JKW-KABUM-17-TSA-002-042

🚧 This website is under continued development. We appreciate your patience!

Previous Text Back to Volume PageNext Text

རེག་དུག་གི་ནད་ལ།

Wylie title	reg dug gi nad la
Location	mkhyen brtse'i bka' 'bum Volume 17, sde tshan 2, Text 42, Pages 374-378 (Folios 114b1 to 116b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. reg dug gi nad la. In 'jam dbyangs mkhyen brtse'i dbang po'i bka' 'bum, Vol. 17: 374-378. Khams sde dge rdzong sar dgon: Rdzong sar blo gros phun tshogs, 2020.
Genre	Medicine Texts - gso ba rig pa

1 Texts in this Section (sde tshan or chos tshan)

42 374-378	རེག་དུག་གི་ནད་ལ། reg dug gi nad la Medicine Texts - gso ba rig pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རེག་དུག་གི་ནད་ལ། ཐོག་མར་བརྟག་ཐབས་ནི། རྩ་ཕྲ་ཞིང་གཏིང་ན་བྱིངས་དྲག་དལ་ངེས་མེད་དུ་འཕར་ཞིང་སྐབས་སུ་སྡོད་པ་དང་། ཆུ་མདོག་ལྗང་ལ་ལྦུ་བ་གཡུང་། མར་ནག་ཐིགས་གཅིག་བླུགས་པས་སེར་པོའམ་ཁྲག་མདོག་ཏུ་འགྱུར། ཡང་ན་ལྦུ་བ་འཐོར་འགྲོ། ནད་ཕོག་མ་ཐག་ནས་ཆམ་པ་འདེབས་ཤིང་། ལུས་ལྕི། སྒྱིད་པ་སྐྱུར། མཁལ་རྐེད་གཟེར་ཞིང་ཆུ་སོ་ཟ་བ་སོགས་འབྱུང་། དེ་ལ་བྱང་ལུགས་མིང་ཅན་ནག་པོ་འཁྲུལ་མེད་ཀྱི་ཐང་གཏོང་བས་རང་གི་མངོན་ཚུལ་འབྲུམ་ཐོར་སོགས་འབྱུང་། དེ་ནས་ཐང་ཆེན་ཉེར་ལྔའམ། བྱང་ལུགས་མིང་ཅན་གཅིག་པུའི་ཐང་ལན་ཁ་ཡར་གཏོང་རྗེས། དངོས་གཞིའི་སྨན་སྦྱོར་ནི། དངུལ་ཆུ་རྒོད་པོ། ༡ ༠༠ལ་མཚོན་ན། བིག་པན་ཏེ་རྒྱ་མཚུར་དཀར་པོ་འཁྲུལ་མེད། ༠ ༤༠མཚལ་རྒོད། ༠ ༡༠ཟེ་ཚྭ། ༠ ༧༠བཅས་ལ། སྨན་ཕྱི་མ་གསུམ་སོ་སོར་ཞིབ་པར་བཏགས། དེ་ནས་སླ་ང་སོགས་ལྕགས་སྣོད་མཐིལ་ཡངས་ལ་བུག་རྡོལ་མེད་པ་ཞིག་གི་ནང་དུ། ཐོག་མར་ཟེ་ཚྭ། དེ་ནས་མཚུར། དེ་ནས་མཚལ་རྣམས་རིམ་པར་བརྡལ་ཏེ་བརྩེགས་ལ་བཞག །དེ་སྟེང་དངུལ་ཆུ་དེ་ཤོག་བུར་ཚོ་བཞི་ལྔ་ཐུམ་པོར་བྱས་ནས་ཕྱོགས་ཕྱོགས་སུ་མི་འདྲིལ་བར་བཅུག །དཀར་ཡོལ་ཆེན་པོ་གས་ཆག་མེད་པ་ཞིག་གི་སྟེང་ནས་སྦུབས། བར་མཚམས་ས་སྦྱོར་སྤྱི་ལྟར་རམ། མ་འཛོམ་ན། རྟ་སྦང་། ལན་ཚྭ། ས་ནག་གསུམ་བསྲེས་པའི་འདམ་གྱིས་ལེགས་པར་གཡོགས། དེ་སྟེང་ཞ་ཉེ་དང་རྡོ་སོགས་ཆེ་བས་མནན་ལ་སྐམ། སྐམ་ཐག་ཆོད་ནས་གནས་དབེན་པར་མེ་ཐབ་ཏུ་བཙུག་ལ་བསྲེགས། དེ་ཡང་དང་པོ་མེ་ཆུང་། བར་དུ་ཆེ། ཐ་མར་སླ་ངའི་ཞབས་སྐྱ་བོར་སོང་རན་ཚོས་ཚད་ཡིན་པས་མེ་རིམ་གྱིས་ལྷོད་ལ་གྲང་བཅུག །གྲང་ཐག་ཆོད་ནས་ངང་རིང་གིས་འདགས་པ་བཀོག་སྟེ་ཁ་ཕྱེ་ལ་བལྟས་པས། དཀར་ཡོལ་ཡ་འགེབ་ལ་དམར་པོ་ལི་ཁྲིའམ་མཚལ་མདོག་ལྟ་བུ་ཟུར་ལ་འཇའ་རིས་འཕྲོ་བ་བྱུང་ན་མཆོག་ཏུ་བཟང་། དམར་སེར་དང་ནག་ཐིག་ཨན་ཙམ་བྱུང་ཡང་བཏང་རུང་། ནག་པོ་ནི་གཏན་ནས་མི་གཏོང་། བར་ལྗང་ཞིང་གཏིང་དཀར་བར་འོང་། དེ་ནས་ཆི་བ་ཁ་རྡོག་ཉེར་ལྔ་ཙམ་ཇ་ནང་དུ་རླངས་ཚོས་བྱས་ལ་རུས་པ་དོར་ནས་རྡོ་གཞོང་དུ་བསྣུར། སླར་ཡང་རླངས་ཚོས་བྱས་པ་ཟན་ལྟ་བུ་དེས་ཡ་ཁེབས་ལ་ཆགས་པའི་དུད་པ་ཁ་དམར་བར་ལྗང་ཡན་བསྡུས་ལ་རིལ་བུ་སྲན་མ་ཆུང་ཤོས་ཙམ་དུ་དྲིལ་ཞིང་རྒྱ་ཤོག་དམར་པོར་བསྟུམ། འདི་ལ་ལས་ར་ཁྲག་གིས་དྲིལ་ན་ཕན་ཆེ་ངེས་སུ་བཤད། པར་བུ་སོགས་རླུང་མི་འཆོར་བའི་སྣོད་བཟང་པོར་ཚགས་བྱ། མ་འགེབ་ལ་ཆགས་པ་རོ་མ་དེ་ར་ཁྲག་ལ་སྦྱར་ནས་བྱུགས་སྨན་བྱ། བའི་མེ་ཏོག་ལ་དངུལ་ཆུ་ཕྲན་བུ་མ་ཚིགས་པ་བྱུང་ཡང་སྐྱོན་ཆེ། གཏིང་དཀར་པོའི་དཀྱིལ་དངུལ་ཆུ་མ་ཚིགས་པ་བྱུང་ན་ཁ་སྔར་ལྟར་རྒྱབ། སྐམ་ཐག་ཆོད་ནས་བསྲེགས་སྐྱོར་བྱེད་པར་གསུངས། ཇི་ལྟར་གཏོང་ཚུལ་གྱི་ཕྱག་ལེན་ནི། ཐོ་རངས་སྔ་བར་རིལ་བུ་གསུམ་རེ་ཇ་ཐང་གར་སླ་སྙོམས་པ་བྱ་སྒང་དོ་ཙམ་ལོང་ལོང་ཁོལ་བས་ཕུལ། དེ་མིན་ཆུ་བསྐོལ་གྱིས་ཕུལ་ཡང་རུང་། འཇུ་ཚོད་ལ་སྐྱུགས་གྲབས་བྱེད་ན་སྐྱུགས་ནོན་གང་དྲག་བྱེད། འགྲིམ་སོང་ན་ཕན་ཆེ། འགྲིམ་གྲབས་ཀྱིས་རྒྱུ་མ་གཟེར་ཆེ་ན་ཆང་ཧུབ་དོ་གསུམ་འཐུང་བས་གཟེར་ཆག་འགྲོ་ཞིང་བཤལ་འོང་། མ་གཟེར་ན་ཆང་མི་གཏོང་། སྨན་བཏང་རྗེས་ཞག་གཅིག་ནས་མཚན་མོ་སོ་ཤིང་འཛུག །ཞོགས་དང་ཉིན་མོ་སོགས་ཇ་ཐང་། གོ་ཡུ་ཁྱི་ཝར་བསྐོལ་གྲང་གིས་མཁུར་བཀང་འཆང་། དེས་ཁ་ལ་རྨ་མི་འོང་ཞིང་སོ་རྩ་བརྟན། དེ་བྱས་ཀྱང་རྙིལ་སྐྲངས་ཆེ་ན། གསེར་མདོག །ཁྱི་ཝར། སྟར་བུ་རྣམས་ཕན་ཆེ་བ། བིག་པན་ཨ་རུའི་བཞི་ཆ། གླ་རྩི་དྲི་ཐོན་བཅས་ཀྱིས་རྒྱུན་དུ་མཁུར་བཀང་བྱེད། ཁ་ནང་རྨ་བྱུང་ན་བིག་པན་ལ་ལྡོང་རོས་མདོག་འགྱུར་བསྲེས་པ་སྐམས་འདེབས་བྱེད། ན་ཚས་མ་བཏུབ་ན་དེ་རྣམས་ཆུ་ལ་སྦྱར་བས་མཁུར་བཀང་བྱེད། སྔར་སྨོས་པའི་མ་ཁེབས་ལ་ཆགས་པའི་གཏིང་དཀར་པོ་དེ་སྟེང་། ཁྱི་ཝཾར། གོ་ཡུ་དང་། ཤ་རུ་ནུས་བསྲེགས་སོ་སོར་ཆ་གཉིས། བིག་པན་ཆ་གཅིག །གླ་རྩི་དྲི་ཐོན་བཅས་རློན་བྱུགས་སྐམ་འདེབས་གང་དགོས་རིགས་པས་དཔྱད། ཉི་མར་ནན་གྱིས་སྐམ་ན་ཕན་ཆེ། དེ་མིན་ཀྱང་བྱུགས་ཆོག །ཡང་བྱུགས་པ་ལུགས་གཅིག་ལ། གཏིང་དཀར་པོའི་སྟེང་། གོ་ཡུ། སྙིང་ཞོ་ཤ །བ་རུ་ར། ཆིབ་ཁའི་རུས་པ། སྟག་ཤ །ཡུ་གུ་ཤིང་། སྣ་དུད་ཤིང་། གསམ་པ་དཀར་པོ། ལུག་མུར་རྣམས་ནུས་བསྲེགས། དུང་ཧར་བསྲེགས། ནཱི་ལ་ཐོ་ཋ། ཆུ་རྩ། ཡུང་བ། ལུག་མུར་མ་བསྲེགས་པ་བཅས་ཞིབ་ཏུ་བཏགས། ཞོ་ལ་བཏབ་ནས་ཟངས་སྣོད་དུ་སྦྱར་བ་བྱུགས། མིག་ནད་ལ་བསྲེགས་སྨན་གྱི་དུད་པ་སེར་པོ་ཆགས་པ་དང་། ཁ་ཆེ་སྦྱར་བ་བྱུགས་པས་ཕན། གཞན་ཡང་ཁོང་སྨན་ར་ཁྲག་བཅོ་ལྔ་དང་བཅུ་གསུམ་སོགས་སྤེལ། རླུང་ཤས་ཆེ་ན་ཨ་གར་བཅོ་ལྔ་དང་སོ་ལྔ། ཆུ་སེར་ཤས་ཆེ་ཞིང་ཟ་འཕྲུགས་བྱུང་ན་སྤོས་དཀར་བཅུ་པ་དང་། སེ་འབྲུ་བརྒྱད་པ་སོགས་བཏང་། ཟས་སྤྱོད་རྒྱ་ལུགས་ལུག་ཤ་འཛེམ་རྒྱུ་མ་མཛད་ཀྱང་། ཞག་བདུན་ཚྭ་དང་ལུག་ཤ་མ་འདྲེས་པའི་འབྲི་གཡག་གི་ཤ་ཟ་གང་ཐུབ་དང་། ནད་གཞི་ལ་མ་གནོད་ན་ར་ཤ་ཡང་གཏོང་བས་