DKR-KABUM-10-THA-003

🚧 This website is under continued development. We appreciate your patience!

Previous Text"THA" is not a number. Back to Volume Page"THA" is not a number.Next Text "THA" is not a number.

Wylie title
Location	dil mgo mkhyen brtse bka' 'bum Volume , Text 3, Pages (Folios to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation
Genre	"THA" is not a number.

"THA" is not a number.

Tibetan Text

Wylie

[edit]

འུྃ༔ །བླ་སྒྲུབ་དྭངས་མའི་ཐིག་ལེའི་ཡང་གསང་དྲག་པོའི་རྒྱུན་གྱི་རྣལ་འབྱོར་བཞུགས༔ ༄༅། རྩ་བ་གསུམ་ལ་ཕྱག་འཚལ་ལོ༔ འདིར་མོས་བརྩོན་པ་མཆོག་ལྡན་པས༔ ཡང་ཟབ་རྒྱུན་གྱི་རྣལ་འབྱོར་བསྒོམ༔ ན་མོ༔ བླ་མ་མཆོག་གསུམ་ཡི་དམ་ལྷར༔ གུས་པས་སྐྱབས་མཆི་མཁའ་མཉམ་འགྲོ༔ དྲག་པོའི་གོ་འཕང་འཐོབ་བྱའི་ཕྱིར༔ ཟབ་མོའི་རྣལ་འབྱོར་བསྒོམ་པར་བགྱི༔ ལན་གསུམ། ཧཱུྃ་ཧཱུྃ་ཧཱུྃ༔ རང་སེམས་གདོད་ནས་སྟོང་པ་ཆེ༔ རིག་གདངས་རྡོ་རྗེ་ཆེན་པོར་ཤར༔ ཟུང་འཇུག་རྒྱུ་ཡི་ཏིང་འཛིན་ཧཱུྃ༔ འོད་ཀྱི་སྣོད་བཅུད་སྟོང་པར་སྦྱངས༔ སྟོང་པའི་ངང་ལས་སྐད་ཅིག་གིས༔ དུར་ཁྲོད་འཇིགས་པའི་གཞལ་མེད་ཁང༔ པད་ཉི་དམ་སྲི་བསྣོལ་པའི་སྟེང༔ སྐད་ཅིག་པདྨ་ཀཱི་ལ་ཡ༔ སྐུ་མདོག་དམར་ནག་དུས་མེ་ལྟར༔ ཁྲོ་བོ་ཆེན་པོ་ཞལ་གསུམ་པ༔ དབུས་ཞལ་དམར་ནག་དྲག་ཏུ་ཁྲོས༔ གཡས་དཀར་གཡོན་མཐིང་བཞད་གཤེ་རྔམས༔ ཁྲོ་གཏུམ་གར་དགུའི་གཟི་བྱིན་འབར༔ སྤྱི་གཙུག་རྟ་གདོང་ལྗང་ཞུར་འཚེར༔ ཕྱག་དྲུག་དང་པོས་རྡོ་རྗེ་དང༔ ཕྱག་གཡོན་བྷནྡྷ་དམར་ཆེན་སྟོབ༔ བར་པ་གཉིས་ཀྱིས་ལྕགས་འཁོར་དང༔ སྡིགས་མཛུབ་ལྕགས་སྡིག་སྤྲུལ་པ་འགྱེད༔ འོག་གཉིས་རི་རབ་ཕུར་བུ་འདྲིལ༔ སྦྱོར་ཡུམ་པདྨཻ་ཤྭ་རི་མ༔ གྲི་ཐོད་བསྣམས་པ་གཡོན་ནས་རོལ༔ ཁྲོ་མོའི་རྒྱན་དང་ཆ་ལུགས་རྫོགས༔ གནས་ལྔར་གཤིན་རྗེ་རྟ་མཆོག་དཔལ༔ ཕྱག་རྡོར་ཁྲོས་ནག་མེ་དབལ་གཏམས༔ གཙོ་འཁོར་དུར་ཁྲོད་ཆས་བརྒྱད་དང༔ མཚོན་ཆའི་གཤོག་བརྐྱངས་ནམ་མཁར་ལྡིང༔ ཁྱུང་ཆེན་རྣམ་ལྔ་སྤྲུལ་པ་འགྱེད༔ དབལ་ཆས་ཡོངས་རྫོགས་ཉམས་དང་ལྡན༔ སྐུ་སྨད་གནམ་ལྕགས་ཕུར་པ་ནི༔ ཟུར་གསུམ་ཐོག་མེའི་ཚྭ་ཚྭ་འཕྲོ༔ གནོད་བྱེད་བདུད་བཞིའི་སྙིང་ལ་གཟིར༔ དྲག་ཤུལ་རྡོ་རྗེ་སྲིན་པོ་ནི༔ ཤིན་ཏུ་མི་བཟད་ཁྲོས་པའི་སྐུ༔ ཁམས་གསུམ་ཟ་བྱེད་ཆེན་པོར་གསལ༔ དྲག་མེ་འཁྲུགས་པའི་ཀློང་ན་འགྱིང༔ སྟེང་ཕྱོགས་བརྒྱུད་གསུམ་བླ་མ་དང༔ བར་དུ་སྒྲུབ་པ་བཀའ་བརྒྱད་ལྷ༔ ཕྱི་རོལ་དཔལ་ཆེན་ཁྲོ་བོ་བཅུ༔ གནས་ཡུལ་མཁའ་འགྲོ་བཀའ་སྡོད་བཅས༔ སྡེ་བརྒྱད་དྲེགས་པ་སྤྲིན་ལྟར་གཏིབས༔ དམ་ཚིག་ཡེ་ཤེས་གཉིས་སུ་མེད༔ ཅེས་པས་གསལ་སྣང་རྩེ་གཅིག་བསྒྲུབ༔ ཐུགས་ཀར་ཙིཏྟ་རིན་ཆེན་གུར༔ ལྟེ་བར་ཉི་མ་ལ་གནས་པའི༔ རྡོ་རྗེ་རྩེ་ལྔའི་ལྟེ་བར་ཧཱུྃ༔ རྩ་བའི་སྔགས་ཀྱི་ཕྲེང་བས་བསྐོར༔ འོད་ཟེར་རབ་འབར་འཕྲོ་འདུ་ཡིས༔ རྩ་གསུམ་ལྷ་ཚོགས་ཐུགས་རྒྱུད་བསྐུལ༔ རྒྱལ་བའི་མཁྱེན་ནུས་བྱིན་རླབས་རྣམས༔ ལྷ་སྔགས་ཕྱག་མཚན་འབྲུ་གསུམ་པོ༔ རང་ལ་སིབ་སིབ་ཐིམ་པ་ཡིས༔ ཡེ་ཤེས་གཟི་བྱིན་ཆེ་འབར་གྱུར༔ ཨོཾ་པདྨ་ཀཱི་ལ་ཡ་ཧཱུྃ༔ ཞེས་བཟླ། ལུས་ཀྱི་དཀྱིལ་འཁོར་ལ་དམིགས་པ་གཏད་ལ༔ ཨོཾ་པདྨཱནྟ་ཀྲྀཏ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ྄༔ ཅེས་བཟླས་ལ། ལྷ་དང་རང་སེམས་གཉུག་མའི་དབྱིངས༔ དབྱེར་མེད་ཚུལ་དུ་དགོངས་པས་གཟིར༔ སྣོད་བཅུད་འོད་ཞུ་རང་ལ་ཐིམ༔ རང་སེམས་ཀ་དག་ཆོས་ཀྱི་སྐུ༔ པདྨ་དྲག་པོའི་ཡེ་ཤེས་དང༔ དབྱེར་མེད་མཉམ་པའི་དབྱིངས་སུ་བཞག༔ དགེ་བ་འདི་ཡིས་མྱུར་དུ་སོགས། ཤིས་བརྗོད་བྱ། ཞེས་འདི་མཆོག་གི་རིག་པ་འཛིན། །པདྨ་དབང་ཆེན་ཧེ་རུ་ཀའི། །ཟབ་གསང་ཐུགས་ཀྱི་ཐིག་ལེའི་བཅུད། །ཐུན་མོང་མ་ཡིན་གནད་ཏིག་གི །རྒྱུན་གྱི་རྣལ་འབྱོར་སྙིང་པོ་འདི། །པདྨ་རང་བྱུང་ཧེ་རུ་ཀ །རྡོ་རྗེ་གཟི་བརྗིད་རྩལ་ཆེན་པོས། །བྱིན་གྱིས་བརླབས་པའི་རྣལ་འབྱོར་པ། །གར་དབང་མདོ་སྔགས་གླིང་པས་བཀོད། །ལས་སྨོན་དག་པའི་རིག་པ་འཛིན། །ཀློང་ཆེན་ཡེ་ཤེས་རྡོ་རྗེ་ཡིས། །དུས་ཚེས་རྟེན་འབྲེལ་དགེ་བའི་ཆར། །རྟེན་བཅས་གསུང་གིས་བསྐུལ་བའི་མཐུས། །སྙིགས་དུས་བར་ཆད་མཐའ་དག་ཞི། །མཆོག་ཐུན་དངོས་གྲུབ་འབད་མེད་འགྲུབ། །སྐུ་གསུམ་གོ་འཕང་མྱུར་ཐོབ་ཤོག །རྒྱུན་ཁྱེར་ཅུང་ཟད་རྒྱས་པར་སྤྲོ་ན་བཟླས་པའི་འགོར། ཧཱུྃ་ཧྲཱིཿ བདེ་ཆེན་ཆོས་དབྱིངས་ཁྱབ་བརྡལ་ཀློང་རོལ་ནས༔ འགག་མེད་ཡེ་ཤེས་རོལ་པའི་ཆོ་འཕྲུལ་ནི༔ སྐུ་གསུམ་རྒྱལ་བའི་སྤྱི་གཟུགས་ཐོད་ཕྲེང་རྩལ༔ འགག་མེད་ཐུགས་རྗེའི་སྤྲུལ་པ་ཧེ་རུ་ཀ༔ དབང་དྲག་འབར་བའི་དཀྱིལ་འཁོར་ལྷ་ཚོགས་རྣམས༔ ཆོས་ཀྱི་དབྱིངས་ནས་གནས་འདིར་གཤེགས་སུ་གསོལ༔ ཕྱི་ནང་གསང་བའི་བར་ཆད་བདུད་ཚོགས་བསྒྲལ༔ སྐུ་གསུང་ཐུགས་ཀྱི་རྡོ་རྗེ་ཡེ་ཤེས་ཆེ༔ བྱིན་རླབས་དངོས་གྲུབ་མཐའ་དག་སྩོལ་བ་དང༔ འཁོར་འདས་མཉམ་ཉིད་བདེ་བ་ཆེན་པོའི་ཀློང༔ མཆོག་དང་ཐུན་མོང་དངོས་གྲུབ་ཐོབ་པར་མཛོད༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཀཱི་ལ་ཡ་དྷེ་ཝ་དྷཱ་ཀི་ནི་དྷརྨ་པཱ་ལ་ས་པ་རི་ཝཱ་ར་མཎྜ་ལ་བཛྲ་ས་མ་ཡ་ཛཿཛཿ ཧཱུྃ་ཧྲཱིཿ གདོད་ནས་སྣང་སྲིད་ཡེ་ཤེས་ལྷ་ཡི་དལ༔ དག་པ་རབ་འབྱམས་དམ་ཚིག་འཁོར་ལོ་ལ༔ དབྱིངས་ནས་སྤྱན་དྲངས་ཡེ་ཤེས་སྐུ་གསུམ་ལྷ༔ རྟག་ཏུ་འདུ་འབྲལ་མེད་པར་བརྟན་པར་བཞུགས༔ ས་མ་ཡ་ཏིཥྛ་ལྷན༔ ཧཱུྃ་ཧྲཱིཿ རྩ་གསུམ་རྒྱལ་བ་རབ་འབྱམས་མ་ལུས་པའི༔ ཡེ་ཤེས་ཐུགས་རྗེའི་བཀོད་པ་ཀུན་འདུས་པ༔ དབང་དྲག་བདེ་ཆེན་རྒྱལ་བའི་དཀྱིལ་འཁོར་ལྷར༔ མི་ཕྱེད་གུས་པའི་བརྡ་ཡིས་ཕྱག་བགྱིའོ༔ ན་མོ་ན་མ་མི༔ ཧཱུྃ་ཧྲཱིཿ ་ཆོས་ཉིད་ཀ་ནས་དག་པའི་ངོ་བོ་ལས༔ ཆོས་ཅན་སྒྱུ་འཕྲུལ་ཀུན་བཟང་རྡོ་རྗེའི་གར༔ རབ་འབྱམས་མཆོད་པ་ཆེན་པོ་བླ་ན་མེད༔ ཕྱི་ལྟར་ཉེར་སྤྱོད་དུར་ཁྲོད་དྲག་པོའི་རྫས༔ ནང་དུ་སྨན་རཀ་གཏོར་མའི་འདོད་ཡོན་གཏེར༔ གསང་བ་བདེ་སྟོང་གཉིས་མེད་སྦྱོར་སྒྲོལ་གར༔ གཟུང་འཛིན་རང་གྲོལ་ཆེན་པོར་བཞེས་སུ་གསོལ༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཀཱི་ལ་ཡ་དྷེ་ཝ་དྷཱ་ཀི་ནི་མཎྜ་ལ་ས་པཱ་རི་ཝ་ར་བཛྲ་ཨརྒྷཾ་ནས་ ཤབྟ་མ་ཧཱ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཏ་ན་ག་ན་མ་ཧཱ་སུ་ཁ་པཱུ་ཛ་དྷརྨ་དྷཱ་ཏུ་ཨ༔ ཧཱུྃ་ཧྲཱིཿ ཆོས་སྐུ་བདེ་ཆེན་འོད་མི་འགྱུར་བ་ཉིད༔ ལོངས་སྐུ་པདྨ་གཏུམ་པོ་དབང་དྲག་འབར༔ བདུད་དཔུང་འཇོམས་མཛད་བཛྲ་ཀཱི་ལ་ཡ༔ སྤྲུལ་སྐུ་དབང་ཆེན་ཕྱག་རྒྱར་བཞེངས་ལ་བསྟོད༔ བདེ་སྟོང་ཐུགས་རྗེའི་རོལ་པ་འགག་མེད་ཀྱི༔ ཆོ་འཕྲུལ་གཙོ་དང་འཁོར་གྱི་རྣམ་པར་རོལ༔ དོན་དམ་ཡེ་ཤེས་གཅིག་པུའི་ངོ་བོ་རུ༔ གཟོད་ནས་ལྷུན་གྱིས་རྫོགས་པར་སྟོན་ལ་འདུད༔ མཆོད་དང་བསྟོད་པས་དཀྱིལ་འཁོར་ལྷ་ཡི་ཚོགས༔ མཉམ་ཉིད་དབྱིངས་སུ་དགྱེས་པ་ཆེར་བཞེས་ནས༔ མཆོག་དང་ཐུན་མོང་རབ་འབྱམས་དངོས་གྲུབ་སྩོལ༔ འབད་མེད་ལྷུན་གྱིས་འགྲུབ་པར་མཛད་དུ་གསོལ༔ ཞེས་འདིར་རང་ཤར་རྡོ་རྗེའི་ཚིག །ཕལ་པའི་ངག་གིས་བསླད་མིན་ཀྱང༌། །ཟབ་གསང་རྡོ་རྗེའི་སྣོད་ལྡན་ཆེ། །དབྱིངས་རིག་བྱང་ཆུབ་དབང་པོ་ཡིས། །དད་འདུན་མོས་པས་བཀས་བསྐུལ་བཞིན། །མཚོ་སྐྱེས་བླ་མ་འཇམ་པའི་དབྱངས། །མོས་པས་རིག་པའི་ཐིག་ལེ་རུ། །བཀོད་ནས་རིག་རྩལ་མ་འགག་པའི། །ཆོ་འཕྲུལ་བཀོད་པའི་ཡི་གེའི་རྐྱེན། །དམ་པ་མཆོག་གིས་མཛད་འདིས་ཀྱང༌། །ཀུན་བཟང་པདྨའི་བཀའ་བརྒྱུད་ཀྱི། །ཕྲིན་ལས་བསྟན་འགྲོའི་དཔལ་གྱུར་ཅིག །ཅེས་པའང་པདྨ་གར་དབང་འོད་གསལ་མདོ་སྔགས་གླིང་པས་སྤེལ་བའོ། །དགེའོ།། །དགེའོ།། །དགེའོ།། །།

[edit]

