JKW-KABUM-11-DA-014-010

🚧 This website is under continued development. We appreciate your patience!

Previous Text Back to Volume PageNext Text

ཁྲོ་བོའི་རྒྱལ་པོ་གཙུག་ཏོར་འབར་བའི་གཏོར་མ་ལ་བརྟེན་ནས་ཕྱིར་ཟློག་པའི་གདམས་པ་བར་ཆད་ཀུན་སེལ།

Wylie title	khro bo'i rgyal po gtsug tor 'bar ba'i gtor ma la brten nas phyir zlog pa'i gdams pa bar chad kun sel
Location	mkhyen brtse'i bka' 'bum Volume 11, sde tshan 14, Text 10, Pages 499-505 (Folios 49a6 to 52a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	མཆིམས་ནམ་མཁའ་གྲགས་པ་ (mchims nam mkha' grags pa)
Citation	'jam dbyangs mkhyen brtse'i dbang po. khro bo'i rgyal po gtsug tor 'bar ba'i gtor ma la brten nas phyir zlog pa'i gdams pa bar chad kun sel. In 'jam dbyangs mkhyen brtse'i dbang po'i bka' 'bum, Vol. 11: 499-505. Khams sde dge rdzong sar dgon: Rdzong sar blo gros phun tshogs, 2020.
Genre	Torma-offering Rituals - gtor chog  ·  Spiritual Instructions - gdams ngag  ·  Averting or Dispelling Rites- zlog pa
Deity	khro rgyal gtsug tor 'bar ba
Colophon	།ཞེས་པའང་བསྟན་པ་ཡོངས་ཀྱི་རྩ་ལག་ཆེན་པོ་མཆིམས་སྟོན་ཐམས་ཅད་མཁྱེན་པ་ནམ་མཁའ་གྲགས་ཀྱིས་མཛད་པའི་གཞུང་གསལ་བྱེད་དང་བཅས་པའི་རྗེས་སུ་འབྲངས་ཏེ། འཇམ་དབྱངས་མཁྱེན་བརྩེའི་དབང་པོས་སྦྱར་བའི་དགེ་བས་བདག་དང་སེམས་ཅན་ཐམས་ཅད་ལམ་གྱི་བར་དུ་གཅོད་པ་མཐའ་དག་ཞི་བ་དང་། ཕན་བདེའི་དགེ་མཚན་མཆོག་ཏུ་རྒྱས་པའི་རྒྱུར་གྱུར་ཅིག།
	zhes pa'ang bstan pa yongs kyi rtsa lag chen po mchims ston thams cad mkhyen pa nam mkha' grags kyis mdzad pa'i gzhung gsal byed dang bcas pa'i rjes su 'brangs te/__'jam dbyangs mkhyen brtse'i dbang pos sbyar ba'i dge bas bdag dang sems can thams cad lam gyi bar du gcod pa mtha' dag zhi ba dang /__phan bde'i dge mtshan mchog tu rgyas pa'i rgyur gyur cig

1 Texts in this Section (sde tshan or chos tshan)

10 499-505	ཁྲོ་བོའི་རྒྱལ་པོ་གཙུག་ཏོར་འབར་བའི་གཏོར་མ་ལ་བརྟེན་ནས་ཕྱིར་ཟློག་པའི་གདམས་པ་བར་ཆད་ཀུན་སེལ། khro bo'i rgyal po gtsug tor 'bar ba'i gtor ma la brten nas phyir zlog pa'i gdams pa bar chad kun sel Torma-offering Rituals - gtor chog   ·   Spiritual Instructions - gdams ngag   ·   Averting or Dispelling Rites- zlog pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །ཁྲོ་བོའི་རྒྱལ་པོ་གཙུག་ཏོར་འབར་བའི་གཏོར་མ་ལ་བརྟེན་ནས་ཕྱིར་ཟློག་པའི་གདམས་པ་བར་ཆད་ཀུན་སེལ་ཞེས་བྱ་བ་བཞུགས་སོ། །ན་མོ་གུ་རུ་ཨུཥྞཱི་ཥ་ཛྭ་ལཱ་ཡ། འཕགས་པ་འཇམ་དཔལ་རྩ་བའི་རྒྱུད་ཀྱི་རྟོགས་པ་ཆེན་པོ་ལས། །ཇི་ལྟར་སཱ་ལུའི་འབྲུ་རྣམས་ནི། །མྱུ་གུས་རྣམ་པར་ཤེས་པར་བྱེད། །དེ་བཞིན་གྲུབ་པའི་རྫས་རྣམས་ནི། །མཚན་ཉིད་ཀྱིས་ནི་རྣམ་པར་ཤེས། །ཞེས་སོགས་རྒྱ་ཆེར་གསུངས་ཏེ། འདི་ལྟར་འཇིག་རྟེན་ན་སཱ་ལུའི་འབྲས་བུ་ཕུན་སུམ་ཚོགས་པ་འབྱུང་མི་འབྱུང་མྱུ་གུའི་དུས་ནས་ཤེས་པ་ལྟར། རིག་སྔགས་སྦྱོར་བ་པོའི་སྔགས་འགྲུབ་མི་འགྲུབ་ལྟས་ཀྱི་བྱེ་བྲག་ལས་ཤེས་ཤིང་། ལྟས་ཀྱི་མཚན་མ་དང་། རྨི་ལམ་དང་། གཞན་གྱི་སྤྱོད་ཚུལ་སོགས་ལེགས་ཉེས་ལས་ཤེས་པས་ན། རྨི་ལམ་ངན་པ་གཙོ་བོར་གྱུར་པའི་ལྟས་མི་ཤིས་པ་བྱུང་ན་དེ་དག་ཟློག་ཅིང་། ཤིས་པའི་ལྟས་ཀྱི་བྱེད་ལས་ཆུད་མི་ཟ་བར་བདག་གིར་འགྱུར་བས་མཚོན་ཕྱིར་ཟློག་པའི་ཐབས་མཆོག་ཏུ་གྱུར་པ་གཙུག་ཏོར་འབར་བའི་གཟུངས་སྔགས་འདི་གསུངས་པ་ལ་བརྟེན། གྲུབ་པའི་སློབ་དཔོན་ཨ་བྷ་ཡཱ་ཀ་རས་ལེགས་པར་བཀྲལ་བའི་མན་ངག་ཆག་ལོ་ཙཱ་བ་ཡབ་སྲས་ལ་བཀའ་བབས་པའི་རྗེས་སུ་གནང་བ། སྒྲུབ་པའི་ཐབས། ཕྱིར་ཟློག་པའི་སྒོམ་བཟླས། བྱང་ཆུ་བོར་བསྒྱུར་བའི་ལས་ཚོགས་དང་བཅས་པ་ནི་གཞན་དུ་ཤེས་ལ། འདི་ཇོ་བོ་བཀའ་གདམས་པའི་མན་ངག་གཏོར་མ་ལ་བརྟེན་ནས་ཕྱིར་ཟློག་པའི་ཚུལ་མདོ་ཙམ་འཆད་པ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། འདི་ཉིད་ཀྱི་རྗེས་སུ་གནང་བ་ཐོབ་ཅིང་དམ་ཚིག་དང་སྡོམ་པར་ལྡན་པའི་རྣལ་འབྱོར་པས། གནས་དབེན་པར་སྟེགས་བུའི་དབུས་སུ་མཉྫིའི་ཁར་མཎྜལ་ཚོམ་བུ་དང་བཅས་པའི་མདུན། གཏོར་མ་ཟླུམ་པོ་ཐེབ་ཀྱུས་བསྐོར་བ་དང་། ཆུ་གཉིས་སྔོན་འགྲོའི་ཉེར་སྤྱོད་རྣམས་བཤམ། མཆོད་པ་བྱིན་རླབས་སྔོན་དུ་འགྲོ་བས་བདག་བསྐྱེད་བཟླས་པ་དང་བཅས་སྒྲུབ་ཐབས་ནས་འབྱུང་བ་ལྟར་ཉམས་སུ་བླང་། གཉིས་པ་ནི། མདུན་གྱི་ཚོམ་བུ་ཨམྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་པྃ་ལས་པདྨ་དང་། རྃ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་དམར་པོ་ཡོངས་སུ་གྱུར་པ་ལས། བཅོམ་ལྡན་འདས་གཙུག་ཏོར་འབར་བ་ནས། གནོད་བྱེད་མ་ལུས་པ་ཚར་གཅད་པ། གཞན་ཡང་ཡེ་ཤེས་ཀྱི་ཁྲོ་བོ་ཁྲོ་མོ་རྡོ་རྗེའི་ཆོས་སྲུང་གི་ཚོགས་བསམ་གྱིས་མི་ཁྱབ་པས་བསྐོར་བ། གཙོ་བོའི་ཐུགས་ཀར་པད་ཉི་ལ་ཧཱུྃ་དམར་པོ། དེ་ལས་འོད་ཟེར་འཕྲོས་པས་འོག་མིན་དེ་བཞིན་གཤེགས་པའི་གཙུག་ཏོར་ནས་ཁྲོ་བོའི་རྒྱལ་པོ་འཁོར་དང་བཅས་པ་ཨོཾ་བཛྲ་ས་མཱ་ཛཿས་སྤྱན་དྲང་། ཛཿཧཱུྃ་བྃ་ཧོཿ མདུན་བསྐྱེད་ལ་གཉིས་སུ་མེད་པར་ཐིམ། སླར་ཡང་རང་གི་སྙིང་ག་ནས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿ དེ་བཞིན་གཤེགས་པ་ཐམས་ཅད་ཀྱིས་འདི་རྣམས་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས་དབང་གི་ལྷ་རྣམས་ཀྱིས། ཨོཾ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུ་ལྷག་མ་ཡར་ལུད་པ་ལས་རྡོ་རྗེ་སེམས་དཔའ་རེ་རེས་དབུར་བརྒྱན། མཆོད་པ་བྱིན་གྱིས་བརླབས་ལ། ཨོཾ་ཨུཥྞཱི་ཥ་ཛྭ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ་ཤཔྡའི་བར་སྦྱར་བས་མཆོད། དཔལ་མགོན་སངས་རྒྱས་སྟོང་གི་རིག་སྔགས་སྐུ། །སོགས་ཆག་ལོ་གསུམ་པས་མཛད་པའི་བསྟོད་པས་བསྟོད། གཏོར་མ་བསང་སྦྱང་། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་འདོད་དགུ་འབྱུང་བའི་བདུད་རྩིའི་རྒྱ་མཚོ་ཆེན་པོར་གྱུར། ཨ་ཀཱ་རོ་ལན་གསུམ་གྱིས་བརླབ། མདུན་བསྐྱེད་འཁོར་དང་བཅས་པའི་ལྗགས་ལས་བྱུང་བའི་འོད་ཀྱི་སྦུ་གུས་གཏོར་མའི་བདུད་རྩི་དྲངས་ཏེ་གསོལ་བས་མཉེས་པར་བསམས་ལ། གཟུངས་སྔགས་ཀྱི་མཐར་ཨི་དཾ་བ་ལིནྟ་ཁ་ཁ་ཁཱ་ཧི་ཁཱ་ཧི། བཏགས་པ་ལན་གསུམ་གྱིས་ཕུལ། སྔར་བཞིན་མཆོད། རྒྱལ་བའི་གཙུག་ཏོར་ལས་འཁྲུངས་ཤིང་། །ཉི་མ་བྱེ་བའི་གཟི་འབར་བ། །གཙུག་ཏོར་འབར་བ་ཞེས་གྲགས་པའི། །ཁྲོ་བོའི་དབང་པོ་ལ་ཕྱག་འཚལ། །ཁྲོ་རྒྱལ་འཁོར་དང་བཅས་པ་རྣམས། །མཆོད་སྦྱིན་གཏོར་མ་འདི་བཞེས་ལ། །སོགས་དང་། ཁྲོ་བོའི་རྒྱལ་པོ་གཙུག་ཏོར་འབར་བ་འཁོར་དང་བཅས་པས་བདག་དང་སྦྱིན་པའི་བདག་པོའི་རྨི་ལམ་ངན་པ་དང་། མཚན་མ་ངན་པ་དང་། ལྟས་ངན་པ་དང་། དུས་མ་ཡིན་པར་འཆི་བ་དང་། ནད་དང་། གདོན་དང་། གནོད་པ་དང་། བགེགས་དང་བར་དུ་གཅོད་པ་ཐམས་ཅད་ཕྱིར་ཟློག་པར་མཛད་དུ་གསོལ། ཞེས་བསྟོད་ཅིང་ཕྲིན་ལས་བཅོལ། དེ་ནས། རང་གི་སྤྱི་བོར་རྃ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་སྔོན་པོ། དེ་ལས་འོད་ཟེར་འཕྲོས། སེམས་ཅན་ཐམས་ཅད་ལ་ཕོག་པས་དེ་དག་གི་རྨི་ལམ་ངན་པ་དང་། མཚན་མ་ངན་པ་དང་། བར་ཆད་ཐམས་ཅད་ཞི་བར་བྱས། སླར་འདུས་ཏེ་རང་གི་ལུས་ལ་ཕོག་པས་བར་ཆད་ཐམས་ཅད་སྦྱངས། མདུན་བསྐྱེད་རྣམས་ལས་ཀྱང་འོད་ཟེར་དང་རྡོ་རྗེ་ཁྲོ་བོའི་ཚོགས་བསམ་གྱིས་མི་ཁྱབ་པ་འཕྲོས་པས་གདུག་པ་ཅན་ཐམས་ཅད་ཕྱིར་ཟློག་པའི་ལས་མཛད་པར་བསམས་ལ། གཟུངས་སྔགས་ཀྱི་ཕཊ་ཕཊ་ཅེས་པའི་མཇུག །སྤྱིར་བཏང་ལ། བདག་སྦྱིན་བདག་གི་དོན་དུ་བྱེད་ན། བདག་གི་ཞེས་པར་སྦྱིན་པའི་བདག་པོའི་ཞེས་སྦྱར། གི་བར་ཆད་ཐམས་ཅད་ཤཱནྟིཾ་ཀུ་རུ་སྭཱ་ཧཱ། དམིགས་བསལ་མཚན་མ་དང་རྨི་ལྟས་ངན་པ་ཟློག་པའི་དོན་དུ་བྱེད་ན། བདག་གི་སརྦ་དུརྣི་མིཏྟ་དུརྶཱ་པྣ་ཤཱནྟིཾ་ཀུ་རུ་སྭཱ་ཧཱ། ཞེས་སྦྱར་ལ། བརྒྱ་རྩ་སོགས་ཇི་ལྟར་རིགས་པ་བཟླས་པའི་མཇུག་ཏུ་ཐལ་མོ་སྦྱར་ལ། སངས་རྒྱས་སྟོང་གི་སྔགས་འདི་ནི། །གཙུག་ཏོར་འབར་བ་ཞེས་གྲགས་ཏེ། །ལས་རྣམས་གང་དག་སྟོང་ཕྲག་ནི། །བརྒྱད་ཅུ་དང་ནི་དགུ་དང་ལྔ། །རྣམ་པ་སྣ་ཚོགས་ལས་རྣམས་དང་། །བཀྲ་ཤིས་དཔལ་གྲགས་ཐམས་ཅད་བྱེད། །རྨི་ལམ་ངན་དང་མཚན་མ་ངན། །ལན་གཅིག་བཟླས་པས་སེལ་བར་བྱེད། །བདེན་པ་དང་བདེན་པའི་ཚིག་འདིས་བདག་དང་སྦྱིན་པའི་བདག་པོའི་རྨི་ལམ་ངན་པ་དང་སོགས་ནས། བགེགས་དང་བར་དུ་གཅོད་པ་ཐམས་ཅད་ཕྱིར་ཟློག་པར་གྱུར་ཅིག །མེད་པར་གྱུར་ཅིག །ཞི་བར་གྱུར་ཅིག །རབ་ཏུ་ཞི་བར་གྱུར་ཅིག །ཅེས་བརྗོད་ལ་ཐལ་མོ་བརྡབ་གྲངས་གསོག་ན། སླར་ཡང་གཏོར་མ་ཐེབ་ཀྱུས་གསོས་ལ་བསང་སྦྱང་བྱིན་རླབས་ནས་བཟླས་པའི་མཇུག་གི་བདེན་སྟོབས་བརྗོད་པའི་བར་གོང་བཞིན་བྱ་བ་སྟེ་ལོ་གྲངས་སོགས་ཇི་ལྟར་རིགས་པ་བསྐྱར། །གྲངས་རྫོགས་པ་ན། བདེན་བརྗོད་ཀྱི་མཇུག་ཏུ། གཙུག་ཏོར་འབར་བའི་ལྷ་ཚོགས་རྣམས། །མཐུ་སྟོབས་ཐོགས་པ་མི་མངའ་ཞིང་། །སོགས་ཟློག་སྒྱུར་གྱི་མཐར་གཟུངས་སྔགས་བཟླ་ཞིང་རོལ་མོ་དང་བཅས་གཏོར་མ་གཙང་སར་བཏང་། །གསུམ་པ་ནི། མཆོད་པ་ཁ་གསོས་བསང་སྦྱང་བྱིན་གྱིས་བརླབ། མདུན་བསྐྱེད་ལ་མཆོད་བསྟོད་བྱ། ཡི་གེ་བརྒྱ་པ་ལན་གསུམ་དང་། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ། ཨོཾ། ཁྱེད་ཀྱིས་སོགས་དང་། བཛྲ་མུཿས་ཡེ་ཤེས་པ་གཤེགས། དམ་ཚིག་པ་རང་ལ་ཐིམ། རང་གི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། དགེ་བ་འདི་ཡིས་མྱུར་དུ་བདག །གཙུག་ཏོར་འབར་བ་འགྲུབ་གྱུར་ནས། །སོགས་བསྔོ་སྨོན་དང་ཤིས་བརྗོད་རྒྱས་པར་སྤེལ། ལས་ཀྱི་རྗེས་མི་མངོན་པར་བྱའོ། །དེ་ལྟར་བརྩོན་པས་གོང་དུ་ཇི་སྐད་སྨོས་པའི་ཕན་ཡོན་རྣམས་འབྱུང་ཞིང་། ལྷག་པར་རིག་སྔགས་ཀྱི་དངོས་གྲུབ་སྒྲུབ་པ་རྣམས་ཀྱི་བར་ཆད་ཞི་བ་དང་། གྲུབ་པའི་འབྲས་བུ་འབྱིན་པ་ལ་མཆོག་ཏུ་བསྔགས་པས་འདི་ཁོ་ན་ལ་བརྩོན་པར་བྱའོ། །ཞེས་པའང་བསྟན་པ་ཡོངས་ཀྱི་རྩ་ལག་ཆེན་པོ་མཆིམས་སྟོན་ཐམས་ཅད་མཁྱེན་པ་ནམ་མཁའ་གྲགས་ཀྱིས་མཛད་པའི་གཞུང་གསལ་བྱེད་དང་བཅས་པའི་རྗེས་སུ་འབྲངས་ཏེ། འཇམ་དབྱངས་མཁྱེན་བརྩེའི་དབང་པོས་སྦྱར་བའི་དགེ་བས་བདག་དང་སེམས་ཅན་ཐམས་ཅད་ལམ་གྱི་བར་དུ་གཅོད་པ་མཐའ་དག་ཞི་བ་དང་། ཕན་བདེའི་དགེ་མཚན་མཆོག་ཏུ་རྒྱས་པའི་རྒྱུར་གྱུར་ཅིག། ། ༈

[edit]

khro bo'i rgyal po gtsug tor 'bar ba'i gtor ma la brten nas phyir zlog pa'i gdams pa bar chad kun sel/ @#/_/khro bo'i rgyal po gtsug tor 'bar ba'i gtor ma la brten nas phyir zlog pa'i gdams pa bar chad kun sel zhes bya ba bzhugs so/__/na mo gu ru uSh+NI Sha dz+wa lA ya/__'phags pa 'jam dpal rtsa ba'i rgyud kyi rtogs pa chen po las/__/ji ltar sA lu'i 'bru rnams ni/__/myu gus rnam par shes par byed/__/de bzhin grub pa'i rdzas rnams ni/__/mtshan nyid kyis ni rnam par shes/__/zhes sogs rgya cher gsungs te/__'di ltar 'jig rten na sA lu'i 'bras bu phun sum tshogs pa 'byung mi 'byung myu gu'i dus nas shes pa ltar/__rig sngags sbyor ba po'i sngags 'grub mi 'grub ltas kyi bye brag las shes shing /__ltas kyi mtshan ma dang /__rmi