DKR-KABUM-15-BA-004

🚧 This website is under continued development. We appreciate your patience!

Previous Text Back to Volume PageNext Text

Wylie title	'
Location	dil mgo mkhyen brtse bka' 'bum Volume 15, Text 4, Pages (Folios 1a to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	མཆོག་གྱུར་གླིང་པ་ (mchog gyur gling pa)
Citation	Khyentse, Dilgo. '. In Skyabs rje dil mgo mkhyen brtse rin po che'i bka' 'bum, Vol. 15: . Delhi: Shechen Publications, 1994.
Genre	Detailed Explanation - rnam bshad

Tibetan Text

Wylie

[edit]

༄༅། དམ་ཆོས་རྫོགས་པ་ཆེན་པོ་སྡེ་གསུམ་གྱི་ཁྲིད་ཡིག་འདུས་གསལ་ཀུན་བཟང་དགོངས་པའི་མཛེས་རྒྱན་འོད་གསལ་གདོད་མའི་མྱུར་ལམ་ཞེས་བྱ་བ་བཞུགས་སོ།།

༄༅། །ཀ་དག་དབྱིངས་ཀྱི་སྟོན་མཆོག་ཀུན་ཏུ་བཟང༌། །ལྷུན་གྲུབ་འོད་གསལ་རང་གདངས་རྡོ་རྗེ་སེམས། །ཟུང་འཇུག་སྒྱུ་འཕྲུལ་བརྒྱུད་གསུམ་བླ་མའི་གར། །ཐེག་མཆོག་ཤིང་རྟའི་སྲོལ་འབྱེད་ཇི་སྙེད་རྒྱལ། །ཁྱད་པར་ཀུན་བཟང་རྡོ་རྗེའི་ནང་དབྱིངས་སུ། །སྲིད་ཞིའི་ཟག་པ་ཟད་པའི་ཡེ་ཤེས་གདངས། །རབ་འབྱམས་སྐུ་དང་ཞིང་ཁམས་སྒྱུ་འཕྲུལ་གྱི། །ཁྱབ་བདག་རྒྱལ་དབང་པདྨ་སཾ་བྷར་གུས། །འཕོ་ཆེན་ཡེ་ཤེས་སྐུ་ཅན་ཤྲཱི་སིངྷའི། །ཐུགས་བཅུད་རྫོགས་པ་ཆེན་པོ་སྡེ་གསུམ་གྱི། །ཟབ་ཏིག་སྲོལ་འབྱེད་བཻ་རོ་རྗེ་འབངས་གྲོགས། །ལྷ་སྲས་རྣམ་སྣང་ཡེ་ཤེས་སྡེ་ཀུན་འདུད། །རྒྱུད་དང་སྒྲུབ་སྡེའི་ཤིང་རྟ་ཆེན་པོའི་སྲོལ། །རྒྱུད་ལུང་མན་ངག་འདོད་དགུའི་དབྱིག་རྒྱ་མཚོ། །འབྱེད་མཛད་བཀའ་གཏེར་བསྟན་པའི་མངའ་བདག་ཆེ། །གཏེར་ཆེན་མཆོག་གྱུར་བདེ་ཆེན་གླིང་པར་བསྔགས། །བི་མ་དངོས་སྣང་ཀུན་གཟིགས་མཁྱེན་བརྩེའི་དབང༌། །རྣམ་སྣང་ལོ་ཆེན་ཡོན་ཏན་རྒྱ་མཚོའི་སྡེ། །དགོངས་ཀློང་ཚད་ཕེབས་ཆོས་ཀྱི་བློ་གྲོས་གསུམ། །དབྱེར་མེད་རང་རིག་གཉུག་མའི་ཐིག་ལེར་མཆོད། །ཟབ་གསང་ཆོས་གཏེར་འཕགས་པའི་སྤྱོད་ཡུལ་ཅན། །མཁའ་འགྲོ་གསང་བའི་བཀའ་རྒྱས་གཙིགས་བསྡམས་སྲོག །འབྱེད་ནུས་མིན་ཡང་ཆོས་ཀྱི་བདག་པོའི་བཀའ། །རྗེས་སུ་གནང་བཞིན་ཆ་ཤས་དགྲོལ་ལ་ཕྱོགས། །ལྷ་དང་སྲུང་མས་བཀའ་ཆད་མི་འབྱུང་ཞིང༌། །སྨིན་གྲོལ་ཉིན་བྱེད་དུས་ཀྱི་མཐར་གསལ་ཏེ། །ཟབ་རྒྱས་ངོ་མཚར་རྣམ་བཀྲའི་པདྨའི་ཚལ། །སྐལ་བཟང་རྐང་དྲུག་ཀུན་དགའི་དཔལ་སྨིན་མཛོད། །དེ་ལ་འདིར་དཔལ་ཨོ་རྒྱན་སངས་རྒྱས་གཉིས་པའི་རྒྱལ་ཚབ་འགྲོ་འདུལ་གཏེར་ཆེན་ཆོས་ཀྱི་རྒྱལ་པོ་མཆོག་གྱུར་བདེ་ཆེན་གླིང་པ་ལ་ཟབ་གཏེར་གྱི་གསང་མཛོད་བསམ་གྱི་མི་ཁྱབ་པ་བཞུགས་པ་ལས་རྒྱལ་མཚན་གྱི་ཏོག་བཞིན་ཁྱད་པར་དུ་འཕགས་ཤིང༌། །ངོ་མཚར་རྡོ་རྗེ་ཐེག་པའི་གསེང་ལམ་གྱི་རྩེ་མོ་འོད་གསལ་རྫོགས་པ་ཆེན་པོ་སེམས་ཀློང་མན་ངག་གི་སྡེ་གསུམ་གྱི་སྨིན་གྲོལ་རྩ་བ་ཡན་ལག་མཐར་ཐུག་གི་ལམ་ཡོངས་སུ་རྫོགས་པ་ལོ་ཆེན་བཻ་རོ་ཙ་ནའི་སྙིང་ཐིག་ཆེན་པོའི་ཁྲིད་ཀྱི་རིམ་པ་འཆད་པ་ལ་ལོ་རྒྱུས་བརྗོད་པས་ཡིད་ཆེས་བསྐྱེད་པ་དང༌། །ཉམས་སུ་བླང་བྱའི་ལམ་དངོས་བཤད་པའོ། །དང་པོ་ལ་སྔོན་ཇི་ལྟར་བྱུང་བ་དང༌། ད་ལྟ་གདུལ་བྱའི་སྤྱོད་ཡུལ་དུ་སྣང་ཚུལ་ལོ། །དང་པོ་ནི། ཀློང་གསལ་ཉི་མའི་རྒྱུད་ལས། བརྒྱུད་པ་ཉེ་ཟབ་ཁུངས་བཙུན་ཞིང༌། ཀུན་ཏུ་བཟང་ནས་རིམ་པར་བཤད། །ཅེས་པ་ལྟར། དད་ལྡན་ངེས་ཤེས་བསྐྱེད་པའི་ལོ་རྒྱུས་ནི། གཏེར་གཞུང་ལོ་རྒྱུས་སྙིང་གི་ཏི་ཀ་ལས། ན་མོ་གུ་རུ༔ དམ་ཆོས་རྫོགས་པ་ཆེན་པོ་སྡེ་དྲུག་ལས༔ ཐོག་མར་ལོ་རྒྱུས་ཀྱི་སྡེ་ལའང་སོགས་ནས་མཁྱེན་བརྩེའི་དབང་པོས་བྲིས་པ་དགེ །ཞེས་གསུངས་པ་ལྟར། སྐུ་འོད་གསལ་ཡེ་ཤེས་ཀྱི་ཕྱག་རྒྱ་འཕོ་ཆེན་རྡོ་རྗེའི་མཚན་དཔེར་སྨིན། གསུང་ཡེ་ཤེས་ཀྱི་ཆོ་འཕྲུལ་རྒྱུད་སྡེ་རྒྱ་མཚོ་སྟོན་པ་དང་སྡུད་པར་མཛད། ཐུགས་རིག་པ་རྩལ་གྱི་དབང་ཐོབ་པས་སྣང་སྲིད་འདོད་དགུར་བསྒྱུར་བའི་རྫུ་འཕྲུལ་དང་ཕྲིན་ལས་ལ་མངའ་དབང་འབྱོར་བའི་རིག་འཛིན་ཤྲཱི་སིངྷ། གུ་རུ་རིན་པོ་ཆེ། སློབ་དཔོན་བཻ་རོ་ཙ་ན་གསུམ་གྱི་ཐུགས་བཅུད་ཐེག་མཆོག་རྫོགས་པ་ཆེན་པོ་སྡེ་གསུམ་གྱི་མན་ངག་གི་སྙིང་པོ་མཐར་ཐུག་བསྟན་ཚུལ་གསུངས་པ་ལྟར་རོ། །གཉིས་པ་ནི། མདོ་བྱང་རབ་ཏུ་གསལ་བ་ལས། ལྟ་བ་དགོངས་ཀློང་མངོན་གྱུར་པའི༔ ཡེ་ཤེས་སྐུ་ཅན་དཔལ་སེང་ལ༔ གདམས་པའི་མཐར་ཐུག་ཞུས་པའི་ཚེ༔ མི་ཡུལ་ཀུན་ཏུ་མ་གྲགས་པའི༔ རིག་རྩལ་དབང་མཆོག་བདག་གིས་ཐོབ༔ དེ་ཉིད་བོད་དུ་སྤེལ་བའི་སྣོད༔ གཅིག་ཀྱང་མ་མཆིས་གསང་བའི་ཚེ༔ མངའ་བདག་ཁྲི་སྲོང་ལྡེའུ་བཙན་དང༔ མཁས་པའི་དབང་པོ་བཻ་རོ་དང༔ ཀུན་ལས་ཁྱད་འཕགས་མཚོ་རྒྱལ་ཏེ༔ ལས་ཅན་སྐལ་ལྡན་གསུམ་གྱི་ངོར༔ ཤྲཱི་སིངྷའི་ཐུགས་ཀྱི་བཅུད༔ བླ་མ་དགོངས་པ་རྣམ་པ་བཞི༔ སྦྱིན་ཏེ་ཡང་ཏིག་དགོངས་ཉམས་བསྟན༔ གཞན་ཡང་རྗེ་འབངས་མཆེད་བདུན་ལ༔ དམ་ཆོས་རྫོགས་ཆེན་སྡེ་གསུམ་བཤད༔ ཅེས་གསུངས་པ་ལྟར། ཕྱི་སྐོར་སེམས་སྡེ་ནམ་མཁའི་ཞུན་མའམ་ནམ་མཁའ་ཀློང་ཡངས། ནང་སྐོར་ཀློང་སྡེ་ཉི་མ་ཀློང་ཆུབ། ཤིན་ཏུ་གསང་སྐོར་མན་ངག་འོད་ཟེར་མཐའ་ཡས་སྙིང་གི་བྱང་བུ་ཞེས་མཐར་ཐུག་ཆེ་བ་བརྗོད་པའི་མཚན་དང༌། ཟབ་པས་མདུང་ཚུགས་མ། གྲངས་ཀྱི་མཚན་གསོལ་མ་བུ་བཅོ་བརྒྱད་དུ་གསུངས་ལ། དེ་ལས་ཕྱི་སྐོར་ནམ་མཁའ་ཀློང་ཡངས་སྐོར་བརྒྱད་དང༌། ནང་སྐོར་ཉི་མ་ཀློང་ཆུབ་སྐོར་དགུ་རྣམས་རིག་འཛིན་ཤྲཱི་སིངྷ་ལས་གུ་རུ་རིན་པོ་ཆེ་དང༌། སློབ་དཔོན་བོ་རོ་ཙ་ན་གཉིས་ཀས་གསན་པ་གུ་རུ་ཉིད་ལ་སྤེལ་བར་བཀའ་མ་ཁྲོལ་ཀྱང་བཻ་རོ་ལ་སྤེལ་བར་བཀས་གནང་ནས་བོད་དུ་བསྒྱུར་བ་དང༌། མན་ངག་སྐོར་དགུ་འོད་ཟེར་མཐའ་ཡས་གུ་རུ་རིན་པོ་ཆེས་སྤེལ་བར་གསུངས་པས་ན། སློབ་དཔོན་རྣམ་པ་གཉིས་རྫོགས་པ་ཆེན་པོ་སྡེ་གསུམ་གྱི་ཆོས་སྐོར་ཡོངས་སུ་རྫོགས་པ་རིག་འཛིན་ཤྲཱི་སིངྷ་ལས་གསན་ཅིང་ཐུགས་ཀྱི་བཅུད་དུ་བཟུང་བ་ཉིད། བོད་ཀྱི་རྗེ་འབངས་རྣམས་ལ་བསྩལ་བའི་དུས་ལ་བབས་པ་ན། རྒྱུད་ལུང་མན་ངག་སྤྱི་དང་བྱེ་བྲག་གི་དགོངས་པ་གཅིག་ཏུ་དྲིལ་ནས། ལོ་པཎ་རྣམ་པ་གཉིས་ཀའི་ཐུགས་ཏིག་འདི་སྨར་ཆོས་སྨིན་གྲོལ་གྱི་རྒྱུན་བཅས་ཆུ་བོ་གཅིག་འདྲེས་སུ་སོང་ནས་དམ་ཆོས་རྫོགས་པ་ཆེན་པོ་སྡེ་གསུམ་ལོ་ཆེན་བཻ་རོ་ཙ་ནའི་སྙིང་ཐིག་ཅེས་མཚན་དུ་གྲགས་པར་མངོན་ལ་ངོ་མཚར་གདམས་པ་ཁྱད་པར་ཅན་འདི་གུ་རུ་རིན་པོ་ཆེས་བསྩལ་བའི་རྗེ་འབངས་གྲོགས་གསུམ་དང༌། དེ་རྗེས་ནམ་མཁའི་སྙིང་པོ། ལྷ་སྲས་མུ་ཁྲི། ངན་ལམ་བནྡེ་ཡེ་ཤེས། གཉགས་ཛྙཱ་ན་ཀུ་མཱ་ར། ལང་གྲོ་དཀོན་མཆོག་འབྱུང་གནས། སྣ་ནམ་རྡོ་རྗེ་བདུད་འཇོམས་རྣམས་ལའང་བསྩལ་བར་གསུངས་ཤིང༌། མདོར་ན་རྨད་བྱུང་གསང་བ་ཆེན་པོ་འདི་ཉིད་ཕྱི་མའི་གདུལ་བྱ་ལ་དགོངས་ཏེ་རིན་ཆེན་ས་ཡི་གཏེར་དུ་རྒྱས་བཏབ་པ་གང་ས་ཡི་སྟེང་དུ་འདོན་པའི་དུས་སུ་བབ་པ་ན་ལུང་བསྟན་གཅེས་པའི་ལྡེའུ་མིག་ལས། དེ་ཡི་དུས་སུ་ལྷོ་ཟླའི་ཕྱོགས༔ རཏྣའི་མིང་ཅན་སྟག་གམ་གླང༔ མཆོག་གི་མིང་གྱུར་སྐྱེས་བུ་ཞིག༔ དེ་ནི་སྔོན་དུ་ལྷ་སྲས་འབྲིང༔ ད་ལྟ་ངན་ལམ་ཡེ་ཤེས་མཆོག༔ དེ་ལྟ་བུ་རུ་སྐྱེ་བ་ལེན༔ འབྲུག་གི་ལོ་ལ་གདམས་པ་འདི༔ ས་ཡི་སྟེང་དུ་དེས་འབྱིན་བྱེད༔ རྗེ་འབངས་ཡིད་ལ་ངེས་པར་གྱིས༔ ཞེས་དང༌། ཁྲི་སྲོང་ལྡེའུ་བཙན་དབང་པོའི་མིང༔ དེ་ལ་རྫོགས་པར་འཐོབ་པར་གྱུར༔ ཞེས་སོགས་ཀྱི་མཚོན། གཏེར་གནས། འདོན་པ་པོ། གཏེར་སྒོ་འབྱེད་ཚུལ། ཆོས་འཁོར་བསྐོར་ཚུལ། ལས་ཅན་ཆོས་བདག་དུས་རྟགས། བོད་ཁམས་ཕན་བྱེད་ཀྱི་ཕྲིན་ལས་རྒྱས་པར་བསྟན་པ་བཞིན་དཔལ་ཨོ་རྒྱན་ཆེན་པོ་ཡབ་སྲས་ཀྱི་ཐུགས་བསྐྱེད་དང་སྨོན་ལམ་དུས་སུ་བབ་པ་ན། དུས་གསུམ་ཀུན་མཁྱེན་མ་ཧཱ་གུ་རུའི་ཐུགས་ཀྱི་སྲས་མཆོག །མངའ་བདག་ཚངས་པ་ལྷ་ཡི་མེ་ཏོག་གི་ལྷ་སྲས་བར་པ་ས་བཅུ་དབང་ཕྱུག་མུ་རུབ་བཙན་པོའམ་ལྷ་སྲས་ལོ་ཙ་བ་ཞེས་མཁས་གྲུབ་ཀྱི་མཛད་པ་རྨད་དུ་བྱུང་བ་དེས། བློན་པོ་འུ་རིང་གི་བུ་བསད་པས་རྒྱལ་ཁྲིམས་ལ་སྙད་བཏགས་ནས་ཁམས་ཀྱི་ཕྱོགས་སུ་སྤྱུགས་སྐབས་ཡེ་རྒྱལ་ནམ་མཁའ་མཛོད་དུ་ཨོ་རྒྱན་སྤྲུལ་པའི་རྗེ་འབངས་དང་བཅས་པ་སྤྱན་དྲངས་ནས་བཀའ་འདུས་ཆོས་ཀྱི་རྒྱ་མཚོའི་དཀྱིལ་འཁོར་ཞལ་ཕྱེས་ཏེ་གུ་རུའི་ཐུགས་དམ་ཟབ་པ་སྐོར་བདུན་བརྒྱུད་ལུང་མན་ངག་དང་བཅས་པའི་གསང་མཛོད་གཏད་ཅིང༌། མདོ་ཁམས་སྨད་ཀྱི་ས་གཞི་ཐམས་ཅད་ལ་ཞབས་ཀྱིས་བཅགས་ཤིང༌། སྒྲུབ་གནས་མཛད་ནས་སྣོད་བཅུད་བྱིན་གྱིས་བརླབས་ཤིང་ཟབ་གཏེར་མང་པོའི་རྒྱས་བཏབ་པའི་རྟེན་འབྱུང་གིས་མདོ་ཁམས་སྨད་ཀྱི་ལྗོངས་སུ་སྙིགས་མ་ལྔ་ཡི་མུན་རུམ་ཆེ་ཆེར་བདོ་བའི་སྐབས་སུ་ཡང་མཁན་སློབ་ཆོས་གསུམ་རྗེ་འབངས་དང་བཅས་ལས་ཅན་སྨོན་ལམ་དག་པའི་ལོ་པཎ་མཁས་གྲུབ་ཐམས་ཅད་ཀྱི་སྐྱེ་བ་སྐྱེས་བུ་དམ་པ་དུ་མ་ཚོགས་པས་བཀའ་བབས་བདུན་གྱི་ཤིང་རྟ་དྲངས་ཏེ་ཐུབ་བསྟན་རྫོགས་ལྡན་དང་པོའི་དགའ་སྟོན་ལ་སྦྱར་བའི་མཛད་པ་མཐའ་ཀླས་པའི་སྒོ་འབྱེད་པདྨའི་ཕོ་ཉ་ཨོ་རྒྱན་མཆོག་གྱུར་བདེ་ཆེན་ཞིག་པོ་གླིང་པ་ཞེས་གཞི་ལམ་འབྲས་བུའི་རྒྱུད་དོན་རྒྱ་མཚོ་དང་འབྲེལ་བའི་མཚན་གྱི་རྔ་གསང་འཇིག་རྟེན་གསུམ་ན་སྙན་པར་གྲགས་པ་གང་ཉིད་ལ་ཟབ་མོའི་གཏེར་ཁ་སུམ་ཅུ་རྩ་བརྒྱད་ཐུན་མོང་གི་གདུལ་བྱའི་སྤྱོད་ཡུལ་དུ་སྨིན་པའི་དགུ་པ། རྫོགས་པ་ཆེན་པོ་སྡེ་གསུམ་ཀློང་དགུའི་མན་ངག་གི་བཅུད་དྲིལ། སྙིང་ཐིག་སྐོར་བདུན་ལས། རྣམ་སྣང་ལོ་ཙ་ཆེན་པོའི་ཐུགས་ཀྱི་ཐིག་ལེ། མདོར་ན་འཆི་མེད་ཡེ་ཤེས་རྡོ་རྗེའི་སྐུ་ཅན་ཤྲཱི་སིངྷ། གསུང་རྡོ་རྗེ་པདྨ་སཾ་བྷ་ཝ། ལོ་ཆེན་བཻ་རོ་ཙ་ན་གསུམ་གྱི་དགོངས་བཅུད་གཅིག་དྲིལ་དབང་དང་སྒྲུབ་ཐབས་མན་ངག་ནང་རྒྱུད་ཡོ་ག་གསུམ་གྱི་མཐར་ཐུག་ཆོས་སྡེ་གཅིག་ཏུ་དྲིལ་ཏེ་གཏན་ལ་དབབ་བྱའི་དགོངས་པའི་སྐྱེལ་སོ་རྫོགས་པ་ཆེན་པོ་སྡེ་གསུམ་གྱི་གྲུབ་མཐའ་རྐང་ཚུགས་སུ་བསྟན་པས་ཤིན་ཏུ་གསང་བའི་དམ་ཆོས་རྫོགས་ཆེན་སྡེ་གསུམ་ཞེས་ཡོངས་སུ་གྲགས་པའི་རྡོ་རྗེའི་གསེང་ལམ་ཆེན་པོ་གང༌། རིན་ཆེན་ས་ཡི་སྟེང་དུ་སྣང་བའི་དུས་ལ་བབས་པ་ན། ཡབ་གཅིག་ཆོས་རྒྱལ་ཁྲི་སྲོང་གི་རྣམ་འཕྲུལ་གངས་ཅན་མཁས་གྲུབ་རྒྱ་མཚོའི་ཚོགས་རྗེ་འཇམ་དབྱངས་མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་དང་ཡབ་སྲས་གསེར་ཞལ་ལྷན་རྒྱས་པས། བོད་ཆེན་པོའི་ས་ཡི་ཐིག་ལེ། སྡེ་དགེ་ཆོས་རྒྱལ་ཆེན་པོའི་ཕོ་བྲང་གི་ཤར་ཕྱོགས་སྨད་ཤོད་ཛམ་ནང་ཕུ། གངས་རི་ལྗོངས་ཙམ་ན་འགྲན་ཟླ་དང་བྲལ་བའི་སྒྲུབ་གནས་བདེ་ཆེན་པདྨ་ཤེལ་ཕུག་གི་གནམ་མཐོང་ནས་ལས་ཅན་རྡོ་རྗེའི་འདུས་པ་ཉེར་ལྔ་ཙམ་གྱིས་མཐོང་བར་མེ་འབྲུག་རྒྱལ་ཟླ་བའི་དཀར་ཕྱོགས་ཀྱི་དགའ་བ་དང་པོར་སྤྱན་དྲངས་ཏེ་མཆོང་ཤོག་སྨུག་པོའི་ངོས་ལས་གཏན་ལ་ཕབ་པའི་ཡི་གེ་པ་འཇིགས་བྲལ་གྱི་སློབ་དཔོན་ཆེན་པོ་མཁྱེན་བརྩེའི་དབང་པོས་མཛད་དེ་མཁས་གྲུབ་ཆེན་པོ་དེ་གཉིས་ཀྱི་ཐུགས་ཀྱི་དཔལ་བེའུ་ཟབ་གསང་སྙིང་པོའི་ཏི་ལ་ཀར་བཞུགས་པ་ཉིད་མདོ་བྱང་ལས། དེ་ལ་དབང་བས་འདི་ཉིད་འཐོན་པའི་ཚེ༔ ལོ་གཅིག་གམ་ནི་ཡང་ནི་ལོ་གསུམ་ཁོང༔ སྐྱེས་བུ་དཔྲལ་བར་སྨེ་བ་དམར་པོའི་མཚན༔ བྱིས་པའི་ཚུལ་ཅན་དེ་ལ་མཐའ་ནས་སྟེར༔ གནས་ཀྱི་ཉེ་འདབས་འདི་རུ་ཤིན་ཏུ་འབྱུང༔ ཞེས་རྡོ་རྗེའི་ལུང་གི་གདམས་ཤིང་གཏད་པ་བཞིན་ངེས་པའི་དོན་དུ་འཕགས་པ་འཇིག་རྟེན་དབང་ཕྱུག་གི་ཡེ་ཤེས་ཀྱི་དབྱིངས་དང་གཉིས་སུ་མེད་པ་ལ། རྣམ་པ་ཙམ་དུ་སྣང་བཞི་མཐར་ཕྱིན་གྱི་གྲུབ་བརྙེས་རྒྱལ་མོ་གཡུ་སྒྲ་སྙིང་པོའི་རྣམ་འཕྲུལ་དུ་བསྔགས་པ་གཏེར་ཆེན་ཆོས་ཀྱི་རྒྱལ་པོའི་སྐུ་གསུང་ཐུགས་ཀྱི་སྲས་ཀུན་བཟང་འགྱུར་མེད་ཚེ་དབང་ནོར་བུ་ཞེས་མཁས་གྲུབ་ཕྲིན་ལས་ཀྱི་དཔལ་ཡོན་ཕུན་སུམ་ཚོགས་པས་ཟབ་གཏེར་སྙིང་པོའི་རིང་ལུགས་ཀྱི་བསྟན་པའི་སྲོལ་ཟིན་པའི་བཀའ་དྲིན་རྨད་བྱུང་རིག་པ་འཛིན་པ་མཆོག་ལ་སྒྲུབ་གནས་དེ་ཉིད་ཀྱི་གཟིམ་ཆུང་རྡོ་རྗེ་བཀོད་པར་མེ་སྟག་ཁྲུམ་གྱི་ཉ་བའི་ཟླ་བར་འཇམ་མགོན་རྣམ་གསུམ་ལྷན་རྒྱས་པས་ཟབ་ཆོས་འདི་ཉིད་ཀྱི་ཡི་དམ་ཁྲོ་བོ་མངོན་རྫོགས་རྒྱལ་པོའི་སྒོ་ནས་སྣང་སྲིད་བདུད་རྩིའི་དཀྱིལ་འཁོར་དུ་བྱིན་གྱིས་བརླབས་ཏེ། བོད་ཁམས་ཕན་བདེའི་དགའ་སྟོན་སྤེལ་བའི་སྐབས་ཚིག་བརྒྱུད་དུ་བསྩལ། རིགས་ཀྱི་སྲས་མཆོག་དེའི་གཏེར་ཆེན་བླ་མའི་རྣམ་འཕྲུལ་ངེས་དོན་གྲུབ་པའི་རྡོ་རྗེ། དེས་འཇམ་པའི་དབྱངས་དངོས་པདྨ་ཡེ་ཤེས་རྡོ་རྗེ་ཀུན་བཟང་འོད་གསལ་སྙིང་པོ་རྩལ་གྱིས་གསན་ནས། ཟབ་གཏེར་བཞེས་པའི་གནས་མཆོག་ཁམ་གྱི་མཆིམས་ཕུ་གཉིས་པ་དང་འདབས་འབྲེལ་བ། བཀའ་གཏེར་ཆོས་ཀྱི་ཆུ་ཀླུང་འབུམ་ཕྲག་འཁྱིལ་བ་གཞལ་མེད་ཁང་བཀྲ་ཤིས་འཆི་མེད་གྲུབ་པའི་དགའ་ཚལ་ཞེས་རྩ་གསུམ་སྤྲིན་ལྟར་གཏིབས་པའི་དྲི་གཙང་ཁང་ནས་བདག་ཅག་ལས་ཅན་འདུས་པའི་ཚོགས་སྨིན་གྲོལ་ཆིག་རྫོགས་དགྱེས་པས་བསྩལ་ཞིང་ཁོ་བོ་ལ་གཏད་རྒྱ་བཅས་མཛད་པའི་སྐལ་བཟང་ཐོབ་པའི་བཀའ་དྲིན་བྱང་ཆུབ་སྙིང་པོའི་བར་དུ་གཞལ་བའི་གནས་སུ་གྱུར་པའོ། །གཉིས་པ་ཉམས་ལེན་གྱི་ལམ་དངོས་ལ། འཇུག་སྒོ་སྨིན་བྱེད་ཀྱི་དབང༌། ཞུགས་ནས་སྒོམ་གྱི་ལམ་ཡོངས་རྫོགས་འཆད་པའོ། །དང་པོ་ནི། ལོ་རྒྱུས་སྙིང་གི་ཏི་ཀ་ལས། སྤྱི་ལ་གཅེས་པ་ཤྲཱི་སིངྷའི་དབང་བསྐུར་གསུམ༔ ཕྱི་སེམས་སྡེའི་བླ་མ་སུམ་ཅུ་རྩ་གཅིག་གི་དགོངས་པ་གཅིག་ཏུ་དྲིལ་བའི་དབང་བསྐུར་བ༔ ཡི་དམ་རྡོ་རྗེའི་དབྱིངས་ཀྱི་དབང་བཞི་སྤྱི་བླུགས་སུ་བསྐུར་བ༔ མན་ངག་ཨ་ཡིག་མདའ་འཕེན་ཏེ་ཕྱི་ཐུན་མོང་གི་དབང་བསྐུར་གསུམ༔ ནང་ཀློང་སྡེ་ལས༔ རིག་འཛིན་བཅོ་ལྔའི་བྱིན་རླབས༔ སྟོན་པ་བཅུ་གཉིས་བརྡ་དབང༔ མངོན་རྫོགས་རྒྱལ་པོའི་དོན་དབང༔ རྩ་བ་དགུ་བསྒྲིལ་ འདི་ལ་རྗེས་འབྲེལ་ཚེ་དབང་དང༌། མཁའ་འགྲོའི་དབང་བཅས་བཞུགས། མཆན། ཏེ་ནང་སྐོར་གྱི་དབང་གསུམ་བསྐུར༔ གསང་བ་མན་ངག་གི་སྡེ་ལས༔ རིག་འཛིན་བཅོ་ལྔའི་བྱིན་རླབས༔ ཞི་ཁྲོའི་དོན་དབང༔ སྒྲུབ་དབང་བརྒྱད་དུ་དྲིལ་བའི་དབང་སྟེ་གསང་སྐོར་གྱི་དབང་གསུམ་བསྐུར༔ དེ་རྗེས་སྒྲུབ་ཐབས་དགུ་ཕྲུགས་སུ་གནང༔ རྫོགས་རིམ་སྔོན་འགྲོའི་བརྡ་དབང་གསུམ་གྱི་སྨིན་པར་མཛད༔ དངོས་གཞི་ཁྲིད་གསུམ་གྱིས་གྲོལ་ཞིང༔ རྗེས་ཀྱི་མན་ངག་གསུམ་གྱིས་གྲོལ་བ་མཐར་ཕྱིན་པར་མཛད་དོ༔ ཞེས་གསུངས་པ་ལྟར་གཏེར་གཞུང་གི་དངོས་བསྟན་ནས། བཀའ་སྲུང་ཡེ་ཤེས་པ། དྲེགས་པ་ཕོ་མོ། གཏེར་སྲུང་རྣམ་གསུམ་གྱི་སྲོག་གཏད་བཅས་རྗེས་འབྲེལ་དུ་འབྱུང་བ་སྟེ། སྤྱིར་གསང་སྔགས་ཀྱི་ལམ་ལ་དབང་སྔོན་དུ་མ་སོང་ན་དངོས་གཞིའི་ལམ་ཉན་སྒོམ་ལྟ་ཅི། རྒྱུད་དང་མན་ངག་གི་དཔེ་ཙམ་ལྟ་བ་ལ་མི་དབང་ཞིང༌། བལྟས་ཀྱང་དོན་དུ་མི་འགྱུར་བ་དང༌། དབང་གིས་རྒྱུད་སྨིན་པར་བྱས་ཕྱིན་ཆད་ཟབ་ལམ་གྱི་གནད་ཀུན་ཉན་སྒོམ་སྣོད་དུ་རུང་ཞིང༌། རིམ་པ་གཉིས་ཀྱི་ལམ་ལ་བརྩོན་པས་དྲོད་རྟགས་མྱུར་དུ་འབྱུང་བ་དང༌། དེར་མ་ཟད་སློབ་དཔོན་ལྟ་དགོངས་ཅན་དང༌། སློབ་མ་སྣོད་ལྡན་ནང་འཛོམས་ན་དབང་གི་སྨིན་གྲོལ་ཅིག་ཆར་དུ་འགྱུར་བར་ངེས་པ་དང༌། སྐབས་འདིའི་རིག་པ་རྩལ་དབང་ཐོབ་པས་ནང་གི་ཡེ་ཤེས་ཀྱི་མྱོང་བ་རྒྱུད་ལ་ངེས་པར་སད་ནུས་པ་དང༌། དབང་ཐོབ་དམ་ཚིག་ལ་གནས་པས་ལམ་སྒོམ་མ་ནུས་ཀྱང་སྐྱེ་བ་བརྒྱུད་ནས་གྲོལ་བར་ངེས་པ་དང༌། དཀྱིལ་འཁོར་ཙམ་མཐོང་བས་ཀྱང་ངན་སོང་གི་སྒོ་ཁེགས་པ་སོགས་དགོས་པ་དང་ཕན་ཡོན་ཆེ་ཞིང༌། དེ་ཡང་སྤྱིར་གསང་སྔགས་ཀྱི་ལམ་ཐམས་ཅད་དབང་བཞིའི་དོན་ལས་མི་འདའ་བས་བསྐྱེད་རྫོགས་ཀྱི་མན་ངག་ཀྱང་དབང་ལས་མ་འདས་ཤིང༌། དབང་གི་དག་བྱ་སྒྲིབ་པ་བཞི་གཏོར་ཞིང༌། དག་བྱེད་སྐུ་བཞིའི་ནུས་པ་རྒྱུད་ལ་སད་པར་བྱེད་པ་མཐར་ཐུག་གི་སྐུ་བཞི་ཡང་དབང་གི་གྲུབ་དོན་ལས་མ་འདས་ལ། དེས་ན་སྐབས་འདིའི་དབང་གི་རྣམ་གྲངས་བཅུ་གསུམ་དུ་གསུངས་ཀྱང༌། དེ་ཐམས་ཅད་རྩ་བ་དབང་བཞིའི་དགོངས་པ་ལས་མ་འདས་ཞིང༌། དབང་བཞི་པོའི་མཐར་ཐུག་གི་དབང་བཞི་པ་སྟེ་བཞི་པའི་དོན་གྱི་ཡེ་ཤེས་རྒྱུད་ལ་བསྐྱེད་པ་ལ་བླ་མའི་བྱིན་རླབས་འབའ་ཞིག་གཅེས་པས་ན། སྐབས་འདིར་ཡང་སྤྱི་ལ་གཅེས་པའི་ཤྲཱི་སིངྷའི་དབང་བསྐུར་དང༌། ཕྱི་སེམས་སྡེའི་བླ་མ་སུམ་ཅུ་རྩ་གཅིག །ནང་ཀློང་སྡེའི་རིག་འཛིན་བཅོ་ལྔ། གསང་བ་རིག་འཛིན་བཅོ་ལྔ་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་དང༌། རྟོག་པ་ཆོས་སྐུའི་འདྲ་འབག་རྡོ་རྗེའི་དོ་ཧ་གླུ་རུ་གདམས་པས་ངོ་སྤྲོད་པའང་དེ་ཡིན་ཏེ། ཕྱི་སྐོར་ཁྲིད་ཀྱི་བྱིན་རླབས་ལས། རིགས་ཀྱི་བུ་དབང་བསྐུར་བའི་ཚུལ་ནི་འདི་ལྟ་སྟེ། བསྐུར་བྱ་སྐུར་བྱེད་བསྐུར་ཐོབ་དང་བྲལ་བའོ༔ ཞེས་གསུངས། དབང་བཞི་པ་དེ་ཐོབ་པས་གནད་དོན་ཆེ་བའི་རྒྱུ་མཚན་འདིའི་ལོ་རྒྱུས་སུ། ཁྲི་སྲོང་ལྡེའུ་བཙན་གྱིས་གསུངས་པ། བདག་ཅག་རྣམས་ལ་བཀའ་དྲིན་ཆེ་བ་ནི་གུ་རུ་རིན་པོ་ཆེ་ཉིད་ལགས་ཤིང༔ དེང་སང་མོན་དུ་བཞུགས༔ མོན་མོ་བཀྲ་ཤིས་ཁྱེའུ་འདྲེན་སོགས་མོན་མི་འགའ་ལ༔ སྐུ་ཡི་བཀོད་པ་སྒྱུ་འཕྲུལ་ཞི་ཁྲོའི་ལྷ་ཚོགས་སུ་བསྟན་ཅིང་སྔར་མ་གྲགས་པའི་རྫུ་འཕྲུལ་གྱི་བཀོད་པ་དུ་མ་ཞིག་བསྟན་པར་ཐོས༔ ལོ་པཎ་མཁས་གྲུབ་གཞན་རྣམས་ཀྱིས་ཀྱང་རྫུ་འཕྲུལ་ཡ་མ་ཟུང་ཅི་གནང་ནའང༔ ཨོ་རྒྱན་ཆེན་པོ་ལ་ནི་འགྲན་ཟླ་མ་མཆིས་སོ༔ འདིའི་དོན་མི་ཡུལ་དུ་རིག་པའི་རྩལ་དབང་ཐོབ་པ་ཨོ་རྒྱན་ཁོ་ན་ལས་མེད་པར་གྲགས༔ དེ་རིག་པའི་རྩལ་དབང་བསྐུར་བའི་སློབ་དཔོན་ཡེ་ཤེས་ཀྱི་སྐུ་བརྙེས་པ་རྒྱ་གར་འཕགས་ཡུལ་དུ་འགྲན་ཟླ་དང་བྲལ་བ་ཞིག་ཡོད་ཚུལ་སངས་རྒྱས་གསང་བའི་ཞལ་ནས་ཐོས༔ གཞན་ངེས་པ་མ་རྙེད་པས་དེང་ཤར་བའི་ལོ་འདིར་གུ་རུ་ཉིད་ཀྱི་རྩ་བའི་སློབ་དཔོན་དེ་ཉིད༔ རབ་གདམས་ངག་ཐོབ་པ༔ འབྲིང་རྣམ་ཐར་ཐོས་པ༔ ཐ་མའང་མཚན་ཐོས་པ་ཞིག་གི་བདག་ཅག་རྣམས་ལ་ངལ་བ་མེད་པར་དོན་དུ་གཉེར་བ་ནི་གལ་ཆེའོ༔ ཞེས་དང༌། མདོ་བྱང་དུ། ལྟ་བ་དགོངས་ཀློང་མངོན་གྱུར་པའི༔ ཡེ་ཤེས་སྐུ་ཅན་དཔལ་སེང་ལ༔ གདམས་པའི་མཐར་ཐུག་ཞུས་པའི་ཚེ༔ མི་ཡུལ་ཀུན་ཏུ་མ་གྲགས་པའི༔ རིག་རྩལ་དབང་མཆོག་བདག་གིས་ཐོབ༔ ཅེས་གསུངས་པ་ལྟར་ཟག་མེད་ཡེ་ཤེས་ཀྱི་སྐུ་བརྙེས་པའི་རིག་འཛིན་ཤྲཱི་སིངྷས་འཇིགས་མེད་རྡོ་རྗེའི་བརྟུལ་ཞུགས་གྲུབ་པས་རྡོ་རྗེའི་བླ་མ་པདྨ་སཾ་བྷ་ཝ་ལ་ཡེ་ཤེས་ཆེན་པོ་དོན་གྱི་དགོངས་ཉམས་སད་པའི་ཕྱིར་རིག་པ་རྩལ་གྱི་དབང་བསྐུར་ཞིང་སྨིན་པའི་ཚུལ་མཛད་པས་སྲིད་ཞི་འདོད་དགུར་བསྒྱུར་བའི་རྫུ་འཕྲུལ་དང་ཡེ་ཤེས་ལ་མངའ་བརྙེས་པའི་ཚུལ་བསྟན་པས། གུ་རུ་རིན་པོ་ཆེའི་འགྲོ་འདུལ་གྱི་བླ་མ་སུམ་བརྒྱ་དང་དྲུག་ཅུའི་གཙོ་བོ་རིགས་ཀྱི་བདག་པོ་ཤྲཱི་སིངྷ་ཡིན་པར་གསུངས་པས་ཤེས་ལ། དབང་གི་ཡེ་ཤེས་དེའི་སྲོག་རྒྱུད་ལ་འཛིན་པ་ནི་དམ་ཚིག་འབའ་ཞིག་ལ་རག་ལས་པས་དབང་ཐོབ་ནས་དམ་ཚིག་གི་རྣམ་གྲངས་ཤེས་པས་སྲུང་བར་གཅེས་ཤིང༌། དེ་ལའང་དབྱེ་བསྡུའི་ཚུལ་དུ་མ་གསུངས་ཀྱང༌། ཅུང་ཟད་ཉམས་ཆག་བྱུང་ནའང་བཤགས་པས་སོར་ཆུད་པ་ཤིན་ཏུ་གལ་ཆེ་བ་འཕྲོས་སུ་གདམས་པའོ། །གཉིས་པ་ཉམས་སུ་བླང་བྱའི་ལམ་དངོས་བཤད་པ་ལ། མདོ་བྱང་ལས། འདི་བརྒྱད་ཀུན་ལ་རྩ་བའི་ཆོས་བཞི་ནི༔ ཕྱི་སྐོར་སེམས་སྡེ་ནམ་མཁའ་ཀློང་ཡངས་དང༔ ནང་སྐོར་ཀློང་སྡེ་ཉི་མ་ཀློང་ཆུབ་དང༔ གསང་སྐོར་མན་ངག་འོད་ཟེར་མཐའ་ཡས་ཏེ༔ ཕྱི་སྐོར་ནམ་མཁའ་ཀློང་ཡངས་སྐོར་བརྒྱད་དང༔ ནང་སྐོར་ཉི་མ་ཀློང་ཆུབ་སྐོར་དགུ་རྣམས༔ སློབ་དཔོན་བཻ་རོ་ཙ་ནས་བོད་དུ་བསྒྱུར༔ འདི་ནི་ཤྲཱི་སིངྷའི་ཐུགས་བཅུད་དེ༔ ཟབ་ལ་འདྲིལ་ཞིང་གཞན་ལ་མ་བསྟན་པ༔ སློབ་དཔོན་བདག་ལ་སྤེལ་བར་བཀའ་གནང་མེད༔ བཻ་རོ་ལ་ནི་གནང་བ་བསྩལ་འདུག་པས༔ མ་བུར་བསྡེབས་ཏེ་འདི་རུ་བཞག་པའོ༔ མན་ངག་སྐོར་དགུ་འོད་ཟེར་མཐའ་ཡས་ནི༔ པདྨ་བདག་གི་དཔལ་སེང་ཉིད་ལ་ཞུས༔ ཟབ་པའི་མཐར་ཐུག་འདི་རུ་གདམས་པ་ནི༔ མན་ངག་ཉི་ཤུ་རྩ་དྲུག་བསྟན་པའོ༔ ཞེས་གསུངས་པ་ལྟར་ཕྱི་སྐོར་སེམས་སྡེ། ནང་སྐོར་ཀློང་སྡེ། གསང་སྐོར་མན་ངག་སྡེའི་ཟབ་ཏིག་དབང་དང༌། བསྐྱེད་རྫོགས་ཀྱི་གདམས་པ་རྒྱ་ཆེར་བཞུགས་པའི་དང་པོ་ཕྱི་སྐོར་སེམས་སྡེ་ནམ་མཁའ་ཀློང་ཡངས་ཀྱི་མན་ངག་ལ་བསྐྱེད་རྫོགས་ཀྱི་དོན་གཉིས་ལས། དང་པོ་བསྐྱེད་རིམ་ལའང༌། བླ་མའི་བྱིན་རླབས་ལམ་དུ་བྱ་བ་རིག་འཛིན་གྱི་སྲོག་སྒྲུབ་དང༌། དེ་ཉིད་ཡི་དམ་གནས་བསྒྱུར་གྱི་བསྒྲུབ་པའོ། །དང་པོ་ལ་གཉིས། ཀུན་ལ་གཅེས་པ་སྔོན་འགྲོའི་ཉམས་ལེན་དང༌། དངོས་གཞི་རིག་འཛིན་བླ་མའི་བྱིན་རླབས་ལམ་བྱེད་ཀྱི་བསྐྱེད་རིམ་བསྒོམ་ཚུལ་ལོ། །དང་པོ་ལའང༌། ཐུན་མོང་དང༌། ཁྱད་པར་གྱི་སྔོན་འགྲོའོ། །དང་པོ་ནི། དེ་ཡང་ངོ་བོ་མི་ཁོམ་པ་བརྒྱད་ཀྱི་ལྡོག་ཆ་དལ་བ་བརྒྱད་དང༌། དེའི་ཁྱད་པར་གྱི་ཆོས་རང་གཞན་གྱི་འབྱོར་བ་བཅུ་དང་ལྡན་པ་སྟེ། དལ་འབྱོར་གྱི་ཆོས་བཅོ་བརྒྱད་དང་ལྡན་པའི་མི་ལུས་ཙམ་པོ་བ་དང༌། ཁྱད་པར་ཅན། མི་ལུས་རིན་པོ་ཆེ་རྣམས་ཀྱི་རྒྱུ་དང༌། དཔེ་དང༌། གྲངས་སོགས་གང་གི་སྒོ་ནས་བསམ་ཀྱང་ཤིན་ཏུ་རྙེད་དཀའ་ཞིང་ཕན་འདོགས་བསམ་གྱི་མི་ཁྱབ་པ་དང་ལྡན་པ་འདི་ལྟ་བུ་རྙེད་དུ་ཟིན་ཡང༌། ནམ་མཁའ་རིན་པོ་ཆེའི་མདོ་ལས། བཅོམ་ལྡན་འདས་དལ་འབྱོར་ཇི་ལྟར་བལྟ་བར་བྱ། བཀའ་བསྩལ་པ། སེམས་རྣམ་པར་རྟོག་པས་དབྱེན་བཅོས་ཏེ་གཡེང་བ་ནི་བྲེལ་བ་ཞེས་བྱའོ། །སེམས་རྣམ་པར་རྟོག་པ་ཞི་ནས་རང་བཞིན་དུ་གནས་པ་ནི་དལ་བ་ཞེས་བྱའོ། །འབྱོར་བ་ནི་སེམས་ཀྱི་རང་བཞིན་ཤེས་པ། བློ་ཡང་དག་པའི་དོན་ལ་འབྱོར་བས་ན་འབྱོར་བ་ཞེས་བྱའོ། །ཞེས་གསུངས་པ་ལྟར། མི་ཡི་ལུས་སུ་གྱུར་ན་ཡང་སེམས་རྣམ་རྟོག་གི་དབྱེན་བཅོས་པའི་ཚེ་འདིའི་སྣང་བ་འབའ་ཞིག་ལ་སྤྱོད་དེ་འཇིག་རྟེན་ཕྱི་མ་མི་ཤེས་པའི་མི་ཁོམ་པའི་གནས་ལས་མ་ཐར་ན་དལ་བ་དོན་ལྡན་སྙིང་པོར་ལེན་པའི་ཆོས་བྱར་མི་བཏུབ་པས། སེམས་རྣལ་དུ་གནས་ཏེ་སེམས་ཀྱི་རང་བཞིན་ཤེས་པས་བློ་ཡང་དག་པའི་དོན་ལ་འབྱོར་བའི་ཕྱིར་མྱུར་དུ་ཐེག་མཆོག་རྫོགས་པ་ཆེན་པོའི་ལམ་གྱི་རྣལ་འབྱོར་མཐར་སོན་པར་མ་བྱས་ན། ཕྱི་སྣོད་ཀྱི་འཇིག་རྟེན་སྲ་ཞིང་འཐས་པ་ལྟར་སྣང་བ་རྣམས་ཀྱང་མཐར་མེ་བདུན་ཆུས་གཅིག་གིས་འཇིག་པའི་ཚེ་ཐལ་བ་ཙམ་ཡང་ལུས་པར་མི་འགྱུར། ནང་བཅུད་ཀྱི་སེམས་ཐམས་ཅད་ཀྱང་སྐྱེས་ནས་ཚེ་ཐར་དུ་སོང་བ་གཅིག་ཀྱང་མེད་པས་རང་ཉིད་ཀྱང་ངེས་པར་འཆི་བ་མ་ཟད། དོ་ནུབ་ཙམ་ཡང་མི་འཆི་བའི་གདེང་ནི་མེད། འཆི་བའི་ཚེ་ཆོས་རྣམ་པར་དག་པ་ཁོ་ན་མ་གཏོགས་གཞན་ཅི་ཡང་མི་ཕན། དེར་མ་ཟད་ད་ལྟའི་སེམས་ཀྱི་ཀུན་རྟོག་རེ་ལའང་འཁྲུལ་པའི་འཇིག་རྟེན་གྲངས་མེད་པ་བཀོད་ཀྱང་སྐད་ཅིག་རེ་རེས་ཀྱང་སྐྱེ་འགགས་སུ་གྱུར་བའི་ནང་གི་མི་རྟག་མངོན་སུམ་ཚད་མའི་མ་ཚང་ཤེས་པས་གཟུང་འཛིན་འཁྲུལ་པའི་རྣམ་རྟོག་རྒྱུན་མཐུད་ལ་ངན་ཤོར་དུ་མི་གཏོང་བར་རིག་པ་གཉུག་མའི་གཏན་སྲིད་འཛིན་ཅི་ནུས་ཀྱི་རྣལ་འབྱོར་ལ་འབད་པ་རྩལ་དུ་བཏོན་པ་གཅེས་པ་ལས། ཤི་ནས་ཅང་མེད་དུ་མི་འགྲོ་བར་ལས་འབའ་ཞིག་གི་རྗེས་སུ་འབྲང་དགོས་པ་རྟེན་འབྱུང་བསླུ་མེད་ཀྱི་དོན་ཤེས་པས། རྟེན་འབྱུང་གི་མཐར་ཐུག་སྟོང་ཉིད། སྟོང་ཉིད་ཀྱི་གཤིས་ལུགས་ཡེ་ཤེས་རང་རིག་ལ་ཐུག་པས་ཆོས་ཕུང་བརྒྱད་ཁྲིའི་མན་ངག་གི་ཐུས་ཀ་འོད་གསལ་རིག་པའི་ཡེ་ཤེས་ཀྱི་ཡིན་ལུགས་མངོན་སུམ་རྟོགས་ན་ཀུན་རྫོབ་རྒྱུ་རྐྱེན་གྱི་བྱས་ཆོས་འཁྲུལ་པ་ཐམས་ཅད་བྱར་མེད་ཀྱི་ཀློང་དུ་ངེས་པར་དག་པའི་ཐབས་ཁོ་ན་ལ་མ་བརྩོན་ན། སྡིག་པའི་ལས་ཀྱི་ངན་སོང་གསུམ་དུ་སྐྱེས་ན། སྡུག་བསྔལ་བཟོད་པའི་གླགས་མེད། ཟག་བཅས་ཀྱི་དགེ་བས་མཐོ་རིས་གསུམ་དུ་སྐྱེས་ཀྱང༌། འགྱུར་བའི་སྡུག་བསྔལ་དང༌། སྡུག་བསྔལ་གྱི་སྡུག་བསྔལ་དང༌། ཁྱབ་པ་འདུ་བྱེད་ཀྱི་སྡུག་བསྔལ་ཁོ་ན་ལས་མ་འདས་པས། ད་རེས་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་འདི་ལས་ཅི་ནས་ཀྱང་ཐར་པ་ཞིག་བྱ་དགོས། འཁོར་བའི་འཁྲུལ་སྣང་དེའི་རྩ་བ་ཡང༌། ཕྱོགས་ཀྱི་གླང་པོས། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཡིན། །ཞེས་གསུངས་པ་ལྟར། འཁྲུལ་བའི་རྣམ་རྟོག་རང་ག་མའི་མཚང་བརྟོལ་ནས། འཁྲུལ་མེད་ཡེ་ཤེས་རྗེན་པའི་ཡིན་ལུགས་མངོན་གྱུར་གྱི་ཏིང་འཛིན་ལ་ངལ་འཚོ་བའི་ཐབས་ཀྱི་གསེང་ལམ་ཟླ་མེད་པ་འོད་གསལ་ཐེག་པའི་རྩེ་རྒྱལ་གྱི་ལམ་མ་ནོར་བ་སྟོན་པའི་ཆེད་དུ། ཐེག་པ་མཆོག་གི་དགོངས་སྤྱོད་ལ་མངའ་བརྙེས་པ་དགེ་བའི་བཤེས་གཉེན་མཚན་ཉིད་དང་ལྡན་པ་མཉེས་པ་གསུམ་གྱིས་བསྟེན་ནས། འོད་གསལ་རྡོ་རྗེ་སྙིང་པོའི་ལྟ་སྒོམ་སྤྱོད་འབྲས་ཀྱི་གནས་ཇི་སྐད་བསྟན་པ་རྣམས་བྱིས་པ་དང་སྡིག་གྲོགས་རྟོག་གེའི་བློ་ངན་གྱི་རྗེས་སུ་འབྲང་བའི་གཞན་དབང་དུ་མ་སོང་བར་ལག་ལེན་ཐེབ་ངེས་པས་སྐྱེ་འཆིའི་འཁྲུལ་སྣང་དག་པའི་ཟབ་ལམ་ལ་གདེང་དུ་ཁེལ་བ་ཞིག་ཅིས་ཀྱང་དགོས་པས་ཉིན་ཞག་རེ་རེའི་ཁོངས་སུ་ཡང་ཅི་ནུས་སུ་ཆོས་ཀྱི་དོན་རྒྱུད་ལ་སྦྱོར་བར་བྱ། དེ་ལྟར་ནུས་པ་བླ་མ་དང་དཀོན་མཆོག་རིན་པོ་ཆེ་མཁྱེན་སྙམ་པའི་དད་པ་དང༌། ངེས་འབྱུང་གི་རྒྱུད་སྦྱངས་ཞིང་བློ་འཁུལ་བའི་ཐབས་གལ་ཆེ་བས་འདིར་མདོར་བསྡུས་སུ་བསྟན་པ་བཞིན་ཁྲིད་གཞུང་གཞན་དག་ལས་རྒྱས་པར་འབྱུང་བ་ལྟར་དམིགས་རྐང་ཐུན་དུ་བཅད་ཅིང༌། མྱོང་བ་ཐོན་ཐོན་གྱིས་སེམས་རྒྱུད་ལས་སུ་རུང་བ་མ་བྱས་ན་དངོས་གཞིའི་ལམ་གྱི་ཉམས་རྟོགས་ཡང་དག་པ་རྒྱུད་ལ་མི་སྐྱེ། སྐྱེས་ཀྱང་མཐར་ཕྱིན་པ་མི་འབྱུང་བས་ཐོག་མ་ཉིད་ནས་དངོས་གཞི་ལ་འཇུག་སྔ་མི་བྱ་བར་སྔོན་འགྲོའི་རྣལ་འབྱོར་ལ་འབད་པ་རྩལ་འདོན་ཤིན་ཏུའང་གལ་ཆེའོ། །གཉིས་པ་ཁྱད་པར་གྱི་སྔོན་འགྲོ་ལ་དྲུག་ལས། ཐོག་མར་སྐྱབས་འགྲོ་ནི། དོན་དམ་རང་བཞིན་ཡོངས་ཤེས་ཀྱི་སྐྱབས་འགྲོ་རང་རིག་བདེ་གཤེགས་སྙིང་པོ་མཆོག་གསུམ་གཞིར་གནས་ཀྱི་ཡེ་ཤེས་གསུམ་རྫོགས་སུ་བཞུགས་པ་སོ་སོ་རང་རིག་པས་མངོན་དུ་བྱེད་པ་དང༌། ཀུན་རྫོབ་ཀྱི་སྐྱབས་འགྲོའི་དམིགས་རྣམ་རིག་འཛིན་ཆེན་པོ་ཤྲཱི་སིངྷ་ལ་མཆོག་གསུམ་རྩ་གསུམ་སྐུ་གསུམ་གྱི་ལྷ་ཚོགས་ཀྱིས་བསྐོར་བ་མདུན་མཁར་གསལ་བའི་སྤྱན་སྔར་རང་གཞན་མཁའ་ཁྱབ་ཡིད་ཅན་འཁོད་པས་བྱང་ཆུབ་སྙིང་པོའི་བར་སྐྱབས་སུ་འགྲོ་བར་བསམ་པས། ཀུན་གཞིའི་དག་པའི་སངས་རྒྱས་དང༔ སོགས་ནས་གྲངས་བསགས། གཉིས་པ་སེམས་བསྐྱེད་ནི། བདག་གཞན་གཉིས་མེད་ཁྱབ་གདལ་ཡེ་ཤེས་ཀྱི་རང་གདངས་རང་བྱུང་ཐུགས་རྗེའི་འཇུག་པ་རྒྱུན་མི་ཆད་དུ་བརྡལ་བ་དོན་དམ་དང༌། མཁའ་མཉམ་གྱི་ཡིད་ཅན་འོད་གསལ་ཆོས་ཉིད་ཀྱི་འཁོར་ལོ་ལས་གཞན་དུ་མ་གྱུར་ཀྱང་གནས་ལུགས་མ་རྟོགས་འཁྲུལ་པའི་གཞན་དབང་ཅན་ཀུན་གདོད་མའི་གཞི་ཐོག་ཏུ་བསྒྲལ་བའི་བློས་སྙིང་རྗེ་དྲག་ཏུ་བསྐྱེད་པ་ཀུན་རྫོབ་ཀྱི་སེམས་བསྐྱེད་པ་ཟུང་འཇུག་གིས། ཨེ་མ་ཧོ་བདེ་གཤེགས་སྙིང་པོ་ལས༔ སོགས་བརྗོད། གསུམ་པ་ཡན་ལག་བདུན་པ་ནི། དོན་དམ་བསགས་སྦྱངས་ཀྱི་སྤྲོས་པ་ཐམས་ཅད་ཀ་ནས་དག་པའི་ཆོས་ཉིད་ཀྱི་གཤིས་ལུགས་ལ་འཁོར་གསུམ་གྱི་མཚན་འཛིན་ཅན་ལ་མི་ལྟོས་པར་ཚོགས་ཆེན་ཡེ་རྫོགས་སུ་བཞུགས་པའི་དོན་ལ་གསལ་འདེབས་པས། ཀུན་རྫོབ་སྒྱུ་མ་ལྟ་བུའི་ཡེ་ཤེས་ཀྱི་རོལ་མོ་ཕྱག་འཚལ་མཆོད་འབུལ་སོགས་ཡན་ལག་བདུན་གྱི་ཏིང་འཛིན་ཅིར་ཡང་སྤྲུལ་པས་ཚོགས་བསགས་ཀྱི་དམིགས་པ་དང་མ་བྲལ་བས། སྣང་བ་རྣམ་དག་བདེ་གཤེགས་ལ༔ སོགས་བརྗོད། བཞི་པ་སྒྲིབ་སྦྱོང་རྡོར་སེམས་ནི། ཀུན་རྟོག་འཁྲུལ་པའི་ལས་ཉོན་ཐམས་ཅད་ཡུལ་དབང་ཤེས་གསུམ་འདུས་ཏེ་རེག་པས་བྱེད་པ་ལྟར་སྣང་ཡང་དོན་བཅིངས་གྲོལ་མེད་པའི་དབྱིངས་ལ་ཕན་གནོད་ཀྱི་ཡུལ་རང་མཚན་དུ་མ་གྲུབ་པ་ཀ་ནས་དག་པའི་དབྱིངས་སུ་མཉམ་པར་བཞག་པས། རིག་སྟོང་རྡོ་རྗེ་སེམས་དཔའི་ཡེ་ཤེས་གཅིག་ཏུ་རྟོགས་པ་དོན་གྱི་བསགས་སྦྱངས་དང༌། རྣམ་པ་ཙམ་དུ་རྡོར་སེམས་བསྒོམ་བཟླས་འོད་ཟེར་སྤྲོ་བསྡུ་དོན་གཉིས་སྒྲུབ་པའི་དམིགས་པ་སྤྱི་ལྟར་བྱ་བས། ཡུལ་དུ་འཁྲུལ་པའི་ཐ་མལ་ལུས༔ སོགས་ནས་མཐར་སྙིང་པོ་ཡིག་དྲུག་དང་ཡིག་བརྒྱའང་བཟླས་པས་ལེགས་ཆེ་ཤིང་མཐོལ་བཤགས་དང༌། དམིགས་མེད་ཀྱི་ལྟ་བས་རྒྱས་འདེབས་བྱ། ལྔ་པ་ཚོགས་བསགས་ནི། སྐུ་གསུམ་ཞིང་ཁམས་རྒྱ་མཚོའི་བཀོད་པ་ངོ་བོ་རང་བཞིན་ཐུགས་རྗེའི་ཡེ་ཤེས་གསུམ་ལྡན་གྱི་གནས་ལུགས་སུ་རྟོགས་པ་དོན་དམ་གྱི་ཚོགས་བསགས་དང༌། རྣམ་པ་ཟག་མེད་ཡེ་ཤེས་ཀྱི་བཀོད་པའི་ཆོ་འཕྲུལ་སྒྲོན་མ་བསམ་གྱི་མི་ཁྱབ་པའི་སྤྲིན་ཕུང་མཁའ་ཁྱབ་ཀྱི་ཚོགས་ཞིང་ལ་འབུལ་བའི་བློས་མཎྜལ་ཚོམ་བུའི་བརྒྱན་པ་འབུལ་ཏེ། ངོ་བོའི་ཞིང་ཁམས་རྒྱ་ཆེར་བར༔ སོགས་གྲངས་བསགས། དྲུག་པ་བླ་མའི་བྱིན་རླབས་ནི། དོན་དམ་ཆོས་ཉིད་དོན་གྱི་བླ་མའི་རང་ཞལ་སོ་སོ་རང་རིག་པའི་ཡེ་ཤེས་མཆོག་གི་རང་བྱུང་རིག་པའི་གཤིས་ལུགས་མངོན་སུམ་མཇལ་བའི་མོས་གུས་ཀྱིས་འཁྲུལ་རྟོག་གཞི་གྲོལ་དག་པའི་བྱིན་རླབས་སྩོལ་བར་གསོལ་བ་གདབ་པ་དང༌། ཀུན་རྫོབ་འོད་གསལ་ཡེ་ཤེས་ཀྱི་སྐུ་བརྙེས་པ་དཔལ་ཧེ་རུ་ཀ་འཇིགས་པ་མེད་པ་ཤྲཱི་སིངྷ་དཀར་སྨུག་རྣལ་འབྱོར་སྤྱོད་པའི་ཆ་ལུགས་ཅན་ཕྱག་གཡས་སྡིག་མཛུབ་ནམ་མཁར་གཏོད་པ། གཡོན་བྷཉྫ་བདུད་རྩིས་བཅུད་བཀང་དཀུར་བསྟེན་པ། ཞབས་སེམས་དཔའི་སྐྱིལ་ཀྲུང་གིས་པདྨ་ཉི་ཟླའི་སྟེང་དུ་བཞུགས་པའི་འཁོར་དུ་སེམས་སྡེའི་རིག་འཛིན་སུམ་ཅུ་རྩ་གཅིག་གིས་མཚོན་པའི་བརྒྱུད་གསུམ་རིག་འཛིན་བླ་མས་བསྐོར་བ་གསལ་ཏེ་མོས་གུས་ཀྱི་འཇུག་པ་རྩེ་གཅིག་པས་རྒྱས་པར་སྤྲོ་ན་བྱང་གཏེར་བླ་མ་སྐུ་གསུམ་དང༌། བརྒྱུད་འདེབས་རྒྱས་པ་སྔོན་དུ་འགྲོ་བས། ཀུན་གཞི་དག་པའི་བླ་མ་ལ༔ སོགས་གསོལ་འདེབས་གྲངས་བཟུང༌། ཐུན་མཐར་དབང་གཞི་ལེན་པའི་དམིགས་གནད་སྤྱི་ལྟར་བྱའོ། །སྐབས་འདིར་སྤྱི་ལ་གཅེས་པའི་རིག་འཛིན་བླ་མའི་ཟབ་དབང་གི་ནང་གསེས་ཐུན་མོང་གི་བྱིན་རླབས་ཀྱི་ཕྲིན་ལས་ཉིད་བླ་མའི་རྣལ་འབྱོར་གྱི་སྒྲུབ་པའི་ཚུལ་དུ་སྦྱར་བ་འགལ་བ་མེད་སྙམ་གྱི་སྔོན་འགྲོའི་ངག་འདོན་ཁྲིགས་བསྡེབས་སུ་གསལ་བ་ལྟར་རོ། །སྤྱིར་དངོས་གཞི་ཉམས་རྟོགས་སྐྱེ་བ་ལ་སྔོན་འགྲོ་གནད་དུ་སྨིན་པ་གཅེས་པས་ཉམས་ལེན་སྨིན་ཁྲིད་དུ་བྱེད་ན་ཕྱི་ནང་གསང་བའི་སྔོན་འགྲོ་འདི་དག་འབུམ་ཕྲག་རེ་རེ་མ་མཐའ་བྱས་པ་བསགས་དགོས་པས་ན། དེ་དག་གི་སྐབས་སུ་སོ་སོའི་གོ་དོན་དང༌། རྣམ་བཞག །བསླབ་བྱ་སོགས་ཤེས་ན་ཆེས་ལེགས་ཀྱང་ཆོས་སྐོར་འདི་ཤིན་ཏུ་རྒྱ་ཆེ་བས་ཡིག་ཚོགས་ཆེས་ཐལ་བ་ལ་འཇིགས་ཏེ་མ་སྤྲོས་པས། སློབ་དཔོན་གྱིས་བཤད་ནུས་དགོས་ལ། ངག་འདོན་རིགས་ཀྱང་ཟབ་ཏིག་སྙིང་པོ་རྡོ་རྗེའི་ཚིག་རྐང་ཙམ་ལས་མ་མཆིས་པས་དང་པོའི་ལས་ཅན་གྱི་བློས་མ་ཆུད་ན་དམིགས་པ་གསལ་འདེབས་ལྟ་བུར་ཅུང་ཟད་རྒྱས་ན་ལེགས་སྙམ་གྱིས་ཟུར་བཀོད་དུ་བྲིས་པ་ལྟར་རོ། །གཉིས་པ་རིག་འཛིན་བླ་མའི་བྱིན་རླབས་ལམ་བྱེད་ཀྱི་ཕྱི་སྐོར་བླ་མའི་བསྙེན་སྒྲུབ་ཇི་ལྟར་བྱ་བའི་ཚུལ་ལ་དངོས་དང་ཞར་བྱུང་ངོ༌། །དང་པོ་ནི། སྐུ་བསྐྱེད་རིམ་ཕྱག་རྒྱ། གསུང་བཟླས་པའི་སྔགས། ཐུགས་འོད་གསལ་དེ་ཁོ་ན་ཉིད་ཀྱི་ཏིང་ངེ་འཛིན་ནོ། །དང་པོ་ལ། སྔོན་འགྲོ་དང༌། དངོས་གཞིའོ། །དང་པོ་ནི། ཡིད་དང་མཐུན་ཞིང་རྣམ་གཡེང་མེད་པའི་གནས་ཁང་བྱི་དོར་བྱ། སྔོན་འགྲོའི་སྐབས་མཚམས་མ་བསྡམས་ན་སྐབས་འདིར་ཕྱི་ནང་གི་རྒྱུ་འགྲུལ་བསྡམས། སྤྲོ་ན་སྒྲུབ་པའི་རྟེན་རིག་འཛིན་བླ་མའི་གཙོ་འཁོར་གྱི་སྐུ་འབག་བྲིས་འབུར་གང་རུང་གི་མདུན་དུ་སྨན་རཀ་གཏོར་གསུམ། ཉེར་སྤྱོད་བཅས་བཤམས། བསྙེན་སྒྲུབ་ཀྱི་ཐོག་མཐའ་དང་ཡར་མར་གྱིས་ཚེས་བཅུ་ལ་ཚོགས་མཆོད་རྒྱས་པ་དང༌། བཀའ་གཏེར་སྲུང་མའི་གཏོར་འབུལ། རྒྱལ་ཆེན་བཞི་དང༌། དཀར་བགེགས་ཀྱི་གཏོར་མ་བཅས་འདུ་བྱས་ལ། ཡར་ངོའི་ཚེས་བཅུ་སོགས་གཟའ་སྐར་ལེགས་པ་ནས་བརྩམས་ཏེ། བསྙེན་པའི་དབུ་བརྩམས་པའི་སྐབས་གནས་གཞིའི་བདག་པོ་ལ་དཀར་གཏོར་དང་གསེར་སྐྱེམས། བགེགས་གཏོར་བསྔོས་ལ་གནས་ཁང་གུ་གུལ་གྱི་བདུག །ཡུངས་ཀར་བྲབ། སྒོ་དྲུང་གི་ཐོ་མདུན་རྒྱལ་ཆེན་གཏོར་མ་བཤམས་ལ་མཆོད་དེ་ཕྲིན་ལས་བཅོལ་ཞིང་བརྟན་བཞུགས་བྱ། སྲུང་འཁོར་གྱི་རྒྱས་བཏབ་ནས། དངོས་གཞིའི་སྒོམ་བཟླས་ལ་འཇུག་པ་འོག་མ་རྣམས་ལའང་རིགས་འགྲེ་ཤེས་པར་བྱའོ། །གཉིས་པ་དངོས་གཞིའི་ཉམས་ལེན་ལ། སྐུ་བསྐྱེད་རིམ་ཕྱག་རྒྱའི་ཏིང་འཛིན་ནི། རྒྱུ་ཏིང་ངེ་འཛིན་གསུམ་གྱི་ཁོག་ཕུབ་པ། འབྲས་བུ་རྟེན་དང་བརྟེན་པའི་དཀྱིལ་འཁོར་པའི་རྣམ་བཞག་སྤྱི་ལྟར་ངེས་པས་གསལ་བཏབ་སྟེ་སྣོད་བཅུད་ཡེ་ཤེས་ཀྱི་འཁོར་ལོ་རྫོགས་པའི་གཞལ་མེད་ཁང་རྟ་བབ་སྣམ་བཞི་མ་སྤྱི་ལྟར་གྱི་དབུས་སུ་ཨིནྡྲ་ནི་ལའི་གྲུ་ཆད་སྟེང་སྣ་ཚོགས་པདྨ་འདབ་བརྒྱད་ཀྱི་ཟེའུ་དམར་སེར་མཐོ་བའི་སྟེང་ཁམས་གསུམ་གྱི་འདོད་ཆགས་དག་པའི་བརྡར་པདྨ་དམར་པོ་སུམ་བརྩེགས་ཀྱི་སྟེང༌། ཞེ་སྡང་དག་པའི་ཉི་དཀྱིལ་གཏི་མུག་དག་པའི་ཟླ་དཀྱིལ་སྟེང་དུ་རང་རིག་བྱང་ཆུབ་ཀྱི་སེམས་བདེ་གཤེགས་སྙིང་པོ་དང་ངོ་བོ་དབྱེར་མེད་པའི་བདག་ཉིད་ལ་ཐེག་མཆོག་དོན་གྱི་དགོངས་པ་སྟོན་པའི་བླ་མ་ཉིད་རྣམ་པའི་སྣང་ཆ་ཕྱོགས་དུས་རྒྱལ་བ་ཀུན་གྱི་སྐུ་གསུང་ཐུགས་ཀྱི་གསང་བ་གཅིག་ཏུ་འདུས་པའི་ཡེ་ཤེས་རྡོ་རྗེའི་སྐུ་ཅན། རིགས་རྣམས་ཀུན་གྱི་ཁྱབ་བདག་རྩ་གསུམ་རྒྱ་མཚོའི་སྤྱི་དཔལ་དཔལ་མགོན་རིག་འཛིན་བླ་མ་འཇིགས་མེད་ཧེ་རུ་ཀ་ཤྲཱི་སིངྷ་འཕོ་མེད་འཇའ་ལུས་དྭངས་མའི་སྐུ་ཅན་སྐུའི་གཡོན་ཕྱོགས་རང་འོད་སྦས་པའི་ཡུམ་ཌཱ་ཀིའི་ཆས་ཅན་དཀར་མོ་ཡབ་ལ་བདུད་རྩི་སྟོབ་པ་ཅན་དུ་གསལ་ཏེ། མདོ་བྱང་ལས། སློབ་དཔོན་རྣམས་ཀྱི་བསྒོམ་ཚུལ་ཁྱད་པར་ཡང༔ རིམ་པའི་ཚུལ་དུ་བསྒྲིགས་པར་མ་བྱས་ཏེ༔ རྩ་བའི་བླ་མ་དབུས་སུ་སྒོམ་པ་ཡིན༔ ཞེས་གསུངས་པ་ལྟར། མངོན་དུ་བྱ་བའི་ལམ་མཐར་ཐུག་ནང་གི་ཡེ་ཤེས་ཆེན་པོ་སྟེ། དེ་རྟོགས་པ་མོས་གུས་འབའ་ཞིག་ལ་རག་ལས་ཤིང༌། མོས་གུས་ཀྱང་རང་གི་རྩ་བའི་བླ་མ་ཉིད་སངས་རྒྱས་ལས་ཀྱང་ལྷག་པའི་བཀའ་དྲིན་དྲན་དགོས་པ་དང༌། ཆོས་འདིའི་སྟོན་པ་གཙོ་བོ་ཤྲཱི་སིངྷ་ཡིན་པས་རྣམ་པ་དེ་ལྟར་སྒོམ་པས་བྱིན་རླབས་ཚན་ཆེ་ཞིང༌། ངོ་བོ་རྩ་བའི་བླ་མ་དང་དབྱེར་མེད་དུ་བསྒོམ་པས་ཐུགས་རྗེ་མྱུར་བའི་དགོས་པ་ཁྱད་པར་ཅན་ཡོད་ལ། གཙོ་བོའི་སྐུ་སྟོང་ཆེན་སྒྲིབ་གཡོགས་དང་བྲལ་བའི་དབུས་སུ་རྩ་དབུ་མ་ཁྱད་པར་བཞི་ལྡན། གཡས་རོ་མ་དམར་མོ། གཡོན་རྐྱང་མ་དཀར་མོ་འཁོར་ལོ་བཞིར་གཅིག་ཏུ་འདྲེས་པ། དབུ་མའི་ཡར་སྣེར་རྡོ་རྗེར་ཕྱེད་པས་མཚན་པ། མར་སྣེར་གསང་གནས་སུ་ཟུག་ཅིང་རོ་རྐྱང་ཡང་དེར་འདུ་བ་ཅན་དྭངས་གསལ་འོད་ཀྱི་རང་བཞིན་ཅན་དུ་སྒོམ་པའི་ཡར་སྣེར་རྡོ་རྗེའི་ལྟེ་བར་རྡོར་སེམས་དཀར་གསལ་ལོངས་སྐུའི་ཆས་ཅན་རྡོར་དྲིལ་བསྣམས་པ། ཞབས་རྡོ་རྗེའི་སྐྱིལ་ཀྲུང་ཅན་དང་སྤྱི་བོ་བདེ་ཆེན་འཁོར་ལོའི་རྣམ་ཤེས་འཇུག་ཡུལ་གྱི་རྩ་འདབ་བཞིའི་རྩ་སྣེ་ཟླུམ་པོ་བམ་གྱི་དབྱིབས་ཅན་གྱི་ཤར་དུ་རྒྱལ་པོ་ཛ་འམ་ཆོས་རྒྱལ་ལུང་བསྟན་རྡོ་རྗེ་རྒྱལ་པོའི་ཆས་ཅན་གཡས་ཆོས་འཆད། གཡོན་གླེགས་བམ། ལྷོར་ལྷ་དབང་བརྒྱ་བྱིན་དཀར་པོ་ལྷ་ཡི་ཆས། གཡས་ཕ་ལམ་ལས་གྲུབ་པའི་རྡོ་རྗེ་དཀར་པོ། གཡོན་སྡིག་མཛུབ། ནུབ་ཏུ་གནོད་སྦྱིན་སྐར་མདའ་གདོང་གསེར་མདོག་རིན་ཆེན་རྒྱན་དང་དར་ཤམ་ཤ་རྒྱས་གསུས་ཁྱིམ་ཆེ་བ་གཡས་སྐྱབས་སྦྱིན། གཡོན་ནོར་བུ། བྱང་དུ་སྲིན་པོ་བློ་གྲོས་ཐབས་ལྡན་དམར་སྨུག་ཞི་མ་ཁྲོ་རལ་པ་དམར་སེར་ཞོལ་པོ། སྟག་ཤམ་དར་འཕྱང་ཅན་ཕྱག་གཉིས་བཻཌཱུརྻའི་གླེགས་བམ་འཛིན་པ། བཞི་ཀ་ཞབས་སེམས་སྐྱིལ། མགྲིན་པ་ལོངས་སྤྱོད་འཁོར་ལོའི་ཚོགས་བརྒྱད་རྣམ་དག་གི་རྩ་འདབ་བརྒྱད་ཀྱི་ཤར་དུ་དགའ་རབ་རྡོ་རྗེ་དཀར་པོ་དབུ་ལ་གཙུག་ཏོར་ཆོས་གོས་རྣམ་གསུམ། ཕྱག་གཉིས་ཆོས་འཁོར་ཕྱག་རྒྱ། ཞབས་རྡོར་སྐྱིལ། ལྷོར་པད་འབྱུང་ཐེག་དགུའི་ཆས་སྤྱི་ལྟར་རྡོ་རྗེ་ཐོད་པ་ཚེ་བུམ་ཁ་ཊྭཱྃ་བཅས། ནུབ་ཏུ་སློབ་དཔོན་འཇམ་དཔལ་བཤེས་གཉེན་པཎ་ཞྭ་ཆོས་གོས་ཕྱག་གཉིས་པདྨ་ལ་གནས་པའི་རལ་པོད། ཞབས་ཕྱེད་སྐྱིལ། བྱང་དུ་བི་མ་མི་ཏྲ་དཀར་ལྗང་པཎ་ཞྭ་དམར་པོ་རྩེ་སྨྱུག །ཤ་འགག་སྔོན་པོ་ཆོས་གོས་རྣམ་གསུམ་གཡས་ཆོས་འཆད། གཡོན་མཉམ་བཞག་གི་བདུད་རྩིས་བཀང་བའི་ཐོད་པ། ཞབས་རྡོར་སྐྱིལ། ཤར་ལྷོར་རྒྱལ་པོ་ད་ན་ཧ་ཏེ་ལོ་རྒྱལ་པོའི་ཆས་ཕྱག་མཉམ་བཞག །ལྷོ་ནུབ་ཏུ་རྒྱལ་སྲས་རཱ་ཛ་ཧསྟི་རྒྱལ་སྲས་གཞོན་ནུའི་ཚུལ། དར་གོས་རིན་ཆེན་རྒྱན་ལྡན། ཕྱག་གཉིས་ཐལ་སྦྱར། ནུབ་བྱང་དུ་སྲས་མོ་གོ་མ་སཱ་ར། བཙུན་མའི་ཆས། ཕྱག་གཉིས་ཁྲུས་བུམ་སྟེ་སྤྱི་བླུགས། བྱང་ཤར་དུ་ཀླུ་རྒྱལ་བྱང་སེམས་དཀར་པོ་སྦྲུལ་གྱི་གདེང་ཀ་བདུན་ལྡན། འཕང་དུ་སྦྲུལ་མཇུག །དར་དང་རིན་པོ་ཆེའི་རྒྱན་ལྡན། ཞབས་རོལ་སྟབས། ཕྱག་གཉིས་ཤེལ་གྱི་མཆོད་སྡོང༌། ཐུགས་ཀར་ཆོས་ཀྱི་འཁོར་ལོའི་ཡུལ་བརྒྱད་དག་པའི་རྩ་འདབ་བརྒྱད་ཀྱི་ཤར་དུ་རྒྱལ་པོ་ཀུ་ཀུ་རཱ་ཛ་རྒྱལ་པོའི་ཆས། ཕྱག་གཉིས་རིན་པོ་ཆེའི་བགྲང་ཕྲེང༌། ལྷོར་ཀླུ་སྒྲུབ་དབུ་ལ་གཙུག་ཏོར་ཅུང་ཟད་འབུར་བ། ཆོས་གོས་དམར་སེར། ཐང་ཤམ་སྔོན་པོ། ཕྱག་གཉིས་ཆོས་འཆད་མཉམ་བཞག །ནུབ་ཏུ་ཀུ་ཀུ་སིདྡྷི་ཕྱི་མ་གཅེར་བུ་ཨང་རག་སྒོམ་ཐག་ཅན། ཕྱག་མཉམ་བཞག་དབུ་སྐྲ་ཅོ་རེག་ ཐོར་ཅོག་ཟེར་བའང་སྣང༌། མཆན། བྱང་དུ་གནོད་སྦྱིན་བུ་མོ་བྱང་ཆུབ་མ་རིན་པོ་ཆེའི་གཙུག་ཕུད་ཅན་དར་དང་རིན་པོ་ཆེའི་རྒྱན་ལྡན་སྐུ་མདོག་སྔོ་སངས། ཕྱག་གཉིས་རིན་པོ་ཆེའི་སྒྲོམ་བུ། ཤར་ལྷོར་འཇམ་དཔལ་བཤེས་གཉེན་ཕྱི་མ་རྒྱ་གར་པཎ་ཆེན་ཆས་པཎ་ཞྭ། ཕྱག་གཉིས་གླེགས་བམ། ལྷོ་ནུབ་ཏུ་མཁའ་འགྲོ་མ་བུདྡྷ་མ་ཏི་དཀར་མོ་དར་དང་རིན་ཆེན་རྒྱན་ལྡན་མཛེས་ཤིང་སྒེག་པ་ཕྱག་གཉིས་གར་རྒྱ། ནུབ་བྱང་དུ་མཁས་པ་ཨརྻ་པཱ་ལོ་དགེ་སློང་ཆས་པཎ་ཞྭ་ལེབ་ཆགས་ཕྱག་གཉིས་མཉམ་བཞག །བྱང་ཤར་དུ་ཨོ་རྒྱན་མཁན་པོ་དྷཱ་ཧི་ཏ་དགེ་སློང་ཆས་ཕྱག་གཉིས་ས་གནོན། དབུ་ཞྭ་མེད་པ། ལྟེ་བ་སྤྲུལ་པའི་འཁོར་ལོའི་འཛིན་བྱེད་དག་པའི་རྩ་འདབ་བརྒྱད་ལ་ཤར་དུ་དྲང་སྲོང་རྒྱལ་པོ་བི་ཤྭ་ཏི། སྐུ་མདོག་སྔོ་སངས། དབུ་སྐྲ་ནག་པོ་ཐོར་ཚུགས་བཅིངས་པ། རས་ཟན་དཀར་པོ་ཅན། ཕྱག་གཡས་ཤིང་འབྲས་དང་གཡོན་བཅུད་ལེན་རིལ་བུ་བཀང་བའི་བྷནྡྷ། ལྷོར་སྲས་མོ་གོ་མ་དེ་ཝི་མཁའ་འགྲོའི་ཆ་ལུགས་ཐོར་ཚུགས་བཅིངས་པ། དར་ཤམ་ཕྱག་གཉིས་རྡོར་དྲིལ། ནུབ་ཏུ་མཁན་པོ་རབ་སྣང་མཛད། དགེ་སློང་བགྲེས་ཚུལ་ཨག་ཚོམ་ཅན་ཕྱག་གཉིས་མཉམ་བཞག་གི་ནོར་བུ། བྱང་དུ་རྒྱལ་པོ་དེ་ཝ་རཱ་ཛ་རྒྱལ་པོའི་ཆས་གཡས་སྐྱབས་སྦྱིན། གཡོན་གསེར་འཁོར། ཤར་ལྷོར་རྒྱལ་པོ་དྷརྨ་རཱ་ཛ་རྒྱལ་པོའི་ཆས་ཕྱག་གཉིས་པི་ཝང་བརྡུང་བ། ལྷོ་ནུབ་སངས་རྒྱས་སྦས་པ་རྣལ་འབྱོར་པའི་ཆ་ལུགས་གཅེར་བུ་སྒོམ་ཐག་རྣམ་སྣང་ཆོས་བདུན་ལྡན་པས་རླུང་བཟུང་བ། ནུབ་བྱང་དུ་བཻ་རོ་ཙ་ན་པཎ་ཞྭ་རྣ་རིང་བོད་ཀྱི་དགེ་སློང་ཆས་ཕྱག་གཉིས་མཉམ་བཞག །བྱང་ཤར་དུ་ཡེ་ཤེས་མཚོ་རྒྱལ་དབུ་སྐྲ་ལྟག་པར་བཅིངས་པ། ནང་གོས་དམར་པོ་སྟེང་དུ་རྔུལ་གཟན་ལྗང་གུ་ཅན། ཕྱག་གཡས་ཕུར་པ་འཕྱར་བ། གཡོན་བགྲང་ཕྲེང༌། གོང་དུ་མ་བཤད་པ་ཐམས་ཅད་ཞབས་ཕྱེད་སྐྱིལ། ཐམས་ཅད་པདྨ་ཉི་ཟླའི་གདན་ལ་བཞུགས་པའོ། །རྩ་འཁོར་བཞིའི་དབུས་ཀྱི་ལྟེ་བར་སྐུ་གསུང་ཐུགས་ཡེ་ཤེས་རྡོ་རྗེའི་བདག་ཉིད་རྡོར་སེམས་དཀར་དམར་མཐིང་སེར་གཡས་འཁོར་ལོ་པདྨ་རྡོ་རྗེ་རིན་ཆེན་དང་གཡོན་རང་རྟགས་ཀྱི་ཡུ་བ་བྱས་པའི་དྲིལ་བུ་འཛིན་པ། ཞབས་རྡོ་རྗེ་སྐྱིལ་ཀྲུང་ཅན་རྩ་འདབ་ཀྱི་ལྷ་རྣམས་རྩ་འཁོར་གྱི་སྐེད་པ་ཙམ་དུ་ཞལ་རྡོར་སེམས་ལ་ཕྱོགས་པས་བཞུགས་པ། སྤྱི་བོ། མགྲིན་པ། སྙིང་ག་དང༌། ལྟེ་བའི་རྩ་འཁོར་གདུགས་ཀྱི་རྩིབས་མ་ལྟར་ཁ་ཡར་མར་དུ་ལྟ་བས་ཡོད་པར་བསྒོམ་པ་རྩ་འཁོར་གྱི་དབྱིབས་སོགས་ཞིབ་པར་དཔེ་རིས་བཞིན་ལ། མདོར་ན་རང་དང་ལུས་དཀྱིལ་གྱི་ལྷ་རྣམས་སྐུ་མདོག་ཕྱག་རྒྱ་བཞུགས་སྟངས་རྒྱན་ཆ་ལུགས་རེ་རེ་བཞིན་གསལ་བཏབ་ལ་སེམས་བཟུང༌། མཐར་སྤྱིའི་རྣམ་པ་བདེ་བླག་ཏུ་ཤར་བ་ན་གསལ་ལ་རྟོགས་པ་མེད་པ་མེ་ལོང་གི་གཟུགས་བརྙན་ལྟ་བུ། སྣང་ལ་རང་བཞིན་མེད་པ་བར་སྣང་གི་འཇའ་ཚོན་ལྟ་བུ། ཐོགས་མེད་ཀུན་ལ་ཁྱབ་པ་ཆུ་ཟླའི་རྣམ་འགྱུར་ལྟ་བུར་ངེས་པ་བསྐྱེད་ནས་སྣང་སྟོང་གཉིས་མེད་ཀྱི་ངང་དུ་ཡུན་རིང་དུ་མཉམ་པར་བཞག །དེ་ལྟར་གསལ་བཏབ་པ་དེ་ཡང་ཕྱི་སྐོར་བླ་མའི་སྒྲུབ་དབང་ལས། སྤྱིར་ནི་འགྲོ་འདུལ་ལྔ་བཅུ་རྩ་བརྒྱད་པོ༔ ཐམས་ཅད་ཟུང་འཇུག་མངོན་གྱུར་ཀུན་ཏུ་བཟང༔ དགོངས་པ་རང་བྱུང་ནམ་མཁའི་རྣལ་འབྱོར་ཚོགས༔ ཡེ་ཤེས་སྐུ་ཅན་འཁོར་འདས་ཡོངས་ལ་ཁྱབ༔ བཞུགས་ཡུལ་ཞིང་ཁམས་གཞན་དུ་བཙལ་མི་འཚལ༔ ད་ལྟའི་ནམ་མཁའ་འདིར་ཡང་རྣལ་འབྱོར་རྣམས༔ རང་གི་སེམས་ཉིད་འདི་ལའང་བླ་མས་ཁྱབ༔ བསྐུར་བྱ་སྐུར་ཐབས་བསྒྲུབ་དང་སྒྲུབ་ཐབས་མེད༔ རྣལ་འབྱོར་ལྟ་བའི་ངང་ལ་སྒྲུབ་དབང་རྫོགས༔ ཞེས་གསུངས་པ་ལྟར་རང་རིག་གདོད་མའི་ཡེ་ཤེས་རིག་སྟོང་བླ་མའི་དཀྱིལ་འཁོར་དུ་རྫོགས་པ་ཡིན་ལུགས་གསལ་འདེབས་ཀྱི་དགོངས་པ་མངོན་སུམ་གྱུར་བའི་འོད་གསལ་ཡེ་ཤེས་ཀྱི་རང་གདངས་མ་འགག་ཅིར་ཡང་འཆར་བའི་ཆ། རྣམ་པ་རྫོགས་པ་ཆེན་པོ་སེམས་སྡེའི་རིག་འཛིན་གཙོ་འཁོར་གྱི་མཚན་དཔེར་ཤར་བའི་ཡེ་ཤེས་ཀྱི་ལྷ་རུ་བསྒོམས་པར་ཤེས་པ་ནི་ཤིན་ཏུ་གཅེས་པའི་སྲོག་ཏིག་གོ །གཉིས་པ་གསུང་བཟླས་པ་སྔགས་ཀྱི་ཏིང་འཛིན་ནི། སྐུ་ཡི་སྣང་ཆ་ལ་གསལ་བརྟན་གྱི་ཉམས་ཅི་རིགས་སྐྱེས་པའི་ཚེའམ། ལྷར་སྣང་གི་ཏིང་ངེ་འཛིན་གྱིས་དུབ་སྟེ་སྐྱོ་ན། བོགས་འབྱིན་བཟླས་པ་ནི། བླ་མའི་ཐུགས་དབུས་ཟླ་དཀྱིལ་སྟེང༌། རང་རིག་ངོ་བོ་ཧྲཱིཿཡིག་མཐར། །སྔགས་ཀྱི་ཕྲེང་བས་བསྐོར་བ་ལས། འོད་ཟེར་འཕྲོ་འདུས་བྱིན་དབང་ཐོབ། ཞེས་པའི་དགོངས་པ་གསལ་འདེབས་ཕྱིར་རང་ཉིད་རིག་འཛིན་ཤྲཱི་སིངྷའི་ཐུགས་ཀ་རྡོ་རྗེ་སེམས་དཔའི་ཐུགས་ཀར་ཟླ་བའི་སྟེང་ཧྲཱིཿཡིག་མཐར་སྔགས་ཕྲེང་གི་བསྐོར་བ་ལས་འོད་ཟེར་འཕྲོས། དག་པའི་ཞིང་རབ་འབྱམས་ཐམས་ཅད་དུ་ཁྱབ། རྩ་གསུམ་རྒྱལ་བ་སྲས་དང་བཅས་པ་ཐམས་ཅད་དང་ཁྱད་པར་འོད་གསལ་རྫོགས་པ་ཆེན་པོའི་སྟོན་པ་ཐམས་ཅད་ཀྱི་གསང་བ་གསུམ་གྱི་བྱིན་རླབས་ཐམས་ཅད་སྐུ་དང་ཡིག་འབྲུ་ཕྱག་ཚན་གྱི་རྣམ་པ་ཆར་དྲག་ཏུ་བབས་པ་ཙམ་སྤྱན་དྲངས་ནས་ཐུགས་ཀར་ཐིམ་པས་བྱིན་རླབས་དང་དངོས་གྲུབ་ཐོབ་ཅིང་ཁྱད་པར་རིག་སྟོང་དགོངས་པའི་ཡེ་ཤེས་རྩལ་རྫོགས། ཡང་འོད་ཟེར་འཕྲོས་པས་མ་དག་པའི་ཞིང་ཀུན་ལ་ཁྱབ། བརྟན་གཡོ་སྣོད་བཅུད་ཐམས་ཅད་དག་པའི་ཞིང་རབ་འབྱམས་སུ་སད་པས་སྣང་སྲིད་རང་སྣང་ཡེ་ཤེས་ཀྱི་འཁོར་ལོ་རྫོགས་པར་མོས་ལ། མཚན་སྔགས་ཉིད་རྩེ་གཅིག་ཏུ་བཟླ། བསྙེན་པའི་ཚད་ནི་འབུམ་ཕྲག་བཅུ་གཉིས་གྲངས་བསྙེན་ཁ་སྐོང་དང་བཅས་སྟེ་བཞི་འགྱུར་དུ་བཟླས་ནའང་ཤིན་ཏུ་ལེགས་པའི་ཡན་ལག་ཏུ་འགྱུར་རོ། །ཐུན་གྱི་གཤམ་དུ། སྙིང་དབུས་ཐིག་ཟླུམ་འོད་ལྔའི་ཀློང༌། །ཨ་ཡིག་མཐའ་མར་སྔགས་ཀྱིས་བསྐོར། །བདེ་ཆེན་ཡེ་ཤེས་སྣང་བ་ཡིས། །འཁོར་འདས་སྣོད་བཅུད་རྟོག་པ་སྦྱངས། །ཐམས་ཅད་མ་ལུས་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །སྣང་སྲིད་གཞིར་བཞེངས་ཆེན་པོའི་ངང༌། །གྲགས་སྟོང་རྡོ་རྗེའི་ཛཔ་འདི་བཟླ། ཨ་ཨ་ཨ། ཞེས་རླུང་འབྱུང་འཇུག་གནས་གསུམ་དང་སྦྱར་བའི་བུམ་ཅན་སྒྲགས་པའི་རྡོར་བཟླས་བྱས་ལ། སྣང་སྲིད་ཐམས་ཅད་རིག་འཛིན་བླ་མའི་སྐུ་གསུང་ཐུགས་དབྱེར་མི་ཕྱེད་པའི་ཡེ་ཤེས་རྡོ་རྗེ་རང་བྱུང་གསང་བ་ཆེན་པོ་གཅིག་གི་དཀྱིལ་འཁོར་དུ་སད་པར་མོས་ལ། ཆོས་ཉིད་དོན་གྱི་དགོངས་པ་སྲོག་ཏུ་བཟུང་བས་རླུང་སྔགས་དབྱིངས་སུ་བསྐྱལ་བ་ལ་བསླབ་པར་བྱའོ། །གསུམ་པ་ཐུགས་འོད་གསལ་དེ་ཁོ་ན་ཉིད་ཀྱི་ཏིང་འཛིན་ལ། དངོས་དང༌། ཞར་བྱུང་ངོ༌། །དང་པོ་ནི། ཐུན་ལས་ལྡང་བ་ན། དབྱངས་གསལ་རྟེན་སྙིང་བཟླས་པས་ལྷག་ཆད་བསྐང་ཞིང་བྱིན་རླབས་བརྟན་པར་བྱས་ལ། སྣོད་བཅུད་ཐམས་ཅད་རིམ་གྱིས་བསྡུས་ཏེ་རང་ལ་ཐིམ། རང་ཡང་ཐུགས་སྲོག་ལ་ཐིམ། དེ་ཡང་མི་དམིགས་པ་འོད་གསལ་གྱི་དབྱིངས་སུ་བསྡུས་ཏེ་དམིགས་མེད་ཀྱི་ངང་དུ་ཅི་གནས་སུ་མཉམ་པར་བཞག་སྟེ་རིག་པའི་ངང་བསྐྱངས། དེའི་ངང་ལས་སྣོད་བཅུད་དག་པ་བླ་མའི་སྐུ་གསུང་ཐུགས་ཀྱི་འཁོར་ལོར་ལྡང་བས་བསྔོ་སྨོན་བཅས་བྱའོ། །དེ་ཡང་བསྙེན་མཚམས་ལ་འཇུག་པའི་ཐོག་མཐའ་ཡར་མར་གྱི་ཚེས་བཅུ་སོགས་དུས་བཟང་ཚོགས་མཆོད་དང་བཀའ་གཏེར་སྲུང་མའི་གཏོར་བསྔོ་རྟག་པར་མ་ཆད་པར་བྱ། གྲོལ་སྐབས་དངོས་གྲུབ་ལེན་པ་སོགས་སྤྱི་ལྟར་ཤེས་པར་བྱའོ། །ཕྱི་ནང་གསང་སྐོར་གྱི་རིག་འཛིན་བླ་མའི་བསྐྱེད་རིམ་འདི་དག་སྤྲོས་བཅས་གཞན་ལྟར་སྒྲུབ་རྟེན་མཆོད་པ་སོགས་མ་འབྱོར་ཀྱང་དུས་དང་རྒྱུན་གྱི་སྐབས་ཇི་ལྟར་རིགས་པར་མོས་གུས་རྩལ་དུ་འདོན་པ་ཉམས་ལེན་གྱི་གཙོ་བོར་བྱ་ཞིང༌། ཐུན་མཚམས་ཐམས་ཅད་དང༌། ཚོགས་ཀྱི་འཁོར་ལོ་ལ་སོགས་པའི་དུས་སུ་རིག་འཛིན་བླ་མ་རྣམས་ཀྱིས་རྡོ་རྗེའི་གླུ་རྣམས་དབྱངས་སྙན་པོས་སྒྲོགས་ཤིང་དོན་ལ་བསམ་གཞིག་གིས་ཉམས་མྱོང་གི་བོགས་འདོན་པ་ནི་ཤིན་ཏུ་གཅེས་ཏེ། མདོ་བྱང་ལས། ཁྱད་པར་དགོངས་པའི་རང་བཞིན་ཉམས་བསྐྱང་བ༔ གླུ་ཡི་སྡེ་ཚོགས་སྔ་ཕྱི་གཉིས་སུ་བརྗོད༔ ཅེས་གསུངས་སོ། །གཉིས་པ་ཞར་བྱུང་ནི། མདོ་བྱང་ལས། འགྲོ་འདུལ་བླ་མའི་སྒྲུབ་ཐབས་ཟབ་པ་ནི༔ ཡང་ཟབ་བསྟན་པའི་སྙིང་པོ་ཞེས་བྱའོ༔ འདི་ནི་སྤྱི་ཆོས་ཡིན་པས་སྤེལ་ཡང་རུང༔ ཞེས་དང༌། ད་ལྟ་ཤིན་ཏུ་སྤེལ་འཕོངས་བས༔ ཟབ་པ་ཐུགས་ཀྱི་གཏེར་དུ་སྦས༔ ནམ་ཞིག་ལས་ཅན་བུར་འཕྲད་ནས༔ གདམས་པ་སྣ་རེས་གྲོལ་བར་འགྱུར༔ སྙན་ནས་སྙན་དུ་བརྒྱུད་པ་གཅེས༔ གང་ཞིག་འགྲོ་དོན་སྒོ་དབྱེ་ཙམ༔ སྒྲུབ་ཐབས་སྣ་རེ་སྦྱིན་པར་བྱ༔ ཡོངས་རྫོགས་སྤེལ་བའི་སྣོད་མེད་དོ༔ ཞེས་གསུངས་པ་ལྟར་ལམ་འདིར་དད་པས་རྗེས་སུ་འཛིན་པར་འོས་ཀྱང་གསང་བ་ཡོངས་རྫོགས་ཀྱི་སྣོད་དུ་མ་གྱུར་པའམ། ཐམས་ཅད་ཉམས་སུ་ལེན་པ་དབང་པོས་མི་ཆུན་པའི་རིགས་ལ་གོང་སྨོས་རིག་འཛིན་བླ་མའི་སྤྱི་དབང་གིས་སྨིན་པར་བྱས་ནས་ཀུན་བཟང་དོན་གྱི་ཕྲིན་ལས་ལ་བརྟེན་པས་གསལ་སྣང་རྩེ་གཅིག་ཏུ་སྒྲུབ་པ་རྟེན་བཅས་ཀྱི་ཞི་གནས་དང༌། དེའི་ཉེར་བསྡུས་ཏིང་ངེ་འཛིན་རྟེན་མེད་ཀྱི་ཞི་གནས་ལ་བརྟེན་ནས་རིག་པ་ངོ་སྤྲད་དེ་ཤྲཱི་སིངྷའི་རྡོ་རྗེའི་གླུ། ཇི་ལྟར་བསམ་ཀྱང་མི་རྟོག་ངང༔ སོགས་ཀྱི་དགོངས་དོན་ལྟར་ལྟ་སྒོམ་སྤྱོད་འབྲས་བཞི་པོའི་དོན་ཉམས་ཁྲིད་དུ་གདབ་པས། བསྐྱེད་རྫོགས་རྐང་ཚང་གི་ལམ་ཡོངས་རྫོགས་སུ་འགྱུར་བའང་ཤེས་པར་བྱའོ། །གཉིས་པ་ཕྱི་སྐོར་ཡི་དམ་གྱི་སྒྲུབ་པའི་ལྷ་ཁྲིད་ནི། མདོ་བྱང་ལས། རྡོ་རྗེ་དབྱིངས་ཀྱི་ལྷ་ཚོགས་སྒྲུབ་པ་ཡང༔ ཤྲཱི་སིངྷས་རྒྱུད་ལས་བཀྲལ་བའི་ཚུལ༔ རྡོར་དབྱིངས་རྡོ་རྗེ་རྩེ་མོ་འོད་གསལ་ཞིང༔ ཡི་དམ་ཁྲོ་བོའི་སྒྲུབ་པ་འདི་ལས་མེད༔ ཞེས་གསུངས་པ་ལྟར་རིག་འཛིན་ཆེན་པོ་ཤྲཱི་སིངྷས་རྒྱུད་ཀྱི་དགོངས་པ་བཀྲལ་བའི་ཡི་དམ་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་བསྙེན་སྒྲུབ་ཇི་ལྟར་བགྱི་བའི་ཚུལ་འཆད་པ་ནི། སྒྲུབ་པའི་གནས་སུ་སྨན་གཏོར་རཀྟ་ཉེར་སྤྱོད་ཙམ་ལ་བརྟེན་པའམ་སྤྲོ་ན་གཞུང་མཐུན་གྱི་དཀྱིལ་འཁོར་བཀྲམ་བའམ། ཚོམ་བུ་ལྷ་གྲངས་བཀོད་པའི་སྟེང་དུ་རང་བྱུང་རྡོ་རྗེ་སེམས་དཔའི་མེ་ལོང་ཙམ་ལ་བརྟེན་ཀྱང་ལེགས་པར་སེམས། གང་ལྟར་ཡང་བརྒྱུད་འདེབས་དང༌། སྐྱབས་སེམས་ནས་བརྩམས། དངོས་གཞི་ལྷ་བསྐྱེད་ཕྲིན་ལས། ཧཱུྃ༔ ཀུན་གཞི་མི་དམིགས་རྣམ་པར་སྟོང༔ སོགས་ནས། ཐུགས་རྗེ་སྣ་ཚོགས་སྤྲུལ་སྐུར་ཤར༔ ཕྱི་སྐོར་ཡི་དམ་ཞི་བའི་སྒྲུབ་ཐབས་ཀྱི༔ སེམས་ཉིད་ཀ་ནས་དག་པའི་ངང༔ སོགས་ནས། ཞི་བའི་དབྱིངས་ཀྱི་དཀྱིལ་འཁོར་གསལ༔ ཞེས་པའི་བར་བཏང་རྗེས། ཕྱི་སྐོར་བླ་མའི་ཕྲིན་ལས་ཀྱི༔ དུག་གསུམ་ཡེ་དག་རྡོ་རྗེ་གསུམ༔ སོགས། བླ་མའི་ལས་བྱང་གི་དབང་བསྐུར་རྒྱས་གདབ། སྤྱན་འདྲེན། བཞུགས་ཕྱག །མཆོད་བསྟོད་བཅས་སྒྲུབ་པའི། རང་གི་ཐུགས་སྲོག་ས་བོན་ལས༔ བདེ་བ་ཆེན་པོའི་འོད་ཟེར་འཕྲོས༔ རབ་འབྱམས་རྒྱལ་བའི་དཀྱིལ་འཁོར་བའི༔ ལྷ་ཚོགས་རྣམས་ཀྱི་ཐུགས་བརྒྱུད་བསྐུལ༔ དེ་རྣམས་ཐུགས་རྗེའི་འོད་ཟེར་རྣམས༔ མཁའ་ཁྱབ་ཀུན་ཏུ་སྣང་བ་ཡིས༔ བདག་དང་འགྲོ་ཀུན་སྒྲིབ་གཉིས་སྦྱངས༔ ཡེ་ཤེས་མཆོག་གི་བྱིན་རླབས་གྱུར༔ ཨོཾ་ཧཱུྃ་ཏྲཱྃ་ཧྲཱིཿཨཿ མཱུཾ་ལཱཾ་མཱཾ་པཱཾ་ཏཾ་ཛྙཱ་ན་སཏྭ་ཧཱུྃ༔ ཞེས་གཙོ་བོ་རྣམ་སྣང་དང༌། ཨོཾ་བཛྲ་སཏྭ་ཨ༔ རྡོར་སེམས། ཨོཾ་མཉྫུ་ཤྲཱི༔ འཇམ་དཔལ། ཨོཾ་ཨཱ་རྻ་ཨཱ་ཝ་ལོ་ཀི་ཤྭ་རི་ཧྲཱིཿ འཇིག་རྟེན་དབང་ཕྱུག །ཨོཾ་བཛྲ་པཱ་ཎི་ཧཱུྃ༔ ཕྱག་རྡོར། ཨོཾ་ས་མནྟ་བྷ་དྲ་ཧཱུྃ༔ ཀུན་བཟང༌། ཨོཾ་ཁགྷརྦྷ་ཏྲཱྃ༔ ནམ་སྙིང༌། ཨོཾ་ཀྵིཾ་ཧི་རཱ་ཛ་ཧཱུྃ༔ ས་སྙིང༌། ཨོཾ་མཻ་ཏྲི་དྷཱ་རི་ཨཱཿ བྱམས་པ་བཅས་ཀྱི་རྩ་སྔགས་རྣམས་སོ་སོར་བཟླ། དེ་ཡང་གཙོ་བོ་ལ་འབུམ་ཕྲག་བཞི་འཁོར་སྔགས་བརྒྱད་པོ་དེའི་བཅུ་ཆ་རེ་བཟླས་པ་སྤྱི་འགྲོའི་བསྙེན་ཚད་དོ། །རྩོད་དུས་དེ་ལས་བཞི་འགྱུར་བྱུང་ན་ལེགས་པ། སྐོར་གསུམ་གྱི་བསྐྱེད་བཟླས་ཀུན་ལ་ཤེས་པར་བྱ། བསྐྱེད་རིམ་གྱི་གསལ་སྣང་གྲུབ་ན་རྣམ་པ་གསལ་བ། རྣམ་དག་དྲན་པ། ང་རྒྱལ་བརྟན་པ་རྣམས་ཀྱི་ལྷ་ཁྲིད་ལམ་རིམ་ཡེ་ཤེས་སྙིང་པོ་དང་ཡོན་འགྲེལ་སོགས་ལས་འབྱུང་བ་ལྟར་སྦྱར། བསྙེན་སྒྲུབ་ཀྱི་ཐོག་མཐའ་དང་དུས་བཟང་རྣམས་སུ་ཚོགས་དང༌། དངོས་གྲུབ་བླངས་བ་བཅས་སྤྱི་ལྟར་རམ། སྒྲུབ་པ་བྱེ་བྲག་ཏུ་སྤྲོ་ན་རྡུལ་ཚོན་གྱི་དཀྱིལ་འཁོར་རམ། ཚོམ་བུ་གཙོ་འཁོར་དགུ་པ་དེ་རྒྱབ་ཕྱོགས་མཚམས་བཞི་དང་ཤར་ནུབ་རེ་རེ་དྲུག །ཕྱོགས་བཞིར་བཞི་བཀོད་པའི་དབུས་སུ། བུམ་པ། གསང་ཐོད། རིག་ཙཀ །ཤེལ་རྡོ་བཅས་སྐུ་གསུང་ཐུགས་ཡེ་ཤེས་རྡོ་རྗེའི་དབང་གི་རྫས་རྣམས་བཀྲམ། མཆོད་པ་དང་ཚོགས་རྫས་བཟང་དུ་བཤམས་པས་ལས་བྱང་དཀྱུས་ལྟར་ཞག་བདུན ལྔ་སོགས་བྱ་ཞིང་གྲོལ་མཐར་དོན་དབང་གི་ཚུལ་དུ་བདག་འཇུག་ལེན་པ་བཅས་རིག་འཛིན་རྩལ་འཆང་རྣམ་གསུམ་ཟབ་གཏེར་གྱི་ཕྱག་བཞེས་སུ་གནང་བ་ལྟར་སྦྱར་ཀྱང་ལེགས་པར་སེམས་སོ། །གཉིས་པ་ཟབ་མོ་རྫོགས་པའི་རིམ་པ་བཤད་པ་ལ། ལོ་རྒྱུས་ལས་གསུངས་པ་ལྟར་སྔོན་འགྲོ་བརྡ་དབང་གསུམ་དབང་གིས་སྨིན་པར་བྱེད་པ། དངོས་གཞི་ཁྲིད་གསུམ་གྱིས་གྲོལ་བར་བྱེད་པ། རྗེས་མན་ངག་གསུམ་གྱིས་གྲོལ་བ་མཐར་ཕྱིན་པར་མཛད་པ་སྟེ་གསུམ་རེ་གསུངས་ལ། མདོ་བྱང་ལས། གྲོལ་བའི་ཁྲིད་ནི་དོན་བཞིའི་ཁོངས་སུ་རྫོགས༔ སེམས་ཀྱི་རང་བཞིན་རྟོགས་པར་བྱ་བ་ལས༔ སྟོང་ཉིད་ཆོས་དབྱིངས་བརྡལ་ཁྱབ་གདམས་པ་ལས༔ དེ་ཉིད་རྗེས་འབྲེལ་དགོངས་པ་མཐར་གསལ་བ༔ དགོངས་པ་རང་གསལ་ལྟ་བ་ཀློང་ཡངས་ཞེས༔ དེ་ཡི་སྐོར་ཚོ་ཆོས་ཚན་བརྒྱད་ཡིན་ལ༔ ཞེས་དང༌། ཕྱི་སྐོར་ཁྲིད་ཀྱི་དོན་བསྡུས་ལས། ལྟ་སྒོམ་སྤྱོད་གསུམ་འབྲས་བུ་ལས༔ ཞེས་གསུངས་པ་ལྟར་བཞི་ལས། དང་པོ་ལྟ་བ་ངོ་སྤྲོད་པ་ནི། ཕྱི་སྐོར་ཁྲིད་ཀྱི་རྗེས་འབྲེལ་ནི། ལྟ་བ་ཀུན་གཞི་སྟོང་པ་ཉིད༔ ཞེས་དང༌། སྦུབས་མཆུའི་སྐབས། བུམ་པ་ཁུངས་གཏོར་གྱི་དགོངས་པ་ལས། ཆོས་ཐམས་ཅད་ཡེ་ཤེས་སུ་ཤར༔ ཡེ་ཤེས་བཙལ་དུ་མེད་པའོ༔ ཞེས་དང༌། ཕྱི་སྐོར་དངོས་གཞིའི་ཁྲིད་ཀྱི་གཏེར་གཞུང་ལས། ན་མོ་གུ་རུ༔ ཕྱི་སྐོར་དངོས་གཞིའི་ཁྲིད་རིམ་ནི༔ སོགས་ནས། ཀུན་གཞི་ཉིད་ལས་འབྱུང་བའོ༔ ཞེས་པའི་བར་ཏེ་སྤྱིར་མདོ་སྔགས་ཀྱི་ལམ་ཐམས་ཅད་བླ་མས་མ་བསྟན་པར་ཕོ་ཚོད་ཀྱིས་སུས་ཀྱང་རྟོགས་པར་མདོ་རྒྱུད་ཐམས་ཅད་ནས་མ་གསུངས། ཁྱད་པར་གསང་སྔགས་ཀྱི་ལམ་དང་དངོས་གྲུབ་ཐམས་ཅད་ནི་བྱིན་རླབས་ཁོ་ན་ལ་རག་ལས། ཡང་སྒོས་རྫོགས་པ་ཆེན་པོའི་དོན་གྱི་ཡེ་ཤེས་ནི་བླ་མའི་བྱིན་རླབས་འབའ་ཞིག་གིས་རྟོགས་ཤིང༌། གེགས་སེལ། བོགས་འབྱིན་ཐམས་ཅད་བླ་མའི་བྱིན་རླབས་ལ་བརྟེན་དགོས་ལ། བྱིན་རླབས་ཞུ་པའི་བླ་མ་ནི་མཚན་ཉིད་དང་ལྡན་པའི་བཤེས་གཉེན་ལ་མ་བརྟེན་ན་གཏན་གྱི་འདུན་མ་འཕྱུགས་པས་ཐོག་མ་ཉིད་ནས་བླ་མ་མཚན་ལྡན་བསྟེན་པ་གལ་ཆེ། བླ་མའི་མཚན་ཉིད་ཀྱང་རྒྱ་ཆེར་གསུངས་པ་ལས་ཁྱད་པར་རྫོགས་པ་ཆེན་པོའི་ལམ་བསྟན་གྱི་བླ་མའི་མཚན་ཉིད་ནི། ཨ་ཏི་བཀོད་པ་ཆེན་པོ་ལས། མཁས་ཤིང་བྱ་བ་བྲལ་བ་དང༌། །ཆོས་ཉིད་དོན་ལ་ཚད་ཕེབས་དང༌། །འདོད་པའི་དོན་ལ་རྨོངས་པ་མེད། །གསང་སྔགས་བླ་མའི་མཚན་ཉིད་དོ། །ཞེས་པ་ལྟར་སྤྱིར་གསང་སྔགས་ཀྱི་རྒྱུད་སྡེ་མཐའ་དག་གི་དོན་ལ་མཁས་པས་གྲུབ་མཐའ་དབྱེ་བ་ཕྱེད་པ། བྱེ་བྲག་དེ་དག་གི་ཉམས་མྱོང་གི་དྲོད་ཚད་དང་ལྡན་པས་མན་ངག་གི་དོན་སྟོན་པ་ལ་མཁས་པ། རྙེད་བཀུར་སོགས་ཆོས་བརྒྱད་ཚེ་འདིའི་དོན་གཉེར་གྱི་འདུ་འཛིའི་རྣམ་གཡེང་གི་བྱ་བ་དང་བྲལ་བ། ཟབ་མོའི་ལྟ་སྒོམ་སྤྱོད་འབྲས་ཀྱི་ཉམས་ལེན་མཐར་སོན་པས་ཆོས་ཉིད་ཀྱི་དགོངས་པ་ཚད་དུ་ཕེབས་པའམ་གདེང་འབྱོར་བ། སློབ་མས་ཐེ་ཚོམ་གྱི་དོགས་གནས་དང་དྲིས་པའི་ལན་འདེབས་པ་ལ་མཁས་ཤིང་མ་རྨོངས་པའོ། །བླ་མ་མཚན་ལྡན་གྱིས་ཆོས་ཟབ་མོ་བསྟན་ཀྱང་དོན་དུ་འགྱུར་མིན་སློབ་མའི་ཉེར་ལེན་ལ་རག་ལས་པས་དེ་ཡང་བླ་མས་ཆོས་མ་བསྟན་པའི་སྔ་ལོགས་སུ་བརྟགས་དགོས་པའང་རང་ཤར་ལས། དད་པའི་སྟོབས་དང་བརྩོན་འགྲུས་ཆེ། །ཤེས་རབ་ཆེ་ཞིང་འཛིན་ཆགས་མེད། །ཕུ་དུད་ཆེ་ཞིང་གསང་སྔགས་སྤྱོད། །རྟོག་མེད་སེམས་ལ་ཡེངས་པ་མེད། །དམ་ཚིག་ལྡན་ཞིང་སྒྲུབ་ལ་བརྩོན། །སློབ་དཔོན་ཇི་སྐད་གསུང་བཞིན་བྱེད། ཅེས་གསུངས་པ་ལྟར་བྱིན་རླབས་འཇུག་པའི་རྒྱུ་དང་འདོད་ཡིད་ཆེས་ཕྱིར་མི་ལྡོག་པའི་དད་པ་ཆེ་བ། ཆོས་ལ་ཕྱི་བཤོལ་དང་ཐང་ལྷོད་མེད་པའི་བརྩོན་འགྲུས་ཆེ་བ། ཟབ་རྒྱས་རྡོ་རྗེའི་གནས་ཐམས་ཅད་ཁོང་དུ་ཆུད་ནུས་པའི་ཤེས་རབ་ཆེ་བ། ཟས་གོས་སོགས་སྡིག་པའི་བདེ་འབྱོར་ལ་ཞེན་ཆགས་ཆུང་བ། བླ་མ་དང་ལྷ་གདམས་ངག་ལ་ཆེ་བ་ཤེས་པས་ཕུ་དུད་ཆེ་བ། ཐེ་ཚོམ་གྱི་སྒྲོ་འདོགས་ཆོད་པས་ཟབ་མོའི་ལྟ་སྤྱོད་ལ་འཇུག་ཅིང་སྤྱོད་ནུས་པ། ཀོ་ལོང་གི་རྣམ་རྟོག་དང་རྣམ་གཡེང་ཆུང་བ་དམ་ཚིག་གཉེར་དུ་བླང་བ་ལས་མི་འདའ་བ་བརྟན་པ། མདོར་ན་བླ་མས་ཇི་ལྟར་བསྟན་པ་ལས་མི་འདའ་ཞིང་རྩེ་གཅིག་ཏུ་སྒྲུབ་ནུས་པ་ནི་སྣོད་དང་སྐལ་པ་ལྡན་པ་ཞིག་དགོས་ལ། དེ་ལྟར་བླ་སློབ་ཀྱི་རྟེན་འབྲེལ་ཚོགས་པས་གདམས་ངག་ཟབ་མོ་རྣམས་དབང་དང་ཁྲིད་རྒྱབ་བརྟེན་བཤད་ལུང་སྐོར་བཅས་རིག་འཛིན་གྲུབ་པའི་ཕྱག་བཞེས་ཀྱི་གོ་རིམ་མ་འཆོལ་ཞིང་ཐོས་བསམ་གྱི་སྒྲོ་འདོགས་ཀྱི་ཞུན་ཐར་ཆོད་པ་ནི། ཐོག་མ་ཉིད་ནས་མེད་དུ་མི་རུང་ཞིང༌། དངོས་གཞི་ཉམས་ལེན་གྱི་སྐབས་སུ་བབ་པ་ན། གནས་དུས་ཡོ་བྱད་གྲོགས་དང་བཅས་ཆོས་དང་མཐུན་ཞིང་སྒྲུབ་པའི་གྲོགས་སུ་འགྲོ་བའི་མཐུན་རྐྱེན་གྱི་གདམས་ངག་གི་སྒྲོམ་དུ་གཞུག་པར་བྱས་ཏེ། འདིར་དགོངས་པ་འཕྲོ་ལུས་ཡོད་འདྲ མཆན གཉིས་པ་ནི། མདོ་བྱང་ལས། ད་ནི་ནང་སྐོར་ཀློང་སྡེ་སྐོར་དགུ་ནི༔ ཞེས་པ་སྟེ། འདི་ལ་ཡང་གཉིས། བསྐྱེད་པ་དང༌། རྫོགས་པའི་རིམ་པའོ། །དང་པོ་ལ་གཉིས། བྱིན་རླབས་ཀྱི་སྒོ་འབྱེད་པ་རིག་འཛིན་བླ་མའི་བསྐྱེད་རིམ། དངོས་གྲུབ་ཀྱི་བཅུད་འགུགས་པ་ཡི་དམ་ཞི་ཁྲོའི་བསྐྱེད་བཟླས་སོ། །དང་པོ་ལའང༌། སྔོན་འགྲོའི་རྒྱུད་ལས་རུང་དུ་སྒྲུབ་པ་དང༌། དངོས་གཞི་བསྐྱེད་རིམ་འཕྲོས་དོན་དང་བཅས་པའོ། །དང་པོ་ནི། བསམ་གཏན་ཚེར་མ་མེད་པའི་གནས་སུ། བདེ་བའི་སྟན་ལ་བག་ཕེབས་པར་འཁོད་དེ་རླུང་རོ་གསལ་ཞིང་ངལ་གསོ། ཐུན་གྱི་སྔོན་འགྲོ་དང་བཅས་བློ་ལྡོག་རྣམ་པ་བཞི་ཡི་ངེས་འབྱུང་བློ་བསྐྱེད། མི་རྟག་པས་བསྐུལ་མ་གདབ། རྒྱུ་འབྲས་ཡིད་ཆེས་ཀྱི་དྲན་ཤེས་བརྟན་པས། དལ་འབྱོར་དོན་ཡོད་པའི་ཐབས་ལ་བསླབ་ནས། ཐར་པའི་ཕན་ཡོན་ལ་བསམ་གཞིག་གིས་དད་པ་དང་བརྩོན་འགྲུས་བསྐུལ་ཏེ། སྐྱབས་འགྲོ། སེམས་བསྐྱེད། རྡོར་སེམས། མཎྜལ། ཁྱད་པར་བླ་མའི་བྱིན་རླབས་ཐུན་མོང་དང༌། ཐུན་མིན་གྱི་ཉམས་ལེན་བློ་ཚོད་དང་བསྟུན་ཏེ་ཉམས་སུ་ལེན་ཞིང་གནད་དུ་འགྲོ་བར་བསླབ་པ་ནི་ངེས་པར་གཅེས་སོ། །ཇི་ལྟར་ཉམས་སུ་ལེན་པའི་ཚུལ་གོང་དུ་བཤད་པ་ལྟར་ལ་སྐྱབས་འགྲོའི་ཚོགས་རྟེན་གྱི་གཙོ་བོ་དང༌། བླ་མའི་བྱིན་རླབས་སྐབས་རིག་འཛིན་དགའ་རབ་རྡོ་རྗེའམ་བཻ་རོ་གང་མོས་སྒོམ་པ་ཁྱད་པར་ཏེ། ཞིབ་པར་སྔོན་འགྲོའི་ངག་འདོན་ལྟར་རོ། །གཉིས་པ་བསྐྱེད་བཟླས་ནི། གཞུང་མཐུན་བླ་མའི་སྐུ་བརྙན་མདུན་ཕྱི་ནང་གི་མཆོད་པ་བསྐོར། མཚམས་བསྡམ་པ་སོགས་སྔར་ལྟར་ལ། དངོས་གཞིའི་ལས་བྱང་ནང་སྐོར་ཁྲོ་བོའི་བྱང་བུ་ཁྲིགས་བསྡེབས་ཀྱི་སྐྱབས་སེམས་ནས་མཆོད་པ་བྱིན་རླབས་བར་བཏང་རྗེས། ཨཿ ཀ་དག་དེ་བཞིན་ཉིད་ཀྱི་དབྱིངས༔ སོགས་ནས་སྣང་ལ་རང་བཞིན་མེད་པར་གསལ༔ ཞེས་པའི་མཚམས་སུ། དུག་གསུམ་ཡེ་དག་སོགས་ནས ཐུགས་ལ་བསྟོད༔ བསྙེན་བཟླས་ཀྱི་དམིགས་པ་ནི། ཐུགས་ཀར་པདྨ་ཟླ་བའི་གདན༔ དེ་དབུས་ཨ་ལས་སྔགས་ཀྱིས་བསྐོར༔ འོད་འཕྲོས་རྒྱལ་བ་སྲས་བཅས་མཆོད༔ ཚུར་བསྡུས་དངོས་གྲུབ་བདག་ལ་ཐིམ༔ སླར་འཕྲོས་འགྲོ་བའི་སྒྲིབ་གཉིས་སྦྱངས༔ སྣོད་བཅུད་སྐུ་དང་ཞིང་དུ་དག༔ སྐུ་གསུང་ཐུགས་ཀྱི་དཀྱིལ་འཁོར་རྫོགས༔ ཨོཾ་ཨཱཿཧཱུྃ་བཛྲ་མ་ཧཱ་གུ་རུ་པྲ་ཧེ་བཛྲ་སརྦ་སིདྡྷི་ཧཱུྃ༔ ཞེས་བཟླ་བ་ནི་གཙོ་སྔགས་དང༌། རིག་འཛིན་ཡོངས་རྫོགས་ཀྱི་བཟླས་པ་སྤྲོ་ན། ཨོཾ་ཨཱཿཧཱུྃ་བཛྲ་མ་ཧཱ་གུ་རུ་ས་མནྟ་བྷ་དྲ་སརྦ་སིདྡྷི་ཧཱུྃ༔ ཀུན་བཟང་ཡབ་ཡུམ། ཐོག་མཐའ་རིགས་འགྲེ་བས། བཛྲ་མ་ཧཱ་གུ་རུ་བཛྲ་སཏྭ། རྡོར་སེམས། བཛྲ་མ་ཧཱ་གུ་རུ་མཉྫུ་ཤྲཱི་མི་ཏྲ། འཇམ་དཔལ་བཤེས་གཉེན། བཛྲ་མ་ཧཱ་གུ་རུ་ཤྲཱི་སིངྷ། ཤྲཱི་སེང༌། བཛྲ་མ་ཧཱ་གུ་རུ་བི་མ་ལ་མི་ཏྲ། བི་མ་ལ། བཛྲ་མ་ཧཱ་གུ་རུ་པདྨ་སཾ་བྷ་ཝ། གུ་རུ་རིན་པོ་ཆེ་བཅས་སོ་སོར་བཟླ། བསྙེན་པའི་ཚད་ནི་འབྲུ་འབུམ་མམ་འབུམ་ཕྲག་བཞི། འཁོར་རྣམས་དེའི་བཅུ་ཆ་བཟླ། ཚེ་སྒྲུབ་ལ། ཐུགས་ཀར་རིན་ཆེན་ཟུར་བརྒྱད་པ༔ མཆོང་གུར་ཕུབ་པ་ལྟ་བུའི་ནང༔ པད་ཟླར་ཧྲཱིཿལས་ཚེ་དཔག་མེད༔ དཀར་པོའི་ལོངས་སྤྱོད་རྫོགས་སྐུའི་ཆས༔ ཕྱག་གཡོན་མཉམ་བཞག་ཚེ་བུམ་ནི༔ ཚེ་ཡི་བཅུད་ཀྱིས་གང་རྒྱར་བཏམས༔ གཡས་པས་སྣ་ཚོགས་རྡོ་རྗེ་ཡིས༔ གཡོན་པའི་ཚེ་ཡི་ཁ་བཀབ་སྟེ༔ རྡོ་རྗེ་སྐྱིལ་མོ་ཀྲུང་གིས་བཞུགས༔ ལོངས་སྤྱོད་རྫོགས་པའི་ཆས་ཀྱིས་སྤྲས༔ ཐུགས་ཀར་ཉི་ཟླའི་གྭའུ་ནང༔ ནྲྀ་ཡིག་ལྗང་གུ་ཧཱུྃ་ཨས་མཚན༔ གྭའུ་སྟེང་དུ་ཧྲཱིཿཡིག་ལས༔ སྔགས་ཀྱི་ཕྲེང་བས་གཡས་སུ་བསྐོར༔ འོད་འཕྲོས་འཁོར་འདས་ཚེ་བཅུད་བསྡུས༔ གྭའུ་ནང་དང་བུམ་པའི་ནང༔ ཡོངས་སུ་གང་ཞིང་འཕེལ་བ་ཡིས༔ རིག་འཛིན་བླ་མའི་སྐུ་ཡི་ནང༔ ཚེ་ཡི་བདུད་རྩིས་གང་བར་བསམ༔ ཨོཾ་བཛྲ་མ་ཧཱ་གུ་རུ་ཨཱ་ཡུརྫྙཱ་ན་སརྦ་སིདྡྷི་ཧཱུྃ༔ ཞེས་བཟླ། ཐུན་མཐར་ཚེ་འགུགས་སྦྱར་ན། ཧྲཱིཿ འོད་གསལ་ཆོས་སྐུའི་ཕོ་བྲང་ནས༔ ལོངས་སྤྱོད་ཡོངས་རྫོགས་སྤྲུལ་པའི་སྐུ༔ འཆི་མེད་རིག་འཛིན་བླ་མའི་ཚོགས༔ རྩ་གསུམ་རྒྱ་མཚོའི་འཁོར་དང་བཅས༔ སྒྲུབ་ལ་ཚེ་དབང་མཆོག་སྩོལ་ཕྱིར༔ ཐུགས་དམ་བསྐུལ་ལོ་དབྱིངས་ནས་བཞེངས༔ རྣལ་འབྱོར་བདག་ཅག་འཁོར་བཅས་ཀྱི༔ བླ་ཚེ་ཆད་ཉམས་ཡར་བ་དང༔ ཕྱི་སྣོད་འབྱུང་བ་བཞི་ཡི་བཅུད༔ ནང་བཅུད་འགྲོ་བའི་ཚེ་བསོད་དཔལ༔ གསང་བ་རྒྱལ་བ་སྲས་བཅས་ཀྱི༔ མཁྱེན་བརྩེ་ནུས་པའི་ཡོན་ཏན་ཀུན༔ འོད་ཟེར་བདུད་རྩིའི་རྣམ་པར་བསྡུས༔ བདག་དང་སྒྲུབ་པའི་རྫས་ལ་བསྟིམ༔ རྒས་མེད་ལང་ཚོའི་དངོས་གྲུབ་སྩོལ༔ ནད་མེད་བདེ་བའི་དངོས་གྲུབ་སྩོལ༔ འཆི་མེད་ཚེ་ཡི་དངོས་གྲུབ་སྩོལ༔ ཡེ་ཤེས་མཆོག་གི་དངོས་གྲུབ་སྩོལ༔ ཞེས་དང༌། ཚེ་ཛཔ་བཟླས་ལ། ཨཿ སྤྲོས་པས་སྲིད་ཞིར་ཁྱབ་པའི་ཚེ༔ བསྡུས་པས་ཐིག་ལེ་ཉག་གཅིག་ཀློང༔ འཕོ་འགྱུར་མེད་པར་རྒྱས་བཏབ་པས༔ ཡེ་ཤེས་ཆེན་པོའི་སྲོག་འགྲུབ་ཤོག༔ ཛྙཱ་ན་བཛྲ་རཀྴ་ཨ༔ ཞེས་རྒྱས་གདབ་བྱ། ཐུན་མཐར་མཆོད་བསྟོད། ཚོགས་མཆོད་སོགས་རྗེས་རིམ་ཁྲོ་བོའི་ལས་བྱང་བཞིན་དང༌། བསྐྱེད་རྫོགས་ཀྱི་དམིགས་གནད་སྔ་མ་ལྟར་ལ། སྐབས་འདིའི་དཀྱིལ་འཁོར་གྱི་གཙོ་བོ་ནི། དགའ་རབ་རྡོ་རྗེ་སྟེ། ངེས་པའི་དོན་དུ་ཁྱབ་བདག་རྡོ་རྗེ་སེམས་དཔའ་ཉིད་ཛམ་བུའི་གླིང་དུ་རྫོགས་པ་ཆེན་པོའི་བསྟན་པ་སྤེལ་བའི་ཕྱིར་མཆོག་གི་སྤྲུལ་སྐུ་རིག་པ་འཛིན་པའི་རྣམ་པར་བཞེངས་པ་དང་རྩ་བའི་བླ་མ་དབྱེར་མེད་ལ་གསོལ་འདེབས་དང་མོས་གུས་ལ་རྩལ་སྦྱངས་པ་ནི་གནད་དུ་ཆེས་ཟབ་པོ། །སྐབས་འདིར་མདོ་བྱང་ལས། རིག་འཛིན་བླ་མ་འགྲོ་འདུལ་བཅོ་ལྔ་ཡང༔ རྒྱ་གར་ཡུལ་གྱི་སློབ་དཔོན་ཆེན་པོ་རྣམས༔ འགྲོ་དོན་ཕྱིར་དུ་བོད་ཀྱི་ཡུལ་དུ་འཁྲུངས༔ དེ་ཡི་དབང་བྱས་ཡེ་ཤེས་མཚོ་རྒྱལ་ལ༔ ལྷ་སྲས་ཀྱིས་ཞུས་ལྷ་སྲས་གཤེགས་རྗེས་སུ༔ ཟུར་མཁར་བཟའ་ཡིས་ཡི་གེར་བཀོད་པ་དག༔ ངན་ལམ་བནྡེས་ཁྲིགས་སུ་བཏབ་པ་འདི༔ བླ་མའི་ཕྲིན་ལས་དགོངས་པ་འོད་གསལ་ཞེས༔ འདི་ཡི་བྱིན་རླབས་བླ་མའི་སྤྱི་སྐོར་ལས༔ གྲུབ་པའི་ཚུལ་སྟོན་བཀའ་བབ་དབང་བསྐུར་ཞིང༔ ཐུགས་ཀྱི་བྱིན་རླབས་རྡོ་རྗེའི་གླུ་རྣམས་བླངས༔ ཞེས་པའི་དགོངས་པ་གཙོ་བོར་བཏོན། ནང་སྐོར་རིག་འཛིན་བླ་མའི་སྒྲུབ་པ་བཻ་རོ་གཙོ་བོར་མཛད་པ་གཏེར་ཆེན་ཐུགས་སྲས་མཁན་ཆེན་རཏྣའི་ཕྱག་བཞེས་ལྟར་ན་ནང་སྐོར་རིག་འཛིན་བཅོ་ལྔའི་བསྐྱེད་རིམ་བྱང་བུ་ལྟར། ཧཱུྃ༔ ཀུན་གཞི་མི་དམིགས་རྣམ་པར་སྟོང༔ སོགས་ནས། ལས་གཞུང་ལྟར་དང༌། གཙོ་སྔགས། ཨོཾ་ཨཱཿཧཱུྃ་བཛྲ་གུ་རུ་བཻ་རོ་ཙ་ན་སིདྡྷི་ཧཱུྃ༔ ཞེས་གཙོ་བོ་དང༌། ཨོཾ་སརྦ་མ་ཧཱ་གུ་རུ་ཧཱུྃ༔ འཁོར་སྔགས་དང༌། ཨོཾ་ཨཱཿཧཱུྃ་གུ་རུ་བཻ་རོ་ཙ་ན་ཨཱ་ཡུརྫྙཱ་ན་སིདྡྷི་ཧཱུྃ༔ ཞེས་ཚེ་ཛཔ་སྦྱར་བ་ཁྱད་པར་རོ། །དེ་ཡང་ལོ་ཆེན་བཻ་རོ་ཙ་ན་ནི། གུ་རུ་རིན་པོ་ཆེས་སློབ་དཔོན་ཉིད་དང་དགོངས་པ་མཉམ་པ་ཞེས་རྗེ་འབངས་ཀུན་ལས་དགོངས་ཉམས་ཁྱད་པར་འཕགས་པའི་བསྔགས་བརྗོད་བསྩལ་བ་དང༌། བོད་དུ་སངས་རྒྱས་ཀྱི་བསྟན་པ་དར་རྒྱས་མཛད་པ་ལ་མཁན་སློབ་ཆོས་གསུམ་དང་བཀའ་དྲིན་མཉམ་པ་ལ་གཙོ་འཁོར་གྱི་རྣམ་པར་སྣང་བའི་རིག་འཛིན་རྣམས་ཀྱང༌། ནང་སྐོར་བླ་མ་རིག་འཛིན་དབང་ཆོག་ལས། སྤྱིར་ནི་འགྲོ་འདུལ་བླ་མ་བཅོ་ལྔ་པོ༔ ཐམས་ཅད་ཟུང་འཇུག་མངོན་གྱུར་ཀུན་ཏུ་བཟང༔ དགོངས་པ་རང་བྱུང་ནམ་མཁའི་རྣལ་འབྱོར་ཚོགས༔ ཡེ་ཤེས་སྐུ་ཅན་འཁོར་འདས་ཡོངས་ལ་ཁྱབ༔ བཞུགས་ཡུལ་ཞིང་ཁམས་གཞན་དུ་བཙལ་མི་འཚལ༔ ད་ལྟའི་ནམ་མཁའ་འདི་ཡང་རྣལ་འབྱོར་རྣམས༔ རང་གི་སེམས་ཉིད་འདི་ཡང་བླ་མས་ཁྱབ༔ བསྐུར་བྱ་སྐུར་ཐབས་བསྒྲུབ་དང་སྒྲུབ་ཐབས་མེད༔ རྣལ་འབྱོར་ལྟ་བའི་ངང་ལ་སྒྲུབ་དབང་རྫོགས༔ ཞེས་གསུངས་པའི་གནད་ཏིག་གི་དགོངས་དོན་ལ་ཡིད་ཆེས་ཀྱི་དད་པས་གསོལ་བ་གདབ་པར་བྱ་ཞིང་གཞན་རྣམས་སྔ་མ་ལྟར་རོ། །གཉིས་པ་ལ་གཉིས། ཞི་བ་སྟོན་པ་བཅུ་གཉིས་ཀྱི་བསྐྱེད་བཟླས་དང༌། ཁྲོ་བོ་མངོན་རྫོགས་རྒྱལ་པོ་ཡབ་ཡུམ་གྱི་སྒོམ་རིམ་མོ། །དང་པོ་ནི། མདོ་བྱང་ལས། ཞི་བ་རྫོགས་ཆེན་སྟོན་པ་བཅུ་གཉིས་ཀྱི༔ སྒྲུབ་པ་ཟབ་གསལ་ཀློང་ཡངས་ཞེས་བྱ་དེ༔ གཙོ་བོ་ཆོས་ཉིད་ཀློང་ལས་བསྐྱེད་པ་མེད༔ སྐུ་གསུམ་དོན་གྱི་ཕྲིན་ལས་ཆེན་པོའོ༔ ཞེས་པའི་དགོངས་དོན་ཉམས་སུ་ལེན་པ་ལ། སྨན་རཀ་གཏོར་མ་མཆོད་པ་སོགས་སྤྱི་ལྟར་བཀྲམ་ལ། ནང་སྐོར་ཁྲོ་བོ་བྱང་བུ་ཁྲིགས་བསྡེབས་ཀྱི་ཐོག་མཐའི་ཆིངས་ལ། བྷྲཱུྃ་ཛྙཱ་ན་ཙཀྲ་མཎྜ་ལ་ཧཱུྃ༔ ཞེས་རྟེན་བསྐྱེད་རྗེས་སུ། ནང་སྐོར་ཡི་དམ་ཞི་སྒྲུབ་ལྟར། ཆོས་དབྱིངས་ཀློང་ཡངས་ཆོས་ཐམས་ཅད༔ སོགས་ནས ཆགས་བྲལ་མཚན་དང་དཔེ་བྱད་རྫོགས༔ ཞེས་པའི་མཚམས་སུ། ནང་སྐོར་ཁྲོ་བོ་བྱང་བུ་ཁྲིགས་བསྡེབས་ལྟར། དུག་གསུམ་ཡེ་དག་རྡོ་རྗེ་གསུམ༔ སོགས་ནས བསྟོད་པའི་བར་དང༌། བཟླས་དམིགས་ནི། བདེ་གཤེགས་སྟོན་པ་བཅུ་གཉིས་རྣམས༔ སྣང་སྲིད་སྐུ་ཡི་རོལ་པས་གང༔ སྔགས་ནི་གྲགས་སྟོང་རང་སྒྲ་སྒྲོགས༔ འོད་གསལ་ངོ་བོའི་ཐུགས་ཀྱི་ངང༔ མཆོད་སྤྲིན་རྒྱ་མཚོས་རྒྱལ་བ་དགྱེས༔ འགྲོ་རྣམས་བླ་མེད་ས་ལ་བཀོད༔ སྣང་སྲིད་གཞིར་བཞེངས་བདེ་བ་ཆེ༔ དགོངས་པ་ཀློང་ཡངས་ངང་དུ་རྫོགས༔ ཨོཾ་བཛྲ་མ་ཧཱ་གུ་རུ་སརྦ་སིདྡྷི་ཧཱུྃ༔ སརྦ་ཏ་ཐཱ་ག་ཏ་མ་ཧཱ་ནཱ་མསྟྲཻ་ཡ་དྷཱི་ཀ་ནཾ་བུདྡྷ་སརྦ་སིདྡྷི་ཧཱུྃ༔ ཞེས་བཟླ། སྤྱིར་འདི་དག་ཀུན་བཟང་དོན་གྱི་ཕྲིན་ལས་ཞེས་རིག་སྟོང་ཡེ་ཤེས་ཀྱི་ཆོ་འཕྲུལ་ཆེན་པོའི་བཀོད་པ་ལས་གཞན་དུ་མ་དམིགས་པའི་ཡིན་ལུགས་ཀྱི་དགོངས་པ་གསལ་འདེབས་ཙམ་ལས། བསྐྱེད་རིམ་གཞན་ལྟར་ལམ་ངེས་རྫོགས་ཀྱི་གསལ་སྣང་སོགས་མ་བསྒྲུབས་ཀྱང་རུང་བར། མདོ་བྱང་གི་སྐབས་སུ་གསལ་བ་ལྟར་ལ། ལས་དང་པོ་པའི་བློ་ངོར་མཚན་དང་སྐུ་ཡི་རྣམ་འགྱུར་སོགས་མ་གསལ་ནའང་འགལ་བ་མེད་པས། འདིར་འཕྲོ་ལུས། ༈ གཉིས་པ་ཁྲོ་བོ་མངོན་རྫོགས་རྒྱལ་པོ་ཡབ་ཡུམ་གྱི་སྒོམ་རིམ་ལ་གཉིས། ཡབ་བཀའ་དང༌། ཡུམ་བཀའོ། །དང་པོ་ནི། མདོ་བྱང་ལས། ཡི་དམ་ཁྲོ་བོ་མངོན་རྫོགས་རྒྱལ་པོ་ནི༔ མདོ་ལུང་ཆེན་པོའི་རྒྱུད་ལས་བཏུས་པ་སྟེ༔ དགའ་རབ་རྡོ་རྗེས་མཛད་པའི་ལུགས་བཞིན་དུ༔ ཤྲཱི་སིང་ཧའི་ཆོས་ཀྱི་ཁྱད་ཆོས་སོ༔ ཕྲིན་ལས་ཉི་མ་མཐའ་ཡས་ཞེས་བྱ་སྟེ༔ ཞེས་གསུངས་པ་ལྟར་རྩ་བ་མངོན་རྫོགས་རྒྱལ་པོ་དང༌། ཡན་ལག་ཐེག་པ་དགུ་བསྒྲིལ་དཀྱིལ་འཁོར་གཅིག་ཏུ་རྫོགས་པ་རིག་འཛིན་དགའ་རབ་རྡོ་རྗེས་རྒྱུད་ཀྱི་དགོངས་པའི་ལུགས་སུ་བསྡེབས་པའི་མན་ངག་གི་ཞལ་ཤེས་སློབ་དཔོན་ཤྲཱི་སིངྷའི་བསྙེན་སྒྲུབ་ཇི་ལྟར་བྱ་བའི་ཚུལ་ལས། བསྙེན་སྒྲུབ་ལས་གསུམ་བྱ་བའི་ཚུལ་ལ། དཀྱིལ་འཁོར་སྒྲུབ་རྫས་སོགས་བསྙེན་པའི་སྐབས་འདིར་མ་འཛོམ་ཀྱང་རུང་མོད་ལག་ལེན་བདེ་བའི་ཆེད་ཐོག་མ་ཉིད་ནས་གཞུང་མཐུན་གྱི་དཀྱིལ་འཁོར་རས་བྲིས་ཡོད་ན་བཀྲམ། མ་འབྱོར་ན་ཚོམ་བུ་ལྷ་གནས་ལྟར་བཀོད་པའི་དབུས་སུ་ཐོད་སྐུ་ཡོད་ན་དང༌། སྨན་རཀ་གཏོར་མ་མཆོད་པས་བསྐོར། བསྙེན་པའི་དབུ་ཕྱི་ཐུན་ནས་འཛུགས། མཚམས་དམ་དུ་བཅད་ཅིང་རྒྱལ་ཆེན་ཐོ་འཛུགས་པ་སོགས་གོང་ལྟར་བྱ། དངོས་གཞི་ནང་སྐོར་ཁྲོ་བོའི་བྱང་བུ་ཁྲིགས་སྡེབས་ལ་གཏེར་གཞུང་དགོངས་པ་ཕྱོགས་གཅིག་པ་ལྟར་བཏང་བ་ལེགས་ཤིང༌། ལས་བྱང་སྔོན་དངོས་རྗེས་གསུམ་གྱི་སྒོམ་དོན་སྤྱི་ལྟར་ཤེས་པར་བྱ་དགོས་ཤིང༌། སྐབས་དོན་དམིགས་པའི་གཙོ་བོ་ལྷ་ཁྲིད་མཁན་རཏྣའི་གསུང་སོར་བཞག་ཏུ་བཀོད་པ་འདི་ལྟར། དེ་ལ་འདིར་སྲུང་འཁོར་ཡེ་ཤེས་ལྔ་ཡི་འོད་ཟེར་སྒོ་ལྔའི་དབྱིབས་ཟླུམ་ཧྲིལ། རྡོ་རྗེ། འཁོར་ལོ། རིན་ཆེན། པདྨ། རྒྱ་གྲམ་གྱི་གུར་ནང་ནས་རིམ་པར། མཐིང༌། དཀར། སེར། དམར། ལྗང་གུ་རྣམས་སྒོ་ང་ལ་རི་མོ་བྲིས་པ་ལྟར་བར་སེང་མེད་པ། ཡེ་ཤེས་ལྔའི་མེ་གཡོན་འཁོར་དུ་འབར་བའོ། །འདི་སྐབས་ནམ་མཁའ་ཆོས་འབྱུང་ཞེས་པ་ཆོས་ཐམས་ཅད་ཀྱི་འབྱུང་གནས་ཡིན་པ་ཟུར་གསུམ་མི་དགོས་ཏེ། འོག་ནས་རིམ་པ་དང་པོ་ནམ་མཁའ་མཐིང་ནག །དེ་སྟེང་རླུང་དཀྱིལ་ལྗང་ནག །དེ་སྟེང་མེ་དཀྱིལ་དམར་པོ། དེ་སྟེང་ཆུ་དཀྱིལ་དཀར་པོ། དེ་སྟེང་ས་དཀྱིལ་སེར་པོ་ཐམས་ཅད་ཟླུམ་པོ་སྟེ། འབྱུང་ལྔའི་དག་པ་ཡུམ་ལྔའི་མཁར༔ ཅེས་སོ། །དེ་སྟེང་རི་རབ་བང་རིམ་བཞི་སྟེང་གྲུ་བཞི་ཏི་ཚ་འདྲ་བ། བང་རིམ་རི་རབ་བཅས་ཤར་ཤེལ། ལྷོ་བཻ་ཌཱུརྻ། ནུབ་པདྨ་རཱ་ག །བྱང་གསེར་ལས་གྲུབ་པ། གློ་འབུར་དང་བཅས་པའི་སྟེང་ཕྱོགས་མཚམས་དུར་ཁྲོད་བརྒྱད་ཕྱོགས་བཞི་པད་དབྱིབས། མཚམས་བཞི་གཞུ་དབྱིབས། བར་མཚམས་སུ་མཚོ་ཆེན་བརྒྱད་ལ་ཀླུ་ཆེན་བརྒྱད་དང་བཅས་པ་ནི། ཚོགས་བརྒྱད་དག་པའི་དུར་ཁྲོད་བརྒྱད༔ འགྱུར་མེད་སྲུང་འཁོར་ཀུན་ལ་ཁྱབ༔ ཞེས་སོ། །དུར་ཁྲོད་ཀྱི་ནང་དུ་སྣ་ཚོགས་པདྨ་འབུམ་ལྡན་གྱི་དབུས་སུ་རྡོ་རྗེ་རྒྱ་གྲམ་རྭ་བཅུ་གཉིས་པའི་ལྟེ་བར། དུག་ལྔ་རྣམ་དག་གཞལ་ཡས་ཁང༔ ཡེ་ཤེས་རྩལ་རྫོགས་རྒྱན་གྱིས་སྤྲས༔ ཞེས་པ་འདི་རྒྱས་པ་ལ་ལུགས་གཉིས། བསྡུས་པ་དང་གསུམ་ལས། དང་པོ་ནི། གཞལ་ཡས་རིམ་པ་སོ་སོ་ཐམས་ཅད་དུ༔ དཔལ་ཆེན་ཡེ་ཤེས སོགས་ནི ཟབ་བདུན་མ་མོ་རོལ་པ་ལྟར་ཡིན་པས་རང་རེས་ཟིན་བྲིས་བཀོད་ཡོད་པ་ལྟར་རོ། །ཡང་མངོན་རྫོགས་གཏེར་གཞུང་དགོངས་པ་ཕྱོགས་གཅིག་པ་ལྟར་ན། སྟེང་ཁང་ཞི་བ་རྡོ་རྗེ་དབྱིངས་ཀྱི་ལྷ༔ བཞི་ཅུ་རྩ་གཉིས་མ་འདྲེས་ཚོམ་བུར་རྫོགས༔ གཞལ་ཡས་བར་ཁྱམས་འཁོར་ཡུག །སོགས་ནི། སྟེང་ཁང་ཞི་བ་དང་འོག་ཁང་ཁྲོ་བོ། བཀའ་འདུས་རྩ་དཀྱིལ་ལྟར་ཡིན་པས་གསལ་བྱེད་ཐོ་ཡིག་མཆོག་གླིང་ཞལ་གསུང་ཟུར་དུ་བྲིས་པ་ཡོད་པས་དེར་བལྟའོ། །འདིར་བསྡུས་པའི་ལུགས་ནི། ཡེ་ཤེས་དང་འཇིག་རྟེན་གྱི་གཞལ་ཡས་ཁང་ཉིས་རིམ་ནང་མ་རྟ་བབ་བཞི་མ། ཕྱི་མ་བརྒྱད་ལྡན་གྱི་དབུས་སུ། རིན་ཆེན་ཨསྨ་གརྦྷའི་གྲུ་ཆད་གློ་འབུར་ལྡན་པའི་སྟེང་གསེར་གྱི་འཁོར་ལོ་དབྱིབས་དྲུག་པོ་ལྟར་ལྟེ་བ་མུ་ཁྱུད་དང་བཅས་པ་དེའི་མཐར་ལྷ་སྣམ་མམ། ཁྱམས་དྲུག་ལ་དཔལ་ཆེན་པོའི་ཡེ་ཤེས་ཀྱི་རང་རྩལ་སུམ་བརྒྱ་དྲུག་ཅུ་རེ་དགུ་འགོད་ཚུལ་ནི། དབུས་ཀྱི་གྲུ་ཆད་དང་གློ་འབུར་ལ་གནས་མ་བརྒྱད། དང་པོ་གསེར་ཁྱམས་ལ་ཡུལ་མ་བརྒྱད། སྒོ་སྐྱོང་བཞི། ཁྱམས་གཉིས་པ་ཕྱོགས་མདོག་དབང་མོ་ཉི་ཤུ་རྩ་བརྒྱད། ཁྱམས་གསུམ་པ་ལྗང་གུ་ལ་མཁའ་འགྲོ་སོ་གཉིས་ཕྱོགས་རེར་བརྒྱད་རེ། མ་མོ་བདུན་བྱང་ཤར་མ་གཏོགས་པའི་ཕྱོགས་མཚམས་བདུན། སྲིང་མོ་བཞི་ཕྱོགས་བཞིར་བཀོད། ཁྱམས་བཞི་པ་སྔོན་པོ་ལ་གིང་ཆེན་བཅོ་བརྒྱད་ཕྱོགས་མཚམས་བརྒྱད་རེ་དང༌། ཤར་ནུབ་གཉིས་སུ་རེ་རེ་ལྷག་པ་སྟེ་བཅོ་བརྒྱད། ཁྲོ་བོ་དྲུག་ཅུ་ཕྱོགས་རེར་བཅོ་ལྔ་རེ། ཁྱམས་ལྔ་པ་དམར་པོ་ལ་རིགས་བཞི་ཕོ་ཉ་བརྒྱ་དང་བཞི་བཅུ་ནི་ཕྱོགས་རེར་སུམ་ཅུ་སོ་ལྔ་རེའོ། །ཁྱམས་དྲུག་དཀར་པོ་ལ་མ་མོ་དྲུག་ཅུ་ནི་ཕྱོགས་རེར་བཅུ་བཞི་སྒོ་བཞིར་རེ་རེ་སྟེ་ཐམས་ཅད་ཡོངས་དྲིལ་བ་བསྡོམས་པས་སུམ་བརྒྱ་དྲུག་ཅུ་རེ་དགུའོ། །དེ་མཐར་ཡེ་ཤེས་སྙིང་པོའི་གཞལ་ཡས་ཁང་རྟ་བབས་བཞི་པ་པདྨ་འཁོར་ལོ་གདུགས་དང་རི་དྭགས་ཆོས་ཉན་དང་བཅས་པའོ། །ངེས་རྫོགས་ཞིབ་པར་སྐུ་མདོག་ཕྱག་མཚན་བཀའ་འདུས་ལྟར་རོ། །འདིར་མོས་སྒོམ་ཙམ་ལ་ཁྲོ་མོ་ལས་མདོག་ཅན་སོགས་མི་དགོས་ཏེ། གནས་མ་བརྒྱད་སྔོན་མོ་ཌཱ་རུ་ཐོད་ཆང༌། ཡུལ་མ་བརྒྱད་སྨུག་ནག་ཐོད་ཁྲག་ཕྱོགས་མདོག །སྒོ་སྐྱོང་ཕྱོགས་མདོག་ཕྱག་རྒྱ་བཞི་དབང་མོ་ཉེར་བརྒྱད་རྡོ་རྗེ་རིན་ཆེན་པདྨ་རྒྱ་གྲམ་འཛིན་པ་དཀར་སེར་དམར་ལྗང༌། མཁའ་འགྲོ་སོ་གཉིས་རྡོ་རྗེ་རིན་ཆེན་པདྨ་རྒྱ་གྲམ་གྱིས་མཚན་པའི་གྲི་ཐོད་ཕྱོགས་མདོག །མ་མོ་བདུན་མཐིང་ནག་རལ་གྲི་ཐོད་ཁྲག །སྲིང་མོ་བཞི་དཀར་སེར་དམར་ལྗང་རང་མདོག་གི་རྒྱལ་མཚན་འཛིན་པ། གིང་ཆེན་བཅོ་བརྒྱད་དཀར་སེར་དམར་ལྗང་རྔེའུ་ཆུང་བརྡུང་བ། ཁྲོ་བོ་དྲུག་ཅུ་མཐིང་ནག་གྲི་ཐོད་འཛིན་པ། རིགས་བཞིའི་ཕོ་ཉ་བརྒྱ་དང་བཞི་བཅུ་དཀར་སེར་དམར་ལྗང༌། ཤར་ཕྱོགས་པ་རྣམས་ལྕགས་ཀྱུ། ལྷོ་ཕྱོགས་པ་རྣམས་ཞགས་པ། ནུབ་ཕྱོགས་པ་རྣམས་ལྕགས་སྒྲོག །བྱང་ཕྱོགས་པ་རྣམས་དྲིལ་བུ། གཡོན་ཐམས་ཅད་སྡིག་མཛུབ། མ་མོ་དྲུག་ཅུ་སྒོ་བཞིར་གནས་པ་ཕྱག་རྒྱ་བཞི་དང་ཐོད་ཁྲག །གཞན་ཐམས་ཅད་གཡས་བདུད་རྩིའི་བུམ་པ་དང་གཡོན་ནད་རྐྱལ་འཛིན་པ་ཕྱོགས་མདོག །གིང་ཆེན་བཅོ་བརྒྱད་མ་གཏོགས་ཐམས་ཅད་མི་ལྤགས་དང་སྟག་གཟིག་གི་ཤམ་ཐབས་རུས་རྒྱན། ཞབས་གར་སྟབས་མེ་རླུང་གི་དབུས་སུ་གནས་པའོ། ༈ འཇིག་རྟེན་གྱི་གཞལ་ཡས་ཁང་གཉིས་པའི་འོབས་སུ་ཁྲག་མཚོ་འཁྱིལ་བའི་ཁྱམས་ལ་འཇིག་རྟེན་མ་མོ་བདུན་བརྒྱ་ཉི་ཤུ་ནི། ཕྱོགས་རེར་བརྒྱ་དང་ཉི་ཤུ་རེ་ཕྱོགས་མདོག་ཁྲོ་མོའི་ཆས་ཅན་ཐམས་ཅད་ཀྱང་དཔལ་ཆེན་པོའི་ཡེ་ཤེས་ཀྱི་དཀྱིལ་འཁོར་ལ་གུས་པས་ཐལ་མོ་སྦྱར་བའོ། །དཀྱིལ་འཁོར་གྱི་ཕྱི་ཁྱམས་པདྨའི་ར་བའི་ནང་དུ་འཇིག་རྟེན་པའི་འཁོར་ཡུག་ལ། ཤར་དུ་ལྷ་དང་ལྷ་མིན། ལྷོར་མི། ནུབ་ཏུ་དམྱལ་བ་དང་ཡི་དྭགས། བྱང་དུ་བྱོལ་སོང་གི་འཇིག་རྟེན་གྱིས་ཡོངས་སུ་བསྐོར་བའི་སྟེང་གི་ནམ་མཁར། ཤར་དུ་བྱང་སེམས། ལྷོར་རང་རྒྱལ། ནུབ་ཏུ་ཉན་ཐོས། བྱང་དུ་དྲང་སྲོང་གྲུབ་པ་བདེན་ཚིག་གྲུབ་པའི་ཚོགས་དང་བཅས་པ། དཀྱིལ་འཁོར་ཕྱི་མའི་རྟ་བབས་ཐད་ཀྱི་བར་སྣང་ལ་རིག་འཛིན་བྱེ་བ་ས་ཡ་སྤྲིན་ལྟར་གཏིབས་པའོ། །སྟེང་ཁང་བུམ་པའི་ནང་གི་ནམ་མཁར་ཞི་བ་བཞི་བཅུ་རྩ་གཉིས་ཀྱི་དཀྱིལ་འཁོར་ནི་སྒྱུ་འཕྲུལ་ལྟར་རོ། ༈ དུར་ཁྲོད་བརྒྱད་ཀྱི་ཕྱི་རོལ་སྲུང་འཁོར་ནང་རི་རབ་ཀྱི་སྟེང་དེར། ཤར་དུ་མངོན་མཐོ་ལྷ་མིའི་ཐེག་པ་ལ་ཕྱག་རྡོར་ངན་སོང་ཀུན་འདྲེན་གྱི་དཀྱིལ་འཁོར། ལྷོར་བྱ་རྒྱུད་ལ་མི་འཁྲུགས་པ། ནུབ་ཏུ་སྤྱོད་རྒྱུད་ལ་ཤཱཀྱ་ཐུབ་པ་སྐུ་ཡི་དཀྱིལ་འཁོར། བྱང་དུ་རྣལ་འབྱོར་རྒྱུད་ལ་ཀུན་རིགས་རྩ་བའི་དཀྱིལ་འཁོར་རྣམས་མགྲོན་ཐབས་ཀྱི་ཚུལ་ལོ། །འདི་བསྡུས་པའི་ལུགས་ཡིན་གྱི། རྒྱས་པར་ནང་སྐོར་ཡི་དམ་ཁྲོ་བོའི་སྔགས་བྱང་གི་བསྙེན་དམིགས་སྐབས་ལྟར་བསྒོམས་པར་བྱའོ། ༈ སྙིང་པོའི་དཀྱིལ་འཁོར་གྱི་ལྟེ་བར་དཔལ་ཆེན་པོ་བསྒོམ་ཚུལ་ནི། གཡས་ནས་རིམ་པར། སེང་གེ །སྟག །གཟིག །དོམ གླང་ཆེན། མ་ཧེ། ཆུ་སྲིན། སྦྲུལ་ཏེ་བྱོལ་སོང་གཙོ་བོ་བརྒྱད་ཀྱི་ཁྲིར། པདྨ་ཟླ་བ་ཉི་མའི་གདན་ལ་དཔལ་ཆེན་མངོན་རྫོགས་རྒྱལ་པོ་སྐུ་ལུས་སྨུག་ནག་དབུས་ཞལ་བདུན་སྨུག་ནག་ཁྲོ་བོ། །གཡས་ཞལ་བདུན་དཀར་པོ་བཞད་པ། གཡོན་ཞལ་བདུན་དམར་པོ་ཆགས་ཉམས་ཅན། རྩ་བའི་ཕྱག་བརྒྱད་ཀྱི་དང་པོ་གཉིས་གྲི་ཐོད་འཛིན་པས་ཡུམ་ལ་འཁྱུད་པ། བར་པ་གཉིས་ཀྱི་གཡས་པས་དག་པའི་ཞིང་དང༌། མ་དག་པའི་འཇིག་རྟེན་འདེགས་པའི་ཚུལ། ཐ་མ་གཉིས་ཀྱིས་འདོད་ཁམས་དང་གཟུགས་ཁམས་ཐིག་ལེར་གནས་པ་འཛིན་པའོ། །ལྷག་མ་བར་ཕྱག་བཅུས་གཡས་པ་ལྔས་ས་དཀྱིལ་གྲུ་བཞི་སེར་པོ། ཆུ་དཀྱིལ་དཀར་པོ་ཟླུམ་པོ། མེ་དཀྱིལ་དམར་པོ་གྲུ་གསུམ། རླུང་དཀྱིལ་ཟླ་གམ་ལྗང་གུ །ནམ་མཁའ་མཐིང་ནག་གྲུ་གསུམ་འཛིན་པ། གཡོན་པ་ལྔས། རྡོ་རྗེ། འཁོར་ལོ། རིན་ཆེན། པདྨ། རྒྱ་གྲམ་རྣམས་འཛིན་པ། ཡན་ལག་གི་ཕྱག་བརྒྱས་གཡས་པ་ལྔ་བཅུས་གྲི་གུག །གཡོན་ལྔ་བཅུས་ཐོད་ཁྲག་འཛིན་པ། དཔལ་དང་དུར་ཁྲོད་ཆས་རྫོགས་རྡོ་རྗེ་རིན་ཆེན་གྱི་གཤོག་པ་གཡས་གཡོན་དུ་བརྒྱངས་ཤིང་ཞབས་རྡོར་སྐྱིལ་གྱིས་བཞུགས་པའི་པང་དུ་ཡུམ་བཅོམ་ལྡན་འདས་རྡོ་རྗེ་བདེ་མ་སྐུ་མདོག་མཐིང་ནག་དབུས་ཞལ་སུམ་བརྩེགས་མཐིང་ག །གཡས་ཞལ་སུམ་བརྩེགས་དཀར་པོ། གཡོན་ཞལ་སུམ་བརྩེགས་དམར་པོ། ཕྱག་བཅོ་བརྒྱད་ཀྱི་གཡས་དགུས་རྡོ་རྗེ་དང༌། གཡོན་དགུས་དུང་ཁྲག་འཛིན་ཅིང་ཡབ་ལ་སྦྱོར་བ། ཞབས་གཉིས་ཡབ་ཀྱི་སྐེད་དུ་པདྨའི་སྐྱིལ་ཀྲུང་གིས་འཁྲིལ་བའོ། །དེ་ཕྱིར་འཁོར་ལོ་རྩིབས་བརྒྱད་ལ་པདྨ་ཉི་མ་ཞིང་གི་གདན་ལ་རྒྱུད་ལུང་གི་ཁྲོ་བོ་བརྒྱད་ནི། ཤར་དུ་བུདྡྷ་ཧེ་རུ་ཀ་ཡབ་ཡུམ་དཀར་གསལ་ཞལ་གསུམ་ཕྱག་དྲུག་པ་གཡས་གསུམ་འཁོར་ལོ། ལྷོར་རཏྣ་ཧེ་རུ་ཀ་སེར་པོ་ཡབ་ཡུམ་གཡས་གསུམ་རིན་ཆེན། དེ་བཞིན་ནུབ་པདྨ། བྱང་དུ་རྒྱ་གྲམ། མཚམས་བཞིའི་ལུང་གི་ཁྲོ་བོ་བཀའ་འདུས་ལྟར་ན། ཤར་ལྷོར་རཀྴ། ལྷོ་ནུབ་ས་ནུ། ནུབ་བྱང་གུཧྱ། བྱང་ཤར་དུ་ཡཀྴ་ཧེ་རུ་ཀ་ཡིན་ཀྱང༌། འདིར་ནི། ཤར་ལྷོར་གུཧྱ་ཧེ་རུ་ཀ་གསང་བའི་ཁྲག་འཐུང༌། ལྷོ་ནུབ་ཏུ་ས་ནུ་ཧེ་རུ་ཀ་སྟེ་ཕྲ་བའི་ཁྲག་འཐུང༌། ནུབ་བྱང་ཡཀྴ་ཧེ་རུ་ཀ་སྟེ་གནོད་སྦྱིན་ཁྲག་འཐུང༌། བྱང་ཤར་དུ་རཀྴ་ཧེ་རུ་ཀ་སྟེ་སྲིན་པོ་ཁྲག་འཐུང༌། བཞི་ཀ་གཡས་གསུམ་རྡོ་རྗེ། རིན་ཆེན། པདྨ། རལ་གྲི། ཁྲོ་བོ་བརྒྱད་པོ་ཐམས་ཅད་ཀྱི་ཕྱག་གཡོན་ཐོད་ཁྲག །ཡུམ་རྣམས་ཞལ་གཅིག་ཕྱག་གཉིས་རང་མདོག་རང་རྟགས་དང་ཐོད་ཁྲག་འཛིན་ཅིང་འཁྲིལ་སྦྱོར། རྒྱུད་ཀྱི་ཁྲོ་བོ་བཞི་ཡི་ཡབ་རྣམས་ཞབས་གཡས་བརྐྱང༌། ལུང་གི་ཁྲོ་བོ་བཞིས་ཞབས་གཡོན་བརྐྱང་དཔལ་དང་དུར་ཁྲོད་ཆས་རྫོགས་རྡོ་རྗེའི་གཤོག་པ། ཡུམ་ལ་གཟིག་ཤམ་སོགས་སྔ་འགྱུར་སྤྱི་ལྟར་རོ། ༈ ཞར་བྱུང་འཕྲོས་དོན་ཤིན་ཏུ་རྒྱས་སྐབས་རྡོ་རྗེའི་སྲུང་འཁོར་ནང་གི་ཚོམ་བུའི་དཀྱིལ་འཁོར་ལ། བྱང་ཤར་དུ་ངན་སོང་གནས་འདྲེན། ནུབ་བྱང་དུ་ལྷ་མིའི་དཀྱིལ་འཁོར། ལྷོ་ནུབ་ཏུ་ཉན་ཐོས། ཤར་ལྷོར་རང་རྒྱལ། བྱང་དུ་བྱང་སེམས། ནུབ་ཏུ་ཀྲི་ཡ། ལྷོ་རུ་ཨུ་པ། ཤར་དུ་རྣམ་སྣང་རྡོར་དབྱིངས་དཀྱིལ་འཁོར་ཏེ། འདི་རྒྱས་པའི་སྐབས་ཡིན། བསྡུས་པ་སྔར་བཤད་པ་བཞིན་ནོ། །སྤྱིར་དེ་དག་གི་དག་བྱ་དག་བྱེད་ཀྱི་གོ་དོན་གལ་ཆེ་བས་ འདིར་འཕྲོ་ལུས། ༈ ཛཔ་དམིགས་ལ་གཉིས་ལས། དང་པོ་རྒྱས་པ་ནི། བྱང་བུ་ཁྲིགས་བསྡེབས་སུ། བསྙེན་སྒྲུབ་ཆིག་དྲིལ་གྱི་ཏིང་ངེ་འཛིན་ལ། བཟླ་བྱའི་སྔགས་ཀྱང་སྤྱི་དྲིལ་ཆེན་པོ་དྲག་སྔགས་འདུས་པ་དང་རུ་ལུ་ཁོ་ན་ཡིན་ཀྱང༌། ནང་སྐོར་ཡི་དམ་ཁྲོ་བོའི་སྒྲུབ་པ་ལས། འཁོར་གྱི་ལྷ་སྔགས་སྤྲོས་འདོད་ན༔ གུད་དུ་གསལ་ལས་ཤེས་པར་བྱ༔ ཞེས་གསུངས་པ་བཞིན། བརྒྱུད་འཛིན་ཟབ་ཆོས་ཀྱི་མངའ་བདག་མཁན་ཆེན་རཏྣའི་གསུང་ལྟར་ཛཔ་དམིགས་འབྲིང་པོ་ལྟར་ངེས་པར་སྦྱོར་དགོས་པས་དེ་ལྟར་བཤད་པ་ལ་གསུམ། དང་པོ་ཞི་བར་བསྙེན་པ་ནི། ནང་སྐོར་ཁྲོ་བོའི་བྱང་བུ་ཁྲིགས་བསྡེབས་ཀྱི་ཛཔ་དགོངས་གསལ་འདེབས། ཧཱུྃ་སྟོང་གསུམ་འཇིག་རྟེན་ཐམས་ཅད་ཀུན༔ སོགས་ནས། ལྷུན་གྲུབ་ཞི་བའི་རང་བཞིན་བསྒོམ༔ ཞེས་ཛཔ་བསྐུལ་བྱས་ཏེ། རང་གི་ཐུགས་སྲོག་ས་བོན་ལས༔ བདེ་བ་ཆེན་པོའི་འོད་ཟེར་འཕྲོས༔ སྟེང་ཁང་ཞི་བའི་དཀྱིལ་འཁོར་པའི༔ ལྷ་ཚོགས་རྣམས་ཀྱི་ཐུགས་བརྒྱུད་བསྐུལ༔ དེ་རྣམས་ཐུགས་སྲོག་འོད་ཟེར་སྤྲིན༔ མཁའ་ཁྱབ་ཀུན་ཏུ་སྣང་བ་ཡིས༔ བདག་དང་འགྲོ་བའི་སྒྲིབ་གཉིས་སྦྱངས༔ ཡེ་ཤེས་མཆོག་གི་བྱིན་རླབས་གྱུར༔ ཨོཾ་གུཧྱ་ཛྙཱ་ན་བྷོ་དྷི་ཙིཏྟ་མ་ཧཱ་སུ་ཁ་ཧཱུྃ་ཧཱུྃ༔ ཞེས་པའི་ཏིང་འཛིན་དང་མ་བྲལ་བས་བསྙེན་སྔགས་འབུམ་ཕྲག་བཞི་བཟླ། ཐུན་མཐར་ཁྲག་འཐུང་གཙོ་འཁོར་གྱི་བཟླས་པ་ཁྱུག་ཙམ་བྱས་ལ་གྲོལ། ཞི་བའི་བསྙེན་ཚད་ལོང་བ་དང༌། ཁྲག་འཐུང་གཙོ་བོའི་ཉེ་བསྙེན་གྱི་བཟླས་དམིགས་ནི། ཐོག་མར་ཞི་བསྙེན་ཁྱུག་ཙམ་སྔར་ལྟར་བཏང་རྗེས། རང་གི་ཐུགས་ཀར་ཉི་མའི་སྟེང༔ རྡོ་རྗེ་རྩེ་ལྔའི་ལྟེ་བར་ཧཱུྃ༔ མཐའ་མར་རྩ་བའི་སྔགས་ཀྱིས་བསྐོར༔ བཟླས་པས་སྔགས་ཕྲེང་ལུ་གུ་རྒྱུད༔ ཡབ་ཡུམ་ཞལ་ཞུགས་གསང་བར་འཁོར༔ བདེ་བ་ཆེན་པོའི་གཟི་བྱིན་བསྐྱེད༔ མཆོག་ཐུན་དངོས་གྲུབ་བདུད་རྩིའི་བཅུད༔ ཧཱུྃ་ཐིམ་ཡེ་ཤེས་འབར་བར་གྱུར༔ ཨོཾ་ཨ་ཀྲ་མ་ཧཱ་ཤྲཱི་ཧེ་རུ་ཀ །ཀ་ཏ་མ་ཧཱ་ཀྲོ་དྷཱི་ཤྭ་རི་ཧཱུྃ་ཕཊ྄༔ ཞེས་འབུམ་ཕྲག་གཅིག་བཟླ། གཞན་རྣམས་ཁྱུག་ཙམ་བཏང་བ་སོགས་སྔ་མ་དང་མཚུངས། གསུམ་པ་སྒྲུབ་པ་གཙོ་དགུའི་བཟླས་དམིགས་ནི། གཙོ་འཁོར་ཐུགས་ཀར་ཉི་མའི་སྟེང༔ རྡོ་རྗེ་རྩེ་དགུའི་ལྟེ་བར་ཧཱུྃ༔ དྲིལ་སྒྲུབ་སྔགས་ཀྱི་ཕྲེང་བས་བསྐོར༔ བཟླས་པས་སྔགས་ཕྲེང་ལུ་གུ་རྒྱུད༔ ཡབ་ཡུམ་ཞལ་ཞུགས་སོགས་གོང་དང་འདྲ། ཨོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་བཛྲ་ཀྲོ་དྷཱི་ཤྭ་རི་བུདྡྷ་ཤྲཱི་ཧེ་རུ་ཀ་བུདྡྷ་ཀྲོ་དྷཱི་ཤྭ་རི་རཏྣ་ཤྲཱི་ཧེ་རུ་ཀ་རཏྣ་ཀྲོ་དྷཱི་ཤྭ་རི་པདྨ་ཤྲཱི་ཧེ་རུ་ཀ་པདྨ་ཀྲོ་དྷཱི་ཤྭ་རི་ཀརྨ་ཤྲཱི་ཧེ་རུ་ཀ་པདྨ་ཀྲོ་དྷཱི་ཤྭ་རི་གུཧྱ་ས་ནུ་ཡཀྴ་རཀྴ་ཤྲཱི་ཧེ་རུ་ཀ་ཀྲོ་དྷཱི་ཤྭ་རི་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཞེས་སྤྱི་དྲིལ་ཆེན་པོ་གཙོ་བོར་བྱས་སྟེ་འབུམ་ཕྲག་གཅིག་བཟླ་གསུངས། བཞི་པ་སྒྲུབ་པ་ཆེན་པོ་དཀྱིལ་འཁོར་ཡོངས་རྫོགས་ཀྱི་བཟླས་པ་ལ། བདག་མདུན་ཛཔ་ཁང་ཕྱེས་ན་ལེགས་པས། བསྟོད་པའི་རྗེས། ཨོཾ་རུ་ལུ་རུ་ལུ་སོགས། ཕཊ྄་ཛཿས་བདག་མདུན་མེ་རི་འདབས་འབྱོར་གྱི་ཚུལ་དུ་བཞུགས་པར་མོས་ལ། ཛཔ་བསྐུལ། ཧཱུྃ༔ སྟོང་གསུམ་འཇིག་རྟེན་ཐམས་ཅད་སོགས་རྗེས། ཞི་ཁྲོ་གཙོ་དགུའི་བསྙེན་པ་ཁྱུག་ཙམ་སྔོན་དུ་བཏང་སྟེ། བདག་ཉིད་གཙོ་མཆོག་ཧེ་རུ་ཀའི༔ ཐུགས་སྲོག་ལས་བྱུང་འབར་བའི་འོད༔ དཀྱིལ་འཁོར་རབ་འབྱམས་ཐུགས་ཀར་ཐིམ༔ ཐུགས་རྒྱུད་རང་དབང་མེད་པར་བསྐུལ༔ སོ་སོའི་སྐུ་ཡི་གནས་གསུམ་ནས༔ སྐུ་དང་སྔགས་ཕྲེང་ཕྱག་མཚན་ཚོགས༔ འོད་དང་འོད་ཟེར་དང་བཅས་འཕྲོས༔ ཁམས་གསུམ་ཐམས་ཅད་སྣང་བར་བྱས༔ གང་འདུལ་ཕྲིན་ལས་ལྷུན་གྱིས་གྲུབ༔ སྣོད་བཅུད་ཐ་མལ་སྣང་ཞེན་སྦྱངས༔ དཀྱིལ་འཁོར་རབ་འབྱམས་གོ་འཕང་བཀོད༔ ཚུར་བསྡུས་བདག་ལ་ཐིམ་པ་ཡི༔ དངོས་གྲུབ་རྣམ་གཉིས་ཐོབ་པར་གྱུར༔ ལྷ་སྔགས་སོ་སོ་ལ་སེམས་འཛིན་སྤྲོ་བསྡུ་དང་བཅས། ཧ་ཧ་ཧ་ཧ་ཧ་ཧ་ཧ་ཧ༔ ཞེས་གནས་མ་བརྒྱད་དང༌། ཧེ་ཧེ་ཧེ་ཧེ་ཧེ་ཧེ་ཧེ་ཧེ༔ ཡུལ་མ་བརྒྱད། ཛཿཧཱུྃ་བཾ་ཧོཿ སྒོ་མ་བཞི། བྷྱོ་བྷྱོ་བྷྱོ་བྷྱོ་བྷྱོ་བྷྱོ༔ བྷྱོ་བྷྱོ་བྷྱོ་བྷྱོ་བྷྱོ་བྷྱོ༔ བྷྱོ་བྷྱོ་བྷྱོ་བྷྱོ་བྷྱོ་བྷྱོ༔ བྷྱོ་བྷྱོ་བྷྱོ་བྷྱོ་བྷྱོ་བྷྱོ༔ བྷྱོ་བྷྱོ་བྷྱོ་བྷྱོ༔ དབང་མོ་ཉེར་བརྒྱད་དང༌། ཨེ་ཨ་རལླི་ཧཱུྃ༔ མཁའ་འགྲོ་སོ་གཉིས། མ་མེ་དྷཱ་ཏུ་ཧཱུྃ༔ བཛྲ་དུནྟིཾ་བྷྱོ༔ མ་བདུན་སྲིང་བཞི། ཀིངྐ་ར་ཧ་ཧ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ གིང་ཆེན་བཅོ་བརྒྱད། ཀྲོ་དྷ་ཀྲོ་དྷཱི་ཧཱུྃ༔ ཁྲོ་བོ་དྲུག་ཅུ། བྷ་ན་ཧ་ན་གརྫ་པ་ཙ་ཛཿཧཱུྃ་བྃ་ཧོཿ མ་མོ་ཉིས་བརྒྱ་བཞི་བཅུ་དང་ཕོ་ཉ་རིགས་བཞི། མ་མ་ཤྭ་རི་ཧཱུྃ༔ མ་མོ་དྲུག་ཅུ། ཨོཾ་མ་ཧཱ་གུ་རུ་ཤཱ་རི་རམ་གི་ལི་ཧཱུྃ༔ རྒྱུ་ཡི་རྟ་བབ་ཁོར་ཡུག་ཏུ་བཞུགས་པའི་རིག་འཛིན་བྱེ་བ་ས་ཡ་བཅས་དང༌། རང་གི་ཐུགས་ཀའི་འོད་ཟེར་གྱིས༔ ཡན་ལག་དཀྱིལ་འཁོར་ཐུགས་དམ་བསྐུལ༔ དེ་རྣམས་ཐུགས་ནས་ཡེ་ཤེས་ཀྱི༔ སྣང་བས་འཁོར་འདས་ཞིང་ཀུན་ཁྱབ༔ འཕགས་རྣམས་དགྱེས་ཤིང་དགྱེས་པ་བསྐྱེད༔ སེམས་ཅན་ཀུན་གྱི་སྒྲིབ་གཉིས་སྦྱངས༔ ཚུར་འདུས་བདག་ལ་ཐིམ་པ་ཡིས༔ བདག་དང་འགྲོ་དྲུག་ཡིད་ཅན་ཀུན༔ ངན་སོང་འཁོར་བའི་སྡུག་བསྔལ་བསལ༔ མཐོ་རིས་ཐར་པའི་གོ་འཕང་བཀོད༔ བྱང་ཆུབ་གསུམ་གྱི་ས་བོན་དང༔ འབྲས་བུ་མངོན་དུ་གྱུར་ནས་ཀྱང༔ དངོས་གྲུབ་ཐམས་ཅད་ཐོབ་པར་བསམ༔ ཞེས་སྤྱིའི་བཟླས་དམིགས་ལ། ཨོཾ་བཛྲ་པཱ་ཎི་སརྦ་ཀརྨ་ཨ་བ་ར་ཎ་བི་ཤྭ་དྷ་ཡ་ཧ་ན་ཧཱུྃ་ཕཊ྄༔ བྱང་ཤར་ངན་སོང་ཀུན་འདྲེན་གྱི་དཀྱིལ་འཁོར་དང༌། ཨོཾ་མུ་ནེ་ཡེ་ཀྵྃ་བྲེཾ་ཏྲུྃ་སྭཱ་ཧཱ༔ ཨོཾ་མུ་ནེ་སྲུཾ་ཀྲིཾ་སྭཱ་ཧཱ༔ ནུབ་བྱང་ལྷ་མིའི་ཐེག་པའི་དཀྱིལ་འཁོར། ཨོཾ་མུ་ནེ་མུ་ནེ་མ་ཧཱ་མུ་ནེ་ཤཱཀྱ་མུ་ན་ཡེ་སྭཱ་ཧཱ༔ ལྷོ་ནུབ་ཉན་ཐོས་ཐེག་པའི་དཀྱིལ་འཁོར། ཨོཾ་ཡེ་དྷརྨ་སོགས་ཎཿསྭཱ་ཧཱ༔ ཤར་ལྷོར་རང་རྒྱལ་ཐེག་པའི་དཀྱིལ་འཁོར། ཨོཾ་མ་ཧཱ་ཀ་རུ་ཎི་ཀ་སརྦ་བྷོ་དྷི་སཏྭ་སྭ་ཧཱ༔ བྱང་ཕྱོགས་བྱང་སེམས་ཐེག་པའི་དཀྱིལ་འཁོར། ཨོཾ་སརྦ་ཏ་ཐཱ་ག་ཏ་ཨ་ནུ་ག་ཏེ་ཨོཾ་ཀུ་རུཾ་གི་ནི་སྭཱཧཱ༔ ཞེས་དཀྱིལ་འཁོར་སྤྱི་དང༌། ཨོཾ་ཝཱ་གཱི་ཤྭ་རི་མུྃ༔ ཨོཾ་མ་ཎི་པདྨེ་ཧཱུྃ༔ ཨོཾ་བཛྲ་པཱ་ཎི་ཧཱུྃ༔ ཞེས་གཙོ་བོ་རིགས་གསུམ་སྔགས་བཅས་བཟླ། ཨོཾ་བཛྲ་བཻ་རོ་ཙ་ན་ཨཀྵོ་བྷྱ་རཏྣ་སཾ་བྷ་ཝ་པདྨ་དྷ་ར་ཧཱུྃ་སྭཱ་ཧཱ༔ ལྷོ་ཕྱོགས་སུ་ཨུ་བྷ་རིགས་བཞི་དང༌། ཨོཾ་ཧཱུྃ་ཏྲཱྃ་ཧྲཱིཿཨཿ མཱུྃ་ལཱྃ་མཱྃ་པཱྃ་ཏཱྃ་སརྦ་ཏ་ཐཱ་ག་ཏ་མ་ཧཱ་ཡོ་གི་ཤྭ་རི་ཧཱུྃ༔ ཤར་ཕྱོགས་རྡོ་རྗེ་དབྱིངས་ཀྱི་དཀྱིལ་འཁོར་དང༌། ན་མོ་བྷ་ག་ཝ་ཏེ་སརྦ་དུརྒ་ཏེ་པ་རི་ཤྭ་དྷ་ན་རཱ་ཛ་ཡ༔ ཏ་ཐཱ་ག་ཏ་ཡ༔ ཨརྷ་ཏེ་སམྱཀྶཾ་བུདྡྷ་ཡ༔ ཏ་དྱ་ཐཱ༔ ཨོཾ་ཤོ་དྷ་ནི་ཤོ་དྷ་ནི༔ སརྦ་པཱ་པཾ་ཤོ་དྷ་ནི༔ ཤུདྡྷེ་ཤུདྡྷེ་སརྦ་ཨཱ་བ་ར་ཎ་བི་ཤུདྡྷེ་སྭཱཧཱ༔ གཙོ་བོ་ངན་སོང་སྦྱོང་བ་རྣམ་སྣང་གི་གཟུངས་ཀྱང་བཟླ། སོ་སོའི་བཟླས་པ་འདི་དག་གྲངས་ཚད་ཁྲི་རེ་གསུངས། རང་ཉིད་ཁྲག་འཐུང་ཆེན་པོ་ཡི༔ ཙིཏྟ་རིན་ཆེན་ཟུར་བརྒྱད་པའི༔ ཉི་ཟླ་ཁ་སྦྱོར་ལྟེ་བར་ཧཱུྃ༔ སྔགས་ཀྱི་ཕྲེང་བས་བསྐོར་བ་ལས༔ འོད་འཕྲོས་ལུས་ཀྱི་ནང་ཀུན་གང༔ སྒྲིབ་དག་དབང་དང་དངོས་གྲུབ་ཐོབ༔ སླར་ཡང་སྔགས་ཀྱི་འོད་ཟེར་གྱིས༔ དཀྱིལ་འཁོར་རབ་འབྱམས་ཐུགས་རྒྱུད་བསྐུལ༔ དེ་ལས་འོད་ཟེར་མཁའ་ཁྱབ་འཕྲོས༔ ཐ་མལ་སྣང་ཞེན་དབྱིངས་སུ་ཐིམ༔ སྣོད་བཅུད་གཞལ་ཡས་ཁང་དང་ལྷ༔ སྒྲ་ཀུན་གྲགས་སྟོང་སྔགས་ཀྱི་དབྱངས༔ དྲན་བསམ་བདེ་གསལ་མི་རྟོག་པ༔ དབྱེར་མེད་ཀུན་བཟང་དགོངས་པའི་ཀློང༔ མ་ནོར་མ་བཅོས་བསམ་འདས་པ༔ བརྗོད་བྲལ་ཡེ་ཤེས་མངོན་གྱུར་བསམ༔ ཞེས་པའི་དགོངས་པ་དང་མ་བྲལ་བས། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཁྲག་འཐུང་རབ་འབྱམས་སྤྱི་དྲིལ་གྱི་སྔགས་འབུམ་ཕྲག་བཞི་བཟླ་བའམ། ཁྱད་པར་རུ་ལུ་འབྲུ་བརྒྱད་པ༔ ཡོངས་དྲིལ་མཐར་ཐུག་བཟླས་པའི་སྐབས༔ ཞེས་གསུངས་པས་གཙོ་འཁོར་ལྷ་ཚོགས་ཐམས་ཅད་ཀུན་འདུས་ཀྱི་སྤྱི་སྔགས་སྙིང་པོ་མཐར་ཐུག་ཡིན་པས་བཟླས་གྲངས་ཇི་ཙམ་མང་བཞིན་ལེགས་པའང་ཤེས་པར་བྱའོ། །ཡན་ལག་གི་དཀྱིལ་འཁོར་སོ་སོའི་བཟླས་པ་མ་གྲུབ་ན། བདག་ཉིད་གཙོ་མཆོག་ཧེ་རུ་ཀའི༔སོགས་ཀྱི་དམིགས་བཟླས་མཐར་རུ་ལུ་ཁོ་ན་བཟླ་བ་མཁན་ཆེན་རཏྣའི་ཟིན་བྲིས་སུ་གསུངས་པ་དང་སྔ་འགྱུར་གྱི་རྒྱུད་རྣམས་སུའང༌། རུ་ལུ་འདི་ཉིད་སྤྱི་སྙིང་དུ་བསྔགས་པར་མཛད་པ་ལྟར་ལགས་ཀྱང༌། རྩ་བ་ཡན་ལག་གི་ཐེག་པ་དགུ་བསྒྲིལ་གྱི་ལྷ་སྔགས་སོ་སོའི་བཟླས་གྲངས་བསྐྱལ་ན་ཤིན་ཏུ་ལེགས་པར་སེམས་སོ། །ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཚུལ་འདི་ནི་ཚིགས་ཚོགས་ཤིན་ཏུ་ཁྱེར་བདེ་བཅུད་དྲིལ་མཛད་པ་ལས་ལྷ་དང་དཀྱིལ་འཁོར་ཚོམ་བུའི་བཀོད་པ་ཤིན་ཏུ་རྒྱས་པས་བསྙེན་སྒྲུབ་ཀྱི་སྐབས་ཛཔ་དམིགས་འདི་བཞིན་ངེས་པར་སྦྱར་ཏེ་བསྙེན་སྒྲུབ་ཡན་ལག་བཞི་རུ་དབྱེ་བ་ངེས་པར་གལ་ཆེ་བའང་ཤེས་པར་བྱའོ། ༈ གཉིས་པ་ནི། ཡང་ན་བསྙེན་སྒྲུབ་ཀྱི་བཟླས་དམིགས་བསྡུས་པའི་ལུགས་སུ་བྱེད་པ་ལ། དང་པོའི་བསྙེན་པ་གཙོ་དགུའི་བཟླས་པ་ནི། ཁྲོ་བོའི་བྱང་བུ་ཁྲིགས་བསྡེབས་ཀྱི། ལྷུན་གྱིས་གྲུབ་པའི་རང་བཞིན་བསྒོམ༔ ཞེས་པའི་རྗེས། རང་གི་ཐུགས་ཀར་ཉི་མའི་སྟེང༔ རྡོ་རྗེ་རྩེ་ལྔའི་ལྟེ་བར་ཧཱུྃ༔ མཐར་མར་རྩ་བའི་སྔགས་ཀྱིས་བསྐོར༔ བཟླས་པས་སྔགས་ཕྲེང་ལུ་གུ་རྒྱུད༔ ཡབ་ཡུམ་ཞལ་ཞུགས་གསང་བར་འཁོར༔ བདེ་བ་ཆེན་པོའི་གཟི་བྱིན་བསྐྱེད༔ མཆོག་ཐུན་དངོས་གྲུབ་བདུད་རྩིའི་བཅུད༔ ཧཱུྃ་ཐིམ་ཡེ་ཤེས་འབར་བར་གྱུར༔ ཞེས་གཞུང་དུ་བསྙེན་དམིགས་མ་གསུངས་ཀྱང་ཚུལ་འདི་སྦྱར་ན་ལེགས་སྙམ་གྱིས་བཀོད་པ་སྟེ། བཟླ་བྱའི་སྔགས་ནི། ཨོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་བཛྲ་ཀྲོ་དྷཱི་ཤྭ་རི་ཧཱུྃ་ཕཊ྄༔ ཀྱིས་གཙོ་བོ་དང༌། དེ་བཞིན་དུ། ཨོཾ་བུདྡྷ་ཤྲཱི་ཧེ་རུ་ཀ་བུདྡྷ་ཀྲོ་དྷཱི་ཤྭ་རི་ཧཱུྃ་ཕཊ྄༔ ཤར། ཨོཾ་རཏྣ་ཤྲཱི་ཧེ་རུ་ཀ་རཏྣ་ཀྲོ་དྷཱི་ཤྭ་རི་ཧཱུྃ་ཕཊ྄༔ ལྷོ། ཨོཾ་པདྨ་ཤྲཱི་ཧེ་རུ་ཀ་པདྨ་ཀྲོ་དྷཱི་ཤྭ་རི་ཧཱུྃ་ཕཊ྄༔ ནུབ། ཨོཾ་ཀརྨ་ཤྲཱི་ཧེ་རུ་ཀ་ཀརྨ་ཀྲོ་དྷཱི་ཤྭ་རི་ཧཱུྃ་ཕཊ྄༔ བྱང་སྟེ་རྒྱུད་ཀྱི་ཁྲོ་བོ་བཞིའོ། ཨོཾ་གུཧྱ་ཤྲཱི་ཧེ་རུ་ཀ་གུཧྱ་ཀྲོ་དྷཱི་ཤྭ་རི་ཧཱུྃ་ཕཊ྄༔ ཤར་ལྷོ། ཨོཾ་ས་ནུ་ཤྲཱི་ཧེ་རུ་ཀ་ས་ནུ་ཀྲོ་དྷཱི་ཤྭ་རི་ཧཱུྃ་ཕཊ྄༔ ལྷོ་ནུབ། ཨོཾ་ཡཀྴ་ཤྲཱི་ཧེ་རུ་ཀ་ཡཀྴ་ཀྲོ་དྷཱི་ཤྭ་རི་ཧཱུྃ་ཕཊ྄༔ ནུབ་བྱང༌། ཨོཾ་རཀྴ་ཤྲཱི་ཧེ་རུ་ཀ་རཀྴ་ཀྲོ་དྷཱི་ཤྭ་རི་ཧཱུྃ་ཕཊ྄༔ བྱང་ཤར་ཏེ་ལུང་གི་ཁྲོ་བོ་བཞིའོ། །དེ་རྣམས་ཀྱི་དཔལ་ཆེན་པོ་གཙོ་དགུ་གསལ་བཏབ་ལ་གང་འོས་བཟླ་ཞིང༌། གཉིས་པ་འཁོར་ཁྲག་འཐུང་སྤྱི་དྲིལ་གྱི་བཟླས་པ་ནི། ཛཔ་ཁང་ཕྱེས་ཏེ་ཛཔ་བསྐུལ་རྗེས། གཏེར་གཞུང་ལས། ཁྱད་པར་རུ་ལུ་འབྲུ་བརྒྱད་པ༔ ཡོངས་དྲིལ་མཐར་ཐུག་བཟླས་པའི་སྐབས༔ བདག་མདུན་ཁྲག་འཐུང་ཆེན་པོ་ཡི༔ ཙིཏྟ་རིན་ཆེན་ཟུར་བརྒྱད་པའི༔ ཉི་ཟླ་ཁ་སྦྱོར་ལྟེ་བར་ཧཱུྃ༔ སྔགས་ཀྱི་ཕྲེང་བས་བསྐོར་བ་ལས༔ འོད་འཕྲོས་ལུས་ཀྱི་ནང་ཀུན་གང༔ སྒྲིབ་དག་དབང་དང་དངོས་གྲུབ་ཐོབ༔ སླར་ཡང་སྔགས་ཀྱི་འོད་ཟེར་གྱིས༔ དཀྱིལ་འཁོར་རབ་འབྱམས་ཐུགས་རྒྱུད་བསྐུལ༔ དེ་ལས་འོད་ཟེར་མཁའ་ཁྱབ་འཕྲོས༔ ཐ་མལ་སྣང་ཞེན་དབྱིངས་སུ་ཐིམ༔ སྣོད་བཅུད་གཞལ་ཡས་ཁང་དང་ལྷ༔ སྒྲ་ཀུན་གྲགས་སྟོང་སྔགས་ཀྱི་དབྱངས༔ དྲན་བསམ་འོད་གསལ་ལ་མི་རྟོག་པ༔ དབྱེར་མེད་ཀུན་བཟང་དགོངས་པའི་ཀློང༔ མ་ནོར་མ་བཅོས་བསམ་འདས་པ༔ བརྗོད་བྲལ་ཡེ་ཤེས་མངོན་དུ་གྱུར༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ རུ་ལུ་འབུམ་ཕྲག་བཞི་བཟླས་པས༔ དགོངས་པ་མི་འགྱུར་ཏིང་འཛིན་ཐོབ༔ དོན་གཉིས་ལྷུན་གྲུབ་དཔལ་ལ་སྤྱོད༔ ས་མ་ཡ༔ བསྡུས་པའི་སྐབས་འདིར་སྟེང་ཁང་གི་ཞི་བ་ཞེ་གཉིས་རྩ་བ་ཡན་ལག་གི་དཀྱིལ་འཁོར་བཅས་གསལ་འདེབས་ཤིང་རུ་ལུ་ཁོ་ན་བཟླ་བར་གསུངས། གཏེར་གཞུང་དུ་འབུམ་ཕྲག་བཞི་གསུངས་ཀྱང་ཁྲག་འཐུང་གཙོ་འཁོར་ཐམས་ཅད་ཀྱི་སྤྱི་དྲིལ་ཆེན་པོ་ཡིན་པས་གྲངས་ཚད་ཀྱང་བྱེ་བ་གཅིག་ལས་མི་ཉུང་བ་བཟླ་བར་གཅེས་སོ། །དུས་གྲངས་ཀྱི་བསྙེན་པ་ཐེམས་པའི་རྗེས་ཚོགས་མཆོད་དང་གཏོར་མ་རྒྱས་སྤྲོས་བཅས་བདག་འཇུག་གི་དབང་ལེན་བཅས། ཞག་བདུན་ནམ་ལྔ། གསུམ་ཅི་རིགས་དང་དངོས་གྲུབ་ལེན་པའི་ཆོ་ག་བཅས་མཐའ་རྒྱས་དང༌། ཁ་སྐོང་ཞི་བའི་སྦྱིན་སྲེག་ཀྱང་བསྙེན་པའི་བཅུ་ཆ་འགྲོ་ངེས་དང༌། རྗེས་འབྲེལ་མྱོང་གྲོལ་བདུད་རྩིའི་སྒྲུབ་པའང་གྲུབ་ན་ངེས་པར་བྱ་ཞིང་མཐའ་རྟེན་བདུད་རྩིའི་ཆོས་སྨན་གྱི་ཚེ་ལུང་བཞིན་ཚེ་སྒྲུབ་ཀྱང་སྦྱར་ན་ལེགས་པའི་ཕྱིར། ཚེ་འབྲང༌། ཚེ་རིལ་ཆང༌། མདའ་དར་སོགས་བཤམས་པ་གཞུང་ལྟར་བྱ། རྩ་བའི་བཟླས་པ་ཁྱུག་ཙམ་སྔོན་དུ་འགྲོ་བའམ། ལས་བྱང་གི་བསྟོད་པའི་རྗེས། གང་བདེར། ཐུགས་ཀར་རིན་ཆེན་ཟུར་བརྒྱད་པ༔ མཆོང་གུར་ཕུབ་པ་ལྟ་བུའི་ནང༔ པད་ཟླར་ཧྲཱིཿལས་ཚེ་དཔག་མེད༔ དཀར་པོ་ལོངས་སྤྱོད་རྫོགས་པའི་ཆས༔ ཕྱག་གཡོན་མཉམ་བཞག་ཚེ་བུམ་ནི༔ ཚེ་ཡི་བཅུད་ཀྱི་གང་རྒྱར་གཏམས༔ གཡས་པས་སྣ་ཚོགས་རྡོ་རྗེ་ཡིས༔ གཡོན་པའི་ཚེ་བུམ་ཁ་བཀབ་སྟེ༔ རྡོ་རྗེ་སྐྱིལ་མོ་ཀྲུང་གི་བཞུགས༔ ལོངས་སྤྱོད་རྫོགས་སྐུའི་ཆས་ཀྱི་སྤྲས༔ ཐུགས་ཀར་ཉི་ཟླའི་གྭའུ་ནང༔ ནྲྀ་ཡིག་ལྗང་གུ་ཧཱུྃ་ཨས་མཚན༔ གྭའུ་སྟེང་དུ་ཧྲཱིཿཡིག་ལས༔ སྔགས་ཀྱི་ཕྲེང་བས་གཡས་སུ་བསྐོར༔ འོད་འཕྲོས་འཁོར་འདས་ཚེ་བཅུད་བསྡུས༔ གྭའུ་ནང་དང་བུམ་པའི་ནང༔ ཡོངས་སུ་གང་ཞིང་འཕེལ་བ་ཡིས༔ ཧེ་རུ་ཀ་དཔལ་སྐུ་ཡི་ནང༔ ཚེ་ཡི་བདུད་རྩིའི་གང་བར་བསམ༔ ཨོཾ་ཨ་མཱ་ར་ཎི་ཛཱི་བནྟི་ཡེ་གུ་རུ་ཨཱ་པ་རི་མི་ཏ་ཨཱ་ཡུརྫྙཱ་ན་པུཎྱེ་པུཎྱེ་མ་ཧཱ་པུཎྱེ་བྷྲཱུྃ་བྷྲཱུྃ་བྷྲཱུྃ༔ ཞེས་རྩེ་གཅིག་ཏུ་བཟླ། ཐུན་མཐར་མདའ་དར་གཡབ་ལ། ཐུགས་ཀར་ཚེ་དཔག་མེད་པ་ཡི༔ ཐུགས་ལས་མགྱོགས་མའི་ཚོགས་སྤྲོས་ཏེ༔ ཕྱོགས་བཅུའི་ཚེ་བཅུད་འགུགས་པར་གྱུར༔ ཧཱུྃ༔ བདུད་རྩི་འི་གང་རྒྱ་སྨན་གྱི་ལུང༔ རཏྣ་པདྨ་ཚེ་ཡི་ལུང༔ བཛྲ་པདྨ་ཕོ་ཉ་སྤྲོས༔ འཇིག་རྟེན་གསུམ་པོ་ཐམས་ཅད་ཀྱི༔ ཚེ་དང་སྨན་གྱི་བཅུད་བསྡུས་ལ༔ གནས་འདིར་ད་ལྟ་ཉིད་དུ་ཁུག༔ མགྱོགས་མ་བཞི་དང་མཁའ་འགྲོ་བཞི༔ སྲོག་བདག་བཞི་དང་ཤུགས་འགྲོ་བཞི༔ སྲིད་གསུམ་ཚེ་ཡི་བདག་མོ་རྣམས༔ ཚེ་དང་སྨན་གྱི་བཅུད་འདིར་བསྡུས༔ བཀྲ་ཤིས་བུམ་པའི་ནང་དུ་བསྐྱིལ༔ སྐལ་ལྡན་བདག་ལ་བསྩལ་དུ་གསོལ༔ ཞེས་དང༌། ཧཱུྃ༔ ཚེ་བཅུད་སྙིང་དབུས་རྟེན་ལ་ཐིམ༔ རིག་འཛིན་ཚེ་ཡི་དངོས་གྲུབ་ཐོབ༔ ཡེ་ཤེས་རྡོ་རྗེའི་ཕྱག་རྒྱ་ཡིས༔ རྟག་པ་དམ་པར་རྒྱས་བཏབ་པོ༔ ཛྙཱ་ན་བཛྲ་རཀྵ་རཀྵ་ཧཱུྃ་ཞེས་རྒྱས་བཏབ་བྱ། བསྙེན་ཚད་འཁྱོལ་བའི་ཚེ་གཞུང་གི་དངོས་གྲུབ་ལེན་པ་དང་བཅས་ཆབས་ཅིག་གམ་ཡང་ན་ཚེ་དབང་ལྟར་སྒྲུབ་རྫས་ཀྱི་དངོས་གྲུབ་ལེན་པར་བྱའོ། །གཉིས་པ་ནང་སྐོར་མཁའ་འགྲོའི་བསྐྱེད་བཟླས་ཇི་ལྟར་བྱ་ཚུལ་ནི། ཚུལ་འདིའི་བསྙེན་སྒྲུབ་བྱེད་པའི་སྐབས་སྒྲུབ་པའི་རྟེན་དུ་ཕྱི་དཀྱིལ་ཕྱི་རུ་བཀོད་པ་ནི། མདུན་གྱི་སྟེགས་བུར་ཟངས་ཀྱི་མཎྜལ་སྟེང་སིནྡྷཱུ་རའི་རྡུལ་གྱིས་སྦགས་པར་ཆོས་འབྱུང་བསྣོལ་མ་བྲིས་པའི་ལྟེ་བར་མེ་ཏོག་དམར་པོའི་ཚོམ་བུའི་སྟེང་མཉྫའི་ཁར་བྷཉྫ་མཚན་ལྡན་བདུད་རྩིའི་གཏམ་པ། མཁར་བའི་མེ་ལོང་ལ་སིན་དྷཱུ་རའིཆོས་འབྱུང་གི་དབུས་སུ་བྃ། རྩིབས་དྲུག་ལ་བྃ་གྱི་མདུན་ནས། ཨེ་ཡཾ་ཧཾ་ལཾ་རཾ་ཧཱུྃ། རྣམས་ཡིག་ངོ་ནང་བསྟན་གཡས་བསྐོར་དུ་བཀོད་པ་ལ་དར་དམར་གྱི་གུར་ཕུབ་མཐར་ཕྱི་ནང་གི་མཆོད་པས་བསྐོར་བ་དང༌། ནང་དཀྱིལ་ལུས་ལ་འགོད་པ་ནི། སྲོག་འཁོར་ཏེ་དར་རས་སམ་ཤོག་བུ་དམར་པོ་ལ་བླ་མ་ཡབ་ཡུམ་གྱི་བྱང་སེམས་དཀར་དམར། གནས་ཆེན་གྱི་རང་བྱུང་གི་ཅུ་གང་དང་སིནྡྷཱུ་ར་མཚལ་དང་སྦྱར་ནས་ཆོས་འབྱུང་ཟུར་དྲུག་མུ་ཁྱུད་དང་བཅས་པའི་ལྟེ་བ་དང་རྩིབས་ལ་ས་བོན་རྣམས་སྔ་མ་ལྟར་བཀོད། མུ་ཁྱུད་དང་པོར་བསྙེན་སྒྲུབ་ཀྱི་སྔགས་མཐར། སརྦ་བུདྡྷ་ཀྲོ་དྷཱི་ཤྭ་རི་ཀཱ་ཡ་ཝཱཀྐ་ཙིཏྟ་ཛྙཱ་ན་ཨ་བེ་ཤ་ཡ་ཧྲཱིཾཿཧྲཱིཾཿཕེཾ་ཕེཾ་ཛཿཧཱུྃ་བྃ་ཧོཿ མུ་ཁྱུད་གཉིས་པར། དབྱངས་གསལ་རྟེན་སྙིང༌། གསུམ་པར་རྡོ་ར་མེ་རིས་བསྐོར་བ་ལ་བྲིས་རྫས་ཀྱིས་བྱུག་ནས་རབ་ཏུ་གནས་ཏེ་མི་ལག་ཏུ་མི་བརྒྱུད་པར་ལུས་ཀྱི་དྲོད་དང་མ་བྲལ་བར་བཅངས་གསུངས། གསང་དཀྱིལ་སེམས་ལ་འགོད་པ་ནི། རྫོགས་རིམ་གྱི་ཚུལ་དུ་འོག་ནས་འཆད་པར་འགྱུར་རོ། །དེ་ལྟར་སྒྲུབ་པའི་རྫས་རྣམས་ཚོགས་པ་དང༌། མར་ངོའི་ཚེས་བཅུ་སོགས་ཁྱད་པར་གྱི་དུས་ཚེས་བཟང་པོའི་ཕྱི་ཐུན་ནམ། སྲོད་ཐུན་གང་བདེ་ནས་བསྙེན་སྒྲུབ་ལ་འཇུག །དེ་ཡང་གཏེར་གཞུང་ལས། སྣང་སྲིད་གཞིར་བཞེངས་དཀྱིལ་འཁོར་གྱི༔ ཏིང་འཛིན་གསལ་བརྟན་མཐར་ཕྱིན་བྱ༔ ཞེས་གསུངས་པ་ལྟར་སྐུ་བསྐྱེད་པ་དབྱིབས་ཀྱི་རྣལ་འབྱོར་གྱི་གསལ་སྣང་སྒྲུབ་པ་ནི། སྣོད་བཅུད་ཕྱི་ནང་གི་འབྱུང་བ་གང་ལྟར་སྣང་ཡང་འབྱུང་ལྔ་དག་པ་ཡུམ་གྱི་མཁའ་དབྱིངས་ལས་མ་འདས་པ་མཚོན་བྱེད་ས་གཞི་ལྗང་གུའི་སྟེང་དུ་གཞལ་ཡས་ཁང་རྟ་བབ་བཞི་པའམ་སྒོ་རྐྱང་གི་དབུས་སུ་ཆོས་འབྱུང་བསྣོལ་མ་གདན་ཐབས་མཐིང་ནག་ཁ་ཁྱེར་སྔོ་སྐྱ་ཅན་གྱི་མཐའ་བསྐོར་དུ་དུར་ཁྲོད་བརྒྱད་དང་པདྨ་རྭ་བ་སྲུང་འཁོར་མེ་རིས་བསྐོར་བའི་དབུས་སུ་སྣ་ཚོགས་པདྨ་འདབ་བཞིའི་ལྟེ་བར་པད་ཉི་བཾ་རོའི་སྟེང་དུ། སྲིད་པའི་ཀུན་འབྱུང་ལས་ཉོན་སྡུག་བསྔལ་གྱི་རྟེན་ཚོགས་དྲུག་དག་པ་དོན་གྱི་བཞུགས་ཚུལ་ཡེ་ཤེས་མཁའ་འགྲོ་དྲུག་གི་དཀྱིལ་འཁོར་དུ་གདོད་ནས་གནས་པའི་སྣང་ཆ་འབུམ་ཕྲག་མཁའ་འགྲོའི་གཙོ་མོ་གསང་བ་ཡེ་ཤེས་སྟོབས་ལྡན་མའི་རྣམ་པར་བཞེངས་པའི་འཁོར་དུ་ཚོགས་དྲུག་དག་པའི་འཁོར་གྱི་ཌཱ་ཀི་དྲུག་དང་བཅས་པའི་ཞལ་ཞི་མ་ཁྲོ་ཕྱག་མཚན་རྒྱན་ཆས་ཡོངས་སུ་རྫོགས་པ་འཇའ་འོད་མེ་དཔུང་གི་དབུས་ན་བཞུགས་པ་བསྐྱེད་ཆོག་གཞུང་ལྟར་གསལ་བ། ནང་སྐོར་ཁྲོ་བོའི་བྱང་བུ་ཁྲིགས་བསྡེབས་དང༌། མཁའ་འགྲོའི་ལས་བྱང་ལྟོ་སྦྱར་བའི་ལས་རིམ་རྫོགས་པར་བཏང་ལ་སྤྱི་ལྟར་གསལ་སྣང་ལེགས་པར་བསྒྲུབ། དེས་སྐྱོ་བའམ། བོགས་འབྱིན་གྱི་སླད་དུ་གསུང་བཟླས་པའི་བསྙེན་སྒྲུབ་ལས་གསུམ་བྱ་བ་ནི། རང་ཉིད་བདེ་བའི་སྟོབས་ལྡན་མའི༔ ཐུགས་ཀར་ཙིཏྟ་རིན་པོ་ཆེ༔ ཟུར་དྲུག་མཆོང་གུར་ལྟ་བུའི་དབུས༔ ཉི་ཟླའི་གྭའུ་ཁ་སྦྱོར་ནང༔ བཾ་ཡིག་མར་མེ་ལྟར་འབར་བའི༔ ནཱ་ད་ལས་ནི་སྔགས་ཀྱི་ཕྲེང༔ མགལ་མེ་ལྟ་བུར་འཁོར་བ་ཡིས༔ བདེ་ཆེན་རྩོལ་མེད་སྐྱེ་བར་བསམ༔ ཞེས་པ་ལྟར། ཐུགས་རིན་པོ་ཆེ་ཟུར་དྲུག་སྨུག་པོའི་དབུས་སུ་ཉི་ཟླའི་གྭའུའི་ནང་བཾ་ཡིག་མཐིང་ནག་གི་ནཱ་ད་ལས་བྱུང་བའི་སྔགས་ཕྲེང་སྤྲོས་ཏེ་མདུན་ནས་ཞལ་ནང་བསྟན་གྱི་གཡས་སུ་འཁོད་པ་ལ་གཡོན་དུ་མགལ་མེ་ལྟར་འཁོར་བའི་འོད་ཀྱིས་ལུས་ཀྱི་ནང་གང༌། མུན་ཁང་དུ་སྒྲོན་མེ་བཏེགས་པ་ལྟར་ལས་ཉོན་གྱི་སྒྲིབ་པ་སངས་ཀྱིས་བསལ། བདེ་ཆེན་ལྷན་སྐྱེས་ཡེ་ཤེས་ཀྱི་སྣང་བ་རྒྱས་པར་མོས་ལ་འགོག་བཟླས་བྱ་བར་གསུངས། གྲངས་བསྙེན་སྔགས་འབུམ་ཕྲག་བཞི་བཟླ། མཁའ་འགྲོའི་ཐུགས་རིན་པོ་ཆེ་མཆོང་གུར་ཕུབ་པ་ལྟ་བའི་དབུས་སུ་ཆོས་འབྱུང་བསྣོལ་མའི་ལྟེ་བར་ཉི་ཟླའི་གྭའུ་ཁ་སྦྱོར་གྱི་ནང་བཾ་གྱིས་མཚན་པའི་ཆོས་འབྱུང་གི་ཟུར་དྲུག་ལ་ངོ་བོ་ལྷ་ལ་རྣམ་པ་ས་བོན། དོན་དམ་ཚོགས་དྲུག་དག་པའི་ཡེ་ཤེས་དྲུག་གི་བདག་ཉིད་ཅན་གྱི་སྔགས་ཀྱི་རང་སྒྲ་སྒྲོགས་པས་རབ་འབྱམས་ཕྱོགས་དུས་ཀྱི་ཞིང་གི་མཁའ་འགྲོ་འབུམ་ཕྲག་ཡངས་པའི་ཆོམ་བུ་ཐམས་ཅད་བདེ་བ་ཆེན་པོའི་མཆོད་པས་མཉེས་ཤིང་ཐུགས་རྒྱུད་བསྐུལ་ཏེ་བདུད་རྩིའི་རྣམ་པར་ཞུ་བ་ཆར་དུ་བབ་པ་རང་ལ་ཐིམ་པས་སྐུ་གསུང་ཐུགས་ཀྱི་བྱིན་རླབས་མ་ལུས་པ་རྒྱུད་ལ་ཞུགས་པར་མོས་ནས་སྒྲུབ་པའི་སྔགས་ཁྲི་ཕྲག་བཞི་བཟླ། སྒྲུབ་རྟེན་ཐོད་པའི་མདུན་དུ་བྷཉྫ་མཚན་ལྡན་བདུད་རྩིའི་རིལ་བུའམ་ཆོས་སྨན་དང༌། དར་སྣ་རིན་ཆེན་འབྲུ་སྨན་གྱིས་བཀང་བ་དར་དམར་གྱིས་བཀབ་པ་གསར་དུ་བཤམས་ལ། བསྙེན་སྒྲུབ་ཀྱི་བཟླས་པ་གྲུབ་པའི་རྗེས། རང་མདུན་དུར་ཁྲོད་འཇིགས་པའི་དབུས༔ ཀེང་རུས་བརྩེགས་པའི་སོགས་ནས། དངོས་གྲུབ་ཀུན་གྱི་དབྱིག་ཏུ་བསམ༔ ཨོཾ་བཛྲ་ཧཱ་ན་དྷ་ཧཱ་ན་ད་ཧ་ན་སིདྡྷི་ཧཱུྃ༔ ཞེས་ལས་སྦྱོར་གྱི་སྔགས་ཁྲི་གཅིག་གྲངས་ཚད་དུ་གསུངས། རྟག་མཚན་འགྱངས་ན། སརྦ་སིདྡྷི་ཧྲཱིཾཿཧྲཱིཾཿཕེཾ་ཕེཾ་སྡུས་སྡུས་ཝཱ་ཤཾ་ཀུ་རུ་ཛཿཧཱུྃ་བྃ་ཧོཿ ལས་སྦྱོར་གྱི་ཤམ་བུར་འདི་བཏགས་ཏེ་བཟླ་བར་བྱའོ། །གང་ལྟར་ཡང༌། བསྙེན་སྒྲུབ་གྲུབ་ནས་དངོས་གྲུབ་བླངས་བ་གཏང་རག་སོགས་སྤྱིར་ལྟར་དང༌། རྟེན་རྣམས་འབྲལ་མེད་དུ་འཆང་བར་བྱའོ། ༈ གསུམ་པ་ཐུགས་འོད་གསལ་དེ་ཁོ་ན་ཉིད་ཀྱི་རྣལ་འབྱོར་ནི། གསང་དཀྱིལ་སེམས་ལ་འགོད་པ་ནི༔ མཚན་མེད་ཟབ་མོའི་རྫོགས་རིམ་སྟེ༔ ཐུན་དང་ཐུན་མཚམས་ཐམས་ཅད་དུ༔ སྔོན་འགྲོའི་རིམ་པས་རྒྱུད་སྦྱངས་ནས༔ ཞེས་གསུངས་པ་ལྟར། རྫོགས་རིམ་རླུང་སེམས་གཉིས་མེད་ནི། གསང་བ་ངེས་དོན་གྱི་མཁའ་འགྲོའི་དཀྱིལ་འཁོར་སེམས་ཀྱི་བདག་ཉིད་དུ་གདོད་ནས་བཞུགས་པའི་གནས་ལུགས་ཉམས་སུ་ལེན་པ་ལ་དངོས་གཞིའི་ཉམས་རྟོགས་སྐྱེ་བ་སྔོན་འགྲོ་མཐར་ཕྱིན་པ་གལ་ཆེ་བས་ན་སྔོན་འགྲོ་བསགས་སྦྱངས་རྣམས་ནང་སྐོར་གྱི་ཐོག་མའི་སྐབས་ལྟར་ཅི་ནུས་སུ་ཉམས་སུ་ལེན་པ་དང༌། ཁྱད་པར་ངེས་འབྱུང་དང་དད་མོས་བརྩོན་འགྲུས་དྲན་ཤེས་ཀྱི་གསལ་འདེབས་གཤའ་མ་རྣམས་དང༌། དངོས་གཞིའི་ཉམས་ལེན་གཉིས། གཅིག་གྲོགས་གཅིག་གིས་བྱ་བ་ནི། འདི་ཙམ་དུ་མ་ཟད་གོང་འོག་ཐམས་ཅད་དུ་ཤེས་པར་བྱ་དགོས་ཤིང༌། དངོས་གཞི་མཁའ་འགྲོའི་བསྐྱེད་བཟླས་ཁྱུག་ཙམ་སྔོན་དུ་བཏང་སྟེ། བདེ་བའི་སྟན་ལ་ལུས་གནད་བསྲང༔ རླུང་རོ་བསལ་ཞིང་འོག་གི་རླུང༔ ཡིད་ཙམ་འཐེན་ལ་ལྟེ་བར་བསྐྱིལ༔ ལུས་སེམས་བདེ་བས་ཁྱབ་པར་བསམ༔ ཞེས་གསུངས་པ་ལྟར། སྟན་བདེ་བ་ལ་ལུས་གནད་རྣམ་སྣང་ཆོས་བདུན་དང་ལྡན་པས་ལུས་གནད་དྲང་པོར་བསྲང་ལ་རླུང་རོ་སུམ་ཕྲུགས་སུ་བསལ། འོག་རླུང་ཡིད་ཙམ་འཐེན་ལ་ལྟེ་བར་བསྐྱིལ་བས་ལུས་སེམས་ཐམས་ཅད་བདེ་ཉམས་ཀྱིས་ཁྱབ་པར་དམིགས། དབང་པོའི་སྒོ་རྣམས་ནང་དུ་མི་བསྡུ་ཞིང་ཁྱད་པར་མིག་མི་འགུལ་བར། བར་སྣང་དུ་ཧ་རེར་གཏོད། རིག་པ་མིག་ལ་གཏད་པས་ངར་ཐོན་ཏེ་གསལ་སྟོང་བརྗོད་མེད་ཀྱི་ཉམས་སྐྱེས་པའི་ངང་བསྐྱངས། བདེ་གསལ་གྱི་ཉམས་དེས་དྲངས་པའི་རང་སེམས་གཉུག་མའི་གཤིས་ལུགས་རྣམ་རྟོག་གིས་མ་དཀྲུགས་པའི་ཆོས་ཉིད་རྗེན་པ་རྟོག་བྲལ་བསམ་འདས་ཆེན་པོའི་ཉམས་མྱོང་སྐྱེས་པའི་རང་ངོ་སྐྱོང༌། མདོར་ན་ཕྱི་གཙོ་འཁོར་གྱི་རྣམ་པར་སྣང་བའི་མཁའ་འགྲོའི་དཀྱིལ་འཁོར་རྣམས་ནང་རང་རིག་བདེ་གསལ་མི་རྟོག་པའི་ཡེ་ཤེས་གཅིག་གི་ཆོ་འཕྲུལ་ལས་གཞན་དུ་མེད་པར་ལ་བཟླས་པས་དོན་གྱི་ཡེ་ཤེས་རླུང་སེམས་རྩོལ་མེད་ཀྱི་བྱེད་པས་རྒྱུད་ལ་འདྲེན་པ་ཟབ་མྱུར་ཉམས་ལེན་བདེ་བའི་རྫོགས་རིམ་རྣོ་ཁྱད་ཅན་ཐུན་མིན་ཏེ་ཐུན་དངོས་གཞི་དང་ཐུན་མཚམས་ཐམས་ཅད་ཀྱི་སྐབས་སུ་ཉམས་ལེན་ཅི་ནུས་སུ་འབད་པ་གལ་ཆེ་ཞིང༌། དེར་མ་ཟད་ལྷན་སྐྱེས་དོན་གྱི་ཡེ་ཤེས་དངོས་རྒྱུད་ལ་འདྲེན་པ་ལ་སྔགས་ལམ་གྱི་ཐབས་ཐམས་ཅད་ལས་ཟབ་ཤོས་སྟོང་ཉིད་ཤེས་རབ་ཀྱི་ནུས་པ་ཡིན་ལ། རྟེན་འབྲེལ་དེའི་དབང་གིས་མཁའ་འགྲོའི་བསྐྱེད་རྫོགས་ཟབ་མོ་འདི་ལྟ་བུ་ནི། ལམ་འདི་ཉམས་སུ་ལེན་པའི་བོགས་འབྱིན་དུ་མེད་དུ་མི་རུང་བ་ཡིན་ཕྱིར་ལྷག་པར་ཉམས་སུ་ལེན་པ་གལ་ཆེའོ། །རྩ་བའི་གཉིས་པ་རྫོགས་པའི་རིམ་པ་ལ། སྔོན་འགྲོའི་ཁྲིད་ཀྱི་བྱིན་རླབས་བརྡ་བཞི་བསྟན་པ། དངོས་གཞི་བརྡ་བཞིའི་སྒོམ་ཚུལ་བསྟན་པ། རྗེས་འབྲེལ་ཤན་འབྱེད། ནམ་མཁའི་སྒོ་འབྱེད་དོ། །དང་པོ་ནི། མདོ་བྱང་ལས། ཁྲིད་ཀྱི་བྱིན་རླབས་བརྡ་བཞི་བསྟན་པ་དང༔ སོགས་ཀྱིས་གསལ་བ་ལྟར་ལོ་ཆེན་བཻ་རོས་སྤང་མི་ཕམ་མགོན་པོ་དང༌། གཡུ་སྒྲ་ལ་རུ་དམ་ཕ་བང་ནག་པོའི་སྟེང་ནས་གནང་བ་མཚོ་རྒྱལ་གྱི་གཏེར་རྒྱས་གདམས་པ་གསུངས་པ་ལོ་རྒྱུས་སྙིང་གི་ཏི་ཀ་རུའང་ཟུར་ཙམ་གསལ་བ་ལྟར། འཕྲོ་ལུས། ༈ གསུམ་པ་གསང་སྐོར་མན་ངག་སྡེའི་སྐོར་གྱི་ཁྲིད་ལ། ལོ་རྒྱུས་ལས། དངོས་གཞི་ཁྲིད་གསུམ་གྱིས་གྲོལ་ཞིང༔ ཞེས་གསུངས་པ་ལྟར་འཆད་པ་ལ། གསང་སྐོར་ཁྲིད་ཀྱི་རིམ་པ་ལས། གསང་སྐོར་ཁྲིད་ཀྱི་རིམ་པ་ནི༔ གཞི་ལམ་འབྲས་བུའི་བསྟན་པའོ༔ ཞེས་གསུངས་པ་ལྟར་གཞི་གདོད་མའི་གནས་ལུགས། དེ་ཁོ་ན་ཉིད་མངོན་དུ་བྱེད་པའི་ལམ། མཐར་ཕྱིན་འབྲས་བུའི་ས་བཤད་པའོ། །དང་པོ་ལའང་གཉིས། འཁྲུལ་གྲོལ་གྱི་གཞི་དང༌། གྲོལ་གཞི་དངོས་ཀྱི་དཔེ་དོན་བཤད་པའོ། །དང་པོ་ནི། དང་པོ་ནམ་མཁའ་ལྟ་བུའི་སེམས༔ རིག་དང་མ་རིག་འཁོར་འདས་ཀྱི༔ ས་མཚམས་གྲིབ་སོ་ཙམ་ལས་མེད༔ ཅེས་པ་སྟེ། །འཁོར་འདས་གང་དུ་ཡང་མ་ཕྱེ་པའི་དང་པོ་ཆོས་ཉིད་ཅིར་ཡང་མ་ཡིན་པ་རྒྱ་ཆད་ཕྱོགས་ལྷུང་དང་བྲལ་པ། རང་གདངས་གསལ་ལ་འགྲིབ་པ་མེད་པ། སྟོང་ལ་གོ་འབྱེད་པ། རིག་ལ་འཆར་བའི་གཞིར་གྱུར་པ། དབྱིངས་སུ་གནས་ལ་ཕྱིར་མ་འཕྲོས་པ། སྣང་བར་གསལ་ཡང་ངང་ལས་མི་གཡོ་བ། རིག་པར་གནས་ལ་རྟོག་པར་མ་འགྱུས་པ་ནི། གཞོན་ནུ་བུམ་པའི་སྐུ་ཀ་དག་ཆེན་པོ་ཞེས་བྱ་བ་ནམ་མཁའ་ལྟ་བུའི་ཆོས་ཉིད་དེ། དེའི་ངང་དུ་སྐུ་དང་ཡེ་ཤེས་ཀྱི་ཆོས་རྣམས་སོ་སོ་མ་ཡིན་ཐ་དད་དུ་མི་གནས་པ་ཆུའི་དབྱིངས་ན་གཟུགས་བརྙན་ལྟར་བཞུགས་ལ་དེ་ནི་ཆོས་ཉིད་དག་པའི་ཡེ་གདངས་ཞེས་བྱ་ཞིང༌། རྟོག་དཔྱོད་འཆར་བའི་འཁྲུལ་གཞི་དང༌། རང་རིག་པའི་གྲོལ་གཞི་གཉིས་འཆར་རུང་དུ་ཡོད་པ་ལ་ཡེ་ཤེས་ཀྱི་རྩལ་གཡོས་པས་ཕྱིར་གསལ་དུ་ཤར་ནས། འོད་ལྔ་ལྷུན་གྲུབ་ཀྱི་གདངས་འཇའ་ཚོན་ལྟ་བུ་དང༌། ལོངས་སྐུའི་ཞི་ཁྲོའི་དཀྱིལ་འཁོར། རང་བཞིན་སྤྲུལ་པའི་ཞིང་ལྔ། འགྲོ་དྲུག་གི་འཇིག་རྟེན། ཐུབ་པ་དྲུག་དང་བཅས་པ་སྟེ། འོད་སྐུ་ཟེར་དུ་ཤར་བ་འཁོར་འདས་ཕྱོགས་རིས་མེད། གང་ལའང་རྣམ་པར་མི་རྟོག་པའི་གཞི་སྣང་ཆེན་པོ་རིག་པའི་ཆོ་འཕྲུལ་དུ་ཤར་བའི་ཚེ། གདོད་མའི་མགོན་པོ་ཀུན་ཏུ་བཟང་པོ་དབྱིངས་ནས་ཡེ་ཤེས་སྐད་ཅིག་དང་པོ་ཉུག་ཙམ་སྣང་བར་ཤར་དུས། རང་སྣང་དུ་ཧྲིག་གིས་རིག་པས་ལུས་དང་གྲིབ་མ་བཞིན་གྲོལ་འཁྲུལ་གྱི་བྱེ་བྲག་ཕྱེད་དེ་གཞི་སྣང་ཀུན་བྱེད་བྱང་ཆུབ་ཀྱི་སེམས་ཉིད་ནང་གསལ་དུ་ཐིམ་ནས། མ་རིག་པའི་སྒྲིབ་པ་ཝལ་གྱིས་བསལ་ནས། གདོད་མའི་དབྱིངས་སུ་འཕོ་འགྱུར་མེད་པར་ཁྱད་ཆོས་དྲུག་གིས་གྲོལ་བ་སྟེ། ལུང་སྟོན་བྱེད་ཀྱི་སློབ་དཔོན་མེད་པར་རང་བྱུང་གི་སངས་རྒྱས་ལ་ལུང་ལས་མ་བྱུང་བའི་མན་ངག་མངའ། གཟུང་འཛིན་ཀུན་བརྟགས་ཀྱི་ཡེ་ཤེས་ཟད་སར་འཁྱོལ་བས་ཡེ་ཤེས་ཉིད་རང་གསལ་བའི་རང་རིག་ཚོགས་གཉིས་ཀྱི་རྒྱུ་རྐྱེན་གཞན་གྱིས་བསྐྱེད་པ་མེད་པས་ཡེ་གྲོལ་གྱི་འབྲས་བུ་མཐར་ཕྱིན་པ། བཞིན་དང་མེ་ལོང་གི་གཟུགས་ལྟར་འོད་གསལ་རང་སྣང་རིག་པ་ཉིད་དེ་ལྟར་སྣང་བས་རང་ཤར། འཁྲུལ་མེད་ཡེ་ཡིན་ཆེན་པོ་རྟོགས་པས་རང་གྲོལ་དུ་གྱུར་མ་ཐག་དབྱིངས་ནས་ཤར་བའི་སྣང་བ་ལུང་མ་བསྟན་གྲོལ་འཁྲུལ་གྱི་གཞི་ཅན་ཉིད། རང་སྣང་རིག་གདངས་སུ་ཐག་ཆོད་དེ་ངོ་ཤེས་པའི་རིག་པས་ལྷན་སྐྱེས་ཀྱི་མ་རིག་པ་བཅོམ། རིག་པ་རྒྱུན་ཆད་མེད་པས་བདག་ཉིད་གཅིག་པའི་མ་རིག་པ་བཅོམ། རང་སྣང་ལ་གཟུང་འཛིན་མེད་པས་ཀུན་བརྟགས་ཀྱི་མ་རིག་པ་བཅོམ། དེའི་ཚེ་གདོད་མའི་ངང་ལས་ཡུད་ཙམ་སྣང་ཞིང་གཡོས་ཀྱང་དེ་མ་ཐག་རང་རིག་པས་བཙན་ས་ཟིན་ཏེ་རིག་མཁན་ཉིད་ཀྱང་གྲོལ་ནས་རིག་དང་རིག་གདངས་ཤན་ཕྱེ་ནས་འཕོ་འགྱུར་མེད་པའི་ངང་ནས། གཞན་དོན་ལྷུན་གྲུབ་ཏུ་ཐུགས་རྗེ་དང་ཕྲིན་ལས། བྱིན་རླབས་ཀྱི་ཆོ་འཕྲུལ། གདུལ་བྱ་མོས་པའི་རང་སྣང་དུ་འབད་རྩོལ་མེད་པར་རང་བྱུང་བའོ། །ཁམས་གསུམ་སེམས་ཅན་རྣམས་དབྱིངས་སྣང་སྐད་ཅིག་མ་རང་སྣང་དུ་ངོ་མ་ཤེས་པས་འཁྲུལ་པ་རྨི་ལམ་གྱི་འཇིགས་སྣང་ལྟར་ཇེ་རགས་སུ་སོང་སྟེ་རྒྱུའི་རྐྱེན་མི་རྟོག་པའི་ཆ་ངོ་མ་ཤེས་པ་བདག་ཉིད་གཅིག་པའི་མ་རིག་པ་གཞི་ལ་མེད་ཀྱང་ངེས་པ་མེད་པའི་ལྷུན་གྲུབ་ཀྱི་སྣང་བ་ལ་ཡེ་ལྡན་གྱི་ཚུལ། རང་བཞིན་འོད་གསལ་རང་ངོ་མ་ཤེས་པའི་ལྷན་སྐྱེས་མ་རིག་པ་སྒོ་གཉིས་ཤར་བ་དང་དུས་མཉམ་གྱི་ཚུལ། ཐུགས་རྗེ་རང་རིག་ཏུ་ཤེས་པས་གཞན་དུ་བཟུང་བ་ཀུན་བརྟག་མ་རིག་གཟུང་འཛིན་རགས་པར་ཤར་བ་ཕྱིས་བྱུང་གི་ཚུལ་དུ་རྒྱས་པས། བདག་པོའི་རྐྱེན་རིག་པ། དམིགས་པའི་རྐྱེན་སྣང་བ། དེ་མ་ཐག་པའི་རྐྱེན་དེ་གསུམ་དུས་མཚུངས་སུ་ཚོགས་པ། འོད་ལྔ་ཡུལ་གྱི་འཁྲུལ་གཞི། རིག་པ་སེམས་ཀྱི་འཁྲུལ་གཞིར་གྱུར་ནས། གཟུགས་མེད། གཟུགས་ཁམས། འདོད་ཁམས་ཀྱི་གནས། འགྲོ་དྲུག་གི་གནས་དོན་ལུས་སུ་སྣང་བ་སྟེ་བདེ་སྡུག་གི་འཁྲུལ་སྣང་མཐའ་ཡས་པ་ལ་སྤྱོད་པ་སྟེ། དེས་ན་འཁོར་འདས་གཉིས་གཅིག་ཆར་རིག་པ་གཅིག་གི་ཆོས་ཉིད་དང་རང་གདངས་ལས་གཞན་དུ་མེད་ཀྱང་རང་ངོ་རིག་མ་རིག་གི་གནད་ལ་བརྟེན་ནས་གྲོལ་འཁྲུལ་གཉིས་བྱུང་བ་སྣང་མུན་གྱི་གྲིབ་སོ་ཙམ་ལས་མེད་པས་ལམ་ཁྲེགས་ཆོད་དང་ཐོད་རྒལ་གྱི་གནད་མངོན་དུ་བྱས་ཏེ་བསྣུན་པས། ཡིན་ལུགས་ཇི་བཞིན་མངོན་དུ་གྱུར་ནས་རིག་གདངས་གློ་བུར་གྱི་འཁྲུལ་པ་རང་སངས་ཏེ། དབང་རྣོན་ཚེ་འདིར་གྲོལ་ནུས་པའི་རྒྱུ་མཚན་ཡང་དེ་ཡིན་ནོ། །གཉིས་པ་གྲོལ་གཞི་དངོས་ཀྱི་དཔེ་དོན་བཤད་པ་ལ། རྒྱལ་བུ་དམངས་སུ་བབས་པ་ན༔ བློན་པོས་ངོ་ཤེས་དབང་བསྐུར་ཚེ༔ རྒྱལ་པོས་ཁམས་གསུམ་དབང་དུ་སྡུད༔ དེ་བཞིན་རང་རིག་བྱང་ཆུབ་སེམས༔ དེ་ཡི་མཚན་ཉིད་བསྟན་པར་བྱ༔ ཞེས་པ་སྟེ་དཔེར་ན་འཁོར་ལོ་བསྒྱུར་བའི་རྒྱལ་རིགས་ཀྱི་ཁྱེའུ་དྭ་ཕྲུག་ཏུ་གྱུར་བས་རྐང་འཁྱམས་ནས་དམངས་བབས་ཏེ་ཡུལ་ཀུན་ཏུ་འཁྱར་བ་ན་བློན་པོ་ཆེན་པོ་ཞིག་གིས་དེའི་གནས་ཚུལ་ངོ་ཤེས་ཏེ་རྩད་བཅད་ནས་ཕ་ཡི་རྒྱལ་སར་དབང་བསྐུར་ཏེ་མངའ་གསོལ་བའི་ཚེ་དེས་ཀྱང་རིགས་དང་མཐུན་པའི་ལས་བརྩམས་ནས་རྒྱལ་སྲིད་བཟུང་ཞིང་བསྐྱངས་བས་ཐབས་དང་སྟོབས་ཀྱིས་ཁམས་གསུམ་གྱི་ཁྱོན་ན་གནས་པའི་ཆེ་རྒུ་འཁོར་དང་བཅས་པ་རང་གི་མངའ་འོག་ཏུ་བསྡུས་ནས་བྲན་བཞིན་བཀོལ་ཏེ་འབངས་ཀྱང་བདེ་ལ་བཀོད་ཅིང་རྒྱལ་པོའི་མངའ་ཐང་ཡང་རྒྱས་པར་གྱུར་བ་བཞིན། རང་ལ་ཡེ་ནས་གནས་པའི་རིག་སྟོང་འོད་གསལ་བྱང་ཆུབ་སེམས་ཀྱི་ཆོས་ཉིད་རང་དང་འདུ་འབྲལ་མེད་པར་བཞུགས་ཀྱང་རང་གདངས་རང་སྣང་དུ་ངོ་མ་ཤེས་ཏེ་འཁྲུལ་སྣང་རང་རྒྱུད་དུ་སྤྱོད་པས་འཁོར་བར་ཁ་ཕྱིར་བལྟས་ཀྱིས་འཁྱམས་པའི་ཚེ་ཀུན་བྱེད་བྱང་ཆུབ་སེམས་དེ་ཡི་མཚན་ཉིད་དོན་གྱི་གནས་ལུགས་མ་ནོར་བའི་གནད་གསང་བླ་མའི་མན་ངག་གིས་མཐའ་བསྟན་ཏེ་ཉམས་སུ་བླང་བས་འཁྲུལ་པ་གཞི་ལ་དག་ནས་སྐུ་གསུམ་ཡེ་གནས་ཆེན་པོའི་དགོངས་པ་མངོན་དུ་གྱུར་པས་གྲོལ་ཏེ་ཕྱིར་མི་ལྡོག་པའི་བཙན་ས་ཟིན་པའི་ཐབས་ཀྱི་གསེང་ལམ་མཐར་ཐུག་ཏུ་ངེས་པས་ན་བསྐལ་བཟང་དག་གིས་ཉམས་ལེན་གྱི་སྙིང་པོར་བྱ་འོས་སོ། །སྤྱིར་རྫོགས་པ་ཆེན་པོའི་ཉམས་ལེན་གྱི་ལམ་གནད་ཐམས་ཅད་གཞི་དང་གཞི་སྣང་གི་གྲོལ་འཁྲུལ་གྱི་ཤན་འབྱེད་འདི་ཤིན་ཏུ་གལ་ཆེ་ཞེས་ཡང་ཡང་གསུངས་བས་འདིར་ཡང་ཅུང་ཟད་སྤྲོས་ཏེ་བཤད་པའོ། །གཉིས་པ་དེ་ཉིད་མངོན་དུ་བྱེད་པའི་ལམ་བཤད་པ་ལ། ལྟ་བ། སྒོམ་པ། སྤྱོད་པ་ལམ་དུ་བྱེད་པའོ། །དང་པོ་ལྟ་བ་ལམ་དུ་བྱེད་ཚུལ་ནི། གསལ་ཞིང་རྙོགས་པ་མེད་པ་ལ༔ རིག་པ་རང་བྱུང་སྟོང་པའི་ངང༔ གསལ་སྟོང་དབྱེར་མེད་རྒྱུན་ཆད་བྲལ༔ འགྱུར་བ་མེད་ཅིང་ཀུན་ཏུ་རྟོག༔ འདི་ཡིན་མེད་པ་ངོས་བཟུང་བྲལ༔ འོན་ཀྱང་མྱོང་བ་ཅན་གྱི་གདངས༔ ངེས་པ་ཅན་དུ་གནས་པའོ༔ །ཞེས་པ་སྟེ། གཏན་ལ་དབབ་བྱ་རིག་པའི་རང་བཞིན་འོད་དུ་གསལ་བས་འཁོར་འདས་སྣ་ཚོགས་སུ་སྣང་བར་གྱུར་ཀྱང་གྲོལ་འཁྲུལ་གང་གི་སྐབས་སུ་ཡང་རང་གི་ངོ་བོ་ཀ་དག་ཡེ་གྲོལ་ཆེན་པོའི་གཤིས་ལུགས་ལ་ནི་ཉོན་མོངས་དང་འཁྲུལ་པས་རྙོགས་ཏེ་སྒྲིབ་པར་གྱུར་བ་མེད་ཅིང༌། ཐུགས་རྗེ་ཀུན་ཁྱབ་ཀྱི་རང་གདངས་འགག་མེད་ཅིར་ཡང་འཆར་བའི་ཕུག་དེད་ན་ཆོས་ཉིད་སྐྱེ་འགག་གནས་གསུམ་དང་བྲལ་བ་ལས་མ་འདས་པའི་ཕྱིར། འཁྲུལ་རྟོག་སེམས་ཀྱི་བྱུང་ཚོད་ཐམས་ཅད་རྩད་བཅད་པས་རང་བྱུང་རིག་པའི་རྩལ་ལས་བྱུང་ཞིང་གནས་པ་ལྟར་སྣང་ཡང་དོན་ལ་བྱུང་གནས་ཀྱི་དུས་ཉིད་ནས་སྟོང་པའི་ངང་ལས་མ་འདས་པས། སྐྱེ་མེད་ཆོས་སྐུ། གནས་མེད་ལོངས་སྐུ། འགག་མེད་སྤྲུལ་སྐུ་སྟེ་ཡེ་ཤེས་གསུམ་ལྡན་གྱི་གནས་ལུགས་མྱོང་བས་གཏན་ལ་ཕབ་ནས། འོད་གསལ་ལྷུན་གྲུབ་དང་ཀ་དག་སྟོང་ཉིད་ཀྱི་དབྱིངས་ལས་ནམ་ཡང་འདུ་འབྲལ་མེད་པའམ། དབྱེར་མེད་པའི་ཡིན་ལུགས་ལ་རང་བཞིན་བབ་ཀྱི་དྲན་པས་ངོས་ཟིན་པར་བྱས་ཏེ་མྱོང་བས་འཕྲོ་གནས་གང་གི་སྐབས་སུ་ཐ་མལ་དུ་མ་འཁྲུལ་པས་རིག་པའི་ངོ་བོ་རྒྱུན་ཆད་མེད་པར་འཆར་ཞིང༌། རིག་རྩལ་སེམས་ཀྱི་འཕྲོ་འདུ་ཇི་ལྟར་བྱུང་ཡང་དགག་སྒྲུབ་མེད་པའི་གཤིས་ལ་བཞག་པས་རྩལ་རང་ཐིམ་སོང་ནས་ངོ་བོ་གཤིས་ལུགས་ལ་མཉམ་རྗེས་གང་གི་སྐབས་སུ་ཡང་འཕོ་འགྱུར་བྲི་གང་མེད་ཅིང་དུས་ཀུན་རྟག་པ་དམ་པའི་བདག་ཉིད་ཆེན་པོ་སྟེ་ཡིད་དཔྱོད་བློ་ཡི་སྤྱོད་ཡུལ་ལས་འདས་ཀྱང་སོ་སོ་རང་རིག་པའི་ཡེ་ཤེས་ཀྱིས་ཉམས་སུ་མྱོང་བས་དངོས་པོ་དང༌། མཚན་མའི་ཆོས་ཀྱིས་འདི་ཡིན་གྱི་གཏད་སོ་མེད་པས་སྣང་སྟོང་ཕྱོགས་རེའི་མཚན་རྟོག་གི་ངོས་བཟུང་ཐམས་ཅད་བྲལ་ཞིང༌། འོན་ཀྱང་བེམ་ཆོས་དང་ཐ་མལ་དུ་ཡེངས་ལ་ཕྱལ་བར་ཤོར་བ། མི་རྟོག་ལུང་མ་བསྟན་མ་ཡིན་པ་སོ་སོ་རང་རིག་གི་ཡེ་ཤེས་ཀྱི་ཉམས་སུ་མྱོང་བའི་སྤྱོད་ཡུལ་ཅན་གྱི་བདག་ཉིད་ངོ་ཤེས་ནང་ནས་སྐྱེས་པས་ཐེ་ཚོམ་གྱི་སྨག་དང་བྲལ་བའི་ངེས་པ་ཅན་ཀུན་གཞི་ལུང་མ་བསྟན། ཀུན་གཞིའི་རྣམ་ཤེས་གསལ་རིག་གི་ཆ་ལས་འདས་པའི་ཚུལ་དུ་རྟོགས་པ་སྟེ། ཁ་ཕྱིར་བལྟས་ཐོས་བསམ་གྱི་རིགས་པས་དཔྱད་པའི་ལྟ་བ་གཏན་ལ་ཕབ་པ་ལྟ་བུ་མ་ཡིན་པ་དོན་གྱི་ཡིན་ལུགས་ནང་གི་ཉམས་མྱོང་གིས་ངོ་སྤྲད་པས་མིང་ལྟ་བར་བཏགས་ཀྱང་དོན་སྒོམ་པ་ཡིན་པས་འཁྲུལ་པའི་འཕྲུལ་འཁོར་བཤིག་པ་ལ་ཆེས་ཟབ་པའོ། །གཉིས་པ་སྒོམ་པ་བཤད་པ་ལ། སྔོན་འགྲོ། དངོས་གཞི། རྗེས་ཀྱི་ཉམས་ལེན་བཤད་པའོ། །དང་པོ་ནི། དེ་ཉིད་མཐོང་བར་བྱེད་པའི་ལམ༔ རྒྱུད་སྦྱང་ཚོགས་བསག་སྡོམ་པ་བླང༔ ཞེས་པ་སྟེ། དངོས་གཞི་ཉམས་ལེན་ཚུལ་བཞིན་རྒྱུད་ལ་སྐྱེ་བ་ལ་སྔོན་འགྲོའི་བསགས་སྦྱང་གིས་རྒྱུད་དུལ་བ་ཤིན་ཏུ་གཅེས་པའི་ཕྱིར་ངེས་འབྱུང་གི་བློ་བསྐྱེད་པས། ཐར་པའི་གནས་སུ་བློ་བཀོལ་བ་དང༌། ལམ་དེ་སྒྲུབ་པའི་རྟེན་རྙེད་པར་དཀའ་ཞིང༌། མི་རྟག་པས་བརྩོན་འགྲུས་བསྐུལ་ཏེ། རྒྱུ་འབྲས་ཡིད་ཆེས་ཀྱི་ལྟ་བས་གཞི་བཟུང་ནས། ལམ་གྱི་སྒོ་འབྱེད་སྐྱབས་འགྲོ། ལམ་གྱི་སྲོག་རྩ་སེམས་བསྐྱེད། ལམ་གྱི་གེགས་སེལ་རྡོར་སེམས། ལམ་གྱི་བོགས་འབྱིན་ཚོགས་བསགས། ལམ་གྱི་སྙིང་པོ་བླ་མའི་རྣལ་འབྱོར་རྣམས་ལ་བརྩོན་པས་མཐར་བསྐྱལ་ཞིང༌། རྒྱུད་དྲན་ཤེས་དང་མ་བྲལ་བའི་སྡོམ་ལྡན་དུ་སྒྲུབ་པར་བྱའོ། ༈ གཉིས་པ་དངོས་གཞིའི་ཉམས་ལེན་ལ། གཞི་དབང་གིས་བཟུང༌། ལམ་བསྐྱེད་རྫོགས་ལ་འབད། འབྲས་བུ་མཐར་ཐུག་ཏུ་ལ་བཟླའོ། །དང་པོ་ནི། སྤྲོས་བཅས་སྤྲོས་མེད་ཤིན་ཏུ་དང༔ རབ་ཏུ་སྤྲོས་མེད་དབང་བཞི་ཞུ༔ ཞེས་པའི་བར་ཏེ། སྦྱང་བྱ་དྲི་མ་རགས་པ་ལུས་ངག་ཡིད་གསུམ་ཆ་མཉམ། ཕྲ་བ་རླུང་ཐིག་ལེ་ཡེ་ཤེས་ཀྱི་ཁམས་ལ། སྦྱོང་བྱེད་ལམ་དབང་གི་རིམ་པ་སྤྲོས་བཅས་བུམ་དབང་རྡུལ་ཚོན་ལ་བརྟེན་པ། སྤྲོས་མེད་མཎྜལ་དང་བུམ་པ་ལ་བརྟེན་པ། ཤིན་ཏུ་སྤྲོས་མེད་བརྡ་ལ་བརྟེན་པ། རབ་ཏུ་སྤྲོས་མེད་སེམས་ལ་བརྟེན་ནས་བསྐུར་བས་དཀྱིལ་འཁོར་དང་དབང་བསྐུར་ཚུལ་བཅས་བཞི་རེར་ངེས་པ་དང༌། སྒོམ་པའི་ལམ་ཡང་འོག་ནས་འབྱུང་བ་བཞིན་བསྐྱེད་རྫོགས་རྫོགས་ཆེན་བཞིར་ངེས་པ་དང༌། འབྲས་བུ་ཡང་སྐུ་བཞིའི་གོ་འཕང་ཐོབ་བྱའི་དབང་གིས་བཞིར་ངེས་ཤིང༌། སྤྱིར་གསང་སྔགས་ཀྱི་དབང་ཐམས་ཅད་དོན་གནད་དབང་བཞི་ལས་མི་འདའ་མོད། འདི་ནི་བཞི་པ་ཚིག་གི་དབང་ལ་ནང་གསེས་བཞིར་དབྱེ་བར་གསུངས་པས་མཚན་ཉིད་དང་ལྡན་པའི་བླ་མ་ལས། སྣོད་དང་ལྡན་པའི་སློབ་མས་ཞུ་ཞིང་ལམ་སྦྱང་པ་ལས། དབང་གིས་མ་སྨིན་ན་ཉམས་སུ་ལེན་པ་ལྟ་ཅི། དཔེ་ཙམ་ཡང་བལྟ་བར་མི་དབང་བས་ཐོག་མར་གསང་སྔགས་ཆོས་ཀྱི་སྙིང་པོ་དབང་ལ་ནན་ཏན་དུ་བྱ་དགོས་སོ། ༈ གཉིས་པ་ལམ་བསྐྱེད་རྫོགས་ལ་འབད་པ་ལའང་གཞུང་ལས། སྤྲོས་བཅས་བསྐྱེད་རིམ་སྤྲོས་མེད་དུ༔ རྩ་རླུང་བསྒོམ་ཞིང་ལུས་གནད་བསྣུན༔ ཤིན་ཏུ་སྤྲོས་མེད་བདེ་བ་སྦྱང༔ རབ་ཏུ་སྤྲོས་མེད་དེ་ཉིད་བལྟ༔ ཞེས་པ་ལྟར་རྩ་རླུང་ཞི་ཁྲོ་བསྐྱེད་རིམ། བདེ་དྲོད་མི་རྟོག་པའི་རྫོགས་རིམ་གཉིས་ལས། དང་པོ་ལའང༌། བྱིན་རླབས་ལམ་བྱེད་རིག་འཛིན་བླ་མ་ཡོངས་རྫོགས་ཀྱི་བསྐྱེད་རིམ་དང༌། དངོས་གྲུབ་ལམ་བྱེད་ཡི་དམ་པདྨའི་སྙིང་ཐིག་ཞི་ཁྲོའི་བསྙེན་སྒྲུབ་བྱ་ཚུལ་ལོ། །དང་པོ་ནི། མདོ་བྱང་ལས། མན་ངག་སྐོར་ལ་ཐོག་མར་པདྨ་བདག༔ རྒྱ་གར་ཡུལ་ནས་དཀའ་བ་མང་པོ་ཡིས༔ མཉེས་པ་གསུམ་གྱིས་སློབ་དཔོན་བསྟེན་པ་རྣམས༔ ཐམས་ཅད་ཡེ་ཤེས་སྐུ་ཅན་ཤ་སྟག་སྟེ༔ དེ་དག་སྒྲུབ་པའི་ཚུལ་ནི་འདི་ལྟ་སྟེ༔ བླ་མ་ཡོངས་རྫོགས་སྒོམ་པའི་གསེང་ལམ་ཞེས༔ བྱིན་རླབས་སྤྱི་ལས་ཁྱད་པར་མཚན་དང་ནི༔ སྐུ་ཡི་རྣམ་པས་སྔོན་དུ་སྐུས་དབང་བསྐུར༔ གསུང་ལ་གདམས་པ་ཐུགས་ལ་རྡོ་རྗེའི་གླུ༔ དགོངས་པའི་ཉམས་སྐྱོང་བཞི་ཡིས་རྫོགས་པ་ལ༔ དབང་བསྐུར་དགོངས་པ་མཐར་ཕྱིན་ཞེས་བྱའོ༔ ཞེས་པ་ལྟར། རིག་འཛིན་བླ་མའི་འོད་གསལ་ཡེ་ཤེས་ཀྱི་སྐུ་ཅན་བརྟན་གཡོ་སྲིད་ཞི་ཀུན་ཁྱབ་རྡུལ་དང་དངོས་པོའི་ཆོས་ལས་འདས་ཀྱང་སྣང་སྟོང་མཁའ་ཁྱབ་མཁའི་རྡོ་རྗེ་སྒྱུ་མ་དང་འཇའ་ཚོན་ལྟར་ཤར་བ་མཚོན་བྱེད་སྐུ་འབག་གི་རྣམ་པས་བསྐུར་བ་བུམ་དབང༌། དོན་གྱི་དགོངས་པ་བསམ་གྱིས་མི་ཁྱབ་པའི་དབྱིངས་རང་བྱུང་རྡོ་རྗེ་གསང་བའི་ཚིག་ཏུ་ཤར་བ་གྲོལ་བ་དྲུག་གི་བདག་ཉིད་ཅན་གསུང་རྡོ་རྗེའི་ནཱ་དའི་གླུས་ངོ་སྤྲོད་པ་གསང་དབང༌། ཐུགས་ཟབ་ཞི་ཡེ་ཤེས་ཀྱི་དགོངས་པའི་རྩལ་རྡོ་རྗེའི་གླུ་དོན་ལ་སློབ་མས་ཀྱང་མཉམ་པར་བཞག་པས་བྱིན་རླབས་འཕོས་པ་ཤེར་དབང༌། སློབ་མའི་རྒྱུད་ལ་ཡེ་ཤེས་ཀྱི་དྲོད་སྐྱེས་ཏེ་དོན་གྱི་འོད་གསལ་མངོན་སུམ་ཉམས་མྱོང་གིས་ངོ་འཕྲོད་པས་དགོངས་པའི་ཉམས་སྐྱོང་བ་བཞི་པ་སྟེ། རྡུལ་ཚོན་སོགས་སྤྲོས་བཅས་མཚན་མའི་ཆོས་ལ་མི་ལྟོས་པར་ཁྱབ་བདག་བླ་མའི་ཟག་མེད་ཡེ་ཤེས་ཀྱི་སྐུ་གསུང་ཐུགས་རྡོ་རྗེའི་དཀྱིལ་འཁོར་ལ་བརྟེན་ནས་དོན་གྱི་དབང་བསྐུར་བ་སྟེ། དེས་ན་དབང་བཞི་པ་ལ་ནང་གསེས་བཞིར་དབྱེ་པའི་ཚུལ་ཡིན་ལ། སྤྱིར་ཕྱི་ནང་གསང་སྐོར་གསུམ་དུ་ལམ་གྱི་ཡན་ལག་རྫོགས་པའི་ཆེད་ཡི་དམ་དང་མཁའ་འགྲོའི་དབང་དང་སྒྲུབ་ཐབས་མང་དུ་འབྱུང་བ་རྣམས་ཡེ་ཤེས་རྣམ་པ་ཐམས་ཅད་པའི་ཆོ་འཕྲུལ་ཅིར་ཡང་འཆར་བའི་མཐའ་གཅིག་ཏུ་རྩོལ་མེད་ཀྱི་ལམ་ལ་འགལ་འདུར་མི་གནས་ཏེ། གང་ཟག་དབང་རབ་ཅིག་ཆར་བ་རྣམས་ནི་ཅིར་སྣང་ཡེ་ཤེས་ཀྱི་རོལ་རྩལ་ལས་མ་འདས་པས་བསྐྱེད་བཟླས་རྫོགས་གསུམ་གང་ཉམས་སུ་བླངས་ཀྱང་ཨ་ཏིའི་ལམ་ལས་མ་འདས་ལ། དབང་བསྐུར་རིམ་ཅན་པ་དག་དད་པས་ཐེག་རྩེར་མོས་ཀྱང་རྩོལ་མེད་ཡེ་ཤེས་ཁོ་ན་ལམ་ཁྱེར་མི་ནུས་པས་ཇི་ལྟར་བསྟན་པ་བཞིན་ཉམས་སུ་བླངས་ནས་མཐར་ཐུག་རྩོལ་མེད་ཀྱི་ས་ལ་བསྐྱལ་བའི་གནད་ཀྱིས་བསྐྱེད་བཟླས་རྫོགས་པའི་རིམ་པ་ཐམས་ཅད་ཤིན་ཏུ་རྒྱས་པར་བསྟན་པ་ཡིན་ཅིང༌། ལམ་གྱི་ངོ་ཏི་མཐར་ཐུག་གི་དབང་དང་ཉམས་ལེན་བཅས་རིག་འཛིན་བླ་མའི་རྡོ་རྗེ་བཞིའི་དཀྱིལ་འཁོར་དུ་སྨིན་པར་བྱེད་པ་ཉིད་ཡིན་པར་མདོ་བྱང་རྡོ་རྗེའི་ཚིག་གིས་བསྟན་པ་ལྟར་གནད་ཆེ་བས་སྤྲོས་ཏེ་བཤད་པའི་གནད་སྡེ་གསུམ་ཆར་གྱི་སྐབས་ཤེས་པར་བྱ་དགོས་སོ། །དེ་ལྟར་དོན་དམ་ནང་གི་དབང་ཞེས་སྨིན་པའི་སློབ་མས་ལམ་དངོས་བསྐྱེད་བཟླས་ཇི་ལྟར་བྱ་ཚུལ་ནི། གཞུང་མཐུན་རིག་འཛིན་བླ་མའི་སྐུ་འབག་མདུན། ཕྱི་ནང་གི་མཆོད་པ་སོགས་སྤྲོས་པ་ཆེ་ཆུང་སྐབས་བསྟུན་ལས་མཐའ་གཅིག་ཏུ་སྤར་ཁབ་མི་དགོས་སྙམ། ལས་བྱང་གསང་སྐོར་རིག་འཛིན་བླ་མའི་སྒྲུབ་ཐབས་དང་ཁྲོ་བོའི་བྱང་བུ་ཁྲིགས་བསྡེབས་གཉིས་གུང་བསྡེབས་ཀྱིས་བཏང་སྟེ། ཉམས་ལེན་དངོས་གཞུང་ལས། དག་པ་རབ་འབྱམས་བསྐྱེད་རིམ་ལ༔ གསལ་བརྟན་དག་པ་མཐར་ཕྱིན་བསླབ༔ ཅེས་གསུངས་པ་ལྟར་སྣང་སྲིད་གཞིར་བཞེངས་དག་པ་རབ་འབྱམས་སྐུ་དང་ཡེ་ཤེས་ཀྱི་སྣང་བ་ཚད་ལ་ཕེབས་པའི་ཟག་མེད་ཡེ་ཤེས་ཀྱི་སྐུ་ཅན་ཚོམ་བུའི་ཚུལ་དུ་བཞུགས་བཞིན་གསལ་བཏབ། སྣང་ཆ་སྐུ་ཡི་བྱད་དབྱིབས། བཞུགས་སྟངས། ཕྱག་རྒྱ་སོགས་ཞིབ་པར་གསལ་ཞིང༌། སྟོང་ཆ་དེ་ཀུན་རིག་པ་ཀ་དག་གི་རང་རྩལ་ལས་གང་ལའང་མི་གནས། ཅིར་ཡང་མ་གྲུབ་བཞིན་ཅིར་ཡང་འཆར་བའི་གནས་ལུགས་དང་དབྱེར་མེད་དུ་བསྲེས་ཏེ་མཉམ་པར་བཞག །སྣང་སྟོང་དེ་གཉིས་ཀྱང་འགལ་འདུར་མི་གནས་པ་ཟག་མེད་སྐུ་དང་ཡེ་ཤེས་ཀྱི་ཡོན་ཏན་གདོད་ནས་འདུ་འབྲལ་མེད་པའི་དག་པ་དྲན་པས་ཐ་མལ་ཞལ་ཕྱག་གི་ཞེན་རྟོག་སྦྱང༌། གསལ་བརྟན་དག་གསུམ་གྱི་ཏིང་འཛིན་སྐྱེ་བ་འམ། བོགས་འབྱིན་སླད་བཟླས་པ་བྱ་སྟེ་དེ་ལའང་བསྙེན་སྒྲུབ་ལས་གསུམ་ལས། དང་པོ་ནི། ཡེ་ཤེས་སེམས་དཔའི་ཐུགས་དབུས་སུ༔ ཙིཏྟ་མཆོང་གུར་སྨུག་པོའི་ཀློང༔ ཉི་ཟླ་ཁ་སྦྱོར་ལྟེ་བར་ཧྲཱི་དེ་མཐར་རྡོ་རྗེའི་སྔགས་ཀྱིས་བསྐོར༔ རྩེ་གཅིག་སེམས་བཟུང་བཟླས་པ་ཡིས༔ ཡེ་ཤེས་འོད་ཟེར་མཁའ་ཁྱབ་འཕྲོས༔ རྩ་གསུམ་རྒྱལ་བ་རབ་འབྱམས་དང༔ ཁྱད་པར་འོད་གསལ་རྫོགས་ཆེན་གྱི༔ རིག་འཛིན་བླ་མའི་ཐུགས་རྒྱུད་བསྐུལ༔ སྐུ་གསུང་ཐུགས་ཀྱི་བྱིན་རླབས་དབྱིག༔ ལྷ་སྔགས་ཕྱག་མཚན་འོད་ཟེར་གྱི༔ རྣམ་པར་སྤྱན་དྲངས་ཧྲཱིཿལ་ཐིམ༔ བྱིན་རླབས་དབང་དང་དངོས་གྲུབ་ཐོབ༔ དབྱིངས་རིག་དབྱེར་མེད་ངང་ནས་བཟླ༔ ཞེས་དམིགས་པའི་ཏིང་འཛིན་དང་བཅས། ཨོཾ་ཨཱཿཧཱུྃ་བཛྲ་མ་ཧཱ་གུ་རུ་ཤྲཱི་སིངྷ་སརྦ་སིདྡྷི་ཧཱུྃ་ཕཊ྄༔ ཅེས་བསྙེན་སྔགས་འབུམ་ཕྲག་བཞི་བཟླ། གཉིས་པ་སྒྲུབ་པ་ནི། སླར་ཡང་ཐུགས་སྲོག་སྔགས་ཕྲེང་ལས༔ འོད་འཕྲོས་ལོངས་སྤྱོད་སྟོན་པ་དང༔ འཁོར་ཚོགས་རྒྱ་མཚོའི་ཐུགས་དམ་བསྐུལ༔ དེ་རྣམས་གསང་གསུམ་འོད་ཟེར་གྱིས༔ སྣོད་བཅུད་ཐ་མལ་གཟུང་འཛིན་སྦྱངས༔ ལྷ་སྔགས་ཡེ་ཤེས་ཕྱག་རྒྱར་སད༔ ཚུར་འདུས་དངོས་གྲུབ་རྣམ་གཉིས་ཐོབ༔ བྱིན་རླབས་བརྟན་ཅིང་ནུས་ལྡན་བསམ༔ ཞེས་གསལ་བཏབ་སྟེ། ཨོཾ་བཛྲ་མ་ཧཱ་གུ་རུ་སརྦ་སིདྡྷི་ཧཱུྃ་ཕཊ྄༔ ཅེས་སྒྲུབ་སྔགས་འབུམ་ཕྲག་གསུམ་བཟླ། སྒྲུབ་པའི་སྔགས་རིག་འཛིན་སོ་སོའི་མཚན་སྔགས་བཟླ་བར་འདོད་ན་སྐབས་ཐོབ་གཙོ་འཁོར་སོ་སོར་སེམས་འཛིན་སྤྲོ་བསྡུ་བྱ་བས། ཨོཾ་གུ་རུ་ཨིནྡྲ་བྷཱུ་ཏི་ཧཱུྃ༔ ཨོཾ་གུ་རུ་པདྨ་སཾབྷ་ཝ་ཧཱུྃ༔ ཨོཾ་གུ་རུ་བི་མ་ལ་མི་ཏྲ་ཧཱུྃ༔ ཨོཾ་གུ་རུ་ཛྙཱ་ན་སཱུ་ཏྲ་ཧཱུྃ༔ ཨོཾ་གུ་རུ་ཧཱུྃ་ཀཱ་ར་ཧཱུྃ༔ ཨོཾ་གུ་རུ་ཧེ་རུ་ཀ་ཧཱུྃ༔ ཨོཾ་གུ་རུ་ནཱ་གརྫུ་ན་ཧཱུྃ༔ ཨོཾ་གུ་རུ་པྲ་བྷ་ཧསྟི་ཧཱུྃ༔ ཨོཾ་གུ་རུ་དྷཱ་ན་སཾསྐྲྀ་ཏ་ཧཱུྃ༔ ཨོཾ་གུ་རུ་ཀརྨ་ཨིནྡྲ་ནཱི་ལ་ཧཱུྃ༔ ཨོཾ་གུ་རུ་རོམྦུ་གུ་ཧྱ་ཧཱུྃ༔ ཨོཾ་གུ་རུ་ཤནྟིཾ་གརྦྷ་ཧཱུྃ༔ ཞེས་མཚན་སྔགས་རེ་རེ་བཞིན་བཟླ། བསྙེན་སྒྲུབ་རྒྱས་པར་ལོངས་ན་མཚན་སྔགས་རེ་རེ་བཞིན་འབུམ་རེ་བཟླ། བསྙེན་སྒྲུབ་འབྲིང་པོའི་དབང་དུ་བྱས་ན་ཁྲི་ཚོ་རེ་བཟླས་ཀྱང་རུང་ངམ་སྙམ། གསུམ་པ་ལས་སྦྱོར་ནི། ཐུགས་སྲོག་སྔགས་ཕྲེང་བཅས་པ་ལས༔ འོད་ཟེར་ལྕགས་ཀྱུ་མཁའ་ཁྱབ་འཕྲོས༔ རང་གཞན་བླ་ཚེ་ཡར་ཉམས་དང༔ འཁོར་འདས་སྲོག་གི་དྭངས་མའི་བཅུད༔ འཆི་མེད་བདུད་རྩིའི་རྣམ་པར་དྲངས༔ ཐུགས་སྲོག་ལ་ཐིམ་གཟི་བྱིན་འབར༔ སྒྲིབ་དག་ཚེ་དང་བསོད་ནམས་རྒྱས༔ ཡེ་ཤེས་རྡོ་རྗེའི་སྲོག་འགྲུབ་བསམ༔ ཨོཾ་ཨཱཿཧཱུྃ་བཛྲ་མ་ཧཱ་གུ་རུ་ཨཱ་ཡུརྫྙཱ་ན་སརྦ་སིདྡྷི་ཧཱུྃ༔ ཞེས་ཚེ་ཛཔ྄་འབུམ་ཕྲག་གཅིག་གྲངས་ཚད་དུ་གསུངས། ཚེ་འགུགས་ཀྱང་ནང་སྒྲུབ་རིག་འཛིན་བླ་མའི་སྐབས་ལྟར་སྦྱར། མཆོག་གི་ལས་སྦྱོར་ཐུན་མོང་མ་ཡིན་པ་ནི། གཞུང་ལས། ཁྱད་པར་མཆོག་གི་ལས་སྦྱོར་ནི༔ དབྱིངས་ཀྱི་རང་ངོ་རྗེན་པར་བསྐྱང༔ རིག་གདངས་ལུ་གུ་རྒྱུད་ལ་གཟིར༔ ཉིན་མཚན་མུན་པའི་རྣལ་འབྱོར་གྱིས༔ སྣང་བཞི་མཐར་ཕྱིན་ཚེ་འདིར་འགྲུབ༔ ཅེས་གསུངས་པའི་དོན་རྒྱས་པར་དབང་བཞི་པའི་ལམ་གྱི་སྐབས་སུ་འཆད་འགྱུར་ལྟར་ཤེས་པར་བྱའོ། །བསྙེན་བཟླས་གྲུབ་ནས་སྨན་རཀ་གཏོར་མ་སོགས་སྤྲོས་བཅས་ཡིན་ན་དངོས་གྲུབ་ལེན་པ་སྤྱི་ལྟར་བྱ་ཞིང༌། བསྙེན་སྒྲུབ་རྫོགས་པ་དང་ཚོགས་རྒྱས་པར་འབུལ་ཞིང་དབང་ལེན་གྱི་དམིགས་པ་ཡང་ཡང་བགྱིས་པས་དོན་གྲུབ་བོ། ༈ གཉིས་པ་དངོས་གྲུབ་ལམ་བྱེད་ཡི་དམ་པདྨའི་སྙིང་ཐིག་ཇི་ལྟར་ཉམས་སུ་ལེན་ཚུལ། ཞི་ཁྲོ་སྦྲག་སྒྲུབ་དང་ཁྲོ་བོ་བཀའ་བརྒྱད་གཉིས། དང་པོ་ལ། བསྐྱེད་རྫོགས་གཉིས། བསྐྱེད་རིམ་ལ་ཡང༌། བསྙེན་སྒྲུབ་གཉིས་ལས། དང་པོ་ནི། སྒྲུབ་རྟེན་མན་ཤེལ་ཟུར་དྲུག་པ་དང་མཆོད་པ་སོགས་ཕྱི་སྐོར་ཡི་དམ་ཞི་བ་ལྟར་ལ། ཕྲིན་ལས་ཀྱི་ཆིངས་གསང་སྐོར་ཁྲོ་བོའི་བྱང་བུ་ཁྲིགས་བསྡེབས་ལ། དངོས་གཞི། ཨ༔ མ་བཅོས་གསལ་རྫོགས་ཀུན་ཏུ་བཟང༔ ཞལ་ཕྱག་མཚན་མ་སོགས་ནས་འགྱུར་མེད་ཡོང་གྲུབ་ངང་དུ་རྫོགས༔ བར་གྱི་གསལ་གདབ། དུག་གསུམ་ཡེ་དག་རྡོ་རྗེ་གསུམ༔ སོགས་བསྟོད་པའི་མཐར། སྤྲོ་ན་ལྷ་ལ་སེམས་བཟུང་ནས༔ ཞི་བའི་བསྙེན་སྔགས་བཟླ་བ་འམ༔ ཞི་བའི་སྤྱི་དྲིལ་ཛཔ྄་སྔགས་བཟླ༔ ཞེས་གསུངས་པའི། རིག་སྟོང་གཉུག་མའི་སྣང་ཆ་གཞིར་གནས་སུ་ཀུན་བཟང་ཡབ་ཡུམ་གྱི་རྣམ་པར་བཞེངས་པ་གདན་གསུམ་དཀྱིལ་འཁོར་རྒྱ་མཚོ་གཅིག་ཏུ་རྫོགས་པའི་རིགས་ཀུན་ཁྱབ་བདག་ཆེན་པོར་རྩེ་གཅིག་ཏུ་དམིགས་པའི་གསལ་སྣང་སྒྲུབ། དེ་ལ་གོམས་ན་ཞི་བ་བཞི་བཅུ་ཞེ་གཉིས་རང་བྱུང་ཡོངས་གྲུབ་ཀྱི་འཁོར་ལོ་གདོད་ནས་གནས་པ་སྣང་ཆ་འགག་མེད་ལུས་དཀྱིལ་གྱི་ཚུལ་དུ་གསལ་བཏབ་ལ་བསྒོམས། ཞར་བྱུང་བཟླས་པ་ལ། ཨ༔ བརྗོད་མེད་འབྲུ་གཅིག་ཡིད་ཀྱིས་བཟླ༔ ཞེས་གསུངས་པས་རླུང་རིག་ཨ་གསུམ་གཅིག་ཏུ་བསྲེས་ལ་བར་རླུང་དང་སྦྲགས་ཨ་ཤུབ་བུར་བྱེ་བ་སོགས་ཅི་ནུས་སུ་བཟླ། སྐབས་ཇི་ལྟར་རིགས་པར་ཞི་བ་ཡོངས་རྫོགས་སམ་ཀུན་བཟང་གི་ཐུགས་ཀར་ཉི་ཟླའི་གྭའུར་ཨ་ཡིག་མཐར་སྔགས་ཕྲེང་གིས་བསྐོར་བ་ལས་སྤྲོ་བསྡུ་སྤྱི་ལྟར་བྱ་བས། ཨོཾ་བོདྷི་ཙིཏྟ་ས་མནྟ་བྷ་དྲ་ཨ༔ ཞེས་འབུམ་ཕྲག་བཞི་ཙམ་བཟླ་བ་ནི་ཕྱག་རྒྱ་གཅིག་པ་ལ་བརྟེན་པའི་བསྙེན་པའོ། །གཏེར་གཞུང་ལས། སྤྲོ་ན་ལྷ་ལ་སེམས་བཟུང་ནས༔ ཞི་བའི་བསྐྱེད་སྔགས་བཟླ་བའམ༔ ཞི་བ་སྤྱི་དྲིལ་ཛཔ྄་སྔགས་བཟླ༔ ཞེས་གསུངས་པ་ལྟར་སྤྲོ་ན་ལེགས་ཀྱང༌། འདིར་ཞི་བའི་སྒྲུབ་ཐབས་དྲག་པོ་གནས་བསྒྱུར་དང་སྦྲགས་ཏེ་བཟླས་ན་འབྲེལ་ཆགས་སུ་འབྱུང་ཞིང་འགལ་བ་མེད་པར་བསམ་ནས་ཕྱི་མ་གཙོ་བོར་བྱས་པའོ། །ཕྲིན་ལས་ཀྱི་ཐོག་མཐའ་སྔར་ལྟར་ལ་དངོས་གཞི་ལྷ་བསྐྱེད་སྐབས། ཏིང་འཛིན་གསུམ་ནི། ཧཱུྃ༔ ཀུན་གཞི་མི་དམིགས་རྣམ་པར་སྟོང༔ ཨཱཿ རང་བཞིན་གསལ་བ་ཀུན་ལ་ཁྱབ༔ ཨོཾ༔ ཐུགས་རྗེ་སྣ་ཚོགས་སྤྲུལ་སྒྱུར་ཤར༔ ཐུགས་རྗེའི་འོད་ཀྱིས་སྣོད་བཅུད་སྦྱངས༔ ལས་གཞུང་གི །ཡེ་ནས་རྣམ་པར་དག་པའི་ཞིང༔ སོགས་ནས། གཉིས་མེད་མཉམ་སྦྱོར་ཟུང་འཇུག་བསྒོམ༔ ཞེས་གསལ་བཏབ་ནས། བྱིན་རླབས་འགུགས་བསྟིམས་སོགས་བྱང་བུ་ལྟར་བསྟོད་པའི་བར་བཏང་རྗེས། བྷྲཱུྃ་བི་ཤྭ་བི་ཤུདྡྷེ་ཛྙཱ་ན་ཙཀྲ་མཎྜ་ལ་བྷྲཱུྃ༔ ཨོཾ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ ཕཊ྄་ཛཿས་བདག་མདུན་སོ་སོར་ཛཔ྄་ཁང་ཕྱེས་ཏེ། ཧཱུྃ སྟོང་གསུམ་འཇིག་རྟེན་ཐམས་ཅད་སོགས་ནས། ལྷུན་གྱིས་གྲུབ་པའི་རང་བཞིན་བསྒོམ། ཞེས་ཛཔ྄་ཀྱི་དགོངས་པ་བསྐུལ་ཏེ། སྣང་བ་ཐམས་ཅད་ཞི་བའི་སྐུ༔ གྲགས་པ་ཐམས་ཅད་སྔགས་ཀྱི་དབྱངས༔ རིག་པ་རྟོག་མེད་འོད་གསལ་དབྱིངས༔ མཆོད་སྤྲིན་རྒྱ་མཚོའི་ཞིང་ཁམས་ཁེངས༔ ཕྲིན་ལས་དུ་མ་འགྲོ་བ་བསྒྲལ༔ མཁའ་ཁྱབ་རྒྱལ་བའི་དཀྱིལ་འཁོར་ཉིད༔ དུ་མ་རོ་གཅིག་ངང་དུ་རྫོགས༔ ཞེས་པའི་སྤྲོ་བསྡུ་དང་བཅས། ལྷ་སྔགས་རྒྱས་པ་བཏང་ན། རྒྱས་པར་རྒྱུད་བཞིན་སྙིང་པོ་བཟླ༔ ཞེས་གསུངས་པ་ལྟར་འགོད་པ་ལ། ཨོཾ་བཛྲ་སཏྭ་ཨཱ༔ གཙོ་བོ་རྡོར་སེམས། ཨོཾ་ཛི་ན་ཛྀཀ྄༔ རྣམ་སྣང༌། སྭ་རཏྣ་དྷྲྀཀ྄༔ རིན་འབྱུང༌། ཨྃ་ཨ་རོ་ལྀ་ཀ྄༔ སྣང་མཐའ། ཧཱ་པྲཛྙཱ་དྷྲྀཀ྄༔ དོན་གྲུབ། མཱུྃ་དྷཱ་ཏི་ཤྭ་རི༔ དབྱིངས་ཕྱུག༔ ལཱྃ་དེ་ཥ་རཱ་ཏི༔ སྤྱན་མ། མཱྃ་མོ་ཧ་ར་ཏི༔ མཱ་མ་ཀི །པཱྃ་རཱ་ག་ར་ཏི༔ གོས་དཀར། ཏཱྃ་བཛྲ་ར་ཏི༔ སྒྲོལ་མ། ཧཱུྃ་ཀྵིཾ་ཧི་རཱ་ཛ་ཡ༔ ས་སྙིང༌། ཏྲཱྃ་ཨ་གྷརྦྷ་ཡ༔ ནམ་སྙིང༌། ཧྲཱི་ཧ་ཧཱུྃ་པདྨ་པྲ་ད་མ༔ སྤྱན་རས་གཟིགས། ཛྲིཾ་ཀུ་རུ་པཱ་ཎི༔ ཕྱག་རྡོར། ཧཱུྃ་ལཱ་སྱེ་ས་མ་ཡ་ཧཱུྃ༔ སྒེག་མ། ཏྲཱྃ་མཱ་ལྱེ་ས་མ་ཡ་ཧོ༔ ཕྲེང་བ་མ། ཧྲཱི་གཱིརྟི་རཱ་གོ་ཧཾ༔ གླུ་མ། ཨཿནཱིརྟི་རཱ་ག་ཡ་མི༔ གར་མ། མཻ་ཏྲི་དྷཱ་ར་ནི་སྭཱ་ཧཱ༔ བྱམས་པ། ཐིཾལྷ་ནི་སྶ་རཾ་བྷ་ཡ་སྭཱ་ཧཱ༔ སྒྲིབ་སེལ། ཧཱུྃ་སྭཱ་རཱ་ཛ་ཡ་སྭཱ་ཧཱ༔ ཀུན་བཟང༌། མཱུྃ་ཤྲཱི་ཨ་རཱ་ག་ཡ་སྭ་ཧཱ༔ འཇམ་དཔལ། ཧཱུྃ་པུཥྤེ་ཨ་བེ་ཤ༔ མེ་ཏོག་མ། ཛ་དྷཱུ་པེ་པྲ་བེ་ཤ༔ བདུག་པ་མ༔ བྃ་དཱི་པཾ་སུ་གི་ནི༔ མར་མེ་མ། ཧོ་གནྡྷེ་ཙིཏྟ༔ དྲི་ཆབ་མ། ཨོཾ་མུ་ནེ་ཀྲེཾ་སྭཱ་ཧཱ༔ ལྷ་ཡི་ཐུབ་པ། ཨོཾ་མུ་ནེ་ཏྲཱུྃ་སྭཱ་ཧཱ༔ ལྷ་མིན་ཐུབ། ཨོཾ་མུ་ནེ་སྲུྃ་སྭཱ་ཧཱ༔ མི་ཡི་ཐུབ་པ། ཨོཾ་མུ་ནེ་བྲེཾ་སྭཱ་ཧཱ༔ བྱོལ་སོང་ཐུབ་པ། ཨོཾ་མུ་ནེ་ཀྵྃ་སྭཱ་ཧཱ༔ ཡི་དྭགས་ཐུབ་པ། ཨོཾ་མུ་ནེ་ཡེ་སྭཱ་ཧཱ༔ དམྱལ་བའི་ཐུབ་པ། ཨོཾ་ཡ་མཱནྟ་ཀྲྀཏ་ཕཊ྄༔ སྒོ་བ་གཤིན་རྗེ། ཨོཾ་པྲཛྙཱ་ན་ཏ་ཀྲྀཏ་ཕཊ྄༔ སྟོབས་ཆེན། ཨོཾ་པདྨཱ་ནྟ་ཀྲྀཏ་ཕཊ྄༔ རྟ་མགྲིན། ཨོཾ་བིགྷྣཱནྟ་ཀྲྀཏ་ཕཊ྄༔ བདུད་རྩི་འཁྱིལ་བ། ཧཱུྃ་ཧཱུྃ་ཧཱུྃ་བཛྲ་ཙིཏྟ་ཨོཾ༔ བྱེད་པ་ཀུན་བཟང༌། ཨ་ཨ་ཨ་བཛྲི་བྷ་དྲ་ས་མནྟ་ཨ༔ བྱ་བ་ཀུན་བཟང་མོ་རྣམས་སོ་སོར་ཇི་ལྟར་རིགས་པ་བཟླ། གཞུང་ལས། བསྡུ་ན་སྙིང་པོའི་ཡང་སྙིང་ནི། ཨོཾ་བོདྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨ༔ ཞེས་བཟླ་བར་གསུངས་པས་རྡོ་རྗེ་དབྱིངས་གཅིག་དྲིལ་གྱི་རྩ་སྔགས་འབུམ་ཕྲག་བཞི་ཉུང་མཐའ་བྱས་པ་གཙོ་བོར་བཟླ། ཐུན་གཤམ་དུ་ཁྲོ་བོ་གནས་བསྒྱུར་བ་ནི། དེ་ཉིད་ཁྲོ་བོར་གནས་བསྒྱུར་ནི༔ སོགས་ནས་དཔལ་གྱི་དཀྱིལ་འཁོར་ཆེན་པོ་གསལ༔ ཞེས་པའི་བར་དང༌། གསང་སྐོར་ཁྲོ་བོའི་བྱང་བུ་ཁྲིགས་བསྡེབས་ལྟར། དུག་གསུམ་ཡེ་དག་རྡོ་རྗེ་གསུམ༔ སོགས་ནས་ཛཔ྄་བསྐུལ་བར་ཞི་བའི་སྐབས་ལྟར་དང༌། ཧཱུྃ༔ སྣང་བ་ཐམས་ཅད་ཁྲོ་བོའི་སྐུ༔ གྲགས་པ་ཐམས་ཅད་སོགས་ནས་ཞི་བའི་སྐབས་ཀྱི་བཟླས་དམིགས་སྦྱར་བ་ཁྲོ་བོའི་ལྷ་སྔགས་ཡོངས་རྫོགས་སྦྱར། བསྡུ་ན་ཁྲོ་བོ་སྤྱི་དྲིལ་གྲངས་ཚད་ཞི་བ་ལྟར་བཟླའོ། སྔོན་འགྲོ་རྒྱས་པར་སྤྲོ་ན་དེ་དག་གི་གསང་སྐོར་ཁྲིད་ཀྱི་བྱིན་རླབས་ལས། བསྐྱེད་རིམ་རྒྱལ་བ་རིགས་ལྔ་འམ༔ ཡང་ན་ཞི་ཁྲོ་གསལ་རྫོགས་སྒོམ༔ ཡུལ་སྣང་ལྷ་རུ་འགྱུར་བར་བསླབ༔ ཅེས་གསུངས་པ་ཉིད་དེང་སང་མོས་སྒོམ་གཙོར་སྟོན་དང་མཐུན་པར་བསྙེན་སྒྲུབ་ཕྱག་རྒྱ་གཅིག་པའི་བསྙེན་པ། ཕྱག་རྒྱ་སྤྲོས་བཅས་ཞི་ཁྲོ་སྦྲག་སྒྲུབ་ཀྱི་སྒྲུབ་པ་བྱ་བའི་ཚུལ་སྨོས་པའོ། །དེ་ལྟར་ཞི་ཁྲོའི་བསྙེན་པ་ཚད་དུ་ལོངས་པའི་ཚེ་རྒྱས་པ་ལ་བདག་འཇུག་དང་བཅས་པའམ། བསྡུས་ན་དངོས་གྲུབ་ཀྱི་རྫས་ལ་བརྟེན་པས་དངོས་གྲུབ་བླང་པ་བཅས་སྤྱི་ལྟར་རོ། །གཉིས་པ་ཁྲོ་བོ་བཀའ་བརྒྱད་ནི། བསྙེན་སྒྲུབ་ཀྱི་རྟེན་ཕྱི་ནང་གི་མཆོད་པ་སྤྱི་ལྟར་ཚོགས་པར་བྱས་ལ་བསྙེན་སྒྲུབ་ལ་འཇུག་པས། བསྐྱེད་རིམ་བྱང་བུ་ཁྲིགས་བསྡེབས་བཞིན་བཏང་སྟེ་ཡེ་ཤེས་ཀློང་དགུའི་དཀྱིལ་འཁོར་གྱི་འཁོར་ལོ་ལ་གསལ་སྣང་སྒྲུབ་པ་སོགས་སྔ་མ་ལྟར་ལ། དངོས་གཞིའི་བཟླས་པ་ལ། ཞི་བར་བསྙེན་པ། ཁྲོ་བོར་སྒྲུབ་པ། དེ་ཉིད་ལས་ལ་སྦྱོར་ཚུལ་བདེ་གླིང་བཀའ་བརྒྱད་དྲེགས་འདུལ་བཞིན་སྦྱོར་བར་མཛད་པས། ལས་བྱང་ནི། ཧཱུྃ༔ སྟོང་གསུམ་འཇིག་རྟེན་ཐམས་ཅད་ཀུན༔ སོགས་ནས། ལྷུན་གྱིས་གྲུབ་པའི་རང་བཞིན་བསྒོམ༔ ཐོག་མར་ཞི་བར་བསྙེན་པ་ནི། ཧཱུྃ༔ ཕྱག་མཚན་ཞི་བའི་ལྷ་ཚོགས་ཀྱི༔ ཐུགས་སྲོག་སྔགས་ཕྲེང་འོད་ཟེར་འཕྲོས༔ རྩ་གསུམ་རྒྱལ་བ་རབ་འབྱམས་མཆོད༔ བྱིན་རླབས་དངོས་གྲུབ་རང་ལ་ཐིམ༔ ཨོཾ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱ༔ ཞེས་དམིགས་པའི་གཟེར་དང་མ་བྲལ་བས་ཞི་བ་སྤྱི་སྙིང་གྲངས་ཚད་འབུམ་ཕྲག་གསུམ་དུ་གསུངས། གཉིས་པ་ཁྲོ་བོར་སྒྲུབ་པ་ལ་ཛཔ྄་ཁང་ཕྱེས་ཏེ། ཞི་བསྙེན་ཁྱུག་ཙམ་བཏང་རྗེས། ཧཱུྃ༔ ཆོམ་བུ་དགུ་ལྡན་གཙོ་མཆོག་གི༔ ཐུགས་ཀར་ཉི་ཟླ་ཁ་སྦྱོར་དབུས༔ ཐུགས་སྲོག་སྔགས་ཀྱི་ཕྲེང་བས་བསྐོར༔ བཟླས་པས་རྒྱུད་བསྐུལ་འོད་ཟེར་འཕྲོས༔ སྣོད་བཅུད་སྣང་ཞེན་ཐམས་ཅད་སྦྱངས༔ སྣང་སྟོང་ལྷ་དང་གྲགས་སྟོང་སྔགས༔ རིག་སྟོང་འོད་གསལ་ཕྱག་རྒྱ་ཆེ༔ ཧེ་རུ་ཀ་དང་དབྱེར་མེད་གྱུར༔ ཨོཾ་བཛྲ་ཙཎྜ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ྄༔ ཁྲོ་བོ་ཀུན་འདུས་ཀྱི་སྒྲུབ་སྔགས་འབུམ་ཕྲག་བཞི་བཟླ། དེ་གྲུབ་པ་དང༌། ལས་སྦྱོར་ཐུན་མོང་བ་ནི། ཞི་ཁྲོའི་བཟླས་པ་ཁྱུག་ཙམ་སྔོན་དུ་འགྲོ་བས། ཧཱུྃ༔ བདག་ཉིད་དཀྱིལ་འཁོར་ལྷ་ཚོགས་ལས༔ སྐུ་དང་སྔགས་ཕྲེང་འོད་ཟེར་འཕྲོས༔ ཕོ་ཉ་དྲེགས་པ་སྐར་ལྟར་འཁྲུགས༔ སྲིད་གསུམ་ཁྱབ་ཅིང་ཁམས་གསུམ་འཕྲོས༔ ཞི་རྒྱས་དབང་དྲག་ཕྲིན་ལས་རྫོགས༔ ཁྱད་པར་གདུག་ཅིང་གཏུམ་པའི་ཚོགས༔ འགུགས་བསྒྲལ་གནས་སྤར་ཆོས་དབྱིངས་བསྟིམ༔ མིང་གི་ལྷག་མ་མེད་པར་གྱུར༔ ཨོཾ་བཛྲ་མ་ཧཱ་ཀྲོ་དྷ་པདྨ་ཀྲོ་དྷཱི་ཤྭ་རི་བཛྲ་ཀཱི་ལི་ཀཱི་ལ་ཡ་མ་ཧཱ་ཡཀྵ་ཀཱ་ལ་རཱུ་པ་ཀརྨ་རཾ་རཾ་ཛྭ་ལ་རཾ་ཧཱུྃ་ཕཊ྄༔ ཅེས་ལས་སྦྱོར་ཁྲི་ཕྲག་བཞི་བཟླ་བར་གསུངས། གང་ལྟར་ཡང༌། སྐབས་འདིའི་བསྐྱེད་རྫོགས་ཀྱི་སྙིང་པོ། མདོ་བྱང་ལས། ལྟ་བ་ཀློང་ཡངས་དབྱིངས་ཀྱི་རྫོང་དང་ལྡན༔ རིག་པ་རང་བྱུང་འཕྲང་གི་སྒོ་ལྕགས་ཚུལ༔ རྫོང་འཕྲང་དབྱེར་མེད་བདེ་གཤེགས་འདུས་པ་ཞེས༔ དབང་གི་མདོ་བྱང་སྤྱི་བླུགས་ཞེས་བྱའོ༔ ཞི་ཁྲོ་དབང་ཆེན་རྡོ་རྗེའི་གནས་སྦྱང་ངོ༔ ཞེས་པ་ལྟར་བསླབ་པོ། །གཉིས་པ་རྫོགས་རིམ་ནི། གསང་སྐོར་ཁྲིད་ཀྱི་རིམ་པ་ལས། རྩ་རླུང་རང་ཉིད་ཀུན་བཟང་གི༔ སྐུ་ལ་རྩ་གསུམ་འཁོར་ལོ་དྲུག༔ ཐིག་ལེ་གཏུམ་མོ་འབར་འཛག་བསྒོམ༔ ལུས་གནད་བདུན་ལྡན་དྲུག་ཆིངས་དང༔ ཙོག་པུར་གནས་པ་རྣམ་གསུམ་གྱིས༔ བདེ་དྲོད་མི་རྟོག་གསུམ་ལྡན་གཅེས༔ ཞེས་པ་ལྟར། ལམ་དངོས་དང༌། བོགས་འབྱིན། འཕྲོས་དོན་གསུམ་ལས། དང་པོ་ལ། དྲོད་བདེ་བ་མི་རྟོག་པའི་རྣལ་འབྱོར་རོ། །དང་པོ་དྲོད་ཀྱི་རྣལ་འབྱོར་ལ། ལུས་གནད་མེ་ཐབ་དྲུག་ལྡན་དུ་བཅས་པས་ལུས་ཀྱི་སྟོང་ར་གསལ་གདབ་པ་ནི། ཨ༔ མ་བཅོས་གསལ་རྫོགས་ཀུན་ཏུ་བཟང༔ ཞལ་ཕྱག་མཚན་མའི་སྐུ་རུ་བཞེངས༔ ཕུང་པོ་ལྔ་ཉིད་བདེ་གཤེགས་ལྔ༔ འབྱུང་བ་ལྔ་ནི་ཡུམ་ཆེན་ལྔ༔ ཚོགས་ཡུལ་སེམས་དཔའ་ལྕམ་དྲལ་བརྒྱད༔ རིགས་དྲུག་གནས་དག་ཐུབ་པ་དྲུག༔ ཕྲིན་ལས་ལྷུན་གྲུབ་སྒོ་མ་བཞི༔ བཞི་བཅུ་རྩ་གཉིས་ཞི་བའི་ལྷ༔ ཡེ་ཤེས་ཐིག་ལེ་གཅིག་ཏུ་འཁྱིལ༔ གདོད་ནས་དམ་ཡེ་དབྱེར་མེད་པ༔ འགྱུར་མེད་ཡོངས་གྲུབ་ངང་དུ་རྫོགས༔ ཞེས་པའི་བར་ཀུན་བཟང་དོན་གྱི་ཕྲིན་ལས་རྡོ་རྗེའི་ཚིག་རྐང་གིས་གསལ་བཏབ་སྟེ་རང་ཉིད་ཀུན་ཏུ་བཟང་པོ་མཐིང་ནག་རྒྱན་མེད་གཅེར་བུ་གསལ་རྫོགས། ཡུམ་ཀུན་ཏུ་བཟང་མོ་དཀར་མོ་དང་སྦྱོར་བ་གསལ། སྐུ་དབུས་དྲང་པོར་རྩ་དབུ་མ། རོ་རྐྱང་གཉིས། གཙུག་ཏོར་ནམ་མཁའི་འཁོར་ལོ། སྤྱི་བོ་བདེ་ཆེན། མགྲིན་པ་ལོངས་སྤྱོད། སྙིང་ག་ཆོས། ལྟེ་བ་སྤྲུལ་སྐུ། གསང་གནས་བདེ་སྐྱོང་བཅས་འཁོར་ལོ་དྲུག་བརྩེགས་སུ་གསལ་བ། ཡར་སྣེར་ཐིག་ལེར་ཧཾ་ཡིག་དཀར་པོ། སྨར་སྣེར་གཏུམ་མོ་ཨ་ཤད་དམར་པོ་གསལ་ཏེ། རླུང་རོ་བསལ་ཞིང་བུམ་ཅན་བཟུང་བས་གཏུམ་མོ་ལས་མེ་འབར། གསང་གནས་ནས་ཡས་རིམ་གྱིས་འཁོར་ལོ་དྲུག་ཏུ་འབར་བས་དྲོད་སྐྱེས་ཏེ་རིམ་གྱི་རྩ་གསུམ། འཁོར་ལོ་དྲུག །ལུས་ཀྱི་ནང་ཐམས་ཅད་ཁྱབ་ནས་བ་སྤུའི་བུ་ག་ཐམས་ཅད་ནས་མེ་ལྕེས་ཁྱབ་སྟེ་ལྕགས་གོང་མེར་བསྲེགས་པ་བཞིན་གྱུར་བར་བསམ་ལ་དྲག་རླུང་བུམ་པ་ཅན་ཅི་ནུས་སུ་བཟུང་བའོ། །གཉིས་པ་བདེ་བའི་རྣལ་འབྱོར་ནི། ལུས་གནད་རྣམ་སྣང་ཆོས་བདུན་བྱས་ལ། ཕྱི་ནང་སྟོང་ར་སྒོམ་པ་རླུང་རོ་བསལ་བ་སྔར་ལྟར་གྱིས་གཏུམ་མོ་སྦར་བའི་མེས་སྤྱི་བོའི་ཧཾ་ལ་རེག་པས་ཞུ་བདེ་འབར་འཛག་གི་ཉམས་རྒྱས། ཐིག་ལེ་དཀར་གསལ་གྱི་རྒྱུན་བྱུང་བ་གཙུག་ཏོར་ནས་མས་རིམ་དུ་བབ་པས་འཁོར་ལོ་སོ་སོར་སོན་ཏེ་ཁེངས། དགའ་བ་དང༌། མཆོག་དགའ། དགའ་བྲལ། ལྷན་སྐྱེས་ཀྱི་དགའ་བ་རྣམས་རྒྱུད་ལ་སྐྱེས། ལུས་ངག་ཡིད་ཆ་མཉམ་དང་བཅས་པའི་འཁྲུལ་རྟོག་སྦྱངས་ཤིང་བཀྲུས། མེ་དང་ཐིག་ལེ་གཉིས་མེད་དུ་འདྲེས་པས་ལུས་ཀྱི་ནང་ཐམས་ཅད་ཁྱབ་པས་བདེ་སྟོང་གི་ཡེ་ཤེས་རྒྱུད་ལ་སྐྱེས་པར་བསམ་ལ་བུམ་ཅན་ཅི་ནུས་སུ་བཟུང་བའོ། །གསུམ་པ་མི་རྟོག་པའི་རྣལ་འབྱོར་ནི། ལུས་གནད་དྲང་སྲོང་ཙོག་པུར་གནས་པས་སྟོང་ར་གསལ་ཞིང་འབར་འཛག་བསྒོམ། བདེ་སྟོང་གི་ཉམས་སྐྱེས་པས་རྟོག་པའི་གཡོ་འཁྲུལ་ཆད་པའི་རང་ངོ་ལ་བལྟས་ཏེ་བདེ་རླུང་སེམས་གསུམ་བསྲེས་པས་མཉམ་བཞག་གི་ངང་བསྐྱང་པའོ། །བཞི་པ་གཞན་ལུས་ནི། བདེ་བ་མི་མོ་གཞོན་ནུ་ལ༔ ཆོས་ཀྱིས་རབ་ཏུ་སྨིན་བྱས་ཏེ༔ ཡབ་ཡུམ་ཀུན་བཟང་ཀུན་བཟང་མོ༔ གནས་རྣམས་བྱིན་རླབས་མཉམ་པར་སྦྱར༔ དགའ་བ་དགའ་བ་ཆེན་པོ་དང༔ མཆོག་དགའ་དགའ་བྲལ་ལྷན་ཅིག་སྐྱེས༔ ཚོར་བ་བདེ་བའི་ངང་དུ་བསླབ༔ ཅེས་པ་སྟེ། བདེ་དྲོད་མི་རྟོག་པའི་ཏིང་འཛིན་རྩ་རླུང་ཐིག་ལེ་ལ་དབང་ཐོབ་པའི་རྣལ་འབྱོར་པས་རིགས་ཅན་ལྔ་ཡི་བུ་མོ་མཚན་དང་ལྡན་པ་བརྟགས་གཞུག་སྔོན་འགྲོའི་ཆོས་ཀྱི་རྒྱུད་སྦྱངས་པ་དང་བཅས་སྤྱི་ལྟར་བྱ་བས་རྒྱུད་གསང་སྔགས་ལམ་གྱི་སྣོད་ལྡན་དུ་སྒྲུབ་ལ། ཡབ་ཡུམ་ཀུན་བཟང་སྟངས་དཔྱལ་གནས་ལྔར་གཙུག་ཏོར་རྡོར་སེམས། སྤྱི་བོ་ནས་རྣམ་སྣང༌། སྣང་མཐའ། མི་བསྐྱོད། རིན་འབྱུང༌། དོན་གྲུབ་ཡབ་ཡུམ་རྣམས་སོ་སོར་གསལ། མཁའ་གསང་རྡོ་རྗེ་པདྨ་སྦྱོར་བའི་ཐབས་ཀྱིས་ལྷན་སྐྱེས་བདེ་བ་ཆེན་པོའི་གནས་ལུགས་མངོན་དུ་བྱ་སྙམ་པའི་འདུ་ཤེས་གསུམ་གྱིས་མཉམ་པར་སྦྱོར་བས་འབར་འཛག་གི་དམིགས་པ་སྔར་ལྟར་ལ། ཐིག་ལེ་གནས་སོ་སོར་སོན་པས་རིགས་ལྔ་ཡབ་ཡུམ་གྱི་ཐུགས་རྒྱུད་བསྐུལ་ལ་བདེ་སྟོང་གི་ཉམས་རྒྱས། དེ་ཀུན་ཀྱང་ཡབ་ཡུམ་སོ་སོར་སྦྱོར་བས་འཁོར་ལོ་དྲུག་ཏུ་ཐིག་ལེ་དཀར་དམར་གྱི་བདུད་རྩིས་ཁེངས། ཐིག་ལེའི་རྒྱུན་གནས་སོ་སོར་སོན་པས། དགའ་བཞི་ལྷན་སྐྱེས་ཀྱི་ཉམས་སྐྱེས། འཁྲུལ་རྟོག་མི་རུང་བ་བཀག་པའི་བདེ་སྟོང་གི་རང་ངོ་སྐྱོང༌། མཐར་རིག་སྟོང་ནམ་མཁའ་ལྟ་བུའི་དབྱིངས་དང་བསྲེས་ཏེ་མཉམ་པར་བཞག་གོ །ལྔ་པ་གཉིས་ཀའི་ལམ་ཁྱེར་ནི། རྫོགས་པ་ཆེན་པོའི་དེ་ཉིད་ནི༔ ལུས་གནད་བདུན་ལྡན་ཞི་གནས་བསྒོམ༔ འཁྲུལ་འཁོར་སྣ་ཚོགས་ལྷག་མཐོང་བསྒོམ༔ ཞི་ལྷག་ཟུང་འཇུག་སྤྱོད་ལམ་ལ༔ དབྱེར་མེད་ཉིད་དུ་འདྲེས་པར་བྱ༔ ཞེས་པ་སྟེ། སྤྱིར་རྫོགས་པ་ཆེན་པོར་དབང་རབ་སྐལ་བ་ཅན་ལ་དགོངས་པའི་ཆོས་སུ་གསུངས་པས་གདུལ་བྱ་གཅིག་ཆར་བ་རྣམས་དབང་བཞི་པའི་ཡེ་ཤེས་ཁོ་ན་རྩལ་དུ་བཏོན་ནས་ཉམས་ལེན་མཐར་དབྱུང་བ་ཡིན་ཀྱང༌། དེང་སང་དེ་ལྟ་བུ་དཀོན་པ་ལ་དགོངས་ནས་བི་མ་དང་མཁའ་འགྲོའི་སྙིང་ཐིག་གཉིས་ཆར་སྔོན་འགྲོ་ལམ་སྟེགས་ཀྱི་ཚུལ་དུ་བདེ་སྟོང་གི་རྣལ་འབྱོར་དུ་གསུངས་པས་སྐབས་འདིར་ཡང་ལུས་གནད་ཆོས་བདུན་དང་ལྡན་པས་རང་ལུས་རྩ་རླུང་ཐིག་ལེའི་བདེ་དྲོད་མི་རྟོག་པའི་རྣལ་འབྱོར་དང༌། བོགས་འབྱིན་གཞན་ལུས་བཅས་གསུངས་པ་ཉིད་ལ་བརྟེན་ནས་རླུང་སེམས་ཀྱི་འགྱུ་ཆ་བཀག་སྟེ་བདེ་བའི་ངང་བསྐྱངས་པས་ཞི་གནས་དང༌། ཐུན་མཚམས་སུ་རླུང་རིག་བསྲེས་ཏེ་འཁྲུལ་འཁོར་ལ་འབད་པས་ལྷག་མཐོང་གི་དེ་ཉིད་མངོན་དུ་འགྱུར་བར་གསུངས་བ་ལྟར་བསླབ། འཁྲུལ་འཁོར་ནི་ཡན་ལག་ལྔ་སྦྱོང་སོགས་སྤྱི་ལྟར་བྱ་དགོས་སྙམ་མོ། །སྤྱིར་གང་ཟག་ལས་དང་པོ་བ་ཕལ་ཆེར་རྩོལ་མེད་ཉིན་མཚན་འོད་གསལ་གྱི་རྣལ་འབྱོར་ཁོ་ན་ལ་བཟླ་བ་དཀའ་ཞིང༌། རིག་པ་རྐྱང་དེད་ཀྱིས་དང་པོའི་རྣལ་འབྱོར་གྱི་བློར་ཆུད་དཀའ་བར་སྣང་བས་ལམ་འདི་ཀ་ངེས་པར་གལ་ཆེ་བར་གསུངས་སོ། །གསུམ་པ་འབྲས་བུ་མཐར་ཐུག་ཏུ་ལ་བཟླ་བ་ནི། འབྲས་བུ་བླ་ན་མེད་པའི་ས༔ ཡང་དག་པར་ནི་ཐོབ་པར་འགྱུར༔ སྐུ་ལྔའི་འབྲས་བུ་ཚེ་འདིར་ཐོབ༔ འབྲས་བུ་གཞི་ལ་སྨིན་པར་ངེས༔ གདམས་པ་མཐར་ཐུག་ཁོ་ནའོ༔ གསང་སྐོར་ཁྲིད་ཀྱི་དངོས་གཞི་རྫོགས༔ ས་མ་ཡ་རྒྱ་རྒྱ༔ ཞེས་པའི་བར་ཏེ་འབྲས་བུ་མཐར་ཐུག་གི་གྲོལ་ས་བླ་ན་མེད་པ་ཡང༌། རང་རིག་དོན་གྱི་ཡིན་ལུགས་ཀྱི་གནས་སྣང་གཉིས་མངོན་སུམ་དུ་གྱུར་བས་ཀུན་འབྱུང་གི་འཁྲུལ་རྒྱུ་ས་བོན་དང་བཅས་པ་སྟོང་ཞིང་སངས་ནས་སྐུ་དང་ཡེ་ཤེས་ཀྱི་སྣང་བ་ཁྱབ་བརྡལ་དུ་ཤར་བ་ལ་བྱ་སྟེ། ལམ་སྔར་བསྟན་པ་ལ། འབད་པ་རྩལ་དུ་བཏོན་པས་གེགས་དང་གོལ་ཤོར་མེད་པར་མངོན་སུམ་ཡང་དག་པར་ཐོབ་པར་འགྱུར་ཏེ། ཆོས་ཉིད་ཀ་དག་གི་གཤིས་ལུགས་རྣམ་ཀུན་མཆོག་ལྡན་གྱི་སྟོང་ཉིད་ཆོས་སྐུ། འོད་གསལ་རྒྱུན་ཆད་མེད་པའི་སྣང་བ་ལོངས་སྐུ། ཐུགས་རྗེའི་རིག་རྩལ་འཁོར་འདས་ཀུན་ལ་ཁྱབ་པ་སྤྲུལ་སྐུ། དེ་གསུམ་ལྡོག་ཆས་དབྱེ་བ་ཙམ་ལས་དོན་ལ་དབྱེར་མེད་པའི་ངོ་བོ་ཉིད་སྐུ། ལམ་གྱི་ཡོན་ཏན་ཐམས་ཅད་ལྷུན་གྲུབ་ཏུ་རྫོགས་པར་མངའ་བ་མངོན་བྱང་གི་སྐུ་ཞེས་བྱ་སྟེ། འབྲས་བུའི་ཡོན་ཏན་དེ་དག་ཕྱི་དུས་ལ་མ་ལྟོས་པར་སྙིགས་མའི་ཚེ་ཐུང་གཅིག་གི་སྟེང་འདིར་མངོན་དུ་ཐོབ་པ་ལ་བསླུ་བ་མེད་པར་ངེས་པས་ན། ཐེག་པ་གཞན་རྣམས་ལྟར་འབྲས་བུ་དང་གཞི་གཉིས་བཟང་ངན་གྱི་རྣམ་དབྱེ་མེད་པ་ཆོས་ཉིད་ལྷུན་རྫོགས་ཀྱི་གོ་འཕང་མངོན་དུ་གྱུར་པའི་ཚེ། གཞི་འབྲས་གཉིས་མེད་དུ་ཤེས་པར་བྱ་དགོས་པས། དེ་མངོན་བྱེད་ཀྱི་ལམ་གྱི་མཐར་ཐུག་ཀྱང་ཡེ་ཤེས་ལམ་བྱེད་རྗེན་ཅེར་དུ་སྟོན་པས་མཐར་ཐུག་གི་གསང་བ་འདི་ཁོ་ན་ཞེས་གསུངས་སོ། །གསུམ་པ་རྗེས་ཀྱི་ཁྲིད་རིམ་ལ། རྟེན་སྒྲོན་མ་དྲུག་གནས་ཚུལ། བརྟེན་པ་གནད་བཞིའི་དོན་ཉམས་སུ་ལེན་ཚུལ་དང་གཉིས་ལས། དང་པོ་ནི། གསང་སྐོར་ཁྲིད་ཀྱི་རྗེས་འབྲེལ་དུ༔ གནས་ཐབས་འབྲས་བུ་རྣམ་གསུམ་ནི༔ གནས་ནི་སྙིང་གའི་སྒྲོན་མ་རུ༔ ཀུན་གཞི་རང་རིག་ཡེ་ཤེས་ཏེ༔ སྐུ་དང་ཡེ་ཤེས་འོད་ལྔར་བཞུགས༔ དཀར་འཇམ་རྩ་ཡི་སྒྲོན་མ་ལས༔ དབང་པོ་གསལ་བའི་སྒྲོན་མེར་སྣང༔ སྟོང་པའི་དབྱིངས་ནི་རྣམ་པར་དག༔ རིག་པ་ཐིག་ལེ་ལུ་གུ་རྒྱུད༔ གནས་ནི་ལུས་ཀྱི་ནང་ན་གསལ༔ ཤར་ནི་དབང་པོའི་ཕྱི་རུ་སྣང༔ དོན་དུ་ཕྱི་ནང་དབྱེར་མེད་ཤེས༔ ཞེས་པ་སྟེ་གཉིས་སྣང་གི་སྒྲིབ་ཚོགས་ཤིན་ཏུ་ཞི་བའི་དབྱིངས་ནང་གསལ་གསང་བ་ཆེན་པོའི་དེ་ཉིད་ཀ་དག་ཁྲེགས་ཆོད་ཀྱི་ལམ་གྱིས་མངོན་སུམ་རྟོགས་པར་ནུས་ཀྱང་ཡེ་ཤེས་ཀྱི་གདངས་དབང་པོའི་མངོན་སུམ་དུ་ཤར་བ་ལ་བརྟེན་ནས་ས་ལམ་ཐོད་རྒལ་དུ་བགྲོད་པ་རྫོགས་པ་ཆེན་པོ་མན་ངག་སྡེའི་གསང་བ་མཐར་ཐུག་ཏུ་ངེས་པའི་ཕྱིར། ལམ་ཉམས་སུ་ལེན་པ་ལ། སྒྲོན་མ་དྲུག་གི་གནས་ལུགས་ཤེས་དགོས་པས་དེ་ནི་རྡོ་རྗེ་ལུས་ལ་གནས་པ་སྟེ། གཞིའི་ཆོས་ཉིད་སྟོང་པ་ཀུན་ཁྱབ་ཀྱིས་ཡུལ་གྱི་འཁྲུལ་གཞི། འོད་ལྔའི་གཟུགས་སུ་སྣང་བས། ཕྱི་སྣོད་དང༌། གདོས་བཅས་ལུས། ཐུགས་རྗེའི་གདངས་རིག་པ་རིག་ཅིང་ཤེས་པས་སེམས་ཀྱི་འཁྲུལ་གཞི་བྱས་ནས་འཁོར་བར་ཁ་བརྒྱུད་པ་སྟེ་དེ་དག་ལྷན་ཅིག་ཏུ་འདུས་པས་སྲིད་པའི་ཀུན་སྣང་རྒྱ་ཆེན་པོ་འདི་གྲུབ་པའི་ཕྱིར། གང་དུ་སྐྱེས་ཀྱང༌། རླུང་སེམས་ལུས་གསུམ་ལྷན་ཅིག་ཏུ་འབྲེལ་པར་སྣང་ཞིང༌། རགས་པའི་ཕུང་ཁམས་སྐྱེ་མཆེད་ཀྱི་སྦུབས་སུ་དྭངས་མའི་རྩ་རླུང་ཐིག་ལེ། དེ་ལས་ཡེ་ཤེས་ཀྱི་རྒྱུན་བསྲེས་པར་གནས་པའི་ཚུལ་ཤེས་པས་སྒོ་ཡུལ་རླུང་རིག་གི་གནད་ཀྱིས་སྒོ་གསུམ་གཅུན་ནས་གཟིར་བས་འོད་གསལ་ཡེ་ཤེས་ཀྱི་སྣང་བའི་འཕེལ་རྫོགས་ཤིང་ཟད་སར་སྐྱེལ་དགོས་པས་ན། དྲི་ཟ་ཉེར་ལེན་གྱི་རླུང་སེམས་གཉིས་འདུས་ཀྱིས་སྲིད་པ་ཉིད་ཕ་མའི་ཁམས་དཀར་དམར་འདུས་པའི་དབུས་སུ་ཞུགས་ཏེ་ལུས་གྲུབ་པའི་ཚེ། གཡས་རོ་མ་བདེ་བའི་ཡེ་ཤེས། གཡོན་རྐྱང་མ་གསལ་བའི་ཡེ་ཤེས། དབུས་ཨ་ཝ་དྷཱུ་ཏི་མི་རྟོག་པའི་ཡེ་ཤེས་འཆར་བའི་རྟེན་དཀར་དམར་མཐིང་གའི་མདོག་ཅན་མ་དག་པའི་དུས་སྒོ་གསུམ་དང་དུག་གསུམ་དག་པའི་སྐབས་སྐུ་གསུམ་གྱི་རྟེན་ལ། གནས་བཞིར་འཁོར་ལོ་བཞི་སྐུ་བཞི་ཡེ་ཤེས་ལྔ་ཡི་རྟེན་ཅན་དུ་གསུངས། དེར་རྒྱུ་བའི་རླུང་ལ་རྙིང་དབུས་སུ་སྲོག་རླུང༌། ཤར་གྱི་རྩ་འདབ་ཏུ་ཁྱབ་བྱེད། ལྷོར་རྫོགས་བྱེད། ནུབ་ཏུ་མེ་མཉམ། བྱང་དུ་སྐྱེད་བྱེད་ཅེས་དུག་ལྔ་དང་ཡེ་ཤེས་ལྔ་ཡི་རླུང་རྩ་བའི་རླུང་ལྔ། གྱེན་རྒྱུ་སྟོད་ན་གནས་པས་དབུགས་འགྲོ་འོང་གི་རྟེན། ཐུར་སེལ་སྨད་ན་གནས་པས་ཟག་པ་འདོར་སྡོམ། མཉམ་གནས་བར་ན་གནས་པས་ཟས་ཀྱི་དྭངས་སྙིགས་འབྱེད་པའི་ལས་བྱེད་པ་ལ་འགྱུར་བ་ཆེན་པོ། ལེགས་བྱེད་ཚིགས་བཞི་ལ་གནས་པས་ཤ་རུས་ཀྱི་སྟོབས་སྐྱེད་པ་དང༌། འགྲོ་འདུག་བརྐྱང་གསུམ་གྱི་ལས་བྱེད། སྐྱོད་བྱེད་སྨིན་ཕྲག་ན་གནས་པས་ཁྲག་དང་ཆུ་སེར་གྱི་སྟོབས་བསྐྱེད་པ་ལ་ལས་བྱེད་ཀྱི་རླུང་ལྔ་དང༌། ཉིན་ཞག་གཅིག་ལ་རླུང་ཉི་ཁྲི་ཆིག་སྟོང་དྲུག་བརྒྱ་རྒྱུ་བ་ལ་འགྱུ་བ་ཆུང་བར་གསུངས། རྩ་དེ་དག་ན་གནས་པའི་ཁམས་བྱང་ཆུབ་ཀྱི་སེམས་རོ་མ་ནས་ཟླ་བ་ཧྃ་ཐུར་དུ་ལྟེ་བ་ལ་བབ་པས་ལུས་ཟུངས་བདུན་དང༌། ཀླད་པ་རྐང་ཚིལ་རུས་པ་བསྐྱེད། རྐྱང་མ་ལས་ཉི་མ་ཨ་ལས་གྱེན་དུ་འཕེལ་ནས་ཤ་ཁྲག་ཆུ་སེར་པགས་པ་སྐྲ་བ་སྤུ་བསྐྱེད། དབུ་མ་ནས་ཀུན་ཁྱབ་འོད་གསལ་གྱི་ཐིག་ལེ་འཆར་ཞིང་གནས་པར་གསུངས་ཤིང༌། དེ་ལས་ཀྱང་སྙིང་གི་ཤར་དུ་ཁྲག །ལྷོར་ཤ། ནུབ་ཏུ་དྲོད། བྱང་དུ་དབུགས། དབུས་ཀྱི་ལྟེ་བར་ནམ་མཁའ་དྭངས་མ་སྟེ་ལྔ་འདུས་པའི་ཐིག་ལེར་སྡོང་བུ་སྣུམ་ཅན་ལ་མེ་སྦར་བ་ལྟར་གནས་པའི་སྙིང་གི་འོད་གསལ་ལ་སྐུ་དང་ཡེ་ཤེས་འདུ་འབྲལ་མེད་པ་ངོ་བོ་རང་བཞིན་ཐུགས་རྗེ་གསུམ་ལྡན་གྱི་བདག་ཉིད་དུ་བཞུགས་པའི་གནས་ཙིཏྟ་ཤ་ཡི་སྒྲོན་མ་མཆོང་གུར་ཕུབ་པ་ལྟ་བུའི་དབུས་ཀུན་འཁོར་ལས། གཞི་དབྱིངས་ཀ་དག་གི་གནས་ལུགས་སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ། འོད་གསལ་བསམ་གྱིས་མི་ཁྱབ་པའི་ཡེ་ཤེས་གཏིང་གསལ་གྱི་བདག་ཉིད་ལ་གནས་ལུགས་གཞིའི་སྒྲོན་མ། ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། སྙིང་པོ་རིག་པའི་གདངས་མ་འགགས་པར་འཆར་བ་ནི་སྤྲུལ་སྐུ། དེ་གསུམ་དབྱེར་མེད་པ་ངོ་བོ་ཉིད་སྐུ། རྟག་ཏུ་འཕེལ་འགྲིབ་མེད་པ་མི་འགྱུར་རྡོ་རྗེའི་སྐུ་དང༌། ཆོས་དབྱིངས། མེ་ལོང༌། མཉམ་ཉིད། སོར་རྟོག །བྱ་གྲུབ་ཀྱི་ཡེ་ཤེས་རྣམ་པ་ལྔ་རང་བཞིན་ལྷུན་གྱིས་གྲུབ་པ་དང༌། རིག་པ་ལ་དྲི་མ་མེད་པས་འོད་དཀར་པོ། ཡོན་ཏན་རྫོགས་པས་སེར་པོ། རིག་པར་འདུས་པས་དམར་པོ། མ་བཙལ་རྫོགས་པས་ལྗང་གུ། འགྱུར་བ་མེད་པས་མཐིང་ག་སྟེ་ལྔ་བཅས་ལྷུན་གྱིས་རྫོགས་པར་བཞུགས་པའོ། །ཆོས་ཉིད་དོན་གྱི་བཞུགས་ཚུལ་དེ་མངོན་དུ་བྱེད་པ་ལ་ཡེ་ཤེས་ཀྱི་གདངས་སྣང་ཞིང་འཆར་བའི་སྒོ་ནི་དཀར་འཇམ་རྩ་ཡི་སྒྲོན་མ་དར་དཀར་གྱི་སྐུད་པ་ལྟ་བུ་དེས་སྙིང་གི་རྩེ་ནས་སྒལ་ཚིགས་ལ་འཁྲིལ་ཏེ། མགྲིན་པའི་རྩེའུ་ཆུང་གཡས་གཡོན་གྱི་འདབ་ནས་རྣ་བ་གཉིས་ལ་བརྒྱུད་ཀླད་པ་ནས་མིག་གི་ཨ་འབྲས་ཆུའི་སྒྲོན་མ་གཉིས་ལ་ཟུག་པ་འོད་རྩ་དྭངས་མའི་སྒོ་ཡེ་ཤེས་འདུས་པའི་རྒྱང་ཞགས། འབྱུང་བ་འདུས་པའི་རྒྱང་ཞགས་མིག་གི་དབང་རྟེན། དབང་པོ་འདུས་པའི་རྒྱང་ཞགས་དབང་ཤེས་གསུམ་ལྡན་རྟེན་བརྟེན་པ་སྟེ་མིག་རྩའི་རྩ་བ་ལྟེ་བ་ནས་སྙིང་ག་དང་མགྲིན་པ་བརྒྱུད་དུང་ཁང་དུ་གཡས་སུ་འཁྱིལ་བའི་རྩ་འདབ་བཞིར་གྱེས་པའི་དབང་པོ་ཡུལ་ལ་འཆར་བའི་རྩ་འདབ་གཅིག་ལས་རྩེ་མོ་ལྔར་གྱེས་པས་སྒོ་ལྔ་སོ་སོའི་རྟེན་བྱེད་པ་ལས། སྐྱོན་ཡོན་དབང་པོ་དྭངས་བྱེད་ཀྱི་རྩ་དཀར་ནག་ཕྱེད་མ་ཆུ་ཡི་རང་བཞིན་གྱི་མིག་གི་དབང་རྟེན་ཕྱི་ནང་དུ་ཕྲ་བ་བ་མན་གྱི་རྭ་ལྟ་བུའི་ཡལ་ག་གཉིས་མིག་གི་ཨ་འབྲས་ཀྱི་དྭངས་མ་གཉིས་ལ་ཟུག་ནས་འོད་རྩའི་རང་བཞིན་དྭངས་ལ་གསལ་བར་བྱུང༌། རྩ་དེ་སྐུ་གསུམ་བཞུགས་སྟངས་གཟིགས་སྟངས་རླུང་རིག་གི་གནད་ཀྱིས་གཟིར་བས་ཕྱི་ནང་གི་དབྱིངས་སྣང་རྣམ་དག་གི་སྒྲོན་མ་ཀ་དག་གི་གདངས་དང༌། རིག་པའི་འོད་གསལ་ལྷུན་གྲུབ་ཀྱི་གདངས་རྡོ་རྗེ་ལུ་གུ་རྒྱུད་དང༌། ཐིག་ལེ་སྟོང་སྒྲོན་དང་ཤེས་རབ་རང་བྱུང་གི་སྒྲོན་མ་རྣམས་ལུས་ནང་ཙིཏྟ་རིན་པོ་ཆེ་གསང་བའི་སྦུབས་སུ་ད་ལྟ་གདོས་བཅས་ཤ་ཁྲག་གིས་བཅིངས་ཏེ་གནས་པ། མིག་ནས་འོད་སྣང༌། སྙིང་ག་ནས་དུང་ཁང་གི་ཁྲོ་བོ་དབུ་མ་དང་རྩ་བ་རྣམས་ལས་ཐིག་ལེ་ཕྲ་རགས། སྤྱི་བོ་ནས་ཐིག་ལེ་དགུ་བརྩེགས་བཅས་འཆར་བའི་སྒོ་ཡིན་ལ་སྣང་བའི་འཆར་ཚུལ་དང་གནས་ཚུལ་དེ་ལྟར་ཡང་གཟུང་ཡུལ་རགས་པ་ལྟར་ཕྱི་ནང་དུ་དབང་ཡུལ་ཤེས་པ་གཉིས་སུ་མེད་པ་དབྱིངས་རིག་ཟུང་འཇུག་གི་རིག་སྟོང་ཡེ་ཤེས་ཆེན་པོ་གཅིག་གི་འཆར་ཚུལ་ལོ། །དེ་ལྟར་ཙིཏྟ་ཀ་ཏི་ཤེལ་སྦུག །རྒྱང་ཞགས་གསུམ་དང༌། དབྱིངས་རིག་ཐིག་ལེ་གསུམ་ཕྱི་བར་དོ་དུས་ཀྱི་སྒྲོན་མ། མཐར་ཐུག་འབྲས་བུའི་སྒྲོན་མ། གནས་པ་གཞིའི་སྒྲོན་མ་དང་དགུར་དབྱེ་བའང་གསུངས། བསྡུ་ན་བཞིར་འདུ་བའང་གསུངས་སོ། །གཉིས་པ་བརྟེན་པ་གནད་བཞིས་ཉམས་སུ་ལེན་པ་ལ། དངོས་དང༌། རྟག་སྣང་བཞིའི་འཆར་ཚུལ། མཐའ་རྟེན་གྱི་མན་ངག་བསྟན་པའོ། །དང་པོ་གནད་བཞི་དངོས་ནི། ཐབས་ནི་སྐུ་གསུམ་བཞུགས་སྟངས་ཀྱིས༔ དབྱིངས་རིག་ཐིག་ལེ་འདི་ལ་སྦྱངས༔ ཆོས་སྐུའི་བཞུགས་སྟངས་སེང་གེ་ལྟར༔ ཉི་མ་འཆར་ཀར་དབྱིངས་ལ་བསླབ༔ ལོངས་སྐུའི་བཞུགས་སྟངས་གླང་ཆེན་གྱིས༔ ཤར་མ་ཁད་པར་རིམ་པར་བསླབ༔ སྤྲུལ་སྐུའི་བཞུགས་སྟངས་ཙོག་པུ་ཡིས༔ ཤར་བའི་དུས་ན་འོད་ལ་སྦྱངས༔ ཤིན་ཏུ་གོམ་པར་གྱུར་པའམ༔ མ་འདྲེས་སོ་སོར་སྣང་བ་ན༔ ལུས་གནད་བདུན་ལྡན་ཅི་བདེ་བས༔ དབྱིངས་རིག་ཐིག་ལེ་ཉེ་རྫོགས་སུ༔ སྣང་བ་རིག་པ་དབྱེར་མེད་བསྒོམ༔ ཞེས་གསུངས་ཏེ་སྒྲོན་མ་རྣམས་ཀྱི་རྟེན་རྩ་ནི་ལུས་ལ་གནས་ཤིང་ལུས་གནད་དུ་གཅུན་པས་ངག་ཡིད་ཀྱང་གནད་དུ་ཆུན་པའི་ཕྱིར་བཞུགས་སྟངས་བྱ་བར་གཅེས་པས་དེ་ནི། །ལག་བསྣོལ་རྐང་པའི་བར་དུ་བཞག །མིག་གཉིས་གཙུག་ཏོར་ཐད་དུ་བལྟ། །ཆོས་སྐུ་སེངྒེའི་ལྟ་སྟངས་ཀྱི། །སྟོང་ཉིད་དབྱིངས་ལ་རྣམ་པར་སྦྱངས། ཞེས་ཆོས་སྐུ་སེངྒེའི་འདུག་སྟངས། ཡན་ལག་བཞི་ནི་ས་ལ་ཕབ། །ལག་གཉིས་འགྲམ་སྐྱོར་ཨོག་མ་བཏེགས། །མིག་གཉིས་ཟུར་ལ་ཁྲིད་ནས་ཀྱང༌། ལོངས་སྐུ་གླང་པོའི་གཟིགས་སྟངས་ཀྱིས། །རང་རྩལ་ཐིག་ལེ་རྩལ་ལ་སྦྱངས། །ཞེས་ལོངས་སྐུ་གླང་པོ་ཆེའི་ཉལ་སྟངས། ལག་གཉིས་པུས་མོར་འཁྱུད་ནས་ནི། །ཙོག་པུར་པུས་བྲང་ཐད་དུ་བལྟ། །སྤྲུལ་སྐུ་དྲང་སྲོང་གཟིགས་སྟངས་ཀྱིས། །ཟུང་འཇུག་རིག་པའི་རྩལ་ལ་སྦྱང༌། །ཞེས་སྤྲུལ་སྐུ་དྲང་སྲོང་ཙོག་པུའི་འདུག་སྟངས་གསུམ་གང་རུང་གི་ཚུལ་གྱིས་འཆར་བྱེད་སྒོ་ཡི་གནད། ཆོས་སྐུའི་གཟིགས་སྟངས་གཙུག་ཏོར་རྣམ་བར་བལྟ་བ། ལོངས་སྐུའི་གཟིགས་སྟངས་མདའ་མཁན་སྙུག་མ་བསྲང་བ། སྤྲུལ་སྐུའི་གཟིགས་སྟངས་དྲང་སྲོང་བསམ་གཏན་སྒོམ་པ་ལྟ་བུའི་ཚུལ་གྱིས། ཡུལ་གྱི་གནད་ནམ་མཁའ་བསླད་བྱེད་ཀྱི་རྐྱེན་གསུམ་དང་བྲལ་བ་ལ་ཆོས་སྐུའི་རྟེན་ཉི་མ། ལོངས་སྐུའི་ཟླ་བ། སྤྲུལ་སྐུ་རྟེན་ཨཱ་ལོ་ཀེ་སྟེ་གསུམ་དང༌། ཆོས་སྐུའི་བཞུགས་སྟངས་གཟིགས་སྟངས་ཀྱི་ཉི་མ་འཆར་ཀའི་ཟེར་ཐག་གི་དབྱིངས་སྣང་དང༌། ལོངས་སྐུའི་ཉི་མ་ཤར་ལ་ཁད་པ། སྤྲུལ་སྐུའི་ཉི་ཟླའི་འོད་ལ་བལྟ་བས་དབྱིངས་རིག་གི་སྣང་བ་ཚད་ལ་ཕེབས་དགོས་པར་གཞུང་འདི་རུ་གསུངས། རླུང་གནད་ཁ་སྣ་ནས་འབྱུང་འཇུག་ཤིན་ཏུ་དལ་བ་དང་ལས་དང་པོ་པའི་དུས་སུ་བར་རླུང་བཟུང་ན་ལེགས་པར་གསུངས། རིག་པས་མིག་དབྱིངས་རིག་གི་སྣང་བ་ལ་གཏད་པས་གནད་དུ་གཅུན་པ་དང༌། གོམས་པ་བརྟན་པའི་ཚེ་རྣམ་སྣང་ཆོས་བདུན་དང་ལྡན་པས་རྩལ་སྦྱང་པར་གསུངས་ཤིང༌། དེའི་ཚེ་དབྱིངས་གསུམ་བསྲེས་པའི་གདམས་ངག་ལ། ཕྱི་དབྱིངས་སྤྲིན་མེད་ནམ་མཁའི་དབྱིངས། །ནང་དབྱིངས་རང་བཞིན་སྟོང་པའི་བབ། །གསང་དབྱིངས་རིག་པ་ལུ་གུ་རྒྱུད། །ནམ་མཁའ་སུམ་ཕྲུག་གདམས་ངག་སྐབས། །ལུ་གུ་རྒྱུད་ལ་རིག་པ་གཏད། །རིམ་གྱིས་གཡོ་བ་བརྟན་ཅིང་དག །ཅེས་གསུངས་པ་ལྟར་ཕྱི་དབྱིངས་རིག་གི་སྣང་བ། ནང་རང་བྱུང་གི་རིག་པ་གཉིས་དངོས་དང༌། གདངས་ཀྱི་རྩལ་སྣང་ངོ་བོ་བདག་གཅིག་གི་འབྲེལ་བས་ཡུལ་དབང་ཤེས་གསུམ་ཐ་དད་དུ་མི་བལྟ་བར་གཅིག་ཏུ་དྲིལ་ནས་ཉམས་སུ་ལེན་པར་བྱའོ། །གཉིས་པ་སྣང་བཞིའི་འཆར་ཚུལ་ནི། དེ་ལ་ཉམས་རྟགས་འཆར་ཚུལ་རྣམས༔ ཆེས་ཆེར་རིམ་པས་འཕེལ་བ་སྟེ༔ ཡུལ་ཁམས་གང་བར་མངོན་སུམ་སྣང༔ ཕྱག་མཚན་ཡིག་འབྲུ་སྟོང་དུ་འཕེལ༔ སྐུ་ནི་ཡོངས་རྫོགས་ཚད་ལ་ཕེབས༔ རིག་པ་རང་སྣང་ཟད་སར་ཟིན༔ སྤྱི་བོའི་གཙུག་ཏུ་འོད་བདུན་ནི༔ ཐོ་བརྩེགས་ཚུལ་དུ་བྱུང་བ་ནི༔ ཞག་བདུན་འོད་ལུས་འགྲུབ་པའི་རྟགས༔ ཞེས་གསུངས་པ་ལྟར་སྟོང་གསལ་རང་རིག་འདུས་མ་བྱས་པའི་ཡེ་ཤེས་སྐད་ཅིག་རྗེན་པ་ཁྲེགས་ཆོད་ཀྱིས་ངོ་འཕྲོད་ནས་སོར་བཞག་ཏུ་སྐྱོང་བའི་ཆོསྃ་ཉིདྃ་ལ་གདེངས་ཐོབ་པས་གཞི་བཅས་ཏེ་ཡེ་ཤེས་ཀྱི་རིག་གདངས་ནམ་མཁའི་དཀྱིལ་དུ་དབྱིངས་འོད་མཐིང་ག་ཁྱབ་པ་ཆེན་པོ་མེ་ལོང་དྭངས་པ་ལྟ་བུ་ལ་འོད་ལྔའི་དབྱིངས་སྣང་གི་སྟེང་ཐིག་ལེ་ཉིས་སྦྲེལ་ནས་སུམ་སྦྲེལ་ཚུན་ཆད་དང༌། རྡོ་རྗེ་ལུ་གུ་རྒྱུད་གསེར་གྱི་སྐུད་པ་ལྡིང་བ་ལྟ་བུ་འཆར་ཏེ་དངོས་སུ་མིག་གིས་བལྟར་ཡོད་ཅིང༌། རང་སྣང་རང་རིག་གི་ཉམས་སུ་མྱོང་བ་མངོྃན་སུམྃ། སྣང་ཉམྃས་དབྱིངས་རིག་སྨིན་མཚམས་ནས་བྲལ་ཏེ་འོད་ལྔ་རྩིབས་ཤར་དང༌། གྱེན་འགྲེང་དང༌། ཟླུམ་མཁྲིག་དང༌། མཆོད་རྟེན་ལྟ་བུ་དང༌། པདྨ་སྟོང་ལྡན་དང༌། མཁར་ཐབས་དང༌། མདའ་དང་མདུང་རྩེ་ལྟ་བུ་དང༌། དྲྭ་བ་དྲྭ་ཕྱེད་དང༌། མིག་མང་རིས་ལ་སོགས་པ་དང༌། ཡིག་འབྲུ་དང་རིགས་ལྔའི་ཕྱག་མཚན་སོགས་སྣངྃ་བའི་རིགས་ཅིར་ཡང་འཆར་ལ། ཐིག་ལེ་སྟོང་སྒྲོན་ཡང་སྲན་མ་ཙམ་ནས་བསེ་ཕུབ་ཙམ་གྱི་བར་དུ་རྣམ་པར་སྣང་ཞིང་འཕེལ་བ་དང༌། རིག་པ་རྡོ་རྗེ་ལུ་གུ་རྒྱུད་ཆེ་བརྟན་དུ་སོང་བ་དང༌། ཤེས་ཉམས་བདེ་གསལ་མི་རྟོག་པའི་ཏིང་འཛིན་བཅས་གོང་ནས་གོངྃ་འཕེྃལ་དུ་སྣང་བ་དང༌། ཡུལ་སྣང་གི་རིགྃ་པྃ་སྟོང་ཉིད་གང་དང་ཡང་དབྱེར་མི་ཕྱེད་པ། ལྷག་མཐོང་གི་རིག་པ་རྡོ་རྗེ་ལུ་གུ་རྒྱུད། གཞི་འཛིན་པའི་རིག་པ་ངོ་བོ་རང་བཞིན་ཐུགས་རྗེ་གསུམ་ལྡན་གཞི་གནས་ཀྱི་རིག་པ་ཤེས་པ་ཐམས་ཅད་ཀྱི་འཆར་གཞིར་གྱུར་པ། མཚན་ཉིད་འཛིན་པའི་རིག་པ་མ་རིག་པ་རང་ལོག་ནས་རིག་པའི་ཡོན་ཏན་འཕེལ་བའི་ཆ་རྟེན་དུ་གྱུར་པ་ལས་ཡེ་ཤེས་ཀྱི་སྣང་བ་ཐམས་ཅད་འོད་དུ་གསལ་བ། ཡེ་ཤེས་ལྔའི་ཆོས་ཉིད་ལ་བྱན་ཚུན་པས་ཐིག་ལེ་ལྔ་ཚོམས་སུ་ཤར་བའི་དབུས་སྤྲུལ་སྐུའི་ཡེ་ཤེས་ཚད་ལ་ཕེབས་པས་གཙུག་ཏོར་དང་བཅས་པའི་དབུ་ཕྱེད་པ་ནས་སྐུ་རྐྱང་གི་བར་དང༌། ལོངས་སྐུའི་ཡེ་ཤེས་ཚད་ལ་ཕེབས་པས་རིགས་ལྔའི་སངས་རྒྱས་རྐྱང་པ་ནས་ཡབ་ཡུམ་ཞལ་སྦྱོར་རྒྱན་ཆ་ལུགས་ཡོངས་སུ་རྫོགས་པའི་བར། ཆོས་སྐུའི་ཡེ་ཤེས་ཚད་ལ་ཕེབས་པས་གཙོ་འཁོར་གྱི་ཚོམ་བུ་ཐ་དད་པའི་དཀྱིལ་འཁོར་མུ་ཁྱུད་ཀྱི་རྭ་བ་དང་བཅས་པ་མཆོག་ཏུ་གསལ་བས་འདུས་བྱས་ཀྱི་སྣང་བ་རང་སར་འགགས། རི་བྲག་ཟང་ཐལ་དུ་འགྲོ། གཟུང་འཛིན་ཐད་ཀར་ཞིག །ཅིར་སྣང་ཐམས་ཅད་སྐུ་དང་ཡེ་ཤེས་ཀྱི་རྣམ་རོལ་འབའ་ཞིག་ཏུ་སྣང་བའི་དག་པ་རབ་འབྱམས་ཆེན་པོར་ལོངས་སྤྱོད་པས་ཚདྃ་ལ་ཕེབྃས་པའམ་ཚད་དུ་ཕྱིན་པའི་སྣང་བ། དེ་ལྟ་བུའི་གནད་ལ་བརྟེན་ནས་རླུང་མི་གཡོ་བ་ཡེ་ཤེས་སུ་འཕེལ། ཆོས་ཉིད་དུ་དག་པའི་མཐུ་ལས། ཕྱི་གཟུངས་བའི་ཡུལ། ནང་འཛིན་པའི་སེམས། གསང་བ་འོད་གསལ་གྱི་སྣང་བ་ཐམས་ཅད་ཀྱང་ཆོསྃ་ཉིདྃ་བསམ་གྱིས་མི་ཁྱབ་པའི་ནང་དབྱིངས་སུ་ཐིམ་པས། དཔེ་ཤེལ་འོད་ནང་དུ་ནུབ་པར་ལྟར་ནང་གསལ་ཐིམ་ལ་མ་རྨུགས་པའི་ངང་དུ་སྐུ་དང་ཡེ་ཤེས་ཀྱི་འཆར་གཞི་ཐམས་ཅད་གཏིང་གསལ་ཡེ་ཤེས་གཅིག་པའི་སྦུབས་སུ་ལམ་མེར་རྫོགས་པ་ནི་ཆོས་ཅན་གྱི་སྣང་ཆ་ཐམས་ཅད་ཆོས་ཉིད་རིག་པའི་ངང་དུ་ཟདྃ་པྃ་ནས་གཞི་དབྱིངས་འཕོ་མེད་དུ་བཙན་ས་ཟིན་པའི་སྣང་བ་ཞེས་བྱའོ། །གསུམ་པ་མཐའ་རྟེན་གྱི་མན་ངག་ལ་ལྔ། ཅོག་བཞག་བཞི། མི་འགུལ་བ་གསུམ་ལ་གཞི་བཅའ། སྡོད་པ་གསུམ་གྱི་ཚད་བཟུང༌། ཐོབ་པ་གསུམ་གྱི་གཟེར་གདབ། །གདེང་བཞིའི་གྲོལ་ཚད་དུ་བསྟན་པ་ལས། དང་པོ་ནི། སྒྲོན་མ་སྣང་བྱེད་ལས། རི་བོ་ཅོག་བཞག་ལྟ་བའི་ཚད། །རྒྱ་མཚོ་ཅོག་བཞག་སྒོམ་པའི་ཚད། །སྣང་བ་ཅོག་བཞག་སྤྱོད་པའི་ཚད། །རིག་པ་ཅོག་བཞག་འབྲས་བུའི་ཚད། །ཚད་བཞི་ལྡན་པའི་རྣལ་འབྱོར་དེ། །ངེས་པའི་དོན་ལ་བློ་འདྲེས་པའོ། །ཞེས་གསུངས་པའི་དོན་ལུས་བཞུགས་སྟངས་གསུམ་གང་དང་རུང་མ་བྲལ་བས་རྩ་རླུང་ཐད་སོར་གནས་པས་འགྱུ་བྱེད་ཀྱི་རྟོགས་པ་རང་འགགས་ཏེ་རིག་པ་རྗེན་ལ་ཕུད་དེ་དབྱིངས་སྣང་དང་བསྲེས་པས་སེམས་རིག་ཤན་ཕྱེས་ནས་འོད་གསལ་གྱི་དབྱིངས་སུ་མི་གཡོ་བར་བྱེད་པས་ལྟ་བ་རི་བོ་ཅོག་གཞག །མིག་གཟིགས་སྟངས་ཀྱིས་གཅུན་པས་རྒྱ་མཚོར་གཟའ་སྐར་ཤར་བ་བཞིན་ཚོགས་དྲུག་གི་ཡུལ་གྱིས་དབང་ཤེས་མི་གཡོ། རྐྱེན་བཟང་ངན་གྱི་ཕན་གནོད་དང་བྲལ་བ་རྒྱ་མཚོར་གཟའ་སྐར་ཤར་བ་བཞིན་སྒོམ་པ་ཀློང་དུ་གྱུར། སྣང་བ་བཟང་ངན་གང་ཤར་ཡང་རེ་དོགས་ཀྱི་དེར་འཛིན་མེད་པར་བཞག་པས་ཐམས་ཅད་ཆོས་ཉིད་གཅིག་ཏུ་གྲོལ་ཏེ་ལམ་གྱི་གེགས་སུ་མི་ལྡང་ཞིང་བོགས་འབྱིན་དུ་འགྱུར་བས་སྤྱོད་པའི་རྒྱན་དུ་ཁྱེར་ནུས། ནང་གི་རིག་པ་ཕྱི་ཡི་སྣང་བས་བོགས་དབྱུང་སྟེ་ཉམས་ལེན་གདེང་དུ་ཁེལ་ནས། རིག་སྟོང་རྗེན་པའི་ཡེ་ཤེས་ལས་ལམ་ནས་ཡང་མི་འདའ་བས་འབྲས་བུའི་གྲོལ་སར་ཕྱིན་པ་སྟེ། མདོར་ན་རིག་པ་གཅིག་ལ་རྣམ་པའི་དབྱེ་ཚུལ་བཞིར་གསུངས་པས་དོན་དུ་ཀ་དག་གི་དགོངས་པ་དང་ལྷུན་གྲུབ་ཀྱི་སྣང་བཞི་མཐར་ཕྱིན་པའི་ཚད་དུ་བསྟན་པའོ། །གཉིས་པ་མི་འགུལ་བ་གསུམ་ནི། ལུས་བཞུགས་སྟངས་གསུམ་དང༌། རྣམ་སྣང་ཆོས་བདུན་ལས་མ་གཡོས་པས་རྩ་རླུང་བདེ་ལུགས་སུ་རྒྱུ། མིག་གཟིགས་སྟངས་གསུམ་ལས་མི་འགུལ་བས། མངོན་སུམ་གྱི་སྣང་བ་ཡུལ་ལ་གསལ། རླུང་རིག་མི་འགུལ་བ་དལ་བར་བརྟན་པས་ཕྱི་ནང་གསང་བ་གསུམ་གནད་ཀྱི་བྱེད་པ་གཅིག་པས་ཆོས་ཉིད་རང་ངོར་གནས་ཏེ་སྣང་བ་བུ་ལྟ་བུ་རང་རྩལ་དང༌། རིག་པ་མ་ལྟ་བུ་དབྱེར་མེད་དུ་འདྲེས་ནས་གནས་པའི་དགོས་པ་ཡོད་པས། ཉམས་ལེན་གྱི་གཞི་བཅའ་བའི་ཐབས་ཟབ་མོའོ། །གསུམ་པ་སྡོད་པ་གསུམ་ནི། མི་འགུལ་བ་གསུམ་གྱིས་གནད་དུ་གཟིར་བས་ཕྱི་ཡི་སྣང་བས་ནང་རིག་རྩལ་མི་གཡོ་བས་རྐྱེན་ངན་གྲོགས་སུ་འཆར། ནང་སྒྱུ་ལུས་བྱ་བ་དགུ་ཕྲུགས་སུ་བཏང་སྟེ་སྡོད་པས་འཁྲུལ་པའི་ལས་དང་བྱ་བ་བྲལ། གསང་བ་ལས་རླུང་དང་འཁྲུལ་པའི་སེམས་སྡོད་པས་རྣམ་རྟོག་མི་སྐྱེའོ། །འདི་སྐབས་སུ་ཚད་རྨི་ལམ་གྱིས་བཟུང་བ་དང༌། རྟགས་ལུས་ངག་ལ་འཆར་བ་གཉིས་འབྱུང་བའི་དང་པོ་ནི། བརྩོན་འགྲུས་རབ་རྨི་ལམ་གཏན་ནས་འགགས། འབྲིང་རྨི་ལམ་ངོ་ཤེས། ཐ་མས་བཟང་པོ་ཤ་སྟག་རྨིས། གཉིས་པ་ནི། ཆོས་ཉིད་མངོན་སུམ་གྱི་སྐབས་སུ་ལུས་རུས་སྦལ་མཁར་གཞོང་དུ་བཅུག་པ་ལྟར་འདུག་སྟངས་ལས་འབྲལ་མི་ཕོད། ངག་ལྐུགས་པ་ལྟར་བརྗོད་མི་ཤེས། སེམས་མཁའ་ཁྲོ་སྙི་ལ་ཟིན་པ་ལྟར་འཕྲོ་བ་སྣང་ཡང་གཞི་ལས་མ་གཡོས། ཉམས་གོང་འཕེལ་གྱི་དུས་སུ་ལུས་སྐྱེས་བུ་ནད་ཀྱིས་གདུང་བ་ལྟར་རྒྱན་དང་བྱི་དོར་མེད། ངག་སྨྱོན་པ་ལྟར་ཟང་ཐལ་རྗེས་མེད། སེམས་དུག་ནད་ཀྱིས་ཟིན་པ་ལྟར་རྟོག་པའི་འཕྲོ་འདུ་ཆད་པའོ། །རིག་པ་ཚད་ཕེབས་ཀྱི་དུས་སུ། ལུས་གླང་ཆེན་འདམ་དུ་བྱིངས་ཀྱང་རང་སྟོབས་ཀྱིས་འགྲོ་བ་ལྟར་རི་བྲག་ཟང་ཐལ། ངག་གྲུལ་བུམ་གྱི་ཕྲུ་གུ་ལྟར་ཀུན་གྱི་རྣ་བར་སྙན་ཅིང་ཡིད་ལ་འབབ། སེམས་སྙིང་ལ་མདས་ཟིན་པ་ལྟར་དྲན་བསམ་གྱི་འཕྲོ་ཆད་པའོ། །ཆོས་ཉིད་ཟད་པའི་དུས་སུ་ལུས་དུར་ཁྲོད་ཀྱི་མི་རོ་ལྟར་དགག་སྒྲུབ་དང་ཉམས་ང་བྲལ། ངག་བྲག་ཅ་ལྟར་རྗེས་སུ་ཟློ། སེམས་རྩི་དུག་གིས་མྱོས་པའི་སྐྱེས་བུ་ལྟར་དྲན་བསམ་དབྱིངས་སུ་དག་པའོ། །རྟགས་འདི་དག་གི་སོ་མཚམས་མ་ཟིན་ན་བར་ཆད་བདུད། འཕེལ་འགྲིབ་ཉམས། འགྱུར་མེད་གསང་བའི་རྟགས་གསུམ་འབྱུང་བས་ཤན་འབྱེད་པར་དཀའ་བར་གསུངས་ཤིང༌། རྟགས་གསུམ་པོ་གང་ལ་ཡང་རེ་དོགས་ཀྱི་རྩིས་གདབ་མེད་པར་ལམ་དུ་ཁྱེར་པ་ནི་ཤིན་ཏུ་གཅེས་པར་གསུངས་སོ། །བཞི་པ་ཐོབ་པ་གསུམ་ནི། ཕྱི་སྣང་བ་ལ་དབང་ཐོབ་པས་སྣང་རྐྱེན་ཐ་མལ་དུ་མེད་པ་དག་པ་ཆེན་པོའི་ཞིང་དུ་གྲོལ། ནང་ཕུང་པོ་ལ་དབང་ཐོབ་པས་གདོས་བཅས་འོད་ཀྱི་ལུས་སུ་གྲོལ། གསང་བ་དབྱིངས་རིག་ལ་དབང་ཐོབ་པས་འཁྲུལ་རྟོག་གཞི་ལ་དག་པའོ། །ལྔ་པ་གདེང་བཞི་ནི། ཡར་སངས་རྒྱས་ཐོབ་ཏུ་རེ་བ་དང༌། མ་ཐོབ་ཀྱི་དོགས་པ། མར་འཁོར་བར་མི་སྐྱེ་བའི་རེ་བ་དང༌། སྐྱེས་ཀྱིས་དོགས་པ་མེད་པ་ཆོས་ཉིད་རང་བྱུང་གི་དགོངས་པ་ཀློང་དུ་གྱུར་པའོ། །ཉམས་ལེན་གྱི་རྩ་བ་ཁྲེགས་ཐོད་གཉིས་ལས་གཞན་མེད་ཀྱང༌། གྲོལ་ཚད་ཀྱི་དབང་གིས་དབང་པོ་འབྲིང་བར་དོ་རྣམ་པ་བཞི། ཐ་མ་རང་བཞིན་སྤྲུལ་པའི་ཞིང་དུ་དབུགས་དབྱུང་ཚུལ་གསུངས་པ་གཏེར་གཞུང་ཕབ་ཟིན་གྱི་དངོས་བསྟན་དུ་མི་འབྱུང་ཞིང༌། ཤེས་པར་བྱ་འདོད་ན་གཏེར་ཆེན་བླ་མའི་ཟབ་གཏེར་གཞན་ལས་འབྱུང་བ་ལྟར་ཤེས་པར་བྱའོ། །གསུམ་པ་འབྲས་བུ་མཐར་ཐུག་ཏུ་ལ་བཟླ་བ་ནི། འབྲས་བུ་ཚེ་གཅིག་ལུས་འདི་ཐོག༔ གང་དུ་གནས་ཀྱང་ཞིང་ཁམས་སུ༔ འགྱུར་ལས་གཞན་དུ་འཕོ་བ་མེད༔ དེ་ལྟ་བུ་ཡི་རྣལ་འབྱོར་ཅན༔ མན་ངག་ཀུན་གྱི་མཐར་ཐུག་གོ༔ གསང་སྐོར་ཁྲིད་ཀྱི་རྗེས་འབྲེལ་རྫོགས༔ ཞེས་པ་སྟེ་མྱུར་ལམ་བླ་ན་མེད་པ་འདི་ལ་བརྩོན་པ་ཕུལ་དུ་བསྐྱེད་ཅིང་དད་མོས་བློ་རྩེ་གཅིག་པས་ཚེ་འདི་ཡི་འཆིང་ཐག་བཅད་དེ་དབེན་པར་རྩེ་གཅིག་ཏུ་རྩོལ་མེད་ནང་གི་ཉམས་ལེན་ཁོ་ནར་འབད་པ་རྩལ་དུ་བཏོན་ན་མར་མེའི་སྙིང་པོ་ལ་མུན་པ་ཡེ་ནས་མི་གནས་པས་འོད་ཀྱིས་ཀུན་ཏུ་ཁྱབ་ཅིང་གསལ་བ་བཞིན་སྤང་བྱ་སྒྲིབ་གཉིས་མཐའ་དག་གི་འཁྲུལ་པ་དབྱིངས་སུ་དག་ནས། སྣོད་བཅུད་འོད་གསལ་ཡེ་ཤེས་ཀྱི་བཀོད་པ་ཆེན་པོར་འབྱམས་ཀླས་པ་མངོན་དུ་གྱུར་ཏེ་སྐུ་དང་ཡེ་ཤེས་ཀྱི་ཆོ་འཕྲུལ་ཚད་མེད་པས་ས་བཅུའི་བྱང་ཆུབ་སེམས་དཔའ་ནས་རིགས་དྲུག་གི་གདུལ་བྱ་ཕྲ་མོ་ཡན་ཆད་ཀྱི་དོན་མངོན་མཐོ་དང༌། ངེས་ལེགས་དང༌། རྣམ་གྲོལ་གྱི་ལམ་དང་འབྲས་བུའི་ཡོན་ཏན་མཐའ་དག་གསལ་ཞིང་སྣང་བར་མཛད་པས་ན། འཁོར་འདས་ཐམས་ཅད་ཀྱི་སྒྲོན་མེ་གཅིག་པུར་གྱུར་པའི་མཛད་པ་ཕྲིན་ལས་རྟག་པ་དང༌། ཁྱབ་པ་དང༌། ལྷུན་གྱིས་གྲུབ་པའི་ཚུལ་གྱིས་རྩོལ་མེད་དུ་འབྱུང་བ་ནི། མཐར་ཐུག་གི་འབྲས་བུ་ལ་མངོན་སུམ་དུ་ལོངས་སྤྱོད་ནུས་པའོ། །སྤྱིར་གསང་ཆེན་རྡོ་རྗེ་ཐེག་པའི་མྱུར་ལམ་ཐམས་ཅད་ཀྱི་མཐར་ཐུག་ནི། འོད་གསལ་རྫོགས་པ་ཆེན་པོ་ཁོ་ན་ཡིན་པས། དེ་ཉིད་རྡོ་རྗེའི་བླ་མ་པདྨ་སཾ་བྷ་ཝས་མཁའ་འགྲོ་ཡེ་ཤེས་མཚོ་རྒྱལ་གཙོ་བོར་གྱུར་བའི་རྗེ་འབངས་རྣམས་དང༌། ཡེ་ཤེས་རྡོ་རྗེའི་སྐུ་ཅན་བི་མ་ལ་མི་ཏྲས་མངའ་བདག་ཁྲི་སྲོང༌། ཉང་བན་ཏིང་འཛིན་བཟང་པོ་གཙོ་བོར་གྱུར་པའི་ལས་ཅན་རྣམས་དང༌། སྣང་བཞི་མཐར་ཕྱིན་གྱི་ལོ་ཆེན་བཻ་རོ་ཙ་ནས། རྒྱལ་མོ་གཡུ་སྒྲ་སྙིང་པོ། སྤང་མི་ཕམ། མངའ་བདག་རྗེ་འབངས་ཚོགས་ལ་གསུངས་པས་གངས་ཅན་གྱི་ལྗོངས་སུ་ཐེག་མཆོག་རྫོགས་པ་ཆེན་པོའི་ཤིང་རྟ་རྣམ་གསུམ་ཞེས་ཡོངས་སུ་གྲགས་པ་བཞིན་ཟབ་གསང་ཆོས་ཀྱི་ཆུ་ཀླུང་ཁྱབ་པར་བརྡལ་བ་ལས། བཀའ་གཏེར་གྱི་རྒྱུན་ཕལ་ཆེར་མ་ནུབ་པ་བསྟན་པའི་སྲོག་དང་སྙིང་གི་ཁྲག་ལྟ་བུར་ད་ལྟའང་བཞུགས་ཤིང༌། སྔ་འགྱུར་རྙིང་ཕྱོགས་ཙམ་དུ་མ་ཟད། རྟོགས་པ་དོན་བརྒྱུད་ཀྱི་མངའ་བདག་བཀའ་བརྒྱུད། འཇམ་མགོན་ས་སྐྱ་པ། བཀའ་གདམས་གསར་རྙིང་གི་མཁས་གྲུབ་ཆོས་སྤྱན་རྡུལ་དང་བྲལ་ཞིང་གཟུ་བོར་གནས་པ་དག་གིས་གསན་བསམ་བསྒོམ་པས་ཅི་རིགས་སུ་འཕེལ་རྒྱས་སུ་མཛད་པ་སོ་སོའི་རྣམ་ཐར་དུ་གསལ་བ་བཞིན་རྒྱལ་བས་ཆོས་སྒོ་ཐམས་ཅད་ཀྱི་མཐར་ཐུག་གཅིག་པུ་ཡིན་ལ། ཁྱད་པར་སེམས་ཀློང་མན་ངག་གསུམ་ཀའི་གྲུབ་མཐའ་རྐང་ཚུགས་ཟབ་གཏེར་གྱི་སྟོན་པ་གཅིག་གིས་སྤྱན་དྲངས་པ་ནི་ཤིན་ཏུ་དཀོན་པ་ལས་སངས་རྒྱས་གཉིས་པ་རྗེ་འབངས་ལོ་པཎ་དང་བཅས་པས་བོད་ཡུལ་གྱི་གདུལ་བྱ་ནམ་ཡང་ཡལ་བར་མི་འདོར་བའི་ཐུགས་བསྐྱེད་དང་ཕྲིན་ལས་ཀྱི་སྣང་བ་འགྲིབ་པ་མེད་པས་སྤྲུལ་པའི་གཏེར་སྟོན་གྲུབ་ཐོབ་ཡོངས་ཀྱི་འཁོར་ལོས་བསྒྱུར་བ། རྒྱ་ཆེ་བ་མདོ་སྒྱུ་སེམས་གསུམ། ཟབ་པ་ཐུགས་སྒྲུབ་སྐོར་བཞི། ཆོས་ནོར་རྫས་ཀྱི་གཏེར་ཁ་འཛད་པ་མེད་པས་སྙིགས་འགྲོ་སྐྱོབ་པའི་འདྲེན་པ་གུ་རུའི་རྒྱལ་ཚབ་འགྲན་ཟླ་དང་བྲལ་བའི་རིག་འཛིན་ཆེན་པོ་ཨོ་རྒྱན་མཆོག་གྱུར་བདེ་ཆེན་ཞིག་པོ་གླིང་པ་ལ་སྙིང་ཐིག་བརྒྱ་རྩའི་བཀའ་བབས་པའི་ཡང་བཅུད་སྙིང་ཐིག་ཆེན་པོ་སྐོར་བདུན་གྱི་དབང་སྒྲུབ་ཐབས་རྒྱུད། མན་ངག་སྐོར་ཤིན་ཏུ་རྒྱ་ཆེར་བཞུགས་པའི་ཡང་བཅུད། རྣམ་སྣང་ལོ་ཙཱ་ཆེན་པོ་བཻ་རོ་ཙ་ནའི་སྙིང་ཐིག་ཟབ་ཆོས་རྫོགས་པ་ཆེན་པོ་སྡེ་གསུམ་ཞེས་གངས་ཅན་ས་ཡི་བཅུད་དུ་གཏམས་པ་ཉིད། པཎ་ཆེན་ལྔ་རྒྱའི་གཙུག་རྒྱན་འཕོ་ཆེན་ཡེ་ཤེས་རྡོ་རྗེའི་ལང་ཚོ་འཇིགས་བྲལ་གྱི་སློབ་དཔོན་གངས་ཅན་མཁས་གྲུབ་རྒྱ་མཚོའི་དེད་དཔོན་དུ་བྱེད་པ་འཇམ་དབྱངས་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པ་དང་ཡབ་སྲས་ཞལ་འཛོམ་པས་ཟབ་གསང་མཁའ་འགྲོའི་སྙིང་ཁྲག་གི་བྱང་བུ་རྣམས་གཏན་ལ་ཕབ་ཅིང་ཁྲིགས་བསྡེབས་སུ་མཛད་པ་འདི་ནི་སྲིད་ཞིའི་དཔལ་འབྱོར་ཐམས་ཅད་ཀྱིས་བསྒྲུན་དུ་མི་ནུས་པའི་གདམས་ཟབ་གྲོལ་བ་དྲུག་ལྡན་གྱི་གསེར་ཆོས་སུ་ངེས་པས་ན། སྤྱིར་འཁོར་བའི་འཁྲུལ་སྣང༌། སྒོས་སྙིགས་དུས་ཀྱི་རང་མཚངས་མངོན་སུམ་དུ་འགྱུར་བ་ལ་ངེས་འབྱུང་དང༌། སྐྱོ་ཤས་ཀྱི་ཡིད་འཁུལ་བས། འདིར་སྣང་ཚེ་འདིའི་བྱ་སྤྱོད་ལ་ལྟ་ཅི་རྣམ་དཀར་དུ་རློམས་པ་ནི་སྤྲོས་བཅས་ཀྱི་ཙབ་ཙུབ་བློ་སྣ་མང་པོ་ལ་ཡིད་མི་གདུང་བར་སྙིང་པོ་དོན་གྱི་མན་ངག་གསང་སྔགས་སྔ་འགྱུར་བའི་མདོ་སྒྱུ་སེམས་གསུམ་གྱི་མན་ངག་གི་སྲོག་རྩ་གཅིག་ཏུ་དྲིལ་བས་བསྐྱེད་རྫོགས་ཀྱི་རྐང་ཚང་བ། མཐར་ཐུག་གི་སྐྱེལ་སོ་ཐེག་མཆོག་རྫོགས་པ་ཆེན་པོའི་ཡང་བཅུད་གསེར་ཞུན་མ་ལྟ་བུ། བརྒྱུད་ཐག་ཉེ་ཞིང༌། བྱིན་རླབས་ཀྱི་གཟི་བྱིན་མ་ཉམས་པ། ཚིག་ཉུང་དོན་ཟབ་དུས་བབས་ཀྱི་ཟབ་ཆོས་ལ་ངེས་པ་ཕྱིར་མི་ལྡོག་པའི་ཉམས་ལེན་གྱི་སྙིང་པོར་གནང་ན་གལ་ཆེ་བར་སེམས་པས་འཕྲོས་སུ་གདམས་པའོ། །མཐའ་ཀླས་ཆོས་ཀྱི་བདུད་རྩི་ཉིང་ཁུ་ནི། འོད་གསལ་ཡེ་ཤེས་དོན་གྱི་སྙིང་པོ་སྟེ། དེ་ཉིད་ཇི་བཞིན་སྟོན་པའི་རྡོ་རྗེའི་ཚིག །ཟབ་གསང་རྫོགས་པ་ཆེན་པོ་ཉིད་དུ་གྲགས། །རྡོ་རྗེའི་ལམ་འདིས་འཕགས་བོད་འཛིན་མའི་ཁྱོན། །སྐུ་བཞིའི་གྲོང་ཁྱེར་ཆེན་པོའི་དགེ་མཚན་མཐུ། །དུས་ཀྱི་མཐར་ཡང་རྒུད་མེད་ཆེས་གསལ་བའི། །ངོ་མཚར་ཐུབ་བསྟན་ཡངས་པའི་རྒྱན་དུ་མཛེས། །ཁྱད་པར་ཟབ་གསང་མཁའ་འགྲོའི་ཁ་རླངས་ཅན། །ཁུངས་བཙུན་བརྒྱུད་ཐག་ཉེ་བའི་བྱིན་རླབས་གཟི། །མ་ཉམས་སྐལ་བཟང་སྲོག་གི་ཟུངས་སྨིན་པ། །སངས་རྒྱས་ལས་ཀྱང་དཀོན་པའི་ངེས་པ་རྙེད། །མཐར་ཐུག་འོད་གསལ་སྙིང་པོའི་ལྟ་གྲུབ་ཀྱི། ལྟེ་བ་རབ་ཟབ་མདོ་སྒྱུ་སེམས་གསུམ་གྱི། །མན་ངག་རྩིབས་སྟོང་བཀྲ་བའི་འཁོར་ལོའི་མཆོག །གངས་ཅན་བསྟན་འགྲོའི་གླིང་བཞིར་དབང་བསྒྱུར་རྨད། །དུས་དང་ལུང་རྟོགས་རང་གཤིས་དད་བརྩོན་མཐུ། དམན་ཡང་ཁྱབ་བདག་བླ་མའི་མཁྱེན་བརྩེའི་ཉི། །བདག་བློའི་པདྨོར་གཟོད་ནས་སིམ་པའི་མཐུས། །ཟབ་ཆོས་འདི་ལ་སྨྲ་བའི་སྐལ་བཟང་རྙེད། །ཐེག་དགུའི་གསེང་ལམ་ཁྱད་པར་རྫོགས་པ་ཆེའི། །གདམས་པའི་གནད་ཀུན་ས་འོག་གསེར་བཞིན་དུ། །མཆིས་པ་གསལ་བྱེད་ཡི་གེ་འདི་འདྲ་ཡང༌། །དཔྱོད་ལྡན་ཐར་འདོད་ཀུན་དགའི་ཟས་འགྱུར་སྙམ། །མཁས་གྲུབ་རྒྱ་མཚོས་གཏེར་རྒྱ་མ་བཀྲོལ་ཞིང༌། དཀོན་ལ་ཟབ་པའི་ནོར་བུ་མཐོན་ཀ་ཆེ། དེང་དུས་ལེགས་བཤད་རྒྱལ་མཚན་རྩེར་མཆོད་པ། །ལྷ་དང་ཌཱ་ཀིའི་བདག་སྐལ་གཏད་དམ་སྙམ། བསམ་སྦྱོར་ཟླ་བ་ལྟ་བུའི་བསིལ་འོད་ཀྱིས། །གང་ཅན་དུས་ཀྱི་མུན་པ་སླར་བསལ་ནས། །ཡོངས་རྫོགས་ཐུབ་བསྟན་བཤད་དང་སྒྲུབ་པའི་སྲོལ། །འཇམ་མགོན་རྣམ་གསུམ་དུས་བཞིན་འཛིན་གྱུར་ཅིག །རྡོ་རྗེ་གསང་བར་སྤྱོད་དང་སྨྲ་བའི་ལས། །རྣམ་དཀར་རྫོགས་ལྡན་ནོར་བུའི་ཆུ་འཛིན་དེས། །ཕ་མ་མཆེད་ཀྱི་མཚོན་པའི་འབྲེལ་ཐོགས་གཙོས། །མཁའ་ཁྱབ་ཡིད་ཅན་ཀུན་ལ་སྨན་གྱུར་ཅིག །མི་ཤེས་རྨོངས་པས་མཆོག་གསུམ་ཕྲིན་ལས་སྣུབས། །མཐའ་དམག་ཀླ་ཀློའི་སྡེ་ཀུན་བདག་གཅིག་པུས། །བྱང་ཆུབ་ལམ་དུ་འབད་མེད་ཁྲིད་པ་ཡིས། །ལས་མཐའ་ལོག་པའི་ས་བོན་འབྱིན་ནུས་ཤོག །ཆོས་འདིའི་གཉེར་འཛིན་ཌཱ་ཀི་དམ་ཅན་གྱིས། །གསང་སྒྲོགས་འགལ་འཁྲུལ་ཉམས་པ་མི་འབྱུང་ཞིང༌། སྨིན་གྲོལ་དབྱར་གྱི་ཆུ་གཏེར་ལྟར་རྒྱས་པས། །འཇའ་ལུས་རྡོ་རྗེའི་ལམ་སྲོལ་རྒྱས་པར་མཛོད། །ཤིན་ཏུ་རྣམ་དག་ཀུན་བཟང་རྡོ་རྗེའི་དབྱིངས། །མཐོང་ཐོས་དྲན་པའི་ཡིད་ཅན་ཀུན་ཁྲིད་ནས། །འོད་གསལ་མཁའ་ཁྱབ་དགོངས་པས་སྲིད་མཚོ་སྐེམ། །དོན་གཉིས་མངའ་དབང་རྫོགས་པའི་སྟོན་པར་ཤོག །མཁའ་ཁྱབ་ཞིང་དུ་རྒྱལ་ཀུན་དགོངས་བཅུད་ཀྱི། །ཡེ་ཤེས་རྩལ་བཏོན་ཐེག་མཆོག་སེངྒེའི་སྒྲ། །སྒྲོགས་ལ་མི་ངལ་སྤོབས་པའི་གཏེར་བརྒྱད་ཀྱིས། །འཇམ་དཔལ་ཀུན་ཏུ་བཟང་པོའི་སྤྱོད་འཆང་ཤོག །ཚེ་འདིའི་མཐར་ཡང་འདུ་འཛིའི་མི་འཆིང་བ། །མེ་ཏོག་འབྲས་མང་བྲག་རིའི་ཁང་བཟང་ཅན། །དབེན་པར་འཇའ་ལུས་རྡོ་རྗེའི་གསེང་ལམ་བགྲོད། །ནང་གསལ་ཆོས་སྐུའི་རྒྱལ་ཐབས་སྐྱོང་ནུས་ཤོག །སྐྱེ་ཀུན་མཆོྃག་གི་ཡེ་ཤེས་མངོན་གྱུར་གླིངྃ། །མཁྱེནྃ་བརྩེྃའི་གཟུངས་སྤོབས་སྟོབས་དང་དབང་བཅུའི་དཔལ། །ཟག་མེད་ཡོནྃ་ཏནྃ་རྒྱྃ་མཚོྃའི་མཛེས་པའི་མཐུས། །པྃདྨྃ་ཡེྃ་ཤེསྃ་རྡོྃ་རྗེྃའི་དབྱིངས་སིམ་ཤོག །ཆོས་རབ་རྣམ་འབྱེད་ཐོས་བསམ་སྒོམ་པའི་མཐུ། །ཆོས་སྒོ་རབ་འབྱམས་འཛིན་སྤེལ་སྡུད་པའི་ལས། །ཆོས་བཟང་ཕྲིན་ལས་རྒྱལ་བསྟན་རིས་མེད་གསལ། །ཆོས་ཀྱི་རྒྱལ་པོ་འཇམ་མགོན་གསུམ་བཞིན་སྨོན། །འོད་གསལ་ཆེན་པོ་འཕེལ་འགྲིབ་མེད་པའི་དབྱིངས། །འཁྲུལ་པའི་ཟུག་རྔུ་ཀུན་བྲལ་བདེ་བ་ཆེར། །མཁའ་ཁྱབ་འགྲོ་ཀུན་གནས་ལུགས་མངོན་གྱུར་གཞིར། །བཀྲ་ཤིས་སྣང་བ་རྟག་ཁྱབ་ལྷུན་གྲུབ་ཤོག །ཅེས་གདོད་ནས་ཀུན་བཟང་རྡོ་རྗེའི་དགོངས་ཀློང་ལ་མངའ་དབང་འབྱོར་བས་གྲོལ་བ་དྲུག་ལྡན་གྱི་ཕྲིན་ལས་ཆེན་པོའི་སྲས་བཅས་རྒྱལ་བའི་རྣམ་ཐར་ལ་སྤྱོད་པའི་ཀུན་མཁྱེན་བླ་མ་འཇམ་དབྱངས་ཆོས་ཀྱི་བློ་གྲོས་འཇིགས་མེད་ནམ་མཁའི་རྡོ་རྗེ་ཀུན་བཟང་འོད་གསལ་སྙིང་པོའི་ཞལ་སྔ་ནས་སྨིན་གྲོལ་གདམས་པ་ཡོངས་སུ་རྫོགས་པར་བསྩལ་ཅིང་དགོངས་པའི་གཏད་རྒྱ་ཐུན་མིན་དང་བཅས་ཏེ་ཁྲིད་ཡིག་ཞིག་ཞབས་ཏོག་ཏུ་སྤེལ་བར་འོས་པའི་བཀའ་ཡི་གནང་བ་བསྩལ་ཀྱང༌། རང་ཉིད་ལྟ་སྒོམ་གྱི་དྲོད་ཚད་ཆུང་ཞིང་ཉམས་ལེན་ཇི་བཞིན་མ་ནུས་པ་དང༌། དུས་ཀྱི་རྒུད་པས་ཡིད་སྐྱོ་བས་སྙོམས་ལས་སུ་ཐལ་བ་ན། སླར་ཡང་ཟབ་གསང་འདི་ཉིད་ཀྱི་བདག་པོར་གདོད་ནས་གྲུབ་པ་འཇིག་རྟེན་དབང་ཕྱུག་རྒྱལ་དབང་ཀརྨ་པ་ཆེན་པོ་བཅུ་དྲུག་པ་རང་བྱུང་ཁྱབ་བདག་རིག་པའི་རྡོ་རྗེས་དགྱེས་པ་ཆེན་པོས་ངེས་པར་འབྲི་བར་འོས་པའི་བཀའ་ལན་དུ་མར་བསྩལ་བ་དང༌། སྙིགས་དུས་ཀྱི་བསྟན་འགྲོའི་དཔལ་མགོན་མཚུངས་མེད་སྐྱབས་རྗེ་མདོ་ཁམས་པ་སྐལ་བཟང་དོན་བརྒྱུད་ཉི་མ་དང༌། གཏེར་ཆེན་མཆོག་གི་སྤྲུལ་པའི་སྐུ་པདྨ་འགྱུར་མེད་ཐེག་མཆོག་བསྟན་འཛིན་ནས་ཀྱང་ཕྲིན་ལས་ཀྱི་གསོས་སུ་འདི་ལྟར་འབྲི་བར་འོས་ཞེས་བཀས་བསྐུལ་བ་དང༌། མཆོག་གཏེར་རིགས་ཆོས་བརྒྱུད་འཛིན་མཁྱེན་རྟོགས་ཡོན་ཏན་རྨད་བྱུང་མཆེད་གྲོགས་མཆོག་སྤྲུལ་ཀརྨ་ཨོ་རྒྱན་ཐུགས་ཀྱི་བསྟན་འཛིན་ནས་མྱུར་དུ་གྲུབ་པར་དགོས་ཞེས་དམ་པ་དུ་མས་བཀའ་ལུང་ལྡོག་ཏུ་མ་སྤོབས་པས། སྡེ་གསུམ་རྫོགས་པ་ཆེན་པོའི་བཀའ་གཏེར་ཡོངས་རྫོགས་ཐོབ་པའི་སྐལ་པ་མི་དམན་ཞིང་འོད་གསལ་ཡེ་ཤེས་ཀྱི་དགོངས་ཀློང་ཚད་ལ་ཕེབས་པའི་རིགས་ཀྱི་བདག་པོ་ཁྱབ་བདག་ཞེ་ཆེན་པ་གཙོ་བོར་གྱུར་པའི་མཁས་གྲུབ་དུ་མའི་ཞབས་རྡུལ་ཚངས་གནས་སུ་མཆོད་པའི་མདོ་ཁམས་ཀྱི་ཀུ་སཱ་ལི་འཇིགས་མེད་མཁྱེན་བརྩེའི་འོད་ཟེར་འོད་གསལ་ཐུགས་མཆོག་རྡོ་རྗེ་ཐེག་མཆོག་བསྟན་པའི་རྒྱལ་མཚན་གྱིས་སྔ་འགྱུར་རིག་འཛིན་བརྒྱུད་པའི་མན་ངག་སྤྱི་དང་ལམ་འདིའི་བཀའ་བབས་མཁན་ཆེན་རཏྣའི་ཟིན་ཐུན་རྣམས་གུང་སྤྲོས་ཏེ་གཏེར་གཞུང་དངོས་བསྟན་གྱི་དགོངས་པ་ཇི་ལྟར་དཔོག་པ་བཞིན་དཀྱུས་གཅིག་ཏུ་ལྷོ་འབྲུག་གི་སྨན་ལྗོངས་ཉུལ་པའི་སྐབས་ཐུན་མཚམས་ཅི་རིགས་པར་བྲིས་ཏེ་ལྕགས་གླང་སྣྲོན་ཟླའི་ཚེས་སྐྱབས་རྗེ་པདྨ་དགྱེས་པའི་དུས་ཀྱི་མཆོད་པའི་ཉིན་རྫོགས་པར་བྱས་པ་དཀྱུས་གཅིག་ཏུ་སྤེལ་བའི་ཡི་གེ་པ་ནི་སྔགས་བན་འཇིགས་མེད་སྐལ་བཟང་རྡོ་རྗེས་གུས་པ་ལྷུར་ལེན་གྱིས་བགྱིས་པ་འདིས་ཀྱང་ཀུན་བཟང་ཐུགས་ཀྱི་བསྟན་པ་ལ་བྱ་བ་མཆོག་ཏུ་བྱེད་པའི་རྒྱུར་སྨོན་པ་བཞིན་འགྲུབ་པར་གྱུར་ཅིག། །།

[edit]

@#/__dam chos rdzogs pa chen po sde gsum gyi khrid yig 'dus gsal kun bzang dgongs pa'i mdzes rgyan 'od gsal gdod ma'i myur lam zhes bya ba bzhugs so//

@#/__/ka dag dbyings kyi ston mchog kun tu bzang*/_/lhun grub 'od gsal rang gdangs rdo rje sems/_/zung 'jug sgyu 'phrul brgyud gsum bla ma'i gar/_/theg mchog shing rta'i srol 'byed ji snyed rgyal/_/khyad par kun bzang rdo rje'i nang dbyings su/_/srid zhi'i zag pa zad pa'i ye shes gdangs/_/rab 'byams sku dang zhing khams sgyu 'phrul gyi/_/khyab bdag rgyal dbang pad+ma saM b+har gus/_/'pho chen ye shes sku can shrI sing+ha'i/_/thugs bcud rdzogs pa chen po sde gsum gyi/_/zab tig srol 'byed bai ro rje 'bangs grogs/_/lha sras rnam snang ye shes sde kun 'dud/_/rgyud dang sgrub sde'i shing rta chen po'i srol/_/rgyud lung man ngag 'dod dgu'i dbyig rgya mtsho/_/'byed mdzad bka' gter bstan pa'i mnga' bdag che/_/gter chen mchog gyur bde chen gling par bsngags/_/bi ma dngos snang kun gzigs mkhyen brtse'i dbang*/_/rnam snang lo chen yon tan rgya mtsho'i sde/_/dgongs klong tshad phebs chos kyi blo gros gsum/_/dbyer med rang rig gnyug ma'i thig ler mchod/_/zab gsang chos gter 'phags pa'i spyod yul can/_/mkha' 'gro gsang ba'i bka' rgyas gtsigs bsdams srog_/'byed nus min yang chos kyi bdag po'i bka'/_/rjes su gnang bzhin cha shas dgrol la phyogs/_/lha dang srung mas bka' chad mi 'byung zhing*/_/smin grol nyin byed dus kyi mthar gsal te/_/zab rgyas ngo mtshar rnam bkra'i pad+ma'i tshal/_/skal bzang rkang drug kun dga'i dpal smin mdzod/_/de la 'dir dpal o rgyan sangs rgyas gnyis pa'i rgyal tshab 'gro 'dul gter chen chos kyi rgyal po mchog gyur bde chen gling pa la zab gter gyi gsang mdzod bsam gyi mi khyab pa bzhugs pa las rgyal mtshan gyi tog bzhin khyad par du 'phags shing*/_/ngo mtshar rdo rje theg pa'i gseng lam gyi rtse mo 'od gsal rdzogs pa chen po sems klong man ngag gi sde gsum gyi smin grol rtsa ba yan lag mthar thug gi lam yongs su rdzogs pa lo chen bai ro tsa na'i snying thig chen po'i khrid kyi rim pa 'chad pa la lo rgyus brjod pas yid ches bskyed pa dang*/_/nyams su blang bya'i lam dngos bshad pa'o/__/dang po la sngon ji ltar byung ba dang*/_da lta gdul bya'i spyod yul du snang tshul lo/_/dang po ni/_klong gsal nyi ma'i rgyud las/_brgyud pa nye zab khungs btsun zhing*/_kun tu bzang nas rim par bshad/_/ces pa ltar/_dad ldan nges shes bskyed pa'i lo rgyus ni/_gter gzhung lo rgyus snying gi ti ka las/_na mo gu ru:_dam chos rdzogs pa chen po sde drug las:_thog mar lo rgyus kyi sde la'ang sogs nas mkhyen brtse'i dbang pos bris pa dge_/zhes gsungs pa ltar/_sku 'od gsal ye shes kyi phyag rgya 'pho chen rdo rje'i mtshan dper smin/_gsung ye shes kyi cho 'phrul rgyud sde rgya mtsho ston pa dang sdud par mdzad/_thugs rig pa rtsal gyi dbang thob pas snang srid 'dod dgur bsgyur ba'i rdzu 'phrul dang phrin las la mnga' dbang 'byor ba'i rig 'dzin shrI sing+ha/_gu ru rin po che/_slob dpon bai ro tsa na gsum gyi thugs bcud theg mchog rdzogs pa chen po sde gsum gyi man ngag gi snying po mthar thug bstan tshul gsungs pa ltar ro/__/gnyis pa ni/_mdo byang rab tu gsal ba las/_lta ba dgongs klong mngon gyur pa'i:_ye shes sku can dpal seng la:_gdams pa'i mthar thug zhus pa'i tshe:_mi yul kun tu ma grags pa'i:_rig rtsal dbang mchog bdag gis thob:_de nyid bod du spel ba'i snod:_gcig kyang ma mchis gsang ba'i tshe:_mnga' bdag khri srong lde'u btsan dang:_mkhas pa'i dbang po bai ro dang:_kun las khyad 'phags mtsho rgyal te:_las can skal ldan gsum gyi ngor:_shrI sing+ha'i thugs kyi bcud:_bla ma dgongs pa rnam pa bzhi:_sbyin te yang tig dgongs nyams bstan:_gzhan yang rje 'bangs mched bdun la:_dam chos rdzogs chen sde gsum bshad:_ces gsungs pa ltar/_phyi skor sems sde nam mkha'i zhun ma'am nam mkha' klong yangs/_nang skor klong sde nyi ma klong chub/_shin tu gsang skor man ngag 'od zer mtha' yas snying gi byang bu zhes mthar thug che ba brjod pa'i mtshan dang*/_zab pas mdung tshugs ma/_grangs kyi mtshan gsol ma bu bco brgyad du gsungs la/_de las phyi skor nam mkha' klong yangs skor brgyad dang*/_nang skor nyi ma klong chub skor dgu rnams rig 'dzin shrI sing+ha las gu ru rin po che dang*/_slob dpon bo ro tsa na gnyis kas gsan pa gu ru nyid la spel bar bka' ma khrol kyang bai ro la spel bar bkas gnang nas bod du bsgyur ba dang*/_man ngag skor dgu 'od zer mtha' yas gu ru rin po ches spel bar gsungs pas na/_slob dpon rnam pa gnyis rdzogs pa chen po sde gsum gyi chos skor yongs su rdzogs pa rig 'dzin shrI sing+ha las gsan cing thugs kyi bcud du bzung ba nyid/_bod kyi rje 'bangs rnams la bstsal ba'i dus la babs pa na/_rgyud lung man ngag spyi dang bye brag gi dgongs pa gcig tu dril nas/_lo paN rnam pa gnyis ka'i thugs tig 'di smar chos smin grol gyi rgyun bcas chu bo gcig 'dres su song nas dam chos rdzogs pa chen po sde gsum lo chen bai ro tsa na'i snying thig ces mtshan du grags par mngon la ngo mtshar gdams pa khyad par can 'di gu ru rin po ches bstsal ba'i rje 'bangs grogs gsum dang*/_de rjes nam mkha'i snying po/_lha sras mu khri/_ngan lam ban+de ye shes/_gnyags dz+nyA na ku mA ra/_lang gro dkon mchog 'byung gnas/_sna nam rdo rje bdud 'joms rnams la'ang bstsal bar gsungs shing*/_mdor na rmad byung gsang ba chen po 'di nyid phyi ma'i gdul bya la dgongs te rin chen sa yi gter du rgyas btab pa gang sa yi steng du 'don pa'i dus su bab pa na lung bstan gces pa'i lde'u mig las/_de yi dus su lho zla'i phyogs:_rat+na'i ming can stag gam glang:_mchog gi ming gyur skyes bu zhig:_de ni sngon du lha sras 'bring:_da lta ngan lam ye shes mchog:_de lta bu ru skye ba len:_'brug gi lo la gdams pa 'di:_sa yi steng du des 'byin byed:_rje 'bangs yid la nges par gyis:_zhes dang*/_khri srong lde'u btsan dbang po'i ming:_de la rdzogs par 'thob par gyur:_zhes sogs kyi mtshon/_gter gnas/_'don pa po/_gter sgo 'byed tshul/_chos 'khor bskor tshul/_las can chos bdag dus rtags/_bod khams phan byed kyi phrin las rgyas par bstan pa bzhin dpal o rgyan chen po yab sras kyi thugs bskyed dang smon lam dus su bab pa na/_dus gsum kun mkhyen ma hA gu ru'i thugs kyi sras mchog_/mnga' bdag tshangs pa lha yi me tog gi lha sras bar pa sa bcu dbang phyug mu rub btsan po'am lha sras lo tsa ba zhes mkhas grub kyi mdzad pa rmad du byung ba des/_blon po 'u ring gi bu bsad pas rgyal khrims la snyad btags nas khams kyi phyogs su spyugs skabs ye rgyal nam mkha' mdzod du o rgyan sprul pa'i rje 'bangs dang bcas pa spyan drangs nas bka' 'dus chos kyi rgya mtsho'i dkyil 'khor zhal phyes te gu ru'i thugs dam zab pa skor bdun brgyud lung man ngag dang bcas pa'i gsang mdzod gtad cing*/_mdo khams smad kyi sa gzhi thams cad la zhabs kyis bcags shing*/_sgrub gnas mdzad nas snod bcud byin gyis brlabs shing zab gter mang po'i rgyas btab pa'i rten 'byung gis mdo khams smad kyi ljongs su snyigs ma lnga yi mun rum che cher bdo ba'i skabs su yang mkhan slob chos gsum rje 'bangs dang bcas las can smon lam dag pa'i lo paN mkhas grub thams cad kyi skye ba skyes bu dam pa du ma tshogs pas bka' babs bdun gyi shing rta drangs te thub bstan rdzogs ldan dang po'i dga' ston la sbyar ba'i mdzad pa mtha' klas pa'i sgo 'byed pad+ma'i pho nya o rgyan mchog gyur bde chen zhig po gling pa zhes gzhi lam 'bras bu'i rgyud don rgya mtsho dang 'brel ba'i mtshan gyi rnga gsang 'jig rten gsum na snyan par grags pa gang nyid la zab mo'i gter kha sum cu rtsa brgyad thun mong gi gdul bya'i spyod yul du smin pa'i dgu pa/_rdzogs pa chen po sde gsum klong dgu'i man ngag gi bcud dril/_snying thig skor bdun las/_rnam snang lo tsa chen po'i thugs kyi thig le/_mdor na 'chi med ye shes rdo rje'i sku can shrI sing+ha/_gsung rdo rje pad+ma saM b+ha wa/_lo chen bai ro tsa na gsum gyi dgongs bcud gcig dril dbang dang sgrub thabs man ngag nang rgyud yo ga gsum gyi mthar thug chos sde gcig tu dril te gtan la dbab bya'i dgongs pa'i skyel so rdzogs pa chen po sde gsum gyi grub mtha' rkang tshugs su bstan pas shin tu gsang ba'i dam chos rdzogs chen sde gsum zhes yongs su grags pa'i rdo rje'i gseng lam chen po gang*/_rin chen sa yi steng du snang ba'i dus la babs pa na/_yab gcig chos rgyal khri srong gi rnam 'phrul gangs can mkhas grub rgya mtsho'i tshogs rje 'jam dbyangs mkhyen brtse'i dbang po kun dga' bstan pa'i rgyal mtshan dang yab sras gser zhal lhan rgyas pas/_bod chen po'i sa yi thig le/_sde dge chos rgyal chen po'i pho brang gi shar phyogs smad shod dzam nang phu/_gangs ri ljongs tsam na 'gran zla dang bral ba'i sgrub gnas bde chen pad+ma shel phug gi gnam mthong nas las can rdo rje'i 'dus pa nyer lnga tsam gyis mthong bar me 'brug rgyal zla ba'i dkar phyogs kyi dga' ba dang por spyan drangs te mchong shog smug po'i ngos las gtan la phab pa'i yi ge pa 'jigs bral gyi slob dpon chen po mkhyen brtse'i dbang pos mdzad de mkhas grub chen po de gnyis kyi thugs kyi dpal be'u zab gsang snying po'i ti la kar bzhugs pa nyid mdo byang las/_de la dbang bas 'di nyid 'thon pa'i tshe:_lo gcig gam ni yang ni lo gsum khong:_skyes bu dpral bar sme ba dmar po'i mtshan:_byis pa'i tshul can de la mtha' nas ster:_gnas kyi nye 'dabs 'di ru shin tu 'byung:_zhes rdo rje'i lung gi gdams shing gtad pa bzhin nges pa'i don du 'phags pa 'jig rten dbang phyug gi ye shes kyi dbyings dang gnyis su med pa la/_rnam pa tsam du snang bzhi mthar phyin gyi grub brnyes rgyal mo g.yu sgra snying po'i rnam 'phrul du bsngags pa gter chen chos kyi rgyal po'i sku gsung thugs kyi sras kun bzang 'gyur med tshe dbang nor bu zhes mkhas grub phrin las kyi dpal yon phun sum tshogs pas zab gter snying po'i ring lugs kyi bstan pa'i srol zin pa'i bka' drin rmad byung rig pa 'dzin pa mchog la sgrub gnas de nyid kyi gzim chung rdo rje bkod par me stag khrum gyi nya ba'i zla bar 'jam mgon rnam gsum lhan rgyas pas zab chos 'di nyid kyi yi dam khro bo mngon rdzogs rgyal po'i sgo nas snang srid bdud rtsi'i dkyil 'khor du byin gyis brlabs te/_bod khams phan bde'i dga' ston spel ba'i skabs tshig brgyud du bstsal/_rigs kyi sras mchog de'i gter chen bla ma'i rnam 'phrul nges don grub pa'i rdo rje/_des 'jam pa'i dbyangs dngos pad+ma ye shes rdo rje kun bzang 'od gsal snying po rtsal gyis gsan nas/_zab gter bzhes pa'i gnas mchog kham gyi mchims phu gnyis pa dang 'dabs 'brel ba/_bka' gter chos kyi chu klung 'bum phrag 'khyil ba gzhal med khang bkra shis 'chi med grub pa'i dga' tshal zhes rtsa gsum sprin ltar gtibs pa'i dri gtsang khang nas bdag cag las can 'dus pa'i tshogs smin grol chig rdzogs dgyes pas bstsal zhing kho bo la gtad rgya bcas mdzad pa'i skal bzang thob pa'i bka' drin byang chub snying po'i bar du gzhal ba'i gnas su gyur pa'o/__/gnyis pa nyams len gyi lam dngos la/_'jug sgo smin byed kyi dbang*/_zhugs nas sgom gyi lam yongs rdzogs 'chad pa'o/__/dang po ni/_lo rgyus snying gi ti ka las/_spyi la gces pa shrI sing+ha'i dbang bskur gsum:_phyi sems sde'i bla ma sum cu rtsa gcig gi dgongs pa gcig tu dril ba'i dbang bskur ba:_yi dam rdo rje'i dbyings kyi dbang bzhi spyi blugs su bskur ba:_man ngag a yig mda' 'phen te phyi thun mong gi dbang bskur gsum:_nang klong sde las:_rig 'dzin bco lnga'i byin rlabs:_ston pa bcu gnyis brda dbang:_mngon rdzogs rgyal po'i don dbang:_rtsa ba dgu bsgril _'di la rjes 'brel tshe dbang dang*/_mkha' 'gro'i dbang bcas bzhugs/_mchan/_te nang skor gyi dbang gsum bskur:_gsang ba man ngag gi sde las:_rig 'dzin bco lnga'i byin rlabs:_zhi khro'i don dbang:_sgrub dbang brgyad du dril ba'i dbang ste gsang skor gyi dbang gsum bskur:_de rjes sgrub thabs dgu phrugs su gnang:_rdzogs rim sngon 'gro'i brda dbang gsum gyi smin par mdzad:_dngos gzhi khrid gsum gyis grol zhing:_rjes kyi man ngag gsum gyis grol ba mthar phyin par mdzad do:_zhes gsungs pa ltar gter gzhung gi dngos bstan nas/_bka' srung ye shes pa/_dregs pa pho mo/_gter srung rnam gsum gyi srog gtad bcas rjes 'brel du 'byung ba ste/_spyir gsang sngags kyi lam la dbang sngon du ma song na dngos gzhi'i lam nyan sgom lta ci/_rgyud dang man ngag gi dpe tsam lta ba la mi dbang zhing*/_bltas kyang don du mi 'gyur ba dang*/_dbang gis rgyud smin par byas phyin chad zab lam gyi gnad kun nyan sgom snod du rung zhing*/_rim pa gnyis kyi lam la brtson pas drod rtags myur du 'byung ba dang*/_der ma zad slob dpon lta dgongs can dang*/_slob ma snod ldan nang 'dzoms na dbang gi smin grol cig char du 'gyur bar nges pa dang*/_skabs 'di'i rig pa rtsal dbang thob pas nang gi ye shes kyi myong ba rgyud la nges par sad nus pa dang*/_dbang thob dam tshig la gnas pas lam sgom ma nus kyang skye ba brgyud nas grol bar nges pa dang*/_dkyil 'khor tsam mthong bas kyang ngan song gi sgo khegs pa sogs dgos pa dang phan yon che zhing*/_de yang spyir gsang sngags kyi lam thams cad dbang bzhi'i don las mi 'da' bas bskyed rdzogs kyi man ngag kyang dbang las ma 'das shing*/_dbang gi dag bya sgrib pa bzhi gtor zhing*/_dag byed sku bzhi'i nus pa rgyud la sad par byed pa mthar thug gi sku bzhi yang dbang gi grub don las ma 'das la/_des na skabs 'di'i dbang gi rnam grangs bcu gsum du gsungs kyang*/_de thams cad rtsa ba dbang bzhi'i dgongs pa las ma 'das zhing*/_dbang bzhi po'i mthar thug gi dbang bzhi pa ste bzhi pa'i don gyi ye shes rgyud la bskyed pa la bla ma'i byin rlabs 'ba' zhig gces pas na/_skabs 'dir yang spyi la gces pa'i shrI sing+ha'i dbang bskur dang*/_phyi sems sde'i bla ma sum cu rtsa gcig_/nang klong sde'i rig 'dzin bco lnga/_gsang ba rig 'dzin bco lnga rnams kyi sku gsung thugs kyi byin rlabs dang*/_rtog pa chos sku'i 'dra 'bag rdo rje'i do ha glu ru gdams pas ngo sprod pa'ang de yin te/_phyi skor khrid kyi byin rlabs las/_rigs kyi bu dbang bskur ba'i tshul ni 'di lta ste/_bskur bya skur byed bskur thob dang bral ba'o:_zhes gsungs/_dbang bzhi pa de thob pas gnad don che ba'i rgyu mtshan 'di'i lo rgyus su/_khri srong lde'u btsan gyis gsungs pa/_bdag cag rnams la bka' drin che ba ni gu ru rin po che nyid lags shing:_deng sang mon du bzhugs:_mon mo bkra shis khye'u 'dren sogs mon mi 'ga' la:_sku yi bkod pa sgyu 'phrul zhi khro'i lha tshogs su bstan cing sngar ma grags pa'i rdzu 'phrul gyi bkod pa du ma zhig bstan par thos:_lo paN mkhas grub gzhan rnams kyis kyang rdzu 'phrul ya ma zung ci gnang na'ang:_o rgyan chen po la ni 'gran zla ma mchis so:_'di'i don mi yul du rig pa'i rtsal dbang thob pa o rgyan kho na las med par grags:_de rig pa'i rtsal dbang bskur ba'i slob dpon ye shes kyi sku brnyes pa rgya gar 'phags yul du 'gran zla dang bral ba zhig yod tshul sangs rgyas gsang ba'i zhal nas thos:_gzhan nges pa ma rnyed pas deng shar ba'i lo 'dir gu ru nyid kyi rtsa ba'i slob dpon de nyid:_rab gdams ngag thob pa:_'bring rnam thar thos pa:_tha ma'ang mtshan thos pa zhig gi bdag cag rnams la ngal ba med par don du gnyer ba ni gal che'o:_zhes dang*/_mdo byang du/_lta ba dgongs klong mngon gyur pa'i:_ye shes sku can dpal seng la:_gdams pa'i mthar thug zhus pa'i tshe:_mi yul kun tu ma grags pa'i:_rig rtsal dbang mchog bdag gis thob:_ces gsungs pa ltar zag med ye shes kyi sku brnyes pa'i rig 'dzin shrI sing+has 'jigs med rdo rje'i brtul zhugs grub pas rdo rje'i bla ma pad+ma saM b+ha wa la ye shes chen po don gyi dgongs nyams sad pa'i phyir rig pa rtsal gyi dbang bskur zhing smin pa'i tshul mdzad pas srid zhi 'dod dgur bsgyur ba'i rdzu 'phrul dang ye shes la mnga' brnyes pa'i tshul bstan pas/_gu ru rin po che'i 'gro 'dul gyi bla ma sum brgya dang drug cu'i gtso bo rigs kyi bdag po shrI sing+ha yin par gsungs pas shes la/_dbang gi ye shes de'i srog rgyud la 'dzin pa ni dam tshig 'ba' zhig la rag las pas dbang thob nas dam tshig gi rnam grangs shes pas srung bar gces shing*/_de la'ang dbye bsdu'i tshul du ma gsungs kyang*/_cung zad nyams chag byung na'ang bshags pas sor chud pa shin tu gal che ba 'phros su gdams pa'o/__/gnyis pa nyams su blang bya'i lam dngos bshad pa la/_mdo byang las/_'di brgyad kun la rtsa ba'i chos bzhi ni:_phyi skor sems sde nam mkha' klong yangs dang:_nang skor klong sde nyi ma klong chub dang:_gsang skor man ngag 'od zer mtha' yas te:_phyi skor nam mkha' klong yangs skor brgyad dang:_nang skor nyi ma klong chub skor dgu rnams:_slob dpon bai ro tsa nas bod du bsgyur:_'di ni shrI sing+ha'i thugs bcud de:_zab la 'dril zhing gzhan la ma bstan pa:_slob dpon bdag la spel bar bka' gnang med:_bai ro la ni gnang ba bstsal 'dug pas:_ma bur bsdebs te 'di ru bzhag pa'o:_man ngag skor dgu 'od zer mtha' yas ni:_pad+ma bdag gi dpal seng nyid la zhus:_zab pa'i mthar thug 'di ru gdams pa ni:_man ngag nyi shu rtsa drug bstan pa'o:_zhes gsungs pa ltar phyi skor sems sde/_nang skor klong sde/_gsang skor man ngag sde'i zab tig dbang dang*/_bskyed rdzogs kyi gdams pa rgya cher bzhugs pa'i dang po phyi skor sems sde nam mkha' klong yangs kyi man ngag la bskyed rdzogs kyi don gnyis las/_dang po bskyed rim la'ang*/_bla ma'i byin rlabs lam du bya ba rig 'dzin gyi srog sgrub dang*/_de nyid yi dam gnas bsgyur gyi bsgrub pa'o/__/dang po la gnyis/_kun la gces pa sngon 'gro'i nyams len dang*/_dngos gzhi rig 'dzin bla ma'i byin rlabs lam byed kyi bskyed rim bsgom tshul lo/__/dang po la'ang*/_thun mong dang*/_khyad par gyi sngon 'gro'o/__/dang po ni/_de yang ngo bo mi khom pa brgyad kyi ldog cha dal ba brgyad dang*/_de'i khyad par gyi chos rang gzhan gyi 'byor ba bcu dang ldan pa ste/_dal 'byor gyi chos bco brgyad dang ldan pa'i mi lus tsam po ba dang*/_khyad par can/_mi lus rin po che rnams kyi rgyu dang*/_dpe dang*/_grangs sogs gang gi sgo nas bsam kyang shin tu rnyed dka' zhing phan 'dogs bsam gyi mi khyab pa dang ldan pa 'di lta bu rnyed du zin yang*/_nam mkha' rin po che'i mdo las/_bcom ldan 'das dal 'byor ji ltar blta bar bya/_bka' bstsal pa/_sems rnam par rtog pas dbyen bcos te g.yeng ba ni brel ba zhes bya'o/__/sems rnam par rtog pa zhi nas rang bzhin du gnas pa ni dal ba zhes bya'o/_/'byor ba ni sems kyi rang bzhin shes pa/_blo yang dag pa'i don la 'byor bas na 'byor ba zhes bya'o/__/zhes gsungs pa ltar/_mi yi lus su gyur na yang sems rnam rtog gi dbyen bcos pa'i tshe 'di'i snang ba 'ba' zhig la spyod de 'jig rten phyi ma mi shes pa'i mi khom pa'i gnas las ma thar na dal ba don ldan snying por len pa'i chos byar mi btub pas/_sems rnal du gnas te sems kyi rang bzhin shes pas blo yang dag pa'i don la 'byor ba'i phyir myur du theg mchog rdzogs pa chen po'i lam gyi rnal 'byor mthar son par ma byas na/_phyi snod kyi 'jig rten sra zhing 'thas pa ltar snang ba rnams kyang mthar me bdun chus gcig gis 'jig pa'i tshe thal ba tsam yang lus par mi 'gyur/_nang bcud kyi sems thams cad kyang skyes nas tshe thar du song ba gcig kyang med pas rang nyid kyang nges par 'chi ba ma zad/_do nub tsam yang mi 'chi ba'i gdeng ni med/_'chi ba'i tshe chos rnam par dag pa kho na ma gtogs gzhan ci yang mi phan/_der ma zad da lta'i sems kyi kun rtog re la'ang 'khrul pa'i 'jig rten grangs med pa bkod kyang skad cig re res kyang skye 'gags su gyur ba'i nang gi mi rtag mngon sum tshad ma'i ma tshang shes pas gzung 'dzin 'khrul pa'i rnam rtog rgyun mthud la ngan shor du mi gtong bar rig pa gnyug ma'i gtan srid 'dzin ci nus kyi rnal 'byor la 'bad pa rtsal du bton pa gces pa las/_shi nas cang med du mi 'gro bar las 'ba' zhig gi rjes su 'brang dgos pa rten 'byung bslu med kyi don shes pas/_rten 'byung gi mthar thug stong nyid/_stong nyid kyi gshis lugs ye shes rang rig la thug pas chos phung brgyad khri'i man ngag gi thus ka 'od gsal rig pa'i ye shes kyi yin lugs mngon sum rtogs na kun rdzob rgyu rkyen gyi byas chos 'khrul pa thams cad byar med kyi klong du nges par dag pa'i thabs kho na la ma brtson na/_sdig pa'i las kyi ngan song gsum du skyes na/_sdug bsngal bzod pa'i glags med/_zag bcas kyi dge bas mtho ris gsum du skyes kyang*/_'gyur ba'i sdug bsngal dang*/_sdug bsngal gyi sdug bsngal dang*/_khyab pa 'du byed kyi sdug bsngal kho na las ma 'das pas/_da res 'khor ba sdug bsngal gyi rgya mtsho chen po 'di las ci nas kyang thar pa zhig bya dgos/_'khor ba'i 'khrul snang de'i rtsa ba yang*/_phyogs kyi glang pos/_rnam rtog ma rig chen po ste/_/'khor ba'i rgya mtshor ltung byed yin/_/zhes gsungs pa ltar/_'khrul ba'i rnam rtog rang ga ma'i mtshang brtol nas/_'khrul med ye shes rjen pa'i yin lugs mngon gyur gyi ting 'dzin la ngal 'tsho ba'i thabs kyi gseng lam zla med pa 'od gsal theg pa'i rtse rgyal gyi lam ma nor ba ston pa'i ched du/_theg pa mchog gi dgongs spyod la mnga' brnyes pa dge ba'i bshes gnyen mtshan nyid dang ldan pa mnyes pa gsum gyis bsten nas/_'od gsal rdo rje snying po'i lta sgom spyod 'bras kyi gnas ji skad bstan pa rnams byis pa dang sdig grogs rtog ge'i blo ngan gyi rjes su 'brang ba'i gzhan dbang du ma song bar lag len theb nges pas skye 'chi'i 'khrul snang dag pa'i zab lam la gdeng du khel ba zhig cis kyang dgos pas nyin zhag re re'i khongs su yang ci nus su chos kyi don rgyud la sbyor bar bya/_de ltar nus pa bla ma dang dkon mchog rin po che mkhyen snyam pa'i dad pa dang*/_nges 'byung gi rgyud sbyangs zhing blo 'khul ba'i thabs gal che bas 'dir mdor bsdus su bstan pa bzhin khrid gzhung gzhan dag las rgyas par 'byung ba ltar dmigs rkang thun du bcad cing*/_myong ba thon thon gyis sems rgyud las su rung ba ma byas na dngos gzhi'i lam gyi nyams rtogs yang dag pa rgyud la mi skye/_skyes kyang mthar phyin pa mi 'byung bas thog ma nyid nas dngos gzhi la 'jug snga mi bya bar sngon 'gro'i rnal 'byor la 'bad pa rtsal 'don shin tu'ang gal che'o/__/gnyis pa khyad par gyi sngon 'gro la drug las/_thog mar skyabs 'gro ni/_don dam rang bzhin yongs shes kyi skyabs 'gro rang rig bde gshegs snying po mchog gsum gzhir gnas kyi ye shes gsum rdzogs su bzhugs pa so so rang rig pas mngon du byed pa dang*/_kun rdzob kyi skyabs 'gro'i dmigs rnam rig 'dzin chen po shrI sing+ha la mchog gsum rtsa gsum sku gsum gyi lha tshogs kyis bskor ba mdun mkhar gsal ba'i spyan sngar rang gzhan mkha' khyab yid can 'khod pas byang chub snying po'i bar skyabs su 'gro bar bsam pas/_kun gzhi'i dag pa'i sangs rgyas dang:_sogs nas grangs bsags/__gnyis pa sems bskyed ni/_bdag gzhan gnyis med khyab gdal ye shes kyi rang gdangs rang byung thugs rje'i 'jug pa rgyun mi chad du brdal ba don dam dang*/_mkha' mnyam gyi yid can 'od gsal chos nyid kyi 'khor lo las gzhan du ma gyur kyang gnas lugs ma rtogs 'khrul pa'i gzhan dbang can kun gdod ma'i gzhi thog tu bsgral ba'i blos snying rje drag tu bskyed pa kun rdzob kyi sems bskyed pa zung 'jug gis/_e ma ho bde gshegs snying po las:_sogs brjod/_gsum pa yan lag bdun pa ni/_don dam bsags sbyangs kyi spros pa thams cad ka nas dag pa'i chos nyid kyi gshis lugs la 'khor gsum gyi mtshan 'dzin can la mi ltos par tshogs chen ye rdzogs su bzhugs pa'i don la gsal 'debs pas/_kun rdzob sgyu ma lta bu'i ye shes kyi rol mo phyag 'tshal mchod 'bul sogs yan lag bdun gyi ting 'dzin cir yang sprul pas tshogs bsags kyi dmigs pa dang ma bral bas/_snang ba rnam dag bde gshegs la:_sogs brjod/_bzhi pa sgrib sbyong rdor sems ni/_kun rtog 'khrul pa'i las nyon thams cad yul dbang shes gsum 'dus te reg pas byed pa ltar snang yang don bcings grol med pa'i dbyings la phan gnod kyi yul rang mtshan du ma grub pa ka nas dag pa'i dbyings su mnyam par bzhag pas/_rig stong rdo rje sems dpa'i ye shes gcig tu rtogs pa don gyi bsags sbyangs dang*/_rnam pa tsam du rdor sems bsgom bzlas 'od zer spro bsdu don gnyis sgrub pa'i dmigs pa spyi ltar bya bas/_yul du 'khrul pa'i tha mal lus:_sogs nas mthar snying po yig drug dang yig brgya'ang bzlas pas legs che shing mthol bshags dang*/_dmigs med kyi lta bas rgyas 'debs bya/_lnga pa tshogs bsags ni/_sku gsum zhing khams rgya mtsho'i bkod pa ngo bo rang bzhin thugs rje'i ye shes gsum ldan gyi gnas lugs su rtogs pa don dam gyi tshogs bsags dang*/_rnam pa zag med ye shes kyi bkod pa'i cho 'phrul sgron ma bsam gyi mi khyab pa'i sprin phung mkha' khyab kyi tshogs zhing la 'bul ba'i blos maN+Dal tshom bu'i brgyan pa 'bul te/_ngo bo'i zhing khams rgya cher bar:_sogs grangs bsags/__drug pa bla ma'i byin rlabs ni/_don dam chos nyid don gyi bla ma'i rang zhal so so rang rig pa'i ye shes mchog gi rang byung rig pa'i gshis lugs mngon sum mjal ba'i mos gus kyis 'khrul rtog gzhi grol dag pa'i byin rlabs stsol bar gsol ba gdab pa dang*/_kun rdzob 'od gsal ye shes kyi sku brnyes pa dpal he ru ka 'jigs pa med pa shrI sing+ha dkar smug rnal 'byor spyod pa'i cha lugs can phyag g.yas sdig mdzub nam mkhar gtod pa/_g.yon b+hany+dza bdud rtsis bcud bkang dkur bsten pa/_zhabs sems dpa'i skyil krung gis pad+ma nyi zla'i steng du bzhugs pa'i 'khor du sems sde'i rig 'dzin sum cu rtsa gcig gis mtshon pa'i brgyud gsum rig 'dzin bla mas bskor ba gsal te mos gus kyi 'jug pa rtse gcig pas rgyas par spro na byang gter bla ma sku gsum dang*/_brgyud 'debs rgyas pa sngon du 'gro bas/_kun gzhi dag pa'i bla ma la:_sogs gsol 'debs grangs bzung*/_thun mthar dbang gzhi len pa'i dmigs gnad spyi ltar bya'o/__/skabs 'dir spyi la gces pa'i rig 'dzin bla ma'i zab dbang gi nang gses thun mong gi byin rlabs kyi phrin las nyid bla ma'i rnal 'byor gyi sgrub pa'i tshul du sbyar ba 'gal ba med snyam gyi sngon 'gro'i ngag 'don khrigs bsdebs su gsal ba ltar ro/__/spyir dngos gzhi nyams rtogs skye ba la sngon 'gro gnad du smin pa gces pas nyams len smin khrid du byed na phyi nang gsang ba'i sngon 'gro 'di dag 'bum phrag re re ma mtha' byas pa bsags dgos pas na/_de dag gi skabs su so so'i go don dang*/_rnam bzhag_/bslab bya sogs shes na ches legs kyang chos skor 'di shin tu rgya che bas yig tshogs ches thal ba la 'jigs te ma spros pas/_slob dpon gyis bshad nus dgos la/_ngag 'don rigs kyang zab tig snying po rdo rje'i tshig rkang tsam las ma mchis pas dang po'i las can gyi blos ma chud na dmigs pa gsal 'debs lta bur cung zad rgyas na legs snyam gyis zur bkod du bris pa ltar ro/__/gnyis pa rig 'dzin bla ma'i byin rlabs lam byed kyi phyi skor bla ma'i bsnyen sgrub ji ltar bya ba'i tshul la dngos dang zhar byung ngo*/_/dang po ni/_sku bskyed rim phyag rgya/_gsung bzlas pa'i sngags/_thugs 'od gsal de kho na nyid kyi ting nge 'dzin no/__/dang po la/_sngon 'gro dang*/_dngos gzhi'o/__/dang po ni/_yid dang mthun zhing rnam g.yeng med pa'i gnas khang byi dor bya/_sngon 'gro'i skabs mtshams ma bsdams na skabs 'dir phyi nang gi rgyu 'grul bsdams/_spro na sgrub pa'i rten rig 'dzin bla ma'i gtso 'khor gyi sku 'bag bris 'bur gang rung gi mdun du sman raka gtor gsum/_nyer spyod bcas bshams/_bsnyen sgrub kyi thog mtha' dang yar mar gyis tshes bcu la tshogs mchod rgyas pa dang*/_bka' gter srung ma'i gtor 'bul/_rgyal chen bzhi dang*/_dkar bgegs kyi gtor ma bcas 'du byas la/_yar ngo'i tshes bcu sogs gza' skar legs pa nas brtsams te/_bsnyen pa'i dbu brtsams pa'i skabs gnas gzhi'i bdag po la dkar gtor dang gser skyems/_bgegs gtor bsngos la gnas khang gu gul gyi bdug_/yungs kar brab/_sgo drung gi tho mdun rgyal chen gtor ma bshams la mchod de phrin las bcol zhing brtan bzhugs bya/_srung 'khor gyi rgyas btab nas/_dngos gzhi'i sgom bzlas la 'jug pa 'og ma rnams la'ang rigs 'gre shes par bya'o/__/gnyis pa dngos gzhi'i nyams len la/_sku bskyed rim phyag rgya'i ting 'dzin ni/_rgyu ting nge 'dzin gsum gyi khog phub pa/_'bras bu rten dang brten pa'i dkyil 'khor pa'i rnam bzhag spyi ltar nges pas gsal btab ste snod bcud ye shes kyi 'khor lo rdzogs pa'i gzhal med khang rta bab snam bzhi ma spyi ltar gyi dbus su in+d+ra ni la'i gru chad steng sna tshogs pad+ma 'dab brgyad kyi ze'u dmar ser mtho ba'i steng khams gsum gyi 'dod chags dag pa'i brdar pad+ma dmar po sum brtsegs kyi steng*/_zhe sdang dag pa'i nyi dkyil gti mug dag pa'i zla dkyil steng du rang rig byang chub kyi sems bde gshegs snying po dang ngo bo dbyer med pa'i bdag nyid la theg mchog don gyi dgongs pa ston pa'i bla ma nyid rnam pa'i snang cha phyogs dus rgyal ba kun gyi sku gsung thugs kyi gsang ba gcig tu 'dus pa'i ye shes rdo rje'i sku can/_rigs rnams kun gyi khyab bdag rtsa gsum rgya mtsho'i spyi dpal dpal mgon rig 'dzin bla ma 'jigs med he ru ka shrI sing+ha 'pho med 'ja' lus dwangs ma'i sku can sku'i g.yon phyogs rang 'od sbas pa'i yum DA ki'i chas can dkar mo yab la bdud rtsi stob pa can du gsal te/_mdo byang las/_slob dpon rnams kyi bsgom tshul khyad par yang:_rim pa'i tshul du bsgrigs par ma byas te:_rtsa ba'i bla ma dbus su sgom pa yin:_zhes gsungs pa ltar/_mngon du bya ba'i lam mthar thug nang gi ye shes chen po ste/_de rtogs pa mos gus 'ba' zhig la rag las shing*/_mos gus kyang rang gi rtsa ba'i bla ma nyid sangs rgyas las kyang lhag pa'i bka' drin dran dgos pa dang*/_chos 'di'i ston pa gtso bo shrI sing+ha yin pas rnam pa de ltar sgom pas byin rlabs tshan che zhing*/_ngo bo rtsa ba'i bla ma dang dbyer med du bsgom pas thugs rje myur ba'i dgos pa khyad par can yod la/_gtso bo'i sku stong chen sgrib g.yogs dang bral ba'i dbus su rtsa dbu ma khyad par bzhi ldan/_g.yas ro ma dmar mo/_g.yon rkyang ma dkar mo 'khor lo bzhir gcig tu 'dres pa/_dbu ma'i yar sner rdo rjer phyed pas mtshan pa/_mar sner gsang gnas su zug cing ro rkyang yang der 'du ba can dwangs gsal 'od kyi rang bzhin can du sgom pa'i yar sner rdo rje'i lte bar rdor sems dkar gsal longs sku'i chas can rdor dril bsnams pa/_zhabs rdo rje'i skyil krung can dang spyi bo bde chen 'khor lo'i rnam shes 'jug yul gyi rtsa 'dab bzhi'i rtsa sne zlum po bam gyi dbyibs can gyi shar du rgyal po dza 'am chos rgyal lung bstan rdo rje rgyal po'i chas can g.yas chos 'chad/_g.yon glegs bam/_lhor lha dbang brgya byin dkar po lha yi chas/_g.yas pha lam las grub pa'i rdo rje dkar po/_g.yon sdig mdzub/_nub tu gnod sbyin skar mda' gdong gser mdog rin chen rgyan dang dar sham sha rgyas gsus khyim che ba g.yas skyabs sbyin/_g.yon nor bu/_byang du srin po blo gros thabs ldan dmar smug zhi ma khro ral pa dmar ser zhol po/_stag sham dar 'phyang can phyag gnyis baiDUr+Ya'i glegs bam 'dzin pa/_bzhi ka zhabs sems skyil/_mgrin pa longs spyod 'khor lo'i tshogs brgyad rnam dag gi rtsa 'dab brgyad kyi shar du dga' rab rdo rje dkar po dbu la gtsug tor chos gos rnam gsum/_phyag gnyis chos 'khor phyag rgya/_zhabs rdor skyil/_lhor pad 'byung theg dgu'i chas spyi ltar rdo rje thod pa tshe bum kha T+wA~M bcas/_nub tu slob dpon 'jam dpal bshes gnyen paN zhwa chos gos phyag gnyis pad+ma la gnas pa'i ral pod/_zhabs phyed skyil/_byang du bi ma mi tra dkar ljang paN zhwa dmar po rtse smyug_/sha 'gag sngon po chos gos rnam gsum g.yas chos 'chad/_g.yon mnyam bzhag gi bdud rtsis bkang ba'i thod pa/_zhabs rdor skyil/_shar lhor rgyal po da na ha te lo rgyal po'i chas phyag mnyam bzhag_/lho nub tu rgyal sras rA dza hasti rgyal sras gzhon nu'i tshul/_dar gos rin chen rgyan ldan/_phyag gnyis thal sbyar/_nub byang du sras mo go ma sA ra/_btsun ma'i chas/_phyag gnyis khrus bum ste spyi blugs/_byang shar du klu rgyal byang sems dkar po sbrul gyi gdeng ka bdun ldan/_'phang du sbrul mjug_/dar dang rin po che'i rgyan ldan/_zhabs rol stabs/_phyag gnyis shel gyi mchod sdong*/_thugs kar chos kyi 'khor lo'i yul brgyad dag pa'i rtsa 'dab brgyad kyi shar du rgyal po ku ku rA dza rgyal po'i chas/_phyag gnyis rin po che'i bgrang phreng*/_lhor klu sgrub dbu la gtsug tor cung zad 'bur ba/_chos gos dmar ser/_thang sham sngon po/_phyag gnyis chos 'chad mnyam bzhag_/nub tu ku ku sid+d+hi phyi ma gcer bu ang rag sgom thag can/_phyag mnyam bzhag dbu skra co reg _thor cog zer ba'ang snang*/_mchan/_byang du gnod sbyin bu mo byang chub ma rin po che'i gtsug phud can dar dang rin po che'i rgyan ldan sku mdog sngo sangs/_phyag gnyis rin po che'i sgrom bu/_shar lhor 'jam dpal bshes gnyen phyi ma rgya gar paN chen chas paN zhwa/_phyag gnyis glegs bam/_lho nub tu mkha' 'gro ma bud+d+ha ma ti dkar mo dar dang rin chen rgyan ldan mdzes shing sgeg pa phyag gnyis gar rgya/_nub byang du mkhas pa ar+Ya pA lo dge slong chas paN zhwa leb chags phyag gnyis mnyam bzhag_/byang shar du o rgyan mkhan po d+hA hi ta dge slong chas phyag gnyis sa gnon/_dbu zhwa med pa/_lte ba sprul pa'i 'khor lo'i 'dzin byed dag pa'i rtsa 'dab brgyad la shar du drang srong rgyal po bi shwa ti/_sku mdog sngo sangs/_dbu skra nag po thor tshugs bcings pa/_ras zan dkar po can/_phyag g.yas shing 'bras dang g.yon bcud len ril bu bkang ba'i b+han+d+ha/_lhor sras mo go ma de wi mkha' 'gro'i cha lugs thor tshugs bcings pa/_dar sham phyag gnyis rdor dril/_nub tu mkhan po rab snang mdzad/_dge slong bgres tshul ag tshom can phyag gnyis mnyam bzhag gi nor bu/_byang du rgyal po de wa rA dza rgyal po'i chas g.yas skyabs sbyin/_g.yon gser 'khor/_shar lhor rgyal po d+harma rA dza rgyal po'i chas phyag gnyis pi wang brdung ba/_lho nub sangs rgyas sbas pa rnal 'byor pa'i cha lugs gcer bu sgom thag rnam snang chos bdun ldan pas rlung bzung ba/_nub byang du bai ro tsa na paN zhwa rna ring bod kyi dge slong chas phyag gnyis mnyam bzhag_/byang shar du ye shes mtsho rgyal dbu skra ltag par bcings pa/_nang gos dmar po steng du rngul gzan ljang gu can/_phyag g.yas phur pa 'phyar ba/_g.yon bgrang phreng*/_gong du ma bshad pa thams cad zhabs phyed skyil/_thams cad pad+ma nyi zla'i gdan la bzhugs pa'o/__/rtsa 'khor bzhi'i dbus kyi lte bar sku gsung thugs ye shes rdo rje'i bdag nyid rdor sems dkar dmar mthing ser g.yas 'khor lo pad+ma rdo rje rin chen dang g.yon rang rtags kyi yu ba byas pa'i dril bu 'dzin pa/_zhabs rdo rje skyil krung can rtsa 'dab kyi lha rnams rtsa 'khor gyi sked pa tsam du zhal rdor sems la phyogs pas bzhugs pa/_spyi bo/_mgrin pa/_snying ga dang*/_lte ba'i rtsa 'khor gdugs kyi rtsibs ma ltar kha yar mar du lta bas yod par bsgom pa rtsa 'khor gyi dbyibs sogs zhib par dpe ris bzhin la/_mdor na rang dang lus dkyil gyi lha rnams sku mdog phyag rgya bzhugs stangs rgyan cha lugs re re bzhin gsal btab la sems bzung*/_mthar spyi'i rnam pa bde blag tu shar ba na gsal la rtogs pa med pa me long gi gzugs brnyan lta bu/_snang la rang bzhin med pa bar snang gi 'ja' tshon lta bu/_thogs med kun la khyab pa chu zla'i rnam 'gyur lta bur nges pa bskyed nas snang stong gnyis med kyi ngang du yun ring du mnyam par bzhag_/de ltar gsal btab pa de yang phyi skor bla ma'i sgrub dbang las/_spyir ni 'gro 'dul lnga bcu rtsa brgyad po:_thams cad zung 'jug mngon gyur kun tu bzang:_dgongs pa rang byung nam mkha'i rnal 'byor tshogs:_ye shes sku can 'khor 'das yongs la khyab:_bzhugs yul zhing khams gzhan du btsal mi 'tshal:_da lta'i nam mkha' 'dir yang rnal 'byor rnams:_rang gi sems nyid 'di la'ang bla mas khyab:_bskur bya skur thabs bsgrub dang sgrub thabs med:_rnal 'byor lta ba'i ngang la sgrub dbang rdzogs:_zhes gsungs pa ltar rang rig gdod ma'i ye shes rig stong bla ma'i dkyil 'khor du rdzogs pa yin lugs gsal 'debs kyi dgongs pa mngon sum gyur ba'i 'od gsal ye shes kyi rang gdangs ma 'gag cir yang 'char ba'i cha/_rnam pa rdzogs pa chen po sems sde'i rig 'dzin gtso 'khor gyi mtshan dper shar ba'i ye shes kyi lha ru bsgoms par shes pa ni shin tu gces pa'i srog tig go_/gnyis pa gsung bzlas pa sngags kyi ting 'dzin ni/_sku yi snang cha la gsal brtan gyi nyams ci rigs skyes pa'i tshe'am/_lhar snang gi ting nge 'dzin gyis dub ste skyo na/_bogs 'byin bzlas pa ni/_bla ma'i thugs dbus zla dkyil steng*/_rang rig ngo bo hrIHyig mthar/_/sngags kyi phreng bas bskor ba las/_'od zer 'phro 'dus byin dbang thob/_zhes pa'i dgongs pa gsal 'debs phyir rang nyid rig 'dzin shrI sing+ha'i thugs ka rdo rje sems dpa'i thugs kar zla ba'i steng hrIHyig mthar sngags phreng gi bskor ba las 'od zer 'phros/_dag pa'i zhing rab 'byams thams cad du khyab/_rtsa gsum rgyal ba sras dang bcas pa thams cad dang khyad par 'od gsal rdzogs pa chen po'i ston pa thams cad kyi gsang ba gsum gyi byin rlabs thams cad sku dang yig 'bru phyag tshan gyi rnam pa char drag tu babs pa tsam spyan drangs nas thugs kar thim pas byin rlabs dang dngos grub thob cing khyad par rig stong dgongs pa'i ye shes rtsal rdzogs/_yang 'od zer 'phros pas ma dag pa'i zhing kun la khyab/_brtan g.yo snod bcud thams cad dag pa'i zhing rab 'byams su sad pas snang srid rang snang ye shes kyi 'khor lo rdzogs par mos la/_mtshan sngags nyid rtse gcig tu bzla/_bsnyen pa'i tshad ni 'bum phrag bcu gnyis grangs bsnyen kha skong dang bcas ste bzhi 'gyur du bzlas na'ang shin tu legs pa'i yan lag tu 'gyur ro/__/thun gyi gsham du/_snying dbus thig zlum 'od lnga'i klong*/_/a yig mtha' mar sngags kyis bskor/_/bde chen ye shes snang ba yis/_/'khor 'das snod bcud rtog pa sbyangs/_/thams cad ma lus sku gsung thugs/_/yon tan phrin las rmad po che/_/snang srid gzhir bzhengs chen po'i ngang*/_/grags stong rdo rje'i dzapa 'di bzla/_a a a/_zhes rlung 'byung 'jug gnas gsum dang sbyar ba'i bum can sgrags pa'i rdor bzlas byas la/_snang srid thams cad rig 'dzin bla ma'i sku gsung thugs dbyer mi phyed pa'i ye shes rdo rje rang byung gsang ba chen po gcig gi dkyil 'khor du sad par mos la/_chos nyid don gyi dgongs pa srog tu bzung bas rlung sngags dbyings su bskyal ba la bslab par bya'o/__/gsum pa thugs 'od gsal de kho na nyid kyi ting 'dzin la/_dngos dang*/_zhar byung ngo*/_/dang po ni/_thun las ldang ba na/_dbyangs gsal rten snying bzlas pas lhag chad bskang zhing byin rlabs brtan par byas la/_snod bcud thams cad rim gyis bsdus te rang la thim/_rang yang thugs srog la thim/_de yang mi dmigs pa 'od gsal gyi dbyings su bsdus te dmigs med kyi ngang du ci gnas su mnyam par bzhag ste rig pa'i ngang bskyangs/_de'i ngang las snod bcud dag pa bla ma'i sku gsung thugs kyi 'khor lor ldang bas bsngo smon bcas bya'o/__/de yang bsnyen mtshams la 'jug pa'i thog mtha' yar mar gyi tshes bcu sogs dus bzang tshogs mchod dang bka' gter srung ma'i gtor bsngo rtag par ma chad par bya/_grol skabs dngos grub len pa sogs spyi ltar shes par bya'o/__/phyi nang gsang skor gyi rig 'dzin bla ma'i bskyed rim 'di dag spros bcas gzhan ltar sgrub rten mchod pa sogs ma 'byor kyang dus dang rgyun gyi skabs ji ltar rigs par mos gus rtsal du 'don pa nyams len gyi gtso bor bya zhing*/_thun mtshams thams cad dang*/_tshogs kyi 'khor lo la sogs pa'i dus su rig 'dzin bla ma rnams kyis rdo rje'i glu rnams dbyangs snyan pos sgrogs shing don la bsam gzhig gis nyams myong gi bogs 'don pa ni shin tu gces te/_mdo byang las/_khyad par dgongs pa'i rang bzhin nyams bskyang ba:_glu yi sde tshogs snga phyi gnyis su brjod:_ces gsungs so/__/gnyis pa zhar byung ni/_mdo byang las/_'gro 'dul bla ma'i sgrub thabs zab pa ni:_yang zab bstan pa'i snying po zhes bya'o:_'di ni spyi chos yin pas spel yang rung:_zhes dang*/_da lta shin tu spel 'phongs bas:_zab pa thugs kyi gter du sbas:_nam zhig las can bur 'phrad nas:_gdams pa sna res grol bar 'gyur:_snyan nas snyan du brgyud pa gces:_gang zhig 'gro don sgo dbye tsam:_sgrub thabs sna re sbyin par bya:_yongs rdzogs spel ba'i snod med do:_zhes gsungs pa ltar lam 'dir dad pas rjes su 'dzin par 'os kyang gsang ba yongs rdzogs kyi snod du ma gyur pa'am/_thams cad nyams su len pa dbang pos mi chun pa'i rigs la gong smos rig 'dzin bla ma'i spyi dbang gis smin par byas nas kun bzang don gyi phrin las la brten pas gsal snang rtse gcig tu sgrub pa rten bcas kyi zhi gnas dang*/_de'i nyer bsdus ting nge 'dzin rten med kyi zhi gnas la brten nas rig pa ngo sprad de shrI sing+ha'i rdo rje'i glu/_ji ltar bsam kyang mi rtog ngang:_sogs kyi dgongs don ltar lta sgom spyod 'bras bzhi po'i don nyams khrid du gdab pas/_bskyed rdzogs rkang tshang gi lam yongs rdzogs su 'gyur ba'ang shes par bya'o/__/gnyis pa phyi skor yi dam gyi sgrub pa'i lha khrid ni/_mdo byang las/_rdo rje dbyings kyi lha tshogs sgrub pa yang:_shrI sing+has rgyud las bkral ba'i tshul:_rdor dbyings rdo rje rtse mo 'od gsal zhing:_yi dam khro bo'i sgrub pa 'di las med:_zhes gsungs pa ltar rig 'dzin chen po shrI sing+has rgyud kyi dgongs pa bkral ba'i yi dam zhi ba rdo rje dbyings kyi dkyil 'khor chen po'i bsnyen sgrub ji ltar bgyi ba'i tshul 'chad pa ni/_sgrub pa'i gnas su sman gtor rak+ta nyer spyod tsam la brten pa'am spro na gzhung mthun gyi dkyil 'khor bkram ba'am/_tshom bu lha grangs bkod pa'i steng du rang byung rdo rje sems dpa'i me long tsam la brten kyang legs par sems/_gang ltar yang brgyud 'debs dang*/_skyabs sems nas brtsams/_dngos gzhi lha bskyed phrin las/_hU~M:_kun gzhi mi dmigs rnam par stong:_sogs nas/_thugs rje sna tshogs sprul skur shar:_phyi skor yi dam zhi ba'i sgrub thabs kyi:_sems nyid ka nas dag pa'i ngang:_sogs nas/_zhi ba'i dbyings kyi dkyil 'khor gsal:_zhes pa'i bar btang rjes/_phyi skor bla ma'i phrin las kyi:_dug gsum ye dag rdo rje gsum:_sogs/_bla ma'i las byang gi dbang bskur rgyas gdab/_spyan 'dren/_bzhugs phyag_/mchod bstod bcas sgrub pa'i/_rang gi thugs srog sa bon las:_bde ba chen po'i 'od zer 'phros:_rab 'byams rgyal ba'i dkyil 'khor ba'i:_lha tshogs rnams kyi thugs brgyud bskul:_de rnams thugs rje'i 'od zer rnams:_mkha' khyab kun tu snang ba yis:_bdag dang 'gro kun sgrib gnyis sbyangs:_ye shes mchog gi byin rlabs gyur:_oM hU~M trA~M hrIHaH_mUM lAM mAM pAM taM dz+nyA na satwa hU~M:_zhes gtso bo rnam snang dang*/_oM badz+ra satwa a:_rdor sems/_oM many+dzu shrI:_'jam dpal/_oM A r+Ya A wa lo ki shwa ri hrIH_'jig rten dbang phyug_/oM badz+ra pA Ni hU~M:_phyag rdor/_oM sa man+ta b+ha dra hU~M:_kun bzang*/_oM khag+har+b+ha trA~M:_nam snying*/_oM k+ShiM hi rA dza hU~M:_sa snying*/_oM mai tri d+hA ri AH_byams pa bcas kyi rtsa sngags rnams so sor bzla/_de yang gtso bo la 'bum phrag bzhi 'khor sngags brgyad po de'i bcu cha re bzlas pa spyi 'gro'i bsnyen tshad do/__/rtsod dus de las bzhi 'gyur byung na legs pa/_skor gsum gyi bskyed bzlas kun la shes par bya/_bskyed rim gyi gsal snang grub na rnam pa gsal ba/_rnam dag dran pa/_nga rgyal brtan pa rnams kyi lha khrid lam rim ye shes snying po dang yon 'grel sogs las 'byung ba ltar sbyar/_bsnyen sgrub kyi thog mtha' dang dus bzang rnams su tshogs dang*/_dngos grub blangs ba bcas spyi ltar ram/_sgrub pa bye brag tu spro na rdul tshon gyi dkyil 'khor ram/_tshom bu gtso 'khor dgu pa de rgyab phyogs mtshams bzhi dang shar nub re re drug_/phyogs bzhir bzhi bkod pa'i dbus su/_bum pa/_gsang thod/_rig tsaka_/shel rdo bcas sku gsung thugs ye shes rdo rje'i dbang gi rdzas rnams bkram/_mchod pa dang tshogs rdzas bzang du bshams pas las byang dkyus ltar zhag bdun_lnga sogs bya zhing grol mthar don dbang gi tshul du bdag 'jug len pa bcas rig 'dzin rtsal 'chang rnam gsum zab gter gyi phyag bzhes su gnang ba ltar sbyar kyang legs par sems so/__/gnyis pa zab mo rdzogs pa'i rim pa bshad pa la/_lo rgyus las gsungs pa ltar sngon 'gro brda dbang gsum dbang gis smin par byed pa/_dngos gzhi khrid gsum gyis grol bar byed pa/_rjes man ngag gsum gyis grol ba mthar phyin par mdzad pa ste gsum re gsungs la/_mdo byang las/_grol ba'i khrid ni don bzhi'i khongs su rdzogs:_sems kyi rang bzhin rtogs par bya ba las:_stong nyid chos dbyings brdal khyab gdams pa las:_de nyid rjes 'brel dgongs pa mthar gsal ba:_dgongs pa rang gsal lta ba klong yangs zhes:_de yi skor tsho chos tshan brgyad yin la:_zhes dang*/_phyi skor khrid kyi don bsdus las/_lta sgom spyod gsum 'bras bu las:_zhes gsungs pa ltar bzhi las/_dang po lta ba ngo sprod pa ni/_phyi skor khrid kyi rjes 'brel ni/_lta ba kun gzhi stong pa nyid:_zhes dang*/_sbubs mchu'i skabs/_bum pa khungs gtor gyi dgongs pa las/_chos thams cad ye shes su shar:_ye shes btsal du med pa'o:_zhes dang*/_phyi skor dngos gzhi'i khrid kyi gter gzhung las/_na mo gu ru:_phyi skor dngos gzhi'i khrid rim ni:_sogs nas/_kun gzhi nyid las 'byung ba'o:_zhes pa'i bar te spyir mdo sngags kyi lam thams cad bla mas ma bstan par pho tshod kyis sus kyang rtogs par mdo rgyud thams cad nas ma gsungs/_khyad par gsang sngags kyi lam dang dngos grub thams cad ni byin rlabs kho na la rag las/_yang sgos rdzogs pa chen po'i don gyi ye shes ni bla ma'i byin rlabs 'ba' zhig gis rtogs shing*/_gegs sel/_bogs 'byin thams cad bla ma'i byin rlabs la brten dgos la/_byin rlabs zhu pa'i bla ma ni mtshan nyid dang ldan pa'i bshes gnyen la ma brten na gtan gyi 'dun ma 'phyugs pas thog ma nyid nas bla ma mtshan ldan bsten pa gal che/_bla ma'i mtshan nyid kyang rgya cher gsungs pa las khyad par rdzogs pa chen po'i lam bstan gyi bla ma'i mtshan nyid ni/_a ti bkod pa chen po las/_mkhas shing bya ba bral ba dang*/_/chos nyid don la tshad phebs dang*/_/'dod pa'i don la rmongs pa med/_/gsang sngags bla ma'i mtshan nyid do/__/zhes pa ltar spyir gsang sngags kyi rgyud sde mtha' dag gi don la mkhas pas grub mtha' dbye ba phyed pa/_bye brag de dag gi nyams myong gi drod tshad dang ldan pas man ngag gi don ston pa la mkhas pa/_rnyed bkur sogs chos brgyad tshe 'di'i don gnyer gyi 'du 'dzi'i rnam g.yeng gi bya ba dang bral ba/_zab mo'i lta sgom spyod 'bras kyi nyams len mthar son pas chos nyid kyi dgongs pa tshad du phebs pa'am gdeng 'byor ba/_slob mas the tshom gyi dogs gnas dang dris pa'i lan 'debs pa la mkhas shing ma rmongs pa'o/__/bla ma mtshan ldan gyis chos zab mo bstan kyang don du 'gyur min slob ma'i nyer len la rag las pas de yang bla mas chos ma bstan pa'i snga logs su brtags dgos pa'ang rang shar las/_dad pa'i stobs dang brtson 'grus che/_/shes rab