DKR-KABUM-08-NYA-032

🚧 This website is under continued development. We appreciate your patience!

Previous Text Back to Volume PageNext Text

ཡང་ཟབ་བདེ་ཆེན་དཔལ་མོའི་ཐུགས་ཀྱི་མེ་ལོང་ལས༔ དབྱངས་ཅན་མ་དམར་མོའི་གསང་སྒྲུབ་ཡིད་བཞིན་འཕྲུལ་མཛོད༔

Wylie title	yang zab bde chen dpal mo'i thugs kyi me long las: dbyangs can ma dmar mo'i gsang sgrub yid bzhin 'phrul mdzod:
Location	dil mgo mkhyen brtse bka' 'bum Volume 8, Text 32, Pages 266-274 (Folios 1a to 9a4)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	ཆོས་ཀྱི་གོ་ཆ་ (chos kyi go cha)
Citation	Khyentse, Dilgo. Yang zab bde chen dpal mo'i thugs kyi me long las dbyangs can ma dmar mo'i gsang sgrub yid bzhin 'phrul mdzod. In Skyabs rje dil mgo mkhyen brtse rin po che'i bka' 'bum, Vol. 8: 266-274. Delhi: Shechen Publications, 1994.
Genre	Sadhanas - Evocation Ritual - sgrub thabs
Cycle	ཡང་ཟབ་བདེ་ཆེན་དཔལ་མོའི་ཐུགས་ཀྱི་མེ་ལོང་ (yang zab bde chen dpal mo'i thugs kyi me long)
Deity	dbyangs can ma
Colophon	ཡང་དག་དོན་གྱི་ལྷ་མོ་ཡི༔ གསང་གསུམ་རང་རིག་ཨེ་ཝཾ་གཟུགས༔ ཀུན་ནས་ཟླུམ་པོའི་ཏི་ལ་ཀའི༔ ཀློང་ལས་རང་བྱུང་ཤར་བ་བཞིན༔ པདྨ་ཐུགས་མཆོག་རྡོ་རྗེ་རྩལ༔ ཆོས་ཀྱི་གོ་ཆ་འཛིན་དེས་ཕབ༔ དམ་པ་ཟུང་གིས་བཀའ་ལུང་བཞིན༔ མི་འགྱུར་རྟགས་ཀྱི་རི་མོར་བཀོད༔ བསྟན་འགྲོའི་སྨན་ཡོན་མཆོག་ཏུ་ཤོག༔ གཡུ་ཡི་སྒྲོན་མས་བཀའ་འདི་སྲུངས༔ དོན་གཉིས་འགྲུབ་པའི་བཀྲ་ཤིས་ཤོག༔ ས་མཱ་ཡ༔ རྒྱ༔རྒྱ༔རྒྱ༔ མངྒ་ལཾ། དགེའོ།།
	yang dag don gyi lha mo yi:_gsang gsum rang rig e waM gzugs:_kun nas zlum po'i ti la ka'i:_klong las rang byung shar ba bzhin:_pad+ma thugs mchog rdo rje rtsal:_chos kyi go cha 'dzin des phab:_dam pa zung gis bka' lung bzhin:_mi 'gyur rtags kyi ri mor bkod:_bstan 'gro'i sman yon mchog tu shog:_g.yu yi sgron mas bka' 'di srungs:_don gnyis 'grub pa'i bkra shis shog:_sa mA ya:__rgya:rgya:rgya:_mang+ga laM/_dge'o//
Notes	These texts were compiled and arranged by Dilgo Khyentse Rinpoche. Elsewhere this cycle is attributed to rdzong sngon pad+ma thugs mchog rdo rje.

Tibetan Text

Wylie

[edit]

༁ྃ༔ ཡང་ཟབ་བདེ་ཆེན་དཔལ་མོའི་ཐུགས་ཀྱི་མེ་ལོང་ལས༔ དབྱངས་ཅན་མ་དམར་མོའི་གསང་སྒྲུབ་ཡིད་བཞིན་འཕྲུལ་མཛོད་ཞེས་བྱ་བཞུགས་སོ༔

༁ྃ༔ ༠༠༠༠༠༔ ཨེ་དབྱིངས་དྲི་མེད་མཁྱེན་པའི་ཡེ་ཤེས་དངོས༔ མི་ཤིགས་ཝཾ་ཡིག་བདེ་བ་ཆེན་པོའི་ཀློང༔ གཉིས་མེད་ཟུང་འཇུག་ཧེ་རུ་ཀ་དཔལ་མོར༔ བློ་འདས་མཐའ་བྲལ་འཛིན་མེད་ཕྱག་གིས་འདུད༔ ཀ་དག་གཞི་དབྱིངས་དག་ཆེན་ཡེ་ཤེས་ལས༔ རྩལ་སྣང་ལྷུན་གྲུབ་ཟླ་བའི་སྲིང་མོ་ཞེས༔ གསང་བ་ལྷ་མོ་དམར་མོ་ཡོངས་ཤར་བའི༔ རྩ་སྒྲུབ་ཡིད་བཞིན་འཕྲུལ་མཛོད་འདི་ན་ངོམ༔ དེ་ཡང་དབང་གི་ལས་དག་ལ༔ ཤིས་པའི་གནས་ནི་ཉམས་དགའ་བར༔ ཌཱཀྐིའི་རཀྟ་བཞད་པ་ཡི༔ མདའ་མིག་དབང་གི་ཚེས་ལ་ནི༔ བྷནྡྷ་མཚན་ལྡན་སྣོད་མཆོག་ཏུ༔ དམ་རྫས་ཨ་མྲྀ་ཏ་དང་ནི༔ ཆགས་པའི་རྡུལ་གྱི་མེ་ཏོག་གི༔ ཕོན་པོ་སོ་ལྔ་ཕྱོགས་བསྡུས་བཅུད༔ གཏམས་པའི་མཁའ་འགྲོའི་བླ་ཆགས་རྫས༔ མེ་ལོང་སིནྡྷུ་རས་བཅག་དང༔ ཤེལ་དཀར་དུང་འགྲོན་ལ་སོགས་པ༔ འདུ་བགྱིས་ཡོ་བྱད་ཚོགས་པར་བཤམས༔ དེ་ནས་དངོས་གཞི་སྒྲུབ་པའི་རིམ༔ དང་པོ་སྐྱབས་སུ་འགྲོ་བ་ནི༔ ན་མོ༔ གདོད་ནས་རྣམ་དག་སྐུ་གསུམ་མཁའ་འགྲོ་ཡི༔ ངོ་མཚར་རང་བྱུང་ལྷུན་གྲུབ་དཀྱིལ་འཁོར་ལ༔ ཤེས་དང་ཤེས་བྱ་བདག་ཉིད་གཅིག་པ་རུ༔ འདུ་འབྲལ་མེད་པའི་ངང་ནས་སྐྱབས་སུ་མཆི༔ ལན་གསུམ༔ གཉིས་པ་གཞན་དོན་སེམས་བསྐྱེད་ནི༔ ཧོ༔ མཐའ་མེད་འཁོར་བའི་སེམས་ཅན་ཐམས་ཅད་ཀུན༔ ཡང་དག་ཞི་བ་མཆོག་གི་སར་འགོད་ཕྱིར༔ ཡེ་ཤེས་མཁའ་འགྲོ་དབྱངས་ཅན་ཁྱོད་བསྒྲུབས་ནས༔ འགྲོ་རྣམས་བདེ་ཆེན་ས་ལ་འགོད་པར་བགྱི༔ ལན་གསུམ༔ གསུམ་པ་ཡན་ལག་བདུན་པ་ནི༔ ཧཱུྃ༔ གཞི་དབྱིངས་ཀློང་ལ་གཞི་སྣང་གྲོལ་ཕྱག་འཚལ༔ སྒྲིབ་མེད་ཡེ་ཤེས་རྩལ་སྣང་མཆོད་པར་འབུལ༔ ཉེས་པའི་ཚོགས་ཀུན་སྐུ་ལྔའི་ངང་དུ་བཤགས༔ གསུང་ལྔས་འགྲོ་རྒྱུད་གྲོལ་བར་རྗེས་ཡི་རང༔ ཐུགས་གསང་མཆོག་གི་ཆོས་འཁོར་བསྐོར་བར་བསྐུལ༔ ཡོན་ཏན་མངའ་དབང་བསྒྱུར་ལ་བཞུགས་གསོལ་འདེབས༔ དགེ་ཚོགས་མཛད་པ་ལྷུན་གྱིས་གྲུབ་ཕྱིར་བསྔོ༔ བཞི་པ་བགེགས་ལ་བསྒོ་བ་ནི༔ ཧཱུྃ༔ རང་སྣང་དག་པ་རབ་འབྱམས་ཆེན་པོ་ལ༔ མ་དག་འཁྲུལ་པའི་ཀུན་བཏགས་གདོན་གྱི་ཚོགས༔ དགག་སྒྲུབ་སྤང་བླང་མེད་པའི་གཏོར་མ་ལོངས༔ སྤང་ཐོབ་བྲལ་བའི་ངང་དུ་མཚམས་བཅད་དོ༔ ཧཱུྃ་བཞིའི་སྔགས་ཀྱིས་བསྡིགས་པར་བྱ༔ ལྔ་པ་སྲུང་འཁོར་ཕུབ་པ་ནི༔ ཧཱུྃ༔ སྣོད་བཅུད་རྒྱུད་རྣམས་ཡེ་ནས་དག་རྟོགས་ཤིང༔ ཀུན་རྫོབ་སྒྱུ་མ་དོན་དམ་སྐྱེ་བ་མེད༔ ངོ་བོ་ཡེ་ཤེས་རང་བཞིན་སྐུར་སྨིན་པས༔ བརྟན་གཡོ་དག་མཉམ་སྲུང་བའི་འཁོར་ལོར་གྲུབ༔ ཛྙཱ་ན་བཛྲ་ཙཀྲ་བྷྲཱུྃ༔ དྲུག་པ་བྱིན་ཆེན་འབེབས་པ་ནི༔ ཨེ་མ་ཧོ༔ རང་བཞིན་སྐྱེ་མེད་ཆོས་སྐུའི་ཕོ་བྲང་ནས༔ རོལ་པ་འགག་མེད་མཁའ་འགྲོ་དབྱངས་ཅན་མ༔ རྩལ་སྣང་གནས་ཡུལ་དཔའ་བོ་ཌཱ་ཀྐིའི་ཚོགས༔ འདིར་གཤེགས་གནས་དང་ཡོ་བྱད་སྒྲུབ་པ་པོར༔ དབང་བསྐུར་བྱིན་རློབས་མཆོག་ཐུན་དངོས་གྲུབ་སྩོལ༔ བྱ་བྱེད་རོལ་པ་ངོ་བོ་དབྱེར་མེད་དུ༔ མཚན་ཉིད་བློ་དང་བྲལ་བར་བྱིན་ཆེན་ཕོབ༔ མི་བརྗེད་གཟུངས་དང་མི་འཇིགས་སྤོབས་པ་དང༔ མི་ཟད་བློ་གྲོས་མཆོག་ཐོབ་བྱིན་ཕོབ་ཅིག༔ ལུས་ལ་བདེ་དྲོད་ངག་ལ་ནུས་པ་དང༔ སེམས་ལ་ཉམས་རྟོགས་འཆར་བར་བྱིན་གྱིས་རློབས༔ སྒྲུབ་པའི་རྟགས་མཚན་མངོན་དུ་འགྱུར་བར་མཛོད༔ ཨོཾ་བཛྲ་ཛྙཱ་ན་ཌཱཀྐི་ནི་སྭ་ར་སྭ་སྟི་ས་མ་ཡ་ཧྲཱིཾཿཧྲཱིཾཿཧྲཱིཾཿ ཕེཾཿཕེཾཿ ཨེ་ཨཱ་ར་ལི་ཛཿཛཿ བདུན་པ་མཆོད་རྫས་བརླབ་པ་ནི༔ ཧོཿ ཕྱི་ནང་དངོས་ཀུན་མཆོད་པའི་སྤྲིན་ཕུང་གཡོ༔ རྩ་རྣམས་དག་པ་མི་འགྱུར་འཁོར་ལོའི་དཔྱིད༔ རླུང་ཁམས་ཡེ་ཤེས་རོལ་པའི་ཡོ་ལང་གིས༔ སྒྲོན་དྲུག་ཐིག་ལེ་ཆེན་པོའི་རྩལ་ལས་ནི༔ དཔག་མེད་གསང་གསུམ་མཆོད་པ་བླ་ན་མེད༔ སརྦ་པཉྩ་ས་མ་ཡ་ཧོ༔ བརྒྱད་པ་དངོས་གཞིའི་རིམ་པ་ནི༔ ཨཱཿ བློ་འདས་སྤྲོས་བྲལ་ཆེན་པོ་ལ༔ རང་མདངས་འགགས་མེད་སྙིང་རྗེའི་རྩལ༔ ཐུགས་རྗེའི་རིག་པའི་ཡེ་ཤེས་ནི༔ ཧྲཱིཾཿཡིག་དམར་པོ་འོད་དུ་ཞུ༔ སྲིད་ཞིའི་སྣང་བརྙན་བཀྲ་བ་ཡི༔ ཡེ་ཤེས་མེ་ལོང་ཡོངས་གྱུར་ལས༔ ཟླ་གམ་མཚན་རྫོགས་གཞལ་ཡས་དབུས༔ སྣ་ཚོགས་པདྨ་ཉི་ཟླའི་སྟེང༔ བཅོམ་ལྡན་ལྷ་མོ་དབྱངས་ཅན་མ༔ སྐུ་མདོག་དམར་མོ་ཆགས་ཉམས་རྒྱས༔ ཞལ་གཅིག་ཕྱག་གཉིས་གཡས་པ་ཡིས༔ དགོས་འདོད་འཇོ་བའི་ནོར་བུ་དང༔ གཡོན་པས་ཤེས་བྱའི་སྣང་བརྙན་འབུམ༔ གཅིག་ཆར་རྫོགས་པའི་ཨ་དརྴ༔ མ་རིག་གཉིད་སློང་གཡས་འཁྱིལ་དུང༔ འཛིན་ཅིང་དགྱེས་པའི་གར་གྱིས་རོལ༔ མཐོན་མཐིང་རལ་པའི་ཟུར་ཕུད་རྩེར༔ མ་ཎི་ཀ་ཡི་ཐོར་ཚུགས་མཛེས༔ གཉེན་ལྕུག་འཁྲིལ་ལྡེམ་གཞོན་པ་དང༔ གསལ་འཚེར་ལྷུན་སྡུག་གཟི་བྱིན་ཏེ༔ ཞི་ཚུལ་དགུ་ཡི་ཉམས་ཀྱིས་སྒེག༔ སྤྱན་གསུམ་སྐུ་གསུམ་གཟིགས་སྟངས་ངོམ༔ མཚན་ཉིད་དྲུག་ལྡན་པདྨ་རྒྱས༔ འདོད་པའི་མྱོས་བུམ་འབུར་ཞིང་གཡོ༔ རིན་ཆེན་དབུ་རྒྱན་སྙན་ཆ་དང༔ མགུར་ཆུན་ཕྱག་ཞབས་གདུ་བུས་བརྒྱན༔ གཞོན་ནུའི་འཕྱང་འཕྲུལ་དུ་མས་སྤུད༔ པཉྩ་ལི་ཀའི་སྨད་གཡོགས་དང༔ དར་དཔྱངས་རཏྣའི་སྐ་རགས་འཆང༔ ཞབས་གཉིས་མཉམ་པའི་སྟབས་ཀྱིས་བཞེངས༔ སྐུ་ལ་གདན་གསུམ་དཀྱིལ་འཁོར་ཀུན༔ མ་ལུས་ལུས་པ་མེད་པར་རྫོགས༔ རྩ་འཁོར་འོད་ཀྱི་དྲྭ་བའི་ཀློང༔ གནས་ཡུལ་དཔའ་བོ་ཌཱཀྐིའི་ཚོགས༔ ཏིལ་གོང་ཁ་ཕྱེས་ལྟ་བུར་གསལ༔ སྤྱི་བོར་འཇའ་གུར་འཁྲིགས་པའི་ཀློང༔ རིགས་བདག་བླ་མ་འཇམ་དཔལ་དབྱངས༔ དམར་གསལ་ལོངས་རྫོགས་ཆས་ཀྱིས་བརྒྱན༔ ཕྱག་ཟུང་རྡོར་དྲིལ་ཐུགས་ཀར་བསྣོལ༔ ཕྲག་གོང་ཨུཏྤལ་ཁ་ཕྱེའི་དབུས༔ རལ་གྲིའི་མགུལ་པར་གླེགས་བམ་མཚན༔ ཐུགས་ལས་འཇའ་ཟེར་ཕྱོགས་བཅུར་འཕྲོས༔ ལྔ་ལྡན་ཐིག་ལེ་ཉེར་གཅིག་ཀློང༔ འཕགས་མ་ལྷ་མོ་ཉི་ཤུ་གཅིག༔ སྐུ་མདོག་ཕྱག་མཚན་རྒྱན་ཆ་ལུགས༔ མ་འདྲེས་ཡོངས་རྫོགས་ཆེན་པོར་གསལ༔ ཡེ་ནས་དམ་ཡེ་གཉིས་སུ་མེད༔ ས་མཱ་ཡ༔ དགུ་པ་གདུང་བས་སྤྱན་འདྲེན་ནི༔ ཨེ་མ་ཧོཿ གནས་འོག་མིན་མཁའ་སྤྱོད་གཡུ་ལོ་བཀོད༔ ཡུལ་ལྷོ་ཕྱོགས་རྒྱ་མཚོའི་འགྲམ་ལ་སོགས༔ ཞིང་དག་པ་རབ་འབྱམས་གར་བཞུགས་ནས༔ མ་ཆོས་སྐུ་ཡུམ་ཆེན་ཀུན་ཏུ་བཟང༔ དཔལ་ལོངས་སྤྱོད་རྫོགས་མཛད་ཝ་རཱ་ཧི༔ ལྷ་འཇམ་དཔལ་དགྱེས་བསྐྱེད་ཚངས་སྲས་མོ༔ ཡུམ་རྗེ་བཙུན་ཨརྻ་ཏཱ་རེ་མ༔ མགོན་པདྨའི་ལྕམ་གཅིག་མཁར་ཆེན་བཟའ༔ ཡུལ་ཉེར་བཞིའི་དཔའ་བོ་ཌཱཀྐིའི་ཚོགས༔ འདིར་གདུང་བའི་དབྱངས་ཀྱིས་སྤྱན་འདྲེན་ན༔ དུས་སྐད་ཅིག་ཉིད་ལ་བྱོན་ནས་ཀྱང༔ དོན་ཡུམ་ཆེན་དགོངས་པ་མངོན་གྱུར་མཛོད༔ སླར་མི་བརྗེད་གཟུངས་དང་མི་འཇིགས་སྤོབས༔ དོན་མི་ཟད་བློ་གྲོས་སྣང་བ་སྩོལ༔ མཆོག་ཐུན་མོང་དངོས་གྲུབ་ཆར་བཞིན་ཕོབ༔ བཛྲ་ཌཱཀྐི་ནི་ས་མཱ་ཡ་ཧྲཱིཾཿཧྲཱིཾཿཛཿཛཿ བཅུ་པ་བཞུགས་སུ་གསོལ་བ་ནི༔ ཧཱུྃ༔ ཡིན་ལུགས་བསམ་ངོ་བྲལ་བ་དང༔ བློ་ནི་ངོ་བོ་ཉིད་ཀྱིས་དག༔ ལྷ་དང་རང་རིག་གཉིས་མེད་དུ༔ དགག་སྒྲུབ་ལས་འདས་བཞུགས་གསོལ་འདེབས༔ ཛཿཧཱུྃ་བཾ་ཧོཿ ས་མཱ་ཡ་ཏིཥྛ་ལྷན༔ བཅུ་གཅིག་བརྡ་ཕྱག་འཚལ་བ་ནི༔ ཧཱུྃ༔ ཡེ་ནས་རང་རིག་ཌཱཀྐི་རུ༔ ཤེས་ལ་སྒོམ་བྱེད་བློ་དང་བྲལ༔ གཞི་འབྲས་དབྱེར་མེད་རང་བཞིན་ལ༔ བརྡ་དོན་མཇལ་བས་ཕྱག་བགྱིའོ༔ ཨ་ཏི་པུ་ཧོ༔ པྲ་ཏཱིཙྪ་ཧོ༔ བཅུ་གཉིས་མཆོད་པ་འབུལ་བ་ནི༔ ཧཱུྃ༔ སྲིད་ཞིའི་དངོས་ཀུན་མཆོད་པའི་སྤྲིན་ཕུང་ནི༔ མི་ཟད་རྒྱན་གྱི་འཁོར་ལོའི་རོལ་པ་རུ༔ ཡིད་བཞིན་འདོད་པ་འཇོ་བའི་འཕྲུལ་གྱི་མཛོད༔ དེ་བཞིན་ཉིད་དབྱིངས་ཡེ་ཤེས་ཆེན་པོར་རོལ༔ ཨོཾ་བཛྲ་ཛྙཱ་ན་དྷཱཀྐི་ནི་སྭ་ར་སྭ་སྟི་ས་པཱ་རི་ཝ་ར་པུཥྤེ་ནས་ཤབྟ་སརྦ་པཉྩ་རཀྟ་བ་ལིངྟ་པཱུ་ཛ་ཧོ༔ བཅུ་གསུམ་བསྟོད་པ་བྱ་བ་ནི༔ ཨེ་མ་ཧོཿ དང་པོའི་སངས་རྒྱས་ཡུམ་ཆེན་ཀུན་བཟང་མོ༔ འཕགས་བཞི་སྐྱེད་ཡུམ་ཤེས་རབ་ཕ་རོལ་ཕྱིན༔ སྤྲུལ་པའི་མཁའ་འགྲོ་ངག་གི་དབང་ཕྱུག་མ༔ པདྨའི་ལས་རྒྱ་མཁར་ཆེན་བཟའ་ལ་བསྟོད༔ ཀུན་དགའི་དཔལ་སྟེར་མཚན་དཔེའི་ལང་ཚོ་འབར༔ རྒྱལ་བའི་ཆོས་ཀུན་དབྱངས་སུ་ལེན་པའི་གསུང༔ ཇི་ལྟ་ཇི་སྙེད་མཁྱེན་པའི་ཡེ་ཤེས་ཐུགས༔ དཔལ་མོ་དབྱངས་ཅན་མ་ལ་ཕྱག་འཚལ་བསྟོད༔ དགའ་བ་བཅུ་དྲུག་དཔལ་གྱིས་མངོན་མཛེས་སྐུ༔ སྟོང་ཉིད་བཅུ་དྲུག་དཔྱིད་དུ་སྙོམས་ཞུགས་པས༔ ཐིག་ལེ་བཅུ་དྲུག་ཨེ་ཝཾ་དབྱིངས་སུ་དག༔ ཡེ་ཤེས་བཅུ་དྲུག་ས་ལ་སྙེམས་གྱུར་ཅིག༔ བཅུ་བཞི་བཟླས་པའི་དམིགས་པ་ནི༔ ཐུགས་ཀར་པདྨ་ཉི་ཟླའི་སྟེང༔ ཀུ་རུ་ཀུལླེ་སྐུ་མདོག་དམར༔ ཞལ་གཅིག་ཕྱག་གཉིས་སྤྱན་གསུམ་པ༔ ཕྱག་གཉིས་ཨུཏྤལ་མདའ་གཞུ་འགེངས༔ ཞབས་གཉིས་བརྐྱང་བསྐུམ་རོལ་སྟབས་བཞུགས༔ ཁྲོ་མོའི་ཆས་ཀུན་ཡོངས་རྫོགས་པའི༔ ཙིཏྟ་འོད་ལྔའི་ཐིག་ལེའི་དབུས༔ དགའ་འཁྱིལ་ཧྲཱིཾཿགིས་མཚན་པའི་མཐར༔ སྔགས་ཕྲེང་འཁོར་བའི་འོད་ཟེར་གྱིས༔ སྣང་དང་ཕྱེད་སྣང་མི་སྣང་གི༔ སྲིད་པའི་སྣང་ཞེན་མ་ལུས་ཀུན༔ ལྷ་སྔགས་ཆོས་སྐུའི་རོལ་པར་གསལ༔ རིག་འདུས་བླ་མའི་ཐུགས་རྒྱུད་བསྐུལ༔ འོད་འཕྲོས་དོན་གཉིས་ལྷུན་གྱིས་གྲུབ༔ སྐུ་ལས་བྱང་སེམས་བདུད་རྩིའི་རྒྱུན༔ གོ་རིམ་བཞིན་དུ་བབས་པ་ལས༔ གནས་དང་སྤང་བྱ་ངོ་བོ་ཡི༔ དགའ་བཞིའི་ཡེ་ཤེས་ཉམས་སུ་མྱོང༔ ཆོས་དོན་རབ་ཏུ་རྣམ་འབྱེད་ཀྱི༔ གཟུངས་སྤོབས་བློ་གྲོས་སྣང་བ་རྒྱས༔ མཆོག་ཐུན་དངོས་གྲུབ་ཐོབ་པར་བསམ༔ ཨཱོཾ་སྭ་ར་སྭ་སྟི་ཧྲཱིཾཿཧྲཱིཾཿཧྲཱིཾཿསྭཱ་ཧཱཿ རྩ་སྔགས་ཆུ་བོའི་རྒྱུན་བཞིན་བསྙེན༔ འཁྲུལ་མེད་དགོངས་རྒྱུད་རྟོགས་པ་འཕོ༔ རང་མདངས་འགགས་མེད་ལྷུན་གྲུབ་ཀྱི༔ ལུ་གུ་རྒྱུད་ཀྱི་སྣང་བ་མཐོང༔ རྩལ་ལས་བཀའ་དང་བསྟན་བཅོས་ཀྱི༔ ཚིག་དོན་ཀློང་རྡོལ་ལྷུག་པར་འཆར༔ མི་བརྗེད་གཟུངས་དང་མི་འཇིགས་པའི༔ ཡང་དག་སྤོབས་པ་ཐོབ་པ་དང༔ མི་ཟད་བློ་གྲོས་སྣང་བ་རྒྱས༔ སྒྲུབ་དང་ལས་བཞིའི་ཁ་བསྒྱུར་སོགས༔ གབ་པའི་མན་ངག་ཞལ་ལས་ཤེས༔ གཞན་ཡང་དངོས་ཉམས་རྨི་ལམ་དུ༔ གྲུབ་པའི་རྟགས་མཚན་སྣ་ཚོགས་འོང༔ མཐར་ཐུག་རྣམ་ཀུན་མཆོག་ལྡན་གྱི༔ དོན་གྱི་དབྱངས་ཅན་རང་ཞལ་མཇལ༔ ཐུན་མོང་རབ་འབྱམས་ལས་རྣམས་ཀུན༔ གེགས་མེད་བདེ་ལེགས་འགྲུབ་པར་འགྱུར༔ ས་མཱ་ཡ༔ དེ་རྗེས་བླ་ན་མེད་པ་ཡི༔ ཁྱད་པར་ཚོགས་གཉིས་གསོག་པའི་ཕྱིར༔ ག་ཎ་ཙཀྲའི་མཆོད་པ་ནི༔ ཕྱི་ནང་གསང་བའི་དམ་ཚིག་རྫས༔ མ་ཚང་མེད་པར་འདུ་བྱས་ལ༔ དང་པོ་བྱིན་གྱིས་བརླབ་པ་ནི༔ རྃ་ཡྃ་ཁྃ༔ ཨོཾ་ཨཱཿཧཱུྃཿ ཀུན་བཏགས་ཕྱི་སྣོད་བྷནྡྷ་རུ༔ གཞན་དབང་ནང་བཅུད་སྣང་སྲིད་དངོས༔ ཡོངས་གྲུབ་ཀ་ནས་དག་པ་ཡི༔ ངོ་བོ་ཡེ་ཤེས་རོལ་པའི་རྒྱན༔ རྣམ་པ་འདོད་པའི་ཡོན་ཏན་ཀུན༔ ཡིད་བཞིན་འབྱུང་བའི་གཏེར་དུ་བསྒྱུར༔ ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ༔ གཉིས་པ་ཚོགས་ཞིང་སྤྱན་འདྲེན་ནི༔ ཧྲཱིཿ ཕྱི་ལྟར་འོག་མིན་མཁའ་སྤྱོད་གཡུ་ལོ་བཀོད༔ གནས་ཡུལ་ཉེར་བཞི་དུར་ཁྲོད་བརྒྱད་ལ་སོགས༔ ནང་ལྟར་རྡོ་རྗེ་ལུས་ཀྱི་གྲོང་ཁྱེར་མཆོག༔ རྩ་ཁམས་ཡེ་ཤེས་སྤྲིན་དུ་རོལ་པའི་དཔྱིད༔ རླུང་ཁམས་ཡེ་ཤེས་གདངས་སུ་སྦྱོར་བའི་དབྱིངས༔ གདན་གསུམ་དཀྱིལ་འཁོར་ཡོངས་སུ་རྫོགས་པ་ལས༔ དཔའ་བོ་དང་ནི་རྣལ་འབྱོར་མ་རྣམས་ཀུན༔ ཚོགས་ཀྱི་འདུ་བར་སྤྱན་འདྲེན་གཤེགས་སུ་གསོལ༔ བྱིན་རླབས་དབང་བསྐུར་མཆོག་ཐུན་དངོས་གྲུབ་སྩོལ༔ བཛྲ་ཛྙཱ་ན་ཌཱཀྐི་ནི་ཨེ་ཨ་ར་ལི་ཕེཾཿཕེཾཿཛཿཛཿ གསུམ་པ་ཚོགས་ཕུད་འབུལ་བ་ནི༔ ཧོཿ ཕྱི་ལྟར་བླ་མེད་དམ་ཚིག་ཆེན་པོའི་རྫས༔ ནང་ལྟར་ཀཱ་མ་གུ་ཎ་པཉྩར་སྨིན༔ གཞན་དུ་དགའ་བཞི་རྣམ་དག་མཐར་ཕྱིན་གྱི༔ གསལ་ཡངས་རང་བྱུང་མཆོད་པ་འབུལ་ལོ་བཞེས༔ ག་ཎ་ཙཀྲ་པཱུ་ཛ་ཁ་ཧི༔ བཞི་པ་བར་པ་བཤགས་པ་ནི༔ ཧོཿ གདོད་ནས་བཤགས་བྱ་བཤགས་བྱེད་གཉིས་མེད་ཀྱང༔ གློ་བུར་མ་རིག་འཁྲུལ་པའི་ལས་དབང་གིས༔ ཐོག་མེད་ནས་བསགས་དམ་ཚིག་ཆག་ཉམས་ཀུན༔ མཐོལ་བཤགས་མི་སྒྲིབ་ཚངས་པ་བསྩལ་དུ་གསོལ༔ ཨོཾ་བཛྲ་ས་མ་ཡ་ཧོཿ ལྔ་པ་ཐ་མ་བསྒྲལ་བསྟབ་ནིཿ ཧཱུྃ༔ འཇིག་ལྟའི་རུ་ཏྲ་ལས་སྐྱེས་ཞིང་གྱུར་གྱི༔ མཆོག་དང་མཆོག་ཕྲན་དག་མཉམ་ཆེན་པོ་རུ༔ ཡོངས་བསྒྲལ་གཞི་དབྱིངས་རིག་པའི་ཀློང་དུ་བསྟབ༔ བསྐང་ངོ་ཀུན་ཟླུམ་ཐིག་ལེའི་དབྱིངས་སུ་བསྐང༔ སྐོང་གྱུར་དབང་དང་དངོས་གྲུབ་བསྩལ་དུ་གསོལ༔ དྲུག་པ་ལྷག་མ་བསྔོ་བ་ནི༔ ཨ་ཀཱ་རོས་བརླབས་ལ༔ ཕེཾཿ དཀྱིལ་འཁོར་མུ་རན་མཐར་སྐྱོང་བའི༔ ལྷག་ལ་དབང་བའི་མགྲོན་ཚོགས་རྣམས༔ ལྷག་མའི་གཏོར་མ་འདི་བཞེས་ལ༔ བཅོལ་བའི་ལས་རྣམས་འགྲུབ་པར་མཛོད༔ དེ་ནས་ཐ་མའི་ལས་རིམ་ལ༔ དང་པོ་ཐུགས་དམ་བསྐུལ་བ་ནི༔ ཧྲཱིཿ གཞི་དབྱིངས་ཡུམ་ཆེན་ཆོས་སྐུའི་མཁའ་ཀློང་ནས༔ གཞི་སྣང་མ་འགག་དབྱངས་ཅན་མཁའ་འགྲོའི་ཚོགས༔ གཞི་རྩལ་རོལ་པ་རྒྱན་གྱི་འཁོར་ལོར་བཞེངས༔ གཞི་ཐོག་ཉིད་དུ་གྲོལ་བའི་ཕྲིན་ལས་མཛོད༔ གཉིས་པ་ཆད་མདོ་བསྒྲག་པ་ནི༔ ཧཱུྃ༔ སྔོན་ཚེ་དུས་བཞི་མཉམ་ཉིད་ཆེན་པོའི་ཀློང༔ འདུས་མ་བྱས་པ་ཡེ་ཤེས་རྡོ་རྗེ་ཆེ༔ ཁྱད་ཆོས་དྲུག་གིས་མངོན་པར་བྱང་ཆུབ་ཚེ༔ རྟག་ཆད་མཐར་འཛིན་གཞི་ཐོག་གྲོལ་བ་ཡི༔ ཆད་དང་གཡར་དམ་ད་དུས་སྐུལ་བྱེད་ན༔ ལམ་སྣང་འབྲས་བུར་སྨིན་པའི་ཕྲིན་ལས་མཛོད༔ འོག་མིན་མཁའ་སྤྱོད་གཡུ་ལོ་བཀོད་པ་དང༔ གནས་ཡུལ་ཉེར་བཞི་དུར་ཁྲོད་བརྒྱད་ལ་སོགས༔ ལོངས་སྤྱོད་རྫོགས་མཛད་ཌཱཀྐིའི་ཚོགས་རྣམས་ཀྱིས༔ ཉིད་ལས་མི་གཞན་འཁོར་ལ་བརྡ་དོན་དང༔ རྟགས་ཀྱི་ཆོས་གསུངས་དེ་ཡི་ཚེ་སྐབས་སུ༔ སྟོན་འཁོར་སྲིད་ཞི་མཉམ་ཉིད་ཆེན་པོ་རུ༔ རྟོགས་པའི་ཆད་བཞིན་ཕྲིན་ལས་འགྲུབ་པར་མཛོད༔ བོད་ཡུལ་ལྗོངས་འདིར་སློབ་དཔོན་པདྨ་ཡི༔ གཟུངས་མཆོག་ཌཱཀྐི་ཡེ་ཤེས་མཚོ་རྒྱལ་གྱིས༔ བྱིན་རླབས་དགོངས་པའི་རྩལ་ལ་རྒྱས་བཏབ་ཚེ༔ སྲིང་གཅིག་གཡུ་སྒྲོན་ཡིད་འོང་ལྷ་མོ་དང༔ རྨུག་འཛིན་དབང་པོ་གཏེར་གྱི་མཛོད་འཛིན་པས༔ ཅི་འདོད་དངོས་གྲུབ་སྟེར་བའི་ཆད་མདོ་བཞིན༔ གཏོར་མ་འདི་བཞེས་རྣལ་འབྱོར་སྡོང་གྲོགས་མཛོད༔ གསུམ་པ་བརྟན་མ་སྐྱོང་བ་ནི༔ ཧཱུྃ་བྷྱོཿ དུས་སྦྱོར་རྟེན་འབྲེལ་བཅུ་གཉིས་གནས་དག་པའི༔ བརྟན་མ་བཅུ་གཉིས་འདིར་བྱོན་གཏོར་མ་ལོངས༔ རྩ་རླུང་ཐིག་ལེ་དབང་ཐང་ཉམས་པ་གསོས༔ ཚེ་བསོད་ཉམས་རྟོགས་འཕེལ་བའི་ཕྲིན་ལས་མཛོད༔ མ་མ་ཧྲིཾ་ཧྲིཾ་བ་ལིང་ཏ་ཁ་ཁ་ཁཱ་ཧི་ཁཱ་ཧི༔ བཞི་པ་བརྟུལ་ཞུགས་བྲོས་མནན་ནིཿ ཧཱུྃ༔ མཚན་བཅས་རྟོགས་པའི་དམ་སྲི་ལོག་འདྲེན་ཀུན༔ ཨེ་དབྱིངས་སྟོང་ཆེན་ཡུམ་གྱི་མཁའ་ཀློང་དུ༔ ལྡང་མེད་རྒྱས་བཏབ་ལས་བཞི་ལྷུན་གྲུབ་ཀྱི༔ བྲོ་བརྡུང་ཉོན་མོངས་ཀ་དག་ངང་དུ་ནོན༔ སྟྭཾ་བྷ་ཡ་ནན་ནན༔ ལྔ་པ་དངོས་གྲུབ་བླང་པ་ནི༔ ཨེ་མ་ཧོཿ རྒྱལ་ཡུམ་བསྒྲུབ་པས་དངོས་གྲུབ་ཉི་མ་བཞིན༔ འདྲེན་པའི་སྐྱ་རེངས་ཤར་ཚེ་བསྐུལ་བྱེད་ན༔ ཐུགས་རྗེ་མ་ཆུང་སྔོན་གྱི་ཐུགས་དམ་དགོངས༔ ཐུགས་གསང་མི་ཤིགས་འོད་ལྔའི་ཏི་ལ་ཀ༔ སྣང་སྲིད་ཡོངས་དག་དཔལ་གྱི་བེའུ་ནས༔ འཛད་མེད་མཆོག་ཐུན་དངོས་གྲུབ་གཏེར་གྱི་དབྱིག༔ ད་ལྟ་སྐད་ཅིག་ཉིད་ལ་བསྩལ་དུ་གསོལ༔ རྩ་སྔགས་མཐར། ཀཱ་ཡ་ཝཱཀྐ་ཙིཏྟ་སིདྡྷི་ཕ་ལ་ཧཱུྃ༔ དེ་ནས་མཆོད་ཅིང་བསྟོད་ལ༔ དྲུག་པ་བཟོད་གསོལ་ནོངས་བཤགས་ནི༔ ཧོཿ མཁའ་འགྲོའི་དཀྱིལ་འཁོར་དམ་པ་རུ༔ འགལ་འཁྲུལ་ཉེས་ཚོགས་ཅི་བགྱིས་པ༔ ཌཱཀྐི་དམ་ཅན་སྤྱན་སྔ་རུ༔ མཐོལ་ལོ་བཤགས་སོ་བཟོད་པར་གསོལ༔ ཡིག་གེ་བརྒྱ་པས་ལྷག་ཆད་བསྐང༔ བདུན་པ་རྫོགས་རིམ་བསྡུ་བ་ནི༔ ཧོཿ སྣང་གྲགས་ལྷ་སྔགས་སྒྱུ་མའི་རོལ་པ་ཀུན༔ ཀ་དག་སྒྲིབ་མེད་གཉུག་མའི་ཀློང་དུ་ཨཿ སླར་ཡང་གཞི་ལས་གཞི་སྣང་ལྷུན་གྲུབ་ཀྱི༔ དག་མཉམ་ཟུང་འཇུག་ལྷ་སྐུའི་ཕྱག་རྒྱར་ལྡང༔ བརྒྱད་པ་བསྔོ་བའི་མཚམས་སྦྱོར་ནི༔ ཧོཿ སྒྲ་དབྱངས་ལྷ་མོའི་དཀྱིལ་འཁོར་དམ་པ་རུ༔ སྨིན་གྲོལ་ལམ་ལ་བསླབས་པའི་དགེ་བའི་མཐུས༔ འགྲོ་ཀུན་ཕྱམ་གཅིག་རྫོགས་པའི་སངས་རྒྱས་ཀྱི༔ གོ་འཕང་དམ་པ་ཐོབ་པའི་རྒྱུ་རུ་བསྔོ༔ དགུ་པ་སྨོན་ལམ་གདབ་པ་ནི༔ ཧོཿ བྱ་བྱེད་རོལ་བ་དག་པའི་འཁོར་ལོ་རུ༔ ཡོངས་ཤར་ཁྱད་ཆོས་དྲུག་ལྡན་གདོད་མའི་དབྱིངས༔ སྒྲོན་དྲུག་ཡེ་ཤེས་སྐུ་ཡི་འཛུམ་ཞལ་དང༔ གཉིས་མེད་མཇལ་ཏེ་མངོན་པར་བྱང་ཆུབ་ཤོག༔ བཅུ་པ་བཀྲ་ཤིས་བརྗོད་པ་ནི༔ ལྷ་ཡི་ལམ་ཀུན་མཁའ་ཡི་གོས་ཀྱིས་ནི༔ ཁྱབ་པ་ཇི་བཞིན་དགའ་སྟེར་ལྷ་མོའི་ཚོགས༔ སྲིད་ཞིའི་མཛེས་སྡུག་རྫོགས་པའི་རྣམ་འགྱུར་ངོམ༔ མེ་ཏོག་མནྡྷ་ར་དང་པདྨ་དང༔ ཀུ་མུད་ཏ་དང་ཨུཏྤལ་གུར་གུམ་སོགས༔ ཤིས་བརྗོད་ཆུ་སྐྱེས་འཕྲེང་བ་ཆར་དུ་བསྙིལ༔ ངོ་མཚར་དབྱངས་བདུན་དཔྱིད་ལ་རབ་དྲངས་པའི༔ གླུ་གར་རོལ་མོའི་འགྱུར་བ་འགྲན་ལ་བརྩོན༔ འཇའ་ཚོན་འོད་ལྔའི་གུར་ཁྱིམ་རྣམ་བཀྲ་ཞིང༔ ཀུན་ཀྱང་རྗེས་ཆགས་ཉམས་ཀྱི་དགྱེས་པར་བཞུགས༔ རང་རིག་འགྱུར་མེད་ཆོས་སྐུ་ཡུམ་ཆེན་མོ༔ རང་རྩལ་འགག་མེད་ཤེས་རབ་ཕ་རོལ་ཕྱིན༔ རང་སྣང་བདེ་ཆེན་དཔལ་མོ་མཚོ་རྒྱལ་མས༔ རང་གཞན་དོན་གཉིས་འགྲུབ་པའི་བཀྲ་ཤིས་ཤོག༔ མཚན་དཔེ་གསལ་རྫོགས་སྐུ་ཡི་བཀྲ་ཤིས་ཤོག༔ དྲུག་ཅུའི་གདངས་ལྡན་གསུང་གི་བཀྲ་ཤིས་ཤོག༔ སྒྲིབ་མེད་གསལ་སྟོང་ཐུགས་ཀྱི་བཀྲ་ཤིས་ཤོག༔ དབྱངས་ཅན་སྐུ་གསུང་ཐུགས་ཀྱི་བཀྲ་ཤིས་ཤོག༔ མདོ་རྒྱུད་མ་ལུས་དགོངས་དོན་ས་ལེར་བཀྲ༔ སྒྲ་དོན་རྒྱན་གྱི་བརྗོད་པ་རྣམ་པར་དག༔ འགལ་ཟློས་ལྷག་ཆད་སྐྱོན་སྤངས་འཆོས་སྐྱོབ་ཀྱི༔ དབྱངས་སྙན་ཕྱོགས་སུ་སྒྲོགས་པའི་བཀྲ་ཤིས་ཤོག༔ གཞི་ཡི་བཀྲ་ཤིས་ཡོད་མེད་ཚིག་ལས་འདས༔ ལམ་གྱི་བཀྲ་ཤིས་སྒོམ་བྱེད་བློ་དང་བྲལ༔ འབྲས་བུའི་བཀྲ་ཤིས་སྐུ་དང་ཡེ་ཤེས་ཀྱི༔ སྣང་བ་མངོན་དུ་འགྱུར་བའི་བཀྲ་ཤིས་ཤོག༔ ཕུན་ཚོགས་སྡེ་བཞིའི་ལང་ཚོའི་འདབ་མ་བཞད༔ ལུང་རྟོགས་ཡོན་ཏན་སྦྲང་རྩིའི་བཅུད་ཀྱིས་གཏམས༔ དོན་གཉིས་གེ་སར་དོགས་པས་རབ་བཟུང་བའི༔ དགེ་མཚན་པདྨོ་རྒྱས་པའི་བཀྲ་ཤིས་ཤོག༔ ཡང་དག་དོན་གྱི་ལྷ་མོ་ཡི༔ གསང་གསུམ་རང་རིག་ཨེ་ཝཾ་གཟུགས༔ ཀུན་ནས་ཟླུམ་པོའི་ཏི་ལ་ཀའི༔ ཀློང་ལས་རང་བྱུང་ཤར་བ་བཞིན༔ པདྨ་ཐུགས་མཆོག་རྡོ་རྗེ་རྩལ༔ ཆོས་ཀྱི་གོ་ཆ་འཛིན་དེས་ཕབ༔ དམ་པ་ཟུང་གིས་བཀའ་ལུང་བཞིན༔ མི་འགྱུར་རྟགས་ཀྱི་རི་མོར་བཀོད༔ བསྟན་འགྲོའི་སྨན་ཡོན་མཆོག་ཏུ་ཤོག༔ གཡུ་ཡི་སྒྲོན་མས་བཀའ་འདི་སྲུངས༔ དོན་གཉིས་འགྲུབ་པའི་བཀྲ་ཤིས་ཤོག༔ ས་མཱ་ཡ༔ རྒྱ༔རྒྱ༔རྒྱ༔ མངྒ་ལཾ། དགེའོ།། །།

[edit]

