JKW-KABUM-22-ZA-012-074

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 22, sde tshan 12, Text 74, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 22: . Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

74 549-551	ལམ་ཐུན་མོང་གི་རྡོ་རྗེའི་ཐོལ་གླུ་ངེས་པར་འབྱུང་བའི་རོལ་མོ། lam thun mong gi rdo rje'i thol glu nges par 'byung ba'i rol mo Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ལམ་ཐུན་མོང་གི་རྡོ་རྗེའི་ཐོལ་གླུ་ངེས་པར་འབྱུང་བའི་རོལ་མོ། ལམ་ཐུན་མོང་གི་རྡོ་རྗེའི་ཐོལ་གླུ་ངེས་པར་འབྱུང་བའི་རོལ་མོ་ཞེས་བྱ་བ། ཨ་ཧོ། སྤངས་རྟོགས་ཡོན་ཏན་ནོར་བུའི་ཟ་མ་ཏོག་གི་གཏེར། །ཕན་བདེའི་འདོད་འཇོ་མཚན་དཔེའི་དཔལ་གྱིས་མཛེས་འཁྱུད་སྐུ། །གང་གི་ཞབས་ན་སྲིད་ཞིའི་ཐོར་ཚུགས་ཀྱིས་བཏུད་པ། །དེ་ལ་བདག་ཀྱང་མི་ཕྱེད་དད་པའི་སྲིད་ཞུ་སྟོབ། །རྙེད་པར་དཀའ་ཞིང་རྙེད་ན་དོན་གྱི་མཆོག་ལྡན་པ། །ངོ་བོ་དལ་བ་བརྒྱད་ཀྱི་མྱུ་གུ་གཞོན་ནུའི་ངོགས། །ཁྱད་པར་འབྱོར་བཅུའི་ཀུནྡཱ་གསར་བའི་ལ་ཐོད་ཅན། །འཕྲལ་རྐྱེན་རིས་ཆད་ཚ་གདུང་སྟུག་པོ་ལས་བརྒལ་མཛོད། །ཕྱི་སྣོད་བརྟེན་པ་ཆགས་གནས་འཇིག་སྟོང་རྣམ་བཞི་དང་། །ནང་བཅུད་སེམས་ཅན་སྐྱེ་རྒ་ན་འཆིའི་གཞན་དབང་ཅན། །ཀུན་ཀྱང་མཐའ་བཞིས་བསྡུས་པའི་ངང་ཚུལ་འདི་བསམས་ནས། །སྐད་ཅིག་བགྱི་བ་དལ་མེད་དགེ་བའི་དོན་ལ་སྤྱོད། །དེ་ཡང་དཀར་ནག་ལས་ཀྱི་ས་བོན་བཙུགས་པ་ལས། །ཀུན་ཏུ་མི་བསླུའི་མྱུ་གུ་སོ་སོར་སྨིན་པ་གང་། །གཞི་དང་བསམ་སྦྱོར་མཐར་ཐུག་རྫོགས་པས་བྱུང་གྱུར་ན། །ཐར་པ་ཆ་མཐུན་ཚོགས་གཉིས་ལམ་ལ་འབད་པར་འཚལ། །གང་ཞིག་མེ་ཚོགས་སྤུ་གྲིའི་སོར་ཆགས་སྦྲང་རྩི་བཞིན། །སྤྱོད་པ་ཙམ་ནས་སྡུག་བསྔལ་གསུམ་གྱི་ཁོར་ཡུག་ཅན། །གནས་རིས་དྲུག་གི་ཆུ་གཏེར་སྲིད་རྩེར་གཡོ་བ་ལས། །ངེས་པར་འབྱུང་བའི་རིན་ཆེན་གྲུ་བོ་བརྙེས་པར་མཛོད། །སྐྱོན་བྲལ་སྤངས་རྟོགས་ཡོན་ཏན་ཕུན་སུམ་ཚོགས་པའི་གཏེར། །སྲིད་པའི་འཇིགས་འཕྲོག་ཐར་པ་ལ་སྦྱོར་ཐུགས་རྗེ་ལྡན། །སངས་རྒྱས་དངོས་དང་མི་ཕྱེད་དད་པས་བླ་མ་མཆོག །རྟག་ཏུ་བསྙེན་ཅིང་དོན་ལྡན་གསུང་གི་གསང་བ་བསླབ། །རང་རྒྱུད་ཉེས་པ་སུམ་ཅུ་རྩ་དྲུག་རྡུལ་རྫབ་ཁྲོད། །ལྟུང་བའི་ནོར་བུ་དེ་ལྡོག་ཡོན་ཏན་ཡན་ལག་གིས། །ལེགས་བླངས་བྱི་དོར་དང་བཅས་ཐོས་པའི་རྣམ་པ་ནི། །བརྒྱད་ཅུ་རྩ་བཞིའི་གདུགས་དཀར་རྩེ་མོར་ངལ་བསོ་བྱ། །རྣམ་པ་ཀུན་ཏུ་སྒོ་གསུམ་ཐར་པ་ལས་གོལ་བའི། །ཤིན་ཏུ་རེངས་པ་སྦྲུལ་གདུག་ལྟ་བུའི་གྲོགས་པོ་ནི། །བསྟེན་པ་ཉིད་ནས་ཚུལ་མིན་དུག་གིས་མྱོས་བྱེད་ཕྱིར། །དེ་དག་ཕྱི་ཕྱིར་བསྲིང་བའི་དམ་བཅའ་ལེགས་བརྟན་པར། །བག་ཡོད་ཚུལ་ཁྲིམས་ནོར་གྱིས་རབ་ཕྱུག་སྤྱོད་པ་དང་། །བྱང་ཆུབ་སེམས་གཉིས་རིན་ཆེན་དྲྭ་བའི་ཐོར་ཚུགས་ཅན། །འཇིག་རྟེན་འདི་ན་རྙེད་དཀའ་དགེ་བའི་གཉིས་འཐུང་དབང་། །ཕན་བདེའི་འདོད་པ་སྟེར་ཕྱིར་དུས་ཀུན་བཤེས་པར་བྱ། །དཀར་པོའི་ཡུལ་རྐྱེན་གྱིས་བསྐུལ་མི་ཕྱེད་དད་པའི་སྤྲིན། །རྟག་ཏུ་འབྲལ་མེད་འཁོར་བའི་ཚ་གདུང་ཀུན་སྐྱོབ་ཅིང་། །ཡོན་ཏན་ལོ་ཏོག་གོང་འཕེལ་འགྱུར་ཕྱིར་སྲོག་གི་ཕྱིར། །འདི་ཉིད་མི་བཏང་བསྙེན་པའི་འབྲས་བུ་ཚད་བཟུང་མེད། །གང་ན་སྙིང་པོའི་ལྕིད་ཀྱིས་ལྷག་པའི་གོ་འཕང་ནི། །སྲིད་པའི་སྡུག་བསྔལ་མཐའ་དག་མངོན་བཏང་འཕོ་འགྱུར་མེད། །ཞི་བདེ་བསིལ་བའི་བདུད་རྩིའི་སིམ་པ་སྟེར་བྱེད་པ། །འགྲོ་སྒྲོལ་ཕྲིན་ལས་ལྷུན་གྱིས་གྲུབ་ཕྱིར་སྤྲོ་བ་བསྐྱེད། །རྟག་ཏུ་ཐོས་པའི་རྩ་བ་མི་གཡོ་རྣམ་པར་བརྟན། །བསམ་བྱུང་ཤེས་རབ་ཡལ་ག་མཛེས་པའི་གདེངས་ཀ་ཅན། །སྒོམ་སྤང་དེ་ཉིད་ཁྱད་པར་འཕགས་པའི་འབྲས་བུའི་གཏེར། །འདི་ནི་རྒྱལ་བསྟན་ཡོངས་རྫོགས་ལྗོན་ཤིང་ཡིན་ཕྱིར་བསྙེན། །དེ་ལྟར་ཐུན་མོང་སྤྱོད་ཚུལ་སྙིང་པོ་མདོ་ཙམ་ཞིག །རང་གཞན་དོན་དུ་རྡོ་རྗེའི་གླུ་རུ་བླངས་པ་ལ། །རྣམ་པར་དགེ་བའི་ཚོགས་ཀུན་གཅིག་བསྡུས་མཁའ་མཉམ་འགྲོ། །བླ་མེད་བྱང་ཆུབ་དམ་པར་གཤེགས་པའི་རྒྱུ་རུ་བསྔོ།། །། ༈

[edit]

lam thun mong gi rdo rje'i thol glu nges par 'byung ba'i rol mo/__ lam thun mong gi rdo rje'i thol glu nges par 'byung ba'i rol mo zhes bya ba/__a ho/__spangs rtogs yon tan nor bu'i za ma tog gi gter/__/phan bde'i 'dod 'jo mtshan dpe'i dpal gyis mdzes 'khyud sku/__/gang gi zhabs na srid zhi'i thor tshugs kyis btud pa/__/de la bdag kyang mi phyed dad pa'i srid zhu stob/__/rnyed par dka' zhing rnyed na don gyi mchog ldan pa/__/ngo bo dal ba brgyad kyi myu gu gzhon nu'i ngogs/__/khyad par 'byor bcu'i kun+dA gsar ba'i la thod can/__/'phral rkyen ris chad tsha gdung stug po las brgal mdzod/__/phyi snod brten pa chags gnas 'jig stong rnam bzhi dang /__/nang bcud sems can skye rga na 'chi'i gzhan dbang can/__/kun kyang mtha' bzhis bsdus pa'i ngang tshul 'di bsams nas/__/skad cig bgyi ba dal med dge ba'i don la spyod/__/de yang dkar nag las kyi sa bon btsugs pa las/__/kun tu mi bslu'i myu gu so sor smin pa gang /__/gzhi dang bsam sbyor mthar thug rdzogs pas byung gyur na/__/thar pa cha mthun tshogs gnyis lam la 'bad par 'tshal/__/gang zhig me tshogs spu