JKW-KABUM-22-ZA-006-002

🚧 This website is under continued development. We appreciate your patience!

Previous Text Back to Volume PageNext Text

འགྲོ་འདུལ་མཆོག་གྱུར་བདེ་ཆེན་གླིང་པས་སྤྱན་དྲངས་པའི་དམ་རྫས་རྟེན་འདུས་རབ་འབྱམས་གཏའ་སྤེལ་བགྱིས་པའི་དཀར་ཆག།

Wylie title	'gro 'dul mchog gyur bde chen gling pas spyan drangs pa'i dam rdzas rten 'dus rab 'byams gta' spel bgyis pa'i dkar chag
Location	mkhyen brtse'i bka' 'bum Volume 22, sde tshan 6, Text 2, Pages 59- (Folios 5a6 to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	མཆོག་གྱུར་གླིང་པ་ (mchog gyur gling pa)
Citation	'jam dbyangs mkhyen brtse'i dbang po. gro 'dul mchog gyur bde chen gling pas spyan drangs pa'i dam rdzas rten 'dus rab 'byams gta' spel bgyis pa'i dkar chag. In jam dbyangs mkhyen brtse'i dbang po'i bka' 'bum, Vol. 22: 59-. Khams sde dge rdzong sar dgon: Rdzong sar blo gros phun tshogs, 2020.
Genre	Catalogue of Contents - dkar chag

1 Texts in this Section (sde tshan or chos tshan)

2 59-130	འགྲོ་འདུལ་མཆོག་གྱུར་བདེ་ཆེན་གླིང་པས་སྤྱན་དྲངས་པའི་དམ་རྫས་རྟེན་འདུས་རབ་འབྱམས་གཏའ་སྤེལ་བགྱིས་པའི་དཀར་ཆག། 'gro 'dul mchog gyur bde chen gling pas spyan drangs pa'i dam rdzas rten 'dus rab 'byams gta' spel bgyis pa'i dkar chag Catalogue of Contents - dkar chag   ·   Revelations - gter ma	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

འགྲོ་འདུལ་མཆོག་གྱུར་བདེ་ཆེན་གླིང་པས་སྤྱན་དྲངས་པའི་དམ་རྫས་རྟེན་འདུས་རབ་འབྱམས་གཏའ་སྤེལ་བགྱིས་པའི་དཀར་ཆག་སྙིང་པོ་ཤིན་ཏུ་བསྡུས་པ་གཞན་ཕན་མཁའ་ཁྱབ་ཏུ་རྟག་པའི་ལྷའི་རྔ་སྒྲ་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷི་རསྟུ། རྩོད་བྲལ་དུས་བབ་ཀྱི་གཏེར་སྟོན་ཨོ་རྒྱན་མཆོག་གྱུར་བདེ་ཆེན་གླིང་པས་རབ་བྱུང་བཅུ་བཞི་པའི་དོན་གྲུབ་ཅེས་པ་ས་མོ་ལུག་གི་ལོའི་སྣྲོན་ཟླ་བ་ཡན་ཆད་ལ་ཉུང་འབྲུ་ལྟ་བུའི་རིང་བསྲེལ། སྐུ་གདུང་གི་རིང་བསྲེལ། སྐུ་བལ་གྱི་རིང་བསྲེལ། ཆོས་ཀྱི་རིང་བསྲེལ། མྱོང་གྲོལ་གྱི་རིལ་བུ། བདུད་རྩི་ཕུར་མ་སོགས་རབ་འབྱམས་ཞིག་གཏེར་ནས་བཞེས་པ་ལས་རང་གི་ལག་ཏུ་ཇི་ཙམ་སོན་པ་འགྲོ་དོན་རྒྱ་ཆེ་ལ་རྒྱུན་མི་འཆད་པའི་ལྷག་བསམ་བཟང་པོས་གཏའ་སྤེལ་ཇི་ལྟར་བགྱིས་པའི་ཚུལ་ལ་གསུམ། མྱོང་གྲོལ་རིལ་བུའི་སྐོར། བདུད་རྩི་སྨན་གྱི་སྐོར། དེ་རྣམས་ཐུན་མོང་དུ་སྦྱར་བའི་སྐོར་རོ། །དང་པོ་ལ་རྣམ་གྲངས་སུམ་ཅུ་རྩ་བདུན་ལས། ། ༈

ཐོག་མར་ཡོན་ཏན་གྱི་ཐུགས་ཀྱི་གནས་མཆོག་དཔལ་སྤུངས་ཡང་ཁྲོད་དེ་ཝཱི་ཀོ་ཊ་གསུམ་པ་ཙཱ་འདྲ་རིན་ཆེན་བྲག་ནས་སྤྱན་དྲངས་པའི་བདེ་བར་གཤེགས་པ་ཐམས་ཅད་ཀྱི་གདུང་གི་རིལ་བུ་དམ་རྫས་རིན་པོ་ཆེའི་ཏོག་ནི། གངས་ཐིག་དང་། ཅུ་གང་ཞིབ་བཏགས་དབང་ལག་གི་དམ་ཆེ་བར་སྦྱར་ཏེ་ཆུ་གཙང་གིས་སྦྲུས་པར། སངས་རྒྱས་འོད་སྲུང་གི་རིང་བསྲེལ། གུ་རུའི་ཚེམས་ལས་བྱུང་བའི་རིང་བསྲེལ་གྱི་འཕེལ་ཕྱེ། དགའ་རབ་གདུང་རྟེན་ཕྱེ་མ་རྣམས་དང་ལྷན་ཅིག་ཕབ་གཏའ་ཁ་ཆེའི་ཆུར་སྦྱངས་པ་བླུགས་ནས་རིལ་བུ་ཡུངས་ཀར་འབྲུ་དགུའི་ཚད་དུ་དྲིལ། ལི་ཁྲིའི་ན་བཟའ་གསོལ་བ་སྐམ་ཐག་ཆོད་པ་དང་། གསེར་འདུར་གྱིས་མདོག་བསྒྱུར། ཀུན་འདུས་རིག་པ་རྡོ་རྗེ་བཀོད་པའི་རྒྱུད་ལས་གསུངས་པ་ལྟར་རིང་བསྲེལ་སྒྲུབ་པའི་སྔགས་ཀྱིས་བྱིན་གྱིས་བརླབས། སྐྱེ་བདུན་རིལ་སྒྲུབ་ཆེན་མོའི་སྒོ་ནས་ལེགས་པར་བསྒྲུབས་པ་སྟེ། ཇི་སྐད་དུ། རྒྱལ་བའི་རིང་བསྲེལ་ནོར་བུའི་མཆོག །དགོས་འདོད་ཐམས་ཅད་འབྱུང་བར་བྱེད། །ཉན་ཐོས་རང་རྒྱལ་བྱང་ཆུབ་སེམས། །དེ་བཞིན་རྣལ་འབྱོར་ལྡན་པའི་གདུང་། །མཆོད་ཅིང་ལུས་ལ་བཅང་པ་ཡིས། །གདོན་ཀུན་ཕྱོགས་སུ་ཉེ་མི་ནུས། །ཞེས་སོགས་གསུངས་པ་ལྟར། མཐོང་ཐོས་མྱོང་དང་མགུལ་དུ་འཆང་བ་ཙམ་གྱིས་ཀྱང་ནད་གདོན་སྒྲིབ་གཉིས་ཞི་ཞིང་སྲུང་བ་དང་། ཚེ་བསོད་ཡེ་ཤེས་རྒྱས་པ་སོགས་གནས་སྐབས་དང་། མཐར་ཐུག་རྫོགས་པའི་བྱང་ཆུབ་མྱུར་དུ་ཐོབ་པས་མཚོན་དགོས་འདོད་ཡིད་བཞིན་དུ་འབྱུང་བའི་ཕྱིར་བྱིན་རྫས་ཐམས་ཅད་ཀྱི་མཆོག་ཏུ་གྲུབ་པས་ནོར་བུ་རིན་པོ་ཆེ་ཏོག་གི་བློ་གྲོས་དང་མཚུངས་པ་ལས་ཀྱང་ཁྱད་པར་དུ་མས་འཕགས་པ་ཉིད་དོ། ། ༈ ཁ་ལ་རོང་སྒོ་ནས་བཞེས་པའི་རྫོགས་པའི་སངས་རྒྱས་འོད་སྲུང་དང་། སེང་ཆེན་གནམ་བྲག་ནས་སྤྱན་དྲངས་པའི་ཐུབ་པ་ཆེན་པོའི་སྐུ་ཆོས་ཀྱི་ཟེག་མ་རིལ་བུར་དྲིལ་བ་དམ་རྫས་མཐོང་གྲོལ་ཆེན་མོ་ནི། དེ་དག་གི་ཟེག་མ་ཅོང་ཞི་དང་ཞིབ་བཏགས་ཁ་ཆེའི་ཆུར་སྦྱར་བ། འབྲུ་དཀར་གྱི་ཕྱེ། གུར་གུམ་དང་། ཙནྡན་དཀར་པོ་དྲི་ཐོན་བཅས་ཀྱི་ཕྱེ་མར་བརྫིས་ཏེ་རིལ་བུ་ཉུང་ཀར་སྦོམ་པོའི་ཚད་དུ་དྲིལ། འགྲོ་འདུལ་ངན་སོང་དོང་སྤྲུགས་དང་། སྐྱེ་བདུན་རིལ་སྒྲུབ་ཆེན་མོའི་སྒོ་ནས་བསྒྲུབས་པ་སྟེ། མཐོང་ཐོས་མྱོང་དང་འཆང་བས་བར་ཆད་ཐམས་ཅད་སྲུང་ཞིང་། བསམ་དགུའི་དོན་ཀུན་འགྲུབ་པ་སོགས་ཕན་ཡོན་བསྔགས་པ་ཉུང་འབྲུ་ལྟ་བུའི་རིང་བསྲེལ་དང་མཚུངས་པ་ཉིད་དོ།། །། ༈ ཡོན་ཏན་གྱི་གསུང་གི་གནས་མཆོག་བདེ་ཆེན་པདྨ་ཤེལ་ཕུག་གི་དབུ་རྩེ་ནས་སྤྱན་དྲངས་པའི་དགའ་རབ་རྡོ་རྗེའི་གདུང་རྟེན་རིལ་བུ་དམ་རྫས་བསྟན་པའི་བཙས་སུ་བསྔགས་པ་མྱོང་གྲོལ་ཀུན་གྱི་རྒྱལ་པོ་འཁོར་འདས་རང་གྲོལ་ནི། གདུང་རྟེན་དྭངས་མ་དང་ཤྲཱི་སིདྷ་ཡབ་ཡུམ་གྱི་བྱང་སེམས། བྲམ་ཟེ་སྐྱེ་བདུན་ཟླ་བ་དྲི་མེད་ཀྱི་གདུང་ལས་གྲུབ་པའི་གཏེར་སྒྲོམ་བཅས་ཞིབ་པར་བཏགས་པའི་ཕྱེ་མ་ལ་དབང་པོ་ལག་པས་དམ་སྦྱར་ཏེ་ཆུ་གཙང་གིས་སྦྲུས་ནས་རིལ་བུ་ཡུངས་ཀར་སྦོམ་པོ་ཙམ་དུ་དྲིལ་བ་དཔལ་རྡོ་རྗེ་སེམས་དཔའ་ཐུགས་ཀྱི་སྒྲུབ་པ་དང་། དགའ་རབ་སྙིང་ཏིག་ལས་འབྱུང་བའི་མྱོང་གྲོལ་གྱི་རིལ་སྒྲུབ་ལྟར་ལན་མང་དུ་བསྐྱར་ནས་བསྒྲུབས་པ་སྟེ། གཏེར་ལུང་ལས། འཇིག་རྟེན་ཀུན་ཏུ་རྙེད་དཀའ་བའི༔ མྱོང་གྲོལ་བྱེ་བའི་རྒྱལ་པོ་ནི༔ རིན་ཆེན་ནོར་བུ་ཀུན་གྱི་མཆོག༔ དགའ་རབ་དགྱེས་པ་རྡོ་རྗེ་ཡི༔ ཤེལ་གྱི་གོང་བུའི་གདུང་རྟེན་ཆེ༔ ཤྲཱི་སིདྷ་ཡབ་ཡུམ་དང་༔ ཨོ་རྒྱན་ཡབ་ཡུམ་སྙོམས་ཞུགས་པས༔ བདེ་བར་གཤེགས་པ་ཐམས་ཅད་ཀྱི༔ ཡེ་ཤེས་གཟུགས་སྐུ་ཞལ་དུ་དྲངས༔ སྐུ་ཡི་དབྱིབས་བརྒྱུད་མཁར་འཁྱིལ་བའི༔ བྱང་ཆུབ་སེམས་ཀྱིས་རབ་ཏུ་སྤེལ༔ འཕགས་མཆོག་སྙིང་རྗེ་ཆེན་པོ་ཡི༔ རྣམ་འཕྲུལ་འབྲེལ་ཚད་དོན་ལྡན་པ༔ བྲམ་ཟེ་ཟླ་བ་དྲི་མེད་ཀྱི༔ གདུང་གི་རུས་པས་བུང་བསྐྱེད་དེ༔ མ་འོངས་སེམས་ཅན་དོན་སླད་དུ༔ སྒྲུབ་གནས་ཀུན་གྱི་རྒྱལ་པོ་ནི༔ པདྨ་ཤེལ་གྱི་ཕུག་པ་ཡི༔ སྒོ་སྐྱོང་དྷཱ་ཀིའི་ བྲག་ལ་སྦས༔ ནམ་ཞིག་སྨོན་ལམ་དུས་བབ་ཚེ༔ གཏེར་འབྱིན་ཀུན་གྱི་རྒྱལ་པོ་ཆེ༔ མཆོག་གི་མིང་ཅན་སྐྱེས་བུ་ཡིས༔ ཕྱི་ནང་རྟེན་འབྲེལ་གནད་འགྲིགས་པས༔ གློ་བུར་ཐོག་བབ་ཚུལ་དུ་འདོན༔ འཇམ་དཔལ་ཆོས་ཀྱི་བཤེས་གཉེན་གྱིས༔ བྱིན་བརླབས་དབང་གི་མིང་ཅན་སོགས༔ ལས་ཅན་རྣམས་ཀྱི་སྐལ་བར་འགྱུར༔ ཞེས་དང་། དེ་ལྟ་བུ་ཡི་མྱོང་གྲོལ་རྒྱལ༔ འདི་ཉིད་མྱོང་བས་ངན་སོང་མེད༔ གལ་ཏེ་ངན་སོང་ཡོད་སྲིད་ན༔ རྡོ་རྗེ་སེམས་དཔའ་རྫུན་དུ་ཐལ༔ དགའ་རབ་རྡོ་རྗེའི་བདེན་པ་རྫུན༔ འཇམ་དཔལ་བཤེས་གཉེན་མཁྱེན་རབ་རྫུན༔ ཤྲཱི་སིདྷའི་ཡེ་ཤེས་རྫུན༔ ཨོ་རྒྱན་པདྨའི་རྫུ་འཕྲུལ་རྫུན༔ དེ་རྣམས་འཕགས་ཆེན་ས་བརྙེས་ཕྱིར༔ རྫུན་མི་སྲིད་ཅིང་བདེན་པ་ཆེ༔ དེ་བས་གྲུབ་པའི་རྫས་མཆོག་འདི༔ གནས་སྐབས་བཅུད་ལེན་རྣམས་ཀྱི་མཆོག༔ མཐར་ཐུག་ཐར་པར་འདྲེན་པའི་ལམ༔ བདེ་ཆེན་འཕོ་བ་ཆེན་པོའི་རྫས༔ དྭངས་མ་འོད་སྐུར་གྲུབ་པའི་བཅུད༔ མཐོང་ཐོས་དྲན་རེག་ཐམས་ཅད་ཀུན༔ རྩོལ་མེད་ངང་གིས་གྲོལ་བྱེད་པ༔ རྡོ་རྗེ་སེམས་དཔའ་ཉིད་དང་མཚུངས༔ ཞེས་མྱོང་གྲོལ་ཀུན་གྱི་རྒྱལ་པོར་ཆེས་མཆོག་ཏུ་བསྔགས་སོ། ། ༈ ཡོན་ཏན་གྱི་ཕྲིན་ལས་གནས་སེང་ཆེན་གནམ་བྲག་གི་བྲག་གོང་མོ་འོག་ནས་སྤྱན་དྲངས་པའི་འཇམ་དཔལ་བཤེས་གཉེན་ཤེས་རབ་རིལ་བུ་ཡེ་ཤེས་སེམས་དཔའི་དྭངས་བཅུད་ནི། གཏེར་ལུང་ལས་འབྱུང་བ་ལྟར། སྤང་རྒྱན་དཀར་པོ་དང་། ཨ་རུ་ར་ཕྱེད་ཁྱེར་དུ་བྱས་པར། སྒྲུབ་གཞུང་ལས་བཤད་པའི་ཤུ་དག་དཀར་པོ་དང་། ཅུ་གང་ཕྱེ་མ་ཞིབ་བཏགས་ཤིང་མངར་གྱི་ཆུས་སྦྲུས་པ་ལ། ཕབ་གཏའ་ཁ་ཆེའི་ཆུར་སྦྱར་བ་བླུགས་ནས་རིལ་བུ་སྲན་མ་ཙམ་དུ་དྲིལ། བླ་མའི་ཐུགས་སྒྲུབ་བར་ཆད་ཀུན་སེལ་གྱི་འཇམ་དཔལ་སྨྲ་བའི་སེང་གེའི་རིལ་སྒྲུབ་དང་། འཇམ་དཔལ་སྙིང་ཏིག་གི་མན་ངག་ལྟར་སྔ་ཕྱིར་བསྐྱར་ནས་བསྒྲུབས་པ་སྟེ། དེ་ལྟའི་ཕན་ཡོན་ཀྱང་། བླ་མའི་ཐུགས་སྒྲུབ་ཞལ་ཤེས་ལས། དེ་ལྟར་སྒྲུབ་པའི་རིལ་བུ་ནི༔ ཞག་བདུན་བསྟེན་ན་རྨོངས་པ་སེལ༔ བཅུ་གཉིས་མི་བརྗེད་གཟུངས་ཐོབ་ཅིང་༔ བདུན་གསུམ་ཡེ་ཤེས་སྣང་བ་འཆར༔ ཡུན་དུ་བསྲིངས་ན་ནད་སེལ་ཞིང་༔ ལུས་ཀྱིས་འཆི་མེད་བཅུད་ལེན་འགྲུབ༔ ངག་སྙན་ཚངས་པའི་དབྱངས་ལྟར་འགྱུར༔ ཡིད་ལ་མངོན་ཤེས་ཕྱོགས་མེད་འཆར༔ འཇམ་དཔལ་གཞོན་ནུ་དང་མཚུངས་པའི༔ ཟབ་ཅིང་རྒྱ་ཆེའི་བློ་གྲོས་ཐོབ༔ རྨོངས་པའི་དུད་འགྲོ་ཡིན་ཀྱང་རུང་༔ རིལ་བུ་དྲི་ཙམ་ཚོར་བས་ཀྱང་༔ འཇམ་པའི་དབྱངས་ཀྱི་རིག་སྔགས་མཐུས༔ སྒྲིབ་པའི་དྲི་མ་རབ་སྲབ་ནས༔ ཕྱི་མ་མཐོ་རིས་རྟེན་ཐོབ་ཅིང་༔ བློ་གྲོས་རྒྱ་ཆེར་ལྡན་པར་འགྱུར༔ དེ་ཕྱིར་སྙིང་རྗེར་ལྡན་པ་ཡིས༔ ཀུན་ལ་འགྲོ་དོན་རྒྱ་ཆེར་བྱ༔ ཨེ་མ་ངོ་མཚར་རྨད་ཀྱི་ཆོས༔ མྱོང་གྲོལ་རྫས་ཀྱི་སྦྱོར་བའོ༔ ཞེས་གསུངས་སོ། ། ༈ གསུང་གི་ཡོན་ཏན་གྱི་གནས་ཆེན་ནམ་མཁའ་མཛོད་ནས་སྤྱན་དྲངས་པའི་གུ་རུ་ཡབ་ཡུམ་གྱི་བྱང་སེམས་བདེ་བར་གཤེགས་པ་ཐམས་ཅད་འདུས་པའི་དམ་རྫས་རོལ་པ་ཆེན་པོ་བདེ་ཆེན་རང་གྲོལ་ནི། གཞི་གུ་རུ་ཡབ་ཡུམ་གྱིས་བམ་སྒྲུབ་མཛད་པའི་ས་སྦྱིན་བཟང་པོ་ལ། གཏེར་བྱོན་ཅུ་གང་། སིནྡྷུ་ར། ཙནྡན་དཀར་དམར། ག་བུར། གི་ཝཾ་རྣམས་དང་། འབྲས་གསུམ། བཟང་དྲུག་སོགས་བྱང་སེམས་དཀར་དམར་གྱི་སྨན་གྱི་སྐྱོབས་ཕྲན་བུ་དང་བཅས་སྦྱར་ནས་ཞིབ་པར་བཏགས་པའི་ཕྱེ་མ་གུར་གུམ་གྱི་དྭང་ཆུས་སྦྲུས་པ་ལ། གོང་དུ་སྨོས་པའི་ཕབས་གཏའ་དང་། འབུར་མོ་གནས་ཀྱི་གཏེར་བྱོན་དམ་རྫས་རོལ་པ་ཆེན་པོའི་རིལ་བུ་གསུམ་བཅས་ཁ་ཆེ་གུར་གུམ་གྱི་གྲུང་ཆུར་ཡུན་རིང་དུ་སྦངས་ཤིང་འདྲེས་པར་འདུར་བའི་ཁུ་བ་བླུགས་ཏེ་རིལ་བུ་སྲན་ཆུང་སྐམ་པ་ཙམ་དང་། ལེབ་མོ་ཆ་ཤས་བཅས་བཟོས་ནས། ཐུགས་སྒྲུབ་སྙིང་བྱང་ལས་གསུངས་པའི་མ་སྒོམ་སངས་རྒྱས་ཆོས་དྲུག་གི་དམ་རྫས་མྱོང་གྲོལ་གྱི་སྒྲུབ་པ་དང་། བླ་མའི་ཐུགས་སྒྲུབ་སྤྱིའི་སྒྲུབ་ཁོག་ལས་གསུངས་པ་ལྟར་སྔ་ཕྱིར་ལེགས་པར་བསྒྲུབས་པ་སྟེ། འདིའི་ལོ་རྒྱུས་ལས། ཚེ་བདག་པདྨའི་ཞབས་ལ་ཕྱག་འཚལ་འདུད༔ དམ་རྫས་རོལ་པ་ཆེན་པོའི་ཡིག་ཆུང་ནི༔ ནམ་མཁའ་རྫོང་དུ་སྨན་སྒྲུབ་མཛད་པའི་ཚེ༔ ཨོ་རྒྱན་པདྨ་ཡབ་ཡུམ་མཉམ་སྦྱོར་བའི༔ བདེ་བར་གཤེགས་པ་ནམ་མཁའི་སྐར་ཚོགས་ཙམ༔ ཡབ་ཡུམ་སྐུ་ལ་ཐིམ་ཞིང་འོད་དུ་ཞུ༔ རྒྱལ་ཀུན་འདུས་པའི་བདུད་རྩི་མཁའ་ལ་འཁྱིལ༔ དད་ལྡན་དོན་དུ་ཕྱི་རུ་བབ་པ་ལ༔ བམ་པོར་སྤྲུལ་པའི་གང་བུ་རེ་རེ་ཡང་༔ རྗེ་འབངས་སོ་སོའི་ཡི་དམ་དང་མཐུན་པའི༔ སྲོག་གི་ཡིག་འབྲུའི་ཚུལ་དུ་བྱོན་པ་རྣམས༔ གཅིག་ཏུ་བསྡུས་ཏེ་གཏེར་དུ་སྦས་པ་ནི༔ མཐོང་བ་ཙམ་གྱིས་ངན་སོང་སྐྱེ་སྒོ་ཆོད༔ མྱོང་བ་ཙམ་གྱིས་མཁའ་སྤྱོད་གནས་སུ་འདྲེན༔ འཇིགས་པའི་འཕྲང་ལས་འདྲེན་པའི་དམ་པའི་རྫས༔ བདེར་གཤེགས་ཐམས་ཅད་བདེ་བར་རོལ་པ་ཡི༔ ཐུགས་རྗེའི་ལྕགས་ཀྱུ་ཆེན་པོ་འདི་ཁོ་ན༔ དམ་རྫས་མྱོང་གྲོལ་སྙིང་ལ་གཅེས་པར་གྱིས༔ ཞེས་ཡོན་ཏན་བསྔགས་པ་བསམ་གྱིས་མི་ཁྱབ་པར་གསུངས་པ་དང་རྗེས་སུ་མཐུན་པ་ཉིད་དོ། ། ༈ གསུང་གི་ཐུགས་ཀྱི་གནས་མཆོག་ན་བུན་རྫོང་ནས་སྤྱན་དྲངས་པའི་སློབ་དཔོན་རིན་པོ་ཆེའི་ཤངས་མཚལ་རིལ་བུ་དམ་རྫས་ཉི་མ་ཆེན་པོ་ནི། གཏེར་བྱོན་སོགས་ཀྱི་སིནྡྷུ་ར་དང་། ཙན་དན་དམར་པོ་ཕོན་མང་བ་ལ་གཞི་བྱས། སིཧླ། སྐྱུ་རུ་ར། སྟར་བུ། གནས་ཆེན་རྣམས་ཀྱི་ཅོང་ཞི་དམར་པོ། གངས་རིའི་ལྷ་བཙག ལི་ཤི། གུར་གུམ་བཅས་ཀྱི་ཕྱེ་མ་ཤིན་ཏུ་ཞིབ་པར་ཁ་ཆེའི་ཆུས་སྦྲུས་བའི་ཟན་ལ། གོང་སྨྲོས་ཕབ་གཏའ་དང་། སེང་བྲག་གཏེར་བྱོན་ཨོ་རྒྱན་རིན་པོ་ཆེའི་སྐུ་ཚབ་ཀྱི་གཞི་ཤངས་མཚལ་མཐུག་པོས་བྱུགས་པ་ལས་ཆ་ཤས་ལྷུང་བ་དག་ཁ་ཆེའི་གྲུང་ཆུར་ཡུན་དུ་སྦངས་ཏེ་བླུགས། རིལ་བུ་ཉུང་ཀར་སྦོམ་པོའི་ཚད་ཙམ་དུ་དྲིལ་ནས། པདྨའི་རིགས་ཀྱི་བདག་པོ་སྣང་བ་མཐའ་ཡས་སུ་བསྐྱེད་ཅིང་བཟླས་པས་བྱིན་གྱིས་བརླབས་པ་དང་། མྱོང་གྲོལ་རིལ་སྒྲུབ་ཆེན་མོའི་སྒོ་ནས་བསྒྲུབས་པ་སྟེ། གཏེར་ཁ་གཞན་ནས་འབྱུང་བའི་དམ་རྫས་པདྨ་རཱ་གའི་ཡིག་ཆུང་ལས། གསུང་གི་རྡོ་རྗེ་པདྨ་སཾ་བྷཱ་བའི༔ གཉིས་མེད་ཡེ་ཤེས་ཐུགས་རྗེ་ཆགས་པའི་མདངས༔ དངོས་མེད་དངོས་པོའི་ཚུལ་དུ་རང་སྣང་བའི༔ ཤངས་མཚལ་རིལ་བུ་ཉུང་ཀར་འབྲུ་ཚད་ཙམ༔ དེ་ལས་འཕེལ་བ་ཆེ་ཕྲ་དཔག་ཏུ་མེད༔ སུས་མྱོང་ནད་གདོན་སྡུག་བསྔལ་ཐམས་ཅད་ཞི༔ ཁྱད་པར་མཛེ་དང་མ་མོ་འཁྲུགས་པའི་ཡམས༔ ཤིན་ཏུ་གསོ་དཀའ་ཐམས་ཅད་སེལ་བར་བྱེད༔ ཚེ་བསོད་རྒྱས་ཤིང་ཉམས་རྟོགས་འཕེལ་བ་དང་༔ མཆོག་གི་སིདྡྷི་ཚེ་འདིར་ཐོབ་པར་འགྱུར༔ ཞེས་སོགས་རྒྱ་ཆེར་གསུངས་སོ། ། ༈ ཀེ་རོང་རྡོ་རྗེ་ཅོང་ཕུག་གི་གཏེར་བྱོན་གཟི་སྒྲོམ་ནས་བྱུང་བའི་ཨོ་རྒྱན་ཡབ་ཡུམ་གྱིས་ཤེལ་བྲག་ཏུ་བསྒྲུབས་གནང་རྡོ་རྗེ་ཚེའི་རིལ་བུ་འཆི་མེད་བདུད་རྩིའི་དྭང་བཅུད་ནི། གཞི་སིནྡྷཱུ་ར་འདམ་བཏགས་སོ་མི་སེགས་པར་བྱས་པ་དང་། འབྲས་དཀར་གྱི་ཕྱེ་མ་ལ། བུམ་རྫས་ཉེར་ལྔ། དབང་ལག འབྲས་གསུམ། ཅོང་ཞི། བྲག་ཞུན། རྩ་བ་ལྔ། རྟག་དུ། དུརྦ་བཅས་ཅུང་ཟད་སྦྱར་བ་ཞིབ་བཏགས་དང་། ཤིང་མངར་རོ་འགྱུར་བ། ཙནྡན་དཀར་པོ་དྲི་ཐོན། གཏེར་ཆེན་མཆོག་ནས་སྔ་ཕྱིར་ཐུགས་སྒྲུབ་ཀྱི་སྒྲུབ་པ་གནང་སྐབས། ཚེ་རྫས། སེང་བྲག་དང་། ཤེལ་ཕུག་གི་ཚེ་ཆུ། ཚེ་སྒྲུབ་དཀར་པོའི་བུམ་ཆུ་སོགས་ལྷན་ཅིག་ཏུ་བརྫིས་པའི་ཟན་ལ། ཕབ་གཏའ་ཁ་ཆེའི་དྭང་ཆུར་སྦངས་པ་བསྲེས་ནས་རིལ་བུ་སྲན་ཆུང་འཕོས་པ་ཙམ་དུ་དྲིལ། རྒྱ་མཚལ་དང་སིནྡྷཱུ་ར་བསྲེས་པའི་ན་བཟའ་གསོལ། ཐུགས་སྒྲུབ་བར་ཆད་ཀུན་སེལ་གྱི་བླ་མ་ལོངས་སྐུ་པདྨ་ཚེ་དཔག་མེད་རིགས་ལྔའི་རིལ་སྒྲུབ་དང་། སྒྱུ་འཕྲུལ་ཚེ་དཀར་རིགས་ལྔའི་སྒྲུབ་པ་ལ་བརྟེན་ནས་བྱིན་གྱིས་བརླབས་པ་སྟེ། ཞལ་གདམས་ཀྱི་གཞུང་ལས། རིལ་བུའི་དྲི་ཙམ་ཚོར་བས་ཀྱང་༔ གདོན་བགེགས་ཞི་ཞིང་ཚེ་བསོད་འཕེལ༔ དམ་ཚིག་ལྡན་པས་བསྟེན་གྱུར་ན༔ ཚེ་དབང་རིག་འཛིན་ངེས་པར་འགྲུབ༔ ཅེས་དང་། གཞུང་གཞན་ལས་ཀྱང་རྒྱ་ཆེར་གསུངས་སོ། ། ༈ ཡོན་ཏན་ཕྲིན་ལས་ཀྱི་གནས་མཆོག་སེང་ཆེན་གནམ་བྲག་གི་བྲག་གོང་མོ་འོག་མ་ནས། ཇི་སྐད་དུ། ཟབ་གཏེར་གྱི་ཐོ་བྱང་ལས། དམ་རྫས་དང་པོ་དགའ་རབ་རྡོ་རྗེ་ཡི༔ བདེ་ཆེན་ཡེ་ཤེས་བདུད་རྩིའི་ཕབ་གཏའ་ཡིན༔ འཇམ་དཔལ་བཤེས་གཉེན་ཤེས་རབ་རིལ་བུ་གསུམ༔ ཀླུ་སྒྲུབ་སྙིང་པོའི་ཀླུ་སྨན་རིལ་བུ་གཅིག༔ རིག་པའི་ཡེ་ཤེས་སྨན་གྱི་རིལ་བུ་གསུམ༔ ཨིནྡྲ་བྷུ་ཏིའི་རིན་ཆེན་རིལ་བུ་བཞི༔ སྐྱེ་བདུན་ཤ་ཡི་རིལ་བུ་བདུན་ཚར་དང་༔ ཐུགས་རྗེ་ཆེན་པོའི་མ་ཎི་རིལ་བུ་ལྔ༔ སངས་རྒྱས་གསང་བའི་རྡོར་སེམས་རིལ་བུ་གསུམ༔ པོ་ཏཱ་ལ་ཡི་འབྲུ་དང་སྨན་གྱི་རིགས༔ ཞེས་གསུངས་པ་ལྟར་སྔར་ཡོངས་སུ་མ་གྲགས་པའི་རྫས་མཆོག་ངོ་མཚར་ཅན་རབ་འབྱམས་ཞིག་ཁྲོམ་གཏེར་དུ་སྤྱན་དྲངས་པར་མཛད་པ་ལས། ཐུགས་རྗེ་ཆེན་པོའི་མ་ཎི་རིལ་བུ་འགྲོ་འདུལ་འཕགས་པའི་ཐིག་ལེ་རིགས་དྲུག་དོང་སྤྲུགས་ནི། སྤྱན་རས་གཟིགས་རྟག་དུ་གཙོར་གྱུར་གནས་ཆེན་རྣམས་སུ་སྐྱེས་པའི་རྟག་དུ་རིགས་གསུམ་དང་། འབྲུ་དཀར་གྱི་ཕྱེ་མ་སྦྱར་བ་ཆུ་གཙང་གིས་སྦྲུས་པར། ཕབ་གཏའ་ཁ་ཆེའི་ཆུར་སྦྱངས་པ་བླུགས་ནས་རིལ་བུ་སྲན་ཆུང་ཙམ་དུ་དྲིལ། མཚལ་གྱིས་ན་བཟའ་གསོལ། གཏེར་ཁ་གསར་རྙིང་གི་ཐུགས་རྗེ་ཆེན་པོའི་སྒྲུབ་ཆེན་དང་འབྲེལ་བར་བྱིན་གྱིས་བརླབས་པ་སྟེ། འདིའི་ཕན་ཡོན་སྤྱིར་བཏང་ཉང་གཏེར་འགྲོ་འདུལ་གྱི་གཞུང་ལས། ཡི་གེ་དྲུག་པའི་སྔགས་ཀྱི་སྒྲ༔ ཐོས་པས་ངན་སོང་སྐྱེ་སྒོ་གཅོད༔ རིལ་བུ་ལ་བཏབ་ཟོས་གྱུར་ན༔ ཚེ་རིང་རྒས་སྲ་ནད་གདོན་སེལ༔ ཚེ་རབ་འཕགས་པས་རྗེས་བཟུང་ཞིང་༔ ལས་ངན་སྒྲིབ་པ་ཀུན་བྱང་སྟེ༔ བདེ་བ་ཅན་ཏུ་ངེས་པར་སྐྱེ༔ ཞེས་སོགས་རྒྱ་ཆེར་གསུངས་པས་མཚོན་ཏེ་ཤེས་པར་བྱའོ། ། ༈ སེང་ཆེན་གནམ་བྲག་ནས་སྤྱན་དྲངས་པའི་ཐུགས་རྗེ་ཆེན་པོའི་རྣམ་འཕྲུལ་བྲམ་ཟེ་སྐྱེ་བདུན་ཤའི་རིལ་བུ་རྫས་ཀྱི་ཐིག་ལེ་ངན་སོང་དོང་སྤྲུགས་ནི། འབྲུ་དཀར་གྱི་ཕྱེ་མ་དང་། ཤིང་ཚྭ་རོ་འགྱུར་ངེས་སྦྱར་ནས་བརྫིས་པའི་ཟན་ལ། ཕབ་གཏའ་ཁ་ཆེའི་ཁུ་བ་གར་མོ་ལ་སྦྱངས་པ་བླུགས། རིལ་བུ་ཉུང་དཀར་འབྲུ་དགུའི་ཚད་དུ་དྲིལ། ཐུགས་རྗེ་ཆེན་པོ་གསང་བ་འདུས་པ་སོགས་ཀྱི་སྐྱེ་བདུན་རིལ་སྒྲུབ་ཆེན་མོའི་སྒོ་ནས་ལེགས་པར་བསྒྲུབས་པ་སྟེ། འདིའི་ཕན་ཡོན་གཏེར་ཁ་ཐ་དད་ནས་བསམ་གྱིས་མི་ཁྱབ་པ་ཞིག་གསུངས་པ་དང་། ཁྱད་པར་ཐུགས་སྒྲུབ་ཞལ་གདམས་སྙིང་བྱང་དུ་ལུང་དྲངས་པ། ངན་སོང་དོང་སྤྲུགས་འགྲོ་བ་འདུལ་བའི་རྒྱུད་ཆེན་པོ་ལས༔ བཅོམ་ལྡན་འདས་པདྨའི་སྤྱན་གྱིས་མཁའ་འགྲོ་མ་གར་གྱི་དབང་མོ་ལ་བཀའ་སྩལ་པ༔ དོན་གྱི་བདུད་རྩི་མྱོང་གྲོལ་ནི་སྐྱེ་བ་མེད་པའོ༔ རྟགས་ཀྱི་བདུད་རྩི་མྱོང་གྲོལ་ནི་སྐྱེ་བ་བདུན་པའི་བཅུད་དོ༔ མཚན་མའི་བདུད་རྩི་མྱོང་གྲོལ་ནི་ཚུལ་བཞིན་ཏུ་བསྒྲུབས་པའི་རིལ་བུའོ༔ འདི་ནི་ངན་སོང་དང་འཁོར་བ་ཐམས་ཅད་དོང་ནས་སྤྲུགས་པའི་ཐབས་ཆེན་པོ་འཕགས་པའི་ཐུགས་རྗེ་ལས་རང་བྱུང་བའོ༔ འགྲོ་བའི་རེ་འདོད་ཚུལ་བཞིན་ཏུ་སྐོང་བའི་ཡིད་བཞིན་གྱི་ནོར་བུའོ༔ འདི་ཉིད་སེམས་ཅན་གང་དང་གང་གིས་མཐོང་ངམ༔ ཐོས་སམ༔ རེག་གམ༔ མགུལ་དུ་འཆང་བའམ༔ དྲི་ཚོར་བའམ༔ ཁར་མྱོང་བ་སོགས་འབྲེལ་ཚད་ཐམས་ཅད་ཀྱི་ཚེ་རབས་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་དུང་དཀར་གྱི་རྡུལ་ཕྱིས་པ་བཞིན་དག་པར་འགྱུར་རོ༔ འཁོར་བ་དང་ངན་སོང་དུ་སྐྱེ་བའི་ལས་ཀྱི་སྒོ་ཆོད་པར་འགྱུར་རོ༔ མཐོ་རིས་དང་ཐར་པའི་ས་བོན་ཐེབ་པར་འགྱུར་རོ༔ གཞན་ཡང་ནད་དང་༔ གདོན་དང་༔ ཡིད་མི་བདེ་བ་ཐམས་ཅད་ཞི་ཞིང་༔ ཚེ་དང་བསོད་ནམས་ཡེ་ཤེས་ཐམས་ཅད་རྒྱས་པར་འགྱུར་རོ༔ བགེགས་དང་བར་དུ་གཅོད་པས་མི་ཚུགས་པའི་སྲུང་བ་ཆེན་པོར་འགྱུར་རོ༔ མདོར་ན་གཞན་མང་དུ་སྨོས་ཅི་དགོས་ཏེ༔ རིལ་བུ་གང་གི་ལྟོར་སོང་བའི་སེམས་ཅན་དེ་འཕགས་པའི་གདུང་འཛིན་པས་སྤྱན་རས་གཟིགས་དབང་ཕྱུག་དང་སྐལ་པ་མཉམ་པར་ཤེས་པར་བྱའོ། །ཞེས་གསུངས་པས་མཚོན་ནོ། ། ༈ ཐུགས་ཀྱི་ཡོན་ཏན་གྱི་གནས་མཆོག་ལྷོ་ཟླའི་ཀརྨའི་འབུམ་རྫོང་ནས་སྤྱན་དྲངས་པའི་ཨོ་རྒྱན་རིན་པོ་ཆེའི་ཕྱག་དྲིལ་ཐུགས་རྗེ་ཆེན་པོའི་མྱོང་གྲོལ་གྱི་རིལ་བུ་བྱིན་རླབས་ཀྱི་ཐིག་ལེ་འཁོར་བ་དོང་སྤྲུགས་ནི། གཏེར་ཁ་འདིའི་ཐུགས་རྗེ་ཆེན་པོ་འཁོར་བ་དོང་སྤྲུགས་ཀྱི་རིལ་བུའི་ལོ་རྒྱུས་ལས། འཁོར་བ་དོང་སྤྲུགས་རིལ་བུ་འདི༔ བདག་དང་རྗེ་འབངས་སྟོང་ཕྲག་གིས༔ བསྒྲུབ་ཚེ་ཐུགས་རྗེའི་ལྷ་ཚོགས་རྣམས༔ དངོས་སུ་ཐིམ་པས་སུས་མྱོང་བ༔ ཐུགས་རྗེ་ཆེན་པོར་གཉིས་སུ་མེད༔ གཞན་ཡང་འདི་ལས་ཆེས་ཆེར་སྤེལ༔ རིལ་བུ་རེ་ལ་ཁྲི་རེ་བསྒྲུབ༔ ཡིག་དྲུག་ཁྲི་ཕྲག་རེ་བཟླས་ནས༔ རིལ་བུ་སུ་དང་སུས་མྱོང་བ༔ ངན་སོང་མེད་པར་ཐེ་ཚོམ་མེད༔ ཅེས་བསྔགས་པ་ཉིད་ཁ་ཆེའི་གྲུངས་ཆུར་སྦྱར་བ། འགྲོ་དོན་ཆོས་དྲུག་གི་མྱོང་གྲོལ་རིལ་སྒྲུབ་ལས་འབྱུང་བ་ལྟར་ནས་དཀར་གཙང་མའི་ཟན་དང་སྦྱར་ཞིང་ཨོ་རྒྱན་རྗེ་འབངས་ཉེར་ལྔའི་ཆོས་སྨན་དང་། བདེ་བར་གཤེགས་པ་ཐམས་ཅད་ཀྱི་གདུང་གི་རིལ་བུ་དང་བཅས་ཏེ་ཡུངས་ཀར་སྦོམ་པོའི་ཚད་ཙམ་དུ་དྲིལ་བ་ལ་མཚལ་གྱི་ན་བཟའ་གསོལ། རང་གཞུང་གི་མན་ངག་དང་། སྐྱེ་བདུན་སྒྲུབ་ཆེན་གྱི་སྒོ་ནས་ལེགས་པར་བསྒྲུབས་ཏེ། གཏེར་རྙིང་ཕལ་མོ་ཆེར། རིལ་བུ་སུ་ཡི་ལྟོར་སོང་བ༔ ཚེ་རབས་གང་དང་གང་སྐྱེས་ཀྱང་༔ སྤྱན་རས་གཟིགས་དང་འབྲལ་མི་སྲིད༔ སྐྱེ་བ་དྲན་ཅིང་ཐོས་པ་འཛིན༔ ཡོན་ཏན་བསྔགས་པ་ཚད་ལས་འདས༔ ཞེས་དང་། བྱང་གཏེར་འགྲོ་དོན་ལས་སྦྱོར་ལྔ་པ་ལས། རྫས་དེ་སེམས་ཅན་ཐམས་ཅད་ཀྱི༔ ལུས་ལ་རེག་གམ་ལྟོ་རུ་བཏང་༔ ཐམས་ཅད་ལས་ངན་མཐའ་བྱང་ནས༔ རིམ་གྱིས་འཕགས་པའི་ཞིང་དུ་སྐྱེ༔ གང་ཞིག་འཆི་ཁའི་སེམས་ཅན་གྱིས༔ རྫས་དེ་ལྟོར་བཏང་སྡིག་སྒྲིབ་དག༔ བར་དོའི་དུཿཁ་འཕགས་པས་སྐྱོབ༔ རྫས་དེ་ཚོང་འདུས་སྲང་མདོ་དང་༔ དུར་ཁྲོད་གནས་དང་རི་མཐོའི་གནས༔ གང་དུ་བཞག་པ་དགེ་བའི་གནས༔ དེ་ལ་རེག་གམ་དྲི་ཚོར་བའི༔ སེམས་ཅན་ཐམས་ཅད་མཐོ་རིས་འགྲོ༔ འདི་ཡི་ཡོན་ཏན་བརྗོད་མི་ལོང་༔ ཞེས་སོགས་དང་མཐུན་པར་གཞུང་འདི་ཉིད་ལས་ཀྱང་རྡོ་རྗེའི་སྨོན་ལམ་དུ་མཛད་པ་བཞིན་ནོ། ། ༈ གནས་ཆེན་ནམ་མཁའ་མཛོད་ནས་དྲངས་པའི་འཕགས་པ་ཐུགས་རྗེ་ཆེན་པོས་བྱིན་གྱིས་བརླབས་པའི་རི་བོ་ཏཱ་ལའི་ས་རྡོ་མྱོང་གྲོལ་གྱི་རིལ་བུ་དམ་རྫས་སྡུག་བསྔལ་ཞི་བྱེད་ཉོན་མོང་རང་གྲོལ་ནི། གཏེར་གཞུང་ཡིད་བཞིན་འཁོར་ལོའི་མན་ངག་ལས༔ བདག་འདྲ་པདྨ་འབྱུང་གནས་ཀྱིས༔ མ་འོངས་བོད་ལ་ཕན་པའི་ཕྱིར༔ པོ་ཏཱ་ལ་ཡི་གནས་སུ་ཕྱིན༔ འཕགས་པ་ཐུགས་རྗེ་ཆེན་པོ་ལ༔ ཞི་མཐུན་ཚེ་ནོར་ཆོས་རྣམས་ནི༔ སྒྲུབ་ཐབས་ཞུས་པས་གདམས་པ་དང་༔ པོ་ཏཱ་ལ་ཡི་ས་རྡོ་ལ༔ ཐུགས་རྗེས་བྱིན་བརླབས་བདག་ལ་གནང་༔ མཆིམས་ཕུར་བསྒྲུབས་ཏེ་བོད་ཁམས་སུ༔ དམ་རྫས་སྡུག་བསྔལ་ཞི་བྱེད་འགྱེད༔ བོད་ཁམས་བདེ་ཞིང་སྐྱིད་པ་བྱུང་༔ རྒྱལ་ཁམས་མ་ཎིར་བདག་གིས་བསྐུལ༔ ཕྱི་རབས་རྗེས་འཇུག་དེ་བཞིན་མཛོད༔ གདམས་པ་དམ་རྫས་འདི་ལྟ་བུ༔ གཏེར་ཁ་གཅིག་ལས་སྦས་པ་མེད༔ ལྷ་སྲས་སྐྱེ་བར་འཕྲོད་པར་ཤོག༔ ཅེས་གསུངས་པ་ལྟར་ངོ་མཚར་བྱིན་རླབས་ཀྱི་ཕུང་པོར་ཡོངས་སུ་གྲུབ་པའི་མྱོང་གྲོལ་ཉིད་གུར་གུམ་གྱི་ཕྱེ་མ་དང་ལྷན་ཅིག་ཏུ་ཞིབ་བཏགས་ཆུ་གཙང་ལ་སྦྱངས་པར། དེའི་ཐུམ་ཤུན་ཅོང་ཞི་དང་ལྷན་དུ་འདུར་བ་བཏབ། གནས་ཆེན་པདྨ་ཤེལ་ཕུག་སོགས་ལས་བྱུང་བའི་ས་ཞག་དཀར་དམར། ཅོང་ཞི། ཅུ་གང་། སིནྡྷཱུ་ར། ཕྲན་བུ་བཅས་ཞིབ་འདུར་ཙནྡན་དམར་པོའི་ཁུ་གར་གྱིས་སྤྲུས་པའི་ཟན་དང་སྦྱར་ཏེ་རིལ་བུ་སྲན་ཆུང་ཙམ་དུ་དྲིལ། ཐུགས་རྗེ་ཆེན་པོ་ཡིད་བཞིན་འཁོར་ལོ་རྩ་བའི་བུམ་སྒྲུབ་དང་། ཡན་ལག་ཆོས་འཕེལ་པ། ཕན་ཚུན་མཐུན་པ། ནོར་དང་ལོངས་སྤྱོད་རྒྱས་པ། ཚེ་སྤེལ་བར་བྱེད་པའི་བུམ་པ་སྒྲུབ་པའི་མན་ངག་རྣམས་ཀྱིས་ལེགས་པར་བསྒྲུབས་པ་སྟེ། མྱོང་གྲོལ་གྱི་ཕན་ཡོན་སྤྱི་དང་། ཁྱད་པར་ནད་གདོན་སྡིག་སྒྲིབ་ཐམས་ཅད་ཞི་ཞིང་ཕན་ཚུན་མཐུན་ཅིང་སྐྱིད་པ་དང་། ཚེ་ཆོས་ལོངས་སྤྱོད་ཐམས་ཅད་འཕེལ་བ་དང་། བུམ་གཏེར་གྱི་སྙིང་པོར་སྦས་ན་ཡུལ་ཕྱོགས་དེ་ཐམས་ཅད་ལ་གོང་གི་ཕན་ཡོན་འབྱུང་བ་སོགས་བསམ་གྱིས་མི་ཁྱབ་པས། ལས་སྦྱོར་གྱི་མན་ངག་ཞིབ་ཏུ་ཤེས་པར་འདོད་ན་གཏེར་གཞུང་རྩ་བ་མན་ངག་ཕྱག་བཞེས་ཀྱིས་བརྒྱན་ཏེ་རྟོགས་པར་བྱའོ། ། ༈ གོ་སྟོད་འོད་འབར་བྲག་ནས་སྤྱན་དྲངས་པའི་སིདྡྷི་རིལ་བུ་དམ་རྫས་མྱོང་གྲོལ་ཕྲིན་ལས་རོལ་པའི་ལོ་རྒྱུས་བཞུགས་སོ།། །།ཨོཾ་སྭ་སྟི། །སྤྲུལ་པའི་གཏེར་སྟོན་རིན་པོ་ཆེ་ཨོ་རྒྱན་མཆོག་གྱུར་བདེ་ཆེན་གླིང་པས་གོ་སྟོད་འོད་འབར་བྲག་ནས་སྤྱན་དྲངས་པའི་སིདྡྷི་རིལ་བུར་གྲགས་པ་དམ་རྫས་མྱོང་གྲོལ་ཕྲིན་ལས་རོལ་པའི་ལོ་རྒྱུས་ནི། ཨོ་རྒྱན་རིན་པོ་ཆེའི་གསུང་བཞིན་ཡེ་ཤེས་མཁའ་འགྲོ་མཚོ་རྒྱལ་གྱིས་ཟིན་བྲིས་སུ་མཛད་པའི་དཀར་ཆག་ལས། པདྨ་བཛྲ་རྩལ་ལ་ཕྱག་འཚལ་ལོ༔ བླ་མའི་ཐུགས་སྒྲུབ་ཟབ་མོ་བསམ་ཡས་ཀྱི༔ སྙིང་པོ་སྐུ་གསུམ་སྤྱི་དང་བྱེ་བྲག་སྟེ༔ དེ་དག་ཀུན་གྱི་ཕྲིན་ལས་སྦྱོར་བའི་ཆེད༔ དམ་རྫས་མྱོང་གྲོལ་སྒྲུབ་པའི་ཕབས་འདི་ནི༔ བོད་ཡུལ་གླིང་དགུའི་ས་ཡི་ལྟེ་བ་མཆོག༔ སྤྲུལ་པའི་ཞིང་ཁམས་བྲག་དམར་བསམ་ཡས་ཀྱི༔ དབེན་གནས་མཆིམས་ཕུ་དབང་ཆེན་ཕོ་བྲང་དུ༔ བཀའ་འདུས་རྒྱ་མཚོ་སྒྲུབ་པའི་ཚོགས་གྲལ་ནས༔ དཀྱིལ་འཁོར་གཙོ་མཆོག་ཁྱབ་བདག་བདེ་བ་ཆེ༔ གུ་རུ་པདྨའི་སྐུ་ཡི་བཀོད་པ་ནི༔ བསམ་གྱིས་མི་ཁྱབ་འཁོར་འདས་ཀུན་ཏུ་འཕྲོས༔ འདས་དང་ད་ལྟར་བཞུགས་པའི་རྫོགས་སངས་རྒྱས༔ བྱང་སེམས་ཁྱུ་མཆོག་ཀུན་གྱི་ཡེ་ཤེས་རྣམས༔ འོད་ཀྱི་གོང་བུ་བྱེ་བ་མཐའ་ཡས་སུ༔ སྤྱན་དྲངས་རིན་ཆེན་བུམ་པའི་ནང་དུ་ཞུགས༔ དེ་བཞིན་འཇིག་རྟེན་སྣོད་བཅུད་བདུད་རྩིའི་ཚོགས༔ གཅིག་ཏུ་བསྡུས་ནས་སྔར་བཞིན་ཐིམ་པ་ལས༔ སློབ་དཔོན་ཆེན་པོའི་ཏིང་འཛིན་ཆོ་འཕྲུལ་གྱིས༔ དེ་ཉིད་དམ་རྫས་དངོས་པོའི་གཟུགས་སུ་སྤྲུལ༔ མ་འོངས་དད་ལྡན་མཐོང་ཐོས་དྲན་རེག་ཀུན༔ སྐྱེ་བ་བདུན་ནས་འབད་མེད་གྲོལ་བའི་ཕྱིར༔ ཕྲིན་ལས་རྟེན་མཆོག་སྙིང་པོའི་བཙས་སུ་བཞག༔ ཕྱི་མའི་དུས་སུ་ལས་ཅན་སྐྱེས་བུས་རྙེད༔ དེ་ཚེ་འགྲོ་འདུལ་ཆོས་ཀྱི་བདག་པོ་ཡིས༔ དམ་རྫས་སེལ་མེད་རྣམས་དང་ལྷན་ཅིག་གམ༔ འདི་ཉིད་ཁོ་ན་རིན་ཆེན་སྙིང་པོ་བཞིན༔ ཁམས་སའམ་ནི་འབྲུ་དཀར་ཕྱེ་མ་དང་༔ ལེགས་པར་སྦྱར་ཏེ་དམ་རྫས་རིལ་བུའི་ཚད༔ ཡུངས་ཀར་ལྔ་བསྒྲིལ་ཙམ་དུ་བྱས་ནས་སུ༔ ཕབས་ཀྱི་རིལ་བུ་རེ་རེར་འབུམ་དུ་སྤེལ༔ ཚུལ་བཞིན་བསྒྲུབས་པའི་རིལ་བུ་སུས་སྤྱོད་པ༔ ཚེ་འདིར་ནད་དང་སྡུག་བསྔལ་བར་ཆད་ཞི༔ ལེགས་དགུའི་བསམ་པ་ཐམས་ཅད་འབད་མེད་འགྲུབ༔ ཕྱི་མ་ངན་སོང་གསུམ་གྱི་སྐྱེ་སྒོ་གཅོད༔ མཐོ་རིས་མི་ལུས་ཆོས་ལྡན་ངེས་པར་ཐོབ༔ རྡོ་རྗེ་གསང་མཆོག་ཉེ་ལམ་ལ་བརྟེན་ནས༔ སྐྱེ་བ་བདུན་ནས་འབད་པ་མེད་པར་གྲོལ༔ རིལ་བུ་འགྱེད་ལ་གུ་རུའི་སྙིང་པོ་མཆོག༔ གསུང་རབ་ཡན་ལག་བཅུ་གཉིས་འདུས་པའི་བཅུད༔ ༔བླ་མའི་གསང་སྔགས་ཡི་གེ་བཅུ་གཉིས་པ༔ ཀུན་ལ་བསྐུལ་ཞིང་མཐོང་ཐོས་དྲན་རེག་ཀུན༔ བྱང་ཆུབ་སྙིང་པོར་འགོད་པའི་སྨོན་ལམ་གདབ༔ དེ་ཚེ་རྔ་ཡབ་དཔལ་གྱི་རི་བོ་ནས༔ ཨོ་རྒྱན་ཡེ་ཤེས་སེམས་དཔའ་མངོན་སུམ་བྱོན༔ དད་ལྡན་སྐྱེས་བུའི་སྙིང་ལ་ཞུགས་ནས་ཀྱང་༔ བྱང་ཆུབ་བར་དུ་མི་འབྲལ་བྱིན་གྱི་རླབས༔ བོད་ཡུལ་འཕྲལ་ཡུན་བདེ་ཐབས་དེ་ལས་མེད༔ གུ་རུའི་ཞལ་ཆེམས་ཡིན་ནོ་ཕྱི་རབས་རྣམས༔ ཁོ་མོ་མཚོ་རྒྱལ་བོད་ལ་སེམས་བརྩེ་སྟེ༔ གདམས་པའི་ཡང་སྙིང་བླ་མའི་སྒྲུབ་ཁོག་དང་༔ དམ་རྫས་ཡང་སྙིང་ཕྲིན་ལས་རོལ་པ་གཉིས༔ མ་འོངས་དོན་དུ་ཟབ་མོའི་གཏེར་དུ་སྦས༔ གལ་ཆེན་དོན་ལ་མོས་པའི་སེམས་ཀྱིས་སྤྱོད༔ ཡལ་བར་མ་དོར་ཕྱི་རབས་སྐྱེས་བུ་རྣམས༔ ཐ་ཚིག་སྙིང་ལ་ཕུར་ཞིག་ས་མ་ཡ༔ རྒྱ་རྒྱ༔ ཞེས་གསུངས་པ་ལྟར། བྱིན་བརླབས་ཀྱི་གཟི་བྱིན་མཆོག་ཏུ་འབར་བའི་རིལ་བུ་འདི་ཉིད་རྡོ་རྗེའི་ལུང་གིས་རྒྱ་ཆེར་སྤེལ་བར་བསྔགས་པའི་རྗེས་སུ་འབྲངས་ཏེ། བཀའ་བརྒྱད་བདེ་གཤེགས་འདུས་པའི་དཔལ་དགུའི་རྟེན་ཐོད་ནས་བྱུང་བའི་འབྲུ་དཀར་གྱི་ཕྱེ་གཙང་མ་དང་། ཙནྡན་དཀར་པོ་དྲི་ཐོན། སྤྲུལ་པའི་གཏེར་ཆེན་རིན་པོ་ཆེ་ནས་ཐུགས་སྒྲུབས་དང་། བཀའ་བརྒྱད་ཀྱི་ཚོམ་བུ་ཚོགས་སྒྲུབ་གནང་བའི་བུམ་ཆུ། བདག་ཅག་གིས་འོག་མིན་ཚོགས་ཆེན་འདུས་པ་ཐེག་དགུ་ཡོངས་རྫོགས་ཀྱི་དཀྱིལ་འཁོར་དུ་བསྒྲུབས་པའི་བུམ་ཆུ་ཁ་ཆེའི་ཁུ་གར་དང་བཅས་ཀྱིས་རིལ་བུར་དྲིལ་ནས། དོན་གྲུབ་ཅེས་པ་ས་མོ་ལུག་གི་ལོའི་དབོ་ཟླ་བའི་དཀར་ཕྱོགས་ཀྱི་ཚེས་བཅུ་ནས་བརྩམས། དཔལ་སྡེ་དགེ་ལྷུན་གྲུབ་སྟེང་གི་སྒྲུབ་ཁང་བླ་བྲང་ཕན་བདེ་ཀུན་ཁྱབ་གླིང་དུ་སྐྱབས་མགོན་རྡོ་རྗེ་འཛིན་པ་ཆེན་པོ་འཇམ་དབྱངས་ནམ་མཁའ་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱིས་གཙོ་མཛད། བདག་ཅག་འདུས་པ་རྣམས་ཀྱིས་བླ་མའི་ཐུགས་སྒྲུབ་བར་ཆད་ཀུན་སེལ་དང་། ཐུགས་སྒྲུབ་ཡིད་བཞིན་ནོར་བུ་བསམ་པ་ལྷུན་གྲུབ་མ་ཟུང་དུ་འབྲེལ་བའི་གཞུང་ལ་གོང་གི་དམ་རྫས་ཉིད་དང་ལྷན་གཅིག་ཏུ་སྤྱན་དྲངས་པའི། འགྲོ་བའི་དོན་ཏུ་དམ་རྫས་མྱོང་གྲོལ་གྱི་སྒྲུབ་པ་བླ་མའི་བསྙེན་སྒྲུབ་ལས་གསུམ་དང་འབྲེལ་བའི་གདམས་པ་ཞེས་སྒྲུབ་ཆེན་གྱི་ཁོག་འབུབས་པའི་ཆོ་ག་ཁྱད་པར་ཅན་སྦྱར་ཏེ། བསྙེན་སྒྲུབ་ཡན་ལག་བཞི་ལྡན་གྱི་སྒོ་ནས་བསྒྲུབས་པ་འདིས་ཀྱང་མཐོང་ཐོས་དྲན་རེག་གི་འགྲོ་ཀུན་འཁོར་བ་དང་ངན་སོང་གི་འཇིགས་པ་དང་སྡུག་བསྔལ་ཐམས་ཅད་ལས་གྲོལ་ཞིང་། མཆོག་དང་ཐུན་མོང་གི་དངོས་གྲུབ་རབ་འབྱམས་ཡིད་བཞིན་ཏུ་འགྲུབ་པ་དང་། ཨོ་རྒྱན་རྡོ་རྗེ་འཆང་ཆེན་པོའི་གོ་འཕང་ལ་མྱུར་དུ་རེག་པའི་རྒྱུར་སིདྡྷི་རསྟུ། །ཞེས་པའང་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་སོ། ། ༈ སེང་ཆེན་གནམ་བྲག་ནས་སྤྱན་དྲངས་པའི་སློབ་དཔོན་ཆེན་པོ་སངས་རྒྱས་གསང་བས་རྡོ་རྗེར་སེམས་དཔའ་སྒྱུ་འཕྲུལ་དྲྭ་བ་ཆེན་པོ་ཕྱག་རྒྱ་གཅིག་པ་དང་། ཕྱག་རྒྱ་སྤྲོས་བཅས་ཀྱི་དཀྱིལ་འཁོར་དུ་བསྒྲུབས་པའི་རྡོ་རྗེ་སེམས་དཔའི་རིལ་བུ་བདེ་བ་ཆེན་པོའི་ཐིག་ལེ་ཉམས་ཆག་དོང་སྤྲུགས་ནི། སྦས་གནས་ཆེན་པོ་རྣམས་ནས་བྱུང་བའི་ཅུ་གང་གཞི་བྱས། གངས་ཏིག །ཅོང་ཞི། སིནྟུ་ར། ཡུངས་ཀར་བཅས་ཅུང་ཟད་རེ་སྦྱར་བ་ཞིབ་བཏགས་ཆུ་གཙང་གིས་སྦྲུས་པའི་ཟན་ལ། ཕབས་གཏའ་ཆུ་གཙང་དུ་སྦྱངས་པ་བླུགས་ཏེ་རིལ་བུ་སྲན་མ་ཙམ་དུ་བསྒྲིལ་བར་རྒྱ་དཀར་གྱི་དྭང་མས་ན་བཟའ་གསོལ། དཔལ་རྡོ་རྗེ་སེམས་དཔའ་ཐུགས་ཀྱི་སྒྲུབ་པའི་གྲོལ་ལམ་གསུམ་གྱི་མན་ངག་དང་། དགའ་རབ་སྙིང་ཏིག་གི་རིལ་སྒྲུབ་ཀྱི་སྒོ་ནས་སྔ་ཕྱིར་ཚད་ལྡན་ཏུ་བསྒྲུབས་པ་སྟེ། འདིའི་ཕན་ཡོན་ཀྱང་། གྲོལ་ལམ་གྱི་མན་ངག་ལས། དེ་ལྟ་བུ་ཡི་དམ་རྫས་དེ། གང་གིས་ཟོས་པས་ཉམ་ཆགས་སྦྱོང་༔ དམ་ཚིག་དངོས་གྲུབ་ཀུན་ཐོབ་ནས༔ འཕོ་མེད་བདེ་ཆེན་གྲུབ་པར་འགྱུར༔ ཞེས་དང་༔ དགའ་རབ་རྡོ་རྗེའི་སྙིང་ཏིག་ལས། བདེ་ཆེན་རྡོ་རྗེ་སེམས་དཔའ་ཡི༔ རྫས་མཆོག་མྱོང་བས་གྲོལ་བ་འདི། མཐོང་ཐོས་དྲན་རེག་ཚོར་བ་ཀུན༔ སྐྱེ་བ་བདུན་ནས་འབད་མེད་གྲོལ༔ གནས་སྐབས་བགེགས་ཞི་ཉམ་ཆག་སྐོང་༔ ཚེ་དང་ལུས་ཀྱི་བཅུད་ལེན་འགྱུར༔ ཞེས་སོགས་རྒྱ་ཆེར་བསྔགས་པའི་ཕྱིར་དམ་རྫས་ཀུན་གྱི་སྙིང་པོ་ངོ་མཚར་ཅན་ནོ། ། ༈ འཛི་སྨད་མཁའ་འགྲོ་ཤེལ་ཕུག་གི་གཏེར་བྱོན་མཁན་ཆེན་བོ་དྷི་སཏྭའི་སྐུ་ཆོས་རིལ་བུ་དམ་རྫས་མྱོང་གྲོལ་ཆེན་མོ་ནི། གུ་རུ་ཆོས་ཀྱི་དབང་ཕྱུག་གི་གཏེར་བྱོན་ལུང་བྱང་བདེ་གཤེགས་འདུས་པའི་ཕྱི་མ་ལས། གསང་བའི་བདག་པོ་ཀུན་དགའ་བོ༔ ཟ་ཧོར་ཡུལ་དུ་སྐུ་འཁྲུངས་པ༔ བློ་ལྡན་སྙིང་སྟོབས་ཆེན་པོ་ནི༔ བྷོ་དྷི་སཏྭ་ཞེས་བྱ་བ༔ མཐོང་བས་དོན་ཡོད་སེམས་དཔའ་སྟེ༔ མིང་ཙམ་གྱིས་ཀྱང་དོན་ཆེན་བྱེད༔ ཞེས་སོགས་གསུངས་པ་ལྟར་དཔལ་གསང་བའི་བདག་པོའི་ཡེ་ཤེས་ཀྱི་སྐུ་ངུར་སྨྲིག་འཛིན་པའི་ཚུལ་དུ་བསྟན་པ་དགེ་སློང་བྱང་ཆུབ་སེམས་དཔའ་ཆེན་པོ་གངས་རིའི་ཁྲོད་ཀྱི་ཐུབ་དབང་གཉིས་པར་གྱུར་ཅིང་། འབྲེལ་ཚད་དོན་ལྡན་དུ་བསྔགས་པ་མཐའ་ཡས་པས་ན། དེའི་སྐུ་ཆོས་ཀྱི་ཟེག་མ་ཅོང་ཞི་དང་ལྷན་ཅིག་ཞིབ་བཏགས་ཁ་ཆེའི་དྭངས་ཆུར་སྦྱར། འབྲུ་དཀར་གྱི་ཕྱེ་མ། གུར་གུམ་མདོག་འགྱུར། ཙན་དཀར་དྲི་ཐོན་བཅས་ཀྱི་ཟན་ལ་སྦྱར་ནས་རིལ་བུ་ཉུངས་ཀར་སྦོམ་པོའི་ཚད་དུ་དྲིལ། མྱོང་གྲོལ་རིལ་བུའི་བསྒྲུབ་པས་བྱིན་གྱིས་བརླབས་པ་སྟེ། གང་གིས་མྱོང་བ་དང་མགུལ་དུ་འཆང་བ་སོགས་བྱང་ཆུབ་སེམས་པའི་ཐུགས་བསྐྱེད་དང་སྨོན་ལམ་བླ་ན་མེད་པས་ཕྱི་ནང་གི་མི་མཐུན་པའི་ཕྱོགས་ཐམས་ཅད་ཞི་བ་དང་། ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ཀྱི་ཕུང་པོ་རྣམ་པར་དག་པས་ཐར་པའི་མྱུ་གུ་གོང་ནས་གོང་དུ་འཕེལ་བར་འགྱུར་ཉིད་དོ། ། ༈ ཀརྨའི་འབུམ་རྫོང་གནས་རྙིང་གི་གསང་ཕུག་སློབ་དཔོན་རིན་པོ་ཆེ་ནས་སྒྲུབ་ཆེན་མཛད་པའི་སྟེགས་བུ་ནས་སྤྱན་དྲངས་པའི་བྲམ་ཟེའི་སློབ་དཔོན་ཆེན་པོ་པྲ་བྷ་ཧ་སྟིའི་སྐུ་གདུང་རིལ་བུ་སྐྱེ་བདུན་མྱོང་གྲོལ་འགྲོ་འདུལ་ཆེན་མོ་ནི། གངས་ཏིག་དང་། གནས་ཆེན་རྣམས་ཀྱི་ས་ཞག་ཁམ་པ་ལ་གཞི་བྱས། རྟག་ཏུ་རིགས་གསུམ་དང་བཅས་ཞིབ་བཏགས་ཆུ་གཙང་གིས་སྦྲུས་པར། སྐུ་གདུང་གུར་གུམ་དང་ལྷན་ཅིག་ཞིབ་བཏགས་ཁ་ཆེའི་ཆུར་སྦྱངས་པ་བླུགས་ནས་རིལ་བུ་སྲན་ཆུང་ཙམ་དུ་དྲིལ། སྐྱེ་བདུན་སྒྲུབ་ཆེན་གྱི་སྒོ་ནས་ལེགས་པར་བསྒྲུབ་པ་སྟེ། ཕན་ཡོན་ཀྱང་། ཨོ་རྒྱན་ཆེན་པོས། གང་ཞིག་མནར་མེད་མྱོང་འགྱུར་ཀྱང་༔ ཁྱད་འཕགས་རྫས་འདི་ཤིག་སྙིང་ཙམ༔ ལྟོར་སོང་རྒྱལ་བའི་གོ་འཕང་ཐོབ༔ རླུང་ཕྱོགས་དྲི་ཙམ་ཚོར་བས་ཀྱང་༔ ཆོས་ལྡན་མི་ལུས་ངེས་པར་ཐོབ༔ ཞེས་གཏེར་ཁ་ཐམས་ཅད་ལས་དོན་མཚུངས་པར་གསུངས་པས་མཚོན་ཏེ་ཤེས་པར་བྱའོ། ། ༈ སློབ་དཔོན་པྲ་བྷ་ཧ་སྟིའི་གསང་ཆེན་གསེར་དུ་གྱུར་པ་རྣམ་སྣང་རིལ་བུ་བཅུད་ཀྱི་སྙིང་པོ་ནི། གནས་ཆེན་ནས་བྱུང་བའི་ས་ཞག་དཀར་པོ་དང་། སེར་པོ་དག་ལ་གཞི་བྱས། གླ་རྩི། ཛྭ་ཏི། ཨ་ག་རུ་དཀར་ནག །སྤང་སྤོས་བཅས་ཞིབ་བཏགས་ཆུ་གཙང་གིས་སྦྲུས་པར། ཕབས་གཏའ་ཁ་ཆེའི་ཆུར་སྦྱངས་པ་བླུགས། རིལ་བུ་ཉུངས་ཀར་སྦོམ་པོའི་ཚད་དུ་དྲིལ་ནས་བདུད་རྩི་ཁྲོལ་སྒྲུབ་སོགས་ཀྱི་སྐབས་སུ་དཔལ་རྟག་པའི་རྡོ་རྗེ་རྣམ་རང་སྣང་མཛད་ཀྱི་ངོ་བོར་བྱིན་གྱིས་བརླབས་པ་སྟེ། ཕན་ཡོན་མྱོང་གྲོལ་གྱི་སྐབས་སུ་བཤད་པ་སྤྱི་དང་། བྱེ་བྲག་ཏུ་འདི་ཉིད་ཁོ་ནའམ། བདུད་རྩི་མར་ཁུ་སོགས་དང་སྦྱར་ཏེ་བསྟེན་པའི་ཕན་ཡོན་ཡོན་ཏན་བདུད་རྩིའི་རྒྱུད་ལས། ཚེ་དང་བསོད་ནམས་འཕེལ་བ་དང་། འབྱུང་བ་སྙོམས་ནས་ལུས་བདེ་སྟེར། བགེགས་ཀྱིས་མི་ཚུགས་རིམས་མི་འོང་། འགྲོ་བ་རྣམས་ཀྱི་མགོན་ཏུ་འགྱུར། ཀུན་ལ་ཕན་ཐོགས་ནོར་བུ་དང་། གནོད་པས་མི་ཚུགས་ནམ་མཁའ་འདྲ། ཞེས་གནས་སྐབས་དང་། དྲི་ཆེན་རྡོ་རྗེ་རྣམ་སྣང་མཛད། །ཉོན་མོངས་གཏི་མུག་སྦྱོང་བ་སྟེ། །ཆོས་ཀྱི་དབྱིངས་ཀྱི་ཡེ་ཤེས་ཐོབ། །ཞེས་མཐར་ཐུག་གི་ཡོན་ཏན་དང་། གཞན་ཡང་ཀླུ་གདོན་འཇོམས་ཤིང་། མཛེ་ནད་དང་དུག་ནད་ཐུབ་པ། ཚེ་དང་ལུས་ཀྱི་བཅུད་ལེན་དུ་འགྱུར་པ་སོགས་མཐའ་ཡས་པར་གསུངས་སོ། ། ༈ སློབ་དཔོན་པྲ་བྷ་ཧ་སྟིའི་གསང་ཆབ་གསེར་དུ་གྱུར་པའི་མི་བསྐྱོད་རིལ་བུ་བདུད་རྩིའི་སྙིང་པོ་ནི། ས་ཞག་གསེར་མདངས་ཅན་ལ་གཞི་བྱས། གུར་གུམ། གླ་རྩི་དྲི་ཐོན། ཅོང་ཞི། བྲག་ཞུན། ལི་ག་དུར། ལི་ཤི། སྤོས་དཀར་རྣམས་ཞིབ་བཏགས་ཆུས་སྦྲུས་པའི་ཟན་ལ། ཕབས་གཏའ་ཁ་ཆེའི་ཆུར་སྦྱངས་པ་བླུགས་ནས་རིལ་བུ་ཉུངས་ཀར་སྦོམ་པོའི་ཚད་དུ་དྲིལ། །བདུད་རྩི་ཁྲོལ་སྒྲུབ་སོགས་ཀྱི་སྐབས་དཔལ་མི་བསྐྱོད་རྡོ་རྗེ་སེམས་དཔའི་ངོ་བོར་བྱིན་གྱིས་བརླབས་པ་སྟེ། ཕན་ཡོན་སྐུ་གདུང་མྱོང་གྲོལ་གྱི་སྐབས་སུ་བཤད་པ་སྤྱི་དང་། བྱེ་བྲག་ཏུ། རང་བྱུང་དྭང་མ་བདུད་རྩིའི་རྒྱུན། །མི་བསྐྱོད་དྲི་ཆུ་ཞེས་གྲགས་ཏེ། །རིམས་དང་ག་ལྷོག་འབྲུམ་ནད་སྲུང་། །རྙིང་པ་འབྱོངས་ཤིང་གསར་པ་ཞི། །ལྕེ་བདེ་གྲེ་འགྱུར་སྐད་སྙན་འབྱུང་། །ཞེས་སོགས་དང་། །དྲི་ཆུ་རྡོ་རྗེ་མི་བསྐྱོད་པ། །ཉོན་མོངས་ཞེ་སྡང་སྦྱོང་བ་སྟེ། །མེ་ལོང་ཡེ་ཤེས་སྐུ་འགྲུབ་བོ། །ཞེས་སོགས་རྒྱ་ཆེར་གསུངས་སོ། ། ༈ གསུང་གི་ཐུགས་ཀྱི་གནས་མཆོག་ན་བུན་རྫོང་ནས་སྤྱན་དྲངས་པའི་ཆོས་རྒྱལ་ཁྲི་སོང་ལྡེའུ་བཙན་གྱི་གདུང་རུས་རིལ་བུ་དམ་རྫས་ཟླ་ཞུན་ཆེན་མོ་ནི། །འཇམ་དཔལ་རྩ་བའི་རྒྱུད་ལས་ས་འོད་བཟང་པོ་ཞེས་ལུང་བསྟན་ཅིང་། རིག་འཛིན་རྩ་བའི་རྒྱུད་ལས། བཱ་གི་ཤྭ་རིའི་ཐུགས་རྒྱུད་ཀྱི། །རིག་པ་འཛིན་གྱིས་དེ་བཞིན་ཏེ། །བསྟན་པའི་སྙིང་པོ་རབ་ཏུ་འདྲེན། །སོགས་ནས། བྲཧྨ་ཚངས་པ་ལྷའི་མེ་ཏོག་དེ་བ་པུཥྤེ་ཡིས། །ཀུན་གྱི་ལུང་རྩལ་སྣང་བྱེད་ཅིང་། །མཐར་ཕྱིན་བྱང་ཆུབ་སོན་པར་བྱེད། །ཅེས་རྗེ་བཙུན་འཇམ་པའི་དབྱངས་ཀྱི་རྣམ་འཕྲུལ་བསྔགས་ཤིང་། བྱང་ཆུབ་ཆེན་པོར་ལུང་བསྟན་པས་ན་འབྲེལ་ཚད་དོན་དང་ལྡན་པའི་ཕྱིར། གཏེར་བྱོན་ལས་སྤེལ་པའི་རིལ་བུ་དང་། ས་སྐྱོང་སེ་ནཱ་ཤུ་བྷའི་རྟེན་ཁྲོད་དུ་བཞུགས་པའི་ཆོས་རྒྱལ་ཁྲི་སྲོང་གི་དབུ་ཐོད་ལ་རིགས་གསུམ་མགོན་པོའི་སྣང་བརྙན་རང་བྱོན་ཤིན་ཏུ་གསལ་བའི་ཆ་ཤས་བརྡར་བའི་ཕྱེ་མ་ཅོང་ཞི་དང་ལྷན་ཏུ་བཏགས་པ་བཅས་ཁ་ཆེའི་ཆུར་སྦྱངས། གངས་ཏིག་དང་། ཅུ་གང་ཞིབ་བཏགས་ཁ་ཆེའི་ཆུས་སྦྲུས་ཏེ་མདོག་ངང་སེར་དུ་གྱུར་པའི་ཟན་དང་སྦྱར་ནས་རིལ་བུ་ཉུངས་ཀར་སྦོམ་པོའི་ཚད་དུ་དྲིལ། བདུད་རྩི་བསྒྲུབ་པ་སོགས་ཀྱི་སྐབས་དཔལ་དོན་ཡོད་གྲུབ་པ་རྡོ་རྗེ་རྟའི་རྒྱལ་པོའི་ངོ་བོར་བྱིན་གྱིས་བརླབས་པ་སྟེ། ཕན་ཡོན་ནི་མྱོང་གྲོལ་གྱི་སྐབས་སུ་བཤད་པའི་ཕན་ཡོན་སྤྱི་དང་། རྒྱུད་ལས། དོན་ཡོད་གྲུབ་པ་རྒྱལ་པོ་ཆེས། །དཔལ་ལྡན་དོན་ཀུན་གྲུབ་པར་བྱེད། །དེ་ཕྱིར་རྣལ་འབྱོར་པས་བསྟེན་བྱ། །ཞེས་སོགས་རྒྱ་ཆེར་གསུངས་པ་ལྟར་རོ། ། ༈ འབུར་མོ་གནས་ནས་སྤྱན་དྲངས་པའི་མཁའ་འགྲོ་མཚོ་རྒྱལ་གྱི་གསང་ཆབ་གསེར་དུ་གྱུར་པའི་རིལ་བུ་དམ་རྫས་རིན་ཆེན་སྙིང་པོ་ནི། ས་ཞག་གསེར་མདངས་ཅན་ལ་གཞི་བྱས། དྲི་ཆུའི་སྐྱོབས་གུར་གུམ་སོགས་ཇི་སྐད་བཤད་པ་རྣམས་དང་བཅས་ཞིབ་པར་བཏགས་ཏེ་ཆུ་གཙང་གིས་སྦྲུས་པའི་ཟན་ལ། ཕབས་གཏའ་ཁ་ཆེའི་ཆུར་སྦྱངས་བ་བླུགས་ནས་རིལ་བུ་ཉུངས་ཀར་སྦོམ་པོའི་ཚད་ཙམ་དུ་དྲིལ། རྡོ་རྗེ་ཕག་མོ་ཁྲོས་མའི་དཀྱིལ་འཁོར་དུ་རཏྣ་དྷཱ་ཀི་སེར་མོ་དོན་གྲུབ་པའི་ངོ་བོར་བྱིན་གྱིས་བརླབས་པ་སྟེ། ཕན་ཡོན་ནི། ཨོ་རྒྱན་དྲི་མེད་ཀུན་དགའི་གཏེར་ལུང་ལས། གསང་བ་ཀུན་བཟང་རྡོ་རྗེ་ཕག་མོའི་དབྱིངས༔ ནང་ལྟར་འགྲོ་འདུལ་རྗེ་བཙུན་སྒྲོལ་མར་བཞེངས༔ དེ་ཉིད་ཐུགས་རྗེ་ཆེན་པོས་རྒྱུད་བསྐུལ་ནས༔ ཕྱི་ལྟར་བོད་འདིར་མི་མོ་མཚོ་རྒྱལ་མ༔ མི་བརྗེད་གཟུངས་ཐོབ་གསང་སྔགས་བཀའ་བསྡུ་མཛད༔ འབྲེལ་ཚད་དོན་ལྡན་བྱང་ཆུབ་སེམས་མ་ཆེ༔ ལས་ལུས་མ་ཡིན་དག་པ་ཡེ་ཤེས་སྐུ༔ མིང་ཙམ་ཐོས་པས་འཁོར་བ་མཐའ་ཅན་འགྱུར༔ ཞེས་སོགས་རྒྱ་ཆེར་བསྔགས་པས་ན་མྱོང་གྲོལ་ཀུན་གྱི་རྒྱལ་པོར་གྲུབ་ཅིང་། བྱེ་བྲག་གི་ཕན་ཡོན་ཀྱང་། ཉང་གཏེར་ཕག་མོའི་བདུད་རྩིའི་གཞུང་ལས། དྲི་ཆུ་རིན་ཆེན་སྤྲུལ་པའི་སྐུ༔ མཉམ་པ་ཉིད་ཀྱི་ཡེ་ཤེས་ཐོབ༔ ཞེས་དང་། དྲི་ཆུས་བདུད་དང་འབྲུམ་ནག་ཐུབ༔ ཅེས་སོགས་བསྔགས་པའི་ཡོན་ཏན་ཐམས་ཅད་ཀྱང་ཡར་ལྡན་དུ་འབྱུང་བ་ཉིད་དོ། ། ༈ དེ་ལྟར་རྣམ་སྣང་རིལ་བུ་སོགས་འདི་རྣམས་མྱོང་གྲོལ་གྱི་རིགས་སྤྱི་དང་། ཁྱད་པར་བདུད་རྩི་ཆོས་སྨན་གྱི་རྫས་ལ་མཆོག་ཏུ་བསྔགས་སོ། ། ༈ ས་སྤྱོད་གསུངས་གི་འཁོར་ལོ་འོག་མིན་ཀརྨའི་ཆོས་གྲྭར་མེ་སྦྲུལ་སྨིན་ཟླའི་ནང་། གཏེར་ཆེན་རིན་པོ་ཆེ་མཁན་སློབ་རྣམས་ཀྱིས་གཏེར་གསར་ཡང་ཕུར་སྦྲགས་མའི་སྒྲུབ་ཆེན་མཛད་སྐབས་སྒྲུབ་གཏོར་ལས་བདུད་རྩི་ཤེལ་ལྟར་དྭང་ཞིང་དྲི་རོ་ཕུན་སུམ་ཚོགས་པ་བབས་པ་ཉིད་གཏའ་སྤེལ་དུ་སྦྱར་བའི་དམ་རྫས་བདུད་རྩི་གྲུབ་པའི་ཐིག་ལེ་ལ། འབྲས་དཀར་ཞིབ་བཏགས་དར་ཚགས་སུ་དྲངས་པར་གཞི་བྱས། ཤིང་མངར་རོ་འགྱུར་བ། ཙནྡན་དཀར་པོ་དྲི་ཐོན། དེའི་སུམ་ཆ་ཙམ་ཏོང་ཀུ། གཏོར་མའི་སྤོད་སྨན་བྱིན་ལྡན་ཕྲན་བུ་བཅས་བཏག་བཙགས་བསྲེ་འདུར་བྱས་པ། ཁ་ཆེའི་ཁུ་བ་གར་མོ་དང་། ཆང་ལ་སྦྱར་བའི་སྦྲང་དཀར་གྱི་ཉིང་ཁུ་ཅུང་ཟད་ཀྱིས་སྦོལ། ཕབས་རྟ་ཁ་ཆེའི་ཆུར་སྦྱངས་པས་བྲན་ཏེ་ཆ་ཤས་རིལ་བུ་སྲན་ཆུང་ཙམ་དང་། བྱིངས་རྣམས་བདུད་རྩི་ཕུར་མའི་ཚུལ་དུ་བྱས་པ། བླ་མ་ཡིད་དམ་གྱི་སྒྲུབ་པའི་སྐབས་དམ་རྫས་གཏོར་མ་ལྟར་བྱིན་གྱིས་བརླབས། སྐྱེ་བདུན་མྱོང་གྲོལ་སོགས་ཀྱི་སྐབས་སུའང་སྒྲུབ་པའི་ཀློང་དུ་བཞུགས་སུ་གསོལ་བ་སྟེ། ཕན་ཡོན་ནི། གཏེར་གསར་མྱོང་གྲོལ་སྒྲུབ་ཁོག་ཏུ་རྒྱུད་ཀྱི་ལུང་དྲངས་པར། རྡུལ་ཚོན་བུམ་ཆུ་གཏོར་མ་སོགས༔ སྒྲུབ་པའི་རྫས་ཀྱི་ཆ་ཤས་ཙམ༔ མཐོང་ཐོས་རེག་པས་དོན་ཡོད་ཅིང་༔ མྱོང་བས་ཚེ་བསོད་ལུས་ཟུངས་འཕེལ༔ སྒྲིབ་དག་ཐར་པའི་ས་བོན་ཐེབ༔ བུམ་པའི་སྙིང་པོར་བཞུགས་པའམ༔ རྟེན་གྱི་ནང་དུ་གཞུག་ཀྱང་རུང་༔ ཡུལ་ཕྱོགས་དགེ་ཞིང་བཀྲ་ཤིས་འགྱུར༔ ཅེས་སོགས་རྒྱ་ཆེར་གསུངས་པས་མྱོང་གྲོལ་རིལ་བུ་དང་༔ བདུད་རྩི་ཕུར་མ་སོགས་ལ་བསྲེ་བ་དང་། བུམ་གཏེར་གྱི་ནང་གཞུག་སོགས་ལ་བསྔགས་སོ། ། ༈ སྐུའི་གསུང་གི་གནས་མཆོག་འོག་མིན་ཀརྨའི་དཔལ་གྱི་དེའུ་ནས་ཁྲག་འཐུང་མངོན་རྫོགས་རྒྱལ་པོའི་མན་ངག་མ་མོ་སྤྱི་བསྡུས་ཀྱི་ཟབ་ཆོས་དང་ལྷན་ཅིག་ཏུ་སྤྱན་དྲངས་པའི་སྐུ་གསུང་ཐུགས་ཀྱི་རིལ་བུ་ཁྱད་འཕགས་ཚུལ་དྲུག་དང་ལྡན་པ་ལ། གཟི་བརྗིད་བསྐྱེད་པ་སྐུའི་རིལ་བུ་དམ་རྫས་ཉི་མའི་སྙིང་པོ་ནི། དམ་རྫས་སྒྲུབ་པའི་ཡན་ལག་ལས། དཔལ་ཆེན་མངོན་རྫོགས་རྒྱལ་པོ་ཡི༔ འཆི་མེད་བདུད་རྩིའི་ལུང་བསྒྲུབ་ཚེ༔ ལས་ཀྱི་ཁ་བསྒྱུར་ཡན་ལག་ནི༔ སྐུ་གསུང་ཐུགས་ཀྱི་རིལ་བུ་བསྒྲུབ༔ གཟི་བརྗིད་སྐུ་ཡི་རིལ་བུ་ནི༔ ཨ་རུ་དབང་ལག་ཀ་ར་དང་༔ དམར་སེར་བ་ཡི་འོ་མས་བསྒྲིལ༔ ཞེས་གསུངས་པ་ལྟར། ཨ་རུ་ར་གསེར་མདོག་དང་། དབང་ལག་དུག་འདོན་བཅུད་འགུགས་སོགས་ཚད་ལྡན་དུ་བྱས་པ་ཆ་མཉམ་པའི་ཕྱེ་མ། བ་གསར་དམར་ཟལ་གྱི་འོ་མ་དང་ཤེལ་ཀ་ར་སྦྱར་བས་སྦོལ་བ་ལ་ཕབ་གཏའ་བ་འོར་སྦྱར་བ་བྲན་ཏེ། ཐོག་མར་བདུད་རྩི་ཕུར་མའི་ཚུལ་དུ་འོག་མིན་ཚོགས་ཆེན་འདུས་པའི་བདུད་རྩི་སྨན་གྱི་ཆོ་གས་བསྒྲུབས། སླར་ཡང་རིལ་བུ་སྲན་འཕོས་ཙམ་དུ་དྲིལ་ནས་སངས་རྒྱས་ཀུན་གྱི་སྐུ་རྡོ་རྗེའི་བདག་ཉིད་འཇམ་དཔལ་ཡེ་ཤེས་སེམས་དཔའི་ངོ་བོར་བྱིན་གྱིས་བརླབས་པ་སྟེ། ཕན་ཡོན་ནི། གནས་སྐབས་སུ་ལུས་ཀྱི་ནད་གདོན་ཞི། སྡིག་སྒྲིབ་དག །ཚེ་དང་སྟོབས་དང་གཟི་བརྗིད་རྒྱས། གཞན་སྣང་ཟིལ་གྱིས་གནོན། སྐྲ་དཀར་དང་གཉེར་མ་མི་འབྱུང་། མཐར་ཐུག་ལུས་ཀྱི་རྩ་མདུད་གྲོལ་ཞིང་། སྐུ་རྡོ་རྗེ་སྤྲུལ་པའི་སྐུར་འགྲུབ་པར་བྱེད་པ་སོགས་ཕན་ཡོན་མཐའ་ཡས་པས་མྱོང་གྲོལ་གྱི་རིགས་སྤྱི་དང་། བཅུད་ལེན་གྱི་རྫས་སོགས་ལ་མཆོག་ཏུ་བསྔགས་སོ། ། ༈ དཔལ་གྱི་དེའུ་ནས་སྤྱན་དྲངས་པའི་ཚངས་དབྱངས་སྐྱེད་པ་གསུང་གི་རིལ་བུ་དམ་རྫས་ཟླ་བའི་བདུད་རྩི་ནི། གཏེར་གཞུང་ལས། ཚངས་དབྱངས་གསུང་གི་རིལ་བུ་ནི༔ ཁུག་གྲེ་སྤང་རྒྱན་ཀྱི་ཀྱེ་དང་༔ ཙནྡན་དམར་པོ་ཆ་མཉམ་སྦྱར༔ ཞེས་པ་ལྟར། སྤང་རྒྱན་དཀར་པོ། ཀྱི་ཀྱེ་དཀར་པོ། ཙནྡན་དམར་པོ་རྣམས་ཆ་མཉམ་དང་། ཁུ་བྱུག་གི་གྲེ་བ་བཅས་ཞིབ་པར་བཏགས་པ་ཙནྡན་དམར་པོའི་ཁུ་བས་སྦོལ། ཕབ་གཏའ་ཙན་དམར་གྱི་ཁུ་བ་དང་སྦྱར་བས་བྲན་ཏེ་འོག་མིན་ཚོགས་ཆེན་འདུས་པའི་བསྙེན་སྒྲུབ་བཞི་ལྡན་བདུད་རྩི་བདེ་བ་ཆེན་པོའི་དཀྱིལ་འཁོར་དུ་བྱིན་གྱིས་བརླབ་ཅིང་། སླར་རིལ་བུ་སྲན་མ་ཙམ་དུ་བསྒྲིལ་ཏེ་གསུང་རྡོ་རྗེ་འཇིག་རྟེན་དབང་ཕྱུག་གི་ངོ་བོར་བསྒྲུབས་པ་སྟེ། ཕན་ཡོན་ནི། གནས་སྐབས་ངག་གི་ནད་གདོན་ཞི། སྡིག་སྒྲིབ་དག །ལྕེ་བདེ། གྲེ་བ་སྙན། དབང་པོ་གསལ་ཞིང་དྭངས། ཡིད་འཕྲོག་པ་ཚངས་པའི་དབྱངས་ལྟ་བུ་འཐོབ་ཅིང་། མཐར་ཐུག་རླུང་དབུ་མར་ཐིམ་ནས་གསུང་རྡོ་རྗེ་ལོངས་སྤྱོད་རྫོགས་པའི་སྐུ་འགྲུབ་པ་སོགས་མཐའ་ཡས་པས་ན། མྱོང་གྲོལ་བདུད་རྩིའི་རིགས་སྤྱི་དང་། ཁྱད་པར་བློ་འཕེལ་གྱི་རིལ་བུའི་རིགས་སོགས་ལ་མཆོག་ཏུ་བསྔགས་སོ། ། ༈ དཔལ་གྱི་དེའུ་ནས་སྤྱན་དྲངས་པའི་བདེ་ཆེན་སྐྱེད་པ་ཐུགས་ཀྱི་རིལ་བུ་དམ་རྫས་དགའ་བཞིའི་ཐིག་ལེ་ནི། གཏེར་གཞུང་ལས། བདེ་ཆེན་ཐུགས་ཀྱི་རིལ་བུ་ནི༔ ཤ་ཆེན་ལུག་མུར་ཅོང་ཞི་གཉིས༔ རྒྱལ་བའི་གདུང་རྟེན་རིང་བསྲེལ་བཅས༔ ཞེས་གསུངས་པ་ལྟར། སྟོན་དུས་བརྐོས་པའི་ལུག་མུར་གྱི་ཕྱེ་མ་དང་། ཅོང་ཞི་མཛོ་མོའི་འོ་མར་འདམ་བཏགས་ཆ་མཉམ། ཤ་ཆེན་ནུས་ཐོན་ཞིབ་བཏགས་བཅས་གར་ཆང་གིས་སྦོལ། དེ་ལ་ཕབས་རྟ་ཆང་གི་ཉིང་ཁུར་སྦྱངས་བ་ལ། སངས་རྒྱས་ཀྱི་འཕེལ་གདུང་དང་། དགའ་རབ་རྡོ་རྗེའི་གདུང་རྟེན་ཅོང་ཞི་དང་ལྷན་ཅིག་ཞིབ་ཏུ་བཏགས་པས་བྲན་པའི་བདུད་རྩི་ཕུར་མ་ཉིད་དཔལ་ཚོགས་ཆེན་འདུས་པའི་བདེ་ཆེན་སྦྱོར་བའི་དཀྱིལ་འཁོར་དུ་ཧེ་རུ་ཀ་བྱེ་བ་སྙེད་ཡབ་ཡུམ་གྱི་དགའ་བཞིའི་ཟིལ་དངར་དང་རོ་གཅིག་ཏུ་བྱིན་གྱིས་བརླབས། སླར་རིལ་བུ་སྲན་མ་ཙམ་དུ་དྲིལ་ནས་ཐུགས་རྡོ་རྗེ་གསང་བའི་བདག་པོའི་ཡེ་ཤེས་སུ་བསྒྲུབས་པ་སྟེ། ཕན་ཡོན་ནི། གནས་སྐབས་སུ་ཡིད་ཀྱི་ནད་གདོན་ཞི། སྡིག་སྒྲིབ་དག །ཉམས་རྟོགས་དང་རིག་རྩལ་ཕྱོགས་མེད་དུ་རྒྱས། གཟུངས་དྲན་དང་། མངོན་ཤེས་ཏིང་ངེ་འཛིན་འགྲུབ། དགའ་བཞིའི་ཡེ་ཤེས་ལ་བརྟེན་ནས་ཐུགས་རྡོ་རྗེ་ཆོས་ཀྱི་སྐུའི་གོ་འཕང་ལ་སྦྱོར་བ་སོགས་ཕན་ཡོན་བསྔགས་པ་མཐའ་ཡས་པས་ན། མྱོང་གྲོལ་གྱི་རིགས་སྤྱི་དང་། ཁྱད་པར་བདུད་རྩི་ཕུར་མ་དང་རིལ་བུ་སོགས་བླ་མེད་ཀྱི་རྫས་མཐའ་དག་ལ་མཆོག་ཏུ་གཅེས་ཤིང་། ཚོགས་ཀྱི་འཁོར་ལོའི་དུས་སུ་མ་ད་ན་ལ་སྦྱར་ནས་བསྟེན་ན་ཉམས་རྟོགས་རྩོལ་མེད་དུ་འཆར་བ་དང་། ཡེ་ཤེས་དབབ་པའི་སྐབས་སུ། གླ་རྩི། ཙནྡན་དཀར་དམར། མིའི་སྐྲ་སེན་དང་ཉྭ་བཞིའི་ཤ །མི་ཀླད། ཚིལ་ཆེན། བྱང་སེམས་དཀར་དམར། བྱི་ལའི་བྲུན། གུ་གུལ། སྤོས་ཀར། ཤུ་དག་ནག་པོ་བཅས་ཀྱི་ཕྱེ་མ་ཆང་གིས་སྦོལ་བ་དང་སྦྱར་ཞིང་། ཐུགས་སྒྲུབ་སྙིང་བྱང་གི་པདྨ་དཔའ་བོའི་ལས་ཚོགས་ལྟར་བསྒྲུབས་པ་རོ་སོལ་གྱི་མེར་བདུག་པས་ཡེ་ཤེས་ཀྱི་ཟིལ་ཆེན་ལྷག་པར་འབེབ་སྟེ། བསྙེན་སྒྲུབ་དུས་སུ་བདུག་པ་ཡིས༔ ཡེ་ཤེས་པ་རྣམས་དབང་མེད་འདུ༔ བྱིན་ཆེན་ཕེབས་ཤིང་ཉམས་རྟོགས་འཕེལ༔ དངོས་གྲུབ་རྣམ་གཉིས་ཐོབ་པར་འགྱུར༔ ཞེས་སོགས་གསུངས་པས་མཚོན་ཏེ། དབང་བསྐུར་བའི་དུས་སུ་བདུད་རྩིར་སྦྱར་ནས་བྱིན་པས་དཔེ་དོན་གྱི་ཡེ་ཤེས་འདྲེན་པ་དང་། ཟབ་མོའི་རྣལ་འབྱོར་གྱི་སྐབས་སུ་བསྟན་པས་ཏིང་ངེ་འཛིན་གནད་དུ་འགྲོ་བ་སོགས་མཐའ་ཡས་པར་རྟོགས་པར་བྱའོ། ། ༈ གོ་སྟོད་འོད་འབར་བྲག་ནས་སྤྱན་དྲངས་པའི་སྐུ་ཚབ་རིན་པོ་ཆེ་ཐུགས་རྗེ་འོད་འཕྲོའི་རྒྱུ་དམ་རྫས་དཔལ་གྱི་སྙིང་པོ་ནི། མཐོང་གྲོལ་སྐུ་རྟེན་རྣམ་གཉིས་ཀྱི་དཀར་ཆག་མཁའ་འགྲོ་མཚོ་རྒྱལ་གྱིས་མཛད་པ་ལས། སྐུ་ཡི་ཆ་ཤས་རྡུལ་ཕྲན་རེ་རེ་དང་༔ མ་དྲོས་ས་དང་བྱེ་མ་ཨ་ཀྲོང་སྦྱར༔ སྐུ་ཚབ་གྲངས་མེད་སྤེལ་ལ་རབ་ཏུ་གནས༔ དད་ལྡན་མོས་པར་མཚམས་པའི་རྟགས་རྣམས་འབྱུང་༔ གང་དུ་བཞུགས་པའི་ཕྱོགས་དེར་བཀྲ་ཤིས་ཤིང་། ཐུགས་རྗེའི་བདག་ཉིད་གུ་རུ་པདྨ་ཡི༔ བྱིན་རླབས་ངེས་པར་འཇུག་པའི་ཞལ་ཆེམས་ཡོད༔ ཤེས་རབ་ཅན་གྱིས་ལེགས་པར་སེམས་ལ་སྤྱོད༔ དེ་བཞིན་སྐུ་རྒྱུའི་ཆ་ཤས་ཕྲ་མོ་དག༔ འབུར་དུ་བཏོད་དམ་རིས་སུ་བྲིས་པ་དང་༔ རྒྱ་ལས་བཏབ་པའི་སྐུ་ལ་འདྲེས་པ་ནི༔ ཡེ་ཤེས་སེམས་དཔའ་དངོས་སུ་བཞུགས་པར་འགྱུར༔ རྟེན་མཆོག་གྲུབ་དང་རབ་གནས་མཉམ་དུ་འབྱུང་༔ ཞེས་རྒྱ་ཆེར་བསྔགས་པ་ལྟར་འབྲས་གསུམ། བཟང་དྲུག །ཙནྡན་དཀར་དམར་སོགས་བཟང་སྨན་གྱི་ཕྱེ་མ་ཁ་ཆེའི་ཆུས་སྦྲུས་པའི་ཟན་ལ། ཕབས་རྟ་ཁ་ཆེའི་ཆུར་སྦྱར་བས་རིལ་བུ་རྒྱ་སྲན་སྦོས་པ་ཙམ་དུ་བསྒྲིལ། འོག་མིན་ཚོགས་ཆེན་འདུས་པ་དང་། ཐུགས་སྒྲུབ་རྣམ་གཉིས་ཀྱི་སྒྲུབ་པ་ཆེན་པོའི་སྐབས་སུ་ཡེ་ཤེས་ཀྱི་གཟི་བྱིན་ཕབས་ཤིང་བདེ་བར་གཤེགས་པ་ཐམས་ཅད་འདུས་པའི་ངོ་བོར་བྱིན་གྱིས་བརླབས་པ་སྟེ། ཕན་ཡོན་ནི། གོང་དུ་གཏེར་ལུང་ལས་གསལ་ལ། རིལ་བུ་རེ་རེ་སྐུ་ཚབ་རེ་བཞེངས་པའི་རྒྱུ་ཡིན་ཅིང་། སྤྱིར་གུ་རུའི་སྐུ་ཚབ་གཙོར་གྱུར་རྩ་གསུམ་དང་སངས་རྒྱས་བྱང་སེམས་སོགས་ཀྱི་སྣང་བརྙན་རབ་འབྱམས་བཞེངས་པའི་སྐབས་སྡེར་སྐུའི་རྒྱུར་བསྲེ་བ། བརྡུང་དང་བླུགས་སྐུ་སོགས་ཀྱི་ནང་གཞུག་ཏུ་འཇོག །བྲིས་སྐུའི་རིགས་ཀྱི་གཞིར་བྱུགས་པའམ་ཚོན་དང་སྦྱར་བ་སོགས་གང་འོས་བྱ། གཞན་ཡང་གསུང་རྟེན་སྤྱི་དང་གཟུངས་གཞུག་སོགས་འབྲི་བ་དང་སྤར་བའི་ཚེ་སྣག་ཚལ་བསྲེ་བ། ཐུགས་ཆོས་སྐུའི་རྟེན་གྱི་ནང་དུ་གཞུག་པ་སོགས་མདོར་ན་རྟེན་གསུམ་གང་ལའང་མཆོག་ཏུ་བསྔགས་པའི་སྔོན་མེད་ཀྱི་གྲུབ་པའི་རྫས་ངོ་མཚར་ཆེ་བའོ། ། ༈ སེང་གནམ་བྲག་ནས་སྤྱན་དྲངས་པའི་སངས་རྒྱས་སྨན་གྱི་བླ་མའི་ཡེ་ཤེས་ཀྱི་སྐུ་གཟུགས་གཞན་དུ་སྣང་བ་དྲང་སྲོང་ཆེན་པོ་རིག་པའི་ཡེ་ཤེས་ཀྱི་འཆི་མེད་བདུད་རྩི་སྨན་གྱི་ནོར་བུ་སྲིད་ཞིའི་ཐིག་ལེ་དུག་གསུམ་དོང་སྤྲུགས་ནི། ཨ་རུ་ར་གསེར་མདོག་སྤུས་ལེགས་ཀྱི་ཕྱེ་མ་ཤིན་ཏུ་ཞིབ་པ་ཆུ་གཙང་གིས་སྦྲུས་པའི་ཟན་ལ། ཕབས་རྟ་ཆུ་གཙང་དང་སྦྱར་བ་བླུགས་ནས་རིལ་བུ་སྲན་མ་ཙམ་དུ་དྲིལ། གཡུ་ཐོག་བླ་སྒྲུབ་ཀྱི་ལས་གཞུང་དང་སྨན་གྱི་དངོས་གྲུབ་བསྡུ་བའི་སྔགས་གཙོ་བོར་བཏོན་པས་བྱིན་གྱིས་བརླབ། གཞན་ཡང་སྔ་ཕྱིར་བདུད་རྩི་སྨན་གྱི་སྒྲུབ་པ་དང་། ཐུགས་སྒྲུབ་བསམ་པ་ལྷུན་གྲུབ་མའི་ལས་ཚོགས་ཨོ་རྒྱན་སྨན་བླའི་རིལ་སྒྲུབ་སོགས་ཀྱིས་ཀྱང་བསྒྲུབ་ཅིང་། སྟོང་ཆེན་རབ་འབྱམས་ལས་གསུངས་པའི་སྔགས་དང་བདེན་པའི་ཚིག་གིས་ལྷག་པར་གནས་པ་སྟེ། ཕན་ཡོན་ནི། འདི་ཉིད་གྲོང་ཁྱེར་ལྟ་ན་སྡུག་སྨན་གྱི་ནགས་ཚལ་ཆེན་པོའི་ཨ་རུ་ར་རྣམ་པར་རྒྱལ་བ་གཙོར་གྱུར་སྨན་ཐམས་ཅད་ཀྱི་བཅུད་བསྡུས་པ་གོང་བུར་གྲུབ་པས་མྱོང་གྲོལ་གྱི་སྐབས་སུ་བཤད་པའི་ཕན་ཡོན་ཐམས་ཅད་འབྱུང་བར་མ་ཟད། སྤྱིར་སློབ་དཔོན་ཆེན་པོ་ངག་དབང་གྲགས་པས། གྲུབ་པའི་སྨན་ནི་གཞན་དག་ཀྱང་། །ངེས་པར་བསྟེན་པར་གྱུར་པ་ཡིས། །ཚེ་འཕེལ་ནད་དང་རྒས་པ་ནི། །ཟད་པས་འཆི་བ་མི་མཐོང་ངོ་། །ཞེས་དང་། སྨན་རྣམས་ཀྱི་ནི་མཐུ་ལ་ཡང་། །སོམ་ཉི་བྱ་བ་རིགས་མིན་ཏེ། །གང་ཕྱིར་སྨན་གྱི་ནུས་པ་ནི། །བསམ་མི་ཁྱབ་པར་ཀུན་ཏུ་སྣང་། །ཞེས་གསུངས་པ་ལྟར། རིལ་བུ་མྱོང་བའམ། མགུལ་དུ་འཆང་བ་ཙམ་གྱིས་ཀྱང་སྟོང་ཕྲག་བརྒྱད་ཅུའི་གདོན་བགེགས་ཀྱིས་མི་ཚུགས་པ་དང་། བཞི་བརྒྱ་རྩ་བཞིའི་ནད་ཞི་བ་སོགས་བྱིན་ནུས་བསམ་གྱིས་མི་ཁྱབ་ཅིང་། བྱེ་བྲག་ཨ་རུ་ར་རྣམ་པར་རྒྱལ་བ་གཅིག་པུའི་ནུས་པས་ཀྱང་། དཔལ་ལྡན་རྒྱུད་ལས། རླུང་མཁྲིས་བད་ཀན་འདུས་པའི་ནད་རྣམས་སེལ། །ཁྱད་པར་བཀྲ་ཤིས་དོན་ཀུན་འགྲུབ་པས་བཟང་། ཞེས་དང་། བདུད་རྩི་མཆོག་གི་ལུང་ལས། །རོ་ནུས་ཡོན་ཏན་ཀུན་ལྡན་པ། །རྣམ་པར་རྒྱལ་བའི་དྲི་ཙམ་ཡང་། །གང་གིས་མཐོང་ཚོར་མྱོང་བ་ན། །ནད་འཕྲོག་གདོན་ཞི་བགེགས་ཀུན་འདུལ། །བསམ་ཀུན་འགྲུབ་ཅིང་བཀྲ་ཤིས་བྱེད། །སྨན་གྱི་ནོར་བུ་ཆེན་པོ་ཡིན། །ཅེས་བསྔགས་པ་དང་། ཁྱད་པར་ཨོ་རྒྱན་སྨན་གྱི་བླ་མའི་སྒྲུབ་རྫས་སུ་སྦྱར་བས་ན་ཐུགས་སྒྲུབ་བསམ་པ་ལྷུན་གྲུབ་མའི་ཞལ་ཆེམས་ལས། སུས་སྤྱོད་འདུ་བ་སྙོམས་ཤིང་ནད་རྣམས་ཞི༔ གདོན་བགེགས་བར་ཆད་ཕྱོགས་སུ་ཉེ་མི་ནུས༔ ལུས་སྟོབས་འཕེལ་ཞིང་གཟི་བརྗིད་རིག་རྩལ་རྒྱས༔ མཐར་ཐུག་འཁོར་བ་ངན་སོང་སྡུག་བསྔལ་ལས༔ རྣམ་གྲོལ་བྱང་ཆུབ་མཆོག་གི་རིགས་སུ་འགྱུར༔ ཞེས་པས་མཚོན་ཏེ་རྒྱ་ཆེར་ཤེས་པར་བྱ་ཞིང་མྱོང་གྲོལ་ཆོས་སྨན་སོགས་སྤྱི་དང་། རིན་ཆེན་རིལ་བུས་མཚོན་སྨན་སྦྱོར་ཁྱད་པར་ཅན་རྣམས་ལ་བསྲེ་བ་མཆོག་ཏུ་བསྔགས་སོ། ། ༈ སེང་ཆེན་གནམ་བྲག་ནས་སྤྱན་དྲངས་པའི་སློབ་དཔོན་ཆེན་པོ་ཀླུ་སྒྲུབ་སྙིང་པོའི་ཀླུའི་ནོར་བུ་སྨན་གྱི་རིལ་བུ་རྩི་སྨན་ཀུན་གྱི་དྭང་བཅུད་དགེ་ལེགས་འཇོ་བ་ནི། རིལ་བུ་སྤེལ་དཔྱད་གཏེར་ལུང་ལས་ཀླུ་སྨན་ཐམས་ཅད་ཚོགས་པའམ། སྤང་སྤོས་ཁོ་ནས་ཀྱང་རུང་པར་གསུངས་པས། འདིར་སྤང་སྤོས་སྟོན་དུས་བརྐོས་པའི་རྩ་བ་སྙིང་པོ་ཁོ་ན་ལོགས་སུ་ཕྱེ་བའི་གཙང་མ་ལ་གཞི་བྱས། ཀླུ་སྨན་གྱི་སྦྱོར་བ་རྒྱས་བསྡུས་མཐའ་ཡས་པར་གསུངས་ནའང་། ཡོངས་སུ་གྲགས་ཤིང་རྙེད་སླ་བ་སེང་གེ་སྒྲའི་ཆོ་ག་ལས་བྱུང་བ། བཟང་པོ་དྲུག འབྲས་བུ་གསུམ། རྒྱ་མཚོ་སྦུ་བ་དངོས་འཁྲུལ་མེད་སྙེད་དཀའ་ནའང་། དེའི་ཚབ་ཆུ་བལ་སྔོན་པོ་སྲོག་ཆགས་སོགས་ཀྱི་རོ་མེད་པའི་གཙང་མ་གྲིབ་སྐམ་བྱས་པ། ཀཎྜ་ཀ་རིའི་བར་ཤུན། བྲག་ལ་སྐྱེས་པའི་སྔོ་ཆུ་སྲིན་སྡེར་མོ། དབང་པོ་ལག་པ་སོར་མོ་ལྔ་པ་ནས་གསུམ་པ་ཡན་ཁོ་ན། པདྨ་གེ་སར་དངོས་དང་། ཁ་སབ་ཤང་དྲིལ་དཀར་པོའི་མེ་ཏོག ནཱ་ག་གེ་སར་དངོས་དང་། ཁ་སབ་ཀླུ་ཤིང་འོམ་བུའི་མེ་ཏོག སྔོ་སྙི་བའི་མེ་ཏོག །འདི་མ་འབྱོར་ན་ནུས་མཚུངས་ལུག་མུར་བའི་མེ་ཏོག་གིས་ཀྱང་རུང་། ཨུཏྤལ་སྔོན་པོ་ཡོངས་གྲགས་ཀྱི་མེ་ཏོག །དཔེ་ལ་ལར་གྲ་མའི་མེ་ཏོག་ཞེས་སྣང་བ་ལྟར་ཀླུ་ཤིང་གྲ་མའི་མེ་ཏོག་སེར་པོ། མཚལ་དཀར་རྡོ་མཚལ་ལྷད་མེད། པུ་ཤེལ་རྩེའམ་རྩ་འབའ་ལ། སྙིང་ཞོ་ཤ །མཁལ་ཞོ་དཀར་པོ། མཆིན་པ་ཞོ་ཤ །གླ་གོར་ཞོ་ཤ །བལ་ཡུལ་སོགས་ནས་བྱུང་བའི་རྩ་རྨ་བྱའི་མདོངས་དངོས་དང་། དེའི་ཁ་སབ་རྩ་ཀོ་ཋ་སྟེ་གྲེས་མ་ཆུང་བའི་མེ་ཏོག་དང་ལོ་མ། ཕྱག་ཚང་ཀུ་བ། ནོར་བུ་ཞེས་སངས་རྒྱས་ཀྱི་འཕེལ་གདུང་དང་། དེའི་ཚབ་ཏུ་གངས་ཏིག་རིལ་བུར་འདྲིལ་བ། མྱུ་གུ་ཞེས་རྩ་ཀུ་ཤ །ལྷང་ཚེར་དཀར་པོ། མཁལ་སྲན་དཀར་པོ། གསེར་མེའི་མེ་ཏོག །སྔོ་པྲི་ཡངྐུ་། སྤང་རྒྱན་དཀར་པོ་དང་། སྔོན་པོའི་མེ་ཏོག །ཤུ་དག་དཀར་པོ་འཁྲུལ་མེད་དབྱིབས་ཤུ་དག་ནག་པོ་འདྲ་བ་མདོག་དཀར་ཞིང་དྲི་ང་བ་མེད་པ་ཚིགས་མཚམས་རིང་པོ་ཅན། སླེ་ཏྲེས། གྲོ་མ། མོན་བུ་དཀར་པོ། རྒུན་འབྲུམ་དཀར་པོ། ནཱ་ག་པུཥྤེ་ཞེས་བལ་ཡུལ་སོགས་སུ་ཡོད་པའི་ཀླུ་ཤིང་མེ་ཏོག་གི་ཚབ་རུང་གོང་སྨོས་འོམ་བུ་དང་གྲ་མའི་མེ་ཏོག་གིས་མཐུས་པ་བཅས་དང་། དེ་སྟེང་ཀླུའི་པང་ཀོང་ལས་བྱུང་བ། ཐང་མ་སྒྲོན་ཤིང་གི་ལོ་མ། འདི་ཚབ་ཐང་དཀར་གྱི་ལོ་མས་ཀྱང་རུང་། སྨྱུག་ལོ། ཟི་ར་དཀར་པོ་དང་། ནག་པོ། སྦྲུལ་ལྤགས་སུ་གྲགས་པ་རོང་མཚམས་ནས་འབྱུང་བའི་ཤིང་གི་ཤུན་པ་ཁྲ་བོ་དང་། ཁམས་འདིར་འབྲུག་ཤིང་དུ་གྲགས་པའི་བར་ཤུན། སློབ་དཔོན་དགའ་རབ་རྡོ་རྗེའི་གཞུང་ལས་འདིའི་འབྲས་བུ་ཆར་འབེབས་ཀྱི་རྫས་མཆོག་ཏུ་གསུངས་པས་འབྲས་བུའང་ཅི་རིགས་པ། དུང་ཕོར་མདོག་བཟང་འདི་དུང་དངོས་དང་། རྡོ་མདུང་རྩེ་དཀར་པོ་བཏང་བའི་ཕྱག་ལེན་ཀྱང་སྣང་བས་སྐབས་འདིར་ཕྱི་མ། སྤོས་དཀར། རྡོ་རྒྱུས་བྱ་བལ་མ། ཏིལ་དཀར་པོ་དང་། ནག་པོ། ག་བུར། གུར་གུམ། ཙནྡན་དཀར་པོ། ཙནྡན་དམར་པོ་བཅས་རྣམས་ལས་བཀྲུ་བར་འོས་པ་རྣམས། རྣམ་འཇོམས་དང་སྨེ་བརྩེགས་ཀྱི་བུམ་ཆུས་ལེགས་པར་བཀྲུས་ཤིང་གྲིབ་མར་སྐམ། ཐམས་ཅད་སྤོས་དཀར་དང་། སྤང་སྤོས་ལ་གྲིབ་སེལ་གྱི་སྔགས་ཀྱིས་བཏབ་པས་བདུག་སྟེ་མདོར་ན་དམར་སྐྱུར་གླ་རྩི་སོགས་ཀྱི་དྲིས་ཕོག་པའི་སྐྱོན་སྦྱངས་ཏེ་ཤིན་ཏུ་གཙང་བར་བྱས་རྗེས། སོ་སོར་ཞིབ་བཏགས་བསྲེ་འདུར་སོགས་འཐེམ་པར་བྱས་པ། བལ་ཡུལ་ནས་འབྱུང་བའི་ཀ་ར་སྐྱ་སོབ་ཕག་ཚིལ་གྱིས་མ་བཞུས་པ་དང་། བུར་དཀར་ཚིལ་གྱིས་མ་བཞུས་པ། སྦྲང་དཀར་སྲོག་ཆགས་དང་སྙིགས་མའི་སྐྱོན་བྲལ་བ། ར་དཀར་འོ་མ་དང་། བ་དམར་མོའི་འོ་མ་རྣམས་ལྷན་ཅིག་ཏུ་སྦྱར་བས་སྦོལ། ཐོག་མར་ཉུང་ཤས་ཙམ་གཏེར་བྱོན་གྱི་རིལ་བུའི་ཁ་དོགས་དང་མཚུངས་པར་བྱ་བའི་ཕྱིར་གནས་ཆེན་ལས་བྱུང་བའི་སིནྡྷུ་ར་མདོག་འགྱུར་བ་བསྲེས་ཏེ། དེ་ལ་ཕབས་གཏའ་སེང་གེ་སྒྲའི་བུམ་ཆུ་དང་། ཁ་ཆེའི་ཆུར་སྦྱངས་པ་བླུགས་ནས་རིལ་བུ་སྲན་སྦོས་ཙམ་དང་། དེས་ཕབས་རྟ་བྱས་ཏེ་བྱིངས་རྣམས་ཕུར་མའི་ཚུལ་དུ་སྦྱར། བདག་ཅག་སོགས་ཀླུ་དབང་རྒྱལ་པོའི་བསྙེན་པ་ཚད་ལྡན་སོང་བའི་དགེ་སློང་བརྒྱད་གྲས་ཀླུ་དབང་གཟུངས་འབུམ་ཕྲག་གསུམ་དང་། སེང་གེ་སྒྲའི་རྩི་སྨན་གྱི་བུམ་སྒྲུབ་ལྟར་སྨན་བདུད་རྩིར་བསྒྱུར་བའི་སྔགས་ཁྲི་ཕྲག་གསུམ་གྱིས་བྱིན་གྱིས་བརླབས་ཅིང་། སྟོང་ཆེན་རབ་འབྱམས་ལས་གསུངས་པའི་བདེན་ཚིག་གིས་ལྷག་པར་གནས་པ་དང་། སླར་ཡང་ཐུགས་སྒྲུབ་སྙིང་བྱང་གུ་རུ་རྒྱལ་བའི་གདུང་འཛིན་གྱི་ལས་ཚོགས་པདྨ་མཁའ་འགྲོའི་ལྷ་སྔགས་ཀྱིས་ཀྱང་བསྒྲུབ་པ་སྟེ། ཕན་ཡོན་ནི། སློབ་དཔོན་ཀླུས། ཀླུའི་བུམ་པ་བཞུགས་པའི་ས་ཕྱོགས་སུ་ནོར་རྫས་ལོངས་སྤྱོད་འཕེལ་བ་དང་། སད་སེར་ཐོག་གི་འཇིགས་པ་མི་འབྱུང་བ་དང་། ཀླུའི་གནོད་པ་དང་བྲལ་ཞིང་སྐྱེས་པ་དང་བུད་མེད་ཐམས་ཅད་དར་བར་འགྱུར་པ་སོགས་གསུངས་པ་འདིར་ཡང་མཚུངས་ཤིང་། དཔལ་རྒྭ་ལོའི་ཀླུ་གཏོར་གྱི་གཞུང་རྙིང་ལས། ཀླུའི་སྨན་རྣམས་སྦྱར་བ་ནི། ས་བདག་ཀླུ་གཉེན་ཐམས་ཅད་ཀྱི་དགོས་འདོད་འབྱུང་བའི་ནོར་བུ། ན་བ་གསོ་བའི་སྨན། འཆི་བ་སློང་བའི་བདུད་རྩི་ཡིན་པས། ཀླུ་རྟེན་དུ་གཞུག་པའམ། གཏོར་མའི་རྫས་ལ་བསྲེས་ན་དེས་ཀླུ་དང་ས་བདག་མཉེས་ཤིང་། ཆར་ཆུ་དུས་སུ་འབེབས་པ་དང་། མི་ཕྱུགས་ཀྱི་ནད་ཡམས་དང་ཀླུའི་གནོད་པ་ཞི། རྩ་ཤིང་ལོ་ཏོག་རྒྱས་པ་སོགས་ཕན་ཡོན་དཔག་ཏུ་མེད་ཅིང་། དགོས་དགུའི་གཏེར་དང་འཕྲད་པར་འགྱུར་རོ། །ཞེས་སྤྱི་དང་བྱེ་བྲག་ཏུ་ག་བུར་ཛཱ་ཏིས་དབུག་ཉམས་གསོ། ཞེས་སོགས་སོ་སོར་བཤད་པ་དང་། ཐུགས་སྒྲུབ་པདྨ་མཁའ་འགྲོའི་ལས་ཚོགས་ལས། མཚོ་ཡི་དཀྱིལ་དང་རྫིང་བུའི་དབུས༔ ཡུལ་གྱི་ཆུ་མགོ་དག་ཏུ་སྦ༔ ཆར་ཆུ་འབེབས་ཤིང་ལོ་ཕྱུག་ལེགས༔ རྩཱ་ཤིང་མེ་ཏོག་རྒྱས་པ་སོགས༔ སྣོད་བཅུད་འབྱོར་པ་ཕུན་ཚོགས་འགྱུར༔ ཞེས་གཏེར་བུམ་གྱི་སྐབས་སུ་གསུངས་པ་འདིར་ཡང་མཚུངས་པས། ཀླུ་རྟེན་དང་ཀླུ་བུམ་གྱི་ནང་དུ་གཞུག །ས་བཅུད་གསོ་བའི་གཏེར་བུམ་སྤྱི་ལའང་བསྔགས། སེང་གེ་སྒྲ་སོགས་ཀྱི་ཆོ་གའི་སྐབས་རྩི་སྨན་གྱི་བུམ་པར་བླུགས། ཀླུ་གཏོར་དང་ཀླུ་མཆོད་སོགས་ཀྱི་སྐབས་གཏོར་མའི་རྫས་ལ་བསྲེ། ཀླུ་བསང་གི་ཚེ་བསང་རྫས་དང་སྦོལ། ཆར་འབེབས་ཚེ་མཚོ་རྫིང་ཆུ་མིག་ལྟ་བུར་རས་དཀར་གྱིས་བསྟུམ་སྟེ་འཇུག་པར་བྱ། འདི་ལ་དམར་སྐྱུར་གླ་རྩི་སོགས་ཀྱི་དྲིས་ཕོག་ན་ཀླུ་ལ་ཤིན་ཏུ་གནོད་པས། ཆོས་སྨན་སོགས་བྱིན་རྟེན་སྤྱི་དང་མཉམ་དུ་མི་བཞག་པར། རས་དཀར་གྱི་སྣོད་དུ་བླུགས་ནས་སྒྲོམ་ལྟ་བུར་བཅུག་ལ་གཙང་སྦྲ་དང་བཅས་པའི་ཕྱོགས་སུ་བཞག་པར་བྱའོ། །ཞར་བྱུང་ཆར་འབེབས་ཀྱི་རྫས་དཀར་གཏའ་འམ་ཆུ་འཛིན་རིལ་བུར་གྲགས་པ་ལ་སྦྱོར་ཚུལ་མང་ནའང་། འདིར་ཐུགས་སྒྲུབ་སྙིང་བྱང་གི་སྤྱིར་བཏང་རྒྱས་པའི་ལས་ཚོགས་ལས་གསུངས་པ་ལྟར། སྤང་སྤོས། ཤུ་དག་དཀར་པོ། སྤོས་དཀར། འོམ་བུའི་མེ་ཏོག །གླང་སྣའི་མེ་ཏོག །ཤང་དྲིལ་དཀར་པོའི་མེ་ཏོག །ཅུ་གང་། བག་ཕྱེ་གཙང་མ་བཅས་སྦྱར་བ་བ་དམར་མོ་དང་། ར་དཀར་མོའི་འོ་མས་སྦྲུས་པའི་ཟན་ལ། གོང་གི་ཕབས་གཏའ་ཁ་ཆེའི་ཆུར་སྦྱངས་པ་བླུགས་ནས་རིལ་བུ་སྲན་འཕོས་ཙམ་དུ་དྲིལ་ཏེ་རང་སྔགས་ཀྱིས་བྱིན་གྱིས་བརླབ། ལས་སྦྱོར་གྱི་དུས་སུ་རས་དཀར་གྱིས་བསྟུམ་ཏེ་ཆུ་མིག་སོགས་སུ་འཇུག་པ་དང་། བག་ཕྱེའི་རིལ་བུ་དང་སྦྱར་ཏེ་སྔགས་རེ་དང་རིལ་བུ་རེ་སྤྲད་ལ་ཆུ་མཚོ་ལྟ་བུར་དོར་བ་སོགས་ཕྱག་ལེན་ལྟར་བྱ་བ་ནི་བྱང་ཆུབ་སེམས་དཔའི་ཕྲིན་ལས་སུ་བསྔགས་ཏེ་གཞུང་ལས། སྨན་དང་འབྲས་བུ་ལ་སོགས་པ༔ སྣོད་བཅུད་འབྱོར་པ་རྒྱས་པའི་ཕྱིར༔ ཆར་ཆེན་འབེབས་པའི་ཕྲིན་ལས་ནི༔ གཞན་ཕན་བྱང་སེམས་ལྡན་པས་བྱ༔ ཞེས་གསུངས་པའི་ཕྱིར་རོ། ། ༈ སེང་ཆེན་གནམ་བྲག་ནས་སྤྱན་དྲངས་པའི་རྒྱལ་ཆེན་ཨིནྡྲ་བྷཱུ་ཏིའི་རིན་ཆེན་རིལ་བུ་སྲིད་ཞིའི་དྭངས་བཅུད་ཙིནྟ་མ་ཎིར་གྲགས་པ་ནི། གཏེར་བྱོན་རྩ་བའི་དཀར་ཆག་ཨོ་རྒྱན་རིན་པོ་ཆེས་མཛད་པ་ལས། ཆོས་རྒྱལ་ཨིནྡྲ་བྷཱུ་ཏི་ཡིས༔ ལྷ་ཀླུ་མི་ཡི་རིན་ཆེན་བསྡུས༔ དེ་ཡི་རིལ་བུ་རྡོག་གཅིག་ནི༔ རིན་ཆེན་སྣ་ཚོགས་དག་གིས་སྤེལ༔ ཞེས་གསུངས་པ་ལྟར། སྔོན་རབ་བྱུང་བཅུ་གསུམ་པའི་ལྕགས་ཕོ་སྟག་གི་ལོར་ལྕང་ར་ལྷ་ཀླུ་འཆི་མེད་དགའ་ཚལ་དུ། འཇམ་པའི་དབྱངས་དངོས་ཀུན་མཁྱེན་བསྟན་པའི་ཉིན་བྱེད་ཀྱིས། གྲུབ་ཆེན་ཨོ་རྒྱན་པར་རྡོ་རྗེ་རྣལ་འབྱོར་མས་དངོས་སུ་གནང་བའི་མན་ངག་རྩ་བར་བཟུང་། འཕགས་བལ་བོད་ལྗོངས་མ་ཧཱ་ཙཱི་ནའི་གསོ་རིག་འཛིན་པ་མཐའ་དག་གི་ཕྱག་གཞེས་ཉམས་འོག་ཏུ་ཆུད་པའི་དཔྱད་པ་ཡོངས་སུ་རྫོགས་པས་བརྒྱན་ཏེ་ཁུངས་བཙུན་ཁྱད་འཕགས་སུ་སྦྱར་བའི་རིན་ཆེན་རིལ་ནག་ཆེན་མོ་དང་། མང་སྦྱོར་ཆེན་མོའི་རིལ་བུ་བྱིན་རླབས་དང་ནུས་པའི་གཟི་འོད་འབར་བ། ཁོ་བོ་ཅག་གིས་རབ་ཡིད་མེ་འབྲུག་ལོར་ལག་ལེན་དག་པར་སྦྱར་བའི་རིན་ཆེན་མང་སྦྱོར་ཆེན་མོ་བཅས། ཕྱོགས་བསྡམས་རིལ་བུ་གཉིས་བྲེ་གང་རེ་ཙམ་སོ་སོར་ཁ་ཆེའི་ཆུར་ཡུན་རིང་དུ་སྦངས་ཤིང་འདྲེས་པར་འདུར་བའི་ཟན་ལ། གོང་གི་ཕབས་རྟ་ཁ་ཆེའི་ཆུར་སྦྱར་བ་བླུགས། རིལ་བུ་རྒྱ་ཐུར་ལ་བཏེགས་པའི་སྐར་མ་བཞི་རེའི་རྩིས་སུ་ཕབས་ཏེ་དྲིལ། སྐམ་ཐག་ཆོད་པ་དང་རྒྱ་སྣག་དང་ཟར་མའི་ཁུ་བས་རྩི་ལེགས་པར་གསོལ། རིལ་ཆགས་ཤིན་ཏུ་འཐེམ་པར་བྱས་པ་རིན་པོ་ཆེའི་སྣོད་དུ་བླུགས་ཏེ། ས་རྟ་ཆོ་འཕྲུལ་ཟླ་བའི་ཚེས་བཟང་པོ་ནས་བརྩམས་ཞག་བདུན་ཏུ་གཡུ་ཐོག་བླ་སྒྲུབ་ཀྱི་ལས་བྱང་ལ་བརྟེན། སྨན་གྱི་དངོས་གྲུབ་བསྡུ་བའི་སྔགས་གཙོར་བོར་བཏོན་ཏེ་རྟགས་མཚན་དགེ་བར་བསྒྲུབས། ཞར་བྱུང་རྨ་བྱ་ཆེན་མོའི་སྔགས། དུག་འཇོམས་ཀྱི་གསེར་གཟུངས། སྨན་ལ་སྔགས་ཀྱིས་གདབ་བའི་གཟུངས་སོགས་ཀྱིས་ཀྱང་བྱིན་གྱིས་རླབས། སྟོང་ཆེན་རབ་འབྱམས་ནས་འབྱུང་བའི་སྔགས་དང་ཚིག་དང་དཔལ་ལྡན་རྒྱུད་ལས་གསུངས་པའི་སྨོན་ལམ་སོགས་བརྒྱ་ཕྲག་མང་པོས་ཤིས་པར་བརྗོད་པའི་མེ་ཏོག་འཐོར། སླར་ཡང་ཐུགས་སྒྲུབ་ཡིད་བཞིན་ནོར་བུའི་ཨོ་རྒྱན་སྨན་གྱི་བླ་མའི་རིལ་སྒྲུབ་ལ་བརྟེན་ནས་བྱིན་རླབས་ཀྱི་རྒྱུན་བརྟན་པར་བྱས་པ་སྟེ། ཕན་ཡོན་ནི། སྤྱིར་གཏེར་གཞུང་རྩ་བའི་དཀར་ཆག་ལས། ལྷ་རྟེན་ནང་གཞུག་མགུལ་དུ་བཏག༔ སྒྲུབ་པའི་རྟེན་བྱས་ས་ལ་སྦས༔ དངོས་གྲུབ་ཀུན་གྱི་དབྱིག་ཏུ་འགྱུར༔ ཞེས་དང་། བྱེ་བྲག་ཏུ་འདིའི་སྦྱོར་བའི་གཙོ་བོ་གྲུབ་པའི་དངུལ་ཆུ་ཁོ་ནའི་ཡོན་ཏན་ཀྱང་མཐའ་ཀླས་སྟེ། དཔལ་ལྡན་དུས་ཀྱི་འཁོར་ལོའི་རྒྱུད་ལས། ཟླ་བ་དྲུག་གིས་ལྷ་ཡི་ལུས་ཏེ་སྐྲ་དཀར་གཉེར་མ་དང་བྲལ་འདི་ཡིས་འཆི་མེད་ཉིད་དུ་འགྱུར། །ཞེས་ཟླ་བ་དྲུག་ཏུ་བརྟེན་པས་རྡོ་རྗེའི་ལུས་འགྲུབ་པར་གསུངས་པ་དང་། དཔལ་རྡོ་རྗེ་མཁའ་འགྲོའི་རྒྱུད་ལས། རིག་པ་དེ་དག་ལྷ་མོ་ཆེ། །སྦྱོར་བ་ཀུན་གྱི་དམ་པ་ཡིན། །ཚངས་པ་བརྒྱ་བྱིན་སོགས་འགྲུབ་ན། །གཞན་དག་ལ་ལྟ་སྨོས་ཅི་དགོས། །ཞེས་སྤྱིར་གྲུབ་པའི་རྫས་སྦྱོར་ཐམས་ཅད་ཀྱི་དམ་པར་བསྔགས་ཤིང་། འཇིག་རྟེན་གྱི་དངོས་གྲུབ་མཐའ་དག་འགྲུབ་པ་དང་། །དེ་ནི་ཕྲོས་ཤིང་བསྟེན་པ་ཡིས། །ཚེ་དང་ནད་མེད་ཕུན་སུམ་ཚོགས། །རིམ་འདི་རྟག་ཏུ་བསྟེན་བྱས་ན། །ལོ་ནི་སུམ་བརྒྱར་འཚོ་འགྱུར་ཞིང་། །སྐྲ་དཀར་དང་ནི་གཉེར་མ་སེལ། །བསྟན་བཅོས་ཀུན་ལ་འཇིགས་མེད་འགྱུར། །ཅེས་སོགས་དམིགས་ཀྱིས་བསལ་བའི་ཕན་ཡོན་མང་པོ་དང་། གཞན་ཡང་གྲུབ་པའི་དངུལ་ཆུའི་གཞུང་ལས་ཚད་ལྡན་སྦྱར་བའི་བཅུད་ལེན་འདི། །ཀུན་ཏུ་ཚོགས་པར་སྤྱད་གྱུར་ན། །ཉི་ཟླ་གཟའ་སྐར་གནས་ཀྱི་བར། །ཚེ་ཡི་རིག་འཛིན་རྙེད་པར་འགྱུར། །ཅེས་དངུལ་ཆུའི་ནུས་པས། །ཚེ་ཡི་རིག་འཛིན་འགྲུབ་པ་དང་། །འཆི་བདག་སླུ་བའི་རྟོགས་པ་ལས། །རིན་ཆེན་བརྟག་པའི་བསྟན་བཅོས་གང་། །རྟོགས་ལ་མཁས་པས་རྡོ་རྗེ་འཆང་། །ཚེ་ཡི་ནོར་བུ་འཆང་བའང་རུང་། །དེ་བཞིན་ནོར་བུ་སྣ་ཚོགས་འཆང་། །ཨིནྡྲ་ནཱི་ལ་རིན་ཆེན་སོགས། །ནོར་བུ་ཆེན་པོ་གཞན་དག་ཀྱང་། །འཆང་བར་བྱད་པས་འཆིང་བ་ཀུན། །བཟློག་པར་འགྱུར་བ་ཐེ་ཚོམ་མེད། །ཅེས་རིན་པོ་ཆེའི་ནུས་པས་ནད་གདོན་ཞི་ཞིང་ཚེ་བསྲིང་བ་དང་། དཔལ་ལྡན་རྒྱུད་ལས། ཁྲག་མཁྲིས་བད་རླུང་བཞི་བརྒྱ་རྩ་བཞིའི་ནད། །མགོ་དང་བྱང་ཁོག་ཡན་ལག་རྨ་རྣམས་དང་། །རྨུ་འོར་མཛེ་འབྲས་གག་ལྷོག་གཉན་ནད་དང་། །ཀླུ་གཉན་རྒྱལ་པོ་ལ་སོགས་འབྱུང་པོའི་གདོན། །རིན་པོ་ཆེ་ཡིས་མི་སེལ་འགའ་ཡང་མེད། །ནད་གཞི་མེད་པའི་མི་ལ་བཅུད་ལེན་འགྱུར། །ཅེས་ལེགས་པར་སྦྱར་བའི་ནུས་པས་འཚོ་བར་དཀའ་བའི་ནད་གདོན་ཐམས་ཅད་སེལ་ཞིང་ཚེ་དང་ལུས་ཀྱི་བཅུད་ལེན་དུ་འགྱུར་བ་དང་། །ཐིག་ལེ་དར་ཡ་ཀན་ཞེས་པ། །ཡུངས་འབྲུ་ཙམ་ཞིག་སེམས་ཅན་རྣམས། །སུས་མྱོང་མཁའ་ལ་སྤྱོད་པའི་རྟེན། །ཡོན་ཏན་མཆོག་གིས་བརྒྱན་པ་འཐོབ། །ཅེས་མཁའ་སྤྱོད་གསུམ་གྱི་གོ་འཕང་འགྲུབ་པར་གསུངས་པས་མཚོན་གནས་སྐབས་དང་མཐར་ཐུག་གི་ཕན་ཡོན་མཐའ་ཡས་ཤིང་། རྟོག་པ་ལས། ནོར་བུ། སྨན་དང་སྔགས་གྲུབ་དང་། བཅུད་ལེན་སྟོབས་ཀྱིས་བདག་ཉིད་ནི། །འཆི་བདག་ཕ་རོལ་གནོན་མཐོང་སྟེ། །རིག་འཛིན་གྲུབ་པ་ཇི་བཞིན་ནོ། །ཞེས་གསུངས་པའི་ཁྱད་ཆོས་ཐམས་ཅད་ཀྱང་འདི་ལ་ཚང་བ་ཡིན་ཏེ། གཞི་བཅུད་ལེན་དང་། ནོར་བུ་རིན་པོ་ཆེ་དང་། སྨན་ཐམས་ཅད་ཚོགས་ཤིང་། གྲུབ་པའི་སྔགས་ཀྱིས་བྱིན་བརླབས་པས་ནུས་ལྡན་དུ་བྱས་པའི་ཕྱིར་རོ། །དེས་ན་ནད་གདོན་བར་ཆད་སྲུང་བའི་སླད་དུ་ལུས་ལ་འཆང་བ་དང་། དུག་ནད་སོགས་སྲུང་དང་ཞི་བའི་ཕྱིར་གསོ་དཔྱད་ཀྱི་ཆོ་ག་བཞིན་དུ་བསྟེན་པ་དང་། གཞན་ཡང་རྟེན་གྱི་ནང་དུ་གཞུག་པ་དང་། བདུད་རྩི་ཆོས་སྨན་དང་། སྨན་སྦྱོར་ཁྱད་པར་ཅན་གྱི་ཕབས་རྟ་བསྲེ་བ་དང་། ནོར་གཏེར་གྱི་བུམ་པའི་སྙིང་པོར་བྱ་བ་སོགས་ལ་མཆོག་ཏུ་བསྔགས་ཤིང་། འདིའི་དམ་ཚིག་ཏུ་ཁྱི་དང་བུད་མེད་ཀྱིས་མ་མཐོང་བར་བྱ། ནམ་མཁའ་དང་ཉི་ཟེར་ལ་མི་སྟོན། རླུང་མི་འཚོར་བའི་སྣོད་བཟང་པོར་ག་བུར་སོགས་དྲི་བཟང་པོའི་སྨན་དང་ལྷན་ཅིག་ཏུ་བཅང་བར་བྱ་སྟེ། འཚོ་བྱེད་གྲུབ་པས། ལེགས་པར་སྦྱར་བའི་སྨན་མཆོག་རྣམས། །རིན་ཆེན་ཟེའུ་འམ་ར་ཟེ་རུ། །ག་བུར་འབྲས་དང་ལྷན་ཅིག་གཞུག །སྤྲ་ཚིལ་དག་གིས་ཞལ་བ་བྱ། །ཕྱི་ལ་ཁ་ཤའམ་གླ་བ་ཡི། །རྐྱལ་བ་སྲུབས་མེད་བཟང་པོར་བཅངས། །ཞེས་གསུངས་པ་ལྟར་རོ། ། ༈ སེང་ཆེན་གནམ་བྲག་ནས་སྤྱན་དྲངས་པའི་རི་བོ་པོ་ཏཱ་ལའི་འབྲུ་དང་སྨན་གྱི་རིལ་བུ་བརྟན་གཡོའི་དྭངས་བཅུད་ནི། ཇི་སྐད་དུ། འཕགས་པ་སྤྱན་རས་གཟིགས་ཀྱི་ཞལ་ནས། །དཔལ་ལྡན་ཡིད་འོང་པོ་ཏཱ་ལ། །སྣ་ཚོགས་ཁམས་ཀྱིས་རྣམ་པར་སྤྲས། །སྣ་ཚོགས་ལྗོན་པས་བཀྲ་བ་སྟེ། སོགས་ནས། ཐུབ་པ་འདོད་ཆགས་བྲལ་རྣམས་དང་། །བྱང་ཆུབ་སེམས་དཔའི་ཚོགས་གཞན་དང་། །ས་བཅུའི་དབང་ཕྱུག་རྣམས་དང་ནི། །འཕགས་མ་སྒྲོལ་སོགས་ལྷ་མོ་རྣམས། །རིག་པའི་རྒྱལ་མོ་སྟོང་གིས་ཀྱང་། །རྟག་ཏུ་ལེགས་པར་བསྟེན་པའོ། །ཞེས་དང་། །པདྨའི་རྣམ་ཐར་ཆེན་མོ་ལས། །དུས་བཟང་ལ་ནི་མཁའ་འགྲོ་དངོས་སུ་བྱོན༔ ཉམས་དགའ་དང་སྤྲོ་སྐྱོ་བ་མེད་པའི་གནས༔ ཏིང་འཛིན་རྒྱུད་ལ་རང་ཤུགས་སྐྱེ་བའི་ས༔ ཕོ་བྲང་རི་བོ་ཏཱ་ལའི་རྩེ་མོར་བྱོན༔ ཞེས་སོགས་བསྔགས་པ་ལྟར། ཛམ་གླིང་ན་ཡོངས་སུ་གྲགས་ཤིང་ཆེ་བའི་གནས་མཆོག་རྣམ་པ་ལྔའི་ཡ་གྱལ། ཡོན་ཏན་དང་བཀོད་པ་བསམ་ལས་འདས་པས་ཆེ་བ་ཤར་ཕྱོགས་རི་བོ་ཏཱ་ལའི་ཞིང་ཁམས་ཆེན་པོའི་འབྲུ་དང་། སྨན་དང་། མེ་ཏོག་སྣ་ཚོགས་པ་དག་གུར་གུམ་དང་ལྷན་ཅིག་ཏུ་ཞིབ་པར་བཏགས་ཏེ། དྲི་ཞིམ་པོའི་ཆུར་སྦྱངས་པ་ཉིད། གཏེར་ལུང་ལས་འབྱུང་བ་ལྟར། སད་སེར་སོགས་ཀྱིས་མ་བཅོམ་པའི་གྲོ། ནས་དཀར། འབྲས། སོ་བ། ཁྲེ། ཏིལ་དཀར་པོ། ཉུངས་ཀར། སྲན་མ་དཀར་པོ་སོགས་འབྲུ་དཀར་གྱི་ཕྱེ་གཙང་དང་། འབྲས་གསུམ། བཟང་དྲུག །གེ་སར་གསུམ། ཙནྡན་དཀར་དམར། ཨུཏྤལ་དཀར་སྔོན་སོགས་སྨན་དང་མེ་ཏོག་རིགས་བཟང་པོ། གཞན་ཡང་བུམ་རྫས་ཉེར་ལྔ་ཚད་ལྡན་དང་། དཀར་གསུམ་མངར་གསུམ། རིན་པོ་ཆེ་སྣ་ཚོགས་སོགས་དཔལ་ཅན་གྱི་རྫས་གཙང་དག་ཅུང་ཟད་ཀྱང་སྦྱར་བའི་ཕྱེ་མ་རྣམས་ཅུ་གང་གིས་མདོག་བསྒྱུར་བ་ཆུ་གཙང་གིས་སྦྲུས་པའི་ཟན་ལ་ཕབས་རྟ་བླུགས་ནས་རིལ་བུ་སྲན་མ་ཙམ་དུ་དྲིལ། ཐུགས་སྒྲུབ་བར་ཆད་ཀུན་སེལ་གྱི་བླ་མ་ནོར་ལྷའི་དཀྱིལ་འཁོར་དུ་བསྒྲུབས་ཤིང་ལྷ་སྔགས་སྤྱི་དང་ཁྱད་པར་རིལ་བུའི་སྔགས་ཀྱིས་བྱིན་གྱིས་བརླབ། ཕྱྭ་གཡང་འགུགས་པའི་ཕྲིན་ལས་ཀྱིས་སྲིད་ཞིའི་དཔལ་བཅུད་བསྟིམ། གུ་རུ་རྒྱལ་བའི་གདུང་འཛིན་གྱི་ལས་ཚོགས་རྡོ་རྗེ་མཁའ་འགྲོའི་ལྷ་སྔགས་དང་བརྟན་མའི་རིག་ལ་སོགས་ཀྱིས་ཀྱང་ནུས་པ་བསྐྱེད་པ་སྟེ། ཕན་ཡོན་ནི། གཙོ་བོར་རྟེན་དང་གཏེར་བུམ་གྱི་ནང་དུ་གཞུག་པ་དང་། གཞན་ཡང་མགུལ་དུ་འཆང་བ་དང་། བཅུད་ལེན་གྱི་ཚུལ་དུ་བསྟེན་པ་དང་། ཆུ་གཙང་ལ་སྦྱར་ཏེ་ས་བོན་དང་། ཞིང་ས་དང་། ལྷས་མལ་དང་། གནས་ཁང་སོགས་སུ་གཏོར་བས། བླ་མ་ནོར་ལྷའི་གཞུང་ལས། དེ་ལྟར་བགྱིས་པས་ཚེ་རིང་ནད་མེད་ཀླུ༔ ཆོས་དང་རིགས་ཀྱི་བརྒྱུད་པ་འཕེལ༔ ལོངས་སྤྱོད་ཆོས་སྲིད་ཕྱ་གཡང་གི་འབྱོར་པ་ནམ་མཁའི་མཛོད་ལ་མངའ་བརྙེས་པར་འགྱུར་རོ༔ ས་ཕྱོགས་ཐམས་ཅད་ཀྱང་བཀྲ་ཤིས་བྱིན་ཆགས་སྣུམ་འོད་དང་ལྡན་ཅིང་ལོ་ཏོག་རྩི་སྨན་ཆུ་ཀླུང་རྒྱས་པ་དང་༔ སྐྱེ་རྒུ་ཐམས་ཅད་བདེ་སྐྱིད་ཀྱི་འབྱོར་པ་བསྐལ་པ་རྫོགས་ལྡན་གྱི་དུས་ལྟར་སྣོད་བཅུད་ཐམས་ཅད་ཕུན་སུམ་ཚོགས་བར་འགྱུར་རོ༔ ཞེས་དང་། ཡུལ་དབུས་ཀྱི་རི་འཕན་བཟང་ལ་སྦས་ན་ཡུལ་ཕྱོགས་ཐམས་ཅད་ལ་ཕན༔ ཁང་པའི་དབུས་སུ་སྦས་ན་གནས་ཁང་བཀྲ་ཤིས་ལོངས་སྤྱོད་འཕེལ། ཐབ་དཀྱིལ་དུ་སྦས་ན་ཟས་ནོར་ལོངས་སྤྱོད་འདུ་ཞིང་སྲིས་སྨེ། ཞིང་ས་བཟང་པོར་སྦས་ན་ལོ་ཏོག་ལེགས། ཆུ་མིག་བཟང་པོའི་མདུན་རིར་སྦས་ན་ཆར་ཆུ་འབེབས། རྟ་ཕྱུགས་ཀྱི་ལྷས་མལ་དུ་སྦས་ན་གོད་ཀ་རྒྱུན་ཆོད་ཅིང་སྒབ་འཕེལ་བ་སོགས་གཏེར་བུམ་གྱི་སྐབས་སུ་ཇི་སྐད་བཤད་པ་ཐམས་ཅད་འདིར་ཡང་མཚུངས་ཤིང་། གཞན་ཡང་འདི་ལས་སྤྲོས་ཏེ། དམིགས་བསལ་བླ་མ་ནོར་ལྷའི་གཞུང་དུ་བཤད་པའི་གཡང་རྫས་རྣམས་དང་ལྷན་ཅིག་ཏུ་རིལ་བུ་དྲིལ་ནས་བསྒྲུབས་པ་དཔལ་ཅན་རིལ་བུ་དང་། འོག་ཏུ་འབྱུང་བའི་ས་སྣའི་རིལ་བུ་དང་། བཀྲ་ཤིས་གཏེར་བུམ་གྱི་སྐབས་སུ་བཤད་པའི་རྫས་རྣམས་དང་བཅས་ལྷན་ཅིག་ཏུ་རིལ་བུར་དྲིལ་ནས་བསྒྲུབ་པས་ས་བཅུད་གསོ་བའི་རིལ་བུ་སོགས་སོ་སོར་སྦྱར་ནའང་ཤིན་ཏུ་ལེགས་པར་འགྱུར་རོ། ། ༈ དཔལ་སྤུངས་ཡང་ཁྲོད་དེ་ཝཱི་ཀོ་ཊ་ཙཱ་འདྲ་རིན་ཆེན་བྲག་ནས་སྤྱན་དྲངས་པའི་གཏེར་སྒྲོམ་གྱི་ཆ་ཤས་གནས་ཡུལ་དུར་ཁྲོད་དྲུག་ཅུ་རྩ་བཞིའི་ས་སྣ་རིལ་བུ་བརྟན་གཡོའི་དཔལ་སྐྱེད་ནི། དེ་ལ་ཤྲཱི་ཧེ་རུ་ཀ་ཡབ་ཡུམ་གྱི་ཐུགས་གསུང་སྐུའི་འཁོར་ལོའི་བཀོད་པ་བགྲང་ལས་འདས་པའི་དཔའ་བོ་དང་རྣལ་འབྱོར་མ་རི་རབ་སུམ་ཅུ་རྩ་གཉིས་ཀྱི་རྡུལ་གྲངས་དང་མཉམ་པ་དང་། དེ་ལས་ཀྱང་ཆེས་ལྷག་པས་བྱིན་གྱིས་བརླབས་ཅིང་དགྱེས་རྒུར་རོལ་པའི་རྡོ་རྗེའི་ཞིང་ཁམས་ཆེན་པོར་གདོད་ནས་གྲུབ་པ་ཛམ་གླིང་ན་ཡོངས་སུ་གྲགས་པའི་གནས་སོ་གཉིས། ཡུལ་ཉེར་བཞི། དུར་ཁྲོད་ཆེན་པོ་བརྒྱད་བཅས་ཀྱི་ས་སྣ་དང་ཆུ་སྣ་ཚོགས་པའི་སྒྲོམ་གྱི་ཆ་ཤས་དང་། གནས་ཡུལ་དུར་ཁྲོད་ཀྱི་ས་རྡོ་ཕྱེ་མ་བཅས་དྲི་བཟང་གི་ཆུ་དང་སྦྱར་བ། གནས་ཆེན་རྣམས་ནས་འབྱུང་བའི་ཁམས་བཟང་པོ་ལ། ཅུ་གང་དང་། སིནྡྷུར་དང་། ཅོང་ཞི་སོགས་ཅུང་ཟད་བཅས་ཞིབ་བཏགས་ཆུ་གཙང་གིས་སྦྲུས་པར་བླུགས་ཏེ་རིལ་བུ་སྲན་མ་ཙམ་དུ་བསྒྲིལ། བླ་མ་ཡི་དམ་གྱི་སྒྲུབ་པའི་སྐབས་དང་། བཀྲ་ཤིས་གཏེར་བུམ་ཆེན་མོ་སྒྲུབ་པའི་སྐབས་སོགས་སུ་ལྷ་སྔགས་ཀྱིས་བྱིན་གྱིས་བརླབ་ཅིང་། འཁོར་འདས་བརྟན་གཡོའི་དྭང་བཅུད་མཐའ་དག་བསྟིམ་པས་ལས་དང་། ཡེ་ཤེས་ཀྱི་འབྱུང་བཅུད་ཐམས་ཅད་བརྟན་ཅིང་ནུས་ལྡན་གྱི་ཕུང་པོར་བསྒྲུབ་པ་སྟེ། ཕན་ཡོན་ནི། རྟེན་གསུམ་བཞེངས་པའི་རྒྱུར་བསྲེ་བ། ནང་དུ་གཞུག་པ། ས་བཅུད་གསོ་བ་གཙོ་བོར་གྱུར་པའི་བུམ་གཏེར་གྱི་སྙིང་པོར་བྱ་བ། ཐུགས་སྒྲུབ་བསམ་པ་ལྷུན་གྲུབ་མའི་ལས་ཚོགས་ལས་འབྱུང་བ་ལྟར་ས་བཅུད་གསོ་བའི་དཔལ་གྱི་རིལ་བུ་བསྒྲུབ་པ། མགུལ་དུ་འཆང་བ། ཁོང་དུ་བསྟེན་ཀྱང་རུང་སྟེ། བཀྲ་ཤིས་གཏེར་བུམ་གྱི་གཞུང་ལས། ཆོས་སྲིད་རྣལ་འབྱོར་རིང་གནས་ཤིང་༔ བཀྲ་ཤིས་བྱིན་ཆགས་དགེ་ལེགས་འཕེལ༔ ཚེ་རིང་ནད་མེད་འཐབ་རྩོད་བྲལ༔ མདོར་ན་སྲིད་དང་ཞི་བ་ཡི༔ ཕུན་ཚོགས་ཐམས་ཅད་ངང་གིས་འདུ༔ བསྐལ་བའི་བར་དུ་གནས་པར་འགྱུར༔ ཅེས་གསུངས་པ་སྐབས་འདིར་ཡང་མཚུངས་ཤིང་། གཞན་ཡང་ཐུན་མོང་དུ་འབྱུང་བ་བཞིའི་གནོད་པ་དང་རྒུད་པ་ཞི་ཞིང་དཔལ་འབྱོར་རྒྱས་པ་དང་། ཁྱད་པར་སྣོད་བཅུད་ཐམས་ཅད་ཤྲཱི་ཧེ་རུ་ཀའི་ཞིང་དུ་བྱིན་གྱིས་བརླབ་པར་འགྱུར་བ་སོགས་ཕན་ཡོན་མཐའ་ཡས་སོ། ། ༈

སེང་ཆེན་གནམ་བྲག་གི་གཏེར་ལྕིབས་ཅུ་གང་རིལ་བུ་བྱང་སེམས་ཟླ་བའི་ཐིག་ལེ་ནི།  གཏེར་བྱོན་ཆུ་གཙང་དང་སྦྱར་བ།  གངས་རི།  པྲེ་ཏཱ་པུ་རི།  ཏི་སྒྲོ་སོགས་བོད་ཁམས་ཀྱི་སྦས་གནས་མང་པོའི་ཅུ་གང་གི་ཕྱེ་མ་དང་ལྷན་ཅིག་ཏུ་བསྲེས་ནས་རིལ་བུ་སྲན་འཕོས་ཙམ་དུ་དྲིལ།  བདུད་རྩི་སྨན་སྒྲུབ་སོགས་ཀྱི་སྐབས་རྡོ་རྗེ་ཉི་མ་རིན་ཆེན་འབྱུང་ལྡན་གྱི་ངོ་བོར་བྱིན་གྱིས་བརླབས་པ་སྟེ།  ཕན་ཡོན་ནི་མྱོང་གྲོལ་སྤྱི་དང་མཚུངས་ཤིང་།  ཐུགས་རྗེ་ཆེན་པོའི་སྔགས་ཀྱིས་བཏབ་སྟེ་བསྟེན་ན་མིག་ནད་སེལ་བ་དང་།  དམ་རྫས་ཀྱི་རིགས་སྤྱི་དང་།  ཁྱད་པར་བདུད་རྩི་སྨན་གྱི་སྐབས་བྱང་སེམས་དཀར་པོའི་རྫས་སུ་གཅེས་སོ།   །  ༈ 

ཤེལ་ཕུག་སོགས་ནས་བྱོན་པའི་སིནྡྷུ་རའི་རིལ་བུ་ཤེས་རབ་དཔྱིད་ཀྱི་ཐིག་ལེ་མཁའ་སྤྱོད་གྲུབ་པའི་རྫས་མཆོག་ནི། བདེ་ཆེན་པདྨ་ཤེལ་ཕུག་གི་རྫོགས་ཆེན་སྡེ་གསུམ་གྱི་གཏེར་བཅིབས་ཨོ་རྒྱན་ག་ཛའི་སིནྡྷུ་ར་ཡེལ་ཕུག་ནམ་མཁའ་མཛོད་ཀྱི་གཏེར་བྱོན་ཁྲོ་སྒྲོམ་ནང་གི་སིནྡྷུ་ར། འབུམ་རྫོང་གཏེར་བྱོན་ཆོས་སྐྱོང་དགོངས་འདུས་ཀྱི་གཏེར་སྒྲོམ་ནང་གི་སིནྡྷུ་ར། བིརཱུ་པ་དང་། ནཱ་རོ་པའི་སིནྡྷུ་རའི་རྒྱུན་བཅས་ཁ་ཆེའི་ཆུར་སྦྱངས་པ། གངས་རི། ཙཱ་རི། ཏི་སྒྲོ། པདྨོ་བཀོད། ཁམས་ཀྱི་སྤྱི་འབྱམས་བྲག །གནས་མཆོག་ཆོས་སྒྲ་རང་སྒྲོགས། །ཤེལ་ཕུག །བཟང་ཤོད། ཁ་བ་དཀར་སོགས་སྦས་གནས་མང་པོའི་སིནྡྷུ་རས་བུངས་བསྐྱེད་དེ་རིལ་བུ་སྲན་འཕོས་ཙམ་དུ་དྲིལ། རྩ་གསུམ་གྱི་སྒྲུབ་པའི་རྫས་སུ་བྱིན་གྱིས་བརླབ། བདུད་རྩི་སྨན་གྱི་སྐབས་སུ་དཔལ་རྡོ་རྗེ་ཆོས་སྣང་བ་མཐའ་ཡས་ཀྱི་ངོ་བོར་བསྒྲུབས་པ་སྟེ། ཕན་ཡོན་མྱོང་གྲོལ་གྱི་ཡོན་ཏན་སྤྱི་དང་། སྣང་བ་དབང་སྡུད་ཀྱི་རྫས་དང་། དོན་ཏིག་ལས། བྷ་ག་གསང་བའི་སིནྡྷུས་ས་ལམ་བསྒྲོད༔ ཅེས་གསུངས་པས། ཁྱད་པར་མཁའ་སྤྱོད་ཀྱི་དངོས་གྲུབ་སྒྲུབ་པ་ལ་བསྔགས་ཤིང་། ཐུགས་རྗེ་ཆེན་པོ་དང་། ཕག་མོ་གཙོར་གྱུར་གྱི་སྒྲུབ་རྫས་དང་། དམ་རྫས་རིགས་གང་ལའང་སྦྱར་དུ་རུང་། བདུད་རྩི་སྨན་གྱི་ཚེ་བྱང་སེམས་དམར་པོའི་རྫས་སོགས་ཉེ་བར་མཁོ་བའི་སྐབས་མང་ངོ་། ། ༈ སེང་བྲག་གཏེར་བཅིབས་ག་བུར་རིལ་བུ་བདེ་ཆེན་ཐབས་ཀྱི་ཐིག་ལེ་ནི། གཏེར་རྫས་ཉིད་ག་བུར་དཀྱུས་མ་དང་། ཅུ་གང་བཅས་ལྷན་ཅིག་ལེགས་པར་བཏགས་ཏེ་ཆུ་གཙང་གིས་སྦྲུས། རིལ་བུ་སྲན་མ་ཙམ་དུ་བསྒྲིལ། རྩ་གསུམ་སྤྱི་དང་བྱེ་བྲག་གི་སྒྲུབ་པའི་སྐབས་མང་པོར་བྱིན་གྱིས་བརླབས་ཤིང་། སྨན་ཁྲོལ་སྒྲུབ་སྐབས་རིན་ཆེན་འབྱུང་ལྡན་གྱི་ངོ་བོར་བསྒྲུབས་པ་སྟེ། ཕན་ཡོན་མྱོང་གྲོལ་གྱི་རྫས་སྤྱི་དང་མཚུངས། ཁྱད་པར་ཚད་པའི་ནད་སེལ་བ་ལ་བསྔགས། གྲིབ་སེལ་བ་དང་། ཀླུ་སྨན་གྱི་རིགས་དང་། བདུད་རྩི་སྨན་ཕྱེ་མ་དང་། རིལ་བུ་བསྒྲུབ་པའི་བྱང་སེམས་དཀར་པོའི་རྫས་སུ་གཅེས་ཤིང་། སྤྱིར་དམ་རྫས་ཀྱི་རིགས་གང་ལའང་སྦྱར་དུ་རུང་ངོ་། ། ༈ སེང་ཆེན་གནམ་བྲག་གི་གནས་ཀྱི་གོང་བ་བྲག་སྨན་རྒྱལ་འདྲ་བ་ནས་སྤྱན་དྲངས་པའི་ཙནྡན་དཀར་པོའི་རིལ་བུ་སྟོབས་བསྐྱེད་དབང་པོའི་ཐིག་ལེ་ནི། གཏེར་བྱོན་ཙནྡན་ཉིད། ཙན་དཀར་དཀྱུས་མས་བུངས་སྐྱེད་དེ་ཞིབ་བཏགས་ཆུ་གཙང་གིས་སྦྲུས་ཏེ་རིལ་བུ་སྲན་འཕོས་ཙམ་དུ་བསྒྲིལ། རྩ་གསུམ་སྤྱི་དང་བྱེ་བྲག་གི་སྒྲུབ་པའི་སྐབས་སུ་བྱིན་གྱིས་བརླབས་པ་སྟེ། ཕན་ཡོན་ནི། དོན་ཏིག་ལས། ཙནྡན་ཧ་རིའི་ཚལ་པས་ཉོན་མོངས་སེལ༔ ཞེས་སོགས་གསུངས་པ་ལྟར་མྱོང་གྲོལ་སྤྱི་དང་མཚུངས། གྲིབ་སེལ་དང་། པདྨ་གཙུག་ཏོར་གྱི་བདུག་སྤོས་ཚོར་གྲོལ་དང་། བདུད་རྩི་ཆོས་སྨན་དང་སྐྱེ་བདུན་སོགས་ཀྱི་སྒྲུབ་རྫས་སུ་བསྔགས་སོ། ། ༈ སེང་ཆེན་གནམ་བྲག་གི་གནས་ཀྱི་གོང་མ་ནས་སྤྱན་དྲངས་པའི་ཙནྡན་དམར་པོའི་རིལ་བུ་འོད་འབར་ཉི་མའི་ཐིག་ལེ་ནི། གཏེར་བྱོན་དང་ཙན་དམར་དཀྱུས་མ་ལྷན་ཅིག་ཏུ་ཞིབ་བཏགས་ཆུ་གཙང་དང་སྦྱར་ཏེ་རིལ་བུ་སྲན་འཕོས་ཙམ་དུ་བསྒྲིལ། རྩ་གསུམ་སྒྲུབ་པའི་རྫས་དང་། སྨན་ཁྲོལ་སྒྲུབ་སྐབས་སྣང་བ་མཐའ་ཡས་ཀྱི་ངོ་བོར་བྱིན་གྱིས་བརླབས་པ་སྟེ། མྱོང་གྲོལ་སྤྱི་དང་། དབང་སྡུད་ཀྱི་རྫས་དང་། ཁྱད་པར་བདུད་རྩི་སྨན་སྒྲུབ་སྐབས་བྱང་སེམས་དམར་པོའི་རྫས་དང་། བདུད་རྩི་རིལ་བུ་སོགས་ལ་ཤ་ཆེན་གྱི་དྭང་མའི་རྫས་སུ་བསྔགས་སོ། ། ༈ རྩི་རྐེ་སུམ་མདོ་ནོར་བུ་སྤུན་གསུམ་གྱི་བྲག་ནས་སྤྱན་དྲངས་པའི་གུ་རུའི་སྐུ་ཚབ་བདེ་བ་ཆེན་པོ་དངོས་གྲུབ་དཔལ་འབར་གྱི་གཏེར་བཅིབས་གི་ཝཾ་རིལ་བུ་དོན་ཀུན་གྲུབ་པའི་ཐིག་ལེ་ནི། གནས་ཆེན་རྣམས་ནས་བྱུང་བའི་ས་གི་ཝཾ་དུ་གྲགས་པ་ལ་གཞི་བྱས། ལུག་རུ་སེར་པོ་བུངས་མང་དང་། བྲག་ཞུན་དྲི་ཐོན་བཅས་ཞིབ་བཏགས་ཕྱེ་མ་ཆུ་གཙང་གིས་སྦྲུས་པའི་ཟན་ལ། གི་ཝཾ་སྒྲུབ་པ་ལས་བཤད་པའི་སིནྡྷུ་ར། གླ་རྩི། རྡོ་ཁབ་ལེན། བྱང་སེམས་དཀར་དམར་དམ་རྫས་རོལ་པ་ཆེན་པོ་བཅས་ཅུང་ཟད་སྦྱར། ཕབས་རྟ་ཁ་ཆེའི་ཆུར་སྦྱངས་པ་བླུགས་ཏེ་རིལ་བུ་སྲན་མ་ཙམ་དུ་དྲིལ། ཐུགས་སྒྲུབ་གུ་རུ་རྒྱལ་བའི་གདུང་འཛིན་གྱི་ལས་ཚོགས་རྒྱལ་ཆེན་བཞིའི་སྔགས་ཀྱིས་བྱིན་གྱིས་བརླབས་པ་སྟེ། ཕན་ཡོན་ནི། སྤྱིར་ཐུགས་སྒྲུབ་ཡིད་བཞིན་ནོར་བུའི་ལོ་རྒྱུས་ལས། དྲི་ཚོར་ཙམ་གྱིས་ནད་ཞི་གདོན་འཕྲོག་ཅིང་༔ སྣང་བ་དབང་སྡུད་ཐུགས་རྗེ་ཆགས་པའི་རྫས༔ དོན་ཀུན་གྲུབ་སྟེར་བྱིན་བརླབས་གི་ཝཾ་བཟང་༔ ཅེས་དང་། བྱེ་བྲག་རྒྱལ་ཆེན་བཞིའི་གི་ཝཾ་སྒྲུབ་པའི་ལས་སྦྱོར་ལས། རྫས་དེས་སྨིན་མཚམས་སུ་ཐིག་ལེ་བྱས་པས་རང་ཉིད་གང་གིས་མཐོང་བ་ཐམས་ཅད་དགའ་ཞིང་དབང་དུ་འགྱུར་རོ༔ མིག་ལ་བྱུགས་པས་རང་གིས་གང་མཐོང་བ་དེ་དབང་དུ་འགྱུར་རོ༔ གོས་ལ་བདུག་སྟེ་རྒྱལ་པོའི་ཕོ་བྲང་དུ་ཞུགས་ན་དེར་གནས་པ་ཐམས་ཅད་དབང་དུ་འདུ་ཞིང་ཟིལ་གྱིས་གནོན་པར་འགྱུར་རོ༔ ཁ་ཟས་སྤྱི་དང་ཁྱད་པར་མངར་སྐྱུར་གྱི་རིགས་ལ་སྦྱར་ཏེ་བྱིན་ན་གང་གི་ལྟོར་སླེབས་པའི་མོད་བདག་ལ་ཆགས་ཤིང་ཞེན་པར་འགྱུར་རོ༔ མགུལ་དུ་འཆང་ན་ནད་ཀྱིས་མི་ཚུགས་ཤིང་ཟས་ནོར་འདུ་བར་འགྱུར་རོ༔ ཞེས་གསུངས། ཁྱད་པར་སྐྱེ་བདུན་དང་། ཆོས་སྨན་སོགས་སྒྲུབ་པའི་རྫས་ལ་བསྲེས་ན་སྒྲུབ་པ་ལ་བར་ཆད་མི་འབྱུང་ཞིང་དངོས་གྲུབ་མྱུར་དུ་འགྲུབ་པས་ན་མཆོག་ཏུ་གཅེས་ཤིང་། ༈ ཡང་འདི་ཉིད་དབང་སྡུད་ཀྱི་རྫས་སུ་ལྷག་པར་བསྔགས་པས་གུ་རུ་རྒྱལ་བའི་གདུང་འཛིན་གྱི་མཁའ་འགྲོ་ཡོངས་རྫོགས་ཀྱི་ལས་སྦྱོར་དབང་གི་རིལ་བུ་བསྒྲུབ་ན། གོང་གི་རིལ་བུ་ཇི་ལྟར་རིགས་པ་ཆུ་གཙང་ལ་སྦྱར་བ་དང་། ལྷ་ཤིང་ཤུག་པ། སྤང་སྤོས། གུར་གུམ། སིནྡྷུ་ར། བྱང་སེམས་དཀར་དམར། ཤུ་དག་ནག་པོ། རྡོ་ཁབ་ལེན། ཙནྡན་དམར་པོ། སྤོས་ཀར། ལན་ཚྭ་རྟ་སོ་མ་རིན་ཆེན་འབྲུ་སྨན་དར་སྣ་བཅས་ཀྱི་ཕྱེ་མ་ཆང་དང་སྦྲང་རྩིའི་དྭང་མ་རྣམས་སྦོལ་ཏེ་རིལ་བུ་སྲན་མ་ཙམ་དུ་དྲིལ། ན་བཟའ་དམར་པོ་གསོལ། ཐོད་པ་མཚན་ལྡན་དུ་བླུགས། ཞལ་གདམས་སྙིང་བྱང་ལྟར་རྟགས་མཐོང་བར་བསྒྲུབས་པས། ལྷ་རྟེན་ནང་ངམ་བུམ་པར་སྦས༔ ལྷ་སྲུང་གཞི་བདག་དབང་དུ་འགྱུར༔ སོགས་ནས། མགུལ་དུ་འཆང་བས་ལས་ཀུན་འགྲུབ༔ སྐྱེ་བོ་ཐམས་ཅད་དགའ་ཞིང་འདུ༔ ཞེས་པའི་བར་གསུངས་པ་བཞིན་ནོ། །གཞན་ཡང་གང་གི་སིནྡྷུ་ར། ག་བུར། ཙནྡན་དཀར་དམར། གི་ཝཾ་འདི་རྣམས་རྒྱུད་དང་མན་ངག་ལས་སྲུང་བ་སྤྱིའི་རྫས་ལའང་མཆོག་ཏུ་བསྔགས་པར་གསུངས་སོ། ། ༈ པོ་ཏཱ་ལའི་འབྲུ་སྨན་གྱི་གྲས་སུ་སྣང་བའི་གྲིབ་སེལ་ཉུངས་ཀར་རིལ་བུ་བགེགས་འཇོམས་ནུས་མཐུའི་སྙིང་པོ་ནི། གཏེར་བྱོན་གྱི་ཆ་ཤས་དང་། རིག་འཛིན་ཆེན་པོ་འཇའ་ཚོན་སྙིང་པོ། མཐུ་སྟོབས་ཀྱི་དབང་ཕྱུག་དཔལ་བཀྲ་ཤིས་སྟོབས་རྒྱལ། པདྨ་དྲག་པོའི་ནུས་རྩལ་འཆང་བ་གཏེར་ཆེན་ཀློང་གསལ་སྙིང་པོ་རྣམས་ཀྱི་ལྗགས་བཟླས་གནང་བའི་བཟླས་ཉུང་བྱིན་ཅན་ཉུང་ཀར་ཁྲོ་ཞལ་ཅན་དཀྱུས་མས་བུངས་བསྐྱེད། གཞན་ཡང་། གུ་གུལ་ནག་པོ། ཤུ་དག །ཡུངས་བ། གླ་རྩི། རུ་རྟ། ཨ་རུ་ར། སྔོ་རྒྱ་སྤོས་སུ་གྲགས་པ་རྩ་བ་ལ་ག་བུར་གྱི་དྲི་བྲོ་བ། སྤང་སྤོས། ག་བུར། རྩ་ཀུ་ཤ། མཁན་པ་དཀར་པོ། སྤོས་དཀར། རུ་རྟ། གི་ཝཾ་རྣམས་ཕྲན་བུ་དང་། བུམ་རྫས་ཉེར་ལྔ་ཚད་ལྡན། གཏེར་ཆེན་ཉིད་ཀྱིས་ལྗགས་བཟླས་མང་དུ་གནང་བའི་སྲི་ཟློག་བདུག་རྫས། གངས་རི་དང་ཙཱ་རི་རྭ་བསྒྲིངས་སོགས་ཀྱི་བསང་སྣ། པྲ་བྷ་ཧ་སྟི་དང་། མཚོ་རྒྱལ་གྱི་གསང་ཆབ་བཅས་སྦྱར་ཏེ་རིལ་བུ་ཉུངས་ཀར་སྦོམ་པོ་ཙམ་དུ་དྲིལ། ན་བཟའ་ཉུངས་ཀར་གྱི་མདོག་ལྟར་དུ་བསྒྱུར། ཐུགས་སྒྲུབ་ཞལ་གདམས་སྙིང་བྱང་ཐུགས་རྗེ་ཆེན་པོའི་བདུད་རྩི་འཁྱིལ་བའི་ལས་ཀུན་བྱེད་པའི་རིལ་སྒྲུབ་དང་། དེའི་ཆ་ལག་སྨེ་བརྩེགས་ཀྱི་བུམ་སྒྲུབ་དང་རྡོ་རྗེ་བདུག་པའི་སྦྱོར་བ་ལྟར་བསྒྲུབས་པ་སྟེ། ཕན་ཡོན་ཀྱང་། བདུད་རྩི་འཁྱིལ་བའི་རིལ་སྒྲུབ་ལས། འདི་ནི་ལུས་ལ་འཆང་བའམ༔ ཟོས་བདུག་དྲི་ཡིས་བྱུགས་པས་ཀྱང་༔ བསམ་པ་བཞིན་ཏུ་ལས་ཀུན་བྱེད༔ ཞེས་སོགས་ལས་བཞི་ཐམས་ཅད་བསམ་པས་འགྲུབ་པ་དང་༔ གཞན་ཡང་སྲུང་བ་ཆེན་པོ་སྟེ༔ ཁྱད་པར་ཉམས་གྲིབ་འགོ་བའི་རིམས༔ ལྷ་སྲིན་གདུག་པས་མི་ཚུགས་ཤིང་༔ རྟག་ཏུ་ཡིད་བདེ་ཏིང་འཛིན་འཕེལ༔ དེ་ཕྱིར་རྣལ་འབྱོར་ལྡན་རྣམས་ཀྱིས༔ ལས་ཀུན་འགྲུབ་ཕྱིར་འཆང་བར་བྱ༔ ཞེས་དང་། སྨེ་བརྩེགས་ཀྱི་གཞུང་ལས། མགུལ་དུ་འཆང་ངམ་ཁོང་དུ་བཏང་༔ ཟོས་བདུག་བྱུགས་པས་ནད་གདོན་དང་༔ གྲིབ་དང་མི་གཙང་ཐམས་ཅད་སེལ༔ ཞེས་གསུངས་པས་རྣམ་འཇོམས་དང་སྨེ་བརྩེགས་སོགས་ཀྱི་ཁྲུས་རྫས་ལ་མཆོག་ཏུ་བསྔགས་ཤིང་། གཞན་ཡང་ནད་གདོན་གང་ལའང་དུ་བས་བདུག་པ། ཁོང་དུ་བཏང་བ། ཕྱི་ནས་བྱུགས་པ་དང་། སྲུང་བ་སྤྱིའི་རྫས་སོགས་ལ་ཁྱད་པར་འཕགས་སོ། །འདི་ལས་འཕྲོས་ཏེ་བྱད་འགྲོལ་རིལ་བུ་བྱེད་ན། གོང་གི་རིལ་བུའི་སྟེང་། བཟང་དྲུག །ཤུ་དག་དཀར་པོ། གི་ཝཾ། བྱང་སེམས་དཀར་དམར་གྱི་རིལ་བུ། བདུད་རྩི་ཆོས་སྨན། ཤིང་ཀུན་ཅུང་ཟད་བཅས་སྦྱར་ཏེ་རྒྱུན་འབབ་ཀྱི་ཆུས་སྦྱངས་ལ་བུམ་པར་བླུགས། ཞལ་གདམས་སྙིང་བྱང་གི་བླ་མ་སྨྲ་སེང་དྲག་པོའི་ལས་ཚོགས་རྡོ་རྗེ་གཙུག་ཏོར་གྱི་བུམ་ཆོག་ལྟར་བསྒྲུབས། དེ་ཉིད་གོང་སྨོས་རྫས་ཀྱི་ཕྱེ་མས་རིལ་བུར་དྲིལ་བ་བྱད་ཁྲོལ་གྱི་བུམ་རྫས་ལ་མཆོག་ཏུ་གཅེས་ཤིང་། རིལ་བུ་ཆུར་སྦྱངས་པས་ཁྲུས་དང་། བཏུང་བ་དང་། གནས་ཁང་སོགས་ལ་གཏོར་བ་དང་། དུ་བས་བདུག་པ་སོགས་བགྱིས་ན་བྱད་ཕུར་རྦོད་གཏོང་གཏད་སེལ་ཐམས་ཅད་ཞི་བར་འགྱུར་རོ། །ཡང་ཞལ་གདམས་སྙིང་བྱང་གི་ལས་ཚོགས་སྤྱིར་བཏང་སྲུང་བའི་སྐོར་དུ་བཤད་པའི་དུག་ཁྲག་རིལ་བུ་རྫས་སྲུང་ནག་པོ་ཀུན་ཐུབ་ལ་སྦྱར་ཏེ་ཚུལ་བཞིན་དུ་བསྒྲུབས་པས། གདོན་བགེགས་འབྱུང་པོ་ཉེ་མི་ནུས༔ ཀླུ་གཉན་གདུག་པ་ཕྱོགས་བཅུར་འབྲོས༔ ཞེས་སོགས་ཀྱི་ཡོན་ཏན་ཀྱང་ལྷག་པར་འབྱུང་བ་ཉིད་དོ། ། ༈ དབང་གི་གནས་མཆོག་རི་བོ་དབང་ཞུའི་བྲག་ནས་བྱུང་བའི་བཀྲ་ཤིས་བྲག་ཕུག་མ་རཱ་ཏཱི་ཀའི་ས་སྣ་རིལ་བུ་འཆི་མེད་བཅུད་ཀྱི་སྙིང་པོ་ནི། པདྨའི་རྣམ་ཐར་ཆེན་མོར། བྲག་ཕུག་མཱ་ར་ཏཱི་ཀ་ཞེས་བྱ་བ༔ རིགས་གསུམ་མགོན་པོས་བྱིན་གྱིས་བརླབས་པའི་གནས༔ དགུན་ཡང་མེ་ཏོག་ཆར་དུ་འབེབས་པའི་ས༔ བཀྲ་ཤིས་བྱིན་རླབས་ཆེ་བའི་གནས་མཆོག་དེར༔ ཚེ་དཔག་མེད་པའི་དཀྱིལ་འཁོར་ཞལ་ཕྱེས་ཏེ༔ ཚེ་ཡི་རིག་འཛིན་ཟླ་བ་གསུམ་དུ་བསྒྲུབ༔ ཞེས་བསྔགས་པ་ལྟར། མཱ་ར་ཏཱི་ཀ་སྟེ་འཆི་བ་མཐར་བྱེད་ཀྱི་བྲག་གི་ས་བཅུད་ལ༔ གངས་རིའི་སློབ་དཔོན་རིན་པོ་ཆེ་ནས་ཚེ་སྒྲུབ་གནང་བའི་ས། གུ་གེ་ཁྱུང་ལུང་གི་ཚེ་རིལ། གཡའ་མ་ལུང་སོགས་འཆི་མེད་གྲུབ་པའི་སྦས་གནས་མང་པོའི་ས་རྡོ་ཆུ་ཤིང་། སེང་བྲག་དང་ཤེལ་ཕུག་གི་ཚེ་ཆུ། ཅོང་ཞི་མཛོ་འོར་འདམ་བཏགས། སྙིང་པོ་ལྔ་སྦྲང་རྩི། བུ་རམ། མར། ལན་ཚྭ། ཀ་ར། ཨ་རུ་གསེར་མདོག །གཞན་ཡང་ཚེ་བཅུད་ཀྱི་སྨན་སྣ་ཐམས་ཅད་ཚོགས་པ་ཅུང་ཟད་དང་བཅས་ཞིབ་བཏགས་འབྲིའི་འོ་མས་རིལ་བུ་སྲན་མ་ཙམ་དུ་བསྒྲིལ། ཐུགས་སྒྲུབ་ཚེ་དཔག་མེད་པདྨ་སྒྱུ་འཕྲུལ་དྲྭ་བའི་ལས་ཚོགས་བཅུད་ལེན་གྱི་གདམས་པ་ལྟར་རིན་འབྱུང་ཚེ་མཐའ་ཡས་པའི་ལྷ་སྔགས་ཀྱིས་བྱིན་བརླབས་པ་སྟེ། ཕན་ཡོན་ནི། བྱང་གཏེར་བཅུད་ལེན་བདུད་རྩིའི་ཕྲེང་བ་ལས། རིན་ཆེན་ནོར་འཛིན་བཅུད་ལེན་འདི༔ ཟོས་པས་ཚེ་རིང་ཡེ་ཤེས་ལྡན༔ ཟས་ནོར་དགོས་འདོད་ཆར་བཞིན་འབབ༔ ཏིང་འཛིན་མི་འགྱུར་ལྷ་སྐུ་གསལ༔ རྨུ་རྫིང་ས་གདོན་ནད་ཀུན་འཇོམས༔ ཤ་རྒྱས་དབུགས་རིང་ཉོན་མོངས་ཞི༔ རིགས་བརྒྱུད་འཁོར་འཕེལ་མཁའ་འགྲོ་འདུ༔ རང་རིག་ཡེ་ཤེས་ཚེ་འདིར་རྟོགས༔ སངས་རྒྱས་མྱུར་དུ་འགྲུབ་པར་འགྱུར༔ ཅེས་པའི་བཅུད་ལེན་ཉིད་མཆོག་ཏུ་བསྔགས་པའི་ཡོན་ཏན་ཐམས་ཅད་འདིར་ཡང་ཡར་ལྡན་དུ་འབྱུང་ཞིང་། དགོངས་འདུས་ལས་ཀྱང་ཚིག་རིས་གོང་དང་མཐུན་པར་གསུངས། བྱེ་བྲག་ཐུགས་སྒྲུབ་ཚེ་གཞུང་ལས། རབ་ནི་ཁ་ཟས་ཀུན་སྤངས་ལ། གྲུབ་པའི་བཅུད་ལེན་ཚུལ་དུ་བསྟེན༔ འབྲིང་ནི་གནོད་པའི་ཟས་སྤངས་ལ༔ སྨན་གྱི་བཅུད་ལེན་ཚུལ་དུ་བསྟེན༔ ཐ་མ་ཐོ་རངས་ཁམས་རྒྱས་དུས༔ དམ་ཚིག་རྫས་ཀྱི་ཚུལ་དུ་བསྟེན༔ བཅོམ་ལྡན་རྡོ་རྗེ་སེམས་དཔའ་ཡི༔ ཚེ་དང་ལང་ཚོ་འགྲུབ་པར་འགྱུར༔ ཅེས་གསུངས་པས༔ ཚེ་སྒྲུབ་དང་། བཅུད་ལེན་གྱི་རྫས་ལ་བསྔགས་ཤིང་། བཀྲ་ཤིས་གཏེར་བུམ་གྱི་སྙིང་པོར་གཞུག་ནའང་ཤིན་ཏུ་ལེགས་སོ༔ དེ་ལྟར་ལེགས་པར་སྦྱར་ཞིང་བསྒྲུབས་པའི་རིལ་བུ་འདི་རྣམས་སྤྱིར་བཏང་གི་སྦྱོར་ཚུལ་མདོ་ཙམ་བརྗོད་ན། ཐོག་མར་གཏའ་སྤེལ་དཔྱད་རྣམས་སོ་སོར་ངོས་འཛིན་མ་འཁྲུལ་བའི་ཁུངས་ལྡན་གཙང་དག་ལྷད་དང་བྲལ་བ་འདུ་བྱས་སྟེ། བཀྲུ་བར་འོས་པ་རྣམས་རྣམ་འཇོམས་དང་སྨེ་བརྩེགས་ཀྱི་ཁྲུས་ཆུས་བཀྲུས་ཏེ་གྲིབ་མར་སྐམ། གཞན་རྣམས་ལའང་སྦྱོང་ཁྲུས་ཚད་ལྡན་དང་། གྲིབ་སེལ་གྱི་སྔགས་བཏབ་པའི་བསང་བདུག་སོགས་ཡིད་ཆེས་པར་བྱས། དེ་ནས་རྡོ་ཤིང་སྔོ་སྨན་གྱི་རིགས་ཞིབ་འདུར་དར་ཚགས་ལ་དྲངས། སྣུམ་བག་དང་གཤེར་ཆེ་བ་རྣམས་ཡུན་རིང་དུ་བཏགས་པ་དང་། གླ་རྩི་དང་ཤིང་ཀུན་ལྟ་བུའི་རྩི་སྨན་གྱི་རིགས་བསྲེ་འདུར་སྐབས་སུ་བསྲེས། སྤྱིར་ཁ་དོག་གནག་པ་དང་། རོ་ཁ་བ་དང་ལན་ཚྭ་བ། ཤིང་ཀུན་སོགས་དྲི་ང་བའི་རིགས་རྣམས་ཆ་ཆུང་བ་ལེགས། ཕབས་རྟ་ཁ་ཆེའི་ཆུ་སོགས་གང་འོས་དཀར་ཡོལ་ལྟ་བུའི་སྣོད་གཙང་མ་གཡའ་མེད་པར་བླུགས་པ་ལ་བཏབ། ཁ་ཆོད་བརྒྱབས་ཏེ་ཞག་གཉིས་གསུམ་བཞག་ནས་འདྲེས་པར་འདུར། སྲ་བའི་རིགས་གུར་གུམ་དང་། ཅོང་ཞི་གང་འོས་ཅུང་ཟད་རེ་དང་བཅས་རྡོ་གཞོང་གཙང་མ་ཆུ་འདུར་ཡུན་རིང་དུ་འདུར་བ་སྦྲུ་ཟན་གྱིས་ལེན་པའམ། ཆུར་སྦྱངས་པ་ལས་དར་ཚགས་ལ་དྲངས་ན་ཆུད་ཟོས་སུ་འགྲོ་དོགས་བཞག །ཐམས་ཅད་ལ་གཅེས་པ། དབང་ལག་སྟོན་དུས་སུ་བརྐོས་ཤིང་མ་རུལ་མ་སུམ་པ་སྤུས་ལེགས་ཤིན་ཏུ་ཞིབ་འདུར་དར་ཚགས་ལ་དྲངས་བའི་དམ་རྩི་ཆེ་བ་རེ་སྦྱར། ཁྱད་པར་ས་རྡོ་ཤས་ཆེ་བའི་རིགས་ལ་དམ་རྩི་ཆེ་དགོས་པར་སྣང་། དེ་ཡང་དང་པོ་གཏའ་སྤེལ་དཔྱད་ཀྱི་རྫས་རྣམས་དམ་རྩི་བཅས་ཟན་དུ་སྦྱར་ནས་འདྲེས་པར་སྦྲུས། དེ་ལ་ཕབས་རྟ་བླུགས་ཏེ་ཐམས་ཅད་ལ་ཁྱབ་ངེས་སུ་བརྫིས། དེ་ནས་རིལ་བུར་བསྒྲིལ་སྐབས་དང་པོར་ཚད་བཞག་པ་ལས་ཇེ་ཆེར་འགྲོ་བས་མཚོན་ཆེ་ཆུང་སྣ་ཚོགས་རེད་འདུག་པས་ཡིད་གཞུང་པའི་རྟོག་འཇུག་ཞིབ་ཆ་དང་། བསྒྲིལ་ཚར་རིམ་ བཞིན་སྣོད་གཙང་མར་རས་དཀར་གསར་པའི་ཁུད་དུ་བཏིང་། ཅུང་ཟད་སྐམ་པ་ན་ཐོག་མར་པར་བུ་ལྟ་བུའི་སྣོད་དང་། དེ་ནས་ཁུག་མར་བླུགས་ཏེ་རིལ་ཆགས་འཐེམ་པར་བྱས། ན་བཟའ་དམིགས་བསལ་མ་སྨོས་པ་རྣམས་རང་མདོག་དང་། དམིགས་ཀྱིས་བསལ་བ་རྣམས་རིལ་བུ་བསྒྲིལ་ནས་ཟླ་ཤས་ལོན་པའི་སྐམ་ཐག་ཆོད་ངེས་མཚམས། ཚོན་རྩི་རྣམས་ཤེལ་ཀ་རའམ་ཟར་མའི་ཁུ་བ་འོས་མཚམས་དང་སྦྱར་ཏེ་གསོལ་ཞིང་། རིལ་ཆགས་ནན་ཏན་ཏུ་བགྱིས། ཐོག་མཐའ་བར་གསུམ་དུ་སྦྱོང་ཁྲུས་བསང་བདུག་སོགས་གཙང་སྦྲ་གང་ཆེའི་སྒོ་ནས་སྦྱར་ཞིང་། སྔ་ཕྱིར་སྤྱི་སྒོས་ཀྱི་སྒྲུབ་པ་ལན་གྲངས་དུ་མས་བྱིན་གྱིས་བརླབས་པ་ཡིན་ནོ། ། ༈ གཉིས་པ་བདུད་རྩི་སྨན་གྱི་སྐོར་ལ་ནང་གསེས་སུ་བདུན་ལས། ཐོག་མར་སེང་ཆེན་གནམ་བྲག་ནས་སྤྱན་དྲངས་པའི་རིག་འཛིན་དགའ་རབ་རྡོ་རྗེའི་བདེ་ཆེན་ཡེ་ཤེས་སྐྱེད་པའི་བདུད་རྩི་ཆོས་སྨན་བདེ་ཆེན་རྡོ་རྗེའི་བཅུད་ལེན་ལ། གཏེར་ལུང་ལས་འབྱུང་བ་ལྟར་ཅོང་ཞི་སྤུས་ལེགས་འདམ་བཏགས་སོ་མི་སེག་པར་བྱས་པའི་ཕྱེ་མ་དང་། བྲག་ཞུན་གྱི་དྭང་མ། གཞན་ཡང་ཨ་རུ་ར། ཙནྡན་དཀར་པོ། ཁ་ཆེ། ནཱ་གི། གླ་རྩི་སོགས་གཙོར་གྱུར་བདུད་རྩི་སྨན་སྒྲུབ་ཀྱི་གཞུང་ནས་བཤད་པའི་སྨན་གྱི་རིགས། ཅུ་གང་མདོག་འགྱུར་བ་བཅས་ཞིབ་བཏགས་དམ་རྩི་དང་ཕབས་བཅས་གར་ཆང་དང་ཁ་ཆེའི་ཆུས་སྦོལ། ཕབས་རྟ་ཁ་ཆེའི་གྲུང་ཆུར་སྦྱར་བས་ཁྱབ་པར་བྲན། མེ་སྦྲུལ་ས་ག་ཟླ་བའི་ཡར་ངོའི་ཚེས་བརྒྱད་ནས་བརྩམས་བདེ་ཆེན་པདྨ་ཤེལ་ཕུག་ཏུ་གཏེར་གསར་བཀའ་བརྒྱད་རྫོང་འཕྲང་གི་བདུད་རྩི་སྨན་གྱི་སྒྲུབ་པ་ཆེན་པོའི་སྒོ་ནས་ལེགས་པར་བསྒྲུབས། སླར་ཡང་དགའ་རབ་སྙིང་ཏིག་གི་གཞུང་དང་མཐུན་པར་བྱིན་གྱིས་བརླབས་པ་སྟེ། ཕན་ཡོན་ནི། སྤྱིར་ཡོན་ཏན་བདུད་རྩི་རོལ་པའི་རྒྱུད་ལུང་མན་ངག་རྣམས་ལས་རྒྱ་ཆེར་འབྱུང་བ་ལྟར་རྟོགས་པར་བྱ་ཞིང་། །འདིར་དམིགས་ཀྱིས་བསལ་བ་དགའ་རབ་སྙིང་ཏིག་ལས། གང་གིས་དྲི་ཙམ་ཚོར་བས་ཀྱང་༔ ནད་གདོན་བགེགས་ཞི་ཚེ་བསོད་རྒྱས༔ བདེ་ཆེན་ཡེ་ཤེས་རྩོལ་མེད་འཆར༔ མཚམས་མེད་ལས་ལ་སྤྱད་པའང་༔ ངན་སོང་གནས་ལས་ངེས་ཐར་ན༔ དད་དང་དམ་ཚིག་ལྡན་པ་དག༔ བྱང་ཆུབ་ཐོབ་པ་ལྟ་ཅི་སྨོས༔ དེ་ཕྱིར་རང་བྱུང་ཀུན་བཟང་གི༔ རྩོལ་མེད་ཕྲིན་ལས་ཟབ་མོའོ། །ཞེས་གསུངས་སོ། ། ༈ གངས་རིའི་ཁྲོད་ཙམ་ན་མངོན་པར་མཐོ་བའི་སྒྲུབ་གནས་ཀྱི་རྒྱལ་པོར་བསྔགས་པ་བདེ་ཆེན་པདྨ་ཤེལ་ཕུག་ནས་དམ་ཆོས་ཀུན་གྱི་རྒྱལ་པོ་རྫོགས་ཆེན་སྡེ་གསུམ་དང་ལྷན་ཅིག་ཏུ་སྤྱན་དྲངས་པའི་རིག་འཛིན་ཤྲཱི་སེདྷའི་བདུད་རྩི་ཆོས་སྨན་འཆི་མེད་དྭང་མའི་བཅུད་ལེན་ནི། བདུད་རྩིའི་གཞུང་ལས་འབྱུང་བའི་སྨན་སྣ་སྤྱི་དང་། ཁྱད་པར་ཡུང་བ་ཤིན་ཏུ་ཞིབ་བཏགས་ཕྱེ་མ་མདོག་འགྱུར་བ་དང་ཁ་ཆེའི་ཁུ་གར་བསྲེས་པར། ཕབས་རྟ་ཉིད་ཁ་ཆེའི་ཆུར་ལེགས་པར་འདུར་བ་ཁྱབ་པར་བྲན། གཏེར་ནས་བཞེས་ཏེ་ཉིན་དྲུག་འདས་པའི་མཚམས། ལུང་བྱང་ལས། ཟབ་གཏེར་སྦས་པའི་གནས་མཆོག་དེར༔ སྒྲུབ་པ་ཆེན་པོ་དང་འབྲེལ་བར༔ དང་པོར་བཀའ་བརྒྱད་སྤྱི་དབང་དེ༔ ཀུན་ལ་སྤྲོ་བ་སྐྱེད་ཕྱིར་བསྐུར༔ དམ་རྫས་མྱོང་གྲོལ་འབྲེལ་ཚད་གྲོལ༔ དེ་ཕྱིར་ཆོས་སྒོ་འཕྲལ་དུ་དབྱེ༔ ཞེས་སོགས་གསུངས་པའི་ལུང་དོན་རྗེས་སུ་བསྒྲུབ་ཕྱིར། སྤྲུལ་པའི་གཏེར་ཆེན་རིན་པོ་ཆེ་དང་བདག་ཅག་གིས་མེ་འབྲུག་རྒྱལ་ཟླ་བའི་དཀར་ཕྱོགས་ཀྱི་ཚེས་དགུ་ནས་བརྩམས། རིག་འཛིན་ཤྲཱི་སིདྷས་བྱིན་གྱིས་བརླབས་པའི་གནས་མཆོག་བདེ་ཆེན་པདྨ་ཤེལ་ཕུག་གི་ཉེ་འདབས་སུ་ཐོག་མར་གཏེར་ཁ་འདི་ཉིད་ཀྱི་བཀའ་བརྒྱད་རྫོང་འཕྲང་གི་བདུད་རྩི་སྨན་སྒྲུབ་ཀྱི་སྒོ་ནས་བྱིན་གྱིས་བརླབ་ཅིང་། སླར་ཡང་མེ་སྦྲུལ་ས་ག་ཟླ་བར་བསྐྱར་ནས་ཀྱང་བསྒྲུབ་པ་སྟེ། ཕན་ཡོན་ནི། སྤྱིར་བདུད་རྩིའི་གཞུང་རྣམས་ལས་རྒྱ་ཆེར་འབྱུང་བར་མ་ཟད། དམིགས་ཀྱིས་བསལ་བའང་གཏེར་ལུང་ལས། ཟུང་འཇུག་རིག་འཛིན་ཤྲཱི་སིདྷའི༔ འཆི་མེད་བདུད་རྩི་སྨན་གྱི་བཅུད༔ མཐོང་བས་བསྐལ་མང་སྡིག་སྒྲིབ་འདག༔ དྲི་ཚོར་ཙམ་གྱིས་ནད་གདོན་ཞི༔ ལུས་ལ་རེག་པས་བདེ་ཆེན་སྐྱེ༔ རྡུལ་ཕྲན་ཙམ་ཞིག་མྱོང་བས་ཀྱང་༔ མཆོག་ཐུན་དངོས་གྲུབ་ངེས་པར་ཐོབ༔ མདོར་ན་འབྲེལ་ཚད་ཐམས་ཅད་ཀུན༔ ངན་སོང་འཁོར་བའི་སྒོ་འགེག་ཅིང་༔ མཐོ་རིས་ཐར་པའི་ལམ་རྙེད་ཕྱིར༔ རང་བྱུང་ཡེ་ཤེས་ཐུགས་རྗེའི་མཐུ༔ རྩོལ་མེད་ངང་གིས་འཆར་བ་སྟེ༔ དེ་ཕྱིར་ཐུན་ཕྲན་རེ་རེ་ལ༔ ཁྲི་འབུམ་སྤེལ་ཞིང་བསྒྲུབ་པ་བསྐྱར༔ མཁའ་ཁྱབ་འགྲོ་དོན་བླ་ན་མེད༔ བདེ་ཆེན་རྡོ་རྗེའི་གསེང་ལམ་མོ༔ ཞེས་ཆེད་དུ་བསྔགས་པ་ལྟར་རོ། ། ༈ ན་བུན་རྫོང་ནས་སྤྱན་དྲངས་པའི་རིག་འཛིན་བི་མ་ལ་མི་ཏྲའི་བདུད་རྩི་ཆོས་སྨན་བདེ་ཆེན་བདུད་རྩིའི་བཅུད་ལེན་ནི། སྨན་གྱི་རིགས་སྤྱི་དང་། ཁྱད་པར་ཙནྡན་དམར་པོའི་ཕྱེ་མ་ཤིན་ཏུ་ཞིབ་པ་མདོག་འགྱུར་ངེས་སུ་བཏབ་པ་ལ། ཕབས་རྟ་དྲི་བཟང་དང་སྦྱར་བ་བླུགས་ཅིང་ལེགས་པར་སྦོལ། མེ་སྦྲུལ་ས་ག་ཟླ་བར་བདེ་ཆེན་པདྨ་ཤེལ་ཕུག་ཏུ་བཀའ་བརྒྱད་རྫོང་འཕྲང་གི་སྒོ་ནས་བསྒྲུབ་ཅིང་། སླར་ཡང་སྙིང་ཏིག་སྐོར་བདུན་གྱི་ནང་ཚན་བི་མའི་ཡང་ཏིག་ཡེ་ཤེས་གསང་ལམ་གྱི་བདུད་རྩི་ཆིག་སྒྲུབ་ལྟར་བསྐྱར་ནས་བསྒྲུབ་པ་སྟེ། དམིགས་ཀྱིས་གསལ་བའི་ཕན་ཡོན་ཀྱང་༔ རང་གཞུང་ལས། བདུད་རྩི་ཆེན་པོ་བླ་ན་མེད༔ མཐོང་བས་བསྐལ་མང་སྡིག་སྒྲིབ་འདག༔ དྲི་ཚོར་ཙམ་གྱི་ངན་སོང་བྱང་༔ མྱོང་ན་བདེ་ཆེན་ཡེ་ཤེས་སྐྱེ༔ བཅངས་པས་མི་མཐུན་ཐམས་ཅད་སྲུང་༔ ཚེ་བསོད་ཡེ་ཤེས་རྒྱས་པར་འགྱུར༔ མདོར་ན་བླ་མེད་དམ་ཚིག་རྫས༔ ཐུགས་རྗེ་འཁོར་འདས་མཉམ་ཉིད་ཕྱིར༔ འབྲེལ་པ་ཐོབ་པ་ཐམས་ཅད་ཀུན༔ ཚེ་རིང་ནད་མེད་བསམ་རྒུ་འགྲུབ༔ མཆོག་ཐུན་ཁྱད་པར་དངོས་གྲུབ་ཀུན༔ དཔལ་ཆེན་པོ་དང་མཉམ་པ་འཐོབ༔ ཅེས་སོགས་རྒྱ་ཆེར་གསུངས་པར་མ་ཟད། རིག་འཛིན་བི་མ་ལ་ཉིད་དོན་དམ་པར་འདའ་ཀ་ཡེ་ཤེས་ཕྱག་རྒྱའི་གཟུགས་སུ་རང་སྣང་བ་ཁ་སྦྱོར་བརྒྱད་ལྡན་གྱི་གཙོ་མཆོག་དང་དབྱེར་མ་མཆིས་ཤིང་། རྣམ་པ་ཙམ་དུའང་ཡོན་ཏན་བདུད་རྩི་རོལ་པའི་རྒྱུད་ལུང་མན་ངག་མཐའ་དག་གི་བཀའ་བབ་པས་ཀྱང་ཁྱད་པར་དུ་འཕགས་པར་གྲུབ་བོ། ། ༈ སེང་ཆེན་གནམ་བྲག་ནས་མེ་སྦྲུལ་ཆོ་འཕྲུལ་ཟླ་བའི་ཚེས་བཅུ་དགུ་ལ་སྤྱན་དྲངས་པའི་འཕགས་ཡུལ་རིག་འཛིན་བརྒྱད་ཀྱི་བདུད་རྩི་ཆོས་སྨན་ཡེ་ཤེས་ཀློང་དགུའི་བཅུད་ལེན་ནི། ཇི་སྐད་དུ། ཕྱི་ལྟར་བྱང་སེམས་ནང་རིག་འཛིན༔ གསང་བ་དཔལ་ཆེན་སྒྲུབ་སྡེ་བརྒྱད༔ ངོ་བོ་ཡེ་ཤེས་ཀློང་དགུའི་རྩལ༔ རྣམ་པ་གྲུབ་པའི་སློབ་དཔོན་ཆེ༔ ཞེས་སོགས་གཏེར་ཁ་ཐམས་ཅད་ནས་དོན་མཚུངས་པར་གསུངས་པ་ལྟར། ཡེ་ཤེས་ཀློང་དགུའི་རང་གཟུགས་དཀྱིལ་འཁོར་རྒྱ་མཚོའི་ཁྱབ་བདག་དཔལ་ཆེན་པོ་སྒྲུབ་སྡེ་བརྒྱད་དང་ཐ་མི་དད་པར་གྲུབ་པའི་རིག་འཛིན་མཉྫུ་ཤྲཱི་མི་ཏྲ། ནཱ་ག་རྫུ་ན། ཧཱུྃ་ཀ་ར། བི་མ་ལ་མི་ཏྲ། པྲ་བྷ་ཧ་སྟི། དྷ་ན་སཾ་སྐྲྀ་ཏ། གུ་ཧྱ་ཙནྡྲ། ཤནྟིཾ་གརྦྷ་རྣམས་གདན་འཛོམས་ནས་རྩ་བ་བརྒྱད་དང་ཡན་ལག་སྟོང་ཚང་བར་སྦྱར་ཞིང་། གདོད་ནས་གྲུབ་པའི་དུར་ཁྲོད་ཆེན་པོ་བསིལ་བ་ཚལ་གྱི་མཆོད་རྟེན་བདེ་བྱེད་བརྩེགས་པར་དཀྱིལ་འཁོར་བདུན་དང་སྦྱོར་བ་བརྒྱད་ཀྱི་སྒོ་ནས་ལེགས་པར་བསྒྲུབས་པའི་འཇིག་རྟེན་ན་རྙེད་པར་དཀའ་བའི་དམ་རྫས་སྨན་ཕུད་ཁྱད་པར་ཅན་ཉིད་ཁ་ཆེའི་གྲུང་ཆུར་སྦྱར་ཏེ། རྩ་བ་དང་ཡན་ལག་གི་སྨན་ཇི་ཙམ་རྙེད་པས་བུངས་བསྐྱེད། ཡུང་བ་ཤིན་ཏུ་ཞིབ་བཏགས་དང་ཁ་ཆེའི་ཁུ་གར་གྱིས་སྦོལ་ནས་མདོག་སེར་པོར་བསྒྱུར། བདེ་ཆེན་པདྨ་ཤེལ་ཕུག་ཏུ་གཏེར་གསར་བཀའ་བརྒྱད་རྫོང་འཕྲང་གི་བསྙེན་པ་སྔོན་དུ་འགྲོ་བས་བསྒྲུབ་པ་སྟེ། ཕན་ཡོན་མཐའ་ཡས་པར་རྒྱུད་ལུང་མན་ངག་རྣམས་ནས་རྒྱ་ཆེར་འབྱུང་བའི་དོན་བསྡུས་ཨོ་རྒྱན་རིན་པོ་ཆེའི་ཞལ་ནས། བདེ་གཤེགས་མ་ལུས་མཆོད་པའི་རྫས༔ བླ་མ་ཡི་དམ་སྡུད་པའི་རྩི༔ མཁའ་འགྲོ་ཀུན་གྱི་སྙིང་ཁྲག་ཡིན༔ ཟོས་པས་ཡོན་ཏན་བརྗོད་མི་ལངས༔ སངས་རྒྱས་ལྔའི་ཡོན་ཏན་ཐོབ༔ ཕྱི་ལྟར་ལུས་ཀྱི་ནད་གདོན་འཇོམས༔ ནང་དུ་ཉོན་མོང་དུག་ལྔ་འདག༔ དམ་ཚིག་ཉམ་ཆག་ཐམས་ཅད་བསྐང་༔ གསང་བ་རང་བྱུང་ཡེ་ཤེས་རྟོགས༔ ཉན་ཐོས་རང་སངས་རྒྱས་རྣམས་ཀྱིས༔ ཟོས་ན་ས་བཅུ་ཐོབ་ནས་ཀྱང་༔ ཐེག་ཆེན་བྱང་སེམས་ཆེན་པོར་འགྱུར༔ བླ་མ་མཆོད་ན་བྱིན་རླབས་འཇུག༔ ཡི་དམ་མཆོད་ན་དངོས་གྲུབ་སྟེར༔ བདེ་གཤེགས་མཆོད་ན་ཐུགས་རྗེ་འབྱུང་༔ མཁའ་འགྲོ་མཆོད་པས་ལུང་ཡང་སྟོན༔ རྣལ་འབྱོར་པའམ་སུས་ཟོས་ཀྱང་༔ ཕྱི་ཡི་ནད་གདོན་སྡིག་སྒྲིབ་བྱང་༔ ནང་གི་བསྐྱེད་རིམ་ཏིང་འཛིན་གསལ༔ གསང་བ་རང་རིག་ཆོས་སྐུར་རྟོགས༔ ཉམས་དང་ལྷག་ཆད་མ་ལུས་སྐོང་༔ འཆང་བས་དུས་མིན་འཆི་བ་ཟློག༔ གདུག་པའི་དུག་ཀྱང་འཇིལ་བར་ནུས༔ བྱུགས་པས་ནད་གདོན་མ་ལུས་སེལ༔ བསྲེག་ན་གདོན་བགེགས་ཐམས་ཅད་སྐྲོད༔ འདི་ཉིད་བསྒྲུབ་པའི་གནས་དེ་ཡང་༔ དུར་ཁྲོད་བསིལ་བའི་ཚལ་དང་མཚུངས༔ དཔའ་བོ་མཁའ་འགྲོ་ཐམས་ཅད་འདུས༔ ས་ཕྱོགས་བྱིན་དང་ལྡན་པར་འགྱུར༔ ཆར་ཆུ་འབེབས་ཤིང་ལོ་ཕྱུགས་ལེགས༔ གང་བསྒྲུབས་ས་ཡི་གནས་དེ་རུ༔ སུ་བསྡད་མི་རྣམས་ཏིང་འཛིན་འཆར༔ ནམ་ཞིག་ཚེ་ཡི་དུས་བྱས་ནས༔ ཕོ་མོ་བཟང་ངན་མེད་པ་རུ། རིག་འཛིན་དམ་པའི་ས་ལ་གནས༔ དེ་ཕྱིར་མཆོག་གི་དམ་རྫས་སོ༔ ཞེས་གསུངས་ཏེ། གོང་འོག་གི་བདུད་རྩི་སྨན་གྱི་རིགས་ཐམས་ཅད་ལ་མཚུངས་བར་ཤེས་པ་བྱའོ། ། ༈ སེང་ཆེན་གནམ་བྲག་གི་གནས་མཐིལ་མཁའ་འགྲོའི་བྲོ་རའི་དབུ་རྩེ་བྲག་རིན་ཆེན་འབར་བ་ནས་སྤྱན་དྲངས་བའི་ཨོ་རྒྱན་རྗེ་འབངས་ཉེར་ལྔའི་བདུད་རྩི་ཆོས་སྨན་བདེ་བར་གཤེགས་པ་ཐམས་ཅད་འདུས་པའི་བཅུད་ལེན་ནི། ཟབ་གཏེར་ཐོ་བྱང་མཚོ་རྒྱལ་གྱི་ཕྱག་བྲིས་མ་ལས། ཨོ་རྒྱན་ཆེན་པོ་པདྨ་འབྱུང་གནས་དང་༔ མཁས་གྲུབ་རྗེ་འབངས་ཉེར་ལྔས་མཆིམས་ཕུ་རུ༔ སློབ་དཔོན་བརྒྱད་ཀྱི་ཆོས་སྨན་གཞིར་བྱས་ནས༔ བཀའ་བརྒྱད་སྒོ་ནས་བསྒྲུབས་པའི་སྨན་སྒྲུབ་ནི༔ ཚོན་ཚད་མེ་ལོང་ཡུ་བ་ཅན་ཞིག་གིས༔ གཞལ་བའི་མེ་ལོང་བཅུ་ཕྲག་བཞུགས་པ་འདི༔ མེ་ལོང་གཅིག་ལ་མེ་ལོང་འབུམ་ཕྲག་སྤེལ༔ གྲོག་མའི་རྐང་ཙམ་སུ་ཡི་ལྟོར་སོང་བ༔ དེ་ཉིད་ངན་སོང་གནས་ནས་ངེས་པར་ཐར༔ བླ་མེད་འཕགས་པའི་ས་ལ་ཕྱིན་པར་ནི༔ དུས་གསུམ་རྒྱལ་བ་རྣམས་ཀྱིས་ཡང་ཡང་བསྔགས༔ དེ་བས་གཅེས་པར་ཟུངས་ཤིག་ས་མ་ཡ༔ ཞེས་གསུངས་པ་ལྟར་བླ་ན་མེད་པའི་མྱོང་གྲོལ་གྱི་རྫས་མཆོག་ཁྱད་པར་ཅན་ཉིད་ཁ་ཆེའི་ཆུར་སྦྱར། རྩ་བ་དང་ཡན་ལག་གི་སྨན་སྣ་ཇི་སྙེད་པ་དང་བཅས་ཡུང་བ་ཅུང་ཟད་དང་། ཁ་ཆེའི་ཁུ་གར་ཤས་ཆེ་བས་མདོག་སེར་སྨུག་ཏུ་བསྒྱུར། ཟབ་གཏེར་མེ་སྦྲུལ་ཆོ་འཕྲུལ་ཟླ་བའི་ཚེས་༢༠ལ་སྣང་བར་མཛད་པའི་ལོ་དེ་ཉིད་ཀྱི་ས་ག་ཟླ་བའི་དཀར་ཕྱོགས་ཀྱི་དུས་མཆོག་ཏུ་དགེ་བར། གཏེར་ལུང་ལས། རྒྱ་གར་སོ་ས་གླིང་གི་གནས༔ བོད་ཀྱི་ཡུལ་དུ་སྤྱན་དྲངས་ནས༔ བསྟིམས་པའི་གནས་ནི་མཆིམས་ཕུ་ཡིན༔ དེ་ཉིད་གཅིག་ལས་གཉིས་མཆེད་ཚུལ༔ ཁམས་ཀྱི་སྨད་ཤོད་ཛཾ་དུ་འཕོས༔ ལུང་པ་པདྨ་ཁ་བྱེ་འདྲ༔ དབུས་ཀྱི་ལུང་པའི་མདོ་དག་ལ༔ བྲག་དཀར་ཤེལ་གྱི་གུར་ཕུབས་འདྲ༔ སྒྲུབ་ཕུག་པདྨ་ཤེལ་ཕུག་འདིར༔ ཨོ་རྒྱན་པདྨ་བདག་ཉིད་ཀྱིས༔ བདེ་གཤེགས་འདུས་པའི་སྒྲུབ་ཆེན་བྱས༔ ཕུག་བའི་ནང་རྣམས་ཐམས་ཅད་དུ༔ དཀྱིལ་འཁོར་དགུ་ཀློང་རང་བྱོན་བྱུང་༔ བདེ་བར་གཤེགས་པ་ཐིམ་པས་ནི༔ མཐོང་ཚད་ངན་སོང་སྐྱེ་སྒོ་ཆོད༔ ཅེས་རྒྱ་ཆེར་བསྔགས་པའི་གནས་མཆོག་ཏུ། བདག་ཅག་གིས་གཏེར་གསར་རྫོགས་ཆེན་སྡེ་གསུམ་གྱི་མན་ངག་སྡེའི་ཡི་དམ་ཁྲོ་བོའི་སྒྲུབ་པ་བཀའ་བརྒྱད་རྫོང་འཕྲང་གི་ལས་བྱང་ལ་ཟབ་བདུན་སྒྲུབ་ཁོག་སྦྱར་བའི་བསྙེན་སྒྲུབ་ཡན་ལག་བཞི་ལྡན་དང་འབྲེལ་བར། ཐུགས་དམ་ཟབ་པ་སྐོར་བདུན་གྱི་མཆོག་གི་ལས་ཚོགས་ཀྱི་ཟབ་པ་བདུད་རྩིའི་གཞུང་གིས་ལྷ་དང་མཁའ་འགྲོ་འདུ་བའི་རྟགས་མཚན་དགེ་བ་དང་བཅས་ལེགས་པར་བསྒྲུབས་པ་སྟེ། ཕན་ཡོན་གོང་དུ་སྨོས་པའི་རྡོ་རྗེའི་ལུང་སྤྱི་དང་བྱེ་བྲག་གིས་མཚོན་ཏེ་ཤེས་བར་བྱ་ཞིང་། མདོར་བསྡུ་ན་ཟབ་དོན་བདུད་རྩིའི་གཞུང་ལས། བླ་མེད་མཆོག་གི་བདུད་རྩི་འདི༔ ཏིལ་འབྲུ་ཙམ་ཞིག་སུས་མྱོང་བ༔ ཧེ་རུ་ཀ་དང་གོ་འཕང་མཉམ༔ ཅེས་གསུངས་སོ། ། ༈

ས་རྟ་དབྱུག་པ་ཟླ་བའི་དམར་ཕྱོགས་མཁའ་འགྲོ་འདུ་བའི་དུས་བཟང་པོར་ཀརྨའི་འབུམ་རྫོང་གི་གཏེར་སྲུང་མཚོ་སྨན་གྱིས་བྱིན་བརླབས་བདུད་རྩིའི་ཟིལ་པ་ཁྲོམ་མེར་དངོས་སུ་ཕུལ་བའི་ཨོ་རྒྱན་རིན་པོ་ཆེ་རྗེས་འབྲངས་སྟོང་ཕྲག་གིས་བསྒྲུབས་པའི་འདུས་པ་མདོའི་ཆོས་སྨན་བདེ་ཆེན་རོལ་པ་ནི། གོ་སྟོད་འོད་འབར་བྲག་ནས་བཞེས་པའི་མཐོང་གྲོལ་སྐུ་རྟེན་རྣམ་གཉིས་ཀྱི་དཀར་ཆག་སློབ་དཔོན་རིན་པོ་ཆེའི་གསུངས་ལ་མཁའ་འགྲོ་ཡེ་ཤེས་མཚོ་རྒྱལ་གྱིས་ཟིན་བྲིས་སུ་མཛད་པ་ལས། རྫ་རྒྱལ་གོ་བོ་ཕུག་གི་གནས་མཆོག་ཏུ༔ འདུས་པ་ཆེན་པོ་པདྨ་འབྱུང་གནས་དང་༔ ཡེ་ཤེས་སྐུ་དང་ལས་ལུས་ཚུལ་བཟུང་བའི༔ རྗེས་འབྲངས་ཚོམ་བུར་འདུས་པ་སྟོང་ཕྲག་གིས༔ སྒྲོལ་བྱེད་ཐུགས་རྗེའི་རྒྱལ་པོ་ཆེ་བའི་མཆོག༔ ཤིན་ཏུ་རྣམ་པར་གྲོལ་བའི་ཧེ་རུ་ཀས༔ ཆོས་ཉིད་རང་སྒྲས་མངོན་སུམ་བསྟན་པའི་རྒྱུད༔ རྡོ་རྗེ་བཀོད་པའི་གསང་བ་ཟབ་མོའི་དོན༔ འདུས་པ་མདོ་ཡི་དཀྱིལ་འཁོར་ཞལ་ཕྱེས་ཏེ༔ བདུད་རྩི་སྨན་གྱི་སྒྲུབ་པ་མཛད་པའི་ཚེ༔ ནམ་མཁའ་གང་བའི་ཁྲག་འཐུང་དཀྱིལ་འཁོར་ལྷ༔ རབ་འབྱམས་སྒྲུབ་པའི་རྫས་ལ་མངོན་སུམ་ཐིམ༔ དེ་ཚེ་སྨན་ལས་ཡེ་ཤེས་འོད་འབར་ཞིང་༔ ཛཾ་གླིང་ཐམས་ཅད་ཚོར་གྲོལ་དྲི་ཡིས་ཁྱབ༔ གང་གིས་མཐོང་དང་ཐོས་དང་དྲན་རེག་གམ༔ ཐུན་ཕྲན་གཅིག་ལ་ཐུན་ཆེན་འབུམ་སྤེལ་ཏེ༔ དེ་ཉིད་ཏིལ་འབྲུ་ཙམ་ཞིག་མྱོང་བས་ཀྱང་༔ ནད་དང་སྡུག་བསྔལ་བར་གཅོད་ཀུན་ཞི་ཞིང་༔ རྡོ་རྗེའི་ཚེ་དང་ལང་ཚོ་མཆོག་ཏུ་འགྲུབ༔ བདེ་ཆེན་ཡེ་ཤེས་རྩོལ་བ་མེད་པར་འཆར༔ ཧེ་རུ་ཀ་དང་སྤྱོད་ཡུལ་མཉམ་པ་ཡིས༔ སྐྱེ་བ་བདུན་ན་འབད་མེད་གྲོལ་བའི་ཚུལ༔ ཌཱ་ཀི་བྱེ་བས་རྡོ་རྗེའི་གླུ་རུ་བླངས༔ ཞེས་རྒྱ་ཆེར་བསྔགས་པས་ཡིད་ཉེ་བར་དྲངས་ཏེ། བླ་ན་མེད་པའི་མཆོག་གི་བདུད་རྩི་ཉིད་ཁ་ཆེའི་ཆུར་སྦྱངས་པ་དང་། རྒྱུད་ལུང་མན་ངག་གི་བདུད་རྩིའི་གཞུང་ལས་གསུངས་པའི་རྩ་བ་དང་ཡན་ལག་གི་སྨན་ཇི་ལྟར་འབྱོར་པ་ལ། ནཱ་གི། གླ་རྩི། ཁ་ཆེ་རྣམས་དྲི་རོ་དང་མདོག་འགྱུར་བ་སྦྱར་ཏེ། དོན་གྲུབ་ཅེས་པ་ས་མོ་ལུག་གི་ལོའི་ཆོ་འཕྲུལ་ཟླ་བར་ཕུན་ཚོགས་ལུགས་བརྒྱའི་འདུན་ས་དཔལ་སྡེ་དགེ་ལྷུན་གྲུབ་སྟེང་གི་གཟིམས་ཆུང་ཁམས་གསུམ་ཟིལ་གནོན་འཆི་མེད་བདེ་ལྡན་བཀོད་པར། བདག་ཅག་སོགས་རིག་འཛིན་འདུས་པའི་ཚོགས་ཀྱིས་དཔལ་རྡོ་རྗེ་བཀོད་པ་ཀུན་འདུས་རིག་པའི་རྒྱུད་ཀྱི་དགོངས་དོན་ལུང་ཨ་ནུ་ཡོ་ག་འདུས་པ་ཆེན་པོ་མདོའི་ཚོམ་བུ་ཚོགས་ཀྱི་སྒྲུབ་པ་བསྙེན་སྒྲུབ་ཡན་ལག་བཞི་ལྡན་དང་འབྲེལ་བར་བདུད་རྩི་བདེ་བ་ཆེན་པོའི་དཀྱིལ་འཁོར་དུ་ཕྱི་ནང་གི་རྟགས་མཚན་དགེ་བ་བཅས་ལེགས་པར་བསྒྲུབས་པ་སྟེ། ཕན་ཡོན་ནི། གོང་དུ་སྨོས་པས་མཚོན་རྒྱུད་ལུང་མན་ངག་རྣམས་ནས་རྒྱ་ཆེར་གསུངས་པ་ལྟར་ཤེས་པར་བྱའོ། ། ༈

[edit]

'gro 'dul mchog gyur bde chen gling pas spyan drangs pa'i dam rdzas rten 'dus rab 'byams gta' spel bgyis pa'i dkar chag/ 'gro 'dul mchog gyur bde chen gling pas spyan drangs pa'i dam rdzas rten 'dus rab 'byams gta' spel bgyis pa'i dkar chag snying po shin tu bsdus pa gzhan phan mkha' khyab tu rtag pa'i lha'i rnga sgra zhes bya ba bzhugs so/_/oM swa sti sid+d+hi rastu/__rtsod bral dus bab kyi gter ston o rgyan mchog gyur bde chen gling pas rab byung bcu bzhi pa'i don grub ces pa sa mo lug gi lo'i snron zla ba yan chad la nyung 'bru lta bu'i ring bsrel/__sku gdung gi ring bsrel/__sku bal gyi ring bsrel/__chos kyi ring bsrel/__myong grol gyi ril bu/__bdud rtsi phur ma sogs rab 'byams zhig gter nas bzhes pa las rang gi lag tu ji tsam son pa 'gro don rgya che la rgyun mi 'chad pa'i lhag bsam bzang pos gta' spel ji ltar bgyis pa'i tshul la gsum/__myong grol ril bu'i skor/__bdud rtsi sman gyi skor/__de rnams thun mong du sbyar ba'i skor ro/__/dang po la rnam grangs sum cu rtsa bdun las/___/__!_ thog mar yon tan gyi thugs kyi gnas mchog dpal spungs yang khrod de wI ko Ta gsum pa tsA 'dra rin chen brag nas spyan drangs pa'i bde bar gshegs pa thams cad kyi gdung gi ril bu dam rdzas rin po che'i tog ni/__gangs thig dang /__cu gang zhib btags dbang lag gi dam che bar sbyar te chu gtsang gis sbrus par/__sangs rgyas 'od srung gi ring bsrel/__gu ru'i tshems las byung ba'i ring bsrel gyi 'phel phye/__dga' rab gdung rten phye ma rnams dang lhan cig phab gta' kha che'i chur sbyangs pa blugs nas ril bu yungs kar 'bru dgu'i tshad du dril/__li khri'i na bza' gsol ba skam thag chod pa dang /__gser 'dur gyis mdog bsgyur/__kun 'dus rig pa rdo rje bkod pa'i rgyud las gsungs pa ltar ring bsrel sgrub pa'i sngags kyis byin gyis brlabs/__skye bdun ril sgrub chen mo'i sgo nas legs par bsgrubs pa ste/__ji skad du/__rgyal ba'i ring bsrel nor bu'i mchog__/dgos 'dod thams cad 'byung bar byed/__/nyan thos rang rgyal byang chub sems/__/de bzhin rnal 'byor ldan pa'i gdung /__/mchod cing lus la bcang pa yis/__/gdon kun phyogs su nye mi nus/__/zhes sogs gsungs pa ltar/__mthong thos myong dang mgul du 'chang ba tsam gyis kyang nad gdon sgrib gnyis zhi zhing srung ba dang /__tshe bsod ye shes rgyas pa sogs gnas skabs dang /__mthar thug rdzogs pa'i byang chub myur du thob pas mtshon dgos 'dod yid bzhin du 'byung ba'i phyir byin rdzas thams cad kyi mchog tu grub pas nor bu rin po che tog gi blo gros dang mtshungs pa las kyang khyad par du mas 'phags pa nyid do/__/__!_ kha la rong sgo nas bzhes pa'i rdzogs pa'i sangs rgyas 'od srung dang /__seng chen gnam brag nas spyan drangs pa'i thub pa chen po'i sku chos kyi zeg ma ril bur dril ba dam rdzas mthong grol chen mo ni/__de dag gi zeg ma cong zhi dang zhib btags kha che'i chur sbyar ba/__'bru dkar gyi phye/__gur gum dang /__tsan+dan dkar po dri thon bcas kyi phye mar brdzis te ril bu nyung kar sbom po'i tshad du dril/__'gro 'dul ngan song dong sprugs dang /__skye bdun ril sgrub chen mo'i sgo nas bsgrubs pa ste/__mthong thos myong dang 'chang bas bar chad thams cad srung zhing /__bsam dgu'i don kun 'grub pa sogs phan yon bsngags pa nyung 'bru lta bu'i ring bsrel dang mtshungs pa nyid do//__//__!_ yon tan gyi gsung gi gnas mchog bde chen pad+ma shel phug gi dbu rtse nas spyan drangs pa'i dga' rab rdo rje'i gdung rten ril bu dam rdzas bstan pa'i btsas su bsngags pa myong grol kun gyi rgyal po 'khor 'das rang grol ni/__gdung rten dwangs ma dang shrI sid+ha yab yum gyi byang sems/__bram ze skye bdun zla ba dri med kyi gdung las grub pa'i gter sgrom bcas zhib par btags pa'i phye ma la dbang po lag pas dam sbyar te chu gtsang gis sbrus nas ril bu yungs kar sbom po tsam du dril ba dpal rdo rje sems dpa' thugs kyi sgrub pa dang /__dga' rab snying tig las 'byung ba'i myong grol gyi ril sgrub ltar lan mang du bskyar nas bsgrubs pa ste/__gter lung las/__'jig rten kun tu rnyed dka' ba'i:__myong grol bye ba'i rgyal po ni:__rin chen nor bu kun gyi mchog:__dga' rab dgyes pa rdo rje yi:__shel gyi gong bu'i gdung rten che:__shrI sid+ha yab yum dang :__o rgyan yab yum snyoms zhugs pas:__bde bar gshegs pa thams cad kyi:__ye shes gzugs sku zhal du drangs:__sku yi dbyibs brgyud mkhar 'khyil ba'i:__byang chub sems kyis rab tu spel:__'phags mchog snying rje chen po yi:__rnam 'phrul 'brel tshad don ldan pa:__bram ze zla ba dri med kyi:__gdung gi rus pas bung bskyed de:__ma 'ongs sems can don slad du:__sgrub gnas kun gyi rgyal po ni:__pad+ma shel gyi phug pa yi:__sgo skyong d+hA ki'i _brag la sbas:__nam zhig smon lam dus bab tshe:__gter 'byin kun gyi rgyal po che:__mchog gi ming can skyes bu yis:__phyi nang rten 'brel gnad 'grigs pas:__glo bur thog bab tshul du 'don:__'jam dpal chos kyi bshes gnyen gyis:__byin brlabs dbang gi ming can sogs:__las can rnams kyi skal bar 'gyur:__zhes dang /__de lta bu yi myong grol rgyal:__'di nyid myong bas ngan song med:__gal te ngan song yod srid na:__rdo rje sems dpa' rdzun du thal:__dga' rab rdo rje'i bden pa rdzun:__'jam dpal bshes gnyen mkhyen rab rdzun:__shrI sid+ha'i ye shes rdzun:__o rgyan pad+ma'i rdzu 'phrul rdzun:__de rnams 'phags chen sa brnyes phyir:__rdzun mi srid cing bden pa che:__de bas grub pa'i rdzas mchog 'di:__gnas skabs bcud len rnams kyi mchog:__mthar thug thar par 'dren pa'i lam:__bde chen 'pho ba chen po'i rdzas:__dwangs ma 'od skur grub pa'i bcud:__mthong thos dran reg thams cad kun:__rtsol med ngang gis grol byed pa:__rdo rje sems dpa' nyid dang mtshungs:__zhes myong grol kun gyi rgyal por ches mchog tu bsngags so/___/__!_ yon tan gyi phrin las gnas seng chen gnam brag gi brag gong mo 'og nas spyan drangs pa'i 'jam dpal bshes gnyen shes rab ril bu ye shes sems dpa'i dwangs bcud ni/__gter lung las 'byung ba ltar/__spang rgyan dkar po dang /__a ru ra phyed khyer du byas par/__sgrub gzhung las bshad pa'i shu dag dkar po dang /__cu gang phye ma zhib btags shing mngar gyi chus sbrus pa la/__phab gta' kha che'i chur sbyar ba blugs nas ril bu sran ma tsam du dril/__bla ma'i thugs sgrub bar chad kun sel gyi 'jam dpal smra ba'i seng ge'i ril sgrub dang /__'jam dpal snying tig gi man ngag ltar snga phyir bskyar nas bsgrubs pa ste/__de lta'i phan yon kyang /__bla ma'i thugs sgrub zhal shes las/__de ltar sgrub pa'i ril bu ni:__zhag bdun bsten na rmongs pa sel:__bcu gnyis mi brjed gzungs thob cing :__bdun gsum ye shes snang ba 'char:__yun du bsrings na nad sel zhing :__lus kyis 'chi med bcud len 'grub:__ngag snyan tshangs pa'i dbyangs ltar 'gyur:__yid la mngon shes phyogs med 'char:__'jam dpal gzhon nu dang mtshungs pa'i:__zab cing rgya che'i blo gros thob:__rmongs pa'i dud 'gro yin kyang rung :__ril bu dri tsam tshor bas kyang :__'jam pa'i dbyangs kyi rig sngags mthus:__sgrib pa'i dri ma rab srab nas:__phyi ma mtho ris rten thob cing :__blo gros rgya cher ldan par 'gyur:__de phyir snying rjer ldan pa yis:__kun la 'gro don rgya cher bya:__e ma ngo mtshar rmad kyi chos:__myong grol rdzas kyi sbyor ba'o:__zhes gsungs so/___/__!