JKW-KABUM-06-CHA-002-016

🚧 This website is under continued development. We appreciate your patience!

Previous Text Back to Volume PageNext Text

Wylie title	zhal gdams kyi 'grel chung gsang sngags snye ma
Location	mkhyen brtse'i bka' 'bum Volume 6, sde tshan 2, Text 16, Pages 235-262 (Folios 52a4 to 65b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	འཇིགས་མེད་གླིང་པ་ ('jigs med gling pa)
Citation	'jam dbyangs mkhyen brtse'i dbang po. zhal gdams kyi 'grel chung gsang sngags snye ma. In 'jam dbyangs mkhyen brtse'i dbang po'i bka' 'bum, Vol. 6: 235-262. Khams sde dge rdzong sar dgon: Rdzong sar blo gros phun tshogs, 2020.
Genre	Commentary on Content - don 'grel  ·  Dzogchen - rdzogs pa chen po
Colophon	།ཅེས་ཀུན་མཁྱེན་ཆོས་ཀྱི་རྒྱལ་པོ་རིག་འཛིན་འཇིགས་མེད་གླིང་པའི་ཞལ་སྔ་ནས་སྩལ་བའི་ཉམས་སུ་ལེན་བྱའི་རྡོ་རྗེའི་ཐོལ་གླུའི་དོན་འགྲེལ་ཉུང་ངུ་འདི་ནི་དོན་གཉེར་ཅན་གྱི་ངོར་གཞོན་ནུ་ཨ་བྷཱ་ཡས་རང་ལོ་བཅུ་དྲུག་པར་སྦྱར་བའོ། །སརྦ་ས་མནྟ་མངྒ་ལཾ།།
	ces kun mkhyen chos kyi rgyal po rig 'dzin 'jigs med gling pa'i zhal snga nas stsal ba'i nyams su len bya'i rdo rje'i thol glu'i don 'grel nyung ngu 'di ni don gnyer can gyi ngor gzhon nu a b+hA yas rang lo bcu drug par sbyar ba'o/__/sarba sa man+ta mang+ga laM/

1 Texts in this Section (sde tshan or chos tshan)

16 235-262	ཞལ་གདམས་ཀྱི་འགྲེལ་ཆུང་གསང་སྔགས་སྙེ་མ། zhal gdams kyi 'grel chung gsang sngags snye ma Commentary on Content - don 'grel   ·   Dzogchen - rdzogs pa chen po	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཞལ་གདམས་ཀྱི་འགྲེལ་ཆུང་གསང་སྔགས་སྙེ་མ་བཞུགས་སོ། །ན་མོ་གུ་རུ་ཝེ། འཇིག༷ས་བྲལ་བདེ་ཆེན་རྟག་ཏུ་རབ་ཞི་འགྱུར་མེ༷ད་བདེ་བའི་ཕྱག་རྒྱས་འཁྱུད། །ཐར་པའི་གླིང༷་མཆོག་རྨད་བྱུང་ལ་སྦྱོར་བདེན་གཉིས་གསུང་གི་གསང་བར་རྫོགས། །བརྟན་གཡོའི་དངོས་ཀུན་རོ་གཅིག་བསྡོམས་པའི་ཟག་བྲལ་ཧེ་རུ་ཀ་ཡི་དངོས། །རྣམ་པ༷་ཀུན་གྱི་མཆོག་དང་ལྡན་པའི་ཀུན་མཁྱེན་རྗེ་དེར་སྙིང་ནས་འདུད། །དེ་ལ་འདིར་རྗེ་བཙུན་མཁྱེན་བརྩེའི་འོད་ཟེར་གྱི་ཞལ་སྔ་ནས་སྩལ་བའི་བསྐྱེད་རྫོགས་ཀྱི་གདམས་པ་ཚིག་ཉུང་ལ་ཟབ་བཅུད་འདྲིལ་བའི་གནད་བསྡུས་རྡོ་རྗེའི་ཚིག་རྐང་དོན་ཅུང་ཟད་འགྲོལ་བ་ལ་ལྔ་ལས། དང་པོ་སྤྲོས་བྲལ་རང་བྱུང་གི་ཡེ་ཤེས་ཤིན་ཏུ་རྣལ་འབྱོར་གྱི་དགོངས་པ་སྟོན་པ་ལ་ཚིག་རྐང་བཞི་སྟེ། ཨེ་མ་ཧོ། ཆོས་ཉིད་མངོན་སུམ་མཇལ་བ་སྤྲོས་བྲལ་གྱི་བླ་མ། །གཏད་མེད་དྲན་པས་ལྟ་བ་མོས་གུས་ཀྱི་མཐར་ཐུག །ཐིག་ལེ་ཕྱི་ན་མི་བཞུགས་ཤེལ་སྦུག་གི་ཟེར་གདངས། །འོད་གསལ་རྫོགས་ཆེན་བསྒོམ་ན་དེ་ལྟར་དུ་མཛོད་ཅིག །ཅེས་པ་སྟེ། ཨེ་མ་ཧོ་ཞེས་པ་ནི་ངོ་མཚར་བའི་སྒྲ་དོན་ལ་གནས་ཕྱིར། འདི་ཉིད་བླ་ན་མེད་པའི་གསར་ལམ་མཐར་ཐུག་པ་ཐམས་ཅད་གནད་གཅིག་ཏུ་འདྲིལ་བའི་གདམས་པ་ཟབ་མོ་ཡིན་པའི་ཕྱིར་རོ། །ཆོས་ཉིད་མངོན་སུམ་མཇལ་བ་ནི་སྔོན་གྱི་སྨོན་ལམ་དག་པས་མཚམས་སྦྱར་ཏེ། རྟོགས་པ་དོན་བརྒྱུད་དང་ལྡན་པའི་བླ་མ་དམ་པ་ཡང་དག་ལམ་གྱི་ས་མཁན་གཅིག་པུར་གྱུར་པ་ཞིག་མཇལ་ནས་བཟུང་། དེ་ལ་རྩེ་གཅིག་གི་དད་འདུན་དྲག་པོས་རྐྱེན་བྱས། བླ་མའི་ཐུགས་རྒྱུད་ཀྱི་རྟོགས་པ་སློབ་མ་ལ་གཉིས་སུ་མེད་པར་འདྲེས་པའི་མཐུས་སྤྲོས་བྲལ་གྱི་ཡེ་ཤེས་རྒྱ་ཆད་ཕྱོགས་ལྷུང་དང་བྲལ་བ། ཚིག་དང་དཔེ་ཡིས་མི་མཚོན་པ་ཆོས་ཉིད་དེ་བཞིན་ཉིད་ཀྱི་ངོ་བོ་གང་ཟག་རྫོགས་པ་ཆེན་པོར་མངོན་དུ་གྱུར་པ་ནས་བཟུང་དེ་ལ་བསལ་བཞག་དང་ཡིན་མིན་གྱི་སྒྲོ་བཏགས་ཐམས་ཅད་སྤངས་ནས། རང་ངོ་གཉུག་མའི་རང་མདངས་སྐྱོང་བས་བློས་བྱས་ཀྱི་མཐའ་ཐམས་ཅད་དང་བྲལ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་དགོངས་པ་སྒྲ་ཇི་བཞིན་པར་མཐོང་བ་སྟེ། འཕགས་པ་ཀླུས། གང་ཞིག་རྟེན་ཅིང་འབྲེལ་བར་འབྱུང་། །འགགས་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞིའི་ཆོས་བསྟན་པ། །ཞེས་གསུངས་པ་ལྟར། བླ་མ་ཆོས་སྐུའི་རང་ཞལ་མངོན་སུམ་མཇལ་བ་གང་ཞིག་གཞི་ལྟ་བའི་ངོ་བོ་བརྗོད་པའོ། །དེ་ལྟར་མཐོང་ནས་ཀྱང་བློ་ཡི་གཏད་སོ་དང་བཅས་པའི་འཆིང་བས་བཅིངས་པ་ནི། རྣལ་མའི་དོན་མ་ཡིན་པའི་ཚུལ། སེང་གེ་རྩལ་རྫོགས་ལས། བསམ་གཏན་བསྒོམས་པས་ཆོས་ཉིད་དོན་མི་མཐོང་། །རང་སྣང་ཏིང་འཛིན་བསམ་པའི་ཕྱོགས་དང་བྲལ། །སྤྲོས་བྲལ་ཆོས་ཉིད་ནམ་མཁའི་མཐའ་དང་མཉམ། །དམིགས་པ་དག་གི་ཡུལ་ལ་འཛིན་རྟོག་མེད། །མཐའ་བཞི་བྲལ་བའི་སངས་རྒྱས་རང་རིག་ཡིན། །ཡོད་མེད་མཐའ་ལས་འདས་པ་ཆོས་ཀྱི་སྐུ། །ཞེས་དང་། ཉེ་བའི་སྙིང་པོའི་རྒྱུད་ལས། བསམ་གཏན་བྱང་ཆུབ་དོན་ལ་གང་རེག་པ། །སྒོམ་མོ་སྙམ་པའི་ནད་ཀྱིས་ཟིན་ཏ་རེ། །སངས་རྒྱས་ཡུལ་དུ་བསྟན་པ་འཁྲུལ་པའི་ལམ། །བདེ་གཤེགས་ཡུལ་ནི་ཚིག་གིས་མཚོན་དུ་མེད། །ཅེས་སོ། །དེས་ན་ཡོངས་གྲུབ་དྲན་པའི་རྩིས་ཆེད་དུ་བཀག་པ་ཡང་མ་ཡིན། ཐ་མལ་འཁྲུལ་པའི་དབང་དུ་སོང་བ་མ་ཡིན་པར་འཇོག་ཏུ་མེད་པའི་མཉམ་གཞག་རྩིས་གདབ་མེད་པའི་རྗེས་ཐོབ། ཐིམ་ལ་མ་རྨུགས་པ་ཤིན་ཏུ་ཕྲ་བའི་ཡེ་ཤེས་སྣང་ངོ་ལ་མ་འགགས་ཀྱང་། རིག་ངོ་ལ་དེ་དང་དེར་འཛིན་གྱིས་འདུ་ཤེས་ཟད་པའི་ངང་དུ་བསྒོམ་དང་མི་བསྒོམ་གྱི་གཏད་སོ་བྲལ་བའི་ཡང་དག་གི་དྲན་པས་ལྟ་བ་ནི་བསྒོམ་མོ་ཞེས་པ་ཐ་སྙད་ཙམ་དུ་མཚོན་ཏེ། རྒྱལ་བ་བྱམས་པས། འདི་ལ་བསལ་བར་བྱ་བ་དང་། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཅེས་དང་། བརྒྱད་སྟོང་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་ནི་མི་བསྒོམ་པའི་ཚུལ་དུ་བསྒོམ་པར་བྱའོ། །ཞེས་པ་ལ་སོགས་པ་བསམ་གྱིས་མི་ཁྱབ་པ་བཀའ་སྩལ་བའི་ཕྱིར། དེ་ལྟ་བུའི་དོན་ལ་གོམས་པར་བྱེད་པ་ནི་མོས་གུས་ཐམས་ཅད་ཀྱི་མཐར་ཐུག་པའང་ཡིན་ཏེ། ནམ་མཁའ་རིན་པོ་ཆེའི་མདོ་ལས། ཅི་ལྟར་ཆུ་ལ་ཆུ་བཞག་དང་། །ཇི་ལྟར་མར་ལ་མར་བཞག་ལྟར། །རང་གི་རང་རིག་ཡེ་ཤེས་ནི། །ལེགས་མཐོང་གང་ཡིན་འདིར་ཕྱོགས་མིན། །ཞེས་གསུངས་པ་བཞིན་བསྒོམ་པའི་ངོ་བོ་མདོར་བསྟན་པའོ། །དེ་ལྟར་གཞི་ལྟ་བ་དང་ལམ་སྒོམ་པ་ལ་བརྟེན་ནས་མངོན་སུམ་ཁྲེགས་ཆོད་ཀྱི་དོན་ལ་གོམས་པ་དག་ནི་ཐོད་རྒལ་གྱི་སྐུ་དང་ཐིག་ལེའི་བཀོད་པ་ཡང་ཕྱི་རོལ་ན་གནས་པ་མ་ཡིན་ཏེ། རང་གི་སྙིང་དབུས་ནས་མིག་ཏུ་འབྲེལ་བའི་རང་བྱུང་གི་རྩ་རྒྱུ་རྐྱེན་ལ་འདས་པ། ཀ་ཏི་ཤེལ་སྦུག་ཅན་གྱི་གདངས་ལས་འཕྲོས་པའི་འཇའ་ཟེར་ཡིན་ཏེ། གསེར་ཕྲེང་ལས། རིན་ཆེན་རྒྱ་མཚོར་འབྲེལ་བའི་རྩ། །དཀར་འཇམ་ཁོག་པ་སྟོང་པ་ཉིད། །ཐིག་ལེ་ཁྲག་གིས་མ་གོས་པ། །ཡེ་ཤེས་ཆེན་པོ་དེ་ནས་རྒྱུ། །ཞེས་དང་། མན་ངག་གི་རྒྱུད་ཕྱི་མ་ལས་ཀྱང་། སྙིང་ནས་མིག་ཏུ་འབྲེལ་པ་ཡིས། །རང་བྱུང་གསང་བ་ཆེན་པོའི་རྩ། །ཀ་ཏི་ཤེལ་གྱི་སྦུ་གུ་ཅན། །ཅེས་གསུངས་པའི་ཕྱིར་ནང་དབྱིངས་བརྗོད་པ་དང་བྲལ་བའི་མདངས་ལས་རིག་པ་རྡོ་རྗེ་ལུ་གུ་རྒྱུད་ཀྱི་འཆར་སྒོ་ལ་གཟིར་བ་ཙམ་ཉིད་ཀྱང་དོན་དུ་དབྱིངས་རིག་དབྱེར་མེད་ཀྱི་དགོངས་པ་ལ་ལ་བཟླ་བ་སྟེ་སྤྱོད་པའི་ངོ་བོར་སྨྲས་པའོ། །དེ་ལྟར་ལྟ་སྒོམ་སྤྱོད་པ་གསུམ་ནི། ཟབ་མོའི་ལམ་ཀུན་གྱི་སྙིང་པོ་ཡིན་ཏེ། ཅིའི་ཕྱིར་ན་བླ་ན་མེད་པའི་མན་ངག་འདི་ཉིད་ལ་མངོན་དུ་གོམས་པ་དག་ནི། འདི་ལྟར་ངོ་བོ་རྟག་པ་མ་ཡིན་ཏེ་སྤྲོས་པ་ཐམས་ཅད་དང་བྲལ་བའི་ནང་གསལ་གཞོན་ནུ་བུམ་སྐུ་ཀུན་གཞི་ལས་ཁྱད་ཆོས་དྲུག་གིས་འཕགས་པའི་ཡེ་ཤེས། རང་བཞིན་ཆད་པ་མ་ཡིན་ཏེ་ཕྱི་གསལ་གྱི་རང་མདངས་སྐུ་དང་ཡེ་ཤེས་ཀྱི་བཀོད་པ་མ་འགགས་པར་འཆར་བ། ཐུགས་རྗེ་བསམ་གྱིས་མི་ཁྱབ་པ་སོ་སོའི་སྐྱེ་བོའི་བློ་ལས་འདས་པ་ཉིད་ཀྱི་ངང་དུ་གྲོལ་བ་ཐོབ་པ་སྟེ། རྒྱུད་ལས། རྟག་པ་མ་ཡིན་ཡེ་ཤེས་སྐུ། །ཆད་པ་མ་ཡིན་གསལ་བའི་གདངས། །གཉིས་ཀ་མ་ཡིན་ཟུང་འཇུག་སྦུབས། །ཞེས་གསུངས་པ་ལྟར། གཞི་ལམ་འབྲས་གསུམ་གྱི་ཐ་སྙད་ཐམས་ཅད་རང་རིག་བཅོས་བསྒྱུར་དང་བྲལ་བ་ཉག་གཅིག་ལ་རྫོགས་པའི་ཕྱིར་ཐེག་པ་ཆེན་པོ་ཟད་པ་ཉིད་དངོས་སུ་བསྟན་པའི་འབྲས་བུའི་མཐུས་ཤིན་ཏུ་རྣལ་འབྱོར་ལ་གོམས་པར་འདོད་པ་དག་གིས་དེ་ལྟར་དུ་མཛོད་ཅིག་ཅེས་བསྐུལ་བའོ། །གཉིས་པ་རྩ་རླུང་ཐིག་ལེའི་ལམ་ལ་བརྟེན་ནས་བདེ་སྟོང་ཟུང་འཇུག་རྣམ་ཀུན་མཆོག་ལྡན་གྱི་གོ་འཕང་མངོན་དུ་བྱ་བའི་ཕྱིར། རྗེས་སུ་རྣལ་འབྱོར་གྱི་དོན་སྟོན་པར་བྱེད་པ་ལ་ཚིག་རྐང་བཞི་སྟེ། བཀོད་པ་བྱང་ཆུབ་སེམས་མཆོག་བདེ་སྟོང་གི་ཌཱ་ཀི། །གཡོ་བའི་རླུང་གི་འགྲེམས་པ་ཐབས་ལམ་གྱི་རྩ་བ། །གནས་ཡུལ་ཕྱི་ན་མི་བཞུགས་རྩ་འཁོར་དང་དབྱེར་མེད། །བདེ་ཆེན་ཨ་ནུ་བསྒོམ་ན་དེ་ལྟར་དུ་མཛོད་ཅིག །ཅེས་པ་སྟེ། ཕ་རྒྱུད་རྣམས་སུ་རླུང་ལྔ་རྣམ་པར་དག་པས་གསལ་སྟོང་གི་ཡེ་ཤེས་བསྐྱེད་པ་དང་། མ་རྒྱུད་རྣམས་སུ་ཁམས་ལ་ཞུ་བདེ་འཕེལ་བས་བདེ་སྟོང་གི་ཡེ་ཤེས་མངོན་དུ་བྱེད་པ་དང་། གཉིས་མེད་ཀྱི་རྒྱུད་རྣམས་སུ་འོད་གསལ་ཐིག་ལེ་ཆེན་པོའི་རྣལ་འབྱོར་ལམ་དུ་ཁྱེར་བས་སྤྲོས་བྲལ་གྱི་དོན་མ་ནོར་བར་རྟོགས་པར་འདོད་པ་དག་ཀྱང་གནས་པ་རྩ། གཡོ་བ་རླུང་། བཀོད་པ་བྱང་སེམས་ཏེ་གསུམ་ལ་བསྟེན་པ་ཡིན་ཅིང་། དེའི་ཚུལ་ཐོག་མར་བཀོད་པ་བྱང་ཆུབ་ཀྱི་སེམས་ནི། རོ་མ་ལས་འབབས་པའི་ཉི་མའི་རྡུལ་བདེ་བ་ཐབས་ཀྱི་ངོ་བོ་དང་། རྐྱང་མ་ལས་འབབས་པའི་ཟླ་བའི་བདུད་རྩི་སྟོང་པ་ཤེས་རབ་ཀྱི་རང་བཞིན་ཏེ། ཇི་སྐད་དུ། རྡོ་རྗེ་ཕྲེང་བ་ལས། སྟོང་ཕྲག་ཉི་ཤུ་རྩ་བཞི་ནི། །ཟླ་བ་འབབས་པ་རྐྱང་མའི་རིགས། །སྟོང་ཕྲག་ཉི་ཤུ་རྩ་བཞི་ནི། །ཉི་མ་འབབས་པ་རོ་མའི་རིགས། །ཞེས་པ་ལྟར། དེ་ཉིད་མཉམ་སྦྱོར་དུ་འཁྲིལ་བའི་ཟུང་འཇུག་གི་བདེ་བ་ལ་བརྟེན་ནས་དགའ་བ་བཞིའི་ཡེ་ཤེས་ཐོབ་པར་བྱེད་པས་ན་ཁམས་བདེ་ཆེན་རྒྱལ་པོ་ཞེས་བྱ་སྟེ། ཧེ་བཛྲ་ལས། ཁུ་བའི་རྣམ་པ་བཅོམ་ལྡན་འདས། །དེ་ཡི་བདེ་བ་འདོད་མར་བརྗོད། །ཅེས་དང་། ཡོན་ཏན་རིན་པོ་ཆེའི་མཛོད་ལས་ཀྱང་། རྩ་མདུད་ནང་ན་དྭངས་མ་དཀར་དམར་གཉིས། །དཔའ་བོ་དང་ནི་རྣལ་འབྱོར་མའི་ཚུལ་དུ། །འཁྱིལ་ཞིང་སྦྱོར་བས་བདེ་སྟོང་མཆོད་པ་ལེན། །ཞེས་པ་ལྟར། རྩ་དང་ཁམས་ཀྱི་རྒྱུ་བ་གཉིས་ཀྱང་དབུ་མའི་མཁའ་རུ་འགྲོ་བ་ལས། ཌཱ་ཀི་ཞེས་བརྡར་བཏགས་པ་སྟེ། དེ་ལྟར་ཐིག་ལེའི་གནས་ཚུལ་ཤེས་ནས་དེ་ཉིད་འགྲོ་འོང་གི་ཁ་ལོ་བ་ནི་གཡོ་བ་རླུང་སྟེ། རགས་པ་ཉིན་ཞག་ཕྲུགས་རེ་ལ་ཉི་ཁྲི་ཆིག་སྟོང་དྲུག་བརྒྱ་དང་། ཕྲ་བ་ཀུན་རྟོག་བརྒྱད་ཁྲི་བཞི་སྟོང་གི་བཞོན་པ་ཉིད་དུ་གནས་ཤིང་། དེར་མ་ཟད་ཕྱིའི་རླུང་སྲོག་འཛིན། མེ་མཉམས། ཁྱབ་བྱེད། གྱེན་རྒྱུ། ཐུར་སེལ་ལྔར་གནས་ཤིང་། ནང་ལྟར་ས་ཆུ་མེ་རླུང་ནམ་མཁའ་སྟེ་འབྱུང་བ་ཆེན་པོ་ལྔ་ཡི་ཁ་དོག་ཏུ་སྣང་བ་དང་། གསང་བ་ཡེ་ཤེས་རྣམ་པ་ལྔའི་རྟེན་ཏེ་རགས་པའི་ཆོས་དང་འགལ་བ་ཉིད་དོ། །དེ་ཉིད་གནད་དུ་སོང་ན་ཐིག་ལེ་དྷཱུ་ཏིའི་དབྱིངས་སུ་འགྲེམས་པར་བྱེད་ཅིང་། དྭངས་མའི་རླུང་ལྔ་དབུ་མར་ཚུད་པས་ཟད་པར་གྱི་ཏིང་ངེ་འཛིན་དང་། ཡོན་ཏན་རྫུ་འཕྲུལ་སྣ་ཚོགས་པ་འགྲུབ་པར་བྱེད་ཅིང་། མཐར་ཐུག་མི་སློབ་ལམ་གྱི་གོ་འཕང་མངོན་དུ་གྱུར་ནས། གཙུག་ཏོར་གྱི་འཁོར་ལོ་ཡོངས་སུ་སྨིན་མཐུས་སངས་རྒྱས་རྣམས་ལ་འབྲས་བུའི་དབང་འོད་ཟེར་ཆེན་པོ་ནོད་དེ་ཡེ་ཤེས་ཆེན་པོའི་སྤྱོད་ཡུལ་མངོན་དུ་ཐོབ་པ་སྟེ། འདུས་པའི་རྒྱུད་ལས། དེ་ཚེ་ཡང་དག་རང་ངོ་སྤྲོད། །རླུང་རིག་རང་དྭང་དེར་སངས་རྒྱས། །ཞེས་པ་ལ་སོགས་པས་མཚོན། གསང་སྔགས་ཀྱི་ལམ་མཐའ་ཡས་པ་ལས་སྟོན་པའོ། །དེ་ཡང་ཐིག་ལེ་དང་རླུང་གི་རྟེན་ནི་གནས་པ་རྩ་ཡི་འཁོར་ལོ་སྟེ། དེ་ཡང་ལུས་རྡོ་རྗེ་ཕུང་པོའི་གྲོང་ཁྱེར་འདི་སྐྱེས་པའི་ཐོག་མར་མིག་དང་ལྟེ་བའི་རྩ་མདུད་ཆགས་པའི་རྗེས་ཐོག་དྭངས་མ་གྱུར་པའི་རྩ་དབུ་རྐྱང་རོ་གསུམ་ཀ་བ་ལྟ་བུར་གནས་པ་སྟེ། དཔལ་དང་པོའི་སངས་རྒྱས་ལས། དེ་ནི་མཐུར་དུ་རྩེ་གསུམ་སྟེ། །དེ་བཞིན་གྱེན་དུའང་རྩེ་གསུམ་མོ། །སྒྲ་གཅན་རྩེ་མོ་དབུས་ན་གནས། །ཉི་མའི་གཙོ་མོ་གཡས་པ་སྟེ། །ཟླ་བའི་རྩེ་མོ་གཡོན་པའོ། །ཆུ་དང་མེ་དང་ནམ་མཁའ་རླུང་། །གཡས་གཡོན་དབུ་མའི་བར་སྣང་གནས། །གསང་བ་ལྕི་བ་ཁུ་བ་རྒྱུ། །ལྕགས་སྒྲོག་བཅིངས་པ་ལྟ་བུའི་རྩ། །སྲིད་དང་ཐུར་སེལ་ལམ་གསུམ་ཉིད། །ཅེས་པ་ལྟར་རོ་རྐྱང་གཉིས་ནི་གཡས་གཡོན་ན་གནས་ཤིང་། མོ་ལ་དེ་ལས་གོ་ལྡོག་ལ། དབུ་མ་ནི་གཟུང་འཛིན་རྣམ་པར་སྤང་པའི་ཕྱིར་དབུས་སུ་གནས་ཏེ། བརྟག་པ་གཉིས་པར། ཀུན་འདར་མ་ནི་དབུས་གནས་སུ། །གཟུང་དང་འཛིན་པ་རྣམ་པར་སྤངས། །ཞེས་སོ། །དེའང་ཐབས་ཤེས་ཀྱི་རྩ་གཉིས་པོས་དྷཱུ་ཏིར་མདུད་པ་ཉེར་གཅིག་ཏུ་བྱས་ཏེ། ཁ་སྦྱོར་དུ་འབྲེལ་བའི་ཚུལ་ཡང་། རྡོ་རྗེ་ཕྲེང་བར། དྲུག་ཅུ་རྩ་བཞིར་བརྒྱད་འདབ་བྱ། །སྟེང་དང་འོག་དང་ཁ་བསྡམས་ནས། །སླར་ཡང་ཁ་སྦྱོར་ཚུལ་དུ་གནས། །ཞེས་པས་བསྟན་ཅིང་། དེ་བཞིན་དུ་ཕྱི་རུ་ལུས་ངག་ཡིད་གསུམ། ནང་དུ་དུག་གསུམ། གསང་བ་སྐུ་གསུམ་རྟེན་ཡི་གེ་གསུམ་དུ་གནས་ཤིང་འཁོར་ལོའི་གྲངས་ངེས་ཀྱང་། དང་པོའི་སངས་རྒྱས་དུས་ཀྱི་འཁོར་ལོ་རུ་དྲུག་ཏུ་གསུངས་ཏེ། སོ་སོའི་ཁ་སྦྱོར་གྱི་མཚམས་སུ་འཕོ་བ་བཅུ་གཉིས་དང་། རྟེན་འབྲེལ་བཅུ་གཉིས་གནས་ཤིང་ཁམས་ལུགས་ལྡོག་གི་འགྲོས་ཀྱི་རླུང་དང་རྟེན་འབྲེལ་ཆ་རེ་ལྡོག་སྟེ། ས་བཅུ་གཉིས་ཀྱི་ཡོན་ཏན་རྫོགས་པའི་མཐའ་རུ་ཐིག་ལེ་ནམ་མཁའི་ཁམས་དང་འདྲེས་པའི་ཚེ་ན་མངོན་པར་སངས་རྒྱས་པར་འགྱུར་བར་བཞེད་ཅིང་། དེ་བཞིན་སྙིང་ག་ཞི་བའི་འཁོར་ལོ་དང་། སྤྱི་གཙུག་ཁྲོ་བོའི་འཁོར་ལོ་གཉིས་ལ་སོ་སོའི་ལྷ་གྲངས་དང་མཉམ་པའི་རྩ་འདབས་ཀྱིས་འབྲེལ་བ་ནི། ཐབས་ལམ་དང་གྲོལ་ལམ་སྟེང་འོག་གི་སྒོ་གཉིས་སུ་གསུངས་ཤིང་། གཞན་ཡང་སྐུ་བཞི་དང་། སྐུ་ལྔ། ཕ་རོལ་ཏུ་ཕྱིན་པ་དྲུག་ལ་སོགས་པ་སོ་སོ་སྦྱང་གཞི་དང་སྦྱོང་བྱེད་སྦྱངས་འབྲས་ཀྱི་ཚུལ་དུ་འཁོར་ལོའི་རྩ་འདབས་སུ་གནས་པར་བཞེད་དོ། །དེ་ལྟར་རྡོ་རྗེའི་ལུས་ཀྱི་རྩ་ཐིག་རླུང་གསུམ་གྱི་གནད་ལ་འདྲེན་འགྲེམས་ཀྱི་འཁྲུལ་འཁོར་ལ་སོགས་ཀྱིས་གནད་དུ་བསྣུན་པས། ཁམས་ཀྱི་ཞུ་བདེ་འཕེལ་པའི་བྱེད་ལས་ལ་བརྟེན་ནས། ཇི་སྐད་དུ། འཁོར་ལོ་སྡོམ་པར། རྣལ་འབྱོར་མ་ཡི་ཀླ་ཀློའི་སྐད། །སུ་ལ་སོགས་པ་གང་གསུངས་ཀྱང་། །ཕྱི་དང་ནང་གི་བདག་ཉིད་དེ། །ཞེས་པ་ལྟར་བཟོད་ནས་ཡོངས་གྲུབ་ཏུ་གནས་པའི་རྟེན་ལུས་ཀྱི་དཀྱིལ་འཁོར་སྤྱི་བོ་ཛ་ལནྡྷ་ར་ལ་སོགས་པ་དང་། བརྟེན་པ་རྩ་ཡི་འཁོར་ལོ་སྐུ་ལྔའི་གནས་ཡུལ་དུ་དབང་བསྒྱུར་བས་ན་ཕྱི་རོལ་དུ་མི་བཞུགས་པར་རང་ལ་དབྱེར་མེད་དུ་རྫོགས་པའི་ཕྱིར། མཚན་འཛིན་གྱི་བདེ་བ་ལས་འདས་པའི་ཟུང་འཇུག་ཆོས་སྐུའི་རྒྱལ་ས་ཆེན་པོར་མངོན་དུ་བྱེད་པའི་ལམ་ལུང་ཨ་ནུ་ཡོ་ག་ལ་གོམས་པར་འདོད་པ་དག་གིས་དེ་ལྟར་དུ་མཛོད་ཅེས་བསྐུལ་བའོ། །གསུམ་པ་བསྙེན་སྒྲུབ་ཡན་ལག་བཞི་ཡི་ཚུལ་ལ་བརྟེན་ནས་རིག་འཛིན་རྣམ་པ་བཞི་ཡི་ཐེམ་སྐས་སུ་བགྲོད་པའི་རྣལ་འབྱོར་ཆེན་པོའི་དོན་བསྟན་པ་ལ་ཚིག་རྐང་བཞི་སྟེ། གཡོ་ཐོབ་གོམས་བརྟན་མཐར་ཕྱིན་ལྷུན་གྲུབ་ཀྱི་ཡི་དམ། །དཀྱིལ་འཁོར་གསུམ་གྱི་སྒོམ་པ་བསྐྱེད་རིམ་གྱི་སྙིང་པོ། །ཞི་ཁྲོ་ཕྱི་ན་མི་བཞུགས་ལྷན་སྐྱེས་ཀྱི་རང་གདངས། །མ་ཧཱ་ཡོ་ག་བསྒོམ་ན་དེ་ལྟར་དུ་མཛོད་ཅིག །ཅེས་པ་སྟེ། དེ་ཡང་དཔལ་སྒྱུ་འཕྲུལ་དྲྭ་བ་ལས། སྐྱེ་གནས་བཞི་པོ་སྦྱང་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། །སྤྲོས་བཅས་སྤྲོས་པ་མེད་པ་དང་། །ཤིན་ཏུ་སྤྲོས་པ་མེད་པའོ། །ཞེས་པ་ལྟར་དབང་པོ་ཡང་རབ་ཀྱིས་རང་བཞིན་གདོད་ནས་ལྷ་ཡི་ཕྱག་རྒྱར་རང་རྩལ་རྫོགས་པའི་ཡེ་ཤེས་ཀྱི་སྒྱུ་འཕྲུལ་རང་བྱུང་དུ་ཤར་བས་རྫུས་སྐྱེས་དང་རྗེས་མཐུན་དང་རབ་ཀྱིས་དབྱིངས་དང་ཡེ་ཤེས་ཟུང་དུ་འཇུག་པས་སྙིང་པོ་དྲན་ཙམ་གྱིས་ལྷའི་སྐུར་ལྡང་ནུས་པས་ན་དྲོད་གཤེར་སྐྱེས་ཀྱི་ཆ་མཐུན། རྟོག་བཅས་རྣམས་ལ་བདག་སྲས་དང་གཞན་སྲས་ཀྱི་སྒོ་ནས་སྒོམ་པར་འདོད་པས་སྒོང་སྐྱེས་དང་མངལ་སྐྱེས་ཀྱི་ཆར་དབྱེ་བ་སོགས་དང་། གཞན་ཡང་ཕ་རྒྱུད་ལྟར་ཕྱག་མཚན་ས་བོན་སྐུར་སྨིན་པ་སྟེ་རྡོ་རྗེའི་ཆོ་ག་གསུམ་དང་། མ་རྒྱུད་ལྟར་མངོན་བྱང་ལྔ་སྟེ། ཟླ་ཉི་ཕྱག་མཚན་ས་བོན་གྱིས་མཚན་པ་དང་དེ་རོ་གཅིག་ཏུ་འདྲེས་ཤིང་སྐུ་ཡོངས་སུ་རྫོགས་པ་སྟེ་སྦྱང་གཞི་སྦྱོང་བྱེད་སྦྱངས་འབྲས་ཀྱི་ཚུལ་དུ་གནས་ཤིང་། གཉིས་ཀར་ཏིང་འཛིན་རྣམ་པ་གསུམ་གྱི་གཞིར་བརྟེན་ཅིང་དག་རྫོགས་སྨིན་གསུམ་གྱིས་ཁྱབ་པའོ། །དེ་ལྟར་གཞི་བསྐྱེད་རིམ་འགྲུབ་པའི་རྒྱུ་ཤེས་ནས། ལམ་ཇི་ལྟར་བསྒོམ་པའི་ཚུལ་ནི། ཐོག་མར་ཐོད་སྐུ་ལ་སོགས་པའི་རྟེན་ལ་རྩེ་གཅིག་པས་བལྟས་པས། དང་པོ་འདུ་བྱེད་ལོང་ལོང་དུ་གཡོས་པ་ནི་གཡོ་བའི་ཉམས་སོ། །སླར་དེ་ལས་གོམས་པ་ཇེ་ཞིག་ན་རྣམ་འགྱུར་ཇི་ལྟ་བའི་བག་ཆགས་བརྟས་པས་ཡིད་ཡུལ་དུ་བཀྲ་ལམ་མེ་གསལ་བ་ཐོབ་པའི་ཉམས་ཞེས་བྱའོ། །དེའི་ཚེ་ན་སྐུ་དེ་ཉིད་ཐོགས་བཅས་ཀྱི་རྣམ་པ་དང་བྲལ་བ་འཇའ་ཚོན་ནམ་མེ་ལོང་ནང་གི་གཟུགས་བརྙན་བཞིན་ཕྱི་གསལ་ནང་གསལ་དུ་རྩལ་སྦྱངས་པས། ལྷ་དེ་ཉིད་ཉལ་བའམ། ལངས་པའམ། ཤིན་ཏུ་རགས་པའམ། ཤིན་ཏུ་ཕྲ་བ་ལ་སོགས་པ་གང་ལྟར་བསྒོམ་ཡང་བཏུབ་པ་ནི་གོམས་པའི་ཉམས་སུ་བརྗོད་ལ། དེ་ནས་བསྒོམ་བྱ་དང་སྒོམ་བྱེད་ཀྱི་གཉིས་འཛིན་སྤངས་པའི་ཕྱིར། ལྷའི་རྣམ་པ་རང་སེམས་དབྱེར་མེད་དུ་འདྲེས་ཏེ་བསྒོམས་པས་རྟོག་པ་གང་གིས་ཀྱང་བར་མ་ཆོད་པར་ཇི་སྲིད་བརྟན་པར་འདོད་པའི་བར་དེ་སྲིད་དུ་སྡོད་པ་ནི་བརྟན་པའི་ཉམས་ཏེ། དེ་ལས་ཀྱང་གསལ་བརྟན་གྱི་ཚད་བརྒྱད་ཐོབ་ནས་ཉིན་མཚན་ཀུན་ཏུ་ཡུལ་རྐྱེན་གང་གིས་ཀྱང་མི་འཕྲོག་པར་དཀྱིལ་འཁོར་གང་གི་དབང་ཕྱུག་ཆེན་པོར་རྩལ་རྫོགས་པ་ནི་མཐར་ཕྱིན་པ་སྟེ་སྣང་བ་ལྷ་ཡི་དཀྱིལ་འཁོར་དང་འདྲེས་པ་ཡིན་ཏེ། པཎྜི་ཏ་དྲི་མེད་བཤེས་གཉེན་གྱི་ཕྱག་རྒྱ་བསམ་གཏན་གྱི་འགྲེལ་པ་ལས། གཡོ་ཐོབ་གོམས་བརྟན་མཐར་ཕྱིན་ལྔ། །ཏིང་འཛིན་ཉམས་ཀྱི་སྐྱེ་ཚུལ་ཡིན། །ཅེས་གསུངས་པ་བཞིན་ནོ། །དེ་དག་ཀྱང་རང་སེམས་ཀྱི་ངོ་བོར་ལྷུན་གྱིས་གྲུབ་པར་རྫོགས་པ་ནི་བྲལ་ཐོབ་སྤངས་པའི་གཉུག་མ་དོན་གྱི་ཡི་དམ་ཡིན་ཏེ། ཇི་སྐད་དུ། ལྷ་ཉིད་རང་ལ་རང་ཉིད་ལྷ། །རང་དང་ལྷན་ཅིག་སྐྱེས་པ་སྟེ། །དམ་ཚིག་ཡེ་ཤེས་གཉིས་མེད་པས། །སྤྱན་འདྲེན་བཞུགས་གསོལ་འདིར་མི་དགོས། །རང་ལས་སྤྲུལ་ཞིང་རང་དབང་བསྐུར། །རང་རིག་རྩ་བ་གསུམ་དུ་གནས། །ཞེས་སོ། །དེ་ལྟར་རིམ་པའི་སོ་མཚམས་ལེགས་པར་ཕྱེད་ནས། ཁྱད་པར་གནད་དུ་དྲིལ་བའི་ཉམས་ལེན་ཉིད་དཀྱིལ་འཁོར་རྣམ་པ་གསུམ་གྱིས་བསྟན་ཏེ། དེའང་སྐུ་ཕྱག་རྒྱའི་རྣལ་འབྱོར་དུ་གསལ་བཏབ་པའི་ཚུལ་ནི་ཡི་དམ་གང་རུང་གི་སྐུར་ལམ་གྱིས་གསལ་ནས། ཞི་བ་ལ་ཚུལ་དགུ་དང་། ཁྲོ་བོ་ལ་གར་དགུས་དཔའ་ཞིང་སོ་སོར་དག་བྱ་དང་དག་བྱེད་དག་འབྲས་ཚུལ་བཞིན་ཉམས་སུ་བླང་བ་ནི་བསྐྱེད་རིམ་སྣང་སྟོང་ཟུང་འཇུག་གི་དཀྱིལ་འཁོར་ཏེ། སྒྲུབ་ཐབས་ཀུན་ཏུ་བཟང་པོ་ལས། ཐ་མལ་རྣམ་རྟོག་རྒྱུན་འདི་མ་གཏོགས་པ། །སྲིད་པའི་སྡུག་བསྔལ་ཅི་ཡང་ཡོད་མ་ཡིན། །དེས་ན་དེ་དག་གཞོམ་པར་བྱ་བའི་ཕྱིར། །ཐབས་ཀྱི་དཀྱིལ་འཁོར་འཁོར་ལོ་བསྒོམ་པའོ། །ཞེས་གསུངས་པ་ལྟར་དང་། དེ་ལས་སྣང་བའི་ཡུལ་ཀུན་ཞི་ཁྲོའི་རོལ་གར་དུ་བལྟ་བ་ནི་སྣང་བ་སྐུ་ཡི་ལམ་ཁྱེར་རོ། །ངག་སྲོག་རྩོལ་འབྲུ་གསུམ་བཟླ་བའམ། ཡང་ན་ཡི་དམ་གྱི་སྙིང་པོ་སྐྱོན་བཅུ་སྤངས་ལ་བཟླ་བའི་ཚུལ་གསུམ་དང་ལྡན་པས་ཡང་ཡང་དུ་བསྒྱུར་བ་ནི་ཡེ་ཤེས་ལྷ་དང་ཉེ་བར་འགྱུར་བའི་ཕྱིར་ཏེ། རྡོ་རྗེ་གུར་ལས། སངས་རྒྱས་བྱང་ཆུབ་སེམས་དཔའ་དང་། །མཁའ་འགྲོ་མ་དང་རང་བཙུན་མོ། །མངོན་སུམ་དུ་ནི་བྱ་བའི་ཕྱིར། །སྔགས་ཀྱི་སྙན་གསན་དབབ་པ་ཡིན། །ཅེས་པ་ལྟར། གྲགས་སྟོང་ཟུང་འཇུག་ངག་སྔགས་ཀྱི་དཀྱིལ་འཁོར་རོ། །དེ་ལས་ཀྱང་བཟང་ངན་གྱི་སྒྲ་ཀུན་སྔགས་ཀྱི་རོལ་པར་ལྟ་བ་གྲགས་པ་གསུང་གི་ལམ་ཁྱེར་ཞེས་བྱའོ། །བསྐྱེད་རྫོགས་ཀྱི་ཏིང་ངེ་འཛིན་དེ་དག་ཀྱང་ངོ་བོ་ལ་སྐྱེ་འགག་གནས་གསུམ་བྲལ་ཞིང་འདི་ལྟ་བུའོ་སྙམ་པའི་དྲན་འཛིན་ཀྱང་རང་ངོར་ཡུལ་མེད་རྩ་བྲལ་དུ་སོང་བའི་ཕྱིར་གནས་པས་ཕན་མ་བཏགས། འགྱུ་བས་གནོད་མ་བསྐྱལ། ལུང་མ་བསྟན་གྱི་འཁྲུལ་པར་མ་འཁྱམས། རྟག་ཆད་ཀྱི་རྒྱ་རལ། བསྒོམ་དང་མི་བསྒོམ་ཀྱི་གཏད་སོ་མེད་པའི་ངང་དུ་མཉམ་པར་གྲོལ་བ་ནི་སངས་རྒྱས་ཐམས་ཅད་ཀྱི་ཐུགས་ཀྱི་རང་བཞིན་ཡིན་པའི་ཕྱིར། དོན་འདི་མ་རྟོགས་ན་བསྐྱེད་རྫོགས་ལམ་ཟབ་ཅི་དང་ཅི་ལྟ་བུས་ཀྱང་ཤེས་བྱའི་སྒྲིབ་པ་ལས་གྲོལ་བ་མིན་ཏེ། འཁོར་གསུམ་རྣམ་པར་རྟོག་པའི་ཕྱིར་རོ། །དེ་སྐད་དུ། འཕགས་པ་སྡུད་པ་ལས། གང་ཞིག་དཔག་ཚད་ལྔ་བརྒྱ་ཡོད་པའི་རི་ཡི་སུལ། །སྦྲུལ་གྱིས་གང་བར་བྱས་ནས་ལོ་མང་གནས་བྱས་ཀྱང་། །དབེན་པ་འདི་མི་ཤེས་པའི་བྱང་ཆུབ་སེམས་དཔའ་ནི། །ལྷག་པའི་ང་རྒྱལ་རྙེད་ནས་འགྲོ་བར་གནས་པ་བཞིན། །ཅེས་སོ། །དེས་ན་ཆོས་ཉིད་ཇི་བཞིན་གཉུག་མའི་གནས་ལུགས་རྟོགས་པ་ནི་རིག་སྟོང་སྤྲོས་བྲལ་ཐུགས་འོད་གསལ་གྱི་དཀྱིལ་འཁོར་རོ། །དེ་ལས་ཀྱང་ཚོགས་དྲུག་གི་ཡུལ་ཀུན་ལྟ་སྟངས་ཀྱིས་ཕྱིར་མ་འཆིང་། དྲན་འཛིན་གྱིས་ནང་དུ་མི་སྡུད། ཤར་བ་དང་གྲོལ་བ་དུས་མཉམ་གྱི་ངང་དུ་ལྷུག་པར་བཞག་པ་ནི་དྲན་རྟོག་ཐུགས་ཀྱི་ལམ་ཁྱེར་ཏེ། རིག་འཛིན་དགའ་རབ་རྡོ་རྗེས། ཤར་བའི་དུས་ན་མཉམ་ཤར་བཟང་ངན་མེད། །གྲོལ་བའི་དུས་ན་མཉམ་གྲོལ་བཟང་ངན་མེད། །གནས་པའི་དུས་ན་མཉམ་གནས་བཟང་ངན་མེད། །ཅེས་པ་ལྟར་རོ། །དེ་གོམས་པར་བྱེད་པ་ནི་བསྐྱེད་རིམ་ཐམས་ཅད་ཀྱི་སྙིང་པོ་ཡིན་ཏེ། སྣང་ཞེན་གྱི་ཡུལ་ཀུན་རྡོ་རྗེ་གསུམ་མམ་མངོན་བྱང་ལྔས་བསྐྱེད་པའི་ལྷ་སྐུའི་ཕྱག་རྒྱ་ཉག་གཅིག་ཏུ་རྫོགས། སྒྲ་གྲགས་པ་ཐམས་ཅད་ཡི་གེའི་འཁོར་ལོར་སྨིན་ནས་དབུ་མའི་དབྱིངས་སུ་ཐིམ་སྟེ་བདེ་ཆེན་བརྗོད་མེད་ནཱ་དའི་རང་བཞིན་དུ་དག །དྲན་རྟོག་ཡིད་ཀྱི་འགྱུ་འཕྲོ་ཐམས་ཅད་ཟབ་ཞི་སྤྲོས་བྲལ་གཉུག་མའི་སྦུབས་སུ་ཉེ་བར་ཞི་བས་ན་ཐུགས་ཀྱི་རྡོ་རྗེར་སྨིན་པའོ། །དེ་ལྟ་བུའི་དོན་ལ་སྒྲ་ཇི་བཞིན་པར་གོམས་པ་དག་གིས་ནི་ཞི་བ་དང་ཁྲོ་བོ་ལ་སོགས་པ་མཐའ་ཡས་མཐའ་དག་ཀྱང་རང་ལས་ཕྱི་རོལ་ན་ལོགས་སུ་གྲུབ་པ་མེད་དེ། ཕུང་ཁམས་གཤེགས་པ་གཤེགས་མ། ཚོགས་དབང་སེམས་དཔའ་སེམས་མ། ཡན་ལག་ཁྲོ་བོ་ཁྲོ་མོ་སྟེ་གདན་གསུམ་ལྷ་ཡི་སྐུ་རུ་གནས་པ་ཉིད་ཀྱི་ཕྱིར་བརྗོད་མེད་དོན་གྱི་བཤགས་པ་ལས་ཀྱང་། སྣང་སྲིད་རྣམ་དག་ལྷ་དང་ལྷ་མོའི་དབྱིངས། །བྱུང་དང་འབྱུང་འགྱུར་ཡབ་ཡུམ་ལྷུན་རྫོགས་པ། །ཞེས་པ་ལྟར། རང་དང་ལྷན་ཅིག་སྐྱེས་ཤིང་རང་ལས་ཤར་བ་ཡིན་ཏེ། གང་དཀྱིལ་འཁོར་གསུམ་དང་ལྡན་པའི་རྣལ་འབྱོར་ཆེན་པོ་ལ་ཞུགས་ནས་གོམས་པར་འདོད་པ་དག་གིས་དེ་ལྟར་དུ་མཛོད་ཅིག་ཅེས་བསྐུལ་བའོ། །དེ་ལྟར་བསྐྱེད་པ་དང་རྫོགས་པའི་རིམ་པ་ནི་རང་ལ་གནས་པའི་ཡེ་ཤེས་ཆེན་པོ་མངོན་དུ་བྱེད་པའི་ཐབས་ཚུལ་ཏེ། དེའི་ཁྱད་པར་གང་ཞེ་ན། ལྷ་སྐུ་སྣང་སྟོང་ཟུང་འཇུག་གི་བསྐྱེད་རིམ་ཆོ་གའི་ཁྱད་པར་གཞུང་ལས་གསུངས་པའི་བསྐྱེད་ཆོག་ཚང་བ། རང་འབྲས་ཀྱི་ཁྱད་པར་སྔགས་ཀྱི་མཐུ་བསྐྱེད་ནུས་པ། ངོ་བོའི་ཁྱད་པར་ཞུ་བདེ་དང་སྟོང་པ་ཉིད་ཀྱི་རང་བཞིན། བྱེད་ལས་ཀྱི་ཁྱད་པར་དག་རྫོགས་སྨིན་གསུམ་ཚང་བའོ། །དེ་ལས་ཁྱད་པར་དུ་གྱུར་པ་རྫོགས་རིམ་གྱི་མཚན་ཉིད་ནི། རྒྱུ་ཡི་ཁྱད་པར་རྡོ་རྗེ་ལུས་ཀྱི་རྩ་ཐིག་རླུང་གསུམ་ལ་གནད་དུ་བསྣུན་པ། བྱེད་ལས་ཀྱི་ཁྱད་པར་རྩ་རླུང་ཐིག་ལེ་འཁྲུལ་པའི་བག་ཆགས་ཐམས་ཅད་དབུ་མར་དག་བྱེད། རྣམ་པའི་ཁྱད་པར་འདུ་འབྲལ་མེད་པའི་བདེ་བ་དང་སྟོང་གཟུགས་ཀྱི་ཕྱག་རྒྱ་གཉིས་མི་ཕྱེད་པའི་རྫོགས་རིམ་གྱི་ཁྱད་པར་གསུམ་ལྡན་འདི་ཁ་ཅིག་གིས་མི་བཞེད་པའང་ཡོད་ལ། དེ་ལྟར་གཉིས་ཆར་དགོས་པའི་ཚུལ་ནི། བསྐྱེད་རིམ་གྱིས་འཇིག་རྟེན་གྱི་དངོས་གྲུབ་ཐོབ་ཅིང་སྣོད་བཅུད་ཐ་མལ་དུ་འཛིན་པ་སྤངས་ཏེ། གཟུགས་སྐུའི་རྟེན་འབྲེལ་བསྒྲིགས་པ་ཡིན་ཅིང་། རྫོགས་རིམ་གྱིས་མཆོག་གི་དངོས་གྲུབ་ཐོབ་ཅིང་འཕོ་བའི་བག་ཆགས་ཀྱི་དྲི་མ་སྤངས་ཤིང་མཐར་ཐུག་ལྷན་སྐྱེས་ཀྱི་སྐུའི་རྟེན་འབྲེལ་བསྒྲིགས་པ་ཡིན་ལ། དེ་སྐད་དུ། གསང་སྙིང་གི་རྒྱུད་ཕྱི་མར། འཇིག་རྟེན་པ་ཡི་དངོས་གྲུབ་ནི། །བསྐྱེད་པའི་རིམ་པ་སྦྱོར་བས་ཐོབ། །འཇིག་རྟེན་འདས་པའི་དངོས་གྲུབ་ནི། །རྫོགས་པའི་རིམ་བའི་སྦྱོར་བས་སོ། །ཞེས་སོ། །གྲངས་ངེས་ཀྱི་སྒོ་ནས་སྐྱེ་བ་ཀུན་རྫོབ་དང་འཆི་བ་དོན་དམ་གྱི་བདེན་པ་ལམ་དུ་བྱས་ནས་སྦྱོང་བ་ནི་བསྐྱེད་རིམ་དང་རྫོགས་རིམ་དུ་བསྟན་ཏེ། ཡེ་ཤེས་རྡོ་རྗེའི་ཀུན་ལས་བཏུས་པར། སྐྱེ་བ་ཀུན་རྫོབ་བདེན་པ་ཞེས་བྱ་སྟེ། །འཆི་བ་ཡང་ནི་དོན་དམ་བདེན་པ་ཡིན། །བདེན་གཉིས་འདི་ལ་རྣམ་པར་ངེས་བྱས་ནས། །བཤད་པ་གཉིས་ཀྱི་དབྱེ་བ་གསུངས་པ་ཡིན། །ཞེས་སོ། །དེའི་ཕྱིར་ན། སྔོན་དུ་རྒྱུད་སྦྱངས་པ་ལ་བསྐྱེད་རིམ་དང་། །གནས་ལུགས་དངོས་བསྒོམ་པ་ལ་རྫོགས་རིམ་སྟེ། །རིམ་པར་འཇུག་པའི་ཚུལ་ཡང་། རིམ་ལྔ་ལས། བསྐྱེད་པའི་རིམ་ལ་ལེགས་གནས་ཤིང་། །རྫོགས་པའི་རིམ་པར་འདོད་པ་རྣམས། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །ཞེས་དང་། ཌོམྦྷི་ཧེ་རུ་ཀས་ཀྱང་། བློ་བཟང་དང་པོ་བསྐྱེད་པའི་རིམ་པ་སྒོམ་པར་བྱེད་དང་ལག་པའི་རྒྱ། །སྔགས་ནི་རྣམ་དག་གུག་བསྐྱེད་ཆོ་ག་ངེས་པར་དྲན་པ་འབྲལ་མི་བྱ། །ཕྱི་ནས་བློ་བཟང་རང་ཤི་སྐད་ཅིག་རྒྱུན་དུ་དེ་ཉིད་གཅིག་པའི་སེམས་དང་ལྡན། །རྫོགས་པའི་རིམ་པ་བསྒོམས་པས་སྲིད་པ་ནམ་ཡང་ལྷན་ཅིག་སྐྱེས་པ་རྟག་ཏུ་བསམ། །ཞེས་གསུངས་པའི་ཕྱིར་རོ། །དེ་ལྟར་བསྐྱེད་རིམ་དང་རྫོགས་རིམ་ལ་བརྟེན་ནས་ཟུང་འཇུག་རྫོགས་པ་ཆེན་པོའི་དོན་མངོན་དུ་མ་མཐོང་ན་སྤྲོས་པ་བྲལ་བའི་ཡེ་ཤེས་ཆེན་པོ་མ་མཐོང་བའི་ཕྱིར། ཐེག་པ་རིམ་པ་བརྒྱད་དང་དེ་ལ་བརྟེན་པའི་སྡོམ་པ་གསུམ་དང་། ཕ་རོལ་ཏུ་ཕྱིན་པ་དྲུག་སོགས་དམིགས་བཅས་དམིགས་མེད་ཐབས་ཚུལ་ཐམས་ཅད་བློ་ཡི་བྱི་དོར་ལས་མ་འདས་པས་ན་ཀུན་ཀྱང་ལམ་འདིའི་བཞོན་པ་ཉིད་དུ་གནས་ཏེ། འཇམ་དཔལ་མཚན་བརྗོད་ལས། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གིས་འབྲས་བུར་གནས། །ཞེས་དང་། ཨིནྡྲ་བྷཱུ་ཏིའི་དབང་གི་འཁོར་ལོའི་མན་ངག་ལས། རང་བཞིན་གྱིས་ནི་འོད་གསལ་བ། །རྫོགས་པ་ཆེན་པོའི་མཐར་ཐུག་པ། །མན་ངག་ཀུན་གྱི་མཆོག་གི་མཆོག །དེ་སྒྲུབ་ཐབས་སུ་གསུངས་པར་ཟད། །ཅེས་སོ། །མདོར་ན་ཉོན་མོངས་པའི་སྒྲིབ་པའི་ཚོགས་ནི་བློ་དང་བཅས་པས་སྦྱངས་ལ། འཁོར་གསུམ་རྣམ་པར་རྟོག་པའི་ཤེས་བྱའི་སྒྲིབ་པ་བློ་དང་བྲལ་བས་སྦྱངས་ཏེ། སྒྲིབ་གཉིས་ཡོངས་སུ་སྤངས་པས་རྫོགས་པའི་སངས་རྒྱས་ཀྱི་གོ་འཕང་མངོན་དུ་བྱེད་པའི་ཕྱིར་ན། འདིར་ཡང་དེ་ལྟར་དུ་བསྟན་པར་རིག་པར་བྱའོ། །བཞི་པ་གསང་སྔགས་ཀྱི་རྩ་བ་ནི་དམ་ཚིག་ཡིན་ཅིང་། གལ་ཏེ་དེ་ལ་ཉམས་ཆག་བྱུང་ན་གནས་སྐབས་དང་མཐར་ཐུག་ཀུན་ཏུ་སྡུག་བསྔལ་གྱི་རྒྱུ་རུ་འགྱུར་པའི་ཚུལ། གསང་སྙིང་ལས། རྩ་བའི་དམ་ཚིག་ཉམས་གྱུར་ན། །སྒྲུབ་པ་ཐམས་ཅད་ལོག་པར་འགྱུར། །ཡིད་དུ་མི་འོང་སྣ་ཚོགས་པའི། །འབྲས་བུ་མི་འདོད་བཞིན་དུ་འདུ། །ཞེས་སོ། །དེའི་ཕྱིར་ན། དེ་ཉིད་སྦྱོང་བའི་ཐབས་ཚུལ་མང་དུ་ཡོད་པ་ལས། འདིར་ཟབ་མོ་ལྟ་བའི་ཀློང་བཤགས་དང་འབྲེལ་བར་སྟོན་པ་ལ་ཚིག་རྐང་བཞི་སྟེ། ཡེ་ནས་སྲུང་མཚམས་བྲལ་བ་དམ་ཚིག་གི་ཁྱད་ཆོས། །ཉམས་མཁན་རྩད་གདར་ཆོད་པ་ཆོས་ཉིད་ཀྱི་གཤིས་ལུགས། །ཉམས་བྱ་གདོད་ནས་དག་པ་ཀ་དག་གི་ངོ་བོ། །ལྟ་བའི་ཀློང་བཤགས་བསྒོམ་ན་དེ་ལྟར་དུ་མཛོད་ཅིག །ཅེས་པས་བསྟན་ཏེ། དེ་ཡང་དང་པོ་གཞི་དམ་ཚིག་གི་ངོ་བོ་བཤད་པ་ནི། བསྲུང་དུ་མེད་པའི་གཅིག་ཅར་བའི་དམ་ཚིག་དང་། བསྲུང་མཚམས་ཅན་རིམ་གྱིས་པའི་དམ་ཚིག་གཉིས་ལས། འདིར་སྔ་མ་ལྟར་ཏེ། ཡེ་ནས་སངས་རྒྱས་དང་སེམས་ཅན་ལས་འདས་པའི་རང་རིག་རྗེན་པ་འཁྲུལ་གྲོལ་གྱི་སྒྲོ་མ་བཏགས་པའི་དབྱིངས་ཀྱི་རང་བཞིན་ཉག་གཅིག་ལས་གཞན་དུ་འཕོ་འགྱུར་བྲལ་བ་ནི་གཅིག་པུའི་དམ་ཚིག །དེ་ཡི་ཆོས་ཉིད་བློ་ལས་འདས་པ་ནི་ཕྱལ་བའི་དམ་ཚིག །ཤེས་བྱའི་མཐའ་ལ་ཐུག་པ་མེད་ཅིང་ཕྱོགས་རིས་ལ་ཆད་པ་བྲལ་བ་ནི་བཏང་སྙོམས་ཀྱི་དམ་ཚིག་གམ། བསྲུང་བྱ་དང་སྲུང་བྱེད་གཉིས་སུ་ཤར་བའི་གཟུང་འཛིན་གྱི་དྲྭ་བས་བཅིངས་པ་མེད་པ་ནི་མེད་པའི་དམ་ཚིག་སྟེ། དེ་དག་ཀྱང་ཡེ་བསྲུང་ལྷུན་གྲུབ་ཆེན་པོའི་ངང་དུ་སྲུང་མཚམས་དང་བྲལ་བ་རྟག་པ་རྒྱུན་གྱི་འཁོར་ལོར་མི་གཡོ་བ་ནི་བླང་དོར་མེད་པའི་ངོ་བོ་ཉིད་དེ། ཀུན་མཁྱེན་རྒྱལ་པོ་ལྟ་བ་ནམ་མཁའ་དང་མཉམ་པའི་རྒྱུད་ལས། ཀྱེ། ཀུན་བྱེད་ང་ཡི་དགོངས་པའི་དམ་ཚིག་ནི། །མ་ཡེངས་དྲན་པ་དངོས་པོ་ཡེ་ཤེས་སུ། །མ་བཅོས་སུས་ཀྱང་མ་བྱས་རང་བྱུང་སྟེ། །རིག་པས་དབང་བསྒྱུར་བསྲུང་དང་བསྲུང་དུ་མེད། །ཅེས་དང་། སྤྱི་མདོ་ལས། བསྲུང་བྱ་བསྲུང་དུ་མེད་པ་ནི། །ཆོས་ཉིད་དམ་ཚིག་དམ་པ་ཡིན། །ཅེས་དང་། འཕགས་པ་འཇམ་དཔལ་གྱིས། །དེ་ལ་དཀྱིལ་འཁོར་སྦྱིན་སྲེག་དང་། །གཏོར་མ་བཟླས་པ་བགྲང་ཕྲེང་དང་། །སྐྱིལ་མོ་ཀྲུང་དང་སྟངས་སྟབས་སོགས། །སྤྲོས་བྲལ་རྣམ་པར་བསླུ་བ་སྟེ། །བྱ་བ་མ་ཡིན་དགག་པའང་མིན། །ཅེས་དང་། ཐིག་ལེ་མཉམ་གནས་ཀྱི་རྒྱུད་ལས། བདེ་བ་ཆེན་པོའི་ངང་གནས་ན། །དམ་ཚིག་མེད་ཅིང་སྡོམ་པའང་མེད། །བྱ་བ་བྱེད་དང་རྩོལ་བའང་མེད། །ནམ་མཁའ་ལྟ་བུར་འགྲུབ་པར་འགྱུར། །ཞེས་དང་། དཔལ་ནཱ་རོ་ཏ་པས་ཀྱང་། རྒྱལ་པོ་དམ་ཚིག་མ་བཅོས་པ། །བསྲུང་བ་མེད་པའི་ཚུལ་གྱིས་བསྲུང་། །ཞེས་བསྟན་ལ། དེ་བཞིན་དུ་ཐེག་པ་ཆེན་པོར་མ་ཟད་ཐུན་མོང་གི་མདོ་སྡེ་རྣམས་ལས་ཀྱང་གསལ་པར་གསུངས་ཏེ། སྡུད་པ་ལས། སེམས་ཅན་འདི་དག་ཁྲིམས་ལྡན་འདི་དག་ཁྲིམས་འཆལ་ཅེས། །སྣ་ཚོགས་འདུ་ཤེས་ཞུགས་པ་ཤིན་ཏུ་ཚུལ་ཁྲིམས་འཆལ། །ཚུལ་ཁྲིམས་ཉམས་ཤིང་དེ་ལ་ཡང་དག་ཚུལ་ཁྲིམས་མེད། །གང་ལ་བདག་གི་འདུ་ཤེས་སེམས་ཅན་འདུ་ཤེས་མེད། །འདུ་ཤེས་འདོད་ཆགས་བྲལ་ལ་སྡོམ་མིན་ག་ལ་ཡོད། །ཅེས་དང་། བློ་གྲོས་རབ་གསལ་གྱིས་ཞུས་པའི་མདོ་ལས་ཀྱང་། བསླབ་པ་དང་ཚུལ་ཁྲིམས་ཇི་ལྟར་བསྲུང་བར་བགྱི། འཇམ་དཔལ་གྱིས་སྨྲས་པ། དགེ་སློང་རྣལ་འབྱོར་སྤྱོད་པ་ཚུལ་ཁྲིམས་དང་། ཚུལ་ཁྲིམས་འཆལ་བ་དང་། ཚུལ་ཁྲིམས་བསྲུང་བ་ལ་སོགས་པའི་འདུ་ཤེས་སྣ་ཚོགས་པ་དང་ལྡན་པ་ནི་ལྟ་བའི་བདེ་བ་ཉམས་སུ་མྱོང་ནས་སླར་ངན་སོང་དུ་འཁོར་བར་འགྱུར་རོ། །གང་ལ་སྡོམ་པ་དང་སྡོམ་པ་མིན་པའི་རློམ་སེམས་མེད་ཅིང་རྟོག་པ་མེད་པ་དེ་ནི་མྱ་ངན་ལས་འདས་པའི་ཚུལ་ཁྲིམས་རྣམ་པར་དག་པ་ཡིན་ནོ་ཞེས་བཤད་པ་ལྟར། ཐེག་པའི་རྒྱལ་པོའི་ཁྱད་ཆོས་བླ་ན་མེད་པ་ཤེས་པར་བྱའོ། །དེ་ལྟར་གོམས་པའི་རྣལ་འབྱོར་པ་དག་ལ་དམ་ཚིག་ཉམས་ཆགས་ཞིག་བྱུང་ཟིན་ཀྱང་། དེའི་ངོ་བོ་ལ་བལྟས་པས་སྐྱེ་འགག་གནས་གསུམ་དང་བྲལ་བའི་ངང་གནས་རྗེན་པ་གང་དུའང་མིང་བཏགས་ཟད་པའི་ཡེ་ཤེས་སྙོམས་བྱེད་ལས་འདས་པ་མ་བཅོས་གཉུག་མའི་གཤིས་ལུགས་སོ་མ་ངང་བཞག །རྒྱ་ཡན། ལྷུན་འབྱམས། ཅོག་གཞག་སྟེ་ཀུན་ཏུ་བཟང་པོའི་ཆོས་ལྔ་དང་ལྡན་པའི་དབྱིངས་སུ་རྩད་གདར་ཆོད་པས། ལྟ་བ་མཐོན་པོས་ཕན་མ་བརྟགས། རྣམ་རྟོག་ངན་པས་གནོད་མ་བསྐྱལ། ངེས་ཤེས་ཀྱི་བློ་དང་བྲལ་བ་ཞིག་བྱུང་ན་སྐྱོན་གྱིས་གོས་པ་མ་ཡིན་ཏེ། ཀུན་མཁྱེན་གྱིས། མ་བཅོས་ལྷུག་པ་ཡེ་གྲོལ་ཟང་ཀ་མ། །ཅོག་གཞག་ཅེར་མཐོང་བསམ་ཡུལ་འདས་པ་འདི། །སོ་མ་གཉུག་མ་ཇི་བཞིན་ཆོས་ཉིད་ངང་། །ཡེ་བཞིན་རྣམ་དག་ཕྱོགས་ལྷུང་ཀུན་དང་བྲལ། །དུས་བཞི་འཕོ་འགྱུར་མེད་པའི་དོན་ལ་ཞོག །རེ་དོགས་ཆེད་འཛིན་ཞིག་ནས་རྣལ་མའི་དོན། །སུས་ཀྱང་བཅོས་སུ་མེད་པའི་གཞི་བྲལ་ངང་། །དམིགས་བསལ་གདོད་ནས་དག་པར་ཤེས་པར་བྱ། །གནས་ལུགས་ཡེ་གཞི་ལྷུན་གྲུབ་བཅོས་བསླད་མེད། །མཁའ་ལྟར་རྣམ་དག་ཕྱོགས་ལྷུང་ཀུན་དང་བྲལ། །དེ་ཉིད་རྟོགས་པ་རྣལ་འབྱོར་ལམ་གྱི་གཞི། །ཕྱོགས་བྲལ་ནམ་མཁའ་དྲྭ་བས་གུད་མ་བཅད། །མ་རྟོགས་སྐྱོན་རྣམས་སོ་སོར་བཟུང་ལས་བྱུང་། །དེ་བས་བསམ་འདས་ཕྱམ་བརྡལ་མཁྱེན་པར་མཛོད། །ཅེས་གསུངས། དེ་བཞིན་དུ་ཐར་པ་ཆེན་པོའི་ཕྱོགས་སུ་རྒྱས་པའི་མདོ་ལས། གང་ཞིག་བཤགས་པ་བྱེད་འདོད་ན། །དྲང་པོར་འདུག་ལ་ཡང་དག་ལྟོས། །ཡང་དག་མཐོང་ན་རྣམ་པར་གྲོལ། །དེ་ནི་འགྱོད་ཚངས་མཆོག་ཡིན་ནོ། །ཞེས་པ་ལྟར་དམ་ཚིག་བསྲུང་བ་དང་ཉམས་པ་ཐམས་ཅད་ཆོས་ཉིད་ཀྱི་གཤིས་ལུགས་སྤྲོས་པ་དང་བྲལ་བར་མཉམ་པར་གྲོལ་བ་ཡིན་ནོ། །འབྲས་བུ་དང་ཉམས་བྱའི་དམ་ཚིག་ཀྱང་གདོད་ནས་རྣམ་པར་དག་པ་ཡིན་ཏེ་བྱ་རྩོལ་དང་རེ་དོགས་ལས་འདས་པའི་ཕྱིར་རོ། །དེ་སྐད་དུའང་བརྗོད་མེད་དོན་གྱི་བཤགས་པར། དོན་དམ་གཉིས་མེད་སྤྲོས་དང་བྲལ་བ་ལ། །རྣམ་རྟོག་གང་ཡང་དམིགས་པར་མི་འགྱུར་ཏེ། །ཞེས་དང་། འཁོར་ལོ་བཅུ་པའི་མདོ་ལས། ཁྱིམ་ན་གནས་ཤིང་སྐྲ་དང་ཁ་སྤུ་ཡང་མ་བྲེགས། ཆོས་གོས་ཀྱང་མ་གོན། ཚུལ་ཁྲིམས་ཀྱང་མནོས་པ་མེད་ཀྱང་འཕགས་པའི་ཆོས་ཉིད་དང་ལྡན་པ་དེ་ནི་དོན་དམ་པའི་དགེ་སློང་ཞེས་བྱའོ། །ཞེས་སོ། །དེའི་ཕྱིར་ན་ཀུན་ཏུ་བརྟགས་པའི་བློའི་རྣམ་པར་རྟོག་པའི་ཆོས་སྤང་སྒྱུར་གྲོལ་གསུམ་གྱི་ཚོགས་གང་ཡང་དམིགས་པར་མ་གྱུར་པའི་ངང་དུ་གྲོལ་བ་ཡིན་ནོ། །དེ་ལྟར་གཞི་ལམ་འབྲས་གསུམ་གྱི་སྒོ་ནས་སྟོན་པའི་ལམ་འདི་ལ་བརྟེན་ནས་སྤྲོས་བྲལ་གྱི་ལྟ་བ་རྣམ་པར་དག་པའི་ཀློང་དུ་བཤགས་བྱ་དང་བཤགས་བྱེད་ལས་འདས་པར་དམ་ཚིག་ཉམས་ཆག་གི་རྒྱུ་འབྲས་ཐམས་ཅད་དག་པར་འདོད་པ་དག་གིས་དེ་ལྟར་དུ་མཛོད་ཅིག་ཅེས་བསྐུལ་བའོ། །ལྔ་པ་ཐབས་ཀྱི་ཆེ་བ་བླ་ན་མེད་པའི་རྡོ་རྗེའི་ཐེག་པ་ལ་ཚུལ་བཞིན་དུ་ཞུགས་ནས་དེའི་འབྲས་བུ་སྟོན་པའི་ཕྱིར་དུ་ཚིག་རྐང་བཞི་སྟེ། ཟབ་མོའི་སྙན་བརྒྱུད་བསྒོམ་པ་ཉམས་ལེན་གྱི་གནད་འགགས། །དབུ་མའི་རྩ་མདུད་གྲོལ་བ་ལམ་རྟགས་ཀྱི་ཡོན་ཏན། །ས་ལམ་ཕྱི་ན་མི་བཞུགས་རང་རིག་ལ་རྫོགས་འདུག །སངས་རྒྱས་ལག་བཅང་བསྒོམ་ན་དེ་ལྟར་དུ་མཛོད་ཅིག །ཅེས་པ་ལྟར། བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཆེ་བ་དག་གིས་སེམས་ཅན་རྣམས་ཀྱི་ཁམས་དབང་བསམ་པའི་རིམ་པ་དང་རྗེས་སུ་མཐུན་པར་ཐེག་པའི་ཐབས་ཚུལ་བསམ་གྱིས་མི་ཁྱབ་པར་བསྟན་པ་དེ་དག་ཀྱང་བླ་ན་མེད་པའི་ལམ་འདིར་དགོངས་བརྡ་སྙན་བརྒྱུད་གསུམ་ལས་བྱུང་བ་ཡིན་ཏེ། དེ་ལས་ཀྱང་ཟབ་མོ་སྙན་དུ་བརྒྱུད་པ་ནི་ཀུན་གྱི་སྤྱོད་ཡུལ་དུ་གྱུར་ཅིང་། ཁྱད་པར་རླུང་དང་རིག་པའི་གནད་ལ་སོགས་པ་ལ་བརྟེན་ནས་སྐད་ཅིག་གིས་གྲོལ་བ་ཐོབ་པའི་ཆོས་ཚུལ་དེ་དག་གི་འབྱུང་གནས་ཀྱང་དགེ་བའི་བཤེས་གཉེན་ཁོ་ན་ལ་རག་ལས་ཏེ། སྡུད་པ་ལས། སངས་རྒྱས་ཆོས་རྣམས་དགེ་བའི་བཤེས་ལ་བསྟེན་ཏོ་ཞེས། །ཡོན་ཏན་ཀུན་གྱི་མཆོག་མངའ་རྒྱལ་བས་དེ་སྐད་གསུངས། །ཞེས་སོ། །དེའི་ཕྱིར་ན་སྨིན་གྲོལ་གྱི་གནད་ལས་བྱུང་བའི་ལམ་བསྐྱེད་རྫོགས་བསྒོམ་པ་ཁོ་ན་ལ་གནད་འགག་གཅིག་ཏུ་དྲིལ་བ་ཡིན་ཏེ། ཐུན་མོང་གི་ལམ་ལས་ཀྱང་། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་སོ། །དེ་ཡི་ཕྱིར་ན་བསྐྱེད་རིམ་ལ་བརྟེན་ནས་བསྙེན་སྒྲུབ་ཡན་ལག་བཞི་ཡོངས་སུ་རྫོགས་པས་རིག་འཛིན་རྣམ་པ་བཞིའི་གོ་འཕང་མངོན་དུ་བྱེད་པ་དང་། ཁྱད་པར་རྫོགས་རིམ་ལ་བརྟེན་ནས་འཁོར་ལོ་བཞི་པོའི་རླུང་སེམས་ལས་སུ་རུང་བས་ཚོགས་སྦྱོར་མཐོང་སྒོམ་གྱི་ལམ་བཞིའི་ཡོན་ཏན་འཆར་ཞིང་། དབུ་མ་ལ་རོ་རྐྱང་གི་མདུད་པ་ཉི་ཤུ་རྩ་གཅིག་ཡོད་པའི་གཉིས་གཉིས་གྲོལ་བས་ས་བཅུ་པོ་རེ་རེའི་ཡོན་ཏན་འཆར་ལ། ཐ་མ་གྲོལ་བས་མི་སློབ་པའི་ལམ་གྱི་ཡོན་ཏན་མངོན་དུ་གྱུར་ནས་སངས་རྒྱས་ཀྱི་ས་འགྲུབ་པར་བཞེད་དེ། ངེས་བརྗོད་རྩེ་མོ་ལས། རོ་མ་རྐྱང་མ་ཀུན་འདར་མ། །མདུད་པ་འཁོར་བའི་འཁྲུལ་སྣང་སྟེ། །གྲོལ་བས་ཡེ་ཤེས་མྱ་ངན་འདའ། །ཞེས་དང་། ཡིད་བཞིན་རིན་པོ་ཆེའི་མཛོད་ལས། འཁོར་ལོ་བཞི་པོའི་རླུང་སེམས་ལས་རུང་ཚེ། །ལམ་བཞིའི་ཡོན་ཏན་རིམ་པར་འཆར་བ་སྟེ། །དབུ་མའི་མདུད་པ་གཉིས་གཉིས་གྲོལ་བ་ལས། །ས་བཅུའི་ཡོན་ཏན་ནང་ནས་འཆར་བར་བཞེད། །ཅེས་སོ། །དེའི་ཕྱིར་ན་ཐུན་མོང་དང་ཐུན་མོང་མ་ཡིན་པའི་ལམ་རྟགས་དང་དེ་ལ་སྐྱེས་པའི་ཡོན་ཏན་ཏེ། རྒྱུ་འབྲས་ཀྱི་ཚུལ་དུ་གནས་པ་ཐམས་ཅད་འགྲུབ་པར་བྱེད་པ་ཡིན་ནོ། །ཁྱད་པར་ཐེག་མཆོག་གི་རྒྱལ་པོ་རྫོགས་པ་ཆེན་པོ་ལ་ས་ལམ་གྱི་ཡོན་ཏན་ཐམས་ཅད་ལོགས་སུ་གྲུབ་པ་མེད་དེ། རང་རིག་ཉག་གཅིག་ལ་རྫོགས་པའི་ཚུལ། ཀུན་བྱེད་རྒྱལ་པོར། ལྟ་བ་བསྒོམ་མེད་དམ་ཚིག་བསྲུང་དུ་མེད། །ས་ལ་སྦྱང་མེད་ལམ་ལ་བགྲོད་དུ་མེད། །ཕྲིན་ལས་རྩོལ་མེད་དབང་ལ་བསྐུར་དུ་མེད། །སྒོ་གསུམ་རྩོལ་མེད་དཀྱིལ་འཁོར་བསྐྱེད་དུ་མེད། །རྒྱུ་འབྲས་གཉིས་མེད་ནམ་མཁའ་ལྟ་བུའོ། །ཞེས་གསུངས་ལ། རྣམ་པ་ཙམ་དུ་ཕར་ཕྱིན་གྱི་སྒོ་དང་བསྟུན་ནས་གནས་ལུགས་ཡེ་གྲོལ་ལས་ལམ་གྱིས་འགྱུར་བ་བརྩི་བའི་ཚུལ་ནི། རིག་པ་རང་ཤར་ཆེན་པོའི་རྒྱུད་ལས་ཇི་ལྟར་བསྟན་པ་བཞིན་དང་། དེ་བཞིན་དུ་ཀློང་གསལ་ལས། བདེན་པ་མཐོང་བའི་གང་ཟག་གིས། །དང་པོའི་ས་ནས་བཅུ་དྲུག་བར། །རིམ་གྱིས་ཉམས་སུ་བླངས་པས་འབྱུང་། །གཞན་དང་སྒོ་བསྟུན་གནས་སྐབས་ཀྱི། །ཡོན་ཏན་འབྲས་བུའི་ཐོབ་ཚུལ་ལོ། །ཞེས་གསུངས་པ་ལྟར་རོ། །དེ་ལྟར་ཉོན་མོངས་པའི་དྲི་མ་ཐམས་ཅད་དང་བྲལ་ཞིང་ཐམས་ཅད་མཁྱེན་པའི་ཡོན་ཏན་ཐམས་ཅད་ཡོངས་སུ་རྫོགས་པ་སངས་རྒྱས་ཀྱི་གོ་འཕང་མྱུར་དུ་ཐོབ་པར་འདོད་པས། འདི་ལ་གོམས་པར་གྱིས་ཤིག །ཅེས་བསྐུལ་བའོ། །དེ་ལྟར་རིམ་པ་སྔ་མ་གསུམ་གྱིས་བསྐྱེད་རྫོགས་ཟུང་འཇུག་གི་ཚུལ་ལེགས་པར་བསྟན་ཅིང་། ཕྱི་མ་གཉིས་ཀྱི་དམ་ཚིག་དང་འབྲས་བུའི་ལམ་གསལ་བར་གདམས་པའོ། །བསྐྱེད་རྫོགས་ཟུང་འཇུག་ཉི་གཞོན་འཆར་ཀའི་རྡུལ། །སྐལ་བཟང་བློ་གྲོས་ཨུཏྤལ་གིས་བཏུང་བས། །གྲུབ་པ་གཉིས་ཀྱི་སྦྲང་རྩིའི་བཅུད་ལེན་གྱིས། །ཕན་བདེའི་ལང་ཚོ་རྒྱས་བྱེད་འདི་རྨད་བྱུང་། །དེ་ལས་གྲུབ་པའི་དགེ་བ་གང་། །རྙོག་བྲལ་ཤར་གྱི་ཐིག་ལེའི་གཟུགས། །ཆོས་དབྱིངས་ཆུ་གཏེར་ལ་བསྔོས་པས། །སྒྲིབ་གཉིས་ཚ་གདུང་བཅིལ་གྱུར་ཅིག །ཅེས་ཀུན་མཁྱེན་ཆོས་ཀྱི་རྒྱལ་པོ་རིག་འཛིན་འཇིགས་མེད་གླིང་པའི་ཞལ་སྔ་ནས་སྩལ་བའི་ཉམས་སུ་ལེན་བྱའི་རྡོ་རྗེའི་ཐོལ་གླུའི་དོན་འགྲེལ་ཉུང་ངུ་འདི་ནི་དོན་གཉེར་ཅན་གྱི་ངོར་གཞོན་ནུ་ཨ་བྷཱ་ཡས་རང་ལོ་བཅུ་དྲུག་པར་སྦྱར་བའོ། །སརྦ་ས་མནྟ་མངྒ་ལཾ།། །། ༈

[edit]

zhal gdams kyi 'grel chung gsang sngags snye ma/ zhal gdams kyi 'grel chung gsang sngags snye ma bzhugs so/__/na mo gu ru we/__'jigaXs bral bde chen rtag tu rab zhi 'gyur meXd bde ba'i phyag rgyas 'khyud/__/thar pa'i glingaX mchog rmad byung la sbyor bden gnyis gsung gi gsang bar rdzogs/__/brtan g.yo'i dngos kun ro gcig bsdoms pa'i zag bral he ru ka yi dngos/__/rnam paX kun gyi mchog dang ldan pa'i kun mkhyen rje der snying nas 'dud/__/de la 'dir rje btsun mkhyen brtse'i 'od zer gyi zhal snga nas stsal ba'i bskyed rdzogs kyi gdams pa tshig nyung la zab bcud 'dril ba'i gnad bsdus rdo rje'i tshig rkang don cung zad 'grol ba la lnga las/__dang po spros bral rang byung gi ye shes shin tu rnal 'byor gyi dgongs pa ston pa la tshig rkang bzhi ste/__e ma ho/__chos nyid mngon sum mjal ba spros bral gyi bla ma/__/gtad med dran pas lta ba mos gus kyi mthar thug__/thig le phyi na mi bzhugs shel sbug gi zer gdangs/__/'od gsal rdzogs chen bsgom na de ltar du mdzod cig__/ces pa ste/__e ma ho zhes pa ni ngo mtshar ba'i sgra don la gnas phyir/__'di nyid bla na med pa'i gsar lam mthar thug pa thams cad gnad gcig tu 'dril ba'i gdams pa zab mo yin pa'i phyir ro/__/chos nyid mngon sum mjal ba ni sngon gyi smon lam dag pas mtshams sbyar te/__rtogs pa don brgyud dang ldan pa'i bla ma dam pa yang dag lam gyi sa mkhan gcig pur gyur pa zhig mjal nas bzung /__de la rtse gcig gi dad 'dun drag pos rkyen byas/__bla ma'i thugs rgyud kyi rtogs pa slob ma la gnyis su med par 'dres pa'i mthus spros bral gyi ye shes rgya chad phyogs lhung dang bral ba/__tshig dang dpe yis mi mtshon pa chos nyid de bzhin nyid kyi ngo bo gang zag rdzogs pa chen por mngon du gyur pa nas bzung de la bsal bzhag dang yin min gyi sgro btags thams cad spangs nas/__rang ngo gnyug ma'i rang mdangs skyong bas blos byas kyi mtha' thams cad dang bral ba shes rab kyi pha rol tu phyin pa'i dgongs pa sgra ji bzhin par mthong ba ste/__'phags pa klus/__gang zhig rten cing 'brel bar 'byung /__/'gags pa med pa skye med pa/__/chad pa med pa rtag med pa/__/'ong ba med pa 'gro med pa/__/tha dad don min don gcig min/__/spros pa nyer zhi'i chos bstan pa/__/zhes gsungs pa ltar/__bla