JKW-KABUM-10-THA-008-001

🚧 This website is under continued development. We appreciate your patience!

First text in section. Back to Volume PageNext Text

Wylie title	theg pa chen po'i blo sbyong don bdun ma nyams su len tshul snying por dril ba phan bde'i sa bon
Location	mkhyen brtse'i bka' 'bum Volume 10, sde tshan 8, Text 1, Pages 519-550 (Folios 1a to 16b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	འཆད་ཁ་བ་ ('chad kha ba)
Citation	'jam dbyangs mkhyen brtse'i dbang po. theg pa chen po'i blo sbyong don bdun ma nyams su len tshul snying por dril ba phan bde'i sa bon. In 'jam dbyangs mkhyen brtse'i dbang po'i bka' 'bum, Vol. 10: 519-550. Khams sde dge rdzong sar dgon: Rdzong sar blo gros phun tshogs, 2020.
Genre	Mind Training Texts - blo sbyong  ·  Contemplative Guide Books and Instructional Manuals - khrid yig
DNZ	In the Damngak Dzö: https://dnz.tsadra.org/index.php/Wylie:Theg_pa_chen_po_blo_sbyong_don_bdun_ma%27i_nyams_su_len_tshul_snying_por_dril_ba_phan_bde%27i_sa_bon
Colophon	།ཅེས་པའང་ཐེག་པ་ཆེན་པོའི་དགེ་བའི་བཤེས་གཉེན་དམ་པ་ཕན་བདེ་བཟང་པོས་བཀའ་སྩལ་རིན་པོ་ཆེའི་ཕྲེང་བས་བསྐུལ་བ་དོན་ཡོད་པར་བྱ་བའི་ཕྱིར། རྗེ་བླ་མ་དམ་པ་ཡོངས་ཀྱི་དགེ་བའི་བཤེས་གཉེན་བཅུ་ཕྲག་རིག་པའི་མ་ཧཱ་པཎྜི་ཏ་དཀོན་མཆོག་བསྟན་པ་རབ་རྒྱས་དཔལ་བཟང་པོ་སོགས་ཡོངས་འཛིན་དམ་པ་ཆོས་བཞིན་དུ་སྤྱོད་པ་རྣམས་ལས་ཚུལ་འདིའི་བཀའ་དྲིན་མང་དུ་ཐོས་པའི་རྒྱལ་ཁམས་ཀྱི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས། རྗེ་བཙུན་བླ་མ་རྣམས་ཀྱི་གསུང་སྒྲོས་དང་ཕྱག་གཞེས་ལྟར་ཉུང་གསལ་སྙིང་པོར་དྲིལ་ཏེ་སྦྱར་བ་དགེ་ལེགས་མཆོག་ཏུ་གྱུར་ཅིག།
	ces pa'ang theg pa chen po'i dge ba'i bshes gnyen dam pa phan bde bzang pos bka' stsal rin po che'i phreng bas bskul ba don yod par bya ba'i phyir/__rje bla ma dam pa yongs kyi dge ba'i bshes gnyen bcu phrag rig pa'i ma hA paN+Di ta dkon mchog bstan pa rab rgyas dpal bzang po sogs yongs 'dzin dam pa chos bzhin du spyod pa rnams las tshul 'di'i bka' drin mang du thos pa'i rgyal khams kyi bya bral ba 'jam dbyangs mkhyen brtse'i dbang pos/__rje btsun bla ma rnams kyi gsung sgros dang phyag gzhes ltar nyung gsal snying por dril te sbyar ba dge legs mchog tu gyur cig

1 Texts in this Section (sde tshan or chos tshan)

1 519-550	ཐེག་པ་ཆེན་པོའི་བློ་སྦྱོང་དོན་བདུན་མ་ཉམས་སུ་ལེན་ཚུལ་སྙིང་པོར་དྲིལ་བ་ཕན་བདེའི་ས་བོན། theg pa chen po'i blo sbyong don bdun ma nyams su len tshul snying por dril ba phan bde'i sa bon Mind Training Texts - blo sbyong   ·   Contemplative Guide Books and Instructional Manuals - khrid yig	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །ཧི ཏ སུ ཁ སྱ བཱི ཛཾ ནཱ མ མ ཧཱ ཡཱ ན སྱ མ ཏི ཛྙ པྟ ས པྟ མྱ རྠཱ ནུ བྷ ཝ ནཱ ཡ ག རྦྷཾ པི ཎྜཱ སྟི།།

༄༅། །ཐེག་པ་ཆེན་པོའི་བློ་སྦྱོང་དོན་བདུན་མ་ཉམས་སུ་ལེན་ཚུལ་སྙིང་པོར་དྲིལ་བ་ཕན་བདེའི་ས་བོན་ཞེས་བྱ་བ་བཞུགས་སོ།

།ཨོཾ་སྭ་སྟི་སིདྡྷཾ། མཁའ་ཁྱབ་འགྲོ་ལ་ཕན་བདེའི་མཆོག་སྦྱིན་པའི། །རིན་ཆེན་བྱང་ཆུབ་སེམས་དང་དེ་སྟོན་པ། །ཐེག་ཆེན་དགེ་བའི་བཤེས་ལ་གུས་བཏུད་ནས། །རྒྱལ་སྲས་ལམ་གྱི་ས་བོན་ཅུང་ཟད་དབྱེ། །དེ་ལ་ཐེག་པ་ཆེན་པོའི་བློ་སྦྱོང་དོན་བདུན་མའི་མན་ངག་ཟབ་མོ་ཉམས་སུ་ལེན་ཚུལ་གྱི་ཕྱག་གཞེས་མདོ་ཙམ་བརྗོད་ན་གཉིས། ཐུན་གྱི་ངོ་བོ་ལ་ཇི་ལྟར་བྱ་བའི་ཚུལ་དང་། ཐུན་མཚམས་སུ་ཇི་ལྟར་བྱ་བའི་ཚུལ་ལོ། །དང་པོ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ལ་དྲུག །གནས་ཁང་བྱི་དོར་བྱས་ལ་སྐུ་གསུང་ཐུགས་ཀྱི་རྟེན་དགྲམ་པ། མཆོད་པ་གཡོ་མེད་ཅིང་བཀོད་པ་མཛེས་པར་བཤམ་པ། སྟན་བདེ་བ་ལ་བསམ་གཏན་གྱི་སྤྱོད་ལམ་གྱིས་འཁོད་ནས་སྐྱབས་འགྲོ་སེམས་བསྐྱེད་རྒྱུད་དང་འདྲེས་ངེས་སུ་བྱ་བ། ཚོགས་ཞིང་གསལ་གདབ་པ། བསག་སྦྱང་གི་གནད་བསྡུས་པའི་ཡན་ལག་བདུན་པས་རྒྱུད་སྦྱང་བ། དམིགས་པ་གསལ་བར་བྱས་ཤིང་མཎྜལ་ཕུལ་ཏེ་དོན་ཆེན་པོ་གསུམ་གྱིས་གསོལ་བ་གདབ་པའོ། །དང་པོ་ནི། བླ་མ་གསེར་གླིང་པའི་རྣམ་ཐར་ལྟར་ཕྱག་གཞེས་སུ་འདེབས་པ་ཡིན་པས་དགོན་སྡེའམ་རི་ཁྲོད་ལྟ་བུ་གང་ཡིན་ཡང་འདྲ་སྟེ། རང་དབང་བའི་གནས་ཁང་སྤྱི་དང་། ཁྱད་པར་གང་དུ་སྡོད་པའི་ཁུལ་དེར། བདག་གིས་གནས་ཁང་འདིར་འདུག་ནས་གཞུང་དང་བླ་མའི་མན་ངག་ལ་བརྟེན་ཏེ་ལས་སུ་བྱ་བ་གཞན་སྤངས་ལ། གཞན་དོན་དུ་རྫོགས་པའི་བྱང་ཆུབ་ཅི་ནས་ཀྱང་ཐོབ་པར་བྱ། དེའི་ཆེད་དུ་བླ་མ་རྒྱལ་བ་སྲས་དང་བཅས་པ་ཚོགས་ཞིང་དུ་བཞུགས་པའི་གནས་འདིར་ཕྱག་དར་བགྱིའོ་སྙམ་དུ་འཕེན་པ་བཏང་ལ། རང་རྒྱུད་ཀྱི་སྡིག་སྒྲིབ་སྦྱོང་བ་དང་། རང་གཞན་གྱི་སེམས་དྭང་བར་འགྱུར་པ་སོགས་ཀྱི་དགོས་པ་དང་ཕན་ཡོན་དྲན་བཞིན་པས་མི་འདོད་པའི་ཁྲལ་ཆོས་སུ་མ་སོང་བར་དགའ་བ་དང་གུས་པའི་སྤྱོད་ལམ་གྱིས། ཐོག་མར་རྡུལ་མི་ལྡང་བའི་ཕྱིར་ཆུ་གཙང་མས་བྲན་པའམ། བསང་ཤིང་གི་དྲི་ཞིམ་པོ་སྦྱར། རང་གཞན་གྱི་སྡིག་སྒྲིབ་ཉལ་ཉིལ་རྣམས་ཕྱག་པར་མོས་ལ་བྱི་དོར་ལེགས་པར་བྱས་རྗེས། འབྱོར་ན་དྲི་བཟང་པོའི་ཆུས་ཆག་ཆག་གདབ། དེ་ནས་གུང་དུ་སེང་གེའི་ཁྲི་སོགས་བཀོད་པས་མཛེས་པར་རྟེན་གྱི་གཙོ་བོ་སྟོན་པ་ཐུབ་པའི་དབང་པོའི་སྐུ་དང་། དེའི་སྟེང་དུ་ཆོས་འདི་གཙོ་བོར་གྱུར་པའི་བླ་མ་བརྒྱུད་པ། གཡས་གཡོན་དུ་ཡི་དམ་གྱི་ལྷ་དང་སངས་རྒྱས་བྱང་སེམས། འོག་ཏུ་མཁའ་འགྲོ་ཆོས་སྐྱོང་ནོར་ལྷ་སོགས་གོ་རིམ་མ་ལོག་པར་བཤམས་པའི་མདུན་ནམ་གཡས་གཡོན་གང་བདེར་ཤེར་ཕྱིན་སོགས་དམ་པའི་ཆོས་ཀྱི་གླེགས་བམ་དང་། མཆོད་རྟེན་རྣམས་བཞུགས་སུ་གསོལ། དེ་ལྟ་བུའི་རྟེན་གསུམ་རྒྱས་པར་མ་འབྱོར་ཡང་རང་ལ་གང་ཡོད་པའི་རྟེན་རྣམས་བཀུར་སྟི་དང་བཅས་ཏེ་དྭང་བ་འདྲེན་པར་བཤམ་མོ། །གཉིས་པ་ནི། རང་གི་གནས་དེར་མཆོད་པ་དངོས་སུ་བཤམ་དགོས་ཏེ། མཆོད་པ་མེད་པ་དད་པ་མེད་པའི་རྟགས་ཡིན། དད་པ་མེད་པ་ནི་དམ་པའི་ཆོས་རྣལ་མ་མི་འབྱུང་བའི་རྟགས་ཡང་དག་ཡིན་པས་རང་དབང་བའི་ཡོ་བྱད་སུམ་གཅིག་མ་མཐར་བྱས་པ་མཆོད་པའི་ཕྱོགས་སུ་གཏོང་དགོས་པས། གོང་དུ་བཤམས་པའི་རྟེན་གསུམ་གྱི་སྤྱན་སྔར་མཆོད་པའི་སྣོད་རབ་གསེར་དངུལ། འབྲིང་ལི་དང་འཁར་བ། ཐ་མའང་རྫ་ཤིང་སོགས་གང་འབྱོར་བྱི་དོར་ལེགས་པར་བྱས་ཏེ། མཆོད་ཡོན་དང་། མེ་ཏོག་དང་། སྤོས་དང་། མར་མེ་སོགས་དངོས་གཙང་ཞིང་ཡ་ཡོ་འཁྱར་འཁྱོར་དུ་མ་སོང་བར་བཀོད་པ་ཅི་མཛེས་སུ་བསྟར། དེའང་ཚེ་འདིའི་ཁེ་གྲགས་སོགས་ཆོས་བརྒྱད་སྒྲུབ་པའི་བསམ་པས་མ་ཡིན་པར། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བླ་མ་དང་དཀོན་མཆོག་ལ་མཆོད་པ་རྒྱ་ཆེན་པོ་དབུལ་བར་བགྱིའོ་སྙམ་དུ་བྱང་ཆུབ་ཀྱི་སེམས་གསལ་བཏབ་ཅིང་མཆོད་པའི་ཕན་ཡོན་ལ་སྤྲོ་ཞིང་དད་པ་ཤུགས་དྲག་ཏུ་བསྐྱེད་པ་སོགས་གཡོ་དང་སྒྱུའི་སྤྱོད་པ་དང་བྲལ་བའི་ལྷག་པའི་བསམ་པ་རྣམ་པར་དག་པས་ཀུན་ནས་བསླངས་ཏེ། སྦྱོར་བ་སེར་སྣ་དང་། ཆོག་ཤེས་དང་། བརྙས་བཅོས་སོགས་རིང་དུ་དོར་ནས་གཙང་སྦྲ་ཐོན་པར་བྱས་ལ་དགའ་ཞིང་གུས་པས་ལག་ཏུ་བླང་ངོ་། །གསུམ་པ་ནི། རྒྱུན་བསྲིངས་ཏེ་ཉམས་སུ་ལེན་ན་གནས་ཁང་གི་ཕྱོགས་བཞིའམ་སྒོ་རྩར་ཐོ་བརྟན་པོ་བཙུགས་ལ་མིའི་རྒྱུ་འགྲུལ་དང་ཕྱི་ནང་གི་རྣམ་གཡེང་སོགས་སྤྲོས་པ་གཞན་ཐམས་ཅད་རྒྱང་གིས་བཅད། སྡོད་ཚུགས་པའི་རྟེན་འབྲེལ་གྱི་ཆེད་རང་གིས་མལ་འོག་ཏུ་ས་དཀར་གྱི་གཡུང་དྲུང་རིས་ཆོས་སྐོར་དུ་བྲིས་པའི་སྟེང་རྩྭ་ཀུ་ཤའི་ཆུན་པོ་དཀྲམ་པའང་ཕྱག་ལེན་དུ་མཛད། གང་ལྟར་ཡང་བསམ་གཏན་གྱི་འབོལ་ཆུང་དངོས་སུ་བཅོས་པ་ཡོད་ན་དེ་དང་། མེད་ན་རྒྱབ་ཅུང་ཟད་མཐོ་ཞིང་འཇམ་པའི་སྟན་ཇི་ལྟར་རིགས་པ་བཤམ། དེ་ནས་གཟའ་སྐར་སྦྱོར་བྱེད་བཟང་པོ་འཛོམ་པའི་ཕྱི་དྲོའི་ཐུན་ལྟ་བུ་ལ་མགོ་བཟུང་སྟེ། གོང་དུ་བཤམས་པའི་སྟན་ལ་ལུས་གནད་སྐྱིལ་ཀྲུང་ངམ་སྐྱིལ་ཀྲུང་ཕྱེད་པས་ཀྱང་རུང་སྟེ་དྲང་པོར་བསྲང་། ངག་གནད་རླུང་ཕྱི་ནང་དུ་རང་བཞིན་གྱིས་རྒྱུ་བ་ཉེར་གཅིག་གི་བར་དུ་མ་འཁྲུལ་པར་བགྲང་བ་ལ་ཡིད་གཏད་དེ་རླུང་ཆམ་ལ་ཕབ། ཁྱད་པར་སེམས་ཀྱི་གནད་མི་དགེ་བ་དང་ལུང་མ་བསྟན་གྱི་དབང་དུ་མ་སོང་བར་ངེས་འབྱུང་དང་བྱང་ཆུབ་ཀྱི་སེམས་སྒོ་དུ་མ་ནས་ཡིད་ལ་བྱ་སྟེ། འདི་ལྟར་བློ་ཁ་ནང་དུ་ལོག་སྟེ་རང་གི་སེམས་ཆགས་སོགས་ཉོན་མོངས་ཀྱི་དབང་དུ་སོང་འདུག་གམ། དད་པ་ལ་སོགས་པའི་དགེ་སེམས་གང་འདུག་སྙམ་དུ་བརྟག་པར་བྱ། དེ་ལྟར་བརྟག་པ་ན་རང་རེ་ལས་དང་པོ་པ་རྣམས་ལ་ནི་སེམས་ཉོན་མོངས་པའི་གཞན་དབང་གིས་ཚེ་འདིའི་སྣང་ཤས་འབའ་ཞིག་འཆར་བ་ཁོ་ན་ཤས་ཆེ་བས་ན། ཆགས་སོགས་ཉོན་མོངས་པའི་དབང་དུ་སོང་འདུག་ན་དེ་ངོས་ཟིན་པར་བྱས་ཏེ། བློ་ངན་འདི་ལྟ་བུ་ཞིག་གིས་འཁོར་བ་ཐོག་མ་མེད་པ་ནས་ད་ལྟའི་བར་དུ་བདག་རང་དབང་མེད་པར་འཁོར་བར་འཁྱམས་ཤིང་སྡུག་བསྔལ་བར་མ་ཆད་པར་མྱང་དུ་བཅུག་པ་ཡིན་པས། ད་ནི་བློ་ངན་འདིའི་དབང་དུ་སྐད་ཅིག་ཀྱང་མི་གཏོང་། ཕྱིན་ཆད་ནམ་དུའང་རྒྱུད་ལ་མི་སྐྱེ་བ་ཞིག་བྱའོ་སྙམ་དུ་འདུན་པ་དང་སྙིང་སྟོབས་ཤུགས་དྲག་ཏུ་བསྐྱེད་དེ། ག་རེ་འཁོར་བ་ཐོག་མ་མེད་པ་ནས་ད་ལྟའི་བར་དུ་སྡུག་བསྔལ་བར་མ་ཆད་དུ་མྱོང་འདུག་ཀྱང་སྐྱོ་བ་དང་སུན་པ་སྐད་ཅིག་ཀྱང་མེད་པར་འཁོར་བའི་གནས་འབའ་ཞིག་ལ་མངོན་པར་དགའ་བ་འདིའི་དབང་དུ་སོང་ན། ད་དུང་སྔར་ལྟར་མཐའ་མེད་མུ་མེད་དུ་སྡུག་བསྔལ་ཁོ་ན་ཞིག་མྱོང་དགོས་པར་འདུག །དེས་ན་ད་རེས་བླ་མ་དཀོན་མཆོག་གི་ཐུགས་རྗེས་དལ་བའི་རྟེན་བཟང་པོ་ཐོབ། ལམ་མ་ནོར་བར་སྟོན་པའི་བཤེས་གཉེན་དམ་པས་རྗེས་སུ་བཟུང་། མཇལ་བར་དཀའ་བའི་སངས་རྒྱས་ཀྱི་བསྟན་པ་རིན་པོ་ཆེ་ཡོངས་སུ་རྫོགས་པ་དང་མཇལ། བླང་དོར་འབྱེད་པའི་ཤེས་རབ་ཀྱི་མཐུ་ཅུང་ཟད་རྙེད། རང་གི་ངོས་ནས་ཉམས་སུ་ལེན་ནུས་ན་མྱུར་དུ་སངས་རྒྱས་ཀྱི་གོ་འཕང་ཉིད་ཀྱང་བདེ་བླག་ཏུ་སྟེར་ནུས་པའི་གདམས་པ་ཟམ་མོ་འདི་འདྲ་ཐོབ། དེ་ལྟ་བུའི་ཆོས་ཟབ་མོ་ཉམས་སུ་ལེན་པར་བྱེད་པ་ལ་རང་དབང་ཡོད་པའི་སྐབས་འདི་འབད་ནས་བཙན་ས་ཟིན་པ་ཞིག་མ་བྱས་ན། སླར་རྟེན་བཟང་འདི་འདྲ་ཤིན་ཏུ་རྙེད་པར་དཀའ། ལན་ཅིག་རྙེད་པ་འདིའང་ཡུན་རིང་དུ་མི་གནས་པར་མྱུར་དུ་འཇིག་སྟེ་ངེས་པར་འཆི། ནམ་འཆི་ལ་ངེས་པ་མེད། འཆི་བའི་ཚེ་ཆོས་མ་གཏོགས་གང་གིས་ཀྱང་མི་ཕན། ཤི་ནས་ཅང་མེད་དུ་མི་འགྲོ། མ་བྱས་པའི་ལས་དང་མི་འཕྲད། བྱས་པ་ཆུད་མི་འཛའ་བར་ལས་དང་ལས་ཀྱི་འབྲས་བུ་འབའ་ཞིག་ལ་བརྟེན་ནས་ངན་སོང་གསུམ་དུ་ལྟུང་ན་ནི་ཚ་གྲང་དང་། བཀྲེས་སྐོམ་དང་། བཀོལ་སྤྱད་དང་གླེན་ཞིང་གཏི་མུག་པ་སོགས་སྡུག་བསྔལ་བཟོད་བླག་མེད་པ་མྱོང་དགོས་ཤིང་། ཆོས་ཀྱི་སྒྲ་ཙམ་ཡང་ཐོས་པར་དཀའ། གནས་དེར་སྐྱབས་བཙལ་ཡང་མི་རྙེད། བརྒྱ་ལ་བདེ་འགྲོའི་རྟེན་ཐོབ་ཀྱང་སྡུག་བསྔལ་འབའ་ཞིག་ལས་མ་འདས་ཏེ། མི་རྣམས་ལ་སྐྱེ་རྒ་ན་འཆིའི་སྡུག་བསྔལ། ལྷ་མ་ཡིན་རྣམས་ལ་འཐབ་ཅིང་རྩོད་པ། ཁམས་འོག་མའི་ལྷ་རྣམས་ལ་འཆི་འཕོ་ལྟུང་བའི་སྡུག་བསྔལ། ཁམས་གོང་མའི་ལྷ་རྣམས་ལ་ཁྱབ་པ་འདུ་བྱེད་ཀྱི་སྡུག་བསྔལ་ཏེ། མདོར་ན་གནས་རིགས་དྲུག་ཏུ་རྟེན་ཁམས་གསུམ་གང་དུ་སྐྱེས་ཀྱང་ལས་དང་ཉོན་མོངས་པའི་གཞན་དབང་དུ་སོང་སྟེ་རང་དབང་མེད་པར་འཁྱམས་ཤིང་སྡུག་བསྔལ་འབའ་ཞིག་གིས་མནར། རང་ཉིད་སྡུག་བསྔལ་གྱིས་མནར་བ་དེ་བཞིན་དུ་སེམས་ཅན་ཐམས་ཅད་ཀྱང་སྡུག་བསྔལ་གྱིས་མནར། སྡུག་བསྔལ་གྱིས་མནར་བའི་སེམས་ཅན་ཐམས་ཅད་རང་གི་དྲིན་ཅན་གྱི་མ་ཤ་སྟག་ཡིན་ཞིང་། མ་བྱས་པ་ལའང་གྲངས་ཀྱིས་མི་ཆོད། ནམ་བྱས་རེས་ཀྱིས་ཚེ་འདིའི་མས་ཇི་ལྟར་དྲིན་གྱིས་བསྐྱངས་པ་ལྟར་དྲིན་གྱིས་བསྐྱངས་པས་དྲིན་ཤིན་ཏུ་ཆེ། དྲིན་ཅན་གྱི་མ་འདི་རྣམས་བདེ་བ་འདོད་ཀྱང་བླང་དོར་གོ་ལོག་ཏུ་སྤྱད་པས་སྡུག་བསྔལ་འབའ་ཞིག་མྱོང་བ་ལས་བདེ་བའི་སྐབས་སྐད་ཅིག་ཀྱང་མི་འདུག་པས་སྙིང་རེ་རྗེ། དེ་བས་ན་མ་འདི་རྣམས་བདེ་བ་ཕུན་སུམ་ཚོགས་པ་དང་ལྡན་ན་ཅི་མ་རུང་། སྡུག་བསྔལ་མཐའ་དག་དང་བྲལ་ན་ཅི་མ་རུང་སྙམ་དུ་བྱམས་སྙིང་རྗེ་ཤུགས་དྲག་ཏུ་བསྒོམ། འོ་ན་སེམས་ཅན་ཐམས་ཅད་སྡུག་བསྔལ་ལས་སྒྲོལ་བའི་ཁུར་དེ་སུ་ལ་བབས་ན་ངེད་རང་ལ་བབས་ཤིང་ངེས་པར་སྤྲོ་ནའང་། ད་ལྟ་རང་ཉིད་ལ་དེའི་ནུས་པ་མེད། རང་ལས་ལྷག་པའི་ཚངས་པ་དང་བརྒྱ་བྱིན་སོགས་འཇིག་རྟེན་གྱི་ཆེན་པོ་རྣམས་ལའང་མེད། སུ་ལ་ཡོད་ན་བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ཁོ་ན་ལ་མངའ་བས་ན། བདག་གཞན་སེམས་ཅན་ཐམས་ཅད་འཁོར་བ་དང་ངན་སོང་གི་སྡུག་བསྔལ་ལས་བསྒྲལ་བར་བྱ་བའི་ཕྱིར་བླ་མ་དང་དཀོན་མཆོག་རིན་པོ་ཆེར་སྐྱབས་དང་ར