lam dang /__gzhan gyi spyod tshul sogs legs nyes las shes pas na/__rmi lam ngan pa gtso bor gyur pa'i ltas mi shis pa byung na de dag zlog cing /__shis pa'i ltas kyi byed las chud mi za bar bdag gir 'gyur bas mtshon phyir zlog pa'i thabs mchog tu gyur pa gtsug tor 'bar ba'i gzungs sngags 'di gsungs pa la brten/__grub pa'i slob dpon a b+ha yA ka ras legs par bkral ba'i man ngag chag lo tsA ba yab sras la bka' babs pa'i rjes su gnang ba/__sgrub pa'i thabs/__phyir zlog pa'i sgom bzlas/__byang chu bor bsgyur ba'i las tshogs dang bcas pa ni gzhan du shes la/__'di jo bo bka' gdams pa'i man ngag gtor ma la brten nas phyir zlog pa'i tshul mdo tsam 'chad pa la gsum/__sbyor ba/__dngos gzhi/__rjes so/__/dang po ni/__'di nyid kyi rjes su gnang ba thob cing dam tshig dang sdom par ldan pa'i rnal 'byor pas/__gnas dben par stegs bu'i dbus su many+dzi'i khar maN+Dal tshom bu dang bcas pa'i mdun/__gtor ma zlum po theb kyus bskor ba dang /__chu gnyis sngon 'gro'i nyer spyod rnams bsham/__mchod pa byin rlabs sngon du 'gro bas bdag bskyed bzlas pa dang bcas sgrub thabs nas 'byung ba ltar nyams su blang /__gnyis pa ni/__mdun gyi tshom bu amr-i tas bsang /__swa b+hA was sbyang /__stong pa'i ngang las pa~M las pad+ma dang /__ra~M las nyi ma'i dkyil 'khor gyi steng du hU~M dmar po yongs su gyur pa las/__bcom ldan 'das gtsug tor 'bar ba nas/__gnod byed ma lus pa tshar gcad pa/__gzhan yang ye shes kyi khro bo khro mo rdo rje'i chos srung gi tshogs bsam gyis mi khyab pas bskor ba/__gtso bo'i thugs kar pad nyi la hU~M dmar po/__de las 'od zer 'phros pas 'og min de bzhin gshegs pa'i gtsug tor nas khro bo'i rgyal po 'khor dang bcas pa oM badz+ra sa mA dzaHsa spyan drang /__dzaHhU~M ba~M hoH__mdun bskyed la gnyis su med par thim/__slar yang rang gi snying ga nas 'od zer 'phros pas dbang gi lha rigs lnga 'khor dang bcas pa oM badz+ra sa mA dzaH__de bzhin gshegs pa thams cad kyis 'di rnams la mngon par dbang bskur ba stsal du gsol/__zhes gsol ba btab pas dbang gi lha rnams kyis/__oM badz+rI b+ha wa a b+hi Shiny+tsa hU~M/__zhes gsung zhing bum pa'i chus spyi bo nas dbang bskur/__sku gang /__dri ma dag__/chu lhag ma