གསུར་མཆོད་ཉེར་མཁོ་སྤྱི་དང་དམིགས་བསལ་བ་ལེ་ཚན་གྱི་སྐོར།

🚧 This website is under continued development. We appreciate your patience!

Previous Text Back to Volume PageNext Text

Wylie title	gsur mchod nyer mkho spyi dang dmigs bsal ba le tshan gyi skor
Location	dpal sprul bka' 'bum Volume 6, Text 14, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Burnt Offerings - gsur mchod
Colophon	།དཔལ་སྤྲུལ་པས་སོ། །དགེའོ།
	/dpal sprul pas so/_/dge'o/

Tibetan Text

[edit]

༄༅། །གསུར་མཆོད་ཉེར་མཁོ་སྤྱི་དང་དམིགས་བསལ་བ་ལེ་ཚན་གྱི་སྐོར་བཞུགས་སོ། །

གསུར་མཆོད་བདུད་རྩིའི་ཆར་འབེབས་ཞེས་བྱ་བ་བཞུགས། ཨོཾ་ཨཱཿཧཱུྃ། བསྲེག་བྱེད་མེའི་དཀྱིལ་འཁོར་རྣམ་པར་དག་པའི་འོད་སྣང་དང་འདྲེས་པའི་དུ་བ་ཡེ་ཤེས་ཀྱི་བདུད་རྩིའི་སྤྲིན་ཆེན་པོ། རྒྱལ་བ་དགྱེས་པའི་མཆོད་སྤྲིན། འགྲོ་དྲུག་ཚིམ་པའི་ལོངས་སྤྱོད། བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་འཕྲུལ་དང་ནམ་མཁའ་མཛོད་ཀྱི་ཡོ་བྱད་ལས་བྱུང་བ། རྒྱལ་བ་སྲས་དང་བཅས་པའི་བདེན་པའི་ཚིག་དང་ཏིང་ངེ་འཛིན་གྱི་རྣམ་པར་ཐར་པ་བསམ་གྱིས་མི་ཁྱབ་པས་བྱིན་གྱིས་བརླབས་ཤིང་ཕུན་སུམ་ཚོགས་པ་ཟད་མི་ཤེས་པའི་རང་བཞིན་དུ་གྱུར་ཅིག །ན་མཿ་སརྦ་ཏ་ཐཱ་ག་ཏ་བྷྱོ་སོགས་ཀྱིས་བྱིན་གྱིས་བརླབ། ན་མོ། རྒྱལ་བ་རྣམས་ཀྱི་ཐུགས་རྗེ་བསླུ་བ་མེད། །བསོད་ནམས་ཞིང་དུ་རྫུ་འཕྲུལ་སྟོབས་ཀྱིས་བྱོན། །སེམས་དཔའ་མཆོག་རྣམས་གཞན་དོན་རྟག་ཏུ་དགོངས། །ཡིད་ཀྱི་ཤུགས་ལྟར་འདིར་ནི་གཤེགས་མཛད་ནས། །སྲས་བཅས་རྒྱལ་བ་རྣམས་ཀྱི་བདེན་སྟོབས་ཀྱིས། །ལན་ཆགས་སྙིང་རྗེའི་མགྲོན་རྣམས་མཆིས་གྱུར་ཅིག །བཛྲ་ས་མ་ཡ་ཛཿ ཨོཾ་ཨཱཿཧཱུྃ། སངས་རྒྱས་སྐུ་གསུམ་གྱི་ལྷ་ཚོགས་སྙིང་རྗེ་ཆེན་པོའི་རྒྱུ་ལས་འཁྲུངས་པ། སྨོན་ལམ་རྣམ་པར་དག་པ་ལ་མངའ་མཛད་པ། ཉིན་མཚན་དུས་དྲུག་ཏུ་ཐུགས་རྗེས་སེམས་ཅན་ལ་གཟིགས་ཤིང་རྟག་ཏུ་ཕན་པ་འབའ་ཞིག་དགོངས་པ། ཞི་ཁྲོ་ཕྲ་མེན་ལ་སོགས་སྐུའི་རྣམ་འཕྲུལ། ཟབ་དང་རྒྱ་ཆེ་བ་གསུང་གི་རྣམ་འཕྲུལ། མངོན་ཤེས་བསམ་གྱིས་མི་ཁྱབ་པ་ཐུགས་ཀྱི་རྣམ་འཕྲུལ་ལ་རོལ་པ་ཁྱེད་རྣམས་ལ་ཐོགས་མེད་ཀྱི་གཟིགས་པ་མངའ། ཐབས་མཁས་