ཕན། ཇ་ཡང་སྨན་ཆུ་བྱས་པས་འཛེམ་མི་དགོས། སྨན་གཏོང་ནས་ཞག་གཉིས་གསུམ་སོང་ནས་ཟུང་ངན་ན་ཞག་གཅིག་གཉིས་སྨན་ངལ་གསོ། །དེ་ནས་ཟུང་བསྟུན་གཏོང་གསར་པ་ལ་སྨན་དངོས་ཐུན་ལྔ་གསུམ། ཕལ་ཆེར་ལ་བདུན་ལས་མང་བ་གཏོང་མི་དགོས་པ་མྱོང་གྲུབ། ཞག་བཅུ་གཉིས་ནས་ཚྭ་ཕྱེད་ཚྭ། ཉེར་གཅིག་ནས་ལུག་ཤ་མ་གཏོགས་པ་འཛེམ་མི་དགོས་པ་ཁྱད་ཆོས། ཟུང་ངན་དོང་ག་མི་བདེ་བའི་རིགས་ལ་ཆང་བག་ཡོད་བཏང་ཆོག །རྗེས་སུ་ལོང་རྩ་དང་རུ་ཐུང་གང་འོས་ལན་གཉིས་ཙམ་གཏར་ཞིང་། ཆུ་ཚན་གྱི་འཕྲོད་བསྟེན་དང་ལུས་ཟུངས་གསོ་བའི་སྨན་མར་སོགས་སྦྱར། དྲག་ཤུལ་གྱི་ལས་དང་། རྟ་ཞོན། ཉིན་གཉིད། ཉལ་པོ་སོགས་སློང་རྐྱེན་རྣམས་ལོ་དུས་སམ་ཟླ་བ་དྲུག་སོགས་ལ་སྤང་བར་བྱའོ། །ཟས་ཁ་ཚ་རུལ་སྐྱུར་དང་། ལ་ཕུག་སོགས་འཛེམ། ཤིང་ཏོག་དང་མངར་རིགས་ཀྱིས་ཀྱང་གནོད། སྨན་བཏང་དུས་ནད་འགོས་སླ་བས་འཛེམ་གལ་ཆེ། སྤྱིར་ནད་འདི་དཔྱིད་ཁམ་བུའི་མེ་ཏོག་རྒྱས་པ་དང་། སྟོན་དུས་བཅས་ལྡང་བའི་དུས་ཚོད་ཡིན་པས་སྤང་བླངས་ཚུལ་བཞིན་དུ་བྱ། གལ་སྲིད་ལས་དབང་གིས་འགོས་ན་ནད་ཕོག་མ་ཐག་མ་གསང་ནས་བཅོས་པས་མྱུར་དུ་འཚོ་བ་ཡིན་ནོ། ། ༈

[edit]

reg dug gi nad la/ reg dug gi nad la/__thog mar brtag thabs ni/__rtsa phra zhing gting na byings drag dal nges med du 'phar zhing skabs su sdod pa dang /__chu mdog ljang la lbu ba g.yung /__mar nag thigs gcig blugs pas ser po'am khrag mdog tu 'gyur/__yang na lbu ba 'thor 'gro/__nad phog ma thag nas cham pa 'debs shing /__lus lci/__sgyid pa skyur/__mkhal rked gzer zhing chu so za ba sogs 'byung /__de la byang lugs ming can nag po 'khrul med kyi thang gtong bas rang gi mngon tshul 'brum thor sogs 'byung /__de nas thang chen nyer lnga'am/__byang lugs ming can gcig pu'i thang lan kha yar gtong rjes/__dngos gzhi'i sman sbyor ni/__dngul chu rgod po/__1_00la mtshon na/__big pan te rgya mtshur dkar po 'khrul med/__0_40mtshal rgod/__0_10ze tshwa/__0_70bcas la/__sman phyi ma gsum so sor zhib par btags/__de nas sla nga sogs lcags snod mthil yangs la bug rdol med pa zhig gi nang du/__thog mar ze tshwa/__de nas mtshur/__de nas mtshal rnams rim par brdal te brtsegs la bzhag__/de steng dngul chu de shog bur tsho bzhi lnga thum por byas nas phyogs phyogs su mi 'dril bar bcug__/dkar yol chen po gas chag med pa zhig gi steng nas sbubs/__bar mtshams sa sbyor spyi ltar ram/__ma 'dzom na/__rta sbang /__lan tshwa/__sa nag gsum bsres pa'i 'dam gyis legs par g.yogs/__de steng zha nye dang rdo