JKW-KABUM-04-NGA-001-021

🚧 This website is under continued development. We appreciate your patience!

Previous Text Back to Volume PageNext Text

སློབ་དཔོན་པདྨ་བཛྲ་གྱིས་མཛད་པའི་གསང་བ་གྲུབ་པ།

Wylie title	slob dpon pad+ma badz+ra gyis mdzad pa'i gsang ba grub pa
Location	mkhyen brtse'i bka' 'bum Volume 4, sde tshan 1, Text 21, Pages 269-282 (Folios 135a1 to 141b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	པདྨ་བཛྲ་ (Padmavajra)
Citation	'jam dbyangs mkhyen brtse'i dbang po. slob dpon pad+ma badz+ra gyis mdzad pa'i gsang ba grub pa. In 'jam dbyangs mkhyen brtse'i dbang po'i bka' 'bum, Vol. 4: 269-282. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris  ·  Tantras - rgyud

1 Texts in this Section (sde tshan or chos tshan)

21 269-282	སློབ་དཔོན་པདྨ་བཛྲ་གྱིས་མཛད་པའི་གསང་བ་གྲུབ་པ། slob dpon pad+ma badz+ra gyis mdzad pa'i gsang ba grub pa Notes - zin bris   ·   Tantras - rgyud	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཝི། རྒྱུད་མ་ལུས་པའི་དོན་སྐུལ་བར་བྱེད་པ། དཔལ་གསང་བ་གྲུབ་པ་ཞེས་བྱ་བ་སློབ་དཔོན་པདྨ་བཛྲ་གྱིས་མཛད་པ་ལས། ལེའུ་དང་པོར། དངོས་པོ་མེད་ཅིང་ཁྱབ་པ་མཆོག་ཏུ་ཞི་བའི་གོ་འཕང་འཇིག་རྟེན་སྤྱོད་པ་དག་ལས་རྣམ་གྲོལ་བ། །གང་ཞིག་རྟག་འབྱུང་ཞི་ལ་རྒྱལ་བ་དམ་པ་ཁྱུ་མཆོག་རྣམས་ཀྱིས་ཕྱག་བྱས་བསམ་གཏན་དང་བྲལ་བ། །ཅི་ཡང་རུང་བའི་གནས་གྱུར་དཔལ་ལྡན་རྒྱལ་བའི་སྐུ་ཡི་དམ་པ་རྣམ་དག་ནང་གི་བདག་ཉིད་ཀྱིས་འཇུག་པ། །སངས་རྒྱས་ཀྱིས་ཀྱང་རྟོགས་པར་བྱ་བ་མིན་ཞིང་དྲི་མ་རྣམས་དང་བྲལ་བ་དེ་ཉིད་དེ་ལ་ཕྱག་འཚལ་ནས། །ཞེས་དང་། རྫོགས་པའི་རིམ་པའི་རྣལ་འབྱོར་ཉིད། །དེ་ཉིད་ལྡན་པས་བསྒོམ་པར་བྱ། །གཞན་དུ་དེ་ཉིད་དམན་པས་ནི། །དངོས་གྲུབ་ཐོབ་པར་མི་འགྱུར་རོ། །ཞེས་དང་། །འབབས་སྟེགས་ལྷ་རྟེན་སྦྱིན་པའང་མིན། །ཁྲུས་དང་གཙང་སྦྲ་དེ་བཞིན་ཏེ། འདི་ཀུན་བདེན་པ་མ་ཡིན་གྱི། །འདི་ཉིད་གཅིག་པུ་བདེན་པ་ཡིན། །ཞེས་དང་། མཚམས་མེད་ལྔ་པོ་བྱས་པ་དང་། །སྲིད་པར་ངལ་བར་བྱས་པས་ཀྱང་། །དེ་ཉིད་ལྡན་ན་འགྲུབ་འགྱུར་ཏེ། །དྲི་མེད་གོ་འཕང་འཐོབ་པར་འགྱུར། །ཞེས་དང་། །བྱ་བ་སྤྱོད་པའི་དབྱེ་བ་དང་། །མདོ་སྡེའི་སྡེ་སྣོད་ལ་སོགས་སུ། །མཆོག་ཏུ་དག་པ་གཅིག་པུ་ཉིད། །རྣམ་པ་དུ་མར་རྣམ་པར་གནས། །ཕུང་པོ་རིན་ཆེན་སྣོད་ཉིད་དུ། །སེམས་ཅན་བསམ་པའི་བྱེ་བྲག་གིས། །དེ་ཉིད་འབད་པས་སྦ་མཛད་ནས། །སངས་རྒྱས་མགོན་པོ་རྣམ་པར་བཞག །བྱང་ཆུབ་སེམས་མཆོག་རྣམ་པར་དག །བླ་མའི་ཞབས་ཀྱི་བཀའ་དྲིན་གྱིས། །རང་གི་ལུས་ལ་རབ་གནས་པ། །དེ་ནི་འབད་པས་རིག་པར་བྱ། །དེ་ནས་སྤྱོད་པ་བྱ་བའམ། །ཁྱིམ་དུ་གནས་ཏེ་བསྒོམ་པར་བྱ། ཞེས་དང་། །བླ་མ་དང་ནི་རྡོ་རྗེ་འཛིན། །གང་གིས་གཉིས་སུ་མེད་དེར་མཐོང་། །དངོས་གྲུབ་བསྡུས་པའི་མཚན་ཉིད་ཅན། །དེ་ཉིད་འདིར་ནི་ཐོབ་པར་འགྱུར། །ཞེས་དང་། །དབང་བསྐུར་རྗེས་གནང་མེད་པར་ཡང་། །སློབ་མ་དག་ནི་སྡུད་པར་བྱེད། །གླེགས་བམ་མཐོང་བས་དགའ་གྱུར་ནས། །གསང་སྔགས་རང་ཉིད་ལེན་པར་བྱེད། ཅེས་དང་། །དཔལ་ལྡན་འདུས་པ་ཞེས་བྱ་འདིར། །རྟོག་པ་ཐམས་ཅད་རྣམ་པར་སྤངས། །རྫོགས་པའི་རིམ་པའི་རྣལ་འབྱོར་གྱིས། །ཚེ་འདི་ཉིད་ལ་འགྲུབ་པར་འགྱུར། །དཔལ་ལྡན་འདུས་ལས་ཆོས་གཞན་མེད། །འཇིག་རྟེན་གསུམ་གྱི་རིན་ཆེན་འགྱུར། །སྙིང་པོ་ལས་ཀྱང་སྙིང་པོའི་མཆོག །རྒྱུད་ཀུན་གྱི་ནི་བླ་མའི་བླ། །བསྟན་དང་བཤད་པའི་རྣམ་པར་གནས། །རྫོགས་པའི་རྣལ་འབྱོར་རིམ་པ་ཉིད། །འདུས་པ་གང་གིས་མི་ཤེས་པར། །དེ་ཡིས་དངོས་གྲུབ་ཇི་ལྟར་འགྲུབ། །ཐེ་ཚོམ་ཐམས་ཅད་གཅོད་བྱེད་ཅིང་། །མི་ཤེས་རབ་རིབ་སེལ་བྱེད་པ། །སངས་རྒྱས་རིན་ཆེན་ཟ་མ་ཏོག །དཔལ་ལྡན་འདུས་པ་ཡོངས་སྤངས་ནས། །རྣམ་རྟོག་དུ་མས་བརྟགས་པ་ཡི། །རྨོངས་པ་དངོས་གྲུབ་འདོད་གྱུར་པ། །མཁའ་ལ་ཁུ་ཚུར་བརྡེག་པ་དང་། །སྨིག་རྒྱུའི་ཆུ་ལ་འཐུང་བ་བཞིན། །ཞེས་དང་། ཚེས་གྲངས་མེད་ཅིང་རྒྱུ་སྐར་མེད། །འདི་ལ་སྨྱུང་བར་བཤད་པ་མེད། །གཉིས་མེད་ཡེ་ཤེས་དང་ལྡན་ན། །བདེ་བར་གཤེགས་པའི་དངོས་གྲུབ་འགྱུར། །ཞེས་དང་། ལེའུ་གཉིས་པ་ལས། །སློབ་དཔོན་ཕལ་ཆེར་འདི་སྐད་བརྗོད། །དཔལ་ལྡན་འདུས་པ་མདངས་ཆེན་གྱི། །རྒྱུད་ཀྱི་སྡུད་པར་བྱེད་པ་པོ། །དཔའ་བོ་འཇིག་རྟེན་དབང་ཕྱུག་ཟེར། །བླ་མའི་ཞབས་ཀྱི་བཀའ་དྲིན་གྱིས། །དཔལ་ལྡན་འདས་པའི་སྡུད་པ་པོ། །གཞན་དག་ཡོད་པ་མ་ཡིན་ཞེས། །བདག་ཉིད་འབའ་ཞིག་སྨྲ་བར་བྱེད། །རྒྱུད་མཛད་པ་ནི་ཐུགས་རྗེ་ཆེ། །གསུང་བ་པོ་དེ་བརྗོད་པའང་དེ། །དེ་ལས་གཞན་དག་ཡོད་མིན་པས། །བདེ་ཆེན་ལས་གཞན་གསུངས་པ་མེད། །ཅེས་དང་། སངས་རྒྱས་ཀུན་གྱི་གནས་ཞེས་པ། །ཆོས་འབྱུང་མི་འགྱུར་ཞི་བ་ཉིད། །ཤེས་རབ་རང་གི་དངོས་དེ་སྲིད། །ཀུན་ཏུ་བཟང་པོའི་ཡེ་ཤེས་ཀྱིས། །སྤྲོས་པ་མེད་ཅིང་དག་པ་ལས། །འདི་དག་ཐམས་ཅད་རྣམ་པར་འཕྲུལ། །མཆོག་ཏུ་ཤེས་ཤིང་རྣམ་དག་གང་། །སངས་རྒྱས་ཀུན་གྱིས་ཕྱག་བྱས་པའི། །བརྗོད་མིན་ཀུན་ལ་ཁྱབ་པར་གནས། །ཐམས་ཅད་དེ་ཡི་རྣམ་འཕྲུལ་ཡིན། །ཞེས་དང་། གང་ཞིག་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ཚུལ་དག་གིས། །གནས་ཤིང་དངོས་གྲུབ་བཟང་སྟེར་བ། །ཤེས་རབ་ཅེས་བྱའི་མིང་གིས་གནས། །དེ་ལ་གནས་པ་གང་ཡིན་པ། །བྷ་ག་ཞེས་བྱའི་ཡི་གེ་གཉིས། །དག་པའི་དེ་ཉིད་ཅེས་བྱ་སྟེ། །དོན་དམ་པ་དེ་བདག་གིས་བསྟན། །ཞེས་སོགས་དེའི་དོན་རྒྱས་པར་སྨོས་ནས། གཞན་ཡང་། རྡོ་རྗེ་བཙུན་མོ་ལས་བྱུང་བ། །ཨེ་ཝཾ་རྣམ་དག་ཡི་གེ་ཉིད། །ཨེ་ཝཾ་ནམ་མཁའི་ཁམས་སུ་བརྗོད། །མཱ་ཡཱ་ཕྱག་རྒྱར་རྗེས་སུ་ཐོབ། །གང་ཞིག་དེ་ནི་སྟོན་བྱེད་པ། །ཐོབ་པ་ཞེས་བྱར་འདིར་བརྗོད་དོ། །རྟོག་མེད་ཀུན་མཁྱེན་ཡེ་ཤེས་ཉིད། །དུས་གཅིག་པ་ཡང་དེ་བཞིན་ནོ། །ཞེས་དང་། རྡོ་རྗེ་བཙུན་མོ་ཞེས་བརྗོད་པ། །ཤེས་རབ་རྒྱལ་བ་ཀུན་དངོས་ཏེ། །ཞེས་དང་། རྣམ་དག་བཙུན་མོའི་བྷ་ག་དེར། །བདེ་བ་ཆེན་པོ་རྟག་ཏུ་བཞུགས། །ཞེས་དང་། རྡོ་རྗེ་ཐུགས་སམ་གཞན་ཡང་རུང་། །དཔལ་ལྡན་བདེ་ཆེན་རྒྱལ་པོ་ནི། །འདུས་པ་ཞེས་བྱ་བྱེད་པོ་གང་། །དེ་ནི་ཨེ་ཝཾ་འདི་རབ་གནས། །ཞེས་དང་། འདིར་ནི་ཡི་གེ་གཉིས་པོ་ནི། །རྒྱུད་ཀྱི་དང་པོར་མེད་མི་འདོད། །ཅེས་སོ། །ལེའུ་གསུམ་པ་མངོན་པར་བྱང་ཆུབ་བསྟན་པ་ལས། དབང་པོ་ཀུན་ལས་རྣམ་གྲོལ་ཞིང་། །གཉིས་མེད་མཆོག་ཏུ་ཞི་བ་ཉིད། །ཁྱབ་ཅིང་རང་བཞིན་མེད་པ་ཡི། །རྟོག་པ་དེ་ནི་གོ་འཕང་མཆོག །ཅེས་དང་། ངོ་མཚར་མཆོག་གྱུར་རྡོ་རྗེ་ཅན། །དེ་ཡི་ཚེ་ན་བསྒྲུབ་པར་བྱ། །རང་ལུས་ཐབས་དང་ལྡན་པའམ། །ཡང་ན་ལས་ཀྱི་ཕྱག་རྒྱས་སོ། །ཞེས་དང་། ལས་ཀྱི་ཕྱག་རྒྱ་ཁྲོ་རྒྱུ་ཅན། །ཡེ་ཤེས་ཕྱག་རྒྱ་ཡང་དེ་བཞིན། །རྣམ་རྟོག་མང་བ་སྤངས་བྱས་ལ། །ཕྱག་རྒྱ་ཆེན་པོ་རྣམ་བསྒོམ་བྱ། །ཞེས་དང་། རྣམ་པར་གཡེང་བ་ཀུན་འབྱུང་བའི། །བུད་མེད་ཕྱག་རྒྱ་རྣམ་སྤངས་ལ། །རང་ལུས་ཐབས་དང་ལྡན་པ་ཡི། །ཕྱག་རྒྱ་ཆེན་པོ་བསྟེན་པར་བྱ། །རང་གི་རིག་པའི་ལྷ་རྫས་དེ། །ཕྱག་རྒྱ་ཆེན་པོ་མཆོག་ཏུ་དག །ཐ་མལ་ལུས་ལ་བསྟེན་ནས་གནས། །ཤེས་རབ་ཆུང་བས་མཐོང་མི་འགྱུར། །ཞེས་དང་། མི་འགྱུར་བ་ཡི་རང་ལུས་དེ། །མཆོག་གཅིག་གིས་ནི་ཤེས་པར་འགྱུར། །བླ་མའི་བཀའ་དྲིན་གནང་བ་ལས། །ཇི་ལྟ་བ་བཞིན་རྣམ་པར་གནས། །ཞེས་དང་། ཐབས་དང་བྲལ་ན་ནམ་དུ་ཡང་། །ལྷ་རྫས་ཡོན་ཏན་ཀུན་འབྱུང་བ། །གཉུག་མའི་ལུས་ལ་གནས་ན་ཡང་། །ཤེས་རབ་དེ་བཞིན་མཐོང་མི་འགྱུར། །ཞེས་དང་། ཇི་ལྟར་བུར་ཤིང་ཁུ་བ་དང་། །ཏིལ་ལ་ཏིལ་མར་ཇི་བཞིན་པ། །དེ་བཞིན་ལུས་ལ་ཐམས་ཅད་དུ། །ཤེས་རབ་ཕ་རོལ་ཕྱིན་པ་གནས། །ཞེས་དང་། བློ་ལྡན་དངོས་པོ་མི་བསྒོམས་ཤིང་། །དངོས་མེད་ཕ་རོལ་རིང་དུ་སྤངས། །གཅིག་གིས་རྟག་པར་འཛིན་གྱུར་ཅིག །གཞན་དག་གིས་ནི་སྟོང་ཉིད་དུའོ། །རྟག་དང་ཆད་པའི་སྦྱོར་བ་ལས། །མཆོག་ཏུ་འཛིན་པ་ཟག་པ་གང་། །ཡེ་ཤེས་ཅི་ཞིག་འབྱུང་འགྱུར་བ། །ཐོག་མ་དབུས་མཐའ་དྲི་མ་མེད། །གཙོ་བོ་རྟག་པ་མཆོག་ཏུ་ཞི། །རྒྱུ་དང་དཔེ་ནི་རྣམ་སྤངས་པ། །དངོས་དང་དངོས་མེད་རྣམ་པར་སྤངས། །རྟག་ཏུ་འབྱུང་ཞིང་འགྱུར་བ་མེད། །མི་གནས་མྱ་ངན་འདས་པ་ཉིད། །སྡིག་པ་ཐམས་ཅད་རྣམ་པར་སྤངས། །དེར་གནས་སྒོམ་དང་ལྡན་གྱུར་པས། །སངས་རྒྱས་ཀྱི་ཡང་སྤྱོད་ཡུལ་མིན། །དེར་ནི་བགྲོད་དང་བགྲོད་བྱ་མེད། །བགྲོད་པར་འགྱུར་བ་འགའ་ཡང་མེད། །སྒོམ་དང་བསྒོམ་བྱ་སྒོམ་པ་པོ། །དོན་དམ་པར་ན་ཡོད་མ་ཡིན། །དཔེ་ལས་འདས་ཤིང་བརྗོད་དུ་མེད། །གཟུང་དང་འཛིན་པ་རྣམ་པར་སྤངས། མཚན་མ་མེད་ཅིང་རྡུལ་བྲལ་བ། །མྱ་ངན་འདས་ཞེས་དེ་ལ་བཤད། །ཅེས་དང། ལྷ་དང་ལྷ་མིན་མིར་བཅས་པ། །ཐམས་ཅད་མ་ལུས་འདི་ལས་འབྱུང་། །ཁམས་གསུམ་མ་ལུས་པ་འདི་དག །ཐམས་ཅད་བདེ་བ་ཉིད་དུ་གནས། །ཞེས་དང་། གང་གིས་གཟུགས་ནི་ཤེས་མིན་ཞིང་། །གང་ཞིག་ཚིག་དང་བློ་སྤངས་ལ། །སྒྲ་དང་དྲི་དང་རོ་ལས་འདས། །བློ་ཡི་ཡུལ་ལས་གང་འདས་པ། །དེ་ནི་འཇིག་རྟེན་ལས་འདས་པ། །ཞེས་དང་། ལས་ཀྱི་ཕྱག་རྒྱ་ལྡན་པའམ། །ཡང་ན་ཕྱག་རྒྱ་ཆེན་པོ་ཡི། །སངས་རྒྱས་རྣམས་ཀྱི་ཐུགས་གྱུར་པ། །འདི་ནི་མཆོག་ཉིད་མཆོག་ཡིན་ན། །ཞེས་དང་། རང་གི་རིག་པའི་དེ་ཉིད་དེ། །གཞན་གྱིས་བརྗོད་པར་ནུས་མི་འགྱུར། །གུས་དང་བསྒོམས་པས་རྟོགས་འགྱུར་གྱི། །དེ་ནི་གཞན་དུ་རྟོགས་མི་ནུས། །དེ་ཉིད་ཤེས་ནས་ཉིན་མཚན་དུ། །གུས་པས་བསྒོམ་པར་བྱ་བ་ཡིན། །མྱ་ངན་འདས་པའི་གོ་འཕང་མཆོག །བདེ་ཞིང་བདེ་བ་བླ་མེད་དེར། །དེར་ནི་གུས་པའི་སྟོབས་ཉིད་དང་། །སྒོམ་པའི་སྟོབས་ཀྱིས་གང་སྤྲུལ་པ། །དེར་ནི་འབྱུང་བར་འགྱུར་བའི་གཟུགས། །ཀུན་དགའ་ལས་བྱུང་ཅི་ཡང་མཆོག །སྤྲོ་ཞིང་སྡུད་པར་བྱེད་པ་ཅན། །གསལ་པོར་ཡུད་ཀྱིས་བྱུང་གྱུར་པ། །ས་འོག་ས་སྟེང་ས་བླ་ཡི། །རྒྱུ་དང་མི་རྒྱུ་སྣང་བར་བྱེད། །དེ་ཉིད་སྒོམ་པའི་སྟོབས་ཀྱིས་ནི། །ཐབས་དང་ཤེས་རབ་དངོས་ཞི་བ། །ཉོན་མོངས་ཀུན་ལས་རྣམ་གྲོལ་ཞིང་། །མཚན་རྣམས་ཀུན་གྱིས་རྣམ་བརྒྱན་པ། །སྟོང་ཉིད་ཡེ་ཤེས་ལས་བྱུང་ཞེས། །གཉིས་མེད་མཆོག་ཏུ་ཞི་བ་ཉིད། །རྣམ་པ་ཀུན་ཏུ་མཆོག་ལྡན་ཞིང་། །གཟུང་དང་འཛིན་པ་རྣམ་པར་སྤངས། །རྣམ་དག་ཡེ་ཤེས་སྒྱུ་མའི་དངོས། །གསལ་ཞིང་རང་བཞིན་དྲི་མ་མེད། །ས་དང་དྲི་དང་རོ་ལས་འདས། །དེ་བཞིན་རེག་པ་རྣམ་པར་སྤངས། །ཏིང་འཛིན་ཡེ་ཤེས་མིག་གཉིས་ཀྱིས། །མཆོག་གཅིག་པུ་དེ་མཐོང་བར་འགྱུར། །བཟང་པོ་གྲིབ་མའི་སྒྱུ་འདྲ་བ། །འདུ་བྱེད་བཟང་པོ་བདེ་ལྡན་པ། །མེ་ཡིས་ཐག་པ་སྲེག་པ་བཞིན། །ཉོན་མོངས་འཆིང་བ་ལས་གྲོལ་བ། །རྣམ་པ་སྣ་ཚོགས་ལུས་རྣམས་དང་། །ཡེ་ཤེས་རླབས་ཀྱི་ཕྲེང་བ་སྤྲོད། །དབང་པོའི་གཞུ་དང་འདྲ་བའི་སྐུ། །དེ་ཉིད་བསྒོམས་པས་ཐོབ་པར་འགྱུར། །རྣལ་འབྱོར་སྒོམ་པའི་ནུས་པ་དང་། །དམ་ཚིག་རྣམས་ནི་བསྐྱངས་བྱས་ལ། །རྒྱལ་བ་ཡིས་ཀྱང་བརྗོད་མེད་པའི། །དེ་འདྲའི་གཟུགས་ནི་ཐོབ་པར་འགྱུར། །ཞེས་སོ། །ལེའུ་བཞི་པ་ལས། གོང་མ་གོང་མའི་ལམ་ཉིད་ཀྱིས། །བསྒོམ་པར་བྱ་བ་བཞི་པོ་ཉིད། །དང་པོར་ཡི་གེ་དགོད་པར་བྱ། །བསྐྱེད་པའི་རིམ་པ་ལ་གནས་པ། །སྒྲུབ་པོའི་དབང་པོས་བསྒོམ་པར་བྱ། །གཉིས་པ་ནང་གི་རང་བཞིན་ཉིད། །གསུམ་པ་བཟང་པོ་མཆོག་གྱུར་པ། །ཡེ་ཤེས་ཕྱག་རྒྱ་རྣམ་པར་བསྒོམ། །བཞི་པ་གོང་མར་གང་གསུངས་པ། །ཕྱག་རྒྱ་ཆེན་པོ་རྣམ་པར་བསྒོམ། །ཞེས་དང་། ཡི་གེ་དགོད་པའི་སྦྱོར་བ་ཡིས། །བསྒོམ་པར་བྱ་བ་གང་བསྟན་པ། །སེམས་ཅན་དང་པོའི་ལས་ཅན་རྣམས། །གཞུག་པར་བྱ་བའི་ཕྱིར་དུ་གསུངས། །ཞེས་དང་། བསྐྱེད་པའི་རིམ་པའི་ལམ་ཉིད་དུ། །གཅིག་ཉིད་རྣམ་པ་ལྔ་རུ་འགྱུར། །མངོན་པར་བྱང་ཆུབ་རྣམ་ལྔ་ཡིས། །ཡེ་ཤེས་མཆོག་ཏུ་དགེ་བ་ཉིད། །ཅེས་དང་། སྤྲོས་པ་ཀུན་ལས་རྣམ་གྲོལ་ཞིང་། གཟུགས་གང་མཆོག་ནི་ཞི་བ་ཉིད། །ཆོས་ཀྱི་དབྱིངས་ཀྱི་ངོ་བོ་ཤེས། །ཡེ་ཤེས་འདི་ལ་འདི་རབ་གྲགས། །ཞེས་དང་། རྣལ་འབྱོར་ཕྱག་རྒྱ་གཟུགས་ལྡན་པའི། །དངོས་པོ་མེད་པའི་རང་བཞིན་གྱིས། །གཟུགས་བརྙན་ཡིད་ཀྱི་རང་བཞིན་ཉིད། །ཡོན་ཏན་མཐའ་མེད་འབྱུང་འགྱུར་བ། །སངས་རྒྱས་ཀྱིས་ཀྱང་མི་མཁྱེན་པའི། །དཔལ་ལྡན་མེ་ལོང་མིང་ཅན་དུ། །ཡེ་ཤེས་དེ་ལ་བརྗོད་པར་བྱ། །དངོས་པོ་མེད་པའི་རང་བཞིན་དུ། །དེར་ནི་འགོག་པའི་ཡེ་ཤེས་གང་། །དེ་ཡི་རང་བཞིན་རྣལ་འབྱོར་ལྡན། །མཉམ་ཉིད་ཡེ་ཤེས་ཞེས་བརྗོད་དོ། །རྒྱས་པ་ཅན་ཞེས་བྱ་བ་གང་། །ལྷ་རྫས་བུད་མེད་དཀྱིལ་འཁོར་རོ། །འབད་པས་སོ་སོར་རྟོག་གྱུར་པ། །དེ་བཞིན་གཤེགས་པ་ཀུན་གྱི་གནས། །ཞེས་དང་། །སངས་རྒྱས་གཟུགས་ནི་འོད་ཆེན་པོ། །བཟང་པོ་དེ་ནི་མཐོང་གྱུར་ནས། །ནམ་མཁའི་དབྱིངས་ཀྱི་གནས་བཟང་པོར། །རྣལ་འབྱོར་འདི་ལ་བརྟག་པར་བྱ། །ཞེས་དང་། དག་ཅིང་དྭངས་པ་དྲི་མེད་དེ། །དེ་བཞིན་གཤེགས་པ་ཀུན་གྱིས་མཆོད། །ཡེ་ཤེས་དེ་ནི་མདོར་བསྡུ་ན། །སོ་སོར་རྟོག་པ་ཞེས་བྱར་བརྗོད། །ཅེས་དང་། རྡོ་རྗེ་པདྨ་མཉམ་སྦྱོར་བས། །མཆོག་ཏུ་དགའ་བའི་གཟུགས་ཅན་གྱིས། །རྣམ་པ་སྣ་ཚོགས་གཟུགས་ལྡན་པའི། །ཡེ་ཤེས་རླབས་ཀྱི་ཕྲེང་བ་སྤྲོས། །བྱ་བ་ནན་ཏན་ཡེ་ཤེས་ཞེས། །མཆོག་ཏུ་གྱུར་པ་དེ་ལ་བརྗོད། །ཅེས་སོགས་ཤིན་ཏུ་རྒྱས་པར་བསྟན་ཅིང་། །ལྷག་མ་གསུམ་པོ་ཡང་། །བསྐྱེད་པའི་རིམ་ལ་ཉུང་ལྡན་པས། །རྡོ་རྗེ་པདྨ་མཉམ་སྦྱོར་བ། །འདི་ནི་སྒོམ་པ་གཉིས་པ་སྟེ། །རང་གི་ངོ་བོ་ཡིན་ཞེས་གྲགས། །གསུམ་པ་དེ་ནི་བསྟན་པ་སྟེ། །ནང་གི་གོ་འཕང་བསྒོམས་པ་ཡིན། །རྣམ་པ་ཀུན་གྱི་མཆོག་ལྡན་པའི། །ཡེ་ཤེས་ཕྱག་རྒྱ་རབ་བརྟག་པའོ། །བཞི་པ་གོང་ན་མེད་པའི་རྒྱུ། །མངོན་པར་བྱང་ཆུབ་བྱེད་པ་པོ། །ཕྱག་རྒྱ་ཆེན་པོ་རྣམ་བསྒོམས་པ། །དེ་ཡི་གོང་ན་གཞན་མེད་པའོ། །ཞེས་པ་ལ་སོགས་པས་བསྟན་ཅིང་། །གཞན་ཡང་གཅིག་ཏུ་གསང་བའི་ས་ཕྱོགས་ཡོན་ཏན་བརྒྱ་ཡི་གཞིར་གྱུར་རིའམ་ཁྱིམ་སྟོང་ངམ། །སྐྱེད་ཚལ་ཉིད་དམ་བྲག་ཕུག་དུར་ཁྲོད་དག་གམ་ས་ཕུག་ཉམས་དགའ་བའམ། །དེ་ལྟར་དྲི་མེད་བྱས་པའི་ས་ཕྱོགས་དག་ཏུ་བཟང་པོ་མཚོན་ཅིང་བཟུང་། །ཡུལ་གྱི་བདེ་བསྐྱེད་དེ་ཉིད་རིན་ཆེན་རྡོ་རྗེ་ཅན་གྱི་འདུ་འཛི་སྤངས་ལ་བསྒོམ། །ཞེས་དང་། འཁོར་བར་རབ་ཏུ་འཆིང་གྱུར་པར། །ཁམས་གསུམ་པ་ཡིས་བསྟན་པའི་ལམ། །དེ་ཀུན་དངོས་པོ་མེད་གྱུར་པའི། །ཡེ་ཤེས་མཆོག་གི་རྣམ་འཕྲུལ་ཡིན། །ཞེས་དང་། དངོས་དང་དངོས་མེད་ལས་གྲོལ་ཞིང་། །སྤྲོས་པ་མེད་པའི་ངོ་བོ་ཉིད། །སངས་རྒྱས་ཀྱིས་ཀྱང་རྟོགས་མིན་ན། །སྐྱེ་བོ་གཞན་གྱིས་སྨོས་ཅི་དགོས། །ཞེས་དང་། སྒོམ་དང་བསྒོམས་པ་བསྒོམ་བྱ་དག །དོན་དམ་པར་ན་ཡོད་མ་ཡིན། །དེ་ཉིད་མཆོག་གྱུར་གཅིག་པུ་དེ། །བྱང་ཆུབ་སེམས་དཔའ་ཞེས་སུ་བརྗོད། །ཅེས་དང་། ལྟ་བའི་བུད་ཤིང་ཕུང་པོ་རྣམས། །སྟོང་ཉིད་མེ་ཡིས་བསྲེགས་བྱས་ནས། །འདིར་ནི་མཉམ་ཉིད་ལ་གནས་ན། དེ་བཞིན་ཉིད་ཀྱི་མེ་ཡང་འགགས། །ཞེས་དང་། ལེའུ་ལྔ་པ་ཕྱག་རྒྱ་ཆེན་པོ་མངོན་པར་བསྟན་པ་ལས། ལུགས་བཅས་རིམ་པ་དེ་ཉིད་ངེས་པའི་བློ་ལྡན་སྒོམ་འགྱུར་རྡོ་རྗེ་ཅན། །འདོད་པའི་ཡིད་ཅན་བཟང་པོར་རབ་དགའི་ཡིད་ཅན་དངོས་གྲུབ་དོན་ཀུན་བསྒྲུབ། །མི་ཡི་ཚེ་འདི་ཉིད་ལ་འགྲུབ་འགྱུར་དཔལ་ལྡན་གསང་གྲུབ་ལ་གནས་ནས། །ཐབས་བཟང་དག་དང་ལྡན་པས་བརྗོད་མེད་མཆོག་གྱུར་གོ་འཕང་དམ་པར་འགྲོ། །ཞེས་སོགས་གསུངས་ཤིང་དབང་བསྐུར་བའི་ཆོ་ག་མདོ་ཙམ་བསྟན་ནོ། །ལེའུ་དྲུག་པ་གསང་བའི་སྤྱོད་པ་བསྟན་པ་ལས། མཚན་མ་མེད་ཅིང་སྣང་བ་མེད། །རང་གི་ལུས་ཀྱི་ཐབས་ལྡན་པའི། །རྡོ་རྗེ་སེམས་དཔའ་བདེ་བའི་མཆོག །འབད་པས་རབ་ཏུ་བསྒོམ་པར་བྱ། །ཞེས་དང་། ཏིལ་འབྲུ་ཙམ་གྱི་དངོས་པོ་ཡང་། །ཡོངས་སུ་གཟུང་བར་མི་བྱའོ། །ཡོངས་སུ་འཛིན་ལས་སྡུག་བསྔལ་འབྱུང་། །སྡུག་བསྔལ་གྱིས་ནི་སེམས་འཁོར་འགྱུར། །འཁོར་བས་སེམས་ནི་ཞུམ་འགྱུར་ཏེ། །ཞུམ་པས་དངོས་གྲུབ་ཉམས་པར་འགྱུར། །དངོས་གྲུབ་ཉམས་པས་འཁོར་བ་སྟེ། །འཁོར་བས་དམྱལ་བ་སྒྲུབ་པར་བྱེད། །དམྱལ་བར་ཉོན་མོངས་སྡུག་བསྔལ་གྱིས། །གྲངས་མེད་བསྐལ་པར་གནོད་པར་འགྱུར། །ཞེས་དང་། ཐེག་པ་གསུམ་ལ་ཞུགས་རྣམས་ལ། །ཕྱག་ལ་སོགས་པ་མི་བྱའོ། །སངས་རྒྱས་དམ་པར་མ་འཛིན་ན། །རྣལ་འབྱོར་པ་གཞན་སྨོས་ཅི་དགོས། །ཞེས་དང་། ཕྱོགས་བཅུ་དག་ཏུ་རྣམ་པར་རྒྱུག་བྱེད་པའི། །རང་སེམས་གལ་ཏེ་འཛིན་པར་འདོད་གྱུར་ན། །སངས་རྒྱས་ཐོབ་པའི་རྒྱུར་གྱུར་རང་གི་སེམས། །དེ་ཚེ་ཡང་དག་སྦྱོར་བ་མཆོག་ཏུ་བྱ། །ཞེས་སོ། །ལེའུ་བདུན་པ་རིག་པའི་བརྟུལ་ཞུགས་ལས། འདོད་པའི་རྫུ་འཕྲུལ་ཆེ་ལྡན་ཞིང་། །ཆུ་དང་རྡུལ་དག་རྣམ་པར་སྤངས། །སྣ་ཚོགས་གཟུགས་དག་རབ་སྟོན་པའི། །ལྷ་རྫས་བཙུན་མོ་བསྟེན་པར་བྱ། །ཞེས་དང་། ལྷ་རྫས་བཙུན་མོ་འགུགས་པ་ཡི། །ནུས་པ་གལ་ཏེ་མེད་གྱུར་ན། །འདོད་ཆགས་གནོད་པ་ཉིད་གྱུར་ལ། །དེས་ན་མི་ཡི་བུ་མོ་བསྟེན། །ཞེས་སོ། །ལེའུ་བརྒྱད་པ་ཚོགས་ཀྱི་བརྟུལ་ཞུགས་ལས། །མགོ་བོའི་སྐྲ་ནི་བྲེགས་ནས་ཀྱང་། །རལ་པ་སྦོམ་པོ་གཅིག་བཞག་ལ། །གཙུག་ཕུད་གཅིག་ནི་བཟུང་བར་བྱ། །ཞེས་དང་། ཇི་སྲིད་རྣལ་འབྱོར་བྱང་ཆུབ་སེམས། །གཏོང་བར་བྱེད་པ་མ་ཡིན་པ། །དེ་སྲིད་ཀུན་དགའ་ལས་བྱུང་བདེ། །ཅི་ཡང་རྒྱུན་མི་འཆད་པ་ཐོབ། །བདེ་བ་དེ་ཡི་ངོ་བོ་དང་། །ཡང་དག་ལྡན་པའི་བྱང་ཆུབ་མཆོག །བདག་ཉིད་རྟག་ཏུ་བསྒོམས་ན་ནི། །འགྲུབ་འགྱུར་འདི་ལ་ཐེ་ཚོམ་མེད། །དངོས་གྲུབ་ཀུན་གྱི་གཏེར་གྱུར་པ། །བྱང་ཆུབ་སེམས་ནི་དེར་ལྷུང་བས། །ཕུང་པོ་རྣམ་ཤེས་བརྒྱལ་གྱུར་ནས། །མ་སྨད་དངོས་གྲུབ་ག་ལ་ཡོད། ཅེས་སོ། །ལེའུ་དགུ་པ་དོན་དམ་པའི་སློབ་དཔོན་གྱི་མཆོད་པ་ངེས་པར་བསྟན་པ་ལས། །དམ་ཚིག་དག་ནི་ཐམས་ཅད་ལས། །བླ་མ་མཆོད་པ་མཆོག་ཡིན་ཏེ། །སངས་རྒྱས་རིན་ཆེན་ཟ་མ་ཏོག །དཔལ་ལྡན་འདུས་པའམ་གཞན་དུ་བསྟེན། །ཞེས་དང་། ཁམས་གསུམ་རིན་པོ་ཆེར་གྱུར་པ། །སློབ་དཔོན་ལས་ནི་མཆོག་གཞན་མེད། །གང་ལས་བཀའ་དྲིན་ཐོབ་པ་ནི། །མཁས་པས་དངོས་གྲུབ་དུ་མ་ཐོབ། །ཅེས་དང་། གང་གིས་སངས་རྒྱས་རྣམས་ཀྱི་ཆོས། །ནམ་མཁའ་ལྟ་བུ་མི་ཤེས་པས། །ཐེག་པ་མཆོག་འདི་ཐོས་གྱུར་ནས། །སེམས་ཅན་དེ་ནི་སྐྲག་གྱུར་ན། །རྡོ་རྗེ་ཐེག་པ་སྨོད་པ་དེ། །ངན་འགྲོ་དག་ཏུ་འགྲོ་བར་འགྱུར། །ཞེས་དང་ཡང་། མུན་པ་ལས་ནི་མར་མེ་བཞིན། །བདེ་ཆེན་མགོན་པོ་གཅིག་པུ་ཉིད། །གང་ཞིག་རྟག་ཏུ་དྲན་བྱེད་ཅིང་། །ཞབས་ཀྱི་པདྨོ་གཉིས་གུས་པས། །སྡིག་པ་ཐམས་ཅད་ཟད་གྱུར་ནས། །སེམས་ཅན་དེ་ཉིད་དེ་ཡི་མཐུས། །པད་བསྣམས་འཇིག་རྟེན་མགོན་པོ་ལྟར། །དངོས་གྲུབ་ཀུན་གྱི་གཏེར་གྱུར་པ། །དུས་མི་རིང་བར་འགྱུར་བ་ཉིད། །ཅེས་གསུངས་སོ། །བདེ་བ་ཆེན་པོ་པདྨ་བཛྲ་གྱི་ཞལ་ལུང་བདུད་རྩིའི་ཕུང་པོ་འདི་ཉིད། །རྒྱ་གར་གྱི་པཎྜི་ཏ་ཀྲྀཥྞ་པ་དང་། ལོ་ཙཱ་བ་ཚུལ་ཁྲིམས་རྒྱལ་བས་བསྒྱུར་བ་སྟེ། གཞུང་གི་དུམ་བུ་ཅུང་ཟད་བཏུས་པའོ། །ཇི་ལྟར་ཟླ་བའི་འཛུམ་རླབས་ཀྱིས། །ཀུནྡའི་ནགས་ཚལ་བྱེ་བ་བཞིན། །གསང་བ་གྲུབ་པའི་ལུང་འདི་ཡིས། །གྲུབ་པའི་བློ་མཆོག་གྲོལ་བར་ཤོག །ཤུ་བྷཾ།། །། ༈

[edit]

slob dpon pad+ma badz+ra gyis mdzad pa'i gsang ba grub pa/__ wi/__rgyud ma lus pa'i don skul bar byed pa/__dpal gsang ba grub pa zhes bya ba slob dpon pad+ma badz+ra gyis mdzad pa las/__le'u dang por/__dngos po med cing khyab pa mchog tu zhi ba'i go 'phang 'jig rten spyod pa dag las rnam grol ba/__/gang zhig rtag 'byung zhi la rgyal ba dam pa khyu mchog rnams kyis phyag byas bsam gtan dang bral ba/_/ci yang rung ba'i gnas gyur dpal ldan rgyal ba'i sku yi dam pa rnam dag nang gi bdag nyid kyis 'jug pa/__/sangs rgyas kyis kyang rtogs par bya ba min zhing dri ma rnams dang bral ba de nyid de la phyag 'tshal nas/__/zhes dang /__rdzogs pa'i rim pa'i rnal 'byor nyid/__/de nyid ldan pas bsgom par bya/__/gzhan du de nyid dman pas ni/__/dngos grub thob par mi 'gyur ro/__/zhes dang /__/'babs stegs lha rten sbyin pa'ang min/__/khrus dang gtsang sbra de bzhin te/__'di kun bden pa ma yin gyi/__/'di nyid gcig pu bden pa yin/__/zhes dang /__mtshams med lnga po byas