སྤུངས་གཏོར་ཆ་བཞིའི་ཆོ་ག་བསྡུས་པ།

Previous Text Back to Volume Page Next Text

Wylie title	spungs gtor cha bzhi'i cho ga bsdus pa
Location	dpal sprul bka' 'bum Volume 6, Text 10, Pages 51-54 (Folios 1a1 to 2b5)
Author	དཔལ་སྤྲུལ་རིན་པོ་ཆེ་
Less details More details
Citation	Dpal sprul rin po che. Spungs gtor cha bzhi'i cho ga bsdus pa. In Dpal sprul 'jigs med chos kyi dbang po'i gsung 'bum, Vol. 6: 51-54. Kathmandu: Tsadra Foundation and Shechen Publications, 2026.
Genre	Torma-offering Rituals - gtor chog

[edit]

༄༅། །སྤུངས་གཏོར་ཆ་བཞིའི་ཆོ་ག་བསྡུས་པ།

༄༅། །དབུལ་གཏོར་ཆ་བཞིའི་ཡོ་བྱད་འདུ་བྱ་སྟེ། །དང་པོ་བཤམས། ཨ་མྲྀ་ཏས་བསང་། སྭ་བྷ་ཝས་སྦྱངས། སྟོང་པའི་ངང་ལས་ཐོད་པའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ལན་གསུམ། སམྦྷ་ར་སོགས་ཅི་ནུས་བརྗོད། ཨརྒྷཾ་སོགས། ཨོཾ་ཨཱཿཧཱུྃ། མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བླ་མ་ཡི་དམ་ལོངས་སྤྱོད་རྫོགས་སྐུའི་ཞིང་ཁམས་ན་བཞུགས་པ་རྣམས་ལ་འབུལ་ལོ། །བདག་གིས་བླ་མ་ལ་དད་ཅིང་གུས་པ་མ་བགྱིས་པ་དང་། །བླ་མའི་དཀོར་ལ་འབགས་པ་དང་ཐེག་པ་ཆེན་པོའི་ཆོས་སྤངས་པ་ལ་སོགས་པ་དམ་ཚིག་ཉམས་ཆགས་ཐམས་ཅད་བྱང་ཞིང་དག་ནས་ལོངས་སྤྱོད་རྫོགས་པའི་སྐུའི་ཞིང་ཁམས་སུ་འཚང་རྒྱ་བར་གྱུར་ཅིག །གཉིས་པ་བཤམས་ལ། བསང་སྦྱང་བྱ། སྟོང་པའི་ངང་ལས་པདྨའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ལན་གསུམ་དང་། སམ་བྷ་ར་སོགས་དང་། ཨརྒྷཾ་སོགས། ཨོཾ་ཨཱཿཧཱུྃ། མཆོད་སྦྱིན་གྱི་གཏོར་མ་རྒྱ་ཆེན་པོ་རྒྱལ་བ་ཤཱཀྱ་ཐུབ་པ་འཁོར་ཉན་ཐོས་རང་རྒྱལ་སྤྲུལ་པ་སྐུའི་ཞིང་ཁམས་ན་བཞུགས་པ་རྣམས་ལ་འབུལ་ལོ། །བདག་གི་ཚེ་རབས་ཐོག་མ་མེད་པ་ནས་ཐ་མ་ད་ལྟ་ལ་ཐུག་གི་བར། སངས་རྒྱས་ཀྱི་དཀོར། ཆོས་ཀྱི་དཀོར། དགེ་འདུན་གྱི་དཀོར། མར་མེའི་དཀོར་ལ་འབག་པ་ལ་སོགས་པ་དཀོར་དང་གླུད་ཐམས་ཅད་བྱང་ཞིང་དག་ནས་སྤྲུལ་པ་སྐུའི་ཞིང་ཁམས་སུ་སངས་རྒྱས་པར་གྱུར་ཅིག །གསུམ་པ་བཤམས་ལ། བསང་སྦྱང་བྱ། སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ལན་གསུམ། སཾ་བྷ་ར་སོགས་དང་། དེ་བཞིན་གཤེགས་པ་བཞིའི་མཚན་བརྗོད་ལ། ཨོཾ་ཨཱཿཧཱུྃ། ལན་གསུམ། མཆོད་སྦྱིན་གྱི་གཏོར་མ་རྒྱ་ཆེན་པོ་འདི་ཕ་མས་གཙོ་བྱས་པའི་འགྲོ་བ་རིགས་དྲུག་གི་སེམས་ཅན་ཐམས་ཅད་ལ་བསྔོའོ། །ལན་ཆགས་བྲལ་བུ་ལོན་སོད་ཞེ་འཁོན་བྱང་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རིན་པོ་ཆེ་ཐོབ་པར་གྱུར་ཅིག །བཞི་པ་བཤམས་ལ། བྱིན་རླབས་གོང་ལྟར་བྱ། ཨོཾ་ཨཱཿཧཱུྃ། ལན་གསུམ། མཆོད་སྦྱིན་གྱི་གཏོར་མ་རྒྱ་ཆེན་པོ་འདི་ཀླུའི་རྒྱལ་པོ་ཝ་རུ་ཎ་འཁོར་དང་བཅས་པ་རྣམས་ལ་འབུལ་ལོ། །འཛམ་བུའི་གླིང་དུ་ཆར་ཆུ་དུས་སུ་འབེབས་པ་དང་། ལོ་ཕྱུགས་རྟག་ཏུ་ལེགས་པའི་ཕྲིན་ལས་མཛོད་ཅིག །ཀླུ་རྒྱལ་ཀུན་གྱི་རྗེར་གྱུར་པ། །མཐུ་སྟོབས་རྫུ་འཕྲུལ་རྨད་དུ་བྱུང་། །ཀླུ་རྣམས་མ་ལུས་འདུལ་མཛད་པ། །ཝ་རུ་ཎ་ལ་ཕྱག་འཚལ་བསྟོད། །ཅེས་བསྟོད་ལ་གཏོར་མ་འབུལ། ཆུ་སྦྱིན་བཏང་བ་ནི་ཡི་དྭགས་ལ། འཕགས་པ་སྤྱན་རས་གཟིགས་དབང་གི །སོགས། བསིལ་བར་ཤོག །མ་ཎི་བརྒྱ་རྩ་བརྗོད་ལ་གཤེགས། ཆོས་སྦྱིན་དང་བསྔོ་སྨོན་བྱའོ།། །།