་མདའ་ཞུ་བར་བགྱིའོ་སྙམ་དུ་འདུན་པ་སྙིང་ནས་བསྐྱེད། སྤྲོ་ན་ཚིགས་སུ་བཅད་པ་འདི་རྣམས་ཀྱི་དོན་ཡིད་ལ་དྲན་བཞིན་པས་ཀྱང་རང་རྒྱུད་ལ་བསྐུལ་མ་གདབ་པར་བྱ་སྟེ། དལ་འབྱོར་འདི་ནི་ཤིན་ཏུ་རྙེད་པར་དཀའ། །སྐྱེས་བུའི་དོན་སྒྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་འདི་ཡང་དག་འབྱོར་བར་ག་ལ་འགྱུར། །སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་ལྟ་དང་མཚུངས། །འགྲོ་བའི་ཚེ་འགྲོ་ནམ་མཁའི་གློག་འདྲ་སྟེ། །རི་གཟར་འབབ་ཆུ་བཞིན་དུ་མྱུར་མགྱོགས་འགྲོ། །དུས་ཀྱིས་བསྙེན་ནས་རྒྱལ་པོ་འགྲོ་འགྱུར་ན། །ལོངས་སྤྱོད་མཛའ་དང་གཉེན་བཤེས་རྗེས་མི་འབྲངས། །སྐྱེས་བུ་དག་ནི་གར་གནས་གར་འགྲོ་ཡང་། །ལས་ནི་ལུས་དང་གྲིབ་མ་བཞིན་དུ་འབྲངས། །སྲེད་སྲིད་མ་རིག་དབང་གིས་སྐྱེ་བོ་རྣམས། །མི་དང་ལྷ་དང་ངན་སོང་རྣམ་གསུམ་པོ། །འགྲོ་བ་ལྔ་པོ་དག་ཏུ་མི་མཁས་འཁོར། །དཔེར་ན་རྫ་མཁན་འཁོར་ལོ་འཁོར་བ་བཞིན། །སྲིད་གསུམ་རྒ་དང་ནད་ཀྱི་སྡུག་བསྔལ་འབར། །འདི་ན་འཆི་མེ་རབ་འབར་མགོན་མེད་དེ། །སྲིད་ལས་བྱུང་ལ་འགྲོ་བ་རྟག་ཏུ་རྨོངས། །བུམ་པར་ཆུད་པའི་བུང་བ་འཁོར་བ་བཞིན། །དེ་ལྟའི་འཇིགས་རུང་སྲིད་པའི་སྡུག་བསྔལ་ལས། །མར་གྱུར་མཁའ་མཉམ་འགྲོ་རྣམས་བསྒྲལ་བའི་ཕྱིར། །བླ་མ་མཆོག་དང་དཀོན་མཆོག་རྣམ་གསུམ་ལ། །མི་ཕྱེད་དད་པས་སྐྱབས་སུ་གཟུང་བར་བགྱི། །ཞེས་ཚིག་དལ་བུས་བརྗོད་ཅིང་དོན་ཡིད་ལ་བསམ། དེ་ནས་ས་ཕྱོགས་ཐམས་ཅད་དག་པའི་ཞིང་ཁམས་བདེ་བ་ཅན་གྱི་བཀོད་པ་ལྟ་བུར་གྱུར་པའི་རང་གི་མདུན་གྱི་ནམ་མཁར་ཡིད་འཕྲོག་པའི་མཆོད་སྤྲིན་རྒྱ་མཚོ་འཁྲིགས་བའི་དབུས་སུ། སེང་གེས་བཏེགས་པའི་རིན་པོ་ཆེའི་ཁྲི་བཀོད་པ་ཕུན་སུམ་ཚོགས་པའི་སྟེང་དུ་པད་ཟླའི་གདན་ལ་རྩ་བའི་བླ་མ་དང་གཉིས་སུ་མེད་པའི་སྟོན་པ་ཐུབ་པའི་དབང་པོའི་མཐའ་སྐོར་དུ་བརྒྱུད་པའི་བླ་མ་ཡི་དམ་སངས་རྒྱས་བྱང་སེམས། ལུང་རྟོགས་ཀྱི་ཆོས་དཀོན་མཆོག་མཚོན་པའི་གླེགས་བམ་གྱི་ཚོགས། རང་ལས་བསླབ་པ་རྒན་པ་ཡན་གྱི་འཕགས་པ་དང་སོ་སོ་སྐྱེ་བོའི་དགེ་འདུན་བསྟན་སྲུང་ཡེ་ཤེས་པ་རྣམས་དང་བཅས་པ་སྤྲིན་གྱི་ཕུང་པོ་གཏིབས་པ་ལྟར་རང་ཉིད་ལ་དགྱེས་ཤིང་འཛུམ་པས་ཞལ་ཕྱོགས་ཏེ་མངོན་སུམ་དུ་བཞུགས་པའི་སྤྱན་སྔར། རང་དང་སེམས་ཅན་ཐམས་ཅད་ས་གཞིའི་ངོས་སུ་ས་ཆེན་པོའི་དྲེག་པ་ལྟར་སྨུག་ཤིག་གེ་ཚོགས་པས་སྒོ་གསུམ་འཇུག་པ་གཅིག་པའི་ཚུལ་གྱིས་འདི་ནས་བྱང་ཆུབ་མ་ཐོབ་ཀྱི་བར་དུ་སྐྱིད་སྡུག་ལེགས་ཉེས་ཅི་བྱུང་ཡང་བླ་མ་དང་དཀོན་མཆོག་ཁྱེད་རྣམས་མ་གཏོགས་རེ་ས་དང་ལྟོས་ས་གཞན་ན་མེད་པས་ཅི་མཛད་ཁྱེད་མཁྱེན་ནོ་སྙམ་པའི་མོས་གུས་གདུང་ཤུགས་དྲག་པོས་སྐྱབས་སུ་འགྲོ་བར་གྱུར་པར་བསམས་ལ། སྐྱབས་འགྲོའི་ཚིག་ཇི་ལྟར་རིགས་པའམ། དགེ་བའི་བཤེས་གཉེན་འགའ་ཞིག་ཇོ་བོ་རྗེའི་སེམས་བསྐྱེད་ཀྱི་ཆོ་ག་ལས་འབྱུང་བ་འདི་ལྟར་བརྗོད་པ་ཕྱག་གཞེས་སུ་མཛད་པས། བདག་གཞན་སེམས་ཅན་ཐམས་ཅད་ཀྱིས་མགྲིན་གཅིག་ཏུ་བརྗོད་པར་བསམས་ལ་ངག་ཏུ། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། རྐང་གཉིས་རྣམས་ཀྱི་མཆོག་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །ཆོས་རྣམས་ཀྱི་མཆོག་ཞི་བ་འདོད་ཆགས་དང་བྲལ་བའི་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་འཕགས་པ་བྱང་ཆུབ་སེམས་དཔའ་ཕྱིར་མི་ལྡོག་པའི་དགེ་འདུན་ཆེན་པོ་རྣམས་ལ་སྐྱབས་སུ་མཆིའོ། །ཞེས་གང་མང་དང་། བདག་གཞན་གྱིས་དུས་གསུམ་དུ་བསགས་དང་གསོག་བར་འགྱུར་པའི་སྦྱིན་ཚུལ་སྒོམ་པ་ལས་བྱུང་པའི་དགེ་བའི་རྩ་བས་སེམས་ཅན་ཐམས་ཅད་ཀྱི་དོན་དུ་རྣམ་པ་ཐམས་ཅད་མཁྱེན་པའི་རྫོགས་པའི་སངས་རྒྱས་ཀྱི་གོ་འཕང་ཐོབ་པར་ཤོག་ཅིག་སྙམ་པ་སྨོན་སེམས་དང་། དེའི་ཆེད་དུ་ཐེག་པ་ཆེན་པོའི་ལམ་གྱི་རྩ་བ་བྱང་ཆུབ་མཆོག་ཏུ་སེམས་བསྐྱེད་ནས་བློ་སྦྱོང་གི་གདམས་པ་ཟབ་མོ་ཉམས་སུ་བླངས་ལ། ཉམས་སུ་མྱོང་ངེས་པ་ཞིག་ཅི་ནས་ཀྱང་བགྱིའོ་སྙམ་པ་འཇུག་པ་སེམས་བསྐྱེད་པའི་དོན་ཡིད་ལ་དྲན་བཞིན་དུ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་དང་མཁའ་མཉམ་གྱི་སེམས་ཅན་མ་ལུས་པ་ཐམས་ཅད་ཀྱིས་སྐྱེ་བ་འདི་དང་སྐྱེ་བ་གཞན་དག་ཏུ་སྦྱིན་པའི་རང་བཞིན་དང་། ཚུལ་ཁྲིམས་ཀྱི་རང་བཞིན་དང་། སྒོམ་པའི་རང་བཞིན་ཅན་གྱི་དགེ་བའི་རྩ་བ་ཅི་བགྱིས་པ་དང་། བགྱིད་དུ་སྩལ་བ་དང་། བགྱིས་པ་ལ་རྗེས་སུ་ཡི་རང་བའི་དགེ་བའི་རྩ་བ་དེས། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་། ས་ཆེན་པོ་ལ་རབ་ཏུ་བཞུགས་པའི་བྱང་ཆུབ་སེམས་དཔའ་རྣམས་ཀྱིས་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་པར་མཛད་པ་དེ་བཞིན་དུ། བདག་དང་སེམས་ཅན་ཐམས་ཅད་ཀྱིས་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །སེམས་ཅན་མ་བསྒྲལ་བ་རྣམས་བསྒྲལ་བར་བགྱིའོ། །མ་གྲོལ་བ་རྣམས་དགྲོལ་བར་བགྱིའོ། །དབུགས་མ་ཕྱུང་བ་རྣམས་དབུགས་དབྱུང་བར་བགྱིའོ། །ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བར་བགྱིའོ། །ཞེས་སེམས་བསྐྱེད་ཀྱི་ཆོ་ག་ལས་བྱུང་བའི་ཚིག་འདི་ལན་གསུམ་སོགས་ཇི་ལྟར་རིགས་པ་བློ་དང་འདྲེ་ངེས་སུ་བྱ། སླར་ཡང་སྐྱབས་སེམས་སྦྲགས་མའི་ཚུལ་དུ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གང་མང་བརྗོད། བསྡུ་ན་སངས་རྒྱས་ཆོས་ཚོགས་ཁོ་ནས་ཀྱང་རུང་། དེ་ནས་མཐའ་ཡས་པའི་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དགེ་བའི་རྩ་བ་དང་ལྡན། སྡུག་བསྔལ་དང་སྡུག་བསྔལ་གྱི་རྒྱུ་ལས་དང་ཉོན་མོངས་པའི་ཀུན་འབྱུང་དང་བྲལ། སྡུག་བསྔལ་མེད་པའི་བདེ་བ་དང་དུས་རྟག་ཏུ་མི་འབྲལ་ཞིང་། བདེ་སྡུག་གི་རྒྱུ་རང་ཕྱོགས་ལ་ཆགས་པ། གཞན་ཕྱོགས་ལ་སྡང་བ། དེ་གཉིས་ཀྱི་རྒྱུ་ལས་འབྲས་ལ་རྨོངས་པའི་མ་རིག་པ་དང་བྲལ་ནས་བཏང་སྙོམས་ཆེན་པོ་ལ་གནས་པ་ཞིག་བྱུང་ན་ཅི་མ་རུང་སྙམ་པའི་འདུན་པ། དེ་ལྟར་གྱུར་ཅིག་སྙམ་པའི་སྨོན་ལམ། དེ་ལྟར་བདག་གིས་བགྱིའོ་སྙམ་པའི་དམ་བཅའ། དེ་ལྟར་འགྱུར་བར་བླ་མ་དང་དཀོན་མཆོག་མཁྱེན་སྙམ་པའི་གསོལ་འདེབས་དང་འབྲེལ་བའི་དོན་ཡིད་ལ་དྲན་བཞིན་ཏུ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་དང་བྲལ་བའི་བཏང་སྙོམས་ཚད་མེད་པ་ལ་གནས་པར་གྱུར་ཅིག །ཅེས་བརྗོད། དེ་ལྟར་སྐྱབས་སེམས་ཚད་མེད་བཞི་བསྒོམས་པ་ལ་བརྟེན་ནས། སྐྱབས་ཡུལ་རྣམས་ཀྱི་སྐུ་ལས་བདུད་རྩི་སྣ་ལྔ་འོད་ཟེར་གྱི་རྒྱུན་དང་བཅས་པ་བྱུང་། རང་དང་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་སྤྱི་དང་། ཁྱད་པར་སྐྱབས་ཡུལ་རྣམས་ལ་མ་གུས་པ་དང་། བརྙས་པ་ལ་སོགས་པའི་སྡིག་སྒྲིབ་དང་། བྱང་ཆུབ་ཀྱི་སེམས་རིན་པོ་ཆེའི་གེགས་སུ་གྱུར་པ་ཐམས་ཅད་སྦྱངས། ལུས་དྭངས་གསལ་འོད་ཀྱི་རང་བཞིན་དུ་གྱུར། ཚེ་དང་བསོད་ནམས་དང་ལུང་རྟོགས་ཀྱི་ཡོན་ཏན་ཐམས་ཅད་འཕེལ་ཞིང་རྒྱས། ཁྱད་པར་བླ་མ་དང་དཀོན་མཆོག་གི་སྐྱབས་འོག་ཏུ་ཚུད་ཅིང་ཐུགས་རྗེ་དང་བྱིན་རླབས་རྒྱུད་ལ་ཞུགས་པ་ལ་བརྟེན་ནས་སྨོན་པ་དང་འཇུག་པའི་བདག་ཉིད་ཅན་གྱི་བྱང་ཆུབ་ཀྱི་སེམས་དང་། ཚད་མེད་པ་བཞི་བཅོས་མ་མ་ཡིན་པ་རྒྱུད་ལ་སྐྱེས་པར་མོས་ཏེ་སེམས་ཟུང་ལ་མཉམ་པར་བཞག་མཐར་སྐྱབས་ཡུལ་རྣམས་མི་དམིགས་པར་བསམ་མོ། །བཞི་པ་ནི། ཐོག་མར་གནས་ཁང་དང་མཆོད་པའི་ཡོ་བྱད་ལ་དམིགས་ཏེ་སྨན་བླ་དང་གནས་བརྟན་གྱི་ཆོ་ག་སོགས་ལས་འབྱུང་བ་ལྟར་བྱིན་རླབས་བཞི་སྐོར་རྒྱས་པར་བྱ་བའམ། དེ་ཙམ་མི་ནུས་ན། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེང་འདིར་ཁོར་ཡུག་གི་ས་གཞི་འདི་དག་བཅོམ་ལྡན་འདས་འོད་དཔག་མེད་ཀྱི་ཞིང་གི་བཀོད་པའི་ཡོན་ཏན་ཕུན་སུམ་ཚོགས་པའི་རྒྱན་ཐམས་ཅད་ཀྱིས་བརྒྱན་པ་མཛེས་ཤིང་ཡིད་དུ་འོང་བར་གྱུར་པའི་གཞིར། གཞལ་མེད་ཁང་རིན་པོ་ཆེ་སྣ་བདུན་མཆོག་ཏུ་འབར་བ་བཀོད་པ་ལེགས་པས་མཛེས་ཤིང་ལྷུན་སྟུག་པ་ཡངས་ཤིང་རྒྱ་ཆེ་བའི་དབུས་སུ། རིན་པོ་ཆེ་སྣ་ཚོགས་ལས་གྲུབ་པའི་ཁྲི་སེང་གེ་ཆེན་པོ་བརྒྱད་ཀྱིས་བཏེགས་པའི་སྟེང་དུ་པདྨ་དང་ཟླ་བའི་གདན། མཐའ་སྐོར་ཀུན་ཏུ་སེང་ཁྲི་པད་ཟླའི་གདན་གྲངས་མེད་པ་དང་། ཕྱི་ནང་ཀུན་ཏུའང་ཆ་རིགས་དང་འཚམས་པར་ལྷ་དང་མིའི་ཡོ་བྱད་དམ་པ་ཞལ་ཟས་དང་། ན་བཟའ་དང་། རོལ་མོ་ལ་སོགས་པ་ཕུལ་དུ་ཕྱིན་པ་སྣ་ཚོགས་པ་ཕུང་པོ་གསུམ་པའི་མདོ་དང་། བཟང་པོ་སྤྱོད་པའི་སྨོན་ལམ་ལས་བྱུང་བའི་མཆོད་པའི་སྤྲིན་རྒྱ་མཚོ་ཐམས་ཅད་ཀྱིས་རྒྱས་པར་གང་ཞིང་རྒྱན་བཀླུབས་པ་དང་ལྡན་པ་འབྱུང་བར་གྱུར་ཅིག །ཅེས་དང་། ཨོཾ་ན་མོ་བྷ་ག་ཝ་ཏེ། བཛྲ་སཱ་ར་པྲ་མརྡྷ་ནེ། ཏ་ཐཱ་ག་ཏཱ་ཡ། ཨརྷ་ཏེ། སམྱ་ཀྶཾ་བུདྡྷཱ་ཡ། ཏདྱ་ཐཱ། ཨོཾ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སྃ་ཀྲ་མ་ཎ་བཛྲེ། སརྦ་ཀརྨ་ཨཱ་ཝ་ར་ཎ་བི་ཤོ་དྷ་ན་བཛྲེ་སྭཱ་ཧཱ། ཞེས་མཆོད་པའི་སྤྲིན་གྱི་གཟུངས་ལན་གསུམ་དང་། སླར་ཡང་། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེ་བཞིན་དུ་གྱུར་ཅིག །ཅེས་བདེན་པའི་སྟོབས་བརྗོད། དེ་ནས་འདུན་པ་རྩེ་གཅིག་པས་སྤོས་བཏུལ་ཞིང་སྙན་པའི་གདངས་དང་བཅས་པས། ཕྱོགས་དུས་ཀུན་ནས་སྐྱབས་གསུམ་བཀའ་སྡོད་བཅས། །ཉོན་མོངས་འགྲོ་ལ་མཁྱེན་བརྩེས་རབ་དགོངས་ཏེ། །དཔག་མེད་ཞིང་ནས་ཐོགས་མེད་རྫུ་འཕྲུལ་གྱིས། །འདིར་གཤེགས་མཆོད་སྤྲིན་རྒྱ་མཚོའི་དབུས་བཞུགས་གསོལ། །རྣམ་དག་ཆོས་ཀྱི་དབྱིངས་ལས་མ་གཡོས་ཀྱང་། །ཐུགས་རྗེ་ཚད་མེད་འགྲོ་ལ་ཕྱོགས་བཅུར་གཟིགས། །རྒྱལ་བ་ཀུན་གྱི་ཕྲིན་ལས་རྒྱས་མཛད་པ། །དུས་གསུམ་བླ་མ་འཁོར་བཅས་འདིར་གཤེགས་ཤིག །མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཅོམ་ལྡན་བསྐལ་པ་གྲངས་མེད་དུ་མ་རུ། །འགྲོ་ལ་བརྩེ་ཕྱིར་ཐུགས་རྗེ་རྣམ་སྦྱངས་ཤིང་། །སྨོན་ལམ་རྒྱ་ཆེན་དགོངས་པ་ཡོངས་རྫོགས་པའི། །ཁྱེད་བཞེད་འགྲོ་དོན་མཛད་དུས་འདི་ལགས་ན། །དེ་ཕྱིར་ཆོས་དབྱིངས་ཕོ་བྲང་ལྷུན་གྲུབ་ནས། །རྫུ་འཕྲུལ་བྱིན་རླབས་སྣ་ཚོགས་སྟོན་མཛད་ཅིང་། །མཐའ་ཡས་སེམས་ཅན་ཚོགས་རྣམས་བསྒྲལ་བའི་ཕྱིར། །ཡོངས་དག་འཁོར་དང་བཅས་ཏེ་གཤེགས་སུ་གསོལ། །ཞེས་གསོལ་བ་བཏབ་པས་རང་ལ་ཆོས་འདི་དངོས་སུ་སྟོན་པའི་རྩ་བའི་བླ་མ་དང་གཉིས་སུ་མེད་པའི་སྟོན་པ་ཤཱཀྱའི་རྒྱལ་པོ་ལ་བརྒྱུད་པའི་བླ་མ་རྣམས་དང་ཡི་དམ་དཀྱིལ་འཁོར་གྱི་ལྷ་ཚོགས། སངས་རྒྱས་དང་བྱང་ཆུབ་སེམས་དཔའ་ཉན་རང་གི་དགེ་འདུན་ཆོས་སྐྱོང་སྲུང་མ་ཡེ་ཤེས་པའི་ཚོགས་དང་བཅས་པས་བསྐོར་བ་སྤྲིན་གྱི་ཕུང་པོ་འཁྲིགས་པ་ལྟར་བྱོན་ནས་སོ་སོའི་གདན་ལ་དགྱེས་བཞིན་དུ་བཞུགས་པར་བསམས་ལ། བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་པར་ལྡན། །བདག་གི་མཆོད་ཡོན་བཞེས་ནས་ཀྱང་། །ཐུགས་ལ་དགོངས་ཤིང་གནང་བར་མཛོད། །ཅེས་བྱོན་ལེགས་བྱ། དེ་ནས་ཁྲུས་གསོལ་བའི་ཐོག་མར་སྙན་བསན་པ་ནི། ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། །ཤེལ་གྱི་ས་གཞི་གསལ་ཞིང་འཚེར་བར་བསྟར། །རིན་ཆེན་འབར་བའི་ཀ་བ་ཡིད་འོང་ལྡན། །མུ་ཏིག་འོད་ཆགས་བླ་རེ་བྲེས་པ་དེར། །དེ་བཞིན་གཤེགས་པ་རྣམས་དང་དེ་སྲས་ལ། །རིན་ཆེན་བུམ་པ་མང་པོ་སྤོས་ཀྱི་ཆུས། །ཡིད་འོང་ལེགས་པར་བཀང་བ་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །ཁྲུས་གསོལ་བ་ནི། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་གསོལ་ལོ། །འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་བརླབས་ཡེ་ཤེས་ཆུ་ཡིས་ནི། །ཅི་འདོད་དངོས་གྲུབ་སྩོལ་བར་མཛོད། །རྒྱལ་བའི་སྐུ་གསུང་ཐུགས་མཆོག་ལ། །ཉོན་མོངས་སྒྲིབ་པ་མི་མངའ་ཡང་། །སེམས་ཅན་སྒོ་གསུམ་སྒྲིབ་སྦྱང་ཕྱིར། །གཙང་མའི་ཆབ་ཀྱིས་ཁྲུས་གསོལ་ལོ། །སྐུ་ཕྱི་བ་ནི། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བསྒོས་པས་སྐུ་ཕྱིའོ། །དེ་ནས་གོས་འབུལ་བ་ནི། དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །གོས་བཟང་སྲབ་ལ་འཇམ་པ་སྣ་ཚོགས་དང་། །རྒྱན་མཆོག་བརྒྱ་ཕྲག་དེ་དང་དེ་དག་གིས། །འཕགས་པ་ཀུན་ཏུ་བཟང་དང་འཇམ་དབྱངས་དང་། །འཇིག་རྟེན་དབང་ཕྱུག་སོགས་ལའང་བརྒྱན་པར་བགྱི། །སྣ་ཚོགས་དབང་པོའི་གཞུ་ལྟར་རབ་བཀྲ་ཞིང་། །གང་ལ་རེག་ན་བདེ་བའི་རྒྱུར་འགྱུར་བའི། །གོས་བཟང་རིན་ཆེན་བདག་བློ་སྦྱང་ཕྱིར་འབུལ། །བཟོད་པ་དམ་པའི་གོས་ཀྱིས་བརྒྱན་པར་ཤོག །དྲི་མེད་མཚན་ལ་སྒྲིབ་བསལ་མི་མངའ་ཡང་། །དད་པས་ངུར་སྨྲིག་རྒྱལ་མཚན་ཕུལ་བ་ཡིས། །ནམ་མཁའི་མཐའ་ཀླས་གྱུར་པའི་སེམས་ཅན་རྣམས། །སངས་རྒྱས་བརྟུལ་ཞུགས་མཆོག་ལ་སྤྱོད་པར་ཤོག །བཞུགས་སུ་གསོལ་བ་ནི། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །ཞེས་བརྗོད་པས་ཚོགས་ཀྱི་ཞིང་དུ་བརྟན་པར་བཞུགས་པར་མོས་ལ། གསལ་སྣང་ལ་སེམས་བཟུང་ཞིང་དད་མོས་ཤུགས་དྲག་ཏུ་བྱའོ། །ལྔ་པ་ནི། ལམ་རྒྱུད་ལ་སྐྱེ་བའི་མཐུན་རྐྱེན་ཚོགས་བསག་པ་དང་། འགལ་རྐྱེན་སྒྲིབ་པ་སྦྱོང་བའི་ལྷན་ཅིག་བྱེད་རྐྱེན་མེད་ན། ཉེར་ལེན་གྱི་རྒྱུ་དམིགས་རྣམ་སྐྱོང་བ་ཙམ་ལ་འབད་ཀྱང་ལམ་ཤིན་ཏུ་སྐྱེ་བར་དཀའ་བས་བསག་སྦྱོང་གི་གནད་རྣམས་བསྡུས་པའི་ཡན་ལག་བདུན་པས་རྒྱུད་སྦྱང་དགོས་པར་གསུངས་པས་ན། རྒྱས་པར་ན་བཟང་སྤྱོད་དང་། སྤྱོད་འཇུག་སོགས་ཀྱི་ཚིགས་སུ་བཅད་པ་སྤེལ་ཞིང་། བཤགས་པའི་སྐབས་ལྟུང་བཤགས་དང་། སྤྱི་བཤགས་སོགས་ཆོས་སྤྱོད་རྣམ་པ་ལས་འབྱུང་བ་ལྟར་བྱ་བའམ། བསྡུ་ན། ཇི་སྙེད་སུ་དག་སོགས་ནས། ཕྱིར་བསྔོའོ་ཞེས་པའི་བར་བཟང་སྤྱོད་ལས་འབྱུང་བའི་ཡན་ལག་བདུན་པ་ཚིག་དོན་ཡིད་ལ་དྲན་བཞིན་དུ་ཚར་ཇི་ལྟར་རིགས་པ་ཕྱག་དང་བཅས་ཏེ་བྱའོ། །དྲུག་པ་ནི། མཎྜལ་གྱི་གཞི་དང་། ཚོམ་བུ་དགོད་པའི་འབྲུ། དྲི་བཟང་གི་ཆུ་སོགས་སྟ་གོན་བྱས་ལ། ཐོག་མར་མཎྜལ་ལེགས་བར་ཕྱི་ཞིང་དྲི་བཟང་གི་ཆུས་བརླན། དེ་ནས་ལུས་ཀྱི་ལས་སུ་ཚོམ་བུ་དགོད་པ། ངག་གི་ལས་སུ་ཚིག་བརྗོད་པ། ཡིད་ཀྱི་ལས་སུ་དམིགས་རྣམ་ཡིད་ལ་བྱ་བ་སྟེ་སྒོ་གསུམ་འཇུག་པ་གཅིག་པས་མཎྜལ་ཚོམ་བུ་སོ་བདུན་མའམ། ཉེར་གསུམ་མ། བདུན་མ་སོགས་ཅི་རིགས་པ་མ་ཚང་བ་མེད་པ་འདི་ཉིད་ཅེས་པའི་བར་སྤྱི་ལྟར་ལ། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་འབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། བཞེས་ནས་བྱིན་གྱིས་བརླབ་ཏུ་གསོལ། ཞེས་པ་ཙམ་མམ། སྤྲོ་ན། བཞེས་ནས་བདག་གི་རྒྱུད་ཀྱི་ཐེག་པ་ཆེན་པོའི་ལམ་བསྒྲུབ་པ་དང་འགལ་བའི་ཕྱིན་ཅི་ལོག་གི་བློ་སྣ་མཐའ་དག་མྱུར་དུ་འགགས་པར་བྱིན་གྱིས་བརླབ་ཏུ་གསོལ། བྱང་ཆུབ་ཀྱི་སེམས་རིན་པོ་ཆེ་རྣམ་པ་གཉིས་སོགས་རྟོགས་པའི་ཡོན་ཏན་ཁྱད་པར་ཅན་མྱུར་དུ་སྐྱེ་བར་བྱིན་གྱིས་བརླབ་ཏུ་གསོལ། ཕྱི་ནང་གི་བར་དུ་གཅོད་པ་ཐམས་ཅད་ཉེ་བར་ཞི་བར་བྱིན་གྱིས་བརླབ་ཏུ་གསོལ། །ཞེས་དོན་ཆེན་པོ་གསུམ་གྱི་སྒོ་ནས་གསོལ་བ་གདབ། དེ་ནས་སླར་ཡང་མོས་གུས་གདུང་ཤུགས་དྲག་ཏུ་བསྐྱེད་པ་ལམ་འདིའི་བླ་མ་བརྒྱུད་པ་ལ་གསོལ་བ་འདེབས་པ་ནི། ཚོགས་གཉིས་རབ་རྫོགས་འདྲེན་མཆོག་ཤཱཀྱའི་ཏོག །རྒྱལ་བའི་རྒྱལ་ཚབ་རྒྱལ་སྲས་མི་ཕམ་མགོན། །ས་གསུམ་མངའ་བདག་འཕགས་པ་ཐོགས་མེད་ཞབས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཀུན་མཁྱེན་གཉིས་པ་རྒྱལ་སྲས་དབྱིག་གི་གཉེན། །མཐའ་བྲལ་དོན་གཟིགས་འཕགས་པ་རྣམ་གྲོལ་སྡེ། །བདེན་གཉིས་དོན་རྟོགས་བཙུན་པ་རྣམ་གྲོལ་སྡེ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །འགྲོ་བའི་རྩ་ལག་གུ་ཎ་མི་ཏྲའི་ཞབས། །ལྟ་ངན་རི་དྭགས་འཇོམས་མཛད་སེང་གེ་བཟང་། །བདག་གཞན་ཚོགས་གཉིས་སྤེལ་མཛད་གང་བ་སྤེལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཡོན་ཏན་རིན་ཆེན་གཏེར་གྱུར་ཀུ་སཱ་ལི། །བདག་གཞན་བརྗེ་མཛད་ཀུ་སཱ་ལི་གཉིས་པ། །མཁས་གྲུབ་ཆེན་པོ་མཉམ་མེད་གསེར་གླིང་པ། །གསོལ་བ་འདེབས་སོ༴ ཡིད་བཞིན་ནོར་འདྲའི་ཐུགས་མངའ་མར་མེ་མཛད། །རྒྱལ་བའི་འབྱུང་གནས་སྟོན་པ་རིན་པོ་ཆེ། །བསྟན་པ་རིན་ཆེན་གསལ་མཛད་པུ་ཏོ་བ། །གསོལ་བ་འདེབས་སོ༴ ཡོན་ཏན་མཆོག་གིས་གྲགས་པའི་ཤ་ར་བ། །བྱང་ཆུབ་ཐུགས་གཉིས་འབྱོངས་པའི་འཆད་ཀ་བ། །ལྟ་སྤྱོད་རྣམ་པར་དག་པའི་རྒྱལ་བ་སེ། །གསོལ་བ་འདེབས་སོ༴ གཅིག་ཏུ་གཞན་དོན་མཛད་པའི་སྐྱེས་མཆོག་ལྷ། །བསླབ་གསུམ་རྣམ་པར་དག་པའི་ལྷ་སྡིངས་པ། །སྒོ་གསུམ་གཞན་དོན་མཛད་པའི་ལྷ་སྡིངས་དབོན། །གསོལ་བ་འདེབས་སོ༴ དུས་གསུམ་རྒྱལ་བའི་ལམ་གནས་ཡོན་ཏན་དཔལ། །སངས་རྒྱས་བསྟན་པ་རྒྱས་མཛད་བདེ་བ་དཔལ། །མཁས་བཙུན་འགྲན་ཟླ་བྲལ་བའི་ཀ་བཞི་པ། །གསོལ་བ་འདེབས་སོ༴ ཕན་བདེ་ཀུན་གྱི་འབྱུང་གནས་རིན་པོ་ཆེ། །བསོད་ནམས་ཡེ་ཤེས་སྟོབས་ཀྱིས་སྟོང་གསུམ་གྲགས། །བྱམས་དང་སྙིང་རྗེའི་མངའ་བདག་ཆོས་ཀྱི་རྗེ། །གསོལ་བ་འདེབས་སོ༴ ཁ་སྐོང་ནི། དུས་གསུམ་རྒྱལ་བའི་སྲས་མཆོག་བཟང་པོ་དཔལ། །རྩེ་གཅིག་སྒྲུབ་ལ་བརྩོན་མཛད་བུདྡྷ་ཤྲཱི། །བྱང་ཕྱོགས་ཐུབ་པའི་རྒྱལ་ཚབ་ཨེ་ཝྃ་པ། །གསོལ་བ་འདེབས་སོ༴ ཕྱག་ན་པདྨོའི་རྣམ་འཕྲུལ་མུས་ཆེན་རྗེ། །རྒྱ་ཆེན་ཤེས་བྱ་ཀུན་གཟིགས་གུང་རུ་བ། །ངག་གི་དབང་ཕྱུག་གཉུག་ལ་པཎ་ཆེན་ཞབས། །གསོལ་བ་འདེབས་སོ༴ སྤྱན་སྔ་སེམས་དཔའ་ཆེན་པོ་ཆོས་གྲགས་མཚན། །ཆོས་ཀྱི་སྤྱན་ལྡན་ཤེའུ་ལོ་ཙཱ་བ། །སྲིད་ཞིའི་ཕུན་ཚོགས་རབ་རྒྱས་བཅོ་བརྒྱད་པར། །གསོལ་བ་འདེབས་སོ༴ ཟབ་རྒྱས་གདམས་པའི་མཛོད་འཛིན་མཁྱེན་རབ་ཞབས། །མདོ་སྔགས་བསྟན་པའི་སྒྲོན་མེ་རྨོར་ཆེན་རྗེ། །མཁྱེན་བརྩེ་ནུས་པའི་བདག་ཉིད་གནས་གསར་པ། །གསོལ་བ་འདེབས་སོ༴ སྙིགས་དུས་འགྲོ་བའི་སྐྱབས་མགོན་ས་སྐྱ་པ། །རིག་པའི་དབང་ཕྱུག་ཀུན་དགའ་མཁས་གྲུབ་དབང་། །བཀའ་དྲིན་མཉམ་མེད་རྩ་བའི་བླ་མ་ལ། །གསོལ་བ་འདེབས་སོ༴ ཡང་ན། །སྤྱན་སྔ་སེམས་དཔའ་ཆེན་པོ་ཆོས་གྲགས་མཚན། །ཅེས་པའི་མཚམས། །མདོ་རྒྱུད་མངའ་བདག་གཞོན་ནུ་ཆོས་དཔལ་བཟང་། །འཇམ་དབྱངས་འཁོན་སྟོན་དཔལ་འབྱོར་ལྷུན་གྲུབ་ལ། །གསོལ་བ་འདེབས་སོ༴ མཁས་གྲུབ་དཔལ་འབྱོར་ཕྲིན་ལས་རབ་རྒྱས་དང་། །ཕྱག་ན་པདྨོ་བློ་བཟང་རྒྱ་མཚོའི་སྡེ། །ལུང་རྟོགས་གཏེར་ཆེན་བློ་བཟང་དར་རྒྱས་ཞབས། །གསོལ་བ་འདེབས་སོ༴ གནས་བརྟན་ཆེན་པོ་འཇམ་དབྱངས་གྲགས་པའི་དཔལ། །ལམ་བཟང་གསལ་མཛད་དགེ་ལེགས་རྒྱ་མཚོའི་ཞབས། །ངག་གི་དབང་ཕྱུག་བྱམས་མགོན་གཉིས་པ་ལ། །གསོལ་བ་འདེབས་སོ༴ རིག་གྲོལ་མཐར་ཕྱིན་ཡེ་ཤེས་རྒྱལ་མཚན་དཔལ། །འཇམ་དཔལ་དབྱངས་དངོས་བསྟན་པའི་སྒྲོན་མེ་ཆེ། །སྐྱབས་གནས་ཀུན་འདུས་རྩ་བའི་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་སོ། །རྙེད་དཀའ་ཡོན་ཏན་ལྡན་པའི་དལ་འབྱོར་འདི། །དོན་མེད་ཚེ་འདིའི་བྱ་བས་མི་གཡེང་པར། །དྲག་ལ་རྒྱུན་མི་འཆད་པའི་བརྩོན་འགྲུས་ཀྱིས། །ཉིན་མཚན་ཆོས་ཀྱིས་འདའ་བར་བྱིན་གྱིས་རློབས། །ཆུ་བུར་ལྟ་བུར་མི་རྟག་ལུས་སྲོག་འདི། །ནམ་འཇིག་ངེས་པ་མེད་པར་རྟོགས་གྱུར་ནས། །ཚེ་འདིའི་ཕུན་ཚོགས་སྒྲུབ་པའི་བསམ་སྦྱོར་རྣམས། །སྐད་ཅིག་ཙམ་ཡང་མེད་པར་བྱིན་གྱིས་རློབས། །སྲིད་པའི་བདེ་ལ་ནམ་ཡང་མ་ཞེན་ཅིང་། །རང་ཉིད་ཞི་བ་དོན་དུ་མི་གཉེར་པར། །འགྲོ་ཀུན་དོན་དུ་སངས་རྒྱས་སྒྲུབ་པ་ཡི། །བསམ་སྦྱོར་རྒྱུན་མི་འཆད་པར་བྱིན་གྱིས་རློབས། །ཐོག་མེད་དུས་ནས་གཉེན་གྱུར་འགྲོ་བ་རྣམས། །སྡུག་བསྔལ་རྒྱ་མཚོར་བྱིང་བ་མཐོང་གྱུར་ནས། །བུ་སྡུག་ཆུ་ཡིས་ཁྱེར་བའི་མ་བཞིན་དུ། །བཅོས་མིན་སྙིང་རྗེ་སྐྱེ་བར་བྱིན་གྱིས་རློབས། །རང་བདེ་འདོད་ལས་ཉེས་པ་ཀུན་འབྱུང་ཞིང་། །གཞན་ཕན་སེམས་ལས་ཡོན་ཏན་ཀུན་འབྱུང་ཕྱིར། །གཞན་སྐྱོན་བདག་ལ་ལེན་ཅིང་བདག་ཉིད་ཀྱི། །བདེ་དགེ་གཞན་ལ་གཏོང་བར་བྱིན་གྱིས་རློབས། །རང་ཉིད་གཅེས་པར་འཛིན་པའི་དགྲ་བོ་འདིས། །ཐོག་མེད་དུས་ནས་རང་གཞན་སྡུག་བསྔལ་བྱས། །ཕྱིན་ཆད་བྱང་ཆུབ་སེམས་གཉིས་སྟོབས་རྒྱས་ནས། །བདག་འཛིན་རྩད་ནས་ཐོན་པར་བྱིན་གྱིས་རློབས། །འགྲོ་འདིས་ཐོག་མེད་དུས་ནས་ཕན་བཏགས་ཤིང་། །བྱང་ཆུབ་སྒྲུབ་པའང་འདི་ལ་རག་ལས་པས། །རྒྱལ་བ་བཞིན་དུ་ཕན་བདེའི་རྒྱུར་མཐོང་ནས། །གུས་པས་སྤྱི་བོར་ལེན་པར་བྱིན་གྱིས་རློབས། །ལས་ངན་དབང་གིས་སྣོད་བཅུད་འགལ་རྐྱེན་གྱིས། །གང་བའི་དུས་འདིར་འགལ་རྐྱེན་ཀུན་སྤངས་ནས། །ལོགས་ནས་དམ་ཆོས་སྒྲུབ་དབང་མི་གདའ་བས། །རྐྱེན་ངན་ལམ་དུ་སློང་བར་བྱིན་གྱིས་རློབས། །བདེ་སྡུག་ཕན་གནོད་འབྱོར་རྒུད་ཅི་བྱུང་ཡང་། །རྨི་ལམ་ཡུལ་གྱི་འབྱོར་རྒུད་ཇི་བཞིན་དུ། །སྣང་ཡང་བདེན་པ་མེད་པར་ཤེས་བྱས་ནས། །ཞེན་མེད་རང་སར་གྲོལ་བར་བྱིན་གྱིས་རློབས། །ཞེས་རྒྱལ་སྲས་རིན་པོ་ཆེ་ཐོགས་མེད་བཟང་པོ་དཔལ་གྱི་གསུང་ཞལ་སྐོང་དང་བཅས་པའི་སྒོ་ནས་གསོལ་བ་གདབ། དེ་ལ་སྤྱིར་དོན་ཆེན་པོ་གསུམ་གྱི་སྒོ་ནས་གསོལ་བ་གདབ་ཚུལ་གོང་ལྟར་ལ། བྱེ་བྲག་དལ་འབྱོར་རྙེད་དཀའ་ཁོ་ན་བསྒོམ་པའི་དབང་དུ་བྱས་ན་མཎྜལ་གྱི་གསོལ་འདེབས་དང་། སྐབས་འདིར་ཡང་། བདག་གི་རྒྱུད་ལ་དལ་འབྱོར་རྙེད་དཀའི་རྟོགས་པ་དང་འགལ་བའི་ཕྱིན་ཅི་ལོག་གི་བློ་སྣ་མཐའ་དག་མྱུར་དུ་འགགས་པར་བྱིན་གྱིས་བརླབ་ཏུ་གསོལ། དལ་འབྱོར་རྙེད་དཀའི་རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཕྱི་ནང་གི་བར་དུ་གཅོད་པ་ཐམས་ཅད་ཉེ་བར་ཞི་བར་བྱིན་གྱིས་བརླབ་ཏུ་གསོལ། ཞེས་ངག་ཏུ་བརྗོད་པའམ་ཡིད་ཀྱིས་བསམས་ཏེ་དམིགས་ཕུག་པའི་གསོལ་འདེབས་བློ་སྣ་འགྱུར་ངེས་པ་བྱ། མཐར་ཚོགས་ཞིང་རྣམས་ཀྱི་སྐུ་ལས་བདུད་རྩི་སྣ་ལྔ་འོད་ཟེར་གྱི་རྒྱུན་དང་བཅས་པ་བྱུང་། རང་གཞན་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་སྤྱི་དང་། ཁྱད་པར་དངོས་གཞིའི་ལམ་གྱི་རྟོགས་པ་ཁྱད་པར་ཅན་སྐྱེ་བ་ལ་གེགས་བྱེད་ཀྱི་སྡིག་སྒྲིབ་ཐམས་ཅད་སྦྱངས། ལུས་དྭངས་གསལ་འོད་ཀྱི་རང་བཞིན་ཅན་དུ་བྱུང་། ཚེ་དང་བསོད་ནམས་ལུང་རྟོགས་ཀྱི་ཡོན་ཏན་ཐམས་ཅད་འཕེལ་ཞིང་རྒྱས། ཁྱད་པར་དུའང་དངོས་གཞིའི་ལམ་གྱི་རྟོགས་པ་རྩོལ་བ་མེད་པར་ངམ་ངམ་ཤུགས་ཀྱིས་སྐྱེ་བའི་རྟེན་འབྲེལ་བསྒྲིགས་ཤིང་བྱིན་གྱིས་བརླབ་པར་བསམ་མོ། །གཉིས་པ་དངོས་གཞི་ལ་བདུན། སྔོན་འགྲོ་རྟེན་གྱི་ཆོས་བསྟན་པ། དངོས་གཞི་བྱང་ཆུབ་ཀྱི་སེམས་གཉིས་སྦྱང་བ། རྐྱེན་ངན་བྱང་ཆུབ་ཀྱི་ལམ་དུ་བསྒྱུར་བ། ཚེ་གཅིག་གི་ཉམས་ལེན་དྲིལ་ནས་བསྟན་པ། བློ་འབྱོངས་པའི་ཚད། བློ་སྦྱོང་གི་དམ་ཚིག །བློ་སྦྱོང་གི་བསླབ་བྱའོ། །དེ་ལས་ས་བཅད་དང་པོ་གཉིས་ནི་དམིགས་ཐུན་དུ་བཅད་ནས་མྱོང་བ་མཐར་མ་སྐྱོལ་གྱི་བར་དུ་བསྐྱང་བར་བྱ་བ་ཡིན་ལ། ལྷག་མ་རྣམས་དེ་དག་གི་གེགས་སེལ་དང་། བོགས་འདོན་དང་། བསླབ་བྱའི་ཚུལ་དུ་སྦྱར་བས་དོན་གྲུབ་ཀྱང་། ལས་དང་པོ་པས་དམིགས་ཐུན་ཅི་རིགས་པར་བསྐྱངས་ནས་གོམས་འདྲིས་བརྟན་པོས་ནམ་དགོས་པའི་དུས་ལག་ཏུ་ལོན་ངེས་པ་ཞིག་ཅི་ནས་གལ་ཆེ་བ་ཡིན། གང་ལྟར་ཡང་དང་པོ་སྔོན་འགྲོ་རྟེན་གྱི་ཆོས་བསྟན་པ་ལ་གསུམ། དལ་འབྱོར་རྙེད་དཀའ་བསམ་པ། འཆི་བ་མི་རྟག་པ་བསམ་པ། ལས་རྒྱུ་འབྲས་དང་འཁོར་བའི་ཉེས་དམིགས་བསམ་པའོ། །དེའི་དང་པོ་ཉམས་སུ་ལེན་པ་ལ་མཚོན་ན་ཤེས་པ་རྣལ་དུ་ཕབ་ནས། དལ་འབྱོར་རང་གི་ངོ་བོ་ངོས་བཟུང་སྟེ། དེ་ཉིད་རྒྱུ་དང་། ངོ་བོ་དང་། གྲངས་དང་། དཔེའི་སྒོ་ནས་རྙེད་པར་དཀའ་པའི་ཚུལ་དང་། རྙེད་ན་ཕན་ཡོན་ཆེ་བའི་ཚུལ་རྣམས། རྒྱལ་སྲས་རིན་པོ་ཆེའི་གསུང་སྒྲོས་འགྲོ་མགོན་དཔལ་ལྡན་ཡེ་ཤེས་ཀྱིས་བསྒྲིགས་པའི་བློ་སྦྱོང་སྙན་བརྒྱུད་ཆེན་མོ་ནས་ཇི་ལྟར་འབྱུང་བ་བཞིན་སྒོ་དུ་མ་ནས་ལེགས་པར་བསམས་ཏེ། རྟེན་ཁྱད་པར་ཅན་འདི་ལྟ་བུ་རྙེད་པའི་སྐབས་སུ་ཚེ་རབས་གཏན་གྱི་འདུན་མ་དམ་པའི་ཆོས་རྣམ་པར་དག་པ་དང་། དེ་ལས་ཀྱང་ད་རེས་སྐྱེས་བུ་ཆེན་པོའི་ལམ་གྱི་སྙིང་པོ་བྱང་ཆུབ་སེམས་གཉིས་ལ་བློ་སྦྱོང་བའི་གདམས་པ་ཟབ་མོ་འདི་ཉམས་སུ་བླངས་ལ་ཉམས་སུ་མྱོང་ངེས་པ་ཞིག་ཅི་ནས་ཀྱང་བྱའོ་སྙམ་དུ་ཤ་ལ་བབས། རུས་ལ་ཐུག་པའི་ཚུལ་དུ་བསྒོམ་ཞིང་སེམས་གཟུང་། དེ་ལྟར་འགྱུར་བར་བླ་མ་དང་དཀོན་མཆོག་རིན་པོ་ཆེ་མཁྱེན་སྙམ་པའི་གསོལ་འདེབས་དང་། སྐབས་སུ་བདུད་རྩི་འབེབས་སྦྱོང་གི་དམིགས་པའང་བྱ། དེས་མཚོན་ཏེ་སྔོན་འགྲོ་དང་དངོས་གཞིའི་དམིགས་པ་འོག་མ་རྣམས་ལའང་དཔྱད་འཇོག་སྤེལ་མའི་ཚུལ་གྱིས་ཉམས་སུ་བླང་ཚུལ་འདི་ཉིད་ཀྱིས་རིགས་འགྲེ་སྟེ་ཤེས་པར་བྱའོ། །གསུམ་པ་ནི། ཐུན་དེ་ལས་ལྡང་བར་བརྩམས་པ་ན། སྤྲོ་ཞིང་ནུས་ན་སླར་ཡང་ཡན་ལག་བདུན་པ་མཎྜལ་དང་བཅས་པ་ཕུལ་ཞིང་གསོལ་བ་ཤུགས་དྲག་ཏུ་གདབ། གང་ལྟར་ཡང་ཚོགས་ཞིང་རྣམས་རྟེན་ཡོད་ན་རྟེན་དང་དབྱེར་མེད་དུ་བཞུགས་པར་བསམ། ཡང་ན་རང་བཞིན་གྱི་གནས་སུ་གཤེགས་པའམ་མི་དམིགས་པར་བསམས་པས་ཀྱང་རུང་། ཐུན་གཅིག་ཏུ་ཉམས་ལེན་བྱས་པ་ལས་བྱུང་བའི་དགེ་བའི་རྩ་བས་མཚོན་དུས་གསུམ་དུ་བསགས་དང་བསག་པར་འགྱུར་བའི་དགེ་ཚོགས་ཐམས་ཅད་རང་གཞན་སེམས་ཅན་ཐམས་ཅད་རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་རྒྱུ་ཁོ་ནར་བསྔོ་ཞིང་། དེ་ལྟར་བསྔོས་པ་ལ་བརྟེན་ནས། དལ་འབྱོར་རྙེད་པར་དཀའ་བས་མཚོན་དངོས་གཞིའི་ཉམས་ལེན་གྱིས་སྣ་དྲངས་ཏེ་སེམས་ཅན་ཐམས་ཅད་ཀྱི་རྒྱུད་ལ་བྱང་ཆུབ་གྱི་སེམས་རིན་པོ་ཆེ་རྣམ་པ་གཉིས་བཅོས་མ་མ་ཡིན་པར་སྐྱེས་པའི་མཐུས་རང་གཞན་ཐམས་ཅད་གནས་སྐབས་དང་མཐར་ཐུག་གི་ཕན་པ་དང་བདེ་བའི་དོན་ཐམས་ཅད་ཡིད་བཞིན་དུ་འགྲུབ་པར་ཤོག་ཅིག་སྙམ་དུ་བཟང་པོ་སྤྱོད་པ་ལ་སོགས་པའི་སྨོན་ལམ་རྒྱས་པའམ། དེ་ཙམ་མི་ནུས་ན། འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ། །དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །ཞེས་བསྔོ་བ་དང་། དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཤིང་། །བསོད་ནམས་ཡེ་ཤེས་ལས་བྱུང་བའི། །དམ་པ་སྐུ་གཉིས་ཐོབ་པར་ཤོག །བྱང་ཆུབ་སེམས་ནི་རིན་པོ་ཆེ། །མ་སྐྱེས་པ་རྣམས་སྐྱེ་གྱུར་ཅིག ། སྐྱེས་པ་ཉམས་པ་མེད་པ་དང་། །གོང་ནས་གོང་དུ་འཕེལ་བར་ཤོག །བྱང་ཆུབ་སེམས་དང་མི་འབྲལ་ཞིང་། །བྱང་ཆུབ་སྤྱོད་ལ་གཞོལ་བ་དང་། །སངས་རྒྱས་རྣམས་ཀྱིས་ཡོངས་བཟུང་ཞིང་། །བདུད་ཀྱི་ལས་རྣམས་སྤོང་བར་ཤོག །བྱང་ཆུབ་སེམས་དཔའ་རྣམས་ཀྱིས་ནི། །འགྲོ་དོན་ཐུགས་ལ་དགོངས་འགྲུབ་ཤོག །མགོན་པོ་ཡིས་ནི་གང་དགོངས་པ། །སེམས་ཅན་རྣམས་ལ་དེ་འབྱོར་ཤོག །སེམས་ཅན་ཐམས་ཅད་བདེ་དང་ལྡན་གྱུར་ཅིག །ངན་འགྲོ་ཐམས་ཅད་རྟག་ཏུ་སྟོངས་པར་ཤོག །བྱང་ཆུབ་སེམས་དཔའ་གང་དག་སར་བཞུགས་པ། །དེ་དག་ཀུན་གྱི་སྨོན་ལམ་འགྲུབ་པར་ཤོག །ཅེས་སྨོན་ལམ་ཁྱད་པར་བ་གདབ་ཅིང་། སྤྲོ་ན་ལམ་གྱི་རིམ་པ་དང་མཐུན་པའི་སྨོན་ལམ་འདི་ལྟར་ཡང་བྱ་སྟེ། ཕྱོགས་བཅུ་དུས་གསུམ་རྩ་བརྒྱུད་བླ་མ་དང་། །སྐྱབས་གནས་བསླུ་མེད་དཀོན་མཆོག་རྒྱ་མཚོའི་ཚོགས། །ཡེ་ཤེས་ཐུགས་རྗེའི་སྤྱན་གྱིས་ལེགས་གཟིགས་ནས། །བདག་གི་སྨོན་པའི་གནས་འདི་མྱུར་འགྲུབ་མཛོད། །དེང་འདིར་རྩེ་གཅིག་བསྒོམས་པའི་བསོད་ནམས་དང་། །དུས་གསུམ་བསགས་པའི་ལེགས་བྱས་མཐའ་དག་ཀུན། །སྲས་བཅས་རྒྱལ་བའི་ཡོངས་བསྔོ་ཇི་བཞིན་དུ། །དམིགས་མེད་བྱང་ཆུབ་སྙིང་པོར་བསྔོ་བར་བགྱི། །དགེ་བ་འདི་ཡིས་བདག་གཞན་ཡིད་ཅན་ཀུན། །ཚེ་རབས་ཀུན་ཏུ་རྒྱལ་བས་བསྔགས་པ་ཡི། །འཁོར་ལོ་བཞི་དང་ལྡན་པའི་ལུས་ཐོབ་ནས། །ཐེག་ཆེན་རིགས་ཀྱི་ནུས་པ་རྫོགས་པར་ཤོག །དཔེ་གྲངས་རྒྱུ་དང་ངོ་བོས་རྙེད་དཀའ་བའི། །དལ་འབྱོར་རྟེན་ལ་སྙིང་པོ་ལེན་པའི་བློས། །ཚུལ་གནས་ཐོས་བསམ་སྒོམ་པའི་བྱ་བ་ལ། །གཡེལ་བ་མེད་པར་རྟག་ཏུ་བརྩོན་པར་ཤོག །དལ་འབྱོར་རྙེད་ཀྱང་ངེས་པར་འཆི་བ་དང་། །ནམ་འཆི་ངེས་མེད་དམ་ཆོས་ཁོ་ན་ལས། །ཕན་པ་མེད་པའི་ངང་ཚུལ་ལེགས་རྟོགས་ནས། །སྙིང་ནས་འཆི་ཆོས་མྱུར་དུ་སྒྲུབ་པར་ཤོག །ཤི་བའི་འོག་ཏུ་ལས་ཀྱི་རྗེས་འབྲངས་ནས། ཁམས་གསུམ་རིགས་དྲུག་མཐོ་དམན་གང་སྐྱེས་ཀྱང་། །སྡུག་བསྔལ་རྒྱ་མཚོར་བྱིང་བ་མཐོང་གྱུར་ཏེ། །ངེས་འབྱུང་དྲག་པོ་གཏིང་ནས་སྐྱེ་བར་ཤོག །རང་ཉིད་ཇི་ལྟར་འཁོར་བར་སྡུག་བསྔལ་བཞིན། །མ་གྱུར་འགྲོ་ཀུན་དེ་ལས་མ་འདས་པས། །བླ་མ་དཀོན་མཆོག་གསུམ་ལ་སྐྱབས་བཟུང་སྟེ། །སྐྱེས་བུ་ཆེན་པོའི་ལམ་ལ་འཇུག་པར་ཤོག །ཤིན་ཏུ་དབེན་ཞིང་ཉམས་དགའི་སྨན་ལྗོངས་སུ། །ཉེས་པ་ལྔ་སྤོང་འདུ་བྱེད་བརྒྱད་བསྟེན་པས། །སེམས་བྱུང་རྙོག་པ་ཉེ་བར་ཞི་བའི་གནས། །ཤིན་སྦྱངས་མི་གཡོའི་ཏིང་འཛིན་འགྲུབ་པར་ཤོག །གཟུང་བའི་ཆོས་ཀུན་རྨི་ལམ་ལྟ་བུ་སྟེ། །འཛིན་བའི་སེམས་ཉིད་མ་སྐྱེས་རིག་པའི་གཤིས། །དཔྱོད་བྱེད་གཉེན་པོ་ཉིད་ཀྱང་རང་གྲོལ་བའི། །ལྷག་མཐོང་ཤེས་རབ་ཕར་ཕྱིན་རྟོགས་པར་ཤོག །ལམ་གྱི་ངོ་བོ་ཀུན་གཞི་འོད་གསལ་དབྱིངས། །ཞི་ལྷག་ཟུང་འཇུག་ངང་དུ་མཉམ་བཞག་ཅིང་། །ཐུན་མཚམས་རྟེན་འབྱུང་སྒྱུ་མའི་སྐྱེས་བུ་ཡིས། །རྣམ་དཀར་དགེ་ཚོགས་རྒྱ་ཆེན་སྡུད་པར་ཤོག །མཁའ་ཁྱབ་འགྲོ་ཀུན་མར་ཤེས་དྲིན་དྲན་ཞིང་། །དྲིན་བཟོའི་སླད་དུ་ཡིད་འོང་བྱམས་པ་དང་། །སྙིང་རྗེ་ཆེན་པོའི་སྦྱོར་བ་ལ་བརྟེན་ནས། །རྨད་བྱུང་ལྷག་བསམ་རྒྱུད་ལ་སྐྱེ་བར་ཤོག །ཁྱད་པར་བདག་ལུས་ལོངས་སྤྱོད་དགེ་ཚོགས་ཀུན། །ཕངས་པ་མེད་པར་གཞན་ལ་གཏོང་བ་དང་། །གཞན་གྱི་སྡུག་བསྔལ་ཀུན་འབྱུང་རྒྱུ་དང་བཅས། །སྙིང་ནས་རང་གི་ཁུར་དུ་ལེན་པར་ཤོག །རླུང་དང་སྦྱར་ནས་དམིགས་པའི་རྩལ་སྦྱོང་ཞིང་། །ཉེ་འཁོན་བར་མའི་ཡུལ་ལས་དུག་གསུམ་གྱི། །གདུང་བས་མནར་བའི་ཡིད་ཅན་ཇི་སྙེད་ཀྱང་། །རླབས་ཆེན་དགེ་རྩ་གསུམ་ལ་འགོད་པར་ཤོག །འགྲོ་འཆག་ཉལ་འདུག་སྤྱོད་ལམ་ཐམས་ཅད་དུ། །དྲན་དང་ཤེས་བཞིན་གཉེན་པོ་ལེགས་བརྟེན་ནས། །སྨོན་པའི་ཚིག་དང་རྗེས་སུ་མཐུན་པ་ཡི། །བྱང་ཆུབ་སེམས་མཆོག་རྟག་ཏུ་སྦྱོང་བར་ཤོག །སྣོད་བཅུད་སྡིག་པའི་འབྲས་བུས་གང་བའི་ཚེ། །སྡུག་བསྔལ་རྩ་བ་བདག་འཛིན་འདུལ་བ་དང་། །བྱང་ཆུབ་བསྒྲུབ་པ་གང་ལ་རག་ལས་ཕྱིར། །འགྲོ་ཀུན་བཀའ་དྲིན་སྙིང་ནས་སྒོམ་པར་ཤོག །འཁྲུལ་སྣང་སྐྱེ་འགག་གནས་གསུམ་དང་བྲལ་བའི། །སྐུ་བཞི་དབྱེར་མེད་ཆེན་པོར་ངོ་འཕྲོད་ནས། །རྩེ་གཅིག་བསྒོམ་པའི་སྟོང་ཉིད་སྲུང་བ་ཡིས། །གཟུང་འཛིན་སྤྲོས་མཚན་དབྱིངས་སུ་ཞི་བར་ཤོག །ཚོགས་བསག་སྒྲིབ་སྦྱང་གདོན་ལ་མཆོད་པ་དང་། །ཆོས་སྐྱོང་ཚོགས་ལ་གཏོར་མ་འབུལ་བ་སྟེ། །སྦྱོར་བ་བཞི་སོགས་ཐབས་མཁས་དཔག་མེད་ཀྱིས། །རྐྱེན་ངན་བྱང་ཆུབ་ལམ་དུ་སྒྱུར་བར་ཤོག །འཕེན་པས་གཞི་བཟུང་གོམས་པའི་སྟོབས་རྫོགས་ཤིང་། །བསག་སྦྱང་ལ་བརྩོན་སྨོན་ལམ་མཐར་སོན་པས། །འདི་དང་འཆི་ཁ་བར་དོའི་གནས་སྐབས་ཀུན། །སྟོབས་ལྔའི་ཉམས་ལེན་སྙིང་པོར་དྲིལ་བར་ཤོག །ལེགས་གསུངས་ཆོས་ཀུན་དགོས་པ་གཅིག་འདུས་པའི། །ཉམས་མྱོང་རང་སེམས་དབང་པོར་ཐུབ་པ་དང་། །ཆོས་དང་སེམས་འདྲིས་ཡིད་བདེ་འབའ་ཞིག་དང་། །མཉམ་རྗེས་ཀུན་ཏུ་ལམ་ཁྱེར་བརྟན་པར་ཤོག །བསླབ་གསུམ་རྣམ་དག་ཐོ་ཅོའི་སྤྱོད་པ་སྤོང་། །ཕྱོགས་དང་རིས་མེད་བྱང་ཆུབ་སེམས་མཆོག་འབྱོངས། །བསམ་སྦྱོར་བག་ཡོད་སྤྱོད་པས་དུས་འདའ་བའི། །བློ་སྦྱོང་དམ་ཚིག་སྲོག་བཞིན་སྲུང་བར་ཤོག །རྟག་ཏུ་གཞན་ཕན་བསམ་པ་འབའ་ཞིག་གིས། །འབྱོར་རྒུད་བདེ་སྡུག་མཐོ་དམན་ཅི་བྱུང་ཡང་། །རྒྱལ་བའི་སྲས་ཀྱི་བསླབ་པར་བྱ་བ་དང་། །ནམ་ཡང་མི་འགལ་གྲོགས་སུ་འགྱུར་བར་ཤོག །མདོར་ན་འདི་ནས་བྱང་ཆུབ་སྙིང་པོའི་བར། །ཐེག་མཆོག་དགེ་བའི་བཤེས་དང་མི་འབྲལ་ཞིང་། །རྒྱལ་བ་དགྱེས་པའི་ལམ་བཟང་འདིར་བརྟེན་ནས། །རང་གཞན་དོན་གཉིས་འགྲུབ་པའི་བཀྲ་ཤིས་སྩོལ། །ཅེས་པའི་ཚིག་དོན་ཡིད་ལ་དྲན་བཞིན་དུ་འདུན་བ་རྩེ་གཅིག་པས་བརྗོད་ཅིང་སྤྱོད་ལམ་ལ་འཇུག་གོ། །གཉིས་པ་ཐུན་མཚམས་སུ་ཇི་ལྟར་བྱ་བ་ནི། ཐུན་གྱི་དངོས་གཞིའི་སྐབས་སུ་གང་བསྒོམ་པའི་ཉམས་ལེན་ཀྱི་རྩི་དང་མ་བྲལ་བར་དྲན་པ་དང་། ཤེས་བཞིན་དང་། བག་ཡོད་པས་ཀུན་ནས་བསླངས་ཏེ་སྤྱོད་ལམ་ཐམས་ཅད་མི་དགེ་བ་དང་། ལུང་མ་བསྟན་གྱི་དབང་དུ་མ་སོང་བར། དགེ་བའི་རྩ་བ་འབའ་ཞིག་གིས་དུས་འདའ་བར་བྱ་བ་སྟེ། དལ་འབྱོར་རྙེད་དཀའ་བསྒོམ་པའི་སྐབས་ལ་མཚོན་ན། དེ་ཉིད་སྟོན་པའི་མདོ་དང་བསྟན་བཅོས་རྣམས་ལ་ཡང་དང་ཡང་དུ་བལྟ་ཞིང་ཚིག་ཏུའང་བརྗོད་ལ་ངེས་ཤེས་བསྐྱེད། ད་རེས་རྟེན་བཟང་པོ་འདི་ལྟ་བུ་ཐོབ་པའི་སྐབས་སུ་དོན་མེད་དུ་མ་སོང་བར་བསམ་པ་དང་སྦྱོར་བ་གཉིས་ཀའི་སྒོ་ནས་སྙིང་པོ་ལེན་པའི་ཐབས་ལ་འབད་པར་བགྱིའོ་སྙམ་དུ་ཡིད་ལ་བསམ། ངག་ཏུ་བརྗོད། ལག་ལེན་ལ་ཐེག་པར་བྱ་བས་མཚོན་ཏེ་ཤེས་པར་བྱའོ། །མྱོང་བ་ཅུང་ཟད་སྐྱེས་པས་སྟན་ཐོག་གཅིག་ཏུ་ལམ་ཆ་ཚང་བར་བསྒོམ་པར་འདོད་ན། སྦྱོར་བའི་ཆོས་དྲུག་ཚུལ་བཞིན་དུ་བྱས་པས་ཀུན་སློང་བཅོས་པའི་ནང་དུ་སྔོན་འགྲོའི་ཆོས་རྣམས་འདུ་བས་ན། དངོས་གཞི་ཞི་ལྷག་ཟུང་འཇུག་གི་ཉམས་ལེན་ལ་ཇི་ཙམ་གནས་ཀྱི་བར་དུ་བློ་འཇོག །དེ་ལ་མི་གནས་ན་གནས་ལུགས་མ་རྟོགས་པའི་སེམས་ཅན་རྣམས་ལ་དམིགས་པ་མེད་པའི་བྱམས་པ་དང་སྙིང་རྗེ་སྒྱུ་མ་ལྟ་བུ་བསྒོམ། བདེ་སྡུག་གཏོང་ལེན་གྱི་དམིགས་པ་ཁོ་ན་ལ་གནད་དུ་བསྣུན། ཐུན་ལས་ལྡང་བར་ཕྱོགས་པ་ན། རྐྱེན་ངན་བྱང་ཆུབ་ཀྱི་ལམ་དུ་བསྒྱུར་བ་མན་ཆད་ཀྱི་ས་བཅད་རྣམས་ལའང་བཤེར་སྒོམ་གྱི་ཚུལ་དུ་རྒྱས་བསྡུས་གང་རུང་རེ་བྱས་ལ་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག་གོ། །དེའང་ལས་དང་པོ་པས་བསག་སྦྱོང་ཁོ་ན་གལ་ཆེ་བས་ན། སྐྱབས་སུ་འགྲོ་བ་དང་། ཡན་ལག་བདུན་པ་སྤྱི་དང་ཁྱད་པར་ལྟུང་བཤགས་སོགས་དང་སྦྲགས་ཏེ་ཕྱག་འཚལ་བ་དང་མཎྜལ་འབུལ་བ་རྣམས་འབུལ་ཐེར་རེའམ་རྟགས་མ་བྱུང་གི་བར་ནན་ཏན་ཏུ་བྱ། དེ་ནས་སྔོན་འགྲོ་དང་དངོས་གཞིའི་དམིགས་པ་རྣམས་སོ་སོ་ལ་མྱོང་བ་མ་སྐྱེས་ཀྱི་བར་དུ་བསྒོམ་མོ། །འདི་ནི་གཙོ་བོར་བློ་སྦྱོང་སྙན་བརྒྱུད་ཆེན་མོ་དང་བསྟུན་པ་ཡིན་ཡང་། སེམས་དཔའ་ཆེན་པོ་གཞོན་ནུ་རྒྱལ་མཆོག་གིས་མཛད་པའི་ལེགས་བཤད་ཀུན་འདུས་ལའང་སྦྱར་བར་སྤྲོ་ན། སྦྱོར་བའི་ཆོས་བཞིས་ཚོགས་ཞིང་གསལ་གདབ་པའི་སྐབས། གནས་དང་མཆོད་པའི་ཡོ་བྱད་བྱིན་གྱིས་བརླབས་རྗེས་ཁྲིད་ཡིག་གི་གཞུང་དང་ངག་འདོན་གཞན་ནས་འབྱུང་བ་སོགས་གང་རུང་ལྟར་བློ་སྦྱོང་བླ་མའི་རྣལ་འབྱོར་གསལ་གདབ། ཡན་ལག་བདུན་པ་དང་མཎྜལ་འབུལ་ཞིང་གསོལ་བ་གདབ་པ་རྣམས་འདྲ། རྗེས་སུ་ཐུན་བསྡུ་བའི་ཚེ་བླ་མ་རང་གི་སྙིང་དབུས་སུ་སྤྱན་དྲང་བའི་ཚུལ་བཞུང་ནས་འབྱུང་བ་ལྟར་ཉམས་སུ་བླངས་རྗེས་བསྔོ་སྨོན་སོགས་དཀྱུས་བཞིན་བྱས་པས་དོན་འགྲུབ་ལ། སྔོན་འགྲོ་དང་། དངོས་གཞིའི་སྐབས་ཀྱི་དམིགས་པའི་སྤྲོས་པ་ཅུང་ཟད་མི་འདྲ་བ་རྣམས་ཀྱང་གཞུང་བཞིན་དུ་ཤེས་པར་བྱས་ལ་ཉམས་སུ་བླང་ངོ་།། །།

མཐའ་ཡས་འགྲོ་ལ་ཕན་བདེ་འབྱུང་བའི་གཞི། །རིན་ཆེན་བྱང་ཆུབ་སེམས་ཀྱི་ས་བོན་མཆོག །བློ་སྦྱོང་བདུད་རྩིས་བྲན་པའི་དགེ་མཚན་གྱིས། རྣམ་མཁྱེན་འབྲས་བཟང་མྱུར་དུ་སྨིན་པར་ཤོག། །ཅེས་པའང་ཐེག་པ་ཆེན་པོའི་དགེ་བའི་བཤེས་གཉེན་དམ་པ་ཕན་བདེ་བཟང་པོས་བཀའ་སྩལ་རིན་པོ་ཆེའི་ཕྲེང་བས་བསྐུལ་བ་དོན་ཡོད་པར་བྱ་བའི་ཕྱིར། རྗེ་བླ་མ་དམ་པ་ཡོངས་ཀྱི་དགེ་བའི་བཤེས་གཉེན་བཅུ་ཕྲག་རིག་པའི་མ་ཧཱ་པཎྜི་ཏ་དཀོན་མཆོག་བསྟན་པ་རབ་རྒྱས་དཔལ་བཟང་པོ་སོགས་ཡོངས་འཛིན་དམ་པ་ཆོས་བཞིན་དུ་སྤྱོད་པ་རྣམས་ལས་ཚུལ་འདིའི་བཀའ་དྲིན་མང་དུ་ཐོས་པའི་རྒྱལ་ཁམས་ཀྱི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས། རྗེ་བཙུན་བླ་མ་རྣམས་ཀྱི་གསུང་སྒྲོས་དང་ཕྱག་གཞེས་ལྟར་ཉུང་གསལ་སྙིང་པོར་དྲིལ་ཏེ་སྦྱར་བ་དགེ་ལེགས་མཆོག་ཏུ་གྱུར་ཅིག། །། ༈

[edit]

blo sbyong don bdun ma nyams su len tshul phan bde'i sa bon/ @#/__/hi_ta_su_kha_s+ya_bI_dzaM_nA_ma_ma_hA_yA_na_s+ya_ma_ti_dz+nya_p+ta_sa_p+ta_mya_r+thA_nu_b+ha_wa_nA_ya_ga_r+b+haM_pi_N+DA_sti//_ @#/__/theg pa chen po'i blo sbyong don bdun ma nyams su len tshul snying por dril ba phan bde'i sa bon zhes bya ba bzhugs so/__/ oM swa sti sid+d+haM/__mkha' khyab 'gro la phan bde'i mchog sbyin pa'i/__/rin chen byang chub sems dang de ston pa/__/theg chen dge ba'i bshes la gus btud nas/__/rgyal sras lam gyi sa bon cung zad dbye/__/de la theg pa chen po'i blo sbyong don bdun ma'i man ngag zab mo nyams su len tshul gyi phyag gzhes mdo tsam brjod na gnyis/__thun gyi ngo bo la ji ltar bya ba'i tshul dang /__thun mtshams su ji ltar bya ba'i tshul lo/__/dang po la gsum/__sbyor ba/__dngos gzhi/__rjes so/__/dang po la drug__/gnas khang byi dor byas la sku gsung thugs kyi rten dgram pa/__mchod pa g.yo med cing bkod pa mdzes par bsham pa/__stan bde ba la bsam gtan gyi spyod lam gyis 'khod nas skyabs 'gro sems bskyed rgyud dang 'dres nges su bya ba/__tshogs zhing gsal gdab pa/__bsag sbyang gi gnad bsdus pa'i yan lag bdun pas rgyud sbyang ba/__dmigs pa gsal bar byas shing maN+Dal phul te don chen po gsum gyis gsol ba gdab pa'o/__/dang po ni/__bla ma gser gling pa'i rnam thar ltar phyag gzhes su 'debs pa yin pas dgon sde'am ri khrod lta bu gang yin yang 'dra ste/__rang dbang ba'i gnas khang spyi dang /__khyad par gang du sdod pa'i khul der/__bdag gis gnas khang 'dir 'dug nas gzhung dang bla ma'i man ngag la brten te las su bya ba gzhan spangs la/__gzhan don du rdzogs pa'i byang chub ci nas kyang thob par bya/__de'i ched du bla ma rgyal ba sras dang bcas pa tshogs zhing du bzhugs pa'i gnas 'dir phyag dar bgyi'o snyam du 'phen pa btang la/__rang rgyud kyi sdig sgrib sbyong ba dang /__rang gzhan gyi sems dwang bar 'gyur pa sogs kyi dgos pa dang phan yon dran bzhin pas mi 'dod pa'i khral chos su ma song bar dga' ba dang gus pa'i spyod lam gyis/__thog mar rdul mi ldang ba'i phyir chu gtsang mas bran pa'am/__bsang shing gi dri zhim po sbyar/__rang gzhan gyi sdig sgrib nyal nyil rnams phyag par mos la byi dor legs par byas rjes/__'byor na dri bzang po'i chus chag chag gdab/__de nas gung du seng ge'i khri sogs bkod pas mdzes par rten gyi gtso bo ston pa thub pa'i dbang po'i sku dang /__de'i steng du chos 'di gtso bor gyur pa'i bla ma brgyud pa/__g.yas g.yon du yi dam gyi lha dang sangs rgyas byang sems/__'og tu mkha' 'gro chos skyong nor lha sogs go rim ma log par bshams pa'i mdun nam g.yas g.yon gang bder sher phyin sogs dam pa'i chos kyi glegs bam dang /__mchod rten rnams bzhugs su gsol/__de lta bu'i rten gsum rgyas par ma 'byor yang rang la gang yod pa'i rten rnams bkur sti dang bcas te dwang ba 'dren par bsham mo/__/gnyis pa ni/__rang gi gnas der mchod pa dngos su bsham dgos te/__mchod pa med pa dad pa med pa'i rtags yin/__dad pa med pa ni dam pa'i chos rnal ma mi 'byung ba'i rtags yang dag yin pas rang dbang ba'i yo byad sum gcig ma mthar byas pa mchod pa'i phyogs su gtong dgos pas/__gong du bshams pa'i rten gsum gyi spyan sngar mchod pa'i snod