JKW-KABUM-22-ZA-007-019

🚧 This website is under continued development. We appreciate your patience!

Previous Text Back to Volume PageNext Text

འཇམ་དབྱངས་བླ་མའི་རྣལ་འབྱོར་ཡེ་ཤེས་སྣང་སྟེར།

Wylie title	'jam dbyangs bla ma'i rnal 'byor ye shes snang ster
Location	mkhyen brtse'i bka' 'bum Volume 22, sde tshan 7, Text 19, Pages 243-250 (Folios 30a6 to 33b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. jam dbyangs bla ma'i rnal 'byor ye shes snang ster. In jam dbyangs mkhyen brtse'i dbang po'i bka' 'bum, Vol. 22: 243-250. Khams sde dge rdzong sar dgon: Rdzong sar blo gros phun tshogs, 2020.
Genre	Guru Yoga Texts - bla ma'i rnal 'byor
Deity	'jam dpal dbyangs
Colophon	།ཞེས་པའང་དད་བརྩོན་ཤེས་རབ་དང་ལྡན་པའི་དགེ་སློང་དགེ་བའི་བཤེས་གཉེན་ངག་དབང་འོད་ཟེར་གྱིས་ནན་ཏན་ཆེན་པོས་འདི་ལྟར་དགོས་ཞེས་བསྐུལ་བའི་ངོར། འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་སྨན་ཤོད་ཕུའི་ཆོས་རར་སྦྱར་བའི་ཡི་གེ་པ་ནི་རིག་པར་སྨྲ་བ་འཇམ་དབྱངས་ཡེ་ཤེས་མཐའ་ཡས་ཀྱིས་བགྱིས་པའི་དགེ་བས་འགྲོ་ཀུན་འཇམ་དཔལ་གཞོན་ནུའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག །
	zhes pa'ang dad brtson shes rab dang ldan pa'i dge slong dge ba'i bshes gnyen ngag dbang 'od zer gyis nan tan chen pos 'di ltar dgos zhes bskul ba'i ngor/__'jam dbyangs bla ma dgyes pa'i 'bangs mkhyen brtse'i dbang pos sman shod phu'i chos rar sbyar ba'i yi ge pa ni rig par smra ba 'jam dbyangs ye shes mtha' yas kyis bgyis pa'i dge bas 'gro kun 'jam dpal gzhon nu'i go 'phang la myur du reg pa'i rgyur gyur cig

1 Texts in this Section (sde tshan or chos tshan)

19 243-250	འཇམ་དབྱངས་བླ་མའི་རྣལ་འབྱོར་ཡེ་ཤེས་སྣང་སྟེར། 'jam dbyangs bla ma'i rnal 'byor ye shes snang ster Guru Yoga Texts - bla ma'i rnal 'byor	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །འཇམ་དབྱངས་བླ་མའི་རྣལ་འབྱོར་ཡེ་ཤེས་སྣང་སྟེར་ཞེས་བྱ་བ་བཞུགས་སོ། །ན་མོ་གུ་རུ་མཉྫུ་གྷོ་ཥཱ་ཡ། དེ་ལ་ཁམས་གསུམ་གྱི་འཁོར་བ་ལས་རང་གཞན་ཐམས་ཅད་ངེས་པར་འབྱུང་སྟེ་མཐའ་གཉིས་ལ་མི་གནས་པའི་རྣམ་མཁྱེན་གྱི་གོ་འཕང་མྱུར་དུ་ཐོབ་པར་འདོད་པ་དག་གིས་ཏིང་ངེ་འཛིན་དང་། གཟུངས་ཀྱི་སྒོ་མཐའ་ཡས་པ་བསྒྲུབ་པར་བྱ་བའི་ཕྱིར་རིགས་ཐམས་ཅད་ཀྱི་ཁྱབ་བདག་འཁོར་ལོའི་མགོན་པོ་འཇམ་དཔལ་གཞོན་ནུའི་རྣམ་པར་བསྒོམ་པའི་ཟབ་མོའི་རྣལ་འབྱོར་ལ་འཇུག་པའི་ཐོག་མར་བདེ་བའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་འཁོད་དེ་མདུན་གྱི་ནམ་མཁར་སྐྱབས་ཡུལ་རྣམས་མངོན་སུམ་བཞིན་དུ་གསལ་བཏབ་སྟེ། སྐྱབས་སུ་འགྲོ་བ་ནི། བདག་སོགས་འགྲོ་ཀུན་སྲིད་པའི་གྲོང་ཁྱེར་དུ། །ཕ་མཐར་མི་མངོན་སྡུག་བསྔལ་རྒྱ་མཚོར་བྱིངས། །དེ་ལས་སྐྱོབ་ཕྱིར་བླ་མ་མཆོག་གསུམ་ལ། །བྱང་ཆུབ་སྙིང་པོའི་བར་དུ་སྐྱབས་སུ་མཆི། །སེམས་བསྐྱེད་པ་ནི། ཤེས་པས་སྲིད་པའི་སྦྱོར་བ་ལས་བརྒལ་ཀྱང་། །སྙིང་རྗེས་ཞི་བའི་ཕ་མཐར་ལྷུང་མིན་པ། །བླ་མ་འཇམ་དཔལ་གཞོན་ནུའི་ཡེ་ཤེས་སྐུ། །ཐོབ་ཕྱིར་ཟབ་མོའི་རྣལ་འབྱོར་བསྒོམ་པར་བགྱི། །ཚོགས་ཞིང་གསལ་གདབ་པ་ནི། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭབྷཱ་བ་ཤུདྡྷོ྅ཧཾ། འོད་གསལ་སྟོང་ཉིད་ངང་ལས་སྒྱུ་མའི་འཕྲུལ། །སྣོད་བཅུད་ཐམས་ཅད་བདེ་བ་ཅན་གྱི་ཞིང་། །ཡིད་འཕྲོག་ངོ་མཚར་བཀོད་པ་འབྱམས་ཀླས་དབུས། །པད་ཟླའི་སྟེང་དུ་རང་ཉིད་སྐད་ཅིག་གིས། །སྒྲ་དབྱངས་རྒྱ་མཚོའི་བདག་ཉིད་བཅོམ་ལྡན་མ། །རབ་དཀར་སྟོན་ཟླ་གསར་པའི་ལང་ཚོ་ལ། །མཚན་དཔེའི་ཉམས་འགྱུར་ཆ་ཤས་ཡོངས་སུ་རྫོགས། །ཕྱག་གཉིས་བཻ་ཌཱུར་རྒྱུད་མངས་དལ་གྱིས་བརྡུང་། །ཞབས་ཟུང་ཙོག་པུར་བསྣོལ་བའི་ཚུལ་གྱིས་བཞུགས། །དབུ་སྐྲ་གནག་སྣུམ་མེ་ཏོག་ཆུན་པོས་བཅིངས། །རྣམ་མང་དར་དང་རིན་ཆེན་རྒྱན་གྱིས་མཛེས། །སྣང་སྟོང་དབང་པོའི་གཞུ་བཞིན་གསལ་བ་ཡི། །མདུན་གྱི་ནམ་མཁར་ཡིད་འཕྲོག་མཆོད་སྤྲིན་དབུས། །སྣ་ཚོགས་ཆུ་སྐྱེས་ཟླ་བའི་དཀྱིལ་འཁོར་སྟེང་། །རིགས་ཀུན་ཁྱབ་བདག་རྩ་བའི་བླ་མ་ནི། །རྣམ་པ་འཇམ་དཔལ་གཞོན་ནུའི་ཡེ་ཤེས་སྐུ། །གསེར་རི་གུར་གུམ་ཆབ་ཀྱིས་བཀྲུས་པ་ལ། །ཉི་གཞོན་བྱེ་བས་འཁྱུད་པའི་མཚན་དཔེའི་དཔལ། །མཐོང་ན་མི་མཐུན་མེད་པའི་ཕྱག་གཡས་ཀྱི། །གཟུངས་འཛིན་དྲ་བ་གཅོད་པའི་རལ་གྲི་འཕྱར། །གཡོན་པས་ཨུཏྤལ་ཟེའུ་འབྲུར་སྙོམས་ཞུགས་པའི། །ཤེར་ཕྱིར་སྟོང་ཕྲག་བརྒྱ་པའི་གླེགས་བམ་བསྣམས། །ཟུར་ཕུད་ལྔ་ལྡན་དར་དང་རིན་ཆེན་བརྒྱན། །ཟླ་བའི་འོད་ཀྱི་རྒྱབ་ཡོལ་ལ་བརྟེན་ནས། །ཞབས་ཟུང་རྡོ་རྗེའི་སྐྱིལ་ཀྲུང་དྲང་པོར་བཞུགས། །མཐའ་སྐོར་སྐྱབས་གནས་རྒྱ་མཚོའི་སྤྲིན་ཕུང་འཕྲོ། །ཀུན་ཀྱང་གནས་གསུམ་ཨོཾ་ཨཱཿཧཱུྃ་གིས་མཚན། །འོད་འཕྲོས་ཡེ་ཤེས་སྤྱན་དྲངས་གཉིས་མེད་དུ། །ཐིམ་ལས་སྐྱབས་ཡུལ་ཐམས་ཅད་འདུས་པའི་དངོས། །བདག་ལ་དགྱེས་བཞིན་མངོན་སུམ་བཞུགས་པར་གྱུར། །ཚོགས་བསགས་པའི་ཕྱིར་ཡན་ལག་བདུན་པ་ལོགས་སུ་བཀོད་