JKW-KABUM-06-CHA-002-022

🚧 This website is under continued development. We appreciate your patience!

Previous Text Back to Volume PageLast text in section.

ཆུ་སྦྱིན་སྐབས་ཀྱི་སྨོན་ལམ་གྱི་དོན་ཅུང་ཟད་བཤད་པ།

Wylie title	chu sbyin skabs kyi smon lam gyi don cung zad bshad pa
Location	mkhyen brtse'i bka' 'bum Volume 6, sde tshan 2, Text 22, Pages 337-340 (Folios 103a2 to 104b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. chu sbyin skabs kyi smon lam gyi don cung zad bshad pa. In 'jam dbyangs mkhyen brtse'i dbang po'i bka' 'bum, Vol. 6: 337-340. Khams sde dge rdzong sar dgon: Rdzong sar blo gros phun tshogs, 2020.
Genre	Prayers - smon lam  ·  Spiritual Instructions - gdams ngag  ·  Offering Rituals - mchod sbyin
Colophon	།ཞེས་པའང་མཉྫུ་གྷོཥས་བརྗེད་བྱང་དུ་བྲིས་པ་དགེ།
	zhes pa'ang many+dzu g+hoShas brjed byang du bris pa dge

1 Texts in this Section (sde tshan or chos tshan)

22 337-340	ཆུ་སྦྱིན་སྐབས་ཀྱི་སྨོན་ལམ་གྱི་དོན་ཅུང་ཟད་བཤད་པ། chu sbyin skabs kyi smon lam gyi don cung zad bshad pa Prayers - smon lam   ·   Spiritual Instructions - gdams ngag   ·   Offering Rituals - mchod sbyin	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཆུ་སྦྱིན་སྐབས་ཀྱི་སྨོན་ལམ་གྱི་དོན་ཅུང་ཟད་བཤད་པ་བཞུགས་སོ། །ཨོཾ་སྭ་སྟི། ཆུ་སྦྱིན་གྱི་སྐབས། ཀླུའི་རྒྱལ་པོ་དགའ་བོ་དང་སོགས་ཀྱི་སྨོན་ལམ་གྱི་དོན་ལ། གང་གིས་ཆེད་དུ་བསྔོ་ཞིང་སྨོན་ལམ་གདབ་པའི་ཡུལ་སྦྱིན་པའི་བདག་པོའི་མིང་ནས་སྨོས་པ་དང་། དེའི་ཆེད་དུ་བསྔོ་སྨོན་བྱ་བ་དངོས་ཏེ་གཉིས་ལས། དང་པོ་ནི། མདོ་སྡུད་པ་ལས། འཛམ་བུའི་གླིང་འདིར་ཆུ་ཀླུང་ཇི་སྙེད་གཅིག་འབབ་ཅིང་། །མེ་ཏོག་འབྲས་ལྡན་སྨན་དང་ནགས་ཚལ་སྐྱེད་བྱེད་པ། །མ་དྲོས་གནས་པའི་ཀླུ་དབང་ཀླུ་བདག་བརྟེན་གནས་ཏེ། །དེ་ནི་ཀླུ་ཡི་བདག་པོ་དེ་ཡི་མཐུ་དཔལ་ཡིན། །ཅེས་གསུངས་པ་ལྟར། སྤྱིར་བརླན་ཅིང་གཤེར་བ་ཆུའི་བྱེད་ལས་ལ་བརྟེན་ནས། མེ་ཏོག་དང་འབྲས་བུ་སོགས་སྣོད་བཅུད་ཀྱི་དཔལ་ཕུན་སུམ་ཚོགས་པར་སྐྱེད་པའི་བྱེད་པ་པོ་ནི་ཀླུའི་རྒྱལ་པོ་འཁོར་དང་བཅས་པའི་མཐུ་ཁོ་ན་ཡིན་ཅིང་། ཁྱད་པར་སྐབས་འདིར་ཆུ་ཡི་སྦྱིན་པ་རྒྱ་ཆེན་པོ་ལ་བརྟེན་ནས་ཡི་དྭགས་རྣམས་ཚིམ་པར་བྱས་པའི་ཕྱིར། སྦྱིན་རྒྱུའི་དངོས་པོ་མཚོ་དང་། རྫིང་བུ་སོགས་ཆུའི་རིགས་སུ་གཏོགས་པ་ཐམས་ཅད་ཀྱི་བདག་པོ་ནི་ཀླུའི་རྒྱལ་པོ་དགའ་བོ་སོགས་ཀླུ་རྣམས་ཡིན་པས་ན། སྦྱིན་པ་འདི་ལ་བརྟེན་ནས་སྦྱིན་བདག་ཀླུ་ཡི་རྒྱལ་པོ་དགའ་བོ་དང་། འཇོག་པོ་དང་། ཉེ་དགའ་བོ་སྟེ་དངོས་སུ་མིང་སྨོས་པ་གསུམ་གྱིས་མཚོན། སྲིད་པ་འདི་ན་བརླན་ཅིང་གཤེར་བའི་ཆུ་ཀླུང་། ཆུ་མིག་རྫིང་བུ་སོགས་ཀྱི་བདག་པོ་ཀླུ་རྣམས་དམིགས་ཡུལ་དུ་བྱ་བའོ། །གཉིས་པ་ནི། དེ་རྣམས་ཀྱི་རྒྱུད་ལ་ལམ་ལྔ་རིམ་གྱིས་རྫོགས་ནས་སངས་རྒྱས་ཀྱི་གོ་འཕང་ཐོབ་པར་སྨོན་པ་སྟེ། དེ་ལ་དང་པོ་སྦྱིན་པ་དམ་པ་ནི་ཚོགས་ལམ་གྱི་སྐབས་ཡིན་ཏེ། སྦྱིན་པ་ཙམ་ལམ་ལ་མ་ཞུགས་པའི་འཇིག་རྟེན་པ་རྣམས་ལའང་ཡོད་མོད། བྱང་ཆུབ་གསུམ་གྱི་རྒྱུར་འགྲོ་བའི་སྦྱིན་པ་དམ་པ་མེད་ལ། ཚོགས་ལམ་དུ་ཞི་གནས་དང་ལྷག་མཐོང་གི་རྩིས་ཟིན་པའི་བསོད་ནམས་དང་ཡེ་ཤེས་ཟུང་དུ་འབྲེལ་བས་འཇིག་རྟེན་པ་ལས་ཁྱད་པར་དུ་འཕགས་པའི་ཚོགས་གསོག་ཚུལ་ཡོད་པའི་ཕྱིར། གཉིས་པ་སེམས་ཀྱི་རྒྱན་ནི་སྦྱོར་ལམ་གྱི་སྐབས་ཡིན་ཏེ། དེའི་སྐབས་སུ་སྟོང་ཉིད་རྗེས་མཐུན་རྟོགས་པའི་མཐུས་དགེ་བའི་རྩ་བ་མཐའ་དག་བྱང་ཆུབ་ཀྱི་རྒྱུར་འགྱུར་ངེས་པས། སྤོས་ཀྱི་གླང་པོ་ཆེ་ལ་གསེར་གྱི་དྲྭ་བས་མཛེས་པ་ལྟར་རྣལ་འབྱོར་པའི་སེམས་འབྱོང་བ་ལ་དགེ་བའི་རྩ་བ་རྣམས་ཀྱིས་ཤིན་ཏུ་མཛེས་པའི་རྒྱན་བྱེད་པའི་ཕྱིར། གསུམ་པ་སེམས་ཀྱི་ཡོ་བྱད་ནི་མཐོང་ལམ་གྱི་སྐབས་ཡིན་ཏེ། དེའི་སྐབས་སུ་ཆོས་ཉིད་སྤྲོས་བྲལ་གྱི་གནས་ལུགས་མངོན་སུམ་དུ་རྟོགས་པས་ཚོགས་གཉིས་དངོས་སུ་ཟུང་དུ་འབྲེལ་བའི་སྟོབས་ཀྱིས་བྱང་ཆུབ་ཀྱི་ཡན་ལག་བདུན་གྱི་འབྱོར་པས་རྣལ་འབྱོར་པའི་སེམས་རབ་ཏུ་ཕྱུག་པར་བྱེད་པའི་ཕྱིར། བཞི་པ་རྣལ་འབྱོར་གྱི་ཚོགས་ནི་སྒོམ་ལམ་གྱི་སྐབས་ཡིན་ཏེ། དེའི་ཚེ་ས་དང་པོའི་ཡེ་ཤེས་གོམས་པར་བྱས་པའི་རྒྱུན་གོང་ནས་གོང་དུ་འཕེལ་བར་བྱེད་ཅིང་། འཕགས་པའི་ལམ་ཡན་ལག་བརྒྱད་སོགས་རྣལ་འབྱོར་པའི་ནང་ཏིང་ངེ་འཛིན་གྱི་ཚོགས་མཐའ་དག་རབ་ཏུ་རྫོགས་པར་བྱེད་པའི་ཕྱིར། ལྔ་པ་དོན་གྱི་མཆོག་ནི་མི་སློབ་པའི་ལམ་གྱི་སྐབས་ཡིན་ཏེ། བསྒྲུབ་བྱའི་དོན་མཐར་ཕྱིན་པའི་མཆོག་བརྙེས་པའི་ཕྱིར་རོ། །དེའི་ཡོན་ཏན་གྱི་ཁྱད་པར་ཇི་ལྟ་བུ་ཞེ་ན། ཤེས་བྱའི་རྣམ་པ་ཐམས་ཅད་མཁྱེན་ཅིང་། སྒྲིབ་གཉིས་མཐའ་དག་སྤངས་པ་སོགས་རྫོགས་པའི་སངས་རྒྱས་ཀྱི་སྐུ་དང་ཡེ་ཤེས་དང་། ཡོན་ཏན་དང་། ཕྲིན་ལས་རྒྱ་མཚོ་ལྟ་བུ་ལ་དབང་འབྱོར་པ་སྟེ། དེ་ལྟ་བུའི་གོ་འཕང་རིན་པོ་ཆེ་ཐོབ་པར་གྱུར་ཅིག་ཅེས་སྨོན་ལམ་གདབ་པའོ། །ཞེས་ཁྲོ་ཕུ་ལོ་ཙཱ་བ་སོགས་གསུངས་ལ། གཞན་བཤད་ཚུལ་མི་འདྲ་བ་མངོན་པ་ནས། སྦྱིན་པ་དམ་པ་སེམས་ཀྱི་རྒྱན་རྫུ་འཕྲུལ། སེམས་ཀྱི་ཡོ་བྱད་འཕགས་ལམ་ཡན་ལག་བརྒྱད། རྣལ་འབྱོར་གྱི་ཚོགས་ཏིང་ངེ་འཛིན། དོན་གྱི་མཆོག་མྱང་འདས་ལ་བཤད་དོ། །ཞེས་པའང་མཉྫུ་གྷོཥས་བརྗེད་བྱང་དུ་བྲིས་པ་དགེ། །།

