JKW-KABUM-22-ZA-012-071

Previous Text Back to Volume PageNext Text

རྫོགས་ཆེན་གཞི་ལམ་འབྲས་གསུམ་གྱི་བསྡུས་དོན་རྡོ་རྗེའི་ཐོལ་གླུ་རིག་འཛིན་དགྱེས་པའི་སྒྲ་དབྱངས།

Wylie title	rdzogs chen gzhi lam 'bras gsum gyi bsdus don rdo rje'i thol glu rig 'dzin dgyes pa'i sgra dbyangs
Location	mkhyen brtse'i bka' 'bum Volume 22, sde tshan 12, Text 71, Pages 542-545 (Folios 99b2 to 101a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdzogs chen gzhi lam 'bras gsum gyi bsdus don rdo rje'i thol glu rig 'dzin dgyes pa'i sgra dbyangs. In 'jam dbyangs mkhyen brtse'i dbang po'i bka' 'bum, Vol. 22: 542-545. Khams sde dge rdzong sar dgon: Rdzong sar blo gros phun tshogs, 2020.
Genre	Dzogchen - rdzogs pa chen po  ·  Vajra Songs - rdo rje'i glu

Tibetan Text

Wylie

[edit]

རྫོགས་པ་ཆེན་པོ་གཞི་ལམ་འབྲས་གསུམ་གྱི་བསྡུས་དོན་རྡོ་རྗེའི་ཐོལ་གླུ་རིག་འཛིན་དགྱེས་པའི་སྒྲ་དབྱངས་ཞེས་བྱ་བ།། ཨ་ཧོ། བློ་ཡིས་མཚོན་དུ་མེད་པ་ནི། །རྣམ་ཐར་སྒོ་གསུམ་དབྱིངས་སུ་འདྲེས། །ཟུང་འཇུག་ཤེས་རབ་ཕ་རོལ་ཕྱིན། །ཡེ་ཤེས་ཌཱ་ཀིའི་ངོ་བོར་འདུད། །དོན་གནས་ལུགས་རྫོགས་པ་ཆེན་པོའི་ཞལ། །དྲན་པ་ཀུན་ཏུ་བཟང་པོ་ཞེས། །འགྲོ་རྒྱུད་ལ་གཉིས་མེད་གནས་མོད་དེ། །ཕུང་པོ་ལྔ་ཡི་སྒྲོག་གིས་བཅིངས། །རིག་པ་ཡེ་གྲོལ་སོར་བཞག་ལ། །ཚིག་དང་གོ་བས་མི་མཚོན་ཀྱང་། །གཞི་ལམ་འབྲས་བུ་རྣམ་པ་གསུམ། །འཁོར་འདས་ཀྱི་ཆོས་ཀུན་མཚོན་ཕྱིར་བཤད། །དེར་ཐོག་མར་གཞི་ཡི