che zhing 'dzin chags med/_/phu dud che zhing gsang sngags spyod/_/rtog med sems la yengs pa med/_/dam tshig ldan zhing sgrub la brtson/_/slob dpon ji skad gsung bzhin byed/_ces gsungs pa ltar byin rlabs 'jug pa'i rgyu dang 'dod yid ches phyir mi ldog pa'i dad pa che ba/_chos la phyi bshol dang thang lhod med pa'i brtson 'grus che ba/_zab rgyas rdo rje'i gnas thams cad khong du chud nus pa'i shes rab che ba/_zas gos sogs sdig pa'i bde 'byor la zhen chags chung ba/_bla ma dang lha gdams ngag la che ba shes pas phu dud che ba/_the tshom gyi sgro 'dogs chod pas zab mo'i lta spyod la 'jug cing spyod nus pa/_ko long gi rnam rtog dang rnam g.yeng chung ba dam tshig gnyer du blang ba las mi 'da' ba brtan pa/_mdor na bla mas ji ltar bstan pa las mi 'da' zhing rtse gcig tu sgrub nus pa ni snod dang skal pa ldan pa zhig dgos la/_de ltar bla slob kyi rten 'brel tshogs pas gdams ngag zab mo rnams dbang dang khrid rgyab brten bshad lung skor bcas rig 'dzin grub pa'i phyag bzhes kyi go rim ma 'chol zhing thos bsam gyi sgro 'dogs kyi zhun thar chod pa ni/_thog ma nyid nas med du mi rung zhing*/_dngos gzhi nyams len gyi skabs su bab pa na/_gnas dus yo byad grogs dang bcas chos dang mthun zhing sgrub pa'i grogs su 'gro ba'i mthun rkyen gyi gdams ngag gi sgrom du gzhug par byas te/_'dir dgongs pa 'phro lus yod 'dra_mchan__gnyis pa ni/_mdo byang las/_da ni nang skor klong sde skor dgu ni:_zhes pa ste/_'di la yang gnyis/_bskyed pa dang*/_rdzogs pa'i rim pa'o/__/dang po la gnyis/_byin rlabs kyi sgo 'byed pa rig 'dzin bla ma'i bskyed rim/_dngos grub kyi bcud 'gugs pa yi dam zhi khro'i bskyed bzlas so/__/dang po la'ang*/_sngon 'gro'i rgyud las rung du sgrub pa dang*/_dngos gzhi bskyed rim 'phros don dang bcas pa'o/__/dang po ni/_bsam gtan tsher ma med pa'i gnas su/_bde ba'i stan la bag phebs par 'khod de rlung ro gsal zhing ngal gso/_thun gyi sngon 'gro dang bcas blo ldog rnam pa bzhi yi nges 'byung blo bskyed/_mi rtag pas bskul ma gdab/_rgyu 'bras yid ches kyi dran shes brtan pas/_dal 'byor don yod pa'i thabs la bslab nas/_thar pa'i phan yon la bsam gzhig gis dad pa dang brtson 'grus bskul te/_skyabs 'gro/_sems bskyed/_rdor sems/_maN+Dal/_khyad par bla ma'i byin rlabs thun mong dang*/_thun min gyi nyams len blo tshod dang bstun te nyams su len zhing gnad du 'gro bar bslab pa ni nges par gces so/__/ji ltar nyams su len pa'i tshul gong du bshad pa ltar la skyabs 'gro'i tshogs rten gyi gtso bo dang*/_bla ma'i byin rlabs skabs rig 'dzin dga' rab rdo rje'am bai ro gang mos sgom pa khyad par te/_zhib par sngon 'gro'i ngag 'don ltar ro/__/gnyis pa bskyed bzlas ni/_gzhung mthun bla ma'i sku brnyan mdun phyi nang gi mchod pa bskor/_mtshams bsdam pa sogs sngar ltar la/_dngos gzhi'i las byang nang skor khro bo'i byang bu khrigs bsdebs kyi skyabs sems nas mchod pa byin rlabs bar btang rjes/_aH_ka dag de bzhin nyid kyi dbyings:_sogs nas snang la rang bzhin med par gsal:_zhes pa'i mtshams su/_dug gsum ye dag sogs nas_thugs la bstod:_bsnyen bzlas kyi dmigs pa ni/_thugs kar pad+ma zla ba'i gdan:_de dbus a las sngags kyis bskor:_'od 'phros rgyal ba sras bcas mchod:_tshur bsdus dngos grub bdag la thim:_slar 'phros 'gro ba'i sgrib gnyis sbyangs:_snod bcud sku dang zhing du dag:_sku gsung thugs kyi dkyil 'khor rdzogs:_oM AHhU~M badz+ra ma hA gu ru pra he badz+ra sarba sid+d+hi hU~M:_zhes bzla ba ni gtso sngags dang*/_rig 'dzin yongs rdzogs kyi bzlas pa spro na/_oM AHhU~M badz+ra ma hA gu ru sa man+ta b+ha dra sarba sid+d+hi hU~M:_kun bzang yab yum/_thog mtha' rigs 'gre bas/_badz+ra ma hA gu ru badz+ra satwa/_rdor sems/_badz+ra ma hA gu ru many+dzu shrI mi tra/_'jam dpal bshes gnyen/_badz+ra ma hA gu ru shrI sing+ha/_shrI seng*/_badz+ra ma hA gu ru bi ma la mi tra/_bi ma la/_badz+ra ma hA gu ru pad+ma saM b+ha wa/_gu ru rin po che bcas so sor bzla/_bsnyen pa'i tshad ni 'bru 'bum mam 'bum phrag bzhi/_'khor rnams de'i bcu cha bzla/_tshe sgrub la/_thugs kar rin chen zur brgyad pa:_mchong gur phub pa lta bu'i nang:_pad zlar hrIHlas tshe dpag med:_dkar po'i longs spyod rdzogs sku'i chas:_phyag g.yon mnyam bzhag tshe bum ni:_tshe yi bcud kyis gang rgyar btams:_g.yas pas sna tshogs rdo rje yis:_g.yon pa'i tshe yi kha bkab ste:_rdo rje skyil mo krung gis bzhugs:_longs spyod rdzogs pa'i chas kyis spras:_thugs kar nyi zla'i gwa'u nang:_nr-i yig ljang gu hU~M as mtshan:_gwa'u steng du hrIHyig las:_sngags kyi phreng bas g.yas su bskor:_'od 'phros 'khor 'das tshe bcud bsdus:_gwa'u nang dang bum pa'i nang:_yongs su gang zhing 'phel ba yis:_rig 'dzin bla ma'i sku yi nang:_tshe yi bdud rtsis gang bar bsam:_oM badz+ra ma hA gu ru A yur+dz+nyA na sarba sid+d+hi hU~M:_zhes bzla/_thun mthar tshe 'gugs sbyar na/_hrIH_'od gsal chos sku'i pho brang nas:_longs spyod yongs rdzogs sprul pa'i sku:_'chi med rig 'dzin bla ma'i tshogs:_rtsa gsum rgya mtsho'i 'khor dang bcas:_sgrub la tshe dbang mchog stsol phyir:_thugs dam bskul lo dbyings nas bzhengs:_rnal 'byor bdag cag 'khor bcas kyi:_bla tshe chad nyams yar ba dang:_phyi snod 'byung ba bzhi yi bcud:_nang bcud 'gro ba'i tshe bsod dpal:_gsang ba rgyal ba sras bcas kyi:_mkhyen brtse nus pa'i yon tan kun:_'od zer bdud rtsi'i rnam par bsdus:_bdag dang sgrub pa'i rdzas la bstim:_rgas med lang tsho'i dngos grub stsol:_nad med bde ba'i dngos grub stsol:_'chi med tshe yi dngos grub stsol:_ye shes mchog gi dngos grub stsol:_zhes dang*/_tshe dzapa bzlas la/_aH_spros pas srid zhir khyab pa'i tshe:_bsdus pas thig le nyag gcig klong:_'pho 'gyur med par rgyas btab pas:_ye shes chen po'i srog 'grub shog:_dz+nyA na badz+ra rak+sha a:_zhes rgyas gdab bya/_thun mthar mchod bstod/_tshogs mchod sogs rjes rim khro bo'i las byang bzhin dang*/_bskyed rdzogs kyi dmigs gnad snga ma ltar la/_skabs 'di'i dkyil 'khor gyi gtso bo ni/_dga' rab rdo rje ste/_nges pa'i don du khyab bdag rdo rje sems dpa' nyid dzam bu'i gling du rdzogs pa chen po'i bstan pa spel ba'i phyir mchog gi sprul sku rig pa 'dzin pa'i rnam par bzhengs pa dang rtsa ba'i bla ma dbyer med la gsol 'debs dang mos gus la rtsal sbyangs pa ni gnad du ches zab po/__/skabs 'dir mdo byang las/_rig 'dzin bla ma 'gro 'dul bco lnga yang:_rgya gar yul gyi slob dpon chen po rnams:_'gro don phyir du bod kyi yul du 'khrungs:_de yi dbang byas ye shes mtsho rgyal la:_lha sras kyis zhus lha sras gshegs rjes su:_zur mkhar bza' yis yi ger bkod pa dag:_ngan lam ban+des khrigs su btab pa 'di:_bla ma'i phrin las dgongs pa 'od gsal zhes:_'di yi byin rlabs bla ma'i spyi skor las:_grub pa'i tshul ston bka' bab dbang bskur zhing:_thugs kyi byin rlabs rdo rje'i glu rnams blangs:_zhes pa'i dgongs pa gtso bor bton/_nang skor rig 'dzin bla ma'i sgrub pa bai ro gtso bor mdzad pa gter chen thugs sras mkhan chen rat+na'i phyag bzhes ltar na nang skor rig 'dzin bco lnga'i bskyed rim byang bu ltar/_hU~M:_kun gzhi mi dmigs rnam par stong:_sogs nas/_las gzhung ltar dang*/_gtso sngags/_oM AHhU~M badz+ra gu ru bai ro tsa na sid+d+hi hU~M:_zhes gtso bo dang*/_oM sarba ma hA gu ru hU~M:_'khor sngags dang*/_oM AHhU~M gu ru bai ro tsa na A yur+dz+nyA na sid+d+hi hU~M:_zhes tshe dzapa sbyar ba khyad par ro/__/de yang lo chen bai ro tsa na ni/_gu ru rin po ches slob dpon nyid dang dgongs pa mnyam pa zhes rje 'bangs kun las dgongs nyams khyad par 'phags pa'i bsngags brjod bstsal ba dang*/_bod du sangs rgyas kyi bstan pa dar rgyas mdzad pa la mkhan slob chos gsum dang bka' drin mnyam pa la gtso 'khor gyi rnam par snang ba'i rig 'dzin rnams kyang*/_nang skor bla ma rig 'dzin dbang chog las/_spyir ni 'gro 'dul bla ma bco lnga po:_thams cad zung 'jug mngon gyur kun tu bzang:_dgongs pa rang byung nam mkha'i rnal 'byor tshogs:_ye shes sku can 'khor 'das yongs la khyab:_bzhugs yul zhing khams gzhan du btsal mi 'tshal:_da lta'i nam mkha' 'di yang rnal 'byor rnams:_rang gi sems nyid 'di yang bla mas khyab:_bskur bya skur thabs bsgrub dang sgrub thabs med:_rnal 'byor lta ba'i ngang la sgrub dbang rdzogs:_zhes gsungs pa'i gnad tig gi dgongs don la yid ches kyi dad pas gsol ba gdab par bya zhing gzhan rnams snga ma ltar ro/__/gnyis pa la gnyis/_zhi ba ston pa bcu gnyis kyi bskyed bzlas dang*/_khro bo mngon rdzogs rgyal po yab yum gyi sgom rim mo/__/dang po ni/_mdo byang las/_zhi ba rdzogs chen ston pa bcu gnyis kyi:_sgrub pa zab gsal klong yangs zhes bya de:_gtso bo chos nyid klong las bskyed pa med:_sku gsum don gyi phrin las chen po'o:_zhes pa'i dgongs don nyams su len pa la/_sman raka gtor ma mchod pa sogs spyi ltar bkram la/_nang skor khro bo byang bu khrigs bsdebs kyi thog mtha'i chings la/_b+h+rU~M dz+nyA na tsakra maN+Da la hU~M:_zhes rten bskyed rjes su/_nang skor yi dam zhi sgrub ltar/_chos dbyings klong yangs chos thams cad:_sogs nas_chags bral mtshan dang dpe byad rdzogs:_zhes pa'i mtshams su/_nang skor khro bo byang bu khrigs bsdebs ltar/_dug gsum ye dag rdo rje gsum:_sogs nas_bstod pa'i bar dang*/_bzlas dmigs ni/_bde gshegs ston pa bcu gnyis rnams:_snang srid sku yi rol pas gang:_sngags ni grags stong rang sgra sgrogs:_'od gsal ngo bo'i thugs kyi ngang:_mchod sprin rgya mtshos rgyal ba dgyes:_'gro rnams bla med sa la bkod:_snang srid gzhir bzhengs bde ba che:_dgongs pa klong yangs ngang du rdzogs:_oM badz+ra ma hA gu ru sarba sid+d+hi hU~M:_sarba ta thA ga ta ma hA nA mas+t+rai ya d+hI ka naM bud+d+ha sarba sid+d+hi hU~M:_zhes bzla/_spyir 'di dag kun bzang don gyi phrin las zhes rig stong ye shes kyi cho 'phrul chen po'i bkod pa las gzhan du ma dmigs pa'i yin lugs kyi dgongs pa gsal 'debs tsam las/_bskyed rim gzhan ltar lam nges rdzogs kyi gsal snang sogs ma bsgrubs kyang rung bar/_mdo byang gi skabs su gsal ba ltar la/_las dang po pa'i blo ngor mtshan dang sku yi rnam 'gyur sogs ma gsal na'ang 'gal ba med pas/_'dir 'phro lus/__!_gnyis pa khro bo mngon rdzogs rgyal po yab yum gyi sgom rim la gnyis/_yab bka' dang*/_yum bka'o/__/dang po ni/_mdo byang las/_yi dam khro bo mngon rdzogs rgyal po ni:_mdo lung chen po'i rgyud las btus pa ste:_dga' rab rdo rjes mdzad pa'i lugs bzhin du:_shrI sing ha'i chos kyi khyad chos so:_phrin las nyi ma mtha' yas zhes bya ste:_zhes gsungs pa ltar rtsa ba mngon rdzogs rgyal po dang*/_yan lag theg pa dgu bsgril dkyil 'khor gcig tu rdzogs pa rig 'dzin dga' rab rdo rjes rgyud kyi dgongs pa'i lugs su bsdebs pa'i man ngag gi zhal shes slob dpon shrI sing+ha'i bsnyen sgrub ji ltar bya ba'i tshul las/_bsnyen sgrub las gsum bya ba'i tshul la/_dkyil 'khor sgrub rdzas sogs bsnyen pa'i skabs 'dir ma 'dzom kyang rung mod lag len bde ba'i ched thog ma nyid nas gzhung mthun gyi dkyil 'khor ras bris yod na bkram/_ma 'byor na tshom bu lha gnas ltar bkod pa'i dbus su thod sku yod na dang*/_sman raka gtor ma mchod pas bskor/_bsnyen pa'i dbu phyi thun nas 'dzugs/_mtshams dam du bcad cing rgyal chen tho 'dzugs pa sogs gong ltar bya/_dngos gzhi nang skor khro bo'i byang bu khrigs sdebs la gter gzhung dgongs pa phyogs gcig pa ltar btang ba legs shing*/_las byang sngon dngos rjes gsum gyi sgom don spyi ltar shes par bya dgos shing*/_skabs don dmigs pa'i gtso bo lha khrid mkhan rat+na'i gsung sor bzhag tu bkod pa 'di ltar/_de la 'dir srung 'khor ye shes lnga yi 'od zer sgo lnga'i dbyibs zlum hril/_rdo rje/_'khor lo/_rin chen/_pad+ma/_rgya gram gyi gur nang nas rim par/_mthing*/_dkar/_ser/_dmar/_ljang gu rnams sgo nga la ri mo bris pa ltar bar seng med pa/_ye shes lnga'i me g.yon 'khor du 'bar ba'o/__/'di skabs nam mkha' chos 'byung zhes pa chos thams cad kyi 'byung gnas yin pa zur gsum mi dgos te/_'og nas rim pa dang po nam mkha' mthing nag_/de steng rlung dkyil ljang nag_/de steng me dkyil dmar po/_de steng chu dkyil dkar po/_de steng sa dkyil ser po thams cad zlum po ste/_'byung lnga'i dag pa yum lnga'i mkhar:_ces so/__/de steng ri rab bang rim bzhi steng gru bzhi ti tsha 'dra ba/_bang rim ri rab bcas shar shel/_lho bai DUr+Ya/_nub pad+ma rA ga_/byang gser las grub pa/_glo 'bur dang bcas pa'i steng phyogs mtshams dur khrod brgyad phyogs bzhi pad dbyibs/_mtshams bzhi gzhu dbyibs/_bar mtshams su mtsho chen brgyad la klu chen brgyad dang bcas pa ni/_tshogs brgyad dag pa'i dur khrod brgyad:_'gyur med srung 'khor kun la khyab:_zhes so/__/dur khrod kyi nang du sna tshogs pad+ma 'bum ldan gyi dbus su rdo rje rgya gram rwa bcu gnyis pa'i lte bar/_dug lnga rnam dag gzhal yas khang:_ye shes rtsal rdzogs rgyan gyis spras:_zhes pa 'di rgyas pa la lugs gnyis/_bsdus pa dang gsum las/_dang po ni/_gzhal yas rim pa so so thams cad du:_dpal chen ye shes_sogs ni_zab bdun ma mo rol pa ltar yin pas rang res zin bris bkod yod pa ltar ro/__/yang mngon rdzogs gter gzhung dgongs pa phyogs gcig pa ltar na/_steng khang zhi ba rdo rje dbyings kyi lha:_bzhi cu rtsa gnyis ma 'dres tshom bur rdzogs:_gzhal yas bar khyams 'khor yug_/sogs ni/_steng khang zhi ba dang 'og khang khro bo/_bka' 'dus rtsa dkyil ltar yin pas gsal byed tho yig mchog gling zhal gsung zur du bris pa yod pas der blta'o/__/'dir bsdus pa'i lugs ni/_ye shes dang 'jig rten gyi gzhal yas khang nyis rim nang ma rta bab bzhi ma/_phyi ma brgyad ldan gyi dbus su/_rin chen asma gar+b+ha'i gru chad glo 'bur ldan pa'i steng gser gyi 'khor lo dbyibs drug po ltar lte ba mu khyud dang bcas pa de'i mthar lha snam mam/_khyams drug la dpal chen po'i ye shes kyi rang rtsal sum brgya drug cu re dgu 'god tshul ni/_dbus kyi gru chad dang glo 'bur la gnas ma brgyad/_dang po gser khyams la yul ma brgyad/_sgo skyong bzhi/_khyams gnyis pa phyogs mdog dbang mo nyi shu rtsa brgyad/_khyams gsum pa ljang gu la mkha' 'gro so gnyis phyogs rer brgyad re/_ma mo bdun byang shar ma gtogs pa'i phyogs mtshams bdun/_sring mo bzhi phyogs bzhir bkod/_khyams bzhi pa sngon po la ging chen bco brgyad phyogs mtshams brgyad re dang*/_shar nub gnyis su re re lhag pa ste bco brgyad/_khro bo drug cu phyogs rer bco lnga re/_khyams lnga pa dmar po la rigs bzhi pho nya brgya dang bzhi bcu ni phyogs rer sum cu so lnga re'o/__/khyams drug dkar po la ma mo drug cu ni phyogs rer bcu bzhi sgo bzhir re re ste thams cad yongs dril ba bsdoms pas sum brgya drug cu re dgu'o/__/de mthar ye shes snying po'i gzhal yas khang rta babs bzhi pa pad+ma 'khor lo gdugs dang ri dwags chos nyan dang bcas pa'o/__/nges rdzogs zhib par sku mdog phyag mtshan bka' 'dus ltar ro/__/'dir mos sgom tsam la khro mo las mdog can sogs mi dgos te/_gnas ma brgyad sngon mo DA ru thod chang*/_yul ma brgyad smug nag thod khrag phyogs mdog_/sgo skyong phyogs mdog phyag rgya bzhi dbang mo nyer brgyad rdo rje rin chen pad+ma rgya gram 'dzin pa dkar ser dmar ljang*/_mkha' 'gro so gnyis rdo rje rin chen pad+ma rgya gram gyis mtshan pa'i gri thod phyogs mdog_/ma mo bdun mthing nag ral gri thod khrag_/sring mo bzhi dkar ser dmar ljang rang mdog gi rgyal mtshan 'dzin pa/_ging chen bco brgyad dkar ser dmar ljang rnge'u chung brdung ba/_khro bo drug cu mthing nag gri thod 'dzin pa/_rigs bzhi'i pho nya brgya dang bzhi bcu dkar ser dmar ljang*/_shar phyogs pa rnams lcags kyu/_lho phyogs pa rnams zhags pa/_nub phyogs pa rnams lcags sgrog_/byang phyogs pa rnams dril bu/_g.yon thams cad sdig mdzub/_ma mo drug cu sgo bzhir gnas pa phyag rgya bzhi dang thod khrag_/gzhan thams cad g.yas bdud rtsi'i bum pa dang g.yon nad rkyal 'dzin pa phyogs mdog_/ging chen bco brgyad ma gtogs thams cad mi lpags dang stag gzig gi sham thabs rus rgyan/_zhabs gar stabs me rlung gi dbus su gnas pa'o/__!__'jig rten gyi gzhal yas khang gnyis pa'i 'obs su khrag mtsho 'khyil ba'i khyams la 'jig rten ma mo bdun brgya nyi shu ni/_phyogs rer brgya dang nyi shu re phyogs mdog khro mo'i chas can thams cad kyang dpal chen po'i ye shes kyi dkyil 'khor la gus pas thal mo sbyar ba'o/__/dkyil 'khor gyi phyi khyams pad+ma'i ra ba'i nang du 'jig rten pa'i 'khor yug la/_shar du lha dang lha min/_lhor mi/_nub tu dmyal ba dang yi dwags/_byang du byol song gi 'jig rten gyis yongs su bskor ba'i steng gi nam mkhar/_shar du byang sems/_lhor rang rgyal/_nub tu nyan thos/_byang du drang srong grub pa bden tshig grub pa'i tshogs dang bcas pa/_dkyil 'khor phyi ma'i rta babs thad kyi bar snang la rig 'dzin bye ba sa ya sprin ltar gtibs pa'o/_/steng khang bum pa'i nang gi nam mkhar zhi ba bzhi bcu rtsa gnyis kyi dkyil 'khor ni sgyu 'phrul ltar ro/__!__dur khrod brgyad kyi phyi rol srung 'khor nang ri rab kyi steng der/_shar du mngon mtho lha mi'i theg pa la phyag rdor ngan song kun 'dren gyi dkyil 'khor/_lhor bya rgyud la mi 'khrugs pa/_nub tu spyod rgyud la shAkya thub pa sku yi dkyil 'khor/_byang du rnal 'byor rgyud la kun rigs rtsa ba'i dkyil 'khor rnams mgron thabs kyi tshul lo/__/'di bsdus pa'i lugs yin gyi/_rgyas par nang skor yi dam khro bo'i sngags byang gi bsnyen dmigs skabs ltar bsgoms par bya'o/__!__snying po'i dkyil 'khor gyi lte bar dpal chen po bsgom tshul ni/_g.yas nas rim par/_seng ge_/stag_/gzig_/dom_glang chen/_ma he/_chu srin/_sbrul te byol song gtso bo brgyad kyi khrir/_pad+ma zla ba nyi ma'i gdan la dpal chen mngon rdzogs rgyal po sku lus smug nag dbus zhal bdun smug nag khro bo/_/g.yas zhal bdun dkar po bzhad pa/_g.yon zhal bdun dmar po chags nyams can/_rtsa ba'i phyag brgyad kyi dang po gnyis gri thod 'dzin pas yum la 'khyud pa/_bar pa gnyis kyi g.yas pas dag pa'i zhing dang*/_ma dag pa'i 'jig rten 'degs pa'i tshul/_tha ma gnyis kyis 'dod khams dang gzugs khams thig ler gnas pa 'dzin pa'o/__/lhag ma bar phyag bcus g.yas pa lngas sa dkyil gru bzhi ser po/_chu dkyil dkar po zlum po/_me dkyil dmar po gru gsum/_rlung dkyil zla gam ljang gu_/nam mkha' mthing nag gru gsum 'dzin pa/_g.yon pa lngas/_rdo rje/_'khor lo/_rin chen/_pad+ma/_rgya gram rnams 'dzin pa/_yan lag gi phyag brgyas g.yas pa lnga bcus gri gug_/g.yon lnga bcus thod khrag 'dzin pa/_dpal dang dur khrod chas rdzogs rdo rje rin chen gyi gshog pa g.yas g.yon du brgyangs shing zhabs rdor skyil gyis bzhugs pa'i pang du yum bcom ldan 'das rdo rje bde ma sku mdog mthing nag dbus zhal sum brtsegs mthing ga_/g.yas zhal sum brtsegs dkar po/_g.yon zhal sum brtsegs dmar po/_phyag bco brgyad kyi g.yas dgus rdo rje dang*/_g.yon dgus dung khrag 'dzin cing yab la sbyor ba/_zhabs gnyis yab kyi sked du pad+ma'i skyil krung gis 'khril ba'o/__/de phyir 'khor lo rtsibs brgyad la pad+ma nyi ma zhing gi gdan la rgyud lung gi khro bo brgyad ni/_shar du bud+d+ha he ru ka yab yum dkar gsal zhal gsum phyag drug pa g.yas gsum 'khor lo/_lhor rat+na he ru ka ser po yab yum g.yas gsum rin chen/_de bzhin nub pad+ma/_byang du rgya gram/_mtshams bzhi'i lung gi khro bo bka' 'dus ltar na/_shar lhor rak+sha/_lho nub sa nu/_nub byang guh+ya/_byang shar du yak+sha he ru ka yin kyang*/_'dir ni/_shar lhor guh+ya he ru ka gsang ba'i khrag 'thung*/_lho nub tu sa nu he ru ka ste phra ba'i khrag 'thung*/_nub byang yak+sha he ru ka ste gnod sbyin khrag 'thung*/_byang shar du rak+sha he ru ka ste srin po khrag 'thung*/_bzhi ka g.yas gsum rdo rje/_rin chen/_pad+ma/_ral gri/_khro bo brgyad po thams cad kyi phyag g.yon thod khrag_/yum rnams zhal gcig phyag gnyis rang mdog rang rtags dang thod khrag 'dzin cing 'khril sbyor/_rgyud kyi khro bo bzhi yi yab rnams zhabs g.yas brkyang*/_lung gi khro bo bzhis zhabs g.yon brkyang dpal dang dur khrod chas rdzogs rdo rje'i gshog pa/_yum la gzig sham sogs snga 'gyur spyi ltar ro/__!__zhar byung 'phros don shin tu rgyas skabs rdo rje'i srung 'khor nang gi tshom bu'i dkyil 'khor la/_byang shar du ngan song gnas 'dren/_nub byang du lha mi'i dkyil 'khor/_lho nub tu nyan thos/_shar lhor rang rgyal/_byang du byang sems/_nub tu kri ya/_lho ru u pa/_shar du rnam snang rdor dbyings dkyil 'khor te/_'di rgyas pa'i skabs yin/_bsdus pa sngar bshad pa bzhin no/__/spyir de dag gi dag bya dag byed kyi go don gal che bas _'dir 'phro lus/_!_dzapa dmigs la gnyis las/_dang po rgyas pa ni/_byang bu khrigs bsdebs su/_bsnyen sgrub chig dril gyi ting nge 'dzin la/_bzla bya'i sngags kyang spyi dril chen po drag sngags 'dus pa dang ru lu kho na yin kyang*/_nang skor yi dam khro bo'i sgrub pa las/_'khor gyi lha sngags spros 'dod na:_gud du gsal las shes par bya:_zhes gsungs pa bzhin/_brgyud 'dzin zab chos kyi mnga' bdag mkhan chen rat+na'i gsung ltar dzapa dmigs 'bring po ltar nges par sbyor dgos pas de ltar bshad pa la gsum/_dang po zhi bar bsnyen pa ni/_nang skor khro bo'i byang bu khrigs bsdebs kyi dzapa dgongs gsal 'debs/_hU~M stong gsum 'jig rten thams cad kun:_sogs nas/_lhun grub zhi ba'i rang bzhin bsgom:_zhes dzapa bskul byas te/_rang gi thugs srog sa bon las:_bde ba chen po'i 'od zer 'phros:_steng khang zhi ba'i dkyil 'khor pa'i:_lha tshogs rnams kyi thugs brgyud bskul:_de rnams thugs srog 'od zer sprin:_mkha' khyab kun tu snang ba yis:_bdag dang 'gro ba'i sgrib gnyis sbyangs:_ye shes mchog gi byin rlabs gyur:_oM guh+ya dz+nyA na b+ho d+hi tsit+ta ma hA su kha hU~M hU~M:_zhes pa'i ting 'dzin dang ma bral bas bsnyen sngags 'bum phrag bzhi bzla/_thun mthar khrag 'thung gtso 'khor gyi bzlas pa khyug tsam byas la grol/_zhi ba'i bsnyen tshad long ba dang*/_khrag 'thung gtso bo'i nye bsnyen gyi bzlas dmigs ni/_thog mar zhi bsnyen khyug tsam sngar ltar btang rjes/_rang gi thugs kar nyi ma'i steng:_rdo rje rtse lnga'i lte bar hU~M:_mtha' mar rtsa ba'i sngags kyis bskor:_bzlas pas sngags phreng lu gu rgyud:_yab yum zhal zhugs gsang bar 'khor:_bde ba chen po'i gzi byin bskyed:_mchog thun dngos grub bdud rtsi'i bcud:_hU~M thim ye shes 'bar bar gyur:_oM a kra ma hA shrI he ru ka_/ka ta ma hA kro d+hI shwa ri hU~M phaTa?:_zhes 'bum phrag gcig bzla/_gzhan rnams khyug tsam btang ba sogs snga ma dang mtshungs/_gsum pa sgrub pa gtso dgu'i bzlas dmigs ni/_gtso 'khor thugs kar nyi ma'i steng:_rdo rje rtse dgu'i lte bar hU~M:_dril sgrub sngags kyi phreng bas bskor:_bzlas pas sngags phreng lu gu rgyud:_yab yum zhal zhugs sogs gong dang 'dra/_oM badz+ra kro d+ha ma hA shrI he ru ka badz+ra kro d+hI shwa ri bud+d+ha shrI he ru ka bud+d+ha kro d+hI shwa ri rat+na shrI he ru ka rat+na kro d+hI shwa ri pad+ma shrI he ru ka pad+ma kro d+hI shwa ri karma shrI he ru ka pad+ma kro d+hI shwa ri guh+ya sa nu yak+sha rak+sha shrI he ru ka kro d+hI shwa ri ru lu ru lu hU~M b+h+yo hU~M:_zhes spyi dril chen po gtso bor byas ste 'bum phrag gcig bzla gsungs/_bzhi pa sgrub pa chen po dkyil 'khor yongs rdzogs kyi bzlas pa la/_bdag mdun dzapa khang phyes na legs pas/_bstod pa'i rjes/_oM ru lu ru lu sogs/_phaTa? dzaHsa bdag mdun me ri 'dabs 'byor gyi tshul du bzhugs par mos la/_dzapa bskul/_hU~M:_stong gsum 'jig rten thams cad sogs rjes/_zhi khro gtso dgu'i bsnyen pa khyug tsam sngon du btang ste/_bdag nyid gtso mchog he ru ka'i:_thugs srog las byung 'bar ba'i 'od:_dkyil 'khor rab 'byams thugs kar thim:_thugs rgyud rang dbang med par bskul:_so so'i sku yi gnas gsum nas:_sku dang sngags phreng phyag mtshan tshogs:_'od dang 'od zer dang bcas 'phros:_khams gsum thams cad snang bar byas:_gang 'dul phrin las lhun gyis grub:_snod bcud tha mal snang zhen sbyangs:_dkyil 'khor rab 'byams go 'phang bkod:_tshur bsdus bdag la thim pa yi:_dngos grub rnam gnyis thob par gyur:_lha sngags so so la sems 'dzin spro bsdu dang bcas/_ha ha ha ha ha ha ha ha:_zhes gnas ma brgyad dang*/_he he he he he he he he:_yul ma brgyad/_dzaHhU~M baM hoH_sgo ma bzhi/_b+h+yo b+h+yo b+h+yo b+h+yo b+h+yo b+h+yo:_b+h+yo b+h+yo b+h+yo b+h+yo b+h+yo b+h+yo:_b+h+yo b+h+yo b+h+yo b+h+yo b+h+yo b+h+yo:_b+h+yo b+h+yo b+h+yo b+h+yo b+h+yo b+h+yo:_b+h+yo b+h+yo b+h+yo b+h+yo:_dbang mo nyer brgyad dang*/_e a ral+li hU~M:_mkha' 'gro so gnyis/_ma me d+hA tu hU~M:_badz+ra dun+tiM b+h+yo:_ma bdun sring bzhi/_king+ka ra ha ha ru lu ru lu hU~M b+h+yo hU~M:_ging chen bco brgyad/_kro d+ha kro d+hI hU~M:_khro bo drug cu/_b+ha na ha na gardza pa tsa dzaHhU~M ba~M hoH_ma mo nyis brgya bzhi bcu dang pho nya rigs bzhi/_ma ma shwa ri hU~M:_ma mo drug cu/_oM ma hA gu ru shA ri ram gi li hU~M:_rgyu yi rta bab khor yug tu bzhugs pa'i rig 'dzin bye ba sa ya bcas dang*/_rang gi thugs ka'i 'od zer gyis:_yan lag dkyil 'khor thugs dam bskul:_de rnams thugs nas ye shes kyi:_snang bas 'khor 'das zhing kun khyab:_'phags rnams dgyes shing dgyes pa bskyed:_sems can kun gyi sgrib gnyis sbyangs:_tshur 'dus bdag la thim pa yis:_bdag dang 'gro drug yid can kun:_ngan song 'khor ba'i sdug bsngal bsal:_mtho ris thar pa'i go 'phang bkod:_byang chub gsum gyi sa bon dang:_'bras bu mngon du gyur nas kyang:_dngos grub thams cad thob par bsam:_zhes spyi'i bzlas dmigs la/_oM badz+ra pA Ni sarba karma a ba ra Na bi shwa d+ha ya ha na hU~M phaTa?:_byang shar ngan song kun 'dren gyi dkyil 'khor dang*/_oM mu ne ye k+Sha~M breM tru~M swA hA:_oM mu ne sruM kriM swA hA:_nub byang lha mi'i theg pa'i dkyil 'khor/_oM mu ne mu ne ma hA mu ne shAkya mu na ye swA hA:_lho nub nyan thos theg pa'i dkyil 'khor/_oM ye d+harma sogs NaHswA hA:_shar lhor rang rgyal theg pa'i dkyil 'khor/_oM ma hA ka ru Ni ka sarba b+ho d+hi satwa swa hA:_byang phyogs byang sems theg pa'i dkyil 'khor/_oM sarba ta thA ga ta a nu ga te oM ku ruM gi ni swAhA:_zhes dkyil 'khor spyi dang*/_oM wA gI shwa ri mu~M:_oM ma Ni pad+me hU~M:_oM badz+ra pA Ni hU~M:_zhes gtso bo rigs gsum sngags bcas bzla/_oM badz+ra bai ro tsa na ak+Sho b+h+ya rat+na saM b+ha wa pad+ma d+ha ra hU~M swA hA:_lho phyogs su u b+ha rigs bzhi dang*/_oM hU~M trA~M hrIHaH_mU~M lA~M mA~M pA~M tA~M sarba ta thA ga ta ma hA yo gi shwa ri hU~M:_shar phyogs rdo rje dbyings kyi dkyil 'khor dang*/_na mo b+ha ga wa te sarba durga te pa ri shwa d+ha na rA dza ya:_ta thA ga ta ya:_ar+ha te samyak+saM bud+d+ha ya:_ta d+ya thA:_oM sho d+ha ni sho d+ha ni:_sarba pA paM sho d+ha ni:_shud+d+he shud+d+he sarba A ba ra Na bi shud+d+he swAhA:_gtso bo ngan song sbyong ba rnam snang gi gzungs kyang bzla/_so so'i bzlas pa 'di dag grangs tshad khri re gsungs/_rang nyid khrag 'thung chen po yi:_tsit+ta rin chen zur brgyad pa'i:_nyi zla kha sbyor lte bar hU~M:_sngags kyi phreng bas bskor ba las:_'od 'phros lus kyi nang kun gang:_sgrib dag dbang dang dngos grub thob:_slar yang sngags kyi 'od zer gyis:_dkyil 'khor rab 'byams thugs rgyud bskul:_de las 'od zer mkha' khyab 'phros:_tha mal snang zhen dbyings su thim:_snod bcud gzhal yas khang dang lha:_sgra kun grags stong sngags kyi dbyangs:_dran bsam bde gsal mi rtog pa:_dbyer med kun bzang dgongs pa'i klong:_ma nor ma bcos bsam 'das pa:_brjod bral ye shes mngon gyur bsam:_zhes pa'i dgongs pa dang ma bral bas/_oM ru lu ru lu hU~M b+h+yo hU~M:_khrag 'thung rab 'byams spyi dril gyi sngags 'bum phrag bzhi bzla ba'am/_khyad par ru lu 'bru brgyad pa:_yongs dril mthar thug bzlas pa'i skabs:_zhes gsungs pas gtso 'khor lha tshogs thams cad kun 'dus kyi spyi sngags snying po mthar thug yin pas bzlas grangs ji tsam mang bzhin legs pa'ang shes par bya'o/__/yan lag gi dkyil 'khor so so'i bzlas pa ma grub na/_bdag nyid gtso mchog he ru ka'i:sogs kyi dmigs bzlas mthar ru lu kho na bzla ba mkhan chen rat+na'i zin bris su gsungs pa dang snga 'gyur gyi rgyud rnams su'ang*/_ru lu 'di nyid spyi snying du bsngags par mdzad pa ltar lags kyang*/_rtsa ba yan lag gi theg pa dgu bsgril gyi lha sngags so so'i bzlas grangs bskyal na shin tu legs par sems so/__/oM ru lu ru lu hU~M b+h+yo hU~M:_tshul 'di ni tshigs tshogs shin tu khyer bde bcud dril mdzad pa las lha dang dkyil 'khor tshom bu'i bkod pa shin tu rgyas pas bsnyen sgrub kyi skabs dzapa dmigs 'di bzhin nges par sbyar te bsnyen sgrub yan lag bzhi ru dbye ba nges par gal che ba'ang shes par bya'o/__!__gnyis pa ni/_yang na bsnyen sgrub kyi bzlas dmigs bsdus pa'i lugs su byed pa la/_dang po'i bsnyen pa gtso dgu'i bzlas pa ni/_khro bo'i byang bu khrigs bsdebs kyi/_lhun gyis grub pa'i rang bzhin bsgom:_zhes pa'i rjes/_rang gi thugs kar nyi ma'i steng:_rdo rje rtse lnga'i lte bar hU~M:_mthar mar rtsa ba'i sngags kyis bskor:_bzlas pas sngags phreng lu gu rgyud:_yab yum zhal zhugs gsang bar 'khor:_bde ba chen po'i gzi byin bskyed:_mchog thun dngos grub bdud rtsi'i bcud:_hU~M thim ye shes 'bar bar gyur:_zhes gzhung du bsnyen dmigs ma gsungs kyang tshul 'di sbyar na legs snyam gyis bkod pa ste/_bzla bya'i sngags ni/_oM badz+ra kro d+ha ma hA shrI he ru ka badz+ra kro d+hI shwa ri hU~M phaTa?:_kyis gtso bo dang*/_de bzhin du/_oM bud+d+ha shrI he ru ka bud+d+ha kro d+hI shwa ri hU~M phaTa?:_shar/_oM rat+na shrI he ru ka rat+na kro d+hI shwa ri hU~M phaTa?:_lho/_oM pad+ma shrI he ru ka pad+ma kro d+hI shwa ri hU~M phaTa?:_nub/_oM karma shrI he ru ka karma kro d+hI shwa ri hU~M phaTa?:_byang ste rgyud kyi khro bo bzhi'o/__oM guh+ya shrI he ru ka guh+ya kro d+hI shwa ri hU~M phaTa?:_shar lho/_oM sa nu shrI he ru ka sa nu kro d+hI shwa ri hU~M phaTa?:_lho nub/_oM yak+sha shrI he ru ka yak+sha kro d+hI shwa ri hU~M phaTa?:_nub byang*/_oM rak+sha shrI he ru ka rak+sha kro d+hI shwa ri hU~M phaTa?:_byang shar te lung gi khro bo bzhi'o/__/de rnams kyi dpal chen po gtso dgu gsal btab la gang 'os bzla zhing*/_gnyis pa 'khor khrag 'thung spyi dril gyi bzlas pa ni/_dzapa khang phyes te dzapa bskul rjes/_gter gzhung las/_khyad par ru lu 'bru brgyad pa:_yongs dril mthar thug bzlas pa'i skabs:_bdag mdun khrag 'thung chen po yi:_tsit+ta rin chen zur brgyad pa'i:_nyi zla kha sbyor lte bar hU~M:_sngags kyi phreng bas bskor ba las:_'od 'phros lus kyi nang kun gang:_sgrib dag dbang dang dngos grub thob:_slar yang sngags kyi 'od zer gyis:_dkyil 'khor rab 'byams thugs rgyud bskul:_de las 'od zer mkha' khyab 'phros:_tha mal snang zhen dbyings su thim:_snod bcud gzhal yas khang dang lha:_sgra kun grags stong sngags kyi dbyangs:_dran bsam 'od gsal la mi rtog pa:_dbyer med kun bzang dgongs pa'i klong:_ma nor ma bcos bsam 'das pa:_brjod bral ye shes mngon du gyur:_oM ru lu ru lu hU~M b+h+yo hU~M:_ru lu 'bum phrag bzhi bzlas pas:_dgongs pa mi 'gyur ting 'dzin thob:_don gnyis lhun grub dpal la spyod:_sa ma ya:_bsdus pa'i skabs 'dir steng khang gi zhi ba zhe gnyis rtsa ba yan lag gi dkyil 'khor bcas gsal 'debs shing ru lu kho na bzla bar gsungs/_gter gzhung du 'bum phrag bzhi gsungs kyang khrag 'thung gtso 'khor thams cad kyi spyi dril chen po yin pas grangs tshad kyang bye ba gcig las mi nyung ba bzla bar gces so/__/dus grangs kyi bsnyen pa thems pa'i rjes tshogs mchod dang gtor ma rgyas spros bcas bdag 'jug gi dbang len bcas/_zhag bdun nam lnga/_gsum ci rigs dang dngos grub len pa'i cho ga bcas mtha' rgyas dang*/_kha skong zhi ba'i sbyin sreg kyang bsnyen pa'i bcu cha 'gro nges dang*/_rjes 'brel myong grol bdud rtsi'i sgrub pa'ang grub na nges par bya zhing mtha' rten bdud rtsi'i chos sman gyi tshe lung bzhin tshe sgrub kyang sbyar na legs pa'i phyir/_tshe 'brang*/_tshe ril chang*/_mda' dar sogs bshams pa gzhung ltar bya/_rtsa ba'i bzlas pa khyug tsam sngon du 'gro ba'am/_las byang gi bstod pa'i rjes/_gang bder/_thugs kar rin chen zur brgyad pa:_mchong gur phub pa lta bu'i nang:_pad zlar hrIHlas tshe dpag med:_dkar po longs spyod rdzogs pa'i chas:_phyag g.yon mnyam bzhag tshe bum ni:_tshe yi bcud kyi gang rgyar gtams:_g.yas pas sna tshogs rdo rje yis:_g.yon pa'i tshe bum kha bkab ste:_rdo rje skyil mo krung gi bzhugs:_longs spyod rdzogs sku'i chas kyi spras:_thugs kar nyi zla'i gwa'u nang:_nr-i yig ljang gu hU~M as mtshan:_gwa'u steng du hrIHyig las:_sngags kyi phreng bas g.yas su bskor:_'od 'phros 'khor 'das tshe bcud bsdus:_gwa'u nang dang bum pa'i nang:_yongs su gang zhing 'phel ba yis:_he ru ka dpal sku yi nang:_tshe yi bdud rtsi'i gang bar bsam:_oM a mA ra Ni dzI ban+ti ye gu ru A pa ri mi ta A yur+dz+nyA na puN+ye puN+ye ma hA puN+ye b+h+rU~M b+h+rU~M b+h+rU~M:_zhes rtse gcig tu bzla/_thun mthar mda' dar g.yab la/_thugs kar tshe dpag med pa yi:_thugs las mgyogs ma'i tshogs spros te:_phyogs bcu'i tshe bcud 'gugs par gyur:_hU~M:_bdud rtsi 'i gang rgya sman gyi lung:_rat+na pad+ma tshe yi lung:_badz+ra pad+ma pho nya spros:_'jig rten gsum po thams cad kyi:_tshe dang sman gyi bcud bsdus la:_gnas 'dir da lta nyid du khug:_mgyogs ma bzhi dang mkha' 'gro bzhi:_srog bdag bzhi dang shugs 'gro bzhi:_srid gsum tshe yi bdag mo rnams:_tshe dang sman gyi bcud 'dir bsdus:_bkra shis bum pa'i nang du bskyil:_skal ldan bdag la bstsal du gsol:_zhes dang*/_hU~M:_tshe bcud snying dbus rten la thim:_rig 'dzin tshe yi dngos grub thob:_ye shes rdo rje'i phyag rgya yis:_rtag pa dam par rgyas btab po:_dz+nyA na badz+ra rak+Sha rak+Sha hU~M zhes rgyas btab bya/_bsnyen tshad 'khyol ba'i tshe gzhung gi dngos grub len pa dang bcas chabs cig gam yang na tshe dbang ltar sgrub rdzas kyi dngos grub len par bya'o/__/gnyis pa nang skor mkha' 'gro'i bskyed bzlas ji ltar bya tshul ni/_tshul 'di'i bsnyen sgrub byed pa'i skabs sgrub pa'i rten du phyi dkyil phyi ru bkod pa ni/_mdun gyi stegs bur zangs kyi maN+Dal steng sin+d+hU ra'i rdul gyis sbags par chos 'byung bsnol ma bris pa'i lte bar me tog dmar po'i tshom bu'i steng many+dza'i khar b+hany+dza mtshan ldan bdud rtsi'i gtam pa/_mkhar ba'i me long la sin d+hU ra'ichos 'byung gi dbus su ba~M/_rtsibs drug la ba~M gyi mdun nas/_e yaM haM laM raM hU~M/_rnams yig ngo nang bstan g.yas bskor du bkod pa la dar dmar gyi gur phub mthar phyi nang gi mchod pas bskor ba dang*/_nang dkyil lus la 'god pa ni/_srog 'khor te dar ras sam shog bu dmar po la bla ma yab yum gyi byang sems dkar dmar/_gnas chen gyi rang byung gi cu gang dang sin+d+hU ra mtshal dang sbyar nas chos 'byung zur drug mu khyud dang bcas pa'i lte ba dang rtsibs la sa bon rnams snga ma ltar bkod/_mu khyud dang por bsnyen sgrub kyi sngags mthar/_sarba bud+d+ha kro d+hI shwa ri kA ya wAk+ka tsit+ta dz+nyA na a be sha ya hrIMHhrIMHpheM pheM dzaHhU~M ba~M hoH_mu khyud gnyis par/_dbyangs gsal rten snying*/_gsum par rdo ra me ris bskor ba la bris rdzas kyis byug nas rab tu gnas te mi lag tu mi brgyud par lus kyi drod dang ma bral bar bcangs gsungs/_gsang dkyil sems la 'god pa ni/_rdzogs rim gyi tshul du 'og nas 'chad par 'gyur ro/__/de ltar sgrub pa'i rdzas rnams tshogs pa dang*/_mar ngo'i tshes bcu sogs khyad par gyi dus tshes bzang po'i phyi thun nam/_srod thun gang bde nas bsnyen sgrub la 'jug_/de yang gter gzhung las/_snang srid gzhir bzhengs dkyil 'khor gyi:_ting 'dzin gsal brtan mthar phyin bya:_zhes gsungs pa ltar sku bskyed pa dbyibs kyi rnal 'byor gyi gsal snang sgrub pa ni/_snod bcud phyi nang gi 'byung ba gang ltar snang yang 'byung lnga dag pa yum gyi mkha' dbyings las ma 'das pa mtshon byed sa gzhi ljang gu'i steng du gzhal yas khang rta bab bzhi pa'am sgo rkyang gi dbus su chos 'byung bsnol ma gdan thabs mthing nag kha khyer sngo skya can gyi mtha' bskor du dur khrod brgyad dang pad+ma rwa ba srung 'khor me ris bskor ba'i dbus su sna tshogs pad+ma 'dab bzhi'i lte bar pad nyi baM ro'i steng du/_srid pa'i kun 'byung las nyon sdug bsngal gyi rten tshogs drug dag pa don gyi bzhugs tshul ye shes mkha' 'gro drug gi dkyil 'khor du gdod nas gnas pa'i snang cha 'bum phrag mkha' 'gro'i gtso mo gsang ba ye shes stobs ldan ma'i rnam par bzhengs pa'i 'khor du tshogs drug dag pa'i 'khor gyi DA ki drug dang bcas pa'i zhal zhi ma khro phyag mtshan rgyan chas yongs su rdzogs pa 'ja' 'od me dpung gi dbus na bzhugs pa bskyed chog gzhung ltar gsal ba/_nang skor khro bo'i byang bu khrigs bsdebs dang*/_mkha' 'gro'i las byang lto sbyar ba'i las rim rdzogs par btang la spyi ltar gsal snang legs par bsgrub/_des skyo ba'am/_bogs 'byin gyi slad du gsung bzlas pa'i bsnyen sgrub las gsum bya ba ni/_rang nyid bde ba'i stobs ldan ma'i:_thugs kar tsit+ta rin po che:_zur drug mchong gur lta bu'i dbus:_nyi zla'i gwa'u kha sbyor nang:_baM yig mar me ltar 'bar ba'i:_nA da las ni sngags kyi phreng:_mgal me lta bur 'khor ba yis:_bde chen rtsol med skye bar bsam:_zhes pa ltar/_thugs rin po che zur drug smug po'i dbus su nyi zla'i gwa'u'i nang baM yig mthing nag gi nA da las byung ba'i sngags phreng spros te mdun nas zhal nang bstan gyi g.yas su 'khod pa la g.yon du mgal me ltar 'khor ba'i 'od kyis lus kyi nang gang*/_mun khang du sgron me btegs pa ltar las nyon gyi sgrib pa sangs kyis bsal/_bde chen lhan skyes ye shes kyi snang ba rgyas par mos la 'gog bzlas bya bar gsungs/_grangs bsnyen sngags 'bum phrag bzhi bzla/_mkha' 'gro'i thugs rin po che mchong gur phub pa lta ba'i dbus su chos 'byung bsnol ma'i lte bar nyi zla'i gwa'u kha sbyor gyi nang baM gyis mtshan pa'i chos 'byung gi zur drug la ngo bo lha la rnam pa sa bon/_don dam tshogs drug dag pa'i ye shes drug gi bdag nyid can gyi sngags kyi rang sgra sgrogs pas rab 'byams phyogs dus kyi zhing gi mkha' 'gro 'bum phrag yangs pa'i chom bu thams cad bde ba chen po'i mchod pas mnyes shing thugs rgyud bskul te bdud rtsi'i rnam par zhu ba char du bab pa rang la thim pas sku gsung thugs kyi byin rlabs ma lus pa rgyud la zhugs par mos nas sgrub pa'i sngags khri phrag bzhi bzla/_sgrub rten thod pa'i mdun du b+hany+dza mtshan ldan bdud rtsi'i ril bu'am chos sman dang*/_dar sna rin chen 'bru sman gyis bkang ba dar dmar gyis bkab pa gsar du bshams la/_bsnyen sgrub kyi bzlas pa grub pa'i rjes/_rang mdun dur khrod 'jigs pa'i dbus:_keng rus brtsegs pa'i sogs nas/_dngos grub kun gyi dbyig tu bsam:_oM badz+ra hA na d+ha hA na da ha na sid+d+hi hU~M:_zhes las sbyor gyi sngags khri gcig grangs tshad du gsungs/_rtag mtshan 'gyangs na/_sarba sid+d+hi hrIMHhrIMHpheM pheM sdus sdus wA shaM ku ru dzaHhU~M ba~M hoH_las sbyor gyi sham bur 'di btags te bzla bar bya'o/__/gang ltar yang*/_bsnyen sgrub grub nas dngos grub blangs ba gtang rag sogs spyir ltar dang*/_rten rnams 'bral med du 'chang bar bya'o/__!