JKCL-KABUM-05-CA-029

🚧 This website is under continued development. We appreciate your patience!

Previous Text Back to Volume PageNext Text

Wylie title	snyan brgyud phur pa'i gnad tig gi las bzhi'i sbyin sreg mdor bsdus phrin las myur 'grub
Location	chos kyi blo gros bka' 'bum Volume 5, Text 29, Pages 387-401 (Folios 1a1 to 8a4)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Associated People	པྲ་བྷ་ཧསྟི་ (Prabhahasti)
Citation	'jam dbyangs mkhyen brtse chos kyi blo gros. snyan brgyud phur pa'i gnad tig gi las bzhi'i sbyin sreg mdor bsdus phrin las myur 'grub. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 5: 387-401. Bir, H.P.: Khyentse Labrang, 2012.
Genre	Fire Offerings - sbyin sreg
Cycle	ཕྲིན་ལས་ཕུར་པའི་གནད་ཏིག་ (phrin las phur pa'i gnad tig)
Deity	rdo rje phur pa
Recension Link	Other Versions on this site: སྙན་བརྒྱུད་ཕུར་པའི་གནད་ཏིག་གི་ལས་བཞིའི་སྦྱིན་སྲེག་མདོར་བསྡུས་ཕྲིན་ལས་མྱུར་འགྲུབ།
RTZ	In the Rinchen Terdzö: https://rtz.tsadra.org/index.php/Terdzo-KHI-023
Colophon	།ཅེས་པའང་ནང་ཆེན་ཚེས་བཅུ་བླ་མ་བློ་གྲོས་མཆོག་ལྡན་གྱིས་བསྐུལ་ངོར་ཆོས་ཀྱི་བློ་གྲོས་དང་། བཀྲ་ཤིས་དཔལ་འབྱོར་ཟུང་གིས་ལེགས་པར་དཔྱད་ནས་ཤིན་ཏུ་མདོར་བསྡུས་སུ་བྲིས་པ་དགེ་ལེགས་མཆོག་ཏུ་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།
	/ces pa'ang nang chen tshes bcu bla ma blo gros mchog ldan gyis bskul ngor chos kyi blo gros dang /__bkra shis dpal 'byor zung gis legs par dpyad nas shin tu mdor bsdus su bris pa dge legs mchog tu gyur cig__/sarba dA ka l+yA NaM b+ha ba tu/

1 Texts in this Section (sde tshan or chos tshan)

387-401	སྙན་བརྒྱུད་ཕུར་པའི་གནད་ཏིག་གི་ལས་བཞིའི་སྦྱིན་སྲེག་མདོར་བསྡུས་ཕྲིན་ལས་མྱུར་འགྲུབ། snyan brgyud phur pa'i gnad tig gi las bzhi'i sbyin sreg mdor bsdus phrin las myur 'grub Fire Offerings - sbyin sreg	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༄༅། །སྙན་བརྒྱུད་ཕུར་པའི་གནད་ཏིག་གི་ལས་བཞིའི་སྦྱིན་སྲེག་མདོར་བསྡུས་ཕྲིན་ལས་མྱུར་འགྲུབ་ཅེས་བྱ་བ་བཞུགས་སོ། ། ཨོཾ་སྭ་སྟི། །འཇིགས་རུང་ཞལ་གདངས་མི་བཟད་མཆེ་བ་གཙིགས། །གཏུམ་ཆེན་རབ་འབར་རྔམས་པའི་གད་རྒྱངས་སྒྲོགས། །བཅོམ་ལྡན་སྲིད་གསུམ་སྒྲོལ་བྱེད་ཀུ་མཱ་རར། །བཏུད་དེ་ལས་བཞིའི་སྲེག་བླུགས་ཆོ་ག་སྤེལ། །དེ་ལ་འདིར་རྡོ་རྗེ་ཕུར་བའི་བསྙེན་སྒྲུབ་མཐར་སོན་པའི་རྣལ་འབྱོར་པས་ཕྲིན་ལས་མྱུར་དུ་འགྲུབ་པའི་སླད་དུ་རྣོ་མྱུར་མེ་ཡི་ཆོ་ག་བྱ་བར་འདོད་པས་འདི་ལྟར་འཇུག་པར་བྱ་སྟེ། དེ་ལའང་ཞི་རྒྱས་དབང་དྲག་གི་ལས་ཀྱི་དབྱེ་བས་བཞི་ཡི། དང་པོ་ལ་སྦྱོར་དངོས་རྗེས་གསུམ་ལས། དང་པོ་ནི། སྒྲུབ་མཆོད་སོགས་ཀྱི་སྐབས་ཐུན་མཚམས་གང་བདེར་ལྷ་ཡི་ང་རྒྱལ་ལ་གནས་པ་དང་། སྦྱིན་སྲེག་ཁོ་ནའི་སྐབས་བདག་བསྐྱེད་ཀྱི་རྣལ་འབྱོར་བསྡུ་ལྡངས་བཅས་སྔོན་དུ་འགྲོ་བས། གང་དུ་བྱ་བའི་གཞི་དེར་དཀར་གཏོར་བཤམས་ལ། བྱིན་བརླབ་བསྔོ་བ་བཅས་ལས་བྱང་ཕྲིན་ལས་རྣམ་པར་རོལ་པའི་དགའ་སྟོན་ལྟར་བྱ། རྩ་སྔགས་ཀཱི་ལ་ཡ་བརྒྱ་རྩ་དང་། ཤཱུ་ནྱ་ཏཱའི་སྔགས་བརྗོད་དེ་ཆོས་ཉིད་ཀྱི་དོན་དྲན་པར་བྱས་པས་ས་གཞི་ལས་རུང་དུ་བྱའོ། །དེར་བཀྲ་ཤིས་པའི་ས་ལས་སྟེགས་བུ་བཅོས་ཏེ་ཐབ་ཁུང་ཟླུམ་པོ་པདྨ་འདབ་བརྒྱད་ཀྱི་ལྟེ་བར་རྡོ་རྗེ། ཁ་ཁྱེར་ལ་རྡོ་རྗེའི་ཕྲེང་བ། གྲྭ་བཞིར་ཟླ་ཕྱེད་རྡོ་རྗེས་མཚན་པ། ཁ་དོག་དཀར་པོ་བཅད་ཚོན་དམར་སྐྱས་བྲིས་པ་ལ་འོམ་བུ་བ་དང་ལྕང་མ་སོགས་འོ་མ་ཅན་གྱི་ཤིང་གིས་ཁྲུ་གང་ཙམ་ཟླུམ་པོར་བརྩིགས། ཤར་ལྷོར་མེ་ཚང་བཅའ། སློབ་དཔོན་གྱི་གཡས་སུ་སྟེགས་བུ་ཁེབས་དཀར་པོས་དགབ་པའི་སྟེང་བདུད་རྩི་ཅན་གྱི་ཡམ་ཤིང་སོར་བཅུ་གཉིས་པ་མར་ཁུས་ཉུག་པ། མངར་གསུམ་དང་སྦྱར་བའི་མར་ཁུ། ཏིལ། ཟས་མཆོག །སོ་བ། འབྲས། ནས། སྲན་མ། གྲོ། དཱུརྦ། ཀུ་ཤ། གཞན་ཡང་སྨན་སྣ་འབྲུ་སྣ་རིན་པོ་ཆེ་སྣ་ཚོགས་མེ་ཏོག་དཀར་པོ་དར་ཟབ་སོགས་ཅི་འབྱོར་པའི་བསྲེག་རྫས་རྫས་སྤུངས་ཅན་དང་། གོས་ཟུང་། སོ་རྩི་བཅས། འདས་མ་འདས་གཉིས་རིམ་དུ་དགོད། གཡོན་དུ་སྟེགས་ལ་གཏོར་མ་དཀར་ཟླུམ་ཆེ་ཆུང་གཉིས། སྨན་རཀ་བཅས་དང་། ཉེར་སྤྱོད་ཆ་གཉིས་སོགས་བཤམས། མདུན་དུ་མེ་ཡོལ་ལ་གངས་རི་དང་ཝྃ་ཡིག་བྲིས་པ། རྡོར་དྲིལ། དགང་བླུགས། ལས་བུམ། ལས་མཐུན་གྱི་མེ་དར། ཀུ་ཤའི་ཆུན་པོ་བརྒྱད། རླུང་གཡབ་སོགས་འོག་ཏུ་དགོས་པའི་ཡོ་བྱད་རིགས་འདུ་བྱ། དེ་ཐམས་ཅད་ཀྱང་སྣོད་དང་ཁ་དོག་ཐམས་ཅད་དཀར་པོ་འབའ་ཞིག་བྱ། དུས་རབ་བཞི་དང་ནམ་ལངས་ལ་སློབ་དཔོན་ཆས་གོས་རྒྱན་དཀར་པོ་དང་བཅས་ཁ་ཤར་དུ་ཕྱོགས་པས་འཇམ་པའི་སྟན་ལ་སེམས་དཔའི་སྐྱིལ་ཀྲུང་གིས་འཁོད་ལ། གཉིས་པ་དངོས་གཞི་ལ་གསུམ། འཇིག་རྟེན་པའི་མེ་ལྷ་མཆོད་པ། དཀྱིལ་འཁོར་གྱི་འཁོར་ལོ་མཆོད་པ། མེ་ལྷར་གཏང་རག་འབུལ་བའོ། །དང་པོ་ནི། རབ་གནས་དང་སྒྲུབ་མཆོད་སོགས་ལ་དཀྱིལ་འཁོར་གྱི་གཙོ་བོ་ལས་རང་མར་མེ་གཅིག་ལས་གཉིས་མཆེད་དུ་ཞལ་གཅིག་ཕྱག་གཉིས་པའི་རྣམ་པར་ལྡང་བ་དང་། སྦྱིན་སྲེག་ཁོ་ནའི་སྐབས་བདག་ཉིད་ལྷ་ཡི་རྣལ་འབྱོར་བཟླས་པ་བཅས་གྲུབ་པའི་རྗེས་འདི་ལ་འཇུག །བདུད་རྩི་འཁྱིལ་པའི་སྔགས་ཀྱིས་ལས་བུམ་གྱི་ཆུ་བྱིན་གྱིས་བརླབས། རྡོ་དྲིལ་བསང་སྦྱང་། ཧཱུྃ། །ཐབས་ཤེས་ཟུང་འཇུག་ཆོས་ཉིད་མཚོན། །འདས་དུས་འགྲོ་རྣམས་སད་པ་དང་། །འགྲོ་རྣམས་སྨིན་པར་བྱ་བའི་ཕྱིར། །རྡོ་རྗེ་གསོར་ཞིང་དྲིལ་བུ་དཀྲོལ། །ཨོཾ་བཛྲ་གཎྜེ་ཧཱུྃ་ཨཱཿཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བརྗོད་ལ་རྡོ་རྗེ་གསོར། དྲིལ་བུ་དཀྲོལ། འཁྱུད་རྒྱ་བྱ། ཡོ་བྱད་རྣམས་ལ་དམིགས་ཏེ། བསང་སྦྱང་། སྟོང་པའི་ངང་ལས་མཆོད་རྫས་དང་བསྲེག་རྫས་རྣམས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་འོད་དུ་ཞུ་བ་ལས་བྱུང་བའི་རྫས་སོ་སོའི་དངོས་པོ་བདུད་རྩིའི་རང་བཞིན་ཅན་ཟད་མི་ཤེས་པར་གྱུར། ཨོཾ་བཛྲ་ཨརྒྷཾ་སོགས་དང་། ཨོཾ་ཧཱུྃ་ཏྲཱྃ་ཧྲཱིཿཨཱཿམཱུྃ་ལཱྃ་མཱྃ་པཱྃ་ཏཱྃ༔སརྦ་ཛྙཱ་ན་པཉྩ་ཨ་མྲྀ་ཏ་རཀྟ་བ་ལིཾ་ཏ་ག་ཎ་ཙཀྲ་བྷོ་དྷི་ཙིཏྟ་ཨཱཿཧཱུྃ། ཞེས་བརྗོད། དེ་ནས་ཐབ་བསང་སྦྱང་། ཆོས་རྣམས་སྐྱེ་མེད་རྣམ་ཀུན་མཆོག་ལྡན་དབྱིངས། །སྣ་ཚོགས་སྒྱུ་འཕྲུལ་འགགས་མེད་རྡོ་རྗེའི་སྤྲིན། །རྒྱས་པའི། དབང་གི། དྲག་པོའི། ཞེས་བསྒྱུར། ཞི་བའི་ཕྲིན་ལས་ཡོངས་རྫོགས་ཐབ་ཀྱི་དབུས། །གོས་དཀར་ཌཱ་ཀིའི་ངོ་བོར་རོ་གཅིག་པའི། །ཆགས་བྲལ་བདེ་བ་ཆེན་པོའི་མེ་དཔུང་འབར། །ཨོཾ་སརྦ་ཛྙཱ་ན་ཛྭ་ལ་རཾ། ཞེས་དགེ་འདུན་གྱི་ཐབ་ལས་བྱུང་བའི་མེ་སྦར། ལས་བུམ་གྱི་ཆུས་བསང་ལ། ཨོཾ། །ཀུ་ཤ་འདི་ནི་གཙང་ཞིང་དགེ། ས་ལས་སྐྱེས་པའི་སྙིང་པོ་མཆོག །དཀོན་མཆོག་གསུམ་གྱི་དག་བྱེད་ཡིན། །ཚངས་པའི་ཡང་དག་བྱེད་པ་སྟེ། །དེ་ཡིས་བདག་ཅག་ཐམས་ཅད་ལ། །བགེགས་རྣམས་ཐམས་ཅད་ཞི་བར་མཛོད། །སྭཱ་ཧཱ། ཞེས་ལན་བརྒྱད་བརྗོད་ལ་ཤར་ནས་བརྩམས་ཕྱོགས་མཚམས་རྣམས་སུ་བཀྲམས། དེ་དབུས་རྃ་ཡིག་ཡོངས་གྱུར་མེ་ལྷ་ནི། །རྒྱས་པའི། དབང་གི། དྲག་པོའི། ཞེས་བསྒྱུར། །ཞི་བའི་རྒྱན་རྫོགས་འོད་ཟེར་ཕྲེང་བས་དཀྲིགས། །ཞལ་གཅིག་ཕྱག་གཉིས་བགྲང་ཕྲེང་གནྡྷེ་བསྣམས། །སྐུ་གསུང་ཐུགས་ལ་རྡོ་རྗེ་འབྲུ་གསུམ་མཚན། །དེ་ལས་འོད་འཕྲོས་དམ་ཚིག་སྤྱན་དྲངས་བསྟིམ། །སྤྱན་འདྲེན་པ་ནི། དབྱུ་གུ་རྩེ་གསུམ་པའི་རྒྱས་མེ་དར་གཡབ་ལ། ཧཱུྃ། །དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷ་དྲང་སྲོང་བྲམ་ཟེ་མཆོག །འདི་ཉིད་དུ་ནི་གཤེགས་སུ་གསོལ། །ཨགྣི་རཱ་ཛ་རྀ་ཥི་བཛྲ་ས་མ་ཡ་ཛཿཛཿཧཱུྃ་བྃ་ཧོཿཨརྒྷཾ་སོགས་ཀྱིས་ཉེར་སྤྱོད་ཕུལ། བསྟོད་པ་ནི། ཧཱུྃ། །འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཌཱཀྐིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་སྲེག །འཇིག་བྱེད་མེ་ལྷ་ཉིད་ལ་རྣམ་པར་འདུད། །བྱོན་སྐྱེམས་ནི། མེ་ལྷ་ཞལ་གདངས་པའི་ལྗགས་རྡོ་རྗེའི་སྦུ་གུས་སྲེག་བླུག་གི་རྒྱུན་དྲངས་ཏེ་གསོལ་བར་བསམས་ལ། ཨོཾ་ཨགྣ་ཡེ་སྭཱ་ཧཱ། ཞེས་མར་ཁུ་བླུགས་གཟར་བདུན་གྱིས་བཀང་བའི་དགང་བླུག་ཁ་སྦྱར་ལ། ཨོཾ་ཨགྣ་ཡེ་བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་ཉེས་ལྟུང་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་འདོད་གསོལ་སྦྱར་བ་ཚན་གསུམ་གྱིས་ཕུལ། དེ་ནས་རྫས་གཞན་ལག་གིས་བཟུང་དུ་བཏུབ་པ་རྣམས་མཐེབ་སྲིན་གྱིས་དབུལ། གཞན་རྣམས་བླུགས་གཟར་གྱིས་ཕུལ་ཏེ་སྔགས་ནི། ཡམ་ཤིང་ལ། ཨོཾ་བྷོ་དྷི་བྷྲྀཀྵཱ་ཡ་སྭཱ་ཧཱ། མར་ཁུ། ཨོཾ་ཨགྣ་ཡེ་སྭཱ་ཧཱ། རྫས་སྤུངས། ཨོཾ་ཨགྣི་དེ་ཝ་རྀ་ཥི་ཧ་བྱ་ཀ་བྱ་ཤཱནྟིཾ་ཀུ་རུ་ཡེ་སྭཱ་ཧཱ། དེ་ལྟར་བདུན་ལ་སོགས་པའི་རྗེས་འདོད་གསོལ་སྦྱར་བས་ཕུལ། རྫས་རྫོགས་པ་དང་སྔར་བཞིན་མཆོད་བསྟོད་བྱ། ཡུངས་ཀར་ཐབ་ཏུ་ཕུལ་ལ། ན་མོ། རིག་པའི་རྒྱལ་པོ་ཁྱོད་ཀྱིས་སྲེག་བླུག་གི་རྫས་རྣམས་ལྷ་ཡི་ཞལ་དུ་དབུལ་བ་དང་། ཡེ་ཤེས་ཀྱི་མེར་བྱིན་གྱིས་བརླབས་ནས་ཞི་བའི་ཕྲིན་ལས་ཐམས་ཅད་འགྲུབ་པར་མཛད་དུ་གསོལ། བཛྲ་མུཿཡེ་ཤེས་པ་ཐབ་ཀྱི་ཤར་ལྷོར་གཤེགས། དམ་ཚིག་པ་འབར་བའི་རྣམ་པར་གྱུར། གཉིས་པ་ནི། ཐབ་ལ་ལས་ཆུས་བྲན། བསང་སྦྱང་། ཨ། །སྐྱེ་མེད་དབྱིངས་ཀྱི་ཆོ་འཕྲུལ་ལས། །འགགས་མེད་སྒྱུ་འཕྲུལ་རྡོ་རྗེའི་གར། །ཞ྄ི༵་བའི་ཐབ་ཁུང་མཚན་རྫོགས་པ། །ཡེ་ཤེས་མེ་ལྕེ་འབར་བའི་དབུས། །ཀློང་ལྔའི་དྭངས་མ་འབྱུང་རིམ་སྟེང་། །སོགས་ནས་བསྟོད་པའི་བར་ཕྲིན་ལས་རྒྱས་བསྡུས་གང་འོས་རྒྱས྄༵། དབང་། དྲག །སྦྱར། སྒྲུབ་མཆོད་ལ་སོགས་པའི་སྐབས། གནམ་ལྕགས་ཙཀྲ་རྩིབས་བཅུའི་དབུས༔ཞེས་པའི་མཚམས་ལས་བྱང་གི་སྤྱན་འདྲེན་བརྗོད་ལ་ལས་རྡོར་གྱིས་ཚོམ་བུ་སྤྱན་དྲངས། སློབ་དཔོན་ལ་གཡས་སུ་བསྐོར་ཏེ་གཡོན་ནས་ཕུལ་བས་རྩ་སྔགས་བརྗོད་ལ་མེ་ཏོག་ཐབ་ཏུ་དོར་བ་ལས། དབུས་སུ་མ་བཅོས་རྩ་བའི་ལྷ། །སོགས་ཀྱིས་ལྷ་ཚོགས་ཡོངས་རྫོགས་བསྐྱེད་ནས་ལས་རིམ་རྣམས་བྱ་དགོས་སོ། །གང་ལྟར་ཡང་བསྟོད་པ་གྲུབ་པ་དང་དགང་བླུགས་ཁ་སྦྱར་ལ། དཀྱིལ་འཁོར་པའི་ལྷ་ཚོགས་རྣམས་ཀྱི་ལྗགས་རྡོ་རྗེའི་སྦུ་གུ་ཅན་གྱིས་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམ། སྒྲུབ་སྔགས་ལན་བདུན་དང་བཅས་མར་ཁུ་བླུགས་གཟར་བདུན་གྱིས་བཀང་བ་ཕུལ་རྗེས། རྣལ་འབྱོར་པ་བདག་དང་ཡོན་གྱི་བདག་པོའི་དམ་ཚིག་ཉམས་ཆག་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་འདོད་གསོལ་སྦྱར་བ་ཚན་གསུམ་གྱིས་བྱོན་སྐྱེམས་ཕུལ། རྩ་སྔགས་ལ། ཤཱནྟིཾ་ཀུ་རུ་ཡེ་སྭཱ་ཧཱ། ཞེས་བཏགས་པས་ཡམ་ཤིང་། མར་ཁུ། རྫས་སྤུངས་རྣམས་བརྒྱ་རྩ་སོགས་དང་། བསྙེན་སྒྲུབ་ཀྱི་ཁ་སྐོང་ལ་ཏིལ་ཁོ་ན་བསྙེན་གྲངས་གང་ཐེམ་དེའི་བཅུ་ཆ་ཕུལ། དམིགས་པ་ནི། དཀྱིལ་འཁོར་གྱི་ལྷ་ཚོགས་ཐམས་ཅད་ལ་སྲེག་བླུག་གི་མཆོད་པ་ཕུལ་བས་ཐུགས་དགྱེས་པ་ཆེན་པོའི་རང་བཞིན་ལས་བྱུང་བའི་འོད་ཟེར་དཀར་པོས་འཇིག་རྟེན་གྱི་ཁམས་ཐམས་ཅད་ཁྱབ། སངས་རྒྱས་ཐམས་ཅད་ལ་མཉེས་པའི་མཆོད་པ་ཕུལ། སེམས་ཅན་མ་ལུས་པའི་སྒྲིབ་གཉིས་རྒྱུ་དང་བཅས་པ་ཞི་བར་མཛད་པར་བསམ། མཐར་རྫས་ཐམས་ཅད་རྫོགས་པ་དང་། མེ་ཏོག་དཀར་པོ་ཐབ་ཏུ་ཕུལ་ལ། ཡེ་ཤེས་མེ་དང་གཉིས་མེད་འབར་བ་ཡི། །ཕྱག་རྒྱ་ཆེན་པོ་བསྲེག་བྱ་ཟ་བའི་ཞལ། །སྲེག་རྫས་བདུད་རྩིའི་མཆོད་པས་མཉེས་གྱུར་ནས། །ཞི་བའི་ཕྲིན་ལས་ལྷུན་གྱིས་གྲུབ་པར་མཛོད། །རྒྱས་པའི། དབང་གི། མངོན་སྤྱོད་ཕྲིན་ལས་ཞེས་བསྒྱུར། ཅེས་ལན་གསུམ་གྱིས་ཕྲིན་ལས་གསོལ། གང་ལ་རེག་ན་འཇམ་པའི་ལྷ་རྫས་ཀྱང་། །དབང་པོའི་ཚོན་གྱིས་བསྒྱུར་བའི་སྨིག་རྒྱུ་ཡིས། །བར་སྣང་ཟ་འོག་བཅལ་དུ་བཀྲམས་པ་ལྟར། །འབར་བས་འགྲོ་ཀུན་བཟོད་པའི་གོས་ཐོབ་ཤོག །ཨོཾ་བཛྲ་ཝསྟྲ་ཡེ་སྭཱ་ཧཱ། ཞེས་དང་། ཨོཾ་བཛྲ་ཏཾ་བུ་ལེ་ཡེ་སྭཱ་ཧཱ། ཞེས་པས་རྡོ་ཐལ་མེད་པའི་སོ་རྩི་འཇམ་པོ་ཕུལ། གཏང་རག་གི་མཆོད་བསྟོད་མདོར་བསྡུས་བྱ། འཇིགས་པ་བརྒྱད་སོགས་ཞི་བའི་དངོས་གྲུབ་སྩོལ། །འབྱོར་པ་དྲུག་ལྡན་རྒྱས་པའི་དངོས་གྲུབ་སྩོལ། །མོས་པ་རྣམ་བཞི་དབང་གི་དངོས་གྲུབ་སྩོལ། །དགྲ་བགེགས་ཚར་གཅོད་དྲག་པོའི་དངོས་གྲུབ་སྩོལ། །ཞེས་བསྐུལ་ལ། རྩ་སྔགས་མཐར་ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕ་ལ་ཧོཿཞེས་དངོས་གྲུབ་ཀྱང་བླངས། དཀྱིལ་འཁོར་པའི་ལྷ་ཚོགས་སོགས་གོང་ལྟར་གཤེགས་སྐྱེམས་དགང་བླུགས་ཚན་གསུམ་ཕུལ། མ་འབྱོར་པ་དང་ཉམས་པ་དང་། །སོགས་ཀྱི་མཐར་ཡིག་བརྒྱས་ནོངས་པ་བཤགས། ཨོཾ། ཁྱེད་ཀྱིས་སེམས་ཅན་སོགས་མཐར། བཛྲ་མུཿས་ཡེ་ཤེས་པ་གཤེགས་སུ་གསོལ། སྒྲུབ་མཆོད་སྐབས། དཀྱིལ་འཁོར་པའི་ལྷ་ཚོགས་དགྱེས་པ་ཆེན་པོས་སྒྲུབ་པའི་དཀྱིལ་འཁོར་དང་གཉིས་སུ་མེད་པར་གཤེགས་པར་བསམས་ལ་ཚོམ་བུའི་མཎྜལ་སྒྲུབ་ཁང་དུ་སྤྱན་དྲངས། གསུམ་པ་ནི། བསང་སྦྱངས། དམ་ཚིག་མེ་ལྷ་རང་བཞིན་ཡོངས་སུ་རྫོགས་པར་གསལ་བའི་གནས་གསུམ་ལས་འོད་ཟེར་འཕྲོས་པས་ཡེ་ཤེས་པ་བཛྲ་ས་མཱ་ཡ་ཛཿཛཿཧཱུྃ་བྃ་ཧོཿབྱོན་སྐྱེམས་དགང་བླུགས་གསུམ་སྔ་མ་ལྟར་ཕུལ། ཨོཾ་བི་མ་ལ་ཨགྣ་ཡེ་སྭཱ་ཧཱ། ལན་གསུམ། གོས་ཟུང་དང་སོ་རྩི་ཕུལ། མེ་གསོས་ཏེ་གཏང་རག་གི་ཚུལ་དུ་རྫས་ལྷག་མ་རྣམས་སོ་སོའི་སྔགས་མཐར། ཨོཾ་ཨགྣ་ཡེ་རྀ་ཥི་རཱ་ཛཱ་ཡ། བདག་ཅག་དཔོན་སློབ་ཡོན་མཆོད་ཐམས་ཅད་ཀྱི་ཆོ་ག་ལྷག་ཆད་འགལ་འཁྲུལ་ཉམས་ཆགས་ཉེས་ལྟུང་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་པས་ཕུལ། སྔ་མ་ལྟར་མཆོད་ཅིང་བསྟོད། ཨ་ཀཱ་རོས་གཏོར་མ་བསྔོས་ལ། མཆོད་སྦྱིན་གཏོར་མ་སོགས་ཀྱིས་ཕྲིན་ལས་བཅོལ། ནོངས་པ་བཤགས། གཤེགས་སུ་གསོལ་བ་ནི། དོན་གཉིས་སྒྲུབ་པའི་མེ་ཡི་ལྷ། །རང་རང་ཡུལ་དུ་གཤེགས་ནས་ཀྱང་། །སླར་ཡང་ཕྲིན་ལས་བསྒྲུབ་པའི་ཕྱིར། །དུས་སུ་འབྱོན་པར་མཛད་དུ་གསོལ། །བཛྲ་མུཿས་ཡེ་ཤེས་པ་གཤེགས། དམ་ཚིག་པ་ལྟེ་བའི་ཨ་ཐུང་ལ་ཐིམ། དགེ་བ་བསྔོ་ཞིང་སྨོན་ལམ་གདབ་པ་ཤིས་བརྗོད་བཅས་ལས་བྱང་ལྟར་བྱས་པས་གྲུབ་པའོ། །ཞི་བ་ལ་མེ་རང་ཞིར་འཇོག །ལོང་ཁྱབ་ཀྱིས་མ་ཁོམས་ན་འོ་མའི་ཆུས་བཏུལ་ལ། ཨ་ཀཱ་རོ་བརྗོད་ལ་ཐལ་སོལ་རྒྱ་མཚོ་ཆེན་པོར་བསྐྱལ་བར་བྱའོ། །དེ་དག་ནི་ཕྱི་དོན་དུ་གཙོ་བོར་སྨོས་པའི་སྦྱིན་སྲེག་གི་ཆོ་ག་སྙིང་པོ་སྟེ། གཞན་དུ་ན་ཚིམ་པ་དྲུག་ལྡན་གྱི་ཚོགས་ཀྱི་འཁོར་ལོ་དང་། རྡོ་རྗེའི་ལུས་ལ་གདོད་ནས་གྲུབ་པའི་ཉེ་བའི་འདུ་བ་ལྷན་སྐྱེས་བདེ་སྟོང་བདུད་རྩིའི་མཆོད་པ་གསང་བའི་སྲེག་བླུག་གི་ཆོ་ག་རྣམས་ཀྱང་སྐབས་སུ་གང་བབས་ཉམས་སུ་ལེན་པར་གཅེས་སོ། །༈གཉིས་པ་རྒྱས་པའི་སྦྱིན་སྲེག་ནི། སྔོན་དངོས་རྗེས་ཀྱི་ཆིངས་ཞི་བའི་སྐབས་ལྟར་ལ། རྒྱལ་པོའི་བང་མཛོད་ཀྱི་ས་ལས་ཐབ་སྟེགས་སེར་པོ་གྲུ་བཞི་ལ་དབུས་དང་ཁ་ཁྱེར་གྲྭ་བཞི་བཅས་ལ་ནོར་བུ་འབར་བས་མཚན་པའི་ཐབ་སེར་པོ་ཚོན་དམར་པོས་བཅད་པར་འབྲས་བུ་ཅན་གྱི་ཤིང་གིས་གྲུ་བཞི་པར་བརྩིགས། ཡམ་ཤིང་ཡང་དེ་མཚུངས་མར་ཁུ་དྲི་བཟང་གིས་སེར་པོར་བསྒྱུར། གཏོར་མ་གྲུ་བཞི་སེར་པོ། སྟར་ཁ་དང་གུར་གུམ་སོགས་མེ་ཏོག་སེར་པོ། དཱུཪྺ་དང་དར་ཟབ་གཙོ་བོར་གྱུར་པའི་རྫས་རྣམས་དང་། སྣོད་གསེར་ལ་སོགས་པའི་སེར་པོ་འབའ་ཞིག་བྱ། དུས་སྟོན་ར་དང་ཉིན་གུང་ལ་བསྔགས། སློབ་དཔོན་ཆས་གོས་སེར་པོ་རིན་པོ་ཆེའི་རྒྱན་དང་བཅས་ཁྲིའུ་སེར་པོའི་སྟེང་བཟང་པོའི་སྟབས་ཀྱིས་ཞལ་བྱང་དུ་ཕྱོགས་པར་བཞུགས། རྒྱལ་པོའི་ཕོ་བྲང་ལས་བྱུང་བའི་མེ་སྦར། འདོད་གསོལ། བདག་དང་སེམས་ཅན་ཐམས་ཅད་ཀྱི་ཚེ་བསོད་དཔལ་འབྱོར་ཐམས་ཅད་པུཥྚིཾ་ཀུ་རུ་ཡེ་སྭཱ་ཧཱ། གྲངས་བསགས་ཀྱི་རྩ་སྔགས་ལ། པུཥྚིཾ་ཀུ་རུ་ཨོཾ། དམིགས་པའི་སྐབས་འོད་ཟེར་སྤྲོ་བསྡུའི་རྗེས། འོད་ཟེར་སེར་པོའི་ཚོགས་གསེར་ཞུན་འཁྱིལ་བ་ལྟ་བུས་རང་དང་བསྲུང་བྱ་ལ་ཕོག་པས་ཚེ་བསོད་བཀྲག་མདངས་ཉམས་རྟོགས་ཡེ་ཤེས་ཡོན་ཏན་ཕྲིན་ལས་ཐམས་ཅད་རྒྱས་པར་བསམས། རྗེས་མེ་རང་ཞིའམ་དྲི་སེར་པོའི་ཆུས་བཏུལ། ཐལ་བ་མཛོད་དུ་གཏེར་བུམ་ལ་བཙལ་ཏེ་སྦ་བར་གསུངས་སོ། ༈གསུམ་པ་དབང་གི་སྦྱིན་སྲེག་ནི། ཡིད་མཐུན་པའི་མཛའ་བཤེས་སམ་སྨད་ཚོང་མ་ཉལ་པོ་བྱས་པའི་མལ་འོག་གི་ས་ལ་སྟེགས་བུ་དམར་པོ་ཟླ་གམ་ལ་དབུས་དང་ཁ་ཁྱེར་གྲྭ་བཞི་བཅས་ལ་ལྕགས་ཀྱུ་ཁ་ཕྱིར་བསྟན་དང་པདྨའི་ཕྲེང་བས་བསྐོར་བ་ཚོན་སེར་པོས་བཅད། ཙནྡན་དམར་པོ་དང་མཛོ་མོ་ཤིང་སོགས་རོ་སྐྱུར་མདོག་དམར་བའི་བུད་ཤིང་ཟླ་གམ་དུ་བརྩིགས། ཡམ་ཤིང་དེ་མཚུངས་དང་མར་ཁུ་ཡང་དམར་པོ་བྱ། གཏོར་མ་ཟླ་གམ་དམར་པོ། ཙནྡན་དམར་པོ་དང་། མཛོ་མོ་ཤིང་སོགས་རོ་སྐྱུར་བ་དང་སྣུམ་པའི་བཟའ་བཅའ་གཙོར་གྱུར་གྱི་རྫས་སྤུངས། སྣོད་དང་རྫས་རྣམས་ཟངས་སོགས་ཁ་དོག་དམར་པོའི་རིགས་བྱ། སློབ་དཔོན་ཆས་གོས་དམར་པོ་བྱེ་རུ་ལ་སོགས་པའི་རྒྱན་དང་བཅས་ཆགས་པའི་སེམས་ཀྱིས་པདྨའི་སྐྱིལ་ཀྲུང་གིས་ཁ་ནུབ་ཏུ་ཕྱོགས་པར་འཁོད། དུས་དཔྱིད་རའམ་ཉི་མྱུར་ལ་བསྔགས། སྨད་ཚོང་མའི་ཁྱིམ་ལས་བྱུང་བའི་མེ་སྦར། འདོད་གསོལ། བདག་སྒྲུབ་པ་པོས་ཁམས་གསུམ་སྣོད་བཅུད་ཐམས་ཅད་ཝ་ཤཾ་ཀུ་རུ་ཡེ་སྭཱ་ཧཱ། གྲངས་བསགས་རྩ་སྔགས་ལ་ཝ་ཤཾ་ཀུ་རུ་ཧྲཱིཿདམིགས་པའི་སྐབས། ཐུགས་བདེ་སྟོང་ཆགས་པ་ཆེན་པོའི་རང་བཞིན་ལས་བྱུང་བའི་འོད་ཟེར་དམར་པོ་ལྕགས་ཀྱུའི་རྡུལ་ཅན་ཉི་ཟེར་ལྟར་འཕྲོས་པས་ཁམས་གསུམ་སྲིད་གསུམ་འཇིག་རྟེན་དང་འཇིག་རྟེན་ལས་འདས་པའི་དཔལ་འབྱོར་དངོས་གྲུབ་རྣམ་ཤེས་ཡེ་ཤེས་ཐམས་ཅད་དབང་དུ་བསྡུས་པར་བསམས། མེ་རང་ཞིའམ་ཆང་དང་ཙནྡན་གྱི་ཆུས་བསང་། ཐལ་བ་རི་རྩེར་རླུང་ལ་ཕྱར་བའོ། །། །བཞི་པ་དྲག་པོའི་སྦྱིན་སྲེག་ནི། རྡོ་རྗེ་ཐབ་ཀྱི་ཁུང་བུ་རུཿཞལ་དུ་གྱུར་པའི་མེ་སྦར་ལཿལྷར་བསྐྱེད་དགྲ་བགེགས་དགུག་ཅིང་གཟིརཿརྡོ་རྗེ་མེ་ཡི་དཔལ་གྱིས་བསྲེགས༔ཞེས་གསུངས་པ་ལྟར་གཏེར་གཞུང་རྩ་བའི་དངོས་བསྟན་ཏེ། ཕུང་སའི་སྟེགས་བུ་གྲུ་གསུམ་པར་རོ་སོལ་བྱུགས་པའི་སྟེང་མ་ཊཾ་གཟུགས་ཀྱི་ལྟོ་བར་གྲུ་གསུམ་གྱི་ལྟེ་བར་འཁོར་ལོ་རྩིབས་བཅུའི་དབུས་ཆོས་འབྱུང་རཾ་གྱིས་མཚན་པ་ལ་ཚེར་མ་ཅན་གྱི་ཤིང་ངམ་དུག་ཤིང་དུག་ཁྲག་གིས་སྤགས་པ་གྲུ་གསུམ་བརྩིགས། ཐབ་ཀྱི་ཟུར་གསུམ་དུ་ཤིང་གསུམ་མཆེ་བའི་ཚུལ་དུ་བསླང་། དྲག་པོའི་ཤིང་གི་ཡམ་ཤིང་དུག་ཁྲག་གིས་ཉུག་པ། ཚ་བ་གསུམ་དང་ཁྲག་སྣ་སྦྱར་བའི་མར་ནག་གི་ཁུ་བ། གཏོར་མ་གྲུ་གསུམ་ནག་པོ། དྲག་པོ་ལ་ཁྱད་པར་གྱི་རྫས་དུག་ཤོག་ལ་དགྲ་བགེགས་ཀྱི་རཱུ་པ་མིང་རུས་བླ་དྭགས་གནས་ཡིག་དང་བཅས་པ། ཤ་སྣ་བག་ཕྱེ་དང་བསྲེས་པའི་རིལ་བུ་མིང་རུས་ཅན། སྦལ་སྦྲུལ་ཉ་ཁྱིལ་སོགས་པའི་ཤ་དུག་སྣ་དང་བསྲེས་པའི་རིལ་བུ། ལྕགས་ཟངས་རྡོའི་ཕྱེ་མ། ཏིལ་དང་ཡུངས་དཀར་ཚབ་གསུམ་སོགས་ཕྱོགས་གཅིག་ཏུ་བསྡུས་པ་རྣམས་བསགས། སྣོད་དང་རྫས་སོགས་ཀྱང་ཁ་དོག་ནག་པོ་དབྱིབས་གྲུ་གསུམ་པ་ཤ་སྟག་བྱ། སློབ་དཔོན་ཆས་གོས་ནག་པོ་རུས་པའི་རྒྱན་དང་ལྡན་པས་དུར་ཁྲོད་ཀྱི་རས་ལ་ཞིང་ཆེན་བྲིས་པའི་སྟེང་ཁ་ལྷོར་བལྟ་བས་འཁོད། ཁྲོས་པའི་སེམས་དང་ལྡན་པས་ཙོག་པུར་འདུག །གདོལ་བཤན་དམེ་ཡུགས་ཀྱི་ལག་ནས་བྱུང་བའི་མེ་སྦར། འདོད་གསོལ། གནོད་བྱེད་དགྲ་བགེགས་བྱད་མ་རྦོད་གཏོང་དང་བཅས་པ་ཐམས་ཅད་མཱ་ར་ཡ་ཕཊ། ཅེས་སྦྱར། འདས་པའི་མེ་ལྷ་མཆོད་པའི་བྱོན་སྐྱེམས། ཡམ་ཤིང་། མར་ཁུ་བཅས་ཞི་བའི་སྐབས་ལྟར་སོང་བ་དང་། ལིངྒ་རྣམས་མདུན་དུ་བཞག་ལ་ཧོམ་བསྐྱེད་འགུགས་པ་བཅས་གཏོར་བཟློག་སྐབས་ལྟར་དང་། དངོས་གཞིའི་བསྒྲལ་བ། ཧཱུྃ་བྷྱོཿབསྟན་དང་འགྲོ་ལ་འཚེ་བ་ཡི༔སོགས་མཐར་དྲག་སྔགས་སྤུ་གྲི་མཱ་ར་ཡའི་ཤམས་ཅན་གྱིས་བསྒྲལ། ཧཱུྃ་བྷྱོཿགནམ་ས་ཙམ་གྱི་ཞལ་གདངས་སོགས་བསྟབས་པ་བྱ་བའམ། མ་བྱས་ཀྱང་ཆོག །ལིང་རོ་དྲག་རྫས་ལ་བསྲེས་ཏེ། བསང་སྦྱངས། ཐོད་སྣོད་ཡངས་ཤིང་རྒྱ་ཆེ་བར་ངོ་བོ་ཡེ་ཤེས་ཀྱི་བདུད་རྩི། རྣམ་པ་དྲག་པོའི་མཆོད་རྫས་བསམ་མི་ཁྱབ་པར་གྱུར། ཞེས་བྱིན་གྱིས་བརླབས་པ་སློབ་དཔོན་གྱི་ལག་གཡས་པར་བཟུང་། གཡོན་པས་སྡིག་མཛུབ་ཁ་ཕྱིར་བསྟན་གྱིས་ཕུལ་ལ། ཧཱུྃ། །སངས་རྒྱས་བསྟན་པ་བཤིགས་པ་དང་། །དཀོན་མཆོག་སྐུ་དགྲ་དབེན་རྩ་འཇོམས། །ཆོས་ཁྲིམས་འདྲལ་དང་སློབ་དཔོན་དགྲ། །རྣལ་འབྱོར་འཇོམས་པ་ལ་སོགས་པ། །བསད་དང་དབབ་དང་ནད་ངན་གྱིས། །ཅི་ནས་བརླག་པར་ཁྱེད་ཀྱིས་གྱིས། །ཞེས་དང་རྩ་སྔགས་ལ། དགྲ་བགེགས་མཱ་ར་ཡ་ཕཊ་སྦྱར་བ་གྲངས་བསགས། དམིགས་པ། དགྱེས་པ་ཆེན་པོའི་རང་བཞིན་ལས་བྱུང་བའི་འོད་ཟེར་མེ་དཔུང་ཁྲོ་ཚོགས་མཚོན་ཆའི་ཚྭ་ཚྭ་དུས་མཐའི་མེ་རླུང་ལྟར་འབར་ཞིང་འཕྲོ་བས་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ལ་གནོད་ཅིང་འཚེ་བའི་དགྲ་བགེགས་བྱད་མ་དམ་སྲིའི་སྡེ་དང་བཅས་པ་ཐལ་བའི་རྡུལ་བཞིན་དུ་མིང་གི་ལྷག་མ་མེད་པར་བརླག་པའི་དྲག་པོ་མངོན་སྤྱོད་ཀྱི་ཕྲིན་ལས་མཛད་པར་བསམས། མེ་དུག་ཁྲག་གི་ཆུས་བསད། ཐལ་བ་ལམ་གྱི་བཞི་མདོར་མནན་ལ་རྟ་བྲོ་བྱ། ལས་ཐམས་ཅད་ལ་ལས་རྗེས་མི་མངོན་པར་བསྡུའོ། །དེ་ལྟར་སྐབས་སུ་གང་བབས་ཀྱི་འདོན་ཚིག་བསྒྱུར་འོས་ཅན་རྣམས་མཆན་གྱིས་གསལ་བ་ལྟར་བྱས་པས་གྲུབ། ཚུལ་འདིས་ནི་ལས་ཐམས་ཅད་ཐོགས་མེད་དུ་འགྲུབ་པར་བྱེད་པ་རྣོ་ལ་ངར་གྱིས་བཏགས་པ་དང་འདྲ་བར་གསུངས་པས་བསྙེན་སྒྲུབ་ཀྱི་ཁ་སྐོར་སོགས་ལ་གཅེས་ཤིང་། དེར་མ་ཟད་སྤྱིའི་ཁོག་དབུབ་འདི་ལྟར་ལ་སྐབས་སུ་བབས་པའི་ལྷ་སྔགས་ཁ་བསྒྱུར་བྱས་པས་གཤིན་རྗེ་སོགས་སྙན་བརྒྱུད་ཀྱི་རིགས་སྤྱི་ལའང་སྦྱར་བས་དོན་གྲུབ་པའོ། །། །སླར་སྨྲས་པ། །མཐུ་སྟོབས་དུས་མཐའི་ཞུགས་ལྕེ་རབ་རྣོ་བས། །མ་རུངས་བདུད་དགྲའི་ཚོགས་རྣམས་སྐད་ཅིག་བསྲེགས། །མཆོག་གི་ཡེ་ཤེས་མེ་ཡི་འོད་ཟེར་གྱིས། །ཞི་དང་རྒྱས་མཛད་དབང་གི་ལས་ལ་མྱུར། །དེ་ལྟའི་སྲེག་བླུགས་ཆོ་གའི་ལས་རིམ་འདི། །སྤེལ་བས་བདག་རྟོག་ཡེ་ཤེས་མེས་བསྲེགས་ནས། །བདག་མེད་རིག་སྟོང་བཛྲ་ཀུ་མཱ་རའི། །གོ་འཕང་ཚེ་འདི་ཉིད་ལ་མངོན་བྱེད་ཤོག །ཅེས་པའང་ནང་ཆེན་ཚེས་བཅུ་བླ་མ་བློ་གྲོས་མཆོག་ལྡན་གྱིས་བསྐུལ་ངོར་ཆོས་ཀྱི་བློ་གྲོས་དང་། བཀྲ་ཤིས་དཔལ་འབྱོར་ཟུང་གིས་ལེགས་པར་དཔྱད་ནས་ཤིན་ཏུ་མདོར་བསྡུས་སུ་བྲིས་པ་དགེ་ལེགས་མཆོག་ཏུ་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ། །ཨོཾ་སྭསྟི། །ལས་རྣམས་མྱུར་དུ་འགྲུབ་བྱེད་པའི། །རྡོ་རྗེ་ཡེ་ཤེས་མེ་བོ་ཆེས། །ཀུན་ཏུ་རྟོག་པའི་ཚང་ཚིང་བསྲེག །དངོས་གྲུབ་དཔལ་སྟེར་འདི་ལོངས་ཤིག །བཀྲ་ཤིས་ཞལ་དྲོའོ། །དགེའོ། །དགེའོ། །དགེའོ། །། །

[edit]