rab gser dngul/__'bring li dang 'khar ba/__tha ma'ang rdza shing sogs gang 'byor byi dor legs par byas te/__mchod yon dang /__me tog dang /__spos dang /__mar me sogs dngos gtsang zhing ya yo 'khyar 'khyor du ma song bar bkod pa ci mdzes su bstar/__de'ang tshe 'di'i khe grags sogs chos brgyad sgrub pa'i bsam pas ma yin par/__sems can thams cad kyi don du rdzogs pa'i sangs rgyas kyi go 'phang thob par bya/__de'i ched du bla ma dang dkon mchog la mchod pa rgya chen po dbul bar bgyi'o snyam du byang chub kyi sems gsal btab cing mchod pa'i phan yon la spro zhing dad pa shugs drag tu bskyed pa sogs g.yo dang sgyu'i spyod pa dang bral ba'i lhag pa'i bsam pa rnam par dag pas kun nas bslangs te/__sbyor ba ser sna dang /__chog shes dang /__brnyas bcos sogs ring du dor nas gtsang sbra thon par byas la dga' zhing gus pas lag tu blang ngo /__/gsum pa ni/__rgyun bsrings te nyams su len na gnas khang gi phyogs bzhi'am sgo rtsar tho brtan po btsugs la mi'i rgyu 'grul dang phyi nang gi rnam g.yeng sogs spros pa gzhan thams cad rgyang gis bcad/__sdod tshugs pa'i rten 'brel gyi ched rang gis mal 'og tu sa dkar gyi g.yung drung ris chos skor du bris pa'i steng rtswa ku sha'i chun po dkram pa'ang phyag len du mdzad/__gang ltar yang bsam gtan gyi 'bol chung dngos su bcos pa yod na de dang /__med na rgyab cung zad mtho zhing 'jam pa'i stan ji ltar rigs pa bsham/__de nas gza' skar sbyor byed bzang po 'dzom pa'i phyi dro'i thun lta bu la mgo bzung ste/__gong du bshams pa'i stan la lus gnad skyil krung ngam skyil krung phyed pas kyang rung ste drang por bsrang /__ngag gnad rlung phyi nang du rang bzhin gyis rgyu ba nyer gcig gi bar du ma 'khrul par bgrang ba la yid gtad de rlung cham la phab/__khyad par sems kyi gnad mi dge ba dang lung ma bstan gyi dbang du ma song bar nges 'byung dang byang chub kyi sems sgo du ma nas yid la bya ste/__'di ltar blo kha nang du log ste rang gi sems chags sogs nyon mongs kyi dbang du song 'dug gam/__dad pa la sogs pa'i dge sems gang 'dug snyam du brtag par bya/__de ltar brtag pa na rang re las dang po pa rnams la ni sems nyon mongs pa'i gzhan dbang gis tshe 'di'i snang shas 'ba' zhig 'char ba kho na shas che bas na/__chags sogs nyon mongs pa'i dbang du song 'dug na de ngos zin par byas te/__blo ngan 'di lta bu zhig gis 'khor ba thog ma med pa nas da lta'i bar du bdag rang dbang med par 'khor bar 'khyams shing sdug bsngal bar ma chad par myang du bcug pa yin pas/__da ni blo ngan 'di'i dbang du skad cig kyang mi gtong /__phyin chad nam du'ang rgyud la mi skye ba zhig bya'o snyam du 'dun pa dang snying stobs shugs drag tu bskyed de/__ga re 'khor ba thog ma med pa nas da lta'i bar du sdug bsngal bar ma chad du myong 'dug kyang skyo ba dang sun pa skad cig kyang med par 'khor ba'i gnas 'ba' zhig la mngon par dga' ba 'di'i dbang du song na/__da dung sngar ltar mtha' med mu med du sdug bsngal kho na zhig myong dgos par 'dug__/des na da res bla ma dkon mchog gi thugs rjes dal ba'i rten bzang po thob/__lam ma nor bar ston pa'i bshes gnyen dam pas rjes su bzung /__mjal bar dka' ba'i sangs rgyas kyi bstan pa rin po che yongs su rdzogs pa dang mjal/__blang dor 'byed pa'i shes rab kyi mthu cung zad rnyed/__rang gi ngos nas nyams su len nus na myur du sangs rgyas kyi go 'phang nyid kyang bde blag tu ster nus pa'i gdams pa zam mo 'di 'dra thob/__de lta bu'i chos zab mo nyams su len par byed pa la rang dbang yod pa'i skabs 'di 'bad nas btsan sa zin pa zhig ma byas na/__slar rten bzang 'di 'dra shin tu rnyed par dka'/__lan cig rnyed pa 'di'ang yun ring du mi gnas par myur du 'jig ste nges par 'chi/__nam 'chi la nges pa med/__'chi ba'i tshe chos ma gtogs gang gis kyang mi phan/__shi nas cang med du mi 'gro/__ma byas pa'i las dang mi 'phrad/__byas pa chud mi 'dza' bar las dang las kyi 'bras bu 'ba' zhig la brten nas ngan song gsum du ltung na ni tsha grang dang /__bkres skom dang /__bkol spyad dang glen zhing gti mug pa sogs sdug bsngal bzod blag med pa myong dgos shing /__chos kyi sgra tsam yang thos par dka'/__gnas der skyabs btsal yang mi rnyed/__brgya la bde 'gro'i rten thob kyang sdug bsngal 'ba' zhig las ma 'das te/__mi rnams la skye rga na 'chi'i sdug bsngal/__lha ma yin rnams la 'thab cing rtsod pa/__khams 'og ma'i lha rnams la 'chi 'pho ltung ba'i sdug bsngal/__khams gong ma'i lha rnams la khyab pa 'du byed kyi sdug bsngal te/__mdor na gnas rigs drug tu rten khams gsum gang du skyes kyang las dang nyon mongs pa'i gzhan dbang du song ste rang dbang med par 'khyams shing sdug bsngal 'ba' zhig gis mnar/__rang nyid sdug bsngal gyis mnar ba de bzhin du sems can thams cad kyang sdug bsngal gyis mnar/__sdug bsngal gyis mnar ba'i sems can thams cad rang gi drin can gyi ma sha stag yin zhing /__ma byas pa la'ang grangs kyis mi chod/__nam byas res kyis tshe 'di'i mas ji ltar drin gyis bskyangs pa ltar drin gyis bskyangs pas drin shin tu che/__drin can gyi ma 'di rnams bde ba 'dod kyang blang dor go log tu spyad pas sdug bsngal 'ba' zhig myong ba las bde ba'i skabs skad cig kyang mi 'dug pas snying re rje/__de bas na ma 'di rnams bde ba phun sum tshogs pa dang ldan na ci ma rung /__sdug bsngal mtha' dag dang bral na ci ma rung snyam du byams snying rje shugs drag tu bsgom/__'o na sems can thams cad sdug bsngal las sgrol ba'i khur de su la babs na nged rang la babs shing nges par spro na'ang /__da lta rang nyid la de'i nus pa med/__rang las lhag pa'i tshangs pa dang brgya byin sogs 'jig rten gyi chen po rnams la'ang med/__su la yod na bla ma dang dkon mchog rin po che rnam pa gsum kho na la mnga' bas na/__bdag gzhan sems can thams cad 'khor ba dang ngan song gi sdug bsngal las bsgral bar bya ba'i phyir bla ma dang dkon mchog rin po cher skyabs dang ra mda' zhu bar bgyi'o snyam du 'dun pa snying nas bskyed/__spro na tshigs su bcad pa 'di rnams kyi don yid la dran bzhin pas kyang rang rgyud la bskul ma gdab par bya ste/__dal 'byor 'di ni shin tu rnyed par dka'/__/skyes bu'i don sgrub thob par gyur pa la/__/gal te 'di la phan pa ma bsgrubs na/__/phyis 'di yang dag 'byor bar ga la 'gyur/__/srid gsum mi rtag ston ka'i sprin dang 'dra/__/'gro ba'i skye 'chi gar la lta dang mtshungs/__/'gro ba'i tshe 'gro nam mkha'i glog 'dra ste/__/ri gzar 'bab chu bzhin du myur mgyogs 'gro/__/dus kyis bsnyen nas rgyal po 'gro 'gyur na/__/longs spyod mdza' dang gnyen bshes rjes mi 'brangs/__/skyes bu dag ni gar gnas gar 'gro yang /__/las ni lus dang grib ma bzhin du 'brangs/__/sred srid ma rig dbang gis skye bo rnams/__/mi dang lha dang ngan song rnam gsum po/__/'gro ba lnga po dag tu mi mkhas 'khor/__/dper na rdza mkhan 'khor lo 'khor ba bzhin/__/srid gsum rga dang nad kyi sdug bsngal 'bar/__/'di na 'chi me rab 'bar mgon med de/__/srid las byung la 'gro ba rtag tu rmongs/__/bum par chud pa'i bung ba 'khor ba bzhin/__/de lta'i 'jigs rung srid pa'i sdug bsngal las/__/mar gyur mkha' mnyam 'gro rnams bsgral ba'i phyir/__/bla ma mchog dang dkon mchog rnam gsum la/__/mi phyed dad pas skyabs su gzung bar bgyi/__/zhes tshig dal bus brjod cing don yid la bsam/__de nas sa phyogs thams cad dag pa'i zhing khams bde ba can gyi bkod pa lta bur gyur pa'i rang gi mdun gyi nam mkhar yid 'phrog pa'i mchod sprin rgya mtsho 'khrigs ba'i dbus su/__seng ges btegs pa'i rin po che'i khri bkod pa phun sum tshogs pa'i steng du pad zla'i gdan la rtsa ba'i bla ma dang gnyis su med pa'i ston pa thub pa'i dbang po'i mtha' skor du brgyud pa'i bla ma yi dam sangs rgyas byang sems/__lung rtogs kyi chos dkon mchog mtshon pa'i glegs bam gyi tshogs/__rang las bslab pa rgan pa yan gyi 'phags pa dang so so skye bo'i dge 'dun bstan srung ye shes pa rnams dang bcas pa sprin gyi phung po gtibs pa ltar rang nyid la dgyes shing 'dzum pas zhal phyogs te mngon sum du bzhugs pa'i spyan sngar/__rang dang sems can thams cad sa gzhi'i ngos su sa chen po'i dreg pa ltar smug shig ge tshogs pas sgo gsum 'jug pa gcig pa'i tshul gyis 'di nas byang chub ma thob kyi bar du skyid sdug legs nyes ci byung yang bla ma dang dkon mchog khyed rnams ma gtogs re sa dang ltos sa gzhan na med pas ci mdzad khyed mkhyen no snyam pa'i mos gus gdung shugs drag pos skyabs su 'gro bar gyur par bsams la/__skyabs 'gro'i tshig ji ltar rigs pa'am/__dge ba'i bshes gnyen 'ga' zhig jo bo rje'i sems bskyed kyi cho ga las 'byung ba 'di ltar brjod pa phyag gzhes su mdzad pas/__bdag gzhan sems can thams cad kyis mgrin gcig tu brjod par bsams la ngag tu/__bdag dang 'gro ba nam mkha'i mtha' dang mnyam pa'i sems can thams cad dus 'di nas bzung ste/__ji srid byang chub snying po la mchis kyi bar du/__rkang gnyis rnams kyi mchog sangs rgyas bcom ldan 'das rnams la skyabs su mchi'o/__/chos rnams kyi mchog zhi ba 'dod chags dang bral ba'i chos la skyabs su mchi'o/__/tshogs rnams kyi mchog 'phags pa byang chub sems dpa' phyir mi ldog pa'i dge 'dun chen po rnams la skyabs su mchi'o/__/zhes gang mang dang /__bdag gzhan gyis dus gsum du bsags dang gsog bar 'gyur pa'i sbyin tshul sgom pa las byung pa'i dge ba'i rtsa bas sems can thams cad kyi don du rnam pa thams cad mkhyen pa'i rdzogs pa'i sangs rgyas kyi go 'phang thob par shog cig snyam pa smon sems dang /__de'i ched du theg pa chen po'i lam gyi rtsa ba byang chub mchog tu sems bskyed nas blo sbyong gi gdams pa zab mo nyams su blangs la/__nyams su myong nges pa zhig ci nas kyang bgyi'o snyam pa 'jug pa sems bskyed pa'i don yid la dran bzhin du/__phyogs bcu na bzhugs pa'i sangs rgyas dang byang chub sems dpa' thams cad bdag la dgongs su gsol/__bdag dang mkha' mnyam gyi sems can ma lus pa thams cad kyis skye ba 'di dang skye ba gzhan dag tu sbyin pa'i rang bzhin dang /__tshul khrims kyi rang bzhin dang /__sgom pa'i rang bzhin can gyi dge ba'i rtsa ba ci bgyis pa dang /__bgyid du stsal ba dang /__bgyis pa la rjes su yi rang ba'i dge ba'i rtsa ba des/__ji ltar sngon gyi de bzhin gshegs pa dgra bcom pa yang dag par rdzogs pa'i sangs rgyas rnams dang /__sa chen po la rab tu bzhugs pa'i byang chub sems dpa' rnams kyis dang po bla na med pa yang dag par rdzogs pa'i byang chub tu thugs bskyed par mdzad pa de bzhin du/__bdag dang sems can thams cad kyis dus 'di nas bzung ste ji srid byang chub snying po la mchis kyi bar du bla na med pa yang dag par rdzogs pa'i byang chub tu sems bskyed par bgyi'o/__/sems can ma bsgral ba rnams bsgral bar bgyi'o/__/ma grol ba rnams dgrol bar bgyi'o/__/dbugs ma phyung ba rnams dbugs dbyung bar bgyi'o/__/yongs su mya ngan las ma 'das pa rnams yongs su mya ngan las bzla bar bgyi'o/__/zhes sems bskyed kyi cho ga las byung ba'i tshig 'di lan gsum sogs ji ltar rigs pa blo dang 'dre nges su bya/__slar yang skyabs sems sbrags ma'i tshul du/__sangs rgyas chos dang tshogs kyi mchog rnams la/__/byang chub bar du bdag ni skyabs su mchi/__/bdag gis sbyin sogs bgyis pa'i bsod nams kyis/__/'gro la phan phyir sangs rgyas 'grub par shog__/ces lan gang mang brjod/__bsdu na sangs rgyas chos tshogs kho nas kyang rung /__de nas mtha' yas pa'i sems can thams cad bde ba dang bde ba'i rgyu dge ba'i rtsa ba dang ldan/__sdug bsngal dang sdug bsngal gyi rgyu las dang nyon mongs pa'i kun 'byung dang bral/__sdug bsngal med pa'i bde ba dang dus rtag tu mi 'bral zhing /__bde sdug gi rgyu rang phyogs la chags pa/__gzhan phyogs la sdang ba/__de gnyis kyi rgyu las 'bras la rmongs pa'i ma rig pa dang bral nas btang snyoms chen po la gnas pa zhig byung na ci ma rung snyam pa'i 'dun pa/__de ltar gyur cig snyam pa'i smon lam/__de ltar bdag gis bgyi'o snyam pa'i dam bca'/__de ltar 'gyur bar bla ma dang dkon mchog mkhyen snyam pa'i gsol 'debs dang 'brel ba'i don yid la dran bzhin tu/__sems can thams cad bde ba dang bde ba'i rgyu dang ldan par gyur cig__/sdug bsngal dang sdug bsngal gyi rgyu dang bral bar gyur cig__/sdug bsngal med pa'i bde ba dang mi 'bral bar gyur cig__/nye ring chags sdang dang bral ba'i btang snyoms tshad med pa la gnas par gyur cig__/ces brjod/__de ltar skyabs sems tshad med bzhi bsgoms pa la brten nas/__skyabs yul rnams kyi sku las bdud rtsi sna lnga 'od zer gyi rgyun dang bcas pa byung /__rang dang sems can thams cad kyi lus sems la zhugs pas tshe 'khor ba thog ma med pa nas bsags pa'i sdig sgrib spyi dang /__khyad par skyabs yul rnams la ma gus pa dang /__brnyas pa la sogs pa'i sdig sgrib dang /__byang chub kyi sems rin po che'i gegs su gyur pa thams cad sbyangs/__lus dwangs gsal 'od kyi rang bzhin du gyur/__tshe dang bsod nams dang lung rtogs kyi yon tan thams cad 'phel zhing rgyas/__khyad par bla ma dang dkon mchog gi skyabs 'og tu tshud cing thugs rje dang byin rlabs rgyud la zhugs pa la brten nas smon pa dang 'jug pa'i bdag nyid can gyi byang chub kyi sems dang /__tshad med pa bzhi bcos ma ma yin pa rgyud la skyes par mos te sems zung la mnyam par bzhag mthar skyabs yul rnams mi dmigs par bsam mo/__/bzhi pa ni/__thog mar gnas khang dang mchod pa'i yo byad la dmigs te sman bla dang gnas brtan gyi cho ga sogs las 'byung ba ltar byin rlabs bzhi skor rgyas par bya ba'am/__de tsam mi nus na/__dkon mchog gsum gyi bden pa dang /__sangs rgyas dang byang chub sems dpa' thams cad kyi byin gyi rlabs dang /__tshogs gnyis yongs su rdzogs pa'i mnga' thang chen po dang /__chos kyi dbyings rnam par dag cing bsam gyis mi khyab pa'i stobs kyis deng 'dir khor yug gi sa gzhi 'di dag bcom ldan 'das 'od dpag med kyi zhing gi bkod pa'i yon tan phun sum tshogs pa'i rgyan thams cad kyis brgyan pa mdzes shing yid du 'ong bar gyur pa'i gzhir/__gzhal med khang rin po che sna bdun mchog tu 'bar ba bkod pa legs pas mdzes shing lhun stug pa yangs shing rgya che ba'i dbus su/__rin po che sna tshogs las grub pa'i khri seng ge chen po brgyad kyis btegs pa'i steng du pad+ma dang zla ba'i gdan/__mtha' skor kun tu seng khri pad zla'i gdan grangs med pa dang /__phyi nang kun tu'ang cha rigs dang 'tshams par lha dang mi'i yo byad dam pa zhal zas dang /__na bza' dang /__rol mo la sogs pa phul du phyin pa sna tshogs pa phung po gsum pa'i mdo dang /__bzang po spyod pa'i smon lam las byung ba'i mchod pa'i sprin rgya mtsho thams cad kyis rgyas par gang zhing rgyan bklubs pa dang ldan pa 'byung bar gyur cig__/ces dang /__oM na mo b+ha ga wa te/__badz+ra sA ra pra mar+d+ha ne/__ta thA ga tA ya/__ar+ha te/__samya k+saM bud+d+hA ya/__tad+ya thA/__oM badz+re badz+re/__ma hA badz+re/__ma hA te dza badz+re/__ma hA bid+yA badz+re/__ma hA bo d+hi tsit+ta badz+re/__ma hA bo d+hi maN+Do pa sa~M kra ma Na badz+re/__sarba karma A wa ra Na bi sho d+ha na badz+re swA hA/__zhes mchod pa'i sprin gyi gzungs lan gsum dang /__slar yang /__dkon mchog gsum gyi bden pa dang /__sangs rgyas dang byang chub sems dpa' thams cad kyi byin gyi rlabs dang /__tshogs gnyis yongs su rdzogs pa'i mnga' thang chen po dang /__chos kyi dbyings rnam par dag cing bsam gyis mi khyab pa'i stobs kyis de bzhin du gyur cig__/ces bden pa'i stobs brjod/_de nas 'dun pa rtse gcig pas spos btul zhing snyan pa'i gdangs dang bcas pas/__phyogs dus kun nas skyabs gsum bka' sdod bcas/__/nyon mongs 'gro la mkhyen brtses rab dgongs te/__/dpag med zhing nas thogs med rdzu 'phrul gyis/__/'dir gshegs mchod sprin rgya mtsho'i dbus bzhugs gsol/__/rnam dag chos kyi dbyings las ma g.yos kyang /__/thugs rje tshad med 'gro la phyogs bcur gzigs/__/rgyal ba kun gyi phrin las rgyas mdzad pa/__/dus gsum bla ma 'khor bcas 'dir gshegs shig__/ma lus sems can kun gyi mgon gyur cing /__/bdud sde dpung bcas mi bzad 'joms mdzad lha/__/dngos rnams ma lus ji bzhin mkhyen gyur pa'i/__/bcom ldan 'khor bcas gnas 'dir gshegs su gsol/__/bcom ldan bskal pa grangs med du ma ru/__/'gro la brtse phyir thugs rje rnam sbyangs shing /__/smon lam rgya chen dgongs pa yongs rdzogs pa'i/__/khyed bzhed 'gro don mdzad dus 'di lags na/__/de phyir chos dbyings pho brang lhun grub nas/__/rdzu 'phrul byin rlabs sna tshogs ston mdzad cing /__/mtha' yas sems can tshogs rnams bsgral ba'i phyir/__/yongs dag 'khor dang bcas te gshegs su gsol/__/zhes gsol ba btab pas rang la chos 'di dngos su ston pa'i rtsa ba'i bla ma dang gnyis su med pa'i ston pa shAkya'i rgyal po la brgyud pa'i bla ma rnams dang yi dam dkyil 'khor gyi lha tshogs/__sangs rgyas dang byang chub sems dpa' nyan rang gi dge 'dun chos skyong srung ma ye shes pa'i tshogs dang bcas pas bskor ba sprin gyi phung po 'khrigs pa ltar byon nas so so'i gdan la dgyes bzhin du bzhugs par bsams la/__bcom ldan 'dir ni byon pa legs/__/bdag cag bsod nams skal par ldan/__/bdag gi mchod yon bzhes nas kyang /__/thugs la dgongs shing gnang bar mdzod/__/ces byon legs bya/__de nas khrus gsol ba'i thog mar snyan bsan pa ni/__khrus kyi khang pa shin tu dri zhim pa/__/shel gyi sa gzhi gsal zhing 'tsher bar bstar/__/rin chen 'bar ba'i ka ba yid 'ong ldan/__/mu tig 'od chags bla re bres pa der/__/de bzhin gshegs pa rnams dang de sras la/__/rin chen bum pa mang po spos kyi chus/__/yid 'ong legs par bkang ba glu dang ni/__/rol mor bcas pa du mas sku khrus gsol/__/khrus gsol ba ni/__ji ltar bltams pa tsam gyis ni/__/lha rnams kyis ni khrus gsol ltar/__/lha yi chu ni dag pa yis/__/de bzhin bdag gis khrus gsol lo/__/'di ni khrus mchog dpal dang ldan/__/thugs rje'i chu ni bla na med/__/byin brlabs ye shes chu yis ni/__/ci 'dod dngos grub stsol bar mdzod/__/rgyal ba'i sku gsung thugs mchog la/__/nyon mongs sgrib pa mi mnga' yang /__/sems can sgo gsum sgrib sbyang phyir/__/gtsang ma'i chab kyis khrus gsol lo/__/sku phyi ba ni/__de dag sku la mtshungs pa med pa'i gos/__/gtsang la dri rab bsgos pas sku phyi'o/__/de nas gos 'bul ba ni/__de nas de la kha dog legs bsgyur ba'i/__/na bza' shin tu dri zhim dam pa 'bul/__/gos bzang srab la 'jam pa sna tshogs dang /__/rgyan mchog brgya phrag de dang de dag gis/__/'phags pa kun tu bzang dang 'jam dbyangs dang /__/'jig rten dbang phyug sogs la'ang brgyan par bgyi/__/sna tshogs dbang po'i gzhu ltar rab bkra zhing /__/gang la reg na bde ba'i rgyur 'gyur ba'i/__/gos bzang rin chen bdag blo sbyang phyir 'bul/__/bzod pa dam pa'i gos kyis brgyan par shog__/dri med mtshan la sgrib bsal mi mnga' yang /__/dad pas ngur smrig rgyal mtshan phul ba yis/__/nam mkha'i mtha' klas gyur pa'i sems can rnams/__/sangs rgyas brtul zhugs mchog la spyod par shog__/bzhugs su gsol ba ni/__bdag dang 'gro la thugs brtse'i phyir/__/nyid kyi rdzu 'phrul mthu yis ni/__/ji srid mchod pa bdag bgyid na/__/de srid bcom ldan bzhugs su gsol/__/zhes brjod pas tshogs kyi zhing du brtan par bzhugs par mos la/__gsal snang la sems bzung zhing dad mos shugs drag tu bya'o/__/lnga pa ni/__lam rgyud la skye ba'i mthun rkyen tshogs bsag pa dang /__'gal rkyen sgrib pa sbyong ba'i lhan cig byed rkyen med na/__nyer len gyi rgyu dmigs rnam skyong ba tsam la 'bad kyang lam shin tu skye bar dka' bas bsag sbyong gi gnad rnams bsdus pa'i yan lag bdun pas rgyud sbyang dgos par gsungs pas na/__rgyas par na bzang spyod dang /__spyod 'jug sogs kyi tshigs su bcad pa spel zhing /__bshags pa'i skabs ltung bshags dang /__spyi bshags sogs chos spyod rnam pa las 'byung ba ltar bya ba'am/__bsdu na/__ji snyed su dag sogs nas/__phyir bsngo'o zhes pa'i bar bzang spyod las 'byung ba'i yan lag bdun pa tshig don yid la dran bzhin du tshar ji ltar rigs pa phyag dang bcas te bya'o/__/drug pa ni/__maN+Dal gyi gzhi dang /__tshom bu dgod pa'i 'bru/__dri bzang gi chu sogs sta