DKR-KABUM-06-CHA-028

🚧 This website is under continued development. We appreciate your patience!

Previous Text"CHA" is not a number. Back to Volume Page"CHA" is not a number.Next Text "CHA" is not a number.

Wylie title
Location	dil mgo mkhyen brtse bka' 'bum Volume , Text 28, Pages (Folios to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation
Genre	"CHA" is not a number.

"CHA" is not a number.

Tibetan Text

Wylie

[edit]

༄༅། །རྩ་གསུམ་འོད་གསལ་སྙིང་ཐིག་ལས། སྔོན་འགྲོ་ཟབ་ལམ་སྒོ་འབྱེད་ཀྱི་བླ་མའི་རྣལ་འབྱོར་ཟབ་ལམ་སྙིང་པོ་བཞུགས་སོ། ཨེ་མ་ཧོ། སྣོད་བཅུད་རྣམ་དག་རྡོ་རྗེའི་འོག་མིན་ཆེ། །འོད་གསལ་རང་སྣང་པདྨ་དྲྭ་བའི་དབུས། །གཞི་ལུས་ཕག་མོ་དམར་སེར་གྲི་ཐོད་ཅན། །པད་ཉི་བམ་རོའི་སྟེང་ན་བརྐྱང་བསྐུམ་བཞེངས། །སྤྱི་བོར་རིགས་ཀུན་ཁྱབ་བདག་ཨོ་རྒྱན་རྗེ། །གསང་བ་འདུས་པ་མཐིང་སྔོན་ནམ་མཁའི་མདོག །ཁྲོ་ཆགས་སྒེག་པའི་ཡེ་ཤེས་གཟི་བྱིན་འབར། །རྡོ་རྗེ་དྲིལ་བསྣམས་ཞབས་གཉིས་སྐྱིལ་ཀྲུང་བཞུགས། །ཡུམ་མཆོག་དམར་མོ་གྲི་ཐོད་འཛིན་པ་སྦྱོར། །གཉིས་ཀ་རིན་ཆེན་རུས་པ་དར་སྣས་བརྒྱན། །སྣང་སྟོང་འཇའ་ཟེར་འོད་ཕུང་ཀློང་ན་འགྱིང༌། །རིགས་ཀྱི་བདག་པོ་ཀུན་བཟང་ཡབ་ཡུམ་ལ། །དགོངས་བརྡ་སྙན་བརྒྱུད་བླ་མ་སྤྲིན་ལྟར་འཁྲིགས། །སྐུ་ཡི་གནས་སུ་དཔལ་ཆེན་སྒྲུབ་སྡེ་བརྒྱད། །ཡི་དམ་ཞི་ཁྲོའི་དཀྱིལ་འཁོར་སྤྲོ་ཞིང་སྡུད། །ཐུགས་གསུང་སྐུ་ཡི་རྡོ་རྗེའི་གནས་ཡུལ་དུ། །འབུམ་ཕྲག་དཔའ་བོ་ཌཱ་ཀིའི་གླུ་གར་བསྒྱུར། །འཁོར་དུ་ཐོད་ཕྲེང་སྡེ་ལྔ་མཚན་མཆོག་བརྒྱད། །རྣམ་འཕྲུལ་བཅུ་གཉིས་གུ་རུ་བཅུ་གསུམ་དང༌། །འཕྲུལ་མཚན་ཉི་ཤུ་མདོ་སྔགས་སྟོན་པ་བརྒྱ། །གང་འདུལ་བཀོད་པ་བསམ་མི་ཁྱབ་པར་སྟོན། །མདོར་ན་ཕྱོགས་དུས་སྐྱབས་གནས་ཀུན་འདུས་པ། །དྲན་པས་སྲིད་ཞིའི་གདུང་སེལ་ཆེན་པོར་གསལ། །འཁོར་དུ་རྒྱ་བོད་པཎ་གྲུབ་ལོ་ཙཱ་ཆེ། །རྗེ་འབངས་རིག་འཛིན་རྩ་གསུམ་རྒྱ་མཚོས་བསྐོར། །མོས་གུས་དྲག་པོའི་གསོལ་བཏབ་རྒྱུད་བསྐུལ་བས། །ཡེ་ཤེས་འཁོར་ལོ་སྤྱན་དྲངས་གཉིས་མེད་བསྟིམ། །ཧཱུྃ། ཨོ་རྒྱན་ཡུལ་གྱི་སོགས། ཕ་ལ་ཧཱུྃ་ཨཱཿ ཞེས་བརྗོད་པས་ཚོགས་རྟེན་གསལ་བཏབ་ལ། ཧོཿ ཕྱོགས་བཅུ་དུས་བཞིའི་རྒྱལ་བ་སྲས་བཅས་ལ༔ ལུས་ངག་ཡིད་གསུམ་གུས་པས་ཕྱག་འཚལ་ལོ༔ ཕྱི་ནང་གསང་གསུམ་ཀུན་བཟང་མཆོད་སྤྲིན་འབུལ༔ ཉོན་མོངས་ཤེས་བྱའི་སྒྲིབ་གཉིས་མཐོལ་ཞིང་བཤགས༔ བྱང་ཆུབ་སྤྱོད་པ་རྒྱ་མཚོར་རྗེས་ཡི་རང༔ ཐེག་མཆོག་ཆོས་ཀྱི་འཁོར་ལོ་བསྐོར་བར་བསྐུལ༔ མྱ་ངན་མི་འདའ་རྟག་པར་བཞུགས་གསོལ་འདེབས༔ འདིས་མཚོན་དགེ་ཚོགས་ཆོས་དབྱིངས་སྙིང་པོར་བསྔོ༔ ཞེས་གྲུབ་ན་ལུས་ཕྱག་དངོས་སུ་འཚལ་བ་དང་བཅས་ཡན་ལག་བདུན་གྱིས་བསགས་སྦྱངས་ལ་འབད། སྤྲོ་ན། ཨོཾ་ཨཱཿཧཱུྃ༔ རབ་འབྱམས་རྒྱ་མཚོའི་ཞིང་ཀུན་ཡོངས་ཁྱབ་པའི༔ སྲིད་ཞིའི་འབྱོར་ཚོགས་དཔག་མེད་མཎྜལ་འདི༔ བླ་མ་རྩ་གསུམ་སྤྲུལ་སྐུའི་ཞིང་དུ་འབུལ༔ བཞེས་ནས་སྣང་སྟོང་ཟུང་འཇུག་དངོས་གྲུབ་སྩོལ༔ ཕུང་ཁམས་སྐྱེ་མཆེད་ཡོངས་གྲུབ་རྡོ་རྗེའི་གྲོང༔ ཚོགས་བརྒྱད་གདོད་ནས་དག་པའི་མཎྜལ་འདི༔ བླ་མ་རྩ་གསུམ་ལོངས་སྐུའི་ཞིང་དུ་འབུལ༔ བཞེས་ནས་བདེ་སྟོང་ཟུང་འཇུག་དངོས་གྲུབ་སྩོལ༔ ཀ་དག་ཆོས་དབྱིངས་གཞོན་ནུ་བུམ་སྐུའི་སྦུབས༔ ལྷུན་གྲུབ་འོད་གསལ་སྣང་བཞིའི་མཎྜལ་འདི༔ བླ་མ་རྩ་གསུམ་ཆོས་སྐུའི་ཞིང་དུ་འབུལ༔ བཞེས་ནས་རིག་སྟོང་ཟུང་འཇུག་དངོས་གྲུབ་སྩོལ༔ ཨོཾ་གུ་རུ་དེ་བ་ཌཱ་ཀི་ནཱི་སརྦ་མཎྜ་ལ་པཱུ་ཛ་ཧོ༔ ཞེས་མཎྜལ་འབུལ། ཉམས་ལེན་གྱི་དངོས་གཞི་མོས་གུས་ཁོ་ན་རྩལ་དུ་བཏོན་པ་བླ་མ་ལ་བློ་གཏད་ལིང་གི་བཀལ་ཏེ། རབ་འབྱམས་སྐུ་གསུམ་མཆོག་གསུམ་རྩ་གསུམ་ཆོས་སྐྱོང་དང་བཅས་པ་བླ་མའི་སྐུ་གསུང་ཐུགས་ཀྱི་གསང་བ་གཅིག་ཏུ་རྫོགས་པའི་ངེས་ཤེས་དང་ཆབས་ཅིག ཨོཾ་ཨཱཿཧཱུྃ༔ ཆོས་ཀུན་སྙིང་པོ་སྤྲོས་བྲལ་ཀུན་ཏུ་བཟང༔ བདེ་སྟོང་སྒྱུ་འཕྲུལ་དྲྭ་བ་རྡོ་རྗེ་སེམས༔ སྤྲུལ་པའི་རྣམ་རོལ་འཆི་མེད་ཐོད་ཕྲེང་རྩལ༔ གསོལ་བ་འདེབས་སོ་སྨིན་གྲོལ་དངོས་གྲུབ་སྩོལ༔ གདོད་མའི་མགོན་པོ་འོད་སྣང་ཚེ་མཐའ་ཡས༔ སྟོང་ཉིད་སྙིང་རྗེའི་སྐུར་བཞེངས་སྤྱན་རས་གཟིགས༔ དབྱེར་མེད་གྲུབ་པའི་སློབ་དཔོན་མཚོ་སྐྱེས་རྗེར༔ གསོལ་བ་འདེབས་སོ་སྨིན་གྲོལ་དངོས་གྲུབ་སྩོལ༔ དགའ་རབ་འཇམ་དཔལ་ཤྲཱི་སིངྷ་དང༔ ཛྙཱ་ན་སཱུ་ཏྲ་དྲི་མེད་བཤེས་གཉེན་གྱི༔ གདམས་པའི་བཀའ་བབས་པདྨ་སཾ་བྷ་ལ༔ གསོལ་བ་འདེབས་སོ་སྨིན་གྲོལ་དངོས་གྲུབ་སྩོལ༔ རིག་འཛིན་བླ་མ་ཀུན་འདུས་པདྨ་འབྱུང༔ ཡི་དམ་ཞི་ཁྲོ་ཐུགས་ཀྱི་ཀློང་ན་རྫོགས༔ རབ་འབྱམས་མཁའ་འགྲོའི་མིང་པོ་དཔའ་བོ་ཆེར༔ གསོལ་བ་འདེབས་སོ་སྨིན་གྲོལ་དངོས་གྲུབ་སྩོལ༔ ཅིར་སྣང་ཡེ་ཤེས་ལྷ་ཡི་ཕྱག་རྒྱར་དག༔ སྒྲར་གྲགས་མི་ཤིགས་རྡོ་རྗེའི་སྔགས་སུ་རྫོགས༔ རྟོག་ཚོགས་དབྱིངས་རིག་དབྱེར་མེད་ཐིག་ལེར་སྨིན༔ སྣང་སྲིད་གཞིར་བཞེངས་ཆེན་པོར་བྱིན་ཕོབ་ཅིག༔ ལུས་ལ་སྣང་སྟོང་སྐུ་ཡི་བྱིན་གྱིས་རློབས༔ ངག་ལ་གྲགས་སྟོང་གསུང་གི་བྱིན་གྱིས་རློབས༔ ཡིད་ལ་རིག་སྟོང་ཐུགས་ཀྱི་བྱིན་གྱིས་རློབས༔ ལུས་ངག་ཡིད་ལ་རྡོ་རྗེའི་དབང་བཞི་སྐུར༔ ཕྱི་ནང་གསང་བའི་བར་ཆད་དབྱིངས་སུ་སོལ༔ མཆོག་དང་ཐུན་མོང་དངོས་གྲུབ་ཆར་ལྟར་ཕོབ༔ མཐོང་ཐོས་དྲན་རེག་སྨིན་ཅིང་གྲོལ་བ་དང༔ འཆི་མེད་སྐུ་གསུམ་འགྲུབ་པར་བྱིན་གྱིས་རློབས༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱཿ ཧཱུྃ་ཧཱུྃ་ཧཱུྃ་ཧཱུྃ་ཧཱུྃ༔ གསོལ་འདེབས་བྱིན་རླབས་མྱུར་ལམ་གྱིས་ཕུར་ཚུགས་སུ་གསོལ་བ་བཏབ། གསོལ་འདེབས་འབུམ་བསགས་ན་རྡོ་རྗེའི་ཚིག་རྐང་བདུན་པ་ལ་བྱ། ཐུན་མཇུག་ཏུ། ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱཿ ཞེས་དང༌། ཐུགས་ཡིད་བསྲེས་ཏེ། ཧཱུྃ་གི་བཟླས་པའང་ཅུང་ཟད་བྱ། བརྒྱུད་འདེབས་བྱིན་རླབས་སྤྲིན་ཕུང་གི་ཐུགས་བརྒྱུད་བསྐུལ་མཐར། བླ་མའི་གནས་གསུམ་འབྲུ་གསུམ་ལས༔ འོད་ཟེར་རིམ་དང་གཅིག་ཆར་འཕྲོས༔ བདག་གི་གནས་གསུམ་ཐིམ་པ་ཡིས༔ དབང་བཞི་ཐོབ་ཅིང་སྒྲིབ་བཞི་དག༔ ལམ་བཞི་བསྒོམ་པའི་སྣོད་དུ་གྱུར༔ མཐར་ནི་རང་ཐིམ་དབྱེར་མེད་ངང༔ བློ་འདས་ཆོས་སྐུའི་རང་ཞལ་བལྟ༔ དབང་ལེན་བཅས་ཐུགས་ཡིད་བསྲེས་ལ་མཉམ་པར་བཞག །ཐུན་ལས་ལྡང་བ་ན་སྣང་གྲགས་རིག་པ་བླ་མའི་སྐུ་གསུང་ཐུགས་ཀྱི་དཀྱིལ་འཁོར་དུ་གདོད་ནས་རྫོགས་པར་ཤེས་པའི་ཡོངས་གྲུབ་ཆེན་པོའི་མོས་གུས་ཀྱི་ལམ་ཁྱེར་དང་མ་བྲལ་བས། སྐྱེ་བ་ཀུན་ཏུ་སོགས་བསྔོ་སྨོན་རྒྱས་བསྡུས་ཅི་རིགས་བྱ་ཞིང༌། བླ་མའི་རྣལ་འབྱོར་འདི་ཁོ་ན་ཙམ་ཞིག་ཉམས་སུ་བླངས་ཀྱང་སྐྱེ་འཆི་བར་དོའི་ལམ་ཁྱེར་ཐམས་ཅད་དོན་གྱིས་ཚང་བས་ཟུང་འཇུག་མཆོག་གི་དངོས་གྲུབ་ངེས་པར་མངོན་དུ་བྱེད་ནུས་པའང་རྡོ་རྗེའི་ཚིག་རྐང་ལས། འདི་ཉིད་ཁོ་ན་ཉམས་བླངས་ཀྱང༔ ཚེ་འདིར་མཆོག་གི་དངོས་གྲུབ་ཐོབ༔ དེ་ཕྱིར་སྙིང་ལ་གཅེས་པར་ཟུངས༔ ས་མ་ཡ༔ ཞེས་གདམས་པར་མཛད་པ་ལྟར་སྐལ་ལྡན་རྣམས་ཀྱིས་རྩེ་གཅིག་ཏུ་འབད་པར་བྱའོ། །ཞེས་པའང་རྩ་གསུམ་འོད་གསལ་སྙིང་ཐིག་གི་ལམ་ཡོངས་སུ་རྫོགས་པའི་ཆ་རྐྱེན་དུ་ཟབ་ལམ་འདི་ཉིད་ཀྱི་སྨིན་གྲོལ་ཡོངས་སུ་རྫོགས་པར་ལོངས་སྤྱོད་པའི་སྐལ་པ་དགེ་བ་འོད་གསལ་རྡོ་རྗེ་ཐུགས་མཆོག་རྩལ་གྱིས་ལྷོ་ལྗོངས་དགེ་བའི་ཞིང་གི་བྱེ་བྲག་ཕུན་ཚོགས་ཆོས་གླིང་དུ་གཏེར་གཞུང་རྩ་བའི་དགོངས་པ་ལྟར་གསལ་བར་ཕྱེ་བས་འགྲོ་ཀུན་བླ་མ་ཡེ་ཤེས་རྡོ་རྗེའི་གསང་མཛོད་ལ་དབུགས་དབྱུང་བའི་སྐལ་བཟང་དུ་གྱུར་ཅིག །།

[edit]