པ་ལྟར་རམ། བསྡུ་ན། བདག་དང་མཐའ་ཡས་སེམས་ཅན་མ་ལུས་ཀུན། །ཞིང་གི་རྡུལ་རྙེད་ལུས་རབ་སྤྲུལ་བྱས་ཏེ། །འཇམ་དབྱངས་བླ་མར་འཁོར་བཅས་ཞབས་པད་མོར། །སྒོ་གསུམ་གུས་པས་རྟག་ཏུ་ཕྱག་འཚལ་ལོ། །དངོས་ཡིད་ལས་བྱུང་མཆོད་སྤྲིན་རྒྱ་མཚོས་མཆོད། །སྡིག་ལྟུང་ཀུན་བཤགས་དགེ་ལ་རྗེས་ཡི་རངས། །ཆོས་འཁོར་བསྐོར་ཞིང་མྱ་ངན་མི་འདའ་བཞུགས། །དགེ་ཚོགས་བླ་མེད་བྱང་ཆུབ་ཐོབ་ཕྱིར་བསྔོ། །ཞེས་ཕྱག་དང་བཅས་བྱ། མཎྜལ་རྒྱས་བསྡུས་ཇི་ལྟར་རིགས་པ་འབུལ། །ཐུགས་རྒྱུད་བསྐུལ་བའི་ཕྱིར་གསོལ་བ་གདབ་པ་ནི། ན་མོ་གུ་རུ་མཉྫུ་གྷོ་ཥཱ་ཡ། མཁའ་ཁྱབ་རྒྱལ་བ་ཀུན་གྱི་སྐུ་ཡེ་ཤེས། །གཅིག་བསྡུས་བླ་མ་བརྟན་པའི་འཁོར་ལོ་ལ། །མི་ཕྱེད་སྙིང་ནས་གུས་པས་གསོལ་འདེབས་ན། །ཐུགས་རྗེའི་སྤྱན་གྱིས་གཟིགས་ཤིག་འཇམ་པའི་དབྱངས། །རྙེད་དཀའི་དལ་འབྱོར་མི་ལུས་ཐོབ་དུས་འདིར། །ལོང་མེད་འཆི་བ་དྲན་པའི་བརྩོན་འགྲུས་ཀྱིས། །སྲིད་པའི་ཕུན་ཚོགས་ཀུན་ལ་མ་ཆགས་པའི། །ཐར་འདོད་བློ་གྲོས་སྐྱེད་ཅིག་འཇམ་པའི་དབྱངས། །དེང་ནས་བཟུང་སྟེ་ཚེ་རབས་ཐམས་ཅད་དུ། །མཚན་ལྡན་བླ་མ་དགེ་བའི་བཤེས་གཉེན་གྱི། །ཞབས་པད་མཉེས་པ་གསུམ་གྱིས་བསྙེན་ནུས་པའི། །སྐལ་བ་བཟང་པོ་སྦྱོར་ཅིག༴ དེ་ལས་ཁས་བླངས་ཚུལ་ཁྲིམས་རྣམ་པར་དག །མང་དུ་ཐོས་དང་བསམ་པའི་ཕ་རོལ་སོན། །རྩེ་གཅིག་བསྒོམ་པས་ཞི་ལྷག་ཟུང་འཇུག་གི །ཏིང་འཛིན་སྒོ་བརྒྱ་འབྱེད་མཛོད༴ ལོག་སྨྲ་ཚར་གཅོད་གཞན་དག་རྗེས་བཟུང་བའི། །ཐུན་མོང་རིག་པའི་གནས་ལ་མ་རྨོངས་ཤིང་། །ཁྱད་པར་སྡེ་སྣོད་རྒྱུད་སྡེའི་ངེས་གསང་ལ། །འཁྲུལ་མེད་བློ་གྲོས་སྩོལ་ཅིག་འཇམ་པའི༴ འཆད་མཁས་བློ་ལྡན་བྱེ་བའི་ཡིད་དབང་འཕྲོག །རྩོད་པས་ཕས་རྒོལ་འཁྲུལ་པའི་དྲེགས་པ་བཅོམ། །རྩོམ་པས་ཐུབ་བསྟན་ཡུན་རིང་གསལ་ནུས་པའི། །སྨྲ་བའི་དབང་ཕྱུག་སྩོལ་ཅིག༴ ཐ་སྙད་ཁོ་ནའི་གནས་ལ་མ་ཞེན་པར། །དབེན་པའི་གནས་སུ་མདོ་སྔགས་ལམ་གྱི་རིམ། །ཚུལ་བཞིན་བསྒྲུབས་པས་ཉམས་རྟོགས་ཡོན་ཏན་ཀུན། །རྩོལ་མེད་རྒྱུད་ལ་སྐྱེད་ཅིག༴ གལ་ཏེ་ཚེ་འདིར་བརྟན་པ་མ་ཐོབ་ན། །འཆི་བ་འོད་གསལ་དོན་གྱི་འཇམ་པའི་དབྱངས། །མངོན་སུམ་མཐོང་ནས་ཆོས་སྐུའི་གྲོང་ཁྱེར་དུ། །འབྲལ་མེད་རྗེས་སུ་ཟུངས་ཤིག༴ དེར་ཡང་འཁྲུལ་ནས་བར་དོར་འཁྱམས་སྲིད་ན། །བླ་མ་མཆོག་དང་བརྟན་པའི་འཁོར་ལོ་ཡིས། །རྣམ་འཕྲུལ་དུ་མས་དག་པའི་ཞིང་ཁམས་སུ། །ལུང་བསྟན་དབུགས་དབྱུང་སྩོལ་ཅིག༴ ལས་ཉོན་དབང་གིས་སྲིད་པར་སྐྱེས་གྱུར་ཀྱང་། །དལ་འབྱོར་རྟེན་ཐོབ་ཐེག་ཆེན་རིགས་སད་ནས། །དཀའ་བ་མེད་པར་ལམ་གྱི་ལྷག་མ་ཀུན། །རྫོགས་པའི་རྟེན་འབྲེལ་སྒྲིགས་ཤིག༴ མདོར་ན་འདི་ཕྱི་བར་དོའི་གནས་སྐབས་ཀུན། །མགོན་པོ་ཁྱོད་ལས་སྐྱབས་གཞན་མི་འཚོལ་བས། །རང་གཞན་དོན་གཉིས་ལྷུན་གྱིས་གྲུབ་པ་ཡི། །དགེ་མཚན་མངོན་སུམ་སྩོལ་ཅིག་འཇམ་པའི་དབྱངས། །ཞེས་དད་མོས་ཀྱི་ཤུགས་དྲག་ཏུ་བསྐྱེད་ལ་གསོལ་བ་གདབ། མཇུག་དབང་བླང་ཞིང་དེ་ཁོ་ན་ཉིད་ལ་མཉམ་པར་གཞག་པ་ནི། །ཕྱོགས་དུས་རྒྱལ་བ་སྲས་བཅས་ཡེ་ཤེས་ཀུན། །གཅིག་བསྡུས་བླ་མ་འཇམ་དཔལ་གཞོན་ནུ་ཡིས། །བདག་ལ་བརྩེ་བའི་ཐུགས་རྗེས་ཉེར་དགོངས་ནས། །དབང་དང་བྱིན་རླབས་དངོས་གྲུབ་སྩལ་དུ་གསོལ། །ཞེས་པས་གསོལ་བཏབ་མཐའ་སྐོར་སྐྱབས་ཡུལ་ཀུན། །བླ་མ་འཇམ་དཔལ་གཞོན་ནུར་དབྱེར་མེད་ཐིམ། །དེ་ཡི་གནས་གསུམ་རྡོ་རྗེའི་འབྲུ་གསུམ་ལས། །འོད་ཟེར་དཀར་དམར་མཐིང་གའི་ཁ་དོག་ཅན། །རིམ་དང་ཅིག་ཅར་བདག་གི་གནས་གསུམ་ཞུགས། །དབང་བཞི་ཐོབ་ཅིང་སྒྲིབ་བཞི་རྒྱུར་བཅས་སྦྱོང་། །ཟབ་མོའི་ལམ་བཞི་བསྒོམ་པའི་རྟེན་འབྲེལ་བསྒྲིགས། །འབྲས་བུ་སྐུ་བཞི་ཐོབ་པའི་སྐལ་ལྡན་བྱས། །མཐར་ནི་བླ་མ་ཚངས་པའི་ལམ་ནས་བྱོན། །རང་གི་སྙིང་དབུས་འོད་ལྔའི་གུར་ཁྱིམ་དུ། །པད་ཟླའི་གདན་ལ་དགེས་བཞིན་བཞུགས་པ་ཡིས། །རྟག་ཏུ་བྱིན་རླབས་དངོས་གྲུབ་སྩོལ་བར་གྱུར། །ཅེས་བརྗོད་ཅིང་བསམས་ལ་བླ་མའི་སྐུའི་གསལ་སྣང་ལ་སེམས་ཞུགས་པ་བཞིན་ཆེར་གྱིས་གཏད་ནས་འཛིན་མེད་ཀྱི་ངང་དུ་ཅི་གནས་སུ་མཉམ་པར་གཞག །ཞར་བྱུང་བཟླས་པ་བྱ་བར་སྤྲོ་ན། བླ་མ་འཇམ་པའི་དབྱངས་ཀྱི་ཐུགས་ཀ་རུ། །དྲི་མེད་རི་བོང་འཛིན་པའི་དཀྱིལ་འཁོར་དབུས། །དམར་སེར་དྷཱིཿཡིག་སྔགས་ཀྱི་ཕྲེང་བས་བསྐོར། །བཟླས་པས་འོད་འཕྲོས་རང་གི་ལུས་ཀུན་གང་། །སྡིག་སྒྲིབ་ཀུན་སྦྱངས་གཟུངས་དང་སྤོབས་པ་སོགས། །བསམ་གྱིས་མི་ཁྱབ་ཡེ་ཤེས་སྣང་བ་རྒྱས། །སླར་འཕྲོས་འཕགས་མཆོད་འགྲོ་བའི་དོན་བྱས་ནས། །ཚུར་འདུས་བདག་ཐིམ་བྱིན་གྱིས་བརླབས་པར་གྱུར། །ཨོཾ་ཨ་ར་པ་ཙ་ན་དྷཱིཿ ཞེས་དང་། སྤྲོ་ན་ཤེས་རབ་བློ་འཕེལ་གྱི་གཟུངས་ཀྱང་བཟླ། རྗེས་བསྔོ་སྨོན་ནི། དགེ་བ་འདི་ཡིས་བདག་སོགས་སེམས་ཅན་ཀུན། །ལས་ཉོན་ཤེས་བྱའི་སྒྲིབ་པ་ཀུན་བྱང་ནས། །སྤངས་རྟོགས་ཕྲིན་ལས་མཐའ་ཡས་བདག་ཉིད་ཆེ། །འཇམ་དབྱངས་བླ་མའི་གོ་འཕང་མྱུར་ཐོབ་ཤོག །ཅེས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག་པའི་ཚེ་སྣང་གྲགས་རྟོག་གསུམ་བླ་མའི་གསང་བ་གསུམ་གྱི་རྣམ་རོལ་དུ་ལྟ་བ་དང་མ་བྲལ་བའི་ངང་། དོན་ཡོད་བཞིའི་སྒོ་ནས་བླ་མ་མཉེས་པར་བྱ་བ་དང་། ཆོས་སྤྱོད་བཅུ་སོགས་དགེ་བའི་བྱ་བས་དུས་འདའ་བར་བྱའོ། །ཞེས་པའང་དད་བརྩོན་ཤེས་རབ་དང་ལྡན་པའི་དགེ་སློང་དགེ་བའི་བཤེས་གཉེན་ངག་དབང་འོད་ཟེར་གྱིས་ནན་ཏན་ཆེན་པོས་འདི་ལྟར་དགོས་ཞེས་བསྐུལ་བའི་ངོར། འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་སྨན་ཤོད་ཕུའི་ཆོས་རར་སྦྱར་བའི་ཡི་གེ་པ་ནི་རིག་པར་སྨྲ་བ་འཇམ་དབྱངས་ཡེ་ཤེས་མཐའ་ཡས་ཀྱིས་བགྱིས་པའི་དགེ་བས་འགྲོ་ཀུན་འཇམ་དཔལ་གཞོན་ནུའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག ། ༈

[edit]

'jam dbyangs bla ma'i rnal 'byor ye shes snang ster/__ @#/_/'jam dbyangs bla ma'i rnal 'byor ye shes snang ster zhes bya ba bzhugs so/__/na mo gu ru many+dzu g+ho ShA ya/__de la khams gsum gyi 'khor ba las rang gzhan thams cad nges par 'byung ste mtha' gnyis la mi gnas pa'i rnam mkhyen gyi go 'phang myur du thob par 'dod pa dag gis ting nge 'dzin dang /__gzungs kyi sgo mtha' yas pa bsgrub par bya ba'i phyir rigs thams cad kyi khyab bdag 'khor lo'i mgon po 'jam dpal gzhon nu'i rnam par bsgom pa'i zab mo'i rnal 'byor la 'jug pa'i thog mar bde ba'i stan la bsam gtan gyi spyod lam dang ldan pas 'khod de mdun gyi nam mkhar skyabs yul rnams mngon sum bzhin du gsal btab ste/__skyabs su 'gro ba ni/__bdag sogs 'gro kun srid pa'i grong khyer du/__/pha mthar mi mngon sdug bsngal rgya mtshor byings/__/de las skyob phyir bla ma mchog gsum la/__/byang chub snying po'i bar du skyabs su mchi/__/sems bskyed pa ni/__shes pas srid pa'i sbyor ba las brgal kyang /__/snying rjes zhi ba'i pha mthar lhung min pa/__/bla ma 'jam dpal gzhon nu'i ye shes sku/__/thob phyir zab mo'i rnal 'byor bsgom par bgyi/__/tshogs zhing gsal gdab pa ni/__oM swa b+hA ba shud+d+haHsarba d+harmAHswab+hA ba shud+d+ho\u0f85haM/__'od gsal stong nyid ngang las sgyu ma'i 'phrul/__/snod bcud thams cad bde ba can gyi zhing /__/yid 'phrog ngo mtshar bkod pa 'byams klas dbus/__/pad zla'i steng du rang nyid skad cig gis/__/sgra dbyangs rgya mtsho'i bdag nyid bcom ldan ma/__/rab dkar ston zla gsar pa'i lang tsho la/__/mtshan dpe'i nyams 'gyur cha shas yongs su rdzogs/__/phyag gnyis bai DUr rgyud mangs dal gyis brdung /__/zhabs zung tsog pur bsnol ba'i tshul gyis bzhugs/__/dbu skra gnag snum me tog chun pos bcings/__/rnam mang dar dang rin chen rgyan gyis mdzes/__/snang stong dbang po'i gzhu bzhin gsal ba yi/__/mdun gyi nam mkhar yid 'phrog mchod sprin dbus/__/sna tshogs chu skyes zla ba'i dkyil 'khor steng /__/rigs kun khyab bdag rtsa ba'i bla ma ni/__/rnam pa 'jam dpal gzhon nu'i ye shes sku/__/gser ri gur gum chab kyis bkrus pa la/__/nyi gzhon bye bas 'khyud pa'i mtshan dpe'i dpal/__/mthong na mi mthun med pa'i phyag g.yas kyi/__/gzungs 'dzin dra ba gcod pa'i ral gri 'phyar/__/g.yon pas ut+pal ze'u 'brur snyoms zhugs pa'i/__/sher phyir stong phrag brgya pa'i glegs bam bsnams/__/zur phud lnga ldan dar dang rin chen brgyan/__/zla ba'i 'od kyi rgyab yol la brten nas/__/zhabs zung rdo rje'i skyil krung drang por bzhugs/__/mtha' skor skyabs gnas rgya mtsho'i sprin phung 'phro/__/kun kyang gnas gsum oM AHhU~M gis mtshan/__/'od 'phros ye shes spyan drangs gnyis med du/__/thim las skyabs yul thams cad 'dus pa'i dngos/__/bdag la dgyes bzhin mngon sum bzhugs par gyur/__/tshogs bsags pa'i phyir yan lag bdun pa logs su bkod pa ltar ram/__bsdu na/__bdag dang mtha' yas sems can ma lus kun/__/zhing gi rdul rnyed lus rab sprul byas te/__/'jam dbyangs bla mar 'khor bcas zhabs pad mor/__/sgo gsum gus pas rtag tu phyag 'tshal lo/__/dngos yid las byung mchod sprin rgya mtshos mchod/__/sdig ltung kun bshags dge la rjes yi rangs/__/chos 'khor bskor zhing mya ngan mi 'da' bzhugs/__/dge tshogs bla med byang chub thob phyir bsngo/__/zhes phyag dang bcas bya/__maN+Dal rgyas bsdus ji ltar rigs pa 'bul/__/thugs rgyud bskul ba'i phyir gsol ba gdab pa ni/__na mo gu ru many+dzu g+ho ShA ya/__mkha' khyab rgyal ba kun gyi sku ye shes/__/gcig bsdus bla ma brtan pa'i 'khor lo la/__/mi phyed snying nas gus pas gsol 'debs na/__/thugs rje'i spyan gyis gzigs shig 'jam pa'i dbyangs/__/rnyed dka'i dal 'byor mi lus thob dus 'dir/__/long med 'chi ba dran pa'i brtson 'grus kyis/__/srid pa'i phun tshogs kun la ma chags pa'i/__/thar 'dod blo gros skyed cig 'jam pa'i dbyangs/__/deng nas bzung ste tshe rabs thams cad du/__/mtshan ldan bla ma dge ba'i bshes