JKW-KABUM-11-DA-014-007

🚧 This website is under continued development. We appreciate your patience!

Previous Text Back to Volume PageNext Text

Wylie title	dbang gi lha mo ti nu ma'i bsnyen sgrub las gsum gyi man ngag gi yi ge yid 'phrog li khri'i chu gter
Location	mkhyen brtse'i bka' 'bum Volume 11, sde tshan 14, Text 7, Pages 463-474 (Folios 31a5 to 36b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dbang gi lha mo ti nu ma'i bsnyen sgrub las gsum gyi man ngag gi yi ge yid 'phrog li khri'i chu gter. In 'jam dbyangs mkhyen brtse'i dbang po'i bka' 'bum, Vol. 11: 463-474. Khams sde dge rdzong sar dgon: Rdzong sar blo gros phun tshogs, 2020.
Genre	Recitation Manual - bsnyen yig  ·  Sadhanas - Evocation Ritual - sgrub thabs  ·  Pith Instructions - man ngag  ·  Activity Practices - las tshogs
Deity	dbang gi lha mo ti nu ma
Colophon	།ཅེས་རྩ་བའི་ཡི་གེ་དང་། གསལ་བྱེད་ཀྱི་ཡིག་ཆ་སྔ་ཕྱི་འགའ་ཞིག་ལ་བརྟེན་ནས་དབང་གི་ལྷ་མོ་ཏི་ནུ་མའི་བསྙེན་པ་དང་། སྒྲུབ་པ་དང་། ལས་ལ་སྦྱར་བའི་མན་ངག་ཐམས་ཅད་བཀླགས་པས་གྲུབ་པར་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་ཤནྟ་ཤྩ་བྷ་བ་ཡོ་སྶརྦ་སུ་ཤྲེ་ཡོ་བ་ཤཾ་ཀ་ར་བྷཱུ་ཡཱ་ཏ།།
	ces rtsa ba'i yi ge dang /__gsal byed kyi yig cha snga phyi 'ga' zhig la brten nas dbang gi lha mo ti nu ma'i bsnyen pa dang /__sgrub pa dang /__las la sbyar ba'i man ngag thams cad bklags pas grub par 'jam dbyangs bla ma dgyes pa'i 'bangs mkhyen brtse'i dbang pos bris pa shan+ta sh+tsa b+ha ba yo s+sarba su shre yo ba shaM ka ra b+hU yA ta

1 Texts in this Section (sde tshan or chos tshan)

7 463-474	དབང་གི་ལྷ་མོ་ཏི་ནུ་མའི་བསྙེན་སྒྲུབ་ལས་གསུམ་གྱི་མན་ངག་གི་ཡི་གེ་ཡིད་འཕྲོག་ལི་ཁྲིའི་ཆུ་གཏེར། dbang gi lha mo ti nu ma'i bsnyen sgrub las gsum gyi man ngag gi yi ge yid 'phrog li khri'i chu gter Recitation Manual - bsnyen yig   ·   Sadhanas - Evocation Ritual - sgrub thabs   ·   Pith Instructions - man ngag   ·   Activity Practices - las tshogs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

དབང་གི་ལྷ་མོ་ཏི་ནུ་མའི་བསྙེན་སྒྲུབ་ལས་གསུམ་གྱི་མན་ངག་གི་ཡི་གེ་ཡིད་འཕྲོག་ལི་ཁྲིའི་ཆུ་གཏེར་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། ཁྱབ་བདག་འཁོར་ལོའི་མགོན་པོ་དང་། །དབང་མཛད་ལྷ་མོར་གུས་བཏུད་ནས། །བརྟན་གཡོའི་ཕུན་ཚོགས་འགུགས་བྱེད་པའི། །མན་ངག་ལི་ཁྲིའི་ཆུ་གཏེར་སྤེལ། །འདི་ལ་བཞི། བསྙེན་པ། སྒྲུབ་པ། ཁྱད་པར་གྱི་ལས་སྦྱོར། དམ་ཚིག་གི་ངེས་པའོ། །དང་པོ་ནི། སྲིད་ལས་ངེས་པར་འབྱུང་བའི་ཟིལ་དངར་གྱིས་སྐྱེད་བསྲིངས་པའི་གཞན་ཕན་བྱང་ཆུབ་སེམས་ཀྱི་པདྨ་དཀར་པོའི་དགའ་ཚལ་མཆོག་ཏུ་དར་ལ་བབས་ཤིང་གཞན་དོན་ཁོ་ནར་ཟུང་འཇུག་རྡོ་རྗེ་འཛིན་པའི་གོ་འཕང་དོན་དུ་གཉེར་བའི་སྐལ་བཟང་རྣམ་དཔྱོད་ཅན་གྱིས། གསང་ཆེན་བླ་ན་མེད་པ་དཔལ་འཁོར་ལོ་སྡོམ་པའི་དཀྱིལ་འཁོར་ཆེན་པོར་དབང་བཞི་ཡོངས་སུ་རྫོགས་པས་རྒྱུད་སྨིན་པ་དང་། གཞིའི་བསྙེན་པ་ལས་སུ་རུང་པ་དང་། དམ་ཚིག་དང་སྡོམ་པ་རྣམ་པར་དག་པ་གཞིར་བཞག་ནས། འདིའི་རྗེས་སུ་གནང་བ་མན་ངག་དང་བཅས་པ་བརྒྱུད་ལྡན་གྱི་བླ་མ་ལས་མནོས་ཏེ། བསྟན་པ་དང་སེམས་ཅན་གྱི་དོན་ཁོ་ནར་རབ་འབྱམས་དབང་གི་ཕྲིན་ལས་ལ་འཇུག་པར་བྱའོ། །དེའང་གནས་དབེན་པར་མཚམས་དམ་དུ་གཅད། རང་གི་མདུན་འདིའི་བྲིས་སྐུ་ཡོད་ན་བཀྲམ་པའི་སྤྱན་སྔར་རང་ཉིད་ཁ་ནུབ་ཏུ་ཕྱོགས་ཤིང་ལྷ་མོའི་ང་རྒྱལ་ལ་གནས་པས་ཟངས་ཀྱི་མེ་ལོང་ལ་མ་ད་ནའི་རླན་ཅུང་ཟད་དང་བཅས་གནས་ཆེན་ལས་བྱུང་བའི་སིནྡྷུ་ར་ཁོད་སྙོམས་པར་བཀྲམ་ལ་པདྨ་འདབ་མ་བཞི་བྲིས་པའི་ལྟེ་བར་ཧྲཱི༔ ཤར་གྱི་འདབ་མ་ནས་གཡས་སྐོར་གྱིས། ས། ཧི། ཀ །ལ་ཞེས་པའི་ཡི་གེ་འབྲུ་རེ་དབུ་ཕྱིར་བསྟན་དུ་བྲི། བྲིས་སྐུའི་སྤྱན་སྔར་སྟེགས་བུ་དམར་ཟླུམ་གྱི་དབུས་སུ་མཉྫིའི་ཁར་གཞག །དར་དམར་པོའི་ལྡིང་གུར་དབུབ། མདུན་དུ་འབུལ་གཏོར་ཟླུམ་པོ་སྨུག་རྩིས་བྱུགས་པ་རྒྱན་ལྡན་ཤ་ཆང་དང་མངར་གསུམ་ལ་སོགས་པའི་ཁ་ཟས་བཟང་རྒུས་གཏམས་པ་དང་། མེ་ཏོག་དམར་པོ་ལ་སོགས་པའི་ཉེར་སྤྱོད་ལྔ་བཀོད་མཛེས་སུ་བསྟར། རང་གི་ཉེ་ལོགས་སུ་རྡོ་རྗེ་དྲིལ་བུ། ཌཱ་མ་རུ། མེ་ཏོག་དམར་པོའི་སྣོད། བདུད་རྩི་རིལ་བུ་བཏབ་པའི་ཆང་ཕུད་དང་བཅས་པ་བཤམ། གོས་རྒྱན་དམར་པོ་དང་བཅས་སྟན་བདེ་བ་ལ་ལུས་བསྲང་། ཆགས་ཤིང་འདུན་པའི་བསམ་པས་དྲན་པ་མངོན་དུ་བཞག་སྟེ། གནས་ཁང་དབང་གི་ཕོ་བྲང་པདྨ་རཱ་ག་ལས་གྲུབ་པ་ཟླ་གམ་སྒོ་གཅིག་པ་ཡངས་ཤིང་རྒྱ་ཆེ་བའི་མདུན་གྱི་ནམ་མཁར་སྐྱབས་ཡུལ་བླ་མ་རྡོ་རྗེ་འཆང་སྐུ་མདོག་དམར་པོ་ལ་སྐྱབས་གནས་ཀུན་གྱིས་བསྐོར་བའི་སྤྱན་སྔར། བདག་དང་འགྲོ་བ་ཞེས་སོགས་སྐྱབས་འགྲོ་ཇི་ལྟར་རིགས་པ་དང་། གསོལ་བ་བཏབ་མཐར་སྐྱབས་ཡུལ་རང་ལ་བསྟིམ། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རབ་འབྱམས་དབང་གི་ཕྲིན་ལས་ལ་འཇུག་པར་བགྱིའོ། །ཞེས་ལན་གསུམ་གྱིས་སེམས་བསྐྱེད། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམས་པས་བསོད་ནམས་ཀྱི་ཚོགས་དང་། སྭ་བྷཱ་ཝའི་སྔགས་བརྗོད་པས་ཆོས་ཐམས་ཅད་འོད་གསལ་སྟོང་ཉིད་དུ་སྦྱངས་ཏེ་ཡེ་ཤེས་ཀྱི་ཚོགས་བསག །སྟོང་པའི་ངང་ལས་རང་ཉིད་སྐད་ཅིག་གིས་ལྷ་མོ་ཏི་ནུ་མ་སྐུ་མདོག་དམར་མོ་ཞལ་གཅིག་ཕྱག་གཉིས་མ། གཡས་གྲི་གུག་འཕྱར་ཞིང་། གཡོན་ཐོད་པ་ཁྲག་གིས་གང་བ་ཐུགས་ཀར་འཛིན་པ། ཞབས་གཡོན་པདྨ་དང་ཟླ་བའི་སྟེང་ན་བརྐྱང་པ། གཡས་བསྐུམས་ནས་གཡོན་གྱི་བརླ་ལ་བྲང་ངའི་མཚམས་བཙུགས་པའི་སྐྱིལ་ཀྲུང་ཕྱེད་པའི་གར་གྱིས་བཞུགས་པ། སྤྱན་གསུམ་མ་ཁྲོ་མོའི་རྣམ་པ་རུས་པའི་རྒྱན་གྱིས་བརྒྱན་པ། དེའི་ལྟེ་བར་ཟླ་བའི་སྟེང་དུ་ཤར་དུ་ས། ལྷོར་ཧི། ནུབ་ཏུ་ཀ །བྱང་དུ་ལ། དབུས་སུ་ཧྲཱིཿདམར་པོ། མདུན་དུ་མཎྜལ་གྱི་གནས་སུའང་སྔགས་ཀྱི་འཁོར་ལོ་ངོ་བོ་ལྷ་ལ། རྣམ་པ་ཡི་གེའི་གཟུགས་འོད་ཟེར་དམར་པོ་འཕྲོ་ཞིང་འདུ་བ་དང་བཅས་པར་གྱུར། ཅེས་བརྗོད་ཅིང་བསམ། རང་གི་ཐུགས་ཀ་ནས་འོད་ཟེར་འཕྲོས་པས་རང་བཞིན་གྱི་གནས་ན་བཞུགས་པའི་ལྷ་མོ་ཏི་ནུ་མའི་ཐུགས་ཀར་ཕོག་པས་ཐུགས་རྒྱུད་བསྐུལ། ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ་སྔགས་ཀྱི་ཡི་གེའི་རྣམ་པར་སྤྱན་དྲངས། མདུན་གྱི་འཁོར་ལོ་ལ་ཐིམ་པར་དམིགས། མཆོད་པ་བསང་སྦྱངས། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མེ་ཏོག །བདུག་སྤོས། མར་མེ། དྲི་མཆོག །ཞལ་ཟས། རོལ་མོ་ལ་སོགས་པ་མཆོད་རྫས་བསམ་གྱིས་མི་ཁྱབ་པར་གྱུར། ཨོཾ་བཛྲ་པུཥྤེ་ཨཱཿཧཱུྃ་ནས་ཤཔྡ་ཨཱཿཧཱུྃ་གི་བར་གྱིས་བྱིན་གྱིས་བརླབ། ཨོཾ་བཛྲ་པུཥྤེ་པྲ་ཏཱིཙྪ་སྭཱ་ཧཱ་ནས་ཤཔྡའི་བར་སྦྱར་བ་དང་། ཁྱད་པར་མེ་ཏོག་དམར་པོ་གཡོན་པའི་མཐེབ་སྲིན་གྱིས་བླངས་ལ་དབུལ་ཞིང་། ཨོཾ་རཀྟ་པུཥྤེ་པྲ་ཏཱིཙྪ་སྭཱ་ཧཱ་ལན་ལྔ་དང་། དེ་བཞིན་དུ་ཆང་ཕུད་ལན་ལྔ་གཏོར་ཞིང་། ཨོཾ་མ་ད་ན་ཨ་མྲྀ་ཏ་ཨཱཿཧཱུྃ་ཞེས་བརྗོད་པས་མདུན་གྱི་ཡི་གེ་ལྷའི་ངོ་བོར་གྱུར་པ་ལ་མཆོད། ལག་པ་གཡོན་པའི་སྲིན་ལག་ལ་ཕྲེང་བ་བཀལ་ཏེ་ལྟེ་བའི་ཡིག་འབྲུ་ལ་སེམས་རྩེ་གཅིག་ཏུ་བཟུང་ལ། ས་ཧི་ཀ་ལ་ཧྲཱིཿཞེས་བཟླ། དེའི་ཚེ་དམིགས་པ་ནི། མདུན་གྱི་འཁོར་ལོ་ལས་འོད་ཟེར་འཕྲོས། རང་གི་ལྟེ་བའི་ཧྲཱིཿལ་ཐིམ། དེ་ལས་སྔགས་ཀྱི་ཡིག་འབྲུ་ཐོལ་ཐོལ་དུ་བྱུང་། རང་གི་ཞལ་དུ་ཞུགས། ལྟེ་བ་ནས་བརྒྱུད། བར་མ་ཆད་པར་འཁོར་བ་ལས་འོད་ཟེར་དམར་པོ་དཔག་ཏུ་མེད་པ་འཕྲོས་པས་བདེ་བ་ཆེན་པོའི་ཡེ་ཤེས་སྐྱེས། སྣང་བ་ཐམས་ཅད་དམར་ལམ་སོང་སྟེ་དབང་གི