JKW-KABUM-21-ZHA-023

🚧 This website is under continued development. We appreciate your patience!

Previous Section Back to Volume PageNext Section

Wylie title
Location	mkhyen brtse'i bka' 'bum Volume 21, sde tshan 23, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 21: . Khams sde dge rdzong sar dgon: Rdzong sar blo gros phun tshogs, 2020.
Genre

1 Texts in this Section (sde tshan or chos tshan)

595-611	རིན་ཆེན་རིལ་བུའི་ཕན་ཡོན་དང་བསྟེན་ཚུལ་བདུད་རྩིའི་ཟླ་སྣང་། rin chen ril bu'i phan yon dang bsten tshul bdud rtsi'i zla snang Medicinal Pills - Making and Activating Practices - sman sgrub	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རིན་ཆེན་རིལ་བུའི་ཕན་ཡོན་དང་བསྟེན་ཚུལ་བདུད་རྩིའི་ཟླ་སྣང་།

༄༅། །རིན་ཆེན་རིལ་བུ་རྣམས་ཀྱི་ཕན་ཡོན་དང་བསྟེན་ཚུལ་སྙིང་པོར་དྲིལ་བ་བདུད་རྩིའི་ཟླ་སྣང་ཞེས་བྱ་བ་བཞུགས་སོ།། །། ཨོཾ་ཨ་ཐཱ། གྲུབ་པའི་བདུད་རྩིས་ཡིད་ཅན་གདུང་སེལ་བ། །དབང་བཅུ་མངའ་བའི་ཕྲིན་ལས་གཟུགས་ཅན་བཞིན། །གང་དུ་སྣང་གྱུར་སྨན་གྱི་ནོར་བུ་ལ། །བཏུད་ནས་ཕན་ཡོན་བསྟེན་ཐབས་མདོ་ཙམ་བྲི། །དེ་ལ་སློབ་དཔོན་ཆེན་པོ་ངག་གི་དབང་ཕྱུག་གྲགས་པའི་ཞལ་སྔ་ནས། གྲུབ་པའི་སྔགས་དང་སྨན་སོགས་ནི། །འཕྲལ་དུ་ཡིད་ཆེས་བྱེད་པ་ཡིས། །འཆི་བདག་རྣམ་པར་བསལ་བར་བྱ། །ནོར་བུ་སྔགས་དང་སྨན་གྲུབ་དང་། །བཅུད་ལེན་སྟོབས་ཀྱིས་བདག་ཉིད་ནི། །འཆི་བདག་ཕ་རོལ་གནོན་མཐོང་སྟེ། །རིག་འཛིན་གྲུབ་པ་ཇི་བཞིན་ནོ། །ཞེས་དང་། གང་ཕྱིར་ནོར་བུའི་མཐུ་ལ་ནི། །སོམ་ཉི་བྱ་བར་རིགས་མིན་ཏེ། །ནོར་བུ་བསམ་གྱིས་མི་ཁྱབ་པའི། །མཐུ་དང་ལྡན་པར་ཐམས་ཅད་འདོད། །ཅེས་དང་། འཇིག་རྟེན་ན་ནི་དངོས་གཞན་གང་། །སྔགས་ཀྱིས་མི་འགྲུབ་དེ་ཡོད་མིན། །ཡང་དག་དད་དང་མངོན་བརྩོན་ལ། །སྔགས་རྣམས་ཡིད་བཞིན་ནོར་བུ་མཚུངས། །ཞེས་དང་། སྨན་རྣམས་ཀྱི་ནི་མཐུ་ལ་ཡང་། །སོམ་ཉི་བྱ་བར་རིགས་མིན་ཏེ། །གང་ཕྱིར་སྨན་གྱི་ནུས་པ་ནི། །བསམ་མི་ཁྱབ་པར་ཀུན་ཏུ་སྣང་། །ཞེས་སོགས་རྒྱ་ཆེར་བསྔགས་པ་ལྟར་ངོ་བོ་ནོར་བུ་རིན་པོ་ཆེ་དང་། བཅུད་ལེན་ཐམས་ཅད་ཀྱི་མཆོག་ཏུ་གྱུར་པ་གྲུབ་པའི་དངུལ་ཆུ་དང་། རོ་ནུས་ཞུ་རྗེས་ཕུན་སུམ་ཚོགས་པར་སྦྱར་བའི་སྨན་གྱི་རིལ་བུ་གང་ཞིག །རང་བཞིན་རྡོ་རྗེའི་སྔགས་ཀྱི་མཐུས་བྱིན་གྱིས་བརླབས་པ་ན། བྱེད་ལས་མཐོང་ཚོར་མྱང་ཞིང་མགུལ་དུ་འཆང་བ་ཙམ་གྱིས་ཀྱང་ནད་གདོན་བར་ཆད་ཐམས་ཅད་སེལ་བ་དང་། བཀྲ་ཤིས་ཤིང་དོན་གྲུབ་པ་དང་། ཚེ་དང་ལུས་ཀྱི་བཅུད་ལེན་དུ་འགྱུར་བ་སོགས་ཡོན་ཏན་བསྔགས་པ་མཐའ་ཡས་པའི་བདུད་རྩི་སྨན་གྱི་ནོར་བུ་རིན་ཆེན་རིལ་བུའི་ཚུལ་ལས་བརྩམས་ཏེ་ཅུང་ཟད་བརྗོད་ན་གཉིས། ཕན་ཡོན་དང་། བསྟེན་ཚུལ་ལོ། །དང་པོ་ལ་གཉིས། སྤྱི་དང་བྱེ་བྲག་གོ། །དང་པོ་ནི། དཔལ་ལྡན་རྒྱུད་ལས། ཞི་བྱེད་ཀུན་གྱི་ལོག་གནོན་རིན་པོ་ཆེ། །ཁྲག་མཁྲིས་བད་རླུང་བཞི་བརྒྱ་རྩ་བཞིའི་ནད། །མགོ་དང་བྱང་ཁོག་ཡན་ལག་རྨ་རྣམས་དང་། །དམུ་འོར་མཛེ་འབྲས་གག་ལྷོག་གཉན་ནད་དང་། །ཀླུ་གཉན་རྒྱལ་པོ་ལ་སོགས་འབྱུང་པོའི་གདོན། །རིན་པོ་ཆེ་ཡིས་མི་སེལ་གང་ཡང་མེད། །ནད་གཞི་མེད་པའི་མི་ལ་བཅུད་ལེན་འགྱུར། །ཞེས་པས་མཚོན་རྒྱུད་དང་མན་ངག་རྣམས་ལས་རྒྱ་ཆེར་གསུངས་སོ། །གཉིས་པ་ལ་དྲུག་ལས། དང་པོ་གྲུབ་ཆེན་ཨོ་རྒྱན་པའི་དགོངས་པ་གཙོར་གྱུར་རིན་ཆེན་རིལ་ནག་ཆེན་མོའི་ཕན་ཡོན་ནི། དཔལ་ལྡན་ཟུར་མཁར་བ་ཆེན་པོ་དྷརྨ་སྭཱ་མཱི་ས། སྦྱོར་བ་འདི་ནི་རིལ་ནག་ཆེན་པོ་ཞེས་བྱ་སྟེ། ཡོན་ཏན་བརྗོད་ཀྱིས་མི་ལོང་བ་དང་ལྡན་པས་རྒྱལ་ཁམས་ཡོངས་ལ་གྲགས་པའོ། །དམ་ཚིག་དང་ལྡན་པས་བསྟེན་ན་ནད་མེད་པ་ལ་སྲུང་བའི་མཆོག་ཏུ་འགྱུར་ཏེ། མི་ཚེ་འདི་ཡི་དུག་རིགས་ཐུབ། འཁྲུགས་དང་ཚད་རྙིང་སོགས་གཞན་གྱིས་གསོ་བར་དཀའ་བའི་ནད་ཐམས་ཅད་སྦྱོར་བ་འདིས་མི་སེལ་བ་འགའ་ཡང་མེད་དོ། །ཞེས་གསུངས་པ་ལྟར་སྦྱར་དུག་གཙོ་བོར་གྱུར་བའི་ནད་རིགས་ཐམས་ཅད་ལ་བསྔགས་ཤིང་། གདོན་ཐམས་ཅད་འཇོམས། བཅུད་ལེན་གྱི་མཆོག་ཏུ་འགྱུར། ཁྱད་པར་ཁོང་ནད་ཚ་ཤས་ཅན་དང་། སྨན་གཞན་གྱིས་ཕན་པར་དཀའ་བའི་ནད་གདོན་ཤས་ཆེ་བ་སོགས་ལ་མཆོག་ཏུ་བསྔགས། ལུས་ལ་འཆང་བས་སྲུང་བའི་རྒྱལ་པོ་འགྲུབ་བོ། །འོན་ཀྱང་བསིལ་ཁ་ཅུང་མཐོ་བས་གྲང་རླུང་གི་ཁམས་མཐོ་བ་དང་། བྱིས་པ་དང་རྒན་པོ་སོགས་ལ་འཕྲོད་དཀའ་ཙམ་སྣང་ངོ་། །གཉིས་པ་དཔལ་ལྡན་རྒྱུད་ལས་གཙོ་བོར་གསུངས་པའི་རིན་ཆེན་མང་སྦྱོར་ཆེན་མོའི་ཕན་ཡོན་ནི། ཕྲིན་ལས་ཀྱི་རྒྱུད་ལས། དུག་ནད་ཀུན་ལ་མང་སྦྱོར་ཆེན་མོ་མཆོག །ཅེས་སྦྱར་བ་དང་། གྱུར་པ་དང་། དངོས་ཀྱི་དུག་སོགས་དུག་རིགས་ཐམས་ཅད་ལ་མཆོག་ཏུ་ཟབ་པར་མ་ཟད། བསིལ་དྲོད་སྙོམས་པས་ཁོང་ནད་ཀྱི་རིགས་ཕལ་ཆེར་ལ་ཕན་པ་ཤིན་ཏུ་ཆེ་བ་ཡིན་ནོ། །གསུམ་པ་གྲུབ་ཆེན་ཨོ་རྒྱན་པའི་གདམས་ངག །རྗེ་རང་བྱུང་རྡོ་རྗེའི་ཐུགས་བཅུད་ཡང་ཟབ་རིན་ཆེན་རིལ་བུའི་ཕན་ཡོན་ནི། དཔལ་དྷརྨ་སྭཱ་མཱིའི་གསུང་ལས་བྱུང་བ་ལྟར་མདོར་བསྡུ་ན་ཐུན་མོང་དུ་ནད་མེད་ཀྱིས་བསྟེན་པའི་ཕན་ཡོན་དང་། ནད་པ་ལ་བཏང་བའི་ཕན་ཡོན་ནོ། །དང་པོ་ནི། རྡོ་རྗེ་མཁའ་འགྲོ་ལ་སོགས་པའི་རྒྱུད་ལས། གླང་པོའི་སྟོབས་དང་ཉི་ཟླའི་ཚེ། །ལྷ་ཡི་ལང་ཚོ་འཛིན་པར་འགྱུར། །ཞེས་གསུངས་པ་ལྟར་ལུས་སྟོབས་རྒྱས། མདངས་གསལ། སྐྲ་དཀར་ཉུང་དུ་འགྲོ། གཉེར་མའང་རང་ཞིར་འགྲོ། སོ་ཚགས་དམ་དུ་འགྲོ། མིག་ལ་སོགས་པའི་དབང་པོ་གསལ་དུ་འགྲོ། ཚ་གྲང་བཀྲེས་སྐོམ་བཟོད་པ་སོགས་ཡོན་ཏན་མང་དུ་འབྱུང་བ་མངོན་དུ་གྲུབ། ནང་དུ་རྩ་ཁ་འཛིན་སྡོམ་བྱེད། སྟེང་གདོན་དང་འོག་གདོན་སོགས་གདོན་གྱི་རིགས་ཐམས་ཅད་སྲུང་བ་དང་། རིམས་སོགས་ནད་རིགས་ཐམས་ཅད་སྲུང་བ་དང་། ཐ་མ་ཆམ་པ་ཡང་མི་འོང་བ་མྱོང་བས་གྲུབ་བོ། །གཉིས་པ་ནི། འདི་ནད་རིགས་གང་ལ་བཏང་ཡང་མཆོག་ཏུ་ཕན་པ་ཞིག་ཡིན་ལ། ཁྱད་པར་ནད་ཇི་ལྟར་ཆེ་བ་དང་། ནད་རྙིང་པར་གཏོགས་པ་དང་། སྨན་གཞན་བཏང་བའི་ནུས་པ་ཟད་ནས་བོར་བ་སོགས་ཉེས་པ་ཆེ་བ་ཙམ་ལ་འདིས་ཕན། དེ་ལས་ཀྱང་བརྟན་གཡོའི་དུག་ཐམས་ཅད་ལ་ཆེས་ཆེར་བསྔགས་སོ། །ཐུན་མོང་མ་ཡིན་པའི་དབང་དུ་བྱས་ན་གཞུང་རྩ་བའི་རྡོ་རྗེའི་ཚིག་ལས། འདི་ཡི་རིམ་པས་ནང་ལ་ཡང་། །སྲོག་རྩོལ་དྷཱུ་ཏིའི་ལམ་དུ་འཆིངས། །ཞེས་རླུང་སེམས་དབུ་མར་ཐིམ་ནས་ཡང་དག་པའི་ཡེ་ཤེས་མངོན་དུ་བྱེད་པའི་ཆ་རྐྱེན་དུ་བསྔགས་པས་མཚོན་བསམ་གྱིས་མི་ཁྱབ་བོ། །བཞི་པ་དབང་རིལ་ཤེལ་དཀར་མཆོད་རྟེན་དུ་གྲགས་པའི་ཕན་ཡོན་ནི། གཞུང་ལས། ལེགས་པར་བསྟེན་པའི་ཕན་ཡོན་ནི། །དུག་རིགས་ཤ་སྦྱོར་རྩི་སྦྱོར་དང་། །སྔོ་སྦྱོར་སྤུ་སྦྱོར་ས་རྡོའི་སྦྱོར། །ཤིང་སྦྱོར་རིན་པོ་ཆེ་ཡི་སྦྱོར། །ཆུ་སྦྱོར་ཚ་སྦྱོར་གྲང་སྦྱོར་སོགས། །མདོར་ན་དུག་རིགས་གང་ཡིན་ཀྱང་། །མི་ཐུབ་གཅིག་ཀྱང་ཡོད་མ་ཡིན། །གསོ་དང་སྲུང་བ་གཉིས་ཀ་བྱེད། །ཅེས་སོགས་གསུངས་པ་ལྟར་དུག་རིགས་ཐམས་ཅད་ལ་མཆོག་ཏུ་བསྔགས་ཤིང་། ཁོང་ནད་ཀྱི་རིགས་གང་ལའང་ཕན་ནོ། །ལྔ་པ་དབང་རིལ་རིན་ཆེན་རྟ་རི་མའི་ཕན་ཡོན་ནི་སྨན་སོ་སོའི་ཡོན་ཏན་དང་ནུས་པ་སོགས་རྒྱས་པར་དཀར་ཆག་ཏུ་གསལ་བ་ལྟར་ལ། མདོར་བསྡུ་ན། སྦྲུལ་ལ་སོགས་པ་སྲོག་ཆགས་དུག །བོང་ང་ལ་སོགས་བཙན་དུག་དང་། །ཆུ་དུག་རླངས་དུག་ས་ཡི་དུག །རྫི་དུག་ཤ་དུག་གྱུར་པའི་དུག །སྒོང་དུག་མུ་སྟེགས་ངན་སྔགས་དུག །སྦྱར་དུག་ལོ་ཟླར་ཞེན་པ་སོགས། །དུག་རིགས་ཐམས་ཅད་འདི་ཡིས་འཇོམས། །ཞེས་གསུངས་པ་ལྟར་དང་། གཞན་ཡང་གསོ་དཀའ་བའི་ཁོང་ནད་རིགས་ཕལ་ཆེར་ལ་བསྔགས་སོ། །དྲུག་པ་བསམ་འཕེལ་རིན་ཆེན་རིལ་བུའི་ཕན་ཡོན་ནི། ཇི་སྐད་དུ། རིན་ཆེན་སྨན་གྱི་སྦྱོར་བ་ཁྱད་པར་ཅན། །འདི་ཡི་ཕན་ཡོན་བརྗོད་ཀྱིས་མི་ལོང་ཡང་། །མདོར་བསྡུས་ཚ་གྲང་འདུ་བ་འཁྲུགས་པའི་ནད། །ཡུན་རིང་གསོ་དཀའ་སྨན་པས་བོར་པ་དང་། །ཁྱད་པར་རྩ་དཀར་རིང་འཁུམས་འཁྲུགས་པ་འཇོམས། །བྱེར་བ་བསྡུ་ཞིང་རྙིང་པ་གཏིང་ནས་འདོན། །མཁལ་ཚད་རྩ་འགྲམ་ཁྲག་རླུང་གཟེར་མདའ་གཅོག །སྟེང་གདོན་གཟའ་དང་བར་གདོན་རྒྱལ་པོ་བཙན། །འོག་གདོན་ཀླུ་ཡི་རིགས་རྣམས་ཐམས་ཅད་སེལ། །རྨ་རྙིང་སུཪྻ་རྐང་འབམ་ཞ་འཁུམ་སོགས། །ཕྱི་ནང་ཕལ་ཆེའི་ནད་ལ་བསྔགས་པ་སྟེ། །མགུལ་དུ་འཆང་ན་སྲུང་བའི་རྒྱལ་པོར་འགྱུར། །དྲི་ཚོར་ཙམ་གྱིས་གདོན་བགེགས་འབྱུང་པོ་འབྲོས། །དེ་ཕྱིར་བསམ་འཕེལ་ཡིད་བཞིན་རིན་པོ་ཆེ། །སྨན་གྱི་ནོར་བུ་རྒྱུན་ཤེས་སྨན་པའི་ལུགས། །གསོ་རིག་རྒྱ་མཚོ་བསྲུབས་པའི་བདུད་རྩི་སྟེ། །དྲང་སྲོང་འཚོ་ཐབས་ཤེས་པའི་སྙིང་ནོར་ཡིན། །ཞེས་སོགས་བསྔགས་པ་ལྟར་ནད་གདོན་རིགས་སྤྱི་དང་། ཁྱད་པར་རྩ་དཀར་གྲིབ་ཤས་ཅན་གྱི་རིགས་ལ་མཆོག་ཏུ་བསྔགས་ཤིང་། གཟའ་གདོན་སོགས་ལའང་ཆེས་ཆེར་ཕན་པ་མྱང་བས་གྲུབ་བོ། །གཉིས་པ་ཇི་ལྟར་བསྟེན་པའི་ཚུལ་ལ། སྤྱིར་རིན་ཆེན་རིལ་བུའི་རིགས་ཕལ་ཆེར་དུག་ནད་ཁོ་ནའི་གཉེན་པོར་བསྔགས་པས། དེ་ལ་སྲུང་བ་ལྟར་བསྟེན་ཚུལ། གསོ་བ་ལྟར་བསྟེན་ཚུལ་སོགས་མང་དུ་བཤད་ཅིང་། བྱེ་བྲག་གསོ་བ་ལའང་། དང་པོར་ཐང་གིས་བྱེར་བ་བསྡུ། བར་དུ་རིན་ཆེན་གྱི་སྦྱོར་བས་བསད། ཐ་མ་བཤལ་གྱིས་དག་པར་སྦྱོང་བས་མཚོན་རྒྱ་ཆེར་གསུངས་པ་གཞུང་དང་མན་ངག་ཕྱག་ལེན་གྱིས་གཏན་ལ་ཕབ་པས་ཤེས་པར་འགྱུར་གྱི་ཡི་གེ་ཉུང་ངུས་མཚོན་པར་མི་ནུས་ལ། འདིར་ཐུན་མོང་དུ་བཏང་ཚུལ་རྒྱུན་གྱི་ལག་ལེན་མདོ་ཙམ་བཤད་ན། དུག་སོགས་ལ་མར་ངོའི་ཟླ་ཟད་ལ་བཏང་བའི་གནད་ཡོད་ཀྱང་། སྤྱིར་གཟའ་ཚེས་ཤིན་ཏུ་བཟང་བར་ལེགས་ཤིང་། སྡུད་སྨིན་གྱི་ཐང་སྨན་གང་རིགས་ཞག་བརྒྱད་ཙམ་གོང་ནས་བཏང་ཞིང་། ཁྱད་པར་ཞག་གསུམ་ནས་གཡེར་འབྲུ་བདུན་ཙམ་གྱི་ཐང་རྩ་ཁ་འབྱེད་པ་ལ་བཏང་། གཤོམ་ནི། སྟན་དཀར་དྲི་མེད་སྟེང་དུ་འབྲུ་དཀར་གྱི་གཡུང་དྲུང་གཡོན་འཁྱིལ་བྲི། དེའི་སྟེང་ལྷུང་བཟེད་ནང་དུ་འབྲུ་བཟང་པོ་བླུགས། དེ་ནང་དཀར་ཡོལ་གས་ཆག་མེད་པ་ཞིག་ཏུ་ཚ་ཤས་ཅན་ལ་ཁ་ཆེའི་གྲུང་ཆུ། གྲང་ཤས་ཅན་ལ་སེ་འབྲུའི་ཁུ་བ། སྤྱིར་བཏང་ཆང་བཟང་པོ་ཁྱོར་གང་ཙམ་ནང་རིལ་བུ་བཞག །དེ་སྟེང་དར་དམར་གྱིས་ཁ་བཅད། དེ་སྟེང་ཆོས་གོས་བྱིན་ལྡན་བརྒྱད་ལྟེབ་སྟེང་དུ་སྨན་བླའི་སྐུ་ཞལ་རང་ལ་བསྟན། གཞན་ཡང་སྨན་རྒྱུད་ཀྱི་དཔེ་དང་མཆོག་གསུམ་གྱི་རྟེན་གང་འབྱོར་མདུན་དུ་རྣམ་ལྔས་གཙོས་པའི་མཆོད་པ་ཅི་འབྱོར་བཤམ། མདོ་ལུགས་ལྟར་ན་བདེ་གཤེགས་བདུན་གྱི་སྨོན་ལམ་ཆོ་ག་དང་། སྔགས་ལུགས་ལྟར་ན་རྒྱས་པར་སྙིང་ཐིག་སྡུག་བསྔལ་མུན་སེལ་ལྟར་རམ། བསྡུས་པ་སྒྲུབ་ཐབས་དངོས་གྲུབ་བང་མཛོད་ཀྱི་ཆོ་ག་བྱས་ལོ་མ་ཡིན་པར་བཏང་ནས། བྱེ་བྲག་གི་དམིགས་འདུན་དང་སྙིང་རྗེའི་བསམ་སྦྱོར་དང་ལྡན་པས་གཟུངས་སྔགས་ཅི་མང་བཀྲ་ཤིས་བཅས་བྱའོ། །དེ་ནས་གླུད་གཏོར་རམ་སྦྱོང་བ་བགེགས་བསྐྲད་དང་བཅས་མཚམས་ཐོ་ལྡན་པས་འགྲིམ་འགྲུལ་འཛེམ། ནང་པར་བདུད་རྩི་ཐུན་མཚམས་དང་ལྡན་པའི་ཚེ། སྨན་པའི་ལག་གཙང་མར་བྱས་ཏེ། སྲིན་མཛུབ་ཀྱི་རིལ་བུ་བཤིགས་ནས་ནད་པ་ཁ་ཤར་དུ་ཕྱོགས་པའི་སྔས་མགོ་ཁྲིའུའི་ཁར་བཟང་པོའི་འདུག་སྟངས་ཀྱིས་འཁོད་དེ་སྨན་སྣོད་ལག་གཡོན་དུ་ཐོགས་ལ། ༈ སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །ཞེས་སོགས་སྐྱབས་སེམས་ལན་གསུམ་དང་། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། ༈ རང་ཉིད་བཻཌཱུཪྻ་འོད་སྨན་གྱི་རྒྱལ། །མཚན་བཟང་སོ་གཉིས་དཔེ་བྱད་བརྒྱད་ཅུར་ལྡན། །སྤྲུལ་པའི་སྐུ་མཆོག་ཕྱག་གཡས་ཨ་རུ་ར། །གཡོན་པས་བདུད་རྩིས་གང་བའི་ལྷུང་བཟེད་བསྣམས། །པད་ཟླའི་གདན་བཞུགས་སངས་རྒྱས་བྱང་ཆུབ་སེམས། །དྲང་སྲོང་བཀའ་སྲུང་རྒྱ་མཚོའི་ཚོགས་ཀྱིས་བསྐོར། །མདུན་གྱི་སྨན་སྣོད་བདུད་རྩིའི་ལྷུང་བཟེད་གསལ། །ཐུགས་ལས་འོད་ཟེར་དཔག་མེད་འཕྲོས་པ་ཡིས། །ཕྱོགས་བཅུའི་སངས་རྒྱས་བྱང་སེམས་ཐམས་ཅད་དང་། །བླ་མ་ཡི་དམ་མཁའ་འགྲོ་ཆོས་སྐྱོང་སོགས། །ལྷ་མིའི་དྲང་སྲོང་འཇིག་རྟེན་སྐྱོང་རྣམས་ཀུན། །སྤྲིན་ལྟར་སྤྱན་དྲངས་མདུན་མཁར་བཞུགས་ནས་ཀྱང་། །བཀྲ་ཤིས་དང་བཅས་སྨན་མཆོག་བྱིན་བརླབས་ནས། །ཚེ་ཡི་བཅུད་བསྡུས་སྨན་མཆོག་ཉིད་ལ་ཐིམ། །འཚོ་མཛད་སྨན་པའི་རྒྱལ་པོ་བཅོམ་ལྡན་འདས། །དུག་གསུམ་ནད་སེལ་སངས་རྒྱས་སྨན་གྱི་བླ། །སྐུ་མདོག་མཐིང་ག་བཻ་ཌཱུཪྻ་ཡི་འོད། །སྤྲུལ་པའི་སྐུ་ལ་མཚན་དང་དཔེ་བྱད་ལྡན། །རླུང་མཁྲིས་བད་ཀན་ནད་ཀྱིས་གདུངས་པ་ལ། །ནད་ཀྱི་གཉེན་པོར་ཕྱག་གཡས་ཨ་རུ་ར། །ཕྱག་གཡོན་བདུད་རྩིའི་ལྷུང་བཟེད་པར་བུ་བསྣམས། །བཻ་ཌཱུཪྻ་ཡི་འོད་ལ་ཕྱག་འཚལ་ལོ། །རིག་པའི་གནས་མཆོག་བཅོ་བརྒྱད་ཐུགས་སུ་ཆུད། །ཚེ་ལ་དབང་བའི་བཅུད་ལེན་དངོས་གྲུབ་བརྙེས། །མངོན་ཤེས་སྙིང་རྗེས་འགྲོ་མཆོག་འདུ་བ་སྙོམས། །དྲང་སྲོང་རིག་འཛིན་རྣམས་ལ་ཕྱག་འཚལ་ལོ། །ལྷ་རྣམས་ཀྱི་ནི་བདུད་རྩི་ལྟ་བུ་དང་། །ཀླུ་རྣམས་ཀྱི་ནི་གཙུག་ནོར་ལྟ་བུ་དང་། །དྲང་སྲོང་རྣམས་ཀྱི་བཅུད་ལེན་ལྟ་བུར་ནི། །ཁྱོད་ལ་སྨན་འདི་ཉེ་བར་གནས་གྱུར་ཅིག །རླུང་མཁྲིས་བད་ཀན་བཞི་བརྒྱ་རྩ་བཞིའི་ནད། །ཚེ་ལ་བར་དུ་གཅོད་པ་ཞི་བ་དང་། །གནོད་པའི་བགེགས་རིགས་སྟོང་ཕྲག་བརྒྱད་ཅུ་དང་། །ཡེ་འདྲོགས་སུམ་བརྒྱ་དྲུག་ཅུ་ལ་སོགས་པ། །བསམ་པའི་བར་དུ་གཅོད་པ་ཞི་བར་མཛོད། ཨོཾ་ན་མོ་བྷ་ག་ཝ་ཏེ་བྷཻ་ཥ་ཛྱེ་གུ་རུ་བཻ་ཌཱུཪྻ་པྲ་བྷ་རཱ་ཛཱ་ཡ། ཏ་ཐ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་བྷཻ་ཥ་ཛྱ་བྷཻ་ཥ་ཛྱ་མ་ཧཱ་བྷཻ་ཥ་ཛྱ་བྷཻ་ཥ་ཛྱ་རཱ་ཛ་ས་མུངྒ་ཏེ་སྭཱ་ཧཱ། ཞེས་གཟུངས་ལན་བདུན་བཟླས། དེ་ནས་སྨན་ཕུད་མཐེབ་སྲིན་གྱིས་འཐོར་ཞིང་། ཆོས་དབྱིངས་རྣམ་དག་ལྷུན་གྲུབ་གཞལ་ཡས་ནས། །རྫོགས་པའི་སངས་རྒྱས་སྨན་གྱི་རྒྱལ་པོ་ལ། །སྨན་མཆོག་བདུད་རྩིའི་མཆོད་པ་འདི་ཕུལ་བས། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །རྒྱུན་ཤེས་བུ་སོགས་དྲང་སྲོང་མཆོག་རྣམས་དང་། །འཚོ་བྱེད་གཞོན་ནུ་ཀླུ་སྒྲུབ་དཔའ་བོའི་ཞབས། །ཟླ་དགའ་ལ་སོགས་གྲུབ་པ་མཆོག་རྣམས་དང་། །ཁྲི་སྲོང་ལྡེའུ་བཙན་གྲྭ་མངོན་གཡུ་ཐོག་མགོན། །མཁས་པའི་ཁྱུ་མཆོག་བྱང་ཟུར་རྣམ་གཉིས་སོགས། །དངོས་བརྒྱུད་དྲང་སྲོང་སྨན་པའི་ཚོགས་རྣམས་ལ། །སྨན་ཕུད་བདུད་རྩི་མཆོག་གི་མཆོད་པ་འབུལ། །གཞན་ཡང་ཡི་དམ་རྒྱལ་བ་རྒྱ་མཚོའི་ཚོགས། །ཞང་བློན་ཆེན་པོ་རྡོ་རྗེ་བདུད་འདུལ་དང་། །སྨན་སྐྱོང་བཀྲ་ཤིས་ཚེ་རིང་མ་ལ་སོགས། །ཆོས་སྐྱོང་དམ་ཅན་རྒྱ་མཚོ་འཁོར་བཅས་ལ། །སྨན་ཕུད་བདུད་རྩིའི་མཆོད་པ་འདི་ཕུལ་བས། །སྨན་རྣམས་བདུད་རྩིར་འགྱུར་བར་མཛད་ནས་ཀྱང་། །དྲི་ཐོས་ཙམ་གྱིས་རྡོ་རྗེའི་ལུས་ཐོབ་ནས། །བདག་སོགས་འགྲོ་ཕན་རླབས་ཆེན་ཡོངས་སྤྱད་ཅིང་། །འགྲོ་ཀུན་སྨན་རྒྱལ་གོ་འཕང་མྱུར་ཐོབ་ཤོག །ཀཱ་ཡ་ཝཱ་ཀ྄་ཙིཏྟ་མ་ཧཱ་སརྦ་སིདྡྷི་ཕ་ལ་ཧོཿ ཞེས་བརྗོད་ཅིང་དངོས་གྲུབ་བླང་བའི་ཚུལ་དུ་སྨན་ཅུང་ཟད་རང་གི་ལྕེ་ལ་བཞག་རྗེས། བདག་གི་ལེགས་བྱས་དགེ་བ་འདིས་མཚོན་ཏེ། །ནད་རིགས་མི་མཐུན་ཕྱོགས་ཀུན་རབ་ཞི་ཞིང་། །བསམ་པའི་དོན་ཀུན་འབད་མེད་འགྲུབ་པ་དང་། །གཙོ་བོ་ཁྱོད་བཞིན་བྱང་ཆུབ་རེག་གྱུར་ཅིག །ཅེས་སྨོན་ལམ་གདབ། སྤྲོ་ན་སྟོང་ཆེན་རབ་འབྱམས་ལས་གསུངས་པའི་ཚིགས་བཅད་དང་སྔགས་ཀྱང་བརྗོད། སྨན་བླའི་གཟུངས་དང་རྟེན་འབྲེལ་སྙིང་པོ་བཟླ་བཞིན་པས་བཏང་བའི་མཐར། རླུང་ལས་གྱུར་དང་མཁྲིས་ལས་གྱུར། །བད་ཀན་ལས་གྱུར་འདུས་ལས་གྱུར། །ནད་རྣམས་ཐམས་ཅད་རབ་བཅོམ་སྟེ། །ཀུན་ལ་རྟག་ཏུ་དགེ་བར་ཤོག །སེམས་ཅན་ནད་པ་ཇི་སྙེད་པ། །མྱུར་དུ་ནད་ལས་ཐར་གྱུར་ཅིག །འགྲོ་བའི་ནད་རྣམས་མ་ལུས་ནི། །རྟག་ཏུ་འབྱུང་བ་མེད་པར་ཤོག །ཅེས་སོགས་བསྔོ་སྨོན་ཁྱད་པར་བ་དང་། ཆེ་བའི་ཆེ་མཆོག་སོགས་མདོ་རྒྱུད་ནས་བྱུང་བའི་བཀྲ་ཤིས་ཚིགས་བཅད་དང་། འབད་དང་རྩོལ་བས་མ་གོས་པའི། །ཞེས་སོགས་བརྗོད་ཅིང་མེ་ཏོག་འཐོར། ཆུ་བསྐོལ་ཧུབ་གང་ཙམ་གྱིས་སྣོད་དེ་ཉིད་བཤལ་ལ་འཐུང་། དེ་ནས་གོས་ཤིན་ཏུ་དྲོ་བར་བགོས་ཏེ་ལུས་རྡུལ་ངེས་བྱས་ནས་ཉལ། རྡུལ་བྱུང་བ་རྣམས་རིམ་བཞིན་བལ་སོགས་ཀྱིས་ལེགས་པར་ཕྱིས། ལུས་མ་རྡུལ་ན་ཆུ་ཚོད་གཉིས་ཙམ་ནས་ཇ་རྒོད་ཚ་མོ་ཅན་ཕོར་ཆུང་གང་བཏུང་བ་གནད། དེ་ནས་མར་ཁུ་བཙག་བཅད་ནང་དོམ་མཁྲིས་ཐུན་ཆུང་བཏབ་ནས་འཐུང་། ཞག་བདུན་ཙམ་ལ་འགྲིམ་འགྲུལ་དང་ཟས་རིགས་ཇི་ལྟར་འཛེམ་ཐུབ་ན་ལེགས། གཞན་ཡང་སྒོག་བཙོང་ལ་ཕུག །ཁ་ཚ་རུལ་སུམ་དང་སྔོ་ངད་ཀྱི་རིགས། ཁྱད་པར་དངུལ་ཆུ་བཤིག་པའི་རྫས་དང་། ཆང་སྐྱུར་ཆགས་སྤྱོད་སོགས་ནི་ཡུན་རིང་དུ་འཛེམ་པ་གལ་ཆེ། གཞན་ཡང་ནད་གཞི་ཆེ་ཆུང་གི་བཏང་ཚུལ་བློ་གྲོས་ཀྱིས་དཔྱད་དགོས་པའོ། །རིལ་བུ་ཉིད་ཀྱིས་ནམ་དུའང་ནམ་མཁའ་མི་མཐོང་བ་དང་། ཁྱི་དང་བུད་མེད་ཀྱི་སྒྲ་ཙམ་ཡང་ཚོར་མི་ཉན་ཅིང་། བུད་མེད་ལ་བླུད་དུས་སྐྱེས་པས་སྟེར་དགོས་པ་ཡིན་ནོ། །གཞན་ཡང་བཅུད་ལན་གྱི་ཚུལ་དུ་བསྟེན་པ་སོགས་རྒྱ་ཆེར་གཞུང་དང་མན་ངག་རྣམས་ལས་ཤེས་པར་བྱ་ཞིང་། མདོར་ན་རིན་ཆེན་རིན་ཐང་དང་བྲལ་བའི་སྨན་གྱི་ནོར་བུ་མཆོག་ཏུ་གྱུར་པ་སངས་རྒྱས་དང་བྱང་ཆུབ་སེམས་དཔའི་ཐུགས་བསྐྱེད་དང་སྨོན་ལམ་གྱི་མཐུ་ལས་གྲུབ་པར་ཤེས་པས་གཅེས་སྤྲས་སུ་འཆང་ཞིང་། གུས་པས་མཆོད། ཚུལ་བཞིན་དུ་བསྟེན་ན་འཕྲལ་དང་ཡུན་གྱི་རྒུད་པ་ཞི་ཞིང་། ཕན་བདེའི་དགེ་མཚན་རྒྱས་པར་འགྱུར་བ་ནི་ངེས་པའོ། །དེ་ལྟར་རིན་ཆེན་སྦྱོར་བའི་ཕན་ཡོན་དང་། །བསྟེན་ཚུལ་ཅུང་ཟད་བརྗོད་པའི་ལེགས་བྱས་ཀྱིས། །བསྟན་འཛིན་མཆོག་རྣམས་བསྐལ་བརྒྱར་ཞབས་བརྟན་ཅིང་། །འགྲོ་ཀུན་སྲིད་ཞིའི་དགེ་མཚན་འགྲུབ་གྱུར་ཅིག །སརྦ་དཱ་ཤྲེ་ཡོ་བྷ་བ་ཏུ། འཇམ་དབྱངས་མཁྱེན་བརྩེས། ༈ སྟོང་ཆེན་རབ་འབྱམས་ལས། རྫོགས་སངས་རྣམ་པར་སངས་རྒྱས་ཚེ། །འཇིག་རྟེན་སྐྱོང་བས་ཕྱོགས་བཞི་ནས། །སྣོད་བཞི་དག་ནི་བླངས་ནས་སུ། །བདེ་བར་གཤེགས་ལ་ཕུལ་བ་དང་། །མཐུ་ཡིས་གཅིག་ཏུ་སྤྲུལ་མཛད་པ། །ལྷ་ཡི་སྣོད་མཆོད་དེ་དང་ནི། །བདུད་རྩི་འདྲ་བའི་སྨན་གྱི་རྣམས། །སྟོན་པའི་ཕྱག་ན་བསྣམས་གྱུར་པ། །བདེན་པའི་བདེན་ཚིག་དེ་དག་གིས། །སྨན་རྣམས་བདུད་རྩིར་འགྱུར་བར་ཤོག །དེ་བཞིན་ལྷ་མོ་འཕྲོག་མ་ཡིས། །ལྷ་རྫས་དགེ་བ་ཨ་རུ་ར། །བླངས་ནས་སྟོན་ལ་རབ་ཕུལ་བ། །བདུད་རྩི་འདྲ་བའི་སྨན་གྱི་རྣམས། །སྟོན་པའི་ཕྱག་ན་བསྣམས་གྱུར་པ། །བདེན་པའི་ཚིག་ནི་དེ་དག་གིས། །ནད་པ་རྣམས་ནི་ནད་སེལ་ཞིང་། །ཉེས་པ་ཐམས་ཅད་འཕྲོག་བྱེད་པ། །སྨན་རྣམས་བདུད་རྩིར་འགྱུར་བར་ཤོག །སངས་རྒྱས་རྣམ་གཟིགས་གཟི་བརྗིད་དང་། །གཙུག་ཏོར་ཅན་གྱི་སྟོབས་རྣམས་དང་། །ཐམས་ཅད་སྐྱོབས་ཀྱི་བདེན་ཚིག་དང་། །ལོག་དད་སེལ་གྱི་ཏིང་འཛིན་དང་། །གསེར་ཞེས་བྱ་བའི་ཡེ་ཤེས་དང་། །འོད་སྲུང་གི་ནི་རྫུ་འཕྲུལ་དང་། །ཤཱཀྱ་སེང་གེའི་མཐུ་རྣམས་ཀྱིས། །སྨན་རྣམས་བདུད་རྩིར་འགྱུར་བར་ཤོག །སྱཱད་ཐེ་དནྲ། ཁ་ཊེ་ཁ་ཊེ་ཁ་ཊེ། ཁ་ཊེ་བི་ཁ་ཊེ། བི་མ་ལེ། བི་ལམྦེ་བཱ་ལེ། བཱ་ལ་བ་ཏཱི་ཙནྡྲེ། ཙ་ར་ཎེ། ཨ་མྲྀ་ཏེ་ནིརྒྷོ་ཥེ་སྭཱ་ཧཱ། སྨན་གྱི་དངོས་གྲུབ་བྱས་སྔགས་ནི། ཨོཾ་ཨཱཿཧཱུྃ་སྭཱ་ཧཱ། ཨ་མྲྀ་ཏ་ཛཱི་བནྟི་བྷཻ་ཥ་ཛྱེ་སརྦ་སིདྡྷི་ཧཱུྃ་ཧོ། ཉེར་གཅིག །ཕུད་མཆོད་ནི། བཅོམ་ལྡན་སྨན་གྱི་བླ་མ་སོགས། སྨོན་ལམ་ནི། རླུང་ལས་གྱུར་དང་མཁྲིས་ལས་གྱུར། །བད་ཀན་ལས་གྱུར་འདུས་ལས་གྱུར། །ནད་རྣམས་ཐམས་ཅད་རབ་བཅོམ་སྟེ། །ཀུན་ལ་རྟག་ཏུ་དགེ་བར་ཤོག །སྨན་རྣམས་མཐུ་དང་ལྡན་པ་དང་། །སོགས། ༈ སངས་རྒྱས་སྨན་གྱི་བླ་མ་ཤཱཀྱ་ཐུབ། །རིགས་གསུམ་མགོན་དང་དྲང་སྲོང་ཉི་ཤུ་གཅིག །བཻ་རོ་ཙ་ན་མཁས་པ་མི་དགུ་སོགས། །རྒྱ་བོད་དྲང་སྲོང་བརྒྱུད་པར་བཅས་རྣམས་ལ། །སྨན་མཆོད་འབུལ་ལོ་འཆི་མེད་དངོས་གྲུབ་སྩོལ། ཨོཾ་མ་ཧཱ་ཨ་མྲྀ་ཏ་བྷཻ་ཥ་ཛྱེ་པཱུ་ཛ་ཨཱཿཧཱུྃ། ཨོཾ་མ་ཧཱ་ཨ་མྲྀ་ཏ་བྷཻ་ཥ་ཛྱེ་སརྦ་སིདྡྷི་ཕ་ལ་ཧོ།། །།ཨོཾ་སྭ་སྟི། རིན་ཆེན་སྨན་གྱི་གཏོང་ཐབས་སྤར། །པདྨ་ཆོས་འཕེལ་བཟང་པོ་ཡིས། །གཞན་ཕན་བསམ་པས་བསྒྲུབས་པའི་དགེས། །འགྲོ་ཀུན་རྒྱུ་འབྲས་ནད་སེལ་ཤོག །སརྦ་མངྒ་ལཾ་བྷ་བ་ཏུ།།

�

[edit]

rin chen ril bu'i phan yon dang bsten tshul bdud rtsi'i zla snang / @#/_/rin chen ril bu rnams kyi phan yon dang bsten tshul snying por dril ba bdud rtsi'i zla snang zhes bya ba bzhugs so//__// oM a thA/__grub pa'i bdud rtsis yid can gdung sel ba/__/dbang bcu mnga' ba'i phrin las gzugs can bzhin/__/gang du snang gyur sman gyi nor bu la/__/btud nas phan yon bsten thabs mdo tsam bri/__/de la slob dpon chen po ngag gi dbang phyug grags pa'i zhal snga nas/__grub pa'i sngags dang sman sogs ni/__/'phral du yid ches byed pa yis/__/'chi bdag rnam par bsal bar bya/__/nor bu sngags dang sman grub dang /__/bcud len stobs kyis bdag nyid ni/__/'chi bdag pha rol gnon mthong ste/__/rig 'dzin grub pa ji bzhin no/__/zhes dang /__gang phyir nor bu'i mthu la ni/__/som nyi bya bar rigs min te/__/nor bu bsam gyis mi khyab pa'i/__/mthu dang ldan par thams cad 'dod/__/ces dang /__'jig rten na ni dngos gzhan gang /__/sngags kyis mi 'grub de yod min/__/yang dag dad dang mngon brtson la/__/sngags rnams yid bzhin nor bu mtshungs/__/zhes dang /__sman rnams kyi ni mthu la yang /__/som nyi bya bar rigs min te/__/gang phyir sman gyi nus pa ni/__/bsam mi khyab par kun tu snang /__/zhes sogs rgya cher bsngags pa ltar ngo bo nor bu rin po che dang /__bcud len thams cad kyi mchog tu gyur pa grub pa'i dngul chu dang /__ro nus zhu rjes phun sum tshogs par sbyar ba'i sman gyi ril bu gang zhig__/rang bzhin rdo rje'i sngags kyi mthus byin gyis brlabs pa na/__byed las mthong tshor myang zhing mgul du 'chang ba tsam gyis kyang nad gdon bar chad thams cad sel ba dang /__bkra shis shing don grub pa dang /__tshe dang lus kyi bcud len du 'gyur ba sogs yon tan bsngags pa mtha' yas pa'i bdud rtsi sman gyi nor bu rin chen ril bu'i tshul las brtsams te cung zad brjod na gnyis/__phan yon dang /__bsten tshul lo/__/dang po la gnyis/__spyi dang bye brag go/__/dang po ni/__dpal ldan rgyud las/__zhi byed kun gyi log gnon rin po che/__/khrag mkhris bad rlung bzhi brgya rtsa bzhi'i nad/__/mgo dang byang khog yan lag rma rnams dang /__/dmu 'or mdze 'bras gag lhog gnyan nad dang /__/klu gnyan rgyal po la sogs 'byung po'i gdon/__/rin po che yis mi sel gang yang med/__/nad gzhi med pa'i mi la bcud len 'gyur/__/zhes pas mtshon rgyud dang man ngag rnams las rgya cher gsungs so/__/gnyis pa la drug las/__dang po grub chen o rgyan pa'i dgongs pa gtsor gyur rin chen ril nag chen mo'i phan yon ni/__dpal ldan zur mkhar ba chen po d+harma swA mI sa/__sbyor ba 'di ni ril nag chen po zhes bya ste/__yon tan brjod kyis mi long ba dang ldan pas rgyal khams yongs la grags pa'o/__/dam tshig dang ldan pas bsten na nad med pa la srung ba'i mchog tu 'gyur te/__mi tshe 'di yi dug rigs thub/__'khrugs dang tshad rnying sogs gzhan gyis gso bar dka' ba'i nad thams cad sbyor ba 'dis mi sel ba 'ga' yang med do/__/zhes gsungs pa ltar sbyar dug gtso bor gyur ba'i nad rigs thams cad la bsngags shing /__gdon thams cad 'joms/__bcud len gyi mchog tu 'gyur/__khyad par khong nad tsha shas can dang /__sman gzhan gyis phan par dka' ba'i nad gdon shas che ba sogs la mchog tu bsngags/__lus la 'chang bas srung ba'i rgyal po 'grub bo/__/'on kyang bsil kha cung mtho bas grang rlung gi khams mtho ba dang /__byis pa dang rgan po sogs la 'phrod dka' tsam snang ngo /__/gnyis pa dpal ldan rgyud las gtso bor gsungs pa'i rin chen mang sbyor chen mo'i phan yon ni/__phrin las kyi rgyud las/__dug nad kun la mang sbyor chen mo mchog__/ces sbyar ba dang /__gyur pa dang /__dngos kyi dug sogs dug rigs thams cad la mchog tu zab par ma zad/__bsil drod snyoms pas khong nad kyi rigs phal cher la phan pa shin tu che ba yin no/__/gsum pa grub chen o rgyan pa'i gdams ngag__/rje rang byung rdo rje'i thugs bcud yang zab rin chen ril bu'i phan yon ni/__dpal d+harma swA mI'i gsung las byung ba ltar mdor bsdu na thun mong du nad med kyis bsten pa'i phan yon dang /__nad pa la btang ba'i phan yon no/__/dang po ni/__rdo rje mkha' 'gro la sogs pa'i rgyud las/__glang po'i stobs dang nyi zla'i tshe/__/lha yi lang tsho 'dzin par 'gyur/__/zhes gsungs pa ltar lus stobs rgyas/__mdangs gsal/__skra dkar nyung du 'gro/__gnyer ma'ang rang zhir 'gro/__so tshags dam du 'gro/__mig la sogs pa'i dbang po gsal du 'gro/__tsha grang bkres skom bzod pa sogs yon tan mang du 'byung ba mngon du grub/__nang du rtsa kha 'dzin sdom byed/__steng gdon dang 'og gdon sogs gdon gyi rigs thams cad srung ba dang /__rims sogs nad rigs thams cad srung ba dang /__tha ma cham pa yang mi 'ong ba myong bas grub bo/__/gnyis pa ni/__'di nad rigs gang la btang yang mchog tu phan pa zhig yin la/__khyad par nad ji ltar che ba dang /__nad rnying par gtogs pa dang /__sman gzhan btang ba'i nus pa zad nas bor ba sogs nyes pa che ba tsam la 'dis phan/__de las kyang brtan g.yo'i dug thams cad la ches cher bsngags so/__/thun mong ma yin pa'i dbang du byas na gzhung rtsa ba'i rdo rje'i tshig las/__'di yi rim pas nang la yang /__/srog rtsol d+hU ti'i lam du 'chings/__/zhes rlung sems dbu mar thim nas yang dag pa'i ye shes mngon du byed pa'i cha rkyen du bsngags pas mtshon bsam gyis mi khyab bo/__/bzhi pa dbang ril shel dkar mchod rten du grags pa'i phan yon ni/__gzhung las/__legs par bsten pa'i phan yon ni/__/dug