JKW-KABUM-13-PA-014

🚧 This website is under continued development. We appreciate your patience!

Previous Section Back to Volume PageNext Section

ཐུགས་རྗེ་ཆེན་པོ་འཇིག་རྟེན་དབང་ཕྱུག་གི་རྒྱུན་ཁྱེར་ཟབ་ལམ་སྙིང་པོ།

Wylie title	thugs rje chen po 'jig rten dbang phyug gi rgyun khyer zab lam snying po
Location	mkhyen brtse'i bka' 'bum Volume 13, sde tshan 14, Pages 199-204 (Folios 1a to 3b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	ངག་དབང་བློ་བཟང་རྒྱ་མཚོ་ (Dalai Lama, 5th)
Citation	'jam dbyangs mkhyen brtse'i dbang po. thugs rje chen po 'jig rten dbang phyug gi rgyun khyer zab lam snying po. In 'jam dbyangs mkhyen brtse'i dbang po'i bka' 'bum, Vol. 13: 199-204. Khams sde dge rdzong sar dgon: Rdzong sar blo gros phun tshogs, 2020.
Genre	Daily Practice - rgyun khyer
Cycle	ཐུགས་རྗེ་ཆེན་པོ་འཇིག་རྟེན་དབང་ཕྱུག་ལྷ་དགུ་ (thugs rje chen po 'jig rten dbang phyug lha dgu)
Parent Cycle	དག་སྣང་རྒྱ་ཅན་ (dag snang rgya can)
Deity	thugs rje chen po
RTZ	In the Rinchen Terdzö: https://rtz.tsadra.org/index.php/Terdzo-YA-007
Colophon	།ཅེས་པའང་རྡོ་རྗེའི་གསུང་གི་གཞུང་ལ་རིགས་མཐུན་གྱི་མཚམས་སྦྱོར་འཇུག་པ་བདེ་བར་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག།
	ces pa'ang rdo rje'i gsung gi gzhung la rigs mthun gyi mtshams sbyor 'jug pa bde bar mtsho skyes bla ma dgyes pa'i 'bangs mkhyen brtse'i dbang pos bris pa dge legs su gyur cig

1 Texts in this Section (sde tshan or chos tshan)

199-204	ཐུགས་རྗེ་ཆེན་པོ་འཇིག་རྟེན་དབང་ཕྱུག་གི་རྒྱུན་ཁྱེར་ཟབ་ལམ་སྙིང་པོ། thugs rje chen po 'jig rten dbang phyug gi rgyun khyer zab lam snying po Daily Practice - rgyun khyer	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །ཐུགས་རྗེ་ཆེན་པོ་འཇིག་རྟེན་དབང་ཕྱུག་གི་རྒྱུན་ཁྱེར་ཟབ་ལམ་སྙིང་པོ་ཞེས་བྱ་བ་བཞུགས་སོ།། །། ན་མོ་གུ་རུ་ལོ་ཀེ་ཤྭ་རཱ་ཡ། འདིར་དག་སྣང་རྒྱ་ཅན་ལས་བྱུང་བའི་ཐུགས་རྗེ་ཆེན་པོ་འཇིག་རྟེན་དབང་ཕྱུག་གི་རྒྱུན་གྱི་རྣལ་འབྱོར་སྙིང་པོར་དྲིལ་ཏེ་ཉམས་སུ་བླང་བའི་ཚུལ་ལ་གསུམ། སྔོན་འགྲོ། དངོས་གཞི། རྗེས་སོ། །དང་པོ་ལ་སྐྱབས་སེམས་ནི། བདག་སོགས་འགྲོ་ཀུན་དེང་ནས་བྱང་ཆུབ་བར། །བླ་མ་རྩ་བ་གསུམ་ལ་སྐྱབས་སུ་མཆི། །གཞན་དོན་རྫོགས་པའི་སངས་རྒྱས་ཐོབ་བྱའི་ཕྱིར། །འཇིག་རྟེན་དབང་ཕྱུག་བསྒྲུབ་པར་སེམས་བསྐྱེད་དོ། །ལན་གསུམ། བགེགས་བསྐྲད་སྲུང་འཁོར་ནི། ཧྲཱིཿ རང་ཉིད་རྟ་མགྲིན་བེ་ཅོན་སྡིགས་མཛུབ་མཛད། །ཐུགས་ལས་སྤྲུལ་པའི་ཁྲོ་མཚོན་མེ་ཕུང་གིས། །བར་དུ་གཅོད་པའི་གདོན་བགེགས་འབྱུང་པོ་རྣམས། །མཐར་བསྐྲད་རྡོ་རྗེ་སྲུང་བའི་གུར་དུ་གྱུར། །ཨོཾ་བཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ། གནོད་བྱེད་འབྱུང་པོ་ཨུ་ཙཊྚ་ཡ་ཕཊ། ཨོཾ་བཛྲ་ཙཀྲ་ཛྭ་ལ་རྃ་ཧཱུྃ་བྷྲཱུྃ་ཧཱུྃ། མཆོད་པ་དངོས་བཤམས་ཡོད་ན། རྃ་ཡྃ་ཁྃ། ཐུགས་ནས་རྃ་ཡྃ་ཁྃ་འཕྲོས་པས། །ཕྱི་ནང་གསང་བའི་མཆོད་རྫས་ཀྱིས། །མ་དག་ཉེས་སྐྱོན་ཀུན་སྦྱངས་ནས། །མི་ཟད་ནམ་མཁའི་མཛོད་དུ་གྱུར། །ཨོཾ་ཨཱཿཧཱུྃ་ཞེས་པས་བརླབ་བོ། །གཉིས་པ་ལ། དམ་ཚིག་པ་བསྐྱེད་པ་ནི། །ཨོཾ། སྟོང་ཉིད་སྙིང་རྗེ་དབྱེར་མེད་རང་རིག་ཧྲཱིཿ དེ་ལས་འོད་ཟེར་ཐིག་འཕྲོས་འབྱུང་ལྔའི་སྟེང་། །བྷྲཱུྃ་ལས་བདེ་ཆེན་ལྷུན་གྲུབ་གཞལ་ཡས་ཁང་། །གྲུ་བཞི་སྒོ་བཞི་རྟ་བབས་བཞི་དང་ལྡན། །རྩིག་པ་ལྔ་ལྡན་ཕ་གུ་པ་ཏྲ་ཅན། །དྲ་ཕྱེད་ཤར་བུ་མདའ་ཡབ་ཕིབ་ཏོག་མཛེས། །རྡོ་རྗེའི་ར་གུར་ཡེ་ཤེས་མེ་འོད་འཕྲོ། །ཕྱི་རོལ་དུར་ཁྲོད་བརྒྱད་ཀྱིས་ཡོངས་སུ་བསྐོར། །དེ་དབུས་པདྨ་འདབ་བཞིའི་ལྟེ་བ་དང་། །འདབ་མར་ཟླ་བའི་དཀྱིལ་འཁོར་ཉ་གང་སྟེང་། །རང་སེམས་ཧཱུྃ་དཀར་བྷྲཱུྃ་སྔོ་ཨྃ་སེར་པོ། །ཛྲཱིྃ་དམར་ཁྃ་ལྗང་ཛཿཧཱུྃ་བྃ་ཧོཿརྣམས། །རང་རང་མདོག་ཅན་སྒོ་བཞིར་ཡོངས་གྱུར་ལས། །ལྟེ་བར་རང་ཉིད་མི་བསྐྱོད་འཇིག་རྟེན་དབང་། །དཀར་གསལ་འཛུམ་ལྡན་སྤྱན་གཉིས་འགྲོ་ལ་གཟིགས། །དབུ་སྐྲ་ཐོར་ཚུགས་ལྷག་མ་ཐུར་དུ་འཕྱང་། །ཕྱག་གཉིས་གཡས་པ་མཆོག་སྦྱིན་ཕྱག་རྒྱ་དང་། །གཡོན་པ་སྟ་ཟུར་ངོས་སུ་དཀུར་བསྟེན་པ། །རིན་ཆེན་རྒྱན་དང་དར་གྱི་ན་བཟའ་གསོལ། །ཞབས་གཉིས་མཉམ་པའི་སྟབས་ཀྱིས་བཞེངས་ཚུལ་ཅན། །ཤར་དུ་སྣང་མཛད་འཇིག་རྟེན་དབང་ཕྱུག་སྔོ། །ལྷོ་རུ་རིན་འབྱུང་འཇིག་རྟེན་དབང་ཕྱུག་སེར། །ནུབ་ཏུ་སྣང་མཐའ་འཇིག་རྟེན་དབང་ཕྱུག་དམར། །བྱང་དུ་དོན་ཡོད་འཇིག་རྟེན་དབང་ཕྱུག་ལྗང་། །ཀུན་ཀྱང་རྒྱན་གོས་ཕྱག་རྒྱ་གཙོ་བོ་བཞིན། །སྒོ་བཞིར་ཟླ་བའི་གདན་ལ་ལྷ་མོ་བཞི། །དཀར་སེར་དམར་ལྗང་དབུ་སྐྲ་ཐོར་ཚུགས་ཅན། །རིན་ཆེན་རྒྱན་དང་དར་གྱི་ན་བཟའ་གསོལ། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་འཛིན། །གཡོན་པ་སྡིགས་མཛུབ་ཞབས་གཉིས་དོར་སྟབས་བཞུགས། །གནས་གསུམ་རྡོ་རྗེ་གསུམ་གྱི་ཡི་གེས་མཚན། །དེ་ལས་འོད་འཕྲོས་ཡེ་ཤེས་སྤྱན་དྲངས་གྱུར། །ཡེ་ཤེས་པ་སྤྱན་འདྲེན་བཞུགས་གསོལ་ཕྱག་མཆོད་བསྟོད་པ་དང་བཅས་པ་ནི། ཧྲཱིཿ རང་བཞིན་རྣམ་དག་ཞིང་ཁམས་ནས། །འཇིག་རྟེན་དབང་ཕྱུག་སྙིང་རྗེའི་ལྷ། །འདིར་གཤེགས་གཉིས་སུ་མེད་པར་བཞུགས། །སྒོ་གསུམ་གུས་པས་ཕྱག་འཚལ་ཞིང་། །ཕྱི་ནང་གསང་བའི་མཆོད་པ་འབུལ། །མཆོག་དང་ཐུན་མོང་དངོས་གྲུབ་སྩོལ། །ཨོཾ་ལོ་ཀེ་ཤྭ་ར་ས་མ་ཡ་ཛ་ཛཿ ཨོཾ་བཛྲ་ས་མ་ཡ་ཏིཥྛནྟུ། ན་མོ་པུ་རུ་ཤ་ཡ་ཧོ། ཨོཾ་ཨཱཿཧཱུྃ་བཛྲ་པུཥྤེ་ནས་ཤཔྡ་པཱུ་ཛ་ཧོཿ སརྦ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཁཱ་ཧི། ཧྲཱིཿ དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །སྨོན་ལམ་སྟོབས་ཀྱིས་འགྲོ་བའི་དོན་མཛད་པ། །མཐོང་ཐོས་དྲན་པས་སྡུག་བསྔལ་ཀུན་ལས་སྒྲོལ། །འཕགས་པ་སྤྱན་རས་གཟིགས་ལ་ཕྱག་འཚལ་བསྟོད། །བཟླས་པ་བྱ་བ་ནི། ཧྲཱིཿ རང་བྱུང་རྣམ་དག་གཞལ་ཡས་འདིར། །ལོངས་སྐུ་ཐུགས་རྗེ་ཆེན་པོའི་ལྷ། །སྣ་ཚོགས་སྐུ་དང་ཆ་ལུགས་ལ། །ཐུགས་སྲོག་ཛཔ྄་ཀྱི་རང་སྒྲ་སྒྲོགས། །མི་འགྱུར་ཐུགས་ལས་འོད་ཟེར་འཕྲོས། །ཕར་འཕྲོས་སེམས་ཅན་དོན་རྣམས་རྫོགས། །ཚུར་འདུས་དངོས་གྲུབ་བཅུད་དུ་བསྡུ། །རྟགས་མཐོང་བར་དུ་རྒྱུན་མི་བཅད། །ཅེས་དགོངས་པའི་སྲོག་ཏུ་བཟུང་ལ། ཨོཾ་མ་ཎི་པདྨེ་ཧཱུྃ། ཞེས་ཡི་གེ་དྲུག་པའི་བཟླས་པ་རྩེ་གཅིག་ཏུ་བྱ། སྤྲོ་ན་སོ་སོའི་སྔགས་བཟླ་བའི་ཚུལ་ལས་བྱང་ལྟར་རོ། །གསུམ་པ་ལ། ཐུན་ལས་ལྡང་བ་ན་དབྱངས་གསལ་རྟེན་སྙིང་གིས་སྔགས་ཀྱི་ལྷག་ཆད་ཁ་བསྐང་། གོང་ལྟར་སྔགས་ཀྱིས་མཆོད་ཅིང་། བསྟོད་པའི་མཐར་ཡི་གེ་བརྒྱ་པས་ནོངས་པ་བཤགས། བསྡུ་རིམ་ནི། ཧྲཱིཿ སྣོད་བཅུད་མ་ལུས་གཞལ་ཡས་ཁང་ལ་ཐིམ། །དེ་ཉིད་འཁོར་དང་འཁོར་ཡང་གཙོ་བོར་ཐིམ། །གཙོ་བོ་མི་དམིགས་སྟོང་པའི་ངང་ཉིད་ལས། །སླར་ཡང་འཇའ་ཚོན་བཞིན་དུ་གསལ་བར་གྱུར། །བསྔོ་སྨོན་ནི། དགེ་བ་འདི་ཡིས་མཁའ་མཉམ་འགྲོ་ཀུན་གྱི། །སྒྲིབ་གཉིས་དེ་འབྲས་མ་ལུས་ཀུན་བྱང་ནས། །ཐུགས་རྗེ་ཆེན་པོའི་གོ་འཕང་མངོན་གྱུར་ཏེ། །རང་གཞན་དོན་གཉིས་མ་ལུས་འགྲུབ་པར་ཤོག །བཀྲ་ཤིས་ནི། ཆོས་སྐུ་སྣང་མཐའ་ལོངས་སྐུ་འཇིག་རྟེན་དབང་། །སྤྲུལ་པའི་སྐུ་མཆོག་སྲོང་བཙན་སྒམ་པོ་སྟེ། །སྐུ་གསུམ་དབྱེར་མེད་ཐུགས་རྗེ་ཆེན་པོ་ཡི། །བཀྲ་ཤིས་ཕྱོགས་དུས་ཀུན་ཏུ་ཁྱབ་པར་ཤོག །ཅེས་བརྗོད་ཅིང་ཐུན་མཚམས་ཀྱི་བྱ་བ་ལ་འཇུག་གོ །ཅེས་པའང་རྡོ་རྗེའི་གསུང་གི་གཞུང་ལ་རིགས་མཐུན་གྱི་མཚམས་སྦྱོར་འཇུག་པ་བདེ་བར་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག། །།

[edit]

thugs rje chen po 'jig rten dbang phyug gi rgyun khyer zab lam snying po/ @#/__/thugs rje chen po 'jig rten dbang phyug gi rgyun khyer zab lam snying po zhes bya ba bzhugs so//__// na mo gu ru lo ke shwa rA ya/__'dir dag snang rgya can las byung ba'i thugs rje chen po 'jig rten dbang phyug gi rgyun gyi rnal 'byor snying por dril te nyams su blang ba'i tshul la gsum/__sngon 'gro/__dngos gzhi/__rjes so/__/dang po la skyabs sems ni/__bdag sogs 'gro kun deng nas byang chub bar/__/bla ma rtsa ba gsum la skyabs su mchi/__/gzhan don rdzogs pa'i sangs rgyas thob bya'i phyir/__/'jig rten dbang phyug bsgrub par sems bskyed do/__/lan gsum/__bgegs bskrad srung 'khor ni/__hrIH__rang nyid rta mgrin be con sdigs mdzub mdzad/__/thugs las