་ལས་རབ་འབྱམས་འགྲུབ་པར་བསམ་མོ། །ཐུན་འཇོག་པ་ན། བཅོམ་ལྡན་འདས་མས་བདག་ལ་རབ་འབྱམས་དབང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་འདོད་དོན་གསོལ། གཏོར་མ་འབུལ་བར་འདོད་ན། གཏོར་མ་བསང་སྦྱངས། ཨོཾ་ཨཱཿཧཱུྃ་ཧ་ཧོ་ཧྲཱིཿས་བྱིན་གྱིས་བརླབ། རང་གི་སྙིང་ག་ནས་འོད་ཟེར་འཕྲོས་པས་རང་བཞིན་གྱི་གནས་ནས་ལྷ་མོ་ཏི་ནུ་མ་ལ་དཔའ་བོ་དང་མཁའ་འགྲོའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿས་སྤྱན་དྲངས། པདྨ་ཀ་མ་ལཱ་ཡ་སྟྭཾ་གྱིས་གདན་ཕུལ་ལ་མདུན་དུ་བཞུགས་པར་བསམ། ཨོཾ་བྷ་ག་ཝ་ཏཱི་དེ་ཝཱི་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་མམ་ལྔས་གཏོར་མ་དབུལ། གོང་ལྟར་མཆོད། རྡོ་རྗེ་དཔག་མེད་རྒྱལ་པོ་ཆེ། །མི་རྟོག་རྡོ་རྗེ་ནམ་མཁའ་འཛིན། །འདོད་ཆགས་ཕ་རོལ་ཕྱིན་པ་བརྙེས། །པདྨ་མཁའ་འགྲོར་ཕྱག་འཚལ་བསྟོད། །ཅེས་བསྟོད། སྤྲོ་ན་ཕུན་ཚོགས་ཆོས་དབྱིངས་སོགས་འཇམ་མགོན་མཁྱེན་བརྩེས་མཛད་པའི་བསྟོད་པའང་བྱ། བཅོམ་ལྡན་འདས་མ་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ་སོགས་ཀྱིས་འདོད་དོན་གསོལ། ཡི་གེ་བརྒྱ་པས་ནོངས་པ་བཤགས། ཛཿཧཱུྃ་བྃ་ཧོཿ གཏོར་མགྲོན་འཁོར་ལོའི་ཡིག་འབྲུ་དང་བཅས་པ་རང་གི་ལྟེ་བའི་ཧྲཱིཿཡིག་ལ་ཐིམ་པར་བསམ། རང་གི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། དགེ་བ་འདི་ཡིས་མྱུར་དུ་བདག །དབང་གི་ལྷ་མོ་འགྲུབ་གྱུར་ནས། །ཞེས་སོགས་བསྔོ་སྨོན་བཀྲ་ཤིས་ཀྱིས་མཚམས་སྦྱར་ཏེ་སྤྱོད་ལམ་ལ་འཇུག་གོ། །དེ་ལྟ་བུའི་རིམ་པས་བསྙེན་པ་འབུམ་ཕྲག་ཉི་ཤུས་ལས་ཀྱི་དངོས་གྲུབ་ངེས་པར་འགྲུབ་པ་ཡིན་ནོ། །གཉིས་པ་སྒྲུབ་པ་དང་ལས་སྦྱོར་གཞི་མཐུན་པ་ནི། གཞན་གོང་བཞིན་ལ། བཟླས་པའི་སྐབས་སུ་ལྟེ་བའི་ཧྲཱིཿལས་འོད་ཟེར་དམར་པོ་ལྕགས་ཀྱུ་ལྟ་བུ་རྣོ་ཞིང་མྱུར་བ་གློག་གི་ཟེར་མ་ལྟར་འཕྲོས། གང་དབང་དུ་བསྡུ་བར་འདོད་པའི་བསྒྲུབ་བྱ་ཕོ་ཡིན་ན་སྙིང་ག་དང་། མོ་ཡིན་ན་གསང་གནས་ལ་རེག་པ་ཙམ་གྱིས་རང་དབང་མེད་པར་ཡིད་གཡོས། རླུང་གི་ཤུགས་ཀྱིས་རང་ཉིད་ཀྱི་མདུན་དུ་བཀུག་སྟེ་མགོ་བོ་བདག་ལ་བསྟན་ནས་ཆགས་ཤིང་མྱོས་པས་འགྱེལ་ཏེ་འདུག་པར་བསམ། དེ་ནས་སྔགས་བཟླས་པའི་རྐྱེན་གྱིས་ལྟེ་བའི་ཧྲཱིཿལས་འོད་ཟེར་དམར་པོ་འཕྲོས། རླུང་ཕྱིར་འགྲོ་བ་དང་ལྷན་ཅིག་ཏུ་སྣ་བུག་གཡས་ནས་སོང་། བསྒྲུབ་བྱ་ལ་ཐིམ་པས་དམར་ལམ་གྱིས་སོང་། བདག་ལ་སེམས་ལྷག་པར་ཆགས་ཤིང་མྱོས་པར་བསམ། རླུང་ནང་དུ་འཇུག་པ་ན་བསྒྲུབ་བྱའི་ཡིད་དང་འོད་དམར་པོ་ལྷན་ཅིག་ཏུ་སྣ་བུག་གཡོན་ནས་བྱུང་། ལྟེ་བའི་ཧྲཱིཿལ་ཐིམ་པས་བདག་གི་དབང་དུ་འདུས་པར་མོས་པ་དང་བཅས་རླུང་བུམ་པ་ཅན་ཁ་སྦྱར་དུ་གཟུང་། རིག་པ་འཛིན་མེད་དུ་གཞག །སྔགས་ཡིད་བཟླས་བྱ། དེ་ལྟར་ངག་བཟླས་དང་། ཡིད་བཟླས་སྤེལ་ནས་ཐུན་གྱི་དངོས་གཞིར་ཉམས་སུ་བླང་། ཐུན་འཇོག་པ་ན། བསྒྲུབ་བྱ་འོད་དམར་པོ་བདེ་བ་ཆེན་པོའི་ངོ་བོར་ལྟེམ་གྱིས་ཞུ་སྟེ་ལྟེ་བའི་ཧྲཱིཿལ་ཐིམ་པར་བསམ་ཞིང་རླུང་སྦྱོར་དང་། འཛིན་མེད་ཀྱི་ལྟ་བའི་རྒྱས་གདབ། མཐར་འདོད་དོན་གསོལ་གདབ་དང་། གཏོར་བསྔོ་སོགས་བསྙེན་པའི་སྐབས་དང་འདྲའོ། །དེ་ལྟ་བུ་ཞག་བདུན་དུ་ཉམས་སུ་བླངས་པས་བསྒྲུབ་བྱ་དབང་དུ་འགྱུར་པ་ཡིན་ལ། གལ་ཏེ་བསྒྲུབ་བྱ་བསོད་ནམས་ཆེ་བས་དབང་དུ་མ་འདུས་ན་སླར་ཡང་བསྙེན་པ་ཁ་གསོ་དང་བཅས་ལན་གཉིས་ལན་གསུམ་དུ་བསྐྱར་བས་མི་འགྲུབ་མི་སྲིད་པ་ཡིན་ནོ། །གསུམ་པ་ཁྱད་པར་གྱི་ལས་སྦྱོར་དབང་གི་སྦྱིན་སྲེག་བྱ་བར་འདོད་ན། རང་གི་མདུན་དུ་སྟེགས་བུ་ཇི་ལྟར་རིགས་པར་ལི་ཁྲི་ལ་སོགས་པས་བྱུགས་ལ་ཐབ་ཁུང་གྲུ་གསུམ་དམར་པོ་ཞིག་བྱ། དེར་ཙནྡན་དམར་པོའམ་མཛོ་མོ་ཤིང་ལ་སོགས་པ་མདོག་དམར་ཞིང་རོ་སྐྱུར་བའི་ཤིང་བརྩིག །བསྲེག་རྫས་ཀྱི་གཙོ་བོ་ཀཎྜ་ཀ་རིའི་མེ་ཏོག་དམར་པོ་དང་ལན་ཚ་དང་། བུ་རམ་བསྲེས་པའི་རིལ་བུ་སོ་སོ་སྲན་མ་ཙམ་མང་དུ་བསག །གཞན་ཡང་ཡམ་ཤིང་དང་། མར་ཁུ་ཁ་དོག་དམར་པོར་བསྒྱུར་བའང་འདུ་བྱ། ཐབ་ཀྱི་གཡས་སུ་གཏོར་མ་ཁ་དོག་དམར་པོར་བསྒྱུར་བ་ཞིག་གཞག །མེ་ཏོག་ལ་སོགས་པའི་མཆོད་པ་ལྔ་འང་བཤམ། རང་གི་མདུན་མཎྜལ་ཁ་དོག་དམར་པོར་བསྒྱུར་བ་ལ་མེ་ཏོག་གི་ཚོམ་བུ་ལྔ་བཀྲམ་པ་དང་། རྡོ་རྗེ་དྲིལ་བུ། མེ་ཏོག་དམར་པོ། མ་ད་ན། དགང་བླུགས་ཁ་སྦྱར་བ་སོགས་དགོས་པའི་ཡོ་བྱད་ཐམས་ཅད་ཚོགས་པར་བྱས་ལ། ཉིན་ཕྱེད་ཀྱི་དུས་སུ་གོས་རྒྱན་དམར་པོ་དང་བཅས་ཁ་ནུབ་ཏུ་ཕྱོགས་པས་སྐྱབས་འགྲོ་ནས་བཟུང་། དབུས་སུ་ཧྲཱིཿདམར་པོས་མཚན་པར་གྱུར་ཅེས་པའི་བར་བདག་བསྐྱེད་གོང་ལྟར་བསྒོམ། ལྟེ་བའི་ཡིག་འབྲུ་ལ་སེམས་གཏད་དེ། ས་ཧི་ཀ་ལ་ཧྲཱིཿཆེ་གེ་མོ་ཝ་ཤཾ་མ་ན་ཡ་ཧྲཱིཿཛཿ ཞེས་ཅུང་ཟད་བཟླས་ནས་འདོད་དོན་གསོལ། བསྲེག་རྫས་རྣམས་ལ་བསང་ཆུ་འཐོར་ཞིང་ཨོཾ་ཨཱཿཧཱུྃ་མང་དུ་བརྗོད་པས་དབང་གི་ལས་སྒྲུབ་པའི་བདུད་རྩིའི་རང་བཞིན་དུ་བྱིན་གྱིས་བརླབ། དེ་ནས་སྔགས་ཀྱི་མཐར་ཛྭ་ལ་རྃ་ཞེས་བཏགས་པས་ཐབ་ཏུ་དཔལ་འབར་གྱི་མེ་སྦར། སྟོང་པའི་ངང་ལས་དབང་གི་ཐབ་ཁུང་དམར་པོ་འོད་ཟེར་དམར་པོ་ཁོར་ཡུག་ཏུ་དཀྲིགས་པའི་དབུས་སུ་ལྷ་རྫས་ཀྱི་བུད་ཤིང་མེ་འབར་བ་དང་བཅས་པར་བསམ། ས་ཧི་ཀ་ལ་ཧྲཱིཿཞེས་བརྗོད་ཅིང་མཎྜལ་གྱི་མེ་ཏོག་ཐབ་ཀྱི་དབུས་སུ་ཅུང་ཟད་དོར་ལ། དེའི་དབུས་སུ་སྐད་ཅིག་གིས་དབང་གི་ལྷ་མོ་ཏི་ནུ་མ་སྐུ་མདོག་དམར་པོ་སོགས་ནས། དབུས་སུ་ཧྲཱིཿདམར་པོས་མཚན་པར་གྱུར་ཅེས་པའི་བར་གྱིས་གསལ་གདབ། མཆོད་པ་རྣམས་བྱིན་གྱིས་བརླབས་ལ་ཉེར་སྤྱོད་རོལ་མོ་དང་བཅས་པ་དང་། མེ་ཏོག་དམར་པོ། མ་ད་ན་རྣམས་གོང་ལྟར་དབུལ། རྡོ་རྗེ་དཔག་མེད་རྒྱལ་པོ་སོགས་དང་། ཕུན་ཚོགས་ཆོས་དབྱིངས་སོགས་ཀྱིས་བསྟོད། དགང་བླུགས་བཟུང་ལ། ས་ཧི་ཀ་ལ་ཧྲཱིཿཆེ་གེ་མོ་ཝ་ཤཾ་མ་ན་ཡ་ཧྲཱིཿཛཿ ཞེས་པས་མར་ཁུ་ཉེར་གཅིག་སོགས་ཇི་ལྟར་རིགས་པ་དང་། ཡམ་ཤིང་ཉེར་གཅིག་སོགས་དབུལ། དེ་ནས་ཁྱད་པར་གྱི་རྫས་ཀཎྜཀ་རིའི་མེ་ཏོག །ལན་ཚ་བུ་རམ་གྱི་རིལ་བུ་རྣམས་གོ་རིམ་མ་ནོར་བར་གོང་གི་སྔགས་ཁོ་ནས་རེས་མོས་སུ་རྫས་མ་རྫོགས་ཀྱི་བར་དུ་དབུལ། དེའི་ཚེ་དམིགས་པ་ནི། མདུན་བསྐྱེད་ཀྱི་ལྷ་མོའི་ལྟེ་བའི་ཧྲཱིཿལས་སོགས་སྒྲུབ་པའི་སྐབས་ལྟར་ཡིད་ཀྱིས་གསལ་གདབ་པ་དང་། མཐར་བསྒྲུབ་བྱ་རང་ལ་བསྟིམ་པའི་བར་འདྲ། རྫོགས་པ་ན་མཆོད་བསྟོད་གོང་ལྟར་དང་གཏོར་མའི་ཕུད་ནས་ཀྱང་དབུལ། འདོད་དོན་གསོལ། མ་འབྱོར་པ་དང་སོགས་ཀྱི་མཐར་ཡི་གེ་བརྒྱ་བས་ནོངས་པ་བཤགས། ཛཿཧཱུྃ་བྃ་ཧོཿས་ཐབ་ཀྱི་ལྷ་མོ་རང་གི་ལྟེ་བའི་ཧྲཱིཿལ་ཐིམ་པར་བསམ། གནས་གསུམ་བསྲུང་། བསྔོ་སྨོན་བཀྲ་ཤིས་བྱའོ། །དེ་ལྟར་ཞག་ཉེར་གཅིག་སོགས་ཐུན་དུ་བཅད་དེ་ཉམས་སུ་བླངས་པས་ལས་ཐོགས་པ་མེད་པར་འགྲུབ་པར་འགྱུར་བ་ནི་ངེས་པའོ། །བཞི་པ་ནི། རྡོ་རྗེ་ཐེག་པའི་རྩ་བ་དང་ཡན་ལག་གི་དམ་ཚིག་སྤྱི་དང་ཁྱད་པར་དུ་འདིའི་དམ་ཚིག་ཏུ་སེམས་ཅན་ཐམས་ཅད་ལ་ཕྲག་དོག་མེད་པར་དགའ་བར་བྱ། མིག་ཡུལ་དུ་གང་མཐོང་བ་ཐམས་ཅད་ལྷ་མོར་བསམས་ནས་དགྱེས་བཞིན་དུ་རང་ལ་ཐིམ་པར་བསྒོམ། འདིའི་བསྙེན་སྒྲུབ་ལ་བརྩོན་པར་བྱ། ལོངས་སྤྱོད་གང་བྱུང་གི་ཕུད་བླ་མ་དང་ལྷ་མོ་ལ་མཆོད་པར་དབུལ། ཆགས་ཞེན་ཆུང་བར་བྱ། མན་ངག་གསང་བས་སྤྱད་ཅིང་སློབ་མ་སྣོད་ལྡན་གཅིག་གཉིས་ཙམ་ལས་མང་བར་མི་སྤེལ་བར་གསུངས་པ་ལྟར་ཚུལ་བཞིན་དུ་བསླབ་པར་བྱའོ། །རིག་སྔགས་གྲུབ་པའི་ཡེ་ཤེས་བྱིན། །ཡིད་འཕྲོག་ལི་ཁྲིའི་ཆུ་གཏེར་གྱིས། །བརྟན་གཡོའི་དངོས་ཀུན་དབང་བྱས་ནས། །སྲིད་ཞིའི་དགེ་ལེགས་རྒྱས་གྱུར་ཅིག །ཅེས་རྩ་བའི་ཡི་གེ་དང་། གསལ་བྱེད་ཀྱི་ཡིག་ཆ་སྔ་ཕྱི་འགའ་ཞིག་ལ་བརྟེན་ནས་དབང་གི་ལྷ་མོ་ཏི་ནུ་མའི་བསྙེན་པ་དང་། སྒྲུབ་པ་དང་། ལས་ལ་སྦྱར་བའི་མན་ངག་ཐམས་ཅད་བཀླགས་པས་གྲུབ་པར་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་ཤནྟ་ཤྩ་བྷ་བ་ཡོ་སྶརྦ་སུ་ཤྲེ་ཡོ་བ་ཤཾ་ཀ་ར་བྷཱུ་ཡཱ་ཏ།། །། ༈

[edit]