_ gsung gi yon tan gyi gnas chen nam mkha' mdzod nas spyan drangs pa'i gu ru yab yum gyi byang sems bde bar gshegs pa thams cad 'dus pa'i dam rdzas rol pa chen po bde chen rang grol ni/__gzhi gu ru yab yum gyis bam sgrub mdzad pa'i sa sbyin bzang po la/__gter byon cu gang /__sin+d+hu ra/__tsan+dan dkar dmar/__ga bur/__gi waM rnams dang /__'bras gsum/__bzang drug sogs byang sems dkar dmar gyi sman gyi skyobs phran bu dang bcas sbyar nas zhib par btags pa'i phye ma gur gum gyi dwang chus sbrus pa la/__gong du smos pa'i phabs gta' dang /__'bur mo gnas kyi gter byon dam rdzas rol pa chen po'i ril bu gsum bcas kha che gur gum gyi grung chur yun ring du sbangs shing 'dres par 'dur ba'i khu ba blugs te ril bu sran chung skam pa tsam dang /__leb mo cha shas bcas bzos nas/__thugs sgrub snying byang las gsungs pa'i ma sgom sangs rgyas chos drug gi dam rdzas myong grol gyi sgrub pa dang /__bla ma'i thugs sgrub spyi'i sgrub khog las gsungs pa ltar snga phyir legs par bsgrubs pa ste/__'di'i lo rgyus las/__tshe bdag pad+ma'i zhabs la phyag 'tshal 'dud:__dam rdzas rol pa chen po'i yig chung ni:__nam mkha' rdzong du sman sgrub mdzad pa'i tshe:__o rgyan pad+ma yab yum mnyam sbyor ba'i:__bde bar gshegs pa nam mkha'i skar tshogs tsam:__yab yum sku la thim zhing 'od du zhu:__rgyal kun 'dus pa'i bdud rtsi mkha' la 'khyil:__dad ldan don du phyi ru bab pa la:__bam por sprul pa'i gang bu re re yang :__rje 'bangs so so'i yi dam dang mthun pa'i:__srog gi yig 'bru'i tshul du byon pa rnams:__gcig tu bsdus te gter du sbas pa ni:__mthong ba tsam gyis ngan song skye sgo chod:__myong ba tsam gyis mkha' spyod gnas su 'dren:__'jigs pa'i 'phrang las 'dren pa'i dam pa'i rdzas:__bder gshegs thams cad bde bar rol pa yi:__thugs rje'i lcags kyu chen po 'di kho na:__dam rdzas myong grol snying la gces par gyis:__zhes yon tan bsngags pa bsam gyis mi khyab par gsungs pa dang rjes su mthun pa nyid do/__/__!_ gsung gi thugs kyi gnas mchog na bun rdzong nas spyan drangs pa'i slob dpon rin po che'i shangs mtshal ril bu dam rdzas nyi ma chen po ni/__gter byon sogs kyi sin+d+hu ra dang /__tsan dan dmar po phon mang ba la gzhi byas/__sih+la/__skyu ru ra/__star bu/__gnas chen rnams kyi cong zhi dmar po/__gangs ri'i lha btsag__li shi/__gur gum bcas kyi phye ma shin tu zhib par kha che'i chus sbrus ba'i zan la/__gong smros phab gta' dang /__seng brag gter byon o rgyan rin po che'i sku tshab kyi gzhi shangs mtshal mthug pos byugs pa las cha shas lhung ba dag kha che'i grung chur yun du sbangs te blugs/__ril bu nyung kar sbom po'i tshad tsam du dril nas/__pad+ma'i rigs kyi bdag po snang ba mtha' yas su bskyed cing bzlas pas byin gyis brlabs pa dang /__myong grol ril sgrub chen mo'i sgo nas bsgrubs pa ste/__gter kha gzhan nas 'byung ba'i dam rdzas pad+ma rA ga'i yig chung las/__gsung gi rdo rje pad+ma saM b+hA ba'i:__gnyis med ye shes thugs rje chags pa'i mdangs:__dngos med dngos po'i tshul du rang snang ba'i:__shangs mtshal ril bu nyung kar 'bru tshad tsam:__de las 'phel ba che phra dpag tu med:__sus myong nad gdon sdug bsngal thams cad zhi:__khyad par mdze dang ma mo 'khrugs pa'i yams:__shin tu gso dka' thams cad sel bar byed:__tshe bsod rgyas shing nyams rtogs 'phel ba dang :__mchog gi sid+d+hi tshe 'dir thob par 'gyur:__zhes sogs rgya cher gsungs so/__/__!_ ke rong rdo rje cong phug gi gter byon gzi sgrom nas byung ba'i o rgyan yab yum gyis shel brag tu bsgrubs gnang rdo rje tshe'i ril bu 'chi med bdud rtsi'i dwang bcud ni/__gzhi sin+d+hU ra 'dam btags so mi segs par byas pa dang /__'bras dkar gyi phye ma la/__bum rdzas nyer lnga/__dbang lag__'bras gsum/__cong zhi/__brag zhun/__rtsa ba lnga/__rtag du/__durba bcas cung zad sbyar ba zhib btags dang /__shing mngar ro 'gyur ba/__tsan+dan dkar po dri thon/__gter chen mchog nas snga phyir thugs sgrub kyi sgrub pa gnang skabs/__tshe rdzas/__seng brag dang /__shel phug gi tshe chu/__tshe sgrub dkar po'i bum chu sogs lhan cig tu brdzis pa'i zan la/__phab gta' kha che'i dwang chur sbangs pa bsres nas ril bu sran chung 'phos pa tsam du dril/__rgya mtshal dang sin+d+hU ra bsres pa'i na bza' gsol/__thugs sgrub bar chad kun sel gyi bla ma longs sku pad+ma tshe dpag med rigs lnga'i ril sgrub dang /__sgyu 'phrul tshe dkar rigs lnga'i sgrub pa la brten nas byin gyis brlabs pa ste/__zhal gdams kyi gzhung las/__ril bu'i dri tsam tshor bas kyang :__gdon bgegs zhi zhing tshe bsod 'phel:__dam tshig ldan pas bsten gyur na:__tshe dbang rig 'dzin nges par 'grub:__ces dang /__gzhung gzhan las kyang rgya cher gsungs so/___/__!_ yon tan phrin las kyi gnas mchog seng chen gnam brag gi brag gong mo 'og ma nas/__ji skad du/__zab gter gyi tho byang las/__dam rdzas dang po dga' rab rdo rje yi:__bde chen ye shes bdud rtsi'i phab gta' yin:__'jam dpal bshes gnyen shes rab ril bu gsum:__klu sgrub snying po'i klu sman ril bu gcig:__rig pa'i ye shes sman gyi ril bu gsum:__in+d+ra b+hu ti'i rin chen ril bu bzhi:__skye bdun sha yi ril bu bdun tshar dang :__thugs rje chen po'i ma Ni ril bu lnga:__sangs rgyas gsang ba'i rdor sems ril bu gsum:__po tA la yi 'bru dang sman gyi rigs:__zhes gsungs pa ltar sngar yongs su ma grags pa'i rdzas mchog ngo mtshar can rab 'byams zhig khrom gter du spyan drangs par mdzad pa las/__thugs rje chen po'i ma Ni ril bu 'gro 'dul 'phags pa'i thig le rigs drug dong sprugs ni/__spyan ras gzigs rtag du gtsor gyur gnas chen rnams su skyes pa'i rtag du rigs gsum dang /__'bru dkar gyi phye ma sbyar ba chu gtsang gis sbrus par/__phab gta' kha che'i chur sbyangs pa blugs nas ril bu sran chung tsam du dril/__mtshal gyis na bza' gsol/__gter kha gsar rnying gi thugs rje chen po'i sgrub chen dang 'brel bar byin gyis brlabs pa ste/__'di'i phan yon spyir btang nyang gter 'gro 'dul gyi gzhung las/__yi ge drug pa'i sngags kyi sgra:__thos pas ngan song skye sgo gcod:__ril bu la btab zos gyur na:__tshe ring rgas sra nad gdon sel:__tshe rab 'phags pas rjes bzung zhing :__las ngan sgrib pa kun byang ste:__bde ba can tu nges par skye:__zhes sogs rgya cher gsungs pas mtshon te shes par bya'o/___/__! seng chen gnam brag nas spyan drangs pa'i thugs rje chen po'i rnam 'phrul bram ze skye bdun sha'i ril bu rdzas kyi thig le ngan song dong sprugs ni/__'bru dkar gyi phye ma dang /__shing tshwa ro 'gyur nges sbyar nas brdzis pa'i zan la/__phab gta' kha che'i khu ba gar mo la sbyangs pa blugs/__ril bu nyung dkar 'bru dgu'i tshad du dril/__thugs rje chen po gsang ba 'dus pa sogs kyi skye bdun ril sgrub chen mo'i sgo nas legs par bsgrubs pa ste/__'di'i phan yon gter kha tha dad nas bsam gyis mi khyab pa zhig gsungs pa dang /__khyad par thugs sgrub zhal gdams snying byang du lung drangs pa/__ngan song dong sprugs 'gro ba 'dul ba'i rgyud chen po las:__bcom ldan 'das pad+ma'i spyan gyis mkha' 'gro ma gar gyi dbang mo la bka' stsal pa:__don gyi bdud rtsi myong grol ni skye ba med pa'o:__rtags kyi bdud rtsi myong grol ni skye ba bdun pa'i bcud do:__mtshan ma'i bdud rtsi myong grol ni tshul bzhin tu bsgrubs pa'i ril bu'o:__'di ni ngan song dang 'khor ba thams cad dong nas sprugs pa'i thabs chen po 'phags pa'i thugs rje las rang byung ba'o:__'gro ba'i re 'dod tshul bzhin tu skong ba'i yid bzhin gyi nor bu'o:__'di nyid sems can gang dang gang gis mthong ngam:__thos sam:__reg gam:__mgul du 'chang ba'am:__dri tshor ba'am:__khar myong ba sogs 'brel tshad thams cad kyi tshe rabs thog ma med pa nas bsags pa'i sdig sgrib thams cad dung dkar gyi rdul phyis pa bzhin dag par 'gyur ro:__'khor ba dang ngan song du skye ba'i las kyi sgo chod par 'gyur ro:__mtho ris dang thar pa'i sa bon theb par 'gyur ro:__gzhan yang nad dang :__gdon dang :__yid mi bde ba thams cad zhi zhing :__tshe dang bsod nams ye shes thams cad rgyas par 'gyur ro:__bgegs dang bar du gcod pas mi tshugs pa'i srung ba chen por 'gyur ro:__mdor na gzhan mang du smos ci dgos te:__ril bu gang gi ltor song ba'i sems can de 'phags pa'i gdung 'dzin pas spyan ras gzigs dbang phyug dang skal pa mnyam par shes par bya'o/__/zhes gsungs pas mtshon no/___/__!_ thugs kyi yon tan gyi gnas mchog lho zla'i karma'i 'bum rdzong nas spyan drangs pa'i o rgyan rin po che'i phyag dril thugs rje chen po'i myong grol gyi ril bu byin rlabs kyi thig le 'khor ba dong sprugs ni/__gter kha 'di'i thugs rje chen po 'khor ba dong sprugs kyi ril bu'i lo rgyus las/__'khor ba dong sprugs ril bu 'di:__bdag dang rje 'bangs stong phrag gis:__bsgrub tshe thugs rje'i lha tshogs rnams:__dngos su thim pas sus myong ba:__thugs rje chen por gnyis su med:__gzhan yang 'di las ches cher spel:__ril bu re la khri re bsgrub:__yig drug khri phrag re bzlas nas:__ril bu su dang sus myong ba:__ngan song med par the tshom med:__ces bsngags pa nyid kha che'i grungs chur sbyar ba/__'gro don chos drug gi myong grol ril sgrub las 'byung ba ltar nas dkar gtsang ma'i zan dang sbyar zhing o rgyan rje 'bangs nyer lnga'i chos sman dang /__bde bar gshegs pa thams cad kyi gdung gi ril bu dang bcas te yungs kar sbom po'i tshad tsam du dril ba la mtshal gyi na bza' gsol/__rang gzhung gi man ngag dang /__skye bdun sgrub chen gyi sgo nas legs par bsgrubs te/__gter rnying phal mo cher/__ril bu su yi ltor song ba:__tshe rabs gang dang gang skyes kyang :__spyan ras gzigs dang 'bral mi srid:__skye ba dran cing thos pa 'dzin:__yon tan bsngags pa tshad las 'das:__zhes dang /__byang gter 'gro don las sbyor lnga pa las/__rdzas de sems can thams cad kyi:__lus la reg gam lto ru btang :__thams cad las ngan mtha' byang nas:__rim gyis 'phags pa'i zhing du skye:__gang zhig 'chi kha'i sems can gyis:__rdzas de ltor btang sdig sgrib dag:__bar do'i duHkha 'phags pas skyob:__rdzas de tshong 'dus srang mdo dang :__dur khrod gnas dang ri mtho'i gnas:__gang du bzhag pa dge ba'i gnas:__de la reg gam dri tshor ba'i:__sems can thams cad mtho ris 'gro:__'di yi yon tan brjod mi long :__zhes sogs dang mthun par gzhung 'di nyid las kyang rdo rje'i smon lam du mdzad pa bzhin no/___/__!_ gnas chen nam mkha' mdzod nas drangs pa'i 'phags pa thugs rje chen pos byin gyis brlabs pa'i ri bo tA la'i sa rdo myong grol gyi ril bu dam rdzas sdug bsngal zhi byed nyon mong rang grol ni/__gter gzhung yid bzhin 'khor lo'i man ngag las:__bdag 'dra pad+ma 'byung gnas kyis:__ma 'ongs bod la phan pa'i phyir:__po tA la yi gnas su phyin:__'phags pa thugs rje chen po la:__zhi mthun tshe nor chos rnams ni:__sgrub thabs zhus pas gdams pa dang :__po tA la yi sa rdo la:__thugs rjes byin brlabs bdag la gnang :__mchims phur bsgrubs te bod khams su:__dam rdzas sdug bsngal zhi byed 'gyed:__bod khams bde zhing skyid pa byung :__rgyal khams ma Nir bdag gis bskul:__phyi rabs rjes 'jug de bzhin mdzod:__gdams pa dam rdzas 'di lta bu:__gter kha gcig las sbas pa med:__lha sras skye bar 'phrod par shog:__ces gsungs pa ltar ngo mtshar byin rlabs kyi phung por yongs su grub pa'i myong grol nyid gur gum gyi phye ma dang lhan cig tu zhib btags chu gtsang la sbyangs par/__de'i thum shun cong zhi dang lhan du 'dur ba btab/__gnas chen pad+ma shel phug sogs las byung ba'i sa zhag dkar dmar/__cong zhi/__cu gang /__sin+d+hU ra/__phran bu bcas zhib 'dur tsan+dan dmar po'i khu gar gyis sprus pa'i zan dang sbyar te ril bu sran chung tsam du dril/__thugs rje chen po yid bzhin 'khor lo rtsa ba'i bum sgrub dang /__yan lag chos 'phel pa/__phan tshun mthun pa/__nor dang longs spyod rgyas pa/__tshe spel bar byed pa'i bum pa sgrub pa'i man ngag rnams kyis legs par bsgrubs pa ste/__myong grol gyi phan yon spyi dang /__khyad par nad gdon sdig sgrib thams cad zhi zhing phan tshun mthun cing skyid pa dang /__tshe chos longs spyod thams cad 'phel ba dang /__bum gter gyi snying por sbas na yul phyogs de thams cad la gong gi phan yon 'byung ba sogs bsam gyis mi khyab pas/__las sbyor gyi man ngag zhib tu shes par 'dod na gter gzhung rtsa ba man ngag phyag bzhes kyis brgyan te rtogs par bya'o/__/__!_ go stod 'od 'bar brag nas spyan drangs pa'i sid+d+hi ril bu dam rdzas myong grol phrin las rol pa'i lo rgyus bzhugs so//_//oM swa sti/__/sprul pa'i gter ston rin po che o rgyan mchog gyur bde chen gling pas go stod 'od 'bar brag nas spyan drangs pa'i sid+d+hi ril bur grags pa dam rdzas myong grol phrin las rol pa'i lo rgyus ni/__o rgyan rin po che'i gsung bzhin ye shes mkha' 'gro mtsho rgyal gyis zin bris su mdzad pa'i dkar chag las/__pad+ma badz+ra rtsal la phyag 'tshal lo:__bla ma'i thugs sgrub zab mo bsam yas kyi:__snying po sku gsum spyi dang bye brag ste:__de dag kun gyi phrin las sbyor ba'i ched:__dam rdzas myong grol sgrub pa'i phabs 'di ni:__bod yul gling dgu'i sa yi lte ba mchog:__sprul pa'i zhing khams brag dmar bsam yas kyi:__dben gnas mchims phu dbang chen pho brang du:__bka' 'dus rgya mtsho sgrub pa'i tshogs gral nas:__dkyil 'khor gtso mchog khyab bdag bde ba che:__gu ru pad+ma'i sku yi bkod pa ni:__bsam gyis mi khyab 'khor 'das kun tu 'phros:__'das dang da ltar bzhugs pa'i rdzogs sangs rgyas:__byang sems khyu mchog kun gyi ye shes rnams:__'od kyi gong bu bye ba mtha' yas su:__spyan drangs rin chen bum pa'i nang du zhugs:__de bzhin 'jig rten snod bcud bdud rtsi'i tshogs:__gcig tu bsdus nas sngar bzhin thim pa las:__slob dpon chen po'i ting 'dzin cho 'phrul gyis:__de nyid dam rdzas dngos po'i gzugs su sprul:__ma 'ongs dad ldan mthong thos dran reg kun:__skye ba bdun nas 'bad med grol ba'i phyir:__phrin las rten mchog snying po'i btsas su bzhag:__phyi ma'i dus su las can skyes bus rnyed:__de tshe 'gro 'dul chos kyi bdag po yis:__dam rdzas sel med rnams dang lhan cig gam:__'di nyid kho na rin chen snying po bzhin:__khams sa'am ni 'bru dkar phye ma dang :__legs par sbyar te dam rdzas ril bu'i tshad:__yungs kar lnga bsgril tsam du byas nas su:__phabs kyi ril bu re rer 'bum du spel:__tshul bzhin bsgrubs pa'i ril bu sus spyod pa:__tshe 'dir nad dang sdug bsngal bar chad zhi:__legs dgu'i bsam pa thams cad 'bad med 'grub:__phyi ma ngan song gsum gyi skye sgo gcod:__mtho ris mi lus chos ldan nges par thob:__rdo rje gsang mchog nye lam la brten nas:__skye ba bdun nas 'bad pa med par grol:__ril bu 'gyed la gu ru'i snying po mchog:__gsung rab yan lag bcu gnyis 'dus pa'i bcud:__:bla ma'i gsang sngags yi ge bcu gnyis pa:__kun la bskul zhing mthong thos dran reg kun:__byang chub snying por 'god pa'i smon lam gdab:__de tshe rnga yab dpal gyi ri bo nas:__o rgyan ye shes sems dpa' mngon sum byon:__dad ldan skyes bu'i snying la zhugs nas kyang :__byang chub bar du mi 'bral byin gyi rlabs:__bod yul 'phral yun bde thabs de las med:__gu ru'i zhal chems yin no phyi rabs rnams:__kho mo mtsho rgyal bod la sems brtse ste:__gdams pa'i yang snying bla ma'i sgrub khog dang :__dam rdzas yang snying phrin las rol pa gnyis:__ma 'ongs don du zab mo'i gter du sbas:__gal chen don la mos pa'i sems kyis spyod:__yal bar ma dor phyi rabs skyes bu rnams:__tha tshig snying la phur zhig sa ma ya:__rgya rgya:__zhes gsungs pa ltar/__byin brlabs kyi gzi byin mchog tu 'bar ba'i ril bu 'di nyid rdo rje'i lung gis rgya cher spel bar bsngags pa'i rjes su 'brangs te/__bka' brgyad bde gshegs 'dus pa'i dpal dgu'i rten thod nas byung ba'i 'bru dkar gyi phye gtsang ma dang /__tsan+dan dkar po dri thon/__sprul pa'i gter chen rin po che nas thugs sgrubs dang /__bka' brgyad kyi tshom bu tshogs sgrub gnang ba'i bum chu/__bdag cag gis 'og min tshogs chen 'dus pa theg dgu yongs rdzogs kyi dkyil 'khor du bsgrubs pa'i bum chu kha che'i khu gar dang bcas kyis ril bur dril nas/__don grub ces pa sa mo lug gi lo'i dbo zla ba'i dkar phyogs kyi tshes bcu nas brtsams/__dpal sde dge lhun grub steng gi sgrub khang bla brang phan bde kun khyab gling du skyabs mgon rdo rje 'dzin pa chen po 'jam dbyangs nam mkha' rgyal mtshan dpal bzang po'i zhal snga nas kyis gtso mdzad/__bdag cag 'dus pa rnams kyis bla ma'i thugs sgrub bar chad kun sel dang /__thugs sgrub yid bzhin nor bu bsam pa lhun grub ma zung du 'brel ba'i gzhung la gong gi dam rdzas nyid dang lhan gcig tu spyan drangs pa'i/__'gro ba'i don tu dam rdzas myong grol gyi sgrub pa bla ma'i bsnyen sgrub las gsum dang 'brel ba'i gdams pa zhes sgrub chen gyi khog 'bubs pa'i cho ga khyad par can sbyar te/__bsnyen sgrub yan lag bzhi ldan gyi sgo nas bsgrubs pa 'dis kyang mthong thos dran reg gi 'gro kun 'khor ba dang ngan song gi 'jigs pa dang sdug bsngal thams cad las grol zhing /__mchog dang thun mong gi dngos grub rab 'byams yid bzhin tu 'grub pa dang /__o rgyan rdo rje 'chang chen po'i go 'phang la myur du reg pa'i rgyur sid+d+hi rastu/_/zhes pa'ang mtsho skyes bla ma dgyes pa'i 'bangs mkhyen brtse'i dbang pos so/___/__!_seng chen gnam brag nas spyan drangs pa'i slob dpon chen po sangs rgyas gsang bas rdo rjer sems dpa' sgyu 'phrul drwa ba chen po phyag rgya gcig pa dang /__phyag rgya spros bcas kyi dkyil 'khor du bsgrubs pa'i rdo rje sems dpa'i ril bu bde ba chen po'i thig le nyams chag dong sprugs ni/__sbas gnas chen po rnams nas byung ba'i cu gang gzhi byas/__gangs tig__/cong zhi/__sin+tu ra/__yungs kar bcas cung zad re sbyar ba zhib btags chu gtsang gis sbrus pa'i zan la/__phabs gta' chu gtsang du sbyangs pa blugs te ril bu sran ma tsam du bsgril bar rgya dkar gyi dwang mas na bza' gsol/__dpal rdo rje sems dpa' thugs kyi sgrub pa'i grol lam gsum gyi man ngag dang /__dga' rab snying tig gi ril sgrub kyi sgo nas snga phyir tshad ldan tu bsgrubs pa ste/__'di'i phan yon kyang /__grol lam gyi man ngag las/__de lta bu yi dam rdzas de/__gang gis zos pas nyam chags sbyong :__dam tshig dngos grub kun thob nas:__'pho med bde chen grub par 'gyur:__zhes dang :__dga' rab rdo rje'i snying tig las/__bde chen rdo rje sems dpa' yi:__rdzas mchog myong bas grol ba 'di/__mthong thos dran reg tshor ba kun:__skye ba bdun nas 'bad med grol:__gnas skabs bgegs zhi nyam chag skong :__tshe dang lus kyi bcud len 'gyur:__zhes sogs rgya cher bsngags pa'i phyir dam rdzas kun gyi snying po ngo mtshar can no/___/__!_ 'dzi smad mkha' 'gro shel phug gi gter byon mkhan chen bo d+hi satwa'i sku chos ril bu dam rdzas myong grol chen mo ni/__gu ru chos kyi dbang phyug gi gter byon lung byang bde gshegs 'dus pa'i phyi ma las/__gsang ba'i bdag po kun dga' bo:__za hor yul du sku 'khrungs pa:__blo ldan snying stobs chen po ni:__b+ho d+hi satwa zhes bya ba:__mthong bas don yod sems dpa' ste:__ming tsam gyis kyang don chen byed:__zhes sogs gsungs pa ltar dpal gsang ba'i bdag po'i ye shes kyi sku ngur smrig 'dzin pa'i tshul du bstan pa dge slong byang chub sems dpa' chen po gangs ri'i khrod kyi thub dbang gnyis par gyur cing /__'brel tshad don ldan du bsngags pa mtha' yas pas na/__de'i sku chos kyi zeg ma cong zhi dang lhan cig zhib btags kha che'i dwangs chur sbyar/__'bru dkar gyi phye ma/__gur gum mdog 'gyur/__tsan dkar dri thon bcas kyi zan la sbyar nas ril bu nyungs kar sbom po'i tshad du dril/__myong grol ril bu'i bsgrub pas byin gyis brlabs pa ste/__gang gis myong ba dang mgul du 'chang ba sogs byang chub sems pa'i thugs bskyed dang smon lam bla na med pas phyi nang gi mi mthun pa'i phyogs thams cad zhi ba dang /__tshul khrims dang /__ting nge 'dzin dang /__shes rab kyi phung po rnam par dag pas thar pa'i myu gu gong nas gong du 'phel bar 'gyur nyid do/___/__! _karma'i 'bum rdzong gnas rnying gi gsang phug slob dpon rin po che nas sgrub chen mdzad pa'i stegs bu nas spyan drangs pa'i bram ze'i slob dpon chen po pra b+ha ha sti'i sku gdung ril bu skye bdun myong grol 'gro 'dul chen mo ni/__gangs tig dang /__gnas chen rnams kyi sa zhag kham pa la gzhi byas/__rtag tu rigs gsum dang bcas zhib btags chu gtsang gis sbrus par/__sku gdung gur gum dang lhan cig zhib btags kha che'i chur sbyangs pa blugs nas ril bu sran chung tsam du dril/__skye bdun sgrub chen gyi sgo nas legs par bsgrub pa ste/__phan yon kyang /__o rgyan chen pos/__gang zhig mnar med myong 'gyur kyang :__khyad 'phags rdzas 'di shig snying tsam:__ltor song rgyal ba'i go 'phang thob:__rlung phyogs dri tsam tshor bas kyang :__chos ldan mi lus nges par thob:__zhes gter kha thams cad las don mtshungs par gsungs pas mtshon te shes par bya'o/___/__!