sprul pa'i khro mtshon me phung gis/__/bar du gcod pa'i gdon bgegs 'byung po rnams/__/mthar bskrad rdo rje srung ba'i gur du gyur/__/oM badz+ra kro d+ha ha ya grI wa hu lu hu lu hU~M phaT/__gnod byed 'byung po u tsaT+Ta ya phaT/__oM badz+ra tsakra dz+wa la ra~M hU~M b+h+rU~M hU~M/__mchod pa dngos bshams yod na/__ra~M ya~M kha~M/__thugs nas ra~M ya~M kha~M 'phros pas/__/phyi nang gsang ba'i mchod rdzas kyis/__/ma dag nyes skyon kun sbyangs nas/__/mi zad nam mkha'i mdzod du gyur/__/oM AHhU~M zhes pas brlab bo/__/gnyis pa la/__dam tshig pa bskyed pa ni/__/oM/__stong nyid snying rje dbyer med rang rig hrIH__de las 'od zer thig 'phros 'byung lnga'i steng /__/b+h+rU~M las bde chen lhun grub gzhal yas khang /__/gru bzhi sgo bzhi rta babs bzhi dang ldan/__/rtsig pa lnga ldan pha gu pa tra can/__/dra phyed shar bu mda' yab phib tog mdzes/__/rdo rje'i ra gur ye shes me 'od 'phro/__/phyi rol dur khrod brgyad kyis yongs su bskor/__/de dbus pad+ma 'dab bzhi'i lte ba dang /__/'dab mar zla ba'i dkyil 'khor nya gang steng /__/rang sems hU~M dkar b+h+rU~M sngo a~M ser po/__/dz+rI~M dmar kha~M ljang dzaHhU~M ba~M hoHrnams/__/rang rang mdog can sgo bzhir yongs gyur las/__/lte bar rang nyid mi bskyod 'jig rten dbang /__/dkar gsal 'dzum ldan spyan gnyis 'gro la gzigs/__/dbu skra thor tshugs lhag ma thur du 'phyang /__/phyag gnyis g.yas pa mchog sbyin phyag rgya dang /__/g.yon pa sta zur ngos su dkur bsten pa/__/rin chen rgyan dang dar gyi na bza' gsol/__/zhabs gnyis mnyam pa'i stabs kyis bzhengs tshul can/__/shar du snang mdzad 'jig rten dbang phyug sngo/__/lho ru rin 'byung 'jig rten dbang phyug ser/__/nub tu snang mtha' 'jig rten dbang phyug dmar/__/byang du don yod 'jig rten dbang phyug ljang /__/kun kyang rgyan gos phyag rgya gtso bo bzhin/__/sgo bzhir zla ba'i gdan la lha mo bzhi/__/dkar ser dmar ljang dbu skra thor tshugs can/__/rin chen rgyan dang dar gyi na bza' gsol/__/lcags kyu zhags pa lcags sgrog dril bu 'dzin/__/g.yon pa sdigs mdzub zhabs gnyis dor stabs bzhugs/__/gnas gsum rdo rje gsum gyi yi ges mtshan/__/de las 'od 'phros ye shes spyan drangs gyur/__/ye shes pa spyan 'dren bzhugs gsol phyag mchod bstod pa dang bcas pa ni/__hrIH__rang