\u0f01\u0f83:___yang zab bde chen dpal mo'i thugs kyi me long las:_dbyangs can ma dmar mo'i gsang sgrub yid bzhin 'phrul mdzod zhes bya bzhugs so: \u0f01\u0f83:_00000:__e dbyings dri med mkhyen pa'i ye shes dngos:_mi shigs waM yig bde ba chen po'i klong:_gnyis med zung 'jug he ru ka dpal mor:_blo 'das mtha' bral 'dzin med phyag gis 'dud:_ka dag gzhi dbyings dag chen ye shes las:_rtsal snang lhun grub zla ba'i sring mo zhes:_gsang ba lha mo dmar mo yongs shar ba'i:_rtsa sgrub yid bzhin 'phrul mdzod 'di na ngom:_de yang dbang gi las dag la:_shis pa'i gnas ni nyams dga' bar:_DAk+ki'i rak+ta bzhad pa yi:_mda' mig dbang gi tshes la ni:_b+han+d+ha mtshan ldan snod mchog tu:_dam rdzas a mr-i ta dang ni:_chags pa'i rdul gyi me tog gi:_phon po so lnga phyogs bsdus bcud:_gtams pa'i mkha' 'gro'i bla chags rdzas:_me long sin+d+hu ras bcag dang:_shel dkar dung 'gron la sogs pa:_'du bgyis yo byad tshogs par bshams:_de nas dngos gzhi sgrub pa'i rim:_dang po skyabs su 'gro ba ni:__na mo:_gdod nas rnam dag sku gsum mkha' 'gro yi:_ngo mtshar rang byung lhun grub dkyil 'khor la:_shes dang shes bya bdag nyid gcig pa ru:_'du 'bral med pa'i ngang nas skyabs su mchi:_lan gsum:_gnyis pa gzhan don sems bskyed ni:_ho:_mtha' med 'khor ba'i sems can thams cad kun:_yang dag zhi ba mchog gi sar 'god phyir:_ye shes mkha' 'gro dbyangs can khyod bsgrubs nas:_'gro rnams bde chen sa la 'god par bgyi:_lan gsum:_gsum pa yan lag bdun pa ni:_hU~M:_gzhi dbyings klong la gzhi snang grol phyag 'tshal:_sgrib med ye shes rtsal snang mchod par 'bul:_nyes pa'i tshogs kun sku lnga'i ngang du bshags:_gsung lngas 'gro rgyud grol bar rjes yi rang:_thugs gsang mchog gi chos 'khor bskor bar bskul:_yon tan mnga' dbang bsgyur la bzhugs gsol 'debs:_dge tshogs mdzad pa lhun gyis grub phyir bsngo:_bzhi pa bgegs la bsgo ba ni:_hU~M:_rang snang dag pa rab 'byams chen po la:_ma dag 'khrul pa'i kun btags gdon gyi tshogs:_dgag sgrub spang blang med pa'i gtor ma longs:_spang thob bral ba'i ngang du mtshams bcad do:_hU~M bzhi'i sngags kyis bsdigs par bya:_lnga pa srung 'khor phub pa ni:_hU~M:_snod bcud rgyud rnams ye nas dag rtogs shing:_kun rdzob sgyu ma don dam skye ba med:_ngo bo ye shes rang bzhin skur smin pas:_brtan g.yo dag mnyam srung ba'i 'khor lor grub:_dz+nyA na badz+ra tsakra b+h+rU~M:_drug pa byin chen 'bebs pa ni:_e ma ho:_rang bzhin skye med chos sku'i pho brang nas:_rol pa 'gag med mkha' 'gro dbyangs can ma:_rtsal snang gnas yul dpa' bo DA k+ki'i tshogs:_'dir gshegs gnas dang yo byad sgrub pa por:_dbang bskur byin rlobs mchog thun dngos grub stsol:_bya byed rol pa ngo bo dbyer med du:_mtshan nyid blo dang bral bar byin chen phob:_mi brjed gzungs dang mi 'jigs spobs pa dang:_mi zad blo gros mchog thob byin phob cig:_lus la bde drod ngag la nus pa dang:_sems la nyams rtogs 'char bar byin gyis rlobs:_sgrub pa'i rtags mtshan mngon du 'gyur bar mdzod:_oM badz+ra dz+nyA na DAk+ki ni swa ra swa sti sa ma ya hrIMHhrIMHhrIMH_pheMHpheMH_e A ra li dzaHdzaH_bdun pa mchod rdzas brlab pa ni:_hoH_phyi nang dngos kun mchod pa'i sprin phung g.yo:_rtsa rnams dag pa mi 'gyur 'khor lo'i dpyid:_rlung khams ye shes rol pa'i yo lang gis:_sgron drug thig le chen po'i rtsal las ni:_dpag med gsang gsum mchod pa bla na med:_sarba pany+tsa sa ma ya ho:_brgyad pa dngos gzhi'i rim pa ni:_AH_blo 'das spros bral chen po la:_rang mdangs 'gags med snying rje'i rtsal:_thugs rje'i rig pa'i ye shes ni:_hrIMHyig dmar po 'od du zhu:_srid zhi'i snang brnyan bkra ba yi:_ye shes me long yongs gyur las:_zla gam mtshan rdzogs gzhal yas dbus:_sna tshogs pad+ma nyi zla'i steng:_bcom ldan lha mo dbyangs can ma:_sku mdog dmar mo chags nyams rgyas:_zhal gcig phyag gnyis g.yas pa yis:_dgos 'dod 'jo ba'i nor bu dang:_g.yon pas shes bya'i snang brnyan 'bum:_gcig char rdzogs pa'i a dar+sha:_ma rig gnyid slong g.yas 'khyil dung:_'dzin cing dgyes pa'i gar gyis rol:_mthon mthing ral pa'i zur phud rtser:_ma Ni ka yi thor tshugs mdzes:_gnyen lcug 'khril ldem gzhon pa dang:_gsal 'tsher lhun sdug gzi byin te:_zhi tshul dgu yi