DKR-KABUM-18-TSHA-020

🚧 This website is under continued development. We appreciate your patience!

Previous Text Back to Volume PageNext Text

Wylie title	bdud 'dul pad+ma'i snying tig las: gu ru drag po kI la ya'i sgrub thabs bdud bzhi'i dpung 'joms
Location	dil mgo mkhyen brtse bka' 'bum Volume 18, Text 20, Pages 121-129 (Folios 1a to 9a5)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ (Khyentse, Dilgo)
Citation	Khyentse, Dilgo. bdud 'dul pad+ma'i snying tig las gu ru drag po kI la ya'i sgrub thabs bdud bzhi'i dpung 'joms. In Skyabs rje dil mgo mkhyen brtse rin po che'i bka' 'bum, Vol. 18: 121-129. Delhi: Shechen Publications, 1994.
Genre	Sadhanas - Evocation Ritual - sgrub thabs
Cycle	བདུད་འདུལ་པདྨའི་སྙིང་ཏིག་ (bdud 'dul pad+ma'i snying tig)
Deity	gu ru drag po
Colophon	ཅེས་པའང་ཁྱབ་བདག་འཁོར་ལོའི་མགོན་པོ་པདྨ་ཡེ་ཤེས་རྡོ་རྗེའི་མནལ་ལམ་དག་སྣང་གི་རྟེན་འབྲེལ་གྱི་བརྡས་བསྐུལ་ཏེ་གངས་ཅན་མཁས་གྲུབ་རྒྱ་མཚོའི་གཙུག་རྒྱན་སྤྲུལ་པའི་གཏེར་འབྱིན་ཡོངས་ཀྱི་རྒྱལ་པོ་འཇམ་དབྱངས་མཁྱེན་བརྩེའི་དབང་པོ་ལ་ཁ་རག་རྡོ་རྗེ་ཁྱུང་བཙུན་མས་དངོས་སུ་ཕུལ་བའི་གནམ་ལྕགས་ཀྱི་ཕུར་བུའི་ལོགས་སུ་གསལ་བའི་བརྡ་རིས་ལ་བསྟེན་ཏེ་པདྨ་གར་དབང་འོད་གསལ་མདོ་སྔགས་གླིང་པས་གཏན་ལ་ཕབ་པ་འདིས་ཀྱང་འཇམ་མགོན་གྲུབ་པའི་དཔའ་བོ་ཀུན་གཟིགས་དྷརྨ་མ་ཏིའི་གསང་གསུམ་བར་ཆད་བདུད་བཞིའི་གཡུལ་ལས་རྣམ་པར་རྒྱལ་ཏེ་ཐུགས་བསྐྱེད་དང་ཕྲིན་ལས་མཁའ་མཐར་ཁྱབ་པའི་རྟེན་འབྱུང་རྨད་དུ་འབྱུང་བའི་དཔལ་དམ་པར་གྱུར་ཅིག།
	ces pa'ang khyab bdag 'khor lo'i mgon po pad+ma ye shes rdo rje'i mnal lam dag snang gi rten 'brel gyi brdas bskul te gangs can mkhas grub rgya mtsho'i gtsug rgyan sprul pa'i gter 'byin yongs kyi rgyal po 'jam dbyangs mkhyen brtse'i dbang po la kha rag rdo rje khyung btsun mas dngos su phul ba'i gnam lcags kyi phur bu'i logs su gsal ba'i brda ris la bsten te pad+ma gar dbang 'od gsal mdo sngags gling pas gtan la phab pa 'dis kyang 'jam mgon grub pa'i dpa' bo kun gzigs d+harma ma ti'i gsang gsum bar chad bdud bzhi'i g.yul las rnam par rgyal te thugs bskyed dang phrin las mkha' mthar khyab pa'i rten 'byung rmad du 'byung ba'i dpal dam par gyur cig/

Tibetan Text

Wylie

[edit]

༁ྃ༔ བདུད་འདུལ་པདྨའི་སྙིང་ཏིག་ལས༔ གུ་རུ་དྲག་པོ་ཀཱི་ལ་ཡའི་སྒྲུབ་ཐབས་བདུད་བཞིའི་དཔུང་འཇོམས་བཞུགས༔

༁ྃ༔ བརྡ་ཡིག རྩ་གསུམ་འདུས་པའི་ལྷ་ལ་འདུད༔ རྩུབ་འགྱུར་ལྔ་བརྒྱའི་ཐ་མ་ལ༔ དུག་ལྔའི་ཉོན་མོངས་རང་གཟུགས་ལས༔ གློ་བུར་དམ་སྲི་རྒྱལ་བསེན་ཀླུས༔ ཆོས་བྱེད་ཡོངས་ལ་གནོད་ཅིང་རྒོལ༔ བར་ཆད་སྐབས་མང་བཙལ་བའི་ཚེ༔ ནད་གདོན་བྱད་གཏད་མི་མཐུན་ཕྱོགས༔ མཐའ་དག་སྐྱོབས་པའི་གདམས་པའི་མཆོག༔ ཀུན་དང་ཐུན་མོང་མ་གྱུར་པའི༔ གསང་སྒྲུབ་ཟབ་བརྒྱའི་མཐར་ཐུག་བསྟན༔ ས་མ་ཡཱ༔ སྐལ་བཟང་དད་མོས་མཆོག་ལྡན་པས༔ ངེས་འབྱུང་སྙིང་རྗེའི་སེམས་བསྐྱེད་ཀྱིས༔ དབང་ཐོབ་དམ་ཚིག་ལ་གནས་པས༔ ཉམས་ལེན་སྙིང་པོའི་རྣལ་འབྱོར་ནི༔ ཧཱུྃ༔ རང་རིག་འོད་གསལ་བདེ་གཤེགས་འདུས་པའི་ལྷ༔ བར་ཆད་བདུད་འདུལ་པདྨ་ཀཱི་ལ་ཡ༔ རིགས་ཀུན་འདུས་པ་བླ་མ་དྲག་པོའི་ཚུལ༔ མི་ཕྱེད་དད་མོས་གདུང་བས་སྐྱབས་སུ་མཆི༔ ཧཱུྃ༔ གདོད་ནས་རྣམ་དག་འོད་གསལ་དེ་བཞིན་ཉིད༔ མ་རྟོགས་འཁྲུལ་སྣང་བདེན་པར་བཟུང་བའི་མཐུས༔ གཟུང་འཛིན་རང་རྒྱུད་བར་ཆད་བདུད་འདུལ་ཕྱིར༔ ཁྲག་འཐུང་ལྷ་ཚོགས་སྒྲུབ་པར་སེམས་བསྐྱེད་དོ༔ ཧོཿ རྡོ་རྗེ་སློབ་དཔོན་སངས་རྒྱས་དཔལ་སོགས། ཧྲཱིཿ ང་ནི་དབང་དྲག་པདྨ་ཧེ་རུ་ཀ༔ ལོག་འདྲེན་མཐར་བྱེད་འཇིགས་མཛད་དཔའ་བོའི་གར༔ བདེན་པའི་ཚིག་ལས་ནམ་ཡང་མ་འདའ་བར༔ གཏོར་མ་ལོངས་ལ་རྒྱ་མཚོའི་ཕ་མཐར་དེངས༔ ཧཱུྃ་བཞིའི་སྔགས་ཀྱིས་གཟིར་ལ་བསྐྲད༔ ཧྲཱིཿ ཡོངས་གྲུབ་གཉུག་མ་ཆོས་སྐུའི་ཞིང་ཁམས་ལ༔ འོད་གསལ་ཡེ་ཤེས་རྡོ་རྗེའི་སྲུང་གུར་འཁྲིགས༔ ཀུན་བརྟགས་གདོན་ཚོགས་འཇུག་པའི་སྐབས་མེད་པས༔ ཁྱབ་བརྡལ་ལྷ་སྔགས་ཡེ་ཤེས་ཕྱག་རྒྱར་ཤར༔ བཛྲ་རཀྵ་ཧཱུྃ་བྷྲཱུྃ༔ ཧཱུྃ༔ ཆོས་དབྱིངས་ཀློང་ནས་རང་བྱུང་ཐུགས་རྗེའི་རྩལ༔ གཏུམ་དྲག་དམར་ནག་མེ་ལྕེའི་ཕྲེང་བ་ཅན༔ པདྨ་ཁྲག་འཐུང་རོལ་པའི་དཀྱིལ་འཁོར་ལྷ༔ བྱིན་རླབས་ཐུགས་རྗེའི་དབང་གིས་གནས་འདིར་གཤེགས༔ བགེགས་དང་ལོག་འདྲེན་བར་ཆད་རྡུལ་དུ་རློག༔ དབང་བསྐུར་བྱིན་ཕོབ་རྟགས་དང་མཚན་མ་སྟོན༔ སྐུ་གསུང་ཐུགས་ཀྱི་ཡེ་ཤེས་རྒྱུད་ལ་བསྐྱེད༔ མཆོག་དང་ཐུན་མོང་དངོས་གྲུབ་མྱུར་དུ་སྩོལ༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཧེ་རུ་ཀ་ཀཱི་ལ་ཡ་སརྦ་ས་མ་ཡ་ཨ་བེ་ཤ་ཡ་ཨ་ཨ༔ རཾ་ཡཾ་ཁཾ༔ སྣང་བ་རྣམ་དག་བདེ་ཆེན་དག་པའི་ཞིང༔ སྲིད་པ་རང་གྲོལ་རྡོ་རྗེའི་འདོད་ཡོན་རྫས༔ ཕྱི་ནང་གསང་བ་མཆོད་པའི་སྤྲིན་རྒྱ་མཚོ༔ ཟག་མེད་ནམ་མཁའ་མཛོད་དུ་ལྷུན་གྱིས་གྲུབ༔ ཨོཾ་བཛྲ་ཨརྒྷཾ་ནས། ཤབྡ་མ་ཧཱ་པཱུ་ཛ་ཧོ༔ ཨོཾ་ཨཱཿཧཱུྃ་མ་ཧཱ་ཨ་མྲྀ་ཏ་རཀྟ་བ་ལིངྟ་སརྦ་པཱུ་ཛ་ཡེ་ཧཱུྃ༔ ཧཱུྃ༔ སྟོང་ཆེན་བདག་མེད་ཀ་ནས་དག་པ་ལས༔ ལྷུན་གྲུབ་སྙིང་རྗེ་ནམ་མཁའ་མཉམ་པར་ཤར༔ ཟུང་འཇུག་རིག་པ་རང་བྱུང་ཡི་གེ་ཧྲཱིཿ ནམ་མཁའི་ཀློང་ན་སྐར་ཆེན་བཞིན་དུ་གསལ༔ དེ་ལས་དྭངས་མའི་འོད་ཟེར་འཁྲིགས་པ་ལས༔ དག་པའི་གཞལ་ཡས་ཚད་དང་མཚན་ཉིད་རྫོགས༔ གསང་ཆེན་རོལ་པ་དབང་དྲག་འབར་བའི་ཞིང༔ རབ་འཇིགས་དྲག་པོའི་རྒྱན་བཀོད་ལྷུན་གྱིས་གྲུབ༔ ལྟེ་བར་ནམ་ལྕགས་འཁོར་ལོ་རྩིབས་བརྒྱད་པའི༔ ཨེ་དབྱིངས་རྡོ་རྗེའི་བྲག་ཆེན་འབར་བ་དང༔ པད་ཉིར་རྒྱལ་འགོང་གན་རྐྱལ་བསྒྱེལ་བའི་སྟེང༔ རྡོ་རྗེའི་ས་བོན་ཐོག་ལྟར་ལྷུང་བ་ལས༔ སྤྲོ་བསྡུའི་འོད་ཀྱིས་རྒྱལ་ཀུན་མཐུ་སྟོབས་བསྡུས༔ བདུད་བཞིའི་དཔུང་བཅོམ་བར་ཆད་དབྱིངས་སུ་བསྒྲལ༔ ས་བོན་ཡོངས་གྱུར་རྡོ་རྗེ་རྩེ་ལྔ་པ༔ དེ་ཉིད་འོད་ཞུ་ཐིག་ལེར་འདྲིལ་བ་ལས༔ མ་ཧཱ་གུ་རུ་པདྨ་ཁྲག་འཐུང་ཆེ༔ དུས་མཐའི་མེ་བཞིན་ཁྲོས་འཁྲུགས་རྔམ་པའི་སྐུ༔ གར་དགུའི་བསྒྱིངས་བའི་དམར་ནག་དྲག་པོའི་ཞལ༔ གཡས་མཐིང་ཆོས་སྐུ་རྟོག་མེད་དེ་བཞིན་ཉིད༔ གཡོན་དཀར་སྐྱོན་བྲལ་བདེ་ཆེན་བཞད་པའི་ཉམས༔ སྤྱན་དགུ་སྡང་མིག་ཁྲོ་གཉེར་རླབས་ལྟར་འཁྲུགས༔ ཞལ་གདངས་ལྗགས་འདྲིལ་ཤིན་ཏུ་ཁྲོས་པའི་སྐུ༔ ཐོད་སྐམ་ལྔས་བརྒྱན་ཁམ་ནག་དབུ་སྐྲ་བརྫེས༔ ཕྱག་དྲུག་གཡས་ཀྱི་དང་པོས་རྡོ་རྗེ་གསོར༔ གཉིས་པས་རལ་གྲི་གཡོན་གྱི་ཐོག་མས་སྙིང༔ བར་པས་ལྕགས་སྡིག་ཐ་མའི་ཕྱག་གཉིས་ཀྱིས༔ གནམ་ལྕགས་ཕུར་པ་འདྲིལ་ཞིང་བགེགས་ལ་འདེབས༔ སྐུ་སྨད་ཆུ་སྲིན་གདུག་པའི་ཁར་ཐོན་པའི༔ ཕུར་བུའི་དབལ་གྱིས་དམ་སྲིའི་སྙིང་ནས་གཟིར༔ དཔལ་དང་དུར་ཁྲོད་རོལ་པའི་རྒྱན་ཆས་ཀྱིས༔ བརྗིད་པའི་སྐུ་མཆོག་ཡེ་ཤེས་མེ་དབུས་རོལ༔ སྐུ་ཡི་གནས་ལྔར་སྲུང་བྱེད་ཁྲོ་བོ་ཆེ༔ ཡབ་ཡུམ་བཅུ་དང་ཕྲ་ཕྱག་སྒོ་མའི་ཚོགས༔ ཉི་ཟེར་རྡུལ་ལྟར་འཁྲིགས་པས་བ་སྤུ་ཡན༔ གོ་མཚམས་མེད་པར་གཏམས་པས་ཕོ་ཉ་སྤྲོ༔ ཤར་དུ་དཔལ་ཆེན་བཛྲ་ཧེ་རུ་ཀ༔ ལྷོ་རུ་འཇམ་དཔལ་གཤིན་རྗེ་དུག་གི་གདོང༔ ནུབ་ཏུ་དབང་ཆེན་རྟ་མཆོག་རོལ་པའི་ལྷ༔ བྱང་དུ་ཕྲིན་ལས་རྡོ་རྗེ་ཕུར་བུ་རྣམས༔ མཐིང་སེར་དམར་ལྗང་ཞལ་གཅིག་ཕྱག་གཉིས་པ༔ རྡོ་རྗེ་དགྲ་སྟྭ་ཐོད་དབྱུག་རལ་གྲི་གཡས༔ ལྕགས་གསེར་ཟངས་གཡུའི་སྡིག་པ་གཡོན་པས་བསྣམས༔ སྐུ་སྨད་ཟུར་གསུམ་གནམ་ལྕགས་ཕུར་བུའི་དབལ༔ བར་ཆད་བདུད་བཞིའི་སྙིང་ལ་ཟུག་པས་བཞེངས༔ རིགས་ལྔའི་ཁྲོ་རྒྱལ་སོ་སོའི་སྤྱི་གཙུག་ཏུ༔ རང་མདོག་སྤྲུལ་པའི་བྱ་ཁྱུང་རྔམ་པར་ལྡིང༔ མཚམས་བཞི་གདུགས་དཀར་ལྷ་མོ་འོད་ཟེར་ཅན༔ བདུད་འདུལ་དྲག་མོ་ཀརྨ་ཌཱ་ཀི་ནཱི༔ དཀར་སེར་མཐིང་ལྗང་ཁྲོས་འཁྲུགས་འབར་བའི་སྐུ༔ ཕྲ་མེན་རིགས་སྔགས་གྲུབ་པའི་ལྷ་མོའི་ཚུལ༔ གཅེར་བུ་སྐྲ་བརྫེས་རུས་པའི་ཕྱག་རྒྱ་ལྔ༔ འཆང་ཞིང་གྲི་གུག་ཕྱར་ཏེ་ཐོད་ཁྲག་འཐུང༔ དུས་མཐའི་མེ་རླུང་འཁྲུགས་པའི་དཀྱིལ་འཁོར་ན༔ ཁྲག་འཐུང་ལྷ་ཚོགས་མཁའ་ལ་སྤྲིན་ལྟར་ཤར༔ གནས་གསུམ་རྡོ་རྗེའི་ཡིག་འབྲུའི་འོད་ཟེར་གྱིས༔ ཡེ་ཤེས་འཁོར་ལོ་བཛྲ་ས་མ་ཛཿ ཧཱུྃ༔ བདེ་ཆེན་རོལ་པ་དབང་དྲག་དུར་ཁྲོད་ཆེ༔ འབར་བའི་ཞིང་མཆོག་པདྨ་འོད་ཀྱི་གླིང༔ སྐུ་གསུམ་ཡོན་ཏན་རྫོགས་པའི་ཕོ་བྲང་ནས༔ བླ་མ་དྲག་པོ་དཔལ་ཆེན་ཁྲག་འཐུང་ཆེ༔ ཕྱག་རྒྱ་གར་གྱི་བརྡ་ཡིས་བསྐུལ་ལགས་ན༔ གནས་འདིར་རྫུ་འཕྲུལ་ཆེན་པོས་གཤེགས་སུ་གསོལ༔ སྔགས་དང་སྒྲ་ཚིག་གླུ་ཡིས་འབོད་ལགས་ན༔ དགོད་གཤེ་དྲག་ཤུལ་རོལ་པས་གཤེགས་སུ་གསོལ༔ ཏིང་འཛིན་རྡོ་རྗེའི་གནད་ཀྱིས་དེང་བསྐུལ་ན༔ ཡེ་ཤེས་རང་སྣང་དཀྱིལ་འཁོར་གཤེགས་སུ་གསོལ༔ དབང་བསྐུར་བྱིན་ཕོབ་གྲུབ་པའི་རྟགས་མཚན་སྟོན༔ འཁྲུལ་སྣང་བདུད་བཞིའི་བར་ཆད་ད་ལྟ་སྒྲོལ༔ མཆོག་དང་ཐུན་མོང་དངོས་གྲུབ་བསྩལ་ནས་ཀྱང༔ སྒོ་གསུམ་རྡོ་རྗེའི་ཡེ་ཤེས་སྨིན་པར་མཛོད༔ ཨོཾ་གུ་རུ་པདྨ་ཀྲོ་དྷ་ས་པ་རི་ཝཱ་ར་ས་མ་ཡ་ཛཿཛཿ ཧཱུྃ༔ ཁྲག་འཐུང་དགྱེས་པ་རང་བྱུང་དྲག་པོའི་ཞིང༔ གདོད་ནས་དམ་ཚིག་ཡེ་ཤེས་དབྱེར་མེད་པའི༔ ངོ་བོར་བཞུགས་ལ་རང་ངོ་ཤེས་པའི་ཕྱག༔ གཉིས་མེད་མཉམ་པ་ཆེན་པོར་འཚལ་བས་འདུད༔ ས་མ་ཡ་ཏིཥྛ་ལྷན༔ ན་མོ་ན་མ་མི༔ ཧཱུྃ༔ ཉམས་པའི་དགྲ་བགེགས་བསྒྲལ་བའི་ལོངས་སྤྱོད་ཆེ༔ དབང་པོའི་མེ་ཏོག་ཚིལ་ཆེན་སྤོས་སྤྲིན་གཏིབས༔ ཞུན་ཆེན་སྣང་གསལ་བསད་ཁྲག་དྲི་ཆབ་སྐྱེམས༔ ཤ་རུས་ཞལ་ཟས་དུར་ཁྲོད་བཤུག་པའི་གླུ༔ དྲག་ཤུལ་ཆེན་པོས་གནམ་སའི་ཁྱོན་གང་བ༔ དཀྱིལ་འཁོར་ལྷ་ཚོགས་དགྱེས་པའི་དཔལ་དུ་འབུལ༔ ཨོཾ་མ་ཧཱ་གུ་རུ་ཀྲོ་དྷ་ཀཱི་ལ་ཡ་ས་པ་རི་ཝཱ་ར་རཱུ་པ་ཤབྡ་གྷནྡྷེ་རཱ་ས་སྤརྴེ་སུ་ཁ་པཱུ་ཛ་ཧོ༔ ཧཱུྃ༔ རྩ་བརྒྱད་སྟོང་སྦྱར་སྨན་གྱི་རྒྱ་མཚོ་འཁྱིལ༔ འདོད་ཡོན་ལྷུན་རྫོགས་གཏོར་མའི་ཕུང་པོ་སྤུངས༔ རྒྱུད་དྲུག་རྩད་གཅོད་རཀྟ་རྦ་ཀློང་འཁྲུགས༔ ཁྲག་འཐུང་དགྱེས་པ་དཔའ་བོའི་སྐྱེམས་སུ་འབུལ༔ མ་ཧཱ་ཨ་མྲྀ་ཏ་རཀྟ་བ་ལིངྟ་ཁཱ་ཧི༔ ཧཱུྃ༔ གདོད་ནས་གཉིས་མེད་ཆོས་སྐུའི་ཡེ་ཤེས་སུ༔ མཉམ་པར་སྦྱོར་ལ་མཆོད་དང་མཆོད་བྱ་བྲལ༔ གཉིས་འཛིན་ཡོངས་སྒྲོལ་ཡེ་ཤེས་ཐུགས་རྗེ་ཆེ༔ ཁམས་གསུམ་བསྒྲལ་བའི་དམ་ཚིག་བླ་ན་མེད༔ དྷརྨ་དྷཱ་ཏུ་ཛྙཱ་ན་ཨ་ཨ༔ ཧཱུྃ༔ འཇིགས་རུང་སྲིན་པོའི་ལང་ཚོ་འབར་བའི་སྐུ༔ ཧཱུྃ་ཕཊ྄་ང་རོས་བདུད་འདུལ་དྲག་པོའི་གསུང༔ རྟོག་བྲལ་དེ་བཞིན་ཉིད་དུ་དགྱེས་པའི་ཐུགས༔ རྗེ་བཙུན་བླ་མ་དྲག་པོའི་སྐུར་བཞེངས་བསྟོད༔ སྐུ་གསུམ་ཞལ་གྱིས་ཉོན་མོངས་དབྱིངས་སུ་གསོལ༔ ཕ་རོལ་ཕྱིན་པའི་ཕྱག་གིས་འགྲོ་དྲུག་སྒྲོལ༔ རྣམ་ཐར་གསུམ་གྱི་མཚོན་ཆས་བདུད་དགྲ་འདུལ༔ དོན་གཉིས་ཡོན་ཏན་རྫོགས་པའི་ལྷ་ལ་བསྟོད༔ རྡོ་རྗེ་རལ་གྲིས་ཕུང་པོ་ཉོན་བདུད་འཇོམས༔ ལྕགས་སྡིག་ཙིཏྟས་ལྷ་བདུད་སྐྱེ་འཆི་གཅོད༔ གནམ་ལྕགས་ཕུར་བུས་ཁམས་གསུམ་ཐལ་མར་འབྱིན༔ ཆེ་བའི་ཡོན་ཏན་རྟགས་སུ་བརྒྱན་ལ་བསྟོད༔ སྐུ་གསུང་ཐུགས་དང་ཕྲིན་ལས་དཔལ་ཆེན་བཞི༔ ཚད་མེད་ཕྱག་རྒྱ་བདེ་ཆེན་ཌཱ་ཀིའི་ཚུལ༔ ཀུན་ཀྱང་ཡེ་ཤེས་ཕྱག་རྒྱའི་རོལ་མོ་རུ༔ གཉིས་མེད་དད་དང་གུས་པའི་ཕྱག་གིས་བསྟོད༔ བདག་ཉིད་པདྨ་ཁྲག་འཐུང་ཀཱི་ལ་ཡའི༔ ཡེ་ཤེས་སེམས་དཔའ་ཨོ་རྒྱན་ཐོད་ཕྲེང་རྩལ༔ སྣང་སྲིད་ཟིལ་གནོན་རྡོ་རྗེ་ཐོད་བུམ་ཅན༔ ཁ་ཊྭཱཾ་མཆན་བཅུག་པད་ཟླར་རོལ་པ་ཡི༔ ཐུགས་ཀྱི་ཐིག་ལེར་ཉི་ཟླའི་གྭའུའི་ཀློང༔ གསེར་གྱི་རྡོ་རྗེའི་ལྟེ་བར་ཧྲཱིཿདམར་པོ༔ འབར་བའི་སྔགས་ཕྲེང་གཡས་སུ་བསྐོར་བ་ལས༔ འཕྲོས་པའི་འོད་ཀྱིས་རྩ་གསུམ་ལྷ་ཚོགས་དང༔ ཁྱད་པར་དཔལ་ཆེན་ཁྲོ་བོའི་དཀྱིལ་འཁོར་ཆེའི༔ མཁྱེན་ནུས་མཐུ་སྟོབས་ཡོན་ཏན་མ་ལུས་པ༔ སྐུ་དང་ས་བོན་ཕྱག་མཚན་རྣམ་པ་རུ༔ རབ་འབྱམས་དག་པའི་ཞིང་ནས་སྤྱན་དྲངས་ཏེ༔ བདག་ལ་ཐིམ་པས་གཟི་བྱིན་ལྷག་པར་འབར༔ སླར་ཡང་འོད་ཀྱིས་སྣང་སྲིད་མ་ལུས་པ༔ བླ་མ་དྲག་པོའི་སྐུ་དང་ཞིང་དུ་རྫོགས༔ ཨོཾ་ཨཱཿཧཱུྃ་ཧྲཱིཿབཛྲ་གུ་རུ་པདྨ་ཀྲོ་དྷ་ཀཱི་ལ་ཡ་སརྦ་སིདྡྷི་ཧཱུྃ་ཕཊ྄༔ བླ་མ་ཞི་དྲག་གཅིག་ཏུ་འདྲིལ་བ་ཡི༔ བསྙེན་པའི་བཟླས་པ་འབུམ་བཅུའི་ལས་ཀུན་བྱེད༔ ཡེ་ཤེས་སེམས་དཔའི་ཐུགས་ཀའི་ས་བོན་ལས༔ སྔགས་ཕྲེང་བྱུང་བ་ཞལ་ནས་འཕྲོས་པ་ལས༔ རིགས་བཞིའི་ཁྲོ་བོའི་ཞལ་དང་སྐུའི་དབྱིབས་བརྒྱུད༔ གཡས་སུ་བསྐོར་ནས་གཙོ་བོའི་ལྟེ་བར་ཞུགས༔ ཐུགས་ཀ་ལ་ཐིམ་སླར་ཡང་འཕྲོས་པའི་སྔགས༔ ལྟེ་བ་ནས་ཐོན་མཁའ་འགྲོ་རྣམ་པ་བཞིའི༔ ལྟེ་བ་ཞལ་བརྒྱུད་གཡོན་དུ་བསྐོར་བ་ཡང༔ བླ་མ་དྲག་པོའི་ཞལ་ནས་ཐུགས་ཀར་ཐིམ༔ དེ་ལྟར་འཁོར་བས་ཀུན་ཀྱང་གསང་བའི་སྔགས༔ འུར་འུར་ཆེམས་ཆེམས་སྒྲོགས་པས་སྣང་སྲིད་ཀུན༔ དབང་དྲག་པདྨ་འོད་ཀྱི་ཞིང་དུ་གྱུར༔ གང་འདོད་དངོས་གྲུབ་ཐོགས་མེད་འགྲུབ་པར་བསམ༔ ཨོཾ་ཨཱཿཧཱུྃ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ྄༔ ཨ་ཧཱུྃ་ཧཱུྃ་ཕཊ྄༔ ཅེས་དང༌། སྤྱི་དྲིལ་སྔགས་རྒོད་ཅི་ནུས་བཟླ༔ ཨོཾ་པདྨ་ཀྲོ་དྷ་མ་ཧཱ་ཤྲཱི་ཧེ་རུ་ཀ་སརྦ་ཀྲོ་དྷ་དྷཱ་ཀི་ནཱི་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ྄༔ སྤྲོ་ན་རིགས་བཞི་ཡབ་ཡུམ་གསང་སྔགས་ནི༔ ཨོཾ་བཛྲ་པ་ཎི་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཨོཾ་ཡ་མཱནྟ་ཀ་ཧྲཱིཿཥྚི་ཝཱི་ཀྲྀ་ཏ་ན་ན་ཧཱུྃ་ཕཊ྄༔ ཨོཾ་ཧྲཱིཿཔདྨཱནྟ་ཀྲྀ་ཏ་མ་ཧཱ་ཀྲོ་དྷ་ཧ་ཡ་གྲཱྀ་ཝ་ཧཱུྃ་ཕཊ྄༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ྄༔ ཏདྱ་ཐཱ༔ ཨོཾ་ཨ་ན་ལེ་ཨ་ན་ལེ༔ བི་ཥ་དེ་བི་ཥ་དེ༔ བཻ་ར་བཻ་ར༔ བཛྲ་དྷ་རི་ཎི༔ བཛྲ་པ་ཎི་བྷནྡྷ་བྷནྡྷ་ཧཱུྃ་ཕཊ྄༔ ཨོཾ་མ་རི་ཙྱཻ་མཾ་སརྦ་བིགྷྣཱན་མཱ་ར་ཡ་ཕཊ྄་སྭཱ་ཧཱ༔ ཨཿཀཿསཿམཿརཿཙཿཤཿདཿརཿསཿམཿརཿཡཿཕཊ྄༔ ཨོཾ་སརྦ་ཀརྨ་དྷཱ་ཀི་ཧཱུྃ་ཧ་ཧེ་ཕཊ྄་བྷྱོ༔ གཙོ་བོ་སྤྱི་དྲིལ་སྒྲུབ་སྔགས་འབུམ་བཞི་དང༔ སོ་སོའི་བཟླས་པ་འབུམ་རེའི་དངོས་གྲུབ་ཐོབ༔ ལས་སྦྱོར་གཙོ་བོ་དྲག་པོའི་ཏིང་འཛིན་ནི༔ ཧཱུྃ་ཧཱུྃ་ཧཱུྃ་ཞེས་རྔམ་པའི་སྒྲ་གདངས་ཀྱིས༔ བསྐུལ་བས་ཀུན་ཀྱང་ཐུགས་སྲོག་ཧཱུྃ་གི་གླུས༔ སྐུ་ལས་སྐུ་འཕྲོས་ཞལ་ནས་སྔགས་ཀྱི་མེ༔ ཐུགས་སྲོག་ལས་བྱུང་ས་བོན་ཕྱག་མཚན་གྱི༔ སྤྲོ་བསྡུས་སྣང་བས་ཁམས་གསུམ་ཤིག་ཤིག་གཡོས༔ སྡེ་བརྒྱད་དྲེགས་པ་སྤ་བཀོང་འདར་ཞིང་ཞུམ༔ སྲོག་སྙིང་དབང་མེད་ཁབ་ལེན་ལྕགས་ལྟར་དྲངས༔ ལྟེ་འོག་ནས་ཐིམ་དམ་སྲི་བདུད་བགེགས་བསྒྲལ༔ བར་ཆད་བྱད་ཕུར་གདོན་ཚོགས་གཞོབ་ཀྱིས་བསྲེགས༔ གཏད་ཁྲོམ་མནན་གཟིར་སྦྱོར་བ་ཐམས་ཅད་བཤིག༔ སྣང་སྲིད་འབར་བ་ཁྲོ་བོའི་ཞིང་དུ་རྫོགས༔ རང་དང་བསྲུང་བྱ་མཚོན་ཆ་སྣ་ལྔའི་གུར༔ ཁོང་སེང་མེད་པ་གཞོམ་གཞིག་བྲལ་བར་ཚུད༔ སྒོ་གསུམ་སྤྱི་དཔལ་ཆེན་པོའི་གསང་བ་དང༔ དབྱེར་མེད་ནུས་པའི་གདིང་དང་ལྡན་པར་མོས༔ ཨོཾ་བཛྲ་མ་ཧཱ་ཀྲོ་དྷ་པདྨ་ཀྲོ་དྷཱི་ཤྭ་རི་བཛྲ་ཀཱི་ལི་ཀཱི་ལ་ཡ་མ་ཧཱ་ཡཀྵ་ཀཱ་ལ་རཱུ་པ་ཀརྨ་རཾ་རཾ་ཛྭ་ལ་རཾ་ཧཱུྃ་ཕཊ྄༔ ཁྲི་ཕྲག་སྔགས་ཀྱིས་ནུས་པ་ཚད་དུ་ཕྱིན༔ པདྨ་དྲག་པོའི་ཐུགས་དང་གཉིས་མེད་འགྱུར༔ རྗེས་ཀྱི་རིམ་པ་ཚོགས་ཀྱི་མཆོད་པ་ནི༔ རཾ་ཡཾ་ཁཾ་གི་ཡི་གེ་ཐུགས་ལས་སྤྲོས༔ མ་དག་མཚན་འཛིན་བསྲེགས་གཏོར་སྦྱངས་པ་ལས༔ ཟག་མེད་ཡེ་ཤེས་བདུད་རྩི་ཚོགས་ཀྱི་རྫས༔ རིགས་ལྔའི་དམ་ཚིག་ཡེ་ཤེས་སྤྲིན་དུ་གྱུར༔ ཨོཾ་ཨཱཿཧཱུྃ་ཧ་ཧོ་ཧྲཱི༔ ཧཱུྃ༔ དབང་དྲག་རོལ་པ་ལངྐ་སྲིན་པོའི་ཡུལ༔ དག་པའི་ཞིང་མཆོག་པདྨ་དྲྭ་བ་ནས༔ ཁྲག་འཐུང་རྗེ་བཙན་སྤྱི་དཔལ་ཀཱི་ལ་ཡ༔ དུར་ཁྲོད་ཆེན་པོའི་གནས་འདིར་གཤེགས་སུ་གསོལ༔ ས་མ་ཡ་ཛ་ཛཿ ཧཱུྃ༔ བཟའ་བཅའ་བཏུང་བ་བདུད་རྩི་སྙིང་པོའི་བཅུད༔ འདོད་ཡོན་ལྔ་ལྡན་མཆོད་པའི་ཟེགས་མ་ཅན༔ ཁྲག་འཐུང་ལྷ་ཚོགས་དགྱེས་པའི་མཆོད་པར་འབུལ༔ ཐུགས་དམ་གཉན་བསྐང་མཆོག་ཐུན་དངོས་གྲུབ་སྩོལ༔ མ་ཧཱ་ག་ཎ་ཙཀྲ་པཱུ་ཛ་ཧོ༔ ཧྲཱིཿ དོན་ལ་བདག་རྟོག་བློ་ཡི་འཁྲུལ་བྲལ་ཀྱང༔ གཉིས་འཛིན་མཚན་མའི་རྟོག་ངོར་ཉམས་ཆག་ཀུན༔ བདུད་རྩི་རྣམ་ལྔའི་ཚོགས་ཀྱི་འཁོར་ལོ་ཡིས༔ བཤགས་སོ་བྱང་ཞིང་དག་པར་མཛད་དུ་གསོལ༔ ས་མ་ཡ་བི་ཤུདྡྷེ་ཨ་ཨ༔ ཧཱུྃ་བྷྱོ༔ དབང་དྲག་དུས་ཀྱི་ཕོ་ཉ་ཀཱི་ལ་ཡས༔ གནོད་བྱེད་རྒྱལ་འགོང་དམ་སྲི་བྱུར་འདྲེའི་ཚོགས༔ རྣམ་ཐར་སྒོ་གསུམ་དབྱིངས་ཀྱི་ཨེ་རུ་བསྒྲལ༔ ཤ་ཁྲག་དྭངས་མ་ཡེ་ཤེས་དབྱིངས་སུ་འབུལ༔ སརྦ་ཤ་ཏྲཱུན་མཱ་ར་ཡ་ཕཊ྄༔ མ་ཧཱ་མཾ་ས་རཀྟ་ཀེཾ་ནི་རུ་དྷི་ཁཱ་ཧིཿ རྣལ་འབྱོར་ལྡན་པས་དམ་ཚིག་རྫས་ལ་རོལ༔ ལྷག་མས་དཔལ་གྱི་བཀའ་སྡོད་མཆོད་པ་ནི༔ བྷྱོ༔ ཧེ་རུ་ཀ་དཔལ་དགྱེས་པའི་དམ་རྫས་ཀྱི༔ ལྷག་གཏོར་དཀྱིལ་འཁོར་མུ་རན་སྐྱོང་ལ་འབུལ༔ རྡོ་རྗེའི་ཡལ་གམ་འདའ་བར་མ་མཛད་པར༔ རྣལ་འབྱོར་འདོད་པའི་ཕྲིན་ལས་ཐོགས་མེད་སྒྲུབས༔ ཨོཾ་ཨུཙྪིཥཊ་བ་ལིངྟ་ཁ་ཧི༔ ཧཱུྃ༔ བཞེངས་ཤིག་བླ་མ་དྲག་པོ་ཧེ་རུ་ཀ༔ འབར་བའི་གར་དགུས་མཐུ་སྟོབས་ནུས་རྩལ་བསྐྱེད༔ དུག་ལྔའི་བདུད་སྡེ་ཡེ་ཤེས་དབྱིངས་སུ་སྒྲོལ༔ སྐུ་གསུང་ཐུགས་ཀྱི་བྱིན་རླབས་བསྩལ་དུ་གསོལ༔ ཧཱུྃ་ཧྲཱིཿ སྔོན་ཚེ་འདས་དུས་བསམ་མི་ཁྱབ་པའི་ཞིང༔ ཆོས་དབྱིངས་ཀུན་ཁྱབ་རྒྱལ་བ་དགོངས་བརྒྱུད་ཀྱིས༔ སྟོན་འཁོར་གཉིས་མེད་རྒྱུད་ཀྱི་གནས་བསྟན་ཚེ༔ འཁྲུལ་པ་ཡེ་ཤེས་འཆར་བའི་ཆོས་སྲུང་དང༔ བར་དུ་རང་སྣང་དག་པའི་གནས་ཡུལ་དུ༔ རིག་འཛིན་བརྡ་བརྒྱུད་ཨོ་རྒྱན་རྗེ་འབངས་ཀྱིས༔ ཡིད་བྱེད་ཚིག་འདས་ཆོས་འཁོར་བསྐོར་བའི་ཚེ༔ རྡོ་རྗེའི་ཐ་ཚིག་ཕོག་པའི་དམ་ཅན་དགོངས༔ ཐ་མ་བདེ་ཆེན་རྔ་ཡབ་དཔལ་གྱི་རིར༔ སྨོན་ལམ་དུས་བབས་མདོ་སྔགས་གླིང་པ་ལ༔ སྙན་བརྒྱུད་གཏད་པས་གསང་བའི་མཛོད་བརྡོལ་ཚེ༔ དམ་བཅའ་ཞལ་བཞེས་ཌཱ་ཀི་གཏེར་བདག་རྣམས༔ དུག་གསུམ་ཤ་ཁྲག་རུས་པའི་གཏོར་མ་ལོངས༔ འདའ་ཀའི་ཆད་ཐོ་མ་བསྙེལ་ཕྲིན་ལས་སྒྲུབས༔ སངས་རྒྱས་བསྟན་སྲུངས་རྣལ་འབྱོར་བུ་བཞིན་སྐྱོངས༔ བར་ཆད་ཀུན་སོལ་རིག་འཛིན་གནས་ཐོབ་མཛོད༔ བྷྱོཿ བདུད་དང་གནོད་སྦྱིན་སྨན་བཙུན་ཌཱ་ཀིའི་རིགས༔ ཕྱི་ནང་རྟེན་འབྲེལ་དག་པའི་བརྟན་མ་ཡིས༔ བཤལ་ཆུ་བཞེས་ལ་མཐའ་ཡི་སོ་ཁ་སྲུངས༔ རྟག་ཆད་ཀླ་ཀློའི་སྡེ་དཔུང་སྒྲོལ་བར་མཛོད༔ ཧཱུྃ་ཡཱ༔ བྱང་ཆུབ་སྒྲུབ་ལ་བར་གཅོད་དམ་སྲིའི་ཚོགས༔ མནན་ནོ་ལྡང་མེད་གཤིན་རྗེའི་གྲེ་བར་གཟིར༔ ཀློང་ལྔའི་དཀྱིལ་འཁོར་ཆེན་པོའི་རྒྱས་བཏབ་སྟེ༔ སྣོད་བཅུད་འབར་བའི་ཕྱག་རྒྱས་བྲོ་བརྡུང་ངོ༔ སྟྭམ་བྷ་ཡ་ནན༔ ཧཱུྃ༔ རིག་འཛིན་བླ་མས་བྱིན་རླབས་དབང་མཆོག་བསྐུར༔ དཔལ་ཆེན་འབར་བས་མཆོག་ཐུན་དངོས་གྲུབ་སྩོལ༔ བདེ་ཆེན་ཌཱ་ཀིས་ལམ་གྱི་གྲོགས་མཛད་ནས༔ གསང་གསུམ་ཡོན་ཏན་ཕྲིན་ལས་རྫོགས་པར་མཛོད༔ ཨོཾ་ཨཱཿཧཱུྃ་གུ་རུ་ཀྲོ་དྷ་པདྨ་ཀཱི་ལ་ཡ་ཀཱ་ཡ་སིདྡྷི་ཨོཾ༔ ཝཱཀྐ་སིདྡྷི་ཨཱ༔ ཙིཏྟ་སིདྡྷི་ཧཱུྃ༔ སརྦ་སིདྡྷི་ཧྲཱི༔ ཨཿ གདོད་ནས་དག་པའི་ཡེ་ཤེས་ལྷ་ཚོགས་ལ༔ གཉིས་འཛིན་མཚན་མའི་རྟོག་པ་མི་མངའ་ཡང༔ ཀུན་རྫོབ་ཆོ་ག་ལྷག་ཆད་ནོར་འཁྲུལ་སོགས༔ དོན་དམ་བསལ་བཞག་བྲལ་བའི་ཐིག་ལེར་བཤགས༔ ཡིག་བརྒྱ་བཟླ༔ ཧྲཱིཿ སྣང་བཅས་ལྷ་སྔགས་ཏིང་འཛིན་བཀོད་པའི་ཚོགས༔ འོད་གསལ་ཆོས་སྐུའི་དབྱིངས་སུ་གཅིག་ཏུ་ཐིམ༔ རྣམ་པར་མི་རྟོག་ཡེ་ཤེས་བདེ་བ་ཆེས༔ སླར་ཡང་ཅིར་སྣང་དག་པའི་རོལ་པར་ཤར༔ ཧོ༔ རིམ་གཉིས་ཏིང་འཛིན་སྒོམ་པའི་བྱིན་རླབས་ཀྱིས༔ བར་ཆད་མེད་པར་རྡོ་རྗེའི་ལམ་བཟང་རྫོགས༔ འགྲོ་ཀུན་བདུད་བཞིའི་དགྲ་སྡེ་ལས་བསྒྲལ་ཏེ༔ ཁྲག་འཐུང་པདྨ་རྒྱལ་པོའི་གནས་ཐོབ་ཤོག༔ ཨོཾ༔ བྱིན་རླབས་མཁའ་ཁྱབ་བླ་མ་བདེ་བ་ཆེས༔ མི་འབྲལ་ཐུགས་རྗེས་བཟུང་བའི་བཀྲ་ཤིས་ཤོག༔ དངོས་གྲུབ་ཆར་འབེབས་དཔལ་ཆེན་ཀཱི་ལ་ཡའི༔ ཧེ་རུ་ཀ་དཔལ་གནས་ཐོབ་བཀྲ་ཤིས་ཤོག༔ ཕྲིན་ལས་ལྷུན་གྲུབ་ཌཱ་ཀི་ཆོས་སྲུང་གིས༔ ལས་བཞི་ཐོགས་པ་མེད་པའི་བཀྲ་ཤིས་ཤོག༔ ཕན་བདེའི་ཡོན་ཏན་ལྷུན་གྱིས་གྲུབ་པ་ཡིས༔ དོན་གཉིས་འབད་མེད་རྫོགས་པའི་བཀྲ་ཤིས་ཤོག༔ དེ་ལྟར་བླ་མ་ཡི་དམ་ཌཱ་ཀིའི་ཚོགས༔ གཅིག་ཏུ་སྒྲུབ་པའི་ཕྲིན་ལས་རྨད་བྱུང་བ༔ དུས་མཐའི་འགྲོ་བ་སྐྱོབས་པའི་བཙས་སུ་བཞག༔ ཟབ་འདྲིལ་སྙིང་པོ་བཀའ་བཙན་བྱིན་རླབས་མྱུར༔ སྙིང་གི་ཐིག་ལེ་ཤིན་ཏུ་ཐུན་མིན་འདི༔ མངའ་བདག་ཆེན་པོ་ཡེ་ཤེས་སྒྱུ་མའི་གཟུགས༔ དྲག་ཤུལ་མཐུ་སྟོབས་ནུས་པའི་རྩལ་འཆང་བ༔ པདྨའི་མིང་གིས་སྣང་བའི་རྟེན་འབྲེལ་གྱིས༔ ཐ་མའི་གདུལ་བྱ་བསྟན་འགྲོ་ཡོངས་ལ་ཕན༔ ཁྱད་པར་འཇམ་དཔལ་གྲུབ་པའི་སློབ་དཔོན་གྱིས༔ ཉམས་སུ་བླང་བས་བར་ཆད་ཀེག་ལས་གྲོལ༔ དམ་སྲི་འབྱུང་པོའི་ཚ་ངར་གཅོག་པ་ཡི༔ འཕྲད་ཆོག་གཉེན་པོར་འགྱུར་རོ་ཨ་ཐཾ་རྒྱ༔ ས་མ་ཡ༔ རྒྱ་རྒྱ་རྒྱ༔ ཅེས་པའང་ཁྱབ་བདག་འཁོར་ལོའི་མགོན་པོ་པདྨ་ཡེ་ཤེས་རྡོ་རྗེའི་མནལ་ལམ་དག་སྣང་གི་རྟེན་འབྲེལ་གྱི་བརྡས་བསྐུལ་ཏེ་གངས་ཅན་མཁས་གྲུབ་རྒྱ་མཚོའི་གཙུག་རྒྱན་སྤྲུལ་པའི་གཏེར་འབྱིན་ཡོངས་ཀྱི་རྒྱལ་པོ་འཇམ་དབྱངས་མཁྱེན་བརྩེའི་དབང་པོ་ལ་ཁ་རག་རྡོ་རྗེ་ཁྱུང་བཙུན་མས་དངོས་སུ་ཕུལ་བའི་གནམ་ལྕགས་ཀྱི་ཕུར་བུའི་ལོགས་སུ་གསལ་བའི་བརྡ་རིས་ལ་བསྟེན་ཏེ་པདྨ་གར་དབང་འོད་གསལ་མདོ་སྔགས་གླིང་པས་གཏན་ལ་ཕབ་པ་འདིས་ཀྱང་འཇམ་མགོན་གྲུབ་པའི་དཔའ་བོ་ཀུན་གཟིགས་དྷརྨ་མ་ཏིའི་གསང་གསུམ་བར་ཆད་བདུད་བཞིའི་གཡུལ་ལས་རྣམ་པར་རྒྱལ་ཏེ་ཐུགས་བསྐྱེད་དང་ཕྲིན་ལས་མཁའ་མཐར་ཁྱབ་པའི་རྟེན་འབྱུང་རྨད་དུ་འབྱུང་བའི་དཔལ་དམ་པར་གྱུར་ཅིག། །།

[edit]

\u0f01\u0f83:__bdud 'dul pad+ma'i snying tig las:_gu ru drag po kI la ya'i sgrub thabs bdud bzhi'i dpung 'joms bzhugs:

\u0f01\u0f83:__brda yig_rtsa gsum 'dus pa'i lha la 'dud:_rtsub 'gyur lnga brgya'i tha ma la:_dug lnga'i nyon mongs rang gzugs las:_glo bur dam sri rgyal bsen klus:_chos byed yongs la gnod cing rgol:_bar chad skabs mang btsal ba'i tshe:_nad gdon byad gtad mi mthun phyogs:_mtha' dag skyobs pa'i gdams pa'i mchog:_kun dang thun mong ma gyur pa'i:_gsang sgrub zab brgya'i mthar thug bstan:_sa ma yA:_skal bzang dad mos mchog ldan pas:_nges 'byung snying rje'i sems bskyed kyis:_dbang thob dam tshig la gnas pas:_nyams len snying po'i rnal 'byor ni:_hU~M:_rang rig 'od gsal bde gshegs 'dus pa'i lha:_bar chad bdud 'dul pad+ma kI la ya:_rigs kun 'dus pa bla ma drag po'i tshul:_mi phyed dad mos gdung bas skyabs su mchi:_hU~M:_gdod nas rnam dag 'od gsal de bzhin nyid:_ma rtogs 'khrul snang bden par bzung ba'i mthus:_gzung 'dzin rang rgyud bar chad bdud 'dul phyir:_khrag 'thung lha tshogs sgrub par sems bskyed do:_hoH_rdo rje slob dpon sangs rgyas dpal sogs/_hrIH_nga ni dbang drag pad+ma he ru ka:_log 'dren mthar byed 'jigs mdzad dpa' bo'i gar:_bden pa'i tshig las nam yang ma 'da' bar:_gtor ma longs la rgya mtsho'i pha mthar dengs:_hU~M bzhi'i sngags kyis gzir la bskrad:_hrIH_yongs grub gnyug ma chos sku'i zhing khams la:_'od gsal ye shes rdo rje'i srung gur 'khrigs:_kun brtags gdon tshogs 'jug pa'i skabs med pas:_khyab brdal lha sngags ye shes phyag rgyar shar:_badz+ra rak+Sha hU~M b+h+rU~M:_hU~M:_chos dbyings klong nas rang byung thugs rje'i rtsal:_gtum drag dmar nag me lce'i phreng ba can:_pad+ma khrag 'thung rol pa'i dkyil 'khor lha:_byin rlabs thugs rje'i dbang gis gnas 'dir gshegs:_bgegs dang log 'dren bar chad rdul du rlog:_dbang bskur byin phob rtags dang mtshan ma ston:_sku gsung thugs kyi ye shes rgyud la bskyed:_mchog dang thun mong dngos grub myur du stsol:_oM AHhU~M badz+ra gu ru pad+ma he ru ka kI la ya sarba sa ma ya a be sha ya a a:_raM yaM khaM:_snang ba rnam dag bde chen dag pa'i zhing:_srid pa rang grol rdo rje'i 'dod yon rdzas:_phyi nang gsang ba mchod pa'i sprin rgya mtsho:_zag med nam mkha' mdzod du lhun gyis grub:_oM badz+ra ar+g+haM nas/_shab+da ma hA pU dza ho:_oM AHhU~M ma hA a mr-i ta rak+ta ba ling+ta sarba pU dza ye hU~M:_hU~M:_stong chen bdag med ka nas dag pa las:_lhun grub snying rje nam mkha' mnyam par shar:_zung 'jug rig pa rang byung yi ge hrIH_nam mkha'i klong na skar chen bzhin du gsal:_de las dwangs ma'i 'od zer 'khrigs pa las:_dag pa'i gzhal yas tshad dang mtshan nyid rdzogs:_gsang chen rol pa dbang drag 'bar ba'i zhing:_rab 'jigs drag po'i rgyan bkod lhun gyis grub:_lte bar nam lcags 'khor lo rtsibs brgyad pa'i:_e dbyings rdo rje'i brag chen 'bar ba dang:_pad nyir rgyal 'gong gan rkyal bsgyel ba'i steng:_rdo rje'i sa bon thog ltar lhung ba las:_spro bsdu'i 'od kyis rgyal kun mthu stobs bsdus:_bdud bzhi'i dpung bcom bar chad dbyings su bsgral:_sa bon yongs gyur rdo rje rtse lnga pa:_de nyid 'od zhu thig ler 'dril ba las:_ma hA gu ru pad+ma khrag 'thung che:_dus mtha'i me bzhin khros 'khrugs rngam pa'i sku:_gar dgu'i bsgyings ba'i dmar nag drag po'i zhal:_g.yas mthing chos sku rtog med de bzhin nyid:_g.yon dkar skyon bral bde chen bzhad pa'i nyams:_spyan dgu sdang mig khro gnyer rlabs ltar 'khrugs:_zhal gdangs ljags 'dril shin tu khros pa'i sku:_thod skam lngas brgyan kham nag dbu skra brdzes:_phyag drug g.yas kyi dang pos rdo rje gsor:_gnyis pas ral gri g.yon gyi thog mas snying:_bar pas lcags sdig tha ma'i phyag gnyis kyis:_gnam lcags phur pa 'dril zhing bgegs la 'debs:_sku smad chu srin gdug pa'i khar thon pa'i:_phur bu'i dbal gyis dam sri'i snying nas gzir:_dpal dang dur khrod rol pa'i rgyan chas kyis:_brjid pa'i sku mchog ye shes me dbus rol:_sku yi gnas lngar srung byed khro bo che:_yab yum bcu dang phra phyag sgo ma'i tshogs:_nyi zer rdul ltar 'khrigs pas ba spu yan:_go mtshams med par gtams pas pho nya spro:_shar du dpal chen badz+ra he ru ka:_lho ru 'jam dpal gshin rje dug gi gdong:_nub tu dbang chen rta mchog rol pa'i lha:_byang du phrin las rdo rje phur bu rnams:_mthing ser dmar ljang zhal gcig phyag gnyis pa:_rdo rje dgra s+t+wa thod dbyug ral gri