@#/__/snyan brgyud phur pa'i gnad tig gi las bzhi'i sbyin sreg mdor bsdus phrin las myur 'grub ces bya ba bzhugs so/__/ oM swa sti/__/'jigs rung zhal gdangs mi bzad mche ba gtsigs/__/gtum chen rab 'bar rngams pa'i gad rgyangs sgrogs/__/bcom ldan srid gsum sgrol byed ku mA rar/__/btud de las bzhi'i sreg blugs cho ga spel/__/de la 'dir rdo rje phur ba'i bsnyen sgrub mthar son pa'i rnal 'byor pas phrin las myur du 'grub pa'i slad du rno myur me yi cho ga bya bar 'dod pas 'di ltar 'jug par bya ste/__de la'ang zhi rgyas dbang drag gi las kyi dbye bas bzhi yi/__dang po la sbyor dngos rjes gsum las/__dang po ni/__sgrub mchod sogs kyi skabs thun mtshams gang bder lha yi nga rgyal la gnas pa dang /__sbyin sreg kho na'i skabs bdag bskyed kyi rnal 'byor bsdu ldangs bcas sngon du 'gro bas/__gang du bya ba'i gzhi der dkar gtor bshams la/__byin brlab bsngo ba bcas las byang phrin las rnam par rol pa'i dga' ston ltar bya/__rtsa sngags kI la ya brgya rtsa dang /__shU n+ya tA'i sngags brjod de chos nyid kyi don dran par byas pas sa gzhi las rung du bya'o/__/der bkra shis pa'i sa las stegs bu bcos te thab khung zlum po pad+ma 'dab brgyad kyi lte bar rdo rje/__kha khyer la rdo rje'i phreng ba/__grwa bzhir zla phyed rdo rjes mtshan pa/__kha dog dkar po bcad tshon dmar skyas bris pa la 'om bu ba dang lcang ma sogs 'o ma can gyi shing gis khru gang tsam zlum por brtsigs/__shar lhor me tshang bca'/__slob dpon gyi g.yas su stegs bu khebs dkar pos dgab pa'i steng bdud rtsi can gyi yam shing sor bcu gnyis pa mar khus nyug pa/__mngar gsum dang sbyar ba'i mar khu/__til/__zas mchog__/so ba/__'bras/__nas/__sran ma/__gro/__dUrba/__ku sha/__gzhan yang sman sna 'bru sna rin po che sna tshogs me tog dkar po dar zab sogs ci 'byor pa'i bsreg rdzas rdzas spungs can dang /__gos zung /__so rtsi bcas/__'das ma 'das gnyis rim du dgod/__g.yon du stegs la gtor ma dkar zlum che chung gnyis/__sman raka bcas dang /__nyer spyod cha gnyis sogs bshams/__mdun du me yol la gangs ri dang wa~M yig bris pa/__rdor dril/__dgang blugs/__las bum/__las mthun gyi me dar/__ku sha'i chun po brgyad/__rlung g.yab sogs 'og tu dgos pa'i yo byad rigs 'du bya/__de thams cad kyang snod dang kha dog thams cad dkar po 'ba' zhig bya/__dus rab bzhi dang nam langs la slob dpon chas gos rgyan dkar po dang bcas kha shar du phyogs pas 'jam pa'i stan la sems dpa'i skyil krung gis 'khod la/__gnyis pa dngos gzhi la gsum/__'jig rten pa'i me lha mchod pa/__dkyil 'khor gyi 'khor lo mchod pa/__me lhar gtang rag 'bul ba'o/__/dang po ni/__rab gnas dang sgrub mchod sogs la dkyil 'khor gyi gtso bo las rang mar me gcig las gnyis mched du zhal gcig phyag gnyis pa'i rnam par ldang ba dang /__sbyin sreg kho na'i skabs bdag nyid lha yi rnal 'byor bzlas pa bcas grub pa'i rjes 'di la 'jug__/bdud rtsi 'khyil pa'i sngags kyis las bum gyi chu byin gyis brlabs/__rdo dril bsang sbyang /__hU~M/__/thabs shes zung 'jug chos nyid mtshon/__/'das dus 'gro rnams sad pa dang /__/'gro rnams smin par bya ba'i phyir/__/rdo rje gsor zhing dril bu dkrol/__/oM badz+ra gaN+De hU~M AHoM sarba ta thA ga ta a nu rA ga Na dz+nyA na badz+ra swa b+hA wa At+ma ko\u0f85 haM/__zhes brjod la rdo rje gsor/__dril bu dkrol/__'khyud rgya bya/__yo byad rnams la dmigs te/__bsang sbyang /__stong pa'i ngang las mchod rdzas dang bsreg rdzas rnams rang rang gi ming yig dang po thig les brgyan pa 'od du zhu ba las byung ba'i rdzas so so'i dngos po bdud rtsi'i rang bzhin can zad mi shes par gyur/__oM badz+ra ar+g+haM sogs dang /__oM hU~M trA~M hrIHAHmU~M lA~M mA~M pA~M tA~M:sarba dz+nyA na pany+tsa a mr-i ta rak+ta ba liM ta ga Na tsakra b+ho d+hi tsit+ta AHhU~M/__zhes brjod/__de nas thab bsang sbyang /__chos rnams skye med rnam kun mchog ldan dbyings/__/sna tshogs sgyu 'phrul 'gags med rdo rje'i sprin/__/rgyas pa'i/__dbang gi/__drag po'i/__zhes bsgyur/__zhi ba'i phrin las yongs rdzogs thab kyi dbus/__/gos dkar DA ki'i ngo bor ro gcig pa'i/__/chags bral bde ba chen po'i me dpung 'bar/__/oM sarba dz+nyA na dz+wa la raM/__zhes dge 'dun gyi thab las byung ba'i me sbar/__las bum gyi chus bsang la/__oM/__/ku sha 'di ni gtsang zhing dge/__sa las skyes pa'i snying po mchog__/dkon mchog gsum gyi dag byed yin/__/tshangs pa'i yang dag byed pa ste/__/de yis bdag cag thams cad la/__/bgegs rnams thams cad zhi bar mdzod/__/swA hA/__zhes lan brgyad brjod la shar nas brtsams phyogs mtshams rnams su bkrams/__de dbus ra~M yig yongs gyur me lha ni/__/rgyas pa'i/__dbang gi/__drag po'i/__zhes bsgyur/__/zhi ba'i rgyan rdzogs 'od zer phreng bas dkrigs/__/zhal gcig phyag gnyis bgrang phreng gan+d+he bsnams/__/sku gsung thugs la rdo rje 'bru gsum mtshan/__/de las 'od 'phros dam tshig spyan drangs bstim/__/spyan 'dren pa ni/__dbyu gu rtse gsum pa'i rgyas me dar g.yab la/__hU~M/__/dad pa dang ni dam tshig gis/__/tshur gshegs tshur gshegs 'byung po che/__/me lha drang srong bram ze mchog__/'di nyid du ni gshegs su gsol/__/ag+ni rA dza r-i Shi badz+ra sa ma ya dzaHdzaHhU~M ba~M hoHar+g+haM sogs kyis nyer spyod phul/__bstod pa ni/__hU~M/__/'jig rten dbang phyug tshangs dbang mgon gyi sras/__/me lha'i rgyal po DAk+kis dbang bskur ba/__/shes rab mchog gis nyon mongs thams cad sreg__/'jig byed me lha nyid la rnam par 'dud/__/byon skyems ni/__me lha zhal gdangs pa'i ljags rdo rje'i sbu gus sreg blug gi rgyun drangs te gsol bar bsams la/__oM ag+na ye swA hA/__zhes mar khu blugs gzar bdun gyis bkang ba'i dgang blug kha sbyar la/__oM ag+na ye bdag dang sems can thams cad kyi sdig sgrib nyes ltung thams cad shAn+tiM ku ru ye swA hA/__zhes 'dod gsol sbyar ba tshan gsum gyis phul/__de nas rdzas gzhan lag gis bzung du btub pa rnams mtheb srin gyis dbul/__gzhan rnams blugs gzar gyis phul te sngags ni/__yam shing la/__oM b+ho d+hi b+hr-ik+ShA ya swA hA/__mar khu/__oM ag+na ye swA hA/__rdzas spungs/__oM ag+ni de wa r-i Shi ha bya ka bya shAn+tiM ku ru ye swA hA/__de ltar bdun la sogs pa'i rjes 'dod gsol sbyar bas phul/__rdzas rdzogs pa dang sngar bzhin mchod bstod bya/__yungs kar thab tu phul la/__na mo/__rig pa'i rgyal po khyod kyis sreg blug gi rdzas rnams lha yi zhal du dbul ba dang /__ye shes kyi mer byin gyis brlabs nas zhi ba'i phrin las thams cad 'grub par mdzad du gsol/__badz+ra muHye shes pa thab kyi shar lhor gshegs/__dam tshig pa 'bar ba'i rnam par gyur/__gnyis pa ni/__thab la las chus bran/__bsang sbyang /__a/__/skye med dbyings kyi cho 'phrul las/__/'gags med sgyu 'phrul rdo rje'i gar/__/zhi?~X ba'i thab khung mtshan rdzogs pa/__/ye shes me lce 'bar ba'i dbus/__/klong lnga'i dwangs ma 'byung rim steng /__/sogs nas bstod pa'i bar phrin las rgyas bsdus gang 'os rgyasa?~X/__dbang /__drag__/sbyar/__sgrub mchod la sogs pa'i skabs/__gnam lcags tsakra rtsibs bcu'i dbus:zhes pa'i mtshams las byang gi spyan 'dren brjod la las rdor gyis tshom bu spyan drangs/__slob dpon la g.yas su bskor te g.yon nas phul bas rtsa sngags brjod la me tog thab tu dor ba las/__dbus su ma bcos rtsa ba'i lha/__/sogs kyis lha tshogs yongs rdzogs bskyed nas las rim rnams bya dgos so/__/gang ltar yang bstod pa grub pa dang dgang blugs kha sbyar la/__dkyil 'khor pa'i lha tshogs rnams kyi ljags rdo rje'i sbu gu can gyis sreg blugs kyi bdud rtsi'i rgyun drangs nas gsol bar bsam/__sgrub sngags lan bdun dang bcas mar khu blugs gzar bdun gyis bkang ba phul rjes/__rnal 'byor pa bdag dang yon gyi bdag po'i dam tshig nyams chag thams cad shAn+tiM ku ru ye swA hA/__zhes 'dod gsol sbyar ba tshan gsum gyis byon skyems phul/__rtsa sngags la/__shAn+tiM ku ru ye swA hA/__zhes btags pas yam shing /__mar khu/__rdzas spungs rnams brgya rtsa sogs dang /__bsnyen sgrub kyi kha skong la til kho na bsnyen grangs gang them de'i bcu cha phul/__dmigs pa ni/__dkyil 'khor gyi lha tshogs thams cad la sreg blug gi mchod pa phul bas thugs dgyes pa chen po'i rang bzhin las byung ba'i 'od zer dkar pos 'jig rten gyi khams thams cad khyab/__sangs rgyas thams cad la mnyes pa'i mchod pa phul/__sems can ma lus pa'i sgrib gnyis rgyu dang bcas pa zhi bar mdzad par bsam/__mthar rdzas thams cad rdzogs pa dang /__me tog dkar po thab tu phul la/__ye shes me dang gnyis med 'bar ba yi/__/phyag rgya chen po bsreg bya za ba'i zhal/__/sreg rdzas bdud rtsi'i mchod pas mnyes gyur nas/__/zhi ba'i phrin las lhun gyis grub par mdzod/__/rgyas pa'i/__dbang gi/__mngon spyod phrin las zhes bsgyur/__ces lan gsum gyis phrin las gsol/__gang la reg na 'jam pa'i lha rdzas kyang /__/dbang po'i tshon gyis bsgyur ba'i smig rgyu yis/__/bar snang za 'og bcal du bkrams pa ltar/__/'bar bas 'gro kun bzod pa'i gos thob shog__/oM badz+ra was+t+ra ye swA hA/__zhes dang /__oM badz+ra taM bu le ye swA hA/__zhes pas rdo thal med pa'i so rtsi 'jam po phul/__gtang rag gi mchod bstod mdor bsdus bya/__'jigs pa brgyad sogs zhi ba'i dngos grub stsol/__/'byor pa drug ldan rgyas pa'i dngos grub stsol/__/mos pa rnam bzhi dbang gi dngos grub stsol/__/dgra bgegs tshar gcod drag po'i dngos grub stsol/__/zhes bskul la/__rtsa sngags mthar kA ya wAk+ka tsit+ta sarba sid+d+hi pha la hoHzhes dngos grub kyang blangs/__dkyil 'khor pa'i lha tshogs sogs gong ltar gshegs skyems dgang blugs tshan gsum phul/__ma 'byor pa dang nyams pa dang /__/sogs kyi mthar yig brgyas nongs pa bshags/__oM/__khyed kyis sems can sogs