JKW-KABUM-06-CHA-002-019

🚧 This website is under continued development. We appreciate your patience!

Previous Text Back to Volume PageNext Text

སྦྱངས་པའི་ཡོན་ཏན་བཅུ་གཉིས་ཀྱི་རྣམ་པར་བཤད་པའི་ལེའུ་ཚན།

Wylie title	sbyangs pa'i yon tan bcu gnyis kyi rnam par bshad pa'i le'u tshan
Location	mkhyen brtse'i bka' 'bum Volume 6, sde tshan 2, Text 19, Pages 287-298 (Folios 78a2 to 83b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. sbyangs pa'i yon tan bcu gnyis kyi rnam par bshad pa'i le'u tshan. In 'jam dbyangs mkhyen brtse'i dbang po'i bka' 'bum, Vol. 6: 287-298. Khams sde dge rdzong sar dgon: Rdzong sar blo gros phun tshogs, 2020.
Genre	Detailed Explanation - rnam bshad

1 Texts in this Section (sde tshan or chos tshan)

19 287-298	སྦྱངས་པའི་ཡོན་ཏན་བཅུ་གཉིས་ཀྱི་རྣམ་པར་བཤད་པའི་ལེའུ་ཚན། sbyangs pa'i yon tan bcu gnyis kyi rnam par bshad pa'i le'u tshan Detailed Explanation - rnam bshad	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

སྦྱངས་པའི་ཡོན་ཏན་བཅུ་གཉིས་ཀྱི་རྣམ་པར་བཤད་པའི་ལེའུ་ཚན་ནོ། །ན་མཿཤཱཀྱ་མུ་ན་ཡེ། སྤྱིར་སྦྱངས་པའི་ཡོན་ཏན་ལ་བཅུ་གཉིས་ཡོད་དེ། ཟས་ཀྱི་དབང་དུ་བྱས་པ་གསུམ། གོས་ཀྱི་དབང་དུ་བྱས་པ་གསུམ། གནས་མལ་གྱི་དབང་དུ་བྱས་པ་དྲུག་ཡོད་པས་སོ། །ཟས་ཀྱི་དབང་དུ་བྱས་པ་གསུམ་ནི། བསོད་སྙོམས་པ་དང་། སྟན་གཅིག་པ་དང་། ཟས་ཕྱིས་མི་ལེན་པའོ། །དང་པོ་ལ་རྙེད་པས་ཆོག་པའི་བསོད་སྙོམས་པ་དང་། མཐར་གྱིས་སློང་བའི་བསོད་སྙོམས་པ་གཉིས་སུ་ཕྱེ་ན་སྦྱངས་པའི་ཡོན་ཏན་བཅུ་གསུམ་དུ་འགྱུར། གོས་ཀྱི་དབང་དུ་བྱས་པ་གསུམ་ནི། ཆོས་གོས་གསུམ་པ་དང་། ཕྱིར་བ་པ་དང་། ཕྱགས་དར་ཁྲོད་པའོ། །གནས་མལ་གྱི་དབང་དུ་བྱས་པ་དྲུག་ནི། དགོན་པ་དང་། ཤིང་དྲུང་པ་དང་། བླ་གབ་མེད་པ། དུར་ཁྲོད་པ་དང་། ཙོག་པུ་དང་། གཞི་ཇི་བཞིན་པའོ། །ཁ་ཅིག་ཕྱི་མ་གཉིས་སྤྱོད་ལམ་གྱི་དབང་དུ་བྱས་པར་མཛད་ནས། གནས་མལ་གྱི་དབང་དུ་བྱས་པ་བཞི་ཡིན་ཞེས་ཟེར། དེ་དག་སོ་སོའི་ངོ་བོ་གང་ཞེ་ན། རྙེད་པས་ཆོག་པའི་བསོད་སྙོམས་པ་ནི། འདྲིས་པའི་ཁྱིམ་ནས་ཇི་ཙམ་རྙེད་པ་ཟ་བར་བྱེད་པ་ཡིན་ལ། མཐར་གྱིས་སློང་བའི་བསོད་སྙོམས་པ་ནི། ཁྱིམ་རྣམས་སུ་རིམ་གྱིས་བརྒྱུད་དེ་བསོད་སྙོམས་ཇི་ཙམ་རྙེད་པ་ཟ་བར་བྱེད་ཀྱི། བདག་གིས་འདི་ནས་བཟའ་བ་དང་བཅའ་བ་བཟང་པོ་ཐོབ་བོ་སྙམ་ནས་མགོ་འཕང་བསྟོད་དེ་མི་འགྲོའོ། །སྟན་གཅིག་པ་ནི། སྟན་གཅིག་པོ་དེ་ལ་འདུག་ནས་ཇི་ཙམ་ཟ་བ་དེ་ཙམ་དུ་ཟ་བར་བྱེད་ཀྱི། དེ་ལས་ལངས་ནས་མི་ཟ་བའོ། །ཟས་ཕྱིས་མི་ལེན་པ་ནི། ཟས་ཀྱི་ཕྱིར་འདུག་ནས་ཇི་ཙམ་གྱིས་བདག་འཚོ་བའི་ཟས་ཐམས་ཅད་མ་བླངས་ཀྱི་བར་དུ་མི་ཟ་ཞིང་། འདིས་འཚོའོ་སྙམ་པ་དང་ཐམས་ཅད་གཅིག་ཅར་དུ་བླངས་ནས་ཟ་བའོ། །ཆོས་གོས་གསུམ་པ་ནི། སྣམ་སྦྱར། བླ་གོས། མཐང་གོས་གསུམ་གྱིས་འཚོ་བར་བྱེད་ཅིང་། དེ་ལས་ལྷག་པའི་གོས་མི་འཆང་བ་དང་། ཕྱིང་བ་པ་ནི། ཆོས་གོས་གསུམ་མམ། གོས་ལྷག་པ་གཅིག་འཆང་བ་ཐམས་ཅད་བལ་ལས་བྱས་པ་ཤ་སྟག་འཆང་གི། དེ་ལས་གཞན་མི་འཆང་བ་དང་། ཕྱགས་དར་ཁྲོད་པ་ནི། ལམ་པོ་ཆེ་ལ་སོགས་པར་བོར་བའི་བཤང་གཅིན་སོགས་ཀྱིས་རེག་པ་མི་གཙང་བ་རྣམས་བོར་ཏེ། རུང་བ་རྣམས་བླངས་ཏེ་བཀྲུས་དྲུབས་ཁ་དོག་བཟང་པོར་བསྒྱུར་ནས་འཆང་བར་བྱེད་པ་དང་། དགོན་པ་བ་ནི་གྲོང་དང་གྲོང་བརྡལ་ལ་སོགས་པས་དབེན་པའི་དགོན་པ་དང་། ནགས་འདབས་ལ་སོགས་པར་གནས་པ་དང་། ཤིང་དྲུང་པ་ནི་ཤིང་ལྗོན་པའི་དྲུང་དུ་གནས་འཆའ་ཞིང་རྟེན་པར་བྱེད་པ་དང་། བླ་གབ་མེད་པ་ནི། སྟེང་གི་ཐོག་མ་བཀབ་ཅིང་མ་གཡོགས་པའི་ཕྱོགས་སུ་གནས་འཆའ་བར་བྱེད་པ་དང་། དུར་ཁྲོད་པ་ནི། གང་དུ་སྐྱེའོ་ཤིའོ་ཅོག་འདོང་བའི་དུར་ཁྲོད་དུ་གནས་འཆའ་བར་བྱེད་པ་དང་། ཙོག་པུ་པ་ནི། ཁྲིའམ། ཁྲིའུ་འམ། རྩྭའི་སྟེང་དུ་ཙོག་པུར་འདུག་སྟེ། ཁྲི་ལ་སོགས་པར་རྒྱབ་བམ། གློས་མི་བསྟེན་པ་དང་། གཞི་ཇི་བཞིན་པ་ནི། རྩྭ་དང་ལོ་མ་ལ་སོགས་པ་བཏིང་བ་ལ་མལ་འཆའ་ཞིང་། ལན་གཅིག་ཇི་ལྟར་བཏིང་བ་མལ་འཆའ་བར་བྱེད་ཀྱི། ཡང་ཡང་དུ་བརྗེ་ཞིང་མི་འཆོས་པའོ། །དེ་དག་ནི་ཉན་ཐོས་ཀྱི་ས་ལས་ཇི་ལྟར་འབྱུང་བ་བཞིན་ཡིན་ནོ། །ཡང་ཕྱིང་བ་པ་མ་གཏོགས་པ་རྣམས་ལ་ཆུང་ངུ་། འབྲིང་། ཆེན་པོ་གསུམ་གསུམ་ཡོད་དེ། བསོད་སྙོམས་པ་ལ་གསུམ་ལས། ཆུང་ངུ་ནི། གྲོང་དུ་ཕྱིན་པ་ན་ཀུན་དགའ་ར་བར་རྙེད་པ་ལེན་པར་བྱེད་པ་དང་། འབྲིང་ནི་དེར་མི་ལེན་པར་ལམ་བར་དུ་རྙེད་པ་ལེན་པར་བྱེད་པ་དང་། ཆེན་པོ་ནི། དེར་ཡང་མི་ལེན་པར་གྲོང་ཁྱེར་གྱི་ཉེ་སྐོར་དུ་ཕྱིན་ནས་རྙེད་པ་ལེན་པར་བྱེད་པའོ། །སྟན་གཅིག་པ་ལ་ཡང་གསུམ་ལས། ཆུང་ངུ་ནི། ཉན་པ་ལས་བཤད་པ་བཞིན་དང་། འབྲིང་ནི་སྟན་གཅིག་པོ་དེ་མ་སྤངས་ཀྱི་བར་དུ་ཟས་ཟོས་ནས་ཟས་བསོད་པ་བྱུང་ན་ལེན་པ་དང་། ཆེན་པོ་ནི། ཟོས་ནས་ཟས་བསོད་པ་ཡང་ལེན་པར་མི་བྱེད་པའོ། །ཟས་ཕྱིས་མི་ལེན་པ་ལ་ཡང་གསུམ་ལས། ཆུང་ངུ་ནི་ཁ་ལ་སོགས་པ་མ་བཀྲུས་ཀྱི་བར་དུ་ལེན་པར་བྱེད་པ་དང་། འབྲིང་ནི། ཟས་ཟ་བཞིན་དུ་གཞན་གྱིས་བསྟབས་པ་ལེན་ལ། ཁ་ལ་སོགས་པ་བཀྲུས་ནས་མི་ལེན་པ་དང་། ཆེན་པོ་ནི། སྔར་ཟས་ཐམས་ཅད་གཅིག་ཅར་དུ་བླངས་ནས་ཟས་ཟ་བཞིན་དུ་མི་ལེན་པའོ། །ཆོས་གོས་གསུམ་པ་ལ་ཡང་གསུམ་ལས། ཆུང་ངུ་ནི། ཆོས་གོས་གསུམ་དང་རས་ཆེན་གཡན་པ་དགབ་པ་སྟན་དང་གདིང་བ་བཅས་འཆང་བར་བྱེད་པ་དང་། འབྲིང་ནི། རས་ཆེན་སོགས་བཞི་རང་གིས་བྱིན་གྱིས་བརླབས་པ་མི་འཆང་ལ། གཞན་གྱིས་བྱིན་གྱིས་བརླབས་པ་ལ་ལོངས་སྤྱོད་པར་བྱེད་པ་དང་། ཆེན་པོ་ནི། ཆོས་གོས་གསུམ་ཙམ་འཆང་གི། དེ་ལས་ལྷག་པར་མི་འཆང་བའོ། །ཕྱགས་དར་ཁྲོད་པ་ལ་ཡང་གསུམ་ལས། ཆུང་ངུ་ནི། བྱི་བས་ཟོས་པ། ཚིག་པ། དུམ་བུར་བཅད་པ། གཞན་གྱིས་རང་གི་ཆེད་དུ་བྱས་པ་ལེན་པ་དང་། འབྲིང་ནི། རང་གི་ཆེད་དུ་བྱས་པ་མི་ལེན་པར། མ་ངེས་པར་བོར་བ་ལེན་པ་དང་། ཆེན་པོ་ནི། དེ་དག་མི་ལེན་པར། དུར་ཁྲོད་དང་། ཕྱགས་དར་ཁྲོད་དང་། ལམ་པོ་ཆེར་ལྷུང་བ་ལེན་པའོ། །དགོན་པ་པ་ལ་ཡང་གསུམ་ལས། ཆུང་ངུ་ནི། གྲོང་ལས་གཞུ་འདོམ་ལྔ་བརྒྱས་བཅད་པའི་སར་གནས་པ་དང་། འབྲིང་ནི། གྲོང་ལས་གཞུ་འདོམ་སྟོང་ཕྲག་གཉིས་ཀྱིས་བཅད་པའི་སར་གནས་པ་དང་། ཆེན་པོ་ནི། གྲོང་ལས་གཞུ་འདོམ་སྟོང་ཕྲག་བརྒྱད་ཀྱིས་བཅད་པའི་སར་གནས་པའོ། །ཤིང་དྲུང་པ་ལ་ཡང་གསུམ་ལས། ཆུང་ངུ་ནི། ཤིང་དྲུང་ངོ་བཞི་པོ་ཐམས་ཅད་སྐྱོར་བར་གནས་པ་དང་། འབྲིང་ནི། དེར་ངོས་ཅུང་ཟད་སྐྱོར་བར་གནས་པ་དང་། ཆེན་པོ་ནི། དེར་ངོས་ཐམས་ཅད་ནས་མ་སྐྱོར་བར་གནས་པའོ། །བླ་གབ་མེད་པ་ལ་ཡང་གསུམ་ལས། ཆུང་ངུ་ནི། སྟེང་གི་ངོས་གསུམ་གཡོགས་ལ། གཅིག་མ་གཡོགས་པར་གནས་པ་དང་། འབྲིང་ནི། སྟེང་ངོས་གཅིག་གཡོགས་ལ་གསུམ་མ་གཡོགས་པར་གནས་པ་དང་། ཆེན་པོ་ནི། སྟེང་གི་ངོས་ཐམས་ཅད་མ་གཡོགས་པར་གནས་པའོ། །དུར་ཁྲོད་པ་ལ་ཡང་གསུམ་ལས། ཆུང་ངུ་ནི། སྔོན་དུར་ཁྲོད་ཡིན་ལ། ད་ལྟ་དུར་ཁྲོད་མ་ཡིན་པར་གནས་པ་དང་། འབྲིང་ནི། རོ་ཅུང་ཟད་སྐྱེལ་བའི་སར་གནས་པ་དང་། ཆེན་པོ་ནི། སྐྱེ་བོ་ཤིའོ་ཅོག་སྐྱེལ་བའི་སར་གནས་པའོ། །ཙོག་པུ་པ་ལ་ཡང་གསུམ་ལས། ཆུང་ངུ་ནི། ངོས་གཉིས་སྙེས་ནས་གནས་པ་དང་། འབྲིང་ནི། ངོས་གཅིག་སྙེས་ནས་གནས་པ་དང་། ཆེན་པོ་ནི་ངོས་ཐམས་ཅད་ལ་མ་སྙེས་པར་གནས་པའོ། །གཞི་ཇི་བཞིན་པ་ལ་གསུམ་ལས། ཆུང་ངུ་ནི་ལན་གསུམ་མལ་འཆའི་གཞན་མི་བྱེད་པ་དང་། འབྲིང་ནི། ལན་གཉིས་སུ་མལ་འཆའི་གཞན་མི་བྱེད་པ་དང་། ཆེན་པོ་ནི། ལན་གཅིག་སྟན་བཏིང་བ་ལ་མལ་འཆའི། ཡང་དང་ཡང་དུ་མི་བརྗེ་མི་འཆོས་པའོ། །དེ་དག་ལ་ཅིའི་ཕྱིར་སྦྱངས་པའི་ཡོན་ཏན་ཞེས་བྱ་ཞེ་ན། དཔེར་ན། བལ་མ་རྨེལ་བ་དེའི་ཚེ་སྐུད་པ་མི་རུང་ལ། རྨེལ་ནས་རུང་བ་དེ་བཞིན་དུ། བསོད་སྙོམས་དང་། ཆོས་གོས་དང་། གནས་མལ་ལ་ཆགས་པའི་ཚེ་སེམས་ལས་སུ་མི་རུང་ལ། ཡོན་ཏན་འདི་དག་གིས་ཚངས་སྤྱོད་ལ་གནས་པར་བྱ་བའི་ཕྱིར། སེམས་ལས་རུང་དུ་སྦྱོང་བར་བྱེད་པས་དེ་སྐད་ཅེས་བྱའོ། །སྦྱངས་པའི་ཡོན་ཏན་བཅུ་གཉིས་པོ་འདི་དག་བསྟེན་པ་ལ་དགོས་པ་ཅི་ཡོད་ཅེ་ན། ཟས་ཀྱི་དབང་དུ་བྱས་པ་གསུམ་བསྟེན་པ་ལ་དགོས་པ་ཡོད་དེ། ཟས་བཟང་པོ་ལ་ཆགས་པ་སྤང་པའི་ཕྱིར་དུ་བསོད་སྙོམས་པ་དང་། ཟས་མང་པོ་ལ་ཆགས་པ་སྤང་བའི་ཕྱིར་དུ་སྟན་གཅིག་པ་དང་། ཟས་ཕྱིས་མི་ལེན་པ་གཉིས་བརྟེན་པར་བྱ་བ་ཡིན་པའི་ཕྱིར། གོས་ཀྱི་དབང་དུ་བྱས་པ་གསུམ་བསྟེན་པ་ལ་དགོས་པ་ཡོད་དེ། གོས་མང་པོ་ལ་ཆགས་པ་སྤང་བའི་ཕྱིར་དུ་ཆོས་གོས་གསུམ་པ་དང་། གོས་འཇམ་ཞིང་རེག་ན་བདེ་བ་ལ་ཆགས་པ་སྤང་བའི་ཕྱིར་དུ་ཕྱིང་བ་པ་དང་། གོས་བཟང་པོ་ལ་ཞེན་པ་དགག་པའི་ཕྱིར་དུ་ཕྱགས་དར་ཁྲོད་པ་བསྟེན་པར་བྱ་བ་ཡིན་པའི་ཕྱིར། གནས་མལ་གྱི་དབང་དུ་བྱས་པ་དྲུག་བསྟེན་པ་ལ་དགོས་པ་ཡོད་དེ། འདུ་འཛི་ལ་ཆགས་པ་སྤང་བའི་ཕྱིར་དགོན་པ་དང་། གནས་ལ་ཆགས་པ་སྤང་བའི་ཕྱིར་ཤིང་དྲུང་པ་དང་། བླ་གབ་མེད་པ་དང་། དུར་ཁྲོད་པ་སྟེ་གསུམ་དང་། དུར་ཁྲོད་པ་ནི་འཁྲིག་པ་ལ་ཆགས་པ་སྤང་པའི་ཕྱིར་ཡང་ཡིན་ལ། གློས་འབེབས་པ་དང་ཉལ་བའི་བདེ་བ་ལ་ཆགས་པ་སྤང་བའི་ཕྱིར་ཙོག་པུ་པ་དང་། སྟན་འདིང་བ་དང་གབ་པ་ལ་ཆགས་པའི་གཉེན་པོར་གཞི་ཇི་བཞིན་པ་བསྟེན་པར་བྱ་བ་ཡིན་པའི་ཕྱིར་རོ། །སྦྱངས་པའི་ཡོན་ཏན་བཅུ་གཉིས་པོ་བརྟེན་པ་འདི་དག་ལ་ཕན་ཡོན་ཅི་ཡོད་ཅེ་ན། འདི་ལ་སྤྱིར་བསྟན་པ་དང་། སོ་སོར་ཕྱེ་ནས་བསྟན་པ་གཉིས་ལས། དང་པོ་ནི། འདི་དག་བསྟེན་པ་ལ་ཕན་ཡོན་ཡོད་དེ། གྲགས་པ་དང་རྙེད་བཀུར་ཚུལ་འཆོས་དང་ཁ་གསགས་ཆགས་སྡང་སོགས་རིམ་གྱིས་སྤང་བར་འགྱུར་བ་དང་། བསོད་སྙོམས་དང་ཆོས་གོས་གནས་མལ་ངན་ངོན་ཙམ་གྱིས་ཆོག་ཤེས་པ་འཕགས་པའི་རིགས་ལ་གནས་པར་འགྱུར་བ་དང་། ཡོ་བྱད་བསྙུངས་པར་འགྱུར་བ་དང་། སངས་རྒྱས་དང་ཉན་ཐོས་ཀྱིས་བསྔགས་པར་འགྱུར་བའི་ཕན་ཡོན་ཡོད་པའི་ཕྱིར་རོ། །གཉིས་པ་ནི། བསོད་སྙོམས་པ་ལ་ནི་ང་རྒྱལ་མེད་ཅིང་། བརྙས་པ་བཟོད་པ་དང་། ཟས་ཀྱིས་ཕོངས་པ་མེད་པ་དང་། ཟས་བཟང་པོ་དོན་དུ་གཉེར་བའི་སྡུག་བསྔལ་མི་འབྱུང་བའི་ཕན་ཡོན་ཡོད་དོ། །སྟན་གཅིག་པ་ལ་ཡང་ཟས་གཉིས་པ་ཚོལ་བ་དང་། བྱིན་ལེན་ཡང་དང་ཡང་དུ་བྱེད་པའི་གནོད་པ་མི་འབྱུང་བ་དང་། ཟོས་པ་འཇུ་ཞིང་གནོད་པ་ཆུང་བ་དང་། ལྡང་བ་ཡང་ཞིང་བདེ་བར་གནས་པའི་ཕན་ཡོན་ཡོད་དོ། །ཟས་ཕྱིས་མི་ལེན་པ་ལ་ཡང་། ཆོག་ཤེས་པ་དང་། ཟས་ལ་བརྐམ་ཆགས་མེད་པ་དང་། ཟས་ཡང་དང་ཡང་དུ་ཚོལ་བའི་གནོད་པ་མེད་པ་དང་། བསམ་གཏན་དང་ཀློག་པ་ལ་མི་གནོད་པའི་ཕན་ཡོན་ཡོད་དོ། །ཆོས་གོས་གསུམ་པ་ལ་ཡང་། ཆོས་གོས་ལྷག་པོ་ཚོལ་བའི་སྡུག་བསྔལ་མེད་པ་དང་། གོས་ཞག་བཅུ་འཆང་ཡང་ལྟུང་བ་མི་འབྱུང་བ་དང་། གོས་ལྷག་པ་བྱིན་གྱིས་རློབས་པའི་ལས་མི་འབྱུང་བ་དང་། ཡོ་བྱད་བསྙུངས་ཤིང་རྣལ་འབྱོར་དང་རྗེས་སུ་མཐུན་པའི་ཕན་ཡོན་ཡོད་དོ། །ཕྱིང་བ་པ་ལ་ཡང་། གོས་བཟང་པོ་ལ་སྲེད་པ་མེད་པས། དེ་ཚོལ་བའི་སྡུག་བསྔལ་མེད་པ་དང་། དེ་ལ་བརྟེན་ནས་ཆར་དང་ཚ་གྲང་ལ་སོགས་པའི་གནོད་པ་བཟོད་པའི་ཕན་ཡོན་ཡོད་དོ། །ཕྱགས་དར་ཁྲོད་པ་ལ་ཡང་། གོས་ཀྱི་ཕྱིར་ཁྱིམ་པ་རྣམས་དང་མི་འདྲེ་བ་དང་། ཆོམ་རྐུན་པས་གླགས་མི་བལྟ་ཞིང་། གོས་བསྲུང་བའི་ཕྱིར་སྡུག་བསྔལ་མེད་པ་དང་། ཕྱོགས་གང་དུ་ཕྱིན་ཀྱང་གོས་ཀྱིས་མི་བྲེལ་བ་དང་། ལོག་འཚོའི་སྐྱོན་གྱིས་མི་གོས་པའི་ཕན་ཡོན་ཡོད་དོ། །དགོན་པ་བ་ལ་ཡང་། གྲོང་གི་འདུ་འཛི་ལ་གནས་པས། ཏིང་ངེ་འཛིན་ཐོབ་པ་དང་། བསྲུང་བར་མི་ནུས་ལ། འདུ་འཛི་སྤངས་ནས་དགོན་པར་མཉམ་པར་བཞག་པས། ཏིང་ངེ་འཛིན་ཐོབ་པ་དང་། བསྲུང་བར་ནུས་པ་དང་། དགེ་བ་ལ་མངོན་དུ་ཕྱོགས་པ་དང་། འགྱོད་པ་མེད་པར་འཆི་བའི་དུས་བྱེད་པའི་ཕན་ཡོན་ཡོད་དོ། །ཤིང་དྲུང་པ་ལ་ཡང་། གནས་མལ་ཚོལ་བའི་སྡུག་བསྔལ་མེད་པ་དང་། གཞན་དང་རྩོད་གཞི་མེད་པ་དང་། ཤིང་གི་ཡལ་ག་དང་ལོ་མའི་དུས་ཀྱི་འགྱུར་ལྡོག་ལ་བརྟེན་ནས་འདུས་བྱས་མི་རྟག་པར་རྟོགས་པ་དང་། གནས་མལ་ལ་ཆགས་པ་མེད་ཅིང་ཐོགས་མེད་དུ་རྒྱུ་བའི་ཕན་ཡོན་ཡོད་དོ། །བླ་གབ་མེད་པ་ལ་ཡང་། གནས་མལ་ཚོལ་བ་དང་སྦ་བ་དང་བྱི་དོར་བྱེད་པའི་སྡུག་བསྔལ་མེད་པ་དང་། རྒྱུ་སྐར་གྱི་འགྲོ་འདུག་ལ་བརྟེན་ནས་འདུས་བྱས་མི་རྟག་པར་རྟོགས་པ་ལ་སོགས་པའི་ཕན་ཡོན་ཡོད་དོ། །དུར་ཁྲོད་པ་ཡང་། དུར་ཁྲོད་དུ་མི་རྟག་པ་དང་། མི་གཙང་བ་བསྒོམ་པ་ལ་བརྟེན་ནས་འདོད་ཆགས་སོགས་བག་མེད་པ་མི་འབྱུང་བ་དང་། ལུས་སྲོག་ལ་བལྟ་བ་བསྲབ་པར་འགྱུར་བ་དང་། དེ་ལ་བརྟེན་པའི་རྒྱགས་པ་སྤང་པའི་ཕན་ཡོན་ཡོད་དོ། །ཙོག་པུ་པར་ཡང་། །སེམས་གཉིད་དང་མལ་བདེ་བའི་དབང་དུ་མི་འགྲོ་བ་དང་། ལུས་ལ་ཆགས་པ་བསྲབ་པར་འགྱུར་བ་དང་། ལྡང་བ་ཡང་ཞིང་རྨི་ལམ་ཉུང་བ་དང་། གནས་མལ་འཚོལ་བ་དང་འཆོས་པའི་བྱ་བ་ཉུང་བའི་ཕན་ཡོན་ཡོད་དོ། །གཞི་ཇི་བཞིན་པ་ལ་ཡང་། ལན་གཅིག་ཇི་ལྟར་སྟན་བཅས་པས་ཆོག་ཤེས་ནས་གནས་མལ་འཚོལ་བའི་སྡུག་བསྔལ་མེད་པ་དང་། གནས་མལ་ལ་ཆགས་པ་མེད་པ་དང་། དོན་ཉུང་བ་དང་བྱ་བ་ཉུང་བ་ལ་སོགས་པའི་ཕན་ཡོན་རྣམས་ཡོད་དོ། །འོ་ན་སྦྱངས་པའི་ཡོན་ཏན་འདི་དག་གང་ལས་འཐོབ་ཅེ་ན། མཛོད་ལས། ལྷག་མའི་རྣམ་རིག་མིན་ཞིང་དང་། །ལེན་དང་གུས་པར་བྱེད་ལས་འཐོབ། །ཅེས་པ་ལྟར། དགེ་སློང་ལྟ་བུ་ལས་ལེན་པར་བྱེད་པ་ལས་འཐོབ་བོ། །ཚུལ་ཇི་ལྟར་ན། ཡུལ་དེ་ཕྱག་འོས་ཡིན་ན་ཕྱག་འཚལ། མདུན་དུ་ཙོག་པུར་འདུག་སྟེ། ཐལ་མོ་སྦྱར་ནས་བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ། དུས་འདི་ནས་བཟུང་སྟེ། ཇི་སྲིད་འཚོའི་བར་དུ་ཆོས་གོས་བཞི་སྤངས་ཏེ། ཆོས་གོས་གསུམ་པ་ཡང་དག་པར་ལེན་ཏེ། བདག་ཆོས་གོས་གསུམ་པའི་ཡི་དམ་དང་ལྡན་པར་བཙུན་པས་བཟུང་དུ་གསོལ། །ཞེས་ལན་གསུམ་དང་། མཇུག་ཏུ་ཐབས་ལེགས་བྱའོ། །དེ་བཞིན་དུ་གཞན་རྣམས་ལ་ཡང་ཇི་ལྟར་རིགས་པ་ཤེས་པར་བྱའོ། །འོ་ན་སྦྱངས་པའི་ཡོན་ཏན་འདི་དག་གི་ཡི་དམ་གང་གིས་འཇིག་པའམ་གཏོང་བ་ཡིན་ཞེ་ན། མཛོད་ལས། བར་མ་ཤུགས་བླངས་བྱ་བ་དང་། །དེ་ཚེ་རྩ་བ་ཆད་པ་ལས། །ཞེས་བཤད་པ་ལྟར། འདི་ཙམ་དུ་ཞེས་བླངས་པ་ནི་བླངས་པ་ཆད་པ་དང་། བླངས་ཀྱང་བྱ་བ་ཇི་བཞིན་མི་བྱེད་ན་བྱ་བ་ཆད་པ་དང་། ཚེ་ཆད་པ་དང་། དགེ་རྩ་ཆད་པས་གཏོང་བ་དང་། མི་བརྡ་འཕྲོད་པའི་དྲུང་དུ་བསམ་པ་ཐག་པས་ཕུལ་བས་ཀྱང་གཏོང་ལ། འབུལ་ཚུལ་ནི། ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བྱ་བས་ཆོས་གོས་གསུམ་པའི་ཡི་དམ་ཡང་དག་པར་བླངས་པ་ལས། ཆེ་གེ་མོའི་རྐྱེན་གྱིས་དེ་ཉིད་སླར་འབུལ་ལོ། །ཚེ་དང་ལྡན་པ་བདག་ཆོས་གོས་གསུམ་པའི་ཡི་དམ་མ་མཆིས་པར་བཟུང་དུ་གསོལ། །ཞེས་པ་ལྟ་བུའོ། །འོ་ན་འདི་དག་ལ་གནང་བ་ཡོད་དམ་མེད་ཅེ་ན། ཡོད་དེ། འདི་དག་ནི་གོས་དང་ཟས་དང་གནས་མལ་ལ་ལྷག་པར་ཆགས་པའི་གཉེན་པོར་གསུངས་པ་ཡིན་པས། སྦྱོར་བའི་དུས་སུ་འབད་རྩོལ་གྱིས་བསྒྲུབས་མི་དགོས་ཤིང་། དངོས་གཞིའི་དུས་སུ་ཆགས་ཞེན་མེད་ན། གོས་སྲང་འབུམ་རི་བ་དང་། ཁང་པ་བརྩེགས་པ་ལྔ་བརྒྱ་པ་དང་། ཟས་རོ་བརྒྱ་པ་ལ་ལོངས་སྤྱད་པར་ཆོག་པར་གསུངས་པའི་ཕྱིར། དེ་ལྟར་ཡང་མདོ་རྩ་བ་ལས། མྱ་ངན་ལས་འདས་པའི་བསམ་པས་རབ་ཏུ་བྱུང་བ་ཚུལ་ཁྲིམས་དང་ལྡན་པ་ལ་ནི་གོས་སྟོང་ཕྲག་བརྒྱ་པ་དང་། ཟས་རོ་བརྒྱ་པ་དང་། ཁང་པ་བརྩེགས་པ་ལྔ་བརྒྱ་པ་ཡང་འོས་སོ། །ཞེས་གསུངས་སོ། །དེ་ལྟ་བུའི་གནང་བཀག་འབྱུང་བའི་རྒྱུ་མཚན་ཡོད་དེ། རབ་ཏུ་བྱུང་བ་རྣམས་ཀྱིས་འདོད་པ་བསོད་ཉམས་ཀྱི་མཐའ་དང་། ངལ་ཞིང་དུབ་པའི་མཐའ་སྤངས་ནས་དབུ་མའི་ལམ་ལ་གནས་པར་བྱ་དགོས་པའི་ཕྱིར་རོ། །ཞེས་པའང་ཉེར་མཁོའི་ལེའུ་ཚན་ནོ།། །། ༈

[edit]

sbyangs pa'i yon tan bcu gnyis kyi rnam par bshad pa'i le'u tshan/ sbyangs pa'i yon tan bcu gnyis kyi rnam par bshad pa'i le'u tshan no/__/na maHshAkya mu na ye/__spyir sbyangs pa'i yon tan la bcu gnyis yod de/__zas kyi dbang du byas pa gsum/__gos kyi dbang du byas pa gsum/__gnas mal gyi dbang du byas pa drug yod pas so/__/zas kyi dbang du byas pa gsum ni/__bsod snyoms pa dang /__stan gcig pa dang /__zas phyis mi len pa'o/__/dang po la rnyed pas chog pa'i bsod snyoms pa dang /__mthar gyis slong ba'i bsod snyoms pa gnyis su phye na sbyangs pa'i yon tan bcu gsum du 'gyur/__gos kyi dbang du byas pa gsum ni/__chos gos gsum pa dang /__phyir ba pa dang /__phyags dar khrod pa'o/__/gnas mal gyi dbang du byas pa drug ni/__dgon pa dang /__shing drung pa dang /__bla gab med pa/__dur khrod pa dang /__tsog pu dang /__gzhi ji bzhin pa'o/__/kha cig phyi ma gnyis