JKCL-KABUM-09-TA-013

🚧 This website is under continued development. We appreciate your patience!

Previous Text Back to Volume PageNext Text

Wylie title	gu ru'i gsol 'debs dus gsum sangs rgyas kyi 'grel pa rdo rje'i tshig gi sbas 'byed
Location	chos kyi blo gros bka' 'bum Volume 9, Text 13, Pages 129-139 (Folios 1a to 6a5)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Tertön	མཆོག་གྱུར་གླིང་པ་ (mchog gyur gling pa)
Citation	'jam dbyangs mkhyen brtse chos kyi blo gros. gu ru'i gsol 'debs dus gsum sangs rgyas kyi 'grel pa rdo rje'i tshig gi sbas 'byed. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 9: 129-139. Bir, H.P.: Khyentse Labrang, 2012.
Genre	Commentaries - 'grel pa  ·  Commentary with Annotations - mchan 'grel  ·  Supplications - gsol 'debs
Deity	pad+ma 'byung gnas
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/vajra-words-unveiled
Colophon	དེ་ལྟར་འཆད་པ་ཉུང་ངུ་འདི། །ཆུ་བྱ་ཟླ་དྲུག་ཚེས་ཉེར་ལྔ། །ཡིད་ལ་ཐོལ་གྱིས་ཤར་བ་བཞིན། །པདྨ་ཡེ་ཤེས་རྡོ་རྗེས་བྲིས།།
	de ltar 'chad pa nyung ngu 'di/__/chu bya zla drug tshes nyer lnga/__/yid la thol gyis shar ba bzhin/__/pad+ma ye shes rdo rjes bris//

Tibetan Text

Wylie

[edit]

༄༅། །གུ་རུའི་གསོལ་འདེབས་དུས་གསུམ་སངས་རྒྱས་ཀྱི་འགྲེལ་པ་རྡོ་རྗེའི་ཚིག་གི་སྦས་འབྱེད་ཅེས་བྱ་བ་བཞུགས་སོ། ། པདྨའི་འབྱུང་གནས་པདྨའི་གཙོ། །པདྨ་རྒྱལ་ལ་གུས་བཏུད་ནས། །རྡོ་རྗེའི་ཚིག་གི་སྦས་འབྱེད་ནི། །འབྲི་ལ་ཌཱ་ཀིས་གནང་བ་སྩོལ། །དེ་ཡང་གསོལ་འདེབས་འདི་ལ། དོན་གསུམ་སྟེ། ཕྱི་ཚིག་དོན་ལྟར་བཤད་པ། ནང་སྦས་དོན་ལྟར་བཤད་པ། གསང་བ་མཐར་ཐུག་གི་དོན་དུ་བཤད་པ་དང་གསུམ་ལས། །དང་པོ་ནི། དུས༷་གསུམ༷་སང༷ས་རྒྱས༷་གུ༷་རུ༷་རིན༷་པོ༷་ཆེ༷། ཞེས་སོགས་ཀྱིས་བསྟན་ཏེ། དེ་ཡང་སེམས་ཅན་དང་སངས་རྒྱས་གང་ཡང་མ་བྱུང་བའི་བསྐལ་པའི་ཐོག་མར་སྟོན་པ་འཁོར་འདས་ཀྱི་མེས་པོ་ཆོས་སྐུ་ཀུན་ཏུ་བཟང་པོའི་བྱིན་རླབས་ཀྱིས་ལོངས་སྐུ་རིགས་ལྔ་སྣང་བ་ལས་རྒྱན་སྟུག་པོ་བཀོད་པ་སོགས་ཀྱི་ཞིང་ཁམས་ཀྱི་སྤྲིན་ཆེན་འབྱམས་ཀླས་པར་བཀོད་པ་དང་། དེ་ལས་མཆོག་གི་སྤྲུལ་པ་ཞི་བ་དང་། ཁྲོ་བོ། རིག་པ་འཛིན་པ་དང་དཔལ་བོ་རྣལ་འབྱོར་མ་སོགས་གདུལ་བྱ་དམན་དད་མཆོག་གི་རིམ་པས་འདུལ་བྱེད་སྟོན་པ་ཡང་ཚད་མེད་པ་སྟེ། གུ་རུ་རྡོ་རྗེའི་གསུང་ལས། རང་བྱུང་པདྨར་ཞེས་བྱ་གྲགས་པ་གང་༔ ཞེས་སོགས་རྣམ་འཕྲུལ་ཚད་མེད་པ་ལས་རེ་ཞིག་གླིང་བཞི་པའི་འཇིག་རྟེན་ཁམས་ཀྱི་ཛམ་གླིང་འདིའི་ཡུལ་དབུས་རྡོ་རྗེ་གདན་གྱི་ནུབ་ཕྱོགས་ཨོ་ཌི་ཡ་ན་སྟེ་འཕུར་འགྲོའི་གླིང་ཞེས་ཟུར་ཆད་ཀྱི་སྐད་དུ་ཨོ་རྒྱན་གྱི་ཡུལ་གྱི་ནུབ་བྱང་སིནྡྷའི་རྒྱ་མཚོར་རྫུས་སྐྱེས་སུ་བྱོན་པའི་སློབ་དཔོན་ཆེན་པོ་འདི་ཉིད་ཀྱི་མཛད་པའི་རྣམ་ཐར་བསམ་གྱིས་མི་ཁྱབ་པ་ལས་གཙོ་བོར་གངས་ཅན་བོད་ཡུལ་གྱི་བསྟན་འགྲོའི་དོན་མཐའ་ཡས་པར་མཛད་པའི་སྐབས་ཤིག་ཆོས་རྒྱལ་ཡབ་སྲས་གཙོ་བོར་གྱུར་པའི་རྗེ་འབངས་རྣམས་ལ་གསོལ་འདེབས་རྡོ་རྗེའི་ཚིག་འདི་ཆོས་ཉིད་ཀྱི་རང་སྒྲ་ཡོངས་ལ་བཀའ་སྩལ་བའི་དོན་ནི་འདི་ལྟར་ཏེ། །འདས་མ་འོངས་ད་ལྟ་དུས་གསུམ་དུ་གཤེགས་ཤིང་བཞུགས་པའི་སངས་རྒྱས