tu ngo sprad pa'i don sgom pa ma bcos cog bzhag bzhis ngang bskyangs nas bzo bcos bral ba chos nyid 'od gsal chen po'i lhums su zhugs te grogs spyod pas bogs 'byin tshogs drug gang shar 'dzin med rang grol lam du khyer bas/_'bras bu sku dang ye shes lhun 'byams chen por mngon par byang chub pa'i phyir lus bzhugs stangs gsum/_mig gzig stangs gsum las mi g.yo ba sgo yul rlung rig gi gnad kyis gcun te sgron ma drug ldan 'od gsal ye shes rin po che'i gsang mdzod la spyod pas chos nyid mngon sum mthong*/_nyams gong du 'phel/_rig pa tshad la phebs/_chos nyid zad sar phyin nas sku gsum lam snang du rdzogs te phyi nang gsang ba'i zag pa dbyings su zad/_'byung bzhi 'od du dengs/_dran rig gzhi grol khyad par drug ldan snang bzhi mthar phyin 'pho chen 'ja' lus rdo rje'i srog grub par mdzod cig_/des lhun grub mngon sum gyi don nyams su len pa la dbang zhing*/_snang bzhi mthar phyin nas 'ja' lus 'pho chen gzhon nu bum pa skur byang chub pa'i rten 'brel 'grigs pa yin no/__/lnga pa dbang bzhi yongs su rdzogs pa'i mtha' rten du bka' lung yongs rdzogs gtad rgya'i dbang bskur ba ste/_slob dpon kun mkhyen chos kyi rgyal po dngos su gsal bas snying thig gi glegs bam spyi bor bkod cing dgongs brgyud byin rlabs 'pho ba'i dbang bskur bas/_mdun gyi nam mkhar phyogs dus rtsa brgyud bla ma yi dam rgyal ba zhi khro mkha' 'gro chos skyong srung ma rgya mtsho rnams mngon sum du bzhugs pa'i gnas gsum nas sku dang sngags phreng phyag mtshan 'od zer thig le yig 'bru dkar dmar mthing gsum char babs pa ltar byon nas khyed rang rnams kyi gnas gsum du thim pas brgyud gsum rig 'dzin DA ki'i sku gsung thugs ye shes rdo rje'i gsang ba mi zad rgyan gyi 'khor lo dang gnyis su med pa'i dbang dang byin rlabs dngos grub ma lus pa thob par mos shig_/snying thig gi glegs bam spyi bor bkod la/_oM AHhU~M/_kun bzang rdo rje sems dpa' dga' rab rje/_/'jam dpal bshes gnyen shrI sing ha dang*/_/dz+nyA na sU tra 'chi med pad+ma 'byung*/_/'od gsal snying po'i shing rta bi ma la/_/dbyer med kun mkhyen chos kyi rgyal po yi/_/sku gsung thugs dang yon tan phrin las kyi/_deng 'dir skal ldan khyod la byin brlabs pas/_/cir snang sgyu 'phrul drwa ba'i 'khor lor shar/_/sgra grags mi shigs rdo rje'i dbyings su smin/_/ka dag rig pa gdod ma'i lhums su zhugs/_/lhun grub snang ba rnam bzhi'i rtsal rdzogs nas/_/tshe gcig 'ja' lus rdo rje'i srog 'grub shog_/oM AHhU~M ma hA gu ru dz+nyA na sid+d+hi hU~M:_badz+ra kA ya wAka tsit+ta gu Na karma sid+d+hi a b+hi Shiny+tsa mi/_de ltar dbang gi ye shes skyed brtan gong 'phel du bya ba'i phyir mkha' dbyings gang ba'i rgyal ba sras dang bcas pas lha'i me tog gi char dang shis pa'i tshig gi glu dbyangs di ri ri sgrogs pas phyogs dus gnas skabs kun tu dge legs kyi snang bas khyab par mos shig_/las byang gi shis brjod sogs brjod la/_me tog 'thor zhing rol mo'i sgra rgyun ring du bya'o/__!__zhar byung myong grol ril bu'i dbang sbyin par 'dod na gzhung las/_de sogs sgrub pa'i rtags thon nas/_/ril bu rigs 'dus bla mar bskyed/_/bdag 'jug tshul gyis dngos grub blang*/_/gzhan la smin byed cho gas sbyin/_/zhes gsungs pas bum dbang bskur zin pa dang*/_mtha' rten myong grol dam rdzas ril bu'i dbang sbyin pa la/_bum pa rang byung gi gzhal med khang lhun gyis rdzogs pa'i nang du rig 'dzin dpal mgon bla ma'i lha tshogs rnams bzhugs pa'i sku las rdo rje'i gsang ba gsum gyi byin rlabs thams cad 'od zer bdud rtsi'i rgyun gyi rnam pas dbang bskur bar mos shig_/ril bu'i bum pa spyi bor bkod de/_dbyings kyi bum par rig pa'i lha tshogs rnams/_/ye shes thugs rje'i gzi byin rab 'bar bas/_/sgo gsum rdo rje gsum du byin brlabs nas/_/dngos grub stsol zhing brtan par mdzad du gsol/_oM AHhU~M ma hA gu ru dz+nyA na sid+d+hi hU~M/_kA ya wAka tsit+ta sarba sid+d+hi pha la hU~M/_zhes brjod cing gnas gsum du gtug_/ril bu lhar gsal ba rdo rje lce'i lam nas brgyud de snying dbus mi shigs pa'i thig le dang dbyer med pa ye shes sems dpa'i tshul gyis byang chub bar du bzhugs shing dngos grub stsol bar gyur pa'i mos pas myong du gzhug__!__rig 'dzin srog 'khor dpal gyi gdu bu'i dbang bskur na/_gzhung las/_dbang bskur byed na sdom pa gsum/_/cho ga bzhin du bzung byas la/_/bstan bur brgya phyag maN+Dal phul/_/tshar gcig bklag la spyi bor bzhag_/ces gsungs pa ltar bla sgrub 'di dang rjes 'brel du bskur na legs pas dbang bzhi pa grub pa dang*/_na raka skong bshags sam brjod med don bshags gang rung sngon du 'gro bas yig brgya bzla ba dang bcas phyag brgya phrag 'tshal la/_de yang sangs rgyas thams cad thabs mkhas thugs rje'i rnam rol tshad med pas sems can rnams rang bzhin gyis grol bar mdzad pa'i phrin las kyi bye brag_/gdul dka' shin tu rmongs shing dmu rgod sems can rnams rgyu 'bras rtsol bcas kyi theg pas 'dul ba'i zhing du ma gyur pa la phrin las kyi 'jug tshul bsam gyis mi khyab pas grol ba'i tshul so sor 'brang ma'i 'khor lo gdags pas sbyor lam zin pa dang*/_skye bdun gyi shas mkha' spyod grub pa dang*/_pad+ma gtsug tor gyi rig sngags btab pa'i bdug spos kyi dri tshor bas ngan song gi sgo gcod pa sogs gsar rnying gi mdo rgyud du ma dang*/_khyad par rnying ma bka' gter gyi rgyud dang man ngag nas gsungs pa'i grol ba drug ldan ma bsgoms sangs rgyas chos lnga'i gseng lam du grags/_thugs rje phyogs su ma chad pas dud 'gro yan chad kyi rgyud la thar pa'i sa bon 'debs pa'i ngo mtshar rmad du byung ba'i phrin las kyi ya gyal 'od gsal rdzogs pa chen po'i rgyud dang man ngag du ma nas yang yang bstan pa'i btags grol tsakra'i dbang sbyin pa ste/_de la'ang bka' gter man ngag gi dgongs pas rnam grangs mi 'dra ba du ma las skabs 'dir klong chen snying gi thig le'i chos sde las byon pa'i rgyal ba rig 'dzin srog 'khor dpal gyi gdu bu'i dbang bskur zhu ba'i don du maN+Dal phul/_'di nyid kho na sger du byed na/_skyabs sems/_slob ma lhar bskyed/_byin 'bebs bcas dgos pas rigs mthun gyi cho ga zhi khro sogs gang rung ltar byas kyang rung bar mngon mod/_'dir bla sgrub thig le'i rgya can gyi gzhung dang 'brel ba'i dbang bskur sngon du grub pa'i dbang du byas te/_btags grol gyi 'khor lo 'di nyid sangs rgyas kun gyi spyi mes kun mkhyen chos kyi rgyal po'i 'od gsal ye shes kyi sku yi thugs chos dbyings khyab brdal chen po'i klong du bde gshegs zhi ba bzhi bcu rtsa gnyis dang*/_de'i rang rtsal spyi bo bde chen gyi 'khor lo'i dbus su khrag 'thung lnga cu rtsa brgyad kyi tshom bu dang*/_gzhan yang phung khams skye mched thams cad gdod nas rnam par dag pa zhi khro rab 'byams rgyal ba'i spyi gzugs chen por lam gyis gsal ba'i 'khor du bla ma yi dam mkha' 'gro/_sangs rgyas byang sems sogs phyogs dus skyabs yul rgya mtshos bskor ba gtso 'khor thams cad kyi sku gsung thugs yon tan phrin las kyi dbang dang byin rlabs dngos grub thams cad sku sngags phyag mtshan 'od zer sna lnga'i rnam par byung ba khyed rnams kyi gnas lngar rim dang cig car du thim pas nyon mongs pa dug lnga'i 'khrul rtog sangs kyis dag_/'od gsal khyab brdal chen po rang rig sku bzhi ye shes lnga ldan gyi go 'phang mngon du gyur te bcom ldan 'das zhi khro rab 'byams rgyal ba'i spyi gzugs chos sku kun tu bzang po dang skal pa mnyam pas mthong thos dran reg gi sems can thams cad chos nyid gdod ma'i klong du skad cig gis sgrol nus pa'i mkhyen brtse nus pa'i ye shes bsam mi khyab pa'i dbang thams cad skad cig gis thob par mos shig_/'khor lo'i gter gzhung nyid tshar gcig dag par bklag la/_ho:_rgyal ba rig 'dzin zhi khro'i lha:_btags grol srog gi 'khor lo 'dis:_skal ldan slob ma 'di rnams kyi:_sgo gsum smin par mdzad du gsol:_grol zhing gang bar mdzad du gsol:_rgyas dang 'phel bar mdzad du gsol:_kA ya wAka tsit+ta rat+na karma a b+hi Shiny+tsa swA hA:_zhes brjod de gnas lngar gtugs/_spos bsregs/_rol mo bsgrags mthar/_dpon slob kun gyis sam slob dpon gyis brjod de 'dun pa rtse gcig pas/_oM hU~M trA~M hrIHAH_sangs rgyas thams cad kyi sras gcig po:_gser gyi nyi ma rab tu snang byed:_gsang ba spyod pa sa bon gyi dgongs pa chen po yongs rdzogs kyis:_skal ldan skyes bu 'dus shing tshogs pa rnams kyi lus ngag yid gsum:_phung po khams dang skye mched thams cad byin gyis brlab tu gsol:_lus ngag yid gsum phung po khams dang skye mched rang sar grol nas:_yongs su smin par mdzad du gsol:_rgyal ba'i sku gsung thugs yon tan phrin las kyi klong du grol bar mdzad du gsol:_nyon mongs pa thams cad rang sar grol zhing:_rgyud ye shes kyi gang bar mdzad du gsol:_'khrul pa'i bag chags rang sar dag nas:_sku dang ye shes kyi thig le cher 