pa dang /__/srid par ngal bar byas pas kyang /__/de nyid ldan na 'grub 'gyur te/__/dri med go 'phang 'thob par 'gyur/__/zhes dang /__/bya ba spyod pa'i dbye ba dang /__/mdo sde'i sde snod la sogs su/__/mchog tu dag pa gcig pu nyid/__/rnam pa du mar rnam par gnas/__/phung po rin chen snod nyid du/_/sems can bsam pa'i bye brag gis/__/de nyid 'bad pas sba mdzad nas/__/sangs rgyas mgon po rnam par bzhag__/byang chub sems mchog rnam par dag__/bla ma'i zhabs kyi bka' drin gyis/__/rang gi lus la rab gnas pa/__/de ni 'bad pas rig par bya/__/de nas spyod pa bya ba'am/__/khyim du gnas te bsgom par bya/__zhes dang /__/bla ma dang ni rdo rje 'dzin/__/gang gis gnyis su med der mthong /__/dngos grub bsdus pa'i mtshan nyid can/__/de nyid 'dir ni thob par 'gyur/__/zhes dang /__/dbang bskur rjes gnang med par yang /__/slob ma dag ni sdud par byed/__/glegs bam mthong bas dga' gyur nas/_/gsang sngags rang nyid len par byed/__ces dang /__/dpal ldan 'dus pa zhes bya 'dir/_/rtog pa thams cad rnam par spangs/__/rdzogs pa'i rim pa'i rnal 'byor gyis/__/tshe 'di nyid la 'grub par 'gyur/__/dpal ldan 'dus las chos gzhan med/__/'jig rten gsum gyi rin chen 'gyur/__/snying po las kyang snying po'i mchog__/rgyud kun gyi ni bla ma'i bla/__/bstan dang bshad pa'i rnam par gnas/__/rdzogs pa'i rnal 'byor rim pa nyid/_/'dus pa gang gis mi shes par/__/de yis dngos grub ji ltar 'grub/__/the tshom thams cad gcod byed cing /__/mi shes rab rib sel byed pa/__/sangs rgyas rin chen za ma tog__/dpal ldan 'dus pa yongs spangs nas/__/rnam rtog du mas brtags pa yi/__/rmongs pa dngos grub 'dod gyur pa/__/mkha' la khu tshur brdeg pa dang /__/smig rgyu'i chu la 'thung ba bzhin/__/zhes dang /__tshes grangs med cing rgyu skar med/__/'di la smyung bar bshad pa med/___/gnyis med ye shes dang ldan na/__/bde bar gshegs pa'i dngos grub 'gyur/_/zhes dang /__le'u gnyis pa las/__/slob dpon phal cher 'di skad brjod/__/dpal ldan 'dus pa mdangs chen gyi/__/rgyud kyi sdud par byed pa po/__/dpa' bo 'jig rten dbang phyug zer/__/bla ma'i zhabs kyi bka' drin gyis/__/dpal ldan 'das pa'i sdud pa po/_/gzhan dag yod pa ma yin zhes/__/bdag nyid 'ba' zhig smra bar byed/__/rgyud mdzad pa ni thugs rje che/__/gsung ba po de brjod pa'ang de/__/de las gzhan dag yod min pas/_/bde chen las gzhan gsungs pa med/__/ces dang /___sangs rgyas kun gyi gnas zhes pa/__/chos 'byung mi 'gyur zhi ba nyid/__/shes rab rang gi dngos de srid/__/kun tu bzang po'i ye shes kyis/__/spros pa med cing dag pa las/__/'di dag thams cad rnam par 'phrul/__/mchog tu shes shing rnam dag gang /_/sangs rgyas kun gyis phyag byas pa'i/_/brjod min kun la khyab par gnas/__/thams cad de yi rnam 'phrul yin/__/zhes dang /___gang zhig sangs rgyas thams cad kyi/__/sku gsung thugs kyi tshul dag gis/__/gnas shing dngos grub bzang ster ba/__/shes rab ces bya'i ming gis gnas/__/de la gnas pa gang yin pa/__/b+ha ga zhes bya'i yi ge gnyis/__/dag pa'i de nyid ces bya ste/__/don dam pa de bdag gis bstan/__/zhes sogs de'i don rgyas par smos nas/__gzhan yang /__rdo rje btsun mo las byung ba/__/e waM rnam dag yi ge nyid/__/e waM nam mkha'i khams su brjod/__/mA yA phyag rgyar rjes su thob/__/gang zhig de ni ston byed pa/__/thob pa zhes byar 'dir brjod do/__/rtog med kun mkhyen ye shes nyid/__/dus gcig pa yang de bzhin no/_/zhes dang /___rdo rje btsun mo zhes brjod pa/__/shes rab rgyal ba kun dngos te/__/zhes dang /__rnam dag btsun mo'i b+ha ga der/__/bde ba chen po rtag tu bzhugs/__/zhes dang /___rdo rje thugs sam gzhan yang rung /__/dpal ldan bde chen rgyal po ni/__/'dus pa zhes bya byed po gang /__/de ni e waM 'di rab gnas/__/zhes dang /__'dir ni yi ge gnyis po ni/__/rgyud kyi dang por med mi 'dod/__/ces so/__/le'u gsum pa mngon par