JKW-KABUM-17-TSA-002-041

Previous Text Back to Volume PageNext Text

བད་ཀན་མགུལ་འགགས་ལ།

Wylie title	bad kan mgul 'gags la
Location	mkhyen brtse'i bka' 'bum Volume 17, sde tshan 2, Text 41, Pages 371-374 (Folios 113a2 to 114b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bad kan mgul 'gags la. In 'jam dbyangs mkhyen brtse'i dbang po'i bka' 'bum, Vol. 17: 371-374. Khams sde dge rdzong sar dgon: Rdzong sar blo gros phun tshogs, 2020.
Genre	Medicine Texts - gso ba rig pa

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

བད་ཀན་མགུལ་འགགས་ལ། སྤྱིར་དབྱེ་བ་བཅོ་བརྒྱད་ཙམ་བཤད་ཀྱང་། བསྡུ་ན་ཚ་འགགས་གྲང་འགགས་གཉིས་ལས། ཚ་འགགས་རྩ་ཅུང་ཟད་གྲིམ། ཆུ་མདོག་སེར། ཟུག་ཤིན་ཏུ་ཆེ། གྲང་འགགས་རྩ་སྟོང་ཞིང་ལྷོད། ཆུ་མདོག་སྔོ། ཟུག་གཟེར་ཆུང་། དེ་གཉིས་ཀ་གང་ཡང་། ཐོག་མར་མན་ངག་བསིལ་སྦྱོར་ཚད་ལྡན་ཞག་ཁ་ཡར་བསྟེན། དེ་རྗེས་ཚ་འགགས་ལ། སྤང་རྒྱན་བཅོ་ལྔ། སྤང་རྒྱན་ཉེར་ལྔ། མཁའ་འགྲོ་བཅུ་སྦྱོར་རྒོད་གཡག་ཁྲག་གིས་ཕུལ་བ་རྣམས་ཕན་ཆེ། གྲང་འགགས་ལ་ཉང་ལུགས་རྡོ་ཐལ་ཉེར་བདུན། །གཉིས་ཀ་ལ་བེ་ཁྲག་ཚད་ལྡན་དང་། གོ་གྲེ་བཅུ་བདུན། བད་ཁྲག་ཤས་ཆེ་ན་སྐྱུ་རུ་ཉེར་ལྔ། གུར་གུམ་བཅུ་གསུམ་དང་བདུད་རྩི་སུམ་སྦྱོར་ལྟག་པ་སྤྲད། ཕོ་ཐོག་ལ་སེ་འབྲུ་དར་གདུགས་ཅན་དང་། སེ་འབྲུ་ཉེར་ལྔ་སྨན་བྱིངས་དང་མཉམ་པའི་རྡོ་ཐལ་བསྣན་པ་སྟར་ཁཎ་གྱི་འདམ་བཏགས་བྱས་པ་ལ་བདུད་རྩི་རིལ་དཀར་ཟེར་སྟེ། དེ་རྣམས་ཤིན་ཏུ་ཟབ། དེ་ནས་སྐབས་ཐོབ་ཀྱི་བཅོས་ཚུལ་ནི། མར་བབས་ནས་ལྷེན་སྣ་དང་ཕོ་ཁར་འདྲིལ་ན་རྡོ་ཐལ་ཉེར་ལྔའམ། ཉེར་བདུན་གྱིས་བཤིག་ལ། ཡར་བབས་ནས་ལྕེ་ལ་འབྲུམ་པ་བྱུང་ན་གྲི་ལྕགས་ཀྱི་ཏེལ་པས་བསྲེགས། རྗེས་གཅོད་ཚ་འགགས་ལ་གསལ་ན་ཐོང་རྩ་དང་། མི་གསལ་ན་རྩེའུ་ཆུང་ཞད་ཙམ་གཏར། གྲང་འགགས་ལ་སྐེ་སྟོང་ལྷེན་གསང་ཚིགས་པ་བཞི་རྣམས་བསྲེགས། ཡང་གཉན་ནད་དང་ཚ་ཤས་མེད་པའི་རིགས་ལ་མེ་བཙའ་ཁོ་ནས་བཅོས་ཚུལ་སྙན་བརྒྱུད་མ་ནི། སྤྱིར་མེ་སྔགས་སོགས་སྤང་བའི་ཡུལ་ནད་ཚང་བཞི་དང་། གདབ་པའི་དམིགས་འབྲོས་འཕྲང་དགུ་ཕྱི་ཡི་འབྲོས་འཕྲང་དང་བཅས་པ་རྣམས་སུ་ཡོད་པ་ལ། དང་པོ་ནི། རྐེ་སྟོང་ཅ་ར་ཁུག་ནས་གྱེན་དུ་ཚོན་ཕྱེད་བཅལ་བ་ནད་ཚང་འོག་མ༡། དེ་ནས་གྱེན་དུ་སོར་ཕྱེད་བཅལ་བ་ནད་ཚང་༢བར་མ། ཨོལ་མདུད་ཀྱི་མགོ་ནི་ནད་ཚང་ཆེན་༣མོ། །དེ་ནས་གྱེན་དུ་ཚོན་ཕྱེད་བཅལ་བ་༤ནད་ཚང་གོང་མ་སྟེ། དེ་བཞི་ལ་བསྲེགས་ན་ནད་གཏོར་ཞིང་སྲོག་ལ་རྒོལ་ངེས་པས་རྣམ་པ་ཀུན་ཏུ་སྤང་བར་བྱའོ། །གཉིས་པ་ནི། ནད་ཕོག་ནས་ཟླ་བ་གཅིག་གི་བར་དུ་སྔར་བཤད་པའི་ཞི་བྱེད་རིགས་བསྟེན། དེ་ནས་ཟླ་བ་གཉིས་པ་ལ་མེ་བསྲེགས་ཏེ། གཞན་དུ་སྔ་ན་འཚང་ལ་ཕོག་པས། འཚོ་དཀའ་ཞིང་། ཕྱི་ན་འབྲོས་ཚར་བས་ཕན་མེད། འོན་ཀྱང་ཅུང་ཕྱིན། འཕྲང་སྔོན་མ་མ་ཆོད་ཀྱང་། རྗེས་མ་གང་ཡིན་པ་དེ་དགག་པས་ཨེན་ཙམ་ཕན། ཐོག་མར་རྐེ་སྟོང་ཅ་ར་ཁུག་དང་། ནད་ཚང་འོག་མའི་གཡས་གཡོན་ནས་ཐད་དུ་ཚོན་རེ་བཅལ་བ་སྟེ་གསུམ་ལ་བསྲེགས། དེ་ནས་ཞག་གསུམ་ནང་ནད་ཚང་བར་མའི་གཡས་གཡོན། དེ་ནས་ཞག་གསུམ་ནང་ནད་ཚང་ཆེན་མོའི་གཡས་གཡོན། དེ་ནས་ཞག་གསུམ་ནང་ནད་ཚང་གོང་མའི་གཡས་གཡོན་བཅས་རིམ་བཞིན་དུ་བསྲེགས་པ་ནི་འབྲོས་འཕྲང་དགུ་དགག་པའི་ཐབས་སོ། །དེ་ནས་ཞག་གསུམ་ན་ཕྱི་ཡི་འབྲོས་འཕྲང་ནི། རྐེ་སྟོང་ནས་འཕྲག་མིག་བར་ལིང་ལིང་འཕར་བའི་རྩ་རྩེ་ཡོད་པ་དེ་ཡིན་ལ། དེ་ནས་གཡས་སུ་འབྲོས་པས་མཆིན་ཐོག་དང་། གཡོན་དུ་འབྲོས་པས་ཕོ་ཐོག་འབྱུང་བས་འཕྲག་མིག་ནས་རྐེ་སྟོང་བར་ཚོན་རེ་དང་། ཚོན་ཕྱེད་རེ་སྤེལ་མར་གཅིག་རྗེས་གཅིག་མཐུད་དུ་མེ་བཙའི་ཕྲེང་བ་གདབ། དེ་རྣམས་ཀྱི་བར་བར་དུ་སྔགས་ཟབ་མོ་ལག་བླངས་ཅན་ཆུ་དང་མར་ལ་གདབས་ནས་ནད་ཚང་རྣམས་མ་གཏོགས་པར་བྱུགས། ནད་ཚང་བཞི་པོར་མེ་སྔགས་གང་ཡང་མི་གདབ་པ་གནད་ཤིན་ཏུ་ཆེ། ཤེས་ཤིང་ནུས་ན་འཇམ་དཔལ་ནཱ་ག་རཀྴའམ། །ཁྱུང་ནག་གང་རུང་གི་རྗེས་གནང་ཞུས་ནས་བསྙེན་པ་བསྐྱལ། དེ་ལྟར་སྨན་སྔགས་ཀྱི་སྦྱོར་བས་ནད་ལས་གྲོལ་བའི་རྟགས་སུ། དངོས་སུ་དབང་པོའི་སྒོ་ནས་རྣག་ཁྲག་ཆུ་སེར་འབབ་བའམ། རྨི་ལམ་དུ་བྱུང་ཡང་ཕན་ངེས་པ་ལག་བླངས་ཅན་ཨི་ཐི། ། ༈