rigs sha sbyor rtsi sbyor dang /__/sngo sbyor spu sbyor sa rdo'i sbyor/__/shing sbyor rin po che yi sbyor/__/chu sbyor tsha sbyor grang sbyor sogs/__/mdor na dug rigs gang yin kyang /__/mi thub gcig kyang yod ma yin/__/gso dang srung ba gnyis ka byed/__/ces sogs gsungs pa ltar dug rigs thams cad la mchog tu bsngags shing /__khong nad kyi rigs gang la'ang phan no/__/lnga pa dbang ril rin chen rta ri ma'i phan yon ni sman so so'i yon tan dang nus pa sogs rgyas par dkar chag tu gsal ba ltar la/__mdor bsdu na/__sbrul la sogs pa srog chags dug__/bong nga la sogs btsan dug dang /__/chu dug rlangs dug sa yi dug__/rdzi dug sha dug gyur pa'i dug__/sgong dug mu stegs ngan sngags dug__/sbyar dug lo zlar zhen pa sogs/__/dug rigs thams cad 'di yis 'joms/__/zhes gsungs pa ltar dang /__gzhan yang gso dka' ba'i khong nad rigs phal cher la bsngags so/__/drug pa bsam 'phel rin chen ril bu'i phan yon ni/__ji skad du/__rin chen sman gyi sbyor ba khyad par can/__/'di yi phan yon brjod kyis mi long yang /__/mdor bsdus tsha grang 'du ba 'khrugs pa'i nad/__/yun ring gso dka' sman pas bor pa dang /__/khyad par rtsa dkar ring 'khums 'khrugs pa 'joms/__/byer ba bsdu zhing rnying pa gting nas 'don/__/mkhal tshad rtsa 'gram khrag rlung gzer mda' gcog__/steng gdon gza' dang bar gdon rgyal po btsan/__/'og gdon klu yi rigs rnams thams cad sel/__/rma rnying suR+Ya rkang 'bam zha 'khum sogs/__/phyi nang phal che'i nad la bsngags pa ste/__/mgul du 'chang na srung ba'i rgyal por 'gyur/__/dri tshor tsam gyis gdon bgegs 'byung po 'bros/__/de phyir bsam 'phel yid bzhin rin po che/__/sman gyi nor bu rgyun shes sman pa'i lugs/__/gso rig rgya mtsho bsrubs pa'i bdud rtsi ste/__/drang srong 'tsho thabs shes pa'i snying nor yin/__/zhes sogs bsngags pa ltar nad gdon rigs spyi dang /__khyad par rtsa dkar grib shas can gyi rigs la mchog tu bsngags shing /__gza' gdon sogs la'ang ches cher phan pa myang bas grub bo/__/gnyis pa ji ltar bsten pa'i tshul la/__spyir rin chen ril bu'i rigs phal cher dug nad kho na'i gnyen por bsngags pas/__de la srung ba ltar bsten tshul/__gso ba ltar bsten tshul sogs mang du bshad cing /__bye brag gso ba la'ang /__dang por thang gis byer ba bsdu/__bar du rin chen gyi sbyor bas bsad/__tha ma bshal gyis dag par sbyong bas mtshon rgya cher gsungs pa gzhung dang man ngag phyag len gyis gtan la phab pas shes par 'gyur gyi yi ge nyung ngus mtshon par mi nus la/__'dir thun mong du btang tshul rgyun gyi lag len mdo tsam bshad na/__dug sogs la mar ngo'i zla zad la btang ba'i gnad yod kyang /__spyir gza' tshes shin tu bzang bar legs shing /__sdud smin gyi thang sman gang rigs zhag brgyad tsam gong nas btang zhing /__khyad par zhag gsum nas g.yer 'bru bdun tsam gyi thang rtsa kha 'byed pa la btang /__gshom ni/__stan dkar dri med steng du 'bru dkar gyi g.yung drung g.yon 'khyil bri/__de'i steng lhung bzed nang du 'bru bzang po blugs/__de nang dkar yol gas chag med pa zhig tu tsha shas can la kha che'i grung chu/__grang shas can la se 'bru'i khu ba/__spyir btang chang bzang po khyor gang tsam nang ril bu bzhag__/de steng dar dmar gyis kha bcad/__de steng chos gos byin ldan brgyad lteb steng du sman bla'i sku zhal rang la bstan/__gzhan yang sman rgyud kyi dpe dang mchog gsum gyi rten gang 'byor mdun du rnam lngas gtsos pa'i mchod pa ci 'byor bsham/__mdo lugs ltar na bde gshegs bdun gyi smon lam cho ga dang /__sngags lugs ltar na rgyas par snying thig sdug bsngal mun sel ltar ram/__bsdus pa sgrub thabs dngos grub bang mdzod kyi cho ga byas lo ma yin par btang nas/__bye brag gi dmigs 'dun dang snying rje'i bsam sbyor dang ldan pas gzungs sngags ci mang bkra shis bcas bya'o/__/de nas glud gtor ram sbyong ba bgegs bskrad dang bcas mtshams tho ldan pas 'grim 'grul 'dzem/__nang par bdud rtsi thun mtshams dang ldan pa'i tshe/__sman pa'i lag gtsang mar byas te/__srin mdzub kyi ril bu bshigs nas nad pa kha shar du phyogs pa'i sngas mgo khri'u'i khar bzang po'i 'dug stangs kyis 'khod de sman snod lag g.yon du thogs la/__!