dbang gi lha mo ti nu ma'i bsnyen sgrub las gsum gyi man ngag gi yi ge yid 'phrog li khri'i chu gter/ dbang gi lha mo ti nu ma'i bsnyen sgrub las gsum gyi man ngag gi yi ge yid 'phrog li khri'i chu gter zhes bya ba bzhugs so/__/oM swa sti sid+d+haM/__khyab bdag 'khor lo'i mgon po dang /__/dbang mdzad lha mor gus btud nas/__/brtan g.yo'i phun tshogs 'gugs byed pa'i/__/man ngag li khri'i chu gter spel/__/'di la bzhi/__bsnyen pa/__sgrub pa/__khyad par gyi las sbyor/__dam tshig gi nges pa'o/__/dang po ni/__srid las nges par 'byung ba'i zil dngar gyis skyed bsrings pa'i gzhan phan byang chub sems kyi pad+ma dkar po'i dga' tshal mchog tu dar la babs shing gzhan don kho nar zung 'jug rdo rje 'dzin pa'i go 'phang don du gnyer ba'i skal bzang rnam dpyod can gyis/__gsang chen bla na med pa dpal 'khor lo sdom pa'i dkyil 'khor chen por dbang bzhi yongs su rdzogs pas rgyud smin pa dang /__gzhi'i bsnyen pa las su rung pa dang /__dam tshig dang sdom pa rnam par dag pa gzhir bzhag nas/__'di'i rjes su gnang ba man ngag dang bcas pa brgyud ldan gyi bla ma las mnos te/__bstan pa dang sems can gyi don kho nar rab 'byams dbang gi phrin las la 'jug par bya'o/__/de'ang gnas dben par mtshams dam du gcad/__rang gi mdun 'di'i bris sku yod na bkram pa'i spyan sngar rang nyid kha nub tu phyogs shing lha mo'i nga rgyal la gnas pas zangs kyi me long la ma da na'i rlan cung zad dang bcas gnas chen las byung ba'i sin+d+hu ra khod snyoms par bkram la pad+ma 'dab ma bzhi bris pa'i lte bar hrI:__shar gyi 'dab ma nas g.yas skor gyis/__sa/__hi/__ka__/la zhes pa'i yi ge 'bru re dbu phyir bstan du bri/__bris sku'i spyan sngar stegs bu dmar zlum gyi dbus su many+dzi'i khar gzhag__/dar dmar po'i lding gur dbub/__mdun du 'bul gtor zlum po smug rtsis byugs pa rgyan ldan sha chang dang mngar gsum la sogs pa'i kha zas bzang rgus gtams pa dang /__me tog dmar po la sogs pa'i nyer spyod lnga bkod mdzes su bstar/__rang gi nye logs su rdo rje dril bu/__DA ma ru/__me tog dmar po'i snod/__bdud rtsi ril bu btab pa'i chang phud dang bcas pa bsham/__gos rgyan dmar po dang bcas stan bde ba la lus bsrang /__chags shing 'dun pa'i bsam pas dran pa mngon du bzhag ste/__gnas khang dbang gi pho brang pad+ma rA ga las grub pa zla gam sgo gcig pa yangs shing rgya che ba'i mdun gyi nam mkhar skyabs yul bla ma rdo rje 'chang sku mdog dmar po la skyabs gnas kun gyis bskor ba'i spyan sngar/_bdag dang 'gro ba zhes sogs skyabs 'gro ji ltar rigs pa dang /__gsol ba btab mthar skyabs yul rang la bstim/__sems can thams cad kyi don du rdzogs pa'i sangs rgyas kyi go 'phang thob par bya/__de'i ched du rab 'byams dbang gi phrin las la 'jug par bgyi'o/__/zhes lan gsum gyis sems bskyed/__sems can thams cad bde ba dang sogs tshad med bzhi bsgoms pas bsod nams kyi tshogs dang /__swa b+hA wa'i sngags brjod pas chos thams cad 'od gsal stong nyid du sbyangs te ye shes kyi tshogs bsag__/stong pa'i ngang las rang nyid skad cig gis lha mo ti nu ma sku mdog dmar mo zhal gcig phyag gnyis ma/__g.yas gri gug 'phyar zhing /__g.yon thod pa khrag gis gang ba thugs kar 'dzin pa/__zhabs g.yon pad+ma dang