'phel bar mdzad du gsol:_rgyal ba'i dkyil 'khor zhing rab 'byams mtha' yas par myur du sangs rgyas par mdzad du gsol:_sangs rgyas kyi sku gsung thugs yon tan phrin las dang bcas pas byin gyis brlab tu gsol:_oM AHhU~M kA ya wAka tsit+ta bud+d+habadz+ra rat+na pad+ma karma sarba d+harma swa b+ha wa a b+hi Shiny+tsa swA hA:_de ltar ji skad brjod pa thams cad nges par 'grub par gdon mi za ste gter gzhung rdo rje'i tshig rkang dngos las/_'di ni chos sku'i ring bsrel dngos:_sde snod rgyud lung man ngag dang:_rgyal ba yongs rdzogs srog 'khor yin:_spyi bo mgrin pa mchan khung du:_sus bcang sdig pa kun las grol:_dus gsum rgyal ba bsnyen dang mtshungs:_'das dus gdung dang ring bsrel dang:_sa g.yo sgra 'od 'ja' tshon 'byung:_zhes gsungs pa'i don la nges shes skyed de mnyam par zhog cig_/de ltar dbang thob phyin chad rdo rje 'chang gi dus gnad nges pa las ji ltar gsungs pa ltar 'khor lo drod dang ma bral bar bcangs shing rig stong 'od gsal chen po'i lta dgongs kyi ting nge 'dzin dang ma bral bas bklag pa sogs mdzod cig_/shis brjod sogs spyi ltar bya'o/_/de dag ni brgyud pa mi 'chad pa'i phyir bkod pa yin gyi bla sgrub dkyus kyi dbang la ril bu dang*/_btags grol ma bskur yang chad skyon du mi 'gyur ro/_/de dag gis klong chen snying gi thig le'i zab chos mthar thug yang gsang bla ma'i sgrub pa 'od gsal thig le'i rgya can gyi thun mong ma yin pa'i dbang bskur tshang sprugs su phul grub pa lags pas snang grags rig pa bla ma'i rdo rje gsum gyi dkyil 'khor du gdod nas lhun rdzogs chen por bzhugs pa'i gnas lugs dang mthun par lam du byed pas ye srung thig le chen po'i dam tshig rdo rje bzhi ru la bzla ba'i 'dun pas 'di'i rjes zlos mdzod/_gtso bos ji ltar sogs dam tshig khas blang*/_gtang rag yon 'bul gyi rjes dpon slob thams cad dga' ston tshogs 'khor dang*/_rdo rje'i glu gar yang byas rjes smon lam dang bcas te grol/_slob dpon gyis lhag ma nas brtsams cho ga'i las rim mthar dbyung dgos so/_/kun mkhye~Mn dgongs bcud zab gsang chos/_/ba~Mrtse bas 'gro la snang mdzad lam/_/smin grol 'oda~M zera~M 'bum phrag dpal/_/dus mthar gsal zhing rgyas la ltos/_/paN chen bi ma la dang kun mkhyen chen po dbyer med pa'i yang gsang bla ma'i sgrub pa 'od gsal thig le'i rgya can gyi smin byed rgyas par spros pa 'phros don dang bcas pa'i le'u tshan bcu pa ste 'od gsal sna tshogs rang grol gyis sbyar ba'o/__!__phrin las kyi rtsa ba rig 'dzin yum ka bde chen rgyal mo la'ang phyi nang gsang ba'i sgrub tshul gsum las kun gyi rtsa ba phyi sgrub bde chen dpal phreng gi byin rlabs dbang gi cho ga ni 'jam mgon pad+ma gar dbang gi gsung bde chen bcud 'bebs dang*/_rdo grub thams cad mkhyen pa bstan pa'i nyi ma'i gsung dbang gi mtshams sbyor mu tig chun po bzhugs bzhin dang*/_nang sgrub sgrol ma nyer gcig gi rjes gnang kun mkhyen gnyis pa mkhyen brtse'i dbang pos sngon gnas rjes dran gyis gtan la phab pa khyab bdag dpal mgon bla ma pad+ma ye shes rdo rje'am kun mkhyen chos kyi blo gros rin po che'i bka' drin gyis dpyid las snying gi bum par sim pa'i skal bzang mngon du gyur pa'i dpe rgyun thob na 'dir bzhugs su gsol dgos la/_nang sgrub las tshogs bzhi ba tshe dbang dang*/_bco brgyad pa sgrol ma rnal 'byor ma'i dug dbyung byab khrus rnams kun mkhyen nyid dang*/_rigs bdag 'od dpag med pa'i dbang chog rdo grub 'jigs med phrin las 'od zer dang*/_tshe dbang khol byung mkhyen brtse rin po che'i gsungs rnams dpe rgyun bzhugs bzhin pa'o/__!__stong chen dbyings kyi srog tu ye shes rtsal/_/stobs bcu'i dbang po'i mtshon gyis bdud sde'i grong*/_/'joms mdzad drag mo bdud 'dul seng ge'i zhal/_/rang rig gnyug ma'i thig ler dgyes rtsen mdzod/_/rig 'dzin yum ka'i gsang sgrub seng ge'i gdong can gyi dbang chog byin rlabs chun po la/_gzhung mthun gyi dkyil 'khor dbus su chos 'byung bsnol ma'i steng mkha' 'gro'i dpal gtor/_chos 'byung gi zur drug la 'khor rang 'dra drug_/rtsa bar mtheb kyu sum cu rtsa gnyis kyis bskor ba rgyan spros sku tsaka dar gdugs kyis spras pa dang*/_rak+sha'i phreng ba/_phyag mtshan khaT+wAM ga_/gri thod bcas dngos sam tsakli dang*/_phyi nang gi mchod pa dang las bum sogs spyi ltar tshogs par byas la/_brgyud 'debs nas brtsams las byang bsnyen pa'i bar gzhung bsrang*/_bdag mdun dbyer med du gsungs kyang rtogs dgongs dman na dzapa khang dbye la bsnyen sgrub kyi bzlas pa bya/_las bum sgrub pa dang tshogs skong sogs dang rig pa'i me tog dor te gnang ba zhus rjes/_slob ma rnams khrus nas dbyung*/_bgegs bsal/_srung 'khor bsgom rjes lo rgyus dngos la/_de'ang chos kyi dbyings las gdod nas rnam par dag pa'i rang rtsal bde chen byang chub kyi sems kyi rol pa shin tu phra ba'i rtsa rlung thig le nas rags par khams gsum gyi snod dang bcud du snang ba thams cad kun bzang mu kha le'i mkha' klong dbyings gsum gyi rang bzhin du ye nas shar ba rang byung rig pa rang sa zin nas ye shes chen po'i rtsal rdzogs pa bla na med pa'i he ru ka mngon rdzogs rgyal pos ye shes kyi ma mo rnams sku las sprul/_las kyi ma mo rnams dam la bzhag ste snang srid 'khor 'das kyi bde sdug thams cad ma mo'i cho 'phrul las byung zhing*/_legs nyes kyi stangs 'dzin pa'i mthu stobs dang rtsal che ba la dgongs nas ma mo'i rgyud sde mtha' yas pa gsungs pa las/_dur khrod chen po bsil ba'i tshal du mu stegs phra men gyi mkha' 'gro ma 'jig rten kun tu mi bde zhing sdug bsngal bar byed pa zhig byung ba 'dul ba'i don du dbyings kyi yum chen rdo rje phag mos rnam pa de dang mtshungs pa'i mkha' 'gro ma seng ge'i gdong pa can zhes bya bar sprul pas mu stegs kyi phra men ma bsgral/_de yi srog sngags kyang ye shes kyi sngags su byin gyis brlabs te/_ye shes las dang 'jig rten pa'i rig sngags thams cad kyi nus stobs gcig tu dril ba/_phyi nang gi byad dgra bdud bgegs mu stegs gdug pa can thams cad rig sngags bzlas pa tsam gyis 'joms pa'i gshed ma/_'jig rten pa dang 'jig rten las 'das pa sus kyang bzlog med bskal pa'i me chen bdud 'dul drag mo seng ge'i gdong pa can zhes grags pa 'di la gsar rnying gi bka' srol mi 'dra ba du ma zhig bzhugs pa las da lam skabs su bab pa 'di ni rig pa 'dzin thams cad kyi rgyal po slob dpon chen po pad+ma 'byung gnas rgyal po'i khab dang nye ba'i ri ma la ya gnam lcags 'bar ba seng ge'i za 'gram lta bur mkha' 'gro'i tshogs dpon mdzad cing bzhugs pa'i tshe mu stegs kyi ston pa b+ha na ba ti la sogs pa lnga brgyas slob dpon la rtsod pa byas pas ma thub ste/_slar khros nas ri sul zhig tu mu stegs kyi ngan sngags bcas chog nag po zhes bya ba bsgrubs pas mthu rtags chen po byung bas slob dpon nyid lag na rdo rje seng ge'i nga ro can zhes bya bar skur bzhengs te/_rig sngags kyi sbyor ba bshig pa'i ting nge 'dzin la snyoms par zhugs pa'i tshe/_mkha' 'gro bdud 'dul seng ge'i gdong can gyi zhal bstan nas rig sngags kyi dngos grub byin pas de nyid du mu stegs kyi ston pa ngan sngags mkhan gnam lcags thog gis bsgral/_phyi rabs kyi 'gro ba'i don du gdams pa zab mo 'di mkha' lding 'bar ba'i brda ris la bris te klong lnga 'dus pa'i gter sgrom du rgyas btab pas snyigs ma'i dus dmag 'khrug dang byad phur dar ba'i tshe chos 'dis skyob pa'i dus su bab pa na kun mkhyen rig 'dzin 'jigs med gling pa la dus gsum mkhyen pa o rgyan chen pos mngon sum du dgongs pa gtad cing*/_brda rgyud shog ser bya khra'i gzugs kyi lto ba la snyan brgyud mkha' 'gro'i brda yig tu shar ba las bsgyur ba rig 'dzin yum ka'i gsang sgrub mkha' 'gro seng ge'i gdong can gyi sgrub thabs te/_gter gzhung las/_tshogs brgyad bsgral ba'i dur khrod du:_chos nyid rang sgra chos nyid zer:_chos nyid 'od kyi klong dkyil nas:_dbyings kyi mkha' 'gro'i chos 'di gtad:_ces dang*/_gsang sgrub seng ge'i gdong can 'di:_shin tu zab phyir gud du sbas:_rnam bcas 'phur 'gro'i brda ris las:_rgyal rigs gang zag brgyud pa rdzogs:_zhes dang*/_lnga brgya phrag bcu'i mthar gnas tshe:_dam chos rnam gnyis mi shes par:_dam par khas 'che stobs 'byor 'gran:_rtags tsam 'dzin la dge 'dun re:_khyim rkun byed cing khyim sun 'byin:_bskyed rdzogs gdeng med sngags par rloms:_dkon mchog las kyang 'byung por dad:_de tshe mu stegs hin du yis:_kla klo g.yob cing bstan zhabs sdud:_nga sprul byang chub sems ldan rnams:_mtha' dmag byad phur bzlog la brtson:_zhes sogs smon lam gtad rgyas phyi ma'i gdul bya la ched du dgongs shing bsngags pa 'di nyid kyi dbang bskur zhu ba'i don du maN+Dal phul/_bla ma ye shes kyi mkha' 'gro ma dngos su gsal ba la mi phyed dad pas gsol ba 'debs pa 'di'i rjes zlos mdzod/_kun mkhyen ye shes phung po can:_srid pa'i 'khor