་གནས་ལུགས་ནི། །འཁྲུལ་གྲོལ་གྱི་སྦུབས་སུ་མ་ཆུད་པའི། །གཉིས་སྣང་དང་བྲལ་བའི་རང་ངོ་ལ། །ལམ་དུས་ཀྱི་རྟོགས་པའི་འཆར་གཞིར་གནས། །དེར་རླུང་རིག་གཡོས་པའི་རྩལ་སྣང་སེམས། །རང་ཤར་དུ་འབྱུང་བའི་སྐད་ཅིག་མར། །རྟོག་འཛིན་གྱི་ཤེས་པ་བྲལ་གྱུར་ཚེ། །གྲོལ་ལུགས་བརྒྱད་ཀྱི་རོལ་པ་ལས། །གཞི་དབྱིངས་ཀྱི་ངོ་བོར་རོ་གཅིག་སྟེ། །གདོད་མའི་མགོན་པོར་མངོན་སངས་རྒྱས། །དེ་རང་གཞན་རྟོག་པས་བཅིངས་ནས་ཀྱང་། །འཁྲུལ་པ་ལ་བདག་ཏུ་བཟུང་བའི་མཐུས། །མ་རིག་པ་རྣམ་གསུམ་དང་འགྲོགས་ནས། །མཐའ་མེད་ཀྱི་འཁོར་བའི་རྒྱ་མཚོ་བྱུང་། །ཡང་ཉམས་ལེན་ལམ་གྱི་གནས་སྐབས་སུ། །ལྟ་སྒོམ་སྤྱོད་འབྲས་རྣམ་པ་བཞི། །གཟུགས་ཕུང་ལ་རྟེན་ཅིང་འབྲེལ་འབྱུང་ཞིང་། །ཚོར་བ་ཡིས་བདེ་སྡུག་སྣང་ཚུལ་མྱོང་། །འདུ་ཤེས་ཀྱི་སྣ་ཚོགས་ཡུལ་ལ་འཇུག །འདུ་བྱེད་ཀྱིས་སླད་མའི་རྗེས་སྒྲུབ་ཅིང་། །རྣམ་ཤེས་ཀྱིས་དེ་ཀུན་ངོ་བོར་ཁྱབ། །དེ་ཕུང་པོ་ལྔ་ཡི་རང་བཞིན་ཏེ། །དེ་ཡིན་ལུགས་བསམ་ངོ་བྲལ་བ་ལ། །ཟག་ཟད་ཀྱི་རིག་པ་མངོན་འགྱུར་ཕྱིར། །ཕུང་པོ་ལྔ་བྲལ་གྱི་ཡེ་ཤེས་ཏེ། །ཀ་དག་རྫོགས་པ་ཆེན་པོ་དང་། །གཞན་དུ་ཤེས་རབ་ཕ་རོལ་ཕྱིན། །རྣམ་ཐར་གསུམ་ལྡན་སྟོང་པ་ཉིད། །དོན་དམ་བདེན་པ་ཆེན་པོ་སྟེ། །ཡོངས་གྲུབ་འདི་ལྟ་བའི་རྩེ་མོ་ལགས། །དེ་ཉིད་ལྷན་སྐྱེས་ཉིད་ཡིན་ཀྱང་། །ཉོན་སྒྲིབ་དྲྭ་བར་འཐུམས་ཆེས་ཤིང་། །ཤེས་སྒྲིབ་བློ་དང་ལྷན་ཅིག་ཕྱིར། །ཚོགས་གཉིས་མྱུར་དུ་འདུམ་བྱེད་པ། །མདོ་སྔགས་ཀྱི་ལམ་མཆོག་རྨད་བྱུང་སྤྱད། །ཁྱད་པར་དུ་སེམས་ཅན་ལ་སྙིང་རྗེ་དང་། །བླ་མ་ལ་མོས་གུས་སྲོག་བཟུང་ནས། །སྒོམ་མེད་བློ་བྲལ་གྱི་དོན་ལ་བལྟ། །ཉམས་དང་ཞེན་པའི་མཐའ་སྤངས་