_ slob dpon pra b+ha ha sti'i gsang chen gser du gyur pa rnam snang ril bu bcud kyi snying po ni/__gnas chen nas byung ba'i sa zhag dkar po dang /__ser po dag la gzhi byas/__gla rtsi/__dz+wa ti/__a ga ru dkar nag__/spang spos bcas zhib btags chu gtsang gis sbrus par/__phabs gta' kha che'i chur sbyangs pa blugs/__ril bu nyungs kar sbom po'i tshad du dril nas bdud rtsi khrol sgrub sogs kyi skabs su dpal rtag pa'i rdo rje rnam rang snang mdzad kyi ngo bor byin gyis brlabs pa ste/__phan yon myong grol gyi skabs su bshad pa spyi dang /__bye brag tu 'di nyid kho na'am/__bdud rtsi mar khu sogs dang sbyar te bsten pa'i phan yon yon tan bdud rtsi'i rgyud las/__tshe dang bsod nams 'phel ba dang /__'byung ba snyoms nas lus bde ster/__bgegs kyis mi tshugs rims mi 'ong /__'gro ba rnams kyi mgon tu 'gyur/__kun la phan thogs nor bu dang /__gnod pas mi tshugs nam mkha' 'dra/__zhes gnas skabs dang /__dri chen rdo rje rnam snang mdzad/__/nyon mongs gti mug sbyong ba ste/__/chos kyi dbyings kyi ye shes thob/__/zhes mthar thug gi yon tan dang /__gzhan yang klu gdon 'joms shing /__mdze nad dang dug nad thub pa/__tshe dang lus kyi bcud len du 'gyur pa sogs mtha' yas par gsungs so/__/__! _slob dpon pra b+ha ha sti'i gsang chab gser du gyur pa'i mi bskyod ril bu bdud rtsi'i snying po ni/__sa zhag gser mdangs can la gzhi byas/__gur gum/__gla rtsi dri thon/__cong zhi/__brag zhun/__li ga dur/__li shi/__spos dkar rnams zhib btags chus sbrus pa'i zan la/__phabs gta' kha che'i chur sbyangs pa blugs nas ril bu nyungs kar sbom po'i tshad du dril/__/bdud rtsi khrol sgrub sogs kyi skabs dpal mi bskyod rdo rje sems dpa'i ngo bor byin gyis brlabs pa ste/__phan yon sku gdung myong grol gyi skabs su bshad pa spyi dang /__bye brag tu/__rang byung dwang ma bdud rtsi'i rgyun/__/mi bskyod dri chu zhes grags te/__/rims dang ga lhog 'brum nad srung /__/rnying pa 'byongs shing gsar pa zhi/__/lce bde gre 'gyur skad snyan 'byung /__/zhes sogs dang /__/dri chu rdo rje mi bskyod pa/__/nyon mongs zhe sdang sbyong ba ste/__/me long ye shes sku 'grub bo/__/zhes sogs rgya cher gsungs so/___/__!_ gsung gi thugs kyi gnas mchog na bun rdzong nas spyan drangs pa'i chos rgyal khri song lde'u btsan gyi gdung rus ril bu dam rdzas zla zhun chen mo ni/__/'jam dpal rtsa ba'i rgyud las sa 'od bzang po zhes lung bstan cing /__rig 'dzin rtsa ba'i rgyud las/__bA gi shwa ri'i thugs rgyud kyi/__/rig pa 'dzin gyis de bzhin te/__/bstan pa'i snying po rab tu 'dren/__/sogs nas/__brah+ma tshangs pa lha'i me tog de ba puSh+pe yis/__/kun gyi lung rtsal snang byed cing /__/mthar phyin byang chub son par byed/__/ces rje btsun 'jam pa'i dbyangs kyi rnam 'phrul bsngags shing /__byang chub chen por lung bstan pas na 'brel tshad don dang ldan pa'i phyir/__gter byon las spel pa'i ril bu dang /__sa skyong se nA shu b+ha'i rten khrod du bzhugs pa'i chos rgyal khri srong gi dbu thod la rigs gsum mgon po'i snang brnyan rang byon shin tu gsal ba'i cha shas brdar ba'i phye ma cong zhi dang lhan tu btags pa bcas kha che'i chur sbyangs/__gangs tig dang /__cu gang zhib btags kha che'i chus sbrus te mdog ngang ser du gyur pa'i zan dang sbyar nas ril bu nyungs kar sbom po'i tshad du dril/__bdud rtsi bsgrub pa sogs kyi skabs dpal don yod grub pa rdo rje rta'i rgyal po'i ngo bor byin gyis brlabs pa ste/__phan yon ni myong grol gyi skabs su bshad pa'i phan yon spyi dang /__rgyud las/__don yod grub pa rgyal po ches/__/dpal ldan don kun grub par byed/__/de phyir rnal 'byor pas bsten bya/__/zhes sogs rgya cher gsungs pa ltar ro/___/__!_ 'bur mo gnas nas spyan drangs pa'i mkha' 'gro mtsho rgyal gyi gsang chab gser du gyur pa'i ril bu dam rdzas rin chen snying po ni/__sa zhag gser mdangs can la gzhi byas/__dri chu'i skyobs gur gum sogs ji skad bshad pa rnams dang bcas zhib par btags te chu gtsang gis sbrus pa'i zan la/__phabs gta' kha che'i chur sbyangs ba blugs nas ril bu nyungs kar sbom po'i tshad tsam du dril/__rdo rje phag mo khros ma'i dkyil 'khor du rat+na d+hA ki ser mo don grub pa'i ngo bor byin gyis brlabs pa ste/__phan yon ni/__o rgyan dri med kun dga'i gter lung las/__gsang ba kun bzang rdo rje phag mo'i dbyings:__nang ltar 'gro 'dul rje btsun sgrol mar bzhengs:__de nyid thugs rje chen pos rgyud bskul nas:__phyi ltar bod 'dir mi mo mtsho rgyal ma:__mi brjed gzungs thob gsang sngags bka' bsdu mdzad:__'brel tshad don ldan byang chub sems ma che:__las lus ma yin dag pa ye shes sku:__ming tsam thos pas 'khor ba mtha' can 'gyur:__zhes sogs rgya cher bsngags pas na myong grol kun gyi rgyal por grub cing /__bye brag gi phan yon kyang /__nyang gter phag mo'i bdud rtsi'i gzhung las/__dri chu rin chen sprul pa'i sku:__mnyam pa nyid kyi ye shes thob:__zhes dang /__dri chus bdud dang 'brum nag thub:__ces sogs bsngags pa'i yon tan thams cad kyang yar ldan du 'byung ba nyid do/___/__!_ de ltar rnam snang ril bu sogs 'di rnams myong grol gyi rigs spyi dang /__khyad par bdud rtsi chos sman gyi rdzas la mchog tu bsngags so/___/__!_ sa spyod gsungs gi 'khor lo 'og min karma'i chos grwar me sbrul smin zla'i nang /__gter chen rin po che mkhan slob rnams kyis gter gsar yang phur sbrags ma'i sgrub chen mdzad skabs sgrub gtor las bdud rtsi shel ltar dwang zhing dri ro phun sum tshogs pa babs pa nyid gta' spel du sbyar ba'i dam rdzas bdud rtsi grub pa'i thig le la/__'bras dkar zhib btags dar tshags su drangs par gzhi byas/__shing mngar ro 'gyur ba/__tsan+dan dkar po dri thon/__de'i sum cha tsam tong ku/__gtor ma'i spod sman byin ldan phran bu bcas btag btsags bsre 'dur byas pa/__kha che'i khu ba gar mo dang /__chang la sbyar ba'i sbrang dkar gyi nying khu cung zad kyis sbol/__phabs rta kha che'i chur sbyangs pas bran te cha shas ril bu sran chung tsam dang /__byings rnams bdud rtsi phur ma'i tshul du byas pa/__bla ma yid dam gyi sgrub pa'i skabs dam rdzas gtor ma ltar byin gyis brlabs/__skye bdun myong grol sogs kyi skabs su'ang sgrub pa'i klong du bzhugs su gsol ba ste/__phan yon ni/__gter gsar myong grol sgrub khog tu rgyud kyi lung drangs par/__rdul tshon bum chu gtor ma sogs:__sgrub pa'i rdzas kyi cha shas tsam:__mthong thos reg pas don yod cing :__myong bas tshe bsod lus zungs 'phel:__sgrib dag thar pa'i sa bon theb:__bum pa'i snying por bzhugs pa'am:__rten gyi nang du gzhug kyang rung :__yul phyogs dge zhing bkra shis 'gyur:__ces sogs rgya cher gsungs pas myong grol ril bu dang :__bdud rtsi phur ma sogs la bsre ba dang /__bum gter gyi nang gzhug sogs la bsngags so/___/__!_ sku'i gsung gi gnas mchog 'og min karma'i dpal gyi de'u nas khrag 'thung mngon rdzogs rgyal po'i man ngag ma mo spyi bsdus kyi zab chos dang lhan cig tu spyan drangs pa'i sku gsung thugs kyi ril bu khyad 'phags tshul drug dang ldan pa la/__gzi brjid bskyed pa sku'i ril bu dam rdzas nyi ma'i snying po ni/__dam rdzas sgrub pa'i yan lag las/__dpal chen mngon rdzogs rgyal po yi:__'chi med bdud rtsi'i lung bsgrub tshe:__las kyi kha bsgyur yan lag ni:__sku gsung thugs kyi ril bu bsgrub:__gzi brjid sku yi ril bu ni:__a ru dbang lag ka ra dang :__dmar ser ba yi 'o mas bsgril:__zhes gsungs pa ltar/__a ru ra gser mdog dang /__dbang lag dug 'don bcud 'gugs sogs tshad ldan du byas pa cha mnyam pa'i phye ma/__ba gsar dmar zal gyi 'o ma dang shel ka ra sbyar bas sbol ba la phab gta' ba 'or sbyar ba bran te/__thog mar bdud rtsi phur ma'i tshul du 'og min tshogs chen 'dus pa'i bdud rtsi sman gyi cho gas bsgrubs/__slar yang ril bu sran 'phos tsam du dril nas sangs rgyas kun gyi sku rdo rje'i bdag nyid 'jam dpal ye shes sems dpa'i ngo bor byin gyis brlabs pa ste/__phan yon ni/__gnas skabs su lus kyi nad gdon zhi/__sdig sgrib dag__/tshe dang stobs dang gzi brjid rgyas/__gzhan snang zil gyis gnon/__skra dkar dang gnyer ma mi 'byung /__mthar thug lus kyi rtsa mdud grol zhing /__sku rdo rje sprul pa'i skur 'grub par byed pa sogs phan yon mtha' yas pas myong grol gyi rigs spyi dang /__bcud len gyi rdzas sogs la mchog tu bsngags so/___/__!_ dpal gyi de'u nas spyan drangs pa'i tshangs dbyangs skyed pa gsung gi ril bu dam rdzas zla ba'i bdud rtsi ni/__gter gzhung las/__tshangs dbyangs gsung gi ril bu ni:__khug gre spang rgyan kyi kye dang :__tsan+dan dmar po cha mnyam sbyar:__zhes pa ltar/__spang rgyan dkar po/__kyi kye dkar po/__tsan+dan dmar po rnams cha mnyam dang /__khu byug gi gre ba bcas zhib par btags pa tsan+dan dmar po'i khu bas sbol/__phab gta' tsan dmar gyi khu ba dang sbyar bas bran te 'og min tshogs chen 'dus pa'i bsnyen sgrub bzhi ldan bdud rtsi bde ba chen po'i dkyil 'khor du byin gyis brlab cing /__slar ril bu sran ma tsam du bsgril te gsung rdo rje 'jig rten dbang phyug gi ngo bor bsgrubs pa ste/__phan yon ni/__gnas skabs ngag gi nad gdon zhi/__sdig sgrib dag__/lce bde/__gre ba snyan/__dbang po gsal zhing dwangs/__yid 'phrog pa tshangs pa'i dbyangs lta bu 'thob cing /__mthar thug rlung dbu mar thim nas gsung rdo rje longs spyod rdzogs pa'i sku 'grub pa sogs mtha' yas pas na/__myong grol bdud rtsi'i rigs spyi dang /__khyad par blo 'phel gyi ril bu'i rigs sogs la mchog tu bsngags so/___/__!_ dpal gyi de'u nas spyan drangs pa'i bde chen skyed pa thugs kyi ril bu dam rdzas dga' bzhi'i thig le ni/__gter gzhung las/__bde chen thugs kyi ril bu ni:__sha chen lug mur cong zhi gnyis:__rgyal ba'i gdung rten ring bsrel bcas:__zhes gsungs pa ltar/__ston dus brkos pa'i lug mur gyi phye ma dang /__cong zhi mdzo mo'i 'o mar 'dam btags cha mnyam/__sha chen nus thon zhib btags bcas gar chang gis sbol/__de la phabs rta chang gi nying khur sbyangs ba la/__sangs rgyas kyi 'phel gdung dang /__dga' rab rdo rje'i gdung rten cong zhi dang lhan cig zhib tu btags pas bran pa'i bdud rtsi phur ma nyid dpal tshogs chen 'dus pa'i bde chen sbyor ba'i dkyil 'khor du he ru ka bye ba snyed yab yum gyi dga' bzhi'i zil dngar dang ro gcig tu byin gyis brlabs/__slar ril bu sran ma tsam du dril nas thugs rdo rje gsang ba'i bdag po'i ye shes su bsgrubs pa ste/__phan yon ni/__gnas skabs su yid kyi nad gdon zhi/__sdig sgrib dag__/nyams rtogs dang rig rtsal phyogs med du rgyas/__gzungs dran dang /__mngon shes ting nge 'dzin 'grub/__dga' bzhi'i ye shes la brten nas thugs rdo rje chos kyi sku'i go 'phang la sbyor ba sogs phan yon bsngags pa mtha' yas pas na/__myong grol gyi rigs spyi dang /__khyad par bdud rtsi phur ma dang ril bu sogs bla med kyi rdzas mtha' dag la mchog tu gces shing /__tshogs kyi 'khor lo'i dus su ma da na la sbyar nas bsten na nyams rtogs rtsol med du 'char ba dang /__ye shes dbab pa'i skabs su/__gla rtsi/__tsan+dan dkar dmar/__mi'i skra sen dang nywa bzhi'i sha__/mi klad/__tshil chen/__byang sems dkar dmar/__byi la'i brun/__gu gul/__spos kar/__shu dag nag po bcas kyi phye ma chang gis sbol ba dang sbyar zhing /__thugs sgrub snying byang gi pad+ma dpa' bo'i las tshogs ltar bsgrubs pa ro sol gyi mer bdug pas ye shes kyi zil chen lhag par 'beb ste/__bsnyen sgrub dus su bdug pa yis:__ye shes pa rnams dbang med 'du:__byin chen phebs shing nyams rtogs 'phel:__dngos grub rnam gnyis thob par 'gyur:__zhes sogs gsungs pas mtshon te/__dbang bskur ba'i dus su bdud rtsir sbyar nas byin pas dpe don gyi ye shes 'dren pa dang /__zab mo'i rnal 'byor gyi skabs su bstan pas ting nge 'dzin gnad du 'gro ba sogs mtha' yas par rtogs par bya'o/___/__! go stod 'od 'bar brag nas spyan drangs pa'i sku tshab rin po che thugs rje 'od 'phro'i rgyu dam rdzas dpal gyi snying po ni/__mthong grol sku rten rnam gnyis kyi dkar chag mkha' 'gro mtsho rgyal gyis mdzad pa las/__sku yi cha shas rdul phran re re dang :__ma dros sa dang bye ma a krong sbyar:__sku tshab grangs med spel la rab tu gnas:__dad ldan mos par mtshams pa'i rtags rnams 'byung :__gang du bzhugs pa'i phyogs der bkra shis shing /__thugs rje'i bdag nyid gu ru pad+ma yi:__byin rlabs nges par 'jug pa'i zhal chems yod:__shes rab can gyis legs par sems la spyod:__de bzhin sku rgyu'i cha shas phra mo dag:__'bur du btod dam ris su bris pa dang :__rgya las btab pa'i sku la 'dres pa ni:__ye shes sems dpa' dngos su bzhugs par 'gyur:__rten mchog grub dang rab gnas mnyam du 'byung :__zhes rgya cher bsngags pa ltar 'bras gsum/__bzang drug__/tsan+dan dkar dmar sogs bzang sman gyi phye ma kha che'i chus sbrus pa'i zan la/__phabs rta kha che'i chur sbyar bas ril bu rgya sran sbos pa tsam du bsgril/__'og min tshogs chen 'dus pa dang /__thugs sgrub rnam gnyis kyi sgrub pa chen po'i skabs su ye shes kyi gzi byin phabs shing bde bar gshegs pa thams cad 'dus pa'i ngo bor byin gyis brlabs pa ste/__phan yon ni/__gong du gter lung las gsal la/__ril bu re re sku tshab re bzhengs pa'i rgyu yin cing /__spyir gu ru'i sku tshab gtsor gyur rtsa gsum dang sangs rgyas byang sems sogs kyi snang brnyan rab 'byams bzhengs pa'i skabs sder sku'i rgyur bsre ba/__brdung dang blugs sku sogs kyi nang gzhug tu 'jog__/bris sku'i rigs kyi gzhir byugs pa'am tshon dang sbyar ba sogs gang 'os bya/__gzhan yang gsung rten spyi dang gzungs gzhug sogs 'bri ba dang spar ba'i tshe snag tshal bsre ba/__thugs chos sku'i rten gyi nang du gzhug pa sogs mdor na rten gsum gang la'ang mchog tu bsngags pa'i sngon med kyi grub pa'i rdzas ngo mtshar che ba'o/__/__!_ seng gnam brag nas spyan drangs pa'i sangs rgyas sman gyi bla ma'i ye shes kyi sku gzugs gzhan du snang ba drang srong chen po rig pa'i ye shes kyi 'chi med bdud rtsi sman gyi nor bu srid zhi'i thig le dug gsum dong sprugs ni/__a ru ra gser mdog spus legs kyi phye ma shin tu zhib pa chu gtsang gis sbrus pa'i zan la/__phabs rta chu gtsang dang sbyar ba blugs nas ril bu sran ma tsam du dril/__g.yu thog bla sgrub kyi las gzhung dang sman gyi dngos grub bsdu ba'i sngags gtso bor bton pas byin gyis brlab/__gzhan yang snga phyir bdud rtsi sman gyi sgrub pa dang /__thugs sgrub bsam pa lhun grub ma'i las tshogs o rgyan sman bla'i ril sgrub sogs kyis kyang bsgrub cing /__stong chen rab 'byams las gsungs pa'i sngags dang bden pa'i tshig gis lhag par gnas pa ste/__phan yon ni/__'di nyid grong khyer lta na sdug sman gyi nags tshal chen po'i a ru ra rnam par rgyal ba gtsor gyur sman thams cad kyi bcud bsdus pa gong bur grub pas myong grol gyi skabs su bshad pa'i phan yon thams cad 'byung bar ma zad/__spyir slob dpon chen po ngag dbang grags pas/__grub pa'i sman ni gzhan dag kyang /__/nges par bsten par gyur pa yis/__/tshe 'phel nad dang rgas pa ni/__/zad pas 'chi ba mi mthong ngo /__/zhes dang /__sman rnams kyi ni mthu la yang /__/som nyi bya ba rigs min te/__/gang phyir sman gyi nus pa ni/__/bsam mi khyab par kun tu snang /__/zhes gsungs pa ltar/__ril bu myong ba'am/__mgul du 'chang ba tsam gyis kyang stong phrag brgyad cu'i gdon bgegs kyis mi tshugs pa dang /__bzhi brgya rtsa bzhi'i nad zhi ba sogs byin nus bsam gyis mi khyab cing /__bye brag a ru ra rnam par rgyal ba gcig pu'i nus pas kyang /__dpal ldan rgyud las/__rlung mkhris bad kan 'dus pa'i nad rnams sel/__/khyad par bkra shis don kun 'grub pas bzang /__zhes dang /__bdud rtsi mchog gi lung las/__/ro nus yon tan kun ldan pa/__/rnam par rgyal ba'i dri tsam yang /__/gang gis mthong tshor myong ba na/__/nad 'phrog gdon zhi bgegs kun 'dul/__/bsam kun 'grub cing bkra shis byed/__/sman gyi nor bu chen po yin/__/ces bsngags pa dang /__khyad par o rgyan sman gyi bla ma'i sgrub rdzas su sbyar bas na thugs sgrub bsam pa lhun grub ma'i zhal chems las/__sus spyod 'du ba snyoms shing nad rnams zhi:__gdon bgegs bar chad phyogs su nye mi nus:__lus stobs 'phel zhing gzi brjid rig rtsal rgyas:__mthar thug 'khor ba ngan song sdug bsngal las:__rnam grol byang chub mchog gi rigs su 'gyur:__zhes pas mtshon te rgya cher shes par bya zhing myong grol chos sman sogs spyi dang /__rin chen ril bus mtshon sman sbyor khyad par can rnams la bsre ba mchog tu bsngags so/__/__!_ seng chen gnam brag nas spyan drangs pa'i slob dpon chen po klu sgrub snying po'i klu'i nor bu sman gyi ril bu rtsi sman kun gyi dwang bcud dge legs 'jo ba ni/__ril bu spel dpyad gter lung las klu sman thams cad tshogs pa'am/__spang spos kho nas kyang rung par gsungs pas/__'dir spang spos ston dus brkos pa'i rtsa ba snying po kho na logs su phye ba'i gtsang ma la gzhi byas/__klu sman gyi sbyor ba rgyas bsdus mtha' yas par gsungs na'ang /__yongs su grags shing rnyed sla ba seng ge sgra'i cho ga las byung ba/__bzang po drug__'bras bu gsum/__rgya mtsho sbu ba dngos 'khrul med snyed dka' na'ang /__de'i tshab chu bal sngon po srog chags sogs kyi ro med pa'i gtsang ma grib skam byas pa/__kaN+Da ka ri'i bar shun/__brag la skyes pa'i sngo chu srin sder mo/__dbang po lag pa sor mo lnga pa nas gsum pa yan kho na/__pad+ma ge sar dngos dang /__kha sab shang dril dkar po'i me tog__nA ga ge sar dngos dang /__kha sab klu shing 'om bu'i me tog__sngo snyi ba'i me tog__/'di ma 'byor na nus mtshungs lug mur ba'i me tog gis kyang rung /__ut+pal sngon po yongs grags kyi me tog__/dpe la lar gra ma'i me tog zhes snang ba ltar klu shing gra ma'i me tog ser po/__mtshal dkar rdo mtshal lhad med/__pu shel rtse'am rtsa 'ba' la/__snying zho sha__/mkhal zho dkar po/__mchin pa zho sha__/gla gor zho sha__/bal yul sogs nas byung ba'i rtsa rma bya'i mdongs dngos dang /__de'i kha sab rtsa ko Tha ste gres ma chung ba'i me tog dang lo ma/__phyag tshang ku ba/__nor bu zhes sangs rgyas kyi 'phel gdung dang /__de'i tshab tu gangs tig ril bur 'dril ba/__myu gu zhes rtsa ku sha__/lhang tsher dkar po/__mkhal sran dkar po/__gser me'i me tog__/sngo pri yang+ku /__spang rgyan dkar po dang /__sngon po'i me tog__/shu dag dkar po 'khrul med dbyibs shu dag nag po 'dra ba mdog dkar zhing dri nga ba med pa tshigs mtshams ring po can/__sle tres/__gro ma/__mon bu dkar po/__rgun 'brum dkar po/__nA ga puSh+pe zhes bal yul sogs su yod pa'i klu shing me tog gi tshab rung gong smos 'om bu dang gra ma'i me tog gis mthus pa bcas dang /__de steng klu'i pang kong las byung ba/__thang ma sgron shing gi lo ma/__'di tshab thang dkar gyi lo mas kyang rung /__smyug lo/__zi ra dkar po dang /__nag po/__sbrul lpags su grags pa rong mtshams nas 'byung ba'i shing gi shun pa khra bo dang /__khams 'dir 'brug shing du grags pa'i bar shun/__slob dpon dga' rab rdo rje'i gzhung las 'di'i 'bras bu char 'bebs kyi rdzas mchog tu gsungs pas 'bras bu'ang ci rigs pa/__dung phor mdog bzang 'di dung dngos dang /__rdo mdung rtse dkar po btang ba'i phyag len kyang snang bas skabs 'dir phyi ma/__spos dkar/__rdo rgyus bya bal ma/__til dkar po dang /__nag po/__ga bur/__gur gum/__tsan+dan dkar po/__tsan+dan dmar po bcas rnams las bkru bar 'os pa rnams/__rnam 'joms dang sme brtsegs kyi bum chus legs par bkrus shing grib mar skam/__thams cad spos dkar dang /__spang spos la grib sel gyi sngags kyis btab pas bdug ste mdor na dmar skyur gla rtsi sogs kyi dris phog pa'i skyon sbyangs te shin tu gtsang bar byas rjes/__so sor zhib btags bsre 'dur sogs 'them par byas pa/__bal yul nas 'byung ba'i ka ra skya sob phag tshil gyis ma bzhus pa dang /__bur dkar tshil gyis ma bzhus pa/__sbrang dkar srog chags dang snyigs ma'i skyon bral ba/__ra dkar 'o ma dang /__ba dmar mo'i 'o ma rnams lhan cig tu sbyar bas sbol/__thog mar nyung shas tsam gter byon gyi ril bu'i kha dogs dang mtshungs par bya ba'i phyir gnas chen las byung ba'i sin+d+hu ra mdog 'gyur ba bsres te/__de la phabs gta' seng ge sgra'i bum chu dang /__kha che'i chur sbyangs pa blugs nas ril bu sran sbos tsam dang /__des phabs rta byas te byings rnams phur ma'i tshul du sbyar/__bdag cag sogs klu dbang rgyal po'i bsnyen pa tshad ldan song ba'i dge slong brgyad gras klu dbang gzungs 'bum phrag gsum dang /__seng ge sgra'i rtsi sman gyi bum sgrub ltar sman bdud rtsir bsgyur ba'i sngags khri phrag gsum gyis byin gyis brlabs cing /__stong chen rab 'byams las gsungs pa'i bden tshig gis lhag par gnas pa dang /__slar yang thugs sgrub snying byang gu ru rgyal ba'i gdung 'dzin gyi las tshogs pad+ma mkha' 'gro'i lha sngags kyis kyang bsgrub pa ste/__phan yon ni/__slob dpon klus/__klu'i bum pa bzhugs pa'i sa phyogs su nor rdzas longs spyod 'phel ba dang /__sad ser thog gi 'jigs pa mi 'byung ba dang /__klu'i gnod pa dang bral zhing skyes pa dang bud med thams cad dar bar 'gyur pa sogs gsungs pa 'dir yang mtshungs shing /__dpal rgwa lo'i klu gtor gyi gzhung rnying las/__klu'i sman rnams sbyar ba ni/__sa bdag klu gnyen thams cad kyi dgos 'dod 'byung ba'i nor bu/__na ba gso ba'i sman/__'chi ba slong ba'i bdud rtsi yin pas/__klu rten du gzhug pa'am/__gtor ma'i rdzas la bsres na des klu dang sa bdag mnyes shing /__char chu dus su 'bebs pa dang /__mi phyugs kyi nad yams dang klu'i gnod pa zhi/__rtsa shing lo tog rgyas pa sogs phan yon dpag tu med cing /__dgos dgu'i gter dang 'phrad par 'gyur ro/__/zhes spyi dang bye brag tu ga bur dzA tis dbug nyams gso/__zhes sogs so sor bshad pa dang /__thugs sgrub pad+ma mkha' 'gro'i las tshogs las/__mtsho yi dkyil dang rdzing bu'i dbus:__yul gyi chu mgo dag tu sba:__char chu 'bebs shing lo phyug legs:__rtsA shing me tog rgyas pa sogs:__snod bcud 'byor pa phun tshogs 'gyur:__zhes gter bum gyi skabs su gsungs pa 'dir yang mtshungs pas/__klu rten dang klu bum gyi nang du gzhug__/sa bcud gso ba'i gter bum spyi la'ang bsngags/__seng ge sgra sogs kyi cho ga'i skabs rtsi sman gyi bum par blugs/__klu gtor dang klu mchod sogs kyi skabs gtor ma'i rdzas la bsre/__klu bsang gi tshe bsang rdzas dang sbol/__char 'bebs tshe mtsho rdzing chu mig lta bur ras dkar gyis bstum ste 'jug par bya/__'di la dmar skyur gla rtsi sogs kyi dris phog na klu la shin tu gnod pas/__chos sman sogs byin rten spyi dang mnyam du mi bzhag par/__ras dkar gyi snod du blugs nas sgrom lta bur bcug la gtsang sbra dang bcas pa'i phyogs su bzhag par bya'o/__/zhar byung char 'bebs kyi rdzas dkar gta' 'am chu 'dzin ril bur grags pa la sbyor tshul mang na'ang /__'dir thugs sgrub snying byang gi spyir btang rgyas pa'i las tshogs las gsungs pa ltar/__spang spos/__shu dag dkar po/__spos dkar/__'om bu'i me tog__/glang sna'i me tog__/shang dril dkar po'i me tog__/cu gang /__bag phye gtsang ma bcas sbyar ba ba dmar mo dang /__ra dkar mo'i 'o mas sbrus pa'i zan la/__gong gi phabs gta' kha che'i chur sbyangs pa blugs nas ril bu sran 'phos tsam du dril te rang sngags kyis byin gyis brlab/__las sbyor gyi dus su ras dkar gyis bstum te chu mig sogs su 'jug pa dang /__bag phye'i ril bu dang sbyar te sngags re dang ril bu re sprad la chu mtsho lta bur dor ba sogs phyag len ltar bya ba ni byang chub sems dpa'i phrin las su bsngags te gzhung las/__sman dang 'bras bu la sogs pa:__snod bcud 'byor pa rgyas pa'i phyir:__char chen 'bebs pa'i phrin las ni:__gzhan phan byang sems ldan pas bya:__zhes gsungs pa'i phyir ro/___/__!