ma chos sku'i rang zhal mngon sum mjal ba gang zhig gzhi lta ba'i ngo bo brjod pa'o/__/de ltar mthong nas kyang blo yi gtad so dang bcas pa'i 'ching bas bcings pa ni/__rnal ma'i don ma yin pa'i tshul/__seng ge rtsal rdzogs las/__bsam gtan bsgoms pas chos nyid don mi mthong /__/rang snang ting 'dzin bsam pa'i phyogs dang bral/__/spros bral chos nyid nam mkha'i mtha' dang mnyam/_/dmigs pa dag gi yul la 'dzin rtog med/__/mtha' bzhi bral ba'i sangs rgyas rang rig yin/__/yod med mtha' las 'das pa chos kyi sku/__/zhes dang /__nye ba'i snying po'i rgyud las/__bsam gtan byang chub don la gang reg pa/__/sgom mo snyam pa'i nad kyis zin ta re/__/sangs rgyas yul du bstan pa 'khrul pa'i lam/__/bde gshegs yul ni tshig gis mtshon du med/__/ces so/__/des na yongs grub dran pa'i rtsis ched du bkag pa yang ma yin/__tha mal 'khrul pa'i dbang du song ba ma yin par 'jog tu med pa'i mnyam gzhag rtsis gdab med pa'i rjes thob/__thim la ma rmugs pa shin tu phra ba'i ye shes snang ngo la ma 'gags kyang /__rig ngo la de dang der 'dzin gyis 'du shes zad pa'i ngang du bsgom dang mi bsgom gyi gtad so bral ba'i yang dag gi dran pas lta ba ni bsgom mo zhes pa tha snyad tsam du mtshon te/__rgyal ba byams pas/__'di la bsal bar bya ba dang /__/bzhag par bya ba cung zad med/__/yang dag nyid la yang dag blta/__/yang dag mthong na rnam par grol/__/ces dang /__brgyad stong pa las/__shes rab kyi pha rol tu phyin pa ni mi bsgom pa'i tshul du bsgom par bya'o/__/zhes pa la sogs pa bsam gyis mi khyab pa bka' stsal ba'i phyir/__de lta bu'i don la goms par byed pa ni mos gus thams cad kyi mthar thug pa'ang yin te/__nam mkha' rin po che'i mdo las/__ci ltar chu la chu bzhag dang /__/ji ltar mar la mar bzhag ltar/__/rang gi rang rig ye shes ni/__/legs mthong gang yin 'dir phyogs min/__/zhes gsungs pa bzhin bsgom pa'i ngo bo mdor bstan pa'o/__/de ltar gzhi lta ba dang lam sgom pa la brten nas mngon sum khregs chod kyi don la goms pa dag ni thod rgal gyi sku dang thig le'i bkod pa yang phyi rol na gnas pa ma yin te/__rang gi snying dbus nas mig tu 'brel ba'i rang byung gi rtsa rgyu rkyen la 'das pa/__ka ti shel sbug can gyi gdangs las 'phros pa'i 'ja' zer yin te/__gser phreng las/__rin chen rgya mtshor 'brel ba'i rtsa/__/dkar 'jam khog pa stong pa nyid/__/thig le khrag gis ma gos pa/__/ye shes chen po de nas rgyu/__/zhes dang /__man ngag gi rgyud phyi ma las kyang /__snying nas mig tu 'brel pa yis/__/rang byung gsang ba chen po'i rtsa/__/ka ti shel gyi sbu gu can/__/ces gsungs pa'i phyir nang dbyings brjod pa dang bral ba'i mdangs las rig pa rdo rje lu gu rgyud kyi 'char sgo la gzir ba tsam nyid kyang don du dbyings rig dbyer med kyi dgongs pa la la bzla ba ste spyod pa'i ngo bor smras pa'o/__/de ltar lta sgom spyod pa gsum ni/__zab mo'i lam kun gyi snying po yin te/__ci'i phyir na bla na med pa'i man ngag 'di nyid la mngon du goms pa dag ni/__'di ltar ngo bo rtag pa ma yin te spros pa thams cad dang bral ba'i nang gsal gzhon nu bum sku kun gzhi las khyad chos drug gis 'phags pa'i ye shes/__rang bzhin chad pa ma yin te phyi gsal gyi rang mdangs sku dang ye shes kyi bkod pa ma 'gags par 'char ba/__thugs rje bsam gyis mi khyab pa so so'i skye bo'i blo las 'das pa nyid kyi ngang du grol ba thob pa ste/__rgyud las/__rtag pa ma yin ye shes sku/__/chad pa ma yin gsal ba'i gdangs/__/gnyis ka ma yin zung 'jug sbubs/__/zhes gsungs pa ltar/__gzhi lam 'bras gsum gyi tha snyad thams cad rang rig bcos bsgyur dang bral ba nyag gcig la rdzogs pa'i phyir theg pa chen po zad pa nyid dngos su bstan pa'i 'bras bu'i mthus shin tu rnal 'byor la goms par 'dod pa dag gis de ltar du mdzod cig ces bskul ba'o/__/gnyis pa rtsa rlung thig le'i lam la brten nas bde stong zung 'jug rnam kun mchog ldan gyi go 'phang mngon du bya ba'i phyir/__rjes su rnal 'byor gyi don ston par byed pa la tshig rkang bzhi ste/__bkod pa byang chub sems mchog bde stong gi DA ki/__/g.yo ba'i rlung gi 'grems pa thabs lam gyi rtsa ba/__/gnas yul phyi na mi bzhugs rtsa 'khor dang dbyer med/__/bde chen a nu bsgom na de ltar du mdzod cig__/ces pa ste/__pha rgyud rnams su rlung lnga rnam par dag pas gsal stong gi ye shes bskyed pa dang /__ma rgyud rnams su khams la zhu bde 'phel bas bde stong gi ye shes mngon du byed pa dang /__gnyis med kyi rgyud rnams su 'od gsal thig le chen po'i rnal 'byor lam du khyer bas spros bral gyi don ma nor bar rtogs par 'dod pa dag kyang gnas pa rtsa/__g.yo ba rlung /__bkod pa byang sems te gsum la bsten pa yin cing /__de'i tshul thog mar bkod pa byang chub kyi sems ni/__ro ma las 'babs pa'i nyi ma'i rdul bde ba thabs kyi ngo bo dang /__rkyang ma las 'babs pa'i zla ba'i bdud rtsi stong pa shes rab kyi rang bzhin te/__ji skad du/__rdo rje phreng ba las/__stong phrag nyi shu rtsa bzhi ni/__/zla ba 'babs pa rkyang ma'i rigs/__/stong phrag nyi shu rtsa bzhi ni/__/nyi ma 'babs pa ro ma'i rigs/__/zhes pa ltar/__de nyid mnyam sbyor du 'khril ba'i zung 'jug gi bde ba la brten nas dga' ba bzhi'i ye shes thob par byed pas na khams bde chen rgyal po zhes bya ste/__he badz+ra las/__khu ba'i rnam pa bcom ldan 'das/__/de yi bde ba 'dod mar brjod/__/ces dang /__yon tan rin po che'i mdzod las kyang /__rtsa mdud nang na dwangs ma dkar dmar gnyis/__/dpa' bo dang ni rnal 'byor ma'i tshul du/__/'khyil zhing sbyor bas bde stong mchod pa len/__/zhes pa ltar/__rtsa dang khams kyi rgyu ba gnyis kyang dbu ma'i mkha' ru 'gro ba las/__DA ki zhes brdar btags pa ste/__de ltar thig le'i gnas tshul shes nas de nyid 'gro 'ong gi kha lo ba ni g.yo ba rlung ste/__rags pa nyin zhag phrugs re la nyi khri chig stong drug brgya dang /__phra ba kun rtog brgyad khri bzhi stong gi bzhon pa nyid du gnas shing /__der ma zad phyi'i rlung srog 'dzin/__me mnyams/__khyab byed/__gyen rgyu/__thur sel lngar gnas shing /__nang ltar sa chu me rlung nam mkha' ste 'byung ba chen po lnga yi kha dog tu snang ba dang /__gsang ba ye shes rnam pa lnga'i rten te rags pa'i chos dang 'gal ba nyid do/__/de nyid gnad du song na thig le d+hU ti'i dbyings su 'grems par byed cing /__dwangs ma'i rlung lnga dbu mar tshud pas zad par gyi ting nge 'dzin dang /__yon tan rdzu 'phrul sna tshogs pa 'grub par byed cing /__mthar thug mi slob lam gyi go 'phang mngon du gyur nas/__gtsug tor gyi 'khor lo yongs su smin mthus sangs rgyas rnams la 'bras bu'i dbang 'od zer chen po nod de ye shes chen po'i spyod yul mngon du thob pa ste/__'dus pa'i rgyud las/__de tshe yang dag rang ngo sprod/__/rlung rig rang dwang der sangs rgyas/__/zhes pa la sogs pas mtshon/__gsang sngags kyi lam mtha' yas pa las ston pa'o/__/de yang thig le dang rlung gi rten ni gnas pa rtsa yi 'khor lo ste/__de yang lus rdo rje phung po'i grong khyer 'di skyes pa'i thog mar mig dang lte ba'i rtsa mdud chags pa'i rjes thog dwangs ma gyur pa'i rtsa dbu rkyang ro gsum ka ba lta bur gnas pa ste/__dpal dang po'i sangs rgyas las/__de ni mthur du rtse gsum ste/__/de bzhin gyen du'ang rtse gsum mo/__/sgra gcan rtse mo dbus na gnas/__/nyi ma'i gtso mo g.yas pa ste/__/zla ba'i rtse mo g.yon pa'o/__/chu dang me dang nam mkha' rlung /__/g.yas g.yon dbu ma'i bar snang gnas/__/gsang ba lci ba khu ba rgyu/__/lcags sgrog bcings pa lta bu'i rtsa/__/srid dang thur sel lam gsum nyid/__/ces pa ltar ro rkyang gnyis ni g.yas g.yon na gnas shing /__mo la de las go ldog la/__dbu ma ni gzung 'dzin rnam par spang pa'i phyir dbus su gnas te/__brtag pa gnyis par/__kun 'dar ma ni dbus gnas su/__/gzung dang 'dzin pa rnam par spangs/__/zhes so/__/de'ang thabs