JKCL-KABUM-04-NGA-029

🚧 This website is under continued development. We appreciate your patience!

Previous Text Back to Volume PageNext Text

Wylie title	'jam dbyangs bla ma'i sgrub thabs ye shes snang gter
Location	chos kyi blo gros bka' 'bum Volume 4, Text 29, Pages 165-182 (Folios 1a1 to 9b4)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. 'jam dbyangs bla ma'i sgrub thabs ye shes snang gter. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 4: 165-182. Bir, H.P.: Khyentse Labrang, 2012.
Genre	Feast Offering - tshogs mchod - tshogs kyi 'khor lo  ·  Guru Yoga Texts - bla ma'i rnal 'byor
Deity	'jam dpal dbyangs
Colophon	ཞེས་པའང་དགེ་སློང་འཚོ་བྱེད་ཚེ་རིང་ཕུན་ཚོགས་ཀྱིས་ནན་ཏན་དུ་བསྐུལ་བ་དོན་ཡོད་པའི་ཕྱིར་དུ་༧འཇམ་དབྱངས་ཆོས་ཀྱི་བློ་གྲོས་པས་བླ་མ་གོང་མའི་གསུང་ལས་བཏུས་ཏེ་བཀོད་པ་འདིས་ཀྱང་ཚོགས་གཉིས་རྒྱ་ཆེན་པོ་འཕེལ་བའི་རྒྱུར་གྱུར་ཅིག །སརྦ་ཛ་ག་ཏཾ།།
	zhes pa'ang dge slong 'tsho byed tshe ring phun tshogs kyis nan tan du bskul ba don yod pa'i phyir du 7'jam dbyangs chos kyi blo gros pas bla ma gong ma'i gsung las btus te bkod pa 'dis kyang tshogs gnyis rgya chen po 'phel ba'i rgyur gyur cig__/sarba dza ga taM//

1 Texts in this Section (sde tshan or chos tshan)

165-182	འཇམ་དབྱངས་བླ་མའི་སྒྲུབ་ཐབས་ཡེ་ཤེས་སྣང་གཏེར། 'jam dbyangs bla ma'i sgrub thabs ye shes snang gter Guru Yoga Texts - bla ma'i rnal 'byor   ·   Feast Offering - tshogs mchod - tshogs kyi 'khor lo	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༄༅། །འཇམ་དབྱངས་བླ་མའི་སྒྲུབ་ཐབས་ཡེ་ཤེས་སྣང་གཏེར་བཞུགས། །

བླ་མ་འཇམ་པའི་དབྱངས་ལ་འདུད། །དབང་ཐོབ་ལ་གནས་རྣལ་འབྱོར་པས། །སྐུ་གསུང་ཐུགས་ཀྱི་རྟེན་བཀྲམ་སྟེ། །བདེ་བའི་སྟན་ལ་རླུང་རོ་བསལ། །ངེས་འབྱུང་བྱང་སེམས་གསལ་བཏབ་ནས། །སྔོན་འགྲོ་སྐྱབས་སེམས་ཚོགས་བསགས་བྱ། ན་མོ། དཀོན་མཆོག་གསུམ་གྱི་ངོ་བོ་ཉིད། །འཇམ་དབྱངས་བླ་མར་སྐྱབས་སུ་མཆི། །འགྲོ་རྣམས་མ་རིག་ལས་བསྒྲལ་ཕྱིར། །ཟབ་མོའི་རྣལ་འབྱོར་བསྒོམ་པར་བགྱི། །ལན་གསུམ། རྡོ་རྗེ་སློབ་དཔོན་སངས་རྒྱས་དཔལ། སོགས་ཀྱི་རྒྱུན་བཤགས་བྱ། བགེགས་ལ་གཏོར་མ་སྦྱིན་ཅིང་བསྐྲད། །བསྲུང་བའི་འཁོར་ལོས་ཕྱོགས་མཚམས་བཅིངས། ཧཱུྃ་ཧྲཱིཿགཉིས་སྣང་འཁྲུལ་པའི་གདོན་བགེགས་ཚོགས། །གཏོར་མ་འདི་ལོངས་རང་གནས་དེང་། །གཉིས་མེད་ཡེ་ཤེས་སྲུང་བའི་གུར། །ཕྱོགས་མཚམས་ཀུན་ཏུ་གཏམས་པར་གྱུར། །ཨོཾ་བཛྲ་རཀྵ་རཀྵ་ཧཱུྃ་བྷྲཱུྃ། བྱིན་ཆེན་འབེབས་ཅིང་མཆོད་རྫས་བརླབས། ཧཱུྃ་ཧྲཱིཿསྐུ་གསུམ་ཞིང་ན་བཞུགས་པ་ཡི། །རྩ་གསུམ་རྒྱ་མཚོས་བྱིན་ཆེན་ཕོབས། །སྣོད་བཅུད་དག་པའི་ཞིང་དུ་བསྒྱུར། །འདོད་ཡོན་མཆོད་སྤྲིན་མཁའ་ཁྱབ་སྤེལ། །བཛྲ་ས་མ་ཡ་ཨ་བེ་ཤ་ཡ་ཨ་ཨཿ ཨོཾ་ཨཱཿཧཱུྃ་སརྦ་པཱུ་ཛ་མེ་གྷ་ས་མ་ཡེ་ཨ་ཧཱུྃ། དངོས་གཞི་ལྷ་བསྐྱེད་སྤྱན་དྲངས་བསྟིམས། དྷཱིཿཆོས་རྣམས་མི་དམིགས་སྟོང་པའི་ངང་། །པྃ་ལས་པད་དཀར་འདབ་བརྒྱད་སྟེང་། །ཨ་ལས་ཟླ་བའི་དཀྱིལ་འཁོར་སྟེང་། །རང་ཉིད་འཇམ་དབྱངས་བླ་མ་ནི། །དམར་སེར་ཞལ་གཅིག་ཕྱག་གཉིས་པ། །ཞི་འཛུམ་པཎྜི་ཏ་ཡི་ཆས། །མཚན་དཔེའི་གཟི་བརྗིད་རབ་ཏུ་འབར། །ཕྱག་གཉིས་ཆོས་འཁོར་ཕྱག་རྒྱ་ལས། །ཨུཏྤལ་སྡོང་བུ་རྒྱས་པའི་རྩེར། །རལ་གྲི་དང་ནི་གླེགས་བམ་བསྣམས། །གནས་གསུམ་འབྲུ་གསུམ་མཚན་པ་ལས། །འོད་འཕྲོས་མངོན་དགའི་ཞིང་ཁམས་ནས། །འཇམ་དབྱངས་བླ་མ་སྤྱན་དྲངས་གྱུར། །སྤོས་བཏུལ་གདུང་བའི་གླུ་ཡིས་བསྐུལ། ཧཱུྃ་ཧྲཱིཿགཞི་དབྱིངས་ཆོས་སྐུའི་ཕོ་བྲང་ནས། །འཇམ་དབྱངས་བླ་མ་ཀུན་དགའི་མཚན། །གདན་གསུམ་ཚང་བའི་དཀྱིལ་འཁོར་པ། །ཏིལ་གྱི་གོང་བུ་ཁ་ཕྱེས་བཞིན། །རྩ་གསུམ་རྒྱ་མཚོའི་འཁོར་དང་བཅས། །གནས་འདིར་སྤྱན་དྲངས་གཤེགས་སུ་གསོལ། །ལུང་ངག་ཡིད་ལ་བྱིན་ཆེན་ཕོབས། །མཆོག་དང་ཐུན་མོང་དངོས་གྲུབ་སྩོལ། ཨོཾ་མཉྫུ་ཤྲཱི་ཨནྡན་དྷཱ་ཛ་ས་པ་རི་ཝ་ར་བཛྲ་ས་མཱ་ཛཿབཞུགས་སུ་གསོལ་ཞིང་ཕྱག་མཆོད་བསྟོད། ཧཱུྃ། རང་ལས་ཤར་བའི་ཡེ་ཤེས་པ། །བཟོད་ནས་འདུ་འབྲལ་མེད་པ་ཡི། །དག་མཉམ་ལྟ་བའི་ཀློང་ཆེན་པོར། །འཕོ་འགྱུར་མེད་པར་བཞུགས་སུ་གསོལ། །བཛྲ་ས་མ་ཡ་ཏིཥྛ་ལྷན། ཧོཿརང་གསལ་ཡེ་ཤེས་ཕྱག་རྒྱའི་སྐུ། །ཡོན་ཏན་ལྷུན་གྱིས་རྫོགས་པ་ལ། །རང་རིག་ལྟ་བའི་ངང་ཉིད་ནས། །འདུ་འབྲལ་མེད་པར་ཕྱག་བགྱིའོ། །ཨ་ཏི་པཱུ་ཧོཿཔྲ་ཏཱིཙྪ་ཧོཿཨོཾ་ཨཱཿཧཱུྃ། སྲིད་ཞིའི་འབྱོར་ཚོགས་ཅི་མཆིས་པ། །ཕྱི་ནང་གསང་བའི་མཆོད་པར་འབུལ། །རྡོ་རྗེའི་དབང་པོས་དགྱེས་པར་བཞེས། །མཆོག་དང་ཐུན་མོང་དངོས་གྲུབ་སྩོལ། །ཨོཾ་གུ་རུ་མཉྫུ་ཤྲཱི་ས་པ་རི་ཝ་ར་བཛྲ་ཨརྒྷཾ་ནས། ཤབྡའི་བར་དང་། རཱུ་པ་ཤབྡ་གནྡྷེ་རཱ་ས་སྤཪྴེ་སརྦ་པཉྩ་ཨ་མྲྀ་ཏ་རཀྟ་བ་ལིཾ་ཏ་མ་ཧཱ་སུ་ཁ་དྷརྨ་དྷཱ་ཏུ་པཱུ་ཙ་ཧོ། ཧཱུྃ་ཧྲཱིཿངོ་བོ་འོད་གསལ་སྤྲོས་བྲལ་ཆོས་ཀྱི་སྐུ། །རང་བཞིན་ལྷུན་རྫོགས་བླ་མ་ལོངས་སྤྱོད་ཆེ། །ཐུགས་རྗེ་གང་འདུལ་རབ་འབྱམས་སྤྲུལ་པའི་སྐུ། །སྐུ་གསུམ་དབྱེར་མེད་འཇམ་དབྱངས་བླ་མར་བསྟོད། །སེམས་བཟུང་གསལ་དག་ང་རྒྱལ་བརྟན། བཟླས་པས་བསྙེན་སྒྲུབ་ལས་ལ་སྦྱོར། ཐུགས་ཀར་འོད་ཀྱི་གུར་ཁྱིམ་དབུས། །ཡེ་ཤེས་སེམས་དཔའ་འཇམ་པའི་དབྱངས། །དམར་སེར་ཞལ་གཅིག་ཕྱག་བཞི་པ། །རལ་གྲི་གླེགས་བམ་མདའ་གཞུ་འཛིན། །རང་འོད་དབྱངས་ཅན་དམར་མོ་ནི། །ནོར་བུ་མེ་ལོང་འཛིན་པས་འཁྱུད། །དེ་ཡི་ཐུགས་ཀར་ཟླ་བའི་སྟེང་། །དྷཱི་མཐར་སྔགས་ཀྱི་ཕྲེང་བས་བསྐོར། །འོད་འཕྲོས་རྒྱལ་མཆོད་འགྲོ་སྒྲིབ་སྦྱངས། །འཇམ་དཔལ་ཡབ་ཡུམ་སྐུར་གྱུར་ནས། །སྔགས་ཀྱི་སྒྲ་སྒྲོགས་རང་ལ་ཐིམ། །སྔགས་ཀྱི་བུང་བ་རབ་སྤྲོས་པས། །སྲིད་ཞིའི་ཤེས་རབ་དྭངས་བཅུད་བསྡུས། །བདག་གཞན་གཉིས་སྣང་རྟོག་ཚོགས་ཀུན། །གཉིས་མེད་ཡེ་ཤེས་གཅིག་གི་ངང་། །རོ་གཅིག་མཉམ་ཉིད་ངང་ནས་བཟླས། །ཨོཾ་ཨཱ་ར་པ་ཙ་ན་དྷཱིཿབསྙེན་པ་འབུམ་ཕྲག་བཅུ་བཟླ་ཞིང་། ཨོཾ་ཧྲཱིཿདྷཱིཿམ་མེ་དཱི་པཾ་གུ་རུ་མཉྫུ་ཤྲཱི་མཱུྃ་ཧྲཱི་པྲཉྫ་ཛྙཱ་ན་ཧྲཱིཿདྷཱིཿསྭཱ་ཧཱ། སྒྲུབ་སྔགས་འབུམ་ཕྲག་བཞི་ཡིས་འགྲུབ། ཨོཾ་དྷཱི་ཧྲཱིཾ་ཧཱུྃ་མཱྃ། པི་ཙུ་པི་ཙུ་པྲཉྫ་ཝརྔྷ་ནི་ཛྭ་ལ་ཛྭ་ལ་མེ་དྷཱི་ཝརྡྷ་ནི་དྷི་རི་དྷི་བུདྡྷི་ཝརྡྷ་ནི་ཧྲཱིཿསྭཱ་ཧཱ། ལས་སྦྱོར་ཁྲི་ཕྲག་གཅིག་བཟླའོ། །ཟབ་མོ་རྫོགས་པའི་རིམ་པ་ནི། །ཡེ་ཤེས་སེམས་དཔའ་མཉམ་སྦྱོར་སྒྲས། །རྒྱལ་རྣམས་རབ་བཀུག་ལུས་ལ་གཞུགས། །རྗེས་ཆགས་ཞུ་བདེའི་བདུད་རྩིའི་རྒྱུན། །ལུས་གང་བདེ་ཆེན་ཡེ་ཤེས་བསྐྱེད། །དེ་ཡི་ངང་ལ་མཉམ་པར་བཞག །ཡབ་ཡུམ་འོད་ཞུ་ཐིག་ལེ་ནི། །དམར་སེར་ཞལ་སྦྱོར་དྭངས་པ་ལས། །འོད་འཕྲོས་འཁོར་འདས་ཐམས་ཅད་བསྡུས། །ཐིག་ལེ་ནང་དུ་རབ་གཞུགས་ལ། །རླུང་རིག་སེམས་གསུམ་དབྱེར་མེད་བསྲེ། །ཐིག་ལེ་ཇེ་ཕྲར་དབྱིངས་སུ་བསྟིམ། །རིག་སྟོང་དོན་གྱི་འཇམ་པའི་དཔལ། །ཇི་བཞིན་པ་ཡི་ངང་ལ་བཞག །སྐབས་སུ་དབུ་མའི་ཡས་མར་སྣེར། །ཐིག་ལེ་བསྐྱེད་ནས་འབར་འཛག་གི། རྗེས་ཆགས་རྣལ་འབྱོར་ཡེ་ཤེས་བསྐུལ། །ས་མ་ཡ། ཐུན་མཚམས་ཚོགས་ཀྱི་མཆོད་པ་བྱ། །རྗེས་ལ་རྟག་ཆད་མཐའ་བསལ་ཞིང་། །བསྔོ་སྨོན་ཤིས་པ་བརྗོད་པ་ནི། ཨ། ལྷར་སྣང་རིག་པའི་དབྱིངས་སུ་ཐིམ། །དབྱིངས་རིག་འདུ་འབྲལ་མེད་པའི་ངང་། །དོན་གྱི་གནས་ལུགས་འཇམ་པའི་དཔལ། །རིག་འཛིན་བླ་མའི་སྐུ་རུ་ལྡང་། ཧོཿདགེ་འདིས་མཐའ་ཡས་སེམས་ཅན་ཀུན། །བློ་ཡི་མུན་པ་ཀུན་སེལ་ཞིང་། །མཁྱེན་གཉིས་སྣང་བ་རབ་རྒྱས་ནས། །འཇམ་དབྱངས་བླ་མའི་སྐུ་ཐོབ་ཤོགཧོཿབྱིན་རླབས་ཆར་འབེབས་བླ་མའི་སྐུ། །ཡི་དམ་དངོས་གྲུབ་ཀུན་སྩོལ་ཞིང་། །ཕྲིན་ལས་མཁའ་འགྲོ་ཆོས་སྐྱོང་གི། བཀྲ་ཤིས་དམ་པ་དེང་འདིར་སྩོལ། །སྲིད་ཞིར་བཀྲ་ཤིས་རབ་འཕེལ་ཤོག །ཅེས་བརྗོད་ཤིས་པའི་མེ་ཏོག་འཐོར། །རོལ་མོ་དབྱངས་སྙན་སྒྲོགས་པར་བྱ། ས་མ་ཡ། ཆུ་ལུག་མགོ་ཟླའི་ཚེས་༡༤ལའོ། །འདི་ནི་རང་གི་མོས་གུས་ཀྱི། །ཉམས་ལས་བྱུང་ཞིང་བཀའ་གཏེར་མིན། །དད་མོས་ལྡན་པས་བརྩོན་བྱས་ན། །དངོས་གྲུབ་ཐོབ་པར་འགྱང་པ་མེད། ། ༈ ནང་ལྟར་སྒྲུབ་པའི་རིམ་པ་ནི། ཨཿ སྐྱེ་མེད་དེ་བཞིན་ཉིད་ཀྱི་ངང་། །སྙིང་རྗེ་མ་འགགས་གཟུགས་སྐུའི་སྤྲིན། །རྒྱུ་ཡི་ཏིང་འཛིན་དྷཱི་དམར་སེར། །དེ་ཉིད་མཁའ་ལ་འཇའ་ལྟར་ཤར། །དེ་ལས་རིམ་ཆད་འབྱུང་བཞི་དང་། །ལྷུན་པོ་རྡོ་རྗེའི་སྲུང་འཁོར་ནང་། །པདྨ་སྣ་ཚོགས་རྡོ་རྗེ་ལ། །ཡེ་ཤེས་ལྔ་ལྡན་གཞལ་ཡས་ཁང་། །རྒྱན་དང་བཀོད་པ་བསམ་ཡས་དབུས། །འདབ་བརྒྱད་གེ་སར་བཅས་པ་ཡི། །སེང་ཁྲི་པད་ཉི་ཟླ་བའི་སྟེང་། །དྷཱིཿཡིག་རལ་གྲི་དྷཱིས་མཚན་གྱུར། །དེ་ཉིད་ཡོངས་གྱུར་འཇམ་པའི་དབྱངས། །དམར་སེར་ཞལ་གཅིག་ཕྱག་བཞི་པ། །དང་པོས་རལ་གྲི་གླེགས་བམ་དང་། །འོག་མས་ཐབས་ཤེས་མདའ་གཞུ་བསྣམས། །དར་དང་རིན་ཆེན་རྒྱན་གྱིས་བརྒྱན། །ཉི་མའི་རྒྱབ་ཡོལ་ལ་བརྟེན་པ། །མཚན་དཔེའི་གཟི་བརྗིད་འབར་བ་གསལ། །གནས་གསུམ་ཡིག་འབྲུ་གསུམ་གྱིས་མཚན། །ཡེ་ཤེས་སེམས་དཔའ་སྤྱན་དྲངས་གྱུར། ཨོཾ༔ མ་ལུས་ཕྱོགས་བཅུའི་ཞིང་བཞུགས་པའི། །རྒྱལ་བ་སྲས་བཅས་ཚོགས་རྣམས་ཀུན། །སྤྱན་དྲངས་དམ་ཡེ་གཉིས་མེད་གྱུར། །དབང་ལྷས་དབང་བསྐུར་རིགས་ཀྱི་བདག །མི་བསྐྱོད་རིགས་ལྔས་དབུར་བརྒྱན་གྱུར། ཧོཿལྷ་དང་བདག་རྟོག་གཉིས་མེད་པ། །རང་ངོ་ཤེས་པའི་ཕྱག་གིས་བཏུད། །ཀུན་བཟང་མཆོད་སྤྲིན་རྒྱ་མཚོས་མཆོད། །སྐུ་གསུང་ཐུགས་ཡོན་ཕྲིན་ལས་བསྟོད། །ཐུགས་ཀའི་ཟླ་སྟེང་དྷཱིཿདམར་སེར། །རྩ་བའི་སྔགས་ཀྱིས་བསྐོར་བ་ལས། །འོད་འཕྲོས་བདག་གཞན་དོན་གཉིས་བྱས། །སྣོད་བཅུད་ལྷ་ཡི་འཁོར་ལོར་གསལ། །རྡོ་རྗེའི་ཡི་གེ་དྲུག་པ་དང་། །འཇམ་དཔལ་རྒྱུད་ཀྱི་གསང་སྔགས་བཟླ། །ཨོཾ་སརྦ་དྷརྨཱ་བྷཱ་ཝ་སྭཱ་བྷཱ་ཝ། བི་ཤུདྡྷེ་བཛྲ་ཨ་ཨཱ་ཨཾ་ཨཿ པྲ་ཀྲྀ་ཏི་པ་རི་ཤུདྡྷཿསརྦ་དྷརྨ་ཡ་དུ་ཏ་སརྦ་ཏ་ཐཱ་ག་ཏ། ཛྙཱ་ནཱ་ཀཱ་ཡ་མཉྫུ་ཤྲཱི་པ་རི་ཤུདྡྷི་ཏཱ་མུ་པཱ་དཱ་ཡ་ཏི་ཨཾ་ཨཿ སརྦ་ཏ་ཐཱ་ག་ཏ་ཧྲཱི་ད་ཡ། ཧ་ར་ཧ་ར། ཨོཾ་ཧཱུྃ་ཧྲཱིཿབྷ་ག་ཝཱན་ཛྙཱ་ན་མུརྟྟི་ཝཱ་གི་ཤྭ་ར། མ་ཧཱ་བཱ་ཙ། སརྦ་དྷརྨ། ག་ག་ནཱ་མ་ལ་སུ་པ་རི་ཤུདྡྷ། དྷརྨཱ་དྷཱ་ཏུ་ཛྙཱ་ན་གརྦྷ་ཨཱཿ ༈ གསང་སྒྲུབ་འཇམ་དཔལ་རྡོ་རྗེ་ནི། །དམར་སེར་ཞལ་གསུམ་ཕྱག་དྲུག་པ། །ཞལ་གཡས་སྔོ་ཞིང་གཡོན་དཀར་བ། །དང་པོ་གཉིས་ཀྱིས་ཡུམ་ལ་འཁྱུད། །གཡས་གཉིས་རྡོ་རྗེ་རལ་གྲི་དང་། །གཡོན་གཉིས་གླེགས་བམ་མདའ་གཞུ་བསྣམས། །རང་འོད་རྡོ་རྗེ་དབྱངས་ཅན་མ། །དཀར་སེར་རལ་གྲི་པི་ཝཾ་འཛིན། །གཉིས་ཀ་དར་དང་རུས་པ་དང་། །རིན་པོ་ཆེ་ཡི་རྒྱན་གྱིས་བརྒྱན། །གཞན་རྣམས་སྔར་དང་འདྲ་བར་གསལ། །ཐུགས་ཀར་ཡེ་ཤེས་སེམས་དཔའ་ནི། །ཙིཏྟ་འོད་ཀྱི་གུར་ཁྱིམ་དབུས། །འཇམ་དཔལ་ཞལ་གཅིག་ཕྱག་གཉིས་པ། ཡབ་ཡུམ་ཚོན་གང་གསལ་བ་ཡི། །ཐུགས་ཀར་ཉི་སྟེང་རལ་གྲི་ཡི། །ཆང་ཟུང་དྷཱིཿམུྃ་གསང་བའི་མཐར། །སྔགས་ཀྱི་ཕྲེང་བས་བསྐོར་བ་དང་། །འོད་ཀྱིས་ཁམས་གསུམ་སྣོད་བཅུད་སྦྱོངས། །འཇམ་དཔལ་སྐུ་གསུང་ཐུགས་སུ་བསྒྱུར། །བདག་ཐིམ་དངོས་གྲུབ་རྣམ་གཉིས་ཐོབ། །མཁྱེན་གཉིས་ཡེ་ཤེས་རྒྱས་པར་མོས། །ཨོཾ་ཨཱ་ར་པ་ཙ་ན་དྷཱིཿམཱུྃ་ཧྲཱི་ཨ་ཨ། སོགས་ཀྱི་གསང་སྔགས་བཟླ། ཐིག་ལེ་ཕྲ་མོའི་རྣལ་འབྱོར་ནི། །ཐུགས་ཀའི་རལ་གྲི་ས་བོན་ལས། །སྤྲོ་བསྡུས་སྣོད་བཅུད་ཐམས་ཅད་བསྡུ། །རལ་གྲི་ས་བོན་བཅས་པར་ཐིམ། །དེ་ཉིད་འོད་ཞུ་ཐིག་ལེ་ནི། །དམར་སེར་ཤིན་ཏུ་དྭངས་ཕྲའི་ནང་། །འཁོར་འདས་གཟུགས་བརྙན་རབ་བཀྲ་བར། །སེམས་གཏད་དེ་ལས་འོད་འཕྲོས་པས། །རང་ལུས་དེ་ལ་བསྡུ་བྱ་ཞིང་། །ཐིག་ལེ་རྒྱ་བསྐྱེད་ནམ་མཁར་ཁྱབ། །ཇེ་ཕྲར་སྲན་མ་ཙམ་གྱུར་བསྒོམ། །དེ་ལྟའི་སྤྲོ་བསྡུ་ཡང་ཡང་བྱ། །མཐར་ནི་མི་དམིགས་བརྗོད་པ་བྲལ། །གནས་ལུགས་ལྟ་བའི་ངང་བསྐྱང་ངོ་།། །།

༄༅། །འཇམ་དབྱངས་བླ་མའི་རྣལ་འབྱོར་ལ་བརྟེན་པའི་ཚོགས་མཆོད་བསོད་ནམས་རབ་རྒྱས་ཞེས་བྱ་བ་བཞུགས་སོ། །བླ་མ་འཇམ་པའི་དབྱངས་ཀྱི་ཞབས་ལ་ཕྱག་འཚལ་ལོ། །དེ་ལ་འདིར་གསང་སྔགས་ཀྱི་རྣལ་འབྱོར་པས་རང་གཞན་གྱི་རྒྱུད་ལ་ཚོགས་གཉིས་རླབས་པོ་ཆེ་སྐད་ཅིག་གིས་བཟླུམ་པར་བྱ་བའི་ཐབས་མཁས་ཚོགས་ཀྱི་འཁོར་ལོའི་རྗེས་མཐུན་ཚོགས་ཀྱི་མཆོད་པ་འབུལ་བར་སྤྲོ་ན་སྡིག་དང་མ་འདྲེས་པའི་དམ་ཚིག་གི་རྫས་རྣམས་ཅི་འབྱོར་པ་བཤམས་ལ། བླ་མཆོད་བཟླས་པ་ཡན་གྲུབ་རྗེས། ཨོཾ་བཛྲ་ཨ་མྲྀ་ཏ་ཀུནྜ་ལིས་བསང་། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ཡཾ་ལས་རླུང་དཀྱིལ་སྔོ། །དེ་སྟེང་རྃ་ལས་མེ་དཀྱིལ་གྲུ་གསུམ་དམར། །ཨ་ལས་རབ་དཀར་ཐོད་པ་སྟོང་གསུམ་ཁྱོན། །དེ་སྟེང་ཨ་ལས་ཟླ་བའི་དཀྱིལ་འཁོར་སྟེང་། །གོ་ཀུ་ད་ཧ་ན་ལས་ཤ་ལྔ་དང་། །དེ་སྟེང་བྷྲཱུྃ་ཨཱྃ་ཛྲཱིཾ་ཁཾ་ཧཱུྃ་ལྔ་ལས། །བདུད་རྩི་ལྔ་དང་ཡེ་ཤེས་ལྔའི་ངོ་བོ། །བདེ་གཤེགས་རིགས་ལྔའི་ས་བོན་རྣམས་ཀྱིས་མཚན། །ཟླ་བའི་མཐའ་མར་དབྱངས་གསལ་གཡས་གཡོན་བསྐོར། །སྟེང་གི་ནམ་མཁར་ཨོཾ་དཀར་ཐུར་དུ་བལྟ། །དེ་སྟེང་རྃ་ལས་ཉི་དཀྱིལ་ཧཱུྃ་ཡིག་ལས། །རྡོ་རྗེ་རྩེ་ལྔའི་ལྟེ་བར་ཧཱུྃ་གིས་མཚན། །ཧཱུྃ་ལས་འོད་འཕྲོས་རླུང་གཡོས་མེ་སྦར་བས། །ཤ་ལྔ་བདུད་རྩི་ལྔ་རྣམས་སྐོལ་ཞིང་ཞུ། །རླངས་པ་ཨོཾ་ཧཱུྃ་ལ་ཕོག་བདུད་རྩིའི་རྒྱུན། །ཆར་ལྟར་བབ་ཅིང་སླར་ཡང་འོད་འཕྲོས་པས། །ཕྱོགས་བཅུའི་རྒྱལ་བའི་ཡེ་ཤེས་བདུད་རྩི་རྣམས། །ཧེ་རུ་ཀ་ཡི་རྣམ་པར་སྤྱན་དྲངས་ཏེ། །རྡོ་རྗེ་ལྟེ་བའི་ཧཱུྃ་ལ་ཐིམ་པ་དང་། །རྡོ་རྗེ་ཉི་མ་ཨོཾ་བཅས་ཞུ་བ་ལས། །ཚོགས་ཀྱི་བདུད་རྩི་རྣམས་དང་གཉིས་མེད་པ། །ཁ་དོག་དྲི་རོ་ནུས་མཐུ་ཕུན་སུམ་ཚོགས། །འདོད་ཡོན་བདུད་རྩིའི་རྒྱ་མཚོ་ཆེན་པོར་གྱུར། །ཨོཾ་ཨཱཿཧཱུྃ་ཧ་ཧོ་ཧྲཱིཿཕྱག་རྒྱ་དང་བཅས་ལན་མང་དུ་བརྗོད་པས་བྱིན་གྱིས་བརླབས། ཚོགས་ཞིང་སྤྱན་དྲངས་བ་ནི། འབར་བའི་ཕྱག་རྒྱས། ཕཻཾ། གནས་གསང་བ་མཆོག་གི་དགྱེས་པ་ན། །དཔལ་རྡོ་རྗེ་འཆང་ཆེན་དབྱིངས་ནས་བཞེངས། །འདིར་གཤེགས་ཚོགས་ཀྱི་མཆོད་པ་བཞེས། །བདག་མོས་པའི་བུ་ལ་བྱིན་གྱིས་རློབས། །ཤར་མངོན་པར་དགའ་བའི་ཞིང་ཁམས་ནས། །མགོན་བདེ་གཤེགས་དྲི་མ་མེད་པའི་དཔལ། །འདིར་གཤེགས་སོགས་ཚིག་རྐང་གཉིས་རིགས་འགྲེའོ། །གནས་བདེ་བ་ཅན་གྱི་ཞིང་ཁམས་ནས། །བླ་མ་ས་སྐྱ་པ་ཆེན་པོ་ཡང་། །འདིར་གཤེགས༴ །སྟེང་མཁའ་སྤྱོད་དག་པའི་ཞིང་ཁམས་ནས། །རྗེ་འཇམ་དབྱངས་བླ་མ་རིག་པ་འཛིན། །འདིར་གཤེགས༴ །བུ་རང་སྣང་དག་པའི་ཞིང་ཁམས་ནས། །ཆོས་རྗེ་ས་སྐྱ་པཎྜི་ཏ། །འདིར་གཤེགས༴ །གནས་སྤྱི་གཙུག་ཉི་ཟླའི་གདན་སྟེང་དུ། །ཕ་མཚུངས་མེད་ཀུན་དགའ་རྒྱལ་མཚན་ཡང་། །འདིར་གཤེགས༴ །སྣང་སྲིད་ཀུན་འོག་མིན་གཞལ་ཡས་ཁང་། །བཅོམ་ལྡན་འདས་དགྱེས་མཛད་རྡོ་རྗེ་དང་། །དཔལ་འཁོར་ལོ་སྡོམ་པ་རྣལ་འབྱོར་མ། །ཡི་དམ་གྱི་ལྷ་ཚོགས་གྲངས་མེད་ཀྱང་། འདིར་གཤེགས༴ །དབྱིངས་རྡོ་རྗེ་བདག་མེད་མ་དཔལ་དང་། །རྗེ་བཙུན་རིགས་བྱེད་ལྷ་མོ་སོགས། །དཔའ་བོ་དང་ཌཱ་ཀིའི་ཚོགས་ཆེན་པོ། །རི་རབ་ཀྱི་རྡུལ་དང་མཉམ་པ་ཡང་། །རུས་རྒྱན་དང་གཡེར་ཁ་སི་ལི་ལི། །ཅང་ཏེའུ་དྲིལ་བུའི་སྒྲ་དང་བཅས། །འདིར་གཤེགས༴ །གནས་དུར་ཁྲོད་ཆེན་པོའི་ཚོགས་ཁང་ནས། །དཔལ་ལྡན་མགོན་པོ་ལྕམ་དྲལ་ལ། །འཁོར་རྒྱུད་གསུམ་བསྟན་སྲུང་རྒྱ་མཚོས་བསྐོར། །འདིར་གཤེགས༴ །གནས་རང་ལུས་རྡོ་རྗེའི་ཕུང་པོ་ཡི། །རྩ་འཁོར་ལོ་ལྔ་ཡི་དབུས་བཞུགས་པའི། །བླ་མ་རིགས་ལྔ་ཌཱ་ཀི་དང་། །དབང་ཡུལ་གྱི་སེམས་དཔའ་ལྕམ་དྲལ་དང་། །སྤྲུལ་པའི་ཁྲོ་ཚོགས་ཆེན་པོ་རྣམས། །འདིར་གཤེགས་ཚོགས་ཀྱི་མཆོད་པ་བཞེས། །བདག་མོས་པའི་བུ་ལ་བྱིན་གྱིས་རློབས། །ཚོགས་གཏོར་གྱི་མཆོད་པ་རྒྱ་རེ་ཆེ། །བདུད་རྩི་ཡི་རླངས་པས་ཕྱོགས་བཅུར་གཏིབས། །འདོད་ཡོན་གྱི་ལྷ་མོ་དྭངས་ཤིང་སྤྲོ། །པད་ཅན་གྱི་མཚན་ཉིད་ཡོངས་རྫོགས་པའི། །བཅུ་དྲུག་གི་རིག་མས་གར་སྟབས་བསྒྱུར། །ཟག་མེད་ཀྱི་བདེ་བ་ཆེན་པོ་ཡི། །རོ་ཡིས་སྨྱོས་ཤིང་ཨ་ཧྃ་སྒྲ་ཆེན་སྒྲོགས། །འཁོར་འདས་ཀུན་བདེ་སྟོང་ཕྱག་རྒྱའི་གར། །དཔལ་འཇམ་དབྱངས་བླ་མའི་རོལ་པར་ཤར། །སྐུ་རྡོ་རྗེའི་གར་སྟབས་ཁྲིགས་སེ་ཁྲིག །གསུང་ཚངས་པའི་དབྱངས་ཀྱི་ཆོས་སྒྲ་སྒྲོགས། །ཐུགས་མཁྱེན་བརྩེའི་དགོངས་པ་ཉི་ཤར་བཞིན། །ལུས་ལ་རྡོ་རྗེའི་སྐུ་ཡི་བྱིན་གྱིས་རློབས། །ངག་ལ་གསུང་དབྱངས་ནུས་པའི་དཔལ་ཐོབ་ཅིང་། །ཡིད་ལ་བདེ་སྟོང་ཡེ་ཤེས་ཆེན་པོ་འཆར། །སྒོ་གསུམ་སྐུ་བཞིར་སྨིན་པར་མཛད་དུ་གསོལ། །ཨོཾ་གུ་རུ་བུདྡྷ་བོ་དྷི་ས་ཏྭ་ཤྲཱི་ཧེ་རུ་ཀ་མཎྜ་ལ་ཌཱ་ཀི་ནཱི་དྷརྨ་པཱ་ལ་ས་པ་རི་ཝཱ་ར་ཨོཾ་བཛྲ་ས་མཱ་ཛཿཞེས་སྤྱན་དྲངས། དེ་ནས་བདུད་རྩིའི་མཆོད་པ་ནི། ཨོཾ་ཨཱཿཧཱུྃ། དམན་པའི་སྤྱོད་ཡུལ་དག་ལས་རབ་འདས་ཤིང་། །རྒྱལ་བ་ཀུན་གྱིས་བསྟེན་བྱའི་དམ་ཚིག་མཆོག །དངོས་གྲུབ་རྣམ་གཉིས་ཀུན་གྱི་གཞིར་གྱུར་པ། །ཟག་མེད་བདུད་རྩི་མཆོག་གི་མཆོད་པ་འདི། །ཕྱོགས་བཅུ་དུས་གསུམ་རྒྱལ་བ་སྲས་བཅས་ཀྱི། །མཁྱེན་བརྩེ་ནུས་གསུམ་གཅིག་ཏུ་འདུས་པའི་དངོས། །དྲན་པས་སྲིད་ཞིའི་རྒུད་པ་ཀུན་སེལ་བའི། །རྩ་བའི་བླ་མའི་ཞལ་དུ་ཨོཾ་ཨཱཿཧཱུྃ། །བྱ་སྤྱོད་རྣལ་འབྱོར་བླ་མེད་རྒྱུད་སྡེ་སོགས། །རྒྱུད་སྡེ་ཆེན་པོ་བཞི་དང་རྗེས་འབྲེལ་བའི། །གང་འདུལ་སྒྱུ་འཕྲུལ་དྲྭ་བའི་རྣམ་རོལ་ཅན། །ཡི་དམ་ལྷ་ཚོགས་ཞལ་དུ་ཨོཾ་ཨཱཿཧཱུྃ། །ཨོཾ་ཨཱཿཧཱུྃ། །རྡོ་རྗེའི་ཆོས་སྲུང་ནོར་ལྷ་རྒྱ་མཚོ་དང་། །གནས་གསུམ་བཞུགས་པའི་དཔའ་བོ་རྣལ་འབྱོར་མ། །ཡུལ་ལྷ་གཞི་བདག་རིགས་དྲུག་ཚོགས་བཅས་རྣམས། །ལྷ་རུ་གསལ་བའི་ཞལ་དུ་ཨོཾ་ཨཱཿཧཱུྃ། །སྒྲིབ་པ་གཉིས་ཀྱི་དྲི་མ་ཀུན་བསལ་ནས། །གཟུང་འཛིན་རྟོག་པ་ཀུན་ལས་རྣམ་གྲོལ་བ། །བླ་ན་མེད་པའི་བྱང་ཆུབ་སེམས་ཀྱི་དངོས། །བདེ་བ་ཆེན་པོའི་མཆོད་པས་མཉེས་གྱུར་ཅིག །ཨོཾ་ཨཱཿཧཱུྃ། ཞེས་བརྗོད། ཚོགས་ཕུད་ཆ་གསུམ་དུ་བསྒོས་ལ། ཨོཾ་ཨཱཿཧཱུྃ། །ཕྱོགས་བཅུ་དུས་གསུམ་རྒྱལ་བ་སྲས་བཅས་ཀྱི། །ཡེ་ཤེས་སྒྱུ་འཕྲུལ་དྲྭ་བའི་རྣམ་རོལ་ཅན། །བཀའ་དྲིན་མཉམ་མེད་རྩ་བའི་བླ་མ་ལ། །ཟག་མེད་བདུད་རྩིའི་ཚོགས་ཀྱི་མཆོད་པ་འབུལ། །རྒྱལ་བའི་མཁྱེན་བརྩེ་ཡེ་ཤེས་གཅིག་བསྡུས་པ། །སྲིད་ཞིའི་དབང་ཕྱུག་བླ་མ་འཇམ་པའི་དབྱངས། །གདན་གསུམ་ཚང་བའི་དེད་དཔོན་ཆེན་པོ་ལ། །ཟག་མེད་བདུད་རྩིའི་ཚོགས་ཀྱི་མཆོད་པ་འབུལ། །གཞན་ཡང་ཚད་མེད་ཐུགས་རྗེའི་སྤྲིན་མཛེས་ལས། །དབང་བསྐུར་རྒྱུད་བཤད་མན་ངག་སྟོན་མཛད་པའི། །བརྒྱུད་པའི་བླ་མ་དམ་པ་ཐམས་ཅད་ལ། །ཟག་མེད་བདུད་རྩིའི་ཚོགས་ཀྱི་མཆོད་པ་འབུལ། །ཨོཾ་གུ་རུ་བཛྲ་དྷ་ར་མཉྫུ་གྷོ་ཥ་བྷཱུ་མི་པཎྜི་ཏ་ས་པ་རི་ཝཱ་ར་ཨོཾ་ཨ་ཀཱ་རོ་མུ་ཁཾ་སརྦ་དྷརྨ་ཎཾ། ཨཱདྱཱ་ནུཏྤནྣ་ཏྭཱ་ཏ་ཨོཾ་ཨཱཿཧཱུྃ་ཕཊ་སྭཱ་ཧཱ། །ལན་གསུམ་གྱིས་འབུལ། ཕུད་བར་པ་ཕུལ་ཏེ། ཨོཾ་ཨཱཿཧཱུྃ། སྤངས་རྟོགས་མཐར་ཕྱིན་རྒྱལ་བ་སྲས་བཅས་དང་། །ཡི་དམ་དཀྱིལ་འཁོར་འཁོར་ལོ་རབ་འབྱམས་སོགས། །སྐྱབས་གནས་མཆོད་འོས་རྒྱ་མཚོ་ཐམས་ཅད་ལ། །ཟག་མེད་བདུད་རྩིའི་ཚོགས་ཀྱི་མཆོད་པ་འབུལ། །བཞེས་ནས་བདག་དང་མཐའ་ཡས་སེམས་ཅན་ཀུན། །བསོད་ནམས་ཡེ་ཤེས་ཚོགས་གཉིས་རབ་རྫོགས་ཤིང་། །མཆོག་དང་ཐུན་མོང་དངོས་གྲུབ་རྣམ་གཉིས་ཀྱི། །ཕན་བདེའི་དགའ་སྟོན་རྒྱས་པར་བྱིན་གྱིས་རློབས། །ཨོཾ་གུ་རུ་བུདྡྷ་བོ་དྷི་ས་ཏྭ་ཤྲཱི་ཧེ་རུ་ཀ་མཎྜལ་བྷཱུ་མི་པཎྜི་ཏ་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ལན་གསུམ་གྱིས་འབུལ། ཕུད་ཐ་མ་ཕུལ་ཏེ། ཨོཾ་ཨཱཿཧཱུྃ། སྲིད་ཞིར་མི་གནས་ཡེ་ཤེས་སྒྱུ་མའི་གར། །བརྟན་གཡོ་ཀུན་ཁྱབ་དགྱེས་མཛད་རྡོ་རྗེ་དང་། །གསང་འདུས་འཇིགས་བྱེད་འཁོར་ལོ་སྡོམ་པ་ཆེ། །དང་པོའི་སངས་རྒྱས་དུས་ཀྱི་འཁོར་ལོ་སོགས། །ཐབས་ཤེས་གཉིས་མེད་རྒྱུད་སྡེའི་ལྷ་ཚོགས་ལ། །ཟག་མེད་བདུད་རྩིའི་ཚོགས་ཀྱི་མཆོད་པ་འབུལ། །བཞེས་ནས་རྣལ་འབྱོར་བདག་ཅག་འཁོར་བཅས་ཀྱི། །ཕུང་ཁམས་སྐྱེ་མཆེད་རྩ་རླུང་ཐིག་ལེ་རྣམས། །དག་པ་གདན་གསུམ་ཚང་བའི་དཀྱིལ་འཁོར་གྱི། །རང་བཞིན་མངོན་དུ་འགྱུར་བར་བྱིན་གྱིས་རློབས། །ཨོཾ་གུ་རུ་སཾ་གྲ་ཧ་བྷཻ་ར་ཝ་ཧེ་བཛྲ་ཀཱ་ལ་ཙཀྲ་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ལན་གསུམ་བརྗོད་དེ་ཕུལ། ཨོཾ་ཨཱཿཧཱུྃ། རྡོ་རྗེའི་ཡེ་ཤེས་འབར་བའི་མེ་བོ་ཆེས། །ལོག་འདྲེན་བགེགས་ཀྱི་བུད་ཤིང་ཀུན་བསྲེགས་ནས། །གྲུབ་གཉིས་སྣང་བ་རྟག་ཏུ་རྒྱས་མཛད་པའི། །ཆོས་སྐྱོང་སྲུང་མའི་ཚོགས་རྣམས་ཐམས་ཅད་དང་། །གནས་ཡུལ་དུར་ཁྲོད་ཀུན་ན་བཞུགས་པ་ཡི། །སྤྲུལ་པའི་གར་མཛད་དཔའ་བོ་རྣལ་འབྱོར་མ། །སྲིད་ཞིའི་འབྱོར་པ་མཐའ་དག་སྦྱིན་མཛད་པའི། །གནོད་སྦྱིན་ནོར་ལྷ་རྒྱ་མཚོའི་ཚོགས་བཅས་དང་། །གཞན་ཡང་ཡུལ་ལྷ་གཞི་བདག་རིགས་དྲུག་མགྲོན། །ཐམས་ཅད་ཡེ་ཤེས་གཅིག་གིས་བྱིན་བརླབས་པར། །ཞལ་ཟས་བདུད་རྩིའི་ཚོགས་ཀྱི་མཆོད་པ་འབུལ། །འགལ་རྐྱེན་ཞི་ཞིང་མཐུན་རྐྱེན་ཡིད་བཞིན་སྒྲུབས། །མཆོག་ཐུན་དངོས་གྲུབ་ཐོབ་པའི་ཕྲིན་ལས་མཛོད། །ཆོས་སྐྱོང་སོ་སོའི་གཏོར་སྔགས་དང་མཁའ་འགྲོ་སྤྱི་གཏོར་སྔགས་ཀྱིས་ཕུལ། ལས་རྡོར་གྱིས་ཚོགས་ཞུ་འབུལ་བྱས་ནས་དྲངས་ཏེ་ཚིམ་པར་རོལ། མཐར་ལྷག་མ་ཆུ་ཆང་གིས་བྲན། ཨོཾ་ཨཱཿཧཱུྃ། ལྷག་མའི་གཏོར་མ་ཞལ་ཟས་བདུད་རྩིའི་སྤྲིན། །འདོད་པའི་ཡོན་ཏན་རྣམ་པ་ཐམས་ཅད་པ། །ཟད་པ་མེད་པ་ནམ་མཁའི་མཛོད་ལྟ་བུ། །དཔག་ཡས་སྲིད་ཞིའི་ཁམས་ཀུན་ཁྱབ་པར་གྱུར། །ཨོཾ་ཨཱཿཧཱུྃ། ལན་གསུམ་གྱིས་བརླབ། ཕཻཾ། ཞེས་པས་མགྲོན་བཀུག །ཨོཾ་ཁ་ཁ་ཁཱ་ཧི་ཨུཥྩི་ཊ་བ་ལིཾ་ཏ་བྷཀྵ་སཱི་སྭཱ་ཧཱ། ཞེས་དང་། འབྱུང་པོ་ལྷག་ལ་དབང་བའི་ཚོགས་རྣམས་ལ། །འདོད་ཡོན་ཚོགས་ཀྱི་ལྷག་མ་འདི་སྦྱིན་ནོ། །ཟག་མེད་བདེ་བ་མཆོག་གིས་ལུས་དང་སེམས། །ངོམས་ཤིང་ཚིམ་པའི་སྐལ་བ་ལྡན་གྱུར་ཅིག །ཅེས་བསྔོས་ལ་ཕྱི་རོལ་གཙང་སར་ཕུལ། རྡོར་གླུ་ཤིས་བརྗོད་སྨོན་ལམ་རྣམས་ཀྱེ་རྡོར་ལྟར་བྱའོ། །ཚོགས་ཞིང་ཐམས་ཅད་རིམ་གྱིས་འོད་དུ་ཞུ་ནས་ཆོས་ཀྱི་རྗེ་ཉིད་ལ་ཐིམ་པར་གྱུར། ཞེས་བརྗོད་ལ། རྗེས་གསོལ་བཏབ་དབང་བླང་བ་ཡན་བླ་མཆོད་གཞུང་ལྟར་བྱའོ། །ཚོགས་པ་མང་སྐབས་ལས་རྡོར་གྱི་ཕྱག་སྔོན་འགྲོས། ཚོགས་ཀྱི་ཡོ་བྱད་ལ་བྱིན་རླབས་གནང་བར་ཞུ། ཞེས་དང་། བླ་མ་དང་དཀོན་མཆོག་གི་དྲུང་དུ་སྨན་ཕུད་འབུལ་བར་ཞུ། ཞེས་དང་། བླ་མ་དང་དཀོན་མཆོག་གི་དྲུང་དུ་ཚོགས་ཕུད་འབུལ་བར་ཞུ། ཞེས་དང་། མཁའ་འགྲོ་དང་ཆོས་སྐྱོང་གི་དྲུང་དུ་ཚོགས་ཕུད་འབུལ་བར་ཞུ། ཞེས་པ་སོ་སོའི་ཐད་ཀྱི་སྐབས་དང་སྦྱར། དྲངས་པའི་སྐབས་ལས་རྡོར་གྱིས་བཟའ་བ་གཡས་དང་བཏུང་བ་གཡོན་དུ་ཐོགས་ཏེ། ཧོཿགཟིགས་ཤིག་མཛེས་ལྡན་དམ་པའི་ཆོས། །འདི་ལ་ཐེ་ཚོམ་བྱར་མི་རུང་། །བྲམ་ཟེ་གདོལ་པ་ཁྱི་དང་ཕག །རང་བཞིན་གཅིག་ཏུ་དགོངས་ཏེ་རོལ། །ཞེས་ལག་གཉིས་ཀྱིས་སྟོབ། ལེན་པ་པོས་པད་བསྐོར་དང་བཅས། བདེ་གཤེགས་ཆོས་ལ་རིན་ཐང་མེད། །འདོད་ཆགས་ལ་སོགས་དྲི་མ་བྲལ། །གཟུང་དང་འཛིན་པ་རྣམ་པར་སྤངས། །དེ་བཞིན་ཉིད་ལ་བདག་ཕྱག་འཚལ། ཞེས་པདྨའི་ཕྱག་རྒྱས་བླངས། ཨ་ཧོ་མ་ཧཱ་སུ་ཁ། ཞེས་བརྗོད་ཐམས་ཅད་ལ་བྲིམ་ཚར་བ་དང་། ཐམས་ཅད་ཚོགས་ལ་རོལ་བར་ཞུ། ཞེས་བསྐུལ་ཏེ། མགྲིན་པར་བླ་མ། སྙིང་གར་ཡི་དམ་གྱི་ངོ་བོ་ཧཱུྃ་སྔོན་པོ། ལྟེ་བར་མཁའ་འགྲོ་ཆོས་སྐྱོང་རྣམས་གསལ་བཏབ་ལ་རོལ་བར་བྱའོ། །ཡང་ལས་རྡོར་ནས་ཕྱག་སྔོན་འགྲོས། ལྷག་མའི་གཏོར་མ་ལ་བྱིན་བརླབ་གནང་བར་ཞུ། ཞེས་བསྐུལ་ནས་ལྷག་ཆོག་བཏང་བར་བྱ་བ་ནི་སྤྲོས་བཅས་ཀྱི་ལུགས་སོ། །ཚོགས་འཁོར་གྱི་བཤད་པ་ཞིབ་མོ་ནི་གཞུང་གཞན་དུ་ཤེས་དགོས་པ་ཁོ་ནའོ། ཞེས་པའང་དགེ་སློང་འཚོ་བྱེད་ཚེ་རིང་ཕུན་ཚོགས་ཀྱིས་ནན་ཏན་དུ་བསྐུལ་བ་དོན་ཡོད་པའི་ཕྱིར་དུ་༧འཇམ་དབྱངས་ཆོས་ཀྱི་བློ་གྲོས་པས་བླ་མ་གོང་མའི་གསུང་ལས་བཏུས་ཏེ་བཀོད་པ་འདིས་ཀྱང་ཚོགས་གཉིས་རྒྱ་ཆེན་པོ་འཕེལ་བའི་རྒྱུར་གྱུར་ཅིག །སརྦ་ཛ་ག་ཏཾ།། །།

[edit]

@#/__/'jam dbyangs bla ma'i sgrub thabs ye shes snang gter bzhugs/__/ bla ma 'jam pa'i dbyangs la 'dud/__/dbang thob la gnas rnal 'byor pas/__/sku gsung thugs kyi rten bkram ste/__/bde ba'i stan la rlung ro bsal/__/nges 'byung byang sems gsal btab nas/__/sngon 'gro skyabs sems tshogs bsags bya/__na mo/__dkon mchog gsum gyi ngo bo nyid/__/'jam dbyangs bla mar skyabs su mchi/__/'gro rnams ma rig las bsgral phyir/__/zab mo'i rnal 'byor bsgom par bgyi/__/lan gsum/__rdo rje slob dpon sangs rgyas dpal/__sogs kyi rgyun bshags bya/__bgegs la gtor ma sbyin cing bskrad/__/bsrung ba'i 'khor los phyogs mtshams bcings/__hU~M hrIHgnyis snang 'khrul pa'i gdon bgegs tshogs/__/gtor ma 'di longs rang gnas deng /__/gnyis med ye shes srung ba'i gur/__/phyogs mtshams kun tu gtams par gyur/__/oM badz+ra rak+Sha rak+Sha hU~M b+h+rU~M/__byin chen 'bebs cing mchod rdzas brlabs/__hU~M hrIHsku gsum zhing na bzhugs pa yi/__/rtsa gsum rgya mtshos byin chen phobs/__/snod bcud dag pa'i