@#/_/rtsa gsum 'od gsal snying thig las/_sngon 'gro zab lam sgo 'byed kyi bla ma'i rnal 'byor zab lam snying po bzhugs so/_e ma ho/_snod bcud rnam dag rdo rje'i 'og min che/_/'od gsal rang snang pad+ma drwa ba'i dbus/_/gzhi lus phag mo dmar ser gri thod can/_/pad nyi bam ro'i steng na brkyang bskum bzhengs/_/spyi bor rigs kun khyab bdag o rgyan rje/_/gsang ba 'dus pa mthing sngon nam mkha'i mdog_/khro chags sgeg pa'i ye shes gzi byin 'bar/_/rdo rje dril bsnams zhabs gnyis skyil krung bzhugs/_/yum mchog dmar mo gri thod 'dzin pa sbyor/_/gnyis ka rin chen rus pa dar snas brgyan/_/snang stong 'ja' zer 'od phung klong na 'gying*/_/rigs kyi bdag po kun bzang yab yum la/_/dgongs brda snyan brgyud bla ma sprin ltar 'khrigs/_/sku yi gnas su dpal chen sgrub sde brgyad/_/yi dam zhi khro'i dkyil 'khor spro zhing sdud/_/thugs gsung sku yi rdo rje'i gnas yul du/_/'bum phrag dpa' bo DA ki'i glu gar bsgyur/_/'khor du thod phreng sde lnga mtshan mchog brgyad/_/rnam 'phrul bcu gnyis gu ru bcu gsum dang*/_/'phrul mtshan nyi shu mdo sngags ston pa brgya/_/gang 'dul bkod pa bsam mi khyab par ston/_/mdor na phyogs dus skyabs gnas kun 'dus pa/_/dran pas srid zhi'i gdung sel chen por gsal/_/'khor du rgya bod paN grub lo tsA che/_/rje 'bangs rig 'dzin rtsa gsum rgya mtshos bskor/_/mos gus drag po'i gsol btab rgyud bskul bas/_/ye shes 'khor lo spyan drangs gnyis med bstim/_/hU~M/_o rgyan yul gyi sogs/_pha la hU~M AH_zhes brjod pas tshogs rten gsal btab la/_hoH_phyogs bcu dus bzhi'i rgyal ba sras bcas la:_lus ngag yid gsum gus pas phyag 'tshal lo:_phyi nang gsang gsum kun bzang mchod sprin 'bul:_nyon mongs shes bya'i sgrib gnyis mthol zhing bshags:_byang chub spyod pa rgya mtshor rjes yi rang:_theg mchog chos kyi 'khor lo bskor bar bskul:_mya ngan mi 'da' rtag par bzhugs gsol 'debs:_'dis mtshon dge tshogs chos dbyings snying por bsngo:_zhes grub na lus phyag dngos su 'tshal ba dang bcas yan lag bdun gyis bsags sbyangs la 'bad/_spro na/_oM AHhU~M:_rab 'byams rgya mtsho'i zhing kun yongs khyab pa'i:_srid zhi'i 'byor tshogs dpag med maN+Dal 'di:_bla ma rtsa gsum sprul sku'i zhing du 'bul:_bzhes nas snang stong zung 'jug dngos grub