DKR-KABUM-09-TA-012

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma'i thugs sgrub bar chad kun sel las/ rig 'dzin khyad par 'phags pa'i las tshogs lha srin dam bsgrags rdo rje'i ri dbang gi zur rgyan ngo mtshar rdo rje'i 'phrul mig
Location	dil mgo mkhyen brtse bka' 'bum Volume 9, Text 12, Pages 60-66 (Folios 1a to 7b5)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	མཆོག་གྱུར་གླིང་པ་ (mchog gyur gling pa)
Citation	Khyentse, Dilgo. Bla ma'i thugs sgrub bar chad kun sel las rig 'dzin khyad par 'phags pa'i las tshogs lha srin dam bsgrags rdo rje'i ri dbang gi zur rgyan ngo mtshar rdo rje'i 'phrul mig. In Skyabs rje dil mgo mkhyen brtse rin po che'i bka' 'bum, Vol. 9: 60-66. Delhi: Shechen Publications, 1994.
Genre	Activity Practices - las tshogs  ·  Supplemental Instructions - zur 'debs - zur rgyan
Cycle	བླ་མའི་ཐུགས་སྒྲུབ་བར་ཆད་ཀུན་སེལ་ (bla ma'i thugs sgrub bar chad kun sel)
Deity	rig 'dzin khyad par 'phags pa
Colophon	།ཅེས་པའང་ལྕགས་སྤྲེལ་སྤྲེལ་ཟླའི་༦ཚེས་བཅུར་བོད་ཡུལ་བཀྲ་ཤིས་འབྱུང་བའི་གནས་མཆོག་སྤ་གྲོ་སྟག་ཚང་སེངྒེ་བསམ་འགྲུབ་ནས་ལས་སྦྱོར་འདི་བརྩམས་པའི་ཚེ་རྙིང་སྔགས་རྒས་པོ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་ཀུན་གཟིགས་མཁྱེན་བརྩེ་རིན་པོ་ཆེའི་གསུང་རི་ཁྲུས་སོགས་བསྣན་ཏེ་ཟིན་རིས་སུ་བཏབ་པ་གངས་ཅན་བདེ་སྐྱིད་དཔལ་ཡོན་རྒྱས་བརྟན་གྱི་རྟེན་འབྱུང་དུ་སྨོན་པ་བཞིན་འགྲུབ་པར་གྱུར་ཅིག །སརྦ་མངྒ་ལཾ། དགེའོ།།
	/ces pa'ang lcags sprel sprel zla'i 6tshes bcur bod yul bkra shis 'byung ba'i gnas mchog spa gro stag tshang seng+ge bsam 'grub nas las sbyor 'di brtsams pa'i tshe rnying sngags rgas po 'gyur med theg mchog bstan pa'i rgyal mtshan gyis kun gzigs mkhyen brtse rin po che'i gsung ri khrus sogs bsnan te zin ris su btab pa gangs can bde skyid dpal yon rgyas brtan gyi rten 'byung du smon pa bzhin 'grub par gyur cig_/sarba mang+ga laM/_dge'o//

Tibetan Text

Wylie

[edit]

༄༅། །བླ་མའི་ཐུགས་སྒྲུབ་བར་ཆད་ཀུན་སེལ་ལས། རིག་འཛིན་ཁྱད་པར་འཕགས་པའི་ལས་ཚོགས་ལྷ་སྲིན་དམ་བསྒྲགས་རྡོ་རྗེའི་རི་དབང་གི་ཟུར་རྒྱན་ངོ་མཚར་རྡོ་རྗེའི་འཕྲུལ་མིག་ཅེས་བྱ་བ་བཞུགས།།

མཁའ་ཁྱབ་ཐུགས་རྗེའི་སྤྲིན་ཆེན་ལས། །ཚར་གཅོད་རྗེས་འཛིན་ཕྲིན་ལས་ཆར། །བསྟན་འགྲོའི་སྙིང་གི་དཔྱིད་སྨིན་པའི། །གུ་རུ་ཁྱད་འཕགས་རིག་འཛིན་རྒྱལ། །སྔོན་བྱོན་སྟོན་པའི་རྣམ་པར་ཐར། །རྗེས་འཇུག་གྲུབ་པས་ཉམས་བླངས་ནས། །སྙིགས་དུས་ཕན་བདེའི་གསོས་འགྱུར་ཕྱིར། །ཟབ་གཏེར་མན་ངག་སྤྲོས་ཏེ་འཆད། །དེ་ཡང་གཏེར་སྟོན་གྲུབ་ཐོབ་ཡེ་ཤེས་ཀྱི་རྒྱལ་པོ་རིག་འཛིན་རྩལ་འཆང་ཡབ་སྲས་ཀྱི་ཟབ་གཏེར་གཅིག་དྲིལ་བླ་མའི་ཐུགས་སྒྲུབ་བར་ཆད་ཀུན་སེལ་གྱི་གུ་རུ་ཁྱད་པར་འཕགས་པའི་ལས་མཐའ་བཀའ་ནན་རབ་བརྗིད་ཀྱི་ཆོ་ག་རྒྱས་པར་བྱ་བའི་ཚུལ་ལ། བྱེད་པ་པོའི་གང་ཟག་བྱང་གླིང་དཔལ་གྱི་རྒྱལ་མཚན་གྱི་གཏེར་བྱོན་བཀའ་ནན་རབ་བརྗིད་ལས། ཨོ་རྒྱན་བརྒྱུད་འཛིན་རྣལ་འབྱོར་པས༔ ཞེས་པ་ལྟར། གུ་རུའི་ལུང་གིས་བསྔགས་པའི་རྒྱལ་ཚབ་དང༌། དེའི་གདུང་རིགས་ནུས་ལྡན་དང༌། རྩ་བ་གསུམ་གྱི་བསྙེན་སྒྲུབ་ལས་སུ་རུང་ཞིང་བསྐྱེད་རྫོགས་ཀྱི་གདིང་དང་ལྡན་པས། བྱ་བའི་དགོས་པ། མ་འོངས་སྙིགས་མ་ལྔ་སྤྱོད་དུས༔ ཉོན་མོངས་དུག་ལྔའི་རང་སྐྱོན་གྱིས༔ ནད་མཚོན་མུ་གེས་རང་སྲོག་འདོར༔ བོད་ཁམས་སྡུག་བསྔལ་སྤྱོད་པའི་ཚེ༔ དམག་དཔུང་གདུག་པས་འཚེ་བའམ༔ སད་སེར་ལོ་དགྲ་འབྱུང་འགྱུར་རོ༔ ནད་བདག་ངེས་མེད་རིམས་འབེབས་ཤིང༔ ནད་ངན་གདུག་པས་ཉེས་གྱུར་ན༔ ཡུལ་ཁམས་གྲོང་ངམ་གྲོང་བརྡལ་རྒྱུ༔ སྲུང་བཟློག་ཞི་བར་བྱ་འདོད་ན༔ དུས་ནི། ཡུལ་གསར་འཛིན་ནམ་ལས་སྒོ་འབྱེད༔ མཁར་བརྩེགས་ཀླུ་འདུལ་སྲིའུ་གསོ༔ བྱ་བ་གང་དང་གང་བྱེད་ཀྱང༔ ཞེས་དང༌། དུས་དང་གཟའ་སྐར་ཤིས་པའི་ཚེ༔ ཞེས་པ་ལྟར། དེ་དག་གི་སྐབས་སུ་ཟབ་གཏེར་གྱི་སྒོ་འབྱེད་པ་དང༌། གནས་ཆེན་བྱིན་འབེབས་ཀྱི་སྐབས་སུ། སྤྲེལ་ལོ་སྤྲེལ་ཟླའི་ཡར་མར་གྱི་ཚེས་བཅུ་སོགས་དུས་ཚེས་གཟའ་སྐར་སྦྱོར་བྱེད་ཤིས་པའི་ཉིན་ལས་རིམ་ལ་འཇུག་པ་སྟེ། ཚུལ་འདི་ལྟ་བུའི་ཆོ་ག་ཚད་ལྡན་ནི་ཁེ་ཉེན་ཆེ་བའི་ལས་ཡིན་པས་ན་ཐོག་མར་སྣ་སེལ་དུ་འབུམ་སྡེ་ལྔ། སྲོག་བསླུ། ཉེའུ་འདོན་པ། སྒྲོལ་མ་མཎྜལ་བཞི་ཆོག །སཱཙྪ་གདབ་པ། ཕུད་རབས་རྒྱས་པ། བཤགས་རྒྱུད་དང་དོང་སྤྲུགས་ཀྱི་ཆོ་ག་རྩ་གསུམ་ཚོགས་སྐོང་སོགས་རྒྱས་པར་བསྒྲུབ། བྱེ་བྲག་ཏུ་དམག་བཟློག་ལ་མ་གཤིན་ཕུར་གསུམ་གྱི་མདོས་བཟློག །གདུགས་དཀར། གཙུག་ཏོར་རྣམ་རྒྱལ། སྟོབས་པོ་ཆེ། གཟུངས་གྲྭ་ལྔ། ཕྱིར་བཟློག །སྡོང་རྒྱན་སོགས་མདོ་གཟུངས་སྒྲོག །སད་སེར་ལོ་ཉེས་སྲུང་བ་གཏེར་བུམ་སྒྲུབ་པ། ཀླུ་མཆོད་དང་ཀླུ་གཏོར། ནོར་རྒྱུན་མའི་གཟུངས་མདོ་སྒྲོག །ནོར་ལྷ་དང་ཞིང་ལྷ་མཆོད། གཡང་སྒྲུབ་དང་ཛཾ་གཏོར་བཏང༌། ནད་ཡམས་སྲུང་བཟློག་ལ། གཙུག་ཏོར་ནག་མོ་དང་མ་མོའི་མདོས། བརྟན་མའི་མདོས་ཆེན། བརྒྱ་བཞི། ཁ་འབར་དཀར་ནག་ཁྲ་གསུམ། དཀར་དམར་གྱི་གསུར། དམ་སྲི་དང༌། ཤི་འདྲེའི་གླུད་བསྔོ། ལོ་གྱོན་མའི་གཟུངས་སྒྲུབ་རྣམས་ལེགས་པར་བསྒྲུབ། དམ་བསྒྲགས་ཀྱི་གནས་ནི། སྦས་པའི་གནས་དང་རི་ཡི་རྩེ༔ ཕོ་བྲང་མཁར་གྱི་ཡང་ཐོག་སོགས༔ ས་ཕྱོགས་ཐམས་ཅད་མཐོང་བ་དང༔ གཉན་ཞིང་བཀྲ་ཤིས་གནས་མཆོག་ཏུ༔ ཞེས་གསུངས་པ་ལྟར་འགལ་རྐྱེན་བྲལ་ཞིང་མཐུན་རྐྱེན་རྣམས་ཚོགས་པར་བྱས་ལ། ཇི་ལྟར་བྱ་བའི་ལས་རིམ་ནི་བླ་མའི་ཐུགས་སྒྲུབ་བར་ཆད་ཀུན་སེལ་ལམ། ཡིད་བཞིན་ནོར་བུ་ལྟ་བུའི་གུ་རུའི་བླ་སྒྲུབ་གང་རུང་ལ་བསྟེན་པའི་བསྐྱེད་བཟླས་ཚོགས་སྐོང་ཞག་བདུན། གསུམ་སོགས་ཇི་ལྟར་རིགས་པས་གཞུང་བསྲངས་ཏེ། དེ་དག་གི་སྐབས་སུ་བྱེ་བྲག་ཁྱད་འཕགས་རིག་འཛིན་གྱི་བསྐྱེད་བཟླས་ཡང་ཡང་བྱ་ཞིང་གཞུང་གསལ་རྩ་བའི་བསྙེན་དམིགས་དང༌། ཁྱད་པར་རང་འདྲའི་ཡེ་ཤེས་སྐུ་གཉིས་པ༔ དཔག་མེད་ཉི་ཟེར་རྡུལ་ལྟར་སོགས་ཀྱི་དམིགས་བཟླས་དང༌། རེས་འགའ་ཀུན་ལ་སྙིང་རྗེ་དང༔ རེས་འགའ་སྟོང་ཉིད་ཕྱག་རྒྱས་གདབ༔ ཅེས་པ་རྣམས་གནད་དུ་བསྣུན་ཏ་རྟགས་ཐོན་པར་བྱ། ཡང་གློ་བུར་དུ་དགོས་པ་བྱུང་བ་ཁྱད་འཕགས་རིག་འཛིན་ལ་ཕྲིན་ལས་སྙིང་པོའི་ཆིངས་དང་སྦྱར་ཏེ་བཏང་ཀྱང་མི་རུང་བ་མེད། དམ་བསྒྲགས་དངོས་ལ་རྒྱས་པ་ཉིན་གསུམ་དུ་བྱས་ན་ལེགས་པའི་དང་པོ་ལས་གཞུང་གང་ཡིན་བསྲངས་རྗེས། ཁྲུས་ཆོག་ཟླ་བའི་བདུད་རྩིའི་བུམ་སྒྲུབ་ལྟར་ཁྲུས་བུམ་ལེགས་པར་བསྒྲུབས། གལ་ཆེ་ན་གཟུངས་སྔགས་རྣམས་དགེ་སློང་བཞི་སྡེ་སོགས་ཀྱིས་གྲངས་བསགས། སྐུ་གསུང་ཐུགས་རྟེན་བྱིན་ཅན་ལ་མཆོག་ཁྲུས་གསོལ་ནས་ཁྲུས་བུམ་ཏུ་བླུགས། བསང་བརྔན་འདོད་དགུའི་རྒྱ་མཚོ་རྒྱས་པར་བཏང་སྟེ་མགྲོན་སྤྱན་འདྲེན་མཆོད་བསྟོད་བར་བཏང་རྗེས། བླ་གབ་མེད་པ་རི་ཀླུང་དང་ཡུལ་ལྷ་ཀུན་མཐོང་བའི་སར་ཕྱིན་ལ། དང་པོ་ཉེས་ཚོགས་བཀྲུ་པ་ནི། རང་གི་སྙིང་ག་ནས་འོད་ཟེར་འཕྲོས་པས་ལྗོངས་ཀྱི་དཀྱིལ་འཁོར་ཆེན་པོ་འདིར་མངའ་བསྒྱུར་བའི་ཡུལ་ལྷ་གཞི་བདག་གནས་བདག་གཉུག་མར་གནས་པའི་དཀར་ཕྱོགས་ཀྱི་ཟོ་དོར་ཆེན་པོ། རྒྱ་བལ་འབྲས་འབྲུག་སོགས་ཀྱི་སྐབས་ཐོབ་དམིགས་བསལ་ཁ་བསྒྱུར། བོད་ཁམས་སྐྱོངས་བའི་བརྟན་མ་བཅུ་གཉིས། ཡ་མ་བཅུ་གཉིས། སྐྱོང་མ་བཅུ་གཉིས། དགེ་བསྙེན་ཉེར་གཅིག །གངས་ཅན་ཉེར་གཅིག །བྲག་ཕུག་བརྒྱད། ཕྱོགས་བཞིའི་བྲག་རི། མཚོ་ཆེན་བཞི། ལུང་ལྔ། ལྗོངས་གསུམ། འབྲོས་ཡུལ་བཞི་ལ་སོགས་པ་མངའ་རིས་སྐོར་གསུམ། དབུས་གཙང་རུ་བཞི། གཉན་ཆེན་སྡེ་བཞི། སྒང་དྲུག་གཞི་བདག་བཅུ་གཉིས། ཆུ་བཞིའི་དགེ་བསྙེན་བཞི་སོགས་མདོ་ཁམས་ཆུ་བཞི་སྒང་དྲུག་གི་གཞི་གནས། གཏེར་བདག་མཆེད་དང་རིགས་སྲས་བཙུན་མོ་འཁོར་དང་ཡང་འཁོར་བཅས་པ་ཐམས་ཅད་དང༌། གཞན་ཡང་འཛམ་གླིང་ཐ་གྲུ་ཁོ་ར་ཁོར་ཡུག་གི་ས་ཆུ་རྡོ་ཤིང་གཉན་པ་ལ་གནས་པ་རྣམས་དང༌། ཁྱད་པར་ཕོག་ཐུག་འཁོན་གྲིབ་སོགས་ཀྱི་ཉེས་པས་ཕོག་པ་ཐམས་ཅད་དག་བྱེད་ཁྲུས་ཀྱི་ཆོ་གའི་མགྲོན་འདིར་སྐད་ཅིག་ཐང་གཅིག་ཡུད་ཙམ་ལ་འདུས་ཤིང་ཁྲུས་ཀྱི་བྱ་བ་ལ་དགྱེས་ཤིང་གུས་པས་འཁོད་པར་གྱུར་ཅིག །སརྦ་བྷཱུ་མི་པ་ཏི་ལོ་ཀ་པ་ལ་ཨ་ཀརྵ་ཡ་ཛཿ ཧཱུྃ། ང་ནི་པདྨ་ཐོད་ཕྲེང་རྩལ། །སོགས་བཀའ་ནན་རབ་བརྗིད་ལྟར་སྦྱར། བྱང་གླིང་དཔལ་གྱི་རྒྱལ་མཚན་གྱི་བཀའ་ནན་རབ་བརྗིད་སྦྱར་ན། ཧཱུྃ་ཧཱུྃ་ཧཱུྃ། རྗེ་བཙུན་ང་ནི་ཀུན་ཏུ་བཟང་སོགས་སྦྱར། དེ་ནས་དེ་བཞིན་གཤེགས་པ་སྲས་དང་བཅས་པ་སོགས་ཁྲུས་ཆོག་ཟླ་བའི་བདུད་རྩི་ལྟར་བྱ། སྐབས་འདིར་ཞི་བ། ཕྱེད་མ། དྲག་པོའི་སྦྱང་བ་རྣམས་ཟླ་བའི་བདུད་རྩི་ལྟར་བྱ། གཞི་བདག་གནས་བདག་ཡུལ་བདག་གྲོང་བདག་གཉུག་མར་གནས་པ་ཐམས་ཅད་ཀྱི། ཚེ་ཐོག་མ་མེད་པ་ནས་བསགས་པའི་ཉོན་མོངས་ཞེ་སྡང་ལས་གྱུར་པའི་བརྟན་གཡོའི་རྟེན་འབྲེལ་སོགས་སྦྱར། བྱབ་པའི་སླད་དུ་རྨ་བྱའི་མདངས་ཀྱི་དབུས་སུ་ཧཱུྃ་ཡིག་གི་མཐར་སྔགས་ཕྲེང་གིས་བསྐོར་བ་རྡོ་རྗེ་དང་བཅས་པས་བྱབ་པར་བསམ་ལ། དར་དཀར་རྨ་བྱའི་མདོངས་ཀྱིས་བྱབས་ཏེ། ཧཱུྃཿ དཀོན་མཆོག་གསུམ་གྱི་བདེན་པ་དང༔ སོགས་ཟླ་བའི་བདུད་རྩི་ལྟར་ལ། འདོད་གསོལ། ཡུལ་ལྷ་རྣམས་ཀྱིས་ཚེ་ཐོག་མ་མེད་པ་ནས་བསགས་པའི་ཉོན་མོངས་དུག་ལྔ་ལས་གྱུར་པའི་བརྟན་གཡོའི་རྟེན་འབྲེལ་སོགས་པའི་རྒུད་པ་ཐམས་ཅད་ཨ་པ་ན་ཡ་སྭཱ་ཧཱ། སྲུང་བའི་སླད་དུ། དེ་དག་གི་སྒོ་གསུམ་ཕྱིན་ཆད་བར་ཆད་གང་གིས་མི་ཚུགས་པའི་ཕྱིར་སློབ་དཔོན་གྱི་ཕྱག་མཚན་རྡོ་རྗེ་ལས་རྡོ་རྗེ་གྲངས་མེད་པ་འཕྲོས་སོགས་ཟླ་བའི་བདུད་རྩི་ལྟར། ཧཱུྃ༔ མ་སྐྱེས་འཇིགས་པ་སོགས་བརྗོད་བཞིན་རྡོ་རྗེ་དང་བཅས་པས་ཕྱོགས་ཀུན་ཏུ་རྒྱ་གྲམ་དུ་བཞག་སྟེ། ཡུལ་རྒུད་པ་ཐམས་ཅད་ཀྱི་མི་ཚུགས་པ་རཀྵ་རཀྵ་སྭཱ་ཧཱ། དེ་ནས་དགེ་ལེགས་ཤིས་པའི་སླད་དུ་སངས་རྒྱས་བྱང་སེམས་དཔག་ཏུ་མེད་པས་སློབ་དཔོན་དང་ལྷན་ཅིག་ཤིས་པ་བརྗོད་པ་དང་ཆབས་ཅིག་ལྷ་ཡི་མེ་ཏོག་སིལ་མ་ཆར་དུ་བསྙིལ་བའི་མོས་པ་མཛོད། གང་ལ་སེར་སྣ་སོགས་རོལ་མོ་བཅས་བྱ། བསང་བརྔན་འདོད་དགུའི་རྒྱ་མཚོའི་བསང་རབས། ཀྱཻ། དང་པོ་བསང་བྱུང་སོགས་གཞུང་བསྲངས། ཆོས་སྦྱིན་གྱི་དབུར། སླར་ཡང་བདེ་གཤེགས་ཀུན་གྱི་བགྲོད་པ་གཅིག་པའི་ལམ་སྐྱབས་སེམས་ཀྱི་སྡོམ་པ་འཛིན་སྙམ་པས་དམིགས་པ་འདི་བཞིན་མཛོད། ཁྱེད་རང་རྣམས་ཀྱི་མདུན་གྱི་ནམ་མཁར་སེང་གེས་བཏེགས་པའི་པདྨ་དང་ཟླ་བའི་སྟེང་དུ་བཅོམ་ལྡན་འདས་ཤཱཀྱ་ཐུབ་པར་ཕྱོགས་བཅུའི་སངས་རྒྱས་ཐམས་ཅད་ཀྱིས་བསྐོར་བར་དམིགས་པ་སངས་རྒྱས་དཀོན་མཆོག །ཐེག་ཆེན་གྱི་དམ་ཆོས་གླེགས་བམ་བྲག་རི་བརྩེགས་པ་ལྟར་བཞུགས་པ་ཆོས་དཀོན་མཆོག །ཐེག་པ་ཆེན་པོའི་བྱང་སེམས་བསམ་གྱིས་མི་ཁྱབ་པས་བསྐོར་བ་དགེ་འདུན་དཀོན་མཆོག་སྟེ། དེ་རྣམས་ལ་འདི་ནས་བྱང་ཆུབ་མ་ཐོབ་པར་སྐྱབས་སུ་འགྲོ་སྙམ་པས་འདིའི་རྗེས་ཟློས་མཛོད། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་ཅག་གཞི་བདག་གནས་བདག་གི་རིགས་སུ་གཏོགས་པ་ཐམས་ཅད་དུས་འདི་ནས་བཟུང་སྟེ། བྱང་ཆུབ་སྙིང་པོར༴ ལན་གསུམ་བརྗོད་པས་དེ་རྣམས་ཀྱི་རྒྱུད་ལ་སྐྱབས་འགྲོའི་སྡོམ་པ་སྐྱེས་པར་བསམ། སླར་ཡང་བླ་ན་མེད་པའི་བྱང་ཆུབ་མཆོག་ཏུ་སེམས་བསྐྱེད་སྙམ་པས་འདིའི་རྗེས་ཟློས་མཛོད། ཕྱོགས་བཅུ་ན་བཞུགས་པ་སོགས་ནས། དུས་འདི་ནས་བཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར་དུ། ཇི་ལྟར་སྔོན་གྱི་བདེ་གཤེགས་སོགས་ལན་གསུམ་བརྗོད་པས་བྱང་སེམས་ཀྱི་སྡོམ་པ་ཐོབ་བྱུང་སྙམ་དུ་མོས་མཛོད། དེ་ནས་རང་དགའ་བ་བསྒོམ་པ་དང༌། གཞན་དགའ་བ་བསྒོམ་ཏུ་འཇུག་པ་དང༌། སྨོན་ལམ་གདབ་པ་རྣམས་ཀྱང་བྱ། བསོད་ནམས་འདི་ཡིས༴ ལྷ་ཡང་དུས་སུ༴ འཇིག་རྟེན་བདེ་ཞིང་སོགས་སྨོན་ལམ་གང་ཤེས་གདབ་བོ། །དེ་ཡང༌། དབུ་མ་ལུགས་ཀྱི་སེམས་བསྐྱེད་འདི། །སེམས་ཅན་ཀུན་གྱི་ལེགས་ཐོབ་ན། །རྫོགས་པའི་སངས་རྒྱས་རྒྱུར་འགྱུར་ཞེས། །མདོ་དང་བསྟན་བཅོས་རྣམས་ལས་གསུངས། །ཞེས་སོ། །བསང་བརྔན་གཞུང་གི་ཆོས་སྦྱིན། ཨཿ སྐྱེ་མེད་དབྱིངས་སུ་ལྷུན་གྲུབ་གསལ་སོགས་བརྗོད་པས་མཐར་དབྱུང་ལ། ལས་གཞུང་གང་ལ་བསྟེན་པའི་བཀའ་གཏེར་སྲུང་མའི་གཏོར་ཆོག་དང༌། ཚོགས་བསྐང་སོགས་ལས་མཇུག་བསྡུའོ། །ཉིན་གཉིས་པ་ལ་རྩ་གསུམ་ལས་གཞུང་བསྲངས་ཏེ། གལ་ཆེ་གསེར་སྐྱེམས་ཙམ་བྱས་ལ། སློབ་དཔོན་འཁོར་འདས་ཡོངས་ཀྱི་རྗེ་བཙན་མ་ཧཱ་གུ་རུ་ཁྱད་པར་འཕགས་པའི་སྐུས་སྲིད་གསུམ་ཁྱབ་པ་ཁམས་གསུམ་ཟིལ་གྱིས་གནོན་པ། གསུང་གི་དྲག་སྔགས་ལྡིར་བས་དྲེགས་པའི་སྲོག་སྙིང་འདྲེན་པ། ཐུགས་མི་གཡོ་མཁའ་ཁྱབ་ཀྱི་དགོངས་རྩལ་རྫོགས་པས་དྲེགས་བྱེད་ཨར་ལ་གཏོད་པ། ཞི་ཁྲོ་སྤྲུལ་པའི་འཁོར་ལོ་ཉི་ཟེར་ལ་རྡུལ་འཁྲིགས་པ་ལྟ་བུའི་འཕྲོ་འདུ་གློག་ལྟར་འབྱེད་པའི་ཐུགས་སྲོག་ལས་འོད་ཟེར་ལྕགས་ཀྱུ་དང༌། ལས་བྱེད་ལས་བཞིའི་གིང་ཆེན་གྱི་ཚོགས་ཕྱོགས་བཅུར་རྡོ་རྗེའི་སེར་དྲག་འབེབས་པ་བཞིན་འཕྲོས་པས་སྲིད་པ་གསུམ་གྱི་སྡེ་བརྒྱད་འབྱུང་པོ་མཐུ་ཆེན་ཕོ་མོ་རྣམས་རང་དབང་མེད་པར་ཕྱག་རྒྱ་བཞིས་བཏབ་ཏེ་བཀུག་པར་བསམ་ལ། རྔ་རོལ་དབྱངས་དང་བཅས་སྟེ། ཧཱུྃ༔ ང་ནི་པདྨ་ཐོད་ཕྲེང་རྩལ་སོགས་དང༌། ཞི་དྲག་ཕྱེད་མའི་སྦྱོང་བ་རི་ཁྲུས། བསང་བསྡུས་རྣམས་སྔ་ཉིན་ལྟར་བྱ། སྡེ་བརྒྱད་ཁེངས་མདོས་འཇམ་མགོན་གསུང་ལྟར་མདོས་བྱིན་རླབས་སྤྱན་འདྲེན་ཡན་ཆད་གྲུབ་པ་དང༌། རང་ཉིད་ཁྱད་པར་འཕགས་པའི་རིག་འཛིན་གྱི་ལྷ་སྲིན་ཐམས་ཅད་དགོངས་པས་གཟིར་ནས་ཐམས་ཅད་དཔའ་བཀོང་ང་རྒྱལ་ཆགས། རྒོལ་བའི་ནུས་སྟོབས་ཟད། མཐུ་དང་རྫུ་འཕྲུལ་གཟི་བརྗིད་ཉམས་ཏེ་འདར་ཞིང་འདུད་པར་བསམ་ལ། ཧཱུྃ་ཧཱུྃ༔ ང་ནི་སངས་རྒྱས་ཀུན་གྱི་སོགས་ནས། འབངས་སུ་གྱུར༔ བར་ཆེ་བ་བརྗོད། དམ་བཞག་དངོས་ནི། ནང་མཆོད་རྡོ་རྗེའི་རྩེའི་འཐོར་ཏེ། བྱང་གླིང་གི །ཧཱུྃ། ཨོ་རྒྱན་པདྨ་རྒྱལ་པོ་སོགས་དང༌། ཧཱུྃ། ང་ནི་པདྨ་འབྱུང་གནས་ཡིན་སོགས། ས་མ་ཡ་ལ་རྩེན་པར་མཛོད༔ བར་སྦྱར་མཐར། དམ་ཚིག་གི་དཔང་པོ་རྡོ་རྗེའི་མནའ་ཆུ་བྱིན་པར་མོས་ལ། ཧཱུྃ༔ སྔོན་གྱི་བསྐལ་བའི་དང་པོ་ནས་སོགས་མཐར། སྔགས་མཐར། ས་མ་ཡ་སྨ་ར༔ ས་མ་ཡ་མ་ཏི་ཀྲ་མ༔ ས་མ་ཡ་རཀྵནྟུ༔ བརྗོད་ལ། ཧཱུྃ༔ བླ་མ་ཡི་དམ་དཀོན་མཆོག་གསུམ་སོགས་སྡེ་བརྒྱད་མདོས་དང༌། བཀའ་ཉན་རབ་བརྗིད་གཞུང་གི །ཨོཾ་ཨཱཿཧཱུྃ། སྣང་སྲིད་གཞིར་བཞེངས་སོགས་གྲངས་བསགས་མཐར། གླུད་བཅས་བསྔོས་མཐར་དྲེགས་པ་ཐམས་ཅད་མངའ་འབངས་སུ་ཚུད་པ་ལ་མདོས་གཏོར་འདོད་ཡོན་གྱིས་བརྔན་པས་དགའ་མགུ་ཡི་རང་དམ་ཚིག་གི་རྡོ་རྗེ་སྤྱི་བོར་བཞག་ཅིང་ཐ་ཚིག་བསྒྲགས་ཏེ་ཕྲིན་ལས་བཅོལ་བས་དགའ་བའི་འཛུམ་མདངས་བཅས་ཕྲིན་ལས་ཐོག་མེད་དུ་སྒྲུབ་པར་ཁས་བླང་བར་བསམ་ལ། མདོས་ལ་ཁྲག་ཆང་བདུད་རྩིའི་བྲན། གསེར་སྐྱེམས་སྦྲེང་ཞིང༌། སློབ་དཔོན་གྱིས་རྡོ་རྗེ་གདེང་ཞིང་རིག་རྩལ་སྦར་ལ། ཧཱུྃ་བྷྱོཿ ཉོན་ཅིག་སྣང་སྲིད་སོགས། རྡོ་རྗེའི་ཐ་ཚིག་བྲོ་བོར་གྱུར༔ མཐར་རྫོང་འདེབས་དང་བཅས། སྡེ་བརྒྱད་ཁེངས་མདོས་ཀྱི། ཀྱཻ༔ ད་ནི་སྣང་སྲིད་དྲེགས་པ་སོགས་གཤེགས་གསོལ་བཅས་མདོས་རི་རྩེར་བསྐྱལ། སྐུ་གླུད་གནོད་པའི་ཕྱོགས་སུ་བཏང༌། ལས་གཞུང་གི་གཏོར་བསྔོ་དང་ཚོགས་སྐོང་སོགས་འཇུག་བསྡུའོ། །ཉིན་གསུམ་པ་ལ་སྔ་དྲོ་ལས་གཞུང་གང་ཡིན་རྒྱས་པར་བཏང༌། ཕྱི་དྲོ་གྲོ་ལོད་ཀྱི་ལས་བྱང་མཆོད་པ་བྱིན་བརླབ་ནས་བརྩམས་མདུན་རྟེན་བཟློག་དཀྱིལ་ལ་དམིགས་པའི་བསྐྱེད་བཟླས་སྟོང་ཚིག་མཆོད་བསྟོད་དང༌། བཀའ་ནན་རབ་བརྗིད་ཀྱི། ཧཱུྃ༔ ང་ནི་པདྨ་ཐོད་ཕྲེང་སོགས་དང༌། ཞི་དྲག་ཕྱེད་མའི་སྦྱང་པ། བརྟན་གཡོའི་ཁྲུས། བསང་བསྡུས་མཐར། ཧཱུྃ་ཧཱུྃ༔ ང་ནི་སངས་རྒྱས་ཀུན་སོགས་མཐར་དཔལ་གཏོར་སྡེ་བརྒྱད་ཀྱི་བཤོས་བུས་བསྐོར་བ་ལ་བརྟེན་པའི་མདོས་གཏོར་བསྔོ། དམ་བསྒྲགས་བཅས་བཀའ་ཉན་རབ་བརྗིད་དཀྱུས་ལྟར་དམ་བསྒྲགས། ཧཱུྃ༔ ཉོན་ཅིག་སྣང་སྲིད་བར་བཏང་ནས་ཚོགས་དང་གསོལ་ཀ་གྲོ་ལོད་བཟློག་པའི་ལས་གཞུང་བསྲང་ལ། འགུགས་པའི་བདེན་བརྗོད་སྐབས། བསྟན་དང་འགྲོ་བའི་སྤྱི་དགྲ། ཁྱད་པར་དུ་རྡོ་རྗེའི་ཐ་ཚིག་བཀའ་ནན་ཕོག་པའི་བཀའ་ལ་མི་ཉན། དམ་ལ་མི་སྡོད་སླར་ལ་འཁུ་ཞིང་གཤེ་བའི་སྨོན་ལམ་ལོག་པའི་དམ་སྲི་འབྱུང་པོ་གསར་སྐྱེས་ཀྱི་ཚོགས་དང་བཅས་པ་ཐམས་ཅད་སྲིད་པ་གསུམ་གྱི་ཁོངས་སོགས་སྦྱར། ལྷ་སྲིན་ཟིལ་གནོན་སྔགས། སརྦ་དུཥྚཾ་ཨེ་ཡ་མ་ཡ་མ་མ་ཧཱ་དེ་ཝ་ཨ་དུ་ཏྲ་མུན་མུ་ཐུན་མུ་ཐུཾ༔ ཤུ་ལ་ཛཿ རཱ་ཙ་ཙཿ གྷྲྀ་བ་ཙ་ཛཿ རཀྵ་རཿ བཛྲ་ས་དྷཱུ་ཏྲིཿ ཧཾ་ཤཾ་ཏྲིཿ ས་ནཱ་ག་ཕུ༔ ཧུར་ཐུཾ་ཛཿ ཞེས་པས་གཟིར། ཕུར་གདབ་ཀྱི་མགོར། ཧཱུྃ། ཆེ་མཆོག་པདྨ་ཐོད་ཕྲེང་རྩལ་སོགས་སྔགས་བཅས་དང༌། ཧཱུྃ། བདག་ཉིད་རིག་འཛིན་དཔལ་ཆེན་པོ་སོགས་མཐར། ཞལ་བསྟབ་ཀྱི་སྔགས་མཐར་ ཨཿཡཿམཿདུཿརུ་ཙཿཤཿནཿ ས་པ་རི་ཝཱ་ར་སརྦ་དུཥྚན་བིགྷྣཱན་ཤ་ཏྲཱུན་མཱ་ར་ཡ་ཁ་ཁ་ཁཱ་ཧི་ཁཱ་ཧི༔ སརྦ་དུཥྚན་ཧ་ན་ཧ་ན་ད་ཧ་ད་ཧ་པ་ཙ་པ་ཙ་མ་ར་ཡ་ཧཱུྃ་ཕཊ྄༔ ཅེས་སྦྱར། ཤིན་ཏུ་རྩུབ་ན་སྡེ་བརྒྱད་སོ་སོའི་སྔགས་བཅུན་པ་དང་ཤི་ས་བསྟན་པ་སོགས་བྱ་བར་གསུངས་ཀྱང་ཞལ་ལས་ཤེས་པར་བྱ་དགོས་སོ། །ཚོགས་ལ་རོལ་ཞིང་ལྷག་མ་སོགས་གཏོར་བཟློག་དཀྱུས་ལྟར་བྱ། སྡེ་བརྒྱད་གནད་ལ་ཆུན་པའི་རྟགས་བྱུང་ན་སླར་ཁྲུས་དང༌། བསང་དང་གཏོར་མ་སོགས་ཀྱིས་བརྔན་འབུལ་བ་དང༌། སྡེ་བརྒྱད་ཀྱི་གཏོར་མ་གྲོ་ལོད་ཀྱི་གཏོར་ཟོར་ནང་དུ་འབུལ་བ་དང༌། རྟེན་འབྲེལ་གྱི་དགའ་སྟོན་མཐའ་རྒྱས་སུ་བྱས་པའི་དགོས་པ་ནི། ཞི་བས་བརྔན་དང་དྲག་པོས་གཟིར༔ ཤིན་ཏུ་དྲག་པོས་ཚར་གཅོད་པའི༔ མན་ངག་ཁྱད་པར་འཕགས་པའི་མཆོག༔ རྡོ་རྗེའི་བཀའ་ནན་ཆོ་ག་འདི༔ ནུས་ལྡན་གང་གིས་བརྩམས་པ་ན༔ བོད་ཁམས་སྤྱི་དང་བྱེ་བྲག་ལ༔ ཕན་པའི་རྟེན་འབྲེལ་བླ་ན་མེད༔ ནད་ཡམས་འཁྲུགས་རྩོད་ཐམས་ཅད་ཞི༔ ཆར་ཆུ་ལོ་ཕྱུགས་དཔལ་གཡང་རྒྱས༔ བསམ་པ་འགྲུབ་ཅིང་འདོད་དགུ་འདུ༔ ནག་ཕྱོགས་འབྱུང་པ་ཚར་གཅོད་ཅིང༔ སངས་རྒྱས་བསྟན་པ་ཡུན་དུ་གནས༔ དེ་ཕྱིར་སྙིང་རྗེ་དམ་ཚིག་ཅན༔ པདྨ་བདག་གི་བརྒྱུད་འཛིན་རྣམས༔ གཞན་དོན་འགྲོ་འདུལ་ཐབས་ཆེན་པོ༔ འདི་ཉིད་ཁོ་ན་བརྩོན་པར་བྱ༔ ཞེས་དང༌། དེ་ལྟར་བྱས་པར་གྱུར་པ་ན༔ དམག་བཟློག་ནད་རིམས་ཡོད་ན་ཆད༔ དམོད་ངན་ཐུབ་ཅིང་ཟོར་ཁ་བཟློག༔ སད་སེར་ལོ་དགྲ་འབྱུང་མི་འགྱུར༔ ལེགས་པའི་ཡོན་ཏན་བརྗོད་ལས་འདས༔ ས་སྐོ་ས་འབྱེད་བདེ་བར་འགྱུར༔ ཡུལ་མཁར་འཛིན་ན་བཀྲ་ཤིས་བརྟན༔ གཡུལ་འཐབ་པ་ན་རྒྱལ་བར་འགྱུར༔ བན་སྔགས་མཐུ་བྱད་ནུས་པ་ཆེ༔ སྲི་དང་ཤི་ཁ་ཆོད་པར་འགྱུར༔ ལོ་ལེགས་འབྲུ་ཕྱུགས་སྨིན་པར་འགྱུར༔ དགེ་ལེགས་ཚོགས་འཕེལ་བདེ་སྐྱིད་འབྱུང༔ ཞེས་གསུངས་སོ། །པདྨའི་ཕྲིན་ལས་ཉིན་མོར་བྱེད་པའི་མཐུ། །ལེགས་བྱས་ཁྱུང་སྔོན་སྐྱེས་འདི་དྲངས་བས་ཀྱང༌། །དགེ་ལེགས་ཕན་བདེའི་པདྨོ་རབ་བཞད་པས། །བསྟན་འགྲོ་ལེགས་ཚོགས་སྦྲང་རྩིའི་ཕྱུག་གྱུར་ཅིག །ཅེས་པའང་ལྕགས་སྤྲེལ་སྤྲེལ་ཟླའི་༦ཚེས་བཅུར་བོད་ཡུལ་བཀྲ་ཤིས་འབྱུང་བའི་གནས་མཆོག་སྤ་གྲོ་སྟག་ཚང་སེངྒེ་བསམ་འགྲུབ་ནས་ལས་སྦྱོར་འདི་བརྩམས་པའི་ཚེ་རྙིང་སྔགས་རྒས་པོ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་ཀུན་གཟིགས་མཁྱེན་བརྩེ་རིན་པོ་ཆེའི་གསུང་རི་ཁྲུས་སོགས་བསྣན་ཏེ་ཟིན་རིས་སུ་བཏབ་པ་གངས་ཅན་བདེ་སྐྱིད་དཔལ་ཡོན་རྒྱས་བརྟན་གྱི་རྟེན་འབྱུང་དུ་སྨོན་པ་བཞིན་འགྲུབ་པར་གྱུར་ཅིག །སརྦ་མངྒ་ལཾ། དགེའོ།། །།

[edit]

