JKCL-KABUM-09-TA-011

🚧 This website is under continued development. We appreciate your patience!

Previous Text Back to Volume PageNext Text

Wylie title	dpal sgrub sde brgyad kyi gsung dbang chen rta mgrin gyi rta skad thengs gsum bshad pa snang srid dbang sdud
Location	chos kyi blo gros bka' 'bum Volume 9, Text 11, Pages 99-121 (Folios 1a to 12a4)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. dpal sgrub sde brgyad kyi gsung dbang chen rta mgrin gyi rta skad thengs gsum bshad pa snang srid dbang sdud. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 9: 99-121. Bir, H.P.: Khyentse Labrang, 2012.
Genre	Detailed Explanation - rnam bshad
Deity	rta mgrin
Colophon	།ཅེས་དབང་ཆེན་པདྨ་ཧེ་རུ་ཀའི་རྟ་སྐད་ཀྱི་དགོངས་པ་ཅུང་ཟད་བྲིས་པ་འདིའང་རིག་འཛིན་མཁས་གྲུབ་ཆེན་པོ་རྣམས་ཀྱི་གསུང་གི་རྗེས་སུ་འབྲང་ནས་པདྨའི་སྔགས་རིག་འཛིན་པ་༧པདྨ་ཡེ་ཤེས་རྡོ་རྗེ་ལ་རང་སློབ་གདོང་སྣ་མཆོག་སྤྲུལ་རིན་པོ་ཆེའི་ལྷ་རྫས་བཟང་གོས་ཀྱི་རྟེན་དང་བྲི་གཞི་ཤོག་བུ་བཅས་ནན་ཏན་ཆེན་པོའི་གསུང་གི་བསྐུལ་བ་མི་ལྡོག་ཙམ་དུ་བྲིས་པ་འདིས་ཀྱང་སྒྲུབ་སྡེ་ཆེན་པོའི་བསྟན་པ་རིན་པོ་ཆེ་ཕྱོགས་བཅུར་རྒྱས་པའི་རྒྱུར་གྱུར་ཅིག །སརྦ་དཱ་མངྒ་ལཾ།།
	/ces dbang chen pad+ma he ru ka'i rta skad kyi dgongs pa cung zad bris pa 'di'ang rig 'dzin mkhas grub chen po rnams kyi gsung gi rjes su 'brang nas pad+ma'i sngags rig 'dzin pa 7pad+ma ye shes rdo rje la rang slob gdong sna mchog sprul rin po che'i lha rdzas bzang gos kyi rten dang bri gzhi shog bu bcas nan tan chen po'i gsung gi bskul ba mi ldog tsam du bris pa 'dis kyang sgrub sde chen po'i bstan pa rin po che phyogs bcur rgyas pa'i rgyur gyur cig__/sarba dA mang+ga laM//

Tibetan Text

Wylie

[edit]

༄༅། །དཔལ་སྒྲུབ་སྡེ་བརྒྱད་ཀྱི་གསུང་དབང་ཆེན་རྟ་མགྲིན་གྱི་རྟ་སྐད་ཐེངས་གསུམ་བཤད་པ་སྣང་སྲིད་དབང་སྡུད་ཅེས་བྱ་བ་བཞུགས་སོ། །ན་མོ་གུ་རུ་ཧྱ་གྲཱི་ཝཱ་ཡ། དཔལ་གྱི་འབྱུང་གནས་དཔལ་གྱི་དབང་ཕྱུག་ཆེ། །དཔལ་ཆེན་རྟ་མགྲིན་དཔལ་གྱི་རྟ་སྐད་སྒྲོགས། །དཔལ་ལྡན་པདྨ་དཔལ་ཆེན་གྲུབ་པའི་གཙོ། །དཔལ་ལ་སྨོན་པས་དཔལ་དེར་གུས་བཏུད་ནས། །གཞི་ལམ་འབྲས་གསུམ་ཧཱི་ཧཱིའི་སྒྲས་སྟོན་ཅིང་། །རྡོ་རྗེ་རྟ་ཡི་ངུར་དབྱངས་འཚེར་བ་ལས། །ཁམས་གསུམ་འབྱུང་པོ་ཟིལ་གྱིས་གནོན་པ་ཡི། །དགོངས་དོན་གསལ་བྱེད་ཉུང་ངུར་སྤེལ་བར་བྱ། །དེ་ལ་འདིར་ཁམས་གསུམ་དང་། མྱ་ངན་ལས་འདས་པའི་ཆར་གཏོགས་པ་ཐམས་ཅད་ཀྱི་སྤྱི་རྗེ་དཔལ་ཆེན་པོ་པདྨ་དབང་ཆེན་གྱི་དཀྱིལ་འཁོར་འདི་ནི་མཁའ་ཁྱབ་ཀྱི་དེ་བཞིན་གཤེགས་པ་ཐམས་ཅད་ཀྱི་གསུང་གི་རྡོ་རྗེ་པདྨའི་རིགས་ཀྱི་གཙོ་བོ་སྣང་བ་མཐའ་ཡས་འོད་མི་འགྱུར་བ་དེ་ཉིད་ཆོས་སྐུ་མཚན་མ་ཐམས་ཅད་དང་བྲལ་བ་བརྡལ་ཁྱབ་ཀ་དག་ཆོས་སྐུའི་དབྱིངས་ལས་མ་གཡོས། ལྷུན་གྲུབ་འོད་གསལ་རང་བཞིན་ལྷུན་རྫོགས་ཡེ་ཤེས་རིགས་ལྔ་གངས་ཆེན་མཚོ་ཡི་སྤྲིན་ཆེན་རྣམ་པར་བཀོད་དེ། རྒྱན་སྟུག་པོ་བཀོད་པའི་ཞིང་ཁམས་ཕྱི་དང་ནང་མེད་པ་མཐའ་དབུས་ཐམས་ཅད་དང་བྲལ་བ་ཚད་བཟུང་དུ་མེད་ཅིང་། རྒྱ་ཁྱོན་དཔག་པར་དཀའ་བའི་རྟེན་དང་བརྟེན་པའི་བཀོད་པ་མཐའ་ཡས་པར་འཕྲོ་བའི་རང་སྣང་གི་ཡེ་ཤེས་ཀྱི་རྩལ་གདངས་དེ་ལས། ཐུགས་རྗེ་གང་འདུལ་གྱི་སྤྲུལ་པའི་སྐུ་ཡི་ཆོ་འཕྲུལ་ཕྱོགས་དང་དུས་ཐམས་ཅད་ཁྱབ་ཅིང་སྣ་ཚོགས་ཅིར་ཡང་བསྒྱུར་བའི་ཞི་དང་ཁྲོ་གར་གྱི་ཉམས་བརྒྱ་སྐད་ཅིག་རེར་ཡང་རྡུལ་ཕྲ་རབ་ཀྱི་གྲངས་སྙེད་དུ་འདུ་འཕྲོ་ཆེན་པོས། གདུལ་བྱ་དག་མ་དག་གི་དོན་མཐའ་ཡས་པར་སྟོན་ཅིང་འབད་པ་མེད་པའི་ཕྲིན་ལས་ཀྱི་རོལ་མོ་ཕྱོགས་བརྒྱར་འཕྲོ་བ་ལས། སྔོན་གྱི་བསྐལ་པའི་དུས་གསང་སྔགས་ཀྱི་དོན་ལ་ལོག་པར་གོལ་ཞིང་བདག་ཏུ་འཛིན་པའི་འཆིང་བ་དམ་པོས་རབ་ཏུ་བཅིངས་ཤིང་ཉོན་མོངས་པའི་འཐོར་རླུང་དྲག་པོས་རབ་ཏུ་བསྐྱོད་ཅིང་། སྔོན་དུས་གསང་སྔགས་རང་བཞིན་གྱི་གསང་བ་དང་། སྦས་པ་གསང་བའི་དོན་ཇི་བཞིན་མ་རྟོགས་ཀྱང་ཚིག་དང་སྔགས་ཀྱི་བདེན་པའི་སྟོབས་ཀྱི། རུ་ཏྲ་ཐར་པ་ནག་པོར་སྐྱེས་ནས་དུག་ཤིང་གི་རྩ་བར་འཁོར་བདུད་དང་སྲིན་པོའི་ཆུང་མའི་ཚོགས་དང་བཅས་པ་གནས་ནས་ཤ་ཟ་ཁྲག་འཐུང་རུས་མུར་ལྤགས་གྱོན་གྱི་བརྟུལ་ཞུགས་ཉམས་སུ་བླངས་ཏེ་སྦྱོར་སྒྲོལ་སྒྲ་ཇི་བཞིན་པར་སྤྱོད་པ་དང་། མ་རུང་བརླངས་པོའི་ང་རོ་གཏུམ་པོ་རབ་ཏུ་བསྒྲགས་ནས་གཟུགས་ཁམས་ཀྱི་འབྲས་བུ་ཆེ་བའི་ལྷ་གནས་མན་ཆད་དབང་དུ་བསྡུས་ཏེ་གནས་པའི་དུས་ན། དེ་བཞིན་གཤེགས་པ་ཐམས་ཅད་བཀའ་བགྲོས་ནས་ཞི་བ་ཆེན་པོས་འདུལ་བར་བཞེད་ཀྱང་དྲག་པོ་ཆེན་པོ་དེ་ཉིད་མ་ཐུལ་བའི་ཚུལ་མཛད་ནས། སླར་ཡང་ཆོས་ཉིད་ཞི་བ་ཆེན་པོའི་ངང་ལས་མ་གཡོས་བཞིན་དུ། གར་གྱི་ཉམས་དགུ་ལྡན་པའི་འབར་བ་ཆེན་པོ་ཁྲོ་བོའི་དཀྱིལ་འཁོར་གྱི་སྤྲིན་རྣམ་པར་བཀོད་པ་ལས་ཁྱད་པར་དུ་གྱུར་པ་རྡོ་རྗེ་རྟ་ཡི་མགྲིན་བུའི་ཁྲོ་བོ་ཆེན་པོ་མངོན་བར་ཕྱུངས་ཏེ། བདུད་པོ་དེ་ཡི་ལུས་ལ་ཞུགས་ནས་རྡོ་རྗེའི་གཤོགས་པ་རབ་ཏུ་བརྒྱང་སྟེ་སྤྱི་བོ་ནས་རྡོ་རྗེ་རྟ་ཡི་གདོང་པ་ཕྱུངས་ཏེ་ཧཱི་ཧཱི་ཧཱི་ཞེས་མགྲིན་གླུ་རབ་ཏུ་སྒྲོགས་པ་དང་། དཔལ་གྱི་རྟ་སྐད་དེས་ཁམས་གསུམ་དབང་དུ་སྡུད་ཅིང་རུ་ཏྲ་དེ་ཉིད་མ་བཟོད་དེ་ཤིན་ཏུ་སྐྲག་པར་གྱུར་པའི་སྨྲེ་སྔགས་ཀྱི་གདུང་དབྱངས་དྲག་པོས་དཔལ་ཆེན་པོ་ལ་བཟོད་པར་གསོལ་བ་དང་། འཁོར་གྱི་སླས་དང་བྱི་ཕོ་བྱི་མོ། བྲན་དང་བྲན་མོ་ཐམས་ཅད་ཀྱི་སྲོག་སྙིང་ཕུལ་ཞིང་དྲག་པོ་ཆེན་པོ་ཉིད་ཀྱི་ལུས་གདན་དུ་དབུལ་ནས་སྐྱབས་སུ་མཆི་བ་དང་། བྱང་ཆུབ་ཏུ་སེམས་བསྐྱེད་ཅིང་པདྨ་དབང་གི་དཀྱིལ་འཁོར་དུ་བཅུག་སྟེ་བྱང་ཆུབ་ཀྱི་སྙིང་པོར་ལུང་བསྟན་པ་དང་། འཁོར་གྱི་ཆུང་མ་ཐམས་ཅད་ལ་མ་ཆགས་ཐབས་ཀྱི་སྦྱོར་བ་མཛད་དེ་དཀྱིལ་འཁོར་གྱི་དབུས་ལ་མི་འཚལ་ཡང་ཕྱི་ཁྱམས་སུ་གནས་པར་ཞུས་བཞིན་བཀོད་དེ་དཔལ་གྱི་ཕ་འབབ་ཆེན་པོས་ཚིམ་པར་མཛད་པ་རྣམས་ཀྱང་གདུལ་བྱ་འདུལ་བྱེད་དང་། གསང་སྔགས་ཀྱི་རྒྱུད་འབྱུང་བའི་གླེང་གཞིའི་ཆོ་འཕྲུལ་དུ་སྟོན་པ་ཙམ་ལས་རང་རྒྱུད་དུ་གོ་བར་མི་བྱའོ། །དེ་ལྟར་གླེང་གཞིའི་སྐབས་དོན་དེ་ཡི་སྐབས་སུ་སྟོན་པ་དཔལ་ཆེན་པདྨ་དབང་གི་རྒྱལ་པོ་དེ་ཉིད་ཀྱི་འཁོར་པདྨའི་རིགས་ཀྱི་ཁྲོ་བོ་ཁྲོ་མོ་རིག་འཛིན་གྲུབ་པའི་ཚོགས་བྱེ་བ་འབུམ་ཕྲག་མང་པོ་ལ་པདྨ་རིགས་ཀྱི་ཞི་དང་ཁྲོ་བོའི་རྒྱུད་བསམ་གྱི་མི་ཁྱབ་པ་བཀའ་སྩལ་པ་རྣམས་རང་ལས་མི་གཞན་པའི་སྡུད་མཛད་རྡོ་རྗེ་ཆོས་ཀྱི་བསྡུས་ཏེ་གླེགས་བམ་དུ་བཀོད་པ་རྣམས་མཁའ་འགྲོའི་ཕྱག་དང་། ཨོ་རྒྱན་གྱི་གནས་སུ་བཞུགས་པ་རྣམས་སློབ་དཔོན་ཆེན་པོ་ནཱ་ག་རྫུ་ན་དང་། པདྨ་འབྱུང་གནས། སློབ་དཔོན་རྟ་མཆོག་ཞབས་སོགས་ཀྱི་སྤྱན་དྲངས་ཤིང་། ཁྱད་པར་དུ་མཁའ་འགྲོ་ལས་ཀྱི་དབང་མོ་ཆེས་མཆོད་རྟེན་བདེ་བྱེད་བརྩེགས་པར་སྒྲུབ་སྡེ་བརྒྱད་སྤྱི་དང་བྱེ་བྲག་གི་རྒྱུད་ལུང་མན་ངག་རྣམས་གཏེར་དུ་སྦས་པ་རྣམས་གྲུབ་པ་བརྙེས་པའི་རིག་འཛིན་སློབ་དཔོན་བརྒྱད་ཀྱིས་དགུང་བདུན་དགོངས་པ་མཛད་ནས་བཞུགས་པ་ན། མཁའ་འགྲོ་མས་སློབ་དཔོན་སོ་སོར་སྒྲོམ་བུ་ཕུལ་བ་ན་ཟངས་ཀྱི་སྒྲོམ་བུ་སློབ་དཔོན་ཀླུ་སྒྲུབ་ཀྱི་ཕྱག་ཏུ་ཕུལ་བ་ན་དབང་ཆེན་འདུས་པ་རྩ་བའི་རྒྱུད་དང་། རྟ་མཆོག་རོལ་པའི་རྒྱུད་དང་། རྔོག་མ་ལེ་བརྒན་གྱི་རྒྱུད་སོགས་རྒྱུད་སྡེ་རྒྱ་མཚོ་དེའི་དགོངས་འགྲེལ་ལུང་དང་མན་ངག་གི་གདམས་སྐོར་མཐའ་ཡས་པ་གསུང་གི་རྡོ་རྗེ་པདྨ་སཾ་བྷ་ཝ་ལ་བཀའ་བབ་པ་དེ་ཉིད་ཀྱིས་ཆོས་རྒྱལ་ཡབ་སྲས། ངན་ལམ་བནྡེ་རྒྱལ་བ་མཆོག་དབྱངས་སོགས་ལ་སྩལ་བའི་བཀའ་གཏེར་གྱི་གདམས་ཟབ་མཐའ་ཡས་པ་བཞུགས་པ་རྣམས་ཀྱི་བསྟན་དོན་སྙིང་པོ་ནི་རྟ་སྐད་ཐེངས་གསུམ་གྱི་དགོངས་པ་ཡིན་ཏེ། བཀའ་བརྒྱད་བདེ་གཤེགས་ཀུན་འདུས་ཀྱི་རྟ་མགྲིན་དགོངས་པ་སྟོན་པ་ལས། སངས་རྒྱས་ས་ལ་འགྲོ་མགྱོགས་པས༔ རྟ་སྐད་ཞེས་ནི་དེ་ལ་བྱ༔ རྟ་ཡི་རང་བཞིན་འགྲོས་མཁས་ལྟར༔ ཐེག་པ་དགུ་དང་ས་ལམ་བསྒྲོད༔ མཁས་ཤིང་རྩེ་མོར་ཕྱིན་པས་ན༔ རྟ་མགྲིན་ཞེས་ནི་དེ་ལ་བྱ༔ རྟ་མགྲིན་རང་བཞིན་ཁ་རྩལ་ཆེ༔ དེ་བཞིན་རྟ་མཆོག་གསང་སྔགས་འདི༔ གསང་སྔགས་གཞན་པས་ཁ་རྩལ་ཆེ༔ རྟ་མགྲིན་ཞེས་ནི་དེ་ལ་བྱ༔ རྟ་ནི་དྲག་པོའི་རྔམ་ཚུལ་ལས༔ རྟ་མགྲིན་ལས་ནི་བྱེད་པའོ༔ རྟ་ནི་དྲག་པོའི་ངར་དང་ལྡན༔ མགྲིན་ནི་གདུག་པ་འདུལ་བའོ༔ རྟ་ནི་རྫུ་འཕྲུལ་རྐང་པར་ལྡན༔ མགྲིན་ནི་སངས་རྒྱས་ས་གནོན་པའོ༔ ཞེས་སོ། །དེ་ཡང་རྟ་ཡི་འགྲོས་དགུ་དང་མཚུངས་སྦྱར་གྱི་ཐེག་པ་དགུར་བཤད་པ་ལ། དང་པོ་སྒྲོག་ཏུ་ཚུད་པ་ནི་མི་མྱུར་པ་འགྲོ་བ་ལྟར། འཇིག་རྟེན་ལྷ་མིའི་ཐེག་པ་ནི་ཆོས་ཉིད་མཉམ་པ་ཆེན་པོའི་དོན་མ་མཐོང་ཞིང་མི་དགེ་བཅུ་སྤང་ལེན་གྱི་ལེགས་སྨོན་ཙམ་ལས་ངེས་འབྱུང་གི་བསམ་པ་དང་བྲལ་བས་ལམ་སྟེགས་ཙམ་དང་། གཉིས་པ་ལྕགས་ཀྱི་འགྲོས་ནི་ལྕགས་སྒྲོག་གིས་སྡོམ་པ་དེ་ཐག་འགྲོས་སུམ་ལག་ལས་མྱུར་ཡང་རང་དབང་གི་བགྲོད་དུ་མེད་པ་ལྟར་ཉན་ཐོས་ཀྱི་གང་ཟག་བདག་མེད་རྟོགས་པའི་ལྟ་བས་སྔ་མའི་དོན་ལས་འཕགས་ཀྱང་མཉམ་པའི་དོན་ཉིད་ཁོང་དུ་མ་ཆུད་པས་ལྟ་སྤྱོད་ཀྱི་འཆིང་བ་དམ་པོས་སྒྲོག་ཏུ་ཚུད་པ་དང་། གསུམ་པ་ཕོ་ཉ་སྲུས་ཀྱི་འགྲོས་ནི། ཐག་པ་དང་ལྕགས་སྒྲོག་སོགས་ལས་གྲོལ་བ་སྔ་མ་ལས་མྱུར་བ་བཞིན། ཆོས་བདག་གི་ཕྱོགས་གཅིག་གཟུང་བ་རང་བཞིན་མེད་པའི་རྟོགས་པས་ཁྱད་པར་དུ་འཕགས་ཀྱང་གོང་མ་ལས་ཐབས་ཤེས་དམན་པས་ལམ་བུལ་ཞིང་མཐར་འབྲས་མངོན་དུ་བྱེད་མི་ནུས་པའོ། །བཞི་པ་མཚམས་ལེགས་གཟེངས་ཀྱི་འགྲོས་ནི། མགོ་འཕང་བཏེགས་ནས་རང་དབང་གི་མྱུར་བའི་ཤུགས་ཀྱི་འགྲོ་བ་ལྟར་ཐེག་ཆེན་པ་བདག་མེད་གཉིས་རྟོགས་ཀྱི་ལྟ་བས་ཁྱད་དུ་འཕགས་ཤིང་། སྤྱོད་པ་ཐབས་ལ་མཁས་པའི་ཆེ་བས་ཁྱད་པར་འཕགས་ཀྱང་རང་འབྲས་ཇི་ཙམ་མྱུར་ཡང་བསྐལ་པ་གྲངས་མེད་གསུམ་སོགས་ལ་བརྩོན་དགོས་པས་ལམ་དལ་བ་དང་། ལྔ་པ་གམ་བུ་ཉལ་འགྲོས་ནི། རྟ་གོམ་པ་མཁས་པའི་འགྲོས་དེ་མྱུར་ཞིང་བདེ་བ་ལྟར་མཉམ་པའི་དོན་མཐོང་ཞིང་། ཀུན་རྫོབ་ཐ་མལ་དུ་མི་འཛིན་པར་ལྷར་བལྟ་བའི་ཐབས་ཀྱི་ཁྱད་པར་དུ་བྱས་བ་དང་། དྲུག་བ་སྤྱང་མོའི་འདུར་འགྲོས་ནི། གོམ་འགྲོས་ལས་འདུར་འགྲོས་ཀྱི་སྤྱང་ཀུ་འགྲོ་བ་ལྟ་བུ་མྱུར་བ་ཡིན་བ་བཞིན། ཀྲི་ཡའི་ལྟ་བ་ལས་ཨུ་པ་དང་ཡོ་ག་ཁྱད་པར་འཕགས་པའི་བདག་དང་ལྷ་མཉམ་པར་ཤེས་པས་དངོས་གྲུབ་སྒྲུབ་ཅིང་ཕྱི་ནང་གི་རྒྱུ་རྐྱེན་མཉམ་པར་སྤྱོད་པ་དང་། བདུན་པ་རོལ་མོའི་སྟབས་འགྲོས་ཞེས་སྔ་མ་ལས་ཀྱང་མྱུར་བར་ལྡིང་སྟབས་ཀྱི་འགྲོ་བ་མགྱོགས་པ་དང་མཚུངས་པར། དབྱིངས་ཡེ་མཉམ་པ་ཉིད་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོར་རྟོགས་པའི་དགོངས་སྤྱོད་ཁྱད་པར་ཅན་གྱི་རྡོ་རྗེ་འཛིན་པའི་གོ་འཕང་མངོན་དུ་བྱེད་བ་དང་། བརྒྱད་པ་འཇོལ་མོ་དཀྱུས་འགྲོས་ནི། རྟ་ཤིན་ཏུ་མགྱོགས་པའི་རྒྱུགས་ཆུང་བྱས་ཏེ་འགྲོ་བ་དེ་སྔ་མ་ལས་མྱུར་བ་བཞིན་ཨ་ནུ་ཡོ་གས་སྤྲོས་བཅས་ཀྱི་བསྐྱེད་རིམ་རྒྱས་པ་ལ་ལྟོས་མི་དགོས་པར་སྔགས་བརྗོད་པ་ཙམ་གྱིས་དབྱིངས་ལས་ཡེ་ཤེས་ཀྱི་དཀྱིལ་འཁོར་རང་ཤར་བའི་ཚུལ་གྱི་ཆོས་ཐམས་ཅད་གདོད་ནས་དག་པའི་བདེ་ཆེན་བྱང་ཆུབ་སེམས་ཀྱི་དཀྱིལ་འཁོར་དུ་ཤེས་པས་མཆོག་སྒྲུབ་པ་དང་། དགུ་པ་དཀྱུས་ཚང་བའི་འགྲོས་ནི། རྟ་ལ་རྒྱུགས་རྩལ་ཇི་ཡོད་ཕྱུངས་ན་ཐོགས་པ་མེད་པར་འགྲོ་བ་བཞིན། ཨ་ཏི་ཡོ་ག་རིག་པ་བཅིངས་གྲོལ་ལས་འདས་པ་ཉིད་རང་གནས་རང་བབ་ཡེ་གྲོལ་ཐོག་མཐའ་མེད་པའི་རང་བྱུང་བདེ་བ་ཆེན་པོ་བྱང་ཆུབ་ཀྱི་སེམས་ཐིག་ལེ་ཉག་གཅིག་སྤྲོས་བྲལ་འོད་གསལ་གྱི་སྦུབས་སུ་སྐུ་གསུམ་མངོན་དུ་གྱུར་པ་སྟེ། དེ་ལྟར་ཐེག་པ་རིམ་དགུའི་དོན་ཐམས་ཅད་ཀྱང་རྟ་མཆོག་རོལ་པའི་དགོངས་པ་འདིར་འདུས་ཤིང་ཐེག་པ་ཐམས་ཅད་ཀྱི་འཕྲོ་གཞིར་གྱུར་པས་རྒྱུད་ལུང་མན་ངག་ཐམས་ཅད་ཀྱི་སྤྱིའམ་བླ་མར་གྱུར་པའོ། །དེ་ལྟར་ཐེག་དགུའི་རྩེ་རྒྱལ་མཆོག་གསང་རྫོགས་པ་ཆེན་པོར་ཐེག་པ་འོག་མ་རྣམས་འདུས་ཤིང་ཐེག་པའི་རྩེ་རྒྱལ་གོལ་སྒྲིབ་ཐམས་ཅད་ལས་འདས་པའི་རང་རིག་བྱང་ཆུབ་ཀྱི་སེམས་རང་བྱུང་རིག་པའི་རྒྱལ་པོ་མཚན་མཚོན་བརྗོད་པ་ཐམས་ཅད་དང་བྲལ་བ་འདི་ནི་ལྟ་བ་སྟེ་རྟ་སྐད་ཐེངས་གཅིག་དང་། རྟ་སྐད་གཉིས་པས་ནི་པདྨའི་རིགས་ཀྱི་ཞི་བ་དང་ཁྲོ་བོའི་བསྐྱེད་རྫོགས་ལམ་གྱི་རིམ་པའི་མཐར་ཐུག་ཁམས་གསུམ་ཟིལ་གྱི་གནོན་པ་རང་སྣང་དབང་མཛད་པདྨ་དབང་ཆེན་ཁྲོ་བོའི་རྒྱལ་པོ་འདི་ཉིད། ལྷག་པའི་ལྷ་ཐམས་ཅད་ལས་ཐུགས་རྗེ་ཤུགས་དྲག་མྱུར་བ་ཚན་ཆེ་ཞིང་བྱིན་བརྗིད་ཆེ་བ་སྟེ། ཨོ་རྒྱན་མཁན་པོའི་ལུང་ལས། འགྲོས་སྐད་ལྗང་ཞུར་བརྡ་སྐད་ཀྱིས༔ ཐེག་དགུ་ཆུབ་དང་ས་ལམ་སྦྱང་༔ ལ་ཤན་ཕྱེ་སྟེ་བརྡ་སྤྲོད་དང་༔ སུམ་ལག་སྒྲོག་འགྲོས་སྡོམ་པ་ལྕགས༔ ཕོ་ཉ་བསྲུས་དང་མཚམས་ལེགས་གཟེངས༔ གམ་བུའི་ཉལ་དང་སྤྱང་མོའི་མདུར༔ རོལ་པའི་སྟབས་དང་འཇོལ་མོའི་འགྲོས༔ དཀྱུས་རྫོགས་རྣམས་ཀྱིས་ཐེག་དགུ་རྫོགས༔ སྙན་འཇམ་གསང་དང་ཡིད་འོང་རིང་༔ འགྲེལ་རྩལ་ཟིལ་དངར་གདངས་ངར་ཆེ༔ ཕུལ་དུ་ཕྱིན་དང་རྩོལ་མེད་པར༔ ས་མཆོག་བཅུ་གསུམ་རབ་ཏུ་གནོན༔ ཞེས་པ་ལྟར་རྟ་ཡི་སྐད་སྙན་པ་དང་། འཇམ་པ་དང་། གཏང་བ་དང་། གསང་བ། རིང་བ། ཡིད་དུ་འོང་བ། འགྲེལ་བ། བར་མ་ཆད་པ། ཟིལ་ཆེ་བ། རྩལ་ཆེ་བ། གདངས་ཆེ་བ། ངར་ཆེས་པ། ཕུལ་དུ་བྱུང་བ་སྟེ་ཆེ་བ་བཅུ་གསུམ་དང་ལྡན་པའི་དཔེས་ཐེག་དགུ་དང་ས་ཡི་རིམ་པ་རྣམས་དང་སྦྱར་ཏེ་ཐུགས་རྗེ་ཆེན་པོས་འགྲོ་བའི་དོན་ལ་རབ་ཏུ་དགའ་བ་ས་དང་པོ་དང་། ཐུགས་བྱམས་པ་ཆེན་པོ་ས་གཉིས་པ་དང་། འགྲོ་བ་ཐམས་ཅད་ལ་ཐུགས་སྙོམས་པས་ས་གསུམ་པ་དང་། ཐུགས་གསལ་བས་དོན་མཛད་པ་ས་བཞི་པ་དང་། དུས་རིང་པོར་འགྲོ་དོན་ལ་མི་སྐྱོ་བས་ས་ལྔ་པ་དང་། གདུལ་བྱའི་རེ་བ་ཐམས་ཅད་རྫོགས་པར་མཛད་པས་ས་དྲུག་པ་དང་། འགྲོ་བ་རྣམས་ལ་ཐུགས་རྗེས་རྟག་པར་འབྲེལ་བས་ས་བདུན་པ་དང་། འགྲོ་དོན་རྒྱུན་མི་ཆད་པས་ས་བརྒྱད་པ་དང་། གདུལ་བྱའི་ཉོན་མོངས་པ་འཇམ་ཞིང་ཟིལ་གྱིས་གནོན་པས་ས་དགུ་པ་དང་། འགྲོ་བའི་དོན་ལ་ཐུགས་རྗེ་མཐུ་ནུས་སྟོབས་རྩལ་ལྡན་པས་ས་བཅུ་པ་དང་། འགྲོ་དོན་མཛད་པ་དེའང་ནམ་མཁའི་དབྱིངས་ལྟར་རྒྱ་ཆེ་བས་ས་བཅུ་གཅིག་པ་དང་། འགྲོ་བ་རྒྱ་མཚོ་སྒྲོལ་བའི་ངར་དང་ལྡན་པས་ས་བཅུ་གཉིས་པ་མ་ཆགས་པདྨ་ཅན་དང་། འགྲོ་བའི་དོན་ལ་ལྷ་དང་བཅས་པའི་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱི་ཕུལ་དུ་བྱུང་བས་ས་བཅུ་གསུམ་པ་ཡི་གེ་འཁོར་ལོ་ཚོགས་ཆེན་གྱི་ས་དང་སྦྱར་ཞིང་། དེ་རྣམས་ཀྱང་ལམ་ལྔས་རྫོགས་པ་སྟེ་རྟ་སྐད་ཆེ་བ་བཅུ་གསུམ་དང་ལྡན་པ་ཐེངས་གཅིག་བསྒྲགས་པས་ཡོན་ཏན་བཅུ་གསུམ་དུས་གཅིག་ལ་ཚང་བ་བཞིན། རྟ་ཞལ་ལ་རྟ་གདོང་ལྗང་གུ་ཞུར་དཀར། ཕྲུམ་ཕྲུམ་སེར་པོ། རྔོག་མ་དམར་པོ་སོགས་བརྡ་རྟགས་ཀྱི་རྣམ་པ་དུ་མས་མཚོན་པའི་བསྐྱེད་རྫོགས་ཟབ་མོས་རྟ་སྐད་ཀྱི་དགོངས་པ་ལམ་དུ་ལྷོངས་བས་དུས་གཅིག་ཆར་དུ་བསྒྲོད་པ་ཡིན་ནོ། །གསང་སྔགས་ལ་ཤན་དབྱེ་བའི་རྟ་སྐད་ནི། རྟ་མཆོག་རོལ་པའི་ལྷ་སྔགས་དགོངས་སྤྱོད་ཐམས་ཅད་ལམ་གཞན་ལས་བགྲོད་པ་མགྱོགས་པ་དང་། ས་ལམ་བགྲོད་པ་ལ་མཁས་པའི་རྩེ་མོར་ཕྱིན་པ་དང་། གསང་སྔགས་གཞན་ལས་ཁ་རྩལ་ཆེ་བ་དང་། རྔམ་དྲག་གི་གདུག་པ་འདུལ་བ་དང་། རྫུ་འཕྲུལ་གྱི་རྐང་པས་སངས་རྒྱས་ཀྱི་ས་ལ་མྱུར་དུ་ཕྱིན་པའི་རྟགས་དང་ལྡན་པ་དེ་རྣམས་ཀྱིས་རྟ་མགྲིན་ཞེས་བྱ་སྟེ་སྔར་གྱི་ལུང་གིས་བསྟན་ལ། ཕྱི་ཡི་རྟ་མགྲིན་དེ་ནང་རྣལ་འབྱོར་པའི་ལུས་རྟ་མགྲིན་གྱི་སྐུ། གསང་བ་རང་གི་སེམས་ལས་གཞན་དུ་མེད་པས་སྣང་གྲགས་རིག་གསུམ་རྟ་མཆོག་རོལ་པའི་རྡོ་རྗེ་གསུམ་དུ་ཤེས་ཤིང་། སེམས་ཉིད་རང་བྱུང་གི་ཡེ་ཤེས་འདི་ངེས་པ་དོན་གྱི་པདྨ་དབང་ཆེན་དུ་ངོ་ཤེས་རྩལ་རྫོགས་བརྟན་པ་ཐོབ་ན་མཆོག་ཐུན་གྱི་དངོས་གྲུབ་ཐོབ་པར་འགྱུར་ཞིང་། ས་ལམ་དང་སྦྱར་བ་ཐེག་པའི་ལ་ཤན་དབྱེ་ཞིང་སྒོམ་པའི་གནད་ཀྱི་ཆེ་བ་བསྟན་པའི་རྟ་སྐད་གཉིས་པ་སྟེ། ལུང་ལས། ཕྱི་ཡི་རྟ་མགྲིན་ཁྲོ་བོའི་སྐུ༔ ནང་གི་རྟ་མགྲིན་རྣལ་འབྱོར་སྐུ༔ གསང་བ་རྟ་མགྲིན་རང་སེམས་འདི༔ སེམས་ལས་ལོག་ན་བསྒྲུབ་ཏུ་མེད༔ སེམས་ཉིད་རྟ་མགྲིན་དུ་ཤེས་ན༔ མཆོག་དང་ཐུན་མོང་དངོས་གྲུབ་ཐོབ༔ ཡིད་བཞིན་ནོར་བུ་རང་ལས་རྙེད༔ ཅིར་སྣང་ཅིར་སྟོང་ཅིར་ཐོབ་པ༔ རྟ་མགྲིན་ཉིད་ལས་གཞན་མ་ཡིན༔ སྐུ་ཡི་ཆོ་འཕྲུལ་རྟ་མགྲིན་སྐུ་རུ་གསལ༔ གསུང་གི་རང་བཞིན་རྟ་སྐད་ཅི་སྒྲོགས་པ༔ མ་སྐྱེས་མ་འགགས་གསུང་དུ་མྱ་ངན་འདས༔ ཐུགས་ཀྱི་རང་བཞིན་རྟ་མགྲིན་ཅི་ཡང་གསལ༔ ཆོས་སྐུ་མཚན་མེད་ངང་དུ་མྱ་ངན་འདས༔ འདི་ལྟར་རྟོགས་ན་རྟ་མགྲིན་རྣལ་འབྱོར་ཡིན༔ གསང་སྔགས་ལ་ཤན་དབྱེ་བས་ཁྱད་པར་འཕགས༔ ཞེས་དང་། མཆོག་གཏེར་བཀའ་བརྒྱད་ལས། རྟ་མགྲིན་རྒྱལ་བའི་སྐུ་གསུང་ཐུགས༔ རྣལ་འབྱོར་ལུས་ངག་སེམས་སུ་གཅིག༔ ཅིར་སྣང་ཅི་ཐོས་ཅི་རྟོགས་པ༔ རྟ་མགྲིན་ལས་ནི་གཞན་མེད་དོ༔ སྐྱེ་མེད་དངོས་མེད་མཚན་མ་མེད༔ འགྱུར་མེད་དབྱིངས་སུ་ལ་ཤན་དབྱེ༔ དཔལ་གྱི་རྟ་སྐད་ཐེངས་གསུམ་ནི༔ ལྷང་ལྷང་ཙེར་ཙེར་ལན་གསུམ་གྱིས༔ ཐམས་ཅད་དཔལ་ཆེན་སྐུར་རྫོགས་ནས༔ དུག་གསུམ་དྲི་གསུམ་མཆོད་ཕུལ་ཏེ༔ མ་མོ་མཁའ་འགྲོ་དབང་དུ་སྡུད༔ ཅེས་འབྱུང་ངོ་། །གདུལ་བྱ་ཐབས་ཀྱི་རྟ་སྐད་ནི། དཔལ་གྱི་རྟ་སྐད་ཐེངས་གསུམ་གྱི་མ་མོ་མཁའ་འགྲོའི་ཚོགས་ལ་བརྡ་སྤྲོད། མ་མོའི་འགྱིང་སྐད་ཐེངས་གསུམ་གྱིས་རྡོ་རྗེའི་མིང་སྲིང་བརྡ་འཕྲོད་དེ་དགོངས་པའི་གཏེར་མཛོད་གྲོལ་བ་དང་། རྣལ་འབྱོར་པའི་བརྡ་སྐད་ཐེངས་གསུམ་སྣང་སྲིད་ཀྱི་མ་མོ་བྱེ་བ་འབུམ་ཕྲག་མཁའ་ཀློང་ཡངས་པ་ཆེན་པོའི་ཚོགས་ལ་དབང་བསྒྱུར་ཏེ་རྡོ་རྗེའི་རྣལ་འབྱོར་དཔལ་ཧེ་རུ་ཀའི་རིག་པ་འཛིན་པ་ལྕམ་དྲལ་གྱི་ལས། བྱེད་པའི་ཚུལ་བསྟན་པ་དང་གསུམ་གྱིས། དང་པོ་དཔལ་གྱི་རྟ་མགྲིན་གྱི་གཙུག་ནས་རྟ་སྐད་དང་པོས། སྣང་སྲིད་གདོད་ནས་དག་མཉམ་ཆེན་པོ་རང་བྱུང་གི་ཡེ་ཤེས་ཀྱི་ངང་དུ་རྟ་མགྲིན་གྱི་དཀྱིལ་འཁོར་ལྷུན་གྱིས་རྫོགས་པ་དང་། རྟ་སྐད་བར་པས། སྲིད་གསུམ་གྱི་བསྡུས་པའི་ཆོས་ཐམས་ཅད་ཤ་ཁྲག་རུས་པའི་གཏེར་ཆེན་པོར་གྱུར་པས་མ་མོ་མཁའ་འགྲོ་འདས་མ་འདས་ཐམས་ཅད་ཀྱི་དགྱེས་རྒུའི་མཆོད་སྤྲིན་ཆེན་པོར་བྱས། རྟ་སྐད་ཐ་མས། སྣང་སྲིད་ཀྱི་མ་མོ་མཁའ་འགྲོ་དབང་དུ་སྡུད་དེ་བཀའ་བཞིན་ཉན་པར་འགྱིང་གླུ་དང་བཅས་པས་བཀུག་ནས་ཞི་སོགས་ལས་ཐམས་ཅད་བསམ་པ་བཞིན་དུ་རྫོགས་པར་བྱེད་པ་སྟེ། ཡི་དམ་དཔལ་ཆེན་པོའི་རྟ་སྐད་བསྒྲགས་པ་དེ་བཞིན་ལམ་དུས་སུ་རྣལ་འབྱོར་པས་འབྲས་བུའི་རྣམ་པ་དེ་བཞིན་བསྒོམ་པ་ཡིན་ནོ། །དེའང་རྫོང་འཕྲང་ལས། རྟ་མཆོག་རྒྱལ་པོའི་ཏིང་ངེ་འཛིན་ལ་ཞུགས་པས། ཆེ་བའི་ང་རྒྱལ་གྱི་སྐད་ཐབས་གསུམ་གྱིས་ཁམས་གསུམ་ཟིལ་གྱིས་གནོན་ནོ། །དེ་ལ་རྟ་སྐད་དང་པོ་བོས་པས། ཁམས་གསུམ་སྲིད་གསུམ་དུ་སྣང་བའི་ཆོས་ཐམས་ཅད་ཡེ་ནས་མ་བཅོས་མ་བྱས་ལྷུན་གྱིས་གྲུབ་པར་རྟོགས་སོ། །རྟ་སྐད་བར་མ་བོས་པས། སྣང་ཞིང་སྲིད་པས་བསྡུས་པའི་ཆོས་ཐམས་ཅད་ཤ་ཆེན་གྱི་ཕུང་པོ་དང་། ཁྲག་ཆེན་གྱི་རྒྱ་མཚོ་དང་། ཀེང་རུས་ཀྱི་རི་རབ་ཏུ་གྱུར་པས། མ་མོ་དང་མཁའ་འགྲོ་ཐམས་ཅད་དགྱེས་པའི་ལོངས་སྤྱོད་རྒྱུན་མི་ཆད་པར་བསམ་མོ། །རྟ་སྐད་ཐ་མ་བོས་པས། མ་མོ་དང་མཁའ་འགྲོ་ཐམས་ཅད་བཀའ་འོག་ཏུ་འདུས་ནས་ཅི་བཅོལ་བ་བྱེད་ཅིང་ཕྲིན་ལས་རྣམ་བཞི་རྫོགས་པར་བྱེད་པ་ནི་བཀའ་ཉན་གསུང་སྡོད་ཞེས་དེ་ལ་བྱའོ། །ཞེས་གསུངས་སོ། །རྟ་སྐད་གསུམ་པོ་དེས་ལྟ་སྒོམ་སྤྱོད་པ་གསུམ་བསྟན་ཏེ། རྟ་མཆོག་རོལ་པའི་ཐུགས་ཏིག་ལས། གནས་ལུགས་རྟ་ཡི་མགྲིན་པ་ཅན༔ ཐབས་གྲོལ་གྱིས་ནི་མཆོག་ཏུ་སྣང་༔ འབྲས་བུ་མཐར་ཕྱིན་རོལ་པ་ཡིས༔ འགྲོ་འདུལ་ཕྲིན་ལས་ལྷུན་གྱིས་གྲུབ༔ ཅེས་གསུངས་པ་ལྟར། རྟ་སྐད་དང་པོས་སྣང་སྲིད་ཐམས་ཅད་གདོད་ནས་མ་བཅོས་མ་བསླད་དག་མཉམ་ཆེན་པོ་ཡེ་ཇི་བཞིན་པ་བྱ་རྩོལ་དང་བྲལ་བའི་ལྟ་བ་དང་། གཉིས་པས་གསང་ཆེན་ཐབས་ལ་མཁས་པས་དུག་གསུམ་མ་སྤང་གནས་སུ་དག་ཅིང་རང་སྣང་གི་མ་ཚོགས་ཌཱ་ཀི་དབང་དུ་བསྡུས་ནས་སྦྱོར་སྒྲོལ་མཆོག་གི་བརྟུལ་ཞུགས་ལམ་དུ་བྱེད་པ་དང་། རྟ་སྐད་གསུམ་པས་བླ་མེད་ཐེག་པའི་རྣལ་འབྱོར་པས་དྷཱ་ཀི་ཐམས་ཅད་དབང་དུ་གྱུར་པས་ལས་རྣམ་བཞི་གང་མོས་པ་ཐམས་ཅད་བསམ་མ་ཐག་ཏུ་འབད་མེད་ལྷུན་གྲུབ་ཏུ་འབྱུང་བར་བསྟན་པ། ངེས་དོན་དུ། རྟ་སྐད་དང་པོས་ལྟ་བ་གཏན་ལ་དབབ་པ་སྟེ། སྣང་གྲགས་རིག་གསུམ་གྱི་ཆོས་ཐམས་ཅད་རང་གི་སེམས་སྣང་ཡིན་ལ། དེའང་གཅིག་དང་ཐ་དད་བྲལ་བ་གཉིས་སུ་མེད་པར་སྣང་བ་དེ་ཀུན་ཀྱང་འགགས་མེད་དུ་འཆར་བ་སྒྱུ་མ་ལྟ་བུ་དང་། རང་བཞིན་སྟོང་པ་ཆུ་ཟླ་ལྟ་བུར་འཆར་ཞིང་སྣང་ལ། ནང་ཡུལ་ཅན་གྱི་ཤེས་པ་ལ་བརྟགས་པས། ཡེ་ཤེས་ནང་གསལ་འདུས་མ་བྱས་པ་འཁོར་འདས་དབྱེར་མེད་ཆེན་པོར་གནས་པ་སྟེ། ནཱ་གཱ་རྫུ་ནའི་ཐུགས་ཏིག་ལས། ཕྱི་རོལ་སྣང་བ་ཇི་སྙེད་པ༔ རང་སྣང་ཡིན་ཏེ་རྨི་ལམ་འདྲ༔ སྣང་བ་མ་འགགས་སྒྱུ་མ་འདྲ༔ རང་བཞིན་བདེན་མེད་ཆུ་ཟླ་འདྲ༔ སྣང་མཁན་སེམས་ལ་ཚུར་དཔྱད་པས༔ ཆེས་ཕྲའི་ཡེ་ཤེས་ནང་དུ་གསལ༔ སྟོང་ཉིད་རྡོ་རྗེ་ནམ་མཁའི་དཀྱིལ༔ རྡུལ་བྲལ་འདུས་མ་བྱས་པ་སྟེ༔ རང་གི་རང་བཞིན་དེ་ཁོ་ན༔ འདི་ནི་གསལ་བ་འཁོར་བ་སྟེ༔ འདི་ནི་རང་བཞིན་མྱ་ངན་འདས༔ འཁོར་འདས་དབྱེར་མེད་དོན་རྟོགས་ན༔ གང་བལྟས་པདྨ་དབང་གི་ལྷ༔ ཅི་སྤྱོད་གཟི་ལྡན་རོལ་པའི་ཡུམ༔ དེ་ཁོ་ན་ཉིད་མངོན་དུ་འགྱུར༔ ཞེས་གསུངས་སོ། །རྟ་སྐད་གཉིས་པས་ཐ་མལ་གྱི་སྣང་ཞེན་སྦྱངས་པའི་ཕྱིར་བསྐྱེད་རིམ་གསལ་དག་བརྟན་པ་གསུམ་སྒྲུབ་པས་སྦྱོངས་པ་དང་། རླུང་སྲོག་རྩོལ་བཟླས་པ་སྔགས་ཀྱིས་སྦྱངས་པ། སེམས་འཁྲུལ་རྟོག་དག་བྱེད་སྟོང་བཞིའི་སྡུད་རིམ་དང་དབྱེར་མེད་པའི་འོད་གསལ་ཆེན་པོའི་ངང་དུ་འཇོག་པ་དང་། དེ་ལྟར་གོམས་པས་ལས་རླུང་སྲོག་རྩོལ་གྱི་རྒྱུ་བ་དྷུ་ཏིའི་དབྱིངས་སུ་འགོགས་པར་བྱེད་པའི་སྒོ་གསུམ་བཅིངས་ཏེ། རྡོར་བཟླས་ཀྱི་རྩ་ལམ་སྦྱངས། བུམ་ཅན་གྱི་སྦྱོར་བས་ཞུ་བདེའི་རྣལ་འབྱོར་སྒྲུབ། དེ་ལས་འགྱུར་མེད་བདེ་བ་ཆེན་པོ་སྒྲུབ། དེ་ལས་མཁའ་ཁྱབ་མཁའ་ཡི་རྡོ་རྗེ་ཡེ་ཤེས་རིས་མེད་སྐུ་གསུང་ཐུགས་རྡོ་རྗེ་རྣམ་པ་ཐམས་ཅད་པའི་མཆོག་དམ་པ་མངོན་སུམ་དུ་འགྲུབ་པའི་ཚུལ་རྣམས་ཀྱང་བསྟན་ཏོ། །རྟ་སྐད་གསུམ་པས་དབང་གི་རྒྱུད་སྨིན་ཅིང་སྡོམ་པ་དང་དམ་ཚིག་མ་ཉམས་པས་ལྟ་བ་གཏན་ལ་དབབ། བསྐྱེད་རིམ་སྒོམ་པས་སྔགས་ཀྱི་ཚོགས་ལམ་དང་། རླུང་སེམས་ལས་སུ་རུང་བས་དྲོད་རྩེ་དང་། ཐིག་ལེ་བདེ་ཆེན་དུ་རྫོགས་པས་བཟོད་ཆོས། ཟུང་འཇུག་དོན་གྱི་ཡེ་ཤེས་མཐོང་ལམ། དེ་གོམ་པས་སྒོམ་ལམ་སླེབ་པ་དང་། དེ་ཉིད་མཐར་ཐུག་པ་མི་སློབ་པའི་སྐུ་དང་ཡེ་ཤེས་མངོན་དུ་བྱས་ཏེ། ཇི་སྐད་དུ། འཁོར་འདས་གཉིས་མེད་ཀུན་གྱི་སྲོག༔ མཉམ་པ་ཉིད་ལས་མ་གཡོས་བཞིན༔ གང་འདུལ་སྒྱུ་འཕྲུལ་དྲྭ་བའི་སྤྲིན༔ རྟ་མཆོག་རོལ་པ་ཚེ་འདིར་འགྲུབ༔ ཅེས་གསུངས་བ་བཞིན་འབྲས་བུ་བཅུ་གསུམ་རྡོ་རྗེ་འཛིན་པའི་གོ་འཕང་མཆོག་ཉིད་ཚེ་འདིའམ་བར་དོར་མངོན་དུ་བྱེད་པ་ཡིན་ནོ། །དེ་ལྟར་ཡི་དམ་ལྷ་ཡི་དཔལ་གྱི་རྟ་སྐད་དེས་བསྐུལ་ནས། མ་ཚོགས་མཁའ་འགྲོའི་འགྱིང་གླུ་སྔོན་དཔལ་ཆེན་པོའི་ཐ་ཚིག་ཇི་ལྟར་བསྒོ་བ་རྗེས་སུ་དྲན་ཅིང་དེ་ལས་མི་འདའ་བ་འགྱིང་གླུ་བླངས་པ་ནི། བདག་ཅག་ནམ་མཁའ་དབྱིངས་ནས་མཆི། །ནམ་མཁའི་དབྱིངས་ནས་མི་མཆི་རུ། །བདག་ཅག་གནས་ནི་ནམ་མཁའ་ལགས། །བདག་ཅག་འཐེང་ཞིང་གྲུམ་ཞིང་མཆི། །འཐེང་ཞིང་གྲུམ་ཞིང་མི་མཆི་རུ། །ཞེས་སོགས་ཀྱི་གླུ་བླངས་པ་སྟེ། རྫོང་འཕྲང་ལས། མ་མོའི་འགྱིང་སྐད་ནི་དཔལ་གྱི་རྟ་སྐད་བོས་ཙམ་ན་མ་མོ་རྣམས་འགྱིང་ཞིང་སྔོན་གྱི་ཐ་ཚིག་དང་དམ་ཚིག་ལས་མི་འདའ་བའི་གླུ་ལེན་ཏེ། ཞེས་འབྱུང་ངོ་། །རྣལ་འབྱོར་པའི་བརྡ་སྐད་ཐེངས་གསུམ་ནི། ཐལ་མོ་ལན་གསུམ་བརྡབ་པའི་དང་པོས་ཁྲག་འཐུང་ཆེན་པོ་རྣམས་ཐུགས་དམ་བསྐུལ། གཉིས་པས་ཕྲ་མེན་རྣམས་དབྱིངས་ནས་བསྐུལ། གསུམ་པས་མཁའ་འགྲོའི་ཚོགས་རྣམས་ལས་ལ་བསྐུལ་ནས་གཙིགས་ལ་དབབ་པ་སྟེ། བཀའ་བརྒྱད་རྫོང་འཕྲང་ལས། རྣལ་འབྱོར་པའི་བརྡ་སྐད་ཐེངས་གསུམ་ནི། །ཆོས་ལ་དགྲ་བྱུང་སངས་རྒྱས་ར་མདའ་ལོག །ཅེས་བྱ་སྟེ་ཐལ་མོ་བརྡབ་པས་ཁྲག་འཐུང་རྣམས་དབྱིངས་ནས་བསྐུལ། ཞེས་དང་། མཆོག་གཏེར་རྟ་ཡི་དགོངས་འདུས་ལས། དེ་ཚེ་མ་མོའི་འགེངས་སྐད་ཀྱིས༔ དམ་ཚིག་དགོངས་ནས་མྱུར་འོངས་ཏེ༔ བདག་གི་བསྒོ་བཞིན་བཀའ་ལུང་ཉན༔ ཐལ་མོ་དྲག་ཏུ་བརྡབ་པ་ཡི༔ བདག་ཅག་ནམ་མཁའི་དཀྱིལ་ན་མཆི༔ ཞེས་སོགས་འབྱུང་ངོ་། །དེ་ལྟར་དཔལ་གྱི་རྟ་སྐད་ཀྱིས་སྔོན་བྱུང་སྟོན་པའི་རྣམ་ཐར། རྗེས་འཇུག་ཉམས་ལེན་དང་སྦྱར་བས་བརྡ་སྤྲད། མ་མོའི་འགྱིང་སྐད་ཀྱི་ཐུགས་དགོངས་པ་རང་བྱུང་གི་ཀློང་རྡོལ་ཏེ་དེ་ཐམས་ཅད་རང་སྣང་གི་རོལ་རྩལ་དུ་ཤེས། རྣལ་འབྱོར་པའི་བརྡ་སྐད་ཀྱི་སྲིད་ཞི་ཐམས་ཅད་དབང་དུ་བསྡུས་པས་ཕྲིན་ལས་བྱེད་པས་ན་གདུལ་བྱ་ཐབས་ཀྱི་རྟ་སྐད་དང་། དེ་ཐམས་ཅད་རྟོགས་པའི་ལྟ་བར་དགོངས། གྲོགས་སྤྱོད་པར་དགོངས་པ་གཉིས་སུ་བསྡུ། དང་པོ་ལ། རང་བཞིན་དོན་གྱི་རྟ་སྐད་ཆོས་ཐམས་ཅད་མ་བཅོས་མཉམ་པ་ཉིད་ཀྱི་རྟ་མགྲིན། དེའང་རང་གི་རིག་པ་ཡེ་ནས་མ་བཅོས་དེར་ཤར་བ་དང་། དེ་ལྟར་སྣང་སྟོང་བདེན་གཉིས་དབྱེར་མེད་དམ་དབྱིངས་དང་ཡེ་ཤེས་གཉིས་སུ་མེད་པའི་གཉིས་མེད་བདེ་བ་ཆེན་པོ་རྟ་མགྲིན་དབང་གི་དཀྱིལ་འཁོར་དུ་བསྟན་པས་ནི་རང་བཞིན་ངོ་བོ་དོན་གྱི་རྟ་སྐད་དེ་ཇི་བཞིན་གཏན་ལ་ཕེབས་པའོ། །རྟ་སྐད་སྤྱོད་པར་དགོངས་པ་ལ་གདུལ་བྱ་ཐབས་ཀྱི་རྟ་སྐད་དཔལ་ཆེན་ཆེ་བའི་རྟ་སྐད་དེ་ལ་དམ་ཚིག་རྗེས་བསྐུལ་གྱི་དཔལ་གྱི་རྟ་སྐད་དང་པོ། གཉིས་པས་བཀའ་ལ་དྲང་། གསུམ་པས་དོན་བྱེད། མ་མོའི་འགྱིང་གླུ་གསུམ་གྱི་དང་པོ་རང་རྒྱུད་ཆེ་བའི་རྔམ་སྐད། བར་པ་བྱིན་རླབས་རྫས་ལྡན་གྱི་གདངས་སྐད། ཐ་མ་དྲག་པོ་ལས་ལ་ཆས་པའི་རྔམ་སྐད་དོ། །རྣལ་འབྱོར་པའི་བརྡ་སྐད་ཐེང་གསུམ་གྱི་དང་པོ་ལུས་བརྡ། གཉིས་པས་ངག་བརྡ། གསུམ་པས་ཡིད་བརྡའོ། །དཔལ་གྱི་ཆེ་བའི་རྟ་སྐད་ནི། ཇི་སྐད་དུ། པདྨ་དབང་གི་སྤྱི་བོ་ནས༔ མྱུར་མགྱོགས་ཤུགས་ལྡན་གདོང་པ་ཡི༔ ཨི་ཧིའི་རྟ་དབྱངས་འཚེར་བ་ལས༔ ཞེས་དང་། པདྨ་ཁྲག་འཐུང་ཁྲོས་པའི་སྐུ༔ ཐམས་ཅད་དབང་དུ་སྡུད་པར་བྱེད༔ ཅེས་སོགས་རྒྱ་ཆེར་འབྱུང་ཞིང་། ལྷ་སྲིན་སྡེ་བརྒྱད་དབང་དུ་མི་འདུ་བ་དང་། རྟགས་མི་ཐོན། བགོ་བ་མི་ཉན་ན་པདྨ་དབང་གི་ཏིང་ངེ་འཛིན་གྱིས་སྒྲུབ་ན་འགྲུབ་སྟེ་རྟ་སྐད་ཐེངས་གསུམ་གྱི་དྲེགས་པ་ཐམས་ཅད་ཧད་ཀྱི་སྔངས་པ་དང་། ཤ་རུལ་ལ་སྒྲང་མ་བཞིན་དུ་འདུ་ཞིང་། རྒྱལ་པོའི་བཀའ་ཐེམ་ལས་འདའ་མི་ནུས་པ་བཞིན་ལས་བྱེད་པར་འགྱུར་བས་ཞི་རྒྱས་དྲག་གསུམ་གྱིས་འདུལ་བར་མི་ནུས་པ་རྣམས་དབང་གི་ལས་ཀྱི་གདུལ་བས་ན། ལས་ཀྱི་རྩ་བ་མཆོག་གི་དངོས་གྲུབ་དབང་དུ་བྱེད་པའང་འདི་ཁོ་ན་ཡིན་ནོ། །དེ་ལྟར་གྱི་རྣལ་འབྱོར་ཉམས་སུ་བླངས་འདོད་པས་དང་པོ་དབང་གིས་སྨིན་པ་གལ་ཆེ་སྟེ། རྟ་མཆོག་རོལ་པའི་རྒྱུད་ལས། རིགས་ཀྱི་བུ་མ་འོངས་པའི་འགྲོ་བ་གསང་སྔགས་ཀྱི་ལམ་ལ་འཇུག་པར་འདོད་པ་དག་ནི་རྡོ་རྗེ་སློབ་དཔོན་ལ་བརྟེན་ནས་གཟུགས་བརྙན་གྱི་དཀྱིལ་འཁོར་དུ་གཞུག་པར་བྱའོ། །ཞེས་གསུངས་པས་སོ། །དེ་ནས་ལྟ་བ་གཏན་ལ་དབབ་དགོས་ཏེ། རྒྱུད་དེ་ཉིད་ལས། ཐམས་ཅད་སྒྱུ་མ་ལྟ་བུའི་ཚུལ། །ཐམས་ཅད་རང་བཞིན་སྟོང་པ་ཉིད། །ཟུང་དུ་འཇུག་པའི་ཡེ་ཤེས་ནི། །དེ་ནི་བླ་མེད་མཆོག་དམ་པ། །ཞེས་དང་། ལྟ་བ་དེ་གོམས་པ་དང་བསྐྱེད་རྫོགས་ཀྱི་རྣལ་འབྱོར་ཟབ་མོར་བརྩོན་པ་ལས་པདྨ་དབང་མངོན་དུ་འགྱུར་ཏེ། དགོངས་པ་ལུང་སྟོན་ལས། ཡུལ་སེམས་རབ་ཏུ་རྟོགས་གྱུར་ན། །གང་བལྟས་པདྨ་དབང་གི་ལྷ། །ཇི་ལྟར་བྱས་ཀྱང་སྐྱོན་མེད་པ། །དབང་ཆེན་ཞེས་ནི་དེ་ལ་བྱ། །ཞེས་གསུངས་སོ། །རྟ་སྐད་ཐེངས་གསུམ་དུ་བསྒྲགས་པ་དེ་རྣམས་ཀྱང་རང་རིག་པ་སྐྱེ་མེད་ཆོས་ཀྱི་སྐུ་ཐིག་ལེ་ཉག་གཅིག་གི་ཆོས་ཉིད་ཀྱི་དཔལ་གྱི་རྟ་སྐད་ཐེངས་གཅིག་ཏུ་ལ་བཟླ་བ་ཡིན་ཏེ། རྟ་མགྲིན་ཐུགས་ཏིག་ལས། ཧཱི་ཧཱི་ཧཱི། རྡོ་རྗེའི་རྟ་སྐད་འཚེར་བའི་དབྱངས༔ གསལ་ཞིང་བརྗིད་པའི་གདངས་ཆེན་པོ༔ རང་བྱུང་ནམ་མཁའི་དཀྱིལ་ནས་བསྒྲགས༔ བདེ་སྟོང་ཉམས་ཀྱི་ངོ་བོར་ལྟོས༔ དེ་ལ་རྩེ་གཅིག་མཉམ་བཞག་པས༔ དང་པོ་སྐྱེ་མེད་སྟོང་སང་ངེ་༔ བར་དུ་གནས་མེད་ཟང་ཐལ་ལེ༔ ཐ་མ་འགགས་མེད་ལྗེན་ཅེ་རེ༔ རང་བཞིན་ཡོངས་ཤེས་དྲན་པའི་ངང་༔ ཡིད་མིག་རླུང་གསུམ་དབྱེར་མེད་འཇོག༔ འདི་དོན་རྟོགས་ན་དོན་གྱི་དབང་༔ པདྨ་དབང་ཆེན་ཚེ་འདིར་འགྲུབ༔ ཅེས་ངོ་སྤྲོད་དོན་གྱི་སྙིང་པོ་རྩ་བ་ཉིད་སྙིང་གི་བཅུད་ཕུར་དུ་བཟུང་ནས་གཞི་ལམ་འབྲས་གསུམ་དབྱེར་མེད་ཀྱི་ཉམས་ལེན་ལ་ཆུ་བོའི་རྒྱུན་བཞིན་བརྩོན་པར་བྱའོ། །སླར་སྨྲས་པ། མཆོག་སྒྲུབ་ཀུན་གྱི་རྒྱལ་པོ་པདྨ་དབང་། །པདྨ་གསུང་གི་རིག་འཛིན་ཨོ་རྒྱན་རྗེ། །བརྒྱུད་པར་བཅས་པས་གསང་བའི་ཐུགས་དམ་ཡིན། །དེ་ཕྱིར་པདྨའི་རྗེས་འཇུག་འདིར་བརྩོན་རིགས། །འདི་ལ་ནོངས་པའི་དྲི་མ་མཆིས་གྱུར་ན། །བླ་མ་རྟ་མཆོག་རོལ་པའི་སྤྱན་སྔར་བཤགས། །དགེ་བ་དྲི་མེད་པདྨ་ལྟར་རྒྱལ་པ། །བསྟན་དང་འགྲོ་ལ་ཕན་པའི་ཕྱིར་དུ་བསྔོ། །ཁམས་གསུམ་རླུང་སེམས་སྣང་བ་དབང་དུ་འདུས། །ཆོས་ཉིད་ཤུགས་དྲག་རྟ་མཆོག་རྩལ་རྫོགས་ཏེ། །རྣམ་མཁྱེན་སྐུ་བཞིའི་གྲོང་དུ་འཁྲིད་པ་དང་། །དོན་གཉིས་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་དབང་ཆེན་པདྨ་ཧེ་རུ་ཀའི་རྟ་སྐད་ཀྱི་དགོངས་པ་ཅུང་ཟད་བྲིས་པ་འདིའང་རིག་འཛིན་མཁས་གྲུབ་ཆེན་པོ་རྣམས་ཀྱི་གསུང་གི་རྗེས་སུ་འབྲང་ནས་པདྨའི་སྔགས་རིག་འཛིན་པ་༧པདྨ་ཡེ་ཤེས་རྡོ་རྗེ་ལ་རང་སློབ་གདོང་སྣ་མཆོག་སྤྲུལ་རིན་པོ་ཆེའི་ལྷ་རྫས་བཟང་གོས་ཀྱི་རྟེན་དང་བྲི་གཞི་ཤོག་བུ་བཅས་ནན་ཏན་ཆེན་པོའི་གསུང་གི་བསྐུལ་བ་མི་ལྡོག་ཙམ་དུ་བྲིས་པ་འདིས་ཀྱང་སྒྲུབ་སྡེ་ཆེན་པོའི་བསྟན་པ་རིན་པོ་ཆེ་ཕྱོགས་བཅུར་རྒྱས་པའི་རྒྱུར་གྱུར་ཅིག །སརྦ་དཱ་མངྒ་ལཾ།། །།

[edit]

@#/__/dpal sgrub sde brgyad kyi gsung dbang chen rta mgrin gyi rta skad thengs gsum bshad pa snang srid dbang sdud ces bya ba bzhugs so/__/ na mo gu ru h+ya grI wA ya/__dpal gyi 'byung gnas dpal gyi dbang phyug che/__/dpal chen rta mgrin dpal gyi rta skad sgrogs/__/dpal ldan pad+ma dpal chen grub pa'i gtso/__/dpal la smon pas dpal der gus btud nas/__/gzhi lam 'bras gsum hI hI'i sgras ston cing /__/rdo rje rta yi ngur dbyangs 'tsher ba las/__/khams gsum 'byung po zil gyis gnon pa yi/__/dgongs don gsal byed nyung ngur spel bar bya/__/de la 'dir khams gsum dang /__mya ngan las 'das pa'i char gtogs pa thams cad kyi spyi rje dpal chen po pad+ma dbang chen gyi dkyil 'khor 'di ni mkha' khyab kyi de bzhin gshegs pa thams cad kyi gsung gi rdo rje pad+ma'i rigs kyi gtso bo snang ba mtha' yas 'od mi 'gyur ba de nyid chos sku mtshan ma thams cad dang bral ba brdal khyab ka dag chos sku'i dbyings las ma g.yos/__lhun grub 'od gsal rang bzhin lhun rdzogs ye shes rigs lnga gangs chen mtsho yi sprin chen rnam par bkod de/__rgyan stug po bkod pa'i zhing khams phyi dang nang med pa mtha' dbus thams cad dang bral ba tshad bzung du med cing /__rgya khyon dpag par dka' ba'i rten dang brten pa'i bkod pa mtha' yas par 'phro ba'i rang snang gi ye shes kyi rtsal gdangs de las/__thugs rje gang 'dul gyi sprul pa'i sku yi cho 'phrul phyogs dang dus thams cad khyab cing sna tshogs cir