རྫོགས་པ་ཆེན་པོའི་ཉམས་ལེན་གྱི་གནད་མཐར་ཐུག་པའི་རྩ་འགྲེལ་འོད་གསལ་གྱི་སྣང་ཆ།

Previous Text Back to Volume Page Next Text

Wylie title	rdzogs pa chen po'i nyams len gyi gnad mthar thug pa'i rtsa 'grel 'od gsal gyi snang cha
Location	dpal sprul bka' 'bum Volume 4, Text 34, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Commentaries - 'grel pa · Key Points - gnad yig
Colophon	།མཁས་པ་ཤྲཱི་རྒྱལ་པོས་གསུངས་སོ། །དགེའོ། །དགེའོ། །དགེའོ།
Colophon	/mkhas pa shrI rgyal pos gsungs so/_/dge'o/_/dge'o/_/dge'o/

[edit]

༄༅། །རྫོགས་པ་ཆེན་པོའི་ཉམས་ལེན་གྱི་གནད་མཐར་ཐུག་པའི་རྩ་འགྲེལ་འོད་གསལ་གྱི་སྣང་ཆ་ཞེས་བྱ་བ་བཞུགས་སོ། །

དུས་གསུམ་སངས་རྒྱས་ཐམས་ཅད་ཀྱི་ངོ་བོ་རིགས་ཀྱི་བདག་པོ་དྲིན་ཆེན་འཇིགས་མེད་རྒྱལ་བའི་མྱུ་གུའི་ཞབས་ལ་སྒོ་གསུམ་གུས་པ་ཆེན་པོས་ཕྱག་འཚལ་ལོ། །ཆུ་ཡོས་ཟླ་བ་དང་པོའི་ཚེས་ཉེར་ལྔ་ལ། བདག་སྤྲུལ་མིང་ཚོགས་དྲུག་རང་གྲོལ་ས་སྐྱོང་རྒྱལ་པོའི་ཚེ་སྒྲུབ་བསྙེན་སྐབས། ནངས་པར་ཐོ་རེངས་ཀྱི་ཆ་ཐུན་གྱི་འོད་གསལ་གྱི་ངང་ནས། བདག་མཆོད་རྟེན་བདེ་བྱེད་བརྩེགས་པར་སླེབས་འདུག །ཁོ་བོ་བུམ་པའི་ནང་དུ་འདུག་སྐབས། མདུན་གྱི་ནམ་མཁའ་ནས་དཔའ་བོ་མཁའ་འགྲོ་རྣམས་ཀྱིས་རོལ་མོའི་སྒྲ་མང་དུ་བསྒྲགས་ཤིང་། དྲི་བཟང་གི་དུད་པས་ཕྱོགས་ཀུན་ཏུ་ཁྱབ་པར་རྒྱས་ཤིང་། བདག་ལ་མཁའ་འགྲོ་ཞིག་གིས་ཕ་ཀི་རིག་འཛིན་ཆེན་པོ་འཇིགས་མེད་རྒྱལ་བའི་མྱུ་གུ་འཇིག་རྟེན་མི་ཡུལ་ནས་ཨོ་རྒྱན་མཁའ་འགྲོའི་ཚོགས་དཔོན་ལ་གཤེགས་སོ་ཟེར་བས་དཔའ་བོ་མཁའ་འགྲོའི་ཚོགས་ཀྱི་དབུས་སུ་མཁའ་འགྲོ་མ་བཞིས་དར་དཀར་གྱི་འདོ་ལི་ཕྱོགས་བཞིར་རྡོ་རྗེ་ཕྱེད་པས་མཚན་པས་བཏེགས་པའི་སྟེང་དུ་སེང་གེའི་ཁྲི་པདྨ་ཉི་ཟླའི་གདན་གྱི་སྟེང་དུ་དྲིན་ཆེན་རྩ་བའི་བླ་མ་དེ་ཉིད་རྣལ་འབྱོར་གྱི་ཆ་བྱད་ཅན་གཟི་བརྗིད་སྔོན་ལས་ཆེས་ཆེར་ལྷག་པ། ཕྱག་གཉིས་རྡོ་རྗེ་དང་དྲིལ་བུ་འཛིན་པ་ཐུགས་ཀར་བསྣོལ་ཏེ་བཞུགས་པ། དར་གྱི་གྲ་བཞིར་ཤར་ལྷོ་ནུབ་བྱང་གི་མཁའ་འགྲོ་མ་དཀར་སེར་དམར་ལྗང་བཞིའི་ཕྱག་གཡས་རང་རྟགས་དང་གཡོན་དར་གྱི་གྲ་བཞིའི་རྡོ་རྗེ་བཟུང་ལ་བཏེགས་པ། མཁའ་འགྲོ་བཞི་གླང་ཆེན་རྟ་མཆོག་རྨ་བྱ་ཤང་ཤང་རྣམས་ལ་ཞོན་པ་འཇའ་སྤྲིན་འོད་ལྔའི་ཀློང་ན་དཔའ་བོ་མཁའ་འགྲོ་རྣམས་གདུགས་རྒྱལ་མཚན་གླུ་གར་རོལ་མོའི་བྱེ་བྲག་སྣ་ཚོགས་བྱེད་པར་འདུག་པའི་མོད་ལ་ཁོ་བོས་མི་ཡུལ་དུ་འགྲོ་དོན་མཛད་པར་ཞུས་པའི་ལན་དུ། རྗེ་སྲོང་བཙན་ནས་ད་ལྟའི་བར་དག་ཏུ། །འགྲོ་དྲུག་གི་གདུལ་བྱ་བྱས་ཟིན་ཏེ། །ཁྱད་པར་དུ་མི་ཡུལ་འདི་ཉིད་དུ། །ཁམས་གསུམ་གྱི་སེམས་ཅན་ཐམས་ཅད་ལ། །དཀར་ནག་གི་ལས་འབྲས་བླང་དོར་དང་། །རྫོགས་ཆེན་གྱི་ཁྱད་ཆོས་ཨ་ཏི་ཡིས། །ཐམས་ཅད་ལ་འགྲོ་དོན་བྱས་ཟིན་ཏེ། །རྗེས་འཇུག་གི་བུ་སློབ་ཐམས་ཅད་ཀྱིས། །རང་ལུགས་ལས་གཞན་ན་མེད་པའི་ཆོས། །ཁོ་བོ་ཡི་རིག་འཛིན་ཆེན་པོའི་གསུངས། །དོན་མ་ནོར་བར་ཁྱོད་ལ་གདམས་པར་བྱ། །གདོད་ནས་རྣམ་དག་བསམ་ཡུལ་འདས་པའི་ཀློང་། །སེམས་ཉིད་རྒྱལ་པོ་རང་བཞིན་རྫོགས་པ་ཆེ། །གང་ཡང་མ་སྤང་ཀུན་ལས་འདས་པའི་དོན། །གང་ཤར་ཞེན་མེད་ལྷུན་འབྱམས་རིག་པའི་ཀློང་། །ཅོག་བཞག་རང་གྲོལ་གཅེར་མཐོང་བསམ་ཡུལ་མེད། །རང་བཞིན་བབ་ཡིན་བཅོས་བསླད་མ་བྱེད་ཅིག །རྨོངས་པ་གང་གིས་ངོ་བོ་དེ་བོར་ནས། །གཉུག་མའི་སེམས་ལ་སྒྲོན་པོའི་གཟེབ་བསྐུར་ནས། །བཅོས་ཤིང་བཅོས་ཤིང་སྙིང་པོའི་དོན་ལ་སྒྲིབ། །གྲོལ་བ་མེད་པ་དེ་ཡིས་སླར་བཅིང་བྱེད། །གང་ལ་བློ་ཡི་ཁོང་ན་ལྷོད་ཡོད་ན། །རང་བཞིན་ཉིད་དེ་དེ་ལ་བཅོས་མི་དགོས། །འགྱུར་མཐོང་རང་དག་གཉེན་པོས་མ་བསླད་ཅིང་། །སྤངས་བྱས་མ་བསྒྱུར་གཤིས་དེ་རྫོགས་པ་ཆེ། །ཡོད་ཉིད་མེད་ལ་མེད་པ་ཡོད་པའི་མཐའ། །དངོས་ཀུན་ཞིག་པའི་སྟོང་པ་རྫོགས་པ་ཆེ། །བཅོས་ཤིང་བཅོས་ཤིང་གྲོལ་བར་འདོད་པའི་མི། །རྟག་ཆད་གཉིས་ལས་ཐར་བར་ཡོད་དམ་ཅི། །གཞི་མེད་རྩ་བྲལ་ཡེ་ནས་རྫོགས་པ་ཆེ། །སྟོང་དང་སྣང་དང་ཡོད་དང་མེད་པའི་སྒོམ། །གང་ལ་བསྒོམ་ཡོད་ལྟ་དང་སྤྱོད་པ་ཡོད། །དེ་ལ་སྲིད་ཡོད་འཁོར་བའི་སྡུག་བསྔལ་ཡོད། །གང་ལ་ཆོས་ཡོད་ཐེག་པའི་ཞེན་འདོད་ཡོད། །དེ་ལ་ཉོན་མོངས་གཉེན་ཡོད་འཆིང་བ་ཡོད། །གཞི་བྲལ་ལམ་འགགས་འབྲས་བུ་ཞེན་པ་གང་། །ཐེག་པའི་འདོད་ཞེན་རྡུལ་ཙམ་མི་གནས་པ། །དེ་ལ་ལས་མེད་རྣམ་སྨིན་གོས་པ་མེད། །སྲིད་ཞིར་མི་གནས་ནམ་མཁའི་ངང་དུ་འགྲོ། །ཡུལ་གྱི་མཁའ་ལ་རིག་པའི་རྩལ་འཕྱོ་བར། །གཏད་མེད་རྒྱལ་པོ་འཛིན་མེད་ཤར་བའི་མི། །ཡུལ་དང་ཡུལ་ཅན་སྲིད་ལས་རང་གྲོལ་ཆོས། །དུས་གསུམ་འཕོ་འགྱུར་མེད་པའི་ངང་དུ་གནས། །རིག་པའི་རྒྱལ་པོ་སྟོང་གསལ་ཆོས་སྐུའི་གདེང་། །མི་འགྱུར་ལྷུན་གྲུབ་གཞི་རྩ་བྲལ་བའི་གདེང་། །གདེང་དང་ལྡན་པ་གདོད་མའི་ཀློང་དུ་ཨཿཞེས་གསུངས་ཤིང་སྐད་ཅིག་ཉིད་ལ་རྔ་ཡབ་དཔལ་རིའི་གྲོང་ཆེན་པོའི་དབུས་སུ་རིག་འཛིན་བླ་མ་དེ་གནས་འགྱུར་ནས་ཆེ་མཆོག་ཧེ་རུ་ཀ་སྐུ་མདོག་མཐིང་ནག་ཞལ་གསུམ་ཕྱག་དྲུག་ཞབས་བཞི་བསྒྲད་པ་གར་གྱི་ཉམས་དགུ་དུར་ཁྲོད་ཆས་བརྒྱད་དང་ལྡན་པ་འཁོར་བདུན་བརྒྱ་ཉེར་ལྔའི་ལྷ་ཚོགས་ཐམས་ཅད་ལམ་གྱིས་ཤར་བྱུང་། ཁོ་བོའི་དབང་བསྐུར་བའི་གསོལ་བ་བཏབ་པའི་ཉམས་བྱུང་། ཡང་བདུན་བརྒྱ་ཉེར་ལྔའི་ལྷ་ཚོགས་ཐམས་ཅད་གཙོ་བོ་ལ་ཐིམ། དཔལ་ཆེན་པོ་ཡང་འོད་སྔོན་པོའི་རྣམ་པར་གྱུར་ཏེ་གུ་རུ་རིན་པོ་ཆེའི་ཐུགས་ཀར་ཐིམ། དེ་མ་ཐག་ཏུ་དཔའ་བོ་མཁའ་འགྲོ་རྣམས་ཀྱིས་བཛྲ་གུ་རུའི་སྒྲ་འབའ་ལྡིར་བཟླས་པའི་རྐྱེན་གྱིས་སད་པས་ཁོ་བོ་རང་མལ་དུ་ཡོད་འདུག །ཉེར་ལྔའི་ཉིན་དེར་རིག་འཛིན་ཆེན་པོ་བླ་མ་དུས་དྲན་གྱི་ཚུལ་དུ་བླ་སྒྲུབ་རིག་འཛིན་འདུས་པའི་ཚོགས་བརྒྱ་ཞིག་ཕུལ་ལོ། །དགེའོ། །

༄༅། །རྫོགས་པ་ཆེན་པོའི་ཉམས་ལེན་གྱི་གནད་མཐར་ཐུག་པའི་འགྲེལ་པ་འོད་གསལ་གྱི་སྣང་ཆ་ཞེས་བྱ་བ་བཞུགས་སོ། །སངས་རྒྱས་ཀུན་འདུས་ཀྱི་ངོ་བོ་དྲིན་ཆེན་རྩ་བའི་བླ་མ་ལ་ཕྱག་འཚལ་ལོ། །འདིར་རང་བཞིན་རྫོགས་པ་ཆེན་པོའི་ལམ་ནས་གྲུབ་པ་བརྙེས་པའི་སྔོན་གྱི་སློབ་དཔོན་ཆེན་པོ་དགའ་རབ་རྡོ་རྗེ་ལ་སོགས་པ་རྣམས་ཀྱིས་རྟོགས་དོན་ཉམས་ལེན་གྱི་གནད་མཐར་ཐུག་པ་སྲས་ཀྱི་ཐུ་བོ་རྣམས་ལ་འདས་རྗེས། ཞལ་ཆེམས་ཀྱི་ཚུལ་དུ་གདམས་པས་རྟོགས་གྲོལ་དུས་མཉམ་ཞིང་སློབ་དཔོན་དང་དགོངས་པ་མཉམ་པར་གྱུར་པ་ཤ་སྟག་ཡིན་ལ། དེ་བཞིན་དུ་དེང་གི་སྐབས་སུ་ཡང་མཚུངས་མེད་ཆོས་ཀྱི་ཁྱབ་བདག་འཁོར་ལོའི་མགོན་པོ་འཇིགས་མེད་རྒྱལ་བའི་མྱུ་གུ་ཞེས་ཡོངས་སུ་གྲགས་པ་དེ་ཉིད་དགོངས་པ་ཆོས་དབྱིངས་སུ་ཐིམ་པའི་སྐབས་སུ་ཐུགས་ཀྱི་སྲས་མཚུངས་པ་མེད་པ་སྤྲུལ་པའི་སྐུ་རིན་པོ་ཆེ་མི་འགྱུར་ནམ་མཁའི་རྡོ་རྗེ་ལ་འོད་གསལ་གྱི་སྣང་ཆར་རྫོགས་པ་ཆེན་པོའི་ཉམས་ལེན་གྱི་གནད་མཐར་ཐུག་པ། ཞལ་ཆེམས་འདས་རྗེས་ཀྱི་ཚུལ་དུ་གསུངས་པའི་འདིའི་དོན་ཅུང་ཟད་བཀྲལ་ནས་འཆད་པ་ལ་གསུམ། གཞི་མ་འཁྲུལ་བའི་ཆོས་ཉིད་གཉུག་མ་རང་གི་ངོ་བོ་བསྟན་པ། ལམ་མ་བཅོས་པའི་སེམས་ཉིད་རིག་སྟོང་རྗེན་པར་ཉམས་སུ་བླངས་ཚུལ། འབྲས་བུ་བླང་དོར་དང་བྲལ་བའི་ངང་དུ་འཁྲུལ་རྟོག་གི་གྲོལ་ས་བསྟན་པའོ། །དང་པོ་ནི། འདི་ལྟར་གདོད་མ་གཤིས་ཀྱིས་གནས་ལུགས་སྤྲོས་པ་ཐམས་ཅད་དང་བྲལ་བའི་ཡེ་ཤེས་བདེ་གཤེགས་སྙིང་པོ་རང་གི་ངོ་བོ་གང་ཡིན་པར་དེ་རྟོགས་ཏེ་སངས་རྒྱས་མ་བྱུང་། མ་རྟོགས་ཏེ་སེམས་ཅན་མ་བྱུང་གི་དུས་ཙམ་ན་འཁོར་འདས་ཀྱི་སྤྱི་གཞི་སྟེ་ཆོས་ཉིད་རང་གི་ངོ་བོ་སྒྲིབ་གཉིས་ཀྱི་དྲི་མས་བསླད་མ་མྱོང་བའི་གཞི་ཀ་དག་ཆེན་པོ་དེ་ལ་གདོད་ནས་རྣམ་དག་ཅེས་བྱ་ལ། དེ་ལྟ་བུའི་ཆོས་ཉིད་དེ་བློས་རྟོག་དཔྱོད་དང་ཚིག་གིས་བརྗོད་པ་ལ་སོགས་པས་ཤེས་པར་མི་ནུས་ཤིང་བསམ་པའི་ཡུལ་ལས་འདས་པས་ན་ཀློང་དེ་ཡང་དོན་དུ་ན་དབྱིངས་སྟོང་པ་ཉིད་སྤྲོས་པའི་མཐའ་ཐམས་ཅད་དང་བྲལ་བ་དེ་ནི་བསམ་བརྗོད་ཀྱི་ཡུལ་ལས་འདས་པ་ཡིན་ནོ་ཞེས་བསྟན། དེ་ལྟ་བུའི་ཆོས་ཉིད་དེ་ཡང་གཞན་ན་མེད་དེ་རང་གི་སེམས་ཀྱི་རང་བཞིན་འོད་གསལ་བ་དང་གཉིས་སུ་མེད་པས་ན་སེམས་ཉིད། སེམས་ཀྱི་གཉུག་མ་དེ་ནི་འཁོར་འདས་ཀྱི་ཆོས་ཐམས་ཅད་ཀྱི་བྱེད་པོ་ཡིན་ཞིང་ཆོས་ཐམས་ཅད་ལ་དབང་བསྒྱུར་བས་རྒྱལ་པོ། དེ་ཡང་ཆོས་ཐམས་ཅད་ཀྱི་རང་བཞིན་སྟོང་པ་ཉིད་དང་དབྱེར་མེད་པས་ན་རང་བཞིན། ཆོས་ཉིད་དེའི་ཀློང་དབྱིངས་དོན་དམ་པའི་ངང་དུ་སྣང་སྲིད་གཞི་ལས་མ་གཡོས་པར་རྫོགས་པས་ན་རྫོགས་པ་ཆེན་པོ། དཔེར་ན་དངོས་པོ་ཐམས་ཅད་ལ་ནམ་མཁས་ཁྱབ་ཅིང་ནམ་མཁས་དངོས་པོ་ཐམས་ཅད་མ་སྤངས་པ་ལྟར་ཆོས་ཐམས་ཅད་ལ་ཆོས་ཉིད་རྫོགས་པ་ཆེན་པོས་ཆོས་གང་ཡང་མ་སྤང་བས་ན་གང་ཡང་མ་སྤངས། དངོས་པོའི་མཚན་ཉིད་དབྱིབས་དང་ཁ་དོག་ལ་སོགས་པ་ཐམས་ཅད་ནམ་མཁའ་ལ་མེད་ཅིང་ནམ་མཁའ་དེ་དག་གི་ཡུལ་ལས་འདས་པ་ལྟར། ཆོས་ཅན་ཐམས་ཅད་ལ་ཡོད་པའི་དངོས་པོ་དང་མཚན་མ་དང་སྨྲར་བརྗོད་ལ་སོགས་པ་ཐམས་ཅད་ཆོས་ཉིད་རྫོགས་པ་ཆེན་པོ་ལ་མེད་ཅིང་རྫོགས་པ་ཆེན་པོ་དེ་དག་གི་ཡུལ་ལས་འདས་པས་ན་ཀུན་ལས་འདས་པའི་དོན། དེ་ལྟར་དབྱིངས་ཆོས་ཉིད་རྫོགས་པ་ཆེན་པོའི་གཞིའི་གནས་ལུགས་གཉུག་མའི་ཡེ་ཤེས་རང་གི་ངོ་བོ་བསྟན་ནས་དེ་ཉིད་ཤར་གྲོལ་གཉིས་མེད་ཀྱི་ཆོས་སྐུ་ཀ་དག་ཁྲེགས་ཆོད་ཀྱི་ལྟ་བར་ཐག་བཅད་པ་ནི། ཐོལ་སྐྱེས་ཀྱི་རྣམ་རྟོག་ཡུལ་ལ་ཤར་པའི་ཚེ། ཤར་བའི་ཡུལ་དང་ཤར་བའི་རྣམ་རྟོག་གཉིས་ཀ་ལ་ཞེན་འཛིན་གྱི་སྤང་བླང་ཅུང་ཟད་ཀྱང་མི་བྱེད་པར་གང་ཤར་གྱི་ངོ་བོ་ལ་བལྟས་པས་ན་རྣམ་རྟོག་རང་དག་སྟེ་རང་རིག་མ་བཅོས་པར་ཤར་བ་དེ་ལྷུན་གྲུབ་སྐུ་གསུམ་གྱི་ངང་དུ་འབྱམས་པའི་རིག་ཡེ་ཤེས་ཀྱི་ཀློང་ཆེན་པོ་ཡིན་པས་ན། གང་ཤར་ཞེན་མེད་ལྷུན་འབྱམས་རིག་པའི་ཀློང་། དེ་ལྟར་ལྟ་བའི་རང་ངོ་མཐོང་བ་དེའི་ངང་དུ་སེམས་མ་བཅོས་པར་ཅོག་གེ་བཞག་པས་རྣམ་རྟོག་རང་དག་སྟེ་རང་བཞིན་བབས་ཀྱི་བསམ་གཏན་ལ་གནས་པ་ནི་ཅོག་བཞག །དེའི་ཚེ་སྐྱེ་མེད་ཀྱི་ངང་ནས་འགག་མེད་རིག་རྩལ་སྣ་ཚོགས་སུ་ཤར་ཡང་ཞེན་མེད་ཀྱི་ངང་དུ་གྲོལ་བས་ན་རང་གྲོལ། རྣམ་རྟོག་གང་སྐྱེས་ཀྱི་ངོ་བོ་ལ་གཅེར་གྱིས་བལྟས་པས་རྣམ་རྟོག་རང་ཡལ་བའི་ཚེ་གཉུག་མའི་ངོ་བོ་ལྷག་གིས་མཐོང་བ་ནི་གཅེར་མཐོང་། དེ་ལྟ་བུའི་སྒོམ་དེ་ཡང་བདེ་གསལ་མི་རྟོག་ལ་སོགས་པའི་ཉམས་ཀྱི་ཞེན་པ་ཐམས་ཅད་དང་བྲལ་ཏེ་རང་བཞིན་འདི་ལྟ་བུ་ཞིག་གོ་ཞེས་བློས་བསམ་པའི་ཡུལ་ལས་འདས་པས་ན་བསམ་ཡུལ་མེད། སེམས་མ་བཅོས་པ་འདི་རང་ངོ་རང་ཤེས་དྲན་པས་སྐྱོང་བ་ཙམ་ཉམས་ལེན་གྱི་གནད་འགག་ཡིན་པས་ན་རང་བཞིན་རང་བབས་ཡིན་པའི་ཕྱིར་བློས་ནན་གྱིས་བཟུང་ནས་སེམས་ལ་བཟོ་བཅོས་ན་ཅི་ཙམ་བཅོས་པ་དེ་ཙམ་ལམ་གོལ་དུ་འགྲོ་བས་ན་བཅོས་བསླད་མ་བྱེད་ཅིག །དེ་ལྟར་མ་བཅོས་པའི་ཆོས་ཉིད་རང་ངོ་མ་ཤེས་པ་རྣམས་ནི་རང་བཞིན་རྫོགས་པ་ཆེན་པོའི་ལམ་ལ་རྨོངས་པ་ཡིན་པས་ན་རྨོངས་པ་གང་གིས་དེ་ལྟ་བུའི་རྨོངས་པ་རྣམས་ཀྱི་སེམས་ཀྱི་ངོ་བོ་མ་བཅོས་པ་དེ་བོར་ཞིང་། བཅོས་མ་ལ་ལམ་དུ་བྱེད་པས་ན་ངོ་བོ་དེ་བོར་ཏེ། གཉུག་མའི་སེམས་ཡེ་གྲོལ་དུ་གནས་པ་ཉིད་ལ་རིག་པ་སྒྲིམ་པོའི་རྟོག་དཔྱོད་སྣ་ཚོགས་བཏང་ནས་རེ་དོགས་ཀྱི་གཟེབ་ཏུ་ཚུད་པས་ན། གཉུག་མའི་སེམས་ལ་སྒྲིམ་པོའི་གཟེབ་བསྐུར་ནས། དེ་ལྟར་རེ་དོགས་ཀྱི་གཟེབས་སུ་ཚུད་པ་འདི་ནི་ཡིན་ནོ་འདི་ནི་མིན་ནོ་སྙམ་དུ་བློས་ཡང་དང་ཡང་དུ་བཅོས་ཤིང་ཅི་ཙམ་བཅོས་པ་དེ་ཙམ་དུ་སྙིང་པོའི་དོན་མི་མཐོང་ཞིང་བློས་བྱས་ཀྱི་ལྟ་སྒོམ་གྱིས་ས་མི་ཆོད་པས་ན་སྙིང་པོའི་དོན་ལ་སྒྲིབ། ནམ་མཁའ་ལ་ཡེ་ནས་མདུད་པ་བྱར་མེད་པས་ན་བཀྲོལ་རྒྱུ་ཡང་མེད་པ་ལྟར་སེམས་ཉིད་ཡེ་གྲོལ་དུ་གནས་པ་ལ་གཟོད་འབད་པས་གྲོལ་བར་རློམ་པས་མི་གྲོལ་བས་ན་གྲོལ་བ་མེད། དེ་ལྟར་འབད་ནས་བཅོས་པས་གྲོལ་བར་འདོད་པ་རྣམས་ནི་སྲིན་བུའི་ཁ་ཆུས་རང་ཉིད་བཅིང་བ་ལྟར་ཞེ་འདོད་ཀྱི་གྲུབ་མཐས་སླར་བཅིང་བས་ན་དེ་ཡིས་སླར་འཆིང་བྱེད། དེ་དག་གི་གནད་དོན་ཧྲིལ་དྲིལ་ན་ད་ལྟ་ཐ་མལ་གྱི་ཤེས་པ་བློའི་བཟོ་བཅོས་གང་ཡང་མ་སོང་བ་འདི་ཀ་གཞི་གནས་ཀྱི་རིག་པ་ཡང་ཟེར། རྫོགས་པ་ཆེན་པོ་ཡང་ཟེར། དེ་བཞིན་དུ་ཕྱག་རྒྱ་ཆེན་པོ། དབུ་མ་ཆེན་པོ། སྤྲོས་པ་དང་བྲལ་བ། སྐྱེ་བ་མེད་པ་ལ་སོགས་མིང་ཅི་བཏགས་ཀྱང་དོན་དུ་ཐ་མལ་གྱི་ཤེས་པ་རང་རིག་རྗེན་པ་འདི་ཀ་ཡིན་པས་དེ་རང་ངོ་ཤེས་པ་ལ་ལྟ་བ་ཟེར་བ་ཡིན་ཏེ་དེ་ཡན་གྱིས་ས་བཅད་དང་པོའོ། །གཉིས་པ་ནི། དེ་ལྟར་རང་ངོ་ཤེས་པའི་ལྟ་བའི་གནས་ཚུལ་མ་བཅོས་པ་དེ་ཀའི་ངང་དུ་སེམས་བཅོས་མ་དང་བྲལ་བར་ལྷོད་དེ་འཇོག་པ་ནི་བསྒོམ་པ་ཡིན་པས་ན། གང་ལ་བློ་ཡི་ཁོངས་ན་ལྷོད་ཡོད་ན། དེ་ལྟར་རང་བབས་ཀྱི་ངང་དུ་མ་ཡེངས་ཙམ་དུ་བཞག་ན་རིག་པ་ལ་རང་གནས་ཀྱི་བསམ་གཏན་ཡོད་པས་རང་བཞིན་ཉིད་དེ་དེ་ལ་བཅོས་མི་དགོས། དེ་ལྟར་རང་བབས་སུ་བཞག་པས་དེ་རྩལ་གྱི་རྣམ་རྟོག་སྣ་ཚོགས་ཡུལ་ལ་འཕྲོ་ཞིང་འགྱུ་བའི་ཚེ། དང་པོ་རྣམ་རྟོག་འགྱུ་བ་དེ་ངོ་ཤེས། དེ་ནས་རང་ངོ་མཐོང་བའི་ངང་དུ་བཞག་པས་རྣམ་རྟོག་རང་སར་དག་སྟེ་ཤར་གྲོལ་རྗེས་མེད་དུ་འགྲོ་བས་ན་འགྱུ་མཐོང་རང་དག །དེ་ཡང་བཟང་རྟོག་དགེ་བའི་རྣམ་པ་ཅི་ཤར་ཡང་འདི་ནི་བཟང་པོ་ཡིན་ནོ་སྙམ་དུ་དེ་ལ་ཞེན་འཛིན་གྱི་འཁྲིས་མི་གདགས་པར་ཞེན་མེད་དུ་བཞག་པས་རང་ཡལ་བས་ན་གཉེན་པོས་བསླད་ཅིང་། ངན་རྟོག་ཆགས་སྡང་དང་ཆོས་བརྒྱད་ཀྱི་རྟོག་པ་ཤར་ཡང་འདི་ནི་ངན་པ་ཡིན་ནོ་སྙམ་ནས་འགྱོད་པ་དང་དགག་པ་སོགས་མི་བྱ་བར་རང་གྲོལ་གྱི་གཤིས་ལ་བཞག་པས་ན་སྤང་བྱས་མ་བསྒྱུར། དེ་ལྟར་བཟང་རྟོག་དགེ་བའི་རྣམ་པར་ཤར་ཡང་སེམས་ཀྱི་རང་ངོ་ལ་བཟང་པོར་བསྒྱུར་དུ་མེད་ཅིང་། ངན་རྟོག་མི་དགེ་བའི་རྣམ་པར་ཤར་ཡང་ངན་པར་བསྒྱུར་དུ་མེད་ལ་སེམས་ཅན་ནས་སངས་རྒྱས་ཀྱི་བར་དུ་སེམས་ཀྱི་གཤིས་ལ་ཁྱད་པར་མེད་པས་གཤིས་དེ་རྫོགས་པ་ཆེ། དེ་ལྟ་བུའི་རང་བཞིན་རྟོགས་ན་གང་སྤང་བླང་མེད་པའི་ངང་དུ་རོ་མཉམ་སྟེ་ད་ལྟའི་བླང་དོར་དང་རེ་དོགས་དགག་སྒྲུབ་དང་ཆགས་སྡང་འདི་ནི་ཡིན་ནོ། །འདི་ནི་མིན་ནོ་སྙམ་དུ་བདེན་ཞེན་གྱིས་བཅིང་བའི་ཆོས་དང་ཁྲིགས་སྣ་ཚོགས་སུ་ཡོད་པ་དེ་ཐམས་ཅད་མེད་པར་རང་རིག་ཟང་ཐལ་ཡུག་འབྱམས་ཀྱི་ངང་དུ་ཐམས་ཅད་སྤང་བླང་མེད་པར་དག་པས་ན་ཡོད་ནི་མེད་ལ། དེའི་ཚེ་ཉམས་ལེན་རང་རིག་རྗེན་པ་དེ་ཡང་དེའི་རང་བཞིན་འདི་དང་འདི་ལྟ་བུ་ཡིན་ནོ་ཞེས། བདེ་ལྷང་ངེ་བ་དང་། གསལ་སང་ངེ་བ་དང་། མི་རྟོག་པའི་ངང་དུ་ཆམས་སེ་བ་ལ་སོགས་གང་ཡང་མིན་པས་ཚིག་གི་བརྗོད་པ་དང་བློས་བསམ་པའི་ཡུལ་དུ་མེད་ལ་རྣལ་འབྱོར་བ་དུས་ཐམས་ཅད་དུ་རང་རིག་ཟངས་མ་ཐལ་བྱུང་དུ་ལྷག་གེར་ཤར་བ་ཉིད་སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་དུ་ཡོད་པས་མེད་པ་ཡོད་པའི་མཐའ། དེ་ལྟར་སེམས་ཉིད་མ་བཅོས་པའི་ངང་དུ་དངོས་པོ་བདེན་ཞེན་གྱི་ཆ་ཐམས་ཅད་རང་ཞིག་པས་ན་དངོས་ཀུན་བཤིགས་པས། བདེན་ཞེན་གྱི་འཆིང་བ་དང་བྲལ་བའི་རང་བབ་དེ་ཀ་རིག་སྟོང་གཉིས་སུ་མེད་པའི་སྟོང་ཉིད་ཡིན་པས་བློའི་ཡུལ་དུ་བྱས་པའི་སྟོང་ཉིད་ལོག་ནས་ཚོལ་མི་དགོས་པས་ན་སྟོང་པ་རྫོགས་པ་ཆེ། དེ་ལྟར་མ་ཤེས་པར་ཡོད་དཔྱོད་ཀྱི་སྟོང་པ་ལ་རེ་བ་རྣམས་སྣང་ཐོག་ཏུ་སྟོང་བ་ལོག་ནས་བཙལ་ཏེ་སྟོང་འཛིན་གྱི་ཞེན་པས་བཅིངས་ནས་བཅོས་ཤིང་བཅོས་ཤིང་བརྟག་པའི་སྟོང་པ་ཡིན་ནོ་སྙམ་པའི་བློས་གྲོལ་བར་འདོད་པས་ན། བཅོས་ཤིང་བཅོས་ཤིང་གྲོལ་བར་འདོད་པའི་མི། དེ་ལྟ་བུ་དེ་ནི་སྣང་ཚོད་ལ་སྐུར་པ་བཏབ་ནས་སྟོང་པ་བཤིགས་པས་ཆད་པའི་མཐར་ལྟུང་ལ། སྟོང་པ་ལ་མཆོག་ཏུ་བཟུང་ནས་བདེན་པར་ཞེན་པས་རྟག་པའི་ལྟུང་སྟེ། རྟག་ཆད་ཀྱི་གཡང་ས་ལས་མི་ཐར་བས་ན། རྟག་ཆད་གཉིས་ལས་ཐར་བ་ཡོད་དམ་ཅི། དཔེར་ན། འབྱུང་བཞིས་བསྡུས་པའི་སྣོད་བཅུད་ཐམས་ཅད་ནམ་མཁའ་ལ་བརྟེན་ནས་གནས་ཀྱང་ནམ་མཁའ་གང་ལའང་བརྟེན་ས་མེད་པ་ལྟར་ཆོས་ཐམས་ཅད་ཆོས་ཉིད་རྫོགས་པ་ཆེན་པོ་ལ་བརྟེན་ཀྱང་ཆོས་ཉིད་རྫོགས་པ་ཆེན་པོ་ནི་གང་ལ་ཡང་མི་བརྟེན་ཏེ། བརྟེན་པའི་གཞི་མེད་པས་ན་གཞི་མེད་འཁོར་འདས་ཀྱི་ཆོས་ཐམས་ཅད་རྒྱུ་དང་རྐྱེན་གྱིས་མ་བསྐྱེད་པ་མེད་ཀྱང་ཆོས་ཉིད་རྫོགས་པ་ཆེན་པོ་ནི་གང་གིས་ཀྱང་བསྐྱེད་པའི་རྩ་བ་མེད་པས་ན་རྩ་བྲལ། གཞི་རྩ་མེད་པའི་ཆོས་ཉིད་དེ་ནི་དུས་ཐམས་ཅད་དུ་བཅོས་བསླད་མེད་པར་ཡེ་ནས་གནས་པས་ན་ཡེ་གནས་རྫོགས་པ་ཆེ། དེ་ལྟར་ཡེ་གནས་གཉུག་མའི་ཆོས་ཉིད་རང་བབས་སུ་གནས་པ་མི་ཤེས་པ་རྣམས་ཁ་ཅིག་ནི་ཆོས་ཐམས་ཅད་སྟོང་པ་ཉིད་ཡིན་ནོ་སྙམ་དུ་སྟོང་འཛིན་ལ་ཆེད་དུ་གཉེར་ནས་བསྒོམ། ཁ་ཅིག་ནི་སྣང་ཆ་གཟུགས་ཀྱི་རྣམ་པ་ལ་དོན་དུ་འཛིན་ཞིང་ལྷ་དང་ཐིག་ལེ་ལ་སོགས་མཚན་བཅས་ཀྱི་སྒོམ་ལ་རེ། ཁ་ཅིག་ནི་ཆོས་ཉིད་དོན་དམ་པ་དེ་ནི་འདི་དང་འདི་ལྟ་བུ་ཡིན་ནོ་ཞེས། བདེན་བདེན་རྟག་རྟག་ཨ་འཐས་སུ་བཟུང་ནས་བློས་གཏད་སོ་ལ་སྒོམ་དུ་བཟུང་ནས་ཡོད་པར་སྒྲོ་འདོགས། ཁ་ཅིག་ཆོས་ཐམས་ཅད་སྟོང་པ་ཉིད་ཡིན་པས་འཁོར་བ་མེད་མྱང་འདས་མེད། ལས་འབྲས་མེད་ཅང་མེད་ཆད་པར་སྒོམ་ཞིང་མེད་པར་སྐུར་བ་འདེབས་པ། དེ་ལྟར་མ་རྟོགས་པ་རྣམས་རང་རང་གི་ཞེ་འདོད་སྣ་ཚོགས་ལ་དམ་པའི་དོན་དུ་འཛིན་ཞིང་བསྒོམ་པས་ན། སྟོང་དང་སྣང་དང་ཡོད་དང་མེད་པའི་སྒོམ། དེ་ལྟར་བློས་བྱས་གཉིས་འཛིན་གྱི་སྒོམ་པ་སུ་ལ་ཡོད་པ་དེ་ལ་ཞེ་འདོད་གྲུབ་མཐའི་ལྟ་བའང་ཡོད། བླང་དོར་ཕྱོགས་རིས་ཀྱི་སྤྱོད་པའང་ཡོད་པས་ན། །གང་ལ་བསྒོམ་ཡོད་ལྟ་དང་སྤྱོད་པ་ཡོད། །དེ་ལྟར་བློས་བྱས་བཅོས་མའི་ལྟ་སྒོམ་ལ་རེ་བ་རྣམས་ལ་ཡེ་གྲོལ་སྤང་བླང་དང་བྲལ་བའི་གནད་མེད་པས་འཁོར་འདས་ལ་བཟང་ངན་དུ་འཛིན་པས་ན་དེ་ལ་སྲིད་ཡོད། དེ་ལྟར་སྲིད་པ་བདེན་པར་བཟུང་ནས་སྤང་བྱར་བྱེད་པ་དེས་ནི་སྲིད་པ་སྤངས་མི་ནུས་ཏེ་དཔེར་ན་ལུས་མ་སྤང་བར་གྲིབ་མ་སྤང་མི་ནུས་པ་ལྟར། འཁོར་བའི་རྩ་བ་བདེན་ཞེན་མ་སྤང་བར་འཁོར་བའི་སྡུག་བསྔལ་སྤངས་མི་ནུས་པས་ན་འཁོར་བའི་སྡུག་བསྔལ་ཡོད། དེ་བཞིན་དུ་གཉིས་འཛིན་ཕྱོགས་རེ་ལ་ཞེན་པ་རྣམས་ཆོས་དང་ཐེག་པའི་ཞེན་འདོད་སྣ་ཚོགས་ཀྱིས་བཅིངས་ཏེ་འདི་ནི་བཟང་པོའོ། །འདི་ནི་ངན་པའོ། །འདི་ནི་རང་ལུགས་སོ། །འདི་ནི་གཞན་ལུགས་སོ། །ངེད་ནི་མཆོག་གོ །གཞན་ནི་དམན་ནོ་ཞེས་ཆགས་སྡང་དང་རྩོད་པ་མངོན་པར་འཕེལ་བས་ན། གང་ལ་ཆོས་ཡོད་ཐེག་པའི་ཞེ་འདོད་ཡོད། དེ་ལྟ་བུ་དེ་ནི་རང་གཞན་གཉིས་འཛིན་གྱི་རྗེས་སུ་འབྲང་ནས་ཉོན་མོངས་པའི་གཟེབ་ཏུ་ཆུད་ཅིང་འཁོར་བའི་འཆིང་བ་ཐམས་ཅད་ཀྱིས་བཅིང་བ་ཡིན་པས་ན། དེ་ལ་ཉོན་མོངས་གཟེབ་ཡོད་འཆིང་བ་ཡོད། །འདི་ལྟ་བུ་འདི་ནི་མགོན་པོ་ཀླུ་སྒྲུབ་ཀྱིས་དབུ་མ་རིན་ཆེན་ཕྲེང་བ་ལས་གསུངས་ཏེ། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །ཞེས་སོགས་གསུངས་པ་ལྟར་རོ། །གཤིས་དག་གི་ངང་དུ་ཡེ་སྟོང་རྩ་བ་བྲལ་བས་གཞི་འཛིན་པ་དང་བྲལ། རང་རིག་ཟང་ཐལ་རྗེན་པར་སྩོལ་སྒྲུབ་ཀྱི་སྒྲོག་ལས་གྲོལ་བས་ལམ་གྱི་གོ་རིམ་འགག །ཐམས་ཅད་ཡེ་གྲོལ་དུ་ཤེས་པས་བསྒྲུབ་བྱའི་འདོད་པ་མེད་པས་འབྲས་བུ་ཞེ་འདོད་ཟད་པས་ན། གཞི་བྲལ་ལམ་འགག་འབྲས་བུ་ཞེ་འདོད་ཟད། ཆོས་ཟད་ཀྱི་རིག་པ་མཚོན་བརྗོད་ལས་འདས་ཏེ་ཐེག་པའི་ཚིག་གིས་ཇི་བཞིན་པ་མཚོན་མི་ནུས་ཤིང་ཕྱོགས་རེ་ནས་གཞལ་ན་ཐེག་པ་ཐམས་ཅད་ཀྱང་འཐད་པས་ཐེག་པ་དང་གྲུབ་མཐའི་ལྟ་གྲུབ་ལ་མཆོག་དམན་གྱི་འདོད་ཞེན་དང་བྲལ་བས་ན། ཐེག་པར་འདོད་ཞེན་རྡུལ་ཙམ་མི་གནས་པ། དེ་ལྟ་བུའི་རྣལ་འབྱོར་པ་དེ་རང་རིག་ཟང་ཐལ་དུ་རྟོགས་པས་རྣམ་རྟོག་ཐམས་ཅད་ཤར་གྲོལ་དུས་མཉམ་དུ་དག་སྟེ་ཆུ་ལ་རི་མོ་བྲིས་པ་ལྟར་སྐད་ཅིག་གིས་ཞིག་པས་ལས་མི་གསོག་པས་ན་དེ་ལ་ལས་མེད། ལས་མི་གསོག་པའི་ལྟ་སྣང་གི་རྟོག་པ་ཆགས་སྡང་ལྟར་སྣང་ཡང་དེའི་ཕན་གནོད་གང་ཡང་མེད་པས་ན་རྣམ་སྨིན་གོས་པ་མེད། འཁོར་བ་མེད་སྣང་དུ་ཤེས་པས་སྲིད་པའི་མཐའ་ལ་མི་གནས་ཤིང་སྐུ་གསུམ་ལམ་སྣང་དུ་རྫོགས་པས་ཞི་བ་ཕྱོགས་གཅིག་ཏུ་མི་ལྟུང་བས་ན་སྲིད་ཞིར་མི་གནས། ཆོས་ཉིད་ནམ་མཁའ་ལྟ་བུའི་ངང་དུ་གཉུག་མ་རྒྱུན་ཆད་མེད་པས་ནམ་མཁའི་ངང་དུ་གྲོལ། ཕྱི་ཡུལ་འབུལ་བའི་སྣོད་བཅུད་ལྟར་སྣང་བ་ཐམས་ཅད་ཀྱང་སྟོང་གཟུགས་སྒྱུ་མའི་རྣམ་པར་ཤར་བས་ན་ཡུལ་གྱི་ནམ་མཁའ་ལ་རིག་རྩལ་སེམས་ཀྱི་རྣམ་རྟོག་ཡད་ཡུད་དུ་འཕྱོ་བ་ཡང་ཤར་གྲོལ་རྒྱུན་མི་ཆད་སངས་རྒྱས་ཉིད་དེ་གཞན་ལས་མ་ཐོས་པར་རང་ཉིད་སློབ་དཔོན་མེད་པར་རང་བྱུང་གི་ཡེ་ཤེས་བརྗོད་དུ་མེད་པའི་རང་བཞིན་མངོན་པར་རྫོགས་པར་སངས་རྒྱས་ཏེ་ཞེས་པ་ལ་སོགས་པ་དྲངས་པས་ཀྱང་དེ་གཉིས་དགོངས་པ་གཅིག་པར་གསལ་ཞིང་། གཞན་ཡང་འཇམ་དཔལ་མཚན་བརྗོད་ལས་ཀྱང་། དང་པོའི་སངས་རྒྱས་རིས་མེད་པ། །ཞེས་གསུངས་པ་དང་། དུས་འཁོར་ལས་ཀྱང་། མཆོག་གི་དང་པོའི་སངས་རྒྱས་ཞེས་བཤད་པ་དང་། རྒྱུད་གཞན་ལས་ཀྱང་། སངས་རྒྱས་སངས་རྒྱས་སྔར་སངས་རྒྱས། །ཞེས་བཤད་པ་དང་། མདོ་པདྨ་དཀར་པོ་ལས་ཀྱང་། བསྐལ་པ་བྱེ་སྟོང་བསམ་གྱིས་མི་ཁྱབ་པ། །དེ་ཡི་ཚད་ནི་ནམ་ཡང་མེད་པ་ནས། །བྱང་ཆུབ་མཆོག་རབ་དེ་ནི་ངས་རྙེད་དེ། །ང་ནི་རྟག་ཏུ་ཆོས་ཀྱང་རབ་འཆད་དོ། །ཞེས་པ་འདི་དག་ཀྱང་མི་མཐུན་པ་མེད་པར་གནད་གཅིག་པ་ཡིན་པས་བདེ་བར་གཤེགས་པའི་གསུང་རབ་ལ་འགལ་འདུ་ཁོ་ན་སེམས་པར་མི་བྱའོ། །དེ་ལྟར་ནའང་འོག་མ་འོག་མས་ཕྱོགས་ཙམ་ལས་ཡོངས་སུ་མ་རྫོགས་པས་གོང་མ་གོང་མར་དེ་ལས་ཞལ་གསལ་ཞིང་ཞིབ་པའི་ཁྱད་ཆོས་བཞག་ཏུ་ཡོད་པའང་རྟོགས་དགོས་ཤིང་། དེར་མ་ཟད་བཤད་པ་ལྟར་འཁོར་འདས་ཀྱི་གཞི་དང་། བདེ་གཤེགས་སྙིང་པོའི་ཁམས་གཉིས་ཀྱང་ངོ་བོ་ཐ་དད་དུ་ནམ་ཡང་བསམ་པར་མི་བྱ་ཞིང་། ལྡོག་ཆའི་དབང་གིས་དབྱེ་བ། གཞི་སྣང་མཐར་ཐུག་དང་རིག་པ་འོད་ཀྱི་ཁང་པར་གནས་པ་དང་མི་གནས་པ་ལ་སོགས་པ་ཕྲ་རག་གི་ཁྱད་ཆོས་རྣམས་ཀྱང་ལེགས་པར་ཤེས་པར་བྱ་དགོས་པ་ཡིན་ནོ། །གསུམ་པ་དེ་ལ་རྩོད་པ་སྤང་བ་ནི། དེ་ཡང་ལྟ་བ་ཕྱོགས་རེ་ལ་ཞེན་ཆེ་ཞིང་བཟང་ངན་གཉིས་འཛིན་གྱི་སྒྲོག་གིས་བཅིང་བ་དག་འདི་སྐད་ཅེས་དོན་དམ་པའི་ཆོས་ཉིད་བདེ་གཤེགས་སྙིང་པོ་ནི་སྐྱོན་ཀུན་ཟད་ཡོན་ཏན་ཀུན་རྫོགས་སངས་རྒྱས་ཀྱི་རང་བཞིན་འབའ་ཞིག་པས་གྲོལ་གཞི་ཁོ་ན་ཡིན་གྱི་དེ་འཁོར་འདས་གཉིས་ཀའི་སྤྱི་གཞིར་བཤད་པ་ནི་ནམ་ཡང་མི་འཐད་དོ་ཞེ་ན། དེ་ལ་འདི་སྐད་ཅེས་བཤད་པར་བྱ་སྟེ། དབྱིངས་བདེ་གཤེགས་སྙིང་པོ་རང་ངོས་ནས་འཁོར་བའི་འཁྲུལ་སྣང་ཡེ་ནས་ལྷུན་གྲུབ་ཏུ་ཡོད་པ་མ་ཡིན་ཡང་། དེ་ལས་ཤར་བ་གཞི་སྣང་གི་དུས་ན་རང་ངོ་ཤེས་མ་ཤེས་ལས་གྲོལ་འཁྲུལ་གཉིས་སུ་འབྱུང་བ་ཡིན་པས་བདེ་གཤེགས་སྙིང་པོ་སྤྱི་གཞིར་བཤད་པ་ལ་འགལ་བ་ཅུང་ཟད་ཀྱང་མེད་དེ། ཡིད་བཞིན་མཛོད་རྩ་འགྲེལ་ལས། གཞི་དེ་ཡང་འཁོར་བ་ལ་ལྟོས་པས་རྟེན་གཞི་ནམ་མཁའ་ལྟར་གདོད་མ་ནས་སྟོང་ཞིང་། ངོ་བོ་ཉིད་ཀྱིས་བདག་མེད་པ། ཉི་ཟླ་ལྟར་འོད་གསལ་ཞིང་ལྷུན་གྱིས་གྲུབ་པ་སྟེ། ཐོག་མ་མེད་པ་ནས་གནས་པས་འཕོ་འགྱུར་མེད་པ་སྤྲོས་པའི་མཐའ་ལས་འདས་པས་ངང་གིས་འོད་གསལ་བ་སྐུ་དང་ཡེ་ཤེས་འདུ་འབྲལ་མེད་དབྱིངས་སུ་གནས་པའི་བདེ་བར་གཤེགས་པའི་སྙིང་པོ་འཁོར་འདས་ཀྱི་ཆོས་རྣམས་བརྟེན་པའི་གནས་ལུགས་དོན་གྱི་ཀུན་གཞི་ཞེས་བྱ་སྟེ་འདུས་མ་བྱས་ཤིང་ཡེ་ནས་རྣམ་དག་ཆེན་པོར་གནས་པའོ། །དེ་ཡང་འཁོར་བའི་ཆོས་ལས་དང་ཉོན་མོངས་པ་རྣམས་རྟེན་པ་མེད་པའི་ཚུལ་གྱིས་བརྟེན་པ་ནི། ཉི་མཁའི་ངོས་ན་སྤྲིན་ཕུང་བརྟེན་པ་ལྟར། གཞི་ལ་མ་རེག་མ་འབྱར་ལ་དེའི་ངང་ན་གནས་པ་སྟེ། དོན་ལ་རང་བཞིན་མེད་པས་རྟེན་དང་བརྟེན་པར་མ་གྲུབ་བཞིན་དུ་བརྟེན་པར་སྣང་བས་བཏགས་པ་སྟེ། མྱ་ངན་ལས་འདས་པའི་ཆོས་རྣམས་ཉི་མ་དང་ཟེར་ལྟར་དབྱེར་མེད་དུ་བརྟེན་ཏེ་ཡེ་ནས་འདུ་འབྲལ་མེད་པར་གནས་པའི་ཕྱིར་རོ། །ཞེས་དང་། ཁྱད་པར་ཐེག་མཆོག་མཛོད་དུ། ཐོག་མའི་གཞི་ལ་འཁྲུལ་བ་མེད་ཀྱང་གཞི་སྣང་དུ་ཤར་དུས་རང་ངོ་མ་རིག་པའི་ཤེས་པ་ལུང་མ་བསྟན་མ་རིག་པའི་རྩ་བ་ཅན་དེས་གཞི་སྣང་རིས་སུ་བཅད་པས་སེམས་ཅན་དུ་འཁྲུལ་སྟེ། མུ་ཏིག་ཕྲེང་བ་ལས། ཁྱད་པར་ཆེན་པོའི་སྣང་བ་ལས། །ཡོད་དང་མེད་པ་གཉིས་འབྱུང་སྟེ། །སྤྱི་ལ་འཁྲུལ་གཞི་ཞེས་བྱ་སྟེ། །མ་རིག་ཉིད་དང་སྦགས་པའི་ཕྱིར། །ཤེས་བྱ་ཉིད་ཀྱང་ཕྲི་བར་སྣང་། །ཞེས་པ་དང་། ཆོས་སྐུ་ནམ་མཁའ་ལྟ་བུ་ལ། །གློ་བུར་སེམས་ཅན་སྤྲིན་གྱིས་བསྒྲིབ། །མ་འཁྲུལ་བ་ཡི་ཆོས་ཉིད་ཀྱང་། །བློ་ལ་འཁྲུལ་བའི་ཚུལ་དུ་སྣང་། །ཞེས་དང་། རྡོ་རྗེ་སེམས་དཔའ་སྙིང་གི་མེ་ལོང་ལས། ཁམས་གསུམ་གྱི་སེམས་ཅན་འདི་དག་ཐམས་ཅད་ནི། གཞི་ཅི་ཡང་མ་ཡིན་པ་ལས་འཁྲུལ་ལོ། །ཞེས་དང་། རྡོ་རྗེ་སེམས་དཔའ་འཁྲུལ་པ་མི་མངའ་ཡང་། །སེམས་ཅན་ལ་འཁྲུལ་པའི་ཚུལ་སྟོན་པའོ། །ཞེས་སོགས་དྲངས་ནས་གསུངས་ཤིང་། ཁྱད་པར་རྐྱེན་གྱིས་སྐྱོན་ཡོན་ཆར་དབྱེ་