JKW-KABUM-02-KHA-002-040

🚧 This website is under continued development. We appreciate your patience!

Previous Text Back to Volume PageNext Text

Wylie title	rje mkhyen brtse'i rnam thar gsol 'debs bkra shis 'khyil pa'i sgra dbyangs gu Nas mdzad pa
Location	mkhyen brtse'i bka' 'bum Volume 2, sde tshan 2, Text 40, Pages 340-344 (Folios 29b1 to 31b5)
Author	འཇམ་མགོན་ཀོང་སྤྲུལ་
Less details More details
Associated People	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam mgon kong sprul. rje mkhyen brtse'i rnam thar gsol 'debs bkra shis 'khyil pa'i sgra dbyangs gu Nas mdzad pa. In 'jam dbyangs mkhyen brtse'i dbang po'i bka' 'bum, Vol. 2: 340-344. Khams sde dge rdzong sar dgon: Rdzong sar blo gros phun tshogs, 2020.
Genre	Biographies - Hagiography - rnam thar  ·  Supplications - gsol 'debs
Colophon	།ཐུབ་བསྟན་ཡོངས་རྫོགས་ཀྱི་མངའ་བདག་ཀུན་མཁྱེན་བླ་མ་རིན་པོ་ཆེའི་རྣམ་ཐར་རྒྱ་མཚོ་ཆེན་པོ་ལས་དད་གུས་སྐྲ་རྩེས་བླངས་པའི་ཐིགས་པ་འདི་ཉིད་རྨོངས་རྟུལ་བློ་གྲོས་མཐའ་ཡས་ཀྱིས་མཉམ་མེད་ཤངས་པ་བཀའ་བརྒྱུད་ཀྱི་རྣམ་ཐར་གསོལ་འདེབས་ཨུ་དུམྺཱ་རའི་ཕྲེང་བར་བསྟར་བ་ལས་མོས་ལྡན་དུ་མའི་བཞེད་ངོར་ཁོལ་དུ་ཕྱུངས་པ་དགེ་ལེགས་འཕེལ།།
	thub bstan yongs rdzogs kyi mnga' bdag kun mkhyen bla ma rin po che'i rnam thar rgya mtsho chen po las dad gus skra rtses blangs pa'i thigs pa 'di nyid rmongs rtul blo gros mtha' yas kyis mnyam med shangs pa bka' brgyud kyi rnam thar gsol 'debs u dum+WA ra'i phreng bar bstar ba las mos ldan du ma'i bzhed ngor khol du phyungs pa dge legs 'phel/

1 Texts in this Section (sde tshan or chos tshan)

40 340-344	རྗེ་མཁྱེན་བརྩེའི་རྣམ་ཐར་གསོལ་འདེབས་བཀྲ་ཤིས་འཁྱིལ་པའི་སྒྲ་དབྱངས་གུ་ཎས་མཛད་པ། rje mkhyen brtse'i rnam thar gsol 'debs bkra shis 'khyil pa'i sgra dbyangs gu Nas mdzad pa Biographies - Hagiography - rnam thar   ·   Supplications - gsol 'debs	Text page View PDF
	འཇམ་མགོན་ཀོང་སྤྲུལ་ ('jam mgon kong sprul)

Tibetan Text

Wylie

[edit]