gon byas la/__thog mar maN+Dal legs bar phyi zhing dri bzang gi chus brlan/__de nas lus kyi las su tshom bu dgod pa/__ngag gi las su tshig brjod pa/__yid kyi las su dmigs rnam yid la bya ba ste sgo gsum 'jug pa gcig pas maN+Dal tshom bu so bdun ma'am/__nyer gsum ma/__bdun ma sogs ci rigs pa ma tshang ba med pa 'di nyid ces pa'i bar spyi ltar la/__bla ma dang dkon mchog rin po che rnam pa gsum la 'bul bar bgyi'o/__/thugs rjes 'gro ba'i don du bzhes su gsol/__bzhes nas byin gyis brlab tu gsol/__zhes pa tsam mam/__spro na/__bzhes nas bdag gi rgyud kyi theg pa chen po'i lam bsgrub pa dang 'gal ba'i phyin ci log gi blo sna mtha' dag myur du 'gags par byin gyis brlab tu gsol/__byang chub kyi sems rin po che rnam pa gnyis sogs rtogs pa'i yon tan khyad par can myur du skye bar byin gyis brlab tu gsol/__phyi nang gi bar du gcod pa thams cad nye bar zhi bar byin gyis brlab tu gsol/__/zhes don chen po gsum gyi sgo nas gsol ba gdab/__de nas slar yang mos gus gdung shugs drag tu bskyed pa lam 'di'i bla ma brgyud pa la gsol ba 'debs pa ni/__tshogs gnyis rab rdzogs 'dren mchog shAkya'i tog__/rgyal ba'i rgyal tshab rgyal sras mi pham mgon/__/sa gsum mnga' bdag 'phags pa thogs med zhabs/__/gsol ba 'debs so bdag rgyud byin gyis rlobs/__/kun mkhyen gnyis pa rgyal sras dbyig gi gnyen/__/mtha' bral don gzigs 'phags pa rnam grol sde/__/bden gnyis don rtogs btsun pa rnam grol sde/__/gsol ba 'debs so bdag rgyud byin gyis rlobs/__/'gro ba'i rtsa lag gu Na mi tra'i zhabs/__/lta ngan ri dwags 'joms mdzad seng ge bzang /__/bdag gzhan tshogs gnyis spel mdzad gang ba spel/__/gsol ba 'debs so bdag rgyud byin gyis rlobs/__/yon tan rin chen gter gyur ku sA li/__/bdag gzhan brje mdzad ku sA li gnyis pa/__/mkhas grub chen po mnyam med gser gling pa/__/gsol ba 'debs so=__yid bzhin nor 'dra'i thugs mnga' mar me mdzad/__/rgyal ba'i 'byung gnas ston pa rin po che/__/bstan pa rin chen gsal mdzad pu to ba/__/gsol ba 'debs so=__yon tan mchog gis grags pa'i sha ra ba/__/byang chub thugs gnyis 'byongs pa'i 'chad ka ba/__/lta spyod rnam par dag pa'i rgyal ba se/__/gsol ba 'debs so=__gcig tu gzhan don mdzad pa'i skyes mchog lha/__/bslab gsum rnam par dag pa'i lha sdings pa/__/sgo gsum gzhan don mdzad pa'i lha sdings dbon/__/gsol ba 'debs so=__dus gsum rgyal ba'i lam gnas yon tan dpal/__/sangs rgyas bstan pa rgyas mdzad bde ba dpal/__/mkhas btsun 'gran zla bral ba'i ka bzhi pa/__/gsol ba 'debs so=__phan bde kun gyi 'byung gnas rin po che/__/bsod nams ye shes stobs kyis stong gsum grags/__/byams dang snying rje'i mnga' bdag chos kyi rje/__/gsol ba 'debs so=__kha skong ni/__dus gsum rgyal ba'i sras mchog bzang po dpal/__/rtse gcig sgrub la brtson mdzad bud+d+ha shrI/__/byang phyogs thub pa'i rgyal tshab e wa~M pa/__/gsol ba 'debs so=__phyag na pad+mo'i rnam 'phrul mus chen rje/__/rgya chen shes bya kun gzigs gung ru ba/__/ngag gi dbang phyug gnyug la paN chen zhabs/__/gsol ba 'debs so=__spyan snga sems dpa' chen po chos grags mtshan/__/chos kyi spyan ldan she'u lo tsA ba/__/srid zhi'i phun tshogs rab rgyas bco brgyad par/__/gsol ba 'debs so=__zab rgyas gdams pa'i mdzod 'dzin mkhyen rab zhabs/__/mdo sngags bstan pa'i sgron me rmor chen rje/__/mkhyen brtse nus pa'i bdag nyid gnas gsar pa/__/gsol ba 'debs so=__snyigs dus 'gro ba'i skyabs mgon sa skya pa/__/rig pa'i dbang phyug kun dga' mkhas grub dbang /__/bka' drin mnyam med rtsa ba'i bla ma la/__/gsol ba 'debs so=__yang na/__/spyan snga sems dpa' chen po chos grags mtshan/__/ces pa'i mtshams/__/mdo rgyud mnga' bdag gzhon nu chos dpal bzang /__/'jam dbyangs 'khon ston dpal 'byor lhun grub la/__/gsol ba 'debs so=__mkhas grub dpal 'byor phrin las rab rgyas dang /__/phyag na pad+mo blo bzang rgya mtsho'i sde/__/lung rtogs gter chen blo bzang dar rgyas zhabs/__/gsol ba 'debs so=__gnas brtan chen po 'jam dbyangs grags pa'i dpal/__/lam bzang gsal mdzad dge legs rgya mtsho'i zhabs/__/ngag gi dbang phyug byams mgon gnyis pa la/__/gsol ba 'debs so=__rig grol mthar phyin ye shes rgyal mtshan dpal/__/'jam dpal dbyangs dngos bstan pa'i sgron me che/__/skyabs gnas kun 'dus rtsa ba'i bla ma la/__/gsol ba 'debs so bdag rgyud byin gyis rlobs/__/zhes so/__/rnyed dka' yon tan ldan pa'i dal 'byor 'di/__/don med tshe 'di'i bya bas mi g.yeng par/__/drag la rgyun mi 'chad pa'i brtson 'grus kyis/__/nyin mtshan chos kyis 'da' bar byin gyis rlobs/__/chu bur lta bur mi rtag lus srog 'di/__/nam 'jig nges pa med par rtogs gyur nas/__/tshe 'di'i phun tshogs sgrub pa'i bsam sbyor rnams/__/skad cig tsam yang med par byin gyis rlobs/__/srid pa'i bde la nam yang ma zhen cing /__/rang nyid zhi ba don du mi gnyer par/__/'gro kun don du sangs rgyas sgrub pa yi/__/bsam sbyor rgyun mi 'chad par byin gyis rlobs/__/thog med dus nas gnyen gyur 'gro ba rnams/__/sdug bsngal rgya mtshor bying ba mthong gyur nas/__/bu sdug chu yis khyer ba'i ma bzhin du/__/bcos min snying rje skye bar byin gyis rlobs/__/rang bde 'dod las nyes pa kun 'byung zhing /__/gzhan phan sems las yon tan kun 'byung phyir/__/gzhan skyon bdag la len cing bdag nyid kyi/__/bde dge gzhan la gtong bar byin gyis rlobs/__/rang nyid gces par 'dzin pa'i dgra bo 'dis/__/thog med dus nas rang gzhan sdug bsngal byas/__/phyin chad byang chub sems gnyis stobs rgyas nas/__/bdag 'dzin rtsad nas thon par byin gyis rlobs/__/'gro 'dis thog med dus nas phan btags shing /__/byang chub sgrub pa'ang 'di la rag las pas/__/rgyal ba bzhin du phan bde'i rgyur mthong nas/__/gus pas spyi bor len par byin gyis rlobs/__/las ngan dbang gis snod bcud 'gal rkyen gyis/__/gang ba'i dus 'dir 'gal rkyen kun spangs nas/__/logs nas dam chos sgrub dbang mi gda' bas/__/rkyen ngan lam du slong bar byin gyis rlobs/__/bde sdug phan gnod 'byor rgud ci byung yang /__/rmi lam yul gyi 'byor rgud ji bzhin du/__/snang yang bden pa med par shes byas nas/__/zhen med rang sar grol bar byin gyis rlobs/__/zhes rgyal sras rin po che thogs med bzang po dpal gyi gsung zhal skong dang bcas pa'i sgo nas gsol ba gdab/__de la spyir don chen po gsum gyi sgo nas gsol ba gdab tshul gong ltar la/__bye brag dal 'byor rnyed dka' kho na bsgom pa'i dbang du byas na maN+Dal gyi gsol 'debs dang /__skabs 'dir yang /__bdag gi rgyud la dal 'byor rnyed dka'i rtogs pa dang 'gal ba'i phyin ci log gi blo sna mtha' dag myur du 'gags par byin gyis brlab tu gsol/__dal 'byor rnyed dka'i rtogs pa khyad par can rgyud la skye bar byin gyis brlab tu gsol/__phyi nang gi bar du gcod pa thams cad nye bar zhi bar byin gyis brlab tu gsol/__zhes ngag tu brjod pa'am yid kyis bsams te dmigs phug pa'i gsol 'debs blo sna 'gyur nges pa bya/__mthar tshogs zhing rnams kyi sku las bdud rtsi sna lnga 'od zer gyi rgyun dang bcas pa byung /__rang gzhan sems can thams cad kyi lus sems la zhugs pas tshe 'khor ba thog ma med pa nas bsags pa'i sdig sgrib spyi dang /__khyad par dngos gzhi'i lam gyi rtogs pa khyad par can skye ba la gegs byed kyi sdig sgrib thams cad sbyangs/__lus dwangs gsal 'od kyi rang bzhin can du byung /__tshe dang bsod nams lung rtogs kyi yon tan thams cad 'phel zhing rgyas/__khyad par du'ang dngos gzhi'i lam gyi rtogs pa rtsol ba med par ngam ngam shugs kyis skye ba'i rten 'brel bsgrigs shing byin gyis brlab par bsam mo/__/gnyis pa dngos gzhi la bdun/__sngon 'gro rten gyi chos bstan pa/__dngos gzhi byang chub kyi sems gnyis sbyang ba/__rkyen ngan byang chub kyi lam du bsgyur ba/__tshe gcig gi nyams len dril nas bstan pa/__blo 'byongs pa'i tshad/__blo sbyong gi dam tshig__/blo sbyong gi bslab bya'o/__/de las sa bcad dang po gnyis ni dmigs thun du bcad nas myong ba mthar ma skyol gyi bar du bskyang bar bya ba yin la/__lhag ma rnams de dag gi gegs sel dang /__bogs 'don dang /__bslab bya'i tshul du sbyar bas don grub kyang /__las dang po pas dmigs thun ci rigs par bskyangs nas goms 'dris brtan pos nam dgos pa'i dus lag tu lon nges pa zhig ci nas gal che ba yin/__gang ltar yang dang po sngon 'gro rten gyi chos bstan pa la gsum/__dal 'byor rnyed dka' bsam pa/__'chi ba mi rtag pa bsam pa/__las rgyu 'bras dang 'khor ba'i nyes dmigs bsam pa'o/__/de'i dang po nyams su len pa la mtshon na shes pa rnal du phab nas/__dal 'byor rang gi ngo bo ngos bzung ste/__de nyid rgyu dang /__ngo bo dang /__grangs dang /__dpe'i sgo nas rnyed par dka' pa'i tshul dang /__rnyed na phan yon che ba'i tshul rnams/__rgyal sras rin po che'i gsung sgros 'gro mgon dpal ldan ye shes kyis bsgrigs pa'i blo sbyong snyan brgyud chen mo nas ji ltar 'byung ba bzhin sgo du ma nas legs par bsams te/__rten khyad par can 'di lta bu rnyed pa'i skabs su tshe rabs gtan gyi 'dun ma dam pa'i chos rnam par dag pa dang /__de las kyang da res skyes bu chen po'i lam gyi snying po byang chub sems gnyis la blo sbyong ba'i gdams pa zab mo 'di nyams su blangs la nyams su myong nges pa zhig ci nas kyang bya'o snyam du sha la babs/__rus la thug pa'i tshul du bsgom zhing sems gzung /__de ltar 'gyur bar bla ma dang dkon mchog rin po che mkhyen snyam pa'i gsol 'debs dang /__skabs su bdud rtsi 'bebs sbyong gi dmigs pa'ang bya/__des mtshon te sngon 'gro dang dngos gzhi'i dmigs pa 'og ma rnams la'ang dpyad 'jog spel ma'i tshul gyis nyams su blang tshul 'di nyid kyis rigs 'gre ste shes par bya'o/__/gsum pa ni/__thun de las ldang bar brtsams pa na/__spro zhing nus na slar yang yan lag bdun pa maN+Dal dang bcas pa phul zhing gsol ba shugs drag tu gdab/__gang ltar yang tshogs zhing rnams rten yod na rten dang dbyer med du bzhugs par bsam/__yang na rang bzhin gyi gnas su gshegs pa'am mi dmigs par bsams pas kyang rung /__thun gcig tu nyams len byas pa las byung ba'i dge ba'i rtsa bas mtshon dus gsum du bsags