[edit]

bad kan mgul 'gags la/ bad kan mgul 'gags la/__spyir dbye ba bco brgyad tsam bshad kyang /__bsdu na tsha 'gags grang 'gags gnyis las/__tsha 'gags rtsa cung zad grim/__chu mdog ser/__zug shin tu che/__grang 'gags rtsa stong zhing lhod/__chu mdog sngo/__zug gzer chung /__de gnyis ka gang yang /__thog mar man ngag bsil sbyor tshad ldan zhag kha yar bsten/__de rjes tsha 'gags la/__spang rgyan bco lnga/__spang rgyan nyer lnga/__mkha' 'gro bcu sbyor rgod g.yag khrag gis phul ba rnams phan che/__grang 'gags la nyang lugs rdo thal nyer bdun/__/gnyis ka la be khrag tshad ldan dang /__go gre bcu bdun/__bad khrag shas che na skyu ru nyer lnga/__gur gum bcu gsum dang bdud rtsi sum sbyor ltag pa sprad/__pho thog la se 'bru dar gdugs can dang /__se 'bru nyer lnga sman byings dang mnyam pa'i rdo thal bsnan pa star khaN gyi 'dam btags byas pa la bdud rtsi ril dkar zer ste/__de rnams shin tu zab/__de nas skabs thob kyi bcos tshul ni/__mar babs nas lhen sna dang pho khar 'dril na rdo thal nyer lnga'am/__nyer bdun gyis bshig la/__yar babs nas lce la 'brum pa byung na gri lcags kyi tel pas bsregs/__rjes gcod tsha 'gags la gsal na thong rtsa dang /__mi gsal na rtse'u chung zhad tsam gtar/__grang 'gags la ske stong lhen gsang tshigs pa bzhi rnams bsregs/__yang gnyan nad dang tsha shas med pa'i rigs la me btsa' kho nas bcos tshul snyan brgyud ma ni/__spyir me sngags sogs spang ba'i yul nad tshang bzhi dang /__gdab pa'i dmigs 'bros 'phrang dgu phyi yi 'bros 'phrang dang bcas pa rnams su yod pa la/__dang po ni/__rke stong ca ra khug nas gyen du tshon phyed bcal ba nad tshang 'og ma1/__de nas gyen du sor phyed bcal ba nad tshang 2bar ma/__ol mdud kyi mgo ni nad tshang chen 3mo/__/de nas gyen du tshon phyed bcal ba 4nad tshang gong ma ste/__de bzhi la bsregs na nad gtor zhing srog la rgol nges pas rnam pa kun tu spang bar bya'o/__/gnyis pa ni/__nad phog nas zla ba gcig gi bar du sngar bshad pa'i zhi byed rigs bsten/__de nas zla ba gnyis pa la me bsregs te/__gzhan du snga na 'tshang la phog pas/__'tsho dka' zhing /__phyi na 'bros tshar bas phan med/__'on kyang cung phyin/__'phrang sngon ma ma chod kyang /__rjes ma gang yin pa de dgag pas en tsam phan/__thog mar rke stong ca ra khug dang /__nad tshang 'og ma'i g.yas g.yon nas thad du tshon re bcal ba ste gsum la bsregs/__de nas zhag gsum nang nad tshang bar ma'i g.yas g.yon/__de nas zhag gsum nang nad tshang chen mo'i g.yas g.yon/__de nas zhag gsum nang nad tshang gong ma'i g.yas g.yon bcas rim bzhin du bsregs pa ni 'bros 'phrang dgu dgag pa'i thabs so/__/de nas zhag gsum na phyi yi 'bros 'phrang ni/__rke stong nas 'phrag mig bar ling ling 'phar ba'i rtsa rtse yod pa de yin la/__de nas g.yas su 'bros pas mchin thog dang /__g.yon du 'bros pas pho thog 'byung bas 'phrag mig nas rke stong bar tshon re dang /__tshon phyed re spel mar gcig rjes gcig mthud du me btsa'i phreng ba gdab/__de rnams kyi bar bar du sngags zab mo lag blangs can chu dang mar la gdabs nas nad tshang rnams ma gtogs par byugs/__nad tshang bzhi por me sngags gang yang mi gdab pa gnad shin tu che/__shes shing nus na 'jam dpal nA ga rak+sha'am/__/khyung nag gang rung gi rjes gnang zhus nas bsnyen pa bskyal/__de ltar sman sngags kyi sbyor bas nad las grol ba'i rtags su/__dngos su dbang po'i sgo nas rnag khrag chu ser 'bab ba'am/__rmi lam du byung yang phan nges pa lag blangs can i thi/__/_!