_ _seng chen gnam brag nas spyan drangs pa'i rgyal chen in+d+ra b+hU ti'i rin chen ril bu srid zhi'i dwangs bcud tsin+ta ma Nir grags pa ni/__gter byon rtsa ba'i dkar chag o rgyan rin po ches mdzad pa las/__chos rgyal in+d+ra b+hU ti yis:__lha klu mi yi rin chen bsdus:__de yi ril bu rdog gcig ni:__rin chen sna tshogs dag gis spel:__zhes gsungs pa ltar/__sngon rab byung bcu gsum pa'i lcags pho stag gi lor lcang ra lha klu 'chi med dga' tshal du/__'jam pa'i dbyangs dngos kun mkhyen bstan pa'i nyin byed kyis/__grub chen o rgyan par rdo rje rnal 'byor mas dngos su gnang ba'i man ngag rtsa bar bzung /__'phags bal bod ljongs ma hA tsI na'i gso rig 'dzin pa mtha' dag gi phyag gzhes nyams 'og tu chud pa'i dpyad pa yongs su rdzogs pas brgyan te khungs btsun khyad 'phags su sbyar ba'i rin chen ril nag chen mo dang /__mang sbyor chen mo'i ril bu byin rlabs dang nus pa'i gzi 'od 'bar ba/__kho bo cag gis rab yid me 'brug lor lag len dag par sbyar ba'i rin chen mang sbyor chen mo bcas/__phyogs bsdams ril bu gnyis bre gang re tsam so sor kha che'i chur yun ring du sbangs shing 'dres par 'dur ba'i zan la/__gong gi phabs rta kha che'i chur sbyar ba blugs/__ril bu rgya thur la btegs pa'i skar ma bzhi re'i rtsis su phabs te dril/__skam thag chod pa dang rgya snag dang zar ma'i khu bas rtsi legs par gsol/__ril chags shin tu 'them par byas pa rin po che'i snod du blugs te/__sa rta cho 'phrul zla ba'i tshes bzang po nas brtsams zhag bdun tu g.yu thog bla sgrub kyi las byang la brten/__sman gyi dngos grub bsdu ba'i sngags gtsor bor bton te rtags mtshan dge bar bsgrubs/__zhar byung rma bya chen mo'i sngags/__dug 'joms kyi gser gzungs/__sman la sngags kyis gdab ba'i gzungs sogs kyis kyang byin gyis rlabs/__stong chen rab 'byams nas 'byung ba'i sngags dang tshig dang dpal ldan rgyud las gsungs pa'i smon lam sogs brgya phrag mang pos shis par brjod pa'i me tog 'thor/__slar yang thugs sgrub yid bzhin nor bu'i o rgyan sman gyi bla ma'i ril sgrub la brten nas byin rlabs kyi rgyun brtan par byas pa ste/__phan yon ni/__spyir gter gzhung rtsa ba'i dkar chag las/__lha rten nang gzhug mgul du btag:__sgrub pa'i rten byas sa la sbas:__dngos grub kun gyi dbyig tu 'gyur:__zhes dang /__bye brag tu 'di'i sbyor ba'i gtso bo grub pa'i dngul chu kho na'i yon tan kyang mtha' klas ste/__dpal ldan dus kyi 'khor lo'i rgyud las/__zla ba drug gis lha yi lus te skra dkar gnyer ma dang bral 'di yis 'chi med nyid du 'gyur/__/zhes zla ba drug tu brten pas rdo rje'i lus 'grub par gsungs pa dang /__dpal rdo rje mkha' 'gro'i rgyud las/__rig pa de dag lha mo che/__/sbyor ba kun gyi dam pa yin/__/tshangs pa brgya byin sogs 'grub na/__/gzhan dag la lta smos ci dgos/__/zhes spyir grub pa'i rdzas sbyor thams cad kyi dam par bsngags shing /__'jig rten gyi dngos grub mtha' dag 'grub pa dang /__/de ni phros shing bsten pa yis/__/tshe dang nad med phun sum tshogs/__/rim 'di rtag tu bsten byas na/__/lo ni sum brgyar 'tsho 'gyur zhing /__/skra dkar dang ni gnyer ma sel/__/bstan bcos kun la 'jigs med 'gyur/__/ces sogs dmigs kyis bsal ba'i phan yon mang po dang /__gzhan yang grub pa'i dngul chu'i gzhung las tshad ldan sbyar ba'i bcud len 'di/__/kun tu tshogs par spyad gyur na/__/nyi zla gza' skar gnas kyi bar/__/tshe yi rig 'dzin rnyed par 'gyur/__/ces dngul chu'i nus pas/__/tshe yi rig 'dzin 'grub pa dang /__/'chi bdag slu ba'i rtogs pa las/__/rin chen brtag pa'i bstan bcos gang /__/rtogs la mkhas pas rdo rje 'chang /__/tshe yi nor bu 'chang ba'ang rung /__/de bzhin nor bu sna tshogs 'chang /__/in+d+ra nI la rin chen sogs/__/nor bu chen po gzhan dag kyang /__/'chang bar byad pas 'ching ba kun/__/bzlog par 'gyur ba the tshom med/__/ces rin po che'i nus pas nad gdon zhi zhing tshe bsring ba dang /__dpal ldan rgyud las/__khrag mkhris bad rlung bzhi brgya rtsa bzhi'i nad/__/mgo dang byang khog yan lag rma rnams dang /__/rmu 'or mdze 'bras gag lhog gnyan nad dang /__/klu gnyan rgyal po la sogs 'byung po'i gdon/__/rin po che yis mi sel 'ga' yang med/__/nad gzhi med pa'i mi la bcud len 'gyur/__/ces legs par sbyar ba'i nus pas 'tsho bar dka' ba'i nad gdon thams cad sel zhing tshe dang lus kyi bcud len du 'gyur ba dang /__/thig le dar ya kan zhes pa/__/yungs 'bru tsam zhig sems can rnams/__/sus myong mkha' la spyod pa'i rten/__/yon tan mchog gis brgyan pa 'thob/__/ces mkha' spyod gsum gyi go 'phang 'grub par gsungs pas mtshon gnas skabs dang mthar thug gi phan yon mtha' yas shing /__rtog pa las/__nor bu/__sman dang sngags grub dang /__bcud len stobs kyis bdag nyid ni/__/'chi bdag pha rol gnon mthong ste/__/rig 'dzin grub pa ji bzhin no/__/zhes gsungs pa'i khyad chos thams cad kyang 'di la tshang ba yin te/__gzhi bcud len dang /__nor bu rin po che dang /__sman thams cad tshogs shing /__grub pa'i sngags kyis byin brlabs pas nus ldan du byas pa'i phyir ro/__/des na nad gdon bar chad srung ba'i slad du lus la 'chang ba dang /__dug nad sogs srung dang zhi ba'i phyir gso dpyad kyi cho ga bzhin du bsten pa dang /__gzhan yang rten gyi nang du gzhug pa dang /__bdud rtsi chos sman dang /__sman sbyor khyad par can gyi phabs rta bsre ba dang /__nor gter gyi bum pa'i snying por bya ba sogs la mchog tu bsngags shing /__'di'i dam tshig tu khyi dang bud med kyis ma mthong bar bya/__nam mkha' dang nyi zer la mi ston/__rlung mi 'tshor ba'i snod bzang por ga bur sogs dri bzang po'i sman dang lhan cig tu bcang bar bya ste/__'tsho byed grub pas/__legs par sbyar ba'i sman mchog rnams/__/rin chen ze'u 'am ra ze ru/__/ga bur 'bras dang lhan cig gzhug__/spra tshil dag gis zhal ba bya/__/phyi la kha sha'am gla ba yi/__/rkyal ba srubs med bzang por bcangs/__/zhes gsungs pa ltar ro/___/__!_ seng chen gnam brag nas spyan drangs pa'i ri bo po tA la'i 'bru dang sman gyi ril bu brtan g.yo'i dwangs bcud ni/__ji skad du/__'phags pa spyan ras gzigs kyi zhal nas/__/dpal ldan yid 'ong po tA la/__/sna tshogs khams kyis rnam par spras/__/sna tshogs ljon pas bkra ba ste/__sogs nas/__thub pa 'dod chags bral rnams dang /__/byang chub sems dpa'i tshogs gzhan dang /__/sa bcu'i dbang phyug rnams dang ni/__/'phags ma sgrol sogs lha mo rnams/__/rig pa'i rgyal mo stong gis kyang /__/rtag tu legs par bsten pa'o/__/zhes dang /__/pad+ma'i rnam thar chen mo las/__/dus bzang la ni mkha' 'gro dngos su byon:__nyams dga' dang spro skyo ba med pa'i gnas:__ting 'dzin rgyud la rang shugs skye ba'i sa:__pho brang ri bo tA la'i rtse mor byon:__zhes sogs bsngags pa ltar/__dzam gling na yongs su grags shing che ba'i gnas mchog rnam pa lnga'i ya gyal/__yon tan dang bkod pa bsam las 'das pas che ba shar phyogs ri bo tA la'i zhing khams chen po'i 'bru dang /__sman dang /__me tog sna tshogs pa dag gur gum dang lhan cig tu zhib par btags te/__dri zhim po'i chur sbyangs pa nyid/__gter lung las 'byung ba ltar/__sad ser sogs kyis ma bcom pa'i gro/__nas dkar/__'bras/__so ba/__khre/__til dkar po/__nyungs kar/__sran ma dkar po sogs 'bru dkar gyi phye gtsang dang /__'bras gsum/__bzang drug__/ge sar gsum/__tsan+dan dkar dmar/__ut+pal dkar sngon sogs sman dang me tog rigs bzang po/__gzhan yang bum rdzas nyer lnga tshad ldan dang /__dkar gsum mngar gsum/__rin po che sna tshogs sogs dpal can gyi rdzas gtsang dag cung zad kyang sbyar ba'i phye ma rnams cu gang gis mdog bsgyur ba chu gtsang gis sbrus pa'i zan la phabs rta blugs nas ril bu sran ma tsam du dril/__thugs sgrub bar chad kun sel gyi bla ma nor lha'i dkyil 'khor du bsgrubs shing lha sngags spyi dang khyad par ril bu'i sngags kyis byin gyis brlab/__phywa g.yang 'gugs pa'i phrin las kyis srid zhi'i dpal bcud bstim/__gu ru rgyal ba'i gdung 'dzin gyi las tshogs rdo rje mkha' 'gro'i lha sngags dang brtan ma'i rig la sogs kyis kyang nus pa bskyed pa ste/__phan yon ni/__gtso bor rten dang gter bum gyi nang du gzhug pa dang /__gzhan yang mgul du 'chang ba dang /__bcud len gyi tshul du bsten pa dang /__chu gtsang la sbyar te sa bon dang /__zhing sa dang /__lhas mal dang /__gnas khang sogs su gtor bas/__bla ma nor lha'i gzhung las/__de ltar bgyis pas tshe ring nad med klu:__chos dang rigs kyi brgyud pa 'phel:__longs spyod chos srid phya g.yang gi 'byor pa nam mkha'i mdzod la mnga' brnyes par 'gyur ro:__sa phyogs thams cad kyang bkra shis byin chags snum 'od dang ldan cing lo tog rtsi sman chu klung rgyas pa dang :__skye rgu thams cad bde skyid kyi 'byor pa bskal pa rdzogs ldan gyi dus ltar snod bcud thams cad phun sum tshogs bar 'gyur ro:__zhes dang /__yul dbus kyi ri 'phan bzang la sbas na yul phyogs thams cad la phan:__khang pa'i dbus su sbas na gnas khang bkra shis longs spyod 'phel/__thab dkyil du sbas na zas nor longs spyod 'du zhing sris sme/__zhing sa bzang por sbas na lo tog legs/__chu mig bzang po'i mdun rir sbas na char chu 'bebs/__rta phyugs kyi lhas mal du sbas na god ka rgyun chod cing sgab 'phel ba sogs gter bum gyi skabs su ji skad bshad pa thams cad 'dir yang mtshungs shing /__gzhan yang 'di las spros te/__dmigs bsal bla ma nor lha'i gzhung du bshad pa'i g.yang rdzas rnams dang lhan cig tu ril bu dril nas bsgrubs pa dpal can ril bu dang /__'og tu 'byung ba'i sa sna'i ril bu dang /__bkra shis gter bum gyi skabs su bshad pa'i rdzas rnams dang bcas lhan cig tu ril bur dril nas bsgrub pas sa bcud gso ba'i ril bu sogs so sor sbyar na'ang shin tu legs par 'gyur ro/___/__!_ dpal spungs yang khrod de wI ko Ta tsA 'dra rin chen brag nas spyan drangs pa'i gter sgrom gyi cha shas gnas yul dur khrod drug cu rtsa bzhi'i sa sna ril bu brtan g.yo'i dpal skyed ni/__de la shrI he ru ka yab yum gyi thugs gsung sku'i 'khor lo'i bkod pa bgrang las 'das pa'i dpa' bo dang rnal 'byor ma ri rab sum cu rtsa gnyis kyi rdul grangs dang mnyam pa dang /__de las kyang ches lhag pas byin gyis brlabs cing dgyes rgur rol pa'i rdo rje'i zhing khams chen por gdod nas grub pa dzam gling na yongs su grags pa'i gnas so gnyis/__yul nyer bzhi/__dur khrod chen po brgyad bcas kyi sa sna dang chu sna tshogs pa'i sgrom gyi cha shas dang /__gnas yul dur khrod kyi sa rdo phye ma bcas dri bzang gi chu dang sbyar ba/__gnas chen rnams nas 'byung ba'i khams bzang po la/__cu gang dang /__sin+d+hur dang /__cong zhi sogs cung zad bcas zhib btags chu gtsang gis sbrus par blugs te ril bu sran ma tsam du bsgril/__bla ma yi dam gyi sgrub pa'i skabs dang /__bkra shis gter bum chen mo sgrub pa'i skabs sogs su lha sngags kyis byin gyis brlab cing /__'khor 'das brtan g.yo'i dwang bcud mtha' dag bstim pas las dang /__ye shes kyi 'byung bcud thams cad brtan cing nus ldan gyi phung por bsgrub pa ste/__phan yon ni/__rten gsum bzhengs pa'i rgyur bsre ba/__nang du gzhug pa/__sa bcud gso ba gtso bor gyur pa'i bum gter gyi snying por bya ba/__thugs sgrub bsam pa lhun grub ma'i las tshogs las 'byung ba ltar sa bcud gso ba'i dpal gyi ril bu bsgrub pa/__mgul du 'chang ba/__khong du bsten kyang rung ste/__bkra shis gter bum gyi gzhung las/__chos srid rnal 'byor ring gnas shing :__bkra shis byin chags dge legs 'phel:__tshe ring nad med 'thab rtsod bral:__mdor na srid dang zhi ba yi:__phun tshogs thams cad ngang gis 'du:__bskal ba'i bar du gnas par 'gyur:__ces gsungs pa skabs 'dir yang mtshungs shing /__gzhan yang thun mong du 'byung ba bzhi'i gnod pa dang rgud pa zhi zhing dpal 'byor rgyas pa dang /__khyad par snod bcud thams cad shrI he ru ka'i zhing du byin gyis brlab par 'gyur ba sogs phan yon mtha' yas so/___/__! _seng chen gnam brag gi gter lcibs cu gang ril bu byang sems zla ba'i thig le ni/__gter byon chu gtsang dang sbyar ba/__gangs ri/__pre tA pu ri/__ti sgro sogs bod khams kyi sbas gnas mang po'i cu gang gi phye ma dang lhan cig tu bsres nas ril bu sran 'phos tsam du dril/__bdud rtsi sman sgrub sogs kyi skabs rdo rje nyi ma rin chen 'byung ldan gyi ngo bor byin gyis brlabs pa ste/__phan yon ni myong grol spyi dang mtshungs shing /__thugs rje chen po'i sngags kyis btab ste bsten na mig nad sel ba dang /__dam rdzas kyi rigs spyi dang /__khyad par bdud rtsi sman gyi skabs byang sems dkar po'i rdzas su gces so/___/__!_ shel phug sogs nas byon pa'i sin+d+hu ra'i ril bu shes rab dpyid kyi thig le mkha' spyod grub pa'i rdzas mchog ni/__bde chen pad+ma shel phug gi rdzogs chen sde gsum gyi gter bcibs o rgyan ga dza'i sin+d+hu ra yel phug nam mkha' mdzod kyi gter byon khro sgrom nang gi sin+d+hu ra/__'bum rdzong gter byon chos skyong dgongs 'dus kyi gter sgrom nang gi sin+d+hu ra/__birU pa dang /__nA ro pa'i sin+d+hu ra'i rgyun bcas kha che'i chur sbyangs pa/__gangs ri/__tsA ri/__ti sgro/__pad+mo bkod/__khams kyi spyi 'byams brag__/gnas mchog chos sgra rang sgrogs/__/shel phug__/bzang shod/__kha ba dkar sogs sbas gnas mang po'i sin+d+hu ras bungs bskyed de ril bu sran 'phos tsam du dril/__rtsa gsum gyi sgrub pa'i rdzas su byin gyis brlab/__bdud rtsi sman gyi skabs su dpal rdo rje chos snang ba mtha' yas kyi ngo bor bsgrubs pa ste/__phan yon myong grol gyi yon tan spyi dang /__snang ba dbang sdud kyi rdzas dang /__don tig las/__b+ha ga gsang ba'i sin+d+hus sa lam bsgrod:__ces gsungs pas/__khyad par mkha' spyod kyi dngos grub sgrub pa la bsngags shing /__thugs rje chen po dang /__phag mo gtsor gyur gyi sgrub rdzas dang /__dam rdzas rigs gang la'ang sbyar du rung /__bdud rtsi sman gyi tshe byang sems dmar po'i rdzas sogs nye bar mkho ba'i skabs mang ngo /___/__!_seng brag gter bcibs ga bur ril bu bde chen thabs kyi thig le ni/__gter rdzas nyid ga bur dkyus ma dang /__cu gang bcas lhan cig legs par btags te chu gtsang gis sbrus/__ril bu sran ma tsam du bsgril/__rtsa gsum spyi dang bye brag gi sgrub pa'i skabs mang por byin gyis brlabs shing /__sman khrol sgrub skabs rin chen 'byung ldan gyi ngo bor bsgrubs pa ste/__phan yon myong grol gyi rdzas spyi dang mtshungs/__khyad par tshad pa'i nad sel ba la bsngags/__grib sel ba dang /__klu sman gyi rigs dang /__bdud rtsi sman phye ma dang /__ril bu bsgrub pa'i byang sems dkar po'i rdzas su gces shing /__spyir dam rdzas kyi rigs gang la'ang sbyar du rung ngo /___/__!_ seng chen gnam brag gi gnas kyi gong ba brag sman rgyal 'dra ba nas spyan drangs pa'i tsan+dan dkar po'i ril bu stobs bskyed dbang po'i thig le ni/__gter byon tsan+dan nyid/__tsan dkar dkyus mas bungs skyed de zhib btags chu gtsang gis sbrus te ril bu sran 'phos tsam du bsgril/__rtsa gsum spyi dang bye brag gi sgrub pa'i skabs su byin gyis brlabs pa ste/__phan yon ni/__don tig las/__tsan+dan ha ri'i tshal pas nyon mongs sel:__zhes sogs gsungs pa ltar myong grol spyi dang mtshungs/__grib sel dang /__pad+ma gtsug tor gyi bdug spos tshor grol dang /__bdud rtsi chos sman dang skye bdun sogs kyi sgrub rdzas su bsngags so/__/__!_ seng chen gnam brag gi gnas kyi gong ma nas spyan drangs pa'i tsan+dan dmar po'i ril bu 'od 'bar nyi ma'i thig le ni/__gter byon dang tsan dmar dkyus ma lhan cig tu zhib btags chu gtsang dang sbyar te ril bu sran 'phos tsam du bsgril/__rtsa gsum sgrub pa'i rdzas dang /__sman khrol sgrub skabs snang ba mtha' yas kyi ngo bor byin gyis brlabs pa ste/__myong grol spyi dang /__dbang sdud kyi rdzas dang /__khyad par bdud rtsi sman sgrub skabs byang sems dmar po'i rdzas dang /__bdud rtsi ril bu sogs la sha chen gyi dwang ma'i rdzas su bsngags so/___/__!_ rtsi rke sum mdo nor bu spun gsum gyi brag nas spyan drangs pa'i gu ru'i sku tshab bde ba chen po dngos grub dpal 'bar gyi gter bcibs gi waM ril bu don kun grub pa'i thig le ni/__gnas chen rnams nas byung ba'i sa gi waM du grags pa la gzhi byas/__lug ru ser po bungs mang dang /__brag zhun dri thon bcas zhib btags phye ma chu gtsang gis sbrus pa'i zan la/__gi waM sgrub pa las bshad pa'i sin+d+hu ra/__gla rtsi/__rdo khab len/__byang sems dkar dmar dam rdzas rol pa chen po bcas cung zad sbyar/__phabs rta kha che'i chur sbyangs pa blugs te ril bu sran ma tsam du dril/__thugs sgrub gu ru rgyal ba'i gdung 'dzin gyi las tshogs rgyal chen bzhi'i sngags kyis byin gyis brlabs pa ste/__phan yon ni/__spyir thugs sgrub yid bzhin nor bu'i lo rgyus las/__dri tshor tsam gyis nad zhi gdon 'phrog cing :__snang ba dbang sdud thugs rje chags pa'i rdzas:__don kun grub ster byin brlabs gi waM bzang :__ces dang /__bye brag rgyal chen bzhi'i gi waM sgrub pa'i las sbyor las/__rdzas des smin mtshams su thig le byas pas rang nyid gang gis mthong ba thams cad dga' zhing dbang du 'gyur ro:__mig la byugs pas rang gis gang mthong ba de dbang du 'gyur ro:__gos la bdug ste rgyal po'i pho brang du zhugs na der gnas pa thams cad dbang du 'du zhing zil gyis gnon par 'gyur ro:__kha zas spyi dang khyad par mngar skyur gyi rigs la sbyar te byin na gang gi ltor slebs pa'i mod bdag la chags shing zhen par 'gyur ro:__mgul du 'chang na nad kyis mi tshugs shing zas nor 'du bar 'gyur ro:__zhes gsungs/__khyad par skye bdun dang /__chos sman sogs sgrub pa'i rdzas la bsres na sgrub pa la bar chad mi 'byung zhing dngos grub myur du 'grub pas na mchog tu gces shing /__! _yang 'di nyid dbang sdud kyi rdzas su lhag par bsngags pas gu ru rgyal ba'i gdung 'dzin gyi mkha' 'gro yongs rdzogs kyi las sbyor dbang gi ril bu bsgrub na/__gong gi ril bu ji ltar rigs pa chu gtsang la sbyar ba dang /__lha shing shug pa/__spang spos/__gur gum/__sin+d+hu ra/__byang sems dkar dmar/__shu dag nag po/__rdo khab len/__tsan+dan dmar po/__spos kar/__lan tshwa rta so ma rin chen 'bru sman dar sna bcas kyi phye ma chang dang sbrang rtsi'i dwang ma rnams sbol te ril bu sran ma tsam du dril/__na bza' dmar po gsol/__thod pa mtshan ldan du blugs/__zhal gdams snying byang ltar rtags mthong bar bsgrubs pas/__lha rten nang ngam bum par sbas:__lha srung gzhi bdag dbang du 'gyur:__sogs nas/__mgul du 'chang bas las kun 'grub:__skye bo thams cad dga' zhing 'du:__zhes pa'i bar gsungs pa bzhin no/__/gzhan yang gang gi sin+d+hu ra/__ga bur/__tsan+dan dkar dmar/__gi waM 'di rnams rgyud dang man ngag las srung ba spyi'i rdzas la'ang mchog tu bsngags par gsungs so/___/__!