g.yas:_lcags gser zangs g.yu'i sdig pa g.yon pas bsnams:_sku smad zur gsum gnam lcags phur bu'i dbal:_bar chad bdud bzhi'i snying la zug pas bzhengs:_rigs lnga'i khro rgyal so so'i spyi gtsug tu:_rang mdog sprul pa'i bya khyung rngam par lding:_mtshams bzhi gdugs dkar lha mo 'od zer can:_bdud 'dul drag mo karma DA ki nI:_dkar ser mthing ljang khros 'khrugs 'bar ba'i sku:_phra men rigs sngags grub pa'i lha mo'i tshul:_gcer bu skra brdzes rus pa'i phyag rgya lnga:_'chang zhing gri gug phyar te thod khrag 'thung:_dus mtha'i me rlung 'khrugs pa'i dkyil 'khor na:_khrag 'thung lha tshogs mkha' la sprin ltar shar:_gnas gsum rdo rje'i yig 'bru'i 'od zer gyis:_ye shes 'khor lo badz+ra sa ma dzaH_hU~M:_bde chen rol pa dbang drag dur khrod che:_'bar ba'i zhing mchog pad+ma 'od kyi gling:_sku gsum yon tan rdzogs pa'i pho brang nas:_bla ma drag po dpal chen khrag 'thung che:_phyag rgya gar gyi brda yis bskul lags na:_gnas 'dir rdzu 'phrul chen pos gshegs su gsol:_sngags dang sgra tshig glu yis 'bod lags na:_dgod gshe drag shul rol pas gshegs su gsol:_ting 'dzin rdo rje'i gnad kyis deng bskul na:_ye shes rang snang dkyil 'khor gshegs su gsol:_dbang bskur byin phob grub pa'i rtags mtshan ston:_'khrul snang bdud bzhi'i bar chad da lta sgrol:_mchog dang thun mong dngos grub bstsal nas kyang:_sgo gsum rdo rje'i ye shes smin par mdzod:_oM gu ru pad+ma kro d+ha sa pa ri wA ra sa ma ya dzaHdzaH_hU~M:_khrag 'thung dgyes pa rang byung drag po'i zhing:_gdod nas dam tshig ye shes dbyer med pa'i:_ngo bor bzhugs la rang ngo shes pa'i phyag:_gnyis med mnyam pa chen por 'tshal bas 'dud:_sa ma ya tiSh+Tha lhan:_na mo na ma mi:_hU~M:_nyams pa'i dgra bgegs bsgral ba'i longs spyod che:_dbang po'i me tog tshil chen spos sprin gtibs:_zhun chen snang gsal bsad khrag dri chab skyems:_sha rus zhal zas dur khrod bshug pa'i glu:_drag shul chen pos gnam sa'i khyon gang ba:_dkyil 'khor lha tshogs dgyes pa'i dpal du 'bul:_oM ma hA gu ru kro d+ha kI la ya sa pa ri wA ra rU pa shab+da g+han+d+he rA sa spar+she su kha pU dza ho:_hU~M:_rtsa brgyad stong sbyar sman gyi rgya mtsho 'khyil:_'dod yon lhun rdzogs gtor ma'i phung po spungs:_rgyud drug rtsad gcod rak+ta rba klong 'khrugs:_khrag 'thung dgyes pa dpa' bo'i skyems su 'bul:_ma hA a mr-i ta rak+ta ba ling+ta khA hi:_hU~M:_gdod nas gnyis med chos sku'i ye shes su:_mnyam par sbyor la mchod dang mchod bya bral:_gnyis 'dzin yongs sgrol ye shes thugs rje che:_khams gsum bsgral ba'i dam tshig bla na med:_d+harma d+hA tu dz+nyA na a a:_hU~M:_'jigs rung srin po'i lang tsho 'bar ba'i sku:_hU~M phaTa? nga ros bdud 'dul drag po'i gsung:_rtog bral de bzhin nyid du dgyes pa'i thugs:_rje btsun bla ma drag po'i skur bzhengs bstod:_sku gsum zhal gyis nyon mongs dbyings su gsol:_pha rol phyin pa'i phyag gis 'gro drug sgrol:_rnam thar gsum gyi mtshon chas bdud dgra 'dul:_don gnyis yon tan rdzogs pa'i lha la bstod:_rdo rje ral gris phung po nyon bdud 'joms:_lcags sdig tsit+tas lha bdud skye 'chi gcod:_gnam lcags phur bus khams gsum thal mar 'byin:_che ba'i yon tan rtags su brgyan la bstod:_sku gsung thugs dang phrin las dpal chen bzhi:_tshad med phyag rgya bde chen DA ki'i tshul:_kun kyang ye shes phyag rgya'i rol mo ru:_gnyis med dad dang gus pa'i phyag gis bstod:_bdag nyid pad+ma khrag 'thung kI la ya'i:_ye shes sems dpa' o rgyan thod phreng rtsal:_snang srid zil gnon rdo rje thod bum can:_kha T+wAM mchan bcug pad zlar rol pa yi:_thugs kyi thig ler nyi zla'i gwa'u'i klong:_gser gyi rdo rje'i lte bar hrIHdmar po:_'bar ba'i sngags phreng g.yas su bskor ba las:_'phros pa'i 'od kyis rtsa gsum lha tshogs dang:_khyad par dpal chen khro bo'i dkyil 'khor che'i:_mkhyen nus mthu stobs yon tan ma lus pa:_sku dang sa bon phyag mtshan rnam pa ru:_rab 'byams dag pa'i zhing nas spyan drangs te:_bdag la thim pas gzi byin lhag par 'bar:_slar yang 'od kyis snang srid ma lus pa:_bla ma drag po'i sku dang zhing du rdzogs:_oM AHhU~M hrIHbadz+ra gu ru pad+ma kro d+ha