་རྣམས་སྤངས་རྟོགས་ཡོངས་སུ་རྫོགས་ཤིང་དོན་གཉིས་མཐར་ཕྱིན་པའི་དེ་བཞིན་གཤེགས་པ་མ་ལུས་པ་ཐམས་ཅད་ཀྱི་སྤྲུལ་པ་དང་། བྱིན་རླབས་གཅིག་ཏུ་བསྡུས་པ་གུ་རུ་སྟེ། བླ་མ་ཨོ་རྒྱན་རིན་པོ་ཆེ་ནི་བསམ་འཕེལ་དབང་གི་རྒྱལ་པོ་དང་ཆོས་མཚུངས་པ་འདི་ཕྱིའི་མཆོག་ཐུན་དགེ་ལེགས་ཀྱི་དངོ༷ས་གྲུབ༷་ཐམས་ཅད་ཀུན༷་འབད་མེད་དུ་སྩོལ་བའི་མཐུ་དང་ལྡན་པས་ན་བད༷ག་སེམས་བྱེད་པ་པོ་གང་གི་སྲིད་ཞིའི་སྤྱི་དཔལ་ཡིན་པས་དད་མོས་སྐལ་བ་དང་ལྡན་ན་དངོས་གྲུབ་སྩོལ་བའི་མཐུ་སྟོབས་མཚུངས་པ་མེད་པ་ཡིན་པ་དང་། དེ་ཉིད་ལ་མཚན་གྱི་རྣམ་གྲངས་ཞིང་ཁམས་ཀུན་ཏུ་མཐའ་ཡས་པར་གྲགས་པ་ལས་གཙོ་བོར་ཕྱིར་ལྟར་ན་ཨོ་རྒྱན་གུ་རུ་ཆེན་པོ་པདྨ་འབྱུང་གནས། ནང་ལྟར་ན་ཟག་བཅས་གྱི་ཆོས་ལས་འདས་ཤིང་ཁམས་གསུམ་གྱི་ཀུན་ཏུ་སྦྱོར་བའི་སྲིད་པ་ཐམས་ཅད་རྩད་ནས་འཇོམ་པས་བདེ༷་བ༷་ཆེན༷་པོ༷་བླ་ན་མེད་པ་ཟུང་འཇུག་གི་རྒྱལ་ཐབས་ལ་རང་དབང་འབྱོར་པས་འཇིག་རྟེན་པ་དང་། ཉན་རང་དང་བྱང་སེམས་ཐམས་ཅད་ཀྱི་བླ་མར་གྱུར་ཅིང་དེ་བཞིན་གཤེགས་པ་ཐམས་ཅད་དང་དགོངས་པར་རོ་གཅིག་པའི་བདག་ཉིད་ཅན་གྱི་ཞབ༷ས་ལ་གུས་པའི་འདུད་པ་དང་། གསང་བ་ལྟར་ན། ཕྱི་འཇིགས་པ་བརྒྱད་དང་བཅུ་དྲུག །ནང་དུག་ལྔའི་རྟོག་པ་དང་དེས་བསྐྱེད་པའི་ནད་གདོན་གྱི་འཇིག་པ། གསང་བ་རྩ་རླུང་ཐིག་ལེའི་གེགས་སོགས་བར༷་ཆད༷་ཀུན༷་སེལ༷་བར་མཛད་ཅིང་བདུད༷་བཞིའི་དགྲ་ཐམས་ཅད་འདུ༷ལ་བ་ལ་ཤིན་ཏུ་དཔའ་ཞིང་། ཕྱོགས་ཐམས་ཅད་ལས་རྣམ་པར་རྒྱལ་བའི་ཟིལ་གནོན་རྡོ་རྗེ་དྲག༷་པོ༷་རྩལ༷་སྟེ་སྙིང་རྗེས་ཞི་ལས་མ་གཡོས་ཀྱང་། གདུལ་བྱ་རྒྱུད་མ་རུང་པ་རྣམས་ལ་ཤིན་ཏུ་དྲག་པོར་ཁྲོས་པའི་སྡེ་ནས་ཁྲོ་བོ་གདན་ཐམས་ཅད་ཀྱི་རྩལ་ཤུགས་གཅིག་ཏུ་འདུས་པ་སྟེ། དེ་ལྟ་བུའི་བླ་མ་ཨོ་རྒྱན་ཆེན་པོ་ལ་གསོ༷ལ་བ༷་སྙིང་ནས་འདེ༷བས་སོ༷་སྐུ་གསུང་ཐུགས་ཡེ་ཤེས་རྡོ་རྗེ་དང་བཅས་པས་བདག་གི་རྒྱུད་བྱིན༷་གྱིས༷་རླབ༷ས་པ་དང་། སྨིན་པ་དང་གྲོལ་བར་མཛད་དུ་གསོ༷ལ། གོང་དུ་བཤད་པའི་ཕྱི༷་ནང༷་གས༷ང་བའི༷་བྱང་ཆུབ་སྒྲུབ་པའི་བར༷་ཆད༷་ཐམས་ཅད་ལྷག་མེད་དུ་ཞི༷་བ༷་དང༷་། ཡིད་ལ་ཅི་བས༷མ་པ༷་ཐམས་ཅད་དང་། ཁྱད་པར་ཆོས་མཐུན་གྱི་བསམ་རྒུ་འབད་རྩོལ་ཆེན་པོ་ལ་མི་ལྟོས་པ་སྨོན་པ་ཙམ་གྱིས་འདི་ཕྱིའི་དོན་ཐམས་ཅད་བདེ་བླག་ཏུ་རྒྱ་མཚོ་ཆེན་པོ་ལ་ཆུ་བོ་འདུ་བ་ལྟར་ངང་ངང་ཤུགས་ཀྱིའམ་ལྷུན༷་གྱིས༷་འགྲུབ༷་པར༷་བྱིན༷་གྱིས༷་རློབ༷ས་ཤིག །ཅེས་ཐུགས་དམ་གྱི་རྒྱུད་བསྐུལ་ཞིང་གསོལ་བ་འདེབས་པའོ། །གཉིས་པ་ནི། དུས་གསུམ་སྟེ། ནང་རྡོ་རྗེའི་ལུས་ཀྱི་བཀོད་པ་ལ་ཚ་ཞིང་རྩ་ཡི་གཙོ་མོ་གསུམ་གྱི་རོ་མ་རེ་རྐྱང་སྟེ་ཁམས་ཕྲི་བའམ་ནུབ་པར་བྱེད་པ་ཉི་མའི་རླུང་རྒྱུ་བའི་གཡས་སུ་རོ་མ་དམར་མོ་ནི་འདས་པ་སྟེ་རུལ་ཉི་མ་དེར་ནུབ་ཅིང་གསོད་པར་བྱེད་པ་དང་། ཁམས་འཕེལ་བའམ་རྩུབ་རེག་ཞི་བསིལ་དུ་བྱེད་བ་ཟླ་བའི་རླུང་རྒྱུ་བའི་གཡོན་རྐྱང་མ་ནི་ད་ལྟ་བ་སྟེ་ཀུན་ཟླ་བ་འབབས་ཤིང་འཕེལ་བས་བདེ་བ་སྟེར་བ་བྱེད་པ་དང་། ཡེ་ཤེས་ཀྱི་རླུང་རྒྱུ་བའི་དབུ་མ་ནི་སྒྲ་གཅན་སྟེ་མ་འོངས་པ་དེར་རླུང་སེམས་ཐིག་ལེ་ཚུད་པ་དང་ཟླ་ཉི་ཟོས་ཤིང་མི་རྟོགས་ཡེ་ཤེས་ཆེན་པོ་རྒྱུད་ལ་སྐྱེ་བར་འགྱུར་བའོ། །དེ་ཡང་དཀར་ཆ་དག་པ་ནི་སངས་རྒྱས་སྐུ་རྡོ་རྗེ། དམར་ཆ་ནི་གསུང་རྡོ་རྗེ། མི་རྟོགས་པ་ནི་ཐུགས་རྡོ་རྗེ་སྟེ་གཟོད་ནས་རང་བཞིན་ཀྱིས་རྣམ་པར་དག་པའི་སངས་རྒྱས་གུ་རུ་རིན་པོ་ཆེ་ནི་ཡོན་ཏན་ཐམས་ཅད་ཀྱི་ལྕི་ཤིང་སྤངས་ཐོབ་བྲལ་བའི་བདག་ཉིད་གཞིན་དུས་སུ་རང་ལ་རང་ཆས་སུ་བྲི་གང་འཕོ་འགྱུར་བྲལ་བར་བཞུགས་ཤིང་། ལམ་དུས་སུ་རྩ་རླུང་ཐིག་ལེའི་འགྲོས་ཀྱི་རྡོ་རྗེའི་ལུས་ལ་གནད་དུ་བསྣུན་པས་ས་ལམ་གྱི་ཡོན་ཏན་ཐམས་ཅད་སྐད་ཅིག་རེར་ཡང་བསྐྱེད་པ་དང་རྫོགས་པར་འགྱུར་བ་དང་། དེ་ཡང་གཞན་ནས་མ་བརྩལ་ཡེ་ནས་ལྷུན་གྱིས་རྫོགས་པ་རིན་པོ་ཆེའོ། །མཆོག་ཐུན་དངོས་གྲུབ་ཀུན་གྱི་བདག་པོ་ནི་བདེ་བ་ཆེན་པོ་ལྟེ་འོག་ཏུ་དམར་ཆའི་དྭངས་མ་གཏུམ་མོ་ཨ་ཐུང་མེ་ཡི་རང་བཞིན་དང་། སྤྱི་བོར་དཀར་ཆའི་དྭངས་མ་ཧྃ་ཡིག་ཟླ་བ་ཁུ་བའི་རང་བཞིན་ལས་འབར་འཛགས་ཀྱི་བདེ་དྲོད་སྤར་བས་ཞུ་བདེ་ཐབས་ཀྱི་ལུས་སེམས་ཐམས་ཅད་ལ་མཆོག་ཏུ་མི་འགྱུར་བདེ་བ་ཆེན་པོས་ཁྱབ་པ་ནི། དེས་དྲངས་པའི་དཔེ་ཡི་ཡེ་ཤེས་རྒྱུད་ལ་སྐྱེས་པ་དང་། རིམ་གྱིས་གོམས་པ་མཐར་ཕྱིན་པ་ན་མཚོན་བྱ་དོན་གྱི་ཡེ་ཤེས་བཙན་ཐབས་སུ་རྒྱུད་ལ་སྐྱེ་བའོ། །དེ་ལྟར་ཉམས་སུ་བླང་བའི་སྐབས་སུ་རྩ་རླུང་ཐིག་ལེ་འདུ་འཁྲུགས་པ་ཡི་བགེགས་དང་བར་ཆད་ཀུན་སེལ་བ་དང་རོ་རྐྱང་དང་རྒྱུ་མི་རླུང་གི་བདུད་ཡོན་པོ་འདུལ་བ་ལ་རྡོ་རྗེའི་ལུས་ཀྱི་འཕྲུལ་འཁོར་དྲག་པོ་དང་ལུས་ལ་རྩ་རང་ཤུགས་ཀྱིས་འབྱོངས་པར་གྱུར་པ་དེ་སྲིད་དུ་ལུས་རྒྱུག་པ་འཕུར་བ་སྦྲུག་པ་བརྡབ་པ་སོགས་དང་ངག་ཧ་རིང་ཧ་ཐུང་། ཧཱུྃ་འདྲེན་དང་། ཡིད་ཀྱི་གནད་རླུང་བཙུན་པས་རྟོག་པ་བཙན་ཐབས་སུ་དྷཱུ་ཏིར་བགགས་པའོ། །དེ་གོམས་པས་རང་གི་ལུས་ངག་སེམས་གསུམ་རང་བྱུང་རྡོ་རྗེ་གསུམ་དུ་སྨིན་པར་འགྱུར་བ་སྟེ། དེ་ལྟར་རྡོ་རྗེའི་ལུས་ཀྱི་གྲོང་ཁྱེར་ནི་བླ་མ་ཕྱི་ནང་གསང་གསུམ་གྱི་བདག་ཉིད་དུ་བཞུགས་པ་སྟེ། ཀྱཻ་རྡོར་ལས། ཡེ་ཤེས་ཆེན་པོ། སྒྱུ་འཕྲུལ་མེ་ལོང་ལས། མི་ཤིག་ཐིག་ལེ། ཕྱི་སྒྲུབ་བར་ཆད་ཀུན་སེལ་གྱི་ལྷ་ཚོགས་ཐམས་ཅད་ལུས་ལ་བཀོད་དེ་བསྐྱེད་པ་མ་ཧཱ་ལྟར་འཆད་པ་དང་། ནང་སྒྲུབ་པ་བདེ་བ་ཆེན་པོ་བསམ་པ་ལྷུན་གྲུབ་ཀྱི་དཀྱིལ་འཁོར་རྩ་ཐིག་ལ་བཀོད་དེ་ཨ་ནུ་ལྟར་འཆད་པ་དང་། གསང་བ་རང་བྱུང་གི་ཁྲོ་བོ་རྡོ་རྗེ་དྲག་པོ་རྩལ་རིག་པ་དང་དབྱེར་མེད་ཀྱི་གཉུག་མ་ཆོས་ཉིད་ཀྱི་དཀྱིལ་འཁོར་དུ་ཤར་བའི་དོན་ཨ་ཏི་ལྟར་འཆད་པ་སྟེ་ཡོ་ག་གསུམ་གྱི་བསྐྱེད་རིམ་དང་། དེ་རྣམས་ཀྱི་སྦས་དོན་རྫོགས་རིམ་དང་སྦྱར་སྟེ་འཆད་ཏུ་ཡོད་པར་སེམས་པ། །གསུམ་པ་ནི། དུས་གསུམ་སྟེ། ལུས་ངག་ཡིད་གསུམ་པོ་ལུས་ནི་སྐད་ཅིག་གི་སྐྱེ་འཆི་ཅན་གྱི་འདས་པ་དང་། ངག་རླུང་འབྱུང་འཇུག་ལ་བརྟན་ནས་ལུས་ཡིད་གནས་པས་ད་ལྟ་བ་དང་། སེམས་ནི་མ་འོངས་པའི་རྣམ་རྟོག་གི་འཕྲོ་གཞི་དང་འཁོར་བ་བསྐྱེད་པར་བྱེད་པས་གཙོ་ཆེ་ཆུང་གི་དེ་ལྟར་བསྟན་ལ་དེ་ལྟ་བུའི་དུས་གསུམ་པོ་ལས་འདས་པའི་དུས་བཞི་མཉམ་པ་ཉིད་ཀྱི་དུས་ན་གཞི་ཐོག་མའི་མགོན་པོ་དཔལ་རང་བྱུང་གི་སངས་རྒྱས་དེ་བཞིན་གཤེགས་པ་ཐམས་ཅད་ཀྱི་མེས་པོ་བླ་མ་ཀུན་ཏུ་བཟང་པོ་འཁོར་འདས་ཀུན་ཁྱབ་ཞལ་ཕྱག་གི་མཚན་མ་ལས་འདས་པས་ཆོས་དབྱིངས་ཡེ་ཤེས་འཁོར་འདས་ཐམས་ཅད་ངག་གི་གསལ་བས་མེ་ལོང་། སྲིད་ཞི་རོ་མཉམ་དུ་བཞུགས་པས་མཉམ་ཉིད། ཆོས་ཀུན་ལ་འདྲེས་པར་བྱེད་པས་སོར་རྟོག་ཡེ་ཤེས་ཆེན་པོའི་སྤྱི་གཟུགས་ཟང་ཐལ་སྒྲིབ་གཡོག་བྲལ་བ་གཟོད་ནས་རང་བཞིན་ནས་དག་ཅིང་ཡོན་ཏན་ཡེ་རྫོགས་རིན་པོ་ཆེ་དེ་ཉིད། སིདྡྷི་གྲ་ལས་དངོས་གྲུབ་སྟེ་བྱ་བ་གྲུབ་པའི་ཡེ་ཤེས་ཀྱི་སྲིད་ཞིའི་བསྡུས་པའི་སེམས་ཅན་ཐམས་ཅད་ཀྱི་དོན་མ་ལུས་པ་ཡོངས་སུ་སྒྲུབ་པར་བྱེད་པའི་བདག་པོ་ཆེན་པོར་བཞུགས་པ་ནི་རང་ཤེས་རིག་གི་རྒྱལ་པོ་སྟོན་པ་འོད་མི་འགྱུར་བ་རྣམ་པ་ཐམས་ཅད་ཀྱི་མཆོག་དང་ལྡན་ཞིང་འཁོར་འདས་ཐམས་ཅད་རྫོགས་པའི་ཐིག་ལེ་ཉག་གཅིག་གི་ཀློང་དང་རྟག་ཏུ་བདེ་བ་ཆེན་པོར་བཞུགས་པ་སྟེ། རྫོགས་ཆེན་ཆོས་ཉིད་བྱང་ཆུབ་སེམས་རྣམ་དག་སྟོན་པའི་རྒྱུད་ལས། རང་བྱུང་། ཆོས་ཉིད་དོ། །ཞེས་གསུངས་པ་ལྟར་རོ། །དེ་ཉིད་ལམ་དུས་སུ་བླ་མའི་མན་ངག་དང་། རང་གི་ལས་འཕྲོ་སད་པས་སེམས་ཀྱི་སྒྲིབ་པ་ཆུང་བ་ལ་རིག་པ་གཅེར་བུ་ཟང་ཀ་མ་རྗེན་པར་ངོ་ཕྲོད་ཅིང་། ཐག་ཆོད་དེ། རང་གྲོལ་ཆེན་པོར་གདིང་འཆོས་པས་དང་། ཁྱད་པར་གནད་གསུམ་གྱི་ཐབས་ལ་བརྟེན་པས་སྐུ་གསུམ་གྱི་ཡོན་ཏན་ཐམས་ཅད་ལམ་གྱི་རྟག་སྣང་འཕེལ་ཞིང་རྫོགས་པ་དང་དབྱིངས་སུ་སྡུད་པས་ནང་གསལ་ཆེན་པོར་ཐིམ་ལ་མ་རྨུགས་པ་ཤིན་ཏུ་ཕྲ་བའི་ཡེ་ཤེས་འོད་གསལ་ཆེན་པོ་ལྷུན་གྲུབ་རིན་པོ་ཆེའི་སྦུབས་སུ་བཙན་ས་ཟིན་པ་དང་། དེ་ལྟར་ཆོས་ཉིད་ལ་རྟོགས་གོམ་གཏིང་དང་ལྡན་པས་མ་རིག་པར་རྟག་ཆད་ཀྱི་དགྲ་ལས་རྣམ་པར་རྒྱལ་ཞིང་སྲིད་པ་གསུམ་གྱི་གྲོང་ཁྱེར་འཇིག་པར་བྱེད་ཅིང་། བདུད་ཀྱི་དགྲ་སྟེ་བདུད་རྣམས་ངང་གིས་འདུལ་ཞིང་གཟུང་འཛིན་གྱི་མཚན་རྟོག་བཅོམ་པའི་རིག་པའི་རྡོ་རྗེ་ཉིད་ཤིན་ཏུ་གཏུམ་ཞིང་ཁྲོ་བོ་གཉུག་མའི་ཡི་དམ་དྲག་པོ་རྩལ་སྟོན་པ་གཞོན་ནུ་དཔའ་བོ་སྟོབས་ལྡན་མངོན་རྫོགས་ཧེ་རུ་ཀའི་གོ་འཕང་མཆོག་ལ་སྦྱོར་བ་ནི་འབྲས་བུ་དམ་པ་སྟེ། ཡེ་ཤེས་གཏིང་རྫོགས་ཀྱི་རྒྱུད་ལས། ཡེ་ནས་གནས་པའི༴ དེ་ཡང་ཚིག་རྐང་དང་པོ་སེམས་སྡེ་ལྟར་བཤད། གཉིས་པ་ཀློང་སྡེ། གསུམ་པ་མན་ངག་སྡེ་ལྟར་འཆད་ཏུ་ཡོང་དོ། །ཚིག་རྐང་ལྷག་མ་གསུམ་པོ་ནི་ཚིག་དོན་སྤྱི་ལྟར་བཤད་པའི་སྐབས་བཞིན་ཕྱི་མ་གཉིས་ལའང་འཆད་པ་ལ་སོ་སོའི་ལམ་གྱི་མངོན་རྟོགས་བཞིན་བྱིན་གྱིས་རློབས་པར་བསྐུལ་བ་དང་། དངོས་གྲུབ་ཞུ་བའོ། །དེ་རྣམས་ལ་སྤྱི་སྦས་མཐར་ཐུག་གསུམ་དངོས་བསྟན་དང་། ཡི་གེའི་བཤད་པ། ཚིག་རྐང་དང་པོ་ཨེ་མཁའ་ཁམས་གྲུ་གསུམ་རྡོ་རྗེ་བཙུན་མོའི་མཁའ། རྒྱལ་ཀུན་བསྐྱེད་པའི་ཡུམ་བླ་མར་གྱུར་པ་དང་། གཉིས་པ་ཝྃ་ཡིག་ཆུ་ཁམས་རྡོ་རྗེ་སྟེ་བདེ་བ་ཆེན་པོ་བསྐྱེད་པའི་ཐབས་ཡབ་ཀྱི་སྣང་ཆ་དང་། གསུམ་པས་མ་ཡིག་མེ་ཁམས་སྟེ། བདུད་དང་གཤིན་རྗེ་མ་མོ་སྲིན་པོ་འབྱུང་པོ་ལྷ་ཆེན་དྲག་པོ་ཡབ་ཡུམ་སོགས་བདུད་ཚོགས་འདུལ་བ་ལ། མ་ཡིག་ང་རོལ་གྱུར་པ་ཤིན་ཏུ་ཁྲོས་པ་དྲེག་ཚོགས་གདན་དུ་བྱས་པའི་ཁྲོ་བོ་ཁྲག་འཐུང་ཆེན་པོ་རྡོ་རྗེ་དྲག་རྩལ། ཚིག་རྐང་བཞི་པ་མན་ཆད་ནི་ཨ་ཡིག་རླུང་ཁམས་འཕེལ་བ་སྟེ། ས་ལམ་གྱི་ཡོན་ཏན་བསྐྱེད་ཅིང་སྡུད་པས་དོན་གཉིས་ལྷུན་གྲུབ་ཆོས་ཀྱི་རྒྱལ་པོར་དབང་འབྱོར་བའི་གོ་འཕང་དམ་པ་བརྙེས་པའི་ཚུལ་བསྟན་པའོ། །དེ་ལྟར་གསོལ་བ་རྩེ་གཅིག་ཏུ་བཏབ་པས་བྱིན་བརླབ་མྱུར་དུ་འཇུག་པ་ལ་སློབ་དཔོན་པདྨ་འབྱུང་གནས་ཉིད་ཐུགས་རྗེ་ཆེས་མྱུར་སྟེ། ཇི་སྐད་དུ། ང་སྒྲུབ་སངས་རྒྱས་སོགས། ཞེས་དང་། མོས་གུས༴ ཞེས་དང་། གསོལ་འདེབས་ལེའུ་བདུན་མའི་མཚོ་རྒྱལ་ལ་གདམས་པའི་ཡིག་ཆུང་ལས། དགོས་འདོད་འབྱུང་ཞེས་སོགས། དེ་ལྟར་འཆད་པ་ཉུང་ངུ་འདི། །ཆུ་བྱ་ཟླ་དྲུག་ཚེས་ཉེར་ལྔ། །ཡིད་ལ་ཐོལ་གྱིས་ཤར་བ་བཞིན། །པདྨ་ཡེ་ཤེས་རྡོ་རྗེས་བྲིས།། །།

[edit]

@#/__/gu ru'i gsol 'debs dus gsum sangs rgyas kyi 'grel pa rdo rje'i tshig gi sbas 'byed ces bya ba bzhugs so/__/ pad+ma'i 'byung gnas pad+ma'i gtso/__/pad+ma rgyal la gus btud nas/__/rdo rje'i tshig gi sbas 'byed ni/__/'bri la DA kis gnang ba stsol/__/de yang gsol 'debs 'di la/__don gsum ste/__phyi tshig don ltar bshad pa/__nang sbas don ltar bshad pa/__gsang ba mthar thug gi don du bshad pa dang gsum las/__/dang po ni/__dusaX gsumaX sangaXs rgyasaX guX ruX rinaX poX cheX/__zhes sogs kyis bstan te/__de yang sems can dang sangs rgyas gang yang ma byung ba'i bskal pa'i thog mar ston pa 'khor 'das kyi mes po chos sku kun tu bzang po'i byin rlabs kyis longs sku rigs lnga snang ba las rgyan stug po bkod pa sogs kyi zhing khams kyi sprin chen 'byams klas par bkod pa dang /__de las mchog gi sprul pa zhi ba dang /__khro bo/__rig pa 'dzin pa dang dpal bo rnal 'byor ma sogs gdul bya dman dad mchog gi rim pas 'dul byed ston pa yang tshad med pa ste/__gu ru rdo rje'i gsung las/__rang byung pad+mar zhes bya grags pa gang :__zhes sogs rnam 'phrul tshad med pa las re zhig gling bzhi pa'i 'jig rten khams kyi dzam gling 'di'i yul dbus rdo rje gdan gyi nub phyogs o Di ya na ste 'phur 'gro'i gling zhes zur chad kyi skad du o rgyan gyi yul gyi nub byang sin+d+ha'i rgya mtshor rdzus skyes su byon pa'i slob dpon chen po 'di nyid kyi mdzad pa'i rnam thar bsam gyis mi khyab pa las gtso bor gangs can bod yul gyi bstan 'gro'i don mtha' yas par mdzad pa'i skabs shig chos rgyal yab sras gtso bor gyur pa'i rje 'bangs rnams la gsol 'debs rdo rje'i tshig 'di chos nyid kyi rang sgra yongs la bka' stsal ba'i don ni 'di ltar te/__/'das ma 'ongs da lta dus gsum du gshegs shing bzhugs pa'i sangs rgyas rnams spangs rtogs yongs su rdzogs shing don gnyis mthar phyin pa'i de bzhin gshegs pa ma lus pa thams cad kyi sprul pa dang /__byin rlabs gcig tu bsdus pa gu ru ste/__bla ma o rgyan rin po che ni bsam 'phel dbang gi rgyal po dang chos mtshungs pa 'di phyi'i mchog thun dge legs kyi dngoXs grubaX thams cad kunaX 'bad med du stsol ba'i mthu dang ldan pas na bdaXg sems byed pa po gang gi srid zhi'i spyi dpal yin pas dad mos skal ba dang ldan na dngos grub stsol ba'i mthu stobs mtshungs pa med pa yin pa dang /__de nyid la mtshan gyi rnam grangs zhing khams kun tu mtha' yas par grags pa las gtso bor phyir ltar na o rgyan gu ru chen po pad+ma 'byung gnas/__nang ltar na zag bcas gyi chos las 'das shing khams gsum gyi kun tu sbyor ba'i srid pa thams cad rtsad nas 'jom pas bdeX baX chenaX poX bla na med pa zung 'jug gi rgyal thabs la rang dbang 'byor pas 'jig rten pa dang /__nyan rang dang byang sems thams cad kyi bla mar gyur cing de bzhin gshegs pa thams cad dang dgongs par ro gcig pa'i bdag nyid can gyi zhabaXs la gus pa'i 'dud pa dang /__gsang ba ltar na/__phyi 'jigs pa brgyad dang bcu drug__/nang dug lnga'i rtog pa dang des bskyed pa'i nad gdon gyi 'jig pa/__gsang ba rtsa rlung thig le'i