__gsum pa thugs 'od gsal de kho na nyid kyi rnal 'byor ni/_gsang dkyil sems la 'god pa ni:_mtshan med zab mo'i rdzogs rim ste:_thun dang thun mtshams thams cad du:_sngon 'gro'i rim pas rgyud sbyangs nas:_zhes gsungs pa ltar/_rdzogs rim rlung sems gnyis med ni/_gsang ba nges don gyi mkha' 'gro'i dkyil 'khor sems kyi bdag nyid du gdod nas bzhugs pa'i gnas lugs nyams su len pa la dngos gzhi'i nyams rtogs skye ba sngon 'gro mthar phyin pa gal che bas na sngon 'gro bsags sbyangs rnams nang skor gyi thog ma'i skabs ltar ci nus su nyams su len pa dang*/_khyad par nges 'byung dang dad mos brtson 'grus dran shes kyi gsal 'debs gsha' ma rnams dang*/_dngos gzhi'i nyams len gnyis/_gcig grogs gcig gis bya ba ni/_'di tsam du ma zad gong 'og thams cad du shes par bya dgos shing*/_dngos gzhi mkha' 'gro'i bskyed bzlas khyug tsam sngon du btang ste/_bde ba'i stan la lus gnad bsrang:_rlung ro bsal zhing 'og gi rlung:_yid tsam 'then la lte bar bskyil:_lus sems bde bas khyab par bsam:_zhes gsungs pa ltar/_stan bde ba la lus gnad rnam snang chos bdun dang ldan pas lus gnad drang por bsrang la rlung ro sum phrugs su bsal/_'og rlung yid tsam 'then la lte bar bskyil bas lus sems thams cad bde nyams kyis khyab par dmigs/_dbang po'i sgo rnams nang du mi bsdu zhing khyad par mig mi 'gul bar/_bar snang du ha rer gtod/_rig pa mig la gtad pas ngar thon te gsal stong brjod med kyi nyams skyes pa'i ngang bskyangs/_bde gsal gyi nyams des drangs pa'i rang sems gnyug ma'i gshis lugs rnam rtog gis ma dkrugs pa'i chos nyid rjen pa rtog bral bsam 'das chen po'i nyams myong skyes pa'i rang ngo skyong*/_mdor na phyi gtso 'khor gyi rnam par snang ba'i mkha' 'gro'i dkyil 'khor rnams nang rang rig bde gsal mi rtog pa'i ye shes gcig gi cho 'phrul las gzhan du med par la bzlas pas don gyi ye shes rlung sems rtsol med kyi byed pas rgyud la 'dren pa zab myur nyams len bde ba'i rdzogs rim rno khyad can thun min te thun dngos gzhi dang thun mtshams thams cad kyi skabs su nyams len ci nus su 'bad pa gal che zhing*/_der ma zad lhan skyes don gyi ye shes dngos rgyud la 'dren pa la sngags lam gyi thabs thams cad las zab shos stong nyid shes rab kyi nus pa yin la/_rten 'brel de'i dbang gis mkha' 'gro'i bskyed rdzogs zab mo 'di lta bu ni/_lam 'di nyams su len pa'i bogs 'byin du med du mi rung ba yin phyir lhag par nyams su len pa gal che'o/__/rtsa ba'i gnyis pa rdzogs pa'i rim pa la/_sngon 'gro'i khrid kyi byin rlabs brda bzhi bstan pa/_dngos gzhi brda bzhi'i sgom tshul bstan pa/_rjes 'brel shan 'byed/_nam mkha'i sgo 'byed do/__/dang po ni/_mdo byang las/_khrid kyi byin rlabs brda bzhi bstan pa dang:_sogs kyis gsal ba ltar lo chen bai ros spang mi pham mgon po dang*/_g.yu sgra la ru dam pha bang nag po'i steng nas gnang ba mtsho rgyal gyi gter rgyas gdams pa gsungs pa lo rgyus snying gi ti ka ru'ang zur tsam gsal ba ltar/_'phro lus/__!_gsum pa gsang skor man ngag sde'i skor gyi khrid la/_lo rgyus las/_dngos gzhi khrid gsum gyis grol zhing:_zhes gsungs pa ltar 'chad pa la/_gsang skor khrid kyi rim pa las/_gsang skor khrid kyi rim pa ni:_gzhi lam 'bras bu'i bstan pa'o:_zhes gsungs pa ltar gzhi gdod ma'i gnas lugs/_de kho na nyid mngon du byed pa'i lam/_mthar phyin 'bras bu'i sa bshad pa'o/__/dang po la'ang gnyis/_'khrul grol gyi gzhi dang*/_grol gzhi dngos kyi dpe don bshad pa'o/__/dang po ni/_dang po nam mkha' lta bu'i sems:_rig dang ma rig 'khor 'das kyi:_sa mtshams grib so tsam las med:_ces pa ste/_/'khor 'das gang du yang ma phye pa'i dang po chos nyid cir yang ma yin pa rgya chad phyogs lhung dang bral pa/_rang gdangs gsal la 'grib pa med pa/_stong la go 'byed pa/_rig la 'char ba'i gzhir gyur pa/_dbyings su gnas la phyir ma 'phros pa/_snang bar gsal yang ngang las mi g.yo ba/_rig par gnas la rtog par ma 'gyus pa ni/_gzhon nu bum pa'i sku ka dag chen po zhes bya ba nam mkha' lta bu'i chos nyid de/_de'i ngang du sku dang ye shes kyi chos rnams so so ma yin tha dad du mi gnas pa chu'i dbyings na gzugs brnyan ltar bzhugs la de ni chos nyid dag pa'i ye gdangs zhes bya zhing*/_rtog dpyod 'char ba'i 'khrul gzhi dang*/_rang rig pa'i grol gzhi gnyis 'char rung du yod pa la ye shes kyi rtsal g.yos pas phyir gsal du shar nas/_'od lnga lhun grub kyi gdangs 'ja' tshon lta bu dang*/_longs sku'i zhi khro'i dkyil 'khor/_rang bzhin sprul pa'i zhing lnga/_'gro drug gi 'jig rten/_thub pa drug dang bcas pa ste/_'od sku zer du shar ba 'khor 'das phyogs ris med/_gang la'ang rnam par mi rtog pa'i gzhi snang chen po rig pa'i cho 'phrul du shar ba'i tshe/_gdod ma'i mgon po kun tu bzang po dbyings nas ye shes skad cig dang po nyug tsam snang bar shar dus/_rang snang du hrig gis rig pas lus dang grib ma bzhin grol 'khrul gyi bye brag phyed de gzhi snang kun byed byang chub kyi sems nyid nang gsal du thim nas/_ma rig pa'i sgrib pa wal gyis bsal nas/_gdod ma'i dbyings su 'pho 'gyur med par khyad chos drug gis grol ba ste/_lung ston byed kyi slob dpon med par rang byung gi sangs rgyas la lung las ma byung ba'i man ngag mnga'/_gzung 'dzin kun brtags kyi ye shes zad sar 'khyol bas ye shes nyid rang gsal ba'i rang rig tshogs gnyis kyi rgyu rkyen gzhan gyis bskyed pa med pas ye grol gyi 'bras bu mthar phyin pa/_bzhin dang me long gi gzugs ltar 'od gsal rang snang rig pa nyid de ltar snang bas rang shar/_'khrul med ye yin chen po rtogs pas rang grol du gyur ma thag dbyings nas shar ba'i snang ba lung ma bstan grol 'khrul gyi gzhi can nyid/_rang snang rig gdangs su thag chod de ngo shes pa'i rig pas lhan skyes kyi ma rig pa bcom/_rig pa rgyun chad med pas bdag nyid gcig pa'i ma rig pa bcom/_rang snang la gzung 'dzin med pas kun brtags kyi ma rig pa bcom/_de'i tshe gdod ma'i ngang las yud tsam snang zhing g.yos kyang de ma thag rang rig pas btsan sa zin te rig mkhan nyid kyang grol nas rig dang rig gdangs shan phye nas 'pho 'gyur med pa'i ngang nas/_gzhan don lhun grub tu thugs rje dang phrin las/_byin rlabs kyi cho 'phrul/_gdul bya mos pa'i rang snang du 'bad rtsol med par rang byung ba'o/__/khams gsum sems can rnams dbyings snang skad cig ma rang snang du ngo ma shes pas 'khrul pa rmi lam gyi 'jigs snang ltar je rags su song ste rgyu'i rkyen mi rtog pa'i cha ngo ma shes pa bdag nyid gcig pa'i ma rig pa gzhi la med kyang nges pa med pa'i lhun grub kyi snang ba la ye ldan gyi tshul/_rang bzhin 'od gsal rang ngo ma shes pa'i lhan skyes ma rig pa sgo gnyis shar ba dang dus mnyam gyi tshul/_thugs rje rang rig tu shes pas gzhan du bzung ba kun brtag ma rig gzung 'dzin rags par shar ba phyis byung gi tshul du rgyas pas/_bdag po'i rkyen rig pa/_dmigs pa'i rkyen snang ba/_de ma thag pa'i rkyen de gsum dus mtshungs su tshogs pa/_'od lnga yul gyi 'khrul gzhi/_rig pa sems kyi 'khrul gzhir gyur nas/_gzugs med/_gzugs khams/_'dod khams kyi gnas/_'gro drug gi gnas don lus su snang ba ste bde sdug gi 'khrul snang mtha' yas pa la spyod pa ste/_des na 'khor 'das gnyis gcig char rig pa gcig gi chos nyid dang rang gdangs las gzhan du med kyang rang ngo rig ma rig gi gnad la brten nas grol 'khrul gnyis byung ba snang mun gyi grib so tsam las med pas lam khregs chod dang thod rgal gyi gnad mngon du byas te bsnun pas/_yin lugs ji bzhin mngon du gyur nas rig gdangs glo bur gyi 'khrul pa rang sangs te/_dbang rnon tshe 'dir grol nus pa'i rgyu mtshan yang de yin no/__/gnyis pa grol gzhi dngos kyi dpe don bshad pa la/_rgyal bu dmangs su babs pa na:_blon pos ngo shes dbang bskur tshe:_rgyal pos khams gsum dbang du sdud:_de bzhin rang rig byang chub sems:_de yi mtshan nyid bstan par bya:_zhes pa ste dper na 'khor lo bsgyur ba'i rgyal rigs kyi khye'u dwa phrug tu gyur bas rkang 'khyams nas dmangs babs te yul kun tu 'khyar ba na blon po chen po zhig gis de'i gnas tshul ngo shes te rtsad bcad nas pha yi rgyal sar dbang bskur te mnga' gsol ba'i tshe des kyang rigs dang mthun pa'i las brtsams nas rgyal srid bzung zhing bskyangs bas thabs dang stobs kyis khams gsum gyi khyon na gnas pa'i che rgu 'khor dang bcas pa rang gi mnga' 'og tu bsdus nas bran bzhin bkol te 'bangs kyang bde la bkod cing rgyal po'i mnga' thang yang rgyas par gyur ba bzhin/_rang la ye nas gnas pa'i rig stong 'od gsal byang chub sems kyi chos nyid rang dang 'du 'bral med par bzhugs kyang rang gdangs rang snang du ngo ma shes te 'khrul snang rang rgyud du spyod pas 'khor bar kha phyir bltas kyis 'khyams pa'i tshe kun byed byang chub sems de yi mtshan nyid don gyi gnas lugs ma nor ba'i gnad gsang bla ma'i man ngag gis mtha' bstan te nyams su blang bas 'khrul pa gzhi la dag nas sku gsum ye gnas chen po'i dgongs pa mngon du gyur pas grol te phyir mi ldog pa'i btsan sa zin pa'i thabs kyi gseng lam mthar thug tu nges pas na bskal bzang dag gis nyams len gyi snying por bya 'os so/__/spyir rdzogs pa chen po'i nyams len gyi lam gnad thams cad gzhi dang gzhi snang gi grol 'khrul gyi shan 'byed 'di shin tu gal che zhes yang yang gsungs bas 'dir yang cung zad spros te bshad pa'o/__/gnyis pa de nyid mngon du byed pa'i lam bshad pa la/_lta ba/_sgom pa/_spyod pa lam du byed pa'o/__/dang po lta ba lam du byed tshul ni/_gsal zhing rnyogs pa med pa la:_rig pa rang byung stong pa'i ngang:_gsal stong dbyer med rgyun chad bral:_'gyur ba med cing kun tu rtog:_'di yin med pa ngos bzung bral:_'on kyang myong ba can gyi gdangs:_nges pa can du gnas pa'o:_/zhes pa ste/_gtan la dbab bya rig pa'i rang bzhin 'od du gsal bas 'khor 'das sna tshogs su snang bar gyur kyang grol 'khrul gang gi skabs su yang rang gi ngo bo ka dag ye grol chen po'i gshis lugs la ni nyon mongs dang 'khrul pas rnyogs te sgrib par gyur ba med cing*/_thugs rje kun khyab kyi rang gdangs 'gag med cir yang 'char ba'i phug ded na chos nyid skye 'gag gnas gsum dang bral ba las ma 'das pa'i phyir/_'khrul rtog sems kyi byung tshod thams cad rtsad bcad pas rang byung rig pa'i rtsal las byung zhing gnas pa ltar snang yang don la byung gnas kyi dus nyid nas stong pa'i ngang las ma 'das pas/_skye med chos sku/_gnas med longs sku/_'gag med sprul sku ste ye shes gsum ldan gyi gnas lugs myong bas gtan la phab nas/_'od gsal lhun grub dang ka dag stong nyid kyi dbyings las nam yang 'du 'bral med pa'am/_dbyer med pa'i yin lugs la rang bzhin bab kyi dran pas ngos zin par byas te myong bas 'phro gnas gang gi skabs su tha mal du ma 'khrul pas rig pa'i ngo bo rgyun chad med par 'char zhing*/_rig rtsal sems kyi 'phro 'du ji ltar byung yang dgag sgrub med pa'i gshis la bzhag pas rtsal rang thim song nas ngo bo gshis lugs la mnyam rjes gang gi skabs su yang 'pho 'gyur bri gang med cing dus kun rtag pa dam pa'i bdag nyid chen po ste yid dpyod blo yi spyod yul las 'das kyang so so rang rig pa'i ye shes kyis nyams su myong bas dngos po dang*/_mtshan ma'i chos kyis 'di yin gyi gtad so med pas snang stong phyogs re'i mtshan rtog gi ngos bzung thams cad bral zhing*/_'on kyang bem chos dang tha mal du yengs la phyal bar shor ba/_mi rtog lung ma bstan ma yin pa so so rang rig gi ye shes kyi nyams su myong ba'i spyod yul can gyi bdag nyid ngo shes nang nas skyes pas the tshom gyi smag dang bral ba'i nges pa can kun gzhi lung ma bstan/_kun gzhi'i rnam shes gsal rig gi cha las 'das pa'i tshul du rtogs pa ste/_kha phyir bltas thos bsam gyi rigs pas dpyad pa'i lta ba gtan la phab pa lta bu ma yin pa don gyi yin lugs nang gi nyams myong gis ngo sprad pas ming lta bar btags kyang don sgom pa yin pas 'khrul pa'i 'phrul 'khor bshig pa la ches zab pa'o/__/gnyis pa sgom pa bshad pa la/_sngon 'gro/_dngos gzhi/_rjes kyi nyams len bshad pa'o/__/dang po ni/_de nyid mthong bar byed pa'i lam:_rgyud sbyang tshogs bsag sdom pa blang:_zhes pa ste/_dngos gzhi nyams len tshul bzhin rgyud la skye ba la sngon 'gro'i bsags sbyang gis rgyud dul ba shin tu gces pa'i phyir nges 'byung gi blo bskyed pas/_thar pa'i gnas su blo bkol ba dang*/_lam de sgrub pa'i rten rnyed par dka' zhing*/_mi rtag pas brtson 'grus bskul te/_rgyu 'bras yid ches kyi lta bas gzhi bzung nas/_lam gyi sgo 'byed skyabs 'gro/_lam gyi srog rtsa sems bskyed/_lam gyi gegs sel rdor sems/_lam gyi bogs 'byin tshogs bsags/_lam gyi snying po bla ma'i rnal 'byor rnams la brtson pas mthar bskyal zhing*/_rgyud dran shes dang ma bral ba'i sdom ldan du sgrub par bya'o/__!__gnyis pa dngos gzhi'i nyams len la/_gzhi dbang gis bzung*/_lam bskyed rdzogs la 'bad/_'bras bu mthar thug tu la bzla'o/__/dang po ni/_spros bcas spros med shin tu dang:_rab tu spros med dbang bzhi zhu:_zhes pa'i bar te/_sbyang bya dri ma rags pa lus ngag yid gsum cha mnyam/_phra ba rlung thig le ye shes kyi khams la/_sbyong byed lam dbang gi rim pa spros bcas bum dbang rdul tshon la brten pa/_spros med maN+Dal dang bum pa la brten pa/_shin tu spros med brda la brten pa/_rab tu spros med sems la brten nas bskur bas dkyil 'khor dang dbang bskur tshul bcas bzhi rer nges pa dang*/_sgom pa'i lam yang 'og nas 'byung ba bzhin bskyed rdzogs rdzogs chen bzhir nges pa dang*/_'bras bu yang sku bzhi'i go 'phang thob bya'i dbang gis bzhir nges shing*/_spyir gsang sngags kyi dbang thams cad don gnad dbang bzhi las mi 'da' mod/_'di ni bzhi pa tshig gi dbang la nang gses bzhir dbye bar gsungs pas mtshan nyid dang ldan pa'i bla ma las/_snod dang ldan pa'i slob mas zhu zhing lam sbyang pa las/_dbang gis ma smin na nyams su len pa lta ci/_dpe tsam yang blta bar mi dbang bas thog mar gsang sngags chos kyi snying po dbang la nan tan du bya dgos so/__!__gnyis pa lam bskyed rdzogs la 'bad pa la'ang gzhung las/_spros bcas bskyed rim spros med du:_rtsa rlung bsgom zhing lus gnad bsnun:_shin tu spros med bde ba sbyang:_rab tu spros med de nyid blta:_zhes pa ltar rtsa rlung zhi khro bskyed rim/_bde drod mi rtog pa'i rdzogs rim gnyis las/_dang po la'ang*/_byin rlabs lam byed rig 'dzin bla ma yongs rdzogs kyi bskyed rim dang*/_dngos grub lam byed yi dam pad+ma'i snying thig zhi khro'i bsnyen sgrub bya tshul lo/__/dang po ni/_mdo byang las/_man ngag skor la thog mar pad+ma bdag:_rgya gar yul nas dka' ba mang po yis:_mnyes pa gsum gyis slob dpon bsten pa rnams:_thams cad ye shes sku can sha stag ste:_de dag sgrub pa'i tshul ni 'di lta ste:_bla ma yongs rdzogs sgom pa'i gseng lam zhes:_byin rlabs spyi las khyad par mtshan dang ni:_sku yi rnam pas sngon du skus dbang bskur:_gsung la gdams pa thugs la rdo rje'i glu:_dgongs pa'i nyams skyong bzhi yis rdzogs pa la:_dbang bskur dgongs pa mthar phyin zhes bya'o:_zhes pa ltar/_rig 'dzin bla ma'i 'od gsal ye shes kyi sku can brtan g.yo srid zhi kun khyab rdul dang dngos po'i chos las 'das kyang snang stong mkha' khyab mkha'i rdo rje sgyu ma dang 'ja' tshon ltar shar ba mtshon byed sku 'bag gi rnam pas bskur ba bum dbang*/_don gyi dgongs pa bsam gyis mi khyab pa'i dbyings rang byung rdo rje gsang ba'i tshig tu shar ba grol ba drug gi bdag nyid can gsung rdo rje'i nA da'i glus ngo sprod pa gsang dbang*/_thugs zab zhi ye shes kyi dgongs pa'i rtsal rdo rje'i glu don la slob mas kyang mnyam par bzhag pas byin rlabs 'phos pa sher dbang*/_slob ma'i rgyud la ye shes kyi drod skyes te don gyi 'od gsal mngon sum nyams myong gis ngo 'phrod pas dgongs pa'i nyams skyong ba bzhi pa ste/_rdul tshon sogs spros bcas mtshan ma'i chos la mi ltos par khyab bdag bla ma'i zag med ye shes kyi sku gsung thugs rdo rje'i dkyil 'khor la brten nas don gyi dbang bskur ba ste/_des na dbang bzhi pa la nang gses bzhir dbye pa'i tshul yin la/_spyir phyi nang gsang skor gsum du lam gyi yan lag rdzogs pa'i ched yi dam dang mkha' 'gro'i dbang dang sgrub thabs mang du 'byung ba rnams ye shes rnam pa thams cad pa'i cho 'phrul cir yang 'char ba'i mtha' gcig tu rtsol med kyi lam la 'gal 'dur mi gnas te/_gang zag dbang rab cig char ba rnams ni cir snang ye shes kyi rol rtsal las ma 'das pas bskyed bzlas rdzogs gsum gang nyams su blangs kyang a ti'i lam las ma 'das la/_dbang bskur rim can pa dag dad pas theg rtser mos kyang rtsol med ye shes kho na lam khyer mi nus pas ji ltar bstan pa bzhin nyams su blangs nas mthar thug rtsol med kyi sa la bskyal ba'i gnad kyis bskyed bzlas rdzogs pa'i rim pa thams cad shin tu rgyas par bstan pa yin cing*/_lam gyi ngo ti mthar thug gi dbang dang nyams len bcas rig 'dzin bla ma'i rdo rje bzhi'i dkyil 'khor du smin par byed pa nyid yin par mdo byang rdo rje'i tshig gis bstan pa ltar gnad che bas spros te bshad pa'i gnad sde gsum char gyi skabs shes par bya dgos so/__/de ltar don dam nang gi dbang zhes smin pa'i slob mas lam dngos bskyed bzlas ji ltar bya tshul ni/_gzhung mthun rig 'dzin bla ma'i sku 'bag mdun/_phyi nang gi mchod pa sogs spros pa che chung skabs bstun las mtha' gcig tu spar khab mi dgos snyam/_las byang gsang skor rig 'dzin bla ma'i sgrub thabs dang khro bo'i byang bu khrigs bsdebs gnyis gung bsdebs kyis btang ste/_nyams len dngos gzhung las/_dag pa rab 'byams bskyed rim la:_gsal brtan dag pa mthar phyin bslab:_ces gsungs pa ltar snang srid gzhir bzhengs dag pa rab 'byams sku dang ye shes kyi snang ba tshad la phebs pa'i zag med ye shes kyi sku can tshom bu'i tshul du bzhugs bzhin gsal btab/_snang cha sku yi byad dbyibs/_bzhugs stangs/_phyag rgya sogs zhib par gsal zhing*/_stong cha de kun rig pa ka dag gi rang rtsal las gang la'ang mi gnas/_cir yang ma grub bzhin cir yang 'char ba'i gnas lugs dang dbyer med du bsres te mnyam par bzhag_/snang stong de gnyis kyang 'gal 'dur mi gnas pa zag med sku dang ye shes kyi yon tan gdod nas 'du 'bral med pa'i dag pa dran pas tha mal zhal phyag gi zhen rtog sbyang*/_gsal brtan dag gsum gyi ting 'dzin skye ba 'am/_bogs 'byin slad bzlas pa bya ste de la'ang bsnyen sgrub las gsum las/_dang po ni/_ye shes sems dpa'i thugs dbus su:_tsit+ta mchong gur smug po'i klong:_nyi zla kha sbyor lte bar hrI de mthar rdo rje'i sngags kyis bskor:_rtse gcig sems bzung bzlas pa yis:_ye shes 'od zer mkha' khyab 'phros:_rtsa gsum rgyal ba rab 'byams dang:_khyad par 'od gsal rdzogs chen gyi:_rig 'dzin bla ma'i thugs rgyud bskul:_sku gsung thugs kyi byin rlabs dbyig:_lha sngags phyag mtshan 'od zer gyi:_rnam par spyan drangs hrIHla thim:_byin rlabs dbang dang dngos grub thob:_dbyings rig dbyer med ngang nas bzla:_zhes dmigs pa'i ting 'dzin dang bcas/_oM AHhU~M badz+ra ma hA gu ru shrI sing+ha sarba sid+d+hi hU~M phaTa?:_ces bsnyen sngags 'bum phrag bzhi bzla/__gnyis pa sgrub pa ni/_slar yang thugs srog sngags phreng las:_'od 'phros longs spyod ston pa dang:_'khor tshogs rgya mtsho'i thugs dam bskul:_de rnams gsang gsum 'od zer gyis:_snod bcud tha mal gzung 'dzin sbyangs:_lha sngags ye shes phyag rgyar sad:_tshur 'dus dngos grub rnam gnyis thob:_byin rlabs brtan cing nus ldan bsam:_zhes gsal btab ste/_oM badz+ra ma hA gu ru sarba sid+d+hi hU~M phaTa?:_ces sgrub sngags 'bum phrag gsum bzla/_sgrub pa'i sngags rig 'dzin so so'i mtshan sngags bzla bar 'dod na skabs thob gtso 'khor so sor sems 'dzin spro bsdu bya bas/_oM gu ru in+d+ra b+hU ti hU~M:_oM gu ru pad+ma saMb+ha wa hU~M:_oM gu ru bi ma la mi tra hU~M:_oM gu ru dz+nyA na sU tra hU~M:_oM gu ru hU~M kA ra hU~M:_oM gu ru he ru ka hU~M:_oM gu ru nA gardzu na hU~M:_oM gu ru pra b+ha hasti hU~M:_oM gu ru d+hA na saMskr-i ta hU~M:_oM gu ru karma in+d+ra nI la hU~M:_oM gu ru rom+bu gu h+ya hU~M:_oM gu ru shan+tiM gar+b+ha hU~M:_zhes mtshan sngags re re bzhin bzla/_bsnyen sgrub rgyas par longs na mtshan sngags re re bzhin 'bum re bzla/_bsnyen sgrub 'bring po'i dbang du byas na khri tsho re bzlas kyang rung ngam snyam/_gsum pa las sbyor ni/_thugs srog sngags phreng bcas pa las:_'od zer lcags kyu mkha' khyab 'phros:_rang gzhan bla tshe yar nyams dang:_'khor 'das srog gi dwangs ma'i bcud:_'chi med bdud rtsi'i rnam par drangs:_thugs srog la thim gzi byin 'bar:_sgrib dag tshe dang bsod nams rgyas:_ye shes rdo rje'i srog 'grub bsam:_oM AHhU~M badz+ra ma hA gu ru A yur+dz+nyA na sarba sid+d+hi hU~M:_zhes tshe dzapa? 'bum phrag gcig grangs tshad du gsungs/_tshe 'gugs kyang nang sgrub rig 'dzin bla ma'i skabs ltar sbyar/_mchog gi las sbyor thun mong ma yin pa ni/_gzhung las/_khyad par mchog gi las sbyor ni:_dbyings kyi rang ngo rjen par bskyang:_rig gdangs lu gu rgyud la gzir:_nyin mtshan mun pa'i rnal 'byor gyis:_snang bzhi mthar phyin tshe 'dir 'grub:_ces gsungs pa'i don rgyas par dbang bzhi pa'i lam gyi skabs su 'chad 'gyur ltar shes par bya'o/__/bsnyen bzlas grub nas sman raka gtor ma sogs spros bcas yin na dngos grub len pa spyi ltar bya zhing*/_bsnyen sgrub rdzogs pa dang tshogs rgyas par 'bul zhing dbang len gyi dmigs pa yang yang bgyis pas don grub bo/__!__gnyis pa dngos grub lam byed yi dam pad+ma'i snying thig ji ltar nyams su len tshul/_zhi khro sbrag sgrub dang khro bo bka' brgyad gnyis/_dang po la/_bskyed rdzogs gnyis/_bskyed rim la yang*/_bsnyen sgrub gnyis las/_dang po ni/_sgrub rten man shel zur drug pa dang mchod pa sogs phyi skor yi dam zhi ba ltar la/_phrin las kyi chings gsang skor khro bo'i byang bu khrigs bsdebs la/_dngos gzhi/_a:_ma bcos gsal rdzogs kun tu bzang:_zhal phyag mtshan ma sogs nas 'gyur med yong grub ngang du rdzogs:_bar gyi gsal gdab/_dug gsum ye dag rdo rje gsum:_sogs bstod pa'i mthar/_spro na lha la sems bzung nas:_zhi ba'i bsnyen sngags bzla ba 'am:_zhi ba'i spyi dril dzapa? sngags bzla:_zhes gsungs pa'i/_rig stong gnyug ma'i snang cha gzhir gnas su kun bzang yab yum gyi rnam par bzhengs pa gdan gsum dkyil 'khor rgya mtsho gcig tu rdzogs pa'i rigs kun khyab bdag chen por rtse gcig tu dmigs pa'i gsal snang sgrub/_de la goms na zhi ba bzhi bcu zhe gnyis rang byung yongs grub kyi 'khor lo gdod nas gnas pa snang cha 'gag med lus dkyil gyi tshul du gsal btab la bsgoms/_zhar byung bzlas pa la/_a:_brjod med 'bru gcig yid kyis bzla:_zhes gsungs pas rlung rig a gsum gcig tu bsres la bar rlung dang sbrags a shub bur bye ba sogs ci nus su bzla/_skabs ji ltar rigs par zhi ba yongs rdzogs sam kun bzang gi thugs kar nyi zla'i gwa'ur a yig mthar sngags phreng gis bskor ba las spro bsdu spyi ltar bya bas/_oM bod+hi tsit+ta sa man+ta b+ha dra a:_zhes 'bum phrag bzhi tsam bzla ba ni phyag rgya gcig pa la brten pa'i bsnyen pa'o/__/gter gzhung las/_spro na lha la sems bzung nas:_zhi ba'i bskyed sngags bzla ba'am:_zhi ba spyi dril dzapa? sngags bzla:_zhes gsungs pa ltar spro na legs kyang*/_'dir zhi ba'i sgrub thabs drag po gnas bsgyur dang sbrags te bzlas na 'brel chags su 'byung zhing 'gal ba med par bsam nas phyi ma gtso bor byas pa'o/__/phrin las kyi thog mtha' sngar ltar la dngos gzhi lha bskyed skabs/_ting 'dzin gsum ni/_hU~M:_kun gzhi mi dmigs rnam par stong:_AH_rang bzhin gsal ba kun la khyab:_oM:_thugs rje sna tshogs sprul sgyur shar:_thugs rje'i 'od kyis snod bcud sbyangs:_las gzhung gi_/ye nas rnam par dag pa'i zhing:_sogs nas/_gnyis med mnyam sbyor zung 'jug bsgom:_zhes gsal btab nas/_byin rlabs 'gugs bstims sogs byang bu ltar bstod pa'i bar btang rjes/_b+h+rU~M bi shwa bi shud+d+he dz+nyA na tsakra maN+Da la b+h+rU~M:_oM bo d+hi tsit+ta ma hA su kha dz+nyA na d+hA tu AH_phaTa? dzaHsa bdag mdun so sor dzapa? khang phyes te/_hU~M_stong gsum 'jig rten thams cad sogs nas/_lhun gyis grub pa'i rang bzhin bsgom/_zhes dzapa? kyi dgongs pa bskul te/_snang ba thams cad zhi ba'i sku:_grags pa thams cad sngags kyi dbyangs:_rig pa rtog med 'od gsal dbyings:_mchod sprin rgya mtsho'i zhing khams khengs:_phrin las du ma 'gro ba bsgral:_mkha' khyab rgyal ba'i dkyil 'khor nyid:_du ma ro gcig ngang du rdzogs:_zhes pa'i spro bsdu dang bcas/_lha sngags rgyas pa btang na/_rgyas par rgyud bzhin snying po bzla:_zhes gsungs pa ltar 'god pa la/_oM badz+ra satwa A:_gtso bo rdor sems/_oM dzi na dz-ika?:_rnam snang*/_swa rat+na d+hr-ika?:_rin 'byung*/_a~M a ro l-i ka?:_snang mtha'/_hA pradz+nyA d+hr-ika?:_don grub/_mU~M d+hA ti shwa ri:_dbyings phyug:_lA~M de Sha rA ti:_spyan ma/_mA~M mo ha ra ti:_mA ma ki_/pA~M rA ga ra ti:_gos dkar/_tA~M badz+ra ra ti:_sgrol ma/_hU~M k+ShiM hi rA dza ya:_sa snying*/_trA~M a g+har+b+ha ya:_nam snying*/_hrI ha hU~M pad+ma pra da ma:_spyan ras gzigs/_dz+riM ku ru pA Ni:_phyag rdor/_hU~M lA s+ye sa ma ya hU~M:_sgeg ma/_trA~M mA l+ye sa ma ya ho:_phreng ba ma/_hrI gIrti rA go haM:_glu ma/_aHnIrti rA ga ya mi:_gar ma/_mai tri d+hA ra ni swA hA:_byams pa/_thiMlha ni s+sa raM b+ha ya swA hA:_sgrib sel/_hU~M swA rA dza ya swA hA:_kun bzang*/_mU~M shrI a rA ga ya swa hA:_'jam dpal/_hU~M puSh+pe a be sha:_me tog ma/_dza d+hU pe pra be sha:_bdug pa ma:_ba~M dI paM su gi ni:_mar me ma/_ho gan+d+he tsit+ta:_dri chab ma/_oM mu ne kreM swA hA:_lha yi thub pa/_oM mu ne trU~M swA hA:_lha min thub/_oM mu ne sru~M swA hA:_mi yi thub pa/_oM mu ne breM swA hA:_byol song thub pa/_oM mu ne k+Sha~M swA hA:_yi dwags thub pa/_oM mu ne ye swA hA:_dmyal ba'i thub pa/_oM ya mAn+ta kr-ita phaTa?:_sgo ba gshin rje/_oM pradz+nyA na ta kr-ita phaTa?:_stobs chen/_oM pad+mA n+ta kr-ita phaTa?:_rta mgrin/_oM big+h+nAn+ta kr-ita phaTa?:_bdud rtsi 'khyil ba/_hU~M hU~M hU~M badz+ra tsit+ta oM:_byed pa kun bzang*/_a a a badz+ri b+ha dra sa man+ta a:_bya ba kun bzang mo rnams so sor ji ltar rigs pa bzla/_gzhung las/_bsdu na snying po'i yang snying ni/_oM bod+hi tsit+ta ma hA su kha dz+nyA na d+hA tu a:_zhes bzla bar gsungs pas rdo rje dbyings gcig dril gyi rtsa sngags 'bum phrag bzhi nyung mtha' byas pa gtso bor bzla/_thun gsham du khro bo gnas bsgyur ba ni/_de nyid khro bor gnas bsgyur ni:_sogs nas dpal gyi dkyil 'khor chen po gsal:_zhes pa'i bar dang*/_gsang skor khro bo'i byang bu khrigs bsdebs ltar/_dug gsum ye dag rdo rje gsum:_sogs nas dzapa? bskul bar zhi ba'i skabs ltar dang*/_hU~M:_snang ba thams cad khro bo'i sku:_grags pa thams cad sogs nas zhi ba'i skabs kyi bzlas dmigs sbyar ba khro bo'i lha sngags yongs rdzogs sbyar/_bsdu na khro bo spyi dril grangs tshad zhi ba ltar bzla'o/_sngon 'gro rgyas par spro na de dag gi gsang skor khrid kyi byin rlabs las/_bskyed rim rgyal ba rigs lnga 'am:_yang na zhi khro gsal rdzogs sgom:_yul snang lha ru 'gyur bar bslab:_ces gsungs pa nyid deng sang mos sgom gtsor ston dang mthun par bsnyen sgrub phyag rgya gcig pa'i bsnyen pa/_phyag rgya spros bcas zhi khro sbrag sgrub kyi sgrub pa bya ba'i tshul smos pa'o/__/de ltar zhi khro'i bsnyen pa tshad du longs pa'i tshe rgyas pa la bdag 'jug dang bcas pa'am/_bsdus na dngos grub kyi rdzas la brten pas dngos grub blang pa bcas spyi ltar ro/__/gnyis pa khro bo bka' brgyad ni/_bsnyen sgrub kyi rten phyi nang gi mchod pa spyi ltar tshogs par byas la bsnyen sgrub la 'jug pas/_bskyed rim byang bu khrigs bsdebs bzhin btang ste ye shes klong dgu'i dkyil 'khor gyi 'khor lo la gsal snang sgrub pa sogs snga ma ltar la/_dngos gzhi'i bzlas pa la/_zhi bar bsnyen pa/_khro bor sgrub pa/_de nyid las la sbyor tshul bde gling bka' brgyad dregs 'dul bzhin sbyor bar mdzad pas/_las byang ni/_hU~M:_stong gsum 'jig rten thams cad kun:_sogs nas/_lhun gyis grub pa'i rang bzhin bsgom:_thog mar zhi bar bsnyen pa ni/_hU~M:_phyag mtshan zhi ba'i lha tshogs kyi:_thugs srog sngags phreng 'od zer 'phros:_rtsa gsum rgyal ba rab 'byams mchod:_byin rlabs dngos grub rang la thim:_oM bo d+hi tsit+ta ma hA su kha dz+nyA na d+hA tu A:_zhes dmigs pa'i gzer dang ma bral bas zhi ba spyi snying grangs tshad 'bum phrag gsum du gsungs/_gnyis pa khro bor sgrub pa la dzapa? khang phyes te/_zhi bsnyen khyug tsam btang rjes/_hU~M:_chom bu dgu ldan gtso mchog gi:_thugs kar nyi zla kha sbyor dbus:_thugs srog sngags kyi phreng bas bskor:_bzlas pas rgyud bskul 'od zer 'phros:_snod bcud snang zhen thams cad sbyangs:_snang stong lha dang grags stong sngags:_rig stong 'od gsal phyag rgya che:_he ru ka dang dbyer med gyur:_oM badz+ra tsaN+Da sarba duSh+Tan ta ka ha na da ha pa tsa hU~M phaTa?:_khro bo kun 'dus kyi sgrub sngags 'bum phrag bzhi bzla/_de grub pa dang*/_las sbyor thun mong ba ni/_zhi khro'i bzlas pa khyug tsam sngon du 'gro bas/_hU~M:_bdag nyid dkyil 'khor lha tshogs las:_sku dang sngags phreng 'od zer 'phros:_pho nya dregs pa skar ltar 'khrugs:_srid gsum khyab cing khams gsum 'phros:_zhi rgyas dbang drag phrin las rdzogs:_khyad par gdug cing gtum pa'i tshogs:_'gugs bsgral gnas spar chos dbyings bstim:_ming gi lhag ma med par gyur:_oM badz+ra ma hA kro d+ha pad+ma kro d+hI shwa ri badz+ra kI li kI la ya ma hA yak+Sha kA la rU pa karma raM raM dz+wa la raM hU~M phaTa?:_ces las sbyor khri phrag bzhi bzla bar gsungs/_gang ltar yang*/_skabs 'di'i bskyed rdzogs kyi snying po/_mdo byang las/_lta ba klong yangs dbyings kyi rdzong dang ldan:_rig pa rang byung 'phrang gi sgo lcags tshul:_rdzong 'phrang dbyer med bde gshegs 'dus pa zhes:_dbang gi mdo byang spyi blugs zhes bya'o:_zhi khro dbang chen rdo rje'i gnas sbyang ngo:_zhes pa ltar bslab po/__/gnyis pa rdzogs rim ni/_gsang skor khrid kyi rim pa las/_rtsa rlung rang nyid kun bzang gi:_sku la rtsa gsum 'khor lo drug:_thig le gtum mo 'bar 'dzag bsgom:_lus gnad bdun ldan drug chings dang:_tsog pur gnas pa rnam gsum gyis:_bde drod mi rtog gsum ldan gces:_zhes pa ltar/_lam dngos dang*/_bogs 'byin/_'phros don gsum las/_dang po la/_drod bde ba mi