zla ba'i steng na brkyang pa/__g.yas bskums nas g.yon gyi brla la brang nga'i mtshams btsugs pa'i skyil krung phyed pa'i gar gyis bzhugs pa/__spyan gsum ma khro mo'i rnam pa rus pa'i rgyan gyis brgyan pa/__de'i lte bar zla ba'i steng du shar du sa/__lhor hi/__nub tu ka__/byang du la/__dbus su hrIHdmar po/__mdun du maN+Dal gyi gnas su'ang sngags kyi 'khor lo ngo bo lha la/__rnam pa yi ge'i gzugs 'od zer dmar po 'phro zhing 'du ba dang bcas par gyur/__ces brjod cing bsam/__rang gi thugs ka nas 'od zer 'phros pas rang bzhin gyi gnas na bzhugs pa'i lha mo ti nu ma'i thugs kar phog pas thugs rgyud bskul/__thugs gnyis su med pa'i ye shes kyi ngo bo sngags kyi yi ge'i rnam par spyan drangs/__mdun gyi 'khor lo la thim par dmigs/__mchod pa bsang sbyangs/__stong pa'i ngang las oM las byung ba'i rin po che las grub pa'i snod yangs shing rgya che ba'i nang du oM 'od du zhu ba las byung ba'i lha rdzas las grub pa'i me tog__/bdug spos/__mar me/__dri mchog__/zhal zas/__rol mo la sogs pa mchod rdzas bsam gyis mi khyab par gyur/__oM badz+ra puSh+pe AHhU~M nas shap+da AHhU~M gi bar gyis byin gyis brlab/__oM badz+ra puSh+pe pra tIts+tsha swA hA nas shap+da'i bar sbyar ba dang /__khyad par me tog dmar po g.yon pa'i mtheb srin gyis blangs la dbul zhing /__oM rak+ta puSh+pe pra tIts+tsha swA hA lan lnga dang /__de bzhin du chang phud lan lnga gtor zhing /__oM ma da na a mr-i ta AHhU~M zhes brjod pas mdun gyi yi ge lha'i ngo bor gyur pa la mchod/__lag pa g.yon pa'i srin lag la phreng ba bkal te lte ba'i yig 'bru la sems rtse gcig tu bzung la/__sa hi ka la hrIHzhes bzla/__de'i tshe dmigs pa ni/__mdun gyi 'khor lo las 'od zer 'phros/__rang gi lte ba'i hrIHla thim/__de las sngags kyi yig 'bru thol thol du byung /__rang gi zhal du zhugs/__lte ba nas brgyud/__bar ma chad par 'khor ba las 'od zer dmar po dpag tu med pa 'phros pas bde ba chen po'i ye shes skyes/__snang ba thams cad dmar lam song ste dbang gi las rab 'byams 'grub par bsam mo/__/thun 'jog pa na/__bcom ldan 'das mas bdag la rab 'byams dbang gi dngos grub ma lus pa stsal du gsol/__zhes 'dod don gsol/__gtor ma 'bul bar 'dod na/__gtor ma bsang sbyangs/__oM AHhU~M ha ho hrIHsa byin gyis brlab/__rang gi snying ga nas 'od zer 'phros pas rang bzhin gyi gnas nas lha mo ti nu ma la dpa' bo dang mkha' 'gro'i tshogs kyis bskor ba oM badz+ra sa mA dzaHsa spyan drangs/__pad+ma ka ma lA ya s+t+waM gyis gdan phul la mdun du bzhugs par bsam/__oM b+ha ga wa tI de wI sa pa ri wA ra i daM ba liM ta kha kha khA hi khA hi/__lan gsum mam lngas gtor ma dbul/__gong ltar mchod/__rdo rje dpag med rgyal po che/__/mi rtog rdo rje nam mkha' 'dzin/__/'dod chags pha rol phyin pa brnyes/__/pad+ma mkha' 'gror phyag 'tshal bstod/__/ces bstod/__spro na phun tshogs chos dbyings sogs 'jam mgon mkhyen brtses mdzad pa'i bstod pa'ang bya/__bcom ldan 'das ma 'khor bcas rnams/__/mchod sbyin gtor ma 'di bzhes la sogs kyis 'dod don gsol/__yi ge brgya pas nongs pa bshags/__dzaHhU~M