stsol:_phung khams skye mched yongs grub rdo rje'i grong:_tshogs brgyad gdod nas dag pa'i maN+Dal 'di:_bla ma rtsa gsum longs sku'i zhing du 'bul:_bzhes nas bde stong zung 'jug dngos grub stsol:_ka dag chos dbyings gzhon nu bum sku'i sbubs:_lhun grub 'od gsal snang bzhi'i maN+Dal 'di:_bla ma rtsa gsum chos sku'i zhing du 'bul:_bzhes nas rig stong zung 'jug dngos grub stsol:_oM gu ru de ba DA ki nI sarba maN+Da la pU dza ho:_zhes maN+Dal 'bul/_nyams len gyi dngos gzhi mos gus kho na rtsal du bton pa bla ma la blo gtad ling gi bkal te/_rab 'byams sku gsum mchog gsum rtsa gsum chos skyong dang bcas pa bla ma'i sku gsung thugs kyi gsang ba gcig tu rdzogs pa'i nges shes dang chabs cig__oM AHhU~M:_chos kun snying po spros bral kun tu bzang:_bde stong sgyu 'phrul drwa ba rdo rje sems:_sprul pa'i rnam rol 'chi med thod phreng rtsal:_gsol ba 'debs so smin grol dngos grub stsol:_gdod ma'i mgon po 'od snang tshe mtha' yas:_stong nyid snying rje'i skur bzhengs spyan ras gzigs:_dbyer med grub pa'i slob dpon mtsho skyes rjer:_gsol ba 'debs so smin grol dngos grub stsol:_dga' rab 'jam dpal shrI sing+ha dang:_dz+nyA na sU tra dri med bshes gnyen gyi:_gdams pa'i bka' babs pad+ma saM b+ha la:_gsol ba 'debs so smin grol dngos grub stsol:_rig 'dzin bla ma kun 'dus pad+ma 'byung:_yi dam zhi khro thugs kyi klong na rdzogs:_rab 'byams mkha' 'gro'i ming po dpa' bo cher:_gsol ba 'debs so smin grol dngos grub stsol:_cir snang ye shes lha yi phyag rgyar dag:_sgrar grags mi shigs rdo rje'i sngags su rdzogs:_rtog tshogs dbyings rig dbyer med thig ler smin:_snang srid gzhir bzhengs chen por byin phob cig:_lus la snang stong sku yi byin gyis rlobs:_ngag la grags stong gsung gi byin gyis rlobs:_yid la rig stong thugs kyi byin gyis rlobs:_lus ngag yid la rdo rje'i dbang bzhi skur:_phyi nang gsang ba'i bar chad dbyings su sol:_mchog dang thun mong dngos grub char ltar phob:_mthong thos dran reg smin cing grol