JKCL-KABUM-05-CA-008

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma smra ba'i seng+ge yi/ bskang ba dbyangs can thol glu
Location	chos kyi blo gros bka' 'bum Volume 5, Text 8, Pages 149-151 (Folios 1a1 to 2a5)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. bla ma smra ba'i seng+ge yi bskang ba dbyangs can thol glu. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 5: 149-151. Bir, H.P.: Khyentse Labrang, 2012.
Genre	Mending Rituals - bskang chog  ·  Vajra Songs - rdo rje'i glu
Deity	'jam dpal smra ba'i seng ge
Colophon	།མདོ་སྔགས་ཡིད་གཞུང་ཨཱ་ནནྡ་མངྒས་གསུང་ངག་གླེགས་བམ་རྟེན་བཅས་བསྐུལ་བའི་ངོར། སྐྱེད་ཚལ་བླ་བྲང་ཀུན་གཟིགས་གཟིམ་དཀྱིལ་དུ་འཇམ་དབྱངས་བློ་གྲོས་རྒྱ་མཚོས་སྦྱར་བ་དགེ།
	/mdo sngags yid gzhung A nan+da mang+gas gsung ngag glegs bam rten bcas bskul ba'i ngor/__skyed tshal bla brang kun gzigs gzim dkyil du 'jam dbyangs blo gros rgya mtshos sbyar ba dge/

1 Texts in this Section (sde tshan or chos tshan)

149-151	བླ་མ་སྨྲ་བའི་སེངྒེ་ཡི། བསྐང་བ་དབྱངས་ཅན་ཐོལ་གླུ། bla ma smra ba'i seng+ge yi/ bskang ba dbyangs can thol glu Mending Rituals - bskang chog   ·   Vajra Songs - rdo rje'i glu	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

བླ་མ་སྨྲ་བའི་སེངྒེ་ཡི། བསྐང་བ་དབྱངས་ཅན་ཐོལ་གླུ་བཞུགས། ཧཱུྃ་ཧྲཱིཿརང་བཞིན་རྣམ་དག་སྤྲོས་བྲལ་ཆོས་ཀྱི་དབྱིངས། །རང་སྣང་སྐུ་དང་ཡེ་ཤེས་བརྡལ་བ་ཆེ། །རང་རིག་སྐུ་གསུམ་ཀུན་མཁྱེན་བླ་མའི་དལ། །རང་བྱུང་རང་ཤར་ཀློང་ནས་གཤེགས་སུ་གསོལ། །ཀུན་གཞི་གནས་གྱུར་ཡེ་ཤེས་རོལ་པ་ལས། །ཀུན་འབྱུང་རྣམ་གྲོལ་གཟུངས་དང་ཏིང་འཛིན་འཕྲུལ། །ཀུན་ཏུ་གཟིགས་པའི་ཞིང་ཁམས་འབྱམས་ཀླས་པ། །ཀུན་བཟང་མཆོད་པའི་སྤྲིན་ཆེན་རྣམ་པར་འཕྲོ། །མང་ཐོས་མཆོད་ཡོན་བསམ་བྱུང་ཞབས་བཀྲུ་བསིལ། །བྱང་སེམས་མེ་ཏོག་ཚུལ་ཁྲིམས་བདུག་སྤོས་འཐུལ། །མཁྱེན་རྟོགས་སྣང་གསལ་ཤིན་སྦྱངས་དྲི་ཡི་མཆོག །ཏིང་འཛིན་ཞལ་ཟས་སྤོབས་པའི་ཆོས་རྔ་ལྡིར། །རྣམ་མང་ཤེས་པའི་འཇིག་རྟེན་མཎྜ་ལ། །མདོ་སྔགས་ཆོས་རབ་རྣམ་འབྱེད་རྟགས་བརྒྱད་དང་། །བཟོ་གསོས་རྗེས་འཛིན་རྣམ་བརྒྱད་བཀྲ་ཤིས་རྫས། །སྒྲ་ཚད་རྒོལ་འཇོམས་རྒྱལ་སྲིད་རིན་ཆེན་བདུན། །ལུང་རིགས་གདུགས་དཀར་གྲགས་སྙན་བ་དན་བསྒྲེང་། །ཚོགས་གཉིས་བླ་བྲེ་སྒྲུབ་པའི་རྒྱལ་མཚན་བརྟན། །བྱང་ཆུབ་ཕྱོགས་དང་ཟག་པ་མེད་ཆོས་ཀྱི། །ལམ་དང་འབྲས་བུའི་མངོན་པར་རྟོགས་པའི་ཚོགས། །བཅུ་དྲུག་ཟློས་གར་བསྒྱུར་བའི་རིག་མ་དང་། །ཕྱི་ནང་གསང་བ་དེ་ཉིད་མཆོད་སྤྲིན་གྱིས། །སྐུ་གསུམ་བླ་མའི་ལྷ་ཚོགས་ཐུགས་དམ་བསྐང་། །སྐུ་བཞིའི་གོ་འཕང་མངོན་གྱུར་དངོས་གྲུབ་སྩོལ། །པཎ་ཆེན་སྨྲ་བའི་སེངྒེའི་ཐུགས་དམ༴། མཁྱེན་གཉིས་ཡེ་ཤེས་རྒྱས་པའི་དངོས་གྲུབ༴། རྗེ་བཙུན་བརྟན་པའི་འཁོར་ལོའི༴། ཚིག་དོན་ཕུལ་བྱུང་རྩོམ་པའི༴། འཕགས་མཆོག་ངག་གི་དབང་ཕྱུག༴། གཟུངས་ཀྱི་སྒོ་བཞི་བརྙེས་པའི༴། ཆོས་དབྱིངས་གསུང་གི་དབང་ཕྱུག༴། ལེགས་བཤད་ཐོགས་མེད་འཆད་པའི༴། དཔལ་ལྡན་རྡོ་རྗེ་རྣོན་པོའི༴། རྩོད་པས་ཕས་རྒོལ་ཚར་གཅོད༴། འཕགས་མ་རྡོ་རྗེ་དབྱངས་ཅན༴། མྱུར་བའི་བློ་གྲོས་རབ་འབར༴། རྒྱལ་ཡུམ་རིན་ཆེན་དབྱངས་ཅན༴། བརྟན་པའི་བློ་གྲོས་འགྱུར་མེད༴། མྱུར་མཛད་པདྨ་དབྱངས་ཅན༴། གཏིང་ཟབ་བློ་མཆོག་རྒྱ་མཚོའི༴། ཚངས་སྲས་ལས་ཀྱི་དབྱངས་ཅན༴། རྒྱ་ཆེན་བློ་གྲོས་རབ་ཡངས༴། སྒོ་སྲུང་རྒྱལ་ཆེན་སྡེ་བཞིའི༴། སྤོབས་པ་རབ་ཏུ་བརྟན་པའི༴། འཇམ་དཔལ་ཕ་རོལ་རྒོལ་འཇོམས༴། འཆི་བདག་བདུད་བཞི་འཇོམས་པའི་དངོས༴། ཁྲོ་རྒྱལ་རྡོ་རྗེ་གཙུག་ཏོར༴། རིག་སྔགས་བྱད་སྟེམ་ཚར་གཅོད༴། ལས་གཤིན་དམ་ཅན་ལྕམ་དྲལ་ཐུགས༴། ཞིང་བཅུ་ཚང་བའི་དགྲ་བགེགས་རྡུལ་དུ་རློགས། །བཀའ་གཏེར་ཆོས་སྲུང་རྒྱ་མཚོའི་ཐུགས་དམ་བསྐང་། །བར་ཆད་རྐྱེན་ཟློག་རྣམ་བཞིའི་ཕྲིན་ལས་སྒྲུབས། །འཇམ་དཔལ་སྒྱུ་འཕྲུལ་དྲ་བའི་ལྷ་ཚོགས་རྣམས། །ཐུགས་དམ་གཉན་པོ་ཆོས་ཀྱི་དབྱིངས་སུ་བསྐང་། །མ་རིག་ལས་ཉོན་ཆོས་སྤངས་ལོག་ལྟ་སོགས། །གཉིས་འཛིན་སྒྲིབ་ཚོགས་ཀ་དག་ཀློང་དུ་བཤགས། །འཇིག་རྟེན་འཇིག་རྟེན་འདས་པའི་ཚེ་བསོད་དཔལ། །ཡེ་ཤེས་ཡོན་ཏན་གཟུངས་དྲན་ཏིང་ངེ་འཛིན། །བློ་གྲོས་མཆོག་གྲུབ་ཕྱོགས་ལས་རྣམ་པར་རྒྱལ། །བསྟན་པའི་སྣང་ཆེན་ཉིན་བྱེད་རབ་འབར་མཛོད། །སྐྱེ་བ་ཀུན་ཏུ་བླ་མ་ལྷག་པའི་ལྷས། །རྗེས་བཟུང་རྡོ་རྗེའི་ལམ་མཆོག་བདེ་བླག་བསྒྲོད། །སྒྲིབ་གསུམ་སྦུབས་བཅོམ་མཁྱེན་གཉིས་ཉི་འབུམ་བརྡལ། །ཀུན་མཁྱེན་འཇམ་པའི་རྡོ་རྗེ་མངོན་བྱེད་ཤོག །མདོ་སྔགས་ཡིད་གཞུང་ཨཱ་ནནྡ་མངྒས་གསུང་ངག་གླེགས་བམ་རྟེན་བཅས་བསྐུལ་བའི་ངོར། སྐྱེད་ཚལ་བླ་བྲང་ཀུན་གཟིགས་གཟིམ་དཀྱིལ་དུ་འཇམ་དབྱངས་བློ་གྲོས་རྒྱ་མཚོས་སྦྱར་བ་དགེ། །།