byang chub bstan pa las/___dbang po kun las rnam grol zhing /__/gnyis med mchog tu zhi ba nyid/_/khyab cing rang bzhin med pa yi/__/rtog pa de ni go 'phang mchog__/ces dang /__ngo mtshar mchog gyur rdo rje can/__/de yi tshe na bsgrub par bya/__/rang lus thabs dang ldan pa'am/_/yang na las kyi phyag rgyas so/__/zhes dang /___las kyi phyag rgya khro rgyu can/__/ye shes phyag rgya yang de bzhin/__/rnam rtog mang ba spangs byas la/__/phyag rgya chen po rnam bsgom bya/_/zhes dang /__rnam par g.yeng ba kun 'byung ba'i/__/bud med phyag rgya rnam spangs la/_/rang lus thabs dang ldan pa yi/__/phyag rgya chen po bsten par bya/__/rang gi rig pa'i lha rdzas de/__/phyag rgya chen po mchog tu dag__/tha mal lus la bsten nas gnas/__/shes rab chung bas mthong mi 'gyur/__/zhes dang /___mi 'gyur ba yi rang lus de/__/mchog gcig gis ni shes par 'gyur/__/bla ma'i bka' drin gnang ba las/__/ji lta ba bzhin rnam par gnas/__/zhes dang /___thabs dang bral na nam du yang /__/lha rdzas yon tan kun 'byung ba/__/gnyug ma'i lus la gnas na yang /__/shes rab de bzhin mthong mi 'gyur/__/zhes dang /___ji ltar bur shing khu ba dang /__/til la til mar ji bzhin pa/_/de bzhin lus la thams cad du/__/shes rab pha rol phyin pa gnas/__/zhes dang /__blo ldan dngos po mi bsgoms shing /__/dngos med pha rol ring du spangs/__/gcig gis rtag par 'dzin gyur cig__/gzhan dag gis ni stong nyid du'o/__/rtag dang chad pa'i sbyor ba las/__/mchog tu 'dzin pa zag pa gang /__/ye shes ci zhig 'byung 'gyur ba/__/thog ma dbus mtha' dri ma med/__/gtso bo rtag pa mchog tu zhi/__/rgyu dang dpe ni rnam spangs pa/___/dngos dang dngos med rnam par spangs/__/rtag tu 'byung zhing 'gyur ba med/__/mi gnas mya ngan 'das pa nyid/__/sdig pa thams cad rnam par spangs/__/der gnas sgom dang ldan gyur pas/__/sangs rgyas kyi yang spyod yul min/__/der ni bgrod dang bgrod bya med/_/bgrod par 'gyur ba 'ga' yang med/__/sgom dang bsgom bya sgom pa po/__/don dam par na yod ma yin/__/dpe las 'das shing brjod du med/__/gzung dang 'dzin pa rnam par spangs/__mtshan ma med cing rdul bral ba/__/mya ngan 'das zhes de la bshad/__/ces dang/__lha dang lha min mir bcas pa/__/thams cad ma lus 'di las 'byung /__/khams gsum ma lus pa 'di dag__/thams cad bde ba nyid du gnas/__/zhes dang /__gang gis gzugs ni shes min zhing /__/gang zhig tshig dang blo spangs la/__/sgra dang dri dang ro las 'das/__/blo yi yul las gang 'das pa/__/de ni 'jig rten las 'das pa/__/zhes dang /___las kyi phyag rgya ldan pa'am/__/yang na phyag rgya chen po yi/__/sangs rgyas rnams kyi thugs gyur pa/__/'di ni mchog nyid mchog yin na/__/zhes dang /__rang gi rig pa'i de nyid de/__/gzhan gyis brjod par nus mi 'gyur/__/gus dang bsgoms pas rtogs 'gyur gyi/__/de ni gzhan du rtogs mi nus/__/de nyid shes nas nyin mtshan du/__/gus pas bsgom par bya ba yin/__/mya ngan 'das pa'i go 'phang mchog__/bde zhing bde ba bla med der/__/der ni gus pa'i stobs nyid dang /__/sgom pa'i stobs kyis gang sprul pa/_/der ni 'byung bar 'gyur ba'i gzugs/__/kun dga' las byung ci yang mchog__/spro zhing sdud par byed pa can/__/gsal por yud kyis byung gyur pa/__/sa 'og sa steng sa bla yi/__/rgyu dang mi rgyu snang bar byed/__/de nyid sgom pa'i stobs kyis ni/__/thabs dang shes rab dngos zhi ba/__/nyon mongs kun las rnam grol zhing /__/mtshan rnams kun gyis rnam brgyan pa/__/stong nyid ye shes las byung zhes/__/gnyis med mchog tu zhi ba nyid/__/rnam pa kun tu mchog ldan zhing /__/gzung dang 'dzin pa rnam par spangs/__/rnam dag ye shes sgyu ma'i dngos/__/gsal zhing rang bzhin dri ma med/__/sa dang dri dang ro las 'das/_/de bzhin reg pa rnam par spangs/__/ting 'dzin ye shes mig gnyis kyis/__/mchog gcig pu de mthong bar 'gyur/__/bzang po grib ma'i sgyu 'dra ba/__/'du