spyod lam gyi dbang du byas par mdzad nas/__gnas mal gyi dbang du byas pa bzhi yin zhes zer/__de dag so so'i ngo bo gang zhe na/__rnyed pas chog pa'i bsod snyoms pa ni/__'dris pa'i khyim nas ji tsam rnyed pa za bar byed pa yin la/__mthar gyis slong ba'i bsod snyoms pa ni/__khyim rnams su rim gyis brgyud de bsod snyoms ji tsam rnyed pa za bar byed kyi/__bdag gis 'di nas bza' ba dang bca' ba bzang po thob bo snyam nas mgo 'phang bstod de mi 'gro'o/__/stan gcig pa ni/__stan gcig po de la 'dug nas ji tsam za ba de tsam du za bar byed kyi/__de las langs nas mi za ba'o/__/zas phyis mi len pa ni/__zas kyi phyir 'dug nas ji tsam gyis bdag 'tsho ba'i zas thams cad ma blangs kyi bar du mi za zhing /__'dis 'tsho'o snyam pa dang thams cad gcig car du blangs nas za ba'o/__/chos gos gsum pa ni/__snam sbyar/__bla gos/__mthang gos gsum gyis 'tsho bar byed cing /__de las lhag pa'i gos mi 'chang ba dang /__phying ba pa ni/__chos gos gsum mam/__gos lhag pa gcig 'chang ba thams cad bal las byas pa sha stag 'chang gi/__de las gzhan mi 'chang ba dang /__phyags dar khrod pa ni/__lam po che la sogs par bor ba'i bshang gcin sogs kyis reg pa mi gtsang ba rnams bor te/__rung ba rnams blangs te bkrus drubs kha dog bzang por bsgyur nas 'chang bar byed pa dang /__dgon pa ba ni grong dang grong brdal la sogs pas dben pa'i dgon pa dang /__nags 'dabs la sogs par gnas pa dang /__shing drung pa ni shing ljon pa'i drung du gnas 'cha' zhing rten par byed pa dang /__bla gab med pa ni/__steng gi thog ma bkab cing ma g.yogs pa'i phyogs su gnas 'cha' bar byed pa dang /__dur khrod pa ni/__gang du skye'o shi'o cog 'dong ba'i dur khrod du gnas 'cha' bar byed pa dang /__tsog pu pa ni/__khri'am/__khri'u 'am/__rtswa'i steng du tsog pur 'dug ste/__khri la sogs par rgyab bam/__glos mi bsten pa dang /__gzhi ji bzhin pa ni/__rtswa dang lo ma la sogs pa bting ba la mal 'cha' zhing /__lan gcig ji ltar bting ba mal 'cha' bar byed kyi/__yang yang du brje zhing mi 'chos pa'o/__/de dag ni nyan thos kyi sa las ji ltar 'byung ba bzhin yin no/__/yang phying ba pa ma gtogs pa rnams la chung ngu /__'bring /__chen po gsum gsum yod de/__bsod snyoms pa la gsum las/__chung ngu ni/__grong du phyin pa na kun dga' ra bar rnyed pa len par byed pa dang /__'bring ni der mi len par lam bar du rnyed pa len par byed pa dang /__chen po ni/__der yang mi len par grong khyer gyi nye skor du phyin nas rnyed pa len par byed pa'o/__/stan gcig pa la yang gsum las/__chung ngu ni/__nyan pa las bshad pa bzhin dang /__'bring ni stan gcig po de ma spangs kyi bar du zas zos nas zas bsod pa byung na len pa dang /__chen po ni/__zos nas zas bsod pa yang len par mi byed pa'o/_/zas phyis mi len pa la yang gsum las/__chung ngu ni kha la sogs pa ma bkrus kyi bar du len par byed pa dang /__'bring ni/__zas za bzhin du gzhan gyis bstabs pa len la/__kha la sogs pa bkrus nas mi len pa dang /__chen po ni/__sngar zas thams cad gcig car du blangs nas zas za bzhin du mi len pa'o/__/chos gos gsum pa la yang gsum las/__chung ngu ni/__chos gos gsum dang ras chen g.yan pa dgab pa stan dang gding ba