ཀུན་མཁྱེན་འཇམ་དབྱངས་མཁྱེན་བརྩེའི་དབང་པོའི་རྣམ་ཐར་གསོལ་འདེབས་བཀྲ་ཤིས་འཁྱིལ་བའི་སྒྲ་དབྱངས་ཞེས་བྱ་བ་བཞུགས་སོ། །ཇི་ལྟ་ཇི་སྙེད་ཤེས་བྱ་ཐམས་ཅད་མཁྱེན། །དམིགས་མེད་ཐུགས་རྗེས་འགྲོ་ལ་བུ་ལྟར་དགོངས། །འཁོར་བ་དོང་སྤྲུགས་ནུས་པའི་ཆོས་ཀྱི་རྒྱལ། །མཁྱེན་བརྩེའི་དབང་པོའི་ཞབས་ལ་གསོལ་བ་འདེབས། །རྒྱལ་བའི་ཡབ་གཅིག་རྗེ་བཙུན་འཇམ་པའི་དབྱངས། །གང་འདུལ་རྣམ་རོལ་ཆོས་དབྱིངས་ཁྱབ་པ་ལས། །སྙིགས་དུས་བསྟན་འགྲོ་སྐྱོབ་པའི་དཔལ་མགོན་དུ། །བསམས་བཞིན་སྐྱེ་བ་བཞེས་ལ་གསོལ་བ་འདེབས། །མདོ་སྨད་སྡེ་བཞི་དགེ་བཅུའི་སྨན་གྱི་ལྗོངས། །ཕྲིན་ལས་འགྲོ་འདུལ་སྤྲུལ་པའི་གནས་ཀྱི་ཆར། །རྣམ་དག་རིགས་སོགས་མཆོག་གི་གཟིགས་པ་ལྔས། །སྤྲུལ་པའི་སྐུ་རུ་བསྟན་ལ་གསོལ་བ་འདེབས། །ཡེ་ཤེས་བརྙེས་པའི་རྣམ་འདྲེན་མཆོག་རྣམས་ཀྱིས། །དམ་པའི་སྐྱེས་བུར་མགྲིན་གཅིག་ལུང་བསྟན་ཅིང་། །ཕལ་པའི་སྤྱོད་ལས་འདས་ཕྱིར་ལྷ་མི་ཀུན། །འགྲོ་བའི་མགོན་དུ་བསྔགས་ལ་གསོལ་བ་འདེབས། །དབུས་གཙང་བོད་ཆེན་ཀུན་ཏུ་ཞབས་ཀྱིས་བཅགས། །མཉེས་པ་གསུམ་གྱིས་ཡོངས་འཛིན་བརྒྱ་ལྷག་བསྟེན། །སྐྱོ་ངལ་མེད་པར་དམ་ཆོས་ཡོངས་སུ་ཚོལ། །ཐུགས་བསྐྱེད་དཔག་ཡས་ཁྱེད་ལ་གསོལ་བ་འདེབས། །ས་ཆེན་ཕུག་ཏུ་ཐུགས་དམ་མཛད་པའི་ཚེ། །ལྷག་པའི་ལྷ་ཡི་ཕྱག་རྒྱ་ཐུགས་ཀར་ཐིམ། །སྤོབས་པའི་གཏེར་ཆེན་བརྒྱད་པོ་ཡོངས་སུ་གྲོལ། །མཁྱེན་གཉིས་རྩལ་ཆེན་རྫོགས་ལ་གསོལ་བ་འདེབས། །སྒྲ་ཚད་བཟོ་གསོ་གྲངས་གནས་ཚིག་རྒྱན་སོགས། །གནས་ལྔ་རིག་པ་ཡན་ལག་དང་བཅས་པར། །ཕུལ་དུ་སོན་པས་གངས་ཅན་འཛིན་མའི་ཁོངས། །མཁས་པའི་སྙན་པས་ཁྱབ་ལ་གསོལ་བ་འདེབས། །འདུལ་མངོན་དབུ་མ་ཕར་ཕྱིན་གསང་སྔགས་ཀྱི། །རྒྱུད་ཀུན་གཟིགས་པ་ཙམ་གྱིས་གཏིང་སླེབ་ཅིང་། །མི་བརྗེད་གཟུངས་ཐོབ་བརྟན་པའི་འཁོར་ལོའི་ཚུལ། །མ་སྦས་གསལ་བར་སྟོན་ལ་གསོལ་བ་འདེབས། །དྲི་མེད་ཚུལ་ཁྲིམས་ནོར་བུའི་རྒྱན་ཆས་སྒེག །ཏིང་འཛིན་འཛུམ་དཀར་སྐལ་ལྡན་ཡིད་དབང་འགུགས། །ཤེས་རབ་རོལ་སྒེག་ས་གསུམ་དཔྱིད་དུ་གཡོ། །བསླབ་གསུམ་དབང་ཕྱུག་ཞབས་ལ་གསོལ་བ་འདེབས། །ཟབ་རྒྱས་གནས་ལ་ཆོས་སྤྱན་རྡུལ་དང་བྲལ། །འཆད་རྩོད་རྩོམ་པ་ཆགས་དང་ཐོགས་པ་མེད། །མཛད་སྤྱོད་ཀུན་ལ་འཁྲུལ་པའི་དྲི་མ་ཟད། །ལྷ་མི་ཡིད་ཆེས་སྐྱེད་ལ་གསོལ་བ་འདེབས། །རང་གི་ཡོན་ཏན་རྒྱ་མཚོ་གཏེར་བཞིན་སྦེད། །གཞན་གྱི་ཡོན་ཏན་ཕྲ་མོར་བསྔགས་ཤིང་འདུད། །བསྟན་འགྲོའི་དོན་དུ་གཅེས་རྒུའི་བདོག་པ་ཡང་། །རྩྭ་བཞིན་གཏོང་བར་མཛད་ལ་གསོལ་བ་འདེབས། །གཟུངས་དང་ཏིང་འཛིན་མངོན་ཤེས་རྒྱ་མཚོ་མངའ། །འཇིག་རྟེན་གསུམ་གྱིས་མཆོད་འོས་ཉིད་གྱུར་ཀྱང་། །ཁེངས་དྲེགས་མི་མངའ་དམ་ཆོས་ཚིག་གཅིག་ཕྱིར། །དཀའ་ཆེན་དང་དུ་བཞེས་ལ་གསོལ་བ་འདེབས། །ལྟར་སྣང་ཆོས་ལ་བསྙད་པའི་འཛིན་སྐྱོང་སོགས། །འཇིག་རྟེན་བྱ་གཞག་གང་ལའང་ལྟོས་མེད་པས། །འཇིགས་མེད་སེང་གེ་ལྟ་བུར་ཀུན་བཟང་སྤྱོད། །ས་སྟེང་འགྲན་ཟླ་བྲལ་ལ་གསོལ་བ་འདེབས། །སྒྲུབ་བརྒྱུད་ཤིང་རྟ་ཆེ་བརྒྱད་རིང་ལུགས་ཀྱི། །གཞུང་གདམས་མན་ངག་ཆུ་ཀླུང་མ་ལུས་པར། །ཐུགས་མཚོར་བསྐྱིལ་ནས་སྨིན་གྲོལ་རྒྱུན་འབེབས་པས། །བསྟན་པའི་སྲོག་རྩ་མཐུད་ལ་གསོལ་བ་འདེབས། །ཐུབ་བསྟན་ཡོངས་སུ་རྫོགས་པའི་ཤིང་རྟ་ཆེ། །གདུལ་བྱ་རིས་སུ་མ་ཆད་འདུལ་བའི་གཉེན། །ཕྱོགས་སུ་མ་ལྷུང་གྲུབ་མཐའ་མཐའ་དག་གི །གཙུག་གི་ནོར་བུར་གྱུར་ལ་གསོལ་བ་འདེབས། །ཕྲིན་ལས་ཐམས་ཅད་གཞན་ཕན་འབའ་ཞིག་སྒྲུབ། །འབྲེལ་ཚད་དོན་ལྡན་ངོ་མཚར་ལྟས་མང་མངའ། །བསོད་ནམས་ཚོགས་ཆེན་བསམ་མི་ཁྱབ་པ་བསྐྲུན། །ས་བཅུའི་དབང་ཕྱུག་ཁྱེད་ལ་གསོལ་བ་འདེབས། །ཨོ་རྒྱན་ཡབ་ཡུམ་དྲི་མེད་བཤེས་གཉེན་ཞབས། །ཆོས་རྒྱལ་མེས་དབོན་ཆོས་དབང་ཀུན་མཁྱེན་སོགས། །དགུ་ལྡན་བརྒྱུད་པའི་བླ་མ་ཡི་དམ་ལྷས། །བྱིན་རླབས་དངོས་གྲུབ་སྩལ་ལ་གསོལ་བ་འདེབས། །བརྩེ་བ་ཆེན་པོ་ཁུ་དབོན་བརྒྱུད་བཅས་ཀྱིས། །དབང་བསྐུར་རྒྱུད་གཏད་གཞན་ཡང་འཕགས་བོད་ཀྱི། །མཁས་གྲུབ་དུ་མས་དངོས་ཉམས་རྨི་ལམ་དུ། །ཡང་ཡང་རྗེས་སུ་བཟུང་ལ་གསོལ་བ་འདེབས། །ཁྱད་པར་སློབ་དཔོན་འཇམ་དཔལ་བཤེས་གཉེན་གྱིས། །མདོ་རྒྱུད་གསང་མཛོད་སྩལ་ནས་ཡེ་ཤེས་སྐུར། །བྱིན་གྱིས་བརླབས་པས་ཉིད་དང་དབྱེར་མེད་པའི། །མཁྱེན་རྟོགས་རྫོགས་པར་སད་ལ་གསོལ་བ་འདེབས། །འདུས་པའི་དལ་དུ་ཞུགས་ཚེ་སོ་སྟོན་མཆོག །ཡེ་དབང་མཐུ་ཡིས་སྙིགས་མའི་ཕུང་ཁམས་སྦྱངས། །རྡོ་རྗེ་སེམས་དཔའི་གསང་བ་གསུམ་དུ་གྱུར། །རིགས་ཀུན་ཁྱབ་བདག་མཆོག་ལ་གསོལ་བ་འདེབས། །རྒྱལ་ཡུམ་རྡོ་རྗེ་བཙུན་མོས་རྗེས་སུ་བཟུང་། །སྣང་སྲིད་དག་པ་རབ་འབྱམས་འཁོར་ལོར་ཤར། །རྡོ་རྗེ་ལུས་ཀྱི་དཀྱིལ་འཁོར་གསལ་བར་གཟིགས། །གྲུབ་པའི་ཁྱུ་མཆོག་ཁྱེད་ལ་གསོལ་བ་འདེབས། །ཕྱི་ནང་གནས་གསུམ་མཁའ་འགྲོའི་འདུ་བ་ཐོབ། །འབར་བ་གསུམ་གྱི་ཡེ་ཤེས་གོང་དུ་འཕེལ། །སྤྱོད་པ་གསུམ་གྱི་རྟེན་འབྲེལ་མཐར་ཕྱིན་པའི། །རྣལ་འབྱོར་དབང་ཕྱུག་ཆེན་པོར་གསོལ་བ་འདེབས། །སྐྱེས་རབས་དུ་མའི་ལས་ཀྱི་འཕྲོ་སད་དེ། །མདོ་རྒྱུད་བཀའ་ལུང་དཀོན་པའི་པུསྟ་ཀཿ རྟེན་མཆོག་དམ་རྫས་ཆུ་ཀླུང་བྱེ་བ་སྙེད། །རྣམ་ཐར་རྒྱ་མཚོར་བསྐྱིལ་ལ་གསོལ་བ་འདེབས། །བརྒྱུད་པ་དྲུག་ལྡན་ས་དང་དགོངས་པའི་གཏེར། །དག་སྣང་སྙན་བརྒྱུད་རྗེས་དྲན་ཡང་གཏེར་བཅས། །བཀའ་བབས་རིན་ཆེན་རྣམ་བདུན་རྒྱལ་སྲིད་བསྙེས། །ཆོས་ཀྱི་འཁོར་ལོས་སྒྱུར་ལ་གསོལ་བ་འདེབས། །རང་སྣང་དབང་འདུས་གཞན་སྣང་ཟིལ་གྱིས་མནན། །མ་འབད་པར་ཡང་ཕྲིན་ལས་རྣམ་བཞི་འགྲུབ། །ཌཱ་ཀི་ཆོས་སྲུང་མཐུ་ལྡན་དྲེགས་པ་ཡིས། །ཅི་བཅོལ་བཀའ་བཞིན་སྒྲུབ་ལ་གསོལ་བ་འདེབས། །ཟབ་རྒྱས་ཆོས་ཀྱི་འཁོར་ལོ་གྲངས་མེད་པས། །སྐལ་ལྡན་བྱེ་སྙེད་སྨིན་ཅིང་གྲོལ་བར་མཛད། །བསམ་གྱིས་མི་ཁྱབ་འཕགས་པའི་རྣམ་ཐར་འཆང་། །ཐུགས་རྗེའི་བདག་ཉིད་ཁྱེད་ལ་གསོལ་བ་འདེབས། །ཚེ་དཔག་མེད་བཞིན་ངོ་མཚར་ཞིང་བཟུང་སྟེ། །སྤྱན་རས་གཟིགས་བཞིན་འགྲོ་དོན་མཁའ་དང་མཉམ། །ཆོས་ཆེན་དབྱངས་ཀྱིས་ལྷར་བཅས་སྐྱེ་རྒུ་རྣམས། །རྣམ་གྲོལ་ས་ལ་དབུགས་དབྱུང་སྩལ་དུ་གསོལ། །ཐུབ་བསྟན་ཡོངས་རྫོགས་ཀྱི་མངའ་བདག་ཀུན་མཁྱེན་བླ་མ་རིན་པོ་ཆེའི་རྣམ་ཐར་རྒྱ་མཚོ་ཆེན་པོ་ལས་དད་གུས་སྐྲ་རྩེས་བླངས་པའི་ཐིགས་པ་འདི་ཉིད་རྨོངས་རྟུལ་བློ་གྲོས་མཐའ་ཡས་ཀྱིས་མཉམ་མེད་ཤངས་པ་བཀའ་བརྒྱུད་ཀྱི་རྣམ་ཐར་གསོལ་འདེབས་ཨུ་དུམྺཱ་རའི་ཕྲེང་བར་བསྟར་བ་ལས་མོས་ལྡན་དུ་མའི་བཞེད་ངོར་ཁོལ་དུ་ཕྱུངས་པ་དགེ་ལེགས་འཕེལ།། །། ༈