yang bsgyur ba'i zhi dang khro gar gyi nyams brgya skad cig rer yang rdul phra rab kyi grangs snyed du 'du 'phro chen pos/__gdul bya dag ma dag gi don mtha' yas par ston cing 'bad pa med pa'i phrin las kyi rol mo phyogs brgyar 'phro ba las/__sngon gyi bskal pa'i dus gsang sngags kyi don la log par gol zhing bdag tu 'dzin pa'i 'ching ba dam pos rab tu bcings shing nyon mongs pa'i 'thor rlung drag pos rab tu bskyod cing /__sngon dus gsang sngags rang bzhin gyi gsang ba dang /__sbas pa gsang ba'i don ji bzhin ma rtogs kyang tshig dang sngags kyi bden pa'i stobs kyi/__ru tra thar pa nag por skyes nas dug shing gi rtsa bar 'khor bdud dang srin po'i chung ma'i tshogs dang bcas pa gnas nas sha za khrag 'thung rus mur lpags gyon gyi brtul zhugs nyams su blangs te sbyor sgrol sgra ji bzhin par spyod pa dang /__ma rung brlangs po'i nga ro gtum po rab tu bsgrags nas gzugs khams kyi 'bras bu che ba'i lha gnas man chad dbang du bsdus te gnas pa'i dus na/__de bzhin gshegs pa thams cad bka' bgros nas zhi ba chen pos 'dul bar bzhed kyang drag po chen po de nyid ma thul ba'i tshul mdzad nas/__slar yang chos nyid zhi ba chen po'i ngang las ma g.yos bzhin du/__gar gyi nyams dgu ldan pa'i 'bar ba chen po khro bo'i dkyil 'khor gyi sprin rnam par bkod pa las khyad par du gyur pa rdo rje rta yi mgrin bu'i khro bo chen po mngon bar phyungs te/__bdud po de yi lus la zhugs nas rdo rje'i gshogs pa rab tu brgyang ste spyi bo nas rdo rje rta yi gdong pa phyungs te hI hI hI zhes mgrin glu rab tu sgrogs pa dang /__dpal gyi rta skad des khams gsum dbang du sdud cing ru tra de nyid ma bzod de shin tu skrag par gyur pa'i smre sngags kyi gdung dbyangs drag pos dpal chen po la bzod par gsol ba dang /__'khor gyi slas dang byi pho byi mo/__bran dang bran mo thams cad kyi srog snying phul zhing drag po chen po nyid kyi lus gdan du dbul nas skyabs su mchi ba dang /__byang chub tu sems bskyed cing pad+ma dbang gi dkyil 'khor du bcug ste byang chub kyi snying por lung bstan pa dang /__'khor gyi chung ma thams cad la ma chags thabs kyi sbyor ba mdzad de dkyil 'khor gyi dbus la mi 'tshal yang phyi khyams su gnas par zhus bzhin bkod de dpal gyi pha 'bab chen pos tshim par mdzad pa rnams kyang gdul bya 'dul byed dang /__gsang sngags kyi rgyud 'byung ba'i gleng gzhi'i cho 'phrul du ston pa tsam las rang rgyud du go bar mi bya'o/__/de ltar gleng gzhi'i skabs don de yi skabs su ston pa dpal chen pad+ma dbang gi rgyal po de nyid kyi 'khor pad+ma'i rigs kyi khro bo khro mo rig 'dzin grub pa'i tshogs bye ba 'bum phrag mang po la pad+ma rigs kyi zhi dang khro bo'i rgyud bsam gyi mi khyab pa bka' stsal pa rnams rang las mi gzhan pa'i sdud mdzad rdo rje chos kyi bsdus te glegs bam du bkod pa rnams mkha' 'gro'i phyag dang /__o rgyan gyi gnas su bzhugs pa rnams slob dpon chen po nA ga rdzu na dang /__pad+ma 'byung gnas/__slob dpon rta mchog zhabs sogs kyi spyan drangs shing /__khyad par du mkha' 'gro las kyi dbang mo ches mchod rten bde byed brtsegs par sgrub sde brgyad spyi dang bye brag gi rgyud lung man ngag rnams gter du sbas pa rnams grub pa brnyes pa'i rig 'dzin slob dpon brgyad kyis dgung bdun dgongs pa mdzad nas bzhugs pa na/__mkha' 'gro mas slob dpon so sor sgrom bu phul ba na zangs kyi sgrom bu slob dpon klu sgrub kyi phyag tu phul ba na dbang chen 'dus pa rtsa ba'i rgyud dang /__rta mchog rol pa'i rgyud dang /__rngog ma le brgan gyi rgyud sogs rgyud sde rgya mtsho de'i dgongs 'grel lung dang man ngag gi gdams skor mtha' yas pa gsung gi rdo rje pad+ma saM b+ha wa la bka' bab pa de nyid kyis chos rgyal yab sras/__ngan lam ban+de rgyal ba mchog dbyangs sogs la stsal ba'i bka' gter gyi gdams zab mtha' yas pa bzhugs pa rnams kyi bstan don snying po ni rta skad thengs gsum gyi dgongs pa yin te/__bka' brgyad bde gshegs kun 'dus kyi rta mgrin dgongs pa ston pa las/__sangs rgyas sa la 'gro mgyogs pas:__rta skad zhes ni de la bya:__rta yi rang bzhin 'gros mkhas ltar:__theg pa dgu dang sa lam bsgrod:__mkhas shing rtse mor phyin pas na:__rta mgrin zhes ni de la bya:__rta mgrin rang bzhin kha rtsal che:__de bzhin rta mchog gsang sngags 'di:__gsang sngags gzhan pas kha rtsal che:__rta mgrin zhes ni de la bya:__rta ni drag po'i rngam tshul las:__rta mgrin las ni byed pa'o:__rta ni drag po'i ngar dang ldan:__mgrin ni gdug pa 'dul ba'o:__rta ni rdzu 'phrul rkang par ldan:__mgrin ni sangs rgyas sa gnon pa'o:__zhes so/__/de yang rta yi 'gros dgu dang mtshungs sbyar gyi theg pa dgur bshad pa la/__dang po sgrog tu tshud pa ni mi myur pa 'gro ba ltar/__'jig rten lha mi'i theg pa ni chos nyid mnyam pa chen po'i don ma mthong zhing mi dge bcu spang len gyi legs smon tsam las nges 'byung gi bsam pa dang bral bas lam stegs tsam dang /__gnyis pa lcags kyi 'gros ni lcags sgrog gis sdom pa de thag 'gros sum lag las myur yang rang dbang gi bgrod du med pa ltar nyan thos kyi gang zag bdag med rtogs pa'i lta bas snga ma'i don las 'phags kyang mnyam pa'i don nyid khong du ma chud pas lta spyod kyi 'ching ba dam pos sgrog tu tshud pa dang /__gsum pa pho nya srus kyi 'gros ni/__thag pa dang lcags sgrog sogs las grol ba snga ma las myur ba bzhin/__chos bdag gi phyogs gcig gzung ba rang bzhin med pa'i rtogs pas khyad par du 'phags kyang gong ma las thabs shes dman pas lam bul zhing mthar 'bras mngon du byed mi nus pa'o/__/bzhi pa mtshams legs gzengs kyi 'gros ni/__mgo 'phang btegs nas rang dbang gi myur ba'i shugs kyi 'gro ba ltar theg chen pa bdag med gnyis rtogs kyi lta bas khyad du 'phags shing /__spyod pa thabs la mkhas pa'i che bas khyad par 'phags kyang rang 'bras ji tsam myur yang bskal pa grangs med gsum sogs la brtson dgos pas lam dal ba dang /__lnga pa gam bu nyal 'gros ni/__rta gom pa mkhas pa'i 'gros de myur zhing bde ba ltar mnyam pa'i don mthong zhing /__kun rdzob tha mal du mi 'dzin