sogs che bas mnan la skam/__skam thag chod nas gnas dben par me thab tu btsug la bsregs/__de yang dang po me chung /__bar du che/__tha mar sla nga'i zhabs skya bor song ran tshos tshad yin pas me rim gyis lhod la grang bcug__/grang thag chod nas ngang ring gis 'dags pa bkog ste kha phye la bltas pas/__dkar yol ya 'geb la dmar po li khri'am mtshal mdog lta bu zur la 'ja' ris 'phro ba byung na mchog tu bzang /__dmar ser dang nag thig an tsam byung yang btang rung /__nag po ni gtan nas mi gtong /__bar ljang zhing gting dkar bar 'ong /__de nas chi ba kha rdog nyer lnga tsam ja nang du rlangs tshos byas la rus pa dor nas rdo gzhong du bsnur/__slar yang rlangs tshos byas pa zan lta bu des ya khebs la chags pa'i dud pa kha dmar bar ljang yan bsdus la ril bu sran ma chung shos tsam du dril zhing rgya shog dmar por bstum/__'di la las ra khrag gis dril na phan che nges su bshad/__par bu sogs rlung mi 'chor ba'i snod bzang por tshags bya/__ma 'geb la chags pa ro ma de ra khrag la sbyar nas byugs sman bya/__ba'i me tog la dngul chu phran bu ma tshigs pa byung yang skyon che/__gting dkar po'i dkyil dngul chu ma tshigs pa byung na kha sngar ltar rgyab/__skam thag chod nas bsregs skyor byed par gsungs/__ji ltar gtong tshul gyi phyag len ni/__tho rangs snga bar ril bu gsum re ja thang gar sla snyoms pa bya sgang do tsam long long khol bas phul/__de min chu bskol gyis phul yang rung /__'ju tshod la skyugs grabs byed na skyugs non gang drag byed/__'grim song na phan che/__'grim grabs kyis rgyu ma gzer che na chang hub do gsum 'thung bas gzer chag 'gro zhing bshal 'ong /__ma gzer na chang mi gtong /__sman btang rjes zhag gcig nas mtshan mo so shing 'dzug__/zhogs dang nyin mo sogs ja thang /__go yu khyi war bskol grang gis mkhur bkang 'chang /__des kha la rma mi 'ong zhing so rtsa brtan/__de byas kyang rnyil skrangs che na/__gser mdog__/khyi war/__star bu rnams phan che ba/__big pan a ru'i bzhi cha/__gla rtsi dri thon bcas kyis rgyun du mkhur bkang byed/__kha nang rma byung na big pan la ldong ros mdog 'gyur bsres pa skams 'debs byed/__na tshas ma btub na de rnams chu la sbyar bas mkhur bkang byed/__sngar smos pa'i ma khebs la chags