kI la ya sarba sid+d+hi hU~M phaTa?:_bla ma zhi drag gcig tu 'dril ba yi:_bsnyen pa'i bzlas pa 'bum bcu'i las kun byed:_ye shes sems dpa'i thugs ka'i sa bon las:_sngags phreng byung ba zhal nas 'phros pa las:_rigs bzhi'i khro bo'i zhal dang sku'i dbyibs brgyud:_g.yas su bskor nas gtso bo'i lte bar zhugs:_thugs ka la thim slar yang 'phros pa'i sngags:_lte ba nas thon mkha' 'gro rnam pa bzhi'i:_lte ba zhal brgyud g.yon du bskor ba yang:_bla ma drag po'i zhal nas thugs kar thim:_de ltar 'khor bas kun kyang gsang ba'i sngags:_'ur 'ur chems chems sgrogs pas snang srid kun:_dbang drag pad+ma 'od kyi zhing du gyur:_gang 'dod dngos grub thogs med 'grub par bsam:_oM AHhU~M artsig nirtsig na mo b+ha ga wa te hU~M hU~M phaTa?:_a hU~M hU~M phaTa?:_ces dang*/_spyi dril sngags rgod ci nus bzla:_oM pad+ma kro d+ha ma hA shrI he ru ka sarba kro d+ha d+hA ki nI sarba duSh+Tan ta ka ha na da ha pa tsa hU~M phaTa?:_spro na rigs bzhi yab yum gsang sngags ni:_oM badz+ra pa Ni ru lu ru lu hU~M b+h+yo hU~M:_oM ya mAn+ta ka hrIHSh+Ti wI kr-i ta na na hU~M phaTa?:_oM hrIHpad+mAn+ta kr-i ta ma hA kro d+ha ha ya gr-I wa hU~M phaTa?:_oM badz+ra kI li kI la ya sarba big+h+nAn baM hU~M phaTa?:_tad+ya thA:_oM a na le a na le:_bi Sha de bi Sha de:_bai ra bai ra:_badz+ra d+ha ri Ni:_badz+ra pa Ni b+han+d+ha b+han+d+ha hU~M phaTa?:_oM ma ri ts+yai maM sarba big+h+nAn mA ra ya phaTa? swA hA:_aHkaHsaHmaHraHtsaHshaHdaHraHsaHmaHraHyaHphaTa?:_oM sarba karma d+hA ki hU~M ha he phaTa? b+h+yo:_gtso bo spyi dril sgrub sngags 'bum bzhi dang:_so so'i bzlas pa 'bum re'i dngos grub thob:_las sbyor gtso bo drag po'i ting 'dzin ni:_hU~M hU~M hU~M zhes rngam pa'i sgra gdangs kyis:_bskul bas kun kyang thugs srog hU~M gi glus:_sku las sku 'phros zhal nas sngags kyi me:_thugs srog las byung sa bon phyag mtshan gyi:_spro bsdus snang bas khams gsum shig shig g.yos:_sde brgyad dregs pa spa bkong 'dar zhing zhum:_srog snying dbang med khab len lcags ltar drangs:_lte 'og nas thim dam sri bdud bgegs bsgral:_bar chad byad phur gdon tshogs gzhob kyis bsregs:_gtad khrom mnan gzir sbyor ba thams cad bshig:_snang srid 'bar ba khro bo'i zhing du rdzogs:_rang dang bsrung bya mtshon cha sna lnga'i gur:_khong seng med pa gzhom gzhig bral bar tshud:_sgo gsum spyi dpal chen po'i gsang ba dang:_dbyer med nus pa'i gding dang ldan par mos:_oM badz+ra ma hA kro d+ha pad+ma kro d+hI shwa ri badz+ra kI li kI la ya ma hA yak+Sha kA la rU pa karma raM raM dz+wa la raM hU~M phaTa?:_khri phrag sngags kyis nus pa tshad du phyin:_pad+ma drag po'i thugs dang gnyis med 'gyur:_rjes kyi rim pa tshogs kyi mchod pa ni:_raM yaM khaM gi yi ge thugs las spros:_ma dag mtshan 'dzin bsregs gtor sbyangs pa las:_zag med ye shes bdud rtsi tshogs kyi rdzas:_rigs lnga'i dam tshig ye shes sprin du gyur:_oM AHhU~M ha ho hrI:_hU~M:_dbang drag rol pa lang+ka srin po'i yul:_dag pa'i zhing mchog pad+ma drwa ba nas:_khrag 'thung rje btsan spyi dpal kI la ya:_dur khrod chen po'i gnas 'dir gshegs su gsol:_sa ma ya dza dzaH_hU~M:_bza' bca' btung ba bdud rtsi snying po'i bcud:_'dod yon lnga ldan mchod pa'i zegs ma can:_khrag 'thung lha tshogs dgyes pa'i mchod par 'bul:_thugs dam gnyan bskang mchog thun dngos grub stsol:_ma hA ga Na tsakra pU dza ho:_hrIH_don la bdag rtog blo yi 'khrul bral kyang:_gnyis 'dzin mtshan ma'i rtog ngor nyams chag kun:_bdud rtsi rnam lnga'i tshogs kyi 'khor lo yis:_bshags so byang zhing dag par mdzad du gsol:_sa ma ya bi shud+d+he a a:_hU~M b+h+yo:_dbang drag dus kyi pho nya kI la yas:_gnod byed rgyal 'gong dam sri byur 'dre'i tshogs:_rnam thar sgo gsum dbyings kyi e ru bsgral:_sha khrag dwangs ma ye shes dbyings su 'bul:_sarba sha trUn mA ra ya phaTa?:_ma hA maM sa rak+ta keM ni ru d+hi khA hiH_rnal 'byor ldan pas dam tshig rdzas la rol:_lhag mas dpal gyi bka' sdod mchod pa ni:_b+h+yo:_he ru ka dpal dgyes pa'i dam rdzas kyi:_lhag gtor dkyil 'khor mu ran skyong la 'bul:_rdo rje'i yal gam 'da' bar ma mdzad par:_rnal 