mthar/__badz+ra muHsa ye shes pa gshegs su gsol/__sgrub mchod skabs/__dkyil 'khor pa'i lha tshogs dgyes pa chen pos sgrub pa'i dkyil 'khor dang gnyis su med par gshegs par bsams la tshom bu'i maN+Dal sgrub khang du spyan drangs/__gsum pa ni/__bsang sbyangs/__dam tshig me lha rang bzhin yongs su rdzogs par gsal ba'i gnas gsum las 'od zer 'phros pas ye shes pa badz+ra sa mA ya dzaHdzaHhU~M ba~M hoHbyon skyems dgang blugs gsum snga ma ltar phul/__oM bi ma la ag+na ye swA hA/__lan gsum/__gos zung dang so rtsi phul/__me gsos te gtang rag gi tshul du rdzas lhag ma rnams so so'i sngags mthar/__oM ag+na ye r-i Shi rA dzA ya/__bdag cag dpon slob yon mchod thams cad kyi cho ga lhag chad 'gal 'khrul nyams chags nyes ltung thams cad shAn+tiM ku ru ye swA hA/__zhes pas phul/__snga ma ltar mchod cing bstod/__a kA ros gtor ma bsngos la/__mchod sbyin gtor ma sogs kyis phrin las bcol/__nongs pa bshags/__gshegs su gsol ba ni/__don gnyis sgrub pa'i me yi lha/__/rang rang yul du gshegs nas kyang /__/slar yang phrin las bsgrub pa'i phyir/__/dus su 'byon par mdzad du gsol/__/badz+ra muHsa ye shes pa gshegs/__dam tshig pa lte ba'i a thung la thim/__dge ba bsngo zhing smon lam gdab pa shis brjod bcas las byang ltar byas pas grub pa'o/__/zhi ba la me rang zhir 'jog__/long khyab kyis ma khoms na 'o ma'i chus btul la/__a kA ro brjod la thal sol rgya mtsho chen por bskyal bar bya'o/__/de dag ni phyi don du gtso bor smos pa'i sbyin sreg gi cho ga snying po ste/__gzhan du na tshim pa drug ldan gyi tshogs kyi 'khor lo dang /__rdo rje'i lus la gdod nas grub pa'i nye ba'i 'du ba lhan skyes bde stong bdud rtsi'i mchod pa gsang ba'i sreg blug gi cho ga rnams kyang skabs su gang babs nyams su len par gces so/__/!gnyis pa rgyas pa'i sbyin sreg ni/__sngon dngos rjes kyi chings zhi ba'i skabs ltar la/__rgyal po'i bang mdzod kyi sa las thab stegs ser po gru bzhi la dbus dang kha khyer grwa bzhi bcas la nor bu 'bar bas mtshan pa'i thab ser po tshon dmar pos bcad par 'bras bu can gyi shing gis gru bzhi par brtsigs/__yam shing yang de mtshungs mar khu dri bzang gis ser por bsgyur/__gtor ma gru bzhi ser po/__star kha dang gur gum sogs me tog ser po/__dUR+Wa dang dar zab gtso bor gyur pa'i rdzas rnams dang /__snod gser la sogs pa'i ser po 'ba' zhig bya/__dus ston ra dang nyin gung la bsngags/__slob dpon chas gos ser po rin po che'i rgyan dang bcas khri'u ser po'i steng bzang po'i stabs kyis zhal byang du phyogs par bzhugs/__rgyal po'i pho brang las byung ba'i me sbar/__'dod gsol/__bdag dang sems can thams cad kyi tshe bsod dpal 'byor thams cad puSh+TiM ku ru ye swA hA/__grangs bsags kyi rtsa sngags la/__puSh+TiM ku ru oM/__dmigs pa'i skabs 'od zer spro bsdu'i rjes/__'od zer ser po'i tshogs gser zhun 'khyil ba lta bus rang dang bsrung bya la phog pas tshe bsod bkrag mdangs nyams rtogs ye shes yon tan phrin las thams cad rgyas par bsams/__rjes me rang zhi'am dri ser po'i chus btul/__thal ba mdzod du gter bum la btsal te sba bar gsungs so/__!gsum pa dbang gi sbyin sreg ni/__yid mthun pa'i mdza' bshes sam smad tshong ma nyal po byas pa'i mal 'og gi sa la stegs bu dmar po zla gam la dbus dang kha khyer grwa bzhi bcas la lcags kyu kha phyir bstan dang pad+ma'i phreng bas bskor ba tshon ser pos bcad/__tsan+dan dmar po dang mdzo mo shing sogs ro skyur mdog dmar ba'i bud shing zla gam du brtsigs/__yam shing de mtshungs dang mar khu yang dmar po bya/__gtor ma zla gam dmar po/__tsan+dan dmar po dang /__mdzo mo shing sogs ro skyur ba dang snum pa'i bza' bca' gtsor gyur gyi rdzas spungs/__snod dang rdzas rnams zangs sogs kha dog dmar po'i rigs bya/__slob dpon chas gos dmar po bye ru la sogs pa'i rgyan dang bcas chags pa'i sems kyis pad+ma'i skyil krung gis kha nub tu phyogs par 'khod/__dus dpyid ra'am nyi myur la bsngags/__smad tshong ma'i khyim las byung ba'i me sbar/__'dod gsol/__bdag sgrub pa pos khams gsum snod bcud thams cad wa shaM ku ru ye swA hA/__grangs bsags rtsa sngags la wa shaM ku ru hrIHdmigs pa'i skabs/__thugs bde stong chags pa chen po'i rang bzhin las byung ba'i 'od zer dmar po lcags kyu'i rdul can nyi zer ltar 'phros pas khams gsum srid gsum 'jig rten dang 'jig rten las 'das pa'i dpal 'byor dngos grub rnam shes ye shes thams cad dbang du bsdus par bsams/__me rang zhi'am chang dang tsan+dan gyi chus