lo rnam sbyangs pa:_de ring bshad pa'i rin chen gter:_gtso bos bdag la bka' drin stsol:_lan gsum/_rgyal ba thams cad bskyed pa'i yum kun bzang shes rab kyi pha rol tu phyin ma ye shes mkha' 'gro seng ge'i gdong pa can la rtsa gsum chos srung rgya mtshos bskor te bzhugs pa la 'di nas byang chub bar yid ches dad pas skyabs su 'gro ba dang*/_gdul dka' dmu rgod ma rung pa'i gdul bya gtso bor gyur pa'i yid can thams cad dpal he ru ka'i go 'phang la sbyor ba'i phyir byang chub sems dpa'i g.yar dam lhur len par bgyi'o snyam pas 'di'i rjes zlos mdzod/_ho:_yid chos rnam dag kun bzang yab yum la:_snang stong gnyis su med par skyabs su mchi:_'gro la dmigs pa'i snying rje chen po dang:_chos nyid de bzhin nyid du sems bskyed do:_lan gsum/_tshogs zhing de dag gi spyan sngar rgyun bshags yan lag brgyad pa tshul bzhin bya ba'i mos pas so so'i sgom don gsal thob la 'di'i rjes zlos mdzod/_rdo rje slob dpon sangs rgyas dpal/_sogs lan gsum/_rgyud sdom pa dang mi ldan na dbang gi snod du mi rung bas/_bde bar gshegs pa sras dang bcas pa'i bslab gzhi mtha' dag la rjes su slob cing byang chub spyod pa rgya mtsho ci nus su spyad par bgyi'o snyam du dam bca' rnam gsum brtan por bzung ba'i 'dun pa drag po dang ldan pas 'di'i rjes zlos mdzod/_bde bar gshegs pa khyed ci 'dra/_/de 'dra kho nar bdag gyur cig_/spyod pa rmad byung bsam yas pa/_/'gro la phan phyir bdag gis spyad/_/byang chub sems mchog dam pa dang*/_/sku gsung thugs kyi phyag rgya ni/_/srog gi phyir yang mi gtong na/_/rdo rje rgyal pos byin brlab mdzod/_/lan gsum/_de nas ye shes pa dbab pa'i slad du dmigs 'dun 'di ltar mdzod/_khyed rang gzhi lus tha mal du gnas pa'i mig gnyis la laM laM:_rna ba gnyis la kaM kaM:_sna bug gnyis la raM raM:_lce la maM:_lte bar saM:_snying gar gaM:_yig 'bru de rnams las 'bar ba'i 'od zer gyis rnam smin gyi lus rten dbang yul tshogs brgyad rnams bsregs shing sbyangs:_stong pa'i ngang las pad nyi bdud bzhi'i gdan la ye shes kyi mkha' 'gro ma seng ge'i gdong can sku mdog mthing nag_/phyag g.yas gri gug 'phyar zhing g.yon thod khrag thugs kar bzung ba/_/mchan g.yon du rdo rje'i khaT+wAM ga 'chang zhing zhabs g.yas bskum g.yon brkyang du bzhugs pa/_dbu la thod skam lnga'i dbu rgyan dang sku la rus pa'i phyag rgya lnga dang mi mgo'i phreng ba'i do shal dang seng ge'i g.yang gzhi gsol bar gsal ba'i gnas gsum du oM AHhU~M gis mtshan pa las 'od zer 'phros pas rang bzhin chos kyi gnas nas ye shes sems dpa' spyan drangs nas slob ma dam tshig sems dpar gsal ba dang gnyis su med par gyur/_zhes dmigs la spro na las byang gi spyan 'dren mthar/_oM badz+ra sing ha mu kha hU~M ha he phaT:_dz+nyA na a be sha ya a AH_zhes btags pa brjod cing rol mo dang bcas pas byin dbab/_tiSh+Tha badz+ras brtan par bya/_de nas dbang dngos la gtor ma 'di nyid mkha' 'gro seng ge'i gdong pa can dngos su gsal ba khyed rang gi spyi bor byon nas 'od du zhu ste thim pas phung khams skye mched gdan gsum tshang ba'i ngo bor smin/_seng ge'i gdong can dngos su gyur pa'i mos pa mdzod/_gtor ma spyi bor bzhag la/_ho:_skye ba med las gzugs su skyes:_snang stong dbyer med lha yi sku:_bum pa'i dbang gi ngo bo nyid:_sku lnga ye shes lnga rdzogs shog:_oM badz+ra sing ha mu kha hU~M ha he phaT:_ka la sha a b+hi Shiny+tsahU~M:_des sku yi byin rlabs lus la zhugs/_lus kyi sdig sgrib nad gdon bar chad byad phur thams cad zhi bar byas/_snang stong bum pa'i dbang thob/_sku gzi brjid stobs kyi dngos grub thob par mos shig_/gsung rdo rje phreng ba'i rnam par shar ba mgrin par bzhag pas rdo rje sngags kyi nus pa yongs su rdzogs par mos shig_/bgrang phreng mgrin par bzhag la/_A li thabs kyi ngo bo nyid:_kA li shes rab rang bzhin las:_zung 'jug yig 'bru bcu gnyis byung:_rten 'brel dus sbyor las skyes pa'i:_las rlung sngags su smin par shog:_oM badz+ra sing ha mu kha hU~M ha he phaT:_wAka a b+hi Shiny+tsa AH_de dang rjes su 'brel ba bzlas lung sbyin pa la/_mdun bskyed bdud 'dul drag mo'i thugs kar nyi ma'i dkyil 'khor gyi steng du hU~M mthing nag gi mthar sngags kyis bskor ba las mar me gcig las gnyis mched kyi tshul du byung*/_rig sngags kyi phreng bar gyur pa mgal me bzhin du thon te zhal nas brgyud/_khyed rang lhar gsal ba'i zhal du zhugs/_thugs kar nyi dkyil la hU~M gi mthar 'khod par mos la bsnyen sgrub kyi sngags 'di'i rjes zlos lan gsum mdzod/_oM badz+ra sing ha mu kha hU~M ha he phaT:_lan gsum/_aHkaHsaHmaHraHtsaHshaHdaHraHsaHmaHraHyaHphaTaH_lan gsum mthar/_dbyangs gsal rten snying brjod cing*/_bcom ldan 'das bdud 'dul drag mo seng ge'i gdong pa can gyi rig sngags kyi nus pa thams cad slob ma 'di rnams kyi rgyud la 'jug cing brtan par gyur cig_/ces brjod la me tog 'thor/_des gsung gi byin rlabs ngag la zhugs/_ngag gi sdig sgrib nad gdon bar chad byad phur thams cad zhi bar byas/_gsal stong gsang ba'i dbang thob/_gsung drag sngags nus pa'i dngos grub thob par mos shig_/thugs phyag mtshan khaT+wAM ga yab he ru ka'i ngo bo snying gar gtad cing bzhag pas khyed rang yum gnam zhal sing ha mu kha dang gnyis med mnyam par sbyor ba'i bde stong dga' bzhi'i ye shes rgyud la skyes par mos shig_khaT+wAM ga snying gar gtad de/_hU~M:_phyag mtshan thabs mchog bde ba che:_gsum pa'i dbang gi ngo bo nyid:_dga' bzhis sbyangs pa'i dpe'i ye shes:_rnam thar gsum ldan la gnas shog:_oM badz+ra sing ha mu kha hU~M ha he phaT:_dzaHhU~M ba~M hoH_d+harma d+hA tu a:_tsit+ta a b+hi Shiny+tsa hU~M:_des thugs kyi byin rlabs yid la zhugs/_yid kyi sdig sgrib nad gdon bar chad byad phur thams cad zhi bar byas/_bde stong gsum pa'i dbang thob/_thugs bde chen phyag rgya chen po'i dngos grub thob par mos shig_/yon tan gyi nus pa dang phrin las kyi rtsal gyis don gnyis lhun grub ye shes rdo rje'i byin rlabs yongs su rdzogs te tshar gcod rjes 'dzin gyi nus pa mthar phyin pa'i rtags su gri gug dang thod khrag gis dbang bskur bar mos shig_/gri thod lag g.yas g.yon du gtad la/_hU~M:_gri gug gzung 'dzin rtsa ba gcod:_thod khrag zhi rgyas chags pa'i nyams:_las bzhi lhun grub phyag mtshan 'dis:_phrin las rnam bzhi 'grub par shog:_oM badz+ra sing ha mu kha hU~M ha he phaT:_shIn+taM puSh+TiM wA shaM mA ra ya phaT:_des ye shes kyi byin rlabs rgyud la zhugs/_sgo gsum char la brten pa'i sdig sgrib nad gdon bar chad byad phur thams cad zhi bar byas/_snang gsum 'pho ba'i sgrib pa dag_/bzhi pa tshig dbang rin po che thob/_ye shes rdo rje mchog tu mi 'gyur bde ba chen po'i go 'phang mngon du byas par mos shig_/de dag gis rig sngags stong gi nus pa dang byad ma 'bum gyi mthu stobs kyang dran pa tsam gyis 'joms pa'i bdud 'dul drag mo seng ge'i gdong can gyi dbang bzhi legs par thob pa yin pas dam tshig khas blang ba 'di'i rjes zlos mdzod/_gtso bos ji ltar sogs dam tshig khas blang*/_maN+Dal yon 'bul dge bsngo sogs cho ga'i rjes rim bcas spyi ltar bya'o/_/mkhye~Mn gnyis rjes ba~Mrtse'i 'dzum pa las/_/zab gsang 'oda~M brgya'i zera~M phreng can/_/grub gnyis pad+mo'i nags klong gi_/lang tsho cir yang rgyas de rmad/_/yum ka bde chen rgyal mo'i gsang sgrub seng ge'i gdong can gyi dbang chog byin rlabs chun po bklag chog tu bkod pa'i le'u tshan bcu gcig pa ste lhan skyes dga' ba'i rdo rjes sbyar ba'o/__!__rig stong he ru ka dpal yab yum gyis/_/yid chos 'khrul rtog gzung 'dzin ru tra'i sde/_/bsgral las 'khor 'das rje btsan bka' srung tshul/_/lcam dral sde lnga'i tshul du bzhengs la 'dud/_/chos bka' 'di nyid kyi bla rdzogs thugs gsum yongs rdzogs kyi thun mong ma yin pa'i bka' srung ma mgon lcam dral gyi srog dbang thun mong ma yin pa'i chig brgyud bka' rgya ma bya ba la/_gnas khang rgyan gyis spras pa'i gung du gzhung mthun gyi sku rten bkram pa'i spyan sngar stegs bur khrag chang gis sbags pa'i steng*/_rdor rwa me ri'i dbus su khrag mtsho'i nang du thod mkhar gru gsum gyi lte bar nyi gdan la trag mthing ga_/mdun du b+h+yo dmar po/_g.yas su hU~M mthing ga_/rgyab tu k+Sha dud kha/_g.yon du triHdmar nag gis mtshan pa'i dbus su many+dzi'i steng gong gnon dpal chen 'dus pa'i gtor ma/_mdun du de las cung dma' bar ma mgon lcam dral gyi gtor ma dar gdugs sku tsaka can bshams/_mtha' bskor du sku'i rten sba lcags tshigs gsum pa/_me long la dngul lam sin+d+hu ras/_trag rak+sha mu tra mu:_ru lu ru lu hU~M b+h+yo hU~M:_rag+mo te keM tsa tsa:_ru lu ru lu ma hiM b+h+yo:_ma hA kA la shA sa na hU~M:_badz+ra sA d+hu tri:bris pa/_ma mo'i sku tsaka_/snying dang lcags spyang*/_nal bu'i thod par thun rdzas dug khrag gis bkang ba/_gsang thod/_g.yas su mgon po'i