DKR-KABUM-10-THA-030

🚧 This website is under continued development. We appreciate your patience!

Previous Text"THA" is not a number. Back to Volume Page"THA" is not a number.Next Text "THA" is not a number.

Wylie title
Location	dil mgo mkhyen brtse bka' 'bum Volume , Text 30, Pages (Folios to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation
Genre	"THA" is not a number.

"THA" is not a number.

Tibetan Text

Wylie

[edit]

༡༄༅། །འཇམ་དཔལ་སྒྲུབ་ཐབས་སྙིང་པོ་ཡེ་ཤེས་སྣང་གཏེར་བཞུགས། ། ༄༅། །ན་མོ། བླ་མ་སངས་རྒྱས་འདུས་པའི་སྐུ། །སྐྱབས་ཀྱི་དམ་པ་དད་པས་བསྙེན། །འགྲོ་ཀུན་སྲིད་ཞི་ལས་སྒྲོལ་ཕྱིར། །བྱང་ཆུབ་མཆོག་ཏུ་སེམས་བསྐྱེད་དོ། ཨ། ཆོས་ཀུན་སྟོང་པའི་ཡེ་ཤེས་རྩལ། །རང་བྱུང་ཐུགས་རྗེའི་སྒྲོན་མའི་སྤྲིན། །མཁའ་ཁྱབ་ཞིང་དང་སྐུའི་བཀོད་པ། །སྒྱུ་འཕྲུལ་རོལ་མོ་བསམ་ཡས་པའི། །ཡེ་ཤེས་ས་བོན་དྷཱིཿདམར་སེར། །འོད་ཀྱི་སྤྲོ་བསྡུས་འཕགས་པ་མཆོད། །སེམས་ཅན་དོན་བྱས་སྒྲིབ་པ་སྦྱངས། །ཚུར་འདུས་ཡོངས་གྱུར་སྐད་ཅིག་གིས། །འཇམ་པའི་རྡོ་རྗེ་གུར་གུམ་མདོག །ཉི་མ་འཆར་ཀའི་སྤྲིན་ལྟར་མཛེས། །གཞོན་ནུ་བཅུ་དྲུག་ལང་ཚོ་ཅན། །ཕྱག་གཡས་ཡེ་ཤེས་རལ་གྲི་འཕྱར། །གཡོན་པས་ཤེར་ཕྱིན་གླེགས་བམ་བསྣམས། །གཡས་འོག་མདའ་དང་གཡོན་འོག་གཞུ། །དར་དང་རིན་ཆེན་ཨུཏྤལ་བརྒྱན། །ཞབས་ཟུང་རྡོ་རྗེའི་སྐྱིལ་ཀྲུང་གིས། །པད་ཟླའི་གདན་ལ་མཛེས་པར་འགྱིང༌། །ཟླ་བའི་རྒྱབ་ཡོལ་ལ་བརྟེན་ནས། །སངས་རྒྱས་བྱང་སེམས་ཡི་དམ་ལྷ། །འཁོར་གྱི་ཚོགས་དང་བཅས་ཏེ་བཞུགས། །སྣང་སྟོང་མཁའ་ཁྱབ་སྒྱུ་མའི་སྐུ། །འོད་ཟེར་ཕུང་པོའི་ཀློང་དུ་གསལ། །གནས་གསུམ་རྡོ་རྗེའི་ཡི་གེས་མཚན། །རིགས་ལྔས་དབང་བསྐུར་རྒྱས་བཏབ་གྱུར། ཨོཾ། ཆོས་སྐུ་མཁའ་ཁྱབ་བརྡལ་བ་ལས། །ཡེ་ཤེས་རོལ་པ་ཅིར་ཡང་སྣང༌། །དཔག་ཡས་ཞིང་དང་བཀོད་པའི་སྤྲིན། །གང་འདུལ་དེར་སྣང་ཐུགས་རྗེའི་མཐུ། །མ་འགག་སྒྱུ་མར་རོལ་པ་ཡིས། །སྤྱན་འདྲེན་གནས་འདིར་གཤེགས་སུ་གསོལ། །སྐུ་གསུང་ཐུགས་ཀྱི་བྱིན་གྱིས་རློབས། །དབང་བསྐུར་མཆོག་ཐུན་དངོས་གྲུབ་སྩོལ། །ཨོཾ་སརྦ་ཏ་ཐཱ་ག་ཏ་མཉྫུ་ཤྲཱི་ས་པ་རི་ཝཱ་ར་བཛྲ་ས་མ་ཛཿ ཛཿཧཱུྃ་བྃ་ཧོཿ ས་མ་ཡ་ཏིཥྛནྟུ། ཨོཾ་ཨཱཿཧཱུྃ། ཀུན་བཟང་སྒྱུ་འཕྲུལ་རོལ་པ་ཡི། །མཆོད་པ་རྒྱ་མཚོས་མཉེས་པར་བགྱི། །ཟག་མེད་ཡོན་ཏན་བསམ་ཡས་པའི། །དེ་ཉིད་མངོན་གྱུར་བློ་ཡིས་བསྟོད། །ཐུགས་ཀར་པདྨ་ཟླ་བའི་དབུས། །དྷཱིཿཡིག་དམར་སེར་ཨ་མཐིང་ག །ར་དམར་པ་དཀར་ཙ་ལྗང་གུ །ན་སེར་ལྔ་ལྡན་ཨོཾ་གྱི་ཕྲེང༌། །ཟླ་བ་རྒྱུ་སྐར་བཞིན་དུ་འཁོད། །ཕྱི་ལྟར་རྡོ་རྗེའི་ཁམས་དྲུག་སྟེ། །ནང་དུ་དྲུག་ལྡན་ཕུང་པོ་ལ། །གཞན་དུ་ཡེ་ཤེས་དྲུག་གི་བདག །བདེ་གཤེགས་རྒྱལ་བ་རིགས་དྲུག་གི །ངོ་བོ་རྡོ་རྗེའི་འབྲུ་དྲུག་པོ། །རང་སྒྲ་དང་བཅས་གསལ་ཞིང་འབར། །སྤྲོ་བསྡུའི་འོད་ཀྱིས་སྣོད་དང་བཅུད། །འཇམ་དཔལ་རིགས་དྲུག་དཀྱིལ་འཁོར་དུ། །གསལ་ལ་མ་འདྲེས་ལྷུན་གྱིས་རྫོགས། །སྐུ་གསུང་ཐུགས་དང་ཡེ་ཤེས་ཀྱི། །ངོ་བོ་མཉམ་པ་ཉིད་ཀྱི་དབྱིངས། །གཉིས་མེད་ཡེ་ཤེས་ཚུལ་འཆང་བའི། །རང་བཞིན་གཅིག་ཏུ་སད་པར་གྱུར། །ཨོཾ་ཨ་ར་པ་ཙ་ན་དྷཱིཿ རྩེ་གཅིག་དམིགས་པ་དང་ལྡན་པས། །ཡི་གེ་དྲུག་པ་རྡོ་རྗེའི་སྒྲ། །རླུང་སྔགས་ཡེ་ཤེས་དབྱེར་མེད་པས། །དོན་གྱི་གནད་གསང་ཤེས་པས་བཟླ། །མི་ཤེས་མུན་པའི་ཚོགས་འཇོམས་ཤིང༌། །ཡེ་ཤེས་སྐུ་སྟེ་རང་བྱུང་བ། །འཇམ་དཔལ་ཡེ་ཤེས་སེམས་དཔའ་ཡི། །རྗེས་སུ་འཛིན་པར་གདོན་མི་ཟ། །ཐུན་མཚམས་རྒྱུད་ཀྱི་རྒྱལ་པོ་བཀླག །ལྷག་པའི་ལྷ་མཆོད་བསྟོད་གསོལ་གདབ། །དད་དང་མོས་པས་རྒྱུད་བསྐུལ་ཞིང༌། །ཚོགས་གཉིས་ཟུང་འཇུག་ལམ་ལ་འབད། །དག་པའི་སྣོད་བཅུད་དབྱིངས་སུ་ཐིམ། །ཡེ་ཤེས་གཉིས་མེད་ཚུལ་འཆང་བའི། །ངང་ལས་སྣང་གྲགས་རིག་པའི་ཆོས། །འཇམ་དཔལ་རྡོ་རྗེའི་ངོ་བོར་སད། །འདི་བསྒྲུབས་པ་ལས་བྱུང་བ་ཡི། །དགེ་བ་བདག་གིས་གང་ཐོབ་པ། །དེ་ཡིས་འགྲོ་བ་ཐམས་ཅད་ཀྱི། །བདེ་གཤེགས་ཤེས་རབ་ཐོབ་པར་ཤོག །བཀྲ་ཤིས་ཀུན་གྱི་བཀྲ་ཤིས་པ། །གྲགས་པའི་བཀྲ་ཤིས་སྙན་གྲགས་དགེ །དབུགས་འབྱིན་ཆེན་པོའི་དགའ་སྟོན་གྱིས། །སྲིད་ཞི་ཀུན་ཏུ་ཁྱབ་གྱུར་ཅིག །ཚུལ་འདི་བློ་གསལ་རིག་པར་སྨྲ། །ཨོ་རྒྱན་གཞན་ཕན་གྱིས་བསྐུར་ངོར། །འཇམ་མགོན་བླ་མ་དགྱེས་པའི་འབངས། །བཀྲ་ཤིས་དཔལ་འབྱོར་འབོད་པ་དེས། །ཡེ་ཤེས་ཆོས་སྐུའི་མཆོད་སྡོང་ཆེ། །བྱ་རུང་ཁ་ཤོར་དྲུང་གནས་ཚེ། །ས་སྤྲེལ་མགོ་ཟླའི་ཚེས་བཅུར་བཀོད། །འགྲོ་ཀུན་ཡེ་ཤེས་དབྱིངས་གྲོལ་ཤོག །དགེའོ།། མངྒ་ལཾ། །

[edit]