gegs sogs b.raX chadaX kunaX selaX bar mdzad cing bdudaX bzhi'i dgra thams cad 'duXl ba la shin tu dpa' zhing /__phyogs thams cad las rnam par rgyal ba'i zil gnon rdo rje dragaX poX rtsalaX ste snying rjes zhi las ma g.yos kyang /__gdul bya rgyud ma rung pa rnams la shin tu drag por khros pa'i sde nas khro bo gdan thams cad kyi rtsal shugs gcig tu 'dus pa ste/__de lta bu'i bla ma o rgyan chen po la gsoXl baX snying nas 'deXbs soX sku gsung thugs ye shes rdo rje dang bcas pas bdag gi rgyud byinaX gyisaX rlabaXs pa dang /__smin pa dang grol bar mdzad du gsoXl/__gong du bshad pa'i phyiX nangaX gsaXng ba'iX byang chub sgrub pa'i b.raX chadaX thams cad lhag med du zhiX baX dngaX /__yid la ci bsaXm paX thams cad dang /__khyad par chos mthun gyi bsam rgu 'bad rtsol chen po la mi ltos pa smon pa tsam gyis 'di phyi'i don thams cad bde blag tu rgya mtsho chen po la chu bo 'du ba ltar ngang ngang shugs kyi'am lhunaX gyisaX 'grubaX paraX byinaX gyisaX rlobaXs shig__/ces thugs dam gyi rgyud bskul zhing gsol ba 'debs pa'o/__/gnyis pa ni/__dus gsum ste/__nang rdo rje'i lus kyi bkod pa la tsha zhing rtsa yi gtso mo gsum gyi ro ma re rkyang ste khams phri ba'am nub par byed pa nyi ma'i rlung rgyu ba'i g.yas su ro ma dmar mo ni 'das pa ste rul nyi ma der nub cing gsod par byed pa dang /__khams 'phel ba'am rtsub reg zhi bsil du byed ba zla ba'i rlung rgyu ba'i g.yon rkyang ma ni da lta ba ste kun zla ba 'babs shing 'phel bas bde ba ster ba byed pa dang /__ye shes kyi rlung rgyu ba'i dbu ma ni sgra gcan ste ma 'ongs pa der rlung sems thig le tshud pa dang zla nyi zos shing mi rtogs ye shes chen po rgyud la skye bar 'gyur ba'o/__/de yang dkar cha dag pa ni sangs rgyas sku rdo rje/__dmar cha ni gsung rdo rje/__mi rtogs pa ni thugs rdo rje ste gzod nas rang bzhin kyis rnam par dag pa'i sangs rgyas gu ru rin po che ni yon tan thams cad kyi lci shing spangs thob bral ba'i bdag nyid gzhin dus su rang la rang chas su bri gang 'pho 'gyur bral bar bzhugs shing /__lam dus su rtsa rlung thig le'i 'gros kyi rdo rje'i lus la gnad du bsnun pas sa lam gyi yon tan thams cad skad cig rer yang bskyed pa dang rdzogs par 'gyur ba dang /__de yang gzhan nas ma brtsal ye nas lhun gyis rdzogs pa rin po che'o/__/mchog thun dngos grub kun gyi bdag po ni bde ba chen po lte 'og tu dmar cha'i dwangs ma gtum mo a thung me yi rang bzhin dang /__spyi bor dkar cha'i dwangs ma ha~M yig zla ba khu ba'i rang bzhin las 'bar 'dzags kyi bde drod spar bas zhu bde thabs kyi lus sems thams cad la mchog tu mi 'gyur bde ba chen pos khyab pa ni/__des drangs pa'i dpe yi ye shes rgyud