@#/___/bla ma'i thugs sgrub bar chad kun sel las/_rig 'dzin khyad par 'phags pa'i las tshogs lha srin dam bsgrags rdo rje'i ri dbang gi zur rgyan ngo mtshar rdo rje'i 'phrul mig ces bya ba bzhugs// mkha' khyab thugs rje'i sprin chen las/_/tshar gcod rjes 'dzin phrin las char/_/bstan 'gro'i snying gi dpyid smin pa'i/_/gu ru khyad 'phags rig 'dzin rgyal/_/sngon byon ston pa'i rnam par thar/_/rjes 'jug grub pas nyams blangs nas/_/snyigs dus phan bde'i gsos 'gyur phyir/_/zab gter man ngag spros te 'chad/_/de yang gter ston grub thob ye shes kyi rgyal po rig 'dzin rtsal 'chang yab sras kyi zab gter gcig dril bla ma'i thugs sgrub bar chad kun sel gyi gu ru khyad par 'phags pa'i las mtha' bka' nan rab brjid kyi cho ga rgyas par bya ba'i tshul la/_byed pa po'i gang zag byang gling dpal gyi rgyal mtshan gyi gter byon bka' nan rab brjid las/_o rgyan brgyud 'dzin rnal 'byor pas:_zhes pa ltar/_gu ru'i lung gis bsngags pa'i rgyal tshab dang*/_de'i gdung rigs nus ldan dang*/_rtsa ba gsum gyi bsnyen sgrub las su rung zhing bskyed rdzogs kyi gding dang ldan pas/_bya ba'i dgos pa/_ma 'ongs snyigs ma lnga spyod dus:_nyon mongs dug lnga'i rang skyon gyis:_nad mtshon mu ges rang srog 'dor:_bod khams sdug bsngal spyod pa'i tshe:_dmag dpung gdug pas 'tshe ba'am:_sad ser lo dgra 'byung 'gyur ro:_nad bdag nges med rims 'bebs shing:_nad ngan gdug pas nyes gyur na:_yul khams grong ngam grong brdal rgyu:_srung bzlog zhi bar bya 'dod na:_dus ni/_yul gsar 'dzin nam las sgo 'byed:_mkhar brtsegs klu 'dul sri'u gso:_bya ba gang dang gang byed kyang:_zhes dang*/_dus dang gza' skar shis pa'i tshe:_zhes pa ltar/_de dag gi skabs su zab gter gyi sgo 'byed pa dang*/_gnas chen byin 'bebs kyi skabs su/_sprel lo sprel zla'i yar mar gyi tshes bcu sogs dus tshes gza' skar sbyor byed shis pa'i nyin las rim la 'jug pa ste/_tshul 'di lta bu'i cho ga tshad ldan ni khe nyen che ba'i las yin pas na thog mar sna sel du 'bum sde lnga/_srog bslu/_nye'u 'don pa/_sgrol ma maN+Dal bzhi chog_/sAts+tsha gdab pa/_phud rabs rgyas pa/_bshags rgyud dang dong sprugs kyi cho ga rtsa gsum tshogs skong sogs rgyas par bsgrub/_bye brag tu dmag bzlog la ma gshin phur gsum gyi mdos bzlog_/gdugs dkar/_gtsug tor rnam rgyal/_stobs po che/_gzungs grwa lnga/_phyir bzlog_/sdong rgyan sogs mdo gzungs sgrog_/sad ser lo nyes srung ba gter bum sgrub pa/_klu mchod dang klu gtor/_nor rgyun ma'i gzungs mdo sgrog_/nor lha dang zhing lha mchod/_g.yang sgrub dang dzaM gtor btang*/_nad yams srung bzlog la/_gtsug tor nag mo dang ma mo'i mdos/_brtan ma'i mdos chen/_brgya bzhi/_kha 'bar dkar nag khra gsum/_dkar dmar gyi gsur/_dam sri dang*/_shi 'dre'i glud bsngo/_lo gyon ma'i gzungs sgrub rnams legs par bsgrub/_dam bsgrags kyi gnas ni/_sbas pa'i gnas dang ri yi rtse:_pho brang mkhar gyi yang thog sogs:_sa phyogs thams cad mthong ba dang:_gnyan zhing bkra shis gnas mchog tu:_zhes gsungs pa ltar 'gal rkyen bral zhing mthun rkyen rnams tshogs par byas la/_ji ltar bya ba'i las rim ni bla ma'i thugs sgrub bar chad kun sel lam/_yid bzhin nor bu lta bu'i gu ru'i bla sgrub gang rung la bsten pa'i bskyed bzlas tshogs skong zhag bdun/_gsum sogs ji ltar rigs pas gzhung bsrangs te/_de dag gi skabs su bye brag khyad 'phags rig 'dzin gyi bskyed bzlas yang yang bya zhing gzhung gsal rtsa ba'i bsnyen dmigs dang*/_khyad par rang 'dra'i ye shes sku gnyis pa:_dpag med nyi zer rdul ltar sogs kyi dmigs bzlas dang*/_res 'ga' kun la snying rje dang:_res 'ga' stong nyid phyag rgyas gdab:_ces pa rnams gnad du bsnun ta rtags thon par bya/_yang glo bur du dgos pa byung ba khyad 'phags rig 'dzin la phrin las snying po'i chings dang sbyar te btang kyang mi rung ba med/_dam bsgrags dngos la rgyas pa nyin gsum du byas na legs pa'i dang po las gzhung gang yin bsrangs rjes/_khrus chog zla ba'i bdud rtsi'i bum sgrub ltar khrus bum legs par bsgrubs/_gal che na gzungs sngags rnams dge slong bzhi sde sogs kyis grangs bsags/_sku gsung thugs rten byin can la mchog khrus