'u~M:__/bla sgrub dwangs ma'i thig le'i yang gsang drag po'i rgyun gyi rnal 'byor bzhugs: @#/__rtsa ba gsum la phyag 'tshal lo:_'dir mos brtson pa mchog ldan pas:_yang zab rgyun gyi rnal 'byor bsgom:_na mo:_bla ma mchog gsum yi dam lhar:_gus pas skyabs mchi mkha' mnyam 'gro:_drag po'i go 'phang 'thob bya'i phyir:_zab mo'i rnal 'byor bsgom par bgyi:_lan gsum/_hU~M hU~M hU~M:_rang sems gdod nas stong pa che:_rig gdangs rdo rje chen por shar:_zung 'jug rgyu yi ting 'dzin hU~M:_'od kyi snod bcud stong par sbyangs:_stong pa'i ngang las skad cig gis:_dur khrod 'jigs pa'i gzhal med khang:_pad nyi dam sri bsnol pa'i steng:_skad cig pad+ma kI la ya:_sku mdog dmar nag dus me ltar:_khro bo chen po zhal gsum pa:_dbus zhal dmar nag drag tu khros:_g.yas dkar g.yon mthing bzhad gshe rngams:_khro gtum gar dgu'i gzi byin 'bar:_spyi gtsug rta gdong ljang zhur 'tsher:_phyag drug dang pos rdo rje dang:_phyag g.yon b+han+d+ha dmar chen stob:_bar pa gnyis kyis lcags 'khor dang:_sdigs mdzub lcags sdig sprul pa 'gyed:_'og gnyis ri rab phur bu 'dril:_sbyor yum pad+mai shwa ri ma:_gri thod bsnams pa g.yon nas rol:_khro mo'i rgyan dang cha lugs rdzogs:_gnas lngar gshin rje rta mchog dpal:_phyag rdor khros nag me dbal gtams:_gtso 'khor dur khrod chas brgyad dang:_mtshon cha'i gshog brkyangs nam mkhar lding:_khyung chen rnam lnga sprul pa 'gyed:_dbal chas yongs rdzogs nyams dang ldan:_sku smad gnam lcags phur pa ni:_zur gsum thog me'i tshwa tshwa 'phro:_gnod byed bdud bzhi'i snying la gzir:_drag shul rdo rje srin po ni:_shin tu mi bzad khros pa'i sku:_khams gsum za byed chen por gsal:_drag me 'khrugs pa'i klong na 'gying:_steng phyogs brgyud gsum bla ma dang:_bar du sgrub pa bka' brgyad lha:_phyi rol dpal chen khro bo bcu:_gnas yul mkha' 'gro bka' sdod bcas:_sde brgyad dregs pa sprin ltar gtibs:_dam tshig ye shes gnyis su med:_ces pas gsal snang rtse gcig bsgrub:_thugs kar tsit+ta rin chen gur:_lte bar nyi ma la gnas pa'i:_rdo rje rtse lnga'i lte bar hU~M:_rtsa ba'i sngags kyi phreng bas bskor:_'od zer rab 'bar 'phro 'du yis:_rtsa gsum lha tshogs thugs rgyud bskul:_rgyal ba'i mkhyen nus