nyams kyis sgeg:_spyan gsum sku gsum gzigs stangs ngom:_mtshan nyid drug ldan pad+ma rgyas:_'dod pa'i myos bum 'bur zhing g.yo:_rin chen dbu rgyan snyan cha dang:_mgur chun phyag zhabs gdu bus brgyan:_gzhon nu'i 'phyang 'phrul du mas spud:_pany+tsa li ka'i smad g.yogs dang:_dar dpyangs rat+na'i ska rags 'chang:_zhabs gnyis mnyam pa'i stabs kyis bzhengs:_sku la gdan gsum dkyil 'khor kun:_ma lus lus pa med par rdzogs:_rtsa 'khor 'od kyi drwa ba'i klong:_gnas yul dpa' bo DAk+ki'i tshogs:_til gong kha phyes lta bur gsal:_spyi bor 'ja' gur 'khrigs pa'i klong:_rigs bdag bla ma 'jam dpal dbyangs:_dmar gsal longs rdzogs chas kyis brgyan:_phyag zung rdor dril thugs kar bsnol:_phrag gong ut+pal kha phye'i dbus:_ral gri'i mgul par glegs bam mtshan:_thugs las 'ja' zer phyogs bcur 'phros:_lnga ldan thig le nyer gcig klong:_'phags ma lha mo nyi shu gcig:_sku mdog phyag mtshan rgyan cha lugs:_ma 'dres yongs rdzogs chen por gsal:_ye nas dam ye gnyis su med:_sa mA ya:_dgu pa gdung bas spyan 'dren ni:_e ma hoH_gnas 'og min mkha' spyod g.yu lo bkod:_yul lho phyogs rgya mtsho'i 'gram la sogs:_zhing dag pa rab 'byams gar bzhugs nas:_ma chos sku yum chen kun tu bzang:_dpal longs spyod rdzogs mdzad wa rA hi:_lha 'jam dpal dgyes bskyed tshangs sras mo:_yum rje btsun ar+Ya tA re ma:_mgon pad+ma'i lcam gcig mkhar chen bza':_yul nyer bzhi'i dpa' bo DAk+ki'i tshogs:_'dir gdung ba'i dbyangs kyis spyan 'dren na:_dus skad cig nyid la byon nas kyang:_don yum chen dgongs pa mngon gyur mdzod:_slar mi brjed gzungs dang mi 'jigs spobs:_don mi zad blo gros snang ba stsol:_mchog thun mong dngos grub char bzhin phob:_badz+ra DAk+ki ni sa mA ya hrIMHhrIMHdzaHdzaH_bcu pa bzhugs su gsol ba ni:_hU~M:_yin lugs bsam ngo bral ba dang:_blo ni ngo bo nyid kyis dag:_lha dang rang rig gnyis med du:_dgag sgrub las 'das bzhugs gsol 'debs:_dzaHhU~M baM hoH_sa mA ya tiSh+Tha lhan:_bcu gcig brda phyag 'tshal ba ni:_hU~M:_ye nas rang rig DAk+ki ru:_shes la sgom byed blo dang bral:_gzhi 'bras dbyer med rang bzhin la:_brda don mjal bas phyag bgyi'o:_a ti pu ho:_pra tIts+tsha ho:_bcu gnyis mchod pa 'bul ba ni:_hU~M:_srid zhi'i dngos kun mchod pa'i sprin phung ni:_mi zad rgyan gyi 'khor lo'i rol pa ru:_yid bzhin 'dod pa 'jo ba'i 'phrul gyi mdzod:_de bzhin nyid dbyings ye shes chen por rol:_oM badz+ra dz+nyA na d+hAk+ki ni swa ra swa sti sa pA ri wa ra puSh+pe nas shab+ta sarba pany+tsa rak+ta ba ling+ta pU dza ho:_bcu gsum bstod pa bya ba ni:_e ma hoH_dang po'i sangs rgyas yum chen kun bzang mo:_'phags bzhi skyed yum shes rab pha rol phyin:_sprul pa'i mkha' 'gro ngag gi dbang phyug ma:_pad+ma'i las rgya mkhar chen bza' la bstod:_kun dga'i dpal ster mtshan dpe'i lang tsho 'bar:_rgyal ba'i chos kun dbyangs su len pa'i gsung:_ji lta ji snyed mkhyen pa'i ye shes thugs:_dpal mo dbyangs can ma la phyag 'tshal bstod:_dga' ba bcu drug dpal gyis mngon mdzes sku:_stong nyid bcu drug dpyid du snyoms zhugs pas:_thig le bcu drug e waM dbyings su dag:_ye shes bcu drug sa la snyems gyur cig:_bcu bzhi bzlas pa'i dmigs pa ni:_thugs kar pad+ma nyi zla'i steng:_ku ru kul+le sku mdog dmar:_zhal gcig phyag gnyis spyan gsum pa:_phyag gnyis ut+pal mda' gzhu 'gengs:_zhabs gnyis brkyang bskum rol stabs bzhugs:_khro mo'i chas kun yongs rdzogs pa'i:_tsit+ta 'od lnga'i thig le'i dbus:_dga' 'khyil hrIMHgis mtshan pa'i mthar:_sngags phreng 'khor ba'i 'od zer gyis:_snang dang phyed snang mi snang gi:_srid pa'i snang zhen ma lus kun:_lha sngags chos sku'i rol par gsal:_rig 'dus bla ma'i thugs rgyud bskul:_'od 'phros don gnyis lhun gyis grub:_sku las byang sems bdud rtsi'i rgyun:_go rim bzhin du babs pa las:_gnas dang spang bya ngo bo yi:_dga' bzhi'i ye shes nyams su myong:_chos don rab tu rnam 'byed kyi:_gzungs spobs blo gros snang ba rgyas:_mchog