shes kyi rtsa gnyis pos d+hU tir mdud pa nyer gcig tu byas te/__kha sbyor du 'brel ba'i tshul yang /__rdo rje phreng bar/__drug cu rtsa bzhir brgyad 'dab bya/__/steng dang 'og dang kha bsdams nas/__/slar yang kha sbyor tshul du gnas/__/zhes pas bstan cing /__de bzhin du phyi ru lus ngag yid gsum/__nang du dug gsum/__gsang ba sku gsum rten yi ge gsum du gnas shing 'khor lo'i grangs nges kyang /__dang po'i sangs rgyas dus kyi 'khor lo ru drug tu gsungs te/__so so'i kha sbyor gyi mtshams su 'pho ba bcu gnyis dang /__rten 'brel bcu gnyis gnas shing khams lugs ldog gi 'gros kyi rlung dang rten 'brel cha re ldog ste/__sa bcu gnyis kyi yon tan rdzogs pa'i mtha' ru thig le nam mkha'i khams dang 'dres pa'i tshe na mngon par sangs rgyas par 'gyur bar bzhed cing /__de bzhin snying ga zhi ba'i 'khor lo dang /__spyi gtsug khro bo'i 'khor lo gnyis la so so'i lha grangs dang mnyam pa'i rtsa 'dabs kyis 'brel ba ni/__thabs lam dang grol lam steng 'og gi sgo gnyis su gsungs shing /__gzhan yang sku bzhi dang /__sku lnga/__pha rol tu phyin pa drug la sogs pa so so sbyang gzhi dang sbyong byed sbyangs 'bras kyi tshul du 'khor lo'i rtsa 'dabs su gnas par bzhed do/__/de ltar rdo rje'i lus kyi rtsa thig rlung gsum gyi gnad la 'dren 'grems kyi 'khrul 'khor la sogs kyis gnad du bsnun pas/__khams kyi zhu bde 'phel pa'i byed las la brten nas/__ji skad du/__'khor lo sdom par/__rnal 'byor ma yi kla klo'i skad/__/su la sogs pa gang gsungs kyang /__/phyi dang nang gi bdag nyid de/__/zhes pa ltar bzod nas yongs grub tu gnas pa'i rten lus kyi dkyil 'khor spyi bo dza lan+d+ha ra la sogs pa dang /__brten pa rtsa yi 'khor lo sku lnga'i gnas yul du dbang bsgyur bas na phyi rol du mi bzhugs par rang la dbyer med du rdzogs pa'i phyir/__mtshan 'dzin gyi bde ba las 'das pa'i zung 'jug chos sku'i rgyal sa chen por mngon du byed pa'i lam lung a nu yo ga la goms par 'dod pa dag gis de ltar du mdzod ces bskul ba'o/__/gsum pa bsnyen sgrub yan lag bzhi yi tshul la brten nas rig 'dzin rnam pa bzhi yi them skas su bgrod pa'i rnal 'byor chen po'i don bstan pa la tshig rkang bzhi ste/__g.yo thob goms brtan mthar phyin lhun grub kyi yi dam/__/dkyil 'khor gsum gyi sgom pa bskyed rim gyi snying po/__/zhi khro phyi na mi bzhugs lhan skyes kyi rang gdangs/__/ma hA yo ga bsgom na de ltar du mdzod cig__/ces pa ste/__de yang dpal sgyu 'phrul drwa ba las/__skye gnas bzhi po sbyang bya'i phyir/__/bskyed pa'ang de bzhin rnam pa bzhi/__/spros bcas spros pa med pa dang /__/shin tu spros pa med pa'o/__/zhes pa ltar dbang po yang rab kyis rang bzhin gdod nas lha yi phyag rgyar rang rtsal rdzogs pa'i ye shes kyi sgyu 'phrul rang byung du shar bas rdzus skyes dang rjes mthun dang rab kyis dbyings dang ye shes zung du 'jug pas snying po dran tsam gyis lha'i skur ldang nus pas na drod gsher skyes kyi cha mthun/__rtog bcas rnams la bdag sras dang gzhan sras kyi sgo nas sgom par 'dod pas sgong skyes dang mngal skyes kyi char dbye ba sogs dang /__gzhan yang pha rgyud ltar phyag mtshan sa bon skur smin pa ste rdo rje'i cho ga gsum dang /__ma rgyud ltar mngon byang lnga ste/__zla nyi phyag mtshan sa bon gyis mtshan pa dang de ro gcig tu 'dres shing sku yongs su rdzogs pa ste sbyang gzhi sbyong byed sbyangs 'bras kyi tshul du gnas shing /__gnyis kar ting 'dzin rnam pa gsum gyi gzhir brten cing dag rdzogs smin gsum gyis khyab pa'o/__/de ltar gzhi bskyed rim 'grub pa'i rgyu shes nas/__lam ji ltar bsgom pa'i tshul ni/__thog mar thod sku la sogs pa'i rten la rtse gcig pas bltas pas/__dang po 'du byed long long du g.yos pa ni g.yo ba'i nyams so/__/slar de las goms pa je zhig na rnam 'gyur ji lta ba'i bag chags brtas pas yid yul du bkra lam me gsal ba thob pa'i nyams zhes bya'o/__/de'i tshe na sku de nyid thogs bcas kyi rnam pa dang bral ba 'ja' tshon nam me long nang gi gzugs brnyan bzhin phyi gsal nang gsal du rtsal sbyangs pas/__lha de nyid nyal ba'am/__langs pa'am/__shin tu rags pa'am/__shin tu phra ba la sogs pa gang ltar bsgom yang btub pa ni goms pa'i nyams su brjod la/__de nas bsgom bya dang sgom byed kyi gnyis 'dzin spangs pa'i phyir/__lha'i rnam pa rang sems dbyer med du 'dres te bsgoms pas rtog pa gang gis kyang bar ma chod par ji srid brtan par 'dod pa'i bar de srid du sdod pa ni brtan pa'i nyams te/__de las kyang gsal brtan gyi tshad brgyad thob nas nyin mtshan kun tu yul rkyen gang gis kyang mi 'phrog par dkyil 'khor gang gi dbang phyug chen por rtsal rdzogs pa ni mthar phyin pa ste snang ba lha yi dkyil 'khor dang 'dres pa yin te/__paN+Di ta dri med bshes gnyen gyi phyag rgya bsam gtan gyi 'grel pa las/__g.yo thob goms brtan mthar phyin lnga/__/ting 'dzin nyams kyi skye tshul yin/__/ces gsungs pa bzhin no/__/de dag kyang rang sems kyi ngo bor lhun gyis grub par rdzogs pa ni bral thob spangs pa'i gnyug ma don gyi yi dam yin te/__ji skad du/__lha nyid rang la rang nyid lha/__/rang dang lhan cig skyes pa ste/__/dam tshig ye shes gnyis med pas/__/spyan 'dren bzhugs gsol 'dir mi dgos/__/rang las sprul zhing rang dbang bskur/__/rang rig rtsa ba gsum du gnas/__/zhes so/__/de ltar rim pa'i so mtshams legs par phyed nas/__khyad par gnad du dril ba'i nyams len nyid dkyil 'khor rnam pa gsum gyis bstan te/__de'ang sku phyag rgya'i rnal 'byor du gsal btab pa'i tshul ni yi dam gang rung gi skur lam gyis gsal nas/__zhi ba la tshul dgu dang /__khro bo la gar dgus dpa' zhing so sor dag bya dang dag byed dag 'bras tshul bzhin nyams su blang ba ni bskyed rim snang stong zung 'jug gi dkyil 'khor te/__sgrub thabs kun tu bzang po las/__tha mal rnam rtog rgyun 'di ma gtogs pa/__/srid pa'i sdug bsngal ci yang yod ma yin/__/des na de dag gzhom par bya ba'i phyir/__/thabs kyi dkyil 'khor 'khor lo bsgom pa'o/__/zhes gsungs pa ltar dang /__de las snang ba'i yul kun zhi khro'i rol gar du blta ba ni snang ba sku yi lam khyer ro/__/ngag srog rtsol 'bru gsum bzla ba'am/__yang na yi dam gyi snying po skyon bcu spangs la bzla ba'i tshul gsum dang ldan pas yang yang du bsgyur ba ni ye shes lha dang nye bar 'gyur ba'i phyir te/__rdo rje gur las/__sangs rgyas byang chub sems dpa' dang /_/mkha' 'gro ma dang rang btsun mo/__/mngon sum du ni bya ba'i phyir/__/sngags kyi snyan gsan dbab pa yin/__/ces pa ltar/__grags stong zung 'jug ngag sngags kyi dkyil 'khor ro/__/de las kyang bzang ngan gyi sgra kun sngags kyi rol par lta ba grags pa gsung gi lam khyer zhes bya'o/__/bskyed rdzogs kyi ting nge 'dzin de dag kyang ngo bo la skye 'gag gnas gsum bral zhing 'di lta bu'o snyam pa'i dran 'dzin kyang rang ngor yul med rtsa bral du song ba'i phyir gnas pas phan ma btags/__'gyu bas gnod ma bskyal/__lung ma bstan gyi 'khrul par ma 'khyams/__rtag chad kyi rgya ral/__bsgom dang mi bsgom kyi gtad so med pa'i ngang du mnyam par grol ba ni sangs rgyas thams cad kyi thugs kyi rang bzhin yin pa'i phyir/__don 'di ma rtogs na bskyed rdzogs lam zab ci dang ci lta bus kyang shes bya'i sgrib pa las grol ba min te/__'khor gsum rnam par rtog pa'i phyir ro/__/de skad du/__'phags pa sdud pa las/__gang zhig dpag tshad lnga brgya yod pa'i ri yi sul/_/sbrul gyis gang bar byas nas lo mang gnas byas kyang /__/dben pa 'di mi shes pa'i byang chub sems dpa' ni/__/lhag pa'i nga rgyal rnyed nas 'gro bar gnas pa bzhin/__/ces so/__/des na chos nyid ji bzhin gnyug ma'i gnas lugs rtogs pa ni rig stong spros bral thugs 'od gsal gyi dkyil 'khor ro/__/de las kyang tshogs drug gi yul kun lta stangs kyis phyir ma 'ching /__dran 'dzin gyis nang du mi sdud/__shar ba dang grol ba dus mnyam