JKW-KABAB-03-GA-006: Difference between revisions
From Khyentse Lineage - A Tsadra Foundation Project
WikiBot2015 (talk | contribs) (Created page with "{{Khyentse Metadata |classification=Tibetan Publications |subclass=Tibetan Texts |collectiontitle=mkhyen brtse'i bka' babs |collectiontitletib=མཁྱེན་བརྩེ...") |
m (Text replacement - "Khyentse Metadata" to "Text") |
||
(10 intermediate revisions by one other user not shown) | |||
Line 1: | Line 1: | ||
{{ | {{Text | ||
|classification=Tibetan Publications | |classification=Tibetan Publications | ||
|subclass=Tibetan Texts | |subclass=Tibetan Texts | ||
|fulltitletib=བླ་མའི་ཐུགས་སྒྲུབ་ཡིད་བཞིན་ནོར་བུ་ལས། ལོ་རྒྱུས་ཤེལ་གྱི་ཕྲེང་བ། | |||
|fulltitle=bla ma'i thugs sgrub yid bzhin nor bu las lo rgyus shel gyi phreng ba | |||
|citation=[['jam dbyangs mkhyen brtse'i dbang po]]. ''bla ma'i thugs sgrub yid bzhin nor bu las lo rgyus shel gyi phreng ba''. In ''Rdzong sar 'jam dbyangs mkhyen brtse'i dbang po'i bka' babs'', Vol. 3: 91-122. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013. | |||
|collectiontitle=mkhyen brtse'i bka' babs | |collectiontitle=mkhyen brtse'i bka' babs | ||
|collectiontitletib=མཁྱེན་བརྩེའི་བཀའ་བབས་ | |collectiontitletib=མཁྱེན་བརྩེའི་བཀའ་བབས་ | ||
| | |author='jam dbyangs mkhyen brtse'i dbang po | ||
|sourcerevealer=mchog gyur gling pa | |||
| | |authortib=འཇམ་དབྱངས་མཁྱེན་བརྩེའི་དབང་པོ་ | ||
| | |sourcerevealertib=མཆོག་གྱུར་གླིང་པ་ | ||
| | |tibgenre=History Texts - lo rgyus, Revelations - gter ma | ||
|tibgenre=Revelations - gter ma | |||
|terma=Yes | |terma=Yes | ||
|transmissiontype=sa gter - Earth Treasure | |||
|cycle=bla ma'i thugs sgrub yid bzhin nor bu | |||
|cycletib=བླ་མའི་ཐུགས་སྒྲུབ་ཡིད་བཞིན་ནོར་བུ་ | |||
|language=Tibetan | |language=Tibetan | ||
| | |volumenumber=003 | ||
| | |volnumtib=༣ | ||
|volyigtib=ག་ | |||
|totalvolumes=22 | |||
|textnuminvol=006 | |textnuminvol=006 | ||
|pagenumbers=91-122 | |||
|totalpages=32 | |||
|beginfolioline=1a | |||
|endfolioline=16b5 | |||
|totalfolios=16 | |||
|multivolumework=No | |||
|versonotes=mkhyen brtse'i bka' babs | |||
|colophontib=* '''Author colophon:''' སྤྲུལ་པའི་གཏེར་ཆེན་མཆོག་གྱུར་བདེ་ཆེན་གླིང་པས་རྩི་རྐེ་རིན་ཆེན་འབར་བའི་བྲག་གི་མགུལ་ནས་སྤྱན་དྲངས་པའི་མཐོང་གྲོལ་བདུད་རྩི་ལྔ་ཤོག་ལས༔ ས་ཕོ་རྟའི་ལོའི་མགོ་ཟླ་བའི་དཀར་ཕྱོགས་ཀྱི་རྒྱལ་བ་གསུམ་པར་གཏན་ལ་ཕབ་རིམ་བཞིན་དུ་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག །* '''Printer colophon:''' ཅེས་པའང་མཆོག་གླིང་གདན་ས་རྩི་རྐེ་ནོར་བུ་གླིང་གི་ཆོས་གྲྭར་སྤར་དུ་བཀྲུན་པ་དགེ་ལེགས་འཕེལ།། དགེའོ།། | |||
|colophonwylie=* '''Author colophon:'''sprul pa'i gter chen mchog gyur bde chen gling pas rtsi rke rin chen 'bar ba'i brag gi mgul nas spyan drangs pa'i mthong grol bdud rtsi lnga shog las:_sa pho rta'i lo'i mgo zla ba'i dkar phyogs kyi rgyal ba gsum par gtan la phab rim bzhin du mtsho skyes bla ma dgyes pa'i 'bangs mkhyen brtse'i dbang pos bris pa dge legs su gyur cig | |||
* '''Printer colophon:''' ces pa'ang mchog gling gdan sa rtsi rke nor bu gling gi chos grwar spar du bkrun pa dge legs 'phel//__dge'o// | |||
|pdflink=File:JKW-KABAB-03-GA-006.pdf | |pdflink=File:JKW-KABAB-03-GA-006.pdf | ||
}} | }} | ||
Line 21: | Line 37: | ||
<h1 style="font-size: 24px !important;">Tibetan Text</h1> | <h1 style="font-size: 24px !important;">Tibetan Text</h1> | ||
<onlyinclude> | <onlyinclude> | ||
{{TibP|༁ྃ༔ ༔བླ་མའི་ཐུགས་སྒྲུབ་ཡིད་བཞིན་ནོར་བུ་ལས༔ ལོ་རྒྱུས་ཤེལ་གྱི་ཕྲེང་བ་བཞུགས་སོ༔ ༁ྃ༔ ༔་་་་་་་་་༡༢༣༤༥༥༦༦༧་་་་་་་་༔ མ་བཅོས་སྤྲོས་མེད་ཀུན་བཟང་པདྨ་འབྱུང་༔ བདེ་ཆེན་རིགས་ལྔ་སྒྱུ་འཕྲུལ་དྲ་བའི་བདག༔ གང་འདུལ་སྤྲུལ་པའི་རིག་འཛིན་རྩལ་འཆང་རྗེ༔ རྩ་གསུམ་རྒྱ་མཚོའི་སྤྱི་དཔལ་ཆེན་པོར་འདུད༔ དེ་ལ་སངས་རྒྱས་རྣམས་ཀྱི་ཐུགས་རྗེ་ཚད་མེད་པས་སེམས་ཅན་གྱི་ཁམས་ཡལ་བར་མི་འདོར་བའི་ཕྱིར༔ གདུལ་བྱ་རྣམས་དང་སྐལ་བ་མཚམས་པར་མཛད་པ་བཅུ་གཉིས་བསྟན་པ་མཆོག་གི་སྤྲུལ་པའི་སྐུ་དང་༔ དེ་དང་ཚུལ་མཐུན་པ་མཁས་པ་དང་༔ གྲུབ་པ་དང་༔ རིག་པ་འཛིན་པ་དང་༔ དཔའ་བོ་དང་༔ རྣལ་འབྱོར་མ་དང་༔ མིའི་བདག་པོ་ལ་སོགས་པའི་རྣམ་པར་བསྟན་ནས་གནས་སྐབས་དང་མཐར་ཐུག་གི་འབྲས་བུ་ལ་སྦྱོར་བར་མཛད་པ་ལས༔ བྱེ་བྲག་མི་མཇེད་འཇིག་རྟེན་གྱི་ཁམས་ལྷོ་ཕྱོགས་འཛམ་བུའི་གླིང་འདིར་སངས་རྒྱས་ཤཱཀྱ་ཐུབ་པར་བསྟན་ནས་མངོན་པར་བྱང་ཆུབ་པའི་ཡེ་ཤེས་བརྙེས་ཏེ༔ ཆོས་ཀྱི་འཁོར་ལོ་རིམ་པ་གསུམ་དང་༔ རྡོ་རྗེའི་སྔགས་རྒྱུད་ནམ་མཁའི་མཐའ་ཀླས་པས་སྐལ་བ་དང་ལྡན་པ་རྣམས་ཡོངས་སུ་སྨིན་པར་མཛད་དེ༔ རྟག་པར་ཞེན་པ་རྣམས་ལྡོག་པའི་ཕྱིར་ཡོངས་སུ་མྱ་ངན་ལས་འདས་པའི་ཚུལ་བསྟན༔ ཆད་ལྟ་སུན་འབྱིན་པའི་ཕྱིར་སླར་ཡང་དྷ་ན་ཀོ་ཥ་ཀླུའི་ཕོ་བྲང་དུ་སངས་རྒྱས་གཉིས་པ་མཚོ་སྐྱེས་རྡོ་རྗེའི་སྐུར་བཞེངས་ཏེ༔ ཨོ་རྒྱན་དང་༔ རྒྱ་གར་དང་༔ ཟ་ཧོར་དང་༔ ཁ་ཆེ་དང་༔ སིངྒ་ལའི་གླིང་སོགས་གླིང་ཆེན་དང་གླིང་ཕྲན་དུ་མར་གཤེགས་ཏེ༔ ལྷ་དང་༔ མི་དང་༔ ལྷ་མ་ཡིན་དང་༔ གནོད་སྦྱིན་དང་༔ འབྱུང་པོའི་ཚོགས་དཔག་ཏུ་མེད་པའི་དོན་མཛད་པའི་ཚུལ་ནི་མཐའ་ཡས་ཤིང་བརྗོད་པའི་ཡུལ་ལས་འདས་པ་ཡིན་ལ༔ ཁྱད་པར་སྔོན་གྱི་ཐུགས་བསྐྱེད་རྨད་དུ་བྱུང་བས༔ གདོང་དམར་བོད་ཀྱི་ཡུལ་འདིར་ཆོས་སྐྱོང་བའི་རྒྱལ་པོ་ཡབ་གཅིག་ཁྲི་སྲོང་ལྡེའུ་བཙན་གྱིས་སྤྱན་དྲངས་པ་ལྟར་གཤེགས་ཏེ༔ ལྷ་སྲིན་རྣམས་བཏུལ༔ གཙུག་ལག་ཁང་མང་དུ་བཞེངས་དམ་པའི་ཆོས་ཀྱྀ་སྒྲོན་མེ་ཆེན་པོ་སྦར༔ ཟབ་ཅིང་ཆེས་དཀོན་པའི་གདམས་པ་འབུམ་ཕྲག་མང་པོ་སྐད་ཅིག་རེས་བསྟན་ཏེ༔ རེ་ཞིག་དེ་ཙམ་གྱིས་སྐུ་དངོས་ཀྱི་གདུལ་བྱ་རྫོགས་པར་དགོངས་ནས༔ ཆོས་དང་ནོར་གྱི་གཏེར་ཁ་དུ་མ་བྱིན་གྱིས་བརླབས་པའི་གནས་རྣམས་སུ་སྦས་ཏེ༔ མ་འོངས་པ་ན་ལས་དང་སྐལ་བར་ལྡན་པ་རྣམས་ཀྱིས་སྤྱོད་པའི་སྨོན་ལམ་དང་བཅས་གཏེར་བདག་སྲུང་མ་རྣམས་ལ་རྡོ་རྗེའི་བཀའ་ནན་གྱིས་གཉེར་དུ་གཏད་པར་མཛད་དོ༔ ས་མ་ཡ༔ རྒྱ་རྒྱ༔ དེ་ལྟ་བུའི་རྫོགས་པའི་སངས་རྒྱས་གུ་རུ་རིན་པོ་ཆེ་ཡིད་བཞིན་ནོར་བུ་དེ་ཉིད་ལྷོ་ནུབ་སྲིན་པོ་འདུལ་བ་ལ་དགོངས་པ་མངོན་དུ་གཏད་ནས་གཤེགས་པའི་ཚེ༔ བྲག་དམར་འོམ་བུས་གཏིབས་པའི་ཚལ་ནས༔ མང་ཡུལ་གུང་ཐང་ལ་ཐོག་གི་བར་མངའ་བདག་རྗེས་འབྲངས་རྣམས་ཀྱི་སྐུ་རྗེས་བསྙེགས་ཏེ་ཕྱག་བསྐྱེལ་ལ་བྱོན་པའི་སྐབས་སུ༔ དཔལ་ལྷའི་སྲས་པོ་ཐ་ཆུང་མུ་ཁྲི་བཙན་པོས་གུ་རུའི་ན་བཟའི་སྣེ་མོ་ལ་འཇུས་ཏེ༔ ཤུགས་རིང་དང་སྤྱན་ཆབ་འབྱིན་ཞིང་གདུང་བའི་སྨྲེ་སྔགས་མང་དུ་བཏོན༔ ཁྱད་པར་ཞལ་ཚབ་ཀྱི་གདམས་པ་ཟབ་མོ་མཐར་ཐུག་པ་ཞིག་གནང་དུ་གསོལ་བར་ཞུས་པ་ནི༔ ཀྱེ་མ་གུ་རུ་རིན་པོ་ཆེ༔ བསྟན་པའི་ཉི་མ་པད་འབྱུང་ཁྱེད༔ བོད་དུ་མི་བཞུགས་བཞུད་པའི་ཚེ༔ བདག་ཅག་རྗེས་འབྲངས་སྙིང་མ་དགའ༔ དཔྲལ་བའི་མིག་དང་ཁོག་པའི་སྙིང་༔ ད་ལྟར་ས་ལ་བྱུང་སྙམས་བགྱིད༔ ཇི་ལྟར་བསྲན་ཀྱང་མ་ཚུགས་ཏེ༔ སྨྲེ་སྔགས་གདུང་བས་གསོལ་བཏབ་ཀྱང་༔ ཐུགས་རྗེས་མི་འཛིན་ཇི་ལྟ་བུ༔ ངེས་པར་སྲིན་པོ་འདུལ་གཤེགས་ན༔ ཞལ་ཆེམས་མན་ངག་བཅུ་གསུམ་པོ༔ ཐུན་མོང་ཙམ་ཞིག་བསྟན་ནའང་༔ ད་དུང་བདག་ཅག་བློ་མ་ཚིམ༔ གུ་རུ་བོད་ཡུལ་མི་བཞུགས་ཀྱང་༔ དངོས་དང་ཁྱད་མེད་ཞལ་གྱི་ཚབ༔ བདག་ཅག་བློ་གཏད་གཅིག་ཆོག་ཆོས༔ ཀུན་འདྲིལ་ཟབ་ལ་རྣོ་མྱུར་ཅན༔ སྨིན་གྲོལ་གདམས་པ་ཡོངས་རྫོགས་པའི༔ ཞལ་གདམས་མན་ངག་དང་བཅས་པ༔ ཁྱད་པར་འཕགས་པ་མ་སྩལ་ན༔ ཐུགས་ཀྱི་གཏིང་ནས་བརྩཻ་བ་ཡིས༔ བོད་འབངས་བསྐྱངས་ཞེས་རྫུན་དུ་ཐལ༔ དེ་བས་ཐུགས་ཀྱིས་དམ་དགོངས་ལ༔ མཐོང་ཐོས་དྲན་རེག་ཀུན་གྲོལ་བའི༔ སྙིང་པོའི་གདམས་པ་སྩལ་དུ་གསོལ༔ ཞེས་གསོལ་ཏེ་རྗེས་འབྲངས་འདུས་པ་ཐམས་ཅད་ཀྱིས་གུས་པའི་མིག་གིས་གུ་རུའི་ཞལ་ལ་ཅེ་རེ་བལྟས༔ ལུས་ཀྱི་རྒྱན་དང་གོས་རྣམས་བཀྲོལ་ཏེ་ཕུད་ནས་གུ་རུའི་ཕྱོགས་སུ་གཏོར་ཞིང་སྤུངས༔ མགྲིན་གཅིག་ཏུ་སྨྲེ་ངག་གིས་གསོལ་བ་བཏབ༔ ཕྱག་གྲངས་མེད་པར་བཙལ་བའི་མཐར༔ ལྷ་སྲས་ཉིད་གདུང་བའི་ཤུགས་ཀྱིས་བརྒྱལ་ཞིང་ས་ལ་འགྱེལ་བར་གྱུར་ཏོ༔ དེའི་ཚེ་དེའི་དུས་ན་གུ་རུ་རིན་པོ་ཆེ་ཉིད་ཀྱང་ཐུགས་རྗེའི་འཇུག་པ་ལྷག་པར་གཡོས་ཏེ༔ ལྷ་སྲས་ཀྱི་སྙན་ཁུང་དུ་ལྗགས་ཀྱི་མཆིལ་མ་གཏོར་ཞིང་བརྒྱལ་བ་ལས་བསླངས་ཏེ་ཕྱག་གིས་བྱུགས་ཤིང་དབུགས་དབྱུང་༔ མདུན་དུ་འཁོད་པ་ན་སྐུ་གསུང་ཐུགས་ཀྱི་རྫུ་འཕྲུལ་མཐའ་ཡས་པ་སྤྲོ་བ་དང་༔ བསྡུ་བར་མཛད་དེ༔ ཐུགས་སྒྲུབ་ཐམས་ཅད་ཀྱི་མཐར་ཐུག་པ་གུ་རུ་བདེ་བ་ཆེན་པོའི་སྨིན་གྲོལ་ཆིག་རྫོགས་སུ་སྩལ་ཞིང་༔ ཐུན་མོང་དང་ཐུན་མོང་མ་ཡིན་པའི་མན་ངག་བཅུ་གསུམ༔ ཉོན་མོངས་རང་གྲོལ་གྱི་ཟབ་ལམ་པདྨའི་སྙིང་ཏིག་དང་བཅས་པ་རྣམས་གནང་ངོ་༔ ས་མ་ཡ༔ རྒྱ་རྒྱ༔ ཁྱད་པར་དེའི་ཚེ་དེའི་དུས་ལྷ་སྲས་ལ་བརྩེ་བས་དགོངས་ཏེ་ཞལ་ཆེམས་འདི་སྐད་ཅེས་ཀྱང་བཀའ་སྩལ་ཏོ༔ ཨེ་མ་ཉོན་ཅིག་ཆོས་ཀྱི་འཁོར་ལོས་སྒྱུར༔ བོད་ཀྱི་ལྷ་སྲས་རྗེས་འབྲངས་དད་པ་ཅན༔ བདག་ལ་མོས་ཤིང་རབ་ཏུ་གདུང་བ་ཡིས༔ གསོལ་བཏབ་འབྲས་བུུ་སྙིང་པོ་སྙིང་པོའི་བཅུད༔ གདམས་པའི་མཐར་ཐུག་པདྨའི་ཞལ་ཚབ་འདི༔ སྙིང་དུ་ཆོངས་ལ་ང་ཡི་བཀའ་རྟགས་རྣམས༔ ཚུལ་བཞིན་བཟུང་ནས་ང་ཉིད་དྲན་པར་གྱིས༔ ཆོས་སྐྱོང་རྒྱལ་པོ་ཁྲི་སྲོང་ལྡེའུ་བཙན་གྱིས༔ སྔོན་གྱི་ཐུགས་བསྐྱེད་སྨོན་ལམ་སད་པའི་མཐུས༔ དཀའ་བ་དུ་མས་པཎ་ཆེན་མཆོག་རྣམས་དང་༔ གྲུབ་པ་ཐོབ་པ་མང་དུ་སྤྱན་དྲངས་ཤིང་༔ འབངས་ནས་མཆོད་གནས་ལོ་ཙཱ་སྤྱི་བོར་བཏོན༔ དེ་རྣམས་མཚམས་སྦྱོར་བསྙེན་བཀུར་རྨད་བྱུང་བས༔ བོད་ཀྱི་ཡུལ་དུ་དམ་ཆོས་བསྟན་པ་སྤེལ༔ རྗེས་འཇུག་ཀུན་ལ་བཀའ་དྲིན་ཆེ་བར་མཛད༔ དེ་ཕྱིར་སྙིང་ནས་དྲིན་དྲན་བརྩོན་པ་བསྐྱེད༔ སྐུ་གསུང་ཐུགས་རྟེན་གཙུག་ལག་མཆོད་པ་དང་༔ དམ་པའི་ཆོས་ལ་འཆད་ཉན་སྒོམ་སྒྲུབ་དང་༔ འདུལ་བ་མདོ་སྡེ་མངོན་པའི་དུས་སྟོན་དང་༔ དགེ་འདུན་རྣམས་ལ་བསྙེན་ཅིང་བསྐུར་བ་དང་༔ མཆོད་གནས་སྡེ་གཉིས་དབུ་འཕངས་བསྟོད་པ་དང་༔ འབངས་འཁོར་རིམ་པར་བྱམས་བརྩེས་བསྐྱང་པ་དང་༔ མ་རུངས་པ་རྣམས་ཐབས་ཀྱིས་བཏུལ་བ་དང་༔ ངན་པའི་མཐར་ཐུག་རྩད་ནས་དབྱུང་བ་དང་༔ ཕ་དང་མ་ལ་ལྷ་བཞིན་བསྐུར་བ་དང་༔ བྱམས་པས་འདྲིས་ལ་ཕྱི་ཐག་བསྲིང་བ་སོགས༔ གཙུག་ལག་དམ་པའི་ཆོས་དང་རྗེས་མཐུན་ཞིང་༔ འཇིག་རྟེན་ཡ་རབས་ལུགས་དང་མི་འགལ་བའི༔ ཡབ་མེས་ཕྱག་སྲོལ་མ་བརྗེད་ལྷ་སྲས་རྗེ༔ དེ་ལྟར་ལྷག་པའི་བསམ་པས་བརྩོན་པ་ན༔ ད་དུང་རེ་ཞིག་སྲིད་ཀྱི་མངའ་ཐང་དང་༔ དམ་ཆོས་བསྟན་པ་ཡང་ནས་ཡང་དུ་རྒྱས༔ འགྲོ་མང་ཐར་པའི་ལམ་ལ་འགོད་པར་འགྱུར༔ ནམ་ཞིག་རྒྱལ་པོའི་གདུང་ལ་བདུད་ཀྱི་བུ༔ གླང་གི་མིང་ཅན་སྡིག་སྤྱོད་ཆེན་པོ་འབྱུང་༔ དེ་ཡིས་ཡབ་མེས་ཕྱག་རྗེས་བཟང་པོ་དང་༔ ཁྱད་པར་སངས་རྒྱས་བསྟན་པ་བསྣུབ་འགྱུར་ཀྱང་༔ ཡེ་ཤེས་དབང་པོའི་སྨོན་ལམ་དག་པ་ལས༔ དན་ཏའི་བྲག་ཏུ་གསལ་བའི་མིང་ཅན་འབྱུང་༔ སྐ་བ་དཔལ་བརྩེགས་ཐུགས་རྗེའི་རང་འོད་ཞིག༔ མངའ་རིས་སྟོད་ན་བཟང་པོའི་ལོ་ཙཱར་སྐྱེ༔ དེ་དང་དེ་ཡི་བརྒྱུད་པ་འཛིན་པ་ཡིས༔ མཐའ་ནས་དབུས་སུ་མདོ་སྔགས་བསྟན་པ་ནི༔ ཐོ་རེངས་སྐར་ཆེན་ཤར་བ་བཞིན་དུ་སྣང་༔ ཁྱད་པར་པདྨ་བདག་གྀ་ཐུགས་བསྐྱེད་ལས༔ བསྟན་པའི་བདག་པོ་དམ་པ་ཇོ་བོ་ཞེས༔ ཟ་ཧོར་རིགས་ལས་བསླབ་གསུམ་ལྡན་པ་ཞིག༔ བོད་ཡུལ་དབུས་འདིར་ཉི་མ་བཞིན་དུ་ཤར༔ བསྟན་པ་དྲི་མ་མེད་པའི་སྲོལ་བཙུགས་ཏེ༔ མཐའ་དབུས་ཀུན་ཏུ་རྒྱ་ཆེར་རྒྱས་པར་འགྱུར༔ དེ་ཕྱིར་འཇིག་རྟེན་བདེ་བའི་རྒྱལ་ཁྲིམས་དང་༔ རྒྱལ་ཁྲིམས་སྙིང་པོ་འཛིན་པའི་ཆོས་ཁྲིམས་རྣམས༔ ད་ལྟའི་ཕྱག་སྲོལ་བཟང་པོ་ཇི་ལྟ་བར༔ ཚུལ་བཞིན་མ་ཉམས་སྐྱོངས་ཤིག་ལྷ་ཡི་སྲས༔ མ་འོངས་ཐ་མའི་རྒྱལ་བརྒྱུད་ཀུན་ལའང་༔ ལུགས་གཉིས་སྤྱོད་སྲོལ་དྲི་མ་མེད་པ་དང་༔ ཆོས་བཞིན་སྤྱོད་པའི་བཀའ་ཆེམས་ཡང་ཡང་ཞོག༔ འགའ་ཞིག་སྲས་དང་བློན་པོར་ནན་གྱིས་གདམས༔ འགའ་ཞིག་ཡི་གེར་བྲིས་ལ་གཏེར་དུ་སྦོས༔ ལ་ལ་རྒྱལ་པོའི་མཛོད་ཀྱི་ཕུགས་སུ་བསྟིམས༔ ལ་ལ་སྲ་བའི་རྡོ་རིང་ལོག་སུ་ཐོབ༔ དེ་ལྟར་བཀའ་ཡི་ནན་ཐག་བསྡམས་བྱས་ན༔ སྨོན་ལམ་ལོག་པ་རེ་རེ་ཙམ་མ་གཏོགས༔ ཕལ་ཆེར་ཀུན་གྱིས་ཚད་མར་བཟུང་ནས་ཀྱང་༔ སངས་རྒྱས་བསྟན་པ་མཐའ་ནས་མཐའ་རུ་རྒྱས༔ རྒྱ་གར་ཁ་ཆེ་ཟ་ཧོར་ལི་ཡུལ་སོགས༔ ཡུལ་ཆེན་ཡུལ་ཕྲན་ཕལ་མོ་ཆེ་རྣམས་སུ༔ སངས་རྒྱས་བསྟན་པ་འགྲིབ་པའི་དུས་སུའང་༔ བོད་ཀྱི་ཡུལ་འདིར་བཤད་སྒྲུབ་མ་ཆད་པའི༔ བསྟན་པའི་སྲོག་རྩ་ཡུན་ཏུ་གནས་པར་འགྱུར༔ དེ་ཕྱིར་སྤྲོ་བ་བསྐྱེད་ལ་བརྩོན་པས་སྒྲུབས༔ ཐུགས་ངལ་མ་མཛད་ལྷ་སྲས་བོད་ཀྱི་རྗེ༔ འདི་དང་ཕྱི་མའི་གནས་སྐབས་ཐམས་ཅད་དུ༔ རང་གཞན་ཕན་བདེ་འགྲུབ་པར་གདོན་མི་ཟ༔ ཞེས་གསུངས་སོ༔ སླར་ཡང་ལྷ་སྲས་ཀྱིས་ཞུས་པ༔ དུས་གསུམ་མཁྱེན་པའི་གུ་རུ་རིན་པོ་ཆེ༔ བཀའ་དྲིན་མཉམ་མེད་བདག་ཅག་ཡོངས་ཀྱི་མགོན༔ སྐྱབས་གནས་ཀུན་འདུས་འདྲེན་པ་མཆོག་ཁྱེད་ཀྱིས༔ ཐུགས་བསྐྱེད་དག་པས་འགྲོ་དྲུག་ཐམས་ཅད་བཏུལ༔ ཁྱད་པར་ཡབ་རྗེ་དགུང་ལོ་བཅོ་བརྒྱད་དུས༔ སྨོན་ལམ་དག་པས་གུ་རུ་བོད་དུ་ཕེབས༔ ལྷ་སྲིན་འབྱུང་པོའི་གདུག་པའི་དཔལ་ཟེར་བཏུལ༔ གཙུག་ལག་ཁང་བཞེངས་དགེ་འདུན་འདུ་བ་སྤེལ༔ བསྟན་པ་གཉིས་ལྡན་བཤད་སྒྲུབ་ཉི་ལྟར་བརྡལ༔ རི་བྲག་གངས་གསུམ་སྒྲུབ་པའི་གནས་སུ་མཛད༔ ཆོས་དང་ནོར་གཏེར་མཐའ་དབུས་ཀུན་ཏུ་སྦས༔ བདེ་སྐྱིད་སྙན་གསུམ་ལྷ་ཡི་ཡུལ་ལས་ལྷག༔ འབྲེལ་ཚད་ཐམས་ཅད་བྱང་ཆུབ་ལམ་ལ་བཀོད༔ བཀའ་དྲིན་བསམ་ན་ནམ་མཁའི་མཐའ་ལས་བརྒལ༔ འོན་ཀྱང་འདུས་བྱས་རྟག་པ་མིན་པའི་དཔེས༔ ལྷ་གཅིག་ཁྲི་སྲོང་རྒྱལ་པོ་གཤེགས་ནས་ཀྱང་༔ མི་ལོ་ཉི་ཤུ་རྩ་བརྒྱད་སོང་མཚམས་སུ༔ ལྷ་སྲས་བཙན་པོ་མུ་ཏིག་བཙན་པོ་ནི༔ བདག་ཅག་སོ་བརྒྱད་ལོན་ནས་དགུང་དུ་ཡལ༔ དམ་འཛིན་ཁམས་ཀྱི་ཕྱོགས་སུ་བྱོན་ནས་ཀྱང་༔ འཇིག་རྟེན་སྲིད་བསྐྱང་གྲུབ་པ་མཐར་ཕྱིན་མཛད༔ མདོ་རྒྱུད་ཀུན་ལ་བསྟན་བཅོས་མང་མཛད་དེ༔ ལྷ་སྲས་ལོ་ཙཱ་གཤེགས་ནས་ལོ་བདུན་ཐལ༔ ད་ནི་མུ་ཁྲི་བཙན་པོ་ཁོ་བོ་ཙམ༔ བོད་ཀྱི་ཡུལ་འདིར་གཅིག་པུར་ལུས་པ་ན༔ གུ་རུ་ཐུགས་རྗེ་ཅན་གྱི་བཀའ་ཆེམས་ལྟར༔ རྒྱལ་ཁྲིམས་ཆོས་ཁྲིམས་སྲུང་ཞིང་སྤེལ་ལགས་ཀྱང་༔ ཡང་ཡང་ལུང་བསྟན་རྒྱལ་པོ་གླང་མིང་གིས༔ བསྟན་པའི་ཕུང་བྱེད་ང་ཡི་བརྒྱུད་པ་རྡུག༔ འོན་ཀྱང་མ་འོངས་ཕྱི་མ་ཕྱི་མའི་དུས༔ ད་ལྟའི་ཡོན་མཆོད་ལོ་པཎ་ཐུགས་བསྐྱེད་དང་༔ ཁྱད་པར་གུ་རུ་རྗེ་ཡི་བྱིན་བརླབས་མཐུས༔ རྒྱལ་ཁྲིམས་བསྟན་པའི་དར་ནུབ་འཕོ་འཁྱུགས་སྐབས༔ ད་ལྟའི་དུས་བཞིན་ཐམས་ཅད་ཞལ་འཛོམས་ནས༔ བསྟན་འགྲོའི་ཕན་བདེ་སྤེལ་ཞེས་གསུངས་པ་དང་༔ ཁྱད་པར་ཡབ་དང་བདག་ཅག་སྲས་གསུམ་གྱིས༔ བོད་འབངས་ཡང་ཡང་བསྐྱང་ཞེས་བཀའ་སྩལ་ཞིང་༔ དེ་ཡི་དུས་སུ་ཇི་ལྟར་འབྱུང་བ་ཡི༔ ལུང་བསྟན་ཞལ་གདམས་བསམ་གྱིས་མི་ཁྱབ་ཀྱང་༔ བདག་ཅག་ཡོན་མཆོད་འབྲལ་ཀའི་ཞལ་ཆེམས་མཐིལ༔ སྙིང་པོར་དྲིལ་བ་བླཽ་གཏད་གཅིག་ཆོག་གསུངས༔ མཐོང་བས་ཡིད་ཚིམ་བསམ་པས་དོན་གྲུབ་པ༔ ངེས་པའི་དོན་དུ་གུ་རུས་བཀའ་གནང་སྩོལ༔ ཅེས་ཞུས་པས༔ གུ་རུ་རིན་པོ་ཆེས་བཀའ་སྩལ་པ༔ ཨེ་མ་འཕགས་པའི་བྱིན་རླབས་ཐུགས་རྗེའི་འཕྲུལ༔ འོད་གསལ་ལྷ་ལས་ཆད་པ་རིགས་ཀྱི་རྒྱལ༔ ལེགས་ཉེས་སྤྱན་འབྱེད་རྒྱལ་སྲས་དད་པ་ཅན༔ བདག་ལ་གདུང་བས་གསོལ་བ་བཏབ་པ་ལེགས༔ ངས་བཤད་རྩེ་གཅིག་ཐུགས་ཀྱི་མཐིལ་དུ་ཟུང་༔ མ་འོངས་ཐ་མའི་དུས་སུ་ནུབ་ཕྱོགས་ནས༔ ང་ཡི་གཏེར་འབྱིན་བརྒྱ་སྟོན་ཞེས་བྱ་འབྱུང་༔ དེ་ནས་རིམ་པར་ཟབ་མོའི་གཏེར་གྱི་སྒོ༔ མ་ནོར་འབྱེད་པ་ནམ་མཁའི་སྐར་ཚོགས་ཙམ༔ བསམ་གྱིས་མི་ཁྱབ་འགྲཽ་བའི་དཔལ་དུ་འབྱུང་༔ ལ་ལས་དངོས་གཏེར་ཁྲོམ་ཚོགས་དཀྱིལ་ནས་འདོན༔ འགའ་ཞིག་ཤིན་ཏུ་གསང་བའི་ཚིག་གཏེར་འདོན༔ ལ་ལར་གཏེར་སྲུང་དངོས་ཀྱིས་རྩོལ་མེད་སྤྲོད༔ འགའ་ཞིག་དཀའ་རྒུ་སྤྱད་ནས་ཟབ་གཏེར་ལེན༔ སྐབས་རེར་རྟེན་འབྲེལ་དབང་གིས་འཕྲལ་གཏེར་འབྱུང་༔ རེས་འགའ་ཐུགས་གཏེར་དགོངས་པའི་ཀློང་ནས་རྡོལ༔ འགའ་ཞིག་ལྷ་དང་མཁའ་འགྲོས་དངོས་སུ་སྟོན༔ ལ་ལས་བཏོན་ཀྱང་རང་ཉམས་ཁོ་ན་ལེན༔ ཕལ་ཆེར་ལོ་གྲངས་བཀའ་རྒྱ་བཏབ་ནས་སྤེལ༔ ལ་ལས་ཁ་བྱང་ལུང་བསྟན་གསལ་གྱུར་ཀྱང་༔ དངོས་སུ་མི་འདོན་བཀའ་རྙིང་བསྟན་པ་བསྐྱང་༔ དེ་ལྟར་ཚད་ལྡན་སྐྱེས་བུ་དེ་དག་གིས༔ གང་ལྟར་སྤྱོད་ཀྱང་པདྨ་བདག་ཉིད་ཀྱི༔ བྱིན་རླབས་སྔོན་སྨོན་དབང་གི་བྱེ་བྲག་སྟེ། འབྲེལ་ཚད་འཚིངས་ཤིང་དོན་དང་ལྡན་པ་ཡིན༔ ཁྱད་པར་འཇམ་དཔལ་སྤྲུལ་པའི་རྒྱལ་པོ་ནི༔ ཡབ་གཅིག་ཁྲི་སྲོང་སྐྱེ་བ་བཅུ་གསུམ་དུ༔ བདག་གིས་བྱིན་རླབས་གདམས་པ་ཉམས་བླངས་པས༔ གསང་སྔགས་ནང་གི་ས་ལམ་མ་ལུས་བགྲོད༔ མངོན་པར་བྱང་ཆུབ་ཡེ་ཤེས་ཆེ་བརྙེས་ནས༔ སླར་ཡང་སྐུ་གསུང་ཐུགས་ཡོན་ཕྲིན་ལས་ཀྱི༔ སྤྲུལ་པ་གྲངས་ཅན་གྲངས་མེད་བསམ་མི་ཁྱབ༔ བོད་ཁམས་མཐའི་དབུས་ཀུན་ཏུ་ཡང་ཡང་འབྱུང་༔ ཟབ་གཏེར་ཉེར་ལྔ་ཁྱད་པར་ཐུགས་གཏེར་ལྔ༔ ཉི་མ་འོད་ཟེར་སྤང་རྗེ་སྟོན་པ་སོགས༔ སྨོན་ལམ་དག་པས་སྤྲུལ་སྐུ་རྣམས་ཀྱིས་བཏོན༔ བདག་གིས་དབང་ལུང་གདམས་པའི་བཀའ་གཏད་ནས༔ བླ་རྫོགས་ཐུགས་གསུམ་སྒྲུབ་སྡེ་བརྒྱད་ལ་སོགས༔ སྙིང་པོའི་བསྟན་པའི་སྲོག་རྩ་ཟིན་པ་འབྱུང་༔ མུ་ཏིག་བཙད་པོ་བློ་གྲོས་མཆོག་དང་ལྡན༔ སྐྱེ་བ་བཅུ་གསུམ་སྤྲུལ་པ་ཉི་ཤུ་ལྔ༔ རབ་བྱུང་སྔགས་པ་གཏེར་འབྱིན་ས་སྐྱོང་སོགས༔ ངེས་དང་མ་ངེས་འབྲེལ་ཚད་དོན་དང་ལྡན༔ ལྷ་སྲས་ཁྱོད་ཀྱང་སྐྱེ་བ་བཅུ་བདུན་དུ༔ འགྲོ་དོན་དཔག་མེད་ནམ་མཁའི་མཐའ་དང་མཉམ༔ དེ་ནས་རེས་འགའ་ཨོ་རྒྱན་བདག་ཉིད་དང་༔ དབྱེར་མེད་ཐུགས་ཀྱི་དགོངས་ཀློང་གཅིག་ཏུ་འཁྱིལ༔ རེས་འགའ་ཉི་མ་ལས་ནི་འོད་ཟེར་བཞིན༔ སྤྲུལ་པ་མང་པོས་འགྲོ་བའི་ཁ་ལོ་བསྒྱུར༔ དམ་འཛིན་ལོ་ཙས་པདྨ་བདག་ཉིད་ལ༔ ཟབ་ཅིང་རྒྱ་ཆེའི་གདམས་པ་དཔག་མེད་ཞུས༔ ཉིན་མཚན་མི་དལ་བརྩོན་འགྲུས་ཆེན་པོ་ཡིས༔ བསྒྱུར་བཤད་འཆད་ཉན་བསྒོམ་སྒྲུབ་བགྱིས་པའི་མཐུས༔ མ་འོངས་དུས་ཀྱང་སྤྲུལ་པའི་ཕྲེང་བ་ཡིས༔ ཆོས་མཛོད་ཆེན་པོར་རང་དབང་བསྒྱུར་བ་འབྱུང་༔ དེ་ལས་བྱེ་བྲག་སུམ་ཅུ་ཁ་རལ་དུས༔ མདོ་ཁམས་མཐིལ་དུ་སྔགས་སྐྱེས་རྗེའུའི་རིགས༔ ནོར་བུའི་མིང་ཅན་སྒྱུ་མའི་སྤྲུལ་པ་ཡི༔ ཟབ་རྒྱས་གཏེར་གྱི་བང་མཛོད་ཁ་བྱེ་ཚེ༔ ད་ལྟའི་དུས་ཀྱི་ལོ་པན་ཕལ་མོ་ཆེ༔ དབུས་གཙང་ཁམས་གསུམ་བསྟན་པ་སྤེལ་ཕྱིར་འབྱུང་༔ ང་ཡི་ཟབ་ཆོས་སྙིང་པོར་དྲིལ་བ་རྣམས༔ ཆུ་བུར་བཞིན་དུ་གང་འདོད་ས་ནས་རྡོལ༔ དེ་དག་ཉན་བཤད་སྒྲུབ་དང་འཆང་བ་རྣམས༔ ཨོ་རྒྱན་ང་ཡི་ཐུགས་རྗེས་ངེས་པར་འཛིན༔ དེ་ཚེ་རྒྱལ་བློན་པཎ་གྲུབ་ལོ་ཙཱ་རྣམས༔ ལ་ལ་བླ་མ་ལ་ལ་མཁན་པོ་དང་༔ ལ་ལ་རྒྱལ་པོ་ལ་ལ་བློན་པོ་དང་༔ ལ་ལ་འབངས་དང་ལ་ལ་སྔགས་པའི་སྡེ༔ རང་ཚུལ་འཛིན་པ་བསམ་གྱིས་མི་ཁྱབ་པས༔ ང་ཡི་ཟབ་ཆོས་གཏེར་དུ་སྦས་པ་རྣམས༔ སྤྱན་དྲངས་བྱེད་པའི་ལས་ཅན་གཏེར་སྟོན་དང་༔ འགའ་ཞིག་དེ་ཡི་ཐུགས་རྒྱུད་བསྐུལ་བ་དང་༔ འགའ་ཞིག་དེ་ལ་མངའ་གསོལ་བྱེད་པ་དང་༔ འགའ་ཞིག་དེ་ཡི་ཕྲིན་ལས་བསྐྱང་པ་དང་༔ འགའ་ཞིག་ཟབ་དོན་རྩེ་གཅིག་བསྒོམ་པ་དང་༔ འགའ་ཞིག་སྨིན་གྲོལ་རྒྱ་ཆེར་འཆད་པ་དང་༔ འགའ་ཞིག་དགོངས་འགྲེལ་བསྟན་བཅོས་རྩོམ་པ་དང་༔ འགའ་ཞིག་དེ་ཡི་རྩོད་པ་ཟློག་པ་དང་༔ འགའ་ཞིག་དེ་ཡི་སྦྱིན་བདག་བྱེད་པ་དང་༔ འགའ་ཞིག་ཐུགས་ཀྱྀ་གཟུངས་མ་བྱེད་པ་དང་༔ གཞན་ཡང་བསྟོད་ཅིང་བསྔགས་པ་སྒྲོགས་པ་སོགས༔ གཅིག་ལ་གཅིག་གྲོགས་གཅིག་གིས་གཅིག་སྤེལ་བས༔ བསྟན་པ་འུར་ཆེམ་འབྲུག་ལྟར་གྲགས་པར་འགྱུར༔ དེ་ཡི་དུས་སུ་པདྨ་བདག་ཉིད་དང་༔ ཐུགས་བསྐྱེད་དག་པའི་ཡབ་སྲས་རྗེས་འབྲངས་ཀྱིས༔ མ་འོངས་དོན་དུ་དཀའ་བ་དང་བླངས་ཏེ༔ ཡིད་ཆེས་བསྐྱེད་པའི་ལོ་རྒྱུས་ཐང་ཡིག་དང་༔ ངེས་ཤེས་སྟེར་བའི་ལུང་བསྟན་མ་བུ་དང་༔ བླངས་དོར་སྙིང་པོར་བརྩེ་བའི་ཞལ་གདམས་དང་༔ དངོས་གྲུབ་གཉིས་སྩོལ་སྨིན་གྲོལ་ཡན་ལག་བཅས༔ བསྟན་པ་སྲུང་བའི་ཆོས་སྐྱོང་དྲག་སྔགས་སོགས༔ གང་ལ་གང་འདུལ་དགོངས་པ་ཟབ་མོའི་གཏེར༔ ལ་ལ་རྒྱལ་པོའི་བླ་དཔེ་བཀླག་ཆོག་དང་༔ ལ་ལ་བོད་ཡིག་བརྡའ་རུ་བསྒྱུར་བ་དང་༔ ལ་ལ་བརྡའ་ཡིག་མདོ་ཙམ་བསྟན་པ་དང་༔ ལ་ལ་བརྡ་དོན་གསང་བའི་ཡི་གེ་དང་༔ ལ་ལ་འཕྲུལ་ཡིག་རྐྱེན་གྱིས་མངོན་པ་དང་༔ ལ་ལ་བལྟར་ཡོད་བཟུང་དུ་མེད་པ་སོགས༔ ཆོས་སྐུའི་ཡེ་ཤེས་རྣམ་པ་ཐམས་ཅད་པ༔ ཅིར་ཡང་འཆར་ཞིང་ཅིར་ཡང་འབྱུང་བའི་ཚུལ༔ སོ་སོའི་སྐྱེ་བོའི་བློ་ལས་འདས་པ་དག༔ རི་བྲག་མཚོ་གསུམ་དགོངས་པའི་ཀློང་སྒྲོམ་དུ༔ སངས་རྒྱས་རྫུ་འཕྲུལ་མ་འགགས་རོལ་པ་ཡིས༔ སྦས་པ་ཐམས་ཅད་ཆུད་མི་ཟོས་པ་རུ༔ ཡང་ཡང་བསྒོམ་སྒྲུབ་བཤད་ཉན་དར་བར་འགྱུར༔ དེ་དུས་སྐབས་ཤིག་མཐའ་དབུས་ཀུན་འཁྲུགས་ཤིང་༔ ཁྱད་པར་ལྕགས་སྤྲེལ་ལོ་ཡི་སྔ་རྗེས་སུ༔ སྟོད་སྨད་གཉིས་ནས་འཁྲུགས་པ་ལོང་ལོང་གཡོ༔ མ་མོ་ཆེན་མོ་བཞི་ཡི་ཕོ་བྲང་འཆའ༔ དམ་སྲི་འབྱུང་པོ་བྱེ་བ་ཕྲག་བརྒྱ་ཡིས༔ རང་དབང་མེད་པར་ཀུན་གྱི་ཡིད་བསྒུལ་ཏེ༔ འཇིག་རྟེན་ཁམས་སུ་ནད་མཚོན་ཆར་པ་འབེབས༔ རོང་འཁྲིས་རྣམས་སུ་ཁྲག་གི་ཆུ་མིག་རྡོལ༔ བཟང་བྱེད་སྨོད་ཅིང་ངན་པའི་ཕྱོགས་སུ་འདུ༔ དེ་དག་ཐམས་ཅད་བཟློག་ཅིང་ཞི་བའི་ཕྱིར༔ མདོ་ཁམས་པདྨ་བཀོད་པའི་མཚོ་གླིང་དང་༔ གངས་རིས་བསྐོར་དང་ཤེལ་གྱི་གུར་ཕུབ་ལ༔ བཤད་སྒྲུབ་གྲྭ་བཙུག་དཀོན་མཆོག་རྟེན་ཡང་བཞེངས༔ སྨན་སྒྲུབ་སྒྲུབ་ཆེན་ལས་སྦྱོར་སྣ་ཚོགས་པ༔ ཤིན་ཏུ་གསང་བའི་ལུང་བཞིན་འབད་པས་བསྒྲུབ༔ བདུད་ཀྱི་དབང་གྱུར་སྐྱེ་བོའི་ཁར་མ་བཏང་༔ རྒྱལ་ཁྲིམས་ཆོས་ཁྲིམས་མ་ཉམས་གཞུང་བཞིན་བསྲང་༔ བསྟན་པའི་གསོས་སུ་གྱུར་པ་ཐམས་ཅད་ལ༔ སྒོ་གསུམ་འབད་པས་རྩལ་དུ་སྤྲུགས་བྱས་ན༔ འགྲོ་ཀུན་བདེ་སྐྱིད་ལྷུན་གྱིས་གྲུབ་པར་འགྱུར༔ འོན་ཀྱང་དེ་དུས་སྨོན་ལམ་ལོག་པ་ཡི༔ རྒྱལ་བླཽན་བདུད་ཀྱི་རིས་གྱུར་མང་ཚོགས་པས༔ ནང་གི་སྙིང་བཏོན་ཕྱི་རུ་འཕྱར་བ་དང་༔ ཕྱི་ཡི་སོ་ཁ་ནང་དུ་བསྟན་པ་ཡིས༔ རང་ཕུང་གཞན་ཕུང་ཕུང་ཐལ་ཆེན་པོར་འབྱུང་༔ མ་རབས་བསྐུར་ཞིང་བཟང་པོའི་དབུ་འཕང་སྨད༔ དགྲ་ལ་བློ་གཏད་གྲོགས་ལ་སྙིང་རིང་བྱེད༔ ལྐོག་ནས་ངན་གཡོ་ངོས་སུ་ཁྱུ་གཅིག་བསྲེ༔ ཆད་ལ་མདོ་མེད་མནའ་ལ་ཅིར་མི་བརྩི༔ རྒྱུ་འབྲས་འཆོལ་སྤྱོད་ལོག་བལྟས་རྒྱུད་རབ་དཀྲུགས༔ མདོར་ན་སྨོན་ལམ་དག་པའི་སྐྱེས་བུ་དང་༔ བར་མའི་སྐྱེ་བོ་རེ་འགའ་མ་གཏོག་པ༔ དབང་ཆེའི་བདུད་དང་དམ་སྲིའི་བློ་བསྒྱུར་ནས༔ བྱ་རུ་མི་རུང་ལས་སྤྱོད་སྣ་ཚོགས་དྲན༔ ནོར་བའི་ལམ་ཞུགས་བཅོས་སུ་མེད་པ་ཡིས༔ ལ་ཡོགས་རྣམ་སྨིན་ཆུ་ཡི་གཉེར་མ་འདྲ༔ ཆོས་ལྟར་བཅོས་པའི་དགེ་སྦྱོང་འགའ་ཞིག་ཀྱང་༔ རྨོངས་པས་མཁས་པའི་གོ་ས་བཟུང་ནས་སུ༔ བཀའ་ལ་ཁུངས་གཡར་ལོག་པའི་ལུང་ཆེན་སྟོན༔ རང་བཟོའི་བསྟན་བཅོས་གཏེར་མིན་གཏེར་འདྲ་བྱེད༔ འགའ་ཞིག་དེ་དང་དེ་ཡི་རྗེས་འབྲངས་ནས༔ བསྟན་པའི་སེལ་གྱུར་གྲུབ་མཐའ་སོ་སོར་གྱེས༔ ཆོས་བྱེད་ནང་འཐབ་ནུབ་འཐབ་འཁྲུགས་པ་འབྱུང་༔ བསམ་གཏན་མི་འཕེལ་ཕྱོགས་ཆའི་སྡེ་རིས་རྩོད༔ བསྟན་པའི་ལག་དམར་མཚམས་མེད་བྱེད་པ་ཡི༔ ཆེ་རྒུ་ཐར་ཐོར་བོད་ཀྱི་ཡུལ་དུ་འབྱུང་༔ རང་ཉིད་དགའ་དང་མི་དགའི་དབང་བྱས་ཏེ༔ ཀུན་རྟོག་རི་མོ་ཨོ་རྒྱན་གསུང་དུ་བརྫུ༔ རང་ཕྱོགས་བསྟོད་ཅིང་གཞན་ཕྱོགས་སྨོད་པ་ཡི༔ ལུང་བསྟན་རྫུན་གྱི་གབ་རྩེ་བསྡེབས་པ་ལས༔ བསྟན་པ་ནང་གཅིག་སྡེ་རིས་མང་དུ་ཕྱེ༔ དེ་ཡི་རྐྱེན་གྱིས་བཤད་སྒྲུབ་རབས་བཅད་པས༔ ཆོས་སྤོང་མཚམས་མེད་ལྔ་ལས་ཐུ་བ་ཡིས༔ རང་གཞན་བསྟན་དང་འགྲོ་ལ་ཆེས་གནོད་པའི༔ ཟོག་པོའི་རྗེས་སུ་མ་འབྲངས་སྙིང་གཏམ་ཡིན༔ མདོ་སྔགས་བསྟན་པ་ཡ་བྲལ་མི་སྤྱོད་པར༔ སངས་རྒྱས་གསུང་རབ་དགོངས་པ་གཅིག་བསྡུས་ནས༔ ཕྱོགས་རེ་ནས་ཀྱང་ཅི་དང་ཅི་འཕེལ་གྱིས༔ བཤད་སྒྲུབ་སྙིང་པོར་དྲིལ་ཅིག་ཕྱི་རབས་རྣམས༔ མ་འོངས་ཆོས་རྒྱལ་ཇི་སྙེད་འབྱོན་ནའང་༔ བློན་པོ་སྡིག་ཅན་ཕུང་དཀྲུགས་ཅན་རྣམས་ཀྱིས༔ རང་མགོ་འདོན་པའི་ཐབས་ཙམ་ལྷུར་བྱེད་པའི༔ ཕུང་བའི་སྤྱོད་པས་བྲང་འོག་བཀང་བྱས་ནས༔ རྒྱལ་ཁྲིམས་ཡིན་ཅེས་ལས་ནི་མ་རུང་པ༔ མཐོན་པོར་འཇོག་ནས་དམའ་བའི་སར་ལྷུང་ཞིང་༔ བཟང་པོར་རློམས་པས་ངན་པའི་མཐིལ་རྡོལ་བ༔ ལག་རྗེས་ནག་པོར་འགྱུར་བ་བདུད་ཀྱི་རིགས༔ བསམ་གྱིས་མི་ཁྱབ་པ་ཡིས་ངེས་པར་ཕུང་༔ དེ་བས་ཕྱི་རབས་རྗེས་འཇུག་རྒྱལ་པོ་རྣམས༔ མ་རུངས་སྡིག་སྤྱོད་གདོལ་པའི་བཙུན་མོ་དང་༔ གཡོ་སྒྱུ་སླུ་བྱེད་བློན་པོའི་ཁར་མ་བཏང་༔ དཀོན་མཆོག་གསོལ་བཏབ་བླ་མའི་ལུང་དང་བསྟུན༔ གཟུ་བོར་དཔྱད་ཅིང་དྲང་པོའི་ལམ་དུ་ཞུགས༔ འཁོར་སྲིད་འདྲེ་ལ་སྐྱེས་པའི་རྒྱལ་འགོང་ཚོགས༔ དམ་སྲི་ལྷ་རུ་བསྟེན་པའི་མཆོད་གནས་འགའ༔ རེ་ཞིག་གྲགས་པ་འབྲུག་ལྟར་ཁྱབ་གྱུར་ཀྱང་༔ ཕུག་ཏུ་རང་ཉིད་སྨྱོན་པའི་གྲལ་མཐར་འདུག༔ སྡུག་ཡུས་ཆོས་ལ་བསྒྱུར་བའི་འདྲེ་ཅན་རྣམས༔ བསྟན་པའི་བླ་ཚོང་རྐང་འདྲེན་དེ་ཡིན་པས༔ བླ་མ་ཡི་དམ་མཁའ་འགྲོ་དཀོན་མཆོག་གསུམ༔ མ་མགོན་ལྕམ་དྲལ་ང་ཡི་ཐ་ཚིག་གིས༔ བསྟན་པའི་གཉེར་གཏད་དམ་ཅན་མ་གཏོགས་པ༔ འདྲེ་སྲིན་སྐྱབས་སུ་མ་ཚོལ་ཕྱི་རབས་རྣམས༔ འདོད་སྲེད་ཞེན་པས་སྐྱེ་བོའི་གྲལ་དག་ལས༔ འཕགས་པར་འདོད་ནས་དེ་ཡི་རྗེས་འབྲངས་མང་༔ བཙུན་པར་མི་ནུས་གྲུབ་ཐོབ་ཁས་འཆེ་བ༔ ཉམས་རྟོགས་མེད་པས་ནུས་རྩལ་མི་འབྱུང་ཡང་༔ རྫུན་གྱི་གྲུབ་རྟགས་སྣ་རེས་སྐྱེ་བོ་བསླུ༔ སྔགས་སྤྱོད་ཡིན་ཟེར་བུད་མེད་ཁྱུ་གཅིག་བསྡུ༔ དམ་སྲི་དངོས་བརླམས་ལོག་པའི་ལུང་མང་བསྟན༔ རྟེན་འབྲེལ་ཐམས་ཅད་འདྲེ་ཡི་ཕྱོགས་སུ་བསྒྲིགས༔ སྨྱོ་ཐབས་མང་པོའི་བརྟུལ་ཞུགས་ཅིར་ཡང་སྟོན༔ ཤེས་ལྡན་ཡི་ཆད་བླུན་པོའི་མགོ་བོ་བསྐོར༔ བསྟན་གཉིས་གང་གི་ཆ་ལུགས་མི་འཛིན་པར༔ མ་རབས་གདོལ་བའི་སྤྱོད་པ་བག་མེད་པས༔ དཀར་ཕྱོགས་ངོ་ཚ་ནག་ཕྱོགས་འཕང་བསྟོད་པའི༔ བསྟན་པའི་ལག་དམར་ཟོག་པོ་ཁྱུ་གཅིག་འབྱུང་༔ གསར་དད་ཅན་རྣམས་ཅུང་ཞིག་རྗེས་འབྲངས་ཡང་༔ ནམ་ཞིག་ལོང་བའི་ཁྱུ་རུ་ཚུད་པ་ཡིས༔ འདི་ཕྱི་གཉིས་མེད་གཡང་སར་ལྟུང་བའི་ཕྱིར༔ ངན་པའི་རྗེས་སུ་མ་འབྲངས་ཕྱི་རབས་རྣམས༔ སྤྱིར་ཡང་དོན་དུ་མི་ཁེལ་ཁ་མང་ཅན༔ དྲན་འཕྲུལ་མི་གཅིག་དྲ་བ་བཞིན་དུ་འཛིང་༔ གང་དྲན་ལག་བླངས་རང་ཉིད་ཕུང་བའི་རྒྱུ༔ ཚིག་རྗེས་དོན་སློབས་མཛོད་ཅིག་ཕྱི་རབས་རྣམས༔ ཐོས་ལོང་མེད་པར་ཡོན་ཏན་འུར་ཆེར་སྒྲོགས༔ མཐོང་ལོང་མེད་པར་དད་པས་རྗེས་སུ་འབྲང་༔ རེ་ཞིག་ཙམ་ནས་ལོག་ལྟས་རྒྱུད་ཁེབས་པའི༔ དམ་ཉམས་ཁྱུ་གཅིག་མ་བྱེད་ཕྱི་རབས་རྣམས༔ ཚད་ལྡན་རྒྱལ་བའི་བཀའ་དང་བསྟན་བཅོས་རྣམས༔ ལེགས་པར་མི་བསླབ་ཕྱོགས་ཙམ་ཐོས་པ་ཡིས༔ བདེན་གཉིས་ཡ་བྲལ་མདོ་སྔགས་དཀྲུགས་ཤིང་འཆད༔ བསྟན་པའི་ཕུང་ཐལ་མ་བྱེད་ཕྱི་རབས་རྣམས༔ སྒྲུབ་པས་བཤད་པའི་ལད་མོ་ལྡབ་ལྡིབ་འུར༔ བཤད་གྲྭ་ཕལ་ཆེར་གྲོང་ཡུལ་ཆོ་གས་གཡེང་༔ བཤད་སྒྲུབ་གཉིས་མེད་སེང་གེའི་གཟུགས་བརྙན་གྱིས༔ བསྟན་པའི་རྩ་བ་མ་གཅོད་ཕྱི་རབས་རྣམས༔ ཁྱད་པར་ཨོ་རྒྱན་བདག་གི་རྗེས་འཇུག་རྣམས༔ རྡོ་རྗེ་སློབ་དཔོན་སྤྱི་བོའི་ཐོད་བཞིན་བསྟེན༔ ཡི་དམ་ལྷ་ནི་ལུས་དང་གྲིབ་ལྟར་བསྒོམ༔ གསང་སྔགས་ཟབ་མོ་ཁོངས་པའི་དབུགས་ལྟར་ཟློས༔ རྫོགས་རིམ་མངོན་སུམ་སྙིང་གི་དཀྱིལ་དུ་བསྟིམ༔ མཁའ་འགྲོ་ཆོས་སྐྱོང་གྲོགས་དང་བྲན་ལྟར་བསྐོལ༔ བསྐྱེད་རྫོགས་ཉམས་དང་དྲོད་རྟགས་རྒྱུན་མ་བཅད༔ རྟོག་གེ་ཚིག་ཙམ་རྗེས་སུ་མ་འབྲེང་བར༔ ངས་བཤད་གཏན་ལ་ཕོབས་ཤིག་རྗེས་འཇུག་རྣམས༔ སྙན་རྒྱུད་གདེངས་མེད་གོ་བ་སྐམ་པོ་ལ༔ གདེངས་སུ་བྱས་པའི་བླུན་བསྒོམ་རང་མགུ་ཅན༔ བཟླས་བརྗོད་སྒྲུབ་ཚུག་བཟང་བའི་སྡུག་ཡུས་ཀྱིས༔ རང་གི་རང་ཉིད་མ་བསླུ་ཕྱི་རབས་རྣམས༔ འགའ་ཞིག་དང་པོར་ཐོས་ཤིང་བསྒྲུབ་གྱུར་ཀྱང་༔ དེ་ནས་ཟང་ཟིང་རྗེས་འབྲང་ཆོས་བརྒྱད་མཁན༔ ཆོས་པར་མིང་བཏགས་གཡོ་སྒྱུས་ཁོག་གང་བའི༔ དྲེད་པོ་ཆོས་མེད་མ་བྱེད་ཕྱི་རབས་རྣམས༔ དང་པོར་སྙིང་ལས་ལྷག་པའི་མཛའ་བཤེས་བྱེད༔ བར་དུ་བློ་སྣ་མི་མཐུན་ཁོང་ཁྲོ་ལྷོང་༔ ཐ་མ་ཤིན་ཏུ་འཁོན་ཞིང་སྡང་བའི་དགྲ༔ བརྩོན་པས་སྒྲུབ་པར་མ་བྱེད་ཕྱི་རབས་རྣམས༔ རྫུན་གྱི་བློ་ཆུང་འགའ་ཞིག་བསླུས་གྱུར་ཏེ༔ དེ་ལྟར་རིགས་འགྲེས་ཀུན་ལ་ངན་བློ་ཡིས༔ རང་འདོད་ཕུགས་བཅུགས་དོན་མང་བསྒྲུབ་པའི་མཐར༔ གཉིས་ཀ་ཕུང་བར་མ་བྱེད་ཕྱི་རབས་རྣམས༔ ཡ་རབ་སྐྱེ་བོ་མཆོག་གི་ལུགས་སྲོལ་ལྟར༔ འཇིག་རྟེན་མཐུན་པའི་ཆོས་ལ་ལེགས་བསླབས་ཏེ༔ ཁ་ཉུང་ཁོག་ཡངས་དྲན་ཤེས་ནང་དུ་བཀུག༔ བག་ཡོད་ཚུལ་མཐུན་སྤྱོད་ཅིག་ཕྱི་རབས་རྣམས༔ ཉིན་པར་ཚེ་འདིའི་འཚོ་ཆིས་ལུགས་བཞིན་སྤྱོད༔ ནང་ནུབ་དཀོན་མཆོག་གསོལ་བཏབ་དགེ་ལ་འབད༔ དུས་ཀུན་གཉིད་ཆང་བུད་མེད་ཁར་མ་བཏང་༔ ལས་འབྲས་དཔང་དུ་ཞོག་ཅིག་ཕྱི་རབས་རྣམས༔ དེ་ནས་རང་ཉིད་ཆོས་ལ་བློ་ཕྱོགས་ན༔ བརྒྱུད་ལྡན་རྩོད་པ་བྲལ་བའི་གྲུབ་མཐར་ཞུགས༔ མཚན་ཉིད་ཚང་བའི་བཤེས་གཉེན་ཚུལ་བཞིན་བསྟེན༔ རང་གི་ནུས་ཚོད་སྦྱར་བའི་སྡོམ་པ་བླངས༔ དེ་ཉིད་མཐར་དབྱུང་འདི་ཕྱི་ཀུན་ཏུ་དགེ༔ ངེས་འབྱུང་བྱང་སེམས་ཆོག་ཤེས་ལྡན་པར་གྱིས༔ ཐོས་པས་རྒྱུད་སྦྱངས་བསམ་པས་སྒྲོ་འདོགས་བཅད༔ ཉམས་རྟོགས་མ་ཤར་བར་དུ་བསྒོམ་སྲན་བཟུང་༔ ལྟ་བསྒོམ་ཁ་ལ་མ་ཁྱེར་སྙིང་ལ་ཆོངས༔ རྟོགས་པ་ཡོད་མེད་རྐྱེན་དང་བསྲེས་ལ་དཔྱོད༔ མ་རྟོགས་རྟོགས་བརྫུས་རང་གཞན་ཉམས་པས་ན༔ རྟོགས་པ་གདེངས་ཐོབ་བར་དུ་གསང་ཞིང་སྤྱད༔ ཆོས་དང་འཇིག་རྟེན་བྱ་བ་གང་བྱེད་ཀྱང་༔ མིག་ལྟོས་ངན་པའི་ཕྱོགས་སུ་མི་སྡོད་པར༔ ཡ་རབས་ཚུལ་མཐུན་གྲོགས་དང་འགྲོགས་ནས་སུ༔ རྣམ་ཀུན་བདེ་བའི་ལམ་སྣེ་ཟིན་པ་ལ༔ ད་རེས་འབུང་གསུམ་བཏོན་ཅིག་ཕྱི་རབས་རྣམས༔ ང་དང་འཇལ་ཡང་མན་ངག་བཅུ་གསུམ་དང་༔ ཉོན་མོངས་རང་གྲོལ་སྙིང་ཏིག་འདི་རྣམས་ལས༔ ལྷག་པའི་གདམས་པ་འཆད་དུ་མེད་པས་ན༔ བརྩོན་པས་ཉམས་སུ་ལོངས་ཤིག་ཕྱི་རབས་རྣམས༔ དེ་ལྟར་ཕན་པའི་ཞལ་ཆེམས་མཐར་ཐུག་འདི༔ འདིར་ཚོགས་ལྷ་སྲས་རྗེས་འབྲངས་ཐམས་ཅད་དང་༔ མ་འོངས་རྣམས་ཀྱིས་ཚུལ་བཞིན་སྤྱོད་གྱུར་ན༔ དོན་གཉིས་ལྷུན་གྱིས་གྲུབ་བོ་ཕྱི་རབས་རྣམས༔ ཞེས་ཤིན་ཏུ་བརྩེ་བས་བསླབས་བྱ་ལུང་བསྟན་ཞལ་ཆེམས་དང་བཅས་པ་བཀའ་སྩལ་པས་ལྷ་སྲས་རྗེས་འབྲངས་རྣམས་རབ་ཏུ་དད་ཅིང་༔ དགའ་ཞིང་གུས་པས་རྗེས་སུ་ཡི་རངས་བར་གྱུར་ཏོ༔ ས་མ་ཡ༔ རྒྱ་རྒྱ༔ དེ་ནས་སླར་ཡང་རྗེས་འབྲངས་ཐམས་ཅད་ཀྱིས་མགྲིན་གཅིག་ཏུ་གསོལ་བ་བཏབ་པ༔ འདི་ལྟ་བུའི་བླ་མའི་ཐུགས་སྒྲུབ་མན་ངག་དང་བཅས་པ་དང་༔ ཉོན་མོངས་རང་གྲོལ་སྙིང་ཏིག་དང་བཅས་པ་འདི་རྣམས་ད་ལྟ་སྤེལ་ལམ༔ མ་འོངས་སྣོད་ལྡན་གྱི་དོན་དུ་གཏེར་དུ་སྦ༔ གུ་རུ་རིན་པོ་ཆེས་བཀའ་སྩལ་དུ་གསོལ། ཞེས་ཞུས་པའི་ཚེ༔ གུ་རུ་རིན་པོ་ཆེའི་ཞལ་ལས༔ ཨེ་མ་དད་ལྡན་རྗེས་འབྲངས་རྣམས༔ དེ་ལྟར་གསོལ་བ་བཏབ་པ་ལེགས༔ འདི་འདྲའི་གདམས་པ་ཁྱད་པར་ཅན༔ རྡོ་རྗེའི་གསུང་གི་གསང་བ་གཅིག༔ སྣོད་དང་འཚམས་པར་འཆར་བ་ཀུན༔ བཀའ་སྲོལ་བཞི་རུ་བསྡུས་ནས་ཀྱང་༔ རང་རང་ཉམས་ལེན་གནད་དུ་དྲིལ༔ ནམ་ཞིག་མཁའ་འགྲོ་མཚོ་རྒྱལ་མས༔ དྷཱ་ཀི་གསང་བའི་བརྡར་ཐོབ་ལ༔ སོ་སོའི་སྨོན་ལམ་དང་བཅས་ཏེ༔ དབུས་གཙང་ཁམས་ཀྱི་གནས་སོ་སོར༔ ཟབ་མོའི་གཏེར་དུ་རྒྱས་བཏབ་ན༔ མ་འོངས་ཕྱི་མ་ཕྱི་མའི་དུས༔ ལས་འཕྲོ་སྐལ་བར་ལྡན་པ་ཡིས༔ རིམ་པ་བཞིན་ཏུ་བཏོན་བྱས་ན༔ བསྟན་འགྲོའི་རྒུད་པ་སེལ་བ་དང་༔ ཕན་བདེའི་ཕྲིན་ལས་རྒྱས་པར་འགྱུར༔ འབྲེལ་ཚད་དོན་ལྡན་ཨེ་མ་ཧོ༔ ཞེས་བཀའ་སྩལ་པ་ན༔ ཁོ་མོ་མཚོ་རྒྱལ་བདག་གིས་གུས་ཕྱག་དགུ་ཕྲུགས་སུ་བཙལ་ནས༔ ཨེ་མ་གུ་རུ་སྤྲུལ་པའི་སྐུ༔ ཟབ་མོའི་གདམས་པ་ཁྱད་པར་ཅན༔ རིམ་པར་ཕྱེ་བ་སྙིང་པོའི་དོན༔ གཏེར་དུ་གདམས་པར་བཀས་གནང་ན༔ ཡིད་བཞིན་ནོར་བུའི་གསང་བ་འདི༔ སྦ་བའི་ཐབས་ཚུལ་ཇི་ལྟ་བུ༔ གནས་མཆོག་གང་དུ་ཕྱག་རྒྱས་གདབ༔ དེ་ཉིད་འདོན་པའི་ལས་ཅན་དང་༔ གཞན་དོན་འབྱུང་ཚུལ་བཀའ་སྩལ་གསོལ༔ ཞེས་ཞུས་པའི་ཚེ༔ གུ་རུ་རིན་པོ་ཆེ་དར་གཅིག་དགོངས་པ་མཉམ་པར་བཞག་ནས་གསུང་རྡོ་རྗེའི་དབྱངས་ཀྱིས་འདི་སྐད་ཅེས་བཀའ་སྩལ་ཏོ༔ ཨེ་མ་ཉོན་ཅིག་མཚན་ལྡན་མཁའ་འགྲོའི་གཙོ༔ ཁྱད་པར་གསོལ་བ་འདེབས་པ་ཤིན་ཏུ་ལེགས༔ བདག་ཉིད་འཆི་མེད་པདྨ་ཐོད་ཕྲེང་རྩལ༔ ཆོས་སྐུ་སྣང་བ་མཐའ་ཡས་ཡེ་ཤེས་ལས༔ སྙིང་རྗེའི་འགྲོ་འདུལ་སྤྱན་རས་གཟིགས་སུ་ཤར༔ བྱེ་བྲག་འཛམ་གླིང་སྤྱི་དང་བོད་ཁམས་ཀྱི༔ གདུལ་བྱའི་དོན་ཕྱིར་ཤཱཀྱའི་རྒྱལ་པོ་ཉིད༔ རྡོ་རྗེ་ཐེག་པའི་ལམ་སྟོན་བླ་ན་མེད༔ མཚོ་སྐྱེས་སྤྲུལ་པའི་སྐུ་རུ་སྣང་བ་སྟེ༔ དེ་ཕྱིར་དུས་གསུམ་ཆགས་ཐོགས་དང་བྲལ་བའི༔ གཟིགས་པ་སྒྲིབ་མེད་ཡེ་ཤེས་རྩལ་འཆང་བས༔ གདུལ་བྱའི་ཡུལ་དང་འདུལ་བྱེད་གང་ཟག་དང་༔ འདུལ་བའི་དུས་དང་ཐབས་ཚུལ་ལ་སོགས་པ༔ ད་ལྟའི་མངོན་སུམ་བཞིན་དུ་གཏན་ཕེབས་པས༔ ཞིབ་པར་གདམས་སོ་རྩེ་གཅིག་ཡིད་ལ་ཟུངས༔ མ་འོངས་སུམ་ཅུ་ཁ་རལ་སྙིགས་དུས་ཀྱི༔ བོད་ཁམས་མགོན་མེད་འགྲོ་རྣམས་བསྐྱབ་པའི་ཕྱིར༔ ཡིད་བཞིན་ནོར་བུ་བླ་མའི་ཐུགས་སྒྲུབ་ནི༔ ཟབ་མོའི་གདམས་པ་མན་ངག་སྙིང་པོའི་ཕུལ༔ ཉོན་མོངས་རང་གྲོལ་པདྨའི་སྙིང་ཏིག་བཅས༔ མཐོང་ཐོས་དོན་ལྡན་དགོངས་ཉམས་མཐར་ཐུག་ཆོས༔ ང་དང་མ་མཇལ་ཕྱི་རབས་གདུལ་བྱ་ལ༔ དངོས་དང་ཁྱད་མེད་བྱིན་རླབས་སྐུ་ཚབ་མཆོག༔ རིན་ཆེན་སྣ་ལྔའི་ཕྱེ་མ་ལས་བྱས་ཏེ༔ གཞན་དོན་ཐུགས་རྗེའི་རྫུ་འཕྲུལ་མཐུ་ཡིས་བཞེངས༔ བདེ་ཆེན་ཡེ་ཤེས་མངོན་སུམ་བསྟིམ་པས་ན༔ བདག་དང་མཇལ་བར་ཁྱད་མེད་ཐེ་ཚོམ་བྲལ༔ དེ་ཕྱིར་ཆོས་དང་རྟེན་མཆོག་ཁྱད་པར་ཅན༔ སྦས་པའི་ཚུལ་ཀྱང་གཞན་ལས་འཕགས་པ་སྟེ༔ རྒྱ་ཆེའི་གཞུང་རྣམས་ཟབ་པའི་སྙིང་པོར་དྲིལ༔ སྙིང་པོའི་ཡང་ཞུན་བརྗོད་པ་ཀུན་གྱི་རྒྱུ༔ གདམས་པའི་མཐར་ཐུགས་བརྡ་ཡིག་བདུན་དུ་བསྡུས༔ རྩ་སྒོ་འབྱེད་པའི་རྫས་ནི་བདུད་རྩི་ལྔ༔ ཡི་གེའི་རྐྱེན་བྱེད་མཁའ་འགྲོའི་བརྡ་རིས་བདུན༔ དགོངས་པས་བྱིན་རླབས་ཤོག་དྲིལ་རིན་པོ་ཆེ༔ འབྱུང་བ་བཞི་དང་དུག་མཚོན་གྱིས་མི་ཚུག༔ དྲི་ཚོར་ཙམ་གྱིས་ནད་ཞི་གདོན་འཕྲོག་ཅིང་༔ སྣང་བ་དབང་སྡུད་ཐུགས་རྗེ་ཆགས་པའི་རྫས༔ དོན་ཀུན་གྲུབ་སྟེར་བྱིན་རླབས་གི་ཝཾ་བཟང་༔ བཾ་པོར་བྱས་ཏེ་དེ་ཡི་བཙས་སུ་གཏམས༔ བསྐལ་པ་ཞིག་ཀྱང་མི་འགྱུར་རྐྱེན་གྱི་གཏེར༔ སྦས་པའི་གནས་ནི་མདོ་ཁམས་ཟལ་མོ་སྒང་༔ རྩི་རྐེའི་ཆུ་བོ་འདུས་པའི་རོང་གི་བྲག༔ རིན་ཆེན་འབར་བའི་ལོག་སུ་རྒྱས་ཐོབ་ལ༔ ཀླུ་བཙན་འབར་བ་སྤུན་བདུན་སྲུང་མར་བསྐོས༔ ནམ་ཞིག་བོད་ཁམས་མཐའ་དབུས་ཀུན་ཏུ་འཁྲུགས༔ སྣོད་བཅུད་བཀྲག་ཉམས་རི་བོའི་ན་བུན་ཡལ༔ འབྱུང་བའི་རྐྱེན་མང་སྐྱེ་འགྲོའི་ཤེས་རྒྱུད་འགྱུར༔ གནས་རྟེན་ཉམས་ཤིང་སྨན་སྔགས་ནུས་པ་ཟད༔ བཟང་སྤྱོད་སྨོད་ཅིང་ངན་པའི་ལད་མོ་འུར༔ དྲིན་ལ་ལོག་གཞལ་དགྲ་ལ་བློ་གཏད་འཆའ༔ ཕན་པའི་སྙིང་གཏམ་དྲང་པོ་ཐན་དུ་བལྟ༔ གནོད་པའི་ཁ་འཇམ་ཞེ་གནག་ལྷ་རུ་མཐོང་༔ མི་རུང་སྣ་དགུའི་གདོལ་སྤྱོད་དར་བ་ཡིས༔ དཀར་ཕྱོགས་ལྷ་ཀླུ་ཐམས་ཅད་གྲིབ་ཀྱིས་འཐིབ༔ ནག་ཕྱོགས་མི་དང་མི་མིན་གཟེངས་བསྟོད་པས༔ ནད་མུག་མཚོན་གྱི་བསྐལ་ངན་དུས་གཅིག་ལངས༔ དེ་ཚེ་གཏེར་འདི་འབྱིན་པའི་ལས་ཅན་ནི༔ ཡབ་གཅིག་ཁྲི་སྲོང་སྤྲུལ་པ་དབང་གི་མིང་༔ བསྟན་གཉིས་ཟུང་འཇུག་ཤེས་རབ་རྩལ་འཆང་བར༔ པདྨ་བདག་གིས་ཡང་ཡང་བྱིན་བརླབས་པས༔ གནས་དང་ཟབ་མོའི་གདམས་པའི་མཚོན་ཚུལ་ཀུན༔ མེ་ལོང་བྱད་བཞིན་དྲན་པའི་ཟུངས་སུ་སྨིན༔ དངོས་སུ་སྤྱོད་དམ་བསྐུལ་བས་རྐྱེན་བྱས་ཏེ༔ ད་ལྟའི་སྨོན་ལམ་དབང་གིས་དམ་འཛིན་ནི༔ འབྲེལ་ཚད་དོན་ལྡན་སྔགས་ཀྱི་རྣལ་འབྱོར་པ༔ བྱིས་པའི་ངང་ཚུལ་ལས་ཅན་ཞིག་འབྱུང་ཏེ༔ དེ་ཡིས་གནས་ཡུལ་ཀུན་ཏུ་ཉུལ་བ་དང་༔ མཁའ་འགྲོའི་ཚོགས་དང་དགྱེས་རྒུར་སྤྱོད་པ་དང་༔ ལས་ཅན་རྣམས་ལ་ཡེ་ཤེས་བསྐྱེད་པ་དང་༔ བཤད་སྒྲུབ་བསྟན་པའི་ས་བོན་གདབ་པའི་ཕྱིར༔ འགྲོ་དོན་སྤྱོད་པའི་ལམ་ནས་རྙེད་པར་འགྱུར༔ དེ་ནས་ཡབ་སྲས་ལྷན་ཅིག་ཚོགས་པ་དང་༔ པདྨ་བདག་གིས་བྱིན་གྱིས་བརླབས་པ་དང་༔ མཚོ་རྒྱལ་ཁྱོད་ཀྱི་སྨོན་ལམ་དག་པ་དང་༔ ཕྱི་ནང་རྟེན་འབྲེལ་ཟབ་མོ་ལ་བརྟེན་ནས༔ དོན་རྣམས་ཀུན་གཟིགས་བདུད་རྩིའི་ཤོག་བུ་ལ༔ མི་འགྱུར་རྩ་བའི་ཡི་གེའི་གྲོང་ཁྱེར་བདུན༔ ཆུ་ཟླ་བཞིན་དུ་སྤྲུལ་པའི་འདུ་བྱེད་ཅན༔ བརྡ་ཡི་ཐིག་ལེ་འབུམ་ཕྲག་གྲངས་མེད་ལས༔ ལས་ཅན་དག་གི་བླཽ་གྲོས་དང་མཚམས་པར༔ ངེས་པའི་གདམས་པ་ཟབ་མོའི་ཚིག་ཏུ་འབྱུང་༔ དོན་གྱི་ཐེམས་ལས་མི་འདའ་གཏན་ལ་ཕོབ༔ དེ་ཚེ་གཞན་དོན་ཕྲིན་ལས་འབྱུང་བ་ནི༔ སྤྱན་རས་གཟིགས་དབང་ཐུགས་རྗེའི་འོད་ཟེར་ལས༔ ངོ་མཚར་སྤྲུལ་པ་དབུས་གཙང་ཁམས་སུ་འབྱུང་༔ སྐུ་གསུང་ཐུགས་ཀྱི་གདུལ་བྱ་འདུལ་བ་ལ༔ ཆོས་འདི་གཏད་ན་རང་གཞན་ཕན་བདེ་འགྲུབ༔ པདྨ་བདག་གིས་བྱིན་གྱིས་བརླབས་པའི་བུ༔ སྙིང་པོའི་མིང་གིས་བསྟན་པ་མཐའ་ནས་སྤེལཿ སངས་རྒྱས་ཡེ་ཤེས་སྔགས་ཀྱི་རྣལ་འབྱོར་པར༔ འདི་འཕྲོད་བདུན་བརྒྱུད་བཤད་སྒྲུབ་འཛིན་བྱེད་འཕེལ༔ ནམ་སྙིང་སྤྲུལ་པ་ལོ་གསུམ་མཚམས་སུ་འབྱུང་༔ འདི་ལ་བརྟེན་ནས་ཕྲིན་ལས་མངའ་ཐང་རྒྱས༔ མཚོ་རྒྱལ་བྱིན་བརླབས་གསུང་གི་གནས་སུ་སྣང་༔ ཆོས་འདི་ཉམས་བླངས་དངོས་གྲུབ་ཁྱད་པར་ཐོབ༔ ཤར་གྱི་ཕྱོགས་ནས་སྦ་བཙུན་སྐྱེ་མཐའ་ནི༔ བློ་གྲོས་ལྡན་པ་དཔལ་བཟང་མིང་ཅན་འབྱུང་༔ སྦས་མངོན་སྤྱོད་པས་འགྲོ་བ་ཐབས་ཀྱིས་འདུལ༔ ལྷོ་ན་ཅོག་རོ་ཀླུ་ཡི་རྒྱལ་མཚན་གྱི༔ སྐྱེ་མཐའ་བཀྲ་ཤིས་མིང་ཅན་ཕག་ལོ་པ༔ མ་ངེས་འགྲོ་འདུལ་སྙན་གྲགས་ལྡན་པ་འབྱུང་༔ ནུབ་ནས་བཻ་རོའི་སྐྱེ་མཐའ་བློ་གྲོས་ཅན༔ བསྟན་འཛིན་མིང་ཅན་རྒྱལ་བའི་བསྟན་ལ་ཕན༔ ཟབ་རྒྱས་མཛོད་ལ་རང་དབང་བསྒྱུར་བ་འབྱུང་༔ བྱང་ནས་དཔལ་གྱི་དབང་ཕྱུག་རྡོ་རྗེའི་མིང་༔ དྲག་སྔགས་མཐུ་ལྡན་བསྟན་པ་སྲུང་ལ་བརྩོན༔ རྫུ་འཕྲུལ་སྤྱོད་པས་བློ་སྣ་བསྒྱུར་བ་འབྱུང་༔ བདུད་འཇོམས་རྡོ་རྗེའི་སྨོན་ལམ་མཐུ་གྲུབ་པ༔ རཏྣའི་མིང་ཅན་མཁྱེན་ནུས་ཡོན་ཏན་རྫོགས༔ འབྲེལ་ཚད་དོན་ལྡན་དན་གྱི་ཕྱོགས་སུ་འབྱུང་༔ ཏིང་འཛིན་བཟང་པོའི་སྐྱེ་བ་མངོན་ཤེས་ཅན༔ སྦས་པའི་ཚུལ་འཛིན་བསྟན་པའི་སྙིང་པོ་འཛིན༔ ནུབ་ཀྱི་ཕྱོགས་ནས་ཀུན་དགའི་མིང་ཅན་གྱིས༔ མདོ་སྔགས་ཟུང་འབྲེལ་འཆད་རྩོམ་སྒྲོན་མེ་སྦར༔ དཔལ་གྱི་སེང་གེའི་སྐྱེ་མཐའ་མངྒ་ལ༔ ནུས་པ་ལྡན་པས་མཐའ་དམག་གདུག་ཅན་བཟློག༔ གཉགས་ཆེན་ཛྙཱ་ན་རྟོགས་པས་རང་རྒྱུད་གྲོལ༔ བྱང་ཆུབ་སེམས་ལྡན་འགྲོ་བ་འདུལ་བ་འབྱུང་༔ གཞན་ཡང་རྗེས་འབྲངས་རྣམས་ཀྱི་བྱིན་རླབས་ལས༔ རྡོ་རྗེའི་མིང་ཅན་སྔགས་སྤྱོད་གྲུབ་པ་འབྱུང་༔ གར་གྱི་དབང་ཕྱུག་དབང་ཆེན་གསུང་གི་བདག༔ ཕྲིན་ལས་རབ་འཛིན་ཤིང་པོའི་བསྟན་ལ་ཕན༔ འཇམ་དཔལ་རྡོ་རྗེ་བདེ་བའི་ཡེ་ཤེས་གྲུབ༔ དགེ་ལེགས་མིང་ཅན་ངེས་དོན་བསྟན་པ་འཛིན༔ པདྨའི་དབང་ཕྱུག་ཆོས་ཀྱི་འཁོར་ལོས་བསྒྱུར༔ ནོར་བུའི་མིང་ཅན་འགྲོ་བ་འདུལ་བའི་མཆོག༔ དཔལ་གྱི་མིང་ཅན་ཁྱད་པར་ཆོས་འདིའི་བདག༔ དེ་དང་དེ་བཞིན་སྤྲུལ་པའི་སྐྱེས་བུ་དང་༔ ཟབ་མོའི་ཆོས་འདིར་སྙིང་ནས་དད་ཐོབ་པ༔ མངའ་རིས་དབུས་གཙང་མདོ་ཁམས་སྟོད་སྨད་ནས༔ ཐུགས་ཀྱི་སྲས་ལྔ་ཉེ་བའི་བུ་མཆོག་བརྒྱད༔ བཤད་སྒྲུབ་འཛིན་པ་ཉི་ཤུ་རྩ་ལྔ་སྟེ༔ གྲུབ་པའི་ཉམས་མྱོང་ཐོབ་པ་བརྒྱ་རྩ་བརྒྱད༔ ལམ་སྣ་ཟིན་པའི་རྣལ་འབྱོར་སྟོང་ཕྲག་གཅིག༔ འབྲེལ་བ་ཐོབ་པ་འབུམ་ཚོ་བཅོ་བརྒྱད་རྣམས༔ ཕོ་མོ་མ་ངེས་སྔ་ཕྱི་སྣ་ཚོགས་སུ༔ རིམ་པར་འབྱུང་བས་ཆོས་འདི་ཉམས་བླངས་ན༔ རང་གཞན་ཀུན་གྱི་བསམ་པ་ཡིད་བཞིན་འགྲུབ༔ བསྟན་དང་འགྲོ་ལ་ཕན་པ་རླབས་ཆེན་འབྱུང་༔ ཚེ་འཕོས་འོག་མིན་པདྨ་དྲྭ་བ་རུ༔ རིག་འཛིན་ཚོགས་དང་སྤྱོད་ཡུལ་མཉམ་པར་རྒྱུ༔ ལུས་རྟེན་དེ་ལས་མཆོག་གི་དངོས་གྲུབ་ཐོབ༔ ཁྱད་པར་པདྨའི་སྙིང་ཏིག་ཟབ་མོ་ལ༔ བརྟེན་ནས་ཟག་མེད་འོད་ཀྱི་ལུས་གྲུབ་པ༔ ལྷོ་བྱང་ཀོང་ཡུལ་ཁམས་དང་མོན་གྱི་མཐའ༔ དེ་དག་རྣམས་སུ་ལྔ་ཕྲག་ཟུང་གཅིག་འབྱུང་༔ མདོར་ན་ལས་ཅན་སྐྱེས་བུས་འདི་རྙེད་ཚེ༔ བསྐྱེད་རིམ་གུ་རུ་བདེ་བ་ཆེན་པོ་དང་༔ ཐབས་གྲོལ་ལམ་གྱི་ཉམས་མྱོང་ཟབ་མོའི་དོན༔ དབེན་པར་སོང་ལ་རྩེ་གཅིག་ཡིད་ཀྱིས་བསྒོམ༔ རིམ་གཉིས་ཟབ་མོའི་མྱོང་བ་སྐྱེས་པ་ན༔ རྩ་བའི་དབང་དང་སྒྲུབ་ཐབས་ཀུན་ལ་སྤེལ༔ མན་ངག་ལོ་བདུན་བར་དུ་གསང་བར་བསྡམས༔ དེ་ནས་དུས་བབས་ངེས་པའི་རྟགས་བྱུང་ན༔ རིམ་གྱིས་གདམས་པ་ཚོད་དང་སྦྱར་སྤེལ་ན༔ ཁྱད་པར་ལུང་གི་ཟིན་པའི་སྐྱེས་བུ་དང་༔ འཕྲལ་དུ་ཌཱ་ཀིས་བསྐུལ་མ་གནང་བའི་ཚེ༔ གདམས་པའི་རྩལ་སྐྱུགས་ལྷག་མ་མེད་པར་སྦྱིན༔ དེས་ཀྱང་ཉམས་བླངས་རང་གཞན་དོན་ཆེན་འགྲུབ༔ དབུས་གཙང་ཁམས་ཀྱི་སྒྲུབ་པའི་གནས་རྣམས་ཀྱང་༔ ས་གནད་རྣམས་སུ་ཟབ་མོའི་ཕྲིན་ལས་འདིའི༔ ཚོགས་སྒྲུབ་ཚེས་བཅུའི་མཆོད་པའི་རྒྱུན་ཚུགས་ན༔ གངས་ཅན་མཐའ་དབུས་ཀུན་ཏུ་བདེ་ལེགས་འབྱུང་༔ གཏེར་གནས་འདི་དང་ཉེ་བའི་ས་ཕྱོགས་སུ༔ ལས་ཅན་རང་གི་གདན་ས་གཉིས་ཀྱང་འཆའ༔ གཞན་ཡང་གནས་མཆོག་ཉི་ཤུ་རྩ་ལྔ་ལ༔ སྐྱེས་བུའི་ལག་པའི་སོར་གདུབ་ཇི་བཞིན་དུ༔ བསྒོམ་པའི་སྡེ་རེ་ངེས་པར་ཁྲ་ཆེམས་འབྱུང་༔ རང་བྱུང་པདྨས་བྱིན་རླབས་བསྟན་འཛིན་རེ༔ བློ་བུར་མ་ངེས་ཐོག་འབབས་ཚུལ་དུ་འབྱོན༔ སྙིང་པོའི་བསྟན་པ་མཐའ་ནས་མཐའ་རུ་རྒྱས༔ བོད་ཁམས་འགྲོ་བའི་བསམ་པ་ལྷུན་གྱིས་གྲུབ༔ དེ་ཕྱིར་ད་ལྟར་བཞུགས་པའི་རྗེས་འབྲངས་དང་༔ མ་འོངས་འབྱུང་འགྱུར་ལས་ཅན་སྣོད་ལྡན་ཀུན༔ མི་བསླུ་ངེས་པ་པདྨའི་བཀའ་ཡིན་པས༔ ཐུགས་ བསྐྱེད་རྩལ་ཕྱུངས་ང་ཡི་གསུང་བཞིན་སྒྲུབས༔ རང་གཞན་དོན་གཉིས་འགྲུབ་བོ་ཨེ་མ་ཧོ༔ ཞེས་བཀའ་སྩལ་པ་ན་བདག་ཅག་རྗེས་འབྲངས་ཐམས་ཅད་ཀྱིས་ཀྱང་མགྲིན་གཅིག་ཏུ་ཕྱག་དང་བསྐོར་བ་གྲངས་མེད་པ་བྱས༔ ཞབས་སྤྱི་བོར་བླངས༔ བསམ་པ་ཐག་པས་སྨོན་ལམ་རླབས་པོ་ཆེ་བཏབ་པ་ན༔ ནམ་མཁའི་ཁམས་ཀུན་འཇའ་དང་༔ འོད་དང་༔ རོལ་མོའི་སྒྲ་དང་༔ མཆོད་པའི་སྤྲིན་ཕུང་སྣ་ཚོགས་ཀྱིས་གང་བའི་དབུས་ནས་སངས་རྒྱས་དང་བྱང་ཆུབ་སེམས་དཔའ་གྲངས་མེད་པ་མངོན་སུམ་དུ་བྱོན་ཏེ་གུ་རུ་རིན་པོ་ཆེ་དང་ལྷན་གཅིག་ཏུ་སྨོན་པ་འགྲུབ་པའི་མཐུན་འགྱུར་གྱི་སྒྲ་དབྱངས་བསྒྲགས་ཤིང་༔ མེ་ཏོག་གི་ཆར་ཕབས༔ མཐར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་གུ་རུ་རིན་པོ་ཆེ་ལ་འདུས༔ གུ་རུ་ཉིད་ཉི་ཟེར་ལ་ཆིབས་ཏེ་ལྷོ་ནུབ་སྲིན་པོ་འདུལ་བའི་ཕྱིར་ནམ་མཁའི་ལམ་ནས་ཞལ་ཐལ་ལེར་གཤེགས་པར་གྱུར་ཏོ༔ ས་མ་ཡ༔ རྒྱ་རྒྱ༔ དེ་ནས་གུ་རུ་རིན་པོ་ཆེ་སྲིན་པོའི་ཡུལ་དུ་གཤེགས་པའི་རྗེས༔ མི་ལོ་ལྔ་བཅུ་ཐམ་པར་རྗེས་འབྲང་རང་རང་གིས་ཉམས་སུ་བླངས་ཏེ་དངོས་གྲུབ་གཉིས་ཀྱི་དགའ་སྟོན་སྤེལ༔ རང་གཞན་གྱི་དོན་མཐར་ཕྱིན་པའི་ཚེ༔ གུ་རུ་རིན་པོ་ཆེའི་བཀའ་བཞིན་ཁོ་མོ་མཚོ་རྒྱལ་གྱིས་དཔེ་རྣམས་གཅིག་ཏུ་བསྡུས་ཏེ་སྐོར་ཚོ་སོ་སོར་ཕྱེས༔ ཁྱད་པར་གདམས་པའི་མཐར་ཐུག་འདི་ཉིད་གུ་རུ་རང་གིས་བྱིན་གྱིས་རླབས་པའི་སྤྲུལ་པའི་བརྡ་ཡིག་ལ་བསྟིམ་ནས༔ སྐུ་ཚབ་མཐོང་གྲོལ་དངོས་གྲུབ་དཔལ་འབར་དང་ལྷན་གཅིག་ཏུ་གླང་པོ་ཆེ་ས་སྲུང་གི་གི་ཝཾ་གྱིས་བམ་པོར་བྱས་ཏེ༔ མདོ་ཁམས་རྩི་རྐེ་འདུས་པའི་གནས༔ བྲག་རི་རིན་ཆེན་འབར་བའི་མགུལ་དུ་གཏེར་དུ་སྦས༔ གཏེར་བདག་ཀླུ་བཙན་དྲག་པོ་སྤུན་བདུན་ལ་གཏད་ཅིང་སྨོན་ལམ་གདབ་པ་ནི༔ རྩ་གསུམ་རྒྱལ་བ་འདུས་པའི་ཡེ་ཤེས་སྐུ༔ ཡིད་བཞིན་ནོར་བུ་གུ་རུ་བདེ་བ་ཆེའི༔ བསླུ་མེད་རྡོ་རྗེའི་གསུང་གིས་ལུང་བསྟན་ལྟར༔ མཐོང་གྲོལ་རྟེན་དང་ཟབ་མོའི་གདམས་པ་བཅས༔ མ་འོངས་དོན་ཕྱིར་གཏེར་དུ་སྦས་པ་འདི༔ དུས་སུ་བབ་ཚེ་ལས་ཅན་སྐྱེས་བུས་རྙེད༔ བྱིན་རླབས་སྟོབས་ཀྱི་ཚུལ་བཞིན་གཏན་ཕབས་ནས༔ གཞན་དོན་འགྲོ་འདུལ་ཕྲིན་ལས་མཐར་ཕྱིན་ཤོག༔ ཅེས་བརྗོད་པ་ན༔ གུ་རུ་བཀའ་དྲིན་ཅན་གྱིས་ཀྱང་སྐད་ཅིག་གིས་གློག་འཁྱུགས་པ་ལྟར་ཐུགས་རྗེའི་གཟུགས་སྐུ་མངོན་དུ་སྣང་བར་མཛད་ཅིང་མེ་ཏོག་གི་ཆར་དབབ་པ་དང་བཅས་བདེན་པའི་གསུང་གིས་སླར་ཡང་དབུགས་འབྱིན་ཆེན་པོ་སྩལ་བར་མཛད་དོ༔ ས་མ་ཡ༔ རྒྱ་རྒྱ༔ གཏེར་རྒྱ༔ སྦས་རྒྱ༔ གསང་རྒྱ༔ སྤྲུལ་པའི་གཏེར་ཆེན་མཆོག་གྱུར་བདེ་ཆེན་གླིང་པས་རྩི་རྐེ་རིན་ཆེན་འབར་བའི་བྲག་གི་མགུལ་ནས་སྤྱན་དྲངས་པའི་མཐོང་གྲོལ་བདུད་རྩི་ལྔ་ཤོག་ལས༔ ས་ཕོ་རྟའི་ལོའི་མགོ་ཟླ་བའི་དཀར་ཕྱོགས་ཀྱི་རྒྱལ་བ་གསུམ་པར་གཏན་ལ་ཕབ་རིམ་བཞིན་དུ་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག | {{TibP|༁ྃ༔ ༔བླ་མའི་ཐུགས་སྒྲུབ་ཡིད་བཞིན་ནོར་བུ་ལས༔ ལོ་རྒྱུས་ཤེལ་གྱི་ཕྲེང་བ་བཞུགས་སོ༔ | ||
༁ྃ༔ ༔་་་་་་་་་༡༢༣༤༥༥༦༦༧་་་་་་་་༔ མ་བཅོས་སྤྲོས་མེད་ཀུན་བཟང་པདྨ་འབྱུང་༔ བདེ་ཆེན་རིགས་ལྔ་སྒྱུ་འཕྲུལ་དྲ་བའི་བདག༔ གང་འདུལ་སྤྲུལ་པའི་རིག་འཛིན་རྩལ་འཆང་རྗེ༔ རྩ་གསུམ་རྒྱ་མཚོའི་སྤྱི་དཔལ་ཆེན་པོར་འདུད༔ དེ་ལ་སངས་རྒྱས་རྣམས་ཀྱི་ཐུགས་རྗེ་ཚད་མེད་པས་སེམས་ཅན་གྱི་ཁམས་ཡལ་བར་མི་འདོར་བའི་ཕྱིར༔ གདུལ་བྱ་རྣམས་དང་སྐལ་བ་མཚམས་པར་མཛད་པ་བཅུ་གཉིས་བསྟན་པ་མཆོག་གི་སྤྲུལ་པའི་སྐུ་དང་༔ དེ་དང་ཚུལ་མཐུན་པ་མཁས་པ་དང་༔ གྲུབ་པ་དང་༔ རིག་པ་འཛིན་པ་དང་༔ དཔའ་བོ་དང་༔ རྣལ་འབྱོར་མ་དང་༔ མིའི་བདག་པོ་ལ་སོགས་པའི་རྣམ་པར་བསྟན་ནས་གནས་སྐབས་དང་མཐར་ཐུག་གི་འབྲས་བུ་ལ་སྦྱོར་བར་མཛད་པ་ལས༔ བྱེ་བྲག་མི་མཇེད་འཇིག་རྟེན་གྱི་ཁམས་ལྷོ་ཕྱོགས་འཛམ་བུའི་གླིང་འདིར་སངས་རྒྱས་ཤཱཀྱ་ཐུབ་པར་བསྟན་ནས་མངོན་པར་བྱང་ཆུབ་པའི་ཡེ་ཤེས་བརྙེས་ཏེ༔ ཆོས་ཀྱི་འཁོར་ལོ་རིམ་པ་གསུམ་དང་༔ རྡོ་རྗེའི་སྔགས་རྒྱུད་ནམ་མཁའི་མཐའ་ཀླས་པས་སྐལ་བ་དང་ལྡན་པ་རྣམས་ཡོངས་སུ་སྨིན་པར་མཛད་དེ༔ རྟག་པར་ཞེན་པ་རྣམས་ལྡོག་པའི་ཕྱིར་ཡོངས་སུ་མྱ་ངན་ལས་འདས་པའི་ཚུལ་བསྟན༔ ཆད་ལྟ་སུན་འབྱིན་པའི་ཕྱིར་སླར་ཡང་དྷ་ན་ཀོ་ཥ་ཀླུའི་ཕོ་བྲང་དུ་སངས་རྒྱས་གཉིས་པ་མཚོ་སྐྱེས་རྡོ་རྗེའི་སྐུར་བཞེངས་ཏེ༔ ཨོ་རྒྱན་དང་༔ རྒྱ་གར་དང་༔ ཟ་ཧོར་དང་༔ ཁ་ཆེ་དང་༔ སིངྒ་ལའི་གླིང་སོགས་གླིང་ཆེན་དང་གླིང་ཕྲན་དུ་མར་གཤེགས་ཏེ༔ ལྷ་དང་༔ མི་དང་༔ ལྷ་མ་ཡིན་དང་༔ གནོད་སྦྱིན་དང་༔ འབྱུང་པོའི་ཚོགས་དཔག་ཏུ་མེད་པའི་དོན་མཛད་པའི་ཚུལ་ནི་མཐའ་ཡས་ཤིང་བརྗོད་པའི་ཡུལ་ལས་འདས་པ་ཡིན་ལ༔ ཁྱད་པར་སྔོན་གྱི་ཐུགས་བསྐྱེད་རྨད་དུ་བྱུང་བས༔ གདོང་དམར་བོད་ཀྱི་ཡུལ་འདིར་ཆོས་སྐྱོང་བའི་རྒྱལ་པོ་ཡབ་གཅིག་ཁྲི་སྲོང་ལྡེའུ་བཙན་གྱིས་སྤྱན་དྲངས་པ་ལྟར་གཤེགས་ཏེ༔ ལྷ་སྲིན་རྣམས་བཏུལ༔ གཙུག་ལག་ཁང་མང་དུ་བཞེངས་དམ་པའི་ཆོས་ཀྱྀ་སྒྲོན་མེ་ཆེན་པོ་སྦར༔ ཟབ་ཅིང་ཆེས་དཀོན་པའི་གདམས་པ་འབུམ་ཕྲག་མང་པོ་སྐད་ཅིག་རེས་བསྟན་ཏེ༔ རེ་ཞིག་དེ་ཙམ་གྱིས་སྐུ་དངོས་ཀྱི་གདུལ་བྱ་རྫོགས་པར་དགོངས་ནས༔ ཆོས་དང་ནོར་གྱི་གཏེར་ཁ་དུ་མ་བྱིན་གྱིས་བརླབས་པའི་གནས་རྣམས་སུ་སྦས་ཏེ༔ མ་འོངས་པ་ན་ལས་དང་སྐལ་བར་ལྡན་པ་རྣམས་ཀྱིས་སྤྱོད་པའི་སྨོན་ལམ་དང་བཅས་གཏེར་བདག་སྲུང་མ་རྣམས་ལ་རྡོ་རྗེའི་བཀའ་ནན་གྱིས་གཉེར་དུ་གཏད་པར་མཛད་དོ༔ ས་མ་ཡ༔ རྒྱ་རྒྱ༔ དེ་ལྟ་བུའི་རྫོགས་པའི་སངས་རྒྱས་གུ་རུ་རིན་པོ་ཆེ་ཡིད་བཞིན་ནོར་བུ་དེ་ཉིད་ལྷོ་ནུབ་སྲིན་པོ་འདུལ་བ་ལ་དགོངས་པ་མངོན་དུ་གཏད་ནས་གཤེགས་པའི་ཚེ༔ བྲག་དམར་འོམ་བུས་གཏིབས་པའི་ཚལ་ནས༔ མང་ཡུལ་གུང་ཐང་ལ་ཐོག་གི་བར་མངའ་བདག་རྗེས་འབྲངས་རྣམས་ཀྱི་སྐུ་རྗེས་བསྙེགས་ཏེ་ཕྱག་བསྐྱེལ་ལ་བྱོན་པའི་སྐབས་སུ༔ དཔལ་ལྷའི་སྲས་པོ་ཐ་ཆུང་མུ་ཁྲི་བཙན་པོས་གུ་རུའི་ན་བཟའི་སྣེ་མོ་ལ་འཇུས་ཏེ༔ ཤུགས་རིང་དང་སྤྱན་ཆབ་འབྱིན་ཞིང་གདུང་བའི་སྨྲེ་སྔགས་མང་དུ་བཏོན༔ ཁྱད་པར་ཞལ་ཚབ་ཀྱི་གདམས་པ་ཟབ་མོ་མཐར་ཐུག་པ་ཞིག་གནང་དུ་གསོལ་བར་ཞུས་པ་ནི༔ ཀྱེ་མ་གུ་རུ་རིན་པོ་ཆེ༔ བསྟན་པའི་ཉི་མ་པད་འབྱུང་ཁྱེད༔ བོད་དུ་མི་བཞུགས་བཞུད་པའི་ཚེ༔ བདག་ཅག་རྗེས་འབྲངས་སྙིང་མ་དགའ༔ དཔྲལ་བའི་མིག་དང་ཁོག་པའི་སྙིང་༔ ད་ལྟར་ས་ལ་བྱུང་སྙམས་བགྱིད༔ ཇི་ལྟར་བསྲན་ཀྱང་མ་ཚུགས་ཏེ༔ སྨྲེ་སྔགས་གདུང་བས་གསོལ་བཏབ་ཀྱང་༔ ཐུགས་རྗེས་མི་འཛིན་ཇི་ལྟ་བུ༔ ངེས་པར་སྲིན་པོ་འདུལ་གཤེགས་ན༔ ཞལ་ཆེམས་མན་ངག་བཅུ་གསུམ་པོ༔ ཐུན་མོང་ཙམ་ཞིག་བསྟན་ནའང་༔ ད་དུང་བདག་ཅག་བློ་མ་ཚིམ༔ གུ་རུ་བོད་ཡུལ་མི་བཞུགས་ཀྱང་༔ དངོས་དང་ཁྱད་མེད་ཞལ་གྱི་ཚབ༔ བདག་ཅག་བློ་གཏད་གཅིག་ཆོག་ཆོས༔ ཀུན་འདྲིལ་ཟབ་ལ་རྣོ་མྱུར་ཅན༔ སྨིན་གྲོལ་གདམས་པ་ཡོངས་རྫོགས་པའི༔ ཞལ་གདམས་མན་ངག་དང་བཅས་པ༔ ཁྱད་པར་འཕགས་པ་མ་སྩལ་ན༔ ཐུགས་ཀྱི་གཏིང་ནས་བརྩཻ་བ་ཡིས༔ བོད་འབངས་བསྐྱངས་ཞེས་རྫུན་དུ་ཐལ༔ དེ་བས་ཐུགས་ཀྱིས་དམ་དགོངས་ལ༔ མཐོང་ཐོས་དྲན་རེག་ཀུན་གྲོལ་བའི༔ སྙིང་པོའི་གདམས་པ་སྩལ་དུ་གསོལ༔ ཞེས་གསོལ་ཏེ་རྗེས་འབྲངས་འདུས་པ་ཐམས་ཅད་ཀྱིས་གུས་པའི་མིག་གིས་གུ་རུའི་ཞལ་ལ་ཅེ་རེ་བལྟས༔ ལུས་ཀྱི་རྒྱན་དང་གོས་རྣམས་བཀྲོལ་ཏེ་ཕུད་ནས་གུ་རུའི་ཕྱོགས་སུ་གཏོར་ཞིང་སྤུངས༔ མགྲིན་གཅིག་ཏུ་སྨྲེ་ངག་གིས་གསོལ་བ་བཏབ༔ ཕྱག་གྲངས་མེད་པར་བཙལ་བའི་མཐར༔ ལྷ་སྲས་ཉིད་གདུང་བའི་ཤུགས་ཀྱིས་བརྒྱལ་ཞིང་ས་ལ་འགྱེལ་བར་གྱུར་ཏོ༔ དེའི་ཚེ་དེའི་དུས་ན་གུ་རུ་རིན་པོ་ཆེ་ཉིད་ཀྱང་ཐུགས་རྗེའི་འཇུག་པ་ལྷག་པར་གཡོས་ཏེ༔ ལྷ་སྲས་ཀྱི་སྙན་ཁུང་དུ་ལྗགས་ཀྱི་མཆིལ་མ་གཏོར་ཞིང་བརྒྱལ་བ་ལས་བསླངས་ཏེ་ཕྱག་གིས་བྱུགས་ཤིང་དབུགས་དབྱུང་༔ མདུན་དུ་འཁོད་པ་ན་སྐུ་གསུང་ཐུགས་ཀྱི་རྫུ་འཕྲུལ་མཐའ་ཡས་པ་སྤྲོ་བ་དང་༔ བསྡུ་བར་མཛད་དེ༔ ཐུགས་སྒྲུབ་ཐམས་ཅད་ཀྱི་མཐར་ཐུག་པ་གུ་རུ་བདེ་བ་ཆེན་པོའི་སྨིན་གྲོལ་ཆིག་རྫོགས་སུ་སྩལ་ཞིང་༔ ཐུན་མོང་དང་ཐུན་མོང་མ་ཡིན་པའི་མན་ངག་བཅུ་གསུམ༔ ཉོན་མོངས་རང་གྲོལ་གྱི་ཟབ་ལམ་པདྨའི་སྙིང་ཏིག་དང་བཅས་པ་རྣམས་གནང་ངོ་༔ ས་མ་ཡ༔ རྒྱ་རྒྱ༔ ཁྱད་པར་དེའི་ཚེ་དེའི་དུས་ལྷ་སྲས་ལ་བརྩེ་བས་དགོངས་ཏེ་ཞལ་ཆེམས་འདི་སྐད་ཅེས་ཀྱང་བཀའ་སྩལ་ཏོ༔ ཨེ་མ་ཉོན་ཅིག་ཆོས་ཀྱི་འཁོར་ལོས་སྒྱུར༔ བོད་ཀྱི་ལྷ་སྲས་རྗེས་འབྲངས་དད་པ་ཅན༔ བདག་ལ་མོས་ཤིང་རབ་ཏུ་གདུང་བ་ཡིས༔ གསོལ་བཏབ་འབྲས་བུུ་སྙིང་པོ་སྙིང་པོའི་བཅུད༔ གདམས་པའི་མཐར་ཐུག་པདྨའི་ཞལ་ཚབ་འདི༔ སྙིང་དུ་ཆོངས་ལ་ང་ཡི་བཀའ་རྟགས་རྣམས༔ ཚུལ་བཞིན་བཟུང་ནས་ང་ཉིད་དྲན་པར་གྱིས༔ ཆོས་སྐྱོང་རྒྱལ་པོ་ཁྲི་སྲོང་ལྡེའུ་བཙན་གྱིས༔ སྔོན་གྱི་ཐུགས་བསྐྱེད་སྨོན་ལམ་སད་པའི་མཐུས༔ དཀའ་བ་དུ་མས་པཎ་ཆེན་མཆོག་རྣམས་དང་༔ གྲུབ་པ་ཐོབ་པ་མང་དུ་སྤྱན་དྲངས་ཤིང་༔ འབངས་ནས་མཆོད་གནས་ལོ་ཙཱ་སྤྱི་བོར་བཏོན༔ དེ་རྣམས་མཚམས་སྦྱོར་བསྙེན་བཀུར་རྨད་བྱུང་བས༔ བོད་ཀྱི་ཡུལ་དུ་དམ་ཆོས་བསྟན་པ་སྤེལ༔ རྗེས་འཇུག་ཀུན་ལ་བཀའ་དྲིན་ཆེ་བར་མཛད༔ དེ་ཕྱིར་སྙིང་ནས་དྲིན་དྲན་བརྩོན་པ་བསྐྱེད༔ སྐུ་གསུང་ཐུགས་རྟེན་གཙུག་ལག་མཆོད་པ་དང་༔ དམ་པའི་ཆོས་ལ་འཆད་ཉན་སྒོམ་སྒྲུབ་དང་༔ འདུལ་བ་མདོ་སྡེ་མངོན་པའི་དུས་སྟོན་དང་༔ དགེ་འདུན་རྣམས་ལ་བསྙེན་ཅིང་བསྐུར་བ་དང་༔ མཆོད་གནས་སྡེ་གཉིས་དབུ་འཕངས་བསྟོད་པ་དང་༔ འབངས་འཁོར་རིམ་པར་བྱམས་བརྩེས་བསྐྱང་པ་དང་༔ མ་རུངས་པ་རྣམས་ཐབས་ཀྱིས་བཏུལ་བ་དང་༔ ངན་པའི་མཐར་ཐུག་རྩད་ནས་དབྱུང་བ་དང་༔ ཕ་དང་མ་ལ་ལྷ་བཞིན་བསྐུར་བ་དང་༔ བྱམས་པས་འདྲིས་ལ་ཕྱི་ཐག་བསྲིང་བ་སོགས༔ གཙུག་ལག་དམ་པའི་ཆོས་དང་རྗེས་མཐུན་ཞིང་༔ འཇིག་རྟེན་ཡ་རབས་ལུགས་དང་མི་འགལ་བའི༔ ཡབ་མེས་ཕྱག་སྲོལ་མ་བརྗེད་ལྷ་སྲས་རྗེ༔ དེ་ལྟར་ལྷག་པའི་བསམ་པས་བརྩོན་པ་ན༔ ད་དུང་རེ་ཞིག་སྲིད་ཀྱི་མངའ་ཐང་དང་༔ དམ་ཆོས་བསྟན་པ་ཡང་ནས་ཡང་དུ་རྒྱས༔ འགྲོ་མང་ཐར་པའི་ལམ་ལ་འགོད་པར་འགྱུར༔ ནམ་ཞིག་རྒྱལ་པོའི་གདུང་ལ་བདུད་ཀྱི་བུ༔ གླང་གི་མིང་ཅན་སྡིག་སྤྱོད་ཆེན་པོ་འབྱུང་༔ དེ་ཡིས་ཡབ་མེས་ཕྱག་རྗེས་བཟང་པོ་དང་༔ ཁྱད་པར་སངས་རྒྱས་བསྟན་པ་བསྣུབ་འགྱུར་ཀྱང་༔ ཡེ་ཤེས་དབང་པོའི་སྨོན་ལམ་དག་པ་ལས༔ དན་ཏའི་བྲག་ཏུ་གསལ་བའི་མིང་ཅན་འབྱུང་༔ སྐ་བ་དཔལ་བརྩེགས་ཐུགས་རྗེའི་རང་འོད་ཞིག༔ མངའ་རིས་སྟོད་ན་བཟང་པོའི་ལོ་ཙཱར་སྐྱེ༔ དེ་དང་དེ་ཡི་བརྒྱུད་པ་འཛིན་པ་ཡིས༔ མཐའ་ནས་དབུས་སུ་མདོ་སྔགས་བསྟན་པ་ནི༔ ཐོ་རེངས་སྐར་ཆེན་ཤར་བ་བཞིན་དུ་སྣང་༔ ཁྱད་པར་པདྨ་བདག་གྀ་ཐུགས་བསྐྱེད་ལས༔ བསྟན་པའི་བདག་པོ་དམ་པ་ཇོ་བོ་ཞེས༔ ཟ་ཧོར་རིགས་ལས་བསླབ་གསུམ་ལྡན་པ་ཞིག༔ བོད་ཡུལ་དབུས་འདིར་ཉི་མ་བཞིན་དུ་ཤར༔ བསྟན་པ་དྲི་མ་མེད་པའི་སྲོལ་བཙུགས་ཏེ༔ མཐའ་དབུས་ཀུན་ཏུ་རྒྱ་ཆེར་རྒྱས་པར་འགྱུར༔ དེ་ཕྱིར་འཇིག་རྟེན་བདེ་བའི་རྒྱལ་ཁྲིམས་དང་༔ རྒྱལ་ཁྲིམས་སྙིང་པོ་འཛིན་པའི་ཆོས་ཁྲིམས་རྣམས༔ ད་ལྟའི་ཕྱག་སྲོལ་བཟང་པོ་ཇི་ལྟ་བར༔ ཚུལ་བཞིན་མ་ཉམས་སྐྱོངས་ཤིག་ལྷ་ཡི་སྲས༔ མ་འོངས་ཐ་མའི་རྒྱལ་བརྒྱུད་ཀུན་ལའང་༔ ལུགས་གཉིས་སྤྱོད་སྲོལ་དྲི་མ་མེད་པ་དང་༔ ཆོས་བཞིན་སྤྱོད་པའི་བཀའ་ཆེམས་ཡང་ཡང་ཞོག༔ འགའ་ཞིག་སྲས་དང་བློན་པོར་ནན་གྱིས་གདམས༔ འགའ་ཞིག་ཡི་གེར་བྲིས་ལ་གཏེར་དུ་སྦོས༔ ལ་ལ་རྒྱལ་པོའི་མཛོད་ཀྱི་ཕུགས་སུ་བསྟིམས༔ ལ་ལ་སྲ་བའི་རྡོ་རིང་ལོག་སུ་ཐོབ༔ དེ་ལྟར་བཀའ་ཡི་ནན་ཐག་བསྡམས་བྱས་ན༔ སྨོན་ལམ་ལོག་པ་རེ་རེ་ཙམ་མ་གཏོགས༔ ཕལ་ཆེར་ཀུན་གྱིས་ཚད་མར་བཟུང་ནས་ཀྱང་༔ སངས་རྒྱས་བསྟན་པ་མཐའ་ནས་མཐའ་རུ་རྒྱས༔ རྒྱ་གར་ཁ་ཆེ་ཟ་ཧོར་ལི་ཡུལ་སོགས༔ ཡུལ་ཆེན་ཡུལ་ཕྲན་ཕལ་མོ་ཆེ་རྣམས་སུ༔ སངས་རྒྱས་བསྟན་པ་འགྲིབ་པའི་དུས་སུའང་༔ བོད་ཀྱི་ཡུལ་འདིར་བཤད་སྒྲུབ་མ་ཆད་པའི༔ བསྟན་པའི་སྲོག་རྩ་ཡུན་ཏུ་གནས་པར་འགྱུར༔ དེ་ཕྱིར་སྤྲོ་བ་བསྐྱེད་ལ་བརྩོན་པས་སྒྲུབས༔ ཐུགས་ངལ་མ་མཛད་ལྷ་སྲས་བོད་ཀྱི་རྗེ༔ འདི་དང་ཕྱི་མའི་གནས་སྐབས་ཐམས་ཅད་དུ༔ རང་གཞན་ཕན་བདེ་འགྲུབ་པར་གདོན་མི་ཟ༔ ཞེས་གསུངས་སོ༔ སླར་ཡང་ལྷ་སྲས་ཀྱིས་ཞུས་པ༔ དུས་གསུམ་མཁྱེན་པའི་གུ་རུ་རིན་པོ་ཆེ༔ བཀའ་དྲིན་མཉམ་མེད་བདག་ཅག་ཡོངས་ཀྱི་མགོན༔ སྐྱབས་གནས་ཀུན་འདུས་འདྲེན་པ་མཆོག་ཁྱེད་ཀྱིས༔ ཐུགས་བསྐྱེད་དག་པས་འགྲོ་དྲུག་ཐམས་ཅད་བཏུལ༔ ཁྱད་པར་ཡབ་རྗེ་དགུང་ལོ་བཅོ་བརྒྱད་དུས༔ སྨོན་ལམ་དག་པས་གུ་རུ་བོད་དུ་ཕེབས༔ ལྷ་སྲིན་འབྱུང་པོའི་གདུག་པའི་དཔལ་ཟེར་བཏུལ༔ གཙུག་ལག་ཁང་བཞེངས་དགེ་འདུན་འདུ་བ་སྤེལ༔ བསྟན་པ་གཉིས་ལྡན་བཤད་སྒྲུབ་ཉི་ལྟར་བརྡལ༔ རི་བྲག་གངས་གསུམ་སྒྲུབ་པའི་གནས་སུ་མཛད༔ ཆོས་དང་ནོར་གཏེར་མཐའ་དབུས་ཀུན་ཏུ་སྦས༔ བདེ་སྐྱིད་སྙན་གསུམ་ལྷ་ཡི་ཡུལ་ལས་ལྷག༔ འབྲེལ་ཚད་ཐམས་ཅད་བྱང་ཆུབ་ལམ་ལ་བཀོད༔ བཀའ་དྲིན་བསམ་ན་ནམ་མཁའི་མཐའ་ལས་བརྒལ༔ འོན་ཀྱང་འདུས་བྱས་རྟག་པ་མིན་པའི་དཔེས༔ ལྷ་གཅིག་ཁྲི་སྲོང་རྒྱལ་པོ་གཤེགས་ནས་ཀྱང་༔ མི་ལོ་ཉི་ཤུ་རྩ་བརྒྱད་སོང་མཚམས་སུ༔ ལྷ་སྲས་བཙན་པོ་མུ་ཏིག་བཙན་པོ་ནི༔ བདག་ཅག་སོ་བརྒྱད་ལོན་ནས་དགུང་དུ་ཡལ༔ དམ་འཛིན་ཁམས་ཀྱི་ཕྱོགས་སུ་བྱོན་ནས་ཀྱང་༔ འཇིག་རྟེན་སྲིད་བསྐྱང་གྲུབ་པ་མཐར་ཕྱིན་མཛད༔ མདོ་རྒྱུད་ཀུན་ལ་བསྟན་བཅོས་མང་མཛད་དེ༔ ལྷ་སྲས་ལོ་ཙཱ་གཤེགས་ནས་ལོ་བདུན་ཐལ༔ ད་ནི་མུ་ཁྲི་བཙན་པོ་ཁོ་བོ་ཙམ༔ བོད་ཀྱི་ཡུལ་འདིར་གཅིག་པུར་ལུས་པ་ན༔ གུ་རུ་ཐུགས་རྗེ་ཅན་གྱི་བཀའ་ཆེམས་ལྟར༔ རྒྱལ་ཁྲིམས་ཆོས་ཁྲིམས་སྲུང་ཞིང་སྤེལ་ལགས་ཀྱང་༔ ཡང་ཡང་ལུང་བསྟན་རྒྱལ་པོ་གླང་མིང་གིས༔ བསྟན་པའི་ཕུང་བྱེད་ང་ཡི་བརྒྱུད་པ་རྡུག༔ འོན་ཀྱང་མ་འོངས་ཕྱི་མ་ཕྱི་མའི་དུས༔ ད་ལྟའི་ཡོན་མཆོད་ལོ་པཎ་ཐུགས་བསྐྱེད་དང་༔ ཁྱད་པར་གུ་རུ་རྗེ་ཡི་བྱིན་བརླབས་མཐུས༔ རྒྱལ་ཁྲིམས་བསྟན་པའི་དར་ནུབ་འཕོ་འཁྱུགས་སྐབས༔ ད་ལྟའི་དུས་བཞིན་ཐམས་ཅད་ཞལ་འཛོམས་ནས༔ བསྟན་འགྲོའི་ཕན་བདེ་སྤེལ་ཞེས་གསུངས་པ་དང་༔ ཁྱད་པར་ཡབ་དང་བདག་ཅག་སྲས་གསུམ་གྱིས༔ བོད་འབངས་ཡང་ཡང་བསྐྱང་ཞེས་བཀའ་སྩལ་ཞིང་༔ དེ་ཡི་དུས་སུ་ཇི་ལྟར་འབྱུང་བ་ཡི༔ ལུང་བསྟན་ཞལ་གདམས་བསམ་གྱིས་མི་ཁྱབ་ཀྱང་༔ བདག་ཅག་ཡོན་མཆོད་འབྲལ་ཀའི་ཞལ་ཆེམས་མཐིལ༔ སྙིང་པོར་དྲིལ་བ་བླཽ་གཏད་གཅིག་ཆོག་གསུངས༔ མཐོང་བས་ཡིད་ཚིམ་བསམ་པས་དོན་གྲུབ་པ༔ ངེས་པའི་དོན་དུ་གུ་རུས་བཀའ་གནང་སྩོལ༔ ཅེས་ཞུས་པས༔ གུ་རུ་རིན་པོ་ཆེས་བཀའ་སྩལ་པ༔ ཨེ་མ་འཕགས་པའི་བྱིན་རླབས་ཐུགས་རྗེའི་འཕྲུལ༔ འོད་གསལ་ལྷ་ལས་ཆད་པ་རིགས་ཀྱི་རྒྱལ༔ ལེགས་ཉེས་སྤྱན་འབྱེད་རྒྱལ་སྲས་དད་པ་ཅན༔ བདག་ལ་གདུང་བས་གསོལ་བ་བཏབ་པ་ལེགས༔ ངས་བཤད་རྩེ་གཅིག་ཐུགས་ཀྱི་མཐིལ་དུ་ཟུང་༔ མ་འོངས་ཐ་མའི་དུས་སུ་ནུབ་ཕྱོགས་ནས༔ ང་ཡི་གཏེར་འབྱིན་བརྒྱ་སྟོན་ཞེས་བྱ་འབྱུང་༔ དེ་ནས་རིམ་པར་ཟབ་མོའི་གཏེར་གྱི་སྒོ༔ མ་ནོར་འབྱེད་པ་ནམ་མཁའི་སྐར་ཚོགས་ཙམ༔ བསམ་གྱིས་མི་ཁྱབ་འགྲཽ་བའི་དཔལ་དུ་འབྱུང་༔ ལ་ལས་དངོས་གཏེར་ཁྲོམ་ཚོགས་དཀྱིལ་ནས་འདོན༔ འགའ་ཞིག་ཤིན་ཏུ་གསང་བའི་ཚིག་གཏེར་འདོན༔ ལ་ལར་གཏེར་སྲུང་དངོས་ཀྱིས་རྩོལ་མེད་སྤྲོད༔ འགའ་ཞིག་དཀའ་རྒུ་སྤྱད་ནས་ཟབ་གཏེར་ལེན༔ སྐབས་རེར་རྟེན་འབྲེལ་དབང་གིས་འཕྲལ་གཏེར་འབྱུང་༔ རེས་འགའ་ཐུགས་གཏེར་དགོངས་པའི་ཀློང་ནས་རྡོལ༔ འགའ་ཞིག་ལྷ་དང་མཁའ་འགྲོས་དངོས་སུ་སྟོན༔ ལ་ལས་བཏོན་ཀྱང་རང་ཉམས་ཁོ་ན་ལེན༔ ཕལ་ཆེར་ལོ་གྲངས་བཀའ་རྒྱ་བཏབ་ནས་སྤེལ༔ ལ་ལས་ཁ་བྱང་ལུང་བསྟན་གསལ་གྱུར་ཀྱང་༔ དངོས་སུ་མི་འདོན་བཀའ་རྙིང་བསྟན་པ་བསྐྱང་༔ དེ་ལྟར་ཚད་ལྡན་སྐྱེས་བུ་དེ་དག་གིས༔ གང་ལྟར་སྤྱོད་ཀྱང་པདྨ་བདག་ཉིད་ཀྱི༔ བྱིན་རླབས་སྔོན་སྨོན་དབང་གི་བྱེ་བྲག་སྟེ། འབྲེལ་ཚད་འཚིངས་ཤིང་དོན་དང་ལྡན་པ་ཡིན༔ ཁྱད་པར་འཇམ་དཔལ་སྤྲུལ་པའི་རྒྱལ་པོ་ནི༔ ཡབ་གཅིག་ཁྲི་སྲོང་སྐྱེ་བ་བཅུ་གསུམ་དུ༔ བདག་གིས་བྱིན་རླབས་གདམས་པ་ཉམས་བླངས་པས༔ གསང་སྔགས་ནང་གི་ས་ལམ་མ་ལུས་བགྲོད༔ མངོན་པར་བྱང་ཆུབ་ཡེ་ཤེས་ཆེ་བརྙེས་ནས༔ སླར་ཡང་སྐུ་གསུང་ཐུགས་ཡོན་ཕྲིན་ལས་ཀྱི༔ སྤྲུལ་པ་གྲངས་ཅན་གྲངས་མེད་བསམ་མི་ཁྱབ༔ བོད་ཁམས་མཐའི་དབུས་ཀུན་ཏུ་ཡང་ཡང་འབྱུང་༔ ཟབ་གཏེར་ཉེར་ལྔ་ཁྱད་པར་ཐུགས་གཏེར་ལྔ༔ ཉི་མ་འོད་ཟེར་སྤང་རྗེ་སྟོན་པ་སོགས༔ སྨོན་ལམ་དག་པས་སྤྲུལ་སྐུ་རྣམས་ཀྱིས་བཏོན༔ བདག་གིས་དབང་ལུང་གདམས་པའི་བཀའ་གཏད་ནས༔ བླ་རྫོགས་ཐུགས་གསུམ་སྒྲུབ་སྡེ་བརྒྱད་ལ་སོགས༔ སྙིང་པོའི་བསྟན་པའི་སྲོག་རྩ་ཟིན་པ་འབྱུང་༔ མུ་ཏིག་བཙད་པོ་བློ་གྲོས་མཆོག་དང་ལྡན༔ སྐྱེ་བ་བཅུ་གསུམ་སྤྲུལ་པ་ཉི་ཤུ་ལྔ༔ རབ་བྱུང་སྔགས་པ་གཏེར་འབྱིན་ས་སྐྱོང་སོགས༔ ངེས་དང་མ་ངེས་འབྲེལ་ཚད་དོན་དང་ལྡན༔ ལྷ་སྲས་ཁྱོད་ཀྱང་སྐྱེ་བ་བཅུ་བདུན་དུ༔ འགྲོ་དོན་དཔག་མེད་ནམ་མཁའི་མཐའ་དང་མཉམ༔ དེ་ནས་རེས་འགའ་ཨོ་རྒྱན་བདག་ཉིད་དང་༔ དབྱེར་མེད་ཐུགས་ཀྱི་དགོངས་ཀློང་གཅིག་ཏུ་འཁྱིལ༔ རེས་འགའ་ཉི་མ་ལས་ནི་འོད་ཟེར་བཞིན༔ སྤྲུལ་པ་མང་པོས་འགྲོ་བའི་ཁ་ལོ་བསྒྱུར༔ དམ་འཛིན་ལོ་ཙས་པདྨ་བདག་ཉིད་ལ༔ ཟབ་ཅིང་རྒྱ་ཆེའི་གདམས་པ་དཔག་མེད་ཞུས༔ ཉིན་མཚན་མི་དལ་བརྩོན་འགྲུས་ཆེན་པོ་ཡིས༔ བསྒྱུར་བཤད་འཆད་ཉན་བསྒོམ་སྒྲུབ་བགྱིས་པའི་མཐུས༔ མ་འོངས་དུས་ཀྱང་སྤྲུལ་པའི་ཕྲེང་བ་ཡིས༔ ཆོས་མཛོད་ཆེན་པོར་རང་དབང་བསྒྱུར་བ་འབྱུང་༔ དེ་ལས་བྱེ་བྲག་སུམ་ཅུ་ཁ་རལ་དུས༔ མདོ་ཁམས་མཐིལ་དུ་སྔགས་སྐྱེས་རྗེའུའི་རིགས༔ ནོར་བུའི་མིང་ཅན་སྒྱུ་མའི་སྤྲུལ་པ་ཡི༔ ཟབ་རྒྱས་གཏེར་གྱི་བང་མཛོད་ཁ་བྱེ་ཚེ༔ ད་ལྟའི་དུས་ཀྱི་ལོ་པན་ཕལ་མོ་ཆེ༔ དབུས་གཙང་ཁམས་གསུམ་བསྟན་པ་སྤེལ་ཕྱིར་འབྱུང་༔ ང་ཡི་ཟབ་ཆོས་སྙིང་པོར་དྲིལ་བ་རྣམས༔ ཆུ་བུར་བཞིན་དུ་གང་འདོད་ས་ནས་རྡོལ༔ དེ་དག་ཉན་བཤད་སྒྲུབ་དང་འཆང་བ་རྣམས༔ ཨོ་རྒྱན་ང་ཡི་ཐུགས་རྗེས་ངེས་པར་འཛིན༔ དེ་ཚེ་རྒྱལ་བློན་པཎ་གྲུབ་ལོ་ཙཱ་རྣམས༔ ལ་ལ་བླ་མ་ལ་ལ་མཁན་པོ་དང་༔ ལ་ལ་རྒྱལ་པོ་ལ་ལ་བློན་པོ་དང་༔ ལ་ལ་འབངས་དང་ལ་ལ་སྔགས་པའི་སྡེ༔ རང་ཚུལ་འཛིན་པ་བསམ་གྱིས་མི་ཁྱབ་པས༔ ང་ཡི་ཟབ་ཆོས་གཏེར་དུ་སྦས་པ་རྣམས༔ སྤྱན་དྲངས་བྱེད་པའི་ལས་ཅན་གཏེར་སྟོན་དང་༔ འགའ་ཞིག་དེ་ཡི་ཐུགས་རྒྱུད་བསྐུལ་བ་དང་༔ འགའ་ཞིག་དེ་ལ་མངའ་གསོལ་བྱེད་པ་དང་༔ འགའ་ཞིག་དེ་ཡི་ཕྲིན་ལས་བསྐྱང་པ་དང་༔ འགའ་ཞིག་ཟབ་དོན་རྩེ་གཅིག་བསྒོམ་པ་དང་༔ འགའ་ཞིག་སྨིན་གྲོལ་རྒྱ་ཆེར་འཆད་པ་དང་༔ འགའ་ཞིག་དགོངས་འགྲེལ་བསྟན་བཅོས་རྩོམ་པ་དང་༔ འགའ་ཞིག་དེ་ཡི་རྩོད་པ་ཟློག་པ་དང་༔ འགའ་ཞིག་དེ་ཡི་སྦྱིན་བདག་བྱེད་པ་དང་༔ འགའ་ཞིག་ཐུགས་ཀྱྀ་གཟུངས་མ་བྱེད་པ་དང་༔ གཞན་ཡང་བསྟོད་ཅིང་བསྔགས་པ་སྒྲོགས་པ་སོགས༔ གཅིག་ལ་གཅིག་གྲོགས་གཅིག་གིས་གཅིག་སྤེལ་བས༔ བསྟན་པ་འུར་ཆེམ་འབྲུག་ལྟར་གྲགས་པར་འགྱུར༔ དེ་ཡི་དུས་སུ་པདྨ་བདག་ཉིད་དང་༔ ཐུགས་བསྐྱེད་དག་པའི་ཡབ་སྲས་རྗེས་འབྲངས་ཀྱིས༔ མ་འོངས་དོན་དུ་དཀའ་བ་དང་བླངས་ཏེ༔ ཡིད་ཆེས་བསྐྱེད་པའི་ལོ་རྒྱུས་ཐང་ཡིག་དང་༔ ངེས་ཤེས་སྟེར་བའི་ལུང་བསྟན་མ་བུ་དང་༔ བླངས་དོར་སྙིང་པོར་བརྩེ་བའི་ཞལ་གདམས་དང་༔ དངོས་གྲུབ་གཉིས་སྩོལ་སྨིན་གྲོལ་ཡན་ལག་བཅས༔ བསྟན་པ་སྲུང་བའི་ཆོས་སྐྱོང་དྲག་སྔགས་སོགས༔ གང་ལ་གང་འདུལ་དགོངས་པ་ཟབ་མོའི་གཏེར༔ ལ་ལ་རྒྱལ་པོའི་བླ་དཔེ་བཀླག་ཆོག་དང་༔ ལ་ལ་བོད་ཡིག་བརྡའ་རུ་བསྒྱུར་བ་དང་༔ ལ་ལ་བརྡའ་ཡིག་མདོ་ཙམ་བསྟན་པ་དང་༔ ལ་ལ་བརྡ་དོན་གསང་བའི་ཡི་གེ་དང་༔ ལ་ལ་འཕྲུལ་ཡིག་རྐྱེན་གྱིས་མངོན་པ་དང་༔ ལ་ལ་བལྟར་ཡོད་བཟུང་དུ་མེད་པ་སོགས༔ ཆོས་སྐུའི་ཡེ་ཤེས་རྣམ་པ་ཐམས་ཅད་པ༔ ཅིར་ཡང་འཆར་ཞིང་ཅིར་ཡང་འབྱུང་བའི་ཚུལ༔ སོ་སོའི་སྐྱེ་བོའི་བློ་ལས་འདས་པ་དག༔ རི་བྲག་མཚོ་གསུམ་དགོངས་པའི་ཀློང་སྒྲོམ་དུ༔ སངས་རྒྱས་རྫུ་འཕྲུལ་མ་འགགས་རོལ་པ་ཡིས༔ སྦས་པ་ཐམས་ཅད་ཆུད་མི་ཟོས་པ་རུ༔ ཡང་ཡང་བསྒོམ་སྒྲུབ་བཤད་ཉན་དར་བར་འགྱུར༔ དེ་དུས་སྐབས་ཤིག་མཐའ་དབུས་ཀུན་འཁྲུགས་ཤིང་༔ ཁྱད་པར་ལྕགས་སྤྲེལ་ལོ་ཡི་སྔ་རྗེས་སུ༔ སྟོད་སྨད་གཉིས་ནས་འཁྲུགས་པ་ལོང་ལོང་གཡོ༔ མ་མོ་ཆེན་མོ་བཞི་ཡི་ཕོ་བྲང་འཆའ༔ དམ་སྲི་འབྱུང་པོ་བྱེ་བ་ཕྲག་བརྒྱ་ཡིས༔ རང་དབང་མེད་པར་ཀུན་གྱི་ཡིད་བསྒུལ་ཏེ༔ འཇིག་རྟེན་ཁམས་སུ་ནད་མཚོན་ཆར་པ་འབེབས༔ རོང་འཁྲིས་རྣམས་སུ་ཁྲག་གི་ཆུ་མིག་རྡོལ༔ བཟང་བྱེད་སྨོད་ཅིང་ངན་པའི་ཕྱོགས་སུ་འདུ༔ དེ་དག་ཐམས་ཅད་བཟློག་ཅིང་ཞི་བའི་ཕྱིར༔ མདོ་ཁམས་པདྨ་བཀོད་པའི་མཚོ་གླིང་དང་༔ གངས་རིས་བསྐོར་དང་ཤེལ་གྱི་གུར་ཕུབ་ལ༔ བཤད་སྒྲུབ་གྲྭ་བཙུག་དཀོན་མཆོག་རྟེན་ཡང་བཞེངས༔ སྨན་སྒྲུབ་སྒྲུབ་ཆེན་ལས་སྦྱོར་སྣ་ཚོགས་པ༔ ཤིན་ཏུ་གསང་བའི་ལུང་བཞིན་འབད་པས་བསྒྲུབ༔ བདུད་ཀྱི་དབང་གྱུར་སྐྱེ་བོའི་ཁར་མ་བཏང་༔ རྒྱལ་ཁྲིམས་ཆོས་ཁྲིམས་མ་ཉམས་གཞུང་བཞིན་བསྲང་༔ བསྟན་པའི་གསོས་སུ་གྱུར་པ་ཐམས་ཅད་ལ༔ སྒོ་གསུམ་འབད་པས་རྩལ་དུ་སྤྲུགས་བྱས་ན༔ འགྲོ་ཀུན་བདེ་སྐྱིད་ལྷུན་གྱིས་གྲུབ་པར་འགྱུར༔ འོན་ཀྱང་དེ་དུས་སྨོན་ལམ་ལོག་པ་ཡི༔ རྒྱལ་བླཽན་བདུད་ཀྱི་རིས་གྱུར་མང་ཚོགས་པས༔ ནང་གི་སྙིང་བཏོན་ཕྱི་རུ་འཕྱར་བ་དང་༔ ཕྱི་ཡི་སོ་ཁ་ནང་དུ་བསྟན་པ་ཡིས༔ རང་ཕུང་གཞན་ཕུང་ཕུང་ཐལ་ཆེན་པོར་འབྱུང་༔ མ་རབས་བསྐུར་ཞིང་བཟང་པོའི་དབུ་འཕང་སྨད༔ དགྲ་ལ་བློ་གཏད་གྲོགས་ལ་སྙིང་རིང་བྱེད༔ ལྐོག་ནས་ངན་གཡོ་ངོས་སུ་ཁྱུ་གཅིག་བསྲེ༔ ཆད་ལ་མདོ་མེད་མནའ་ལ་ཅིར་མི་བརྩི༔ རྒྱུ་འབྲས་འཆོལ་སྤྱོད་ལོག་བལྟས་རྒྱུད་རབ་དཀྲུགས༔ མདོར་ན་སྨོན་ལམ་དག་པའི་སྐྱེས་བུ་དང་༔ བར་མའི་སྐྱེ་བོ་རེ་འགའ་མ་གཏོག་པ༔ དབང་ཆེའི་བདུད་དང་དམ་སྲིའི་བློ་བསྒྱུར་ནས༔ བྱ་རུ་མི་རུང་ལས་སྤྱོད་སྣ་ཚོགས་དྲན༔ ནོར་བའི་ལམ་ཞུགས་བཅོས་སུ་མེད་པ་ཡིས༔ ལ་ཡོགས་རྣམ་སྨིན་ཆུ་ཡི་གཉེར་མ་འདྲ༔ ཆོས་ལྟར་བཅོས་པའི་དགེ་སྦྱོང་འགའ་ཞིག་ཀྱང་༔ རྨོངས་པས་མཁས་པའི་གོ་ས་བཟུང་ནས་སུ༔ བཀའ་ལ་ཁུངས་གཡར་ལོག་པའི་ལུང་ཆེན་སྟོན༔ རང་བཟོའི་བསྟན་བཅོས་གཏེར་མིན་གཏེར་འདྲ་བྱེད༔ འགའ་ཞིག་དེ་དང་དེ་ཡི་རྗེས་འབྲངས་ནས༔ བསྟན་པའི་སེལ་གྱུར་གྲུབ་མཐའ་སོ་སོར་གྱེས༔ ཆོས་བྱེད་ནང་འཐབ་ནུབ་འཐབ་འཁྲུགས་པ་འབྱུང་༔ བསམ་གཏན་མི་འཕེལ་ཕྱོགས་ཆའི་སྡེ་རིས་རྩོད༔ བསྟན་པའི་ལག་དམར་མཚམས་མེད་བྱེད་པ་ཡི༔ ཆེ་རྒུ་ཐར་ཐོར་བོད་ཀྱི་ཡུལ་དུ་འབྱུང་༔ རང་ཉིད་དགའ་དང་མི་དགའི་དབང་བྱས་ཏེ༔ ཀུན་རྟོག་རི་མོ་ཨོ་རྒྱན་གསུང་དུ་བརྫུ༔ རང་ཕྱོགས་བསྟོད་ཅིང་གཞན་ཕྱོགས་སྨོད་པ་ཡི༔ ལུང་བསྟན་རྫུན་གྱི་གབ་རྩེ་བསྡེབས་པ་ལས༔ བསྟན་པ་ནང་གཅིག་སྡེ་རིས་མང་དུ་ཕྱེ༔ དེ་ཡི་རྐྱེན་གྱིས་བཤད་སྒྲུབ་རབས་བཅད་པས༔ ཆོས་སྤོང་མཚམས་མེད་ལྔ་ལས་ཐུ་བ་ཡིས༔ རང་གཞན་བསྟན་དང་འགྲོ་ལ་ཆེས་གནོད་པའི༔ ཟོག་པོའི་རྗེས་སུ་མ་འབྲངས་སྙིང་གཏམ་ཡིན༔ མདོ་སྔགས་བསྟན་པ་ཡ་བྲལ་མི་སྤྱོད་པར༔ སངས་རྒྱས་གསུང་རབ་དགོངས་པ་གཅིག་བསྡུས་ནས༔ ཕྱོགས་རེ་ནས་ཀྱང་ཅི་དང་ཅི་འཕེལ་གྱིས༔ བཤད་སྒྲུབ་སྙིང་པོར་དྲིལ་ཅིག་ཕྱི་རབས་རྣམས༔ མ་འོངས་ཆོས་རྒྱལ་ཇི་སྙེད་འབྱོན་ནའང་༔ བློན་པོ་སྡིག་ཅན་ཕུང་དཀྲུགས་ཅན་རྣམས་ཀྱིས༔ རང་མགོ་འདོན་པའི་ཐབས་ཙམ་ལྷུར་བྱེད་པའི༔ ཕུང་བའི་སྤྱོད་པས་བྲང་འོག་བཀང་བྱས་ནས༔ རྒྱལ་ཁྲིམས་ཡིན་ཅེས་ལས་ནི་མ་རུང་པ༔ མཐོན་པོར་འཇོག་ནས་དམའ་བའི་སར་ལྷུང་ཞིང་༔ བཟང་པོར་རློམས་པས་ངན་པའི་མཐིལ་རྡོལ་བ༔ ལག་རྗེས་ནག་པོར་འགྱུར་བ་བདུད་ཀྱི་རིགས༔ བསམ་གྱིས་མི་ཁྱབ་པ་ཡིས་ངེས་པར་ཕུང་༔ དེ་བས་ཕྱི་རབས་རྗེས་འཇུག་རྒྱལ་པོ་རྣམས༔ མ་རུངས་སྡིག་སྤྱོད་གདོལ་པའི་བཙུན་མོ་དང་༔ གཡོ་སྒྱུ་སླུ་བྱེད་བློན་པོའི་ཁར་མ་བཏང་༔ དཀོན་མཆོག་གསོལ་བཏབ་བླ་མའི་ལུང་དང་བསྟུན༔ གཟུ་བོར་དཔྱད་ཅིང་དྲང་པོའི་ལམ་དུ་ཞུགས༔ འཁོར་སྲིད་འདྲེ་ལ་སྐྱེས་པའི་རྒྱལ་འགོང་ཚོགས༔ དམ་སྲི་ལྷ་རུ་བསྟེན་པའི་མཆོད་གནས་འགའ༔ རེ་ཞིག་གྲགས་པ་འབྲུག་ལྟར་ཁྱབ་གྱུར་ཀྱང་༔ ཕུག་ཏུ་རང་ཉིད་སྨྱོན་པའི་གྲལ་མཐར་འདུག༔ སྡུག་ཡུས་ཆོས་ལ་བསྒྱུར་བའི་འདྲེ་ཅན་རྣམས༔ བསྟན་པའི་བླ་ཚོང་རྐང་འདྲེན་དེ་ཡིན་པས༔ བླ་མ་ཡི་དམ་མཁའ་འགྲོ་དཀོན་མཆོག་གསུམ༔ མ་མགོན་ལྕམ་དྲལ་ང་ཡི་ཐ་ཚིག་གིས༔ བསྟན་པའི་གཉེར་གཏད་དམ་ཅན་མ་གཏོགས་པ༔ འདྲེ་སྲིན་སྐྱབས་སུ་མ་ཚོལ་ཕྱི་རབས་རྣམས༔ འདོད་སྲེད་ཞེན་པས་སྐྱེ་བོའི་གྲལ་དག་ལས༔ འཕགས་པར་འདོད་ནས་དེ་ཡི་རྗེས་འབྲངས་མང་༔ བཙུན་པར་མི་ནུས་གྲུབ་ཐོབ་ཁས་འཆེ་བ༔ ཉམས་རྟོགས་མེད་པས་ནུས་རྩལ་མི་འབྱུང་ཡང་༔ རྫུན་གྱི་གྲུབ་རྟགས་སྣ་རེས་སྐྱེ་བོ་བསླུ༔ སྔགས་སྤྱོད་ཡིན་ཟེར་བུད་མེད་ཁྱུ་གཅིག་བསྡུ༔ དམ་སྲི་དངོས་བརླམས་ལོག་པའི་ལུང་མང་བསྟན༔ རྟེན་འབྲེལ་ཐམས་ཅད་འདྲེ་ཡི་ཕྱོགས་སུ་བསྒྲིགས༔ སྨྱོ་ཐབས་མང་པོའི་བརྟུལ་ཞུགས་ཅིར་ཡང་སྟོན༔ ཤེས་ལྡན་ཡི་ཆད་བླུན་པོའི་མགོ་བོ་བསྐོར༔ བསྟན་གཉིས་གང་གི་ཆ་ལུགས་མི་འཛིན་པར༔ མ་རབས་གདོལ་བའི་སྤྱོད་པ་བག་མེད་པས༔ དཀར་ཕྱོགས་ངོ་ཚ་ནག་ཕྱོགས་འཕང་བསྟོད་པའི༔ བསྟན་པའི་ལག་དམར་ཟོག་པོ་ཁྱུ་གཅིག་འབྱུང་༔ གསར་དད་ཅན་རྣམས་ཅུང་ཞིག་རྗེས་འབྲངས་ཡང་༔ ནམ་ཞིག་ལོང་བའི་ཁྱུ་རུ་ཚུད་པ་ཡིས༔ འདི་ཕྱི་གཉིས་མེད་གཡང་སར་ལྟུང་བའི་ཕྱིར༔ ངན་པའི་རྗེས་སུ་མ་འབྲངས་ཕྱི་རབས་རྣམས༔ སྤྱིར་ཡང་དོན་དུ་མི་ཁེལ་ཁ་མང་ཅན༔ དྲན་འཕྲུལ་མི་གཅིག་དྲ་བ་བཞིན་དུ་འཛིང་༔ གང་དྲན་ལག་བླངས་རང་ཉིད་ཕུང་བའི་རྒྱུ༔ ཚིག་རྗེས་དོན་སློབས་མཛོད་ཅིག་ཕྱི་རབས་རྣམས༔ ཐོས་ལོང་མེད་པར་ཡོན་ཏན་འུར་ཆེར་སྒྲོགས༔ མཐོང་ལོང་མེད་པར་དད་པས་རྗེས་སུ་འབྲང་༔ རེ་ཞིག་ཙམ་ནས་ལོག་ལྟས་རྒྱུད་ཁེབས་པའི༔ དམ་ཉམས་ཁྱུ་གཅིག་མ་བྱེད་ཕྱི་རབས་རྣམས༔ ཚད་ལྡན་རྒྱལ་བའི་བཀའ་དང་བསྟན་བཅོས་རྣམས༔ ལེགས་པར་མི་བསླབ་ཕྱོགས་ཙམ་ཐོས་པ་ཡིས༔ བདེན་གཉིས་ཡ་བྲལ་མདོ་སྔགས་དཀྲུགས་ཤིང་འཆད༔ བསྟན་པའི་ཕུང་ཐལ་མ་བྱེད་ཕྱི་རབས་རྣམས༔ སྒྲུབ་པས་བཤད་པའི་ལད་མོ་ལྡབ་ལྡིབ་འུར༔ བཤད་གྲྭ་ཕལ་ཆེར་གྲོང་ཡུལ་ཆོ་གས་གཡེང་༔ བཤད་སྒྲུབ་གཉིས་མེད་སེང་གེའི་གཟུགས་བརྙན་གྱིས༔ བསྟན་པའི་རྩ་བ་མ་གཅོད་ཕྱི་རབས་རྣམས༔ ཁྱད་པར་ཨོ་རྒྱན་བདག་གི་རྗེས་འཇུག་རྣམས༔ རྡོ་རྗེ་སློབ་དཔོན་སྤྱི་བོའི་ཐོད་བཞིན་བསྟེན༔ ཡི་དམ་ལྷ་ནི་ལུས་དང་གྲིབ་ལྟར་བསྒོམ༔ གསང་སྔགས་ཟབ་མོ་ཁོངས་པའི་དབུགས་ལྟར་ཟློས༔ རྫོགས་རིམ་མངོན་སུམ་སྙིང་གི་དཀྱིལ་དུ་བསྟིམ༔ མཁའ་འགྲོ་ཆོས་སྐྱོང་གྲོགས་དང་བྲན་ལྟར་བསྐོལ༔ བསྐྱེད་རྫོགས་ཉམས་དང་དྲོད་རྟགས་རྒྱུན་མ་བཅད༔ རྟོག་གེ་ཚིག་ཙམ་རྗེས་སུ་མ་འབྲེང་བར༔ ངས་བཤད་གཏན་ལ་ཕོབས་ཤིག་རྗེས་འཇུག་རྣམས༔ སྙན་རྒྱུད་གདེངས་མེད་གོ་བ་སྐམ་པོ་ལ༔ གདེངས་སུ་བྱས་པའི་བླུན་བསྒོམ་རང་མགུ་ཅན༔ བཟླས་བརྗོད་སྒྲུབ་ཚུག་བཟང་བའི་སྡུག་ཡུས་ཀྱིས༔ རང་གི་རང་ཉིད་མ་བསླུ་ཕྱི་རབས་རྣམས༔ འགའ་ཞིག་དང་པོར་ཐོས་ཤིང་བསྒྲུབ་གྱུར་ཀྱང་༔ དེ་ནས་ཟང་ཟིང་རྗེས་འབྲང་ཆོས་བརྒྱད་མཁན༔ ཆོས་པར་མིང་བཏགས་གཡོ་སྒྱུས་ཁོག་གང་བའི༔ དྲེད་པོ་ཆོས་མེད་མ་བྱེད་ཕྱི་རབས་རྣམས༔ དང་པོར་སྙིང་ལས་ལྷག་པའི་མཛའ་བཤེས་བྱེད༔ བར་དུ་བློ་སྣ་མི་མཐུན་ཁོང་ཁྲོ་ལྷོང་༔ ཐ་མ་ཤིན་ཏུ་འཁོན་ཞིང་སྡང་བའི་དགྲ༔ བརྩོན་པས་སྒྲུབ་པར་མ་བྱེད་ཕྱི་རབས་རྣམས༔ རྫུན་གྱི་བློ་ཆུང་འགའ་ཞིག་བསླུས་གྱུར་ཏེ༔ དེ་ལྟར་རིགས་འགྲེས་ཀུན་ལ་ངན་བློ་ཡིས༔ རང་འདོད་ཕུགས་བཅུགས་དོན་མང་བསྒྲུབ་པའི་མཐར༔ གཉིས་ཀ་ཕུང་བར་མ་བྱེད་ཕྱི་རབས་རྣམས༔ ཡ་རབ་སྐྱེ་བོ་མཆོག་གི་ལུགས་སྲོལ་ལྟར༔ འཇིག་རྟེན་མཐུན་པའི་ཆོས་ལ་ལེགས་བསླབས་ཏེ༔ ཁ་ཉུང་ཁོག་ཡངས་དྲན་ཤེས་ནང་དུ་བཀུག༔ བག་ཡོད་ཚུལ་མཐུན་སྤྱོད་ཅིག་ཕྱི་རབས་རྣམས༔ ཉིན་པར་ཚེ་འདིའི་འཚོ་ཆིས་ལུགས་བཞིན་སྤྱོད༔ ནང་ནུབ་དཀོན་མཆོག་གསོལ་བཏབ་དགེ་ལ་འབད༔ དུས་ཀུན་གཉིད་ཆང་བུད་མེད་ཁར་མ་བཏང་༔ ལས་འབྲས་དཔང་དུ་ཞོག་ཅིག་ཕྱི་རབས་རྣམས༔ དེ་ནས་རང་ཉིད་ཆོས་ལ་བློ་ཕྱོགས་ན༔ བརྒྱུད་ལྡན་རྩོད་པ་བྲལ་བའི་གྲུབ་མཐར་ཞུགས༔ མཚན་ཉིད་ཚང་བའི་བཤེས་གཉེན་ཚུལ་བཞིན་བསྟེན༔ རང་གི་ནུས་ཚོད་སྦྱར་བའི་སྡོམ་པ་བླངས༔ དེ་ཉིད་མཐར་དབྱུང་འདི་ཕྱི་ཀུན་ཏུ་དགེ༔ ངེས་འབྱུང་བྱང་སེམས་ཆོག་ཤེས་ལྡན་པར་གྱིས༔ ཐོས་པས་རྒྱུད་སྦྱངས་བསམ་པས་སྒྲོ་འདོགས་བཅད༔ ཉམས་རྟོགས་མ་ཤར་བར་དུ་བསྒོམ་སྲན་བཟུང་༔ ལྟ་བསྒོམ་ཁ་ལ་མ་ཁྱེར་སྙིང་ལ་ཆོངས༔ རྟོགས་པ་ཡོད་མེད་རྐྱེན་དང་བསྲེས་ལ་དཔྱོད༔ མ་རྟོགས་རྟོགས་བརྫུས་རང་གཞན་ཉམས་པས་ན༔ རྟོགས་པ་གདེངས་ཐོབ་བར་དུ་གསང་ཞིང་སྤྱད༔ ཆོས་དང་འཇིག་རྟེན་བྱ་བ་གང་བྱེད་ཀྱང་༔ མིག་ལྟོས་ངན་པའི་ཕྱོགས་སུ་མི་སྡོད་པར༔ ཡ་རབས་ཚུལ་མཐུན་གྲོགས་དང་འགྲོགས་ནས་སུ༔ རྣམ་ཀུན་བདེ་བའི་ལམ་སྣེ་ཟིན་པ་ལ༔ ད་རེས་འབུང་གསུམ་བཏོན་ཅིག་ཕྱི་རབས་རྣམས༔ ང་དང་འཇལ་ཡང་མན་ངག་བཅུ་གསུམ་དང་༔ ཉོན་མོངས་རང་གྲོལ་སྙིང་ཏིག་འདི་རྣམས་ལས༔ ལྷག་པའི་གདམས་པ་འཆད་དུ་མེད་པས་ན༔ བརྩོན་པས་ཉམས་སུ་ལོངས་ཤིག་ཕྱི་རབས་རྣམས༔ དེ་ལྟར་ཕན་པའི་ཞལ་ཆེམས་མཐར་ཐུག་འདི༔ འདིར་ཚོགས་ལྷ་སྲས་རྗེས་འབྲངས་ཐམས་ཅད་དང་༔ མ་འོངས་རྣམས་ཀྱིས་ཚུལ་བཞིན་སྤྱོད་གྱུར་ན༔ དོན་གཉིས་ལྷུན་གྱིས་གྲུབ་བོ་ཕྱི་རབས་རྣམས༔ ཞེས་ཤིན་ཏུ་བརྩེ་བས་བསླབས་བྱ་ལུང་བསྟན་ཞལ་ཆེམས་དང་བཅས་པ་བཀའ་སྩལ་པས་ལྷ་སྲས་རྗེས་འབྲངས་རྣམས་རབ་ཏུ་དད་ཅིང་༔ དགའ་ཞིང་གུས་པས་རྗེས་སུ་ཡི་རངས་བར་གྱུར་ཏོ༔ ས་མ་ཡ༔ རྒྱ་རྒྱ༔ དེ་ནས་སླར་ཡང་རྗེས་འབྲངས་ཐམས་ཅད་ཀྱིས་མགྲིན་གཅིག་ཏུ་གསོལ་བ་བཏབ་པ༔ འདི་ལྟ་བུའི་བླ་མའི་ཐུགས་སྒྲུབ་མན་ངག་དང་བཅས་པ་དང་༔ ཉོན་མོངས་རང་གྲོལ་སྙིང་ཏིག་དང་བཅས་པ་འདི་རྣམས་ད་ལྟ་སྤེལ་ལམ༔ མ་འོངས་སྣོད་ལྡན་གྱི་དོན་དུ་གཏེར་དུ་སྦ༔ གུ་རུ་རིན་པོ་ཆེས་བཀའ་སྩལ་དུ་གསོལ། ཞེས་ཞུས་པའི་ཚེ༔ གུ་རུ་རིན་པོ་ཆེའི་ཞལ་ལས༔ ཨེ་མ་དད་ལྡན་རྗེས་འབྲངས་རྣམས༔ དེ་ལྟར་གསོལ་བ་བཏབ་པ་ལེགས༔ འདི་འདྲའི་གདམས་པ་ཁྱད་པར་ཅན༔ རྡོ་རྗེའི་གསུང་གི་གསང་བ་གཅིག༔ སྣོད་དང་འཚམས་པར་འཆར་བ་ཀུན༔ བཀའ་སྲོལ་བཞི་རུ་བསྡུས་ནས་ཀྱང་༔ རང་རང་ཉམས་ལེན་གནད་དུ་དྲིལ༔ ནམ་ཞིག་མཁའ་འགྲོ་མཚོ་རྒྱལ་མས༔ དྷཱ་ཀི་གསང་བའི་བརྡར་ཐོབ་ལ༔ སོ་སོའི་སྨོན་ལམ་དང་བཅས་ཏེ༔ དབུས་གཙང་ཁམས་ཀྱི་གནས་སོ་སོར༔ ཟབ་མོའི་གཏེར་དུ་རྒྱས་བཏབ་ན༔ མ་འོངས་ཕྱི་མ་ཕྱི་མའི་དུས༔ ལས་འཕྲོ་སྐལ་བར་ལྡན་པ་ཡིས༔ རིམ་པ་བཞིན་ཏུ་བཏོན་བྱས་ན༔ བསྟན་འགྲོའི་རྒུད་པ་སེལ་བ་དང་༔ ཕན་བདེའི་ཕྲིན་ལས་རྒྱས་པར་འགྱུར༔ འབྲེལ་ཚད་དོན་ལྡན་ཨེ་མ་ཧོ༔ ཞེས་བཀའ་སྩལ་པ་ན༔ ཁོ་མོ་མཚོ་རྒྱལ་བདག་གིས་གུས་ཕྱག་དགུ་ཕྲུགས་སུ་བཙལ་ནས༔ ཨེ་མ་གུ་རུ་སྤྲུལ་པའི་སྐུ༔ ཟབ་མོའི་གདམས་པ་ཁྱད་པར་ཅན༔ རིམ་པར་ཕྱེ་བ་སྙིང་པོའི་དོན༔ གཏེར་དུ་གདམས་པར་བཀས་གནང་ན༔ ཡིད་བཞིན་ནོར་བུའི་གསང་བ་འདི༔ སྦ་བའི་ཐབས་ཚུལ་ཇི་ལྟ་བུ༔ གནས་མཆོག་གང་དུ་ཕྱག་རྒྱས་གདབ༔ དེ་ཉིད་འདོན་པའི་ལས་ཅན་དང་༔ གཞན་དོན་འབྱུང་ཚུལ་བཀའ་སྩལ་གསོལ༔ ཞེས་ཞུས་པའི་ཚེ༔ གུ་རུ་རིན་པོ་ཆེ་དར་གཅིག་དགོངས་པ་མཉམ་པར་བཞག་ནས་གསུང་རྡོ་རྗེའི་དབྱངས་ཀྱིས་འདི་སྐད་ཅེས་བཀའ་སྩལ་ཏོ༔ ཨེ་མ་ཉོན་ཅིག་མཚན་ལྡན་མཁའ་འགྲོའི་གཙོ༔ ཁྱད་པར་གསོལ་བ་འདེབས་པ་ཤིན་ཏུ་ལེགས༔ བདག་ཉིད་འཆི་མེད་པདྨ་ཐོད་ཕྲེང་རྩལ༔ ཆོས་སྐུ་སྣང་བ་མཐའ་ཡས་ཡེ་ཤེས་ལས༔ སྙིང་རྗེའི་འགྲོ་འདུལ་སྤྱན་རས་གཟིགས་སུ་ཤར༔ བྱེ་བྲག་འཛམ་གླིང་སྤྱི་དང་བོད་ཁམས་ཀྱི༔ གདུལ་བྱའི་དོན་ཕྱིར་ཤཱཀྱའི་རྒྱལ་པོ་ཉིད༔ རྡོ་རྗེ་ཐེག་པའི་ལམ་སྟོན་བླ་ན་མེད༔ མཚོ་སྐྱེས་སྤྲུལ་པའི་སྐུ་རུ་སྣང་བ་སྟེ༔ དེ་ཕྱིར་དུས་གསུམ་ཆགས་ཐོགས་དང་བྲལ་བའི༔ གཟིགས་པ་སྒྲིབ་མེད་ཡེ་ཤེས་རྩལ་འཆང་བས༔ གདུལ་བྱའི་ཡུལ་དང་འདུལ་བྱེད་གང་ཟག་དང་༔ འདུལ་བའི་དུས་དང་ཐབས་ཚུལ་ལ་སོགས་པ༔ ད་ལྟའི་མངོན་སུམ་བཞིན་དུ་གཏན་ཕེབས་པས༔ ཞིབ་པར་གདམས་སོ་རྩེ་གཅིག་ཡིད་ལ་ཟུངས༔ མ་འོངས་སུམ་ཅུ་ཁ་རལ་སྙིགས་དུས་ཀྱི༔ བོད་ཁམས་མགོན་མེད་འགྲོ་རྣམས་བསྐྱབ་པའི་ཕྱིར༔ ཡིད་བཞིན་ནོར་བུ་བླ་མའི་ཐུགས་སྒྲུབ་ནི༔ ཟབ་མོའི་གདམས་པ་མན་ངག་སྙིང་པོའི་ཕུལ༔ ཉོན་མོངས་རང་གྲོལ་པདྨའི་སྙིང་ཏིག་བཅས༔ མཐོང་ཐོས་དོན་ལྡན་དགོངས་ཉམས་མཐར་ཐུག་ཆོས༔ ང་དང་མ་མཇལ་ཕྱི་རབས་གདུལ་བྱ་ལ༔ དངོས་དང་ཁྱད་མེད་བྱིན་རླབས་སྐུ་ཚབ་མཆོག༔ རིན་ཆེན་སྣ་ལྔའི་ཕྱེ་མ་ལས་བྱས་ཏེ༔ གཞན་དོན་ཐུགས་རྗེའི་རྫུ་འཕྲུལ་མཐུ་ཡིས་བཞེངས༔ བདེ་ཆེན་ཡེ་ཤེས་མངོན་སུམ་བསྟིམ་པས་ན༔ བདག་དང་མཇལ་བར་ཁྱད་མེད་ཐེ་ཚོམ་བྲལ༔ དེ་ཕྱིར་ཆོས་དང་རྟེན་མཆོག་ཁྱད་པར་ཅན༔ སྦས་པའི་ཚུལ་ཀྱང་གཞན་ལས་འཕགས་པ་སྟེ༔ རྒྱ་ཆེའི་གཞུང་རྣམས་ཟབ་པའི་སྙིང་པོར་དྲིལ༔ སྙིང་པོའི་ཡང་ཞུན་བརྗོད་པ་ཀུན་གྱི་རྒྱུ༔ གདམས་པའི་མཐར་ཐུགས་བརྡ་ཡིག་བདུན་དུ་བསྡུས༔ རྩ་སྒོ་འབྱེད་པའི་རྫས་ནི་བདུད་རྩི་ལྔ༔ ཡི་གེའི་རྐྱེན་བྱེད་མཁའ་འགྲོའི་བརྡ་རིས་བདུན༔ དགོངས་པས་བྱིན་རླབས་ཤོག་དྲིལ་རིན་པོ་ཆེ༔ འབྱུང་བ་བཞི་དང་དུག་མཚོན་གྱིས་མི་ཚུག༔ དྲི་ཚོར་ཙམ་གྱིས་ནད་ཞི་གདོན་འཕྲོག་ཅིང་༔ སྣང་བ་དབང་སྡུད་ཐུགས་རྗེ་ཆགས་པའི་རྫས༔ དོན་ཀུན་གྲུབ་སྟེར་བྱིན་རླབས་གི་ཝཾ་བཟང་༔ བཾ་པོར་བྱས་ཏེ་དེ་ཡི་བཙས་སུ་གཏམས༔ བསྐལ་པ་ཞིག་ཀྱང་མི་འགྱུར་རྐྱེན་གྱི་གཏེར༔ སྦས་པའི་གནས་ནི་མདོ་ཁམས་ཟལ་མོ་སྒང་༔ རྩི་རྐེའི་ཆུ་བོ་འདུས་པའི་རོང་གི་བྲག༔ རིན་ཆེན་འབར་བའི་ལོག་སུ་རྒྱས་ཐོབ་ལ༔ ཀླུ་བཙན་འབར་བ་སྤུན་བདུན་སྲུང་མར་བསྐོས༔ ནམ་ཞིག་བོད་ཁམས་མཐའ་དབུས་ཀུན་ཏུ་འཁྲུགས༔ སྣོད་བཅུད་བཀྲག་ཉམས་རི་བོའི་ན་བུན་ཡལ༔ འབྱུང་བའི་རྐྱེན་མང་སྐྱེ་འགྲོའི་ཤེས་རྒྱུད་འགྱུར༔ གནས་རྟེན་ཉམས་ཤིང་སྨན་སྔགས་ནུས་པ་ཟད༔ བཟང་སྤྱོད་སྨོད་ཅིང་ངན་པའི་ལད་མོ་འུར༔ དྲིན་ལ་ལོག་གཞལ་དགྲ་ལ་བློ་གཏད་འཆའ༔ ཕན་པའི་སྙིང་གཏམ་དྲང་པོ་ཐན་དུ་བལྟ༔ གནོད་པའི་ཁ་འཇམ་ཞེ་གནག་ལྷ་རུ་མཐོང་༔ མི་རུང་སྣ་དགུའི་གདོལ་སྤྱོད་དར་བ་ཡིས༔ དཀར་ཕྱོགས་ལྷ་ཀླུ་ཐམས་ཅད་གྲིབ་ཀྱིས་འཐིབ༔ ནག་ཕྱོགས་མི་དང་མི་མིན་གཟེངས་བསྟོད་པས༔ ནད་མུག་མཚོན་གྱི་བསྐལ་ངན་དུས་གཅིག་ལངས༔ དེ་ཚེ་གཏེར་འདི་འབྱིན་པའི་ལས་ཅན་ནི༔ ཡབ་གཅིག་ཁྲི་སྲོང་སྤྲུལ་པ་དབང་གི་མིང་༔ བསྟན་གཉིས་ཟུང་འཇུག་ཤེས་རབ་རྩལ་འཆང་བར༔ པདྨ་བདག་གིས་ཡང་ཡང་བྱིན་བརླབས་པས༔ གནས་དང་ཟབ་མོའི་གདམས་པའི་མཚོན་ཚུལ་ཀུན༔ མེ་ལོང་བྱད་བཞིན་དྲན་པའི་ཟུངས་སུ་སྨིན༔ དངོས་སུ་སྤྱོད་དམ་བསྐུལ་བས་རྐྱེན་བྱས་ཏེ༔ ད་ལྟའི་སྨོན་ལམ་དབང་གིས་དམ་འཛིན་ནི༔ འབྲེལ་ཚད་དོན་ལྡན་སྔགས་ཀྱི་རྣལ་འབྱོར་པ༔ བྱིས་པའི་ངང་ཚུལ་ལས་ཅན་ཞིག་འབྱུང་ཏེ༔ དེ་ཡིས་གནས་ཡུལ་ཀུན་ཏུ་ཉུལ་བ་དང་༔ མཁའ་འགྲོའི་ཚོགས་དང་དགྱེས་རྒུར་སྤྱོད་པ་དང་༔ ལས་ཅན་རྣམས་ལ་ཡེ་ཤེས་བསྐྱེད་པ་དང་༔ བཤད་སྒྲུབ་བསྟན་པའི་ས་བོན་གདབ་པའི་ཕྱིར༔ འགྲོ་དོན་སྤྱོད་པའི་ལམ་ནས་རྙེད་པར་འགྱུར༔ དེ་ནས་ཡབ་སྲས་ལྷན་ཅིག་ཚོགས་པ་དང་༔ པདྨ་བདག་གིས་བྱིན་གྱིས་བརླབས་པ་དང་༔ མཚོ་རྒྱལ་ཁྱོད་ཀྱི་སྨོན་ལམ་དག་པ་དང་༔ ཕྱི་ནང་རྟེན་འབྲེལ་ཟབ་མོ་ལ་བརྟེན་ནས༔ དོན་རྣམས་ཀུན་གཟིགས་བདུད་རྩིའི་ཤོག་བུ་ལ༔ མི་འགྱུར་རྩ་བའི་ཡི་གེའི་གྲོང་ཁྱེར་བདུན༔ ཆུ་ཟླ་བཞིན་དུ་སྤྲུལ་པའི་འདུ་བྱེད་ཅན༔ བརྡ་ཡི་ཐིག་ལེ་འབུམ་ཕྲག་གྲངས་མེད་ལས༔ ལས་ཅན་དག་གི་བླཽ་གྲོས་དང་མཚམས་པར༔ ངེས་པའི་གདམས་པ་ཟབ་མོའི་ཚིག་ཏུ་འབྱུང་༔ དོན་གྱི་ཐེམས་ལས་མི་འདའ་གཏན་ལ་ཕོབ༔ དེ་ཚེ་གཞན་དོན་ཕྲིན་ལས་འབྱུང་བ་ནི༔ སྤྱན་རས་གཟིགས་དབང་ཐུགས་རྗེའི་འོད་ཟེར་ལས༔ ངོ་མཚར་སྤྲུལ་པ་དབུས་གཙང་ཁམས་སུ་འབྱུང་༔ སྐུ་གསུང་ཐུགས་ཀྱི་གདུལ་བྱ་འདུལ་བ་ལ༔ ཆོས་འདི་གཏད་ན་རང་གཞན་ཕན་བདེ་འགྲུབ༔ པདྨ་བདག་གིས་བྱིན་གྱིས་བརླབས་པའི་བུ༔ སྙིང་པོའི་མིང་གིས་བསྟན་པ་མཐའ་ནས་སྤེལཿ སངས་རྒྱས་ཡེ་ཤེས་སྔགས་ཀྱི་རྣལ་འབྱོར་པར༔ འདི་འཕྲོད་བདུན་བརྒྱུད་བཤད་སྒྲུབ་འཛིན་བྱེད་འཕེལ༔ ནམ་སྙིང་སྤྲུལ་པ་ལོ་གསུམ་མཚམས་སུ་འབྱུང་༔ འདི་ལ་བརྟེན་ནས་ཕྲིན་ལས་མངའ་ཐང་རྒྱས༔ མཚོ་རྒྱལ་བྱིན་བརླབས་གསུང་གི་གནས་སུ་སྣང་༔ ཆོས་འདི་ཉམས་བླངས་དངོས་གྲུབ་ཁྱད་པར་ཐོབ༔ ཤར་གྱི་ཕྱོགས་ནས་སྦ་བཙུན་སྐྱེ་མཐའ་ནི༔ བློ་གྲོས་ལྡན་པ་དཔལ་བཟང་མིང་ཅན་འབྱུང་༔ སྦས་མངོན་སྤྱོད་པས་འགྲོ་བ་ཐབས་ཀྱིས་འདུལ༔ ལྷོ་ན་ཅོག་རོ་ཀླུ་ཡི་རྒྱལ་མཚན་གྱི༔ སྐྱེ་མཐའ་བཀྲ་ཤིས་མིང་ཅན་ཕག་ལོ་པ༔ མ་ངེས་འགྲོ་འདུལ་སྙན་གྲགས་ལྡན་པ་འབྱུང་༔ ནུབ་ནས་བཻ་རོའི་སྐྱེ་མཐའ་བློ་གྲོས་ཅན༔ བསྟན་འཛིན་མིང་ཅན་རྒྱལ་བའི་བསྟན་ལ་ཕན༔ ཟབ་རྒྱས་མཛོད་ལ་རང་དབང་བསྒྱུར་བ་འབྱུང་༔ བྱང་ནས་དཔལ་གྱི་དབང་ཕྱུག་རྡོ་རྗེའི་མིང་༔ དྲག་སྔགས་མཐུ་ལྡན་བསྟན་པ་སྲུང་ལ་བརྩོན༔ རྫུ་འཕྲུལ་སྤྱོད་པས་བློ་སྣ་བསྒྱུར་བ་འབྱུང་༔ བདུད་འཇོམས་རྡོ་རྗེའི་སྨོན་ལམ་མཐུ་གྲུབ་པ༔ རཏྣའི་མིང་ཅན་མཁྱེན་ནུས་ཡོན་ཏན་རྫོགས༔ འབྲེལ་ཚད་དོན་ལྡན་དན་གྱི་ཕྱོགས་སུ་འབྱུང་༔ ཏིང་འཛིན་བཟང་པོའི་སྐྱེ་བ་མངོན་ཤེས་ཅན༔ སྦས་པའི་ཚུལ་འཛིན་བསྟན་པའི་སྙིང་པོ་འཛིན༔ ནུབ་ཀྱི་ཕྱོགས་ནས་ཀུན་དགའི་མིང་ཅན་གྱིས༔ མདོ་སྔགས་ཟུང་འབྲེལ་འཆད་རྩོམ་སྒྲོན་མེ་སྦར༔ དཔལ་གྱི་སེང་གེའི་སྐྱེ་མཐའ་མངྒ་ལ༔ ནུས་པ་ལྡན་པས་མཐའ་དམག་གདུག་ཅན་བཟློག༔ གཉགས་ཆེན་ཛྙཱ་ན་རྟོགས་པས་རང་རྒྱུད་གྲོལ༔ བྱང་ཆུབ་སེམས་ལྡན་འགྲོ་བ་འདུལ་བ་འབྱུང་༔ གཞན་ཡང་རྗེས་འབྲངས་རྣམས་ཀྱི་བྱིན་རླབས་ལས༔ རྡོ་རྗེའི་མིང་ཅན་སྔགས་སྤྱོད་གྲུབ་པ་འབྱུང་༔ གར་གྱི་དབང་ཕྱུག་དབང་ཆེན་གསུང་གི་བདག༔ ཕྲིན་ལས་རབ་འཛིན་ཤིང་པོའི་བསྟན་ལ་ཕན༔ འཇམ་དཔལ་རྡོ་རྗེ་བདེ་བའི་ཡེ་ཤེས་གྲུབ༔ དགེ་ལེགས་མིང་ཅན་ངེས་དོན་བསྟན་པ་འཛིན༔ པདྨའི་དབང་ཕྱུག་ཆོས་ཀྱི་འཁོར་ལོས་བསྒྱུར༔ ནོར་བུའི་མིང་ཅན་འགྲོ་བ་འདུལ་བའི་མཆོག༔ དཔལ་གྱི་མིང་ཅན་ཁྱད་པར་ཆོས་འདིའི་བདག༔ དེ་དང་དེ་བཞིན་སྤྲུལ་པའི་སྐྱེས་བུ་དང་༔ ཟབ་མོའི་ཆོས་འདིར་སྙིང་ནས་དད་ཐོབ་པ༔ མངའ་རིས་དབུས་གཙང་མདོ་ཁམས་སྟོད་སྨད་ནས༔ ཐུགས་ཀྱི་སྲས་ལྔ་ཉེ་བའི་བུ་མཆོག་བརྒྱད༔ བཤད་སྒྲུབ་འཛིན་པ་ཉི་ཤུ་རྩ་ལྔ་སྟེ༔ གྲུབ་པའི་ཉམས་མྱོང་ཐོབ་པ་བརྒྱ་རྩ་བརྒྱད༔ ལམ་སྣ་ཟིན་པའི་རྣལ་འབྱོར་སྟོང་ཕྲག་གཅིག༔ འབྲེལ་བ་ཐོབ་པ་འབུམ་ཚོ་བཅོ་བརྒྱད་རྣམས༔ ཕོ་མོ་མ་ངེས་སྔ་ཕྱི་སྣ་ཚོགས་སུ༔ རིམ་པར་འབྱུང་བས་ཆོས་འདི་ཉམས་བླངས་ན༔ རང་གཞན་ཀུན་གྱི་བསམ་པ་ཡིད་བཞིན་འགྲུབ༔ བསྟན་དང་འགྲོ་ལ་ཕན་པ་རླབས་ཆེན་འབྱུང་༔ ཚེ་འཕོས་འོག་མིན་པདྨ་དྲྭ་བ་རུ༔ རིག་འཛིན་ཚོགས་དང་སྤྱོད་ཡུལ་མཉམ་པར་རྒྱུ༔ ལུས་རྟེན་དེ་ལས་མཆོག་གི་དངོས་གྲུབ་ཐོབ༔ ཁྱད་པར་པདྨའི་སྙིང་ཏིག་ཟབ་མོ་ལ༔ བརྟེན་ནས་ཟག་མེད་འོད་ཀྱི་ལུས་གྲུབ་པ༔ ལྷོ་བྱང་ཀོང་ཡུལ་ཁམས་དང་མོན་གྱི་མཐའ༔ དེ་དག་རྣམས་སུ་ལྔ་ཕྲག་ཟུང་གཅིག་འབྱུང་༔ མདོར་ན་ལས་ཅན་སྐྱེས་བུས་འདི་རྙེད་ཚེ༔ བསྐྱེད་རིམ་གུ་རུ་བདེ་བ་ཆེན་པོ་དང་༔ ཐབས་གྲོལ་ལམ་གྱི་ཉམས་མྱོང་ཟབ་མོའི་དོན༔ དབེན་པར་སོང་ལ་རྩེ་གཅིག་ཡིད་ཀྱིས་བསྒོམ༔ རིམ་གཉིས་ཟབ་མོའི་མྱོང་བ་སྐྱེས་པ་ན༔ རྩ་བའི་དབང་དང་སྒྲུབ་ཐབས་ཀུན་ལ་སྤེལ༔ མན་ངག་ལོ་བདུན་བར་དུ་གསང་བར་བསྡམས༔ དེ་ནས་དུས་བབས་ངེས་པའི་རྟགས་བྱུང་ན༔ རིམ་གྱིས་གདམས་པ་ཚོད་དང་སྦྱར་སྤེལ་ན༔ ཁྱད་པར་ལུང་གི་ཟིན་པའི་སྐྱེས་བུ་དང་༔ འཕྲལ་དུ་ཌཱ་ཀིས་བསྐུལ་མ་གནང་བའི་ཚེ༔ གདམས་པའི་རྩལ་སྐྱུགས་ལྷག་མ་མེད་པར་སྦྱིན༔ དེས་ཀྱང་ཉམས་བླངས་རང་གཞན་དོན་ཆེན་འགྲུབ༔ དབུས་གཙང་ཁམས་ཀྱི་སྒྲུབ་པའི་གནས་རྣམས་ཀྱང་༔ ས་གནད་རྣམས་སུ་ཟབ་མོའི་ཕྲིན་ལས་འདིའི༔ ཚོགས་སྒྲུབ་ཚེས་བཅུའི་མཆོད་པའི་རྒྱུན་ཚུགས་ན༔ གངས་ཅན་མཐའ་དབུས་ཀུན་ཏུ་བདེ་ལེགས་འབྱུང་༔ གཏེར་གནས་འདི་དང་ཉེ་བའི་ས་ཕྱོགས་སུ༔ ལས་ཅན་རང་གི་གདན་ས་གཉིས་ཀྱང་འཆའ༔ གཞན་ཡང་གནས་མཆོག་ཉི་ཤུ་རྩ་ལྔ་ལ༔ སྐྱེས་བུའི་ལག་པའི་སོར་གདུབ་ཇི་བཞིན་དུ༔ བསྒོམ་པའི་སྡེ་རེ་ངེས་པར་ཁྲ་ཆེམས་འབྱུང་༔ རང་བྱུང་པདྨས་བྱིན་རླབས་བསྟན་འཛིན་རེ༔ བློ་བུར་མ་ངེས་ཐོག་འབབས་ཚུལ་དུ་འབྱོན༔ སྙིང་པོའི་བསྟན་པ་མཐའ་ནས་མཐའ་རུ་རྒྱས༔ བོད་ཁམས་འགྲོ་བའི་བསམ་པ་ལྷུན་གྱིས་གྲུབ༔ དེ་ཕྱིར་ད་ལྟར་བཞུགས་པའི་རྗེས་འབྲངས་དང་༔ མ་འོངས་འབྱུང་འགྱུར་ལས་ཅན་སྣོད་ལྡན་ཀུན༔ མི་བསླུ་ངེས་པ་པདྨའི་བཀའ་ཡིན་པས༔ ཐུགས་ བསྐྱེད་རྩལ་ཕྱུངས་ང་ཡི་གསུང་བཞིན་སྒྲུབས༔ རང་གཞན་དོན་གཉིས་འགྲུབ་བོ་ཨེ་མ་ཧོ༔ ཞེས་བཀའ་སྩལ་པ་ན་བདག་ཅག་རྗེས་འབྲངས་ཐམས་ཅད་ཀྱིས་ཀྱང་མགྲིན་གཅིག་ཏུ་ཕྱག་དང་བསྐོར་བ་གྲངས་མེད་པ་བྱས༔ ཞབས་སྤྱི་བོར་བླངས༔ བསམ་པ་ཐག་པས་སྨོན་ལམ་རླབས་པོ་ཆེ་བཏབ་པ་ན༔ ནམ་མཁའི་ཁམས་ཀུན་འཇའ་དང་༔ འོད་དང་༔ རོལ་མོའི་སྒྲ་དང་༔ མཆོད་པའི་སྤྲིན་ཕུང་སྣ་ཚོགས་ཀྱིས་གང་བའི་དབུས་ནས་སངས་རྒྱས་དང་བྱང་ཆུབ་སེམས་དཔའ་གྲངས་མེད་པ་མངོན་སུམ་དུ་བྱོན་ཏེ་གུ་རུ་རིན་པོ་ཆེ་དང་ལྷན་གཅིག་ཏུ་སྨོན་པ་འགྲུབ་པའི་མཐུན་འགྱུར་གྱི་སྒྲ་དབྱངས་བསྒྲགས་ཤིང་༔ མེ་ཏོག་གི་ཆར་ཕབས༔ མཐར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་གུ་རུ་རིན་པོ་ཆེ་ལ་འདུས༔ གུ་རུ་ཉིད་ཉི་ཟེར་ལ་ཆིབས་ཏེ་ལྷོ་ནུབ་སྲིན་པོ་འདུལ་བའི་ཕྱིར་ནམ་མཁའི་ལམ་ནས་ཞལ་ཐལ་ལེར་གཤེགས་པར་གྱུར་ཏོ༔ ས་མ་ཡ༔ རྒྱ་རྒྱ༔ དེ་ནས་གུ་རུ་རིན་པོ་ཆེ་སྲིན་པོའི་ཡུལ་དུ་གཤེགས་པའི་རྗེས༔ མི་ལོ་ལྔ་བཅུ་ཐམ་པར་རྗེས་འབྲང་རང་རང་གིས་ཉམས་སུ་བླངས་ཏེ་དངོས་གྲུབ་གཉིས་ཀྱི་དགའ་སྟོན་སྤེལ༔ རང་གཞན་གྱི་དོན་མཐར་ཕྱིན་པའི་ཚེ༔ གུ་རུ་རིན་པོ་ཆེའི་བཀའ་བཞིན་ཁོ་མོ་མཚོ་རྒྱལ་གྱིས་དཔེ་རྣམས་གཅིག་ཏུ་བསྡུས་ཏེ་སྐོར་ཚོ་སོ་སོར་ཕྱེས༔ ཁྱད་པར་གདམས་པའི་མཐར་ཐུག་འདི་ཉིད་གུ་རུ་རང་གིས་བྱིན་གྱིས་རླབས་པའི་སྤྲུལ་པའི་བརྡ་ཡིག་ལ་བསྟིམ་ནས༔ སྐུ་ཚབ་མཐོང་གྲོལ་དངོས་གྲུབ་དཔལ་འབར་དང་ལྷན་གཅིག་ཏུ་གླང་པོ་ཆེ་ས་སྲུང་གི་གི་ཝཾ་གྱིས་བམ་པོར་བྱས་ཏེ༔ མདོ་ཁམས་རྩི་རྐེ་འདུས་པའི་གནས༔ བྲག་རི་རིན་ཆེན་འབར་བའི་མགུལ་དུ་གཏེར་དུ་སྦས༔ གཏེར་བདག་ཀླུ་བཙན་དྲག་པོ་སྤུན་བདུན་ལ་གཏད་ཅིང་སྨོན་ལམ་གདབ་པ་ནི༔ རྩ་གསུམ་རྒྱལ་བ་འདུས་པའི་ཡེ་ཤེས་སྐུ༔ ཡིད་བཞིན་ནོར་བུ་གུ་རུ་བདེ་བ་ཆེའི༔ བསླུ་མེད་རྡོ་རྗེའི་གསུང་གིས་ལུང་བསྟན་ལྟར༔ མཐོང་གྲོལ་རྟེན་དང་ཟབ་མོའི་གདམས་པ་བཅས༔ མ་འོངས་དོན་ཕྱིར་གཏེར་དུ་སྦས་པ་འདི༔ དུས་སུ་བབ་ཚེ་ལས་ཅན་སྐྱེས་བུས་རྙེད༔ བྱིན་རླབས་སྟོབས་ཀྱི་ཚུལ་བཞིན་གཏན་ཕབས་ནས༔ གཞན་དོན་འགྲོ་འདུལ་ཕྲིན་ལས་མཐར་ཕྱིན་ཤོག༔ ཅེས་བརྗོད་པ་ན༔ གུ་རུ་བཀའ་དྲིན་ཅན་གྱིས་ཀྱང་སྐད་ཅིག་གིས་གློག་འཁྱུགས་པ་ལྟར་ཐུགས་རྗེའི་གཟུགས་སྐུ་མངོན་དུ་སྣང་བར་མཛད་ཅིང་མེ་ཏོག་གི་ཆར་དབབ་པ་དང་བཅས་བདེན་པའི་གསུང་གིས་སླར་ཡང་དབུགས་འབྱིན་ཆེན་པོ་སྩལ་བར་མཛད་དོ༔ ས་མ་ཡ༔ རྒྱ་རྒྱ༔ གཏེར་རྒྱ༔ སྦས་རྒྱ༔ གསང་རྒྱ༔ སྤྲུལ་པའི་གཏེར་ཆེན་མཆོག་གྱུར་བདེ་ཆེན་གླིང་པས་རྩི་རྐེ་རིན་ཆེན་འབར་བའི་བྲག་གི་མགུལ་ནས་སྤྱན་དྲངས་པའི་མཐོང་གྲོལ་བདུད་རྩི་ལྔ་ཤོག་ལས༔ ས་ཕོ་རྟའི་ལོའི་མགོ་ཟླ་བའི་དཀར་ཕྱོགས་ཀྱི་རྒྱལ་བ་གསུམ་པར་གཏན་ལ་ཕབ་རིམ་བཞིན་དུ་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག །ཅེས་པའང་མཆོག་གླིང་གདན་ས་རྩི་རྐེ་ནོར་བུ་གླིང་གི་ཆོས་གྲྭར་སྤར་དུ་བཀྲུན་པ་དགེ་ལེགས་འཕེལ།། དགེའོ།། | |||
}} | }} |
Latest revision as of 09:41, 1 June 2024
🚧 This website is under continued development. We appreciate your patience!
Wylie title | bla ma'i thugs sgrub yid bzhin nor bu las lo rgyus shel gyi phreng ba | ![]() |
---|---|---|
Location | mkhyen brtse'i bka' babs Volume 3, Text 6, Pages 91-122 (Folios 1a to 16b5) | |
Author | འཇམ་དབྱངས་མཁྱེན་བརྩེའི་དབང་པོ་ | |
Less details More details | ||
Tertön | མཆོག་གྱུར་གླིང་པ་ (mchog gyur gling pa) | |
Citation | 'jam dbyangs mkhyen brtse'i dbang po. bla ma'i thugs sgrub yid bzhin nor bu las lo rgyus shel gyi phreng ba. In Rdzong sar 'jam dbyangs mkhyen brtse'i dbang po'i bka' babs, Vol. 3: 91-122. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013. | |
Genre | History Texts - lo rgyus · Revelations - gter ma | |
Cycle | བླ་མའི་ཐུགས་སྒྲུབ་ཡིད་བཞིན་ནོར་བུ་ (bla ma'i thugs sgrub yid bzhin nor bu) | |
Karchag page | JKW-KABAB-Volume-03-GA-Karchag | |
Colophon |
| |
|