phyag mtshan tsan+dan gyi bing dngos sam tsakli/_ru mtshon nag po dang snying zhags/_g.yon du pha waM long bu la gser gyis srog sngags badz+ra sA d+hu tri:bris pa rnams dang*/_mtha' bskor du drag po'i nyer spyod/_sman raka_/'bul gtor/_sha khrag_/zas sna/_ja chang gi skyems sogs dang*/_tshogs mchod/_chad brtan bcas gtsang la dag par 'du byas la/_bdag bskyed dpal chen 'dus pa'i las byang rgyas 'bring bsdus pa gang rung gi bskyed bzlas bsdu ldang bcas sngon du 'gro bas ma mgon lcam dral gyi bstod pa'i rjes/_bzlas pa bya ba ni/_mdun bskyed kyi thugs kar nyi ma la gnas pa'i trag yig gi mthar sngags kyi phreng ba mthing nag g.yon bskor du 'khor bar bdag nyid dpal chen por gsal ba'i thugs ka'i sa bon las byung ba'i 'od zer phog pas thugs rgyud rab tu bskul nas ci 'dod pa'i phrin las rab 'byams thogs med du sgrub par gyur/_zhes brjod la he ru ka'i yig brgya nyer gcig dang*/_gong gnon gyi bzlas pa sngon du 'gro bas/_trag rak+sha mu tra mu:_ru lu ru lu hU~M b+h+yo hU~M:_rag+mo te keM tsa tsa:_ru lu ru lu ma hiM b+h+yo:_ma hA kA la shA sa na hU~M:_badz+ra sA d+hu tri:_zhes ci nus bzlas mthar/_hU~M/_dngos su 'byor pa'i mchod pa sna tshogs dang*/_/yid sprul zag med kun tu bzang po'i sprin/_/bde stong zung 'jug chen por mnyam sbyor bas/_/lcam dral bka' sdod 'khor bcas mnyes gyur cig_/shrI badz+ra d+harma pA la sa pa ri wA ra ar+g+haM sogs kyis mchod/_hU~M/_drag shul rdo rje'i lang tshor 'bar ba'i sku/_/mi shigs brjod bral nA da'i rang bzhin can/_/'gyur med rnam pa kun gyi mchog ldan thugs/_/lcam dral bka' sdod 'khor dang bcas la bstod/_/ces bstod/_srog gtad dngos la/_dam tshig thub nges pa dang brgyud pa zin nges kyi slob ma bos la/_khrus bya/_bgegs gtor bsngos shing bskrad/_srung 'khor bsgom la mtshams sbyor gyi khyad par/__'o skol rnams rten khyad par can rnyed pa don yod par bya ba'i phyir sangs rgyas kyi bstan pa'i sgor zhugs shing*/_byang chub kyi lam sgrub pa'i bar chad kyi rkyen las skyob byed theg pa chen po'i dge 'dun gyi bye brag srung ma mthu dang ldan pa zhig bsten pa gal che/_srung ma de la'ang 'jig rten pa bsten na rang nyid 'khor ba las ma thar bas gzhan skyob mi nus pa ma zad/_gnas skabs phan pa chung ngu tsam 'grub tu srid kyang mthar log pa'i lam la sbyor ba dang*/_'khu ldog phra mo tsam gyis kyang lus srog la bar du gcod pa sogs nyes dmigs che zhing phan yon chung bas na/_'jig rten las 'das pa'i srung ma khyad par can bsten dgos/_de yang rgyud sde rin po che rnams las rigs bsam gyis mi khyab zhig gsungs pa las/_'khor 'das kyi stong srog rnam thar sgo gsum gyi rang bzhin rdo rje btsun mo ste/_don dam lhag pa'i bden pa dbyer med chos sku yum chen mo nyid/_rnam pa bstan srung dbyings kyi rgyal mo'i tshul bstan pa 'di gtso bo khros ma gsang ba'i rgyud dang*/_a ti dang ma hA yo ga'i rgyud du ma nas bstan cing*/_rdo rje theg pa'i gsang sngags spyi dang khyad par rdzogs pa chen po'i rgyud dang sgrub thabs man ngag thams cad kyi bka' srung gi gtso bo ste/_ngo bo chos dbyings bde ba chen po'i klong na 'khor 'das thams cad bskyed bsdu'i bdag nyid dpal kun tu bzang mo/_rang bzhin sprul pa'i zhing dur khrod me ri 'bar ba na ye shes kyi mkha' 'gro ma e ka tsa Ti spun drug_/bran mo bcu bzhi/_g.yog mo lnga cu rtsa brgyad/_yang g.yog 'bum khri 'bum stong la sogs pa dang*/_nyi shu rtsa bzhi sprul pa'i yul na ma mo mkha' 'gro kun gyi rje mo sogs spyi dang bye brag gi mtshan dang sku yi bkod pa'i cho 'phrul/_sngon bskal pa mang po'i gong rol tu byang chub mchog tu thugs bskyed nas rim bzhin las dang smon lam gyi rnam par smin pa'i 'bras bu dus su sad pa las/_deng 'dir 'dod pa khams kyi dbang phyug ma gtso 'khor can du gyur cing ston pa thub pa'i dbang po'i bstan srung yongs kyi gtso bor dbang bskur ba 'di nyid kyi sngon gyi rabs dang skye rgyud/_da lta gang la bstan pa'i phrin las kyi mdzad tshul/_ma 'ongs pa na zhing gang du 'tshang rgya bar 'gyur ba sogs 'phags pa lha mo dpal chen mo lung bstan pa'i mdo dang gser 'od dam pa mdo sde'i dbang po'i rgyal po dang*/_gser 'od mchog tu rgyas pa rnam par rgyal ba gnyis kyi le'u bcu drug pa dang bcu bdun pa gnyis dang bsdus pa'i le'u nyer gcig pa dang*/_khyad par lha mo 'di nyid kyi sgos rgyud mkha' 'gro ma me lce 'bar ba'i rgyud sogs du ma nas gsal bar bstan pa khungs dang zin so che zhing*/_slob dpon pad+mas mdzad pa'i ma mo'i srog sgrub rtsa ba dang*/_las mdzad skor gyi sgrub pa/_yang snying gnubs kyi man ngag sogs gter ma dang*/_phur srung bdag nyid re ma ti'i sgrub thabs lang lab ma sogs bka' ma nas byung zhing*/_rgyud las/_lha mo klu mo gnod sbyin mo/_/dri za grul bum 'byung po dang*/_/cir yang sprul pa'i rdzu 'phrul can/_/ming brgya ma la mtshan stong ma/_/zhes gsungs pas nam gru re ma ti zhes ye shes kyi ma mo thams cad kyi khyab bdag tu gyur pa ste/_skabs 'dir ye shes kyi ma mo e ka tsa ti ltar sgrub pa 'di la yi dam ltar sgrub pa dang*/_chos skyong ltar sgrub tshul ji snyed cig yod pa las/_'dir chos skyong ltar sgrub pa yin/_de la yang ma mo rang rkyang du sgrub pa dang*/_dregs pa gzhan gyi 'khor can sgrub pa gnyis las/_phyi ma ltar sgrub pa ste/_de yang 'khor gyi ging chen gsum pho nya dang bcas pa rnams kyang dregs pa rang rgyud pa ma yin te/_thabs mchog sbyor ba'i ging chen dpal mgon ma ning nag po bcom ldan 'das kun bzang che mchog he ru ka nyid gdul bya gdug pa can 'dul ba'i ched du dpal ye shes kyi mgon po'i skur bzhengs nas/_'jig rten dang 'jig rten las 'das pa'i dregs pa pho rgyud thams cad kyi rje btsan/_mthu stobs nus pa'i byin rlabs 'gran du med pa'i bstan srung thams cad kyi gtso bo dang*/_shes rab sbyor ba'i ging chen dam can rdo rje legs pa 'di ni/_rnam rol ye shes dang las dang 'jig rten gyi rdo rje legs pa sogs sku dang mtshan gyi rnam 'gyur du ma bstan kyang don du ye shes kyi dbyings su 'phags pa 'jig rten dbang phyug dang gnyis su med kyang*/_rnam pa nub phyogs pha waM long bu'i sku mkhar du dpal rta mgrin gyi sprul pa/_sangs rgyas kyi bstan pa srung phyir dregs pa rang rgyud pa ltar bstan nas dpal gsang ba'i bdag pos dbang bskur bstan pa srung bar bka' bsgos pa bzhin khas blang dam la gnas pas bkra shis la byin chags/_rgyud 'jam la snying brtse/_dpa' zhing brtul phod mthu rtsal che zhing*/_khyad par rdzogs pa chen po'i bka' srung thun mong ma yin pa dang*/_gsang ba'i sgrol ging gza' bdud chen po ni klu srin bshos pa'i sras mchog mthu nus lhag par che zhing drag rtsal myur mgyogs kyi phrin las dang ldan pas 'jig rten dregs pa sde brgyad thams cad kyi rje bo/_rig 'dzin shrI sing ha dang slob dpon chen po pad+ma'i bka' srung mchog tu bsngags pa dang*/_sbas pa'i dkor srung dur khrod lha mo ni rnal 'byor gsang mtha'i rgyud las gsungs pa'i yul nyer bzhi'i nang tshan de wi ko Ta'i zhing skyong lang+ka'i dbang phyug nyid dkor nor srung ba'i ma mo dur khrod kyi 'dre mo'i tshul du bstan pa rdo rje rnal 'byor mas skye brgyud sgrub thabs dang bcas pa bstan nas ming sring brgyad kyi mtshan dang sprul pas phyi ru rno myur che/_nang du snying nye ba sogs te rnam pa thabs shes dang gtso 'khor gyi rol pas phrin las gang 'dul rnam 'gyur can du ston yang ngo bo gdod ma'i mgon po'i ye shes las gnyis su med pas na/_mdor na theg mchog rdzogs pa chen po'i thun mong ma yin pa'i bka' srung*/_kun mkhyen chos kyi rgyal po yab sras kyi phrin las kyi pho nya ba thams cad gcig dril du sgrub pa rdzogs pa chen po klong chen snying gi thig le'i bla rdzogs thugs gsum gyi bka' srung thun mong ma yin pa dpal ldan ma mgon lcam dral gyi srog dbang chig brgyud ma sbyin pa la slob ma'i bya ba maN+Dal phul/_bla ma dpal chen he ru ka dngos su gsal ba la gsol ba 'debs pa 'di'i rjes zlos mdzod/_don dam dbyings las ma g.yos kyang:_'gro ba 'dul phyir sprul pa'i sku:_bka' srung ma mgon lcam dral gyi:_srog dbang bdag la bstsal du gsol:_lan gsum/_'o rigs kyi bu khyod de ltar 'dod na gsang ba'i bka' srung ches gnyan la bstan du 'phang pa'i bka' gtad yin pas bdag gi gces nor theg mchog rdzogs pa chen po'i bstan pa'i srog 'dzin zhing gcig tu gzhan don byed nus na sbyin gyi rang bzhin thod rgal du bstan bya ma yin zhing*/_dbang byin nas rdo rje'i dam tshig las nam yang 'da' rung ba ma yin pas khe nyen shes par gyis la dpal chen he ru ka'i 'da' dka' srog gi mna' chu 'di 'thungs la bag yod par gyis shig_/theg mchog rdzogs pa chen po yi:_lam nas rang gzhan don nus na:_dbang bskur sbyin gyi gzhan du min:_mna' chu 'di 'thungs dam tshig srungs:_'gal na srog la hur thum byed:_sa