ནས། །ཡེངས་མེད་ཀྱི་དྲན་རིག་རྟག་ཏུ་སྐྱོངས། །མཐར་རྒྱུ་རྐྱེན་ཟད་པའི་མེ་བཞིན་དུ། །ཤར་གྲོལ་དུས་མཉམ་ཆེན་པོར་ལོངས། །དེ་ཉམས་ལེན་སྒོམ་པའི་མདོ་འགག་ལགས། །ཁྱད་པར་རྫོགས་པ་ཆེན་པོའི་ལམ། །སྒྲོན་མ་རྣམ་བཞིའི་བསྐྱེད་པ་ཡི། །འཇའ་ཟེར་ཐིག་ལེའི་སྦུབས་འཇུག་པས། །དབྱིངས་རིག་དབྱེར་མེད་སྣང་བཞིའི་ངང་། །ཕྱི་གཟུང་བ་འོད་གསལ་ཆེན་པོར་ཡལ། །ནང་འཛིན་པ་ཀ་དག་གཞི་རུ་གྲོལ། །བདེ་བའི་བསམ་གཏན་ཙམ་མིན་པའི། །ཁམས་གསུམ་འོད་གསལ་ཐུགས་ཀྱི་དངོས། །ཁྱད་ཆོས་དྲུག་ལྡན་ནང་དབྱིངས་སུ། །རོ་གཅིག་འགྱུར་བའི་ཁྱད་པར་ལྡན། །དུས་ཀུན་སྤྱོད་པས་ཉམས་བླང་ཕྱིར། །ཅོག་བཞག་རྣམ་བཞིའི་ལྷུམས་སུ་ཞུགས། །ཁྱད་པར་ནམ་མཁའ་སུམ་ཕྲུགས་དང་། །སེམས་རིག་དབྱེ་བའི་ཉམས་ལེན་ནི། །རྟག་པར་འབད་པ་གསང་བའི་ལམ། །བླ་ན་མེད་པར་ཤེས་མཛོད་ཀྱེ། །ལམ་དེའི་རྟོགས་པ་མངོན་གྱུར་ཏེ། །བསྒོམ་མོ་ཞེས་པའི་ཐ་སྙད་དང་། །མི་བསྒོམ་ཐ་མལ་བློས་བཏང་མིན། །རེ་དོགས་ལས་འདས་ཆོས་སྐུའི་ཞལ། །ཚེ་འདི་ཉིད་ལ་མངོན་དུ་འགྱུར། །འདི་ནི་འབྲས་བུའི་སྐྱེལ་སོ་ལགས། །གཞན་དུ་ཁྲེགས་ཆོད་ཐོད་རྒལ་ལ། །སོ་སོའི་གྲུབ་མཐའ་ཐ་དད་དེ། །སྔ་མ་ནང་དབྱིངས་ཆེན་པོ་རུ། །དབྱེར་མེད་མངོན་སངས་རྒྱས་པ་དང་། །ཕྱི་མས་སྣོད་བཅུད་འོད་གསལ་ངང་། །གྲོལ་བའི་ཁྱད་པར་མཁྱེན་འཚལ་ལོ། །སྤྱིར་རྒྱལ་བས་ཆོས་སྒོ་དཔག་མེད་ཀུན། །ཉོན་མོངས་ཀྱི་གཉེན་པོར་བསྟན་མོད་དེ། །ཚིག་སྤྲོས་པའི་མཐའ་ལ་ཟད་མེད་ཀྱི། །དོན་ཉམས་སུ་ལེན་པ་དེ་ལ་མཛོད། །དེ་སྐད་ཉམས་སུ་ལེན་པའི་མོད། །མཁའ་སྤྱོད་རིག་འཛིན་དགྱེས་པའི་གླུ། །གང་ཤར་རང་གྲོལ་ངང་ནས་བྲིས། །དགེ་བས་འགྲོ་ཀུན་སངས་རྒྱས་ཤོག ། ༈