bzhin rnam dag zhing khams nas/__/'jig rten dbang phyug snying rje'i lha/__/'dir gshegs gnyis su med par bzhugs/__/sgo gsum gus pas phyag 'tshal zhing /__/phyi nang gsang ba'i mchod pa 'bul/__/mchog dang thun mong dngos grub stsol/__/oM lo ke shwa ra sa ma ya dza dzaH__oM badz+ra sa ma ya tiSh+Than+tu/__na mo pu ru sha ya ho/__oM AHhU~M badz+ra puSh+pe nas shap+da pU dza hoH__sarba pany+tsa a mr-i ta rak+ta ba liM ta khA hi/__hrIH__dang por byang chub mchog tu thugs bskyed nas/__/smon lam stobs kyis 'gro ba'i don mdzad pa/__/mthong thos dran pas sdug bsngal kun las sgrol/__/'phags pa spyan ras gzigs la phyag 'tshal bstod/__/bzlas pa bya ba ni/__hrIH__rang byung rnam dag gzhal yas 'dir/__/longs sku thugs rje chen po'i lha/__/sna tshogs sku dang cha lugs la/_/thugs srog dzapa? kyi rang sgra sgrogs/__/mi 'gyur thugs las 'od zer 'phros/__/phar 'phros sems can don rnams rdzogs/__/tshur 'dus dngos grub bcud du bsdu/__/rtags mthong bar du rgyun mi bcad/__/ces dgongs pa'i srog tu bzung la/__oM ma Ni pad+me hU~M/__zhes yi ge drug pa'i bzlas pa rtse gcig tu bya/__spro na so so'i sngags bzla ba'i tshul las byang ltar ro/__/gsum pa la/__thun las ldang ba na dbyangs gsal rten snying gis sngags kyi lhag chad kha bskang /__gong ltar sngags kyis mchod cing /__bstod pa'i mthar yi ge brgya pas nongs pa bshags/__bsdu rim ni/__hrIH__snod bcud ma lus gzhal yas khang la thim/__/de nyid 'khor dang 'khor yang gtso bor thim/__/gtso bo mi dmigs stong pa'i ngang nyid las/__/slar yang 'ja' tshon bzhin du gsal bar gyur/__/bsngo smon ni/__dge ba 'di yis mkha' mnyam 'gro kun gyi/__/sgrib gnyis de 'bras ma lus kun byang nas/__/thugs rje chen po'i go 'phang mngon gyur te/__/rang gzhan don gnyis ma lus 'grub par shog__/bkra shis ni/__chos sku snang mtha' longs sku 'jig rten dbang /__/sprul pa'i sku mchog srong btsan sgam po ste/__/sku gsum dbyer med thugs rje chen po yi/__/bkra shis phyogs dus kun tu khyab par shog__/ces brjod cing thun mtshams kyi bya ba la 'jug go__/ces pa'ang rdo rje'i gsung gi gzhung la rigs mthun gyi mtshams sbyor 'jug pa bde bar mtsho skyes bla ma dgyes pa'i 'bangs mkhyen brtse'i dbang pos bris pa dge legs su gyur cig/__// [�]