bcas 'chang bar byed pa dang /__'bring ni/__ras chen sogs bzhi rang gis byin gyis brlabs pa mi 'chang la/__gzhan gyis byin gyis brlabs pa la longs spyod par byed pa dang /__chen po ni/__chos gos gsum tsam 'chang gi/__de las lhag par mi 'chang ba'o/__/phyags dar khrod pa la yang gsum las/__chung ngu ni/__byi bas zos pa/__tshig pa/__dum bur bcad pa/__gzhan gyis rang gi ched du byas pa len pa dang /__'bring ni/__rang gi ched du byas pa mi len par/__ma nges par bor ba len pa dang /__chen po ni/__de dag mi len par/__dur khrod dang /__phyags dar khrod dang /__lam po cher lhung ba len pa'o/__/dgon pa pa la yang gsum las/__chung ngu ni/__grong las gzhu 'dom lnga brgyas bcad pa'i sar gnas pa dang /__'bring ni/__grong las gzhu 'dom stong phrag gnyis kyis bcad pa'i sar gnas pa dang /__chen po ni/__grong las gzhu 'dom stong phrag brgyad kyis bcad pa'i sar gnas pa'o/__/shing drung pa la yang gsum las/__chung ngu ni/__shing drung ngo bzhi po thams cad skyor bar gnas pa dang /__'bring ni/__der ngos cung zad skyor bar gnas pa dang /__chen po ni/__der ngos thams cad nas ma skyor bar gnas pa'o/__/bla gab med pa la yang gsum las/__chung ngu ni/__steng gi ngos gsum g.yogs la/__gcig ma g.yogs par gnas pa dang /__'bring ni/__steng ngos gcig g.yogs la gsum ma g.yogs par gnas pa dang /__chen po ni/__steng gi ngos thams cad ma g.yogs par gnas pa'o/__/dur khrod pa la yang gsum las/__chung ngu ni/__sngon dur khrod yin la/__da lta dur khrod ma yin par gnas pa dang /__'bring ni/__ro cung zad skyel ba'i sar gnas pa dang /__chen po ni/__skye bo shi'o cog skyel ba'i sar gnas pa'o/__/tsog pu pa la yang gsum las/__chung ngu ni/__ngos gnyis snyes nas gnas pa dang /__'bring ni/__ngos gcig snyes nas gnas pa dang /__chen po ni ngos thams cad la ma snyes par gnas pa'o/__/gzhi ji bzhin pa la gsum las/__chung ngu ni lan gsum mal 'cha'i gzhan mi byed pa dang /__'bring ni/__lan gnyis su mal 'cha'i gzhan mi byed pa dang /__chen po ni/__lan gcig stan bting ba la mal 'cha'i/__yang dang yang du mi brje mi 'chos pa'o/__/de dag la ci'i phyir sbyangs pa'i yon tan zhes bya zhe na/__dper na/__bal ma rmel ba de'i tshe skud pa mi rung la/__rmel nas rung ba de bzhin du/__bsod snyoms dang /__chos gos dang /__gnas mal la chags pa'i tshe sems las su mi rung la/__yon tan 'di dag gis tshangs spyod la gnas par bya ba'i phyir/__sems las rung du sbyong bar byed pas de skad ces bya'o/__/sbyangs pa'i yon tan bcu gnyis po 'di dag bsten pa la dgos pa ci yod ce na/__zas kyi dbang du byas pa gsum bsten pa la dgos pa yod de/__zas bzang po la chags pa spang pa'i phyir du bsod snyoms pa dang /__zas mang po la chags pa spang ba'i phyir du stan gcig pa dang /__zas phyis mi len pa gnyis brten par bya ba yin pa'i phyir/__gos kyi dbang du byas pa gsum bsten pa la dgos pa yod de/__gos mang po la chags pa spang ba'i phyir du chos gos gsum pa dang /__gos 'jam zhing reg na bde ba la chags pa spang ba'i phyir du phying ba pa dang /__gos bzang po la zhen pa dgag pa'i phyir du phyags dar khrod pa bsten par bya ba yin pa'i phyir/__gnas mal gyi dbang du byas pa drug bsten