__sangs rgyas chos dang tshogs kyi mchog rnams la/__/zhes sogs skyabs sems lan gsum dang /__sems can thams cad bde ba dang sogs tshad med bzhi bsgom/__!__rang nyid baiDUR+Ya 'od sman gyi rgyal/__/mtshan bzang so gnyis dpe byad brgyad cur ldan/__/sprul pa'i sku mchog phyag g.yas a ru ra/__/g.yon pas bdud rtsis gang ba'i lhung bzed bsnams/__/pad zla'i gdan bzhugs sangs rgyas byang chub sems/__/drang srong bka' srung rgya mtsho'i tshogs kyis bskor/__/mdun gyi sman snod bdud rtsi'i lhung bzed gsal/__/thugs las 'od zer dpag med 'phros pa yis/__/phyogs bcu'i sangs rgyas byang sems thams cad dang /__/bla ma yi dam mkha' 'gro chos skyong sogs/__/lha mi'i drang srong 'jig rten skyong rnams kun/__/sprin ltar spyan drangs mdun mkhar bzhugs nas kyang /__/bkra shis dang bcas sman mchog byin brlabs nas/__/tshe yi bcud bsdus sman mchog nyid la thim/__/'tsho mdzad sman pa'i rgyal po bcom ldan 'das/__/dug gsum nad sel sangs rgyas sman gyi bla/__/sku mdog mthing ga bai DUR+Ya yi 'od/__/sprul pa'i sku la mtshan dang dpe byad ldan/__/rlung mkhris bad kan nad kyis gdungs pa la/__/nad kyi gnyen por phyag g.yas a ru ra/__/phyag g.yon bdud rtsi'i lhung bzed par bu bsnams/__/bai DUR+Ya yi 'od la phyag 'tshal lo/__/rig pa'i gnas mchog bco brgyad thugs su chud/__/tshe la dbang ba'i bcud len dngos grub brnyes/__/mngon shes snying rjes 'gro mchog 'du ba snyoms/__/drang srong rig 'dzin rnams la phyag 'tshal lo/__/lha rnams kyi ni bdud rtsi lta bu dang /__/klu rnams kyi ni gtsug nor lta bu dang /__/drang srong rnams kyi bcud len lta bur ni/__/khyod la sman 'di nye bar gnas gyur cig__/rlung mkhris bad kan bzhi brgya rtsa bzhi'i nad/__/tshe la bar du gcod pa zhi ba dang /__/gnod pa'i bgegs rigs stong phrag brgyad cu dang /__/ye 'drogs sum brgya drug cu la sogs pa/__/bsam pa'i bar du gcod pa zhi bar mdzod/__oM na mo b+ha ga wa te b+hai Sha dz+ye gu ru bai DUR+Ya pra b+ha rA dzA ya/__ta tha ga tA ya/__ar+ha te samyak+saM bud+d+hA ya/__tad+ya thA/__oM b+hai Sha dz+ya b+hai Sha dz+ya ma hA b+hai Sha dz+ya b+hai Sha dz+ya rA dza sa mung+ga te swA hA/__zhes gzungs lan bdun bzlas/__de nas sman phud mtheb srin gyis 'thor zhing /__chos dbyings rnam dag lhun grub gzhal yas nas/__/rdzogs pa'i sangs rgyas sman gyi rgyal po la/__/sman mchog bdud rtsi'i mchod pa 'di phul bas/__/mchog dang thun mong dngos grub stsal du gsol/__/rgyun shes bu sogs drang srong mchog rnams dang /__/'tsho byed gzhon nu klu sgrub dpa' bo'i zhabs/__/zla dga' la sogs grub pa mchog rnams dang /__/khri srong lde'u btsan grwa mngon g.yu thog mgon/__/mkhas pa'i khyu mchog byang zur rnam gnyis sogs/__/dngos brgyud drang srong sman pa'i tshogs rnams la/__/sman phud bdud rtsi mchog gi mchod pa 'bul/__/gzhan yang yi dam rgyal ba rgya mtsho'i tshogs/__/zhang blon chen po rdo rje bdud 'dul dang /__/sman skyong bkra shis tshe ring ma la sogs/__/chos skyong dam can rgya mtsho 'khor bcas la/__/sman phud bdud rtsi'i mchod pa 'di phul bas/__/sman rnams bdud rtsir 'gyur bar mdzad nas kyang /__/dri thos tsam gyis rdo rje'i lus thob nas/__/bdag sogs 'gro phan rlabs chen yongs spyad cing /__/'gro kun sman rgyal go 'phang myur thob shog__/kA ya wA ka? tsit+ta ma hA sarba sid+d+hi pha la hoH__zhes brjod cing dngos grub blang ba'i tshul du sman cung zad rang gi lce la bzhag rjes/__bdag gi legs byas dge ba 'dis mtshon te/__/nad rigs mi mthun phyogs kun rab zhi zhing /__/bsam pa'i don kun 'bad med 'grub pa dang /__/gtso bo khyod bzhin byang chub reg gyur cig__/ces smon lam gdab/__spro na stong chen rab 'byams las gsungs pa'i tshigs bcad dang sngags kyang brjod/__sman bla'i gzungs dang rten 'brel snying po bzla bzhin pas btang ba'i mthar/__rlung las gyur dang mkhris las gyur/__/bad kan las gyur 'dus las gyur/__/nad rnams thams cad rab bcom ste/__/kun la rtag tu dge bar shog__/sems can nad pa ji snyed pa/__/myur du nad las thar gyur cig__/'gro ba'i nad rnams