བཀའ་བསྲུང་མ་མགོན་ལྕམ་དྲལ་ལསཿ མ་མོ་མཁའ་འགྲོའི་འཁྲུགས་སྐོང་ཿ

From Khyentse Lineage - A Tsadra Foundation Project
JLKO-KABUM-11-DA-038
Wylie title bka' srung ma mgon lcam dral las: ma mo mkha' 'gro'i 'khrugs skong:
Location 'jigs gling bka' 'bum
Volume 11, Text 38, Pages 575-582 (Folios 1a1 to 4b2)
Author འཇིགས་མེད་གླིང་པ་
Less details More details
Tertön འཇིགས་མེད་གླིང་པ་ ('jigs med gling pa)
Citation 'jigs med gling pa. Bka' srung ma mgon lcam dral las ma mo mkha' 'gro'i 'khrugs skong. In Kun mkhyen rig 'dzin 'jigs med gling pa'i gsung 'bum, Vol. 11: 575-582. New Delhi: Shechen Publications, 2025.
Genre Mending Rituals - bskang chog
Cycle བཀའ་སྲུང་མ་མགོན་ལྕམ་དྲལ་ (bka' srung ma mgon lcam dral)
Parent Cycle ཀློང་ཆེན་སྙིང་གི་ཐིག་ལེ་ (klong chen snying gi thig le)
Deity bka' srung
Colophon

འདི་འབེབས་རན་པའི་རྟགས་སུ་རྨི་ལམ་ན་དཀར་ཐབ་ཤོར་བ་མཐོང་བ་ལ་འཁྲུགས་སྐོང་གི་གཏོར་དཔེ་བསྟན་པ་སོགས་བྱུང་བས་བརྡ་རང་གྲོལ་དུ་གྱུར་ཏོཿ

'di 'bebs ran pa'i rtags su rmi lam na dkar thab shor ba mthong ba la 'khrugs skong gi gtor dpe bstan pa sogs byung bas brda rang grol du gyur to:

[edit]

འུྃཿ བཀའ་བསྲུང་མ་མགོན་ལྕམ་དྲལ་ལསཿ མ་མོ་མཁའ་འགྲོའི་འཁྲུགས་སྐོང་བཞུགསཿ

འུྃཿ སྲིད་པ་མ་མོའི་དལ་ལ་འདུདཿ དུས་ངན་སྙིགས་མ་ཤར་བའི་ཚེཿ བསམ་ངན་དར་བས་ལས་ངན་འཚུབསཿ ནད་མཚོན་མུ་གེའི་བསྐལ་པ་དརཿ དེ་ཚེ་མ་མོ་མཁའ་འགྲོ་འཁྲུགསཿ འཁྲུགས་སྐོང་འདི་ལ་འབད་པ་གཅེསཿ ཆོས་འབྱུང་བསྣོལ་མའི་སྟེང་ཉིད་དུཿ མཁའ་འགྲོའི་གཏོར་མ་པད་འདབ་ཅནཿ ཤ་ཁྲག་སྙིང་སྣ་མདོས་ཀྱིས་བརྒྱནཿ སྲོག་ཆགས་མདངས་སམ་དེའི་གཟུགས་བརྙནཿ ནང་མཆོད་བྷནྡྷ་མདའ་དར་ཚོགསཿ ཕྱེ་མར་དཀར་མོ་ལག་གཡས་བཤམསཿ ཡི་དམ་ལྷ་ཡི་ཏིང་འཛིན་དང་ཿ ལྡན་པས་སྔགས་དྲུག་ཕྱག་རྒྱས་བརླབཿ བྷྱོཿ སྣང་སྲིད་ཀུན་གྱི་ཕྱྭ་ཆེན་མོཿ ནམ་མཁའ་དབྱིངས་ཕྱུག་དཔལ་མོ་བཙནཿ སྲ་བའི་དབྱིངས་དང་མཉེན་པའི་དབྱིངསཿ དྲོ་དང་བསྐྱོད་པའི་དབྱིངས་ཆེན་མོཿ རྒྱལ་བ་ཀུན་གྱི་ཡུམ་ཆེན་ཏེཿ མ་མོ་མཁའ་འགྲོའི་བདག་ཉིད་ཡིནཿ རང་བཞིན་ངང་ལས་མ་གཡོས་ཕྱིརཿ གཤེགས་བྱོན་བཞུགས་པར་མི་དམིགས་ཀྱངཿ གདུལ་བྱའི་དོན་དུ་སྣ་ཚོགས་སྐུརཿ སྟོན་ལ་ཕྱག་འཚལ་མཆོད་པ་འབུལཿ དམ་ཚིག་ཉམས་ཆག་མཐོལ་ལོ་བཤགསཿ འབྱུང་ལྔས་བསྡུས་པའི་སྣོད་བཅུད་ལཿ རང་རྒྱུད་བལྟས་ཤིང་བརྙས་པ་ཤོརཿ སྲིད་གསུམ་ཡེ་ནས་སངས་རྒྱས་སུཿ གནས་པ་མ་རྟོགས་མཐོལ་ལོ་བཤགསཿ བྷྱོཿ རྡོ་རྗེ་ཕག་མོ་དབྱིངས་ཀྱི་ཡུམཿ ཁྲོས་མ་ནག་མོ་སེང་གེའི་ཞལཿ ཉིད་ཞི་བདེ་མཆོག་མུ་ཁ་ལེཿ ཀུ་རུ་ཀུ་ལླེ་འོད་ཟེར་ཅནཿ སྣ་ཚོགས་ཡུམ་དང་ཡུམ་ཆེན་མོཿ ཁྲག་འཐུང་གནས་བཅུ་དུར་ཁྲོད་བརྒྱདཿ ཉི་ཤུ་རྩ་བཞིའི་གནས་ཡུལ་བདགཿ གསང་སྔགས་རིག་སྔགས་ཅན་རྣམས་ལཿ ཕྱག་འཚལ་ཕྱི་ནང་མཆོད་པ་འབུལཿ བསྟན་པ་རྒྱ་མཚོའི་འདུལ་བ་དངཿ བྱང་ཆུབ་སེམས་དཔའི་བསླབ་པ་དངཿ སྔགས་ཀྱི་འདའ་དཀའ་དམ་ཚིག་གཉེརཿ སྤྱི་དང་ཁྱད་པར་ལྷག་པ་ཡིསཿ རྣམ་པར་ཕྱེ་ཞིང་བསྡུས་སོ་ཅོགཿ ཉོན་མོངས་དུག་ལྔའི་དབང་གྱུར་ཏེཿ བག་མེད་འགལ་འཁྲུལ་ཐལ་བ་དངཿ ཀློང་དུ་མ་གྱུར་ནོངས་པ་ཀུནཿ མཐོལ་ལོ་བཤགས་སོ་དག་པར་སྩོལཿ བྷྱོཿ འཇིག་རྟེན་འདས་ཀྱང་འཁོར་བའི་ཚུལཿ ཞི་ལ་གནས་ཀྱང་ཐུགས་རྗེའི་གཟུགསཿ ཨེ་ཀ་ཙ་ཊི་སྤུན་དྲུག་དངཿ བྲན་མོ་བཅུ་བཞི་ཡང་གཡོག་འབུམཿ འདོད་ཁམས་བདག་མོ་རེ་མ་ཏིཿ མིང་བརྒྱ་མ་ལ་མཚན་སྟོང་མཿ སྣ་ཚོགས་གཟུགས་དང་རྫུ་འཕྲུལ་ཅནཿ སྟོང་ཁམས་ཁྱབ་པར་སྤྲུལ་ནས་ཀྱངཿ འབྱུང་བ་གཡོ་དང་འཁྲུག་བྱེད་ཅིངཿ དུས་བཞིའི་དྲོད་འཛིན་བཅུད་ཀྱང་འཕྲོགཿ ནད་དང་རིམས་ཀྱི་བདག་མོ་མཛདཿ དབེན་གནས་ཉུལ་ཞིང་ཚོགས་ཁང་འགྲིམཿ རྣལ་འབྱོར་ཅན་ལ་དངོས་གྲུབ་སྟེརཿ དམ་ཚིག་ཉམས་ལ་ཆད་པ་གཅོདཿ ལེགས་ཉེས་སྟངས་འཛིན་འཇིག་རྟེན་སྐྱོངཿ ཀུན་ལ་ཕྱག་འཚལ་མཆོད་པ་འབུལཿ ཚོགས་ཀྱི་འཁོར་ལོས་ཉམས་ཆག་བཤགསཿ མདོས་དང་མདངས་ཀྱིས་ཐུགས་དམ་བསྐངསཿ མི་ནད་ཕྱུགས་ནད་གཅད་དུ་གསོལཿ ཞིང་ལ་སད་སེར་བཙའ་ཐན་དངཿ མུ་གེ་འཁྲུགས་རྩོད་མེད་པར་མཛོདཿ བྷྱོཿ མ་མོ་འཁྲུག་པའི་རྒྱུ་བསྟན་པཿ དམ་པའི་རྡོ་རྗེ་སློབ་དཔོན་ལཿ མ་དད་ལོག་པར་རྟོག་པ་བཤགསཿ དབང་བསྐུར་ཟབ་མོ་ཐོབ་བྱས་ནསཿ བསྙེན་སྒྲུབ་ཕྱག་རྒྱ་གཡེལ་བ་བཤགསཿ དམ་ཚིག་གཅིག་པའི་སྤུན་གྲོགས་ལཿ གཤེ་སྐུར་ཁྲོས་དང་འཁོན་པ་བཤགསཿ སེམས་ཅན་ཕ་མའི་རང་བཞིན་ལཿ ངན་སེམས་གནོད་པ་བྱས་པ་བཤགསཿ སྔགས་ཀྱི་ལྟ་སྤྱོད་གསང་སྒྲོགས་དངཿ དམ་རྫས་སྤང་ལེན་བགྱིས་པ་བཤགསཿ བུད་མེད་ཤེས་རབ་རང་བཞིན་ལཿ བརྙས་དང་ལོག་ལྟ་བགྱིས་པ་བཤགསཿ སྣང་སྲིད་ལྷ་དང་ལྷ་མོ་ལཿ དགྲ་གཉེན་ཕྱོགས་རིས་ཕྱེ་བ་བཤགསཿ ལྟ་བ་སྒོམ་གྱི་ལ་མ་ཟློསཿ ཐ་མལ་འོག་འགྱུར་སོར་བ་བཤགསཿ སྤྱོད་པ་ཀུན་ཏུ་བཟང་པོ་ལཿ ཁ་ན་མ་ཐོ་འཕོག་པ་བཤགསཿ བྷྱོཿ ཁྱད་པར་མ་མོ་འཁྲུགས་པ་ལསཿ འཇིག་རྟེན་མི་བདེ་འབྱུང་བའི་རྒྱུཿ དགེ་འདུན་སྡེ་འཁྲུགས་ཧོར་ལས་བྱེདཿ ཁྱིམ་པ་སུན་འབྱིན་བཤས་ར་འགྲིམཿ སྔགས་པ་དམ་མེད་མཐུ་གཏད་བྱེདཿ བསྐྱེད་རྫོགས་གདེང་བྲལ་ཟོག་ཆོས་འཚོདཿ སྐྱེ་བོ་མནའ་ཟ་དུག་སྦྱོར་གཤོམཿ དགེ་འདུན་ཁྲིམས་ཉམས་ཕ་མ་བསླུཿ རྐུ་ཇག་རྔོན་པའི་ལས་ཀྱིས་འཚོཿ ཕན་ཚུན་འཐབ་ཅིང་མ་རབས་སྤྱོདཿ མིང་སྲིང་མནོལ་ཞིང་ནལ་བུ་གསོདཿ དེ་འདྲའི་ལས་ངན་ཤར་ཙ་ནཿ མཁའ་འགྲོ་གཡེལ་ཞིང་མ་མོ་འཁྲུགསཿ མ་གཡེལ་མ་གཡེལ་ཐུགས་རྗེས་དགོངསཿ ཚོགས་གཏོར་མདངས་ཀྱིས་ཐུགས་དམ་བསྐངཿ སེམས་ཅན་ཉོན་མོངས་རང་བཞིན་ལཿ དགོངས་ཏེ་ཚངས་པའི་དངོས་གྲུབ་སྩོལཿ མི་ཕྱུགས་ནད་རིམས་གོད་ཁ་སོགསཿ ཞི་ནས་འཇིག་རྟེན་བདེ་ལེགས་མཛོདཿ བྷྱོཿ ཡང་ཅིག་མ་མོ་འཁྲུགས་པའི་རྐྱེནཿ བྱི་ནལ་ལྷ་མོའི་སྲས་མཆོག་ལཿ ཁྲོས་དང་བརྔན་སྦྱིན་མ་བྱས་བཤགསཿ བོང་དྲིལ་ལྷ་མོའི་བཞོན་པ་ལཿ སྒྲོག་དང་རྡེག་བཙོག་བྱས་པ་བཤགསཿ ཤ་རྐྱང་ལྷ་མོའི་མཐུན་རྫས་ལཿ རྔོན་བྱས་ཀུ་ཅོས་དཀྲོགས་པ་བཤགསཿ བྱ་ནག་ལྷ་མོའི་ནོར་ཡིན་ཀྱངཿ བསྐྲད་དང་མངོན་སྤྱོད་བྱས་པ་བཤགསཿ ཕག་རྫི་ལྷ་མོའི་མཛའ་གཅུགས་ལཿ ངན་སྨྲས་གནོད་པ་བྱས་པ་བཤགསཿ རྨ་བྱ་ལྷ་མོའི་རྒྱན་ཡིན་ཀྱངཿ སྤྱུགས་དང་ཁྱོ་ཤུགས་དཔྲལ་བ་བཤགསཿ མགར་ཡུགས་ལྷ་མོའི་གྲིབ་ཡིན་ཀྱངཿ ཉེ་སར་བཀོལ་ཞིང་བརྟེན་པ་བཤགསཿ ཐབ་གཞོབ་ལྷ་མོའི་དུག་ཡིན་ཀྱངཿ དབང་མེད་མ་ཚོར་ཤོར་བ་བཤགསཿ མདོར་ན་དབྱིངས་ཀྱི་རྗེ་མོ་ཡིཿ ཐུགས་ལ་ཁྲོ་བ་མི་མངའ་ཡངཿ འཁོར་གྱི་མ་མོ་མཁའ་འགྲོའི་ཚོགསཿ སྐྱོན་མཐོང་ཙམ་ནས་ཆད་པ་གཅོདཿ དེ་ཕྱིར་འགལ་འཁྲུལ་ནོངས་པ་ཀུནཿ སྦེད་པར་མི་བགྱིད་འཆབ་མ་ལགསཿ བརྔན་གྱི་མཆོག་ཏུ་ཚོགས་གཏོར་དངཿ ཛ་གད་ཕུད་ཀྱིས་ཐུགས་དམ་བསྐངཿ མདངས་ཀྱི་མཆོག་ཏུ་མཆོག་ཕྲན་གྱིཿ ཤ་ཁྲག་དྲོད་དབུགས་སྐྱེ་མཆེད་འབུལཿ ལྷ་འདྲེ་ཡིད་ཀྱི་གཟུགས་ཅན་ལཿ ཞོ་ཤས་བརྟེན་པའི་ཤ་ཁྲག་དྲོདཿ རང་རྒྱུད་ཅན་དུ་མ་མཆིས་པསཿ ཤ་མེད་ཤ་ཡིས་ཐུགས་དམ་བསྐངཿ ཁྲག་མེད་ཁྲག་གིས་ཐུགས་དམ་བསྐངཿ དྲོད་མེད་དྲོད་ཀྱིས་ཐུགས་དམ་བསྐངཿ སྲོག་གི་རང་བཞིན་རླུང་ཡིན་ཏེཿ དབུགས་མེད་དབུགས་དང་སྲོག་མེད་སྲོགཿ དེ་ལས་བསྐྱེད་པའི་བཀྲག་མདངས་གྱིསཿ མ་མོ་མཁའ་འགྲོའི་ཐུགས་དམ་བསྐངཿ ཐུགས་དམ་གཉན་པོ་བསྐངས་གྱུར་ནསཿ ཉམས་ཆགས་འཁོན་འཛིན་དག་པ་དངཿ མ་མོ་མཁའ་འགྲོ་འཁྲུགས་པ་ཡིཿ རྒྱུ་རྐྱེན་འབྲས་བུ་སོར་ཆུད་ནསཿ མི་ཕྱུགས་དལ་ཡམས་ཞི་བ་དངཿ མུ་གེ་འཁྲུགས་རྩོད་མེད་པ་དངཿ སད་སེར་བཙའ་ཐན་ལས་རྒྱལ་ཏེཿ འཇིག་རྟེན་བདེ་བའི་ཕྲིན་ལས་མཛོདཿ རྗེས་ལ་མཆོད་གཏོར་གཙང་སར་གཤེགསཿ ཕན་པའི་ཡོན་ཏན་བརྗོད་མི་ལོངཿ ལག་ཏུ་བླངས་པས་ཡིད་ཆེས་འགྱུརཿ ས་མ་ཡཿ བརྡ་ཐིམཿ འདི་འབེབས་རན་པའི་རྟགས་སུ་རྨི་ལམ་ན་དཀར་ཐབ་ཤོར་བ་མཐོང་བ་ལ་འཁྲུགས་སྐོང་གི་གཏོར་དཔེ་བསྟན་པ་སོགས་བྱུང་བས་བརྡ་རང་གྲོལ་དུ་གྱུར་ཏོཿ ཿ