la skyes pa dang /__rim gyis goms pa mthar phyin pa na mtshon bya don gyi ye shes btsan thabs su rgyud la skye ba'o/__/de ltar nyams su blang ba'i skabs su rtsa rlung thig le 'du 'khrugs pa yi bgegs dang bar chad kun sel ba dang ro rkyang dang rgyu mi rlung gi bdud yon po 'dul ba la rdo rje'i lus kyi 'phrul 'khor drag po dang lus la rtsa rang shugs kyis 'byongs par gyur pa de srid du lus rgyug pa 'phur ba sbrug pa brdab pa sogs dang ngag ha ring ha thung /__hU~M 'dren dang /__yid kyi gnad rlung btsun pas rtog pa btsan thabs su d+hU tir bgags pa'o/__/de goms pas rang gi lus ngag sems gsum rang byung rdo rje gsum du smin par 'gyur ba ste/__de ltar rdo rje'i lus kyi grong khyer ni bla ma phyi nang gsang gsum gyi bdag nyid du bzhugs pa ste/__kyai rdor las/__ye shes chen po/__sgyu 'phrul me long las/__mi shig thig le/__phyi sgrub bar chad kun sel gyi lha tshogs thams cad lus la bkod de bskyed pa ma hA ltar 'chad pa dang /__nang sgrub pa bde ba chen po bsam pa lhun grub kyi dkyil 'khor rtsa thig la bkod de a nu ltar 'chad pa dang /__gsang ba rang byung gi khro bo rdo rje drag po rtsal rig pa dang dbyer med kyi gnyug ma chos nyid kyi dkyil 'khor du shar ba'i don a ti ltar 'chad pa ste yo ga gsum gyi bskyed rim dang /__de rnams kyi sbas don rdzogs rim dang sbyar ste 'chad tu yod par sems pa/__/gsum pa ni/__dus gsum ste/__lus ngag yid gsum po lus ni skad cig gi skye 'chi can gyi 'das pa dang /__ngag rlung 'byung 'jug la brtan nas lus yid gnas pas da lta ba dang /__sems ni ma 'ongs pa'i rnam rtog gi 'phro gzhi dang 'khor ba bskyed par byed pas gtso che chung gi de ltar bstan la de lta bu'i dus gsum po las 'das pa'i dus bzhi mnyam pa nyid kyi dus na gzhi thog ma'i mgon po dpal rang byung gi sangs rgyas de bzhin gshegs pa thams cad kyi mes po bla ma kun tu bzang po 'khor 'das kun khyab zhal phyag gi mtshan ma las 'das pas chos dbyings ye shes 'khor 'das thams cad ngag gi gsal bas me long /__srid zhi ro mnyam du bzhugs pas mnyam nyid/__chos kun la 'dres par byed pas sor rtog ye shes chen po'i spyi gzugs zang thal sgrib g.yog bral ba gzod nas rang bzhin nas dag cing yon tan ye rdzogs rin po che de nyid/__sid+d+hi gra las dngos grub ste bya ba grub pa'i ye shes kyi srid zhi'i bsdus pa'i sems can thams cad kyi don ma lus pa yongs su sgrub par byed pa'i bdag po chen por bzhugs pa ni rang shes rig gi rgyal po ston pa 'od mi 'gyur ba rnam pa thams cad kyi mchog dang ldan zhing 'khor 'das thams cad rdzogs pa'i thig le nyag gcig gi klong dang rtag tu bde ba chen por bzhugs pa ste/__rdzogs chen chos nyid byang chub sems rnam dag ston pa'i rgyud las/__rang byung /__chos nyid do/__/zhes gsungs pa ltar ro/__/de nyid lam dus su bla ma'i man ngag dang /__rang gi las 'phro sad pas sems kyi sgrib pa chung ba la rig pa gcer bu zang ka ma rjen par ngo phrod cing /__thag chod de/__rang grol chen por gding 'chos pas dang /__khyad par gnad gsum gyi thabs la brten pas sku gsum gyi yon tan thams cad lam gyi rtag snang 'phel zhing rdzogs pa dang dbyings su sdud pas nang gsal chen por thim la ma rmugs pa shin tu phra ba'i ye shes 'od gsal chen po lhun grub rin po che'i sbubs su btsan sa zin pa dang /__de ltar chos nyid la rtogs gom gting dang ldan pas ma rig par rtag chad kyi dgra las rnam par rgyal zhing srid pa gsum gyi grong khyer 'jig par byed cing /__bdud kyi dgra ste bdud rnams ngang gis 'dul zhing gzung 'dzin gyi mtshan rtog bcom pa'i rig pa'i rdo rje nyid shin tu gtum zhing khro bo gnyug ma'i yi dam drag po rtsal ston pa gzhon nu dpa' bo stobs ldan mngon rdzogs he ru ka'i go 'phang mchog la sbyor ba ni 'bras bu dam pa ste/__ye shes gting rdzogs kyi rgyud las/__ye nas gnas pa'i=_de yang tshig rkang dang po sems sde ltar bshad/__gnyis pa klong sde/__gsum pa man ngag sde ltar 'chad tu yong do/__/tshig rkang lhag ma gsum po ni tshig don spyi ltar bshad pa'i skabs bzhin phyi ma gnyis la'ang 'chad pa la so so'i lam gyi mngon rtogs bzhin byin gyis rlobs par bskul ba dang /__dngos grub zhu ba'o/__/de rnams la spyi sbas mthar thug gsum dngos bstan dang /__yi ge'i bshad pa/__tshig rkang dang po e mkha' khams gru gsum rdo rje btsun mo'i mkha'/__rgyal kun bskyed pa'i yum bla mar gyur pa dang /__gnyis pa wa~M yig chu khams rdo rje ste bde ba chen po bskyed pa'i thabs yab kyi snang cha dang /__gsum pas ma yig me khams ste/__bdud dang gshin rje ma mo srin po 'byung po lha chen drag po yab yum sogs bdud tshogs 'dul ba la/__ma yig nga rol gyur pa shin tu khros pa dreg tshogs gdan du byas pa'i khro bo khrag 'thung chen po rdo rje drag rtsal/__tshig rkang bzhi pa man chad ni a yig rlung khams 'phel ba ste/__sa lam gyi yon tan bskyed cing sdud pas don gnyis lhun grub chos kyi rgyal por dbang 'byor ba'i go 'phang dam pa brnyes pa'i tshul bstan pa'o/__/de ltar gsol ba rtse gcig tu btab pas byin brlab myur du 'jug pa la slob dpon pad+ma 'byung gnas nyid thugs rje ches myur ste/__ji skad du/__nga sgrub sangs rgyas sogs/__zhes dang /__mos gus=_zhes dang /__gsol 'debs le'u bdun ma'i mtsho rgyal la gdams pa'i yig chung las/__dgos 'dod 'byung zhes sogs/__de ltar 'chad pa nyung ngu 'di/__/chu bya zla drug tshes nyer lnga/__/yid la thol gyis shar ba bzhin/__/pad+ma ye shes rdo rjes bris//__//