gri'i sor chags sbrang rtsi bzhin/__/spyod pa tsam nas sdug bsngal gsum gyi khor yug can/__/gnas ris drug gi chu gter srid rtser g.yo ba las/__/nges par 'byung ba'i rin chen gru bo brnyes par mdzod/__/skyon bral spangs rtogs yon tan phun sum tshogs pa'i gter/__/srid pa'i 'jigs 'phrog thar pa la sbyor thugs rje ldan/__/sangs rgyas dngos dang mi phyed dad pas bla ma mchog__/rtag tu bsnyen cing don ldan gsung gi gsang ba bslab/__/rang rgyud nyes pa sum cu rtsa drug rdul rdzab khrod/__/ltung ba'i nor bu de ldog yon tan yan lag gis/__/legs blangs byi dor dang bcas thos pa'i rnam pa ni/__/brgyad cu rtsa bzhi'i gdugs dkar rtse mor ngal bso bya/__/rnam pa kun tu sgo gsum thar pa las gol ba'i/__/shin tu rengs pa sbrul gdug lta bu'i grogs po ni/__/bsten pa nyid nas tshul min dug gis myos byed phyir/_/de dag phyi phyir bsring ba'i dam bca' legs brtan par/__/bag yod tshul khrims nor gyis rab phyug spyod pa dang /__/byang chub sems gnyis rin chen drwa ba'i thor tshugs can/___/'jig rten 'di na rnyed dka' dge ba'i gnyis 'thung dbang /__/phan bde'i 'dod pa ster phyir dus kun bshes par bya/__/dkar po'i yul rkyen gyis bskul mi phyed dad pa'i sprin/__/rtag tu 'bral med 'khor ba'i tsha gdung kun skyob cing /__/yon tan lo tog gong 'phel 'gyur phyir srog gi phyir/__/'di nyid mi btang bsnyen pa'i 'bras bu tshad bzung med/__/gang na snying po'i lcid kyis lhag pa'i go 'phang ni/__/srid pa'i sdug bsngal mtha' dag mngon btang 'pho 'gyur med/__/zhi bde bsil ba'i bdud rtsi'i sim pa ster byed pa/__/'gro sgrol phrin las lhun gyis grub phyir spro ba bskyed/__/rtag tu thos pa'i rtsa ba mi g.yo rnam par brtan/__/bsam byung shes rab yal ga mdzes pa'i gdengs ka can/__/sgom spang de nyid khyad par 'phags pa'i 'bras bu'i gter/__/'di ni rgyal bstan yongs rdzogs ljon shing yin phyir bsnyen/__/de ltar thun mong spyod tshul snying po mdo tsam zhig__/rang gzhan don du rdo rje'i glu ru blangs pa la/__/rnam par dge ba'i tshogs kun gcig bsdus mkha' mnyam 'gro/__/bla med byang chub dam par gshegs pa'i rgyu ru bsngo//__//___!_