gyi ngang du lhug par bzhag pa ni dran rtog thugs kyi lam khyer te/__rig 'dzin dga' rab rdo rjes/__shar ba'i dus na mnyam shar bzang ngan med/__/grol ba'i dus na mnyam grol bzang ngan med/__/gnas pa'i dus na mnyam gnas bzang ngan med/__/ces pa ltar ro/__/de goms par byed pa ni bskyed rim thams cad kyi snying po yin te/__snang zhen gyi yul kun rdo rje gsum mam mngon byang lngas bskyed pa'i lha sku'i phyag rgya nyag gcig tu rdzogs/__sgra grags pa thams cad yi ge'i 'khor lor smin nas dbu ma'i dbyings su thim ste bde chen brjod med nA da'i rang bzhin du dag__/dran rtog yid kyi 'gyu 'phro thams cad zab zhi spros bral gnyug ma'i sbubs su nye bar zhi bas na thugs kyi rdo rjer smin pa'o/__/de lta bu'i don la sgra ji bzhin par goms pa dag gis ni zhi ba dang khro bo la sogs pa mtha' yas mtha' dag kyang rang las phyi rol na logs su grub pa med de/__phung khams gshegs pa gshegs ma/__tshogs dbang sems dpa' sems ma/__yan lag khro bo khro mo ste gdan gsum lha yi sku ru gnas pa nyid kyi phyir brjod med don gyi bshags pa las kyang /__snang srid rnam dag lha dang lha mo'i dbyings/__/byung dang 'byung 'gyur yab yum lhun rdzogs pa/__/zhes pa ltar/__rang dang lhan cig skyes shing rang las shar ba yin te/__gang dkyil 'khor gsum dang ldan pa'i rnal 'byor chen po la zhugs nas goms par 'dod pa dag gis de ltar du mdzod cig ces bskul ba'o/__/de ltar bskyed pa dang rdzogs pa'i rim pa ni rang la gnas pa'i ye shes chen po mngon du byed pa'i thabs tshul te/__de'i khyad par gang zhe na/__lha sku snang stong zung 'jug gi bskyed rim cho ga'i khyad par gzhung las gsungs pa'i bskyed chog tshang ba/__rang 'bras kyi khyad par sngags kyi mthu bskyed nus pa/__ngo bo'i khyad par zhu bde dang stong pa nyid kyi rang bzhin/__byed las kyi khyad par dag rdzogs smin gsum tshang ba'o/__/de las khyad par du gyur pa rdzogs rim gyi mtshan nyid ni/__rgyu yi khyad par rdo rje lus kyi rtsa thig rlung gsum la gnad du bsnun pa/__byed las kyi khyad par rtsa rlung thig le 'khrul pa'i bag chags thams cad dbu mar dag byed/__rnam pa'i khyad par 'du 'bral med pa'i bde ba dang stong gzugs kyi phyag rgya gnyis mi phyed pa'i rdzogs rim gyi khyad par gsum ldan 'di kha cig gis mi bzhed pa'ang yod la/__de ltar gnyis char dgos pa'i tshul ni/__bskyed rim gyis 'jig rten gyi dngos grub thob cing snod bcud tha mal du 'dzin pa spangs te/__gzugs sku'i rten 'brel bsgrigs pa yin cing /__rdzogs rim gyis mchog gi dngos grub thob cing 'pho ba'i bag chags kyi dri ma spangs shing mthar thug lhan skyes kyi sku'i rten 'brel bsgrigs pa yin la/__de skad du/__gsang snying gi rgyud phyi mar/__'jig rten pa yi dngos grub ni/__/bskyed pa'i rim pa sbyor bas thob/__/'jig rten 'das pa'i dngos grub ni/__/rdzogs pa'i rim ba'i sbyor bas so/__/zhes so/__/grangs nges kyi sgo nas skye ba kun rdzob dang 'chi ba don dam gyi bden pa lam du byas nas sbyong ba ni bskyed rim dang rdzogs rim du bstan te/__ye shes rdo rje'i kun las btus par/__skye ba kun rdzob bden pa zhes bya ste/__/'chi ba yang ni don dam bden pa yin/__/bden gnyis 'di la rnam par nges byas nas/__/bshad pa gnyis kyi dbye ba gsungs pa yin/__/zhes so/__/de'i phyir na/__sngon du rgyud sbyangs pa la bskyed rim dang /__/gnas lugs dngos bsgom pa la rdzogs rim ste/__/rim par 'jug pa'i tshul yang /__rim lnga las/__bskyed pa'i rim la legs gnas shing /__/rdzogs pa'i rim par 'dod pa rnams/__/thabs 'di rdzogs pa'i sangs rgyas kyis/__/skas kyi rim pa lta bur gsungs/__/zhes dang /__Dom+b+hi he ru kas kyang /__blo bzang dang po bskyed pa'i rim pa sgom par byed dang lag pa'i rgya/__/sngags ni rnam dag gug bskyed cho ga nges par dran pa 'bral mi bya/__/phyi nas blo bzang rang shi skad cig rgyun du de nyid gcig pa'i sems dang ldan/_/rdzogs pa'i rim pa bsgoms pas srid pa nam yang lhan cig skyes pa rtag tu bsam/__/zhes gsungs pa'i phyir ro/__/de ltar bskyed rim dang rdzogs rim la brten nas zung 'jug rdzogs pa chen po'i don mngon du ma mthong na spros pa bral ba'i ye shes chen po ma mthong ba'i phyir/__theg pa rim pa brgyad dang de la brten pa'i sdom pa gsum dang /__pha rol tu phyin pa drug sogs dmigs bcas dmigs med thabs tshul thams cad blo yi byi dor las ma 'das pas na kun kyang lam 'di'i bzhon pa nyid du gnas te/__'jam dpal mtshan brjod las/__theg pa gsum gyi nges 'byung la/__/theg pa gcig gis 'bras bur gnas/__/zhes dang /__in+d+ra b+hU ti'i dbang gi 'khor lo'i man ngag las/__rang bzhin gyis ni 'od gsal ba/__/rdzogs pa chen po'i mthar thug pa/__/man ngag kun gyi mchog gi mchog__/de sgrub thabs su gsungs par zad/__/ces so/__/mdor na nyon mongs pa'i sgrib pa'i tshogs ni blo dang bcas pas sbyangs la/__'khor gsum rnam par rtog pa'i shes bya'i sgrib pa blo dang bral bas sbyangs te/__sgrib gnyis yongs su spangs pas rdzogs pa'i sangs rgyas kyi go 'phang mngon du byed pa'i phyir na/__'dir yang de ltar du bstan par rig par bya'o/__/bzhi pa gsang sngags kyi rtsa ba ni dam tshig yin cing /__gal te de la nyams chag byung na gnas skabs dang mthar thug kun tu sdug bsngal gyi rgyu ru 'gyur pa'i tshul/__gsang snying las/__rtsa ba'i dam tshig nyams gyur na/__/sgrub pa thams cad log par 'gyur/__/yid du mi 'ong sna tshogs pa'i/__/'bras bu mi 'dod bzhin du 'du/__/zhes so/__/de'i phyir na/__de nyid sbyong ba'i thabs tshul mang du yod pa las/__'dir zab mo lta ba'i klong bshags dang 'brel bar ston pa la tshig rkang bzhi ste/__ye nas srung mtshams bral ba dam tshig gi khyad chos/__/nyams mkhan rtsad gdar chod pa chos nyid kyi gshis lugs/__/nyams bya gdod nas dag pa ka dag gi ngo bo/__/lta ba'i klong bshags bsgom na de ltar du mdzod cig__/ces pas bstan te/__de yang dang po gzhi dam tshig gi ngo bo bshad pa ni/__bsrung du med pa'i gcig car ba'i dam tshig dang /__bsrung mtshams can rim gyis pa'i dam tshig gnyis las/__'dir snga ma ltar te/__ye nas sangs rgyas dang sems can las 'das pa'i rang rig rjen pa 'khrul grol gyi sgro ma btags pa'i dbyings kyi rang bzhin nyag gcig las gzhan du 'pho 'gyur bral ba ni gcig pu'i dam tshig__/de yi chos nyid blo las 'das pa ni phyal ba'i dam tshig__/shes bya'i mtha' la thug pa med cing phyogs ris la chad pa bral ba ni btang snyoms kyi dam tshig gam/__bsrung bya dang srung byed gnyis su shar ba'i gzung 'dzin gyi drwa bas bcings pa med pa ni med pa'i dam tshig ste/__de dag kyang ye bsrung lhun grub chen po'i ngang du srung mtshams dang bral ba rtag pa rgyun gyi 'khor lor mi g.yo ba ni blang dor med pa'i ngo bo nyid de/__kun mkhyen rgyal po lta ba nam mkha' dang mnyam pa'i rgyud las/__kye/__kun byed nga yi dgongs pa'i dam tshig ni/__/ma yengs dran pa dngos po ye shes su/__/ma bcos sus kyang ma byas rang byung ste/__/rig pas dbang bsgyur bsrung dang bsrung du med/__/ces dang /__spyi mdo las/__bsrung bya bsrung du med pa ni/__/chos nyid dam tshig dam pa yin/__/ces dang /__'phags pa 'jam dpal gyis/__/de la dkyil 'khor sbyin sreg dang /__/gtor ma bzlas pa bgrang phreng dang /__/skyil mo krung dang stangs stabs sogs/__/spros bral rnam par bslu ba ste/__/bya ba ma yin dgag pa'ang min/__/ces dang /__thig le mnyam gnas kyi rgyud las/__bde ba chen po'i ngang gnas na/__/dam tshig med cing sdom pa'ang med/__/bya ba byed dang rtsol ba'ang med/__/nam mkha' lta bur 'grub par 'gyur/__/zhes dang /__dpal nA ro ta pas kyang /__rgyal po dam tshig ma bcos pa/__/bsrung ba med pa'i tshul gyis bsrung /__/zhes bstan la/__de bzhin du theg pa chen por ma zad thun mong gi mdo sde rnams las kyang gsal par gsungs te/__sdud pa las/__sems can 'di dag khrims ldan 'di dag khrims 'chal ces/__/sna tshogs 'du shes zhugs pa