[edit]

chu sbyin skabs kyi smon lam gyi don cung zad bshad pa/ chu sbyin skabs kyi smon lam gyi don cung zad bshad pa bzhugs so/__/oM swa sti/__chu sbyin gyi skabs/__klu'i rgyal po dga' bo dang sogs kyi smon lam gyi don la/__gang gis ched du bsngo zhing smon lam gdab pa'i yul sbyin pa'i bdag po'i ming nas smos pa dang /__de'i ched du bsngo smon bya ba dngos te gnyis las/__dang po ni/__mdo sdud pa las/__'dzam bu'i gling 'dir chu klung ji snyed gcig 'bab cing /__/me tog 'bras ldan sman dang nags tshal skyed byed pa/__/ma dros gnas pa'i klu dbang klu bdag brten gnas te/__/de ni klu yi bdag po de yi mthu dpal yin/__/ces gsungs pa ltar/__spyir brlan cing gsher ba chu'i byed las la brten nas/__me tog dang 'bras bu sogs snod bcud kyi dpal phun sum tshogs par skyed pa'i byed pa po ni klu'i rgyal po 'khor dang bcas pa'i mthu kho na yin cing /__khyad par skabs 'dir chu yi sbyin pa rgya chen po la brten nas yi dwags rnams tshim par byas pa'i phyir/__sbyin rgyu'i dngos po mtsho dang /_rdzing bu sogs chu'i rigs su gtogs pa thams cad kyi bdag po ni klu'i rgyal po dga' bo sogs klu rnams yin pas na/__sbyin pa 'di la brten nas sbyin bdag klu yi rgyal po dga' bo dang /__'jog po dang /__nye dga' bo ste dngos su ming smos pa gsum gyis mtshon/__srid pa 'di na brlan cing gsher ba'i chu klung /__chu mig rdzing bu sogs kyi bdag po klu rnams dmigs yul du bya ba'o/__/gnyis pa ni/__de rnams kyi rgyud la lam lnga rim gyis rdzogs nas sangs rgyas kyi go 'phang thob par smon pa ste/__de la dang po sbyin pa dam pa ni tshogs lam gyi skabs yin te/__sbyin pa tsam lam la ma zhugs pa'i 'jig rten pa rnams la'ang yod mod/__byang chub gsum gyi rgyur 'gro ba'i sbyin pa dam pa med la/__tshogs lam du zhi gnas dang lhag mthong gi rtsis zin pa'i bsod nams dang ye shes zung du 'brel bas 'jig rten pa las khyad par du 'phags pa'i tshogs gsog tshul yod pa'i phyir/__gnyis pa sems kyi rgyan ni sbyor lam gyi skabs yin te/__de'i skabs su stong nyid rjes mthun rtogs pa'i mthus dge ba'i rtsa ba mtha' dag byang chub kyi rgyur 'gyur nges pas/__spos kyi glang po che la gser gyi drwa bas mdzes pa ltar rnal 'byor pa'i sems 'byong ba la dge ba'i rtsa ba rnams kyis shin tu mdzes pa'i rgyan byed pa'i phyir/__gsum pa sems kyi yo byad ni mthong lam gyi skabs yin te/__de'i skabs su chos nyid spros bral gyi gnas lugs mngon sum du rtogs pas tshogs gnyis dngos su zung du 'brel ba'i stobs kyis byang chub kyi yan lag bdun gyi 'byor pas rnal 'byor pa'i sems rab tu phyug par byed pa'i phyir/__bzhi pa rnal 'byor gyi tshogs ni sgom lam gyi skabs yin te/__de'i tshe sa dang po'i ye shes goms par byas pa'i rgyun gong nas gong du 'phel bar byed cing /__'phags pa'i lam yan lag brgyad sogs rnal 'byor pa'i nang ting nge 'dzin gyi tshogs mtha' dag rab tu rdzogs par byed pa'i phyir/__lnga pa don gyi mchog ni mi slob pa'i lam gyi skabs yin te/__bsgrub bya'i don mthar phyin pa'i mchog brnyes pa'i phyir ro/__/de'i yon tan gyi khyad par ji lta bu zhe na/__shes bya'i rnam pa thams cad mkhyen cing /__sgrib gnyis mtha' dag spangs pa sogs rdzogs pa'i sangs rgyas kyi sku dang ye shes dang /__yon tan dang /__phrin las rgya mtsho lta bu la dbang 'byor pa ste/__de lta bu'i go 'phang rin po che thob par gyur cig ces smon lam gdab pa'o/_/zhes khro phu lo tsA ba sogs gsungs la/_gzhan bshad tshul mi 'dra ba mngon pa nas/__sbyin pa dam pa sems kyi rgyan rdzu 'phrul/__sems kyi yo byad 'phags lam yan lag brgyad/__rnal 'byor gyi tshogs ting nge 'dzin/__don gyi mchog myang 'das la bshad do/_/zhes pa'ang many+dzu g+hoShas brjed byang du bris pa dge/__//