[edit]

rje mkhyen brtse'i rnam thar gsol 'debs bkra shis 'khyil pa'i sgra dbyangs gu Nas mdzad pa/__ kun mkhyen 'jam dbyangs mkhyen brtse'i dbang po'i rnam thar gsol 'debs bkra shis 'khyil ba'i sgra dbyangs zhes bya ba bzhugs so/_/ji lta ji snyed shes bya thams cad mkhyen/_/dmigs med thugs rjes 'gro la bu ltar dgongs/_/'khor ba dong sprugs nus pa'i chos kyi rgyal/_/mkhyen brtse'i dbang po'i zhabs la gsol ba 'debs/_/rgyal ba'i yab gcig rje btsun 'jam pa'i dbyangs/_/gang 'dul rnam rol chos dbyings khyab pa las/_/snyigs dus bstan 'gro skyob pa'i dpal mgon du/_/bsams bzhin skye ba bzhes la gsol ba 'debs/_/mdo smad sde bzhi dge bcu'i sman gyi ljongs/_/phrin las 'gro 'dul sprul pa'i gnas kyi char/_/rnam dag rigs sogs mchog gi gzigs pa lngas/_/sprul pa'i sku ru bstan la gsol ba 'debs/_/ye shes brnyes pa'i rnam 'dren mchog rnams kyis/_/dam pa'i skyes bur mgrin gcig lung bstan cing /_/phal pa'i spyod las 'das phyir lha mi kun/_/'gro ba'i mgon du bsngags la gsol ba 'debs/_/dbus gtsang bod chen kun tu zhabs kyis bcags/_/mnyes pa gsum gyis yongs 'dzin brgya lhag bsten/_/skyo ngal med par dam chos yongs su tshol/_/thugs bskyed dpag yas khyed la gsol ba 'debs/_/sa chen phug tu thugs dam mdzad pa'i tshe/_/lhag pa'i lha yi phyag rgya thugs kar thim/_/spobs pa'i gter chen brgyad po yongs su grol/_/mkhyen gnyis rtsal chen rdzogs la gsol ba 'debs/_/sgra tshad bzo gso grangs gnas tshig rgyan sogs/_/gnas lnga rig pa yan lag dang bcas par/_/phul du son pas gangs can 'dzin ma'i khongs/_/mkhas pa'i snyan pas khyab la gsol ba 'debs/_/'dul mngon dbu ma phar phyin gsang sngags kyi/_/rgyud kun gzigs pa tsam gyis gting sleb cing /_/mi brjed gzungs thob brtan pa'i 'khor lo'i tshul/_/ma sbas gsal bar ston la gsol ba 'debs/_/dri med tshul khrims nor bu'i rgyan chas sgeg__/ting 'dzin 'dzum dkar skal ldan yid dbang 'gugs/_/shes rab rol sgeg sa gsum dpyid du g.yo/_/bslab gsum dbang phyug zhabs la gsol ba 'debs/_/zab rgyas gnas la chos spyan rdul dang bral/_/'chad rtsod rtsom pa chags dang thogs pa med/_/mdzad spyod kun la 'khrul pa'i dri ma zad/_/lha mi yid ches skyed la gsol ba 'debs/_/rang gi yon tan rgya mtsho gter bzhin sbed/_/gzhan gyi yon tan phra mor bsngags shing 'dud/_/bstan 'gro'i don du gces rgu'i bdog pa yang /_/rtswa bzhin gtong bar mdzad la gsol ba 'debs/_/gzungs dang ting 'dzin mngon shes rgya mtsho mnga'/_/'jig rten gsum gyis mchod 'os nyid gyur kyang /_/khengs dregs mi mnga' dam chos tshig gcig phyir/_/dka' chen dang du bzhes la gsol ba 'debs/_/ltar snang chos la bsnyad pa'i 'dzin skyong sogs/_/'jig rten bya gzhag gang la'ang ltos med pas/_/'jigs med seng ge lta bur kun bzang spyod/_/sa steng 'gran zla bral la gsol ba 'debs/_/sgrub brgyud shing rta che brgyad ring lugs kyi/_/gzhung gdams man ngag chu klung ma lus par/_/thugs mtshor bskyil nas smin grol rgyun 'bebs pas/_/bstan