'byor 'dod pa'i phrin las thogs med sgrubs:_oM uts+tshiShaT ba ling+ta kha hi:_hU~M:_bzhengs shig bla ma drag po he ru ka:_'bar ba'i gar dgus mthu stobs nus rtsal bskyed:_dug lnga'i bdud sde ye shes dbyings su sgrol:_sku gsung thugs kyi byin rlabs bstsal du gsol:_hU~M hrIH_sngon tshe 'das dus bsam mi khyab pa'i zhing:_chos dbyings kun khyab rgyal ba dgongs brgyud kyis:_ston 'khor gnyis med rgyud kyi gnas bstan tshe:_'khrul pa ye shes 'char ba'i chos srung dang:_bar du rang snang dag pa'i gnas yul du:_rig 'dzin brda brgyud o rgyan rje 'bangs kyis:_yid byed tshig 'das chos 'khor bskor ba'i tshe:_rdo rje'i tha tshig phog pa'i dam can dgongs:_tha ma bde chen rnga yab dpal gyi rir:_smon lam dus babs mdo sngags gling pa la:_snyan brgyud gtad pas gsang ba'i mdzod brdol tshe:_dam bca' zhal bzhes DA ki gter bdag rnams:_dug gsum sha khrag rus pa'i gtor ma longs:_'da' ka'i chad tho ma bsnyel phrin las sgrubs:_sangs rgyas bstan srungs rnal 'byor bu bzhin skyongs:_bar chad kun sol rig 'dzin gnas thob mdzod:_b+h+yoH_bdud dang gnod sbyin sman btsun DA ki'i rigs:_phyi nang rten 'brel dag pa'i brtan ma yis:_bshal chu bzhes la mtha' yi so kha srungs:_rtag chad kla klo'i sde dpung sgrol bar mdzod:_hU~M yA:_byang chub sgrub la bar gcod dam sri'i tshogs:_mnan no ldang med gshin rje'i gre bar gzir:_klong lnga'i dkyil 'khor chen po'i rgyas btab ste:_snod bcud 'bar ba'i phyag rgyas bro brdung ngo:_s+t+wam b+ha ya nan:_hU~M:_rig 'dzin bla mas byin rlabs dbang mchog bskur:_dpal chen 'bar bas mchog thun dngos grub stsol:_bde chen DA kis lam gyi grogs mdzad nas:_gsang gsum yon tan phrin las rdzogs par mdzod:_oM AHhU~M gu ru kro d+ha pad+ma kI la ya kA ya sid+d+hi oM:_wAk+ka sid+d+hi A:_tsit+ta sid+d+hi hU~M:_sarba sid+d+hi hrI:_aH_gdod nas dag pa'i ye shes lha tshogs la:_gnyis 'dzin mtshan ma'i rtog pa mi mnga' yang:_kun rdzob cho ga lhag chad nor 'khrul sogs:_don dam bsal bzhag bral ba'i thig ler bshags:_yig brgya bzla:_hrIH_snang bcas lha sngags ting 'dzin bkod pa'i tshogs:_'od gsal chos sku'i dbyings su gcig tu thim:_rnam par mi rtog ye shes bde ba ches:_slar yang cir snang dag pa'i rol par shar:_ho:_rim gnyis ting 'dzin sgom pa'i byin rlabs kyis:_bar chad med par rdo rje'i lam bzang rdzogs:_'gro kun bdud bzhi'i dgra sde las bsgral te:_khrag 'thung pad+ma rgyal po'i gnas thob shog:_oM:_byin rlabs mkha' khyab bla ma bde ba ches:_mi 'bral thugs rjes bzung ba'i bkra shis shog:_dngos grub char 'bebs dpal chen kI la ya'i:_he ru ka dpal gnas thob bkra shis shog:_phrin las lhun grub DA ki chos srung gis:_las bzhi thogs pa med pa'i bkra shis shog:_phan bde'i yon tan lhun gyis grub pa yis:_don gnyis 'bad med rdzogs pa'i bkra shis shog:_de ltar bla ma yi dam DA ki'i tshogs:_gcig tu sgrub pa'i phrin las rmad byung ba:_dus mtha'i 'gro ba skyobs pa'i btsas su bzhag:_zab 'dril snying po bka' btsan byin rlabs myur:_snying gi thig le shin tu thun min 'di:_mnga' bdag chen po ye shes sgyu ma'i gzugs:_drag shul mthu stobs nus pa'i rtsal 'chang ba:_pad+ma'i ming gis snang ba'i rten 'brel gyis:_tha ma'i gdul bya bstan 'gro yongs la phan:_khyad par 'jam dpal grub pa'i slob dpon gyis:_nyams su blang bas bar chad keg las grol:_dam sri 'byung po'i tsha ngar gcog pa yi:_'phrad chog gnyen por 'gyur ro a thaM rgya:_sa ma ya:_rgya rgya rgya:_ces pa'ang khyab bdag 'khor lo'i mgon po pad+ma ye shes rdo rje'i mnal lam dag snang gi rten 'brel gyi brdas bskul te gangs can mkhas grub rgya mtsho'i gtsug rgyan sprul pa'i gter 'byin yongs kyi rgyal po 'jam dbyangs mkhyen brtse'i dbang po la kha rag rdo rje khyung btsun mas dngos su phul ba'i gnam lcags kyi phur bu'i logs su gsal ba'i brda ris la bsten te pad+ma gar dbang 'od gsal mdo sngags gling pas gtan la phab pa 'dis kyang 'jam mgon grub pa'i dpa' bo kun gzigs d+harma ma ti'i gsang gsum bar chad bdud bzhi'i g.yul las rnam par rgyal te thugs bskyed dang phrin las mkha' mthar khyab pa'i rten 'byung rmad du 'byung ba'i dpal dam par gyur cig/__//