yar lud pa las rdo rje sems dpa' re res dbur brgyan/__mchod pa byin gyis brlabs la/__oM uSh+NI Sha dz+wa la sa pa ri wA ra ar+g+haM pra tIts+tsha swA hA/__de bzhin du shap+da'i bar sbyar bas mchod/__dpal mgon sangs rgyas stong gi rig sngags sku/__/sogs chag lo gsum pas mdzad pa'i bstod pas bstod/__gtor ma bsang sbyang /__stong pa'i ngang las oM las byung ba'i rin po che las grub pa'i snod yangs shing rgya che ba'i nang du gtor ma 'dod dgu 'byung ba'i bdud rtsi'i rgya mtsho chen por gyur/__a kA ro lan gsum gyis brlab/__mdun bskyed 'khor dang bcas pa'i ljags las byung ba'i 'od kyi sbu gus gtor ma'i bdud rtsi drangs te gsol bas mnyes par bsams la/__gzungs sngags kyi mthar i daM ba lin+ta kha kha khA hi khA hi/__btags pa lan gsum gyis phul/__sngar bzhin mchod/__rgyal ba'i gtsug tor las 'khrungs shing /__/nyi ma bye ba'i gzi 'bar ba/__/gtsug tor 'bar ba zhes grags pa'i/__/khro bo'i dbang po la phyag 'tshal/__/khro rgyal 'khor dang bcas pa rnams/__/mchod sbyin gtor ma 'di bzhes la/__/sogs dang /__khro bo'i rgyal po gtsug tor 'bar ba 'khor dang bcas pas bdag dang sbyin pa'i bdag po'i rmi lam ngan pa dang /__mtshan ma ngan pa dang /__ltas ngan pa dang /__dus ma yin par 'chi ba dang /__nad dang /__gdon dang /__gnod pa dang /__bgegs dang bar du gcod pa thams cad phyir zlog par mdzad du gsol/__zhes bstod cing phrin las bcol/__de nas/__rang gi spyi bor ra~M las nyi ma'i dkyil 'khor gyi steng du hU~M sngon po/__de las 'od zer 'phros/__sems can thams cad la phog pas de dag gi rmi lam ngan pa dang /__mtshan ma ngan pa dang /__bar chad thams cad zhi bar byas/__slar 'dus te rang gi lus la phog pas bar chad thams cad sbyangs/__mdun bskyed rnams las kyang 'od zer dang rdo rje khro bo'i tshogs bsam gyis mi khyab pa 'phros pas gdug pa can thams cad phyir zlog pa'i las mdzad par bsams la/__gzungs sngags kyi phaT phaT ces pa'i mjug__/spyir btang la/__bdag sbyin bdag gi don du byed na/__bdag gi zhes par sbyin pa'i bdag po'i zhes sbyar/__gi bar chad thams cad shAn+tiM ku ru swA hA/__dmigs bsal mtshan ma dang rmi ltas ngan pa zlog pa'i don du byed na/__bdag gi sarba durni mit+ta dur+sA p+na shAn+tiM ku ru swA