zhing du bsgyur/__/'dod yon mchod sprin mkha' khyab spel/__/badz+ra sa ma ya a be sha ya a aH_oM AHhU~M sarba pU dza me g+ha sa ma ye a hU~M/__dngos gzhi lha bskyed spyan drangs bstims/__d+hIHchos rnams mi dmigs stong pa'i ngang /__/pa~M las pad dkar 'dab brgyad steng /__/a las zla ba'i dkyil 'khor steng /__/rang nyid 'jam dbyangs bla ma ni/__/dmar ser zhal gcig phyag gnyis pa/__/zhi 'dzum paN+Di ta yi chas/__/mtshan dpe'i gzi brjid rab tu 'bar/__/phyag gnyis chos 'khor phyag rgya las/__/ut+pal sdong bu rgyas pa'i rtser/__/ral gri dang ni glegs bam bsnams/__/gnas gsum 'bru gsum mtshan pa las/__/'od 'phros mngon dga'i zhing khams nas/__/'jam dbyangs bla ma spyan drangs gyur/__/spos btul gdung ba'i glu yis bskul/__hU~M hrIHgzhi dbyings chos sku'i pho brang nas/__/'jam dbyangs bla ma kun dga'i mtshan/__/gdan gsum tshang ba'i dkyil 'khor pa/__/til gyi gong bu kha phyes bzhin/__/rtsa gsum rgya mtsho'i 'khor dang bcas/__/gnas 'dir spyan drangs gshegs su gsol/__/lung ngag yid la byin chen phobs/__/mchog dang thun mong dngos grub stsol/__oM many+dzu shrI an+dan d+hA dza sa pa ri wa ra badz+ra sa mA dzaHbzhugs su gsol zhing phyag mchod bstod/__hU~M/__rang las shar ba'i ye shes pa/__/bzod nas 'du 'bral med pa yi/__/dag mnyam lta ba'i klong chen por/__/'pho 'gyur med par bzhugs su gsol/__/badz+ra sa ma ya tiSh+Tha lhan/__hoHrang gsal ye shes phyag rgya'i sku/__/yon tan lhun gyis rdzogs pa la/__/rang rig lta ba'i ngang nyid nas/__/'du 'bral med par phyag bgyi'o/__/a ti pU hoHpra tIts+tsha hoHoM AHhU~M/__srid zhi'i 'byor tshogs ci mchis pa/__/phyi nang gsang ba'i mchod par 'bul/__/rdo rje'i dbang pos dgyes par bzhes/__/mchog dang thun mong dngos grub stsol/__/oM gu ru many+dzu shrI sa pa ri wa ra badz+ra ar+g+haM nas/__shab+da'i bar dang /__rU pa shab+da gan+d+he rA sa spaR+she sarba pany+tsa a mr-i ta rak+ta ba liM ta ma hA su kha d+harma d+hA tu pU tsa ho/__hU~M hrIHngo bo 'od gsal spros bral chos kyi sku/__/rang bzhin lhun rdzogs bla ma longs spyod che/__/thugs rje gang 'dul rab 'byams sprul pa'i sku/__/sku gsum dbyer med 'jam dbyangs bla mar bstod/__/sems bzung gsal dag nga rgyal brtan/__bzlas pas bsnyen sgrub las la sbyor/__thugs kar 'od kyi gur khyim dbus/__/ye shes sems dpa' 'jam pa'i dbyangs/__/dmar ser zhal gcig phyag bzhi pa/__/ral gri glegs bam mda' gzhu 'dzin/__/rang 'od dbyangs can dmar mo ni/__/nor bu me long 'dzin pas 'khyud/__/de yi thugs kar zla ba'i steng /__/d+hI mthar sngags kyi phreng bas bskor/__/'od 'phros rgyal mchod 'gro sgrib sbyangs/__/'jam dpal yab yum skur gyur nas/__/sngags kyi sgra sgrogs rang la thim/__/sngags kyi bung ba rab spros pas/__/srid zhi'i shes rab dwangs bcud bsdus/__/bdag gzhan gnyis snang rtog tshogs kun/__/gnyis med ye shes gcig gi ngang /__/ro gcig mnyam nyid ngang nas bzlas/__/oM A ra pa tsa na d+hIHbsnyen pa 'bum phrag bcu bzla zhing /__oM hrIHd+hIHma me dI paM gu ru many+dzu shrI mU~M hrI prany+dza dz+nyA na hrIHd+hIHswA hA/__sgrub sngags 'bum phrag bzhi yis 'grub/__oM d+hI hrIM hU~M mA~M/__pi tsu pi tsu prany+dza war+ng+ha ni dz+wa la dz+wa la me d+hI war+d+ha ni d+hi ri d+hi bud+d+hi war+d+ha ni hrIHswA hA/__las sbyor khri phrag gcig bzla'o/__/zab mo rdzogs pa'i rim pa ni/__/ye shes sems dpa' mnyam sbyor sgras/__/rgyal rnams rab bkug lus la gzhugs/__/rjes chags zhu bde'i bdud rtsi'i rgyun/__/lus gang bde chen ye shes bskyed/__/de yi ngang la mnyam par bzhag__/yab yum 'od zhu thig le ni/__/dmar ser zhal sbyor dwangs pa las/__/'od 'phros 'khor 'das thams cad bsdus/__/thig le nang du rab gzhugs la/__/rlung rig sems gsum dbyer med bsre/__/thig le je phrar dbyings su bstim/__/rig stong don gyi 'jam pa'i dpal/__/ji bzhin pa yi ngang la bzhag__/skabs su dbu ma'i yas mar sner/__/thig le bskyed nas 'bar 'dzag gi/__rjes chags rnal 'byor ye shes bskul/__/sa ma ya/__thun mtshams tshogs kyi mchod pa bya/__/rjes la rtag chad mtha' bsal zhing /__/bsngo smon shis pa brjod pa ni/__a/__lhar snang rig pa'i dbyings su thim/__/dbyings rig 'du 'bral med pa'i ngang /__/don gyi gnas lugs 'jam pa'i dpal/__/rig 'dzin bla ma'i sku ru ldang /__hoHdge 'dis mtha' yas sems can kun/__/blo yi mun pa kun sel zhing /__/mkhyen gnyis snang ba rab rgyas nas/__/'jam dbyangs bla ma'i sku thob shogahoHbyin rlabs char 'bebs bla ma'i sku/__/yi dam dngos grub kun stsol zhing /__/phrin las mkha' 'gro chos skyong gi/__bkra shis dam pa deng 'dir stsol/__/srid zhir bkra shis rab 'phel shog__/ces brjod shis pa'i me tog 'thor/__/rol mo dbyangs snyan sgrogs par bya/__sa ma ya/__chu lug mgo zla'i tshes 14la'o/__/'di ni rang gi mos gus kyi/__/nyams las byung zhing bka' gter min/__/dad mos ldan pas brtson byas na/__/dngos grub thob par 'gyang pa med/__/_!