ཡུམ་ཀ་བདེ་ཆེན་རྒྱལ་མོ་ལསཿ དཔའ་བོ་དཔའ་མོའི་བསུན་བཟློགཿ

Previous Text Back to Volume Page Next Text

Wylie title	yum ka bde chen rgyal mo las: dpa' bo dpa' mo'i bsun bzlog:
Location	'jigs gling bka' 'bum Volume 10, Text 31, Pages 291-293 (Folios 1a1 to 2a2)
Author	འཇིགས་མེད་གླིང་པ་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jigs med gling pa. Yum ka bde chen rgyal mo las dpa' bo dpa' mo'i bsun bzlog. In Kun mkhyen rig 'dzin 'jigs med gling pa'i gsung 'bum, Vol. 10: 291-293. New Delhi: Shechen Publications, 2025.
Genre	Averting or Dispelling Rites- zlog pa
Cycle	ཡུམ་བཀའ་བདེ་ཆེན་རྒྱལ་མོ་ (yum bka' bde chen rgyal mo)
Parent Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)

[edit]

འུྃཿ ཡུམ་ཀ་བདེ་ཆེན་རྒྱལ་མོ་ལསཿ དཔའ་བོ་དཔའ་མོའི་བསུན་བཟློག་བཞུགསཿ འུྃཿ ཡེ་ཤེས་མཁའ་འགྲོའི་སྐུ་ལ་འདུདཿ ལས་ཅན་དཔའ་བོ་དཔའ་མོ་ལཿ མཁའ་འགྲོའི་བསུན་བཟློག་བྱ་འདོད་ནཿ གཏོར་ཚོགས་འདུ་བྱ་གཞུང་བསྲང་ལཿ བཟླས་མཆོད་ཚོགས་སྐོང་བགྱིས་པའི་མཐརཿ དར་ལམ་མཁའ་འགྲོའི་མཆོད་གཏོར་བཤམཿ དབྱིངས་རང་སྣང་རྣམ་དག་འོག་མིན་དངཿ ཞིང་དག་པ་མཁའ་སྤྱོད་སྤྲུལ་པའི་གནསཿ ཡུལ་ཉེར་བཞིའི་དཔའ་བོ་མཁའ་འགྲོ་རྣམསཿ དེང་ཚོགས་ཀྱི་འདུ་བར་གཤེགས་སུ་གསོལཿ ཡོངས་སྣང་སྲིད་མཆོད་སྤྲིན་རྒྱ་མཚོ་དངཿ ཚོགས་བདེ་སྟོང་དངོས་བཤམས་ཡིད་སྤྲུལ་རྫསཿ དབྱིངས་དག་མཉམ་ནམ་མཁའི་མཛོད་དུ་འབུལཿ མ་མཁའ་འགྲོའི་དམ་ཚིག་ཉམས་ཆག་བསྐངཿ བདག་སྒྲུབ་མཆོག་བུ་ལ་དངོས་གྲུབ་སྩོལཿ དབྱིངས་སྲ་བའི་རང་བཞིན་སངས་རྒྱས་སྤྱནཿ ཤར་རྡོ་རྗེ་རིགས་ཀྱི་མཁའ་འགྲོ་འབུམཿ ཡོངས་ཞི་བའི་མཆོད་གཏོར་འདི་བཞེས་ལཿ ཤར་དར་ལམ་དཀར་པོའི་བསུན་མ་ཟློགཿ མེ་ལོང་ཡེ་ཤེས་ངང་དུ་བཞུགསཿ དབྱིངས་མཉེན་པའི་རང་བཞིན་མཱ་མ་ཀཱིཿ ལྷོ་རིན་ཆེན་རིགས་ཀྱི་མཁའ་འགྲོ་འབུམཿ ཡོངས་རྒྱས་པའི་མཆོད་གཏོར་འདི་བཞེས་ལཿ ལྷོ་དར་ལམ་སེར་པོའི་བསུན་མ་ཟློགཿ མཉམ་ཉིད་ཡེ་ཤེས་ངང་དུ་བཞུགསཿ དབྱིངས་དྲོ་བའི་རང་བཞིན་གོས་དཀར་མོཿ ནུབ་པདྨ་རིགས་ཀྱི་མཁའ་འགྲོ་འབུམཿ ཡོངས་དབང་གི་མཆོད་གཏོར་འདི་བཞེས་ལཿ ནུབ་དར་ལམ་དམར་པོའི་བསུན་མ་ཟློགཿ སོར་རྟོག་ཡེ་ཤེས་ངང་དུ་བཞུགསཿ དབྱིངས་གཡོ་བའི་རང་བཞིན་དམ་ཚིག་སྒྲོལཿ བྱང་ལས་ཀྱི་རིགས་ཀྱི་མཁའ་འགྲོ་འབུམཿ ཡོངས་དྲག་པོའི་མཆོད་གཏོར་འདི་བཞེས་ལཿ བྱང་དར་ལམ་ལྗང་གུའི་བསུན་མ་ཟློགཿ བྱ་གྲུབ་ཡེ་ཤེས་ངང་དུ་བཞུགསཿ དབྱིངས་ནམ་མཁའི་རང་བཞིན་དབྱིངས་ཕྱུག་མཿ དབུས་སངས་རྒྱས་རིགས་ཀྱི་མཁའ་འགྲོ་འབུམཿ ཡོངས་མཆོག་གི་མཆོད་གཏོར་འདི་བཞེས་ལཿ དབུས་དར་ལམ་མཐིང་ཀའི་བསུན་མ་ཟློགཿ ཆོས་དབྱིངས་ཡེ་ཤེས་ངང་དུ་བཞུགསཿ ཉི་ཤུ་རྩ་བཞིའི་གནས་མཆོག་དངཿ འབུམ་ཕྲག་ཡངས་པའི་མཁའ་འགྲོའི་ཚོགསཿ གླུད་གཏོར་བཟང་པོ་འདི་བཞེས་ལཿ འདིར་བཞུགས་དམ་པའི་སྐྱེས་བུ་ཡིཿ ཚེ་འཕྲང་བར་གཅོད་དབྱིངས་སུ་སོལཿ བླ་དང་སྲོག་གི་ཀ་བ་ཚུགསཿ རྩ་ཐིག་རླུང་གི་རྒུད་པ་སོལཿ ཚེ་འགྱུར་བ་མེད་པ་རྡོ་རྗེའི་ཁྲིརཿ སྲོག་གཞོམ་གཞིག་བྲལ་བ་གཡུང་དྲུང་ལུསཿ བླ་གཟི་འོད་འབར་བ་ཉི་ཟླ་བཞིནཿ དུས་འཕོ་འགྱུར་མེད་པར་རྟག་བརྟན་གསོལཿ ཅེས་བརྗོད་གཏོར་གླུད་ཕྱོགས་ཕྱོགས་གཤེགསཿ མཁའ་འགྲོའི་བསུན་མ་བཟློག་པར་འགྱུརཿ ས་མ་ཡཿ རྒྱ་རྒྱ་རྒྱཿ