par lhar blta ba'i thabs kyi khyad par du byas ba dang /__drug ba spyang mo'i 'dur 'gros ni/__gom 'gros las 'dur 'gros kyi spyang ku 'gro ba lta bu myur ba yin ba bzhin/__kri ya'i lta ba las u pa dang yo ga khyad par 'phags pa'i bdag dang lha mnyam par shes pas dngos grub sgrub cing phyi nang gi rgyu rkyen mnyam par spyod pa dang /__bdun pa rol mo'i stabs 'gros zhes snga ma las kyang myur bar lding stabs kyi 'gro ba mgyogs pa dang mtshungs par/__dbyings ye mnyam pa nyid bden pa dbyer med lhag pa'i chos sku chen por rtogs pa'i dgongs spyod khyad par can gyi rdo rje 'dzin pa'i go 'phang mngon du byed ba dang /__brgyad pa 'jol mo dkyus 'gros ni/__rta shin tu mgyogs pa'i rgyugs chung byas te 'gro ba de snga ma las myur ba bzhin a nu yo gas spros bcas kyi bskyed rim rgyas pa la ltos mi dgos par sngags brjod pa tsam gyis dbyings las ye shes kyi dkyil 'khor rang shar ba'i tshul gyi chos thams cad gdod nas dag pa'i bde chen byang chub sems kyi dkyil 'khor du shes pas mchog sgrub pa dang /__dgu pa dkyus tshang ba'i 'gros ni/__rta la rgyugs rtsal ji yod phyungs na thogs pa med par 'gro ba bzhin/__a ti yo ga rig pa bcings grol las 'das pa nyid rang gnas rang bab ye grol thog mtha' med pa'i rang byung bde ba chen po byang chub kyi sems thig le nyag gcig spros bral 'od gsal gyi sbubs su sku gsum mngon du gyur pa ste/__de ltar theg pa rim dgu'i don thams cad kyang rta mchog rol pa'i dgongs pa 'dir 'dus shing theg pa thams cad kyi 'phro gzhir gyur pas rgyud lung man ngag thams cad kyi spyi'am bla mar gyur pa'o/__/de ltar theg dgu'i rtse rgyal mchog gsang rdzogs pa chen por theg pa 'og ma rnams 'dus shing theg pa'i rtse rgyal gol sgrib thams cad las 'das pa'i rang rig byang chub kyi sems rang byung rig pa'i rgyal po mtshan mtshon brjod pa thams cad dang bral ba 'di ni lta ba ste rta skad thengs gcig dang /__rta skad gnyis pas ni pad+ma'i rigs kyi zhi ba dang khro bo'i bskyed rdzogs lam gyi rim pa'i mthar thug khams gsum zil gyi gnon pa rang snang dbang mdzad pad+ma dbang chen khro bo'i rgyal po 'di nyid/__lhag pa'i lha thams cad las thugs rje shugs drag myur ba tshan che zhing byin brjid che ba ste/__o rgyan mkhan po'i lung las/__'gros skad ljang zhur brda skad kyis:__theg dgu chub dang sa lam sbyang :__la shan phye ste brda sprod dang :__sum lag sgrog 'gros sdom pa lcags:__pho nya bsrus dang mtshams legs gzengs:__gam bu'i nyal dang spyang mo'i mdur:__rol pa'i stabs dang 'jol mo'i 'gros:__dkyus rdzogs rnams kyis theg dgu rdzogs:__snyan 'jam gsang dang yid 'ong ring :__'grel rtsal zil dngar gdangs ngar che:__phul du phyin dang rtsol med par:__sa mchog bcu gsum rab tu gnon:__zhes pa ltar rta yi skad snyan pa dang /__'jam pa dang /__gtang ba dang /__gsang ba/__ring ba/__yid du 'ong ba/__'grel ba/__bar ma chad pa/__zil che ba/__rtsal che ba/__gdangs che ba/__ngar ches pa/__phul du byung ba ste che ba bcu gsum dang ldan pa'i dpes theg dgu dang sa yi rim pa rnams dang sbyar te thugs rje chen pos 'gro ba'i don la rab tu dga' ba sa dang po dang /__thugs byams pa chen po sa gnyis pa dang /__'gro ba thams cad la thugs snyoms pas sa gsum pa dang /__thugs gsal bas don mdzad pa sa bzhi pa dang /__dus ring por 'gro don la mi skyo bas sa lnga pa dang /__gdul bya'i re ba thams cad rdzogs par mdzad pas sa drug pa dang /__'gro ba rnams la thugs rjes rtag par 'brel bas sa bdun pa dang /__'gro don rgyun mi chad pas sa brgyad pa dang /__gdul bya'i nyon mongs pa 'jam zhing zil gyis gnon pas sa dgu pa dang /__'gro ba'i don la thugs rje mthu nus stobs rtsal ldan pas sa bcu pa dang /__'gro don mdzad pa de'ang nam mkha'i dbyings ltar rgya che bas sa bcu gcig pa dang /__'gro ba rgya mtsho sgrol ba'i ngar dang ldan pas sa bcu gnyis pa ma chags pad+ma can dang /__'gro ba'i don la lha dang bcas pa'i 'jig rten dang 'jig rten las 'das pa thams cad kyi phul du byung bas sa bcu gsum pa yi ge 'khor lo tshogs chen gyi sa dang sbyar zhing /__de rnams kyang lam lngas rdzogs pa ste rta skad che ba bcu gsum dang ldan pa thengs gcig bsgrags pas yon tan bcu gsum dus gcig la tshang ba bzhin/__rta zhal la rta gdong ljang gu zhur dkar/__phrum phrum ser po/__rngog ma dmar po sogs brda rtags kyi rnam pa du mas mtshon pa'i bskyed rdzogs zab mos rta skad kyi dgongs pa lam du lhongs bas dus gcig char du bsgrod pa yin no/__/gsang sngags la shan dbye ba'i rta skad ni/__rta mchog rol pa'i lha sngags dgongs spyod thams cad lam gzhan las bgrod pa mgyogs pa dang /__sa lam bgrod pa la mkhas pa'i rtse mor phyin pa dang /__gsang sngags gzhan las kha rtsal che ba dang /__rngam drag gi gdug pa 'dul ba dang /__rdzu 'phrul gyi rkang pas sangs rgyas kyi sa la myur du phyin pa'i rtags dang ldan pa de rnams kyis rta mgrin zhes bya ste sngar gyi lung gis bstan la/__phyi yi rta mgrin de nang rnal 'byor pa'i lus rta mgrin gyi sku/__gsang ba rang gi sems las gzhan du med pas snang grags rig gsum rta mchog rol pa'i rdo rje gsum du shes shing /__sems nyid rang byung gi ye shes 'di nges pa don gyi pad+ma dbang chen du ngo shes rtsal rdzogs brtan pa thob na mchog thun gyi dngos grub thob par 'gyur zhing /__sa lam dang sbyar ba theg pa'i la shan dbye zhing sgom pa'i gnad kyi che ba bstan pa'i rta skad gnyis pa ste/__lung las/__phyi yi rta mgrin khro bo'i sku:__nang gi rta mgrin rnal 'byor sku:__gsang ba rta mgrin rang sems 'di:__sems las log na bsgrub tu med:__sems nyid rta mgrin du shes na:__mchog dang thun mong dngos grub thob:__yid bzhin nor bu rang las rnyed:__cir snang cir stong cir thob pa:__rta mgrin nyid las gzhan ma yin:__sku yi cho 'phrul rta mgrin sku ru gsal:__gsung gi rang bzhin rta skad ci sgrogs pa:__ma skyes ma 'gags gsung du mya ngan 'das:__thugs kyi rang bzhin rta mgrin ci yang gsal:__chos sku mtshan med ngang du mya ngan 'das:__'di ltar rtogs na rta mgrin rnal 'byor yin:__gsang sngags