gnyen gyi/__/zhabs pad mnyes pa gsum gyis bsnyen nus pa'i/__/skal ba bzang po sbyor cig=__de las khas blangs tshul khrims rnam par dag__/mang du thos dang bsam pa'i pha rol son/__/rtse gcig bsgom pas zhi lhag zung 'jug gi__/ting 'dzin sgo brgya 'byed mdzod=__log smra tshar gcod gzhan dag rjes bzung ba'i/__/thun mong rig pa'i gnas la ma rmongs shing /__/khyad par sde snod rgyud sde'i nges gsang la/__/'khrul med blo gros stsol cig 'jam pa'i=__'chad mkhas blo ldan bye ba'i yid dbang 'phrog__/rtsod pas phas rgol 'khrul pa'i dregs pa bcom/__/rtsom pas thub bstan yun ring gsal nus pa'i/__/smra ba'i dbang phyug stsol cig=__tha snyad kho na'i gnas la ma zhen par/__/dben pa'i gnas su mdo sngags lam gyi rim/__/tshul bzhin bsgrubs pas nyams rtogs yon tan kun/__/rtsol med rgyud la skyed cig=__gal te tshe 'dir brtan pa ma thob na/__/'chi ba 'od gsal don gyi 'jam pa'i dbyangs/__/mngon sum mthong nas chos sku'i grong khyer du/__/'bral med rjes su zungs shig=__der yang 'khrul nas bar dor 'khyams srid na/__/bla ma mchog dang brtan pa'i 'khor lo yis/__/rnam 'phrul du mas dag pa'i zhing khams su/__/lung bstan dbugs dbyung stsol cig=__las nyon dbang gis srid par skyes gyur kyang /__/dal 'byor rten thob theg chen rigs sad nas/__/dka' ba med par lam gyi lhag ma kun/__/rdzogs pa'i rten 'brel sgrigs shig=__mdor na 'di phyi bar do'i gnas skabs kun/__/mgon po khyod las skyabs gzhan mi 'tshol bas/__/rang gzhan don gnyis lhun gyis grub pa yi/__/dge mtshan mngon sum stsol cig 'jam pa'i dbyangs/__/zhes dad mos kyi shugs drag tu bskyed la gsol ba gdab/__mjug dbang blang zhing de kho na nyid la mnyam par gzhag pa ni/__/phyogs dus rgyal ba sras bcas ye shes kun/__/gcig bsdus bla ma 'jam dpal gzhon nu yis/__/bdag la brtse ba'i thugs rjes nyer dgongs nas/__/dbang dang byin rlabs dngos grub stsal du gsol/__/zhes pas gsol btab mtha' skor skyabs yul kun/__/bla ma 'jam dpal gzhon nur dbyer med thim/__/de yi gnas gsum rdo rje'i 'bru gsum las/__/'od zer dkar dmar mthing ga'i kha dog can/__/rim dang cig car bdag gi gnas gsum zhugs/__/dbang bzhi thob cing sgrib bzhi rgyur bcas sbyong /__/zab mo'i lam bzhi bsgom pa'i rten 'brel bsgrigs/__/'bras bu sku bzhi thob pa'i skal ldan byas/__/mthar ni bla ma tshangs pa'i lam nas byon/__/rang gi snying dbus 'od lnga'i gur khyim du/__/pad zla'i gdan la dges bzhin bzhugs pa yis/__/rtag tu byin rlabs dngos grub stsol bar gyur/__/ces brjod cing bsams la bla ma'i sku'i gsal snang la sems zhugs pa bzhin cher gyis gtad nas 'dzin med kyi ngang du ci gnas su mnyam par gzhag__/zhar byung bzlas pa bya bar spro na/__bla ma 'jam pa'i dbyangs kyi thugs ka ru/__/dri med ri bong 'dzin pa'i dkyil 'khor dbus/__/dmar ser d+hIHyig sngags kyi phreng bas bskor/__/bzlas pas 'od 'phros rang gi lus kun gang /__/sdig sgrib kun sbyangs gzungs dang spobs pa sogs/__/bsam gyis mi khyab ye shes snang ba rgyas/__/slar 'phros 'phags mchod 'gro ba'i don byas nas/__/tshur 'dus bdag thim byin gyis brlabs par gyur/__/oM a ra pa tsa na d+hIH__zhes dang /__spro na shes rab blo 'phel gyi gzungs kyang bzla/__rjes bsngo smon ni/__dge ba 'di yis bdag sogs sems can kun/__/las nyon shes bya'i sgrib pa kun byang nas/__/spangs rtogs phrin las mtha' yas bdag nyid che/__/'jam dbyangs bla ma'i go 'phang myur thob shog__/ces bsngo smon gyis mtshams sbyar te spyod lam la 'jug pa'i tshe snang grags rtog gsum bla ma'i gsang ba gsum gyi rnam rol du lta ba dang ma bral ba'i ngang /__don yod bzhi'i sgo nas bla ma mnyes par bya ba dang /__chos spyod bcu sogs dge ba'i bya bas dus 'da' bar bya'o/_/zhes pa'ang dad brtson shes rab dang ldan pa'i dge slong dge ba'i bshes gnyen ngag dbang 'od zer gyis nan tan chen pos 'di ltar dgos zhes bskul ba'i ngor/__'jam dbyangs bla ma dgyes pa'i 'bangs mkhyen brtse'i dbang pos sman shod phu'i chos rar sbyar ba'i yi ge pa ni rig par smra ba 'jam dbyangs ye shes mtha' yas kyis bgyis pa'i dge bas 'gro kun 'jam dpal gzhon nu'i go 'phang la myur du reg pa'i rgyur gyur cig__/__!