བདེ་བ་ཅན་དུ་སྐྱེ་བའི་སྨོན་ལམ་ཞིང་མཆོག་སྒོ་འབྱེད།

Previous Text Back to Volume Page Next Text

Wylie title	bde ba can du skye ba'i smon lam zhing mchog sgo 'byed
Location	dpal sprul bka' 'bum Volume 4, Text 6, Pages 95-97 (Folios 1a1 to 2a4)
Author	དཔལ་སྤྲུལ་རིན་པོ་ཆེ་
Less details More details
Citation	Dpal sprul rin po che. Bde ba can du skye ba'i smon lam zhing mchog sgo 'byed. In Dpal sprul 'jigs med chos kyi dbang po'i gsung 'bum, Vol. 4: 95-97. Kathmandu: Tsadra Foundation and Shechen Publications, 2026.
Genre	Notes - zin bris · Prayers - smon lam
Colophon	སེར་ཤུལ་དགོན་ལྷ་རམ་པར་ཨ་བུ་བཀའ་དྲིན་ཅན་གྱིས་བསྐུར་བ་ལགས་སོ
Colophon	ser shul dgon lha ram par a bu bka' drin can gyis bskur ba lags so

[edit]

༄༅། །བདེ་བ་ཅན་དུ་སྐྱེ་བའི་སྨོན་ལམ་ཞིང་མཆོག་སྒོ་འབྱེད། བདེ་བ་ཅན་དུ་སྐྱེ་བའི་སྨོན་ལམ་ཞིང་མཆོག་སྒོ་འབྱེད་འདི་ལ། དང་པོ་ཕུལ་བྱུང་མཛད་པ་སོགས་ཀྱི་དོན། མགོན་པོ་འོད་དཔག་མེད་ཀྱིས་སྔོན་སངས་རྒྱས་འཇིག་རྟེན་དབང་ཕྱུག་རྒྱལ་པོའི་དྲུང་དུ་ཐུགས་བསྐྱེད་ནས་སྨོན་ལམ་བཏབ་པ་དང་། བསྐལ་པ་གངྒཱའི་ཀླུང་གི་བྱེ་མ་སྙེད་གཉིས་ཀྱི་བར་དུ་ཚོགས་བསགས་པ་སོགས་མཆོད་བརྗོད་ཤློ་ཀའི་ཚིག་དང་འབྲེལ་བར་ཕྱག་འཚལ་བ་དང་སྐྱབས་གནས་གཅིག་ཆོག་ཏུ་འཛིན་པའི་སྒོ་ནས་བརྗོད་པ་དང་། སྔོན་རྗེ་བདག་ཉིད་ཆེན་པོ་ནས་ཐུགས་བསྐྱེད་ཇི་ལྟར་མཛད་པ་ལྟར་བདག་ཅག་གིས་ཀྱང་བརྩེ་བའི་སྙིང་རྗེ་ཆེན་པོ་དང་། བྱང་ཆུབ་ཀྱི་སེམས་ཀྱི་ཀུན་སློང་རྣམས་མཁན་པོས་གསུངས་བཤད་རྒྱས་པ་གནང་ནས་ཚིགས་བཅད་གཉིས་པོ་སྐྱབས་འགྲོ་དང་སེམས་བསྐྱེད་ཀྱི་ཚུལ་དུ་བརྗོད། དེ་ནས་གཞུང་ན་ཡོད་པ་ལྟར་བདེ་བ་ཅན་གྱི་ཞིང་དུ་སྨོན་ལམ་གདབ་དགོས་ཚུལ་དང་སྐྱེ་བའི་རྒྱུ་བཞི་པོ་སོགས། མཁན་པོས་གསུངས་ནས། རྒྱུ་བཞི་པོ་མཐར་ཆགས་སུ་ཐུན་གཅིག་གི་ཉམས་ལེན་དུ་དྲིལ་ནས་བྱ་བ་ལ། དང་པོ་ཞིང་དང་སྟོན་པའི་ཡོན་ཏན་དྲན་ནས་དེ་ལ་ཡིད་གཏོད་པ་ལ། ཞིང་ཁམས་ཀྱི་བསྟོད་པ་རྒྱས་བསྡུས་ཅི་རིགས་མཁན་པོས་གསུངས་ནས་བྱང་འདྲེན་པས་བསྐུལ་ཏེ། མི་མཇེད་ཞིང་གི་སོགས་གནས་སྐབས་ཀུན་ཏུ་ཁྱོད་ཀྱི་འགྲོ་ཀུན་སྐྱོངས་ཀྱི་བར། བཅད་ལྷུག་སྤེལ་མ་གདངས་སྙན་པོའི་སྒོ་ནས་ཚོགས་མང་གིས་གསུངས་འཕྲལ། རྒྱུ་གཉིས་པ་དགེ་བའི་རྩ་བ་མང་པོ་དཔག་ཏུ་མེད་པ་བསྐྱེད་པ་ཚོགས་བསགས་ཡན་ལག་བདུན་དུ་བསྡུས་ནས་བྱ་བའི་སྔོན་ཚོགས་ཀྱི་ཞིང་དང་སྨོན་ལམ་འགྲུབ་པའི་དཔང་པོ་སྤྱན་འདྲེན་པ། བླང་དོར་གནས་རྣམས་སོགས་ནས། འདིར་གཤེགས་ཤིག་གི་བར་གསུངས། དེ་ནས་ཡན་ལག་བདུན་པ་རྒྱས་པར་ནི་སྤྱོད་འཇུག་དང་བཟང་སྤྱོད་ཡན་ལག་བདུན་པ་སྤེལ་མའམ་བསྡུ་ན་བཟང་སྤྱོད་ལྟར། ཡན་ལག་རེ་རེ་བཞིན་མཁན་པོས་གསུངས་བཤད་དང་བཅས་རིམ་བཞིན་བྱས་འཕྲལ། རྒྱུ་གསུམ་པ་བྱང་ཆུབ་ཏུ་སེམས་བསྐྱེད་པ་བྱང་ཆུབ་སྙིང་པོ་སོགས་ཀྱི་སྐྱབས་འགྲོ་རྩོམ་བྱེད་དུ་བྱས་ཏེ་སྤྱོད་འཇུག་ལྟར་དམ་བཅའ་དང་རྗེས་དགའ་བ་བསྒོམ་པའི་སྒོ་ནས་སེམས་བསྐྱེད། རྒྱུ་བཞི་པ་དགེ་བའི་རྩ་བ་རྣམས། བདེ་བ་ཅན་དུ་སྐྱེ་བའི་རྒྱུར་བསྔོ་བ། སྨོན་ལམ་གྱི་ཚིག་དོན་ཡིད་ལ་དྲན་པའི་སྒོ་ནས་འདུན་པ་དྲག་པོ་བསྐྱེད་དགོས་ཚུལ་མཁན་པོས་གསུངས་ནས་ཚོགས་མང་གིས། བདག་དང་གཞན་གྱི་སོགས་ནས་བདེ་སྨོན་རྐྱང་པ་མ་དག་ཞིང་གི་འགྲོ་བ་འདྲེན་པར་ཤོག་བར་དང་། དེ་མན་གྱི་སྨོན་ལམ་རྣམས་རྒྱས་པར་ཞིང་མཆོག་སྒོ་འབྱེད་དམ་ཕུལ་བྱུང་མ་གང་རུང་གི་ཚིགས་བཅད་ལྷུག་རྫོགས་པའམ་བསྡུ་ན་ཇི་སྲིད་ཐུབ་མཆོག་མ་ཙམ་བྱས་རྗེས་སུ་བཟང་སྤྱོད་སོགས་སྨོན་ལམ་རྣམས་དལ་ཁོམས་དང་བསྟུན་ནས་བྱ་ལ་འདི་ལྟ་བུ་སྔ་ཆོག་ཕྱི་ཆོག་གཉིས་བྱས་ན་སྙམ་ཁོ་བོས་བློ་བཟོ་ལྟ་བུ་ཡིན་ཡང་ཞིབ་པར་སྙིང་ནས་ཐུགས་དཔྱད་གནང་བར་ཞུ་ཞུ། སེར་ཤུལ་དགོན་ལྷ་རམ་པར་ཨ་བུ་བཀའ་དྲིན་ཅན་གྱིས་བསྐུར་བ་ལགས་སོ། །