ma ya i dan na ra kan:_zhes nang mchod sbyin/_bla ma dpal chen po skyabs yul rgya mtsho mngon sum bzhugs pa'i spyan sngar bsags sbyang gi snying po yan lag brgyad pa'i rgyun bshags 'di'i rjes zlos mdzod/_rdo rje slob dpon sangs rgyas dpal sogs lan gsum/_de nas srog dbang gi gzhi 'god pa'i slad du ye shes pa dbab pa la/_khyed rang gang du gnas pa'i khang pa 'di nyid rang bzhin sprul pa'i sku'i zhing khams dbus phyogs me ri 'bar ba drag po'i zhing gi bkod pa tshad med pas brgyan pa 'jigs su rung zhing skyi g.ya' ba'i dbus su khyed rang slob ma rnams pad nyi'i steng du e las sngags kyi bdag mo kun tu bzang mo mthing nag mche ba gtsigs shing brkyang bskum du bzhugs pa'i phyag na dam tshig gi gaN+De 'phred la 'dzin cing*/_mi lpags kyi g.yang gzhi gsol ba'i dpral bar oM dkar po/_mgrin par AHdmar po/_snying ga'i stod du hU~M sngon po/_smad du nyi gdan la trag yig smug nag gis mtshan pa la slob dpon dpal chen por gsal ba'i gsang ba gsum gyi zil dang*/_thugs srog hU~M gi 'od zer gyis phog pas de las 'od zer dpag tu med pa 'phros/_rang bzhin gyi gnas chos dbyings yum gyi mkha'/_dur khrod me ri 'bar ba nas dpal ldan ma mgon lcam dral ye shes las dang 'jig rten gyi 'khor dang bcas pa byon nas ye shes pa rnams slob ma la thim pas rdo rje'i gzi byin mchog tu 'bar/_'jig rten pa rnams mtha' bskor du bka' sdod kyi tshul du 'khod par bsam/_gu gul dang tshil chen la khyad par gyi spos sbyar ba bsregs/_thod rnga dang rol mo/_zhing dang ro ras dar nag gi g.yab mos bskul te/_oM ru lu ru lu hU~M b+h+yo hU~M:_trag rak+sha mu tra mu:_ru lu ru lu hU~M b+h+yo hU~M:_rag+mo te keM tsa tsa:_ru lu ru lu ma hiM b+h+yo:_ma hA kA la shA sa na hU~M:_badz+ra sA d+hu tri:_a be sha ya a a a:_zhes brjod pas dbab/_tiSh+Tha badz+ra sa brtan par bya/_de nas srog dbang dngos la gsum las/_dang po gtso mo dbyings kyi rgyal mo'i sku gsung thugs yon tan phrin las kyi bka' gtad nas srog snying gcig tu bsre ba la/_ma mo'i sku yi rten sba 'khar tshigs gsum pa 'di snying gar gtad pas tshogs brgyad skye 'gag gnas gsum dang bral ba'i mkha' klong dbyings gsum gyi dgongs pas sku yi srog la dbang thob par mos shig_/sba 'khar gtad la/_hU~M:_rnam pa kun gyi mchog ldan ni:_tshogs brgyad dag pa'i ma mo'i tshul:_kun tu bzang mo'i dam shing 'di:_sku yi rten du khyod la gtad:_trag rak+sha mu tra mu:_ru lu ru lu hU~M b+h+yo hU~M:_rag+mo te keM tsa tsa:_ru lu ru lu ma hiM b+h+yo:_kA ya a b+hi Shiny+tsa.oM:_gsung gi rten sngags byang mgrin par bzhag cing gtad pas grags stong skye 'gag gnas bral gzhom med rdo rje'i gsung gi nus pas phrin las rnam bzhi thogs med du 'grub nus pa'i gding thob par mos shig_/me long sngags byang can gtad la/_srog gi snying po rlung yin te:_sgra ni yi ge 'khor lo'i sprin:_grags stong gsung gi dbang bskur bas:_phrin las rnam bzhi 'grub par shog:_rtsa sngags mthar/_wAka a b+hi Shiny+tsa AH_rjes 'brel du bzlas pa'i lung sbyin pa la/_slob dpon la mos gus drag tu byas pas de yi thugs ka nas 'od zer tsha zhing rtsub pa spros/_mdun gyi ma mo'i thugs kar phog pas sngon gyi dam bca' dran te sgrub pa po la rjes su brtse bas thugs kar nyi ma la srog yig sngags phreng gis bskor ba las sngags kyi phreng ba byung*/_zhal nas thon/_khyed rang sngags kyi ma mor gsal ba'i snying gar thim pas srog snying gcig tu 'dres par bsam la sngags 'di'i rjes zlos mdzod/_trag rak+sha mu tra mu:_ru lu ru lu hU~M b+h+yo hU~M:_rag+mo te keM tsa tsa:_ru lu ru lu ma hiM b+h+yo:_trag rak+sha e ka tsa Ti sarba shIn+taMku ru swA hA:_trag rak+sha e ka tsa Ti sarba puSh+TiM ku ru swA hA:_trag rak+sha e ka tsa Ti sarba wA shaM ku ru swA hA:_trag rak+sha e ka tsa Ti dgra bgegs 'byung po mA ra ya phaT:_las bzhi'i sngags sham btags pa lan gsum bzla bzhin me long gi sngags byang bkrus la slob mar sbyin/_thugs ye shes kyi dgongs pa rig stong zung 'jug mtshon pa'i phyir me long du ma mo'i sku 'char ba bstan te ngo sprad pas thugs kyi bka' gtad par mos shig_/me long du ma mo'i sku 'char ba bstan te/_a:_snang zhing srid pa'i chos so cog:_thams cad ma mo mkha' 'gro'i dal:_dran pa rang byung ye shes kyi:_yul dang dbang po gnyis med sbyor:_ma mo 'bum sde'i stong srog yin:_zhes brjod la dgongs pa gtad/_bde stong ye shes chen por gdod nas bral smin gyi yon tan mngon par rdzogs pa'i dgongs pa la dbang thob pas srid pa'i g.yul las rgyal ba'i brdar bdag 'dzin ru tra'i don snying dang*/_tshogs brgyad dag pa'i dur khrod nyul ba'i lcags spyang gi phra thabs gtad pas yon tan gyi bka' gtad par mos shig_/phyag mtshan gnyis gtad la/_phung po lnga la bdag 'dzin gyi:_ru tra'i don snying za ba dang:_lhan cig tshogs brgyad tshar gcod pa'i:_lcags spyang phra thabs khyod kyis zungs:_rtsa sngags mthar/_gu Na a b+hi Shiny+tsa hU~M:_dbyings rig gnyis med rang byung thugs rje kun tu khyab pas tshar gcod rjes 'dzin gyi phrin las bzhi mthar phyin pas byang chub kyi spyod pa yongs su rdzogs pas zhi ba'i mtha' las 'das pa'i phrin las kyi bka' gtad par mos shig_/nal bu'i thod par dug khrag gis sbags pa'i thun rdzas gtad la/_hU~M:_ma ni snying po byang chub sems:_mo ni rang byung ye shes dpal:_gang nas bos kyang khyod kyi mtshan:_'dod khams bdag mos phrin las kun:_thogs pa med par sgrub par shog:_trag rak+sha e ka tsa Ti sarba shIn+taMku ru swA hA:_trag rak+sha e ka tsa Ti sarba puSh+TiM ku ru swA hA:_trag rak+sha e ka tsa Ti sarba wA shaM ku ru swA hA:_trag rak+sha e ka tsa Ti dgra bgegs 'byung po mA ra ya phaT:_zhes las bzhi'i sham can bzla/_dpal ye shes kyi ma mo sngags srung rdo rje rag gdong ma 'khor dang bcas pas brgyud gsum rig 'dzin bla mas rdo rje'i tha tshig ji ltar bsgos pa bzhin rdo rje'i slob ma 'di'i phrin las rnam pa bzhi ji ltar 'dod pa bzhin mdzod cig_/ces dam tshig gi dmod pa brdar/_de ltar na khyed rang gi sgo gsum bya byed dang bcas pa ye shes dbyings kyi rgyal mo'i sku gsung thugs yon tan phrin las dang dbyer med du byin gyis brlabs pas ye shes kyi ma mo dang thabs mchog rdo rje srin po dpal chen he ru ka rjes su chags pa'i sbyor bas snyom par zhugs pa'i byang chub kyi sems bdud rtsi lce la byin pa rol pas lus gnas thams cad la khyab/_'khrul rtog dbyings su nub pas bde stong mi shigs pa'i dgongs klong mngon sum du sad nas yid chos 'khrul pa'i rtog pa ka dag stong dbyings nyid du thim pa'i mos pa mdzod/_gsang rdzas bdud rtsi byin la/_hU~M:_bya byed yid chos rnam dag pa'i:_yab yum mnyam par rol pa'i sprin:_rgyu drug rkyen bzhi las byung ba'i:_byang chub sems la rtag tu rol:_a ho ma hA su kha d+harma d+hA tu ho:_de nas nges don srid zhi'i spyi dpal chen po thabs mchog rdo rje srin po dpal ldan ye shes kyi mgon po ma ning nag po'i rjes su gnang ba sbyin pa la/_thog mar sku yi rjes gnang gi slad du rnam pa dkar phyogs dgra lha'i dmag dpon gyi tshul bstan pa'i phyag mtshan tsan+dan gyi bing chen sprul pa'i dmag dpung 'bum gyi rdzong chen gtad pas sde gsum ru tra'i g.yul las rnam par rgyal ba'i he ru ka dpal chen po'i sku yi rjes gnang thob par mos shig_/tsan+dan gyi bing chen g.yas su gtad la/_hU~M:_lha chen dpal 'bar chen po yi:_sprul pa'i dmag dpung 'bum sde'i mdzod:_g.yul las rnam rgyal bing chen 'di:_sku dang gnyis su med par zungs:_ma hA kA la shA sa na kA ya badz+ra oM:_gsung gi rjes gnang gi slad du slob dpon he ru ka'i thugs srog gi 'od zer gyis bskul bas dpal mgon gyi thugs srog hU~M las sngags phreng byung zhal nas thon/_slob ma'i khar brgyud snying ga'i hU~M la thim pas gsung gi rjes gnang thob par mos la sngags 'di'i rjes zlos mdzod/_ma hA kA la shA sa na hU~M:_lan gsum bzla/_thugs kyi rjes gnang gi slad du dpal ldan ye shes kyi mgon po'i thugs srog ye shes kyi ngo bo mtshon pa'i ru mtshon dang srid zhi'i stong srog la dbang bsgyur ba'i snying zhags phyag g.yas g.yon du gtad pas 'khor 'das thams cad kyi stong srog la dbang thob par mos shig_/ru mtshon dang snying zhags gtad la/_hU~M:_kun tu bzang po'i rol pa las:_byang chub sems kyi ru mtshon ni:_bdag 'dzin ru tra'i gshed po ste:_thugs kyi rten du gces par zungs:_rtsa sngags mthar/_tsit+ta badz+ra hU~M:_de nas sgrol ging bka' yi las byed sde brgyad dregs pa'i tshogs rje skyes mchog badz+ra sA d+hu'i sku rten pha waM long bu/_gsung rten gser gyi sngags byang*/_thugs rten rdo rje dang tsit+ta gtad pas las kyi shan pa chen po'i sku gsung thugs kyi bka' gtad thob par mos shig_/pha waM long bu/_gser gyi sngags byang*/_rdo rje dang tsit+ta gtad de/_hU~M:_pha waM long bu sku yi rten:_sngags byang gsung la rdo rje thugs:_dam