[edit]

rdzogs chen gzhi lam 'bras gsum gyi bsdus don rdo rje'i thol glu rig 'dzin dgyes pa'i sgra dbyangs/__ rdzogs pa chen po gzhi lam 'bras gsum gyi bsdus don rdo rje'i thol glu rig 'dzin dgyes pa'i sgra dbyangs zhes bya ba//_a ho/__blo yis mtshon du med pa ni/__/rnam thar sgo gsum dbyings su 'dres/__/zung 'jug shes rab pha rol phyin/__/ye shes DA ki'i ngo bor 'dud/__/don gnas lugs rdzogs pa chen po'i zhal/__/dran pa kun tu bzang po zhes/__/'gro rgyud la gnyis med gnas mod de/__/phung po lnga yi sgrog gis bcings/__/rig pa ye grol sor bzhag la/__/tshig dang go bas mi mtshon kyang /__/gzhi lam 'bras bu rnam pa gsum/__/'khor 'das kyi chos kun mtshon phyir bshad/__/der thog mar gzhi yi gnas lugs ni/__/'khrul grol gyi sbubs su ma chud pa'i/__/gnyis snang dang bral ba'i rang ngo la/__/lam dus kyi rtogs pa'i 'char gzhir gnas/__/der rlung rig g.yos pa'i rtsal snang sems/__/rang shar du 'byung ba'i skad cig mar/__/rtog 'dzin gyi shes pa bral gyur tshe/__/grol lugs brgyad kyi rol pa las/__/gzhi dbyings kyi ngo bor ro gcig ste/__/gdod ma'i mgon por mngon sangs rgyas/__/de rang gzhan rtog pas bcings nas kyang /__/'khrul pa la bdag tu bzung ba'i mthus/__/ma rig pa rnam gsum dang 'grogs nas/__/mtha' med kyi 'khor ba'i rgya mtsho byung /__/yang nyams len lam gyi gnas skabs su/__/lta sgom spyod 'bras rnam pa bzhi/__/gzugs phung la rten cing 'brel 'byung zhing /__/tshor ba yis bde sdug snang tshul myong /__/'du shes kyi sna tshogs yul la 'jug__/'du byed kyis slad ma'i rjes sgrub cing /__/rnam shes kyis de kun ngo bor khyab/__/de phung po lnga yi rang bzhin te/__/de yin lugs bsam ngo bral ba la/__/zag zad kyi rig pa mngon 'gyur phyir/__/phung po lnga bral gyi ye shes te/__/ka dag rdzogs pa chen po dang /__/gzhan du shes rab pha rol phyin/__/rnam thar gsum ldan stong pa nyid/__/don dam bden pa chen po ste/__/yongs grub 'di lta ba'i rtse mo lags/__/de nyid lhan skyes nyid yin kyang /__/nyon sgrib drwa bar 'thums ches shing /__/shes sgrib blo dang lhan cig phyir/__/tshogs gnyis myur du 'dum byed pa/__/mdo sngags kyi lam mchog rmad byung spyad/__/khyad par du sems can la snying rje dang /__/bla ma la mos gus srog bzung nas/__/sgom med blo bral gyi don la blta/__/nyams dang zhen pa'i mtha' spangs nas/__/yengs med kyi dran rig rtag tu skyongs/__/mthar rgyu rkyen zad pa'i me bzhin du/__/shar grol dus mnyam chen por longs/__/de nyams len sgom pa'i mdo 'gag lags/__/khyad par rdzogs pa chen po'i lam/__/sgron ma rnam bzhi'i bskyed pa yi/__/'ja' zer thig le'i sbubs 'jug pas/__/dbyings rig dbyer med snang bzhi'i ngang /__/phyi gzung ba 'od gsal chen por yal/__/nang 'dzin pa ka dag gzhi ru grol/__/bde ba'i bsam gtan tsam min pa'i/__/khams gsum 'od gsal thugs kyi dngos/__/khyad chos drug ldan nang dbyings su/__/ro gcig 'gyur ba'i khyad par ldan/__/dus kun spyod pas nyams blang phyir/__/cog bzhag rnam bzhi'i lhums su zhugs/__/khyad par nam mkha' sum phrugs dang /__/sems rig dbye ba'i nyams len ni/__/rtag par 'bad pa gsang ba'i lam/__/bla na med par shes mdzod kye/__/lam de'i rtogs pa mngon gyur te/__/bsgom mo zhes pa'i tha snyad dang /__/mi bsgom tha mal blos btang min/__/re dogs las 'das chos sku'i zhal/__/tshe 'di nyid la mngon du 'gyur/__/'di ni 'bras bu'i skyel so lags/__/gzhan du khregs chod thod rgal la/__/so so'i grub mtha' tha dad de/__/snga ma nang dbyings chen po ru/__/dbyer med mngon sangs rgyas pa dang /__/phyi mas snod bcud 'od gsal ngang /__/grol ba'i khyad par mkhyen 'tshal lo/__/spyir rgyal bas chos sgo dpag med kun/__/nyon mongs kyi gnyen por bstan mod de/__/tshig spros pa'i mtha' la zad med kyi/__/don nyams su len pa de la mdzod/__/de skad nyams su len pa'i mod/__/mkha' spyod rig 'dzin dgyes pa'i glu/__/gang shar rang grol ngang nas bris/__/dge bas 'gro kun sangs rgyas shog_/_!