_ po tA la'i 'bru sman gyi gras su snang ba'i grib sel nyungs kar ril bu bgegs 'joms nus mthu'i snying po ni/__gter byon gyi cha shas dang /__rig 'dzin chen po 'ja' tshon snying po/__mthu stobs kyi dbang phyug dpal bkra shis stobs rgyal/__pad+ma drag po'i nus rtsal 'chang ba gter chen klong gsal snying po rnams kyi ljags bzlas gnang ba'i bzlas nyung byin can nyung kar khro zhal can dkyus mas bungs bskyed/__gzhan yang /__gu gul nag po/__shu dag__/yungs ba/__gla rtsi/__ru rta/__a ru ra/__sngo rgya spos su grags pa rtsa ba la ga bur gyi dri bro ba/__spang spos/__ga bur/__rtsa ku sha/__mkhan pa dkar po/__spos dkar/__ru rta/__gi waM rnams phran bu dang /__bum rdzas nyer lnga tshad ldan/__gter chen nyid kyis ljags bzlas mang du gnang ba'i sri zlog bdug rdzas/__gangs ri dang tsA ri rwa bsgrings sogs kyi bsang sna/__pra b+ha ha sti dang /__mtsho rgyal gyi gsang chab bcas sbyar te ril bu nyungs kar sbom po tsam du dril/__na bza' nyungs kar gyi mdog ltar du bsgyur/__thugs sgrub zhal gdams snying byang thugs rje chen po'i bdud rtsi 'khyil ba'i las kun byed pa'i ril sgrub dang /__de'i cha lag sme brtsegs kyi bum sgrub dang rdo rje bdug pa'i sbyor ba ltar bsgrubs pa ste/__phan yon kyang /__bdud rtsi 'khyil ba'i ril sgrub las/__'di ni lus la 'chang ba'am:__zos bdug dri yis byugs pas kyang :__bsam pa bzhin tu las kun byed:__zhes sogs las bzhi thams cad bsam pas 'grub pa dang :__gzhan yang srung ba chen po ste:__khyad par nyams grib 'go ba'i rims:__lha srin gdug pas mi tshugs shing :__rtag tu yid bde ting 'dzin 'phel:__de phyir rnal 'byor ldan rnams kyis:__las kun 'grub phyir 'chang bar bya:__zhes dang /__sme brtsegs kyi gzhung las/__mgul du 'chang ngam khong du btang :__zos bdug byugs pas nad gdon dang :__grib dang mi gtsang thams cad sel:__zhes gsungs pas rnam 'joms dang sme brtsegs sogs kyi khrus rdzas la mchog tu bsngags shing /__gzhan yang nad gdon gang la'ang du bas bdug pa/__khong du btang ba/__phyi nas byugs pa dang /__srung ba spyi'i rdzas sogs la khyad par 'phags so/__/'di las 'phros te byad 'grol ril bu byed na/__gong gi ril bu'i steng /__bzang drug__/shu dag dkar po/__gi waM/__byang sems dkar dmar gyi ril bu/__bdud rtsi chos sman/__shing kun cung zad bcas sbyar te rgyun 'bab kyi chus sbyangs la bum par blugs/__zhal gdams snying byang gi bla ma smra seng drag po'i las tshogs rdo rje gtsug tor gyi bum chog ltar bsgrubs/__de nyid gong smos rdzas kyi phye mas ril bur dril ba byad khrol gyi bum rdzas la mchog tu gces shing /__ril bu chur sbyangs pas khrus dang /__btung ba dang /__gnas khang sogs la gtor ba dang /__du bas bdug pa sogs bgyis na byad phur rbod gtong gtad sel thams cad zhi bar 'gyur ro/__/yang zhal gdams snying byang gi las tshogs spyir btang srung ba'i skor du bshad pa'i dug khrag ril bu rdzas srung nag po kun thub la sbyar te tshul bzhin du bsgrubs pas/__gdon bgegs 'byung po nye mi nus:__klu gnyan gdug pa phyogs bcur 'bros:__zhes sogs kyi yon tan kyang lhag par 'byung ba nyid do/___/__! dbang gi gnas mchog ri bo dbang zhu'i brag nas byung ba'i bkra shis brag phug ma rA tI ka'i sa sna ril bu 'chi med bcud kyi snying po ni/__pad+ma'i rnam thar chen mor/__brag phug mA ra tI ka zhes bya ba:__rigs gsum mgon pos byin gyis brlabs pa'i gnas:__dgun yang me tog char du 'bebs pa'i sa:__bkra shis byin rlabs che ba'i gnas mchog der:__tshe dpag med pa'i dkyil 'khor zhal phyes te:__tshe yi rig 'dzin zla ba gsum du bsgrub:__zhes bsngags pa ltar/__mA ra tI ka ste 'chi ba mthar byed kyi brag gi sa bcud la:__gangs ri'i slob dpon rin po che nas tshe sgrub gnang ba'i sa/__gu ge khyung lung gi tshe ril/__g.ya' ma lung sogs 'chi med grub pa'i sbas gnas mang po'i sa rdo chu shing /__seng brag dang shel phug gi tshe chu/__cong zhi mdzo 'or 'dam btags/__snying po lnga sbrang rtsi/__bu ram/__mar/__lan tshwa/__ka ra/__a ru gser mdog__/gzhan yang tshe bcud kyi sman sna thams cad tshogs pa cung zad dang bcas zhib btags 'bri'i 'o mas ril bu sran ma tsam du bsgril/__thugs sgrub tshe dpag med pad+ma sgyu 'phrul drwa ba'i las tshogs bcud len gyi gdams pa ltar rin 'byung tshe mtha' yas pa'i lha sngags kyis byin brlabs pa ste/__phan yon ni/__byang gter bcud len bdud rtsi'i phreng ba las/__rin chen nor 'dzin bcud len 'di:__zos pas tshe ring ye shes ldan:__zas nor dgos 'dod char bzhin 'bab:__ting 'dzin mi 'gyur lha sku gsal:__rmu rdzing sa gdon nad kun 'joms:__sha rgyas dbugs ring nyon mongs zhi:__rigs brgyud 'khor 'phel mkha' 'gro 'du:__rang rig ye shes tshe 'dir rtogs:__sangs rgyas myur du 'grub par 'gyur:__ces pa'i bcud len nyid mchog tu bsngags pa'i yon tan thams cad 'dir yang yar ldan du 'byung zhing /__dgongs 'dus las kyang tshig ris gong dang mthun par gsungs/__bye brag thugs sgrub tshe gzhung las/__rab ni kha zas kun spangs la/__grub pa'i bcud len tshul du bsten:__'bring ni gnod pa'i zas spangs la:__sman gyi bcud len tshul du bsten:__tha ma tho rangs khams rgyas dus:__dam tshig rdzas kyi tshul du bsten:__bcom ldan rdo rje sems dpa' yi:__tshe dang lang tsho 'grub par 'gyur:__ces gsungs pas:__tshe sgrub dang /__bcud len gyi rdzas la bsngags shing /__bkra shis gter bum gyi snying por gzhug na'ang shin tu legs so:__de ltar legs par sbyar zhing bsgrubs pa'i ril bu 'di rnams spyir btang gi sbyor tshul mdo tsam brjod na/__thog mar gta' spel dpyad rnams so sor ngos 'dzin ma 'khrul ba'i khungs ldan gtsang dag lhad dang bral ba 'du byas ste/__bkru bar 'os pa rnams rnam 'joms dang sme brtsegs kyi khrus chus bkrus te grib mar skam/__gzhan rnams la'ang sbyong khrus tshad ldan dang /__grib sel gyi sngags btab pa'i bsang bdug sogs yid ches par byas/__de nas rdo shing sngo sman gyi rigs zhib 'dur dar tshags la drangs/__snum bag dang gsher che ba rnams yun ring du btags pa dang /__gla rtsi dang shing kun lta bu'i rtsi sman gyi rigs bsre 'dur skabs su bsres/__spyir kha dog gnag pa dang /__ro kha ba dang lan tshwa ba/__shing kun sogs dri nga ba'i rigs rnams cha chung ba legs/__phabs rta kha che'i chu sogs gang 'os dkar yol lta bu'i snod gtsang ma g.ya' med par blugs pa la btab/__kha chod brgyabs te zhag gnyis gsum bzhag nas 'dres par 'dur/__sra ba'i rigs gur gum dang /__cong zhi gang 'os cung zad re dang bcas rdo gzhong gtsang ma chu 'dur yun ring du 'dur ba sbru zan gyis len pa'am/__chur sbyangs pa las dar tshags la drangs na chud zos su 'gro dogs bzhag__/thams cad la gces pa/__dbang lag ston dus su brkos shing ma rul ma sum pa spus legs shin tu zhib 'dur dar tshags la drangs ba'i dam rtsi che ba re sbyar/__khyad par sa rdo shas che ba'i rigs la dam rtsi che dgos par snang /__de yang dang po gta' spel dpyad kyi rdzas rnams dam rtsi bcas zan du sbyar nas 'dres par sbrus/__de la phabs rta blugs te thams cad la khyab nges su brdzis/__de nas ril bur bsgril skabs dang por tshad bzhag pa las je cher 'gro bas mtshon che chung sna tshogs red 'dug pas yid gzhung pa'i rtog 'jug zhib cha dang /__bsgril tshar rim _bzhin snod gtsang mar ras dkar gsar pa'i khud du bting /__cung zad skam pa na thog mar par bu lta bu'i snod dang /__de nas khug mar blugs te ril chags 'them par byas/__na bza' dmigs bsal ma smos pa rnams rang mdog dang /__dmigs kyis bsal ba rnams ril bu bsgril nas zla shas lon pa'i skam thag chod nges mtshams/__tshon rtsi rnams shel ka ra'am zar ma'i khu ba 'os mtshams dang sbyar te gsol zhing /__ril chags nan tan tu bgyis/__thog mtha' bar gsum du sbyong khrus bsang bdug sogs gtsang sbra gang che'i sgo nas sbyar zhing /__snga phyir spyi sgos kyi sgrub pa lan grangs du mas byin gyis brlabs pa yin no/__/_!_ gnyis pa bdud rtsi sman gyi skor la nang gses su bdun las/__thog mar seng chen gnam brag nas spyan drangs pa'i rig 'dzin dga' rab rdo rje'i bde chen ye shes skyed pa'i bdud rtsi chos sman bde chen rdo rje'i bcud len la/__gter lung las 'byung ba ltar cong zhi spus legs 'dam btags so mi seg par byas pa'i phye ma dang /__brag zhun gyi dwang ma/__gzhan yang a ru ra/__tsan+dan dkar po/__kha che/__nA gi/__gla rtsi sogs gtsor gyur bdud rtsi sman sgrub kyi gzhung nas bshad pa'i sman gyi rigs/__cu gang mdog 'gyur ba bcas zhib btags dam rtsi dang phabs bcas gar chang dang kha che'i chus sbol/__phabs rta kha che'i grung chur sbyar bas khyab par bran/__me sbrul sa ga zla ba'i yar ngo'i tshes brgyad nas brtsams bde chen pad+ma shel phug tu gter gsar bka' brgyad rdzong 'phrang gi bdud rtsi sman gyi sgrub pa chen po'i sgo nas legs par bsgrubs/__slar yang dga' rab snying tig gi gzhung dang mthun par byin gyis brlabs pa ste/__phan yon ni/__spyir yon tan bdud rtsi rol pa'i rgyud lung man ngag rnams las rgya cher 'byung ba ltar rtogs par bya zhing /__/'dir dmigs kyis bsal ba dga' rab snying tig las/__gang gis dri tsam tshor bas kyang :__nad gdon bgegs zhi tshe bsod rgyas:__bde chen ye shes rtsol med 'char:__mtshams med las la spyad pa'ang :__ngan song gnas las nges thar na:__dad dang dam tshig ldan pa dag:__byang chub thob pa lta ci smos:__de phyir rang byung kun bzang gi:__rtsol med phrin las zab mo'o/__/zhes gsungs so/___/__!_ gangs ri'i khrod tsam na mngon par mtho ba'i sgrub gnas kyi rgyal por bsngags pa bde chen pad+ma shel phug nas dam chos kun gyi rgyal po rdzogs chen sde gsum dang lhan cig tu spyan drangs pa'i rig 'dzin shrI sed+ha'i bdud rtsi chos sman 'chi med dwang ma'i bcud len ni/__bdud rtsi'i gzhung las 'byung ba'i sman sna spyi dang /__khyad par yung ba shin tu zhib btags phye ma mdog 'gyur ba dang kha che'i khu gar bsres par/__phabs rta nyid kha che'i chur legs par 'dur ba khyab par bran/__gter nas bzhes te nyin drug 'das pa'i mtshams/__lung byang las/__zab gter sbas pa'i gnas mchog der:__sgrub pa chen po dang 'brel bar:__dang por bka' brgyad spyi dbang de:__kun la spro ba skyed phyir bskur:__dam rdzas myong grol 'brel tshad grol:__de phyir chos sgo 'phral du dbye:__zhes sogs gsungs pa'i lung don rjes su bsgrub phyir/__sprul pa'i gter chen rin po che dang bdag cag gis me 'brug rgyal zla ba'i dkar phyogs kyi tshes dgu nas brtsams/__rig 'dzin shrI sid+has byin gyis brlabs pa'i gnas mchog bde chen pad+ma shel phug gi nye 'dabs su thog mar gter kha 'di nyid kyi bka' brgyad rdzong 'phrang gi bdud rtsi sman sgrub kyi sgo nas byin gyis brlab cing /__slar yang me sbrul sa ga zla bar bskyar nas kyang bsgrub pa ste/__phan yon ni/__spyir bdud rtsi'i gzhung rnams las rgya cher 'byung bar ma zad/__dmigs kyis bsal ba'ang gter lung las/__zung 'jug rig 'dzin shrI sid+ha'i:__'chi med bdud rtsi sman gyi bcud:__mthong bas bskal mang sdig sgrib 'dag:__dri tshor tsam gyis nad gdon zhi:__lus la reg pas bde chen skye:__rdul phran tsam zhig myong bas kyang :__mchog thun dngos grub nges par thob:__mdor na 'brel tshad thams cad kun:__ngan song 'khor ba'i sgo 'geg cing :__mtho ris thar pa'i lam rnyed phyir:__rang byung ye shes thugs rje'i mthu:__rtsol med ngang gis 'char ba ste:__de phyir thun phran re re la:__khri 'bum spel zhing bsgrub pa bskyar:__mkha' khyab 'gro don bla na med:__bde chen rdo rje'i gseng lam mo:__zhes ched du bsngags pa ltar ro/___/__!_ na bun rdzong nas spyan drangs pa'i rig 'dzin bi ma la mi tra'i bdud rtsi chos sman bde chen bdud rtsi'i bcud len ni/__sman gyi rigs spyi dang /__khyad par tsan+dan dmar po'i phye ma shin tu zhib pa mdog 'gyur nges su btab pa la/__phabs rta dri bzang dang sbyar ba blugs cing legs par sbol/__me sbrul sa ga zla bar bde chen pad+ma shel phug tu bka' brgyad rdzong 'phrang gi sgo nas bsgrub cing /__slar yang snying tig skor bdun gyi nang tshan bi ma'i yang tig ye shes gsang lam gyi bdud rtsi chig sgrub ltar bskyar nas bsgrub pa ste/__dmigs kyis gsal ba'i phan yon kyang :__rang gzhung las/__bdud rtsi chen po bla na med:__mthong bas bskal mang sdig sgrib 'dag:__dri tshor tsam gyi ngan song byang :__myong na bde chen ye shes skye:__bcangs pas mi mthun thams cad srung :__tshe bsod ye shes rgyas par 'gyur:__mdor na bla med dam tshig rdzas:__thugs rje 'khor 'das mnyam nyid phyir:__'brel pa thob pa thams cad kun:__tshe ring nad med bsam rgu 'grub:__mchog thun khyad par dngos grub kun:__dpal chen po dang mnyam pa 'thob:__ces sogs rgya cher gsungs par ma zad/__rig 'dzin bi ma la nyid don dam par 'da' ka ye shes phyag rgya'i gzugs su rang snang ba kha sbyor brgyad ldan gyi gtso mchog dang dbyer ma mchis shing /__rnam pa tsam du'ang yon tan bdud rtsi rol pa'i rgyud lung man ngag mtha' dag gi bka' bab pas kyang khyad par du 'phags par grub bo/__/__!_ seng chen gnam brag nas me sbrul cho 'phrul zla ba'i tshes bcu dgu la spyan drangs pa'i 'phags yul rig 'dzin brgyad kyi bdud rtsi chos sman ye shes klong dgu'i bcud len ni/__ji skad du/__phyi ltar byang sems nang rig 'dzin:__gsang ba dpal chen sgrub sde brgyad:__ngo bo ye shes klong dgu'i rtsal:__rnam pa grub pa'i slob dpon che:__zhes sogs gter kha thams cad nas don mtshungs par gsungs pa ltar/__ye shes klong dgu'i rang gzugs dkyil 'khor rgya mtsho'i khyab bdag dpal chen po sgrub sde brgyad dang tha mi dad par grub pa'i rig 'dzin many+dzu shrI mi tra/__nA ga rdzu na/__hU~M ka ra/__bi ma la mi tra/__pra b+ha ha sti/__d+ha na saM skr-i ta/__gu h+ya tsan+d+ra/__shan+tiM gar+b+ha rnams gdan 'dzoms nas rtsa ba brgyad dang yan lag stong tshang bar sbyar zhing /__gdod nas grub pa'i dur khrod chen po bsil ba tshal gyi mchod rten bde byed brtsegs par dkyil 'khor bdun dang sbyor ba brgyad kyi sgo nas legs par bsgrubs pa'i 'jig rten na rnyed par dka' ba'i dam rdzas sman phud khyad par can nyid kha che'i grung chur sbyar te/__rtsa ba dang yan lag gi sman ji tsam rnyed pas bungs bskyed/__yung ba shin tu zhib btags dang kha che'i khu gar gyis sbol nas mdog ser por bsgyur/__bde chen pad+ma shel phug tu gter gsar bka' brgyad rdzong 'phrang gi bsnyen pa sngon du 'gro bas bsgrub pa ste/__phan yon mtha' yas par rgyud lung man ngag rnams nas rgya cher 'byung ba'i don bsdus o rgyan rin po che'i zhal nas/__bde gshegs ma lus mchod pa'i rdzas:__bla ma yi dam sdud pa'i rtsi:__mkha' 'gro kun gyi snying khrag yin:__zos pas yon tan brjod mi langs:__sangs rgyas lnga'i yon tan thob:__phyi ltar lus kyi nad gdon 'joms:__nang du nyon mong dug lnga 'dag:__dam tshig nyam chag thams cad bskang :__gsang ba rang byung ye shes rtogs:__nyan thos rang sangs rgyas rnams kyis:__zos na sa bcu thob nas kyang :__theg chen byang sems chen por 'gyur:__bla ma mchod na byin rlabs 'jug:__yi dam mchod na dngos grub ster:__bde gshegs mchod na thugs rje 'byung :__mkha' 'gro mchod pas lung yang ston:__rnal 'byor pa'am sus zos kyang :__phyi yi nad gdon sdig sgrib byang :__nang gi bskyed rim ting 'dzin gsal:__gsang ba rang rig chos skur rtogs:__nyams dang lhag chad ma lus skong :__'chang bas dus min 'chi ba zlog:__gdug pa'i dug kyang 'jil bar nus:__byugs pas nad gdon ma lus sel:__bsreg na gdon bgegs thams cad skrod:__'di nyid bsgrub pa'i gnas de yang :__dur khrod bsil ba'i tshal dang mtshungs:__dpa' bo mkha' 'gro thams cad 'dus:__sa phyogs byin dang ldan par 'gyur:__char chu 'bebs shing lo phyugs legs:__gang bsgrubs sa yi gnas de ru:__su bsdad mi rnams ting 'dzin 'char:__nam zhig tshe yi dus byas nas:__pho mo bzang ngan med pa ru/__rig 'dzin dam pa'i sa la gnas:__de phyir mchog gi dam rdzas so:__zhes gsungs te/__gong 'og gi bdud rtsi sman gyi rigs thams cad la mtshungs bar shes pa bya'o/__/__! seng chen gnam brag gi gnas mthil mkha' 'gro'i bro ra'i dbu rtse brag rin chen 'bar ba nas spyan drangs ba'i o rgyan rje 'bangs nyer lnga'i bdud rtsi chos sman bde bar gshegs pa thams cad 'dus pa'i bcud len ni/__zab gter tho byang mtsho rgyal gyi phyag bris ma las/__o rgyan chen po pad+ma 'byung gnas dang :__mkhas grub rje 'bangs nyer lngas mchims phu ru:__slob dpon brgyad kyi chos sman gzhir byas nas:__bka' brgyad sgo nas bsgrubs pa'i sman sgrub ni:__tshon tshad me long yu ba can zhig gis:__gzhal ba'i me long bcu phrag bzhugs pa 'di:__me long gcig la me long 'bum phrag spel:__grog ma'i rkang tsam su yi ltor song ba:__de nyid ngan song gnas nas nges par thar:__bla med 'phags pa'i sa la phyin par ni:__dus gsum rgyal ba rnams kyis yang yang bsngags:__de bas gces par zungs shig sa ma ya:__zhes gsungs pa ltar bla na med pa'i myong grol gyi rdzas mchog khyad par can nyid kha che'i chur sbyar/__rtsa ba dang yan lag gi sman sna ji snyed pa dang bcas yung ba cung zad dang /__kha che'i khu gar shas che bas mdog ser smug tu bsgyur/__zab gter me sbrul cho 'phrul zla ba'i tshes 20la snang bar mdzad pa'i lo de nyid kyi sa ga zla ba'i dkar phyogs kyi dus mchog tu dge bar/__gter lung las/__rgya gar so sa gling gi gnas:__bod kyi yul du spyan drangs nas:__bstims pa'i gnas ni mchims phu yin:__de nyid gcig las gnyis mched tshul:__khams kyi smad shod dzaM du 'phos:__lung pa pad+ma kha bye 'dra:__dbus kyi lung pa'i mdo dag la:__brag dkar shel gyi gur phubs 'dra:__sgrub phug pad+ma shel phug 'dir:__o rgyan pad+ma bdag nyid kyis:__bde gshegs 'dus pa'i sgrub chen byas:__phug ba'i nang rnams thams cad du:__dkyil 'khor dgu klong rang byon byung :__bde bar gshegs pa thim pas ni:__mthong tshad ngan song skye sgo chod:__ces rgya cher bsngags pa'i gnas mchog tu/__bdag cag gis gter gsar rdzogs chen sde gsum gyi man ngag sde'i yi dam khro bo'i sgrub pa bka' brgyad rdzong 'phrang gi las byang la zab bdun sgrub khog sbyar ba'i bsnyen sgrub yan lag bzhi ldan dang 'brel bar/__thugs dam zab pa skor bdun gyi mchog gi las tshogs kyi zab pa bdud rtsi'i gzhung gis lha dang mkha' 'gro 'du ba'i rtags mtshan dge ba dang bcas legs par bsgrubs pa ste/__phan yon gong du smos pa'i rdo rje'i lung spyi dang bye brag gis mtshon te shes bar bya zhing /__mdor bsdu na zab don bdud rtsi'i gzhung las/__bla med mchog gi bdud rtsi 'di:__til 'bru tsam zhig sus myong ba:__he ru ka dang go 'phang mnyam:__ces gsungs so/___/__!_ sa rta dbyug pa zla ba'i dmar phyogs mkha' 'gro 'du ba'i dus bzang por karma'i 'bum rdzong gi gter srung mtsho sman gyis byin brlabs bdud rtsi'i zil pa khrom mer dngos su phul ba'i o rgyan rin po che rjes 'brangs stong phrag gis bsgrubs pa'i 'dus pa mdo'i chos sman bde chen rol pa ni/__go stod 'od 'bar brag nas bzhes pa'i mthong grol sku rten rnam gnyis kyi dkar chag slob dpon rin po che'i gsungs la mkha' 'gro ye shes mtsho rgyal gyis zin bris su mdzad pa las/__rdza rgyal go bo phug gi gnas mchog tu:__'dus pa chen po pad+ma 'byung gnas dang :__ye shes sku dang las lus tshul bzung ba'i:__rjes 'brangs tshom bur 'dus pa stong phrag gis:__sgrol byed thugs rje'i rgyal po che ba'i mchog:__shin tu rnam par grol ba'i he ru kas:__chos nyid rang sgras mngon sum bstan pa'i rgyud:__rdo rje bkod pa'i gsang ba zab mo'i don:__'dus pa mdo yi dkyil 'khor zhal phyes te:__bdud rtsi sman gyi sgrub pa mdzad pa'i tshe:__nam mkha' gang ba'i khrag 'thung dkyil 'khor lha:__rab 'byams sgrub pa'i rdzas la mngon sum thim:__de tshe sman las ye shes 'od 'bar zhing :__dzaM gling thams cad tshor grol dri yis khyab:__gang gis mthong dang thos dang dran reg gam:__thun phran gcig la thun chen 'bum spel te:__de nyid til 'bru tsam zhig myong bas kyang :__nad dang sdug bsngal bar gcod kun zhi zhing :__rdo rje'i tshe dang lang tsho mchog tu 'grub:__bde chen ye shes rtsol ba med par 'char:__he ru ka dang spyod yul mnyam pa yis:__skye ba bdun na 'bad med grol ba'i tshul:__DA ki bye bas rdo rje'i glu ru blangs:__zhes rgya cher bsngags pas yid nye bar drangs te/__bla na med pa'i mchog gi bdud rtsi nyid kha che'i chur sbyangs pa dang /__rgyud lung man ngag gi bdud rtsi'i gzhung las gsungs pa'i rtsa ba dang yan lag gi sman ji ltar 'byor pa la/__nA gi/__gla rtsi/__kha che rnams dri ro dang mdog 'gyur ba sbyar te/__don grub ces pa sa mo lug gi lo'i cho 'phrul zla bar phun tshogs lugs brgya'i 'dun sa dpal sde dge lhun grub steng gi gzims chung khams gsum zil gnon 'chi med bde ldan bkod par/__bdag cag sogs rig 'dzin 'dus pa'i tshogs kyis dpal rdo rje bkod pa kun 'dus rig pa'i rgyud kyi dgongs don lung a nu yo ga 'dus pa chen po mdo'i tshom bu tshogs kyi sgrub pa bsnyen sgrub yan lag bzhi ldan dang 'brel bar bdud rtsi bde ba chen po'i dkyil 'khor du phyi nang gi rtags mtshan dge ba bcas legs par bsgrubs pa ste/__phan yon ni/__gong du smos pas mtshon rgyud lung man ngag rnams nas rgya cher gsungs pa ltar shes par bya'o/___/__!