la shan dbye bas khyad par 'phags:__zhes dang /__mchog gter bka' brgyad las/__rta mgrin rgyal ba'i sku gsung thugs:__rnal 'byor lus ngag sems su gcig:__cir snang ci thos ci rtogs pa:__rta mgrin las ni gzhan med do:__skye med dngos med mtshan ma med:__'gyur med dbyings su la shan dbye:__dpal gyi rta skad thengs gsum ni:__lhang lhang tser tser lan gsum gyis:__thams cad dpal chen skur rdzogs nas:__dug gsum dri gsum mchod phul te:__ma mo mkha' 'gro dbang du sdud:__ces 'byung ngo /__/gdul bya thabs kyi rta skad ni/__dpal gyi rta skad thengs gsum gyi ma mo mkha' 'gro'i tshogs la brda sprod/__ma mo'i 'gying skad thengs gsum gyis rdo rje'i ming sring brda 'phrod de dgongs pa'i gter mdzod grol ba dang /__rnal 'byor pa'i brda skad thengs gsum snang srid kyi ma mo bye ba 'bum phrag mkha' klong yangs pa chen po'i tshogs la dbang bsgyur te rdo rje'i rnal 'byor dpal he ru ka'i rig pa 'dzin pa lcam dral gyi las/__byed pa'i tshul bstan pa dang gsum gyis/__dang po dpal gyi rta mgrin gyi gtsug nas rta skad dang pos/__snang srid gdod nas dag mnyam chen po rang byung gi ye shes kyi ngang du rta mgrin gyi dkyil 'khor lhun gyis rdzogs pa dang /__rta skad bar pas/__srid gsum gyi bsdus pa'i chos thams cad sha khrag rus pa'i gter chen por gyur pas ma mo mkha' 'gro 'das ma 'das thams cad kyi dgyes rgu'i mchod sprin chen por byas/__rta skad tha mas/__snang srid kyi ma mo mkha' 'gro dbang du sdud de bka' bzhin nyan par 'gying glu dang bcas pas bkug nas zhi sogs las thams cad bsam pa bzhin du rdzogs par byed pa ste/__yi dam dpal chen po'i rta skad bsgrags pa de bzhin lam dus su rnal 'byor pas 'bras bu'i rnam pa de bzhin bsgom pa yin no/__/de'ang rdzong 'phrang las/__rta mchog rgyal po'i ting nge 'dzin la zhugs pas/__che ba'i nga rgyal gyi skad thabs gsum gyis khams gsum zil gyis gnon no/__/de la rta skad dang po bos pas/__khams gsum srid gsum du snang ba'i chos thams cad ye nas ma bcos ma byas lhun gyis grub par rtogs so/__/rta skad bar ma bos pas/__snang zhing srid pas bsdus pa'i chos thams cad sha chen gyi phung po dang /__khrag chen gyi rgya mtsho dang /__keng rus kyi ri rab tu gyur pas/__ma mo dang mkha' 'gro thams cad dgyes pa'i longs spyod rgyun mi chad par bsam mo/__/rta skad tha ma bos pas/__ma mo dang mkha' 'gro thams cad bka' 'og tu 'dus nas ci bcol ba byed cing phrin las rnam bzhi rdzogs par byed pa ni bka' nyan gsung sdod zhes de la bya'o/__/zhes gsungs so/__/rta skad gsum po des lta sgom spyod pa gsum bstan te/__rta mchog rol pa'i thugs tig las/__gnas lugs rta yi mgrin pa can:__thabs grol gyis ni mchog tu snang :__'bras bu mthar phyin rol pa yis:__'gro 'dul phrin las lhun gyis grub:__ces gsungs pa ltar/__rta skad dang pos snang srid thams cad gdod nas ma bcos ma bslad dag mnyam chen po ye ji bzhin pa bya rtsol dang bral ba'i lta ba dang /__gnyis pas gsang chen thabs la mkhas pas dug gsum ma spang gnas su dag cing rang snang gi ma tshogs DA ki dbang du bsdus nas sbyor sgrol mchog gi brtul zhugs lam du byed pa dang /__rta skad gsum pas bla med theg pa'i rnal 'byor pas d+hA ki thams cad dbang du gyur pas las rnam bzhi gang mos pa thams cad bsam ma thag tu 'bad med lhun grub tu 'byung bar bstan pa/__nges don du/__rta skad dang pos lta ba gtan la dbab pa ste/__snang grags rig gsum gyi chos thams cad rang gi sems snang yin la/__de'ang gcig dang tha dad bral ba gnyis su med par snang ba de kun kyang 'gags med du 'char ba sgyu ma lta bu dang /__rang bzhin stong pa chu zla lta bur 'char zhing snang la/__nang yul can gyi shes pa la brtags pas/__ye shes nang gsal 'dus ma byas pa 'khor 'das dbyer med chen por gnas pa ste/__nA gA rdzu na'i thugs tig las/__phyi rol snang ba ji snyed pa:__rang snang yin te rmi lam 'dra:__snang ba ma 'gags sgyu ma 'dra:__rang bzhin bden med chu zla 'dra:__snang mkhan sems la tshur dpyad pas:__ches phra'i ye shes nang du gsal:__stong nyid rdo rje nam mkha'i dkyil:__rdul bral 'dus ma byas pa ste:__rang gi rang bzhin de kho na:__'di ni gsal ba 'khor ba ste:__'di ni rang bzhin mya ngan 'das:__'khor 'das dbyer med don rtogs na:__gang bltas pad+ma dbang gi lha:__ci spyod gzi ldan rol pa'i yum:__de kho na nyid mngon du 'gyur:__zhes gsungs so/__/rta skad gnyis pas tha mal gyi snang zhen sbyangs pa'i phyir bskyed rim gsal dag brtan pa gsum sgrub pas sbyongs pa dang /__rlung srog rtsol bzlas pa sngags kyis sbyangs pa/__sems 'khrul rtog dag byed stong bzhi'i sdud rim dang dbyer med pa'i 'od gsal chen po'i ngang du 'jog pa dang /__de ltar goms pas las rlung srog rtsol gyi rgyu ba d+hu ti'i dbyings su 'gogs par byed pa'i sgo gsum bcings te/__rdor bzlas kyi rtsa lam sbyangs/__bum can gyi sbyor bas zhu bde'i rnal 'byor sgrub/__de las 'gyur med bde ba chen po sgrub/__de las mkha' khyab mkha' yi rdo rje ye shes ris med sku gsung thugs rdo rje rnam pa thams cad pa'i mchog dam pa mngon sum du 'grub pa'i tshul rnams kyang bstan to/__/rta skad gsum pas dbang gi rgyud smin cing sdom pa dang dam tshig ma nyams pas lta ba gtan la dbab/__bskyed rim sgom pas sngags kyi tshogs lam dang /__rlung sems las su rung bas drod rtse dang /__thig le bde chen du rdzogs pas bzod chos/__zung 'jug don gyi ye shes mthong lam/__de gom pas sgom lam sleb pa dang /__de nyid mthar thug pa mi slob pa'i sku dang ye shes mngon du byas te/__ji skad du/__'khor 'das gnyis med kun gyi srog:__mnyam pa nyid las ma g.yos bzhin:__gang 'dul sgyu 'phrul drwa ba'i sprin:__rta mchog rol pa tshe 'dir 'grub:__ces gsungs ba bzhin 'bras bu bcu gsum rdo rje 'dzin pa'i go 'phang mchog nyid tshe 'di'am bar dor mngon du byed pa yin no/__/de ltar yi dam lha yi dpal gyi rta skad des bskul nas/__ma tshogs mkha' 'gro'i 'gying glu sngon dpal chen po'i tha tshig ji ltar bsgo ba rjes su dran cing de las mi 'da' ba 'gying glu blangs pa ni/__bdag cag nam mkha' dbyings nas mchi/__/nam mkha'i