DKR-KABUM-02-KHA-016

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma'i rnal 'byor byin rlabs srog tig
Location	dil mgo mkhyen brtse bka' 'bum Volume 2, Text 16, Pages 113-115 (Folios 1a1 to 3a3)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. Bla ma'i rnal 'byor byin rlabs srog tig. In Skyabs rje dil mgo mkhyen brtse rin po che'i bka' 'bum, Vol. 2: 113-115. Delhi: Shechen Publications, 1994.
Genre	Guru Yoga Texts - bla ma'i rnal 'byor
Colophon	ཞེས་པའང་དད་ལྡན་དམ་པས་བསྐུལ་ངོར་རང་ཉིད་ཀྱིས་བྲིས་པའོ། །བླ་མར་བསྟེན་པའི་རྣམ་དཀར་བསོད་ནམས་འབྲས། །བསམ་མི་ཁྱབ་པར་མདོ་རྒྱུད་ཀུན་ནས་བསྔགས། །བཀའ་དྲིན་སུམ་ལྡན་རྗེ་ཡི་རྣལ་འབྱོར་གྱིས། །སྤར་བསྐྲུན་རྡོ་རྗེའི་ཡེ་ཤེས་མངོན་གྱུར་ཤོག །ཅེས་པའང་རྣམ་དཀར་སྒྲུབ་པ་པོ་རྒྱལ་མཚན་ནས་བསྐུལ་ངོར་མངྒ་ལས་བྲིས་པའོ། སརྦ་མངྒ་ལཾ། དགེའོ།།
	zhes pa'ang dad ldan dam pas bskul ngor rang nyid kyis bris pa'o/__/bla mar bsten pa'i rnam dkar bsod nams 'bras/__/bsam mi khyab par mdo rgyud kun nas bsngags/__/bka' drin sum ldan rje yi rnal 'byor gyis/__/spar bskrun rdo rje'i ye shes mngon gyur shog__/ces pa'ang rnam dkar sgrub pa po rgyal mtshan nas bskul ngor mang+ga las bris pa'o/__sarba mang+ga laM/__dge'o//

Tibetan Text

Wylie

[edit]

༄༅། བླ་མའི་རྣལ་འབྱོར་བྱིན་རླབས་སྲོག་ཏིག་བཞུགས་སོ།། ཨ། རང་རིག་ཆོས་སྐུའི་བླ་མ་ལ། །འཛིན་མེད་ངང་ནས་སྐྱབས་སུ་མཆི། །གཉིས་མེད་ཡེ་ཤེས་འཁོར་ལོ་རུ། །འགྲོ་ཀུན་སྒྲོལ་བར་སེམས་བསྐྱེད་དོ། ཨ། སྣང་སྲིད་ཀུན་བཟང་ཡེ་ཤེས་ཞིང༌། །དག་པ་རབ་འབྱམས་ཆེན་པོའི་ཀློང༌། །རང་ཉིད་རྡོར་སེམས་གསལ་བའི་མདུན། །སངས་རྒྱས་ཀུན་འདུས་བླ་མ་རྗེ། །པདྨ་མདོ་སྔགས་གླིང་པ་ནི། །གཅེར་བུ་རྣལ་འབྱོར་སྤྱོད་པའི་ཆས། །ཕྱག་གཡས་ཡེ་ཤེས་རལ་གྲི་འཕྱར། །གཡོན་པས་འཆི་མེད་ཚེ་བུམ་འཛིན། །ཞབས་གཉིས་རྒྱལ་པོ་རོལ་སྟབས་ཀྱིས། །མ་ཧཱ་གསེར་གྱི་རུས་སྦལ་ཆིབས། །འཇའ་ཟེར་འོད་ཀྱི་དྲ་བར་བཞུགས། །སྤྱི་བོར་རིགས་བདག་ཞེ་ཆེན་པ། །པདྨ་འབྱུང་གནས་ཚུལ་དུ་བཞུགས། །བདེ་ཆེན་འཁོར་ལོར་ཁྲི་སྲོང་རྗེ། །ལོངས་སྤྱོད་འཁོར་ལོར་མཆོག་གྲུབ་རྒྱལ། །ཆོས་ཀྱི་འཁོར་ལོར་ནམ་མཁའི་སྙིང༌། །སྤྲུལ་བའི་འཁོར་ལོར་བི་མ་ལ། །བདེ་སྐྱོང་འཁོར་ལོར་ལང་གྲོ་ཆེ། །སྙིང་གི་ཕྱོགས་མཚམས་རྩ་འདབ་ཏུ། །བཀའ་གཏེར་བཀའ་གདམས་ལམ་འབྲས་དང༌། །