ba dang:_'chi med sku gsum 'grub par byin gyis rlobs:_oM AHhU~M badz+ra gu ru pad+ma thod phreng rtsal badz+ra sa ma ya dzaHsid+d+hi pha la hU~M AH_hU~M hU~M hU~M hU~M hU~M:_gsol 'debs byin rlabs myur lam gyis phur tshugs su gsol ba btab/_gsol 'debs 'bum bsags na rdo rje'i tshig rkang bdun pa la bya/_thun mjug tu/_oM AHhU~M badz+ra gu ru pad+ma thod phreng rtsal badz+ra sa ma ya dzaHsid+d+hi pha la hU~M AH_zhes dang*/_thugs yid bsres te/_hU~M gi bzlas pa'ang cung zad bya/_brgyud 'debs byin rlabs sprin phung gi thugs brgyud bskul mthar/_bla ma'i gnas gsum 'bru gsum las:_'od zer rim dang gcig char 'phros:_bdag gi gnas gsum thim pa yis:_dbang bzhi thob cing sgrib bzhi dag:_lam bzhi bsgom pa'i snod du gyur:_mthar ni rang thim dbyer med ngang:_blo 'das chos sku'i rang zhal blta:_dbang len bcas thugs yid bsres la mnyam par bzhag_/thun las ldang ba na snang grags rig pa bla ma'i sku gsung thugs kyi dkyil 'khor du gdod nas rdzogs par shes pa'i yongs grub chen po'i mos gus kyi lam khyer dang ma bral bas/_skye ba kun tu sogs bsngo smon rgyas bsdus ci rigs bya zhing*/_bla ma'i rnal 'byor 'di kho na tsam zhig nyams su blangs kyang skye 'chi bar do'i lam khyer thams cad don gyis tshang bas zung 'jug mchog gi dngos grub nges par mngon du byed nus pa'ang rdo rje'i tshig rkang las/_'di nyid kho na nyams blangs kyang:_tshe 'dir mchog gi dngos grub thob:_de phyir snying la gces par zungs:_sa ma ya:_zhes gdams par mdzad pa ltar skal ldan rnams kyis rtse gcig tu 'bad par bya'o/__/zhes pa'ang rtsa gsum 'od gsal snying thig gi lam yongs su rdzogs pa'i cha rkyen du zab lam 'di nyid kyi smin grol yongs su rdzogs par longs spyod pa'i skal pa dge ba 'od gsal rdo rje thugs mchog rtsal gyis lho ljongs dge ba'i zhing gi bye brag phun tshogs chos gling du gter gzhung rtsa ba'i dgongs pa ltar gsal bar phye bas 'gro kun bla ma ye shes rdo rje'i gsang mdzod la dbugs dbyung ba'i skal bzang du gyur cig_//