བ་འདི་ལྟར་གསུངས་ཏེ། ག་བུར་དེ་ཚད་ནད་དུ་ཡོན་ཏན་སྣང་ལ། གྲང་ནད་ལ་སྐྱོན་དུ་ཤར་ཡང་། ག་བུར་གྱི་ངོ་བོ་ལ་སྐྱོན་དང་ཡོན་ཏན་མ་གྲུབ་པ་བཞིན་དུ་གཞི་དང་གཞི་སྣང་གི་འཆར་ཚུལ་དེ་ཡང་རང་ངོ་ཤེས་པ་རྣམས་ལ་གྲོལ་རྐྱེན་ལྟར་དུ་སྣང་བས་ཡོན་ཏན་ལྟར་ཤར་ལ། མ་ཤེས་ན་ཆ་དེས་འཁྲུལ་བའི་གཞི་བྱེད་པའི་སྐྱོན་ལྟར་སྣང་ཡང་། གཞི་དེ་དང་དེས་སྣང་བ་སྐྱོན་ཡོན་དུ་གྲུབ་པ་མེད་དོ་ཞེས་སོགས་གསལ་བར་བཤད་པ་ལྟར་ཡིན་ཞིང་། དེར་མ་ཟད་འཁྲུལ་སྣང་འཁོར་བ་ལྟར་སྣང་བའི་དུས་ནའང་། རང་ངོ་གདོད་མའི་གཞི་ལས་གཞན་དུ་གཡོ་བ་ཅུང་ཟད་ཀྱང་མེད་ལ་གཞི་སྣང་ཆོས་ཉིད་ཀྱི་རྩལ་ལས་ཤར་བའི་འཁོར་འདས་གཉིས་ཀྱང་བཟང་ངན་སྐྱོན་ཡོན་དུ་འབྱེད་པ་ཅུང་ཟད་མེད་དེ། དག་མཉམ་སྤྲོས་པ་དང་བྲལ་བར་གཏན་ལ་འབེབས་པ་ནི་ཐེག་ཆེན་ཐུན་མོང་མ་ཡིན་པ་ཡང་དག་གི་ལྟ་བ་ཡིན་ཏེ། ཆོས་ཐམས་ཅད་འབྱུང་བ་མེད་པར་བསྟན་པའི་མདོ་ལས། ལྟ་དང་ལྟ་མིན་གཉིས་ཀ་ཚུལ་གཅིག་སྟེ། །མཉམ་དང་མི་མཉམ་དེ་བཞིན་མཉམ་པ་ཡིན། །སངས་རྒྱས་མེད་ཅིང་ཆོས་དང་དགེ་འདུན་མེད། །དེ་ལྟར་སུས་ཤེས་དེ་ནི་མཁས་པ་ཡིན། །ཞེས་དང་། ཀུན་བྱེད་ལས། སངས་རྒྱས་སེམས་ཅན་ལས་དང་བག་ཆགས་དང་། །བྱང་ཆུབ་སེམས་ལས་མ་གཏོགས་ཆོས་གཞན་མེད། །ཅེས་པ་ལ་སོགས་རྒྱ་ཆེར་བཤད་པ་ཡིན་ནོ། །དེས་ན་གདོད་མའི་གཞི་བདེ་གཤེགས་སྙིང་པོ་གཅིག་གི་རྩལ་དང་རོལ་པ་ལས་ཤར་བའི་འཁོར་འདས་གཉིས་ལ་བཟང་ངན་སྤང་བླང་དུ་འབྱེད་པ་ནི་ཅི་ཡང་མེད་དོ། །དེ་ལྟར་མ་ཡིན་པར་ཆོས་ཉིད་བདེ་གཤེགས་སྙིང་པོ་མ་ཡིན་པའི་འཁོར་འདས་སྤྱི་མཚན་ལ་ལྟོས་པའི་ཡེ་གཞི་ཟུར་བ་ཞིག་འདོད་ན་དེ་ལ་འདི་སྐད་དྲི་སྟེ། དེ་ལྟ་བུའི་གཞི་དེས་སེམས་ཅན་ཐམས་ཅད་ལ་ཁྱབ་བམ་མ་ཁྱབ། ཁྱབ་ན་བདེ་གཤེགས་སྙིང་པོ་ལས་གཞན་པའི་སྤྱི་གཞི་ཞིག་ཁྱབ་བྱེད་དུ་ཡོད་ན་སེམས་ཅན་ཐམས་ཅད་ཀྱང་རྒྱུད་གཅིག་ཏུ་གྱུར་པ་དང་། ཡང་སེམས་ཅན་རེ་རེ་ལ་རྒྱུད་གཉིས་གཉིས་ཡོད་པར་འགྱུར་བ་དང་གཅིག་གྲོལ་དུས་ཐམས་ཅད་གྲོལ་བར་འགྱུར་བ་ལ་སོགས་པའི་སྐྱོན་འདུག་ཅིང་མུ་སྟེགས་གསང་བ་རྣམས་འདོད་པའི་མཁའ་ལྟར་ཁྱད་པར་དགུ་ལྡན་དང་དབྱེ་བ་ཅུང་ཟད་མེད་པར་འགྱུར་ལ། མ་ཁྱབ་ན་ནམ་མཁས་གར་ཁྱབ་སེམས་ཅན་གྱིས་ཁྱབ་པར་གནས་པའི་གོ་སྐབས་ཀྱང་མི་རྙེད་ལ། འཁྲུལ་ཟིན་ནས་གྲོལ་བའང་མི་རིགས་ཤིང་། བར་དོ་ལ་སོགས་པར་གཞི་སྣང་འཆར་བར་བཤད་པའང་མི་འཐད་ལ། དེ་ལྟ་བུའི་གཞི་བཤད་པ་ལ་དོན་མ་མཆིས་པར་འགྱུར་བ་ལ་སོགས་འགལ་འདུ་ཆར་ལྟར་འབབ་པར་འགྱུར་རོ། །དེ་ལྟར་གཞིའི་འཆད་ཚུལ་ལ་གཞུང་གཞན་དང་རྫོགས་པ་ཆེན་པོ་གཉིས་ཁྱད་པར་ཅུང་ཟད་ཀྱང་མེད་དམ་ཞེ་ན། གདོད་མའི་ཡེ་གཞི་རང་གི་ངོ་བོ་འཆད་པ་ནི་ཁྱད་པར་ཅུང་ཟད་ཀྱང་མེད་ལ། དེ་ལས་འཁོར་འདས་སུ་སྣང་བའི་དུས་ན་གཞི་སྣང་ལྷུན་གྲུབ་རིན་པོ་ཆེ་སྒོ་བརྒྱད་ཀྱི་འཆར་ཚུལ་ཞིབ་པར་བཤད་པ་ནི་མདོ་རྒྱུད་གཞན་ན་ཤིན་དུ་གབ་པ་ཡོད་པ་ཉིད་རྫོགས་པ་ཆེན་པོར་རྩལ་དུ་བཏོན་ནས་བཤད་པའི་ཁྱད་ཡོད་པ་ཡིན་ལ། གནད་དེའི་དབང་ལས་ལམ་ཉམས་སུ་ལེན་པའི་གནས་སྐབས་ན་ཡང་རབ་ཚེ་འདིར་གྲོལ་བ་འོད་གསལ་ཐོད་རྒལ་གྱི་གདམས་པ། འབྲིང་བར་དོར་གྲོལ་བ་ཆོས་ཉིད་རང་སྣང་གི་བར་དོ་གཞི་སྣང་གི་འཆར་ཚུལ་དང་། ཐ་མ་སྲིད་པའི་བར་དོར་གཞི་སྣང་རང་བཞིན་སྤྲུལ་སྐུའི་ཞིང་དུ་གྲོལ་བ་ལ་སོགས་པའི་ཁྱད་ཆོས་གཞུང་འདིར་ཡོད་པ་གཞན་ལ་མེད་པ་ནི་ཤེས་པར་བྱ་བ་ཡིན་ནོ། །མཁས་པ་ཤྲཱི་རྒྱལ་པོས་གསུངས་སོ། །དགེའོ། །དགེའོ། །དགེའོ། །