1@#/__/'jam dpal sgrub thabs snying po ye shes snang gter bzhugs/_/ @#/__/na mo/_bla ma sangs rgyas 'dus pa'i sku/_/skyabs kyi dam pa dad pas bsnyen/_/'gro kun srid zhi las sgrol phyir/_/byang chub mchog tu sems bskyed do/_a/_chos kun stong pa'i ye shes rtsal/_/rang byung thugs rje'i sgron ma'i sprin/_/mkha' khyab zhing dang sku'i bkod pa/_/sgyu 'phrul rol mo bsam yas pa'i/_/ye shes sa bon d+hIHdmar ser/_/'od kyi spro bsdus 'phags pa mchod/_/sems can don byas sgrib pa sbyangs/_/tshur 'dus yongs gyur skad cig gis/_/'jam pa'i rdo rje gur gum mdog_/nyi ma 'char ka'i sprin ltar mdzes/_/gzhon nu bcu drug lang tsho can/_/phyag g.yas ye shes ral gri 'phyar/_/g.yon pas sher phyin glegs bam bsnams/_/g.yas 'og mda' dang g.yon 'og gzhu/_/dar dang rin chen ut+pal brgyan/_/zhabs zung rdo rje'i skyil krung gis/_/pad zla'i gdan la mdzes par 'gying*/_/zla ba'i rgyab yol la brten nas/_/sangs rgyas byang sems yi dam lha/_/'khor gyi tshogs dang bcas te bzhugs/_/snang stong mkha' khyab sgyu ma'i sku/_/'od zer phung po'i klong du gsal/_/gnas gsum rdo rje'i yi ges mtshan/_/rigs lngas dbang bskur rgyas btab gyur/_oM/_chos sku mkha' khyab brdal ba las/_/ye shes rol pa cir yang snang*/_/dpag yas zhing dang bkod pa'i sprin/_/gang 'dul der snang thugs rje'i mthu/_/ma 'gag sgyu mar rol pa yis/_/spyan 'dren gnas 'dir gshegs su gsol/_/sku gsung thugs kyi byin gyis rlobs/_/dbang bskur mchog thun dngos grub stsol/_/oM sarba ta thA ga ta many+dzu shrI sa pa ri wA ra badz+ra sa ma dzaH_dzaHhU~M ba~M hoH_sa ma ya tiSh+Than+tu/_oM AHhU~M/_kun bzang sgyu 'phrul rol pa yi/_/mchod pa rgya mtshos mnyes par bgyi/_/zag med yon tan bsam yas pa'i/_/de nyid mngon gyur blo yis bstod/_/thugs kar pad+ma zla ba'i dbus/_/d+hIHyig dmar ser a mthing ga_/ra dmar pa dkar tsa ljang gu_/na ser lnga ldan oM gyi phreng*/_/zla ba rgyu skar bzhin du 'khod/_/phyi ltar rdo rje'i khams drug ste/_/nang du drug ldan phung po la/_/gzhan du ye shes drug gi bdag_/bde gshegs rgyal ba rigs drug gi_/ngo bo rdo rje'i 'bru drug po/_/rang sgra dang bcas gsal zhing 'bar/_/spro bsdu'i 'od kyis snod dang bcud/_/'jam dpal rigs drug dkyil 'khor du/_/gsal la ma 'dres lhun gyis rdzogs/_/sku gsung thugs dang ye shes kyi/_/ngo bo mnyam pa nyid kyi dbyings/_/gnyis med ye shes tshul 'chang ba'i/_/rang bzhin gcig tu sad par gyur/_/oM a ra pa tsa na d+hIH_rtse gcig dmigs pa dang ldan pas/_/yi ge drug pa rdo rje'i sgra/_/rlung sngags ye shes dbyer med pas/_/don gyi gnad gsang shes pas bzla/_/mi shes mun pa'i tshogs 'joms shing*/_/ye shes sku ste rang byung ba/_/'jam dpal ye shes sems dpa' yi/_/rjes su 'dzin par gdon mi za/_/thun mtshams rgyud kyi rgyal po bklag_/lhag pa'i lha mchod bstod gsol gdab/_/dad dang mos pas rgyud bskul zhing*/_/tshogs gnyis zung 'jug lam la 'bad/_/dag pa'i snod bcud dbyings su thim/_/ye shes gnyis med tshul 'chang ba'i/_/ngang las snang grags rig pa'i chos/_/'jam dpal rdo rje'i ngo bor sad/_/'di bsgrubs pa las byung ba yi/_/dge ba bdag gis gang thob pa/_/de yis 'gro ba thams cad kyi/_/bde gshegs shes rab thob par shog_/bkra shis kun gyi bkra shis pa/_/grags pa'i bkra shis snyan grags dge_/dbugs 'byin chen po'i dga' ston gyis/_/srid zhi kun tu khyab gyur cig_/tshul 'di blo gsal rig par smra/_/o rgyan gzhan phan gyis bskur ngor/_/'jam mgon bla ma dgyes pa'i 'bangs/_/bkra shis dpal 'byor 'bod pa des/_/ye shes chos sku'i mchod sdong che/_/bya rung kha shor drung gnas tshe/_/sa sprel mgo zla'i tshes bcur bkod/_/'gro kun ye shes dbyings grol shog_/dge'o//__mang+ga laM/_/