མར་ཤངས་བཀའ་བརྒྱུད་ཞི་བྱེད་གཅོད། །དུས་ཀྱི་འཁོར་ལོ་བསྙེན་སྒྲུབ་ཀྱི། །མཁས་གྲུབ་རིག་འཛིན་བྱེ་བ་བཞུགས། །གཡས་སུ་ར་ས་ནཱ་ཡི་ཀློང༌། །མཉྫུ་བཛྲ་ཨ་ཛི་ཏ། །གཡོན་དུ་ལཱ་ལ་རྩ་ཡི་སྦུབས། །དྷརྨ་མ་ཏི་ཛྙཱ་ནའི་མཚན། །སྐུ་ཡི་གནས་བརྒྱད་སྒྲུབ་སྡེ་བརྒྱད། །བ་སྤུ་དྷཱ་ཀི་ཆོས་སྲུང་བཅས། །མདུན་དུ་རིག་པའི་རྡོ་རྗེ་ནི། །ཌཱ་རུ་ཐོད་ཐོགས་གླང་ཆེན་ཞོན། །གཡས་སུ་བློ་གསལ་བསྟན་སྐྱོང་ཞབས། །གྲི་ཐོད་འཛིན་ཅིང་སེང་གེ་ཆིབས། །རྒྱབ་ཏུ་པདྨ་གར་གྱི་དབང༌། །རྡོར་དྲིལ་འཛིན་པས་འབྲུག་ལ་ཆིབས། །གཡོན་དུ་མཆོག་གྱུར་བདེ་ཆེན་གླིང༌། །རྡོ་རྗེ་ཕུར་གདེངས་སྟག་སྟེང་འགྱིང༌། །འབུམ་ཕྲག་དཔའ་བོ་མཁའ་འགྲོ་བཅས། །ཏིལ་གྱི་གོང་བུ་ཕྱེ་བ་བཞིན། །དངོས་གཅིག་དུ་མའི་རོལ་པ་ཡིས། །དཀྱིལ་འཁོར་ལྷུན་རྫོགས་ཕྱག་རྒྱར་བཞེངས། །ཧཱུྃ་ཧྲཱིཿ འོད་གསལ་ཆོས་སྐུའི་བླ་མ་ནི། །སྲིད་ཞི་ཀུན་ཁྱབ་ཀློང་ནས་གཤེགས། །ཟང་ཐལ་ཆེན་པོའི་བྱིན་རླབས་ཀྱིས། །འཁྲུལ་པ་གཞི་ལ་དག་པར་མཛོད། །བདེ་ཆེན་ལོངས་སྐུའི་བླ་མ་ནི། །ཡེ་ཤེས་རང་སྣང་ཀློང་ནས་གཤེགས། །སྣང་སྲིད་གཞིར་བཞེངས་ཕྱག་རྒྱའི་གར། །རྡོ་རྗེ་གསུམ་དུ་རྫོགས་པར་མཛོད། །ཀུན་ཁྱབ་སྤྲུལ་སྐུའི་བླ་མ་ནི། །མཁའ་ཁྱབ་ཐུགས་རྗེའི་རོལ་པར་གཤེགས། །གང་འདུལ་སྒྱུ་འཕྲུལ་དྲྭ་བ་ཡི། །བྱིན་རླབས་དངོས་གྲུབ་དུས་འདིར་སྩོལ། །བཛྲ་ས་མ་ཡ་ཛཿཛཿ ཨ། ཡེ་ཤེས་རིག་པའི་བླ་མའི་ཞལ། །མངོན་སུམ་མཇལ་བས་ཕྱག་འཚལ་ཞིང༌། །སྣང་སྲིད་ཀུན་བཟང་རོལ་པས་མཆོད། །མ་རྟོག་གློ་བུར་འཁྲུལ་པ་བཤགས། །ནང་གསལ་ཆེན་པོར་རྗེས་ཡི་རང༌། །འཕེལ་འགྲིབ་བྲལ་བའི་རྡོ་རྗེའི་སྐུར། །བཞུགས་ལ་རིག་རྩལ་ཆོས་འཁོར་བསྐོར། །སྐུ་གསུམ་ལྷུན་གྲུབ་ཀློང་རོལ་ཤོག ཨ། རྗེ་བཙུན་དཔལ་མགོན་བླ་མ་ནི། །སངས་རྒྱས་ཀུན་གྱི་ཡེ་ཤེས་སྐུ། །སྒྱུ་འཕྲུལ་རྡོ་རྗེའི་རོལ་གར་མཁན། །སྙིང་ནས་གདུང་བས་གསོལ་བ་འདེབས། །འོད་གསལ་ཡེ་ཤེས་གཅིག་གི་ཀློང༌། །མཁྱེན་བརྩེ་ནུས་པ་བསམ་མི་ཁྱབ། །དགོངས་པའི་བྱིན་རླབས་བཙན་ཐབས་འཕོས། །ཐུགས་ཡིད་གཅིག་ཏུ་འདྲེས་པར་མཛོད། །ཟག་མེད་འབྲས་བུའི་ཡོན་ཏན་ཀུན། །ཁྱེད་ཉིད་གཅིག་པུས་སྩོལ་ནུས་པར། །ཡིད་ཆེས་མོས་པ་རྩེ་གཅིག་གིས། །འདོད་པའི་འབྲས་བུ་མཆིས་པར་མཛོད། ཨོཾ་ཨཱཿབཛྲ་མ་ཧཱ་གུ་རུ་མངྒ་ལ་ཤྲཱི་བྷཱུ་ཏི་སརྦ་སིདྡྷི་ཧཱུྃ། བླ་མའི་སྐུ་ནི་ཡེ་ཤེས་སྐུ། །སྣང་སྲིད་བརྟན་གཡོ་ཁྱབ་པར་བརྡལ། །རྣམ་དག་གདན་གསུམ་འཁོར་ལོ་ཆེ། །སྣང་སྟོང་བུམ་པའི་དབང་མཆོག་གོ །བླ་མའི་གསུང་ནི་རྡོ་རྗེའི་གསུང༌། །གྲགས་སྟོང་རྣམ་པ་ཐམས་ཅད་པ། །རླུང་སྔགས་མི་ཤིགས་ནཱ་དའི་སྒྲ། །གསལ་སྟོང་གསང་བའི་དབང་མཆོག་གོ །བླ་མའི་ཐུགས་ནི་རྡོ་རྗེའི་ཐུགས། །ཅིར་སྣང་ཡེ་ཤེས་ཆེན་པོའི་རྩལ། །སྐྱེ་འགག་གནས་བྲལ་འཕོ་མེད་ཀྱི། །བདེ་སྟོང་ཡེ་ཤེས་དབང་མཆོག་གོ །བླ་མའི་ཡེ་ཤེས་རྡོ་རྗེ་ཆེ། །གང་དུའང་མི་གནས་ཀུན་ལ་ཁྱབ། །དོན་གཉིས་དེ་ཉིད་མངོན་གྱུར་ན། །རིག་སྟོང་བཞི་པའི་དབང་གི་མཆོག །གདོད་ནས་བླ་མ་རང་ལ་རྫོགས། །གཉིས་སུ་མེད་པའི་རྡོ་རྗེ་སེམས། །འཁོར་འདས་ཀུན་གྱི་བྱེད་པོ་སྟེ། །རྟག་ཏུ་འདུ་འབྲལ་མེད་པའོ། །སྣང་བཅས་མོས་གུས་ཉེར་ལེན་གྱིས། །དགོངས་རྒྱུད་བྱིན་རླབས་བཙན་ཐབས་འཕོ། །ངེས་པ་དོན་གྱི་བླ་མ་རྗེའི། །གསང་གསུམ་གཉིས་མེད་འཇུག་གྱུར་ཅིག །དེ་སྐད་གང་ཤར་མ་བཅོས་པའི། །བླ་མའི་རྣལ་འབྱོར་འདི་ཉིད་ཀྱང༌། །གར་ཤའི་རྣལ་འབྱོར་ཨ་ཛི་ཏས། །བསྐུལ་ངོར་རྒན་བུ་རྒྱལ་ཁམས་པས། །སྦས་གནས་བཀྲ་ཤིས་ལྡིང་དུ་སྦྱར། །དགེ་བས་འགྲོ་ཀུན་རང་གི་སེམས། །དོན་གྱི་བླ་མ་མངོན་གྱུར་ཤོག ༈ ཆོས་ཉིད་དབྱིངས་སུ་བཟུང་འཛིན་འཁྲུལ་པ་ཟད། །ཆོས་ཅན་སྐུ་དང་ཡེ་ཤེས་རིག་ཀུན་བདག །ཀུན་མཁྱེན་འཇམ་དཔལ་རྡོ་རྗེ་མདོ་སྔགས་གླིང༌། །དབྱེར་མེད་མཁྱེན་བརྩེའི་འོད་ཟེར་གསོལ་བ་འདེབས། ཞེས་པའང་དད་ལྡན་དམ་པས་བསྐུལ་ངོར་རང་ཉིད་ཀྱིས་བྲིས་པའོ། །བླ་མར་བསྟེན་པའི་རྣམ་དཀར་བསོད་ནམས་འབྲས། །བསམ་མི་ཁྱབ་པར་མདོ་རྒྱུད་ཀུན་ནས་བསྔགས། །བཀའ་དྲིན་སུམ་ལྡན་རྗེ་ཡི་རྣལ་འབྱོར་གྱིས། །སྤར་བསྐྲུན་རྡོ་རྗེའི་ཡེ་ཤེས་མངོན་གྱུར་ཤོག །ཅེས་པའང་རྣམ་དཀར་སྒྲུབ་པ་པོ་རྒྱལ་མཚན་ནས་བསྐུལ་ངོར་མངྒ་ལས་བྲིས་པའོ། སརྦ་མངྒ་ལཾ། དགེའོ།། །།

[edit]

@#/__bla ma'i rnal 'byor byin rlabs srog tig bzhugs so//___a/__rang rig chos sku'i bla ma la/__/'dzin med ngang nas skyabs su mchi/__/gnyis med ye shes 'khor lo ru/__/'gro kun sgrol bar sems bskyed do/__a/__snang srid kun bzang ye shes zhing*/__/dag pa rab 'byams chen po'i klong*/__/rang nyid rdor sems gsal ba'i mdun/__/sangs rgyas kun 'dus bla ma rje/__/pad+ma mdo sngags gling pa ni/__/gcer bu rnal 'byor spyod pa'i chas/__/phyag g.yas ye shes ral gri 'phyar/__/g.yon pas 'chi med tshe bum 'dzin/__/zhabs gnyis rgyal po rol stabs kyis/__/ma hA gser gyi rus sbal chibs/__/'ja' zer 'od kyi dra bar bzhugs/__/spyi bor rigs bdag zhe chen pa/__/pad+ma 'byung gnas tshul du bzhugs/__/bde chen 'khor lor khri srong rje/__/longs spyod 'khor lor mchog grub rgyal/__/chos kyi 'khor lor nam mkha'i