thun dngos grub thob par bsam:_A+oM swa ra swa sti hrIMHhrIMHhrIMHswA hAH_rtsa sngags chu bo'i rgyun bzhin bsnyen:_'khrul med dgongs rgyud rtogs pa 'pho:_rang mdangs 'gags med lhun grub kyi:_lu gu rgyud kyi snang ba mthong:_rtsal las bka' dang bstan bcos kyi:_tshig don klong rdol lhug par 'char:_mi brjed gzungs dang mi 'jigs pa'i:_yang dag spobs pa thob pa dang:_mi zad blo gros snang ba rgyas:_sgrub dang las bzhi'i kha bsgyur sogs:_gab pa'i man ngag zhal las shes:_gzhan yang dngos nyams rmi lam du:_grub pa'i rtags mtshan sna tshogs 'ong:_mthar thug rnam kun mchog ldan gyi:_don gyi dbyangs can rang zhal mjal:_thun mong rab 'byams las rnams kun:_gegs med bde legs 'grub par 'gyur:_sa mA ya:_de rjes bla na med pa yi:_khyad par tshogs gnyis gsog pa'i phyir:_ga Na tsakra'i mchod pa ni:_phyi nang gsang ba'i dam tshig rdzas:_ma tshang med par 'du byas la:_dang po byin gyis brlab pa ni:_ra~M ya~M kha~M:_oM AHhU~MH_kun btags phyi snod b+han+d+ha ru:_gzhan dbang nang bcud snang srid dngos:_yongs grub ka nas dag pa yi:_ngo bo ye shes rol pa'i rgyan:_rnam pa 'dod pa'i yon tan kun:_yid bzhin 'byung ba'i gter du bsgyur:_oM AHhU~M ha ho hrIH_lan gsum:_gnyis pa tshogs zhing spyan 'dren ni:_hrIH_phyi ltar 'og min mkha' spyod g.yu lo bkod:_gnas yul nyer bzhi dur khrod brgyad la sogs:_nang ltar rdo rje lus kyi grong khyer mchog:_rtsa khams ye shes sprin du rol pa'i dpyid:_rlung khams ye shes gdangs su sbyor ba'i dbyings:_gdan gsum dkyil 'khor yongs su rdzogs pa las:_dpa' bo dang ni rnal 'byor ma rnams kun:_tshogs kyi 'du bar spyan 'dren gshegs su gsol:_byin rlabs dbang bskur mchog thun dngos grub stsol:_badz+ra dz+nyA na DAk+ki ni e a ra li pheMHpheMHdzaHdzaH_gsum pa tshogs phud 'bul ba ni:_hoH_phyi ltar bla med dam tshig chen po'i rdzas:_nang ltar kA ma gu Na pany+tsar smin:_gzhan du dga' bzhi rnam dag mthar phyin gyi:_gsal yangs rang byung mchod pa 'bul lo bzhes:_ga Na tsakra pU dza kha hi:_bzhi pa bar pa bshags pa ni:_hoH_gdod nas bshags bya bshags byed gnyis med kyang:_glo bur ma rig 'khrul pa'i las dbang gis:_thog med nas bsags dam tshig chag nyams kun:_mthol bshags mi sgrib tshangs pa bstsal du gsol:_oM badz+ra sa ma ya hoH_lnga pa tha ma bsgral bstab niH_hU~M:_'jig lta'i ru tra las skyes zhing gyur gyi:_mchog dang mchog phran dag mnyam chen po ru:_yongs bsgral gzhi dbyings rig pa'i klong du bstab:_bskang ngo kun zlum thig le'i dbyings su bskang:_skong gyur dbang dang dngos grub bstsal du gsol:_drug pa lhag ma bsngo ba ni:_a kA ros brlabs la:_pheMH_dkyil 'khor mu ran mthar skyong ba'i:_lhag la dbang ba'i mgron tshogs rnams:_lhag ma'i gtor ma 'di bzhes la:_bcol ba'i las rnams 'grub par mdzod:_de nas tha ma'i las rim la:_dang po thugs dam bskul ba ni:_hrIH_gzhi dbyings yum chen chos sku'i mkha' klong nas:_gzhi snang ma 'gag dbyangs can mkha' 'gro'i tshogs:_gzhi rtsal rol pa rgyan gyi 'khor lor bzhengs:_gzhi thog nyid du grol ba'i phrin las mdzod:_gnyis pa chad mdo bsgrag pa ni:_hU~M:_sngon tshe dus bzhi mnyam nyid chen po'i klong:_'dus ma byas pa ye shes rdo rje che:_khyad chos drug gis mngon par byang chub tshe:_rtag chad mthar 'dzin gzhi thog grol ba yi:_chad dang g.yar dam da dus skul byed na:_lam snang 'bras bur smin pa'i phrin las mdzod:_'og min mkha' spyod g.yu lo bkod pa dang:_gnas yul nyer bzhi dur khrod brgyad la sogs:_longs spyod rdzogs mdzad DAk+ki'i tshogs rnams kyis:_nyid las mi gzhan 'khor la brda don dang:_rtags kyi chos gsungs de yi tshe skabs su:_ston 'khor srid zhi mnyam nyid chen po ru:_rtogs pa'i chad bzhin phrin las 'grub par mdzod:_bod yul ljongs 'dir slob dpon pad+ma yi:_gzungs mchog DAk+ki ye shes mtsho rgyal gyis:_byin rlabs dgongs pa'i rtsal la rgyas btab tshe:_sring gcig g.yu sgron yid 'ong lha mo dang:_rmug 'dzin dbang po gter gyi mdzod 'dzin