JKW-KABUM-21-ZHA-022-001

First text in section. Back to Volume PageNext Text

གྲུབ་ཆེན་ཐང་སྟོང་རྒྱལ་པོའི་ལུགས་ཀྱི་ནད་བརྒྱ་སྨན་གཅིག་རིལ་བུ་དཀར་དམར་གྱི་གཞུང་གསལ་བྱེད་དང་བཅས་པ།

Wylie title	grub chen thang stong rgyal po'i lugs kyi nad brgya sman gcig ril bu dkar dmar gyi gzhung gsal byed dang bcas pa
Location	mkhyen brtse'i bka' 'bum Volume 21, sde tshan 22, Text 1, Pages 577-582 (Folios 1a to 3b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	ཐང་སྟོང་རྒྱལ་པོ་ (thang stong rgyal po)
Citation	'jam dbyangs mkhyen brtse'i dbang po. grub chen thang stong rgyal po'i lugs kyi nad brgya sman gcig ril bu dkar dmar gyi gzhung gsal byed dang bcas pa. In 'jam dbyangs mkhyen brtse'i dbang po'i bka' 'bum, Vol. 21: 577-582. Khams sde dge rdzong sar dgon: Rdzong sar blo gros phun tshogs, 2020.
Genre	Medicinal Pills - Making and Activating Practices - sman sgrub

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །གྲུབ་ཆེན་ཐང་སྟོང་རྒྱལ་པོའི་ལུགས་ཀྱི་ནད་བརྒྱ་སྨན་གཅིག་རིལ་བུ་དཀར་དམར་གྱི་གཞུང་གསལ་བྱེད་དང་བཅས་པ་བཞུགས་སོ།། །། ན་མོ་གུ་རུ་དེ་ཝ་ཌཱ་ཀི་ནཱི་བྷྱཿ །ཕ་རྒན་ཐང་སྟོང་རྒྱལ་པོ་ངས། །དཔལ་རི་བོ་ཆེ་ཡི་རྩེ་མོ་རུ། །མི་རྟོག་ཏིང་འཛིན་བསྒོམ་པའི་ཚེ། །མཁའ་ལ་འཇའ་དང་སྒྲ་འོད་བྱུང་། །ནམ་མཁའི་མཐོངས་སུ་བལྟས་པའི་ཚེ། །ཨོ་རྒྱན་མཁའ་འགྲོའི་ཡུལ་ནས་ནི། །མཁའ་འགྲོའི་གཙོ་མོ་ལྔ་བྱོན་ནས། །དབུས་ཀྱི་གཙོ་མོའི་ཞལ་ནས་ནི། །སྔར་ཡང་དཔའ་བོ་ཁྱོད་ཉིད་ཀྱིས། །འགྲོ་བ་སེམས་ཅན་ཐམས་ཅད་ཀྱི། །སེམས་ཀྱི་སྡུག་བསྔལ་ཞི་བར་བྱས། །དེ་ལ་བདག་ནི་རྗེས་ཡི་རང་། །ད་ནི་ལུས་ཀྱི་ནད་རྣམས་ཀུན། །སེལ་ཕྱིར་སྨན་གཙོ་འདི་རྣམས་ཟུངས། །དབུས་ཀྱི་གཙོ་བོའི་ཕྱག་ན་ནི། །འདུ་བ་སྤྱི་སྙོམས་ཨ་རུ་ར། ཆ་དྲུག་བཟུང་། །ཤར་གྱི་གཙོ་མོའི་ཕྱག་ན་ནི། །སྲིད་བཅུད་ཅོང་ཞི། འདུས་པ་དེ་ཡི་ཕྱེད། །ལྷོ་ཡི་གཙོ་མོའི་ཕྱག་ན་ནི། །ཀུན་བྱེད་རྒྱལ་པོ་དེ་དང་མཉམ། །ནུབ་ཀྱི་གཙོ་མོའི་ཕྱག་ན་ནི། །རིན་ཆེན་ལྔ་བཅུད་བྲག་ཞུན། དེ་ཡི་ཕྱེད། །བྱང་གི་གཙོ་མོའི་ཕྱག་ན་ནི། །མེ་ཏོག་མནུཔུཥྐར། བཅུད་དང་གཉེན་པོའི་སྨན། །རྣམ་པ་ལྔ་ཡི་ཚད་དང་སྦྱར། །གཞན་རྣམས་ཐམས་ཅད་ཞིབ་པར་བཏགས། སྔོ་སྨན། །མེ་ཏོག་བཅུད་ཀྱི་སྦྲང་རྩི། ཁུ་བས་སྦྲུ། །རིལ་བུ་བྲ་བའི་རིལ་མ་ཙམ། །རིན་ཆེན་སྣོད་དམ་ཐོད་ནང་བླུག །དེ་སྟེང་ཟླ་བའི་དཀྱིལ་འཁོར་སྟེང་། །སྔར་གྱི་མཁའ་འགྲོ་སྡེ་ལྔ་པོ། །ཕྱོགས་མདོག་ཞལ་གཅིག་ཕྱག་གཉིས་མ། །གཡས་པས་རིན་ཆེན་ཌཱ་མ་རུ། །གཡོན་པས་མི་ཡི་ཐོད་པ་བསྣམས། །བརྐྱང་བསྐུམ་གར་སྟབས་ཁ་ཊྭཱྃ་བསྣམས། །དབུས་ཀྱི་གཙོ་མོའི་སྤྱི་གཙུག་ཏུ། །ཡི་དམ་ཐུགས་རྗེ་ཆེན་པོ་ནི། །སྐད་ཅིག་དྲན་པས་བསྒོམ་པར་བྱ། །ཐོག་མར་མ་ཎི་སྟོང་བཟླས་ལ། །ཐུགས་རྗེ་ཆེན་པོ་བདུད་རྩིར་ཞུ། །མཁའ་འགྲོ་ལྔ་ལ་ཐིམ་པར་བསམ། །དེ་ནས་མཁའ་འགྲོའི་སྔགས་འདི་བཟླས། །ཨོཾ་བུདྡྷ་ཌཱ་ཀི་ནཱི། བཛྲ་ཌཱ་ཀི་ནཱི། རཏྣ་ཌཱ་ཀི་ནཱི། པདྨ་ཌཱ་ཀི་ནཱི། ཀརྨ་ཌཱ་ཀི་ནཱི། ཨོཾ་ཨཱཿཧཱུྃ། ཞེས་པ་ལྔ་བརྒྱ་བཟླས་པ་ཡིས། །མཁའ་འགྲོ་ལྔ་ཡང་བདུད་རྩིར་ཞུ། །སྨན་རྣམས་ཀུན་ལ་ཐིམ་པར་བསམ། །འདུ་བ་གང་ལའང་མི་གནོད་ཅིང་། །རླུང་དང་མཁྲིས་པ་བད་ཀན་སོགས། །བཞི་བརྒྱ་རྩ་བཞིའི་ནད་རྣམས་ལ། །འདི་ཡིས་མི་སེལ་གང་ཡང་མེད། །ནད་རྣམས་སོ་སོར་དབྱེ་མི་དགོས། །འདུ་བ་སྤྱི་སྙོམས་ཞེས་ཀྱང་བྱ། །ནད་བརྒྱ་སྨན་གཅིག་ཞེས་ཀྱང་བྱ། །མགོ་དང་རྐང་པའི་བར་དག་གི། །ནད་རྣམས་ཀུན་ལ་ཐེངས་པས་ཆོག །དབུས་གཙང་སྟོད་སྨད་བར་གསུམ་གྱི། །སྨན་པ་ཀུན་ལ་འདི་ཉིད་གདམས། །སྨན་གཞན་ཐམས་ཅད་གཏེར་དུ་སྦོས། །འདི་ཉིད་གཅིག་པུས་འགྲོ་དོན་གྱིས། །འདི་ཡི་མན་ངག་སྦྱིན་པའི་ཚེ། །འབྲུ་བཅུད་བཟང་པོས་སྣོད་བཀང་ལ། །ཐོག་མར་སློབ་དཔོན་ཧུབ་གང་འཐུངས། །གདམས་པ་འདི་ཡི་ལོ་རྒྱུས་བརྗོད། །སློབ་དཔོན་ཞལ་གྱི་བདུད་རྩིའི་བཅུད། །སློབ་མའི་རྒྱུད་ལ་ཐིམ་པར་བསམ། །སློབ་མས་ལྷག་མ་མེད་པར་འཐུངས། །དུག་ལ་སོགས་པའི་མན་ངག་ཀྱང་། །དུ་མ་གསུངས་ཀྱང་བརྗེད་དེ་ཐལ། །འདི་ལ་ནན་ཏན་བསྐྱེད་པ་ཡིན། །ཁ་བསྒྱུར་སྨན་ནི་འདི་ལྟ་སྟེ། །རླུང་ལ་ཨ་གར་ལི་ཤི་དང་། །མཁྲིས་པར་ཏིག་ཏ་གསེར་མེ་ཏོག །བད་ཀན་སེ་འབྲུ་བསེ་ཡབ་སྟེ། །གཉན་ཚད་བོང་ང་གླ་རྩི་བསྣན། །རིམས་ལ་བོང་དཀར་འཛིམ་པ་བསྣན། །དོན་ལྔ་ལ་ནི་བཟང་དྲུག་སྟེ། །སྙིང་གི་བཟང་པོ་ཛ་ཏི་སྟེ། །སྲོག་རྩའི་བཟང་པོ་ལི་ཤི་ཡིན། །གློ་བའི་བཟང་པོ་ཅུ་གང་ཡིན། མཆིན་པའི་བཟང་པོ་གུར་གུམ་མོ། །མཚེར་པའི་བཟང་པོ་ཀ་ཀོ་ལ། །མཁལ་མའི་བཟང་པོ་སུག་སྨེལ་ལོ། །སྣོད་དྲུག་ཕོ་བའི་བཟང་པོ་སེ་འབྲུ་ཡིན། ལ་ཡང་བཟང་པོ་དྲུག །ཆུ་སེར་སེང་ལྡེང་དངུལ་ཆུ་བསྣན། །གཉེན་པོའི་སྨན་ནི་གཞན་མེད་ཀྱང་། །རྩ་བའི་སྨན་ནི་ཀུན་ལ་བསྔགས། །དེ་སྐད་མཁའ་འགྲོའི་ཞལ་གདམས་བཅུད། །མ་བརྗེད་ལྕགས་ཟམ་སྨྱོན་པ་ངས། །མཁྲིས་པའི་བཟང་པོ་གསེར་མེ་ཏོག །རྒྱུ་མའི་བཟང་པོ་དུག་མོ་ཉུང་། །མཚན་མའི་བཟང་པོ་དབང་པོ་ལག །ལྒང་པའི་བཟང་པོ་རྒྱ་ཚྭ་ཡིན། །མངལ་གྱི་བཟང་པོ་བ་སྤྲུ་བ། །མངལ་དང་བསམ་སེ་གཅིག་ཏུ་འདོད། །ནན་དུ་བགྱིས་ནས་ཡི་གེར་བཏབ། །དགེ་འདིས་ཡུལ་དུས་གནས་སྐབས་ཀྱི། །དབང་གྱུར་འགྲོ་བ་མ་ལུས་པ། །ཀུན་ཀྱང་བྲོ་ནད་མ་མཆིས་པར། །ཕུལ་བྱུང་སྨན་གྱི་བླ་མ་ཡི། །གོ་འཕང་མཆོག་ལ་འགོད་གྱུར་ཅིག ། ༈ གྲུབ་ཐོབ་རིལ་དམར་བཞུགས་སོ། ། ༈ ལོ་ཀེ་ཤྭ་ར་ལ་ན་མོ། །ཕ་རྒན་ཐང་སྟོང་རྒྱལ་པོ་འགྲོ་བའི་དོན་ལ་དགོངས་ནས་སྙུང་བའི་ཚུལ་བསྟན་ནས་བཞུགས་པའི་ཚེ། ཐུགས་རྗེ་ཆེན་པོ་འཕགས་པ་སྤྱན་རས་གཟིགས་བྱོན་ནས་གདམས་པ་འདི་གནང་ངོ་། །རབ་དཀར་བོང་ང་འདྲ་བོང་དཀར་གུ་གུལ། འཇིག་ཐུན་ཚད་རེ། །ཀུན་བྱེད་སྤང་རྩི་དོ་བོ། རྒྱལ་པོ་སྟག་ཤ་ཕྱེད་ཕྱེད་ཕྲི། །ཉི་མའི་རྒྱལ་མཚལ། བུ་ནི་དེ་དག་ཀུན་དང་མཉམ། །ཀུན་གྱི་བཅུད་འགྱུར་བདུད་རྩི་འཛིན་པ་ཐུན་གསུམ་རེ་བཏང་བ་ཕྱག་ལེན། ཟླ་བའི་བུ། །གུར་གུམ་ཆུའམ་མེ་ཏོག་སྦྲང་རྩི། བཅུད་ཀྱིས་སྦྲུ། །པདྨ་རཱ་གའི་མདངས་ལྡན་རིལ་བུ་འདི། ཕྱི་ནང་ཕལ་ཆེའི་ནད་ལ་བསྔགས་པ་སྟེ། །ཁྲག་མཁྲིས་གཉན་ཚད་ཀུན་ལ་ཤིས་པ་ཡིན། །ཁྱད་པར་ནག་པོ་སུམ་འགྲིལ་ནད་ལ་བསྔགས། །ཀུན་ལ་དཀོན་པས་ཨུ་དུམ་ཝཱ་ར་འདྲ། །མཐོང་ཐོས་སྤྱོད་པ་སྐལ་ལྡན་རེ་རེ་ཙམ། ཞེས་པ་འདི་ཡང་ཐང་སྟོང་རྒྱལ་པོས་བཀོད། ཨྠིྀ། ། ༈

[edit]

grub chen thang stong rgyal po'i lugs kyi nad brgya sman gcig ril bu dkar dmar gyi gzhung gsal byed dang bcas pa/ @#/__/grub chen thang stong rgyal po'i lugs kyi nad brgya sman gcig ril bu dkar dmar gyi gzhung gsal byed dang bcas pa bzhugs so//__// na mo gu ru de wa DA ki nI b+h+yaH__/pha rgan thang stong rgyal po ngas/__/dpal ri bo che yi rtse mo ru/__/mi rtog ting 'dzin bsgom pa'i tshe/__/mkha' la 'ja' dang sgra 'od byung /__/nam mkha'i mthongs su bltas pa'i tshe/__/o rgyan mkha' 'gro'i yul nas ni/__/mkha' 'gro'i gtso mo lnga byon nas/__/dbus kyi gtso mo'i zhal nas ni/__/sngar yang dpa' bo khyod nyid kyis/__/'gro ba sems can thams cad kyi/__/sems kyi sdug bsngal zhi bar byas/__/de la bdag ni rjes yi rang /__/da ni lus kyi nad rnams kun/__/sel phyir sman gtso 'di rnams zungs/__/dbus kyi gtso bo'i phyag na ni/__/'du ba spyi snyoms a ru ra/__cha drug bzung /__/shar gyi gtso mo'i phyag na ni/__/srid bcud cong zhi/__'dus pa de yi phyed/__/lho yi gtso mo'i phyag na ni/__/kun byed rgyal po de dang