ཤེར་རྒྱན་སྐབས་བཞི་བའི་སྤྱི་དོན་སྤར་བྱང་།

🚧 This website is under continued development. We appreciate your patience!

Previous Text Back to Volume Page Next Text

Wylie title	sher rgyan skabs bzhi ba'i spyi don spar byang
Location	dpal sprul bka' 'bum Volume 4, Text 7, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Overviews - spyi don · Printing Colophon Prayers - par byang smon tshig

[edit]

༄༅། །ཤེར་རྒྱན་སྐབས་བཞི་བའི་སྤྱི་དོན་སྤར་བྱང་།

ཨོཾ་སྭ་སྟི། རྣམ་དག་ཚུལ་ཁྲིམས་ཕུང་པོའི་མཛེས་པའི་སྐུ། །ཏིང་འཛིན་ཤེས་རབ་ཡོན་ཏན་དཔལ་གྱི་བརྗིད། །མཐའ་ཡས་འགྲོ་བའི་ཕན་བདེའི་གཞིར་གྱུར་པ། །ཐུབ་དབང་སྲས་བཅས་གུས་པའི་གཙུག་གིས་མཆོད། །ཤིན་ཏུ་དཔག་དཀའ་རྒྱལ་བ་ཀུན་གྱི་ཡུམ། །དགོངས་དོན་འཁྲུལ་མེད་གསལ་བར་འབྱེད་པའི་རྒྱན། །བཞི་བའི་སྐབས་ཀྱི་སྤྱི་དོན་ལེགས་བཤད་གཏམ། །འཆད་ཉན་ཉམས་སུ་ལེན་པའི་ཆ་རྐྱེན་དུ། །བཟོ་རིག་འཕྲུལ་གྱི་རྣམ་དཔྱོད་ལས་ཐོན་པ། །གཅིག་ལ་དུ་མར་འཆར་བའི་ཕྱི་མོའི་པར། །བློ་གྲོས་བཟང་པོས་ཐུབ་བསྟན་པདྨའི་ཚལ། །རྒྱས་མཛད་དམ་པའི་ཐུགས་བསྐྱེད་མཐུ་ཡིས་བསྐྲུན། །གང་གི་བཀའ་བཞིན་བརྩོན་པ་ལྷུར་ལེན་པ། །ཉེ་བར་གནས་པ་བློ་བཟང་ཆོས་ཉིད་དང་། །བརྐོས་མཁན་མཁས་པ་བུ་ལྷ་ཕ་བུར་བཅས། །བསམ་དང་སྦྱོར་བའི་ལེགས་བྱས་ཕྱོགས་གཅིག་སྤུངས། །དེ་དག་དྲི་མེད་ཟླ་བ་འབུམ་གྱི་ཞུན། །གཅིག་ཏུ་འཁྱིལ་ལྟར་རྣམ་པར་དཀའ་བའི་མཐུས། །ལུང་དང་རྟོགས་པའི་རྒྱལ་བསྟན་དཔག་བསམ་ལྗོན། །བཤད་དང་སྒྲུབ་པའི་ཁོ་ལག་ཡོངས་རྫོགས་ཤོག །རྣམ་དཀར་ལས་འདིར་འབྲེལ་བ་ཐོགས་པའི་གཙོས། །འགྲོ་བ་མ་ལུས་འོད་སྣང་མཐའ་ཡས་ཀྱིས། །རྒྱལ་བའི་དཀྱིལ་འཁོར་མཛེས་ཤིང་ཉམས་དགའ་བར། །པདྨའི་སྦུབ་ལས་ལུས་མཆོག་འཛིན་གྱུར་ཅིག །མི་གནས་མི་སྦྱོར་རྒྱལ་ཡུམ་དགོངས་པའི་མཁའ། །ཡུལ་དང་ཡུལ་ཅན་གཉིས་སྣང་རྡུལ་བྲལ་བ། །སྦྱོར་བཞིའི་མངོན་རྟོགས་དྲི་མེད་མཐར་བྱས་ཏེ། །ཆོས་སྐུའི་རྒྱལ་སར་ཀུན་ཀྱང་གནས་གྱུར་ཅིག །རྒྱལ་བའི་རྗེས་འཇུག་དགེ་འདུན་འདུས་པའི་སྡེ། །གང་ན་མཆིས་ཀུན་བསླབ་པ་རིན་པོ་ཆེ། །རྣམ་པ་གསུམ་གྱི་མཛད་བཟང་གོང་འཕེལ་མཐུས། །སྲིད་ཞིའི་ལེགས་ཚོགས་རྒྱས་པའི་བཀྲ་ཤིས་ཤོག །ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་འགྲེལ་བ་རྗེ་བཙུན་ཆོས་ཀྱི་རྒྱ་མཚོ་དཔལ་བཟང་པོས་མཛད་པའི་སྐབས་བཞི་བའི་སྤྱི་དོན་འདི་གྲྭ་ཚང་རིན་པོ་ཆེར་དཔེ་རྒྱུན་དཀོན་པ་ལ་ཕན་པར་དགོངས་ནས་གཞུང་ལུགས་རབ་འབྱམས་སྨྲ་བའི་མཁས་དབང་བློ་བཟང་ཐུབ་བསྟན་གྱིས་ཐུགས་བསྐྱེད་དག་པས་སྤར་དུ་སྒྲུབ་སྐབས་སྤར་བྱང་ཉུང་ངུ་ཞིག་གྱིས་ཞེས་བཀའ་གནང་ལྟར་ཆོས་སྨྲ་བའི་གཟུགས་ཙམ་འཛིན་པ་དཔལ་དགེ་ཨ་བུར་འབོད་པས་ཐེག་ཆེན་དར་རྒྱས་གླིང་གི་ཆོས་གྲྭར་བྲིས་པ་དགེ་ཞིང་བཀྲ་ཤིས་པར་གྱུར་ཅིག །དགེའོ། །དགེའོ། །དགེའོ། ། ༈ ཚ་བླའི་མགྲིན་པའི་དཀོར་མཛོད་གསར་དུ་རྡོལ། །འབྲོག་བླའི་མགྲིན་པའི་རྩ་འདབས་རྒ་བས་རྒོག །རྡོལ་ལས་མི་ལེན་རྒོག་ལས་ཚོལ་བ་འགལ། །རྒན་པོ་རྒས་ཆེས་འཆད་རྩོད་རྩོམ་གསུམ་བརྗེད། །ཧ་ཅང་བཙིར་ན་སྟུག་པ་འཆོར་ཉེ་ཡང་། །དབུ་བླའི་བཀའ་ལ་སྐྲག་ཆེས་ཅུང་ཟད་བྲི། ། ༈ སངས་རྒྱས་ཆོས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཟབ་དང་རྒྱ་ཆེ་ཐེག་པ་མཆོག་གཞུང་ལས། །ཟབ་མོ་ལྟ་བའི་དོན་མཆོག་སྟོན་པའི་བཀའ། །ཤེས་རབ་ཕར་ཕྱིན་རྡོ་རྗེ་གཅོད་པ་དང་། །རྒྱ་ཆེན་སྤྱོད་པའི་གནད་ཀུན་ཡོངས་བསྡུས་པ། །སེམས་དཔའི་བསྟན་བཅོས་རྒྱལ་སྲས་སྤྱོད་འཇུག་གཞུང་། །བཀའ་བསྟན་ཀུན་གྱི་གཙོར་གྱུར་རྣམ་གཉིས་ཀྱི། །དཔེ་བརྒྱའི་ཕྱི་མོར་གྱུར་པའི་སྤར་འདི་དག །དམ་པ་མཆོག་གྱུར་པྲཛྙཱའི་མཚན་ཅན་གྱིས། །ཐུགས་བསྐྱེད་རྣམ་དག་མཁའ་ལྟར་དྭངས་བས་བསྒྲུབས། །དགེ་དེས་རྒྱལ་བསྟན་དར་ཞིང་རྒྱས་པ་དང་། །ཁྱད་པར་ཡུན་རིང་དྲིན་གྱིས་ལེགས་སྐྱོང་བའི། །ཕ་མ་དུད་འགྲོའི་སྐྱེ་གནས་ལས་ཐར་ཏེ། །ལྷ་མའི་རྟེན་ལས་རྣམ་གྲོལ་མཆོག་ཐོབ་ཤོག །དགེའོ །། །།