JKW-KABUM-07-JA-010: Difference between revisions
From Khyentse Lineage - A Tsadra Foundation Project
WikiBot2015 (talk | contribs) (Created page with "{{Khyentse Metadata |classification=Tibetan Publications |subclass=Tibetan Texts |collectiontitle=mkhyen brtse'i bka' 'bum |collectiontitletib=མཁྱེན་བརྩེ...") |
No edit summary |
||
Line 2: | Line 2: | ||
|classification=Tibetan Publications | |classification=Tibetan Publications | ||
|subclass=Tibetan Texts | |subclass=Tibetan Texts | ||
|fulltitletib=དཔལ་འཁོར་ལོ་བདེ་མཆོག་ལཱུ་ཧི་པའི་བསྐྱེད་རྫོགས་ཀྱི་སྙིང་པོ་ཤིན་ཏུ་བསྡུས་པ་བདེ་ཆེན་འདོད་འཇོ། | |||
|fulltitle=dpal 'khor lo bde mchog lU hi pa'i bskyed rdzogs kyi snying po shin tu bsdus pa bde chen 'dod 'jo | |||
|collectiontitle=mkhyen brtse'i bka' 'bum | |collectiontitle=mkhyen brtse'i bka' 'bum | ||
|collectiontitletib=མཁྱེན་བརྩེའི་བཀའ་འབུམ་ | |collectiontitletib=མཁྱེན་བརྩེའི་བཀའ་འབུམ་ | ||
|author='jam dbyangs mkhyen brtse'i dbang po | |author='jam dbyangs mkhyen brtse'i dbang po | ||
|editor=rdzong sar blo gros phun tshogs | |||
|authortib=འཇམ་དབྱངས་མཁྱེན་བརྩེའི་དབང་པོ་ | |authortib=འཇམ་དབྱངས་མཁྱེན་བརྩེའི་དབང་པོ་ | ||
|editortib=རྫོང་སར་བློ་གྲོས་ཕུན་ཚོགས་ | |editortib=རྫོང་སར་བློ་གྲོས་ཕུན་ཚོགས་ | ||
|tibgenre=Collected Works - Selected - bka' 'bum | |tibgenre=Collected Works - Selected - bka' 'bum | ||
|terma=No | |||
|language=Tibetan | |language=Tibetan | ||
|volumenumber=JA | |volumenumber=JA | ||
|totalvolumes=25 | |||
|textnuminvol=010 | |textnuminvol=010 | ||
|multivolumework=No | |||
|pdflink=File:JKW-KABUM-07-JA-010.pdf | |pdflink=File:JKW-KABUM-07-JA-010.pdf | ||
}} | }} | ||
Line 20: | Line 22: | ||
<h1 style="font-size: 24px !important;">Tibetan Text</h1> | <h1 style="font-size: 24px !important;">Tibetan Text</h1> | ||
<onlyinclude> | <onlyinclude> | ||
{{TibP| | {{TibP|༄༅། །དཔལ་འཁོར་ལོ་བདེ་མཆོག་ལཱུ་ཧི་པའི་བསྐྱེད་རྫོགས་ཀྱི་སྙིང་པོ་ཤིན་ཏུ་བསྡུས་པ་བདེ་ཆེན་འདོད་འཇོ་ཞེས་བྱ་བ་བཞུགས་སོ།། | ||
༄༅། །དཔལ་འཁོར་ལོ་བདེ་མཆོག་ལཱུ་ཧི་པའི་བསྐྱེད་རྫོགས་ཀྱི་སྙིང་པོ་ཤིན་ཏུ་བསྡུས་པ་བདེ་ཆེན་འདོད་འཇོ་ཞེས་བྱ་བ་བཞུགས་སོ།། | |||
ཨོཾ་སྭསྟི་སིདྡྷཾ། གང་གི་དྲིན་གྱིས་ལྷན་སྐྱེས་བདེ་བ་མཆོག །སྩོལ་མཛད་འཁོར་ལོའི་དབང་ཕྱུག་བླ་མ་ལ། །བཏུད་ནས་དངོས་གྲུབ་མཆོག་བརྙེས་ལཱུ་ཧི་པའི། །གདམས་ཟབ་བསྐྱེད་རྫོགས་སྙིང་པོ་ཅུང་ཟད་དབྱེ། །འདི་ལ་གཉིས། རྒྱུད་ལས་ཇི་ལྟར་གསུངས་པའི་ཁུངས་དགོད་པ་དང་། མངོན་པར་རྟོགས་པ་བསྒོམ་ཚུལ་བྱེ་བྲག་ཏུ་བཤད་པའོ། །དང་པོ་ལ་གསུམ། རྩ་རྒྱུད་ཀྱི་གླེང་གཞིའི་གསང་བ་ཞེས་པའི་ཚིག་གིས་བསྟན་པའི་ལམ་རིམ་དང་། ལེའུ་ལྔ་བཅུ་རྩ་གཅིག་པའི་དེ་ཁོ་ན་ཉིད་བཅུ་བཞིས་བསྟན་པའི་ལམ་རིམ་དང་། བཤད་རྒྱུད་ཀུན་སྤྱོད་ནས་གསུངས་པའི་ལམ་གྱི་རིམ་པའོ། །དང་པོ་ནི། རྩ་རྒྱུད་ཀྱི་ཐོག་མར། དེ་ནས་གསང་བ་བཤད་བྱ་བ། །ཞེས་བྱ་བའི་གསང་བ་ཞེས་པའི་ཚིག་ངེས་དོན་དུ་བཤད་ན། བསྐྱེད་པའི་རིམ་པ་དང་། རྫོགས་པའི་རིམ་པ་དང་། དེ་དག་གི་བསྒྲུབས་པའི་འབྲས་བུ་གསུམ་བསྟན་པ་ལས། དང་པོ་ནི། གསང་བ་མཆོག་གི་དགེས་པ་ན། །ཞེས་སོགས་ཚིག་བཅད་གཉིས་ཀྱི་སྟོན་ཏེ། འདི་ལ་རྟེན་ལ་སྦྱར་བ་དང་། བརྟེན་པ་ལ་སྦྱར་བ་གཉིས་ལས། དང་པོ་ནི། གསང་བ་མཆོག་གི་དགེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་པས་རྣལ་འབྱོར་པའི་རྟེན་རི་བོ་ཚང་ཚིང་རི་སུལ་ལ་སོགས་པ་སྟོན་ཅིང་། ལྷའི་རྟེན་མངལ་སྐྱེས་སྒོང་སྐྱེས་གང་བསྒོམ་ཡང་རླུང་གི་དཀྱིལ་འཁོར་ནས་རི་རབ་ཀྱི་བར་བསྟན་ནོ། །ཡང་ལྷའི་རྟེན་ཐུན་མོང་མ་ཡིན་པ་ཆོས་འབྱུང་ནས་གཞལ་ཡས་ཁང་གི་བར་ཡང་བསྟན་ནོ། །བརྟེན་པ་ལྷ་བསྐྱེད་པ་ལ། མཁའ་འགྲོ་ཀུན་དངོས་སེམས་པ་ནི། ཞེས་པ་ནས། དམ་ཚིག་སྤྱོད་པའི་སྤྱོད་ཡུལ་ཡིན། ཞེས་པའི་བར་ཚིག་རྐང་བ་དྲུག་གིས་མངལ་སྒོང་གཉིས་ཆར་གྱི་བསྐྱེད་རིམ་རྫོགས་པར་བསྟན་ནོ། །གཉིས་པ་རྫོགས་པའི་རིམ་པ་ལ་སྦྱར་ན། གསང་བ་མཆོག་གི་དགེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་པས་རྫོགས་རིམ་རིམ་བཞིའི་དང་པོ་ཤེས་བྱ་རྒྱུད་ཀྱི་རིམ་པ་བསྟན། སྒྲ་ཡི་ཚུལ་ལ་ངེས་འབྱུང་ཞིང་། །དམ་ཚིག་སྤྱོད་པའི་སྤྱོད་ཡུལ་ཡིན། །ཅེས་པས་སྔགས་ཀྱི་རིམ་པ་བསྟན། །མཁའ་འགྲོ་ཀུན་དངོས་སེམས་པ་ནི། །རྡོ་རྗེ་སེམས་དཔའ་བདེ་བའི་མཆོག །ཅེས་པས་ཡེ་ཤེས་ཀྱི་རིམ་པ་བསྟན། །འདི་ནི་རང་བྱུང་བཅོམ་ལྡན་པ། །མཁའ་འགྲོ་དྲྭ་བའི་སྡོམ་པ་ནི། །ཞེས་པས་གསང་བའི་རིམ་པ་བསྟན་ཏེ། དེ་ལྟར་ན་གསང་བ་ཞེས་དང་། དེའི་དོན་ཚིགས་བཅད་གཉིས་ཀྱིས་ལམ་གྱི་གསང་བ་བསྐྱེད་རྫོགས་གཉིས་ཀ་སྟོན་པས། འཁོར་ལོ་བདེ་མཆོག་གི་ལམ་གྱི་རིམ་པ་མ་ལུས་པ་བསྟན་ནོ། །གསུམ་པ་དེ་དག་གིས་བསྒྲུབས་པའི་འབྲས་བུ་གསང་བ་ནི། ཐུན་མོང་དང་མཆོག་གི་དངོས་གྲུབ་སྟེ། །སྔགས་བཟླས་བསམ་གཏན་ལ་སོགས་ལྡན། །ཆོ་གའི་སྦྱོར་ཉིད་ཡེ་ཤེས་ཀྱང་། །ཞེས་པས་བསྟན་ནོ། །གཉིས་པ་ནི། རྩ་རྒྱུད་ལེའུ་ལྔ་བཅུ་རྩ་གཅིག་པ་ལས། གོས་དང་ཕྱག་རྒྱ་ལྔ་ལ་སོགས། །ཤེས་རབ་ཡན་ལག་ཕུར་བུ་དྲ། །ཨཱ་ལི་ཀཱ་ལི་ཞེས་བརྗོད་པ། །རྒྱུ་སོགས་སྟོང་པ་སྔོན་འགྲོ་བ། །འཇུག་པ་སྒྲ་ལ་སོགས་པ་ནས། །ཇི་སྲིད་བསྡུས་པའི་སྦྱོར་ལྡན་ཞིང་། །བདུད་རྩི་ཚིམ་བྱེད་མྱ་ངན་འདས། །ལག་པའི་མཆོད་པ་དབང་བསྐུར་བ། །གོ་ཆ་ཆེན་པོས་ཡང་དག་བསྲུང་། །སྔགས་རྣམས་ཀུན་གྱིས་མཆོད་པ་ཡིན། དེ་ལྟར་དེ་ཉིད་བཅུ་བཞི་ནི། །མདོར་བསྡུས་ནས་ནི་བཤད་པ་ཡིན། །ཞེས་གསུངས་ཏེ། འདི་ཉིད་ལྷ་མངལ་སྐྱེས་ལྟར་ན། བསྐྱེད་རིམ་འབའ་ཞིག་གི་མཉམ་བཞག་རྗེས་སྤྱོད་དང་བཅས་ལ་སྦྱར་བ་དང་། ལྷ་སྒོང་སྐྱེས་ལྟར་ན། བསྐྱེད་རྫོགས་མ་ལུས་པ་སྦྱར་བ་གཉིས་ལས། འདིར་ཕྱི་མ་ལྟར་བཤད་ན། གོས་ནི་ཕན་འདོགས་པས་གོས་ཞེས་བྱ་སྟེ། བསྐྱེད་རིམ་གྱི་སྔོན་འགྲོ་ཚངས་པའི་གནས་བཞི་བསྒོམ་པ་ལ་སོགས་པའོ། །ཕྱག་རྒྱ་ལྔ་ལ་སོགས་པ་ནི་མཉམ་བཞག་གི་དུས་ཀྱི་དཔའ་བོ་དཔའ་མོ་རྣམས་ཀྱི་སྐུ་ལ་ཡོད་པའི་རྒྱན་ནོ། །ཤེས་རབ་ཡན་ལག་ནི་ཕུང་པོ་དང་ཁམས་དང་སྐྱེ་མཆེད་ཀྱི་དག་པ་དྲན་པའོ། །ཕུར་བུ་དྲ་བ་ནི་རྗེས་སྤྱོད་ཀྱི་དུས་སུ་ཚམ་རྔམ་སྔགས་ཀྱིས་སྲུང་བ་བྱེད་པའོ། །ཨཱ་ལི་ཀཱ་ལི་ཞེས་བརྗོད་པ་ནི་ངག་དག་པར་བྱེད་པ་སྟེ། དེས་མཚོན་ནས་ཐོག་མ་ཉིད་དུ་ལུས་ངག་ཡིད་གསུམ་དག་པར་བྱ་བའོ། །རྒྱུ་སོགས་བསོད་ནམས་ཀྱི་ཚོགས། སྟོང་པ་སྔོན་འགྲོ་བ་ཡེ་ཤེས་ཀྱི་ཚོགས་སོ། །འཇུག་པ་ནི་སེམས་ཅན་གྱི་དོན་ལ་འཇུག་ཅིང་སྤྲོ་བ་ཡིན་ལ། སྒྲ་ལ་སོགས་པས་ནི། སྟོང་པའི་ངང་ལས་འབྱུང་བ་རིམ་བརྩེགས་སྣ་ཚོགས་པདྨའི་བར་དུ་བསྐྱེད་པ་དང་། སྣ་ཚོགས་པདྨའི་ལྟེ་བར་ཨཱ་ལི་ལས་ཟླ་བ། དེའི་སྟེང་དུ་ཀཱ་ལི་ལས་ཉི་མ། དེའི་བར་དུ་ཧཱུྃ། ཉི་མའི་སྟེང་དུ་ཡི་གེ་གསུམ་རིམ་པ་བཞིན་དུ། དེའི་སྟེང་དུ་པདྨ། དེའི་སྟེང་དུ་ཟླ་བ། དེའི་སྟེང་དུ་ཧཱུྃ་སྟེ་ཡི་གེ་གསུམ་མས་རིམ་གྱིས་གཅིག་ལ་གཅིག་ཐིམ་ནས་ཧཱུྃ་གི་ཐིག་ལེ་ནཱ་དར་གྱུར་པའི་བར་ནི་སྒྲ་ཡིན་ལ། སོགས་པ་ཞེས་པའི་ནི་ནཱ་ད་སྒྲ་དེ་ཉི་ཟླའི་བར་གྱི་ཚུལ་ཧཱུྃ་ལ་ཐིམ་སྟེ། དེ་ཐམས་ཅད་གྱུར་པ་ལས། རྟེན་བརྟེན་པ་ཐམས་ཅད་དུས་གཅིག་ལ་བསྐྱེད་པའོ། །དེ་ནས་བརྩམ་ནས། ཇི་སྲིད་བསྡུས་པའི་སྦྱོར་ལྡན་ཞིང་ནི། སྤྲུལ་སྐུ་ལ་དམིགས་པའི་རྗེས་ལ་ལུས་དཀྱིལ་བསྒོམ་པ་དང་། ལོངས་སྤྱོད་རྫོགས་པའི་སྐུ་ལ་དམིགས་པ་དང་། བྱང་ཆུབ་ཀྱི་ཕྱོགས་ཀྱི་དག་པ་དྲན་པ་དང་། །ཆོས་ཀྱི་སྐུ་ལ་དམིགས་པའི་བར་དང་། ཡེ་ཤེས་སེམས་དཔའ་སྤྱན་དྲང་བའི་བར་བསྡུ་བའོ། །བདུད་རྩི་ཚིམ་བྱེད་ནི་མཆོད་པ་བྱེད་པའི་དུས་སུ་བདུད་རྩི་མྱོང་བའོ། མྱ་ངན་འདས་ནི་ཕྱག་རྒྱ་བཞི་དང་། རྡོ་རྗེ་སེམས་དཔའ་བསྡུ་བ་སོགས་རྫོགས་རིམ་བསྒོམ་པ་སྟེ། དེ་ལྟར་དེ་ཁོ་ན་ཉིད་བཅུ་པ་དེས་ནི་མཉམ་གཞག་ཁོ་ན་བསྟན་ཏོ། །ལག་པའི་མཆོད་པ་ལ་སོགས་པ་བཞི་ནི་རྗེས་སྤྱོད་ཁོ་ན་སྟེ། རྗེས་སྤྱོད་ཀྱི་དུས་སུ་ལག་མཆོད་བྱ་བ་དང་། དབང་བསྐུར་བ་ཁྲུས་ཀྱི་རྣལ་འབྱོར་བྱ་བ་དང་། རྗེས་ཀྱི་དུས་སུ་གོ་ཆ་ཆེན་པོས་བདག་ཉིད་བསྲུང་བ་དང་། རྩ་བའི་སྔགས་བརྗོད་པ་ལ་སོགས་པའི་སྔགས་རྣམས་ཀུན་གྱིས་མཆོད་པ་བྱ་བ་སྟེ། དེ་ལྟར་ན་འབྲས་བུ་འགྲུབ་པ་ལ་མི་བསླུ་ཞིང་། སྒྲུབ་པ་པོ་ལ་ཕན་འདོགས་པར་བྱེད་པ་དེ་ཁོ་ན་ཉིད་བཅུ་བཞི་པོ་དེ་ནི། བདེ་མཆོག་ཉུང་ངུའི་རྒྱུད་འདིར། འབུམ་ཕྲག་གསུམ་པའི་རྒྱུད་ལས། མདོར་བསྡུས་ནས་བཤད་པ་ཡིན་ནོ། །གསུམ་པ་ནི། བཤད་རྒྱུད་ཀུན་སྤྱོད་ལས་གསུངས་པའི་ལམ་གྱི་རིམ་པ་ལ་གཉིས་ཏེ། རྒྱུད་ཀྱི་བརྗོད་བྱ་མ་ལུས་པ་འཁྲུགས་བསྡེབས་པའི་ལམ་རིམ་དང་། ལམ་གྱི་དངོས་གཞི་ཉིན་ཞག་ཕྲུགས་གཅིག་ལ་ཇི་ལྟར་བྱ་བའི་ཚུལ་མདོར་བསྡུ་བའོ། །དང་པོ་ནི། རྣལ་འབྱོར་མ་ཀུན་ཏུ་སྤྱོད་པའི་བརྗོད་བྱ་ཐམས་ཅད་གཉིས་སུ་བསྡུ་བ་དང་། གསུམ་དུ་བསྡུ་བ་དང་། བཞིར་བསྡུ་བ་དང་གསུམ་ལས། །དང་པོ་ནི། དེ་བཞིན་གཤེགས་པའི་དབུགས་དབྱུང་དང་། རྡོ་རྗེ་འཛིན་པའི་དབུགས་དབྱུང་གཉིས་ཏེ། དེ་ཉིད་རྒྱུའི་དབང་དུ་བྱས་ན་ཀུན་རྫོབ་ཀྱི་བདེན་པ་ནི་དེ་བཞིན་གཤེགས་པའི་དབུགས་དབྱུང་། དོན་དམ་པའི་བདེན་པ་ནི་རྡོ་རྗེ་འཛིན་པའི་དབུགས་དབྱུང་། ལམ་གྱི་དབང་དུ་བྱས་ན་བསྐྱེད་རིམ་དང་། རྫོགས་རིམ་གཉིས། འབྲས་བུའི་དབང་དུ་བྱས་ན་གཟུགས་སྐུ་དང་། ཆོས་སྐུ་གཉིས་ལ་དབུགས་དབྱུང་གཉིས་སྦྱར་དགོས་ཏེ། ཀུན་སྤྱོད་ལས། རྒྱུད་འདི་ཡི་ནི་རྣལ་འབྱོར་པ། །བདེན་པ་གཉིས་ལ་ཡང་དག་བརྟེན། །ཞེས་དང་། ཀུན་སྤྱོད་ལེའུ་བཅུ་གསུམ་པ་ལས། བསོད་ནམས་ཡེ་ཤེས་ཚོགས་དག་ནི། །བདེན་པ་གཉིས་ལ་བརྟེན་པ་ཡིན། །ཞེས་དང་། ལེའུ་བཅུ་གཅིག་པ་ལས། བདེ་གཤེགས་དབུགས་དབྱུང་གསུངས་པ་ནི། །དག་པའི་ལུས་ནི་སྐྱོན་མེད་པ། །ཞེས་གསུངས་པས་སོ། །གཉིས་པ་ནི། ལམ་གྱི་ཀུན་ཏུ་སྤྱོད་པ་དང་། དེ་རྫོགས་པར་བྱེད་པ་ཡན་ལག་གི་ཀུན་ཏུ་སྤྱོད་པ་དང་། འབྲས་བུའི་ཀུན་ཏུ་སྤྱོད་པ་གསུམ་དུ་འདུས་སོ། །གསུམ་པ་ནི། དེའི་སྔོན་དུ་རྒྱུའི་ཀུན་སྤྱོད་སྔོན་དུ་སོང་བས་ཉམས་སུ་ལེན་པའི་རྟེན་གྱི་གང་ཟག་བགྲངས་ན་བཞིར་འགྱུར་རོ། །དེ་ལྟར་བཤད་ན་རྟེན་གྱི་གང་ཟག་ལ་གཉིས་ཏེ། ལམ་ལ་འཇུག་པ་དང་། ཞུགས་པའོ། །དང་པོ་ལ་གསུམ། མི་དགེ་བ་འབའ་ཞིག་སྤྱོད་པ་ལམ་དག་པ། ཕ་རོལ་ཏུ་ཕྱིན་པས་རྒྱུད་ཅི་རིགས་སྦྱངས་བ་དག་པ། རེས་སྡིག་པ། རེས་དགེ་བ་སྤྱོད་པ་འདྲེས་པ་སྟེ། དེ་སྐད་དུ། དག་དང་མ་དག་འདྲེས་པ་སྟེ། །སྒྲུབ་པ་པོ་ནི་གསུམ་དུ་གནས། །ཞེས་གསུངས་པས་སོ། །ལམ་ཞུགས་ལའང་གསུམ་སྟེ། བསྐྱེད་རིམ་འབའ་ཞིག་ལ་དགའ་བ་མཉེས་པར་བྱེད་པའི་སྒྲུབ་པ་པོ་དང་། རྫོགས་རིམ་འབའ་ཞིག་བསྒོམ་པ་རྣམ་པར་དག་པའི་སྒྲུབ་པ་པོ་དང་། ཟུང་དུ་འཇུག་པ་ལ་དགའ་བ་གསལ་བྱེད་ཡོན་ཏན་ལྡན་པ་ཞེས་བྱ་བ་སྟེ། དེ་ཡང་། མཉེས་བྱ་རྣམ་པར་དག་པ་དང་། །གསལ་བྱེད་ཡོན་ཏན་ལྡན་པའི་མི། །ཞེས་གསུངས་པ་ཡིན་ནོ། །ཡང་རྒྱུད་འདིར་ནི་གང་ཟག་གཉིས་ཏེ། སྤང་བར་བྱ་བ་དང་། བསྒྲུབ་པར་བྱ་བའི་གང་ཟག་གོ། །དང་པོ་ནི། ལེའུ་བཅུ་གཅིག་པ་ལས། ལྐུགས་ཤིང་གླེན་པ་སྡིག་དང་ལྡན། །བྱིས་པའི་ཤེས་པས་ཤེས་པ་ཅན། །སེམས་ཅན་ཡོངས་སུ་མ་སྨིན་དང་། །ཕྱི་རོལ་བསྟན་བཅོས་ཀྱིས་འཆལ་བ། །དེ་དག་ཀུན་གྱིས་མི་ཤེས་ཏེ། །མི་ཤེས་མུན་པས་ཁེབས་པ་དང་། །ཁེངས་པ་ལ་ནི་རྟག་དགའ་བ། །ང་རྒྱལ་ལ་སོགས་བདུན་སེམས་ལྡན། །དེ་དག་ཀུན་ཀྱང་སངས་རྒྱས་ཀྱི། །སྤྱོད་ཡུལ་གསང་བ་མི་ཤེས་སོ། །ཞེས་པའི་ཡན་ལག་གསུངས་པ་དང་། །སྒྲུབ་པའི་མཚན་ཉིད་ཀྱང་དེ་ཉིད་ལས། །བླ་མའི་རིམ་པ་ཇི་ལྟར་བསྟན། །གང་གིས་མྱུར་དུ་ཤེས་འགྱུར་བ། །སྐྱེ་བོ་བྱེ་བ་སྟོང་ཕྲག་ཏུ། །ང་ཡི་ཡེ་ཤེས་ཀྱིས་བསྐུལ་ཡིན། དད་པ་ཡང་དག་ལྡན་པ་དང་། །རྣལ་འབྱོར་སྤྱོད་ཚུལ་ལ་གནས་ཡིན། །ཞེས་གསུངས་ལ། ལེའུ་དང་པོ་ལ་རྣལ་འབྱོར་གྱི་དབང་ཕྱུག་ཅེས་གསུངས་སོ། །དང་པོ་ལམ་གྱི་ཀུན་ཏུ་སྤྱོད་པ་ལ་གསུམ། རྟེན་དང་བརྟེན་པར་བཅས་པ་བསྐྱེད་པ་ཕྱིའི་ཀུན་སྤྱོད་སྤྲུལ་པའི་སྐུ་ལམ་དུ་བྱེད་པ་དང་། ལུས་ལ་ལྷ་རྣམས་རྫོགས་པར་བསྒོམ་པ་ནང་གི་ཀུན་སྤྱོད་ལོངས་སྐུ་ལམ་དུ་བྱེད་པ་དང་། རྫོགས་པའི་རིམ་པ་ཉམས་མྱོང་དང་བཅས་པ་ནི་རྫོགས་པའི་ཀུན་སྤྱོད་ཆོས་སྐུ་ལམ་དུ་བྱེད་པའོ། །གཉིས་པ་དེ་རྫོགས་པར་བྱེད་པ་ཡན་ལག་གི་ཀུན་ཏུ་སྤྱོད་པ་ལ་གསུམ་སྟེ། དང་པོ་རྫོགས་པར་བྱེད་པའི་ཡན་ལག་དང་། གསུམ་ག་རྫོགས་པར་བྱེད་པའི་ཡན་ལག་དང་། དེ་དག་བརྟན་པར་བྱེད་པའི་སྤྱོད་པའོ། །དང་པོ་ལ་ལྔ་སྟེ། ཕུང་པོ་ཁམས་དང་སྐྱེ་མཆེད་སྦྱང་བསྒྱུར་དང་། ཚོགས་གཉིས་བསགས་པ་དང་། གོ་ཆ་བཅིང་བ་དང་། ཡེ་ཤེས་པ་དགུག་པ་དང་། དབང་བསྐུར་བའོ། །གཉིས་པ་ལ་ལྔ་སྟེ། སྔགས་མཆོད་དང་། །གསང་པའི་མཆོད་པ་དང་། དམ་ཚིག་ཅན་ལ་གཏོར་མ་སྦྱིན་པ་དང་། དམ་ཚིག་དང་། སྡོམ་པ་དང་། ཐུན་མོང་གི་བྱ་བ་བྱང་ཆུབ་ཀྱི་ཕྱོགས་ཀྱི་དག་པ་དང་། ཐུན་མཚམས་གྱི་ཕྱེ་བའོ། །འདི་ལའང་ལྔ་སྟེ། ཁམས་དང་རྒྱན་ཆའི་དག་པ་དང་། སུམ་བྷ་ནིའི་སྲུང་བ། སྤྱོད་ལམ་གྱི་རྣལ་འབྱོར། ཁ་ཟས་ཀྱི་རྣལ་འབྱོར། ཉལ་བ་དང་ལྡང་བའི་རྣལ་འབྱོར་རོ། །གསུམ་པ་ལ་རང་དོན་གྱི་སྤྱོད་པ་དང་། གཞན་དོན་ཕྱོགས་ལས་རྣམ་པར་རྒྱལ་བའི་སྤྱོད་པ་གཉིས་ལས། དང་པོ་ལ་གསུམ་སྟེ། བསྐྱེད་རིམ་བརྟན་པར་བྱེད་པ་སྤྲོས་བཅས་ཀྱི་སྤྱོད་པ། རྫོགས་རིམ་བརྟན་པར་བྱེད་པ་སྤྲོས་མེད་ཀྱི་སྤྱོད་པ། །གཉིས་ཀ་བརྟན་པར་བྱེད་པ་ཤིན་ཏུ་སྤྲོས་མེད་ཀྱི་སྤྱོད་པའོ། །གསུམ་པ་འབྲས་བུའི་ཀུན་ཏུ་སྤྱོད་པ་ལ། ཐུན་མོང་གི་དངོས་གྲུབ་དང་། མཆོག་གི་དངོས་གྲུབ་དང་། ཕྱག་རྒྱ་ཆེན་པོ་མཆོག་གི་དངོས་གྲུབ་གསུམ་སྟེ། དེ་ལྟར་ན་ཀུན་ཏུ་སྤྱོད་པ་ཞེས་པའི་ཚིག་དེ་ཉིད་ཀྱིས། འཁོར་ལོ་བདེ་མཆོག་གི་ལམ་དང་འབྲས་བུ་མ་ལུས་པ་བསྟན་ཅིང་། ལེའུ་གང་ནས་གང་འབྱུང་བ་ནི་རྒྱུད་ཀྱི་སྟེང་དུ་རྟོགས་པར་བྱའོ། །གཉིས་པ་ལམ་གྱི་དངོས་གཞི་ཉིན་ཞག་ཕྲུགས་གཅིག་ལ་ཇི་ལྟར་བྱ་བའི་ཚུལ་མདོར་བསྡུས་པ་ནི། ཀུན་སྤྱོད་ལེའུ་བཅུ་གཉིས་པ་ལས། འདུག་དང་ལྡང་བ་ཉིད་དང་ནི། །འཇུག་དང་རྫོགས་པ་ཉིད་དག་དང་། །བྱིན་གྱིས་བརླབ་དང་དབང་བསྐུར་དང་། །ཏིང་འཛིན་མཆོད་པ་བསྡུ་བ་ཡིན། །ཞེས་བྱ་བ་དེ་ཁོ་ན་ཉིད་བཅུ་སྟེ། དེ་ལ་གདུག་པ་ཞེས་བྱ་བ་ནི། ཚངས་པའི་གནས་བཞི་དང་། གཞི་སྦྱང་བསྒྱུར་དང་། སྲུང་བའི་འཁོར་ལོ་དང་། བསོད་ནམས་དང་ཡེ་ཤེས་ཀྱི་ཚོགས་བསགས་ནས་བདག་མེད་པ་ལ་བློ་ཅུང་ཟད་འདུག་པ་ཡིན་ནོ། །གཉིས་པ་ལྡང་བ་ནི། བྱང་ཆུབ་ཀྱི་སེམས་ཀྱི་རྒྱུན་གྱིས་སེམས་ཅན་གྱི་དོན་བྱའོ་སྙམ་པའི་བསམ་པས་འབྱུང་བ་རིམ་བརྩེགས་རི་རབ་དང་བཅས་པ་བསྒོམ་པའོ། །གསུམ་པ་འཇུག་པ་ནི། རི་རབ་ཀྱི་སྟེང་དུ་མངོན་པར་བྱང་ཆུབ་པ་ལྔ་ལས་རྟེན་དང་བརྟེན་པ་དུས་གཅིག་ཏུ་ཕྱིའི་དཀྱིལ་འཁོར་བསྒོམ་པའོ། །བཞི་པ་རྫོགས་པ་ནི། ལུས་ཀྱི་དཀྱིལ་འཁོར་རྫོགས་པར་བསྒོམ་པ་སྔགས་ཀྱི་བྱིན་གྱིས་བརླབ་པའོ། །ལྔ་པ་བྱིན་གྱིས་བརླབ་པ་ནི། ཕོ་ཉ་བསྲེ་བ། གོ་ཆ་བཅིང་པ། ཡེ་ཤེས་པ་དགུག་པ་རྣམས་ཡིན་ནོ། །དྲུག་པ་ནི། དབང་བསྐུར་ནས་རིགས་ཀྱི་བདག་པོས་རྒྱས་གདབ་པ་དང་བཅས་པའོ། །བདུན་པ་ཏིང་ངེ་འཛིན་ནི། བྱང་ཆུབ་ཀྱི་ཕྱོགས་ཀྱི་དག་པ་དྲན་པར་བྱས་ལ། ལྷའི་སྐུ་མདོག་དང་ཕྱག་མཚན་ལ་སེམས་ཅུང་ཟད་འཛིན་པ་ཡིན་ནོ། །བརྒྱད་པ་མཆོད་པ་ནི། སྔགས་ཀྱི་མཆོད་པ་དང་། ཕྱིའི་མཆོད་པ་དང་། བདུད་རྩིའི་མཆོད་པ་དང་། མཉེས་པའི་མཆོད་པ་དང་། ཡིད་ལས་བྱུང་བའི་མཆོད་པ་དང་། བསྟོད་པའི་མཆོད་པ་དང་། གསང་བའི་མཆོད་པ་སྟེ། དེ་རྣམས་བཟླས་པ་སྔགས་མཆོད་ཀྱི་ཁོངས་སུ་འདུ་ལ། གསང་བའི་མཆོད་པ་ནི་རྫོགས་པའི་རིམ་པར་འགྲོ་བའི་སྐབས་ཀྱང་ཡོད་དོ། །གཏོར་མའང་མཆོད་པའི་སྐབས་སུ་འདུ་བ་ཡིན་ཏེ། ཐུན་གོང་མ་རྣམས་ལ་གཏོར་མ་ཐུན་མཇུག་བསྡུ་བའི་རྗེས་ལ་གཏོང་ལ། ཐུན་ཐ་མ་ལ་ནི་གཏོར་མ་དང་དག་པ་དྲན་པའི་རྗེས་ལ་བསྡུ་བ་བསྒོམ་པ་ཡིན་ནོ། །ཐུན་མཚམས་ཀྱི་བྱ་བ་ལ། ཁ་ཟས་དང་། སྤྱོད་ལམ་དང་། ཕྱི་མཆོད་དང་། ལག་མཆོད་ཀྱང་མཆོད་པའི་ཁོངས་སུ་བསྡུ་ལ། ཚེས་བཅུའི་མཆོད་པའང་དེར་འདུའོ། །དགུ་པ་བསྡུ་བ་ཞེས་བྱ་བ་ནི་རྫོགས་པའི་རིམ་པ་སྟེ། རྡོ་རྗེ་སེམས་དཔའ་བསྡུ་བའི་རིམ་པས་དཀྱིལ་འཁོར་བསྡུས་ལ། ཐུན་གོང་མ་རྣམས་ལ་ནི། དེ་ལས་ལངས་ལ་དག་པ་དྲན་པ་བྱེད་ལ། ཐུན་ཐ་མ་ལ་ནི་དག་པ་རྗེས་དྲན་གྱི་རྗེས་ལ་རྡོ་རྗེ་སེམས་དཔའི་བསྡུ་བ་བྱས་ནས་དེའི་ངང་ལ་ཉལ་བའི་རྣལ་འབྱོར་བྱེད་པ་ཡིན་ནོ། །བཅུ་བ་ཡིན་ཞེས་པ་ནི་ངེས་པ་སྟེ། དག་པ་ནི་ཁམས་ཀྱི་དག་པ་དང་། རྒྱན་ཆའི་དག་པ་བྱས་ལ། དཀྱིལ་འཁོར་གྱི་འཁོར་ལོ་བསྡུས་ཏེ་ཚམ་རྔམས་སྔགས་ཀྱིས་བསྲུངས་ལ། སྤྱོད་ལམ་གྱི་རྣལ་འབྱོར་བྱེད་པ་ཡིན་ནོ་ཞེས་རྗེ་བཙུན་རིན་པོ་ཆེ་གྲགས་པ་རྒྱལ་མཚན་གྱིས་གསུངས་སོ། །གཉིས་པ་ནི། དེ་ལྟ་བུའི་རྒྱུད་སྡེ་ཟབ་མོའི་དགོངས་པ་སྤྱི་དང་། ཁྱད་པར་རྣལ་འབྱོར་མ་ཀུན་ཏུ་སྤྱོད་པའི་རྒྱུད་ལ་བརྟེན་ནས་གྲུབ་ཆེན་ལཱུ་ཧི་པའི་ཞལ་སྔ་ནས་བསྐྱེད་རྫོགས་གཉིས་ཀའི་སྙིང་པོ་བསྡུས་པ་དཔལ་མངོན་པར་རྟོགས་པ་ཞེས་བྱ་བའི་གཞུང་འདི་མཛད་པ་སྟེ། འདིའི་དོན་ཉེ་བར་བསྡུ་ན་བཞི། གང་དུ་བསྒོམ་པའི་གནས། གང་གིས་སྒོམ་པའི་གང་ཟག །དེས་བསྒོམ་པའི་ལམ། ལམ་དེས་གྲུབ་པའི་འབྲས་བུའོ། །དང་པོ་ནི། རིའི་སུལ་དང་། ཆུ་བོའི་ངོགས་དང་། ཤིང་གཅིག་གི་དྲུང་སོགས་མདོར་ན་དབེན་ཞིང་ཡིད་དང་མཐུན་པའི་གནས་ཇི་ལྟར་རིགས་པའོ། །གཉིས་པ་ནི། གཞུང་ལས། དང་པོར་རེ་ཞིག་རྣལ་འབྱོར་པའི་དབང་ཕྱུག་གིས་ཞེས་གསུངས་པའི་དོན་འཕགས་པ་རིན་པོ་ཆེས། བྱང་ཆུབ་སེམས་བརྟན་དབང་རབ་ཐོབ། །སྔགས་རིག་རྣལ་འབྱོར་དབང་ཕྱུག་གིས། །ཞེས་གསུངས་པ་ལྟར། ངེས་འབྱུང་དང་སྙིང་རྗེ་ཆེན་པོས་རྒྱུད་ལེགས་པར་སྦྱངས་པས་བྱང་ཆུབ་ཀྱི་སེམས་རིན་པོ་ཆེ་ལ་བརྟན་པ་ཐོབ་པ། དཔལ་འཁོར་ལོ་བདེ་མཆོག་གི་དཀྱིལ་འཁོར་དུ་དབང་བསྐུར་བ་རྫོགས་པར་ཐོབ་ཅིང་། དབང་དུས་སུ་ཁས་བླངས་པའི་དམ་ཚིག་དང་སྡོམ་པ་རྣམ་པར་དག་པ། གསང་སྔགས་ཀྱི་རྒྱུད་སྡེའི་དོན་ཐོས་བསམ་གྱིས་གཏན་ལ་ཕབ་པས་ཇི་ལྟ་བ་བཞིན་རིག་པ་སློབ་པའི་རྣལ་འབྱོར་པས་གཞན་དོན་དུ་རྫོགས་པའི་བྱང་ཆུབ་ཚེ་འདི་ཉིད་ལ་དོན་དུ་གཉེར་བའི་བློས་རིམ་པ་གཉིས་ཀྱི་ལམ་འདིར་འཇུག་པར་བྱའོ། །གསུམ་པ་ནི། པཎ་གྲུབ་ནཱ་རོ་ཏ་པའི་སློབ་བཤད་ཀྱི་མན་ངག་འཛིན་པ་བལ་པོ་ཕམ་མཐིང་པ་ཡབ་སྲས་དང་། མལ་གྱོ་བློ་གྲོས་གྲགས་པའི་དགོངས་པ་རྗེ་བཙུན་རིན་པོ་ཆེ་གྲགས་པ་རྒྱལ་མཚན་གྱི་ཞལ་ནས་འདི་ལྟར་གསུངས་ཏེ། ལམ་མངོན་པར་རྟོགས་པ་ནི་བཞིས་བཅིངས་པ་སྟེ། མཉམ་པར་གཞག་པའི་རྣལ་འབྱོར། སྤྱོད་ལམ་གྱི་རྣལ་འབྱོར། གཏོར་མའི་རྣལ་འབྱོར། ཁ་ཟས་ཀྱི་རྣལ་འབྱོར་རོ། །ཉལ་བའི་རྣལ་འབྱོར་ནི་རྫོགས་པའི་རིམ་པའི་ཁོངས་སུ་འདུ་ལ། ལྡང་བའི་རྣལ་འབྱོར་དང་། ཁྲུས་ཀྱི་རྣལ་འབྱོར་གཉིས་ནི་བསྐྱེད་རིམ་གྱི་སྔོན་འགྲོ་ཡིན་ཞིང་། དག་པ་རྗེས་སུ་དྲན་པ་ནི་ཁ་ཅིག་སྤྱོད་ལམ་གྱི་རྣལ་འབྱོར་གྱི་ཁོངས་སུའང་བསྡུ་མོད་ཀྱི། འདིར་བསྐྱེད་རིམ་བརྟན་པར་བྱེད་པ་ཡིན་པས་མཉམ་གཞག་གི་ཁོངས་སུ་བསྡུའོ། །དང་པོ་མཉམ་པར་གཞག་པའི་རྣལ་འབྱོར་ལ་གཉིས་ཏེ། བསྐྱེད་པའི་རིམ་པ་དང་། རྫོགས་པའི་རིམ་པའོ། །དང་པོ་ལ་གཉིས་ཏེ། བདག་ཉིད་སངས་རྒྱས་སུ་བསྐྱེད་པ་ལ་མཆོད་པ་དང་། བཟླས་པའི་རྣལ་འབྱོར་རོ། །དང་པོ་ལ་གསུམ་སྟེ། རྒྱས་པ་ལ་དགའ་བས་ཇི་སྙེད་ཡོད་པའི་ཆོས་ཇི་ལྟ་བ་བཞིན་དུ་བསྒོམ་པ་དང་། འབྲིང་ལ་དགའ་བས་ཇི་ལྟ་བ་བཞིན་བསྒོམ་པ་དང་། བསྡུས་པ་ལ་དགའ་བས་རང་གི་ལུས་ལ་ཇི་ལྟར་གྲུབ་པ་ཙམ་ཞིག་བསྒོམ་པའོ། །ཞེས་གསུངས་པའི་དང་པོ་རྒྱས་པར་བསྒོམ་པ་ལ་གཉིས། བདག་ཉིད་སངས་རྒྱས་སུ་བསྐྱེད་པ་དང་། དེ་ལ་མཆོད་པའོ། །དང་པོ་ལ་གཉིས། རྒྱུ་ཚོགས་གཉིས་བསགས་པ་དང་། འབྲས་བུ་ལྷ་བསྐྱེད་པའོ། །དང་པོ་ལ་གཉིས། བསོད་ནམས་ཀྱི་ཚོགས་བསག་པ་དང་། ཡེ་ཤེས་ཀྱི་ཚོགས་བསྒོམ་པའོ། །དང་པོ་ལ་བཞི། ཉལ་བ་དང་ལྡང་བའི་རྣལ་འབྱོར་སྔོན་དུ་འགྲོ་བས་ཚངས་པའི་གནས་བཞི་བསྒོམ་པ། ཚོགས་གསོག་པའི་རྟེན་བདག་གི་གཞི་སྦྱང་བསྒྱུར། ཚོགས་བསག་པ་དངོས་ལ་ཚོགས་བསག་བཅུ་གསུམ། ཡེ་ཤེས་ཀྱི་ཚོགས་བསྒོམ་པ་ལ་བར་ཆད་མི་འབྱུང་བར་བྱ་བའི་ཕྱིར་སྲུང་བའི་འཁོར་ལོ་བསྒོམ་པའོ། །འབྲས་བུ་ལྷ་བསྐྱེད་པ་ལ་བཞི། དམ་ཚིག་སེམས་དཔའ་བསྐྱེད་པ། ཡེ་ཤེས་ཀྱི་འཁོར་ལོ་དགུག་བཞུག་བྱ་བ། གོ་ཆ་བཅིང་པ། དབང་བསྐུར་ཞིང་རྒྱས་གདབ་པའོ། །དེའི་དང་པོ་ལ་གཉིས། ཕྱིའི་དཀྱིལ་འཁོར་དག་པ་དང་བཅས་བསྒོམ་པ་དང་། ལུས་ཀྱི་དཀྱིལ་འཁོར་སྔགས་ཀྱི་བྱིན་གྱིས་བརླབ་པ་དང་བཅས་བསྒོམ་པའོ། །དེ་ལྟར་བདག་ཉིད་སངས་རྒྱས་སུ་བསྐྱེད་ནས་མཆོད་པ་དང་བཟླས་པས་མཉེས་པར་བྱ། རྫོགས་པའི་རིམ་པས་འོད་གསལ་དུ་བསྡུ་ཞིང་། སླར་ཡང་ལྷའི་སྐུར་ལངས་ཏེ་དག་པ་རྗེས་སུ་དྲན་པ་དང་། གཏོར་མ་དང་། སྤྱོད་ལམ་དང་། ཁ་ཟས་ཀྱི་རྣལ་འབྱོར་སོགས་ཅི་རིགས་པ་ལ་འཇུག་པར་བྱ་སྟེ། མདོར་ན་སྐྱབས་སུ་འགྲོ་བ་དང་། སེམས་བསྐྱེད་པ་དང་། རྡོ་རྗེ་སེམས་དཔའི་སྒོམ་བཟླས་རྣམས་ཁ་བསྐངས་ཏེ། རང་འཁོར་ལོ་བདེ་མཆོག་ཏུ་གསལ་གདབ། བདུད་རྩི་བྱིན་གྱིས་བརླབས་པ་མྱང་བ་ནས་བརྩམས་ཏེ་སྒྲུབ་ཐབས་རྒྱས་པ་ནས་ཇི་ལྟར་གསུངས་པ་བཞིན་ཉམས་སུ་བླང་བ་ཡིན་ནོ། །གཉིས་པ་འབྲིང་དུ་བསྒོམ་པ་ནི། ཉལ་བ་དང་ལྡང་བའི་རྣལ་འབྱོར་སྔོན་དུ་འགྲོ་བས་དགའ་བ་གསུམ་གྱི་རྣལ་འབྱོར་དང་། སེམས་བསྐྱེད་པ་དང་། རང་གི་ལུས་གདོད་ནས་གྲུབ་པའི་དཀྱིལ་འཁོར་གྱི་འཁོར་ལོ་དྲན་པ་དང་། བླ་མ་ལ་གསོལ་བ་གདབ་ཅིང་སྲུང་བའི་འཁོར་ལོ་བསྒོམ་པ་ཙམ་སྔོན་དུ་འགྲོ་བས་ལུས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་བསྒོམ། སྔགས་ཀྱིས་བྱིན་བརླབ། དག་པ་དྲན་པར་བྱ་བའམ་མ་བྱས་ཀྱང་རུང་། ཡེ་ཤེས་པ་བཅུག་ཅིང་གོ་ཆ་བཅིང་བ་སོགས་ལྷག་མ་རྣམས་རྒྱས་པའི་སྐབས་ལྟར་བྱའོ། །གསུམ་པ་བསྡུས་ཏེ་བསྒོམ་པའི་ཚུལ་འདིར་གསལ་བར་བརྗོད་ན་གཉིས། རྟེན་བསྐྱེད་པའི་རིམ་པ་དང་། བརྟེན་པ་རྫོགས་པའི་རིམ་པའོ། །དང་པོ་ལ་གསུམ། འཇུག་པའི་རིམ་པ། གནས་པའི་རིམ་པ། ལྡང་བའི་རིམ་པའོ། །དང་པོ་ལ་བརྒྱད། ཉལ་བའི་རྣལ་འབྱོར། ལྡང་བའི་རྣལ་འབྱོར། ཁྲུས་ཀྱི་རྣལ་འབྱོར། ཚད་མེད་པའི་རྣལ་འབྱོར། བླ་མའི་རྣལ་འབྱོར། བདག་ཉིད་སངས་རྒྱས་སུ་བསྐྱེད་པའི་རྣལ་འབྱོར། མཆོད་པའི་རྣལ་འབྱོར། བཟླས་པའི་རྣལ་འབྱོར་རོ། །དང་པོ་ཉལ་བའི་རྣལ་འབྱོར་ནི། མདངས་ནུབ་མོར་ཉལ་བའི་རྣལ་འབྱོར་ཆོས་ཐམས་ཅད་བསམ་གྱིས་མི་ཁྱབ་པ་རྡོ་རྗེ་སེམས་དཔའི་བསྡུ་བའི་རྫོགས་རིམ་སྟོང་པ་ཉིད་ཀྱི་ངང་དུ་ཉལ། །གཉིས་པ་ལྡང་བའི་རྣལ་འབྱོར་ནི། །ཐོ་རངས་ནམ་གྱི་བཞི་ཆའམ་བརྒྱད་ཆའི་དུས་སུ་བབ་པ་ན། ནམ་མཁའ་ནས་ཌཱ་མ་རུའི་སྒྲ་སྔགས་ཀྱི་གདངས་སུ་བསྒྲགས་པས་གཉིད་བསྐུལ་ནས། དེའི་སྐད་ཅིག་ལ་དཔལ་འཁོར་ལོ་བདེ་མཆོག་ཡབ་ཡུམ་གྱི་སྐུར་ལངས་ཏེ་ལྡང་བ་ནི་སྐུའི་དགའ་བ། བདུད་རྩི་རིལ་བུ་དངོས་སམ། ནང་མཆོད་ཨོཾ་ཨཱཿཧཱུྃ་ཧ་ཧོ་ཧྲཱིཿས་བྱིན་གྱིས་བརླབས་ཏེ་མྱོང་ཞིང་། ངག་ཏུ། ཤྲཱི་ཧེ་རུ་ཀ་ཨ་ཧཾ། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་བརྗོད་ཅིང་དོན་དྲན་པར་བྱ་བ་གསུང་གི་དགའ་བ། སྙིང་གར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་མཐིང་ནག །ཨ་ནི་རྣམ་པར་མི་རྟོག་པའི་ཡེ་ཤེས། ཟླ་བ་ནི་དག་པ་འཇིག་རྟེན་པའི་ཡེ་ཤེས། ཧཱུྃ་ནི་གཟུང་འཛིན་གཉིས་དང་བྲལ་བའི་ཡིད་ཡེ་ཤེས་ལྔའི་རང་བཞིན་ནོ་ཞེས་མོས་པ་ནི་ཐུགས་ཀྱི་དགའ་བའོ། །གསུམ་པ་ཁྲུས་ཀྱི་རྣལ་འབྱོར་ནི། བསམ་གཏན་གྱི་གྲོགས་སུ་འགྲོ་ན། ཆུ་གཙང་མའམ་རྡོ་རྗེའི་ཆུས་དབང་ལྷ་སྤྱན་དྲངས་པས་ཁྲུས་མཛད་པར་བསམས་ལ། ཇི་ལྟར་བལྟམས་པ་སོགས་བརྗོད་ཅིང་ཁྲུས་བྱའོ། །བཞི་པ་ཚད་མེད་པའི་རྣལ་འབྱོར་ནི། བདེ་བའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་འདུག་སྟེ། སྐྱབས་ཡུལ་འཁོར་ལོ་སྡོམ་པའི་རྣམ་པར་གསལ་བཏབ་ལ། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོ། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག །རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་ཅི་ནུས་ཀྱི་མཐར་ཐལ་མོ་སྦྱར་ཏེ། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་བདག་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། སྐྱབས་ཡུལ་རྣམས་འོད་དུ་ཞུ་ནས་རང་ལ་ཐིམ་པར་བསམ། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བདག་གིས་ལམ་ཟབ་མོ་ཉམས་སུ་བླང་བར་བགྱིའོ། །ཞེས་ལན་གསུམ་གྱིས་སེམས་བསྐྱེད། སྤྲོ་ན་རྡོར་སེམས་སྒོམ་བཟླས་ཀྱང་མ་རྒྱུད་སྤྱི་ལྟར་བྱའོ། །ལྔ་པ་བླ་མའི་རྣལ་འབྱོར་ནི། རང་གི་སྤྱི་བོར་པདྨ་དང་ཟླ་བའི་གདན་ལ་སྐད་ཅིག་གིས་རྩ་བའི་བླ་མ་སངས་རྒྱས་རྡོ་རྗེ་ཆོས་ཀྱི་རྣམ་པ་ཅན། སྐུ་མདོག་དམར་པོ་རྡོ་རྗེ་དང་དྲིལ་བུ་འཛིན་པ། དར་དང་རིན་པོ་ཆེ་དང་རུས་པའི་རྒྱན་གྱིས་བརྒྱན་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། སྐྱབས་གནས་ཐམས་ཅད་འདུས་པའི་ངོ་བོར་གྱུར་པར་བསམས་ལ། གང་གི་དྲིན་གྱིས་བདེ་ཆེན་ཉིད། སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །ཅེས་དང་། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེ་ལ་གསོལ་བ་འདེབས་སོ། །བདག་གི་རྒྱུད་བྱིན་གྱིས་བརླབ་ཏུ་གསོལ། ཅེས་མོས་གུས་དྲག་པོས་གསོལ་བ་བཏབ་པས། བླ་མ་འོད་དུ་ཞུ་ནས་རང་ལ་ཐིམ་པས་རང་གི་ལུས་ངག་ཡིད་གསུམ་དང་བླ་མའི་སྐུ་གསུང་ཐུགས་དབྱེར་མེད་དུ་གྱུར་པར་བསམས་ལ། ཆོས་ཐམས་ཅད་རང་གི་སེམས་ཀྱི་རྣམ་འཕྲུལ་དང་། དེའང་སྒྱུ་མ་ལྟ་བུ་དང་། རང་བཞིན་མེད་པའི་སྟོང་ཉིད་དུ་ཤེས་པའི་ངང་ལ་མཉམ་པར་གཞག །དྲུག་པ་བདག་ཉིད་སངས་རྒྱས་སུ་བསྐྱེད་པ་ནི། འོག་གི་རླུང་གིས་རང་གི་ལུས་ལ་གདོད་ནས་གྲུབ་པའི་ལྟེ་བའི་ཨྃ་མས་ཡར་ཕུལ་བ་ནི་ཚུལ། ལྟག་པའི་རླུང་གིས་སྤྱི་གཙུག་གི་ཧྃ་ཡས་མར་ཕུལ་བ་ནི་སྒྲ་སྟེ། དེ་ལྟར་སྒྲ་ཚུལ་གཉིས་སྙིང་གར་འདྲེས་པའི་རྐྱེན་གྱིས་སྐད་ཅིག་གིས་རྟེན་དང་བརྟེན་པར་བཅས་པའི་དཀྱིལ་འཁོར་ཅིག་ཅར་དུ་གྱུར་པ་ནི། རྐང་མཐིལ་རླུང་གི་དཀྱིལ་འཁོར། སུམ་མདོ་མེ། ལྟོ་བ་ཆུ། སྙིང་ག་ས། སྒལ་ཚིགས་རིའི་རྒྱལ་པོ་རི་རབ། མགོ་བོ་རི་རབ་ཀྱི་སྟོད། དཔྲལ་བ་དང་། ལྟག་པ་རྣ་བ་གཉིས་སྣ་ཚོགས་རྡོ་རྗེ། ཀླད་པ་དཀར་པོ་ཟླ་བ། ཀླད་ཁྱིམ་དམར་པོ་ཉི་མ། དེ་གཉིས་ཀྱི་བར་ན་གནས་པའི་ཧྃ་ཡིག་ནི་ཡི་གེ་ཧཱུྃ་རྡོ་རྗེ་སེམས་དཔའི་རང་བཞིན། ལུས་འདོམ་གང་གྲུ་བཞི་ནི་གཞལ་ཡས་ཁང་པ་གྲུ་བཞི། སྙིང་ག་ཆོས་ཀྱི་འཁོར་ལོ་ནས་འབྱུང་བ་བཞིའི་རླུང་རྒྱུ་བའི་སྒོ་བཞི། རྐང་བརྒྱད་ཀ་བ་བརྒྱད། མིག་དང་། རྣ་བ་དང་། སྣ་དང་། ལྕེ་དང་། མཆུ་དང་། རྒྱུ་ལོང་ལ་སོགས་པ་ནི་གཞལ་ཡས་ཁང་གི་རྒྱན། རང་ཉིད་ཕྱི་དབྱིབས་ཀྱི་ལུས་དང་སྙིང་གའི་ནང་གི་ཧཱུྃ་གཉིས་ཀའང་བཅོམ་ལྡན་འདས་ཧེ་རུ་ཀ་སྐུ་མདོག་སྔོན་པོ། ཞལ་བཞི་ཕྱག་བཅུ་གཉིས་པ། རྩ་ཞལ་སྔོན་པོ། གཡོན་ལྗང་། རྒྱབ་དམར། གཡས་སེར་བ། ཞལ་རེ་རེ་བཞིན་སྤྱན་གསུམ་གསུམ་དང་ལྡན་ཞིང་མཆེ་བ་བཞི་བཞི་གཙིགས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་གླང་པོ་ཆེའི་པགས་པ་བརྒྱངས་ཏེ་འཛིན་པ། གཡས་ཀྱི་གསུམ་པ་ན་ཌཱ་མ་རུ། །བཞི་པ་ན་དགྲ་སྟ། ལྔ་པ་ན་གྲི་གུག །དྲུག་པ་ན་མདུང་རྩེ་གསུམ་པ་སྒྲེང་བ། གཡོན་གྱི་གསུམ་པ་ན་རྡོ་རྗེས་མཚན་པའི་ཁ་ཊྭཱཾ་ག །བཞི་པ་ན་ཁྲག་གིས་བཀང་པའི་ཐོད་པ། ལྔ་པ་ན་རྡོ་རྗེའི་ཞགས་པ། དྲུག་པ་ན་ཚངས་པའི་མགོ་བོ་བསྣམས་པ། པདྨ་དང་ཉི་མའི་སྟེང་ན་ཞབས་གཡས་བརྐྱངས་པས་དུས་མཚན་མ་དམར་མོ་དང་། གཡོན་བསྐུམས་པས་འཇིགས་བྱེད་ནག་པོ་མནན་པ། རལ་པའི་ཐོར་ཚུགས་སྤྱི་བོར་བཅིངས་པའི་རྩེར་ཡིད་བཞིན་གྱི་ནོར་བུས་སྤྲས་ཤིང་གཡོན་ན་ཚེས་གཅིག་གི་ཟླ་བ་དང་མཚོགས་མའི་སྟེང་ན་སྣ་ཚོགས་རྡོ་རྗེས་མཚན་པ། དབུ་རེ་རེ་ལ་མི་མགོ་སྐམ་པོ་ལྔ་ལྔས་བརྒྱན་ཅིང་རློན་པ་ལྔ་བཅུའི་དོ་ཤལ་ཅན། རུས་པའི་རྒྱན་དྲུག་གིས་བརྒྱན་པ། སྟག་གི་པགས་པའི་ཤམ་ཐབས་གྲོལ་བ། །སྒེག་པ་དཔའ་བ་མི་སྡུག་པ། །དགོད་ཅིང་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་ཡི། །གར་དགུའི་ཉམས་དང་ལྡན་པ་ཉིད། །དེའི་པང་ན་ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་མ་སྤྱན་གསུམ་དང་ལྡན་པ། ཕྱག་གཡོན་པས་བདུད་དང་གདུག་པའི་ཁྲག་གིས་གང་པའི་ཐོད་པ་འཛིན་པས་ཡབ་ལ་འཁྱུད་པ། གཡས་པས་སྡིགས་མཛུབ་དང་བཅས་པའི་གྲི་གུག་གིས་ཕྱོགས་ཐམས་ཅད་དུ་བསྡིགས་པ། དབུ་སྐྲ་གྲོལ་བ། བྱིན་པ་གཉིས་ཀྱིས་བཅོམ་ལྡན་འདས་ལ་ལེགས་པར་འཁྱུད་ཅིང་། གཅེར་བུའི་མཆོག་མི་མགོ་སྐམ་པོ་ལྔའི་དབུ་རྒྱན་དང་མི་མགོ་སྐམ་པོ་ལྔ་བཅུའི་དོ་ཤལ་དང་རུས་པའི་རྒྱན་ལྔས་བརྒྱན་པ། གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །ཕྱིའི་ཧེ་རུ་ཀའི་ཕྱག་གཡས་ཀྱི་དང་པོ་ལ་མཁའ་འགྲོ་མ་ནག་མོ། །གཉིས་པ་ལཱ་མཱ་ལྗང་གུ། གཡོན་གྱི་དང་པོ་ལ་ཁཎྜ་རོ་ཧ་དམར་མོ། གཉིས་པ་ལ་གཟུགས་ཅན་མ་སེར་མོ། ཐམས་ཅད་ཀྱང་ཞལ་གཅིག་སྤྱན་གསུམ་མ། ཕྱག་བཞིའི་གཡས་ཌ་མ་རུ་དང་གྲི་གུག །གཡོན་ཁ་ཊྭཱཾ་ག་དང་ཐོད་པ་འཛིན་པ། སྐྲ་གྲོལ་བ། གཅེར་བུ་གཡས་བརྐྱངས་པས་བཞུགས་པ་ཕྱག་རྒྱ་ལྔས་བརྒྱན་པའོ། །གཡས་ཀྱི་གསུམ་པ་ན་ཁྭ་གདོང་མ་སྔོན་མོ། བཞི་པ་ན་འུག་གདོང་མ་ལྗང་གུ། ལྔ་པ་ན་ཁྱི་གདོང་མ་དམར་མོ། །དྲུག་པ་ན་ཕག་གདོང་མ་སེར་མོ། གཡོན་གྱི་གསུམ་པ་ན་གཤིན་རྗེ་བརྟན་མ་གཡས་སྔོ་གཡོན་སེར་བ། བཞི་པ་ན་གཤིན་རྗེ་ཕོ་ཉ་མོ་གཡས་སེར་གཡོན་དམར་བ། ལྔ་པ་ན་གཤིན་རྗེ་མཆེ་བ་མ་གཡས་དམར་གཡོན་ལྗང་བ། དྲུག་པ་ན་གཤིན་རྗེ་འཇོམས་མ་གཡས་ལྗང་གཡོན་སྔོ་བ་སྟེ། ཐམས་ཅད་ཀྱང་ཞལ་གཅིག་ཕྱག་བཞི་མ་གཡས་གཉིས་ན་ཌ་མ་རུ་དང་གྲི་གུག །གཡོན་གཉིས་ན་ཁ་ཊྭཱཾ་ག་དང་ཐོད་པ་འཛིན་པ། གཅེར་བུ་ཕྱག་རྒྱས་ལྔས་བརྒྱན་པ། ཡི་དྭགས་ཀྱི་གདན་ལ་ཞབས་གཡས་བརྐྱངས་པས་བཞུགས་ཤིང་སེམས་ཅན་གྱི་དོན་ལ་བརྩོན་པ། རྣལ་འབྱོར་མ་ཐམས་ཅད་ཀྱི་དཔྲལ་བར་རྡོ་རྗེའི་ཕྲེང་བས་བརྒྱན་པའོ། །དེ་ནས་སྤྱི་བོ་ལ་སོགས་པའི་གནས་རྣམས་སུ་པུ་ཛཱ་ཨོ་ཨ་གོ་རཱ་དེ་མཱ། ཀཱ་ཨོ་ཏྲི་ཀོ་ཀ་ལ་ཀཱ་ཧི། པྲེ་གྲྀ་སཽ་སུ་ནཱ་སི་མ་ཀུའི་དབྱིབས་སུ་གནས་པའི་ཁམས་དང་རྩ་རྣམས་དཔའ་བོ་དང་རྣལ་འབྱོར་མ་རྣམས་སུ་གྱུར་པ་ནི། སྤྱི་བོ་པུ་ལླི་ར་མཱ་ལ་ཡང་ཁཎྜ་ཀ་པཱ་ལི་དང་རབ་ཏུ་གཏུམ་མོ། །སྤྱི་གཙུག་ཛཱ་ལནྡྷ་ར་ར་མ་ཧཱ་ཀཾ་ཀཱ་ལ་དང་གཏུམ་པའི་མིག་ཅན་མ། རྣ་བ་གཡས་པ་ཨཽ་ཌྱ་ན་དུ་ཀངྐཱ་ལ་དང་འོད་ལྡན་མ། ལྟག་པ་ཨརྦུ་དང་མཆེ་བ་རྣམ་པར་གཙིགས་པ་དང་སྣ་ཆེན་མ་སྟེ་གནས། རྣ་བ་གཡོན་པ་གོ་དཱ་ཝ་རཱི་ར་སུར་ཝི་རེ་དང་བརྟན་པའི་བློ་ཅན་མ། སྨིན་མའི་དབུས་རཱ་མེ་ཤྭ་རཱི་ར་འོད་དཔག་མེད་དང་མིའུ་ཐུང་མ། མིག་གཉིས་དེ་ཝཱི་ཀོ་ཊར་རྡོ་རྗེའི་འོད་དང་ལངྐའི་དབང་ཕྱུག་མ། ཕྲག་པ་གཉིས་མཱ་ལ་ཝ་ར་རྡོ་རྗེའི་སྐུ་དང་ཤིང་གྲིབ་མ་སྟེ་ཉེ་བའི་གནས་རྣམས་ཐུགས་ཀྱི་འཁོར་ལོ་ཁ་དོག་སྔོན་པོ་མཁའ་ལ་སྤྱོད་པའོ། །མཆན་ཁུང་གཉིས་ཀཱ་མ་རཱུ་པ་ར་ཨངྐུ་རི་དང་ཨཻ་རཱ་ཝ་ཏཱི། ནུ་མ་གཉིས་ཨོ་ཏྲེ་རར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ་སྟེ་ཞིང་། ལྟེ་བ་ཏྲི་ཤ་ཀུ་ནེ་ར་དཔའ་བོ་ཆེན་པོ་དང་རླུང་གི་ཤུགས་ཅན་མ། སྣ་རྩེ་ཀོ་ས་ལར་རྡོ་རྗེ་ཧཱུྃ་མཛད་དང་ཆང་འཐུང་མ་སྟེ་ཉེ་བའི་ཞིང་། ཁ་ཀ་ལིངྒར་རབ་ཏུ་བཟང་མོ་དང་ཤྲཱ་མ་དེ་ཝཱི། མགྲིན་པ་ལམྦཱ་ཀ་ར་རྡོ་རྗེ་བཟང་པོ་དང་ཤིན་ཏུ་བཟང་མོ་སྟེ་ཚནྡོ། སྙིང་ག་ཀཱཉྩི་ར་འཇིགས་བྱེད་ཆེན་པོ་དང་རྟ་རྣ་མ། འདོམས་པ་ར་ཧི་མཱ་ལ་ཡར་མིག་མི་བཟང་དང་ཁ་གཱ་ན་ན་སྟེ་ཉེ་བའི་ཚནྡོ་རྣམས་གསུང་གི་འཁོར་ལོ་ཁ་དོག་དམར་པོ་ས་ལ་སྤྱོད་པའོ། །མཚན་མ་པྲེ་ཏ་པུ་རིར་སྟོབས་པོ་ཆེ་དང་འཁོར་ལོའི་ཤུགས་ཅན་མ། བཤང་ལམ་གྲྀ་ཧ་དེ་ཝར་རིན་ཆེན་རྡོ་རྗེ་དང་ཁཎྜ་རོ་ཧཱ་སྟེ་འདུ་བ། བརླ་གཉིས་སཽ་རཱ་ཥྟར་རྟ་མགྲིན་དང་ཤོཎྜི་ནཱི། བྱིན་པ་གཉིས་སུ་ཝརྞ་དཱི་བར་ནམ་མཁའི་སྙིང་པོ་དང་འཁོར་ལོའི་གོ་ཆ་མ་སྟེ་ཉེ་བའི་འདུ་བ། སོར་མོ་བཅུ་དྲུག་ནཱ་ག་རར་དཔལ་ཧེ་རུ་ཀ་དང་ཤིན་ཏུ་དཔའ་མོ། བོལ་གོང་སིནྡྷུར་པདྨ་གར་གྱི་དབང་ཕྱུག་དང་སྟོབས་ཆེན་མ་སྟེ་དུར་ཁྲོད། མཐེ་བོང་བཞི་མ་རོ་ལ་རྣམ་པར་སྣང་མཛད་དང་འཁོར་ལོས་སྒྱུར་མ། པུས་མོ་གཉིས་ཀུ་ལུ་ཏར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ་ཉེ་བའི་དུར་ཁྲོད་རྣམས་སྐུའི་འཁོར་ལོ་ཁ་དོག་དཀར་པོས་འོག་ན་སྤྱོད་པའོ། ཁཎྜ་ཀ་པཱ་ལི་ལ་སོགས་པའི་དཔའ་བོ་ཐམས་ཅད་ཞལ་གཅིག་ཕྱག་བཞི་པ་རལ་པའི་ཐོར་ཚུགས་ཀྱིས་མཚན་པའི་ཅོད་པན་ཅན། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། གཡས་འོག་མས་ཌཱ་མ་རུ། གཡོན་འོག་མས་ཁ་ཊྭཱཾ་ཀ་འཛིན་པ། སྐུ་ལ་ཕྱག་རྒྱ་དྲུག་གིས་བརྒྱན་པ་གཡས་བརྐྱང་པའི་གནས་པས་བཞུགས་པའོ། །རབ་ཏུ་གཏུམ་མོ་ལ་སོགས་པའི་དཔའ་མོ་རྣམས་ནི་ཞལ་གཅིག་ཕྱག་གཉིས་མ་གཡོན་ཐོད་པ་བསྣམས་པས་ཡབ་ལ་འཁྱུད་པ། གཡས་སྡིགས་མཛུབ་དང་བཅས་པས་གྲི་གུག་བསྣམས་པ། སྤྱན་གསུམ་པ་དྲག་མོའི་གཟུགས་ཅན་མ། སྐྲ་གྲོལ་བས་རྣམ་པར་མཛེས་མ། །གཉིས་སུ་མེད་པའི་སྦྱོར་བ་ལ་བརྩོན་པ། གཅེར་བུའི་མཆོག་རྒྱན་ལྔ་དང་ཚངས་པའི་སྐུད་པས་བརྒྱན་པ། མི་མགོའི་དོ་ཤལ་དང་སྐ་རགས་སིལ་སིལ་གྱི་སྒྲ་སྒྲོགས་པའོ། །དེ་ནས་སྔགས་ཀྱིས་བྱིན་གྱིས་བརླབ་པ་ནི། ངག་ཏུ་ཨོཾ་ཨཱཿཧཱུྃ་སརྦ་བཱི་ར་ཡོ་གི་ནཱི་ཀཱ་ཡ་ཝཱ་ཀ྄་ཙིཏྟ་བཛྲ་སྭ་བྷཱ་བ་ཨཏྨ་ཀོ྅་ཧཾ། ཞེས་བརྗོད་པས་བདག་གིས་བསྒོམས་པའི་ལུས་དཀྱིལ་དང་། འཛམ་བུའི་གླིང་ན་བཞུགས་པ་དང་། འོག་མིན་ན་བཞུགས་པའི་སྐུ་གསུང་ཐུགས་ཀྱི་འཁོར་ལོའི་དཔའ་བོ་དང་རྣལ་འབྱོར་མ་རྣམས་དབྱེར་མི་ཕྱེད་པའི་སྐུ་གསུང་ཐུགས་རྡོ་རྗེའི་རང་བཞིན་ངའོ་སྙམ་དུ་ང་རྒྱལ་བཟུང་། ཨོཾ་བཛྲ་ཤུདྡྷཿསརྦ་དྷརྨཱ་བཛྲ་ཤུདྡྷོཉ་ཧཾ་ཞེས་བརྗོད་པས་ཐམས་ཅད་སྟོང་པ་ཉིད་རྡོ་རྗེའི་རང་བཞིན་དུ་རྣམ་པར་དག་པའི་ངོ་བོ་བདག་ཡིན་ནོ་སྙམ་པ་ལན་གསུམ་དུ་བྱའོ། །དེ་ནས་ལྷ་ལ་ཞེན་པ་སྐྱེ་བ་དང་ལམ་ལ་སོམ་ཉི་ཟ་ན་བྱང་ཆུབ་ཕྱོགས་ཀྱི་དག་པ་དྲན་པ་སྐབས་འདིར་བྱ། མི་སྐྱེ་ན་མི་དགོས་ཞེས་གསུངས་པས་དག་དྲན་བྱེད་ན་རྒྱས་པར་མངོན་རྟོགས་རྒྱས་པའི་སྐབས་ལྟར་བརྗོད། བསྡུ་ན། བདག་གི་བློ་ལ་སྣང་བའི་ལྷ་སུམ་ཅུ་རྩ་བདུན་པོ་འདི་ཉིད་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ངོ་བོ་ཡིན་ལ། བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ཀྱང་ལྷ་སུམ་ཅུ་རྩ་བདུན་གྱི་ངོ་བོར་རྣམ་པར་དག་པ་ཡིན་ནོ། །ཞེས་བརྗོད་ཅིང་དོན་དྲན་པར་བྱའོ། །བདུན་པ་མཆོད་པའི་རྣལ་འབྱོར་ལ་དྲུག་ལས། དང་པོ་སྔགས་ཀྱི་མཆོད་པ་ནི། རྒྱས་པར་རྩ་སྔགས་དང་། སྙིང་པོ་དང་། ཉེ་སྙིང་གཉིས་མེད་ཞལ་བཞི་པ་དང་སྙིང་པོའི་རྣལ་འབྱོར་མ། དཔའ་བོ་དང་དཔའ་མོ་ཉེར་བཞི། ཡབ་ཀྱི་རྐང་བརྒྱད་དང་སྒོ་མཚམས་མ་བརྒྱད་རྣམས་སྤེལ་བའི་སོགས་ལན་རེ་བརྗོད་པས་ལྷ་གསལ་གདབ་པའི་ཚུལ་གྱིས་མཆོད། བསྡུ་ན་སྙིང་པོ་གཉིས་སུ་མེད་པ་བརྗོད་ཅིང་ལྷ་ཐམས་ཅད་གསལ་གདབ་པའམ། ཧཱུྃ་བྃ་མཱྃ་ཏཱྃ་པཱྃ་ལཱྃ། པཱུ་ཛ་ཨོ་ཨ་གོ་རཱ་དེ་མཱ། ཀ་ཨོ་ཏྲི་ཀོ་ཀ་ལ་ཀཱ་ཧི། པྲེ་གྲྀ་སཽ་སུ་ནཱ་སི་མ་ཀུ། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཞེས་ས་བོན་ཙམ་བརྗོད་པས་ཀྱང་རུང་བར་རྗེ་གྲོལ་མཆོག་སོགས་ཀྱིས་གསུངས་སོ། །གཉིས་པ་ཕྱི་མཆོད་ནི། དངོས་སུ་བཤམས་པའམ་ཡིད་ཀྱིས་སྤྲུལ་པ་ལ་དམིགས་ཏེ་སུམྦྷས་བསང་། སྭ་བྷཱ་བས་སྦྱང་། སྟོང་པའི་ངང་ལས་ཨཱཿབདུན་ལས་ཐོད་པའི་སྣོད་བདུན་དུ། ཧཱུྃ་ལས་མཆོད་ཡོན་ལ་སོགས་པ་དྭངས་ཤིང་ཐོགས་པ་མེད་པ་ཡེ་ཤེས་ཀྱི་བདུད་རྩིའི་རང་བཞིན་ཅན་གྱིས་གང་བར་བསམ་ཞིང་། ཨོཾ་བཛྲ་ཨརྒྷཾ་ཨཱཿཧཱུྃ་ནས། ཤབྡའི་བར་གྱིས་བརླབ། ཨོཾ་སརྦ་ཏ་ཐཱ་ག་ཏཱ་ཤྲཱི་ཙཀྲ་སམྦ་ར་མཎྜ་ལ་ཙཀྲ་སརྦ་བཱི་ར་ཡོ་གི་ནཱི་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ་པཱ་དྱཾ་པྲ་ཏཱི་ཙྪ་སྭཱ་ཧཱ། བཛྲ་པུཥྤེ་ཨཱཿཧཱུྃ་ནས། ནཻ་བི་དྱེའི་བར་སྦྱར་བས་ཆུ་གཉིས་སྔོན་འགྲོའི་ཉེར་སྤྱོད་དང་། ཨོཾ་བཛྲ་གཎྜེ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ། པྲ་ཙ་ལི་ཏེ། པྲཛྙཱ་པཱ་ར་མི་ཏཱ་ནཱ་ད་སཾ་བྷ་ཝེ་ཏེ། བཛྲ་དྷརྨཱ་ཧྲི་ད་ཡ་སནྟོཥ་ནི་ཧཱུྃ་ཧཱུྃ་ཧཱུྃ་ཧོ་ཧོ་ཧོ་ཨ་ཁཾ་སྭཱ་ཧཱ། །ཞེས་རོལ་མོ་འབུལ། །གསུམ་པ་བདུད་རྩིའི་མཆོད་པ་ནི། བདུད་རྩི་དངོས་སམ་ཡིད་ཀྱིས་སྤྲུལ་པ། ཨོཾ་ཨཱཿཧཱུྃ་ཧ་ཧོ་ཧྲཱིཿས་བྱིན་གྱིས་བརླབས་ནས། གཡོན་པའི་མཐེབ་སྲིན་གྱིས་སྤྱི་བོ་ནས་འཐོར་ཞིང་། དྲིན་ཅན་རྩ་བའི་བླ་མའི་ཞལ་དུ་ཨོཾ་ཨཱཿཧཱུྃ། བརྒྱུད་པའི་བླ་མ་རྣམས་ཀྱི་ཞལ་དུ་ཨོཾ་ཨཱཿཧཱུྃ། སྙིང་གའི་ཐད་ནས་འཐོར་ཏེ། ཧཱུྃ་བྃ་སོགས་ཀྱི་མཐར་ཨོཾ་ཨཱཿཧཱུྃ་ཞེས་དང་། རང་གི་ལྕེ་རྩེ། སྨིན་མཚམས། སྤྱི་གཙུག་རྣམས་སུ་བདུད་རྩིའི་ཐིག་ལེ་བྱས་ལ། ཨོཾ་ཨཱཿཧཱུྃ་ཞེས་བརྗོད་པས་ལུས་ཀྱི་ལྷ་ཐམས་ཅད་ཚིམ་པར་བསམ། ལྟེ་བའི་ཐད་ནས་འཐོར་ཏེ། ཨོཾ་ཤྲཱི་མ་ཧཱ་ཀཱ་ལཱ་ཡ་ཨོཾ་ཨཱཿཧཱུྃ། ཨོཾ་ཤྲཱི་དྷརྨ་པཱ་ལ་ཙ་ཏུ་རྨུ་ཁ་ཨོཾ་ཨཱཿཧཱུྃ། ཞེས་བརྗོད་དོ། །བཞི་པ་མཉེས་པའི་མཆོད་པ་ནི། རང་གི་ལྕེ་ལ་བདུད་རྩི་མྱངས་པས་ཕྱི་ནང་གི་ལྷ་ཐམས་ཅད་དགྱེས་ཤིང་། ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ་ཅེས་གསུངས་པར་བསམས་ལ། སྙིང་གར་རྣམ་ལྔ་འདོད་སྐོར་གྱི་མཐར་འཁྱུད་རྒྱ་བྱའོ། །ལྔ་པ་ཡིད་བྱུང་གི་མཆོད་པ་ནི། དཔྲལ་བར་ནམ་མཁའ་མཛོད་ཀྱི་ཕྱག་རྒྱ་བཅས་ལ། ན་མོ་ཆོས་ཀྱི་དབྱིངས་ཀྱི་བྱིན་གྱི་རླབས་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེ་རྣམ་པར་དག་པའི་བྱིན་གྱི་རླབས་དང་། གསང་སྔགས་དང་ཕྱག་རྒྱའི་མཐུ་དང་། བདག་གི་མོས་པ་དང་ཏིང་འཛིན་དང་སྨོན་ལམ་གྱི་དབང་གིས་འཇིག་རྟེན་གྱི་ཁམས་ན་བདག་པོས་ཡོངས་སུ་མ་བཟུང་བའི་མཆོད་པའི་བྱེ་བྲག་ཇི་སྙེད་ཡོད་པ་དང་། གཞན་ཡང་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ་བསམ་གྱིས་མི་ཁྱབ་པ་ཞིག་བླ་མ་དང་དཀྱིལ་འཁོར་གྱི་འཁོར་ལོ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཅེས་བརྗོད་ལ་སེ་གོལ་བརྡབ། ཡང་ཕྱག་རྒྱ་བཅས་ལ། ཨོཾ་སརྦ་བིཏ་པཱུ་ར་པཱུ་ར། སུ་ར་སུ་ར། ཨཱ་བརྟ་ཡ་ཨཱ་བརྟ་ཡ་ཧོ། ན་མཿས་སནྟ་བུདྡྷཱ་ནཱཾ། ཨ་བྷི་སྨ་ར་ཡེ་སྥ་ར་ཎ་ཨི་མཾ་ག་ག་ན་ཁཾ། དྷརྨ་དྷཱ་ཏུ་ཨཱ་ཀཱ་ཤ་ས་མནྟ་མཱཾ། སརྦ་ཏ་ཐཱ་ག་ཏ་ཨ་པ་རི་ཤོ་དྷ་ཡེ། མཎྜ་ལེ་མ་མ་པྲ་ཎི་དྷི་པུཎྱ་ཛྙཱ་ན་བ་ལ་ན། སརྦ་ཏ་ཐཱ་ག་ཏ་བ་ལོནྡྷ་བནྡྷ་སྭསྠཱ་ན་བ་ལེ་ན་ཙ་ཡེ་སྭཱ་ཧཱ། ཞེས་བརྗོད་དེ་ཕྱག་རྒྱ་བཀྲོལ་ཏེ་སེ་གོལ་ལན་གཉིས་བརྡབ་པར་བྱའོ། །དྲུག་པ་བསྟོད་པའི་མཆོད་པ་ནི། རྡོ་རྗེ་དྲིལ་བུ་འཛིན་པས་ཡབ་ཡུམ་གྱི་རྐང་བརྒྱད་ཚང་བར་བརྗོད། དེ་ཙམ་མི་ནུས་ན། ཆོས་དབྱིངས་རྣམ་དག་དབྱིངས་ལས་མ་གཡོས་ཀྱང་།།ཐབས་ཀྱིས་ཁྲོ་བོའི་སྐུར་སྟོན་གདུག་པ་འདུལ། །ཆེ་བའི་ཆེ་མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་ལ་ཕྱག་འཚལ་ལོ། །ཞེས་པས་བསྟོད་དོ། །བརྒྱད་པ་བཟླས་པའི་རྣལ་འབྱོར་ལ། དམིགས་པ་ནི། ཡབ་ཀྱི་ཐུགས་ཀའི་ཧཱུྃ་ལས་སྔགས་ཀྱི་ཕྲེང་བ་བྱུང་། ཡབ་ཀྱི་ཞལ་ནས་འཐོན། ཡུམ་གྱི་ཞལ་དུ་ཞུགས། སྐུའི་དབྱིབས་བརྒྱུད། ཡུམ་གྱི་པདྨ་ནས་ཡབ་ཀྱི་གསུང་བའི་རྡོ་རྗེའི་བུ་གར་ཞུགས། སྐུའི་དབྱིབས་བརྒྱུད་དེ་ཐུགས་ཀའི་ཧཱུྃ་ལ་ཐིམ་པའི་ཚུལ་གྱིས་རྒྱུན་མི་འཆད་པར་འཁོར་བས་བདེ་བ་ཆེན་པོའི་ཡེ་ཤེས་བརྟན་པར་བསམས་ལ། བཟླ་བྱའི་སྔགས་ནི། རིན་ཆེན་བཞི་པོ་གང་མོས་པ་གཉིས་མེད་དུ་བཟླ་བར་གསུངས་པས། ཨོཾ་ཤྲཱི་བཛྲ་ཧེ་ཧེ་རུ་རུ་ཀྃ་ཧུྃ་ཧཱུྃ་ཕཊ། ཌཱ་ཀི་ནཱི་ཛྭ་ལ་སམྦ་རི་བཛྲ་བཻ་རོ་ཙ་ནཱི་ཡེ་ཧུྃ་ཧཱུྃ་ཕཊ་སྭཱ་ཧཱ། ཞེས་ཡབ་ཡུམ་གྱི་སྙིང་པོ་གཉིས་སུ་མེད་པ་གཙོ་བོར་བཟླ། གཞན་རྣམས་བཟླ་བར་འདོད་ན་སྒྲུབ་ཐབས་རྒྱས་པར་ཤེས། མཐར་ཐལ་མོ་སྦྱར་ཏེ། བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱིས་བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། མྱུར་ཏུ་ཕྱག་རྒྱ་ཆེན་པོ་མཆོག་གི་དངོས་གྲུབ་དཔལ་འཁོར་ལོ་བདེ་མཆོག་གི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། ཞེས་དངོས་གྲུབ་བླངས་ལ་ཡིག་བརྒྱ་ལན་གསུམ་གྱིས་བརྟན་པར་བྱའོ། །གཉིས་པ་གནས་པའི་རིམ་པ་ནི། བསྐྱེད་རིམ་གྱི་སེམས་འཛིན་ཏེ། དེ་ལ་གཉིས། ང་རྒྱལ་དང་། རྣམ་པ་ལ་སེམས་འཛིན་པའོ། །དང་པོ་ནི། ལུས་གནད་བསྲང་། རླུང་རང་བབས་སུ་བཞག །དྲན་པ་རྩེ་གཅིག་ཏུ་བྱས་ཏེ། ང་ནི་ཐ་མལ་པ་ནམ་ཡང་མ་ཡིན། སྐྱོན་ཀུན་ཟད། ཡོན་ཏན་ཀུན་རྫོགས། འབྲས་བུས་བཅུ་གསུམ་རྡོ་རྗེ་འཛིན་པའི་ས་ལ་བཞུགས་པ་དཔལ་འཁོར་ལོ་སྡོམ་པ་དེ་དངོས་ཡིན་སྙམ་པའི་ང་རྒྱལ་བསྐྱེད། དེའང་དང་པོ་ཧྲིལ་གྱིས་བསྒྲིམ། བར་དུ་ལྷོད་ཀྱིས་ཀློད། ཐ་མ་རང་སོ་བཟུང་ཞེས་སྤེལ་མའི་ཚུལ་དུ་ཉམས་སུ་བླང་། གཉིས་པ་ལ་གཉིས། སྤྱི་དང་། བྱེ་བྲག་གོ །དང་པོ་ནི། རང་འཁོར་ལོ་སྡོམ་པར་གསལ་བའི་སྐུའི་རྣམ་པ་སྤྱི་ཙམ་པ་མེ་ལོང་དུ་གཟུགས་བརྙན་ཤར་བ་ལྟར་དབུ་ནས་ཞབས་ཀྱི་བར་བློ་ལ་གཅིག་ཅར་དུ་སྣང་བ་ལ་སྔར་བཞིན་སེམས་གཟུང་། གཉིས་པ་ལ་གཉིས། རྒྱན་མེད་དང་། རྒྱན་ཅན་ནོ། །དང་པོ་ནི། རྣམ་པ་སྤྱིའི་གསལ་སྣང་མ་ཤོར་བའི་ངང་སྤྱན་དབུས་མ་ནས་བརྩམས་ཏེ་ཡབ་ཡུམ་གྱི་སྐུའི་ཆ་ཤས་སོ་སོ་དང་། དེས་མཚོན་ཏེ་ལུས་དཀྱིལ་གྱི་ལྷ་སོ་སོ་ལ་སེམས་གཟུང་། གཉིས་པ་ནི། སོ་སོའི་རྒྱན་ཆ་རགས་ཕྲ་ནས་མེ་རི་དང་གདན་ཁྲིའི་བར་དུ་སེམས་བཟུང་ཞིང་། ཡུན་ཐུང་ལ་གྲངས་མང་བའི་ཚུལ་གྱིས་བསླབས་པས་གསལ་སྣང་མཐར་ཕྱིན་པར་བྱའོ། །ཐུན་མཐར་རྡོ་རྗེ་སེམས་དཔའི་བསྡུ་བས་འོད་གསལ་དུ་འཇུག་པ་ནི། རྒྱུ་མཚན་རྒྱས་པར་འོག་ཏུ་འབྱུང་ཞིང་། འདིར་དམིགས་པའི་ངོ་བོ་ཙམ་བརྗོད་ན། རང་གི་ལྟེ་བར་པད་ཟླའི་སྟེང་དུ་ཧཱུྃ་ལས་རྡོ་རྗེ་སེམས་དཔའ་དཀར་པོ་རྡོར་དྲིལ་འཛིན་ཅིང་། ཡུམ་རྡོ་རྗེ་སྙེམས་མ་དཀར་མོ་གྲི་ཐོད་འཛིན་པ་དང་མཉམ་པར་སྦྱོར་བ། གཉིས་ཀའང་རུས་པའི་རྒྱན་གྱིས་བརྒྱན་པའི་ཐུགས་ཀར་ཟླ་བའི་སྟེང་དུ་ཧཱུྃ། དེ་ལས་འོད་ཟེར་འཕྲོས་པས་ཕྱི་ནང་གི་ལྷ་ཐམས་ཅད་དང་། ཁམས་གསུམ་སྣོད་བཅུད་མ་ལུས་པ་གསལ་ཞིང་གཡོས་ཏེ། རང་ཧེ་རུ་ཀ་ཡབ་ཡུམ་ལ་ཐིམ། ཡུམ་ཡབ་ལ། ཡབ་ལྟེ་བའི་རྡོ་རྗེ་སེམས་དཔའ་ཡབ་ཡུམ་ལ། དེའི་ཡུམ་རྡོ་རྗེ་སེམས་དཔའ་ལ། དེ་ཐུགས་ཀའི་ཧཱུྃ་ནས་ནཱ་དའི་བར་དུ་ཐིམ་སྟེ། མཐར་ནཱ་དའང་འོད་གསལ་སྟོང་པ་ཉིད་ཀྱི་ངང་དུ་ཐིམ་པར་བསམས་ལ། གནས་ལུགས་བརྗོད་བྲལ་བསམ་གྱིས་མི་ཁྱབ་པའི་དབྱིངས་སུ་མཉམ་པར་བཞག །སླར་ཡང་རང་སྐད་ཅིག་གིས་ཧེ་རུ་ཀ་ཡབ་ཡུམ་ལུས་དཀྱིལ་གྱི་ལྷ་དང་བཅས་པའི་སྐུར་གྱུར་པར་བསམས་ལ་དག་དྲན་རྒྱས་བསྡུས་གང་རུང་བྱའོ། །གསུམ་པ་ལྡང་བའི་རིམ་པ་མཉམ་པར་མ་བཞག་པའི་རྣལ་འབྱོར་ལ་གསུམ། སྤྱོད་ལམ་གྱི་རྣལ་འབྱོར། གཏོར་མའི་རྣལ་འབྱོར། ཁ་ཟས་ཀྱི་རྣལ་འབྱོར་རོ། དང་པོ་ནི། རང་གི་གནས་རྣམས་སུ་ཟླ་བའི་དཀྱིལ་འཁོར་རེ་རེའི་སྟེང་དུ། ཡབ་ཀྱི་སྙིང་གར་ཨོཾ་ཧ་དཀར་པོ་རྡོ་རྗེ་སེམས་དཔའ། མགོ་བོར་ན་མ་ཧི་སེར་པོ་རྣམ་པར་སྣང་མཛད། སྤྱི་གཙུག་ཏུ་སྭཱ་ཧཱ་ཧུ་དམར་པོ་པདྨ་གར་གྱི་དབང་ཕྱུག །ཕྲག་པ་གཉིས་སུ་པཽ་ཥ་ཊ་ཧེ་ནག་པོ་ཧེ་རུ་ཀ །མིག་གཉིས་སུ་ཧཱུྃ་ཧཱུྃ་ཧོ་དམར་སེར་རྡོ་རྗེ་ཉི་མ། ཚིགས་ཆེན་བརྒྱད་ལ་ཕཊ་ཧཾ་ལྗང་གུ་རྟ་མཆོག་གི་ངོ་བོ། ཡུམ་གྱི་ལྟེ་བར་ཨོཾ་བྃ་དམར་མོ་རྡོ་རྗེ་ཕག་མོ། སྙིང་གར་ཧེཾ་ཡོཾ་སྔོན་མོ་གཤིན་རྗེ་མ། ཁར་ཧྲེཾ་མྃ་དཀར་མོ་རྨོངས་བྱེད་མ། སྤྱི་བོར་ཧྲཱིཾ་ཧྲཱིཾ་སེར་མོ་སྐྱོད་བྱེད་མ། སྤྱི་གཙུག་ཏུ་ཧུྃ་ཧཱུྃ་ལྗང་གུ་སྐྲག་བྱེད་མ། ཚིགས་ཆེན་བརྒྱད་ལ་ཕཊ་ཕཊ་དུད་ཀ་ཙཎྜི་ཀིའི་ངོ་བོར་མོས་པ་ནི་ཡབ་ཡུམ་གྱི་གོ་ཆ་དང་། པུ་ཛཱ་སོགས་ཉེར་བཞི་བརྗོད་པས་ལུས་དཀྱིལ་གྱི་ལྷ་རྣམས་རང་རང་གི་གནས་སུ་ཐིམ་པར་བསམ་པ་ནི་གོ་ཆ་ཆེན་པོ་དང་། སྡིགས་མཛུབ་དང་བཅས་སུམྦྷའི་སྔགས་བརྗོད་ཅིང་། ཕྱོགས་གཡོན་སྐོར་དང་། མཚམས་གཡས་སྐོར་དུ་སེ་གོལ་གཏོགས་པ་ཚམ་རྔམས་སྔགས་ཀྱི་སྲུང་བ་སྟེ། དེ་ལྟ་བུའི་སྲུང་བ་རྣམ་པ་གསུམ་གྱིས་བསྲུངས་ལ། རང་དང་སྣང་བ་ཐམས་ཅད་དཔལ་ཧེ་རུ་ཀའི་སྐུ་གསུང་ཐུགས་ཀྱི་ངོ་བོར་ཤེས་པས་སྔགས་ཟློས་བཞིན་ཏུ། དགེ་བ་འདི་ཡིས་མྱུར་དུ་བདག །འཁོར་ལོ་བདེ་མཆོག་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེའི་ས་ལ་འགོད་པར་ཤོག །འཆི་ཚེ་མགོན་དང་དཔའ་བོ་མ་ཚོགས་ཀྱིས། །མེ་ཏོག་གདུགས་དང་རྒྱལ་མཚན་ཐོགས་ནས་ཀྱང་། །རོལ་མོ་གླུ་དབྱངས་སིལ་སྙན་སོགས་མཆོད་ནས། །མཁའ་ལ་སྤྱོད་པའི་གནས་སུ་འཁྲིད་པར་ཤོག །ལྷ་མོ་ཚད་མ་དམ་ཚིག་ཚད་མ་དང་། །དེས་ཆོས་གསུང་ཡང་ཚད་མའི་མཆོག་ཡིན་པས། །བདེན་པ་དེས་ཀྱང་ལྷ་མོ་དེ་དག་གིས། །བདག་ལ་རྗེས་སུ་འཛིན་པའི་རྒྱུར་གྱུར་ཅིག །ཅེས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ཐམས་ཅད་ལྷ་དང་ཡེ་ཤེས་སུ་ཤེས་པས་དུས་འདའ་བར་བྱའོ། །གཉིས་པ་ནི། ཐོད་པ་ལ་སོགས་པའི་སྣོད་དུ་ཤ་ཆང་གི་དམ་རྫས་དང་བཅས་པའི་གཏོར་མ་བཤམས། འོད་གསལ་གྱི་ངང་ལས་ལྷ་སྐུར་ལྡངས་ཏེ། ནང་མཆོད་ཆུ་ཆང་དང་སུམྦྷས་བསང་། སྭབྷཱ་བས་སྦྱང་། རྒྱས་པར་མངོན་རྟོགས་རྣམས་ནས་འབྱུང་བ་ལྟར་རམ། བསྡུ་ན། ཨོཾ་ཨཱཿཧཱུྃ་ཧ་ཧོ་ཧྲཱིཿཧྲཱིཿས་བརླབ། མདུན་གྱི་ནམ་མཁར་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་དུར་ཁྲོད་ཆེན་པོ་བརྒྱད་དང་བཅས་པ་གསལ་བར་དམིགས་ལ། བདག་གི་སྙིང་གའི་ཧཱུྃ་ལས་འོད་ཟེར་འཕྲོས་ཏེ་དུར་ཁྲོད་བརྒྱད་ལ་ཕོག་པས་དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པ་ཆ་བརྒྱད་དུ་གྱུར་པར་བསམས་ལ་འབར་བའི་ཕྱག་རྒྱ་དང་ལྡན་པས་ངག་ཏུ་ཕཻཾ་ཞེས་བརྗོད་ཅིང་། སེམས་ཀྱིས་སྙིང་གའི་ཧཱུྃ་གི་འོད་ཀྱིས་ཡེ་ཤེས་ཀྱི་དཀྱིལ་འཁོར་ཆ་དགུ་སྤྱན་དྲངས་ལ། ཛཿཧཱུྃ་བྃ་ཧོཿ ཞེས་བརྗོད་པས་དཀྱིལ་འཁོར་ཆ་དགུ་ལ་དགུག་གཞུག་བཅིངས་དབང་དུ་བྱས། ཨོཾ་ཡོ་ག་ཞེས་སོགས་བརྗོད་ཅིང་རྣམ་ལྔ་འདོད་སྐོར་བྱ་སྟེ་བརྟན་པར་བྱའོ། །དེ་ནས་ལྷ་ཐམས་ཅད་ཀྱི་ལྗགས་ལ་ཧཱུྃ་ལས་རྡོ་རྗེ་སྦུ་གུ་ཅན་ཧཱུྃ་གིས་མཚན་པར་བསམ། གཏོར་མ་ལས་ཐོད་པ་བདུད་རྩིས་གང་བ་དུ་མ་ཆད་དེ་ཐམས་ཅད་ཀྱི་ཕྱག་ཏུ་བཞག་པས་གསོལ་བར་བསམ་ཞིང་ལག་པ་རྡོ་རྗེ་ཐལ་མོ་ཁ་ཕྱེ་ལ། ངག་ཏུ། ཨོཾ་བཛྲ་ཨཱ་རལླི་ཧོཿ ཛཿཧཱུྃ་བྃ་ཧོཿ བཛྲ་ཌཱ་ཀི་ནཱི་ས་མ་ཡ་སྟྭཾ་དྲི་ཤྱ་ཧོཿཨོཾ་ཨཱཿཧཱུྃ། ཞེས་ལན་ལྔ་བརྗོད་པས་འཁོར་ལོ་དགུ་ཚན་ལྔ་རིམ་པ་བཞིན་ཚིམ་པར་བསམས་ཏེ། །སྔགས་མཆོད་དང་། ཕྱི་ནང་གིས་མཆོད། བསྟོད་པ་ཅི་རིགས་ཀྱི་མཐར། ཧེ་རུ་ཀ་དཔལ་འཁོར་བཅས་རྣམས། མཆོད་སྦྱིན་གཏོར་མ་འདི་བཞེས་ལ་སོགས་ཀྱིས་འདོད་དོན་གསོལ། གཏོར་མ་གཉིས་པ་སོགས་ཡོད་ན་ཆོས་སྐྱོང་དང་། མཁའ་འགྲོ་སྤྱི་གཏོར་གྱི་ཆོ་གས་གཏང་། ཡི་གེ་བརྒྱ་པས་ནོངས་པ་བཟོད་པར་གསོལ་ཏེ། སྤྱན་དྲངས་པའི་གཏོར་མགྲོན་རྣམས་རང་བཞིན་གྱི་གནས་སུ་གཤེགས། མདུན་དུ་སྤྲུལ་པ་རྣམས་བདག་གི་ལུས་ལ་ཐིམ་པར་བསམ། དེ་ནས་དག་དྲན་དང་། གོ་ཆ་དགོད་པ་སོགས་སྔར་ལྟར་བྱའོ། །གསུམ་པ་ནི། ཁ་ཟས་ལ་ལག་པ་གཡོན་པའི་མཐེབ་སྲིན་གྱིས་རེག་སྟེ། ཨོཾ་ཨཱཿཧཱུྃ་ཞེས་བརྗོད་པས་བདུད་རྩིའི་རང་བཞིན་དུ་བརླབས་ལ་ནང་གི་སྦྱིན་སྲེག་གི་ཚུལ་དུ་ཚིམ་པར་རོལ་པའི་མཐར་བདག་མེད་པའི་ངང་དུ་ངལ་བསོ། ནུབ་མོ་ཉལ་བའི་ཚེ་རྡོ་རྗེ་སེམས་དཔའ་བསྡུ་བའི་རིམ་པས་འོད་གསལ་ལ་འཇུག །ཐོ་རངས་ལྡང་བའི་རྣལ་འབྱོར་གྱིས་ལངས་ཏེ་སྔར་བཞིན་དུ་རིམ་པ་གཉིས་ཀྱི་རྣལ་འབྱོར་ལ་བརྩོན་པར་བྱའོ། །བསྙེན་པ་བྱེད་ན་རྒྱས་པར་གཞན་དུ་ཤེས། བསྡུ་ན་མཚམས་དམ་དུ་བཅད། ཇི་སྐད་བཤད་པའི་མངོན་རྟོགས་ཐུན་བཞིའམ། གསུམ་དུ་བསྒོམས་ལ་ཡབ་ཡུམ་གྱི་སྙིང་པོ་འབུམ་ཕྲག་བཞི་ཁ་སྐོང་དང་བཅས་བཟླས་པས་ཀྱང་ལས་རུང་ཙམ་དུ་འགྱུར་བ་ཡིན་ནོ། །གཉིས་པ་བརྟེན་པ་རྫོགས་པའི་རིམ་པ་ནི། རྒྱས་པར་རྩ་དབུ་མ་ཆེ་བའི་ཁྲིད་ཡིག་ལྟར་ཉམས་སུ་བླང་བར་བྱ་ཞིང་། འདིར་གཞུང་གི་དངོས་བསྟན་བསྡུ་བ་གསུམ་གྱི་རྫོགས་རིམ་ཅུང་ཟད་བརྗོད་ན་གསུམ། རྩ་བའི་གཞུང་གིས་མདོར་བསྟན་པ། དེའི་དོན་རྒྱས་པར་བཀྲལ་བ། ཉམས་སུ་ལེན་པའི་ཚུལ་གྱིས་དོན་བསྡུ་བའོ། །དང་པོ་ནི། རྣལ་འབྱོར་མ་ཀུན་སྤྱོད་ཀྱི་རྒྱུད་དང་། གྲུབ་ཆེན་གྱི་གཞུང་ལས། ཨཱ་ལི་ཀཱ་ལི་མདུན་བསམས་ནས། །རྣལ་འབྱོར་ཆེན་པོ་ངལ་བསོ་སྟེ། །ཟླ་བའི་དཀྱིལ་འཁོར་རྫོགས་པ་ནི། །ལྟེ་བའི་རྩ་བར་གནས་པར་བསྒོམ། །ཡི་གེ་མཆོག་གི་གནས་གྱུར་པ། །དེ་ཡི་དབུས་སུ་རྣམ་པར་བསྒོམ། །སྐུ་གསུང་ཐུགས་ཀྱི་རྡོ་རྗེ་ཅན། །ལྷ་ཡི་སྐུ་ནི་བསྒོམ་པར་བྱ། །དེ་ནི་གཟུགས་ལས་འདས་པ་སྟེ། །དངོས་པོ་མེད་པའི་ཆོས་ཉིད་ཡིན། །དེ་ཡང་བསམ་གྱིས་མི་ཁྱབ་བསམ། །སེམས་ཉིད་བརྟག་པར་མི་བྱའོ། །བསམ་གྱིས་མི་ཁྱབ་དེ་བསམས་ནས། །དེ་ལས་གཟུགས་ནི་ཐོབ་པར་འགྱུར། །ཅེས་གསུངས་སོ། །གཉིས་པ་ནི། དེའི་དོན་རྗེ་བཙུན་རིན་པོ་ཆེ་གྲགས་པ་རྒྱལ་མཚན་གྱི་ཞལ་སྔ་ནས། དེ་བརྗོད་པ་ལ་གསུམ་སྟེ། རྡོ་རྗེ་སེམས་དཔའ་བསྡུ་བ་དང་། ཡི་གེ་བསྡུ་བ་དང་། ཐིག་ལེ་བསྡུ་བའོ། །དང་པོ་ནི། རྩ་བའི་དཔེ་ལྔ་དང་། ཡན་ལག་གི་དཔེ་དུ་མས་མཚོན་པ་སྟེ། དེའང་བསྐྱེད་པའི་རིམ་པའི་ཐུན་གྱི་མཇུག་ཏུ། བཅོམ་ལྡན་འདས་ཀྱི་ལྟེ་བར་པདྨ་འདབ་མ་བརྒྱད་པའི་ལྟེ་བར་ཟླ་བས་བརྒྱན་པར་བསྒོམ། དེར་ཧཱུྃ་ལས་བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་དཀར་པོ་རྡོ་རྗེ་དང་དྲིལ་བུ་འཛིན་པ། ཡུམ་རྡོ་རྗེ་སྙེམས་མ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པའི་ཚུལ་དུ་བཞུགས་པ། གཉིས་ཀའང་རུས་པའི་རྒྱན་གྱིས་བརྒྱན་པའི་ཐུགས་ཀར་ཟླ་བའི་སྟེང་དུ་ཡི་གེ་ཧཱུྃ་བསྒོམ། ཧཱུྃ་དེ་ལས་འོད་ཟེར་འཕྲོས་པས། རྡོ་རྗེ་སེམས་དཔའ་ཡབ་ཡུམ་དང་། ཕྱིའི་ཧེ་རུ་ཀ་ཡབ་ཡུམ་ནས་འཁོར་ལོ་ནང་མ་དེ་ནས་རིམ་གྱིས་ཇེ་གསལ་ཇེ་གསལ་ཁམས་གསུམ་སྣོད་བཅུད་ཐམས་ཅད་གསལ་བར་བྱས་ལ། དེའི་སྟོབས་ཀྱིས་ཐམས་ཅད་ཕྲིག་ཕྲིག་གཡོས་པར་བསམས་ཏེ། དེ་ནི་རྡོ་ཁབ་ལེན་གྱིས་ལྕགས་གཡོ་བ་ཞེས་བྱ་བའི་དཔེ་དང་པོ་ཡིན་ནོ། །དེ་ནས་ཁམས་གསུམ་སྣོད་བཅུད་ཐམས་ཅད་སྲུང་བའི་འཁོར་ལོ་ལ་བསྡུ་བ་ནས། བཅོམ་ལྡན་འདས་ཀྱི་ཞལ་བཞི་ལ་བསྡུ་བའི་བར་ཏེ། དཔེ་གཉིས་པ་ལྕི་བས་དངུལ་ཆུ་སྡུད་པ་ཞེས་བྱ་བ་ཡིན་ནོ། །འབྲིང་བསྡུས་གཉིས་ལ་ཕྱིའི་དཀྱིལ་འཁོར་མེད་པས་ཁམས་གསུམ་ལུས་ལ་སྡུད་པ་ཉིད་དཔེ་གཉིས་པ་ཡིན་ནོ། །དེ་ནས་བཅོམ་ལྡན་འདས་ཞལ་བཞི་ཕྱག་བཅུ་གཉིས་པ་ནི། ཞལ་གཅིག་ཕྱག་གཉིས་པར་བསྡུ་སྟེ། དཔེ་གསུམ་པ་རུས་སྦལ་ཡན་ལག་འཁུམས་པ་ཞེས་བྱ་བ་ཡིན་ནོ། །དེ་ནས་བདག་ཕྱིའི་ཧེ་རུ་ཀ་ཡབ་ཡུམ་ལ་བསྡུ། ཡབ་ལྟེ་བའི་རྡོ་རྗེ་སེམས་དཔའ་ཡབ་ཡུམ་ལ་བསྡུ། རྡོ་རྗེ་སྙེམས་མའང་ཡབ་ལ། ཡབ་ཧཱུྃ་ལ། ཧཱུྃ་གི་གདན་ཟླ་བ་ཞབས་ཀྱུ་ལ། ཞབས་ཀྱུ་ཁོག་པ་ལ། ཁོག་པ་མགོ་བོ་ལ། མགོ་བོ་ཟླ་ཚེས་ལ། ཟླ་ཚེས་ཐིག་ལེ་ལ་བསྡུ་སྟེ། དེ་ནི་དཔེ་བཞི་པ་སྐར་མདའ་གཅིག་ལ་གཅིག་ཐིམ་པ་ཞེས་བྱ་བ་ཡིན་ནོ། །དེ་ནས་ཐིག་ལེའང་ཇེ་ཕྲ་ཇེ་ཕྲ་མི་དམིགས་པ་བསམ་གྱིས་མི་ཁྱབ་པའི་ངང་ལ་གཞག་པར་བྱ་སྟེ། དེ་ནི་རྩ་བའི་དཔེ་ལྔ་པ་ལན་ཚྭ་ཆུ་ལ་ཐིམ་པ་ཞེས་བྱ་བ་ཡིན་ནོ། །དེ་ནས་ཡན་ལག་གི་དཔེ་ནི་ངོ་བོ་ཉིད་ཀྱི་སྟེང་དུ་གཏན་ལ་དབབ་སྟེ། གོང་གི་སྤྲོས་པ་རྣམས་ནི་ཆ་ལུགས་སམ། འོད་ཟེར་རམ། རླབས་ཞེས་བྱ་བ་ཡིན་ལ། བསམ་གྱིས་མི་ཁྱབ་པའི་ངོ་བོ་ཉིད་ནི་གར་མཁན་དངོས་སམ། ཉི་མའམ། རྒྱ་མཚོ་ཉིད་དང་འདྲ་བ་ཡིན་པས་ན་གར་མཁན་ཉིད་དང་ཆ་ལུགས་དང་། ཉི་མ་དང་འོད་ཟེར་དང་། མཚོ་དང་རླབས་དག་ངོ་བོ་ཉིད་ཀྱི་སྟེང་དུ་ནི་ཆུ་ལ་ཆུ་བཞག་པའམ། མར་ལ་མར་བཞག་པ་སྟེ་ཡན་ལག་གི་དཔེ་ལྔས་མཚོན་པ་ཡིན་ནོ། །དེའི་ངང་ལ་བློ་ཇི་ཙམ་གནས་པ་ཅིག་བཞག་ལ། ལྡང་བར་འདོད་ན་གོང་དུ་བསྟན་པའི་ལྡང་བའི་རྣལ་འབྱོར་གྱིས་ཧེ་རུ་ཀར་ལངས་ཏེ། དག་པ་རྗེས་སུ་དྲན་པ་བྱ་བ་ཡིན་ནོ། །རྡོ་རྗེ་སེམས་དཔའ་བསྡུ་བ་ཞེས་བྱ་བའི་རིམ་པ་འདི་ནི་བསྐྱེད་པའི་རིམ་པའི་རྗེས་ལ་ཅིས་ཀྱང་བསྒོམ་པ་ཡིན་ནོ། །རྡོ་རྗེ་སེམས་དཔའ་བསྡུ་བའོ། །ཡི་གེ་བསྡུ་བ་དང་། ཐིག་ལེ་བསྡུ་བ་འདི་གཉིས་ནི་བསྐྱེད་རིམ་གྱི་རྗེས་ལ་ཅིས་ཀྱང་འབྱུང་བའི་རྫོགས་རིམ་ནི་མ་ཡིན་ཏེ། རྣལ་འབྱོར་པ་བསྐྱེད་རིམ་ལ་བརྟེན་པའམ། ཡང་ན་ལས་དང་པོ་པ་ཉིད་ནས་ཀྱང་རུང་སྟེ། རླུང་དང་སེམས་ཀྱི་དམིགས་པ་ལ་བརྟེན་ནས་ཏིང་ངེ་འཛིན་གྱི་ཡེ་ཤེས་མྱུར་དུ་ཚོལ་བར་འདོད་པའི་རྟེན་ཡིན་པས། བསྐྱེད་པའི་རིམ་པ་རྒྱས་པར་བསྒོམས་པའི་རྗེས་སམ། འདི་ཉིད་གཙོ་བོར་བྱེད་པའི་དུས་སུ་སྐད་ཅིག་གིས་ཧེ་རུ་ཀ་ཡབ་ཡུམ་དུ་དྲན་པར་བྱས་པའི་ལྟེ་བར་པདྨ་འདབ་མ་བཞི་པའི་ཤར་དུ་ས་རླུང་གི་རང་བཞིན་ལ་སེར་པོ། གཡོན་དུ་ཆུ་རླུང་གི་རང་བཞིན་ཝ་དཀར་པོ། རྒྱབ་ཏུ་མེ་རླུང་གི་རང་བཞིན་ར་དམར་པོ། གཡས་སུ་རླུང་རླུང་གི་རང་བཞིན་ཡ་ལྗང་གུ། དབུས་སུ་ནམ་མཁའི་རླུང་གི་རང་བཞིན་ཐིག་ལེ་ཁ་དོག་སྔོན་པོ་ཅིག་བསམས་ལ། རིམ་གྱིས་བློ་སྦྱང་བའི་ཕྱིར་དབུགས་ཕྱིར་རྒྱུ་བའི་དུས་སུ་མདུན་གྱི་ལ་སེར་པོ་ལས་འོད་ཟེར་ཁ་དོག་སེར་པོ་སྦོམ་ཕྲ་སྐུད་པ་འབྲིང་པོ་ཙམ་ལངས་ཏེ་གྱེན་དུ་བྱུང་བ་སྣ་སྒོ་གཡོན་པ་ནས་ཕྱུང་སྟེ། མདུན་དུ་སོར་བཅུ་དྲུག་ཙམ་གྱི་ཚད་དུ་བྱུང་བར་བསམ། རླུང་ནང་དུ་འཇུག་པ་དང་བསྟུན་ལ་འོད་ཟེར་དེ་ནང་དུ་བསྡོགས། ལ་སེར་པོ་དེ་ལ་བསྟིམས་ལ་ཡིད་ཀྱིས་ལ་སེར་པོ་དེ་ལ་བལྟ་ཞིང་རླུང་ཁ་སྦྱོར་གྱི་དམིགས་པ་བྱའོ། །དེས་དུ་བ་ལྟ་བུའི་རྟགས་མཐོང་བ་དེའི་ཚེ་ས་རླུང་དབང་དུ་གྱུར་པའི་རྟགས་ཡིན་པས་ལ་སེར་པོ་དེ་གཡོན་གྱི་ཝ་དཀར་པོ་ལ་བསྟིམ། ཝ་དཀར་པོ་ལས་འོད་ཟེར་དཀར་པོ་སྣ་བུག་གཡོན་པ་ནས་འབྱུང་བ་དང་། འཇུག་པ་དང་། རླུང་གི་རྣལ་འབྱོར་དང་བཅས་པ་སྔ་མ་བཞིན་བསྒོམས་པས་སྨིག་རྒྱུ་ལྟ་བུ་མཐོང་བ་དེའི་ཚེ་ཆུ་རླུང་དབང་དུ་འདུས་པ་ཡིན་པས་ཝ་དཀར་པོ་དེ་རྒྱབ་ཀྱི་ར་དམར་པོ་ལ་བསྟིམ། ར་དམར་པོ་ལས་འོད་ཟེར་དམར་པོ་སྣ་གཡོན་ནས་འབྱུང་བ་དང་། འཇུག་པ་དང་། རླུང་གི་རྣལ་འབྱོར་སྔ་མ་བཞིན་དུ་བསྒོམས་པས་སྲིན་བུ་མེ་ཁྱེར་ལྟ་བུའི་རྟགས་མཐོང་བ་དེའི་ཚེ་མེ་རླུང་དབང་དུ་འདུས་པ་ཡིན་པས་ར་དམར་པོ་དེ་གཡས་ཀྱི་ཡ་ལྗང་གུ་ལ་བསྟིམས་ལ་བཞག །ཡ་དེ་ལས་འོད་ཟེར་ལྗང་གུ་སྣ་གཡོན་ནས་འབྱུང་བ་དང་། འཇུག་པ་དང་། རླུང་གི་རྣལ་འབྱོར་སྔ་མ་བཞིན་དུ་བསྒོམས་པས་མར་མེ་འབར་བ་ལྟ་བུའི་རྟགས་མཐོང་བ་དེའི་ཚེ་རླུང་གི་རླུང་དབང་དུ་འདུས་པའི་རྟགས་ཡིན་པས་ཡི་གེ་ཡ་ལྗང་གུ་དེ་དབུས་ཀྱི་ཐིག་ལེ་སྔོན་པོ་ལ་བསྟིམས་ལ་བཞག །དེ་ནས་ཐིག་ལེ་སྔོན་པོ་ལས་འོད་ཟེར་འབྱུང་འཇུག་མེད་པར་ཐིག་ལེ་ལ་ཡིད་ཀྱིས་བལྟ་ཞིང་རླུང་ཁ་སྦྱར་གྱི་རྣལ་འབྱོར་པས་ནམ་མཁའ་སྤྲིན་མེད་ལྟ་བུ་མཐོང་བ་དེའི་ཚེ་ནམ་མཁའི་རླུང་དབང་དུ་འདུས་པ་ཡིན་པས། འདིའི་མཇུག་ཏུ་མཐོང་བའི་ལམ་གྱི་ཡེ་ཤེས་སྐྱེ་ཞེས་གསུངས་སོ། །ཡི་གེ་བསྡུ་བའོ། །ཐིག་ལེ་བསྡུ་བ་ནི། ཡི་གེ་རྣམས་ཀྱི་ཤུལ་དུ་ཐིག་ལེ་བསྒོམ་པ་སྟེ། ཤར་དུ་ཐིག་ལེ་སེར་པོ། གཡོན་དུ་དཀར་པོ། རྒྱབ་ཏུ་དམར་པོ། གཡས་སུ་ལྗང་གུ་རྣམས་བསྒོམས་ལ། འོད་ཟེར་གྱི་སྐུད་པའི་འབྱུང་འཇུག་དང་། རླུང་གི་རྣལ་འབྱོར་ལ་སོགས་པ་སྔ་མའི་ཚུལ་དུ་བསྒོམས་པས་མཐར་ཕྱིན་པའི་ཚད་སྔ་མ་བཞིན་དུ་འབྱུང་བར་འགྱུར་རོ། །དེས་ན་འདི་གཉིས་ཀྱང་རྣལ་འབྱོར་པ་རང་གི་བློ་ལ་གང་བདེ་བ་བསྒོམ་པ་ཡིན་ལ། གཅིག་གི་རྗེས་ལ་གཅིག་བསྒོམ་པ་ནི་མ་ཡིན་ནོ། ཞེས་གསུངས་པ་ལྟར་རོ། །གསུམ་པ་ནི། དེ་ལྟ་བུའི་རྡོ་རྗེ་སེམས་དཔའ་བསྡུ་བའི་རྫོགས་རིམ་ནི་བསྐྱེད་རིམ་གྱི་མཇུག་ཏུ་ངེས་པར་བསྒོམ་པའི་ཚུལ་གོང་དུ་བསྟན་ཟིན་ཅིང་། ཡི་གེ་བསྡུ་བ་དང་། ཐིག་ལེ་བསྡུ་བ་ནི་བསྐྱེད་རིམ་དང་འབྲེལ་ན་རྡོ་རྗེ་སེམས་དཔའ་བསྡུ་བའི་གོང་དུ་བསྒོམ། བསྐྱེད་རིམ་ལ་ཅུང་ཟད་བརྟན་པ་ཐོབ་པས་རྫོགས་རིམ་གཙོ་བོར་བྱེད་ནས་འདི་རྐྱང་པ་བསྒོམ་ན། སྐྱབས་འགྲོ་སེམས་བསྐྱེད་བླ་མའི་རྣལ་འབྱོར་རྣམས་སྔོན་དུ་འགྲོ་བས། བླ་མ་རང་ལ་བསྟིམས་པའི་རྐྱེན་གྱིས་རང་སྐད་ཅིག་གིས་དཔལ་འཁོར་ལོ་བདེ་མཆོག་གི་སྐུར་གྱུར་པར་བསམས་ལ་སེམས་གཟུང་། གསལ་སྣང་ཐོན་པ་ན་ལུས་བསྲང་། རླུང་རོ་བསལ། རང་གི་ལུས་ཀྱི་ནང་ཐམས་ཅད་སྟོང་གསལ་འོད་ཀྱི་རང་བཞིན་ཅན་དུ་གྱུར་པའི་སྤྲུལ་འཁོར་གྱི་ལྟེ་བར་ཇི་སྐད་བཤད་པའི་ཡི་གེའམ་ཐིག་ལེ་བསྒོམ། དེ་ལ་སེམས་ཟིན་པ་ན་འོད་ཀྱི་འབྱུང་འཇུག་བྱ། དེ་བརྟན་པའི་ཕྱིར་བུམ་པ་ཅན་ཁ་སྦྱར་དུ་བཟུང་བ་སོགས་ཇི་སྐད་གསུངས་པ་ལྟར་ཉམས་སུ་བླང་ངོ་། །དེ་ལྟར་བསྐྱེད་རྫོགས་ཀྱི་རིམ་པ་ཟབ་མོ་འདི་ནི་སྐུ་གསུམ་ལམ་བྱེད་ཀྱི་རྣལ་འབྱོར་དུ་ཇི་ལྟར་འགྱུར་པའི་ཚུལ་རྗེ་བཙུན་རིན་པོ་ཆེས། དེ་ལ་སློབ་དཔོན་ལཱུ་ཧི་པའི་དགོངས་པ་ཇོ་བོ་ནཱ་རོ་ཏ་པས་བསྐངས་པས་མངོན་པར་རྟོགས་པ་གཅིག་ལ་སྐུ་གསུམ་ལམ་དུ་བྱེད་པའི་སྒྲུབ་ཐབས་ཡིན་ཏེ། དེ་ཡང་བློའི་སྤྱོད་ཡུལ་རྫོགས་པ་གཅིག་ལ་སྐུ་གསུམ་དུ་བཞག་པ་དང་། དཀྱིལ་འཁོར་གྱི་འཁོར་ལོ་རྫོགས་པ་གཅིག་ལ་སྐུ་གསུམ་དུ་བཞག་པ་དང་། མངོན་པར་རྟོགས་པ་གཅིག་ལ་སྐུ་གསུམ་དུ་བཞག་པའོ། །དང་པོ་བདག་གི་བློ་སྣང་གི་དཀྱིལ་འཁོར་ནི་ཞིང་སྐྱེས་ཀྱིས་སྤྲུལ་ལ། ཞིང་སྐྱེས་ཉིད་ཀྱང་ལྷན་སྐྱེས་ཀྱིས་སྤྲུལ་པའི་ཕྱིར། དེ་གཉིས་ཀའང་སྤྲུལ་པའི་སྐུའོ། །ལྷན་སྐྱེས་ནི་གནས་འཕོ་བ་མེད་པའི་ཚུལ་གྱིས་ཟག་པ་མེད་པའི་བདེ་བ་དང་། ཆོས་ལ་ལོངས་སྤྱོད་པའི་ཕྱིར་ལོངས་སྤྱོད་རྫོགས་པའི་སྐུའོ། །ཆོས་ཀྱི་སྐུ་ནི་ཆོས་ཀྱི་སྐུ་ཉིད་དོ། །གཉིས་པ་དཀྱིལ་འཁོར་གྱི་འཁོར་ལོ་རྫོགས་པ་གཅིག་ལ་སྐུ་གསུམ་དུ་འཇོག་ན། བདེ་བ་ཆེན་པོའི་འཁོར་ལོ་ནི་ཆོས་ཀྱི་སྐུ། འཁོར་ལོ་གསུམ་ནི་ལོངས་སྐུ། སྒོ་མཚམས་མ་བརྒྱད་ནི་སྤྲུལ་པའི་སྐུའོ། །མངོན་པར་རྟོགས་པ་རྫོགས་པ་གཅིག་ལ་སྐུ་གསུམ་དུ་འཇོག་ན། ཕྱིའི་དཀྱིལ་འཁོར་དག་པ་དང་བཅས་པ་སྤྲུལ་པའི་སྐུ་ལམ་དུ་བྱེད་པའི་སྒྲུབ་ཐབས། ལུས་ཀྱི་དཀྱིལ་འཁོར་སྔགས་ཀྱིས་བྱིན་གྱིས་བརླབ་པ་དང་བཅས་པ་ལོངས་སྤྱོད་རྫོགས་པའི་སྐུ་ལམ་དུ་བྱེད་པའི་སྒྲུབ་ཐབས། རྫོགས་པའི་རིམ་པ་སྤྱོད་པ་གཅིག་དང་བཅས་པ་ཆོས་ཀྱི་སྐུ་ལམ་དུ་བྱེད་པའི་སྒྲུབ་ཐབས་སོ། །དེ་ལ་འབྲིང་བསྡུས་གཉིས་ཀྱི་དབང་དུ་བྱས་ན་ཕྱིའི་དཀྱིལ་འཁོར་མེད་པས། ལུས་ལ་ལྷ་རྣམས་རྫོགས་པར་བསྐྱེད་པ་ཙམ་ནི་སྤྲུལ་པའི་སྐུ་ཡིན་ལ། བསྐྱེད་པ་གསལ་གདབ་པ་དང་། ཐིམ་པའི་ཚུལ་གྱིས་ལོངས་སྤྱོད་པ་ནི། ལོངས་སྤྱོད་རྫོགས་པའི་སྐུ་ཡིན་ལ། རྫོགས་པའི་རིམ་པ་སྤྱོད་པ་དང་བཅས་པ་ནི་ཆོས་ཀྱི་སྐུ་ལམ་དུ་བྱེད་པའི་སྒྲུབ་ཐབས་སོ། །ཞེས་གསུངས་པ་ལྟར་ཡིན་ལ། མདོར་ན་རིམ་གཉིས་བཟླས་པ་དང་བཅས་པ་ལ་བརྩོན་པས་དྲོད་ཅི་རིགས་པ་ཐོབ་ནས། སྤྲོས་བཅས་དང་། སྤྲོས་མེད་དང་། ཤིན་ཏུ་སྤྲོས་མེད་ཀྱི་སྤྱོད་པས་བོགས་དབྱུང་ཞིང་། ཡེ་ཤེས་ལ་དབང་འབྱོར་པ་ན་གཞན་དོན་དུ་ཕྱོགས་ལས་རྣམ་པར་རྒྱལ་བའི་སྤྱོད་པས་མཚམས་སྦྱར་ཏེ་མཐར་ཐུག་གི་འབྲས་བུ་ལ་རེག་པར་འགྱུར་རོ། །བཞི་པ་དེས་གྲུབ་པའི་འབྲས་བུ་ནི། དམན་བཞི་སོགས་ལས་རབ་འབྱམས་དང་། འབྲིང་གྲུབ་པ་ཆེན་པོ་བརྒྱད་དང་། འབྲིང་གི་རབ་མཁའ་སྤྱོད་ཀྱི་རིག་པ་འཛིན་པ་ཐོབ་པར་འགྱུར་བ་ནི་གནས་སྐབས་ཀྱི་འབྲས་བུ་ཡིན་ལ། །མཐར་ཐུག་ལམ་ལྔ་དང་ས་བཅུ་བདེ་བླག་ཏུ་བགྲོད་དེ་མཆོག་གི་དངོས་གྲུབ་སྐུ་གསུམ་གྱི་རང་བཞིན་སངས་རྒྱས་ཀྱི་ས་རྡོ་རྗེ་འཛིན་པ་ཉིད་འགྲུབ་པར་འགྱུར་བ་ཡིན་ནོ། །རྣལ་འབྱོར་གསང་མཐའ་འཁོར་ལོ་བདེ་མཆོག་གི། །རིམ་གཉིས་མན་ངག་གྲུབ་པའི་ཞལ་གྱི་ལུང་། །བདེ་ཆེན་འདོད་འཇོ་འདིར་བསྟེན་ཡིད་ཅན་ཀུན། །འཆི་མེད་སྐུ་གསུམ་གོ་འཕང་མྱུར་ཐོབ་ཤོག །ཅེས་པའང་རྗེ་བཙུན་རྡོ་རྗེ་འཆང་གྲགས་པ་རྒྱལ་མཚན་གྱི་གསུང་རབ་ཇི་ལྟ་བ་ལ། ཀུན་མཁྱེན་ཆེན་པོའི་རྣམ་བཤད་དང་། རྗེ་སངས་རྒྱས་དཔལ་བཟང་སློབ་ཚོགས་དང་བཅས་པའི་ཟིན་བྲིས་སོགས་ལས་དོན་གྱི་སྙིང་པོ་མདོར་བསྡུས་ཏེ། མང་དུ་ཐོས་པ་ལྟར་སྣང་བའི་བྱ་བྲལ་སྤོང་བ་པ་འཇམ་དབྱངས་མཁྱེན་བརྩེའི་དབང་པོས་བྲིས་པ་དགེ་ལེགས་མཆོག་ཏུ་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ། །འདིའི་རྫོགས་རིམ་ནི། རྗེ་བཙུན་རིན་པོ་ཆེའི་གསུང་གི་དངོས་བསྟན་བླ་མ་ཕྱི་མ་རྣམས་ཀྱིས་ཀྱང་སོར་བཞག་ཏུ་མཛད་པ་ལྟར་བྲིས་པ་ཡིན་ལ། དམིགས་པ་ཉམས་སུ་ལེན་ཚུལ་ཞིབ་པར་ཁྲིད་ཡིག་དག་ལས་ཤེས་པར་བྱའོ།། །། | ཨོཾ་སྭསྟི་སིདྡྷཾ། གང་གི་དྲིན་གྱིས་ལྷན་སྐྱེས་བདེ་བ་མཆོག །སྩོལ་མཛད་འཁོར་ལོའི་དབང་ཕྱུག་བླ་མ་ལ། །བཏུད་ནས་དངོས་གྲུབ་མཆོག་བརྙེས་ལཱུ་ཧི་པའི། །གདམས་ཟབ་བསྐྱེད་རྫོགས་སྙིང་པོ་ཅུང་ཟད་དབྱེ། །འདི་ལ་གཉིས། རྒྱུད་ལས་ཇི་ལྟར་གསུངས་པའི་ཁུངས་དགོད་པ་དང་། མངོན་པར་རྟོགས་པ་བསྒོམ་ཚུལ་བྱེ་བྲག་ཏུ་བཤད་པའོ། །དང་པོ་ལ་གསུམ། རྩ་རྒྱུད་ཀྱི་གླེང་གཞིའི་གསང་བ་ཞེས་པའི་ཚིག་གིས་བསྟན་པའི་ལམ་རིམ་དང་། ལེའུ་ལྔ་བཅུ་རྩ་གཅིག་པའི་དེ་ཁོ་ན་ཉིད་བཅུ་བཞིས་བསྟན་པའི་ལམ་རིམ་དང་། བཤད་རྒྱུད་ཀུན་སྤྱོད་ནས་གསུངས་པའི་ལམ་གྱི་རིམ་པའོ། །དང་པོ་ནི། རྩ་རྒྱུད་ཀྱི་ཐོག་མར། དེ་ནས་གསང་བ་བཤད་བྱ་བ། །ཞེས་བྱ་བའི་གསང་བ་ཞེས་པའི་ཚིག་ངེས་དོན་དུ་བཤད་ན། བསྐྱེད་པའི་རིམ་པ་དང་། རྫོགས་པའི་རིམ་པ་དང་། དེ་དག་གི་བསྒྲུབས་པའི་འབྲས་བུ་གསུམ་བསྟན་པ་ལས། དང་པོ་ནི། གསང་བ་མཆོག་གི་དགེས་པ་ན། །ཞེས་སོགས་ཚིག་བཅད་གཉིས་ཀྱི་སྟོན་ཏེ། འདི་ལ་རྟེན་ལ་སྦྱར་བ་དང་། བརྟེན་པ་ལ་སྦྱར་བ་གཉིས་ལས། དང་པོ་ནི། གསང་བ་མཆོག་གི་དགེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་པས་རྣལ་འབྱོར་པའི་རྟེན་རི་བོ་ཚང་ཚིང་རི་སུལ་ལ་སོགས་པ་སྟོན་ཅིང་། ལྷའི་རྟེན་མངལ་སྐྱེས་སྒོང་སྐྱེས་གང་བསྒོམ་ཡང་རླུང་གི་དཀྱིལ་འཁོར་ནས་རི་རབ་ཀྱི་བར་བསྟན་ནོ། །ཡང་ལྷའི་རྟེན་ཐུན་མོང་མ་ཡིན་པ་ཆོས་འབྱུང་ནས་གཞལ་ཡས་ཁང་གི་བར་ཡང་བསྟན་ནོ། །བརྟེན་པ་ལྷ་བསྐྱེད་པ་ལ། མཁའ་འགྲོ་ཀུན་དངོས་སེམས་པ་ནི། ཞེས་པ་ནས། དམ་ཚིག་སྤྱོད་པའི་སྤྱོད་ཡུལ་ཡིན། ཞེས་པའི་བར་ཚིག་རྐང་བ་དྲུག་གིས་མངལ་སྒོང་གཉིས་ཆར་གྱི་བསྐྱེད་རིམ་རྫོགས་པར་བསྟན་ནོ། །གཉིས་པ་རྫོགས་པའི་རིམ་པ་ལ་སྦྱར་ན། གསང་བ་མཆོག་གི་དགེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་པས་རྫོགས་རིམ་རིམ་བཞིའི་དང་པོ་ཤེས་བྱ་རྒྱུད་ཀྱི་རིམ་པ་བསྟན། སྒྲ་ཡི་ཚུལ་ལ་ངེས་འབྱུང་ཞིང་། །དམ་ཚིག་སྤྱོད་པའི་སྤྱོད་ཡུལ་ཡིན། །ཅེས་པས་སྔགས་ཀྱི་རིམ་པ་བསྟན། །མཁའ་འགྲོ་ཀུན་དངོས་སེམས་པ་ནི། །རྡོ་རྗེ་སེམས་དཔའ་བདེ་བའི་མཆོག །ཅེས་པས་ཡེ་ཤེས་ཀྱི་རིམ་པ་བསྟན། །འདི་ནི་རང་བྱུང་བཅོམ་ལྡན་པ། །མཁའ་འགྲོ་དྲྭ་བའི་སྡོམ་པ་ནི། །ཞེས་པས་གསང་བའི་རིམ་པ་བསྟན་ཏེ། དེ་ལྟར་ན་གསང་བ་ཞེས་དང་། དེའི་དོན་ཚིགས་བཅད་གཉིས་ཀྱིས་ལམ་གྱི་གསང་བ་བསྐྱེད་རྫོགས་གཉིས་ཀ་སྟོན་པས། འཁོར་ལོ་བདེ་མཆོག་གི་ལམ་གྱི་རིམ་པ་མ་ལུས་པ་བསྟན་ནོ། །གསུམ་པ་དེ་དག་གིས་བསྒྲུབས་པའི་འབྲས་བུ་གསང་བ་ནི། ཐུན་མོང་དང་མཆོག་གི་དངོས་གྲུབ་སྟེ། །སྔགས་བཟླས་བསམ་གཏན་ལ་སོགས་ལྡན། །ཆོ་གའི་སྦྱོར་ཉིད་ཡེ་ཤེས་ཀྱང་། །ཞེས་པས་བསྟན་ནོ། །གཉིས་པ་ནི། རྩ་རྒྱུད་ལེའུ་ལྔ་བཅུ་རྩ་གཅིག་པ་ལས། གོས་དང་ཕྱག་རྒྱ་ལྔ་ལ་སོགས། །ཤེས་རབ་ཡན་ལག་ཕུར་བུ་དྲ། །ཨཱ་ལི་ཀཱ་ལི་ཞེས་བརྗོད་པ། །རྒྱུ་སོགས་སྟོང་པ་སྔོན་འགྲོ་བ། །འཇུག་པ་སྒྲ་ལ་སོགས་པ་ནས། །ཇི་སྲིད་བསྡུས་པའི་སྦྱོར་ལྡན་ཞིང་། །བདུད་རྩི་ཚིམ་བྱེད་མྱ་ངན་འདས། །ལག་པའི་མཆོད་པ་དབང་བསྐུར་བ། །གོ་ཆ་ཆེན་པོས་ཡང་དག་བསྲུང་། །སྔགས་རྣམས་ཀུན་གྱིས་མཆོད་པ་ཡིན། དེ་ལྟར་དེ་ཉིད་བཅུ་བཞི་ནི། །མདོར་བསྡུས་ནས་ནི་བཤད་པ་ཡིན། །ཞེས་གསུངས་ཏེ། འདི་ཉིད་ལྷ་མངལ་སྐྱེས་ལྟར་ན། བསྐྱེད་རིམ་འབའ་ཞིག་གི་མཉམ་བཞག་རྗེས་སྤྱོད་དང་བཅས་ལ་སྦྱར་བ་དང་། ལྷ་སྒོང་སྐྱེས་ལྟར་ན། བསྐྱེད་རྫོགས་མ་ལུས་པ་སྦྱར་བ་གཉིས་ལས། འདིར་ཕྱི་མ་ལྟར་བཤད་ན། གོས་ནི་ཕན་འདོགས་པས་གོས་ཞེས་བྱ་སྟེ། བསྐྱེད་རིམ་གྱི་སྔོན་འགྲོ་ཚངས་པའི་གནས་བཞི་བསྒོམ་པ་ལ་སོགས་པའོ། །ཕྱག་རྒྱ་ལྔ་ལ་སོགས་པ་ནི་མཉམ་བཞག་གི་དུས་ཀྱི་དཔའ་བོ་དཔའ་མོ་རྣམས་ཀྱི་སྐུ་ལ་ཡོད་པའི་རྒྱན་ནོ། །ཤེས་རབ་ཡན་ལག་ནི་ཕུང་པོ་དང་ཁམས་དང་སྐྱེ་མཆེད་ཀྱི་དག་པ་དྲན་པའོ། །ཕུར་བུ་དྲ་བ་ནི་རྗེས་སྤྱོད་ཀྱི་དུས་སུ་ཚམ་རྔམ་སྔགས་ཀྱིས་སྲུང་བ་བྱེད་པའོ། །ཨཱ་ལི་ཀཱ་ལི་ཞེས་བརྗོད་པ་ནི་ངག་དག་པར་བྱེད་པ་སྟེ། དེས་མཚོན་ནས་ཐོག་མ་ཉིད་དུ་ལུས་ངག་ཡིད་གསུམ་དག་པར་བྱ་བའོ། །རྒྱུ་སོགས་བསོད་ནམས་ཀྱི་ཚོགས། སྟོང་པ་སྔོན་འགྲོ་བ་ཡེ་ཤེས་ཀྱི་ཚོགས་སོ། །འཇུག་པ་ནི་སེམས་ཅན་གྱི་དོན་ལ་འཇུག་ཅིང་སྤྲོ་བ་ཡིན་ལ། སྒྲ་ལ་སོགས་པས་ནི། སྟོང་པའི་ངང་ལས་འབྱུང་བ་རིམ་བརྩེགས་སྣ་ཚོགས་པདྨའི་བར་དུ་བསྐྱེད་པ་དང་། སྣ་ཚོགས་པདྨའི་ལྟེ་བར་ཨཱ་ལི་ལས་ཟླ་བ། དེའི་སྟེང་དུ་ཀཱ་ལི་ལས་ཉི་མ། དེའི་བར་དུ་ཧཱུྃ། ཉི་མའི་སྟེང་དུ་ཡི་གེ་གསུམ་རིམ་པ་བཞིན་དུ། དེའི་སྟེང་དུ་པདྨ། དེའི་སྟེང་དུ་ཟླ་བ། དེའི་སྟེང་དུ་ཧཱུྃ་སྟེ་ཡི་གེ་གསུམ་མས་རིམ་གྱིས་གཅིག་ལ་གཅིག་ཐིམ་ནས་ཧཱུྃ་གི་ཐིག་ལེ་ནཱ་དར་གྱུར་པའི་བར་ནི་སྒྲ་ཡིན་ལ། སོགས་པ་ཞེས་པའི་ནི་ནཱ་ད་སྒྲ་དེ་ཉི་ཟླའི་བར་གྱི་ཚུལ་ཧཱུྃ་ལ་ཐིམ་སྟེ། དེ་ཐམས་ཅད་གྱུར་པ་ལས། རྟེན་བརྟེན་པ་ཐམས་ཅད་དུས་གཅིག་ལ་བསྐྱེད་པའོ། །དེ་ནས་བརྩམ་ནས། ཇི་སྲིད་བསྡུས་པའི་སྦྱོར་ལྡན་ཞིང་ནི། སྤྲུལ་སྐུ་ལ་དམིགས་པའི་རྗེས་ལ་ལུས་དཀྱིལ་བསྒོམ་པ་དང་། ལོངས་སྤྱོད་རྫོགས་པའི་སྐུ་ལ་དམིགས་པ་དང་། བྱང་ཆུབ་ཀྱི་ཕྱོགས་ཀྱི་དག་པ་དྲན་པ་དང་། །ཆོས་ཀྱི་སྐུ་ལ་དམིགས་པའི་བར་དང་། ཡེ་ཤེས་སེམས་དཔའ་སྤྱན་དྲང་བའི་བར་བསྡུ་བའོ། །བདུད་རྩི་ཚིམ་བྱེད་ནི་མཆོད་པ་བྱེད་པའི་དུས་སུ་བདུད་རྩི་མྱོང་བའོ། མྱ་ངན་འདས་ནི་ཕྱག་རྒྱ་བཞི་དང་། རྡོ་རྗེ་སེམས་དཔའ་བསྡུ་བ་སོགས་རྫོགས་རིམ་བསྒོམ་པ་སྟེ། དེ་ལྟར་དེ་ཁོ་ན་ཉིད་བཅུ་པ་དེས་ནི་མཉམ་གཞག་ཁོ་ན་བསྟན་ཏོ། །ལག་པའི་མཆོད་པ་ལ་སོགས་པ་བཞི་ནི་རྗེས་སྤྱོད་ཁོ་ན་སྟེ། རྗེས་སྤྱོད་ཀྱི་དུས་སུ་ལག་མཆོད་བྱ་བ་དང་། དབང་བསྐུར་བ་ཁྲུས་ཀྱི་རྣལ་འབྱོར་བྱ་བ་དང་། རྗེས་ཀྱི་དུས་སུ་གོ་ཆ་ཆེན་པོས་བདག་ཉིད་བསྲུང་བ་དང་། རྩ་བའི་སྔགས་བརྗོད་པ་ལ་སོགས་པའི་སྔགས་རྣམས་ཀུན་གྱིས་མཆོད་པ་བྱ་བ་སྟེ། དེ་ལྟར་ན་འབྲས་བུ་འགྲུབ་པ་ལ་མི་བསླུ་ཞིང་། སྒྲུབ་པ་པོ་ལ་ཕན་འདོགས་པར་བྱེད་པ་དེ་ཁོ་ན་ཉིད་བཅུ་བཞི་པོ་དེ་ནི། བདེ་མཆོག་ཉུང་ངུའི་རྒྱུད་འདིར། འབུམ་ཕྲག་གསུམ་པའི་རྒྱུད་ལས། མདོར་བསྡུས་ནས་བཤད་པ་ཡིན་ནོ། །གསུམ་པ་ནི། བཤད་རྒྱུད་ཀུན་སྤྱོད་ལས་གསུངས་པའི་ལམ་གྱི་རིམ་པ་ལ་གཉིས་ཏེ། རྒྱུད་ཀྱི་བརྗོད་བྱ་མ་ལུས་པ་འཁྲུགས་བསྡེབས་པའི་ལམ་རིམ་དང་། ལམ་གྱི་དངོས་གཞི་ཉིན་ཞག་ཕྲུགས་གཅིག་ལ་ཇི་ལྟར་བྱ་བའི་ཚུལ་མདོར་བསྡུ་བའོ། །དང་པོ་ནི། རྣལ་འབྱོར་མ་ཀུན་ཏུ་སྤྱོད་པའི་བརྗོད་བྱ་ཐམས་ཅད་གཉིས་སུ་བསྡུ་བ་དང་། གསུམ་དུ་བསྡུ་བ་དང་། བཞིར་བསྡུ་བ་དང་གསུམ་ལས། །དང་པོ་ནི། དེ་བཞིན་གཤེགས་པའི་དབུགས་དབྱུང་དང་། རྡོ་རྗེ་འཛིན་པའི་དབུགས་དབྱུང་གཉིས་ཏེ། དེ་ཉིད་རྒྱུའི་དབང་དུ་བྱས་ན་ཀུན་རྫོབ་ཀྱི་བདེན་པ་ནི་དེ་བཞིན་གཤེགས་པའི་དབུགས་དབྱུང་། དོན་དམ་པའི་བདེན་པ་ནི་རྡོ་རྗེ་འཛིན་པའི་དབུགས་དབྱུང་། ལམ་གྱི་དབང་དུ་བྱས་ན་བསྐྱེད་རིམ་དང་། རྫོགས་རིམ་གཉིས། འབྲས་བུའི་དབང་དུ་བྱས་ན་གཟུགས་སྐུ་དང་། ཆོས་སྐུ་གཉིས་ལ་དབུགས་དབྱུང་གཉིས་སྦྱར་དགོས་ཏེ། ཀུན་སྤྱོད་ལས། རྒྱུད་འདི་ཡི་ནི་རྣལ་འབྱོར་པ། །བདེན་པ་གཉིས་ལ་ཡང་དག་བརྟེན། །ཞེས་དང་། ཀུན་སྤྱོད་ལེའུ་བཅུ་གསུམ་པ་ལས། བསོད་ནམས་ཡེ་ཤེས་ཚོགས་དག་ནི། །བདེན་པ་གཉིས་ལ་བརྟེན་པ་ཡིན། །ཞེས་དང་། ལེའུ་བཅུ་གཅིག་པ་ལས། བདེ་གཤེགས་དབུགས་དབྱུང་གསུངས་པ་ནི། །དག་པའི་ལུས་ནི་སྐྱོན་མེད་པ། །ཞེས་གསུངས་པས་སོ། །གཉིས་པ་ནི། ལམ་གྱི་ཀུན་ཏུ་སྤྱོད་པ་དང་། དེ་རྫོགས་པར་བྱེད་པ་ཡན་ལག་གི་ཀུན་ཏུ་སྤྱོད་པ་དང་། འབྲས་བུའི་ཀུན་ཏུ་སྤྱོད་པ་གསུམ་དུ་འདུས་སོ། །གསུམ་པ་ནི། དེའི་སྔོན་དུ་རྒྱུའི་ཀུན་སྤྱོད་སྔོན་དུ་སོང་བས་ཉམས་སུ་ལེན་པའི་རྟེན་གྱི་གང་ཟག་བགྲངས་ན་བཞིར་འགྱུར་རོ། །དེ་ལྟར་བཤད་ན་རྟེན་གྱི་གང་ཟག་ལ་གཉིས་ཏེ། ལམ་ལ་འཇུག་པ་དང་། ཞུགས་པའོ། །དང་པོ་ལ་གསུམ། མི་དགེ་བ་འབའ་ཞིག་སྤྱོད་པ་ལམ་དག་པ། ཕ་རོལ་ཏུ་ཕྱིན་པས་རྒྱུད་ཅི་རིགས་སྦྱངས་བ་དག་པ། རེས་སྡིག་པ། རེས་དགེ་བ་སྤྱོད་པ་འདྲེས་པ་སྟེ། དེ་སྐད་དུ། དག་དང་མ་དག་འདྲེས་པ་སྟེ། །སྒྲུབ་པ་པོ་ནི་གསུམ་དུ་གནས། །ཞེས་གསུངས་པས་སོ། །ལམ་ཞུགས་ལའང་གསུམ་སྟེ། བསྐྱེད་རིམ་འབའ་ཞིག་ལ་དགའ་བ་མཉེས་པར་བྱེད་པའི་སྒྲུབ་པ་པོ་དང་། རྫོགས་རིམ་འབའ་ཞིག་བསྒོམ་པ་རྣམ་པར་དག་པའི་སྒྲུབ་པ་པོ་དང་། ཟུང་དུ་འཇུག་པ་ལ་དགའ་བ་གསལ་བྱེད་ཡོན་ཏན་ལྡན་པ་ཞེས་བྱ་བ་སྟེ། དེ་ཡང་། མཉེས་བྱ་རྣམ་པར་དག་པ་དང་། །གསལ་བྱེད་ཡོན་ཏན་ལྡན་པའི་མི། །ཞེས་གསུངས་པ་ཡིན་ནོ། །ཡང་རྒྱུད་འདིར་ནི་གང་ཟག་གཉིས་ཏེ། སྤང་བར་བྱ་བ་དང་། བསྒྲུབ་པར་བྱ་བའི་གང་ཟག་གོ། །དང་པོ་ནི། ལེའུ་བཅུ་གཅིག་པ་ལས། ལྐུགས་ཤིང་གླེན་པ་སྡིག་དང་ལྡན། །བྱིས་པའི་ཤེས་པས་ཤེས་པ་ཅན། །སེམས་ཅན་ཡོངས་སུ་མ་སྨིན་དང་། །ཕྱི་རོལ་བསྟན་བཅོས་ཀྱིས་འཆལ་བ། །དེ་དག་ཀུན་གྱིས་མི་ཤེས་ཏེ། །མི་ཤེས་མུན་པས་ཁེབས་པ་དང་། །ཁེངས་པ་ལ་ནི་རྟག་དགའ་བ། །ང་རྒྱལ་ལ་སོགས་བདུན་སེམས་ལྡན། །དེ་དག་ཀུན་ཀྱང་སངས་རྒྱས་ཀྱི། །སྤྱོད་ཡུལ་གསང་བ་མི་ཤེས་སོ། །ཞེས་པའི་ཡན་ལག་གསུངས་པ་དང་། །སྒྲུབ་པའི་མཚན་ཉིད་ཀྱང་དེ་ཉིད་ལས། །བླ་མའི་རིམ་པ་ཇི་ལྟར་བསྟན། །གང་གིས་མྱུར་དུ་ཤེས་འགྱུར་བ། །སྐྱེ་བོ་བྱེ་བ་སྟོང་ཕྲག་ཏུ། །ང་ཡི་ཡེ་ཤེས་ཀྱིས་བསྐུལ་ཡིན། དད་པ་ཡང་དག་ལྡན་པ་དང་། །རྣལ་འབྱོར་སྤྱོད་ཚུལ་ལ་གནས་ཡིན། །ཞེས་གསུངས་ལ། ལེའུ་དང་པོ་ལ་རྣལ་འབྱོར་གྱི་དབང་ཕྱུག་ཅེས་གསུངས་སོ། །དང་པོ་ལམ་གྱི་ཀུན་ཏུ་སྤྱོད་པ་ལ་གསུམ། རྟེན་དང་བརྟེན་པར་བཅས་པ་བསྐྱེད་པ་ཕྱིའི་ཀུན་སྤྱོད་སྤྲུལ་པའི་སྐུ་ལམ་དུ་བྱེད་པ་དང་། ལུས་ལ་ལྷ་རྣམས་རྫོགས་པར་བསྒོམ་པ་ནང་གི་ཀུན་སྤྱོད་ལོངས་སྐུ་ལམ་དུ་བྱེད་པ་དང་། རྫོགས་པའི་རིམ་པ་ཉམས་མྱོང་དང་བཅས་པ་ནི་རྫོགས་པའི་ཀུན་སྤྱོད་ཆོས་སྐུ་ལམ་དུ་བྱེད་པའོ། །གཉིས་པ་དེ་རྫོགས་པར་བྱེད་པ་ཡན་ལག་གི་ཀུན་ཏུ་སྤྱོད་པ་ལ་གསུམ་སྟེ། དང་པོ་རྫོགས་པར་བྱེད་པའི་ཡན་ལག་དང་། གསུམ་ག་རྫོགས་པར་བྱེད་པའི་ཡན་ལག་དང་། དེ་དག་བརྟན་པར་བྱེད་པའི་སྤྱོད་པའོ། །དང་པོ་ལ་ལྔ་སྟེ། ཕུང་པོ་ཁམས་དང་སྐྱེ་མཆེད་སྦྱང་བསྒྱུར་དང་། ཚོགས་གཉིས་བསགས་པ་དང་། གོ་ཆ་བཅིང་བ་དང་། ཡེ་ཤེས་པ་དགུག་པ་དང་། དབང་བསྐུར་བའོ། །གཉིས་པ་ལ་ལྔ་སྟེ། སྔགས་མཆོད་དང་། །གསང་པའི་མཆོད་པ་དང་། དམ་ཚིག་ཅན་ལ་གཏོར་མ་སྦྱིན་པ་དང་། དམ་ཚིག་དང་། སྡོམ་པ་དང་། ཐུན་མོང་གི་བྱ་བ་བྱང་ཆུབ་ཀྱི་ཕྱོགས་ཀྱི་དག་པ་དང་། ཐུན་མཚམས་གྱི་ཕྱེ་བའོ། །འདི་ལའང་ལྔ་སྟེ། ཁམས་དང་རྒྱན་ཆའི་དག་པ་དང་། སུམ་བྷ་ནིའི་སྲུང་བ། སྤྱོད་ལམ་གྱི་རྣལ་འབྱོར། ཁ་ཟས་ཀྱི་རྣལ་འབྱོར། ཉལ་བ་དང་ལྡང་བའི་རྣལ་འབྱོར་རོ། །གསུམ་པ་ལ་རང་དོན་གྱི་སྤྱོད་པ་དང་། གཞན་དོན་ཕྱོགས་ལས་རྣམ་པར་རྒྱལ་བའི་སྤྱོད་པ་གཉིས་ལས། དང་པོ་ལ་གསུམ་སྟེ། བསྐྱེད་རིམ་བརྟན་པར་བྱེད་པ་སྤྲོས་བཅས་ཀྱི་སྤྱོད་པ། རྫོགས་རིམ་བརྟན་པར་བྱེད་པ་སྤྲོས་མེད་ཀྱི་སྤྱོད་པ། །གཉིས་ཀ་བརྟན་པར་བྱེད་པ་ཤིན་ཏུ་སྤྲོས་མེད་ཀྱི་སྤྱོད་པའོ། །གསུམ་པ་འབྲས་བུའི་ཀུན་ཏུ་སྤྱོད་པ་ལ། ཐུན་མོང་གི་དངོས་གྲུབ་དང་། མཆོག་གི་དངོས་གྲུབ་དང་། ཕྱག་རྒྱ་ཆེན་པོ་མཆོག་གི་དངོས་གྲུབ་གསུམ་སྟེ། དེ་ལྟར་ན་ཀུན་ཏུ་སྤྱོད་པ་ཞེས་པའི་ཚིག་དེ་ཉིད་ཀྱིས། འཁོར་ལོ་བདེ་མཆོག་གི་ལམ་དང་འབྲས་བུ་མ་ལུས་པ་བསྟན་ཅིང་། ལེའུ་གང་ནས་གང་འབྱུང་བ་ནི་རྒྱུད་ཀྱི་སྟེང་དུ་རྟོགས་པར་བྱའོ། །གཉིས་པ་ལམ་གྱི་དངོས་གཞི་ཉིན་ཞག་ཕྲུགས་གཅིག་ལ་ཇི་ལྟར་བྱ་བའི་ཚུལ་མདོར་བསྡུས་པ་ནི། ཀུན་སྤྱོད་ལེའུ་བཅུ་གཉིས་པ་ལས། འདུག་དང་ལྡང་བ་ཉིད་དང་ནི། །འཇུག་དང་རྫོགས་པ་ཉིད་དག་དང་། །བྱིན་གྱིས་བརླབ་དང་དབང་བསྐུར་དང་། །ཏིང་འཛིན་མཆོད་པ་བསྡུ་བ་ཡིན། །ཞེས་བྱ་བ་དེ་ཁོ་ན་ཉིད་བཅུ་སྟེ། དེ་ལ་གདུག་པ་ཞེས་བྱ་བ་ནི། ཚངས་པའི་གནས་བཞི་དང་། གཞི་སྦྱང་བསྒྱུར་དང་། སྲུང་བའི་འཁོར་ལོ་དང་། བསོད་ནམས་དང་ཡེ་ཤེས་ཀྱི་ཚོགས་བསགས་ནས་བདག་མེད་པ་ལ་བློ་ཅུང་ཟད་འདུག་པ་ཡིན་ནོ། །གཉིས་པ་ལྡང་བ་ནི། བྱང་ཆུབ་ཀྱི་སེམས་ཀྱི་རྒྱུན་གྱིས་སེམས་ཅན་གྱི་དོན་བྱའོ་སྙམ་པའི་བསམ་པས་འབྱུང་བ་རིམ་བརྩེགས་རི་རབ་དང་བཅས་པ་བསྒོམ་པའོ། །གསུམ་པ་འཇུག་པ་ནི། རི་རབ་ཀྱི་སྟེང་དུ་མངོན་པར་བྱང་ཆུབ་པ་ལྔ་ལས་རྟེན་དང་བརྟེན་པ་དུས་གཅིག་ཏུ་ཕྱིའི་དཀྱིལ་འཁོར་བསྒོམ་པའོ། །བཞི་པ་རྫོགས་པ་ནི། ལུས་ཀྱི་དཀྱིལ་འཁོར་རྫོགས་པར་བསྒོམ་པ་སྔགས་ཀྱི་བྱིན་གྱིས་བརླབ་པའོ། །ལྔ་པ་བྱིན་གྱིས་བརླབ་པ་ནི། ཕོ་ཉ་བསྲེ་བ། གོ་ཆ་བཅིང་པ། ཡེ་ཤེས་པ་དགུག་པ་རྣམས་ཡིན་ནོ། །དྲུག་པ་ནི། དབང་བསྐུར་ནས་རིགས་ཀྱི་བདག་པོས་རྒྱས་གདབ་པ་དང་བཅས་པའོ། །བདུན་པ་ཏིང་ངེ་འཛིན་ནི། བྱང་ཆུབ་ཀྱི་ཕྱོགས་ཀྱི་དག་པ་དྲན་པར་བྱས་ལ། ལྷའི་སྐུ་མདོག་དང་ཕྱག་མཚན་ལ་སེམས་ཅུང་ཟད་འཛིན་པ་ཡིན་ནོ། །བརྒྱད་པ་མཆོད་པ་ནི། སྔགས་ཀྱི་མཆོད་པ་དང་། ཕྱིའི་མཆོད་པ་དང་། བདུད་རྩིའི་མཆོད་པ་དང་། མཉེས་པའི་མཆོད་པ་དང་། ཡིད་ལས་བྱུང་བའི་མཆོད་པ་དང་། བསྟོད་པའི་མཆོད་པ་དང་། གསང་བའི་མཆོད་པ་སྟེ། དེ་རྣམས་བཟླས་པ་སྔགས་མཆོད་ཀྱི་ཁོངས་སུ་འདུ་ལ། གསང་བའི་མཆོད་པ་ནི་རྫོགས་པའི་རིམ་པར་འགྲོ་བའི་སྐབས་ཀྱང་ཡོད་དོ། །གཏོར་མའང་མཆོད་པའི་སྐབས་སུ་འདུ་བ་ཡིན་ཏེ། ཐུན་གོང་མ་རྣམས་ལ་གཏོར་མ་ཐུན་མཇུག་བསྡུ་བའི་རྗེས་ལ་གཏོང་ལ། ཐུན་ཐ་མ་ལ་ནི་གཏོར་མ་དང་དག་པ་དྲན་པའི་རྗེས་ལ་བསྡུ་བ་བསྒོམ་པ་ཡིན་ནོ། །ཐུན་མཚམས་ཀྱི་བྱ་བ་ལ། ཁ་ཟས་དང་། སྤྱོད་ལམ་དང་། ཕྱི་མཆོད་དང་། ལག་མཆོད་ཀྱང་མཆོད་པའི་ཁོངས་སུ་བསྡུ་ལ། ཚེས་བཅུའི་མཆོད་པའང་དེར་འདུའོ། །དགུ་པ་བསྡུ་བ་ཞེས་བྱ་བ་ནི་རྫོགས་པའི་རིམ་པ་སྟེ། རྡོ་རྗེ་སེམས་དཔའ་བསྡུ་བའི་རིམ་པས་དཀྱིལ་འཁོར་བསྡུས་ལ། ཐུན་གོང་མ་རྣམས་ལ་ནི། དེ་ལས་ལངས་ལ་དག་པ་དྲན་པ་བྱེད་ལ། ཐུན་ཐ་མ་ལ་ནི་དག་པ་རྗེས་དྲན་གྱི་རྗེས་ལ་རྡོ་རྗེ་སེམས་དཔའི་བསྡུ་བ་བྱས་ནས་དེའི་ངང་ལ་ཉལ་བའི་རྣལ་འབྱོར་བྱེད་པ་ཡིན་ནོ། །བཅུ་བ་ཡིན་ཞེས་པ་ནི་ངེས་པ་སྟེ། དག་པ་ནི་ཁམས་ཀྱི་དག་པ་དང་། རྒྱན་ཆའི་དག་པ་བྱས་ལ། དཀྱིལ་འཁོར་གྱི་འཁོར་ལོ་བསྡུས་ཏེ་ཚམ་རྔམས་སྔགས་ཀྱིས་བསྲུངས་ལ། སྤྱོད་ལམ་གྱི་རྣལ་འབྱོར་བྱེད་པ་ཡིན་ནོ་ཞེས་རྗེ་བཙུན་རིན་པོ་ཆེ་གྲགས་པ་རྒྱལ་མཚན་གྱིས་གསུངས་སོ། །གཉིས་པ་ནི། དེ་ལྟ་བུའི་རྒྱུད་སྡེ་ཟབ་མོའི་དགོངས་པ་སྤྱི་དང་། ཁྱད་པར་རྣལ་འབྱོར་མ་ཀུན་ཏུ་སྤྱོད་པའི་རྒྱུད་ལ་བརྟེན་ནས་གྲུབ་ཆེན་ལཱུ་ཧི་པའི་ཞལ་སྔ་ནས་བསྐྱེད་རྫོགས་གཉིས་ཀའི་སྙིང་པོ་བསྡུས་པ་དཔལ་མངོན་པར་རྟོགས་པ་ཞེས་བྱ་བའི་གཞུང་འདི་མཛད་པ་སྟེ། འདིའི་དོན་ཉེ་བར་བསྡུ་ན་བཞི། གང་དུ་བསྒོམ་པའི་གནས། གང་གིས་སྒོམ་པའི་གང་ཟག །དེས་བསྒོམ་པའི་ལམ། ལམ་དེས་གྲུབ་པའི་འབྲས་བུའོ། །དང་པོ་ནི། རིའི་སུལ་དང་། ཆུ་བོའི་ངོགས་དང་། ཤིང་གཅིག་གི་དྲུང་སོགས་མདོར་ན་དབེན་ཞིང་ཡིད་དང་མཐུན་པའི་གནས་ཇི་ལྟར་རིགས་པའོ། །གཉིས་པ་ནི། གཞུང་ལས། དང་པོར་རེ་ཞིག་རྣལ་འབྱོར་པའི་དབང་ཕྱུག་གིས་ཞེས་གསུངས་པའི་དོན་འཕགས་པ་རིན་པོ་ཆེས། བྱང་ཆུབ་སེམས་བརྟན་དབང་རབ་ཐོབ། །སྔགས་རིག་རྣལ་འབྱོར་དབང་ཕྱུག་གིས། །ཞེས་གསུངས་པ་ལྟར། ངེས་འབྱུང་དང་སྙིང་རྗེ་ཆེན་པོས་རྒྱུད་ལེགས་པར་སྦྱངས་པས་བྱང་ཆུབ་ཀྱི་སེམས་རིན་པོ་ཆེ་ལ་བརྟན་པ་ཐོབ་པ། དཔལ་འཁོར་ལོ་བདེ་མཆོག་གི་དཀྱིལ་འཁོར་དུ་དབང་བསྐུར་བ་རྫོགས་པར་ཐོབ་ཅིང་། དབང་དུས་སུ་ཁས་བླངས་པའི་དམ་ཚིག་དང་སྡོམ་པ་རྣམ་པར་དག་པ། གསང་སྔགས་ཀྱི་རྒྱུད་སྡེའི་དོན་ཐོས་བསམ་གྱིས་གཏན་ལ་ཕབ་པས་ཇི་ལྟ་བ་བཞིན་རིག་པ་སློབ་པའི་རྣལ་འབྱོར་པས་གཞན་དོན་དུ་རྫོགས་པའི་བྱང་ཆུབ་ཚེ་འདི་ཉིད་ལ་དོན་དུ་གཉེར་བའི་བློས་རིམ་པ་གཉིས་ཀྱི་ལམ་འདིར་འཇུག་པར་བྱའོ། །གསུམ་པ་ནི། པཎ་གྲུབ་ནཱ་རོ་ཏ་པའི་སློབ་བཤད་ཀྱི་མན་ངག་འཛིན་པ་བལ་པོ་ཕམ་མཐིང་པ་ཡབ་སྲས་དང་། མལ་གྱོ་བློ་གྲོས་གྲགས་པའི་དགོངས་པ་རྗེ་བཙུན་རིན་པོ་ཆེ་གྲགས་པ་རྒྱལ་མཚན་གྱི་ཞལ་ནས་འདི་ལྟར་གསུངས་ཏེ། ལམ་མངོན་པར་རྟོགས་པ་ནི་བཞིས་བཅིངས་པ་སྟེ། མཉམ་པར་གཞག་པའི་རྣལ་འབྱོར། སྤྱོད་ལམ་གྱི་རྣལ་འབྱོར། གཏོར་མའི་རྣལ་འབྱོར། ཁ་ཟས་ཀྱི་རྣལ་འབྱོར་རོ། །ཉལ་བའི་རྣལ་འབྱོར་ནི་རྫོགས་པའི་རིམ་པའི་ཁོངས་སུ་འདུ་ལ། ལྡང་བའི་རྣལ་འབྱོར་དང་། ཁྲུས་ཀྱི་རྣལ་འབྱོར་གཉིས་ནི་བསྐྱེད་རིམ་གྱི་སྔོན་འགྲོ་ཡིན་ཞིང་། དག་པ་རྗེས་སུ་དྲན་པ་ནི་ཁ་ཅིག་སྤྱོད་ལམ་གྱི་རྣལ་འབྱོར་གྱི་ཁོངས་སུའང་བསྡུ་མོད་ཀྱི། འདིར་བསྐྱེད་རིམ་བརྟན་པར་བྱེད་པ་ཡིན་པས་མཉམ་གཞག་གི་ཁོངས་སུ་བསྡུའོ། །དང་པོ་མཉམ་པར་གཞག་པའི་རྣལ་འབྱོར་ལ་གཉིས་ཏེ། བསྐྱེད་པའི་རིམ་པ་དང་། རྫོགས་པའི་རིམ་པའོ། །དང་པོ་ལ་གཉིས་ཏེ། བདག་ཉིད་སངས་རྒྱས་སུ་བསྐྱེད་པ་ལ་མཆོད་པ་དང་། བཟླས་པའི་རྣལ་འབྱོར་རོ། །དང་པོ་ལ་གསུམ་སྟེ། རྒྱས་པ་ལ་དགའ་བས་ཇི་སྙེད་ཡོད་པའི་ཆོས་ཇི་ལྟ་བ་བཞིན་དུ་བསྒོམ་པ་དང་། འབྲིང་ལ་དགའ་བས་ཇི་ལྟ་བ་བཞིན་བསྒོམ་པ་དང་། བསྡུས་པ་ལ་དགའ་བས་རང་གི་ལུས་ལ་ཇི་ལྟར་གྲུབ་པ་ཙམ་ཞིག་བསྒོམ་པའོ། །ཞེས་གསུངས་པའི་དང་པོ་རྒྱས་པར་བསྒོམ་པ་ལ་གཉིས། བདག་ཉིད་སངས་རྒྱས་སུ་བསྐྱེད་པ་དང་། དེ་ལ་མཆོད་པའོ། །དང་པོ་ལ་གཉིས། རྒྱུ་ཚོགས་གཉིས་བསགས་པ་དང་། འབྲས་བུ་ལྷ་བསྐྱེད་པའོ། །དང་པོ་ལ་གཉིས། བསོད་ནམས་ཀྱི་ཚོགས་བསག་པ་དང་། ཡེ་ཤེས་ཀྱི་ཚོགས་བསྒོམ་པའོ། །དང་པོ་ལ་བཞི། ཉལ་བ་དང་ལྡང་བའི་རྣལ་འབྱོར་སྔོན་དུ་འགྲོ་བས་ཚངས་པའི་གནས་བཞི་བསྒོམ་པ། ཚོགས་གསོག་པའི་རྟེན་བདག་གི་གཞི་སྦྱང་བསྒྱུར། ཚོགས་བསག་པ་དངོས་ལ་ཚོགས་བསག་བཅུ་གསུམ། ཡེ་ཤེས་ཀྱི་ཚོགས་བསྒོམ་པ་ལ་བར་ཆད་མི་འབྱུང་བར་བྱ་བའི་ཕྱིར་སྲུང་བའི་འཁོར་ལོ་བསྒོམ་པའོ། །འབྲས་བུ་ལྷ་བསྐྱེད་པ་ལ་བཞི། དམ་ཚིག་སེམས་དཔའ་བསྐྱེད་པ། ཡེ་ཤེས་ཀྱི་འཁོར་ལོ་དགུག་བཞུག་བྱ་བ། གོ་ཆ་བཅིང་པ། དབང་བསྐུར་ཞིང་རྒྱས་གདབ་པའོ། །དེའི་དང་པོ་ལ་གཉིས། ཕྱིའི་དཀྱིལ་འཁོར་དག་པ་དང་བཅས་བསྒོམ་པ་དང་། ལུས་ཀྱི་དཀྱིལ་འཁོར་སྔགས་ཀྱི་བྱིན་གྱིས་བརླབ་པ་དང་བཅས་བསྒོམ་པའོ། །དེ་ལྟར་བདག་ཉིད་སངས་རྒྱས་སུ་བསྐྱེད་ནས་མཆོད་པ་དང་བཟླས་པས་མཉེས་པར་བྱ། རྫོགས་པའི་རིམ་པས་འོད་གསལ་དུ་བསྡུ་ཞིང་། སླར་ཡང་ལྷའི་སྐུར་ལངས་ཏེ་དག་པ་རྗེས་སུ་དྲན་པ་དང་། གཏོར་མ་དང་། སྤྱོད་ལམ་དང་། ཁ་ཟས་ཀྱི་རྣལ་འབྱོར་སོགས་ཅི་རིགས་པ་ལ་འཇུག་པར་བྱ་སྟེ། མདོར་ན་སྐྱབས་སུ་འགྲོ་བ་དང་། སེམས་བསྐྱེད་པ་དང་། རྡོ་རྗེ་སེམས་དཔའི་སྒོམ་བཟླས་རྣམས་ཁ་བསྐངས་ཏེ། རང་འཁོར་ལོ་བདེ་མཆོག་ཏུ་གསལ་གདབ། བདུད་རྩི་བྱིན་གྱིས་བརླབས་པ་མྱང་བ་ནས་བརྩམས་ཏེ་སྒྲུབ་ཐབས་རྒྱས་པ་ནས་ཇི་ལྟར་གསུངས་པ་བཞིན་ཉམས་སུ་བླང་བ་ཡིན་ནོ། །གཉིས་པ་འབྲིང་དུ་བསྒོམ་པ་ནི། ཉལ་བ་དང་ལྡང་བའི་རྣལ་འབྱོར་སྔོན་དུ་འགྲོ་བས་དགའ་བ་གསུམ་གྱི་རྣལ་འབྱོར་དང་། སེམས་བསྐྱེད་པ་དང་། རང་གི་ལུས་གདོད་ནས་གྲུབ་པའི་དཀྱིལ་འཁོར་གྱི་འཁོར་ལོ་དྲན་པ་དང་། བླ་མ་ལ་གསོལ་བ་གདབ་ཅིང་སྲུང་བའི་འཁོར་ལོ་བསྒོམ་པ་ཙམ་སྔོན་དུ་འགྲོ་བས་ལུས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་བསྒོམ། སྔགས་ཀྱིས་བྱིན་བརླབ། དག་པ་དྲན་པར་བྱ་བའམ་མ་བྱས་ཀྱང་རུང་། ཡེ་ཤེས་པ་བཅུག་ཅིང་གོ་ཆ་བཅིང་བ་སོགས་ལྷག་མ་རྣམས་རྒྱས་པའི་སྐབས་ལྟར་བྱའོ། །གསུམ་པ་བསྡུས་ཏེ་བསྒོམ་པའི་ཚུལ་འདིར་གསལ་བར་བརྗོད་ན་གཉིས། རྟེན་བསྐྱེད་པའི་རིམ་པ་དང་། བརྟེན་པ་རྫོགས་པའི་རིམ་པའོ། །དང་པོ་ལ་གསུམ། འཇུག་པའི་རིམ་པ། གནས་པའི་རིམ་པ། ལྡང་བའི་རིམ་པའོ། །དང་པོ་ལ་བརྒྱད། ཉལ་བའི་རྣལ་འབྱོར། ལྡང་བའི་རྣལ་འབྱོར། ཁྲུས་ཀྱི་རྣལ་འབྱོར། ཚད་མེད་པའི་རྣལ་འབྱོར། བླ་མའི་རྣལ་འབྱོར། བདག་ཉིད་སངས་རྒྱས་སུ་བསྐྱེད་པའི་རྣལ་འབྱོར། མཆོད་པའི་རྣལ་འབྱོར། བཟླས་པའི་རྣལ་འབྱོར་རོ། །དང་པོ་ཉལ་བའི་རྣལ་འབྱོར་ནི། མདངས་ནུབ་མོར་ཉལ་བའི་རྣལ་འབྱོར་ཆོས་ཐམས་ཅད་བསམ་གྱིས་མི་ཁྱབ་པ་རྡོ་རྗེ་སེམས་དཔའི་བསྡུ་བའི་རྫོགས་རིམ་སྟོང་པ་ཉིད་ཀྱི་ངང་དུ་ཉལ། །གཉིས་པ་ལྡང་བའི་རྣལ་འབྱོར་ནི། །ཐོ་རངས་ནམ་གྱི་བཞི་ཆའམ་བརྒྱད་ཆའི་དུས་སུ་བབ་པ་ན། ནམ་མཁའ་ནས་ཌཱ་མ་རུའི་སྒྲ་སྔགས་ཀྱི་གདངས་སུ་བསྒྲགས་པས་གཉིད་བསྐུལ་ནས། དེའི་སྐད་ཅིག་ལ་དཔལ་འཁོར་ལོ་བདེ་མཆོག་ཡབ་ཡུམ་གྱི་སྐུར་ལངས་ཏེ་ལྡང་བ་ནི་སྐུའི་དགའ་བ། བདུད་རྩི་རིལ་བུ་དངོས་སམ། ནང་མཆོད་ཨོཾ་ཨཱཿཧཱུྃ་ཧ་ཧོ་ཧྲཱིཿས་བྱིན་གྱིས་བརླབས་ཏེ་མྱོང་ཞིང་། ངག་ཏུ། ཤྲཱི་ཧེ་རུ་ཀ་ཨ་ཧཾ། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་བརྗོད་ཅིང་དོན་དྲན་པར་བྱ་བ་གསུང་གི་དགའ་བ། སྙིང་གར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་མཐིང་ནག །ཨ་ནི་རྣམ་པར་མི་རྟོག་པའི་ཡེ་ཤེས། ཟླ་བ་ནི་དག་པ་འཇིག་རྟེན་པའི་ཡེ་ཤེས། ཧཱུྃ་ནི་གཟུང་འཛིན་གཉིས་དང་བྲལ་བའི་ཡིད་ཡེ་ཤེས་ལྔའི་རང་བཞིན་ནོ་ཞེས་མོས་པ་ནི་ཐུགས་ཀྱི་དགའ་བའོ། །གསུམ་པ་ཁྲུས་ཀྱི་རྣལ་འབྱོར་ནི། བསམ་གཏན་གྱི་གྲོགས་སུ་འགྲོ་ན། ཆུ་གཙང་མའམ་རྡོ་རྗེའི་ཆུས་དབང་ལྷ་སྤྱན་དྲངས་པས་ཁྲུས་མཛད་པར་བསམས་ལ། ཇི་ལྟར་བལྟམས་པ་སོགས་བརྗོད་ཅིང་ཁྲུས་བྱའོ། །བཞི་པ་ཚད་མེད་པའི་རྣལ་འབྱོར་ནི། བདེ་བའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་འདུག་སྟེ། སྐྱབས་ཡུལ་འཁོར་ལོ་སྡོམ་པའི་རྣམ་པར་གསལ་བཏབ་ལ། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོ། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག །རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་ཅི་ནུས་ཀྱི་མཐར་ཐལ་མོ་སྦྱར་ཏེ། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་བདག་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། སྐྱབས་ཡུལ་རྣམས་འོད་དུ་ཞུ་ནས་རང་ལ་ཐིམ་པར་བསམ། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བདག་གིས་ལམ་ཟབ་མོ་ཉམས་སུ་བླང་བར་བགྱིའོ། །ཞེས་ལན་གསུམ་གྱིས་སེམས་བསྐྱེད། སྤྲོ་ན་རྡོར་སེམས་སྒོམ་བཟླས་ཀྱང་མ་རྒྱུད་སྤྱི་ལྟར་བྱའོ། །ལྔ་པ་བླ་མའི་རྣལ་འབྱོར་ནི། རང་གི་སྤྱི་བོར་པདྨ་དང་ཟླ་བའི་གདན་ལ་སྐད་ཅིག་གིས་རྩ་བའི་བླ་མ་སངས་རྒྱས་རྡོ་རྗེ་ཆོས་ཀྱི་རྣམ་པ་ཅན། སྐུ་མདོག་དམར་པོ་རྡོ་རྗེ་དང་དྲིལ་བུ་འཛིན་པ། དར་དང་རིན་པོ་ཆེ་དང་རུས་པའི་རྒྱན་གྱིས་བརྒྱན་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། སྐྱབས་གནས་ཐམས་ཅད་འདུས་པའི་ངོ་བོར་གྱུར་པར་བསམས་ལ། གང་གི་དྲིན་གྱིས་བདེ་ཆེན་ཉིད། སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །ཅེས་དང་། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེ་ལ་གསོལ་བ་འདེབས་སོ། །བདག་གི་རྒྱུད་བྱིན་གྱིས་བརླབ་ཏུ་གསོལ། ཅེས་མོས་གུས་དྲག་པོས་གསོལ་བ་བཏབ་པས། བླ་མ་འོད་དུ་ཞུ་ནས་རང་ལ་ཐིམ་པས་རང་གི་ལུས་ངག་ཡིད་གསུམ་དང་བླ་མའི་སྐུ་གསུང་ཐུགས་དབྱེར་མེད་དུ་གྱུར་པར་བསམས་ལ། ཆོས་ཐམས་ཅད་རང་གི་སེམས་ཀྱི་རྣམ་འཕྲུལ་དང་། དེའང་སྒྱུ་མ་ལྟ་བུ་དང་། རང་བཞིན་མེད་པའི་སྟོང་ཉིད་དུ་ཤེས་པའི་ངང་ལ་མཉམ་པར་གཞག །དྲུག་པ་བདག་ཉིད་སངས་རྒྱས་སུ་བསྐྱེད་པ་ནི། འོག་གི་རླུང་གིས་རང་གི་ལུས་ལ་གདོད་ནས་གྲུབ་པའི་ལྟེ་བའི་ཨྃ་མས་ཡར་ཕུལ་བ་ནི་ཚུལ། ལྟག་པའི་རླུང་གིས་སྤྱི་གཙུག་གི་ཧྃ་ཡས་མར་ཕུལ་བ་ནི་སྒྲ་སྟེ། དེ་ལྟར་སྒྲ་ཚུལ་གཉིས་སྙིང་གར་འདྲེས་པའི་རྐྱེན་གྱིས་སྐད་ཅིག་གིས་རྟེན་དང་བརྟེན་པར་བཅས་པའི་དཀྱིལ་འཁོར་ཅིག་ཅར་དུ་གྱུར་པ་ནི། རྐང་མཐིལ་རླུང་གི་དཀྱིལ་འཁོར། སུམ་མདོ་མེ། ལྟོ་བ་ཆུ། སྙིང་ག་ས། སྒལ་ཚིགས་རིའི་རྒྱལ་པོ་རི་རབ། མགོ་བོ་རི་རབ་ཀྱི་སྟོད། དཔྲལ་བ་དང་། ལྟག་པ་རྣ་བ་གཉིས་སྣ་ཚོགས་རྡོ་རྗེ། ཀླད་པ་དཀར་པོ་ཟླ་བ། ཀླད་ཁྱིམ་དམར་པོ་ཉི་མ། དེ་གཉིས་ཀྱི་བར་ན་གནས་པའི་ཧྃ་ཡིག་ནི་ཡི་གེ་ཧཱུྃ་རྡོ་རྗེ་སེམས་དཔའི་རང་བཞིན། ལུས་འདོམ་གང་གྲུ་བཞི་ནི་གཞལ་ཡས་ཁང་པ་གྲུ་བཞི། སྙིང་ག་ཆོས་ཀྱི་འཁོར་ལོ་ནས་འབྱུང་བ་བཞིའི་རླུང་རྒྱུ་བའི་སྒོ་བཞི། རྐང་བརྒྱད་ཀ་བ་བརྒྱད། མིག་དང་། རྣ་བ་དང་། སྣ་དང་། ལྕེ་དང་། མཆུ་དང་། རྒྱུ་ལོང་ལ་སོགས་པ་ནི་གཞལ་ཡས་ཁང་གི་རྒྱན། རང་ཉིད་ཕྱི་དབྱིབས་ཀྱི་ལུས་དང་སྙིང་གའི་ནང་གི་ཧཱུྃ་གཉིས་ཀའང་བཅོམ་ལྡན་འདས་ཧེ་རུ་ཀ་སྐུ་མདོག་སྔོན་པོ། ཞལ་བཞི་ཕྱག་བཅུ་གཉིས་པ། རྩ་ཞལ་སྔོན་པོ། གཡོན་ལྗང་། རྒྱབ་དམར། གཡས་སེར་བ། ཞལ་རེ་རེ་བཞིན་སྤྱན་གསུམ་གསུམ་དང་ལྡན་ཞིང་མཆེ་བ་བཞི་བཞི་གཙིགས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་གླང་པོ་ཆེའི་པགས་པ་བརྒྱངས་ཏེ་འཛིན་པ། གཡས་ཀྱི་གསུམ་པ་ན་ཌཱ་མ་རུ། །བཞི་པ་ན་དགྲ་སྟ། ལྔ་པ་ན་གྲི་གུག །དྲུག་པ་ན་མདུང་རྩེ་གསུམ་པ་སྒྲེང་བ། གཡོན་གྱི་གསུམ་པ་ན་རྡོ་རྗེས་མཚན་པའི་ཁ་ཊྭཱཾ་ག །བཞི་པ་ན་ཁྲག་གིས་བཀང་པའི་ཐོད་པ། ལྔ་པ་ན་རྡོ་རྗེའི་ཞགས་པ། དྲུག་པ་ན་ཚངས་པའི་མགོ་བོ་བསྣམས་པ། པདྨ་དང་ཉི་མའི་སྟེང་ན་ཞབས་གཡས་བརྐྱངས་པས་དུས་མཚན་མ་དམར་མོ་དང་། གཡོན་བསྐུམས་པས་འཇིགས་བྱེད་ནག་པོ་མནན་པ། རལ་པའི་ཐོར་ཚུགས་སྤྱི་བོར་བཅིངས་པའི་རྩེར་ཡིད་བཞིན་གྱི་ནོར་བུས་སྤྲས་ཤིང་གཡོན་ན་ཚེས་གཅིག་གི་ཟླ་བ་དང་མཚོགས་མའི་སྟེང་ན་སྣ་ཚོགས་རྡོ་རྗེས་མཚན་པ། དབུ་རེ་རེ་ལ་མི་མགོ་སྐམ་པོ་ལྔ་ལྔས་བརྒྱན་ཅིང་རློན་པ་ལྔ་བཅུའི་དོ་ཤལ་ཅན། རུས་པའི་རྒྱན་དྲུག་གིས་བརྒྱན་པ། སྟག་གི་པགས་པའི་ཤམ་ཐབས་གྲོལ་བ། །སྒེག་པ་དཔའ་བ་མི་སྡུག་པ། །དགོད་ཅིང་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་ཡི། །གར་དགུའི་ཉམས་དང་ལྡན་པ་ཉིད། །དེའི་པང་ན་ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་མ་སྤྱན་གསུམ་དང་ལྡན་པ། ཕྱག་གཡོན་པས་བདུད་དང་གདུག་པའི་ཁྲག་གིས་གང་པའི་ཐོད་པ་འཛིན་པས་ཡབ་ལ་འཁྱུད་པ། གཡས་པས་སྡིགས་མཛུབ་དང་བཅས་པའི་གྲི་གུག་གིས་ཕྱོགས་ཐམས་ཅད་དུ་བསྡིགས་པ། དབུ་སྐྲ་གྲོལ་བ། བྱིན་པ་གཉིས་ཀྱིས་བཅོམ་ལྡན་འདས་ལ་ལེགས་པར་འཁྱུད་ཅིང་། གཅེར་བུའི་མཆོག་མི་མགོ་སྐམ་པོ་ལྔའི་དབུ་རྒྱན་དང་མི་མགོ་སྐམ་པོ་ལྔ་བཅུའི་དོ་ཤལ་དང་རུས་པའི་རྒྱན་ལྔས་བརྒྱན་པ། གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །ཕྱིའི་ཧེ་རུ་ཀའི་ཕྱག་གཡས་ཀྱི་དང་པོ་ལ་མཁའ་འགྲོ་མ་ནག་མོ། །གཉིས་པ་ལཱ་མཱ་ལྗང་གུ། གཡོན་གྱི་དང་པོ་ལ་ཁཎྜ་རོ་ཧ་དམར་མོ། གཉིས་པ་ལ་གཟུགས་ཅན་མ་སེར་མོ། ཐམས་ཅད་ཀྱང་ཞལ་གཅིག་སྤྱན་གསུམ་མ། ཕྱག་བཞིའི་གཡས་ཌ་མ་རུ་དང་གྲི་གུག །གཡོན་ཁ་ཊྭཱཾ་ག་དང་ཐོད་པ་འཛིན་པ། སྐྲ་གྲོལ་བ། གཅེར་བུ་གཡས་བརྐྱངས་པས་བཞུགས་པ་ཕྱག་རྒྱ་ལྔས་བརྒྱན་པའོ། །གཡས་ཀྱི་གསུམ་པ་ན་ཁྭ་གདོང་མ་སྔོན་མོ། བཞི་པ་ན་འུག་གདོང་མ་ལྗང་གུ། ལྔ་པ་ན་ཁྱི་གདོང་མ་དམར་མོ། །དྲུག་པ་ན་ཕག་གདོང་མ་སེར་མོ། གཡོན་གྱི་གསུམ་པ་ན་གཤིན་རྗེ་བརྟན་མ་གཡས་སྔོ་གཡོན་སེར་བ། བཞི་པ་ན་གཤིན་རྗེ་ཕོ་ཉ་མོ་གཡས་སེར་གཡོན་དམར་བ། ལྔ་པ་ན་གཤིན་རྗེ་མཆེ་བ་མ་གཡས་དམར་གཡོན་ལྗང་བ། དྲུག་པ་ན་གཤིན་རྗེ་འཇོམས་མ་གཡས་ལྗང་གཡོན་སྔོ་བ་སྟེ། ཐམས་ཅད་ཀྱང་ཞལ་གཅིག་ཕྱག་བཞི་མ་གཡས་གཉིས་ན་ཌ་མ་རུ་དང་གྲི་གུག །གཡོན་གཉིས་ན་ཁ་ཊྭཱཾ་ག་དང་ཐོད་པ་འཛིན་པ། གཅེར་བུ་ཕྱག་རྒྱས་ལྔས་བརྒྱན་པ། ཡི་དྭགས་ཀྱི་གདན་ལ་ཞབས་གཡས་བརྐྱངས་པས་བཞུགས་ཤིང་སེམས་ཅན་གྱི་དོན་ལ་བརྩོན་པ། རྣལ་འབྱོར་མ་ཐམས་ཅད་ཀྱི་དཔྲལ་བར་རྡོ་རྗེའི་ཕྲེང་བས་བརྒྱན་པའོ། །དེ་ནས་སྤྱི་བོ་ལ་སོགས་པའི་གནས་རྣམས་སུ་པུ་ཛཱ་ཨོ་ཨ་གོ་རཱ་དེ་མཱ། ཀཱ་ཨོ་ཏྲི་ཀོ་ཀ་ལ་ཀཱ་ཧི། པྲེ་གྲྀ་སཽ་སུ་ནཱ་སི་མ་ཀུའི་དབྱིབས་སུ་གནས་པའི་ཁམས་དང་རྩ་རྣམས་དཔའ་བོ་དང་རྣལ་འབྱོར་མ་རྣམས་སུ་གྱུར་པ་ནི། སྤྱི་བོ་པུ་ལླི་ར་མཱ་ལ་ཡང་ཁཎྜ་ཀ་པཱ་ལི་དང་རབ་ཏུ་གཏུམ་མོ། །སྤྱི་གཙུག་ཛཱ་ལནྡྷ་ར་ར་མ་ཧཱ་ཀཾ་ཀཱ་ལ་དང་གཏུམ་པའི་མིག་ཅན་མ། རྣ་བ་གཡས་པ་ཨཽ་ཌྱ་ན་དུ་ཀངྐཱ་ལ་དང་འོད་ལྡན་མ། ལྟག་པ་ཨརྦུ་དང་མཆེ་བ་རྣམ་པར་གཙིགས་པ་དང་སྣ་ཆེན་མ་སྟེ་གནས། རྣ་བ་གཡོན་པ་གོ་དཱ་ཝ་རཱི་ར་སུར་ཝི་རེ་དང་བརྟན་པའི་བློ་ཅན་མ། སྨིན་མའི་དབུས་རཱ་མེ་ཤྭ་རཱི་ར་འོད་དཔག་མེད་དང་མིའུ་ཐུང་མ། མིག་གཉིས་དེ་ཝཱི་ཀོ་ཊར་རྡོ་རྗེའི་འོད་དང་ལངྐའི་དབང་ཕྱུག་མ། ཕྲག་པ་གཉིས་མཱ་ལ་ཝ་ར་རྡོ་རྗེའི་སྐུ་དང་ཤིང་གྲིབ་མ་སྟེ་ཉེ་བའི་གནས་རྣམས་ཐུགས་ཀྱི་འཁོར་ལོ་ཁ་དོག་སྔོན་པོ་མཁའ་ལ་སྤྱོད་པའོ། །མཆན་ཁུང་གཉིས་ཀཱ་མ་རཱུ་པ་ར་ཨངྐུ་རི་དང་ཨཻ་རཱ་ཝ་ཏཱི། ནུ་མ་གཉིས་ཨོ་ཏྲེ་རར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ་སྟེ་ཞིང་། ལྟེ་བ་ཏྲི་ཤ་ཀུ་ནེ་ར་དཔའ་བོ་ཆེན་པོ་དང་རླུང་གི་ཤུགས་ཅན་མ། སྣ་རྩེ་ཀོ་ས་ལར་རྡོ་རྗེ་ཧཱུྃ་མཛད་དང་ཆང་འཐུང་མ་སྟེ་ཉེ་བའི་ཞིང་། ཁ་ཀ་ལིངྒར་རབ་ཏུ་བཟང་མོ་དང་ཤྲཱ་མ་དེ་ཝཱི། མགྲིན་པ་ལམྦཱ་ཀ་ར་རྡོ་རྗེ་བཟང་པོ་དང་ཤིན་ཏུ་བཟང་མོ་སྟེ་ཚནྡོ། སྙིང་ག་ཀཱཉྩི་ར་འཇིགས་བྱེད་ཆེན་པོ་དང་རྟ་རྣ་མ། འདོམས་པ་ར་ཧི་མཱ་ལ་ཡར་མིག་མི་བཟང་དང་ཁ་གཱ་ན་ན་སྟེ་ཉེ་བའི་ཚནྡོ་རྣམས་གསུང་གི་འཁོར་ལོ་ཁ་དོག་དམར་པོ་ས་ལ་སྤྱོད་པའོ། །མཚན་མ་པྲེ་ཏ་པུ་རིར་སྟོབས་པོ་ཆེ་དང་འཁོར་ལོའི་ཤུགས་ཅན་མ། བཤང་ལམ་གྲྀ་ཧ་དེ་ཝར་རིན་ཆེན་རྡོ་རྗེ་དང་ཁཎྜ་རོ་ཧཱ་སྟེ་འདུ་བ། བརླ་གཉིས་སཽ་རཱ་ཥྟར་རྟ་མགྲིན་དང་ཤོཎྜི་ནཱི། བྱིན་པ་གཉིས་སུ་ཝརྞ་དཱི་བར་ནམ་མཁའི་སྙིང་པོ་དང་འཁོར་ལོའི་གོ་ཆ་མ་སྟེ་ཉེ་བའི་འདུ་བ། སོར་མོ་བཅུ་དྲུག་ནཱ་ག་རར་དཔལ་ཧེ་རུ་ཀ་དང་ཤིན་ཏུ་དཔའ་མོ། བོལ་གོང་སིནྡྷུར་པདྨ་གར་གྱི་དབང་ཕྱུག་དང་སྟོབས་ཆེན་མ་སྟེ་དུར་ཁྲོད། མཐེ་བོང་བཞི་མ་རོ་ལ་རྣམ་པར་སྣང་མཛད་དང་འཁོར་ལོས་སྒྱུར་མ། པུས་མོ་གཉིས་ཀུ་ལུ་ཏར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ་ཉེ་བའི་དུར་ཁྲོད་རྣམས་སྐུའི་འཁོར་ལོ་ཁ་དོག་དཀར་པོས་འོག་ན་སྤྱོད་པའོ། ཁཎྜ་ཀ་པཱ་ལི་ལ་སོགས་པའི་དཔའ་བོ་ཐམས་ཅད་ཞལ་གཅིག་ཕྱག་བཞི་པ་རལ་པའི་ཐོར་ཚུགས་ཀྱིས་མཚན་པའི་ཅོད་པན་ཅན། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། གཡས་འོག་མས་ཌཱ་མ་རུ། གཡོན་འོག་མས་ཁ་ཊྭཱཾ་ཀ་འཛིན་པ། སྐུ་ལ་ཕྱག་རྒྱ་དྲུག་གིས་བརྒྱན་པ་གཡས་བརྐྱང་པའི་གནས་པས་བཞུགས་པའོ། །རབ་ཏུ་གཏུམ་མོ་ལ་སོགས་པའི་དཔའ་མོ་རྣམས་ནི་ཞལ་གཅིག་ཕྱག་གཉིས་མ་གཡོན་ཐོད་པ་བསྣམས་པས་ཡབ་ལ་འཁྱུད་པ། གཡས་སྡིགས་མཛུབ་དང་བཅས་པས་གྲི་གུག་བསྣམས་པ། སྤྱན་གསུམ་པ་དྲག་མོའི་གཟུགས་ཅན་མ། སྐྲ་གྲོལ་བས་རྣམ་པར་མཛེས་མ། །གཉིས་སུ་མེད་པའི་སྦྱོར་བ་ལ་བརྩོན་པ། གཅེར་བུའི་མཆོག་རྒྱན་ལྔ་དང་ཚངས་པའི་སྐུད་པས་བརྒྱན་པ། མི་མགོའི་དོ་ཤལ་དང་སྐ་རགས་སིལ་སིལ་གྱི་སྒྲ་སྒྲོགས་པའོ། །དེ་ནས་སྔགས་ཀྱིས་བྱིན་གྱིས་བརླབ་པ་ནི། ངག་ཏུ་ཨོཾ་ཨཱཿཧཱུྃ་སརྦ་བཱི་ར་ཡོ་གི་ནཱི་ཀཱ་ཡ་ཝཱ་ཀ྄་ཙིཏྟ་བཛྲ་སྭ་བྷཱ་བ་ཨཏྨ་ཀོ྅་ཧཾ། ཞེས་བརྗོད་པས་བདག་གིས་བསྒོམས་པའི་ལུས་དཀྱིལ་དང་། འཛམ་བུའི་གླིང་ན་བཞུགས་པ་དང་། འོག་མིན་ན་བཞུགས་པའི་སྐུ་གསུང་ཐུགས་ཀྱི་འཁོར་ལོའི་དཔའ་བོ་དང་རྣལ་འབྱོར་མ་རྣམས་དབྱེར་མི་ཕྱེད་པའི་སྐུ་གསུང་ཐུགས་རྡོ་རྗེའི་རང་བཞིན་ངའོ་སྙམ་དུ་ང་རྒྱལ་བཟུང་། ཨོཾ་བཛྲ་ཤུདྡྷཿསརྦ་དྷརྨཱ་བཛྲ་ཤུདྡྷོཉ་ཧཾ་ཞེས་བརྗོད་པས་ཐམས་ཅད་སྟོང་པ་ཉིད་རྡོ་རྗེའི་རང་བཞིན་དུ་རྣམ་པར་དག་པའི་ངོ་བོ་བདག་ཡིན་ནོ་སྙམ་པ་ལན་གསུམ་དུ་བྱའོ། །དེ་ནས་ལྷ་ལ་ཞེན་པ་སྐྱེ་བ་དང་ལམ་ལ་སོམ་ཉི་ཟ་ན་བྱང་ཆུབ་ཕྱོགས་ཀྱི་དག་པ་དྲན་པ་སྐབས་འདིར་བྱ། མི་སྐྱེ་ན་མི་དགོས་ཞེས་གསུངས་པས་དག་དྲན་བྱེད་ན་རྒྱས་པར་མངོན་རྟོགས་རྒྱས་པའི་སྐབས་ལྟར་བརྗོད། བསྡུ་ན། བདག་གི་བློ་ལ་སྣང་བའི་ལྷ་སུམ་ཅུ་རྩ་བདུན་པོ་འདི་ཉིད་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ངོ་བོ་ཡིན་ལ། བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ཀྱང་ལྷ་སུམ་ཅུ་རྩ་བདུན་གྱི་ངོ་བོར་རྣམ་པར་དག་པ་ཡིན་ནོ། །ཞེས་བརྗོད་ཅིང་དོན་དྲན་པར་བྱའོ། །བདུན་པ་མཆོད་པའི་རྣལ་འབྱོར་ལ་དྲུག་ལས། དང་པོ་སྔགས་ཀྱི་མཆོད་པ་ནི། རྒྱས་པར་རྩ་སྔགས་དང་། སྙིང་པོ་དང་། ཉེ་སྙིང་གཉིས་མེད་ཞལ་བཞི་པ་དང་སྙིང་པོའི་རྣལ་འབྱོར་མ། དཔའ་བོ་དང་དཔའ་མོ་ཉེར་བཞི། ཡབ་ཀྱི་རྐང་བརྒྱད་དང་སྒོ་མཚམས་མ་བརྒྱད་རྣམས་སྤེལ་བའི་སོགས་ལན་རེ་བརྗོད་པས་ལྷ་གསལ་གདབ་པའི་ཚུལ་གྱིས་མཆོད། བསྡུ་ན་སྙིང་པོ་གཉིས་སུ་མེད་པ་བརྗོད་ཅིང་ལྷ་ཐམས་ཅད་གསལ་གདབ་པའམ། ཧཱུྃ་བྃ་མཱྃ་ཏཱྃ་པཱྃ་ལཱྃ། པཱུ་ཛ་ཨོ་ཨ་གོ་རཱ་དེ་མཱ། ཀ་ཨོ་ཏྲི་ཀོ་ཀ་ལ་ཀཱ་ཧི། པྲེ་གྲྀ་སཽ་སུ་ནཱ་སི་མ་ཀུ། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཞེས་ས་བོན་ཙམ་བརྗོད་པས་ཀྱང་རུང་བར་རྗེ་གྲོལ་མཆོག་སོགས་ཀྱིས་གསུངས་སོ། །གཉིས་པ་ཕྱི་མཆོད་ནི། དངོས་སུ་བཤམས་པའམ་ཡིད་ཀྱིས་སྤྲུལ་པ་ལ་དམིགས་ཏེ་སུམྦྷས་བསང་། སྭ་བྷཱ་བས་སྦྱང་། སྟོང་པའི་ངང་ལས་ཨཱཿབདུན་ལས་ཐོད་པའི་སྣོད་བདུན་དུ། ཧཱུྃ་ལས་མཆོད་ཡོན་ལ་སོགས་པ་དྭངས་ཤིང་ཐོགས་པ་མེད་པ་ཡེ་ཤེས་ཀྱི་བདུད་རྩིའི་རང་བཞིན་ཅན་གྱིས་གང་བར་བསམ་ཞིང་། ཨོཾ་བཛྲ་ཨརྒྷཾ་ཨཱཿཧཱུྃ་ནས། ཤབྡའི་བར་གྱིས་བརླབ། ཨོཾ་སརྦ་ཏ་ཐཱ་ག་ཏཱ་ཤྲཱི་ཙཀྲ་སམྦ་ར་མཎྜ་ལ་ཙཀྲ་སརྦ་བཱི་ར་ཡོ་གི་ནཱི་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ་པཱ་དྱཾ་པྲ་ཏཱི་ཙྪ་སྭཱ་ཧཱ། བཛྲ་པུཥྤེ་ཨཱཿཧཱུྃ་ནས། ནཻ་བི་དྱེའི་བར་སྦྱར་བས་ཆུ་གཉིས་སྔོན་འགྲོའི་ཉེར་སྤྱོད་དང་། ཨོཾ་བཛྲ་གཎྜེ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ། པྲ་ཙ་ལི་ཏེ། པྲཛྙཱ་པཱ་ར་མི་ཏཱ་ནཱ་ད་སཾ་བྷ་ཝེ་ཏེ། བཛྲ་དྷརྨཱ་ཧྲི་ད་ཡ་སནྟོཥ་ནི་ཧཱུྃ་ཧཱུྃ་ཧཱུྃ་ཧོ་ཧོ་ཧོ་ཨ་ཁཾ་སྭཱ་ཧཱ། །ཞེས་རོལ་མོ་འབུལ། །གསུམ་པ་བདུད་རྩིའི་མཆོད་པ་ནི། བདུད་རྩི་དངོས་སམ་ཡིད་ཀྱིས་སྤྲུལ་པ། ཨོཾ་ཨཱཿཧཱུྃ་ཧ་ཧོ་ཧྲཱིཿས་བྱིན་གྱིས་བརླབས་ནས། གཡོན་པའི་མཐེབ་སྲིན་གྱིས་སྤྱི་བོ་ནས་འཐོར་ཞིང་། དྲིན་ཅན་རྩ་བའི་བླ་མའི་ཞལ་དུ་ཨོཾ་ཨཱཿཧཱུྃ། བརྒྱུད་པའི་བླ་མ་རྣམས་ཀྱི་ཞལ་དུ་ཨོཾ་ཨཱཿཧཱུྃ། སྙིང་གའི་ཐད་ནས་འཐོར་ཏེ། ཧཱུྃ་བྃ་སོགས་ཀྱི་མཐར་ཨོཾ་ཨཱཿཧཱུྃ་ཞེས་དང་། རང་གི་ལྕེ་རྩེ། སྨིན་མཚམས། སྤྱི་གཙུག་རྣམས་སུ་བདུད་རྩིའི་ཐིག་ལེ་བྱས་ལ། ཨོཾ་ཨཱཿཧཱུྃ་ཞེས་བརྗོད་པས་ལུས་ཀྱི་ལྷ་ཐམས་ཅད་ཚིམ་པར་བསམ། ལྟེ་བའི་ཐད་ནས་འཐོར་ཏེ། ཨོཾ་ཤྲཱི་མ་ཧཱ་ཀཱ་ལཱ་ཡ་ཨོཾ་ཨཱཿཧཱུྃ། ཨོཾ་ཤྲཱི་དྷརྨ་པཱ་ལ་ཙ་ཏུ་རྨུ་ཁ་ཨོཾ་ཨཱཿཧཱུྃ། ཞེས་བརྗོད་དོ། །བཞི་པ་མཉེས་པའི་མཆོད་པ་ནི། རང་གི་ལྕེ་ལ་བདུད་རྩི་མྱངས་པས་ཕྱི་ནང་གི་ལྷ་ཐམས་ཅད་དགྱེས་ཤིང་། ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ་ཅེས་གསུངས་པར་བསམས་ལ། སྙིང་གར་རྣམ་ལྔ་འདོད་སྐོར་གྱི་མཐར་འཁྱུད་རྒྱ་བྱའོ། །ལྔ་པ་ཡིད་བྱུང་གི་མཆོད་པ་ནི། དཔྲལ་བར་ནམ་མཁའ་མཛོད་ཀྱི་ཕྱག་རྒྱ་བཅས་ལ། ན་མོ་ཆོས་ཀྱི་དབྱིངས་ཀྱི་བྱིན་གྱི་རླབས་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེ་རྣམ་པར་དག་པའི་བྱིན་གྱི་རླབས་དང་། གསང་སྔགས་དང་ཕྱག་རྒྱའི་མཐུ་དང་། བདག་གི་མོས་པ་དང་ཏིང་འཛིན་དང་སྨོན་ལམ་གྱི་དབང་གིས་འཇིག་རྟེན་གྱི་ཁམས་ན་བདག་པོས་ཡོངས་སུ་མ་བཟུང་བའི་མཆོད་པའི་བྱེ་བྲག་ཇི་སྙེད་ཡོད་པ་དང་། གཞན་ཡང་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ་བསམ་གྱིས་མི་ཁྱབ་པ་ཞིག་བླ་མ་དང་དཀྱིལ་འཁོར་གྱི་འཁོར་ལོ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཅེས་བརྗོད་ལ་སེ་གོལ་བརྡབ། ཡང་ཕྱག་རྒྱ་བཅས་ལ། ཨོཾ་སརྦ་བིཏ་པཱུ་ར་པཱུ་ར། སུ་ར་སུ་ར། ཨཱ་བརྟ་ཡ་ཨཱ་བརྟ་ཡ་ཧོ། ན་མཿས་སནྟ་བུདྡྷཱ་ནཱཾ། ཨ་བྷི་སྨ་ར་ཡེ་སྥ་ར་ཎ་ཨི་མཾ་ག་ག་ན་ཁཾ། དྷརྨ་དྷཱ་ཏུ་ཨཱ་ཀཱ་ཤ་ས་མནྟ་མཱཾ། སརྦ་ཏ་ཐཱ་ག་ཏ་ཨ་པ་རི་ཤོ་དྷ་ཡེ། མཎྜ་ལེ་མ་མ་པྲ་ཎི་དྷི་པུཎྱ་ཛྙཱ་ན་བ་ལ་ན། སརྦ་ཏ་ཐཱ་ག་ཏ་བ་ལོནྡྷ་བནྡྷ་སྭསྠཱ་ན་བ་ལེ་ན་ཙ་ཡེ་སྭཱ་ཧཱ། ཞེས་བརྗོད་དེ་ཕྱག་རྒྱ་བཀྲོལ་ཏེ་སེ་གོལ་ལན་གཉིས་བརྡབ་པར་བྱའོ། །དྲུག་པ་བསྟོད་པའི་མཆོད་པ་ནི། རྡོ་རྗེ་དྲིལ་བུ་འཛིན་པས་ཡབ་ཡུམ་གྱི་རྐང་བརྒྱད་ཚང་བར་བརྗོད། དེ་ཙམ་མི་ནུས་ན། ཆོས་དབྱིངས་རྣམ་དག་དབྱིངས་ལས་མ་གཡོས་ཀྱང་།།ཐབས་ཀྱིས་ཁྲོ་བོའི་སྐུར་སྟོན་གདུག་པ་འདུལ། །ཆེ་བའི་ཆེ་མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་ལ་ཕྱག་འཚལ་ལོ། །ཞེས་པས་བསྟོད་དོ། །བརྒྱད་པ་བཟླས་པའི་རྣལ་འབྱོར་ལ། དམིགས་པ་ནི། ཡབ་ཀྱི་ཐུགས་ཀའི་ཧཱུྃ་ལས་སྔགས་ཀྱི་ཕྲེང་བ་བྱུང་། ཡབ་ཀྱི་ཞལ་ནས་འཐོན། ཡུམ་གྱི་ཞལ་དུ་ཞུགས། སྐུའི་དབྱིབས་བརྒྱུད། ཡུམ་གྱི་པདྨ་ནས་ཡབ་ཀྱི་གསུང་བའི་རྡོ་རྗེའི་བུ་གར་ཞུགས། སྐུའི་དབྱིབས་བརྒྱུད་དེ་ཐུགས་ཀའི་ཧཱུྃ་ལ་ཐིམ་པའི་ཚུལ་གྱིས་རྒྱུན་མི་འཆད་པར་འཁོར་བས་བདེ་བ་ཆེན་པོའི་ཡེ་ཤེས་བརྟན་པར་བསམས་ལ། བཟླ་བྱའི་སྔགས་ནི། རིན་ཆེན་བཞི་པོ་གང་མོས་པ་གཉིས་མེད་དུ་བཟླ་བར་གསུངས་པས། ཨོཾ་ཤྲཱི་བཛྲ་ཧེ་ཧེ་རུ་རུ་ཀྃ་ཧུྃ་ཧཱུྃ་ཕཊ། ཌཱ་ཀི་ནཱི་ཛྭ་ལ་སམྦ་རི་བཛྲ་བཻ་རོ་ཙ་ནཱི་ཡེ་ཧུྃ་ཧཱུྃ་ཕཊ་སྭཱ་ཧཱ། ཞེས་ཡབ་ཡུམ་གྱི་སྙིང་པོ་གཉིས་སུ་མེད་པ་གཙོ་བོར་བཟླ། གཞན་རྣམས་བཟླ་བར་འདོད་ན་སྒྲུབ་ཐབས་རྒྱས་པར་ཤེས། མཐར་ཐལ་མོ་སྦྱར་ཏེ། བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱིས་བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། མྱུར་ཏུ་ཕྱག་རྒྱ་ཆེན་པོ་མཆོག་གི་དངོས་གྲུབ་དཔལ་འཁོར་ལོ་བདེ་མཆོག་གི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། ཞེས་དངོས་གྲུབ་བླངས་ལ་ཡིག་བརྒྱ་ལན་གསུམ་གྱིས་བརྟན་པར་བྱའོ། །གཉིས་པ་གནས་པའི་རིམ་པ་ནི། བསྐྱེད་རིམ་གྱི་སེམས་འཛིན་ཏེ། དེ་ལ་གཉིས། ང་རྒྱལ་དང་། རྣམ་པ་ལ་སེམས་འཛིན་པའོ། །དང་པོ་ནི། ལུས་གནད་བསྲང་། རླུང་རང་བབས་སུ་བཞག །དྲན་པ་རྩེ་གཅིག་ཏུ་བྱས་ཏེ། ང་ནི་ཐ་མལ་པ་ནམ་ཡང་མ་ཡིན། སྐྱོན་ཀུན་ཟད། ཡོན་ཏན་ཀུན་རྫོགས། འབྲས་བུས་བཅུ་གསུམ་རྡོ་རྗེ་འཛིན་པའི་ས་ལ་བཞུགས་པ་དཔལ་འཁོར་ལོ་སྡོམ་པ་དེ་དངོས་ཡིན་སྙམ་པའི་ང་རྒྱལ་བསྐྱེད། དེའང་དང་པོ་ཧྲིལ་གྱིས་བསྒྲིམ། བར་དུ་ལྷོད་ཀྱིས་ཀློད། ཐ་མ་རང་སོ་བཟུང་ཞེས་སྤེལ་མའི་ཚུལ་དུ་ཉམས་སུ་བླང་། གཉིས་པ་ལ་གཉིས། སྤྱི་དང་། བྱེ་བྲག་གོ །དང་པོ་ནི། རང་འཁོར་ལོ་སྡོམ་པར་གསལ་བའི་སྐུའི་རྣམ་པ་སྤྱི་ཙམ་པ་མེ་ལོང་དུ་གཟུགས་བརྙན་ཤར་བ་ལྟར་དབུ་ནས་ཞབས་ཀྱི་བར་བློ་ལ་གཅིག་ཅར་དུ་སྣང་བ་ལ་སྔར་བཞིན་སེམས་གཟུང་། གཉིས་པ་ལ་གཉིས། རྒྱན་མེད་དང་། རྒྱན་ཅན་ནོ། །དང་པོ་ནི། རྣམ་པ་སྤྱིའི་གསལ་སྣང་མ་ཤོར་བའི་ངང་སྤྱན་དབུས་མ་ནས་བརྩམས་ཏེ་ཡབ་ཡུམ་གྱི་སྐུའི་ཆ་ཤས་སོ་སོ་དང་། དེས་མཚོན་ཏེ་ལུས་དཀྱིལ་གྱི་ལྷ་སོ་སོ་ལ་སེམས་གཟུང་། གཉིས་པ་ནི། སོ་སོའི་རྒྱན་ཆ་རགས་ཕྲ་ནས་མེ་རི་དང་གདན་ཁྲིའི་བར་དུ་སེམས་བཟུང་ཞིང་། ཡུན་ཐུང་ལ་གྲངས་མང་བའི་ཚུལ་གྱིས་བསླབས་པས་གསལ་སྣང་མཐར་ཕྱིན་པར་བྱའོ། །ཐུན་མཐར་རྡོ་རྗེ་སེམས་དཔའི་བསྡུ་བས་འོད་གསལ་དུ་འཇུག་པ་ནི། རྒྱུ་མཚན་རྒྱས་པར་འོག་ཏུ་འབྱུང་ཞིང་། འདིར་དམིགས་པའི་ངོ་བོ་ཙམ་བརྗོད་ན། རང་གི་ལྟེ་བར་པད་ཟླའི་སྟེང་དུ་ཧཱུྃ་ལས་རྡོ་རྗེ་སེམས་དཔའ་དཀར་པོ་རྡོར་དྲིལ་འཛིན་ཅིང་། ཡུམ་རྡོ་རྗེ་སྙེམས་མ་དཀར་མོ་གྲི་ཐོད་འཛིན་པ་དང་མཉམ་པར་སྦྱོར་བ། གཉིས་ཀའང་རུས་པའི་རྒྱན་གྱིས་བརྒྱན་པའི་ཐུགས་ཀར་ཟླ་བའི་སྟེང་དུ་ཧཱུྃ། དེ་ལས་འོད་ཟེར་འཕྲོས་པས་ཕྱི་ནང་གི་ལྷ་ཐམས་ཅད་དང་། ཁམས་གསུམ་སྣོད་བཅུད་མ་ལུས་པ་གསལ་ཞིང་གཡོས་ཏེ། རང་ཧེ་རུ་ཀ་ཡབ་ཡུམ་ལ་ཐིམ། ཡུམ་ཡབ་ལ། ཡབ་ལྟེ་བའི་རྡོ་རྗེ་སེམས་དཔའ་ཡབ་ཡུམ་ལ། དེའི་ཡུམ་རྡོ་རྗེ་སེམས་དཔའ་ལ། དེ་ཐུགས་ཀའི་ཧཱུྃ་ནས་ནཱ་དའི་བར་དུ་ཐིམ་སྟེ། མཐར་ནཱ་དའང་འོད་གསལ་སྟོང་པ་ཉིད་ཀྱི་ངང་དུ་ཐིམ་པར་བསམས་ལ། གནས་ལུགས་བརྗོད་བྲལ་བསམ་གྱིས་མི་ཁྱབ་པའི་དབྱིངས་སུ་མཉམ་པར་བཞག །སླར་ཡང་རང་སྐད་ཅིག་གིས་ཧེ་རུ་ཀ་ཡབ་ཡུམ་ལུས་དཀྱིལ་གྱི་ལྷ་དང་བཅས་པའི་སྐུར་གྱུར་པར་བསམས་ལ་དག་དྲན་རྒྱས་བསྡུས་གང་རུང་བྱའོ། །གསུམ་པ་ལྡང་བའི་རིམ་པ་མཉམ་པར་མ་བཞག་པའི་རྣལ་འབྱོར་ལ་གསུམ། སྤྱོད་ལམ་གྱི་རྣལ་འབྱོར། གཏོར་མའི་རྣལ་འབྱོར། ཁ་ཟས་ཀྱི་རྣལ་འབྱོར་རོ། དང་པོ་ནི། རང་གི་གནས་རྣམས་སུ་ཟླ་བའི་དཀྱིལ་འཁོར་རེ་རེའི་སྟེང་དུ། ཡབ་ཀྱི་སྙིང་གར་ཨོཾ་ཧ་དཀར་པོ་རྡོ་རྗེ་སེམས་དཔའ། མགོ་བོར་ན་མ་ཧི་སེར་པོ་རྣམ་པར་སྣང་མཛད། སྤྱི་གཙུག་ཏུ་སྭཱ་ཧཱ་ཧུ་དམར་པོ་པདྨ་གར་གྱི་དབང་ཕྱུག །ཕྲག་པ་གཉིས་སུ་པཽ་ཥ་ཊ་ཧེ་ནག་པོ་ཧེ་རུ་ཀ །མིག་གཉིས་སུ་ཧཱུྃ་ཧཱུྃ་ཧོ་དམར་སེར་རྡོ་རྗེ་ཉི་མ། ཚིགས་ཆེན་བརྒྱད་ལ་ཕཊ་ཧཾ་ལྗང་གུ་རྟ་མཆོག་གི་ངོ་བོ། ཡུམ་གྱི་ལྟེ་བར་ཨོཾ་བྃ་དམར་མོ་རྡོ་རྗེ་ཕག་མོ། སྙིང་གར་ཧེཾ་ཡོཾ་སྔོན་མོ་གཤིན་རྗེ་མ། ཁར་ཧྲེཾ་མྃ་དཀར་མོ་རྨོངས་བྱེད་མ། སྤྱི་བོར་ཧྲཱིཾ་ཧྲཱིཾ་སེར་མོ་སྐྱོད་བྱེད་མ། སྤྱི་གཙུག་ཏུ་ཧུྃ་ཧཱུྃ་ལྗང་གུ་སྐྲག་བྱེད་མ། ཚིགས་ཆེན་བརྒྱད་ལ་ཕཊ་ཕཊ་དུད་ཀ་ཙཎྜི་ཀིའི་ངོ་བོར་མོས་པ་ནི་ཡབ་ཡུམ་གྱི་གོ་ཆ་དང་། པུ་ཛཱ་སོགས་ཉེར་བཞི་བརྗོད་པས་ལུས་དཀྱིལ་གྱི་ལྷ་རྣམས་རང་རང་གི་གནས་སུ་ཐིམ་པར་བསམ་པ་ནི་གོ་ཆ་ཆེན་པོ་དང་། སྡིགས་མཛུབ་དང་བཅས་སུམྦྷའི་སྔགས་བརྗོད་ཅིང་། ཕྱོགས་གཡོན་སྐོར་དང་། མཚམས་གཡས་སྐོར་དུ་སེ་གོལ་གཏོགས་པ་ཚམ་རྔམས་སྔགས་ཀྱི་སྲུང་བ་སྟེ། དེ་ལྟ་བུའི་སྲུང་བ་རྣམ་པ་གསུམ་གྱིས་བསྲུངས་ལ། རང་དང་སྣང་བ་ཐམས་ཅད་དཔལ་ཧེ་རུ་ཀའི་སྐུ་གསུང་ཐུགས་ཀྱི་ངོ་བོར་ཤེས་པས་སྔགས་ཟློས་བཞིན་ཏུ། དགེ་བ་འདི་ཡིས་མྱུར་དུ་བདག །འཁོར་ལོ་བདེ་མཆོག་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེའི་ས་ལ་འགོད་པར་ཤོག །འཆི་ཚེ་མགོན་དང་དཔའ་བོ་མ་ཚོགས་ཀྱིས། །མེ་ཏོག་གདུགས་དང་རྒྱལ་མཚན་ཐོགས་ནས་ཀྱང་། །རོལ་མོ་གླུ་དབྱངས་སིལ་སྙན་སོགས་མཆོད་ནས། །མཁའ་ལ་སྤྱོད་པའི་གནས་སུ་འཁྲིད་པར་ཤོག །ལྷ་མོ་ཚད་མ་དམ་ཚིག་ཚད་མ་དང་། །དེས་ཆོས་གསུང་ཡང་ཚད་མའི་མཆོག་ཡིན་པས། །བདེན་པ་དེས་ཀྱང་ལྷ་མོ་དེ་དག་གིས། །བདག་ལ་རྗེས་སུ་འཛིན་པའི་རྒྱུར་གྱུར་ཅིག །ཅེས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ཐམས་ཅད་ལྷ་དང་ཡེ་ཤེས་སུ་ཤེས་པས་དུས་འདའ་བར་བྱའོ། །གཉིས་པ་ནི། ཐོད་པ་ལ་སོགས་པའི་སྣོད་དུ་ཤ་ཆང་གི་དམ་རྫས་དང་བཅས་པའི་གཏོར་མ་བཤམས། འོད་གསལ་གྱི་ངང་ལས་ལྷ་སྐུར་ལྡངས་ཏེ། ནང་མཆོད་ཆུ་ཆང་དང་སུམྦྷས་བསང་། སྭབྷཱ་བས་སྦྱང་། རྒྱས་པར་མངོན་རྟོགས་རྣམས་ནས་འབྱུང་བ་ལྟར་རམ། བསྡུ་ན། ཨོཾ་ཨཱཿཧཱུྃ་ཧ་ཧོ་ཧྲཱིཿཧྲཱིཿས་བརླབ། མདུན་གྱི་ནམ་མཁར་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་དུར་ཁྲོད་ཆེན་པོ་བརྒྱད་དང་བཅས་པ་གསལ་བར་དམིགས་ལ། བདག་གི་སྙིང་གའི་ཧཱུྃ་ལས་འོད་ཟེར་འཕྲོས་ཏེ་དུར་ཁྲོད་བརྒྱད་ལ་ཕོག་པས་དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པ་ཆ་བརྒྱད་དུ་གྱུར་པར་བསམས་ལ་འབར་བའི་ཕྱག་རྒྱ་དང་ལྡན་པས་ངག་ཏུ་ཕཻཾ་ཞེས་བརྗོད་ཅིང་། སེམས་ཀྱིས་སྙིང་གའི་ཧཱུྃ་གི་འོད་ཀྱིས་ཡེ་ཤེས་ཀྱི་དཀྱིལ་འཁོར་ཆ་དགུ་སྤྱན་དྲངས་ལ། ཛཿཧཱུྃ་བྃ་ཧོཿ ཞེས་བརྗོད་པས་དཀྱིལ་འཁོར་ཆ་དགུ་ལ་དགུག་གཞུག་བཅིངས་དབང་དུ་བྱས། ཨོཾ་ཡོ་ག་ཞེས་སོགས་བརྗོད་ཅིང་རྣམ་ལྔ་འདོད་སྐོར་བྱ་སྟེ་བརྟན་པར་བྱའོ། །དེ་ནས་ལྷ་ཐམས་ཅད་ཀྱི་ལྗགས་ལ་ཧཱུྃ་ལས་རྡོ་རྗེ་སྦུ་གུ་ཅན་ཧཱུྃ་གིས་མཚན་པར་བསམ། གཏོར་མ་ལས་ཐོད་པ་བདུད་རྩིས་གང་བ་དུ་མ་ཆད་དེ་ཐམས་ཅད་ཀྱི་ཕྱག་ཏུ་བཞག་པས་གསོལ་བར་བསམ་ཞིང་ལག་པ་རྡོ་རྗེ་ཐལ་མོ་ཁ་ཕྱེ་ལ། ངག་ཏུ། ཨོཾ་བཛྲ་ཨཱ་རལླི་ཧོཿ ཛཿཧཱུྃ་བྃ་ཧོཿ བཛྲ་ཌཱ་ཀི་ནཱི་ས་མ་ཡ་སྟྭཾ་དྲི་ཤྱ་ཧོཿཨོཾ་ཨཱཿཧཱུྃ། ཞེས་ལན་ལྔ་བརྗོད་པས་འཁོར་ལོ་དགུ་ཚན་ལྔ་རིམ་པ་བཞིན་ཚིམ་པར་བསམས་ཏེ། །སྔགས་མཆོད་དང་། ཕྱི་ནང་གིས་མཆོད། བསྟོད་པ་ཅི་རིགས་ཀྱི་མཐར། ཧེ་རུ་ཀ་དཔལ་འཁོར་བཅས་རྣམས། མཆོད་སྦྱིན་གཏོར་མ་འདི་བཞེས་ལ་སོགས་ཀྱིས་འདོད་དོན་གསོལ། གཏོར་མ་གཉིས་པ་སོགས་ཡོད་ན་ཆོས་སྐྱོང་དང་། མཁའ་འགྲོ་སྤྱི་གཏོར་གྱི་ཆོ་གས་གཏང་། ཡི་གེ་བརྒྱ་པས་ནོངས་པ་བཟོད་པར་གསོལ་ཏེ། སྤྱན་དྲངས་པའི་གཏོར་མགྲོན་རྣམས་རང་བཞིན་གྱི་གནས་སུ་གཤེགས། མདུན་དུ་སྤྲུལ་པ་རྣམས་བདག་གི་ལུས་ལ་ཐིམ་པར་བསམ། དེ་ནས་དག་དྲན་དང་། གོ་ཆ་དགོད་པ་སོགས་སྔར་ལྟར་བྱའོ། །གསུམ་པ་ནི། ཁ་ཟས་ལ་ལག་པ་གཡོན་པའི་མཐེབ་སྲིན་གྱིས་རེག་སྟེ། ཨོཾ་ཨཱཿཧཱུྃ་ཞེས་བརྗོད་པས་བདུད་རྩིའི་རང་བཞིན་དུ་བརླབས་ལ་ནང་གི་སྦྱིན་སྲེག་གི་ཚུལ་དུ་ཚིམ་པར་རོལ་པའི་མཐར་བདག་མེད་པའི་ངང་དུ་ངལ་བསོ། ནུབ་མོ་ཉལ་བའི་ཚེ་རྡོ་རྗེ་སེམས་དཔའ་བསྡུ་བའི་རིམ་པས་འོད་གསལ་ལ་འཇུག །ཐོ་རངས་ལྡང་བའི་རྣལ་འབྱོར་གྱིས་ལངས་ཏེ་སྔར་བཞིན་དུ་རིམ་པ་གཉིས་ཀྱི་རྣལ་འབྱོར་ལ་བརྩོན་པར་བྱའོ། །བསྙེན་པ་བྱེད་ན་རྒྱས་པར་གཞན་དུ་ཤེས། བསྡུ་ན་མཚམས་དམ་དུ་བཅད། ཇི་སྐད་བཤད་པའི་མངོན་རྟོགས་ཐུན་བཞིའམ། གསུམ་དུ་བསྒོམས་ལ་ཡབ་ཡུམ་གྱི་སྙིང་པོ་འབུམ་ཕྲག་བཞི་ཁ་སྐོང་དང་བཅས་བཟླས་པས་ཀྱང་ལས་རུང་ཙམ་དུ་འགྱུར་བ་ཡིན་ནོ། །གཉིས་པ་བརྟེན་པ་རྫོགས་པའི་རིམ་པ་ནི། རྒྱས་པར་རྩ་དབུ་མ་ཆེ་བའི་ཁྲིད་ཡིག་ལྟར་ཉམས་སུ་བླང་བར་བྱ་ཞིང་། འདིར་གཞུང་གི་དངོས་བསྟན་བསྡུ་བ་གསུམ་གྱི་རྫོགས་རིམ་ཅུང་ཟད་བརྗོད་ན་གསུམ། རྩ་བའི་གཞུང་གིས་མདོར་བསྟན་པ། དེའི་དོན་རྒྱས་པར་བཀྲལ་བ། ཉམས་སུ་ལེན་པའི་ཚུལ་གྱིས་དོན་བསྡུ་བའོ། །དང་པོ་ནི། རྣལ་འབྱོར་མ་ཀུན་སྤྱོད་ཀྱི་རྒྱུད་དང་། གྲུབ་ཆེན་གྱི་གཞུང་ལས། ཨཱ་ལི་ཀཱ་ལི་མདུན་བསམས་ནས། །རྣལ་འབྱོར་ཆེན་པོ་ངལ་བསོ་སྟེ། །ཟླ་བའི་དཀྱིལ་འཁོར་རྫོགས་པ་ནི། །ལྟེ་བའི་རྩ་བར་གནས་པར་བསྒོམ། །ཡི་གེ་མཆོག་གི་གནས་གྱུར་པ། །དེ་ཡི་དབུས་སུ་རྣམ་པར་བསྒོམ། །སྐུ་གསུང་ཐུགས་ཀྱི་རྡོ་རྗེ་ཅན། །ལྷ་ཡི་སྐུ་ནི་བསྒོམ་པར་བྱ། །དེ་ནི་གཟུགས་ལས་འདས་པ་སྟེ། །དངོས་པོ་མེད་པའི་ཆོས་ཉིད་ཡིན། །དེ་ཡང་བསམ་གྱིས་མི་ཁྱབ་བསམ། །སེམས་ཉིད་བརྟག་པར་མི་བྱའོ། །བསམ་གྱིས་མི་ཁྱབ་དེ་བསམས་ནས། །དེ་ལས་གཟུགས་ནི་ཐོབ་པར་འགྱུར། །ཅེས་གསུངས་སོ། །གཉིས་པ་ནི། དེའི་དོན་རྗེ་བཙུན་རིན་པོ་ཆེ་གྲགས་པ་རྒྱལ་མཚན་གྱི་ཞལ་སྔ་ནས། དེ་བརྗོད་པ་ལ་གསུམ་སྟེ། རྡོ་རྗེ་སེམས་དཔའ་བསྡུ་བ་དང་། ཡི་གེ་བསྡུ་བ་དང་། ཐིག་ལེ་བསྡུ་བའོ། །དང་པོ་ནི། རྩ་བའི་དཔེ་ལྔ་དང་། ཡན་ལག་གི་དཔེ་དུ་མས་མཚོན་པ་སྟེ། དེའང་བསྐྱེད་པའི་རིམ་པའི་ཐུན་གྱི་མཇུག་ཏུ། བཅོམ་ལྡན་འདས་ཀྱི་ལྟེ་བར་པདྨ་འདབ་མ་བརྒྱད་པའི་ལྟེ་བར་ཟླ་བས་བརྒྱན་པར་བསྒོམ། དེར་ཧཱུྃ་ལས་བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་དཀར་པོ་རྡོ་རྗེ་དང་དྲིལ་བུ་འཛིན་པ། ཡུམ་རྡོ་རྗེ་སྙེམས་མ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པའི་ཚུལ་དུ་བཞུགས་པ། གཉིས་ཀའང་རུས་པའི་རྒྱན་གྱིས་བརྒྱན་པའི་ཐུགས་ཀར་ཟླ་བའི་སྟེང་དུ་ཡི་གེ་ཧཱུྃ་བསྒོམ། ཧཱུྃ་དེ་ལས་འོད་ཟེར་འཕྲོས་པས། རྡོ་རྗེ་སེམས་དཔའ་ཡབ་ཡུམ་དང་། ཕྱིའི་ཧེ་རུ་ཀ་ཡབ་ཡུམ་ནས་འཁོར་ལོ་ནང་མ་དེ་ནས་རིམ་གྱིས་ཇེ་གསལ་ཇེ་གསལ་ཁམས་གསུམ་སྣོད་བཅུད་ཐམས་ཅད་གསལ་བར་བྱས་ལ། དེའི་སྟོབས་ཀྱིས་ཐམས་ཅད་ཕྲིག་ཕྲིག་གཡོས་པར་བསམས་ཏེ། དེ་ནི་རྡོ་ཁབ་ལེན་གྱིས་ལྕགས་གཡོ་བ་ཞེས་བྱ་བའི་དཔེ་དང་པོ་ཡིན་ནོ། །དེ་ནས་ཁམས་གསུམ་སྣོད་བཅུད་ཐམས་ཅད་སྲུང་བའི་འཁོར་ལོ་ལ་བསྡུ་བ་ནས། བཅོམ་ལྡན་འདས་ཀྱི་ཞལ་བཞི་ལ་བསྡུ་བའི་བར་ཏེ། དཔེ་གཉིས་པ་ལྕི་བས་དངུལ་ཆུ་སྡུད་པ་ཞེས་བྱ་བ་ཡིན་ནོ། །འབྲིང་བསྡུས་གཉིས་ལ་ཕྱིའི་དཀྱིལ་འཁོར་མེད་པས་ཁམས་གསུམ་ལུས་ལ་སྡུད་པ་ཉིད་དཔེ་གཉིས་པ་ཡིན་ནོ། །དེ་ནས་བཅོམ་ལྡན་འདས་ཞལ་བཞི་ཕྱག་བཅུ་གཉིས་པ་ནི། ཞལ་གཅིག་ཕྱག་གཉིས་པར་བསྡུ་སྟེ། དཔེ་གསུམ་པ་རུས་སྦལ་ཡན་ལག་འཁུམས་པ་ཞེས་བྱ་བ་ཡིན་ནོ། །དེ་ནས་བདག་ཕྱིའི་ཧེ་རུ་ཀ་ཡབ་ཡུམ་ལ་བསྡུ། ཡབ་ལྟེ་བའི་རྡོ་རྗེ་སེམས་དཔའ་ཡབ་ཡུམ་ལ་བསྡུ། རྡོ་རྗེ་སྙེམས་མའང་ཡབ་ལ། ཡབ་ཧཱུྃ་ལ། ཧཱུྃ་གི་གདན་ཟླ་བ་ཞབས་ཀྱུ་ལ། ཞབས་ཀྱུ་ཁོག་པ་ལ། ཁོག་པ་མགོ་བོ་ལ། མགོ་བོ་ཟླ་ཚེས་ལ། ཟླ་ཚེས་ཐིག་ལེ་ལ་བསྡུ་སྟེ། དེ་ནི་དཔེ་བཞི་པ་སྐར་མདའ་གཅིག་ལ་གཅིག་ཐིམ་པ་ཞེས་བྱ་བ་ཡིན་ནོ། །དེ་ནས་ཐིག་ལེའང་ཇེ་ཕྲ་ཇེ་ཕྲ་མི་དམིགས་པ་བསམ་གྱིས་མི་ཁྱབ་པའི་ངང་ལ་གཞག་པར་བྱ་སྟེ། དེ་ནི་རྩ་བའི་དཔེ་ལྔ་པ་ལན་ཚྭ་ཆུ་ལ་ཐིམ་པ་ཞེས་བྱ་བ་ཡིན་ནོ། །དེ་ནས་ཡན་ལག་གི་དཔེ་ནི་ངོ་བོ་ཉིད་ཀྱི་སྟེང་དུ་གཏན་ལ་དབབ་སྟེ། གོང་གི་སྤྲོས་པ་རྣམས་ནི་ཆ་ལུགས་སམ། འོད་ཟེར་རམ། རླབས་ཞེས་བྱ་བ་ཡིན་ལ། བསམ་གྱིས་མི་ཁྱབ་པའི་ངོ་བོ་ཉིད་ནི་གར་མཁན་དངོས་སམ། ཉི་མའམ། རྒྱ་མཚོ་ཉིད་དང་འདྲ་བ་ཡིན་པས་ན་གར་མཁན་ཉིད་དང་ཆ་ལུགས་དང་། ཉི་མ་དང་འོད་ཟེར་དང་། མཚོ་དང་རླབས་དག་ངོ་བོ་ཉིད་ཀྱི་སྟེང་དུ་ནི་ཆུ་ལ་ཆུ་བཞག་པའམ། མར་ལ་མར་བཞག་པ་སྟེ་ཡན་ལག་གི་དཔེ་ལྔས་མཚོན་པ་ཡིན་ནོ། །དེའི་ངང་ལ་བློ་ཇི་ཙམ་གནས་པ་ཅིག་བཞག་ལ། ལྡང་བར་འདོད་ན་གོང་དུ་བསྟན་པའི་ལྡང་བའི་རྣལ་འབྱོར་གྱིས་ཧེ་རུ་ཀར་ལངས་ཏེ། དག་པ་རྗེས་སུ་དྲན་པ་བྱ་བ་ཡིན་ནོ། །རྡོ་རྗེ་སེམས་དཔའ་བསྡུ་བ་ཞེས་བྱ་བའི་རིམ་པ་འདི་ནི་བསྐྱེད་པའི་རིམ་པའི་རྗེས་ལ་ཅིས་ཀྱང་བསྒོམ་པ་ཡིན་ནོ། །རྡོ་རྗེ་སེམས་དཔའ་བསྡུ་བའོ། །ཡི་གེ་བསྡུ་བ་དང་། ཐིག་ལེ་བསྡུ་བ་འདི་གཉིས་ནི་བསྐྱེད་རིམ་གྱི་རྗེས་ལ་ཅིས་ཀྱང་འབྱུང་བའི་རྫོགས་རིམ་ནི་མ་ཡིན་ཏེ། རྣལ་འབྱོར་པ་བསྐྱེད་རིམ་ལ་བརྟེན་པའམ། ཡང་ན་ལས་དང་པོ་པ་ཉིད་ནས་ཀྱང་རུང་སྟེ། རླུང་དང་སེམས་ཀྱི་དམིགས་པ་ལ་བརྟེན་ནས་ཏིང་ངེ་འཛིན་གྱི་ཡེ་ཤེས་མྱུར་དུ་ཚོལ་བར་འདོད་པའི་རྟེན་ཡིན་པས། བསྐྱེད་པའི་རིམ་པ་རྒྱས་པར་བསྒོམས་པའི་རྗེས་སམ། འདི་ཉིད་གཙོ་བོར་བྱེད་པའི་དུས་སུ་སྐད་ཅིག་གིས་ཧེ་རུ་ཀ་ཡབ་ཡུམ་དུ་དྲན་པར་བྱས་པའི་ལྟེ་བར་པདྨ་འདབ་མ་བཞི་པའི་ཤར་དུ་ས་རླུང་གི་རང་བཞིན་ལ་སེར་པོ། གཡོན་དུ་ཆུ་རླུང་གི་རང་བཞིན་ཝ་དཀར་པོ། རྒྱབ་ཏུ་མེ་རླུང་གི་རང་བཞིན་ར་དམར་པོ། གཡས་སུ་རླུང་རླུང་གི་རང་བཞིན་ཡ་ལྗང་གུ། དབུས་སུ་ནམ་མཁའི་རླུང་གི་རང་བཞིན་ཐིག་ལེ་ཁ་དོག་སྔོན་པོ་ཅིག་བསམས་ལ། རིམ་གྱིས་བློ་སྦྱང་བའི་ཕྱིར་དབུགས་ཕྱིར་རྒྱུ་བའི་དུས་སུ་མདུན་གྱི་ལ་སེར་པོ་ལས་འོད་ཟེར་ཁ་དོག་སེར་པོ་སྦོམ་ཕྲ་སྐུད་པ་འབྲིང་པོ་ཙམ་ལངས་ཏེ་གྱེན་དུ་བྱུང་བ་སྣ་སྒོ་གཡོན་པ་ནས་ཕྱུང་སྟེ། མདུན་དུ་སོར་བཅུ་དྲུག་ཙམ་གྱི་ཚད་དུ་བྱུང་བར་བསམ། རླུང་ནང་དུ་འཇུག་པ་དང་བསྟུན་ལ་འོད་ཟེར་དེ་ནང་དུ་བསྡོགས། ལ་སེར་པོ་དེ་ལ་བསྟིམས་ལ་ཡིད་ཀྱིས་ལ་སེར་པོ་དེ་ལ་བལྟ་ཞིང་རླུང་ཁ་སྦྱོར་གྱི་དམིགས་པ་བྱའོ། །དེས་དུ་བ་ལྟ་བུའི་རྟགས་མཐོང་བ་དེའི་ཚེ་ས་རླུང་དབང་དུ་གྱུར་པའི་རྟགས་ཡིན་པས་ལ་སེར་པོ་དེ་གཡོན་གྱི་ཝ་དཀར་པོ་ལ་བསྟིམ། ཝ་དཀར་པོ་ལས་འོད་ཟེར་དཀར་པོ་སྣ་བུག་གཡོན་པ་ནས་འབྱུང་བ་དང་། འཇུག་པ་དང་། རླུང་གི་རྣལ་འབྱོར་དང་བཅས་པ་སྔ་མ་བཞིན་བསྒོམས་པས་སྨིག་རྒྱུ་ལྟ་བུ་མཐོང་བ་དེའི་ཚེ་ཆུ་རླུང་དབང་དུ་འདུས་པ་ཡིན་པས་ཝ་དཀར་པོ་དེ་རྒྱབ་ཀྱི་ར་དམར་པོ་ལ་བསྟིམ། ར་དམར་པོ་ལས་འོད་ཟེར་དམར་པོ་སྣ་གཡོན་ནས་འབྱུང་བ་དང་། འཇུག་པ་དང་། རླུང་གི་རྣལ་འབྱོར་སྔ་མ་བཞིན་དུ་བསྒོམས་པས་སྲིན་བུ་མེ་ཁྱེར་ལྟ་བུའི་རྟགས་མཐོང་བ་དེའི་ཚེ་མེ་རླུང་དབང་དུ་འདུས་པ་ཡིན་པས་ར་དམར་པོ་དེ་གཡས་ཀྱི་ཡ་ལྗང་གུ་ལ་བསྟིམས་ལ་བཞག །ཡ་དེ་ལས་འོད་ཟེར་ལྗང་གུ་སྣ་གཡོན་ནས་འབྱུང་བ་དང་། འཇུག་པ་དང་། རླུང་གི་རྣལ་འབྱོར་སྔ་མ་བཞིན་དུ་བསྒོམས་པས་མར་མེ་འབར་བ་ལྟ་བུའི་རྟགས་མཐོང་བ་དེའི་ཚེ་རླུང་གི་རླུང་དབང་དུ་འདུས་པའི་རྟགས་ཡིན་པས་ཡི་གེ་ཡ་ལྗང་གུ་དེ་དབུས་ཀྱི་ཐིག་ལེ་སྔོན་པོ་ལ་བསྟིམས་ལ་བཞག །དེ་ནས་ཐིག་ལེ་སྔོན་པོ་ལས་འོད་ཟེར་འབྱུང་འཇུག་མེད་པར་ཐིག་ལེ་ལ་ཡིད་ཀྱིས་བལྟ་ཞིང་རླུང་ཁ་སྦྱར་གྱི་རྣལ་འབྱོར་པས་ནམ་མཁའ་སྤྲིན་མེད་ལྟ་བུ་མཐོང་བ་དེའི་ཚེ་ནམ་མཁའི་རླུང་དབང་དུ་འདུས་པ་ཡིན་པས། འདིའི་མཇུག་ཏུ་མཐོང་བའི་ལམ་གྱི་ཡེ་ཤེས་སྐྱེ་ཞེས་གསུངས་སོ། །ཡི་གེ་བསྡུ་བའོ། །ཐིག་ལེ་བསྡུ་བ་ནི། ཡི་གེ་རྣམས་ཀྱི་ཤུལ་དུ་ཐིག་ལེ་བསྒོམ་པ་སྟེ། ཤར་དུ་ཐིག་ལེ་སེར་པོ། གཡོན་དུ་དཀར་པོ། རྒྱབ་ཏུ་དམར་པོ། གཡས་སུ་ལྗང་གུ་རྣམས་བསྒོམས་ལ། འོད་ཟེར་གྱི་སྐུད་པའི་འབྱུང་འཇུག་དང་། རླུང་གི་རྣལ་འབྱོར་ལ་སོགས་པ་སྔ་མའི་ཚུལ་དུ་བསྒོམས་པས་མཐར་ཕྱིན་པའི་ཚད་སྔ་མ་བཞིན་དུ་འབྱུང་བར་འགྱུར་རོ། །དེས་ན་འདི་གཉིས་ཀྱང་རྣལ་འབྱོར་པ་རང་གི་བློ་ལ་གང་བདེ་བ་བསྒོམ་པ་ཡིན་ལ། གཅིག་གི་རྗེས་ལ་གཅིག་བསྒོམ་པ་ནི་མ་ཡིན་ནོ། ཞེས་གསུངས་པ་ལྟར་རོ། །གསུམ་པ་ནི། དེ་ལྟ་བུའི་རྡོ་རྗེ་སེམས་དཔའ་བསྡུ་བའི་རྫོགས་རིམ་ནི་བསྐྱེད་རིམ་གྱི་མཇུག་ཏུ་ངེས་པར་བསྒོམ་པའི་ཚུལ་གོང་དུ་བསྟན་ཟིན་ཅིང་། ཡི་གེ་བསྡུ་བ་དང་། ཐིག་ལེ་བསྡུ་བ་ནི་བསྐྱེད་རིམ་དང་འབྲེལ་ན་རྡོ་རྗེ་སེམས་དཔའ་བསྡུ་བའི་གོང་དུ་བསྒོམ། བསྐྱེད་རིམ་ལ་ཅུང་ཟད་བརྟན་པ་ཐོབ་པས་རྫོགས་རིམ་གཙོ་བོར་བྱེད་ནས་འདི་རྐྱང་པ་བསྒོམ་ན། སྐྱབས་འགྲོ་སེམས་བསྐྱེད་བླ་མའི་རྣལ་འབྱོར་རྣམས་སྔོན་དུ་འགྲོ་བས། བླ་མ་རང་ལ་བསྟིམས་པའི་རྐྱེན་གྱིས་རང་སྐད་ཅིག་གིས་དཔལ་འཁོར་ལོ་བདེ་མཆོག་གི་སྐུར་གྱུར་པར་བསམས་ལ་སེམས་གཟུང་། གསལ་སྣང་ཐོན་པ་ན་ལུས་བསྲང་། རླུང་རོ་བསལ། རང་གི་ལུས་ཀྱི་ནང་ཐམས་ཅད་སྟོང་གསལ་འོད་ཀྱི་རང་བཞིན་ཅན་དུ་གྱུར་པའི་སྤྲུལ་འཁོར་གྱི་ལྟེ་བར་ཇི་སྐད་བཤད་པའི་ཡི་གེའམ་ཐིག་ལེ་བསྒོམ། དེ་ལ་སེམས་ཟིན་པ་ན་འོད་ཀྱི་འབྱུང་འཇུག་བྱ། དེ་བརྟན་པའི་ཕྱིར་བུམ་པ་ཅན་ཁ་སྦྱར་དུ་བཟུང་བ་སོགས་ཇི་སྐད་གསུངས་པ་ལྟར་ཉམས་སུ་བླང་ངོ་། །དེ་ལྟར་བསྐྱེད་རྫོགས་ཀྱི་རིམ་པ་ཟབ་མོ་འདི་ནི་སྐུ་གསུམ་ལམ་བྱེད་ཀྱི་རྣལ་འབྱོར་དུ་ཇི་ལྟར་འགྱུར་པའི་ཚུལ་རྗེ་བཙུན་རིན་པོ་ཆེས། དེ་ལ་སློབ་དཔོན་ལཱུ་ཧི་པའི་དགོངས་པ་ཇོ་བོ་ནཱ་རོ་ཏ་པས་བསྐངས་པས་མངོན་པར་རྟོགས་པ་གཅིག་ལ་སྐུ་གསུམ་ལམ་དུ་བྱེད་པའི་སྒྲུབ་ཐབས་ཡིན་ཏེ། དེ་ཡང་བློའི་སྤྱོད་ཡུལ་རྫོགས་པ་གཅིག་ལ་སྐུ་གསུམ་དུ་བཞག་པ་དང་། དཀྱིལ་འཁོར་གྱི་འཁོར་ལོ་རྫོགས་པ་གཅིག་ལ་སྐུ་གསུམ་དུ་བཞག་པ་དང་། མངོན་པར་རྟོགས་པ་གཅིག་ལ་སྐུ་གསུམ་དུ་བཞག་པའོ། །དང་པོ་བདག་གི་བློ་སྣང་གི་དཀྱིལ་འཁོར་ནི་ཞིང་སྐྱེས་ཀྱིས་སྤྲུལ་ལ། ཞིང་སྐྱེས་ཉིད་ཀྱང་ལྷན་སྐྱེས་ཀྱིས་སྤྲུལ་པའི་ཕྱིར། དེ་གཉིས་ཀའང་སྤྲུལ་པའི་སྐུའོ། །ལྷན་སྐྱེས་ནི་གནས་འཕོ་བ་མེད་པའི་ཚུལ་གྱིས་ཟག་པ་མེད་པའི་བདེ་བ་དང་། ཆོས་ལ་ལོངས་སྤྱོད་པའི་ཕྱིར་ལོངས་སྤྱོད་རྫོགས་པའི་སྐུའོ། །ཆོས་ཀྱི་སྐུ་ནི་ཆོས་ཀྱི་སྐུ་ཉིད་དོ། །གཉིས་པ་དཀྱིལ་འཁོར་གྱི་འཁོར་ལོ་རྫོགས་པ་གཅིག་ལ་སྐུ་གསུམ་དུ་འཇོག་ན། བདེ་བ་ཆེན་པོའི་འཁོར་ལོ་ནི་ཆོས་ཀྱི་སྐུ། འཁོར་ལོ་གསུམ་ནི་ལོངས་སྐུ། སྒོ་མཚམས་མ་བརྒྱད་ནི་སྤྲུལ་པའི་སྐུའོ། །མངོན་པར་རྟོགས་པ་རྫོགས་པ་གཅིག་ལ་སྐུ་གསུམ་དུ་འཇོག་ན། ཕྱིའི་དཀྱིལ་འཁོར་དག་པ་དང་བཅས་པ་སྤྲུལ་པའི་སྐུ་ལམ་དུ་བྱེད་པའི་སྒྲུབ་ཐབས། ལུས་ཀྱི་དཀྱིལ་འཁོར་སྔགས་ཀྱིས་བྱིན་གྱིས་བརླབ་པ་དང་བཅས་པ་ལོངས་སྤྱོད་རྫོགས་པའི་སྐུ་ལམ་དུ་བྱེད་པའི་སྒྲུབ་ཐབས། རྫོགས་པའི་རིམ་པ་སྤྱོད་པ་གཅིག་དང་བཅས་པ་ཆོས་ཀྱི་སྐུ་ལམ་དུ་བྱེད་པའི་སྒྲུབ་ཐབས་སོ། །དེ་ལ་འབྲིང་བསྡུས་གཉིས་ཀྱི་དབང་དུ་བྱས་ན་ཕྱིའི་དཀྱིལ་འཁོར་མེད་པས། ལུས་ལ་ལྷ་རྣམས་རྫོགས་པར་བསྐྱེད་པ་ཙམ་ནི་སྤྲུལ་པའི་སྐུ་ཡིན་ལ། བསྐྱེད་པ་གསལ་གདབ་པ་དང་། ཐིམ་པའི་ཚུལ་གྱིས་ལོངས་སྤྱོད་པ་ནི། ལོངས་སྤྱོད་རྫོགས་པའི་སྐུ་ཡིན་ལ། རྫོགས་པའི་རིམ་པ་སྤྱོད་པ་དང་བཅས་པ་ནི་ཆོས་ཀྱི་སྐུ་ལམ་དུ་བྱེད་པའི་སྒྲུབ་ཐབས་སོ། །ཞེས་གསུངས་པ་ལྟར་ཡིན་ལ། མདོར་ན་རིམ་གཉིས་བཟླས་པ་དང་བཅས་པ་ལ་བརྩོན་པས་དྲོད་ཅི་རིགས་པ་ཐོབ་ནས། སྤྲོས་བཅས་དང་། སྤྲོས་མེད་དང་། ཤིན་ཏུ་སྤྲོས་མེད་ཀྱི་སྤྱོད་པས་བོགས་དབྱུང་ཞིང་། ཡེ་ཤེས་ལ་དབང་འབྱོར་པ་ན་གཞན་དོན་དུ་ཕྱོགས་ལས་རྣམ་པར་རྒྱལ་བའི་སྤྱོད་པས་མཚམས་སྦྱར་ཏེ་མཐར་ཐུག་གི་འབྲས་བུ་ལ་རེག་པར་འགྱུར་རོ། །བཞི་པ་དེས་གྲུབ་པའི་འབྲས་བུ་ནི། དམན་བཞི་སོགས་ལས་རབ་འབྱམས་དང་། འབྲིང་གྲུབ་པ་ཆེན་པོ་བརྒྱད་དང་། འབྲིང་གི་རབ་མཁའ་སྤྱོད་ཀྱི་རིག་པ་འཛིན་པ་ཐོབ་པར་འགྱུར་བ་ནི་གནས་སྐབས་ཀྱི་འབྲས་བུ་ཡིན་ལ། །མཐར་ཐུག་ལམ་ལྔ་དང་ས་བཅུ་བདེ་བླག་ཏུ་བགྲོད་དེ་མཆོག་གི་དངོས་གྲུབ་སྐུ་གསུམ་གྱི་རང་བཞིན་སངས་རྒྱས་ཀྱི་ས་རྡོ་རྗེ་འཛིན་པ་ཉིད་འགྲུབ་པར་འགྱུར་བ་ཡིན་ནོ། །རྣལ་འབྱོར་གསང་མཐའ་འཁོར་ལོ་བདེ་མཆོག་གི། །རིམ་གཉིས་མན་ངག་གྲུབ་པའི་ཞལ་གྱི་ལུང་། །བདེ་ཆེན་འདོད་འཇོ་འདིར་བསྟེན་ཡིད་ཅན་ཀུན། །འཆི་མེད་སྐུ་གསུམ་གོ་འཕང་མྱུར་ཐོབ་ཤོག །ཅེས་པའང་རྗེ་བཙུན་རྡོ་རྗེ་འཆང་གྲགས་པ་རྒྱལ་མཚན་གྱི་གསུང་རབ་ཇི་ལྟ་བ་ལ། ཀུན་མཁྱེན་ཆེན་པོའི་རྣམ་བཤད་དང་། རྗེ་སངས་རྒྱས་དཔལ་བཟང་སློབ་ཚོགས་དང་བཅས་པའི་ཟིན་བྲིས་སོགས་ལས་དོན་གྱི་སྙིང་པོ་མདོར་བསྡུས་ཏེ། མང་དུ་ཐོས་པ་ལྟར་སྣང་བའི་བྱ་བྲལ་སྤོང་བ་པ་འཇམ་དབྱངས་མཁྱེན་བརྩེའི་དབང་པོས་བྲིས་པ་དགེ་ལེགས་མཆོག་ཏུ་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ། །འདིའི་རྫོགས་རིམ་ནི། རྗེ་བཙུན་རིན་པོ་ཆེའི་གསུང་གི་དངོས་བསྟན་བླ་མ་ཕྱི་མ་རྣམས་ཀྱིས་ཀྱང་སོར་བཞག་ཏུ་མཛད་པ་ལྟར་བྲིས་པ་ཡིན་ལ། དམིགས་པ་ཉམས་སུ་ལེན་ཚུལ་ཞིབ་པར་ཁྲིད་ཡིག་དག་ལས་ཤེས་པར་བྱའོ།། །། | ||
Revision as of 14:41, 19 May 2021
🚧 This website is under continued development. We appreciate your patience!
Previous Section"JA" is not a number. Back to Volume Page"JA" is not a number.Next Section "JA" is not a number.
དཔལ་འཁོར་ལོ་བདེ་མཆོག་ལཱུ་ཧི་པའི་བསྐྱེད་རྫོགས་ཀྱི་སྙིང་པོ་ཤིན་ཏུ་བསྡུས་པ་བདེ་ཆེན་འདོད་འཇོ།
Wylie title | dpal 'khor lo bde mchog lU hi pa'i bskyed rdzogs kyi snying po shin tu bsdus pa bde chen 'dod 'jo | ![]() |
---|---|---|
Location | mkhyen brtse'i bka' 'bum Volume Expression error: Unrecognized word "ja"., sde tshan 10, Pages (Folios to ) | |
Author | འཇམ་དབྱངས་མཁྱེན་བརྩེའི་དབང་པོ་ | |
Less details More details | ||
Citation | ||
Genre | Collected Works - Selected - bka' 'bum "JA" is not a number. |
1 Texts in this Section (sde tshan or chos tshan)
"JA" is not a number.