dbyings nas mi mchi ru/__/bdag cag gnas ni nam mkha' lags/__/bdag cag 'theng zhing grum zhing mchi/__/'theng zhing grum zhing mi mchi ru/__/zhes sogs kyi glu blangs pa ste/__rdzong 'phrang las/__ma mo'i 'gying skad ni dpal gyi rta skad bos tsam na ma mo rnams 'gying zhing sngon gyi tha tshig dang dam tshig las mi 'da' ba'i glu len te/__zhes 'byung ngo /__/rnal 'byor pa'i brda skad thengs gsum ni/__thal mo lan gsum brdab pa'i dang pos khrag 'thung chen po rnams thugs dam bskul/__gnyis pas phra men rnams dbyings nas bskul/__gsum pas mkha' 'gro'i tshogs rnams las la bskul nas gtsigs la dbab pa ste/__bka' brgyad rdzong 'phrang las/__rnal 'byor pa'i brda skad thengs gsum ni/__/chos la dgra byung sangs rgyas ra mda' log__/ces bya ste thal mo brdab pas khrag 'thung rnams dbyings nas bskul/__zhes dang /__mchog gter rta yi dgongs 'dus las/__de tshe ma mo'i 'gengs skad kyis:__dam tshig dgongs nas myur 'ongs te:__bdag gi bsgo bzhin bka' lung nyan:__thal mo drag tu brdab pa yi:__bdag cag nam mkha'i dkyil na mchi:__zhes sogs 'byung ngo /__/de ltar dpal gyi rta skad kyis sngon byung ston pa'i rnam thar/__rjes 'jug nyams len dang sbyar bas brda sprad/__ma mo'i 'gying skad kyi thugs dgongs pa rang byung gi klong rdol te de thams cad rang snang gi rol rtsal du shes/__rnal 'byor pa'i brda skad kyi srid zhi thams cad dbang du bsdus pas phrin las byed pas na gdul bya thabs kyi rta skad dang /__de thams cad rtogs pa'i lta bar dgongs/__grogs spyod par dgongs pa gnyis su bsdu/__dang po la/__rang bzhin don gyi rta skad chos thams cad ma bcos mnyam pa nyid kyi rta mgrin/__de'ang rang gi rig pa ye nas ma bcos der shar ba dang /__de ltar snang stong bden gnyis dbyer med dam dbyings dang ye shes gnyis su med pa'i gnyis med bde ba chen po rta mgrin dbang gi dkyil 'khor du bstan pas ni rang bzhin ngo bo don gyi rta skad de ji bzhin gtan la phebs pa'o/__/rta skad spyod par dgongs pa la gdul bya thabs kyi rta skad dpal chen che ba'i rta skad de la dam tshig rjes bskul gyi dpal gyi rta skad dang po/__gnyis pas bka' la drang /__gsum pas don byed/__ma mo'i 'gying glu gsum gyi dang po rang rgyud che ba'i rngam skad/__bar pa byin rlabs rdzas ldan gyi gdangs skad/__tha ma drag po las la chas pa'i rngam skad do/__/rnal 'byor pa'i brda skad theng gsum gyi dang po lus brda/__gnyis pas ngag brda/__gsum pas yid brda'o/__/dpal gyi che ba'i rta skad ni/__ji skad du/__pad+ma dbang gi spyi bo nas:__myur mgyogs shugs ldan gdong pa yi:__i hi'i rta dbyangs 'tsher ba las:__zhes dang /__pad+ma khrag 'thung khros pa'i sku:__thams cad dbang du sdud par byed:__ces sogs rgya cher 'byung zhing /__lha srin sde brgyad dbang du mi 'du ba dang /__rtags mi thon/__bgo ba mi nyan na pad+ma dbang gi ting nge 'dzin gyis sgrub na 'grub ste rta skad thengs gsum gyi dregs pa thams cad had kyi sngangs pa dang /__sha rul la sgrang ma bzhin du 'du zhing /__rgyal po'i bka' them las 'da' mi nus pa bzhin las byed par 'gyur bas zhi rgyas drag gsum gyis 'dul bar mi nus pa rnams dbang gi las kyi gdul bas na/__las kyi rtsa ba mchog gi dngos grub dbang du byed pa'ang 'di kho na yin no/__/de ltar gyi rnal 'byor nyams su blangs 'dod pas dang po dbang gis smin pa gal che ste/__rta mchog rol pa'i rgyud las/__rigs kyi bu ma 'ongs pa'i 'gro ba gsang sngags kyi lam la 'jug par 'dod pa dag ni rdo rje slob dpon la brten nas gzugs brnyan gyi dkyil 'khor du gzhug par bya'o/__/zhes gsungs pas so/__/de nas lta ba gtan la dbab dgos te/__rgyud de nyid las/__thams cad sgyu ma lta bu'i tshul/__/thams cad rang bzhin stong pa nyid/__/zung du 'jug pa'i ye shes ni/__/de ni bla med mchog dam pa/__/zhes dang /__lta ba de goms pa dang bskyed rdzogs kyi rnal 'byor zab mor brtson pa las pad+ma dbang mngon du 'gyur te/__dgongs pa lung ston las/__yul sems rab tu rtogs gyur na/__/gang bltas pad+ma dbang gi lha/__/ji ltar byas kyang skyon med pa/__/dbang chen zhes ni de la bya/__/zhes gsungs so/__/rta skad thengs gsum du bsgrags pa de rnams kyang rang rig pa skye med chos kyi sku thig le nyag gcig gi chos nyid kyi dpal gyi rta skad thengs gcig tu la bzla ba yin te/__rta mgrin thugs tig las/__hI hI hI/__rdo rje'i rta skad 'tsher ba'i dbyangs:__gsal zhing brjid pa'i gdangs chen po:__rang byung nam mkha'i dkyil nas bsgrags:__bde stong nyams kyi ngo bor ltos:__de la rtse gcig mnyam bzhag pas:__dang po skye med stong sang nge :__bar du gnas med zang thal le:__tha ma 'gags med ljen ce re:__rang bzhin yongs shes dran pa'i ngang :__yid mig rlung gsum dbyer med 'jog:__'di don rtogs na don gyi dbang :__pad+ma dbang chen tshe 'dir 'grub:__ces ngo sprod don gyi snying po rtsa ba nyid snying gi bcud phur du bzung nas gzhi lam 'bras gsum dbyer med kyi nyams len la chu bo'i rgyun bzhin brtson par bya'o/__/slar smras pa/__mchog sgrub kun gyi rgyal po pad+ma dbang /__/pad+ma gsung gi rig 'dzin o rgyan rje/__/brgyud par bcas pas gsang ba'i thugs dam yin/__/de phyir pad+ma'i rjes 'jug 'dir brtson rigs/__/'di la nongs pa'i dri ma mchis gyur na/__/bla ma rta mchog rol pa'i spyan sngar bshags/__/dge ba dri med pad+ma ltar rgyal pa/__/bstan dang 'gro la phan pa'i phyir du bsngo/__/khams gsum rlung sems snang ba dbang du 'dus/__/chos nyid shugs drag rta mchog rtsal rdzogs te/__/rnam mkhyen sku bzhi'i grong du 'khrid pa dang /__/don gnyis lhun gyis grub pa'i bkra shis shog__/ces dbang chen pad+ma he ru ka'i rta skad kyi dgongs pa cung zad bris pa 'di'ang rig 'dzin mkhas grub chen po rnams kyi gsung gi rjes su 'brang nas pad+ma'i sngags rig 'dzin pa 7pad+ma ye shes rdo rje la rang slob gdong sna mchog sprul rin po che'i lha rdzas bzang gos kyi rten dang bri gzhi shog bu bcas nan tan chen po'i gsung gi bskul ba mi ldog tsam du bris pa 'dis kyang sgrub sde chen po'i bstan pa rin po che phyogs bcur rgyas pa'i rgyur gyur cig__/sarba dA mang+ga laM//__//