ba~M hoH__gtor mgron 'khor lo'i yig 'bru dang bcas pa rang gi lte ba'i hrIHyig la thim par bsam/__rang gi dpral bar oM dkar po/__mgrin par AHdmar po/__thugs kar hU~M sngon po/__dge ba 'di yis myur du bdag__/dbang gi lha mo 'grub gyur nas/__/zhes sogs bsngo smon bkra shis kyis mtshams sbyar te spyod lam la 'jug go/__/de lta bu'i rim pas bsnyen pa 'bum phrag nyi shus las kyi dngos grub nges par 'grub pa yin no/__/gnyis pa sgrub pa dang las sbyor gzhi mthun pa ni/__gzhan gong bzhin la/__bzlas pa'i skabs su lte ba'i hrIHlas 'od zer dmar po lcags kyu lta bu rno zhing myur ba glog gi zer ma ltar 'phros/__gang dbang du bsdu bar 'dod pa'i bsgrub bya pho yin na snying ga dang /__mo yin na gsang gnas la reg pa tsam gyis rang dbang med par yid g.yos/__rlung gi shugs kyis rang nyid kyi mdun du bkug ste mgo bo bdag la bstan nas chags shing myos pas 'gyel te 'dug par bsam/__de nas sngags bzlas pa'i rkyen gyis lte ba'i hrIHlas 'od zer dmar po 'phros/__rlung phyir 'gro ba dang lhan cig tu sna bug g.yas nas song /__bsgrub bya la thim pas dmar lam gyis song /__bdag la sems lhag par chags shing myos par bsam/__rlung nang du 'jug pa na bsgrub bya'i yid dang 'od dmar po lhan cig tu sna bug g.yon nas byung /__lte ba'i hrIHla thim pas bdag gi dbang du 'dus par mos pa dang bcas rlung bum pa can kha sbyar du gzung /__rig pa 'dzin med du gzhag__/sngags yid bzlas bya/__de ltar ngag bzlas dang /__yid bzlas spel nas thun gyi dngos gzhir nyams su blang /__thun 'jog pa na/__bsgrub bya 'od dmar po bde ba chen po'i ngo bor ltem gyis zhu ste lte ba'i hrIHla thim par bsam zhing rlung sbyor dang /__'dzin med kyi lta ba'i rgyas gdab/__mthar 'dod don gsol gdab dang /__gtor bsngo sogs bsnyen pa'i skabs dang 'dra'o/__/de lta bu zhag bdun du nyams su blangs pas bsgrub bya dbang du 'gyur pa yin la/__gal te bsgrub bya bsod nams che bas dbang du ma 'dus na slar yang bsnyen pa kha gso dang bcas lan gnyis lan gsum du bskyar bas mi 'grub mi srid pa yin no/__/gsum pa khyad par gyi las sbyor dbang gi sbyin sreg bya bar 'dod na/__rang gi mdun du stegs bu ji ltar rigs par li khri la sogs pas byugs la thab khung gru gsum dmar po zhig bya/__der tsan+dan dmar po'am mdzo mo shing la sogs pa mdog dmar zhing ro skyur ba'i shing brtsig__/bsreg rdzas kyi gtso bo kaN+Da ka ri'i me tog dmar po dang lan tsha dang /__bu ram bsres pa'i ril bu so so sran ma tsam mang du bsag__/gzhan yang yam shing dang /__mar khu kha dog dmar por bsgyur ba'ang 'du bya/__thab kyi g.yas su gtor ma kha dog dmar por bsgyur ba zhig gzhag__/me tog la sogs pa'i mchod pa lnga 'ang bsham/__rang gi mdun maN+Dal kha dog dmar por bsgyur ba la me tog gi tshom bu lnga bkram pa dang /__rdo rje dril bu/__me tog dmar po/__ma da na/__dgang blugs kha sbyar ba sogs dgos pa'i yo byad thams cad tshogs par byas la/__nyin phyed kyi dus su gos rgyan dmar po dang bcas kha nub tu phyogs pas skyabs 'gro nas bzung /__dbus su hrIHdmar pos mtshan par gyur ces pa'i bar bdag bskyed gong ltar bsgom/__lte ba'i yig 'bru la sems gtad de/__sa hi ka la hrIHche ge mo wa shaM ma na ya hrIHdzaH__zhes cung zad bzlas nas 'dod don gsol/__bsreg rdzas rnams la bsang chu 'thor zhing oM AHhU~M mang du brjod pas dbang gi las sgrub pa'i bdud rtsi'i rang bzhin du byin gyis brlab/__de nas sngags kyi mthar dz+wa la ra~M zhes btags pas thab tu dpal 'bar gyi me sbar/__stong pa'i ngang las dbang gi thab khung dmar po 'od zer dmar po khor yug tu dkrigs pa'i dbus su lha rdzas kyi bud shing me 'bar ba dang bcas par bsam/__sa hi ka la hrIHzhes brjod cing maN+Dal gyi me tog thab kyi dbus su cung zad dor la/__de'i dbus su skad cig gis dbang gi lha mo ti nu ma sku mdog dmar po sogs nas/__dbus su hrIHdmar pos mtshan par gyur ces pa'i bar gyis gsal gdab/__mchod pa rnams byin gyis brlabs la nyer spyod rol mo dang bcas pa dang /__me tog dmar po/__ma da na rnams gong ltar dbul/__rdo rje dpag med rgyal po sogs dang /__phun tshogs chos dbyings sogs kyis bstod/__dgang blugs bzung la/__sa hi ka la hrIHche ge mo wa shaM ma na ya hrIHdzaH__zhes pas mar khu nyer gcig sogs ji ltar rigs pa dang /__yam shing nyer gcig sogs dbul/__de nas khyad par gyi rdzas kaN+Daka ri'i me tog__/lan tsha bu ram gyi ril bu rnams go rim ma nor bar gong gi sngags kho nas res mos su rdzas ma rdzogs kyi bar du dbul/__de'i tshe dmigs pa ni/__mdun bskyed kyi lha mo'i lte ba'i hrIHlas sogs sgrub pa'i skabs ltar yid kyis gsal gdab pa dang /__mthar bsgrub bya rang la bstim pa'i bar 'dra/__rdzogs pa na mchod bstod gong ltar dang gtor ma'i phud nas kyang dbul/__'dod don gsol/__ma 'byor pa dang sogs kyi mthar yi ge brgya bas nongs pa bshags/__dzaHhU~M ba~M hoHsa thab kyi lha mo rang gi lte ba'i hrIHla thim par bsam/__gnas gsum bsrung /__bsngo smon bkra shis bya'o/__/de ltar zhag nyer gcig sogs thun du bcad de nyams su blangs pas las thogs pa med par 'grub par 'gyur ba ni nges pa'o/__/bzhi pa ni/__rdo rje theg pa'i rtsa ba dang yan lag gi dam tshig spyi dang khyad par du 'di'i dam tshig tu sems can thams cad la phrag dog med par dga' bar bya/__mig yul du gang mthong ba thams cad lha mor bsams nas dgyes bzhin du rang la thim par bsgom/__'di'i bsnyen sgrub la brtson par bya/__longs spyod gang byung gi phud bla ma dang lha mo la mchod par dbul/__chags zhen chung bar bya/__man ngag gsang bas spyad cing slob ma snod ldan gcig gnyis tsam las mang bar mi spel bar gsungs pa ltar tshul bzhin du bslab par bya'o/_/rig sngags grub pa'i ye shes byin/__/yid 'phrog li khri'i chu gter gyis/__/brtan g.yo'i dngos kun dbang byas nas/__/srid zhi'i dge legs rgyas gyur cig__/ces rtsa ba'i yi ge dang /__gsal byed kyi yig cha snga phyi 'ga' zhig la brten nas dbang gi lha mo ti nu ma'i bsnyen pa dang /__sgrub pa dang /__las la sbyar ba'i man ngag thams cad bklags pas grub par 'jam dbyangs bla ma dgyes pa'i 'bangs mkhyen brtse'i dbang pos bris pa shan+ta sh+tsa b+ha ba yo s+sarba su shre yo ba shaM ka ra b+hU yA ta//____//__!_