pa'i srog rtsa mthud la gsol ba 'debs/_/thub bstan yongs su rdzogs pa'i shing rta che/_/gdul bya ris su ma chad 'dul ba'i gnyen/_/phyogs su ma lhung grub mtha' mtha' dag gi__/gtsug gi nor bur gyur la gsol ba 'debs/_/phrin las thams cad gzhan phan 'ba' zhig sgrub/_/'brel tshad don ldan ngo mtshar ltas mang mnga'/_/bsod nams tshogs chen bsam mi khyab pa bskrun/_/sa bcu'i dbang phyug khyed la gsol ba 'debs/_/o rgyan yab yum dri med bshes gnyen zhabs/_/chos rgyal mes dbon chos dbang kun mkhyen sogs/_/dgu ldan brgyud pa'i bla ma yi dam lhas/_/byin rlabs dngos grub stsal la gsol ba 'debs/_/brtse ba chen po khu dbon brgyud bcas kyis/_/dbang bskur rgyud gtad gzhan yang 'phags bod kyi/_/mkhas grub du mas dngos nyams rmi lam du/_/yang yang rjes su bzung la gsol ba 'debs/_/khyad par slob dpon 'jam dpal bshes gnyen gyis/_/mdo rgyud gsang mdzod stsal nas ye shes skur/_/byin gyis brlabs pas nyid dang dbyer med pa'i/_/mkhyen rtogs rdzogs par sad la gsol ba 'debs/_/'dus pa'i dal du zhugs tshe so ston mchog__/ye dbang mthu yis snyigs ma'i phung khams sbyangs/_/rdo rje sems dpa'i gsang ba gsum du gyur/_/rigs kun khyab bdag mchog la gsol ba 'debs/_/rgyal yum rdo rje btsun mos rjes su bzung /_/snang srid dag pa rab 'byams 'khor lor shar/_/rdo rje lus kyi dkyil 'khor gsal bar gzigs/_/grub pa'i khyu mchog khyed la gsol ba 'debs/_/phyi nang gnas gsum mkha' 'gro'i 'du ba thob/_/'bar ba gsum gyi ye shes gong du 'phel/_/spyod pa gsum gyi rten 'brel mthar phyin pa'i/_/rnal 'byor dbang phyug chen por gsol ba 'debs/_/skyes rabs du ma'i las kyi 'phro sad de/_/mdo rgyud bka' lung dkon pa'i pusta kaH__rten mchog dam rdzas chu klung bye ba snyed/_/rnam thar rgya mtshor bskyil la gsol ba 'debs/_/brgyud pa drug ldan sa dang dgongs pa'i gter/_/dag snang snyan brgyud rjes dran yang gter bcas/_/bka' babs rin chen rnam bdun rgyal srid bsnyes/_/chos kyi 'khor los sgyur la gsol ba 'debs/_/rang snang dbang 'dus gzhan snang zil gyis mnan/_/ma 'bad par yang phrin las rnam bzhi 'grub/_/DA ki chos srung mthu ldan dregs pa yis/_/ci bcol bka' bzhin sgrub la gsol ba 'debs/_/zab rgyas chos kyi 'khor lo grangs med pas/_/skal ldan bye snyed smin cing grol bar mdzad/_/bsam gyis mi khyab 'phags pa'i rnam thar 'chang /_/thugs rje'i bdag nyid khyed la gsol ba 'debs/_/tshe dpag med bzhin ngo mtshar zhing bzung ste/_/spyan ras gzigs bzhin 'gro don mkha' dang mnyam/_/chos chen dbyangs kyis lhar bcas skye rgu rnams/_/rnam grol sa la dbugs dbyung stsal du gsol/_/thub bstan yongs rdzogs kyi mnga' bdag kun mkhyen bla ma rin po che'i rnam thar rgya mtsho chen po las dad gus skra rtses blangs pa'i thigs pa 'di nyid rmongs rtul blo gros mtha' yas kyis mnyam med shangs pa bka' brgyud kyi rnam thar gsol 'debs u dum+WA ra'i phreng bar bstar ba las mos ldan du ma'i bzhed ngor khol du phyungs pa dge legs 'phel//___//_!_