ཀྱི་མཛད་པ་བསམ་གྱིས་མི་ཁྱབ་པ་ལགས་པས། གསུར་མཆོད་ཡེ་ཤེས་ཀྱི་བདུད་རྩིར་དགྱེས་ཤིང་བཞེས་ནས་ཚོགས་གཉིས་ཀྱི་སྟོབས་ཀྱིས་བྱིན་གྱིས་བརླབས་པར་མཛད་དུ་གསོལ། ཨོཾ་ཨཱཿཧཱུྃ། བྱང་ཆུབ་སེམས་དཔའ་སེམས་དཔའ་ཆེན་པོ། རྒྱལ་བ་རྣམས་ཀྱི་གདུང་འཚོབ་པ། སེམས་ཅན་རྣམས་ཀྱི་མགོན་མཛད་པ། གྲངས་མེད་ཀྱི་ཞིང་དུ་སྤྲུལ་པས་རོལ་པ། མངོན་ཤེས་དང་ཡེ་ཤེས་ཚད་མེད་པ་ལ་དབང་བ་རྣམས་ཀྱང་། གསུར་མཆོད་བདུད་རྩིའི་རང་བཞིན་འདི་ཉིད་ཀྱི་མཐུས་བདག་དང་སེམས་ཅན་ཐམས་ཅད་ཀྱི་དོན་དུ་བཞེས་ལ། འཇམ་དཔལ་དབྱངས་ཀྱི་མཁྱེན་པ། ཕྱག་ན་རྡོ་རྗེའི་ནུས་སྟོབས། སྤྱན་རས་གཟིགས་ཀྱི་སྙིང་རྗེ། ཀུན་ཏུ་བཟང་པོའི་སྤྱོད་པ། ནམ་མཁའ་མཛོད་ཀྱི་ལོངས་སྤྱོད། བྱམས་པ་མགོན་པོའི་རྣམ་ཐར། རྒྱལ་སྲས་རྣམས་ཀྱི་ཐུགས་བསྐྱེད་ངོ་མཚར་བླ་ན་མེད་པ་སྲིད་ཞིའི་ཁམས་ན་མཚུངས་པ་མེད་པའི་བདེན་པ་དང་། བདེན་པའི་ཚིག་དེས་བདག་གི་མཆོད་སྦྱིན་བཟང་ཞིང་འབྱོར་པ་ཁྱབ་ཆེ་བས་ཁམས་གསུམ་རིགས་དྲུག་གི་སེམས་ཅན་ཚིམ་པར་བྱེད་ནུས་པར་བྱིན་གྱིས་རླབ་ཏུ་གསོལ། ཨོཾ་ཨཱཿཧཱུྃ། ཉན་ཐོས་དང་རང་རྒྱལ། དགྲ་བཅོམ་པ་ཟག་པ་ཟད་པ། བྱ་བ་བྱས་པ། ཁུར་བོར་བ། གསོག་འཇོག་སྤངས་པ། སྲིད་པ་ལས་འདས་པའི་ཡེ་ཤེས་བརྙེས་པ་རྣམས་ཀྱང་བདག་གིས་བསམ་པ་རྣམ་པར་དག་པས་སྦྱང་བའི་གསུར་མཆོད་ཡེ་ཤེས་ཀྱི་བདུད་རྩི་འདིས་བསོད་སྙོམས་ཀྱི་བྱ་བ་མཛད་ནས། བདག་གི་ཡོན་བསྔོ་བ་མ་སེམས་ཅན་ཐམས་ཅད་ཀྱི་དོན་དུ་མཛད་དུ་གསོལ། ཨོཾ་ཨཱཿཧཱུྃ། གསང་སྔགས་དང་རིགས་སྔགས་གཟུངས་སྔགས་ཀྱི་དཀྱིལ་འཁོར་བསམ་གྱིས་མི་ཁྱབ་པའི་གཙོ་བོ་དང་གཙོ་མོ། འཁོར་དང་སྤྲུལ་བ་བཀའ་ཉན་དང་། མགྲོན་ཐབས་ཀྱི་ལྷ་ཚོགས་གྲངས་མེད་པ་རྣམས་དང་། དེ་དག་གིས་རྗེས་སུ་བཟུང་བའི་རིག་པ་འཛིན་པར་འདོད་པ་དང་། གཟུགས་དང་གཟུགས་ལས་འདས་པའི་ཡེ་ཤེས་སྒྱུ་མའི་སྐུ་ཅན་ནམ་མཁའ་ལ་སྤྱོད་པ་རྣམས་ཀྱང་རྫུ་འཕྲུལ་དང་སྙིང་རྗེའི་སྟོབས་ཀྱིས་གསུར་མཆོད་བདུད་རྩིའི་རང་བཞིན་འདི་ཚོགས་ཀྱི་འཁོར་ལོར་བཞེས་ལ་བདག་གི་དམ་ཚིག་ཉམས་ཆགས་ཐམས་ཅད་དག་ནས་སྔགས་དང་ཏིང་ངེ་འཛིན་གྱི་མཐུ་ཐོགས་པ་མེད་པ་བསྐྱེད་དུ་གསོལ། ཨོཾ་ཨཱཿཧཱུྃ། སྲིད་པ་འདི་ན་ཆེ་ཞིང་བཙན་པའི་ལྷ་དང་ཀླུ་དང་ས་བདག་དང་སྲིན་པོ་ལ་སོགས་རང་རང་གི་སྡེ་ཚན་ལས་ཁྱད་པར་དུ་འཕགས་པའི་སྟོབས་དང་། ལུས་དང་ལོངས་སྤྱོད་ལ་དབང་པ། གཙོ་བོ་གཙོ་བོར་སྨོས་ཤིང་གཙོ་བོར་བཀུར་བ་ཇི་སྙེད་པ་རྣམས་དང་། དེ་དག་གི་སྡེ་དང་འཁོར་དུ་གཏོགས་པའི་འབྱུང་པོ་ཆེ་ཕྲ་ཐམས་ཅད་ལ་གསུར་མཆོད་ཡེ་ཤེས་ཀྱི་བདུད་རྩི་འདི་རང་རང་གང་ལ་གང་དགོས་ཅི་ལ་ཅི་འདོད་ཀྱི་ཡོ་བྱད་དུ་རྒྱལ་བ་སྲས་དང་བཅས་པའི་བདེན་ཚིག་གིས་བྱིན་གྱིས་བརླབས་ནས་འབུལ་གྱི་དེ་དེ་བཞིན་དུ་བཞེས་ལ་རྒྱལ་བ་ཐུགས་རྗེའི་བདག་ཉིད་དེས་བྱང་ཆུབ་ཀྱི་སེམས། འདོད་དགུའི་བང་མཛོད། འགྲོ་བ་ལྷ་དང་བཅས་པའི་བགོ་སྐལ་དུ་བཞག་པ་འདི་ལ་ཐུགས་མཉེས་པར་མཛད་དུ་གསོལ། ཨོཾ་ཨཱཿཧཱུྃ། འགྲོ་བ་རིགས་དྲུག་གི་སེམས་ཅན་བདག་ཏུ་འཛིན་པའི་རང་བཞིན་ལ་ཞེན་ཞིང་། བདག་གིར་འཛིན་པ་ལ་གདུང་བ་སྐྱེ་བ། ཡང་དང་ཡང་དུ་སྲིད་པར་སྐྱེ་བའི་ཆོས་ཅན། བདག་ལ་ཆགས། གཞན་ལ་སྡང་། གཉིས་སུ་རྨོང་པའི་རང་བཞིན་སྣང་བ་རགས་པ་ལ་ཞེན་ཅིང་། གདོས་བཅས་ཀྱི་ལུས་ཀྱིས་བཅིངས་པ་རྣམས་སྐད་ཅིག་གིས་འདུ་མི་ནུས་ཤིང་ཕྲ་མོའི་ཟས་ཀྱི་ཚིམ་པར་མི་འགྱུར་ནའང་། བདག་གི་སྙིང་རྗེ་ཆེན་པོའི་སྟོབས་ཀྱིས་ཁམས་གསུམ་གྱི་སེམས་ཅན་ཐམས་ཅད་མདུན་ན་གནས་པ་བཞིན་དུ་བསམ་ནས། གསུར་མཆོད་བདུད་རྩིའི་མཆོད་སྦྱིན་འདིས་མགྲོན་དུ་བགྱིད་ན་བདག་གི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་ཤིང་། མ་སེམས་ཅན་ཐམས་ཅད་རང་རང་སོ་སོའི་ལས་སྣང་སྡུག་བསྔལ་དང་བྲལ་ནས་དགའ་བ་ཆེན་པོའི་ཡུལ་དུ་གྱུར་ཅིག །ཨོཾ་ཨཱཿཧཱུྃ། གཞན་ཡང་སྦྱིན་པ་བླ་ན་མེད་པའི་ཡུལ་དུ་གྱུར་པ། བྱང་ཆུབ་སེམས་དཔའ་རྣམས་ཀྱི་བསོད་ནམས་ཀྱི་ཞིང་། སྙིང་རྗེའི་ཡུལ། བཟོད་པའི་རྟེན། བརྩོན་འགྲུས་ཀྱི་གྲོགས། འཇིག་རྟེན་མི་ཡུལ་གྱི་བཀྲེན་པ། སློང་མོ་ལ་རྒྱུ་བ། སྒོ་ནས་སྒོ་ཉུལ་ཞིང་། རྟག་ཏུ་གཞན་ལ་རེ་བ། སློང་མོས་འཚོ་ཞིང་སློང་མོ་ལ་བརྟེན་པ། དམན་པའི་ལུས་ཅན་དེ་དག་ཀུན་ཡང་མཆོད་སྦྱིན་གྱི་ཡུལ་དུ་བྱས་ནས་སྙིང་རྗེའི་བློས་བཟུང་བ་ལགས་ན་གསུར་མཆོད་བདུད་རྩིའི་རང་བཞིན་འདིས་དེ་དག་ལ་ཁྱབ་སྟེ། བཀྲེས་པ་ལ་ཟས། འཁྱགས་པ་ལ་གོས། རང་རང་གི་འདོད་པའི་ལོངས་སྤྱོད་ལྟར་འགྱུར་བར་རྒྱལ་བ་སྲས་བཅས་ཀྱི་བྱིན་གྱིས་བརླབས་ནས། བདག་ལ་སེར་སྣས་ཟས་ནོར་མི་སྟེར་བའི་རྩ་ལྟུང་མི་འབྱུང་བར་གྱུར་ཅིག །ཨོཾ་ཨཱཿཧཱུྃ། གཞན་ཡང་གསོན་དང་གཤིན་གྱི་ཡུལ་ན། གྲལ་གྱི་མཐའ་ལ་འདུག་པ། ཟས་ཀྱི་ལྷག་མ་ལ་དབང་བ། སྐོམ་གྱི་སྙིགས་ལ་བཏུང་བ། སྔོན་གྱི་སྦྱིན་འབྲས་ཉུང་བ། ད་ལྟ་གཏོང་ཕོད་ཆུང་བ། ལུས་ཀྱི་མདངས་ཞན་པ། གོས་ཀྱི་བརྗིད་ཉམས་པ། དབུལ་ཞིང་ཕོངས་པའི་སེམས་ཅན་ཐམས་ཅད་གསུར་མཆོད་ཡེ་ཤེས་ཀྱི་བདུད་རྩི་འདིས་ངོམས་ཤིང་ཚིམ་ནས་བཀྲེས་སྐོམ་ཉམ་ཆུང་གི་སྡུག་བསྔལ་རང་སར་ཞི་སྟེ་རང་སྡེ་ཁས་དྲག་དང་སྐལ་བ་མཉམ་ནས་དམ་པའི་ཆོས་ལ་སྤྱོད་པར་གྱུར་ཅིག །ཨོཾ་ཨཱཿཧཱུྃ། གཞན་ཡང་སྙིགས་དུས་ཀྱི་རྒུད་པས་གདུང་བའི་བཙུན་གཟུགས་ཁྲིམས་ཀྱང་འཇིགས་སྐྱོབས་དང་ལེགས་སྨོན་ལ་བརྟེན་པ། རྟགས་ཀྱང་དམར་སེར་ཧྲུལ་ཐག་ཆད་པ། ཟས་ཀྱང་དགེ་འདུན་གྱི་དཀོར་ལ་རེ་བ། མདོག་ཀྱང་སྔོ་ནག་དང་སྐྱ་སེར་དུ་འདུག་པ། རང་ཟས་ཀྱིས་ཚིམ་དཀའ་བ། གཞན་ཟས་ལ་རེ་ཆེ་བ། ལྷ་ཟས་ཀྱི་གཏོར་མ་ལེན་པ། མི་ཟས་ཀྱི་སློང་མོ་བྱེད་པ། གྲལ་ཟས་ཀྱི་སྐལ་བ་དབང་པ། དད་ཟས་ཀྱི་འབུལ་བ་ལེན་པ། སྤྲང་ཟས་ཀྱི་ལྷག་རོལ་སྡུད་པ། ཟས་ཟ་སར་ལག་པ་འཛེད་པ། སྐོམ་སྐོལ་སར་ཕོར་བུ་འདེགས་པ། ཤ་མཐོང་ན་མཆིལ་མ་མིད་པ། ཟས་སྣ་དགུ་ཡོད་ཀྱང་སྐྱོབས་པར་དཀའ་བ། ཤ་མུག་ཤ་ཡིན་ཡང་རིན་གྱིས་ཉོ་བ། ཤ་དང་མར་གཉིས་མཉམ་བཀྱགས་བྱེད་པ། སྐུ་གསུང་ཐུགས་རྟེན་མ་ཁྲེབ་དང་བརྗེ་བ། གོད་རོ་ལ་བྱ་རྒོད་ལྟར་འདུ་བ། གོད་ཤ་ལ་གསེར་དངུལ་ལྟར་ཉོ་བ། དབྱར་ཇ་སློང་བ། སྟོན་མར་སློང་བ། དགུན་ནས་སློང་བ། མ་བོས་ཀྱང་འོང་བ། མི་དགོས་ཀྱང་སྙོགས་པ། མ་བྱིན་ན་ཁྲོ་བ། མ་བལྟས་ན་རྐུ་བ། གཅིག་བྱིན་ན་གཉིས་སློང་བ། ཡང་བྱིན་ན་ཡང་སློང་བ། རྒྱུན་དུ་བདག་ཅག་ལ་རེ་བ་དེ་ལྟ་བུ་སྔར་ཤི་བ། ད་ལྟ་ཡོད་པ། ཕྱིས་འབྱུང་བ་ཐམས་ཅད་གསུར་མཆོད་ཡེ་ཤེས་ཀྱི་བདུད་རྩི་འདིས་ངོམ་ཤིང་ཚིམ་ནས་ལྟོག་སྣང་བཀྲེས་སྣང་ཐམས་ཅད་དང་བྲལ་ཏེ། རང་ཟས་ཁབ་རྩེ་ཙམ་གྱིས་ཚིམ་སླ། གཞན་ཟས་རི་བོ་ཙམ་ལའང་གདུང་བ་མི་སྐྱེད་པར། བཞིན་སྣུམ་གྱི་ལེ། ལྟོ་སྒྲོགས་པ་ཆིལ་ལེ། བག་དྲོ་ཕལ་ལེ། དུས་རྟག་ཏུ་ཆོས་སྤྱོད་དང་སྒྲིབ་སྦྱོང་ལ་བརྩོན་ནས། དད་པ་དང་འདུན་པའི་ཡུལ་དུ་གྱུར་ཅིག །ཨོཾ་ཨཱཿཧཱུྃ། གཞན་ཡང་ཟས་སློང་མོ་ལ་བརྟེན་པ། གོས་ཕྱག་དར་ལ་རེ་བ། གཞན་གྱི་སྒོ་ཉུལ་བ། བཞིན་ཐལ་མདོག་ལྟར་འདུག་པ། སྐད་རྙོལ་རྙོལ་ལྟར་འབོད་པ། ལག་པ་དང་ཕོར་བ་བཟེད་པ། དབྱུག་པ་དང་ཁུག་སྟོང་ཐོག་པ། ངོ་ཤེས་ཀྱི་མིང་ནས་འབོད་པ། ངོ་མི་ཤེས་པ་ལ་ངོ་བསྟོད་བྱེད་པ། དབྱར་གསུམ་སྐྱུར་ལ་རེ་བས་སྣོད་ངོ་དང་བཀྲུ་བཤལ་སློང་བ། སྟོན་གསུམ་འབྲུ་ལ་རེ་བས་ཕྱར་སྙིགས་དང་ལྟེ་ཕྱག་སློང་བ། དཔྱིད་གསུམ་མར་ལ་རེ་བས་བཙག་སྙིགས་དང་སྐོག་རོག་རྩོད་པ། དགུན་གསུམ་ཤ་ལ་རེ་བས་རུས་བཏོགས་དང་ཁུ་སྙིགས་སློང་བ། ཡང་ནས་ཡང་དུ་སློང་བ། ད་ནངས་བྱིན་ན་དོ་དགོང་འོང་བ། དེ་རིང་བྱིན་ན་སང་ཉིན་འོང་བ། མི་འོང་ཁ་ལ་བཏགས་པ། འོང་རྒྱུ་རྒྱུན་ཆད་མེད་པ། མནའ་ཟན་ལྟར་ཟ་བ། ལྐུག་ཆོས་ལྟར་འདོན་པ། བརྡུང་ཡང་ལན་མེད་པ། ངག་འཇམ་འཇམ་ལྟར་སྨྲ་བ། གཏིང་ན་གདུག་རྩུབ་པ། བྱིན་ན་ཚིམ་དུས་མེད་པ། མ་བྱིན་ན་ཞེ་སྡང་ལང་བ། རྟག་ཏུ་གཞན་ལ་རེ་བའི་སྤྲང་པོ། སྤྲང་མོ། ཞ་བོ། ལོང་བ། འོན་པ། ལྐུགས་པ་ཐམས་ཅད་གསུར་མཆོད་ཡེ་ཤེས་ཀྱི་བདུད་རྩི་འདིས་ངོམས་ཤིང་ཚིམ་ནས་བཀྲེས་པ་ཞི། སྐོམ་པ་སེལ། ལོང་བས་མཐོང་། འོན་པས་ཐོས། ཞ་བོ་འགྲོ། ལྐུགས་པས་གཏམ། བདེ་སྐྱིད་ཕུན་སུམ་ཚོགས་ཤིང་རྟག་ཏུ་ཆོས་ལ་སྤྱོད་པར་གྱུར་ཅིག །ཨོཾ་ཨཱཿཧཱུྃ། དེ་ལྟར་གསོན་གྱི་དུས་སུ་རང་ཟས་མེད་པས་སྤྲང་ཟས་དང་དཀོར་ཟས་ཀྱི་ལུས་པོ་མ་སྐྱོབ་པར་ཟ་སྙམ། ལོན་སྙམ། རྙེད་སྙམ་གྱི་ངང་ལ། ལྟོག་གྲི་དང་འཁྱགས་གྲིར་ཤི་བ། ཆོས་ཀྱི་སྒྲ་ཙམ་མ་ཐོས་པའམ། ཐོས་ཀྱང་བླ་མ་དང་དགེ་འདུན་ལ་མཉམ་འགྲོགས་ཀྱི་དབང་གིས་དད་པ་སྤུ་ཙམ་མེད་པས། ཆོས་ཀྱི་ཕན་མ་ཐོགས་པར་སྲིད་པ་བར་མ་དོའམ། ཡི་དྭགས་སྡེ་ཚན་གཉིས་གང་རུང་དུ་སྐྱེས་པ། འཁྲུལ་སྣང་དུ་མ་ལ་སྤྱོད་པ། ཉིན་མཚན་གོ་ལོག་ཏུ་ཤར་བ། འཁྱགས་ལྟོག་སྐོམ་གསུམ་གྱིས་གདུང་བ། བཀྲེས་སྣང་དང་ཟས་སྣང་རྒྱུན་ཆད་མེད་པ། རྟག་ཏུ་སྒོ་དང་ཁྱིམ་ཉུལ་ཞིང་། ཟས་སྐོམ་དང་འབྱོར་བ་མཐོང་ཡང་ལོངས་སྤྱོད་རྒྱུ་མེད་པ། འཇིགས་སྐྲག་དང་ཞེ་སྡང་གིས་མནར་བ། ཤི་མིག་གསོན་ལ་བལྟ་བ། ཤི་ལག་གསོན་ལ་གཟེད་པ། ཤི་སེམས་གསོན་ལ་ཆགས་པ། དུང་སྐད་ལ་རྒྱུག་པ། བགོས་གྲལ་དུ་འཚོགས་པ། བཟའ་བཏུང་ལ་རེ་བ། བགོས་བྱེད་པར་སོང་ཡང་སྐལ་བ་མེད་པ། ལག་པ་བཟེད་ཀྱང་གཞན་གྱིས་མི་མཐོང་། མ་མཐོང་ཙ་ན་ཞེ་སྡང་ལང་བ། ཡུལ་མུན་རུབ་ལྟར་སྣང་བ། ལུས་གྲིབ་མ་ལྟར་འདུག་པ། ཁ་ཆར་དང་བུ་ཡུག་གིས་གདུང་བ། སྔོ་ལ་གནག་པ། སྐྱ་ལ་སྐེམ་པ། སེར་ལ་བཙའ་བ། བཞིན་མི་