pa la dgos pa yod de/__'du 'dzi la chags pa spang ba'i phyir dgon pa dang /__gnas la chags pa spang ba'i phyir shing drung pa dang /__bla gab med pa dang /__dur khrod pa ste gsum dang /__dur khrod pa ni 'khrig pa la chags pa spang pa'i phyir yang yin la/__glos 'bebs pa dang nyal ba'i bde ba la chags pa spang ba'i phyir tsog pu pa dang /__stan 'ding ba dang gab pa la chags pa'i gnyen por gzhi ji bzhin pa bsten par bya ba yin pa'i phyir ro/__/sbyangs pa'i yon tan bcu gnyis po brten pa 'di dag la phan yon ci yod ce na/__'di la spyir bstan pa dang /__so sor phye nas bstan pa gnyis las/__dang po ni/__'di dag bsten pa la phan yon yod de/__grags pa dang rnyed bkur tshul 'chos dang kha gsags chags sdang sogs rim gyis spang bar 'gyur ba dang /__bsod snyoms dang chos gos gnas mal ngan ngon tsam gyis chog shes pa 'phags pa'i rigs la gnas par 'gyur ba dang /__yo byad bsnyungs par 'gyur ba dang /__sangs rgyas dang nyan thos kyis bsngags par 'gyur ba'i phan yon yod pa'i phyir ro/__/gnyis pa ni/__bsod snyoms pa la ni nga rgyal med cing /__brnyas pa bzod pa dang /__zas kyis phongs pa med pa dang /__zas bzang po don du gnyer ba'i sdug bsngal mi 'byung ba'i phan yon yod do/__/stan gcig pa la yang zas gnyis pa tshol ba dang /__byin len yang dang yang du byed pa'i gnod pa mi 'byung ba dang /__zos pa 'ju zhing gnod pa chung ba dang /__ldang ba yang zhing bde bar gnas pa'i phan yon yod do/__/zas phyis mi len pa la yang /__chog shes pa dang /__zas la brkam chags med pa dang /__zas yang dang yang du tshol ba'i gnod pa med pa dang /_bsam gtan dang klog pa la mi gnod pa'i phan yon yod do/__/chos gos gsum pa la yang /__chos gos lhag po tshol ba'i sdug bsngal med pa dang /__gos zhag bcu 'chang yang ltung ba mi 'byung ba dang /__gos lhag pa byin gyis rlobs pa'i las mi 'byung ba dang /__yo byad bsnyungs shing rnal 'byor dang rjes su mthun pa'i phan yon yod do/__/phying ba pa la yang /__gos bzang po la sred pa med pas/__de tshol ba'i sdug bsngal med pa dang /_de la brten nas char dang tsha grang la sogs pa'i gnod pa bzod pa'i phan yon yod do/__/phyags dar khrod pa la yang /__gos kyi phyir khyim pa rnams dang mi 'dre ba dang /__chom rkun pas glags mi blta zhing /__gos bsrung ba'i phyir sdug bsngal med pa dang /__phyogs gang du phyin kyang gos kyis mi brel ba dang /__log 'tsho'i skyon gyis mi gos pa'i phan yon yod do/__/dgon pa ba la yang /__grong gi 'du 'dzi la gnas pas/__ting nge 'dzin thob pa dang /__bsrung bar mi nus la/__'du 'dzi spangs nas dgon par mnyam par bzhag pas/__ting nge 'dzin thob pa dang /__bsrung bar nus pa dang /__dge ba la mngon du phyogs pa dang /__'gyod pa med par 'chi ba'i dus byed pa'i phan yon yod do/__/shing drung pa la yang /__gnas mal tshol ba'i sdug bsngal med pa dang /__gzhan dang rtsod gzhi med pa dang /__shing gi yal ga dang lo ma'i dus kyi 'gyur ldog la brten nas 'dus byas mi rtag par rtogs pa dang /__gnas mal la chags pa med cing thogs med du rgyu ba'i phan yon yod do/__/bla gab med pa la yang /__gnas mal tshol ba dang sba ba dang byi dor byed pa'i sdug bsngal med pa dang /__rgyu skar gyi 