nyams bsgral ba'i dpa' rtags snying:_gtad pas dam can 'khor dang bcas:_lus dang grib bzhin 'grogs gyur cig:_badz+ra sA d+hu tri dzaH_sa ma ya hU~M:_de nas gtso 'khor yongs rdzogs kyi bka' gtad pa la/_gtor ma 'di dag dpal ye shes kyi ma mo sngags kyi srung ma/_'khor sku gsung thugs las sprul pa'i ma mo gsum/_ye shes kyi ma mo lnga/_rje mo bcu bzhi/_dman mo lnga cu rtsa brgyad sogs snang srid ma mo'i 'khor tshogs bsam gyis mi khyab pas bskor ba/_g.yas su sbyor ging dpal mgon ma ning nag po sprul pa'i mgon chen sde lnga/_dpal mgon bdun cu'i dmag tshogs dang bcas pa/_g.yon du sgrol ba'i ging chen skyes mchog rdo rje legs pa the'u rang stong sde dang bcas pa/_rgyab tu gsang ba'i sgrol ging gza' bdud srog gi spu gri gza' brgyad gdong mo bzhi dang bcas pa/_mdun du sbas pa'i dkor srung dur khrod lha mo ming sring brgyad dang bcas pa mdor na srid pa ma mo'i dkyil 'khor du dam tshig dang thugs rjes 'khod pa'i sngags srung dregs pa'i tshogs dang bcas par gsal ba'i steng gi cha la rtsa brgyud kyi bla ma sangs rgyas byang sems yi dam dkyil 'khor gyi lha tshogs dang bcas pa sprin bzhin du gtibs pa la slob dpon spyi dpal chen po'i nga rgyal gyis bka' bsgos te phrin las bcol bar mos shig_b+h+yo:_sum cu rtsa gsum lha yul na zhes sogs mthar/_dpal ye shes kyi ma mo sngags srung khros pa'i rgyal mo/_dpal mgon ma ning nag po/_dam can rdo rje legs pa/_drang srong gza' bdud chen po/_dkor srung dur khrod kyi lha mo rnams so so'i 'khor g.yog pho nya las mkhan dang bcas pa rnams kyis chos sku kun tu bzang po/_longs sku rdo rje sems dpa'/_sprul sku dga' rab rdo rje/_slob dpon 'jam dpal bshes gnyen/_rig 'dzin shrI sing ha/_mkhas pa dz+nyA na sU tra/_paN chen bi ma mi tra/_slob dpon pad+ma thod phreng*/_mkha' 'gro ye shes mtsho rgyal/_lo chen bai ro tsA na/_mnga' bdag khri srong lde'u btsan/_kun mkhyen klong chen rab 'byams/_rig 'dzin 'jigs med gling pa/_'jigs med phrin las 'od zer/_'jigs med rgyal ba'i myu gu/_'jam mgon rdo rje gzi brjid/_mkhan chen dkon mchog grags pa/_'gro 'dul dpa' bo rdo rje/_khyab bdag pad+ma ye shes rdo rje'i bar du byon pa'i brgyud gsum rig 'dzin bla ma rnams kyi bka' dang dam las ma 'da' bar rdo rje'i slob ma 'di rnams la sku gsung thugs yon tan phrin las kyi sgo nas dbang dang dngos grub stsol ba dang*/_sangs rgyas kyi bstan pa srung ba la nus mthu dang ldan par mdzad du gsol/_slob ma rnams kyi srung ma chen po mdzad nas/_lus dang grib ma bzhin du 'grogs te/_'gal rkyen sol/_mthun rkyen sgrubs/_mthu dang dpung bskyed/_bsam pa sgrubs/_re ba skongs/_yid la bsam pa'i don thams cad bde blag tu sgrubs/_mthar thug phyag rgya chen po mchog gi dngos grub la yang dag par sbyor cig_/ces gsol bas gtor ma'i lha tshogs las lcam dral gnyis 'od du zhu nas slob ma la thim/_rang rgyud can du ston pa rnams lus dang grib ma bzhin du 'grogs pa'i dam tshig nos par bsam la/_gtor ma'i phud cung zad dngos grub kyi tshul du byin/_nang mchod kyi bdud rtsi byin nas dam tshig gcig tu 'dres par bsam la/_gdod ma'i mgon po yab yum kyang:_khyod las gzhan du med pa'i phyir:_rtag tu rdzogs pa chen po sgom:_gtor tshogs mchod pa rgyun mi gcod:_lcam dral sgrub pa'i dam tshig kun:_deng nas tshul bzhin gzung bar gyis:_lan gsum rjes zlos bya/_de lta bu'i thun mong ma yin pa'i bka' gtad chig brgyud can legs par thob pas srung ma rnams rtag tu mi 'bral bar 'grogs pa chos nyid yin pas/_khyed rnams kyis kyang dam tshig rnam par dag par bsrung dgos te/_spyir mchod gtor gsol bskang ma chag par brtson pa dang*/_lcam dral rgyu ba'i dus gnyan la phud skong dang bshags phrin nan tan du bya ba dang*/_snod du ma gyur pa rnams la lha sngags dam rdzas rnams sba ba dang*/_bya nag dang khyi nag bong drel la mi rdeg pa dang*/_mgar yugs kyi grib la 'dzem bag bya/_sha rkyang la rngon dang ku co bya ba dang*/_bya nag rma bya bskrad pa dang khyo shug dbral ba dang*/_byi nal la khros pa/_thab gzhob shor ba dang*/_rdo rje theg pa spyi dang khyad par gyi dam tshig rnams srung snyam pas dam tshig khas blang ba 'di'i rjes zlos mdzod/_gtso bos ji ltar bka' bstsal sogs dang*/_gtang rag lus 'bul dge bsngo byas la slob ma rnams grol/_slob dpon gyis phud skong tshogs dang mnga' gsol sogs rgyas par byas la phrin las kyi gnyer gtad pa rnams bya'o/__/yang thun mong gi slob ma la gtor ma'i bka' gtad tsam byed na/_lo rgyus nas brtsams ye shes dbab pa yan song nas/_gtso 'khor yongs rdzogs gtor ma'i bka' gtad tsam byas nas/_dpal ldan ma mgon lcam dral 'khor dang bcas pa rnams kyis sgrub pa po'i sdong grogs mdzad par zhal gyis bzhes par mos shig_/ces brjod la bdud rtsi mi sbyin par dam tshig khas blang nas mthar dbyung bas gsang ba gzhan dang sgo bstun na rung ngam snyam pa ni kho bo'i rnam rtog go_/phrin las rtsa ba bka' gnyan srung ma'i zil/_/'jigs kyang snang ba hol rgyug slob dpon gyi/_/'gal 'khrul nongs pa bsal phyir mang+ga la/_/bdud 'dul drag po rtsal gyis sug las so/_/snying thig gnyan po'i bka' srung lcam dral gyi bka' gtad chig brgyud kyi le'u tshan bcu gnyis pa ste sngags ban rgan pos sbyar ba'o/__!__bde stong sgyu ma chen po'i lang tsho'i dpyid/_/srid zhi'i mtshar sdug rdzogs pa'i ri dwags 'dzin/_/'dod dgu'i phrin las bdud rtsi'i zer 'dzag pas/_/sgrub mchog rjes skyong dpa' mo des skyongs shig_/rdzogs pa chen po klong chen snying gi thig le'i thun mong ma yin pa'i bka' srung sman btsun chen mo tshe ring mched lnga'i srog dbang sbyin par 'dod pas/_grong yul ma yin pa gtsang ma dge ba'i gnas khang byi dor rgyan gyis spras pa'i gung du gzhung mthun sku yi mdun stegs mtho bar rdul tshon nam ras bris kyi pad+ma 'dab bzhi'am/_dar ras kyis g.yogs pa'i dbus su 'bru dkar gyi tshom bu gtso 'khor lnga bkod pa'i dbus su many+dzi'i steng rigs 'dus kyi gtor ma dar gdugs tsaklis brgyan pa'i mdun du sman btsun ma'i gtor ma bum pas btegs pa'i 'brang rgyas gtso 'khor lnga la tshe ring mched lnga'i sku tsaka so so dang*/_rma bya'i sgro mdongs dang*/_rang mdog gi dar snas brgyan pa'i sder kha so sor dbus dang phyogs bzhir bkod/_mda' dar kha dog lnga dung dkar me long gis brgyan pa dang*/_'byor na bla rdo/_mu tig_mu men/_gser thig_pad rAg_/g.yu gong skyon med kyi bla rdo'ang mda' dar so sor gdags/_mchod gtor bzang po kha zas sna tshogs dang shing tog gis bskor ba dang*/_g.yas g.yon du sman raka_/mtha' skor du nyer spyod/_gzhan yang phye mar/_rgya phor dang dngul phor du gser skyems dang g.yu skyems/_dkar gsum/_'o chol/_sman sna spyan gzigs dkor cha mthun rdzas rgyas par 'du byas na slob bu'i longs spyod kyi rten 'brel yin par gsungs/_cho ga dngos la bdag bskyed rig 'dzin 'dus pa'i las gzhung bsrang la bzlas pa bsdu ldang bcas bya/_ra~M ya~M kha~M/_stong pa'i ngang las gnas khang thar pa chen po'i gzhal med phun sum tshogs par a las b+hany+dza 'bar ba'i snod bzang zhing rgya che ba rnams su hU~M yig las byung ba'i mchod yon/_zhabs bsil/_me tog_bdug spos/_mar me/_dri chab/_zhal zas/_rol mo la sogs pa mchod pa'i dngos po rnams 'dod yon gyi rnam pa ma tshang ba med pa 'phags pa kun tu bzang po'i mchod pa'i sprin gyi phung po lta bus nam mkha'i mtha' klas pa gang bar gyur/_oM badz+ra ar+g+haM AHhU~M nas/_shab+da'i bar gyis byin gyis brlab/_oM AHhU~M/_na maHsarba ta thA ga ta sogs nam mkha' mdzod sngags lan gsum dang*/_ra~M ya~M kha~M/_stong pa'i ngang las ya~M las rlung*/_ra~M las me/_kaM las mi mgo'i sgyed pu gsum la brten pa'i a yig las byung ba'i thod pa'i snod du bcud thams cad hU~M oM swA AM hA mUM lAM mAM pAM tAM las bdud rtsi lnga dang sgron ma lngar gyur pa so so'i sa bon gyis mtshan pa dang bcas pa'i 'og gi rlung g.yos me sbar rdzas thams cad zhu zhing 'dres pa'i steng gi nam mkha' la oM AHhU~M gi yi ge gsum gnas pa las 'phros pa'i 'od zer gyis de bzhin gshegs pa thams cad kyi thugs ka nas ye shes kyi bdud rtsi bkug yi ge gsum la thim ste rim par zhu ba las dam tshig gi rdzas dang ro gcig tu gyur/_oM AHhU~M sarba pany+tsa a mr-i ta hU~M hrIHTha/_oM AHhU~M ma hA rak+ta dz+wa la maN+Dal hU~M hrIHTha/_oM AHhU~M ma hA ba liM ta te dzo ba liM ta ba la ba te gu hra sa ma ya hU~M hrIHTha/_sman gtor rak+ta'i sngags so sor lan gsum re brjod nas/_kyai:_rang snang 'od gsal sprul sogs nas/_bdag bstod do:_bzlas pa ni/_mdun bskyed thugs kar zla ba'i steng:_baM yig srog gi sngags kyis mtshan:_bdag nyid rdo rje khrag 'thung gi:_thugs srog 'bar ba'i 'od zer gyis:_rab tu bskul zhing drwa bas bcings:_chags dang sdang ba'i stobs bskyed pas:_ma mo 'khor bcas dam la gzir:_gang 'dod las