[edit]

bla ma smra ba'i seng+ge yi/__bskang ba dbyangs can thol glu bzhugs/__hU~M hrIHrang bzhin rnam dag spros bral chos kyi dbyings/__/rang snang sku dang ye shes brdal ba che/__/rang rig sku gsum kun mkhyen bla ma'i dal/__/rang byung rang shar klong nas gshegs su gsol/__/kun gzhi gnas gyur ye shes rol pa las/__/kun 'byung rnam grol gzungs dang ting 'dzin 'phrul/__/kun tu gzigs pa'i zhing khams 'byams klas pa/__/kun bzang mchod pa'i sprin chen rnam par 'phro/__/mang thos mchod yon bsam byung zhabs bkru bsil/__/byang sems me tog tshul khrims bdug spos 'thul/__/mkhyen rtogs snang gsal shin sbyangs dri yi mchog__/ting 'dzin zhal zas spobs pa'i chos rnga ldir/__/rnam mang shes pa'i 'jig rten maN+Da la/__/mdo sngags chos rab rnam 'byed rtags brgyad dang /__/bzo gsos rjes 'dzin rnam brgyad bkra shis rdzas/__/sgra tshad rgol 'joms rgyal srid rin chen bdun/__/lung rigs gdugs dkar grags snyan ba dan bsgreng /__/tshogs gnyis bla bre sgrub pa'i rgyal mtshan brtan/__/byang chub phyogs dang zag pa med chos kyi/__/lam dang 'bras bu'i mngon par rtogs pa'i tshogs/__/bcu drug zlos gar bsgyur ba'i rig ma dang /__/phyi nang gsang ba de nyid mchod sprin gyis/__/sku gsum bla ma'i lha tshogs thugs dam bskang /__/sku bzhi'i go 'phang mngon gyur dngos grub stsol/__/paN chen smra ba'i seng+ge'i thugs dam=/__mkhyen gnyis ye shes rgyas pa'i dngos grub=/__rje btsun brtan pa'i 'khor lo'i=/__tshig don phul byung rtsom pa'i=/__'phags mchog ngag gi dbang phyug=/__gzungs kyi sgo bzhi brnyes pa'i=/__chos dbyings gsung gi dbang phyug=/__legs bshad thogs med 'chad pa'i=/__dpal ldan rdo rje rnon po'i=/__rtsod pas phas rgol tshar gcod=/__'phags ma rdo rje dbyangs can=/__myur ba'i blo gros rab 'bar=/__rgyal yum rin chen dbyangs can=/__brtan pa'i blo gros 'gyur med=/__myur mdzad pad+ma dbyangs can=/__gting zab blo mchog rgya mtsho'i=/__tshangs sras las kyi dbyangs can=/__rgya chen blo gros rab yangs=/__sgo srung rgyal chen sde bzhi'i=/__spobs pa rab tu brtan pa'i=/__'jam dpal pha rol rgol 'joms=/__'chi bdag bdud bzhi 'joms pa'i dngos=/__khro rgyal rdo rje gtsug tor=/__rig sngags byad stem tshar gcod=/__las gshin dam can lcam dral thugs=/__zhing bcu tshang ba'i dgra bgegs rdul du rlogs/__/bka' gter chos srung rgya mtsho'i thugs dam bskang /__/bar chad rkyen zlog rnam bzhi'i phrin las sgrubs/__/'jam dpal sgyu 'phrul dra ba'i lha tshogs rnams/__/thugs dam gnyan po chos kyi dbyings su bskang /__/ma rig las nyon chos spangs log lta sogs/__/gnyis 'dzin sgrib tshogs ka dag klong du bshags/__/'jig rten 'jig rten 'das pa'i tshe bsod dpal/__/ye shes yon tan gzungs dran ting nge 'dzin/__/blo gros mchog grub phyogs las rnam par rgyal/__/bstan pa'i snang chen nyin byed rab 'bar mdzod/__/skye ba kun tu bla ma lhag pa'i lhas/__/rjes bzung rdo rje'i lam mchog bde blag bsgrod/__/sgrib gsum sbubs bcom mkhyen gnyis nyi 'bum brdal/__/kun mkhyen 'jam pa'i rdo rje mngon byed shog__/mdo sngags yid gzhung A nan+da mang+gas gsung ngag glegs bam rten bcas bskul ba'i ngor/__skyed tshal bla brang kun gzigs gzim dkyil du 'jam dbyangs blo gros rgya mtshos sbyar ba dge/__//_