gsol nas khrus bum tu blugs/_bsang brngan 'dod dgu'i rgya mtsho rgyas par btang ste mgron spyan 'dren mchod bstod bar btang rjes/_bla gab med pa ri klung dang yul lha kun mthong ba'i sar phyin la/_dang po nyes tshogs bkru pa ni/_rang gi snying ga nas 'od zer 'phros pas ljongs kyi dkyil 'khor chen po 'dir mnga' bsgyur ba'i yul lha gzhi bdag gnas bdag gnyug mar gnas pa'i dkar phyogs kyi zo dor chen po/_rgya bal 'bras 'brug sogs kyi skabs thob dmigs bsal kha bsgyur/_bod khams skyongs ba'i brtan ma bcu gnyis/_ya ma bcu gnyis/_skyong ma bcu gnyis/_dge bsnyen nyer gcig_/gangs can nyer gcig_/brag phug brgyad/_phyogs bzhi'i brag ri/_mtsho chen bzhi/_lung lnga/_ljongs gsum/_'bros yul bzhi la sogs pa mnga' ris skor gsum/_dbus gtsang ru bzhi/_gnyan chen sde bzhi/_sgang drug gzhi bdag bcu gnyis/_chu bzhi'i dge bsnyen bzhi sogs mdo khams chu bzhi sgang drug gi gzhi gnas/_gter bdag mched dang rigs sras btsun mo 'khor dang yang 'khor bcas pa thams cad dang*/_gzhan yang 'dzam gling tha gru kho ra khor yug gi sa chu rdo shing gnyan pa la gnas pa rnams dang*/_khyad par phog thug 'khon grib sogs kyi nyes pas phog pa thams cad dag byed khrus kyi cho ga'i mgron 'dir skad cig thang gcig yud tsam la 'dus shing khrus kyi bya ba la dgyes shing gus pas 'khod par gyur cig_/sarba b+hU mi pa ti lo ka pa la a kar+Sha ya dzaH_hU~M/_nga ni pad+ma thod phreng rtsal/_/sogs bka' nan rab brjid ltar sbyar/_byang gling dpal gyi rgyal mtshan gyi bka' nan rab brjid sbyar na/_hU~M hU~M hU~M/_rje btsun nga ni kun tu bzang sogs sbyar/_de nas de bzhin gshegs pa sras dang bcas pa sogs khrus chog zla ba'i bdud rtsi ltar bya/_skabs 'dir zhi ba/_phyed ma/_drag po'i sbyang ba rnams zla ba'i bdud rtsi ltar bya/_gzhi bdag gnas bdag yul bdag grong bdag gnyug mar gnas pa thams cad kyi/_tshe thog ma med pa nas bsags pa'i nyon mongs zhe sdang las gyur pa'i brtan g.yo'i rten 'brel sogs sbyar/_byab pa'i slad du rma bya'i mdangs kyi dbus su hU~M yig gi mthar sngags phreng gis bskor ba rdo rje dang bcas pas byab par bsam la/_dar dkar rma bya'i mdongs kyis byabs te/_hU~MH_dkon mchog gsum gyi bden pa dang:_sogs zla ba'i bdud rtsi ltar la/_'dod gsol/_yul lha rnams kyis tshe thog ma med pa nas bsags pa'i nyon mongs dug lnga las gyur pa'i brtan g.yo'i rten 'brel sogs pa'i rgud pa thams cad a pa na ya swA hA/_srung ba'i slad du/_de dag gi sgo gsum phyin chad bar chad gang gis mi tshugs pa'i phyir slob dpon gyi phyag mtshan rdo rje las rdo rje grangs med pa 'phros sogs zla ba'i bdud rtsi ltar/_hU~M:_ma skyes 'jigs pa sogs brjod bzhin rdo rje dang bcas pas phyogs kun tu rgya gram du bzhag ste/_yul rgud pa thams cad kyi mi tshugs pa rak+Sha rak+Sha swA hA/_de nas dge legs shis pa'i slad du sangs rgyas byang sems dpag tu med pas slob dpon dang lhan cig shis pa brjod pa dang chabs cig lha yi me tog sil ma char du bsnyil ba'i mos pa mdzod/_gang la ser sna sogs rol mo bcas bya/_bsang brngan 'dod dgu'i rgya mtsho'i bsang rabs/_kyai/_dang po bsang byung sogs gzhung bsrangs/_chos sbyin gyi dbur/_slar yang bde gshegs kun gyi bgrod pa gcig pa'i lam skyabs sems kyi sdom pa 'dzin snyam pas dmigs pa 'di bzhin mdzod/_khyed rang rnams kyi mdun gyi nam mkhar seng ges btegs pa'i pad+ma dang zla ba'i steng du bcom ldan 'das shAkya thub par phyogs bcu'i sangs rgyas thams cad kyis bskor bar dmigs pa sangs rgyas dkon mchog_/theg chen gyi dam chos glegs bam brag ri brtsegs pa ltar bzhugs pa chos dkon mchog_/theg pa chen po'i byang sems bsam gyis mi khyab pas bskor ba dge 'dun dkon mchog ste/_de rnams la 'di nas byang chub ma thob par skyabs su 'gro snyam pas 'di'i rjes zlos mdzod/_phyogs bcu na bzhugs pa'i sangs rgyas dang byang