byed bzang po bde ldan pa/__/me yis thag pa sreg pa bzhin/__/nyon mongs 'ching ba las grol ba/_/rnam pa sna tshogs lus rnams dang /__/ye shes rlabs kyi phreng ba sprod/__/dbang po'i gzhu dang 'dra ba'i sku/__/de nyid bsgoms pas thob par 'gyur/__/rnal 'byor sgom pa'i nus pa dang /__/dam tshig rnams ni bskyangs byas la/__/rgyal ba yis kyang brjod med pa'i/__/de 'dra'i gzugs ni thob par 'gyur/__/zhes so/__/le'u bzhi pa las/___gong ma gong ma'i lam nyid kyis/__/bsgom par bya ba bzhi po nyid/__/dang por yi ge dgod par bya/_/bskyed pa'i rim pa la gnas pa/__/sgrub po'i dbang pos bsgom par bya/__/gnyis pa nang gi rang bzhin nyid/__/gsum pa bzang po mchog gyur pa/__/ye shes phyag rgya rnam par bsgom/__/bzhi pa gong mar gang gsungs pa/__/phyag rgya chen po rnam par bsgom/__/zhes dang /__yi ge dgod pa'i sbyor ba yis/__/bsgom par bya ba gang bstan pa/__/sems can dang po'i las can rnams/__/gzhug par bya ba'i phyir du gsungs/__/zhes dang /___bskyed pa'i rim pa'i lam nyid du/__/gcig nyid rnam pa lnga ru 'gyur/__/mngon par byang chub rnam lnga yis/__/ye shes mchog tu dge ba nyid/__/ces dang /__spros pa kun las rnam grol zhing /__gzugs gang mchog ni zhi ba nyid/__/chos kyi dbyings kyi ngo bo shes/__/ye shes 'di la 'di rab grags/__/zhes dang /___rnal 'byor phyag rgya gzugs ldan pa'i/_/dngos po med pa'i rang bzhin gyis/__/gzugs brnyan yid kyi rang bzhin nyid/__/yon tan mtha' med 'byung 'gyur ba/__/sangs rgyas kyis kyang mi mkhyen pa'i/__/dpal ldan me long ming can du/__/ye shes de la brjod par bya/__/dngos po med pa'i rang bzhin du/_/der ni 'gog pa'i ye shes gang /__/de yi rang bzhin rnal 'byor ldan/__/mnyam nyid ye shes zhes brjod do/__/rgyas pa can zhes bya ba gang /__/lha rdzas bud med dkyil 'khor ro/__/'bad pas so sor rtog gyur pa/__/de bzhin gshegs pa kun gyi gnas/__/zhes dang /__/sangs rgyas gzugs ni 'od chen po/__/bzang po de ni mthong gyur nas/__/nam mkha'i dbyings kyi gnas bzang por/__/rnal 'byor 'di la brtag par bya/__/zhes dang /__dag cing dwangs pa dri med de/__/de bzhin gshegs pa kun gyis mchod/__/ye shes de ni mdor bsdu na/__/so sor rtog pa zhes byar brjod/__/ces dang /___rdo rje pad+ma mnyam sbyor bas/__/mchog tu dga' ba'i gzugs can gyis/__/rnam pa sna tshogs gzugs ldan pa'i/_/ye shes rlabs kyi phreng ba spros/__/bya ba nan tan ye shes zhes/__/mchog tu gyur pa de la brjod/__/ces sogs shin tu rgyas par bstan cing /__/lhag ma gsum po yang /__/bskyed pa'i rim la nyung ldan pas/__/rdo rje pad+ma mnyam sbyor ba/__/'di ni sgom pa gnyis pa ste/__/rang gi ngo bo yin zhes grags/__/gsum pa de ni bstan pa ste/__/nang gi go 'phang bsgoms pa yin/__/rnam pa kun gyi mchog ldan pa'i/__/ye shes phyag rgya rab brtag pa'o/_/bzhi pa gong na med pa'i rgyu/__/mngon par byang chub byed pa po/__/phyag rgya chen po rnam bsgoms pa/__/de yi gong na gzhan med pa'o/__/zhes pa la sogs pas bstan cing /_/gzhan yang gcig tu gsang ba'i sa phyogs yon tan brgya yi gzhir gyur ri'am khyim stong ngam/__/skyed tshal nyid dam brag phug dur khrod dag gam sa phug nyams dga' ba'am/_/de ltar dri med byas pa'i sa phyogs dag tu bzang po mtshon cing bzung /__/yul gyi bde bskyed de nyid rin chen rdo rje can gyi 'du 'dzi spangs la bsgom/__/zhes dang /___'khor bar rab tu 'ching gyur par/__/khams gsum pa yis bstan pa'i lam/__/de kun dngos po med gyur pa'i/__/ye shes mchog gi rnam 'phrul yin/__/zhes dang /___dngos dang dngos med las grol zhing /__/spros pa med pa'i ngo bo nyid/__/sangs rgyas kyis kyang rtogs min na/__/skye bo gzhan gyis smos ci dgos/__/zhes dang /___sgom dang bsgoms pa bsgom bya dag__/don dam par na yod ma yin/__/de nyid mchog gyur gcig pu de/_/byang chub sems dpa' zhes su brjod/__/ces dang /__lta ba'i bud shing phung po rnams/_/stong nyid