སྔོན་འགྲོ་དངོས་གཞིའི་ལམ་བསྡུས།

Previous Text Back to Volume PageNext Text

Wylie title	sngon 'gro dngos gzhi'i lam bsdus
Location	'jigs gling bka' 'bum Volume 12, Text 38, Pages 705-706 (Folios 1a1 to 1b6)
Author	འཇིགས་མེད་གླིང་པ་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jigs med gling pa. Sngon 'gro dngos gzhi'i lam bsdus. In Kun mkhyen rig 'dzin 'jigs med gling pa'i gsung 'bum, Vol. 12: 705-706. New Delhi: Shechen Publications, 2025.
Genre	Synopsis - mdor bsdus
Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)
Colophon	First colophon: །རྒན་རྒོན་རྣམས་ཀྱི་དོན་དུ་རྒྱལ་བའི་མྱུ་གུ་མཁྱེན་བརྩེའི་ལྷས་སོ།། Second colophon: །ཞེས་པའང་ལན་ཆགས་བུ་ལོན་ལ་འཁོར་སྒྲ་མི་འཐད་ཟེར་བའི་བླུན་གཏམ་ཟློག་ཕྱིར་རོ།།
	First colophon: rgan rgon rnams kyi don du rgyal ba'i myu gu mkhyen brtse'i lhas so// Second colophon: zhes pa'ang lan chags bu lon la 'khor sgra mi 'thad zer ba'i blun gtam zlog phyir ro//

Tibetan Text

[edit]

༄༅། །སྔོན་འགྲོ་དངོས་གཞིའི་ལམ་བསྡུས་བཞུགས། །སེམས་ཅན་ཐམས་ཅད་སངས་རྒྱས་འཐོབ་བྱའི་ཕྱིར། །དཀོན་མཆོག་གསུམ་ལ་སྙིང་ནས་སྐྱབས་སུ་མཆི། །ན་མ་པཱུ་ཛ་ཧོཿ བཛྲ་ས་ཏྭ་ཨཱཿ དགེ་ལ་ཡི་རང་ཆོས་འཁོར་བསྐོར་བཞིན་བཞུགས། །ཀུན་ཏུ་བཟང་པོའི་ཡོངས་བསྔོ་འགྲུབ་པར་ཤོག །ཆོས་ཉིད་མི་འགྱུར་སྣང་བ་མཐའ་ཡས་ནི། །འགག་མེད་སྙིང་རྗེར་ལོངས་སྤྱོད་སྤྱན་རས་གཟིགས། །ཨོ་རྒྱན་པཎ་ཆེན་རྫུས་སྐྱེས་སྤྲུལ་པའི་སྐུར། །གསོལ་བ་འདེབས་སོ་ནད་གདོན་བར་ཆད་སོལ། །འཆི་ཁར་གནད་གཅོད་སྡུག་བསྔལ་མི་འབྱུང་ཞིང་། །ཚེ་འདིའི་སྣང་བ་ནུབ་པར་གྱུར་མ་ཐག །བདེ་བ་ཅན་དང་རི་བོ་པོ་ཏ་ལ། །ཟངས་མདོག་དཔལ་གྱི་རི་བོར་སྐྱེ་བར་ཤོག །ཨོཾ་མ་ཎི་པདྨེ་ཧཱུྃ། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཞེས་བར་མེད་དུ་བཟླའོ། །རྒན་རྒོན་རྣམས་ཀྱི་དོན་དུ་རྒྱལ་བའི་མྱུ་གུ་མཁྱེན་བརྩེའི་ལྷས་སོ།། ༈ །།ཆབ་གཏོར་རྒྱས་པའི་སྐབས། ལན་ཆགས་བུ་ལོན་འཁོར་བའི་དོན་ལ། སྤྱིར་དྲི་མ་དང་། སྒྲིབ་གཉིས་ལ་སོགས་པ་ནི། རང་ས་ནས་དག་བྱ་ཡིན་པས་བྱང་དག་གི་སྒྲ་འཇུག་ལ། ཕ་མའི་དྲིན་ལན་དང་ལན་ཆགས་བུ་ལོན་ལ་སོགས་པ་ནི་གཞན་ས་ལ་ལན་སློན་པ་ཡིན་པས་འཁོར་བའི་སྒྲ་སྟེ། དཔེར་ན་མུར་འབྲེལ་བའམ་རྒྱུན་ཆད་པ་མེད་པར་ལན་ཆགས་ཁ་མ་འཁོར་བ་མེད་པའི་དོན་ཏེ། འཇིག་རྟེན་པའི་ཁ་སྐད་ཙམ་ལའང་ཕ་མའི་དྲིན་ལན་འཁོར་ཞེས་སྨྲ་བའི་ཕྱིར་རོ། །སྤྱིར་ཆབ་གཏོར་གྱི་ཁུངས་ནི་བཀའ་འགྱུར་ནང་ནས་གཟུགས་ལེགས་ཞེས་བྱ་བའི་གཟུངས་དང་། ཡེ་ཤེས་སྐར་མདའི་སྙིང་པོ། ཡི་དྭགས་མོ་ཁ་འབར་མ་དབུགས་ཕྱུང་བའི་གཏོར་ཆོག་དང་། ཁ་ལས་མེ་འབར་མ་ལ་སྐྱབས་སྦྱིན་པའི་གཟུངས་དང་། འཇུར་གེགས་ཞེས་བྱ་བའི་གཟུངས་རྣམས་ལས། ཁ་ལས་མེ་འབར་མའི་གཟུངས་ལས་མཚན་བཞི་བཤད་ཅིང་། འགའ་ཞིག་སྤྱི་བོ་ལ་སོགས་པར་དེ་བཞིན་གཤེགས་པ་བཞི་པོ་སྒོམ་ཟེར་བའང་བཀའ་དངོས་བསྟན་ལ་ནི་མཚན་བརྗོད་པའི་བྱིན་རླབས་དང་ཕན་ཡོན་ཙམ་ལས་མངོན་རྟོགས་དང་སྒོམ་ཡུལ་མ་བཤད། དེ་བཞིན་དུ་མགྲོན་བཞིའི་ཐ་སྙད་ཀྱང་མ་བཤད་མོད། གཏོར་མའི་རིང་ལུགས་མི་མཐུན་པ་མང་པོ་ནི་བོད་འདིར་རང་སྟོབས་ཀྱི་བློའི་འཇུག་པ་དང་མཐུན་པར་བཤད་པ་འབའ་ཞིག་ཡིན་ནོ། །ཞེས་པའང་ལན་ཆགས་བུ་ལོན་ལ་འཁོར་སྒྲ་མི་འཐད་ཟེར་བའི་བླུན་གཏམ་ཟློག་ཕྱིར་རོ།། །།