kun sgrub par bsam:_gong non ru lu cung zad bzla ba sngon du 'gro bas/_baM ha ri ni sa badz+ra pra mo ha tsit+ta hrIM hrIM dzaHdzaH_zhes ji ltar 'os pa bzlas mthar/_tshogs mchod phan bde'i rna cha bzhin bskang bshags kyi bar rgyas par byas la/_snod ldan gyi slob ma khrus nas dbyung*/_bgegs bskrad srung 'khor bcas grub rjes/_lo rgyus mtshams sbyor/_'dir sangs rgyas kyi bstan pa gnyan po srung zhing*/_de 'dzin gyi sdong grogs mdzad pa'i phyir/_'og min gsang ba chen po na dbyings kyi yum chen mo/_rang bzhin sprul pa'i zhing khams na gtso dang 'khor gyi rnam par bstan pa mkha' 'gro ma e ka tsa Ti spun drug dang*/_de'i bran mo bcu bzhi/_g.yog mo lnga bcu rtsa brgyad/_yang g.yog 'bum khri bdun stong la sogs pa/_'jig rten gyi khams su rten 'brel bcu gnyis gnas su dag pa'i brda las dam can brtan ma bcu gnyis su bzhengs pa ni/_sngon gyi tshe dur khrod chen po bsil ba'i tshal du mkha' 'gro ma seng ge'i gdong can gyi spyan sngar dbang nod de bstan pa srung bar bsgos/_bod du bstan pa snga dar gyi tshe slob dpon chen po pad+ma'i zhabs la bal bod kyi mtshams kha la rong sgor mtho brtsams pas phyag rgya gnyan po'i zil 'og tu spa bkong par mdzad nas gangs can bod kyi yul lhar mnga' gsol/_gsang chen rgya mtsho'i bstan pa skyong bar rtsis su phab pa'i nang tshan las/_'dir zhing skyong mkha' 'gro'i dbang mo tshe ring mched lngar grags pa ni/_nang du rnal 'byor sgrub pa po la snying nye la bkra shis/_'chi med kyi bcud len ster bas tshe ring*/_rnam bzhi'i phrin las la mnga' mdzad pas ci bcol gyi las rno la myur/_phyi ltar du snod bcud kun la dbang bsgyur bas tshan che/_mdor na bsam don gyi re ba skong ba la yid bzhin gyi nor bu gcig tu lhun gyis grub pa'i srung ma khyad par can 'di ni rdzogs pa chen po klong chen snying gi thig le'i chos sde las phebs pa yin la/_de yang 'di nyid shin tu bka' gnyan zhing khyab gdal du ster bya ma yin pas chos sde byings gtan la phebs nas kyang bgrang bya'i 'khor lo bcu phrag tsam du bka' rgya ma khrol/_khrid yig chen mo gtan la phebs pa tsam na 'od gsal gyi dbyings nas sgyu ma sprul pa'i skyed mo'i tshal mchog tu nyams dga' bar/_zangs gzhong gi rnam par brten pa'i rdzing bu dwangs gsal gyi chus mer gyis khengs pa'i nang na/_lha mo'i srog gi khams byang sems dkar dmar gyi gong bu 'dar ba dang 'phrigs pa'i rnam 'gyur can gnyis kun tu rgyu ba zhig rma bya gzhon nu skyes bu'i lus tshad tsam pa lngar gyur nas gtsug phud nam mkha' la g.yengs pa'i zlos gar rtses/_slar yang de yongs su gyur pa las sman btsun mched lnga'i snang char bstan nas hi hi'i bzhad sgra chen po dang bcas lkog gyur gyi rnam pa rdo rje'i glu blangs/_dngos su gzugs med pa'i sgra sgrog pa dang phyi nang gsang gsum gyi bla rdo'i rnam par rang dbang du gyur pa'i rten 'brel zab mos go phye nas lha mo'i stong srog mkha' 'gro snyi la zin pa lta bu sbyin pa skabs su bab pa yin pas/_slob dpon gyi bya ba sngon du song*/_slob ma'i bya ba maN+Dal phul/_bla ma snang srid zil gnon ma hA gu ru dngos su gsal bar gsol ba 'debs pa 'di'i rjes zlos lan gsum mdzod/_bde gshegs dpal gyi bka' sdod che:_mthu ldan zhing skyong mkha' 'gro ma'i:_srog dbang bdag la bstsal du gsol:_slob dpon gyi bka' gnyan pa'i tha tshig bsgrags pa ni/_'di ni shin tu bka' gnyan pas:_srog dang dam tshig bsre nus sam:_rtag tu gsol kar brtson nus sam:_slob mas dam las mi 'da' bar khas len pa 'di'i rjes zlos mdzod/_dam tshig gnyan po gang yin pa:_nam yang btang bar mi bgyid do:_de ltar na mthu ldan srung ma'i dbang po dang srog snying gcig tu bsre ba'i phyir/_srung ma'i phud skyems nas slob ma'i khar byin la/_ma mo khyod la gtad par bya:_da lta rje mo'i tshul du sgrub:_rtag tu grogs kyi dam tshig srungs:_nam zhig bran du khol gyur cig:_sa ma ya:_badz+rarak+Shan+tu:_zhes dam tshig gcig tu bsre/_zhing mchog khyad par can mchog gsum rtsa gsum rgya mtsho sprin gtibs pa ltar bzhugs pa'i spyan sngar skyabs sems tshogs bsags sdom pa bzung ba 'di'i rjes zlos lan gsum mdzod/_dkon mchog gsum sogs lan gsum/_de nas slob ma rnams gnyen po stobs kyi lha'i ye shes pa dbab pas dbang gi gzhi 'god cing ye shes pa dbab pa la dmigs pa 'di ltar mdzod/_de yang gnas khang rang bzhin lhun gyis grub pa'i zhing khams pad+ma 'od kyi gzhal yas khang chen po zag pa med pa ye shes kyi 'byor pas khyad par du byas pa'i slob dpon gu ru rin po che pad+ma 'byung gnas sku mdog dkar gsal khro 'dzum chags pa'i nyams can/_rdo rje gdengs shing thod bum bsnams pa snyan zhu chos gos gsang phod sogs rgyan dang cha lugs rdzogs pa/_gzi brjid nyi ma 'bum gyi rang bzhin ltar 'bar ba la mos gus dung dung byas pa'i rkyen gyis thugs ka nas 'od zer me 'od lta bu byung*/_slob ma la phog_/tha mal gyi sgo gsum sbyangs/_'od kyi rnam par gyur/_de yongs su gyur pa las slob ma dpal chen po bde gshegs 'dus pa khrag 'thung yongs kyi rje btsan chen po sku mdog ston ka'i nam mkha' ltar dag pa/_zhal gsum g.yas dkar g.yon dmar/_phyag drug gis g.yas gsum rdo rje khaT+wAM me dpung*/_g.yon gsum thod khrag thong gshol lcags kyi sdig pa bsnams pa/_dpal dang dur khrod rol pa'i chas kyis brjid cing*/_pad nyi rgyal bsen pho mo'i steng na 'gying zhing bskal pa'i me dpung 'bar ba'i klong na bzhugs pa/_gnam zhal dbyings kyi dbang phyug khaT+wAM dung khrag 'dzin pa dang gnyis med du sbyor ba'i gzi byin bzod par dka' ba/_ru lu'i gad rgyangs sgrogs pa'i rnam par gyur pa'i gnas gsum gyi 'od kyis bsgoms pa lta bu'i ye shes sems dpa' srid zhi'i spyi dpal he ru ka'i rnam pa char drag tu bab pa bzhin byon nas sgo gsum la gnyis med du thim par bsam la/_spos rol DA dril dang bcas te ru lu'i dzapa la dz+nyA na a be sha ya a aH_btags pas byin dbab ste/_tiSh+Tha badz+ras brtan par byas la rab tu gnas/_de nas gnyan po stobs kyi lha'i sku gsung thugs kyi byin rlabs kyi nus pa'i stobs bskyed pa la/_dpal gyi gtor ma 'di nyid khro bo yongs kyi rje btsan srid zhi'i spyi dpal chen por dngos su gsal ba spyi bor bzhag pas sku yi gnas thams cad nas 'od zer gyi phreng ba dpag tu med pa spros te slob ma'i sgo gsum la thim pas sku gsung thugs ye shes rdo rje'i byin rlabs zhugs te khrag 'thung he ru ka dang gnyis su med par byin gyis brlab par mos shig_/gong gnon gyi dpal gtor slob ma'i spyi bor bzhag la/_rigs 'dus khrag 'thung dpal chen po:_gnyen po stobs kyi dbang bskur ro:_ci bcol bka' bzhin nyan par shog:_lta ba gyad kyi dbang bskur ro:_stong pa'i srog la dbang thob shog:_ru lu'i rtsa sngags mthar/_d+harma d+hA tu a b+hi Shiny+tsa hU~M:_zhes dbang bskur bas gtor ma lhar gsal ba slob mar thim pas 'khor 'das kun gyi dbang phyug che btsan 'gran zla med pa'i dpal he ru ka'i dbang thob par mos shig_/de nas bka' srung sman btsun gyi bka' gtad dngos la/_slob dpon gyi thugs ka'i hU~M yig las 'od zer 'phros/_mkha' 'gro lnga'i snying gar baM dang ha ri ni sa gnas pa la reg pas rgyud bskul/_slob ma'i bya ba sgrub pa la ma bu'i 'du shes kyis gdung ba drag po skyes pa'i mos pa mdzod/_gtso mo'i gtor ma dang phyag mtshan mda' dar lag tu gtad la/_sman btsun bkra shis tshe ring ma:_rdo rje kun tu bzang mo ni:_dkar dmar mdzes pa'i lang tsho can:_phyag g.yas yid bzhin nor bu dbang:_g.yon pa mda' dar dung sho can:_srid gsum gsal ba'i me long 'dzin:_dar dkar na bza' gsar pa'i steng:_rma bya'i sgro thul g.yang lugs gsol:_rat+na'i srog zhu dar thod can:_mdzes sdug mnyam pa'i stabs kyis bzhengs:_skal ldan bu la dbang bskur ro:_oM badz+ra ra si hU~M:_pra mo ha:_ting ting shag:_tsit+ta a b+hi Shiny+tsahU~M:_mdun gyi 'brang rgyas dang me long gtad la/_dpa' bo yongs kyi sring gcig ma:_rig 'dzin yongs kyi sgrub sde mo:_mthing gi zhal bzang pra'i lha mos:_bu la nye bar mdzad du gsol:_oM badz+ra ra si hU~M:_pra mo haH_ting ting shag:_tsit+ta a b+hi Shiny+tsahU~M:_g.yas kyi 'brang rgyas dang gter bum gtad la/_dpa' bo yongs kyi sring gcig ma:_rig 'dzin yongs kyi sgrub sde mo:_cod paN mgrin bzang nor gyi lhas:_bu la nye bar mdzad du gsol:_oM badz+ra ra si hU~M:_pra mo ha:_ting ting shag:_tsit+ta a b+hi Shiny+tsahU~M:_rgyab kyi 'brang rgyas dang nor gzhong gtad la/_dpa' bo yongs kyi sring gcig ma:_rig 'dzin yongs kyi sgrub sde mo:_mi g.yo glang bzang zas kyi lhas:_bu la nye bar mdzad du gsol:_oM badz+ra ra si hU~M:_pra mo ha:_ting ting shag:_tsit+ta a b+hi Shiny+tsahU~M:_g.yon gyi 'brang rgyas dang dngul phor 'o mas gang ba gtad la/_dpa' bo yongs kyi sring gcig ma:_rig 'dzin yongs kyi sgrub sde mo:_gtad dkar 'gro bzang phyugs kyi lhas:_bu la nye bar mdzad du gsol:_oM badz+ra ra si