chub sems dpa' thams cad bdag la dgongs su gsol/_bdag cag gzhi bdag gnas bdag gi rigs su gtogs pa thams cad dus 'di nas bzung ste/_byang chub snying por=_lan gsum brjod pas de rnams kyi rgyud la skyabs 'gro'i sdom pa skyes par bsam/_slar yang bla na med pa'i byang chub mchog tu sems bskyed snyam pas 'di'i rjes zlos mdzod/_phyogs bcu na bzhugs pa sogs nas/_dus 'di nas bzung ste byang chub snying po la mchis kyi bar du/_ji ltar sngon gyi bde gshegs sogs lan gsum brjod pas byang sems kyi sdom pa thob byung snyam du mos mdzod/_de nas rang dga' ba bsgom pa dang*/_gzhan dga' ba bsgom tu 'jug pa dang*/_smon lam gdab pa rnams kyang bya/_bsod nams 'di yis=_lha yang dus su=_'jig rten bde zhing sogs smon lam gang shes gdab bo/_/de yang*/_dbu ma lugs kyi sems bskyed 'di/_/sems can kun gyi legs thob na/_/rdzogs pa'i sangs rgyas rgyur 'gyur zhes/_/mdo dang bstan bcos rnams las gsungs/_/zhes so/_/bsang brngan gzhung gi chos sbyin/_aH_skye med dbyings su lhun grub gsal sogs brjod pas mthar dbyung la/_las gzhung gang la bsten pa'i bka' gter srung ma'i gtor chog dang*/_tshogs bskang sogs las mjug bsdu'o/_/nyin gnyis pa la rtsa gsum las gzhung bsrangs te/_gal che gser skyems tsam byas la/_slob dpon 'khor 'das yongs kyi rje btsan ma hA gu ru khyad par 'phags pa'i skus srid gsum khyab pa khams gsum zil gyis gnon pa/_gsung gi drag sngags ldir bas dregs pa'i srog snying 'dren pa/_thugs mi g.yo mkha' khyab kyi dgongs rtsal rdzogs pas dregs byed ar la gtod pa/_zhi khro sprul pa'i 'khor lo nyi zer la rdul 'khrigs pa lta bu'i 'phro 'du glog ltar 'byed pa'i thugs srog las 'od zer lcags kyu dang*/_las byed las bzhi'i ging chen gyi tshogs phyogs bcur rdo rje'i ser drag 'bebs pa bzhin 'phros pas srid pa gsum gyi sde brgyad 'byung po mthu chen pho mo rnams rang dbang med par phyag rgya bzhis btab te bkug par bsam la/_rnga rol dbyangs dang bcas ste/_hU~M:_nga ni pad+ma thod phreng rtsal sogs dang*/_zhi drag phyed ma'i sbyong ba ri khrus/_bsang bsdus rnams snga nyin ltar bya/_sde brgyad khengs mdos 'jam mgon gsung ltar mdos byin rlabs spyan 'dren yan chad grub pa dang*/_rang nyid khyad par 'phags pa'i rig 'dzin gyi lha srin thams cad dgongs pas gzir nas thams cad dpa' bkong nga rgyal chags/_rgol ba'i nus stobs zad/_mthu dang rdzu 'phrul gzi brjid nyams te 'dar zhing 'dud par bsam la/_hU~M hU~M:_nga ni sangs rgyas kun gyi sogs nas/_'bangs su gyur:_bar che ba brjod/_dam bzhag dngos ni/_nang mchod rdo rje'i rtse'i 'thor te/_byang gling gi_/hU~M/_o rgyan pad+ma rgyal po sogs dang*/_hU~M/_nga ni pad+ma 'byung gnas yin sogs/_sa ma ya la rtsen par mdzod:_bar sbyar mthar/_dam tshig gi dpang po rdo rje'i mna' chu byin par mos la/_hU~M:_sngon gyi bskal ba'i dang po nas sogs mthar/_sngags mthar/_sa ma ya sma ra:_sa ma ya ma ti kra ma:_sa ma ya rak+Shan+tu:_brjod la/_hU~M:_bla ma yi dam dkon mchog gsum sogs sde brgyad mdos dang*/_bka' nyan rab brjid gzhung gi_/oM AHhU~M/_snang srid gzhir bzhengs sogs grangs bsags mthar/_glud bcas bsngos mthar dregs pa thams cad mnga' 'bangs su tshud pa la mdos gtor 'dod yon gyis brngan pas dga' mgu yi rang dam tshig gi rdo rje spyi bor bzhag cing tha tshig bsgrags te phrin las bcol bas dga' ba'i 'dzum mdangs bcas phrin las thog med du sgrub par khas blang bar bsam la/_mdos la khrag chang bdud rtsi'i bran/_gser skyems sbreng zhing*/_slob dpon gyis rdo rje gdeng zhing rig rtsal sbar la/_hU~M b+h+yoH_nyon cig snang srid sogs/_rdo rje'i tha tshig bro bor gyur:_mthar rdzong 'debs dang bcas/_sde brgyad khengs mdos kyi/_kyai:_da ni snang srid dregs pa sogs gshegs gsol bcas mdos ri rtser bskyal/_sku glud gnod pa'i phyogs su btang*/_las gzhung gi gtor bsngo