byin rlabs rnams:_lha sngags phyag mtshan 'bru gsum po:_rang la sib sib thim pa yis:_ye shes gzi byin che 'bar gyur:_oM pad+ma kI la ya hU~M:_zhes bzla/_lus kyi dkyil 'khor la dmigs pa gtad la:_oM pad+mAn+ta kr-ita kI li kI la ya sarba big+h+nAn baM hU~M phaTa?:_ces bzlas la/_lha dang rang sems gnyug ma'i dbyings:_dbyer med tshul du dgongs pas gzir:_snod bcud 'od zhu rang la thim:_rang sems ka dag chos kyi sku:_pad+ma drag po'i ye shes dang:_dbyer med mnyam pa'i dbyings su bzhag:_dge ba 'di yis myur du sogs/_shis brjod bya/_zhes 'di mchog gi rig pa 'dzin/_/pad+ma dbang chen he ru ka'i/_/zab gsang thugs kyi thig le'i bcud/_/thun mong ma yin gnad tig gi_/rgyun gyi rnal 'byor snying po 'di/_/pad+ma rang byung he ru ka_/rdo rje gzi brjid rtsal chen pos/_/byin gyis brlabs pa'i rnal 'byor pa/_/gar dbang mdo sngags gling pas bkod/_/las smon dag pa'i rig pa 'dzin/_/klong chen ye shes rdo rje yis/_/dus tshes rten 'brel dge ba'i char/_/rten bcas gsung gis bskul ba'i mthus/_/snyigs dus bar chad mtha' dag zhi/_/mchog thun dngos grub 'bad med 'grub/_/sku gsum go 'phang myur thob shog_/rgyun khyer cung zad rgyas par spro na bzlas pa'i 'gor/_hU~M hrIH_bde chen chos dbyings khyab brdal klong rol nas:_'gag med ye shes rol pa'i cho 'phrul ni:_sku gsum rgyal ba'i spyi gzugs thod phreng rtsal:_'gag med thugs rje'i sprul pa he ru ka:_dbang drag 'bar ba'i dkyil 'khor lha tshogs rnams:_chos kyi dbyings nas gnas 'dir gshegs su gsol:_phyi nang gsang ba'i bar chad bdud tshogs bsgral:_sku gsung thugs kyi rdo rje ye shes che:_byin rlabs dngos grub mtha' dag stsol ba dang:_'khor 'das mnyam nyid bde ba chen po'i klong:_mchog dang thun mong dngos grub thob par mdzod:_oM AHhU~M badz+ra gu ru pad+ma kI la ya d+he wa d+hA ki ni d+harma pA la sa pa ri wA ra maN+Da la badz+ra sa ma ya dzaHdzaH_hU~M hrIH_gdod nas snang srid ye shes lha yi dal:_dag pa rab 'byams dam tshig 'khor lo la:_dbyings nas spyan