hA/__zhes sbyar la/__brgya rtsa sogs ji ltar rigs pa bzlas pa'i mjug tu thal mo sbyar la/__sangs rgyas stong gi sngags 'di ni/__/gtsug tor 'bar ba zhes grags te/__/las rnams gang dag stong phrag ni/__/brgyad cu dang ni dgu dang lnga/__/rnam pa sna tshogs las rnams dang /__/bkra shis dpal grags thams cad byed/__/rmi lam ngan dang mtshan ma ngan/__/lan gcig bzlas pas sel bar byed/__/bden pa dang bden pa'i tshig 'dis bdag dang sbyin pa'i bdag po'i rmi lam ngan pa dang sogs nas/__bgegs dang bar du gcod pa thams cad phyir zlog par gyur cig__/med par gyur cig__/zhi bar gyur cig__/rab tu zhi bar gyur cig__/ces brjod la thal mo brdab grangs gsog na/__slar yang gtor ma theb kyus gsos la bsang sbyang byin rlabs nas bzlas pa'i mjug gi bden stobs brjod pa'i bar gong bzhin bya ba ste lo grangs sogs ji ltar rigs pa bskyar/__/grangs rdzogs pa na/__bden brjod kyi mjug tu/__gtsug tor 'bar ba'i lha tshogs rnams/__/mthu stobs thogs pa mi mnga' zhing /__/sogs zlog sgyur gyi mthar gzungs sngags bzla zhing rol mo dang bcas gtor ma gtsang sar btang /__/gsum pa ni/__mchod pa kha gsos bsang sbyang byin gyis brlab/__mdun bskyed la mchod bstod bya/__yi ge brgya pa lan gsum dang /__ma 'byor pa dang sogs kyis nongs pa bzod par gsol/__oM/__khyed kyis sogs dang /__badz+ra muHsa ye shes pa gshegs/__dam tshig pa rang la thim/__rang gi dpral bar oM/__mgrin par AH__thugs kar hU~M/__dge ba 'di yis myur du bdag__/gtsug tor 'bar ba 'grub gyur nas/__/sogs bsngo smon dang shis brjod rgyas par spel/__las kyi rjes mi mngon par bya'o/__/de ltar brtson pas gong du ji skad smos pa'i phan yon rnams 'byung zhing /__lhag par rig sngags kyi dngos grub sgrub pa rnams kyi bar chad zhi ba dang /__grub pa'i 'bras bu 'byin pa la mchog tu bsngags pas 'di kho na la brtson par bya'o/__/zhes pa'ang bstan pa yongs kyi rtsa lag chen po mchims ston thams cad mkhyen pa nam mkha' grags kyis mdzad pa'i gzhung gsal byed dang bcas pa'i rjes su 'brangs te/__'jam dbyangs mkhyen brtse'i dbang pos sbyar ba'i dge bas bdag dang sems can thams cad lam gyi bar du gcod pa mtha' dag zhi ba dang /__phan bde'i dge mtshan mchog tu rgyas pa'i rgyur gyur cig/____/_!