bsang /__thal ba ri rtser rlung la phyar ba'o/__//__/bzhi pa drag po'i sbyin sreg ni/__rdo rje thab kyi khung bu ruHzhal du gyur pa'i me sbar laHlhar bskyed dgra bgegs dgug cing gziraHrdo rje me yi dpal gyis bsregs:zhes gsungs pa ltar gter gzhung rtsa ba'i dngos bstan te/__phung sa'i stegs bu gru gsum par ro sol byugs pa'i steng ma TaM gzugs kyi lto bar gru gsum gyi lte bar 'khor lo rtsibs bcu'i dbus chos 'byung raM gyis mtshan pa la tsher ma can gyi shing ngam dug shing dug khrag gis spags pa gru gsum brtsigs/__thab kyi zur gsum du shing gsum mche ba'i tshul du bslang /__drag po'i shing gi yam shing dug khrag gis nyug pa/__tsha ba gsum dang khrag sna sbyar ba'i mar nag gi khu ba/__gtor ma gru gsum nag po/__drag po la khyad par gyi rdzas dug shog la dgra bgegs kyi rU pa ming rus bla dwags gnas yig dang bcas pa/__sha sna bag phye dang bsres pa'i ril bu ming rus can/__sbal sbrul nya khyil sogs pa'i sha dug sna dang bsres pa'i ril bu/__lcags zangs rdo'i phye ma/__til dang yungs dkar tshab gsum sogs phyogs gcig tu bsdus pa rnams bsags/__snod dang rdzas sogs kyang kha dog nag po dbyibs gru gsum pa sha stag bya/__slob dpon chas gos nag po rus pa'i rgyan dang ldan pas dur khrod kyi ras la zhing chen bris pa'i steng kha lhor blta bas 'khod/__khros pa'i sems dang ldan pas tsog pur 'dug__/gdol bshan dme yugs kyi lag nas byung ba'i me sbar/__'dod gsol/__gnod byed dgra bgegs byad ma rbod gtong dang bcas pa thams cad mA ra ya phaT/__ces sbyar/__'das pa'i me lha mchod pa'i byon skyems/__yam shing /__mar khu bcas zhi ba'i skabs ltar song ba dang /__ling+ga rnams mdun du bzhag la hom bskyed 'gugs pa bcas gtor bzlog skabs ltar dang /__dngos gzhi'i bsgral ba/__hU~M b+h+yoHbstan dang 'gro la 'tshe ba yi:sogs mthar drag sngags spu gri mA ra ya'i shams can gyis bsgral/__hU~M b+h+yoHgnam sa tsam gyi zhal gdangs sogs bstabs pa bya ba'am/__ma byas kyang chog__/ling ro drag rdzas la bsres te/__bsang sbyangs/__thod snod yangs shing rgya che bar ngo bo ye shes kyi bdud rtsi/__rnam pa drag po'i mchod rdzas bsam mi khyab par gyur/__zhes byin gyis brlabs pa slob dpon gyi lag g.yas par bzung /__g.yon pas sdig mdzub kha phyir bstan gyis phul la/__hU~M/__/sangs rgyas bstan pa bshigs pa dang /__/dkon mchog sku dgra dben rtsa 'joms/__/chos khrims 'dral dang slob dpon dgra/__/rnal 'byor 'joms pa la sogs pa/__/bsad dang dbab dang nad ngan gyis/__/ci nas brlag par khyed kyis gyis/__/zhes dang rtsa sngags la/__dgra bgegs mA ra ya phaT sbyar ba grangs bsags/__dmigs pa/__dgyes pa chen po'i rang bzhin las byung ba'i 'od zer me dpung khro tshogs mtshon cha'i tshwa tshwa dus mtha'i me rlung ltar 'bar zhing 'phro bas bdag cag dpon slob yon mchod 'khor dang bcas pa la gnod cing 'tshe ba'i dgra bgegs byad ma dam sri'i sde dang bcas pa thal ba'i rdul bzhin du ming gi lhag ma med par brlag pa'i drag po mngon spyod kyi phrin las mdzad par bsams/__me dug khrag gi chus bsad/__thal ba lam gyi bzhi mdor mnan la rta bro bya/__las thams cad la las rjes mi mngon par bsdu'o/__/de ltar skabs su gang babs kyi 'don tshig bsgyur 'os can rnams mchan gyis gsal ba ltar byas pas grub/__tshul 'dis ni las thams cad thogs med du 'grub par byed pa rno la ngar gyis btags pa dang 'dra bar gsungs pas bsnyen sgrub kyi kha skor sogs la gces shing /__der ma zad spyi'i khog dbub 'di ltar la skabs su babs pa'i lha sngags kha bsgyur byas pas gshin rje sogs snyan brgyud kyi rigs spyi la'ang sbyar bas don grub pa'o/__//__/slar smras pa/__/mthu stobs dus mtha'i zhugs lce rab rno bas/__/ma rungs bdud dgra'i tshogs rnams skad cig bsregs/__/mchog gi ye shes me yi 'od zer gyis/__/zhi dang rgyas mdzad dbang gi las la myur/__/de lta'i sreg blugs cho ga'i las rim 'di/__/spel bas bdag rtog ye shes mes bsregs nas/__/bdag med rig stong badz+ra ku mA ra'i/__/go 'phang tshe 'di nyid la mngon byed shog__/ces pa'ang nang chen tshes bcu bla ma blo gros mchog ldan gyis bskul ngor chos kyi blo gros dang /__bkra shis dpal 'byor zung gis legs par dpyad nas shin tu mdor bsdus su bris pa dge legs mchog tu gyur cig__/sarba dA ka l+yA NaM b+ha ba tu/__/oM swasti/__/las rnams myur du 'grub byed pa'i/__/rdo rje ye shes me bo ches/__/kun tu rtog pa'i tshang tshing bsreg__/dngos grub dpal ster 'di longs shig__/bkra shis zhal dro'o/__/dge'o/__/dge'o/__/dge'o/__//__/