DKR-KABUM-02-KHA-040

🚧 This website is under continued development. We appreciate your patience!

Previous Text Back to Volume PageNext Text

ཟབ་ལམ་སྙིང་ཐིག་གསལ་སྒྲོན་གྱི་དབང་ཆོག་བདུད་རྩིའི་བུམ་བཟང་།

Wylie title	zab lam snying thig gsal sgron gyi dbang chog bdud rtsi'i bum bzang
Location	dil mgo mkhyen brtse bka' 'bum Volume 2, Text 40, Pages 208-211 (Folios 1a to 4a4)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)
Citation	'jam dbyangs mkhyen brtse chos kyi blo gros. zab lam snying thig gsal sgron gyi dbang chog bdud rtsi'i bum bzang. In Skyabs rje dil mgo mkhyen brtse rin po che'i bka' 'bum, Vol. 2: 208-211. Delhi: Shechen Publications, 1994.
Genre	Empowerment Ritual - dbang chog - dbang skur  ·  Guru Yoga Texts - bla ma'i rnal 'byor
Cycle	ཟབ་ལམ་སྙིང་ཐིག་གསལ་སྒྲོན་ (zab lam snying thig gsal sgron)
Recension Link	Other Versions on this site: ཟབ་ལམ་སྙིང་ཐིག་གསལ་སྒྲོན་གྱི་དབང་ཆོག་བདུད་རྩིའི་བུམ་བཟང་།

Tibetan Text

Wylie

[edit]

ཟབ་ལམ་སྙིང་ཐིག་གསལ་སྒྲོན་གྱི་དབང་ཆོག་བདུད་རྩིའི་བུམ་བཟང་ཞེས་བྱ་བ་བཞུགས་སོ།། རང་རིག་བླ་མར་གུས་བཏུད་ནས། །ཟབ་མོ་བླ་མའི་སྒྲུབ་པ་ཡི། །དབང་བསྐུར་ཡེ་ཤེས་ཆུ་རྒྱུན་ནི། །སྒྲུབ་པར་འདོད་པས་སྟེགས་བུ་ལ། །མཎྜལ་ཆོས་འབྱུང་དམར་པོའི་དབུས། །པད་འདབ་བཞི་དང་མཐའ་སྐོར་དུ། །པད་ཕྲེང་རྡོ་ར་མེ་རིས་མཛེས། །མེ་ལོང་སྔགས་མཚན་མན་ཤེལ་བཤམས། །ཕྱི་ནང་མཆོད་པ་ཚོགས་བྱས་ཏེ། །རྣལ་འབྱོར་བདེ་བའི་སྟན་ལ་འདུག །བླ་མའི་སྒྲུབ་པ་གཞུང་བསྲངས་ཤིང༌། །བུམ་ཐོད་དབྱངས་གསལ་རྟེན་སྙིང་གིས། །བྱིན་གྱིས་བརླབས་ཤིང་ཚོགས་མཆོད་བྱ། །སློབ་དཔོན་དགོངས་པ་གཡོ་མེད་ངང༌། །སྣོད་ལྡན་སློབ་མ་ཁྲུས་ནས་དབྱུང༌། །བགེགས་བསྐྲད་སྲུང་བའི་འཁོར་ལོས་བཅིངས། །ངེས་འབྱུང་ཆོས་བཤད་སྤྲོ་བ་བསྐྱེད། །མཎྜལ་ཕུལ་ལ་གསོལ་བ་གདབ། །རྩ་གསུམ་རྒྱ་མཚོ་འདུས་པའི་དངོས། །རྡོ་རྗེའི་བླ་མ་དགོངས་སུ་གསོལ། །བདག་ཅག་སྐལ་ལྡན་བུ་རྣམས་ལ། །སྙིང་པོ་དོན་གྱི་དབང་མཆོག་སྩོལ། །གསོལ་གདབ་གནང་བ་སྦྱིན་པ་ནི། ཨེ་མ་སྐལ་ལྡན་རིགས་ཀྱི་བུ། །དད་དང་དམ་ཚིག་མོས་ལྡན་ན། །ཡང་གསང་བླ་མའི་སྒྲུབ་པ་ཡི། །སྙིང་པོ་དོན་གྱི་དབང་བསྐུར་སྦྱིན། །དེ་ནས་རྒྱུད་སྦྱོང་རིམ་པ་ནི། དམ་ཆུ་བྱིན་ཞིང་དམ་བསྒྲགས་ཏེ། ཧོཿ འདི་ནི་རྡོ་རྗེའི་དམ་ཚིག་ཆུ། །བསྲུངས་ན་ཚེ་འདིར་དངོས་གྲུབ་ཐོབ། །མ་བསྲུངས་ཉམས་ན་དམྱལ་བར་ལྟུང༌། །དེ་བས་ཁེ་ཉེན་ཤེས་པར་བྱོས། །བཛྲ་ས་མ་ཡ་ན་ར་ཀན། །ཞེས་བརྗོད་རྡོ་རྗེ་སྤྱི་བོར་བཞག །ཡེ་ཤེས་དབབ་ཕྱིར་ལུས་བསྲངས་ཤིང༌། རླུང་བཟུང་དམིགས་པ་རྩེ་གཅིག་གཏོད། །བླ་མ་ཧེ་རུ་ཀར་གསལ་བའི། །ཐུགས་ནས་མེ་འོད་འཕྲོས་པ་ཡིས། །སློབ་མའི་ཕུང་ཁམས་བསྲེགས་ཤིང་སྦྱངས། །དེ་ལས་སྐད་ཅིག་དྲན་རྫོགས་སུ། །རྡོ་རྗེ་ཕག་མོ་སྐུ་མདོག་དམར། །གྲི་གུག་ཐོད་ཁྲག་དོར་སྟབས་འགྱིངས། །དར་དང་རིན་ཆེན་རུས་པས་བརྒྱན། །ཐུགས་ཀར་བདེ་བའི་ཐིག་ལེ་ནི། །དགའ་བ་འཁྱིལ་པ་དཀར་དམར་དབུས། །བྃ་དང་ཡན་ལག་བཞི་ལ་ནི། །ཧ་རི་ནི་སས་མཚན་པར་བསྒོམ། །སྤྱི་བོར་བླ་མ་ཧེ་རུ་ཀཿ ཅང་ཏེའུ་ཐོད་པ་བསྣམས་པ་ནི། །བདེ་བའི་ཉམས་དང་ལྡན་པར་གསལ། །ཐུགས་ནས་འོད་འཕྲོས་ཡེ་ཤེས་པ། །སྤྱན་དྲངས་དབྱེར་མེད་ཐིམ་པར་བསམ། །ཡེ་ཤེས་ཕེབས་པའི་སྔགས་ཀྱིས་དབབ། །ཡེ་ཤེས་འབེབས་པའི་རྟགས་བྱུང་ན། །ཉམས་ནི་བྱུང་རྒྱལ་དག་ཏུ་བསྐྱངས། །མ་ཕེབས་བླ་མར་མོས་གུས་བསྐྱེད། །རྗེས་ཆགས་འོད་ཀྱིས་བསྐུལ་བྱས་ཏེ། །སྙིང་གའི་དགའ་འཁྱིལ་གཡོན་དྲག་འཁོར། །དགོངས་པས་གཟིར་ཞིང་དབྱིངས་རིག་བསྲེ། །ཛྙཱ་ན་བཛྲ་ཏིཥྛ་ས་མ་ཡ། ཞེས་བརྗོད་རྡོ་རྗེ་རྒྱ་གྲམ་འཇོག །དངོས་གཞིའི་དབང་བསྐུར་སྦྱིན་པ་ལ། །བླ་མའི་དཔྲལ་བའི་ཨོཾ་དཀར་ལས། །ཨོཾ་དང་རང་འདྲ་དཔག་མེད་འཕྲོས། །དཔྲལ་བར་ཐིམ་པས་ལུས་སྒྲིབ་དག །བུམ་པའི་དབང་བསྐུར་ཐོབ་པར་བསམ། ཨོཾ་གྱི་གླུ་དབྱངས་བརྗོད་པ་དང༌། །བརྟན་བྱེད་བུམ་པའི་ཆུ་དབང་བསྐུར། ཨོཾ། སྣོད་བཅུད་ཡོངས་རྫོགས་བུམ་པ་ནས། །རིག་འཛིན་རྒྱལ་བའི་དཀྱིལ་འཁོར་བཞུགས། །སྐལ་ལྡན་ཁྱོད་ལ་བསྐུར་བ་ཡིས། །ཕུང་ཁམས་ལྷ་སྐུར་སྨིན་པར་ཤོག །བཛྲ་ཀ་ལ་ཤ་ཨ་བྷི་ཥིཉྩ་ཧཱུྃ། བུམ་ཆུ་བླུད་ཅིང་གནས་བཞིར་གཏོར། དབང་དོན་ངོ་སྤྲོད་རྟོགས་པ་བརྗོད། དེ་ནས་གསང་བའི་དབང་བསྐུར་ནི། །བླ་མའི་མགྲིན་པའི་ཨཱཿདམར་ལས། །འོད་འཕྲོས་སྔགས་ཕྲེང་དཔག་མེད་འཕྲོས། །མགྲིན་པར་ཐིམ་པས་ངག་སྒྲིབ་དག །གསང་བའི་དབང་བསྐུར་ཐོབ་པར་དམིགས། །ཨཱཿཡི་གླུ་དབྱངས་སྒྲོགས་པ་དང༌། ཱབྷནྡྷའི་བདུད་རྩི་སྦྱིན་བྱས་ཏེ། ཨཱཿ རང་བྱུང་བྷནྡྷའི་སྣོད་ནང་དུ། །བླ་མ་ཡབ་ཡུམ་སྙོམས་ཞུགས་པའི། །བྱང་སེམས་བདུད་རྩིའི་རྒྱུན་དབང་བསྐུར། །ངག་རླུང་དབུ་མར་ཐིམ་པར་ཤོག །བོ་དྷི་ཙིཏྟ་ཨ་བྷི་ཥིཉྩ་ཧཱུྃ། ཨ་ཧོ་མ་ཧཱ་སུ་ཁ་ཧོ། ཞེས་མྱོང་བདེ་སྟོང་ངང་ལ་བཞག །དོན་ངོ་སྤྲོད་ཅིང་རྟོགས་པ་བསྐྱེད། །ཤེར་དབང་ཕོ་ཉའི་དབང་ཆོག་ནི། བླ་མའི་ཐུགས་ཀའི་ཧཱུྃ་སྔོན་ལས། །འོད་སྔོན་ཕྱག་མཚན་ཚོགས་སྤྲོས་པས། །སློབ་མའི་སྙིང་གར་ཐིམ་པ་དང༌། །ཡིད་སྒྲིབ་དག་ནས་ཤེར་དབང་ཐོབ། །དམ་ཚིག་ཕྱག་རྒྱའི་རྟེན་མཚོན་པར། །མེ་ལོང་སྔགས་ཀྱིས་བརྒྱན་པ་གཏད། །ཧཱུྃ་གི་གླུ་དབྱངས་སྒྲོགས་པ་དང༌། ཨེ་མ་ཧོཿམཆོག་ཏུ་བདེ་བ་ཆེ། །བདེ་བ་འདི་ནི་རྨད་དུ་བྱུང༌། །སངས་རྒྱས་ཀུན་གྱིས་དགྱེས་རོལ་པའི། །བདེ་མཆོག་ཐར་པ་སྤྱོད་པར་གྱིས། །ས་མ་ཡ་ཧོ། །ས་མ་ཡ་སྟྭཾ། ཨ་ནུ་རཱ་ག་ཡ་ཧོཿ ཨ་ནུ་རཱ་ག་ཡ་མི། ཛཿཧཱུྃ་བྃ་ཧོཿ ཛྙཱ་ན་བཛྲ་མ་ཧཱ་སུ་ཁ་ཨཏྨ་ཀོ྅ཧྃཿ ཞེས་བརྗོད་བདེ་བའི་ཡེ་ཤེས་བསྐྱངས། །དོན་ངོ་སྤྲོད་ཅིང་དག་པ་བརྗོད། །དེ་ནས་བཞི་པའི་དབང་བསྐུར་སྦྱིན། བླ་མའི་ལྟེ་བའི་ཧོཿཡིག་ལས། །འོད་ཟེར་སེར་པོ་གསེར་མདོག་དང༌། །བཻཌཱུརྻ་མདོག་ནོར་བུ་སྤྲོས། །སློབ་མའི་ལྟེ་བར་ཐིམ་པ་དང༌། །བཞི་པའི་དབང་ཐོབ་སྒྲིབ་དག་དམིགས། ཧོཿཡིས་གླུ་ལེན་མན་ཤེལ་ཐོགས། ཧོཿ ཤིན་ཏུ་རྣམ་པར་དག་པ་ཡི། །ཡེ་ཤེས་མཆོག་གིས་ཀུན་ཏུ་ཁྱབ། །མཚན་མཆོག་བརྗོད་པ་ལས་འདས་པའི། །རང་བྱུང་ཡེ་ཤེས་ངོ་མཚར་ཆེ། །དྷརྨ་དྷཱ་ཏུ་ཛྙཱ་ན་ཨ་ཏི་ཧོཿ དབྱིངས་རིག་དབྱེར་མེད་ངང་དུ་བཞག །དེ་ནས་རིག་པ་རྩལ་གྱི་དབང༌། སློབ་དཔོན་དགོངས་པ་མི་གཡོའི་ངང༌། །ཐུགས་ཀར་ཨ་ཡིག་གསལ་བ་ལ། །སློབ་མ་རྟོག་པ་ཐམས་ཅད་སྤངས། །རིག་པ་དེ་ལ་གཏད་པ་དང༌། །ཨ་ཞེས་དགོངས་པའི་དྲོད་བསྐྱེད་དོ། །ཕཊ྄་ཀྱིས་རིག་པའི་རྩལ་ཆེན་སྤར། ཨ་ཧོཿ སངས་རྒྱས་ཀུན་གྱི་གསང་བ་ཆེ། །རང་བྱུང་རིག་པ་ལྷུན་གྱིས་གྲུབ། །འོད་གསལ་ཆེན་པོའི་དགོངས་པ་ལ། །མི་གཡོ་རྟག་ཏུ་མཉམ་པར་སྤྱོད། །ཨ་ལ་ལ་ཧོཿ ཞེས་བརྗོད་ལྟ་སྟངས་དབྱིངས་ལ་གཟིར། དོན་ངོ་སྤྲོད་ཅིང་རྟོགས་པ་བརྗོད། རྗེས་ལ་དམ་ཚིག་རྒྱ་ཡིས་གདབ། ཧོཿ འདི་ནི་གསང་བ་ཆེན་པོ་སྟེ། །གསང་བ་གཞན་ལ་སྨྲ་མི་བྱ། །འདས་ན་དམ་ཚིག་ཉམས་འགྱུར་ཞིང༌། །བསྒྲུབས་པས་དངོས་གྲུབ་མཆོག་ཐོབ་འགྱུར། །ཞེས་བསྒྲགས་དམ་ཚིག་ཁས་བླངས་སོགས། །དབང་རྗེས་རིམ་པ་སྤྱི་ལྟར་བྱ། ས་མ་ཡཿ ཞེས་པའང་མཆོག་སྤྲུལ་རིན་པོ་ཆེ་བཀྲ་ཤིས་དཔལ་འབྱོར་དང༌། ཌཱ་ཀི་ཚེ་རིང་ཆོས་སྒྲོན། སྤར་སྐོས་ཆོས་འཕེལ་སོགས་ཀྱིས་ནན་ཏན་ཆེན་པོས་ཡང་ཡང་བསྐུལ་བས་རྐྱེན་བྱས་ཏེ་ཤིང་ལུགས་ས་ཟླའི་དཀར་ཕྱོགས་ཀྱི་དགའ་བ་དང་པོར་ཤར་མར་སྨྲས་རིམ་བཞིན་ཡི་གེའི་བྱེད་པོ་རང་སློབ་བློ་གྲོས་མཆོག་ལྡན་གྱིས་བགྱིས་པ་འདི་ཡང་དོན་དང་ལྡན་པར་གྱུར་ཅིག །སརྦ་མངྒ་ལམ།

[edit]

zab lam snying thig gsal sgron gyi dbang chog bdud rtsi'i bum bzang zhes bya ba bzhugs so// rang rig bla mar gus btud nas/__/zab mo bla ma'i sgrub pa yi/__/dbang bskur ye shes chu rgyun ni/__/sgrub par 'dod pas stegs bu la/__/maN+Dal chos 'byung dmar po'i dbus/__/pad 'dab bzhi dang mtha' skor du/__/pad phreng rdo ra me ris mdzes/__/me long sngags mtshan man shel bshams/__/phyi nang mchod pa tshogs byas te/__/rnal 'byor bde ba'i stan la 'dug__/bla ma'i sgrub pa gzhung bsrangs shing*/__/bum thod dbyangs gsal rten snying gis/__/byin gyis brlabs shing tshogs mchod bya/__/slob dpon dgongs pa g.yo med ngang*/__/snod ldan slob ma khrus nas dbyung*/__/bgegs bskrad srung ba'i 'khor los bcings/__/nges 'byung chos bshad spro ba bskyed/__/maN+Dal phul la gsol ba gdab/__/rtsa gsum rgya mtsho 'dus pa'i dngos/__/rdo rje'i bla ma dgongs su gsol/__/bdag cag skal ldan bu rnams la/__/snying po don gyi dbang mchog stsol/__/gsol gdab gnang ba sbyin pa ni/__e ma skal ldan rigs kyi bu/__/dad dang dam tshig mos ldan na/__/yang gsang bla ma'i sgrub pa yi/__/snying po don gyi dbang bskur sbyin/__/de nas rgyud sbyong rim pa ni/__dam chu byin zhing dam bsgrags te/__hoH__'di ni rdo rje'i dam tshig chu/__/bsrungs na tshe 'dir dngos grub thob/__/ma bsrungs nyams na dmyal bar ltung*/__/de bas khe nyen shes par byos/__/badz+ra sa ma ya na ra kan/__/zhes brjod rdo rje spyi bor bzhag__/ye shes dbab phyir lus bsrangs shing*/__rlung bzung dmigs pa rtse gcig gtod/__/bla ma he ru kar gsal ba'i/__/thugs nas me 'od 'phros pa yis/__/slob ma'i phung khams bsregs shing sbyangs/__/de las skad cig dran rdzogs su/__/rdo rje phag mo sku mdog dmar/__/gri gug thod khrag dor stabs 'gyings/__/dar dang rin chen rus pas brgyan/__/thugs kar bde ba'i thig le ni/__/dga' ba 'khyil pa dkar dmar dbus/__/ba~M dang yan lag bzhi la ni/__/ha ri ni sas mtshan par bsgom/__/spyi bor bla ma he ru kaH__cang te'u thod pa bsnams pa ni/__/bde ba'i nyams dang ldan par gsal/__/thugs