hU~M:_pra mo ha:_ting ting shag:_tsit+ta a b+hi Shiny+tsahU~M:_de nas srog snying sbyin pa ni/_slob dpon la mos gus dung ba dang dam tshig la srog tu lta ba'i 'du shes kyis rkyen byas slob dpon gyi thugs ka nas 'od zer 'phros/_mkha' 'gro lnga'i snying gar baM dang ha ri ni sa gnas pa lcags kyus drangs pa bzhin 'ub kyis bsdus pas brtan pa bral te srog snying dmar nar gyis skyugs pa slob ma'i zhal du zhugs/_snying gar thim pas ci bcol gyi las thogs med du sgrub par mos la/_oM ru lu ru lu hU~M b+h+yo hU~M:_gong non gyi snying pos sna drangs pa'i/_oM badz+ra ra si hU~M:_pra mo ha:_ting ting shag:_sbrel ba rjes zlos lan gsum byar gzhug_gter gzhung rdo rje'i tshig rkang las/_'di ni shin tu bka' gnyan pas:_brgyud 'dzin slob bu dam tshig can:_gcig la chig brgyud las ma spel:_sa ma ya:_zhes gsungs pa nyid grub pa lags/_de nas gtso 'khor yongs rdzogs kyi bka' gtad pa la/_gtor ma phyag mtshan dang bcas pa snod gcig tu bsdus pa slob ma'i lag tu gtad la/_hU~M:_bzhengs shig chos sku'i klong yang las:_skyod cig longs spyod rdzogs pa'i ma:_dgongs shing sprul pa'i gnas mchog 'dir:_dam tshig gnyan po gcig tu bsre:_'da' dka'i chad tho gnyer du longs:_rgyal dbang pad+ma thod phreng dang:_lha sras khri srong lde'u btsan gyi:_chos brgyud chags pa'i rnal 'byor la:_grogs por gtad do gzhung ma ngan:_gtor ma lag tu gtad/_mdza' mor gtad do khrel ma chung:_zhes rkang pa'i thad du bzhag_bran du gtad do rkang ma ngan:_srung mar gtad do mthu ma chung:_ci ltar bcol ba'i las rnams sgrubs:_badz+ra sa ma ya rak+Shan+tu hU~M dzaH_zhes brjod pas sman btsun 'khor dang bcas pas ji ltar bsgos pa bzhin bgyi'o zhes zhal gyis bzhes par bsam la/_gtor ma dang nang mchod bsres pa'i cha shas slob mar byin/_srung ma dang dam tshig gcig tu 'dres pa'i nges shes dang bcas rdo rje'i tha tshig 'di'i rjes zlos mdzod/_mkha' 'gro srog tu btsa' bar bgyi:_'bar ba gsum gyi dngos grub stsol:_sman mo grogs su sgrub par bgyi:_'du ba gsum gyi dngos grub stsol:_rtag tu gsol kar brtson par bgyi:_g.yel dang zhud dang chad pa'i las:_nam yang bdag gis mi bgyid do:_zhes brjod pas sman btsun mched lnga yang dgyes shing chags pas 'od du zhu ste slob mar thim pas bdag dang bka' srung chos nyid kyi klong na gnyis su med par shes pas chos nyid kyi lta ba'i ngang bskyang*/_de ltar na gzhung las/_gangs can bod kyi yul lha yin:_sus bsten dngos grub sna re thob:_rdo rje theg pa'i bka' srung yin:_rnal 'byor yongs la snying yang nye:_snying tig gnyan po'i srung ma ste:_tshar gcod rjes 'dzin rno la myur:_pad+ma nga yi bka' srung 'di:_chos brgyud 'dzin pa'i slob bu las:_gzhan du spel na mgo bo khos:_zhes gsungs pa ltar gter kha gong 'og gi brtan ma'i srog dbang dang*/_rnal 'byor dbang phyug rje btsun bzhad pa rdo rje las brgyud pa'i srog dbang rnams chu bo gcig 'dres zab gnyan byin rlabs kyi tshan ka dang ldan pa legs par phul grub pas dam tshig khas blang ba 'di'i rjes zlos mdzod/_gtso bos ji ltar sogs dang*/_maN+Dal/_lus 'bul dge bsngo bcas byas la slob ma grol/_slob dpon gyis bskang ba byin brlab nas brtsams/_hU~M:_bde chen chos sku'i sogs kyis bskang bshags bskyar zhing tshogs la rol/_lhag ma nas brtsams rjes kyi las rim mthar dbyung bas grub pa'o/_/'gyura~M meda~M thega~M mcho~Mg a ti'i thun min gyi/_/bka' srung bkra shis tshe ring mched sde lnga'i/_/srog dbang zab gnyan lhug par bkrol 'dis kyang*/_/bshad sgrub bstana~M pa'i rgyala~M mtsha~Mn dza yan+tu/_/bka' srung bkra shis tshe ring ma'i srog dbang gi le'u tshan bcu gsum pa ste bkra shis dpal 'byor don thams cad grub pa'i sdes sbyar ba legs par rdzogs so/_/lam stegs skyes bu gsum gyis gzhung bsrangs nas/_/sbas don rdo rje theg pa'i smin grol rdzogs/_/gsang lam theg mchog rgyal po'i khyad chos can/_/bstan pa yongs rdzogs 'di min gzhan su zhig_/de phyir gang la gus dang nyer len gyis/_/zab gsang yongs rdzogs snying gi ze'u 'bru ru/_/ring nas sim las dbyig mchog kun gyi rgyal/_/rin chen pha lam bzhin du gces par bzung*/_/rmad byung chos 'dis don mthun rdo rje'i mched/_/skal mnyam kun la gcig tu sman pa'i blos/_/ji ltar dpog bzhin smin lam dbang gi phreng*/_/lhag bsam gus dang 'bad pas legs par bstar/_/bdag blo shin tu ma sbyangs mu cor smra/_/gsang ba zab mo'i don bzhin ma rtogs pas/_/nyes par gyur kun lha dang mkha' 'gror bshags/_/gzur gnas mkhas par nyes bshad bsal bar bskul/_/gsang chen lam kun dbang la rdzogs pa yi/_/dpal de snang ba'i 'char ka'i bya ma rtas/_/kun bzang thugs kyi bstan pa nyin mor byed/_/snyigs ma'i mun sel gnyen du 'di gyur cig_/bka' gter zung 'jug bstan pa'i chu gter gser gyi sa gzhir g.yas su 'khyil/_/bshad sgrub las kyi ri gling bkod pa lung rtogs dpal 'byor rgyas shing dar/_/mkhas grub skyes bu lha dang klu dbang mi yi khyu mchog gis rtsen pas/_/grol ba drug gi phrin las rmad byung rtag khyab lhun grub 'phel gyur cig_/de ltar rdzogs pa chen po klong chen snying gi thig le'i chos skor gyi dbang 'di dag la dbang gi spyi don snying po don gsal las/_de'ang rang bzhin brgyad ldan gyi rdo rje slob dpon dag la ni yi ge 'di tsam gyis mtshon la/_gzhan du lhongs su ma gyur pa'i gang zag rnams la ni mdo sngags kyi lam spyi dang bye brag dbang gi sgrom nas khong du chud pa'i skal pa can nyung bas rang dang slob ma'i dngos grub kyi gegs su 'gyur phyir mdo sgyu sems gsum gyi rgyud sde'i gnad la nges pa rnyed par ma nus kyang*/_kho bos byas pa'i grol tig gi dbang chog mkhyen brtse'i dgongs rgyan las spyi don shes par bya ba kho na'o/_/zhes rjes su brtse bas bka' bstsal pa bzhin lags kyang rang bzhin brgyad ldan gyi dri tsam yang mi bro ba bdag lta bu las ngan gyis dbang bskur byed pa'i slob dpon bya ba'i dus kyi mthar slebs pa'i tshe/_DA ki'i zhal rlangs 'thul zhing gser zhun ma lta bu'i zab chos 'di dag la gzu lum gyis spyod pa'i nyes pas rang gzhan la phan pa las gnod tshabs che ba 'byung bar rig nas gter gzhung rdo rje'i tshig rkang ha cang bsdus drags/_chos kyi spyan ldan mkhas grub gong ma rnams kyi gsung yid rton 'os dag dpe thob pa'i skal ba ma byung bas 'di lta bu zhig mi bri ka med du gyur pa ste/_sngar mdo khams su rang gnas la 'khod pa'i skabs kun mkhyen 'jam pa'i dbyangs chos kyi blo gros rin po ches yang gsang bla ma'i sgrub thabs thig le'i rgya can dang*/_yum ka'i nang sgrub bde chen gter bum gyi dbang*/_khrag 'thung rigs bzhi'i sgos dbang rnams bklag chog tu bri dgos par rten dang bcas ched du bka' bstsal zhing*/_khrag 'thung rigs bzhi'i dbang gi spyi chings thams cad mkhyen gzigs mkhyen brtse'i dbang pos mdzad pa bcas gnang ba bzhin bris te spyan bstar zhus pas dgyes pa'i dbyug dbyung thob na'ang de dag kyang dpe brlag pas yid yul du gang mchis la zhib dpyod dang*/_gtso bo snying thig rang gzhung dang grol tig dbang chen rnams go bsdur gyis don tshang 'jug bde'i khul du bris pa 'di yang snga 'gyur rdo rje snying po'i ring lugs la rgyu mtshan shes pa'i mkhyen dpyod kyi chos spyan yangs pa rdo rje'i mched po dar thang sprul pa'i sku kun dga'am/_mtshan gzhan ye shes rdo rjer grags pas ring mo nas bskul ba bzhin snyigs ma'i sngags ban hrul po 'khos chung gyi na ba 'jigs med mkhyen brtse'i 'od zer rab gsal zla bar 'bod pa'i rgyal khams pa des rab byung bcu drug pa'i bye brag zil gnon zhes pa me rta lo'i sa zla'i dmar phyogs kyi tshes bcu/_theg mchog chos kyi rgyal rnga sgrogs pa'i 'jigs bral gyi paN+Di ta chen po mi pham 'jam dbyangs rnam rgyal rgya mtsho'i dus kyi mchod pa'i nyin dbu brtsams te rim gyis rdzogs par byas pa'i gnas rang byung pad+ma'i sgrub gnas spa gro stag tshang seng ge bsam grub kyi rdo rje'i ke'u tshang dang 'dabs 'byor zhing*/_chos rgyal byang chub sems dpa' srong btsan sgam po'i sku'i ring la bzhengs pa'i mtha' 'dul gyi gtsug lag khang*/_bod yul phan bde'i btsas gyur gyi sa gnad/_lho ljongs chos kyi rgyal khab 'brug spa gro skyer chu'i lha khang du sangs rgyas gnyis pa mkhan slob chos gsum gyi snang brnyan gsar bskrun gyi zhabs tog bgyis pa'i skabs gseng rnams su bris shing*/_snying po'i bstan dang bstan 'dzin la dad mos mchog tu gyur pa bla ma kun bzang rig 'dzin rdo rjes kyang bskul ba bzhin slar yang zhib dpyod dang bcas yi ge gnyis par 'du bar mdzad pa po nges don snying po'i rnal 'byor dbyings rig byang chub dbang pos mdzad pa 'dis kyang*/_'od gsal rdo rje snying po'i bstan pa gzhir bzhengs su bslang nas 'brel tshad kun bzang gdod ma'i grol gzhir dbugs dbyung zhing grol ba drug ldan gyi phrin las rtag khyab lhun grub tu 'byung ba'i rgyu kho nar gyur cig/__//