__nang ltar sgrub pa'i rim pa ni/__aH_skye med de bzhin nyid kyi ngang /__/snying rje ma 'gags gzugs sku'i sprin/__/rgyu yi ting 'dzin d+hI dmar ser/__/de nyid mkha' la 'ja' ltar shar/__/de las rim chad 'byung bzhi dang /__/lhun po rdo rje'i srung 'khor nang /__/pad+ma sna tshogs rdo rje la/__/ye shes lnga ldan gzhal yas khang /__/rgyan dang bkod pa bsam yas dbus/__/'dab brgyad ge sar bcas pa yi/__/seng khri pad nyi zla ba'i steng /__/d+hIHyig ral gri d+hIs mtshan gyur/__/de nyid yongs gyur 'jam pa'i dbyangs/__/dmar ser zhal gcig phyag bzhi pa/__/dang pos ral gri glegs bam dang /__/'og mas thabs shes mda' gzhu bsnams/__/dar dang rin chen rgyan gyis brgyan/__/nyi ma'i rgyab yol la brten pa/__/mtshan dpe'i gzi brjid 'bar ba gsal/__/gnas gsum yig 'bru gsum gyis mtshan/__/ye shes sems dpa' spyan drangs gyur/__oM:__ma lus phyogs bcu'i zhing bzhugs pa'i/__/rgyal ba sras bcas tshogs rnams kun/__/spyan drangs dam ye gnyis med gyur/__/dbang lhas dbang bskur rigs kyi bdag__/mi bskyod rigs lngas dbur brgyan gyur/__hoHlha dang bdag rtog gnyis med pa/__/rang ngo shes pa'i phyag gis btud/__/kun bzang mchod sprin rgya mtshos mchod/__/sku gsung thugs yon phrin las bstod/__/thugs ka'i zla steng d+hIHdmar ser/__/rtsa ba'i sngags kyis bskor ba las/__/'od 'phros bdag gzhan don gnyis byas/__/snod bcud lha yi 'khor lor gsal/__/rdo rje'i yi ge drug pa dang /__/'jam dpal rgyud kyi gsang sngags bzla/__/oM sarba d+harmA b+hA wa swA b+hA wa/__bi shud+d+he badz+ra a A aM aH_pra kr-i ti pa ri shud+d+haHsarba d+harma ya du ta sarba ta thA ga ta/__dz+nyA nA kA ya many+dzu shrI pa ri shud+d+hi tA mu pA dA ya ti aM aH_sarba ta thA ga ta hrI da ya/__ha ra ha ra/__oM hU~M hrIHb+ha ga wAn dz+nyA na mur+t+ti wA gi shwa ra/__ma hA bA tsa/__sarba d+harma/__ga ga nA ma la su pa ri shud+d+ha/__d+harmA d+hA tu dz+nyA na gar+b+ha AH_!__gsang sgrub 'jam dpal rdo rje ni/__/dmar ser zhal gsum phyag drug pa/__/zhal g.yas sngo zhing g.yon dkar ba/__/dang po gnyis kyis yum la 'khyud/__/g.yas gnyis rdo rje ral gri dang /__/g.yon gnyis glegs bam mda' gzhu bsnams/__/rang 'od rdo rje dbyangs can ma/__/dkar ser ral gri pi waM 'dzin/__/gnyis ka dar dang rus pa dang /__/rin po che yi rgyan gyis brgyan/__/gzhan rnams sngar dang 'dra bar gsal/__/thugs kar ye shes sems dpa' ni/__/tsit+ta 'od kyi gur khyim dbus/__/'jam dpal zhal gcig phyag gnyis pa/__yab yum tshon gang gsal ba yi/__/thugs kar nyi steng ral gri yi/__/chang zung d+hIHmu~M gsang ba'i mthar/__/sngags kyi phreng bas bskor ba dang /__/'od kyis khams gsum snod bcud sbyongs/__/'jam dpal sku gsung thugs su bsgyur/__/bdag thim dngos grub rnam gnyis thob/__/mkhyen gnyis ye shes rgyas par mos/__/oM A ra pa tsa na d+hIHmU~M hrI a a/__sogs kyi gsang sngags bzla/__thig le phra mo'i rnal 'byor ni/__/thugs ka'i ral gri sa bon las/__/spro bsdus snod bcud thams cad bsdu/__/ral gri sa bon bcas par thim/__/de nyid 'od zhu thig le ni/__/dmar ser shin tu dwangs phra'i nang /__/'khor 'das gzugs brnyan rab bkra bar/__/sems gtad de las 'od 'phros pas/__/rang lus de la bsdu bya zhing /__/thig le rgya bskyed nam mkhar khyab/__/je phrar sran ma tsam gyur bsgom/__/de lta'i spro bsdu yang yang bya/__/mthar ni mi dmigs brjod pa bral/__/gnas lugs lta ba'i ngang bskyang ngo //____// @#/__/'jam dbyangs bla ma'i rnal 'byor la brten pa'i tshogs mchod bsod nams rab rgyas zhes bya ba bzhugs so/__/bla ma 'jam pa'i dbyangs kyi zhabs la phyag 'tshal lo/__/de la 'dir gsang sngags kyi rnal 'byor pas rang gzhan gyi rgyud la tshogs gnyis rlabs po che skad cig gis bzlum par bya ba'i thabs mkhas tshogs kyi 'khor lo'i rjes mthun tshogs kyi mchod pa 'bul bar spro na sdig dang ma 'dres pa'i dam tshig gi rdzas rnams ci 'byor pa bshams la/__bla mchod bzlas pa yan grub rjes/__oM badz+ra a mr-i ta kun+Da lis bsang /__swa b+hA was stong par sbyangs/__stong pa'i ngang las yaM las rlung dkyil sngo/__/de steng ra~M las me dkyil gru gsum dmar/__/a las rab dkar thod pa stong gsum khyon/__/de steng a las zla ba'i dkyil 'khor steng /__/go ku da ha na las sha lnga dang /__/de steng b+h+rU~M A~M dz+rIM khaM hU~M lnga las/__/bdud rtsi lnga dang ye shes lnga'i ngo bo/__/bde gshegs rigs lnga'i sa bon rnams kyis mtshan/__/zla ba'i mtha' mar dbyangs gsal g.yas g.yon bskor/__/steng gi nam mkhar oM dkar thur du blta/__/de steng ra~M las nyi dkyil hU~M yig las/__/rdo rje rtse lnga'i lte bar hU~M gis mtshan/__/hU~M las 'od 'phros rlung g.yos me sbar bas/__/sha lnga bdud rtsi lnga rnams skol zhing zhu/__/rlangs pa oM