nas 'od 'phros ye shes pa/__/spyan drangs dbyer med thim par bsam/__/ye shes phebs pa'i sngags kyis dbab/__/ye shes 'bebs pa'i rtags byung na/__/nyams ni byung rgyal dag tu bskyangs/__/ma phebs bla mar mos gus bskyed/__/rjes chags 'od kyis bskul byas te/__/snying ga'i dga' 'khyil g.yon drag 'khor/__/dgongs pas gzir zhing dbyings rig bsre/__/dz+nyA na badz+ra tiSh+Tha sa ma ya/__zhes brjod rdo rje rgya gram 'jog__/dngos gzhi'i dbang bskur sbyin pa la/__/bla ma'i dpral ba'i oM dkar las/__/oM dang rang 'dra dpag med 'phros/__/dpral bar thim pas lus sgrib dag__/bum pa'i dbang bskur thob par bsam/__oM gyi glu dbyangs brjod pa dang*/__/brtan byed bum pa'i chu dbang bskur/__oM/__snod bcud yongs rdzogs bum pa nas/__/rig 'dzin rgyal ba'i dkyil 'khor bzhugs/__/skal ldan khyod la bskur ba yis/__/phung khams lha skur smin par shog__/badz+ra ka la sha a b+hi Shiny+tsa hU~M/__bum chu blud cing gnas bzhir gtor/__dbang don ngo sprod rtogs pa brjod/__de nas gsang ba'i dbang bskur ni/__/bla ma'i mgrin pa'i AHdmar las/__/'od 'phros sngags phreng dpag med 'phros/__/mgrin par thim pas ngag sgrib dag__/gsang ba'i dbang bskur thob par dmigs/__/AHyi glu dbyangs sgrogs pa dang*/__\u0f71b+han+d+ha'i bdud rtsi sbyin byas te/__AH__rang byung b+han+d+ha'i snod nang du/__/bla ma yab yum snyoms zhugs pa'i/__/byang sems bdud rtsi'i rgyun dbang bskur/__/ngag rlung dbu mar thim par shog__/bo d+hi tsit+ta a b+hi Shiny+tsa hU~M/__a ho ma hA su kha ho/__zhes myong bde stong ngang la bzhag__/don ngo sprod cing rtogs pa bskyed/__/sher dbang pho nya'i dbang chog ni/__bla ma'i thugs ka'i hU~M sngon las/__/'od sngon phyag mtshan tshogs spros pas/__/slob ma'i snying gar thim pa dang*/__/yid sgrib dag nas sher dbang thob/__/dam tshig phyag rgya'i rten mtshon par/__/me long sngags kyis brgyan pa gtad/__/hU~M gi glu dbyangs sgrogs pa dang*/__e ma hoHmchog tu bde ba che/__/bde ba 'di ni rmad du