mnyam/__/nub kyi gtso mo'i phyag na ni/__/rin chen lnga bcud brag zhun/__de yi phyed/__/byang gi gtso mo'i phyag na ni/__/me tog mnupuSh+kar/__bcud dang gnyen po'i sman/__/rnam pa lnga yi tshad dang sbyar/__/gzhan rnams thams cad zhib par btags/__sngo sman/__/me tog bcud kyi sbrang rtsi/__khu bas sbru/__/ril bu bra ba'i ril ma tsam/__/rin chen snod dam thod nang blug__/de steng zla ba'i dkyil 'khor steng /__/sngar gyi mkha' 'gro sde lnga po/__/phyogs mdog zhal gcig phyag gnyis ma/__/g.yas pas rin chen DA ma ru/__/g.yon pas mi yi thod pa bsnams/__/brkyang bskum gar stabs kha T+wA~M bsnams/__/dbus kyi gtso mo'i spyi gtsug tu/__/yi dam thugs rje chen po ni/____/skad cig dran pas bsgom par bya/__/thog mar ma Ni stong bzlas la/__/thugs rje chen po bdud rtsir zhu/__/mkha' 'gro lnga la thim par bsam/__/de nas mkha' 'gro'i sngags 'di bzlas/__/oM bud+d+ha DA ki nI/__badz+ra DA ki nI/__rat+na DA ki nI/__pad+ma DA ki nI/__karma DA ki nI/__oM AHhU~M/__zhes pa lnga brgya bzlas pa yis/__/mkha' 'gro lnga yang bdud rtsir zhu/__/sman rnams kun la thim par bsam/__/'du ba gang la'ang mi gnod cing /__/rlung dang mkhris pa bad kan sogs/__/bzhi brgya rtsa bzhi'i nad rnams la/__/'di yis mi sel gang yang med/__/nad rnams so sor dbye mi dgos/__/'du ba spyi snyoms zhes kyang bya/__/nad brgya sman gcig zhes kyang bya/__/mgo dang rkang pa'i bar dag gi/__/nad rnams kun la thengs pas chog__/dbus gtsang stod smad bar gsum gyi/__/sman pa kun la 'di nyid gdams/__/sman gzhan thams cad gter du sbos/__/'di nyid gcig pus 'gro don gyis/__/'di yi man ngag sbyin pa'i tshe/__/'bru bcud bzang pos snod bkang la/__/thog mar slob dpon hub gang 'thungs/__/gdams pa 'di yi lo rgyus brjod/__/slob dpon zhal gyi bdud rtsi'i bcud/__/slob ma'i rgyud la thim par bsam/__/slob mas lhag ma med par 'thungs/__/dug la sogs pa'i man ngag kyang /__/du ma gsungs kyang brjed de thal/__/'di la nan tan bskyed pa yin/__/kha bsgyur sman ni 'di lta ste/__/rlung la a gar li shi dang /__/mkhris par tig ta gser me tog__/bad kan se 'bru bse yab ste/__/gnyan tshad bong nga gla rtsi bsnan/__/rims la bong dkar 'dzim pa bsnan/__/don lnga la ni bzang drug ste/__/snying gi bzang po dza ti ste/__/srog rtsa'i bzang po li shi yin/__/glo ba'i bzang po cu gang yin/__mchin pa'i bzang po gur gum mo/__/mtsher pa'i bzang po ka ko la/__/mkhal ma'i bzang po sug smel lo/__/snod drug pho ba'i bzang po se 'bru yin/__la yang bzang po drug__/chu ser seng ldeng dngul chu bsnan/__/gnyen po'i sman ni gzhan med kyang /__/rtsa ba'i sman ni kun la bsngags/__/de skad mkha' 'gro'i zhal gdams bcud/__/ma brjed lcags zam smyon pa ngas/__/mkhris pa'i bzang po gser me tog__/rgyu ma'i bzang po dug mo nyung /__/mtshan ma'i bzang po dbang po lag__/lgang pa'i bzang po rgya tshwa yin/__/mngal gyi bzang po ba spru ba/__/mngal dang bsam se gcig tu 'dod/__/nan du bgyis nas yi ger btab/__/dge 'dis yul dus gnas skabs kyi/__/dbang gyur 'gro ba ma lus pa/__/kun kyang bro nad ma mchis par/__/phul byung sman gyi bla ma yi/__/go 'phang mchog la 'god gyur cig____/__!__grub thob ril dmar bzhugs so/___/___!_lo ke shwa ra la na mo/__/pha rgan thang stong rgyal po 'gro ba'i don la dgongs nas snyung ba'i tshul bstan nas bzhugs pa'i tshe/__thugs rje chen po 'phags pa spyan ras gzigs byon nas gdams pa 'di gnang ngo /__/rab dkar bong nga 'dra bong dkar gu gul/__'jig thun tshad re/__/kun byed spang rtsi do bo/__rgyal po stag sha phyed phyed phri/__/nyi ma'i rgyal mtshal/__bu ni de dag kun dang mnyam/__/kun gyi bcud 'gyur bdud rtsi 'dzin pa thun gsum re btang ba phyag len/__zla ba'i bu/__/gur gum chu'am me tog sbrang rtsi/__bcud kyis sbru/__/pad+ma rA ga'i mdangs ldan ril bu 'di/__phyi nang phal che'i nad la bsngags pa ste/__/khrag mkhris gnyan tshad kun la shis pa yin/__/khyad par nag po sum 'gril nad la bsngags/__/kun la dkon pas u dum wA ra 'dra/__/mthong thos spyod pa skal ldan re re tsam/__zhes pa 'di yang thang stong rgyal pos bkod/__a+thi+-i/___/___!_