hU~M la phog bdud rtsi'i rgyun/__/char ltar bab cing slar yang 'od 'phros pas/__/phyogs bcu'i rgyal ba'i ye shes bdud rtsi rnams/__/he ru ka yi rnam par spyan drangs te/__/rdo rje lte ba'i hU~M la thim pa dang /__/rdo rje nyi ma oM bcas zhu ba las/__/tshogs kyi bdud rtsi rnams dang gnyis med pa/__/kha dog dri ro nus mthu phun sum tshogs/__/'dod yon bdud rtsi'i rgya mtsho chen por gyur/__/oM AHhU~M ha ho hrIHphyag rgya dang bcas lan mang du brjod pas byin gyis brlabs/__tshogs zhing spyan drangs ba ni/__'bar ba'i phyag rgyas/__phaiM/__gnas gsang ba mchog gi dgyes pa na/__/dpal rdo rje 'chang chen dbyings nas bzhengs/__/'dir gshegs tshogs kyi mchod pa bzhes/__/bdag mos pa'i bu la byin gyis rlobs/__/shar mngon par dga' ba'i zhing khams nas/__/mgon bde gshegs dri ma med pa'i dpal/__/'dir gshegs sogs tshig rkang gnyis rigs 'gre'o/__/gnas bde ba can gyi zhing khams nas/__/bla ma sa skya pa chen po yang /__/'dir gshegs=__/steng mkha' spyod dag pa'i zhing khams nas/__/rje 'jam dbyangs bla ma rig pa 'dzin/__/'dir gshegs=__/bu rang snang dag pa'i zhing khams nas/__/chos rje sa skya paN+Di ta/__/'dir gshegs=__/gnas spyi gtsug nyi zla'i gdan steng du/__/pha mtshungs med kun dga' rgyal mtshan yang /__/'dir gshegs=__/snang srid kun 'og min gzhal yas khang /__/bcom ldan 'das dgyes mdzad rdo rje dang /__/dpal 'khor lo sdom pa rnal 'byor ma/__/yi dam gyi lha tshogs grangs med kyang /__'dir gshegs=__/dbyings rdo rje bdag med ma dpal dang /__/rje btsun rigs byed lha mo sogs/__/dpa' bo dang DA ki'i tshogs chen po/__/ri rab kyi rdul dang mnyam pa yang /__/rus rgyan dang g.yer kha si li li/__/cang te'u dril bu'i sgra dang bcas/__/'dir gshegs=__/gnas dur khrod chen po'i tshogs khang nas/__/dpal ldan mgon po lcam dral la/__/'khor rgyud gsum bstan srung rgya mtshos bskor/__/'dir gshegs=__/gnas rang lus rdo rje'i phung po yi/__/rtsa 'khor lo lnga yi dbus bzhugs pa'i/__/bla ma rigs lnga DA ki dang /__/dbang yul gyi sems dpa' lcam dral dang /__/sprul pa'i khro tshogs chen po rnams/__/'dir gshegs tshogs kyi mchod pa bzhes/__/bdag mos pa'i bu la byin gyis rlobs/__/tshogs gtor gyi mchod pa rgya re che/__/bdud rtsi yi rlangs pas phyogs bcur gtibs/__/'dod yon gyi lha mo dwangs shing spro/__/pad can gyi mtshan nyid yongs rdzogs pa'i/__/bcu drug gi rig mas gar stabs bsgyur/__/zag med kyi bde ba chen po yi/__/ro yis smyos shing a ha~M sgra chen sgrogs/__/'khor 'das kun bde stong phyag rgya'i gar/__/dpal 'jam dbyangs bla ma'i rol par shar/__/sku rdo rje'i gar stabs khrigs se khrig__/gsung tshangs pa'i dbyangs kyi chos sgra sgrogs/__/thugs mkhyen brtse'i dgongs pa nyi shar bzhin/__/lus la rdo rje'i sku yi byin gyis rlobs/__/ngag la gsung dbyangs nus pa'i dpal thob cing /__/yid la bde stong ye shes chen po 'char/__/sgo gsum sku bzhir smin par mdzad du gsol/__/oM gu ru bud+d+ha bo d+hi sa twa shrI he ru ka maN+Da la DA ki nI d+harma pA la sa pa ri wA ra oM badz+ra sa mA dzaHzhes spyan drangs/__de nas bdud rtsi'i mchod pa ni/__oM AHhU~M/__dman pa'i spyod yul dag las rab 'das shing /__/rgyal ba kun gyis bsten bya'i dam tshig mchog__/dngos grub rnam gnyis kun gyi gzhir gyur pa/__/zag med bdud rtsi mchog gi mchod pa 'di/__/phyogs bcu dus gsum rgyal ba sras bcas kyi/__/mkhyen brtse nus gsum gcig tu 'dus pa'i dngos/__/dran pas srid zhi'i rgud pa kun sel ba'i/__/rtsa ba'i bla ma'i zhal du oM AHhU~M/__/bya spyod rnal 'byor bla med rgyud sde sogs/__/rgyud sde chen po bzhi dang rjes 'brel ba'i/__/gang 'dul sgyu 'phrul drwa ba'i rnam rol can/__/yi dam lha tshogs zhal du oM AHhU~M/__/oM AHhU~M/__/rdo rje'i chos srung nor lha rgya mtsho dang /__/gnas gsum bzhugs pa'i dpa' bo rnal 'byor ma/__/yul lha gzhi bdag rigs drug tshogs bcas rnams/__/lha ru gsal ba'i zhal du oM AHhU~M/__/sgrib pa gnyis kyi dri ma kun bsal nas/__/gzung 'dzin rtog pa kun las rnam grol ba/__/bla na med pa'i byang chub sems kyi dngos/__/bde ba chen po'i mchod pas mnyes gyur cig__/oM AHhU~M/__zhes brjod/__tshogs phud cha gsum du bsgos la/__oM AHhU~M/__/phyogs bcu dus gsum rgyal ba sras bcas kyi/__/ye shes sgyu 'phrul drwa ba'i rnam rol can/__/bka' drin mnyam med rtsa ba'i bla ma la/__/zag med bdud rtsi'i tshogs kyi mchod pa 'bul/__/rgyal ba'i mkhyen brtse ye shes gcig bsdus pa/__/srid zhi'i dbang phyug bla ma 'jam pa'i dbyangs/__/gdan gsum tshang ba'i ded dpon chen po la/__/zag med bdud rtsi'i tshogs kyi mchod pa 'bul/__/gzhan yang tshad med thugs rje'i sprin mdzes las/__/dbang bskur rgyud bshad man ngag ston mdzad pa'i/__/brgyud pa'i bla ma dam pa thams cad la/__/zag med bdud rtsi'i tshogs kyi mchod pa 'bul/__/oM gu ru badz+ra d+ha ra many+dzu g+ho Sha b+hU mi paN+Di ta sa pa ri wA ra oM a kA ro mu khaM sarba d+harma NaM/__Ad+yA nut+pan+na twA ta oM AHhU~M phaT swA hA/__/lan gsum gyis 'bul/__phud bar pa phul te/__oM AHhU~M/__spangs rtogs mthar phyin rgyal ba sras bcas dang /__/yi dam dkyil 'khor 'khor lo rab 'byams sogs/__/skyabs gnas mchod 'os rgya mtsho thams cad la/__/zag med bdud rtsi'i tshogs kyi mchod pa 'bul/__/bzhes nas bdag dang mtha' yas sems can kun/__/bsod nams ye shes tshogs gnyis rab rdzogs shing /__/mchog dang thun mong dngos grub rnam gnyis kyi/__/phan bde'i dga' ston rgyas par byin gyis rlobs/__/oM gu ru bud+d+ha bo d+hi sa twa shrI he ru ka maN+Dal b+hU mi paN+Di ta sa pa ri wA ra oM a kA ro sogs lan gsum gyis 'bul/__phud tha ma phul te/__oM AHhU~M/__srid zhir mi gnas ye shes sgyu ma'i gar/__/brtan g.yo kun khyab dgyes mdzad rdo rje dang /__/gsang 'dus 'jigs byed 'khor lo sdom pa che/__/dang po'i sangs rgyas dus kyi 'khor lo sogs/__/thabs shes gnyis med rgyud sde'i lha tshogs la/__/zag med bdud rtsi'i tshogs kyi mchod pa 'bul/__/bzhes nas rnal 'byor bdag cag 'khor bcas kyi/__/phung khams skye mched rtsa rlung thig le rnams/__/dag pa gdan gsum tshang ba'i dkyil 'khor gyi/__/rang bzhin mngon du 'gyur bar byin gyis rlobs/__/oM gu ru saM gra ha b+hai ra wa he badz+ra kA la tsakra sa pa ri wA ra oM a kA ro sogs lan gsum brjod de phul/__oM AHhU~M/__rdo rje'i ye shes 'bar ba'i me bo ches/__/log 'dren bgegs kyi bud shing kun bsregs nas/__/grub gnyis snang ba rtag tu rgyas mdzad pa'i/__/chos skyong srung ma'i tshogs rnams thams cad dang /__/gnas yul dur khrod kun na bzhugs pa yi/__/sprul pa'i gar mdzad dpa' bo rnal 'byor ma/__/srid zhi'i 'byor pa mtha' dag sbyin mdzad pa'i/__/gnod sbyin nor lha rgya mtsho'i tshogs bcas dang /__/gzhan yang yul lha gzhi bdag rigs drug mgron/__/thams cad ye shes gcig gis byin brlabs par/__/zhal zas bdud rtsi'i tshogs kyi mchod pa 'bul/__/'gal rkyen zhi zhing mthun rkyen yid bzhin sgrubs/__/mchog thun dngos grub thob pa'i phrin las mdzod/__/chos skyong so so'i gtor sngags dang mkha' 'gro spyi gtor sngags kyis phul/__las rdor gyis tshogs zhu 'bul byas nas drangs te tshim par rol/__mthar lhag ma chu chang gis bran/__oM AHhU~M/__lhag ma'i gtor ma zhal zas bdud rtsi'i sprin/__/'dod pa'i yon tan rnam pa thams cad pa/__/zad pa med pa nam mkha'i mdzod lta bu/__/dpag yas srid zhi'i khams kun khyab par gyur/__/oM AHhU~M/__lan gsum gyis brlab/__phaiM/__zhes pas mgron bkug__/oM kha kha khA hi uSh+tsi Ta ba liM ta b+hak+Sha sI swA hA/__zhes dang /__'byung po lhag la dbang ba'i tshogs rnams la/__/'dod yon tshogs kyi lhag ma 'di sbyin no/__/zag med bde ba mchog gis lus dang sems/__/ngoms shing tshim pa'i skal ba ldan gyur cig__/ces bsngos la phyi rol gtsang sar phul/__rdor glu shis brjod smon lam rnams kye rdor ltar bya'o/__/tshogs zhing thams cad rim gyis 'od du zhu nas chos kyi rje nyid la thim par gyur/__zhes brjod la/__rjes gsol btab dbang blang ba yan bla mchod gzhung ltar bya'o/__/tshogs pa mang skabs las rdor gyi phyag sngon 'gros/__tshogs kyi yo byad la byin rlabs gnang bar zhu/__zhes dang /__bla ma dang dkon mchog gi drung du sman phud 'bul bar zhu/__zhes dang /__bla ma dang dkon mchog gi drung du tshogs phud 'bul bar zhu/__zhes dang /__mkha' 'gro dang chos skyong gi drung du tshogs phud 'bul bar zhu/__zhes pa so so'i thad kyi skabs dang sbyar/__drangs pa'i skabs las rdor gyis bza' ba g.yas dang btung ba g.yon du thogs te/__hoHgzigs shig mdzes ldan dam pa'i chos/__/'di la the tshom byar mi rung /__/bram ze gdol pa khyi dang phag__/rang bzhin gcig tu dgongs te rol/__/zhes lag gnyis kyis stob/__len pa pos pad bskor dang bcas/__bde gshegs chos la rin thang med/__/'dod chags la sogs dri ma bral/__/gzung dang 'dzin pa rnam par spangs/__/de bzhin nyid la bdag phyag 'tshal/__zhes pad+ma'i phyag rgyas blangs/__a ho ma hA su kha/__zhes brjod thams cad la brim tshar ba dang /__thams cad tshogs la rol bar zhu/__zhes bskul te/__mgrin par bla ma/__snying gar yi dam gyi ngo bo hU~M sngon po/__lte bar mkha' 'gro chos skyong rnams gsal btab la rol bar bya'o/__/yang las rdor nas phyag sngon 'gros/__lhag ma'i gtor ma la byin brlab gnang bar zhu/__zhes bskul nas lhag chog btang bar bya ba ni spros bcas kyi lugs so/__/tshogs 'khor gyi bshad pa zhib mo ni gzhung gzhan du shes dgos pa kho na'o/__zhes pa'ang dge slong 'tsho byed tshe ring phun tshogs kyis nan tan du bskul ba don yod pa'i phyir du 7'jam dbyangs chos kyi blo gros pas bla ma gong ma'i gsung las btus te bkod pa 'dis kyang tshogs gnyis rgya chen po 'phel ba'i rgyur gyur cig__/sarba dza ga taM//____//