snying*/__/sprul ba'i 'khor lor bi ma la/__/bde skyong 'khor lor lang gro che/__/snying gi phyogs mtshams rtsa 'dab tu/__/bka' gter bka' gdams lam 'bras dang*/__/mar shangs bka' brgyud zhi byed gcod/__/dus kyi 'khor lo bsnyen sgrub kyi/__/mkhas grub rig 'dzin bye ba bzhugs/__/g.yas su ra sa nA yi klong*/__/many+dzu badz+ra a dzi ta/__/g.yon du lA la rtsa yi sbubs/__/d+harma ma ti dz+nyA na'i mtshan/__/sku yi gnas brgyad sgrub sde brgyad/__/ba spu d+hA ki chos srung bcas/__/mdun du rig pa'i rdo rje ni/__/DA ru thod thogs glang chen zhon/__/g.yas su blo gsal bstan skyong zhabs/__/gri thod 'dzin cing seng ge chibs/__/rgyab tu pad+ma gar gyi dbang*/__/rdor dril 'dzin pas 'brug la chibs/__/g.yon du mchog gyur bde chen gling*/__/rdo rje phur gdengs stag steng 'gying*/__/'bum phrag dpa' bo mkha' 'gro bcas/__/til gyi gong bu phye ba bzhin/__/dngos gcig du ma'i rol pa yis/__/dkyil 'khor lhun rdzogs phyag rgyar bzhengs/__/hU~M hrIH__'od gsal chos sku'i bla ma ni/__/srid zhi kun khyab klong nas gshegs/__/zang thal chen po'i byin rlabs kyis/__/'khrul pa gzhi la dag par mdzod/__/bde chen longs sku'i bla ma ni/__/ye shes rang snang klong nas gshegs/__/snang srid gzhir bzhengs phyag rgya'i gar/__/rdo rje gsum du rdzogs par mdzod/__/kun khyab sprul sku'i bla ma ni/__/mkha' khyab thugs rje'i rol par gshegs/__/gang 'dul sgyu 'phrul drwa ba yi/__/byin rlabs dngos grub dus 'dir stsol/__/badz+ra sa ma ya dzaHdzaH__a/__ye shes rig pa'i bla ma'i zhal/__/mngon sum mjal bas phyag 'tshal zhing*/__/snang srid kun bzang rol pas mchod/__/ma rtog glo bur 'khrul pa bshags/__/nang gsal chen por rjes yi rang*/__/'phel 'grib bral ba'i rdo rje'i skur/__/bzhugs la rig rtsal chos 'khor bskor/__/sku gsum lhun grub klong rol shog__a/__rje btsun dpal mgon bla ma ni/__/sangs rgyas kun gyi ye shes sku/__/sgyu 'phrul rdo rje'i rol gar mkhan/__/snying nas gdung bas gsol ba 'debs/__/'od gsal ye shes gcig gi klong*/__/mkhyen brtse nus pa bsam mi khyab/__/dgongs pa'i byin rlabs btsan thabs 'phos/__/thugs yid gcig tu 'dres par mdzod/__/zag med 'bras bu'i yon tan kun/__/khyed nyid gcig pus stsol nus par/__/yid ches mos pa rtse gcig gis/__/'dod pa'i 'bras bu mchis par mdzod/__oM AHbadz+ra ma hA gu ru mang+ga la shrI b+hU ti sarba sid+d+hi hU~M/__bla ma'i sku ni ye shes sku/__/snang srid brtan g.yo khyab par brdal/__/rnam dag gdan gsum 'khor lo che/__/snang stong bum pa'i dbang mchog go__/bla ma'i gsung ni rdo rje'i gsung*/__/grags stong rnam pa thams cad pa/__/rlung sngags mi shigs nA da'i sgra/__/gsal stong gsang ba'i dbang mchog go__/bla ma'i thugs ni rdo rje'i thugs/__/cir snang ye shes chen po'i rtsal/__/skye 'gag gnas bral 'pho med kyi/__/bde stong ye shes dbang mchog go__/bla ma'i ye shes rdo rje che/__/gang du'ang mi gnas kun la khyab/__/don gnyis de nyid mngon gyur na/__/rig stong bzhi pa'i dbang gi mchog__/gdod nas bla ma rang la rdzogs/__/gnyis su med pa'i rdo rje sems/__/'khor 'das kun gyi byed po ste/__/rtag tu 'du 'bral med pa'o/__/snang bcas mos gus nyer len gyis/__/dgongs rgyud byin rlabs btsan thabs 'pho/__/nges pa don gyi bla ma rje'i/__/gsang gsum gnyis med 'jug gyur cig__/de skad gang shar ma bcos pa'i/__/bla ma'i rnal 'byor 'di nyid kyang*/__/gar sha'i rnal 'byor a dzi tas/__/bskul ngor rgan bu rgyal khams pas/__/sbas gnas bkra shis lding du sbyar/__/dge bas 'gro kun rang gi sems/__/don gyi bla ma mngon gyur shog__!__chos nyid dbyings su bzung 'dzin 'khrul pa zad/__/chos can sku dang ye shes rig kun bdag__/kun mkhyen 'jam dpal rdo rje mdo sngags gling*/__/dbyer med mkhyen brtse'i 'od zer gsol ba 'debs/__zhes pa'ang dad ldan dam pas bskul ngor rang nyid kyis bris pa'o/__/bla mar bsten pa'i rnam dkar bsod nams 'bras/__/bsam mi khyab par mdo rgyud kun nas bsngags/__/bka' drin sum ldan rje yi rnal 'byor gyis/__/spar bskrun rdo rje'i ye shes mngon gyur shog__/ces pa'ang rnam dkar sgrub pa po rgyal mtshan nas bskul ngor mang+ga las bris pa'o/__sarba mang+ga laM/__dge'o//__//