སྐྱབས་རྗེ་རིན་པོ་ཆེའི་གསུང་ལས་འཕྲོས་པའི་དབང་བཞིའི་རྣམ་བཤད་རིན་ཆེན་ཕུང་པོ།

🚧 This website is under continued development. We appreciate your patience!

Previous Text Back to Volume PageNext Text

Wylie title	skyabs rje rin po che'i gsung las 'phros pa'i dbang bzhi'i rnam bshad rin chen phung po
Location	dpal sprul bka' 'bum Volume 4, Text 16, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Detailed Explanation - rnam bshad
Colophon	།དེ་ལྟར་དབང་བཞིའི་གོ་དོན་ཅུང་ཟད་བཀྲལ་པ་འདི་ཉིད་རྡོ་རྗེའི་མཆེད་དམ་པ་ཚེ་དབང་བཟང་པོས་བསྐུལ་བའི་ནན་ངོར་མ་ལྡོག་པར་དུག་ལྔ་མེ་འབར་དཔལ་དགེ་ཧྲལ་བོས་རྒྱལ་འཕགས་རི་ཁྲོད་དུ་བློ་ཐོག་ནས་ཤར་མར་བྲིས་པ་དགེའོ། །དགེའོ། །དགེའོ།
	/de ltar dbang bzhi'i go don cung zad bkral pa 'di nyid rdo rje'i mched dam pa tshe dbang bzang pos bskul ba'i nan ngor ma ldog par dug lnga me 'bar dpal dge hral bos rgyal 'phags ri khrod du blo thog nas shar mar bris pa dge'o/_/dge'o/_/dge'o/

Tibetan Text

[edit]

༄༅། །སྐྱབས་རྗེ་རིན་པོ་ཆེའི་གསུང་ལས་འཕྲོས་པའི་དབང་བཞིའི་རྣམ་བཤད་རིན་ཆེན་ཕུང་པོ་བཞུགས།

ཨོཾ་མ་ཎི་པདྨེ་ཧཱུྃ་ཧྲཱིཿསངས་རྒྱས་ཀུན་འདུས་མགོན་པོ་སྤྱན་རས་གཟིགས། །གང་དང་དབྱེར་མེད་དྲིན་ཅན་ཆོས་ཀྱི་རྗེ། །རྩ་བའི་བླ་མའི་ཞབས་ལ་ཕྱག་འཚལ་ནས། །དབང་བཞིའི་གོ་དོན་ཉུང་གསལ་བྲི་བར་འདོད། །དེ་ལ་སྤྱིར་སྐལ་བ་མཆོག་དང་ལྡན་པའི་གང་ཟག་ཚེ་གཅིག་གིས་མགོན་པོ་རྡོ་རྗེ་འཆང་གི་གོ་འཕང་ཐོབ་པར་འདོད་པའི་བློ་རབ་གསང་སྔགས་རྡོ་རྗེ་ཐེག་པའི་ལམ་ལ་སློབ་པར་འདོད་པ་དག་གི་དང་པོའི་འཇུག་སྒོ་མ་ནོར་པ་ནི་སྨིན་བྱེད་དབང་བསྐུར་བ་ཉིད་ཡིན་ཏེ། ཇི་སྐད་དུ། དོ་ཧ་ལས། ཨེ་མ་རིན་ཆེན་དབང་དང་བྲལ་བའི་སྐྱེས་བུ་ནི། །གདོལ་པ་དམན་པ་ཞིག་གིས་རྒྱལ་པོར་རེ་སྨོན་བཞིན། །ཞེས་དང་། རྒྱུད་ལས། དབང་མ་བསྐུར་བར་དངོས་གྲུབ་མེད། །བྱེ་མ་བཙིར་ལས་ཞུན་མར་བཞིན། །ཞེས་སོགས་གསུང་པ་དང་། དབང་བསྐུར་མ་ཐོབ་པར་གསང་སྔགས་རྡོ་རྗེ་ཐེག་པའི་ལམ་བསྐྱེད་རྫོགས་དང་། གྲོགས་བསྙེན་བསྒྲུབ་སོགས་གང་ལ་བསླབ་ཀྱང་གསང་སྔགས་རང་ཉིད་ལེན་པའི་ཉེས་པ་འབྱུང་ཞིང་མཁའ་འགྲོ་དང་གྲུབ་པ་ཅན་དག་གིས་བསད་ནས་སེམས་ཅན་དམྱལ་བར་འགྲོ་བར་འགྱུར་ལ། བླ་མ་མཚན་ཉིད་དང་ལྡན་པ་ལས་དབང་བཞི་ཚུལ་དང་མཐུན་པ་ཞིག་ཐོབ་ཕན་ཆད་རབ་དབང་བསྐུར་གྱི་དུས་དེ་ཉིད་དུ་སྨིན་གྲོལ་ཆིག་ཆོད་དུ་གྱུར་ནས་མཆོག་གི་དངོས་གྲུབ་ཐོབ་པའང་ཡོད། འབྲིང་ཉམས་ལེན་བསྐྱེད་རྫོགས་ལ་འབད་པས་ཚེ་འདིར་མཆོག་གྲུབ་པ་དང་། ཐ་མ་ཡང་དམ་ཚིག་མ་ཉམས་ན་ཚེ་རབས་གཞན་དུ་རྡོ་རྗེ་ཐེག་པའི་ཆོས་དང་བླ་མ་ཡང་དག་པ་མཇལ་ཞིང་རྗེས་སུ་བཟུང་ནས་གྲོལ་བར་འགྱུར་ཏེ། ཇི་སྐད་དུ། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡི་སྐྱེ་བ་བདུན་ན་ནི། །མ་བསྒོམ་པར་ཡང་དངོས་གྲུབ་འཐོབ། །ཅེས་སོ། །དབང་བསྐུར་བ་དེ་ཡང་སྤྱིར་རྒྱུད་སྡེའི་རྣམ་གྲངས་དང་བསྟུན་པའི་གྲངས་དང་དབྱེ་སྒོ་མི་འདྲ་བ་དུ་མ་ཡོད་ཀྱང་ཐམས་ཅད་མདོར་བསྡུ་ན་གསང་སྔགས་ཕྱི་ནང་ཐུན་མོང་དུ་གྱུར་པ་ཐུན་མོང་རིགས་པའི་དབང་ལྔ་དང་། ནང་རྒྱུད་བླ་ན་མེད་པའི་ཐུན་མོང་མ་ཡིན་པ་གསང་བ་ཟབ་མོའི་དབང་གསུམ་སྟེ་བརྒྱད་པོ་འདིར་མ་འདུས་པ་མེད་མོད། འོན་ཀྱང་བླ་མེད་ཀྱི་བུམ་དབང་ནི་སྤྱིར་ཡི་དམ་གྱི་ལྷའི་བསྐྱེད་རིམ་སྒོམ་བཟླས་ཕྱིའི་རྣལ་འབྱོར་ལ་དབང་བར་བྱེད་པ་ཡིན་པས་ཐུན་མོང་རིགས་པའི་དབང་ལྔ་དང་རྣམ་པ་མཚུངས་པ་ཙམ་ཡིན་མོད་ཀྱང་དོན་དུ་འཆད་འགྱུར་ལྟར་གང་དུ་བསྐུར་བའི་དཀྱིལ་འཁོར། ཇི་ལྟར་བསྐུར་བའི་ཐབས། གང་ལ་བསྐུར་བའི་གནས། ཅིའི་ཕྱིར་བསྐུར་བའི་དགོས་པ་རྣམས་མི་འདྲ་བས་ཕྱི་རྒྱུད་ཀྱི་ཐུན་མོང་རིགས་པའི་དབང་ལྔ་ཙམ་གྱིས་བླ་མེད་ཀྱིས་བུམ་དབང་ཐུན་མོང་མ་ཡིན་པ་འདིའི་དོད་མི་ཐུབ་ཅིང་། གནས་སྐབས་ཡི་དམ་གྱི་ལྷ་ངོ་བསྟན་ནས་སྒོམ་བཟླས་ལ་དབང་བར་བྱེད་པ་ཙམ་བུམ་དབང་གི་ཞོར་ལ་འདུ་བས་ཐུན་མོང་རིགས་པའི་དབང་ལྔ་ཡང་བུམ་དབང་གི་ཡན་ལག་ལྟ་བུར་འགྱུར་ཞིང་དེར་འདུ་བས། མདོར་ན་གསང་སྔགས་རྡོ་རྗེ་ཐེག་པའི་དབང་བསྐུར་ཐམས་ཅད་དབང་བཞིར་འདུས་པ་ཡིན་ནོ། །དབང་བཞི་པོ་དེ་ཡང་གང་དུ་བསྐུར་བའི་དབང་རང་རང་ལ་ལྟོས་པའི་དཀྱིལ་འཁོར་སྔོན་དུ་འགྲོ་བ་ཅན་ཡིན་གྱིས་དཀྱིལ་འཁོར་ལ་མ་བརྟེན་པར་དབང་བསྐུར་བ་ནི་མི་སྲིད་དེ། སློབ་དཔོན་དྲིལ་བུ་པས། དབང་བསྐུར་དཀྱིལ་འཁོར་སྔོན་འགྲོ་བ། །རྡོ་རྗེ་འཆང་གིས་བཤད་པ་སྟེ། །ཞེས་གསུངས་པ་ལྟར་རོ། །དེ་ནས་དང་པོ་བུམ་པའི་དབང་གང་དུ་བསྐུར་བའི་དཀྱིལ་འཁོར་ནི་གསུམ་ཏེ་སྤྲོས་པ་ལ་དགའ་བས་རྒྱས་པར་རྡུལ་མཚོན་གྱི་དཀྱིལ་འཁོར་ལ་བརྟེན་པ་དང་། སྤྲོས་པ་འབྲིང་གི་དབང་དུ་བྱས་ན་རས་བྲིས་ཀྱི་དཀྱིལ་འཁོར་ལ་བསྟེན་པ་དང་། བློ་རབ་སྤྲོས་དང་བྲལ་བའི་དབང་དུ་སློབ་དཔོན་ལུས་ཀྱི་དཀྱིལ་འཁོར་དུ་འཇུག་པའང་ཡོད་དེ། དྲིལ་བུ་པས། བཅོས་མ་གཉིས་ཀྱི་ངོ་བོ་གང་། །དེ་ནི་གདུལ་བྱའི་དབང་ལས་འདོད། །མཁས་པས་བསྒྲུབ་བྱ་དེ་མ་ཡིན། །ཞེས་པ་རྡུལ་མཚོན་དང་རས་བྲིས་གཉིས་གདུལ་བྱ་བློ་དམན་པའི་དབང་དུ་བྱས་ཀྱི་མཁས་པས་དོན་དུ་གཉེར་བྱ་མ་ཡིན་པར་བསྟན་ནས། བློ་རབ་ཀྱི་ངོར་འགྲོ་བ་འདི་ཀུན་རང་བཞིན་གྱི། གྲུབ་པའི་དཀྱིལ་འཁོར་གཉིས་མེད་པའོ། །ཞེས་གསུང་ཞིང་རྡོ་རྗེ་ལུས་ཀྱི་དཀྱིལ་འཁོར་ལ་བརྟེན་ནས་འཇུག་པ་བཤད་པའང་ཡོད་མོད། བློ་འབྲིང་མན་ཆད་ལས་དང་པོ་རྣམས་ནི་དང་པོ་དཀྱིལ་འཁོར་དུ་མ་ཞུགས་པར་དབང་བསྐུར་དུ་མི་རུང་བས་དང་པོ་དཀྱིལ་འཁོར་དུ་འཇུག་པ་གལ་ཆེ་ཞིང་དེ་ལ་དང་པོ་དཀྱིལ་འཁོར་མེད་པར་འཇུག་དུ་མི་རུང་པས་དཀྱིལ་འཁོར་བཞེངས་པ་དང་། སྒྲུབ་ཅིང་མཆོད་པ་གལ་ཆེའོ། །དཀྱིལ་འཁོར་བཞེངས་པ་དེ་ལའང་རྒྱས་པར་རྡུལ་ཚོན་གྱི་དཀྱིལ་འཁོར་གྱི་དབང་དུ་བྱས་ན་ས་ཆོག་དང་སྟ་གོན་དཀྱིལ་འཁོར་སྒྲུབ་པ་སོགས་ཡན་ལག་ཚང་བར་བྱ་དགོས་ཤིང་། རས་བྲིས་ལ་ས་ཆོག་གི་ཡན་ལག་འགའ་ཞིག་མེད་ཀྱང་ཆོག་པའང་ཡོད་མོད་ཀྱི་གཞན་ཕལ་ཆེར་ངེས་པར་དགོས་ཤིང་གང་ལྟར་ཡང་ཆོ་གའི་ཡན་ལག་མ་ཚང་ན་སློབ་མའི་རྒྱུད་སྨིན་པར་མི་ནུས་ཤིང་སློབ་དཔོན་ལའང་ཉེས་པ་དང་བཅས་པར་འགྱུར་བས་ཆོ་གའི་ཡན་ལག་རྣམས་ཚང་པར་བྱེད་པ་ནི་ཅིས་ཀྱང་གལ་ཆེ་བ་ཡིན་ནོ། །དབང་བསྐུར་བ་དངོས་ལ་དང་པོ་དཀྱིལ་འཁོར་དུ་འཇུག་པ་དང་། ཞུགས་པ་ལ་དབང་བསྐུར་བ་གཉིས། དང་པོ་དཀྱིལ་འཁོར་དུ་འཇུག་པ་ལ་ཡང་སློབ་དཔོན་རང་ཉིད་འཇུག་པ་དང་། སློབ་མ་དཀྱིལ་འཁོར་དུ་འཇུག་པ་གཉིས། དང་པོ། སློབ་དཔོན་རང་ཉིད་འཇུག་པ་ནི་རྒྱས་པར་སློབ་མ་ལ་དབང་ཇི་ལྟར་བསྐུར་བའི་ཚུལ་དུ་བདག་འཇུག་བླང་པ་དང་། བསྡུ་ན་རིག་པའི་མེ་ཏོག་དོར་བ་ཙམ་གྱིས་ཀྱང་ཆོག་སྟེ། སྒྱུ་འཕྲུལ་ལས། ཀུན་བྱས་དབང་ཕྱུག་རིག་པས་འཇུག །དེ་ནས་སློབ་མ་གཞུག་པར་བྱ། །ཞེས་པ་ལྟར་རོ། །གཉིས་པ་སློབ་མ་དཀྱིལ་འཁོར་དུ་ཞུགས་པ་ལ་ཕྱི་འཇུག་དང་ནང་འཇུག་གཉིས། དང་པོ་ཕྱི་འཇུག་གི་སྔོན་དུ་འགྲོ་བ་ནི་སྡིག་སྒྲིབ་སྦྱངས་པའི་ཕྱིར་ཡི་གེ་བརྒྱ་པའི་ཁྲུས་ནས་འདོན་པ། བར་ཆད་བསལ་བའི་ཕྱིར་བགེགས་བསྐྲད་ཅིང་མཚམས་བཅད་པ། ཆོས་ལ་ཡིད་ཆེས་བསྐྱེད་པའི་ཕྱིར་ལོ་རྒྱུས་ཀྱི་སྤྲོ་བ་བསྐྱེད་པ། བསོད་ནམས་ཀྱི་ཚོགས་རྫོགས་པའི་ཕྱིར་མཎྜལ་དབུལ་བ། བསླབ་པ་ཀུན་གྱི་གཞི་འཛིན་པའི་ཕྱིར་སྐྱབས་འགྲོ་འབོག་པ། ཐེག་ཆེན་གྱི་ལམ་དུ་ཚུད་པའི་ཕྱིར་བྱང་ཆུབ་མཆོག་ཏུ་སེམས་བསྐྱེད་པ། དབང་གི་སྣོད་རུང་དུ་གྱུར་པའི་ཕྱིར་དམ་ཚིག་རྣམས་བསྲུང་བར་ཁས་ལེན་པ། ཆོས་ལ་དོན་གཉེར་གྱི་འདུན་པ་གསལ་བའི་ཕྱིར་དབང་དོན་དུ་གསོལ་བ་འདེབས་པ་རྣམས་མེད་དུ་མི་རུང་བའི་ཡན་ལག་ཡིན་པས་ཚིག་དོན་མ་འཛོལ་བ་གནད་དུ་འགྲོ་བར་བྱས་ནས། ཕྱི་འཇུག་དངོས་ལ་དཀྱིལ་འཁོར་དུ་གཞུགས་པར་གསོལ་བ་འདེབས་པ། མིག་དབྱེ་བ། མེ་ཏོག་འཐོར་བ། ལྷ་ངོ་བསྟན་པ་རྣམས་ཏེ། འདིའི་དོན་ནི་ཚེ་རབས་སྔོན་ནས་རང་དང་འབྲེལ་ཆེ་བའི་ཡི་དམ་གྱི་ལྷ་གང་ཡིན་པ་དེ་ངོས་བཟུང་ནས་ལྷ་དེ་ཉིད་ཀྱི་བསྒོམ་བྱའི་དཀྱིལ་འཁོར་དང་སྐུ་མདོག་ཕྱག་མཚན་ལ་སོགས་པ་བརྡའ་དོན་རྟགས་གསུམ་དང་བཅས་པ་ངོ་སྤྲོད་པའོ། །གཞན་ཡང་མེ་ཏོག་དབུས་སུ་བབས་ན་རྡོ་རྗེའི་རིགས། ཤར་དུ་སངས་རྒྱས་རིགས་སོགས་རང་གི་མེ་ཏོག་གང་ལ་བབས་པའི་རིགས་དེ་ཉིད་གཙོ་བོར་བྱས་ནས་བསྒྲུབ་ན་ཉེ་བའི་དཀྱིལ་འཁོར་ཞེས་བྱ་བ་ཚེ་རབས་ཀྱི་ལྷ་སྐལ་ཡིན་པས་འགྲུབ་ཐག་ཉེ་བ་དང་། དམ་ཚིག་བསྲུང་མཚམས་ཀྱི་སྐབས་སུའང་རང་རིག་གི་དམ་ཚིག་གཙོ་བོར་བསྲུང་ཤིང་གཞན་རྣམས་ཞར་བྱུང་ཙམ་དུ་ཅི་ནུས་སུ་འབད་པའོ། །ལྷ་དང་དཀྱིལ་འཁོར་གྱི་རྣམ་དག་གམ་བརྡའ་དོན་བཤད་པ་ནི། ཡི་དམ་གྱི་ལྷ་གཙོ་འཁོར་དང་གཞལ་ཡས་ཁང་གི་རྣམ་པར་སྣང་བ་དེ་ཡང་མཚན་མ་ཞལ་ཕྱག་དང་བཅས་པའི་ལྷ་རང་རྒྱུད་པ་དེ་ལྟ་བུ་ཞིག་ག་ཤེད་ན་ཡོད་པ་མ་ཡིན་གྱི། རང་རྒྱུད་ཀྱི་ཕུང་པོ་འདིའི་རང་བཞིན་ཡེ་ནས་རྒྱལ་བ་རིགས་ལྔར་གནས་པ་སོགས་གཞི་རང་བཞིན་ལྷུན་གྲུབ་ཀྱི་ལྷ་ངོ་སྤྲོད་པ་དང་། ལམ་ཐབས་དང་ཤེས་རབ་ཕ་རོལ་ཕྱིན་དྲུག་བྱང་ཕྱོགས་སོ་བདུན་ལ་སོགས་དེ་དག་གི་དག་པ་དང་སྦྱར་ནས་ལམ་མཚོན་པ་རྟགས་ཀྱི་ལྷ་ངོ་སྤྲད་པ་དང་། མཐར་ཐུག་ཡེ་ཤེས་ལྔ་དང་། སྣང་སྟོང་དབྱེར་མེད་སྐུ་གསུམ་སྐུ་ལྔ་ལ་སོགས་དག་པ་དང་སྦྱར་ནས་བཤད་པས་འབྲས་བུ་ཡེ་ཤེས་ཕྱག་རྒྱའི་ལྷ་ངོ་སྤྲད་པ་སྟེ། གང་ལྟར་ཡང་ལྷ་དང་དཀྱིལ་འཁོར་དུ་སྣང་བ་དེ་ཡང་གཞི་ལམ་འབྲས་བུའི་ཆོས་དེ་དང་དེ་དག་གི་དབྱིབས་དང་ཁ་དོག་དང་གྲངས་ཀྱི་རྣམ་གྲངས་དེ་དང་དེ་ལྟ་བུས་མཚོན་པར་བྱས་ནས་གསང་སྔགས་རྡོ་རྗེ་ཐེག་པའི་ཐབས་མཁས་ཀྱི་སྒོ་ནས་ལྷའི་རྣམ་པ་ཙམ་ལམ་དུ་བྱས་ནས་བསྒོམ་པ་ཡིན་གྱི་རང་ལས་རྒྱུད་ཐ་དད་པའི་ལྷ་དེ་དང་དེ་ལྟ་བུའི་མཆོད་ན་མཉེས་ཤིང་དངོས་གྲུབ་སྦྱིན་པའི་ལྷ་ཕྱི་རོལ་པའི་དབང་ཕྱུག་དང་ཁྱབ་འཇུག་ལ་སོགས་པ་ལྟ་བུ་ཞིག་གཞན་ན་མེད་པ་ངོ་སྤྲོད་པ་ཡིན་ནོ། །གཉིས་པ་ནང་འཇུག་ནི། ཡེ་ཤེས་འབེབས་པ་སྟེ། སློབ་དཔོན་གྱི་བསྐྱེད་རྫོགས་དང་སློབ་མའི་མོས་པ་ལ་བརྟེན་ནས་རྟོགས་པའི་ཡེ་ཤེས་བཙན་ཐབས་སུ་བསྐྱེད་ཅིང་ཡི་དམ་གྱི་ལྷས་བྱིན་གྱིས་བརླབས་པའི་རྟེན་འབྲེལ་སྒྲིག་པ་སྟེ་གཞུང་རང་རང་ནས་འབྱུང་བ་ལྟར་བྱིན་ཕེབས་པའི་རྟགས་མ་བྱུང་བར་བྱ་ཞིང་། རྟགས་ཇི་བཞིན་མ་བྱུང་ན་སྤོག་ཆོག་བྱ་བ་སོགས་ཀྱིས་རྟགས་ཐོན་དུ་བྱ་བའོ། །གཉིས་པ་དབང་དངོས་གཞི་ལ། རྒྱུད་སྡེ་འོག་མ་དང་ཐུན་མོང་པ་དང་། བླ་མེད་ཀྱི་རྒྱུད་ཀྱི་ཐུན་མོང་མ་ཡིན་པའོ། །དང་པོ་ཐུན་མོང་པ་ལ་སྤྱིར་དབྱེ་བསྡུ་མང་དུ་ཡོད་ཀྱང་། ད་ལྟའི་ཡོངས་གྲགས་ཀྱི་དབང་དུ་བྱས་ན། སློབ་མའི་དབང་དྲུག །རྡོ་རྗེ་སློབ་དཔོན་གྱི་དབང་དང་བདུན་ནོ། །སློབ་མའི་དབང་དྲུག་གི་དང་པོ་མི་བསྐྱོད་པ་ཆུའི་དབང་ནི། ལྷ་ཞུ་བའི་རང་བཞིན་རྣམ་རྒྱལ་བུམ་པའི་ཆུ་སྤྱི་བོ་ནས་བླུགས་ཤིང་ཁྲུས་བྱས་པས་ལས་ཉོན་བག་ཆགས་སྡིག་སྒྲིབ་དང་བཅས་པ་ཐམས་ཅད་བྱང་ཞིང་དག་ནས་ཆུའི་ལྷག་མ་སྤྱི་བོར་འཁྱིལ་བ་ལས་སྤྱི་གཙུག་ཏུ་རིགས་ཀྱི་བདག་པོ་རྡོ་རྗེ་མི་བསྐྱོད་པས་དབུ་བརྒྱན་པར་བསམ་པས། ཉོན་མོངས་པ་ཞེ་སྡང་དང་། རྣམ་ཤེས་ཀྱི་ཕུང་པོ་རྡོ་རྗེ་མི་བསྐྱོད་པ་དང་ནམ་མཁའི་ཁམས་རྡོ་རྗེ་དབྱིངས་ཀྱི་དབང་ཕྱུག་མའི་རང་བཞིན་དུ་སངས་རྒྱས། མེ་ལོང་ལྟ་བུའི་ཡེ་ཤེས་མངོན་དུ་བྱས་པར་མོས་པའོ། །གཉིས་པ་རིན་ཆེན་འབྱུང་ལྡན་དབུ་རྒྱན་གྱི་དབང་ནི། རིན་འབྱུང་གི་རང་བཞིན་ཅན་གྱི་དབུ་བརྒྱན་མགོ་ལ་བཅིང་པས་ཉོན་མོངས་པ་ང་རྒྱལ་དག །ཚོར་བའི་ཕུང་པོ་རིན་ཆེན་འབྱུང་ལྡན་དང་ཆུ་ཁམས་མ་མ་ཀིའི་རང་བཞིན་དུ་སངས་རྒྱས། མཉམ་པ་ཉིད་ཀྱི་ཡེ་ཤེས་མངོན་དུ་བྱས་པར་མོས་པའོ། །གསུམ་པ་སྣང་བ་མཐའ་ཡས་རྡོ་རྗེའི་དབང་ནི། སྣང་མཐའི་རང་བཞིན་རྡོ་རྗེ་ལག་གཡས་སུ་གཏད་པས། ཉོན་མོངས་པ་འདོད་ཆགས་དག །འདུ་ཤེས་ཀྱི་ཕུང་པོ་༼སྣང་བ་མཐའ་ཡས་༽དང་མེ་ཁམས་གོས་དཀར་མོའི་རང་བཞིན་དུ་སངས་རྒྱས། སོ་སོར་རྟོགས་པའི་ཡེ་ཤེས་མངོན་དུ་བྱས་པར་མོས་པའོ། །བཞི་པ་དོན་ཡོད་གྲུབ་པ་དྲིལ་བུའི་དབང་ནི། དོན་གྲུབ་ཀྱི་རང་བཞིན་དྲིལ་བུ་ལག་གཡོན་དུ་གཏད་པས་ཉོན་མོངས་པ་ཕྲག་དོག་དག །འདུ་བྱེད་ཀྱི་ཕུང་པོ་དོན་ཡོད་གྲུབ་པ་དང་རླུང་ཁམས་དམ་ཚིག་སྒྲོལ་མའི་རང་བཞིན་དུ་སངས་རྒྱས། བྱ་བ་གྲུབ་པའི་ཡེ་ཤེས་མངོན་དུ་བྱས་པར་མོས་པའོ། །ལྔ་པ་རྣམ་པར་སྣང་མཛད་མིང་གི་དབང་ནི། རང་གི་མེ་ཏོག་གང་ལ་ཕོག་པའི་རིགས་དང་མཐུན་པའི་མིང་བཏགས་ནས་བརྗོད་པས་ཉོན་མོངས་པ་གཏི་མུག་དག །གཟུགས་ཀྱི་ཕུང་པོ་རྣམ་པར་སྣང་མཛད་དང་། ས་ཁམས་སངས་རྒྱས་སྤྱན་མའི་རང་བཞིན་དུ་སངས་རྒྱས། ཆོས་ཀྱི་དབྱིངས་ཀྱི་ཡེ་ཤེས་མངོན་དུ་བྱས་པར་མོས་པའོ། །དྲུག་པ་རྡོ་རྗེ་བརྟུལ་ཞུགས་ཀྱི་དབང་ནི། གསང་སྔགས་རྡོ་རྗེ་ཐེག་པའི་ལམ་ཉམས་སུ་ལེན་པ་ལ་རྡོ་རྗེ་སེམས་དཔའི་བརྟུལ་ཞུགས་དང་མཐུན་པར་ཉམས་སུ་ལེན་དགོས་པས་ཐབས་དང་ཤེས་རབ་གཉིས་སུ་མེད་པའི་རང་བཞིན་རྡོར་དྲིལ་ལག་ཏུ་གཏད་ནས་ཐབས་ཤེས་ཟུང་འཇུག་གི་ལམ་ཉམས་སུ་ལེན་པར་རྗེས་སུ་གདམས་པས་ཕྱི་གཟུང་བ་ཡུལ་དང་ནང་འཛིན་པ་སེམས་ཀྱི་རྣམ་པར་རྟོག་པ་ཐམས་ཅད་གནས་དག་ཐབས་རྡོ་རྗེ་སེམས་དཔའ་སྣང་སྟོང་དབྱིངས་དང་ཡེ་ཤེས་གཉིས་སུ་མེད་པའི་ཉམས་ལེན་ལ་དབང་བར་བྱས་པ་སྟེ་སློབ་མའི་དབང་དྲུག་གོ །སློབ་དཔོན་གྱི་དབང་ནི་སློབ་མ་གཞན་དོན་ནུས་པ་ལ་དམིགས་བསལ་དུ་བསྐུར་བ་སྟེ། སློབ་མ་སེང་གེའི་ཁྲི་ལ་བཀོད་ནས་དམ་ཚིག་གསུམ་སྦྱིན་པ་ནི་ཕྱག་རྒྱ་སྐུའི་དམ་ཚིག་ཡི་དམ་གྱི་ལྷ་ཡབ་ཡུམ་གྱི་སྐུར་བསྒོམ་དུ་བཅུག་ནས། དྲིལ་བུ་གསུང་གི་དམ་ཚིག་ལག་གཡོན་དུ་གཏད་ཅིང་། རྡོ་རྗེ་ཐུགས་ཀྱི་དམ་ཚིག་ལག་གཡས་སུ་སྦྱིན་པས་ཕྱི་མཚན་མ་རྫས་ཀྱི་རྡོར་དྲིལ་དམ་ཚིག་གི་རྫས་སུ་གཏད་པ་རྡོ་རྗེ་གསོལ་ཞིང་དྲིལ་བུ་དཀུར་བརྟེན་པ་དང་། ནང་མཚོན་བྱེད་རྟགས་ཀྱི་རྡོར་དྲིལ་ཡབ་ཡུམ་གྱི་གསང་བ་མཉམ་པར་སྦྱོར་བས་ཁམས་དཀར་དམར་ཞལ་མཇལ་བའི་བདེ་བ་རྒྱུད་ལ་སྐྱེས་པ་དང་། གསང་བ་མཚོན་བྱ་དོན་གྱི་རྡོར་དྲིལ་བདེ་སྟོང་གཉིས་སུ་མེད་པའི་ཡེ་ཤེས་གནས་ལུགས་ཕྱག་རྒྱ་ཆེན་པོའི་ངང་དུ་མ་བཅོས་པར་མཉམ་པར་བཞག་པས་སྟོང་ཉིད་ཀྱི་ཡེ་ཤེས་བསྐྱེད་ཅིང་རྡོ་རྗེ་རྒྱལ་པོའི་གོ་ས་ཐོབ་པ་སྟེ། དེའི་ཡན་ལག་ཏུ་དུས་དེ་རིང་ནས་བཟུང་སྟེ་གསང་སྔགས་རྡོ་རྗེ་ཐེག་པའི་སྨིན་གྲོལ་ཕྲིན་ལས་དང་བཅས་པས་རང་བཞིན་གྱི་དོན་རྒྱ་ཆེན་པོ་སྒྲུབ་པར་མཛོད་ཅིག་ཅེས་རྗེས་སུ་གནང་བ་དང་། ཉམས་ལེན་བརྩོན་འགྲུས་ཀྱི་དབང་གིས་འདི་དང་བར་དོ་གང་རུང་དུ་མེ་ཏོག་ཕོག་པའི་རིགས་དེ་དང་མཐུན་པའི་སངས་རྒྱས་སུ་འགྱུར་རོ། །ཞེས་ལུང་སྟོན་པ་དང་། འཁོར་བའི་སྡུག་བསྔལ་རྒྱུན་རིང་པོ་ལས་གྲོལ་ཞིང་དམ་ཚིག་མ་ཉམས་ན་ངན་སོང་གསུམ་རྒྱུན་ཆད་པ་ཡིན་ནོ་ཞེས་དབུགས་དབྱུང་བ་དང་སངས་རྒྱས་ཐམས་ཅད་ཀྱི་སྲས་དང་བྱང་སེམས་རིག་པ་འཛིན་པ་ཐམས་ཅད་ཀྱི་སྤུན་དུ་འགྱུར་ཞིང་འཁོར་བའི་སེམས་ཅན་ཐམས་ཅད་ཀྱི་མགོན་བྱེད་པ་ཡིན་པས་དགའ་བར་གྱིས་ཤིག་ཅེས་གཟེང་བསྟོད་པ་དང་སློབ་མ་རྡོ་རྗེ་སེམས་དཔའི་རང་བཞིན་དུ་གྱུར་པ་ལ། མཆོད་པ་དང་བསྟོད་པས་མངའ་གསོལ་བ་ལ་སོགས་པའོ། །དེས་ནི་ལུས་ངག་ཡིད་གསུམ་དུ་འཛིན་པའི་གཟུང་འཛིན་གྱི་རྣམ་པར་རྟོག་པ་གནས་འགྱུར། གསང་སྔགས་རྡོ་རྗེ་ཐེག་པའི་ཐབས་ལམ་ཉམས་སུ་བླང་བ་ལས་བྱུང་བའི་འབྲས་བུ་ཐབས་བྱུང་རྡོ་རྗེ་འཆང་རིག་བདག་དྲུག་པ་དཀྱིལ་འཁོར་ཐམས་ཅད་ཀྱི་མངའ་བདག་དམ་པའི་གོ་འཕང་ཐོབ་པའི་རྟེན་འབྲེལ་གྱི་ནུས་པ་བཞག་པའོ། །དེ་དག་གིས་ནི་དབང་བཞི་ལས་བུམ་དབང་གི་དངོས་གཞི་སྟེ་རྒྱུད་སྡེ་འོག་མ་དང་ཐུན་མོང་ཞེས་བཤད་ཀྱང་། དག་བྱ་དག་འབྲས་དབང་དོན་གྱི་ཡེ་ཤེས་ངོ་སྤྲོད་པ་སོགས་ཕལ་མོ་ཆེ་རྒྱུད་སྡེ་འོག་མ་ལས་ཁྱད་པར་དུ་འཕགས་པས་ན་བླ་མེད་ཀྱི་ཁྱད་ཆོས་རྣམས་ནི་ཐུན་མོང་མ་ཡིན་པའང་ཡིན་ནོ། །ད་ལྟའི་ཡོངས་གྲགས་ཀྱི་དབང་ཆོག་རྣམས་ལས་རིག་དབང་ལྔ་ལ་སོགས་པའི་རྗེས་སུ་བུམ་ཆུའི་དབང་ཟུར་དུ་འབྱུང་བ་ནི་སྤྱིར་རིག་དབང་ལྔ་སོགས་བུམ་དབང་གི་དངོས་གཞི་ཡིན་པས་རེ་རེ་བཞིན་ཡང་བུམ་པའི་ཆུ་རྗེས་སུ་འགྲོ་བ་ཅན་ཡིན་ཡང་འདིར་བུམ་པ་གཅིག་ཏུ་བསྡུས་ཏེ་ཐམས་ཅད་ཀྱི་རྗེས་སུ་བུམ་པའི་ཆུ་དབང་གཅིག་བསྐུར་བའོ། །དེའི་ཡན་ལག་ཏུ་ལྷ་སྐུ་ཕྱག་རྒྱའི་དབང་ལྷ་གྲངས་དང་མཐུན་པར་དབང་བསྐུར་བ་དང་། སྙིང་པོ་སྔགས་ཀྱི་བཟླས་ལུང་སྦྱིན་པ་དང་། ཡོ་བྱད་ལོངས་སྤྱོད་རྫས་ཀྱི་དབང་བསྐུར་བ་དང་། ཕྲིན་ལས་དྲག་པོ་སྒྲོལ་བའི་དབང་ལ་སོགས་པ་ནི་ཆོ་ག་རང་རང་གི་གཞུང་དང་བསྟུན་ནས་ཤེས་པར་བྱ་བ་ལས་འདིར་བརྗོད་ཀྱིས་མི་ལང་ངོ་། །དེ་ལྟ་བུའི་བུམ་པའི་དབང་དེ་གང་དུ་བསྐུར་བའི་དཀྱིལ་འཁོར་ནི་རྡུལ་མཚོན་སོགས་ཀྱི་བྲིས་པ་རྟགས་ཀྱི་དཀྱིལ་འཁོར་ཡིན་ལ། གང་གིས་བསྐུར་བ་པོ་ནི་སློབ་དཔོན་དང་དགོངས་པ་དབྱེར་མེད་པའི་མདུན་རྟེན་དཀྱིལ་འཁོར་ན་བཞུགས་པའི་ལྷ་དང་། དེ་ལས་ལོགས་སུ་ཕྱེ་སྟེ་སློབ་དཔོན་དཀྱིལ་འཁོར་གྱི་གཙོ་བོ་གཉིས་པའི་རྣམ་པས་ཤར་སྒོ་ན་བཞུགས་པར་མོས་པ་སློབ་དཔོན་དངོས་དང་། སློབ་དཔོན་དང་དཀྱིལ་འཁོར་གྱི་ལྷའི་དགོངས་པ་གཏད་དེ་དབྱིངས་ནས་སྤྱན་དྲངས་པའི་ལྷ་དེ་བཞིན་གཤེགས་པ་དང་གཤེགས་མ། སེམས་དཔའ་དང་སེམས་མ། ཁྲོ་བོ་དང་ཁྲོ་མོ་སྟེ་གདན་གསུམ་ཚང་བའི་ལྷ་དང་བཅས་པ་གསུམ་ཀ་ལས་ཐོབ་དགོས་ཀྱང་། དབང་གི་ལག་ལེན་བྱེད་པ་པོ་དངོས་ནི་དབང་ལྷ་སྤྱན་དྲངས་པ་རྣམས་ལས། གཤེགས་པ་རྣམས་ཀྱིས་དགོངས་པ་མཛད། གཤེགས་མ་རྣམས་ཀྱིས་བུམ་པ་དང་དབུ་རྒྱན་སོགས་དབང་རྫས་ཐོགས་ཏེ་དབང་བསྐུར། སེམས་དཔའ་རྣམས་ཀྱིས་བཀྲ་ཤིས་བརྗོད། སེམས་མ་རྣམས་ཀྱིས་གླུ་གར་བསྒྱུར། ཁྲོ་བོ་རྣམས་ཀྱིས་བགེགས་བསྐྲད་དེ་དབང་བསྐུར་བར་མོས་པའོ། །དེ་ལྟར་བུམ་པའི་དབང་བསྐུར་བའི་དབང་དོན་གྱི་ཡེ་ཤེས་ནི་ཕྱི་སྣོད་ནང་བཅུད་ཕུང་པོ་ཁམས་དང་སྐྱེ་མཆེད་དང་བཅས་པ་ཡེ་ནས་དཀྱིལ་འཁོར་གྱི་རང་བཞིན་དུ་གནས་པ་ངོ་འཕྲོད་དེ་འཁོར་བ་དང་མྱ་ངན་ལས་འདས་པ་དབྱེར་མེད་གཅིག་ཏུ་རྟོགས་པས་ཐག་གཅོད་པ་སྟེ། བློ་རབ་འབྲིང་ལ་ལྟོས་པའི་སྣང་སྲིད་ལྷ་རུ་ལྟ་བའི་ངེས་ཤེས་ནི་དབང་དོན་གྱི་ཡེ་ཤེས་ཡིན་ལ། དེ་ལྟ་བུའི་ཡེ་ཤེས་རྒྱུད་ལ་སྐྱེས་ན་དབང་ཐོབ་པ་ཡིན་ནོ། །དབང་དེ་ཉིད་ཐོབ་པས་ལུས་དང་རྩའི་སྒྲིབ་པ་དག །ལམ་བསྐྱེད་པའི་རིམ་པ་བསྒོམ་པ་ལ་དབང་། འབྲས་བུ་སྤྲུལ་པའི་སྐུ་འགྲུབ་པའི་སྐལ་བ་རྒྱུད་ལ་བཞག་པའོ། །གཉིས་པ་གསང་བ་སྔགས་བླ་ན་མེད་པའི་ཐུན་མོང་མ་ཡིན་པའི་དབང་ནི་གསུམ་སྟེ། གསང་དབང་། ཤེར་དབང་། ཚིག་དབང་ངོ་། །དང་པོ་གསང་དབང་གང་དུ་བསྐུར་བའི་དཀྱིལ་འཁོར་ནི། རྩ་ཡི་གེ་བྷ་གའི་དཀྱིལ་འཁོར་ཞེས་བྱ་སྟེ། བླ་མ་ཡབ་ཡུམ་གྱི་ལུས་རྩའི་དཀྱིལ་འཁོར་དུ་གནས་ཤིང་རྩ་མདུད་ཡི་གེའི་རྣམ་པ་ལྟར་དུ་གནས་པས་ན་རྩ་ཡི་གེའི་དཀྱིལ་འཁོར་ཞེས་བྱ། ཡི་གེའི་རྣམ་པ་ཅན་གྱི་རྩ་མདུད་དེ་དག་ཏུ་རླུང་དང་ཁམས་ཀྱི་དྭངས་མ་འདུས་པས་མཚན་མའི་རྣམ་པར་རྟོག་པ་འཇོམས་པར་བྱེད་པ་དང་། ཁྱད་པར་ཡབ་ཀྱི་རྡོ་རྗེ་ནོར་བུ་ཐབས་བདེ་བ་ཆེན་པོ་ཝཾ་ཡིག་གི་རྣམ་པར་གནས་ཤིང་། ཡུམ་གྱི་མཁའ་གསང་ཤེས་རབ་སྟོང་པ་ཉིད་ཨེ་ཡིག་གི་རྣམ་པར་གནས་པ་ནི་གསང་དབང་གང་ལས་ལེན་པའི་དཀྱིལ་འཁོར་དངོས་སོ། །དཀྱིལ་འཁོར་འདི་ཉིད་གཉིས་སུ་ཡབ་ཡུམ་གྱི་རླུང་སེམས་དྭངས་མའི་ཐིག་ལེ་ཞལ་མཇལ་བའི་སྐབས་སུ་རང་བཞིན་བརྒྱད་ཅུའི་རྟོག་ཚོགས་ཐམས་ཅད་བཅོམ་ནས་རྟོག་བྲལ་བདེ་སྟོང་གི་ཡེ་ཤེས་བསྐྱེད་པས་ན་ཡི་གེ་བྷ་གའི་དཀྱིལ་འཁོར་ཞེས་བྱ་སྟེ། བྷ་ག་ནི་བཅོམ་པའི་དོན་ནོ། །དབང་ཇི་ལྟར་བསྐུར་བའི་ཚུལ་ནི། ནམ་སྲོད་ཀྱི་དུས་སུ་དཀྱིལ་འཁོར་གྱི་ལྷོ་ཕྱོགས་སུ་བླ་མ་གསུང་རྡོ་རྗེ་ལོངས་སྤྱོད་རྫོགས་སྐུའི་རྣམ་པར་བཞུགས་པ་ལ་གཟུངས་མ་མཚན་ལྡན་དང་མཎྜལ་ཕུལ་ནས་གསོལ་བ་གདབ། སློབ་དཔོན་གྱིས་རྗེས་སུ་གནང་བ་བྱིན་ནས་མིག་དར་བཅིང་སྟེ་ཡོལ་བའི་ཕྱི་རོལ་ཏུ་བཞག །བླ་མ་ཡབ་ཡུམ་ལྷར་གསལ་བའི་མཁའ་གསང་བྱིན་གྱིས་བརླབས་ནས་སྙོམ་པར་ཞུགས་པའི་བདེ་བའི་རོལ་མོས་ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པ་ཐམས་ཅད་བཀུག་སྟེ་བླ་མ་ཡབ་ཡུམ་གྱི་སྐུ་ལ་བསྟིམ་པ་བདེ་ཆེན་བྱང་ཆུབ་སེམས་ཀྱི་རང་བཞིན་དུ་ཞུ་བ་ཉིད་མཁའ་གསང་དུ་ཕབས་ཏེ་སློབ་བུའི་ལུས་ངག་ཡིད་གསུམ་གྱི་སྒྲིབ་པ་དག་པར་བྱ་བའི་ཕྱིར་རླུང་གི་སྟོབས་ཀྱིས་ལན་གསུམ་གྱེན་དུ་ལྡོག་སྟེ་སླར་ཡུམ་མཁར་ཕབས་པའི་དཀར་དམར་འདྲེས་པའི་བདུད་རྩི་དེ་ཉིད་སློབ་བུའི་ལྕེ་ཐོག་ཏུ་བཞག་པས་མགྲིན་པ་ལོངས་སྤྱོད་ཀྱི་འཁོར་ལོ་ནས་བཟུང་སྟེ་རྩ་འཁོར་ལོ་བཞིའི་གནས་ཐམས་ཅད་རིམ་པ་བཞིན་དུ་གང་། མ་དག་པའི་རྩ་ཁམས་ཀྱི་ཡི་གེ་ལས་རླུང་གིས་བསྐྱོད་པའི་གཟུང་འཛིན་འཁྲུལ་བའི་རྣམ་རྟོག་ཆ་དང་བཅས་པ་རང་བཞིན་གྱིས་འགག །སེམས་གསལ་སྟོང་གཉིས་སུ་མེད་པའི་རང་བཞིན་ཐབས་དང་བྱིན་བརླབས་ལ་བསྟེན་པའི་ཡེ་ཤེས་བརྗོད་པ་དང་བྲལ་བ་དེ་ཉིད་ངོ་སྤྲོད་པའོ། །དེའི་དབང་དོན་གྱི་ཡེ་ཤེས་ནི་རླུང་དབུ་མར་ཞུགས་པའི་ཐབས་ཀྱིས་དྲངས་པའི་གསལ་སྟོང་དྭངས་སང་ཕྱེད་པའི་སེམས་བཟོ་བཅོས་དང་བྲལ་བའི་ཡེ་ཤེས་ཕྱག་རྒྱ་ཆེན་པོའི་རང་བཞིན་གང་ཡིན་པའོ། །དེ་ལྟ་བུའི་ཡེ་ཤེས་དེ་སློབ་མ་མོས་གུས་ཀྱིས་སྣོད་དང་ལྡན་པ་དང་བླ་མ་ཐུགས་རྗེ་ཅན་གྱི་བྱིན་བརླབས་གུང་འཛོམ་པ་ལས་དཀར་དམར་བྱང་ཆུབ་ཀྱི་སེམས་རྟེན་འབྲེལ་རྫས་ཀྱི་ནུས་པ་ལ་བརྟེན་ཏེ་རྒྱུད་ལ་ངེས་པར་སྐྱེས་ན་དབང་ཐོབ་པ་ཡིན་ནོ། །དབང་དེ་ཐོབ་པས་ངག་དང་རླུང་གི་སྒྲིབ་པ་དག །ལམ་གཏུམ་མོ་དང་སྒྱུ་ལུས་ལ་སོགས་བདག་བྱིན་གྱིས་རློབས་པའི་རྫོགས་རིམ་ཐམས་ཅད་སྒོམ་པ་ལ་དབང་། འབྲས་བུ་ལོངས་སྤྱོད་རྫོགས་པའི་སྐུ་མངོན་དུ་བྱེད་པའི་སྐལ་བ་རྒྱུད་ལ་བཞག་པ་ཡིན་ནོ། །གཉིས་པ་ཤེས་རབ་ཡེ་ཤེས་ཀྱི་དབང་ནི། གང་དུ་བསྐུར་བའི་དཀྱིལ་འཁོར་ནི་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་ཞེས་བྱ་སྟེ། སློབ་བུ་རང་ཉིད་ཀྱི་ལུས་རྡོ་རྗེ་ཕུང་པོའི་གྲོང་ཁྱེར་དཀྱིལ་འཁོར་འཁོར་ལོའི་རང་བཞིན་དུ་གནས་པའི་ཁམས་བདེ་ཆེན་བྱང་ཆུབ་ཀྱི་སེམས་དཀར་དམར་ནི་དཔའ་བོ་མཁའ་འགྲོའི་གྲོང་ཁྱེར་གྱི་ཚུལ་དུ་གནས་ཤིང་བདེ་སྟོང་ཡེ་ཤེས་ཀྱི་སྙིང་པོ་ལེན་པས་ན་དཀྱིལ་འཁོར་སྟེ། དཀྱིལ་འཁོར་ནི་མཎྜལ་ཞེས་པའི་སྒྲ་ལས་དྲངས་ན་སྙིང་པོ་ལེན་པ་ཞེས་བྱའོ། །དཀྱིལ་འཁོར་དེ་ཉིད་དུ་དབང་ཇི་ལྟར་བསྐུར་བའི་ཚུལ་ནི། ནམ་གུང་གི་དུས་སུ་དཀྱིལ་འཁོར་གྱི་ནུབ་ཕྱོགས་སུ་བླ་མ་ཐུགས་རྡོ་རྗེ་ཆོས་སྐུའི་རྣམ་རོལ་ཏུ་བཞུགས་པ་ལ་སློབ་བུས་མཎྜལ་ཕུལ་ནས་གསོལ་བ་གདབ། བླ་མས་ན་ཚོད་གཞོན་ཞིང་མཚན་ཉིད་དང་ལྡན་པའི་ཕྱག་རྒྱ་ཐེག་པ་ཐུན་མོང་པའི་ཆོས་ཀྱིས་རྒྱུད་སྣོད་རུང་དུ་བྱས་ཤིང་རྡོ་རྗེ་ཐེག་པའི་ཐབས་ལམ་ལ་ཐེ་ཚོམ་མེད་པ་ཉིད་སློབ་མ་ལ་གཏད་དེ་རྗེས་སུ་གནང་བ་སྦྱིན། དེས་ཀྱང་སྤྲོ་བ་དྲིས་ནས་སློབ་བུའི་པང་དུ་བྱོན་པས་སློབ་བུ་ཡབ་ཡུམ་གཉིས་ཡི་དམ་གྱི་ལྷར་བསྒོམས་ནས་མཁའ་གསང་བྱིན་གྱིས་བརླབས་ཏེ་སྙོམ་པར་ཞུགས་པས་བདེ་བའི་འོད་ཟེར་དང་སློབ་དཔོན་ཡབ་ཡུམ་གྱི་བྱིན་རླབས་འོད་ཟེར་གྱིས་ཕྱོགས་བཅུ་དུས་བཞིའི་རྒྱལ་བ་ཐམས་ཅད་བསྐུལ་ཏེ་བྱོན་ནས་སློབ་བུ་ལ་ཐིམ། དེ་ཉིད་ཕྱག་རྒྱ་དང་མཉམ་པར་སྦྱོར་བའི་རྐྱེན་གྱིས་ཁམས་བྱང་ཆུབ་ཀྱི་སེམས་བདེ་བའི་ངོ་བོར་ཞུ་སྟེ་སྤྱི་བོ་ནས་མགྲིན་པར་བབས་པས་དགའ་བ། མགྲིན་པ་ནས་སྙིང་གར་བབས་པས་མཆོག་དགའ། སྙིང་ག་ནས་ལྟེ་བར་བབས་པས་ཁྱད་པར་དགའ་བ། ལྟེ་བ་ནས་གསང་བར་བབས་པས་ལྷན་ཅིག་སྐྱེས་པའི་དགའ་བ་ཉམས་སུ་མྱོང་ཞིང་། དཀར་ཆ་རྡོ་རྗེ་ནོར་བུའི་རྩེར་བྱོན་པས་བདེ་བ་ཆེན་པོའི་ཡེ་ཤེས་ཀྱི་ངང་དུ་རང་བཞིན་བརྒྱད་ཅུའི་རྟོགས་ཚོགས་ཐམས་ཅད་འགགས། བདེ་བས་ཐབས་བྱས་པའི་ཤེས་རབ་སྟོང་པ་ཉིད་ཀྱི་གནས་ལུགས་བཟོ་བཅོས་དང་བྲལ་བ་ཕྱག་རྒྱ་ཆེན་པོ་ལྷན་ཅིག་སྐྱེས་པའི་ཡེ་ཤེས་ཤར་བ་ཉིད་ངོ་སྤྲོད་པའོ། །དབང་འདིའི་སྐབས་སུ་དབང་དོན་གྱི་ཡེ་ཤེས་ནི་དགའ་བཞིས་དྲངས་པའི་བདེ་སྟོང་གཉིས་སུ་མེད་པའི་ཡེ་ཤེས་སེམས་བཅོས་མ་དང་བྲལ་བ་དེ་ཉིད། །དེ་ལྟ་བུའི་ཡེ་ཤེས་ངོ་འཕྲོད་ན་དབང་ཐོབ་པའོ། །དེ་ལྟར་ཤེས་རབ་ཡེ་ཤེས་ཀྱི་དབང་བསྐུར་བས་ཡིད་དང་ཐིག་ལེའི་སྒྲིབ་པ་དག །ལམ་གཞན་ལུས་ཕྱག་རྒྱའི་ལམ་ལ་བརྟེན་པའི་རྫོགས་རིམ་ཐམས་ཅད་བསྒོམ་པ་ལ་དབང་། འབྲས་བུ་ཆོས་སྐུ་འགྲུབ་པའི་སྐལ་བ་རྒྱུད་ལ་བཞག་པའོ། །གསུམ་པ་ཚིག་གི་དབང་ནི། དབང་འདི་གང་དུ་བསྐུར་བའི་དཀྱིལ་འཁོར་ནི་དོན་དམ་བྱང་ཆུབ་སེམས་ཀྱི་དཀྱིལ་འཁོར་ཞེས་བྱ་སྟེ་སློབ་བུའི་སེམས་རྣམ་པར་ཤེས་པ་ཚོགས་བརྒྱད་རྣམ་པར་ཤེས་པའི་རང་བཞིན་རིག་པ་ཡེ་ཤེས་ཀྱི་ཐིག་ལེ་གཉུག་མ་དོན་གྱི་ཆོས་ཉིད་འཁོར་འདས་ཀྱི་དཀྱིལ་འཁོར་མ་ལུས་པའི་སྤྲོ་གཞི་ཆོས་ཉིད་བདེ་གཤེགས་སྙིང་པོ་སེམས་ཉིད་ཡེ་སངས་རྒྱས་པའི་དཀྱིལ་འཁོར་དུ་བཞུགས་པ་ཉིད་དོ། །དཀྱིལ་འཁོར་དེ་ཉིད་དུ་དབང་ཇི་ལྟར་བསྐུར་ན་ནམ་ཐོ་རེངས་ཀྱི་དུས་སུ་དཀྱིལ་འཁོར་གྱི་བྱང་ཕྱོགས་སུ་བླ་མ་ཡེ་ཤེས་རྡོ་རྗེ་ངོ་བོ་ཉིད་སྐུའི་རྣམ་པར་བཞུགས་པ་ལ་སློབ་བུས་མཎྜལ་ཕུལ་ཏེ་གསོལ་བ་བཏབ། བླ་མས་སློབ་མ་ལ་སྔར་ཤེས་རབ་ཡེ་ཤེས་ཀྱི་དུས་སུ་ཐིག་ལེའི་བདེ་བ་ལ་བརྟེན་ཏེ་ངོ་སྤྲད་པའི་ཡེ་ཤེས་དེ་ཉིད་ཐབས་ལས་བྱུང་བའི་དཔེའི་ཡེ་ཤེས་ད་དུང་ཉམས་ཞེན་གྱི་སྦུབས་དང་མ་བྲལ་བ་ཉིད་ཡིན་པས། སེམས་རང་བབ་བཟོ་བཅོས་དང་བྲལ་བའི་གནས་ལུགས་བདེ་གསལ་མི་རྟོག་པའི་ཉམས་ཀྱི་ཞེན་པ་དང་བྲལ་བའི་གཉུག་མ་གཤིས་ཀྱི་ཆོས་སྐུ་རང་རིག་ཟང་ཐལ་རྗེན་པའི་ཡེ་ཤེས་དེ་ཉིད་དུས་དང་རྣམ་པ་ཐམས་ཅད་དུ་བྲལ་མ་མྱོང་ཡང་རང་ངོ་མ་ཤེས་པར་ཡོད་པ་དེ་ཉིད་མཚོན་པའི་བརྡའ་དང་། མཚོན་བྱེད་ཀྱི་ཚིག་གིས་ངོ་སྤྲོད་པ་སྟེ། དབང་བཞི་བ་འདི་ལ་རྣམ་གྲངས་ཙམ་དུ་དབྱེ་ན་ལྔ་སྟེ། སྔར་ཤེས་རབ་ཡེ་ཤེས་ཀྱི་དབང་གི་སྐབས་སུ་དགའ་བཞི་ལུགས་འབྱུང་གི་མཐར་ཁམས་བྱང་སེམས་རླུང་གི་སྟོབས་ཀྱིས་གྱེན་དུ་ལྡོག་པས་ལུགས་ལྡོག་གི་དགའ་བ་བཞི་ཉམས་སུ་མྱོང་སྟེ་ཐིག་ལེ་སྤྱི་བོར་ཐིམ་པས་དགའ་བའི་ཉམས་ཞེན་དང་བྲལ་བའི་གཉུག་མ་ལྷན་ཅིག་སྐྱེས་པའི་ཡེ་ཤེས་དེ་ཉིད་བླ་མས་ཚིག་ཙམ་གྱིས་ངོ་སྤྲད་པ་ཚིག་གི་བཞི་པ། གལ་ཏེ་དེས་ཡེ་ཤེས་མ་སྐྱེས་ན་སླར་ཡང་ཕྱག་རྒྱ་དང་སྙོམ་པར་ཞུགས་ཏེ་དགའ་བཞི་ལུགས་འབྱུང་དང་ལུགས་ལྡོག་གི་ཐབས་ལ་བརྟེན་ནས་ངོ་སྤྲོད་པ་རྟེན་ཅན་གྱི་བཞི་བ་བློ་རབ་དབང་དུས་སམ་འབྲིང་མན་ཆད་ལ་ལམ་གོམས་པའི་མཐུ་ལ་བརྟེན་ནས་མཐོང་ལམ་རྣམ་པར་མི་རྟོག་པའི་ཡེ་ཤེས་རྒྱུད་ལ་སྐྱེས་ཏེ་ཕྱག་རྒྱ་ཆེན་པོ་མཆོག་གི་དངོས་གྲུབ་མངོན་དུ་བྱས་ནས་སེམས་བདེ་གཤེགས་སྙིང་པོའི་ཆོས་ཉིད་མངོན་སུམ་པར་རྟོགས་པ་ནི་དོན་གྱི་བཞི་བ། དེ་ལྟར་རྟོགས་པའི་ཡེ་ཤེས་དེ་ཉིད་ད་དུང་ཤེས་སྒྲིབ་ལྷག་མ་སྦྱང་བའི་དོན་དུ་སྒོམ་ལམ་ས་དགུར་ཡང་དང་ཡང་དུ་གོམས་འདྲིས་སུ་བྱེད་པ་ནི་ལམ་གྱི་བཞི་བ། དེ་ལྟར་གོམས་པར་བྱས་པས་ལམ་མཐར་ཕྱིན་པའི་ཚེ་ས་བཅུ་རྒྱུན་གྱི་ཐ་མ་ལ་སངས་རྒྱས་ལོངས་སྤྱོད་རྫོགས་སྐུ་ལས་འོད་ཟེར་ཆེན་པོའི་དབང་བསྐུར་བ་ནོད་པས་དཀར་དམར་རླུང་གསུམ་དེ་ཉིད་ཀྱི་འགྱུར་བདེ་མྱོང་བའི་ཤེས་རིག་དང་བཅས་པ་རྒྱུན་ཆད་དེ་དཀར་ཆ་དག་པ་སྐུ་རྡོ་རྗེ། དམར་ཆ་དག་པ་གསུང་རྡོ་རྗེ། ཤེས་རིག་དག་པ་ཐུགས་རྡོ་རྗེ་སྟེ་སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་གོ་འཕང་གང་ཡིན་པ་མངོན་དུ་གྱུར་ཞིང་ཆོས་ཀྱི་སྐུའི་དགོངས་པ་བསལ་བཞག་དང་བྲལ་བ་མངོན་དུ་བྱས་པ་ནི་མཐར་ཐུག་འབྲས་བུའི་བཞི་བའོ། །འདིའི་སྐབས་སུ་དབང་དོན་གྱི་ཡེ་ཤེས་ནི་ད་ལྟ་རང་གི་སེམས་འཁྲུལ་རྟོག་འདི་ཉིད་ཀྱི་ཆོས་ཉིད་དམ་རང་བཞིན་གྱི་གནས་ལུགས་བཟོ་བཅོས་དང་བྲལ་བའི་གཤིས་འདི་ཉིད། རང་གནས་ཀྱི་ཡེ་ཤེས་རང་བཞག་གི་ཆོས་སྐུ། གཉུག་མའི་གནས་ལུགས་དོན་དམ་པའི་ཆོས་ཉིད་ཉིད་དུ་གནས་པ་དེ་ཉིད་རང་ངོ་འཕྲོད་ན་དབང་ཐོབ་པའོ། །དེ་ལྟར་དབང་བཞི་བ་བསྐུར་བས་སྒོ་གསུམ་ཆ་མཉམ་པའི་སྒྲིབ་པ་ཞེས་ཐོག་མ་མེད་པའི་དུས་ནས་རང་རྒྱུད་ལ་གནས་པའི་ལུས་ངག་ཡིད་གསུམ་གྱི་ས་བོན་ཕྲ་བ་དཀར་དམར་རླུང་གསུམ་ལ་བརྟེན་པའི་སྣང་གསུམ་ཕྲ་བའི་སྒྲིབ་པ་དེ་ཉིད་དག །ལམ་གནས་ལུགས་ཕྱག་རྒྱ་ཆེན་པོའམ་འོད་གསལ་ལ་རྫོགས་པ་ཆེན་པོ་བསྒོམ་པ་ལ་དབང་། འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་རྒྱུད་ལ་བཞག་པའོ། །དེ་ལྟར་དབང་བཞི་པོ་དེ་དག་གི་དོན་པོ་ནི་དབང་དོན་གྱི་ཡེ་ཤེས་དེ་ཉིད་ངོ་སྤྲོད་པ་ཡིན་པས། གསང་སྔགས་ཀྱི་གཞུང་དང་མཐུན་པར་བླ་མ་དང་སློབ་མའི་མཚན་ཉིད་ཚང་ཞིང་དབང་ཇི་ལྟ་བ་བཞིན་བསྐུར་ན་བྱིན་བརླབས་འཕོ་བའི་སྟོབས་ཀྱིས་སློབ་བུ་ལ་དབང་དོན་གྱི་ཡེ་ཤེས་སྐྱེ་བ་ཡིན་མོད། འོན་ཀྱང་ད་ལྟའི་དུས་སུ་དེ་འདྲ་བ་མི་འོང་པས་མོས་པས་སྤྱོད་པའི་བླ་སློབ་ཀྱིས་ནི་དབང་གི་ཆོ་ག་དང་ཆོ་གའི་ཡན་ལག་རྣམས་སླ་ཆོས་དང་རྩིང་སྤྱོད་དུ་མ་སོང་བར་ཕྱག་ལེན་ལ་ཐེབ་པར་བྱ་ཞིང་གསང་དབང་ཤེར་དབང་གཉིས་ཀྱང་བདུད་རྩི་དང་རིག་ཙཀ་ལ་བརྟེན་ནས་བསྐུར་ན་དམིགས་པ་ལ་དོ་གལ་དུ་བྱ། ཉམས་མྱོང་དང་ཡེ་ཤེས་ཚིག་གིས་ངོ་སྤྲོད་ཅིང་ཉམས་མྱོང་རྒྱུད་ལ་ཅི་སྐྱེས་བྱས་པས་རྒྱུད་སྣོད་རུང་དུ་གྱུར་ཏེ་དམ་ཚིག་མ་ཉམས་ཤིང་བསྐྱེད་རྫོགས་ཀྱི་ལམ་ཉམས་སུ་བླང་བས་དབང་དོན་གྱི་ཡེ་ཤེས་རང་རྒྱུད་ལ་སྐྱེ་རུང་གི་ནུས་ལྡན་དུ་གྱུར་ན་ཡང་དབང་ཐོབ་པར་བྱ་དགོས་སོ། །དེས་ན་དབང་ཐོབ་པའི་ཚད་ནི་དབང་དོན་གྱི་ཡེ་ཤེས་དེ་དང་དེ་རྒྱུད་ལ་སྐྱེས་པའམ་སྐྱེ་ངེས་ཀྱི་ནུས་ལྡན་དུ་བྱས་པས་ན་དབང་ཐོབ་པ་ཡིན་ནོ། །དེའི་ཕྱིར་དབང་དོན་གྱི་ཡེ་ཤེས་ལ་ངེས་ཤེས་ཅུང་ཟད་ཀྱང་མ་སྐྱེས་པར་དབང་བསྐུར་གྱི་གཟུགས་བརྙན་ཙམ་བྱེད་པ་ནི་སྙིང་པོས་དབེན་པ་ཉིད་དོ། །དེ་དག་གི་མཇུག་ཏུ་དམ་ཚིག་དང་སྡོམ་པའི་གནས་ཐམས་ཅད་བསྒྲགས་ནས་ཁས་བླང་དུ་གཞུག་ཅིང་ཡོན་འབུལ་ཞིང་གཏང་རག་ཏུ་ཚོགས་ཀྱི་འཁོར་ལོ་བྱ། ཤིས་པ་བརྗོད་ཅིང་དགེ་བ་བསྔོ་བ་སོགས་བྱ་བ་ནི་མཇུག་གི་ཆོ་གའོ། །གྲངས་མེད་བསྐལ་པའི་ཡུན་ལ་མ་ལྟོས་པར། །ཚེ་གཅིག་སངས་རྒྱས་མངོན་བྱེད་རྡོ་རྗེ་ཐེག །འདོད་ཡོན་རྒྱན་དུ་ཤར་བའི་ཁྱད་པར་ལམ། །ལམ་མཆོག་འདི་འདྲ་མཇལ་རྣམས་སྐལ་བ་བཟང་། །འོན་ཀྱང་སྙིགས་མར་སྤྱོད་པའི་གཞན་དབང་གིས། །སྨིན་གྲོལ་ལམ་གྱི་ཟབ་གནད་ཀུན་ནུབ་ཅིང་། །ཚིག་ཙམ་བོན་དུ་གྱེར་བའི་འཆོལ་སྤྱོད་ཀྱིས། །བསྟན་པའི་གཟུགས་བརྙན་ལུས་ལ་སེམས་འདི་སྐྱོ། །དེ་ལྟ་ན་ཡང་དམ་པའི་བླ་མ་ལ། །བསྟེན་ནས་མན་ངག་གནད་ཀྱི་བཅུད་བླང་སྟེ། །ཚུལ་བཞིན་ཉམས་སུ་ལེན་པའི་མོས་ལྡན་འགའ། །ཡོད་པར་གྱུར་ན་ཚུལ་འདིར་སྤྲོ་བར་འགྱུར། །དེ་ཕྱིར་དམ་པའི་གྲོགས་ཀྱི་བཀས་བསྐུལ་ནས། །བརྗོད་བྱའི་སྙིང་པོ་ཉུང་ངུའི་ངག་གིས་བཀོད། །ལོག་པར་བཤད་དང་སྦས་དོན་བཤད་ཆེས་པའི། །ནོང་པ་གང་མཆིས་ལྷ་དང་བླ་མར་བཤགས། །དགེ་ཚོགས་གང་ཞིག་མཆིས་པས་འགྲོ་བ་ཀུན། །འཁྲུལ་མེད་རྡོ་རྗེ་ཐེག་པའི་ལམ་བཟང་དང་། །མཇལ་ནས་སྨིན་བྱེད་དབང་བཞིའི་རྒྱུད་སྨིན་ཏེ། །གྲོལ་བྱེད་ལམ་གྱིས་མངོན་སངས་རྒྱ་བར་ཤོག །དེ་ལྟར་དབང་བཞིའི་གོ་དོན་ཅུང་ཟད་བཀྲལ་པ་འདི་ཉིད་རྡོ་རྗེའི་མཆེད་དམ་པ་ཚེ་དབང་བཟང་པོས་བསྐུལ་བའི་ནན་ངོར་མ་ལྡོག་པར་དུག་ལྔ་མེ་འབར་དཔལ་དགེ་ཧྲལ་བོས་རྒྱལ་འཕགས་རི་ཁྲོད་དུ་བློ་ཐོག་ནས་ཤར་མར་བྲིས་པ་དགེའོ། །དགེའོ། །དགེའོ། །