rtog pa'i rnal 'byor ro/__/dang po drod kyi rnal 'byor la/_lus gnad me thab drug ldan du bcas pas lus kyi stong ra gsal gdab pa ni/_a:_ma bcos gsal rdzogs kun tu bzang:_zhal phyag mtshan ma'i sku ru bzhengs:_phung po lnga nyid bde gshegs lnga:_'byung ba lnga ni yum chen lnga:_tshogs yul sems dpa' lcam dral brgyad:_rigs drug gnas dag thub pa drug:_phrin las lhun grub sgo ma bzhi:_bzhi bcu rtsa gnyis zhi ba'i lha:_ye shes thig le gcig tu 'khyil:_gdod nas dam ye dbyer med pa:_'gyur med yongs grub ngang du rdzogs:_zhes pa'i bar kun bzang don gyi phrin las rdo rje'i tshig rkang gis gsal btab ste rang nyid kun tu bzang po mthing nag rgyan med gcer bu gsal rdzogs/_yum kun tu bzang mo dkar mo dang sbyor ba gsal/_sku dbus drang por rtsa dbu ma/_ro rkyang gnyis/_gtsug tor nam mkha'i 'khor lo/_spyi bo bde chen/_mgrin pa longs spyod/_snying ga chos/_lte ba sprul sku/_gsang gnas bde skyong bcas 'khor lo drug brtsegs su gsal ba/_yar sner thig ler haM yig dkar po/_smar sner gtum mo a shad dmar po gsal te/_rlung ro bsal zhing bum can bzung bas gtum mo las me 'bar/_gsang gnas nas yas rim gyis 'khor lo drug tu 'bar bas drod skyes te rim gyi rtsa gsum/_'khor lo drug_/lus kyi nang thams cad khyab nas ba spu'i bu ga thams cad nas me lces khyab ste lcags gong mer bsregs pa bzhin gyur bar bsam la drag rlung bum pa can ci nus su bzung ba'o/__/gnyis pa bde ba'i rnal 'byor ni/_lus gnad rnam snang chos bdun byas la/_phyi nang stong ra sgom pa rlung ro bsal ba sngar ltar gyis gtum mo sbar ba'i mes spyi bo'i haM la reg pas zhu bde 'bar 'dzag gi nyams rgyas/_thig le dkar gsal gyi rgyun byung ba gtsug tor nas mas rim du bab pas 'khor lo so sor son te khengs/_dga' ba dang*/_mchog dga'/_dga' bral/_lhan skyes kyi dga' ba rnams rgyud la skyes/_lus ngag yid cha mnyam dang bcas pa'i 'khrul rtog sbyangs shing bkrus/_me dang thig le gnyis med du 'dres pas lus kyi nang thams cad khyab pas bde stong gi ye shes rgyud la skyes par bsam la bum can ci nus su bzung ba'o/__/gsum pa mi rtog pa'i rnal 'byor ni/_lus gnad drang srong tsog pur gnas pas stong ra gsal zhing 'bar 'dzag bsgom/_bde stong gi nyams skyes pas rtog pa'i g.yo 'khrul chad pa'i rang ngo la bltas te bde rlung sems gsum bsres pas mnyam bzhag gi ngang bskyang pa'o/__/bzhi pa gzhan lus ni/_bde ba mi mo gzhon nu la:_chos kyis rab tu smin byas te:_yab yum kun bzang kun bzang mo:_gnas rnams byin rlabs mnyam par sbyar:_dga' ba dga' ba chen po dang:_mchog dga' dga' bral lhan cig skyes:_tshor ba bde ba'i ngang du bslab:_ces pa ste/_bde drod mi rtog pa'i ting 'dzin rtsa rlung thig le la dbang thob pa'i rnal 'byor pas rigs can lnga yi bu mo mtshan dang ldan pa brtags gzhug sngon 'gro'i chos kyi rgyud sbyangs pa dang bcas spyi ltar bya bas rgyud gsang sngags lam gyi snod ldan du sgrub la/_yab yum kun bzang stangs dpyal gnas lngar gtsug tor rdor sems/_spyi bo nas rnam snang*/_snang mtha'/_mi bskyod/_rin 'byung*/_don grub yab yum rnams so sor gsal/_mkha' gsang rdo rje pad+ma sbyor ba'i thabs kyis lhan skyes bde ba chen po'i gnas lugs mngon du bya snyam pa'i 'du shes gsum gyis mnyam par sbyor bas 'bar 'dzag gi dmigs pa sngar ltar la/_thig le gnas so sor son pas rigs lnga yab yum gyi thugs rgyud bskul la bde stong gi nyams rgyas/_de kun kyang yab yum so sor sbyor bas 'khor lo drug tu thig le dkar dmar gyi bdud rtsis khengs/_thig le'i rgyun gnas so sor son pas/_dga' bzhi lhan skyes kyi nyams skyes/_'khrul rtog mi rung ba bkag pa'i bde stong gi rang ngo skyong*/_mthar rig stong nam mkha' lta bu'i dbyings dang bsres te mnyam par bzhag go__/lnga pa gnyis ka'i lam khyer ni/_rdzogs pa chen po'i de nyid ni:_lus gnad bdun ldan zhi gnas bsgom:_'khrul 'khor sna tshogs lhag mthong bsgom:_zhi lhag zung 'jug spyod lam la:_dbyer med nyid du 'dres par bya:_zhes pa ste/_spyir rdzogs pa chen por dbang rab skal ba can la dgongs pa'i chos su gsungs pas gdul bya gcig char ba rnams dbang bzhi pa'i ye shes kho na rtsal du bton nas nyams len mthar dbyung ba yin kyang*/_deng sang de lta bu dkon pa la dgongs nas bi ma dang mkha' 'gro'i snying thig gnyis char sngon 'gro lam stegs kyi tshul du bde stong gi rnal 'byor du gsungs pas skabs 'dir yang lus gnad chos bdun dang ldan pas rang lus rtsa rlung thig le'i bde drod mi rtog pa'i rnal 'byor dang*/_bogs 'byin gzhan lus bcas gsungs pa nyid la brten nas rlung sems kyi 'gyu cha bkag ste bde ba'i ngang bskyangs pas zhi gnas dang*/_thun mtshams su rlung rig bsres te 'khrul 'khor la 'bad pas lhag mthong gi de nyid mngon du 'gyur bar gsungs ba ltar bslab/_'khrul 'khor ni yan lag lnga sbyong sogs spyi ltar bya dgos snyam mo/__/spyir gang zag las dang po ba phal cher rtsol med nyin mtshan 'od gsal gyi rnal 'byor kho na la bzla ba dka' zhing*/_rig pa rkyang ded kyis dang po'i rnal 'byor gyi blor chud dka' bar snang bas lam 'di ka nges par gal che bar gsungs so/__/gsum pa 'bras bu mthar thug tu la bzla ba ni/_'bras bu bla na med pa'i sa:_yang dag par ni thob par 'gyur:_sku lnga'i 'bras bu tshe 'dir thob:_'bras bu gzhi la smin par nges:_gdams pa mthar thug kho na'o:_gsang skor khrid kyi dngos gzhi rdzogs:_sa ma ya rgya rgya:_zhes pa'i bar te 'bras bu mthar thug gi grol sa bla na med pa yang*/_rang rig don gyi yin lugs kyi gnas snang gnyis mngon sum du gyur bas kun 'byung gi 'khrul rgyu sa bon dang bcas pa stong zhing sangs nas sku dang ye shes kyi snang ba khyab brdal du shar ba la bya ste/_lam sngar bstan pa la/_'bad pa rtsal du bton pas gegs dang gol shor med par mngon sum yang dag par thob par 'gyur te/_chos nyid ka dag gi gshis lugs rnam kun mchog ldan gyi stong nyid chos sku/_'od gsal rgyun chad med pa'i snang ba longs sku/_thugs rje'i rig rtsal 'khor 'das kun la khyab pa sprul sku/_de gsum ldog chas dbye ba tsam las don la dbyer med pa'i ngo bo nyid sku/_lam gyi yon tan thams cad lhun grub tu rdzogs par mnga' ba mngon byang gi sku zhes bya ste/_'bras bu'i yon tan de dag phyi dus la ma ltos par snyigs ma'i tshe thung gcig gi steng 'dir mngon du thob pa la bslu ba med par nges pas na/_theg pa gzhan rnams ltar 'bras bu dang gzhi gnyis bzang ngan gyi rnam dbye med pa chos nyid lhun rdzogs kyi go 'phang mngon du gyur pa'i tshe/_gzhi 'bras gnyis med du shes par bya dgos pas/_de mngon byed kyi lam gyi mthar thug kyang ye shes lam byed rjen cer du ston pas mthar thug gi gsang ba 'di kho na zhes gsungs so/__/gsum pa rjes kyi khrid rim la/_rten sgron ma drug gnas tshul/_brten pa gnad bzhi'i don nyams su len tshul dang gnyis las/_dang po ni/_gsang skor khrid kyi rjes 'brel du:_gnas thabs 'bras bu rnam gsum ni:_gnas ni snying ga'i sgron ma ru:_kun gzhi rang rig ye shes te:_sku dang ye shes 'od lngar bzhugs:_dkar 'jam rtsa yi sgron ma las:_dbang po gsal ba'i sgron mer snang:_stong pa'i dbyings ni rnam par dag:_rig pa thig le lu gu rgyud:_gnas ni lus kyi nang na gsal:_shar ni dbang po'i phyi ru snang:_don du phyi nang dbyer med shes:_zhes pa ste gnyis snang gi sgrib tshogs shin tu zhi ba'i dbyings nang gsal gsang ba chen po'i de nyid ka dag khregs chod kyi lam gyis mngon sum rtogs par nus kyang ye shes kyi gdangs dbang po'i mngon sum du shar ba la brten nas sa lam thod rgal du bgrod pa rdzogs pa chen po man ngag sde'i gsang ba mthar thug tu nges pa'i phyir/_lam nyams su len pa la/_sgron ma drug gi gnas lugs shes dgos pas de ni rdo rje lus la gnas pa ste/_gzhi'i chos nyid stong pa kun khyab kyis yul gyi 'khrul gzhi/_'od lnga'i gzugs su snang bas/_phyi snod dang*/_gdos bcas lus/_thugs rje'i gdangs rig pa rig cing shes pas sems kyi 'khrul gzhi byas nas 'khor bar kha brgyud pa ste de dag lhan cig tu 'dus pas srid pa'i kun snang rgya chen po 'di grub pa'i phyir/_gang du skyes kyang*/_rlung sems lus gsum lhan cig tu 'brel par snang zhing*/_rags pa'i phung khams skye mched kyi sbubs su dwangs ma'i rtsa rlung thig le/_de las ye shes kyi rgyun bsres par gnas pa'i tshul shes pas sgo yul rlung rig gi gnad kyis sgo gsum gcun nas gzir bas 'od gsal ye shes kyi snang ba'i 'phel rdzogs shing zad sar skyel dgos pas na/_dri za nyer len gyi rlung sems gnyis 'dus kyis srid pa nyid pha ma'i khams dkar dmar 'dus pa'i dbus su zhugs te lus grub pa'i tshe/_g.yas ro ma bde ba'i ye shes/_g.yon rkyang ma gsal ba'i ye shes/_dbus a wa d+hU ti mi rtog pa'i ye shes 'char ba'i rten dkar dmar mthing ga'i mdog can ma dag pa'i dus sgo gsum dang dug gsum dag pa'i skabs sku gsum gyi rten la/_gnas bzhir 'khor lo bzhi sku bzhi ye shes lnga yi rten can du gsungs/_der rgyu ba'i rlung la rnying dbus su srog rlung*/_shar gyi rtsa 'dab tu khyab byed/_lhor rdzogs byed/_nub tu me mnyam/_byang du skyed byed ces dug lnga dang ye shes lnga yi rlung rtsa ba'i rlung lnga/_gyen rgyu stod na gnas pas dbugs 'gro 'ong gi rten/_thur sel smad na gnas pas zag pa 'dor sdom/_mnyam gnas bar na gnas pas zas kyi dwangs snyigs 'byed pa'i las byed pa la 'gyur ba chen po/_legs byed tshigs bzhi la gnas pas sha rus kyi stobs skyed pa dang*/_'gro 'dug brkyang gsum gyi las byed/_skyod byed smin phrag na gnas pas khrag dang chu ser gyi stobs bskyed pa la las byed kyi rlung lnga dang*/_nyin zhag gcig la rlung nyi khri chig stong drug brgya rgyu ba la 'gyu ba chung bar gsungs/_rtsa de dag na gnas pa'i khams byang chub kyi sems ro ma nas zla ba ha~M thur du lte ba la bab pas lus zungs bdun dang*/_klad pa rkang tshil rus pa bskyed/_rkyang ma las nyi ma a las gyen du 'phel nas sha khrag chu ser pags pa skra ba spu bskyed/_dbu ma nas kun khyab 'od gsal gyi thig le 'char zhing gnas par gsungs shing*/_de las kyang snying gi shar du khrag_/lhor sha/_nub tu drod/_byang du dbugs/_dbus kyi lte bar nam mkha' dwangs ma ste lnga 'dus pa'i thig ler sdong bu snum can la me sbar ba ltar gnas pa'i snying gi 'od gsal la sku dang ye shes 'du 'bral med pa ngo bo rang bzhin thugs rje gsum ldan gyi bdag nyid du bzhugs pa'i gnas tsit+ta sha yi sgron ma mchong gur phub pa lta bu'i dbus kun 'khor las/_gzhi dbyings ka dag gi gnas lugs so so rang rig pa'i ye shes kyi spyod yul/_'od gsal bsam gyis mi khyab pa'i ye shes gting gsal gyi bdag nyid la gnas lugs gzhi'i sgron ma/_ngo bo stong pa chos sku/_rang bzhin gsal ba longs sku/_snying po rig pa'i gdangs ma 'gags par 'char ba ni sprul sku/_de gsum dbyer med pa ngo bo nyid sku/_rtag tu 'phel 'grib med pa mi 'gyur rdo rje'i sku dang*/_chos dbyings/_me long*/_mnyam nyid/_sor rtog_/bya grub kyi ye shes rnam pa lnga rang bzhin lhun gyis grub pa dang*/_rig pa la dri ma med pas 'od dkar po/_yon tan rdzogs pas ser po/_rig par 'dus pas dmar po/_ma btsal rdzogs pas ljang gu/_'gyur ba med pas mthing ga ste lnga bcas lhun gyis rdzogs par bzhugs pa'o/__/chos nyid don gyi bzhugs tshul de mngon du byed pa la ye shes kyi gdangs snang zhing 'char ba'i sgo ni dkar 'jam rtsa yi sgron ma dar dkar gyi skud pa lta bu des snying gi rtse nas sgal tshigs la 'khril te/_mgrin pa'i rtse'u chung g.yas g.yon gyi 'dab nas rna ba gnyis la brgyud klad pa nas mig gi a 'bras chu'i sgron ma gnyis la zug pa 'od rtsa dwangs ma'i sgo ye shes 'dus pa'i rgyang zhags/_'byung ba 'dus pa'i rgyang zhags mig gi dbang rten/_dbang po 'dus pa'i rgyang zhags dbang shes gsum ldan rten brten pa ste mig rtsa'i rtsa ba lte ba nas snying ga dang mgrin pa brgyud dung khang du g.yas su 'khyil ba'i rtsa 'dab bzhir gyes pa'i dbang po yul la 'char ba'i rtsa 'dab gcig las rtse mo lngar gyes pas sgo lnga so so'i rten byed pa las/_skyon yon dbang po dwangs byed kyi rtsa dkar nag phyed ma chu yi rang bzhin gyi mig gi dbang rten phyi nang du phra ba ba man gyi rwa lta bu'i yal ga gnyis mig gi a 'bras kyi dwangs ma gnyis la zug nas 'od rtsa'i rang bzhin dwangs la gsal bar byung*/_rtsa de sku gsum bzhugs stangs gzigs stangs rlung rig gi gnad kyis gzir bas phyi nang gi dbyings snang rnam dag gi sgron ma ka dag gi gdangs dang*/_rig pa'i 'od gsal lhun grub kyi gdangs rdo rje lu gu rgyud dang*/_thig le stong sgron dang shes rab rang byung gi sgron ma rnams lus nang tsit+ta rin po che gsang ba'i sbubs su da lta gdos bcas sha khrag gis bcings te gnas pa/_mig nas 'od snang*/_snying ga nas dung khang gi khro bo dbu ma dang rtsa ba rnams las thig le phra rags/_spyi bo nas thig le dgu brtsegs bcas 'char ba'i sgo yin la snang ba'i 'char tshul dang gnas tshul de ltar yang gzung yul rags pa ltar phyi nang du dbang yul shes pa gnyis su med pa dbyings rig zung 'jug gi rig stong ye shes chen po gcig gi 'char tshul lo/__/de ltar tsit+ta ka ti shel sbug_/rgyang zhags gsum dang*/_dbyings rig thig le gsum phyi bar do dus kyi sgron ma/_mthar thug 'bras bu'i sgron ma/_gnas pa gzhi'i sgron ma dang dgur dbye ba'ang gsungs/_bsdu na bzhir 'du ba'ang gsungs so/__/gnyis pa brten pa gnad bzhis nyams su len pa la/_dngos dang*/_rtag snang bzhi'i 'char tshul/_mtha' rten gyi man ngag bstan pa'o/__/dang po gnad bzhi dngos ni/_thabs ni sku gsum bzhugs stangs kyis:_dbyings rig thig le 'di la sbyangs:_chos sku'i bzhugs stangs seng ge ltar:_nyi ma 'char kar dbyings la bslab:_longs sku'i bzhugs stangs glang chen gyis:_shar ma khad par rim par bslab:_sprul sku'i bzhugs stangs tsog pu yis:_shar ba'i dus na 'od la sbyangs:_shin tu gom par gyur pa'am:_ma 'dres so sor snang ba na:_lus gnad bdun ldan ci bde bas:_dbyings rig thig le nye rdzogs su:_snang ba rig pa dbyer med bsgom:_zhes gsungs te sgron ma rnams kyi rten rtsa ni lus la gnas shing lus gnad du gcun pas ngag yid kyang gnad du chun pa'i phyir bzhugs stangs bya bar gces pas de ni/_/lag bsnol rkang pa'i bar du bzhag_/mig gnyis gtsug tor thad du blta/_/chos sku seng+ge'i lta stangs kyi/_/stong nyid dbyings la rnam par sbyangs/_zhes chos sku seng+ge'i 'dug stangs/_yan lag bzhi ni sa la phab/_/lag gnyis 'gram skyor og ma btegs/_/mig gnyis zur la khrid nas kyang*/_longs sku glang po'i gzigs stangs kyis/_/rang rtsal thig le rtsal la sbyangs/_/zhes longs sku glang po che'i nyal stangs/_lag gnyis pus mor 'khyud nas ni/_/tsog pur pus brang thad du blta/_/sprul sku drang srong gzigs stangs kyis/_/zung 'jug rig pa'i rtsal la sbyang*/_/zhes sprul sku drang srong tsog pu'i 'dug stangs gsum gang rung gi tshul gyis 'char byed sgo yi gnad/_chos sku'i gzigs stangs gtsug tor rnam bar blta ba/_longs sku'i gzigs stangs mda' mkhan snyug ma bsrang ba/_sprul sku'i gzigs stangs drang srong bsam gtan sgom pa lta bu'i tshul gyis/_yul gyi gnad nam mkha' bslad byed kyi rkyen gsum dang bral ba la chos sku'i rten nyi ma/_longs sku'i zla ba/_sprul sku rten A lo ke ste gsum dang*/_chos sku'i bzhugs stangs gzigs stangs kyi nyi ma 'char ka'i zer thag gi dbyings snang dang*/_longs sku'i nyi ma shar la khad pa/_sprul sku'i nyi zla'i 'od la blta bas dbyings rig gi snang ba tshad la phebs dgos par gzhung 'di ru gsungs/_rlung gnad kha sna nas 'byung 'jug shin tu dal ba dang las dang po pa'i dus su bar rlung bzung na legs par gsungs/_rig pas mig dbyings rig gi snang ba la gtad pas gnad du gcun pa dang*/_goms pa brtan pa'i tshe rnam snang chos bdun dang ldan pas rtsal sbyang par gsungs shing*/_de'i tshe dbyings gsum bsres pa'i gdams ngag la/_phyi dbyings sprin med nam mkha'i dbyings/_/nang dbyings rang bzhin stong pa'i bab/_/gsang dbyings rig pa lu gu rgyud/_/nam mkha' sum phrug gdams ngag skabs/_/lu gu rgyud la rig pa gtad/_/rim gyis g.yo ba brtan cing dag_/ces gsungs pa ltar phyi dbyings rig gi snang ba/_nang rang byung gi rig pa gnyis dngos dang*/_gdangs kyi rtsal snang ngo bo bdag gcig gi 'brel bas yul dbang shes gsum tha dad du mi blta bar gcig tu dril nas nyams su len par bya'o/__/gnyis pa snang bzhi'i 'char tshul ni/_de la nyams rtags 'char tshul rnams:_ches cher rim pas 'phel ba ste:_yul khams gang bar mngon sum snang:_phyag mtshan yig 'bru stong du 'phel:_sku ni yongs rdzogs tshad la phebs:_rig pa rang snang zad sar zin:_spyi bo'i gtsug tu 'od bdun ni:_tho brtsegs tshul du byung ba ni:_zhag bdun 'od lus 'grub pa'i rtags:_zhes gsungs pa ltar stong gsal rang rig 'dus ma byas pa'i ye shes skad cig rjen pa khregs chod kyis ngo 'phrod nas sor bzhag tu skyong ba'i chosa~M nyida~M la gdengs thob pas gzhi bcas te ye shes kyi rig gdangs nam mkha'i dkyil du dbyings 'od mthing ga khyab pa chen po me long dwangs pa lta bu la 'od lnga'i dbyings snang gi steng thig le nyis sbrel nas sum sbrel tshun chad dang*/_rdo rje lu gu rgyud gser gyi skud pa lding ba lta bu 'char te dngos su mig gis bltar yod cing*/_rang snang rang rig gi nyams su myong ba mngo~Mn suma~M/_snang nyama~Ms dbyings rig smin mtshams nas bral te 'od lnga rtsibs shar dang*/_gyen 'greng dang*/_zlum mkhrig dang*/_mchod rten lta bu dang*/_pad+ma stong ldan dang*/_mkhar thabs dang*/_mda' dang mdung rtse lta bu dang*/_drwa ba drwa phyed dang*/_mig mang ris la sogs pa dang*/_yig 'bru dang rigs lnga'i phyag mtshan sogs snanga~M ba'i rigs cir yang 'char la/_thig le stong sgron yang sran ma tsam nas bse phub tsam gyi bar du rnam par snang zhing 'phel ba dang*/_rig pa rdo rje lu gu rgyud che brtan du song ba dang*/_shes nyams bde gsal mi rtog pa'i ting 'dzin bcas gong nas gonga~M 'phe~Ml du snang ba dang*/_yul snang gi riga~M pa~M stong nyid gang dang yang dbyer mi phyed pa/_lhag mthong gi rig pa rdo rje lu gu rgyud/_gzhi 'dzin pa'i rig pa ngo bo rang bzhin thugs rje gsum ldan gzhi gnas kyi rig pa shes pa thams cad kyi 'char gzhir gyur pa/_mtshan nyid 'dzin pa'i rig pa ma rig pa rang log nas rig pa'i yon tan 'phel ba'i cha rten du gyur pa las ye shes kyi snang ba thams cad 'od du gsal ba/_ye shes lnga'i chos nyid la byan tshun pas thig le lnga tshoms su shar ba'i dbus sprul sku'i ye shes tshad la phebs pas gtsug tor dang bcas pa'i dbu phyed pa nas sku rkyang gi bar dang*/_longs sku'i ye shes tshad la phebs pas rigs lnga'i sangs rgyas rkyang pa nas yab yum zhal sbyor rgyan cha lugs yongs su rdzogs pa'i bar/_chos sku'i ye shes tshad la phebs pas gtso 'khor gyi tshom bu tha dad pa'i dkyil 'khor mu khyud kyi rwa ba dang bcas pa mchog tu gsal bas 'dus byas kyi snang ba rang sar 'gags/_ri brag zang thal du 'gro/_gzung 'dzin thad kar zhig_/cir snang thams cad sku dang ye shes kyi rnam rol 'ba' zhig tu snang ba'i dag pa rab 'byams chen por longs spyod pas tshada~M la pheba~Ms pa'am tshad du phyin pa'i snang ba/_de lta bu'i gnad la brten nas rlung mi g.yo ba ye shes su 'phel/_chos nyid du dag pa'i mthu las/_phyi gzungs ba'i yul/_nang 'dzin pa'i sems/_gsang ba 'od gsal gyi snang ba thams cad kyang chosa~M nyida~M bsam gyis mi khyab pa'i nang dbyings su thim pas/_dpe shel 'od nang du nub par ltar nang gsal thim la ma rmugs pa'i ngang du sku dang ye shes kyi 'char gzhi thams cad gting gsal ye shes gcig pa'i sbubs su lam mer rdzogs pa ni chos can gyi snang cha thams cad chos nyid rig pa'i ngang du zada~M pa~M nas gzhi dbyings 'pho med du btsan sa zin pa'i snang ba zhes bya'o/__/gsum pa mtha' rten gyi man ngag la lnga/_cog bzhag bzhi/_mi 'gul ba gsum la gzhi bca'/_sdod pa gsum gyi tshad bzung*/_thob pa gsum gyi gzer gdab/_/gdeng bzhi'i grol tshad du bstan pa las/_dang po ni/_sgron ma snang byed las/_ri bo cog bzhag lta ba'i tshad/_/rgya mtsho cog bzhag sgom pa'i tshad/_/snang ba cog bzhag spyod pa'i tshad/_/rig pa cog bzhag 'bras bu'i tshad/_/tshad bzhi ldan pa'i rnal 'byor de/_/nges pa'i don la blo 'dres pa'o/__/zhes gsungs pa'i don lus bzhugs stangs gsum gang dang rung ma bral bas rtsa rlung thad sor gnas pas 'gyu byed kyi rtogs pa rang 'gags te rig pa rjen la phud de dbyings snang dang bsres pas sems rig shan phyes nas 'od gsal gyi dbyings su mi g.yo bar byed pas lta ba ri bo cog gzhag_/mig gzigs stangs kyis gcun pas rgya mtshor gza' skar shar ba bzhin tshogs drug gi yul gyis dbang shes mi g.yo/_rkyen bzang ngan gyi phan gnod dang bral ba rgya mtshor gza' skar shar ba bzhin sgom pa klong du gyur/_snang ba bzang ngan gang shar yang re dogs kyi der 'dzin med par bzhag pas thams cad chos nyid gcig tu grol te lam gyi gegs su mi ldang zhing bogs 'byin du 'gyur bas spyod pa'i rgyan du khyer nus/_nang gi rig pa phyi yi snang bas bogs dbyung ste nyams len gdeng du khel nas/_rig stong rjen pa'i ye shes las lam nas yang mi 'da' bas 'bras bu'i grol sar phyin pa ste/_mdor na rig pa gcig la rnam pa'i dbye tshul bzhir gsungs pas don du ka dag gi dgongs pa dang lhun grub kyi snang bzhi mthar phyin pa'i tshad du bstan pa'o/__/gnyis pa mi 'gul ba gsum ni/_lus bzhugs stangs gsum dang*/_rnam snang chos bdun las ma g.yos pas rtsa rlung bde lugs su rgyu/_mig gzigs stangs gsum las mi 'gul bas/_mngon sum gyi snang ba yul la gsal/_rlung rig mi 'gul ba dal bar brtan pas phyi nang gsang ba gsum gnad kyi byed pa gcig pas chos nyid rang ngor gnas te snang ba bu lta bu rang rtsal dang*/_rig pa ma lta bu dbyer med du 'dres nas gnas pa'i dgos pa yod pas/_nyams len gyi gzhi bca' ba'i thabs zab mo'o/__/gsum pa sdod pa gsum ni/_mi 'gul ba gsum gyis gnad du gzir bas phyi yi snang bas nang rig rtsal mi g.yo bas rkyen ngan grogs su 'char/_nang sgyu lus bya ba dgu phrugs su btang ste sdod pas 'khrul pa'i las dang bya ba bral/_gsang ba las rlung dang 'khrul pa'i sems sdod pas rnam rtog mi skye'o/__/'di skabs su tshad rmi lam gyis bzung ba dang*/_rtags lus ngag la 'char ba gnyis 'byung ba'i dang po ni/_brtson 'grus rab rmi lam gtan nas 'gags/_'bring rmi lam ngo shes/_tha mas bzang po sha stag rmis/_gnyis pa ni/_chos nyid mngon sum gyi skabs su lus rus sbal mkhar gzhong du bcug pa ltar 'dug stangs las 'bral mi phod/_ngag lkugs pa ltar brjod mi shes/_sems mkha' khro snyi la zin pa ltar 'phro ba snang yang gzhi las ma g.yos/_nyams gong 'phel gyi dus su lus skyes bu nad kyis gdung ba ltar rgyan dang byi dor med/_ngag smyon pa ltar zang thal rjes med/_sems dug nad kyis zin pa ltar rtog pa'i 'phro 'du chad pa'o/__/rig pa tshad phebs kyi dus su/_lus glang chen 'dam du byings kyang rang stobs kyis 'gro ba ltar ri brag zang thal/_ngag grul bum gyi phru gu ltar kun gyi rna bar snyan cing yid la 'bab/_sems snying la mdas zin pa ltar dran bsam gyi 'phro chad pa'o/__/chos nyid zad pa'i dus su lus dur khrod kyi mi ro ltar dgag sgrub dang nyams nga bral/_ngag brag ca ltar rjes su zlo/_sems rtsi dug gis myos pa'i skyes bu ltar dran bsam dbyings su dag pa'o/__/rtags 'di dag gi so mtshams ma zin na bar chad bdud/_'phel 'grib nyams/_'gyur med gsang ba'i rtags gsum 'byung bas shan 'byed par dka' bar gsungs shing*/_rtags gsum po gang la yang re dogs kyi rtsis gdab med par lam du khyer pa ni shin tu gces par gsungs so/__/bzhi pa thob pa gsum ni/_phyi snang ba la dbang thob pas snang rkyen tha mal du med pa dag pa chen po'i zhing du grol/_nang phung po la dbang thob pas gdos bcas 'od kyi lus su grol/_gsang ba dbyings rig la dbang thob pas 'khrul rtog gzhi la dag pa'o/__/lnga pa gdeng bzhi ni/_yar sangs rgyas thob tu re ba dang*/_ma thob kyi dogs pa/_mar 'khor bar mi skye ba'i re ba dang*/_skyes kyis dogs pa med pa chos nyid rang byung gi dgongs pa klong du gyur pa'o/__/nyams len gyi rtsa ba khregs thod gnyis las gzhan med kyang*/_grol tshad kyi dbang gis dbang po 'bring bar do rnam pa bzhi/_tha ma rang bzhin sprul pa'i zhing du dbugs dbyung tshul gsungs pa gter gzhung phab zin gyi dngos bstan du mi 'byung zhing*/_shes par bya 'dod na gter chen bla ma'i zab gter gzhan las 'byung ba ltar shes par bya'o/__/gsum pa 'bras bu mthar thug tu la bzla ba ni/_'bras bu tshe gcig lus 'di thog:_gang du gnas kyang zhing khams su:_'gyur las gzhan du 'pho ba med:_de lta bu yi rnal 'byor can:_man ngag kun gyi mthar thug go:_gsang skor khrid kyi rjes 'brel rdzogs:_zhes pa ste myur lam bla na med pa 'di la brtson pa phul du bskyed cing dad mos blo rtse gcig pas tshe 'di yi 'ching thag bcad de dben par rtse gcig tu rtsol med nang gi nyams len kho nar 'bad pa rtsal du bton na mar me'i snying po la mun pa ye nas mi gnas pas 'od kyis kun tu khyab cing gsal ba bzhin spang bya sgrib gnyis mtha' dag gi 'khrul pa dbyings su dag nas/_snod bcud 'od gsal ye shes kyi bkod pa chen por 'byams klas pa mngon du gyur te sku dang ye shes kyi cho 'phrul tshad med pas sa bcu'i byang chub sems dpa' nas rigs drug gi gdul bya phra mo yan chad kyi don mngon mtho dang*/_nges legs dang*/_rnam grol gyi lam dang 'bras bu'i yon tan mtha' dag gsal zhing snang bar mdzad pas na/_'khor 'das thams cad kyi sgron me gcig pur gyur pa'i mdzad pa phrin las rtag pa dang*/_khyab pa dang*/_lhun gyis grub pa'i tshul gyis rtsol med du 'byung ba ni/_mthar thug gi 'bras bu la mngon sum du longs spyod nus pa'o/__/spyir gsang chen rdo rje theg pa'i myur lam thams cad kyi mthar thug ni/_'od gsal rdzogs pa chen po kho na yin pas/_de nyid rdo rje'i bla ma pad+ma saM b+ha was mkha' 'gro ye shes mtsho rgyal gtso bor gyur ba'i rje 'bangs rnams dang*/_ye shes rdo rje'i sku can bi ma la mi tras mnga' bdag khri srong*/_nyang ban ting 'dzin bzang po gtso bor gyur pa'i las can rnams dang*/_snang bzhi mthar phyin gyi lo chen bai ro tsa nas/_rgyal mo g.yu sgra snying po/_spang mi pham/_mnga' bdag rje 'bangs tshogs la gsungs pas gangs can gyi ljongs su theg mchog rdzogs pa chen po'i shing rta rnam gsum zhes yongs su grags pa bzhin zab gsang chos kyi chu klung khyab par brdal ba las/_bka' gter gyi rgyun phal cher ma nub pa bstan pa'i srog dang snying gi khrag lta bur da lta'ang bzhugs shing*/_snga 'gyur rnying phyogs tsam du ma zad/_rtogs pa don brgyud kyi mnga' bdag bka' brgyud/_'jam mgon sa skya pa/_bka' gdams gsar rnying gi mkhas grub chos spyan rdul dang bral zhing gzu bor gnas pa dag gis gsan bsam bsgom pas ci rigs su 'phel rgyas su mdzad pa so so'i rnam thar du gsal ba bzhin rgyal bas chos sgo thams cad kyi mthar thug gcig pu yin la/_khyad par sems klong man ngag gsum ka'i grub mtha' rkang tshugs zab gter gyi ston pa gcig gis spyan drangs pa ni shin tu dkon pa las sangs rgyas gnyis pa rje 'bangs lo paN dang bcas pas bod yul gyi gdul bya nam yang yal bar mi 'dor ba'i thugs bskyed dang phrin las kyi snang ba 'grib pa med pas sprul pa'i gter ston grub thob yongs kyi 'khor los bsgyur ba/_rgya che ba mdo sgyu sems gsum/_zab pa thugs sgrub skor bzhi/_chos nor rdzas kyi gter kha 'dzad pa med pas snyigs 'gro skyob pa'i 'dren pa gu ru'i rgyal tshab 'gran zla dang bral ba'i rig 'dzin chen po o rgyan mchog gyur bde chen zhig po gling pa la snying thig brgya rtsa'i bka' babs pa'i yang bcud snying thig chen po skor bdun gyi dbang sgrub thabs rgyud/_man ngag skor shin tu rgya cher bzhugs pa'i yang bcud/_rnam snang lo tsA chen po bai ro tsa na'i snying thig zab chos rdzogs pa chen po sde gsum zhes gangs can sa yi bcud du gtams pa nyid/_paN chen lnga rgya'i gtsug rgyan 'pho chen ye shes rdo rje'i lang tsho 'jigs bral gyi slob dpon gangs can mkhas grub rgya mtsho'i ded dpon du byed pa 'jam dbyangs mkhyen brtse'i dbang po pad+ma 'od gsal mdo sngags gling pa dang yab sras zhal 'dzom pas zab gsang mkha' 'gro'i snying khrag gi byang bu rnams gtan la phab cing khrigs bsdebs su mdzad pa 'di ni srid zhi'i dpal 'byor thams cad kyis bsgrun du mi nus pa'i gdams zab grol ba drug ldan gyi gser chos su nges pas na/_spyir 'khor ba'i 'khrul snang*/_sgos snyigs dus kyi rang mtshangs mngon sum du 'gyur ba la nges 'byung dang*/_skyo shas kyi yid 'khul bas/_'dir snang tshe 'di'i bya spyod la lta ci rnam dkar du rloms pa ni spros bcas kyi tsab tsub blo sna mang po la yid mi gdung bar snying po don gyi man ngag gsang sngags snga 'gyur ba'i mdo sgyu sems gsum gyi man ngag gi srog rtsa gcig tu dril bas bskyed rdzogs kyi rkang tshang ba/_mthar thug gi skyel so theg mchog rdzogs pa chen po'i yang bcud gser zhun ma lta bu/_brgyud thag nye zhing*/_byin rlabs kyi gzi byin ma nyams pa/_tshig nyung don zab dus babs kyi zab chos la nges pa phyir mi ldog pa'i nyams len gyi snying por gnang na gal che bar sems pas 'phros su gdams pa'o/__/mtha' klas chos kyi bdud rtsi nying khu ni/_'od gsal ye shes don gyi snying po ste/_de nyid ji bzhin ston pa'i rdo rje'i tshig_/zab gsang rdzogs pa chen po nyid du grags/_/rdo rje'i lam 'dis 'phags bod 'dzin ma'i khyon/_/sku bzhi'i grong khyer chen po'i dge mtshan mthu/_/dus kyi mthar yang rgud med ches gsal ba'i/_/ngo mtshar thub bstan yangs pa'i rgyan du mdzes/_/khyad par zab gsang mkha' 'gro'i kha rlangs can/_/khungs btsun brgyud thag nye ba'i byin rlabs gzi/_/ma nyams skal bzang srog gi zungs smin pa/_/sangs rgyas las kyang dkon pa'i nges pa rnyed/_/mthar thug 'od gsal snying po'i lta grub kyi/_lte ba rab zab mdo sgyu sems gsum gyi/_/man ngag rtsibs stong bkra ba'i 'khor lo'i mchog_/gangs can bstan 'gro'i gling bzhir dbang bsgyur rmad/_/dus dang lung rtogs rang gshis dad brtson mthu/_dman yang khyab bdag bla ma'i mkhyen brtse'i nyi/_/bdag blo'i pad+mor gzod nas sim pa'i mthus/_/zab chos 'di la smra ba'i skal bzang rnyed/_/theg dgu'i gseng lam khyad par rdzogs pa che'i/_/gdams pa'i gnad kun sa 'og gser bzhin du/_/mchis pa gsal byed yi ge 'di 'dra yang*/_/dpyod ldan thar 'dod kun dga'i zas 'gyur snyam/_/mkhas grub rgya mtshos gter rgya ma bkrol zhing*/_dkon la zab pa'i nor bu mthon ka che/_deng dus legs bshad rgyal mtshan rtser mchod pa/_/lha dang DA ki'i bdag skal gtad dam snyam/_bsam sbyor zla ba lta bu'i bsil 'od kyis/_/gang can dus kyi mun pa slar bsal nas/_/yongs rdzogs thub bstan bshad dang sgrub pa'i srol/_/'jam mgon rnam gsum dus bzhin 'dzin gyur cig_/rdo rje gsang bar spyod dang smra ba'i las/_/rnam dkar rdzogs ldan nor bu'i chu 'dzin des/_/pha ma mched kyi mtshon pa'i 'brel thogs gtsos/_/mkha' khyab yid can kun la sman gyur cig_/mi shes rmongs pas mchog gsum phrin las snubs/_/mtha' dmag kla klo'i sde kun bdag gcig pus/_/byang chub lam du 'bad med khrid pa yis/_/las mtha' log pa'i sa bon 'byin nus shog_/chos 'di'i gnyer 'dzin DA ki dam can gyis/_/gsang sgrogs 'gal 'khrul nyams pa mi 'byung zhing*/_smin grol dbyar gyi chu gter ltar rgyas pas/_/'ja' lus rdo rje'i lam srol rgyas par mdzod/_/shin tu rnam dag kun bzang rdo rje'i dbyings/_/mthong thos dran pa'i yid can kun khrid nas/_/'od gsal mkha' khyab dgongs pas srid mtsho skem/_/don gnyis mnga' dbang rdzogs pa'i ston par shog_/mkha' khyab zhing du rgyal kun dgongs bcud kyi/_/ye shes rtsal bton theg mchog seng+ge'i sgra/_/sgrogs la mi ngal spobs pa'i gter brgyad kyis/_/'jam dpal kun tu bzang po'i spyod 'chang shog_/tshe 'di'i mthar yang 'du 'dzi'i mi 'ching ba/_/me tog 'bras mang brag ri'i khang bzang can/_/dben par 'ja' lus rdo rje'i gseng lam bgrod/_/nang gsal chos sku'i rgyal thabs skyong nus shog_/skye kun mcho~Mg gi ye shes mngon gyur glinga~M/_/mkhyena~M brtse~M'i gzungs spobs stobs dang dbang bcu'i dpal/_/zag med yona~M tana~M rgya~M mtsho~M'i mdzes pa'i mthus/_/pa~Md+ma~M ye~M shesa~M rdo~M rje~M'i dbyings sim shog_/chos rab rnam 'byed thos bsam sgom pa'i mthu/_/chos sgo rab 'byams 'dzin spel sdud pa'i las/_/chos bzang phrin las rgyal bstan ris med gsal/_/chos kyi rgyal po 'jam mgon gsum bzhin smon/_/'od gsal chen po 'phel 'grib med pa'i dbyings/_/'khrul pa'i zug rngu kun bral bde ba cher/_/mkha' khyab 'gro kun gnas lugs mngon gyur gzhir/_/bkra shis snang ba rtag khyab lhun grub shog__/ces gdod nas kun bzang rdo rje'i dgongs klong la mnga' dbang 'byor bas grol ba drug ldan gyi phrin las chen po'i sras bcas rgyal ba'i rnam thar la spyod pa'i kun mkhyen bla ma 'jam dbyangs chos kyi blo gros 'jigs med nam mkha'i rdo rje kun bzang 'od gsal snying po'i zhal snga nas smin grol gdams pa yongs su rdzogs par bstsal cing dgongs pa'i gtad rgya thun min dang bcas te khrid yig zhig zhabs tog tu spel bar 'os pa'i bka' yi gnang ba bstsal kyang*/_rang nyid lta sgom gyi drod tshad chung zhing nyams len ji bzhin ma nus pa dang*/_dus kyi rgud pas yid skyo bas snyoms las su thal ba na/_slar yang zab gsang 'di nyid kyi bdag por gdod nas grub pa 'jig rten dbang phyug rgyal dbang karma pa chen po bcu drug pa rang byung khyab bdag rig pa'i rdo rjes dgyes pa chen pos nges par 'bri bar 'os pa'i bka' lan du mar bstsal ba dang*/_snyigs dus kyi bstan 'gro'i dpal mgon mtshungs med skyabs rje mdo khams pa skal bzang don brgyud nyi ma dang*/_gter chen mchog gi sprul pa'i sku pad+ma 'gyur med theg mchog bstan 'dzin nas kyang phrin las kyi gsos su 'di ltar 'bri bar 'os zhes bkas bskul ba dang*/_mchog gter rigs chos brgyud 'dzin mkhyen rtogs yon tan rmad byung mched grogs mchog sprul karma o rgyan thugs kyi bstan 'dzin nas myur du grub par dgos zhes dam pa du mas bka' lung ldog tu ma spobs pas/_sde gsum rdzogs pa chen po'i bka' gter yongs rdzogs thob pa'i skal pa mi dman zhing 'od gsal ye shes kyi dgongs klong tshad la phebs pa'i rigs kyi bdag po khyab bdag zhe chen pa gtso bor gyur pa'i mkhas grub du ma'i zhabs rdul tshangs gnas su mchod pa'i mdo khams kyi ku sA li 'jigs med mkhyen brtse'i 'od zer 'od gsal thugs mchog rdo rje theg mchog bstan pa'i rgyal mtshan gyis snga 'gyur rig 'dzin brgyud pa'i man ngag spyi dang lam 'di'i bka' babs mkhan chen rat+na'i zin thun rnams gung spros te gter gzhung dngos bstan gyi dgongs pa ji ltar dpog pa bzhin dkyus gcig tu lho 'brug gi sman ljongs nyul pa'i skabs thun mtshams ci rigs par bris te lcags glang snron zla'i tshes skyabs rje pad+ma dgyes pa'i dus kyi mchod pa'i nyin rdzogs par byas pa dkyus gcig tu spel ba'i yi ge pa ni sngags ban 'jigs med skal bzang rdo rjes gus pa lhur len gyis bgyis pa 'dis kyang kun bzang thugs kyi bstan pa la bya ba mchog tu byed pa'i rgyur smon pa bzhin 'grub par gyur cig/__//