byung*/__/sangs rgyas kun gyis dgyes rol pa'i/__/bde mchog thar pa spyod par gyis/__/sa ma ya ho/__/sa ma ya s+t+waM/__a nu rA ga ya hoH__a nu rA ga ya mi/__dzaHhU~M ba~M hoH__dz+nyA na badz+ra ma hA su kha at+ma ko\u0f85ha~MH__zhes brjod bde ba'i ye shes bskyangs/__/don ngo sprod cing dag pa brjod/__/de nas bzhi pa'i dbang bskur sbyin/__bla ma'i lte ba'i hoHyig las/__/'od zer ser po gser mdog dang*/__/baiDUr+Ya mdog nor bu spros/__/slob ma'i lte bar thim pa dang*/__/bzhi pa'i dbang thob sgrib dag dmigs/__hoHyis glu len man shel thogs/__hoH__shin tu rnam par dag pa yi/__/ye shes mchog gis kun tu khyab/__/mtshan mchog brjod pa las 'das pa'i/__/rang byung ye shes ngo mtshar che/__/d+harma d+hA tu dz+nyA na a ti hoH__dbyings rig dbyer med ngang du bzhag__/de nas rig pa rtsal gyi dbang*/__slob dpon dgongs pa mi g.yo'i ngang*/__/thugs kar a yig gsal ba la/__/slob ma rtog pa thams cad spangs/__/rig pa de la gtad pa dang*/__/a zhes dgongs pa'i drod bskyed do/___/phaTa? kyis rig pa'i rtsal chen spar/__a hoH__sangs rgyas kun gyi gsang ba che/__/rang byung rig pa lhun gyis grub/__/'od gsal chen po'i dgongs pa la/__/mi g.yo rtag tu mnyam par spyod/__/a la la hoH__zhes brjod lta stangs dbyings la gzir/__don ngo sprod cing rtogs pa brjod/__rjes la dam tshig rgya yis gdab/__hoH__'di ni gsang ba chen po ste/__/gsang ba gzhan la smra mi bya/__/'das na dam tshig nyams 'gyur zhing*/__/bsgrubs pas dngos grub mchog thob 'gyur/__/zhes bsgrags dam tshig khas blangs sogs/__/dbang rjes rim pa spyi ltar bya/__sa ma yaH__zhes pa'ang mchog sprul rin po che bkra shis dpal 'byor dang*/__DA ki tshe ring chos sgron/__spar skos chos 'phel sogs kyis nan tan chen pos yang yang bskul bas rkyen byas te shing lugs sa zla'i dkar phyogs kyi dga' ba dang por shar mar smras rim bzhin yi ge'i byed po rang slob blo gros mchog ldan gyis bgyis pa 'di yang don dang ldan par gyur cig__/sarba mang+ga lam/