shin tu tshul khrims 'chal/__/tshul khrims nyams shing de la yang dag tshul khrims med/__/gang la bdag gi 'du shes sems can 'du shes med/__/'du shes 'dod chags bral la sdom min ga la yod/__/ces dang /__blo gros rab gsal gyis zhus pa'i mdo las kyang /__bslab pa dang tshul khrims ji ltar bsrung bar bgyi/__'jam dpal gyis smras pa/__dge slong rnal 'byor spyod pa tshul khrims dang /__tshul khrims 'chal ba dang /__tshul khrims bsrung ba la sogs pa'i 'du shes sna tshogs pa dang ldan pa ni lta ba'i bde ba nyams su myong nas slar ngan song du 'khor bar 'gyur ro/__/gang la sdom pa dang sdom pa min pa'i rlom sems med cing rtog pa med pa de ni mya ngan las 'das pa'i tshul khrims rnam par dag pa yin no zhes bshad pa ltar/__theg pa'i rgyal po'i khyad chos bla na med pa shes par bya'o/__/de ltar goms pa'i rnal 'byor pa dag la dam tshig nyams chags zhig byung zin kyang /__de'i ngo bo la bltas pas skye 'gag gnas gsum dang bral ba'i ngang gnas rjen pa gang du'ang ming btags zad pa'i ye shes snyoms byed las 'das pa ma bcos gnyug ma'i gshis lugs so ma ngang bzhag__/rgya yan/__lhun 'byams/__cog gzhag ste kun tu bzang po'i chos lnga dang ldan pa'i dbyings su rtsad gdar chod pas/__lta ba mthon pos phan ma brtags/__rnam rtog ngan pas gnod ma bskyal/__nges shes kyi blo dang bral ba zhig byung na skyon gyis gos pa ma yin te/__kun mkhyen gyis/__ma bcos lhug pa ye grol zang ka ma/__/cog gzhag cer mthong bsam yul 'das pa 'di/__/so ma gnyug ma ji bzhin chos nyid ngang /__/ye bzhin rnam dag phyogs lhung kun dang bral/__/dus bzhi 'pho 'gyur med pa'i don la zhog__/re dogs ched 'dzin zhig nas rnal ma'i don/__/sus kyang bcos su med pa'i gzhi bral ngang /__/dmigs bsal gdod nas dag par shes par bya/__/gnas lugs ye gzhi lhun grub bcos bslad med/__/mkha' ltar rnam dag phyogs lhung kun dang bral/__/de nyid rtogs pa rnal 'byor lam gyi gzhi/__/phyogs bral nam mkha' drwa bas gud ma bcad/__/ma rtogs skyon rnams so sor bzung las byung /__/de bas bsam 'das phyam brdal mkhyen par mdzod/__/ces gsungs/__de bzhin du thar pa chen po'i phyogs su rgyas pa'i mdo las/__gang zhig bshags pa byed 'dod na/__/drang por 'dug la yang dag ltos/__/yang dag mthong na rnam par grol/__/de ni 'gyod tshangs mchog yin no/__/zhes pa ltar dam tshig bsrung ba dang nyams pa thams cad chos nyid kyi gshis lugs spros pa dang bral bar mnyam par grol ba yin no/__/'bras bu dang nyams bya'i dam tshig kyang gdod nas rnam par dag pa yin te bya rtsol dang re dogs las 'das pa'i phyir ro/__/de skad du'ang brjod med don gyi bshags par/__don dam gnyis med spros dang bral ba la/__/rnam rtog gang yang dmigs par mi 'gyur te/__/zhes dang /__'khor lo bcu pa'i mdo las/__khyim na gnas shing skra dang kha spu yang ma bregs/__chos gos kyang ma gon/__tshul khrims kyang mnos pa med kyang 'phags pa'i chos nyid dang ldan pa de ni don dam pa'i dge slong zhes bya'o/__/zhes so/__/de'i phyir na kun tu brtags pa'i blo'i rnam par rtog pa'i chos spang sgyur grol gsum gyi tshogs gang yang dmigs par ma gyur pa'i ngang du grol ba yin no/__/de ltar gzhi lam 'bras gsum gyi sgo nas ston pa'i lam 'di la brten nas spros bral gyi lta ba rnam par dag pa'i klong du bshags bya dang bshags byed las 'das par dam tshig nyams chag gi rgyu 'bras thams cad dag par 'dod pa dag gis de ltar du mdzod cig ces bskul ba'o/__/lnga pa thabs kyi che ba bla na med pa'i rdo rje'i theg pa la tshul bzhin du zhugs nas de'i 'bras bu ston pa'i phyir du tshig rkang bzhi ste/__zab mo'i snyan brgyud bsgom pa nyams len gyi gnad 'gags/__/dbu ma'i rtsa mdud grol ba lam rtags kyi yon tan/__/sa lam phyi na mi bzhugs rang rig la rdzogs 'dug__/sangs rgyas lag bcang bsgom na de ltar du mdzod cig__/ces pa ltar/__bdag cag gi ston pa thabs mkhas la thugs rje che ba dag gis sems can rnams kyi khams dbang bsam pa'i rim pa dang rjes su mthun par theg pa'i thabs tshul bsam gyis mi khyab par bstan pa de dag kyang bla na med pa'i lam 'dir dgongs brda snyan brgyud gsum las byung ba yin te/__de las kyang zab mo snyan du brgyud pa ni kun gyi spyod yul du gyur cing /__khyad par rlung dang rig pa'i gnad la sogs pa la brten nas skad cig gis grol ba thob pa'i chos tshul de dag gi 'byung gnas kyang dge ba'i bshes gnyen kho na la rag las te/__sdud pa las/__sangs rgyas chos rnams dge ba'i bshes la bsten to zhes/__/yon tan kun gyi mchog mnga' rgyal bas de skad gsungs/__/zhes so/__/de'i phyir na smin grol gyi gnad las byung ba'i lam bskyed rdzogs bsgom pa kho na la gnad 'gag gcig tu dril ba yin te/__thun mong gi lam las kyang /__tshul gnas thos dang bsam ldan pas/__/sgom pa la ni rab tu sbyor/__/zhes so/__/de yi phyir na bskyed rim la brten nas bsnyen sgrub yan lag bzhi yongs su rdzogs pas rig 'dzin rnam pa bzhi'i go 'phang mngon du byed pa dang /__khyad par rdzogs rim la brten nas 'khor lo bzhi po'i rlung sems las su rung bas tshogs sbyor mthong sgom gyi lam bzhi'i yon tan 'char zhing /__dbu ma la ro rkyang gi mdud pa nyi shu rtsa gcig yod pa'i gnyis gnyis grol bas sa bcu po re re'i yon tan 'char la/_tha ma grol bas mi slob pa'i lam gyi yon tan mngon du gyur nas sangs rgyas kyi sa 'grub par bzhed de/__nges brjod rtse mo las/__ro ma rkyang ma kun 'dar ma/__/mdud pa 'khor ba'i 'khrul snang ste/__/grol bas ye shes mya ngan 'da'/__/zhes dang /__yid bzhin rin po che'i mdzod las/__'khor lo bzhi po'i rlung sems las rung tshe/__/lam bzhi'i yon tan rim par 'char ba ste/__/dbu ma'i mdud pa gnyis gnyis grol ba las/__/sa bcu'i yon tan nang nas 'char bar bzhed/__/ces so/__/de'i phyir na thun mong dang thun mong ma yin pa'i lam rtags dang de la skyes pa'i yon tan te/__rgyu 'bras kyi tshul du gnas pa thams cad 'grub par byed pa yin no/__/khyad par theg mchog gi rgyal po rdzogs pa chen po la sa lam gyi yon tan thams cad logs su grub pa med de/__rang rig nyag gcig la rdzogs pa'i tshul/__kun byed rgyal por/__lta ba bsgom med dam tshig bsrung du med/__/sa la sbyang med lam la bgrod du med/__/phrin las rtsol med dbang la bskur du med/__/sgo gsum rtsol med dkyil 'khor bskyed du med/__/rgyu 'bras gnyis med nam mkha' lta bu'o/__/zhes gsungs la/__rnam pa tsam du phar phyin gyi sgo dang bstun nas gnas lugs ye grol las lam gyis 'gyur ba brtsi ba'i tshul ni/__rig pa rang shar chen po'i rgyud las ji ltar bstan pa bzhin dang /__de bzhin du klong gsal las/__bden pa mthong ba'i gang zag gis/__/dang po'i sa nas bcu drug bar/__/rim gyis nyams su blangs pas 'byung /__/gzhan dang sgo bstun gnas skabs kyi/__/yon tan 'bras bu'i thob tshul lo/__/zhes gsungs pa ltar ro/__/de ltar nyon mongs pa'i dri ma thams cad dang bral zhing thams cad mkhyen pa'i yon tan thams cad yongs su rdzogs pa sangs rgyas kyi go 'phang myur du thob par 'dod pas/__'di la goms par gyis shig__/ces bskul ba'o/__/de ltar rim pa snga ma gsum gyis bskyed rdzogs zung 'jug gi tshul legs par bstan cing /__phyi ma gnyis kyi dam tshig dang 'bras bu'i lam gsal bar gdams pa'o/__/bskyed rdzogs zung 'jug nyi gzhon 'char ka'i rdul/__/skal bzang blo gros ut+pal gis btung bas/__/grub pa gnyis kyi sbrang rtsi'i bcud len gyis/__/phan bde'i lang tsho rgyas byed 'di rmad byung /__/de las grub pa'i dge ba gang /__/rnyog bral shar gyi thig le'i gzugs/__/chos dbyings chu gter la bsngos pas/__/sgrib gnyis tsha gdung bcil gyur cig__/ces kun mkhyen chos kyi rgyal po rig 'dzin 'jigs med gling pa'i zhal snga nas stsal ba'i nyams su len bya'i rdo rje'i thol glu'i don 'grel nyung ngu 'di ni don gnyer can gyi ngor gzhon nu a b+hA yas rang lo bcu drug par sbyar ba'o/__/sarba sa man+ta mang+ga laM//____//__!