སྡུག་པ། སྐད་ངན་པ། ཟས་ལ་རེ་བ། སྐོམ་ལ་གདུང་བ། ཇ་ལོ་ངན་སྙིགས་ལ་འདུ་བ། སྣབ་དང་ཁ་ལུད་ལེན་པ། གསུར་དང་གཏོར་མ་ལ་གདུང་བ་ཐམས་ཅད་གསུར་མཆོད་ཡེ་ཤེས་ཀྱི་བདུད་རྩི་མཁོ་དགུ་ལོངས་སྤྱོད་ཀྱི་གཏེར་དུ་གྱུར་པ་འདིས་ངོམས་ཤིང་ཚིམ་ནས་ཟས་སྐོམ་གྱི་ཞེན་པ་དང་བྲལ། རེ་ཞིང་ཆགས་པ་མེད་པར་ལྷ་དང་བླ་མ་རྗེས་སུ་དྲན་ནས། དད་པ་དང་གསོལ་འདེབས་ཡང་དག་པ་ལ་བརྟེན་ཏེ་མྱུར་དུ་དག་པའི་ཞིང་ཁམས་སུ་བགྲོད་ནུས་པར་གྱུར་ཅིག །དེ་ལྟར་མ་གྱུར་གྱི་བར་དུའང་ཁྱེད་གཤིན་གྲལ་ན་མང་བ་ཡིན། ངེད་གསོན་གྲལ་ན་དཀོན་པ་ཡིན་པས། གཤིན་གསོན་ལ་མ་གདུང་། གསོན་ལ་རེ་མ་ཆེ། ཤུལ་དུ་ཆགས་ཞེན་མ་བྱེད། ཟས་སྣུམ་སྣུམ་གྱི་བཅུད་ལ་མ་རྐུ། ཟོག་མེར་མེར་གྱི་གཡང་ལ་མ་རློམས། མི་ཕ་སྤུན་གྱི་གྲལ་དུ་མ་སྙེགས། གསུར་མཆོད་བདུད་རྩིའི་རང་བཞིན་འདིས་ཚིམ་པར་མཛད་དུ་གསོལ། ཚིམ་ནས་ཀྱང་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེ་བར་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། ༈ གསུར་མཆོད་བདུད་རྩིའི་ཆར་འབེབས་ལས་སྙིང་རྗེའི་མགྲོན་དམིགས་བསལ་ལ་བསྔོ་བའི་ཁོལ་བཏོན་ལེ་ཚན། གསུར་མཆོད་ནི། ཨོཾ་ཨཱཿཧཱུྃ། གཞན་ཡང་སྙིགས་དུས་ཀྱི་རྒུད་པས་གདུང་བའི་བཙུན་གཟུགས་ཁྲིམས་ཀྱང་ལེགས་སྨོན་དང་འཇིགས་སྐྱོབས་ལ་བརྟེན་ནས། རྟགས་ཀྱང་དམར་སེར་ཅན། ཟས་ཀྱང་རྟག་ཏུ་དཀོར་ལ་རེ་བ། རང་ཟས་ཀྱིས་ཚིམ་དཀའ་བ། གཞན་ཟས་ལ་རེ་བ། གྲལ་ཟས་ཀྱི་ཕོག་ལ་དབང་བ། དད་ཟས་ཀྱི་འབུལ་བ་ལེན་པ། དབྱར་མར་དང་། སྟོན་ནས་སློང་བ། མ་བོས་ནས་འོང་བ། མི་དགོས་ཀྱང་སྙོགས་པ། མ་བྱིན་ན་ཁྲོ་བ། ད་ལོ་བྱིན་ན་སོང་ཕོད་ཀྱང་འོང་བ། རྒྱུན་དུ་གཞན་ལ་རེ་བ། དེ་ལྟ་བུར་སྔར་ཤི་བ་དང་། ད་ལྟ་ཡོད་པ། ཕྱིས་འབྱུང་བ་ཐམས་ཅད་ལ་གསུར་མཆོད་ཡེ་ཤེས་ཀྱི་བདུད་རྩི་འདི་དག་གིས་ངོམ་ཞིང་ཚིམ་ནས། ལྟོག་སྣང་། བཀྲེས་སྣང་ཐམས་ཅད་དང་བྲལ་ཏེ། རང་ཟས་ཁབ་རྩེ་ཙམ་གྱིས་ཀྱང་འཚོ་སླ་བ། གཞན་ཟས་རི་བོ་ཙམ་ལ་གདུང་བ་མི་སྐྱེ་བར། བཞིན་སྣུམ་གྱི་ལེ། ལྟོ་སྒྲགས་པ་ཆིལ་ལེ། བག་གྲོ་ཕ་ལེ། དུས་རྟག་ཏུ་སྤྱོད་པ་སྒྲིབ་སྦྱང་ལ་བརྩོན་ནས་དད་པ་དང་འདུན་པའི་ཡུལ་དུ་གྱུར་ཅིག ། ༈ གཉན་ཆེན་ཐོག་པ་རྩལ་ལ་སོགས་པ་དམག་དང་ཇག་གི་ཁ་འཛིན་བྱེད་ཅིང་རང་ཕྱོགས་རྒྱལ་ཞིང་གཞན་ཕྱོགས་ཕམ་པར་བྱེད་པའི་ཡུལ་ལྷ་གཞི་བདག་གི་རིགས་སུ་གྱུར་པ་ཐམས་ཅད་མ་ཐོགས་མྱུར་བའི་རྫུ་འཕྲུལ་གྱིས་གནས་འདིར་བྱོན་ལ། རྣལ་འབྱོར་པ་བདག་གིས་སྔགས་དང་ཕྱག་རྒྱ་ཏིང་ངེ་འཛིན་གྱིས་བྱིན་གྱིས་རླབས་པའི་གསུར་མཆོད་བདུད་རྩིའི་རང་བཞིན་འདོད་ཡོན་གྱི་རྣམ་པ་མ་ཚང་བ་མེད་པ་ཡིད་བཞིན་གྱི་ནོར་བུ་དང་དཔག་བསམ་གྱི་ཤིང་ལྟར་འདོད་དགུའི་ལོངས་སྤྱོད་བསྐལ་པའི་བར་དུ་ཟད་མི་ཤེས་པ་འདི་དག་བཞེས་ལ་ཕན་པ་དང་བདེ་བའི་བསམ་པ་བཟང་པོ་རྒྱུད་ལ་སྐྱེས་ནས། སྤྱིར་ཡངས་པའི་རྒྱལ་ཁམས་ཐམས་ཅད་དང་། ཁྱད་པར་དུ་རྨ་རྫ་སྨར་གསུམ་ལ་གནས་པའི་སྐྱེ་དགུ་ཐམས་ཅད་ལ་ཉེ་རིང་ཆགས་སྡང་མེད་པའི་བསམ་པ་བསྐྱེད་ནས་ཀུན་ཡང་ཕན་ཚུན་བྱམས་པའི་སེམས་དང་། ཕན་པའི་སེམས་དང་། དགའ་བའི་སེམས་ཀྱིས་ཤིན་ཏུ་མཐུན་པར་འགྲོགས་ཤིང་འཐབ་འཛིང་རྩོད་པ་ལ་སོགས་པའི་སྤྱོད་ངན་ཐམས་ཅད་དུས་དེང་ནས་རྒྱུན་ཆད་དེ་མི་དང་མི་མ་ཡིན་པ་ཐམས་ཅད་དམ་པའི་ཆོས་བཞིན་སྤྱོད་པ་ལ་ངེས་པར་སྤྲོ་བའི་ཐབས་ཀྱི་སྒོ་ལ་ནན་ཏན་མཛད་དུ་གསོལ་ལོ། །དཔལ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ལ་སོགས་སྔོན་བྱོན་གྲུབ་པའི་སྐྱེས་བུ་རྣམས་ཀྱི་བཀའ་དང་དམ་ལ་མ་འདའ་བར་ཡངས་པའི་རྒྱལ་ཁམས་ཆོས་བཞིན་སྐྱོང་བའི་ས་དབང་སྡེ་དགེའི་རྒྱལ་པོའི་བཀའ་ལུང་འཕྲིན་ལས་ཀྱི་ཕོ་ཉ་བ་ཁ་བསྒྱུར་གཉེར་ཟུར་པདྨ་ཆོས་འཕེལ་གྱི་བཞེད་དོན་ཐམས་ཅད་གེགས་མེད་ཡིད་བཞིན་དུ་འགྲུབ་པའི་སྡོང་གྲོགས་མཛད་དུ་གསོལ། ཁྱད་པར་དུ་ཆགས་སྡང་གི་རྟོག་པ་ལ་ཨ་འཐས་ཤིང་། སྣང་བ་རྨི་ལམ་ལྟ་བུ་ལ་བདེན་པར་ཞེན་པའི་དབང་གིས་འབྱུང་པོ་མི་མ་ཡིན་པའི་ལུས་སུ་གྱུར་ནས་རྒྱལ་ཁམས་མི་བདེ་བ་འཁྲུགས་པའི་ཐབས་ལ་བརྩོན་པར་བྱེད་པའི་དཔོན་རྒན་བསོད་ནམས་བསྟན་པ། དཔོན་ངག་དབང་། སྲས་དཔལ་ཆེན་མགོན་པོ། དབང་ཆེན་ཀར་ཚེ་ལ་སོགས་པ་ལས་ཀྱི་རྫུ་འཕྲུལ་གྱི་ཤུགས་ཀྱིས་རྒྱུ་བ་རྣམས་ཀྱང་གསུར་མཆོད་བདུད་རྩིའི་རང་བཞིན་འདི་དག་ལ་ལོངས་སྤྱོད་ལ་སེམས་ཅན་ཐམས་ཅད་ལ་བསམ་པ་བཟང་པོ་བསྐྱེད་ནས་བདེ་བ་ཅན་དང་པདྨ་འོད་ལ་སོགས་པ་དག་པའི་ཞིང་ཁམས་རྣམས་སུ་འགྲོ་བའི་འདུན་པ་རྩེ་གཅིག་ཏུ་བསྐྱེད་ལ་ཁྱེད་རྣམས་ཀྱི་ལས་ངན་པ་ཟད་ནས་རྒྱལ་བ་སྲས་བཅས་ཀྱིས་གདུལ་བྱར་གྱུར་པར་ངེས་པར་མཛད་དུ་གསོལ། དེ་ལས་གཞན་དུ་སྲོག་བཅད་ཀྱི་དམར་མཆོད་ལ་དགའ་ཞིང་དམག་འཁྲུགས་འཐབ་རྩོད་ཀྱིས་བསད་པའི་དབུགས་འགམས་པར་བྱེད་པ་ལ་སོགས་པ་མི་དགེ་སྡིག་པའི་ལས་ལ་སྤྱོད་ན་ཚེ་འདིར་ཡང་འཇིགས་སྐྲག་བྲེལ་ཟིང་སྡུག་བསྔལ་གྱི་སྣང་བ་རྒྱུན་ཆད་མེད་ཅིང་ཤི་འཕོས་ནས་དམྱལ་བ་ཚ་གྲང་གི་སྡུག་བསྔལ་ཡུན་རིང་མོའི་བར་དུ་མྱོང་བར་འགྱུར་བས། རྒྱལ་སྲས་བྱང་ཆུབ་སེམས་དཔའ་བདག་ཅག་གི་བཀའ་ལས་དུས་ནམ་ཡང་མི་འདའ་བར་གྱིས་ཤིག །ཁམས་གསུམ་དག་པའི་ཞིང་། སྲིད་གསུམ་སྙིང་རྗེའི་མགྲོན་མ་ལུས་ཁྱབ་པའི་ཟས། ཆོས་ཉིད་ཟབ་མོའི་མཐུས། འདོད་ཡོན་མི་ཟད་པའི་གཏེར་ལ་ལོངས་སྤྱོད་པར་གྱུར་ཅིག །ཨོཾ་མ་ཎི་པདྨེ་ཧཱུྃ་ཧྲཱིཿ

༈ དམར་གསུར་ལ་བརྟེན་པའི་ཕྱུགས་ཀྱི་ནད་ཡམས་གཅོད་པ། དང་པོ་མགྲོན་བཞིའི་གསུར་བསྔོས་པའི་གཞུག་ཏུ། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་སོགས་མཐར། མཚན་བཞི་བརྗོད་ནས། ཁྱད་པར་དུ་འབྱུང་པོ་མི་མ་ཡིན་ཤ་ཟ་ཚེ་ལ་རྐུ་བ་མདངས་འཕྲོག་པ། སེམས་ཅན་གཞན་གྱི་དབུགས་ལ་རྔམ་པ། སྡང་བ་དང་གདུག་པའི་བསམ་སྦྱོར་ཅན་མི་ཡི་ནད་བདག །གནག་ཕྱུགས་ཀྱི་གོད་བདག་ལ་སོགས་པ་རྒྱ་འདྲེ་འགོང་པོའི་རིགས་ཆེ་ཆུང་ཇི་སྙེད་མཆིས་པ་མཁོ་རྒུའི་འདོད་ཡོན་ཟད་མི་ཤེས་པའི་ལོངས་སྤྱོད་ཆེན་པོ། བཟའ་བཏུང་། གནས་མལ། ཤ་ཡི་རི་བོ། ཁྲག་གི་རྒྱ་མཚོ། རུས་པའི་གྲམ་ཁྲོད། པགས་རློན་དང་སྐྲ་ཡི་བསྒོ་བ། རྐང་ཀླད་ཞག་གི་གྲུ་ཆར་ལ་སོགས་པ་རང་རང་ཅི་འདོད་ཀྱི་དངོས་པོ་བཟའ་བས་མི་ཟད་པ། བཏུང་བས་མི་བྲི་བ། བགོས་པས་མི་རྙིང་པ། རི་བོ་བས་འཕང་མཐོ་བ། རྒྱ་མཚོ་བས་གཏིང་ཟབ་པ། ཆུ་ཀླུང་བས་རྒྱུན་རིང་བ། ནད་ཀུན་སེལ་བའི་སྨན་མཆོག །འཆི་བ་གསོ་བའི་བདུད་རྩི། སྡུག་བསྔལ་སེལ་བའི་རྩི་ཆེན་དུ་དམིགས་ཏེ་འབུལ་ལོ། །སྦྱིན་ནོ། །བསྔོའོ། །དེ་རྣམས་ཀྱི་འདོད་པ་ཚིམ་ནས། སེམས་ཅན་ཐམས་ཅད་ལ་བྱམས་པའི་སེམས་དང་། སྙིང་རྗེའི་སེམས་དང་། སྙིང་ཉེ་བའི་སེམས་དང་ལྡན་ནས་མི་དང་གནག་ཕྱུགས་ལ་གནོད་པའི་འཚེ་བ་སྤངས་ཏེ་འགྲོ་བ་མང་པོ་སྲོག་གི་འཇིགས་པ་ལས་ཐར་བར་གྱུར་ཅིག །ཞེས་ལན་མང་བརྗོད་མཐར། ན་མོ་བདག་གི་བསམ་པའི་སོགས། དེ་ཟང་ཟིང་སྦྱིན་པ། ཆོས་རྣམས་ཐམས་ཅད་སོགས། སྐར་མ་རབ་རིབ་སོགས། ཆོས་སྦྱིན་བསྔོ་ཞིང་བྱམས་དང་སྙིང་རྗེ་སྐྱེད་དོ། །དཔལ་སྤྲུལ་པས་སོ། །དགེའོ། །