dang bsag par 'gyur ba'i dge tshogs thams cad rang gzhan sems can thams cad rnam pa thams cad mkhyen pa rdzogs pa'i sangs rgyas kyi go 'phang thob pa'i rgyu kho nar bsngo zhing /__de ltar bsngos pa la brten nas/__dal 'byor rnyed par dka' bas mtshon dngos gzhi'i nyams len gyis sna drangs te sems can thams cad kyi rgyud la byang chub gyi sems rin po che rnam pa gnyis bcos ma ma yin par skyes pa'i mthus rang gzhan thams cad gnas skabs dang mthar thug gi phan pa dang bde ba'i don thams cad yid bzhin du 'grub par shog cig snyam du bzang po spyod pa la sogs pa'i smon lam rgyas pa'am/__de tsam mi nus na/__'jam dpal dpa' bos ji ltar mkhyen pa dang /__/kun tu bzang po de yang de bzhin te/__/de dag kun gyi rjes su bdag slob cing /__/dge ba 'di dag thams cad rab tu bsngo/__/dus gsum gshegs pa'i rgyal ba thams cad kyis/__/bsngo ba gang la mchog tu bsngags pa des/__/bdag gi dge ba'i rtsa ba 'di kun kyang /__/bzang po spyod phyir rab tu bsngo bar bgyi/__/zhes bsngo ba dang /__dge ba 'di yis skye bo kun/__/bsod nams ye shes tshogs rdzogs shing /__/bsod nams ye shes las byung ba'i/__/dam pa sku gnyis thob par shog__/byang chub sems ni rin po che/__/ma skyes pa rnams skye gyur cig_/_skyes pa nyams pa med pa dang /__/gong nas gong du 'phel bar shog__/byang chub sems dang mi 'bral zhing /__/byang chub spyod la gzhol ba dang /__/sangs rgyas rnams kyis yongs bzung zhing /__/bdud kyi las rnams spong bar shog__/byang chub sems dpa' rnams kyis ni/__/'gro don thugs la dgongs 'grub shog__/mgon po yis ni gang dgongs pa/__/sems can rnams la de 'byor shog__/sems can thams cad bde dang ldan gyur cig__/ngan 'gro thams cad rtag tu stongs par shog__/byang chub sems dpa' gang dag sar bzhugs pa/__/de dag kun gyi smon lam 'grub par shog__/ces smon lam khyad par ba gdab cing /__spro na lam gyi rim pa dang mthun pa'i smon lam 'di ltar yang bya ste/__phyogs bcu dus gsum rtsa brgyud bla ma dang /__/skyabs gnas bslu med dkon mchog rgya mtsho'i tshogs/__/ye shes thugs rje'i spyan gyis legs gzigs nas/__/bdag gi smon pa'i gnas 'di myur 'grub mdzod/__/deng 'dir rtse gcig bsgoms pa'i bsod nams dang /__/dus gsum bsags pa'i legs byas mtha' dag kun/__/sras bcas rgyal ba'i yongs bsngo ji bzhin du/__/dmigs med byang chub snying por bsngo bar bgyi/__/dge ba 'di yis bdag gzhan yid can kun/__/tshe rabs kun tu rgyal bas bsngags pa yi/__/'khor lo bzhi dang ldan pa'i lus thob nas/__/theg chen rigs kyi nus pa rdzogs par shog__/dpe grangs rgyu dang ngo bos rnyed dka' ba'i/__/dal 'byor rten la snying po len pa'i blos/__/tshul gnas thos bsam sgom pa'i bya ba la/__/g.yel ba med par rtag tu brtson par shog__/dal 'byor rnyed kyang nges par 'chi ba dang /__/nam 'chi nges med dam chos kho na las/__/phan pa med pa'i ngang tshul legs rtogs nas/__/snying nas 'chi chos myur du sgrub par shog__/shi ba'i 'og tu las kyi rjes 'brangs nas/__khams gsum rigs drug mtho dman gang skyes kyang /__/sdug bsngal rgya mtshor bying ba mthong gyur te/__/nges 'byung drag po gting nas skye bar shog__/rang nyid ji ltar 'khor bar sdug bsngal bzhin/__/ma gyur 'gro kun de las ma 'das pas/__/bla ma dkon mchog gsum la skyabs bzung ste/__/skyes bu chen po'i lam la 'jug par shog__/shin tu dben zhing nyams dga'i sman ljongs su/__/nyes pa lnga spong 'du byed brgyad bsten pas/__/sems byung rnyog pa nye bar zhi ba'i gnas/__/shin sbyangs mi g.yo'i ting 'dzin 'grub par shog__/gzung ba'i chos kun rmi lam lta bu ste/__/'dzin ba'i sems nyid ma skyes rig pa'i gshis/__/dpyod byed gnyen po nyid kyang rang grol ba'i/__/lhag mthong shes rab phar phyin rtogs par shog__/lam gyi ngo bo kun gzhi 'od gsal dbyings/__/zhi lhag zung 'jug ngang du mnyam bzhag cing /__/thun mtshams rten 'byung sgyu ma'i skyes bu yis/__/rnam dkar dge tshogs rgya chen sdud par shog__/mkha' khyab 'gro kun mar shes drin dran zhing /__/drin bzo'i slad du yid 'ong byams pa dang /__/snying rje chen po'i sbyor ba la brten nas/__/rmad byung lhag bsam rgyud la skye bar shog__/khyad par bdag lus longs spyod dge tshogs kun/__/phangs pa med par gzhan la gtong ba dang /__/gzhan gyi sdug bsngal kun 'byung rgyu dang bcas/__/snying nas rang gi khur du len par shog__/rlung dang sbyar nas dmigs pa'i rtsal sbyong zhing /__/nye 'khon bar ma'i yul las dug gsum gyi/__/gdung bas mnar ba'i yid can ji snyed kyang /__/rlabs chen dge rtsa gsum la 'god par shog__/'gro 'chag nyal 'dug spyod lam thams cad du/__/dran dang shes bzhin gnyen po legs brten nas/__/smon pa'i tshig dang rjes su mthun pa yi/__/byang chub sems mchog rtag tu sbyong bar shog__/snod bcud sdig pa'i 'bras bus gang ba'i tshe/__/sdug bsngal rtsa ba bdag 'dzin 'dul ba dang /__/byang chub bsgrub pa gang la rag las phyir/__/'gro kun bka' drin snying nas sgom par shog__/'khrul snang skye 'gag gnas gsum dang bral ba'i/__/sku bzhi dbyer med chen por ngo 'phrod nas/__/rtse gcig bsgom pa'i stong nyid srung ba yis/__/gzung 'dzin spros mtshan dbyings su zhi bar shog__/tshogs bsag sgrib sbyang gdon la mchod pa dang /__/chos skyong tshogs la gtor ma 'bul ba ste/__/sbyor ba bzhi sogs thabs mkhas dpag med kyis/__/rkyen ngan byang chub lam du sgyur bar shog__/'phen pas gzhi bzung goms pa'i stobs rdzogs shing /__/bsag sbyang la brtson smon lam mthar son pas/__/'di dang 'chi kha bar do'i gnas skabs kun/__/stobs lnga'i nyams len snying por dril bar shog__/legs gsungs chos kun dgos pa gcig 'dus pa'i/__/nyams myong rang sems dbang por thub pa dang /__/chos dang sems 'dris yid bde 'ba' zhig dang /__/mnyam rjes kun tu lam khyer brtan par shog__/bslab gsum rnam dag tho co'i spyod pa spong /__/phyogs dang ris med byang chub sems mchog 'byongs/__/bsam sbyor bag yod spyod pas dus 'da' ba'i/__/blo sbyong dam tshig srog bzhin srung bar shog__/rtag tu gzhan phan bsam pa 'ba' zhig gis/__/'byor rgud bde sdug mtho dman ci byung yang /__/rgyal ba'i sras kyi bslab par bya ba dang /__/nam yang mi 'gal grogs su 'gyur bar shog__/mdor na 'di nas byang chub snying po'i bar/__/theg mchog dge ba'i bshes dang mi 'bral zhing /__/rgyal ba dgyes pa'i lam bzang 'dir brten nas/__/rang gzhan don gnyis 'grub pa'i bkra shis stsol/__/ces pa'i tshig don yid la dran bzhin du 'dun ba rtse gcig pas brjod cing spyod lam la 'jug go/__/gnyis pa thun mtshams su ji ltar bya ba ni/__thun gyi dngos gzhi'i skabs su gang bsgom pa'i nyams len kyi rtsi dang ma bral bar dran pa dang /__shes bzhin dang /__bag yod pas kun nas bslangs te spyod lam thams cad mi dge ba dang /__lung ma bstan gyi dbang du ma song bar/__dge ba'i rtsa ba 'ba' zhig gis dus 'da' bar bya ba ste/__dal 'byor rnyed dka' bsgom pa'i skabs la mtshon na/__de nyid ston pa'i mdo dang bstan bcos rnams la yang dang yang du blta zhing tshig tu'ang brjod la nges shes bskyed/__da res rten bzang po 'di lta bu thob pa'i skabs su don med du ma song bar bsam pa dang sbyor ba gnyis ka'i sgo nas snying po len pa'i thabs la 'bad par bgyi'o snyam du yid la bsam/__ngag tu brjod/__lag len la theg par bya bas mtshon te shes par bya'o/__/myong ba cung zad skyes pas stan thog gcig tu lam cha tshang bar bsgom par 'dod na/__sbyor ba'i chos drug tshul bzhin du byas pas kun slong bcos pa'i nang du sngon 'gro'i chos rnams 'du bas na/__dngos gzhi zhi lhag zung 'jug gi nyams len la ji tsam gnas kyi bar du blo 'jog__/de la mi gnas na gnas lugs ma rtogs pa'i sems can rnams la dmigs pa med pa'i byams pa dang snying rje sgyu ma lta bu bsgom/__bde sdug gtong len gyi dmigs pa kho na la gnad du bsnun/__thun las ldang bar phyogs pa na/__rkyen ngan byang chub kyi lam du bsgyur ba man chad kyi sa bcad rnams la'ang bsher sgom gyi tshul du rgyas bsdus gang rung re byas la bsngo smon gyis mtshams sbyar te spyod lam la 'jug go/__/de'ang las dang po pas bsag sbyong kho na gal che bas na/__skyabs su 'gro ba dang /__yan lag bdun pa spyi dang khyad par ltung bshags sogs dang sbrags te phyag 'tshal ba dang maN+Dal 'bul ba rnams 'bul ther re'am rtags ma byung gi bar nan tan tu bya/__de nas sngon 'gro dang dngos gzhi'i dmigs pa rnams so so la myong ba ma skyes kyi bar du bsgom mo/__/'di ni gtso bor blo sbyong snyan brgyud chen mo dang bstun pa yin yang /__sems dpa' chen po gzhon nu rgyal mchog gis mdzad pa'i legs bshad kun 'dus la'ang sbyar bar spro na/__sbyor ba'i chos bzhis tshogs zhing gsal gdab pa'i skabs/__gnas dang mchod pa'i yo byad byin gyis brlabs rjes khrid yig gi gzhung dang ngag 'don gzhan nas 'byung ba sogs gang rung ltar blo sbyong bla ma'i rnal 'byor gsal gdab/__yan lag bdun pa dang maN+Dal 'bul zhing gsol ba gdab pa rnams 'dra/__rjes su thun bsdu ba'i tshe bla ma rang gi snying dbus su spyan drang ba'i tshul bzhung nas 'byung ba ltar nyams su blangs rjes bsngo smon sogs dkyus bzhin byas pas don 'grub la/__sngon 'gro dang /__dngos gzhi'i skabs kyi dmigs pa'i spros pa cung zad mi 'dra ba rnams kyang gzhung bzhin du shes par byas la nyams su blang ngo //__// mtha' yas 'gro la phan bde 'byung ba'i gzhi/__/rin chen byang chub sems kyi sa bon mchog__/blo sbyong bdud rtsis bran pa'i dge mtshan gyis/__rnam mkhyen 'bras bzang myur du smin par shog/___/ces pa'ang theg pa chen po'i dge ba'i bshes gnyen dam pa phan bde bzang pos bka' stsal rin po che'i phreng bas bskul ba don yod par bya ba'i phyir/__rje bla ma dam pa yongs kyi dge ba'i bshes gnyen bcu phrag rig pa'i ma hA paN+Di ta dkon mchog bstan pa rab rgyas dpal bzang po sogs yongs 'dzin dam pa chos bzhin du spyod pa rnams las tshul 'di'i bka' drin mang du thos pa'i rgyal khams kyi bya bral ba 'jam dbyangs mkhyen brtse'i dbang pos/__rje btsun bla ma rnams kyi gsung sgros dang phyag gzhes ltar nyung gsal snying por dril te sbyar ba dge legs mchog tu gyur cig/____//_!_