ma lus ni/__/rtag tu 'byung ba med par shog__/ces sogs bsngo smon khyad par ba dang /__che ba'i che mchog sogs mdo rgyud nas byung ba'i bkra shis tshigs bcad dang /__'bad dang rtsol bas ma gos pa'i/__/zhes sogs brjod cing me tog 'thor/__chu bskol hub gang tsam gyis snod de nyid bshal la 'thung /__de nas gos shin tu dro bar bgos te lus rdul nges byas nas nyal/__rdul byung ba rnams rim bzhin bal sogs kyis legs par phyis/__lus ma rdul na chu tshod gnyis tsam nas ja rgod tsha mo can phor chung gang btung ba gnad/__de nas mar khu btsag bcad nang dom mkhris thun chung btab nas 'thung /__zhag bdun tsam la 'grim 'grul dang zas rigs ji ltar 'dzem thub na legs/__gzhan yang sgog btsong la phug__/kha tsha rul sum dang sngo ngad kyi rigs/__khyad par dngul chu bshig pa'i rdzas dang /__chang skyur chags spyod sogs ni yun ring du 'dzem pa gal che/__gzhan yang nad gzhi che chung gi btang tshul blo gros kyis dpyad dgos pa'o/__/ril bu nyid kyis nam du'ang nam mkha' mi mthong ba dang /__khyi dang bud med kyi sgra tsam yang tshor mi nyan cing /__bud med la blud dus skyes pas ster dgos pa yin no/__/gzhan yang bcud lan gyi tshul du bsten pa sogs rgya cher gzhung dang man ngag rnams las shes par bya zhing /__mdor na rin chen rin thang dang bral ba'i sman gyi nor bu mchog tu gyur pa sangs rgyas dang byang chub sems dpa'i thugs bskyed dang smon lam gyi mthu las grub par shes pas gces spras su 'chang zhing /__gus pas mchod/__tshul bzhin du bsten na 'phral dang yun gyi rgud pa zhi zhing /__phan bde'i dge mtshan rgyas par 'gyur ba ni nges pa'o/__/de ltar rin chen sbyor ba'i phan yon dang /__/bsten tshul cung zad brjod pa'i legs byas kyis/__/bstan 'dzin mchog rnams bskal brgyar zhabs brtan cing /__/'gro kun srid zhi'i dge mtshan 'grub gyur cig__/sarba dA shre yo b+ha ba tu/__'jam dbyangs mkhyen brtses/__!__stong chen rab 'byams las/__rdzogs sangs rnam par sangs rgyas tshe/__/'jig rten skyong bas phyogs bzhi nas/__/snod bzhi dag ni blangs nas su/__/bde bar gshegs la phul ba dang /__/mthu yis gcig tu sprul mdzad pa/__/lha yi snod mchod de dang ni/__/bdud rtsi 'dra ba'i sman gyi rnams/__/ston pa'i phyag na bsnams gyur pa/__/bden pa'i bden tshig de dag gis/__/sman rnams bdud rtsir 'gyur bar shog__/de bzhin lha mo 'phrog ma yis/__/lha rdzas dge ba a ru ra/__/blangs nas ston la rab phul ba/__/bdud rtsi 'dra ba'i sman gyi rnams/__/ston pa'i phyag na bsnams gyur pa/__/bden pa'i tshig ni de dag gis/__/nad pa rnams ni nad sel zhing /__/nyes pa thams cad 'phrog byed pa/__/sman rnams bdud rtsir 'gyur bar shog__/sangs rgyas rnam gzigs gzi brjid dang /__/gtsug tor can gyi stobs rnams dang /__/thams cad skyobs kyi bden tshig dang /__/log dad sel gyi ting 'dzin dang /__/gser zhes bya ba'i ye shes dang /__/'od srung gi ni rdzu 'phrul dang /__/shAkya seng ge'i mthu rnams kyis/__/sman rnams bdud rtsir 'gyur bar shog__/s+yAd the dan+ra/__kha Te kha Te kha Te/__kha Te bi kha Te/__bi ma le/__bi lam+be bA le/__bA la ba tI tsan+d+re/__tsa ra Ne/__a mr-i te nir+g+ho She swA hA/__sman gyi dngos grub byas sngags ni/__oM AHhU~M swA hA/__a mr-i ta dzI ban+ti b+hai Sha dz+ye sarba sid+d+hi hU~M ho/__nyer gcig__/phud mchod ni/__bcom ldan sman gyi bla ma sogs/__smon lam ni/__rlung las gyur dang mkhris las gyur/__/bad kan las gyur 'dus las gyur/__/nad rnams thams cad rab bcom ste/__/kun la rtag tu dge bar shog__/sman rnams mthu dang ldan pa dang /__/sogs/__!__sangs rgyas sman gyi bla ma shAkya thub/__/rigs gsum mgon dang drang srong nyi shu gcig__/bai ro tsa na mkhas pa mi dgu sogs/__/rgya bod drang srong brgyud par bcas rnams la/__/sman mchod 'bul lo 'chi med dngos grub stsol/__oM ma hA a mr-i ta b+hai Sha dz+ye pU dza AHhU~M/__oM ma hA a mr-i ta b+hai Sha dz+ye sarba sid+d+hi pha la ho//__//oM swa sti/__rin chen sman gyi gtong thabs spar/__/pad+ma chos 'phel bzang po yis/__/gzhan phan bsam pas bsgrubs pa'i dges/__/'gro kun rgyu 'bras nad sel shog__/sarba mang+ga laM b+ha ba tu// [�]