me yis bsregs byas nas/__/'dir ni mnyam nyid la gnas na/__de bzhin nyid kyi me yang 'gags/__/zhes dang /__le'u lnga pa phyag rgya chen po mngon par bstan pa las/__lugs bcas rim pa de nyid nges pa'i blo ldan sgom 'gyur rdo rje can/__/'dod pa'i yid can bzang por rab dga'i yid can dngos grub don kun bsgrub/__/mi yi tshe 'di nyid la 'grub 'gyur dpal ldan gsang grub la gnas nas/__/thabs bzang dag dang ldan pas brjod med mchog gyur go 'phang dam par 'gro/__/zhes sogs gsungs shing dbang bskur ba'i cho ga mdo tsam bstan no/__/le'u drug pa gsang ba'i spyod pa bstan pa las/__mtshan ma med cing snang ba med/__/rang gi lus kyi thabs ldan pa'i/__/rdo rje sems dpa' bde ba'i mchog__/'bad pas rab tu bsgom par bya/__/zhes dang /___til 'bru tsam gyi dngos po yang /__/yongs su gzung bar mi bya'o/__/yongs su 'dzin las sdug bsngal 'byung /__/sdug bsngal gyis ni sems 'khor 'gyur/__/'khor bas sems ni zhum 'gyur te/__/zhum pas dngos grub nyams par 'gyur/__/dngos grub nyams pas 'khor ba ste/__/'khor bas dmyal ba sgrub par byed/__/dmyal bar nyon mongs sdug bsngal gyis/__/grangs med bskal par gnod par 'gyur/__/zhes dang /__theg pa gsum la zhugs rnams la/__/phyag la sogs pa mi bya'o/__/sangs rgyas dam par ma 'dzin na/_/rnal 'byor pa gzhan smos ci dgos/__/zhes dang /__phyogs bcu dag tu rnam par rgyug byed pa'i/__/rang sems gal te 'dzin par 'dod gyur na/__/sangs rgyas thob pa'i rgyur gyur rang gi sems/__/de tshe yang dag sbyor ba mchog tu bya/__/zhes so/_/le'u bdun pa rig pa'i brtul zhugs las/___'dod pa'i rdzu 'phrul che ldan zhing /__/chu dang rdul dag rnam par spangs/__/sna tshogs gzugs dag rab ston pa'i/__/lha rdzas btsun mo bsten par bya/__/zhes dang /___lha rdzas btsun mo 'gugs pa yi/__/nus pa gal te med gyur na/__/'dod chags gnod pa nyid gyur la/__/des na mi yi bu mo bsten/_/zhes so/__/le'u brgyad pa tshogs kyi brtul zhugs las/__/mgo bo'i skra ni bregs nas kyang /__/ral pa sbom po gcig bzhag la/__/gtsug phud gcig ni bzung bar bya/__/zhes dang /___ji srid rnal 'byor byang chub sems/__/gtong bar byed pa ma yin pa/__/de srid kun dga' las byung bde/__/ci yang rgyun mi 'chad pa thob/__/bde ba de yi ngo bo dang /_/yang dag ldan pa'i byang chub mchog__/bdag nyid rtag tu bsgoms na ni/__/'grub 'gyur 'di la the tshom med/__/dngos grub kun gyi gter gyur pa/__/byang chub sems ni der lhung bas/__/phung po rnam shes brgyal gyur nas/__/ma smad dngos grub ga la yod/__ces so/_/le'u dgu pa don dam pa'i slob dpon gyi mchod pa nges par bstan pa las/__/dam tshig dag ni thams cad las/__/bla ma mchod pa mchog yin te/__/sangs rgyas rin chen za ma tog__/dpal ldan 'dus pa'am gzhan du bsten/__/zhes dang /__khams gsum rin po cher gyur pa/__/slob dpon las ni mchog gzhan med/__/gang las bka' drin thob pa ni/__/mkhas pas dngos grub du ma thob/__/ces dang /__gang gis sangs rgyas rnams kyi chos/__/nam mkha' lta bu mi shes pas/__/theg pa mchog 'di thos gyur nas/__/sems can de ni skrag gyur na/__/rdo rje theg pa smod pa de/__/ngan 'gro dag tu 'gro bar 'gyur/_/zhes dang yang /__mun pa las ni mar me bzhin/__/bde chen mgon po gcig pu nyid/_/gang zhig rtag tu dran byed cing /__/zhabs kyi pad+mo gnyis gus pas/__/sdig pa thams cad zad gyur nas/__/sems can de nyid de yi mthus/__/pad bsnams 'jig rten mgon po ltar/__/dngos grub kun gyi gter gyur pa/__/dus mi ring bar 'gyur ba nyid/__/ces gsungs so/__/bde ba chen po pad+ma badz+ra gyi zhal lung bdud rtsi'i phung po 'di nyid/__/rgya gar gyi paN+Di ta kr-iSh+Na pa dang /__lo tsA ba tshul khrims rgyal bas bsgyur ba ste/__gzhung gi dum bu cung zad btus pa'o/__/ji ltar zla ba'i 'dzum rlabs kyis/__/kun+da'i nags tshal bye ba bzhin/__/gsang ba grub pa'i lung 'di yis/__/grub pa'i blo mchog grol bar shog__/shu b+haM//____//__!