'gro 'dug la brten nas 'dus byas mi rtag par rtogs pa la sogs pa'i phan yon yod do/__/dur khrod pa yang /__dur khrod du mi rtag pa dang /__mi gtsang ba bsgom pa la brten nas 'dod chags sogs bag med pa mi 'byung ba dang /__lus srog la blta ba bsrab par 'gyur ba dang /__de la brten pa'i rgyags pa spang pa'i phan yon yod do/__/tsog pu par yang /__/sems gnyid dang mal bde ba'i dbang du mi 'gro ba dang /__lus la chags pa bsrab par 'gyur ba dang /__ldang ba yang zhing rmi lam nyung ba dang /__gnas mal 'tshol ba dang 'chos pa'i bya ba nyung ba'i phan yon yod do/__/gzhi ji bzhin pa la yang /__lan gcig ji ltar stan bcas pas chog shes nas gnas mal 'tshol ba'i sdug bsngal med pa dang /__gnas mal la chags pa med pa dang /__don nyung ba dang bya ba nyung ba la sogs pa'i phan yon rnams yod do/__/'o na sbyangs pa'i yon tan 'di dag gang las 'thob ce na/__mdzod las/__lhag ma'i rnam rig min zhing dang /__/len dang gus par byed las 'thob/__/ces pa ltar/__dge slong lta bu las len par byed pa las 'thob bo/__/tshul ji ltar na/__yul de phyag 'os yin na phyag 'tshal/__mdun du tsog pur 'dug ste/__thal mo sbyar nas btsun pa dgongs su gsol/__bdag ming 'di zhes bgyi ba/__dus 'di nas bzung ste/__ji srid 'tsho'i bar du chos gos bzhi spangs te/__chos gos gsum pa yang dag par len te/__bdag chos gos gsum pa'i yi dam dang ldan par btsun pas bzung du gsol/__/zhes lan gsum dang /__mjug tu thabs legs bya'o/__/de bzhin du gzhan rnams la yang ji ltar rigs pa shes par bya'o/__/'o na sbyangs pa'i yon tan 'di dag gi yi dam gang gis 'jig pa'am gtong ba yin zhe na/__mdzod las/__bar ma shugs blangs bya ba dang /__/de tshe rtsa ba chad pa las/__/zhes bshad pa ltar/__'di tsam du zhes blangs pa ni blangs pa chad pa dang /__blangs kyang bya ba ji bzhin mi byed na bya ba chad pa dang /__tshe chad pa dang /__dge rtsa chad pas gtong ba dang /__mi brda 'phrod pa'i drung du bsam pa thag pas phul bas kyang gtong la/__'bul tshul ni/__tshe dang ldan pa dgongs su gsol/__bdag ming 'di zhes bya bas chos gos gsum pa'i yi dam yang dag par blangs pa las/__che ge mo'i rkyen gyis de nyid slar 'bul lo/__/tshe dang ldan pa bdag chos gos gsum pa'i yi dam ma mchis par bzung du gsol/__/zhes pa lta bu'o/__/'o na 'di dag la gnang ba yod dam med ce na/__yod de/__'di dag ni gos dang zas dang gnas mal la lhag par chags pa'i gnyen por gsungs pa yin pas/__sbyor ba'i dus su 'bad rtsol gyis bsgrubs mi dgos shing /__dngos gzhi'i dus su chags zhen med na/__gos srang 'bum ri ba dang /__khang pa brtsegs pa lnga brgya pa dang /__zas ro brgya pa la longs spyad par chog par gsungs pa'i phyir/__de ltar yang mdo rtsa ba las/__mya ngan las 'das pa'i bsam pas rab tu byung ba tshul khrims dang ldan pa la ni gos stong phrag brgya pa dang /__zas ro brgya pa dang /__khang pa brtsegs pa lnga brgya pa yang 'os so/__/zhes gsungs so/__/de lta bu'i gnang bkag 'byung ba'i rgyu mtshan yod de/__rab tu byung ba rnams kyis 'dod pa bsod nyams kyi mtha' dang /__ngal zhing dub pa'i mtha' spangs nas dbu ma'i lam la gnas par bya dgos pa'i phyir ro/__/zhes pa'ang nyer mkho'i le'u tshan no//____//__!