dang tshogs skong sogs 'jug bsdu'o/__/nyin gsum pa la snga dro las gzhung gang yin rgyas par btang*/_phyi dro gro lod kyi las byang mchod pa byin brlab nas brtsams mdun rten bzlog dkyil la dmigs pa'i bskyed bzlas stong tshig mchod bstod dang*/_bka' nan rab brjid kyi/_hU~M:_nga ni pad+ma thod phreng sogs dang*/_zhi drag phyed ma'i sbyang pa/_brtan g.yo'i khrus/_bsang bsdus mthar/_hU~M hU~M:_nga ni sangs rgyas kun sogs mthar dpal gtor sde brgyad kyi bshos bus bskor ba la brten pa'i mdos gtor bsngo/_dam bsgrags bcas bka' nyan rab brjid dkyus ltar dam bsgrags/_hU~M:_nyon cig snang srid bar btang nas tshogs dang gsol ka gro lod bzlog pa'i las gzhung bsrang la/_'gugs pa'i bden brjod skabs/_bstan dang 'gro ba'i spyi dgra/_khyad par du rdo rje'i tha tshig bka' nan phog pa'i bka' la mi nyan/_dam la mi sdod slar la 'khu zhing gshe ba'i smon lam log pa'i dam sri 'byung po gsar skyes kyi tshogs dang bcas pa thams cad srid pa gsum gyi khongs sogs sbyar/_lha srin zil gnon sngags/_sarba duSh+TaM e ya ma ya ma ma hA de wa a du tra mun mu thun mu thuM:_shu la dzaH_rA tsa tsaH_g+hr-i ba tsa dzaH_rak+Sha raH_badz+ra sa d+hU triH_haM shaM triH_sa nA ga phu:_hur thuM dzaH_zhes pas gzir/_phur gdab kyi mgor/_hU~M/_che mchog pad+ma thod phreng rtsal sogs sngags bcas dang*/_hU~M/_bdag nyid rig 'dzin dpal chen po sogs mthar/_zhal bstab kyi sngags mthar _aHyaHmaHduHru tsaHshaHnaH_sa pa ri wA ra sarba duSh+Tan big+h+nAn sha trUn mA ra ya kha kha khA hi khA hi:_sarba duSh+Tan ha na ha na da ha da ha pa tsa pa tsa ma ra ya hU~M phaTa?:_ces sbyar/_shin tu rtsub na sde brgyad so so'i sngags bcun pa dang shi sa bstan pa sogs bya bar gsungs kyang zhal las shes par bya dgos so/__/tshogs la rol zhing lhag ma sogs gtor bzlog dkyus ltar bya/_sde brgyad gnad la chun pa'i rtags byung na slar khrus dang*/_bsang dang gtor ma sogs kyis brngan 'bul ba dang*/_sde brgyad kyi gtor ma gro lod kyi gtor zor nang du 'bul ba dang*/_rten 'brel gyi dga' ston mtha' rgyas su byas pa'i dgos pa ni/_zhi bas brngan dang drag pos gzir:_shin tu drag pos tshar gcod pa'i:_man ngag khyad par 'phags pa'i mchog:_rdo rje'i bka' nan cho ga 'di:_nus ldan gang gis brtsams pa na:_bod khams spyi dang bye brag la:_phan pa'i rten 'brel bla na med:_nad yams 'khrugs rtsod thams cad zhi:_char chu lo phyugs dpal g.yang rgyas:_bsam pa 'grub cing 'dod dgu 'du:_nag phyogs 'byung pa tshar gcod cing:_sangs rgyas bstan pa yun du gnas:_de phyir snying rje dam tshig can:_pad+ma bdag gi brgyud 'dzin rnams:_gzhan don 'gro 'dul thabs chen po:_'di nyid kho na brtson par bya:_zhes dang*/_de ltar byas par gyur pa na:_dmag bzlog nad rims yod na chad:_dmod ngan thub cing zor kha bzlog:_sad ser lo dgra 'byung mi 'gyur:_legs pa'i yon tan brjod las 'das:_sa sko sa 'byed bde bar 'gyur:_yul mkhar 'dzin na bkra shis brtan:_g.yul 'thab pa na rgyal bar 'gyur:_ban sngags mthu byad nus pa che:_sri dang shi kha chod par 'gyur:_lo legs 'bru phyugs smin par 'gyur:_dge legs tshogs 'phel bde skyid 'byung:_zhes gsungs so/__/pad+ma'i phrin las nyin mor byed pa'i mthu/_/legs byas khyung sngon skyes 'di drangs bas kyang*/_/dge legs phan bde'i pad+mo rab bzhad pas/_/bstan 'gro legs tshogs sbrang rtsi'i phyug gyur cig_/ces pa'ang lcags sprel sprel zla'i 6tshes bcur bod yul bkra shis 'byung ba'i gnas mchog spa gro stag tshang seng+ge bsam 'grub nas las sbyor 'di brtsams pa'i tshe rnying sngags rgas po 'gyur med theg mchog bstan pa'i rgyal mtshan gyis kun gzigs mkhyen brtse rin po che'i gsung ri khrus sogs bsnan te zin ris su btab pa gangs can bde skyid dpal yon rgyas brtan gyi rten 'byung du smon pa bzhin 'grub par gyur cig_/sarba mang+ga laM/_dge'o//__//