pas:_ci 'dod dngos grub ster ba'i chad mdo bzhin:_gtor ma 'di bzhes rnal 'byor sdong grogs mdzod:_gsum pa brtan ma skyong ba ni:_hU~M b+h+yoH_dus sbyor rten 'brel bcu gnyis gnas dag pa'i:_brtan ma bcu gnyis 'dir byon gtor ma longs:_rtsa rlung thig le dbang thang nyams pa gsos:_tshe bsod nyams rtogs 'phel ba'i phrin las mdzod:_ma ma hriM hriM ba ling ta kha kha khA hi khA hi:_bzhi pa brtul zhugs bros mnan niH_hU~M:_mtshan bcas rtogs pa'i dam sri log 'dren kun:_e dbyings stong chen yum gyi mkha' klong du:_ldang med rgyas btab las bzhi lhun grub kyi:_bro brdung nyon mongs ka dag ngang du non:_s+t+waM b+ha ya nan nan:_lnga pa dngos grub blang pa ni:_e ma hoH_rgyal yum bsgrub pas dngos grub nyi ma bzhin:_'dren pa'i skya rengs shar tshe bskul byed na:_thugs rje ma chung sngon gyi thugs dam dgongs:_thugs gsang mi shigs 'od lnga'i ti la ka:_snang srid yongs dag dpal gyi be'u nas:_'dzad med mchog thun dngos grub gter gyi dbyig:_da lta skad cig nyid la bstsal du gsol:_rtsa sngags mthar/_kA ya wAk+ka tsit+ta sid+d+hi pha la hU~M:_de nas mchod cing bstod la:_drug pa bzod gsol nongs bshags ni:_hoH_mkha' 'gro'i dkyil 'khor dam pa ru:_'gal 'khrul nyes tshogs ci bgyis pa:_DAk+ki dam can spyan snga ru:_mthol lo bshags so bzod par gsol:_yig ge brgya pas lhag chad bskang:_bdun pa rdzogs rim bsdu ba ni:_hoH_snang grags lha sngags sgyu ma'i rol pa kun:_ka dag sgrib med gnyug ma'i klong du aH_slar yang gzhi las gzhi snang lhun grub kyi:_dag mnyam zung 'jug lha sku'i phyag rgyar ldang:_brgyad pa bsngo ba'i mtshams sbyor ni:_hoH_sgra dbyangs lha mo'i dkyil 'khor dam pa ru:_smin grol lam la bslabs pa'i dge ba'i mthus:_'gro kun phyam gcig rdzogs pa'i sangs rgyas kyi:_go 'phang dam pa thob pa'i rgyu ru bsngo:_dgu pa smon lam gdab pa ni:_hoH_bya byed rol ba dag pa'i 'khor lo ru:_yongs shar khyad chos drug ldan gdod ma'i dbyings:_sgron drug ye shes sku yi 'dzum zhal dang:_gnyis med mjal te mngon par byang chub shog:_bcu pa bkra shis brjod pa ni:_lha yi lam kun mkha' yi gos kyis ni:_khyab pa ji bzhin dga' ster lha mo'i tshogs:_srid zhi'i mdzes sdug rdzogs pa'i rnam 'gyur ngom:_me tog man+d+ha ra dang pad+ma dang:_ku mud ta dang ut+pal gur gum sogs:_shis brjod chu skyes 'phreng ba char du bsnyil:_ngo mtshar dbyangs bdun dpyid la rab drangs pa'i:_glu gar rol mo'i 'gyur ba 'gran la brtson:_'ja' tshon 'od lnga'i gur khyim rnam bkra zhing:_kun kyang rjes chags nyams kyi dgyes par bzhugs:_rang rig 'gyur med chos sku yum chen mo:_rang rtsal 'gag med shes rab pha rol phyin:_rang snang bde chen dpal mo mtsho rgyal mas:_rang gzhan don gnyis 'grub pa'i bkra shis shog:_mtshan dpe gsal rdzogs sku yi bkra shis shog:_drug cu'i gdangs ldan gsung gi bkra shis shog:_sgrib med gsal stong thugs kyi bkra shis shog:_dbyangs can sku gsung thugs kyi bkra shis shog:_mdo rgyud ma lus dgongs don sa ler bkra:_sgra don rgyan gyi brjod pa rnam par dag:_'gal zlos lhag chad skyon spangs 'chos skyob kyi:_dbyangs snyan phyogs su sgrogs pa'i bkra shis shog:_gzhi yi bkra shis yod med tshig las 'das:_lam gyi bkra shis sgom byed blo dang bral:_'bras bu'i bkra shis sku dang ye shes kyi:_snang ba mngon du 'gyur ba'i bkra shis shog:_phun tshogs sde bzhi'i lang tsho'i 'dab ma bzhad:_lung rtogs yon tan sbrang rtsi'i bcud kyis gtams:_don gnyis ge sar dogs pas rab bzung ba'i:_dge mtshan pad+mo rgyas pa'i bkra shis shog:_yang dag don gyi lha mo yi:_gsang gsum rang rig e waM gzugs:_kun nas zlum po'i ti la ka'i:_klong las rang byung shar ba bzhin:_pad+ma thugs mchog rdo rje rtsal:_chos kyi go cha 'dzin des phab:_dam pa zung gis bka' lung bzhin:_mi 'gyur rtags kyi ri mor bkod:_bstan 'gro'i sman yon mchog tu shog:_g.yu yi sgron mas bka' 'di srungs:_don gnyis 'grub pa'i bkra shis shog:_sa mA ya:__rgya:rgya:rgya:_mang+ga laM/_dge'o//_//