drangs ye shes sku gsum lha:_rtag tu 'du 'bral med par brtan par bzhugs:_sa ma ya tiSh+Tha lhan:_hU~M hrIH_rtsa gsum rgyal ba rab 'byams ma lus pa'i:_ye shes thugs rje'i bkod pa kun 'dus pa:_dbang drag bde chen rgyal ba'i dkyil 'khor lhar:_mi phyed gus pa'i brda yis phyag bgyi'o:_na mo na ma mi:_hU~M hrIH_ chos nyid ka nas dag pa'i ngo bo las:_chos can sgyu 'phrul kun bzang rdo rje'i gar:_rab 'byams mchod pa chen po bla na med:_phyi ltar nyer spyod dur khrod drag po'i rdzas:_nang du sman raka gtor ma'i 'dod yon gter:_gsang ba bde stong gnyis med sbyor sgrol gar:_gzung 'dzin rang grol chen por bzhes su gsol:_oM AHhU~M badz+ra gu ru pad+ma kI la ya d+he wa d+hA ki ni maN+Da la sa pA ri wa ra badz+ra ar+g+haM nas _shab+ta ma hA pany+tsa a mr-i ta rak+ta ba liM ta ta na ga na ma hA su kha pU dza d+harma d+hA tu a:_hU~M hrIH_chos sku bde chen 'od mi 'gyur ba nyid:_longs sku pad+ma gtum po dbang drag 'bar:_bdud dpung 'joms mdzad badz+ra kI la ya:_sprul sku dbang chen phyag rgyar bzhengs la bstod:_bde stong thugs rje'i rol pa 'gag med kyi:_cho 'phrul gtso dang 'khor gyi rnam par rol:_don dam ye shes gcig pu'i ngo bo ru:_gzod nas lhun gyis rdzogs par ston la 'dud:_mchod dang bstod pas dkyil 'khor lha yi tshogs:_mnyam nyid dbyings su dgyes pa cher bzhes nas:_mchog dang thun mong rab 'byams dngos grub stsol:_'bad med lhun gyis 'grub par mdzad du gsol:_zhes 'dir rang shar rdo rje'i tshig_/phal pa'i ngag gis bslad min kyang*/_/zab gsang rdo rje'i snod ldan che/_/dbyings rig byang chub dbang po yis/_/dad 'dun mos pas bkas bskul bzhin/_/mtsho skyes bla ma 'jam pa'i dbyangs/_/mos pas rig pa'i thig le ru/_/bkod nas rig rtsal ma 'gag pa'i/_/cho 'phrul bkod pa'i yi ge'i rkyen/_/dam pa mchog gis mdzad 'dis kyang*/_/kun bzang pad+ma'i bka' brgyud kyi/_/phrin las bstan 'gro'i dpal gyur cig_/ces pa'ang pad+ma gar dbang 'od gsal mdo sngags gling pas spel ba'o/__/dge'o//__/dge'o//__/dge'o//__//