pa'i gting dkar po de steng /__khyi waMr/__go yu dang /__sha ru nus bsregs so sor cha gnyis/__big pan cha gcig__/gla rtsi dri thon bcas rlon byugs skam 'debs gang dgos rigs pas dpyad/__nyi mar nan gyis skam na phan che/__de min kyang byugs chog__/yang byugs pa lugs gcig la/__gting dkar po'i steng /__go yu/__snying zho sha__/ba ru ra/__chib kha'i rus pa/__stag sha__/yu gu shing /__sna dud shing /__gsam pa dkar po/__lug mur rnams nus bsregs/__dung har bsregs/__nI la tho Tha/__chu rtsa/__yung ba/__lug mur ma bsregs pa bcas zhib tu btags/__zho la btab nas zangs snod du sbyar ba byugs/__mig nad la bsregs sman gyi dud pa ser po chags pa dang /__kha che sbyar ba byugs pas phan/__gzhan yang khong sman ra khrag bco lnga dang bcu gsum sogs spel/__rlung shas che na a gar bco lnga dang so lnga/__chu ser shas che zhing za 'phrugs byung na spos dkar bcu pa dang /__se 'bru brgyad pa sogs btang /__zas spyod rgya lugs lug sha 'dzem rgyu ma mdzad kyang /__zhag bdun tshwa dang lug sha ma 'dres pa'i 'bri g.yag gi sha za gang thub dang /__nad gzhi la ma gnod na ra sha yang gtong bas phan/__ja yang sman chu byas pas 'dzem mi dgos/__sman gtong nas zhag gnyis gsum song nas zung ngan na zhag gcig gnyis sman ngal gso/__/de nas zung bstun gtong gsar pa la sman dngos thun lnga gsum/__phal cher la bdun las mang ba gtong mi dgos pa myong grub/__zhag bcu gnyis nas tshwa phyed tshwa/__nyer gcig nas lug sha ma gtogs pa 'dzem mi dgos pa khyad chos/__zung ngan dong ga mi bde ba'i rigs la chang bag yod btang chog__/rjes su long rtsa dang ru thung gang 'os lan gnyis tsam gtar zhing /__chu tshan gyi 'phrod bsten dang lus zungs gso ba'i sman mar sogs sbyar/__drag shul gyi las dang /__rta zhon/__nyin gnyid/__nyal po sogs slong rkyen rnams lo dus sam zla ba drug sogs la spang bar bya'o/__/zas kha tsha rul skyur dang /__la phug sogs 'dzem/__shing tog dang mngar rigs kyis kyang gnod/__sman btang dus nad 'gos sla bas 'dzem gal che/__spyir nad 'di dpyid kham bu'i me tog rgyas pa dang /__ston dus bcas ldang ba'i dus tshod yin pas spang blangs tshul bzhin du bya/__gal srid las dbang gis 'gos na nad phog ma thag ma gsang nas bcos pas myur du 'tsho ba yin no/_/__!