དྲིས་ལན་རིན་པོ་ཆེའི་བསྟན་བཅོས། ལུང་གི་གཏེར་མཛོད།

First text in volume. Back to Volume Page Next Text

Wylie title	dris lan rin po che'i bstan bcos/ lung gi gter mdzod/
Location	'jigs gling bka' 'bum Volume 6, Text 1, Pages 1-600 (Folios 1a1 to 300b5)
Author	འཇིགས་མེད་གླིང་པ་
Less details More details
Citation	'jigs med gling pa. Dris lan rin po che'i bstan bcos lung gi gter mdzod. In Kun mkhyen rig 'dzin 'jigs med gling pa'i gsung 'bum, Vol. 6: 1-600. New Delhi: Shechen Publications, 2025.
Genre	Replies to Questions - dris lan

[edit]

༄༅། །དྲིས་ལན་རིན་པོ་ཆེའི་བསྟན་བཅོས། ལུང་གི་གཏེར་མཛོད་ཅེས་བྱ་བ་བཞུགས།

༄༅། །རྒྱ་གར་སྐད་དུ། སུཙྪ་པ་རེ་ཧ་ར་རཏྣ་སྱ་ཨཱ་ག་མཿནི་དྷི་ཀོ་ཥ་ནཱ་མ། བོད་སྐད་དུ། དྲིས་ལན་རིན་པོ་ཆེའི་བསྟན་བཅོས་ལུང་གི་གཏེར་མཛོད་ཅེས་བྱ་བ། ཐམས་ཅད་མཁྱེན་པ་ལ་ཕྱག་འཚལ་ལོ། །གཞི་དབྱིངས་་་ཕྱག་བྱ་བའི་སྒོ་དང་པོ་ཡོན་ཏན་རང་བཞིན་བརྗོད་པ་ལ་མཚུངས་པའི་རབ་སྤེལ་གྱིས་སྤུད་པ། རྣམ་དག་ཆུ་གཏེར་ཆེན་པོར་སྐྱོན་བྲལ་ཆུ་སྐྱེས་ཁང་བཟང་དབུས། །བདེ་གཤེགས་ཀུན་གྱིས་སྨོན་ལམ་རྩལ་རྫོགས་རང་བྱུང་ལྷུན་གྲུབ་ནིརྨཱ་ཀ །སྲིད་ཞིའི་མཐའ་ལ་སྐྱེངས་པ་སྟེར་བྱེད་དྭངས་མ་མི་ཤིགས་རྡོ་རྗེའི་སྐུ། །འོད་དཔག་མེད་དངོས་དུས་གསུམ་ཀུན་མཁྱེན་པདྨ་འབྱུང་ལ་ཕྱག་བགྱི་འོ། ༡ །གང་ཞིག་སྐྱེ་དང་གནས་དང་འཇིག་ལས་རྣམ་གྲོལ་རྡོ་རྗེའི་ཆོས་བདུན་ལྡན་པའི་སྐུ་ནི་སྤྲོས་པ་་་ཕྱག་བྱ་བའི་སྒོ་གཉིས་པ་ཁྱད་པར་ཕུལ་བྱུང་གི་རྒྱན།་་་ཀུན་གྱིས་རྣམ་པར་དབེན། །གང་གསུང་སྒྲ་དང་བྲག་ཅའི་དངོས་པོས་ཡོངས་བཏང་གདུལ་བྱའི་བློ་དང་འཚམ་པ་ཉིད་དུ་སོ་སོར་ཐོས་པའི་བདག་ཉིད་ཅན། །གང་ཐུགས་ཟབ་ཞི་སྤྲོས་བྲལ་རྟོག་པའི་ཡུལ་ལས་རིང་པོར་བརྒལ་ཡང་སོ་སོ་ཡང་དག་རིག་པའི་རྩལ་གྱིས་རང་བྱུང་དུ། །མཁྱེན་པའི་ཡེ་ཤེས་བརྩེ་བའི་ཐུགས་རྗེས་སྡུག་བསྔལ་རྒྱུར་བཅས་འཇོམས་པའི་ནུས་པ་རྨད་བྱུང་རྒྱལ་ཀུན་མཆོད་དོ་དགེ་ལེགས་སྩོལ། ༢ །རྗོད་བྱེད་མིང་ཚིག་ཕྱག་བྱ་བའི་སྒོ་གསུམ་པ་བྱ་བའི་རང་བཞིན་བརྗོད་པའི་རྒྱན། ཡི་གེའི་གཟུགས་སུ་ཤར་དེའི་བཞིན་རས་འཇམ་པོའི་ངོགས། །བརྗོད་བྱ་དོན་གྱི་ཨུཏྤལ་མིག་གིས་ཐམས་ཅད་མཁྱེན་པའི་ཡེ་ཤེས་མཐོང་། །སྲིད་པའི་ཟུག་རྔུ་བླང་དོར་མཚོན་གྱིས་གཅོད་ལ་དཔའ་བའི་ངང་ཚུལ་དང་། །ཆགས་བྲལ་འགོག་ལམ་བདེན་པའི་མཐུ་ཅན་དམ་པའི་ཆོས་ཀྱིས་ཡོངས་སུ་སྲུངས། ༣ །ཐོས་བསམ་སྒོམ་པའི་འདབ་གཤོག་མཉེན་་་ཕྱག་བྱ་བའི་སྒོ་བཞི་པ་མཐའ་དག་གཟུགས་ཅན། ལྕུག་འཁྲིལ་དེའི་རྩལ་ཆེན་རྫོགས་པ་ལས། །ཇི་ལྟ་བ་དང་ཇི་སྙེད་མཁའ་ལ་ཆགས་ཐོགས་མེད་པར་འཕུར་བའི་དཔྱིད། །ཐེག་པ་མཐའ་དག་དབྱངས་སུ་ལེན་མཁས་ངང་པ་ཁྱུ་ཆེན་འགྲོགས་པ་ལྟའི། །རྒྱལ་བའི་གདུང་འཛིན་འཕགས་པའི་ཚོགས་དང་ཉན་རང་དགེ་འདུན་སྤྱི་བོས་མཆོད། ༤ །སྟོན་པ་རང་ཉིད་སྙིགས་་་ཕྱག་བྱ་བའི་སྒོ་ལྔ་པ་འགོག་རྒྱན་ལས་བྱུང་བ་འགོག་པ།་ མའི་དུས་ན་གསང་བ་ཆེན་པོའི་རྒྱུད་དང་སྡེ་སྣོད་འཛིན་པའི་ཚུལ། །ལུང་གི་ཕྲེང་བ་མང་པོར་བསྔགས་པ་དགོངས་པ་ཙམ་མམ་འོན་ཏེ་ངེས་པའི་དོན་མིན་ན། །འཛམ་བུའི་གླིང་འདི་མཛེས་པར་བྱེད་པའི་རྒྱན་དྲུག་མཆོག་གཉིས་ལ་སོགས་པཎ་གྲུབ་རྒྱ་མཚོ་ཡི། །བཀའ་ལུང་མཐའ་ཡས་རང་དབང་འགྲེལ་པའི་རྣམ་དཔྱོད་འདི་འདྲ་འགའ་ལ་སྲིད་པ་མིན་པས་སོ། ༥ །ས་གནས་ཕྱག་བྱ་བའི་སྒོ་དྲུག་པ་ཡན་ལག་གསུམ་པའི་གཟུགས་ཅན་ལ་བསྙོན་དོར་གྱིས་བརྒྱན་པ། སེམས་དཔའ་ཁྱིམ་པའི་ཚུལ་བཟུང་བསྟན་དང་སེམས་ཅན་དོན་བྱེད་གསུངས་པ་ལྟར། །ལྡོངས་འདིའི་ཕན་བདེའི་རྩ་ལག་ཆོས་ཀྱི་རྒྱལ་པོ་མེས་དབོན་རྣམ་གསུམ་དེ་དག་གི། །རྣམ་དཀར་ཕྲིན་ལས་གལ་ཏེ་གཟུགས་སུ་མཆིས་ན་ནོར་འཛིན་བུ་མོ་གཞོན་ནུ་ཡང་། །ཐེག་པར་དཀའ་བའི་དོགས་པས་སྐྲག་ནས་རིང་མོར་འདར་ཞེས་སྲིད་པའི་རྩེ་མོར་གླེང་། ༦ །རྣམ་པར་སྣང་མཛད་་་ཕྱག་བྱ་བའི་སྒོ་བདུན་པ་སྟོབས་མཚུངས་པའི་རབ་སྤེལ། གང་ཆེན་མཚོ་དེའི་ཐུགས་བསྐྱེད་ཁམས། །གངས་རིས་བསྐོར་བའི་གསེར་ལྡན་དགའ་མའི་བཞིན་རས་ལ། །བསྐུ་ཕྱིར་འདི་ན་ས་བཅུའི་དབང་ཕྱུག་བི་མ་ལ། །པཎ་གྲུབ་ཟོལ་གྱིས་སྙིང་ཏིག་དགའ་སྟོན་འགྱེད་དེ་མཚར། ༧ །ཕྲལ་སྐད་ཤེས་པའི་ལོ་ཙཱ་མ་་་ཕྱག་བྱ་བའི་སྒོ་བརྒྱད་པ་སེམས་ལྡན་རབ་རྟོག་་་ཡིན་འཕགས་ཡུལ་སྐད་རིགས་རྣམ་པ་བཞི། །དེས་ཀྱང་མི་མཚོན་གསང་བའི་བརྡ་སྐད་རྒྱ་མཚོ་ལྟ་བུར་དབང་བསྒྱུར་ནས། །གཙུག་ལག་མདོ་རྒྱུད་ཉི་ཟླའི་སྣང་བས་པུར་རྒྱལ་མུན་གླིང་གསལ་མཛད་པའི། །འཇིག་རྟེན་མིག་གཅིག་བཻ་རོའི་ཞབས་དང་རྨ་གཉགས་ལ་སོགས་པཎ་གྲུབ་རྗེ་འབངས་རྒྱ་མཚོར་དད། ༨ །ཐོས་བསམ་སྒོམ་པའི་ཕྱག་བྱ་བའི་སྒོ་དགུ་པ་ཤིན་ཏུ་དཔའ་བའི་ཉམས།་་་ཀཻ་ལ་ཤ་རིར་གནས་བཅས་ཏེ། །འཆད་རྩོད་རྩོམ་པའི་གཡུ་རལ་ལན་བུ་གཡོས་པའི་ཚེ། །ལོག་རྟོག་ཕྱོགས་འཛིན་རྨོངས་པའི་རི་དྭགས་སྙིང་འདར་བ། །གདོད་མའི་མགོན་པོ་ཀློང་ཆེན་རབ་འབྱམས་བསམ་བཞིན་དྲན། ༩ །ཤིན་་་ཕྱག་བྱ་བའི་སྒོ་བཅུ་པ་སྒྲུབ་བྱེད་ཀྱི་འགྲུབ་པའི་རྒྱུ།་་་ཏུ་རྨད་བྱུང་ཐུགས་བསྐྱེད་ཟླ་ཟེར་ཀུནྡའི་ཚལ་དུ་ལྷུངས་པ་ལས། །མཐོང་ན་མི་མཐུན་མེད་པའི་སྐུ་ལ་རྒྱུད་སྡེ་རྒྱ་མཚོའི་གསང་མཛོད་རྫོགས། །བརྒྱུད་པའི་ཁྱད་ཆོས་དྲུག་གིས་འཕགས་པའི་ཟབ་རྒྱ་གཏེར་གྱི་རིང་ལུགས་སྒོ། །འབྱེད་ལ་ཟླ་བྲལ་ཉི་མ་འོད་སོགས་བཅུ་ཕྲག་བཅུ་ཡི་འཁོར་ལོར་འདུད། ༡༠ །ངེས་པ་ལྔ་ལྡན་ལོངས་སྐུའི་་་ཕྱག་བྱ་བའི་སྒོ་བཅུ་གཅིག་པ་སྣ་ཚོགས་གཟུགས་ཅན།་་་ཞིང་ཁམས་ཆེན་པོའི་དཔྱིད། །མིག་མི་འཛུམ་དེ་སྡོམ་བརྩོན་རྒྱལ་པོའི་ཆ་བྱད་ཅན། །འོད་གསལ་ངང་ནས་གནས་ལྔ་སྨྲ་བའི་པཎྜི་ཏ། །པདྨའི་ངང་ཚུལ་ཟིལ་གནོན་དྲག་རྩལ་རྡོ་རྗེར་འདུད། ༡༡ །ཕྱོགས་་་ཕྱག་བྱ་བའི་སྒོ་བཅུ་གཉིས་པ་བསམ་པ་རྒྱ་ཆེ་བའི་རྒྱན་གྱིས་བརྩམ་པར་དམ་བཅའ་བ།་་་རེའི་མིག་གིས་གསུང་རབ་རྒྱ་མཚོའི་མཐའ། །མཐོང་བ་མ་ཡིན་དེ་ལ་ཀུན་མཁྱེན་གྱི། །འབྲས་བུ་བྲལ་བ་ཤེས་ནས་དེ་རིང་འདིར། །ཟབ་དང་རྒྱ་ཆེའི་དོན་འགའ་གསལ་བར་བྱ། ༡༢ །དེ་ལ་འདིར་བརྗོད་པར་བྱ་བའི་སྙིང་པོ་ནི། སྔ་རབས་ཀྱི་དུས་ན་བྱོན་པའི་གཏེར་སྟོན་རིག་འཛིན་རཏྣ་གླིང་པ་ཞེས་ཡོངས་སུ་གྲགས་ལ་རྩོད་པ་དང་བྲལ་བའི་སྐྱེས་བུ་དམ་པ་དེས། འཁོར་འདས་ལམ་གསུམ་གྱིས་བསྡུས་པའི་ཆོས་མཐའ་དག་དྲི་གཞིར་བཀོད་པའི་འབྱམས་ཡིག་རྣམ་པར་རྒྱལ་བའི་ཁང་བཟང་ཞེས་བྱ་བའི་ཕོ་ཉས་བསྐུལ་ནས་བརྗོད་འདོད་རླུང་གི་རྟེན་འབྲེལ་བསྐྱོད་པ་ལ་བརྟེན། མཉམ་གཞག་སྤྲོས་པ་དང་བྲལ་བའི་གསེར་ལྡན་གྱི་གཞི་ཐ་གྲུ་ཀུན་ནས་ཡངས་པར། རྗེས་ཐོབ་ཤེས་རབ་ཀྱིས་རོལ་པ་རྣམ་པར་གཡོ་བས་དྲིས་ལན་གྱི་བསྟན་བཅོས་རིན་པོ་ཆེའི་མཆོད་སྡོང་ལུང་གི་གཏེར་མཛོད་ཅེས་བྱ་བ་བཞེང་པ་ལ་མངོན་དུ་ཕྱོགས་པ་འདི་ལ་སྤྱི་དོན་རྣམ་པ་གསུམ། གཞུང་བཤད་པ་ལ་འཇུག་པའི་སྒོ་བསྟན་པ། གཞུང་གི་དངོས་དོན་མཐའ་རྒྱ་རླབས་ཀྱིས་བཅད་ནས་བཤད་པ། མཇུག་ཐུན་མོང་མ་ཡིན་པའི་གྲུབ་མཐའ་གསང་བར་གདམས་ཤིང་བསྔོ་སྨོན་གྱིས་མཐའ་བསྡུ་བའོ། །དང་པོ་དྲི་བ་པོའི་འདོད་པ་བཀོད་དེ་བསྟན་བཅོས་ཀྱི་མཚན་ཉིད་བཤད་ནས་འཇུག་པའི་སྒོ་དབྱེ་བ་ནི་དྲི་བ་པོས། ཨོཾ་སྭསྟི། མ་ཧཱ་གུ་རུ་དྷརྨ་ཀ་ར་ཡེ། ཕྱོགས་མཐའ་དག་གི་བླ་མ་དགེ་བའི་བཤེས་གཉེན་རྟོགས་སྒོམ་དང་གཞུང་ལུགས་འཆད་རྩོད་རྩོམ་པ་ལ་སོགས་ཆོས་ཀྱི་མིག་མ་ཟུམ་པ། ལྟ་ལོག་ཕྱོགས་འཛིན་ཅན་མ་ཡིན་པའི་ཚད་མར་གྱུར་པ་ཐམས་ཅད་ལ་དྲི་བའི་ཚིག་རྣམ་པར་རྒྱལ་བའི་ཁང་བཟང་ཞེས་བྱ་བ། སྨྲ་བའི་སེང་གེ་དབྱངས་ཀྱི་ལྷ་མོར་བཅས་ལ་ཕྱག་འཚལ་ལོ། །དེ་བཞིན་བདག་བློའི་ནོར་བུ་ནི། །རྣམ་པར་མཐོ་བའི་རྒྱལ་མཚན་རྩེར། །བརྩེ་དང་ཐུགས་རྗེ་མངོན་བསྐྱེད་པའི། །རང་བྱུང་མཆོག་གི་བླ་མ་ནི། །མཚོ་སྐྱེས་རྡོ་རྗེ་དེ་ལ་འདུད། །ཐུབ་དབང་སྟོབས་སོགས་མངའ་བ་ཡི། །བསྟན་པའི་མཐར་ཉེ་འབྲས་བུའི་དུས། །རིན་ཆེན་དཔལ་བཟང་ཞེས་བྱ་ཡང་། །དབང་དམན་ཡོན་ཏན་སྟོབས་ཆུང་ཡང་། །རྙེད་དཀའ་ཐོབ་ཅིང་བསྟན་ལ་ཞུགས། །ཆོས་དང་དམ་པའི་བཤེས་རྣམས་ལ། །མི་ཕྱེད་དད་པས་རབ་ཏུ་དགའ། །འོན་ཀྱང་དྲེགས་དང་སྟོབས་ལྡན་ཞིང་། །མཁས་པར་རློམ་ཞིང་མི་ཤེས་པའི། །ཚིག་དང་ཐ་སྙད་ལ་ཞེན་ཅིང་། །ངེས་པའི་དོན་ལ་རློམ་པ་ཡི། །ཀུན་ཤེས་གཅིག་རྡུགས་རིགས་ཅན་དང་། །ཕྱོགས་རིས་ཅན་ལ་བདག་མི་དགའ། །དེ་བས་དམ་པའི་རིགས་ཅན་རྣམས། །ཇི་ལྟར་དྲིས་པ་འདི་ཡི་ལན་འདེབས་མཛོད། །ཅེས་སོ། །དེ་ལ་འདི་ལྟར་ཤེས་པར་བྱ་སྟེ། སངས་རྒྱས་ཀྱི་བསྟན་པ་རིན་པོ་ཆེ་ལ་བྱ་བ་བྱེད་པའི་ནུས་པ་དང་ལྡན་ལ། དཔག་ཏུ་མེད་པའི་སེམས་ཅན་དག་གི་ལམ་གྱི་སྟོན་པར་གྱུར་པ་དེ་ལ་བླ་མ་དང་དགེ་བའི་བཤེས་གཉེན་གྱི་མིང་དུ་གྲུབ་ཅིང་། དེའི་ངང་ཚུལ་ནི་ཐོས་པས་ཆོས་དང་ཆོས་མ་ཡིན་པ་ཤན་ཕྱེད་ཅིང་སྒྲོ་འདོགས་ཆོད་པ་དང་། བསམས་པས་ཇི་སྙེད་པའི་ཤེས་བྱ་མཐའ་དག་ལ་དབང་བསྒྱུར་ཞིང་ཆོས་ཀྱི་མིག་ཐོབ་པ་དང་། སྒོམ་པས་ཇི་ལྟ་བའི་ཡིན་ཚུལ་གཤིས་ཐོག་ཏུ་ཕེབས་ཤིང་འབྲས་བུ་ཡེ་ཤེས་ཀྱི་དབྱིངས་ལ་སྦྱོར་བའི་ཕྱིར་རྣམ་པ་དེ་གསུམ་དང་ལྡན་པ་ཞིག་གོ །ཁྱད་པར་བསྟན་བཅོས་བརྩམ་པ་ལ་མཚན་ཉིད་རྣམ་པ་དུ་མ་དང་མ་ལྡན་ན་ཚིག་གི་སྦྱོར་བ་ཤེས་པ་ཙམ་ནི་གཟུ་ལུམས་རས་ཆོད་མུན་སྤྲུལ་བརྟུན་ངེས་ཀྱི་བདག་པོ་སྟེ་བསྟན་པའི་ཆོམ་རྐུན་ཉིད་ལས་གཞན་དུ་མ་ཡིན་ལ། དེའི་ཕྱིར་རྩོམ་བྱེད་སློབ་དཔོན་གྱི་མཚན་ཉིད་ནི། རབ་ཆོས་ཉིད་ཀྱི་བདེན་པ་གཟིགས་པས་བཀའ་ལུང་རང་དབང་དུ་འགྲེལ་བའི་ནུས་པ་ཅན་རྒྱ་གར་གྱི་རྒྱན་དྲུག་མཆོག་གཉིས་དང་། བོད་ཀྱི་དཔལ་ལྡན་བསམ་ཡས་པ་ཀུན་མཁྱེན་ངག་གི་དབང་པོ་ལྟ་བུ། འབྲིང་ཡི་དམ་ལྷའི་ཞལ་མཐོང་ཞིང་དེས་དབུགས་དབྱུང་བས་མཐའ་དྲུག་དང་ཚུལ་བཞིའི་གནད་གསང་ཆེན་པོས་དཀྲུགས་པ་བསྡེབས། གཅུས་པ་བསྲངས། གབ་པ་མངོན་དུ་ཕྱུང་ནས་འཆད་ནུས་པ། ཐ་མ་ནི། སྒྲ། ཚད་མ། བཟོ། གསོ་བ། ནང་གི་རིག་པ་སྟེ། རིག་པའི་གནས་ལྔ་ལ་མ་རྨོངས་ཤིང་གང་བཤད་བྱའི་དོན་ལ་ཁྱད་པར་གྱི་བཤད་རྒྱུན་རྣམ་པར་དག་པ་དང་ལྡན་ལ། ཚིག་གིས་དོན་བཤད་ཚུལ་ཇི་བཞིན་དུ་འགྲེལ་པར་ནུས་པའི་བདག་ཉིད་ཅན་ཞིག་གོ །བརྩམ་བྱ་བསྟན་བཅོས་ཀྱི་རང་བཞིན་ནི། མགོན་པོ་བྱམས་པས། ཉོན་མོངས་དགྲ་རྣམས་མ་ལུས་འཆོས་པ་དང་། །ངན་འགྲོའི་སྲིད་ལས་སྐྱོབ་པ་གང་ཡིན་པ། །འཆོས་སྐྱོབ་ཡོན་ཏན་ཕྱིར་ན་བསྟན་བཅོས་ཏེ། །གཉིས་པོ་འདི་དག་གཞན་གྱི་ལུགས་ལ་མེད། །ཅེས་གསུངས་པ་ལྟར་མཚན་ཉིད་དེ་ལྡན་གྱི་དགོངས་འགྲེལ་ལ་ཉོན་མོངས་པའི་དགྲ་རྣམས་འཆོས་པ་དང་། ངན་འགྲོའི་སྲིད་ལས་སྐྱོབ་པ་སྟེ་འཆོས་སྐྱོབ་ཀྱི་ཡོན་ཏན་རྣམ་པ་གཉིས་དང་ལྡན་པ་གཞིར་བཞག་ནས་འགྲེལ་ཚུལ་གྱི་མན་ངག་ནི་རྣམ་བཤད་རིག་པར། དགོས་པ་བསྡུས་པའི་དོན་བཅས་དང་། །བརྒལ་ལན་བཅས་དང་མཚམས་སྦྱོར་བཅས། །ཚིག་དོན་བཅས་ཏེ་བསྙད་པར་བྱ། །ཞེས་བཤད་པ་ལྟར་དགོས་པ་དང་དོན་བསྡུས། མངོན་པའི་ང་རྒྱལ་གྱིས་ཆོས་ལ་ཆོས་སུ་འདུ་མི་ཤེས་པའི་ཉེས་སྐྱོན་མ་ཡིན་པའི་ངོས་བརྒལ་ལན་གྱི་འབྲེལ་འགོད། ལུང་གི་རྒྱབ་སྐྱོར། ཚིག་དོན་གཏན་ལ་ཕབས་ནས་འཆད་པ་འདི་ནི་ཤིན་ཏུ་འཕགས་པའི་ཡན་ལག་ལྔ་ཡིན་ལ། དེ་བཞིན་དུ་བསྟན་བཅོས་ཀྱི་ལུས་ཉིད་ཀྱང་ནང་པའི་ཚུལ་གསུམ་དང་ལྡན་ཞིང་། ཕྱི་རོལ་པའི་ངན་པ་དྲུག་དང་བྲལ་བས་དགོས་འབྲེལ་གཉིས་ཀྱི་ཆོས་དང་ལྡན་པ་དེ་ནི་རྣམ་པར་གྲོལ་བའི་ལམ་ཡིན་པའི་ཕྱིར་རྣམ་པ་གསུམ་གྱིས་དབྱེ་བས་བཀར་བཞག་པ་ཡིན་ནོ། །དེའི་ཕྱིར་རྟོགས་པས་འཁོར་འདས་ཀུན་གྱི་མཚང་རིག་ཅིང་ཀུན་བཟང་དགོངས་པའི་རྒྱལ་ཐབས་ཀྱི་ཁྲི་ལ་འཛེགས་པ། གཞུང་ལུགས་གདམས་པར་ཤར་བས་འཆད་རྩོད་རྩོམ་པའི་གནས་ལ་མི་འཇིགས་པའི་བརྟུལ་ཞུགས་ཅན། ཆོས་ཀྱི་མིག་མ་ཟུམ་པས་ལྟ་ལོག་ཕྱོགས་འཛིན་གྱི་གཟེབ་ལས་གྲོལ་བའི་ཀུན་གཟིགས་ནམ་མཁའི་རྣལ་འབྱོར་པ་དེས་སོ། །མོས་པ་ཞན་ཅིང་བློ་ཆུང་བ་གང་ཞིག་གིས་ལོག་པར་རྟོག་པར་མི་བྱ་སྟེ། མཛད་པ་པོ་སློབ་དཔོན་གྱི་ཆེ་བ་བརྗོད་པ་ལ་འཐད་པ་རྣམ་དག་ཡོད་དེ། མགོན་པོ་ཀླུ་སྒྲུབ་ཀྱིས། འདི་ལྟར་ཆོས་རྣམས་ཐམས་ཅད་ཀྱི། །རྩ་བ་མོས་པ་ལགས་པར་གསུངས། །ཞེས་དང་། ཀུན་མཁྱེན་གྱིས། སློབ་དཔོན་དང་ཆོས་ཀྱི་ཆེ་བ་བརྗོད་པས། ཉན་པ་པོ་དང་རྗེས་འཇུག་རྣམས་བླ་མ་དང་ཆོས་ལ་དད་མོས་སྐྱེ། དེའི་བྱིན་རླབས་ཞུགས་ནས་ཐར་པའི་ལམ་དང་ཆོས་ལ་འཇུག་པའི་རྒྱུ་བྱེད་དེ། རྒྱ་ཆེར་རོལ་པ་ལས། དེ་ལ་དད་པ་ནི་ཆོས་སྣང་བའི་སྒོ་སྟེ་སེམས་ལས་སུ་རུང་བར་བྱེད་དོ། །ཞེས་ལུང་གིས་རྒྱབ་སྐྱོར་དང་བཅས་བསྟན་ཅིང་རང་གི་བསྟན་བཅོས་ཀྱང་ཚུལ་དེ་ལྟ་བུས་འཆད་པའི་ཕྱིར་ཁོ་བོ་ཅག་དེས་དངོས་སུ་བྱིན་གྱིས་བརླབས་ཤིང་དབུགས་དབྱུང་བའི་སློབ་མ་ཡིན་པའི་ཕྱིར་རོ། །ལུང་གང་ལས་བཏུས་ན། རྒྱུ་འབྲས་ཀྱི་ཐེག་པ་མཐའ་ཡས་པ་ནས་བཏུས་ཤིང་འགྲེལ་ཚུལ་ཀུན་མཁྱེན་ཉིད་ཀྱི་བཞེད་པ་སོར་བཞག་པའོ། །ཕྱོགས་གང་དུ་གཏོགས་ན། ཐེག་པའི་རྩེ་མོ་རང་བཞིན་རྫོགས་པ་ཆེན་པོར་གཏོགས་སོ། །དོན་གང་གི་ཆེད་དུ་ན། གནས་སྐབས་སུ་དྲིས་ཤིང་སྐུལ་བ་པོའི་མཛད་པ་དོན་ཡོད་པར་བྱ་བ་དང་། མཐར་ཐུག་གང་ཟག་མང་པོས་ལམ་གྱི་གནད་རྟོགས་ཤིང་སངས་རྒྱས་ཐོབ་པའི་ཕྱིར་དུའོ། །དབུ་ནས་ཞབས་སུ་བསྡུས་པའི་དོན་ནི། གཞི་ལམ་འབྲས་གསུམ་དང་། ལྟ་སྒོམ་སྤྱོད་གསུམ་གྱི་རང་བཞིན་གལ་པོ་ཆེ་མཐའ་ཡས་པའི་མདུད་ཐམས་ཅད་ཡིན་ཚུལ་དོན་གྱི་ལུགས་སུ་བཀྲོལ་ཞིང་། གནས་ཚུལ་གཤིས་ཀྱི་ཐོག་ཏུ་བསྡུས་ནས་སྟོན་པ་སྟེ་འདི་དག་ལ་བསྟན་བཅོས་ཀྱི་རྩིས་མགོ་ཡན་ལག་ལྔ་ཞེས་གྲགས་སོ། །གཉིས་པ་ལ་གཉིས། གླེང་བའི་གཞི་བསྟན་པའི་རྣམ་གཞག་སྤྱིར་བཤད་པ་དང་། བརྒལ་བའི་དོན་བྱེ་བྲག་ཏུ་བཤད་པའོ། །དང་པོ་ལ་གསུམ། རྒྱུ་མཚན་ཉིད་ཀྱི་ཐེག་པ། འབྲས་བུ་གསང་སྔགས་ཀྱི་ཐེག་པ། དེ་དག་ལྗོངས་འདིར་དར་ཚུལ་ལོ། །དང་པོ་ལའང་གསུམ། སྟོན་པ་འཇིག་རྟེན་དུ་བྱོན་ཚུལ། དེས་མཛད་པ་བཅུ་གཉིས་ཀྱི་མལ་དུ་བསྟན་པ་རིན་པོ་ཆེའི་སྒྲོམ་ཆོས་ཀྱི་འཁོར་ལོ་ཇི་ལྟར་བསྐོར་བ། དེ་ཉིད་བསྟན་སྐྱོང་ཆེན་པོ་རྣམས་ཀྱིས་བཀའི་བསྡུ་བ་ཇི་ལྟར་བྱས་ཤིང་གཅེས་སྤྲས་ཀྱིས་བསྐྱངས་པའི་ཚུལ་ལས། དང་པོ་ནི། ཞིང་ཁམས་གྲུབ་པའང་སངས་རྒྱས་ཀྱིས་སྨོན་ལམ་དང་སེམས་ཅན་གྱི་ལས་ཉིད་དུ་ཟད་པ་ལས། འདི་ནི་དེ་བཞིན་གཤེགས་པའི་སྨོན་ལམ་གྱིས་སྟོབས་ཁོ་ན་སྟེ། དེའི་ཕྱིར་ན་སངས་རྒྱས་བྱོན་པ་ལ་སྒྲོན་བསྐལ་དང་། དེས་སྟོང་པ་ལ་མུན་བསྐལ་དུ་འཆད་པའི་ད་ལྟའི་བསྐལ་པ་བཟང་པོ་འདི་ལ་ཡོངས་སུ་གྲགས་པ་སངས་རྒྱས་སྟོང་རྩ་གཉིས་དང་། སྙིང་རྗེ་པད་དཀར་སོགས་ཀྱི་རྗེས་སུ་འབྲང་བ་དག་རྩ་བཞི་ནས་རྩ་དྲུག་གི་བར་དུ་འཆད་པའི་དངོས་དོན་སངས་རྒྱས་སྟོང་རྩ་ནི། ཐེག་པ་ཆེན་པོའི་མདོ་སྡེ་དཀོན་ཅོག་བརྩེགས་པ་ལས། བསྐལ་པ་མཛེས་པར་སྣང་བར་འཇིག་རྟེན་གྱི་ཁམས་རྣམ་པར་རྒྱན་པ་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་བའི་དུས། རྒྱལ་པོའི་ཕོ་བྲང་རྣམ་པར་དག་པ་ཅན་ཞེས་བྱ་བ་དེར་འཁོར་ལོས་སྒྱུར་བའི་རྒྱལ་པོ་ཡུལ་འཁོར་སྲུང་ཞེས་བྱ་བ། རིན་ཆེན་སྣ་བདུན་དང་ལྡན་པ། གླིང་བཞི་ལ་དབང་བ་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། དགེ་བའི་རྩ་བ་བསྐྱེད་པ། བསོད་ནམས་ཀྱི་གཟི་དང་ལྡན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཞིག་བྱུང་། དེ་ལ་བཙུན་མོའི་འཁོར་བདུན་འབུམ་ཡོད་དེ། ཐམས་ཅད་ཀྱང་མཚན་དང་ལྡན་པའི་ན་ཆུང་བུད་མེད་རིན་པོ་ཆེའི་ལོངས་སྤྱོད་དང་ལྡན་པ་ཤ་་སྟག་གོ །དེ་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་རབ་ཏུ་ཞུགས་པར་གྱུར་པ་དག་གོ །དེ་ལ་བུ་སྟོང་དུ་ཚང་བ་ཡོད་དེ། དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ་ཕ་རོལ་གྱི་སྡེ་རབ་ཏུ་འཇོམས་པ། སྐྱེས་བུ་ཆེན་པོའི་མཚན་ཉི་ཤུ་རྩ་བརྒྱད་ཀྱིས་བརྒྱན་པ། ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་པ་ཤ་སྟག་གོ །བཙུན་མོའི་ནང་ནས་མ་སྨད་མ་ཞེས་བྱ་བ་དང་། དཔེ་མེད་མ་ཞེས་བྱ་བ་དེ་གཉིས་རྫིང་བུ་དགའ་བ་ཞེས་བྱ་བར་ཁྲུས་བྱས་ཏེ་སྤོས་ཆུས་གོས་བརླན་པས་སེང་གེའི་ཁྲི་པདྨའི་འབྱུང་གནས་བཟང་པོ་ལ་འདུག་གོ །དེར་དེ་གཉིས་འདུག་པའི་པང་ནས་རྒྱལ་བུ་གཞོན་ནུ་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་གཉིས་སྐྱིལ་མོ་ཀྲུང་བཅས་པར་རྫུས་ཏེ་བྱུང་ངོ་། །དེ་ནས་སྐད་ཅིག་དེ་ཉིད་ལ་སྟེང་གི་བར་སྣང་ལས་ལྷ་རྣམས་ཀྱིས། ཀྱེ་མ་ཁྱེའུ་འདི་ནི་ཆོས་ཀྱི་སེམས་དཔའ་འོ། །ཀྱེ་མ་ཁྱེའུ་འདི་ནི་ཆོས་ཀྱི་བློ་གྲོས་སོ། །ཞེས་པའི་སྒྲ་བྱུང་བ་མ་སྨད་པའི་པང་ཆོས་སེམས་དང་། དཔེ་མེད་མའི་པང་ཆོས་ཀྱི་བློ་གྲོས་སུ་བཏགས་སོ། །རྒྱལ་པོ་ཡུལ་འཁོར་སྲུང་གིས་བདག་གི་གཞོན་ནུ་འདི་དག་གི་ནང་ནས་ཐོག་མར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བར་གང་འགྱུར་བརྟག་གོ་སྙམ་ནས། རིན་ཆེན་སྣ་བདུན་གྱི་བུམ་པ་བྱི་དོར་ལེགས་པར་བྱས་ཏེ་དེ་དག་ཐམས་ཅད་ཀྱི་མིང་བྲིས་ནས་བུམ་པའི་ནང་དུ་བཅུག །ཞག་བདུན་དུ་མཆོད་པར་བྱས་ནས་མིང་དེ་རྣམས་རིམ་པར་ཕྱུང་བས་ཐམས་ཅད་ཀྱི་ཐོག་མར་རྒྱལ་བུ་གཞོན་ནུ་རྣམ་པར་དགེ་བའི་བློ་གྲོས་ཞེས་བྱ་བ་དེའི་མིང་བྱུང་བར་གྱུར་ཏོ། །མིང་དེ་བྱུང་མ་ཐག་སྐད་ཅིག་དེ་ཉིད་ལ་ས་ཆེན་པོ་འདི་རྣམ་པ་དྲུག་ཏུ་གཡོས་སོ། །བཙུན་མོའི་འཁོར་ཐམས་ཅད་ཀྱི་པང་ན་སིལ་སྙན་ཡོད་པ་དེ་དག་ཀྱང་མ་དཀྲོལ་བར་བྱེ་བ་ཕྲག་དུ་མའི་སྒྲ་བྱུང་ངོ་། །ཐམས་ཅད་ཀྱི་ཐོག་མར་མིང་བྱུང་བ་རྒྱལ་བུ་གཞོན་ནུ་རྣམ་པར་དགེ་བའི་བློ་གྲོས་ཞེས་བྱ་བར་གྱུར་པ་དེ་གཞན་ཡིན་པ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་འཁོར་བ་འཇིག་དེའི་ཚེ་དེའི་དུས་ན་རྒྱལ་བུ་གཞོན་ནུ་རྣམ་པར་དགེ་བའི་བློ་གྲོས་ཞེས་བྱ་བར་གྱུར་ཏོ། །དེའི་འོག་ཏུ་རྒྱལ་བུ་གཞོན་ནུ་རྣམ་པར་རྒྱལ་བའི་སྡེ་ཞེས་བྱ་བ་དེའི་མིང་བྱུང་སྟེ། བཅོམ་ལྡན་འདས་གསེར་ཐུབ་དེའི་ཚེ་དེའི་དུས་ན་རྒྱལ་བུ་གཞོན་ནུ་རྣམ་པར་རྒྱལ་བའི་སྡེ་ཞེས་བྱ་བར་གྱུར་ཏོ། །དེའི་འོག་ཏུ་རྒྱལ་བུ་གཞོན་ནུ་དབང་པོ་ཞི་བ་ཞེས་བྱ་བ་དེའི་མིང་བྱུང་ངོ་། །བཅོམ་ལྡན་འདས་འོད་སྲུང་དེའི་ཚེ་དེའི་དུས་ན་རྒྱལ་བུ་གཞོན་ནུ་དབང་པོ་ཞི་བ་ཞེས་བྱ་བར་གྱུར་ཏོ། །དེའི་འོག་ཏུ་རྒྱལ་བུ་གཞོན་ནུ་དོན་ཐམས་ཅད་གྲུབ་པ་ཞེས་བྱ་བ་དེའི་མིང་བྱུང་ངོ་། །དེ་ནི་ང་ཡིན་ཏེ་དེའི་ཚེ་དེའི་དུས་ན་རྒྱལ་བུ་གཞོན་ནུ་དོན་ཐམས་ཅད་གྲུབ་པ་ཞེས་བྱ་བར་གྱུར་ཏོ། །ཞེས་པ་ནས། དེའི་བུ་གཞོན་ནུ་སྟོང་ཡོད་པ་དེ་དག་བསྐལ་པ་བཟང་པོའི་དེ་བཞིན་གཤེགས་པ་ཤ་སྟག་གོ །ཞེས་པའི་བར་གྱིས་གསལ་བར་བསྟན་ཅིང་། སེམས་དཔའ་གཉིས་པོ་ནི་སངས་རྒྱས་ཐམས་ཅད་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པ་པོ་ཚངས་པ་དང་། ཕྱག་རྡོར་བཀའི་བསྡུ་བ་པོར་སྨོན་ལམ་བཏབ་པས་དེ་གཉིས་ཡིན་ལ་གཞན་ཡང་གསང་བ་བསམ་གྱིས་མི་ཁྱབ་པའི་མདོ་དང་། ལི་ཙ་བྱི་དྲི་མེད་གྲགས་པས་བསྟན་པ་སོགས་ལའང་དེ་ལྟར་དུ་བཤད་ཅིང་། ད་ལྟའི་བསྐལ་པ་འདིའི་སྟོན་པ་ཤཱ་ཀྱའི་རྒྱལ་པོ་སངས་རྒྱས་བཞི་པར་བྱོན་པ་ལ་ཐམས་ཅད་མི་མཐུན་པར་འཆད་པ་ནི་མེད་དོ། །དེ་ཡང་འདི་ལྟར་ཡབ་སྲས་མཇལ་བའི་མདོ་ལས། སྔོན་འདས་པའི་དུས་བསྐལ་པ་དཔག་ཏུ་མེད་པའི་སྔོན་རོལ་དུ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་ཞིང་གཅིག་ཏུ་གྱུར་པ་དེར། དེ་བཞིན་གཤེགས་པ་དབང་པོའི་ཏོག་ཅེས་བྱ་བར་སངས་རྒྱས་ནས་སེམས་ཅན་རྣམས་ཀྱི་དོན་མཛད་དེ་མྱ་ངན་ལས་འདས་ནས་སླར་ཡང་དེའི་འོག་ཏུ་སངས་རྒྱས་པའི་ཚུལ་བསམ་གྱིས་མི་ཁྱབ་པ་བསྐལ་པ་འདིའི་བར་དུ་བསྟན་ཅིང་། ད་དུང་ཡང་སོ་སོའི་སྐྱེ་བོ་སེམས་དང་པོ་བསྐྱེད་པ་ནས་བཟུང་སྟེ་སངས་རྒྱས་པའི་ཚུལ་འཁོར་བ་མ་སྟོངས་ཀྱི་བར་དུ་སྟོན་པར་མཛད་དོ། །ཞེས་པ་ལྟར། ཐུན་མོང་གི་སྣང་ངོར་ནི་དེ་བཞིན་གཤེགས་པ་འདི་རྒྱུའི་དུས་ན་སོ་སོའི་སྐྱེ་བོ་འཆིང་བ་མཐའ་དག་གིས་བཅིངས་པ་ཞིག་ཏུ་སྟོན་ལ། འདི་ལྟར་དམྱལ་བར་ཤིང་རྟ་འདྲེན་པའི་གྱད་དུ་སྐྱེས་ནས་རང་འདྲ་ལ་སྙིང་རྗེ་ཆེན་པོའི་སེམས་བསྐྱེད། རྒྱལ་པོ་རབ་གསལ་གྱི་དུས་གླང་པོ་ཆེ་འདུལ་སྤྱོད་མཁན་ལས་སངས་རྒྱས་ཀྱི་མཚན་ཐོས་པས་བྱང་ཆུབ་ཀྱི་སེམས་བསྐྱེད། རྫ་མཁན་གྱི་ཁྱེའུ་སྣང་བྱེད་དུ་གྱུར་ཚེ། དེ་བཞིན་གཤེགས་པ་ཤཱཀྱ་ཐུབ་པ་ཆེན་པོ་ལ་གདུགས་དང་། མཆིལ་ལྷམ། རྫའི་བུམ་པ་ཕུལ་ཞིང་། མགྲོན་བུ་ལྔ་མེ་ཏོག་གི་ཚུལ་དུ་གཏོར་ནས་སེམས་བསྐྱེད་པ་ལ་སོགས་རྣམ་གྲངས་ཐ་དད་པའི་དོན་ལ་ཚོགས་ལམ་ཆུང་ངུའི་རྟེན་དེ་ལ་བསྐལ་པ་གྲངས་མེད་གསུམ་དུ་སྨོན་པའི་སེམས་བསྐྱེད་གཙོ་བོར་གྱུར་པས་ཚོགས་རླབས་པོ་ཆེ་བསགས་པའི་མཐར་བྱང་ཆུབ་སྙིང་པོར་སངས་རྒྱས་པར་འདོད་ལ། ཐུན་མོང་མ་ཡིན་པ་ལྟར་ན་ངེས་པ་དོན་གྱི་ལུང་འདི་ཡིན་ཏེ། པདྨ་དཀར་པོ་ལས། བསྐལ་པ་བྱེ་སྟོང་བསམ་གྱིས་མི་ཁྱབ་པ། །དེ་ཡི་ཚད་ནི་ནམ་ཡང་མེད་པ་ནས། །བྱང་ཆུབ་མཆོག་རབ་དེ་ནི་ངས་རྙེད་དེ། །ངས་ནི་རྟག་ཏུ་ཆོས་ཀྱང་རབ་བསྟན་ཏོ། །ཞེས་པ་ལྟར་ཐོག་མ་མེད་པའི་བདག་ཉིད་ཅན་ནས་བྱང་ཆུབ་ཆེན་པོའི་ལྷུམས་སུ་ཞུགས་པ་ཉིད་ལས་གཞན་དུ་མ་ཡིན་ནོ། །དེ་ལྟར་ནའང་ཚོགས་གཉིས་ཀྱི་དུས་རིང་མོའི་མཐའ་ལ་བློ་ཆུང་བ་གང་ཞིག་ཞུམ་པའི་བརྟུལ་ཞུགས་སྤང་བའི་ཕྱིར་རེ་ཞིག་ཐུན་མོང་གི་སྣང་ངོར་བསྟན་པ་འདི་ལ་མཛད་པ་ཇི་ལྟར་བསྟན་པའི་རྣམ་གཞག་མདོར་བསྡུས་ནས་བརྗོད་ན་རྩ་ཚིག་ནི། ཐོགས་མེད་ཀྱིས་བྱམས་པ་བསྒྲུབས་ཏེ་དགའ་ལྡན་དུ་བྱོན་པའི་ལྷའི་དྲོ་སྐད་ཅིག་མར་ཨཱརྱ་མེ་ཏྲིས་བཀའ་སྤྱིའི་འགྲེལ་པར་རྒྱན་གཉིས། འབྱེད་གཉིས། ཐེག་པ་ཆེན་པོ་རྒྱུད་བླ་མའི་བསྟན་བཅོས་དང་ལྔ་མཛད་དེ་གསུངས་པར་གྲགས་པའི་ཕྱི་མ་ལས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱི། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ལྷུམས་སུ་ཞུགས་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་གྱིས་རོལ་པ་དང་། །ངེས་འབྱུང་དཀའ་བ་སྤྱད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་བཅོམ་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཅེས་པ་ལྟར་བྲམ་ཟེའི་ཁྱེའུ་བླ་མ་ཞེས་བྱ་བར་གྱུར་ནས་འོད་སྲུངས་ལ་བསྙེན་བཀུར་བའི་མཐར་འཐབ་བྲལ་མན་ཆད་ནི་བག་མེད་པས་རྣམ་པར་གཡེངས། འཕྲུལ་དགའ་ཡན་ཆོད་ནི་དབང་པོ་ཤིན་ཏུ་རྟུལ་བས་ན། དགའ་ལྡན་དུ་ལྷའི་བུ་དམ་པ་ཏོག་དཀར་པོར་གྱུར་ནས་ལྷ་རྣམས་རྗེས་སུ་བཟུང་། དེའི་ཚེ་ཕྱོགས་བཅུའི་རྒྱལ་བ་རྣམས་ཀྱི་སིལ་སྙན་གྱི་སྒྲས་བསྐུལ་བ་ལྟར་སྐྱེ་བ་མཆོག་གི་སྤྲུལ་པའི་སྐུ་འཛིན་པར་བཞེད་ནས་གཟིགས་པ་རྣམ་པ་བཞི་དང་ལྔ་སྟེ་འཆད་ཚུལ་གཉིས་སུ་ཡོད་པའི་དོན་འཛམ་བུའི་གླིང་ནི། རྒྱ་ཆེར་རོལ་པ་ལས། བྱང་ཆུབ་སེམས་དཔའ་ཆེན་པོ་ཤར་ལུས་འཕགས་པོར་མི་སྐྱེ། ནུབ་བ་ལང་སྤྱོད་དུ་མི་སྐྱེ། བྱང་སྒྲ་མི་སྙན་དུ་མི་སྐྱེ། ལྷོ་འཛམ་བུ་གླིང་ཁོ་ནར་སྐྱེ། ཞེས་གསུངས་པ་དང་། གཞན་ཡང་འཛམ་བུ་གླིང་པ་རྣམས་ཆོས་ཉན་ཕྱིར་དགའ་ལྡན་དུ་འགྲོ་མི་ནུས་ལ། ལྷ་རྣམས་ཀྱིས་དེར་འབབས་པར་ནུས་སོ་སྙམ་དུ་དགོངས་ནས་འཛམ་བུ་གླིང་ལ་གཟིགས་སོ། །དེ་བཞིན་དུ་རིགས་ནི་ཐེག་པ་ཆེ་ཆུང་གི་ཁྱད་པར་ལས་མཐའ་གཅིག་ཏུ་མ་ངེས་ཀྱང་ཤེར་ཕྱིན་སྟོང་ཕྲག་བརྒྱ་པ་ལས། བྱང་ཆུབ་སེམས་དཔའ་རིགས་དམན་པར་མི་སྐྱེ་བར་གསུངས་ཤིང་། དེ་སྐད་དུ་རྒྱ་ཆེར་རོལ་པ་ལས། གང་བཙུན་པར་བཀུར་བ་དེར་སྐྱེ་བར་བཤད་པ་ལྟར་གནས་སྐབས་དེར་རྒྱལ་རིགས་བཙུན་པར་བཀུར་བས་ཡབ་རྒྱལ་པོ་ཟས་གཙང་མར་གཟིགས་སོ། །དུས་ནི་ཚེ་ལོ་མང་པོར་འཚོ་བའི་སྐབས་ན་མི་རྣམས་ཡིད་སྐྱོ་བར་དཀའ་ལ། མར་འགྲིབ་པའི་ཚེ་ནི་ཧ་ཀྱང་མི་བསྲུན་པའི་ཕྱིར་སྐྱེ་བར་མི་མཛད། དེའི་ཕྱིར་མཐའ་གཉིས་དང་བྲལ་བའི་ཚེ་ལོ་བརྒྱ་པ་ལ་གཟིགས་སོ། །དེ་བཞིན་དུ་ཡུམ་ནི་བུད་མེད་ཐ་ཤལ་གྱི་མངལ་དུ་འཇུག་པ་མ་ཡིན་པའི་ཕྱིར་དང་། གང་ཞིག་ཚེ་རབས་མང་པོར་སངས་རྒྱས་ཀྱི་ཡུམ་དུ་སྨོན་ལམ་ཐེབས་ཤིང་ཟླ་བ་བཅུར་རུམ་འཛིན་པར་ནུས་པ་དེའི་མངལ་དུ་འཇུག་པར་དགོངས་ནས་ཡུམ་ལྷ་མོ་སྒྱུ་འཕྲུལ་མ་ལ་གཟིགས་སོ། །རྒྱུད་ནི་སྔོན་ཡུལ་གྲུ་འཛིན་ཅེས་བྱ་བར་རྒྱལ་པོ་བརྒྱ་ཐམ་པ་བྱུང་བའི་ཐ་མ་རྣ་བ་ཅན་གྱི་བུ་གོའུ་ཏ་མ་དང་། བྷ་ར་དྷྭ་ཛ་གཉིས་ལས་སྔ་མ་རབ་ཏུ་བྱུང་ནས་ལོ་མའི་སྤྱིལ་བུ་ཡིད་དུ་འོང་བའི་བསམ་གཏན་གྱི་ཁང་བུར་གནས་བཅས་པ་ན། གཡོན་ཅན་པདྨའི་རྩ་ལག་དང་བཟང་མོ་དགའ་མགུར་སྤྱོད་པའི་དུས་ལས་ཡོལ་བས། བཟང་མོ་བསད་པའི་རལ་གྲི་ཁྲག་ཅན་ལོ་མའི་སྤྱིལ་བུའི་ཉེ་འདབས་སུ་བོར་བའི་རྐྱེན་གྱིས་གོའུ་ཏ་མ་གསལ་ཤིང་གི་རྩེར་ཆད་པས་མནར་བའི་དུས་དྲང་སྲོང་མདོག་ནག་གིས་རྫུ་འཕྲུལ་ལས་གྲུ་ཆར་གྱི་ཐིགས་པ་དང་། དྲི་བཞོན་ལུས་ལ་རེག་པའི་རྐྱེན་གྱིས་འདོད་པའི་གནས་རྗེས་སུ་དྲན་པའི་ཡིད་ཀྱིས་ཤིང་རྟས་དྲངས་ཏེ་ཁམས་ཀྱི་དྭངས་མ་གཉིས་ས་ལ་ལྷུང་བ་སྒོ་ང་གཉིས་སུ་གྱུར་ཏོ། །དེ་ཉི་མའི་འོད་ཀྱིས་བསྐྱངས་པས་ཁྱེའུ་གཉིས་སུ་གྱུར་པ་བུ་རམ་ཤིང་གསེབ་ཏུ་ཞུགས་པས་མིང་ལ་བུ་རམ་ཤིང་པར་གྲགས་པའི་བརྒྱུད་ལ་གཟིགས་སོ། །ཕྱིས་བརྒྱུད་པ་དེ་ལ་མནོལ་ཤོར་བས་དེ་འདྲ་ཕོད་པ་ཅེས་པའི་སྐད་དོད་ཤཱཀྱའི་རིགས་སུ་གྲགས་པ་ཡིན་ནོ། །དེ་ལྟར་བྱང་ཆུབ་སེམས་དཔས་གཟིགས་པ་ལྔ་ལ་གཟིགས་ཏེ་དགའ་ལྡན་ནས་འཕོ་འཇུག་གིས་རྣམ་པས་ལྷ་དག་དགའ་བར་བྱེད་པའི་ཆོས་སྣང་བའི་སྒོ་བརྒྱ་རྩ་བརྒྱད་བསྟན་ནས་ལྷའི་འཁོར་རྣམས་ཆོས་ཀྱི་ལམ་ཡང་དག་པར་བཙུད་དོ། །དེ་ནས་ཁོ་བོ་མངོན་པར་རྫོགས་པར་འཚང་རྒྱ་བའི་ཕྱིར་འཛམ་བུའི་གླིང་དུ་འགྲོའོ་ཞེས་གསུངས་པ་དང་། ལྷ་དེ་རྣམས་བྱང་ཆུབ་སེམས་དཔའ་དང་བྲལ་བའི་སྡུག་བསྔལ་གྱིས་མནར་ཞིང་ཞབས་ལ་འཇུས་ནས་སྨྲེ་སྔགས་དང་བཅས་ཁྱོད་མི་བཞུགས་ན་དགའ་ལྡན་གྱི་གནས་འདི་སྟོངས་པར་འགྱུར་ལ་སུས་ཆོས་སྟོན་ཅེས་གསོལ་པ་ན། བྱང་ཆུབ་སེམས་དཔའ་བྱམས་པ་འདིས་ཁྱོད་རྣམས་ལ་ཆོས་སྟོན་པར་འགྱུར་རོ་ཞེས་གསུངས་ནས་རང་གི་དབུ་རྒྱན་མ་ཕམ་མགོན་པོའི་དབུ་ལ་བསྐོན་ནས་རྒྱལ་ཚབ་ཏུ་དབང་བསྐུར་རོ། །སླར་ཡང་ལྷ་རྣམས་ཀྱིས་འདི་སྐད་དུ་འཛམ་བུའི་གླིང་ན་དེང་སང་རྟོག་གེ་པ་དྲུག་གསུམ་བཅོ་བརྒྱད་ཀྱིས་མ་རུངས་པར་བགྱིད་པས་གཟིགས་པའི་སྐབས་མ་ལགས་སོ་གསོལ་པས། ཉི་མའི་འོད་ཀྱིས་འོད་གཞན་ལྟར་ཟིལ་གྱིས་གནོན་པར་ནུས་སོ་ཞེས་བཀའ་སྩལ་ཏོ། །དེ་ནས་དུས་ལ་བབ་པ་ན་ལྷ་རྣམས་ལ་བདག་ཉིད་མའི་མངལ་དུ་ཇི་ལྟ་བུས་འཇུག་པར་བྱ་ཞེས་དྲིས་པ་ན། དེ་དག་ན་རེ། ཚངས་པ་དང་། བརྒྱ་བྱིན་དང་། ཉི་ཟླ་དང་ཁྱེའུ་དང་། མཁའ་ལྡིང་ལ་སོགས་པའི་ཆ་བྱད་ཀྱིས་འཇུག་པར་རིགས་སོ་ཞེས་ཕྱོགས་སུ་ལྷུང་བ་ལས། ལྷའི་བུ་གཟི་བརྗིད་དམ་པ་ཕྱིར་མི་ལྡོག་པ་དེ་ན་རེ། བྲམ་ཟེའི་རིག་བྱེད་ལས། གླང་ཆེན་དམ་པ་ལུས་ཆེན་མཆོག་གྱུར་པ། །མཆེ་བ་དྲུག་ལྡན་གསེར་གྱི་དྲྭ་བས་གཡོགས། །མགོ་བོ་རབ་ཏུ་དམར་ཞིང་ཤིན་ཏུ་མཛེས། །འགྲམ་བཟང་ཟག་ཅིང་གཟུགས་བཟང་ལྡན་པའོ། །ཞེས་འབྱུང་བ་ལྟར་སྤྲུལ་ཏེ་གཤེགས་པར་རིགས་སོ་ཞེས་གསོལ་བ་བཞིན་འཇུག་པར་དགོངས་སོ། །དེ་ནས་ལྷུམས་སུ་ཞུགས་པའི་མཛད་པ་ནི། དེའི་ཚེ་ཟས་གཙང་མའི་ཁྱིམ་དུ་ས་བཞི་ལག་མཐིལ་ལྟར་སྙོམས་ཤིང་རྡུལ་དང་བྲལ་ལ་སྲོག་ཆགས་མེད་ཅིང་མེ་ཏོག་བཀྲ་བ་ལ་སོགས་པའི་ལྟས་བཟང་པོ་བརྒྱད་བྱུང་ང་ོ། །དེར་རྒྱལ་པོ་ལེགས་པ་རབ་སད་ཀྱི་བུ་མོ་ཟས་གཙང་མའི་བཙུན་མོར་གྱུར་པ་སྒྱུ་འཕྲུལ་མའམ། སྒྱུ་མ་ལྷ་མཛེས་བྱུག་པས་བྱུགས། རྒྱན་གྱིས་བརྒྱན། བུད་མེད་སྟོང་ཕྲག་བཅུས་བསྐོར་ཏེ་ཟས་གཙང་མའི་རོལ་མོའི་ཁང་བཟང་དུ་ཁྲི་བཟང་པོ་ལ་འདུག་ནས་ཡན་ལག་བརྒྱད་དང་དགེ་བ་བཅུའི་ཁྲིམས་ལ་བག་ཡོད་པར་གནས་པའི་ཕྱིར་ཟས་གཙང་མ་ལ་གནང་བ་ཞུས་ནས་ངང་སྐྱ་ལྡན་དུ་སོང་སྟེ་རིན་པོ་ཆེའི་ཁྲི་ལ་མལ་སྟན་བཤམས་པའི་སྟེང་དུ་གཙུག་གི་ནོར་བུ་གློད་ནས་འདུག་གོ །དེ་ལ་ལྷུམས་སུ་ཞུགས་པ་ནི་ཇི་སྐད་དུ། གསེར་གྱི་དྲྭ་བས་ལེགས་གཡོགས་སྤྱི་གཙུག་དམར། །ཐལ་ཀར་མཆེ་བ་དྲུག་དང་རབ་ལྡན་ཞིང་། །དུང་དང་ཁ་བ་དངུལ་མདོག་ལྟ་བུ་ཡི། །གླང་པོའི་མཆོག་གཅིག་ཁོང་དུ་སོང་སྙམ་བྱེད། །དེ་ཞུགས་ནས་ནི་བདག་གི་ལུས་དང་སེམས། །སྔོན་ཆད་མཐོང་ཐོས་མྱོང་བར་མ་གྱུར་པའི། །གྱ་ནོམ་བདེ་བས་ཤིན་ཏུ་བདེ་གྱུར་ཏེ། །བསམ་གཏན་མཉམ་པར་བཞག་པ་བཞིན་དུ་གྱུར། །ཅེས་པ་ལྟར་ལྷའི་ཚོགས་རྣམས་ཀྱིས་རོལ་མོའི་བྱེ་བྲག་མང་པོས་མདུན་བདར་ནས་ས་ཁམས་ཨེ་ཌའི་ཟླ་བའི་ཕུང་པོ་སྟེ། དུས་འཁོར་བའི་དབྱར་འབྲིང་ཆུ་སྟོད་ཀྱིས་ཉ་བའི་མཚན་མོའི་གུང་ཐུན་ལ་བབ་པའི་ཚེ། གླང་པོ་མཆོག་གི་རྣམ་པས་ཡུམ་གསོ་སྦྱོང་ལ་གནས་པའི་ལྷུམས་སུ་ཞུགས་སོ། །ལྷུམས་དེ་ཡང་རྒྱལ་སྲས་རྣམས་ཀྱིས་ཉེ་བར་སྤྱད་པ་རིན་པོ་ཆེའི་བཀོད་པ་ཞེས་བྱ་བའི་་གཞལ་མེད་ཁང་རང་བྱུང་དུ་བྱིན་གྱིས་བརླབས་ནས་ལྷ་མི་ཁྲི་ཕྲག་སུམ་ཅུ་རྩ་དྲུག་སྨིན་པར་མཛད་དོ། །དེའི་ཚེ་ཡུལ་ལ་རྨི་ལྟས་ཁྱད་པར་ཅན་བཞི་བྱུང་ཞིང་ས་རྣམ་པ་དྲུག་ཏུ་གཡོ་བ་ལ་སོགས་ལྟས་བཟང་པོས་ཀུན་ཏུ་ཁྱབ་པར་བརྡལ་ལོ། །སྐུ་བལྟམས་པའི་མཛད་པ་ནི། དེར་རུམ་དུ་ཟླ་བ་བཅུ་བཞུགས་ནས་དུས་ཚོད་གང་ལ་བཙས་ནི་འདུལ་བ་ལས། བཅོམ་ལྡན་འདས་ལ་ཁྱིམ་བདག་མགོན་མེད་ཟས་སྦྱིན་གྱིས་གསོལ་པ། བཅོམ་ལྡན་འདས་ཟླ་བ་གང་ལ་བཙས། བཅོམ་ལྡན་འདས་ཀྱིས་ཁྱིམ་བདག་དཔྱིད་ཟླ་ཐ་ཆུང་ལ་བཙས་སོ། །ཞེས་སོ། །འདིར་གཟའ་སྐར་གྱི་འཐད་པ་ལྟར་དྲག་པོ་ལྕགས་སྤྲེའུ་དཔྱིད་ཟླ་ཐ་ཆུང་ས་ག་ཟླ་བའི་ཚེས་བདུན་ལ་བཙའ་བའི་དུས་ལ་བབ་པ་ན། ཟས་གཙང་གི་སྐྱེད་མོས་ཚལ་དུ་མེ་ཏོག་ལ་སོགས་པ་ལང་ཚོ་མཆོག་ཏུ་བདོ་བའི་རྣམ་འགྱུར་སྟོན་པ་ལ་སོགས་ལྟས་བཟང་པོ་སུམ་ཅུ་རྩ་གཉིས་བྱུང་བས་ཡུམ་གྱིས་བཙའ་བར་མཁྱེན་ཏེ། དགོས་པ་ཁྱད་པར་ཅན་དང་ལྡན་པར་དགོངས་ནས་འཁོར་དཔག་ཏུ་མེད་པ་དང་བཅས་ལུམ་བིའི་ཚལ་དུ་གཤེགས་སོ། །དེར་བདེ་བར་བཙའ་ཕྱིར་ཡུམ་གྱིས་ཕྱག་གཡས་བརྐྱངས་ཏེ་པ་ལཀྵའི་ཡལ་ག་ལ་འཇུས། རྩིབ་ལོགས་་་བྲག་སྒོ་བས་ཐང་ཡིག་ལ་བརྒལ་བ་བྱེད་པའི་ཚེ་དེ་བཞིན་གཤེགས་པ་རྩིབ་ལོགས་ནས་བལྟམས་པས་མངལ་སྒོ་མ་འགྲིམ་ཟེར་བ་ནི་ཤིན་ཏུ་མ་གོ་བའི་རྣམ་འགྱུར་ཏེ། སྟོན་པ་དྲང་སྲོང་ཆེན་པོས། མངལ་ཁ་བྱེ་ནས་ཞག་ནི་བཅུ་གཉིས་བར། ཞེས་དུས་སྐབས་དེར་ཕོ་མོའི་འདུ་འཕྲོད་ལས་བར་དོའི་ཡིད་འཇུག་པར་བྱེད་ཅིང་། འཇུག་ཡུལ་ནི་མའི་རུམ་ཁོ་ན་ཡིན་ཡང་ཁྱོད་ཀྱིས་དེ་བུད་མེད་ཀྱི་མཚན་མ་ཡིན་པར་གོ་ནས་རྩིབ་ལོགས་ནས་བལྟམས་པ་ཡིན་གྱིས་མངལ་ལས་མ་སྐྱེས་སོ། །ཞེས་སྨྲ་བ་ཧ་ཅང་ཐལ་བའི་ཚིག་གོ། གཡས་ནས་ཡུམ་ལ་གནོད་པ་མེད་པར་ན་བཟའ་དང་བཅས་སྐྱེ་བ་རྣམ་པ་བཅུ་དང་ལྡན་པས་བལྟམས་པ་དང་ཆབ་གཅིག་ཏུ་བདུད་སྤ་བཀོང་བ་དང་རེག་ན་བདེ་བའི་འོད་ཟེར་གྱིས་སྣང་བས་གང་བར་བྱས་སོ། །དེའི་ཚེ་ཚངས་པ་དང་བརྒྱ་བྱིན་གྱིས་ཀ་ཤི་ཀའི་སླེ་མོས་བླངས་པ་ན་དེ་དག་གི་དྲེགས་པ་འཇོམས་ཕྱིར་གང་གི་སྐུ་རྡོ་རྗེའི་རང་བཞིན་དུ་སྤྲུལ་པ་ལ་སོགས་པའི་རྫུ་འཕྲུལ་མཐའ་ཀླས་པར་བསྟན། ལྷ་ཀླུ་རྣམས་ཀྱིས་མེ་ཏོག་གི་ཆར་ཕབ་ཅིང་ཁྲུས་གསོལ། ས་ཡང་རྣམ་པ་དྲུག་ཏུ་གཡོས། རྩི་ཤིང་ཐམས་ཅད་ཀྱི་འདབ་མ་རྒྱས་ཤིང་འབྲས་བུ་ཆགས། ཕྱོགས་བཞིར་གོམ་པ་བདུན་བདུན་བོར་ནས་སེང་གེའི་ང་རོ་སྒྲོགས་པས་གོམ་པའི་ཤུལ་དུ་ས་ལྷས་ཕུལ་བའི་པདྨ་བདུན་བདུན་སྐྱེས་ཤིང་ལྷ་རྣམས་ཀྱིས་ཀྱང་བསྟོད། དེའི་ཚེ་དགའ་བོ་དང་བཟང་ལྡན་ལ་སོགས་པ་ཡ་རབས་ཀྱི་མི་ལྔ་བརྒྱ་དང་། ཤཱཀྱ་འབུམ་ཕྲག་ལྔ། འདུན་པ་ལ་སོགས་པའི་འབངས་བརྒྱ་ཕྲག་བརྒྱད། གྲགས་འཛིན་མ་ལ་སོགས་ཤཱཀྱའི་བུ་མོ་ཁྲི། འདུན་མ་སོགས་བྲན་མོ་བརྒྱད་བརྒྱ། རྒྱལ་རིགས་དང་བྲམ་ཟེ་ཁྱིམ་བདག་གི་བུ་མོ་ཉི་ཁྲི། ཆིབས་བསྔགས་ལྡན་ལ་སོགས་རྟ་མཆོག་ཕོ་མོ་ཉི་ཁྲི། གླང་པོ་མཆོག་ཁྲི། བ་ལང་དྲུག་སྟོང་རྣམས་ཀྱང་བཙས། གླིང་གི་དབུས་སུ་བྱང་ཆུབ་ཀྱི་ཤིང་སྐྱེད་ཚལ་ལྔ་བརྒྱ་ཡང་བྱུང་བས་རྒྱལ་པོ་ཟས་གཙང་གིས་དོན་ཐམས་ཅད་གྲུབ་པའི་སྒྲ་ལས་བསྙད་དེ་རྒྱལ་བུའི་མཚན་གཞོན་ནུ་དོན་གྲུབ་ཏུ་བཏགས། དེའི་ཚེ་ཁམས་ཀྱི་རྒྱལ་ཕྲན་བཞི་ལ་བུ་བཙས་པར་གྲགས་པ་འདི་ལྟ་སྟེ། མ་ག་དྷཱའི་རྒྱལ་པོའི་ཁབ་ཀྱི་གྲོང་ཁྱེར་ན་རྒྱལ་པོ་པདྨ་ཆེན་པོའི་བུ་གཟུགས་ཅན་སྙིང་པོ། ཀོ་ས་ལའམ། མཉན་ཡོད་ན་རྒྱལ་པོ་རྩིབས་ཀྱི་འཕུར་ཚངས་བྱིན་གྱི་བུ་གསལ་རྒྱལ། གྲོང་ཁྱེར་འཕགས་རྒྱལ་ལམ་རྡོ་མཆོག་ཏུ་རྒྱལ་པོ་མུ་ཁྱུད་མཐའ་ཡས་ཀྱི་བུ་རབ་སྣང་། ཀཽ་ཤམྦྷིར་དམག་བརྒྱ་པའི་བུ་ཤར་པ་སྟེ། སོ་སོ་ན་འོད་ཟེར་གྱི་སྣང་བ་བྱུང་བ་དག་རང་རང་གི་བུའི་ལྟས་སུ་རློམ་ཞིང་མིང་དེ་སྐད་དུ་བཏགས་སོ། །མཚན་མ་མཁན་ལ་གཞོན་ནུ་གང་ཞིག་གོ་ཞེས་རིག་པས་ཕོ་བྲང་དུ་བཞུགས་ན་འཁོར་ལོས་སྒྱུར་བའི་རྒྱལ་པོ་དང་། ཁྱིམ་ནས་ཁྱིམ་མེད་པར་རབ་ཏུ་བྱུང་ནས་རྫོགས་པའི་བྱང་ཆུབ་ཏུ་འགྱུར་རོ་ཞེས་ལུང་བསྟན། བལྟམས་ནས་ཞག་བདུན་ན་ཡུམ་སྐུ་ཚེ་བཏང་བ་སུམ་ཅུ་རྩ་གསུམ་དུ་ཉིང་མཚམས་སྦྱར། བཙས་མ་ཐག་ནས་གང་གི་སྲུ་མོ་སྒྱུ་འཕྲུལ་མ་ཆུང་བའམ། ཕྱིས་ནས་སྐྱེ་དགུའི་བདག་མོར་གྲགས་པ་དེ་ཉིད་གཙོ་མོར་གྱུར་པའི་པང་ན་འཚོ་བ། ནུ་མ་སྣུན་པ། བརྩེ་གྲོགས། དྲི་མ་འཁྲུད་པ་སྟེ་མ་མ་བརྒྱད་ཚན་བཞི། སྤྱིར་བསྡོམས་པས་སུམ་ཅུ་རྩ་གཉིས་ལ་གཏད་ནས་བསྐྱེད་བསྲིངས་སོ། །དེ་ནས་སེར་སྐྱའི་གཞིར་བྱོན་པ་ན་ཤཱཀྱའི་ཚོགས་མང་པོ་ཞིག་འདུས་པར་གྱུར་པའི་ཤཱཀྱ་གཏུམ་པོ་གཟུ་ལུམས་ཅན་རྩུབ་པ་དེ་བྱང་ཆུབ་སེམས་དཔའ་ཐུབ་པ་ཞེས་གནས་པ་དང་གྲོང་ཁྱེར་དེར་ཤིང་རྟ་ལ་སོགས་པའི་སྒྲ་བཅུ་གཉིས་རྟག་ཏུ་སྒྲོགས་པས་སྐྲག་པར་བྱེད་ཀྱང་གཞོན་ནུ་བཞུགས་པའི་མོད་ལ་མི་བསྲུན་པའི་སྒྲ་དེ་དག་ཉེ་བར་སིམ་ཞིང་ཐུབ་པ་ལྟར་དུ་གནས་པས་ཤཱཀྱ་ཐུབ་པར་གྲགས་སོ། །དེའི་ཚེ་ཤཱཀྱའི་རིགས་ལ་ཁྱེའུ་ཕོ་མོ་གང་བཙས་ཀྱང་ཤཱཀྱ་རྣམས་ཀྱི་ལྷ་ལྟར་བཀུར་བའི་གནོད་སྦྱིན་ཤཱཀྱ་འཕེལ་ཞེས་གཉུག་མར་གནས་པ་ཞིག་ཡོད་པ་དེར་ཕྱག་བྱ་དགོས་པ་བྱེད་པར་བརྩམས་ཚེ། དེས་བྱང་ཆུབ་སེམས་དཔའ་རང་གནས་དང་ཉེ་བར་བྱོན་པ་མཐོང་མ་ཐག་ཕྱིར་བྱུང་ནས་སྔོན་དུ་བསུས་ཤིང་ཕྱག་བྱས་པས་ལྷའི་ཡང་ལྷར་མཚན་ཐོགས་སོ། །དེའི་ཚེ་ཤཱཀྱ་རྣམས་གཞོན་ནུ་འཁོར་ལོས་སྒྱུར་བ་དང་དེ་བཞིན་གཤེགས་པ་གང་དུ་འགྱུར་སྙམ་དུ་ཚོམ་པ་ན། རི་བོ་ཀུན་འཛིན་གྱི་དྲང་སྲོང་ཉོན་མོངས་མེད་ཀྱིས་མཚན་མ་བརྟགས་ཤིང་དཔྱད་ནས་སྔར་ལུང་སྟོན་པའི་བྲམ་ཟེ་རྣམས་ཀྱི་དག་མ་ཡིན་པར་སུན་ཕྱུང་ནས་ཐེ་ཚོམ་གྱི་དྲྭ་བ་བཅད་པ་ནི། ས་བདག་རྟོག་པ་པོ་རྣམས་བློ་འཁྲུལ་ཏེ། །རྩོད་པའི་དུས་ན་འཁོར་ལོས་སྒྱུར་མི་འབྱུང་། །བསོད་ནམས་མཆོག་གི་ཆོས་ཀྱི་མཛོད་འདི་ནི། །ཉེས་ལས་རྣམ་རྒྱལ་སངས་རྒྱས་ཉིད་དུ་འགྱུར། །ཅེས་ཟེར་ཞིང་ཇི་ལྟར་རབ་ཏུ་འབྱུང་བ་དང་། དཀའ་བ་སྤྱད་པ། སངས་རྒྱས་ནས་ཆོས་ཀྱི་འཁོར་ལོ་བསྐོར་བ་ལ་སོགས་པ་མངོན་པར་འདུ་ཤེས་ཀྱང་དེའི་ཚེ་དྲང་སྲོང་རང་ཉིད་འཚོ་བའི་འདུ་བྱེད་གཏོང་བར་ཤེས་ནས་ཡིད་དུབ་པའི་རྣམ་འགྱུར་དང་བཅས་གཞོན་ནུ་ལ་ཕྱག་དང་བསྐོར་བས་བཏུད་དེ་རང་གནས་སུ་བཞུད་དོ། །སླར་གཞོན་ནུ་དགུང་ལོ་ལྔ་པར་དབུ་སྐྲ་བྲེགས། དྲུག་པར་གཙུག་ཕུད་བཞག་ནས་མ་མའི་པང་ན་འཚོ་བའི་ཚེ་གསེར་གཞོང་དུ་འབྲས་ཆན་ཤར་བསྲེས་པ་གསོལ་བ་མ་མས་བཀག་ཀྱང་མ་ཐུབ་པ་ན། གླང་པོ་ཆེ་ལྔ་བརྒྱ་ལ་སྣོད་དེ་བཏགས་ནས་འཕྲོག་པར་བརྩམས་པ་ལས་མཛུབ་མོས་གླང་ཆེན་དེ་ཚུར་དྲངས་པས་དེ་ལྟ་ན་འདིའི་ལག་པ་གཉིས་ཀས་ནི་གླང་པོ་ཆེ་སྟོང་ཡང་ཐུབ་བོ་ཞེས་བསྒྲགས་པས། གླང་པོ་སྟོང་ཐུབ་སྟེ་མཚན་རྣམ་པ་བཞིར་ཐོགས། མདུན་ན་འདོན་དག་གིས་རྒྱན་ཇི་སྙེད་ཅིག་སྒྲོན་ཀྱང་བྱང་ཆུབ་སེམས་དཔའི་གཟི་བྱིན་གྱིས་རྒྱན་དེ་དག་མོག་མོག་པོར་གྱུར་ལ། དེའི་ཚེ་ཚལ་དེ་ལ་གནས་པའི་ལྷ་མོས་གཟུགས་བསྟན་ནས་འདི་ལ་ནི་རང་བཞིན་གྱིས་སྤྲས་པའི་རྒྱན་མཛེས་ཀྱི་བཅོས་མའི་རྒྱན་ནི་མི་མཛེས་སོ་ཞེས་ཟེར་ནས་མི་སྣང་བར་གྱུར་ཏོ། །བཟོའི་གནས་ལ་མཁས་པའི་མཛད་པ་ནི། སྔོན་གྱིས་སྦྱངས་སྟོབས་བསྟན་པའི་ཕྱིར། ཡིག་མཁན་ཀུན་གྱི་བཤེས་གཉེན་དང་། སྲིན་བུ་གོ་ཆ་དང་ཞང་པོ་ལྷར་བཅས་སོགས་པས་ཡི་གེ་དང་། རྩིས་དང་། རོལ་རྩེད་ལ་སོགས་བསླབ་པ་ལྟར་མཛད་པའི་ཚེ། ཡི་གེ་གཅིག་ནས་ལྔ་བརྒྱའི་བར་ཕུལ་བས་དེ་དག་ནི་ཤེས་ཀྱི་པདྨའི་སྙིང་པོ་ལ་སོགས་ཡིག་རིགས་དྲུག་ཅུ་རྩ་བཞི་པོ་ལས་གང་སློབ་གསུངས་པས་སློབ་དཔོན་གྱིས་དེའི་མིང་ཙམ་ཡང་མ་ཤེས་པར་ཁེངས་པ་སྐྱུང་ཞིང་ངོ་མཚར་གྱི་གནས་ལ་བཀོད། ཡང་གཞོན་ནུས་ཡི་གེ་བྲིས་ནས་འདིའི་མིང་ཅི་ཡིན་སྨྲོས་ཤིག་སོགས་གསུངས་པ་ན་དེ་དག་གིས་མ་འཚལ་བས་སློབ་དཔོན་རྣམས་ཀྱང་ཟིལ་གྱིས་མནན་ཅིང་བྱིས་པ་ཁྲི་དང་བཅས་བྱང་ཆུབ་ཀྱི་ལམ་ལ་བཀོད། ཞང་པོ་བཟང་ལེན་གྱིས་གླང་པོའི་གཉར་ཞོན་པ་དང་། འཇིག་རྟེན་གྱི་འཕོང་གནས་ལྔ་སོགས་བསླབས་པ་ན། དེ་ལས་བརྒལ་བའི་འཕོང་ཐབས་གཞན་བསྟན་པས་དེ་དག་སྐྱེངས་ཤིང་ངོ་མཚར་གྱི་ལྟད་མོ་ལ་སྦྱར། དེ་བཞིན་དུ་བཟོ་དང་རྐྱལ་སོགས་མཐའ་ཀླས་ཤིང་གཏུགས་པ་མེད་པའི་སྒྱུ་རྩལ་གྱི་གནས་ཐམས་ཅད་ལ་འགྲན་ཟླ་དང་བྲལ་བར་གྱུར་ཏོ། །དགུང་ལོ་བཅུ་དྲུག་ལོན་ཚེ་མཚན་མཁན་གྱིས་ལུང་བསྟན་པ་ལྟར་ཁབ་བཞེས་པར་རིགས་སོ་ཞེས་ཤཱཀྱ་རྒན་རབས་རྣམས་ཀྱིས་ཡབ་ལ་བསྐུལ་བ་དང་། ཡབ་ཀྱིས་གཞོན་ནུ་ལ་དྲིས་པས་མ་གནང་ངོ་། །སླར་ནན་གྱིས་གསོལ་པས་བུད་མེད་གཟུགས་མཛེས་ལ་སྐྱོན་ལྔ་དང་བྲལ་ཞིང་ཡོན་ཏན་བརྒྱད་དང་ལྡན་པ་བྱུང་ན་སེམས་ཅན་སྨིན་པར་བྱ་བའི་ཕྱིར་བགྱིའོ་ཞེས་ཡི་གེར་བྲིས་ནས་ཡབ་ལ་ཕུལ་བས། ཡབ་ཀྱིས་མདུན་ན་འདོན་རྣམས་ལ་དེ་ལྟ་བུའི་བུད་མེད་ལྟོས་ཤིག་ཅེས་བསྔགས་པ་ལྟར་བྲམ་ཟེའི་རིགས་ཤིག་རྟོག་ཏུ་བཏང་བས། ཤཱཀྱ་ལག་ན་བེ་ཅོན་གྱི་བུ་མོ་ཐམས་ཅད་སྐྱོང་ལ་ཡོན་ཏན་དེ་དག་ཚང་ཞིང་། བུ་མོས་ཀྱང་རང་ཉིད་ལ་ཡོན་ཏན་དེ་དག་ཚང་བར་ཁས་བླངས་ནས་བཙུན་མོ་བགྱི་བར་དམ་བཅས། ཕྱིར་བཤོལ་མི་བྱེད་པའི་བརྡས་ཀྱང་བསྐུལ་ལོ། །དེར་བྲམ་ཟེས་ཡབ་ལ་རྒྱུ་མཚན་གསོལ་པས། ཡབ་ན་རེ་བུད་མེད་འདི་འཕྲུལ་ཆེ་བས་གཞོན་ནུ་གང་ལ་དགའ་བལྟ་བར་བྱ་སྙམ་ནས་རྒྱལ་བུ་བུ་མོའི་ཚོགས་ལ་སྦྱིན་པ་བྱེད་དུ་འཇུག་པས་འདུས་ཤིག་ཅེས་དྲིལ་བསྒྲགས་སོ། །དེ་ནས་བྱང་ཆུབ་སེམས་དཔའ་གླང་པོ་སྟོང་ཐུབ་ཁྲིར་འདུག་ནས་བུ་མོའི་ཚོགས་ལ་སྦྱིན་པ་རིམ་པར་བྱིན་པས་བུ་མོ་གཞན་རྣམས་སྦྱིན་པ་བླངས་ནས་མྱུར་བ་ཉིད་དུ་ལྡོག་གོ །དེར་སྦྱིན་པའི་དངོས་པོ་སྟ་གོན་བྱས་པ་རྣམས་འཛད་པ་དང་། ཐམས་ཅད་སྐྱོང་ངམ། གྲགས་འཛིན་མ་བྱུང་ནས་གཞོན་ནུ་ལ་མིག་ཟུག་པར་བལྟ་ཞིང་བདག་ལ་སྦྱིན་པའི་ཡོ་བྱད་མི་ལུས་པ་ཅི་ཞིག་གིས་ནོངས་ཞེས་ཡུས་པའི་ཚིག་ཏུ་སྨྲས་པས། རྒྱལ་བུས་ཁྱོད་རང་འཕྱིས་སོ་ཞེས་ཚིག་གིས་བཀྲོལ་ཏེ། ཕྱག་གི་སོར་གདུབ་གསེར་སྲང་བརྒྱ་སྟོང་རི་བ་བསྟན་པས་བུ་མོས་ཕྱག་ལས་ཕྱུང་སྟེ་འདི་ཙམ་ལས་ཅིས་མི་སྩོལ་ཞེས་བསྙད་པས། རྒྱལ་བུས་འདོད་ན་རྒྱན་གཞན་དག་ཀྱང་ཁྱེར་ཅིག་བསྒོ་བ་ན། དེས་མགུལ་པ་ནས་མུ་ཏིག་གིས་ཕྲེང་བའང་བཀྲོལ་ཏེ་སོང་བས་རྒྱལ་བུའི་ཐུགས་ཕྲོག་པར་དགོངས་སོ། །དེར་ཡབ་ཀྱིས་ཤཱཀྱ་ལག་ན་བེ་ཅོན་ལ་ཁྱོད་ཀྱི་བུ་མོར་གཞོན་ནུ་སྤྱན་ཆགས་ཀྱིས་བཙུན་མོར་བྱིན་ཅིག་ཅེས་སྨྲས་པས། དེས་བདག་གི་རིགས་ནི་སྒྱུ་རྩལ་དང་གྱད་ཀྱི་འཛིན་སྟངས་ཤེས་པ་ལ་བྱིན་གྱི་གཞན་དུ་མ་ཡིན་ནོ། །ཞེས་ཁེངས་པས་ཡབ་ངོ་གནག་པར་གྱུར་ཏོ། །དེ་ལ་གཞོན་ནུས་གསོལ་པ། ལྷ་གྲོང་ཁྱེར་ན་བདག་དང་སྒྱུ་རྩལ་འགྲན་ནུས་པ་མཆིས་སམ་ཞུས་ནས་རྔོ་ཐོགས་པར་ཞལ་གྱིས་བཞེས་པས། རྒྱལ་པོས་ཤཱཀྱའི་གྲོང་ཁྱེར་ཆེན་པོར་སྒྱུ་རྩལ་འགྲན་པ་ལ་ཚོགས་ཤིག་ཅེས་དྲིལ་བསྒྲགས་སོ། །དེར་སྲུ་སྒྱུ་འཕྲུལ་མའི་བུ་གཅུང་མཛེས་དགའ་བོ་དང་། བདུད་རྩི་ཟས་ཀྱི་བུ་ལྷས་སྦྱིན། ལག་ན་བེ་ཅོན་གྱི་བུ་མདའ་ཐོགས་སོགས་ཤཱཀྱའི་བུ་ང་རྒྱལ་གྱིས་དྲེགས་པས་འགྱིང་བ་དང་། མདུན་ན་འདོན་གྱི་བུ་འཆར་ཀ་སོགས་སྟོབས་ལྡན་མཐའ་ཡས་པ་སྒྱུ་རྩལ་འགྲན་པའི་ཕྱིར་ཚོགས་སོ། །ཚོགས་ནས་སུ་སྒྱུ་རྩལ་ཕུན་སུམ་ཚོགས་པ་དེས་གྲགས་འཛིན་མ་བདག་གིར་བྱེད་པར་དམ་བཅས་སོ། །དུས་དེའི་ཚེ་ཡངས་པ་ཅན་དུ་གླང་པོ་ཆེ་ཁྱད་པར་ཅན་ཞིག་བཙས་པ་ལི་ཙ་བྱི་རྣམས་ཀྱིས་དེ་ཉིད་གཞོན་ནུ་དོན་གྲུབ་ཀྱི་མཐུ་ལས་བྱུང་བར་ཤེས་ནས་དབུལ་བའི་ཕྱིར་གྲོང་ཁྱེར་སེར་སྐྱའི་སྒོར་ཕྱོགས་པ་དང་། ལྷས་བྱིན་གྲོང་ཁྱེར་ནས་བྱུང་བ་ཕྲད་དེ་གླང་འདི་སུའི་སྨྲས་པས། དེ་དག་གིས་སྔར་གྱི་རྒྱུ་མཚན་བརྗོད་པས་ལྷས་བྱིན་ཕྲག་དོག་དང་སྟོབས་ཀྱིས་དྲེགས་པའི་སྙིང་གི་ཚེར་མར་གྱུར་ཏེ། ལག་པ་གཡོན་པས་གླང་གི་གཉའ་ནས་བཟུང་། གཡས་པའི་ཐལ་མོས་བསྣུན་ནས་གླང་བསད་དེ་ཅི་གཞོན་ནུ་དོན་གྲུབ་འཁོར་ལོས་སྒྱུར་བར་མ་གྱུར་པར་གླང་པོ་ཆེ་གང་གིས་སླད་དུ་འབུལ་ཞེས་སྤྱོ་བར་བྱེད་དོ། །དེར་གཅུང་མཛེས་དགའ་བོ་བྱུང་ནས་ལྷས་བྱིན་གྱི་དྲེགས་པ་དང་མཐུ་སད་པའི་ཕྱིར་མཇུག་མ་ནས་བཟུང་སྟེ་སྒོ་ཁང་ནས་གོམ་བདུན་བོར་རོ། །ཕྱི་ནས་བྱང་ཆུབ་སེམས་དཔའ་བྱོན་ཏེ་གཉིས་ཀའི་མཐུ་སད་ཕྱིར་ཤིང་རྟ་ལས་མ་བབས་བཞིན་དུ་ཞབས་གཡས་ཀྱི་མཐེ་བོས་མཇུག་མ་ནས་བཟུང་སྟེ་གྲོང་ཁྱེར་ལས་རྒྱང་གྲགས་གཅིག་གི་སར་དོར་བས་ས་གཤོང་བུར་སོང་བ་དང་གླང་པོའི་གཤོང་དུ་གྲགས་ལ། དེར་དད་པ་ཅན་གྱིས་མཆོད་རྟེན་བརྩིགས་ཤིང་ལྷ་རྣམས་ཀྱིས་ཀྱང་ཚིགས་སུ་བཅད་པས་བསྟོད་དོ། །དེ་ནས་སྒྱུ་རྩལ་གྱི་འགྲན་ཟླ་རྣམས་དང་ལྟད་མོ་ལ་ལྷགས་པའི་སྐྱེ་བོའི་ཚོགས་ཐམས་ཅད་གྲོང་ཁྱེར་ལས་འཐོན་ཏེ། དཔང་པོ་བཀོད་ནས། ཡི་གེ་དང་། གྲངས་དང་། རྩིས་དང་། མཆོངས་དང་། རྐྱལ་དང་། བང་དང་བསྒྱེལ་ལ་སོགས་སྒྱུ་རྩལ་གྱི་རྣམ་འགྱུར་ལ་འགྲན་པས། བྱང་ཆུབ་སེམས་དཔའ་ལ་སུས་ཀྱང་གླགས་ལྟ་བའི་སྐབས་མ་རྙེད་པས་ལྷ་མི་ཐམས་ཅད་ཨེ་མ་ཨ་ལ་ལ་ཞེས་བསྟོད་ཅིང་བསྔགས་པར་བྱེད་དོ། །དེ་ནས་འཕོང་སྟེ་མདའ་འབེམ་ལ་འཕེན་པ་ལ་ཞུགས་པས་དམངས་ཀྱིས་གཅིག་པ་དང་གཉིས་པ། ལྷས་བྱིན་གྱིས་གསུམ། གཅུང་དགའ་བོས་ལྔ། བྱང་ཆུབ་སེམས་དཔས་བདུན་ཏལ་མར་ཕུག་པས་འགྲན་ཟླ་མ་རྙེད་དོ། །དེར་གཅོད་ཚབས་འགྲན་པ་ལ་ཞུགས་པས་ལྷས་བྱིན་གྱིས་ལྕགས་ཏ་ལ་གཅིག །མཛེས་དགས་གཉིས། བྱང་ཆུབ་སེམས་དཔས་ཏ་ལ་བདུན་རྔ་ཕག་དང་བཅས་པ་ཏལ་མར་ཕུག་ནས་ལྕགས་མདའ་ཟུག་སར་ཀླུས་ཕྱུང་ཤུལ་བྱུང་སྟེ་དད་པ་ཅན་གྱིས་མཆོད་རྟེན་ཡང་བརྩིགས་སོ། །ད་དུང་ཤཱཀྱ་གཞོན་ནུ་རྣམས་ང་རྒྱལ་མ་ཞི་བར་བསྐྱར་ནས་འགྲན་པར་བརྩམས་ནའང་ནུས་པ་ཇེ་ཆེར་སོང་བས་སྟོབས་ལྡན་དྲེགས་པས་འགྱིང་བའི་གྱད་ཀྱི་འཛིན་སྟངས་ཅན་ཐམས་ཅད་ཀྱིས་ཁེངས་པ་ཟིལ་གྱིས་མནན་ཏེ་སྒྱུ་རྩལ་དྲུག་ཅུ་རྩ་བཞི་ལ་དཔའ་བའི་རུ་མཚོན་བསྒྲེངས་སོ། །བཙུན་མོའི་འཁོར་གྱིས་རོལ་པའི་མཛད་པ་ནི། སླར་ཤིང་རྟ་ལ་ཞུགས་ཏེ་གྲོང་ཁྱེར་སེར་སྐྱར་གཤེགས་པ་ན་མཚན་མཁན་ཕྱིས་བྱུང་བ་དག་གིས་གཞོན་ནུ་འདི་ལོ་བཅུ་གཉིས་སུ་རབ་ཏུ་མ་བྱུང་ན་འཁོར་ལོས་སྒྱུར་བར་འགྱུར་རོ་ཞེས་བསྔགས་པས། ཡབ་ཀྱི་རྒྱལ་ཚབ་ཏུ་བསྐོས་ཤིང་གྲགས་འཛིན་མ་བཙུན་མོའི་འཁོར་ཉི་ཁྲི་དང་བཅས་ཁབ་ཏུ་བཞེས་སོ། །དེ་བཞིན་དུ་ཤཱཀྱ་དྲིལ་བུ་སྒྲའི་བུ་མོ་ས་འཚོ་མ་ཁང་བཟང་གི་སྟེང་ན་འདུག་པ་གཞོན་ནུས་ཤིང་རྟའི་སྟེང་ནས་གཟིགས་པས་ཐུགས་སོང་བ་དེ་ཉིད་འཁོར་ཉི་ཁྲི་དང་བཅས་བཙུན་མོར་བསུས་ཤིང་དགའ་མགུར་སྤྱད་དོ། །སླར་ཤཱཀྱ་དུས་ལེགས་ཀྱི་བུ་མོ་རི་དྭགས་སྐྱེས་ཞེས་བྱ་བའི་མཚན་དང་ལྡན་པ་དེས་སྐར་ཁུང་ནས་བལྟ་བར། གཞོན་ནུས་མུ་ཏིག་གི་དོ་ཤལ་འཕངས་པ་བུ་མོའི་མགུལ་པར་འཁྲིལ་བ་དེ་སྐྱེ་བོའི་ཚོགས་ཀྱིས་མཐོང་བ་ཡབ་ལ་ཞུས་པས་རི་དྭགས་སྐྱེས་འཁོར་ཉི་ཁྲི་དང་བཅས་པའང་བསུས་ཤིང་། དེར་བཙུན་མོའི་འཁོར་དྲུག་ཁྲི་དང་བཅས་པའི་ཁར་སྔར་རྒྱལ་པོས་ཕུལ་བའི་ཉི་ཁྲི་བཅས་བརྒྱད་ཁྲིའི་ཚོགས་དང་ལྡན་པའི་བཙུན་མོ་དང་ལྡན་པའི་བཙུན་མོ་དང་ལྷན་ཅིག་པར་དགུང་ལོ་ཉི་ཤུ་རྩ་དགུའི་བར་དུ་འདོད་པའི་ཡོན་ཏན་ཕུན་སུམ་ཚོགས་པ་ལ་རོལ་ཀྱང་། འདོད་ཡོན་གྱི་སྣང་བ་ལ་སྒྱུ་མའི་ངང་ཚུལ་དུ་མཁྱེན་པས་བདག་ཏུ་འཛིན་པའི་སྐྱོན་གྱིས་མ་གོས་ཤིང་དམ་པའི་སྤྱོད་པ་ལས་ཉམས་པ་མེད་དོ། །ངེས་པར་འབྱུང་བའི་མཛད་པ་ནི། དེའི་ཚེ་ཕྱོགས་བཅུའི་རྒྱལ་བ་རྣམས་ཀྱིས་རོལ་མོའི་སྒྲ་ལས་འདི་སྐད་ཅེས་བསྐུལ་ལོ། །འཆི་མེད་མྱ་ངན་མེད་ན་སངས་རྒྱས་ཏེ། །སྐོམ་པས་ཉམ་ཐག་བདུད་རྩིས་ཚིམ་བྱ་ཞེས། །སྔོན་གྱི་སྨོན་ལམ་ཚིག་མཆོག་དྲན་གྱིས་ལ། །གྲོང་ཁྱེར་འདི་ནས་མྱུར་དུ་མངོན་པར་བྱུང་། །ཞེས་གསན་པས་ངེས་པར་འབྱུང་བའི་བརྡར་ཤེས་ནས་འདུན་པས་ཤིང་རྟའི་ཁ་ལོ་པ་བྱས་ཏེ་གྲོང་ཁྱེར་གྱི་ཤར་སྒོ་ནས་ཤར་ཕྱོགས་ཀྱི་སྐྱེད་མོས་ཚལ་དུ་བྱོན་པ་དང་། ལམ་ན་ལྷས་སྤྲུལ་པའི་བྲམ་ཟེ་མགོ་དུང་ལས་དཀར་བ། ལུས་རིད་ཅིང་འདར་བ། རྒས་ཤིང་འཁོགས་པའི་རྣམ་པ་ཅན་གཟིགས་པ་ཅི་ཡིན་ཞེས་དྲིས་པས། ཤིང་རྟའི་ཁ་ལོ་པ་ན་རེ་ལྷ་འདི་ནི་རྒས་པ་ཞེས་བྱའོ། །རྒས་པ་ཞེས་བྱ་བ་ནི་རིང་པོར་མི་ཐོགས་པར་འགུམ་པའོ། །ང་ཡང་རྒས་པའི་ཆོས་ལས་མ་འདས་སམ། ལྷ་ཡང་བགྲེས་པའི་ཆོས་ལས་མ་འདས་སོ། །ཞེས་ཟེར་བས་ཐུགས་སྐད་ཅིག་ལ་སྐྱོ་སྟེ་ཕྱིར་ལྡོག་གོ །དེ་བཞིན་དུ་ལྷོ་ཕྱོགས་ཀྱི་སྒོ་ནས་བྱོན་པའི་ལམ་ཁ་ན་ན་བའི་སྡུག་བསྔལ་གྱིས་ཉེན་པ་དང་། ནུབ་ཕྱོགས་ཀྱི་སྒོ་ནས་བྱོན་པའི་ལམ་ཀ་ན་ཤི་བར་གྱུར་པ་ཁྱོགས་ལ་བཞག་སྟེ་ཤུལ་གྱི་མིས་མྱ་ངན་གྱི་ཅ་ཅོ་འདོན་པ་དང་། བྱང་ཕྱོགས་ཀྱི་སྒོ་ནས་བྱོན་པའི་ལམ་ཁ་ན་དགེ་སློང་ཞི་བ་དང་དུལ་བ་ཡང་དག་པ་རྣམས་གཟིགས་པས། ཁྱིམ་གྱི་ཉེས་དམིགས་དང་ཐར་པའི་ཕན་ཡོན་རྗེས་སུ་དྲན་པའི་རྐྱེན་དུ་གྱུར་ཏེ་ཤིང་རྟ་མཆོག་གི་ཁ་ལོ་ནང་དུ་བསྒྱུར་ནས་གྲོང་ཁྱེར་དུ་བཞུགས་ཏེ་ངེས་པར་འབྱུང་བ་ལ་ཐུགས་གཏོད་པ་ན། ཡབ་ཀྱིས་རིག་ནས་གཞོན་ནུ་བག་མེད་པར་གཡེང་བའི་སྦྱོར་བ་སྣ་ཚོགས་པ་བརྩམས་ཤིང་། དེའི་ཚེ་ཁྱིམ་ལས་འབྱུང་བའི་སྔ་ལྟས་སུ་རྒྱལ་པོའི་ཕོ་བྲང་གི་ལྗོན་པ་སྐམ་པ་དང་། ཡབ་དང་སྐྱེ་དགུའི་བདག་མོ། ས་འཚོ་མ་ལ་སོགས་པའི་རྨི་ལྟས་ལོག་པར་གྱུར་ཏོ། །དེར་མཚན་མཁན་གྱིས་ད་སྟེ་ཞག་བདུན་གྱི་བར་རབ་ཏུ་མ་བྱུང་ན་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་གསོལ་པ་དང་། རྒྱལ་པོ་ཟས་གཙང་མཆེད་དང་བཅས་པ་བགྲོས་ཏེ། གྲོང་ཁྱེར་ལ་ལྕགས་རི་དང་འོབས་རིམ་པ་བདུན་གྱིས་བསྐོར། སྒོ་འཕར་རྣམས་ལྕགས་ལ་བྱས་ཤིང་སྒོ་ཕྱེ་ཚེ་སྒྲས་དཔག་ཚད་ཁྱབ་པའི་དྲིལ་བུ་བཏགས། ཕོ་བྲང་གི་ཕྱི་རོལ་དུ་སྐས་སྤོ་བར་རུང་བ་ནུབ་མོ་མི་ལྔ་བརྒྱས་བསྡོགས་ཤིང་། སྔ་དྲོ་ལྔ་བརྒྱས་འཛུགས་དགོས་པ་བྱས། བྱང་ཆུབ་སེམས་དཔའ་ཁང་བཟང་དུ་བཙུན་མོའི་ཚོགས་ཀྱིས་བསྐོར་ཏེ་གླུ་གར་རོལ་མོས་བྲིད་དུ་བཅུག །བློན་པོའི་ཚོགས་དཔུང་ཚོགས་ཡན་ལག་བཞི་དང་ལྷན་ཅིག་བདར་བ་ཕྱི་རོལ་དུ་སྤྱན་པ་ལ་བསྐོས། མཚན་མོ་ཤར་སྒོར་ཟས་གཙང་། ལྷོ་སྒོར་བྲེའོ་ཟས། ནུབ་སྒོར་ཟས་དཀར། བྱང་སྒོར་བདུད་རྩི་ཟས་ཏེ་མཆེད་བཞི་སོ་སོའི་དཔུང་ཚོགས་དང་བཅས་པས་སྲུང་ངོ་། །དེ་ལྟར་དུ་ཞག་དྲུག་འདས་པའི་ནུབ་མོ་བྱང་ཆུབ་སེམས་དཔའ་འདི་སྙམ་དུ། བདག་གིས་ཡབ་རྒྱལ་པོ་ལ་མ་སྦྲན་པར་ཁྱིམ་མེད་པར་གཤེགས་ན། ཕ་མས་མ་གནང་བས་མི་རིགས་སོ་དགོངས་ནས་ཡབ་ཀྱི་དྲུང་དུ་གཤེགས། ཕྱག་དང་ཞེ་སའི་སྒོ་ནས་ལྷ་བདག་མངོན་པར་འབྱུང་བའི་དུས་ལ་བབས་ཀྱིས་མི་དགྱེས་པ་དང་གེགས་སུ་གྱུར་པ་མ་མཛད་ཅིག །ཅེས་གསོལ་བས་རྒྱལ་པོ་སྲིད་ལ་ཞེན་པའི་འཆིང་བས་ལན་གསུམ་གྱི་བར་གནང་བ་མ་སྦྱིན་ནོ། །མཐར་སྲས་ཀྱིས་ཅི་སྟེ་གནང་བ་མི་མཛད་ན། འདི་ནས་ཉིང་མཚམས་མི་སྦྱོར་བར་མཛོད་ཅིག་ཞུས་པས། ཡབ་ཀྱིས་ལྡོག་པར་མ་སྤོབས་ཏེ། ཁྱོད་ཀྱི་བསམ་པ་རྫོགས་པར་གྱུར་ཅིག །རྗེས་སུ་ཡི་རང་ངོ་། །ཞེས་གནང་བ་སྦྱིན་ནོ། །དེར་བྱང་ཆུབ་སེམས་དཔས་བཙུན་མོའི་འཁོར་སྤངས་ནས་རབ་ཏུ་བྱུང་ན་མུ་སྟེགས་བྱེད་རྣམས་ཀྱི་དབང་པོ་ལས་སུ་མ་རུང་བ་ཡིན་ནོ་སྙམ་པའི་ཁ་ན་མ་ཐོ་བ་སྤང་ཕྱིར་དཔའ་བར་འགྲོ་བའི་ཏིང་ངེ་འཛིན་གྱིས་གྲགས་འཛིན་མ་དང་དགའ་མགུར་རོལ་ནས་དེའི་མངལ་དུ་རྡོ་རྗེ་སེམས་དཔའི་སྤྲུལ་པ་སྒྲ་གཅན་འཛིན་སྲས་ཀྱི་ཚུལ་དུ་བྱིན་གྱིས་བརླབས་སོ། །བུད་མེད་དང་བདག་ཁྱིམ་དུ་ཉལ་བའི་ཐ་མ་ནི་འདི་ཡིན་གྱིས། ཕྱིན་ཆད་ནི་བུད་མེད་དང་སྐད་ཅིག་ཀྱང་གནས་པར་མི་བྱའོ་ཞེས་གསུངས་ནས། ནམ་ཕྱེད་ན་ཀོའུ་ཤི་ཀ་དང་ལྔས་རྩེན་གྱིས་ཁང་བཟང་གི་ཕྱི་ལ་སྐས་བཙུགས་པ་ལ་བབས། རྟ་རྒྱལ་དམ་པ་བསྔགས་ལྡན་ལ་བཅིབས་པའི་མོད་དེར་འཇིག་རྟེན་སྐྱོང་བ་བཞིས་རྨིག་པ་བཏེག་སྟེ་སྔོ་སངས་ཀྱི་ལམ་ལ་འཕགས་སོ། །དེར་སེར་སྐྱའི་ཡུལ་གྱི་ཤར་ཕྱོགས་སུ་དཔག་ཚད་བཅུ་གཉིས་འདས་པ་སྤོང་བྱེད་ཀྱིས་ཡུལ་ཆུ་ཀླུང་ཡིད་འོང་ལྡན་གྱི་འགྲམ་དུ་སླེབས་ནས་ཆིབས་བཤོལ་ཏེ་རྒྱན་རྣམས་བཀྲོལ། རྟ་ལ་ན་བཟའ་བཀལ་ཏེ་འདུན་པ་ཕྱིར་ལོག །མཆོད་རྟེན་རྣམ་དག་གི་དྲུང་དུ། རྒ་ཤི་མེད་པའི་གནས་མཆོག་འཆི་མེད་པ། །འཆི་མེད་བྱང་ཆུབ་དམ་པ་མ་ཐོབ་པར། །ང་ནི་སེར་སྐྱའི་གྲོང་ཁྱེར་མངོན་ཕྱོགས་ཏེ། །འགྲེང་དང་ཉལ་དང་འཆག་པར་མི་བྱའོ། །ཞེས་ཐ་ཚིག་བོར་ནས་རལ་གྲི་ཨུཏྤལ་མཐིང་ག་འདྲ་བས་གཙུག་ཕུད་བཅད་དེ་དབུ་སྐྲ་སུམ་ཅུ་རྩ་གསུམ་པའི་ལྷ་རྣམས་ཀྱིས་མཆོད་པའི་ཕྱིར་བཏེག་གོ །དེར་རབ་ཏུ་བྱུང་བའི་གོས་ཡིད་ལ་བྱས་པ་ཙམ་ལས་སྔོན་རང་སངས་རྒྱས་བཅུར་རྒན་མོས་ཕུལ་བའི་ཤ་ནའི་གོས་དེ་དག་གིས་མ་བཞེས་པར་མ་འོངས་པ་ན་ཤཱཀྱ་ཐུབ་པ་འདིར་རབ་ཏུ་འབྱུང་གིས་དེ་ལ་ཕུལ་ཞེས་བསྒོས་པ་རྒན་མོའི་ཚེ་ལ་དེ་ལྟར་མ་གྱུར་པས་བུ་མོར་མངགས། དེའི་ཚེ་ལའང་ལུང་བསྟན་སྐབས་ལ་མ་བབས་པས་ལྗོན་པའི་ལྷ་མོ་ལ་མའི་ངག་ལྟར་གཉེར་བ་དུས་དེར་ལྗོན་པའི་ལྷ་མོས་ཇི་ལྟར་མཆིད་པ་བཞིན་དུ་ཕུལ་བས་ངུར་སྨྲིག་བགོས་ཏེ་ཇི་སྐད་དུ་འདུལ་བ་ལས། ང་ལ་མཁན་པོ་མེད་པས་ན། །ང་ནི་རང་བྱུང་དགེ་སློང་ཡིན། །ཞེས་པ་ལྟར་རང་བྱུང་གིས་བསྙེན་པར་རྫོགས། དེར་ཡང་དད་པ་ཅན་གྱིས་བརྩིགས་པའི་མཆོད་རྟེན་ཡོད་པར་གྲགས། དེ་ནས་རིམ་པར་ཡངས་པ་ཅན་དང་རྒྱལ་པོའི་ཁབ་རྣམས་སུ་རྟོག་གེ་པ་གདམས་ངག་ཆེ་བར་གྲགས་པ་སྒྱུ་རྩལ་ཤེས་ཀྱི་བུ་རིང་འཕུར་དང་། རེངས་བྱེད་ཀྱི་བུ་ལྷག་སྤྱོད་ལས་ཅི་ཡང་མེད་པ་དང་། སྲིད་རྩེའི་སྙོམས་འཇུག་གི་ཏིང་ངེ་འཛིན་མངོན་དུ་མཛད། སློབ་དཔོན་དེ་གཉིས་ཀྱི་གོ་འཕང་བརྙེས་ཀྱང་འདིས་ངེས་པར་མི་འབྱུང་ཞེས་མ་དག་པའི་རིང་ལུགས་དེ་སུན་ཕྱུང་ནས་རིམ་གྱིས་གངྒཱ་བརྒལ། མ་ག་དྷཱར་ལྗོངས་རྒྱུ་ཞིང་བསོད་སྙོམས་མཛད་པ་ན། ཡབ་ཀྱི་སྙན་དུ་ཇི་ལྟ་བ་མ་ཡིན་པའི་གཏམ་རིངས་བྱེད་ཀྱི་བུ་ལྷ་སྤྱོད་དང་ལྷན་དུ་འགྲོགས་པ་ལས་རིམ་གྲོ་མེད་པར་རྒྱལ་པོའི་ཁབ་ཏུ་ཕྱིར་བྱུང་སྟེ་འཁྱམ་མོ། །ཞེས་ཐོས་པས་སེར་སྐྱ་ནས་རིམ་གྲོ་བ་སུམ་བརྒྱ་ལྷས་བསྟན་ནས་ཉིས་བརྒྱ་བཏང་བའི་སུམ་བརྒྱ་པོ་ལས་ཀཽཎྜི་ནྱ་དང་། རྟ་ཐུལ། རླངས་པ་གསུམ་རིང་འཕུར་གྱི་སློབ་མ་དང་། ཉིས་བརྒྱ་ལས་མིང་ཆེན་དང་བཟང་པོ་གཉིས་ལྷག་སྤྱོད་ཀྱི་སློབ་མར་ཁས་འཆེ་བ། དེ་གཉིས་ཀྱང་འགྲེ་བ་མ་ཡིན་པས་རིང་འཕུར་གྱི་སློབ་མ་གསུམ་ཡང་ལྷག་སྤྱོད་དང་ལྷན་ཅིག་གནས་ཤིང་དེ་ལྔ་ལ་དྲང་སྲོང་ལྔ་སྡེར་གྲགས་སོ། །དཀའ་བ་སྤྱད་པའི་མཛད་པ་ནི། དེའི་ཚེ་ལྔ་སྡེ་ཡང་འདི་སྙམ་དུ། བདག་ཅག་གིས་ལྷག་སྤྱོད་ལ་ཚངས་པར་ཡུན་རིང་དུ་སྤྱད་ཀྱང་དོན་མ་རྙེད། གོའུ་ཏ་མས་ཚེགས་ཆུང་ངུས་ཁོང་དུ་ཆུད་པས་འདིའི་རྗེས་སུ་འགྲོ་བར་བྱའོ་སྙམ་ནས་འདོད་པ་རྣམས་དང་འགྲོགས་ནས་ཆུ་ཀླུང་ནཻ་རཱཉྫའི་འགྲམ་དུ་སོང་སྟེ་ལྗོན་པ་ཞིག་གི་དྲུང་ན་སྐྱིལ་ཀྲུང་བཅས་ནས་རགས་པའི་ཟས་སྐོམ་གྱི་ཞེན་པ་བཅད། ཚེམས་ལ་ཚེམས་གཏད། ལྗགས་ཡ་རྐན་ལ་སྦྱར། ཐུགས་ཀྱི་ཐུགས་མངོན་དུ་བསྡམས་ཏེ་མཁའ་ཁྱབ་ཀྱི་ཏིང་ངེ་འཛིན་ལ་སྙོམས་པར་ཞུགས་ནས་ལོ་དྲུག་གི་བར་དུ་དཀའ་བ་ཤིན་ཏུ་དུབ་པར་སྤྱད་དོ། །དེའི་ཚེ་སྐུའི་མདངས་ནག་པོ་དང་རིད་པར་གྱུར་པས་དགེ་སྦྱོང་ནག་པོ་ཞེས་གླེང་། སྐབས་འདིར་སུམ་ཅུ་རྩ་གསུམ་ནས་ཡུམ་དང་མཇལ་བ་དང་། ཡབ་མྱ་ངན་གྱིས་ནོན་པ།གྲགས་འཛིན་མ་མེར་ལྕེབས་ཀྱང་སྲས་ཀྱི་མཐུས་མཉེས་པ་སོགས་ལོ་རྒྱུས་མཐའ་ཡས་པར་ཡོད་དོ། །དེ་ཡང་དཀའ་བ་སྤྱད་པའི་རྟེན་དེ་ལ་ལོ་དང་པོ་གཉིས་ལ་འབྲས་ཉག་མ་རེ། བར་པ་གཉིས་ལ་ཆུ་ཐིགས་པ་རེ། ཐ་མ་གཉིས་ལ་ཅི་ཡང་མ་གསོལ་བར་བཞུགས་ཞེས་གྲགས་སོ། །བྱང་ཆུབ་སྙིང་པོར་གཤེགས་པའི་མཛད་པ་ནི། དེ་ནས་དགུང་ལོ་སོ་ལྔ་པ་རྒྱལ་བ་ཞེས་པ་ཤིང་རྟ་ལོའི་དབྱར་ཟླ་ར་བའི་ཚེས་བརྒྱད་ལ་ཕྱོགས་བཅུའི་སངས་རྒྱས་ནམ་མཁའ་གང་བ་འདུས་ཏེ་སེ་གོལ་གྱི་སྒྲ་དང་བཅས། བསམ་གཏན་འདི་ནི་རྣམ་དག་མིན། །མཐར་ཐུག་འཐོབ་བྱེད་ཀྱང་འདི་མིན། །ཁྱོད་ཀྱིས་འོད་གསལ་དམིགས་བྱ་དེ། །ནམ་མཁའི་ངོས་ལྟར་མཆོག་ཡིན་ནོ། །ཞེས་དབྱངས་གཅིག་གིས་གསུངས་པས་མི་གཡོ་བའི་ཏིང་ངེ་འཛིན་དེ་ལས་བཞེངས་ཏེ་ཧ་རི་ནུ་ཀའི་འབྲུ་བཅུད་སོགས་ཟས་བསོད་པ་བཞེས་པས་སྟོབས་རྒྱས་ཤིང་སྔོན་ལས་མཛེས་པས་དགེ་སྦྱོང་མཛེས་པར་གྲགས། རགས་པའི་ཟས་གསོལ་བས་སྦོང་བ་ལས་ཉམས་པའི་དོགས་པས་ལྔ་སྡེ་བཟང་པོ་མ་མོས་ཏེ་གྲོང་ཁྱེར་ཝཱ་རཱ་ཎ་སཱིར་སོང་ངོ་། །དེ་ནས་ལྷ་རྣམས་ཀྱིས་བསྐུལ་བ་ལྟར་བྱང་ཆུབ་སྙིང་པོར་འཚང་རྒྱ་བའི་ས་རྡོ་རྗེའི་གདན་དུ་སྐྱེས་བུ་ཆེན་པོའི་སྟོབས་ལྔ་བཅུ་རྩ་བཞི་ལ་སོགས་པའི་འགྲོས་ཀྱིས་གཤེགས་ཤིང་ལོ་དེའི་ས་ག་ཟླ་བའི་ཉའི་ཉིན་གྲོང་པའི་བུ་མོ་ལེགས་སྐྱེས་མ་དང་དགའ་སྟོབས་མས། བ་སྟོང་བཞོས་པའི་འོ་མ་ལན་བཅུ་དྲུག་ཏུ་ཉིང་ཁུར་དྲིལ་བའི་འོ་ཐུག་སྦྲང་རྩིའི་སྙིང་པོ་ཅན་གསེར་གྱི་ཡོལ་གོར་བླུགས་ཏེ་ཕུལ་བས། དེ་གསོལ་བ་དང་སྐུ་གསེར་གྱི་གཏན་པ་ཕྱིས་པ་ལྟ་བུར་སོང་སྟེ་སྐྱེས་བུ་ཆེན་པོའི་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ། འོད་འདོམ་གང་བ་ལ་སོགས་པའི་དཔལ་དུ་འབར་རོ། །བདག་ཏུ་འཛིན་པའི་འཆིང་བ་ལས་གྲོལ་བའི་བརྡར་ཡོལ་གོ་ཆུ་ལ་སྐྱུར་བ་མིག་སྟོང་པས་ནམ་མཁའ་ལྡིང་གིས་རྣམ་འགྱུར་གྱིས་བླངས་ཤིང་། བུ་མོས་ཚིགས་སུ་བཅད་པའི་སྨོན་ལམ་བཏབ་པ་དེ་དེ་བཞིན་དུ་འགྲུབ་པའི་མཐུན་འགྱུར་མཛད། བརྒྱ་བྱིན་གྱིས་རི་སྤོས་ངད་ལྡན་ནས་ཤིང་བལ་ལྟར་རེག་ན་འཇམ་པའི་རྩྭ་ཁུར་གཅིག་བླངས་ཏེ་རྩྭ་འཚོང་བཀྲ་ཤིས་སུ་སྤྲུལ་ནས་ཕུལ། སླར་དེའི་དགེ་རྩ་རྫོགས་པའི་ཕྱིར། །བཀྲ་ཤིས་ང་ལ་རྩྭ་ཞིག་མྱུར་དུ་བྱིན། །དེ་རིང་ང་ལ་རྩྭ་ཡིས་དོན་ཆེན་འབྱུང་། །དཔུང་དང་བཅས་པའི་བདུད་ནི་བཅོམ་ནས་སུ། །བྱང་ཆུབ་ཞི་བ་དམ་པ་ཐོབ་པར་འགྱུར། །ཞེས་གསུངས་ནས་རྨ་བྱའི་མགྲིན་པ་ལྟ་བུའི་རྩྭ་ཕྱག་གང་བླངས་པ་བསྣམས་ཏེ་རྡོ་རྗེའི་གདན་དུ་གཤེགས་སོ། །རྡོ་རྗེའི་གདན་དེ་ལ་ཐེག་པ་ཆེ་ཆུང་གིས་བཀོད་པའི་བྱེ་བྲག་ཐ་དད་དུ་བཤད་པ་ཉན་ཐོས་པ་ལྟར་ན་དབང་ཆེན་གསེར་གྱི་ས་གཞི་ལ་ཐུག་གི་བར་དུ་རྒྱུ་རིན་པོ་ཆེ་སྣ་ཚོགས་ལས་གྲུབ་ཅིང་། སངས་རྒྱས་ཐམས་ཅད་ཀྱི་བྱིན་རླབས་ལས་རང་བྱུང་བ། འོག་རྡོ་རྗེ་རྒྱ་གྲམ་དུ་གནས་པའི་ལྟེ་བ་ལས་བྱང་ཆུབ་ཀྱི་ཤིང་སྐྱེས་པ། རྡོ་རྗེ་དེའི་རྩེ་མོ་བཞིའི་སྟེང་ན་རྡོ་རྗེ་ཕུར་པའི་མཆོད་རྟེན་བཞི་ཡོད་པའི་ཤིང་གི་དྲུང་ན་ཁྲི་འདོམ་གསུམ་པ་ཡོད་པར་འདོད་ལ། ཐེག་པ་ཆེན་པོ་པ་ལྟར་ན་རྡོ་རྗེ་རྩེ་ལྔ་པ་གྱེན་དུ་ལངས་པའི་ཁོང་སེང་ནས་བྱང་ཆུབ་ཀྱི་ཤིང་བྱུང་བ། རྭ་བཞི་ལ་རྡོ་རྗེ་ཕུར་པའི་མཆོད་རྟེན་བཞི་གནས་པ། མཆོད་རྟེན་བཞིའི་བར་གྱི་ཐང་ལ་མདའ་རྒྱང་འབྲིང་པོ་རེ་ཡོད་པའི་དབུས་ན་རྡོ་རྗེ་ཕ་ལམ་ལས་གྲུབ་པའི་གདན་ཁྲི་རྒྱར་ཕྱོགས་རེ་ལ་འདོམ་གསུམ་གྱི་དབུས་ནས་བྱང་ཆུབ་ཀྱི་ཤིང་སྐྱེས་པ། སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་ལས་གྲུབ་པ། འཇིག་པའི་བསྐལ་པ་བྱུང་ཡང་མེ་བདུན་ཆུ་གཅིག་གིས་འཇིག་པར་མི་ནུས་པ་ནམ་མཁའ་ལ་ཟོ་བ་དཔྱངས་པ་བཞིན་དུ་གནས་པར་འདོད་དོ། །བདུད་སྡེ་བཅོམ་པའི་མཛད་པ་ནི། དེ་ལྟ་བུའི་གནས་ཚུལ་དང་མཐུན་པར་མིང་ཆགས་པའི་རྡོ་རྗེའི་གདན་ཆོས་ཀྱི་གཡེའི་དགོན་པར་བྱང་ཆུབ་ཀྱི་ཤིང་དང་། ལྷ་རྣམས་ཀྱིས་བཤམས་པའི་ཁྲི་བཀོད་མི་འདྲ་བ་བརྒྱད་ཁྲིས་བརྒྱན་པའི་དྲུང་དུ་གཤེགས་ནས་སེམས་ཅན་དམན་པ་རྣམས་བློ་ཚིམ་པ་དང་། ཆོག་ཤེས་པ་དང་། སྔོན་གྱི་རྒྱལ་བའི་རྗེས་སུ་སློབ་ཕྱིར་རྩྭའི་རྩེ་མོ་ནང་དུ་བསྟན་པའི་སྟེང་དུ་ཞལ་ཤར་དུ་ཕྱོགས་རྡོ་རྗེའི་སྐྱིལ་ཀྲུང་དྲང་པོར་བཅས་ནས་བཞུགས་ཏེ་འདི་སྐད་དུ། སྟན་འདིར་བདག་གི་ལུས་འདི་སྐམ་ཀྱང་རུང་། །པགས་པ་རུས་པའི་ཚོགས་རྣམས་ཞིག་ཀྱང་རུང་། །དེ་སྲིད་དུ་ནི་སྲོག་གི་མཐར་ཐུག་ཀྱང་། །བསྐལ་མང་རྙེད་དཀའི་བྱང་ཆུབ་མ་ཐོབ་བར། །སྟན་འདི་ལས་ནི་ལུས་སྐྱོད་མི་བྱའོ། །ཞེས་ཡི་དམ་བཅས་ཤིང་བྱང་ཆུབ་སེམས་དཔའི་རོལ་པ་བཀོད་པའི་ཏིང་ངེ་འཛིན་གྱི་མཐུས་ལྷ་རྣམས་ནི་རང་རང་གིས་བཀོད་པའི་ཁྲི་ལ་བཞུགས་ཀྱིས་གཞན་ལ་ནི་མ་ཡིན་ནོ་སྙམ་དུ་སེམས་སོ། །དེ་ནས་སྲོད་ཀྱི་ཆར་གླིང་བཞི་འདོད་ཁམས་ཀྱི་དབང་ཕྱུག་བདུད་སྡིག་ཅན་ཡིན་པས་དེ་དག་ལས་མ་རྒྱལ་ན། གདུལ་བྱ་རྣམས་འབྲས་བུ་ཁྱད་པར་ཅན་གྱི་གོ་འཕང་མངོན་དུ་བྱེད་པ་ལ་ཐོ་འཚམས་པས་དེ་དག་འདུལ་བར་དགོངས་ཏེ་སྨིན་མཚམས་ཀྱི་མཛོད་སྤུ་ནས་བདུད་ཀྱི་དཀྱིལ་འཁོར་ཐམས་ཅད་འཇོམས་པ་ཞེས་བྱ་བའི་འོད་ཟེར་ཕྱུང་སྟེ། བདུད་ཀྱི་གནས་ཐམས་ཅད་ཁྱབ་ཅིང་སྒྲ་སྒྲོག་པར་མཛད་པས། དེ་དག་གི་མདངས་དང་གཟི་བརྗིད་མོག་མོག་པོར་གྱུར་ཅིང་བདུད་སྡིག་ཅན་ལ་རྨི་ལམ་ངན་པ་སུམ་ཅུ་རྩ་གཉིས་བྱུང་བས་མ་བཟོད་དེ་རྔོན་པའི་ཆ་བྱད་དུ་བརྫུས་ནས་བྱང་ཆུབ་སེམས་དཔའི་དྲུང་དུ་ལྷགས་ཏེ་སྨྲས་པ། ཁྱོད་འདིར་ཅི་བྱེད་པ་ཡིན། ལན་དུ་མངོན་པར་རྫོགས་པར་འཚང་རྒྱ་བའི་སླད་དུའོ་གསུངས་པས།བདུད་ཀྱིས་སྨྲས་པ། མངོན་པར་རྫོགས་པར་འཚང་རྒྱ་བ་ལ་ཚོགས་དཔག་ཏུ་མེད་པ་རྫོགས་དགོས་པ་མ་ཡིན་ནམ། ཁྱོད་རྒྱལ་པོའི་བུ་སྐྱིད་བདེར་གནས་པ་ཙམ་ལས་ཅི་ཡང་མ་བྱས་སོ། །བྱང་ཆུབ་སེམས་དཔས་སྨྲས་པ། ཁྱོད་ཀྱིས་གཏན་པ་མེད་པའི་མཆོད་སྦྱིན་གཅིག་བྱས་པས་ཀྱང་འདོད་པ་ཁམས་ཀྱི་དབང་ཕྱུག་ཆེན་པོར་གྱུར་ན། ངས་བསྐལ་པ་དཔག་ཏུ་མེད་པར་ཚོགས་གཉིས་རྫོགས་པར་བྱས་པས་ཅིའི་ཕྱིར་འཚང་མི་རྒྱ། བདུད་ཀྱིས་མཛུབ་མོ་གཉིས་གྱེན་དུ་བསྒྲེངས་ཏེ་སྨྲས་པ། ངས་ནི་འདི་ན་མཆོད་སྦྱིན་གཏན་པ་མེད། །བྱས་པ་ལ་ནི་ཁྱོད་ཉིད་དཔང་ཡིན་ན། །ཁྱོད་ལ་འདི་ན་དཔང་འགའ་ཡོད་མིན་པས། །སྨྲས་ཀྱང་དཔང་མེད་ཁྱོད་ནི་ཡེ་ཕམ་ཡིན། །ཞེས་ཟེར་རོ། །དེར་བྱང་ཆུབ་སེམས་དཔས་ཕྱག་བསོད་ནམས་བརྒྱ་ལས་གྲུབ་པ་ས་ལ་བརྡབས་ནས། ས་འདི་འགྲོ་བ་ཀུན་གྱི་གནས་ཡིན་ཏེ། །རྒྱུ་དང་མི་རྒྱུ་སྙོམས་ཤིང་ཉེ་འཁོན་མེད། །འདི་ནི་བདག་གིས་དཔང་སྟེ་བདག་རྫུན་མེད། །འདི་ལ་ཁྱོད་ནི་བདག་གི་དཔང་བྱོས་ཤིག །ཅེས་གསུངས་པའི་མོད་ལ་སའི་ལྷ་མོ་བརྟན་མས་སྐུ་མདོག་གསེར་བཙོ་མ་ལྟ་བུའི་ལུས་ཕྱེད་ས་ལས་ཕྱུང་སྟེ། ཕྱག་ཏུ་རྡུལ་ཕྲ་རབ་གཅིག་བསྣམས་ནས་འདི་སྐད་དོ། །ངས་སའི་དཀྱིལ་འཁོར་ཆེན་པོ་འདི་འདི་ཙམ་དུ་གྲངས་ཀྱིས་བགྲང་བ་ནི་ཚད་བཟུང་དུ་རུང་གིས། རིགས་ཀྱི་བུ་འདིས་མགོ་དང་ཡན་ལག་བྱིན་པ་ནི་བགྲང་བར་མི་ནུས་པས། མངོན་པར་རྫོགས་པར་སངས་རྒྱས་པའི་དུས་ལ་བབ་བོ་ཞེས་བརྗོད་ནས་མི་སྣང་བར་གྱུར་པ་དང་། བདུད་སྡིག་ཅན་ཤིན་ཏུ་ཕྲག་དོག་པར་གྱུར་ནས་བྱང་ཆུབ་སེམས་དཔའ་གཞོམ་པའི་སླད་དུ་རང་གི་དཔུང་ཐམས་ཅད་སྦྲན་ཏེ་བདུད་ཀྱི་དམག་དཀྲིགས་ཕྲག་བཅུས་རུབ་ཅིང་སྒྱུ་མ་ལྟ་བུའི་བློ་དང་མི་ལྡན་པ་རྣམས་འཇིགས་ཤིང་སྐྱི་བུང་བར་བྱས། བྱང་ཆུབ་སེམས་དཔའ་ལ་མཚོན་ཆ་སྣ་ཚོགས་པའི་ཆར་ཕབ་བོ། །དེའི་ཚེ་བྱང་ཆུབ་སེམས་དཔས་བྱམས་པ་ཆེན་པོའི་ཏིང་ངེ་འཛིན་ལ་མཉམ་པར་བཞག་པའི་མཐུས་ཇི་སྙེད་ཕབ་པའི་མཚོན་ཆ་ཐམས་ཅད་ནི་མེ་ཏོག་གི་ཕྲེང་བ་དང་། བླ་རེ་དང་། བྱང་ཆུབ་ཀྱི་ཤིང་མཛེས་པར་བྱེད་པའི་རྒྱན་དུ་གྱུར། མི་སྙན་པའི་སྒྲ་ཐམས་ཅད་ནི་བསྟོད་དབྱངས་སྙན་པའི་རང་བཞིན་དུ་གནས་འགྱུར། ཚངས་པ་དང་བརྒྱ་བྱིན་ལ་སོགས་པས་གདུགས་འཕྱར་བ་དང་དུང་འབུད་པ་ལ་སོགས་ཀྱིས་བསྟོད། གཙང་མའི་ལྷ་རྣམས་ཀྱིས་བདུད་ལ་རྣམ་པ་བཅུ་དྲུག་གིས་སྨད་ཅིང་། ཤིང་གི་ལྷས་བྱང་ཆུབ་སེམས་དཔའ་ལ་རྣམ་པ་བཅུ་དྲུག་གིས་བསྟོད་པས་འདོད་ལྷ་སྡེར་བཅས་མྱ་ངན་གྱི་ཁང་བུར་ཞུགས་ཤིང་མགོ་རྨོངས་པར་གྱུར་ནས་ལམ་ཡང་སྟོར་ཏེ་ཞག་བདུན་དུ་ཕྲད་པ་མེད་པའི་གནས་སྐབས་བྱུང་ཞིང་བྱེར་བར་གྱུར་ཏོ། །སླར་ཡང་རང་གི་བུ་མོ་བདུན་ཉམས་སད་པའི་ཕྱིར་བཏང་ནས་གཡོ་སྒྱུ་སུམ་ཅུ་རྩ་གཉིས་ཀྱིས་བསླུ་བར་བརྩམས་ནའང་བ་སྤུའི་རྩེ་མོ་ཙམ་ཡང་གཡོ་བར་མ་ནུས་ཏེ་རྒན་མོ་བདུན་དུ་བྱིན་གྱིས་བརླབས་པས། བཟོད་པར་གསོལ་ཞིང་རྣམ་དག་སྐུ་ལྔ་ལ་སོགས་པའི་ཚིགས་སུ་བཅད་པས་བསྟོད་པས་སྔོན་གྱི་ལུས་སུ་གྱུར་ནས་རང་གནས་སུ་སོང་ངོ་། །མངོན་པར་བྱང་ཆུབ་པའི་མཛད་པ་ནི། དེ་ནས་དགུང་གི་ཆ་ལ་བསམ་གཏན་བཞི་པའི་ཏིང་ངེ་འཛིན་ལ་མཉམ་པར་བཞག་ནས་རིག་པ་གསུམ་བསྐྱེད་ཅིང་། ནམ་གྱི་ཆ་སྨད་ན་རྟེན་ཅིང་འབྲེལ་བ་བཅུ་གཉིས་ལུགས་འབྱུང་ལུགས་ལྡོག་ལ་བརྟགས་ནས་རྫུ་འཕྲུལ་སྣ་ཚོགས་མྱོང་བར་མཛད་དེ་ཟད་དང་མི་སྐྱེ་བ་ཤེས་པའི་ཡེ་ཤེས་མངོན་དུ་མཛད་ནས་ཐོ་རངས་རྒྱལ་རྔ་བརྡུང་བའི་ཚེ་སྐད་ཅིག་གཅིག་དང་ལྡན་པའི་ཤེས་རབ་ཀྱིས་མངོན་པར་རྫོགས་པར་སངས་རྒྱས་སོ། །དེའི་ཚེ་ས་ཆེན་པོ་འདི་རྣམ་པ་དྲུག་ཏུ་གཡོས་ཤིང་ཕྱོགས་བཅུའི་རྒྱལ་བ་རྣམས་ཀྱིས་དེ་བཞིན་གཤེགས་པ་མངོན་པར་རྫོགས་པར་སངས་རྒྱས་པ་ལེགས་སོ་ཞེས་ཆེད་དུ་བསྔགས་ཤིང་ལྷ་རྣམས་ཀྱིས་ཀྱང་བསྟོད་དོ། །སྐབས་འདི་ནི་ངེས་དོན་རྡོ་རྗེའི་རྣལ་འབྱོར་གྱི་དབང་དུ་དབུ་མའི་མར་སྣེ་དཀར་ཆ་ཧཾ་ཡིག་གི་རྡུལ་འཛག་པ་སྟེ། དྲང་དོན་ཀུན་རྫོབ་ཀྱི་སྣང་ཆར་ཕྱི་རོལ་གྱི་ནམ་མཁའ་ཟླ་བའི་དཀྱིལ་འཁོར་ལ་དུས་མེ་ཞུགས་ཤིང་། དེའི་ཚེ་གྲགས་འཛིན་མ་ལ་སྲས་བལྟམས་པས་ལྟས་དང་མཐུན་པར་སྒྲ་གཅན་འཛིན་དུ་བཏགས། ཚིག་གིས་སྦྱོར་བ་གཞན་དག་ཏུ་རབ་ཏུ་འབྱུང་ཁར་བལྟམས་པར་བཤད་ཀྱང་། ཡུམ་གྱིས་སྐྱེ་བ་སྔོན་མ་ལ་དར་བའི་བུམ་པ་བསྐུར་བ་དང་། སྲས་ཀྱིས་དྲང་སྲོང་ཞག་དྲུག་ཏུ་ལྟོགས་པར་བྱས་པའི་རྣམ་སྨིན་ལ་བརྟེན་ནས་ལྷུམས་སུ་ལོ་དྲུག་བཞུགས་པ་འདི་བཀའ་བཙན་པ་ཡིན་ནོ། །དེ་ནས་དེ་བཞིན་གཤེགས་པ་སྐྱིལ་ཀྲུང་དང་བཅས་ཤིང་ཏཱ་ལ་བདུན་སྲིད་ཙམ་གྱི་ནམ་མཁའ་ལ་འཕགས་ནས། ལམ་གྱི་རྒྱུན་ཆད་སྡུག་བསྔལ་ཉེ་བར་ཞི། །ཞེས་པ་ལ་སོགས་པས་ཆེད་དུ་བརྗོད་ཅིང་། ལྷའི་བུ་རྣམས་ཀྱིས་མེ་ཏོག་གི་ཆར་པུས་ནུབ་ཙམ་དུ་གཏོར་ནས་མཆོད་པ་བྱས། གཟུགས་ཅན་སྙིང་པོ་ལ་སོགས་པས་མངོན་པར་བྱང་ཆུབ་པའི་མཆོད་རྟེན་ཡང་བརྩིགས་སོ། །དེ་ཡང་སྤྱི་མཐུན་གྱི་སྣང་ངོར་མེའི་ཁམས་ལ་སྙོམས་པར་ཞུགས་ནས་ཞག་བདུན་གྱི་བར་དུ་སྐྱིལ་ཀྲུང་མ་བཤིག་པར་ཤིང་གི་རྒྱལ་པོ་ལ་སྤྱན་མི་འཛུམ་པར་གཟིགས། བདུན་ཕྲག་གཉིས་པ་ལ་གཞན་འཕྲུལ་དབང་བྱེད་ཀྱི་རྒྱལ་པོ་དབང་བསྒྱུར་གྱི་གནས་སུ་གཤེགས་ནས་ས་བཅུ་པའི་ཆོས་ཀྱི་རྣམ་གྲངས་བསྟན། བདུན་ཕྲག་གསུམ་པ་ལ་ང་སངས་རྒྱས་ནས་སྐྱེ་རྒ་ན་འཆིའི་སྡུག་བསྔལ་མཐར་དབྱུང་ངོ་ཞེས་བྱང་ཆུབ་ཀྱི་ཤིང་ལ་གཟིགས། བདུན་ཕྲག་བཞི་པ་ལ་ཤར་ནུབ་རྒྱ་མཚོའི་བར་གྱི་འཛམ་གླིང་འཆག་པར་མཛད། བདུན་ཕྲག་ལྔ་པ་ལ་ཀླུ་བཏང་བཟུང་གི་གནས་རི་བཏང་བཟུང་ལ་བཞུགས། བདུན་ཕྲག་དྲུག་པར་ཤིང་ནྱ་གྲོ་དྷཱའི་དྲུང་དུ་རྩྭའི་གདིང་བ་ལ་བཞུགས་ནས་ཀུན་ཏུ་རྒྱུ་དང་གཅེར་བུ་པ་སོགས་ཀྱིས་སྙུན་དྲིའི་ཚིགས་བཅད་གསུངས། བདུན་ཕྲག་བདུན་པ་ལ་སཱ་ལ་དང་འོད་མའི་ཚལ་དུ་ཤིང་སྒྲོལ་རྒྱུའི་དྲུང་ན་བཞུགས། དེའི་ཚེ་ཚོང་དཔོན་ག་གོན་དང་བཟང་པོ་གཉིས་ཀྱིས་བ་སྟོང་གི་འོ་མ་བསྡུས་པའི་སྤྲིས་མ་བཞབས་པ་དང་། སྦྲང་རྩིའི་འདག་གུ་སོགས་རིན་པོ་ཆེའི་སྣོད་དུ་ཕུལ། སྣོད་དུ་རབ་བྱུང་གི་ཆས་མ་ཡིན་པར་གཟིགས་ནས་ལྷུང་བཟེད་ལ་དགོངས་པ་གཏོད་པ་ན། རྒྱལ་ཆེན་བཞིས་གསེར་དངུལ་བཻ་ཌཱུར་ཤེལ་སྤུག་རྡོ་སྙིང་གི་ལྷུང་བཟེད་ཕུལ་བ་དེ་ཡང་རྒྱུས་མི་རུང་བར་དགོངས་ནས་མ་བཞེས་པ་དང་། ལྷའི་བུས་བསྔགས་པ་བཞིན་དུ་རྒྱལ་ཆེན་རྣམས་ཀྱིས་རྡོའི་ལྷུང་བཟེད་ཕུལ་བ་བཞེས། དེ་ཡང་ཉེ་བར་དཔྱད་པའི་དངོས་པོ་འཁྲོལ་མི་ཚགས་པ་དང་དེ་དག་གི་འདོད་པ་རྫོགས་པའི་སླད་དུ་ཐམས་ཅད་གཅིག་ཏུ་བྱིན་གྱིས་བརླབས་ནས། ལྷ་ཡིས་བཀྲ་ཤིས་དོན་གྲུབ་ཅིང་། །ཕྱོགས་རྣམས་བཀྲ་ཤིས་བྱེད་པ་དེས། །ཁྱོད་ལ་བདེ་ལེགས་མཛད་པར་གྱུར། །ཅེས་ཤིས་པ་བརྗོད་པའི་ཚིགས་གསུངས་ནས་བཞེས་ཤིང་ཚོང་དཔོན་གཉིས་སྦྲང་རྩི་འབྱུང་བ་ཞེས་པའི་སངས་རྒྱས་སུ་ལུང་བསྟན། དེར་སེམས་ཅན་སྨིན་པར་མཛད་པའི་ཕྱིར་སྦྲང་དང་འདག་གུའི་ཟས་མཆོག་གསོལ་བ་སྐུ་ལ་མ་འཕྲོད་པར་བསྙུན་པའི་ཚུལ་བསྟན་པ་ན། བདུད་སྡིག་ཅན་གྱིས་མྱ་ངན་ལས་འདའ་བར་གསོལ་བས་འཁོར་རྣམ་པ་བཞི་ལ་ཆོས་སྟོན་པར་མ་གྱུར་པར་མྱ་ངན་ལས་མི་འདའ་བར་སྩལ་བས་ཡིད་མི་བདེ་བར་གྱུར། དེའི་ཚེ་ལྷའི་དབང་པོས་ཨ་རུ་ར་ཕུལ་བས་སྙུན་ལྷག་པར་འཚོ་བའི་ཚུལ་བསྟན་ཅིང་བདུད་རྩི་ཟབ་མོ་རྟོག་གེའི་སྤྱོད་ཡུལ་མ་ཡིན་པར་སྟོན་པའི་སླད་དུ། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་བདག་གིས་རྙེད། །སུ་ལ་བསྟན་ཀྱང་གོ་བར་མི་འདུག་པས། །མི་སྨྲ་ནགས་འདབས་ཉིད་དུ་གནས་པར་བྱ། །ཞེས་གསུངས་ནས་ཐུགས་ལས་ཆུང་ངུ་ལ་གཞོལ་ཏེ་རྡོ་རྗེའི་ཏིང་ངེ་འཛིན་ལ་བཞུགས་སོ། །འདིར་སྨྲས་པ། གྲངས་མེད་གསུམ་དུ་ཚོགས་སྦྱོར་སློབ་ལམ་གྱིས་བསྡུས་པའི། །མཛད་པ་མཐར་ཕྱིན་འོག་མིན་ཞིང་དེར་སངས་རྒྱས་ཀྱང་། །རྣམ་གྲོལ་ཐུགས་རྗེས་འགྲོ་ལ་བདུད་རྩི་སྟེར་བའི་སླད། །མཛད་པའི་འཁོར་ལོ་བཅུ་གཉིས་བདག་པོ་འདིར་ཡང་བསྟན། །གསང་གསུམ་མཛད་པ་ནམ་མཁའ་མཛོད་ལ་དབང་བསྒྱུར་དེའི། །ཕ་མཐའ་བརྗོད་ལ་ཤཱ་རིའི་བུ་ཡང་ཁེངས་སྐྱུང་ན། །ཕྱོགས་རེའི་ཐེག་པའི་གཏན་ཚིགས་མཐའ་ལ་སུ་ཞིག་ཞེ་ན། །དེ་ཕྱིར་འདི་ན་མང་པོའང་གཅིག་ཏུ་སྦམས་ཏེ་བཤད། །ཚོགས་གཉིས་རླུང་གི་ཤིང་རྟས་བཏེག་པ་ཡི། །སྟོབས་བཅུ་མི་འཇིགས་རྣམ་བཞིའི་འོད་བརྒྱ་པ། །བསྐལ་བཟང་འདི་ཡི་མཁའ་ལ་འགྲོས་བཏེག་ཚེ། །ལུས་མེད་མུན་པའི་ཆོམ་རྐུན་གང་དུ་བྲོས། །ཞེས་པའང་བར་སྐབས་ཀྱི་ཚིགས་སུ་བཅད་པའོ། །གཉིས་པ་བསྟན་པ་རིན་པོ་ཆེའི་སྒྲོམ་ཆོས་ཀྱི་འཁོར་ལོ་བསྐོར་ནས་མཛད་པ་དབྱིངས་སུ་བརྟུལ་ཚུལ་ནི། དེ་ཡང་མ་བསྐུལ་བར་ཆོས་ཀྱི་འཁོར་ལོ་བསྐོར་བ་མི་སྟོན་པའི་ཕྱིར་མཛོད་སྤུ་ནས་འོད་ཟེར་བཀྱེས་ཏེ་འཇིག་རྟེན་ཀུན་སྣང་བར་བྱས་པས། མི་མཇེད་ཀྱི་བདག་པོ་ཚངས་པ་སྔོན་གྱི་སྨོན་ལམ་སད་ནས་འཁོར་འབུམ་ཕྲག་དྲུག་ཅུ་རྩ་བརྒྱད་དང་བཅས་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པ་ལ་ལྷགས་ནས་གསོལ་པ། ཡེ་ཤེས་ཆེན་པོ་མཆོག་གི་དཀྱིལ་འཁོར་བསྒྲུབས་ནས་ནི། །ཕྱོགས་བཅུ་དག་ཏུ་འོད་ཟེར་རྣམ་པར་བཀྱེ་མཛད་དེ། །ཡེ་ཤེས་ཟེར་གྱིས་བློ་ཡི་པདྨ་ཁ་འབྱེད་པ། །སྨྲ་བའི་ཉི་མ་ཅིས་སླད་དེ་རིང་བཏང་སྙོམས་བཞུགས། །དམ་པའི་ཆོས་ཀྱི་རྔ་བོ་ཆེ་ནི་བརྡུང་དུ་གསོལ། །དམ་པའི་ཆོས་ཀྱི་དུང་ནི་རབ་ཏུ་འབུད་དུ་གསོལ། །དམ་པའི་ཆོས་ཀྱི་སྡོང་བུ་བསྒྲེང་བར་མཛད་དུ་གསོལ། །དམ་པའི་ཆོས་ཀྱི་མར་མེ་སྦར་བར་མཛད་དུ་གསོལ། །ཞེས་བརྗོད་ནས་ཙན་དན་གྱི་ཕྱེ་མས་གཏོར་བ་ལས། སྟོན་པས་ཅང་མི་གསུང་བ་གནང་བའི་བརྡར་རིག་ནས་རང་གནས་སུ་སོང་སྟེ། དེ་ཉིད་ཀྱིས་དགེ་རྩ་བསམ་གྱིས་མི་ཁྱབ་པ་དང་ཡང་ཡང་བསྐུལ་ན་འཕེལ་བར་རིག་ནས་བརྒྱ་བྱིན་འཁོར་བཅས་ཀྱང་སྦྲན་ཏེ་བརྒྱ་བྱིན་གྱིས་ནོར་བུ་རིན་པོ་ཆེ་ཕུལ་ཏེ་གསོལ་པ། ཟླ་བ་ཉ་པ་གཟའ་ལས་ཐར་པ་ལྟར། །ཐུབ་པ་ཁྱོད་ཀྱི་ཐུགས་ནི་རྣམ་པར་གྲོལ། །གཡུལ་ལས་རྣམ་པར་རྒྱལ་བ་བཞེངས་སུ་གསོལ། །ཞེས་ཞུས་པས་ཀྱང་མ་གནང་། དེ་ནས་ཚངས་པས་སླར་ཡང་གསེར་གྱི་འཁོར་ལོ་རྩིབས་སྟོང་དང་ལྡན་པ་ཕུལ་ཏེ་ཞུས་པ། གཡུལ་ལས་རྣམ་པར་རྒྱལ་བ་བཞེངས་སུ་གསོལ། །འཇིག་རྟེན་མུན་པར་ཤེས་རབ་འོད་དབྱུང་གསོལ། །ཀུན་ནས་འཚལ་བར་གྱུར་པ་མཆིས་ལགས་ཀྱིས། །ཐུབ་པ་ཁྱོད་ཀྱིས་ཆོས་ནི་བསྟན་དུ་གསོལ། །ཞེས་བསྐུལ་པས། སྟོན་པས། སྐྱེ་དགུ་འདོད་པ་རྣམས་ཀྱིས་བཅིངས། །ཉོན་མོངས་རྒྱུན་གྱིས་རབ་ཏུ་བདས། །ང་ཡིས་ཚེགས་ནི་ཆེན་པོས་རྙེད། །དེ་ལྟ་བས་ན་བསྟན་མི་ཕན། །ཚངས་པ་ང་ཡིས་ཐ་བ་ཀུན། །བཅོམ་ནས་ཚེགས་ཆེན་གྱིས་རྟོགས་པས། །ཆོས་འདི་སྲིད་པའི་འདོད་ཆགས་ཀྱིས། །དཀྲིགས་པས་བདེ་བླག་རྟོགས་མ་ཡིན། །ཞེས་གསུངས་ནས་མ་གནང་བ་དང་། ཡང་ཞུས་པ། མ་ག་དྷཱ་ཡི་ཡུལ་འདིར་སྔོན་ཆད་ཆོས། །མ་དག་དྲི་མ་རྗེས་སུ་འབྲེལ་བ་བྱུང་། །བདུད་རྩིའི་སྒོ་མོ་དབྱེ་བར་མཛོད་ཅིག་ཆོས། །རྡུལ་བྲལ་དྲི་མ་མེད་པ་བཤད་དུ་གསོལ། །ཞེས་པ་དང་། འཁོར་ལོ་བཞེས་ཏེ་བཀའ་སྩལ་པ། ཚངས་པ་མ་ག་དྷཱ་ཡི་སེམས་ཅན་གང་། །སྐལ་བར་ལྡན་ཞིང་དད་དང་ཤེས་རབ་ལྡན། །མི་འཚེ་འདུ་ཤེས་རྟག་ཏུ་ཆོས་ཉན་པ། །དེ་དག་ལ་ནི་བདུད་རྩིའི་སྒོ་དབྱེའོ། །ཞེས་བཀའ་སྩལ་པས་སྐད་ཅིག་ལ། དེ་བཞིན་གཤེགས་པས་ཆོས་ཀྱི་འཁོར་ལོ་བསྐོར་བར་གནང་ངོ་ཞེས་བྱ་བའི་སྒྲས་འོག་མིན་གྱི་བར་དུ་ཁྱབ་སྟེ་སོ་སོ་ནས་མཆོད་པའི་ཚོགས་དང་བཅས་ལྷགས་སོ། །དེའི་ཚེ་ལྷ་སྲིད་མཆོག་དང་ཤིང་གི་ལྷ་མོ་བཞིས་གསོལ་པ། ཆོས་ཀྱི་འཁོར་ལོ་གང་དུ་བསྐོར། བཀའ་སྩལ་པ། ཝཱ་རཱ་ཎ་སཱིར་རོ། །ཡང་གསོལ་པ། དེར་ནི་མི་རུང་སྟེ་ལྗོན་ཤིང་གི་གྲིབ་མ་ཉུང་བ་དང་སྐྱེ་བོ་མང་པོའི་ཚོགས་དང་མི་ལྡན་པས་སོ། །བཀའ་སྩལ་པ། དེར་ནི་ང་ཡིས་མཆོད་སྦྱིན་སྟོང་ཕྲག་ཁྲག་ཁྲིག་དྲུག་ཅུས་མཆོད། །ཝཱ་རཱ་ཎ་སཱི་དམ་པ་དེ་ནི་སྔོན་གྱི་དྲང་སྲོང་རྣམས་ཀྱི་གནས། །དེ་ཕྱིར་དྲང་སྲོང་ཞེས་བྱའི་གནས་མཆོག་དེར་ནི་འཁོར་ལོ་དམ་པ་བསྐོར། །ཞེས་གསུངས་ནས་ཐོག་མར་གདུལ་བར་བྱ་བ་ནི་རྣམ་པ་བཟང་བ། གདུལ་སླ་བ་སྦྱོང་སླ་བ། དུག་གསུམ་གྱིས་སྟོབས་ཆུང་བ། རྣམ་པར་ཤེས་པ་ལྐོག་ཏུ་མ་གྱུར་པའི་རིགས་ཅན་ཞིག་ལ་བསྟན་པར་དགོངས་པ་དང་། དེ་ལྟ་བུ་ནི་ལྷག་སྤྱོད་དང་རིང་འཕུར་དུ་མཁྱེན་ཀྱང་སྔ་མ་འདས་ནས་ཞག་བདུན་དང་། ཕྱི་མ་ཚེའི་འདུ་བྱེད་བཏང་བར་གྱུར་ནས་ཞག་གསུམ་ལོན་པས་སྐབས་སུ་མ་གྱུར་ཏོ། །དེ་ནས་སྔོན་གྱི་གནས་རྗེས་སུ་དྲན་ནས་ལྔ་སྡེ་བཟང་པོ་ལ་བསྟན་པར་དགོངས། མ་ག་དྷཱ་ནས་གསལ་ལྡན་དུ་གཤེགས་པར་བཞེད་དེ་རིམ་པར་ལྗོངས་རྒྱུ་ཞིང་ཆུ་བོ་གངྒཱའི་འགྲམ་དུ་ཕེབས་པ་ན། མཉན་པས་གྲུ་བཙས་རྩོད་པ་ན་ནམ་མཁའ་ལ་གཤེགས་པས་དེ་དག་འགྱོད་དོ། །ཕྱིས་རྒྱལ་པོ་གཟུགས་ཅན་སྙིང་པོས་དེ་ཤེས་ནས་ཕྱིན་ཆད་རབ་བྱུང་ལ་གྲུ་ཆས་མི་ལེན་པའི་ཁྲིམས་བཅས། དེ་ནས་ཡུལ་ཀ་ཤིར་ལྗོངས་རྒྱུ་ཞིང་གཤེགས་པའི་ལམ་དུ་བྲམ་ཟེ་ཉེ་བར་འཚོ་བ་དང་མཇལ་བས། བྲམ་ཟེས་དྲིས་པ། གོའུ་ཏ་མ་ཁྱོད་ཀྱི་སུ་ལ་ཚངས་པར་སྤྱད། བཀའ་སྩལ་པ། ང་ལ་མཁན་པོ་གང་ཡང་མེད། །ང་དང་འདྲ་བ་ཡོད་མ་ཡིན། །ང་ནི་གཅིག་པུར་རྫོགས་སངས་རྒྱས། །བསིལ་གྱུར་ཟག་པ་ཟད་པ་ཡིན། །ཞེས་གསུངས་པ་དང་། ཡང་དྲིས་པ། ཁྱོད་དགྲ་བཅོམ་པ་ཡིན་ནམ། བཀའ་སྩལ་པ། ང་ཉིད་འཇིག་རྟེན་དགྲ་བཅོམ་སྟེ། །ང་ནི་སྟོན་པ་བླ་ན་མེད། །ལྷ་དང་ལྷ་མིན་དྲི་ཟར་བཅས། །ང་ནི་དོ་ཟླའི་གང་ཟག་མེད། །ཅེས་གསུངས་པ་དང་། ཡང་དྲིས་པ། ཁྱོད་རྒྱལ་བར་ཁས་འཆེ་འམ། བཀའ་སྩལ་པ། གང་དག་ཟག་པ་ཟད་བརྙེས་པ། །ང་ནི་སྡིག་པའི་ཆོས་ལས་རྒྱལ། །དེ་བས་ཉེས་བཅོམ་རྒྱལ་བ་ཡིན། །ཞེས་གསུངས་པ་དང་། ཡང་དྲིས་པ། གོའུ་ཏ་མ་གར་འགྲོ། བཀའ་སྩལ་པ། ང་ནི་ཝཱ་རཱ་ཎ་སཱིར་འགྲོ། །གྲོང་ཁྱེར་གསལ་ལྡན་དེར་སོང་ནས། །ལོང་བ་ལྟ་བུའི་སེམས་ཅན་ལ། །ཆོས་ཀྱི་སྒྲོན་མེ་སྤར་དུ་འགྲོ། །འོན་པ་ལྟ་བུའི་སེམས་ཅན་ལ། །ཆོས་ཀྱི་རྔ་ཆེན་བརྡུང་དུ་འགྲོ། །ཞེས་གསུངས་ཏེ། ཝཱ་རཱ་ཎ་སཱིར་གཤེགས་ནས་བསོད་སྙོམས་བཞེས། ཟས་ཀྱི་བྱ་བ་མཛད་ནས་དྲང་སྲོང་ལྷུང་བ་རི་དྭགས་ཀྱི་ནགས་ན་ལྔ་སྡེ་གནས་པའི་དྲུང་དུ་གཤེགས་སོ། །དེར་ལྔ་སྡེས་དེ་བཞིན་གཤེགས་པ་རྒྱང་རིང་པོ་ནས་གཤེགས་པ་མཐོང་ནས་འདི་སྐད་དུ། དགེ་སྦྱོང་གོའུ་ཏ་མ། ལྷོད་པ། མང་དུ་ཟ་བ། སྤོང་བ་ལས་ཉམས་པ་འདིར་འོང་གིས་སུས་ཀྱང་བསུ་བར་མི་བྱ། ལྡང་བར་མི་བྱ་ཆོས་གོས་དང་ལྷུང་བཟེད་བླང་བར་མི་བྱ། སྟན་ལྷག་མ་འདི་ལ་འདོད་ན་འདུག་ཏུ་ཆུག་ཅིག་ཟེར་བ་ལ་སོགས་པའི་ནང་ཁྲིམས་བཅས་ནའང་། སྟོན་པ་བྱོན་པ་དང་ཟིལ་མ་བཟོད་པར་ལྔ་སྡེ་རྣམས་སྟན་ལས་ལངས་ཏེ་རིམ་གྲོ་དང་ཕུ་དུད་ཆེན་པོས་གོང་དུ་བཀུར་བས་འགོ་ཁྲིམས་ཀྱི་བཅའ་བ་བྱེ་མའི་ཆངས་པ་བཞིན་དུ་ཞིག་པར་གྱུར་ཏོ། །དེར་སྟོན་པས་གདན་བཤམས་པ་ཉིད་ལ་བཞུགས་ནས་གསུང་གི་བདུད་རྩིས་སྤྲོ་བ་བསྐྱེད་པ་ན། ལྔ་སྡེས་གསོལ་བ། ཚེ་དང་ལྡན་པ་གོའུ་ཏ་མ་དབང་པོ་གསལ་ལ་པགས་པ་ནི་ཡོངས་སུ་དག་ན་ཡེ་ཤེས་མཐོང་བའི་ཁྱད་པར་མངོན་དུ་མཛད་དམ། བཀའ་སྩལ་པ། ཁྱོད་དེ་བཞིན་གཤེགས་པ་ལ་ཚེ་དང་ལྡན་པ་མ་ཟེར་ཞིག །ཡུན་རིང་པོར་མི་བདེ་བར་འགྱུར་ཏ་རེ། ངས་ནི་བདུད་རྩི་ཐོབ་བོ། །སངས་རྒྱས་སོ། །ཐམས་ཅད་མཁྱེན་པའོ། །ཐམས་ཅད་གཟིགས་པའོ་ཞེས་པ་ལ་སོགས་པའི་མཐར། ཁྱེད་ཅག་གིས་འདི་ལྟ་བུའི་འགོ་ཁྲིམས་མ་བཅས་སམ། ཞེས་མཚང་བརྟོལ་བས། དེ་དག་རྣམས་མུ་སྟེགས་ཀྱི་རྟགས་སྐད་ཅིག་ལ་མེད་པར་གྱུར་ནས། གནོང་ཞིང་འགྱོད་དེ་སྟོན་པའི་ཞབས་ལ་སྤྱི་བོའི་ཅོད་པན་གྱིས་འདུད་པར་བྱེད་ཅིང་ཉེས་བྱས་ཀྱི་ཕུང་པོ་ལ་བཤགས་སྡོམ་གྱིས་མེ་ལྕེ་སྦར་བ་ལས། ཡང་དག་པའི་ལམ་ལ་ངེས་ཤེས་འདྲོངས་ཤིང་། ཐོག་མཐའ་བར་གསུམ་དུ་དགེ་བའི་ཆོས་ཉིད་ཅན་མཚམས་སྤྲིན་གྱི་བླ་གོས་གཡོགས་པའི་དགེ་སློང་གི་དངོས་པོར་གྱུར་ཏོ། །དེར་ཁྱིམ་པ་བཞིན་དུ་བགོ་བ་ལ། དང་པོར་བཅའ་བའི་གཞི་འདུལ་བའི་སྡེ་སྣོད་ལས། ཆོས་གོས་ཅི་ནས་ཀྱང་ཟླུམ་པོར་བགོ་བ་ལ་བསླབ་པར་བྱའོ། །ཞེས་བྱ་བ་ལ་སོགས་པའི་བསླབ་པ་བཅས་སོ། །དེ་ནས་ཆུ་སྟོད་ཟླ་བའི་ཚེས་བཞི་ལ་ཆོས་ཀྱི་འཁོར་ལོ་ཆེན་པོ་གང་དུ་བསྐོར་སྙམ་དུ་དགོངས་པ་དང་། སྔོན་གྱི་རྒྱལ་བས་གང་དུ་བསྐོར་བའི་ས་དེར་རིན་པོ་ཆེ་བདུན་གྱི་ཁྲི་སྟོང་བྱུང་བའི་འདས་པའི་སངས་རྒྱས་གསུམ་གྱི་ཁྲི་ལ་གུས་པ་དང་ཕུ་དུད་བསྐྱེད་ཕྱིར་ཕྱག་དང་བསྐོར་བ་མཛད་ནས་བཞི་པའི་སྟེང་དུ་སྐུ་གསེར་གྱི་གཏན་པ་ཕྱིས་པ་ལྟ་བུ་བག་ཚ་བ་མེད་པ་ལྷམ་མེར་བཞུགས་སོ། །དེ་ནས་དགེ་སློང་ལྔ་པོས་ཀྱང་ཕྱག་བཙལ། གུས་པའི་ཚུལ་གྱིས་འདུག་ཚེ་སྐུ་ལས་འོད་ཟེར་བཀྱེ་བས་ལྟས་བཅོ་བརྒྱད་བྱུང་། སྡུག་བསྔལ་གྱི་རྒྱུན་བཅད། ཕྱོགས་བཅུའི་སངས་རྒྱས་བྱང་སེམས་དང་ལྷ་ཀླུ་གནོད་སྦྱིན་དྲི་ཟ་ལྷ་མ་ཡིན་ནམ་མཁའ་ལྡིང་སོགས་བསམ་གྱིས་མི་ཁྱབ་པ་སྐད་ཅིག་ལ་ལྷགས་ནས་ཞབས་ལ་བཏུད་དེ་འདུག་གོ །དེའི་ཚེ་ཚངས་པས་གསེར་ལས་བྱས་པའི་འཁོར་ལོ་རྩིབས་སྟོང་དང་ལྡན་པ། རྣམ་པ་ཐམས་ཅད་ཀྱིས་བརྒྱན་པ། ཉིན་མོར་བྱེད་པ་ལ་ཅོ་འདྲི་བ། སྔོན་གྱི་རྒྱལ་བས་བཞེས་པ་དེ་ཕུལ་ནས་ཆོས་ཀྱི་འཁོར་ལོ་བསྐོར་བ་ལ་ཡིད་གཞུངས་པས་གསོལ་བ་བཏབ་བོ། །དེའི་ཚེ་རི་དྭགས་རུ་རུ་གསེར་གྱི་ཁ་དོག་ཅན་ཟུང་ནགས་ནས་ཐོན་ཏེ་འཁོར་ལོའི་རྩེ་མོ་ལ་ལྟ་ཞིང་འཁོད་དོ། །འདུས་པའི་འཁོར་རྣམས་ཀྱང་དེ་བཞིན་གཤེགས་པའི་ཞལ་ཁོ་ན་ལ་ལྟ་ཞིང་འདུག་པ་ན་རྒྱལ་བ་ཉིད་ནམ་སྟོད་ལ་ཅང་མི་གསུང་བར་བཞུགས། དགུང་ཐུན་ལ་འབེལ་བར་གྱུར་པའི་མཆིད་གླེང་། ནམ་གྱི་ཆ་སྨད་ན་ལྔ་སྡེ་ལ། དགེ་སློང་དག་མཐའ་གཉིས་པོ་འདི་དག་ནི་རབ་ཏུ་བྱུང་བས་འཇུག་པར་བྱ་བ་མ་ཡིན་ཏེ། འདོད་པ་བསོད་སྙོམས་ཀྱི་མཐའ་དང་ངལ་ཞིང་དུབ་པའི་མཐའོ། །དེ་བས་ན་མཐའ་གཉིས་སྤངས་ནས་དབུ་མའི་ལམ་གྱི་དེ་བཞིན་གཤེགས་པས་ཆོས་སྟོན་ཏོ། །ཞེས་པས་གོ་ཕྱེ་ནས་འཁོར་ལོ་དང་པོ་བདེན་པ་བཞིའི་ཆོས་འཁོར་རྣམ་པ་བཅུ་གཉིས་སུ་བསྐོར་བའི་གསུང་གཅིག་གིས་དུ་མ་ཉིད་དུ་སོ་སོར་འཚམ་པའི་གཏམ་ཐེག་གསུམ་ཐ་དད་པར་ཐོས་པས་སྟོང་ཆེན་འདི་ན་བདེན་བཞི་གཅིག་པོའི་མིང་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་བཞིར་ཡོད་པ་ཅིག་ཆར་དུ་གྲགས་སོ། །དེའི་ཚེ་ལྷ་རྣམས་ཀྱིས་བསྔགས་པ་བརྗོད། འདུས་པ་དང་པོ་ལ་ཀཽཎྜི་ནྱ་དང་ལྷ་མང་པོ་ལ་མཐོང་ལམ་སྐྱེས། གཉིས་པར་དེ་དགྲ་བཅོམ་པས་དཀོན་མཆོག་གསུམ་འགྲུབ། གཞན་བཞི་ལ་མཐོང་ལམ་སྐྱེས། གསུམ་པ་ལ་བཞི་པོས་ཀྱང་དགྲ་བཅོམ་པ་ཐོབ། དེའི་ཚེ་ལྔ་སྡེ་བཟང་པོས་ཆོས་འཁོར་བསྐོར་བའི་མཆོད་རྟེན་བཀྲ་ཤིས་སྒོ་མང་བརྩེགས་སོ། །དེ་ནས་མ་ག་དྷཱར་གཤེགས། བཟང་སྡེའི་ཚོགས་དྲུག་ཅུ་རྣམས་ལ་ཆོས་བསྟན་པས་དགྲ་བཅོམ་སྟེ་ལྗོངས་རྒྱུ་བར་བཏང་། སེར་སྐྱའི་བྲམ་ཟེ་ཆུང་མར་བཅས་དང་འོ་ཐུག་འབུལ་བའི་བུ་མོ་ལེགས་སྐྱེས་མ་གཉིས་ལ་ཆོས་བསྟན་པས་བདེན་པ་མཐོང་། ལྟེང་རྒྱས་འོད་སྲུངས་ཞེས་ལོ་བརྒྱ་ཉི་ཤུ་ལོན་ལ་སྲིད་རྩེའི་ཏིང་ངེ་འཛིན་ཐོབ་པ་མི་རྣམས་ཀྱིས་དགྲ་བཅོམ་པར་བརྩི་བ་འཁོར་རལ་པ་ཅན་ལྔ་བརྒྱ་དང་། དེའི་སྤུན་གཉིས་ལ་འཁོར་ཉིས་བརྒྱ་ལྔ་བཅུ་རེ་དང་བཅས་པ་ནཻ་རཉྫ་ནའི་འགྲམ་དུ་དཀའ་ཐུབ་ལ་གནས་པའི་རྩར་བྱོན་ནས་རྫུ་འཕྲུལ་གྱིས་སྤ་བཀོང་བར་བྱས་ཏེ་བཏུལ་ཞིང་བདེན་པ་ལ་བཀོད། བྲམ་ཟེ་གནས་ངན་ལེན་གྱི་བུ་མོ་ཤ་རི་ཀ་དང་བྲམ་ཟེ་དཀར་རྒྱལ་འདུས་པ་ལས་བྱུང་བའི་སྒྲིབ་པ་རྣམ་སེལ་གྱི་སྤྲུལ་པ་ཤཱ་རིའི་བུ་དང་། རྒྱལ་པོའི་ཁབ་ཀྱི་མདུན་ན་འདོན་ཀཽཎྜི་ནྱ་གྲུ་འཛིན་ཕྱུག་པོར་ཆུང་མ་མཽངྒལ་དང་འདུས་པ་ལ་བུ་བཙས་པ་མཽངྒལ་གྱི་བུ་སྟེ། དེ་གཉིས་ཀ་རིག་བྱེད་ལ་གོམས་པས། སློབ་མ་གཉིས་བརྒྱ་ལྔ་བཅུ་དང་བཅས་སྟོན་པའི་སྤྱན་སྔར་ཚུར་ཤོག་གིས་བསྙེན་པར་རྫོགས་པས་ཤེས་རབ་ཅན་གྱི་མཆོག་ཤཱ་རིའི་བུ་དང་། རྫུ་འཕྲུལ་ཅན་གྱི་མཆོག་མཽངྒལ་གྱི་བུ་སྟེ་མཆོག་ཟུང་དུ་གྲགས་པ་ཡང་མི་རིང་བར་དགྲ་བཅོམ་ཐོབ། འོད་སྲུངས་ཀྱི་རིགས་ལ་ནྱ་གྲོ་དྷཱ་སྐྱེས་ཞེས་བྱ་བ་འདོད་པ་སྤངས་པ་ཞིག་ཡོད་པ་ཕ་མས་རབ་ཏུ་འབྱུང་བར་མ་གནང་ནས་ལོ་བཅུ་གཉིས་ཁྱིམ་དུ་གནས། མཐར་ཕ་མ་འདས་པ་དང་ཁྱིམ་གྱི་འབྱོར་པ་སྦྱིན་པར་བཏང་སྟེ་རྒྱལ་པོའི་ཁབ་ཏུ་འོངས་པ་སྟོན་པ་དང་མཇལ་བས་དེར། བཙུན་པ་བཅོམ་ལྡན་འདས་བདག་གི་སྟོན་པ་ལགས་ཀྱིས། བདག་ནི་ཁྱོད་ཀྱི་ཉན་ཐོས་ལགས་སོ་ཞེས་ཞུས་པར། སྟོན་པས་ཀྱང་གནང་བས་རབ་ཏུ་བྱུང་ཞིང་བསྙེན་པར་རྫོགས། ཕུང་པོ་ལྔའི་གདམས་ངག་གནང་སྟེ་བསྒོམས་པས་ཉི་མ་དེ་ལ་རྒྱུན་ཞུགས་ཐོབ། ཞག་བརྒྱད་ཀྱི་བར་སློབ་པའི་ས་ལ་འདས་པར་བྱས་ནས་ཉི་མ་དགུ་པར་དགྲ་བཅོམ་པས་ཉན་ཐོས་འོད་སྲུངས་ཆེན་པོར་གྲགས་ཤིང་ཆོག་ཤེས་པ་རྣམས་ཀྱི་མཆོག་ཏུ་བསྔགས། དེ་བཞིན་དུ་གསང་བའི་བདག་པོ་ཐོས་པ་འཛིན་ཅིང་བཀའི་བསྡུ་བ་བྱེད་པའི་ཕྱིར་ཉན་ཐོས་ཀྱི་ཟོལ་ལ་བརྟེན་པ་ཀུན་དགའ་བོས་མཚོན་ཤཱཀྱའི་རིགས་ཇི་སྙེད་ཅིག་དང་། སྲུ་སྒྱུ་འཕྲུལ་མ་ལ་སོགས་བཙུན་མོའི་ཚོགས་བསམ་གྱིས་མི་ཁྱབ་པ། གཞན་ཡང་བྲམ་ཟེའི་རིགས་དང་དམངས། ཕྱི་རོལ་པ་ལ་སོགས་པ་གདུལ་བར་བྱ་བ་དཔག་ཏུ་མེད་པ་བསྟན་པ་ལ་བཙུད། སྐབས་སོ་སོའི་ཐད་ཀར་ཡུལ་གྱི་རྐྱེན་ཐ་དད་པས་བསྐུལ་བ་ལྟར་དམ་པའི་ཆོས་འདུལ་བ་ལ་ལེགས་པར་གནས་པའི་བཅའ་བ་མཛད་པ་སོགས་འདུལ་བའི་སྡེ་སྣོད་ལས་རྒྱ་ཆེར་བཤད་པ་ལྟར་སོ་སོར་ཐར་པ་རིགས་བདུན་གྱི་གོ་འཕང་ལ་བཞག་པ་སྟེ། ཆོས་ཀྱི་འཁོར་ལོ་དེས་ནི་སྐྱེས་བུ་ཆུང་ངུའི་ལམ་ཞར་ལ་བསྟན་ཅིང་། སྐྱེས་བུ་འབྲིང་གི་ལམ་གཙོ་བོར་བསྟན་པ་ཡིན་ནོ། །བཀའ་བར་པ་མཚན་ཉིད་མེད་པའི་ཆོས་འཁོར་ནི། གནས་བྱ་རྒོད་ཕུང་པོའི་རི་ལ། སྟོན་པ་ཤཱཀྱ་ཐུབ་པས། ཐུན་མོང་གི་འཁོར་རྣམ་པ་བཞི་ལས། ཤཱ་རིའི་བུ་དང་། མཽངྒལ་གྱི་བུ་ལ་སོགས་པ་དགྲ་བཅོམ་པ་ལྔ་སྟོང་ཙམ་དང་། ཡུམ་སྐྱེ་དགུའི་བདག་མོ་ལ་སོགས་པ་དགེ་སློང་མ་ལྔ་བརྒྱ་ཙམ་དང་། ཁྱིམ་བདག་མགོན་མེད་ཟས་སྦྱིན་དང་དགེ་བསྙེན་མ་ས་ག་ལ་སོགས་པའི་དགེ་བསྙེན་དང་དགེ་བསྙེན་མའི་ཚོགས་དང་། ལྷ་དང་ཀླུ་དང་ལྷ་མ་ཡིན་དང་། དྲི་ཟ་ལ་སོགས་པ་རབ་ཏུ་མང་པོ་དང་། ཐུན་མོང་མ་ཡིན་པའི་འཁོར་ས་ཆེན་པོ་ལ་གནས་པའི་བྱང་ཆུབ་སེམས་དཔའ་བཟང་སྐྱོང་དང་། རིན་ཆེན་འབྱུང་ལྡན་དང་། དྲྭ་བ་སྦྱིན་ལ་སོགས་པ་རབ་ཏུ་མང་པོ་རྣམས་དང་ཐབས་གཅིག་ཏུ། དེ་བཞིན་གཤེགས་པ་ཉིད་ཀྱིས་གདན་སེང་གེའི་ཁྲི་བཤམས་ནས་ཆོས་ཀྱི་འཁོར་ལོའི་ཕྱག་རྒྱ་བཅིང་བ་སྔོན་དུ་འགྲོ་བས། གང་གི་སྐུ་གསེར་གྱི་མཆོད་སྡོང་ལྟ་བུ་སྐྱིལ་མོ་ཀྲུང་བཅས་ནས་དྲང་པོར་བསྲངས། དྲན་པ་མངོན་དུ་བཞག་པར་མཛད་ནས་རྣམ་པར་ཐར་པའི་སྒོ་སྟོང་པ་ཉིད་ནི་གཞི། རྣམ་པར་ཐར་པའི་སྒོ་མཚན་མ་མེད་པ་ནི་ལམ། རྣམ་པར་ཐར་པའི་སྒོ་སྨོན་པ་མེད་པ་ནི་འབྲས་བུ་སྟེ་ཆོ་འཕྲུལ་རྣམ་པ་གསུམ་གྱིས་ཐོག་མ་དང་བར་དང་ཐ་མར་དགེ་བ་ལ་སོགས་པ་དང་ལྡན་པའི་ཤེས་རབ་ཀྱི་ཕ་རོལ་ཏུ་ཕྱིན་པ་རྣམས་རྗེས་སུ་སྟོན་པར་མཛད། དེ་ཡང་ཚིག་ལྷུར་ལེན་ཞིང་རྒྱས་པ་ལ་དགའ་བའི་གདུལ་བྱ་རྗེས་སུ་བཟུང་ཕྱིར་འཕགས་པ་སྟོང་ཕྲག་བརྒྱ་པ་སྤྲོས་ཏེ། བར་མ་ལ་དགའ་བའི་རིགས་ལ་སྟོང་ཕྲག་ཉི་ཤུ་ལྔ་པ་དང་། ཁྲི་བརྒྱད་སྟོང་པ། ཤེས་རབ་ཁྲི་པ། མགོ་སྨོས་པས་གོ་བ་རྣམས་ཀྱི་ཆེད་དུ་སྙིང་པོར་དྲིལ་བ་བརྒྱད་སྟོང་པ། ཚིགས་སུ་བཅད་པ་ལ་ཡིད་ཕྱོགས་པ་རྣམས་ཀྱི་དོན་དུ་ཤེར་ཕྱིན་གྱི་དོན་ཐམས་ཅད་བསྡུས་ནས་ཡོན་ཏན་རིན་པོ་ཆེ་སྡུད་པ་གསུངས་ཤིང་། དེའི་ཚེ་ལྷའི་བུ་དག་གིས་སྨྲས་པ། ཀྱེ་མ་ཨ་ལ་ལ་འཛམ་བུའི་གླིང་དུ་ཆོས་ཀྱི་འཁོར་ལོ་གཉིས་པ་བསྐོར་བ་མཐོང་ངོ་ཞེས་ཆེད་དུ་བརྗོད་ལ། ཆོས་ཀྱི་རྣམ་གྲངས་འདི་ལ་སྐྱེས་བུ་ཆེན་པོའི་ལམ་ཕ་རོལ་ཏུ་ཕྱིན་པའི་ཚུལ་ཞེས་གྲགས་ཏེ་དེ་སྐད་དུ་ཐམས་ཅད་མཁྱེན་པ་པྲ་ཛྙ་ཱརསྨིས། རྒྱུ་དང་འབྲས་བུའི་ཐེག་ཆེན་རྣམ་གཉིས་ལས། །ཇི་བཞིན་གསུངས་པའི་གསང་བ་མ་ལུས་པ། །སྐྱེས་བུ་ཆེན་པོའི་ལམ་གྱི་རིམ་པ་སྟེ། །ཞེས་སོ། །འཁོར་ལོ་གསུམ་པ་ནི། གནས་གྲོང་ཁྱེར་ཡངས་པ་ཅན་ལ་སོགས་མ་ངེས་པ་དག་ཏུ། འཁོར་ཐེག་པ་ཆེན་པོ་ཡང་དག་ལ་ཞུགས་པའི་གདུལ་བྱ་རིགས་ཅན་སྣ་ཚོགས་པ་ལ་གསུངས་ཤིང་། དེའི་གཞི་ཀུན་བརྟགས་གཞན་དབང་། ཡོངས་གྲུབ་སྟེ་རྣམ་པ་གསུམ་ལས་བརྩམས་ཏེ་གསུངས་ལ། དེ་ལྟར་འཁོར་ལོ་གསུམ་དུ་བཞག་པའི་བཀའ་དང་པོ་རྗོད་བྱེད་འདུལ་བའི་སྡེ་སྣོད་ཀྱིས་བརྗོད་བྱ་ལྷག་པའི་ཚུལ་ཁྲིམས་ཀྱི་བསླབ་པ། བཀའ་བར་པ་རྗོད་བྱེད་མདོ་སྡེའི་སྡེ་སྣོད་ཀྱིས་བརྗོད་བྱ་ལྷག་པ་ཏིང་ངེ་འཛིན་གྱི་བསླབ་པ། བཀའ་ཐ་མ་རྗོད་བྱེད་མངོན་པའི་སྡེ་སྣོད་ཀྱིས་བརྗོད་བྱ་ལྷག་པ་ཤེས་རབ་ཀྱི་བསླབ་པ་བསྟན་པར་འདོད་པ་གཙོ་ཆེ་བའི་དབང་གིས་སྨོས་པ་སྟེ། དབྱེ་ན་བཀའ་དང་པོ་ལའང་འདུལ་བའི་འདུལ་བ། འདུལ་བའི་མདོ་སྡེ། འདུལ་བའི་མངོན་པ་དང་། དེ་བཞིན་དུ་བར་པ་ལ། མདོ་སྡེའི་འདུལ་བ། མདོ་སྡེའི་མདོ་སྡེ། མདོ་སྡེའི་མངོན་པ་དང་། ཐ་མ་ལ། མངོན་པའི་འདུལ་བ། མངོན་པའི་མདོ་སྡེ། མངོན་པའི་མངོན་པ་སྟེ། སྡེ་སྣོད་གསུམ་ཀའི་རྣམ་གཞག་བཀའ་ཐ་དད་པར་ཚང་བའི་ཆོས་ཅན་ནོ། །དེའང་ཐུན་མོང་མ་ཡིན་པའི་ལུགས་ནི། གདུལ་བྱའི་བློ་ལ་ལྟོས་ནས་རིམ་གྱིས་འཇུག་པའི་ལས་ཅན་རྣམས་ལ་འཁོར་ལོ་གསུམ་རིམ་པར་གསུངས་པར་སྣང་ཞིང་། དུས་ཅིག་ཆར་དུ་འཇུག་པའི་བློ་ཅན་རྣམས་ལ། བྱ་བ་རྫོགས་པའི་སྐད་ཅིག་ལ་བསྟན་པ་ལྟར་སྣང་སྟེ། མདོ་སྡེ་ཡོན་ཏན་བཀོད་པའི་རྒྱལ་པོ་ལས། ང་ཡིས་ཅི་ཡང་མ་གསུངས་པར། །སེམས་ཅན་རྣམས་ལ་ཁྱབ་གདལ་སྣང་། །གང་ཚེ་རིམ་གྱིས་མངོན་འདོད་པ། །དེ་དག་ཀུན་ལ་དེ་བཞིན་ཏེ། །དུས་གཅིག་ཉིད་དུ་འཇུག་པ་ལ། །ཆོས་ཀྱི་རྣམ་གྲངས་རྫོགས་པར་སྣང་། །ཡིད་བཞིན་རེ་བ་རྣམས་བསྐངས་པའི། །གསུང་གི་ཆེ་བ་དེ་ཉིད་དོ། །ཞེས་གསུངས་པའི་ཕྱིར་རོ། །འགའ་ཞིག་ཐེག་པ་ཆེ་ཆུང་གིས་ཁྱད་པར་ལས་གདུལ་བྱའི་སྣང་ངོ་དང་བསྟུན་ནས་བཤད་པའི་འགྲེལ་ཚུལ་ཁོག་ཡངས་པར་མི་ཤེས་པས་ཕྱོགས་སུ་ལྷུང་བ་ཉིད་དུ་སྨྲ་བ་ནི་རིགས་པ་མ་ཡིན་ཏེ། ཤིང་རྟ་ཆེན་པོ་ཀློང་ཆེན་པས། འདིར་སློབ་དཔོན་ཁ་ཅིག་འཁོར་ལོ་གསུམ་པོ་དུས་གཅིག་ཏུ་བསྐོར་བ་ཁོ་ནར་འདོད་པ་དང་། ཁ་ཅིག་རིམ་པས་སྟོན་པར་འདོད་པ་གཉིས་ཀས་ཐུན་མོང་དང་ཐུན་མོང་མ་ཡིན་པ་དབང་པོའི་ཁྱད་ཀྱིས་ཕྱེ་བའི་དོན་ལ་རྨོངས་པར་ཟད་དོ། །ཞེས་གསུངས་སོ། །གཞན་ཡང་འཁོར་ལོ་དེ་དག་སྒྲ་ཚིག་རང་མཚན་པ་མ་ཡིན་པར་སྟོན་པའི་ཐུགས་རྗེ་ནི་ནོར་བུ་རིན་པོ་ཆེ་ལྟར་འགྲོ་བའི་མོས་པ་དང་རྗེས་སུ་མཐུན་པར་དོན་འབྱུང་བའི་ཕྱིར་དཀོན་མཆོག་བརྩེགས་པ་ལས། ཞི་བའི་བློ་གྲོས་གང་གི་མཚན་མོ་ལ་མངོན་པར་རྫོགས་པར་སངས་རྒྱས་ནས། གང་གི་མཚན་མོ་མྱ་ངན་ལས་འདས་པའི་བར་དུ་ངས་ཆོས་འབྲུ་གཅིག་ཙམ་ཡང་བསྟན་པ་མེད་དོ། །ཞེས་པའི་རྣམ་གཞག་ལ། དོན་དམ་པར་ཇི་ལྟ་བ་བཞིན་དུ་ཁས་ལེན་ཅིང་། ཀུན་རྫོབ་ཏུ་སྒྲ་ཚིག་རང་ཚན་པར་འདོད་པ་ཡང་ནོར་བ་ཡིན་ཏེ། ཀུན་མཁྱེན་ཆེན་པོས། མི་ཤེས་པ་ཁ་ཅིག་དོན་དམ་དུ་མ་བསྟན། ཀུན་རྫོབ་ཏུ་བསྟན་ཟེར་བ་ཡང་གསུང་ཚིག་དང་ཡི་གེ་ལས་འདས་པ། འགྲོ་བའི་སྣང་བ་དང་མཐུན་པར་ཚིག་དང་ཡི་གེ་ལྟར་སྣང་བ་འབྱུང་བའི་དེ་ཉིད་ལ་རྨོངས་པར་སྣང་ངོ་། །ཞེས་མདོ་ཏིང་འཛིན་རྒྱལ་པོའི་ལུང་དང་བཅས་གསུངས་པའི་ཕྱིར་འདིར་ཆོས་འབྱུང་བའི་གླེང་གཞིའི་སླད་ཙམ་དུ་ཐེག་པ་ཆེ་ཆུང་གི་རྣམ་གཞག་འདྲེས་མར་བཤད་པ་ལའང་ཅ་ཅོ་སྒྲོག་པར་མི་བྱའོ། །འདིར་སྨྲས་པ། རྟེན་འབྱུང་རྩ་བ་མ་རིག་མུན་པའི་ནགས་ཁྲོད་དེར། །སྐྱེ་རྒ་ན་འཆིའི་དྲྭ་བས་གཡོགས་པའི་སེམས་ཅན་རྣམས། །བུ་རམ་ཤིང་པའི་ཐུགས་བསྐྱེད་མཐུ་ཡིས་བཟོད་མིན་པས། །བདུད་རྩིའི་ཆོས་མཆོག་དཔལ་གྱི་བེའུའི་ཟུང་ནས་ཕྱུང་། །མཐའ་བརྒྱད་སྤྲོས་པ་བྲལ་བའི་བུམ་བཟང་དེར། །གསུང་རབ་དགོངས་དོན་བཅུད་དུ་དྲིལ་བའི་ཚེ། །བགྲང་ཡས་ཐེག་པའི་འཇུག་སྒོ་དྲང་བའི་དོན། །རྣམ་ཐར་སྒོ་གསུམ་བརྗོད་བྱའི་ཡུལ་ལས་བརྒལ། །ཐུགས་རྗེ་རྨད་དུ་བྱུང་བའི་ནུས་པའི་གཟུགས། །སྒྲ་དང་བྲག་ཅའི་དངོས་པོས་ཉེར་བཏང་ཡང་། །མོས་པའི་མེ་ལོང་གཙང་མར་འཆར་བ་འདི། །ཤཱཀྱ་སེང་གེའི་ཆོས་ཡིན་གཞན་དུ་མིན། །ཅེས་བར་སྐབས་ཀྱི་ཚིགས་སུ་བཅད་ནས། ད་ནི་གཞན་གྱིས་རྒོལ་བ་མི་བསྲུན་པ་ཚར་བཅད་དེ། ཆོ་འཕྲུལ་ཆེན་པོ་བསྟན་པ་ལ་སོགས་ཕྲིན་ལས་རླབས་པོ་ཆེ་མཐར་ཕྱིན་ནས་མཛད་པ་དབྱིངས་སུ་བཏུལ་བའི་རྣམ་གཞག་ནི། བདག་ཅག་གི་སྟོན་པ་རྒྱལ་པོ་གཟུགས་ཅན་སྙིང་པོས་གཅུང་བསྐུལ་བའི་ཆོས་སྟོན་ལ་སྤྱན་དྲངས། དེའི་ཚེ་མུ་སྟེགས་རྣམས་གྲལ་གོང་དུ་བསྐྱལ་ཡང་སྟོབས་བཅུ་མངའ་བའི་གཟི་བྱིན་གྱིས་དེ་དག་རྣམས་སྟོན་པ་འཁོར་དང་བཅས་པའི་གྲལ་མཇུག་ཏུ་གྱུར་པ་སོགས་ལན་དུ་མར་ནོངས་པས། མུ་སྟེགས་ཀྱི་སྟོན་པ་དྲུག་ལ་ཡོན་བདག་གིས་བསྙེན་མ་བཀུར་བར་ཁྲོས་ཏེ་སངས་རྒྱས་དང་རྫུ་འཕྲུལ་འགྲན་པར་ཞུས་པ་ན། རྒྱལ་པོ་གཟུགས་ཅན་སྙིང་པོས་སངས་རྒྱས་ནི་ཉི་མའི་འོད་དང་འདྲ་བ་ལ། ཁྱོད་ཅག་སྲིན་བུ་མེ་ཁྱེར་ལྟ་བུས་དེ་ལྟར་མི་རིགས་སོ་ཞེས་བརྗོད་པས་མ་དགའ་སྟེ། རྒྱལ་པོ་འདི་གོའུ་ཏ་མའི་ཕྱོགས་བྱེད་དོ། །དེས་ན་ཀོ་ས་ལའི་རྒྱལ་པོ་གསལ་རྒྱལ་དེ་གཟུ་བོར་ཡོད་འདུག་པས་གམ་དུ་འགྲོ་ཞེས་མཉན་ཡོད་དུ་སོང་ནས་གསལ་རྒྱལ་ལ་རྫུ་འཕྲུལ་འགྲན་པའི་དཔང་པོ་བྱེད་པར་གསོལ་བ་ན། དེས་ཀྱང་ཁྱེད་ཅག་ཕམ་གྱིས་དོགས་པའི་ཚིག་གིས་བཀྲལ་བས་མུ་སྟེགས་བྱེད་རྣམས་མ་རངས་ཏེ་ཁྱོད་ཀྱང་གོའུ་ཏ་མས་བསླུས་ཟིན་ཞེས་སྤྱོ་བར་བྱས་པས། རྒྱལ་པོས་ཀྱང་ཁས་བླངས་ཏེ་དེ་བཞིན་གཤེགས་པ་ལའང་དེ་སྐད་དུ་གསོལ་བས་ཞལ་གྱིས་བཞེས་སོ། །དེར་སྟོན་པ་དྲུག་ལ་དེ་སྨྲས་པས་འདི་སྐད་དུ་གོའུ་ཏ་མ་འབྲོས་སམ་གྲོགས་བཙལ་བ་ལས་མ་འདས་བདག་ཅག་རྣམས་ཀྱང་གྲོགས་བཙལ་ལོ་ཞེས་གྱད་ཡུལ་གྱི་ཀུན་ཏུ་རྒྱུ་རབ་བཟང་བསྐུལ་བ་ན། དེས་ཀྱང་སངས་རྒྱས་ལ་འགྲན་ཟླ་མི་སྤོབས་པར་བརྗོད་པས་སླར་དེ་བོར་ནས་གངས་རིའི་མགུལ་གྱི་དྲང་སྲོང་ལྔ་བརྒྱ་རོགས་སུ་སྦྲན་པས། དེ་དག་གིས་ཁས་བླངས་ཏེ་རན་པའི་ཚེ་མཚན་མ་སྟོན་ཅིག་ཅེས་བསྒོའོ། །དེའི་ཚེ་གསལ་རྒྱལ་གྱི་མེས་དབོན་གྱི་གཅུང་ནག་པོའི་ཡན་ལག་དབྱེན་གྱིས་བཅད་ནས་གྲོང་ཁྱེར་གྱི་སྲང་མདོར་བོར་པ་དང་། གཉེན་གྱིས་སྟོན་པ་དྲུག་ལ་འདི་གསོས་པའི་བདེན་ཚིག་བརྗོད་ཅིག་སྨྲས་པས། སྤོབས་པ་མེད་དེ་ཞུམ་ནས་ཅང་མི་སྨྲ་བར་འདུག་གོ །དེར་ཀུན་དགའ་བོས་སངས་རྒྱས་ལ་གསོལ་བས། ཞལ་ནས། དཀོན་མཆོག་གསུམ་མཆོག་ཡིན་པའི་བདེན་པས་འདིའི་ཡན་ལག་སྔར་བཞིན་གྱུར་ཅིག་གསུངས་མ་ཐག་དེ་ཉིད་གསོས་པས། ཀུན་དགའ་བོས་མུ་སྟེགས་ཕམ་པར་བྱས་སོ་ཞེས་པའི་སྒྲ་བསྒྲགས། དེས་རྫུ་འཕྲུལ་ཡང་གྲུབ། དེར་མཉན་ཡོད་ནས་རྒྱལ་བྱེད་བར་ཆོ་འཕྲུལ་གྱི་འདུན་ཁང་ཕུན་སུམ་ཚོགས་པར་དེ་བཞིན་གཤེགས་པ་བཞུགས་པའི་རིན་པོ་ཆེའི་ཁྲི་དང་། ཕྱི་རོལ་པའི་སྟོན་པ་དྲུག་ལའང་རང་རང་གི་འདུན་ཁང་དྲུག་ཁྲི་དང་བཅས་བཤམས་པ་ལ་སོགས་པའི་མཐར་ནམ་མཁར་ཆོ་འཕྲུལ་བལྟ་བ་ལ་ལྷགས་པའི་ལྷའི་ཚོགས་དཔག་གིས་མི་ལང་བ་འདུས་པའི་ཚེ། བཅོམ་ལྡན་འདས་གཙུག་ལག་ཁང་དུ་གཤེགས་ནས་སྒོ་འཕར་གསེབ་ནས་འོད་ཟེར་ཕྱུང་བས་ཆོ་འཕྲུལ་ཆེན་པོའི་འདུན་ཁང་ཐམས་ཅད་བསྲེགས་པ་དང་། སྟོན་པ་དྲུག་ན་རེ། ལྷ་ད་ནི་གོའུ་ཏ་མའི་འདུན་ཁང་ཚིག་གིས་གལ་ཏེ་རྔོ་ཐོགས་ནས་འདིར་མཆིམས་ལ་ཞི་བར་བགྱིད་གྲང་། ཞེས་སྨྲས་པས། རྒྱལ་པོ་འཁོར་བཅས་ཅང་མི་སྨྲ་བར་སེམས་ཁོང་དུ་ཆུད་དོ། །དེར་སངས་རྒྱས་ཀྱི་མཐུས་མེས་འདུན་ཁང་གི་དྲི་ཀུན་བསྲེགས་ནས་རང་ཉིད་ཞི་བདེའི་འདུན་ཁང་མཛེས་པར་གྱུར་པ་དང་། རྒྱལ་པོ་དགའ་ནས་མུ་སྟེགས་རྣམས་ལ་བཅོམ་ལྡན་འདས་ཀྱིས་ཆོ་འཕྲུལ་བསྟན་ཟིན་གྱིས། ད་ནི་ཁྱེད་ཅག་གིས་དུས་ལ་བབས་སོ་ཞེས་བསྐུལ་བས། སྤོབས་པ་མེད་ནས་ཅང་མི་སྨྲ་བར་འདུག་གོ །སླར་ཡང་སྟོན་པས་བཀྲ་ཤིས་ཀྱི་འཁོར་ལོས་མཛེས་པའི་ཞབས་གཡས་པ་ས་ལ་བསྣུན་པས་ས་ཆེན་པོ་འདི་རབ་ཏུ་གཡོས། རྐྱེན་དེས་སྔར་སྟོན་པ་དྲུག་གིས་རོགས་སུ་བཙལ་བའི་རི་སུལ་གྱི་དྲང་སྲོང་ལྔ་བརྒྱ་པོ་ནི་ཤོག་ཅེས་པའི་བརྡར་གོ་ནས་ནམ་མཁའ་ལ་འཕུར་ཏེ་འོངས་པ་ལས། དེ་བཞིན་གཤེགས་པ་མཐོང་བ་ཙམ་གྱིས་དད་པའི་བ་སྤུ་ཁོང་ནས་གཡོས་ཏེ་ཁོང་ཅག་གི་རོགས་བགྱིད་པ་ལྟ་ཅི། སངས་རྒྱས་ལ་ཡན་ལག་ལྔ་ལྡན་གྱི་ཕྱག་གིས་འདུད་ཅིང་། ཆོས་ཉན་པས་བདེན་པ་མཐོང་། རབ་ཏུ་བྱུང་བར་གསོལ་པས་ཚུར་ཤོག་གིས་བསྙེན་པར་རྫོགས་ནས་སླར་དགྲ་བཅོམ། དེ་ནས་བཅོམ་ལྡན་འདས་དགུང་ལོ་ང་དྲུག་པ་ཤིང་མོ་ཡོས་ཀྱི་ལོ་དགུན་ཟླ་ཐ་ཆུང་ལ་ཆོ་འཕྲུལ་གྱི་འདུན་ཁང་དུ་བྱོན། ཟླ་བའི་དཀྱིལ་འཁོར་མཆུས་ཉ་བའི་དུས་ཚོད་དེ་རྒྱལ་ལུགས་ཀྱིས་ལོ་འགོར་འཇོག་པའི་ཚེ་མུ་སྟེགས་ཀྱི་སྟོན་པ་དྲུག་དང་ཆོ་འཕྲུལ་འགྲན་པར་དུས་བཏབ་པ་བཞིན་དུ་ཚོགས་པ་ལས། ལྟད་མོར་ལྷགས་པའི་སྐྱེ་དགུ་མཐའ་ཡས་པའི་དབུས་སུ་ཆོ་འཕྲུལ་ཆེན་པོའི་མཛད་པ་བསྟན་པར་གྲགས་པ་ནི་འདི་ལྟ་སྟེ། ཚེས་གཅིག་ལ་རྒྱལ་པོ་གསལ་རྒྱལ་གྱིས་མཆོད་པའི་ཚེ། ཚེམས་ཤིང་ས་ལ་བཙུགས་མ་ཐག་དཔག་ཚད་ལྔ་བརྒྱའི་དཔངས་དང་མཉམ་པའི་ལྗོན་པར་གྱུར་ཅིང་། དེའང་མེ་ཏོག་ཤིང་རྟའི་འཕང་ལོ་དང་མཉམ་པ། འབྲས་བུ་བྲེ་ལྔའི་བཅུད་ཤོང་བའི་བོངས་ཅན་ཡལ་འདབ་ཀྱི་རྩ་བར་རིན་པོ་ཆེ་སྣ་བདུན་གྱི་བཀྲག་མདངས་སྣང་བས་གླིང་བཞིའི་མུན་པ་སེལ་བ། དེའི་དྲི་དངར་བ་འཐུལ་བས་དབང་པོ་ཡུལ་གྱི་བདེ་བ་སྟེར་ཞིང་རོ་ཞིམ་པ་སོགས་ཉམས་སུ་མྱོང་། ཚེས་གཉིས་ལ་རྒྱལ་པོ་ཨུ་དྲ་ཡ་ནའམ། ཤར་བས་མཆོད་ཚེ་སྐུའི་གཡས་གཡོན་དུ་སྔོན་མེད་ཀྱི་རིན་པོ་ཆེའི་རི་བོ་མཐོ་ཞིང་བརྗིད་ཆགས་ལ། ལྷའི་ནོར་བུ་གཅལ་དུ་བཀྲམ་པ་ལྟ་བུར་རབ་ཏུ་བཀྲ་བ་ལྗོན་ཤིང་མེ་ཏོག་དང་འདབ་མ་འཛུམ་པ། འབྲས་བུས་ཡོངས་སུ་དུད་ལ་སྙན་པའི་སྒྲ་འཁྲོལ་བ། གཡས་རིར་རོ་བདའི་འབྲས་ཀྱི་སྙེ་མར་མི་རྣམས་ལོངས་སྤྱོད་ལ། གཡོན་རིར་རྩྭ་སྔོ་ལྗང་བཅུད་དང་ལྡན་པས་དུད་འགྲོའི་ཚོགས་ཚིམ་པ་མ་སྨད་པའི་མཛད་པ་མཐའ་ཡས་པར་བསྟན་ནོ། །ཚེས་གསུམ་ལ་རྒྱལ་པོ་ཤུཉྩི་ད་ལས་ཡོན་སྦྱར་དུས་ཞལ་བསིལ་ས་ལ་དོར་བས། ཆུ་རྫིང་བཻ་ཌཱུར་ཞུན་མ་འཁྱིལ་བ་ལྟ་བུ་དཔག་ཚད་ཉིས་བརྒྱའི་ཁོར་ཡུག་ཅན་རིན་པོ་ཆེའི་བྱེ་མ་པདྨ་ཤིང་རྟའི་འཁོར་ལོ་ཙམ་འཇའ་ཚོན་ལྟ་བུའི་ཁ་དོག་ཅན་དེ་དག་གི་བཀྲག་མདངས་ཆེས་ཆེར་འཕེལ་བའི་འོད་ཀྱིས་ཉི་མའང་ལྷོ་ཕྱོགས་སུ་བྲོས། དེར་འཁོད་པའི་མི་རྣམས་རྫིང་དེར་ལྟ་ཞིང་བསྟོད། ཆོས་ཀྱི་སྒྲས་མཐོ་རིས་ཀྱི་ས་བོན་རྙེད་དོ། །ཚེས་བཞི་ལ་ཨིནྡྲ་ཝ་རྨིས་བསྙེན་བཀུར་བའི་ཚེ་དེའི་སྔ་ཉིན་ནས་སྤྲུལ་པའི་རྫིང་བུའི་ངོས་བཞི་ན་ཆུ་ཀླུང་ཆེན་པོ་སྙན་པའི་སྒྲ་དང་བཅས་ཡུར་བ་བརྒྱད་བརྒྱད་ལ་འབབ་པ་སྐོར་བ་གཞན་དུ་འགྲོ་བ་རྫིང་བུར་སླར་ཞུགས་པ་དེའི་སྒྲ་ལས་བྱང་ཆུབ་ཀྱི་ཡན་ལག་བདུན། འཕགས་པའི་ལམ་ཡན་ལག་བརྒྱད། རྣམ་པར་ཐར་པའི་སྒོ་གསུམ། ཕར་ཕྱིན་དྲུག །ཚད་མེད་བཞི་སོགས་ཀྱི་ཆོས་སྒྲར་སྒྲོགས་པས་འགྲོ་བ་རྣམས་མཐོ་རིས་དང་ཐར་པའི་ལམ་ལ་བཀོད་དོ། །ཚེས་ལྔ་ལ་རྒྱལ་པོ་ཚངས་བྱིན་གྱིས་གཡོས་སྦྱར་བའི་ཚེ་ཞལ་གྱི་འཛུམ་ལས་འོད་ཟེར་སྟོང་གསུམ་གྱི་འཇིག་རྟེན་ཁམས་ཀུན་གསལ་ཞིང་། འོད་དེས་ལུས་ལ་རེག་པའི་སྐྱེ་དགུ་རྣམས་སྒྲིབ་པ་ལྔ་དག་སྟེ་ལྷ་མིའི་ཚོགས་དད་པར་བཀོད། ཚེས་དྲུག་ལ་ལི་ཙ་བྱི་དྲྭ་མའི་ཚོགས་ཀྱིས་མཆོད་ཚེ་མངོན་ཤེས་དང་མི་ལྡན་པ་ཀུན་ལ་བྱིན་གྱིས་བརླབས་པས། གཅིག་གིས་ཅིག་ཤོས་ཀྱི་ཁམས་དང་བསམ་པའི་ཁྱད་པར་ཤེས་ཤིང་དཀར་ནག་གི་ལས་འབྲས་རྟོགས་ནས་ཆོས་རབ་ཏུ་འཕེལ། ཚེས་བདུན་ལ་ཤཱཀྱའི་རིགས་ཀྱིས་བསྙེན་བཀུར་བས་ཉེ་བར་འཁོད་པའི་ཞམ་རིང་གི་ཚོགས་ཀུན་གནས་འགྱུར་བ་འཁོར་ལོས་སྒྱུར་བའི་རྒྱལ་པོ་སྲས་སྟོང་། རྒྱལ་ཕྲན་བློན་འབངས་རྣམས་ཀྱིས་ཕུ་དུད་རབ་ཏུ་སྟོབ་པ་ཡ་མཚན་གྱི་གནས་སུ་གྱུར་པ་དེ་ཉིད་སྟོན་པའི་བྱིན་རླབས་སུ་ངེས་པའི་སྐྱེ་དགུ་རྣམས་དད་པ་ཆེས་ཆེར་འཕེལ་བར་མཛད་དོ། །ཚེས་བརྒྱད་ལ་ལྷའི་དབང་པོས་སྲི་ཞུ་བསྐྲུན་པའི་ཚེ་བརྒྱ་བྱིན་གྱིས་གཤམས་པའི་ཁྲིར་བཞུགས་པ་ན། བཟང་བྱིན་ལ་སོགས་པས་བདག་ཅག་རྣམས་ཀྱིས་ཕྱི་རོལ་པའི་སྟོན་པ་འཕམ་པར་བྱའོ་གསོལ་ཀྱང་མ་གནང་སྟེ་མུ་སྟེགས་ཅན་དང་རྫུ་འཕྲུལ་སྟོན་པར་གསོལ་འདེབས་སུ་ཡིན་ཞེས་པས་གསལ་རྒྱལ་གྱིས་བསྟན་པར་གསོལ་བ་བཏབ་མ་ཐག །བཅོམ་ལྡན་འདས་གདན་ལས་མི་སྣང་བར་གྱུར་ནས་ཕྱོགས་བཞིར་གཤེགས་བཞུགས་བཞེངས་གཟིམས་ཀྱིས་སྤྱོད་ལམ་བཞི་མཛད་ཅིང་འོད་སྣ་ཚོགས་འབྱིན། སྐུ་སྨད་ནས་མེ་འབར། སྟོད་ནས་ཆུ་འབེབས་པ་དང་ཟློག་པ་མཛད་ཅིང་། འདི་ནི་ཉན་ཐོས་དང་ཐུན་མོང་བའི་ཆོ་འཕྲུལ་ཡིན་ནོ་གསུངས་ནས་ཁྲིར་བཞུགས་པར་ཚངས་པ་དང་བརྒྱ་བྱིན་གྱིས་གཡས་གཡོན་ནས་མཆོད། ཆོ་འཕྲུལ་སྟོན་པ་ལ་གསོལ་བ་འདེབས་པ་པོ་སུ་ཡིན་ཞེས་གསུངས་པས། གསལ་རྒྱལ་གྱིས་བདག་ལགས་སོ་ཞེས་ཞུས་པ་དང་ཕྱག་ས་ལ་རེག་པས་ཀླུ་རྣམས་ཀྱིས་པདྨ་ཤིང་རྟའི་འཕང་ལོ་ཙམ་གསེར་གྱི་འདབ་མ་སྟོང་ལྡན་རྡོ་རྗེའི་ཟེ་བ་ཅན་ཕུལ་བས་ས་བརྡོལ་ནས་ཕྱུང་བ་དང་དེའི་སྙིང་པོར་བཞུགས། དེ་འདྲ་བ་མང་པོ་བྱུང་བ་རེ་རེར་སྤྲུལ་པའི་སངས་རྒྱས་རེ་བཞུགས་པས་འོག་མིན་གྱི་བར་གང་བ་རྣམས་ལ་ལ་ནི་འབར། ལ་ལ་ནི་གསལ། ལ་ལ་ཆར་འབེབས་པ་ལ་སོགས་སྣང་ཚུལ་སྣ་ཚོགས་བྱིས་པའི་ཚོགས་ཀྱིས་ཀྱང་བསྒྲིབ་མེད་དུ་མཐོང་བ་མཛད་པས་ཀུན་མིག་མི་འཛུམས་པར་ལྟ་ཞིང་ཕྱག་དང་བཅས་མཆོད། སྤྲུལ་པའི་སངས་རྒྱས་རྣམས་ཀྱིས་བརྩམ་པར་བྱ་ཞིང་སོགས་ཀྱི་ཚིགས་བཅད་གསུངས་ནས་མི་སྣང་བར་གྱུར་གསུངས་པས་དེ་ལྟར་གྱུར། དེར་རྒྱལ་པོས་སྟོན་པ་རྣམས་ཀྱིས་རེས་ལ་བབ་པར་བསྐུལ་བས་ཁོ་རང་དྲུག་པོ་གཅིག་གིས་གཅིག་བསྐུལ་ཞིང་། སེམས་ཁོང་དུ་ཆུད་ནས་འདར་བཞིན་གནས་པའི་ཚེ། བདག་ཅག་གི་སྟོན་པས་སེང་ཁྲིར་ཕྱག་སོར་རེག་པས་སེང་གེའི་ཁྲི་ནས་སྒྲ་འབྱིན་པ་དང་མཉམ་དུ་སྲིན་པོ་འཇིགས་སུ་རུང་བ་ལྔ་ཐོན་ནས་སྟོན་པ་དྲུག་གི་ཁྲི་བཤིག །ཕྱག་རྡོར་གྱིས་རྡོ་རྗེའི་རྩེ་ལས་མེ་འབར་བ་ཐོགས་ནས་སྟོན་པ་དྲུག་ཕྱེ་མར་འཐག་པ་ལྟ་བུའི་དྲག་ཤུལ་གྱིས་བདུད་ཀྱི་དཔུང་རྣམས་བཅོམ། ལོག་ལམ་ལ་འཁྱམས་པའི་འཁོར་འབངས་དགུ་ཁྲི་རབ་ཏུ་བྱུང་ཞིང་དགྲ་བཅོམ། སྐུའི་བ་སྤུའི་བུ་ག་བརྒྱད་ཁྲི་དེ་སྙེད་ནས་འོད་འཕྲོས་པའི་རྩེར་པདྨའི་གདན་ལ་བདེ་བར་གཤེགས་པ་རྣམས་རང་རང་གི་འཁོར་ལ་ཆོས་སྟོན་པ་མཐོང་ཞིང་རྣ་བར་ཆོས་ཐོས་པས་མཆོག་རྣམས་སངས་རྒྱས། དམན་པ་རྣམས་ལྷ་མིའི་འཇིག་རྟེན་ཐོབ། འདི་ཡན་ལ་འགྲན་ཟླ་ཅན་གྱི་ཆོ་འཕྲུལ་ཞེས་གྲགས་ལ། ཚེས་དགུར་ཚངས་པས་མཆོད་པ་ལས་དབུ་གཙུག་ཚངས་པའི་ཡུལ་སར་སྙེག་པ་ལ། སྐུ་མཉན་ཡོད་ཀྱི་ཁྲིར་བཞུགས་པ་གནམ་སའི་ཁྱོན་ཀུན་བསྒྲིབ་པ་མེད་པར་ཀུན་གྱིས་མངོན་སུམ་དུ་གསལ་བར་མཐོང་བར་བཞུགས་ནས་ཆོས་བསྟན་པས་མཐོ་རིས་ཐོབ། ཚེས་བཅུ་ལ་རྒྱལ་ཆེན་བཞིས་ཡོན་སྦྱར་སྟོན་པའི་སྐུ་སྲིད་རྩེར་ཁྱབ་པ་ལས་འཕྲོས་པའི་འོད་འཇིག་རྟེན་གསུམ་གྱི་སྒྲོན་མེས་ཁམས་གསུམ་གྱི་གནས་རྣམས་མངོན་སུམ་ལྟ་བའི་སྐལ་བར་སྦྱར་པའི་ཚེ་གདུལ་བྱ་རྣམས་ཆེས་དད་པར་གྱུར་ཅིང་མཐོ་རིས་ཀྱི་ས་བོན་རྙེད། བཅུ་གཅིག་ལ་མགོན་མེད་ཟས་སྦྱིན་གྱིས་མཆོད་པའི་དུས་གང་གི་སྐུ་འོད་ཟེར་དྲྭ་བའི་འཁོར་ཡུག་གཅིག་གི་ཕུང་པོར་གནས་ཤིང་། དམ་པའི་ཆོས་ཀྱི་གསུང་རང་རང་དབང་པོར་འཚམ་པར་བསྟན་པ་ལས། དེར་འདུས་རྣམས་དགྲ་བཅོམ་པ་དང་མཐོ་རིས་ཀྱི་རྟེན་བཟང་བསྒྲུབ་པའི་བསོད་ནམས་ཟླ་བའི་ཡར་ངོ་ལ་ཅོ་འདྲི་བར་བྱེད། བཅུ་གཉིས་ལ་ནག་པའམ་ཙིནྟས་གཡོས་སྦྱར་བའི་ཚེ་ཏིང་ངེ་འཛིན་གྱི་མཐུས་སྐུ་ལས་གསེར་གྱི་འོད་བཀྱེ་བས་སྟོང་གསུམ་འཇིག་རྟེན་མ་ལུས་ཁྱབ་ཅིང་འཁོར་རྣམས་ལ་རེག་པས་དུག་གསུམ་གྱི་རྟོག་ཚོགས་ཞི་སྟེ་ཀུན་ལ་ཕ་མ་དང་ཕུ་ནུ་བཞིན་མ་འདྲིས་པའི་བཤེས་སུ་གྱུར། ཉེ་འཁོན་མེད་པའི་སེམས་ཅན་ལ་བྱམས་པ་དང་སྙིང་རྗེ་ཆེན་པོ་རབ་ཏུ་བསྐྱེད་པའི་སྒྱུ་ཐབས་གང་སངས་རྒྱས་ཀྱི་ཐུགས་རྗེར་ཤེས་པའི་དད་པ་དང་། ཆོས་ཀྱི་བདུད་རྩི་སྣང་བའི་ཟ་མ་ཏོག་ཏུ་ལྷུང་བས་ལྷ་མི་རྣམས་ཕྱི་མའི་བདེ་སྐྱིད་ལ་སྤྱོད། བཅུ་གསུམ་ཤུཉྩིས་མཆོད་སྦྱིན་གྱི་ཚེ་སྐུའི་ལྟེ་བ་ལས་འོད་ཟེར་གཉིས་འདོམ་བདུན་ཙམ་གྱིས་ཡར་འཕྲོས་པའི་རྩེ་མོར་པད་སྟེང་ལ་སྤྲུལ་པའི་སངས་རྒྱས་གཉིས་བཞུགས་པ་གང་གི་ལྟེ་བ་ལས་ཀྱང་འོད་ཟེར་ཟུང་རེ་འཕྲོས་པས་སངས་རྒྱས་སྔར་བཞིན་གྲངས་མེད་པས་སྟོང་གསུམ་གྱི་འཇིག་རྟེན་བཀང་བ། ཆོ་འཕྲུལ་བལྟར་འོངས་པའི་ལུས་ཅན་ཀུན་གྱིས་གསལ་བར་མཐོང་བ་དང་། གསུང་ཆོས་ཀྱི་སྒྲ་ཐོས་པའི་དོན་གྱིས་བྱང་ཆུབ་ཀྱི་ས་བོན་རྒྱ་ཆེ་བ་སྤེལ། བཅུ་བཞིར་ཨུ་དྲ་ཡ་ནས་མཆོད་པའི་མེ་ཏོག་སྐུ་ལ་གཏོར་བས་སྐད་ཅིག་གིས་མེ་ཏོག་རྣམས་རིན་ཆེན་ཁམས་ལས་ལེགས་པར་གྲུབ་པའི་ཤིང་རྟའི་དབྱིབས་ཚངས་པའི་འཇིག་རྟེན་ལ་ཐུག་པ་གསེར་ལྟར་འབར་ཞིང་ནོར་བུས་སྤྲས་པ་དེའི་གྲངས་སྟོང་དང་ཉིས་བརྒྱ་ལྔ་བཅུ་རེའི་སྟེང་སྤྲུལ་པའི་སངས་རྒྱས་རེ་བཞུགས་པའི་འོད་ཀྱིས་སྟོང་གསུམ་གྱི་སྟོང་གི་འཇིག་རྟེན་ཀུན་ཁྱབ་པ་མིག་གི་མངོན་སུམ་པར་བྱིན་གྱིས་བརླབས། བཅོ་ལྔ་ལ་རྒྱལ་པོ་གཟུགས་ཅན་སྙིང་པོས་ཡོན་སྦྱར་བའི་ཚེ་སྣོད་ཀུན་ཟས་ཀྱིས་གང་ཞིང་། ཟས་རྣམས་རོ་བརྒྱའི་དཔལ་དང་ལྡན་པ་ཟོས་པ་ཀུན་བདེ་བའི་དགའ་སྟོན་ལ་སྤྱོད་པ་དེ་ཆོ་འཕྲུལ་བལྟ་བར་འདུས་པ་རྣམས་ཀྱིས་མྱོང་བར་བྱིན་གྱིས་བརླབས། དེར་འཁོད་པའི་ཚོགས་ལ་ཕྱག་སར་རེག་པས་སེམས་ཅན་དམྱལ་བ་པ་སྨྲེ་སྔགས་འོ་དོད་འབོད་པའི་སྡུག་བསྔལ་བསྟན་པས། འཁོར་ཚོགས་རྣམས་སྙིང་རྗེའི་སེམས་དང་འཇིགས་སྐྲག་གི་ངང་དུའང་གྱུར། དམ་པའི་ཆོས་གསུངས་པས་ལ་ལས་ཐེག་པ་ཆེན་པོའི་སེམས་རབ་ཏུ་བསྐྱེད། དམྱལ་བའི་འགྲོ་བ་རྣམས་ཀྱང་ཐུབ་དབང་གི་ཞལ་མཐོང་ཞིང་དད་པས་ཚེ་འཕོས་ཏེ་ལྷ་མིའི་སྲིད་པ་ཐོབ། གཟུགས་ཅན་སྙིང་པོས་ཞུས་པའི་ཞབས་ཀྱི་འཁོར་ལོའི་མཚན་བསྟན་པ་སོགས་ཟླ་ཕྱེད་བར་ཆོ་འཕྲུལ་གྱི་མཛད་པ་མཐའ་ཀླས་པར་བསྟན་པས་རྟག་ཆད་སྨྲ་བའི་རི་དྭགས་རྣམས་ཀྱི་ཁེངས་པའི་རི་བོ་བཅོམ་ཞིང་། ཐེག་གསུམ་ཆོས་ཀྱི་ང་རོས་སྐལ་པ་དང་ལྡན་པའི་གདུལ་བྱ་མང་པོ་ཐར་པ་དང་ཐམས་ཅད་མཁྱེན་པའི་གོ་འཕང་ལ་བཀོད། དེའི་ཚེ་མཉན་ཡོད་ཛེ་ཏའི་ཚལ་དུ་ཤར་པ་ལི་ཙ་བྱི་སོགས་ཀྱིས་མུ་སྟེགས་ཕམ་བྱེད་ཀྱི་མཆོད་རྟེན་ཡང་བརྩིགས་སོ། །གཞན་ཡང་དེ་དང་ཉེ་བར་འགྲོ་བ་མང་པོ་ལ་གནོད་པའི་ཤ་ཟ་སྟོང་ཕྲག་བཏུལ། ཚོང་པ་ལྔ་བརྒྱ་ནགས་ཁྲོད་དུ་རླུང་གིས་འཇིགས་པ་ལས་སྐྱོབས་པས་དད་དེ་རབ་ཏུ་བྱུང་ནས་དགྲ་བཅོམ། སུམ་ཅུ་རྩ་གསུམ་དུ་བྱོན་ནས་ཡུམ་དང་ལྷའི་འགྲོ་བ་མཐའ་དག་བདེན་པ་ལ་བཀོད། གསལ་ལྡན་དུ་བརྒྱ་བྱིན་གྱིས་བཙུགས་པའི་ཐེམ་སྐས་སུ་ལྷ་ལས་བབས། དེར་གསལ་ལྡན་པ་དད་ཅན་དག་གིས་ལྷ་བབས་མཆོད་རྟེན་བརྩིགས། མྱ་ངན་ལས་འདས་པའི་མཛད་པ་ནི། གྲོང་ཁྱེར་ཡངས་པ་ཅན་དུ་བྱོན་ནས་ཡངས་པ་ཅན་ལ་བལྟ་བའི་ཐ་མ་ཡིན་ནོ་ཞེས་པ་ལ་སོགས་གསུངས་ཤིང་ལྗོངས་རྒྱུ་བར་མཛད། རེ་ཞིག་གི་ཚེ་ཀུན་དགའ་བོ་ལ་གང་སུ་ཡང་རུང་། རྫུ་འཕྲུལ་གྱི་རྐང་པ་བཞི་ལ་བསྟེན་གོམས་མང་དུ་བྱས་པ་དེ་འདོད་ན་བསྐལ་བའམ། བསྐལ་བ་ལས་ལྷག་པའི་བར་དུ་ཡང་འདུག་གོ །དེ་བཞིན་གཤེགས་པ་རྫུ་འཕྲུལ་གྱི་རྐང་པ་བཞི་ལ་བསྟེན་གོམས་མང་དུ་བྱས་པས་དེ་བཞིན་གཤེགས་པ་བཞེད་ན་བསྐལ་པའམ། བསྐལ་པ་ལས་ལྷག་པའི་བར་དུ་ཡང་བཞུགས་སོ། །ཞེས་ལན་བསྟུད་ནས་གསུངས་ཀྱང་ཀུན་དགའ་བོ་བདུད་ཀྱིས་ཁེབས་ཏེ་ཅང་ཞུ་བར་མ་སྤོབས། དེར་བདུད་སྡིག་ཅན་གྱིས་མྱ་ངན་ལས་འདའ་བར་བསྐུལ་བས་ཞལ་གྱིས་བཞེས་པ་ན། མགར་བའི་བུ་ཙུནྡས་བཤོལ་འདེབས་པའི་གསོལ་བ་བཏབ་པས་གཉིས་ཀ་དགའ་བའི་ཕྱིར་བཅོམ་ལྡན་འདས་ཀྱིས་འཚོ་བའི་འདུ་བྱེད་ནི་བྱིན་གྱིས་བརླབས། སྐུ་ཚེའི་འདུ་བྱེད་ནི་སྤངས་ནས་ཟླ་བ་གསུམ་དུ་བཤོལ་བཏབ་བོ། །དེའི་ཚེ་གྱད་ཀྱི་ཡུལ་དུ་ས་གཡོ་བ་ལ་སོགས་པའི་ལྟས་ངན་པ་བྱུང་བས་མྱ་ངན་ལས་འདའ་བའི་རྒྱུར་བསྟན། ཀུན་དགའ་བོ་ལ། མདོ་སྡེ་ལ་འཇུག །འདུལ་བ་ལ་སྣང་། ཆོས་ཉིད་དང་མི་འགལ་ན་ཆོས་སུ་བཟུང་ལ། དེ་ལྟར་མ་ཡིན་ན་མི་བཟུང་བར་གདམས་སོ། །དེ་ནས་སྐུ་དངོས་སུ་སྣང་བས་འདུལ་བའི་རིམ་པ་དེ་ཙམ་དུ་དགོངས། གྲོང་ཁྱེར་རྩྭ་ཅན་དུ་གཤེགས་ནས་མྱ་ངན་ལས་འདའ་བར་དགོངས་པ་ན། དཔལ་གྱི་མགུལ་ལས་སྦྲིད་པ་ཞིག་བྱུང་བ་སྐྱེ་དགུའི་བདག་མོས་ཐོས་ནས། སངས་རྒྱས་བསྐལ་པ་གྲངས་མེད་པ་གསུམ་དུ་བཞུགས་པར་གྱུར་ཅིག་ཅེས་སྨོན་ལམ་བཏབ་པས། དེ་ས་བླ་པས་ཐོས་པ་ནས་འོག་མིན་གྱི་བར་དུ་སྐད་ཅིག་ལ་ཐོས་པས་སྨོན་ལམ་དེ་བཞིན་དུ་བཏབ་པ་ན། དེ་བཞིན་གཤེགས་པས་སྐྱེ་དགུའི་བདག་མོ་ལ་ཁྱོད་ཀྱིས་མ་ལེགས་པ་བྱས་སོ། །བསྟན་པ་ཡུན་རིང་དུ་གནས་པར་གྱུར་ཅིག་མི་ཟེར་བར། སྐྱེས་བུ་ལེ་ལོ་ཅན་མང་པོའི་ཆོས་བསྒྲུབ་པའི་གེགས་སུ་གྱུར་གསུངས་པས། དེའི་བཟོད་གསོལ་དུ་སྐྱེ་དགུའི་བདག་མོ་དགྲ་བཅོམ་པ་ལྔ་བརྒྱ་དང་བཅས་མྱ་ངན་ལས་འདས་སོ། །དེའི་ཚེ་ཤཱ་རིའི་བུ་དང་། མཽངྒལ་གྱི་བུས་དམྱལ་བའི་གནས་བལྟར་བྱོན་པས། དེ་ན་མུ་སྟེགས་བྱེད་ཀྱི་སློབ་དཔོན་དང་མཁན་པོ་རྣམས་སྡུག་བསྔལ་ལ་སྤྱོད་པ་ཀུན་གྱིས་འདི་སྐད་དུ། རང་རེའི་ཆོས་དེ་ལོག་ནས་འདུག་པས། སངས་རྒྱས་པའི་ཆོས་ལ་ཞུགས་ཤིག །ཅེས་པའི་འཕྲིན་བསྐུར་བ་ཁྱེར་ཏེ་མི་ཡུལ་དུ་བྱོན་པའི་ཚེ། ལམ་དུ་ཀུན་ཏུ་རྒྱུ་དག་དང་ཕྲད་ནས་དེ་དག་གིས་ཤཱ་རིའི་བུ་ལ་དགེ་སྦྱོང་སུ་ལ་ཡོད་དྲིས་པའི་ལན་དུ། དགེ་སྦྱོང་ཤཱཀྱའི་ནང་ན་ཡོད། །ཀུན་ཏུ་རྒྱུ་ལ་དགེ་སྦྱོང་མེད། །ཁྱེད་རང་གི་མཁན་པོ་དང་སློབ་དཔོན་ཡང་དམྱལ་བ་མནར་མེད་པ་ན་སྐྱེས་ནས་འཕྲིན་འདི་ལྟ་བུ་བརྫངས་སོ། །ཞེས་བསྙད་པས་ཤ་འཁོན་མེད་པའི་མཐུས་མ་ཐོས། དེའི་ཕྱི་ལ་མཽདྒལ་གྱི་བུ་འོངས་པ་ལ་དྲིས་པ་ན་སྔར་བཞིན་བརྗོད་པས། འདི་དག་འུ་ཅག་ལ་སྨྲ་བར་མ་ཟད་མཁན་པོ་དང་སློབ་དཔོན་ལའང་སྨྲ་བར་བྱེད་པས་ཆོམས་ཤིག་ཅེས་དབྱུག་པས་སྐུ་ལུས་འདམ་བུ་བཅོམ་པ་ལྟར་བརྡུངས་སོ། །དེར་ཤཱ་རིའི་བུས་ཆོས་གོས་ཀྱི་གྲྭར་གཏུམས་ཏེ་ཁུར་ནས་གྲོང་ཤིང་ཐག་ཅན་དུ་བསྐྱལ། མི་འཚོ་བར་ཤེས་ནས་གྲོགས་པོ་འཆི་བ་ཐོས་པར་ཡང་མི་བྱ་ན་མཐོང་བ་ལྟ་ཅི་སྨོས་ཞེས་ཤཱ་རིའི་བུ་ན་ལནྡར་སོང་ནས་དེའི་སྔ་དྲོ་དགྲ་བཅོམ་པ་བཞི་སྟོང་དང་བཅས་པ་མྱ་ངན་ལས་འདས་ཤིང་། ཕྱི་དྲོ་མོངྒལ་གྱི་བུ་དགྲ་བཅོམ་པ་བཞི་སྟོང་དང་བཅས་ཀྱང་མྱ་ངན་ལས་འདས་སོ། །གཞན་ཡང་དགྲ་བཅོམ་པ་མང་པོ་བུད་ཤིང་ཟད་པའི་མེ་ལྟར་མྱ་ངན་ལས་འདས་སོ། །དེའི་ཚེ་སངས་རྒྱས་ཀྱི་བསྟན་པ་འཁོར་རྣམ་པ་བཞི་དང་བཅས་པ་གནས་བརྟན་འོད་སྲུངས་ཆེན་པོ་ལ་གཏད། ཀུན་དགའ་བོའི་མྱ་ངན་བསལ་ཞིང་མྱང་འདས་ཀྱི་མདོ་ཡང་གསུངས། སྐུ་གདུང་གི་བཀོད་པ་ཞུས་པས་འཁོར་ལོས་སྒྱུར་བ་བཞིན་བསྩལ། སྐུ་དངོས་ཀྱི་གདུལ་བྱ་དྲི་ཟ་རབ་དགའ་དང་ཀུན་ཏུ་རྒྱུ་རབ་བཟང་གཉིས་ལུས་པ། ཉན་ཐོས་ཀྱི་གདུལ་བྱ་སངས་རྒྱས་ཀྱིས་ཐུལ་ལ། སངས་རྒྱས་ཀྱི་གདུལ་བྱ་ཉན་ཐོས་ཀྱིས་མ་ཡིན་པར་དགོངས་པ་ན། བརྒྱ་བྱིན་དང་དྲི་ཟ་རབ་དགའ་མཛའ་བའི་སྟབས་བརྒྱ་བྱིན་གྱིས་རབ་དགའ་ལ་ཆོས་ཉན་དུ་འགྲོ་བྱས་ཀྱང་ཁྱོད་སོང་ཞིག །ཁོ་བོ་གླུ་དབྱངས་ལེན་ནོ་ཟེར་གླུས་དྲེགས་པས་ཡོང་དུ་མ་ཉན་ཏོ། །སྟོན་པས་དེ་འདུལ་བའི་སླད་དུ་སྐུ་ལུས་གཟིམ་མལ་དུ་བཞག །དྲི་ཟའི་ཆ་བྱད་དུ་སྤྲུལ་ཏེ་པི་ཝང་རྒྱུད་སྟོང་དང་ལྡན་པ་བསྣམས་ནས་རབ་དགའི་སྒོ་དྲུང་དུ་གཤེགས། པི་ཝང་འགྲན་པའི་ཁྱད་པར་ལ་ཞུགས་པ་ན། སྟོན་པས་རྒྱུད་སྟོང་ཕྲག་གཅིག་ཡོད་པ་ནས་གཅིག་ལ་ཐུག་གི་བར་དུ་རིམ་གྱིས་བཅད་ཀྱང་སྒྲ་གདངས་སྙན་པ་ལ་ཁྱད་པར་མ་བྱུང་ངོ་། །མཐར་རྒྱུད་གཅིག་པོ་དེ་ཡང་བཅད་པས་ཁོའི་པི་ཝང་ལ་སྐད་ཀྱི་ཐ་སྙད་ཟད་པའི་ཚེ། སྟོན་པའི་དེར་རྫུ་འཕྲུལ་གྱིས་ནམ་མཁའ་ལས་སྒྲ་གདངས་སྔ་མ་བཞིན་བྱུང་བས་ངོ་མཚར་ཞིང་ང་རྒྱལ་གྱི་རི་བོ་གཞིག་པར་མཛད། །དེར་སྐུ་དངོས་སུ་བསྟན་ནས་བདེན་པ་ལ་བཀོད། དེ་བཞིན་དུ་ཀུན་ཏུ་རྒྱུ་རབ་བཟང་ཞེས་བྱ་བ་ལོ་བརྒྱ་ཉི་ཤུ་ལོན་པ་ཕྱོགས་དེའི་སྐྱེ་དགུ་རྣམས་ཀྱིས་དགྲ་བཅོམ་པར་འཁྲུལ་པ་ཞིག་ཡོད་པ་ལས། རྫིང་བུ་དལ་གྱིས་འབབ་པའི་འགྲམ་ན་ཨུ་དུམ་ཝཱ་རའི་མེ་ཏོག་སྐུ་བལྟམས་ཚེ་སྦལ་མིག་ཁ་བྱེ། རོལ་རྩེད་ཀྱི་དུས་ཁ་འབུས། དཀའ་སྤྱད་ཀྱི་ཚེ་ཅུང་ཟད་རིད། སངས་རྒྱས་པ་དང་ཁ་བྱེ། ཆོས་ཀྱི་འཁོར་ལོའི་ཚེ་ལྷམ་མེ་ལྷན་ནེར་རྒྱས། གཟིམ་མལ་ལ་བཞུགས་དུས་ཤིན་ཏུ་རྙིངས་པར་གྱུར་པ་དེ་རྙིངས་པར་མཐོང་བས་རབ་བཟང་འདི་སྙམ་དུ། རང་འཆི་བར་འགྱུར་གྱིས་ཚལ་འདི་ཡང་རྙིངས་སོ་སྙམ་པ་ན། ལྷས་འདི་ནི་ཁྱོད་ལ་མ་ཡིན། སྟོན་པ་མྱ་ངན་ལས་འདས་པའི་དུས་སོ་ཞེས་ཟེར་བས་བདག་ལ་དྲི་བའི་དུས་ལ་བབ་སྙམ་སཱ་ལའི་དྲུང་དུ་སོང་བ། ཀུན་དགའ་བོས་ལན་གསུམ་བཟློག་ཀྱང་། སྟོན་པས་གསན་ཏེ་ང་དང་མུ་སྟེགས་གཏམ་བྱེད་པའི་ཐ་མ་ཡིན་པས་ཐོང་ཞིག་ཅེས་གསུངས་ནས་རབ་བཟང་ནང་དུ་བཏང་། སྟོན་པས་ཆོས་གསུངས་པས་བདེན་པ་མཐོང་སྟེ་བསྙེན་པར་རྫོགས་ཤིང་དགྲ་བཅོམ། དེས་ཀྱང་སྟོན་པ་མྱ་ངན་ལས་འདའ་བ་མཐོང་བ་ལ་སྤྲོ་བར་མ་གྱུར་པས་གནས་ལྔར་བྱིན་གྱིས་བརླབས་ནས་མྱ་ངན་ལས་འདས་སོ། །དེ་ནས་སྐུའི་སྟོད་གཡོགས་བསལ་ཏེ། དགེ་སློང་དག་དེ་བཞིན་གཤེགས་པའི་སྐུ་ལ་ལྟོས་ཤིག །དེ་བཞིན་གཤེགས་པ་ལ་བལྟ་བ་ནི་རྙེད་པར་དཀའ་སྟེ་མེ་ཏོག་ཨུ་དུམ་ཝཱ་ར་བཞིན་ནོ། །དགེ་སློང་དག་ཅང་མ་སྨྲ་ཞིག་དང་། འདི་ལྟར་འདུས་བྱས་ཐམས་ཅད་ནི་འཇིག་པའི་ཆོས་ཅན་ནོ་གསུངས། གསུང་གི་ཐ་མར་མདོ་སྡེ་ས་བཅུ་པ་བསྟན། སེང་གེའི་ཁྲི་ལ་ཉལ་སྟབས་སུ་བཞུགས་ཏེ་བསམ་གཏན་བཞི་ལ་སོགས་པའི་ཏིང་ངེ་འཛིན་ལ་སྙོམས་པར་ཞུགས་ནས་མྱ་ངན་ལས་འདས་སོ། །དེའི་ཚེ་ས་གཡོ་བ་ལ་སོགས་པའི་ལྟས་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འཁྲུགས་པར་གྱུར་ཏོ། །དེར་འོད་སྲུངས་ཆེན་པོས་སྟོན་པ་མྱ་ངན་ལས་འདས་པར་ཤེས་ནས་དགེ་འདུན་རྣམས་སྐུ་གདུང་ལ་བལྟ་བའི་ཕྱིར་རིངས་པར་འགྲོ་ཞེས་བསྐུལ་ལོ། །གྱད་རྣམས་ཀྱིས་སྐུ་གདུང་འཁོར་ལོས་སྒྱུར་བའི་ལུགས་ལྟར་ཞུགས་ལ་ཞེན་པར་འདོད་ཀྱང་འཚིག་པར་མ་ནུས་པས་འོད་སྲུངས་ཆེན་པོའི་ཀླུའི་ཡུལ་ནས་བྱོན་ཏེ་སྒྲོམ་ཁ་དབྱེ་བར་རྩོམ་པ་དང་། ཁ་རང་བྱེར་གྱུར་ནས་སྐུ་མ་ཉམས་པར་སྣང་བས་ཕྱག་མཛད། མཐར་ཤིང་བལ་ལ་སོགས་པས་སྔར་ལྟར་དཀྲིས་ལྕགས་ཀྱི་སྒྲོམ་བུར་བཅུག་དྲི་ཞིམ་པའི་ཤིང་གིས་སྤུངས། གསོལ་བ་བཏབ་པས། ཐུགས་ཀ་ནས་མེ་རང་འབར་དུ་གྱུར་ཏེ་ཞག་བདུན་དུ་འབར་ནས་སྐུ་གདུང་བསིལ་བུར་གྱུར་ཏོ། །དེའི་ཚེ་མེ་སྤོས་ཆུས་གཞིལ་ཀྱང་ཤི་བར་མ་གྱུར་ཅིང་མཐར་རང་ཞིར་གྱུར་པ་དང་ཨུ་དུམ་ཝཱ་ར་ལ་སོགས་པའི་མེ་ཏོག་གིས་གཅལ་དུ་བཀྲམ་མོ། །དེ་ཡང་སྐུ་ཚེའི་ཚད་ནི་བྱེ་བྲག་བཤད་མཛོད་ལས། ཆོས་འཁོར་ཅན་དང་ཡངས་པ་ཅན། །ས་དཀར་ཅན་དང་ལྷ་ཡི་གནས། །བྱིས་པ་གསོད་དང་ཀཽ་ཤམྦྷི། །འབྲོག་གནས་མཆོད་རྟེན་རི་དང་ནི། །འོད་མའི་ཚལ་དང་དགྲར་བཅས་དང་། །སེར་སྐྱ་ཡི་ནི་གྲོང་ཁྱེར་ཏེ། །འདི་རྣམས་སུ་ནི་ཐུབ་པ་ཡིས། །སྐྱེས་མཆོག་ལོ་རེ་ལོ་རེར་བཞུགས། །འབར་བའི་ཕུག་གི་ནགས་སུ་གཉིས། །སྨན་གྱི་ནགས་སུ་ལོ་བཞི་སྟེ། །རྒྱལ་པོའི་ཁབ་ཀྱི་གྲོང་དུ་ལྔ། །དཀའ་བ་སྤྱོད་པ་ལོ་དྲུག་སྟེ། །ཉི་ཤུ་རྩ་གསུམ་མཉན་ཡོད་དུ། །ཉི་ཤུ་རྩ་དགུ་ཁབ་ཏུ་གནས། །དེ་ལྟར་རྒྱལ་བ་བརྒྱད་ཅུ་ལ། །ཐུབ་མཆོག་དམ་པ་མྱ་ངན་འདས། །ཞེས་དང་། ཉན་ཐོས་ཁ་ཅིག་འབུམ་ཊཱིཀ་ལས། འཆི་བདག་གི་བདུད་བཅོམ་པས་སྐུ་ཚེ་ཟླ་བ་གཉིས་བསྲིངས་པར་མཛད་དོ། །ཞེས་པ་ལྟར་དེའི་སྟེང་དུ་ཟླ་བ་གཉིས་ལྷག་པོར་འདོད་པ་དང་། ཐེག་ཆེན་མྱང་འདས་ཀྱི་མདོར། བརྒྱ་པའི་དུས་འདིར་བརྒྱད་ཅུ་ལ། །མྱ་ངན་འདའ་བ་མཚན་ཉིད་ཀྱང་། །བྲམ་ཟེ་ཁྱོད་ཀྱི་དོན་དུ་ནི། །ང་ཡིས་གཉིས་བསྲིངས་བརྩོན་འགྲུས་བསྐྱེད། །ཅེས་བརྒྱད་ཅུ་རྩ་གཉིས་སུ་བསྟན་པ་དག་བརྩི་ལུགས་ཐ་དད་ཀྱང་མདོ་དོན་མཐུན་པར་བཞེད་དེ། གྲུབ་མཐའ་རིན་པོ་ཆེའི་མཛོད་དུ། སློབ་དཔོན་བྷ་ཝི་ལྷ་ནི་ལོ་དངོས་བརྩིས་ན་བརྒྱད་ཅུ་ལ་བཤོལ་ཟླ་དང་བསྡོམས་ན་བརྒྱད་ཅུ་རྩ་གཉིས་སུ་བཞེད་པ་ལྟར་ལེགས་སོ། །ཞེས་གསུངས་ལ། འདི་ལྟ་བུའི་རིག་པས་རྣམ་པར་དཔྱོད་ཤེས་པས་པདྨ་བཀའ་ཐང་ལ་སོགས་ཏེ་གདུལ་བྱ་ངོར་སྣང་གི་རྣམ་པར་ཐར་པའི་ལོ་ཚིགས་ལའང་འགལ་བ་མེད་པའི་མིག་བསྒྲུབ་པར་རིགས་སོ། །དེའི་ཚེ་སྐུ་གདུང་ཆ་བརྒྱད་དུ་བགོས་པ་ནི། འདུལ་བ་ལུང་ལས། སྤྱན་ལྡན་སྐུ་གདུང་བྲེ་བོ་བརྒྱད་དག་ལས། །བདུན་ནི་འཛམ་བུ་གླིང་པའི་མཆོད་པར་ཐོབ། །སྐྱེས་བུ་མཆོག་དེའི་བྲེ་བོ་གང་ཞིག་ནི། །གྲོང་ཁྱེར་སྒྲ་སྒྲོག་ཀླུ་ཡི་རྒྱལ་པོས་མཆོད། །ཅེས་དང་། སྐྱེས་མཆོག་དེ་ཡི་མཆེ་བ་བཞི་དག་ལས། །གཅིག་ནི་རྩ་གསུམ་ལྷ་ཡུལ་འཇིག་རྟེན་མཆོད། །གཉིས་པ་ཚིག་འཛིན་ཡིད་འོང་གྲོང་ཁྱེར་ན། །གསུམ་པ་ཀ་ལིང་རྒྱལ་པོའི་ཡུལ་ན་སྟེ། །སྐྱེས་མཆོག་དེ་ཡི་མཆེ་བ་བཞི་པ་ནི། །གྲོང་ཁྱེར་སྒྲ་སྒྲོག་ཀླུ་ཡི་རྒྱལ་པོས་མཆོད། །མྱ་ངན་མེད་རྒྱལ་སྐྱ་སྣར་བུ་གནས་པ། །མཆོད་རྟེན་བདུན་པོ་རྒྱ་ཆེར་སྤེལ་བྱས་ཏེ། །དེ་ཡི་མཐུ་ཡིས་དབྱིག་འཛིན་འདིར་ཡང་ནི། །སྨོན་ལམ་དངོས་པོ་མངོན་པར་བརྒྱན་གྱུར་ཏེ། །འདི་ལྟར་སྤྱན་ལྡན་སྐུ་གདུང་དེ་ལ་ནི། །ལྷ་དང་ཀླུ་དང་མི་ཡི་དབང་པོ་དང་། །མིའམ་ཅི་དང་གནོད་སྦྱིན་བདག་པོ་ཡིས། །རབ་ཏུ་བཀུར་ནས་བཀུར་སྟི་མཆོད་པ་བྱས། །ཞེས་སོ། །དེའང་གདུང་རྣམས་བྲེ་བོ་བཞི་དང་བཅས་པ་སོ་སོའི་ཡུལ་དུ་མཆོད་རྟེན་དུ་གྱུར་པ་ལས། ཁྱད་པར་དུ་འཛམ་བུའི་གླིང་གི་ཆ་བདུན་པོ་རྣམས། རྒྱལ་པོ་སྐྱ་སྣར་གྱི་བུ་ཆོས་རྒྱལ་མྱ་ངན་མེད་ཀྱིས་སྔོན་གྱི་སྨོན་ལམ་དང་རྫུ་འཕྲུལ་གྱི་མཐུས་བསྐུལ་ཏེ་འཛམ་བུའི་གླིང་དང་། གླིང་བར་གྱི་ཐང་ལ་བྱེ་མ་སྙིམ་པ་གང་གི་གྲངས་དང་མཉམ་པའི་མཆོད་རྟེན་བཞེངས་པ་ལ་ཙེ་ཏ་མཆོད་རྟེན་བྱེ་བའམ། ཕལ་པ་རྣམས་ལ་བྱེ་བ་འབུམ་པར་གྲགས་པ་སྟེ། དེའི་ལོ་རྒྱུས་རྣམ་གཞག་ནི་སྔོན་སྟོན་པ་མཉན་ཡོད་དུ་བསོད་སྙོམས་ལ་གཤེགས་པ་ན། བུད་མེད་གཅིག་གིས་འབྲས་ཐུག་ཕུལ། དེའི་ཁྱེའུ་ཞིག་བྱིས་པའི་ཁྲོད་ན་བརྩེ་ཞིང་འདུག་པས་སངས་རྒྱས་མཐོང་ནས་དད་དེ། བྱེ་མ་སྙིམ་པ་གང་ཐོགས། བྱིས་པ་ཟླའོ་ཞིག་གིས་སྒུར་བཏེག་བྱས་པའི་སྟེང་དུ་ལངས་ནས་ཕུལ་བ་དང་། སྟོན་པས་ཀྱང་ལྷུང་བཟེད་སྨད་ནས་བཞེས་སོ། །མས་བུ་ལ་དེ་ལྟར་མི་རུང་ཞེས་བརྒལ་བས། བུ་འདི་ལ་མ་རྒོལ་ཞིག །འདི་ལ་དང་བའི་དད་པ་ཡོད་པས་བསོད་ནམས་ཆེན་པོ་ཐོབ་པར་འགྱུར་རོ། །ཞེས་གསུངས་ནས་བྱེ་མ་རྣམས་ཀུན་དགའ་བོར་བགྲང་དུ་བཅུག་པས་བྱེ་བ་གཅིག་གི་གྲངས་སུ་ལོངས་པ་བྱུང་། ཀུན་དགའ་བོ་ང་མྱ་ངན་ལས་འདས་ནས་ལོ་ཉིས་བརྒྱ་ལོན་པ་ན། གྲོང་ཁྱེར་མེ་ཏོག་ཅན་ཞེས་བྱ་བར་རྒྱལ་པོ་མྱ་ངན་མེད་ཅེས་བྱ་བར་གྱུར་ནས། མཆོད་རྟེན་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་བྱེ་བ་ནུབ་གཅིག་ལ་བཞེང་པར་འགྱུར་རོ། །སྒུར་བཏེག་བྱེད་པའི་བྱིས་པ་འདི་ནི་གནོད་སྦྱིན་ཤིང་རྟ་ཞེས་པར་གྱུར་ཏེ་མཆོད་རྟེན་བཞེང་བའི་གྲོགས་བྱེད་པར་འགྱུར་རོ། །ཞེས་ལུང་བསྟན་ནོ། །སྟོན་པ་གཤེགས་ནས་ལོ་ཉིས་བརྒྱ་ན་བྱིས་པ་དེ་རྒྱལ་པོ་མྱ་ངན་མེད་དུ་སྐྱེས་ཏེ། ཁྲིམས་གསར་པ་བཅས་ནས་ལ་ལ་བདེ་བ་ལ་བཀོད་དེ་ལྷ་དང་འདྲ། ལ་ལ་ནི་དམག་འདྲེན་ཞིང་འཐབ་རྩོད་ལ་སྤྱོད་པས་ལྷ་མིན་འདྲ། ལ་ལར་ཆད་པ་གཅོད་པས་དམྱལ་བ་དང་འདྲ་བ་སོགས་རིགས་དྲུག་གི་སྤྱོད་པ་ཚང་བར་ཡོད་པའི་སྐབས་སུ། གསེར་གླིང་པའི་དགེ་ཚུལ་ཞིག་རྒྱལ་པོའི་ཡུལ་ཁམས་སུ་སོང་བ། དེས་རྒྱལ་པོའི་བཙུན་མོ་ཁྲུས་བྱེད་པའི་རྒྱན་བྱ་རོག་གིས་ཁྱེར་བ་ཞིག་རྙེད། དེ་ཁྲོམ་དུ་ཁྱེར་ནས་འདི་སུའི་ཡིན་བསྙད་པས། ཁྱོད་ཀྱིས་བརྐུས་ཟེར་ཆད་པ་ཕོག་པ་ལས། རྒྱལ་པོ་ན་རེ། སྔར་དགེ་ཚུལ་འདི་འདྲ་གསོད་མ་མྱོང་། མར་ཁུ་ཁོལ་མར་ཚོས་ནས་སོད་ཅིག་བསྒོ་བ་ན། བློན་པོ་རྣམས་ཀྱིས་ཞག་གསུམ་བཙོས་ཀྱང་མ་ཤི་བར་ཟིལ་པ་ཕྲུམ་མེར་འདུག །རྒྱལ་པོས་ཁྱོད་སུ་ཡིན་དྲིས་པས། ངའི་མཁན་པོ་དགྲ་བཅོམ་པ་ཞིག་ཡོད། ངས་ཀྱང་རྒྱུན་དུ་ཞུགས་པ་ཐོབ་པས་མེས་མི་ཚུགས་པ་ཡིན་བྱས་པས། རྒྱལ་པོ་དད་དེ་ཆོས་ཞུས། དེར་རྒྱལ་པོ་ན་རེ། ཆད་པས་བཅད་པ་ལ་སྡིག་པ་འོང་ན་བཤགས་པ་བྱེད་པའི་ཐབས་ཞུ་ཟེར་བ་ལ། དགེ་ཚུལ་གྱིས་ངས་ཐབས་མི་ཤེས། ངའི་མཁན་པོ་ལ་ཞུ་དགོས་ཟེར་དགྲ་བཅོམ་པ་སྤྱན་དྲངས་པས། དགྲ་བཅོམ་པ་ན་རེ། རྒྱལ་པོ་ཁྱོད་ཀྱིས་ནུབ་གཅིག་ལ་དེ་བཞིན་གཤེགས་པའི་རིང་བསྲེལ་གྱིས་སྙིང་པོ་ཅན་གྱི་མཆོད་རྟེན་བྱེ་བ་བཞེངས་ཤིག་དང་སྡིག་པ་འདག་པར་འགྱུར་རོ། །ཞེས་གསུངས་པས། རྒྱལ་པོས་ངས་དེ་ལྟར་མི་ཟིན། རིང་བསྲེལ་ཡང་མི་རྙེད་ཟེར། དེར་དགྲ་བཅོམ་པས། ཁྱོད་སངས་རྒྱས་ཀྱི་ལུང་བསྟན་པ་ཡིན་པས་གནོད་སྦྱིན་བསྒྲུབ་ན་བཞེང་ནུས་ལ། རིང་བསྲེལ་ཡང་རྒྱལ་པོ་མ་སྐྱེས་དགྲའི་སྐལ་བ་མ་ག་དྷཱའི་བྲེ་བོ་དྲུག་གསེར་གྱི་བུམ་པར་བཅུག་ནས་རྒྱལ་པོའི་ཁབ་ཀྱི་འོད་མའི་ཚལ་ན་སྦས་ཡོད་པ་དེ་བཏོན་པས་ཆོག་གསུངས། དེར་རྒྱལ་པོས་རིང་བསྲེལ་འདོན་དུ་ཕྱིན་པས་མཚོན་ཆའི་འཁོར་ལོས་བསྲུངས་ནས་ལན་མ་ནུས། འཁོར་ལོ་དེ་ཆུས་བསྐོར་བར་ཤེས་ནས་ཆུ་དེ་གང་ནས་འོང་དྲིས་པས། གཞན་ཤེས་པ་མ་བྱུང་། རྒན་མོ་ཞིག་ན་རེ། ལྷོ་ནུབ་ཀྱི་རི་ཡ་གི་ནས་འོང་བ་ཡིན་ཟེར། རི་དེ་ནི་རྒྱལ་བོའི་ཁབ་ཀྱི་ལྷོ་ཕྱོགས་ན་ཤར་ནུབ་ཏུ་ནར་མོར་ཕྲ་ལ་རིང་བར་ཡོད་ཅེས་གྲགས། དེའི་བྱང་ལོགས་ན་འོད་མའི་ཚལ་སྔོ་ཐིབས་སེ་ཡོད། རི་དེའི་མགོ་རྒྱལ་པོའི་ཁབ་ཀྱི་ལྷོ་ནུབ་ན་ཡོད་པས་དེར་བརྐོས་པ་དང་རྡོའི་སྒྲོམ་ནས་ཆུ་འགྲོ་བ་གཅིག་འདུག་པ་དེ་བཅད་ནས། མཚོན་ཆའི་འཁོར་ཐག་ཆད་པ་དང་བལྟས་པས། སྒྲོམ་ཆུང་ཞིག་གི་སྟེང་ན་ཡི་གེ་འདུག་པ་ལ། མ་འོངས་པའི་དུས་སུ་རྒྱལ་པོ་དབུལ་པོ་ཞིག་གིས་རྙེད་པར་འགྱུར་རོ་བྱ་བ་འདུག་པས། རྒྱལ་པོ་ང་རྒྱལ་གྱིས་དྲེགས་ནས། བདག་ནི་དབུལ་པོ་མ་ཡིན་ཏེ་འདི་རྙེད་པ་དེ་གཞན་ཞིག་ཡིན་པར་མཆི་ཞེས་ཟེར་བ་ན། དགྲ་བཅོམ་པས་ང་རྒྱལ་མ་མཛད་པར་གུས་པས་ལོང་ཞིག་གསུང་བ་ལ་ཉན་ཏེ་བལྟས་པས་སྒྲོམ་ཆུང་དེའི་ནང་ན་གསེར་གྱི་བུམ་པར་རིང་བསྲེལ་བཞུགས། དེའི་ཟུར་བཞི་ན་ནོར་བུ་རིན་པོ་ཆེ་འོད་འབར་བ་བཞི་འདུག་པས། དེ་རེ་རེའི་རིན་ཡང་རྒྱལ་པོའི་རྒྱལ་སྲིད་ཀྱིས་མི་འབྱོངས་པར་འདུག་པས་རང་ཉིད་དབུལ་པོར་ཤེས་ཏེ། སྔོན་རྒྱལ་པོ་ལོངས་སྤྱོད་ཅན་བྱུང་འདུག་སྙམ་ང་རྒྱལ་ཞུམ་པར་གྱུར་ཏོ། །དེ་ནས་དགྲ་བཅོམ་པའི་གསུངས་བཞིན་ཉན་ཏེ། གནོད་སྦྱིན་བསྒྲུབས་པས། ཆེན་པོ་ཤིང་རྟ་ཞེས་བྱ་བ་དཀར་པོ་ལ་དགའ་བ་དེ་འགྲུབ། བཀའ་བསྒོས་པ་ཙམ་གྱིས་ལས་འགྲུབ་པ་ཞིག་བྱུང་བས། དེའི་རྫུ་འཕྲུལ་གྱིས་ཐོག་མར་རྡོ་རྗེ་གདན་གྱི་གནྡྷོ་ལ་དང་། རྡོ་རྗེ་གདན་གྱི་ཤར་ཆུ་བོ་ནེ་རཉྫ་ནའི་འགྲམ་དུ་གྷ་ག་རཱ་ཧུ་ལ་ཇོ་བོ་ཆོས་ཀྱི་འབྱུང་གནས་ཞེས་པའི་མཆོད་རྟེན་ནུབ་གཅིག་ལ་བཞེངས། དེའི་ནང་ན་རིང་བསྲེལ་ཕུལ་ཕྱེད་དོ་བཞུགས། དེའི་ནུབ་ཕྱི་མ་ནམ་ཕྱེད་ཙམ་ན་གནོད་སྦྱིན་དེས་འཛམ་བུའི་གླིང་གིས་ཆ་ཀུན་ཏུ་རིང་བསྲེལ་བཞུགས་པའི་མཆོད་རྟེན་རྡོའི་སྲོག་ཤིང་ཅན་བྱེ་བ་ཅིག་ཆར་དུ་བཞེངས་ནས། གནོད་སྦྱིན་ན་རེ། བཀའ་བཞིན་མཆོད་རྟེན་རྣམས་གྲུབ་ཡོད་པས་གཟིགས་ཤིག་ཟེར། རྒྱལ་པོ་མཐུས་ཁུར་ནས་མཆོད་རྟེན་ཡོད་པ་རྣམས་སུ་སྐད་ཅིག་ལ་ཕྱིན་ནས་གསེར་དངུལ་གྱི་མཆོད་པ་དང་རྒྱན་དབུལ། དགེ་བའི་རྩ་བ་འདིས་བླ་ན་མེད་པ་རྫོགས་པའི་སངས་རྒྱས་ཐོབ་པར་གྱུར་ཅིག་ཅེས་སྨོན་ལམ་བཏབ་སྟེ། ལོ་བརྒྱད་ཅུ་རྩ་བདུན་གྱི་བར་མཆོད་རྟེན་ཆེན་པོ་རྣམས་མཆོད་པར་བྱས། སྤྱིར་ལོ་བརྒྱ་དང་ལྔ་བཅུར་བཞུགས་པའི་མཐར་འདས་ཏེ་ལྷར་སྐྱེས་སོ། །རྒྱལ་པོ་འདི་འཇམ་དཔལ་རྩ་རྒྱུད་ནའང་ཤིན་ཏུ་གསལ་ཞིང་། མདོ་སྡེ་བསྐལ་པ་བཟང་པོ་ལས། སྐུ་གདུང་ནི་རྒྱས་པར་འགྱུར་རོ་ཞེས་པའི་ལུང་བསྟན་གྱི་བདེན་པའི་རྔ་བོ་ཆེ་སྒྲོག་པའི་ཕོ་ཉ་ཡིན་པ་ཤེས་པར་བྱའོ། །དེ་ཡང་བོད་ཀྱི་བསམ་ཡས་མཆོད་རྟེན་དཀར་པོ་ན་བཞུགས་པར་གྲགས་པའང་མཆེ་བ་གཉིས་པ་རྒྱལ་པོ་མ་སྐྱེས་དགྲའི་རྟེན་སྐལ་ལ་བྱིན་པ་དེ་ལས་འཕེལ་བའི་རིང་བསྲེལ་སིལ་བུ་རྒྱ་གར་གྱི་མཆོད་རྟེན་པདྨའི་ཕྲེང་བ་ཅན་ནས་བོད་ཀྱིས་སྤྱན་དྲངས་སོ་ཞེས་གྲགས་ལ། གདུང་བཅུག་པའི་བུམ་པ་ནི་བྲམ་ཟེའི་རིགས་བྲེ་བོ་དང་མཉམ་པ་རྣམས་ལ་བྱིན། གདུང་བསྲེགས་པའི་སོལ་བ་ནི་བྲམ་ཟེ་ནྱ་གྲོ་དྷཱས་བླངས་ཏེ་སོ་སོར་ཁྱེར་ནས་མཆོད་རྟེན་ཆེན་པོ་བྱས་སོ། །གསུམ་པ་ལ་གཉིས། དམ་པའི་ཆོས་བཀའ་བསྡུ་ཇི་ལྟར་བྱས་པ་དང་། བསྟན་པ་ཇི་ཙམ་གནས་པའི་རྣམ་གཞག་གོ །དང་པོ་ནི། གང་གི་ཚེ་བསྐལ་པ་མང་པོར་འཚོ་བའི་ལྷ་རྣམས་སྟོན་པའི་གསུང་རབ་མེ་ཤི་བའི་དུད་པ་ཙམ་དུ་གྱུར་ཅིང་། དགེ་སློང་དབང་པོ་ཡོད་པ་དག་ཀྱང་མྱ་ངན་ལས་འདས་པས་སྡེ་སྣོད་གསུམ་མི་སྒྲོག་གོ་ཞེས་པའི་འཕྱ་བ་བསལ་བ་དང་། བཀའ་རྗེས་སུ་བསྒྲུབ་པའི་ཕྱིར་འོད་སྲུངས་ཀྱིས་གང་པོ་ལ་གཎྜི་རྡུངས་ཤིག་བསྒོ་བ་ན། དེས་ཀྱང་རབ་མཐའི་བསམ་གཏན་ལ་བཞུགས་ནས་གཎྜི་བརྡུངས་པས་བ་ལང་བདག་མ་གཏོགས་ཐམས་ཅད་འདུས་པས་དགྲ་བཅོམ་པ་ལྔ་བརྒྱར་གཅིག་གིས་མ་ཚང་བ་བྱུང་ངོ་། །གཅིག་པོ་དེ་འབོད་དུ་གང་པོ་མངགས་ནས་འབྱོན་པར་ཞུ་ཞེས་སྒྲོན་པ་ན་དེས་སངས་རྒྱས་མྱ་ངན་ལས་འདས་པར་ཤེས་ནས་དགེ་འདུན་རྣམས་ལ་གནང་བ་ཞུ་བའི་ཚིག་དང་། ཆོས་གོས་དང་ལྷུང་བཟེད་བསྐུར་ཏེ་མྱ་ངན་ལས་འདས་སོ། །དེའི་ཚུལ་འོད་སྲུངས་ལ་བསྒྲགས་པས། འོད་སྲུངས་ཀྱིས་ད་ཕྱིན་ཆད་བཀའི་བསྡུ་བ་མ་ཚར་གྱི་བར་ལ་དགྲ་བཅོམ་པ་གང་སུ་ཡང་མྱ་ངན་ལས་མི་འདའ་བའི་ཁྲིམས་བཅས་སོ། །འདིར་ཆོས་ཚུལ་བཤད་ན་དགེ་སློང་མང་པོ་འོངས་ནས་གཡེང་བར་འདུག་པས་བདག་ཅག་མ་ག་དྷཱར་འགྲོའོ་ཞེས་དགེ་འདུན་བྱིངས་ལྗོངས་རྒྱུ་བར་བཏང་། ཀུན་དགའ་བོ་ཆུའི་ཞལ་ཏ་བར་བསྐོས། འོད་སྲུངས་ལམ་དྲང་པོ་ནས་གཤེགས་ཏེ་རྒྱལ་པོའི་ཁབ་ཏུ་སོང་བ་དང་། མ་སྐྱེས་དགྲས་རྒྱང་རིང་པོ་ནས་མཐོང་བ་སྟོན་པ་དྲན་ཏེ་གླང་པོའི་སྟེང་ནས་ས་ལ་ལྷུང་བ་འོད་སྲུངས་ཀྱིས་རྫུ་འཕྲུལ་གྱིས་བཟུང་། ཕྱིན་ཆད་དེ་ལྟར་མི་བྱེད་པའི་ཁྲིམས་བཅས་སོ། །མ་སྐྱེས་དགྲས་ཡོ་བྱད་ཕུལ་ནས་ནྱ་གྲོ་དྷཱའི་ཕུག་ཏུ་དབྱར་གནས་པར་ཁས་བླངས། དེར་འོད་སྲུངས་ཆེན་པོས་ཀུན་དགའ་བོ་དགྲ་བཅོམ་མ་ཐོབ་ཅིང་། བསམ་པར་དྲི་མ་ཅུང་ཟད་ལུས་པ་སྤྱོ་བས་གདུལ་བར་མཁྱེན་ནས། མཆོག་འདུས་པའི་ནང་ནས་འདོད་ཆགས་དང་ཞེ་སྡང་དང་བཅས་པ་མ་ལེགས་ཀྱིས་སོང་ཞིག་ཅེས་སྨྲས་པས། ཀུན་དགའ་བོས། ང་དང་སངས་རྒྱས་ཀྱི་བསྟན་པ་ཁྱོད་ལ་གཏད་པ་ལགས་མོད་ནོངས་པ་མ་མཆིས་ཞེས་བརྗོད་པས། འོད་སྲུངས་ཀྱིས་ཞལ་ནས་ཚུལ་ཤིང་ཞོག་ཅིག་གསུངས་ནས་སྤྱོ་བ་རྣམ་པ་བརྒྱད་མཛད་ནས་གནས་དབྱུང་ངོ་ཞེས་གྲགས་ཀྱང་། འདྲི་སྨེད་འདི་མཛད་དང་ལན་འདི་བཏབ་མི་སྣང་བས་སངས་རྒྱས་ཀྱིས་འདྲི་སྨེད་མཛད་པ་ལ་ལན་ལོག་པ་བཏབ་ཅེས་པའི་སྤྱོ་བ་མི་བགྲང་ངོ་ཞེས་ཀུན་མཁྱེན་བསམ་ཡས་པ་བཞེད་ལ། དེ་ལ་སྤྱོ་བ་བདུན་སྤྱོ་ཆུང་དང་བཅས་ཞེས་གྲགས་པ་ནི་འདི་ལྟ་སྟེ། འོད་སྲུངས་ཀྱི་ཞལ་ནས་སངས་རྒྱས་ཞལ་སྐྱེམས་པ་ལ་ཆུ་རྙོག་མ་ཅན་དྲངས་པས་ཁྱོད་ཀྱིས་ནོངས་ཞེས་པའི་ལན་དུ། དེའི་ཚེ་བདུད་ཀྱིས་ཆུ་ཀླུང་ཀ་ཀུ་ཏ་དཀྲུགས་པས་རྙོག་པ་དང་བྲལ་བ་མ་རྙེད་ཅེས་བཏབ་པས། ལྷུང་བཟེད་ནམ་མཁའ་ལ་དེང་བྱས་ན་ལྷས་བདུད་རྩིས་འགེངས་པས་དེ་ཙམ་མ་ཤེས་པ་ཡང་ཁྱོད་ཀྱིས་ཉེས་གསུངས་པ་དང་། བདུད་ཀྱིས་མྱ་ངན་ལས་འདའ་བར་གསོལ་བ་ན་ཁྱོད་ལ་དྲིས་པའི་ཚེ། དེ་ལྟར་གསོལ་བ་མ་བཏབ་པ་ཁྱོད་ཀྱིས་ཉེས་ཞེས་པའི་ལན་དུ། དེའི་ཚེ་བདུད་ཀྱིས་འོད་ཟེར་གྱིས་ཁྱབ་པས་དྲན་འཛིན་ཉམས་པར་གྱུར་ཏོ་ཞེས་བཏབ་པས། བདེ་བར་གཤེགས་པ་རྫུ་འཕྲུལ་གྱི་རྐང་པ་ལ་གནས་པས་འདོད་ན་བསྐལ་པའམ་བསྐལ་པ་ལས་ལྷག་པར་ཡང་གནས་པར་འགྱུར་རོ། །ཞེས་གསུངས་ཚེ་ཁྱོད་ཀྱིས་གསོལ་བ་བཏབ་ན་མྱ་ངན་ལས་མི་འདའ་བ་དེ་ཙམ་མ་ཤེས་པ་ཉེས་ཞེས་གསུངས་པ་དང་། ན་བཟའ་རྡོག་པའི་འོག་ཏུ་བཅུག་ནས་དྲས་པ་ཁྱོད་ཀྱིས་ཉེས་ཞེས་པའི་ལན་དུ་དེའི་ཚེ་འཛིན་མཁན་མ་རྙེད་ཅེས་བཏབ་པས། ནམ་མཁའ་ལ་དེང་བྱས་ན་ལྷས་འཛིན་པ་ལ་དེ་ཙམ་མ་ཤེས་པ་ཉེས་གསུངས་པ་དང་། གསང་བའི་སྦ་བ་ནུབ་པ་གྲོང་པའི་བུད་མེད་ལ་བསྟན་པ་ཁྱོད་ཀྱིས་ཉེས་ཞེས་པའི་ལན་དུ། དེའི་ཚེ་བུད་མེད་སྐྱེས་པར་འགྱུར་དུ་རེ་ཞེས་བཏབ་པས། རང་གི་ལས་ཀྱིས་བུད་མེད་སྐྱེས་པར་ག་ལ་འགྱུར། དེ་བཞིན་གཤེགས་པའི་གསང་བའི་སྦ་བ་སྦ་བར་བྱ་བ་ཡིན་གྱིས་བསྟན་པར་བྱ་བ་མ་ཡིན་པས་དེ་ཙམ་མ་ཤེས་པ་ཉེས་ཞེས་གསུངས་པ་དང་། སྐུ་གསེར་གྱི་གཏན་པ་ཕྱིས་པ་འདྲ་བ་གྲོང་པའི་སྐྱེ་བོ་ལ་བསྟན་པ་ཁྱོད་ཀྱིས་ཉེས་ཞེས་པའི་ལན་དུ། དེའི་ཚེ་བདེན་པ་མཐོང་དུ་རེ་ཞེས་བཏབ་པས། སྐལ་པ་མེད་པ་དག་གིས་བདེན་པ་ག་ལ་མཐོང་སྐུ་དྲི་མ་ནོག་ཅན་དུ་གྱུར་པས་དེ་ཙམ་མ་ཤེས་པ་ཉེས་ཞེས་གསུངས་པ་དང་། སངས་རྒྱས་ཀྱི་བསྟན་པ་ལ་བུད་མེད་རབ་ཏུ་འབྱུང་བའི་ཞུ་བ་བྱས་པས་ཁྱོད་ཀྱིས་ཉེས་ཞེས་པའི་ལན་དུ། ཡུམ་འདས་ནས་བསྐྱངས་པས་དྲིན་ཆེ་སྙམ་ནས་ཞུས་ཞེས་བཏབ་པས། ཡང་དག་པར་རྫོགས་པའི་སངས་རྒྱས་ཀྱིས་ཕྱོགས་གང་ནས་ཀྱང་དྲིན་ལན་བསབ་ཏུ་ཡོད་པ་ལ་བསྟན་པའི་ཐ་མ་ལྔ་བརྒྱ་ཕྲག་གཅིག་རྟགས་ཙམ་འཛིན་པར་གྱུར་པས་དེ་ཙམ་མ་ཤེས་པ་ཉེས་གསུངས་པ་དང་། གང་ཟག་དཀའ་བས་ཉེ་བར་འཚོ་བའི་ཚེ་བསླབ་པའི་གཞི་ཕྲ་མོ་དག་བག་ཡངས་སུ་གནང་བར་གསུངས་པ་ལ་སང་ཕན་ཆད་གནང་བ་མ་ཞུས་པ་ཁྱོད་ཀྱིས་ཉེས་ཞེས་པའི་ལན་དུ། སངས་རྒྱས་འདས་ནས་དགེ་སྦྱོང་འདི་དག་རེས་འགའ་སྡོམ། རེས་འགའ་གློད་ཅེས་སྐྱེ་བོ་རྣམས་འཕྱ་བར་འགྱུར་དུ་དོགས་ནས་མ་ཞུས་ཞེས་བཏབ་པས། ཆོས་ཀྱི་རྗེས་གནང་ན་ཅི་ཞིག་བྱ་དེ་ཙམ་མ་ཤེས་པ་ཉེས་སོ་ཞེས་གསུངས་ཏེ་མཆིལ་ལྷམ་གྱིས་བསྣུན་ཏེ་བསྐྲད་དོ། །དེར་ཀུན་དགའ་བོ་སྤོང་བྱེད་དུ་བྱོན་ནས་བྲྀ་ཛའི་བུ་རབ་ཏུ་བྱུང་། དེས་ཞམ་རིང་བྱས་ནས་གདམས་ངག་ཕོག་པས་དེ་དག་གིས་དགྲ་བཅོམ་པའི་འབྲས་བུ་ཐོབ། མཁན་པོའི་སེམས་ལ་བརྟགས་ནས་བསྐུལ་བ། མཁན་པོ་ནི་འགྲོ་བ་མང་པོ་སྒྲོལ་བའི་གྲུ་གཟིངས་ལྟ་བུ་ཡིན་ན། ཅིའི་ཕྱིར་དགྲ་བཅོམ་པའི་འབྲས་བུ་མངོན་དུ་མི་མཛད་ཅེས་བསྐུལ་བས། ཉིན་མཚན་གྱི་ཐུན་དང་པོ་ལ་འཆག་པ་དང་འདུག་པས་སེམས་ཀྱི་སྒྲིབ་པ་སྦྱངས། གུང་ཐུན་ལ་གཙུག་ལག་ཁང་གི་ཕྱི་རོལ་དུ་རྐང་པ་བཀྲུས། ནང་དུ་སླེབས་ནས་གློ་གཡས་པ་ས་ལ་ཕབ། སྔས་ལ་མགོ་གླན་པའི་བར་དེར་དགྲ་བཅོམ་པའི་འབྲས་བུ་ཐོབ། མངོན་ཤེས་ཀྱིས་བརྟགས་པས་འོད་སྲུངས་ཀྱིས་བྱམས་པའི་སེམས་ཀྱིས་སྤྱོ་བ་མཛད་པར་མཁྱེན་ཏེ་སླར་དགེ་འདུན་གྱི་ནང་དུ་བྱོན་པས་དགྲ་བཅོམ་པ་ལྔ་བརྒྱར་ལངས། དེའི་ཚེ་གནས་འོད་མའི་ཚལ་དང་རྩྭ་ཅན་ལ་སོགས་པ་སྟོན་པ་མྱ་ངན་ལས་འདས་པས་ཡིད་གདུངས་ཤིང་ཉམས་མི་དགའ་བས་རྒྱལ་པོའི་ཁབ་བྱ་རྒོད་ཕུང་པོའི་རིའི་བྱང་ཤར་ཨ་སུ་ར་གསང་བའི་བྲག་ཕུག་ཏུ་དགྲ་བཅོམ་པ་ལྔ་བརྒྱ་བསྡུ་བ་དང་པོའི་ཆེད་དུ་འདུས་ནས་བསྐུལ་བ་ལྟར་འོད་སྲུངས་ཀྱིས་ཀུན་དགའ་བོ་ལ་སྤྲོ་བ་དྲིས་ནས་མདོ་སྡེ་བསྡུ་བར་བསྐོས། ཆོས་སྨྲ་བའི་ཁྲི་ལ་དགྲ་བཅོམ་པ་ཇི་ལྟར་འདུས་པའི་སྣམ་སྦྱར་བཏིང་ནས་དེའི་ཁར་ཀུན་དགའ་བོ་འདུག་ཏུ་བསྩལ། དེར་འོད་སྲུང་ཆེན་པོས། སྟོན་པ་འཇིག་རྟེན་ཕན་བཞེད་པ། །རྒྱལ་བས་གསུངས་པའི་ཆོས་རྣམས་ཀྱིས། །རྣམ་པ་མཆོག་ནི་གང་བཤད་པ། །ཚེ་དང་ལྡན་པས་མདོ་སྡེ་གསུངས། །ཞེས་གསོལ་པ་དང་། ཀུན་དགའ་བོ་སྟོན་པའི་ཡོན་ཏན་དྲན་ནས་བྱང་ཆུབ་སྙིང་པོའི་ཕྱོགས་སུ་གདོང་གཏད་ཐལ་མོ་སྦྱར་ནས། ཆོས་ཡང་དག་པར་སྡུད་པའི་མན་ངག་བཞིན་དུ། འདི་སྐད་བདག་གིས་ཐོས་པའི་དུས་གཅིག་ན་ཞེས་སྔོན་དུ་འགྲོ་བས་མདོ་སྡེ་བཤད་ཅིང་མཐར་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཞེས་བསྡུས་པ་ན། ཐམས་ཅད་སྟོན་པ་དྲན་ནས་སྐྱོ་བར་གྱུར་ཅིང་ཁྱད་པར་ཀུན་ཤེས་ཀོའུ་དི་ནྱཱས། བདག་གིས་ཆོས་ཀྱི་རྣམ་གྲངས་འདི་མངོན་སུམ་དུ་ཐོས་ཏེ། བདག་གི་ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་ལས་ནི་བརྒལ། ངན་སོང་གི་སྒོ་བཅད། མཐོ་རིས་ཐར་པའི་སྒོ་ཕྱེ་སྟེ་འདི་བཤད་པས་བདག་དང་ལྷ་བརྒྱད་ཁྲི་ཆོས་ཀྱི་མིག་ཐོབ་བོ། །དེ་རིང་འདི་སྐད་ཐོས་ཞེས་བཤད་པ་དེས། ཀྱེ་མ་ཐམས་ཅད་མི་རྟག་པར་ཁྱད་མེད་དོ། །ཞེས་སྨྲས་ནས་སྟན་ལས་བབས་ཏེ་འདུག་གོ །དེ་བཞིན་གཞན་ཐམས་ཅད་ཀྱང་སྟན་ལས་བབས་ཏེ་སྐྱོ་བའི་འདུ་ཤེས་ལ་ཡིད་ཕྱོགས་སོ། །དེའི་ཚེ་དགྲ་བཅོམ་པ་རྣམས་ཀྱིས་མངོན་ཤེས་ཀྱིས་བལྟས་པས། ཀུན་དགའ་བོ་ཁྱོད་ཀྱི་ལུང་དེ་ཡིན་ནམ། དེས་བདག་གི་ལུང་དེ་ལགས་སོ། །ཁྱོད་ཅག་གི་ལུང་དེ་ལགས་སམ། དེ་ཁོ་ན་ལའོ། །དེ་ནས་འོད་སྲུངས་ཀྱིས་མདོ་སྡེ་དང་པོ་བསྡུས་ནས་གང་གིས་ཀྱང་མ་ཟློག་པས་ཆོས་སོ་སྙམ་ནས། ཀུན་དགའ་བོ་མདོ་སྡེ་གཉིས་པ་གང་དུ་བཤད། འདི་སྐད་ལ་སོགས་པས་རིམ་པར་བསྡུས་ཞེས་གྲགས་ལ། དེ་བཞིན་དུ་འདུལ་བ་ཉེ་བ་འཁོར་དང་། མངོན་པ་འོད་སྲུངས་ཆེན་པོས་བསྡུས་པའི་རྣམ་པར་བཞག་ཅིང་། དེའང་གསུང་རབ་ཡན་ལག་བཅུ་གཉིས་པོ་སྡེ་སྣོད་གསུམ་དུ་བསྡུས་ནས་མི་ཉམས་པར་བྱས་པ་སྟེ་དེ་སྐད་དུ་ལུང་ཕྲན་ཚེགས་ལས། སྟོན་པ་མྱ་ངན་ལས་འདས་ཕྱི་དེའི་དབྱར། །རྒྱལ་པོའི་ཁབ་ཀྱི་གསང་བའི་བྲག་ཕུག་ཏུ། །དགྲ་བཅོམ་ལྔ་བརྒྱ་འདུས་པའི་འཚོ་བ་ནི། །མ་སྐྱེས་དགྲས་སྦྱར་སྡེ་སྣོད་གསུམ་དུ་བསྡུས། །མདོ་ཡི་སྡེ་དང་དབྱངས་སུ་བསྙད་པའི་སྡེ། །ལུང་བསྟན་ཚིགས་སུ་བཅད་པའི་སྡེ་དང་ནི། །ཆེད་དུ་བརྗོད་པ་ལྔ་ནི་མདོ་སྡེར་བསྡུས། །གླེང་གཞིའི་སྡེ་དང་རྟོགས་པ་བརྗོད་པ་དང་། །ད་ལྟར་བྱུང་བའི་སྡེ་ཞེས་བྱ་བ་དང་། །སྐྱེས་པ་རབས་དང་བཞི་ནི་འདུལ་བར་བསྡུས། །ཤིན་ཏུ་རྒྱས་དང་རྨད་དུ་བྱུང་བ་དང་། །གཏན་ལ་ཕབ་པ་གསུམ་ནི་མངོན་པར་བསྡུས། །ཞེས་སོ། །དེ་ནས་བསྟན་པའི་གཏད་རབས་ནི་སྙིང་རྗེ་པད་དཀར་ལས། སྟོན་པ་འདས་ནས་བསྟན་པ་སུས་འཛིན་ཞུས་པའི་ལན་དུ། ཀུན་དགའ་བོ། དགེ་སློང་འོད་སྲུངས་དང་ཁྱེད་གཉིས་ཀྱིས་ལོ་བཞི་བཅུ་ལྷག་ཙམ་དུ་ངའི་དམ་པའི་ཆོས་འཛིན་པར་འགྱུར་རོ། །ཞེས་གསུངས་པ་ལྟར་འོད་སྲུངས་ཀྱིས་སྟོན་པའི་གསུང་ལ་གཅེས་སྤྲས་སུ་བསྐྱངས་ནས་གདུལ་བྱ་མང་པོ་རྣམ་གྲོལ་ལ་བཀོད། བསྟན་པ་ལ་ཕན་རྒྱ་ཆེར་གདགས་ནས་མྱ་ངན་ལས་འདའ་བར་དགོངས་ཏེ་ཚིགས་སུ་བཅད་པའི་མཐར་ཀུན་དགའ་བོ་ཤེས་པར་གྱིས་ཤིག །སྟོན་པས་ང་ལ་གཏད་ནས་འདས་སོ། །ང་ཡང་མྱ་ངན་ལས་འདའ་བས་བསྟན་པ་ཁྱོད་ཀྱིས་སྐྱོངས་ཤིག །ཁྱོད་ཀྱིས་ཀྱང་ཤ་ནའི་གོས་ཅན་ལ་གཏོད་ཅིག །ཅེས་གསུངས་ནས་ཀུན་དགའ་བོ་ལ་བསྟན་པ་གཏད། ལྷ་གནས་སུམ་ཅུ་རྩ་གསུམ་དུ་གཤེགས་ནས་མཆོད་རྟེན་དང་ཚེམས་རྣམས་ལ་མཆོད་པའི་སྤྲིན་རྣམ་པར་བཀོད་པ་བསྟབས་ཏེ། རི་བོ་བྱ་རྐང་ཅན་གྱི་ནང་དུ་རྩྭའི་གདན་ལ་བཞུགས། ཕྱག་དར་ཁྲོད་པའི་སྣམ་སྦྱར་མནབས་ནས་བྱམས་པ་འཚང་རྒྱ་ལ་ཐུག་གི་བར་དེ་སྲིད་དུ་སྐུ་གདུང་མི་འཇིག་པར་བྱིན་གྱིས་བརླབས་ཏེ་མྱ་ངན་ལས་འདས་སོ། །དགོས་པ་ནི། མ་འོངས་པ་ན་བྱམས་པ་འཁོར་དུང་ཕྱུར་དང་བཅས་པའི་ཚེ་ལོ་བརྒྱད་ཁྲིའི་དུས་དེར་བྱོན་དུས། རི་ཁ་བྱེ་ནས་པུར་གཟིགས་པ་ན་འཁོར་རྣམས་ཀྱིས་དྲིས་པ་ལས། བྱམས་པས་དེའི་དོན་རྒྱ་ཆེར་གསུངས་པས་ཐམས་ཅད་སྦྱངས་པའི་ཡོན་ཏན་དང་ལྡན་པར་འགྱུར་བ་ལ་དགོངས་པའོ། །དེ་ནས་ཀུན་དགའ་བོས་ཀྱང་བསྟན་པ་ཚུལ་བཞིན་དུ་བསྐྱངས་ཏེ་ཤ་ནའི་གོས་ཅན་ལ་གཏད་དེ་མྱ་ངན་ལས་འདའ་བར་དགོངས། རྒྱལ་པོའི་ཁབ་དང་ཡངས་པ་ཅན་མི་མཛའ་བ་འདུམ་པའི་ཕྱིར་དེ་གཉིས་ཀྱི་བར་ཆུ་བོ་གངྒཱའི་དབུས་གསེར་ལྡན་གྱི་རང་བཞིན་དུ་བྱིན་གྱིས་བརླབས་ནས་བཞུགས། སྐྱེ་བོ་མང་པོ་རབ་ཏུ་བྱུང་ནས་ཆུ་དབུས་པ་དང་། ཉི་མའི་གུང་པ་ལ་སོགས་པའི་མིང་བཏགས། དེ་དག་གིས་བསྒྲུབས་པས་དགྲ་བཅོམ། མཁན་པོའི་སྔོན་དུ་མྱ་ངན་འདའ་བར་བཞེད་པ་ལ་ཀུན་དགའ་བོས་ཉི་མའི་གུང་པ་ལ། ཁྱོད་ཁ་ཆེའི་ཡུལ་དུ་སངས་རྒྱས་ཀྱི་བསྟན་པ་འཛིན་པར་སྙིང་རྗེ་པདྨ་དཀར་པོ་ལས་གསུངས་པས། དེར་སོང་ལ་བསྟན་པ་ཟུང་ཞིག་ཅེས་གཏད་དེ་ཀུན་དགའ་བོས་རྫུ་འཕྲུལ་མང་པོ་བསྟན། སྐུ་གདུང་ཚལ་པ་གཉིས་སུ་འགྲོ་བར་བྱིན་གྱིས་བརླབས་ཏེ་མྱ་ངན་ལས་འདས་སོ། །དེ་རྒྱལ་པོའི་ཁབ་པ་དང་། ཡངས་པ་ཅན་པས་སོ་སོར་སྤྱན་དྲངས་མཆོད་རྟེན་བཞེངས་པས་དེ་ཕྱིན་རྩོད་པ་ཞི་བར་གྱུར་ཏོ། །དེ་ནས་དགྲ་བཅོམ་པ་ཉི་མའི་གུང་པ་འཁོར་དགྲ་བཅོམ་པ་ལྔ་བརྒྱ་དང་བཅས་ཁ་ཆེའི་ཡུལ་དུ་གཤེགས་ནས་མཚོ་འགྲམ་ཞིག་ཏུ་བཞུགས་པ་ན། ཡུལ་དེ་ཀླུས་བདག་བྱས་པས་ཆར་ཆེན་པོ་ཕབ། ཆོ་འཕྲུལ་དུ་མ་བསྟན་དུས་འགོག་པ་ལ་མཉམ་པར་བཞག་པས། སླར་དད་དེ་ཀླུའི་རྒྱལ་པོ་ན་རེ་ཅི་བཀའ་སྩལ་ཟེར་བ་ལ། འདི་ནི་བསམ་གཏན་དང་མཐུན་པའི་གནས་ཤིག་འདུག་པས་ཡུལ་ཞིག་འདོད་པ་ཡིན་གསུངས་པས། ཡུལ་ཇི་ཙམ་འདོད། འཁོར་ཇི་ཙམ་ཡོད། ཡུན་ཇི་ཙམ་བཞུགས་ཟེར། ཡུལ་སྐྱིལ་མོ་ཀྲུང་ཤོང་བ་རེ་འདོད། ཡུན་སངས་རྒྱས་ཀྱི་བསྟན་པ་མ་ནུབ་ཀྱི་བར་དུ་སྡོད་གསུངས་པས། འོ་ན་སྐྱིལ་མོ་ཀྲུང་ཆོས་ཤིག་ཟེར། སྐྱིལ་མོ་ཀྲུང་གཅིག་གིས་ལུང་པ་བཅོ་བརྒྱད་ཀྱི་མདོ་བཅད་པས། ཀླུ་ན་རེ་འཁོར་གཅིག་མ་ཚང་ཡང་ང་རང་ཡུལ་འདོད་ཟེར་རོ། །དེ་ནི་ཤཱཀྱ་ཐུབ་པའི་བསྟན་པ་མ་ནུབ་ཀྱི་རིང་རྟག་ཏུ་དེ་ན་བཞུགས་པ་ཡིན་ནོ། །བསྡུ་བ་གཉིས་པ་ནི། སངས་རྒྱས་མྱ་ངན་ལས་འདས་ནས་ལོ་བརྒྱད་ཅུ་ན། ཡངས་པ་ཅན་དུ་དགེ་སློང་ལྷ་ཆེན་པོས། ཧུ་ལུ་ཧུ་ལུ་ཡི་རངས་དང་། །ཀུན་སྤྱོད་སྣོད་དང་ལན་ཚྭ་དང་། །ལམ་དང་སོར་གྱིས་དཀྲུགས་དང་གདིང་། །གསེར་ལ་རུང་བར་བྱ་བ་ནི། །འདི་དག་རུང་མིན་གཞི་བཅུར་འདོད། །ཅེས་མི་རུང་བའི་གཞི་བཅུ་བཅས་པ་སྟེ། དེའང་མ་འདུས་པས་ལས་བྱས་ནས་ཧུ་ལུ་ཧུ་ལུ་ཞེས་བརྗོད་པ་ལས་ཆགས་པར་འདོད་པ་དང་། ཆོས་དང་མི་མཐུན་པའི་ལས་བྱས་ནས་རྗེས་སུ་ཡི་རང་བ་ཆོས་སུ་བློ་བསྒྱུར་བས་ཆོས་སུ་རུང་བར་འདོད་པ་དང་། ན་བ་ལ་སྲིན་བུ་པད་པའི་འཇིབ་ལུགས་ཀྱིས་ཆང་འཐུངས་ན་ཉེས་པ་མེད་པར་འདོད་པ་དང་། དངོས་ཀྱི་དགག་བྱ་མེད་ན་ས་བརྐོ་བར་རུང་སྟེ་སྲོག་ཆགས་ལ་གནོད་པ་མེད་པས་ཞེས་འདོད་པ་དང་། དུས་སུ་རུང་བ་དང་འདྲེས་པས་ལན་ཚྭ་ཕྱི་དྲོ་སྤྱད་དུ་རུང་སྟེ་རུང་ཆུ་མི་དགོས་ཞེས་འདོད་པ་དང་། ལམ་དཔག་ཚད་ཕྱེད་མི་དགོས་རྒྱང་གྲགས་ཕྱེད་དུ་ཕྱིན་ནའང་འདུས་ཏེ་ཟ་བ་ལ་སོགས་པའི་ཉེས་པ་མེད་དེ་ཞེས་འདོད་པ་དང་། སོར་གཉིས་ནི་ལྷག་པོར་བྱེད་པ་ལ་སོར་མོ་གཉིས་ཀྱིས་རེག་པས་ཆོག་ཅེས་འདོད་པ་དང་། དུས་སུ་རུང་བ་དང་དུས་མ་ཡིན་རུང་བ་གཉིས་བསྲེས་ནས་ཕྱི་དྲོ་ཡང་བཏུང་དུ་རུང་སྟེ་དེ་གཉིས་དཀྲུགས་པ་ན་དུས་སུ་རུང་བས་བྱིན་གྱིས་བརླབས་པར་འགྱུར་ཞེས་འདོད་པ་དང་། གདིང་བ་རྙིང་པ་ལ་བདེ་བར་གཤེགས་པའི་མཐོ་གང་མི་དགོས་རང་གི་མཐོ་གང་གིས་གླན་པས་ཆོག་ཅེས་འདོད་པ་དང་། བསྙེན་པར་མ་རྫོགས་པ་ཁྲིའུ་གྲོང་གི་གསེབ་ཏུ་འཁྱེར་བཅུག་ནས་ཁྱིམ་བདག་ལས་གསེར་བླངས་པ་དེའི་སྟེང་དུ་འཇོག་ཏུ་བཅུག་པས་གསེར་ལ་རུང་བར་འགྱུར་ཏེ་ཉེས་པ་མེད་ཅེས་འདོད་པ་རྣམས་བསལ་བའི་ཕྱིར། ཡངས་པ་ཅན་ཀུ་སྨ་པུ་རིའི་གཙུག་ལག་ཁང་དུ། དགྲ་བཅོམ་པ་བཞི་ལྡན་དང་ཟླ་བའི་སྒུར་ལ་སོགས་པ་བདུན་བརྒྱ་འདུས་ཏེ། ཚེ་དང་ལྡན་པ་གྲགས་པས་གསོལ་བ་བཏབ་ནས་ཆོས་སྡེ་སྣོད་གསུམ་དགྲ་བཅོམ་པ་ཉེར་སྦས་ཀྱིས་བསྡུས་ཏེ་སྦྱིན་བདག་ནི་དྷརྨ་ཨ་ཤོ་ཀ་སྟེ་ཆོས་རྒྱལ་མྱ་ངན་མེད་ཀྱིས་བྱས་སོ། །ཆོས་རྒྱལ་འདས་ནས་དགེ་འདུན་འབྱེད་པའི་ཕྱིར་གྱིས་རྩོད་པ་འགའ་ཞིག་བྱུང་བ་ལས་བརྩམས་ཏེ་རྩ་བའི་སྡེ་བཞིར་གྱེས་པ་བསྡུ་བས་བསྟན་པ་གཅིག་ཏུ་བྱས་སོ། །སྡེ་བཞི་ནི། གཞི་ཐམས་ཅད་ཡོད་སྨྲའི་སྡེ། ཕལ་ཆེན་པའི་སྡེ། གནས་བརྟན་པའི་སྡེ། མང་པོས་བཀུར་བའི་སྡེའོ། འདི་ནི་བསྡུ་བ་གཉིས་པར་གྲགས་ཀྱང་འདུལ་བའི་བསླབ་པ་ལོག་པར་བཅས་པ་བསལ་བ་ཙམ་མོ། །བསྡུ་བ་གསུམ་པ་ནི། སྟོན་པ་མྱ་ངན་ལས་འདས་ནས་ལོ་སུམ་བརྒྱ་ལྷག་བཞི་བརྒྱར་ཉེ་བ་ན། ཁ་ཆེ་ཛ་ལནྡྷ་རིའི་གནས་མེ་ཏོག་བརྩེགས་པའི་ཀུན་དགའ་ར་བར་བ་སུ་མི་ཏྲ་ལ་སོགས་གཟུངས་ཐོབ་པའི་བྱང་ཆུབ་སེམས་དཔའ་ལྔ་བརྒྱ། པུརྞི་ཀ་སོགས་དགྲ་བཅོམ་པ་ལྔ་བརྒྱ། སོ་སོ་སྐྱེ་བོའི་དགེ་སློང་ཁྲི་དྲུག་སྟོང་འདུས་ནས། རྒྱལ་པོ་ཀ་ནི་ཀས་སྦྱིན་བདག་དང་གསོལ་བ་འདེབས་པ་པོ་བྱས་ཏེ། བྱང་ཆུབ་སེམས་དཔའ་དང་དགྲ་བཅོམ་པའི་གཙོ་བོ་བཤད་མ་ཐག་པ་གཉིས་ཀྱིས་བསྡུས་ནས་གྱེས་པ་བཅོ་བརྒྱད་བཀར་གཅིག་པར་བྱས་སོ། །དེ་ལ་གྱེས་པ་བཅོ་བརྒྱད་ནི། ཀློག་པའི་འཁོར་ལོར། ཤཱཀྱ་སེང་གེའི་བསྟན་པ་ནི། །ཐ་དད་རྣམ་པ་བཅོ་བརྒྱད་དུ། །འགྱུར་ཏེ་འགྲོ་བའི་བླ་མ་དེའི། །སྔོན་གྱི་ཕྲིན་ལས་དབང་གིས་ཡིན། །ཞེས་བཤད་པ་ལྟར། དེའི་ཚེ་བདུད་སྡིག་ཏོ་ཅན་གྱིས་དགེ་སློང་གི་ཆ་བྱད་དུ་སྤྲུལ་ཏེ་ཆོས་ལོག་པར་བསྟན་ཅིང་དབྱེན་སྤྱོད་པས། ཐམས་ཅད་སློང་སློང་པོར་གྱུར་ཅིང་། མདོའི་གནས་སོ་སོ་དང་སློབ་བརྒྱུད་སོ་སོར་རང་ཚན་དུ་བཅད་དེ། ལྟ་བ་དང་ཆོས་དང་ཆོས་མི་མཐུན་པས་ངེད་ཀྱི་ལྟར་ཡིན་གྱི། ཁྱེད་ཀྱི་ལྟར་མ་ཡིན་ནོ་ཞེས་སྐུར་པ་འདེབས་པ་ན། དེ་དག་དང་པོ་གང་ལས་འཕྲོས་པའི་སྡེ་པ་དེ་དང་དེར་བསྡུས་ནས་ཁ་འཆམ་པར་སངས་རྒྱས་ཀྱི་ཆོས་དང་བསྟན་པའི་སྲོལ་ཡིན་པར་ཀྲྀ་ཀྲྀའི་རྨི་ལྟས་ཀྱི་ལུང་བསྟན་ལྟར་བཅད་པ་ལ། ནང་ཚན་གྱི་རྩ་བ་སྡེ་པ་བཞི། དེ་ལས་གྱེས་པ་བཅོ་བརྒྱད་ནི། གཞི་ཐམས་ཅད་ཡོད་པར་སྨྲ་བའི་སྡེ། དེ་ལས་རྣམ་པ་དྲུག་ཏུ་གྱེས་པ་འོད་སྲུངས་པའི་སྡེ། ཆོས་སྲུངས་པའི་སྡེ། ས་སྟོན་པའི་སྡེ། མང་དུ་ཐོས་པའི་སྡེ། གོས་དམར་ཅན་གྱི་སྡེ། རྣམ་པར་ཕྱེ་སྟེ་སྨྲ་བའི་སྡེ་སྟེ་སྤྱིར་བདུན་ནོ། །འདི་དག་རྒྱལ་རིགས་སྒྲ་གཅན་འཛིན་བཟང་པོ་ཞེས་བྱ་བ། རབ་ཏུ་མ་བྱུང་ན་ཤཱཀྱའི་རྒྱལ་པོར་འགྱུར་ལ། རབ་ཏུ་བྱུང་བས་བཅོམ་ལྡན་འདས་ཀྱིས་བསླབ་པ་ལ་གུས་པ་རྣམས་ཀྱི་ནང་ནས་མཆོག་ཏུ་ལུང་བསྟན་པ་དེའི་སློབ་བརྒྱུད། སྐད་ནི་སཾ་སྐྲི་ཏ་ལེགས་པར་སྦྱར་བ་སྟེ། སུམ་ཅུ་རྩ་གསུམ་པའི་ལྷ་རྣམས་དང་མཐུན་པའོ། །སྣམ་སྦྱར་ནི་སྣམ་ཕྲན་དགུ་ཡན་ཆད་ཉི་ཤུ་རྩ་ལྔ་མན་ཆད་དེ་ཟུང་མ་གཏོགས་ཡར་འབྱུང་ལ། རྟགས་ནི་ཨུཏྤལ་དང་། པདྨ་དང་། རིན་པོ་ཆེ་དང་། ཤིང་ལོ་འབྱུང་བའོ། །ཕལ་ཆེན་པའི་སྡེ་ལས་དབྱེ་ན། ཤར་གྱི་རི་བོའི་སྡེ། ནུབ་ཀྱི་རི་བོའི་སྡེ། གངས་རིར་གནས་པའི་སྡེ། བརྟགས་པ་སྨྲ་བའི་སྡེ། འཇིག་རྟེན་ལས་འདས་པར་སྨྲ་བའི་སྡེ་དང་ལྔའོ། །འདི་དག་གི་རྩ་བའི་མཁན་པོ་བྲམ་ཟེའི་རིགས་ལས་རབ་ཏུ་བྱུང་བ་གནས་བརྟན་འོད་སྲུངས་ཆེན་པོ་ཞེས་བྱ་བ། སྦྱངས་པའི་ཡོན་ཏན་དང་ལྡན་པ་རྣམས་ཀྱི་ནང་ནས་མཆོག་ཏུ་ལུང་བསྟན་པ་དེའི་སློབ་བརྒྱུད་དོ། །སྐད་ནི་པྲ་ཀྲྀ་ཏ་སྟེ་ཡུལ་སྡེ་སོ་སོའི་སྐད་དོ། །འོད་གསལ་གྱི་ལྷ་རྣམས་དང་མཐུན་ལ། སྣམ་སྦྱར་སྣམ་ཕྲན་དགུ་ཡན་ཆད་ཉི་ཤུ་རྩ་གསུམ་མན་ཆད་ཟུང་མ་གཏོགས་ཡར་འབྱུང་བ་ལ། རྟགས་སུ་གཡུང་དྲུང་འཁྱིལ་བ་དང་། དཔལ་བེའུ་བྲིས་པའོ། །གནས་བརྟན་པའི་སྡེ་ལ། རྒྱལ་བྱེད་ཚལ་ན་གནས་པའི་སྡེ། འཇིགས་མེད་རི་ལ་གནས་པའི་སྡེ། གཙུག་ལག་ཁང་ན་གནས་པའི་སྡེ་དང་གསུམ་མོ། །འདི་དག་སྨྱིག་མ་མཁན་གྱི་རིགས་ལས་རབ་ཏུ་བྱུང་བ་འཕགས་པ་ཀཱ་ཏྱཱ་ཡཱ་ན་ཞེས་བྱ་བ། མཐའ་འཁོབ་འདུལ་བའི་མཆོག་ཏུ་བསྟན་པ་དེའི་སློབ་བརྒྱུད་དོ། །སྐད་ནི་ཨ་ཝ་བྷྲཾ་ཤ་སྟེ་ཟུར་ཆག་པས་ཤ་ཟ་རྣམས་དང་མཐུན་ལ། སྣམ་སྦྱར་སྣམ་ཕྲན་ནི་དགུ་ཡན་ཆད་ཉི་ཤུ་རྩ་གཅིག་མན་ཆད་ཟུང་མ་གཏོགས་ཡར་འབྱུང་། རྟགས་ནི་དུང་ངོ་། །མང་པོས་བཀུར་བ་ལ་དབྱེ་ན། ས་སྒྲོག་རིགས་ཀྱི་སྡེ། སྲུང་བ་པའི་སྡེ། གནས་མ་བུའི་སྡེ་པ་དང་གསུམ་མོ། །འདི་དག་འདྲེག་མཁན་གྱི་རིགས་ལས་རབ་ཏུ་བྱུང་བ་འཕགས་པ་ཉེ་བ་འཁོར་ཞེས་བྱ་བ། འདུལ་བ་འཛིན་པ་རྣམས་ཀྱི་ནང་ནས་མཆོག་ཏུ་ལུང་བསྟན་པ་དེའི་སློབ་བརྒྱུད་དོ། །སྐད་ནི་པི་ཤཱ་ཙི་ཏ་སྟེ་ཤ་ཟའི་སྐད་དུ་སྨྲ་བ་གནས་གཙང་མའི་ལྷ་རྣམས་དང་མཐུན་པའོ། །སྣམ་སྦྱར་གྱི་སྣམ་ཕྲན་ནི་གནས་བརྟན་པ་དང་མཐུན་ལ། རྟགས་ནི་དུང་ངོ་། །ཁ་ཅིག་དེ་ལྟར་སྡེ་པ་བཅོ་བརྒྱད་བསྟན་པར་བཅུག་པའི་དགོས་པ་ནི་མི་བརྗེད་པའི་གཟུངས་མ་ཐོབ་པ་རྣམས་ཀྱི་དོན་དུ་གླེགས་བམ་ལ་བཀོད་པར་འཆད་ཀྱང་། དྲི་མེད་འོད་ལས། སྡུད་པར་བྱེད་པ་པོ་དེ་དག་གིས་ཐེག་པ་གསུམ་གླེགས་བམ་ལ་བྲིས་ཏེ་ཞེས་པས་བསྡུ་བ་དང་པོའི་དུས་ནས་གཞུང་ཡི་གེར་བཀོད་ཀྱང་། རིམ་པར་དཔེ་འཕྱུགས་ནས་དང་པོའི་གཞུང་དང་མ་མཐུན་པར་མངོན་ནོ། །ཐེག་ཆེན་གྱི་ལུགས་སུ་རྒྱལ་པོའི་ཁབ་ཀྱི་ལྷོར་བི་མ་ལ་སྭ་བྷཱ་ཝ་ཞེས་པའི་རི་ལ་རྒྱལ་བའི་སྲས་པོ་འབུམ་ཕྲག་བཅུ་འདུས་ནས། བྱམས་པས་འདུལ་བ་ལ་སོགས་ཏེ་བྱང་ཆུབ་སེམས་དཔའ་ཐ་དད་པས་སྡེ་སྣོད་གསུམ་སོ་སོར་བསྡུས་ལ། དེ་དག་གི་བསྡུ་བ་པོ་ཉན་ཐོས་མ་ཡིན་ཏེ། ཐེག་པ་ཆེན་པོའི་གསུང་དེ་དག་གི་སྤྱོད་ཡུལ་མ་ཡིན་པའི་ཕྱིར་རོ། །ཞེས་རྟོག་གེ་འབར་བ་ལས་འཆད་དོ། །དེ་ལྟར་ཉན་ཐོས་པའི་ལུགས་ཀྱི་བསྟན་པ་སྡེ་བཅོ་བརྒྱད་དུ་གྱེས་པ་སོགས་འཁྲུག་ལྷོངས་ཀྱི་རྣམ་པས་སྡེ་ཚན་ཐ་དད་དུ་ཕྱིར་ཡང་དར་རྒྱས་ནི་མོད་མི་དམའ་ལ། རེ་ཞིག་ན་ཐེག་པ་ཆེན་པོའི་ལུགས་ནི་ཤིན་ཏུ་ཉག་ཕྲ་བར་གྱུར་པ་ན་གྲུབ་པའི་དབང་ཕྱུག་ཡོངས་ཀྱི་སྤྱི་མེས་སུ་གྱུར་པ་ས་ར་ཧ་པ་སྟེ་ལྗོངས་འདིར་མདའ་བསྣུན་དུ་བསྒྱུར་བ་འཛམ་བུའི་གླིང་དུ་བྱོན། དཔལ་གྱི་རི་ག་ལ་བར་གསང་བའི་བདག་པོས་བྱིན་གྱིས་བརླབས་ནས་ཐེག་པ་མཆོག་གི་དངོས་གྲུབ་དམ་པར་མངའ་དབང་བསྒྱུར། དེ་ལྟ་ནའང་རབ་ཏུ་བྱུང་བ་ནི་བསྟན་པའི་རྩ་ལག་ཉིད་དུ་དགོངས་ནས་ཤྲཱི་ན་ལེནྡྲར་གནས་བརྟན་པའི་སྡེ་ལས་རབ་ཏུ་བྱུང་ནས་བསྙེན་པར་རྫོགས། དམ་པའི་ཆོས་འདུལ་བ་ལ་སྨྲ་བའི་མཁན་པོར་གྱུར་ནས་མཐའ་ཡས་པའི་གདུལ་བྱ་ཡང་དག་པའི་ལམ་དེ་ཉིད་ལ་མངོན་པར་གཟུད། མཐར་ཐེག་པ་ཆུང་ངུའི་བརྟུལ་ཞུགས་ལ་ཞེན་པ་སྤང་ཕྱིར། མདའ་འཚོང་གི་བུ་མོ་དངོས་གྲུབ་ཀྱི་རྟེན་དུ་ཉེ་བར་བཟུང་ནས། ཁ་སང་ཕན་ཆད་དགེ་སློང་མིན། །དེ་རིང་ཚུན་ཆད་དགེ་སློང་ཡིན། །ཧེ་རུ་ཀ་དཔལ་དགེ་སློང་མཆོག །ཅེས་གསུངས་ནས་མདའ་མཁན་མཆོག་གི་ཆ་ལུགས་སྤྱོད་ཅིང་རྣལ་འབྱོར་དབང་ཕྱུག་གི་སྤྱོད་པ་བསྐྱངས་ནས་གདུལ་བྱ་མང་པོ་སྲིད་མཚོ་ལས་བསྒྲལ། དོ་ཧ་སྤྱོད་པའི་གླུ་ལ་སོགས་འོད་གསལ་ཕྱག་རྒྱ་ཆེན་པོའི་མགུར་དུ་བཞེངས་ཤིང་གནས་ལུགས་སྤྲོས་བྲལ་དུ་སྟོན་པའི་ཕྱི་མོར་གདམས། ལོ་གྲངས་སྟོང་དང་ཉིས་བརྒྱའི་འཁོར་ལོར་དབང་བསྒྱུར་ནས་ཕྱག་རྒྱ་ཆེན་པོའི་སར་གཤེགས། དེ་ཉིད་ཀྱིས་བྱིན་གྱིས་བརླབས་ཤིང་རྗེས་སུ་གདམས་ལ་ཡོངས་སུ་གྲོལ་བའི་སློབ་མའི་རྩེ་མོར་གྱུར་པ། ཤཱཀྱ་ཐུབ་པས་ངེས་དོན་གྱི་དོན་གྱི་མདོ་སྡེ་ཟབ་མོ་འབྱེད་པར་ལུང་བསྟན་པའི་སློབ་དཔོན་ཆེན་པོ་ཀླུ་སྒྲུབ་ཡབ་སྲས་སྟོན་པ་མྱ་ངན་ལས་འདས་ནས་ལོ་བཞི་བརྒྱའི་ཚེ་ན་བྱོན། ཇི་སྐད་དུ་བཤད་སྦྱར་ལས། ཆོས་རྣམས་ཐམས་ཅད་བཀའ་དང་བསྟན་བཅོས་གཉིས། །ལེགས་པར་གསུངས་དང་དེ་ཡི་དགོངས་འགྲེལ་པ། །དེ་ཡི་དབང་གིས་ཤཱཀྱའི་བསྟན་པ་ནི། །འཇིག་རྟེན་ཁམས་འདིར་ཡུན་རིང་གནས་པར་འགྱུར། །ཞེས་གསུངས་པ་ལྟར། བསྟན་པ་རིན་པོ་ཆེ་ཤིན་ཏུ་གསལ་ཞིང་མི་ཉམས་པར་བྱེད་པ་གང་ཡིན་པ་དེ་བསྟན་འཛིན་གྱི་སྐྱེས་བུའི་རྣམ་པར་ཐར་པའི་གཙོ་བོ་ཡིན་པའི་ཕྱིར་བདག་པོའི་རྐྱེན་དེ་ཉིད་ཀྱིས་རིགས་བྱེད་བཞི་ལ་སོགས་པ་ཡང་དག་པའི་དོན་མེད་པའི་བསྟན་བཅོས་དང་། རྟག་ཆད་དུ་སྨྲ་བ་ལ་སོགས་པས་གྲོལ་བ་འགྲུབ་པར་སྨྲ་བ་དོན་ལོག་གི་བསྟན་བཅོས་དང་། སྙན་ངག་ལ་སོགས་པ་ཐོས་པ་ལྷུར་ལེན་པའི་བསྟན་བཅོས་དང་། རྟོག་གེ་ལ་སོགས་རྩོད་པ་ལྷུར་ཡིན་པ་དང་། གཡུལ་ལས་རྣམ་པར་རྒྱལ་བ་ལ་སོགས་ངན་གཡོ་དང་། བ་གླང་ལ་སོགས་པའི་མཆོད་སྦྱིན་ཆོས་སུ་སྨྲ་བའི་རང་གཞན་འཚེ་བ་ཅན། བརྩེ་བ་དང་བྲལ་བའི་བསྟན་བཅོས་ངན་པ་དྲུག་དང་བྲལ་ཞིང་། གནས་སྐབས་བདེ་ཞིང་མཐར་ཐུག་གྲོལ་བ་འགྲུབ་པའི་དོན་ཆེན་པོ་དང་ལྡན་པ་དང་། བྱང་ཆུབ་བསྒྲུབ་པ་དང་འཁོར་བའི་སྡུག་བསྔལ་མཐའ་དག་སྤོང་བའི་བསྟན་བཅོས་གསུམ་ནང་པའི་ཁྱད་པར་དུ་བསྟན་པ་སྟེ། ཐོས་པ་ལས་བྱུང་བའི་ས་རྣམ་པར་གཏན་ལ་དབབ་པ་ལས། དོན་མེད་དོན་ལོག་དོན་དང་ལྡན། །ཐོས་རྩོད་བསྒྲུབ་པ་ལྷུར་ལེན་དང་། །ངན་གཡོ་བརྩེ་བྲལ་སྡུག་བསྔལ་སྤང་། །བསྟན་བཅོས་དྲུག་བྲལ་གསུམ་དུ་འདོད། །ཅེས་སོ། །དེའི་ཕྱིར་དོན་གྱི་བརྗོད་ཚུལ་ཡང་། འཐོར་བ་སྡུད་པ་དང་། སྦས་པ་མངོན་དུ་འབྱིན་པ་དང་། རྣམ་གྲངས་རྒྱ་ཆེར་བཤད་པ་དང་། དཀའ་བའི་གནས་བསྟན་པ་དང་། ཚིག་གི་རིམ་པ་གསལ་བར་བྱེད་པ་དང་། ཚིག་དོན་བསྡུས་ཏེ་བསྟན་པ་དང་། གོང་འོག་གི་སྡེ་ཚན་འབྱེད་པའི་རིམ་པས་སངས་རྒྱས་ཀྱི་བཀའ་ཆེས་གསལ་བར་མངོན་དུ་ཕྱུང་ཞིང་། དྲང་དོན་དང་། ངེས་དོན་དང་། དགོངས་པ་དང་། ལྡེམ་དགོངས་ཏེ་མདོའི་ཚུལ་བཞིས་ཕྱེ་ནས་འཆོས་སྐྱོབ་ཀྱི་ཡོན་ཏན་དང་ལྡན་པས་དབུ་མའི་གཞུང་ལུགས་རྒྱ་ཆེར་གསལ་བར་མཛད་པ་བཀའ་གསུམ་གྱི་དོན་འགྲེལ་པ། གཏམ་གྱི་ཚོགས་བཀའ་དང་པོའི་འགྲེལ་པ་དང་། རིག་པའི་ཚོགས་བར་པའི་འགྲེལ་པ་དང་། བསྟོད་པའི་ཚོགས་ཐ་མའི་འགྲེལ་པར་མཛད་པ་དང་། དེ་བཞིན་དུ་འཕགས་པ་ལྷས་བཞི་བརྒྱ་པ་ལ་སོགས་པ། ལེགས་ལྡན་འབྱེད་ཀྱིས་སྤྱན་རས་གཟིགས་བརྟུལ་ཞུགས་ལ་སོགས་པ་དང་། ཟླ་བ་གྲགས་པས་ཚིག་གསལ་དང་། དབུ་མ་འཇུག་པ་སོགས་མཛད་ཅིང་། ལོ་དགུ་བརྒྱ་ལྷག་སྟོང་དུ་ཉེ་བ་ན་སློབ་དཔོན་ཐོགས་མེད་སྐུ་མཆེད་ལ་སོགས་པ་བྱོན་ཏེ་ཐོགས་མེད་ཀྱིས་བྱམས་པ་བསྒྲུབས་ནས་བྱམས་ཆོས་ལྔ་འཛམ་གླིང་དུ་དར་བར་མཛད། ཁྱད་པར་རང་གིས་བསྟན་བཅོས་ས་སྡེ་ལྔ། སྡོམ་རྣམ་གཉིས་ལ་སོགས་པ་བྱམས་པ་དང་འབྲེལ་བའི་ཆོས་ཉི་ཤུར་གྲགས་པ་རྣམས་མཛད་པས་དཔལ་མགོན་འཕགས་པ་ཀླུ་སྒྲུབ་དང་། ཐོགས་མེད་སྟེ་ཤིང་རྟ་ཆེན་པོ་གཉིས་སུ་གྲགས་ལ་འཛམ་གླིང་མཛེས་པའི་རྒྱན་དྲུག་གི་གཙོ་བོའང་ཡིན་ནོ། །རྒྱན་དྲུག་ནི་ཀླུ་སྒྲུབ་སྙིང་པོ། ཐོགས་མེད། དབྱིག་གཉེན། ཕྱོགས་ཀྱི་གླང་པོ། ཆོས་ཀྱི་གྲགས་པ། ཡོན་ཏན་འོད་དོ། །མཆོག་བརྒྱད་དུ་བགྲང་ན། ཀུན་མཁྱེན་གྱིས་དེ་རྣམས་ཀྱི་སྟེང་དུ་འཕགས་པ་ལྷ་དང་། ཙནྡྲ་གོ་མཱི། དཔའ་བོ་གསུམ་བསྣན་ནས། ཕྱོགས་གླང་ཕྲི་བའོ། །ཞེས་གསུངས་ལ། གཞན་དུ་མཆོག་གཉིས་ཀྱི་རྣམ་གཞག་གྲགས་ཆེའོ། །དེ་ལྟར་འཛམ་བུའི་གླིང་མཛེས་པར་བྱེད་པའི་རྒྱན་དྲུག་མཆོག་གཉིས་ལ་སོགས་པས་མཚོན་ཏེ་བསྟན་སྐྱོང་ཆེན་པོ་མང་དུ་བྱོན་ནས་ཤཱཀྱ་སེང་གེའི་ལུང་རྟོགས་ཀྱི་བསྟན་པ་རིན་པོ་ཆེ་ལ་གཅེས་སྤྲས་སུ་མཛད་ཅིང་ནམ་མཁའི་མཐའ་གཏུགས་པར་བརྡལ་བ་ཡིན་ནོ། །འདིར་སྨྲས་པ། སྟོན་འཁོར་སྡུད་པ་པོ་དང་བསྟན་སྐྱོང་ཚུལ། །ཐ་དད་བསྟན་ཀྱང་ངེས་དོན་རྒྱལ་ཉིད་ཀྱིས། །ཡེ་ཤེས་ཆེན་པོའི་ཆོ་འཕྲུལ་ཉིད་ལས་གཞན། །མ་ཡིན་གཏམ་གྱི་ངང་ཚུལ་མཁས་རྣམས་གླེང་། །དབང་རྟུལ་རྒྱུ་ལ་མོས་པའི་གདུལ་བྱའི་སླད། །ཀུན་རྫོབ་ཐེག་པའི་འཇུག་སྒོ་བསམ་ཡས་ཀྱང་། །འབྲས་བུ་ལམ་དུ་བཞག་པ་མ་ཡིན་པས། །གྲངས་མེད་གསུམ་གྱི་སྤྲོས་པས་ཅུང་ཟད་དུབ། །མུ་བཞིའི་རྣམ་རྟོག་དབྱིངས་སུ་གྲོལ་གང་རང་གི་རང་བཞིན་རྣམ་པར་དག །མཆོག་འཛིན་བདག་ལྟའི་འཛིན་སྟངས་ཞིག་པས་མཐའ་གྲོལ་མཉམ་པ་ཉིད་ཀྱི་ངང་། །མདོ་སྔགས་གསུང་རབ་རྒྱ་མཚོའི་སྙིང་པོ་དེ་ཉིད་ཡིན་པར་སྐྲག་གྱུར་ནས། །ནང་པའི་ཚུལ་གྱིས་རྟག་ཆད་སྨྲ་རྣམས་ད་དུང་སྲིད་མཚོར་ངལ་གསོས་ཤིག །ཅེས་བར་སྐབས་ཀྱི་ཚིགས་སུ་བཅད་པའོ། །གཉིས་པ་བསྟན་པའི་གནས་ཚད་ལ་ཐུན་མོང་དང་། ཐུན་མོང་མ་ཡིན་པ་ལས། ཐུན་མོང་ལྟར་ན། མདོ་སྡེ་བསྐལ་བཟང་དང་། ལུང་ཕྲན་ཚེགས་ལས་བསྟན་པ་དངོས་ལོ་ལྔ་བརྒྱ་དང་གཟུགས་བརྙན་ཙམ་ལྔ་བརྒྱ་སྟེ་ལོ་སྟོང་དུ་གསུངས་པ་དང་། སྙིང་རྗེ་པད་དཀར་ལས་ཕྱེད་དང་ཉིས་སྟོང་། ཟླ་བའི་སྙིང་པོའི་མདོར་ཉིས་སྟོང་དུ་བཤད་པ་དང་། འབུམ་ཊཱིཀ་གནོད་འཇོམས་ལས་ལོ་ལྔ་སྟོང་དུ་བཤད་ཅིང་ཀ་མ་ཤཱི་ལས་རྡོ་རྗེ་གཅོད་པའི་འགྲེལ་པར་ལྔ་བརྒྱ་ཕྲག་ལྔར་བཤད་པ་ལས། དང་པོ་ནི་གྲོལ་བ་ཐོབ་པ་ཤས་ཆེ་བའི་དབང་དུ་མཛད་ལ། གཉིས་པ་ནི་འབྲས་བུ་ལ་ཞུགས་པ་དང་། ལུང་ལ་བསླབ་པའི་དབང་དུ་མཛད་ལ། གསུམ་པ་ནི་ཕལ་ཆེར་ལྟ་བ་དང་། སྒྲུབ་པ་མཐུན་པའི་དབང་དུ་མཛད་དོ། །འདིར་ནི་བྱམས་པ་ལུང་བསྟན་པའི་མདོར། ཤཱ་རིའི་བུ་ང་ཡོངས་སུ་མྱ་ངན་ལས་འདས་ནས་ལོ་སྟོང་ཕྲག་ལྔའི་བར་ལ་རྣམ་པ་ལྔ་པོ་འདི་དག་རིམ་གྱིས་ནུབ་པར་འགྱུར་རོ། །ལྔ་གང་ཞེ་ན། དང་པོ་འབྲས་བུ་ཐོབ་པ་རྣམས་ནུབ་པར་འགྱུར་བ་ཡིན་ནོ། །ཞེས་པ་ལ་སོགས་པའི་རྣམ་གཞག་ལྟར་བཤད་དེ། ལོ་ལྔ་སྟོང་གི་སྟོང་ཕྲག་ཕྱེད་ཕྱེད་དུ་བཅད་པས། ལྔ་བརྒྱ་ཕྲག་བཅུ་ལས། སྐྱེ་དགུའི་བདག་མོ་ལ་སོགས་པའི་བུད་མེད་རབ་ཏུ་བྱུང་བས་ལྔ་བརྒྱ་ཐ་མ་རྟགས་ཙམ་འཛིན་པར་བཤད་དེ་འགྲིབ་པ་ཞེས་བྱའོ། །དེའང་འབྲས་བུའི་དུས་ལ་ལྔ་བརྒྱ་ཕྲག་གསུམ། ལུང་གི་དུས་ལྔ་བརྒྱ་ཕྲག་གསུམ། སྒྲུབ་པའི་དུས་ལྔ་བརྒྱ་ཕྲག་གསུམ། རྟགས་ཙམ་འཛིན་པའི་དུས་ལྔ་བརྒྱ་ཕྲག་གཅིག་སྟེ་བཅུ་ལས། འབྲས་བུའི་དུས་ལ་ཕྲག་གསུམ་གྱི་དང་པོ་ལ་དགྲ་བཅོམ་པ་དང་། ཕྱིར་མི་འོང་པ་མང་ལ། ཕྱིར་འོང་ཡང་ཡོད་དོ། །གཉིས་པ་ལ་ཕྱིར་མི་འོང་མང་ཞིང་ཕྱིར་འོང་ཡང་ཡོད་དོ། །གསུམ་པ་ལ་རྒྱུན་ཞུགས་མང་ཞིང་གཞན་ཡང་ཉུང་ཟད་ཡོད་དོ། །འདིར་གཞན་དག་སྒྲུབ་པ་སྔོན་ལ་འདྲེན་ཞིང་ལུང་ཕྱི་ལ་འཇོག་ཀྱང་ཀུན་མཁྱེན་ཆེན་པོས་དག་པར་མི་བཞེད་པས། ལུང་གི་དུས་གསུམ་གྱི་དང་པོ་ལ་མངོན་པ་དང་། གཉིས་པ་ལ་མདོ་སྡེ། གསུམ་པ་ལ་འདུལ་བ་དར་ཞིང་འཛིན་པ་མང་དུ་འབྱུང་བའོ། །སྒྲུབ་པའི་དུས་གསུམ་གྱི་དང་པོར་ཚུལ་ཁྲིམས། གཉིས་པར་སེམས། གསུམ་པར་ཤེས་རབ་ཀྱི་བསླབ་པ་ལ་གཙོ་བོར་བསྒྲུབ་པ་མང་དུ་འབྱུང་བའོ། །དེ་ལྟར་ལྔ་བརྒྱ་ཕྲག་བཅུ་ལས་ད་ལྟ་གང་གི་དུས་ཡིན་ན། ཁ་ཅིག་ལུང་ཐ་མར་བཞག་སྟེ་དེ་ལས་མདོ་སྡེའི་དུས་ཀྱི་ལྷག་མ་ལ་སྤྱོད་པའི་སྐབས་སུ་འདོད་པ་དང་། ཁ་ཅིག་འབྲས་བུའི་དུས་ཡོལ་ནས། སྒྲུབ་པའི་དུས་ཀྱི་ཤེས་ཏིང་གཉིས། ཚུལ་ཁྲིམས་ལས་བརྒྱ་སྐོར་འདས་ཤིང་། ད་ཕྱིན་དེའི་འཕྲོ་དང་། ལུང་གི་དུས་གསུམ་རྟགས་ཙམ་འཛིན་པ་སོགས་ཡོད་པར་འདོད་ནའང་། ཀུན་མཁྱེན་བསམ་ཡས་པས། ད་ལྟ་གང་གི་དུས་ཡིན་ན་སྒྲུབ་པའི་དུས་ཡིན་ཏེ། སྐྱེ་བོ་ཕལ་རྣམས་སྐྱོ་ཤས་ཆེ་ཞིང་ཐར་པ་བསྒྲུབ་པ་ལ་འདུན་པ་མང་བའི་ཕྱིར་རོ། །དེའི་ནང་གིའང་ཚུལ་ཁྲིམས་ཀྱི་སྒྲུབ་དུས་ཡོལ་ནས་སེམས་ཀྱི་སྒྲུབ་དུས་ལ་སླེབ་པའོ། །སྔར་ལོ་ཇི་ཙམ་སོང་ཞེ་ན། སངས་རྒྱས་མྱ་ངན་ལས་འདས་ནས་མེ་ཕོ་རྟའི་བར་ལ་ལོ་གསུམ་སྟོང་ལྔ་བརྒྱ་དང་དྲུག་ཅུ་སོང་། ཕྱིན་ཆད་ལོ་དགུ་བརྒྱ་དང་བརྒྱད་ཅུ་རྩ་བཞི་ཡོད་དོ། །སུམ་སྟོང་ལྔ་བརྒྱ་དང་སུམ་ཅུ་རྩ་གཉིས་སོང་བའི་དབང་དུ་བྱས་ན་ད་ཕྱིན་ལ་དགུ་བརྒྱ་དང་དྲུག་ཅུ་རྩ་བརྒྱད་ཡོད་དོ། །རྟགས་ཙམ་འཛིན་པ་ནི་བསྟན་པར་མི་བརྩིའོ། །ཞེས་གསུངས་ལ། དེ་ལྟར་ན་ཀུན་མཁྱེན་ཆེན་པོ་ས་ཕོ་སྤྲེའུར་སྐུ་བལྟམས་ནས་དགུང་ལོ་ལྔ་བཅུ་རྩ་དྲུག་ཆུ་མོ་ཡོས་ལ་གཤེགས་པས་དེའི་བར་ལ་མེ་ཕོ་རྟ་མེད་པའི་ཕྱིར། ལྷུམས་སུ་ཞུགས་པའི་སྔ་ལོ་ཟིལ་གནོན་མེ་ཕོ་རྟ་ཡིན་པར་མངོན་པས་དེ་ནས་ད་ལྟའི་བར་ལ་བཞི་བརྒྱ་ལྔ་བཅུ་རྩ་དྲུག་ཏུ་སླེབ་བོ། །དེས་ཕྱིན་ཆད་ཀྱི་ལོ་དགུ་བརྒྱ་དང་བརྒྱད་ཅུ་རྩ་བཞི་གསུངས་པ་ལ་སྦྱངས་པས་ཀླུ་མིག་དབང་པོའི་གྲངས་སུ་བྲི་བའི་ཕྱིར། དེང་སང་རབ་བྱུང་བཅུ་གསུམ་པའི་ཉི་མ་ཞེས་པ་ཆུ་ལུག་ཏུ་སླེབ་པའི་དུས་ན་ཤེས་རབ་ཀྱི་མཐར་སླེབས་པས་རྟགས་ཙམ་འཛིན་པ་ལ་ཇེ་ཉེར་འདུག་གོ །དེ་ནི་སངས་རྒྱས་འཁྲུངས་པའི་དུས་ཚིགས་རྣམ་གཞག་ལ་རྒྱ་བལ་ཁ་ཆེའི་པཎྜི་ཏ་མང་པོ་ཞལ་མི་འཆམ་ཞིང་། དེའི་དབང་གིས་བཅོམ་ལྡན་འདས་མེ་ཡོས་ལ་ལྷུམས་སུ་ཞུགས། ས་ཕོ་འབྲུག་ལ་སྐུ་བལྟམས་། ཆུ་ཕོ་སྟག་ལ་སངས་རྒྱས། མེ་མོ་ཕག་ལ་མྱ་ངན་ལས་འདས་པ་ལྟར་བརྩིས་པའི་ལུགས་སུ་ངེས་ལ། ལུགས་སྲོལ་དེ་དག་ཐམས་ཅད་དཔལ་ལྡན་དུས་ཀྱི་འཁོར་ལོའི་ཞག་གསུམ་རྣམ་གཞག་གི་དགོངས་པས་དུས་ཚིགས་རྟག་པའི་འགྲོས་ཅན་དང་། རྒྱལ་བའི་གསུང་རབ་ཀྱི་ལུང་དོན་རྒྱ་མཚོ་ལྟོ་སྦྱར་བའི་དཔྱད་པ་གསུམ་གྱིས་གཏན་ལ་འབེབས་པ་པད་དཀར་ཞལ་ལུང་གི་དགོངས་པ་ལྟར་ན་ལྡོག་པ་ཅུང་ཟད་ཡོད་དོ། །དེ་དག་ནི་སྤྲུལ་པ་སྐུའི་རྟགས་དང་ཆ་ལུགས་འཛིན་ཅིང་། བསླབ་པ་གསུམ་དང་། དེའི་རྗོད་བྱེད་སྡེ་སྣོད་གསུམ་ལ་སློབ་ཅིང་། ལས་བརྒྱ་རྩ་གཅིག་གི་ཆོ་གའི་ལག་ལེན་མ་ནུབ་པར་བྱེད་པའི་དབང་དུ་བྱས་པའོ། །དེའང་དྲི་བ་འདིར། ཐུབ་དབང་སྟོབས་སོགས་མངའ་བ་ཡི། །བསྟན་པའི་མཐའ་ཉེ་འབྲས་བུའི་དུས། །ཞེས་པའི་རྣམ་གཞག་ནི་དག་པར་མ་མཐོང་སྟེ། ལུང་དང་སྒྲུབ་པ་གཉིས་གོ་བརྗེ་བའི་རྣམ་གཞག་རགས་པ་ཙམ་ཡང་དག་པར་མི་བཞེད་ན། འབྲས་བུ་སྔོན་ལ་འདྲེན་པ་ལ་མི་མཐུན་པ་མ་བྱུང་བས་དེ་བསྟན་པའི་མཐའ་མ་ཡིན་པའི་ཕྱིར་རོ། །ཐུན་མོང་མ་ཡིན་པ་ལྟར་ན། དེ་ལྟར་ཉན་ཐོས་ཀྱི་ཆ་བྱད་ཀྱིས་བསྟན་པ་འཛིན་པ་ཡོད་མེད་ཀྱི་འཕེལ་འགྲིབ་ལྟར་སྣང་བ་དེ་ཡང་དོན་ལ་མ་ངེས་ཏེ། འདི་ལྟར་ཚེ་བསྐལ་པ་མང་པོར་ཐུབ་པའི་ལྷ་དང་དྲང་སྲོང་དང་ཀླུ་དང་། མཁའ་འགྲོ་མ་ལ་སོགས་པས། མདོ་དང་རྒྱུད་རྣམས་བཟུང་ཞིང་གཞན་ལ་སྟོན་པ་དང་། སྤྱོད་པ་དང་། འགྲོ་བའི་ཡིད་དང་མཐུན་པར་སངས་རྒྱས་ཀྱི་སྤྲུལ་པ་སྣང་བས་ཆོས་སྟོན་ཞིང་དོན་མཛད་པའི་ཕྱིར་ནུབ་པ་ནི་མི་སྲིད་དོ། །དེ་སྐད་དུ་གསེར་འོད་དམ་པ་ལས། སངས་རྒྱས་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་ཏེ། །མ་རིག་སྨིན་མཛད་འདུལ་བའི་ཕྱིར། །ཞེས་དང་། མདོ་སྡེ་ལས་བརྒྱ་པ་ལས། རྒྱ་མཚོ་ཆུ་སྲིན་གནས་ཀྱི་རླབས། །དུས་ལས་ཡོལ་བར་འགྱུར་སྲིད་ཀྱང་། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་མི་མངའ། །ཞེས་སོ། །དེའི་རང་བཞིན་རྒྱས་པ་ནི་ཀུན་མཁྱེན་གྱིས། དེའང་སྤྲུལ་སྐུ་ཐུབ་པ་ཆུ་ཟླ་ལྟ་བུ་གཅིག་འདས་ཀྱང་། འོག་མིན་ན་བཞུགས་པའི་ལོངས་སྐུ་ཟླ་བ་དངོས་ལྟ་བུ་རྟག་ཏུ་བཞུགས་པས། སེམས་ཅན་གྱི་མོས་པ་དང་སྐལ་པའི་ཆུ་སྣོད་ནམ་བྱུང་གི་དེ་དང་འཚམ་པའི་སྤྲུལ་པ་དང་། ཐེག་པ་གང་གིས་འདུལ་བའི་ཆོས་ལྷུན་གྲུབ་ཏུ་གདུལ་བྱ་གཅིག་གམ། བརྒྱའམ། གླིང་གཅིག་ནས་སྟོང་གསུམ་ལ་སོགས་པའི་གྲངས་དང་སྣང་བ་མཐུན་པ་ཇི་ཙམ་ཡོད་པ་དེར་དུས་སྔ་ཕྱི་མེད་པར་འབྱུང་སྟེ། ཆུ་སྣོད་ཀྱི་གྲངས་ཇི་ཙམ་ཡོད་པ་དེར་ཟླ་བའི་གཟུགས་དེ་སྙེད་འཆར་བ་སྔ་ཕྱི་མེད་པ་བཞིན་ནོ། །སྤྲུལ་པ་དང་ཆོས་འདི་དག་ཀྱང་འགྲོ་བའི་སྣང་ངོར་དར་ནུབ་ལྟར་སྣང་ཡང་། དོན་ལ་འཆར་ནུབ་མེད་དེ་གཟུགས་བརྙན་རྨི་ལམ་འདྲ་བའི་ཕྱིར་རོ། །ཚུལ་འདི་དག་ཁོང་དུ་ཆུད་པ་དེ་བླ་ན་མེད་པའི་སྐྱེས་བུ་ཞེས་བྱའོ། །ཞེས་གསུངས་སོ། །དེ་ནི་བླ་ན་མེད་པའི་བཤད་ཚུལ་ཡིན་ཏེ། ཡིད་བཞིན་རྣམ་པར་བཀོད་པའི་རྒྱུད་ལས། སེམས་ཅན་ཀུན་གྱི་ཚོགས་ཆེན་པོ། །ཇི་སྲིད་རྣམ་པར་གནས་དེ་སྲིད། །སངས་རྒྱས་སྤྲུལ་པ་རྒྱུན་མི་འཆད། །གྲོལ་བའི་ཆོས་ཀྱང་རྒྱུན་མི་འཆད། །ཅེས་གསུངས་ཕྱིར་ཞལ་ནས་གསུངས་པའི་ཆོས་ཀྱི་རྣམ་གཞག་རེ་རེ་ཙམ་གོ་རིམ་དང་རྐང་གྲངས་གཤེར་བ་ལྟ་བུའི་ངོ་ནས་ནུབ་པ་ལྟར་སྣང་ཡང་། བྱིན་གྱིས་བརླབས་པའི་བཀས་དེ་དག་གི་དོན་ཕྱིན་ཅི་མ་ལོག་པར་བསྟན་པས་གྲོལ་བ་འགྲུབ་པའི་ཕྱིར་དམ་པའི་ཆོས་ནུབ་པའི་སྐབས་མི་སྲིད་དེ་སངས་རྒྱས་ཀྱི་ཡོན་ཏན་དང་ཕྲིན་ལས་ལྷུན་གྱིས་གྲུབ་པའི་བྱིན་རླབས་ལས། འོད་ཟེར་བཀྱེ་བ་ལས་དེ་བཞིན་གཤེགས་པའི་སྐུ་སྣང་ནས་ཆོས་སྟོན་པ་འབུམ་གྱི་གླེང་གཞི་ལས་བཤད་པ་དང་གཞན་ཡང་ཨ་ར་ལླི་ལས། རི་དང་རྡེའུ་ཤིང་བུ་དང་། །པདྨོ་དག་དང་དཔག་བསམ་ཤིང་། །རྔ་བོ་ཆེ་ལས་བྱུང་བ་ཡང་། །རྒྱལ་བས་བྱིན་གྱིས་བརླབས་པའི་ཕྱིར། །དེ་དག་བཀའ་ཞེས་བྱ་བར་འདོད། །ཅེས་བཤད་དོ། །ཚུལ་འདིའི་རིགས་པས་ཀྱང་སངས་རྒྱས་ཀྱི་སྐུ་ལྔའི་རོལ་པ་ཚད་མེད་ཅིང་ཐུགས་རྗེ་ཡང་ངོ་བོ་གཅིག་ཉིད་ལ་རྣམ་པ་ཐ་དད་པར་འབྱུང་བའི་ཕྱིར་སངས་རྒྱས་གཉིས་པ་མཚོ་སྐྱེས་རྡོ་རྗེས་ཟབ་རྒྱ་མཁའ་འགྲོའི་གསང་མཛོད་ཀྱི་བརྡ་སྒོ་དབྱེ་བའི་སྲོལ་བཏོད་ཅིང་། བྱིན་གྱིས་བརླབས་པས་དེ་དག་གི་སྒོ་ནས་འགྲོ་བ་མང་པོ་འཕོ་བ་ཆེན་པོའི་གོ་འཕང་ལ་བཞག་པའི་དཔང་པོའང་ཡོད་ཕྱིར་ས་ཆོས་དང་རྡོ་ཆོས་ཞེས་སྐུར་པ་གདབ་པ་མི་བྱ་སྟེ། ཅིའི་ཕྱིར་ན་ཧ་ཅང་ཕྱོགས་སུ་ལྷུང་ཞིང་བློ་ཆུང་བའི་ནོངས་པ་ཡོད་པའི་ཕྱིར་རོ། །དྲིས་ལན་རིན་པོ་ཆེའི་བསྟན་བཅོས་ལུང་གི་གཏེར་མཛོད་ཅེས་བྱ་བ་ལས། རྒྱུ་མཚན་ཉིད་ཀྱི་ཐེག་པའི་བྱུང་ཚུལ་རྣམ་པར་གཞག་པའི་སྐབས་ཏེ་སརྒ་དང་པོའོ།། །།གཉིས་པ་གསང་སྔགས་རྡོ་རྗེའི་ཐེག་པ་བསྟན་པ་ལ་གཉིས། མཚན་ཉིད་ལས་ཁྱད་པར་འཕགས་ཚུལ་བསྟན་པ་དང་། ཁྱད་པར་ཅན་གྱི་གསང་སྔགས་དེ་ཉིད་བཤད་པའོ། །དང་པོ་ལའང་གཉིས། འཕགས་ཚུལ་བྱེ་བྲག་ཏུ་བཤད་པ་དང་། འབྲས་བུ་ཡིན་པར་ངོས་བཟུང་བའོ། །དང་པོ་ནི་རྣམ་པ་བཅོ་ལྔས་ཁྱད་པར་དུ་འཕགས་ཏེ། ར་ལི་བསམ་གྱིས་མི་ཁྱབ་པའི་རྒྱུད་ལས། ཉན་ཐོས་ལ་སོགས་ཐེག་ཆུང་ལ། །མན་ངག་ཡོད་པ་མ་ཡིན་ཏེ། །ལྟ་བ་སྤྱོད་པ་སེམས་བཟུང་དང་། །རྒྱུ་དང་ལམ་དང་འབྲས་བུ་ས། །དུས་དང་ལོངས་སྤྱོད་རྣལ་འབྱོར་དང་། །བདག་གཞན་དོན་དང་དགོས་པ་དང་། །ངལ་དུབ་མཐའ་སྤངས་ཚེགས་ཆུང་དང་། །ཚོགས་བསགས་པ་ཡི་ཁྱད་པར་དང་། །ཁྱད་པར་རྣམ་པ་བཅོ་ལྔ་ཡིས། །རིག་འཛིན་ཐེག་པ་ཁྱད་པར་འཕགས། །ཞེས་པས། མཚན་ཉིད་ཀྱི་ལྟ་བ་སྟོང་ཉིད་སྤྲོས་བྲལ་བློས་བཞག་པ་ཙམ་ལས། གདོད་ནས་བདེན་གཉིས་དབྱེར་མེད་ལྷ་དང་སྔགས་ཀྱི་རང་བཞིན་ཡིན་པར་མི་རྟོག་པ་སྔགས་ཀྱིས་འབད་རྩོལ་མེད་པར་རྟོགས་པའི་ཕྱིར་འཕགས་ཏེ། སྒྱུ་འཕྲུལ་ལམ་རིམ་ལས། དོན་དམ་ཀུན་རྫོབ་དབྱེར་མེད་པར། །མཉམ་པའི་དཀྱིལ་འཁོར་ཆེན་པོ་རུ། །ཞེས་སོ། །སྤྱོད་པའང་མཚན་ཉིད་ལ་བླང་དོར་དང་བཅས་པ། སྔགས་སུ་དག་མཉམ་སྒྱུ་མའི་རང་བཞིན་གྱིས་སྣོད་བཅུད་དཀྱིལ་འཁོར་གསུམ་གྱི་རྣམ་རོལ་དུ་ཤེས་པས་སྤོང་ལེན་ལས་འདས་པའི་ཕྱིར་འཕགས་སོ། །སེམས་ཀྱི་གཟུང་ཐབས་ཀྱང་། མཚན་ཉིད་དུ་ཞི་གནས་དང་ལྷག་མཐོང་འཇོག་དཔྱད་ཀྱིས་བསྒྲུབ་པ་ལ་རྟོག་པའི་དྲ་བར་སེམས་འཛིན་གྱི་སྤྲོས་པས་དུབ་པ་ཉིད། སྔགས་སུ་དམིགས་བཅས་བསྐྱེད་པའི་རིམ་པས་སྤྲོས་པ་ཉེ་བར་ཞི་ནས། དམིགས་མེད་རྫོགས་པའི་རིམ་པར་རྩ་རླུང་གི་གནད་གཅུན་པ་ཙམ་གྱིས་ཡེ་ཤེས་མངོན་དུ་འཆར་བའི་ཕྱིར་འཕགས་སོ། །རྒྱུའང་མཚན་ཉིད་དུ་ཀུན་རྫོབ་བསྐྱེད་བྱ་སྐྱེད་བྱེད་སྔོན་དུ་སོང་བའི་འབྲས་བུར་དོན་དམ་རྟོགས་པར་འདོད་པ་ལ། སྔགས་སུ་དག་རྒྱུ་རང་གནས་ཀྱི་ཡེ་ཤེས་བཙན་ཐབས་སུ་ངོ་སྤྲད་ནས་བསྒོམས་པས་ད་ལྟ་ཉིད་དུ་ཡེ་ཤེས་མཐོང་བས་འཕགས་སོ། །ལམ་ཡང་མཚན་ཉིད་དུ་ཚོགས་གཉིས་རེས་འཇོག་ཏུ་གྱུར་པས་བསྐལ་པའི་བར་དུ་ལམ་ལྔའི་བརྟུལ་ཞུགས་ཀྱིས་དུབ་ཀྱང་མི་བགྲོད་པ་ཉིད། སྔགས་སུ་རང་བྱུང་གི་ཡེ་ཤེས་གནད་དུ་བསྣུན་པས་མྱུར་དུ་བགྲོད་པས་འཕགས་སོ། །འབྲས་བུའང་མཚན་ཉིད་དུ་རིང་མོའི་མཐར་ཡིད་སྨོན་དུ་བྱེད་པ། སྔགས་སུ་ད་ལྟ་ལྷུན་གྲུབ་རང་གནས་སུ་འདོད་པས་འཕགས་སོ། །སའང་མཚན་ཉིད་དུ་སྤང་གཉེན་རིམ་ཅན་གྱིས་དབྱེ་བས་བཅུ་གཅིག་ཏུ་འདོད་པ། སྔགས་སུ་གསང་སྙིང་ལས། ས་ཡི་ཁྱད་པར་བཅུ་དང་གསུམ། །ཞེས་པ་ལྟར་དབྱིངས་ཀྱི་ངང་དུ་ན་སྤར་བས་མ་ཆགས་པདྨ་ཅན་དང་། རྡོ་རྗེ་འཛིན་པ་བསྣན་པས་བཅུ་གསུམ་སྟེ། ཁྱད་པར་ཅན་གྱི་གསང་བ་ལ་དེའི་སྟེང་དུའང་སའི་རྣམ་གཞག་དཔག་ཏུ་མེད་པས་ཀྱང་འཕགས་སོ། །དུས་ཀྱང་མཚན་ཉིད་དུ་གྲངས་མེད་གསུམ་ལ་སོགས་པའི་བསྐལ་པར་མི་འགྲུབ་པ། སྔགས་སུ་དམ་ཚིག་མ་ཉམས་ཤིང་བརྩོན་པ་མཆོག་དང་ལྡན་ན་ཚེ་འདིར་འགྲུབ་པས་ཀྱང་འཕགས་སོ། །ལོངས་སྤྱོད་ཀྱང་མཚན་ཉིད་དུ་འདོད་ཡོན་ལ་སྐྱོན་དུ་བལྟས་ཏེ་བསྒྲུབ་པ། སྔགས་སུ་ཐབས་ཀྱིས་ཟིན་པས་ཤ་ལྔ་བདུད་རྩི་ལྔ་བསྟེན་ཞིང་རིག་མ་བསྟེན་པ་ལ་སོགས་གཙང་དམེ་མེད་པས་ཁྱད་དུ་འཕགས་སོ། །རྣལ་འབྱོར་ལའང་མཚན་ཉིད་དུ་མཉམ་གཞག་མི་དམིགས་པ་ནམ་མཁའ་ལྟ་བུ་སྟོང་པར་སྒོམ་ཞིང་། རྗེས་ཐོབ་སྒྱུ་མ་ལྟ་བུའི་ཡིད་བྱེད་ལ་སློབ་པ། སྔགས་སུ་མཉམ་རྗེས་གདོད་ནས་རྣམ་དག་གིས་ཐད་ཀའི་ཤེས་པ་ལམ་དུ་བྱེད་པས་་འཕགས་སོ། །བདག་གཞན་གྱི་དོན་བསྒྲུབ་པ་ལའང་། མཚན་ཉིད་ནས་གནས་སྐབས་ཀྱི་ཕན་པ་ཕྲ་མོ་ཙམ་ལས་མི་འགྲུབ་པ། སྔགས་སུ་ཆར་དབབ་པས་མུ་གེ་ཞི་བ་ལ་སོགས་ཏེ་ཕྲིན་ལས་མཐའ་ཡས་པའི་ཐུགས་རྗེ་ཡུལ་ལ་མངོན་གྱུར་དུ་འཇུག་པར་ནུས་པས་གཞན་དོན་དང་། རིམ་གཉིས་ཀྱི་བྱེད་ལས་ཟབ་མོས་ལས་དང་བག་ཆགས་སྐད་ཅིག་སྐད་ཅིག་ལ་ཟད་ཅིང་། རྟོགས་པ་དང་ཏིང་ངེ་འཛིན་གོང་ནས་གོང་དུ་འཕེལ་བས་རང་དོན་བྱེད་པ་ལ་སོགས་པས་ཀྱང་འཕགས་སོ། །དགོངས་པའང་མཚན་ཉིད་ལ་རྒྱུའི་ཐེག་པའི་མཐའ་བཀག་མཐུན་འཇུག་ཙམ་ལས་མི་ཤེས་པ་ཉིད། སྔགས་སུ་འབྲས་བུ་གསང་ཆེན་གྱི་དོན་ངེས་པར་བྱེད་ཅིང་ཁོག་ཡངས་པས་འཕགས་སོ། །ངལ་དུབ་ཀྱི་མཐའ་སྤངས་པ་ནི་བྱ་དཀའ་བ་མེད་པ་སྟེ་ཚེགས་ཆུང་ངུས་འབྲས་བུ་ཆེན་པོ་འགྲུབ་པའི་ཕྱིར་མཚན་ཉིད་ལས་འཕགས་པ་ནི་ཚུལ་གསུམ་སྒྲོན་མེ་ལས་བཤད་པ་ལྟར་རོ། །ཚོགས་བསགས་པའི་ཁྱད་པར་ཡང་། མཚན་ཉིད་དུ་ཐུན་མོང་གི་ཚོགས་སྦྱིན་སོགས་ཕ་རོལ་ཏུ་ཕྱིན་པ་དྲུག་ཙམ་ལས་མེད་ཅིང་། དེ་ལའང་མི་མཐུན་ཕྱོགས་ཀྱི་སྐྱོན་ཕྲ་མོས་འཚེ་བས་ཡུན་རིང་དུ་འགོར་བ་དེ། སྔགས་སུ་ཐམས་ཅད་སངས་རྒྱས་ཀྱི་ཞིང་དུ་ཤེས་པས་རང་གི་ལོངས་སྤྱོད་ཀྱང་ཚོགས་སུ་འགྱུར་བའི་ཕྱིར་ཆོད་ཆེ་བ་དང་། ཡོ་བྱད་བདུད་རྩིར་ཤེས་པས་དངོས་པོའི་འཛིན་པ་དག་པ་དང་། རང་བཞིན་དག་མཉམ་དུ་རྟོགས་པས་མཆོག་ཏུ་གྱུར་པ་དང་། ཉོན་མོངས་པའང་སྐུ་ལྔའི་རྣམ་རོལ་དུ་ཤེས་པས་འཕགས་སོ། །ཁ་ཅིག་ཐབས་འཇུག་སྒོའི་ཆ་ནས་ཁྱད་པར་ཡོད་ཀྱིས། ཤེས་རབ་ལྟ་བའི་ཆ་ནས་ཁྱད་མེད་དོ་ཞེས་གླེང་བསླངས་ནས་གསང་བ་ཟབ་མོ་ལ་གཤེ་ནའང་། ཨིནྡྲ་བྷཱུ་ཏིས། བླ་མའི་ཁྱད་པར་དང་སྣོད་དང་ཆོ་ག་དང་ལས་དང་དམ་ཚིག་དང་སྒོམ་པའི་ལྟ་བ་དང་སྤྱོད་པའི་ཁྱད་པར་གྱིས་འཕགས་སོ། །ཞེས་པ་ར་ལིའི་རྒྱུད་དང་མཚུངས་པར་བཤད་པ་ལྟར་མཚན་ཉིད་དུ་དྲན་རྟོག་རང་བཞིན་མེད་པར་ཐོས་བསམ་གྱིས་རྒྱས་བཏབ་ནས་ཡིད་ཐ་མལ་གྱི་རྣམ་རྟོག་ལས་ལོག་སྟེ་འཕྲོ་འདུ་མེད་པར་གནས་པ་ལ་མཐའ་བཞིའམ་བརྒྱད་དང་བྲལ་བའི་སྤྲོས་བྲལ་འདོད་ལ། དེ་ལ་མཐའ་བཞི་ནི། སྐྱེ་འགག་གཉིས། རྟག་ཆད་གཉིས་ཏེ་བཞིའོ། །བརྒྱད་ནི། དེའི་སྟེང་དུ། འགྲོ་འོང་གཉིས། ཐ་དད་མ་ཡིན། གཅིག་ཀྱང་མ་ཡིན་པ་སྟེ་བཞི་བསྣན་པས་བརྒྱད་དོ། །སྔགས་སུ་དྲན་རྟོག་ཆོས་ཉིད་ཀྱི་རོལ་པར་ཤར་བ་ལས་ཡིད་རང་གསལ་བཅོས་སླད་དང་བྲལ་བ་རང་བྱུང་གི་ཡེ་ཤེས་སུ་གྱུར་པ་ལ་དོན་དམ་པའི་སྤྲོས་བྲལ་ལྷུན་གྲུབ་ཏུ་ཤར་བའི་བྱེ་བྲག་འདུག་ཕྱིར། འབྲས་བུ་མངོན་དུ་གྱུར་པའི་ཐུགས་རྒྱུད་ལ་གནས་པའི་ཆ་ནས་ཁྱད་པར་མེད་ཀྱང་ལམ་གྱི་ངོས་བཟུང་དང་ངོ་སྤྲོད་ཀྱི་ཆ་ནས་མངོན་སུམ་དང་རྗེས་སུ་དཔག་པའི་ཁྱད་ཞུགས་པར་ཁོ་བོ་ཅག་སྨྲ་སྟེ། ཚུལ་འདི་ནི་བསྒོམས་པའི་ཡོན་ཏན་ཡིན་པར་བལྟའོ། །དེ་ལྟ་བུའི་ཁྱད་པར་འཕགས་ཚུལ་རྒྱས་པ་ནི། བསྐལ་པར་བརྗོད་ཀྱང་ཟད་མི་ཤེས་པར་ཡོད་དོ་ཞེས་ཀུན་མཁྱེན་ཆེན་པོ་བཞེད་ཅིང་། གྲུབ་པའི་མཐའ་རིན་པོ་ཆེའི་མཛོད་ལའང་རྒྱ་ཆེར་དབྱེའོ། །གཉིས་པ་འབྲས་བུ་ཡིན་ཚུལ་ངོས་བཟུང་བ་ནི། རྣམ་པ་གསུམ་སྟེ། དུས་མྱུར་བ་ལ་ལྟོས་ནས་འབྲས་བུར་འཇོག་པ་ནི། ཐབས་གང་གིས་བྱང་ཆུབ་དུས་ཤིན་ཏུ་ཉེ་བར་ཐོབ་པས་འབྲས་བུར་བཞག་པ་སྟེ། སངས་རྒྱས་མཉམ་སྦྱོར་ལས། བསྐལ་པ་བྱེ་བ་གྲངས་མེད་ཀྱིས། །སངས་རྒྱས་ཀུན་དངོས་མི་ཐོབ་པ། །གསང་སྔགས་ཚེ་འདིའི་ཆོ་ག་ཡིས། །ཚེ་འདི་ཉིད་ལ་ཐོབ་པར་འགྱུར། །ཅེས་སོ། །དཔེ་ནི་མཚོན་རྣོན་པོས་ལྗོན་ཤིང་མྱུར་པོར་ཆོད་པ་ལ། འདིས་ཆོད་རེག་པས་ཆོག་ཟེར་ལ། རྟུལ་པོས་ཡུན་བསྲིངས་ནས་ཆོད་ཀྱང་འདིས་མི་ཆོད་ཅེས་ཟེར་བ་ལྟར་མཚན་ཉིད་ནས་རིང་པོར་མི་ཐོབ་པའི་བྱང་ཆུབ། སྔགས་སུ་སྐད་ཅིག་ལ་ཐོབ་པའི་ཕྱིར་འབྲས་བུའི་ཐེག་པར་བཞག་གོ །དེ་བཞིན་དུ་ཐབས་མཆོག་ཏུ་གྱུར་པས་འབྲས་བུར་བཞག་པ་ནི། པདྨ་རྩེ་མོ་ལས། ཤིན་ཏུ་དཀའ་བས་མི་འགྲུབ་པ། །སྐད་ཅིག་ཡང་དག་སྦྱོར་བའི་ཕྱིར། །རྒྱུ་སྔོན་སོང་ལ་མ་ལྟོས་པར། །གནད་ལས་འབྲས་བུ་འབྱིན་པའི་ཕྱིར། །འབྲས་བུའི་ཐེག་པ་ཞེས་བྱའོ། །དཔེ་ནི་བྱ་བ་གང་ཞིག་བསྒྲུབ་པ་ལ་མི་གཅིག་གིས་ཉིན་བདུན་དུ་འབད་པས་མི་ཟིན་པ་དེ། གཅིག་གིས་འཕྲུལ་བྱས་པས་ཉིན་གཅིག་ལ་བཙན་ཐབས་སུ་ཟིན་པ་ལྟར། མཚན་ཉིད་དུ་ལོ་ཟླ་མང་པོས་བསྒྲུབས་པའི་བསམ་གཏན་དང་ཏིང་ངེ་འཛིན་ལ་སོགས་པ། སྔགས་སུ་ཉིན་གཅིག་གཉིས་ཙམ་ལའང་ལུས་གནད་དང་རྩ་རླུང་གི་བྱེད་པ་བཅིངས་པའི་མཐུས་ལམ་རྟགས་ཀྱི་ཡོན་ཏན་མངོན་གྱུར་དུ་གཏན་ལ་དབབ་ཏུ་ཡོད་པས་ཀྱང་འབྲས་བུར་འཇོག་པའོ། །འབྲས་བུ་དང་འདྲ་བ་ལམ་དུ་བྱེད་པས་ཀྱང་འབྲས་བུར་བཞག་པ་ནི་དེ་ཉིད་ལས། དྲི་མེད་དབྱིངས་ཀྱི་རང་བཞིན་ནི། །སྐུ་གསུམ་ཡེ་ཤེས་བཞི་དང་བཅས། །གང་ཚེ་དག་པ་དེ་ཉིད་དུ། །རང་གསལ་མངོན་དུ་འཆར་བ་དང་། །འདྲ་བ་ལམ་དུ་བྱེད་པ་ལ། །འབྲས་བུའི་ཐེག་པར་ཡང་དག་བརྗོད། །ཅེས་པས་། དབྱིངས་ཀྱི་ངོ་བོ་འབྲས་བུའི་རྣམ་རོལ་དུ་ཡེ་བཞུགས་ཆེན་པོ་དེའི་རང་བཞིན་ཤེས་པ་གཞིར་བྱས་ནས། དེ་ཉིད་ལ་ཇི་བཞིན་དུ་བསླབ་པའི་ཕྱིར་དང་། དེའང་གནས་སྐབས་ཀྱི་དྲི་མ་སེལ་བ་ལ་ལྟོས་ནས། སངས་རྒྱས་ཀྱི་དུས་ཀྱི་འབྲས་བུ་གཟུགས་སྐུ་གཉིས་ལྟར་ཐབས་བསྐྱེད་པའི་འཁོར་ལོ་ལྷའི་རང་བཞིན་གསུང་སྔགས་ཀྱི་འཁོར་ལོ་དང་བཅས་པ་དང་། ཆོས་སྐུ་ལྟར་ཤེས་རབ་རྫོགས་པའི་རིམ་པ་འོད་གསལ་གདོད་ནས་དག་པའི་ཡེ་ཤེས་ཀྱི་འཁོར་ལོ་ལམ་དུ་བྱེད་པས། འབྲས་བུ་དང་ཆ་འདྲ་ལམ་དུ་བྱེད་པས་དེ་སྐད་དུ་བརྗོད་ལ། དེའང་ཀུན་མཁྱེན་གྱིས། དབྱིངས་ཀྱི་འབྲས་བུ་ལྷ་དང་དཀྱིལ་འཁོར་ལམ་དངོས་ལམ་དུ་བྱས་ཏེ་བསྒོམ་པ་མ་ཡིན་ཡང་། དབྱིངས་དེའི་དོན་དང་ཉེ་བའི་ཕྱིར་ལམ་ཟབ་མོ་བསླུ་བ་མེད་པར་ཡིན་པར་བལྟའོ། །ཞེས་དོགས་པ་བསལ་བ་ཡིན་ནོ། །དོན་གཉིས་པ་བཤད་བྱའི་གསང་སྔགས་དངོས་ལ་གཉིས། གསར་མ་དང་། རྙིང་མའོ། །དང་པོ་ལའང་གཉིས། བྱུང་ཚུལ་གྱི་རྣམ་པར་གཞག་པ་དང་། །དེའི་རང་བཞིན་བཤད་པའོ། །དང་པོ་ནི། སྤྱིར་གསང་སྔགས་ཀྱི་རྒྱུད་ཕལ་མོ་ཆེ་ལ་བྱུང་བའི་དུས་དང་། དངོས་པོའི་ཚད་དང་། རིས་སུ་ཆད་པ་འགའ་ཡང་མེད་པས་ཕ་མཐའ་མི་དཔོགས་པའི་རང་བཞིན་ཏེ། མཚན་བརྗོད་ལས། འདས་པའི་སངས་རྒྱས་རྣམས་ཀྱིས་གསུངས། །མ་འོངས་རྣམས་ཀྱང་གསུང་འགྱུར་ལ། །ད་ལྟར་བྱུང་བའི་རྫོགས་སངས་རྒྱས། །ཡང་ནས་ཡང་དུ་གསུང་བ་རྣམས། །ཞེས་པ་ལྟར་ཐོག་མ་དང་ཐ་མ་མེད་པའི་དུས་ནས་གྲངས་མེད་པའི་རྡོ་རྗེ་འཆང་རིམ་པར་བྱོན་པས་གསུངས་ལ། སླད་ཀྱིས་འབྱོན་པ་ཐམས་ཅད་ཀྱིས་ཀྱང་གསུང་བའི་ཕྱིར་ཐོག་མཐའ་དང་། རང་བཞིན་བསམ་པར་མི་ནུས་ཀྱང་། རེ་ཞིག་མི་མཇེད་འདིའི་དབང་དང་། དེའི་ནང་ཚན་ལས་ཀྱང་བོད་དུ་གྲགས་པའི་དབང་དུ་བྱས་ན། མདོ་སྡེ་གདམས་ངག་འབོགས་པའི་རྒྱལ་པོ་ལས། འདྲེན་པའི་ཐེག་པ་གསུམ་པོ་དག །བཅོམ་ལྡན་ངེས་པར་གསུངས་ལགས་ན། །རྒྱུ་འབྲས་ལྷུན་གྲུབ་ཏུ་སྤྱོད་ཅིང་། །སངས་རྒྱས་གཞན་ནས་མི་འཚོལ་བའི། །ངེས་པའི་ཐེག་པ་ཅིས་མི་གསུང་། །ཞེས་པ་ལྟར། སྣོད་བཅུད་རིམ་པར་ཆགས་ནས་མ་སྟོངས་ཀྱི་བར་ལ་ཐུན་མོང་གི་སངས་རྒྱས་སྟོང་དང་། སེམས་དཔའ་གཉིས་བྱོན་ཚུལ་བསྟན་ནས་དང་པོའི་སངས་རྒྱས་རྣམ་པར་གཟིགས་ཀྱིས་ཕྱིའི་རྒྱུད་སྡེ་འགའ་གསུངས་པར་འདོད་ལ། དེ་ཡང་བསྐལ་བཟང་འདི་ཡི་གནས་དུས་ཅི་རིགས་པར་སྟོན་པ་མཆོག་གི་སྤྲུལ་སྐུའི་ཚུལ་གྱིས་བྱ་སྤྱོད་རྣལ་འབྱོར་གྱི་རྒྱུད་གསུངས་པ་སྟེ། དབྱེ་ན་བསྐལ་པ་རྫོགས་ལྡན་གྱི་དུས་ན་འཛམ་བུའི་གླིང་གི་མི་རྣམས་ལ་ཡོན་ཏན་བཞི་ཡོད་དེ། ཚེ་ལོ་དཔག་ཏུ་མེད་པ་ཐུབ། ཁ་ཟས་བདུད་རྩི་ལ་སྤྱོད། ལུས་ལ་འོད་ཡོད། རྫུ་འཕྲུལ་གྱིས་ནམ་མཁའ་ལ་འགྲོ་བའོ། །དེའི་དུས་སུ་བྱ་བའི་རྒྱུད་དོ། །དེ་ནས་སྔར་བས་ཡོན་ཏན་ཆུང་ངུ་སོང་སྟེ། ཚེ་དང་། འོད་དང་། རྫུ་འཕྲུལ་རྣམས་འགྲིབས་ཀྱང་། ད་དུང་ཚེ་ལོ་དཔག་ཏུ་མེད། ཁ་ཟས་བདུད་རྩི་ལ་སྤྱོད། འོད་ཆག་གང་། རྫུ་འཕྲུལ་གྱིས་རྐང་པ་ས་ལ་མ་རེག་ཙམ་དུ་འགྲོ་བས། ཡོན་ཏན་སུམ་ལྡན་གྱི་དུས་སུ་སྤྱོད་པའི་རྒྱུད་དོ། །དེ་ནས་ལོངས་སྤྱོད་ལ་བདག་ཏུ་བཟུང་བས་བདུད་རྩིའི་ཁ་ཟས་འགྲིབས་ཏེ་སའི་ཞག་ཟ། ཁ་དོག་གསལ་བ་ཙམ་ཡོད་པས་ཉིས་ལྡན་གྱི་དུས་སུ་རྣལ་འབྱོར་རྒྱུད་དོ། །དེ་ནས་རྫུ་འཕྲུལ་མེད་པས་ཞག་དང་བྲལ། འབྲས་སཱ་ལུ་ཟ་ཞིང་ཕོ་མོའི་མཚན་མ་དོད་པས་རྩོད་ལྡན་དུ་འགྱུར་དུས་བླ་མེད་གསུངས་པ་སྟེ། རྒྱུད་ལས། རྫོགས་ལྡན་དང་པོ་བྱ་བའི་རྒྱུད། །སུམ་ལྡན་གཉིས་པ་སྤྱོད་པའི་རྒྱུད། །ཉིས་ལྡན་གསུམ་པ་རྣལ་འབྱོར་རྒྱུད། །རྩོད་ལྡན་བཞི་པ་བླ་མེད་དོ། །ཞེས་བཤད་དོ། །ཁ་ཅིག་ཏུ་ཤཱཀྱ་ཐུབ་པས་དངོས་སུ་གསུངས་ཏེ། དེ་ནས་བཅོམ་ལྡན་ཤཱཀྱ་ཐུབ། །ཉིད་ཀྱི་ཞལ་ནས་ལྗགས་བཟང་བ། །རིང་ཞིང་ཡངས་པ་བརྐྱང་མཛད་དེ། །ཞེས་དང་། ཁ་ཅིག་རྡོ་རྗེ་འཆང་གི་རྣམ་པར་སྐབས་དེ་ཉིད་དུ་རང་བཞིན་བསྒྱུར་ནས་གསུངས་ཏེ། རྣལ་འབྱོར་ཆེན་པོའི་རྒྱུད་ལས། གསང་བ་ཆེན་པོའི་རྒྱུད་ཤེས་པ་དང་བཤད་པ་སུས་བྱེད་བཀའ་སྩལ་པ། ཨོ་རྒྱན་གྱི་ཡུལ་རྡོ་རྗེ་འཆང་ཆེན་པོའི་གནས་སུ་ཨོ་རྒྱན་གྱི་རྒྱལ་པོ་ཨིནྡྲ་བྷཱུ་ཏི་ཞེས་བྱ་བ་དེས་ཤེས་པ་དང་། བཤད་པ་དང་སེམས་ཅན་ལ་གསལ་བར་བྱེད་དོ། །ཞེས་པ་ལྟར། བཅོམ་ལྡན་འདས་ཝཱ་རཱ་ཎ་སཱི་ན་བཞུགས་པའི་ཚེ། དེ་ནས་ནུབ་ཕྱོགས་སུ་དཔག་ཚད་ལྔ་བརྒྱ་ན་ཨོ་རྒྱན་ཞེས་བྱ་བའི་ཡུལ་ཁམས་སུ་རྒྱལ་པོ་ཨིནྡྲ་བྷཱུ་ཏི་ཞེས་བྱ་བ་ཡོད་པས་སྟོན་པའི་རྫུ་འཕྲུལ་ལ་བརྟེན་ཉན་ཐོས་ནམ་མཁའ་ལ་འགྲོ་བ་གཟིགས་པའི་རྐྱེན་གྱིས་སྟོན་པ་འཁོར་དང་བཅས་པ་གདུགས་ཚོད་ལ་འབྱོན་པར་གསོལ་བ་བཏབ་པས། སྟོན་པ་འཁོར་བཅས་ཐམས་ཅད་དཔག་ཏུ་མེད་པའི་རྫུ་འཕྲུལ་གྱི་བཀོད་པས་དེར་གཤེགས་ནས་མི་བསྐྱོད་པའི་དཀྱིལ་འཁོར་ལྷ་སུམ་ཅུ་རྩ་གཉིས་ཀྱི་བདག་ཉིད་ཅན་དུ་སྤྲུལ་ཏེ་རྒྱལ་པོ་འཁོར་དང་བཅས་པ་ལ་དབང་བསྐུར། རྒྱུད་བཤད་ཅིང་གཏད་པས་རྒྱལ་པོས་དེའི་དོན་ཁོངས་དུ་ཆུད་ནས། ཉོན་མོངས་པ་ལམ་དུ་བྱེད་པའི་སྤྲོས་བཅས་ཀྱི་སྤྱོད་པ་ཆེན་པོ་བརྩམས་པ་ཅི་ཞིག་ན་མངོན་དུ་གྱུར་ཏེ། འཁོར་དང་བཅས་པ་སྙིགས་མའི་ལུས་སྦྲུལ་གྱི་ཤུན་པ་ལྟར་བརྗེས་ནས་དྭངས་མའི་ལུས་གཞའ་ཚོན་གྱི་རྣམ་པར་དེངས་ཏེ་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་མི་སློབ་པའི་ཟུང་འཇུག་རྫོགས་པར་བྱ་བའི་སླད་དུ་རྒྱུའོ། །དེས་ཨོ་རྒྱན་གྱི་ཡུལ་དེ་སྟོངས་ཤིང་། དེའི་ལྷོ་ཕྱོགས་ན་མཚོ་ཞིག་ཡོད་པ་འཕེལ་ནས་ཀླུ་མང་པོ་དང་བཅས་པས་ཡུལ་དེ་གང་བར་གྱུར་ཏོ། །དེ་ནས་ཕྱག་ན་རྡོ་རྗེས་དཔལ་གསང་བ་འདུས་པ་ལ་སོགས་པའི་ཕ་རྒྱུད་རྣམས་གསེར་གྱི་གླེགས་བམ་ལ་བཻ་ཌཱུརྱ་ཞུན་མས་བྲིས་ཏེ་མཚོ་དེའི་ཀླུ་རྣམས་སྨིན་པར་མཛད་ཅིང་གླེགས་བམ་གཏད། ཅི་ཞིག་ན་ཀླུ་དེ་དག་ཕལ་ཆེར་མིར་གྱུར་ནས་མཚོ་འགྲམ་དུ་གྲོང་ཁྱེར་བཅས་ཤིང་རྒྱུད་ཀྱི་དོན་ཉམས་སུ་བསྟར་བས། ཕལ་མོ་ཆེས་དངོས་གྲུབ་ཐོབ་པས་དེ་དག་གི་བུ་རྣམས་རྣལ་འབྱོར་པ་དང་། བུ་མོ་རྣམས་མཁའ་འགྲོ་མར་གྱུར་པས་དེ་ཕྱིན་ཆད་ནས་ཨོ་རྒྱན་མཁའ་འགྲོའི་གླིང་དུ་གྲགས་སོ། །དེ་བཞིན་དུ་གཉིས་སུ་མེད་པ་དུས་ཀྱི་འཁོར་ལོའི་རྒྱུད་ནི། རྩ་རྒྱུད་ལས། སྟོན་པས་བྱ་རྒོད་ཕུང་རི་རུ། །ཤེས་རབ་ཕ་རོལ་ཕྱིན་ཚུལ་བཞིན། །ཆོས་བསྟན་དཔལ་ལྡན་འབྲས་སྤུངས་སུ། །དེ་བཞིན་གསང་སྔགས་ཚུལ་རབ་གསུངས། །ཞེས་པ་ལྟར་དཔལ་ལྡན་འབྲས་སྤུངས་རྒྱུ་སྐར་གྱི་དཀྱིལ་འཁོར་ཏེ། རྒྱུད་འདི་གསུངས་པའི་དུས་ཚོད་ལ་རྣམ་གཞག་མི་མཚུངས་པ་འགའ་ཞིག་བྱུང་ཡང་། ས་བཅུའི་དབང་ཕྱུག་གི་འགྲེལ་པ་དྲི་མེད་འོད་ལས། དེ་ནས་ཆོས་ཀྱི་འཁོར་ལོ་བསྐོར་ཞིང་ཐེག་པ་གསུམ་བསྟན་པར་མཛད་ནས་ཟླ་བ་བཅུ་གཉིས་པ་ནག་པའི་ཉ་ལ་ཤྲཱི་དྷ་ནྱཱ་ཀ་ཊ་ཀར་ཆོས་དབྱིངས་གསུང་གི་དབང་ཕྱུག་གི་དཀྱིལ་འཁོར་ཆ་བཅུ་དྲུག་གི་རྣམ་པར་ཕྱེ་བའི་མཚན་ཉིད་ཅན་དང་། དེའི་སྟེང་དུ་དཔལ་ལྡན་རྒྱུ་སྐར་གྱི་དཀྱིལ་འཁོར་ཆ་དྲུག་གི་རྣམ་པར་དབྱེ་བ་ཅན་དང་པོའི་སངས་རྒྱས་རྣམ་པར་སྤྲོས་སོ། །ཞེས་གསུངས་ལ། ཟླ་བ་བཅུ་གཉིས་ནི་དེ་ནས་བགྲངས་པའི་གྲངས་ཏེ་དེས་གསལ་བར་ཤེས་སོ། །ཞུ་བ་པོ་ནི་ས་བཅུའི་དབང་ཕྱུག་ཕྱག་ན་རྡོ་རྗེ་ཆུ་བོ་ཤི་ཏའི་བྱང་ཕྱོགས་ཤཾ་བྷ་ལའི་གྲོང་ཁྱེར་ཀ་ལཱ་པའམ། ཆ་བསགས་ཞེས་བྱ་བར་ཉི་མའི་འོད་ཀྱིས་ལྷ་མོ་རྣམ་པར་རྒྱལ་མའི་མངལ་ནས་བལྟམས་པ་ཆོས་ཀྱི་རྒྱལ་པོ་ཟླ་བ་བཟང་པོས་སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་བསྒྲུབ་པའི་དོན་དུ་དེ་བཞིན་གཤེགས་པ་ལ་གསོལ་བ་བཏབ་པའི་ངོར་གསུངས་ལ། འབྲས་ཐོབ་ཆོས་རྒྱལ་བདུན་དང་རིགས་ལྡན་སུམ་ཅུ་རྩ་གཉིས་ཀྱི་བསྟན་པ་དེ་ལ་བགྲང་བྱའི་ཕུང་པོ་གྲངས་ཅན་དུ་བྱ་བ་བྱེད་དོ། །གཞན་ཡང་རི་བོ་བྱ་རྐང་ཅན། བསིལ་བ་ཚལ། འབོད་སྒྲོག་གི་གནས་རྣམས་སུ་སྟོན་པ་ཉིད་དཀྱིལ་འཁོར་གྱི་བདག་པོར་བཞེངས་པའམ། ཆགས་བྲལ་དགེ་སྦྱོང་གི་རྣམ་པ་ཅི་རིགས་པས་རྒྱུད་སྡེ་མང་དུ་གསུངས་པར་བཞེད་ལ། དེ་དག་ལས་བླ་མེད་ཀྱི་རྒྱུད་སྡེ་རྣམས་ནི་ཨིནྡྲ་བྷཱུ་ཏི་ལ་སོགས་པ་མཆོག་གཟིགས་ཀྱི་རྣལ་འབྱོར་དབང་ཕྱུག་རྣམས་ཀྱིས་གླེགས་བམ་ལ་བཀོད་ནས། ཨོ་རྒྱན་ཧེ་རུ་ཀའི་ལྷ་ཁང་དང་། ཌཱཀྐིའི་གླིང་། འཛམ་བུའི་གླིང་གི་ཡུལ་གྲུ་ཐ་དད་པ། གདོད་ནས་གྲུབ་པའི་ཡུལ་རྣམས་སུ་བཞུགས་པ་དག་གྲུབ་པའི་འཁོར་ལོས་སྒྱུར་བ་མདའ་བསྣུན་ཞབས། ནཱ་གཱརྫུ་ན། བི་རཱུ་པ། ཀུ་ཀུ་རི་པ། ཙི་ལུ་པ། ཡེ་ཤེས་ཞབས། མཚོ་སྐྱེས་པ། ཉི་མའི་ཤིང་རྟ། ཏཻ་ལོ། ནཱ་རོ། །ལཱུ་ནག་དྲིལ་གསུམ། ཌོམྦྷི་ཧེ་རུ་ཀ །ཆོས་མ་ཧེའི་ཞལ་ནས་གསུང་པའི་གྲུབ་ཆེན་དཔལ་འཛིན། བྲམ་ཟེ་མཆོག་སྲེད་རྣམས་ཀྱིས་བླངས་ཏེ་རྒྱ་ཆེར་སྤེལ་བའོ། །ཕྱི་རྒྱུད་སྡེ་གསུམ་ནི། སྒེག་རྡོར། སོ་ཀྱ་དེ་ཝ། ཤཱཀྱ་བཤེས་གཉེན། རབ་འབྱོར་བསྐྱངས། ཀུན་སྙིང་། རབ་གསལ་ཟླ་བ་ལ་སོགས་པ་དང་། ཁྱད་པར་ཕྱི་ནང་གི་རྒྱུད་སྡེ་མཐའ་དག་གི་དོན་བསྒྲིབ་མེད་དུ་གཟིགས་ཤིང་ཡོ་གའི་ཤིང་རྟ་ཆེན་པོ་སངས་རྒྱས་གསང་བས་སྲོལ་ཕྱེ་ནས་ད་ལྟའི་བར་དུ་དར་བ་ཡིན་ནོ། །ཁ་ཅིག་དེ་ལྟར་ཤཱཀྱ་ཐུབ་པ་ཉིད་ནང་ལྟར་རྡོ་རྗེ་འཆང་དུ་བཞེངས་པའམ། དེས་གསུངས་པ་ཙམ་ལས་གཞན་དུ་གསང་སྔགས་ཀྱི་རྒྱུད་མེད་པར་འཛིན་པ་ནི་ཤིན་ཏུའང་མི་རིགས་ཏེ། ཡེ་ཤེས་རོལ་པའི་རྒྱུད་ལས། ཐོག་མའི་རྡོ་རྗེ་འཆང་པ་ངས། །བསྐལ་པ་ཀུན་གྱི་སྔོན་རོལ་ནས། །ཕྱི་མའི་མུ་མཐར་ཐུག་གྱུར་པ། །དེ་སྲིད་བླ་མེད་གསང་བའི་ཆོས། །རྨད་བྱུང་རྒྱལ་པོས་འགྲོ་བ་ལ། །གསུངས་སོ་གསུང་ངོ་གསུང་བར་འགྱུར། །ཞེས་སོ། །གཞན་ཡང་སྔར་དྲངས་པ་ལྟར་རྫོགས་ལྡན་དང་པོ་བྱ་བའི་རྒྱུད་ཅེས་པ་ལ་སོགས་པས་ཀྱང་ཤེས་ཤིང་། ཁྱོད་ཀྱིས་ལྟར་ན་མ་རྒྱུད་འཁོར་ལོ་སྡོམ་པའང་རྩ་རྒྱུད་འགྲེལ་པས་ཇི་སྐད་བཀྲལ་བ་བཞིན་ཐོག་མ་དང་ཐ་མ་མེད་པའི་ཆོས་ཀྱི་རྣམ་གྲངས་སུ་བསྟན་པས་དེ་ཡང་རྒྱུད་མ་ཡིན་པའི་དོགས་པ་སྐྱེ་ལ། གཞན་ཡང་ངན་སོང་སྦྱོང་རྒྱུད་ལས། །སངས་རྒྱས་ཀུན་བས་སྔར་སངས་རྒྱས། །མི་ཤེས་དྲི་མ་ཀུན་བཅོམ་པ། །རྡོ་རྗེ་རྡོ་རྗེ་འཛིན་རྒྱལ་པོ། །རྡོ་རྗེ་རྡོ་རྗེ་རྡོ་རྗེ་འཛིན། །ཕྱག་ན་རྡོ་རྗེར་ཕྱག་འཚལ་བསྟོད། །ཅེས་ཕྱག་ན་རྡོ་རྗེ་སངས་རྒྱས་ཐམས་ཅད་པའི་སྔོན་རོལ་དུ་བཤད་ན་དེས་བཟུང་ཞིང་བསྡུས་པའི་རྒྱུད་ལ་ཐོག་མཐའ་བསམ་པར་ནུས་པའི་སྐབས་མེད་ཕྱིར་ཆོས་སྤོང་གི་ལས་ལ་འཆི་བ་སྲོག་ལ་བབས་ཀྱང་མི་འཇུག་པ་དམ་པའི་རྣམ་ཐར་ཡིན་པའང་བསམ་པར་བྱའོ། །དེའི་ཕྱིར་བསྐལ་པ་དང་པོ་ཆགས་པ་ནས་ད་ལྟའི་བར་དུ་བཅོམ་ལྡན་འདས་དཔལ་ཀུན་ཏུ་བཟང་པོའི་བྱིན་རླབས་ལས། འོག་མིན་གྱི་གནས་སུ་རྡོ་རྗེ་འཆང་། རྡོ་རྗེ་སེམས་དཔའ་རིགས་ལྔའི་སངས་རྒྱས་ལ་སོགས་པ་བརྗོད་དུ་མེད་པའི་སྟོན་པ་ཉིད་དུ་རྣམ་པར་འཕྲུལ་ཏེ། ཞིང་ཁམས་ཆེན་པོ་དེར་རྟག་པར་བཞུགས་ནས་འཁོར་དཔག་ཏུ་མེད་པ་ལ་སྔར་གསུངས། ད་ལྟ་གསུང་། མ་འོངས་པ་ན་སངས་རྒྱས་མོས་པས་ཀྱང་གསུང་བའི་ཕྱིར་དུས་ཁོ་ར་ཁོར་ཡུག་ཏུ་སྣང་བའི་ཆོས་ཀྱི་རྣམ་གྲངས་དེ་དག་སྔོན་བསྐལ་པ་དང་པོ་ནས་འདིའི་བར་ལ་ཕྱག་ན་རྡོ་རྗེ་དང་དབང་ཐོབ་པའི་བྱང་ཆུབ་སེམས་དཔའ་དང་། གྲུབ་ཐོབ་དང་རིགས་སྔགས་འཆང་དང་། མཁའ་འགྲོ་མ་རྣམས་ཀྱིས་བསྡུས་ཤིང་། ལྷ་ཀླུ་གནོད་སྦྱིན་དྲི་ཟ་མིའམ་ཅིའི་ཡུལ་ལ་སོགས་པ་ནས། འཛམ་བུའི་གླིང་གིའང་ཟ་ཧོར་དང་། མ་ལ་ཡ་གནམ་ལྕགས་འབར་བའི་རི་དང་། ཨུ་རྒྱན་དང་། སིངྒ་ལ་དང་། ཤམྦྷ་ལ་དང་། མཁའ་འགྲོ་མའི་གནས་སོ་སོར་བཟུང་ནས་དར་ཞིང་སྤྱོད་པ་ལས། སློབ་དཔོན་ཆེན་པོ་ཀླུ་སྒྲུབ་དང་། པདྨ་འབྱུང་གནས་དང་། བི་མ་ལ་མི་ཏྲ་སོགས་པས་སྤྱན་དྲངས་ནས་སྐལ་ལྡན་སོ་སོ་ལ་བརྒྱུད་པ་དག་ཉམས་སུ་བླངས་པས། འཕགས་པའི་ཡུལ་དུ་གྲུབ་ཆེན་བརྒྱད་ཅུ་ལ་སོགས་པའང་མན་ངག་དེ་དག་གི་སྒོ་ནས་གྲོལ་བ་བརྙེས་ལ། བོད་དུའང་སྔོན་རྒྱལ་བློན་སྔ་དར་གྱི་དུས་སུ་མང་དུ་བྱོན་ཞིང་དེའི་སྒོ་ནས་གྲུབ་པ་ཐོབ་པའང་ཚད་མེད་དེ་འོག་ཏུ་འཆད་དོ། །བོད་དུ་མཁས་པ་ཇི་སྙེད་གྲགས་ཏེ་འདི་ལྟ་བུའི་བཤད་ཚུལ་ཁོག་ཡངས་ལ་ཕྱོགས་སུ་མ་ལྷུང་བར་སྨྲ་བ་ནི་ཀུན་མཁྱེན་ངག་གི་དབང་པོ་ལས་གཞན་དུ་མ་དམིགས་པའི་ཕྱིར་དེའི་དགོངས་པ་ལྟར་བཤད་པའོ། །གཉིས་པ་གསང་སྔགས་སྤྱིའི་རང་བཞིན་བཤད་པ་ལ་བཞི། མཚན་གཞི། མཚན་ཉིད། ངེས་ཚིག །མིང་གི་རྣམ་གྲངས་སོ། །དང་པོ་ནི། འོད་གསལ་གྱི་རང་བཞིན་སྐུ་དང་ཡེ་ཤེས་འདུ་འབྲལ་མེད་པའི་དབྱིངས་རང་བཞིན་གྱིས་རྣམ་པར་དག་པ་དང་། དེ་ལ་བསྟན་པའི་ཆོས་སྦྱང་གཞི། སྦྱང་བྱ། སྦྱོང་བྱེད། སྦྱངས་འབྲས་རྣམ་པ་བཞིར་འདུས་པ་ལས། རང་བཞིན་གྱིས་རྣམ་པར་དག་ཅིང་དབྱིངས་ཀྱི་བཞུགས་ཚུལ་འོད་གསལ་བའི་བདག་ཉིད་ཅན་དེ་ནི་སྦྱང་བའི་གཞིའོ། །དེ་གློ་བུར་བའི་སྒྲིབ་པ་ལས་དང་ཉོན་མོངས་པ་འཁོར་བའི་ཆོས་ཀུན་གཞི་ཚོགས་བརྒྱད་དང་བཅས་པ་ནི་སྦྱང་བྱའི་དྲི་མའོ། །དེ་ལ་བག་ཆགས་སྣ་ཚོགས་སུ་ཤར་བའི་ཀུན་གཞི་ནི་འཁོར་བའི་རྩ་བ་ཡིན་པས་ལྡོག་ལ། གནས་ལུགས་དོན་གྱི་ཀུན་གཞི་རང་གི་ངོ་བོ་ཡིན་པས་མི་ལྡོག་ཀྱང་། ཐ་སྙད་བརྡར་བཏགས་ཀྱི་ཀུན་གཞི་ནི་བཏགས་པའི་མིང་གི་ཆ་དེ་ལས་ལོག་ནས་ཆོས་ཀྱི་དབྱིངས་ཀྱི་ཡེ་ཤེས་ཞེས་བྱ་བར་འགྱུར་བའོ། །དེའང་སྨིན་བྱེད་ཀྱི་དབང་བཞི་བསྐུར་ནས་སྐུ་བཞིའི་ས་བོན་བཏབ་པ། དེ་གྲོལ་བྱེད་ཀྱི་བསྐྱེད་རྫོགས་བསྒོམས་པས་ཡོན་ཏན་གསར་དུ་སྐྱེ་བ་དང་བཅས་པའི་ཆ་ལས་ཡེ་ཤེས་ཀྱི་ལམ་གྱི་ཆར་གཏོགས་པ་མཐའ་དག་ནི་སྦྱོང་བྱེད་ཀྱི་ཆོས་སོ། །དེ་ལྟར་སྦྱངས་པས་དབྱིངས་ལ་སྒྲིབ་པའི་དངོས་པོ་ཐམས་ཅད་དག་ནས་ཁམས་བྱང་ཆུབ་ཏུ་འགྱུར་བས། ལྷུན་གྱིས་གྲུབ་པའི་སྐུ་དང་ཡེ་ཤེས་མངོན་དུ་གྱུར་ཏེ། རང་དང་གཞན་གྱི་དོན་གཉིས་མཐར་ཕྱིན་པའི་ངོ་བོ་ནི་ཁམས་ལ་དྲི་མ་སྦྱངས་པའི་འབྲས་བུ་ཡིན་ནོ། །གཉིས་པ་ནི། རྡོ་རྗེ་རྩེ་མོ་ལས། སྔགས་རྣམས་ཀུན་གྱི་མཚན་ཉིད་ནི། །སངས་རྒྱས་ཀུན་གྱི་ཐུགས་ཡིན་ཏེ། །ཆོས་ཀྱི་སྙིང་པོ་སྒྲུབ་བྱེད་པས། །ཆོས་ཀྱི་དབྱིངས་དང་ཡང་དག་ལྡན། །ཞེས་པ་ལྟར། དབྱིངས་རང་བཞིན་གྱིས་དག་པ་དང་རྗོད་བྱེད་ཐུགས་རྡོ་རྗེའི་གསང་བ་ཆོས་ཀྱི་སྙིང་པོར་འགྲུབ་པས་སོ། །གསུམ་པ་ནི། མནྟྲ་སྔགས་ཡཱ་ན་ཐེག་པ་སྟེ། མ་ལ་ཡའི་རྐྱེན་བྱིན་པས་མ་ལ་ན་ནི་ཡིད་དེ་བདག་ཏུ་འཛིན་པའི་དོན་གྱི་ཡིད་དོ། །ཏྲ་ལ་ཐའི་རྐྱེན་བྱིན་པས་ཏྲ་ཐ་ལ་ནི་སྐྱོབ་པ་སྟེ། དེའང་མྱུར་དུ་སྐྱོབ། བདེ་བར་སྐྱོབ་ཅེས་བྱ་བ་སྟེ། དོན་ནི་ཡིད་ཀྱི་རྣམ་པར་ཤེས་པ་འཁོར་བའི་འཇིགས་པ་ལས་མྱུར་དུ་སྐྱོབ་པ། བདེ་བར་སྐྱོབ་པས་གསང་སྔགས་ཞེས་བྱ་བའི་སྒྲར་གྲུབ་སྟེ་གསང་བ་འདུས་པའི་རྒྱུད་ཕྱི་མ་ལས། མ་ནི་ཡིད་ཅེས་བྱ་བ་སྟེ། །ཏྲ་ནི་སྐྱོབ་པར་བྱེད་པའི་དོན། །ཞེས་པ་དང་། དེ་བཞིན་དུ་ཡ་ལ་ཧེ་དུའི་རྐྱེན་བྱིན་པས་ཧེ་དུ་ཞེས་པ་རྒྱུའི་རང་བཞིན་ཏེ། གཞི་ལྷུན་གྲུབ་ཏུ་གནས་པ་དེས་འདོད་པས་ན་ཐེག་པའོ། །དེ་བཞིན་དུ་ཡ་མརྒ་ཞེས་པས་ལམ་ཟུང་འཇུག་སྐུ་གསུམ་གྱི་རང་བཞིན་དུ་ཤེས་པས་ཐེག་པ་དང་། ཡ་མ་སྤྲ་ནི་མ་ཞེས་པས། འབྲས་བུའི་དབྱིངས་ལ་དུག་གསུམ་གཞི་མེད་དུ་དག་པས་ཐེག་པ་སྟེ། རྡོ་རྗེ་མཁའ་འགྲོ་རྒྱ་མཚོ་ལས། ཐེག་ཆེན་ཀུན་ལ་རབ་འཇུག་པས། །སྔགས་ཀྱི་ཐེག་པ་ཉིད་དུ་བྱེད། །ཅེས་སོ། །བཞི་པ་ནི། སྔགས་ཀྱི་ཐེག་པ། རྡོ་རྗེའི་ཐེག་པ། འབྲས་བུའི་ཐེག་པ་ཞེས་བྱའོ། །དབྱེ་ན་གསུམ་སྟེ། དགོངས་པ་གྲུབ་པའི་རྒྱུད་ལས། སྔགས་རྣམས་ཀུན་གྱི་དབྱེ་བ་ནི། །རྣམ་པ་གསུམ་དུ་ཤེས་བྱ་སྟེ། །རིག་སྔགས་ཐབས་ཀྱི་ངོ་བོ་ཡིན། །གཟུངས་སྔགས་ཤེས་རབ་ངོ་བོ་ཡིན། །གསང་སྔགས་གཉིས་མེད་ཡེ་ཤེས་སོ། །ཞེས་སོ། །རང་བཞིན་རྒྱས་པ་ནི་སོ་སོའི་གཞུང་དུ་ཤེས་ལ། ལམ་སྤྱིའི་འགྲོས་ཀྱི་རྣམ་པར་གཞག་པ་ནི་འོག་ཏུ་རིམ་དགུའི་བྱེ་བྲག་འཆད་པའི་སྐབས་ཀྱི་མ་ཧཱ་ཡོ་ག་མན་ཆད་ལ་འདིའི་རྒྱུད་སྡེ་བཞིའི་རྣམ་ངེས་ཚང་བ་ཡིན་པའི་ཕྱིར་རོ། །དེའང་ཤེས་བྱེད་རྒྱུད་སྡེའི་རྣམ་གྲངས་རྒྱ་བོད་ཕལ་ལ་གྲགས་ཆེ་བ་དག་ནི་སྔོན་གྱི་འགྲེལ་བྱེད་རྣམས་ཀྱི་གཞུང་ལ་བཀོད་ཅིང་། དེ་བཞིན་དུ་གྲུབ་མཐའ་རིན་པོ་ཆེ་དང་། ངལ་བསོའི་སྤྱི་དོན་སོགས་ལའང་ཤིན་ཏུ་གསལ་མོད། རྣམ་གྲངས་རྒྱས་པ་ནི་བསམ་གྱིས་མི་ཁྱབ་པར་གྲགས་ཏེ་སྡོམ་འབྱུང་སངས་རྒྱས་ཐོད་པ་ལས། རྣལ་འབྱོར་ཕ་རྒྱུད་རྣམས་ཀྱི་ཚད། །བྱེ་བ་ཕྲག་ནི་དགུ་བཅུར་ངེས། །དེ་བཞིན་རྣལ་འབྱོར་མ་རྒྱུད་གྲངས། །བྱེ་བ་ཕྲག་ནི་བཅུ་དྲུག་གྲངས། །ཞེས་བཤད་པས་རྒྱ་གར་གྱི་ཡུལ་གྲུ་ཐ་དད་པ་རེ་ཙམ་དང་གཙུག་ལག་ཁང་ཆུང་རེ་ཙམ་གྱི་ཆོས་ཀྱི་བཞུགས་བྱང་ཡི་གེར་བཀོད་པའི་གཏན་ཚིགས་ལ་ཞེན་པར་མི་བྱའོ། །དེའང་སྔོན་ཆད་བོད་འདིར་གསར་རྙིང་གི་རྒྱུད་མང་པོ་ལ་བཀའ་མ་ཡིན་པར་བསྒྲུབས་པས་སྒྲོ་སྐུར་བྱུང་བའང་དོན་ལ་གནས་པ་མ་ཡིན་ཏེ། སོ་སོ་ཡང་དག་རིག་པ་བཞིའི་བརྟུལ་ཞུགས་ལ་མངའ་དབང་མ་བསྒྱུར་དེ་སྲིད་དུ། སྒྲ་དང་ཚད་མ་དང་། རྟོག་གེའི་རིག་པ་ལ་བག་ཆགས་བརྟས་པའི་འགལ་གྲུབ་ཙམ་གྱིས་ཐམས་ཅད་མཁྱེན་པ་གང་ཡང་མཁྱེན་ལ། ཅི་ཡང་གསུང་བའི་གསུང་རབ་རྒྱ་མཚོའི་ཕ་མཐའ་མི་དཔོགས་པའི་ཕྱིར་ཏེ། ཅིའི་ཕྱིར་ན་འགྲོ་བའི་ཁམས་ལ་ཚད་མེད་པ་དེ་སྙེད་དུ་གདུལ་བའི་ཆོས་ཀྱང་ཚད་མེད་པའི་ཕྱིར། ཁ་ཅིག་ལ་ནི་དགེ་བའི་བཤེས་གཉེན་དང་། སངས་རྒྱས་དང་། བྱང་ཆུབ་སེམས་དཔའ་དང་། སོ་སོ་སྐྱེ་བོ་ལས་ཆོས་ཆར་འབབ་པར་སྣང་ལ། ཁ་ཅིག་པདྨ་དང་། དཔག་བསམ་གྱི་ཤིང་དང་། ནམ་མཁའི་མཐོངས་ལ་སོགས་པ་ནས་ཀྱང་སྣང་བར་འགྱུར་བའི་ཕྱིར་རོ། །དེ་སྐད་དུ་དཔལ་སྒྱུ་འཕྲུལ་དྲྭ་བ་ལས། དཔག་བསམ་ཤིང་དང་ཡིད་བཞིན་གྱི། །དེ་བཞིན་ཉིད་དང་འབྱུང་བ་ཀུན། །དེ་དག་རྫས་ཡོད་མ་ཡིན་ཏེ། །རང་སེམས་བསོད་ནམས་རྟེན་འབྱུང་ཡིན། །ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་ལས་འབྱུང་། །ཞེས་སོ། །དེའི་ཕྱིར་གྲུབ་པའི་མཐའ་རིན་པོ་ཆེར། རྣམ་གཞག་འདི་ལྟར་ཁོང་དུ་མ་ཆུད་པའི་བློ་ཆུང་སྒྲོ་སྐུར་དུ་སྨྲ་བ་དག་རྒྱ་གར་དུ་མ་གྲགས་པས་རྒྱུད་ཡང་དག་པ་མ་ཡིན་ཏེ་བོད་ཀྱིས་བྱས་པའོ་ཞེས་ཡང་དག་པའི་རྒྱུད་ལུང་དང་མདོ་མང་པོ་ལ་སྐུར་པ་འདེབས་པ་ནི་ངན་འགྲོར་ཡུན་རིང་དུ་གནས་པའི་རྒྱུ་གསོག་པ་ཁོ་ནའོ། །དེའང་རྒྱ་གར་གྱི་རྒྱུད་རྣམས་ཀྱང་ཨུ་རྒྱན་དང་། ཤམྦྷ་ལ་དང་། མ་ལ་ཡ་ལ་སོགས་པའི་ཡུལ་ནས་གྲུབ་ཐོབ་ཆེན་པོ་རྣམས་ཀྱིས་སྤྱན་དྲངས་ཏེ། རྒྱུད་ཐམས་ཅད་ནི་རྒྱ་གར་ནའང་བཞུགས་པ་མ་ཡིན་ཏེ་གལ་ཏེ་བཞུགས་སུ་བཅུག་ཀྱང་ཁྱོད་ཀྱིས་ལན་རེ་ཙམ་ཕྱིན་པས་དེ་ཐམས་ཅད་མཐོང་བར་མི་ནུས་ལ། གཙུག་ལག་ཁང་ཆུང་རེ་ན་བཞུགས་པའི་མདོ་རྒྱུད་ཀྱི་མིང་བྱང་དུ་མ་འདུས་པས་གཞན་རྣམས་མིན་པར་མི་འགྱུར་བའི་ཕྱིར་སྔོན་གྱི་ལམ་སྟོན་ཆེན་པོ་རྣམས་ལ་སྨོད་པར་མི་བྱའོ། །བོད་འདིར་རྒྱ་གར་ན་ཡོད་པ་དང་མེད་པའི་མདོ་རྒྱུད་མང་དུ་བཞུགས་ཏེ། སྔོན་གྱི་སློབ་དཔོན་པདྨ་ལ་སོགས་པས་ཨོ་རྒྱན་ལ་སོགས་པ་མཁའ་འགྲོའི་གླིང་རྣམས་ནས་རྒྱུད་སྡེ་མང་དུ་བསྣམས་ནས་བྱོན་ཏེ་བསྒྱུར་ཞིང་། མདོ་ཡང་ཉི་མ་དངོས་གྲུབ་ཀྱི་མེས་མ་ཚིག་གོང་དུ་རྒྱ་ནག་ཏུ་འགྱུར་བའི་མདོ་རྣམས་ལས། ཕལ་པོ་ཆེ་དང་། མྱ་ངན་ལས་འདས་པ་དང་། འདུལ་བ་ལུང་ལ་སོགས་པ་མང་པོ་ཞིག་རྒྱ་ནག་གི་པཎྜི་ཏ་ཧྭ་ཤང་མ་ཧཱ་ཡཱ་ནའི་བློ་ལས་བཻ་རོ་ཙ་ན་དང་འབའ་སངས་ཤིས་ལོ་ཙཱ་བྱས་ཏེ་བསྒྱུར་བ་ཡིན་ནོ། །དེའི་ཕྱིར་ཆོས་དང་གང་ཟག་གི་ཚད་ནི་ཐམས་ཅད་མཁྱེན་པ་ལས་གཞན་གྱིས་བཟུང་བར་མི་ནུས་ཏེ། དཀོན་མཆོག་བརྩེགས་པ་ལས། འོད་སྲུངས་ངའམ་ང་དང་འདྲ་བས་ཆོས་དང་གང་ཟག་གི་ཚོད་བཟུང་བར་རུང་གིས། གཞན་དག་གིས་ནི་མ་ཡིན་ཏེ་ལོག་པར་ལྟུང་བའི་ཕྱིར་རོ་ཞེས་སོ། །ཆོས་ཀྱང་བཀའ་ཡང་དག་པ་ནི་སངས་རྒྱས་ཀྱི་གསུང་སྟེ། སྤྲུལ་སྐུ་དེ་ཡང་སྔོན་བྱུང་གིས་ད་ལྟ་མེད་དོ་མི་བསམ་སྟེ། རྟག་ཏུ་མོས་པའི་ངོར་བྱུང་ལ། དེས་སྔོན་མདོ་དང་རྒྱུད་དུ་མ་གྲགས་པ་གསལ་བར་བྱེད་པའང་སྲིད་པས་སྐུར་བ་མི་བཏབ་ལ། ཆོས་གང་ལ་ཐར་པའི་ལམ་དུ་འཇུག་ཅིང་འཁོར་བ་སྤོང་བ་སྟོན་པ་ཐམས་ཅད་སངས་རྒྱས་ཀྱི་གསུང་རབ་ཚད་མར་བཞག་སྟེ། རྒྱུད་བླ་མ་ལས། ཁམས་གསུམ་དག་ན་ཉོན་མོངས་སྤོང་བྱེད་གསུངས། །ཞི་བའི་ཡོན་ཏན་བརྗོད་པར་མཛད་པ་གང་། །དེ་ནི་དྲང་སྲོང་གསུང་ཡིན་ལྡོག་པ་གཞན། །ཞེས་གྲུབ་ལ། སངས་རྒྱས་ནི་རྟག་པར་བཞུགས་པས་གདུལ་བྱའི་དོན་མཛད་ལ། བྱིན་གྱིས་བརླབས་པའི་བཀའ་ཡང་། རི་དང་ཤིང་དང་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་། བྱ་དང་རི་དྭགས་ལས་ཆོས་ཀྱི་རྣམ་གྲངས་ཀྱི་སྒྲ་འབྱུང་བ་དེ་ཡང་བཀར་གསུངས་པ་ཡོད་ན། སྔར་བྱུང་གིས་ད་ལྟ་མི་སྲིད་ཅེས་ལོག་པར་མི་བལྟ་སྟེ། བྱིན་གྱིས་བརླབས་པ་དག་འབྱུང་སྲིད་པའི་ཕྱིར་རོ། །དེས་ན་གང་ལ་ཡིད་ཆེས་པས་དམ་པར་བཟུང་ནས་ཡི་དམ་དུ་བྱ་བ་འཐད་ཀྱི། གཞན་ལ་སྐུར་བ་ནམ་ཡང་གདབ་པར་མི་བྱ་བ་ཁོ་ནའོ། །ཞེས་དང་། སྔོན་གྱི་དུས་སུ་བྱུང་བ་དག་བཅོས་མ་ཡིན་ན། བརྩམ་གཞི་གང་ལ་བྱས། དེ་ལྟར་ན་ཕྱིས་འབྱུང་བ་རྣམས་བཅོས་མར་འགྱུར་ཏེ། དོན་སྔོན་པས་ལྷག་ཏུ་མ་བྱུང་། ཚིག་ཅུང་ཟད་མི་འདྲ་བ་དང་། མང་ཉུང་ལས་མེད་པའི་ཕྱིར་རོ། །དེས་ན་གསར་རྙིང་གི་རྒྱུད་ཆེན་པོ་འདི་དག་ལ་སློབ་དཔོན་གྲུབ་ཆེན་མང་དུ་བྱོན་ཞིང་། དབང་དང་བྱིན་རླབས་ཟམ་མ་ཆད་པར་འདུག་པས་ཡང་དག་པ་འབའ་ཞིག་སྟེ། སློབ་དཔོན་དེ་དག་གིས་འགྲེལ་པ་དང་མན་ངག་མང་དུ་མཛད་པས་ཡིད་ཆེས་པར་བཟུང་ངོ་། །དེའང་རྒྱ་གར་ན་གསང་སྔགས་ཞེས་པ་ཙམ་ལས། འདི་ནི་གསར་མའོ། །འདི་ནི་རྙིང་མའོ། །ཞེས་སོ་སོར་དབྱེ་བ་མེད་ན་ཡང་བོད་འདིར་འགྱུར་སྔ་ཕྱིས་སོ་སོར་གྲགས་ཏེ་བཻ་རོ་ཙ་ན་ལ་སོགས་པ་རྒྱལ་བློན་སྔ་དར་གྱི་དུས་སུ་བསྒྱུར་བ་ནས་བཟུང་སྟེ་པཎྜི་ཏ་སྨྲྀ་ཏིའི་བར་དུ་བསྒྱུར་བའི་རྒྱུད་ལ་རྙིང་མ་ཞེས་འདོད་ལ། ལོ་ཙཱ་བ་རིན་ཆེན་བཟང་པོ་མན་ཆོད་བསྒྱུར་བའི་རྒྱུད་རྣམས་ལ་གསར་མ་ཞེས་གྲགས་སོ། །འདི་གཉིས་ལ་གོ་དཀའ་སླ་དང་། དབྱིངས་འཇལ་བ་རླབས་ཆེ་ཆུང་ལྟར་འདུག་པ་ནི། སྔོན་གྱི་ལོ་ཙཱ་བ་རྣམས་སངས་རྒྱས་ཀྱི་སྤྲུལ་པ་ཡིན་པས་རང་དབང་བསྒྱུར་ནུས་པའི་ཕྱིར་རླབས་ཆེ་བར་མངོན་ནོ། །དུས་ཕྱིས་ཀྱི་ལོ་ཙཱ་བ་རྣམས་གང་ཟག་ཕལ་པའི་ལུགས་ཀྱི་མཁས་པ་རྣམས་བྱོན་པས། ཚིག་གྲིམས་ལ་གོ་བར་དཀའ་བ་སྟེ། རྒྱ་དཔེའི་ཚིག་གི་རིམ་པ་ཙམ་ལས་དོན་འགྱུར་མ་ནུས་པས་དེ་ལྟར་བྱུང་བའོ། །ཞེས་སོ། །དྲིས་ལན་རིན་པོ་ཆེའི་བསྟན་བཅོས་ལུང་གི་གཏེར་མཛོད་ཅེས་བྱ་བ་ལས། གསང་སྔགས་སྤྱིའི་རང་བཞིན་རྣམ་པར་གཞག་པའི་སྐབས་ཏེ་སརྒ་གཉིས་པའོ།། །།གཉིས་པ་སྔ་འགྱུར་རྡོ་རྗེའི་ཐེག་པ་བཤད་པ་ལ་གཉིས། བྱུང་ཚུལ་གྱི་རྣམ་པར་གཞག་པ་དང་། དེའི་རྣམ་དབྱེ་བཤད་པའོ། །དང་པོ་ལ་གཉིས། གསུང་བ་པོ་སྟོན་པའི་བྱོན་ཚུལ་སྤྱིར་བསྟན་པ་དང་། གསུངས་ཚུལ་བྱེ་བྲག་ཏུ་བཤད་པའོ། །དང་པོ་ནི་སྒྱུ་འཕྲུལ་བླ་མ་ལས། དོན་གྲུབ་དཀའ་ཐུབ་ལུས་ཅན་ལ། །ཕྱོགས་བཅུའི་རྒྱལ་བ་སྤྲིན་བཞིན་དུ། །འདུས་པས་ལོངས་སྤྱོད་དོན་གྱི་ཕྱིར། །སྲོད་དང་ཐོ་རངས་དུས་ཉིད་དུ། །ཉི་ཟླ་ཟ་བའི་དབང་བྱིན་ནས། །རོལ་པའི་ཀ་ར་བསྟན་པ་ཡིས། །དེ་བཞིན་དེ་བཞིན་གཤེགས་པའོ། །ཞེས་པ་ལྟར་ཐུན་མོང་གི་ལུགས་སུ་གྲགས་པའི་དང་པོར་སེམས་བསྐྱེད། བར་དུ་བསྐལ་པ་གྲངས་མེད་གསུམ་དུ་ཚོགས་བསགས། ཞིང་འདིར་མཛད་པ་བཅུ་གཉིས་ལས་དཀའ་བ་སྤྱོད་པའི་རྟེན་དེ་ལ་ཇི་སྐད་དུ་སངས་རྒྱས་ཡེ་ཤེས་ཞབས་ཀྱི་གྲོལ་བའི་ཐིག་ལེ་ལས། ཅི་ཕྱིར་ཤཱཀྱ་ཐུབ་པ་ཡིས། །གྲངས་མེད་གསུམ་དུ་ཚོགས་བསགས་ཀྱང་། །འདི་དོན་མ་རྟོགས་ནཻ་རཉྫར། །ཅི་ཡང་མ་ཡིན་ཏིང་འཛིན་གནས། །དེ་ཚེ་ཕྱོགས་བཅུའི་བདེ་གཤེགས་ཀྱིས། །ཐལ་བྱུང་བློ་ཆགས་དེ་བཟློག་སྟེ། །ནམ་མཁའི་དབྱིངས་ལྟར་རྣམ་དག་པའི། །ཟབ་གསལ་གཉིས་མེད་རབ་བསྟན་པས། །ནམ་ཕྱེད་དུས་ན་རྒྱལ་བ་ལྟར། །དེ་ཉིད་བསྒོམས་པས་ཐོ་རེངས་དུས། །སྐད་ཅིག་གཅིག་གིས་ཡང་དག་རྟོགས། །འགྲོ་བ་གདུལ་བར་བྱ་བའི་ཕྱིར། །བྱང་ཆུབ་སྙིང་པོར་བཞུགས་ནས་ཀྱང་། །དཔུང་ཆེན་བདུད་རྣམས་རབ་བཅོམ་སྟེ། །སེམས་ཅན་གཟུང་བར་བྱ་དོན་དུ། །ཆོས་ཀྱི་འཁོར་ལོ་བསྐོར་བའོ། །ཞེས་པ་ལྟར་དཀའ་བ་སྤྱོད་པའི་ཚེ་རྣམ་སྨིན་གྱི་ལུས་དེ་ཉིད་དུ་བཞག །ཡེ་ཤེས་ཀྱི་ལུས་འོག་མིན་དུ་སངས་རྒྱས་ནས། སླར་ཡང་སེམས་ཅན་གྱི་དོན་དུ་རྡོ་རྗེ་གདན་དུ་འཚང་རྒྱ་བའི་ཚུལ་བསྟན་ནས་ཕྱི་ལྟར་ན་ཤཱཀྱ་ཐུབ་པ། ནང་ལྟར་ན་རྡོ་རྗེ་འཆང་། གསང་བ་ལྟར་ན་གདོད་ནས་གཟུང་འཛིན་གྱི་འཆིང་བ་ལས་རྣམ་པར་གྲོལ་བའི་དཔལ་ཀུན་ཏུ་བཟང་པོ་སྟེ། ལང་ཀར་གཤེགས་པ་ལས་ཀྱང་། འདོད་པའི་ཁམས་དང་གཟུགས་མེད་དུ། །སངས་རྒྱས་མངོན་པར་འཚང་མི་རྒྱ། །གཟུགས་ཀྱི་ཁམས་ཀྱི་འོག་མིན་དུ། །འདོད་ཆགས་བྲལ་ཁྱོད་འཚང་རྒྱའོ། །ཞེས་དང་། གཞན་ཡང་། ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་གཅིག་འདིར་སངས་རྒྱས། །ཞེས་སོ། །བློ་ཆུང་ཞིང་མོས་པ་ཞན་པ་དག་དེ་ལྟ་བུའི་སྐུ་གསུམ་གྱི་སྟོན་པ་ངོ་བོའི་སྒོ་ནས་ཀྱང་ཐ་དད་དུ་བཟུང་ནས་ཕྱོགས་དང་རིས་སུ་བཅད་དེ་ཡང་དག་པའི་རྒྱུད་ལུང་མང་པོ་ལ་ལོག་པར་རྟོག་པའི་འཆིང་བས་དཀྲིགས་པ་ནི། སངས་རྒྱས་ཀྱི་ཐུགས་རྗེའི་རོལ་པ་ཚད་མེད་ཅིང་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་རྣམ་པར་འཕྲུལ་པའི་ཆོས་ཉིད་ཀྱི་དོན་ལ་རྨོངས་པར་ཟད་དེ། དབྱིངས་ན་བཞུགས་པའི་ཟླ་བ་གཅིག་ཉིད་ལས་གདུལ་བྱའི་མོས་པ་དང་རྗེས་སུ་མཐུན་པའི་ཆུ་སྣོད་ཐ་དད་པར་ཟླ་བའི་གཟུགས་བརྙན་དེ་སྙེད་དུ་འཆར་བ་ལྟར། སྐུ་གསུམ་གྱི་སྟོན་པ་དེ་དག་གི་རང་བཞིན་ནི། ཆོས་སྐུའི་གནས་སྐབས་ན་ཐོག་མ་མེད་པའི་གནས་སུ་རིག་པའི་ཆོས་ཉིད་གཟུང་འཛིན་གྱི་འཆིང་བ་ལས་རྣམ་པར་གྲོལ་བའི་མངའ་དབང་རྫོགས་པའི་སྟོན་པ་ཀུན་ཏུ་བཟང་པོ་ཉིད། ལོངས་སྤྱོད་རྫོགས་པ་སྐུའི་གནས་སྐབས་ན་རིགས་ལྔའི་སངས་རྒྱས་སུ་བཞེངས་པའི་ངང་ནས། སྤྲུལ་པ་སྐུའི་གནས་སྐབས་ན་གདུལ་བར་བྱ་བའི་དབང་གིས་འོག་མིན་ཁང་བུ་བརྩེགས་པ་སྟེ་གཙང་མའི་གནས་སུ་རྡོ་རྗེ་འཆང་ངམ། རིགས་དྲུག་པ་དང་། འགྲོ་དྲུག་སོ་སོའི་གནས་སུ་ཤཱཀྱ་ཐུབ་པ་ལ་སོགས་དྲུག་ཏུ་སྣང་བ་གྲངས་མེད་པས། གདུལ་བྱ་རང་རང་གི་མོས་པ་དང་མཐུན་པའི་ཆོས་དཔག་ཏུ་མེད་པ་དང་། ཁྱད་པར་རྡོ་རྗེའི་ཐེག་པའི་ཆོས་ཀྱི་འཁོར་ལོ་བསྐོར་བ་ཡིན་ཏེ། ཕྱག་ན་རྡོ་རྗེ་དབང་བསྐུར་བའི་རྒྱུད་ལས། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་འཛིན། འཇིག་རྟེན་གྱི་ཁམས་གཞི་དང་སྙིང་པོ་མེ་ཏོག་གིས་བརྒྱན་པར་དབང་བསྐུར་བའི་རྗེས་ལ། དེ་ནས་འཇིག་རྟེན་གྱི་ཁམས་མི་མཇེད་འདིར་བཅོམ་ལྡན་འདས་ཤཱཀྱ་ཐུབ་པའི་མཚན་གྱིས་གླིང་བཞི་པ་བར་མའི་འཇིག་རྟེན་གྱི་ཁམས་ཀྱི་འཛམ་བུའི་གླིང་དུ་བདུད་ཕམ་པར་མཛད་ནས་བྱང་ཆུབ་ཏུ་མངོན་པར་སངས་རྒྱས། ཞེས་པ་དང་། དཔལ་སྒྱུ་འཕྲུལ་དྲྭ་བ་ཆེན་པོའི་ཆོས་ཀྱི་རྣམ་གྲངས་སྟོང་ཕྲག་བརྒྱ་པ་ལས་སེམས་དང་ཡེ་ཤེས་རང་སྣང་བར་སྟོན་པའི་གནས་དཔལ་གསང་བའི་སྙིང་པོ་དེ་ཁོ་ན་ཉིད་ངེས་པ་ལས། ཐུགས་རྗེ་ཆེན་པོའི་བྱིན་རླབས་ཞེས་བྱ་བ། རིགས་པའི་སྐྱེས་བུ་ཐུབ་པ་དྲུག །དེ་བཞིན་གཤེགས་པའི་སྐུ་དང་གསུང་དང་ཐུགས་རྡོ་རྗེ་ལས་འཐོན་ཏོ། །འཐོན་ནས་ཀྱང་ལས་ཀྱི་དབང་གིས་སྣྲེལ་གཞི་དང་། ཡན་མན་གྱི་འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པའི་སྟོང་གསུམ་གྱི་སྟོང་ཆེན་པོ་རེ་རེར། ཐུབ་པ་ཆེན་པོ་བཅོམ་ལྡན་འདས་རེ་རེས། འདུལ་བ་རྣམ་པ་བཞིས་འགྲོ་བ་ལྔའི་དོན་མཛད་དེ། ཞེས་སོ། །གཉིས་པ་བྱེ་བྲག་ཏུ་བཤད་པ་ནི། པདྨ་དཀར་པོ་ལས། བསྐལ་པ་བྱེ་སྟོང་བསམ་གྱིས་མི་ཁྱབ་པ། །དེ་ཡི་ཚད་ནི་ནམ་ཡང་མེད་པ་ནས། །བྱང་ཆུབ་མཆོག་རབ་འདི་ནི་ངས་ཐོབ་སྟེ། །ང་ནི་རྟག་ཏུ་ཆོས་ཀྱང་རབ་འཆད་དོ། །ཞེས་པ་ལྟར་བསྐལ་པ་ལ་སོགས་པའི་གྲངས་ཀྱི་རྣམ་གཞག་དང་བློའི་ནུས་པས་བསམ་པར་མི་ནུས་པའི་རང་བཞིན་ཅན། འཁོར་འདས་ཐམས་ཅད་ཀྱི་སྤྱི་གཞི་ལས་ཁྱད་པར་གྱི་ཆོས་རྣམ་པ་དྲུག་གི་སྒོ་ནས་སྤངས་རྟོགས་ཀྱི་ཡོན་ཏན་མཐར་ཕྱིན་ཏེ་འོད་གསལ་ཆོས་ཀྱི་སྐུར་མངོན་པར་བྱང་ཆུབ་པའི་མངའ་དབང་རྫོགས་པའི་སྟོན་པ་ཀུན་ཏུ་བཟང་པོས། ཐབས་སྙིང་རྗེ་ཆེན་པོའི་རྩལ་ལས་གཞི་སྣང་ཡེ་ཤེས་ཀྱི་རོལ་པ་འགག་མེད་རང་བྱུང་གི་སྣང་ཆར། སྟོན་པ་གསུམ་ལ། ཞིང་ཁམས་གསུམ་དང་། བསྟན་པ་གསུམ་དང་། འཁོར་གསུམ་ལ་སོགས་པའི་རོལ་པ་ཚད་མེད་པར་བཀོད་པ་ནི། ཆོས་ཀྱི་སྐུའི་སྟོན་པ་དཔལ་ཀུན་ཏུ་བཟང་པོ། ཆོས་རང་བཞིན་རྫོགས་པ་ཆེན་པོ་གསང་སྔགས་བླ་ན་མེད་པ། འཁོར་ཡེ་ཤེས་རྒྱ་མཚོ། དུས་བསམ་གྱིས་མི་ཁྱབ་པ། གནས་ཆོས་ཉིད་དོན་གྱི་འོག་མིན་ནོ། །ལོངས་སྤྱོད་རྫོགས་པའི་སྐུ་སྟོན་པ་ངེས་པ་རིགས་ལྔའི་སངས་རྒྱས། ཆོས་ངེས་པ་གསང་སྔགས་ཕྱི་ནང་། འཁོར་ངེས་པ་དབང་པོ་དང་ཡུལ་སྣང་དག་པའི་འབྲས་བུའི་སེམས་དཔའ། དུས་ངེས་པ་རྟག་པ་རྒྱུན་གྱི་འཁོར་ལོ། གནས་ངེས་པ་རང་སྣང་སྟུག་པོ་བཀོད་པའི་ཞིང་ཁམས་ཏེ་ངེས་པ་ལྔ་དང་ལྡན་པར་ཁ་སྦྱོར་ཡན་ལག་བདུན་ལྡན་གྱི་རྣམ་རོལ་ཆེན་པོར་བཞུགས་པ་སྟེ། དེ་ལ་ཡན་ལག་བདུན་ནི། འབྲས་བུའི་ཡན་ལག་དང་། རྒྱུའི་ཡན་ལག་སྟེ་བདུན་ཚན་གཉིས་ལས། དང་པོ་འབྲས་བུའི་བདུན་ནི། འོག་མིན་ཆེན་པོར་དག་པའི་འཁོར་ལ་ཟབ་གསལ་གཉིས་སུ་མེད་པའི་ཡེ་ཤེས་ཀྱི་ཆོས་འཁོར་ལ་རྟག་ཏུ་ལོངས་སྤྱོད་པས་ན་ལོངས་སྤྱོད་ཀྱི་ཡན་ལག །མཚན་རྫོགས་ཀྱི་ལོངས་སྐུ་རང་འོད་ཀྱི་ཡུམ་དང་འདུ་འབྲལ་མེད་པ་ཁ་སྦྱོར་གྱི་ཡན་ལག །ཟག་མེད་ཡེ་ཤེས་ཀྱི་བདེ་བ་རྒྱུན་ཆད་མེད་པ་བདེ་བ་ཆེན་པོའི་ཡན་ལག །དམིགས་པ་མེད་པའི་ཐུགས་རྗེ་ཆེན་པོ་མཁའ་ལྟར་ཁྱབ་པ་སྙིང་རྗེས་གང་བའི་ཡན་ལག །ཕྲིན་ལས་ཀྱི་རོལ་པ་འཁོར་བའི་ཕ་མཐར་བརྡལ་བ་རྒྱུན་མི་འཆད་པའི་ཡན་ལག །ཞི་བའི་མཐའ་ལ་མི་གནས་པ་འགོག་པ་མེད་པའི་ཡན་ལག །སྟོང་པ་ཉིད་དང་སྙིང་རྗེ་ཟུང་དུ་འཇུག་པའི་རང་བཞིན་སྤྲོས་པའི་མཐའ་ལ་མི་གནས་པ་རང་བཞིན་མེད་པའི་ཡན་ལག་སྟེ་བདུན་ནོ། །སྐྱེད་བྱེད་རྒྱུའི་ཡན་ལག་བདུན་ནི། ཟུང་དུ་འཇུག་པའི་ལམ་གྱི་ཡེ་ཤེས་ལ་དངོས་པོའི་མཐའ་དང་བྲལ་བས་རང་བཞིན་མེད་པའི་ཡན་ལག །ཀུན་རྫོབ་དང་དོན་དམ་གྱི་ཁམས་ཐམས་ཅད་གདོད་ནས་ལྷུན་གྲུབ་ཏུ་ཤེས་པ་ཁ་སྦྱོར་གྱི་ཡན་ལག །བྱུང་ཚོར་འདུ་ཤེས་ཀྱི་རྟེན་འབྲེལ་ཐམས་ཅད་བདེ་ཆེན་ལྷན་སྐྱེས་ཀྱི་ངོ་བོར་རྟོགས་པ་བདེ་བ་ཆེན་པོའི་ཡན་ལག །འདོད་པའི་ཡོན་ཏན་ལྔ་ལ་སོགས་ཏེ་སྣང་ཆའི་རྟེན་འབྲེལ་བཟང་ངན་གྱི་འཆིང་ཞེན་རོ་མཉམ་ཆེན་པོར་ལོངས་སྤྱོད་པས་ལོངས་སྤྱོད་ཀྱི་ཡན་ལག །དེ་ལྟར་དུ་མ་རྟོགས་པའི་འགྲོ་བ་ལ་རིས་མེད་ཀྱི་ཕན་པ་བསྒྲུབ་པའི་གོ་ཆ་བགོ་བ་ནི་སྙིང་རྗེས་གང་བའི་ཡན་ལག །དེ་ལྟ་བུའི་བརྩོན་པ་རྒྱུན་མི་འཆད་པར་རིམ་པ་གཉིས་ཀྱི་འཁོར་ལོར་གཞན་དོན་ལ་གཡེལ་བ་མེད་པར་བསླབ་པ་ནི་རྒྱུན་ཆད་མེད་པའི་ཡན་ལག །དེའང་མཆོག་འཛིན་བདག་ལྟའི་གཟེབ་ལས་གྲོལ་ཏེ་འཁོར་གསུམ་རྣམ་གྲོལ་དུ་སྤྱོད་པ་འགོག་པ་མེད་པའི་ཡན་ལག་སྟེ། དེ་ལྟར་ཕྱི་མ་བདུན་ནི་བསྒྲུབ་བྱ་དེ་འགྲུབ་པའི་རྒྱུའམ། ས་བོན་ཡིན་ཏེ་ཞར་ལ་སྨྲས་པའོ། །སྤྲུལ་པ་སྐུའི་སྟོན་པ་རྡོ་རྗེ་འཆང་དང་ཐུབ་པ་དྲུག །ཆོས་ཐེག་པ་ཆེ་ཆུང་། འཁོར་སར་གནས་དང་། སོ་སོ་སྐྱེ་བོ་དང་། མཁའ་འགྲོ་དང་། རིགས་སྔགས་འཆང་བ་ལ་སོགས་མ་ངེས་པ་སྟེ། དུས་ཚེས་འབྱུང་གདུལ་བྱ་དང་མཚུངས་པ་ད་ལྟར་བ། གནས་ལྷ་གནས་ཀྱི་འོག་མིན་དང་། དུར་ཁྲོད་ཆེན་པོ་དང་། རྡོ་རྗེ་བཙུན་མོའི་བྷ་ག་ལ་སོགས་པའི་གསང་ཆེན་གྱི་འོག་མིན་དང་། འགྲོ་དྲུག་གི་གནས་རིགས་ཐ་དད་པའོ། །དེའི་ཕྱིར་ཐོག་མ་མེད་པའི་དུས་ནས་ད་ལྟ་ཕྱི་མའི་མཐའི་མུར་ཐུག་གི་བར་སྐུ་གསུང་ཐུགས་མི་བཟད་པ་རྒྱན་གྱི་འཁོར་ལོའི་རོལ་པས་ཚད་མེད་པའི་གདུལ་བྱ་རྣམས་ཐར་པ་དང་། རྣམ་པར་བྱང་ཆུབ་པའི་ལམ་ལ་བཀྲི་བའི་ཕྱིར་ཆོས་ཀྱི་རྣམ་གྲངས་དཔག་ཏུ་མེད་པར་གསུངས་པ་ཡིན་ནོ། །གཉིས་པ་ལ་གཉིས། ཐེག་པའི་རྣམ་གྲངས་སྤྱིར་དབྱེ་བ་དང་། བླ་ན་མེད་པའི་ཐེག་པ་བྱེ་བྲག་ཏུ་བཤད་པའོ། །དང་པོ་ནི། དེ་ལྟར་སྐུ་གསུམ་སོ་སོའི་སྟོན་པས་ཆོས་བསྟན་པ་ཐམས་ཅད་ཀྱང་དབང་པོའི་རིམ་པ་དང་སྦྱར་ནས་གསུངས་པ་དང་། གཉེན་པོའི་དོན་རྣམས་བསྡུས་ཏེ་གསུངས་པ་དང་། དུག་གསུམ་སྤྱི་དང་བྱེ་བྲག་གི་གཉེན་པོར་གསུངས་པ་དང་གསུམ་དུ་ངེས་ཏེ། སྒྲ་ཐལ་འགྱུར་རྩ་བའི་རྒྱུད་ལས། གསུངས་ཚུལ་དགོངས་པ་གསུམ་དང་བཅས། །གཉེན་པོ་བསྡུ་དང་དབང་པོའི་དོན། །ཚིག་རྣམས་བསྡུས་ཏེ་བསྟན་པར་བྱ། །ཞེས་སོ། །དེའང་གཉེན་པོའི་དོན་དུ་གསུངས་པ་ནི། སྦྱང་གཞི་འདོད་ཆགས། ཞེ་སྡང་། གཏི་མུག །དེ་གསུམ་ཆ་མཉམ་པའི་ཉོན་མོངས་པ་ཉི་ཁྲི་ཆིག་སྟོང་སྟེ་སྤྱིར་བརྒྱད་ཁྲི་བཞི་སྟོང་གི་གཉེན་པོར། འདུལ་བ། མདོ་སྡེ། མངོན་པ། སྡེ་སྣོད་གསུམ་ཆ་མཉམ་པ་ཉི་ཁྲི་ཆིག་སྟོང་སྟེ་ཆོས་ཀྱི་སྒོ་ཡང་བརྒྱད་ཁྲི་བཞི་སྟོང་ངོ་། །བསྡུ་བའི་དོན་དུ་གསུངས་པ་ནི་གསང་སྔགས་ཕྱི་ནང་གཉིས་ཏེ། གསང་སྔགས་ཕྱི་པ་ཀྲཱྀ་ཡ། ཨུ་པ། ཡོ་ག་དང་། ནང་པ་མ་ཧཱ། ཨ་ནུ། ཨ་ཏི་གསུམ་སྟེ་རྒྱུད་སྡེ་དྲུག་ཏུ་གསུངས་པ་ནི་ཐལ་འགྱུར་ལས། འདས་པ་རྒྱུ་དང་འབྲས་བུ་ལས། །རྒྱུ་ལ་གསུམ་དང་འབྲས་ལ་གཉིས། །གཉིས་པོ་ལས་ཕྱེ་དྲུག་ཏུ་འགྱུར། །ཞེས་སོ། །དབང་པོའི་དོན་དུ་གསུངས་པ་ནི་ཐེག་པ་རིམ་པ་དགུ་སྟེ། བཀོད་པ་ཆེན་པོ་ཡིད་བཞིན་མཆོག་གི་རྒྱུད་ལས། ཆུང་ངུ་གསུམ་ལ་བསྟན་པ་ནི། །མཚན་མར་འཛིན་ལ་ཉན་ཐོས་ཏེ། །འདུ་ཤེས་ཅན་ལ་རང་རྒྱལ་ཉིད། །རྟོག་འཇུག་ཅན་ལ་བྱང་སེམས་སོ། །ཞེས་བཀའ་དང་པོ་བདེན་པ་བཞི་ནི་ཚུལ་ཁྲིམས་ཀྱི་བསླབ་པ་གཙོ་བོར་སྟོན་པ་འདུལ་བའི་སྡེ་སྣོད་ཉན་ཐོས་ཀྱི་ཐེག་པ། བཀའ་བར་པ་མཚན་ཉིད་མེད་པ་ནི་ཏིང་ངེ་འཛིན་གྱི་བསླབ་པ་གཙོ་བོར་སྟོན་པ་མདོ་སྡེའི་སྡེ་སྣོད་རང་རྒྱལ་གྱི་ཐེག་པ། ཐ་མ་དོན་དམ་རྣམ་པར་ངེས་པ་ནི་ཤེས་རབ་ཀྱི་བསླབ་པ་གཙོ་བོར་སྟོན་པ་མངོན་པའི་སྡེ་སྣོད་བྱང་སེམས་ཀྱི་ཐེག་པ་སྟེ། སྡེ་སྣོད་གསུམ་པོར་ཀུན་འབྱུང་འདྲེན་པའི་ཐེག་པ་ཞེས་བྱའོ། །དེ་བཞིན་དུ་སྔ་མར། འབྲིང་པོ་གསུམ་ལ་བསྟན་པ་ནི། །རབ་ཏུ་དམན་ལ་བྱ་བ་སྟེ། །དམན་པ་རྣམས་ལ་སྤྱོད་པའོ། །རྣམ་ཤེས་ཅན་ལ་རྣལ་འབྱོར་ཉིད། །ཅེས་པས། ཐེག་པ་ཆེན་པོ་ཀྲི་ཡ་སྟེ་བྱ་བའི་རྒྱུད། སྤྱོད་པ་འོག་མ་བྱ་རྒྱུད་དང་། ལྟ་བ་གོང་མ་ཡོ་ག་དང་མཐུན་པའི་གཉིས་ཀར་སྤྱོད་པས་མ་ནིང་གི་ཐེག་པའམ། སྤྱོད་རྒྱུད་ཨུ་པ་ཡ། ཡོ་ག་རྣལ་འབྱོར་གྱི་རྒྱུད་དེ་ཕྱི་རྒྱུད་སྡེ་གསུམ་པོར་དཀའ་ཐུབ་རིག་བྱེད་ཀྱི་ཐེག་པ་ཞེས་གྲགས་སོ། །དེ་བཞིན་དུ་བཀོད་པ་ཆེན་པོར། ཆེན་པོ་གསུམ་ལ་བསྟན་པ་ནི། །སེམས་ཡས་པ་ལ་བསྐྱེད་པ་སྟེ། །སེམས་བཅུད་ཅན་ལ་རྫོགས་པ་ཉིད། །མཆོག་གསང་རབ་ལ་རྫོགས་པ་ཆེ། །ཞེས་པ་ལྟར་གཞི་རྫོགས་འཕོ་མེད་ཀྱི་དབྱིངས་ལས་རང་ཤར་བའི་ཡེ་ཤེས་འོད་གསལ་གྱི་དགོངས་པ་བརྗོད་དུ་མེད་པ་ལས། རིག་པའི་ཆོ་འཕྲུལ་དུ་སྣང་བ་ཆོས་ཐམས་ཅད་ཀྱི་གཞི་ལྟ་བུ་རྒྱུད་བསྐྱེད་པ་མ་ཧཱ་ཡོ་ག །རིག་པའི་རོལ་རྩལ་དུ་སྣང་བ་ཆོས་ཐམས་ཅད་ཀྱི་ལམ་ལྟ་བུ་རྫོགས་པ་ལུང་ཨ་ནུ་ཡོ་ག །རིག་པ་རང་སྣང་བ་ཆོས་ཐམས་ཅད་ཀྱི་འབྲས་བུ་ལྟ་བུ་མན་ངག་རྫོགས་པ་ཆེན་པོ་ཨ་ཏི་ཡོ་ག་སྟེ་ནང་རྒྱུད་སྡེ་གསུམ་པོར་དབང་བསྒྱུར་ཐབས་ཀྱི་ཐེག་པ་ཞེས་གྲགས་ཏེ། བཤད་རྒྱུད་དགོངས་པ་འདུས་པ་ལས། ཀུན་འབྱུང་འདྲེན་པ་དཀའ་ཐུབ་རིག །དབང་བསྒྱུར་ཐབས་ཀྱི་ཐེག་པའོ། །ཞེས་སོ། །དེ་དག་ལས་གསང་སྔགས་ཕྱི་ནང་གཉིས་ལ་ཤེས་བྱེད་རྒྱུད་སྡེའི་རྣམ་གྲངས་མཐའ་ཡས་པར་བཞུགས་པ་ལས། རྒྱལ་བློན་སྔ་དར་གྱི་ཚེ། སློབ་དཔོན་ཞི་བ་འཚོ་དང་། རིག་འཛིན་ཆེན་པོ་པདྨ་འབྱུང་གནས་དང་། གྲུབ་པའི་འཁོར་ལོས་སྒྱུར་བ་བི་མ་ལ་མི་ཏྲ་སོགས་པས་པཎྜི་ཏ་བགྱིས། བཻ་རོ་ཙ་ན་དང་། གཉགས་ཛྙཱ་ན་ཀུ་མཱ་ར་དང་། རྨ་རིན་ཆེན་མཆོག་དང་། ཨཱ་ཙཱརྱ་ཡེ་ཤེས་དབྱངས་ལ་སོགས་པས་ལོ་ཙཱ་བ་བགྱིས་ཏེ་བསྒྱུར་བའི་ཆོས་ཀྱི་རྣམ་གྲངས་ངེས་པ་ནི་གྲུབ་པའི་མཐའ་རིན་པོ་ཆེའི་མཛོད་ལ་གསལ་ཞིང་། སོ་སོའི་རང་བཞིན་ནི་འོག་ཏུ་འགོད་པ་ཡིན་ནོ། །འོ་ན་ཐེག་པའི་རྣམ་གྲངས་དགུ་པོ་ཉིད་ལས་མི་འདའ་བའི་ཆོས་ཅན་ནམ་ཞེ་ན། འདུལ་བའི་དབང་གིས་དེ་ལྟར་བཤད་ཀྱིས་དགོས་པའི་དབང་གིས་བཅུ་དྲུག་ཏུ་དབྱེ་བའི་རྣམ་གཞག་ཀྱང་ཡོད་དེ། གསང་བ་སྤྱོད་པ་ས་བོན་གྱི་རྒྱུད་ལས། ཐེག་པའི་དང་པོ་བཅུ་དྲུག་མགོན། །ཞེས་པས་སོར་བཞག་ལྷ་མིའི་ཐེག་པ་གཉིས། རྟག་ཆད་མུ་སྟེགས་ཀྱི་ཐེག་པ་གཉིས། ཕྱོགས་རྟོགས་ཉན་ཐོས་ཀྱི་ཐེག་པ་བྱེ་བྲག་པ་དང་མདོ་སྡེ་པ་གཉིས། ཡང་དག་པ་ཇི་ལྟ་བ་བཞིན་མ་རྟོགས་པ་དབུ་མ་སེམས་ཙམ་པ་དང་། རང་རྒྱུད་པ་གཉིས། དབུ་མ་ཐལ་འགྱུར་བ་སྟེ། བྱང་ཆུབ་སེམས་དཔའི་ཐེག་པ་གསུམ། འདུལ་བ་བྱ་བ། དགོངས་པ་སྤྱོད་པ། གསང་བ་སྦྱོར་བ། རང་བཞིན་གསང་བའི་དོན་རྒྱུད་སྡེ་བཞིའམ་དྲུག་སྟེ། བྱ་བ་དང་སྤྱོད་པ། རྣལ་འབྱོར་དང་མ་ཧཱ། ཨ་ནུ་དང་ཨ་ཏི་སྟེ་བཅོ་ལྔ། འོད་གསལ་རྡོ་རྗེ་སྙིང་པོའི་ཐེག་པ་དང་བཅུ་དྲུག་ཏུའང་གསུངས་ཏེ། དེ་སྐད་དུ་གསང་བའི་སྙིང་པོ་ལས་ཀྱང་། མ་རྟོགས་པ་དང་ལོག་པར་རྟོག །ཕྱོགས་རྟོགས་ཡང་དག་ཉིད་མ་རྟོགས། །འདུལ་བ་དགོངས་པ་གསང་བ་དང་། །རང་བཞིན་གསང་བའི་དོན་རྣམས་ནི། །ཞེས་སོ། །དེ་ལ་མ་རྟོགས་པ་ནི། སོར་བཞག་ལྷ་མིའི་ཐེག་པ་སྟེ། གང་གི་ཕྱིར་ལྷ་མིའི་ཐེག་པ་བྱ་ཞེ་ན། གསང་བ་མཆོག་གི་རྒྱུད་ལས། དགེ་བཅུ་སྤྱད་ཅིང་མི་དགེ་དོར་བ་ཡིན། །འདོད་པའི་ལྷ་དང་མི་རུ་སྐྱེ་བའི་རྒྱུ། །ཞེས་པས། དགེ་བ་བཅུའི་ཏིང་ངེ་འཛིན་དང་འབྲེལ་བས་འབྲས་བུ་ལྷ་མིའི་གོ་འཕང་ལ་སྦྱོར་བའི་ཕྱིར་རོ། །ལོག་པར་རྟོག་པ་ནི་རྟག་ཆད་མུ་སྟེགས་པ་སྟེ། དབྱེ་ན་མུ་སྟེགས་བྱེད་ཀྱི་སློབ་དཔོན་སྔ་མ་དག་རྟོག་གེ་སྡེ་ལྔར་བཞེད་པ་ལས། གྲངས་ཅན་པ་ནི་ཀུན་གྱི་ཕྱི་མོར་འདོད་དེ། འཇུག་པ་ལས། ཟ་པོ་རྟག་དངོས་བྱེད་པོ་མིན་པའི་བདག །ཡོན་ཏན་བྱར་མེད་གྲངས་ཅན་རྣམས་ཀྱིས་བརྟག །དེ་དབྱེ་དེ་དོན་ཅུང་ཟད་ལ་བརྟེན་ནས། །མུ་སྟེགས་ཅན་རྣམས་ལུགས་ནི་ཐ་དད་འགྱུར། །ཅེས་སོ། །དེ་ལ་རྟག་པར་བལྟ་བ་ནི། གྲངས་ཅན་པ། དབང་ཕྱུག་པ། ཁྱབ་འཇུག་པ། རྒྱལ་བ་པ་བཞི་ཡིན་ལ། ཆད་པར་སྨྲ་བ་ནི་ཕུར་བུ་པའོ། །དེ་དག་ལ་ནང་གསེས་ཀྱི་དབྱེ་བ་དང་གྲུབ་མཐའ་བསམ་ཡས་པར་ཡོད་དེ། ཀུན་གྱི་ཕྱི་མོ་གྲངས་ཅན་པ་ནི་སྐྱེ་དགུ་རྣམས་ཚེ་ལོ་ཉི་ཁྲི་ཐུབ་པའི་དུས་སུ་བྱུང་སྟེ། དཀའ་ཐུབ་ལས་གྲོལ་བ་ཐོབ་པའི་དྲང་སྲོང་སེར་སྐྱ་ཞེས་བྱ་བ་དེས་བསྟན་བཅོས་མང་དུ་བརྩམས་པ་ལས་གྲུབ་མཐའ་དེ་འཛིན་པ་བྱུང་ཞིང་། ཇི་སྐད་དུ། ཟ་པོ་རྟག་དངོས་བྱེད་པོ་མིན་པའི་བདག །ཡོན་ཏན་བྱར་མེད་གྲངས་ཅན་རྣམས་ཀྱིས་བརྟག །ཅེས་བརྟག་པའི་གཞུང་ཆོས་ལྔ་ལྡན་ལ་སོགས་པས་འགོད་པའོ། །དེ་བཞིན་དུ་དབང་ཕྱུག་གི་རྗེས་སུ་འབྲེང་བ་དག །འགྲོ་བའི་བདེ་སྡུག་དང་། འཁོར་བ་དང་གྲོལ་བ་ཐམས་ཅད་དབང་ཕྱུག་མཉེས་པ་དང་མ་མཉེས་པས་བྱས་པར་འདོད་དེ། འགྲོ་བ་པོ་འདི་ཤེས་པ་ཡོད་མིན་ཏེ། །བདག་གི་བདེ་སྡུག་བདག་ལ་རང་དབང་མེད། །དབང་ཕྱུག་གིས་བཏང་ཡང་ན་གཡང་སའམ། །མཐོ་རིས་དག་ཏུ་འགྲོ་བ་ཁོ་ནར་འགྱུར། །ཞེས་ཟེར་རོ། །ཁྱབ་འཇུག་པ་ནི། དེས་བསྟན་བཅོས་འབུམ་སྡེ་བརྩམས་ཤིང་། ལྟེ་བ་པདྨོའི་སྐྱེད་ཚལ་ནས་ཚངས་པ་གདོང་བཞི་པ་བྱུང་སྟེ། སྣོད་བཅུད་ཐམས་ཅད་ཚངས་པ་དེས་སྤྲུལ་པས་འཇིག་རྟེན་གྱི་མེས་པོ་ཞེས་གྲགས་སོ། །དེའི་གདོང་བཞི་ལ་སྙན་ངག་དང་། སྲིད་སྲུང་། མཆོད་སྦྱིན། ངེས་བརྗོད་ཀྱི་རིག་བྱེད་ཆེན་པོ་བཞི་བཤད་པ་རྣམས། ཐོག་མ་མེད་པའི་དུས་ནས་རྟག་པར་ཡོད་པ། ཚངས་པས་དྲན་པ་བརྗོད་པས། རིག་བྱེད་རྟག་པར་འདོད་པའོ། །ཕྱིས་དྲང་སྲོང་རྣམས་ཀྱིས་དེའི་གཞུང་བཀོད་པས་སྡེ་ཚན་ལྔར་གྱེས་ཤིང་། འདི་དག་ནི་སྙན་ངག་གིས་སྐྱེ་བོ་དགའ་བར་བྱེད་པ་དང་། སྲིད་སྲུང་གིས་རང་སྡེ་རྒྱལ་བར་བྱེད་པ་དང་། མཆོད་སྦྱིན་གྱིས་འདི་ཕྱིའི་དོན་སྒྲུབ་པ་དང་། ངེས་བརྗོད་ཀྱིས་མཆོག་སྒྲུབ་པར་བྱེད་ཅིང་རིག་བྱེད་བཞི་ཚད་མར་འདོད་པའོ། །རྒྱལ་བ་པ་ནི། འདི་སྐད་དུ། དཀའ་བཟློག་དད་པས་ལུས་བསྲེགས་ན། །མཆོག་ཏུ་རྒྱལ་བར་སྤྱན་སྟོང་བཞེད། །གཟས་ཟིན་དུས་སུ་མགོ་བཅད་ན། །ཚངས་པ་ཐོབ་པར་ཀརྞ་འདོད། །བཅིངས་བསྲེགས་འགེགས་ཏེ་ཤི་བ་ནི། །གྲོལ་བར་འགྱུར་ཞེས་རྒྱལ་བ་སྨྲ། །ཞེས་པའི་རྗེས་སུ་འབྲེང་ཞིང་། ཐར་པ་མདོག་དབྱིབས་ཅན་དང་། ལྗོན་ཤིང་སེམས་ལྡན་དུ་འདོད་དེ། ལོ་འདབ་བཅད་ན་འཁུམས་པ་དང་པགས་པ་བཤུས་ན་བསྐམས་པས་འཆི་བའི་ཕྱིར་ཞེས་སྨྲའོ། །ཆད་པར་ལྟ་བ་ཕུར་བུ་པ་ནི། སུམ་ཅུ་རྩ་གསུམ་དུ་ཕུར་བུ་ལ་བརྟེན་ནས་གྲུབ་པ་ཐོབ་པ་ཞིག །བརྒྱ་བྱིན་གྱིས་སྒྲ་བསླབས་པས་ལྷའི་བླ་མར་མིང་ཐོགས་པའི་དྲང་སྲོང་དེས། ལྷ་ལ་ལྷ་མ་ཡིན་གྱིས་རྒོལ་བ་ན་ལྷ་རྣམས་རྒྱུ་འབྲས་ལ་འཛེམ་པས་སྤྲོ་བ་ཞན་པར་གྱུར་པ། རེ་ཞིག་ལྷ་རྣམས་སྤྲོ་ཞིང་གཡུལ་ལས་རྒྱལ་བའི་ཕྱིར། ལས་རྒྱུ་འབྲས་དང་། ཚེ་སྔ་ཕྱི་དང་། ཐར་པ་དང་གྲོལ་བ་སོགས་གང་ཡང་མེད་ཅེས་བྱ་བའི་བསྟན་བཅོས་བརྩམས་པ་ལས། དེ་ཉིད་ཕྱིས་མི་ཡུལ་དུ་གྲོག་མཁར་བས་དར་བར་བྱས་ཏེ། འདི་སྐད་དུ། བཟང་མོ་མ་ཤིའི་བར་དུ་དགའ་མགུར་སྤྱོད། །ཤི་ནས་དེ་ཡི་སྤྱོད་ཡུལ་མིན། །ལུས་ཀྱང་ཐལ་བ་བཞིན་སོང་ནས། །སླར་སྐྱེས་བ་དག་ག་ལ་སྲིད། །ཅེས་ཚེ་ཕྱི་མ་མེད་པར་འདོད་ཅིང་། ཀྱེ་མ་མང་ཐོས་གང་སྨྲ་བ། །སླུ་བྱེད་སྤྱང་ཀིའི་རྗེས་དང་མཚུངས། །ཞེས་གཞུང་ལུགས་ལ་སྐུར་པ་འདེབས་པ་དང་། ཇི་ཙམ་དབང་པོས་སྤྱོད་ཡུལ་པ། །སྐྱེས་བུའང་དེ་ཙམ་ཁོ་ནར་ཟད། །ཅེས་མིག་གིས་མཐོང་བའི་སེམས་ཅན་མ་གཏོགས་གཞན་མེད་པར་འདོད་པ་དང་། བློ་ནི་ལུས་ཀྱི་བདག་ཉིད་དང་། །ལུས་འབྲས་ལུས་ཀྱི་ཡོན་ཏན་དང་། །འདི་ལྟར་ལུགས་གསུམ་ལ་བརྟེན་ནས། །གོམས་པས་སྲིད་པ་ཡོད་མ་ཡིན། །ཞེས་ལམ་ལ་གོམས་པའི་འབྲས་བུ་སངས་རྒྱས་ལ་རྫུན་པར་སྨྲ་བ་དང་། པད་མོའི་གེ་སར་སུ་ཡིས་བྱས། །རྨ་བྱའི་རི་མོ་སུ་ཡིས་བྲིས། །ཚེར་མ་རྣོན་པོ་སུ་ཡིས་བརྡར། །ཐམས་ཅད་རྒྱུ་མེད་ངོ་བོས་བྱུང་། །ཞེས་བསྐྱེད་བྱ་སྐྱེད་བྱེད་ཀྱི་རྒྱུ་ལ་སྐུར་པ་འདེབས་ཤིང་། ངོ་བོ་ཉིད་རྒྱུར་སྨྲ་བས་སྤང་ལ་ཤ་མོ་བརྡོལ་བ་ལྟར་འཕྲལ་བྱུང་དུ་འདོད་ཅིང་། བདག་དང་བདེ་སྡུག་ལ་སོགས་པ་མ་ཤིའི་བར་ཡོད་ལ། ཤི་ནས་མེ་ཤི་བའི་དུད་པ་བཞིན་དུ་རྒྱུན་ཆད་པར་འདོད་དེ་མིང་གི་རྣམ་གྲངས་སུ། རྒྱང་འཕེན་པ། ཚུར་རོལ་མཛེས་པ་ཞེས་ཀྱང་གྲགས་སོ། །དེ་ལྟར་ཕྱི་རོལ་པའི་གཞུང་ལ་དབྱེ་ན་ལྟ་ལོག་སུམ་བརྒྱ་དང་དྲུག་ཅུ་ཡོད་པར་བཤད་པའང་ལམ་ངན་པར་རྟོགས་ནས་མི་འཇུག་པ་དང་། དོན་གྱིས་དགག་པའི་ཕྱིར་གྲུབ་མཐའི་དབྱེ་བ་རྒྱས་པ་ཡིད་བཞིན་རིན་པོ་ཆེའི་མཛོད་དུའང་གསུངས་ཤིང་། དེ་སྐད་དུ་མདོ་སྡེ་ཚངས་པའི་འདྲ་བ་དང་། ཡེ་ཤེས་རྒྱས་པར་བལྟ་བར་བྱའོ་ཞེས་གྲུབ་མཐའ་རིན་པོ་ཆེ་ནས་ཀྱང་ཁ་འཕངས་པ་ཡིན་ནོ། །འོ་ན་འདི་ཉིད་ཐེག་པའི་རྣམ་གྲངས་སུ་བཀོད་པ་ལ་དགོས་པ་ཅི་ཡོད་ཅེ་ན། སྤྱིར་ཐེག་པའི་གོ་བ་ནི་འོག་ནས་གོང་དུ་འདེགས་པའམ། །རྣམ་གྲངས་ཙམ་དུ་བསྡུ་བའི་དོན་ཡིན་པས་སོར་བཞག་ལྷ་མིའི་འཇིག་རྟེན་གྱི་ཐེག་པ་ལ་ཞོན་ཏེ་རྟག་ཆད་ལོག་ལྟའི་ཐེག་པ་སུན་ཕྱུང་། ཡང་དག་པའི་ཐེག་པ་ལ་ཞུགས་ནས་འཇིག་རྟེན་ལས་འདས་པའི་སར་བགྲོད་པའི་ཕྱིར་ཐེག་པའི་རྣམ་གྲངས་སུ་བཞག་པ་ཡིན་ལ། དགོས་པ་ནི་ལམ་ངན་པ་དེ་དག་གི་རང་བཞིན་ཤེས་ནས་མི་འཇུག་པ་དང་། ནང་པ་ཡིན་པར་ཁས་བླངས་བཞིན་དུ་རྒྱུད་དང་སྤྱོད་ལམ་ལ་དེའི་བརྟུལ་ཞུགས་བག་ལ་ཉལ་གྱི་ཚུལ་དུ་མི་འགོ་བའི་ཕྱིར་དུ་སྟེ། འདི་སྐད་དུ། རིགས་ཀྱི་བུ་ཁྱོད་ལོག་པའི་ལམ་དུ་ཞུགས་ཀྱིས་དོགས་པའི་ཕྱིར་ངས་འཇིག་ཚོགས་ཀྱི་ལྟ་བ་མང་པོ་བསྡུས་ཏེ་བསྟན་པའོ། །ཞེས་ཐམས་ཅད་མཁྱེན་པས་བཤད་དོ། །སྐབས་འདིར་ཐེག་པའི་རྣམ་གྲངས་དགུ་རུ་འདྲེན་པ་སོགས་ལ་མི་བདེན་ཏོ་ཞེས་སྐུར་པ་འདེབས་པ་ནི་སྔོན་ཆད་བོད་འདིར་བྱུང་བས་ད་དུང་ཡང་དེ་དག་གི་རྗེས་འབྲང་བློ་ཆུང་བ་གང་ཞིག་ཐེ་ཚོམ་ཟ་བ་ནི་མི་རིགས་ཏེ། སྐྱེས་བུའི་བློ་སྟོབས་མ་ཟད་བར་ལ་མིང་ཚིག་ཡི་གེའི་རྣམ་གྲངས་དང་། ཡིད་དཔྱོད་ཀྱི་མཐའ་ལ་ཟད་པ་མེད་པས་ཐེག་པའི་སྒོ་ཡང་དེ་སྙེད་དུ་སྲིད་དེ། ལང་ཀར་གཤེགས་པ་ལས། ཇི་སྲིད་སེམས་ནི་འཇུག་པའི་བར། །ཐེག་པའི་མཐའ་ལ་ཐུག་པ་མེད། །ཅེས་སོ། །དེའི་ཕྱིར་ཐེག་པ་མཐའ་ཡས་པ་ཙམ་དུ་གྲུབ་པའི་མཐའ་ཡང་མཐའ་ཡས་ཏེ། རང་རང་གི་ཐེག་པའི་ལུགས་བསྒྲུབ་པའི་ཕྱིར་རོ། །དེ་སྐད་དུ་ཀུན་མཁྱེན་གྱིས། བློ་ཆུང་ཞིང་ཤེས་རབ་ཀྱི་མིག་རྒྱང་ཐུང་བ་དག་གཅིག་ཏུ་ཞེན་ནས། ཐེག་པའི་གྲངས་དང་གྲུབ་མཐའི་རྣམ་གྲངས་བསམ་གྱིས་མི་ཁྱབ་པའི་རྣམ་གཞག་ལ་སྔངས་ཤིང་མི་བདེན་ཏོ་ཞེས་སྨྲ་བ་ནི། བ་ལང་ལ་སོགས་པ་མ་ཧེ་དག་བདག་ཅག་དུད་འགྲོ་རྣམས་ནི་རྭ་དང་བཅས་པའི་ཕྱིར། མི་དང་ལྷ་རྣམས་ཀྱང་རྭ་ཅན་ཁོ་ནའོ་ཞེས་འཛིན་པ་བཞིན་ནོ། །དེ་བས་ན་ཐེག་པའི་ཚུལ་རྣམས་ནི། མིང་ཚིག་དང་དོན་གྱི་རྣམ་གྲངས་མཐའ་ཡས་ཤིང་། ལམ་བགྲོད་ཚུལ་དང་ས་དང་ཏིང་ངེ་འཛིན་གྱི་འཇོག་ཚུལ་དཔག་ཏུ་མེད་དེ། ཐམས་ཅད་མཁྱེན་པ་ནི་གང་ཡང་མཁྱེན་ཅིང་གསུངས་པའི་ཕྱིར། ལམ་བགྲོད་དུ་ཡོད་པ་དང་། མེད་པ་དང་། རྩོལ་བ་དང་བཅས་པ་དང་། རྩོལ་བ་མེད་པ་དང་། ཚེ་གཅིག་གིས་གྲོལ་བ་དང་། བསྐལ་པས་གྲོལ་བ་ལ་སོགས་པ་ནས། གྲུབ་པའི་རྣམ་གཞག་གང་ལ་དགའ་ཞིང་མོས་པའི་བསམ་པ་དང་མཐུན་པའི་ཆོས་གསུངས་ཏེ། ཆོས་ཚུལ་རྒྱ་མཚོ་རྣམས་ལ་སྔངས་ཤིང་སྐྲག་པས་ལོག་པར་ལྟ་བ་རྣམས་དོར་ནས། དོན་དུ་གཉེར་བས་འཇུག་པར་བྱ་བ་ནི་གདམས་ངག་དམ་པའོ། །ཞེས་གསུངས་པ་ནི་བསྟན་པ་ཐམས་ཅད་འགལ་མེད་དུ་རྟོགས་པའི་རྣམ་པར་ཐར་པ་དོན་ལ་གནས་པ་ཡིན་ནོ། །གཉིས་པ་བླ་ན་མེད་པའི་གསང་བ་ཆེན་པོ་དབང་བསྒྱུར་ཐབས་ཀྱི་ཐེག་པ་སྟེ་ཡོ་ག་རྣམ་པ་གསུམ་གྱི་རྣམ་པར་གཞག་པ་ལ་གཉིས། ལྷ་མིའི་ཡུལ་དུ་བྱུང་ཚུལ་དང་། སོ་སོའི་རང་བཞིན་བཤད་པའོ། །དང་པོ་ནི། སེང་གེ་རྩལ་རྫོགས་ཆེན་པོའི་རྒྱུད་ལས། བསྐྱེད་པ་མ་ཧཱ་ཡོ་ག་ནི་ཆོས་ཐམས་ཅད་ཀྱི་གཞི་ལྟ་བུའོ། །ལུང་ཨ་ནུ་ཡོ་ག་ནི་ཆོས་ཐམས་ཅད་ཀྱི་ལམ་ལྟ་བུའོ། །རྫོགས་པ་ཨ་ཏི་ཡོ་ག་ནི་ཆོས་ཐམས་ཅད་ཀྱི་འབྲས་བུ་ལྟ་བུའོ། །ཞེས་བསྐྱེད་པ་ཐབས་ཀྱི་གཞི་ལ། རྫོགས་པ་ཤེས་རབ་ཀྱི་ལམ་བཀོད་ནས། བླང་དོར་གཉིས་མེད་དུ་རྫོགས་པའི་འབྲས་བུའི་གོ་འཕང་ལ་འཇོག་པ་ནང་རྒྱུད་སྡེ་གསུམ་ལས་དང་པོ་བསྐྱེད་པ་མ་ཧཱ་ཡོ་ག་ལའང་རྒྱུད་སྡེ་དང་སྒྲུབ་སྡེ་གཉིས་སུ་ཡོད་པའི་རྒྱུད་སྡེའི་བྱུང་ཚུལ་ནི། དཔལ་གདོད་མའི་མགོན་པོ་བཅོམ་ལྡན་འདས་ཀུན་ཏུ་བཟང་པོས་རྒྱལ་ཚབ་རིགས་ལྔ་དང་། དེས་རྒྱལ་སྲས་སེམས་དཔའ་རྡོ་རྗེ་ལ་དགོངས་པས་བརྒྱུད་དེ་རིགས་གསུམ་སེམས་དཔའ་ལས་བསྟན་པ་ལས། མཛེས་པའི་ལང་ཚོ་དང་ལྡན་པ་འཇམ་དཔལ་གཞོན་ནུའི་ངང་ཚུལ་དང་ལྡན་པ་དེས་ལྷ་གྲགས་ལྡན་མཆོག་སྐྱོང་སོགས་ལ་བརྒྱུད་ནས་ལྷ་དེ་རྣམས་ཀྱང་བྱང་ཆུབ་སེམས་དཔའི་རིགས་འཛིན་ཞིང་རྒྱལ་བའི་གདུང་བསབས་པར་གྱུར་ཏོ། །སྤྱན་རས་གཟིགས་བདུད་རྩི་སྨན་གྱི་སྐུ་དང་ལྡན་པ་དེས་ཀླུ་རྒྱལ་གྷྲྀ་ན་ནག་པོ་སོགས་ལ་བརྒྱུད་དེ་ཀླུ་དེ་རྣམས་ཀྱང་བྱང་ཆུབ་སེམས་དཔའི་རིགས་འཛིན་ཞིང་རྒྱལ་བའི་གདུང་བསབས་སོ། །ཕྱག་ན་རྡོ་རྗེ་རྡོ་རྗེ་སྙིང་པོ་མི་འཇིགས་པའི་བརྟུལ་ཞུགས་དང་ལྡན་པ་དེས་གནོད་སྦྱིན་སྐར་མདའ་གདོང་སོགས་ལ་བཤད་ནས་དེ་རྣམས་ཀྱང་བྱང་ཆུབ་སེམས་དཔའི་རིགས་འཛིན་ཅིང་གདུང་བསབས་སོ། །དེ་དག་ཀྱང་རང་རང་གི་ལུས་དང་བསམ་པ་དང་མཐུན་པར་བསྟན་ཅིང་རིགས་གསུམ་སེམས་དཔས་ལྷ་ཀླུ་གནོད་སྦྱིན་གསུམ་དང་། ལངྐ་མགྲིན་བཅུས་མི་མ་ཡིན། ལི་ཙ་བྱི་དྲི་མེད་གྲགས་པས་མི་རྣམས་ལ་བསྟན་པས་རང་རང་གི་འཁོར་ཚོམ་བུ་དང་བཅས་པར་སངས་རྒྱས་པ་ལ་རིག་འཛིན་བརྡའི་བརྒྱུད་པ་ཞེས་གྲགས་སོ། །དེའི་ཚེ་རྒྱ་གར་ཤར་ཕྱོགས་ཟ་ཧོར་རྒྱལ་པོ་ལུང་བསྟན་རྡོ་རྗེ་ལ་གླེགས་བམ་གྱི་བཀའ་བབས་ནས་བརྒྱུད་པ་ནི། སྤྱི་མདོ་ལས། ང་ནི་འདི་ནས་མི་སྣང་ནས། །ལོ་ནི་བརྒྱ་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡིས། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་ལྷོའི་ཕྱོགས་མཚམས་ཀྱི། །མི་ལས་སྐལ་ལྡན་རིགས་ཅན་ཏེ། །རྒྱལ་པོ་ཛ་ཞེས་བྱ་བ་ལ། །སྔོན་དུ་ལྟས་རྣམས་སྣང་བར་འགྱུར། །དྲག་ཤུལ་ཅན་ཞེས་བྱ་བའི་རྩེར། །གྲོགས་ཀྱི་སེམས་ཅན་དམན་པའི་ལུས། །ལངྐའི་བདག་པོ་ལ་སོགས་པ། །ལག་ན་རྡོ་རྗེ་སྣང་བར་འགྱུར། །ཞེས་དང་། གསང་བའི་སྙིང་པོ་ལས། རེ་ཞིག་སྣོད་དང་ལྡན་པའི་མི། །དེ་མིང་རྒྱལ་པོ་ཛ་ཞེས་བྱ། །ཕྱག་ན་རྡོ་རྗེས་མཐུས་སྣང་འགྱུར། །ཞེས་པ་ལྟར། ཨོ་རྒྱན་གྱི་རྒྱལ་པོ་ཨིནྡྲ་བོ་དྷི་ཆེ་བའི་སྲས་འབྲིང་པོའི་ཡབ་ཏུ་ངོས་འཛིན་པ་རྒྱལ་པོ་ཛ་སྟེ། དེ་ཡང་འདྲ་འབག་ཆེན་མོར། དེ་ལ་རི་མ་ལ་ཡའི་ཤར་ལྷོ་ན་ཨ་སུ་ར་གསང་བའི་བྲག་ཕུག་ན་རྒྱལ་པོ་ཛའི་ཕོ་བྲང་ཡོད་དོ། །རི་མ་ལ་ཡ་ནི་སངས་རྒྱས་ཐམས་ཅད་ཀྱིས་གསང་སྔགས་སྟོན་པའི་གནས་ཡིན་ཏེ། རི་དེ་ནི་ཤིན་ཏུ་བཀྲ་ཤིས་ཤིང་བྱིན་ཆེ་བ་མཐོང་སྣང་དུ་མ་ཡོད་པ། དག་པ་ལ་རིན་པོ་ཆེ་སྣ་ཚོགས་ལས་གྲུབ་པར་སྣང་བ། ལ་ལ་ནི་བྲག་རི་ཤིན་ཏུ་རྣོ་ཞིང་གཟར་ལ་མཐོ་བར་སྣང་བ་དང་། ལ་ལ་ནི་གནམ་ལྕགས་འབར་བ་གང་གིས་ཀྱང་བགྲོད་མི་ནུས་པར་སྣང་ངོ་། །ངོས་ལ་ཙན་དན་གྱི་སྡོང་པོའི་རྩ་ན་གཅན་གཟན་གྱི་རྒྱལ་པོ་སེང་གེ་གནས་པའོ། །ལོགས་ལ་བྲག་དཀར་པོ་སེང་གེ་འདྲ་བ་ལ་འདབ་ཆགས་ཀྱི་རྒྱལ་པོ་བྱ་རྒོད་ཀྱི་ཚང་བཅས་པ། རྩ་བ་ཙན་དན་གྱི་ནགས་ལ་སྟག་གི་འཁྲ་ས་ཡོད་པ། རི་དེའི་རྩེ་མོ་རྩིབས་བརྒྱད་དུ་ཡོད་པ། དེ་ན་ཕྱག་ན་རྡོ་རྗེའི་ཕོ་བྲང་ཡོད་དེ། དེ་ལ་སྐལ་མེད་ཀྱིས་མི་བགྲོད་ལ། སྐལ་ལྡན་རྣམས་འདུ་ཞིང་གསང་བ་སྒྲོགས་པའོ། །རི་དེའི་ཤར་ལྷོ་ན་ཨ་སུ་ར་གསང་བའི་བྲག་ཕུག་ཡོད་པ། བྲག་ཕུག་དེའི་སྒོ་ཟླ་གམ་དུ་ཡོད་པའི་ནང་ན་བཀྲ་ཤིས་ཀྱི་རྟགས་རིན་པོ་ཆེ་ཟུར་བརྒྱད་ལ་ཉི་ཟླ་གཉིས་ཀྱི་རྒྱན་ཡོད་པའོ། །ལོགས་ལ་བྱ་ཀ་ལན་ཏ་ཀའི་ཚང་བཅས་པའོ། །ཞེས་སོ། །དེ་སྐད་དུ་རྒྱུད་ལས་ཀྱང་། མི་ཡི་གནས་ཀྱི་འཇིག་རྟེན་ཁམས། །གླིང་བཞི་ལས་ནི་འཛམ་གླིང་གི། །དྲག་ཤུལ་ཅན་ཞེས་བྱ་བའི་རི། །གནོད་སྦྱིན་འདུ་བའི་གནས་ཡིན་ཏེ། །ཆོས་འཛིན་རིགས་ཀྱིས་བསྒྲུབ་གནས་ཡིན། །ཞེས་སོ། །དེ་ལྟ་བུའི་རྒྱལ་པོ་ཛས་ཡུལ་བྷངྒ་ལའམ་ཤར་ཕྱོགས་ཟ་ཧོར་གྱི་རྒྱལ་སར་མངའ་དབང་བསྒྱུར། འདྲ་འབག་ཆེན་མོ་ནས་བཤད་པ་ལྟར་སྟོན་པ་མྱ་ངན་ལས་འདས་ནས་ལོ་བརྒྱ་དང་ཉི་ཤུ་རྩ་བརྒྱད་སོང་བ་ཆོ་འཕྲུལ་གྱི་ཟླ་བའི་རྒྱལ་གྱི་ཉིན་ངོ་མཚར་བའི་ལྟས་སྣ་ཚོགས་བྱུང་བ་ན། རྒྱལ་པོ་འཁོར་དང་བཅས་པས་མཆོད་པ་བཤམས་པས་དེའི་ནུབ་མོ་རྒྱལ་པོའི་ཕོ་བྲང་གྲོང་ཁྱེར་རི་བོ་དང་བཅས་འོད་ཀྱིས་གང་བར་གྱུར་ཏོ། །དེའི་ཚེ་གསང་བའི་བདག་པོ་ཕྱག་ན་རྡོ་རྗེས་གསང་སྔགས་ཀྱི་ཆོས་འཁོར་བསྐོར་བའི་དུས་ལ་བབ་པར་དགོངས་ཏེ་མངོན་པར་གཤེགས་ནས་འཁོར་ལྷའི་རིག་འཛིན་གྲགས་ལྡན་མཆོག་སྐྱོང་། དེ་བཞིན་དུ་ཀླུ་རྒྱལ་འཇོག་པོ། གནོད་སྦྱིན་སྐར་མདའ་གདོང་། སྲིན་པོ་བློ་གྲོས་ཐབས་ལྡན། མིའི་སྐལ་ལྡན་ལི་ཙ་བྱི་སྟེ་དམ་པའི་རིགས་ཅན་དྲ་མ་ལྔ་ལ་གསང་རྒྱུད་རྒྱ་མཚོའི་ཆོས་འཁོར་བསྐོར། བློ་གྲོས་ཐབས་ལྡན་གྱིས་ཡི་གེར་བསྡུས་ཏེ་བྱིན་གྱིས་བརླབས་པ་ལས། རྒྱལ་པོ་ཛ་ཨ་སུ་ར་གསང་བའི་བྲག་ཕུག་ཏུ་རྡོ་རྗེའི་རྣལ་འབྱོར་ལ་གཞོལ་བའི་ཚེ་རྨི་ལྟས་ཁྱད་པར་ཅན་བདུན་བྱུང་སྟེ། སྐུ་གསུང་ཐུགས་རྟགས་ཐིམ་པ་དང་། །རིན་ཆེན་གླེགས་བམ་བབས་པ་དང་། །ཆོས་ཀྱི་བགྲོ་བ་བྱེད་པ་དང་། །ཀུན་གྱི་དམ་པར་གྲགས་པ་དང་། །མཆོད་པ་ཆེན་པོ་བྱེད་པ་དང་། །རིན་ཆེན་ཆར་དུ་འབབ་པ་དང་། །སངས་རྒྱས་པར་ལུང་བསྟན་པའོ། །དེའི་ནངས་པར་མནལ་སད་པ་དང་རྒྱལ་པོས་འཁོར་རྣམས་བསྡུས་ཏེ་རྨི་ལམ་ཟློས་པ། མདང་སུམ་བདག་ལ་རྨི་ལམ་འདི་ལྟར་རྨིས། །མ་ལ་ཡ་ཡི་རྩེ་མོ་ན། །ཕྱག་ན་རྡོ་རྗེའི་ཕོ་བྲང་བཞུགས། །སྐུ་ལས་འོད་འཕྲོས་ཐམས་ཅད་བསྲེགས། །གསུང་སྒྲ་འབྲུག་ཏུ་སྟོང་གསུམ་བསྒྲགས། །ཐུགས་ལས་འོད་བྱུང་སྣང་སྲིད་གསལ། །སྐུ་ལས་ཉི་འོད་སྤྱི་བོར་ཐིམ། །གསུང་ལས་ཟླ་འོད་རྐང་མཐིལ་ཐིམ། །རྡོ་རྗེར་འོད་འབར་ཐུགས་ཀར་ཐིམ། །འབྲུ་གསུམ་ཡི་གེ་གནས་གསུམ་ཐིམ། །སྣང་སྲིད་ལྟོ་རུ་ཟོས་པ་རྨིས། །མཁའ་ལས་རིན་ཆེན་སྤྲིན་ལྟར་འཐིབས། །རིན་ཆེན་ཉི་འོད་འབར་བ་ལ། །རིན་ཆེན་སྨུག་པོའི་སྒྲོམ་ཆེན་ནས། །རིན་ཆེན་གསེར་གྱི་གླེགས་བམ་ལ། །བཻ་ཌཱུར་ཞུན་མའི་རྩི་ཡིས་བྲིས། །སྐར་མདའ་བཞིན་དུ་བབས་པ་རྨིས། །སངས་རྒྱས་བྱང་ཆུབ་སེམས་དཔའ་རྣམས། །ཉི་ཟླ་ཞོན་ནས་མཁའ་ལ་བྱོན། །གསེར་གྱི་འཁོར་ལོ་ཕྱག་ཐོགས་ཏེ། སྲིད་གསུམ་ཁ་ལོ་གྱེན་ལ་བསྒྱུར། །གསང་སྔགས་བགྲོ་བ་མཛད་པ་རྨིས། །སངས་རྒྱས་ཀུན་དང་རིག་འཛིན་གྱིས། །ཀུན་གྱི་དམ་པར་བདག་སྒྲོག་རྨིས། །གླེགས་བམ་ཆེན་པོ་དེ་དག་ལ། །སངས་རྒྱས་བྱང་ཆུབ་རིག་པ་འཛིན། །མཁའ་འགྲོ་ལྷ་དང་གནོད་སྦྱིན་ཚོགས། །ཀུན་ཀྱང་ཕྱག་དང་བསྐོར་བ་དང་། །མཆོད་ཅིང་བསྟོད་པ་བྱེད་པ་རྨིས། །མཁའ་ལ་རིན་ཆེན་སྤྲིན་ལྟར་གཏིབས། །ཆོ་འཕྲུལ་འབྲུག་སྒྲ་གློག་སྟོང་འཁྱུག །རིན་ཆེན་སྣ་ཚོགས་ཆར་བཞིན་འབབ། །རིན་ཆེན་མེ་ཏོག་བཏུས་པ་རྨིས། །སངས་རྒྱས་གསུང་གི་འོད་ཟེར་ལས། །སངས་རྒྱས་ས་ལ་ལུང་བསྟན་རྨིས། །ཞེས་གསུངས་སོ། །དེར་རྒྱལ་པོའི་རྨི་ལམ་ལ་ཐམས་ཅད་ངོ་མཚར་ཏེ་བལྟས་པས། ཕོ་བྲང་གི་ཡང་ཐོག་ན་རིན་པོ་ཆེ་གསེར་གྱི་གླེགས་བམ་ལ་བཻ་ཌཱུརྱ་ཞུན་མས་བྲིས་པ། རྩ་བ་རང་ནན་ཏུ་བྱས་པའི་གསང་སྔགས་ཀྱི་རྒྱུད་སྡེའི་གླེགས་བམ་མང་པོ་དང་། ཕྱག་རྡོར་གྱི་སྐུ་ཁྲུ་གང་བ་གཅིག་འདུག་པས་རྒྱལ་པོས་འདི་སྐད་ཅེས་གསོལ་ཏོ། །སྔོན་ཚེ་གོང་ནས་བསྒྲུབས་པའི་ལྷ། །ལས་ཀྱིས་མཇལ་བའི་ས་ཕྱོགས་འདིར། །བསྟན་པའི་སྙིང་པོ་དམ་པ་ནི། །ནམ་གཞག་གཏན་དུ་མི་གཏང་ངོ་། །ངོ་མཚར་ཡ་མཚན་རྨད་ཀྱི་སྐུ། །འདྲེན་པ་མཆོག་གི་དཔལ་ཡང་གྲགས། །ལས་ཀྱིས་འབྲེལ་བའི་ལྷ་མཆོག་ཁྱོད། །མོས་པའི་གཟུགས་སུ་ལྷ་མཆོག་འཛིན། །ཞེས་གསུངས་ཏེ་པོ་ཏི་རྣམས་བལྟས་པས་བརྡ་མ་མཇལ། དེར་རྒྱལ་པོ་ཐུགས་མུག་སྟེ་དར་ཅིག་བཤུམས་སོ། །ཡང་མཁས་པ་གཞན་འདྲ་བཞུགས་པར་དགོངས་ཏེ་སྤྱན་འདྲེན་དུ་བཏང་བས། པཎྜི་ཏ་ཀུན་མཐུན་པར་ཤེས་ན་ངོ་མཚར་ཆེ་སྟེ་མ་ཤེས་ན་སྐྱེངས་པར་འགྱུར་གྱིས་དོགས་ནས་འབྱོན་དུ་མ་བཞེད་པར་པོ་ཏི་འདིར་ཁྱེར་ཤོག་གསུངས་པ་ལྟར། གླང་པོ་ཆེ་ལ་པོ་ཏི་ཀུན་བཀལ་ཏེ་སྤྱན་སྔར་འགྲིམ་པས། ཨུ་པ་རཱ་ཛ་ལ་སོགས་པ་ཀུན་གྱིས་བརྡ་མ་ཁྲོལ་བར་ཕྱིར་ལྡོག་གོ །དེར་རྒྱལ་པོས་ཅུང་ཟད་བསམས་པས། རང་གི་སྒྲིབ་པ་མ་དག་ཚོགས་གཉིས་མ་རྫོགས་པས་ལན་པར་དགོངས་ཏེ། སྐུ་དང་གླེགས་བམ་ལ་གསོལ་བ་བཏབ་པས། སྒྱུ་འཕྲུལ་རྡོ་རྗེ་སེམས་དཔའ་ཐུགས་ཀྱི་སྒྲུབ་པ་དང་ཞལ་མཐོང་གི་ལེའུ་གཉིས་ཤེས་སོ།། །།དེར་ཕྱག་རྡོར་གྱི་སྐུ་སྒྲུབ་རྟེན་དུ་བཟུང་ནས་བསྒྲུབས་པས། ཟླ་བ་དྲུག་ན་རྡོ་རྗེ་སེམས་དཔའི་ཞལ་མངོན་སུམ་དུ་མཐོང་སྟེ། དངོས་གྲུབ་ཅི་འདོད་གསུངས་པ་ལ། བདག་གིས་གླེགས་བམ་འདི་རྣམས་རྟོགས་པར་འཚལ་ལོ་ཞེས་ཞུས་པས། ཕྱག་ཤིང་དང་ཆོས་འཁོར་གཏད་དེ། དབང་བསྐུར། གནང་བ་བྱིན། ལུང་བསྟན། དོན་གྱི་མདོ་ཙམ་གསུངས་ནས་མི་སྣང་བར་གྱུར་ཏོ། །དེའི་བྱིན་རླབས་ཀྱིས་གླེགས་བམ་ཡོངས་སུ་རྫོགས་པར་ཤེས་ཏེ་ཚིག་བརྒྱུད་རྣམས་ལི་ཙ་བྱི་དྲི་མེད་གྲགས་པར་ཞུས་ནས་མི་ཡུལ་དུ་དར་བ་སྟེ། རྡོ་རྗེ་ས་འོག་གི་རྒྱུད་ལས་ཀྱང་། རྒྱུ་ལ་སྦྱོར་བ་རྒྱུ་ཡི་ཆོས། །འཁོར་ལོ་བཞིན་དུ་བསྐོར་བྱས་ནས། །འབྲས་བུའི་ཐེག་པའི་ཉེ་ལམ་ཞིག །མ་འོངས་དུས་ན་འབྱུང་བར་འགྱུར། །ཞེས་གསུངས་པ་དང་ཡང་མཐུན་པ་ཡིན་ནོ། །ཁ་ཅིག་ཏུ་སྔོན་ལ་ཕྱག་རྡོར་གྱི་སྒྲུབ་པ་མཛད་པས། ཞལ་གཟིགས་ནས་གླེགས་བམ་གྱི་ཆར་པ་བབས། གླེགས་བམ་གྱི་དོན་རྣམས་མཁྱེན་ཀྱང་མ་མཁྱེན་པ་ལྟར་མཛད་ནས་ཨུ་པ་རཱ་ཛ་སོགས་ལ་ཞུས་ཀྱང་བརྡ་མ་ཁྲོལ། དགེ་སློང་ཀུ་ཀུ་རཱ་ཛས་སྒྱུ་འཕྲུལ་དྲྭ་བ་ལེའུ་སྟོང་ཕྲག་བརྒྱ་པའི་ལེའུ་གསུམ་པ་རྡོར་སེམས་ཞལ་མཐོང་གི་ལེའུ་རྟོགས་ཟླ་བ་བདུན་བསྒྲུབས་པས་འགྲུབ་པ་ལུང་བསྟན་པ་བཞིན་ཟླ་བ་བདུན་དུ་ཕྱག་རྡོར་བསྒྲུབས་པས་དངོས་སུ་བྱོན། དབང་བསྐུར་ཞིང་བྱིན་གྱིས་བརླབས་ནས་ཚིག་རྣམས་ལི་ཙ་བྱི་དྲི་མེད་གྲགས་པར་ཞུས་ཤིག་པར་ལུང་བསྟན་ཏོ་ཞེས་པ་ཡང་གླེང་ངོ་། །དེ་ལྟར་རྒྱལ་པོ་ཛ་ལས་བརྒྱུད་པའི་ཏནྟྲ་སྡེ་བཅོ་བརྒྱད་ནི། སངས་རྒྱས་མཉམ་སྦྱོར། གླང་པོ་རབ་འབོག །གླང་པོ་ཆེ་ཆུར་འཇུག་སྟེ་སྐུའི་རྒྱུད་གསུམ། ཟླ་གསང་ཐིག་ལེ། གཅིག་ལས་འཕྲོས་པ། དུ་མ་ལས་འཕྲོས་པ་སྟེ་གསུང་གི་རྒྱུད་གསུམ། གསང་བ་འདུས་པ། རི་བོ་བརྩེགས་པ། རྩེ་གཅིག་འདུས་པ་སྟེ་ཐུགས་ཀྱི་རྒྱུད་གསུམ། དཔལ་མཆོག་དང་པོ། བདུད་རྩི་མཆོག་དང་པོ། ཡིད་བཞིན་ནོར་བུ་སྟེ་ཡོན་ཏན་གྱི་རྒྱུད་གསུམ། ཀརྨ་མཱ་ལེ། སྒྲོལ་མ་འབར་བ། ཀཱི་ལ་ཡ་ཡིག་འབྲུ་བཅུ་གཉིས་ཏེ་ཕྲིན་ལས་ཀྱི་རྒྱུད་གསུམ། སྒྱུ་འཕྲུལ་དྲྭ་བ། དམ་ཚིག་ས་མ་ཡ་འབུམ་སྡེ་བཀོད་པ། རྡོ་རྗེ་ཐབས་ཀྱི་ཞགས་པའི་རྒྱུད་དེ་སྤྱིའི་རྒྱུད་གསུམ་རྣམས་བསྡོམས་པས་བཅོ་བརྒྱད་དོ། །དེར་རྒྱལ་པོ་ཛ་ནས་གང་ཟག་སྙན་ཁུང་དུ་བརྒྱུད་དེ། ཀུ་ཀུ་རཱ་ཛ། ཨིནྡྲ་བྷཱུ་ཏི། སིངྷ་རཱ་ཛ། ཨུ་པ་རཱ་ཛ། སྲས་མོ་གོ་མ་དེ་ཝཱི་སྟེ། དེ་ཡན་ཆད་ནི་ཚོགས་ཀྱི་དཀྱིལ་འཁོར་སྤྱོད་པའི་ཉེ་རྒྱུ་ལ་བརྟེན་རང་རང་གི་ཚོམ་བུ་དང་བཅས་རྡོ་རྗེ་འཆང་ཆེན་པོའི་གོ་འཕང་བརྙེས་པ་ཤ་སྟག་གོ །སྲས་མོས་སྒེག་རྡོར་དང་། སངས་རྒྱས་གསང་བ། དེ་གཉིས་ཀས་བི་མ་ལར་བཤད་པ་ཡིན་ནོ། །དེ་དག་ལས་འཕྲོས་ཏེ་འཕགས་པའི་ཡུལ་དུ་བསྟན་བཅོས་བྱུང་ཚུལ་ཡང་། སློབ་དཔོན་ཀུ་ཀུ་རཱ་ཛས་རྒྱུད་སྡེ་བཅོ་བརྒྱད་ཀྱི་དོན་ཐུགས་སུ་ཆུད་ནས། དང་པོ་ཨིནྡྲ་བྷུ་ཏིའི་དོན་དུ་དཔལ་ཕྲེང་དཀར་པོའི་རྒྱུད་འགྲེལ་མཛད། དེ་ནས་སྒྱུ་འཕྲུལ་རྒྱས་པ་དང་། སངས་རྒྱས་མཉམ་སྦྱོར་གྱི་འགྲེལ་པ་དང་བསྡུས་དོན་མང་དུ་མཛད་དོ། །དེ་ནས་ཨིནྡྲ་བྷུ་ཏིས་དཔལ་གསང་བའི་སྙིང་པོ་དང་། ཐབས་ཀྱི་ཞགས་པ་བདུད་རྩི་རོལ་པ། སངས་རྒྱས་མཉམ་སྦྱོར་རྟོགས་པ་བཅུ་པ་དང་། བདུན་པ་དང་། གསང་བ་འདུས་པ་ལ་སོགས་པའི་རྒྱུད་འགྲེལ་མང་པོ་དང་། བསྡུས་དོན། སྒྲུབ་ཐབས་ལ་སོགས་པ་མང་དུ་མཛད་དོ། །སྲས་མོ་གོ་མ་དེ་ཝཱིས་ཀྱང་འགྲེལ་པ་དང་སྒྲུབ་ཐབས་མང་དུ་བརྩམས། དེ་བཞིན་དུ་སྒེག་པའི་རྡོ་རྗེ། སངས་རྒྱས་གསང་བ། ཨོ་རྒྱན་ཆེན་པོ། བི་མ་ལ་སོགས་པའི་འགྲེལ་པའང་རྒྱ་ཆེར་བཞུགས་སོ། །དེ་དག་ལས་ད་ལྟའི་བར་དུ་རྒྱུད་ཀྱི་བཤད་སྲོལ་མ་ཉམས་པ་ནི་དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་དུ་གླེང་ངོ་། །གཉིས་པ་སྒྲུབ་སྡེ་ལ་གཉིས། བཀའ་མའི་ལུགས་སུ་མདོར་བསྟན་པ་དང་། གཏེར་མའི་ལུགས་སུ་རྒྱས་པར་བཤད་པའོ། །དང་པོ་ནི། གྲུབ་པ་བརྙེས་པའི་སློབ་དཔོན་ཆེན་པོ་བརྒྱད་ལ་བཀའ་བབས་པ་སྟེ། དེ་ཡང་དང་པོ་རྣམ་པར་སྣང་མཛད་འཇམ་དཔལ་སྐུ་ལས་བརྒྱུད་པ་ནི། ཇི་སྐད་དུ། བཅོམ་ལྡན་འདས་ཀྱིས་བཀའ་སྩལ་པ། །ང་ནི་མྱ་ངན་འདས་འོག་ཏུ། །ལྔ་བརྒྱ་ཕྲག་བཅུའི་དང་པོ་ལ། །ལྷོ་ནུབ་སྲིན་པོ་གྱད་ཡུལ་དུ། །སིངྒ་ལ་ཡི་ནགས་སུ་ནི། །གཤིན་རྗེ་གཤེད་ཀྱི་སྤྲུལ་པ་ནི། །མིང་ནི་བཤེས་གཉེན་ཞེས་སུ་གྲགས། །འབྲས་བུར་གྲགས་པ་ཀུན་རྫོགས་ནས། །བསྟན་པ་འཛིན་ཞིང་དར་བར་འགྱུར། །ཞེས་པ་ལྟར་འཇམ་པའི་རྡོ་རྗེ་དང་གཉིས་སུ་མེད་པའི་སྐུའི་རིག་འཛིན་སློབ་དཔོན་འཇམ་དཔལ་བཤེས་གཉེན་སིདྒ་ལའི་རྒྱལ་པོ་གཞོན་ནུ་དཔལ་གྱི་སྲས་སུ་འཁྲུངས། མཚན་ཁྱེའུ་དཔལ་བཟང་ཞེས་གྲགས་སོ། །དེས་སྲིད་པའི་འཆིང་ཞེན་སྤངས་ཏེ་ལྷོ་ཕྱོགས་བྷེ་ཏའི་ཡུལ་དུ་བྲོས། སྤྲུལ་པའི་སྐུ་དགའ་རབ་རྡོ་རྗེ་ལས་རབ་ཏུ་བྱུང་། དབང་དང་གདམས་ངག་ཐམས་ཅད་ཞུས་ཏེ་རྒྱུད་ལུང་ཐམས་ཅད་དུས་གཅིག་ཏུ་ཐུགས་སུ་ཆུད། དེར་འཇམ་དཔལ་ལ་ཡི་དམ་མཛད་དེ་བསྒྲུབས་པས། གྲུབ་པའི་རྟགས་སུ། བྲིས་སྐུ་བཞད་ཅིང་བུམ་པ་ཁོལ། མེ་ཏོག་ཡང་འཁྲུངས་སོ། །དེའི་ནུབ་མོ་འཇམ་དཔལ་གྱི་ཞལ་མངོན་སུམ་པར་བསྟན་ནས་ཚེ་དབང་གི་དངོས་གྲུབ་ཐོབ། ཕྱི་ནུབ་ཡི་གེ་འཁོར་ལོ་ཚོགས་ཆེན་གྱི་ས་ནོན་པས་འཇམ་དཔལ་ཡ་མཱནྟ་ཀའི་ཞལ་གཟིགས། ཕྱི་ནང་གསང་བའི་དབང་བསྐུར། རྒྱུད་ལུང་མན་ངག་ཐམས་ཅད་རྫོགས་པར་བཤད་པ་རྨིས་ནས་མནལ་སད་ཙ་ན་གཤེད་མི་སྣང་བར་སྤྲུལ་པའི་གཤིན་རྗེ་མང་པོས་བསྐོར་བ་བྱེད་པར་གཟིགས། དེ་ཐམས་ཅད་ཀྱིས་སྲོག་སྙིང་ཕུལ། དེའི་ཚེ་ནམ་མཁའ་ལས་སྒྲ་ཆེན་པོ་གྲགས་པ་ན། པཎྜི་ཏ་རྣམས་ཀྱིས་རྒྱུ་མཚན་དྲིས་པས། སློབ་དཔོན་དགའ་རབ་རྡོ་རྗེས། དགེ་སློང་དཔལ་བཟང་གིས་འཇམ་དཔལ་གྲུབ་པ་ཡིན་ཏེ། མཚན་ཡང་འཇམ་དཔལ་བཤེས་གཉེན་དུ་བཏགས་སོ། །དེའི་ཚེ་ནམ་མཁའ་ལས་སྐྱེ་མེད་རྡོ་རྗེའི་རང་སྒྲ། རི་གནམ་ལྕགས་མ་ལ་ཡར་སོང་ཞིག །དེ་ན་རྒྱུད་སྡེ་མ་ལུས་པ་ཡོད་དེ། དེ་དག་ལ་ལོངས་སྤྱོད་ལ་འགྲོ་བའི་དོན་གྱིས་ཤིག །ཅེས་ལུང་བསྟན་བྱུང་ངོ་། །དེར་གཤིན་རྗེ་གཤེད་ཀྱི་བརྟུལ་ཞུགས་ལ་བསྙེམས་ནས་སྒྲུབ་པ་མཛད། སྐུ་གཅེར་བུར་ཕྱུང་ནས་ཕྱོགས་ལས་རྣམ་རྒྱལ་གྱི་སྤྱོད་པས་གྲུབ་རྟགས་མང་དུ་མཛད་པས་སྨྱོན་པ་བརྟུལ་ཞུགས་ཅན་དུ་གྲགས། གྲོང་ཁྱེར་དུ་བྱོན་པས་རྒྱལ་པོ་ངོ་མཚར་སྐྱེས་ཏེ་རྣལ་འབྱོར་དབང་ཕྱུག་ཏུ་གླེང་། རི་མ་ལ་ཡ་ཞེས་ཉིན་བཞིན་ཆར་མི་བཟད་པར་འཁྲིགས། མཚན་མོ་མེ་འབར་བ་དེར་བྱོན་པས་གནོད་སྦྱིན་གྱི་བུ་མོ་འོད་འཕྲོ་མ་སོགས་ཀྱིས་བར་ཆད་བརྩམས་ནས་འབྱོན་དུ་མ་སྟེར་བར། བདེན་པས་བཀྲོལ། དེར་ལྕགས་ཀྱི་སྡིག་པ་ཤིན་ཏུ་འཇིགས་པ་ཞིག་བྱུང་བ་བདེ་གཤེགས་ཀྱིས་སྤྲུལ་པར་མཁྱེན་ཏེ་ཕྱག་མཆོད་ཕུལ་བས། དེ་བསེའི་སྒྲོམ་བུར་སོང་སྟེ་ནང་ནས་ལས་བཞི་ཚང་པའི་གསེར་གྱི་གླེགས་བམ་བཻཌཱུརྻས་བྲིས་པ་བྱུང་། གཟིགས་པས་ཐུགས་སུ་ཆུད་དེ་རྡོ་རྗེ་གདན་གྱི་བྱང་དུ་གཏེར་ལ་རྒྱས་བཏབ། དེའི་ནང་ནས་མུ་སྟེགས་འདུལ་བའི་དོན་དྲག་པོ་ཁོལ་བུར་ཕྱུང་སྟེ་བསྒྲུབས་ནས་འཆི་བདག་སྡེ་བརྒྱད་བཀོལ་ཏེ་མུ་སྟེགས་ཀྱི་རྒྱལ་ཁམས་ཐམས་ཅད་བརླག་པར་མཛད་དོ། །དེ་ལ་རྗེས་སུ་སློབ་པའི་སློབ་མའི་དྭངས་མ་གསུམ། སློབ་དཔོན་ཧཱུྃ་ཀཱ་རའི་ལུགས་རིག་འཛིན་ཆེན་པོ་པདྨ་འབྱུང་གནས་ལ་བརྒྱུད། དྷ་ན་ཏ་ལ་མན་ངག་གསུངས། གཞན་ཡང་སློབ་མ་མཐའ་ཡས་ཤིང་། ཁ་ཅིག་ཏུ་འཇམ་དཔལ་བཤེས་གཉེན། ཤཱནྟིཾ་གྷརྦྷ། དེས་རྒྱ་གར་གྱི་རྒྱལ་པོ་ཀུན་སྐྱོང་དང་། བལ་པོ་བ་སུ་དྷ་ར་གཉིས་ལ་བརྒྱུད་ཅིང་མདོར་ན། གཤེད་སྐོར་རྒྱ་མཚོ་སློབ་དཔོན་འདི་ལས་བརྒྱུད་པ་ཤ་སྟག་གོ །སྣང་བ་མཐའ་ཡས་པདྨ་གསུང་གི་བརྒྱུད་པ་ནི། ཆོས་སྐུ་ནས་རིམ་པར་བརྒྱུད་པའི་བཅུ་གཉིས་པ་དཔལ་མགོན་འཕགས་པ་ཀླུ་སྒྲུབ་བམ་སློབ་དཔོན་ནཱ་གཱརྫུ་ན་གསུང་གི་རིག་འཛིན་ཏེ། ལང་ཀར་གཤེགས་པ་ལས། ལྷོ་ཕྱོགས་བེ་ཏའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་འབོད་པ་སྟེ། །ཡོད་དང་མེད་པའི་ཕྱོགས་འཇིགས་པ། །ང་ཡིས་ཐེག་པ་འཇིག་རྟེན་དུ། །བླ་མེད་ཐེག་པ་རབ་བཤད་ནས། །རབ་ཏུ་དགའ་བའི་ས་བསྒྲུབས་ཏེ། །བདེ་བ་ཅན་དུ་དེ་འགྲོའོ། །ཞེས་པ་ལྟར་སྟོན་པ་མྱ་ངན་ལས་འདས་ནས་ལོ་བཞི་བརྒྱ་ན། ལྷོ་ཕྱོགས་བེ་ཏའི་ཡུལ་དུ་བྲམ་ཟེའི་རིགས་སུ་འཁྲུངས། མཚན་མཁན་ལ་བསྟན་པས་ཞག་བདུན་གྱི་ཚེ་ལས་མེད་དོ་ཞེས་ཟེར། ཐབས་དྲིས་པས། བྲམ་ཟེ་བརྒྱ་ལ་སྟོན་མོ་དྲངས་ན་ཟླ་བ་བདུན། དགེ་སློང་བརྒྱ་ལ་དྲངས་ན་ལོ་བདུན། དེ་ནས་ཐབས་མེད་ཟེར་བས་དེ་བཞིན་བྱས། ལོ་བདུན་དུ་ཉེ་བ་དང་བུའི་རོ་ཕ་མས་མཐོང་བ་མི་བཟོད་ཅེས་འཁོར་དང་བཅས་ལྗོངས་རྒྱུ་བར་བཏང་། ཅི་ཞིག་ན་ན་ལེནྡྲའི་མཁན་པོ་སྒྲ་གཅན་འཛིན་བཟང་པོའི་སྒོར་སོན་ནས་དེར་རིག་བྱེད་བསྒྲགས་པས་ནང་དུ་བོས། རྒྱུ་མཚན་དྲིས་པ་ལྟར་གསོལ་བས། རབ་ཏུ་འབྱུང་ནུས་སམ་གསུངས། ནུས་སོ་ཞུས་པས་དེར་རབ་ཏུ་བྱུང་། རྨ་བྱ་ཆེན་མོ་ཡི་དམ་དུ་ཕོག །འཇམ་དཔལ་རྩ་རྒྱུད་ལས། ལོ་ནི་དྲུག་བརྒྱ་དག་ཏུ་འཚོ། །རིག་པ་རྨ་བྱ་ཆེན་མོ་ནི། །བདག་ཉིད་ཆེན་པོ་དེས་འགྲུབ་བོ། །ཞེས་པ་ལྟར། བདུན་པའི་ཚེ་གཟུངས་མཚན་རིལ་པོར་སྟོན་པས་འགྲུབ་སྟེ། ལོ་དྲུག་བརྒྱར་འཚོ་བའི་ཐུན་མོང་གི་དངོས་གྲུབ་བརྙེས། སླར་བསྙེན་པར་རྫོགས། གསེར་འགྱུར་མཛད་ནས་དགེ་འདུན་རྣམས་མུ་གེ་ལས་སྐྱོབས། མཁན་པོ་སྤྱོད་པ་ལ་གཤེགས་ནས་ན་ལེན་དྲའི་མཁན་པོ་མཛད། ཀླུའི་ཡུལ་དུ་གཤེགས་ནས་ཀླུའི་རྒྱལ་པོ་ཟུག་རྔུ་ལས་བསྒྲལ། གཏང་རག་ཏུ་ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་སྡེ་རྣམས་བླངས། ཀླུ་འཇིམ་ཡང་དེའི་ཚེ་བྱུང་ངོ་། །སྤྱིར་ཐེག་པ་ཆེན་པོའི་བསྟན་པའི་སྲོག་ཤིང་དུ་གྱུར། ཁྱད་པར་དུ་བླ་མེད་ཐེག་པ་རབ་བཤད་ནས། །ཞེས་པ་ལྟར་རྒྱུད་སྡེ་རྒྱ་མཚོའི་དེད་དཔོན་དུ་གྱུར་པ་དེས་རྟ་མཆོག་ཧེ་རུ་ཀའི་དགོངས་པ་མངོན་དུ་ཕྱུང་ནས་རིག་འཛིན་ཆེན་པོ་པདྨ་འབྱུང་གནས་ལ་བཤད་པ་ཡིན་ནོ། །རྡོ་རྗེ་མི་བསྐྱོད་པ་སྟེ་ཡང་དག་ཐུགས་ནི། གདོད་མའི་སངས་རྒྱས་ནས་རིམ་པར་དགའ་རབ་རྡོ་རྗེ་ལ་བརྒྱུད། དེས་འཇམ་དཔལ་བཤེས་གཉེན། རོ་ལངས་བདེ་བ། སངས་རྒྱས་གསང་བ། དེས་བལ་པོ་ཧཱུྃ་ཀཱ་ར་ཐུགས་ཀྱི་རིག་འཛིན་ཏེ། སློབ་དཔོན་འདི་བལ་པོའི་ཡུལ་དུ་འཁྲུངས། ཡོ་བྱད་དབུལ་པོར་གྱུར་པས་རྒྱ་གར་དུ་བྱོན་ཏེ་རྒྱལ་པོའི་ཕྱུགས་རྫི་བྱས། མིང་ཕྱུགས་རྫི་གོ་ལེབ་ཅེས་གྲགས། རེ་ཞིག་ན་ནགས་གསེབ་ན་ཕྱུགས་འཚོ་བ་ལ་ཕྱིན་པས་དེར་སློབ་དཔོན་ཀུ་ཀུ་རཱ་ཛ་སྒོམ་གྱིན་བཞུགས་པར་མཐོང་བས་ཤིན་ཏུ་དད་པར་གྱུར་ནས་ཕྱག་དང་བསྐོར་བ་བྱས། མ་ཧེའི་འོ་མ་བཞོས་ཏེ་དྲངས་པ་ན། སློབ་དཔོན་གྱི་ཞལ་ནས། བྱིས་པ་ཁྱོད་ཀྱིས་ཆོས་ཞུ་ནུས་སམ་གསུངས་པས། ཆོས་ནུས་ཏེ་བརྒྱགས་མེད་ཞུས། བརྒྱགས་མི་དགོས་པའི་ཆོས་ཀྱང་ཡོད་དོ་གསུངས་པས་དེ་ལྟར་ན་ཞུའོ་བྱས་པས། རྡོ་རྗེ་སེམས་དཔའ་རྒྱན་གཅིག་པའི་སྒོམ་བཟླས་གནང་། དེས་ཕྱུགས་སྐྱོང་བཞིན་པར་བསྒོམས་པས་རྡོ་རྗེ་སེམས་དཔའ་འགྲུབ་སྟེ། ལན་ཅིག་བྲག་ལ་སྒོམ་གྱིན་འདུག་པ་དང་། རྒྱལ་པོས་མཁར་གྱི་རྩེ་ནས་བྲག་ཁ་ན་རྡོ་རྗེ་སེམས་དཔའ་འོད་སྒོར་རེ་བཞུགས་པ་མཐོང་ངོ་། །དགོངས་མོ་ཕྱུགས་ཐམས་ཅད་དེའི་མདུན་དུ་འདུས། རྡོ་རྗེ་སེམས་དཔས་ཕྱུགས་དེད་ནས་བྱུང་པས། ཕོ་བྲང་ལ་ཉེ་བར་སོང་དུས་ལྷ་མི་གསལ་དུ་སོང་། སྒོར་སླེབས་དུས་ཕྱུགས་རྫི་ཁོ་རང་དུ་འདུག་པས། རྒྱལ་པོ་ཐེ་ཚོམ་ཟོས་ཏེ་ནངས་པར་གོས་བརྗེས་ནས་ཕྱུགས་རྫིའི་ཕྱིར་ཕྱིན་ནས་བལྟས་པས། བྱིས་པ་དེ་ཁར་སང་ལྟར་རྡོ་རྗེ་སེམས་དཔའ་ཀྲོང་ངེ་སོང་བས་ཡིད་ཆེས། སླར་ཕྱུགས་རྫི་སླེབས་དུས་གཙང་ཁང་དུ་བོས་ཏེ། སྔོན་ཆད་ངོ་མ་ཤེས་པ་བཟོད་པར་བགྱིས་ལ་ངའི་མཆོད་གནས་མཛད་པར་གསོལ་ཞེས་སོགས་བསྒོས་པས། བྱིས་པ་ན་རེ། བདག་ལ་ཆེ་བའི་ཡོན་ཏན་ཅི་ཡང་མེད་ཟེར། རྒྱལ་པོས་གོང་གི་ལོ་རྒྱུས་བརྗོད་པས། བྱིས་པ་ན་རེ། ངས་སྐྱེ་བ་འདི་ལ་རྒྱལ་པོ་འདུལ་བའི་དུས་ལ་མ་བབ། ཕྱི་མ་ཤར་ཕྱོགས་མངོན་པར་དགའ་བའི་ཞིང་དུ་མཇལ་ལོ་ཟེར། རྒྱལ་པོ་ན་རེ། འོ་ན་ངས་ཡོ་བྱད་སྦྱར་གྱིས་སྒྲུབ་པ་གྱིས་ཞེས་གསུངས་པ་ལས། བྱིས་པ་དེ་སྔར་གྱི་སློབ་དཔོན་ཀུ་ཀུ་རཱ་ཛའི་དྲུང་དུ་བྱོན། གདམས་པ་ཞུས་པས་དེའི་ཞལ་ནས། སྔར་ལས་འཕྲོ་ཡོད་པས་ལྷ་ངོ་བསྟན་པ་ཡིན་གྱི། ངས་འདུལ་བའི་དུས་ལ་མ་བབ་པས། ཨུ་ཏ་ཡའི་གྲོང་ཁྱེར་ན་སློབ་དཔོན་དུར་ཁྲོད་བདེ་བ་བཞུགས་པས་དེར་སོང་ཞིག་གསུངས་པས། ལུང་བསྟན་པ་ལྟར་གྲོང་ཁྱེར་དེར་སོང་སྟེ་སློབ་དཔོན་བཙལ་བས། སློབ་དཔོན་གྲོངས་ནས་པུར་དུར་ཁྲོད་དུ་བསྐྱལ་ཟེར་རོ། །སླར་ལོག་སྟེ་སློབ་དཔོན་ཀུ་ཀུ་རཱ་ཛ་ལ་ཞུས་པས། རོ་ལངས་བསྒྲུབ་པའི་ཐབས་གནང་། དེས་བམ་ལ་ཡེ་ཤེས་སེམས་དཔའ་དགུག་གཞུག་གི་སྒྲུབ་པ་བྱས་པས་ཞག་ཉེར་གཅིག་ལ་གྲུབ་སྟེ་རོ་ལངས་བདེ་བའི་དངོས་གྲུབ་ཅེས་གྲགས་སོ། །གཤིན་རྗེ་མཁན་པོ་ཁ་ཅིག །སློབ་དཔོན་འཇམ་དཔལ་བཤེས་གཉེན་གྱིས་འཇམ་དཔལ་ཏནྟྲ་འབུམ་སྡེ་དཔེ་ལ་བཀོད། མ་གཤིན་ཚོགས་ཀྱི་དཀྱིལ་འཁོར་ཞལ་ཕྱེ་ནས་བསྒྲུབས་པའི་ཚེ། བམ་ལ་ཡེ་ཤེས་སེམས་དཔའ་དངོས་སུ་ཞུགས་ཏེ་བཞེངས་པ་རོ་ལངས་བདེ་བའི་དངོས་གྲུབ་ཡིན་ཅེས་གླེང་ངོ་། །དེ་ལྟར་སློབ་དཔོན་དེས་ཡན་ལག་དྲུག་ཅུ་རྩ་བརྒྱད་ཀྱི་དཀྱིལ་འཁོར་བཞེངས་ནས་སྨིན་པར་བྱེད་པའི་དབང་བསྐུར། དེའི་ཚེ་དཀྱིལ་འཁོར་གྱི་མེ་ཏོག་སྟེང་ཕྱོགས་ཀྱི་ཁྲོ་བོ་ཧཱུྃ་ཀཱ་ར་ལ་བབས་པས། གསང་མཚན་བཛྲ་ཧཱུྃ་ཀཱ་ར་ཞེས་གྲགས་སོ། །དེར་གདམས་པ་བུམ་པ་གང་འབྱོར་གནང་ནས། ཁྱོད་འདིར་མ་འདུག་པར་ཕྱག་རྒྱ་མཚན་དང་ལྡན་པ་ཞིག་ཁྲིད་ལ་བསེ་བྲག་བྱ་ཁྱུང་གི་ཚལ་དུ་སྒྲུབ་པ་གྱིས་ཤིག་ཅེས་ལུང་བསྟན། དེ་ནས་བྱིས་པས་རིགས་ངན་གྱི་གྲོང་ཁྱེར་དུ་བྱོན་ནས་ཕྱག་རྒྱ་མོ་བཙལ་བས་རྒན་རྒོན་རང་འཐག་མཁན་གཉིས་ལ་བུ་མོ་མཚན་དང་ལྡན་པ་ཞིག་འདུག་ནས་བསླངས་པས། བུ་མོ་ཁྱོད་ལ་མི་བསྐུར་ཟེར་སྟེར་དུ་མ་འདོད། དེར་རིན་འཇལ་བྱས་ནས་ཡུལ་དེའི་རྒྱལ་པོ་ལ་ཞལ་ལྕེ་བཅོལ་བས་གསེར་མོ་རང་ཙམ་ཞིག་གཞོལ་ཟེར་རོ། །དེར་རོ་ལངས་ཀྱི་དྲུང་དུ་བྱོན་ནས་ལོ་རྒྱུས་བརྗོད་པས། མི་རོ་གསེར་དུ་བསྒྲུབ་པའི་མན་ངག་གནང་། དུར་ཁྲོད་ནས་རོ་བཙལ་ཏེ་བསྒྲུབས་པས་ལོ་གཅིག་ལ་གྲུབ། དེ་བུ་མོ་དང་བརྗེས། བུ་མོ་ཁྲིད་དེ་སློབ་དཔོན་ཀུ་ཀུ་རཱ་ཛའི་དྲུང་དུ་བྱོན་ནས་གདམས་པའི་མཐའ་ཞིབ་ཏུ་བཅད། སློབ་དཔོན་སངས་རྒྱས་གསང་བ་སྐྱེད་ཚང་གི་མངའ་བདག་ཏུ་བཞུགས་པའི་དྲུང་དུའང་གཏུགས་ནས་སྒྲོ་འདོགས་ལྷག་མ་མ་ལུས་པར་བཅད་དོ། །གཞན་ཡང་སློབ་དཔོན་སོ་ཀྱ་དེ་ཝ་ལའང་ཡང་དག་གི་སྒྲུབ་པའི་མན་ངག་ཞུས་ཏེ་བསེ་བྲག་བྱ་ཁྱུང་གི་ཚལ་དུ་བསྒྲུབས་པས། ཚེ་ལ་དབང་བའི་རིག་འཛིན་ཐོབ། གཞན་དོན་དུ་ཡང་དག་རྩ་བའི་སྒྲུབ་པ་མཛད། སྒྲུབ་སྡེ་མོས་ཀྱང་མཱ་མ་ཀཱིའི་དངོས་གྲུབ་ཐོབ་བོ། །དེ་ལྟ་བུའི་སློབ་དཔོན་ཧཱུྃ་ཆེན་ཀཱ་རས་ཨོ་རྒྱན་ཆེན་པོ་པདྨ་ལ་གསུངས་པ་ཡིན་ནོ། །རིན་འབྱུང་བདུད་རྩི་ཡོན་ཏན་ནི་བཅོམ་ལྡན་འདས་དཔལ་ཀུན་ཏུ་བཟང་པོ་ཡབ་ཡུམ་གྱིས་རྒྱལ་ཚབ་འཆད་པའི་སྐྱེས་བུ་རིགས་ལྔའི་སངས་རྒྱས་ལ་དགོངས་པས་བརྒྱུད། འཇམ་དཔལ་རྣོན་པོ་དང་། རྡོ་རྗེ་ཆོས་ཀྱིས་བསྡུས། རིག་འཛིན་རིག་པའི་བརྒྱུད་པ་ལི་ཙ་བྱི་དྲི་མེད་གྲགས་པས་ས་བཅུའི་བྱང་སེམས་ལ་བཤད། ལི་ཙ་བྱིས་དགའ་རབ་རྡོ་རྗེ་སོགས་ལ་གང་ཟག་སྙན་བརྒྱུད་ཀྱི་ཚུལ་དུ་བཤད་པས་དགོངས་བརྡ་སྙན་གསུམ་ཀའི་བརྒྱུད་པ་ཡོད་ཅིང་རིམ་པར་བརྒྱུད་པའམ། བདུད་རྩི་ཐོབ་པ་ནི་ཡོན་ཏན་གྱི་རིག་འཛིན་མཁས་པ་བི་མ་ལ་མི་ཏྲ་སྟེ། དེའི་ལོ་རྒྱུས་གདུལ་བྱའི་སྣང་བ་དང་བསྟུན་ནས་གཅིག་ཏུ་མ་ངེས་པར་འཆད་ཀྱང་། ལུགས་གཅིག་ཏུ་ཁྱིམ་བདག་བདེ་ལྡན་ཞེས་བྱ་བ་དང་། ཡུམ་བདག་ཉིད་མ་གསལ་རིག་ཅེས་བྱ་བའི་སྲས་སུ་འཁྲུངས། ལོ་བདུན་ནས་སློབ་མའི་གྲྭར་ཞུགས་པ་ལ་སུས་ཀྱང་དོ་མེད་པ་ཞིག་བྱུང་། རིག་པ་ཆེ་བའི་སྙན་པས་ཁྱབ་སྟེ་བསྟན་པ་ལ་བཙུད་ནས་བཤེས་གཉེན་མང་དུ་བསྟེན། རིག་པའི་གནས་རེ་རེ་ལ་སློབ་དཔོན་གསུམ་གསུམ་བརྟེན་ནས་སློབ་དཔོན་བཅོ་ལྔ་ལས་བསླབས་པས། ལོ་ཉི་ཤུ་རྩ་གཅིག་ལོན་ཚེ་པཎྜི་ཏའི་གྲལ་དུ་ཚུད། སྒྲ་སྐད་མི་འདྲ་བ་སུམ་བརྒྱ་དྲུག་ཅུ་མཁྱེན། འབྱུང་བ་བཞི་དང་། དུད་འགྲོའི་སྐད་ལས་ཀྱང་དོན་འཆད་ནུས། མདོ་སྡེ་ཤེར་ཕྱིན་གྱི་བཀའ་ཐམས་ཅད་ཐུགས་ལ་ཆུད་ནས་ཞལ་འདོན་དུ་མཛད་པ་དེས། བཤད་ལུང་དང་སྒོམ་ལུང་ནོད་པའི་སློབ་དཔོན་བརྒྱ་དང་དྲུག་ཅུ་ཡོད་པའི་ནང་ཚན་ལས་བདུད་རྩི་ཡོན་ཏན་གྱི་ཆོས་འཁོར་འདས་ཐམས་ཅད་བཅིང་གྲོལ་མེད་པའི་བདུད་རྩིའི་ངོ་བོར་ཡེ་སངས་རྒྱས་པའི་རང་བཞིན་འདི། སློབ་དཔོན་ཆེན་པོ་སངས་རྒྱས་གསང་བ་ལ་ཞུས། རྒྱུད་སྡེ་མ་ལུས་པ་ཁོང་དུ་ཆུད་ནས་བདུད་རྩི་བམ་བརྒྱད་ཀྱི་འགྲེལ་པ་ལ་སོགས་མན་ངག་གི་ཡི་གེའང་མང་དུ་མཛད་ཅིང་དར་བ་ཡིན་ནོ། །དོན་ཡོད་གྲུབ་པ་ཕུར་པ་ཕྲིན་ལས་ནི། ཆོས་སྐུ་ཀུན་ཏུ་བཟང་པོ་ནས་རྒྱལ་པོ་ཛ་ལ་བརྒྱུད། ཕྱག་ན་རྡོ་རྗེའི་སྒོ་ནས་དངོས་གྲུབ་བརྙེས་པའི་སློབ་དཔོན་བྲ་བྷ་ཧ་སྟི་ཞེས་རྡོ་རྗེ་ཕུར་པའི་རྒྱུད་ཀྱི་མངའ་བདག་ཆེན་པོ། ཕུར་པ་འབུམ་སྡེའི་རྒྱུད་ལ་འགྲེལ་པ་དང་སྒྲུབ་ཐབས་མང་དུ་མཛད་པའི་བདག་ཉིད་ཆེན་པོ་དེ་ལ་བཀའ་བབས་པའི་རིག་འཛིན་དུའང་བཤད་ཅིང་། བདེ་འདུས་རྩ་རྒྱུད་ཀྱི་འགྲེལ་པ་ལྟར་ན། ཨོ་རྒྱན་གྱི་སློབ་དཔོན་ཆེན་པོ་རིག་འཛིན་པདྨ་འབྱུང་གནས་ཡིན་ཏེ། ཇི་ལྟར་ཡང་དོན་ལ་སྙེལ་བ་མེད་དེ། སློབ་དཔོན་བྲ་བྷ་ཧསྟི་ནི་ཨོ་རྒྱན་ཆེན་པོ་ལ་རྡོ་རྗེ་ཕུར་པ་སྟོན་པའི་སློབ་དཔོན་ཡིན་པའི་ཕྱིར་རོ། །དེའང་ལྗོངས་འདིར་རྒྱུད་འདིའི་དར་སོ་ཆེ་ཞིང་དངོས་གྲུབ་མྱུར་ལ། བཀའ་གཏེར་གྱི་རྣམ་གྲངས་ཀྱང་ཆེས་མང་ཞིང་གྲགས་ཆེ་བས་ཕྱི་མ་ལྟར་གྱི་ལོ་རྒྱུས་ཅུང་ཟད་གླེང་ན། སྔོན་ཨོ་རྒྱན་རྡོ་རྗེ་འཆང་གིས་ཕྱག་རྒྱ་ཆེན་པོའི་རིག་འཛིན་བསྒྲུབ་པར་དགོངས་ཏེ། རྒྱ་གར་ཡུལ་གྱི་ཚུར་རོལ། བལ་པོའི་ཡུལ་གྱི་ཕ་རོལ། ཡང་ལེ་ཤོད་ཀྱི་བྲག་ཕུག་ཏུ་བལ་མོ་ཤཱཀྱ་དེ་ཝས་སྒྲུབ་བདེ་མོ་བྱས་ཏེ་དཔལ་ཡང་དག་མར་མེ་དགུ་པའི་དཀྱིལ་འཁོར་ཞལ་ཕྱེ་ནས་བསྒྲུབས་པས། ཀླུ་གྱོང་པོ། གནོད་སྦྱིན་རྒོད་མ་ཁ། བྱི་དུར་བར་སྣང་ཁམས་ཀྱི་གློག་མ་སྤྲིན་དང་གསུམ་གྱིས་བར་ཆོད་བྱས་ཏེ་ནམ་མཁའ་ལས་ཆར་གྱི་རྒྱུན་བཅད། རྩི་ཤིང་དང་ལོ་ཏོག་ཐམས་ཅད་བསྐམས་པ་ལས། སློབ་དཔོན་གྱིས་བར་ཆད་དུ་མཁྱེན་ཏེ། བལ་པོ་ཀུན་ཞི་དང་། བལ་པོ་ཤཱི་ལ་མཉྫུ་གཉིས་རྒྱ་གར་གྱི་པཎྜི་ཏ་རྣམས་ཀྱི་དྲུང་དུ་བར་ཆད་འདུལ་བ་ལ་བསྔགས་པའི་ཆོས་ལེན་དུ་མངགས་པས། པཎྜི་ཏ་རྣམས་ཀྱིས་ཤྲཱི་ན་ལེནྡྲའི་གཙུག་ལག་ཁང་ནས། དཔལ་ཆེན་རྡོ་རྗེ་ཕུར་པའི་རྒྱུད་བི་ཏོ་ཏ་མ་ལ་འབུམ་སྡེ་དང་། ཕུར་པ་མི་ཁུར་གཉིས་བརྫངས་ཏེ་ཡང་ལེ་ཤོད་དུ་ཕེབས་པ་ཙམ་གྱིས་བར་ཆོད་ཀྱི་ཚང་ཚིང་སྟུག་པོ་བྱིན་རླབས་ཀྱི་མེ་ལྕེས་བསྲེགས་པར་གྱུར་ཏོ། །དེར་ནམ་མཁའ་ལས་ཆར་རྒྱུན་བབས། ས་གཞི་ལས་འབྲུ་སྨིན། དེའི་སྒྲུབ་པ་མཛད་པས་ཟླ་བ་གཅིག་ན་ཞལ་གཟིགས། ཡང་ཕུར་སྦྲག་མའི་སྒྲུབ་པ་མཛད་པའི་ཚེ། ནམ་གྱི་སྲོད་ལ་ཤྭ་ན་མ་མཆེད་བཞིས་སྲོག་སྙིང་ཕུལ་ཏེ་དམ་ལ་བཏགས། གུང་ལ་རེ་མ་ཏི་མཆེད་བཞིས་སྲོག་སྙིང་ཕུལ་ཏེ་དམ་ཚིག་གི་རྭ་བར་བཙུད། ཐོ་རང་བསེའི་ལྷ་མོ་མཆེད་བཞིས་ཀྱང་སྲོག་སྙིང་ཕུལ་ཏེ་དམ་ལ་བཏགས་སོ། །དེའི་ཚེ་ན་ཨོ་རྒྱན་ཆེན་པོས། བི་ཏོ་ཏ་མ་ལའི་རྒྱུད་ལས་འཕྲོས་ཏེ་རྒྱུད་སྡེ་བཞི་བཅུ་ཞེ་བརྒྱད་དམ། སུམ་ཅུ་རྩ་དྲུག་ཏུ་ཕྱེས་ཞེས་གྲགས་པའི་རྒྱུད་སྡེའི་ངེས་བརྗོད་ཕྱི་མ་ལྟར་ན། རྩ་བའི་རྒྱུད་གསུམ་ནི། ཀཱི་ལ་ཡ་འབྲུ་བཅུ་གཉིས་རྒྱུད། བི་ཏོ་ཏ་མ་ལ་རྩ་བའི་རྒྱུད། རྣལ་འབྱོར་བླ་ན་མེད་པ་གསང་ཆེན་དམ་པའི་རྒྱུད་དོ། །བཤད་པའི་རྒྱུད་བཅུ་ནི། གབ་པ་འཁོར་ལོ་ནག་པོ་སྟོང་སྡེའི་རྒྱུད། ཀཱི་ལ་ཡ་མེ་ལྕེ་ཕྲེང་བའི་རྒྱུད། དྲག་པོ་འདུད་པའི་རྒྱུད། འཇིག་རྟེན་སྣང་བྱེད་ཀྱི་རྒྱུད། རྡོ་རྗེ་བཀོད་པའི་རྒྱུད། དཔྱང་ཐག་ཆད་པའི་རྒྱུད། མྱ་ངན་ལས་འདས་པའི་རྒྱུད། དགོངས་པ་དམ་པའི་རྒྱུད། གསང་བ་དམ་པའི་རྒྱུད། ཁུ་བྱུག་རོལ་པའི་རྒྱུད་དོ། །མན་ངག་གི་རྒྱུད་བཅུ་ནི། ཧཱུྃ་ཀཱ་ར་སེར་བ་འབེབས་པ། སྟོབས་ཆེན་སེར་བ་བཟློག་པ། རྣམ་རྒྱལ་དབང་བསྐུར་བ། དབྱུག་སྔོན་སྦྱིན་བསྲེག་བྱ་བ། གཤིན་རྗེའི་གཤེད་བཟློག་པ། མི་གཡོ་སྔོན་པོ་དགྲ་ལ་རྦད་པ། རྟ་མགྲིན་ནཱ་ག་ཀླུ་འདུལ་བ། གཞན་གྱིས་མི་ཐུབ་པ་ལས་ལ་གཟུད་པ། བདུད་རྩི་འཁྱིལ་བ་བྱིན་གྱིས་བརླབ་པ། ཁམས་གསུམ་རྣམ་གྱི་འཕྱང་དྲུག་ལས་ལ་རྦད་པའི་རྒྱུད་དོ། །ལོ་མ་ལྟ་བུའི་རྒྱུད་གསུམ་ནི། ཤྭ་ན་དཀར་ནག་ཐུན་གྱི་རྒྱུད། རེ་མ་ཏི་སྦས་པ་ནག་པོའི་རྒྱུད། བསེ་མོ་སྦས་པ་གཏེར་གྱི་རྒྱུད་དང་གསུམ་མོ། །སྙིང་པོ་དོན་གྱི་རྒྱུད་ལྔ་ལ། སྐུའི་རྒྱུད་ཡེ་ཤེས་འཁོར་ལོ། གསུང་གི་རྒྱུད་པདྨ་གསང་བ། ཐུགས་ཀྱི་རྒྱུད་རྡོ་རྗེ་འབར་བ། ཡོན་ཏན་གྱི་རྒྱུད་རིན་ཆེན་གཙུག་ལག །ཕྲིན་ལས་ཀྱི་རྒྱུད་ཀརྨ་མཱ་ལེ་དང་ལྔའོ། །འབྲས་བུའི་རྒྱུད་བཞི་ནི། རྡོ་རྗེ་རྩེ་མོའི་རྒྱུད། སངས་རྒྱས་རྩེ་མོའི་རྒྱུད། རྣལ་འབྱོར་རྩེ་མོའི་རྒྱུད། ཡེ་ཤེས་རྩེ་མོའི་རྒྱུད་དོ། །སྐྱེས་བུ་གིང་བཞི་ལ། མཚོན་ཆ་སྤུངས་པའི་རྒྱུད་དོ། །དེ་ལྟར་སུམ་ཅུ་རྩ་དྲུག་ཏུ་ཕྱེ་བ་རྣམས་ལས་བྱུང་བའི་མན་ངག་གི་ཡི་གེ་མཛད་པ་ནི། རྩ་བ་སྡེ་ལྔ་ལ། ཕྱི་ནང་གི་གནོད་གདུག་བསྒྲལ་བའི་ཕྱིར། ལིདྒ་བཅའ་ཐབས་གཙོ་བོར་སྟོན་པ་ཐུགས་གསང་བ། དེ་དང་འབྲེལ་བའི་དཀྱིལ་འཁོར་གྱི་རིམ་པ་གཙོ་བོར་སྟོན་པ་ལ་གསང་བ། སྒྲོལ་བའི་ཐབས་ཁྱད་པར་ཅན་སྟོན་པ་རྡོ་རྗེ་གཞོན་ནུའི་རྩ་བ། ལས་ཀྱི་གཞུང་བསྲང་བ་སྟོན་པ་ཕུན་སུམ་ཚོགས་པའི་རྩ་བ་ལས། དེ་ཡང་ལྟ་དགོངས་ཁྱད་པར་ཅན་གྱི་ཕུལ་དུ་བྱུང་བར་སྟོན་པ་བི་ཏོ་ཏ་མ་ལའི་རྩ་བ། དེ་ཐམས་ཅད་ཀྱི་ལུང་རྩ་བར་གྱུར་པ་བཅུ་གཅིག་པ། རྡོ་རྗེ་རིགས་ཀྱི་ལེའུ་གུད་དུ་བཀོལ་བ་དང་དྲུག་གོ །གཞན་ཡང་སྒྲུབ་ཐབས་དང་། མན་ངག་དང་། དབང་གི་རིམ་པ་དང་། ཕྲིན་ལས་ཀྱི་བྱང་བུ་དང་། བསྒྲལ་བ་ཆོས་ཉིད་དུ་གནས་སྤར་བྱ་བ། ཚེ་ལུང་གི་གདམས་པ་ལ་སོགས་ཕུར་སྨད་ཉི་ཤུ་ཐམ་པ་མཛད་ནས། སྔར་གྱི་རྒྱུད་སྡེ་དང་བཅས་པ་ཕོ་ཉ་བ་གཉིས་ལ་བསྐུར་ནས་གཤེགས་པ་ལས། ཡུལ་ཚ་བ་ཚ་ཤོད་ཅེས་བྱ་བར་ནུབ་གཅིག་བཞུགས་པའི་ནམ་ཕྱེད་ན་ཆོ་འཕྲུལ་མི་བཟད་པ་ཞིག་བྱུང་། གཟིགས་པས་མདུན་ན་ནེ་གུ་དྲུང་དྲུང་པ་གཅིག་འདུག །དེ་ཕྱག་རྒྱས་བསྡམས་ལྷུང་བཟེད་དུ་བཅུག་ནས་བཞག་སྟེ། སང་ནངས་པར་ཆུ་མིག་བྱང་ཆུབ་རིས་སུ་དྲོ་བཏབ། དེར་ལྷུང་བཟེད་ཁ་ཕྱེ་ནས་གཟིགས་པས་བུད་མེད་མཛེས་སྡུག་དང་ལྡན་པ་བཞི་འདུག །ཁྱོད་རྣམས་སུ་ཡིན་དྲིས་པས། ངེད་རྣམས་ཡུལ་ཚ་བ་ཚ་ཤོད་ལ་དབང་བྱེད་པའི་ས་བདག་མོ་བཞི་ཡིན། སློབ་དཔོན་ཁྱེད་ཀྱིས་ངེད་ཅག་རྣམས་སེམས་ཅན་ཐམས་ཅད་ཀྱི་ཚེ་སྲོག་ལ་དབང་བྱེད་པའི་བདག་པོར་དབང་བསྐུར་ཅིག་སྐད། སློབ་དཔོན་གྱིས་དེ་ལྟར་མི་རུང་། གསང་སྔགས་རྡོ་རྗེ་ཕུར་པ་བསྒྲུབ་པ་ལ་བར་དུ་གཅོད་པའི་དགྲ་བགེགས་ཀྱི་ཚེ་སྲོག་ལ་དབང་བྱེད་པར་བསྐུར་གྱི་གསུངས་ནས་དེ་ལྟར་དུ་བསྐུར། གསང་བའི་མཚན་རྡོ་རྗེ་ཡ་བྱིན། དེ་བྱིན། བསེ་བྱིན། ཕག་བྱིན་ཞེས་བཏགས་སོ། །དེ་ནས་སྔར་གྱི་ཕུར་པའི་རྒྱུད་སྡེ་བྱུང་བའི་གནས་ཤྲཱི་ན་ལེནྡྲར་བྱོན། པཎྜི་ཏ་རྣམས་ལ་དཔེ་སྔ་མ་གཏད། ཕྱི་མ་རང་གིས་ཕྱེ་བ་དང་། བཀྲལ་བ་རྣམས་གཟིགས་སུ་བཅུག་པས། འདི་དག་ནི་ལུང་དང་མི་འགལ་ཞིང་། སྒྲུབ་པ་པོའི་ཆ་རྐྱེན་དུ་འགྱུར་རོ་ཞེས་བསྔགས་ཏེ། རྒྱལ་མཚན་གྱི་རྩེ་ལ་ཕྱར། དེའི་ཚེ་སློབ་དཔོན་པྲ་བྷ་ཧ་སྟིས་ལུང་བསྟན་ཏེ་དུར་ཁྲོད་སོ་ས་གླིང་དུ་མཁའ་འགྲོ་མ་བདེ་བའི་འཁོར་ལོས་རྡོ་རྗེ་ཕུར་པའི་དཀྱིལ་འཁོར་དུ་དབང་བསྐུར། སླར་ཡང་བལ་ཡུལ་ཡང་ལེ་ཤོད་དུ་བྱོན། ཟ་ཧོར་གྱི་མཁན་པོ་བི་མ་ལ་མི་ཏྲ། བལ་པོ་ཤཱི་ལ་མཉྫུ་དང་གསུམ་གྱིས་དཔལ་རྡོ་རྗེ་ཕུར་པའི་དཀྱིལ་འཁོར་དུ་ནོ་པི་ཀ་མཛད་ཅིང་། སྒྲུབ་པའི་རྟགས་ཀྱང་སོ་སོར་བསྟན་ནོ། །སྤྱིར་རྡོ་རྗེ་ཕུར་པ་ལ་སློབ་དཔོན་ཆེན་པོ་ཀླུ་སྒྲུབ། ཐོགས་མེད། རོ་ལངས་བདེ་བ་རྣམས་ཀྱིས་མཛད་པའི་གཞུང་ཡང་ཡོད་ཅེས་རྒྱ་གར་གྱི་སློབ་དཔོན་བདེ་བྱེད་གླེང་ངོ་། །དེ་ལྟར་རིགས་ལྔ་ལ་རང་བཞིན་ཡེ་ཤེས་ཀྱི་དཀྱིལ་འཁོར་ལྔ་ཞེས་བྱ་ལ། དེ་ལས་སྤྲུལ་པ་ལས་ཀྱི་དཀྱིལ་འཁོར་གསུམ་ནི། སྤྲོ་གཞི་དཀྱིལ་འཁོར་གྱི་བདག་ཉིད་དཔལ་ཆེན་ཆེ་མཆོག་ཧེ་རུ་ཀ་མ་མོ་རྦོད་གཏོང་ངམ། བླ་མེད་ཧེ་རུ་ཀའི་རོལ་པར་བཞེངས་པ་ལ་ཀུན་ཏུ་བཟང་མོ་གནམ་ཞལ་མ་ཡུམ་ཉིད་གཞི་མུ་ཁ་ལེ་ཞེས་པའི་རྣམ་རོལ་དུ་གྱུར་ནས་ཐབས་མཆོག་བདེ་བ་ཆེན་པོ་དང་། སྟོང་ཉིད་ཤེས་རབ་ཀྱི་རང་བཞིན་དབྱེར་མེད་དུ་སྦྱོར་བའི་དཀྱིལ་འཁོར་དུ་བཀའ་བབས་ཀྱི་རིག་འཛིན་དྷ་ན་སཾ་ཀྲྀའམ། པདྨ་ནག་པོ། གསང་བའི་བདག་པ་ོ་ཕྱག་ན་རྡོ་རྗེ་འཇིག་རྟེན་གྱི་དྲེགས་པ་འདུལ་བའི་ཕྱིར་སྤྲུལ་བའི་རོལ་གར་དྲེགས་པ་ཀུན་འདུལ་དང་། སྟོབས་ལྡན་ནག་པོར་བཞེངས་པ་ལ། གནམ་ཞལ་མའི་སྤྲུལ་པ་ཡུམ་གཉིས་ཀྱིས་འཁྲིལ་བ་དེར་བཀའ་བབས་ཀྱི་རིག་འཛིན་གུ་ཧྱ་ཙཎྜ་དང་། ཤཱནྟིཾ་གྷརྦྷ་ཞེས་དུར་ཁྲོད་བསིལ་བའི་ཚལ་ནས་གནམ་ལྕགས་སྡིག་པའི་ཆོས་སྐོར་དགོངས་པའི་རྩལ་གྱིས་བླངས་པའི་དྲག་སྔགས་ཀྱི་བཀའ་བབས་ཀྱི་རིག་འཛིན་ཏེ། ཁ་ཅིག་འདི་གསུམ་ལ་འཇིག་རྟེན་པའི་སྡེ་གསུམ་ཞེས་བོད་དུ་ལྷ་འདྲེ་དམ་ལ་བཏགས་ཏེ་ཕྱི་པར་གྲགས་པ་ནི་མི་རིགས་ཏེ། འོག་ཏུ་སྒྲོམ་བུ་བབས་པའི་རྣམ་གཞག་དང་འགལ་བར་འགྱུར་ལ། འོན་ཏེ་འཁོར་གྱི་རོལ་པ་དྲེགས་པ་ཤས་ཆེ་བར་བྱུང་བ་ལ་ཐ་སྙད་འཇོག་ན། དུས་ཀྱི་འཁོར་ལོ་ལ་ཉི་ཟླ་གཟའ་སྐར་ལ་སོགས་པས་བསྐོར་ཞིང་། དཔལ་ལྡན་འབྲས་སྤུངས་རྒྱུ་སྐར་གྱི་དཀྱིལ་འཁོར་ཞེས་གྲགས་པའང་འཇིག་རྟེན་པར་ཐལ་བའི་ཕྱིར་རོ། །དེའི་ཕྱིར་ཨོ་རྒྱན་སངས་རྒྱས་གཉིས་པས། ཕྱི་ལྟར་བྱང་སེམས་ནང་ལྟར་སྒྲུབ་པ་བརྒྱད། །གསང་བ་སློབ་དཔོན་བཀའ་བབས་རྣམ་བརྒྱད་དང་། །ཞེས་གསུངས་པས་ངེས་པའི་དོན་དུ་བསྒྲུབ་བྱ་སྒྲུབ་བྱེད་གཉིས་སུ་མ་ཡིན་པའི་རིག་འཛིན་བརྒྱད་ལ་བཀའ་བབས་པའི་ཚུལ་བསྟན་ཏོ། །འོན་ཀྱང་མཐའ་དྲུག་དང་ཚུལ་བཞིས་མདོ་རྒྱུད་ཀྱི་དགོངས་པ་རྣམ་པར་འགྲེལ་བ་སྐྱེས་བུ་མཆོག་གི་སྣང་ཚུལ་དུ་ངེས་ཕྱིར་པཎྜི་ཏ་ས་མུ་དྲ་ལ་སོགས་པས་དེ་སྐད་དུ་འཆད་པ་ནི་དགོངས་པའི་དབང་ཡིན་གྱི། འོག་ཏུ་བདེ་གཤེགས་འདུས་པའི་ལུགས་ཇི་ལྟ་བ་བཞིན་ཁས་བླངས་པའི་ཕྱིར་རོ། །དེ་ལས་ཕྱིན་ཅི་ལོག་ཏུ་སྨྲ་བ། གསར་མའི་གཤེད་སྐོར་ལ་སྦྱངས་པ་ཆེ་བར་བརྟེན། རྒྱ་གར་གྱི་སློབ་དཔོན་དཔལ་འཛིན་དང་དོ་མཉམ་པར་རང་གིས་རང་ཉིད་ལ་བསྙེམས་པས་མིང་དེ་སྐད་དུ་གྲགས་པའི་མངོན་པའི་ང་རྒྱལ་ཅན་དབུ་རུ་དཔལ་འཛིན་གྱིས། མཐོང་ཆོས་སུ་མནར་མེད་པའི་དམྱལ་བ་བསྒྲུབ་ཕྱིར་སྔ་འགྱུར་རྡོ་རྗེའི་ཐེག་པ་ལ་ལོག་པར་ལྟ་བའི་སྐུར་པ་མི་བཟད་པས་ངན་རྟོག་གིས་དུག་ཆུ་འཐོར་བའི་ཚེ། ཆོས་ཀྱི་རྣམ་གྲངས་འདི་དག་ལའང་སྨྱོན་པའི་ངང་ཚུལ་གྱིས་ཅི་ཡང་སྨྲ་སྟེ། རང་གིས་འཇིགས་བྱེད་ལྕགས་མཁར་སོགས་ལ་ཡིག་ཆ་འཇོག་པའི་ཚེ། རྒྱ་གཞུང་དུ་ལྕགས་མཁར་དྲུག་ཅུ་པ་མེད་པའི་ཁུངས་སྨོས་པའི་མཐར། འོན་ཀྱང་རྙིང་མ་བ་ལྟར་རྟོག་པས་བརྟགས་ན་ཞེས་གཞན་ལ་ཆགས་སྡང་གི་ངག་འཁྱལ་སྒྲོགས་བཞིན་དུ། རྒྱ་གཞུང་ལ་མེད་ཀྱང་བྱེད་དུ་རུང་བའི་ཤེས་བྱེད་གླེང་པས་མཚོན་ཏེ་སྲིན་བྱའི་རྫུན་དྲུག་ཏུ་སྨྲ་བ་ལ་ཡིད་བརྟན་མ་ཡིན་པར་ཤེས་པར་བྱ་ལ། དེ་ལྟ་ནའང་གཞུང་ལོག་པར་བསྒྲུབས་པ་ལ་དགག་བྱའི་ཐོ་ལུམ་མ་བསྣུན་ན་སེམས་ཅན་བློ་ཆུང་བ་གང་ཞིག་ཚིག་གི་རྗེས་སུ་འབྲངས་པས་ཉེས་པ་མི་བཟད་པ་འཕེལ་གྱིས་དོགས་པས་དེ་ལྟར་དུ་འཆད་ཀྱི། གཞན་དུ་དེ་ལ་གནས་སྐབས་ཐམས་ཅད་སྡང་ཞེན་གྱི་ཡུལ་མ་ཡིན་ཏེ། དྲང་སྲོང་རིག་པའི་ཡེ་ཤེས་ཀྱིས། གནོད་བརྩོན་དགྲ་ལའང་ཕན་གདགས་གཙོར་བྱས་ཏེ། །བྱམས་པས་བྱང་ཆུབ་མཆོག་གི་སེམས་ཉིད་བསྐྱེད། །ཅེས་གསུངས་ཕྱིར་ལས་ཀྱི་ནུས་པས་དེད་པ་འདི་དག་ནི་ཤིན་ཏུའང་སྙིང་རྗེའི་ཡུལ་ལོ། །དེ་སྐད་དུ་མཆོག་སྤྲུལ་མངའ་རིས་པཎ་ཆེན་གྱིས། ཁྱད་པར་འབྲི་གུང་དཔལ་འཛིན་གྱིས། །རྫོགས་ཆེན་ལོག་པའི་ཆོས་སུ་སྨྲ། །སྔ་འགྱུར་རྡོ་རྗེ་ཐེག་པ་ཡི། །འཆད་བྱེད་ལོ་པཎ་མང་པོ་དང་། །སྒྱུར་བྱེད་ལོ་ཙཱ་མཁས་པ་ཡིས། །བསྒྱུར་བའི་ཆོས་རྣམས་ཐམས་ཅད་ལ། །མ་བྱུང་མ་བསྒྱུར་ཞེས་སྨྲ་བའི། །ལོ་རྒྱུས་གཏན་ཚིགས་བཀོད་ནུས་ནས། །སྒྱུ་འཕྲུལ་ཡང་ཕུར་རྟ་མགྲིན་དང་། །བདུད་རྩི་མ་མོ་རྫོགས་པ་ཆེ། །བཀའ་གཏེར་བཀའ་བརྒྱད་ཐམས་ཅད་ལ། །ཆོས་མིན་ཞེས་པའི་གཏན་ཚིགས་ཀྱིས། །ཡི་གེ་གསལ་བར་བཀོད་པའི་ཚེ། །མཁའ་ལ་རྡོ་རྗེའི་འབྲུག་བསྒྲགས་ཤིང་། །བར་སྣང་འཇིགས་པའི་གློག་ཆེན་འཁྱུག །སྤྲིན་ནག་འཁྲུགས་པའི་གུར་ཁྱིམ་ནས། །རྡོ་རྗེའི་དམྱལ་བར་ཨ་ལ་ལ། །ཞེས་པ་ཁྲག་གིས་བྲིས་པའི་རྡོ། །ཆར་བཞིན་བབས་ནས་འཛིན་མའི་ས། །རབ་ཏུ་གས་པའི་ནང་ཚུལ་དེ། །ལྕེ་རྩ་སྡིག་པས་ཟ་བ་དང་། །སྤྱི་འུ་ཚུགས་སུ་བྱས་ནས་ནི། །དབུར་སྟོད་བྱང་གིས་དེར་དི་མ། །ད་ལྟ་ཚད་གཟུང་མེད་པ་ཡི། །སྡུག་བསྔལ་དྲག་པོ་མྱོང་བ་ལ། །ཞེ་འགྲས་མེད་པའི་བཟོད་པ་ཡིས། །ངན་སོང་དོང་སྤྲུགས་ཆོ་ག་དང་། །ཡི་གེ་དྲུག་མའི་སྔགས་རྒྱུན་དང་། །མི་འཁྲུགས་རྒྱལ་པོའི་གཟུངས་ཆོག་དང་། །ངན་སོང་སྦྱོང་བ་གཙུག་ཏོར་གྱི། །ཆོ་ག་བཟང་པོ་ཉིད་དང་ནི། །སྦྱོང་བྱེད་ཀུན་གྱི་རིག་པ་དང་། །སྨན་བླ་མཆེད་བདུན་མདོ་ཆོག་སོགས། །ཀུན་ནས་ཐུགས་རྗེས་གཟུང་དུ་གསོལ། །དེ་དག་སོ་སོའི་རྩོད་ལན་ནི། །ཁོ་བོས་མང་དུ་བྱས་ཟིན་གྱི། །སླར་ཡང་བགྱིད་པར་དམ་བཅའོ། །ཞེས་གདམས་པ་ཡིན་ནོ། །གཉིས་པ་གཏེར་མའི་ལོ་རྒྱུས་ནི་བདེ་གཤེགས་འདུས་པ་རྩ་བའི་རྒྱུད་ཀྱི་འགྲེལ་པ་སློབ་དཔོན་སངས་རྒྱས་གཉིས་པ། པཎ་ཆེན་དྲི་མེད་བཤེས་གཉེན། ལོ་ཆེན་བཻ་རོ་ཙ་ན་གསུམ་གྱིས་མཛད་པའི་བརྒྱུད་པའི་ལོ་རྒྱུས་ཀྱི་སྐབས་སུ་གསུངས་པ་རྩ་བར་བཟུང་ནས་བརྗོད་པར་བྱ་བ་ནི། གང་གི་ཚེ་དབྱིངས་རིག་དོན་གྱི་འོག་མིན་ཆེན་པོ་རིག་པའི་ཡེ་ཤེས་གཟུང་འཛིན་གྱིས་འཆིང་བ་ལས་རྣམ་པར་གྲོལ་བའི་བཅོམ་ལྡན་འདས་དཔལ་དང་པོའི་སངས་རྒྱས་ཀུན་ཏུ་བཟང་པོ་དུས་བཞི་མཉམ་པ་ཉིད་ཀྱི་ངང་དུ་ཆོས་སྐུའི་ངོ་བོར་བཞུགས་པ་ལས། ཡུམ་ཀུན་ཏུ་བཟང་མོས་དབྱིངས་རིག་རྣམ་དག་གི་ཀློང་ནས་རྡོ་རྗེའི་དམ་ཚིག་ཆེན་པོའི་གླུས་བསྐུལ་ནས་ལོངས་སྤྱོད་རྫོགས་པའི་སྐུར་བཞེངས་ཏེ་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་བསྟན་ཏོ། །ཞི་བས་མི་ཐུལ་བ་རྣམས་ཀུན་བཟང་ཆེ་མཆོག་ཧེ་རུ་ཀའི་སྐུར་བཞེངས་ཏེ་ཁྲོ་བོའི་དཀྱིལ་འཁོར་ཆེན་པོ་ཆོས་ཉིད་ཀྱི་རང་སྒྲས་གསུངས་པ་སྟེ། དེའང་རིག་འཛིན་རྡོ་རྗེ་ཆོས་རང་ཉིད་ཚོམ་བུ་དགུའི་དཀྱིལ་འཁོར་དུ་འཁོར་གྱི་ཚུལ་དང་། དཀྱིལ་འཁོར་སོ་སོའི་རིག་འཛིན་བླ་མའི་དཀྱིལ་འཁོར་དུ་རང་ཉིད་གཙོ་བོ་དང་གཞན་འཁོར་གྱི་རྣམ་པར་བསྟན་ཏོ། །དེ་འང་ཇི་ལྟར་གསུངས་པའི་རྒྱུད་སྡེའི་ངེས་བརྗོད་ནི། བདེ་གཤེགས་འདུས་པ་རྩ་བའི་རྒྱུད། ཕྱི་མ་མངོན་འབྱུང་གི་རྒྱུད། ཕྱི་མའི་ཕྱི་མ་སྔགས་ཀྱི་རྒྱུད། མ་ཚང་བ་ཁ་སྐོང་བའི་རྒྱུད། འབྱེད་པ་ལྡེ་མིག་གི་རྒྱུད་དེ་ཞི་ཁྲོ་སྤྱིའི་རྒྱུད་ལྔ། དེ་རྣམས་ཀྱི་རྩ་རྒྱུད་གསང་འདུས་ཞི་བ་འདུས་པ་ཆེ་མཆོག་འདུས་པ་སོགས་བརྒྱད་དང་། ཞི་ཁྲོ་ལྷན་ཅིག་པ། རིག་འཛིན་འདུས་པ་སྟེ་བྱེ་བྲག་གི་རྒྱུད་བཅུ། དེ་ནས་འཇམ་དཔལ་གཤིན་རྗེ་སོགས་སོ་སོའི་གཙོ་བོར་སྤྲུལ་ཏེ་གསུངས་པ་ཡན་ལག་གི་རྒྱུད་ལ། འཇམ་དཔལ་གསང་རྒྱུད་གསང་པ་གྲུབ་པ་བརྗོད་པ་གླུར་བླངས་སོགས་དང་། དམེ་བརྩེགས། འཇིགས་བྱེད་དམར་ནག་དང་བཅས་པ་སྟེ་འཇམ་དཔལ་སྐུའི་རྒྱུད་སོ་བཞི་ལ་སོགས་ཏེ་སྒྲུབ་སྡེ་རང་རང་གི་རྒྱུད་ཀྱི་ཤེས་བྱེད་སྒྲོམ་བུའི་སྐབས་སུ་སྟོན་པའི་གྲངས་ངེས་པ་རྣམས་རྒྱལ་བ་དགོངས་པས་བརྒྱུད་དེ་བརྗོད་པའི་སྒྲ་ཚིག་རང་མཚན་པ་གང་ཡང་མེད་དོ། །དེ་ནས་ཀུན་བཟང་ཧེ་རུ་ཀ་ཉིད་ཀྱི་ཐུགས་རྗེའི་རོལ་པ་ཚད་མེད་པས་སྐུ་གསུང་ཐུགས་ཡོན་ཏན་ཕྲིན་ལས་ལ་སོགས་པའི་སོ་སོའི་རིག་པ་འཛིན་པའི་བྱང་ཆུབ་སེམས་དཔའ་རྣམས་དང་། གཞན་ཡང་ས་ཐོབ་པ་དང་། ལྷུན་གྱིས་གྲུབ་པ་དང་། རིག་པ་འཛིན་པ་དང་། ཕྱག་རྒྱ་ཆེན་པོ་དང་། དེད་དཔོན་ལ་སོགས་པའི་རིག་པ་འཛིན་པ་རྣམས་ལ་ཐུགས་རང་བྱུང་ཡེ་ཤེས་ཀྱི་ཀློང་ནས་གཟིགས་སྟངས་དང་། ཕྱག་རྒྱ་དང་། འོད་ཟེར་ལ་སོགས་པའི་བརྡས་བརྒྱུད་པས་སྟོན་འཁོར་ངོ་བོ་གཅིག་པའི་རྣམ་རོལ་གྱིས་མ་རྟོགས་པ་དང་། ལོག་པར་རྟོག་པའི་དྲི་མས་མ་གོས་པར་ཇི་ལྟ་བ་བཞིན་མངོན་དུ་མཛད་པ་ལས། བཀའི་བསྡུ་བ་མཛད་པར་ཞལ་བགྲོས་ཏེ་རིག་འཛིན་དེ་དག་གི་གཙོ་བོར་གྱུར་པ་ཀུན་ཏུ་བཟང་པོ་དང་གཉིས་སུ་མ་ཡིན་པའི་བྱང་ཆུབ་སེམས་དཔའ་རྡོ་རྗེ་ཆོས་སམ། རྡོ་རྗེ་སེམས་དཔའ། ལག་ན་རྡོ་རྗེ། རྡོ་རྗེ་སྙིང་པོ། རྡོ་རྗེ་ཐོད་པ་རྩལ། རྡོ་རྗེ་དྲག་པོ་རྩལ། མིའི་ཐོད་པ་ཅན། རིག་འཛིན་གྱི་རྒྱལ་པོ་ཀུཉྫ་ར་ལ་སོགས་པའི་མཚོན་གྱི་རྣམ་འགྱུར་ཅན་དེས། རང་ཉིད་སྟོན་པ་པོ་དང་། རིག་འཛིན་གཞན་རྣམས་འཁོར་དུ་བྱས་པ་ལ་རིག་འཛིན་སློབ་དཔོན་དུ་གྲགས་ཤིང་ལྷོ་ནུབ་ཀྱི་ཚོམ་བུའི་དཀྱིལ་འཁོར་ལའང་འཁོད་པ་ནི་ཇི་སྐད་དུ། དགྱེས་རྡོར་རྩ་རྒྱུད་བརྟག་པ་གཉིས་པ་ལས། འཆད་པ་པོ་ང་ཆོས་ཀྱང་ང་། །རང་གི་ཚོགས་སྡུད་འཁོར་ཀྱང་ང་། །འཇིག་རྟེན་སྟོན་པ་བསྒྲུབ་བྱ་ང་། །འཇིག་རྟེན་འཇིག་རྟེན་འདས་པ་དང་། །ཞེས་པ་ལྟར། རང་ཉིད་ཀྱིས་བསྟན་པར་མཚམས་སྦྱར་ནས་བསྡུས་ཏེ་གསེར་གྱི་གླེགས་བུར་བཻ་ཌཱུརྻ་ཞུན་མས་བྲིས་ནས་སྤྱི་དང་བྱེ་བྲག་གི་རྒྱུད་རྣམས་སོ་སོར་ཕྱོགས་སུ་བསྡེབས་ཏེ། གླེགས་བམ་དུ་བྱས་ནས་གཞན་ལ་སྣང་བར་མཛད་པ་ལ་རིག་འཛིན་བརྡའི་བརྒྱུད་པ་ཞེས་བྱའོ། །དེ་ནས་མཁའ་འགྲོ་གཏད་རྒྱ་བརྒྱུད་དེ་གཏེར་དུ་སྦས་ཚུལ་ནི། རིག་འཛིན་དེ་རྣམས་ཀྱིས་མིའི་ནང་ནས་སྐལ་ལྡན་མ་རྙེད་དེ། ཀུན་ཏུ་བཟང་མོའི་ཐུགས་སྤྲུལ་ཡེ་ཤེས་དང་ལས་ལས་གྲུབ་པའི་མ་མོ་མཁའ་འགྲོ་རྣམས་ཀྱི་གཙོ་མོ་རྣལ་འབྱོར་མའི་བདག་མོ། འཇིག་རྟེན་དྲེགས་པའི་ཚོགས་ཀྱི་མ་ཆེན་མོ་མཚན་གྱི་རྣམ་གྲངས་སུ། རྡོ་རྗེ་ཕག་མོ། བདག་མེད་ལྷ་མོ། ཉི་ཟླ་ཐོད་ཕྲེང་དུ་གྲགས་ཤིང་། སྐབས་འདིར་མཁའ་འགྲོ་མ་ལས་ཀྱི་དབང་མོ་ཆེར་འབོད་པ་ལ་བཤད་ཅིང་དབང་བསྐུར་ནས། ཁྱོད་ཀྱིས་བཀའ་ཡང་དག་པའི་རྒྱུད་སྡེ་འདི་རྣམས་ཀྱི་སྤྱི་རྒྱུད། བྱེ་བྲག་གི་རྒྱུད་རྣམས་སོ་སོར་ཕྱེ་ལ་རིན་ཆེན་གྱི་སྒྲོམ་སོ་སོར་བཞུགས་སུ་གསོལ་ཏེ་རིག་པ་འཛིན་པའི་རྣལ་འབྱོར་སྐལ་ལྡན་རྣམས་ལ་དངོས་གྲུབ་ཏུ་བྱིན་ཅིག་ཅེས་ལུང་བསྩལ་བས། མཁའ་འགྲོ་མས་སྤྱི་རྒྱུད་ལྔ་ལ་སོགས་པ་རིན་པོ་ཆེ་སྣ་བརྒྱད་ལས་བྱས་པའི་སྒྲོམ་དང་། འཇམ་དཔལ་སྐུའི་རྒྱུད་ལྕགས་སྒྲོམ། པདྨ་གསུང་གི་རྒྱུད་ཟངས་སྒྲོམ། ཡང་དག་ཐུགས་ཀྱི་རྒྱུད་དངུལ་སྒྲོམ། ཆེ་མཆོག་ཡོན་ཏན་གྱི་རྒྱུད་རྣམས་གསེར་སྒྲོམ། ཕུར་པ་ཕྲིན་ལས་ཀྱི་རྒྱུད་རྣམས་གཡུ་སྒྲོམ། མ་མོ་རྦོད་གཏོང་གི་རྒྱུད་རྣམས་བསེ་སྒྲོམ། འཇིག་རྟེན་མཆོད་བསྟོད་ཀྱི་རྒྱུད་རྣམས་མཆོང་སྒྲོམ། དམོད་པ་དྲག་སྔགས་ཀྱི་རྒྱུད་རྣམས་གཟིའི་སྒྲོམ་བུར་བཅུག །སོ་སོའི་རིགས་དང་མཐུན་པའི་ཕྱག་རྒྱས་བཏབ། འཛམ་གླིང་གི་ལྟེ་བ་རྡོ་རྗེའི་གདན་དང་ཉེ་བའི་གནས། མཆོག་གི་དངོས་གྲུབ་བདེ་བླག་ཏུ་ཐོབ་པའི་ས། དུར་ཁྲོད་ཆེན་པོ་བསིལ་བའི་ཚལ་ལམ། རོ་མྱགས་དང་འདམ་བུའི་ཚལ་ཞེས་བྱ་བའི་དབུས་ན་འཁོར་པ་རང་བྱུང་གི་མཆོད་རྟེན་བདེ་བྱེད་བརྩེགས་པ་ཞེས་བྱ་བ། ཕྱི་མཆོད་རྟེན་ལ་ནང་གཞལ་ཡས་ཁང་གི་རྣམ་པར་གནས་པའི་ནང་དུ་རིན་པོ་ཆེའི་སྒྲོམ་རྣམས་རྒྱས་བཏབ་བོ། །གཞན་དུ་མཆོད་རྟེན་གྱི་རྨང་ནས་ཏོག་གི་བར་ལ་ཆོས་ཀྱི་རྣམ་གྲངས་ཐ་དད་དུ་སྦས་པའི་རྣམ་གཞག་ཀྱང་འཆད་དེ་དགོངས་པ་ཙམ་མོ། །དེར་འཇིག་རྟེན་དང་འཇིག་རྟེན་ལས་འདས་པའི་མ་མོ་མཁའ་འགྲོ་ཐམས་ཅད་ཀྱིས་བཀུར་སྟི་ཕུན་སུམ་ཚོགས་པས་མཆོད་ཅིང་། ཆོ་འཕྲུལ་ཆེན་པོ་རྒྱུན་མི་འཆད་པར་སྟོན་པ་ནི་མཁའ་འགྲོ་གཏད་རྒྱའི་བརྒྱུད་པར་གྲགས་སོ། །དེ་ནས་གྲུབ་ཐོབ་རྣལ་འབྱོར་དུ་བརྒྱུད་པ་ནི། རེ་ཞིག་གི་ཚེ་གསང་བའི་བདག་པོ་རིག་འཛིན་རྡོ་རྗེ་ཆོས་ཀྱི་ཐུགས་ཆོས་དབྱིངས་རྣམ་པར་དག་པའི་རོལ་པ་བཀོད་པའི་རྩལ་ལས་ཤར་བའི་ཡེ་ཤེས་དགུའི་སྒྱུ་འཕྲུལ་གྱི་རྣམ་རོལ་ཅན་རིག་འཛིན་གྱི་སློབ་དཔོན་ཆེན་པོ་བརྒྱད་དགོངས་པ་ལ་བཞུགས་པའི་སྤྱི་མཐུན་གྱི་གཟིགས་སྣང་ལ། དུར་ཁྲོད་ཆེན་པོ་དེ་ན་ཉིན་པར་རླུང་དང་འཚུབས་མ་འཁྲིགས་ཤིང་། ཐོག་དང་སེར་བ་འབབ། མཚན་མོ་འོད་དང་མེར་འབར་གློག་འཁྱུག་པ་ལ་སོགས་པའི་ཆོ་འཕྲུལ་སྣ་ཚོགས་བྱུང་བས། ཐམས་ཅད་བཀའ་བགྲོས་ཏེ་འདི་ནས་འཇིག་རྟེན་གྱི་ཁམས་འཚེངས་པའི་ཆོས་སམ་ནོར་འོང་། ཡང་ན་འཇིག་རྟེན་ཕུང་བའི་ངན་སྔགས་འབྱུང་བས་བཏོན་ན་འཐད་ཅེས་ཞལ་འཆམ་ནས། ནམ་མཁའ་ལ་བྱོན་ཏེ་དགོངས་པ་གཅིག་ཏུ་བསྡུས་ནས་མཆོད་རྟེན་ཆེན་པོའི་མདུན་དུ་མཐུན་པའི་དམ་རྫས་རྒྱ་ཆེན་པོ་བཤམས། བཀའ་བདེན་པའི་ཆོས་མང་དུ་གསུངས། གཞན་དོན་དུ་བརྟུལ་ཞུགས་ཀྱི་དགོངས་པ་བསྐྱེད་ནས་ཏིང་ངེ་འཛིན་གྱི་ལྕགས་ཀྱུ་རྣོན་པོས་མ་ཚོགས་མཁའ་འགྲོ་རྣམས་ཀྱི་སྙིང་ནས་དྲངས་ཏེ་དབང་དུ་བསྡུས་པས། དགུང་ཞག་བདུན་གྱི་ནུབ་མོ་མཁའ་འགྲོ་མ་ལས་ཀྱི་དབང་མོ་ཆེས་གཙོས། མཁའ་འགྲོ་དང་སྡེ་བརྒྱད་ཐམས་ཅད་དབང་དུ་འདུས་ཤིང་བསྟོད་ཅིང་བཀའ་ཉན་པས། ཐུགས་ཀྱི་གཟིགས་པ་ལྟར་རིན་པོ་ཆེའི་སྒྲོམ་བྱིན་ཞེས་པར་བསྒོས་པས། མཆོད་རྟེན་གྱི་ནང་ནས་སྒྲོམ་རྣམས་གཏེར་སྐྱོང་རྣམས་ཀྱིས་ཕྱུང་ནས། ལས་ཀྱི་དབང་མོ་ཆེས་གསེར་གྱི་སྒྲོམ་བུ་བི་མ་ལ་མི་ཏྲ། དངུལ་གྱི་སྒྲོམ་ཧཱུྃ་ཀཱ་ར། ལྕགས་ཀྱི་སྒྲོམ་འཇམ་དཔལ་བཤེས་གཉེན། ཟངས་ཀྱི་སྒྲོམ་སློབ་དཔོན་ཀླུ་སྒྲུབ། གཡུའི་སྒྲོམ་སློབ་དཔོན་པདྨ། གཞན་དུ་པྲ་བྷ་ཧ་སྟིར་བཤད་པས་གདམ་པ་ཅན་ཡིན། བསེ་སྒྲོམ་དྷ་ན་སཾ་ཀྲི། མཆོང་གི་སྒྲོམ་རོམ་བུ་གུ་ཧྱ། གཟིའི་སྒྲོམ་ཤཱནྟིཾ་གྷརྦྷ་སྟེ། སྒྲོམ་བུ་སོ་སོ་བ་བརྒྱད་རིག་འཛིན་རྣམ་བརྒྱད་ལ་གཏད་ནས་རང་རང་གི་བཀའ་ལུང་བསྩལ། དེར་སོ་སོའི་སྒྲོམ་བུ་ཞལ་ཕྱེ་བ་ལས། སློབ་དཔོན་བི་མ་ལའི་གསེར་སྒྲོམ་གྱི་ནང་ནས། ཆེ་མཆོག་ཡོན་ཏན་གྱི་ཆོས་སྡེ། བདུད་རྩི་ཡོན་ཏན་གྱི་རྒྱུད་བདུད་རྩི་བམ་པོ་བརྒྱད་པ། བདུད་རྩི་འཁོར་ལོ་འབར་བ། བདུད་རྩིའི་ཕྲེང་བ། བདུད་རྩིའི་བུམ་པ། བདུད་རྩིར་རོལ་པ་ཆེ་ཆུང་། རྣམ་དག་དྲི་མེད། དངོས་གྲུབ་གཏེར་མཛོད། བདུད་རྩི་ཐིགས་པ། ཉེ་བའི་སྙིང་པོ། ལས་རྒྱ་མཚོ་ལ་སོགས་པ་རྣམས་སོ། །སློབ་དཔོན་ཧཱུྃ་ཀཱ་རའི་དངུལ་སྒྲོམ་གྱི་ནང་ནས། ཡང་དག་ཐུགས་ཀྱི་རྒྱུད། ཁྲག་འཐུང་འདུས་པ་ཆེ་ཆུང་། ཧེ་རུ་ཀ་གལ་པོ་ཆེ་ཆུང་། འཇིག་རྟེན་ལས་འདས་པའི་མདོ། སངས་རྒྱས་མཉམ་སྦྱོར། ཟླ་གསང་ཐིག་ལེ། གསང་བ་འདུས་པ། ཡེ་ཤེས་རྔམ་པ་གློག་གི་འཁོར་ལོ་སོགས་ཡང་དག་ཐུགས་ཀྱི་རྒྱུད་སྡེ་བཅོ་བརྒྱད་བྱུང་ངོ་། །སློབ་དཔོན་འཇམ་དཔལ་བཤེས་གཉེན་གྱི་ལྕགས་ཀྱི་སྒྲོམ་བུ་ནས། འཇམ་དཔལ་སྐུའི་གསང་རྒྱུད་ལེའུ་ཁྲི་དྲུག་སྟོང་པ། ཟླ་གསང་ནག་པོའི་རྒྱུད་ལེའུ་འབུམ་པ། གཞོན་ནུ་གདོང་དྲུག །མེ་ལྕེ་ཕྲེང་བ། རྡོ་རྗེ་ཐོག་འབེབས། མེ་རླུང་སྐྱིན་ཐང་འཁྲུག་པའི་རྒྱུད། འཇིགས་བྱེད་དམར་ནག་ལ་སོགས་འཇམ་དཔལ་སྤྱི་དང་བྱེ་བྲག་གི་རྒྱུད་སྡེ་སུམ་ཅུ་རྩ་བཞི་རྣམས་བྱོན་ནོ། །སློབ་དཔོན་ཀླུ་སྒྲུབ་ཀྱི་ཟངས་སྒྲོམ་ནས་པདྨ་གསུང་གི་རྒྱུད་རྟ་མཆོག་རོལ་པ། རྔོག་མ་ལེ་བརྒན། དབང་ཆེན་འདུས་པ། སྤུ་གྲི་གསང་བ། དྲེགས་པ་ཚར་གཅོད། ཡང་གསང་ཁྲོས་པ། ནཱ་ག་ཀླུ་འདུལ་ལ་སོགས་པདྨ་གསུང་གི་རྒྱུད་བཅུ་གཉིས་བྱོན། སློབ་དཔོན་པདྨའི་གཡུའི་སྒྲོམ་བུ་ནས། ཕུར་པ་ཕྲིན་ལས་ཀྱི་རྒྱུད་བྱི་ཏོ་ཏ་མ་ལ་འབུམ་སྡེ། ཕ་རྒྱུད་རྣལ་འབྱོར་དམ་པ་གསང་ཆེན་ཀཱི་ལ་ཡ་བཅུ་གཉིས། གཉིས་ཀའི་རྒྱུད་སྡེ་ཕུར་པའི་སྤྱི་རྒྱུད་དང་། བྱེ་བྲག་ཏུ་ཕུར་པ་མ་རྒྱུད་ལ་རྡོ་རྗེ། ཡེ་ཤེས། སངས་རྒྱས། རྣལ་འབྱོར་རྩེ་མོ་སྟེ་བཞི། དེའི་ཡན་ལག་བཟློག་ཕུར་བཅུ་གཉིས་ཀྱི་རྒྱུད། ཕྲིན་ལས་རྣམ་པ་བཞིའི་རྒྱུད། སྲུང་མ་བཅུ་གཉིས་ཀྱི་རྒྱུད་དོ། །ཕ་རྒྱུད་ལ་ཡང་སྙིང་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྒྱུད་ལྔ། སྙིང་པོའི་རྒྱུད་གསུམ། ཡན་ལག་ཁྲོ་བོ་བཅུའི་རྒྱུད་བཅུ། ལོ་མའི་རྒྱུད་བཞི། མེ་ཏོག་གི་རྒྱུད་བཅུ། འབྲས་བུའི་རྒྱུད་བཞི། མ་ཚང་བ་ཁ་སྐོང་བའི་རྒྱུད་ལྔ་སྟེ་རྩ་བའི་རྒྱུད་གསུམ། ཡན་ལག་ཕྲ་མོའི་རྒྱུད་མཐའ་ཡས་པ་བྱུང་ངོ་། །སློབ་དཔོན་དྷ་ན་སཾ་ཀྲྀའི་བསེ་སྒྲོམ་ནས། མ་མོ་རྦོད་གཏོང་གི་རྒྱུད། མ་མོ་གསང་བ་གཏན་ཚིགས་ཀྱི་རྒྱུད། སྲིད་པའི་ཀློང་ཆེན་མ་མོ་འབུམ་ཕྲག་གཅིག་སྟེ་རྩ་རྒྱུད་ལེའུ་བརྒྱ་རྩ་བརྒྱད། རྒྱུད་ཕྱི་མ་ལེའུ་གཅིག་དང་། བྱེ་བྲག་ཏུ་ཤེལ་མཚོ་དྭངས་པ་ལ་སོགས་དཀར་མོ་སྐུའི་རྒྱུད་དགུ། ཙིཏྟ་གདོང་བཟློག་སོགས་སྨུག་མོ་གསུང་གི་རྒྱུད་བཞི། སྨུག་ནག་འཁྱིལ་པ་སོགས་ནག་མོ་ཐུགས་ཀྱི་རྒྱུད་བདུན། སེར་མོ་ཡོན་ཏན་དང་། ལྗང་མོ་ཕྲིན་ལས་བརྒྱད་ཚན་རེ། གཞན་མཁའ་འགྲོའི་སྒོས་རྒྱུད་མཐའ་ཀླས་པ་བྱུང་ངོ་། །སློབ་དཔོན་རོམ་བུ་གུ་ཧྱའི་མཆོང་གི་སྒྲོམ་བུ་ནས། འཇིག་རྟེན་མཆོད་བསྟོད་ལ་དྲེགས་པ་འདུས་པ་སྐུའི་རྒྱུད། ངན་སྔགས་ནག་པོ་གསུང་གི་རྒྱུད། སྲོག་ཏིག་ནག་པོ་ཐུགས་ཀྱི་རྒྱུད། ཡོན་ཏན་དྲེགས་པའི་གཏེར་རྒྱུད། ཕྲིན་ལས་དྲེགས་པའི་ལས་རྒྱུད་སོགས། དྲེགས་པ་འདུས་པའི་རྒྱུད་ལྔ། ཡན་ལག་གི་རྒྱུད་དྲེགས་པའི་སྡེ་དཔོན་སོ་སོའི་སྒོས་རྒྱུད་དཔག་ཏུ་མེད་པ་བྱུང་ངོ་། །སློབ་དཔོན་ཤཱནྟིཾ་གརྦྷའི་གཟིའི་སྒྲོམ་བུ་ནས། དམོད་པ་དྲག་སྔགས་ཀྱི་སྐོར། ཤེལ་ཕྲེང་དཀར་པོ་སྐུའི་རྒྱུད། དྲག་སྔགས་འདུས་པ་གསུང་གི་རྒྱུད། ཙིཏྟ་དམར་འབྱིན་ཐུགས་ཀྱི་རྒྱུད། གཏེར་མཛོད་ཆེན་པོ་ཡོན་ཏན་གྱི་རྒྱུད། ལས་མཐའ་སྣ་ཚོགས་ཕྲིན་ལས་ཀྱི་རྒྱུད་ལ་སོགས་པ་དྲག་སྔགས་སྤྱིའི་རྒྱུད། སྔགས་བདག་དྲེགས་པ་བཅོ་བརྒྱད་ཀྱི་སྒོས་རྒྱུད་མཐའ་ཀླས་པ་དང་བཅས་བྱུང་ངོ་། །དེ་ལྟར་སློབ་དཔོན་དེ་ཀུན་ཀྱང་སོ་སོའི་དངོས་གྲུབ་ཏུ་ཐོབ་པའི་རྒྱུད་དོན་ལས་མཁས་ཤིང་རང་དབང་བསྒྱུར་པའི་ནུས་པ་ཅན་དུ་གྱུར་ལ། ཆོས་ཐམས་ཅད་དགོངས་པའི་ཀློང་ནས་རང་ཤར་ཡང་གསང་སྔགས་རང་ཉིད་ལེན་པ་ལ་སོགས་པའི་ཁ་ན་མ་ཐོ་བ་སྤང་ཕྱིར། གདམས་པ་ནོད་རེས་དང་མན་ངག་གི་དགོངས་ཉམས་བསྡུར་བ་ལ་སོགས་པས་སྒྲོ་འདོགས་ཆོད་པའི་ཚུལ་བསྟན། རང་རང་ལ་བཀའ་བབས་པའི་རྒྱུད་སྡེ་རྣམས་ལ་བརྟེན་ནས་དངོས་གྲུབ་རྣམ་པ་གཉིས་བདེ་བླག་ཏུ་བརྙེས་ནས་མ་འོངས་པའི་དོན་དུ་རྒྱུད་རྣམས་ལ་དགོངས་འགྲེལ་བསྟན་བཅོས་ཀྱང་རྒྱ་ཆེར་མཛད་ཅིང་གང་ལ་གང་འདུལ་གྱི་རོལ་པ་ཚད་མེད་པས་སེམས་ཅན་མང་པོ་རྣམ་པར་བྱང་བའི་ལམ་ལ་བཀྲིས་པ་ཉིད་དོ། །དེ་དག་ཕལ་ཆེར་ཀྱང་བརྟུལ་ཞུགས་སྤྱོད་ཅིང་སྦས་པའི་ངང་ཚུལ་ཅན། སྤྲུལ་པ་དང་། རྣམ་འགྱུར་དང་། སྐུ་ཚེ་དང་། ཕྲིན་ལས་ཀྱི་རོལ་པ་ཚད་མེད་པའི་ཕྱིར། རྟོག་གེའི་རིག་པ་དང་། གདུལ་བྱ་ངོར་སྣང་གིས་གཏན་ཚིགས་རྣམ་གཞག །དྲང་དོན་གྱི་རྣམ་པར་ཐར་པ་ལ་སོགས་པའི་དཔང་པོ་བཀོད་ཀྱང་བསམ་པར་མི་ནུས་པའི་རང་བཞིན་ཅན་ཡིན་པའང་ཤེས་པར་བྱ་སྟེ། དཀོན་མཆོག་བརྩེགས་པ་ལས་ཀྱང་། ནམ་མཁས་ཇི་སྙེད་ཁྱབ་གྱུར་པ། །སྐུ་ཡིས་ཀྱང་ནི་དེ་སྙེད་ཁྱབ། །སྐུ་ཡིས་ཇི་སྙེད་ཁྱབ་གྱུར་པ། །འོད་ཀྱིས་ཀྱང་ནི་དེ་སྙེད་ཁྱབ། །འོད་ཀྱིས་ཇི་སྙེད་ཁྱབ་གྱུར་པ། །གསུང་གིས་ཀྱང་ནི་དེ་སྙེད་ཁྱབ། །ཅེས་སོ། །དུས་དེར་རིན་པོ་ཆེ་སྣ་བརྒྱད་ལས་གྲུབ་པའི་སྒྲོམ་ནི་དབུས་སུ་བཞག་པ་ལས་རྒྱ་མ་བཀྲལ་བ་སླར་ཡང་བདེ་བྱེད་བརྩེགས་པའི་མཆོད་རྟེན་དེ་ཉིད་དུ་མཁའ་འགྲོ་མ་ལས་ཀྱི་དབང་མོ་ཆེས་གཏེར་དུ་སྦས་པ། དུས་རིང་ཞིག་གི་ཚེ་སློབ་དཔོན་ཆེན་པོ་པདྨ་འབྱུང་གནས་ཀྱིས་མཁའ་འགྲོ་མ་ལས་ཀྱི་དབང་མོ་ཆེ་ལ་མཆོད་ཅིང་བཀའ་བསྒོས་པས་མཁའ་འགྲོ་མས་སྒྲོམ་ཕྱུང་སྟེ་རྒྱ་བཀྲོལ་དབང་བསྐུར་ཨུ་རྒྱན་ཆེན་པོ་ལ་གཏད་པ་ཞལ་ཕྱེ་བའི་ནང་ནས། སྒྲུབ་པ་བཀའ་བརྒྱད་པོ་ཐམས་ཅད་ཀྱི་སྤྱི་རྒྱུད་ལྔ། ཁ་སྐོང་གི་ལུང་ལྔ། བྱེ་བྲག་གི་སྒོས་རྒྱུད་བཅུ་ལ་སོགས་ཆོས་ཚན་བརྒྱ་དང་སོ་ལྔ་བྱུང་བ་ནི། སྒྲུབ་སྡེ་བརྒྱད་དཀྱིལ་འཁོར་གཅིག་ཏུ་བྱས་ཤིང་། སྒྲོམ་གཅིག་ཏུ་བཞུགས་པ་གང་ཟག་གཅིག་ལ་ཚོམ་བུ་ཡོངས་རྫོགས་ཀྱི་ཚུལ་དུ་བཀའ་བབས་པ་བཀའ་བརྒྱད་བདེ་གཤེགས་འདུས་པ་ཞེས་གྲགས་སོ། །གང་ཟག་སྙན་བརྒྱུད་ནི། རྒྱལ་བློན་སྔ་དར་གྱི་ཚེ་ཨོ་རྒྱན་ཆེན་པོས་བོད་དུ་གསུངས་ཤིང་བསྒྱུར་ནས་དར་བ་སྟེ་འོག་ཏུ་འཆད་དོ། །གཉིས་པ་ལུང་ཨ་ནུ་ཡོ་ག་ནི། སྟོན་པ་མྱ་ངན་ལས་འདས་ནས། སྣོད་བཅུད་ཀྱི་བཀྲག་མདངས་ཉམས་ཏེ་མ་རུངས་པར་གྱུར་པའི་ཚེ། མུ་སྟེགས་བྱེད་རྣམས་ཀྱིས་གོའུ་ཏ་མའི་བསྟན་པ་ནི་མེ་ཤི་བའི་དུད་པ་བཞིན་དུ་སོང་ངོ་ཞེས་སྨྲས་པའི་ཚེ། དམ་པའི་རིགས་ཅན་དྲ་མ་ལྔ་ལོ་ཉེར་བརྒྱད་དུ་ཏིང་ངེ་འཛིན་ལ་ཞུགས་པ་ལས་ལངས་ཏེ་ཉེས་པ་རྣམས་མཐོང་བས་རི་མ་ལ་ཡའི་རྩེ་མོར་འདུས་ཏེ། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཡིད་ལ་བྱས་ནས་གདུང་བའི་ཚིག་ཉི་ཤུ་རྩ་གསུམ་གྱིས་བསྐུལ་བ་ནི་འདི་སྐད་དུ། ཨེ་མ་ཀྱི་ཧུད་ཨེ་མ་ཀློང་། །སྟོན་པ་སྒྲོན་མེའི་འོད་ནུབ་ན། །འཇིག་རྟེན་མུན་པ་གང་གིས་སེལ། །ཚད་མའི་ཞལ་དེ་མི་བཞུགས་པས། །ཚད་མས་གསུངས་པའི་བསྟན་པ་ལ། །འཇུག་པར་འཚལ་བའི་འགྲོ་བ་རྣམས། །ལོག་པར་འཇུག་པར་མི་འགྱུར་རམ། །ཚད་མར་དམ་བཅས་གང་ཟག་གིས། །ངེས་མ་རྙེད་པའི་གང་ཟག་ལ། །ཕན་པར་བྱ་ཕྱིར་བཀའ་བཀྲོལ་བ། །གཏན་ལ་ཕབ་པར་གྱུར་ཅིག་གུ། །ལེགས་ཉེས་འབྱེད་པའི་སྤྱན་ཟུམ་པས། །བཀའ་ཉིད་ཁྱད་དུ་གསོད་བྱེད་པའི། །སྐྱོན་གྱི་སྤྱི་གཙུག་མཐར་ཕྱིན་པས། །ལོག་སྟོབས་འཕེལ་བར་མི་འགྱུར་རམ། །ལོག་པའི་བསྟན་པའི་སྤྲིན་འཁྲིགས་པས། །བདེན་པ་གཉིས་ཀྱི་ཉི་ཟླ་ནུབ། །འགྲོ་བ་གང་ཞིག་ལམ་ཚོལ་བ། །མུན་པར་འཁྱམས་པར་མི་འགྱུར་རམ། །སྟོན་པ་མྱ་ངན་འདས་འོག་ཏུ། །བདུད་དང་སྲིན་པོ་མུ་སྟེགས་དང་། །གནོད་སྦྱིན་འབྱུང་པོ་མི་མ་ཡིན། །མ་རུངས་གདུག་པ་སུས་འདུལ་འགྱུར། །དྲི་མེད་བསྟན་པའི་བདུད་རྩི་འདི། །ནུབ་ནས་ཤིན་ཏུ་མ་རུངས་ན། །རྩལ་དང་ལྡན་པ་སུ་ཞིག་གིས། །འབར་ཞིང་སྣང་བར་བྱེད་པར་འགྱུར། །བསླབ་པ་དམ་པ་རིན་པོ་ཆེ། །བྲལ་ནས་ཤིན་ཏུ་མ་རུངས་ན། །སྐྱེས་བུ་དམ་པ་གང་ཞིག་གིས། །ཚུལ་རྣམས་འཛིན་པར་བྱེད་པར་འགྱུར། །སྟོན་པ་མི་བཞུགས་དེ་རྗེས་ན། །སྟོན་པའི་སློབ་མ་ཇི་སྙེད་པ། །འཕགས་དང་གང་ཟག་ཐ་དད་ལ། །ལུང་བསྟན་འབྱུང་བ་གང་སུ་ཞིག །བསྟན་པ་ནམ་མཁའ་འདྲ་བ་ལ། །མོས་པ་ཐ་དད་པར་བཟུང་ནས། །ཡིན་དང་མ་ཡིན་ཆ་འཛིན་ཞིང་། །རྩོད་པ་འཕེལ་བར་མི་འགྱུར་རམ། །དེ་ཉིད་ངེས་པར་རིགས་གཅིག་ལ། །ལུགས་མི་མཐུན་པར་ཐ་དད་སྤྱོད། །རིགས་གཉིས་ཐ་དད་རིགས་རྣམས་སུ། །བསླད་ཅིང་བཅོས་པར་མི་འགྱུར་རམ། །རིན་ཐང་མེད་པའི་རིན་པོ་ཆེ། །མི་མཁས་གང་ཟག་ཐ་དད་པས། །ཉོན་མོངས་འདོད་པས་ཁྲིད་དབང་གིས། །དུག་དང་བརྗེ་བར་མི་འགྱུར་རམ། །ཆོས་ཀྱི་རྒྱལ་པོ་སྟོན་པ་དེ། །འདི་སྔོན་ཕན་ཆད་ཞལ་བཞུགས་ཏེ། །མ་རུངས་པ་དག་འཚེ་བགྱིས་ན། །གདུག་པ་དགའ་བར་མི་འགྱུར་རམ། །གང་འདིར་བསྟན་པ་གནས་པའི་ཡུན། །ཇི་སྲིད་གཅིག་ཏུ་གནས་པར་འགྱུར། །གང་འདིར་སྔར་བྱུང་གང་སྔར་བྱུང་། །ཕྱིས་འབྱུང་དུས་འདིར་ཇི་ལྟར་འགྱུར། །སྟོན་པའི་བསྟན་པ་ཐ་མའི་ཚེ། །ངེས་པར་ཇི་ལྟར་འགྱུར་ཞིག་གུ །བསླབ་པ་འཛིན་པའི་སློབ་མ་རྣམས། །ཐ་མར་ཇི་ལྟར་འགྱུར་ཞིག་གུ །འདི་ནས་མྱ་ངན་འདས་འོག་ཏུ། །གང་ལྟར་སུ་ཡིས་སྟོན་པར་གཤེགས། །ཞིང་ཁམས་ཕྱོགས་ནི་གང་ན་བཞུགས། །དེ་ན་བསྟན་པ་ཅི་ཞིག་སྒྲོག །ད་ཡང་འཇིག་རྟེན་མགོན་མེད་རྣམས། །མགོན་དང་སྐྱབས་སུ་སུ་ཞིག་འགྱུར། །འཕྲུལ་གྱི་བློ་དང་གྲོས་སྟོར་ན། །བློ་དང་གྲོས་ནི་གང་ནས་བཙལ། །ངེས་པའི་དོན་འདི་མ་རྙེད་ན། །ད་ཡང་ངེས་པ་གང་ལ་བཟུང་། །མཆོད་གནས་ཡིད་བརྟན་མི་བཞུགས་ན། །སྐུ་གདུང་ཇི་ལྟར་འགྱུར་ཞིག་གུ །སླད་ཀྱི་མཆོད་གནས་ཅི་ལ་བགྱི། །དེ་ལྟར་སྟོན་པ་འདས་འོག་ཏུ། །གདུང་འཚོབ་སྐྱེས་བུ་འབྱུང་འགྱུར་རམ། །ཨེ་མ་ཀྱི་ཧུད་ཨེ་མ་ཀློང་། །ཞེས་གདུངས་པས་དུས་གསུམ་གྱི་རྒྱལ་བ་ཚད་མེད་པའི་སྙིང་རྗེ་དང་ཐུགས་རྗེའི་བདག་ཉིད་ཅན་རྣམས་ལྕང་ལོ་ཅན་དུ་འདུས་ཏེ། གསང་བའི་བདག་པོ་ལ་འདི་སྐད་ཅེས་བསྐུལ་ལོ། །གསང་བ་འཛིན་པའི་བདག་པོ་ཁྱོད། །སྔོན་གྱི་གོ་ཆ་ས་ལམ་ཅི། །འཇིག་རྟེན་སྡུག་བསྔལ་མི་ཤེས་སམ། །སྙིང་རྗེའི་ས་ལ་བབས་ནས་ཀྱང་། །འཇིག་རྟེན་གདུང་བ་བསལ་བར་རིགས། །སོ་སོ་རིགས་ཀྱི་ཆ་བཟུང་ནས། །མ་རུངས་པ་དག་ཀུན་བཏུལ་ཏེ། །འདོད་ཁྲིད་ཐབས་ཀྱི་ཚིག་རྣམས་ཀྱིས། །ལས་ཀྱི་ཆ་དང་སྤྱོད་མཐུན་པར། །འདུ་ཤེས་བསྒྱུར་བ་བྱས་ནས་ནི། །བཀའ་ཡི་བགྲོ་བ་བཤད་སྦྱར་ནས། །ཡང་དག་དོན་ལ་འགོད་པར་རིག །ཅེས་འཇིག་རྟེན་གྱི་གདུང་བ་སེལ་བར་བསྐུལ་བས་གསང་བའི་བདག་པོ་དངོས་སུ་བྱོན་ཏེ། འོག་མིན། དགའ་ལྡན། རི་རབ་ཀྱི་རྩེ་སྟེ་ལྷ་གནས་གསུམ་དུ་གྲགས་པའི་གནས་ལ་སོགས་པར་སེང་གེ་རྣམ་པར་བསྒྱིངས་པའི་ཏིང་ངེ་འཛིན་གྱིས་དབྱིངས་བདེ་ཆེན་རྣལ་འབྱོར་གྱི་རྒྱུད་སྡེ་ཆེན་པོ་སྔགས་ཀྱི་མདོ་དྲུག་དང་རྩ་བའི་རྒྱུད་བཞི། མན་ངག་གི་རྒྱུད་དྲུག །བྱེ་བྲག་གི་བསྒྲུབ་པ་སྡེ་དྲུག །ལས་ཁ་ཚར་གྱི་རྒྱུད་བཅུ་གཉིས་ལ་སོགས་པ་སྟེ། འདི་དག་གཙོ་ཆེ་ཆུང་གི་སྒོ་ནས་ཨ་ནུའི་རྒྱུད་དུ་བཞག་པ་ལས། རང་བཞིན་དུ་མ་ཧཱ་དང་། ཨ་ནུ་གཉིས་ཀར་གཏོགས་པས་མན་ངག་གི་རྒྱུད་ཡིན་ཏེ། དམ་པའི་རིགས་ཅན་དྲ་མ་ལྔ་ལ་གསང་བའི་བདག་པོས་དངོས་སུ་གསུངས། དེ་དག་སྲིན་པོ་བློ་གྲོས་ཐབས་ལྡན་གྱིས་གསེར་གྱི་གླེགས་བམ་ལ་བཻ་ཌཱུརྱ་ཞུན་མས་བྲིས་ནས་དགོངས་པའི་རྩལ་བདུན་གྱིས་ནམ་མཁའ་ལ་སྦས། ཆོས་ཀྱི་རྣམ་གྲངས་དེས་གདུལ་བའི་དུས་ལ་བབས་པའི་ཚེ་ལངྐའི་ཡུལ་དུ་གྲགས་པ་སིང་ག་ལའི་གླིང་གི་ནགས་སུ་བབས་པའོ། །གཞན་ཡང་འདྲ་འབག་ཆེན་མོར། ནུབ་ཕྱོགས་ཨོ་རྒྱན་གྱི་ཡུལ་དྷ་ན་ཀོ་ཤའི་གླིང་དུ། གསང་བའི་བདག་པོ་ཕྱག་ན་རྡོ་རྗེས། སྤྲུལ་པའི་སྐུ་དགའ་རབ་ནས་མར་ལ་དཔལ་ཡང་དག་གི་རྒྱུད་དང་། མན་ངག་ལ་སོགས་པ་གསུངས་ཚུལ་དང་། གཞན་ཡང་ཕུར་པ་དང་། མ་མོ་ལ་སོགས་པ་ཇི་ལྟར་བབས་པའི་ཚུལ་རྒྱས་པར་གསུངས་སོ། །ཞེས་ཀྱང་བཤད་དོ། །དོན་གསུམ་པ་ཐེག་པ་མཐའ་དག་གི་ཡང་རྩེ། རྒྱུད་སྡེ་ཐམས་ཅད་ཀྱི་བཅུད་ཕུར། མན་ངག་ཐམས་ཅད་ཀྱི་ཡང་ཞུན་རང་བཞིན་རྫོགས་པ་ཆེན་པོ་རྩོལ་མེད་ཨ་ཏིའི་བསྟན་པ་ལྷ་གནས་གསུམ་དུ་གྲགས་པ་དང་། རྒྱ་གར་འཕགས་པའི་ཡུལ་དུ་བབས་ཚུལ་ལས། དང་པོ་ནི་འོད་གསལ་རྡོ་རྗེ་སྙིང་པོ་བཀའ་ཆེན་རྫོགས་པ་ཆེན་པོ་ལ་བཀའ་བབས་སུམ་ལྡན་དུ་གྲགས་པའི་རྒྱལ་བ་དགོངས་པའི་བརྒྱུད་པ། ཡང་དག་དོན་གྱི་འོག་མིན་ཕྱི་ནང་མེད་པ་ཡེ་ཤེས་རང་གསལ་བའི་གཞལ་ཡས་ཁང་། ཆོས་ཉིད་འདུ་འབྲལ་མེད་པའི་གནས་སུ་དུས་གསུམ་འཕེལ་འགྲིབ་མེད་པར་མངོན་པར་བྱང་ཆུབ་པའི་སྟོན་པ་ཆོས་ཀྱི་སྐུ་ཀུན་ཏུ་བཟང་པོས་ཆོས་སྐུའི་བྱིན་རླབས་ཀྱིས་རང་གྲོལ་མངོན་སུམ་དུ་གསུངས། ལོངས་སྤྱོད་རྫོགས་པའི་སྐུས་རང་གི་ངོ་བོས་གསུངས། གསང་བ་རྡོ་རྗེའི་སྐུས་བདེ་ཆེན་ཐབས་ཀྱིས་གསུངས་ཏེ། ཐུགས་རིག་པ་འོད་གསལ་བའི་ཀློང་དུ་དགོངས་པ་གསལ་འགྲིབ་མེད་པར་བསྡུས་སོ། །དེའང་གསང་སྔགས་འབྱུང་བའི་དུས་དྲུག་ལ་བབས་པའི་ཚེ་རྩོལ་མེད་ཨ་ཏིའི་ཐེག་པ་མངོན་དུ་གྲགས་པ་ནི། ཉོན་མོངས་རྒྱུད་དྲག་མོས་མཐུ་ཞན། །ལས་ཀྱིས་ཚེ་ཐུང་དཀའ་དོན་སྟོར། །བསྟན་རྙིང་གྲུབ་མཐའ་ངན་པས་བསྒྱུར། །གཉེན་པོས་མི་ནོན་བསྒྲུབ་ཚུལ་ཞན། །དེ་ཚེ་རིག་པའི་རྣམ་རྟོག་ཤར། །ཞེས་པ་ལྟར་སེམས་ཅན་རྣམས་ཉོན་མོངས་པ་རྒྱུད་དྲུག །དད་པ་མེད་ཅིང་མོས་པའི་མཐུ་ཞན། ལས་དབང་གིས་ཚེ་ཐུང་། བཀའི་དོན་ཚིག་ཙམ་ལ་བསྟན་ཞིང་ཡིན་ཚུལ་གྱི་དོན་སྟོར། བསྟན་པའི་སྙིགས་མར་གྱུར་པས་གྲུབ་མཐའ་ངན་པའི་ནུས་པ་ཆེ། ཉོན་མོངས་པ་གཉེན་པོས་མི་ནོན་ཞིང་རྩོལ་སྒྲུབ་ཞན་པའི་དུས་སུ། ཤན་འབྱེད། ལ་བཟླ། རང་གྲོལ། མངོན་སུམ་དུ་སྟོན་པ་ཨ་ཏིའི་བསྟན་པ་བྱུང་། དུས་དེའི་ཚེ་སུམ་ཅུ་རྩ་གསུམ་གྱི་ལྷའི་གནས་ན། ལྷ་དེ་བ་བཟང་སྐྱོང་ཞེས་བྱ་བར་བུ་ལྔ་བརྒྱ་རྩ་གཅིག་ཡོད་པའི་བུ་ཀུན་དགའ་སྙིང་པོར་གྲགས་པ། སྐྱེད་ཟླ་གཞན་ལས་བློ་གྲོས་དང་སྒྱུ་རྩལ་ཁྱད་དུ་འཕགས་པ་ཞིག་བྱུང་། དེར་ལྷའི་བུ་གཞན་དག་དགའ་བའི་ཚལ་ལ་སོགས་པར་རོལ་མོ་དང་། རྩེད་འཇོ་དང་། གླུ་གར་ལ་སོགས་པར་དགའ་ནའང་། ཀུན་དགའ་སྙིང་པོ་བསམ་གཏན་གྱི་ཁང་བུར་གཅིག་པུར་འདུག་ཅིང་རྡོ་རྗེའི་བཟླས་པ་ལ་དགའོ། །དེ་ལ་ལྷའི་བུ་སེམས་ལྷག་ཅན་ཞེས་བྱ་བར་གྲགས་སོ། །ལྷའི་བུ་དེ་ལ་ཆུ་མོ་གླང་གི་ལོ་ཆོ་འཕྲུལ་གྱི་ཟླ་བ་ལ་རྨི་ལྟས་ཁྱད་པར་ཅན་བཞི་རྨིས་པར་གྲགས་པ་འདི་ལྟ་སྟེ། དང་པོར་སངས་རྒྱས་ཐམས་ཅད་ལས་འོད་ཟེར་ཕྱོགས་བཅུར་འཕྲོས་ཏེ་མཐར་རང་ལ་འོད་ཟེར་ལ་སོགས་པས་བསྐོར་བ་བྱས་ཏེ་སྤྱི་གཙུག་ཏུ་ཐིམ་པ་རྨིས་སོ། །གཉིས་པ་ལ་ཚངས་པ་དང་། ཁྱབ་འཇུག །གུ་ལང་གསུམ། ཁྱུར་མིད་དུ་ཟོས་པ་རྨིས་སོ། །གསུམ་པ་ལ་ནམ་མཁའི་དབྱིངས་སུ་ཉི་ཟླ་གཉིས་ཤར་ནས། དེ་གཉིས་རང་གི་ལག་ཏུ་བྱུང་ནས་འཇིག་རྟེན་གྱི་ཁམས་ཐམས་ཅད་འོད་ཀྱིས་གང་བར་བྱས་པ་རྨིས་སོ། །བཞི་པ་ལ་ནམ་མཁའ་ནས་སྤྲིན་རིན་པོ་ཆེའི་ཁ་དོག་ཅན་ལས་བདུད་རྩིའི་ཆར་བབས་ཏེ། རྩི་ཐོག་དང་ནགས་ཚལ་ཐམས་ཅད་རྒྱས་ནས་རིན་པོ་ཆེའི་མྱུ་གུ་མེ་ཏོག་དང་འབྲས་བུ་ཐམས་ཅད་དུས་གཅིག་ལ་རྒྱས་པར་རྨིས་སོ། །དེ་ལྟར་རྨི་ལྟས་བཞི་པོ་ནངས་པར་ལྷའི་དབང་པོ་ལ་བཟླས་པས། ལྷའི་དབང་པོ་ན་རེ། ཨེ་མ་ཧོ། སྙིང་པོ་རྣལ་མ་འབྱུང་བའི་དུས། །ཡང་སྤྲུལ་སྣང་ནུས་དུས་གསུམ་བྱང་ཆུབ་རྫོགས། །ལོ་ཀའི་མུན་སེལ་དུས་མཐའི་ས་ནོན་པའི། །ཐུགས་སྲས་འཛམ་གླིང་དཔལ་གྱུར་ངོ་མཚར་ཨ། །ཞེས་བསྟོད་ནས་རྨི་ལམ་བཞི་ལ་འབྲེལ་པ་བྱས་པ་ནི། དང་པོ་དུས་གསུམ་སངས་རྒྱས་ཐམས་ཅད་ཀྱི་དགོངས་པ་ཐུགས་སུ་ལོན་ནས། སངས་རྒྱས་ཐམས་ཅད་ཀྱི་རྒྱལ་ཚབ་བྱེད་པའི་རྟགས་ཡིན། གཉིས་པ་བདུད་ཐམས་ཅད་དབང་དུ་འདུས་ཤིང་དུག་གསུམ་མ་སྤངས་པར་རྩད་བཅད་དེ། མངོན་པར་རྫོགས་པར་སངས་རྒྱས་པའི་རྟགས་ཡིན། གསུམ་པ་ཐབས་དང་ཤེས་རབ་ཟབ་པ་དང་རྒྱ་ཆེ་བའི་སྣང་བས་འགྲོ་བ་ཀུན་གྱི་མ་རིག་པའི་མུན་པ་སེལ་བའི་རྟགས་ཡིན། བཞི་པ་མན་ངག་རང་བྱུང་བདུད་རྩིའི་ཆུས་ཉོན་མོངས་པའི་གདུང་བ་གཏན་ནས་བསལ་ཏེ། རྩོལ་མེད་ཀྱི་འབྲས་བུ་ལྷུན་གྱིས་གྲུབ་པའི་རྟགས་ཡིན། ཞེས་སྤྲོ་བ་བསྐྱེད་པས། ལྷའི་བུ་ཤིན་ཏུ་དགའ་བར་གྱུར་ཏེ། ཕྱོགས་བཞིར་གདོང་ཕྱོགས་ནས་སངས་རྒྱས་ཐམས་ཅད་ལ་བསྐུལ་བ། གསུང་གི་མངའ་བདག་ཐམས་ཅད་ཀྱི། །རྩོལ་བའི་ཐེག་པ་མཐར་བཏོན་ནས། །རྩོལ་མེད་ཐེག་པ་མི་གསུང་བར། །ཐུགས་རྗེ་ཆེན་པོ་ཡལ་ལམ་ཅི། །སྐལ་ལྡན་གདུལ་བྱ་མཆིས་པ་ན། །ལྷུན་གྱིས་གྲུབ་པ་གསུང་དུ་གསོལ། །ཞེས་གསོལ་བ་བཏབ་པས། ཕྱོགས་བཅུའི་དེ་བཞིན་གཤེགས་པ་ཐམས་ཅད་དང་རིགས་ལྔའི་སངས་རྒྱས་རྣམས་ཀྱིས་དཔལ་རྡོ་རྗེ་སེམས་དཔའ་བྱིན་གྱིས་བརླབས་ཤིང་ཚིགས་སུ་བཅད་པས་རྩོལ་མེད་རྒྱུ་འབྲས་ལས་འདས་པའི་ཐེག་པ་སྣང་བར་བྱ་བའི་དུས་ལ་བབ་པར་བསྐུལ་བས། རྡོ་རྗེ་སེམས་དཔའི་ཞལ་ནས། རྡོ་རྗེ་སེམས་དཔའ་ནམ་མཁའ་ཆེ། །ཚིག་གིས་སྤྱོད་ཡུལ་མ་ཡིན་པས། །བདག་གིས་བགྲོ་བར་ཤིན་ཏུ་དཀའ། །མ་རྟོགས་པ་ལ་ཚིག་སྒོ་ནས། །མཚོན་ནས་རྟོགས་པར་བྱ་བའི་ཕྱིར། །ཅི་རིགས་པ་ནི་རྣམ་པར་བགྲོ། །ཞེས་གསུང་པར་ཁས་བླངས་ནས་སངས་རྒྱས་ཐམས་ཅད་ཀྱི་དགོངས་པ་དང་མི་འགལ་བར་བྱ་བའི་ཕྱིར་དུས་གསུམ་གྱི་བདེ་བར་གཤེགས་པ་ཐམས་ཅད་རིགས་ལྔའི་ངོ་བོར་བཞུགས་པ་ལ་འདྲི་བ་དང་ལན་ལྡོན་པའི་ཚུལ་གྱིས་གཞི་འབྲས་ཀྱི་དོན་ལ་སྒྲོ་འདོགས་བཅད་པའི་མཐར་སུམ་ཅུ་རྩ་གསུམ་གྱི་གནས་རྣམ་པར་རྒྱལ་བའི་ཁང་བཟང་གི་དབུ་རྩེ། སྲོག་ཤིང་རྡོ་རྗེ་རྩེ་དགུ་པ་དང་བཅས་པའི་གནས་སུ་བྱོན། དེའི་རྩེ་མོར་རིན་པོ་ཆེ་འབར་བའི་ཁྲི་བཤམས། རིན་ཆེན་སྣ་ཚོགས་ལས་གྲུབ་པའི་གདུགས་ཕུབ། དེར་གསང་བ་འཛིན་པ་བཞུགས་ནས་ལྷའི་བུ་སེམས་ལྷག་ཅན་ལ་རྒྱལ་ཐབས་སྤྱི་བླུགས་ཀྱི་དབང་བསྐུར་ནས་མན་ངག་འཕྲུལ་གྱི་ལུང་བཅུ་ཕོག །ལྷུན་གྲུབ་གསུམ་གྱི་དབང་བསྐུར་ནས་སྐུ་གསུམ་ཐུག་ཕྲད་ཀྱི་གདམས་ངག་བྱིན། ཐིག་ལེ་ཆེན་པོའི་དབང་བསྐུར་ནས་སེམས་ཉིད་འགྱུར་མེད་ཀྱི་མན་ངག་བྱིན། མི་འགྱུར་བརྟན་པའི་དབང་བསྐུར་ནས་སྤྱོད་ལམ་རིག་པའི་མན་ངག་བྱིན། རིག་པ་སྤྱི་བླུགས་ཀྱི་དབང་བསྐུར་ནས་ཡེ་ཤེས་རྫོགས་པའི་མན་ངག་བྱིན། གཉིས་མེད་འདྲེས་པའི་དབང་བསྐུར་ནས་ཕྱག་རྒྱ་ཆེན་པོའི་མན་ངག་བྱིན། གཞན་ཡང་དབང་དང་མན་ངག་གི་རྒྱུད་སྡེ་མང་པོ་དུས་མཐའི་སྐད་ཅིག་ལ་རྫོགས་པར་བྱིན་ནས། རྒྱལ་ཚབ་ཏུ་མངའ་གསོལ་བ་སྟེ། དེ་སྐད་དུ། རྨད་བྱུང་བསྟན་པའི་སྙིང་པོ་འདི། །ལྷ་གནས་གསུམ་དུ་གྲགས་གྱུར་ནས། །ཡང་སྤྲུལ་གང་ཟག་ཐུགས་སྲས་ཀྱིས། །འཛམ་གླིང་དབུས་སུ་རྒྱས་པར་བྱོས། །ཞེས་སོ། །གཉིས་པ་སྣང་བ་དང་མི་སྣང་བ་དང་། ཕྱེད་སྣང་བའི་གྲོང་ཁྱེར་ཞེས་ཁམས་གསུམ་གྱི་མིང་གི་རྣམ་གྲངས་སུ་འཇོག་པ་ལས། སྣང་བའི་གྲོང་ཁྱེར་ཏེ་མིའི་ཡུལ་དུ་ཇི་ལྟར་གྲགས་པའི་རྣམ་གཞག་སྤྱིར་བསྟན་པ་དང་། རིག་འཛིན་ངེས་པའི་ལུང་བསྟན་ལྟར་དར་ཚུལ་བྱེ་བྲག་ཏུ་བཤད་པའོ། །དང་པོ་ནི་དེ་ཡང་གདོད་མའི་མགོན་པོ་དཔལ་ཀུན་ཏུ་བཟང་པོ་དེས་ཐོག་མཐའ་མེད་པའི་དུས་ནས་འཁོར་འདས་ཀུན་གྱི་བླ་མར་བྱོན་ཏེ། སྐུ་གསུམ་གྱི་སྣང་བ་ལ་ཞིང་ཁམས་མི་འདྲ་བ་གསུམ་དུ་བཀོད་ཅིང་། དེའི་གོ་ན་ཀུན་ཏུ་བཟང་པོ་ཉིད་ཀྱིས་སྤྲུལ་པའི་སངས་རྒྱས་དང་། དེས་བྱིན་གྱིས་བརླབས་པའི་གྲགས་ཆེན་གྱི་སྟོན་པ་བཅུ་གཉིས་ལ་སོགས་པ་དུས་གསུམ་དུ་གཤེགས་པ་མཐའ་དག་དང་། སེམས་ཅན་གྱི་ཁམས་ཚད་མེད་པས་ཁྱབ་ཅིང་། སེམས་ཅན་དེ་དག་གི་འཁྲུལ་སྣང་ལ་རྡུལ་ཕྲན་རེའི་གོ་ནའང་ཞིང་ཁམས་གྲངས་མེད་པས་གང་སྟེ། ལས་དག་པའི་སྣང་བ་ལ་སངས་རྒྱས་ཀྱིས་མཛད་པ་ཆེན་པོ་སྣ་ཚོགས་སུ་སྣང་ཞིང་། སླར་མྱ་ངན་ལས་འདས་པ་དང་། བསྟན་པ་གནས་པ་དང་། ལམ་སྒྲུབ་པ་ལ་སོགས་མཐོ་རིས་དང་ཐར་པའི་བདེ་འབྲས་སྤྱོད་ཅིང་། མ་དག་པ་རྣམས་ལ། བསྟན་པ་ནུབ་པ་དང་། ངན་སོང་གི་སྡུག་བསྔལ་དང་། བསྐལ་པ་འཇིག་པ་ལ་སོགས་པ་བདེ་སྡུག་སྣ་ཚོགས་སུ་སྣང་བ་རྨི་ལམ་ལྟ་བུའི་རྣམ་འགྱུར་ལ་སྤྱོད་པས། གང་ན་རྫོགས་པ་ཆེན་པོའི་བསྟན་པ་དར་བ་དང་། གང་ན་རྫོགས་པ་ཆེན་པོའི་བསྟན་པ་ནུབ་པ་དང་། གདུལ་བྱ་དང་འདུལ་བྱེད་ཀྱི་རང་བཞིན་འདི་ཙམ་ཞིག་གོ་ཞེས་བློས་དཔག་པར་མི་ནུས་ཀྱང་། རེ་ཞིག་ཞིང་འདིར་བསྟན་པའི་བཙས་གསུམ་གྱི་བྱིན་རླབས་ལས་སྒྲོན་མེའི་བསྟན་པ་འཛིན་པར་ལུང་བསྟན་པའི་ཚུལ་ནི། དེ་ཡང་སྤྱིར་སྤྲུལ་སྐུས་འདུལ་བའི་གནས་འཛམ་བུའི་གླིང་འདིར། ཆོས་སྐུའི་བསྟན་པ་དངོས་རང་བཞིན་རྫོགས་པ་ཆེན་པོའི་བྱིན་རླབས་ལས་རང་ཤར་བ། རིན་པོ་ཆེ་བརྒྱ་རྩ་གཅིག་གི་རྒྱུ་ལས་རང་འཁྲུངས་པའི་རྡོ་རྗེ་ཚེ་ལོ་དཔག་མེད་ནས། ད་ལྟའི་བར་གྱི་མི་རྣམས་ཀྱི་ཆག་གང་པ་ཞིག་ཡོད་པ་བསྟན་པའི་བཙས་དང་པོ་སྟེ། དེའང་སྐུའི་བསྟན་པའི་དུས་ཨོ་རྒྱན་གྱི་ཡུལ་རྒྱ་མཚོ་ལན་ཚྭའི་རོ་དང་ལྡན་པའི་གླིང་ན་གནས་ཤིང་། སྐབས་སུ་འོད་དང་སྒྲ་དང་དགེ་སློང་རྫུ་འཕྲུལ་དང་ལྡན་པའི་སྤྲུལ་པ་གྲངས་མེད་པ་འབྱུང་བར་བྱེད་དོ། །གསུང་གི་བསྟན་པའི་དུས་རི་མ་ལ་ཡ་ལག་ན་རྡོ་རྗེའི་གནས་ན་གནོད་སྦྱིན་གྱི་རྒྱལ་པོ་རྣམས་ཀྱིས་ཕྱག་བྱེད་དོ། །ཐུགས་ཀྱི་བསྟན་པའི་དུས་རྡོ་རྗེ་གདན་གྱི་ནམ་མཁའ་ལ་ཡོད་དོ། །དེ་བཞིན་དུ་ལོངས་སྐུའི་བསྟན་པ་དངོས་རང་བྱུང་བསྟན་པ་བུ་གཅིག་གི་བྱིན་རླབས་ལས་རང་ཤར་བ། རིན་པོ་ཆེ་བརྒྱ་རྩ་གཅིག་གི་རྒྱུ་ལས་རང་འཁྲུངས་པའི་གླེགས་བམ་སོར་བཞི་པ་ཆོས་ཀྱི་རང་སྒྲ་སྒྲོག་པ་བསྟན་པའི་བཙས་གཉིས་པ་སྟེ། སྐུའི་བསྟན་པའི་དུས་ན་རྡོ་རྗེ་གདན་གྱི་དཔག་ཚད་ལྔ་བརྒྱའི་སྟེང་གི་ནམ་མཁའ་ལ་མཁའ་འགྲོ་མ་རྣམས་ཀྱིས་བཟུང་ནས་གནས་སོ། །གསུང་གི་དུས་ཀྱང་རྡོ་རྗེ་གདན་གྱི་ནམ་མཁའ་ན་མཁའ་འགྲོ་མས་བཟུང་ངོ་། །ཐུགས་ཀྱི་དུས་རབ་ཏུ་ཁྲོས་པ་དྲང་སྲོང་གི་ཕུག་ན་གནས་སོ། །སྤྲུལ་སྐུ་བཅུ་གཉིས་པོའི་བྱིན་རླབས་ལས་རང་ཤར་བའི་རིན་པོ་ཆེ་བརྒྱ་རྩ་གཅིག་གི་རྒྱུ་ལས་སུས་ཀྱང་མ་བྱས་པར་རང་བྱུང་བའི་སྐུ་གཟུགས་འགྲོ་བའི་ལུས་བོངས་དང་འཚམས་པ་ནི་བསྟན་པའི་བཙས་གསུམ་པ་སྟེ། སྐུའི་བསྟན་པའི་དུས་ན་རྡོ་རྗེ་གདན་གྱི་དཔག་ཚད་ལྔ་བརྒྱའི་སྟེང་གི་ནམ་མཁའ་ལ་མཁའ་འགྲོ་མས་བཟུང་ངོ་། །གསུང་གི་དུས་ན་གཅིག་ཏུ་མ་ངེས་ཏེ་འཛམ་བུའི་གླིང་འཁོར་བར་འཕར་ཞིང་། ལྷ་དང་མིའི་འདུ་བ་ཁྱད་པར་ཅན་གྱིས་མཆོད་པའི་ཞིང་བྱེད། སྐབས་སུ་བསྟན་པ་ལ་གནོད་པ་བྱུང་བའི་ཚེ་སྐུ་ལས་འོད་དང་། ཞལ་ནས་ཧཱུྃ། སྤྱན་ལས་མེ་བྱུང་སྟེ་བཟློག་པར་བྱེད་དོ། །ཐུགས་ཀྱི་བསྟན་པའི་དུས་སུམ་ཅུ་རྩ་གསུམ་པའི་ལྷ་རྣམས་ཀྱི་གཞལ་མེད་ཁང་། ལག་ན་རྡོ་རྗེའི་ཁང་པ་བརྩེགས་པ་ཞེས་བྱ་བའི་ཡང་ཐོག་ཏུ་གནས་པ་སྟེ། དེ་ལྟ་བུའི་སྐུ་གསུང་ཐུགས་ཀྱི་སྤྲུལ་པ་དེ་གསུམ་ནི་སུས་ཀྱང་མ་བྱས་པས་འཇིག་པར་མི་ནུས་ལ། སྐུ་གསུང་ཐུགས་ཀྱི་བྱིན་རླབས་ལས་རང་ཤར་བས་རྫུ་འཕྲུལ་དང་ཡོན་ཏན་དཔག་ཏུ་མེད། གང་དང་ཕྲད་པ་འབྱུང་བ་རང་དེངས་སུ་གྲོལ་བའི་ཕྲིན་ལས་ཅན་ནོ། །དེའང་སྐུའི་རྟེན་དེ་ནི་གང་དང་ཕྲད་པའི་ལུས་འོད་གསལ་དུ་གྲོལ་བའི་ཕྲིན་ལས་བྱེད་དོ། །གསུང་གི་རྟེན་དེ་ནི་ཕྲད་པ་དང་སྒྲ་ཐོས་པ་ཙམ་གྱིས་གྲོལ་བའོ། །ཐུགས་ཀྱི་རྟེན་དེ་ནི་འགྲོ་བ་གང་དག་ནད་ཞི་བར་འདོད་པ་རྣམས་ཀྱི་ནད་ཞི་བར་བྱེད་པ་ལ་སོགས་ཏེ། འདོད་པ་ཐམས་ཅད་སྐོང་ཞིང་ཐར་པ་ལ་སྦྱོར་བར་བྱེད་དོ། །དེའང་ཚེ་ལོ་དཔག་མེད་ནས་སྟོང་ཐུབ་པའི་དུས་ཕན་ཆད་ལ་སྐུས་འདུལ་བའི་བསྟན་པ་དང་། དེ་ནས་ཚེ་ལོ་བདུན་ཅུ་པའི་བར་དུ་གསུང་གིས་འདུལ་བ། དེ་ནས་ཚེ་ལོ་བཅུ་པའི་བར་དུ་ཐུགས་ཀྱིས་འདུལ་བའི་བསྟན་པ་སྟེ། དེའི་ཕྱིར་ད་ལྟའི་དུས་ན། རྡོ་རྗེ་ནི་རྡོ་རྗེ་གདན་གྱི་བར་སྣང་ལ་ཡོད་དོ། །གླེགས་བམ་ནི་རབ་ཏུ་ཁྲོས་པ་དྲང་སྲོང་གི་ཕུག་ན་ཡོད་དོ། །སྐུ་ནི་སུམ་ཅུ་རྩ་གསུམ་གྱི་གཞལ་མེད་ཁང་། ལག་ན་རྡོ་རྗེའི་ཁང་བུ་བརྩེགས་པའི་ཡང་སྟེང་ན་བཞུགས་སོ། །དེ་ལྟ་བུའི་སྤྲུལ་པ་གསུམ་གནས་པས་འཛམ་བུའི་གླིང་གཞན་ལས་ཆེས་འཕགས་ཤིང་རང་བཞིན་རྫོགས་པ་ཆེན་པོའི་ལུང་རྟོགས་ཀྱི་བསྟན་པ་དར་བ་ཡང་། ཐལ་འགྱུར་ལས། བཀའ་གསང་ངེས་པ་བཅུ་བདུན་དང་། །བསྟན་པའི་གཟེར་དང་འཕྲུལ་ཡིག་བཅས། །སྤྲུལ་སྐུའི་ཞིང་ཁམས་ཐོག་མ་ལ། །སྟོན་པ་ཀུན་ཏུ་བཟང་པོ་ཡིས། །སྟུག་པོ་བཀོད་པའི་གནས་སུ་བཟུང་། །དེ་ནས་ལྕང་ལོ་ཅན་གྱི་གནས། །ཀུན་རིག་རྣམ་པར་སྣང་མཛད་ཀྱིས། །འདི་ཉིད་བཟུང་བས་རིགས་ལྔར་སྨིན། །དེ་ནས་ང་ཡིས་བཟུང་བ་ཡིས། །བསྟན་པའི་སྲོག་ཤིང་དམ་པ་ཡིན། །སངས་རྒྱས་སྟོང་དང་རྩ་གཉིས་ནི། །འདི་ལ་བརྟེན་ནས་ངེས་པར་འབྱུང་། །ཞེས་སོ། །ཚུལ་འདིས་ད་ལྟ་མི་མཇེད་འདིར་སངས་རྒྱས་སྟོང་བྱོན་ནས་སེམས་ཅན་གྱི་དོན་མཛད་པའང་བསྟན་པའི་བཙས་གསུམ་གྱི་བྱིན་རླབས་ཡིན་པར་བལྟའོ། །དེ་ལས་ཁྱད་པར་དུ་གྲགས་ཆེན་གྱི་སྟོན་པ་བཅུ་གཉིས་ལུང་བསྟན་པ་ནི། དེ་ཉིད་ལས། རྫུས་དང་སྒོ་ང་ལས་སྐྱེས་དང་། །དྲོད་དང་མངལ་ལས་སྐྱེས་པ་ཡིས། །སེམས་ཅན་རྣམས་ནི་སྨིན་པར་བྱེད། །གདུལ་གཞིའི་བསྟན་པ་འདི་ཉིད་ནས། །བཅུ་གཉིས་ཆོས་ཀྱི་འཁོར་ལོ་བྱུང་། །འདི་ཡིས་མཛད་པ་སུམ་ཅུ་དྲུག །སྐུ་གསུང་ཐུགས་ལ་བརྟེན་ནས་ནི། །གདུལ་ཡུལ་སེམས་ཅན་རྣམས་ལ་སྣང་། །ཞེས་གསུངས་པ་སྟེ་དེའི་རང་བཞིན་རྒྱས་པ་ནི་ཐེག་པའི་མཆོག་རིན་པོ་ཆེར་གསུངས་པས་འདིར་མ་བཀོད་དོ། །དེའང་རྡོ་རྗེ་འཆང་གིས་ཚངས་ཆེན་གྱི་ཞིང་ཁམས་བཀོད་ནས་བསྐལ་པ་གྲངས་མེད་འདས་པའི་རྗེས་ལ། ཞིང་འདི་ཆགས་པའི་མགོ་རྩོམ་པ་ན་བསྟན་པའི་བཙས་གསུམ་པོ་འདི་ནས་བྱང་ཕྱོགས་གཡོ་ལྡན་ཞེས་བྱ་བའི་ཞིང་ན་གནས་ཏེ། ཞིང་དེར་ཡང་སེམས་ཅན་སོ་སོའི་ལས་ཀྱིས་འདི་དག་འབྱུང་བའི་དུས་བདུན། མི་འབྱུང་བའི་དུས་བདུན་ཏེ་བཅུ་བཞི་ལ་དར་ནུབ་ཏུ་འགྱུར་རོ། །འབྱུང་བའི་དུས་བདུན་ནི། སྙིང་པོ་ལྡན། རྫོགས་ལྡན། རྫོགས་ལྡན་ཆེན་པོ། ཉིས་ལྡན། སུམ་ལྡན། རྩོད་ལྡན། རྩོད་ལྡན་ཆེན་པོ་སྟེ་བདུན་ནོ། །དེ་དག་གི་བར་དུ་ནུབ་པས་མུན་པའི་བསྐལ་པ་བདུན་ཞེས་བྱའོ། །དེའང་སྔོན་སྟུག་པོ་བཀོད་པར་ཀུན་ཏུ་བཟང་པོས་བཟུང་། དེ་ནས་ལྕང་ལོ་ཅན་དུ་རྣམ་པར་སྣང་མཛད་ཀྱིས་བཟུང་། དེ་ནས་ཞིང་འདིའི་སྣོད་བཅུད་ཆགས་ནས་བསྐལ་པ་དང་པོ་དགའ་ལྡན་བརྩེགས་པ་ལ་སྟོན་པ་བྱོན་པས། བསྟན་པའི་བཙས་གསུམ་པོ་འདིར་བབས་ནས། རིམ་པ་བདུན་གྱིས་དར་ནུབ་བྱས་ཏེ་མཐར་གཞན་དུ་འཕར་བ་ནི། སྒྲ་ཐལ་འགྱུར་ལས། འདི་ལྟར་བསྟན་པ་འདི་ཉིད་ལ། །ལྷག་མའི་བསྟན་པ་འདི་ལྟ་བུ། །དུས་ཀྱི་ངེས་པ་ཆེ་བར་བཤད། །སྙིང་པོ་ལྡན་དང་རྫོགས་ལྡན་དང་། །རྫོགས་ལྡན་དག་ནི་ཆེན་པོ་དང་། །དེ་བཞིན་གཉིས་དང་སུམ་ལྡན་པ། །རྩོད་ལྡན་དང་ནི་རྩོད་ལྡན་ཆེ། །དེ་དག་རེ་རེའི་བར་དག་ཏུ། །མུན་པའི་བསྐལ་པ་དྲུག་ཅུ་ལ། །བསྟན་པའི་བཙས་ནི་གཞན་དུ་འགྱུར། །བྱང་གི་ཕྱོགས་ནི་གཡོ་བ་ལྡན། །བསྟན་པའི་སྒྲོན་མེ་དེར་གནས་ཏེ། །དཔལ་ལྡན་སྐྱོང་ཞེས་བྱ་བ་ཡིས། །ཞེས་པ་ལ་སོགས་པའི་ལུང་གིས་གསལ་བར་བསྟན་པ་ལྟར། བྱང་ཕྱོགས་གཡོ་ལྡན་དུ་དགེ་སློང་དཔལ་ལྡན་སྐྱོང་དང་སྦྱིན་བདག་རྒྱལ་པོ་ཛི་ན་མི་ཏྲ་ཞེས་པས་ལོ་སྟོང་དང་སུམ་བརྒྱ་སྒྲོན་བསྐལ་དང་། དེ་ནས་མུན་བསྐལ་དྲུག་ཅུ། དེ་ནས་ལྷོ་ཕྱོགས་འཚལ་པ་སྐྱོབ་ཏུ་དགའ་བའི་དཔལ་དང་། ཡོན་བདག་དགེ་བའི་དངོས་གྲུབ་ཀྱིས་སྒྲོན་བསྐལ་ལོ་བརྒྱ། དེ་ནས་མུན་བསྐལ་ལོ་བརྒྱ་ཉི་ཤུ། དེ་ནས་ཤར་ཕྱོགས་རྡོ་རྗེ་འབྱུང་བའི་རྩེར་བབས་ཏེ། རྒྱལ་པོ་སུ་ཏྲ་སྡེ་དང་། ཡོན་བདག་བྲམ་ཟེ་ཨ་ཀ་རས་བཟུང་སྟེ་སྒྲོན་བསྐལ་སྟོང་བཞི་བརྒྱ་དང་། དེ་འོག་མུན་བསྐལ་ལོ་ལྔ་སྟོང་། དེ་ནས་ནུབ་ཕྱོགས་བྷ་ཏི་ས་ལིར་བབས་ཏེ་དགེ་སློང་བདེ་བའི་སྐྱོང་དང་། ཡོན་བདག་དཔའ་བོ་འཇིགས་ཀྱིས་སྒྲོན་བསྐལ་ལོ་སྟོང་དང་། དེ་ནས་མུན་བསྐལ་ལྔ་སྟོང་། དེ་ནས་འདིར་བབས་པ་ནི་ཐལ་འགྱུར་ལས། དེ་ནས་ཡང་ནི་འདིར་བབས་ཏེ། །རྡོ་རྗེ་གདན་ཞེས་འབྱུང་བའི་གནས། །འདི་ཉིད་འཕེལ་ནས་འོད་འབར་བ། །ལོ་ནི་ལྔ་བརྒྱ་ལྔ་བཅུའོ། །འདི་ཉིད་བློ་གྲོས་བཟང་པོས་འཛིན། །དེ་ཡི་ཡོན་བདག་མཁའ་འགྲོ་མ། །བསིལ་བྱེད་གཙང་མས་བྱས་ནས་ནི། །དེ་ཡི་འོག་ཏུ་འཇིག་རྟེན་འདི། །ས་ཆུ་མེ་རླུང་བསྡེབ་འཁྲུག་ནས། །མི་གནས་སྟོངས་པ་ཆེན་པོར་འགྱུར། །ཞེས་པ་ལྟར་ལས་བློ་གྲོས་བཟང་པོ་ནི་འདི་འཛིན་པ་ཐམས་ཅད་དང་། ལོ་ལྔ་བརྒྱ་ནི་ལོ་བོ་ཆེ་ཞེས། ལོ་ལྔ་བརྒྱ་ལྔ་བརྒྱར་ལོངས་པའོ། །ཞེས་ཀུན་མཁྱེན་ཆེན་པོ་གསུངས་སོ། །དེ་ཙམ་ཞིག་མིའི་འཇིག་རྟེན་དུ་བསྐལ་པ་དང་པོ་ནས། ཚེ་ལོ་བཅུ་པའི་ཡ་ཐོག་འདིའི་བར་སྣང་ལ། གཞན་རྣམས་ནི་མི་མ་ཡིན་པ་མཁའ་འགྲོ་མིའི་གནས་སུ་དོན་བྱེད་པར་གྲགས་སོ། །དེ་ལས་ཁྱད་པར་འཛམ་བུའི་གླིང་འདི་ཉིད་ཀྱི་དར་ནུབ་བཅུ་བཞི་ནི། སྒྲ་ཐལ་འགྱུར་ལས། བསྟན་པ་འཇིག་པའི་ཉེ་རྒྱུ་ནི། །དེ་དག་སོ་སོའི་གནས་དག་ཏུ། །གང་ཟག་ལོག་སྲེད་ཅན་ཞེས་བྱ། །རེ་རེ་དག་གིས་བསྟན་པ་ཀུན། །འཇིག་པར་བྱེད་པའི་ཉེ་རྒྱུ་ཡིན། །ཞེས་པས་མུན་པར་བྱེད་པའི་གང་ཟག་སྤྱིར་བསྟན་ནས། འདི་ཉིད་དང་པོ་མུན་པའི་དུས། །འཛམ་བུའི་གླིང་གི་ནུབ་ཕྱོགས་སུ། །རྒྱལ་པོ་ལག་པར་སོར་མོ་དྲུག །མདུན་ན་སོ་ལྷག་སྔོན་པོ་ཡོད། །ལག་པ་གཡས་པའི་གྲུ་མོ་ལ། །སྨེ་བ་ནག་པོ་སྡིག་པའི་དབྱིབས། །རབ་ཏུ་འཇིགས་པ་ཡོད་པ་ཡིས། །སངས་རྒྱས་བསྟན་པ་མུན་པར་གྱུར། །ལོ་ནི་དྲུག་ཅུའི་བར་ལ་འགྱུར། །ཅེས་དང་པོ་མུན་པར་ཡོད་ཅིང་། དེ་ནས་སྒྲོན་མེའི་དང་པོ་ལ་ལོ་སྟོང་དང་སུམ་བརྒྱ་ཡོད་པ་ནི། སྔ་མ་ལས། དེ་ནས་དཔལ་འཛིན་དང་པོས་འཛིན། །སྟོང་དང་སུམ་བརྒྱ་འདས་འོག་ཏུ། །ཞེས་བཤད་ལ། མུན་པ་ནི། ཡང་ནི་འཛམ་གླིང་བྱང་གི་ངོས། །གཟི་བརྗིད་ལྡན་པའི་རི་ཡི་རྩེར། །དགེ་སྦྱོང་གཟུགས་ལ་བྱང་སེམས་བྲལ། །གཡས་པ་ལ་ནི་རྣ་བ་གཉིས། །མིག་ནི་ཟུར་གསུམ་མས་ཡར་འགེབས། །འདི་དང་མུ་སྟེགས་སྡེ་རྩོད་ནས། །ལོ་ནི་དྲུག་ཅུ་མུན་པར་འགྱུར། །ཅེས་སོ། །དེ་ནས་སྒྲོན་མེ་གཉིས་པ་ནི། སྔ་མ་ལས། དེ་འོག་བདེ་བའི་ལྷ་ཞེས་བྱ། །ལོ་བརྒྱའི་བར་དུ་འཕེལ་བར་བྱེད། །ཅེས་དང་། ཡང་མུན་པ། དེ་འདས་འཛམ་གླིང་བྱང་ཤར་དུ། །ཆུ་བོ་རབས་མེད་འབབ་པའི་རྩར། །རྒྱལ་པོའི་ལུས་ལ་བསོད་ནམས་ལྡན། །མིག་ནི་གཅིག་ལས་མེད་པ་ལ། །ཡན་ལག་རགས་ཤིང་ལུས་ཤེད་ཅན། །འཕོང་དང་སྒྱུ་རྩལ་རྣམས་ཀྱིས་བརྒྱན། །འདིས་ནི་ཆོས་བྱེད་བསྣུབས་ནས་ནི། །ལོ་ནི་དྲུག་ཅུ་བསྟན་པ་ཉིད། །འདིར་ནི་ནུབ་ནས་གཞན་དུ་འགྱུར། །ཞེས་སོ། །ཡང་སྒྲོན་མེ་གསུམ་པ་ནི། དེ་འདས་རང་སངས་རྒྱས་ཀྱི་གཟུགས། །རྡོ་རྗེ་གདན་ནས་ནུབ་ཏུ་འབྱུང་། །དེས་ནི་བསྟན་པ་དམ་པ་ཉིད། །ལོ་ནི་བརྒྱ་དང་ཉི་ཤུར་གནས། །ཞེས་དང་། མུན་པ། དེ་འདས་འོག་ཏུ་འཛམ་གླིང་དབུས། །གསེར་གྱི་གྲོང་ཁྱེར་ཞེས་བྱ་བར། །གནས་བརྟན་ལུས་ལ་ལྕེ་རྩེ་གཉིས། །བོངས་ཆུང་ཡན་ལག་ཐུང་བ་ཞིག །སྡེ་པ་རྩོད་ཅིང་མཚོན་ཆ་འཛིན། །འདི་བྱུང་བས་ནི་མུན་པར་ཡང་། །ལོ་ནི་དྲུག་ཅུའི་བར་ལ་འགྱུར། །ཅེས་སོ། །སྒྲོན་མེ་བཞི་པ་ནི། དེ་འདས་འོག་ཏུ་འཛམ་གླིང་ཤར། །ཆུ་བོ་དག་ནི་ལོ་ཀ་ཏེ། །གཡས་ཀྱི་ཕྱོགས་ཀྱི་འགྲམ་དག་ཏུ། །དཔལ་གྱི་སེང་གེ་ཞེས་བྱ་བས། །ལོ་ནི་སྟོང་དང་བཞི་བརྒྱར་གནས། །ཞེས་དང་། མུན་པ། དེ་ནས་ཡང་ནི་འཛམ་གླིང་དབུས། །ཆུ་བོ་ཆེན་པོ་གངྒཱའི་འགྲམ། །རྒྱལ་པོའི་བུ་ལ་དཔུང་པ་ནི། །མར་གད་མདོག་དང་མཚུངས་པ་ལ། །རབ་ཏུ་བྱུང་བ་སོར་བཞིའི་ཚད། །འདི་བྱུང་བས་ནི་མུན་པར་ཡང་། །ལོ་ནི་དྲུག་ཅུའི་བར་ལ་འགྱུར། །ཞེས་སོ། །སྒྲོན་མེ་ལྔ་པ་ནི། དེ་འདས་འོག་ཏུ་ཀ་མ་ལ། །ཤཱི་ལ་ཞེས་པའི་གཙུག་ལག་ཁང་། །དེ་ཡི་བདག་པོ་གཞོན་ནུའི་མགོན། །འདིས་ནི་ལོ་སྟོང་བར་དུ་གནས། །ཞེས་དང་། མུན་པ། དེ་འོག་འཛམ་བུའི་གླིང་གི་ལྷོ། །ཚངས་པའི་གླིང་ཞེས་བྱ་བའི་གྲོང་། །དམངས་ཀྱི་རིགས་ལ་སེངྒེའི་མགོ །འདི་ནི་སྐྱེས་ནས་ཟླ་གསུམ་ནས། །དྲུག་ཅུའི་བར་ལ་མུན་པར་འགྱུར། །ཞེས་སོ། །སྒྲོན་མེ་དྲུག་པ་ནི། དེ་འོག་བྱ་རྒོད་ཕུང་པོ་ལ། །དགེ་སློང་མཛེས་བྱེད་གཞོན་ནུ་ཡིས། །ལོ་ནི་ལྔ་བརྒྱ་ལྔ་བཅུར་གནས། །ཞེས་དང་། མུན་པ། དེ་འདས་འོག་ཏུ་འཛམ་གླིང་མཚམས། །ཁ་ཆེའི་ཡུལ་ཞེས་བྱ་བ་ཡི། །སྒྲ་དང་ལྡན་པའི་གྲོང་ཁྱེར་དུ། །བྱ་ཡི་ལུས་ལ་མི་ཡི་གདོང་། །རིགས་ངན་དག་གི་ནང་དུ་སྐྱེ། །འདི་ཉིད་སྐྱེས་ནས་ལོ་བཅུ་ན། །དྲུག་ཅུ་དག་ཏུ་མུན་པར་འགྱུར། །ཞེས་སོ། །དེ་ནས་སྒྲོན་མེའི་ཐ་མ་བདུན་པ་ནི། དེ་འདས་འོག་ཏུ་འཛམ་གླིང་གི། །དབུས་ནས་ཤར་དུ་དཔག་ཚད་ལྔ། །དགེ་སློང་ཤཱཀྱ་ཛི་ཀ་ཡི། །འདིས་ནི་ལོ་བཅུའི་བར་དག་ཏུ། །སྒྲོན་མེ་འབར་བ་བཞིན་དུ་འགྱུར། །དེ་ལྟར་རིམ་པ་བདུན་གྱིས་ནི། །འཛམ་བུའི་གླིང་དུ་འཕེལ་འགྲིབ་བྱེད། །ཅེས་བཤད་པའི་ལོ་བཅུ་ཡང་ལོ་བོ་ཆེར་ཤེས་པར་བྱ་ཞིང་། དེ་ཡང་དང་པོའི་སངས་རྒྱས་ལས། སྟོང་པ་སྟོང་པ་མཁའ་ཀླུ་ལག་པ་ཐུབ་པ་རི་བོང་ཅན་ནི་རྫོགས་ལྡན་དུས་ཀྱི་ཚད་ཡིན་ནོ། །མཁའ་མཁའ་སྟོང་པ་རོ་དང་དགུ་དང་ཉིན་མོར་བྱེད་པ་གསུམ་ལྡན་ལོ་ཡི་གྲངས་སུ་རབ་ཏུ་གྲགས། །སྟོང་པ་མཁའ་དང་རིག་བྱེད་རོ་དང་ལག་འགྲོ་ཞེས་བྱ་ཉིས་ལྡན་ལོ་ནི་ཡང་དག་གོ །སྟོང་པ་ནམ་མཁའ་མཁའ་དང་མིག་དང་ཡོན་ཏན་ཆུ་གཏེར་རྩོད་ལྡན་ལོ་ཡི་གྲངས་སུ་འགྱུར། །ཞེས་དུས་བཞི་སོ་སོའི་ཚད་རྫོགས་ལྡན་ལ་མི་ལོ་འབུམ་ཕྲག་བཅུ་བདུན་དང་སྟོང་ཕྲག་ཉི་ཤུ་རྩ་བརྒྱད། སུམ་ལྡན་ལ་འབུམ་ཕྲག་བཅུ་གཉིས་དང་སྟོང་ཕྲག་དགུ་བཅུ་རྩ་དྲུག །ཉིས་ལྡན་ལ་འབུམ་ཕྲག་བརྒྱད་དང་སྟོང་ཕྲག་དྲུག་ཅུ་རྩ་བཞི། རྩོད་ལྡན་ལ་འབུམ་ཕྲག་བཞི་དང་སྟོང་ཕྲག་སུམ་ཅུ་རྩ་གཉིས་ཡོད་པའི་གཏན་ཚིགས་ཀྱི་བསམ་པར་མི་བྱ་སྟེ། འདི་ལ་དམིགས་བསལ་གྱི་དུས་བདུན་དུ་རྣམ་པར་གཞག་པ་དང་། དངོས་ཀྱི་བསྟན་པ་དེས་ཇི་ཙམ་གདུལ་བྱའི་གྲངས་ཡིན་པ་ཤེས་པར་བྱའོ། །གཉིས་པ་རིག་འཛིན་ངེས་པའི་ལུང་བསྟན་བྱེ་བྲག་ཏུ་བཤད་པ་ནི། དེ་ལྟར་དར་ནུབ་ཀྱི་རིམ་པ་བདུན་ཚེ་ལོ་བཅུ་པས་ཚངས་པའི་སྒྲོན་མེའི་བསྟན་པ་ཐ་མ་འདི་ཉིད་འཛིན་པ་པོ་བྱེ་བྲག་ཏུ་ཐལ་འགྱུར་ནས་ལུང་བསྟན་པ་ལྟར་གླེང་བ་ནི། ང་ནི་མྱ་ངན་འདས་འོག་ཏུ། །ནུབ་ཕྱོགས་ཨོ་རྒྱན་དག་གི་ཡུལ། །དྷ་ན་ཀོ་ཤའི་ལྷ་ལྕམ་ལ། །ཕ་མེད་བུ་སྟེ་བཛྲ་ཧེ། །འདིས་ནི་དམ་པའི་བསྟན་པ་འཛིན། །ཅེས་ཞིང་འདིའི་རྒྱ་གར་འཕགས་པའི་ཡུལ་དུ་རྒྱུ་འབྲས་ལས་འདས་པའི་ཐེག་པའི་རྩེ་མོ་སྣང་བར་བྱེད་པའི་སྟོན་པ་མཆོག །གསང་བདག་སྤྲུལ་པའི་སྐུ་རིག་འཛིན་གྱི་གཙོ་བོ་དགའ་རབ་རྡོ་རྗེ་སྟེ། དེའི་ལོ་རྒྱུས་ལ་གཅིག་ཏུ་མ་ངེས་པའི་རྣམ་པར་ཐར་པ་མཐའ་ཡས་པར་སྣང་བ་ནི། རྒྱུད་བླ་མ་ལས། སངས་རྒྱས་ཁམས་དང་སངས་རྒྱས་བྱང་ཆུབ་དང་། །སངས་རྒྱས་ཡོན་ཏན་སངས་རྒྱས་ཕྲིན་ལས་རྣམས། །དག་པའི་སེམས་ཅན་གྱིས་ཀྱང་བསམ་བྱ་མིན། །ཞེས་པ་ལྟར་སྐུ་གསུང་ཐུགས་ཀྱི་རོལ་པ་ཚད་མེད་ཅིང་གདུལ་བར་བྱ་བའི་སྣང་ཚུལ་དང་བསྟུན་ནས་གང་ཟག་རེའི་མོས་ངོར་ཡང་མཛད་པ་མཐའ་ཡས་པར་སྟོན་པའི་ཕྱིར་རྟག་པ་ཐེར་ཟུག་ཏུ་སྨྲ་བར་མི་རིགས་ཀྱང་། རེ་ཞིག་གདུལ་བྱ་ངོར་སྣང་གི་མཛད་པ་དང་བསྟུན་ནས་གླེང་ན། རྒྱ་གར་ནུབ་ཕྱོགས་ཨོ་རྒྱན་གྱི་ཡུལ། དྷ་ན་ཀོ་ཤའི་གླིང་། མཚོ་ཀུ་ཏྲའི་འགྲམ། རྡོ་རྗེ་གླིང་ཕུག་བྱ་བའི་གནས་སུ། ཡབ་རྒྱལ་པོ་དྷ་ཧེ་ན་ཏ་ལོ་ཞེས་བྱ་བ་དང་། ཡུམ་རྒྱལ་མོ་བརྩོན་རྒྱལ་གཉིས་ཀྱི་སྲས་མོ་བྲ་ར་ནི་ཞེས་བྱ་བ་མཚན་དང་ལྡན་ལ། དགེ་བའི་སེམས་དང་བྱང་ཆུབ་ཀྱི་ཐུགས་ལྷག་པར་ལྡན་པ་ཞིག་ཡོད་པ། རབ་ཏུ་བྱུང་ནས་དགེ་སློང་མའི་ཁྲིམས་རྣམ་པར་དག་པ་བསྲུངས་ཤིང་། འཁོར་དགེ་སློང་མ་ལྔ་བརྒྱ་དང་བཅས་གནས་པ་ན། ཤིང་མོ་གླང་གི་ལོ་དབྱར་ཟླ་ར་བའི་ཚེས་བརྒྱད་ཀྱི་ཐོ་རེངས་ཁའི་རྨི་ལམ་ན། དེ་བཞིན་གཤེགས་པ་ཐམས་ཅད་ལས་འཕྲོས་ཏེ་ཉི་ཟླ་གཉིས་སུ་གྱུར་པ་ལས། ཉི་མ་སྤྱི་བོ་ནས་མར་དང་ཟླ་བ་རྐང་པ་ལས་ཡར་ཐིམ་པ་རྨིས་སོ། །དེའི་ནངས་པར་རྟོག་པ་སྐྱེས། མཚོ་ཀུ་ཏྲའི་འགྲམ་དུ་ཁྲུས་བྱས་ཏེ་ཁ་ཤར་དུ་ཕྱོགས་ནས་འདུག་པ་ལས། ཕྱག་ན་རྡོ་རྗེས་གསེར་གྱི་ངང་པ་ཞིག་ཏུ་སྤྲུལ་ནས་ལྷའི་བུ་སེམས་ལྷག་ཅན་ཡི་གེ་ཧཱུྃ་གཅིག་ཏུ་བསྡུས། སྤྲུལ་པའི་བྱ་ངང་པ་བཞི་དང་བཅས་ནམ་མཁའ་ལས་བབས་ཏེ་སྲས་མོའི་མདུན་དུ་ཁྲུས་བྱས་པའི་མཐར། སྤྲུལ་པ་བཞི་ནམ་མཁའ་ལ་འཕུར། སྤྲུལ་པའི་གཙོ་བོ་གསེར་གྱི་བྱ་སྲས་མོའི་ཐུགས་ཀར་ཆགས་ཏེ་མཆུ་ལན་གསུམ་གཏུགས་ནས་ཧཱུྃ་འོད་འབར་བ་ཞིག་བསྟིམས་ཏེ་སྔར་གྱི་གནས་ལ་འཕུར་རོ། །དེར་སྲས་མོ་ཡ་མཚན་དུ་གྱུར་ཏེ་རྨི་ལམ་དང་བྱ་ངང་པའི་ལོ་རྒྱུས་རང་གི་ཡབ་དང་འཁོར་སོགས་ལ་ཟློས་པས། ཡབ་ཡ་མཚན་པར་གྱུར་ཏེ་སངས་རྒྱས་ཀྱི་སྤྲུལ་པ་འབྱུང་ངེས་གསུངས་ཤིང་བྱ་དགའ་དང་རིམ་གྲོ་ཡང་མང་དུ་མཛད་དོ། །ལོ་དུས་ན་སྲས་མོའི་ཐུགས་ཀ་ནས་གསེར་ལས་གྲུབ་པའི་རྡོ་རྗེ་རྩེ་དགུ་པ་གཅིག་བྱུང་བ་ལས། ཐམས་ཅད་ཡ་མཚན་པར་གྱུར་ཏོ། །དེར་རྡོ་རྗེ་དེ་རང་ཞིག་པ་ལས་ཁྱེའུ་མཚན་དཔེས་བརྒྱན་པ། ཕྱག་གཡས་ན་རྡོ་རྗེ་དང་། གཡོན་ན་རིན་པོ་ཆེའི་ཕྱག་ཤིང་ཐོགས་པ། རྡོ་རྗེ་སེམས་དཔའ་ནམ་མཁའ་ཆེ་ལ་སོགས་པ་ཞལ་འདོན་དུ་མཛད་པ་ཞིག་བྱུང་ངོ་། །ཁྱེའུ་དེར་ནངས་པར་ཉི་མའི་འོད་ཟེར་ལ་བ་སྤུའི་བུ་ག་ནས་དེ་བཞིན་གཤེགས་པ་ཐམས་ཅད་གཤེགས་བཞུད་མཛད་ཅིང་། དེ་དག་གི་མགྲིན་གཅིག་ཏུ་ཁྱོད་ཀྱིས་སེམས་ཅན་གྱི་དོན་གྱིས་ཤིག་པར་ལུང་སྟོན་པ་དང་། ལྷ་མ་སྲིན་སྡེ་བརྒྱད་ཐམས་ཅད་ཀྱང་ཕྱག་བྱེད་པར་སྣང་ངོ་། །རེ་ཞིག་གི་ཚེ་དཔལ་རྡོ་རྗེ་སེམས་དཔའ་དངོས་སུ་བྱོན་ནས་གཡས་སུ་ཀློང་ཆེན་བམ་པོ་ཉི་ཁྲི་ཆིག་སྟོང་གི་པུ་ཏི་དང་གཡོན་དུ་བྱང་ཆུབ་སེམས་ཀྱི་ཕྱག་ཤིང་ལ་སེམས་མད་བཅོ་བརྒྱད་ཡོད་པ་གཏད་ནས། བྱང་ཆུབ་ཡེ་ནས་མ་བཅོས་པ། །ཡེ་ནས་སངས་རྒྱས་པར་བཤད་ན། །སྐྱེ་ཤི་མེད་པར་དབང་བསྐུར་རོ། །ཞེས་གསུངས་ནས་མི་སྣང་བར་གྱུར། དེར་ཐམས་ཅད་དགའ་སྟེ་བྲམ་ཟེ་མཚན་མཁན་ལ་བསྟན་པས། བྲམ་ཟེ་ཤིན་ཏུ་ངོ་མཚར་ཏེ། འདི་ནི་སྤྲུལ་པའི་སྐུ་ཐེག་པ་མཆོག་གི་བསྟན་པའི་བདག་པོར་འགྱུར་ཞེས་ལུང་བསྟན། མཚན་ཡང་དགའ་རབ་རྡོ་རྗེར་བཏགས་སོ། །དེར་གཞོན་ནུ་ནས་རོལ་རྩེད་ལ་སོགས་པ་ཐམས་ཅད་ལ་འགྲན་ཟླ་མེད་པར་གྱུར་ནས་རྒྱལ་སྲིད་བཟུང་བ་ན། གསང་བའི་བདག་པོ་ཕྱག་ན་རྡོ་རྗེ་དངོས་སུ་བྱོན་ནས། རྒྱལ་ཐབས་སྤྱི་བླུགས་རྫོགས་པའི་དབང་ལ་སོགས་པ་དབང་རྣམས་རྫོགས་པར་བསྐུར། ལྷོ་ནུབ་འདམ་ཤོད་ཀྱི་གླིང་ནས་པུ་ཏྲ་རྣམ་གསུམ་བཀུག་སྟེ་དབང་བསྐུར་དམ་ལ་བཞག །ཀློང་དགུ་བམ་པོ་ཉི་ཁྲི་ལ་སོགས་པའི་རྒྱུད་དབང་མན་ངག་ཐམས་ཅད་དུས་མཐའི་སྐད་ཅིག་ལ་རྫོགས་པར་གཏད་ནས་བསྟན་པའི་སྒྲོན་མེ་ཆེན་པོར་དབང་བསྐུར་དམ་ཅན་རྣམས་ལ་གཉེར་དུ་གཏད་དོ། །དེར་སྤྲུལ་པའི་སྐུ་དགའ་རབ་རྡོ་རྗེ་ཉིད་སྐད་ཅིག་ཉིད་ལ་རྩོལ་མེད་རྫོགས་པ་ཆེན་པོའི་ས་ལས་མངོན་པར་སངས་རྒྱས། དུས་གསུམ་གྱི་སངས་རྒྱས་ཐམས་ཅད་དང་དགོངས་པ་གཅིག་ཏུ་གྱུར། སྤྱིར་རྒྱུ་འབྲས་ཀྱི་ཆོས་མཐའ་ཡས་པ་དང་། ཁྱད་པར་རྩོལ་མེད་རྫོགས་པ་ཆེན་པོའི་བསྟན་པ་དམ་པའི་ཆོས། རྩ་བའི་རྒྱུད་ཀློང་དགུ་བམ་པོ་ཉི་ཁྲི། ཡན་ལག་གི་རྒྱུད་རྒྱལ་བ་རིགས་ལྔ། གསང་བདག་དཔའ་བོའི་བཤད་རྒྱུད། བྱེ་བྲག་གི་རྒྱུད་སྡེ་བསམ་གྱིས་མི་ཁྱབ་པ་ཐམས་ཅད་དང་། རང་གྲོལ་མངོན་སུམ་དུ་སྟོན་པའི་མན་ངག །རྒྱལ་ཐབས་སྤྱི་བླུགས་ལ་སོགས་ཏེ་རྒྱལ་བ་སྐུ་བཞིའི་དབང་གི་ཆུ་བོ་ཐམས་ཅད་ཐུགས་འོད་གསལ་ནམ་མཁའ་ཀློང་ཆེན་གྱི་དབྱིངས་སུ་རྫོགས་ནས། རྩོལ་མེད་རང་བྱུང་རྫོགས་པ་ཆེན་པོའི་བསྟན་པ་འཁོར་ཐུན་མོང་མ་ཡིན་པ་ལ་སྒྲོགས་ཤིང་བཞུགས་སོ། །དེ་ལྟ་བུའི་སློབ་དཔོན་དགའ་རབ་རྡོ་རྗེ་ལ་ཐུགས་ཀྱི་སྲས་འཇམ་དཔལ་བཤེས་གཉེན་གཙོ་བོར་གྱུར་པའི་གསུམ་བརྒྱུད། བདུན་བརྒྱུད། ཉི་ཤུ་རྩ་གཅིག་བརྒྱུད་པ་སོགས་མཐའ་ཀླས་པར་ཡོད་དེ་སེམས་ཕྱོགས་སྤྱིའི་བརྒྱུད་པ་དང་འདྲ་འབག་ཆེན་མོར་གསལ་ལོ། །དེ་ལས་ཤན་འབྱེད་པ་བྲམ་ཟེའི་སྐོར། ལ་བཟླ་བ་རྒྱལ་པོའི་སྐོར། རང་གྲོལ་མངོན་སུམ་དུ་སྟོན་པ་མན་ངག་གི་སྐོར་དང་གསུམ་ལས། ཁྱད་པར་དུ་གྱུར་པ་ཕྱི་མ་མན་ངག་གི་སྐོར་ལའང་བརྒྱུད་སྲོལ་ཐ་དད་པ་ཡོད་དེ་འདིར་རིག་འཛིན་ངེས་པའི་ལུང་བསྟན་ལྟར་བརྡ་བསྟན་པ་ཙམ་གྱིས་རྟོགས་གྲོལ་དུས་མཉམ་དུ་གྱུར་ཀྱང་བསྟན་པ་ཡོངས་སུ་རྫོགས་པར་བྱ་ཕྱིར་རྒྱུད་དང་མན་ངག་ལ་ནན་ཏན་དུ་བྱས་པའི་སློབ་དཔོན་ཆེན་པོ་འཇམ་དཔལ་བཤེས་གཉེན་ནི་ཐལ་འགྱུར་ལས། དེ་ཡིས་རྗེས་འཛིན་ནུབ་ཀྱི་ཕྱོགས། །བྲམ་ཟེའི་ཕྲུག་གུ་སྐལ་ལྡན་པ། །མཉྫུ་ཤྲཱི་པ་ཏི་ཞེས། །ལོ་ནི་བདུན་ཅུ་རྩ་ལྔར་འཛིན། །ཞེས་པ་ལྟར་གང་གི་ཚེ་ཡབ་བྲམ་ཟེ་དཔལ་ལྡན་སྐྱོང་དང་། ཡུམ་བྲམ་ཟེ་མོ་ཀུ་ཧ་ན་ཞེས་བྱ་བ་ལ། འཇམ་དཔལ་དབྱངས་ཀྱི་སྤྲུལ་པའི་སྲས་ཁྱེའུ་མཚན་དང་ལྡན་པ་ཞིག་བྱུང་སྟེ། དེའི་མིང་བྲམ་ཟེ་སྙིང་པོ་གྲུབ་པའམ། བདེ་མཆོག་སྙིང་པོ་ཞེས་གྲགས་ཏེ་རིག་པའི་གནས་ལྔ་ལ་མཁས་པའི་དགེ་སློང་རྒྱུ་འབྲས་ཀྱི་ཆོས་ཐམས་ཅད་ཐུགས་སུ་ཆུད་པ་ཞིག་ཏུ་གྱུར་ཏོ། །དེ་པཎྜི་ཏ་ལྔ་བརྒྱའི་མཆོག་ཏུ་གྱུར་ནས་བཞུགས་པའི་ཚེ། སྤྲུལ་པའི་སྐུ་དགའ་རབ་རྡོ་རྗེ་ཞེས་བྱ་བས་རྒྱུ་འབྲས་ལས་འདས་པའི་རྨད་བྱུང་བསྟན་པའི་སྙིང་པོ། རྩོལ་མེད་རྫོགས་པ་ཆེན་པོ་ཞེས་བྱ་བ་སྒྲོག་གོ་ཞེས་པཎྜི་ཏ་ཀུན་གྱིས་ཐོས་པ་ལས། དེར་བྲམ་ཟེ་སྙིང་པོ་གྲུབ་པ་ལ་འཕགས་པ་འཇམ་དཔལ་གྱིས་ལུང་བསྟན་པ། ནུབ་ཕྱོགས་ཨོ་རྒྱན་གྱི་ཡུལ་དྷ་ན་ཀོ་ཤའི་གླིང་། མཚོ་ཆེན་པོ་ཀུ་ཤའི་འགྲམ། དུར་ཁྲོད་གསེར་གླིང་ཧེ་ཆེན་བརྡལ་བའི་འདབས་རྡོ་རྗེ་གླིང་གི་ཕུག་ན། རྡོ་རྗེ་སེམས་དཔའི་སྤྲུལ་པ་སངས་རྒྱས་ཐམས་ཅད་ཀྱིས་རྩོལ་མེད་བསྟན་པའི་སྒྲོན་མེར་དབང་བསྐུར་བ། སྤྲུལ་པའི་སྐུ་དགའ་རབ་རྡོ་རྗེ་ཞེས་བྱ་བ་ཡོད་ཀྱི། དེ་ལ་རྨད་བྱུང་བསྟན་པའི་སྙིང་པོ་ཨ་ཏི་ཡོ་ག་ཞེས་བྱ་བ་བྱ་རྩོལ་མེད་པར་སྐད་ཅིག་ལ་འཚང་རྒྱ་བའི་ཆོས་ཡོད་པས་དེ་ལོང་ལ་སྤྲུལ་པའི་སྡུད་པ་པོ་གྱིས་ཤིག་པར་ལུང་བསྟན་ནོ། །དེར་པཎྜི་ཏ་གཞན་རྣམས་ན་རེ། རྒྱུ་འབྲས་ལས་འདས་པའི་ཆོས་ཡོད་པ་མི་རིགས་ཞེས་སུན་དབྱུང་བར་བགྲོས་སོ། །བྲམ་ཟེ་སྙིང་པོ་གྲུབ་པས་ཀྱང་མཁྱེན་བཞིན་དུ་ཆོས་དང་གང་ཟག་གི་ཆེ་བ་འབྱིན་པའི་ཕྱིར་པཎྜི་ཏ་རྣམས་ཀྱི་རྗེས་སུ་བགྲོས་པ་ལས་ཐམས་ཅད་ཞལ་འཆམ་སྟེ་ཨོ་རྒྱན་གྱི་ཡུལ་ས་ཐག་རིང་བ་དང་། ཀུན་གྱིས་མི་བགྲོད་པས། སྙིང་པོ་གྲུབ་པ་དང་། རཱ་ཛ་ཧ་སྟི་ལ་སོགས་པ་བདུན་སུན་དབྱུང་བར་མངགས་སོ། །དེར་བདུན་པོས་དགའ་རབ་རྡོ་རྗེའི་དྲུང་དུ་རྟོལ་ཏེ་ཉམས་སད་པའི་ཕྱིར་དུ་རྒྱུ་འབྲས་ཀྱི་ཐེག་པའི་ཆེ་བ་དང་། ཆོས་ཀྱི་བགྲོ་བ་བྱས་པས། རྒྱུའི་ཆོས་སྡེ་སྣོད་གསུམ་དང་། འབྲས་བུའི་ཆོས་གསང་སྔགས་ཕྱི་ནང་གཉིས་གང་གི་སྒོ་ནས་ཀྱང་མ་ཐུབ་པས། བདེ་མཆོག་སྙིང་པོས་མཁྱེན་བཞིན་དུ་པཎྜི་ཏ་གཞན་རྣམས་ལ་འོ་ཅག་གིས་རྩོད་པ་ནོངས་པས་སྤྲུལ་པའི་སྐུ་འདི་ལ་རྒྱུ་འབྲས་ལས་འདས་པའི་ཆོས་མི་ཞུའམ་ཞེས་བགྲོ་བ་ལྟར་མཛད་པས། པཎྜི་ཏ་ལ་ལ་ནི་སྐྱེངས་ནས་ངོ་གནག་པར་གྱུར་ཅིང་། ལ་ལ་ནི་འོ་ཅག་གིས་རྩོད་ཅིང་བརྙས་པ་བྱས་པས་ཞུ་བར་མི་སྤོབས་ཟེར་རོ། །དེར་བདེ་མཆོག་སྙིང་པོ་ལ་སོགས་པས་བཤགས་པ་བྱ་བར་བགྲོས་ཏེ་པཎྜི་ཏ་རྣམས་ཀྱིས་སྤྲུལ་པའི་སྐུ་དགའ་རབ་རྡོ་རྗེ་ལ་ཕྱག་དང་བསྐོར་བ་བྱས། མཆི་མ་སྙིལ་བའི་ཚེ་སྙིང་པོ་གྲུབ་པ་རང་གི་ལྕེ་བཅད་དེ་བཤགས་པ་བྱ་བར་དགོངས་པ་དང་། རིག་འཛིན་མཆོག་གི་སྤྲུལ་སྐུ་དགའ་རབ་རྡོ་རྗེས་མཁྱེན་ཏེ་ཚིགས་སུ་བཅད་པ་འདི་གསུངས་སོ། །མཉམ་ཉིད་ཕྱོགས་བྲལ་ལྷུན་གྲུབ་བདེ་བ་ཆེ། །ཆོས་རྣམས་ཐམས་ཅད་བྱང་ཆུབ་སྙིང་པོ་ལ། །འགྲོ་དྲུག་རང་ལ་ཡུལ་བཟུང་ཞེན་པས་བཅིངས། །མུ་སྟེགས་མཐར་འཛིན་རྟག་ཆད་ལོག་ལྟར་ཞུགས། །ཐེག་བརྒྱད་རང་ལ་གཉིས་བཟུང་ཡིན་མིན་གྱིས། །ཞེ་འདོད་ཕྱོགས་རིས་དབྱིངས་ལ་ཕྱོགས་སུ་ཞེན། །མཉམ་པའི་དོན་ལ་ཕྱོགས་དང་རིས་སུ་བཅད། །རང་ལ་ཡོད་བཞག་མེད་པ་གཞན་དུ་འཚོལ། །ལྷུན་གནས་བདེ་བོར་རྩོལ་བས་དང་དུ་ལེན། །རང་སེམས་སངས་རྒྱས་ནམ་ཞིག་དུས་ལ་ལྟོས། །མཉམ་ཉིད་མ་རྟོགས་ཞེ་འདོད་ཕྱོགས་ལྟ་ལ། །འདི་ཡིན་ཐང་ཆད་ཡུས་རྒྱས་སྙིང་རེ་རྗེ། །དེ་བས་ཕྱོགས་འཛིན་ཞེན་པའི་དུག་ཆོམས་ལ། །མཉམ་ཉིད་ཕྱོགས་བྲལ་བདེ་བའི་དོན་ལ་ཞུགས། །ཞེས་གསུངས་ནས་སྙིང་པོ་གྲུབ་པ་ལ་ཁྱོད་ཀྱིས་ལྕེ་བཅད་པས་སྡིག་པ་མི་འདག །རྒྱུ་འབྲས་ལས་འདས་པའི་ཆོས་ཁྱད་དུ་འཕགས་པ་ཞིག་རྩོམས་ཤིག །དེས་སྡིག་པ་འདག་པར་འགྱུར་རོ། །ཞེས་གསུངས་པས་ཕྱིན་ཆད་བྱང་སེམས་་བསྟན་བཅོས་རྒྱུད་ཀྱི་དངོས་པོ་ཅན་ཡིན།་་་སྡེ་ལ་འགྲེལ་པ་གསེར་ཞུན་བརྩམས་ཤིང་བཀའི་བསྡུ་བ་པོ་མཛད། དེར་བརྡ་བསྟན་པ་ཙམ་གྱིས་རྟོགས་གྲོལ་དུས་མཉམ་དུ་གྱུར་ཀྱང་བསྟན་པ་ཡོངས་སུ་རྫོགས་པར་བྱ་བའི་སླད་དུ་ཕྱག་དང་བསྐོར་བ་བྱས། རིན་པོ་ཆེའི་མཎྜལ་སྣ་ཚོགས་པ་སྤྲུལ་པའི་སྐུ་དགའ་རབ་རྡོ་རྗེ་ལ་ཕུལ་ནས་གསོལ་བ་བཏབ་སྟེ་སྙིང་པོའི་དོན་ཞུས་པས། སེམས་སྡེའི་སྐོར་རྩ་བའི་རྒྱུད་བརྒྱད་དང་། ཡན་ལག་གི་རྒྱུད་མཐའ་ཡས་པ། དབང་དང་མན་ངག་ལ་སོགས་པ་རྒྱས་པར་གནང་། དེ་ནས་ཀློང་སྡེའི་སྐོར། ཕྱི་རྩིབས་རྒྱ། ནང་གསང་རྒྱ། གསང་བ་རྒྱའུ་ཆུང་། དགོངས་པ་གཏད་རྒྱའི་སྐོར་ལ་སོགས་པ་རྒྱུད་མན་ངག་དང་བཅས་པས་མཚོན་ཏེ་ཨ་ཏི་ཡོ་གའི་རྒྱུད་དཔག་ཏུ་མེད་པ་གསུངས་སོ། །དེས་ཀྱང་ཐུགས་མ་ཚིམ་པར་ཕྱག་དང་བསྐོར་བ་བྱས་ཏེ་རིན་པོ་ཆེའི་མེ་ཏོག་ཕུལ་ནས་གསོལ་བ་བཏབ་པས། རྒྱལ་ཐབས་སྤྱི་བླུགས་ཀྱི་དབང་བསྐུར། རང་གྲོལ་མངོན་སུམ་དུ་སྟོན་པ་མན་ངག་སྡེའི་སྐོར་ཡང་བྱིན་ཏེ་ཕྱི་ལྟར་འཇམ་དཔལ་བཤེས་གཉེན། ནང་ལྟར་རྡོ་རྗེ་བདེ་བ་རྩལ་དུ་མིང་བཏགས། སླར་ཆུ་བོ་ལྡན་ཏེའི་མགོར་དགའ་རབ་རྡོ་རྗེ་འོད་ཕུང་དུ་ཡལ་བའི་ཚེ། འདས་རྗེས་ཀྱི་གླེགས་བམ་བབས་པ་གཟིགས་པ་ཙམ་གྱིས་ཐུགས་སུ་ཆུད། དགའ་རབ་རྡོ་རྗེ་དང་རྟོགས་པ་མཉམ་པར་གྱུར་པས་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་བཏུས་ནས་གནས་པ་སེམས་ཀྱི་སྡེ། བྱ་བྲལ་ཀློང་གི་སྡེ། ཟབ་པ་མན་ངག་གི་སྡེ་དང་གསུམ་དུ་ཕྱེ་ནས། གནད་ལས་ཟབ་པ་སྙིང་གི་ཐིག་ལེའི་སྐོར་ལ་བཤད་རྒྱུད་དང་། རྣར་རྒྱུད་གཉིས་སུ་ཕྱེ་ནས་རྣར་རྒྱུད་མཆན་དུ་བཏབ། བཤད་རྒྱུད་སྙིང་གི་ཐིག་ལེ་སྤེལ་བའི་གནས་མ་རྙེད་པས་རྡོ་རྗེ་གདན་དུ་གཏེར་ལ་སྦས་ཏེ་རྒྱལ་པོ་དྷ་ཧེ་ན་ཏ་ལོ་སོགས་པ་ལ་དགོངས་པའི་དོན་སྟོན་བཞིན་སོ་ས་གླིང་གི་དུར་ཁྲོད་དུ་ལོ་བརྒྱ་དང་ཉི་ཤུ་རྩ་དགུར་བཞུགས་སོ། །འདྲ་འབག་ཆེན་མོར་སློབ་དཔོན་འདིས་དགའ་རབ་རྡོ་རྗེའི་དངོས་སློབ་དྷ་ཧེ་ན་ཏེ་ལོ། དེས་རང་གི་སྲས་ཐུ་བོ་རཱ་ཛ་ཧསྟི། དེས་སྲས་མོ་པྲ་ར་ནི། དེས་ཀླུའི་རྒྱལ་པོ་ནཱ་ག་རཱ་ཛ་སཾ་ཀྲྀ་ཏ། དེས་གནོད་སྦྱིན་མོ་བྱང་ཆུབ། དེས་སྨད་འཚོང་མ་པ་རི་ནི། དེས་ཁ་ཆེའི་མཁན་པོ་རབ་སྣང་། དེས་མ་ཧཱ་རཱ་ཛ། དེས་སྲས་མོ་གོ་མ་དེ་ཝཱི། དེས་ཨཱ་ཅཱརྱ་ཨ་ལོ་ཀེ། དེས་ཁྱིའི་རྒྱལ་པོ་སྔ་མ་ཞེས་རིག་པའི་གནས་ལྔ་དང་ཏནྟྲ་སྡེ་བཅོ་བརྒྱད་ལ་མཁས་པ་ཞེས་པས། དགེ་སློང་ཀུ་ཀུ་རཱ་ཛའོ། །དེས་དྲང་སྲོང་བྷ་ཤི་ཏ། དེས་སྨད་འཚོང་མ་བདག་ཉིད་མ། དེས་ནཱ་གཱརྫུ་ན་སྟེ་མགོན་པོ་ཀླུ་སྒྲུབ། དེས་ཁྱིའི་རྒྱལ་པོ་ཕྱི་མ། དེས་འཇམ་དཔལ་ཕྱི་མ་ཞེས་བྱ་བ་རྒྱུ་འབྲས་ཀྱི་ཆོས་ལ་ཤིན་ཏུ་མཁས་པ་ཞེས་བཤད་པ་ནི། སློབ་དཔོན་འཇམ་དཔལ་བཤེས་གཉེན་གཤེགས་ནས་ལོ་བརྒྱ་ཉེར་ལྔ་ན་འཇམ་དཔལ་བཤེས་གཉེན་ཉིད། ནུབ་ཕྱོགས་སུ་པདྨ་ལས་རྫུས་ཏེ་སྐྱེས་པ་ལ་འཇམ་དཔལ་བཤེས་གཉེན་ཕྱི་མར་གྲགས་འདིས་ཨཱརྱ་དེ་ཝ་ལ་གདམས་པ་སྙིང་ཐིག་ལྐོག་ཆོས་སུ་བསྟན་པས་ཨཱརྱ་དེ་ཝ་ཡང་འཇའ་ལུས་ཀྱི་གྲུབ་མཐའ་སྙོགས། རྫོགས་པ་ཆེན་པོ་དང་དོན་ཐ་མི་དད་པའི་འཇམ་དཔལ་ཞལ་ལུང་ཞེས་སྔགས་གསར་མར་གྲགས་ཆེ་བ་དེ་བརྩམས། སངས་རྒྱས་ཡེ་ཤེས་ཞབས་ལ་སོགས་པའི་སློབ་མ་ཡང་མང་། ཁྱད་པར་ཨོ་རྒྱན་ཆེན་པོ་ལ་གོང་དུ་བཤད་པའི་རྣལ་འབྱོར་ཆེན་པོའི་རྒྱུད་སྡེ་དང་། གཤེད་སྐོར་རྒྱ་མཚོ་སྟོན་པའི་སློབ་དཔོན་ཡང་འདི་ཉིད་དོ། །འདྲ་འབག་ཏུ་སློབ་དཔོན་འཇམ་དཔལ་བཤེས་གཉེན་གྱིས་རྫོགས་ཆེན་ལ་རང་བྱན་ཆུད་པའི་རྟོགས་པ་བརྗོད་པའི་ཚེ། བདག་ནི་འཇམ་དཔལ་དཔལ་བཟང་སྟེ། །ཞེས་པའི་མཚན་གྱིས་ཀྱང་ཤེས་པར་ནུས་ལ། འོ་ན་གོང་དུ་བཤད་མ་ཐག་པའི་འཇམ་དཔལ་བཤེས་གཉེན་སྔ་མ་ལ་དགའ་རབ་རྡོ་རྗེ་འོད་ཕུང་དུ་ཡལ་རྗེས་སུ་འདས་རྗེས་བབས་པར་བཤད་པའི་ཕྱིར། དགེ་སློང་དཔལ་བཟང་གི་འཇམ་དཔལ་གྲུབ་པ་ཡིན་ཞེས་པའི་ལུང་སློབ་དཔོན་དེ་ཉིད་ཀྱིས་བསྟན་པས་སྔ་ཕྱི་གོ་མི་མཚུངས་ཞེ་ན། དགའ་རབ་རྡོ་རྗེ་འོད་ཕུང་དུ་ཡལ་ལོ་ཞེས་པ་ལས། ལྷག་མ་མེད་པའི་དབྱིངས་སུ་མྱ་ངན་ལས་འདས་པའམ། ཐ་མལ་ལྟར་ལུས་སེམས་བྲལ་ནས་འཚོ་བའི་འདུ་བྱེད་ཟད་པ་ལྟ་བུ་མ་ཡིན་པའི་ཕྱིར། ངེས་གསང་རྫོགས་པ་ཆེན་པོ་ལ་སྐྱེ་བ་དང་འཇུག་པའི་སོ་འཚམས་ནས་སྣང་བ་རང་ལོག་གི་མན་ངག་ཡོད་ཅིང་། དེར་ཡང་མ་ཟད་གྲུབ་ཐོབ་ཀྱི་རྣམ་པར་ཐར་པ་ཡིན་པས་པཎ་ཆེན་ནཱ་རོ་པ་སྤྱོད་པ་ལ་གཤེགས་པ་ལྟར་ཀུན་གྱིས་སྤྱོད་ཡུལ་དུ་མི་མངོན་པ་ནས་བཟུང་འོད་ཕུང་དུ་ཡལ་བའི་བརྡར་བརྟགས་པ་ལས། གཞན་དུ་དག་པའི་གདུལ་བྱ་ལའང་མི་སྣང་བའི་གཏན་ཚིགས་བསྒྲུབ་ཏུ་མེད་པས་འགལ་བ་མེད་པར་གྲུབ་ལ། དཔེར་ན་སློབ་དཔོན་ཆེན་པོ་བི་མ་ལ་རི་བོ་རྩེ་ལྔ་ན་བཞུགས་པ་བཞིན་ནོ། །དེའི་ཕྱིར་སྔགས་གསར་མ་ལ་གྲགས་ཆེ་བའི་སློབ་དཔོན་ཆེན་པོ་དེ་དག་གིས་ཀྱང་རྫོགས་པ་ཆེན་པོ་ཐུགས་ཉམས་སུ་བསྟར་ཞིང་། རྒྱུད་སྡེ་དེ་དག་ནས་ལུ་གུ་རྒྱུད་ཀྱི་མིང་ཙམ་བརྗོད་ཀྱང་དམ་ཚིག་ཉམས་པར་བཤད་པའི་གསང་རྒྱ་ལ་རྒྱ་གར་གྱི་སློབ་དཔོན་དེ་དག་ཚུལ་བཞིན་དུ་སྤྱོད་པའི་ཕྱིར་སྤྱི་མཐུན་གྱི་སྣང་ངོར་ཆོས་དེ་དག་གི་མིང་ཙམ་ཡང་མ་གྲག་པར་མངོན་ཏེ། དཔེར་ན། དཔལ་ནཱ་རོ་པས་སློབ་མ་སོ་སོའི་བཀའ་བབས་དང་བསྟུན་པའི་མན་ངག་བྱིན་པས་སློབ་མ་ཅིག་ཤོས་ཀྱིས་མིང་ཡང་མ་ཐོས་པའི་ཆོས་ཀྱི་རྣམ་གྲངས་ཅིག་ཤོས་ལ་གྲགས་པ་བཞིན་ནོ། །སྤྱིར་ཐེག་པའི་ཡང་རྩེ་འདི་ཆིག་བརྒྱུད་ལྟ་བུར་ཤིན་ཏུ་བཀའ་རྒྱ་དམ་ཞིང་དྲིལ་བསྒྲགས་སུ་འཆད་པ་མེད་ལ། སློབ་དཔོན་དེ་དག་ཀྱང་སངས་རྒྱས་ཀྱིས་དྲི་ཟ་རབ་དགའ་བཏུལ་བ་ལྟར་གདུལ་བྱའི་སྣང་ངོར་སྐད་ཅིག་སྐད་ཅིག་ལ་སྣང་ཞིང་། རོལ་པ་བཀོད་པའི་ཆོ་འཕྲུལ་ཚད་མེད་པའི་བདག་ཉིད་ཅན་ལས་སྤྱི་མཐུན་དུ་གྲགས་པ་ལྟར་མ་ཡིན་པས་རྒྱ་གར་གྱི་ཡུལ་གྲུ་ཆུང་ངུ་རེ་བགྲོད་ཅིང་། གཙུག་ལག་ཁང་ཆུང་ངུ་རེའི་ཆོས་ཀྱི་རྣམ་གྲངས་ཡི་གེར་འགོད་པའི་ལོ་ཙྪ་བ་གསར་བུ་རྣམས་ཀྱིས་ཆོས་སྤོང་བའི་ཡུས་ཚིག་སྨྲ་བ་ལ་ཡིད་བརྟན་མེད་པར་ཤེས་པར་བྱ་ཞིང་། ཚུལ་འདི་ལྟ་བུའང་ཐོས་པ་དང་གཟུ་བོའི་བློས་བསམ་པའི་ཡོན་ཏན་ཡིན་པར་བལྟའོ། །དེ་ལྟར་འཇམ་དཔལ་བཤེས་གཉེན་ནམ། རྡོ་རྗེ་བདེ་བ་རྩལ་གྱི་དངོས་སློབ་ཤྲཱི་སིངྷ་ནི་ཐལ་འགྱུར་ལས། དེ་ཡི་རྗེས་སུ་སྐལ་ལྡན་པ། །སོ་ས་གླིང་ཞེས་བྱ་བ་རུ། །ཁྱིམ་བདག་རིགས་སྐྱེས་ཤྲཱི་སིང་། །ཞེས་བྱ་བ་ཡིས་འཛིན་པར་འགྱུར། །ཞེས་པ་ལྟར། རྒྱ་ནག་ཞོ་ཤའི་གླིང་གི་ཡབ་རྒྱལ་པོ་གྲུ་ཁྱེར། ཡུམ་ནན་ཀ་ཞེས་བྱ་བ་གཉིས་ཀྱི་བུ། ཤྲཱི་སིངྷ་པྲ་བ་ཏ་ཞེས་བྱ་བ། པཎྜི་ཏ་ལྔ་བརྒྱ་ལ་རིག་པ་སྦྱངས་པས་རིག་པའི་གནས་ལྔ་ལ་མཁས་པ་ཞིག་ཡོད་པ་དེར་སྤྱན་རས་གཟིགས་ཀྱིས་ལུང་བསྟན་ཏེ་སློབ་དཔོན་འཇམ་དཔལ་བཤེས་གཉེན་གྱི་དྲུང་དུ་ལྷགས། སློབ་དཔོན་ལོ་ཉེར་ལྔའི་བར་དུ་བསྟེན་ནས་རྫོགས་པ་ཆེན་པོའི་རྒྱུད་མན་ངག་མཐའ་ཡས་པ་ཉན། དེ་ནས་སློབ་དཔོན་འོད་ཕུང་དུ་ཡལ་བའི་རྗེས་ལ་འདས་རྗེས་ཤྲཱི་སིངྷར་བབས་པས་སློབ་དཔོན་དང་དགོངས་པ་མཉམ་པར་གྱུར། མན་ངག་གི་དཔེ་ཕྱུང་ནས་ཐིག་ལེའི་སྐོར་ལ་ཕྱི་སྐོར། ནང་སྐོར། གསང་སྐོར། བླ་མེད་ཀྱི་སྐོར་ཏེ་རྣམ་པ་བཞིར་ཕྱེ་ནས་གསང་སྐོར་ཡན་ཆད་གཏེར་ལ་སྦས། ཡང་གསང་བླ་ན་མེད་པ་ཐུགས་ལ་གབ་སྟེ་བཞུགས་པ་ལས་རེ་ཞིག་གི་ཚེ་མཁའ་འགྲོས་ལུང་བསྟན་ཏེ་དེ་ཉིད་གཏེར་ལ་སྦས་ཏེ་སློབ་དཔོན་ཉིད་བསིལ་སྦྱིན་དུར་ཁྲོད་དུ་བཞུགས་སོ། །དེའི་ཚེ་ཐལ་འགྱུར་ལས། དེ་རྗེས་འཛིན་པ་གདོལ་པའི་རིགས། །ཛྙཱ་ན་སཱུ་ཏྲས་འདི་ཉིད་འཛིན། །ཞེས་པ་ལྟར། ཡབ་གདོལ་པའི་རིགས་ཨ་པ་དྷ་ཛ་ན་བྱ་བ་དང་། ཡུམ་རྒྱ་མཚོ་མ་བྱ་བའི་བུ་སྦྲུལ་གྱི་གདེང་ཀས་མཚན་པ་ཅིག་བྱུང་། ཕ་མ་གཉིས་སྐྲག་སྟེ་དུར་ཁྲོད་དུ་བསྐྱལ་བས་ཁྱེའུ་ན་རེ། སྙིང་པོའི་དོན་ལ་ཐུགས་ཕངས་པའི་སྤྲུལ་པ་ཡིན་གྱིས། ལས་ཀྱི་འབྲེལ་བའི་ཕ་མ་ཡིན་པས་གསོས་ཤིག་ཅེས་ཟེར་བས། བདེན་པར་བཟུང་ནས་བླངས་ཏེ་གསོས། བྱང་ཆུབ་སེམས་དཔའི་སྤྲུལ་པ་ཀླུའི་རྒྱལ་པོ་དགའ་བོས་རྩོལ་མེད་ཀྱི་ཐེག་པ་འདུག་པར་མཁྱེན་ནས་སྤྲུལ་པ་ཡིན་པས་མིང་ནཱ་ག་རཱ་ཛ་པ་ཏྲི་ཞེས་བྱ་བར་བཏགས། འདྲ་འབག་ཆེན་མོར་ཛྙཱ་ན་སཱུ་ཏྲ་དམིགས་བསལ་མ་བྱུང་ཞིང་། རིགས་དང་མཚན་ཟུར་གཅིག་པ་ལྟར་དཔྱད་པའོ། །ཁྱེའུ་དེ་སྐྱེད་ཆེ་ཞིང་བློ་གྲོས་དང་ལྡན་པར་གྱུར་ནས་རྒྱལ་པོ་ཧསྟི་དང་། སྲས་མོ་པྲ་ར་ནི་སོགས་ལས་སེམས་ཕྱོགས་ཀྱི་ཆོས་མང་དུ་ཉན། དེས་མ་ཚིམ་པར་རྡོ་རྗེ་སེམས་དཔའི་ལུང་བསྟན་ལྟར་སློབ་དཔོན་ཤྲཱི་སིངྷར་གཏུགས་ནས། རྣར་རྒྱུད་ཕྱི་ནང་གསང་གསུམ་སྤྲོས་པ་མེད་པའི་དབང་། རུ་ཤན་འབྱེད་པའི་སྤྱོད་པ། ཤིན་ཏུ་སྤྲོས་མེད་ཀྱི་དབང་། རབ་ཏུ་སྤྲོས་མེད་ཀྱི་དབང་རྫོགས་པར་གནང་བས་བརྟན་པ་ཐོབ། དེའི་བརྒྱུད་འཛིན་ནི་ཐལ་འགྱུར་ལས། དེ་རྗེས་འཛིན་པ་ཁྱིམ་བདག་རིགས། །ཕྱག་རྒྱ་རྒྱ་ཆེན་དག་གིས་འཛིན། །ཞེས་པ་སློབ་དཔོན་བི་མ་ལ་སྟེ་དེའི་རྣམ་པར་ཐར་པ་མཐའ་ཡས་ཀྱང་ལོ་རྒྱུས་བཙན་པ་ལྟར་སྨྲས་ཟིན་གྱི། །ཁ་ཅིག་ཏུ། ཕ་མེད་ཀྱི་བུར་གྱུར་པས་ཡུམ་གནོང་སྟེ་གཡོག་མོ་བྱེ་མའི་ཁུང་དུ་སྦ་བར་མངགས། དེ་ལྟར་བྱས་རྗེས་ཕྱིས་བལྟས་ཙ་ན་མིག་བཀྲ་ཧྲིག་གེ་མ་ཤི་བར་འདུག་པས་སྤྲུལ་པའི་སྐུ་ཡིན་པར་ཤེས་ནས་བླངས། སླར་པཎྜི་ཏ་ལྔ་བརྒྱའི་སྤྱི་ཕུད་དུ་གྱུར་ནས་དགེ་སློང་ཆེན་པོ་བི་མ་ལ་མི་ཏྲ་སྟེ་བོད་སྐད་དུ། པཎ་ཆེན་དྲི་མེད་བཤེས་གཉེན་དུ་གྲགས་ཏེ་རིག་པའི་གནས་ལྔ་ལ་མཁས་པར་གྱུར་ཅེས་གྲགས་སོ། །དེའི་ཕྱིར་རྒྱུས་ལ་མི་མཁས་པ་རེ་ཙམ་གྱིས་སྨྲ་བ་ལ་ཡིད་བརྟན་མི་རུང་བའི་ཕྱིར། དེ་ཙམ་ཤེས་བྱེད་དུ་དྲངས་ནས་ཨ་ཏི་དང་སྤྱི་ཏི་ལ་ལོག་པའི་ཀུན་རྟོག་སྨྲ་བའང་ཤ་ཐང་ཆད་པའི་རང་བཞིན་ནོ། །དེ་ལྟ་བུའི་སློབ་དཔོན་ཆེན་པོ་བི་མ་ལ་སྟེ་འཛམ་བུའི་གླིང་གི་སྒྲོན་མེ་ཆེན་པོས་སྔོན་ལ་ཤྲཱི་སིང་ཧར་གཏུགས། རྣར་རྒྱུད་ཕྱི་ནང་གསང་གསུམ་གྱི་མན་ངག་གསན་ནས་ལོག །ཕྱིས་ཤྲཱི་སིངྷ་འོད་ཕུང་དུ་ཡལ་ཁར་ཛྙཱ་ན་སཱུ་ཏྲས་གསོལ་བ་བཏབ་པས། ཞལ་ཆེམས་གཟེར་བུ་བདུན་པ་གསང་བའི་མན་ངག་དང་བཅས་པ་ཛྙཱ་ནར་བབས་པས་གདམས་པ་ཡོངས་སུ་རྫོགས། དེའི་ཚེ་བི་མ་ལར་མཁའ་འགྲོས་ལུང་བསྟན་ནས་སྔ་མ་ལས་ཟབ་པ་གསང་བ་སྙིང་ཐིག་གི་མན་ངག་ཡོད་པ་ལོང་ཞིག་གསུངས་པ་ལྟར། ཛྙཱ་ན་སཱུ་ཏྲ་སྟེ་ཡེ་ཤེས་མདོར་ཞུས་ནས་གདམས་པ་ཡོངས་སུ་རྫོགས། སློབ་དཔོན་དེ་འོད་དུ་ཡལ་ཁར་འདས་རྗེས་པཎྜི་ཆེན་པོ་བི་མ་ལའི་ཕྱག་ཏུ་བབས་པས་དགོངས་པ་ཆོས་དབྱིངས་བྱ་རྩོལ་མེད་པའི་ངོ་བོར་སངས་རྒྱས་སོ། །དགའ་རབ་རྡོ་རྗེ་ཡན་ཆད་ལ་དགོངས་བརྒྱུད་དང་། དེ་མན་ཆད་ལ་མཆོག་གི་དངོས་གྲུབ་བརྙེས་པའི་རིག་འཛིན་བརྡ་བརྒྱུད་དུ་འདྲེན་པའི་རྣམ་གཞག་ཀྱང་ཡོད་དོ། །འདི་མན་ཆད་སྙན་བརྒྱུད་དེ་བོད་དུ་བསྟན་པ་དར་བའི་སྐབས་སུ་གླེང་བར་འཐད་ཀྱང་། རིག་འཛིན་ངེས་པའི་ལུང་བསྟན་གྱི་འགྲོས་ལྟར་དཀྱུས་སུ་གླེང་ན། ཐལ་འགྱུར་ལས། དེ་ཡི་རྗེས་ལ་རྒྱལ་པོའི་རིགས། །སྤྲུལ་པ་ཕྱག་བརྙན་བཅས་པས་འཛིན། །ཞེས་འོད་གསལ་ལྷ་ལས་ཆད་པའི་རྒྱལ་རིགས་འཇམ་དཔལ་དབྱངས་ལྷ་གཅིག་ཁྲི་སྲོང་ལྡེའུ་བཙན། ཉང་ཏིང་འཛིན་བཟང་པོ་དང་གཡུ་སྒྲ་སྙིང་པོ་སོགས་ཕྱག་བརྙན་ཏེ་འཁོར་གྱི་རིགས། དེ་ལས་ཆོས་རྒྱལ་དང་གཡུ་སྒྲ་ནི། བྱ་བ་དགུ་ཕྲུགས་སུ་བཏང་ཞིང་། གནད་རྣམ་པ་གསུམ་ལ་བརྟེན་ནས་སྙིགས་མའི་ལུས་གཞའ་ལྟ་བུར་དྭངས་པ་ནི་བསྟན་པ་དང་སེམས་ཅན་གྱི་དོན་རླབས་པོ་ཆེ་སྒྲུབ་དགོས་པས་མ་ཡིན་ཀྱང་། དགོངས་པ་ཀ་དག་ཆོས་ཟད་ཀྱི་ས་ལ་གྲུབ་མཐའ་སྙོགས་པ་ཡིན་ལ། ཉང་ཏིང་འཛིན་བཟང་པོས་སྒྲུབ་པ་རྩེ་གཅིག་ཏུ་མཛད་པས་ལྷ་ས་བྲག་ལྷའི་ཕུག་ཏུ་སྣང་བཞི་མཐར་ཕྱིན་ནས་འོད་ཕུང་དུ་ཡལ་བ་བོད་དུ་འཇའ་ལུས་འགྲུབ་པའི་ཐོག་མ་ཡིན་ནོ། །དེ་ཡི་རྗེས་ལ་དགེ་སྦྱོང་གཟུགས། །ལྷུན་གྱི་རྒྱལ་མཚན་དག་གིས་འཛིན། །ཞེས་གནས་བརྟན་ལྡང་མ་བ་ལྷུན་གྲུབ་རྒྱལ་མཚན། དེ་རྗེས་སིངྷ་ཤྭ་རས་འཛིན། །ཞེས་པ་ལྕེ་བཙུན་ཆེན་པོ་སེང་གེ་དབང་ཕྱུག་སྟེ། ཕྱི་མ་ནི་ལྷུན་གྲུབ་རྫོགས་པ་ཆེན་པོའི་འོད་གསལ་གྱི་སྣང་བ་དབྱིངས་སུ་ཟད་དེ་རྒྱུད་ཉི་ཟླ་ཁ་སྦྱོར་གྱི་དགོངས་པ་ལྟར། འོ་ཡུག་ལ་ཕྱི་གོང་གི་རྫའི་ཐད་ཀྱི་ནམ་མཁའ་ལ་འོད་ཕུང་གི་རྣམ་པར་གཤེགས་པ་ཡིན་ནོ། །དེ་ཡང་སྔ་མའི་འཕྲོར། དེ་རྗེས་ས་ལ་གནས་པ་ཡི། །བྱང་ཆུབ་སེམས་དཔའ་དག་གིས་འཛིན། །དེ་འོག་ལག་ན་རྡོ་རྗེ་ཡི། །སྤྲུལ་པ་བཛྲ་ཕ་ལས་འཛིན། །དེ་འོག་རྒྱལ་པོ་སེང་གེ་སྟེ། །བཟང་པོ་དག་གིས་འཛིན་པ་ཡིན། །དེ་འོག་སྒྲ་མཁས་དཔལ་འཛིན་ནོ། །དེ་འོག་ཡོ་གི་པྲ་བས་འཛིན། །དེ་འོག་རྒྱལ་པོ་ཁྲི་འོད་དོ། །དེ་འོག་དགེ་སློང་དཔལ་དང་ལྡན། །དེ་ནས་བློ་གྲོས་མཆོག་གིས་འཛིན། །དེ་ནས་མཁའ་འགྲོ་དཔལ་འཛིན་མས། །བསྟན་པ་འདི་ཉིད་བཟུང་ནས་ནི། །ཚེ་ལོ་བཅུ་པའི་དུས་ལ་དར། །དེ་ནས་མི་གནས་རང་ས་ལའོ། །ཞེས་ལུང་བསྟན་པ་ལས། ཕལ་ཆེར་བབས་ལུང་ཆེན་མོར་ལོ་བརྒྱ་བརྒྱ་ན་བི་མ་ལའི་སྤྲུལ་པ་རེ་བྱོན་ནས་སྙིང་ཏིག་གི་ལྟ་སྒོམ་ཐུན་མོང་མ་ཡིན་པ་ཡིད་དཔྱོད་དང་འདྲེས་པ་གསལ་བར་ལུང་བསྟན་པ་ལྟར། ལྡང་མ་མན་ཆད་ན་འབྱུང་བར་ངེས་ཤིང་། དེ་དག་ཀྱང་ཕལ་ཆེར་སར་གནས་ཀྱི་སེམས་དཔའ་སྦས་པའི་ངང་ཚུལ་ཅན་ཡིན་པས་རང་བཞིན་གཅིག་ཏུ་མ་ངེས་ཀྱང་། བརྟག་ན་རིག་པ་རང་ཤར་ལས། རྡོ་རྗེའི་དོན་ལྡན་སློབ་དཔོན་ནི། །ངང་རྒྱུད་བཟང་ཞིང་སློབ་ལ་མཁས། །དབང་ཐོབ་གསང་སྔགས་དོན་ལ་སྦྱོར། །ཕྱི་ནང་བྱ་བ་ཐམས་ཅད་ཤེས། །ཡི་དམ་ལྷ་དང་འདུ་འབྲལ་མེད། །ཏིང་ངེ་འཛིན་ལ་ཡེང་བ་མེད། །རྫོགས་ཆེན་མན་ངག་དོན་ལྡན་པའི། །གསང་སྔགས་གསང་བའི་རྒྱུད་ལ་མཁས། །ཕྱི་ནང་སྒྲུབ་པ་ཐམས་ཅད་བྱེད། །ལྟ་བའི་དོན་ལས་མི་འདའ་ཞིང་། །ཕྱི་ནང་གསང་བའི་བྱ་བ་བཏང་། །ཡོན་ཏན་ནོར་བུ་རིན་ཆེན་ལྟར། །ཟད་མེད་གཏེར་ལ་སྤྱོད་པའོ། །ཞེས་དང་། ཀུན་མཁྱེན་གྱིས། འདིར་མཚན་ཉིད་དྲུག་ལྡན་ལ། འཁོར་བའི་ཆོས་རྒྱབ་ཏུ་དོར་བ། འདོད་པ་ཆུང་ཞིང་ཆོག་ཤེས་པ། ལག་ལེན་ལ་མཁས་ཤིང་ཉམས་མྱོང་ཡོད་པ། རྒྱུད་ཀྱི་ཚིག་དོན་ལ་མཁས་ཤིང་སྒྲུབ་པ་ལ་བརྩོན་པ། ལྟ་བའི་དོན་ལ་མཁས་ཤིང་ནུས་པ་རྫོགས་པ། སྙིང་རྗེ་ཆེ་ཞིང་གཏོང་ལ་དགའ་བའོ། །དེ་དག་རྫོགས་པ་ནི་དཔལ་ལྡན་རྡོ་རྗེ་འཛིན་པ་ཞེས་བྱ་སྟེ། སློབ་མའི་རིགས་དྲུག་གི་ས་བོན་སྟོངས་ནས། ཉོན་མོངས་པ་དྲུག་སྦྱོང་ཞིང་། ཡེ་ཤེས་དྲུག་གི་དོན་འཆར་བ་སྟེ། དེ་ཉིད་ལ་ནུས་པ་དེ་མངའ་བའི་ཕྱིར་རོ། །ཞེས་སོ། །དེ་ལྟ་བུའི་ངང་ཚུལ་དང་ལྡན་པ་དེ་ནི་སྤྱིར་སངས་རྒྱས་བསྟན་པའི་སྲོག་ཤིང་ཡིན་ལ། སྒོས་སུ་རྡོ་རྗེ་ཐེག་པའི་རྒྱལ་མཚན། ཁྱད་པར་རྫོགས་པ་ཆེན་པོའི་སྟོན་པ་སྟེ་སློབ་དཔོན་བི་མ་ལའི་སྤྲུལ་པའང་དེ་ལས་གཞན་སུ་ཞིག་གོ །དེའི་ཕྱིར་དགེ་སློང་དཔལ་ལྡན་ནི་ཀུ་མ་རཱ་ཛར་གྲགས་ལ། བློ་གྲོས་མཆོག་ནི་ཁོ་བོ་ཅག་གི་བླ་མ་དམ་པ་ཐམས་ཅད་མཁྱེན་པ་ཀློང་ཆེན་པ་སྟེ། དེ་སྐད་དུ་བཀའ་ཆེམས་ལས་ཀྱང་། བློ་གྲོས་མིང་ཅན་ཐོགས་མེད་བྱ་བཞིན་རྒྱུ། །ཞེས་སོ། །གཞན་ཡང་ཨ་ཏི་བཀོད་པ་ཆེན་པོ་ལ་སོགས་ཏེ་བཀའ་གཏེར་རིས་མེད་པ་ནས་ལུང་གིས་བསྔགས་ཤིང་། དོན་དམ་པར་གངས་རིའི་ལྗོངས་འདིར་ཤཱཀྱ་སེང་གེའི་ལུང་རྟོགས་ཀྱི་བསྟན་པ་འཛིན་པའི་ཤིང་རྟ་ཆེན་པོ། ཁྱད་པར་ངེས་གསང་རྫོགས་པ་ཆེན་པོའི་བསྟན་པ་གཞི་བཞེངས་སུ་མཛད་ཅིང་། མཁས་པ་དང་གྲུབ་པའི་འཁོར་ལོས་སྒྱུར་བའི་རང་བཞིན་ཆེན་པོར་རྩོད་པ་མེད་པར་ཡོངས་སུ་གྲགས་ཤིང་ཀུན་གྱིས་བསྔགས་ལ། མཆོག་གི་སྤྲུལ་པའི་སྐུ་འདིའི་རྣམ་པར་ཐར་པ་ནི། མཐོང་བ་དོན་ལྡན་དུ་གྲགས་པ་ལ་སོགས་ཏེ་ཕྱི་ནང་གསང་བའི་རང་བཞིན་དུ་མ་ལོ་རྒྱུས་མང་དག་ནས་བཤད་པའི་ཕྱིར་འདིར་མ་བརྗོད་ལ། རྟོགས་པ་བརྗོད་པ་དང་མཐུན་པའི་བསྟོད་ཚིག་དཔྱིད་ཀྱི་རྒྱལ་མོའི་རྒྱང་གླུར་བསྒྲག་པ་ནི། འོག་མིན་དཔལ་གྱི་མཆིམས་ཕུའི་ནགས་ཀྱི་དུར་ཁྲོད་ཆེན་པོ་ག་ལ་བ་དེར་ཕ་ཞལ་བུའི་མཐོང་བའི་ཚེ་གླེངས་ཟིན་ཏོ། །དེ་ལྟར་གང་གི་ལུང་དུ། ཚེ་ལོ་བཅུ་པའི་དུས་ལ་དར། །དེ་ནས་མི་གནས་རང་ས་ལའོ། །ཞེས་བཤད་མ་ཐག་པ་ལྟར་འཛམ་གླིང་འདིའི་འཕེལ་འགྲིབ་ལན་བདུན་རྫོགས་ཏེ། ཚེ་ལོ་བཅུ་པའི་བར་ཁུག་མན་ཆད་ལ་བསྟན་པའི་བཙས་གསུམ་ཡང་ཞིང་འདིར་མི་གནས་པར་འདི་ནས་ལྷོ་ཕྱོགས་མཛེས་ལྡན་བཀོད་པའི་ཞིང་དུ་འཕར་བ་ནི་ཐལ་འགྱུར་ལས། དེ་ནས་མཛེས་ལྡན་བཀོད་པ་ཡི། །ཞིང་ཁམས་དག་ཏུ་ངེས་འཕར་ནས། །ཚེ་ལོ་དག་ནི་བཅུ་འོག་ཏུ། །འདི་ན་མི་གནས་དེར་སྣང་ངོ་། །ཞེས་སོ། །ཞིང་དེའི་ཡང་མཛད་པ་དར་འགྲིབ་བདུན་གྱིས་རྫོགས་ཚེ། མི་མཇེད་སྟོངས་པའི་དུས་ལ་བབ་པ་སྟེ། དེའི་ཚེ་བསྟན་པའི་བཙས་གསུམ་པོ་བྱང་ཕྱོགས་ཡངས་པ་སྐྱོབ་པའི་འཇིག་རྟེན་དུ་འཕར་བ་ནི་སྔ་མ་ལས། དེ་ལྟར་དར་འགྲིབ་རྫོགས་ནས་ནི། །བསྟན་པ་དམ་པའི་སྙིང་པོ་འདི། །ཡངས་པ་སྐྱོབ་པའི་འཇིག་རྟེན་དུ། །སངས་རྒྱས་བསྟན་པ་གནས་བྱེད་པའི། །ཨུཏྤལ་མེ་ཏོག་མཛེས་ཞེས་པའི། །སྟོན་པ་སངས་རྒྱས་བཅོམ་ལྡན་འདས། །བདེ་བྱེད་བརྩེགས་པའི་ཁང་བཟང་སུ། །སྟོང་ཕྲག་ལྔ་དང་བཅས་པའི་འཁོར། །ཐམས་ཅད་བྱང་ཆུབ་སེམས་ཆེན་པོ། །མི་སྐྱེའི་ཆོས་ལ་བཟོད་ཐོབ་སྟེ། །དགེ་བའི་སེམས་ལྡན་འབའ་ཞིག་བྱུང་། །སྟོན་པ་དེ་ཉིད་བྱོན་པ་དང་། །ལོག་སྲེད་ཅན་རྣམས་དེས་བཏུལ་ནས། །བསྟན་པ་དམ་པ་འདི་ཉིད་ནི། །ལོ་ནི་ལྔ་སྟོང་ཕྲག་སྟོང་དུ། །བསྟན་པའི་སྙིང་པོ་གནས་པར་བྱེད། །དེ་ནས་ཡང་ནི་སྔ་མ་བཞིན། །རིམ་པ་བདུན་གྱིས་འཕེལ་འགྲིབ་བྱེད། །ཅེས་པ་ལྟར་ཞིང་ཁམས་དེར་སངས་རྒྱས་ཨུཏྤལ་མེ་ཏོག་གིས་བཟུང་ནས་དར་ནུབ་བདུན་རྫོགས་པའི་འོག་ཏུ། ནུབ་ཕྱོགས་གཙུག་ཕུད་དབྱངས་ཞེས་བྱ་བའི་འཇིག་རྟེན་དུ་འཕར་ནས། སངས་རྒྱས་འཁོར་བ་འཇིག་གིས་བཟུང་། དེར་ལོ་འབུམ་ཕྲག་བདུན་དུ་དར་ནུབ་བདུན་གྱི་ཚུལ་དུ་གནས་པའི་འོག་ཏུ། ཞིང་ཁམས་དེ་དང་། རྡོ་རྗེ་འཆང་གིས་བཀོད་པའི་ཚངས་ཆེན་གྱི་བསྐལ་པ་ན་ཡོད་པའི་ཞིང་ཁམས་ཐམས་ཅད་ཀྱི་འགྲོ་བ་མཐའ་དག་གདོད་མའི་སར་གྲོལ་ཏེ། ཚངས་ཆེན་གྱི་བསྐལ་པ་སྣོད་བཅུད་དང་བཅས་པ་སྟོངས་ཏེ་ཐམས་ཅད་ནམ་མཁའི་རང་བཞིན་དུ་གྱུར་པ་ལ་བསྐལ་པ་བརྒྱད་ཅུ་རྩ་ལྔར་གནས་ཤིང་། བསྟན་པའི་བཙས་གསུམ་ཡང་རྡོ་རྗེ་འཆང་གི་མཛད་པ་ཆེན་པོ་རྫོགས་པས། ཆོས་ཉིད་ཞི་བའི་དབྱིངས་སུ་རང་ཡལ་ནས་མི་སྣང་བར་འགྱུར་ཏེ་སྔ་མ་ལས། དེ་འོག་གཙུག་ཕུད་དབྱངས་ལྡན་པའི། །འཇིག་རྟེན་ཁམས་ནི་ཡངས་པར་ནི། །སྟོན་པ་མཐའ་ཡས་འཁོར་བ་འཇིག །འཁོར་ནི་བརྒྱ་ཕྲག་ཕྱེད་དང་བརྒྱད། །ཀུན་ཀྱང་དགྲ་བཅོམ་ཟག་པ་ཟད། །བྱ་བ་བྱས་ཤིང་ཁུར་བོར་བའོ། །དེས་ཀྱང་བསྟན་པའི་སྙིང་པོ་ཉིད། །ལོ་ནི་འབུམ་ཕྲག་བདུན་དུ་གནས། །སྔར་ཤུགས་ཉིད་ཀྱི་རིམ་པ་ཡིས། །དེ་ལྟར་གནས་པ་བདུན་ཐལ་ནས། །བསྐལ་པ་བརྒྱད་ཅུ་རྩ་ལྔར་ཡང་། །ཆོས་རྣམས་སངས་རྒྱས་སྐུར་ཐིམ་ནས། །འཇིག་རྟེན་ཁམས་ནི་གང་དུ་ཡང་། །སངས་རྒྱས་བསྟན་པ་མི་གནས་སོ། །ཞེས་སོ། །དེ་ལྟར་བསྐལ་པ་སྟོངས་པར་གྱུར་ན་ཡང་། ཡང་རེ་ཞིག་གི་ཚེ་རྡོ་རྗེ་འཆང་གིས་སྤྲུལ་པས་ཚངས་ཆེན་བཀོད་དེ། འགྲོ་བ་དབྱིངས་ནས་སྣང་བ་དང་། བསྐལ་པ་ས་ཡ་དྲུག་འབུམ་དུ་གདུལ་བྱའི་སྣང་བ་ལ་འདུལ་བྱེད་ཀྱི་སྟོན་པ་བྱོན་དུས། བསྟན་པའི་བཙས་གསུམ་ཡང་ཀུན་ཏུ་བཟང་པོའི་བྱིན་རླབས་ལས་རང་ཤར་ཏེ། འཕེལ་འགྲིབ་མེད་པར་སེམས་ཅན་གྱི་དོན་འབྱུང་བར་འགྱུར་ཏེ་སྔ་མ་ལས། དེ་འདས་འཇིག་རྟེན་འོག་མ་ལ། །བསྐལ་པ་ས་ཡ་དྲུག་འབུམ་དུ། །སངས་རྒྱས་བསྟན་པ་ཡུན་རིང་གནས། །འདི་ལ་འཕེལ་འགྲིབ་འབྱུང་བ་མིན། །འགྲོ་བ་རྣམས་ནི་སྨིན་བྱེད་དོ། །ཞེས་བཤད་དོ། །དེའི་ཕྱིར་གསང་ཆེན་ངེས་པའི་བསྟན་པ་བླ་ན་མེད་པ་འདིས་གདུལ་བར་བྱ་བའི་ཞིང་ཁམས་དང་། དུས་ཀྱི་རིམ་པ་ཚད་མེད་པ་ཙམ་དུ་གྲོལ་བའི་རྣམ་གྲངས་ཀྱང་ཚད་མེད་པར་འགྱུར་ཏེ། མི་མ་ཡིན་དང་མཁའ་འགྲོ་མ་གྲོལ་བའི་གྲངས་ནི་གངྒཱའི་ཀླུང་གི་བྱེ་མའི་རྡུལ་གྱིས་ཀྱང་བགྲང་བར་མི་སྤོབས་སོ། །འཛམ་བུའི་གླིང་འདིར་སྐྱེས་པ་དང་། བུད་མེད་དང་། རབ་ཏུ་བྱུང་བ་དང་། ཁྱེའུ་དང་། བུ་མོ་དང་། ཛོ་ཀིའི་རྣམ་འགྱུར་ཅན་དག་ཚེ་འདི་དང་བར་དོ་ལ་སོགས་པར་གྲོལ་བའི་རྣམ་གྲངས་ངེས་པ་ནི། བཀོད་པ་ཆེན་པོ་ལས། ཉོན་ཅིག་རིགས་ལྡན་དགེ་སྦྱོང་དཔལ། །ང་ནི་འདི་ནས་མི་གནས་ནས། །ཚེ་ལོ་དྲུག་ཅུ་ཡན་ཆད་ལ། །འབྲས་བུར་གྲོལ་བ་སྟོང་ཕྲག་གཅིག །འབྱུང་བ་རང་དེངས་དག་ཏུ་སྟེ། །དགེ་སྦྱོང་གཞུགས་ནི་དེ་ཡི་ཕྱེད། །ལྷག་མ་བྱང་ཆུབ་སེམས་དཔའ་འོ། །དེ་ནས་ལྔ་བཅུ་ལ་ཐུག་བར། །འབྱུང་བ་རང་སར་དེངས་པ་ནི། །འབུམ་ཕྲག་གཉིས་ཀྱིས་སྐྱེ་མེད་ཐོབ། །ཕལ་ཆེར་བུད་མེད་དག་གི་གཟུགས། །སྐྱེས་པ་དག་ནི་སྟོང་ཕྲག་གཉིས། །དེ་ནས་ཚེ་ལོ་སུམ་ཅུའི་བར། །འབུམ་ཕྲག་དག་ནི་དྲུག་པ་སྟེ། །འདི་དག་ཕལ་ཆེར་སྐྱེས་པ་ལ། །བུད་མེད་འབུམ་ཕྲག་གཅིག་གིས་ཡིན། །འབྱུང་བ་དག་ནི་རང་དེངས་སོ། །དེ་དག་སྔོན་བྱུང་ང་ཡི་འཁོར། །སྙིགས་མའི་དུས་ན་སངས་རྒྱས་ཐོབ། །ངེས་གསང་སྙིང་པོ་ཡང་བསྡུས་པས། །འབྲས་བུ་ཉིད་ནི་ཐོབ་པ་ལས། །བསྟན་པ་གཞན་གྱི་འབྲས་བུ་མིན། གལ་ཏེ་བསྟན་པ་གཞན་དག་ལ། །མངོན་པར་སངས་རྒྱས་འབྱུང་དག་ན། །འདི་ཉིད་ཕྲད་དེ་དེ་བཞིན་ནོ། །འབྲས་བུ་ཀུན་གྱི་ཐུས་ཀ་རུ། །འདི་ཉིད་དག་ནི་བསྟན་པའོ། །ཞེས་པ་སྟེ། འདི་རྣམས་ནི་འབྱུང་བ་རང་དེངས་ཀྱི་གྲངས་སུ་ངེས་པའོ། །གང་ན་སངས་རྒྱས་ཐོབ་པ་དེ་དག་ཐམས་ཅད་གསང་ཆེན་འདིའི་སྒོ་ནས་སངས་རྒྱས་པའི་ཕྱིར་དུས་གསུམ་གྱི་བདེ་བར་གཤེགས་པ་ཐམས་ཅད་ཀྱི་གཤེགས་ཤུལ་ཞེས་བརྗོད་ལ། ཅིའི་ཕྱིར་ན། རིག་པ་མངོན་སུམ་གྱི་ཆོས་ཉིད་ལ་གོམས་ནས་སངས་རྒྱས་ཀྱི། དེ་ལས་གཞན་གྱིས་མ་ཡིན་པའི་ཕྱིར་རོ། །བར་དོར་གྲོལ་བའི་གྲངས་ནི་བཀོད་པ་ཆེན་པོ་ལས། སྐྱེ་གཉིས་བར་དུ་མངོན་པར་སངས་རྒྱས་པ། །ཚེ་ལོ་བཅུ་པའི་བར་ལ་འདི་དག་གོ །སྟོང་ཕྲག་བདུན་ནི་སྣང་བ་མ་དང་ཕྲད། །སྐྱེས་པ་དག་ནི་སྟོང་ཕྲག་དྲུག་ཉིད་ལ། །བུད་མེད་གཟུགས་ནི་སྟོང་ཕྲག་གཅིག་ཡིན་ནོ། །དེ་ལྟར་སྐྱེས་དང་བུད་མེད་ཁྱེའུ་བུ་མོ། །ཇི་ལྟར་འགྱུར་བའི་གཟུགས་སུ་འདུག་ཀྱང་སླའི། །འདི་དང་ཕྲད་རྣམས་རྣམ་པར་གྲོལ་བའོ། །ཞེས་སོ། །དེའི་ཕྱིར་བླ་ན་མེད་པའི་ཐེག་པ་འདི་འབྲས་བུའི་ཐུས་ཀ་ཡིན་པའི་ཕྱིར་གསང་མཆོག་ངེས་པའི་ལམ་འདི་ལ་ཞུགས་ནས་ཁྲིད་དང་གདམས་པ་ཐོབ་ན། གོ་དོན་མ་རྙེད་ཀྱང་ཐོས་པའི་ཕན་ཡོན་ཁོ་ནས་ཀྱང་རིང་པོར་མི་ཐོགས་པར་གྲོལ་བ་ཡིན་ནོ། །གཏི་མུག་ཅན་ཁ་ཅིག་ཐོས་པས་གྲོལ་བ་དང་བཏགས་པས་གྲོལ་བ་ཞེས་མི་རིགས་པའི་ཤེས་བྱེད་དུ་འདྲེན་པ་ནི། སངས་རྒྱས་ཐབས་མཁས་ལ་ཐུགས་རྗེ་ཆེ་བས་བསྐལ་པས་གྲོལ་བ་དང་། ཚེ་གཅིག་ལ་གྲོལ་བ་དང་། བཙན་ཐབས་སུ་གྲོལ་བ་ལ་སོགས་པའི་ཆོས་ཀྱི་རྣམ་གྲངས་ཚད་མེད་པར་སྟོན་པ་རྣམས་ལའང་ཡིད་མ་ཆེས་པ་སྟེ། བཟང་སྤྱོད་ལས་ཀྱང་། གང་ཡང་བཟང་པོ་སྤྱོད་པའི་སྨོན་ལམ་འདི། །འཆང་བ་དང་ནི་སྟོན་ཏམ་ཀློག་པ་ཡིས། །དེ་ཡི་རྣམ་པར་སྨིན་པ་སངས་རྒྱས་མཁྱེན། །བྱང་ཆུབ་མཆོག་ལ་སོམ་ཉི་མ་བྱེད་ཅིག །ཅེས་ཐུན་མོང་གི་ཐེག་པ་ནས་ཀྱང་དེ་ལྟར་དུ་བཤད་པ་མ་བསམས་པའི་ཕྱིར་རོ། །དེས་ན་གསང་སྔགས་ཟབ་མོ་འདི་ལྟ་བུས་བཙན་ཐབས་སུ་གྲོལ་བ་ཅིའི་ཕྱིར་མི་འཐད། བློ་ཆུང་ཁྱོད་བསྐལ་པ་གྲངས་མེད་གསུམ་དུ་སངས་རྒྱ་བའི་ཆོས་ཁོ་ན་སྒུག་པ་ལས་གཞན་ལ་རྫུན་པར་འཛིན་པའང་རང་གི་ལས་སུ་ཤེས་པར་བྱ་སྟེ། དཔེར་ན་དཀོན་ཅོག་བརྩེགས་པའི་ལེའུ་དང་པོར། འོད་སྲུངས། དགེ་སློང་ཀོ་ཀ་ལི་ཀ་དང་། དགེ་སློང་ལྷས་བྱིན་དང་། དགེ་སློང་ཁཎྜ་ར་བྱ་བ་དང་། དགེ་སློང་ཀརྟ་ཏི་ཤྱ་དང་། དགེ་སློང་རྒྱ་མཚོས་བྱིན་ལ་ལྟོས། འོད་སྲུངས། རྟ་ཐུལ་དང་། ནབས་སོ་ལ་ལྟོས། འོད་སྲུངས། དགེ་སློང་སྐར་བཟང་་་སྐར་མ་རྒྱལ་ལ་སྐྱེས་པར་བརྟེན་རྒྱལ་ལམ་སྐར་བཟང་། རྒྱུ་སྐར་བཟང་པོ་ཞེས་བརྟགས་པ་ལེགས་པའི་སྐར་མ་ཡིན།་་་འདི་ངའི་གཡོག་བྱེད་དེ། ངའི་མདུན་ན་སྨྲ་ཞིང་འཆག་པ་དང་འདུག་པ་ལ་ཡང་བལྟ། རྫུ་འཕྲུལ་གྱིས་སྟོབས་ཀྱིས་སྟེང་གི་བར་སྣང་ལ་འཆག་པ་ལ་ཡང་བལྟ། ཆོས་དང་མཐུན་པས་མུ་སྟེགས་ཅན་སྟོང་ཚར་བཅད་པ་ལ་ཡང་བལྟ། དེ་ང་ལ་དད་པར་མི་བྱེད་ཅིང་། ཚིག་རེ་རེ་ལ་ཡང་མཐུན་པར་མི་བྱེད་པ་ལ་ལྟོས། གང་ཚིག་རེ་རེ་ལ་ཡང་མཐུན་པར་མི་བྱེད་པ་དེ་ནི། ངན་པར་འགྲོ་བར་འགྱུར་རོ། །ཞེས་གསུངས་པས་ཤེས་པར་འགྱུར་ལ། དེའི་ཕྱིར་བདག་ཅག་གིས་བསྐལ་པ་གྲངས་མེད་པར་སངས་རྒྱས་མང་པོ་མཆོད་ཅིང་ཀུན་ཏུ་བཟང་པོའི་འཁོར་དུ་འདུས་པ་ཆོས་ཅན། ཡང་གསང་བླ་ན་མེད་པའི་ཐེག་པ་དང་མཇལ། དེ་ལ་ཡིད་ཆེས་ནས་ཚུལ་བཞིན་དུ་སྤྱོད་པའི་ཕྱིར་རོ། །ཐུན་མོང་གི་ཐེག་པ་དང་ཕྲད་པ་ཙམ་ལའང་སངས་རྒྱས་མཆོད་པ་ལ་སོགས་པའི་དགེ་རྩ་སྔོན་ཏུ་སོང་ངེས་ན། ཚེ་འདིའམ། བར་དོའམ། རང་བཞིན་སྤྲུལ་སྐུའི་ཞིང་གང་རུང་དུ་མྱུར་པོར་སངས་རྒྱས་འགྲུབ་པའི་འབྲས་བུའི་ཐུས་ཀ་འདི་ལྟ་བུ་དང་མཇལ་བ་སྔོན་གྱི་ལས་འཕྲོ་ཁྱད་པར་ཅན་ཡོད་ཅིང་བསོད་ནམས་མ་ཡིན་པའི་ལས་ལ་ཕྱིར་ཕྱོགས་པར་གདོན་མི་ཟའོ། །དེ་ལྟར་རྒྱུད་ཀྱི་ཆོས་འབྱུང་གླེངས་ཤིང་ཐེག་པའི་རང་བཞིན་དབྱེ་བ་ནི་རྒྱུད་འཆད་པའི་མན་ངག་ལས་ཆིངས་ཆེན་པོ་ལྔས་ཁོག་དབུབ་པ་སྟེ། ཉི་ཟླ་ཁ་སྦྱོར་ལས། ལོ་རྒྱུས་དོན་གྱིས་མ་བཤད་ན། །གསང་ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འགྱུར། །རྩ་བ་དོན་གྱིས་མ་བཤད་ན། །ཆོས་རྣམས་རིག་པར་མི་འདུས་པས། །མཐའ་ཡས་པ་ཡི་སྐྱོན་དུ་འགྱུར། །ཡོ་ག་དོན་གྱིས་མ་བཤད་ན། །ཐེག་པའི་རུ་ཤན་མི་ཕྱེད་པས། །ཆེ་ཆུང་རིམ་པ་དོན་མེད་འགྱུར། །ཚིག་གི་དོན་གྱིས་མ་བཤད་ན། །རྒྱུད་རྣམས་རིམ་པར་གསལ་བའི་ཚིག །འབྲུ་མི་ཆོམས་པའི་སྐྱོན་དུ་འགྱུར། །དགོས་ཆེད་དོན་གྱིས་མ་བཤད་ན། །རྫོགས་ཆེན་བྱ་རྩོལ་མེད་པ་ལ། །དོན་མེད་པ་ཡི་སྐྱོན་དུ་འགྱུར། །ཞེས་གསུངས་པའི་ཕྱིར་རོ། །གཉིས་པ་སོ་སོའི་རང་བཞིན་རྣམ་པར་གཞག་པ་ལ་གཉིས། རྒྱུད་ཀྱི་འཆད་ཐབས་སྤྱིར་བསྟན་པ་དང་། རང་བཞིན་བྱེ་བྲག་ཏུ་དབྱེ་བའོ། །དང་པོ་ནི། ཐུན་མོང་གི་གླེང་གཞི་ཕུན་སུམ་ཚོགས་པ་ལྔས་མདོར་བསྟན། ཐུན་མོང་མ་ཡིན་པའི་གླེང་སློང་ཕུན་སུམ་ཚོགས་པ་ལྔའི་ཆིངས་ཀྱིས་རྒྱས་པར་བཤད་པ་སྟེ། དེའང་ཐུན་མོང་བ་རྣམས་ལས་གླེང་གཞི་གང་རུང་གཅིག་ལས་མི་འབྱུང་ལ། འདིར་ཐལ་འགྱུར་ལས། ཐེག་གཞན་རྣམས་དང་སྒོ་བསྟུན་ཕྱིར། །ཐུན་མོང་དག་གི་གླེང་གཞི་ཡིས། །སྡུད་པོ་རང་གི་འཁོར་རྣམས་ལ། །ཡིད་ཆེས་བྱ་ཕྱིར་བསྟན་པ་སྟེ། །གདུལ་གཞི་ལས་ནི་འདུལ་བྱེད་དུ། །བྱུང་བས་བསྟན་པ་གནས་པར་བྱེད། །ཅེས་གཞི་རང་བཞིན་གྱི་འོད་གསལ་བ་ཆོས་དབྱིངས་དོན་གྱི་འོག་མིན་དུ། རང་རིག་འཕོ་འགྱུར་མེད་པས་བླང་དོར་གྱི་ཆོས་ཉིད་ལས་འདས་པའི་རང་བཞིན་སྟོན་པ། འདི་སྐད་བདག་གིས་བསྟན་ཅིང་བཤད་པའི་དུས་ན་ཞེས་འབྱུང་ལ། ཚིག་གི་རྒྱུད་དེ་ཉིད་གནས་གང་དུ་བྱུང་བས་ཉམས་སུ་ལེན་པ་ད་ལྟ་བའི་དུས་མཚོན་ལ། འདི་སྐད་བདག་གིས་ཐོས་པའི་དུས་གཅིག་ན་ཞེས་གླེང་གཞི་གཉིས་སུ་བཀའ་སྩལ་པ་ཡིན་ནོ། །འདུ་ཤེས་ལོག་པ་དག །མདོ་རྒྱུད་གཞན་ནས་འདི་སྐད་བདག་གིས་ཐོས་ཞེས་གསུངས་ཀྱིས། འདིར་བསྟན་ཞེས་བྱུང་བས་རྒྱུད་མ་ཡིན་ཏོ་ཟེར་བ་ནི་བློ་གྲོས་ཀྱི་མིག་ཟུམ་པ་སྟེ། བསྟན་པས་བཅོས་མ་ཡིན་ན་འཇམ་དཔལ་ལས། གསང་བའི་བདག་པོ་དེ་ཕྱིར་ངས། །ཁྱོད་ལ་ལེགས་པར་བསྟན་པར་བྱ། །ཞེས་དང་། བདེ་མཆོག་རྩ་རྒྱུད་ལས། དེ་ནས་གསང་བ་བསྟན་པར་བྱ། །ཞེས་གསུངས་པས་དེ་དག་ཀྱང་། བཅོས་མར་འགྱུར་བའི་སྐྱོན་ཡོད་དོ། །ད་དུང་ཁྱད་པར་གྱི་ཆོས་བསྒྲུབ་ན། ཐུན་མོང་དུ་འདི་སྐད་བདག་གིས་ཐོས་ཞེས་པ་ཚིག་ཙམ་ཐོས་ཀྱི་དོན་ཁོང་དུ་མ་ཆུད་ཅེས་པའི་དོན་དང་། བླ་ན་མེད་པ་འདི་བསྟན་ཅིང་བཤད་པའི་དུས་ཀྱི་སྒྲས་ཚིག་དོན་མ་ལུས་པ་ཁོང་དུ་ཆུད་ཅིང་སྟོན་པ་དང་སྡུད་པོ་གཉིས་སུ་མེད་པའི་ཆེ་བའང་ཞར་ལ་གྲུབ་པས་ཁྱད་པར་དུ་འཕགས་པ་ཡིན་ནོ། །དེའི་ཕྱིར་དོན་གྱི་རྒྱུད་འབྱུང་བར་སྟོན་པ་ཐུན་མོང་མ་ཡིན་པའི་གླེང་གཞི་ཡིན་ལ། ཚིག་གི་རྒྱུད་འབྱུང་བར་མཚོན་པ་ཐུན་མོང་གི་གླེང་གཞི་སྟེ་ཐེག་པ་ཀུན་མདོ་མཐུན་པར་བསྟན་པའོ། །བཤད་ཐབས་དངོས་ལ་ཆིངས་ཆེན་པོ་ལྔ། ཡན་ལག་རྣམ་པ་བཞིར་ཡོད་པའི་སྔ་མ་ནི་དྲངས་ཟིན་ལ། ཡན་ལག་བཞི་ནི་རིག་པར་རང་གྲོལ་ལས། ཁྱུང་ཆེན་མཁའ་ལྡིང་ལྟ་བུའི་བློས། །དོན་གྱི་ཁོག་རྣམས་ཕུབ་སྟེ་བཤད། །སྟག་མོའི་མཆོངས་སྟངས་ཤེས་རབ་ཀྱིས། །དོན་གྱི་ས་ཆེན་བཅད་དེ་བཤད། །རུས་སྦལ་ནུར་འགྲོས་ལྟ་བུའི་བློས། །ཡི་གེའི་འབྲུ་རྣམས་ཆོམ་པར་བཤད། །མུ་ཏིག་བསྟར་བརྒྱུས་ལྟ་བུའི་བློས། །མན་ངག་དོན་དུ་བསྡེབས་ལ་བཤད། །ཅེས་པས་དོན་གྱི་ཁོག་ཁྱུང་གིས་ནམ་མཁའི་དབྱིངས་འཇལ་བ་ལྟར་ཕུབ། དཀྱུས་ཀྱིས་སྟག་མོ་ནགས་ལ་མཆོངས་པ་ལྟར་བཅད། ཚིག་གི་དོན་རུས་སྦལ་དལ་གྱིས་འགྲོ་བ་ལྟར་བཤད། མན་ངག་གི་དོན་མུ་ཏིག་སྟར་ལ་བརྒྱུས་པ་བཞིན་བསྡུ་བ་སྟེ་རྒྱུད་ཀྱི་བཤད་ཐབས་སྤྱིར་བསྟན་པ་ཡིན་ནོ། །གཉིས་པ་སོ་སོའི་རང་བཞིན་བྱེ་བྲག་ཏུ་དབྱེ་བ་ལས། དང་པོ་བསྐྱེད་པ་མ་ཧཱ་ཡོ་ག་ནི། དེ་འང་ཞེ་སྡང་ཤས་ཆེ་ཞིང་རྟོག་པ་མང་བ་རྣམས་ལ་སྣང་བ་ཐབས་ཀྱི་རང་བཞིན་ཕའི་རྒྱུད་དུ་བསྟན་པ་སྟེ། དེ་ལ་གསུམ། ངོ་བོ། དབྱེ་བ། ངེས་འབྱེད་དོ། །དང་པོ་ནི། མ་ཧཱའི་སྒྲ་ལས་དྲངས་པ་ཆེན་པོ། ཡོ་གའི་སྒྲ་ལས་དྲངས་པ་རྣལ་འབྱོར། ཏནྟྲའི་སྒྲ་ལས་དྲངས་པ་རྒྱུད་དེ། རྣལ་འབྱོར་ཆེན་པོ་ཐབས་ཀྱི་རྒྱུད་ཅེས་བྱ་ལ། འདི་ལྟར་སྣང་སྲིད་ཀྱི་རོལ་པར་སྣང་བ་ཐམས་ཅད་ལྷ་དང་གཞལ་མེད་ཁང་ཆེན་པོར་བལྟ་ཞིང་། ཕུང་པོ་ལྔ། ཁམས་དྲུག །སྐྱེ་མཆེད་བཅུ་གཉིས་ལ་སོགས་པ་ལྷའི་ཕྱག་རྒྱ་གཅིག་ཏུ་གསལ་ཞིང་། རླུང་ལྔ་གཙོ་བོར་གྱུར་པའི་བདེ་གསལ་མི་རྟོག་པའི་ཡེ་ཤེས་ཆེན་པོ་གཉིས་སུ་མེད་པའི་ལམ་གཙོ་བོར་བྱས་ནས་སྣང་གྲགས་རིག་གསུམ་དཀྱིལ་འཁོར་གསུམ་གྱི་ངོ་བོར་རྫོགས་པས་ཚེ་འདིར་གྲོལ་བར་འདོད་པའོ། །གཉིས་པ་དབྱེ་བ་ལ་གསུམ། ངོ་བོ་གཞི་ལམ་འབྲས་བུ་གཙོ་བོར་འདོད་པ་དང་། ཐབས་ལམ་བསྒྲུབ་པ་གཙོ་བོར་འདོད་པ་དང་། སྣ་ཚོགས་ལམ་འགྱུར་གཙོ་བོར་འདོད་པའོ། །དང་པོ་ནི། བཤད་རྒྱུད་མེ་ལོང་ལས། ཆོས་རྣམས་མ་ལུས་གཉིས་མེད་པའི། །རང་རིག་བྱང་ཆུབ་སེམས་ཉིད་དོ། །ཞེས་དང་། སྙིང་རྒྱུད་ཕྱི་མ་ལས། རྒྱུད་ནི་རྒྱུན་ཆགས་ལ་བཤད་དེ། ཐབས་དང་རྒྱུ་ལས་འབྲས་བུའོ། །ཞེས་གང་རྟོགས་པར་བྱ་བ་རང་བཞིན་གཞིའི་རྒྱུད་སེམས་ཉིད་འོད་གསལ་བ་དང་། དེ་མཚོན་བྱེད་མིང་ཚིག་ཡི་གེར་སྣང་བས་རྟོགས་པར་བྱེད་པའི་བགྲོད་པ་ཐབས་སམ་ལམ་གྱི་རྒྱུད་སྨིན་བྱེད་ཀྱི་དབང་དང་གྲོལ་བྱེད་ཀྱི་བསྐྱེད་རྫོགས་ཟབ་མོའི་ཏིང་ངེ་འཛིན་ལས་རྩེ་གཅིག་ཏུ་མི་གཡོ་བའི་དྲོད་ལས་ཡོན་ཏན་གོང་ནས་གོང་དུ་བསྒྲུབ་པ་སྟེ། དེ་སྐད་དུ། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་འབྱུང་། །ཞེས་སོ། །དེ་ལྟར་བསྒྲུབས་པས་མཐར་ཕྱིན་པ་འབྲས་བུའི་རྒྱུད་རང་བྱུང་གི་ཡེ་ཤེས་མངོན་དུ་བྱེད་པ་མཆོག་གི་བསྒྲུབ་པ་གཙོ་བོ་ཡིན་པའང་འདོད་དེ། སྦྱང་གཞི་རྒྱུའི་རྒྱུད་ལ་བརྟེན་ནས། སྦྱང་བྱ་གློ་བུར་གྱི་དྲི་མ་རྣམས་སྦྱོང་བྱེད་ལམ་མམ་ཐབས་ཀྱི་རྒྱུད་ཀྱིས་ལེགས་པར་སྦྱངས་པས། སྦྱངས་འབྲས་བླ་ན་མེད་པ་མཆོག་གི་འབྲས་བུ་ནམ་ཡང་རྒྱུན་ཆད་མེད་པའི་རྒྱུད་ཀྱི་དབྱིངས་ལ་སྦྱོར་བ་ལ་ཐ་སྙད་བཞག་པ་སྟེ། སྒྱུ་འཕྲུལ་བྱེ་བྲག་བསྟན་པ་ལས། གྲུབ་པའི་རྣལ་འབྱོར་རྣལ་འབྱོར་ཆེ། །ལྷུན་གྲུབ་ཇི་བཞིན་མངོན་བྱས་པའང་། །བརྟགས་པ་ཙམ་སྟེ་གཉིས་པ་མེད། །དེ་ཕྱིར་དེ་ལ་དེ་བརྗོད་དོ། །ཞེས་བཤད་དོ། །གཉིས་པ་ཐབས་ལམ་བསྒྲུབ་པ་གཙོ་བོར་འདོད་པ་ནི། སྐུའི་དཀྱིལ་འཁོར་འཇམ་དཔལ་སྒྱུ་འཕྲུལ་དྲྭ་བ། གསུང་གི་དཀྱིལ་འཁོར་པདྨ་སྒྱུ་འཕྲུལ་དྲྭ་བ། ཐུགས་ཀྱི་དཀྱིལ་འཁོར་ཁྲག་འཐུང་། ཡོན་ཏན་གྱི་དཀྱིལ་འཁོར་རིན་པོ་ཆེ། ཕྲིན་ལས་ཀྱི་དཀྱིལ་འཁོར་སྒྱུ་འཕྲུལ་དྲྭ་བ་ལམ་དུ་བྱེད་པ་སྟེ། དཀྱིལ་འཁོར་ལྔ་གང་རུང་གི་སྒྲུབ་པ་ལ་བརྟེན་ནས། རྟོགས་པ་དང་ཏིང་ངེ་འཛིན་རྗེས་ལ་སྐྱེ་བས་བསྒྲུབ་པ་ལས་དངོས་གྲུབ་འདོད་ཅིང་ལམ་བསྒྲུབས་པས་གཞི་འབྲས་ཞར་ལ་འདོད་པའོ། །གསུམ་པ་སྣ་ཚོགས་ལམ་གྱུར་ལ་རྒྱུད་དང་། སྒྲུབ་ཐབས་གཉིས་ལས། རྒྱུད་ལ་བསྐྱེད་རྫོགས་རིམ་ཅན་དུ་འདོད་པ་རཏྣ་ཀཽ་ཏུ་བྷ་དང་རྡོའི་ཁམས་ལྷན་ཅིག་ཏུ་བཞག་པས་རིམ་གྱིས་གསེར་གྱི་རང་བཞིན་དུ་འགྱུར་བ་ལྟ་བུ་དང་། དུས་ཅིག་ཅར་དུ་འདོད་པ་མཀྵི་ཀའི་སྦྱོར་བས་ལྕགས་ཁམས་མྱུར་པོར་གསེར་དུ་བསྒྱུར་ནུས་པ་བཞིན་ཏེ། གཉིས་ཀས་གཞི་ལམ་ཞར་ལ་འདོད་པའོ། །ནོ་པི་ཀ་ལ་གཉིས། སོ་ཏ་ནོ་པི་ཀ་ཐམས་ཅད་སེམས་ཀྱི་རོལ་པར་ཤེས་པ་གཙོ་ཞིང་ཡན་ལག་དང་བཅས་བསྒྲུབ་པ་དང་། མཎྜལ་ནོ་པི་ཀ་དཀྱིལ་འཁོར་དུ་འཇུག་པ་ཚོགས་གཙོ་བོར་བྱས་ཏེ་བསྒྲུབ་པའོ། །དེ་དག་གི་ངོ་བོ་ཀུན་རྫོབ་ཙམ་དུ་ཡང་དག་པའི་ཀུན་རྫོབ་གྱི་གནས་སྐབས་ཕྱི་སྣོད་ཀྱི་འཇིག་རྟེན་རྟེན་གཞལ་ཡས་ཁང་དུ་བལྟ། ནང་བཅུད་ཀྱི་སེམས་ཅན་བརྟེན་པ་ལྷ་དང་ལྷ་མོའི་དཀྱིལ་འཁོར་དུ་བལྟས་པས། འགྲོ་བ་ཐམས་ཅད་ལྷ་དང་ལྷ་མོའི་གཟུགས་སུ་མཐོང་བས། གནས་སྐབས་སུ་ཡི་དམ་གྱི་ལྷ་ལ་སྲོག་གཅོད་པ་དང་། རྫུན་དུ་སྨྲ་བ་ལ་སོགས་པས་མཚོན་ཏེ་མི་དགེ་བའི་ལས་སྤང་བ་དང་། མཐར་ཐུག་བདེན་པས་ཕྲལ་དུ་མ་གོལ་བར། དོན་དམ་པ་ཅིའི་ངོ་བོར་ཡང་མ་གྲུབ་པའི་ཟུང་འཇུག་དབྱེར་མེད་དུ་རྟོགས་པ་ཡིན་པའི་ཕྱིར་རོ། །གསུམ་པ་ངེས་འབྱེད་རྒྱུད་སྡེའི་རྣམ་གྲངས་ལ། རྩ་རྒྱུད་དང་མན་ངག་གི་རྒྱུད་གཉིས་ལས། རྩ་བའི་རྒྱུད་ལ། དཔལ་གསང་བ་འདུས་པ་ནམ་མཁའ་དང་མཉམ་པའི་རྒྱུད། རི་རབ་ཟོམ་རྒྱ་མཚོ་དང་མཉམ་པའི་རྒྱུད། ཡེ་ཤེས་རྒྱས་པ་ས་གཞི་དང་མཉམ་པའི་རྒྱུད་དོ། །གདམས་པ་མན་ངག་གི་རྒྱུད་ལ། བར་ཆད་སྲུང་བ་གཟི་ལྡན་འབར་བ་མཚམས་ཀྱི་རྒྱུད། རྔོམ་བྱེད་མེ་ལྟར་འབར་བའི་རྒྱུད། ཟ་བྱེད་རོལ་པ་སྦྱིན་སྲེག་གི་རྒྱུད། སྟོབས་པོ་ཆེ་ཡོངས་སུ་སྒྲོལ་བའི་རྒྱུད། ཟླ་གསང་ནག་པོའི་རྒྱུད། ཞི་བ་ལྷའི་རྒྱུད་ལ་སོགས་པའོ། །གཉིས་པ་ལུང་ཨ་ནུ་ཡོ་ག་ནི། སྦྱང་གཞི་འདོད་ཆགས་ཤས་ཆེ་ཞིང་སེམས་གནས་པ་ལ་དགའ་བ་ལ། སྦྱང་བྱ་སྟོང་པ་དེ་ཁོ་ན་ཉིད་ཀྱི་རྫོགས་རིམ་ཤེས་རབ་མའི་རྒྱུད་དུ་བསྟན་པ་སྟེ། དེ་ལ་གསུམ། ངོ་བོ། དབྱེ་བ། ངེས་འབྱེད་དོ། །དང་པོ་ནི། ཨ་ནུ་ཡོ་གའི་སྒྲ་ལས་རྗེས་སུ་རྣལ་འབྱོར། ཏནྟྲ་སྟེ་རྒྱུད། དབྱིངས་བདེ་ཆེན་རྣལ་འབྱོར་གྱི་རྒྱུད་ཆེན་པོ་སྟེ། སྣོད་བཅུད་ཐམས་ཅད་ལྷའི་རང་བཞིན་དུ་དབྱིངས་ནས་སངས་རྒྱས་པར་རྟོགས་པའི་སྤྲོས་བྲལ་གྱི་མཐའ་གང་དུའང་མ་དམིགས་པའི་རང་བཞིན་གྱིས། ཐབས་བསྐྱེད་པའི་རིམ་པ་ཤས་ཆུང་ཞིང་། རྫོགས་པའི་རིམ་པ་ཤེས་རབ་རྩ་ཐིག་རླུང་གི་རྣལ་འབྱོར་ལ་བརྟེན་དབབ་བཟུང་ལྡོག་ཁྱབ་ཀྱིས་སྦྱོར་བས་བདེ་སྟོང་གཉིས་སུ་མེད་པའི་ཡེ་ཤེས་བསྐྱེད་ཅིང་། བདེ་གསལ་མི་རྟོག་པའི་གནས་ལུགས་ལམ་དུ་བྱེད་པས་ཚེ་འདིར་གྲོལ་བའི་རང་བཞིན་ཅན་ནོ། །གཉིས་པ་ནི། དབྱེ་ན་ལུང་དང་མདོ་གཉིས་ལས། ལུང་ལ་བསྟན་པའི་ལུང་སེམས་དང་སེམས་ལས་བྱུང་བ་དབྱིངས་དང་ཡེ་ཤེས་ཀྱི་རང་བཞིན་དུ་འདོད་པ་དང་། བརྗོད་པའི་ལུང་ཚིག་དང་ཐ་སྙད་ལས་གོ་བར་བྱེད་པའོ། །མདོ་ལ་སྒྱུ་འཕྲུལ་གཞི་ལམ་ལས་ཁྱད་པར་ཏུ་གྱུར་པ་ཡེ་ཤེས་རྔམ་པ་གློག་གི་འཁོར་ལོ་གཞི་ལམ་རྣམ་དག་ཏུ་སྨྲ་བ་དང་། ཕུར་བུ་ཐལ་འབྱིན་གྱི་དོན་ངེས་པར་མཚོན་པ། དུར་ཁྲོད་ཁུ་བྱུག་རོལ་པ་ཡེ་ཤེས་ཐོད་རྒལ་དུ་སྨྲ་བ་དང་། དཔལ་ཆེན་པོ་ཕྱག་རྒྱ་ཡང་དག་པ་ལས་ཁྱད་པར་དུ་འཕགས་པ་ཀུན་འདུས་རིག་པའི་མདོ་ཡང་དག་པ་ལམ་གྱུར་དབྱིངས་སུ་སྨྲ་བ་དང་། ཨ་ནུའི་རང་གཞུང་མངོན་པར་རྟོགས་པ་རང་གསལ་དུ་སྨྲ་བས་དབྱིངས་དང་ཡེ་ཤེས་དབྱེར་མེད་དུ་འདོད་པ་སངས་རྒྱས་ཐམས་ཅད་ཀྱི་དགོངས་པ་འདུས་པའི་མདོ། སེམས་དང་ཡེ་ཤེས་འབྱེད་པ་སེམས་ལུང་ཆེན་མོ་ཡི་གེ་རྣམ་དག་གི་མདོ་དང་དྲུག་གི་རྗེས་སུ་འབྲངས་ནས། བདེ་སྟོང་དབྱིངས་དང་ཡེ་ཤེས་ཀྱི་རིམ་པ་ཅིག་ཆར་དུ་འདོད་པ་ད་ང། རིམ་གྱིས་པ་དང་། མཐར་ཆགས་པ་དང་། ཐོད་རྒལ་དུ་འདོད་པ་སྟེ། དབྱིངས་དང་ཡེ་ཤེས་བདེ་སྟོང་བྱང་ཆུབ་སེམས་ཀྱི་ཐེག་པའི་རང་བཞིན་ནོ། །གསུམ་པ་ངེས་བརྗོད་རྒྱུད་སྡེའི་རྣམ་གྲངས་ལ། བཤད་མ་ཐག་པའི་སྔགས་ཀྱི་མདོ་དྲུག་དང་། རྩ་བའི་རྒྱུད་ལ། ཐིག་ལེ་འདུས་པའི་རྒྱུད། སྒྱུ་མ་ཆེན་པོའི་རྒྱུད། ཟླ་གསང་ཐིག་ལེའི་རྒྱུད། རྡོ་རྗེ་གདན་བཞིའི་རྒྱུད་དོ། །གདམས་པ་མན་ངག་གི་རྒྱུད་ལ། སྐུའི་རྒྱུད་མེ་ལྟར་འབར་བ། གསུང་གི་རྒྱུད་དབང་ཆེན་འདུས་པ། ཐུགས་ཀྱི་རྒྱུད་པུཎྜ་རཱི་ཀ །ཡོན་ཏན་གྱི་རྒྱུད་ལྷ་མོ་གསང་བ། ཕྲིན་ལས་ཀྱི་རྒྱུད་རིག་འཛིན་འདུས་པ། རིག་སྔགས་སྤྱིའི་སྒྲུབ་པ་ཧེ་རུ་ཀའི་ཏནྟྲ། བྱེ་བྲག་གི་སྒྲུབ་པ་ལ། འཇམ་དཔལ་སྐུའི་རྒྱུད་ཟླ་གསང་ནག་པོ། པདྨ་གསུང་གི་རྒྱུད་རྟ་མཆོག་རོལ་པ། ཡང་དག་ཐུགས་ཀྱི་རྒྱུད་ཧེ་རུ་ཀ་གལ་པོ་ཆེ། ཕུར་པ་ཕྲིན་ལས་ཀྱི་རྒྱུད་བྱི་ཏོ་ཏ་མ་ལ་འབུམ་སྡེ། བདུད་རྩི་ཡོན་ཏན་གྱི་རྒྱུད་བདུད་རྩི་རོལ་པ་ཆེ་ཆུང་། མ་མོ་རྦོད་གཏོང་གི་རྒྱུད་མ་མོ་ཀུན་འདུས་སོ། །སྒྲུབ་པ་སྡེ་དྲུག་ལས་ཁ་ཚར་གྱི་རྒྱུད་ལ། ཕྲིན་ལས་ཁ་སྐོང་བ་ཆོས་ཉིད་གཏོར་མའི་རྒྱུད། ལས་རྒྱ་མཚོ་ཇི་ལྟར་བྱ་བ་ཀརྨ་མཱ་ལེ་ཕྲིན་ལས་ཀྱི་རྒྱུད། བསོད་ནམས་དང་ཡེ་ཤེས་ཀྱི་ཚོགས་བསགས་པ་ཚོགས་ཀྱི་རྒྱུད་ཆེ་ཆུང་། མཆོད་པ་མི་ཟད་པའི་གཏེར་དུ་བྱིན་གྱིས་བརླབ་པ་ནམ་མཁའ་མཛོད་ཀྱི་རྒྱུད། སྒྲོལ་བ་གནས་སུ་དག་པ་སྟོབས་པོ་ཆེ་ཡོངས་སུ་སྒྲོལ་བའི་རྒྱུད། སྦྱོར་བ་གནས་སུ་དག་པ་ཐིག་ལེ་ཀློང་གི་རྒྱུད། བརྟུལ་ཞུགས་དྲག་པོས་ཀུན་ཏུ་སྤྱོད་པ་གླང་པོ་ཆེ་རབ་འབོག་གི་རྒྱུད། ལས་བཞི་མཐར་ཕྱིན་པ་ཟ་བྱེད་རོལ་པ་སྦྱིན་སྲེག་གི་རྒྱུད། ལས་ཐམས་ཅད་ཀྱི་སྔོན་དུ་འགྲོ་བ་གཏོར་རྒྱུད་ཆེ་ཆུང་། བཀའི་འཁོར་ལོ་ལྷག་མས་བསྐངས་ནས་ལས་ལ་བསྐུལ་བ་དཔལ་འབར་ཁྲོ་མོའི་རྒྱུད། གདུག་པ་ཅན་གཟིར་མནན་གྱིས་ཚར་བཅད་པ་ཞིང་བཅུ་རོལ་པའི་རྒྱུད་ལ་སོགས་པའོ། །འདི་དག་གི་རྒྱུད་གཙོ་ཆེ་ཆུང་ལས། རང་བཞིན་དུ་མ་ཧཱ་དང་ཨ་ནུ་གཉིས་ཀར་གཏོགས་པའི་མན་ངག་གི་རྒྱུད་དུ་ཐམས་ཅད་མཁྱེན་པ་ཀློང་ཆེན་པས་ངོས་བཟུང་བ་ཡིན་ནོ། །དོན་གསུམ་པ་གདུལ་བྱ་གཏི་མུག་ཤས་ཆེ་ཞིང་བྱ་རྩོལ་ཅན་གྱི་དོན་དུ་གསུངས་པ་གཉིས་སུ་མེད་པའི་རྒྱུད་རང་བཞིན་རྫོགས་པ་ཆེན་པོ་ཨ་ཏི་ཡོ་ག་ལ་གཉིས། འོག་མ་རྣམས་ལས་འཕགས་པའི་ཚུལ་དང་། གསང་བ་ཆེན་པོ་དངོས་བཤད་པའོ། །དང་པོ་ནི། ཐེག་པ་འོག་མ་ཐམས་ཅད་རྩོལ་སྒྲུབ་དང་བླང་དོར་གྱི་རང་བཞིན་ཅན། བཅོས་སླད་དང་རེ་དོགས་ཀྱི་སྒྲིབ་པས་རང་བྱུང་གི་ཡེ་ཤེས་ལྷུན་གྲུབ་རང་གནས་ཆེན་པོ་ཡེ་གྲོལ་འདུས་མ་བྱས་པའི་དགོངས་པ་ལ་བསྒྲིབས་ཏེ་གོལ་བས། ཡང་དག་པའི་དོན་རྣལ་མ་ལ་རེག་པའི་དུས་སྐབས་བསྐལ་པ་ནི་ཀུན་བྱེད་རྒྱལ་པོ་ལྟ་བ་ནམ་མཁའ་དང་མཉམ་པའི་རྒྱུད་ལས། ཀྱཻ། སེམས་དཔའ་ཆེན་པོ་འདི་ཉོན་ཅིག །འཁོར་གྱི་སྟོན་པ་རྣམ་གསུམ་གྱི། །བསྟན་པ་གསུམ་ནི་གོལ་སྒྲིབ་སྟེ། །དེ་ཡང་ཇི་ལྟ་བུ་ཞེ་ན། ངེས་པ་ཐོབ་པའི་ཐེག་པ་དྲུག །རྫོགས་པ་ཆེན་པོའི་གོལ་སར་བསྟན། །ཅེས་གོལ་ས་སྤྱིར་བསྟན་ནས་བྱེ་བྲག་ཏུ་རང་རང་གི་ངོ་བོས་དབྱེ་སྟེ་གསལ་བར་བསྟན་པ་ནི། དེ་ཉིད་ལས། དེ་ཡང་ཇི་ལྟ་བུ་ཞེ་ན། །བྱང་ཆུབ་སེམས་དཔའི་མདོ་སྡེ་ནི། །ཀུན་ཏུ་འོད་ཀྱི་ས་འདོད་པ། །བདེན་པ་གཉིས་ཀྱི་རྟོག་དཔྱོད་ཀྱིས། །ཆོས་ཉིད་སྟོང་པ་ནམ་མཁར་འདོད། །ཨ་ཏི་ཡོ་གའི་བདེ་ཆེན་ནི། །རྟོག་དཔྱོད་འདས་པའི་བྱང་ཆུབ་སེམས། །རྟོག་དཔྱོད་འདས་ལ་མདོ་སྡེས་བསྒྲིབས། །རྫོགས་ཆེན་རྟོག་དང་དཔྱོད་པ་ནི། །མདོ་སྡེ་དག་ཏུ་གོལ་བར་བཤད། །ཅེས་སོ། །འོ་ན་བདེན་པ་གཉིས་ལ་མི་བརྟེན་པའི་ཆོས་དེ་གྲངས་ཅན་པའི་གྲུབ་མཐའ་ལྟར་རྒྱུ་འབྲས་ཐ་ཆད་དུ་སྨྲ་བ་དང་མི་མཚུངས་སམ་ཞེ་ན། མ་ཡིན་ཏེ་བསྐྱེད་བྱ་སྐྱེད་བྱེད་ལ་སོགས་པའི་རྒྱུ་འབྲས་རྐྱེན་དང་བཅས་པ་མེད་པས། ཡེ་ནས་ནམ་མཁའ་ལྟ་བུའི་རང་བཞིན་འཕོ་འགྱུར་བྱ་རྩོལ་ལས་འདས་པ་དོན་དམ་པའི་བདེན་པ་དག་མ་དག་གིས་ཆོས་ཉིད་གང་དུའང་རིས་སུ་མ་ཆད་པའི་གནས་ལུགས་འོད་གསལ་བའི་དབྱིངས་ལ་ཀུན་རྫོབ་དང་དོན་དམ་གྱི་ཆོས་མེད་པ་སྟེ། ཀུན་བྱེད་ལས། བདེན་པ་གཉིས་ཀྱི་གཏན་ལ་དབབ་ཏུ་མེད། །ངེས་པ་གཅིག་ལ་བདེན་པ་རྣམ་པ་གཉིས། །མ་ངེས་ཐེ་ཚོམ་ཅན་གྱི་ལུང་དེ་ལ། །ངེས་པར་གཅིག་ཏུ་བསྟན་པར་ག་ལ་ཡོད། །རྣལ་འབྱོར་གང་ཟག་ཆོས་ལ་རློམ་བྱེད་ནི། །སྟོང་གསུམ་རྒྱུ་འབྲས་ལུང་ལ་བརྟེན་སྨྲ་བ། །དེ་ལ་བདེན་གཉིས་ཚད་མ་བཞི་ཡང་དགོས། །ཀུན་བྱེད་གཞི་ཡིས་ཆོས་ཀུན་བྱས་པའི་ཕྱིར། །ངས་བྱས་ཆོས་ལ་བདེན་པ་གཉིས་མི་དགོས། །ངས་བྱས་ཆོས་ལ་བདེན་པ་གཉིས་དགོས་སུ། །ངས་བྱས་ཐམས་ཅད་བྱང་ཆུབ་སེམས་སུ་བྱས། །བྱང་ཆུབ་སེམས་ལ་ཀུན་རྫོབ་དོན་དམ་མེད། །ཅེས་སོ། །དེ་བཞིན་ཏུ་སྔགས་འོག་མ་ཐམས་ཅད་ལའང་སྤང་གཉེན་གྱི་གོལ་སྒྲིབ་ནི། ཀུན་བྱེད་རྒྱལ་པོ་ལྟ་བ་ནམ་མཁའ་དང་མཉམ་པའི་རྒྱུད་ལས། ཀྱཻ། ཀྲྀ་ཡ་རྡོ་རྗེ་འཛིན་འདོད་པ། །དག་པ་རྣམ་གསུམ་སྒོར་ཞུགས་ནས། །གཟུང་འཛིན་དག་པའི་ཡུལ་ལ་གནས། །ཨ་ཏི་ཡོ་གའི་བདེ་ཆེན་ནི། །གཟུང་འཛིན་འདས་པའི་བྱང་ཆུབ་སེམས། །གཟུང་འཛིན་འདས་ལ་ཀྲྀ་ཡས་བསྒྲིབས། །རྫོགས་ཆེན་གཟུང་དང་འཛིན་བྱེད་པ། །ཀྲྀ་ཡ་དག་ཏུ་གོལ་བར་བཤད། །ཨུ་པ་ཡ་ཡི་ལྟ་སྤྱོད་ནི། །ཀྲྀ་ཡ་སྤྱོད་ཅིང་ཡོ་ག་སྒྲུབ། །ལྟ་སྤྱོད་འབྲེལ་བའི་དོན་མེད་པས། །གཉིས་སུ་མེད་པའི་དོན་མ་རྟོགས། །ཨ་ཏི་ཡོ་གའི་བདེ་ཆེན་ནི། གཉིས་སུ་མེད་པའི་བྱང་ཆུབ་སེམས། །གཉིས་སུ་མེད་ལ་ཨུ་པས་བསྒྲིབས། །རྫོགས་ཆེན་གཉིས་སུ་བྱེད་པ་ནི། །ཨུ་པ་ཡ་རུ་གོལ་བར་བཤད། །ཡོ་ག་སྟུག་པོ་བཀོད་འདོད་པ། །མཚན་མ་ཡོད་མེད་སྒོར་ཞུགས་ནས། །ཕྱག་རྒྱ་བཞི་ལ་གཙོར་བྱེད་ལ། །བླང་དོར་མེད་ལ་འཇུག་མ་ནུས། །ཨ་ཏི་ཡོ་གའི་བདེ་ཆེན་ནི། །བླང་དོར་མེད་པའི་བྱང་ཆུབ་སེམས། །བླང་དོར་མེད་ལ་ཡོ་གས་བསྒྲིབས། །རྫོགས་ཆེན་བླང་དང་དོར་བྱེད་པ། །ཡོ་ག་དག་ཏུ་གོལ་བར་བཤད། །མ་ཧཱ་རྡོ་རྗེ་འཆང་འདོད་པ། །ཐབས་དང་ཤེས་རབ་སྒོར་ཞུགས་ནས། །རང་རྒྱུད་དག་པའི་དཀྱིལ་འཁོར་ལ། །བསྙེན་སྒྲུབ་རྣམ་བཞི་སྒྲུབ་པར་བྱེད། །ཨ་ཏི་ཡོ་གའི་བདེ་ཆེན་ནི། །རྩོལ་སྒྲུབ་འདས་པའི་བྱང་ཆུབ་སེམས། །རྩོལ་སྒྲུབ་འདས་ལ་མ་ཧཱས་བསྒྲིབས། །རྫོགས་ཆེན་རྩོལ་སྒྲུབ་བྱེད་པ་ནི། །མ་ཧཱ་ཡོ་གར་གོལ་བར་བཤད། །ཨ་ནུ་དབྱེར་མེད་ས་འདོད་པ། །དབྱིངས་དང་ཡེ་ཤེས་སྒོར་ཞུགས་ནས། །འདི་ལྟར་སྣང་བའི་ཆོས་རྣམས་ལ། །རྒྱུ་ནི་དག་པའི་དབྱིངས་ལྟ་བ། །འབྲས་བུ་ཡེ་ཤེས་དཀྱིལ་འཁོར་ལྷ། །ཨ་ཏི་ཡོ་གའི་བདེ་ཆེན་ནི། །རྒྱུ་འབྲས་འདས་པའི་བྱང་ཆུབ་སེམས། །རྒྱུ་འབྲས་འདས་ལ་ཨ་ནུས་བསྒྲིབས། །རྫོགས་ཆེན་རྒྱུ་འབྲས་གཉིས་བལྟ་ན། །ཨ་ནུ་ཡོ་གར་གོལ་བར་བཤད། །ཅེས་སོ། །འོ་ན་ཐེག་པ་འོག་མ་དེ་དག་དགོས་པ་ཅིའི་སླད་དུ་བསྟན་སྙམ་ན་མ་དག་པ་འཁོར་བ་དང་ལམ་ལ་སོགས་པ་རྒྱུ་འབྲས་ཀྱི་ནུས་པས་བསྐྱེད་པས་རྒྱུ་འབྲས་ལ་ལྟོས་པའི་ལམ་གྱི་རྣམ་གཞག་གི་གཙོ་ཆེ་བ་རྣམས་དབང་པོ་འབྲིང་མན་ཆོད་ཀྱི་དོན་དུ་བསྟན་པ། དབྱིངས་ངོ་བོ་ཉིད་ཀྱི་རྣམ་པར་དག་པའི་དོན་ལ་རྒྱུ་འབྲས་ཀྱི་ཆོས་མེད་པའི་ཕྱིར་དབང་པོ་རྣོན་པོ་ལ་ཡེ་བཞག་གི་དོན་འདི་ལྟ་བུ་བསྟན་ནས། དེ་ལ་བཅོས་ཤིང་བསྒྱུར་མི་དགོས་པར་འཆད་པ་ཡང་དེ་ཉིད་ལས། ལྟ་བ་བསྒོམ་མེད་དམ་ཚིག་བསྲུང་དུ་མེད། །ས་ལ་སྦྱང་མེད་ལམ་ལ་བགྲོད་དུ་མེད། །ཕྲིན་ལས་བཙལ་མེད་དབང་ལ་བསྐུར་དུ་མེད། །སྒོ་གསུམ་རྩོལ་མེད་དཀྱིལ་འཁོར་བསྐྱེད་དུ་མེད། །རྒྱུ་འབྲས་གཉིས་མེད་ནམ་མཁའ་ལྟ་བུའོ། །ཞེས་དང་། བྱང་ཆུབ་སེམས་ནི་ཡེ་ནས་མ་ནོར་ཡིན། །ཡེ་ནས་ཡིན་ལ་ཡེ་ནས་ནོར་བ་མེད། །ནོར་བ་མེད་ལ་བདེན་རྫུན་སྒྲོ་མི་འདོགས། །རྒྱུ་རྐྱེན་འབྲས་བུ་རྩོལ་སྒྲུབ་ཀུན་ལས་འདས། །བྱས་ཟིན་རྩོལ་སྒྲུབ་འདས་པ་མ་རིག་ནས། །རྩོལ་སྒྲུབ་བྱ་བྱེད་སྒོམ་པས་འགྲུབ་ལྟ་ན། །བྱང་ཆུབ་གེགས་སུ་དེ་ལས་ཆེ་བ་མེད། །ཅེས་གསུངས་པའི་ཕྱིར་རོ། །དེ་ལྟ་ན་ཁམས་ཀྱི་དྲི་མ་བླང་དོར་གྱི་ཆོས་ཟབ་མོས་སྦྱང་དུ་མི་འདུག་པས། ཐ་མལ་པ་ལྟར་འདུག་པ་ཁོ་ནས་སངས་རྒྱས་འགྲུབ་བམ་ཞེ་ན། ཐ་མལ་པས་ཐད་ཀའི་སྣང་བ་ལམ་དུ་འཁྱེར་མི་ནུས་ཤིང་། གནས་ལུགས་ཀྱི་བཞུགས་ཚུལ་དེ་ལྟར་ཡིན་པ་མ་རིག་པས་ལས་དང་བག་ཆགས་ཀྱི་རྟེན་གཞིར་གནས་བཅས་ཤིང་རང་བཞིན་འོད་གསལ་བའི་གནས་ལུགས་རང་ལ་ཡོད་ཀྱང་། དབུལ་པོའི་ཁྱིམ་གྱི་གཏེར་བཞིན་དུ་དེས་གོ་མ་ཆོད་པས་དབུལ་པོའི་རང་བཞིན་འགྱུར་བ་མེད་པ་ལྟར་གནས་པ་དང་། རྫོགས་པ་ཆེན་པོ་བླ་མའི་མན་ངག་ལ་བརྟེན་ནས་ད་ལྟའི་རིག་པ་སྒྲོ་འདོགས་ཅིག་ཆར་དུ་ཆོད་པ་ལ་སངས་རྒྱས་ཀྱི་ཆེ་བའི་ཡོན་ཏན་ལྷུན་གྲུབ་ཏུ་ཚང་བའི་སྐུ་གསུམ་རང་ཆས་ཀྱི་བདེན་པ་མཐོང་བས་སངས་རྒྱས་ལོགས་ནས་བཙལ་མི་དགོས་པའི་སྤང་གཉེན་གྱི་ཆོས་བོར་བ་གཉིས་མི་མཚུངས་ཏེ། ཀུན་ཏུ་བཟང་པོ་ཀློང་དྲུག་པ་ལས། རྙོག་པ་མེད་པའི་རང་སེམས་དང་། །རྟོག་པ་མེད་པའི་རང་རིག་གཉིས། །འདྲའོ་འདྲའོ་ནོར་ར་རེ། །མ་བསྒྲིབས་གཏིང་གསལ་སྣང་བ་དང་། །འགྲོ་བའི་བསམ་རྒྱུད་ཞེན་པ་གཉིས། །འདྲའོ་འདྲའོ་ནོར་ར་རེ། །མ་བཙལ་བཞག་པའི་སྒོམ་པ་དང་། །རྩ་རླུང་སེམས་ཀྱི་ངལ་བསོ་གཉིས། །འདྲའོ་འདྲའོ་ནོར་ར་རེ། །དྲན་མེད་རིག་པ་ཡུལ་སྣང་དང་། །དྲན་བསམ་འགྲོ་དྲུག་འཁྲུལ་པ་གཉིས། །འདྲའོ་འདྲའོ་ནོར་ར་རེ། །ཞེས་གསུངས་པའི་ཕྱིར་རོ། །དེའི་ཕྱིར་སེམས་ཉིད་གཡོ་བ་མེད་པའི་ཆོས་སྐུ་བྱང་ཆུབ་ཀྱི་སེམས་ནི་ཐེག་པའི་ཡང་རྩེ་རང་བཞིན་རྫོགས་པ་ཆེན་པོའི་དགོངས་པ་སྐུ་གསུམ་ལྷུན་གྱིས་གྲུབ་པའི་གནས་ལུགས་ཏེ་ཀུན་བྱེད་ལས། ཀྱེ་སེམས་དཔའ་ཆེན་པོ་ཉོན་ཅིག །ཆོས་ཀྱི་སྐུ་ནི་བྱང་ཆུབ་སེམས། །བྱང་ཆུབ་སེམས་ལས་ཆོས་ཀྱི་སྐུ། །རྡུལ་ཙམ་སུས་ཀྱང་བཅོས་པ་མེད། །དེས་ན་སངས་རྒྱས་སེམས་ལས་མེད། །ལོངས་སྤྱོད་རྫོགས་སྐུ་བྱང་ཆུབ་སེམས། །བྱང་ཆུབ་སེམས་ལས་ལོངས་སྤྱོད་རྫོགས། །སེམས་ལས་བྱུང་བའི་གཟུགས་རྣམས་ལ། །ལོངས་སྤྱོད་རྫོགས་ལས་སྐུ་གཞན་མེད། །སྤྲུལ་པའི་སྐུ་ནི་བྱང་ཆུབ་སེམས། །བྱང་ཆུབ་སེམས་ཀྱི་སྤྲུལ་པ་ལས། །འགྲོ་བའི་དོན་མཛད་གཞན་ན་མེད། །དུས་གསུམ་སངས་རྒྱས་ཐམས་ཅད་ཀྱང་། །བྱང་ཆུབ་སེམས་ལས་གཞན་མེད་དེ། །སྔ་རབས་འདས་པའི་སངས་རྒྱས་རྣམས། །རང་སེམས་མ་བཅོས་སྔར་མཐོང་རྟོགས། །ད་ལྟར་བཞུགས་པའི་སངས་རྒྱས་རྣམས། །མ་བཅོས་པ་ཡི་རང་སེམས་དེ། །མ་བཅོས་ཇི་བཞིན་རྟོགས་གྱུར་པས། །ད་ལྟར་འགྲོ་བའི་དོན་ཡང་མཛད། །སླད་ནས་འབྱོན་པའི་སངས་རྒྱས་རྣམས། །རང་སེམས་བྱང་ཆུབ་སེམས་ཉིད་འདི། །སྔ་མ་བཅོས་པར་ལུང་མ་བསྟན། །ད་ལྟར་ཏིང་འཛིན་སེམས་མི་འཆོས། །མ་བཅོས་ལམ་དུ་ཞུགས་ནས་བྱོན། །ཞེས་དང་། སེམས་ནི་ཇི་བཞིན་པ་ཡི་དངོས་པོ་སྟེ། །ཆོས་རྣམས་ཐམས་ཅད་དེ་བཞིན་ཉིད་དུ་གྲུབ། །ཇི་བཞིན་པ་ལ་འཆོས་པར་མ་བྱེད་ཅིག །ངོ་བོ་ཉིད་ལས་གཞན་དུ་མ་སྒྲུབ་ཅིག །བཙལ་ན་རྒྱལ་བས་དབྱིངས་ནས་རྙེད་མི་འགྱུར། །སྔར་བྱས་ཟིན་པས་ད་ནི་བྱེད་མི་དགོས། །སྔར་བསྒྲུབས་ཟིན་པས་ད་བསྒྲུབ་མ་བྱེད་པར། །མི་རྟོག་ཅིར་མི་དགོངས་ལ་མཉམ་པར་ཞོག །ཅེས་དང་། དེ་སྐད་དུ་གསང་བའི་སྙིང་པོ་ལས་ཀྱང་། དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ལས། །སངས་རྒྱས་གཞན་དུ་མ་འཚོལ་ཅིག །བཙལ་ཀྱང་རྒྱལ་བས་མི་རྙེད་དོ། །ཞེས་གསུངས་པ་ལྟར་ཐེག་པའི་རྒྱལ་པོ་འདིས་དབྱིངས་ཀྱི་ངོ་བོ་འོད་གསལ་རང་བྱུང་གི་ཡེ་ཤེས་སྤང་བླང་མེད་པར་བསྟན་ནས་བྱ་རྩོལ་དང་བྲལ་བའི་ས་ལ་སངས་རྒྱས་པའི་ཕྱིར་གཞན་ལས་ཆེས་འཕགས་པ་ཡིན་ནོ། །གཉིས་པ་ཁྱད་པར་ཅན་གྱི་གསང་བ་ཆེན་པོ་བཤད་པ་ལ་གསུམ། ངོ་བོ། དབྱེ་བ། རྣམ་གྲངས་ངེས་པའོ། །དང་པོ་ནི། ཨ་ཏིའི་སྒྲ་ལས་ཕུལ་བྱུང་ངམ་ཤིན་ཏུ། ཡོ་ག་རྣལ་འབྱོར་ཏེ། ཤིན་ཏུ་རྣལ་འབྱོར་རྫོགས་པ་ཆེན་པོའི་རྒྱུད་དེ་སྤྲོས་བྲལ་རང་བྱུང་གི་ཡེ་ཤེས་ལ་རྒྱ་ཆད་དང་ཕྱོགས་ལྷུང་བྲལ་བས་ཐེག་པ་མཐའ་དག་གི་དོན་ཡོངས་སུ་རྫོགས་པས་རྩེ་མོར་གྱུར་པའོ། །གང་གི་ཕྱིར་རྫོགས་པ་ཆེན་པོ་བྱ་ཞེ་ན། མ་དག་པ་འཁོར་བའི་ཆོས་སྣང་སྲིད་སྣོད་བཅུད་དུ་སྣང་བ་ཕུང་པོ་ཁམས་དང་སྐྱེ་མཆེད་ཀྱིས་བསྡུས་པ་མཐའ་དག་དང་། དག་པ་ཡེ་ཤེས་ཀྱི་སྒོ་ལྟ་སྒོམ་སྤྱོད་པ་ཐེག་པའི་རྣམ་གྲངས་གཞི་ལམ་འབྲས་གསུམ་གྱི་རྣམ་རོལ་དུ་གྱུར་པའི་ཆོས་ཐམས་ཅད་སེམས་ཀྱི་བཟོ་བོས་གློ་བུར་དུ་བྱས་ཤིང་རྣམ་པར་སྒྲོ་བཏགས་པའི་ཕྱིར། དེའི་ངོ་བོ་བག་ཆགས་འཁྲུལ་འཛིན་དུ་ཤར་བས་བདེན་བདེན་ལྟ་བུར་སྣང་ཡང་དོན་ལ་ངོ་བོ་མ་གྲུབ་པས་རང་བྱུང་གི་ཡེ་ཤེས་ཉིད་ལས་མ་གཡོས་པས་སེམས་ཀྱི་ངང་དུ་རྫོགས་པ་དང་། སྤྲོས་བྲལ་རང་བྱུང་གི་ཡེ་ཤེས་འོད་གསལ་བའི་ངོ་བོ་སྟོང་པ། རང་བཞིན་གསལ་བ། ཐུགས་རྗེ་རིག་པ་སྟེ། དེའི་ངང་དུ་སྐུ་གསུམ་གྱི་ཆོས་ཐམས་ཅད་ཕུན་སུམ་ཚོགས་པ་ལྔའི་རྣམ་རོལ་དུ་རྫོགས་པས་ན་ཕུན་སུམ་ཚོགས་པར་རྫོགས་པ་དང་། དེ་བཞིན་དུ་འདི་ལྟར་སྣང་ཞིང་སྲིད་པའི་ཆོས་དག་པ་དང་། མ་དག་པ་དང་། ཤིན་ཏུ་དག་པ་ལ་སོགས་པ་ཐ་དད་དུ་སྣང་བ་ཐམས་ཅད་རང་རིག་བྱང་ཆུབ་སེམས་ཀྱི་ངོ་བོར་འདུས། ངང་ལ་ཤར། དེའི་རང་བཞིན་ལ་གནས་པ། དཔེར་ན་གཉིད་ཀྱི་ངང་དུ་རྨི་ལམ་གྱི་ཆོས་མཐའ་ཡས་པ་རྫོགས་པ་ལྟར་ཐམས་ཅད་སེམས་ཉིད་བྱང་ཆུབ་སེམས་ཀྱི་ངང་དུ་རྫོགས་པ་དང་། དེའང་སེམས་ནི་ཀུན་རྟོག་པ་ཀུན་གཞི་ལས་རྣམ་པར་ཤེས་པ་ཚོགས་བརྒྱད་ཀྱི་རྟེན་འབྲེལ་དུ་ཤར་བ་ནི་དག་བྱ་དྲི་མ་ཡིན་ལ། སྐྱེ་འགག་གཉིས་མེད་བྱང་ཆུབ་ཀྱི་སེམས། སེམས་ཉིད་འོད་གསལ་བ། སེམས་ཀྱི་དམ་པ། རྣམ་པར་མི་རྟོག་པའི་ཡེ་ཤེས་དབྱིངས་ཆོས་ཀྱི་སྐུ། དོན་དམ་པའི་བདེན་པ་དེ་བཞིན་ཉིད་རྫོགས་པ་ཆེན་པོ་ཞེས་པ་རྣམས་ནི། རང་བྱུང་གི་ཡེ་ཤེས་བྱང་ཆུབ་སེམས་ཀྱི་སྙིང་པོ་དོན་དུ་གཉེར་བྱའི་མཐར་ཐུག་ལ་ངོས་འཛིན་པ་སྟེ། དེའི་ཕྱིར་ཀུན་བྱེད་ལས། གཅིག་རྫོགས་གཉིས་རྫོགས་སེམས་ལ་རྫོགས། །གཅིག་རྫོགས་སེམས་ཀྱིས་བྱས་པར་རྫོགས། །གཉིས་རྫོགས་ཕུན་སུམ་ཚོགས་པར་རྫོགས། །ཀུན་རྫོགས་བྱང་ཆུབ་སེམས་སུ་རྫོགས། །ཞེས་དང་། ཆེན་པོ་ནི་དེའི་གོང་དུ་རྣམ་པར་གྲོལ་བའི་ཆོས་གང་ཡང་མེད་པ་སྟེ། རིག་པ་རང་ཤར་ལས། དེ་བཞིན་རྫོགས་ཆེན་ཨ་ཏི་ལ། །བསྒྲུབ་མེད་སྒྲུབ་དང་བྲལ་བའོ། །བྱས་མེད་བྱུང་བ་མེད་པའོ། །འགག་མེད་ཁྱབ་གདལ་འུབ་ཆུབ་བོ། །འགྱུར་མེད་ཀློང་ཡངས་ཆེན་པོའོ། །ཆོས་མེད་སངས་རྒྱས་ཆེན་པོའོ། །ཞེས་སོ། །གཉིས་པ་དབྱེ་བ་ལ་གཉིས། མདོར་བསྟན་པ་དང་། རྒྱས་པར་དབྱེ་བའོ། །དང་པོ་ལ་གསུམ། སེམས་སྡེ། ཀློང་སྡེ། མན་ངག་གི་སྡེ་སྟེ། བཀོད་པ་ཆེན་པོ་ལས། ཡིད་ཅན་རྣམས་ལ་སེམས་ཀྱི་སྡེ། །ནམ་མཁའ་ཅན་ལ་ཀློང་གི་སྡེ། །རིམ་རྩོལ་བྲལ་ལ་མན་ངག་གོ །ཞེས་སོ། །དེ་ལྟར་གསུམ་དུ་ངེས་པ་ནི་ཕྱི་ནང་གི་ཆོས་རྣམས་དོན་གཞན་ནམ། དཀྱིལ་འཁོར་ལ་སོགས་པ་མཐའ་གཅིག་ཏུ་ཞེན་པ་རྣམས་ལ་གཉིས་འཛིན་རང་རྒྱུད་པ་སྤང་བའི་ཕྱིར། མ་དག་པ་སྣོད་བཅུད་དང་། དག་པ་མྱང་འདས་ཀྱི་སྣང་ཆ་ཐམས་ཅད་རང་བྱུང་ཡེ་ཤེས་ཀྱི་རོལ་པ་གཅིག་ཏུ་བསྟན་ནས་གཉིས་མེད་མཐའ་གྲོལ་ཆེན་པོའི་དབྱིངས་སུ་སྡུད་པ་ནི་གནས་པ་སེམས་ཀྱི་སྡེའོ། །དེ་ལའང་ཞེན་པའི་འཆིང་བ་མཐའ་དག་གྲོལ་བར་བྱེད་པ་ཆོས་ཐམས་ཅད་ཡེ་ནས་ཡོད་མ་མྱོང་། མེད་མ་མྱོང་། གདོད་ནས་དག་པའི་རྫོགས་པ་ཆེན་པོ། དབྱིངས་དག་མཉམ་ཀ་དག་ཆེན་པོའི་ཀློང་དུ་ཆམ་བརྡལ་བས་གཉེན་པོར་ཞེན་པའང་རང་སར་གྲོལ་བ་ནི་བྱ་བྲལ་ཀློང་གི་སྡེའོ། །དེ་ལས་གཉེན་པོ་བླང་བྱའི་ཆོས་ཉིད་མཐའ་གྲོལ་སྟོང་ཞེན་གྱི་ཕྱོགས་དེ་ཡང་གཞོམ་པ་དང་། ལྷུན་གྲུབ་རང་གསལ་ཆེན་པོ་དག་པའི་དབྱིངས་ལ་ཇི་ལྟར་གནས་པ་དབང་པོའི་སྤྱོད་ཡུལ་དུ་མངོན་གསུམ་པར་ཐད་དྲང་དུ་སྟོན་པ་ནི་ཟབ་པ་མན་ངག་གི་སྡེ་སྟེ། མདོར་བསྡུ་ན། སྤང་བྱ་དང་། གཉེན་པོ་དང་། གཉིས་ཀའི་མཐའ་ལས་གྲོལ་བ་གསུམ་གྱི་སེམས་ཀློང་མན་ངག་གི་སྡེ་གསུམ་དུ་བྱུང་བ་རིག་པར་བྱ་སྟེ་གོ་བདེ་བར་བརྗོད་ན། རང་ངོ་ལས་གཞན་པའི་སེམས་གུད་ན་མེད་པས་སྣ་ཚོགས་སེམས་ཀྱི་སྡེ། ཆོས་ཉིད་ཀུན་ཏུ་བཟང་མོའི་ཀློང་ལས་འགྲོ་ས་གཞན་མེད་པ་བྱ་བྲལ་ཀློང་གི་སྡེ། ཡིན་ལུགས་གནད་ཐོག་ཏུ་འབེབས་པ་ཟབ་པ་མན་ངག་གི་སྡེ་སྟེ། དང་པོ་ནི་སེམས་རང་བྱུང་གི་ཡེ་ཤེས་ལས་གཞན་དུ་གྱུར་པ་འགོག་པ། གཉིས་པ་ནི་ཆོས་ཉིད་ཀྱི་ཀློང་ནས་གཞན་འབྱུང་འགོག་པ། གསུམ་པ་ནི་གནད་མ་ཡིན་པ་གཞན་དུ་ཁ་འབྱམས་པ་ལས་འགོག་པ་ཙམ་དུ་དགོངས་པ་སྟེ། དང་པོས་གཅོད་ཡུལ་དང་ཕྱག་རྒྱ་ཆེན་པོ་ལྟར་ཡུལ་ལ་ཆོས་ཉིད་ཀྱི་རྒྱས་འདེབས་མི་བྱེད་པར། ཡུལ་ཅན་གྱི་རིག་པ་སྟོང་པ་ཉིད་དུ་གཏན་ལ་འབེབས། གཉིས་པས་ལམ་འབྲས་དང་རིམ་ལྔ་ལྟར་བྱེད་བཅིངས་ཀྱི་གནད་ལ་བརྟེན་ནས་རིལ་འཛིན་དང་། རྗེས་གཞིག་ལ་སོགས་པའི་རྩོལ་བ་ལ་མི་བརྟེན་པར། དམིགས་གཏད་བྲལ་བའི་ངང་དུ་བྱ་རྩོལ་དང་འཛིན་ཞེན་སྤངས་ཏེ་འཇུག །འདིའི་སྒོ་ནས་སྤང་མི་ཕམ་མགོན་པོ་ལ་སོགས་སྐྱེས་མཆོག་མང་ཞིག་གིས་འཇའ་ལུས་འགྲུབ་པ་རྡོ་རྗེ་ཟམ་པའི་ལོ་རྒྱུས་ན་གསལ། གསུམ་པས་སྦྱོར་དྲུག་དང་ཕྲ་ཏིག་ལྟར་རླུང་གདངས་ལ་བརྟེན་པའི་ཤེས་ཉམས་ལ་མི་བརྟེན་པར། རིག་གདངས་ལ་བརྟེན་པའི་སྣང་ཉམས་མངོན་སུམ་པར་གཏན་ལ་འབེབས་པས་སྔ་མ་ལྟར་རག་ལུས་དྭངས་མར་འགྱུར་བ་ཙམ་མ་ཡིན་པར། ཆོས་ཟད་ཀྱི་སྣང་བ་མཐར་ཐུག་པས་ལུས་རྡུལ་ཕྲན་དུ་དེངས་ཤིང་སེམས་ཆོས་ཉིད་དུ་དེངས་པས་ལྷག་མེད་འགྲུབ་པ་ཡིན་ཏེ་སྔར་དགའ་རབ་རྡོ་རྗེ་ལ་སོགས་བརྗོད་ཀྱིས་མི་ལྡང་། ད་ལྟའི་རབ་བྱུང་བཅུ་གསུམ་པ་མ་ཤར་ཙམ་པའི་དུས་སུའང་ལ་སྟོད་ཕྱོགས་སུ་ངག་བྲག་ཅ་ལྟ་བུར་གྱུར་ནས་འཇའ་ལུས་ཀྱི་གྲུབ་མཐའ་སྙོགས་པའི་སྦས་པའི་རྣལ་འབྱོར་པ་ཞིག་བྱུང་མ་ཐག་པ་སྟེ། ལོ་རྒྱུས་ལ། ཁོང་ས་ཕུག་གཅིག་ཏུ་བཞུགས། འདབས་དེར་མི་གྲོང་ཡོད་པའི་ཆང་མ་ཞིག་གི་རྩར་སྐབས་སུ་ཕམ་ཕབས་བཞེས་སུ་ཕེབས་པ་ལ་རེ་ཞིག་གི་ཚེ་དེར་ཡང་མ་བྱུང་། བལྟར་ཕྱིན་པ་ན་སྔ་མའི་ཤུལ་ན་བཞུགས་ཤིང་གཏམ་བརྗོད་ཀྱང་ལན་གང་ཡང་མི་སྒྲོག་པར་རྗེས་ཟློས་བྱེད་སྐད། དེའི་ཚེ་མི་དཔོན་ཞིག་གི་རྟ་སྟོར་བའི་མོ་ཕྱ་དང་བརྟག་པ་ཞུ་ས་ཨེ་ཡོད་ཆང་མ་ལ་དྲིས་པས། དེ་ན་རེ། སྔར་ས་ཕུག་ཡ་གི་ན་རྟོགས་ལྡན་ཞིག་བཞུགས་ཏེ་ད་ནི་སྨྱོན་པ་ལྟར་བྱེད་ནས་རིང་ཞིག་ཐལ། ཞེས་སོགས་གནས་ཚུལ་གླེངས་པས་ཡིད་མ་ཆེས་ཏེ་གཉིས་ཀས་བལྟར་ཕྱིན། དེར་གྲུབ་ཆེན་ཐུགས་དམ་འཕེལ་ལམ་ཞུས་པས། ལན་དུའང་གྲུབ་ཆེན་ཐུགས་དམ་འཕེལ་ལམ་གསུང་། དེ་བཞིན་གང་བརྗོད་ཀྱང་དེ་ཀ་ལྟར་ཟེར་བས་དེ་རྣམས་ཀྱིས་སྨྱོན་པར་ངོས་བཟུང་ནས་ལོག །དེ་ནས་རིང་པོ་མ་ལོན་པ་ན་ཁོང་གཞའ་སྐུར་ཡལ་ནས་མི་སྣང་བ་མཐུན་སྣང་གྲུབ་པས་མཚོན་ཏེ། གཞན་ཡང་རྣམ་གྲངས་མང་ཞིག་ཐོས། འདི་ནི་རྒྱུད་ནས་བཤད་པའི་ལུས་དུར་ཁྲོད་ཀྱི་རོ་ལྟ་བུ། ངག་བྲག་ཅ་ལྟ་བུ་ཡིན་ཚུལ་གཤིས་ཐོག་ཏུ་ཕེབས་པ་ངོ་མཚར་བའི་ཆོས་ཅན། ཐེག་པ་འདི་བསམ་གྱིས་མི་ཁྱབ་པས་ཕྱིན་ཆད་ཀྱང་འབྱུང་བར་ངེས་སོ། །དྲིས་ལན་རིན་པོ་ཆེའི་བསྟན་བཅོས་ལུང་གི་གཏེར་མཛོད་ཅེས་བྱ་བ་ལས། ཡོ་ག་གསུམ་གྱི་ཆོས་འབྱུང་གླེང་ཞིང་མཚན་ཉིད་སྤྱིར་བསྟན་པའི་སྐབས་ཏེ། སརྒ་གསུམ་པའོ།། །།ད་ནི་དོན་གཉིས་པ་རང་བཞིན་རྫོགས་པ་ཆེན་པོའི་གྲུབ་པའི་མཐའ་རྒྱས་པར་དབྱེ་བ་ལ་གསུམ་ལས། དང་པོ་སེམས་ཀྱི་སྡེ་ནི། གཞི་མདུད་འགྱུར་དུ་སྨྲ་བའི་རྫོགས་པ་ཆེན་པོ་ཞེས་བྱ་སྟེ། ངོ་བོ་སྣ་ཚོགས་སུ་སྣང་ཡང་སེམས་ཉིད་གཅིག་པུའི་རོལ་པ་ལས་མ་འདས་པར་འདོད་དེ་དཔེར་ན་མེ་ལོང་གཅིག་གི་ངོས་ལ་གཟུགས་བརྙན་སྣ་ཚོགས་ཤར་བ་བཞིན་ནོ། །དེ་ཡང་སྣ་ཚོགས་ཡིན་པས་གང་ཡང་མི་འགེགས་ལ། སེམས་ཡིན་པས་སྣ་ཚོགས་ཙམ་དུའང་མ་གྲུབ་པས་ན་སེམས་ཀྱི་ངོ་བོ་སེམས་ཉིད་འོད་གསལ་བ་རང་བྱུང་གི་ཡེ་ཤེས་རྫོགས་པ་ཆེན་པོ་ཞེས་བྱ་ལ། ཀློང་གསལ་ལས། སྣ་ཚོགས་སེམས་ཀྱི་སྣང་བ་དེས། །དེ་གཞི་གཉིས་མེད་སེམས་ཉིད་ནི། །རང་བྱུང་ཡེ་ཤེས་མི་གཡོའི་བདག །འོད་གསལ་སྤྲོས་དང་བྲལ་བར་བརྗོད། །ཅེས་སོ། །འདི་ལ་ཁ་ཅིག་གིས་སྣང་བ་སེམས་ཡིན་ཞེས་སེམས་ཀྱིས་སྣང་བ་ཕར་བཟོས་པ་མ་གོ་བར། སྣང་བ་ཁོ་རང་སེམས་སུ་འདོད་པས་སེམས་ཉིད་དངོས་པོ་ངེས་བཟུང་ཅན་དུ་ཐལ་བ་ནི་ཤིན་ཏུའང་མི་རིགས་ཏེ་ངེས་དོན་བསྡུས་པའི་རྒྱུད་ལས། སྣང་བ་སེམས་ཡིན་ཟེར་བ་དེ། །ར་གན་གསེར་དུ་བྱེད་པ་འདྲ། །མ་རིག་སངས་ནས་རང་སེམས་བརླག །དེ་ཕྱིར་ཆོས་སྐུ་འགྱུར་བ་མེད། །འཛིན་བྲལ་སེམས་མེད་ཡེ་ཤེས་སྐུ། །དེ་དོན་འབྲལ་མེད་བྱང་ཆུབ་ཀློང་། །སེམས་བྲལ་ཏིང་འཛིན་རྒྱུན་དུ་གནས། །ཞེས་དང་། ཀུན་མཁྱེན་ཆེན་པོས། དེང་སང་གཏི་མུག་ཅན་རྣམས་རྫོགས་པ་ཆེན་པོ་སྣང་བ་སེམས་སུ་འདོད་པ་ཡིན་ཟེར་རོ། །ཤིན་ཏུའང་མི་འཐད་དེ་སེམས་ཁ་དོག་ངོས་བཟུང་ཕྱོགས་ཆ་དང་བཅས་པར་ཐལ་ཏེ། སྣང་བ་དེ་ལྟར་ཡིན་པའི་ཕྱིར་རོ། །དེས་ན་སྣ་ཚོགས་སུ་སྣང་བ་སེམས་ལ་སྣང་བའི་ཚེ། ཆོ་འཕྲུལ་མེ་ལོང་ནང་གི་གཟུགས་བརྙན་ལྟ་བུ་དོན་ལ་མེད་པ་བློ་ངོར་སྣང་བའི་རང་བཞིན་བག་ཆགས་འཁྲུལ་པའི་རྣམ་ལྡན་དུ་ཤེས་པར་བྱའོ། །ཞེས་གསུངས་སོ། །དེའི་ཕྱིར་དྲན་རྟོག་རང་བཞིན་མེད་པར་གནས་པའི་ཚེ་འདི་ནི་སྣང་བའོ། །འདི་ནི་སེམས་སོ་སྙམ་པའི་ཆོས་ཉིད་རང་མཚན་པ་མེད་པའི་ཕྱིར་སེམས་ཉིད་ཀྱི་ངོ་བོ་རྒྱ་ཆད་ཕྱོགས་ལྷུང་མེད་པ་མེ་ལོང་ལྟ་བུའི་ངང་དུ་སྣང་བ་སྣ་ཚོགས་སུ་ཤར་ཡང་གཅིག་དང་དུ་མའི་སྤྲོས་པ་དབྱིངས་སུ་ཞི་བའི་ཆོས་ཉིད་བསམ་གྱིས་མི་ཁྱབ་པར་ཤེས་པར་བྱ་ཞིང་། སྣང་བ་སེམས་ཡིན་པའི་ཞེ་འདོད་ཕྱིན་ཅི་ལོག་གིས་བག་ཆགས་འཁྲུལ་པ་ལ་གནས་ལུགས་ཡིན་པར་མི་བལྟ་བ་གལ་པོ་ཆེ་ཡིན་ནོ། །འདི་ལ་དབྱེ་ན་བདུན་ལས། དང་པོ་སེམས་ཀྱི་ཕྱོགས་ཡིན་དུ་སྨྲ་བའི་སེམས་ཕྱོགས་པ་ནི། འདི་ལྟར་སྣང་སྲིད་སྣོད་བཅུད་ཀྱི་རྣམ་པར་སྣང་བ་ཐམས་ཅད་སེམས་ཀྱི་རོལ་པའམ་རྩལ་ཡིན་ལ། དེ་ལྟར་སྣ་ཚོགས་སུ་སྣང་ཡང་སེམས་ཉིད་ལ་ངོ་བོ་མེད་པའི་ཕྱིར་སྣང་བ་ལའང་ངོ་བོ་མེད་དེ། སྣང་བརྟགས་ཀྱི་ཆོས་མ་གྲུབ་པས་སེམས་ཀྱི་རོལ་པ་སེམས་ལས་བྱུང་ཞིང་སེམས་ལ་སྣང་། སེམས་ལ་ཤར་ཡང་། འཆར་གཞིའི་སེམས་ཉིད་ལ་ངོ་བོ་མེད་པས་རོལ་པ་དང་གཅིག་དང་ཐ་དད་དུ་འདོད་པ་ནི་མ་ཡིན་ནོ། །དེའི་ཕྱིར་ཤིང་རྟ་ཆེན་པོ་ཀློང་ཆེན་པས། དེའང་ཕྱི་དོན་དུ་སྣང་བ་ཕྱི་རོལ་གྱི་དོན་དུ་མ་གྲུབ་པར་བསྟན་པ་ཙམ་ཡིན་གྱི། ཐམས་ཅད་རང་བྱུང་གི་ཡེ་ཤེས་ལ་བཟུང་མ་བཟུང་གིས། དག་མ་དག་འཁོར་འདས་སུ་ཤར་ཡང་། ཤར་ས་དང་ཤར་མཁན་དབྱིངས་སུ་དག་པ་ནི་འདིའི་ཁྱད་པར་གྱི་ཆོས་སོ། །ཞེས་སོ། །གཉིས་པ་འབྲས་བུ་སེམས་ཀྱི་བྱུང་སར་འདོད་པའི་སེམས་ཕྱོགས་པ་ནི། འབྲས་བུ་གདོད་མའི་དབྱིངས་ལ་བརྗོད་ཅིང་། ཆོས་ཉིད་ལ་འགྱུར་བ་མེད་པས་སེམས་ལ་འཕོ་འགྱུར་མེད་པ། ཆོས་ཅན་རང་གྲོལ་བར་འདོད་པས་གྲོལ་གཞིའི་སྣང་བ་ལྷུན་གྲུབ་ཏུ་གནས་ཏེ། ཁམས་གསུམ་དང་སྣོད་བཅུད་དུ་སྣང་བའི་འཁྲུལ་པ་ཐམས་ཅད་དོན་ལ་མེད་བཞིན་དུ་སྣང་བས། མེད་པའི་ཆ་ནས་གཞི་ལས་མ་གཡོས་མི་གཡོ། གཡོ་བར་མི་འགྱུར་བས་མ་དག་པའི་རང་མཚན་གྱིས་སྟོངས་ལ། སྣང་བའི་ཆ་ནས་དང་པོ་དབྱིངས་ལས་བྱུང་། ད་ལྟ་དབྱིངས་ལ་གནས། ཐ་མའང་དབྱིངས་སུ་གྲོལ་བ་ནམ་མཁའི་ཆོ་འཕྲུལ་ལྟ་བུ་སྟེ། འདུས་མ་བྱས་པ་ཁམས་གསུམ་གཞི་བཞེངས་པས། འཁོར་བ་ལ་ཐོག་མ་མེད་པ། ཐ་མ་སྐྱེ་མེད་ལྷུན་གྲུབ་གཞི་བཞག་ཅེས་བྱ་ལ། དེའང་ཡེ་བཞག་ཡིན་པས་གཟོད་བསྐྱར་ནས་གཉེན་པོས་གྲོལ་དུ་མེད་ལ། རང་བཞག་ཡིན་པས་གཉེན་པོ་ལ་མ་ལྟོས་པ། འབད་རྩོལ་མེད་པས་སྣ་ཚོགས་མུ་མཐའ་དང་བྲལ་བའི་ལྷུན་གྲུབ་ཅེས་བྱ་བར་འདོད་དོ། །གསུམ་པ་གོལ་སྒྲིབ་ལ་བཟླ་བའི་སེམས་ཕྱོགས་པ་ནི། རིམ་པ་བརྒྱད་པོ་ཐམས་ཅད་བློས་བཏགས་པས་གཞི་ལས་གོལ་བའི་ཆོས་སུ་སོང་བས་ཡང་དག་པར་མ་སོང་ཞིང་། མེད་པ་ཕྱོགས་ཉལ་གྱི་ལྷུན་གྲུབ་ལ་བརྟེན་ནས། ཡོད་མཐའ་ཕྱོགས་འཛིན་མཐའ་དང་བཅས་པར་གོལ་ལ། མེད་རྒྱུ་མེད་རང་བྱུང་བར་གོལ་བས་ཡང་དག་ཏུ་མ་གྲུབ་སྟེ། འདིར་ངོ་བོ་རང་བྱུང་གི་ཡེ་ཤེས་བློ་དང་བྲལ་བས་རྒྱུ་རྐྱེན་ལ་བཟླ་བའི་གནད་ཀྱིས། བྱས་པ་མེད་པར་རང་ཤར་བའི་ཆོས་ཉིད་ཡེ་སྟོང་ཆེན་པོ་དྲན་བསམ་ཕྱོགས་འཛིན་གྱི་བློ་དང་བྲལ་བར་འདོད་དེ། མ་དག་པ་ལྟར་སྣང་བའི་ཡུལ་གྱི་སྣང་བ་ཐམས་ཅད་ལ་དང་པོ་བྱུང་ཁུངས་ཀྱི་གཞི་མེད། ད་ལྟ་འདིར་གནས་ཀྱི་མཚན་ཉིད་བྲལ། མཐར་འགྲོ་ཡུལ་དང་འགྲོ་མཁན་གྱི་ཆོས་མེད་པས། རྒྱུ་མེད་འབྲས་ལས་འདས་པའི་གཞི་ཡིན་ལ། སྒྲིབ་པ་ལམ་ལས་འདས་པའི་ཕྱིར་ལས་དགེ་སྡིག་གིས་གོས་པ་མེད་པས་ཁམས་གསུམ་གཞི་གྲོལ་ཆེན་པོ། གྲོལ་འཁྲུལ་དང་སྤང་གཉེན་མཐའ་དག་གཞི་མེད་ཕྱམ་གཅིག་ཏུ་ལ་བཟླ་བར་འདོད་པའོ། །བཞི་པ་གཏན་ཚིགས་ཁུངས་རྡིབ་ཀྱི་སེམས་ཕྱོགས་པ་ནི། སེམས་ཀྱི་ཕྱོགས་ལ་ངོས་གཟུང་མེད་པར་ཤེས་པས་བཏགས་པའི་ཆོས་འཁོར་འདས་ཀྱི་ཁུངས་རྡིབ་པ་ཞེས་བྱ་སྟེ། དེའི་ཕྱིར་གཞི་གནས་ལུགས་རྣལ་མའི་དོན་ལ་བཅོས་སུ་མེད་པས་ཡེ་གྲོལ་ཆེན་པོའི་ཆོས་ཉིད་ལ། ལས་དང་བག་ཆགས་ཀྱི་རྟེན་མེད། སེམས་ལ་སྐྱེ་བ་མེད་པས་ལས་དང་བག་ཆགས་ཀྱི་མཐའ་སྟོངས། བསགས་པའི་ལས་ལ་གང་དུ་བཏགས་ཀྱང་རྒྱུ་མཚན་དང་ངོས་གཟུང་མེད་པས་རྣམ་སྨིན་དང་འབྲས་བུའི་ཁུངས་སྟོར། དེའི་ཕྱིར་སེམས་ཉིད་རང་བྱུང་གི་ཡེ་ཤེས་སྐྱེ་བ་མེད་པའི་དབྱིངས་ལ་འཁོར་བའི་མིང་ཡང་མ་གྲུབ་པས། ཡེ་གྲོལ་ལྷུན་རྫོགས་ཆེན་པོའི་རོལ་པ་འགག་མེད་ཕྱོགས་ཡན་དུ་ཤར་བས། ངོ་བོ་ཉིད་དུ་ཤར་བའི་གཏན་ཚིགས་ཀྱི་ཆོས་ཐམས་ཅད་གདོད་མའི་དབྱིངས་ལས་འདའ་ས་མེད་པས་འཁོར་འདས་གཉིས་མེད་དུ་གྲོལ་བར་འདོད་དོ། །ལྔ་པ་རྒྱ་ཆད་ཕྱོགས་ལྷུང་མེད་པ་རང་བྱུང་ཡེ་ཤེས་ཀྱི་སེམས་ཕྱོགས་པ་ནི། རང་བྱུང་ཡེ་ཤེས་ཀྱི་ངོ་བོ་གང་དུའང་མ་གྲུབ་པས་འཁོར་འདས་ཀུན་ལ་ཕྱོགས་ལྷུང་མེད་པར་ཁྱབ་པས། དག་མ་དག་ཏུ་སྣང་བའི་ཆོས་ཐམས་ཅད་དེའི་རྩལ་ལས་ཤར་བ་སྟེ། ངོ་བོ་ལ་འཁོར་བ་ངན་སོང་དང་། མྱ་ངན་ལས་འདས་པའི་རང་བཞིན་རང་ཚན་པར་གྲུབ་པ་རྡུལ་ཙམ་མེད་པས། སྣང་ངོ་ཐ་དད་པས་རང་བཞིན་ཕྱོགས་ཉལ་གྱི་གཏན་ཚིགས་ལས་མི་འདའ་བས་རང་ངོ་རྣམ་དག་འཁོར་འདས་དོང་སྤྲུགས། ཁྱབ་པ་ཡེ་རྫོགས་ཀྱི་ལྟ་བ་སྟེ། དེའང་ཡོད་མེད་སྣང་སྟོང་གི་ཕྱོགས་སུ་མ་ལྷུང་བས། བདེ་སྡུག་ལས་འདས་པ་བྱ་བྲལ་ཀློང་ཡངས་ཀྱི་ཆོས་ཉིད་ཅན་དུ་འདོད་པའོ། །དྲུག་པ་ཕྱོགས་འཛིན་གྲུབ་མཐའི་སེམས་ཕྱོགས་པ་ནི། སེམས་ཀྱི་ཕྱོགས་ལ་དངོས་པོ་མེད་པས་སྣང་བ་འཁོར་འདས་སུ་མ་གྲུབ། དངོས་པོ་ཀུན་གྱི་དངོས་གཞི་ལ་ཕྱོགས་འཛིན་གང་ཡང་མི་སྤོང་ལ་གང་དུའང་མ་གྲུབ་པས་ཅིར་ཡང་འཆར་ཞིང་། ཤར་ཚད་སེམས་ཀྱི་རོལ་པར་སྣང་སྟེ། ལྟ་བ་བྱ་རྩོལ་དང་བྲལ་བའི་དབྱིངས་ན་གནས་པས། དེ་ཡང་ཡིན་མིན་གང་ཡང་མ་ཡིན་པ། སྣ་ཚོགས་སུ་སྣང་བ་སྟེ། སྣང་སེམས་ཐམས་ཅད་རྒྱ་ཡན་ཕྱོགས་མེད་དུ་གྲོལ་བས་བྱ་བ་དང་སྤྱོད་པ་ལས་འདས་པའི་རང་བཞིན་དུ་འདོད་པའོ། །བདུན་པ་བློ་བྲལ་ཕྱོགས་འཛིན་ལས་འདས་པའི་སེམས་ཕྱོགས་པ་ནི་རང་བྱུང་གི་ཡེ་ཤེས་ལ་བློ་དང་བྲལ་བས་དངོས་པོར་མ་གྲུབ་ལ། དངོས་སྣང་ཆོས་ཉིད་དུ་ཤར་བས་བློ་རྟོག་རང་གྲོལ་ཏེ། སྣང་བའི་རོལ་པ་ཇི་ལྟར་སྣང་ཡང་སྣང་ངོ་བདེན་རྫུན་གང་དུའང་མ་གྲུབ་པས། ཡོད་མེད་ཀྱི་མཐའ་ལས་གྲོལ་བའི་རང་བཞིན་ཆེན་པོར་འདོད་པའོ། །དེ་ལྟར་སེམས་ཀྱི་སྡེ་ལ་རྗོད་བྱེད་ཚིག་གི་རྒྱུད་ཤྭ་ལོ་ཀ་འབུམ་ཕྲག་ཉི་ཤུ་རྩ་གཉིས་སུ་བསྟན་པ་རྣམས། ཀློང་གསུམ་དུ་བསྡུས་པ་ནི། ཆོས་ཉིད་ལ་བརྗོད་དུ་མེད་པའི་ཀློང་། ལྟ་བ་ལ་མིན་པ་མེད་པའི་ཀློང་། སྤྱོད་པ་ལ་ཡིན་པ་མེད་པའི་ཀློང་སྟེ་བམ་པོ་སྟོང་ཕྲག་དྲུག་དང་སུམ་བརྒྱར་གནས་པ་དག་འཕྱོང་གསུམ་དུ་བསྡུ་བ་ནི། གནས་པ་གཞི་ཐོག་ཏུ་ཕེབས་པའི་འཕྱོང་། སྣང་བ་རང་སར་གྲོལ་བའི་འཕྱོང་། ངོ་མཉམ་ཐ་དད་མེད་པའི་འཕྱོང་དང་གསུམ་མོ། །ཆོས་ཉིད་ལ་འཕྱུགས་པ་མེད་པའི་གཟེར་བུ་ལྔ་བཅུ། ཡུལ་སེམས་ལ་་་ལ་བཟླ་བའི་གེགས་་་ལྟ་བའི་གནས་་་ཟེར་བའང་བྱུང་སྟེ་བརྟག་་་ལྔ་བརྒྱ་དང་བཅུ་གཅིག སྣང་སེམས་ཅིག་ཅར་དུ་ཤན་འབྱེད་པའི་གནད་ཁྲི་ཕྲག་གཉིས། ལྟ་བ་ཐོད་རྒལ་དུ་ལ་བཟླ་བ་ཁྲི་ཕྲག་ལྔ། སྒོམ་ཡོད་རྟོག་པ་གཅོད་པའི་གནད་སྟོང་ཕྲག་གཅིག་ཏུ་དབྱེ་བ་རྣམས་ལ། མིང་ཐོགས་ཀྱི་རྒྱུད་སྟོང་དང་གསུམ་དུ་བཞུགས་པ་ཡང་། སེམས་ཀྱི་ཕྱོགས་འཛིན་པ་དང་། སེམས་ཀྱི་གདེང་འཛིན་པ་དང་། སེམས་ཀྱི་གནད་འཛིན་པ་དང་། གསུམ་དུ་བཞུགས་པ་སྟེ་གནས་པ་སེམས་ཀྱི་སྡེ་བཤད་ཟིན་ཏོ། །གཉིས་པ་འབྲས་བུ་ཡེ་གྲོལ་དུ་སྨྲ་བའི་རྫོགས་པ་ཆེན་པོ་ཀློང་སྡེའི་ངོ་བོ་ནི་ཆོས་ཐམས་ཅད་ཡེ་གྲོལ་ཅོག་བཞག་ཆེན་པོ་སྟེ། ཡོད་མེད་སྣ་ཚོགས་སུ་ཤར་བ་ལ། མེད་འབྲས་ཡེ་དག་ཏུ་གྲོལ་བས། སེམས་དང་སེམས་བྱུང་གི་ཆོས་ཉིད་ཙམ་ཡང་གཞག་ཏུ་མེད་པ་སྟེ། ཀུན་ཏུ་བཟང་པོ་ཀློང་ཆེན་པས། ཡིན་མིན་ཕྱོགས་བྲལ་ཆེན་པོའི་རིག་པ་ལ། སྣང་དུ་ཆུག །ཤར་དུ་ཆུག །མི་སྣང་དུ་ཆུག །དག་པའམ་མ་དག་པ་ལ་སོགས་གང་ལྟར་བརྟགས་ཀྱང་། རང་ངོ་སྣང་དུས་ཉིད་ནས། ཡོད་མེད་ཡིན་མིན་ལས་འདས་པ། ཡེ་གྲོལ་ཕྱོགས་འབྱམས་ཆེན་པོ་སྟེ། རྟོག་པ་ཨ་འཐས་སུ་བཏགས་པའི་གྲུབ་མཐའ་སྣ་ཚོགས་སུ་གཞལ་བ་རང་སྟོང་འཁྲུལ་པར་གཏན་ལ་ཕབ་ནས། སྣང་ཤར་གང་གི་དུས་ནས་ཕྱོགས་ཡན་ནམ་མཁའ་འདྲ་བར་ཕྱམ་གདལ་ཀུན་མཉམ་ཆེན་པོར་འདོད་པའོ། །ཞེས་བཞེད་དོ། །དབྱེ་ན་བཞི། ཀློང་ནག་པོ་རྒྱུ་མེད་དུ་སྨྲ་བ་དང་། ཀློང་ཁྲ་བོ་སྣ་ཚོགས་སུ་སྨྲ་བ་དང་། ཀློང་དཀར་པོ་སེམས་སུ་སྨྲ་བ་དང་། ཀློང་རབ་འབྱམས་རྒྱུ་འབྲས་ལ་བཟླ་བའོ། །དང་པོ་ནི། རང་བྱུང་གི་ཡེ་ཤེས་འགྱུར་མེད་རང་རྫོགས་ཕྱོགས་བྲལ་རྒྱུ་རྐྱེན་ལས་འདས་པར་ཤར་བའི་ཆོས་ཅན་དང་ཆོས་ཉིད་ལ་ལྟོས་པ་མེད་པའོ། །དབྱེ་ན་མཛད་པ་ཀློང་ནག་གི་སྡེ། ཐུགས་རྗེ་ཀློང་ནག་གི་སྡེ། སྤྲུལ་པ་ཀློང་ནག་གི་སྡེ་དང་གསུམ་དུ་འདོད་པ་ལས། དང་པོ་མཛད་པ་ཀློང་ནག་གི་སྡེ་ནི། རང་བྱུང་འོད་གསལ་བའི་དབྱིངས་ལས། ཤར་བ་སྣ་ཚོགས་རྒྱུ་མེད་དུ་ཤར་བ་ནས། སྣང་ངོ་རིས་མེད་དུ་སྣང་བ་རྣམས་ཤར་ས་ནས་རང་སྟོང་པས་རྒྱུ་རྐྱེན་རང་ཚན་དུ་མ་གྲུབ། སྣང་ས་ནས་གྲོལ་བས་འཁོར་འདས་མིང་མེད་དུ་འུབ་ཆུབ་པའོ། །དེའང་ཡིན་མིན་ཕྱོགས་ཉལ་གྱི་གཏན་ཚིགས་ཀྱིས་རྫོགས་པ་ཆེན་པོ་མུ་མཐའ་དང་བྲལ་བའི་ལྟ་བར་བསྒྲུབ་པའོ། །གཉིས་པ་ཐུགས་རྗེ་ཀློང་ནག་ནི། ཤར་བ་ཡེ་ཤེས་ཡིན་པས་མཁྱེན་པ་གཞན་ལ་མི་ལྟོས། གྲོལ་བ་སེམས་ཉིད་ཡིན་པས་རྒྱུ་རྐྱེན་ལ་བཟླ། ཤར་གྲོལ་གཉིས་མེད་དུ་གནས་པས་འབྲས་བུ་ཡེ་གྲོལ་དུ་རྫོགས་པའོ། །དེའང་མཐུན་སྣང་རང་དག་པའི་གཏན་ཚིགས་ཀྱིས་རྫོགས་པ་ཆེན་པོ་སྣང་ས་ནས་གྲོལ་བར་འདོད་པའོ། །གསུམ་པ་སྤྲུལ་པ་ཀློང་ནག་གི་སྡེ་ནི། རང་རིག་རོལ་པ་དང་བཅས་པའི་ཆོས་ཐམས་ཅད་སྣང་ཙམ་ཉིད་ནས་ཡིན་མིན་ཕྱོགས་གཏད་དང་བྲལ་བས་རང་གཞན་གཉིས་བཅས་སུ་མ་གྲུབ། རང་བཞིན་གྱི་ལྟོས་པ་མེད་པས་རྒྱུ་མེད་ཡེ་དག །བྱས་བཅོས་ཀྱི་ལྟོས་པ་མེད་དེ་ཡེ་གྲོལ་ཕྱོགས་ཉལ་གྱི་རྒྱས་བཏབ་པས། རང་དག་མི་གནས་པའི་ཡེ་ཤེས་ཆེན་པོ་ཡེ་གྲོལ་ལྟོས་གཞི་ཟད་པ་ཞེས་བྱའོ། །དེའང་འཁྲུལ་སེམས་ལ་བཟླ་བའི་གཏན་ཚིགས་ཀྱིས་བཏགས་པ་རང་གྲོལ་ཆེན་པོར་འདོད་པའོ། །གཉིས་པ་ཀློང་ཁྲ་བོའི་ངོ་བོ་ནི། རང་བྱུང་གི་ཡེ་ཤེས་ལས། ཡིན་སྣ་ཚོགས་སུ་རང་ཤར་བ་ཆོས་ཉིད་ཀྱི་རོལ་པར་སྨྲ་བ་ལ། མིན་ཕྱོགས་མེད་ཀུན་ཁྱབ་ཏུ་ཤར་བས། རོལ་པའི་ཆོས་ཉིད་ལ་དགག་བསྒྲུབ་མེད་པར་འདོད་པའོ། །དེ་ལ་དབྱེ་ན་གསུམ། ཡོད་སྨྲ་སེམས་སྡེ་དང་མཐུན་པ་ཁྲ་བོའི་སྡེ། མེད་སྨྲ་རང་གནད་དང་མཐུན་པ་ཁྲ་བོའི་སྡེ། ཡོད་མེད་མན་ངག་དང་མཐུན་པའི་ཁྲ་བོའི་སྡེ་ལས། དང་པོ་ནི། རང་བྱུང་གི་ཡེ་ཤེས་ལ། ངོ་བོ་རང་དག་གནས་གྲོལ་གང་དུའང་མ་ཕྱེ་ཞིང་། རང་བཞིན་ལ་དགག་བསྒྲུབ་གཉིས་བཅས་སུ་མ་གྲུབ་ཐ་སྙད་བྱ་རྩོལ་ལས་འདས། མཚན་ཉིད་ལ་གཉིས་སུ་མེད་པས་རང་གྲོལ་སེམས་ཉིད་ཀྱི་འཁོར་ལོ་ལ་འདུས་པའོ། །དེའང་བློ་བྲལ་ངོ་བོ་ཉིད་ཀྱི་གཏན་ཚིགས་ཀྱིས་སྣང་བརྟགས་འཁོར་འདས་ཀྱི་བྱས་ཆོས་རྣམས་རང་ས་ནས་ཡེ་གྲོལ་དུ་གནས་པ་ཞེས་བྱའོ། །གཉིས་པ་ནི་ངོ་བོ་མཐོང་སྣང་རང་ས་ནས་གྲོལ་བས་ཡོད་ཆོས་ཉིད་སྣ་ཚོགས་སུ་ཤར་བ་ལ། མེད་སྣང་བ་རང་ས་ནས་གྲོལ་བ་ལས་དང་རྣམ་སྨིན་ལས་འདས་པ་སྟེ། དེ་ཡང་འགྱུ་བ་སྟོང་ཡལ་གྱི་གཏན་ཚིགས་ཀྱིས་མེད་སྣང་རང་དག་ཏུ་བསྒྲུབ་པའོ། །གསུམ་པ་ནི། ངོ་བོ་ཡེ་སྟོང་དུ་གནས་པས་ལས་རྒྱུ་འབྲས་ལ་མི་ལྟོས། རྐྱེན་བྱུང་འདུས་བྱས་སུ་བྱུང་བ་བྱུང་སར་སྟོང་པས་འཁོར་འདས་ཕྱོགས་ཡན་དུ་གྲོལ། སྣང་བརྟགས་ཡེ་དག་ཏུ་ཤར་བ་འཁོར་འདས་གྲུབ་པ་མེད་པའི་གཏན་ཚིགས་སུ་རང་བྱུང་གཞི་ལས་མ་གཡོས་པར་ཤར་བས། བརྗོད་དུ་མེད་པ་བློ་ལས་འདས་ཤིང་ལྟར་མེད་གོམས་པ་མེད་པའི་གནད་དང་། གནས་འགྱུར་གཉིས་མེད་དུ་གྲོལ་བས་སེམས་ལ་འཕོ་འགྱུར་མེད་པའི་གནད་དང་། བྱས་ཆོས་གློ་བུར་དུ་ཤར་བས་ཡིད་དཔྱོད་ལྟ་སྒོམ་གྱི་ངོ་བོ་ལྟར་མེད་ཡེ་གྲོལ་གྱི་གནད་གསུམ་གྱིས། འཁོར་འདས་རྩོལ་བསྒྲུབ་མེད་པར་ལ་བཟླ་བའོ། །གསུམ་པ་ཀློང་དཀར་པོ་སེམས་སུ་སྨྲ་བའི་ངོ་བོ་ནི། རང་བྱུང་ཡེ་ཤེས་ཀྱི་ངང་ལས་ཕྱི་སྣང་བ་དང་ནང་རིག་པའི་རོལ་པར་སྣང་བ་ཐམས་ཅད་སེམས་ཀྱིས་རྣམ་པར་བཀོད་པ་སྟེ། སྣང་རྐྱེན་རང་གྲོལ་བས་བྱར་མེད་རྒྱུ་ནས་དག་སྟེ་གནས་ལུགས་ལ་བསྒྲུབ་ཏུ་མེད་པའོ། །དབྱེ་ན་གཉིས་ལས། བརྗོད་མེད་རང་ཤར་ཆེན་པོ་ཀློང་དཀར་པོའི་ངོ་བོ་ནི་མཐོང་བྱེད་ཅེར་གྲོལ་ལ། མཐོང་བ་རང་དག་ཡུལ་སེམས་གཉིས་མེད་དུ་ལ་ཟློས་པའོ། །ནང་གསེས་སུ་དབྱེ་ན་རྒྱ་མཚོའི་ཀློང་དང་ནམ་མཁའི་ཀློང་གཉིས་ལས། རྒྱ་མཚོའི་ཀློང་གི་ངོ་བོ་རྟག་མཐའ་རང་གྲོལ་ཞིང་། གནད་བྱར་མེད་དུ་མཐོང་བས་དྲན་བསམ་སྣ་ཚོགས་གཉིས་མེད་བློ་འདས་སུ་ཤེས་པའོ། །དབྱེ་ན་ཆེ་ཆུང་གཉིས་ཏེ། རྒྱ་མཚོའི་ཀློང་ཆེ་བ་ནི། སེམས་རང་སྣང་སྟོང་པ་ཡེ་ནས་གྲོལ་བས། སེམས་ཉིད་སྟོང་པ་ལ་ལྟོས་པ་དག་ལ། མཐོང་སྣང་རང་དག་པའི་ཆོས་ཉིད་ལ་ཡེ་ནས་བརྗོད་དུ་མེད་པས། སྐྱེ་འགག་གནས་གསུམ་གྱིས་སྟོངས་ལ། སྟོང་པས་གང་དུའང་མ་གྲུབ་པས་འདོད་པའོ། །རྒྱ་མཚོའི་ཀློང་ཆུང་བ་ནི། ལྟོས་པ་དག་པའམ་རྟེན་གཞི་ངོ་བོ་མེད་པས་སེམས་ལ་དྲི་མ་མེད་ལ། ཁྱབ་པ་གནས་སུ་དག་པས་འཁོར་རྐྱེན་རང་དག་འཕོ་འགྱུར་མེད་པས། འཁོར་བ་གཡུལ་བཟློག་ཆེན་པོར་འདོད་པའོ། །ནམ་མཁའི་ཀློང་གི་ངོ་བོ་ནི། ཆོས་ཉིད་ལ་བཅོས་སུ་མེད་པས་དེའི་ངང་ལས་ཤར་བའི་སེམས་ཉིད་རང་གྲོལ་བའོ། །ནང་གསེས་སུ་དབྱེ་ན། ཉི་ཟླའི་ཀློང་དང་། རིན་པོ་ཆེའི་ཀློང་དཀར་པོ་གཉིས་སོ། །ཉི་ཟླའི་ཀློང་ནི། ངོ་བོ་རྣམ་དག་སྟོང་པ་རང་བཞིན་སྐྱེ་མེད་ཡེ་གྲོལ་ལོ། །རིན་པོ་ཆེའི་ཀློང་ནི། ངོ་བོ་ཡོན་ཏན་ཡོངས་སུ་རྫོགས་པས་འབད་རྩོལ་རྒྱུ་རྐྱེན་རང་དག །སེམས་ལ་བྱ་བ་མེད་པས་ཆོས་ཉིད་ལྷུན་གྲུབ་ཏུ་འདོད་པའོ། །བཞི་པ་ཀློང་རབ་འབྱམས་རྒྱུ་འབྲས་ལ་བཟླ་བའི་ངོ་བོ་ནི། སྣང་བར་སེམས་ཀྱིས་ཤེས་ལ། མི་སྣང་བར་གནས་ལུགས་ཀྱིས་ཤེས་པར་འདོད་པའོ། །དབྱེ་ན་བཞི་སྟེ། བྱ་བ་དང་བྲལ་བ་ཕྱིའི་རབ་འབྱམས། གྲུབ་མཐའ་རང་གཞུང་དུ་སྨྲ་བ་ནང་གི་རབ་འབྱམས། གེགས་བསལ་བ་གསང་བའི་རབ་འབྱམས། གནད་བཀྲོལ་བ་དེ་ཁོ་ན་ཉིད་ཀྱི་རབ་འབྱམས་སོ། །དང་པོ་ནི། ངོ་བོའི་ཆོས་ཉིད་ལ་རྒྱུ་མེད་པས་ལྡོག་པ་མེད་པའི་གནད་དང་། རྐྱེན་མེད་པས་སྣང་བ་སྣ་ཚོགས་མི་གནོད་པའི་གནད་དང་། རྒྱུ་རྐྱེན་གཉིས་ཀ་མེད་པས་འཁོར་འདས་གང་དུ་ཡང་མ་གྲུབ་པའི་གནད་དོ། །དེའང་སེམས་ལ་ཆོས་ཉིད་མེད་པས་བྱས་ཆོས་ཀྱིས་སངས་མི་རྒྱ་བའི་གནད་དང་། སེམས་ལ་རྒྱུ་མཚན་མེད་པས་གཅིག་དང་ཐ་དད་གང་ཡང་མ་ཡིན་པའི་གནད་དུ་འདོད་པའོ། །གཉིས་པ་ནང་གི་རབ་འབྱམས་ནི། ངོ་བོའི་ཆོས་ཐེག་པ་བརྒྱད་ལ་ལྟོས་པ་མེད་པས་རིམ་རྩོལ་བློར་གོལ་བའི། རྒྱུ་འབྲས་འཁོར་བའི་ཆོས་ལས་མ་འདས་པར་བསལ་ཏེ། དངོས་པོ་ཀུན་གྱི་དངོས་གཞི་ཕྱོགས་གང་དུའང་མ་ལྷུང་བའི་གནས་ལུགས་ཡེ་རྫོགས་ཀྱི་རྫོགས་པ་ཆེན་པོ། ཆོས་ཉིད་སྣ་ཚོགས་སུ་ཤར་བས་རྒྱ་གར་ཡང་མ་ཆད་པའོ། །གསུམ་པ་གསང་བའི་རབ་འབྱམས་ནི། གདོད་མའི་གཤིས་ལ་སྣང་སེམས་གཉིས་ཀ་ཡོད་མ་མྱོང་། གློ་བུར་ཕྱོགས་འཛིན་གྱི་བློས་སྣང་བ་སེམས་སུ་གོལ་བའི་གེགས་ཡོངས་སུ་བསལ་བས། སྣང་བ་མ་སྤངས་ལ་ཡོངས་སུ་རྫོགས་ཤིང་། འགྱུ་བ་བློའི་གེགས་དྲན་བསམ་གྱི་འཕྲོ་འདུ་མ་སྤངས་རང་གྲོལ་ཆེན་པོར་བསལ་ཏེ་ངོ་བོ་ཆོས་ཉིད་དུ་རྫོགས་པས་འགྱུ་བ་སྟོང་དག་ཆེན་པོར་འུབ་ཆུབ། ཤེས་པ་འཇུག་པའི་ཡུལ་སྣང་ཕར་ཆད། བློ་དེར་འཛིན་དུ་རིག་པ་ཚུར་ཆད། གཅིག་ལ་གཅིག་མ་འབྲེལ་བའི་ཆོས་ཉིད་དུ་ཡེ་ནས་ཡོད་པ་ལ་འཁོར་བ་ཉིད་མྱང་འདས་སུ་ཤར་བ་ཞེས་བྱའོ། །འདོད་པ་རང་ཤར་བའི་རྫོགས་པ་ཆེན་པོ་ལ། ལྟ་བ་ལ་ཡིན་པ་མེད་པས་ཚིག་ཐ་སྙད་ལས་འདས། སྒོམ་པ་ལ་མིན་པ་མེད་པས་བླང་དོར་དང་དགག་བསྒྲུབ་མེད། སྤྱོད་པ་ལ་ཡིན་མིན་མེད་པས་བྱས་ཆོས་ཉིད་དུ་གྲོལ། འབྲས་བུ་ལ་སྤང་ཐོབ་མེད་པས་རང་བཞག་ལྟོས་པ་དང་བྲལ་བར་འདོད་དོ། །བཞི་པ་དེ་ཁོ་ན་ཉིད་ཀྱི་རབ་འབྱམས་ནི། འཁོར་འདས་ཀྱི་ཆོས་རྣམས་སྣང་ཤེས་སྐུ་དང་ཡེ་ཤེས་སུ་ཤར་བས་འཁོར་འདས་གང་དུའང་མ་ཕྱེ་བའི་ཆོས་ཉིད་ཆེན་པོར་ད་ལྟའི་དུས་ནས་ཕྲི་བསྣན་མེད་པར་ཡུལ་སེམས་གང་སྣང་དེ་ཀར་འདོད་ལ། དེ་ལའང་ཡིན་ཐོག་ངོས་ཟིན་པ་དེར་ཅེར་རེ། ལྷན་ནེར་ཡེང་མེད་ཆེན་པོར་གློད་པས། མི་འགྱུར་ལྷུན་གྲུབ་ཆེན་པོའི་གཟེར་གཟུང་འཛིན་གཉིས་ཀྱི་བར་དུ་ཐེབས་པ་ཞེས་བྱ་སྟེ། ཞེས་ཀུན་མཁྱེན་ཆེན་པོ་བཞེད་ལ། དེའང་འཁོར་འདས་ཀྱིས་གཟེབ་ལས་གྲོལ་བའི་ཐད་ཀའི་ཤེས་པ་སྤང་བླང་དགག་བསྒྲུབ་ལས་འདས་པ་དེའི་ཆོས་ཉིད་ལ། མི་འགྱུར་བའི་གཟེར་སྣང་ཤེས་གཉིས་སུ་སྤྲོས་པས་འཁོར་བ་གཏད་མེད་ཆེན་པོར་ལ་བཟླ། རང་ངོ་ཅེར་མཐོང་གི་གནད་དྲན་བསམ་རང་བཞག་སར་སྤྲོས་པས་བསམ་པ་ཁོང་དག །ཕྱི་ནང་ཡུལ་མེད་ཆེན་པོར་གྲོལ་ནས་བདེ་བ་རྟོག་མེད་དུ་སངས་པ་ཞེས་བྱ་སྟེ། བྱ་བ་དང་བྲལ་བས་དྲན་བསམ་བློ་ལས་འདས་ཤིང་། གང་སྣང་རྟེན་མེད་དུ་ཤར་བས་ཡུལ་གྱི་ཆོས་མེད། གང་ཤར་དེ་ཉིད་དུ་ཞིག་པས་སྤང་གཉེན་གྱི་ཁུངས་སྟོར། སྣང་བརྟགས་རོ་མཉམ་དུ་ཤར་བས་རྒྱུ་འབྲས་ངོ་བོ་མེད་པ་ཞེས་བྱའོ། །དེ་དག་ཀྱང་བསྡུ་ན་བཞི་སྟེ། བྱ་བྲལ། རྒྱན། ཆོས་ཉིད། རོལ་པའི་ཀློང་ངོ། །དང་པོ་ནི། ཆོས་གང་ལའང་འབད་རྩོལ་གྱིས་བླང་དོར་ལ་མ་ལྟོས་ཏེ། མ་བྱས་རང་གྲོལ་བའི་ཆོས་ཉིད་ཆེན་པོ་ལས་མི་འདའ་སྟེ་འདི་ལྟར་མ་བྱས་པར་ཡེ་ཟིན། མ་ཕྱིན་པར་གཏན་སླེབས། མ་སྦྱངས་པར་ཡེ་དག །མ་བསྒྲུབས་པར་ཡེ་གྲུབ་ཏུ་འདུག་པས་འཕོ་འགྱུར་དང་བཅོས་སླད་ཀྱིས་བསྒྲུབས་ཀྱང་ནག་པོའི་ཁ་དོག་དཀར་པོར་མི་འགྲུབ་པ་བཞིན་རང་བཞག་ཡེ་བབས་ཆེན་པོར་འདོད་པའོ། །གཉིས་པ་ནི། སྣང་བ་འདི་ཇི་ལྟར་གཡོ་ཡང་རིག་པ་ལ་སྤང་བླང་མེད་པའི་ཕྱིར་སྣང་བ་སེམས་ཀྱི་རྒྱན་དུ་ཡེ་ཤར། སྟོང་པ་ངོས་གཟུང་མེད་པའི་རྒྱན་དུ་ཡེ་གྲུབ། དགག་བསྒྲུབ་མེད་པའི་རྒྱན་དུ་རང་ཤར་བས། རང་གསལ་ལྷུན་གྲུབ་ཆེན་པོའི་དགོངས་པ་ཞེས་བྱའོ། །གསུམ་པ་ནི། མ་བཅོས་རང་བབས་སུ་བཞག་པས་ཐམས་ཅད་གང་ནས་འོངས་པའི་ཡུལ་མ་རྙེད། རང་གསལ་ངང་གཞག་ཏུ་གནས་པས་འདིར་གནས་ཀྱི་ཆོས་ཉིད་མེད། ངོ་བོ་ལ་འགྱུར་ལྡོག་མེད་པས་འགྲོ་སའི་ཁུངས་སྟོར། ཐམས་ཅད་ཆོས་ཉིད་ཀྱི་ཀློང་ན་ཆམ་བརྡལ་རིས་མེད་དུ་འདུག་པ་ལ་རོལ་རྩལ་སྣ་ཚོགས་སུ་སྣང་བ་ཉམས་དྭངས། སྣོད་བཅུད་ཀྱི་འཕོ་འགྱུར་ཐམས་ཅད་ནམ་མཁའི་ཀློང་ལས་མ་གཡོས་པ་ལྟར་མཐོང་ཤེས་གཉིས་སུ་མེད། ཡེ་ཤེས་ལ་རེ་དོགས་ཀྱིས་འཇུག་པ་གདོད་ནས་དག་པའོ། །བཞི་པ་ནི། ཡིན་ཕྱོགས་བྲལ་གྱིས་རོལ་རྩལ་འགག་མེད་དུ་ཤར་བའི་ངང་ནས། འཁོར་འདས་སྣང་སེམས་ཀྱི་ཆོས་ཐམས་ཅད་མི་གཡོ། འཕོ་འགྱུར་མེད་པའི་རང་བཞིན་ཅན་ལ། མིན་ངོས་བྲལ་གྱིས་ཁས་ལེན་ཕྱོགས་འཛིན་དུ་མ་གྲུབ་པས་མཐའ་བྲལ་ཕྱོགས་ཡན་ཆེན་པོ་ནམ་མཁའ་ལྟ་བུར་ཤེས་པར་བྱའོ། །དེ་ལྟར་སེམས་ཀྱི་སྡེ་ལ་དབྱེ་ན་མཐའ་ཡས་པར་བཤད་དེ་སྔར་བཀོད་པའང་ཕྱོགས་ཙམ་མོ། །བསྡུ་ན་རྣམ་པ་དགུར་འདུས་ཏེ། ལྟ་བ་ལ་འཕོ་འགྱུར་མེད་པའི་ཀློང་། སྒོམ་པ་ལ་ཡིན་མིན་མེད་པའི་ཀློང་། འབྲས་བུ་ལ་རེ་དོགས་མེད་པའི་ཀློང་། ངོ་བོ་ལ་གྲུབ་གསལ་མེད་པའི་ཀློང་། རང་བཞིན་ལ་འགག་པ་མེད་པའི་ཀློང། མཚན་ཉིད་ལ་སྣང་སེམས་གྲོལ་བའི་ཀློང་། དབྱིངས་ལ་འཕོ་འགྱུ་མེད་པའི་ཀློང་། རོལ་པ་འགག་མེད་རང་ཤར་གྱི་ཀློང་། ལྷུན་མཉམ་ཡེ་གྲོལ་ཅོག་བཞག་གི་ཀློང་ངོ་། །དེ་རྣམས་ཀྱང་བསྡུ་ན་གསུམ་དུ་འདུ་སྟེ། ལྷུན་གྲུབ་ཡངས་པ་ཆེན་པོའི་ཀློང་། རང་གསལ་བྱ་རྩོལ་མེད་པའི་ཀློང་། མ་བྱས་ཡེ་ནས་གྲུབ་པའི་ཀློང་སྟེ་གསུམ་མོ། །དེ་དག་གི་རང་བཞིན་རྒྱས་པར་སྟོན་པའི་རྗོད་བྱེད་ཚིག་གི་རྒྱུད་སྟོང་ཕྲག་གསུམ་གྱི་མཚན་གྱིས་བསྡུས་པ་སྤྱིར། རིམ་ཁང་ངམ། ལེའུ་ཁྲི་ཕྲག་གཅིག་དང་ཆིག་སྟོང་། ཤློ་ཀ་འབུམ་ཕྲག་དྲུག་ཅུ་རྩ་བཞིའི་ངེས་པ་ཅན་རྣམས། ལ་བཟླ་བ་ཁྲི་ཕྲག་བརྒྱད་དུ་འདུ་ཞིང་། དེའང་ཤན་འབྱེད་པ་ཁྲི་ཕྲག་གཉིས་སུ་འདུས་ལ། དེ་དག་དགུ་བརྒྱར་བསྡུས་ནས། གནད་སྟོང་ཕྲག་གཉིས། གཟེར་བུ་ལྔ་བཅུ་དང་བཅས་པ་སྟེ། ཐམས་ཅད་ཀྱང་བྱས་གྲོལ། བཞག་གྲོལ། ཅེར་གྲོལ་གྱི་ཕྱོགས་གསུམ་དུ་འདུ་བ་ཡིན་ཞེས་ཀུན་མཁྱེན་ཆེན་པོ་བཞེད་ལ། གྲུབ་པའི་མཐའ་འདི་ཤིན་ཏུ་དབྱེ་དཀའ་བ་ཡིན་པའང་མ་ཟད་སེམས་ཀློང་མན་ངག་སྡེ་སོ་སོའི་ངེས་འབྱེད་ཀྱི་གྲུབ་མཐའི་མིང་འདོགས་ཙམ་ལས། རང་བཞིན་ཇི་བཞིན་པའི་གྲུབ་པའི་མཐའ་སློང་ནུས་པ་ཕྱིན་ཆད་མ་མཐོང་བས་གདོད་མའི་མགོན་པོ་ཀློང་ཆེན་པའི་དགོངས་པ་སོར་བཞག་ནས་གླེངས་པ་སྟེ་བྱ་བྲལ་ཀློང་གི་སྡེ་བཤད་ཟིན་ཏོ། །དོན་གསུམ་པ་དེ་དག་ཀུན་ལས་ཁྱད་པར་དུ་འཕགས་པ་རྫོགས་པ་ཆེན་པོ་མན་ངག་གི་སྡེ་ལ་གསུམ། འོག་མ་གཉིས་ལས་འཕགས་ཚུལ། ངོ་བོ། དབྱེ་བའོ། །དང་པོ་ནི། སེམས་སྡེ་སེམས་ཡིན་ལ། ལ་ལས་སེམས་ཕྱོགས་ཀྱི་ཡིད་དཔྱོད་འཛིན་ཏོ། །ཀློང་སྡེ་ཆོས་ཉིད་ལ་འཛིན་པས་ཡིད་དཔྱོད་དུ་སོང་བ་ལས་སེམས་ཀློང་གཉིས་ལ་ཤེས་སྒྲིབ་ཀྱིས་ནོར་ས་མང་བ། མན་ངག་གི་སྡེས་གནས་ལུགས་རང་གསལ་དུ་བྱེད་པས་གོལ་འཕྱུགས་མེད་པའི་གནད་ཀྱིས་ཆེས་ཁྱད་པར་དུ་འཕགས་ཏེ། བཀོད་པ་ཆེན་པོ་ལས་ཀྱེ་རྡོ་རྗེ་འཛིན་པ། དེ་ལྟར་གཏན་ལ་མ་ཕབ་ན། །ཡིད་དཔྱོད་འཛིན་པ་རྣམས་དང་ནི། །ཁྱད་པར་ཅི་ཡང་མེད་པར་འགྱུར། །དེ་ཕྱིར་ངེས་གསང་སྙིང་པོ་འདི། །མུན་པ་ལས་ནི་མར་མེའམ། །བ་གླང་རྣམས་ལས་གླང་ཆེན་ནམ། །གཅན་གཟན་རྣམས་ལས་སེང་གེའམ། །རྐང་ཐང་རྣམས་ལས་རྟ་པ་བཞིན། །ཀུན་གྱི་ནང་ནས་ཁྱད་པར་འཕགས། །ཞེས་སོ། །གཉིས་པ་ངོ་བོ་ནི། ཡིན་སྙམ་ཡིད་དཔྱོད་དུ་མ་ལུས་པར་གནད་ལ་ཕེབས་པའི་མེ་བཙའ་ལྟ་བུའོ། །དབྱེ་ན་གསུམ། ཁ་འཐོར། ཁ་གཏམ། རྒྱུད་རང་གཞུང་དུ་གསུངས་པའོ། །དང་པོ་ངོ་བོ་ནི་བློ་དང་བྲལ་བའི་ཡེ་ཤེས་ཆེན་པོ་བྱ་རྩོལ་དང་བྲལ་བའི་གནད་ལ་བརྟེན་ནས་སྐད་ཅིག་ལ་འཆར་བའོ། །དབྱེ་ན་གཉིས། བཞག་པ་ལམ་གྱི་མཐའ་གཅོད་པའི་མན་ངག་དང་། གྲོལ་བ་སྟོབས་དག་པའི་ལམ་མངོན་དུ་གྱུར་པའི་མན་ངག་གཉིས་ལས། དང་པོ་ནི། སྟོང་པ་ཁྱབ་ཆེ་བས་བྱ་བ་ཀུན་ཏུ་གྲོལ་བའི་ལམ་ལ་ལྟོས་པ་བྲལ་བས། སྤྲོས་གཞིའི་ཁྱད་སྤྲོས་གཞི་ཚིག་ཙམ་དུའང་མ་གྲུབ་པས། སྤྲོ་བྱེད་མིང་ཚིག་ཏུ་མི་སྲིད་ཅིང་། བརྗོད་མེད་ཀྱི་ཆོས་ཉིད་ལ་ཡི་གེ་མེད། ལམ་ཁྱད་དེ་ལྟར་རང་ངོ་སྤྲོས་བྲལ་ལམ་དུ་ཤར་བ་ན་བྱ་བ་རྒྱུ་མེད་པའི་གཏན་ཚིགས་ཀྱིས་འཁོར་བ་དོང་སྤྲུགས་མྱང་འདས་རང་ས་ན་གྲོལ་བར་འདོད་དོ། །གཉིས་པ་ནི། ཆོས་ཉིད་གནས་པའི་ཆ་ནས་སེམས་ལ་འཕོ་འགྱུར་བྲལ་བས་གཞི་བྱས། སྐུ་གསུམ་ལམ་གྱི་སྣང་བར་ཤར་ཚེ་མ་གྲོལ་བ་གང་ཡང་མེད་ལ། འབྲས་བུ་གཤིས་ཐོག་ཏུ་ཕེབས་པའི་དུས་ན་ཆོས་ཉིད་མ་དང་ཕྲད་པར་འདོད་པའོ། །ཁ་གཏམ་གྱི་ཚུལ་དུ་གསུངས་པའི་ངོ་བོ་བློ་བྲལ་མ་འཁྲུལ་བ། རང་བཞིན་རྣམ་རྟོག་ཁུངས་སྟོར་བ། མཚན་ཉིད་གཉིས་མེད་ངོས་བཟུང་དང་བྲལ་བའོ། །དབྱེ་ན་གཉིས། གླེན་པ་ཡེངས་ལ་བོར་བའི་ཁ་གཏམ་ནི། རྩ་གནད་ཀྱིས་རླུང་། རླུང་གནད་ཀྱིས་སེམས་ཆོས་ཉིད་དུ་ཞི་བས་ཡེ་ཤེས་ཁུངས་ནས་དོན། སྒོ་གསུམ་འབྲེལ་ཐག་ཆོད་པའི་གནད་ཀྱིས་འགྱུ་བ་རང་སར་གྲོལ་ཏེ་སངས་རྒྱས་དང་སེམས་ཅན་གླེང་བ་ཆད་པའི་མན་ངག་གོ །ཁར་ཕོག་ཏུ་མེད་པའི་ཁ་གཏམ་ནི། དབྱིངས་ཀློང་ཡངས་པའི་ངོ་ནས་གང་ཡང་མ་ཤོང་བ་མེད་པས་འཁོར་འདས་ཀྱི་ཁྱབ་བརྩི་བ་དང་། ཆོས་ཉིད་སྟོང་པ་ཉིད་ལ་ངོས་གཟུང་མེད་པས་ངོ་བོ་འགྱུར་བརྩི་བ་དང་། དབྱིངས་ལ་བྱ་རྩོལ་མེད་པས་རང་གནས་ཀྱི་ཡེ་ཤེས་ངོས་བཟུང་བའོ། །གསུམ་པ་རྒྱུད་རང་གཞུང་དུ་གསུངས་པའི་མན་ངག་གི་ངོ་བོ་བཀའ་ཐམས་ཅད་ཀྱི་བྱུང་སར་གྱུར་པ། ཁྱད་པར་ཆོས་ཉིད་ཀྱིས་བཅད་པའོ། །རང་བཞིན་ལ་འཁོར་འདས་མེད་པས་སྤང་བླང་གི་ལྟོས་ཆད་པ་དང་། ཆོས་ཉིད་སྒྲ་ཚིག་ཏུ་མ་གྲུབ་པས་སྟོང་ཉིད་རྩོད་གཞི་དང་བྲལ་བའོ། །དབྱེ་ན་བཞི་ཡོད་པ་ལས། དང་པོ་ལྟ་བ་དགོངས་དྲིལ་གྱི་ངོ་བོ་སྤྲོས་མེད་གཞི་ལ་ཁྱབ་པས། ལས་ལ་བཟང་ངན་མེད་དེ་ཁམས་གསུམ་ཡོངས་གྲོལ་དུ་ཤར། རང་བཞིན་སྟོང་གསལ་དུ་ཤར་བས་དགེ་བས་ཕན་མ་བཏགས། སྡིག་པས་གནོད་མ་བསྐྱལ་ཏེ་སངས་རྒྱས་དང་སེམས་ཅན་མེད། མཚན་ཉིད་ལ་མིང་ཚིག་ཡི་གེའི་སྤྲོས་པ་མེད་པས་ཐེག་པ་སྣ་ཚོགས་ཀྱི་ཆོས་ཀྱིས་སངས་མི་རྒྱ་བས་དབང་པོ་ཅིག་ཅར་གྲོལ་བའི་གནད་དོ། །དབྱེ་ན་གཉིས། སྣང་བརྟགས་ལྟ་བར་འདོད་པ་བྱར་མེད་པ་དང་། སེམས་རྟོག་ལྟ་བར་དྲིལ་བར་ཀུན་ནས་སློང་བ་གཉིས་སོ། །དང་པོའི་ངོ་བོ་ནི་དེ་ལ་ཆོས་མེད་པས་སངས་རྒྱས་མིང་དུའང་མ་གྲུབ། རང་བཞིན་རྩལ་དུ་ཤར་བས་འཁོར་བ་ཐ་དད་དུ་ཤར། མཚན་ཉིད་གཅིག་ཏུ་མ་ངེས་པས་ལྟ་སྒོམ་ལ་ཚད་མེད་པའོ། །སེམས་རྟོག་ལྟ་བར་དྲིལ་བའི་ངོ་བོ་སྐྱེ་མེད་དུ་དག་པས་ཉོན་མོངས་པ་གཞི་མེད་དུ་དེངས། རང་བཞིན་མ་འགགས་པར་ཤར་བས་སྤང་བླང་བྱ་རྩོལ་དང་བྲལ། མཚན་ཉིད་ཡེ་གྲོལ་དུ་ཤར་བས་འཁོར་འདས་ཀྱི་ཁུངས་རྡིབ་པའོ། །གཉིས་པ་གཏར་ཁ་གེགས་སེལ་བའི་ངོ་བོ་ཆོས་ཉིད་ཀྱི་གཤིས་བསྟན་པས་འཁོར་འདས་ཀྱི་མཚམས་ཕྱེད། རང་བཞིན་འཕྱུགས་མེད་ཀྱི་གཞི་ཐེངས་པས་བློ་མ་བུའི་བསྡེབ་མེད། མཚན་ཉིད་ལ་དངོས་པོ་མེད་པས་འཁྲུལ་པ་རང་ཐོག་ཏུ་བསལ་བའོ། །འདི་ལ་དབྱེ་ན་གཉིས་སུ་ཡོད་པའི། དང་པོ་ལྟ་སྒོམ་དྲོད་ཚད་ཀྱི་གེགས་བསལ་བ་ནི། ལྟ་བའི་དྲོད་འཁོར་འདས་གཉིས་རོ་མཉམ་དུ་འདྲེས་པས་གནས་ལུགས་ལ་རིས་མེད། དེའང་ལྟ་བ་གཡོ་བའི་དུས་འཁོར་བའི་མཚང་ངོས་ཟིན་པ་འདྲེ་རྐུན་ངོས་ཟིན་པ་ལྟ་བུའོ། །ལྟ་བ་ཐོབ་པའི་དུས་ལུས་ངག་ལ་དྲོད་ཐོབ་པ་མེ་འབར་བ་ལ་ཞུན་མར་བླུགས་པ་ལྟ་བུའོ། །ལྟ་བ་བརྟན་པའི་དུས་འཁོར་འདས་ཀྱི་ཤན་ཕྱེད་པ་དམག་མི་གཡུལ་ལས་རྒྱལ་བ་ལྟ་བུའོ། །སྒོམ་པ་གཡོ་བའི་དུས་ན་རླུང་སེམས་ལ་རང་བྱན་ཚུད་པ་ཕྱུག་པོའི་བང་མཛོད་དང་ཕྲད་པ་ལྟ་བུའོ། །སྒོམ་པ་ཐོབ་པའི་དུས་ན་སེམས་ལམ་དུ་ཚུད་པ་གླང་ཆེན་བྲེས་ལ་བཙུད་པ་ལྟ་བུའོ། །སྒོམ་པ་བརྟན་པའི་དུས་ན་རིག་པའི་རྩལ་རྫོགས་པ་རྒྱལ་རིགས་སྤྱི་བོ་ནས་དབང་བསྐུར་བ་ལྟ་བུའོ། །སྤྱོད་པ་གཡོ་བའི་དུས་ན་ཤེས་པའི་གཏད་སོ་ཡལ་བ་སྨྱོན་པ་འུར་ལངས་པ་ལྟ་བུའོ། །སྤྱོད་པ་ཐོབ་པའི་དུས་ན་འཁྲུལ་སྣང་ཟིལ་གྱིས་ནོན་པ་སེང་གེ་རི་སུལ་འགྲིམ་པ་ལྟ་བུའོ། །སྤྱོད་པ་བརྟན་པའི་དུས་ན་སྐུ་གསུམ་གྱི་དྲོད་ཚད་ཟིན་པ་བྲམ་ཟེ་མོ་ལས་ཟིན་པ་ལྟ་བུའོ། །དེའང་སྤྱོད་པས་སྣང་བའི་གེགས་བསལ་བས་སྣང་རྐྱེན་ཆོས་ཉིད་དུ་གྲོལ། སྒོམ་པས་འགྱུ་བའི་གེགས་བསལ་བས་དྲན་བསམ་ཏིང་འཛིན་དུ་གྲོལ། ལྟ་བས་ཆོས་ཉིད་ཀྱི་གེགས་བསལ་བས་ཆོས་ལ་མ་བརྟེན་ཡང་སངས་རྒྱ་བ་ལས་འགྲོ་ས་གཞན་མེད་དོ། །གཉིས་པ་དངོས་པོ་འདུག་ཚུལ་གྱི་གེགས་བསལ་བ་ནི། ངོ་བོའི་ཆོས་ཉིད་ལ་བཅོས་སུ་མེད་པས་ཅིར་སྣང་སེམས་ཡིན་དུ་གྲོལ། རང་བཞིན་ལ་རྒྱུ་འབྲས་མེད་པས་ཁམས་གསུམ་དངོས་མེད་དུ་དག །མཚན་ཉིད་ལ་གོམས་པ་མ་དགོས་པས་ཤེས་བྱ་གཞན་ལ་མི་ལྟོས་པའོ། །གསུམ་པ་གབ་པ་མངོན་ཕྱུང་གི་ངོ་བོ་ལ་ཐོབ་ཏུ་མེད་པས་རེ་བ་གང་ལའང་གདེང་མི་འཆའ། རང་བཞིན་ལ་ཕྱོགས་རིས་དག་པས་དོགས་པའི་འཕྲང་མེད། མཚན་ཉིད་ལ་བརྟགས་ཀྱང་མི་རྙེད་པས་འཁོར་འདས་ཀྱི་རྩ་བ་རུལ་བ་ཞེས་བྱའོ། །དབྱེ་ན། གཅིག་གབ་ནས་གཉིས་མངོན་དུ་ཕྱུང་བ་དང་། གཉིས་གབ་ནས་གཅིག་མངོན་དུ་ཕྱུང་བ་གཉིས་ལས། སྔ་མ་ནི། ལྟ་སྤྱོད་གཉིས་མངོན་དུ་ཕྱུང་ནས་སྒོམ་པ་གསང་ན། དེའི་ངོ་བོ་ཟུང་འཇུག་ལ་ཐོག་མཐའ་མེད་པས་འཁོར་འདས་ཀྱི་ཐོག་མཐའ་ཆོད་པའོ། །རང་བཞིན་གཉིས་སུ་མ་ཡིན་པས་ཐིག་ལེ་ལ་ཕྱི་ནང་མེད། མཚན་ཉིད་ལ་ལྟོས་གཞག་བྲལ་བས་རྒྱུ་མེད་ཟང་ཐལ་བའོ། གལ་ཏེ་སྤྱོད་པ་གབ་ནས་ལྟ་སྒོམ་གཉིས་མངོན་དུ་ཕྱུང་ན། སྟོང་པས་སྟོང་པ་དག་པ་ཞེས་འདོད་དོ། །ལྟ་བ་གསང་ནས་སྤྱོད་སྒོམ་གཉིས་མངོན་དུ་ཕྱུང་ན་འཛིན་མེད་ཀྱི་ཤེས་པ་ཕྱོགས་ཡན་དུ་ཤར་བས། ཡུལ་མེད་ཀྱི་རིག་པ་གཏད་མེད་དུ་གྲོལ་བ་ཞེས་བྱའོ། །ཕྱི་མ་ནི། སྒོམ་པ་ཕྱུང་ནས་ལྟ་སྤྱོད་གསང་ན། གཏད་མེད་ཀྱི་རིག་པ་ལྟོས་མེད་དུ་ཕྱུང་བས་རྒྱུ་མེད་ཀྱི་འབྲས་བུ་རང་ལ་གནས་པ་ཞེས་བྱའོ། །སྤྱོད་པ་ཕྱུང་ནས་ལྟ་སྒོམ་གསང་ན་ལུས་གཡང་སར་བོར་ནས་སེམས་ཆོས་ཉིད་དུ་གློད་པ་ཞེས་བྱའོ། །ལྟ་བ་གསལ་ནས་སྒོམ་སྤྱོད་གཉིས་གསང་ན་སེམས་སྟོང་ཉིད་དུ་བསྐྱལ་བས་ལུས་ངག་གནད་ལ་ཕེབས་པ་ཞེས་བྱའོ། །བཞི་པ་བཤད་པ་རང་གསལ་གྱི་ངོ་བོ་སྒྲ་ཚིག་རང་ཚན་ལས་འདས་པ་གྲུབ་པའི་མཐའ་ལ་མི་གནས་པས་གྲུབ་པ་ཁྱད་པར་ཅན་དང་། རང་བཞིན་དམིགས་མེད་དུ་དག་པས་ཀ་ནས་དག་པའི་ཆོས་ཉིད་མུ་མེད་དུ་རང་ཤར་ལ། མཚན་ཉིད་བློ་མ་ཡིན་པས་ཀུན་རྫོབ་ཀྱི་འགྱུ་བྱེད་སྤྲོས་པ་དང་བྲལ་བའོ། དབྱེ་ན་གསུམ། འཁྲུལ་པ་བ་དེད་ཀྱི་ལུགས་སུ་སྨྲ་བ་དང་། འཁྲུལ་པ་གཞི་ལ་བཟློག་པའི་ཚུལ་དུ་སྨྲ་བ་དང་། ཐིག་ལེ་རང་གནད་ལ་ཕེབས་པར་སྨྲ་བའོ། །དང་པོ་ནི། ངོ་བོ་འཁྲུལ་པ་མ་རིག་པའི་ས་བོན་གྱིས་འཁོར་བ་མཐའ་དག་གི་གཞི་བཏིང་བས། དེ་ཉིད་རང་དུ་དེད་པས་མ་རིག་པ་རྩད་ནས་བཅད། རིག་པ་དང་པོའི་གཞི་ལ་ཕྱིན་ཏེ་ཕྱིན་ཆད་ལྡོག་པ་མེད་པའོ། །རང་བཞིན་ཐ་དད་དུ་བྱུང་བས་རྒྱུ་རྐྱེན་གྱི་བ་དེད་ནས་དམིགས་པའི་གདར་ཤ་ཆོད་པས་འཁོར་བར་འཁྲུལ་པའི་ལྟོས་ཟད་ནས། གཞི་ཟད་ཡེ་དག་ཆེན་པོ་ཞེས་བྱའོ། །མཚན་ཉིད་འཁྲུལ་པ་ངོས་ཟིན་པས་མ་འཁྲུལ་པའི་ཡེ་ཤེས་ཀྱི་དྲོད་ཚད་ཟིན་པ་ཞེས་བྱའོ། །དེའང་འཁྲུལ་པ་རང་སོ་ལ་བཞག་པས་མ་འཁྲུལ་པའི་ཆོས་ཉིད་ངོས་ཟིན་པའི་ངོ་བོ་ནི་གདོད་ནས་འཁྲུལ་མ་མྱོང་བས་མ་རིག་པའི་མིང་མེད། ད་ལྟ་འཁྲུལ་མ་ཤེས་པས་ལས་ཉོན་གྱི་ཁུངས་སྟོར། ཕྱིན་ཆད་འཁྲུལ་མི་སྲིད་པས་ལས་དགེ་སྡིག་གི་མིང་མེད་པའོ། །རང་བཞིན་ལ་གཉིས་སུ་མེད་པའི་འཁོར་འདས་རིག་པར་གཞི་གཅིག་པས་འཁྲུལ་པ་གནས་སུ་དག །མཚན་ཉིད་འཁྲུལ་རྒྱུ་མེད་པས་འཁྲུལ་མ་འཁྲུལ་གྱིས་རྩིས་ཆད་དེ་ཁམས་གསུམ་དོང་སྤྲུགས་པའོ། །འཁྲུལ་གཞི་ཁོག་བསྐོར་བས་འཁྲུལ་འཁོར་རྒྱུན་ཆད་པའི་ངོ་བོ་ནི། འཁོར་བར་ལྟུང་བྱེད་ཀྱི་གཞི་སྟོངས་པས་བྱས་པས་མ་རྙེད་པའི་གཞི་འཆོས་པ་དང་། རང་བཞིན་རྩིས་ལས་འདས་པས་འཁྲུལ་གྲོལ་གང་དུའང་གྲུབ་པ་མེད། མཚན་ཉིད་ལ་གཉིས་སུ་མ་གྲུབ་པས་འཁྲུལ་མ་འཁྲུལ་གྱི་བློ་དང་བྲལ་བའོ། །ཐིག་ལེ་རང་གནད་ལ་འབེབས་པ་ནི། ངོ་བོ་ལ་སྤྲོས་པ་དང་བྲལ་བས་གཅིག་དང་དུ་མ་མེད། རང་བཞིན་ལ་དུ་མ་མེད་པས་ཐ་སྙད་དང་ཚིག་ལས་འདས། མཚན་ཉིད་ལ་ངོ་སྤྲད་པས་ཡིད་ཆེས་ཤིང་ཐག་ཆོད་པའོ། །དབྱེ་ན་གཉིས། སྙན་བརྒྱུད་དང་། བཤད་རྒྱུད་དོ། །སྙན་བརྒྱུད་ཀྱི་ངོ་བོ་གཅིག་ནས་གཅིག་ཏུ་བར་མ་ཆད་པས་ཤིན་ཏུ་ཉེ་ལ། རང་བཞིན་ནི་རྣ་བའི་དབང་པོ་དང་འབྲེལ་བས་གཞན་གྱིས་བར་མ་ཆོད། མཚན་ཉིད་ལ་གོལ་འཕྱུགས་མེད་པས་ཡིད་ཆེས་ཀྱི་གདེང་དང་བཅས་པའོ། །དབྱེ་ན་ཡི་གེ་ཅན་དང་། ཡི་གེ་མེད་པའི་སྙན་བརྒྱུད་ཆོས་ཉིད་དོན་གྱི་མན་ངག་གོ། །བཤད་རྒྱུད་ཀྱི་ངོ་བོ་བྱ་རྩོལ་དང་བྲལ་བའི་ཆོས་ཉིད་ལ་རྒྱུ་མེད་པས་འཁོར་བར་ལྡོག་པའི་གཞི་མེད། རང་བཞིན་འོད་གསལ་ལ་དྲི་མ་དང་བྲལ་བའི་ཡེ་ཤེས་ལྔའི་ཆོས་ཉིད་ཤེས། མཚན་ཉིད་རྟོག་དཔྱོད་ལས་འདས་པས་སྐུ་གསུམ་ཡེ་ཤེས་ལྔ་ལྡན་གྱི་དགོངས་པ་ལ་རྟག་པ་རྒྱུན་གྱི་ཁོར་མོར་གནས་སོ། །དབྱེ་ན་བཞི་སྟེ། ཕྱི་སྐོར། ནང་སྐོར། གསང་སྐོར། ཡང་གསང་བླ་ན་མེད་པའི་སྐོར་རོ། །དེའང་སློབ་དཔོན་ཆེན་པོ་བི་མ་ལའི་སྒྲོན་མ་སྣང་བྱེད་ལས། ཕྱི་སྐོར་ལུས་དང་འདྲ་སྟེ་ཐ་སྙད་རྒྱ་ཆེར་བསྟན། །ནང་སྐོར་མིག་དང་འདྲ་སྟེ་མཐོང་བ་བརྡ་ཡི་ཆོས། །གསང་སྐོར་སྙིང་དང་འདྲ་སྟེ་དྲན་བྱེད་ཟུངས་ཀྱི་ཆོས། །འདི་ནི་ལུས་ཀུན་རྫོགས་པའི་སྐྱེས་བུ་འདྲ། །ཞེས་སོ་སོའི་རང་བཞིན་ཡིད་ཆེས་པའི་གནས་སུ་བསྟན་ནས་ཡང་གསང་བླ་ན་མེད་པ་ལ་ཁྱད་པར་དུ་བསྔགས་པའོ། །དེ་ལ་དང་པོ་ཕྱི་སྐོར་གྱི་ངོ་བོ་ནི། ཉོན་མོངས་པ་སྤང་དུ་མེད་པས་དུག་ལྔ་ལམ་དུ་འཁྱེར། རང་བཞིན་ལ་བྱ་རྩོལ་མེད་པས་ཅིར་སྣང་ཆོས་ཉིད་ཀྱི་རྒྱན། མཚན་ཉིད་ལ་གོལ་འཕྱུགས་མེད་པས་སྟོང་ཉིད་གང་དུའང་མ་ཕྱེ་བའོ། །ནང་སྐོར་གྱི་ངོ་བོ་ནི། གཟུགས་ཅན་གྱི་མཚན་མ་མེད་པས་ཆོས་ཉིད་ལ་རིས་སུ་མ་ཆད། རང་བཞིན་ལ་འགྲོ་འོང་མེད་པས་རྟག་པར་བཞུགས་པའི་ཡེ་ཤེས། མཚན་ཉིད་ལ་ཟུག་པའི་ངོས་ནས་རྩ་བ་ལྟར་བྱུང་ལ། འདྲིལ་བའི་ངོས་ནས་སྡོང་པོ་ལྟ་བུ། རྒྱས་པའི་ངོས་ནས་ཡལ་འདབ་ལྟ་བུ། གསལ་བའི་ངོས་ནས་མེ་ཏོག་ལྟ་བུ། སྨིན་པའི་ངོས་ནས་འབྲས་བུ་ལྟར་བྱུང་བའོ། །གསང་སྐོར་གྱི་ངོ་བོ་ནི། ཆོས་ཉིད་ངོ་སྤྲད་པ་དང་རྟོགས་པ་ཐོབ་པ་དུས་མཉམ་པས་ཐོས་བསམ་སྒོམ་པའི་བརྟུལ་ཞུགས་ལ་རག་མ་ལུས། རང་བཞིན་དབུགས་ཆད་པ་དང་སངས་རྒྱ་བ་དུས་མཉམ་པས་རྩོལ་བསྒྲུབ་ལ་རག་མ་ལུས། མཚན་ཉིད་ནི་སངས་རྒྱས་པ་དང་ཐུགས་རྗེའི་ནུས་པ་རྫོགས་པ་དུས་མཉམ་པས་ཚོགས་གཉིས་ཀྱི་འཕེན་པ་རག་མ་ལུས་པའོ། །གསང་བ་བླ་ན་མེད་པའི་སྐོར་གྱི་ངོ་བོ་ནི། ཚིག་དང་དཔེ་ལ་མ་བརྟེན་པས་རྟོག་དཔྱོད་ཀྱི་ཤེས་བྱ་ལ་མ་ལྟོས། རང་བཞིན་མངོན་སུམ་པར་མཐོང་བས་ཡིད་དཔྱོད་ཀྱི་ལྟ་བ་ལ་མི་གནས། མཚན་ཉིད་སྣང་བ་བཞི་ཚད་ལ་ཕེབས་པས་འབྲས་བུ་སྐུ་གསུམ་ཡེ་ཤེས་ལྔར་རེ་ལྟོས་མི་འཆའ་བར་ནང་གསལ་གདོད་མའི་དབྱིངས་ལ་ཚེ་འདི་ཉིད་ལ་སྦྱོར་བའི་ཕྱིར་ཤིན་ཏུའང་ཁྱད་དུ་འཕགས་པ་ཡིན་ནོ། །དེ་ལྟར་རྫོགས་པ་ཆེན་པོ་མན་ངག་གི་སྡེ་གསུམ་པོ་རྣམས་ཀློང་གསུམ་དུ་བསྡུ་ན། རོལ་པ་འགག་མེད་ཀྱི་ཀློང་། བློ་ལ་མ་གྲོལ་བ་མེད་པའི་ཀློང་། ངོ་བོ་ལ་བཟང་ངན་མེད་པའི་ཀློང་དང་གསུམ་མོ། །མན་ངག་གི་སྙིང་པོའང་གནད་བཀྲོལ་བ་དང་། འགག་སྡོམ་པ་དང་། ངོ་སྤྲད་པ་དང་། མངོན་སུམ་རང་གནད་ལ་དབབ་པ་དང་བཞིར་འདུས་ལ། རྗོད་བྱེད་ཀྱི་རྒྱུ་མཚན་སོ་སོ་པ་ཁྲི་ཕྲག་གཉིས་དང་བཅུ་གཉིས། ལེའུ་སྟོང་ཕྲག་སུམ་ཅུ་རྩ་ལྔ། ཤློ་ཀ་འབུམ་ཕྲག་དྲུག་ཅུ་རྩ་བཞི། གནད་སྟོང་ཕྲག་གསུམ། འཕྱོང་ཆེན་པོ་བརྒྱད། གཟེར་བུ་བརྒྱ་དང་བརྒྱད་ཅུ། གགས་སྟོང་ཕྲག་ཕྱེད་དང་གཉིས། ཤན་འབྱེད་ཁྲི་ཕྲག་བདུན། ལ་བཟླ་བ་འབུམ་ཕྲག་ཕྱེད་དང་གཉིས་ཏེ་བརྗོད་བྱ་ནམ་མཁའི་མཐའ་དང་མཉམ་པ་བཀའ་སྩལ་པ་ནི་མཐར་ཕྱིན་པ་མན་ངག་གི་སྡེ་ཡིན་ལ། དེ་ཡང་གྲུབ་མཐའ་རིན་པོ་ཆེར་གགས་སྟོང་ཕྲག་དགུ་བརྒྱ་ཞེས་བྱུང་ཞིང་། ཐེག་པའི་མཆོག་ལས་སྟོང་དང་ལྔ་བརྒྱ་བྱུང་བ། ཐལ་འགྱུར་ལས། རང་བཞིན་རྫོགས་པ་ཆེན་པོ་ལས། །ཚིག་གི་བྱེ་བྲག་རྣམ་འཕྲོས་པ། །སྡེ་གསུམ་ལས་ནི་ཀློང་དགུར་འགྱུར། །ཚིག་སྡུད་པ་ལས་ཤློཀ །འབུམ་ཕྲག་དྲུག་ཅུ་རྩ་བཞི་ལས། །ལེའུ་སྟོང་ཕྲག་སུམ་ཅུ་ལྔ། །བམ་པོ་ཉི་ཁྲི་སྟོང་ཕྲག་གཅིག །བརྗོད་བྱ་ནམ་མཁའི་མཐའ་དང་མཉམ། །གདུལ་བྱའི་སེམས་ཀྱི་རྟོག་པ་གཅོད། །འདི་ལས་བརྗོད་བྱ་ཉེར་བསྡུས་པ། །གཟེར་བུ་བརྒྱ་དང་བརྒྱད་ཅུ་ལ། །གགས་ནི་སྟོང་ཕྲག་ཕྱེད་དང་གཉིས། །གནད་ཆེན་འདུས་པ་སྟོང་ཕྲག་གསུམ། །གོལ་སྒྲིབ་ཁྲི་ཕྲག་བཞི་བཅུ་ལ། །མིང་ཐོགས་རྒྱུད་ནི་ཁྲི་ཕྲག་གཉིས། །ཚིག་བརྗོད་རིམ་པ་གསལ་བཀོད་དོ། །ཞེས་པ་ལྟར་ན་སྟོང་ཕྲག་ཕྱེད་གཉིས་ཏེ་སྟོང་དང་ལྔ་བརྒྱ་འཐད་པར་སེམས་ཤིང་། དེ་བཞིན་དུ་གཉིས་ཀར་གནད་སྟོང་ཕྲག་ལྔ་ཞེས་བྱུང་བའང་སྟོང་ཕྲག་གསུམ་དང་ཡི་གེ་ནོར་བར་དོགས་པས་དཔྱད་པར་བྱའོ། །གཞན་རྣམས་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་ཟེར་བ་ནི་ཤློ་ཀ་དང་། རྒྱུད་ཀྱི་ངེས་བརྗོད་ནོར་བ་སྟེ། དེས་ན་ད་ལྟ་རྒྱུད་ཀྱི་མིང་འདོགས་ཙམ་ངེས་པ་འདྲོངས་པའང་གདོད་མའི་མགོན་པོ་ཀློང་ཆེན་པའི་བཀའ་དྲིན་ཡིན་པར་བལྟའོ། །དེ་ལྟར་རྒྱ་ཆེར་བཤད་པའི་སྐོར་ཐམས་ཅད་མདོ་གཅིག་ཏུ་དྲིལ་ནས་དབྱེ་བསྡུའི་རིམ་པ་ངེས་པ་ལས་རང་རང་གི་བཞེད་གཞུང་ཐུན་མོང་མ་ཡིན་པ་སྐབས་སོ་སོར་བརྗོད་ཟིན་ལ། བསྡུ་བའི་རིམ་པ་ལ་ཐེག་པ་སྤྱི་དང་མདོ་མཐུན་པར་བསྡུ་ན། ཀུན་མཁྱེན་གྱིས། དེ་ཡང་སྡེ་སྣོད་ཀྱི་དབང་དུ་བྱས་ན་མངོན་པའི་སྡེ་སྣོད་ཅེས་བྱ་བར་སྡེ་གསུམ་ཀ་བསྡུས་སོ། །ཞེས་གསུངས་ལ། འདིར་བརྗོད་བྱའི་སྒོ་ནས་སྡེ་སྣོད་གསུམ་དང་། རྗོད་བྱེད་ཀྱི་སྒོ་ནས་བསླབ་པ་གསུམ་དུ་ངེས་པའི་ཕྱིར། དེ་གསུམ་ཀའི་སྤྱི་གཞི་རིག་པ་འཛིན་པའི་སྡེ་སྣོད་ཅེས་སྡེ་སྣོད་བཞི་པར་བསྡུས་ཀྱང་མི་འགལ་ཏེ། དཔུང་བཟང་གིས་ཞུས་པའི་མདོ་ལས། བྱེ་བ་ཕྲག་གསུམ་དང་ནི་འབུམ་ཕྲག་ལྔ། །རིག་འཛིན་སྡེ་སྣོད་དུ་ནི་རྒྱལ་བས་གསུངས། །ཞེས་བཤད་པའི་ཕྱིར་རོ། །དོན་གསུམ་པ་རྒྱུད་སྡེའི་ངེས་པ་བརྗོད་པ་ལ་གསུམ། རྒྱུད་སྤྱིའི་ཆིངས་མདོར་བསྟན་པ། ཤེས་བྱེད་རྒྱུད་སྡེའི་རྣམ་གྲངས་སོ་སོར་བཤད་པ། དེའི་དགོངས་དོན་གསང་བ་བླ་ན་མེད་པའི་ལམ་བྱེ་བྲག་ཏུ་བཤད་པའོ། །དང་པོ་ལ་དྲུག་སྟེ། རྒྱུད་ཀྱི་ངོ་བོ། ངེས་ཚིག །རྣམ་དབྱེ། ལྡང་ཚད། དཔེ། འཐད་པའོ། །དང་པོ་ནི། གཞིའི་རྒྱུད་རིག་པའི་ཆོས་ཉིད། ལམ་གྱི་རྒྱུད་དབང་དང་གདམས་ངག །འབྲས་བུའི་རྒྱུད་སྐུ་དང་ཡེ་ཤེས་སོ། །ངེས་ཚིག་ནི། རིགས་མཚོན་པའི་ཕྱིར་ན་རྒྱུད་དེ། གང་དང་གང་གི་རིགས་སུ་སྐྱེ་བར་བྱེད་པ་དང་། བར་མ་ཆད་ལ་བྲེང་ཆགས་སུ་གནས་པས་རྒྱུད་ཅེས་བྱ་སྟེ་མུ་ཏིག་ཕྲེང་བ་ལས། མཚོན་པར་བྱ་བས་ཐབས་ཡིན་ཏེ། རྒྱུན་དུ་གནས་པས་རྒྱུད་ཅེས་བྱ། །ཞེས་སོ། །དབྱེ་ན་རང་བཞིན་དོན་གྱི་རྒྱུད་དང་། མཚོན་བྱེད་ཚིག་གི་རྒྱུད་དོ། །དང་པོ་ནི། སེམས་ཉིད་འོད་གསལ་བའི་རང་བཞིན་རྣམ་པར་རྟོག་པའི་དྲི་མ་ལས་འདས་པ། ངོ་བོ་རང་བཞིན་ཐུགས་རྗེ་གསུམ་གྱི་བདག་ཉིད་ཅན་ལ་བྱ་སྟེ་སྔ་མ་ལས། དེ་བཞིན་གཤེགས་པའི་རང་བཞིན་ཅན། །རྒྱུད་ཀྱི་སྙིང་པོ་རབ་ཏུ་དབྱེ། །འཁོར་དང་འདས་པ་གང་གིས་ཀྱང་། །འདི་ཉིད་ཤེས་པ་མ་ཡིན་ཏེ། །མི་འབྱེད་རྡོ་རྗེའི་རང་བཞིན་ཅན། །རང་རྒྱུད་མཚོན་པའི་གཞི་གཅིག་པའི། །རང་བཞིན་སྟོང་པ་ཉིད་དུ་གཅིག །རྫོགས་པའི་སངས་རྒྱས་བསྐྱེད་པའི་ཡུམ། །ཞེས་སོ། །གཉིས་པ་ཚིག་གི་རྒྱུད་ནི། དེ་ཉིད་མཚོན་པའི་གནས་ངེས་པ་མིང་ཚིག་ཡི་གེའི་རང་བཞིན་ལེའུ་དང་བམ་པོ་ལ་སོགས་པའི་ཚད་ཀྱིས་བཅད་པ་སྟེ། འོག་ཏུ་ངེས་འབྱེད་ཀྱི་སྐབས་སྟོན་ནོ། །ལྡང་ཚད་ནི། དབང་དང་དམ་ཚིག་གཉིས། ལྷ་དང་སྔགས། དཀྱིལ་འཁོར་དང་མཆོད་པ། ཏིང་ངེ་འཛིན་དང་སྤྱོད་པ། ཕྲིན་ལས་དང་ལྟ་བ་སྟེ་བཅུ་ཚང་ན་བསྐྱེད་རིམ་གཙོ་ཆེ་བ་སྟེ་ཐབས་མཆོག་ཕའི་རྒྱུད་དུ་བསྟན་ནོ། །ཡང་ལྟ་བ་དང་འབྲས་བུ་གཉིས། སྤྱོད་པ་དང་སྒོམ་པ། སེམས་དང་ཡེ་ཤེས། ཉམས་དང་གདམས་པ་གཉིས་ཏེ་བརྒྱད་ཚང་ན་རྫོགས་རིམ་གཙོ་ཆེ་བ་ཤེས་རབ་མའི་རྒྱུད་དུ་སྟོན་ཏོ། །ཟུང་འཇུག་གཉིས་སུ་མེད་པ་ལ་དེ་གཉིས་ཀའི་བརྗོད་བྱ་ཚང་དགོས་པས་བཅོ་བརྒྱད་དོ། །ཡོངས་སུ་རྫོགས་པ་ཆེན་པོ་ནི། བསྐྱེད་རྫོགས་གཉིས་ལས་རྫོགས་རིམ། དེ་ལའང་སྤྲོས་བཅས་རྩ་རླུང་ཐིག་ལེའི་རྫོགས་རིམ་དང་། སྤྲོས་མེད་འོད་གསལ་ཡེ་ཤེས་ཀྱི་རྫོགས་རིམ་ལས། ཕྱི་མ་ལྟར་ལ་ཟབ་པའི་རྫོགས་རིམ་མམ། ཆེན་པོ་འོད་གསལ་གྱི་རྫོགས་རིམ་སྟེ། འདིའི་ལྡང་ཚད་ལ། འཇུག་པའི་སྒོ་དབང་དང་དམ་ཚིག་གཉིས། ལམ་དང་ལ་བཟླ་གཉིས། འབྲས་བུ་དང་ལྔ་ཚང་བ་ཡིན་ནོ། །དཔེ་ནི་ཐགས་དང་འདྲ་སྟེ། རྒྱུ་སྤུན་མང་པོ་ལ་བརྟེན་ནས་རས་ཡུག་ཏུ་ལོངས་པ་ལྟར། རྗོད་བྱེད་ཐ་དད་པ་ལ་བརྟེན་ནས་དོན་གཅིག་ཏུ་སློང་བའོ། །འཐད་པ་ནི། རང་ལ་གཞི་འབྲས་ཀྱི་རྒྱུད་ལྷུན་གྲུབ་ཏུ་གནས་པ་དེ་ལམ་གྱི་རྒྱུད་ཀྱིས་མཚོན་པར་བྱེད་པས་ན་རྒྱུད་དུ་འཐད་པའོ། །དེ་དག་སོ་སོའི་རང་བཞིན་རྒྱས་པར་བཤད་ན་རྗོད་བྱེད་མཐའ་ཡས་པར་ཡོད་དེ་མདོར་བསྡུས་པའོ། །གཉིས་པ་མཚོན་བྱེད་ཚིག་གི་རྒྱུད་ཀྱི་རྣམ་གྲངས་སོ་སོར་བཤད་པ་ལས། དང་པོ་སེམས་སྡེའི་རྒྱུད་ལ་བོད་དུ་འགྱུར་བའི་སེམས་མད་བཅོ་བརྒྱད་དུ་གྲགས་པ་ལས། ལོ་ཙཱ་ཆེན་པོ་བཻ་རོ་ཙ་ནས་བསྒྱུར་བའི་སྔ་འགྱུར་ལྔ་ནི། རིག་པའི་ཁྲ་བྱུག །རྩལ་ཆེན་སྤྲུག་པ། ཁྱུང་ཆེན་ལྡིང་བ། རྡོ་ལ་གསེར་ཞུན། མི་ནུབ་པའི་རྒྱལ་མཚན། ནམ་མཁའ་ཆེའོ། །པཎྜིཏ་ཆེན་པོ་བི་མ་ལ། ཀུ་མཱ་ར། གཡུ་སྒྲ་གསུམ་གྱིས་བསྒྱུར་བའི་ཕྱི་འགྱུར་བཅུ་གསུམ་ནི། རྩེ་མོ་བྱུང་རྒྱལ། ནམ་མཁའི་རྒྱལ་པོ། བདེ་བ་འཕྲུལ་བཀོད། རྫོགས་པ་སྤྱི་ཆིངས། བྱང་ཆུབ་སེམས་ཏིག །བདེ་བ་རབ་འབྱམས། སྲོག་གི་འཁོར་ལོ། །ཐིག་ལེ་དྲུག་པ། རྫོགས་པ་སྤྱི་སྤྱོད། ཡིད་བཞིན་ནོར་བུ། ཀུན་འདུས་རིག་པ། རྗེ་བཙུན་དམ་པ། སྒོམ་པ་དོན་གྲུབ་རྣམས་སོ། །དེ་དག་གི་སྟེང་དུ་བཻ་རོས་སྔར་བསྒྱུར་བའི་ཀུན་བྱེད་རྒྱལ་པོ་ལྟ་བ་ནམ་མཁའ་ལྟར་མཐའ་དབུས་མེད་པའི་རྒྱུད། རྨད་བྱུང་། བྱང་ཆུབ་སེམས་ཀྱི་མདོ་ལེའུ་བཞི་པ་དང་། རྣམ་པ་བགྲང་བའི་མདོ་ལེའུ་གསུམ་པ། ཕུན་སུམ་ཚོགས་པའི་མདོ་ཕུན་ཚོགས་ལྔ་པ་ལ་སོགས་བྱང་ཆུབ་སེམས་ཀྱི་མདོ་བཅུ་དང་། སོ་སོའི་རང་ཞབས་ཀྱི་འགྲེལ་པ་ཆུང་ངུ་རེ་བཅས་དོན་འགྲེལ་བཅུ། ཡང་འགྲེལ་ལྔ། བཤད་རྒྱུད་སྡེ་བཞི་ལ་སོགས་པ་ཕལ་ཆེར་པཎྜི་ཏ་ཤྲཱི་སིངྷ་དང་། ལོ་ཙཱ་བ་ཆེན་པོ་བཻ་རོ་ཙ་ནའི་རྒྱ་འགྱུར་ཤ་སྟག་གོ །ཀུན་མཁྱེན་ཆེན་པོས་སྔར་གྱི་སེམས་མད་བཅོ་བརྒྱད་ཀྱི་སྟེང་དུ་ཀུན་བྱེད། རྨད་བྱུང་། མདོ་བཅུ་གསུམ་བསྡོམས་པས་སེམས་སྡེ་ཉེར་གཅིག་གོ །ལུང་བམ་པོ་བཅོ་བརྒྱད་རྣམས་མིང་གི་རྣམ་གྲངས་ལ་ལ་འདྲ་ཡང་། ལ་ལ་སྔ་ཕྱི་དང་མང་ཉུང་བསྒྱུར་མཁན་མི་འདྲའོ་ཞེས་བཤད་དོ། །འདི་དག་རྙིང་རྒྱུད་ཀྱི་གླེགས་བམ་ཀ་ཁ་ལ་ཕལ་ཆེར་བཞུགས་སོ། །ཀློང་སྡེའི་རྒྱུད། འཁོར་བ་དོང་སྤྲུགས། རིན་ཆེན་གསང་བ། བྱ་རྩོལ་མེད་པ། ནམ་མཁའ་ཀློང་ཡངས་ལ་སོགས་པ་འབུམ་ཕྲག་གཅིག་ཏུ་གསུངས་པ་དང་། དེ་བཞིན་དུ་མན་ངག་གི་རྒྱུད་པདྨ་ཀློང་གསལ། པདྨ་དབང་རྒྱལ། ཡིད་བཞིན་ཏོག་གི་རྒྱུད་ལ་སོགས་པ་ཁྲི་ཕྲག་ལྔ་དང་སྟོང་ཕྲག་གཅིག་ཏུ་བཤད་ཅིང་། བྱེ་བྲག་པའི་སྐོར་ལ་སངས་རྒྱས་མཉམ་སྦྱོར། ཐིག་ལེ་སྐོར་གྱི་སྙིང་པོའི་རྒྱུད་སྟོང་ཕྲག་ལྔ་དང་སུམ་བརྒྱ། གསང་བ་སྤྱོད་པ་ས་བོན་གྱི་རྒྱུད་ལས་འཕྲོས་ཏེ་བྱུང་བ་རྣམས་དང་། སྒྲ་ཐལ་འགྱུར་ལ་སོགས་གསང་ཆེན་ངེས་པའི་རྒྱུད་བཅུ་བདུན་ཁྲོས་མ་དང་བཅས་བཅོ་བརྒྱད་དུ་གྲགས་པ་ལས། རྫོགས་པ་ཆེན་པོ་ཤློ་ཀ་འབུམ་ཕྲག་དྲུག་ཅུ་རྩ་བཞིའི་བཅུད་ཕྱུང་བ་སྙིང་པོ་ལས་ཀྱང་ཆེས་སྙིང་པོར་གྱུར་པ་ཡིན་པས་ཁྱད་པར་དུ་བྱས་པ་ཕྱི་མ་འདི་དག་གི་ངེས་བརྗོད་ལ། དབྱེ་བ། སྡུད་ཚུལ། གནད་དོན། དགོས་ཆེད། མ་བུ་ངེས་པའི་ཁ་བྱང་བཅས་རྒྱས་པར་གླེང་ན། དང་པོ་དབྱེ་བ་ལ་རྣམ་གྲངས་བཅོ་བརྒྱད་དཔེ་དོན་འབྲེལ་ཆགས་སུ་ངེས་པ་ནི། མུ་ཏིག་ཕྲེང་བ་ལས། རྒྱ་མཚོ་དང་ནི་ཉི་མ་དང་། །སེང་གེ་དང་ནི་རི་རྒྱལ་དང་། །འཁོར་ལོ་དང་ནི་ལྡེ་མིག་དང་། །རལ་གྲི་དང་ནི་གསལ་ཤིང་དང་། །གསེར་ཞུན་དང་ནི་མ་བུ་འབྲེལ། །མེ་ལོང་དང་ནི་མུ་ཏིག་རྒྱུས། །སྦྲུལ་མདུད་དང་ནི་ཁྱུང་ཆེན་དང་། །ཆུ་རྒྱུན་དང་ནི་སྤུ་གྲི་དང་། །རྒྱལ་པོ་དང་ནི་བང་མཛོད་དང་། །དེ་དག་རྣམ་པར་ཕྱེ་བས་ནི། །ཚིག་རྒྱུད་གསལ་བར་བྱེད་པའོ། །ཞེས་པས། རྒྱ་མཚོ་ལྟ་བུའི་རྒྱུད་རིག་པ་རང་ཤར། ཉི་མ་ལྟ་བུའི་རྒྱུད་རྡོ་རྗེ་སེམས་དཔའ་སྙིང་གི་མེ་ལོང་། སེང་གེ་ལྟ་བུའི་རྒྱུད་སེང་གེ་རྩལ་རྫོགས། རི་རྒྱལ་ལྟ་བུའི་རྒྱུད་ཡི་གེ་མེད་པ། འཁོར་ལོ་ལྟ་བུའི་རྒྱུད་བཀྲ་ཤིས་མཛེས་ལྡན། ལྡེ་མིག་ལྟ་བུའི་རྒྱུད་སྒྲ་ཐལ་འགྱུར། རལ་གྲི་ལྟ་བུའི་རྒྱུད་ཀུན་ཏུ་བཟང་པོ་ཐུགས་ཀྱི་མེ་ལོང་། གསལ་ཤིང་ལྟ་བུའི་རྒྱུད་སྒྲོན་མེ་འབར་བ། གསེར་ཞུན་ལྟ་བུའི་རྒྱུད་ནོར་བུ་ཕྲ་བཀོད། མ་བུ་འབྲེལ་བ་ལྟ་བུའི་རྒྱུད་ཉི་ཟླ་ཁ་སྦྱོར། མེ་ལོང་ལྟ་བུའི་རྒྱུད་ངོ་སྤྲོད་སྤྲས་པ། མུ་ཏིག་སྟར་ལ་རྒྱུས་པ་ལྟ་བུའི་རྒྱུད་མུ་ཏིག་ཕྲེང་བ། སྦྲུལ་མདུད་ལྟ་བུའི་རྒྱུད་རིག་པ་རང་གྲོལ། ཁྱུང་ཆེན་ལྟ་བུའི་རྒྱུད་ཀློང་དྲུག་པ། ཆུ་བོ་ལྟ་བུའི་རྒྱུད་རྫོགས་པ་རང་བྱུང་། སྤུ་གྲི་ལྟ་བུའི་རྒྱུད་ནག་མོ་ཁྲོས་མ། རྒྱལ་པོ་ལྟ་བུའི་རྒྱུད་སྐུ་གདུང་འབར་བ། བང་མཛོད་ལྟ་བུའི་རྒྱུད་རིན་པོ་ཆེ་སྤུངས་པ་སྟེ་རྣམ་གྲངས་བཅོ་བརྒྱད་ལས་ནག་མོ་ཁྲོས་མ་ནི་བསྟན་པ་བསྲུང་བའི་ཕྱིར་རྒྱུད་ནས་འཕྲོས་པ་ཡིན་ལ། སྒྲ་ཐལ་འགྱུར་ནི་ཀུན་གྱི་འཕྲོ་གཞི་སྟེ། དེའི་ཕྱིར་རྣམ་གྲངས་བཅུ་དྲུག་པོ་སྒྲ་ཐལ་འགྱུར་རྩ་བའི་རྒྱུད་ཀྱི་ཡན་ལག་ལྟ་བུར་ཤེས་པར་བྱ་སྟེ། དེ་ཉིད་ལས། ཐལ་འགྱུར་ལས་ནི་ངེས་འཕྲོས་ནས། །གདུལ་ཡུལ་སེམས་ཅན་རྣམས་ལ་སྣང་། །ཞེས་སོ། །གཉིས་པ་རྒྱུད་དེ་དག་གི་དོན་ཆིངས་བསྡུས་པ་ནི་སྡེ་ཚན་བཅུ་གཅིག་ལས། དང་པོ་རྒྱུད་ཀྱི་སྙིང་པོ་གསུམ་ནི། རིག་པ་རང་ཤར། རིག་པ་རང་གྲོལ། ཡི་གེ་མེད་པ་སྟེ། འདི་གསུམ་ཤེས་ན་རྗེས་འབངས་ལ་དབང་བསྒྱུར་བ་ལྟར། རྒྱུད་སྤྱིའི་དོན་ལ་དབང་བསྒྱུར་བ་སྟེ་དེ་སྐད་དུ་མུ་ཏིག་ཕྲེང་བ་ལས། རྒྱུད་ཀྱི་སྙིང་པོ་གསུམ་ཤེས་ན། །རྒྱལ་བློན་འབངས་གསུམ་འཛོམ་པ་འདྲ། །ཞེས་སོ། །གཉིས་པ་རྒྱུད་ཀྱི་དྭངས་མ་གསུམ་ནི། ཀུན་ཏུ་བཟང་པོ་ཐུགས་ཀྱི་མེ་ལོང་། རྡོ་རྗེ་སེམས་དཔའ་སྙིང་གི་མེ་ལོང་། ནོར་བུ་ཕྲ་བཀོད་དེ། འདི་གསུམ་ཤེས་ན་རི་རྒྱལ་གྱི་རྩེ་ནས་རི་ཕྲན་ཐམས་ཅད་མཐོང་བ་ལྟར་རྒྱུད་ཐམས་ཅད་ཀྱི་དོན་མཐོང་བ་སྟེ་སྔ་མ་ལས། རྒྱུད་ཀྱི་དྭངས་མ་གསུམ་ཤེས་ན། །རི་གསུམ་རྩེ་མོར་ཕྱིན་པ་འདྲ། །ཞེས་སོ། །གསུམ་པ་རྒྱུད་ཀྱི་མེ་ཏོག་གསུམ་ནི། མུ་ཏིག་ཕྲེང་བ། བཀྲ་ཤིས་མཛེས་ལྡན། སེང་གེ་རྩལ་རྫོགས་ཏེ། འདི་གསུམ་ཤེས་ན་ནམ་མཁའ་ལ་ཉི་མ་གསུམ་ཤར་བས་འཇིག་རྟེན་གྱི་མུན་པ་བསལ་བ་ལྟར། རྒྱུད་ཐམས་ཅད་ཀྱི་ཚིག་དོན་ལ་རྨོངས་པ་མེད་པར་གསལ་བ་སྟེ། རྒྱུད་ཀྱི་མེ་ཏོག་གསུམ་ཤེས་ན། །མཁའ་ལ་ཉི་མ་གསུམ་ཤར་འདྲ། །ཞེས་སོ། །བཞི་པ་རྒྱུད་ཀུན་གྱི་སྡོམ་ནི་རྫོགས་པ་རང་བྱུང་སྟེ། མཁར་གྱི་རྨང་རྡོ་འགྲམ་ཚུགས་པ་ལྟར་ཐང་པའི་གཞི་ཐེངས་པས་འཕོ་འགྱུར་མེད་པ་སྟེ། རྒྱུད་ཀུན་སྡོམ་གཅིག་ཤེས་པ་ནི། །མཁར་གྱི་འགྲམ་རྡོ་ལེགས་བཙུད་འདྲ། །ཞེས་སོ། །ལྔ་པ་རྒྱུད་ཀྱི་སྣང་བ་གཏིང་རྫོགས་ནི་ངོ་སྤྲོད་སྤྲས་པ་སྟེ། མཁར་གྱི་རྩེ་མོར་འབྱོངས་ནས་དགྲ་རྐུན་གྱིས་མི་ཚུགས་པ་ལྟར་འཁོར་བའི་གནས་ལ་མི་འཇིགས་པའི་གདེང་ཐོབ་པ་སྟེ། སྣང་བ་གཏིང་རྫོགས་རྒྱུད་ཤེས་ན། །རྩེ་མོར་འབྱོངས་པའི་མཁར་དང་འདྲ། །ཞེས་སོ། །དྲུག་པ་ཡེ་ཤེས་གཡུལ་བཟློག་གི་རྒྱུད་ནི་ཉི་ཟླ་ཁ་སྦྱོར་ཏེ། བར་དོར་འཁྲུལ་པའི་གཡུལ་ངོ་བཟློག་ནས་ཡེ་ཤེས་ཀྱི་སྐར་ཁུང་བཏོད་པ་སྟེ། ཡེ་ཤེས་གཡུལ་བཟློག་རྒྱུད་ཤེས་ན། །ཕྱོགས་བཞིར་སྐར་ཁུང་བཏོད་པ་འདྲ། །ཞེས་སོ། །བདུན་པ་ཡན་ལག་གི་རྒྱུད་གཉིས་ནི་རིན་པོ་ཆེ་སྤུངས་པ་དང་། སྐུ་གདུང་འབར་བ་སྟེ། རྒྱུད་ཀྱི་མ་ཚང་བ་ཁ་སྐོང་བས་ན་ཡན་ལག་ཏུ་བཞག་ཅིང་མཁར་ལ་བ་གམ་བཏགས་པ་ལྟར་ཡེ་ཤེས་རང་སྣང་དུ་རྟོགས་པས་རབ་ཏུ་མཛེས་པའི་དགོས་པ་ཅན་ཏེ། ཡན་ལག་རྒྱུད་ཆེན་གཉིས་ཤེས་ན། །ངོས་བཞིར་བ་གམ་བཏགས་པ་འདྲ། །ཞེས་སོ། །བརྒྱད་པ་རྣལ་འབྱོར་གྲོལ་བའི་རྒྱུད་ནི་སྒྲོན་མེ་འབར་བ་སྟེ། རྒྱལ་པོ་ཕོ་བྲང་གི་རྩེ་ན་བཞུགས་པས་འདོད་དགུ་འགྲུབ་པ་ལྟར་འདི་ཤེས་པས་དོན་འགྲུབ་ཅིང་རྣལ་འབྱོར་གསལ་བ་སྟེ། རྣལ་འབྱོར་གྲོལ་བའི་རྒྱུད་ཤེས་ན། །རྒྱལ་པོ་མཁར་གྱི་རྩེར་བཞག་འདྲ། །ཞེས་སོ། །དགུ་པ་སྙིང་དང་འདྲ་བ་ནི་ཀློང་དྲུག་པ་སྟེ། དགོངས་པ་དྲང་ཐད་དུ་སྟོན་པས་སྙིང་དང་འདྲ་ཞིང་དངོས་འཛིན་གྱི་དམག་མི་འཇུག་པས་སྒོ་བསྡམས་པ་ལྟ་བུ་སྟེ། སྙིང་དང་འདྲ་བའི་རྒྱུད་ཤེས་ན། །དེ་ལ་སྒོ་མོ་དམ་དཀྲིགས་འདྲ། །ཞེས་སོ། །བཅུ་པ་གསང་བ་རང་གཞུང་ནི་ཐལ་འགྱུར་ཏེ། རང་གི་གྲུབ་མཐའ་གསལ་ཞིང་ཐ་མ་ལྕགས་རིས་བསྐོར་བ་ལྟར་དོགས་པ་ཐམས་ཅད་གཅོད་པའི་ཕྱིར་ཏེ། གསང་བ་རང་གཞུང་རྒྱུད་ཤེས་ན། །ཐ་མ་ལྕགས་རིས་སྐོར་བ་འདྲ། །ཞེས་སོ། །བཅུ་གཅིག་པ་མཚོན་ཆ་ལྟ་བུ་ནི་ནག་མོ་ཁྲོས་མ་སྟེ། སྒོ་སྲུང་ལ་སྟག་མོ་བཞག་ན་གནོད་བྱེད་ཀྱིས་གླགས་མི་རྙེད་པ་ལྟར་འགལ་བྱེད་ཆམ་ལ་འབེབས་ཤིང་བར་གཅོད་ཐམས་ཅད་བསྲུང་བ་སྟེ། མཚོན་ཆ་ལྟ་བུའི་རྒྱུད་ཤེས་ན། །གོ་ཞུབ་ལྡན་པས་སྒོ་བསྲུང་འདྲ། །ཞེས་སོ། །གསུམ་པ་གནད་དོན་གོ་རིམ་ངེས་པའི་ཆིངས་ནི་སྡེ་ཚན་བརྒྱད་ལས། དང་པོ་རྩ་བའི་རྒྱུད་གཉིས་ལས་རྫོགས་པ་རང་བྱུང་རྩ་བའི་རྒྱུད་ལེའུ་ཉི་ཤུ་རྩ་ལྔ་པ་ལ་བརྟེན་ནས་ཕྱི་སྤྲོས་བཅས་ཀྱི་དབང་གིས་སྤྲོས་པ་ལ་དགའ་བ་རྣམས་སྨིན་པར་བྱེད། ཡི་གེ་མེད་པའི་རྒྱུད་ལེའུ་དྲུག་པ་ལ་བརྟེན་ནས་སྨིན་པ་དེ་གྲོལ་བར་བྱེད་པའི་མན་ངག་གི་གནད་རྫོགས་པར་བསྟན་པའོ། །དེ་ལྟར་རྩ་རྒྱུད་གཉིས་ཀྱི་ཆོས་ཐམས་ཅད་ངོ་བོ་ཉིད་དུ་དབྱེར་མེད་རོ་མཉམ་པར་བཤད་པ་ནི་མུ་ཏིག་ཕྲེང་བ་ལས། དེ་ཡང་རྒྱུད་ཀྱི་རིམ་པ་ནི། རྩ་བའི་རྒྱུད་ཆེན་རྣམ་གཉིས་ཀྱིས། །ཆོས་ཀུན་ངོ་བོ་གཅིག་པར་བཤད། །ཅེས་སོ། །གཉིས་པ་བཤད་པའི་རྒྱུད་མ་བུ་གཉིས་ཏེ་རིག་པ་རང་ཤར་ལེའུ་བརྒྱད་ཅུ་རྩ་དྲུག་པ་ལ་བརྟེན་ནས་ལྟ་སྒོམ་སྤྱོད་འབྲས་བཞིའི་བརྗོད་བྱ་ཁྱད་པར་དུ་གསལ་བ་དང་། རིག་པ་རང་གྲོལ་ལེའུ་དགུ་པ་ལ་བརྟེན་ནས་ས་གཅོད་ཀྱི་དམིགས་བསལ་བར་བྱེད་པ་སྟེ། དེ་ལྟར་བཤད་རྒྱུད་མ་བུ་གཉིས་ཀྱིས་ལྗོན་ཤིང་གི་ལོ་འདབ་རྒྱས་པ་ལྟར་བཤད་པ་ནི་སྔ་མ་ལས། བཤད་རྒྱུད་མ་བུ་རྣམ་གཉིས་ཀྱིས། །ལོ་འདབ་རྒྱས་པའི་ཚུལ་དུ་བཤད། །ཅེས་སོ། །གསུམ་པ་ཡན་ལག་གི་རྒྱུད་གཉིས་ཏེ་རིན་ཆེན་སྤུངས་པ་ལེའུ་ལྔ་པ་ལ་བརྟེན་ནས་ཡོན་ཏན་རང་རྫོགས་སུ་བསྟན་པ་དང་། སྐུ་གདུང་འབར་བ་ལེའུ་གསུམ་པ་ལ་བརྟེན་ནས་རྟགས་ཚད་ངེས་པར་བསྟན་པ་སྟེ། དེ་ལྟར་ཡན་ལག་གི་རྒྱུད་གཉིས་ཀྱིས་རྒྱ་མཚོ་ལ་གཟའ་སྐར་ཤར་བ་ལྟར་བཤད་པ་ནི། ཡན་ལག་རྒྱུད་ནི་རྣམ་གཉིས་ཀྱིས། །རྒྱ་མཚོར་གཟའ་སྐར་ཤར་བཞིན་བཤད། །ཅེས་སོ། །བཞི་པ་ལུང་རིག་གསལ་བའི་རྒྱུད་གཉིས་ཏེ་སྒྲ་ཐལ་འགྱུར་ལེའུ་དྲུག་པ་ལ་བརྟེན་ནས་སྡེ་སྣོད་ཐམས་ཅད་ཀྱི་རྩ་བར་བརྟན་པ་དང་། བཀྲ་ཤིས་མཛེས་ལྡན་ལེའུ་བདུན་པ་ལ་བརྟེན་ནས་འཁྲུལ་པའི་བཟློག་ཚུལ་ངོས་བཟུང་བ་སྟེ་གཉིས་པོས་མེ་ཏོག་ཁ་བྱེ་བ་ལྟར་བཤད་པ་སྟེ། ལུང་རིག་གསལ་བའི་རྒྱུད་གཉིས་ཀྱིས། །མེ་ཏོག་ཁ་ཕྱེའི་ཚུལ་དུ་བཤད། །ཅེས་སོ། །ལྔ་པ་མན་ངག་གི་རྒྱུད་བཞི་སྟེ་རྡོ་རྗེ་སེམས་དཔའ་སྙིང་གི་མེ་ལོང་ལེའུ་བརྒྱད་པ་ལ་བརྟེན་ནས་ངོ་སྤྲོད་པ་དང་། དབང་དང་དམ་ཚིག་ལ་སོགས་པ་བསྟན། ཀུན་ཏུ་བཟང་པོ་ཐུགས་ཀྱི་མེ་ལོང་ལེའུ་བདུན་པ་ལ་བརྟེན་ནས་གོལ་སྒྲིབ་ཤན་ཕྱེད་པར་བསྟན། ངོ་སྤྲོད་སྤྲས་པ་ལེའུ་གསུམ་པས་དཔེ་དོན་རྟགས་གསུམ་གྱི་ངེས་པ་བསྟན། མུ་ཏིག་ཕྲེང་བ་ལེའུ་བརྒྱད་པས་མན་ངག་གི་མཐའ་ཐ་དད་པ་ཁྲིགས་ཆགས་སུ་བསྟན་པ་སྟེ། དེ་ལྟར་མན་ངག་གི་རྒྱུད་ཆེན་བཞིས་འབྲས་བུ་སྨིན་པའི་ཚུལ་དུ་བཤད་པ་ནི། མན་ངག་རྒྱུད་སྡེ་བཞི་ཡིས་ནི། །འབྲས་བུ་སྨིན་པའི་ཚུལ་དུ་བཤད། །ཅེས་སོ། །དྲུག་པ་དགོངས་པ་རང་གནས་ཀྱི་རྒྱུད་གསུམ་སྟེ། ཀློང་དྲུག་པ་ལེའུ་དྲུག་པ་ལ་བརྟེན་ནས་རིགས་དྲུག་གི་སྐྱེ་གནས་དག་པར་བསྟན་པ་དང་། སྒྲོན་མ་འབར་བ་ལེའུ་བཞི་པ་ལ་བརྟེན་ནས་སྒྲོན་མ་བཞི་མངོན་སུམ་པར་བསྟན་པ་དང་། ཉི་ཟླ་ཁ་སྦྱོར་ལེའུ་བཞི་པ་ལ་བརྟེན་ནས་བར་དོ་བཞིའི་ཆོས་ཉིད་ལམ་འཁྱེར་བསྟན་པ་སྟེ། དེ་ལྟར་དགོངས་པ་རང་གནས་ཀྱི་རྒྱུད་གསུམ་གྱིས་མཐོང་བྱེད་མིག་གི་ཚུལ་དུ་བཤད་པ་ནི། དགོངས་པ་རང་གནས་རྒྱུད་གསུམ་གྱིས། །མཐོང་བྱེད་མིག་གི་ཚུལ་དུ་བཤད། །ཅེས་སོ། །བདུན་པ་འཇུག་པ་རང་གྲོལ་གྱི་རྒྱུད་གཉིས་ཏེ་སེང་གེ་རྩལ་རྫོགས་ལེའུ་བཅུ་གསུམ་པ་ལ་བརྟེན་ནས་ལྟ་བ་ཕྱོགས་ལྷུང་མེད་པར་སྟོན་པ་དང་། ནོར་བུ་ཕྲ་བཀོད་ལེའུ་བཅུ་བཞི་པ་ལ་བརྟེན་ནས་རྣལ་འབྱོར་པའི་ལམ་སྲོལ་དུ་འཇུག་པར་བསྟན་པ་སྟེ་གཉིས་པོས་དྲན་གཞི་སྙིང་གི་ཚུལ་དུ་བཤད་པ་ནི། འཇུག་པ་རང་གྲོལ་རྒྱུད་གཉིས་ཀྱིས། །དྲན་གཞི་སྙིང་གི་ཚུལ་དུ་བཤད། །ཅེས་སོ། བརྒྱད་པ་མཁས་པ་ཆོ་གའི་རྒྱུད་ནི་དཔལ་ནག་མོ་ཁྲོས་མའི་རྒྱུད་ལེའུ་བརྒྱ་རྩ་བརྒྱད་ལ་བརྟེན་ནས་བསྟན་པ་བསྲུང་བའི་ལས་རྒྱས་པར་བསྟན་པ་ནི་ཁྱི་བཟང་པོས་མེལ་ཚེ་བྱེད་པ་ལྟར་བཤད་དེ། མཁས་པ་ཆོ་གའི་རྒྱུད་ཀྱིས་ནི། །མེལ་ཚེ་བྱེད་པའི་ཁྱི་ལྟར་བཤད། །ཅེས་སོ། །དེ་ལྟར་རྒྱུད་སྡེ་བཅོ་བརྒྱད་པོ་སྡེ་ཚན་བརྒྱད་དུ་བསྡུས་པའི་འཐད་པ་ནི་དགོས་པའི་དབང་གི་ཡིན་ཏེ། དེའང་རྩ་བའི་རྒྱུད་གཉིས་མེད་ན། རྩ་བ་རུལ་བའི་སྡོང་པོ་ལ་ཡལ་ག་དང་ལོ་འབྲས་འབྱུང་མི་སྲིད་པའོ། །དེའི་ཕྱིར་ཟུག་པ་རྩ་བ་ལྟར་བཤད་པས་རྩ་བ་རིག་པར་འདུ་བ་ལ་དགོངས་སོ། །བཤད་རྒྱུད་མ་བུ་གཉིས་མེད་ན་ལོ་འདབས་མེད་པའི་མེ་ཏོག་འོང་མི་སྲིད་པ་དང་འདྲའོ། །དེའི་ཕྱིར་རྒྱས་པ་ལོ་འདབས་ལྟར་བཤད་པས་ཚིག་དོན་བསྒྲེ་བ་ལ་དགོངས་སོ། །ཡན་ལག་གི་རྒྱུད་གཉིས་མེད་ན་ལག་རྡུམ་བྲག་ལ་འཛེག་པ་དང་འདྲའོ། །དེའི་ཕྱིར་ཡན་ལག་ནི་འདྲིལ་བ་སྡོང་པོ་ལྟར་བཤད་པས་དབྱིངས་རིག་དབྱེར་མེད་ལ་དགོངས་སོ། །འཇུག་པ་རང་གྲོལ་གྱི་རྒྱུད་གཉིས་མེད་ན་སྙིང་མེད་པའི་མི་རོ་དང་འདྲའོ། །དེའི་ཕྱིར་དྲན་རིག་ལམ་དུ་སློང་བས་སྐྱེས་བུ་སྙིང་སྟོབས་དང་ལྡན་པ་ལྟར་བཤད་པས་སྒྲོན་མ་རང་ངོ་སྤྲད་པ་ལ་དགོངས་སོ། །ལུང་རིགས་གསལ་བའི་རྒྱུད་གཉིས་མེད་ན་མེ་ཏོག་མེད་པས་འབྲས་བུ་མི་འབྱུང་བ་དང་འདྲའོ། །དེའི་ཕྱིར་གསལ་བ་མེ་ཏོག་ལྟར་བཤད་པས་སྒྲོན་མའི་རང་ངོ་མངོན་སུམ་པར་འཛིན་པ་ལ་དགོངས་སོ། །མན་ངག་གི་རྒྱུད་བཞི་མེད་ན་འབྲས་བུ་མེད་པ་ལ་སོ་ནམ་བྱས་པ་དང་འདྲའོ། །དེའི་ཕྱིར་སྨིན་པ་འབྲས་བུ་ལྟར་བཤད་པས་སྐུ་གསུམ་ལམ་དུ་སློང་བ་ལ་དགོངས་སོ། །དགོངས་པ་རང་གནས་ཀྱི་རྒྱུད་གསུམ་མེད་ན་མིག་མེད་པས་ཁ་དོག་དབྱེ་མི་ཤེས་པ་ལྟ་བུའོ། །དེའི་ཕྱིར་གྲོལ་ལམ་མཐོང་བྱེད་ལྟར་བཤད་པས་འབྲས་བུ་མངོན་སུམ་ལམ་དུ་བྱེད་པ་ལ་དགོངས་སོ། །མཁས་པ་ཆོ་གའི་རྒྱུད་མེད་ན་མེལ་ཚེ་བྱེད་པའི་ཁྱི་མེད་པས་དགྲ་རྐུན་གྱིས་འཇབས་ནས་འོང་བ་དང་འདྲའོ། །དེའི་ཕྱིར་མན་ངག་རྫོགས་པར་བཤད་པས་བསྟན་པ་བསྲུང་བ་ལ་དགོངས་པའོ། །སྡེ་ཚན་བརྒྱད་པོ་དེ་དག་གི་དོན་གྱི་འབྲས་བུ་ནི། རྩ་བ་རིག་པ་ལ་འདུས་ལ། རིག་པའི་ཆོས་ཉིད་སྟོང་གསལ་ངོས་བཟུང་དང་བྲལ་བའོ། །དེས་ན་རྒྱུད་དེ་རང་རིག་ཏུ་བཟུང་བས་རིག་པའི་ཡེ་ཤེས་དང་ངོ་འཕྲད། །བཅངས་པས་ཏིང་ངེ་འཛིན་རང་ལ་གནས། བཀླགས་པས་བརྗོད་བྱའི་དོན་ཡིད་ལ་འཆར། བཤད་པས་མཆོག་ཐུན་གྱི་དངོས་གྲུབ་ཐོབ། བསྒོམས་པས་འཁོར་བ་དོང་ནས་སྤྲུགས། ཉན་པས་སྙིང་པོའི་དོན་ལ་རེག་པ་ནི་མུ་ཏིག་ཕྲེང་བ་ལས། དེ་ཡི་དོན་རྣམས་རྣམ་དབྱེ་བས། །ངོ་བོ་ཉིད་ཀྱང་མཐོང་བར་འགྱུར། །ཞེས་སོ། །དེ་ལྟར་གཏན་ལ་དབབ་པ་རྣམས་ལས་བློ་དམན་སྤྲོས་པས་འདུལ་བ་རྣམས་ལ་བཅོ་བརྒྱད་པོ་ཚང་བར་བསྟན་ལ། འབྲིང་པོ་རྣམས་ལ་སྡེ་ཚན་བརྒྱད་དུ་བསྡུས་པ་ལྟར་བསྟན་ཞིང་། རབ་སྤྲོས་པ་ཆུང་བ་རྣམས་ལ་ཐབས་ལས་ཕྱེ་བ་གཉིས། རང་བཞིན་ལས་ཕྱེ་བ་གསུམ་སྟེ་ལྔས་ཆོག་ལ། གང་ཞེ་ན་མཚོན་བྱ་ཐབས་ཀྱི་རྒྱུད་རང་རིག་འོད་གསལ་ཆེན་པོ་དང་། མཚོན་བྱེད་ཐབས་ཀྱི་རྒྱུད་ཁྲེགས་ཆོད་ཐོད་རྒལ་གྱི་ལམ་གཉིས། རང་བཞིན་ལས་ཕྱེ་བ་གཞིའི་རྒྱུད་རང་བྱུང་གི་ཡེ་ཤེས་སྙིང་པོའི་རྒྱུད་སྙིང་པོའི་རྒྱུད་སྙིང་གའི་འོད་གདངས། བཅུད་ཀྱི་རྒྱུད་སྙིང་པོའི་དོན་སྦྱོར་གསུམ་སྟེ་ལྔའོ། །ཡང་རབ་རྣམས་ལ་གཞི་རིག་པའི་གནས་ལུགས་ཀུན་ཁྱབ་དོན་གྱི་རྒྱུད་དང་། དེ་མཚོན་བྱེད་ཉམས་སུ་ལེན་ཐབས་ཚིག་གི་རྒྱུད་དེ་གཉིས་ཀྱི་སྒོ་ནས་བསྟན་ནོ། །ཤིན་ཏུ་ཡང་རབ་སྤྲོས་པ་དང་བྲལ་བ་རྣམས་ལ་རྒྱུད་བཅུ་བདུན་གྱིས་ཐ་སྙད་ཐམས་ཅད་རང་རིག་འོད་གསལ་བའི་དབྱིངས་གཞིའི་རྒྱུད་གཅིག་པོ་ལ་ཚང་བར་བསྟན་པས་འགྲུབ་སྟེ་ཐལ་འགྱུར་ལས། འདི་ལྟར་ཆོས་ཉིད་བརྗོད་མེད་ལས། །ཐ་དད་ཚིག་གི་གཞི་མར་ཤར། །ཚིག་བརྗོད་རིམ་པ་རྣམ་དག་པས། །ད་ལྟ་བརྗོད་མེད་ངང་ལ་རྫོགས། །ཞེས་སོ། །ཡང་ན་ཨ་ཏི་བཀོད་པ་ལས། དེ་ཡི་དོན་ཚིག་རྣམས་སྤྲོས་པས།སྤྲོས་བཅས་རྣམས་ལ་གཞི་སྙིང་དུའོ། །སྤྲོས་མེད་རྣམས་གྲངས་བཅུ་བདུན་ནོ། །ཤིན་ཏུ་སྤྲོས་པ་མེད་ཉིད་ན། །རྡོ་རྗེ་བཀོད་པ་ཉིད་ཡིན་ནོ། །རབ་ཏུ་སྤྲོས་དང་བྲལ་བ་ལ། །འདས་རྗེས་གསུམ་གྱིས་གྲོལ་བ་ཡིན། །ཞེས་པ་ལྟར་སྤྲོས་བཅས་རྣམས་ལ་གཞི་དང་སྙིང་པོའི་རྒྱུད་ཐིག་ལེའི་སྐོར་ཐམས་ཅད་དོ། །འབྲིང་ལ་བཅུ་བདུན་ནོ། །རབ་ལ་རང་བྱུང་ས་བོན་གྱི་རྒྱུད་དོ། །ཡང་རབ་ཐོད་རྒལ་བ་ལ་འདས་རྗེས་གསུམ་གྱིས་གྲོལ་བ་སྟེ་འཇམ་དཔལ་བཤེས་གཉེན་དང་ཤྲཱི་སིངྷ་ལ་སོགས་པ་བཞིན་ནོ། །བཞི་པ་དགོས་ཆེད་ནི་རིག་པ་རང་གྲོལ་ལས། དགོས་པའི་དོན་ནི་འདི་ལྟ་སྟེ། །རིག་པ་ཡེ་ཤེས་གཏན་ལ་ཕེབས། །དེ་ཡིས་དགོས་པ་བསྟན་པ་ལ། །རྒྱུད་ལུང་མན་ངག་ཐམས་ཅད་མཐུན། །འདི་ཡིས་ཡང་དག་གྲོལ་བའི་ཕྱིར། །དགོས་ཆེད་གཉིས་སུ་བསྟན་པའོ། །ཞེས་གསུངས་སོ། །དེ་ལྟར་རྣམ་ངེས་བཤད་པའི་རྒྱུད་བཅུ་བདུན་པོ་རྙིང་རྒྱུད་གླེགས་བམ་ད་་་འདི་ནི་གླེགས་བམ་སྔོན་བསྡུས་འཛོམ་ཆེ་བ་རྒྱུད་འབུམ་དཀར་ཆག་སྔ་འགྱུར་བསྟན་པ་མི་ནུབ་པའི་རྒྱལ་མཚན་ཞེས་བྱ་བའི་དབང་དུ་བྱས་ནས་པོད་འཚོལ་བདེ་ཕྱིར་བཀོད་ལ། པདྨ་འོད་གླིང་གི་རྒྱུད་འབུམ་ལ། ཅ་དང་ཆ་གཉིས་ལ་བཞུགས་པའོ།་་་ན་གཉིས་ལ་བཞུགས་ཤིང་འདི་དག་སློབ་དཔོན་ཆེན་པོ་བི་མ་ལ་དང་། ལོ་ཙཱ་བ་སྐ་ཅོག་རྣམ་གཉིས་ཀྱིས་བསྒྱུར་བ་ཡིན་ལ། གཞན་རྫོགས་པ་ཆེན་པོ་སྤྱིའི་རྒྱུད་དུ་གྲགས་པ་ནམ་མཁའ་ཆེ་ལ་སོགས་པ་སེམས་ཉིད་ཡེ་སངས་རྒྱས་པར་སྟོན་པའི་མཐའ་ཅན་རྒྱུད་སྡེ་ཉི་ཤུ་རྩ་ལྔ་ལ་སོགས་པ་རྣམས་རྒྱུད་འབུམ་གྱིས་སྟོད་ཆ་མ་ངེས་པར་བཞུགས་པ་ཡིན་ནོ། །ལྔ་པ་མ་བུ་ངེས་པའི་ཁ་བྱང་ནི། དེ་ལྟར་གསང་ཆེན་ངེས་པའི་རྒྱུད་བཅུ་བདུན་ཁྲོས་མ་དང་བཅས་རྣམ་གྲངས་བཅོ་བརྒྱད་པོ་གདོད་མའི་མགོན་པོ་དཔལ་ཀུན་ཏུ་བཟང་པོས་དགོངས་པ་བརྗོད་དུ་མེད་པའི་ཀློང་ནས་གསུངས་པའི་རྒྱུད་དངོས་ཡིན་ལ། དེ་རྩ་བའམ་མའི་ཚུལ་དུ་བཞག་ལ། རིག་འཛིན་སོ་སོས་མཛད་པའི་བཤད་ཏིག་རྒྱུད་དེ་དག་གི་བུར་བགྲངས་པས་མ་བུ་ངེས་པའི་ཁ་བྱང་དུ་གྲགས་པ་ནི། རིག་པ་རང་ཤར་ལ། བཤད་པའི་ཡང་ཏིག་ལ་སོགས་པའི་བུ་དྲུག །སྙིང་གི་མེ་ལོང་ལ། གཞུང་དོན་འགྲེལ་པ་ལ་སོགས་པའི་བུ་ཡིག་གསུམ། སེང་གེ་རྩལ་རྫོགས་ལ། བཤད་ཏིག་ཆེན་པོ་ལ་སོགས་པའི་བུ་ཡིག་དགུ། ཡི་གེ་མེད་པ་ལ། པདྨ་ཁ་འབྱེད་ལ་སོགས་པའི་བུ་ཡིག་བཞི། བཀྲ་ཤིས་མཛེས་ལྡན་ལ། འཁྲུལ་གསལ་མེ་ལོང་ལ་སོགས་པའི་བུ་ཡིག་བརྒྱད། སྒྲ་ཐལ་འགྱུར་ལ། འབྱུང་བཞིའི་གནད་ཡིག་ལ་སོགས་པའི་བུ་ཡིག་ལྔ། ཐུགས་ཀྱི་མེ་ལོང་ལ། ཐེག་པའི་རུ་ཤན་ལ་སོགས་པའི་བུ་ཡིག་ལྔ། སྒྲོན་མ་འབར་བ་ལ། སྒྲོན་མའི་ཁུངས་གཅོད་ལ་སོགས་པ་བུ་ཡིག་བཞི། ནོར་བུ་ཕྲ་བཀོད་ལ། ཕྲ་བཀོད་བཅུ་པ་ལ་སོགས་པའི་བུ་ཡིག་དྲུག །ཉི་ཟླ་ཁ་སྦྱོར་ལ། འོད་ཀྱི་ཚུལ་བཤད་ལ་སོགས་པའི་བུ་ཡིག་ལྔ། ངོ་སྤྲོད་སྤྲས་པ་ལ། ངོ་སྤྲོད་གསུམ་པ་ལ་སོགས་པའི་བུ་ཡིག་བཅུ་བཞི། མུ་ཏིག་ཕྲེང་བ་ལ། མུ་ཏིག་གསལ་བྱེད་ལ་སོགས་པའི་བུ་ཡིག་གསུམ། རིག་པ་རང་གྲོལ་ལ། ཡི་གེའི་སྦྱོར་བ་ལ་སོགས་པའི་བུ་ཡིག་གསུམ། རྫོགས་པ་རང་བྱུང་ལ། དབང་གི་རྩ་བ། དབང་གི་དག་བྱེད། འཁོར་ལོ་དྲུག་པ། དབང་གི་ལས་བྱང་། དབང་གི་ཕྲ་ཏིག །དབང་བཀོད་ཆེན་པོ། །སྤྲོས་མེད་གོ་ཆ། དབང་གི་ལྡེ་མིག །དབང་གི་པྲ་ཁྲིད། དོན་བསྡུས་གསལ་བྱེད། གསང་བའི་རྒྱབ་ཡིག་སྟེ་བུ་ཡིག་བཅུ་གཅིག །ཀློང་དྲུག་པ་ལ་ཀློང་ཆེན་དྲུག་པ་ལ་སོགས་པའི་བུ་ཡིག་གསུམ། སྐུ་གདུང་འབར་བ་ལ། པདྨ་ཀློང་ཡངས་ལ་སོགས་ཏེ་བུ་ཡིག་དྲུག །རིན་ཆེན་སྤུངས་པ་ལ། ཤེས་རབ་འཁོར་ལོ་ལ་སོགས་པ་བུ་ཡིག་ལྔ། །ནག་མོ་ཁྲོས་མ་ལ། ཐུན་དྲུག་དྲིལ་བ་ལ་སོགས་ཏེ་བུ་ཡིག་བཅུ་གཉིས་རྣམས་ཏེ་དེ་ལས་རྒྱུད་བཅུ་བདུན་གྱི་དབང་ལུང་འཆད་ཉན་མ་ནུབ་ཙམ་འདུག་པས། རྫོགས་པ་རང་བྱུང་གི་བུ་ཡིག་རྣམས་དབང་གི་ཆ་ལག་ཚང་མིན་བརྟག་སླ་བའི་ཕྱིར་བཀོད་ལ། གཞན་རྣམས་ནི་ཀུན་མཁྱེན་ཆེན་པོའི་གྲུབ་མཐའ་རིན་པོ་ཆེའི་མཛོད་ལ་ཁ་བྱང་ཤིན་ཏུ་གསལ་བས་མ་བཀོད་དོ། །དེ་ལྟར་ཡང་འདིར་མིང་ཙམ་བཀོད་པས་ཀྱང་དོགས་པ་བསླང་བའི་རྒྱུར་སྲིད་དེ། དེང་སང་གི་དུས་བསྟན་པ་འདི་ཉག་ཕྲ་ཞིང་རྫོགས་ཆེན་པར་རློམ་པ་རྣམས་ནི་བེ་བུམ་ལག་མཐིལ་ཙམ་གྱིས་གློ་བ་ཁེངས་ནས་འདི་དག་གི་དགོས་གཞི་ཙམ་ཡང་མེད་པའི་ཕྱིར་རོ། །གསུམ་པ་ནི། དེ་ལྟར་རིག་པ་རང་སྣང་གི་བློ་ཅན་གྱི་དོན་དུ་རྒྱུད་ཀྱི་མཚན་དོན་ལ་སོགས་པའི་གནས་ངེས་པ་གཏན་ལ་ཕབ་ནས། ད་ནི་དམིགས་པ་ཡུལ་གྱི་བློ་ཅན་གྱི་དོན་དུ་རྒྱུད་ཀྱི་གཞུང་དོན་མན་ངག་ལྟར་ཕྱེ་བ་འོད་གསལ་རྡོ་རྗེ་སྙིང་པོ་བླ་ན་མེད་པའི་ཐེག་པ་བྱེ་བྲག་ཏུ་བཤད་པ་ལ་སྤྱི་དོན་ལ་རྣམ་པ་གཉིས། འོག་མ་རྣམས་ལས་ཁྱད་དུ་འཕགས་ཚུལ་དང་། གསང་བ་ཆེན་པོ་དངོས་བཤད་པའོ། །དང་པོ་ནི། རིམ་པ་འོག་མ་ཐམས་ཅད་ཀྱི་ཡིད་དཔྱོད་ཚིག་གི་ལྟ་བ་ལ་གདེང་བཅས་ཏེ། འབད་རྩོལ་དང་བཅས་བསྒྲུབས་ནའང་རང་བྱུང་གི་ཡེ་ཤེས་ལ་བྱ་རྩོལ་དང་བླང་དོར་གྱི་ཆོས་མེད་པས་རྫས་འགལ་ཏེ། བསྐལ་པའམ་ཚེ་རབས་སམ། ཚེ་གཅིག་གམ། བར་མ་དོར་གྲོལ་དུ་རེ་བའི་བྱང་ཆུབ་དུས་ཅན་དུ་སེམས་པ་ལས་མེད་ལ། ཐིག་ལེ་སྐོར་གསུམ་གྱིས་ཀྱང་རང་བྱུང་གི་ཡེ་ཤེས་ལ་དངོས་སུ་བལྟར་མེད་པས་ནོར་ས་དང་འཛོལ་ས་མང་བས་ཆོས་ཉིད་ཇི་བཞིན་པ་མི་མཐོང་བ་ནི། མན་ངག་གི་ཡི་གེ་གཡུ་ཡི་ཅན་ལས། ཨེ་མ་ཧོ། རིགས་ཀྱི་བུ་ཡང་གབ་སྦས་པའི་སྙིང་ཏིག་འདིའི་ཚད་ལ་མ་བརྟེན་པར། ཕྱི་ནང་གསང་གསུམ་གྱི་ངོ་སྤྲོད་ལ་ཡིད་ཆེས་པར་བྱེད་པའི་གང་ཟག་ནི། རྒྱུ་ཁ་བའི་ས་བོན་ལ་འབྲས་བུ་མངར་བ་འདོད་པ་དང་འདྲའོ། །ཞེས་པ་དང་། ཨེ་མ་ཧོ། །རིགས་ཀྱི་བུ་གསང་བ་ཡང་གསང་སྙིང་ཏིག་གི་དོན་མ་མཐོང་བར་ཕྱི་ནང་གསང་བའི་བར་དོ་བཞི་ལ། ཕུགས་གཏོད་པ་ནི་ནམ་མཁའི་སྤྲིན་ལ་འཛོལ་འཛུགས་པ་དང་འདྲའོ། །ཞེས་སོ། །དེའི་ཕྱིར་སངས་རྒྱས་ཀྱི་དགོངས་པ་ཆིག་ཆོད་ཡེ་གྲོལ་ཆེན་པོ་གོལ་འཕྱུགས་མེད་པར་སྟོན་པའི་ལམ་འདིས་རང་བྱུང་གི་ཡེ་ཤེས་ཚིག་དང་ཡི་གེ་རྟོག་བསམ་འཕྲོ་འདུ་མི་རྟོག་པའི་ཏིང་ངེ་འཛིན་སོགས་བློས་བྱས་ཀྱི་ཆོས་གང་ལའང་མ་ལྟོས་པར། སྤྲོས་བྲལ་གྱི་གནས་ལུགས་ནང་དུ་ཤར་བའི་གདངས་རང་བཞིན་ལྷུན་གྲུབ་ཀྱི་སྣང་ཆ་དབང་པོའི་མངོན་སུམ་དུ་བལྟར་ཡོད་པས། དབང་པོ་རྣོ་རྟུལ་ལ་མ་ལྟོས་པར་སྐུ་གསུམ་ལྷུན་གྲུབ་ཆེན་པོའི་ཞིང་ལ་ཚེ་འདིར་མངོན་སུམ་ལམ་སྣང་གི་ཚུལ་དུ་སྤྱོད་པར་ནུས་པ་ནི་གསང་བ་སྒྲ་རྒྱུད་ལས། དངོས་གྲུབ་མཆོག་རྣམས་མཐར་ཐུག་པ། །འབད་ཅིང་རྩོལ་བས་མ་ཡིན་པར། །གང་དུ་ཕྲད་པས་གྲོལ་བར་ངེས། །དེས་ན་རྫོགས་ཆེན་བྱ་བ་བྲལ། །གཞན་འབད་པ་ལས་བྱུང་བ་མིན། །ཆོས་ཉིད་མངོན་སུམ་ཁྱད་པར་གྱིས། །དབང་པོ་རྣོ་དང་རྟུལ་མེད་པས། སེམས་ཅན་ཐམས་ཅད་སངས་རྒྱས་ལས། །གཞན་དུ་གནས་པ་མ་ཡིན་ནོ། །ཞེས་སོ། །དེས་ན་གནས་ལུགས་ཀློང་དུ་གྱུར་པ་ལ་ནི་སྨོས་ཀྱི་མ་འཚལ་ལ། ཟབ་མོ་འདིའི་སྒོ་ནས་དབང་ནོད་པ་དང་། ངོ་སྤྲོད་ཐོབ་པ་དག་ཀྱང་ཆོས་ཉིད་བདེན་པའི་བྱིན་རླབས་ཀྱིས་རང་བཞིན་སྤྲུལ་པར་དབུགས་འབྱིན་ལ། ཅུང་ཟད་ཉམས་སུ་བླངས་པ་གང་ཞིག་གདམས་པའི་རྩལ་མ་རྫོགས་པར་ཚེའི་དུས་བྱས་ཀྱང་བར་དོའི་གྲོལ་ཚད་ས་གཡོ་བ་དང་། གཞའ་ཚོན་གྱི་རྣམ་པ་དང་། རུས་པ་དག་ལས་སྐུ་དང་། ཡིག་འབྲུ་དང་། གདུང་དང་རིང་བསྲེལ་འབྱུང་བ་ཀུན་གྱིས་མཐུན་སྣང་གྲུབ་པའི་ཕྱིར་རོ། །ཁ་ཅིག་རིང་བསྲེལ་ལ་འཐད་པ་བྲལ་བའི་ངེས་པ་སྨྲ་ཞིང་། ཟབ་མོའི་རྒྱུད་ལ་སྐུར་བ་འདེབས་པ་ཡང་ཤིན་ཏུ་མི་རིགས་ཏེ། །དེ་ལྟ་ན་ཤཱཀྱ་ཐུབ་པ་ལ་སོགས་པའི་སངས་རྒྱས་རྣམས་ཀྱི་རིང་བསྲེལ་ཡང་མ་ཡིན་པར་འགྱུར་རོ། །ཁ་ཅིག་མདོ་སྡེ་གསེར་འོད་དམ་པ་ནས་བཤད་པ་ལྟར་བྱུང་བའི་སྡིག་ཅན་དམྱལ་བར་ལྟུང་བའི་རིང་བསྲེལ་ལའང་ངོ་མཚར་བྱེད་དེ། དེ་ཡང་མི་ཤེས་རྨོངས་པའི་ཕྱོགས་སུ་ལྷུང་བའི་ཕྱིར་རོ། །འོ་ན་ངེས་པ་ཅན་དེ་གང་ཞེ་ན། འདིར་ཀུན་མཁྱེན་གྱིས། དེའང་སྙིང་ཏིག་སྒོམ་པའི་སྐལ་ལྡན་ལ་བྱུང་ན་དེ་ཡིན་ལ། གཞན་ཀུན་ལ་མ་ངེས་ཏེ། ལ་ལ་མཐོ་རིས་སུ་སྐྱེ། ལ་ལ་ངན་སོང་དུ་སྐྱེ་བ་ལ་སོགས་པ་སྟེ། འགྲོ་བ་ཕལ་བ་དང་། བྱ་དང་ཁྱི་ལ་སོགས་པ་དང་། སྡིག་ཅན་དང་། དགེ་བའི་བཤེས་གཉེན་ཡིད་དཔྱོད་མཁན་རྣམས་ལའང་འབྱུང་བའི་ཕྱིར་རོ། །གདུང་ནི་འབྱུང་བའི་གནོད་པས་མི་འཇིག་པས་ལྕགས་ཀྱི་གཏུན་དུ་ཐོ་བས་བརྡུངས་ཀྱང་མི་འཇིག་ལ། རིང་བསྲེལ་ནི་འཇིག་སྟེ་བསྲེགས་ཐལ་ནའང་འཚིག་པས་རིང་བསྲེལ་མི་འབྱུང་བ་ཡིན་ལ། རིང་བསྲེལ་རེ་བའི་རོ་བསྲེག་དུས་ཧ་ཅང་མ་ཚིག་པ་གལ་ཆེའོ། །ཞེས་དང་། དེ་བཞིན་དུ་རྟགས་ཚད་རིམ་པ་གཞན་ལའང་། འདི་དག་ནི་སྤྱིའི་རྣམ་པར་གཞག་པ་སྟེ། དམིགས་ཀྱིས་བསལ་ན། ངན་པོ་རླུང་དང་། སེར་བ་ལ་སོགས་པ་མི་མ་ཡིན་ཁྲོས་པས་བཏང་བའམ། སྐྱེ་བོ་གཞན་སྡིག་པ་ཅན་ཤི་བའི་རྟགས་ཡིན་པ་ཡང་སྲིད་ལ། བཟང་པོ་འཇའ་འོད་དང་གནམ་དངས་པ་ལ་སོགས་པ་སྐྱེས་བུ་དམ་པ་གཞན་དག་ས་འཕར་བ་དང་། ཏིང་ངེ་འཛིན་ཐོབ་པ་དང་། ཚེ་འཕོས་པ་ལ་སོགས་པའི་ཡིན་ཡང་སྲིད་པས། འདིར་ཁོ་རང་གི་བློ་ལ་རྟགས་དེ་འབྱུང་བའི་ནུས་པ་ཅན། གསོན་དུས་སེམས་དང་ཀུན་སྤྱོད་བཟང་བ་ཞིག་ལ་ཤི་དུས་རྟགས་བཟང་པོ་དེ་རིགས་ལ། གསོན་དུས་ངན་པོ་ལ་རྟགས་བཟང་ཡང་གཞན་གྱི་རྟགས་ཡིན་ཏེ། འཇིག་རྟེན་ན་འཇའ་དོན་གཉེར་བ་དང་ཕྲད་པ་ཞེས་བྱའི། ཁོའི་རྟགས་ལས་ངན་པ་དེ་འབྱུང་བར་རིག་སྟེ་ཕྱི་ནང་རྟེན་འབྲེལ་གཅིག་ཡིན་པའི་ཕྱིར་རོ། །འདིར་དམིགས་བསལ་མ་ཤེས་ན་སྐྱེས་བུ་དམ་པ་ལ་རྟགས་ངན་པ་དང་འདོམ་པ་སྲིད་པས་སྐུར་པ་འདེབས་སུ་འོང་ལ། སྡིག་ཅན་ལ་རྟགས་བཟང་པོ་འཇའ་དོན་གཉེར་བ་དང་ཐུག་པས་རྗེས་སུ་ཡི་རང་སྐྱེས་ནས་ཁོའི་རྗེས་སུ་ཡི་རང་སྐྱེས་ནས་ཁོའི་རྗེས་སུ་སློབ་པ་འབྱུང་སྲིད་པས་དེ་དག་ལྡོག་པའི་ཕྱིར་བཤད་དོ། །ཞེས་སོ། །དེང་སང་གནད་འདི་ཕྱེད་པ་ཤིན་ཏུ་ཉུང་བས་མི་དཔོན་སྡིག་ཏོ་ཅན་ལ་སོགས་འཇིག་རྟེན་ན་དབང་ཐང་ཆེ་ཚད་ཤི་བ་ལ་རིང་བསྲེལ་བྱུང་བའི་ལོ་རྒྱུས་དང་། འབྱུང་དུ་རེ་བ་མང་པོ་འདུག་པ་གནད་འདི་ལྟ་བུའང་ཁོང་དུ་ཆུད་པར་བྱ་སྟེ། གཞན་ཡང་རྔོན་པ་ཤིན་ཏུ་མི་བཟད་པ་རྒན་པོ་དག་གིས་འཆི་ཁར་སྙིང་རུས་ཀྱིས་ལུས་གནད་བསྲངས་པ་དབུགས་ཐལ་བ་དང་རོ་རེངས་ནས་ཕུང་པོ་སྐྱིལ་མོ་ཀྲུང་བཅས་པ་ལ་ངོ་མཚར་བྱེད་པ་ལྟར་གྱི་ལོ་རྒྱུས་མང་དག་སྲིད་དེ། དེའི་ཕྱིར་གང་ཟག་ཐོས་པ་མང་ཞིང་གཟུ་བོར་གནས་པ་དག་གིས་མཐའ་གཉིས་སུ་མ་ལྷུང་བར་དཔྱད་པར་བྱ་བའོ། །ཞེས་ཞར་ལ་དོགས་པ་བསལ་ལོ། །གཉིས་པ་གསང་བ་བླ་ན་མེད་པ་བཤད་པ་ལ་གཉིས། དའི་རང་བཞིན་སྤྱིར་བསྟན་པ་དང་། ཡང་ཟབ་མན་ངག་གི་ངེས་འབྱེད་བྱེ་བྲག་ཏུ་བསྟན་པའོ། །དང་པོ་ལ་ལྔ་སྟེ། རང་གཞན་གཞིའི་གནས་ལུགས། །དེ་ལས་སེམས་ཅན་གྱིས་འཁྲུལ་ལུགས། དེའི་ཚེ་འོད་གསལ་གྱི་གནས་ལུགས། དེ་ལྟར་གནས་པ་ལམ་གྱི་སྒོ་ནས་ཉམས་སུ་བླང་ལུགས། །དེ་ཉིད་མཐར་ཕྱིན་པ་འབྲས་བུའི་རྣམ་གཞག་གོ །དང་པོ་ནི། བཀྲ་ཤིས་མཛེས་ལྡན་ཆེན་པོའི་རྒྱུད་ལས། རྟོགས་པའི་སངས་རྒྱས་མ་བྱུང་། མ་རྟོགས་པའི་སེམས་ཅན་མ་བྱུང་བའི་སྔ་རོལ་ན། རིག་པ་རང་བྱུང་གི་ཡེ་ཤེས་གཞི་ལས་མ་གཡོས་ཏེ། རྐྱེན་མེད་པའི་སྣང་བ་གསུམ་དང་ཐབས་གཅིག་ཏུ་བཞུགས་སོ། །དེ་ནས་ཡང་རང་རིག་པའི་ཡེ་ཤེས་ཉིད་ཀྱིས་རང་གི་འདུག་ཚུལ་གྱི་གནས་ལུགས་འདི་གསུངས་སོ། །ཀྱེ་སྣང་བ་ཆེན་པོ་ཡངས་པའི་ཀློང་འདི་ནི་མ་གཡོས་པའི་ཆོས་ཀྱི་སྐུ་ཆེན་པོ་ལས། མ་འཁྲུལ་པའི་སངས་རྒྱས་ཆེན་པོར་བཞུགས་སོ། །ངོ་བོའི་སྐུ་མ་འགགས་པར་གནས་ཏེ། ངོ་བོ་མི་འགྱུར། ཐབས་གསལ་བ། མ་གཡོས། མི་གཡོ། མ་བསྐྱོད་པ། སྣང་བ་ཐམས་ཅད་དུས་གཅིག་ལ་རྫོགས་པ། ཡེ་ཤེས་ཐམས་ཅད་སྐད་ཅིག་ལ་རྫོགས་པ། སྐུ་ཐམས་ཅད་སྨིན་པར་གནས་པ། འོད་ཀྱི་སྣང་བ་ཐམས་ཅད་མ་བསྒྲིབས་པར་གསལ་བ། གནས་ལུགས་ཀྱི་སྣང་བ་ལ། སྣང་ཐབས་ཀྱིས་མ་བསྒྲིབས་པ། ངོ་བོ་རང་བཞིན་ཐུགས་རྗེ་གསུམ་རྒྱ་མ་ཆད་པར་ཡོངས་སུ་རྫོགས་པ་ཆེན་པོའོ། །ངོ་བོའི་གནས་ལུགས་དེ་ཡང་སྐུ་ལྟར་གནས་ལ། ཁ་མིག་རྣ་བར་དོད་པ་ནི་ཅང་མི་བཞུགས། སྟོང་པ་ལྟར་གནས་པ་ལ། བེམ་སྟོང་ལྟར་ཅང་མི་བཞུགས། འོད་ལྔ་ལྟར་སྣང་བ་ཆེན་པོ་ལ། ཁ་དོག་ཏུ་ཕྱེ་བ་ནི་ཅང་མི་བཞུགས། རྒྱ་མ་ཆད་པར་སྣང་བ་ལ། འབྲེལ་བ་ལྟར་ཅང་མི་བཞུགས། མཐའ་དབུས་མེད་པ་ལྟར་དམིགས་ལ། ཕྱོགས་སུ་དམིགས་པ་ནི་ཅང་མི་བཞུགས། ཆ་ཡིས་མ་གོས་པ་ལྟར་སྣང་བ་ལ། རིས་སུ་ཕྱེ་བ་ནི་ཅང་མི་བཞུགས་རྒྱ་མ་འགགས་པ་ལྟར་སྣང་བ་ལས་རིས་མི་འཛིན་པ། སེར་པོ་ལྟར་སྣང་བ་ལ་ཡོན་ཏན་རྫོགས་པ། དམར་པོ་ལྟར་སྣང་བ་ལ་གོ་མ་འགགས་པ། ལྗང་གུ་ལྟར་སྣང་བ་ལ་ཡོན་ཏན་རྫོགས་པ། སྣ་ལྔ་ཉིད་དུ་གནས་པ་ལ་ཁ་དོག་མ་འཛིན་པ་ཆེན་པོ། །ཟླུམ་པ་ལ་དབྱིབས་མེད་པ། མ་འགགས་པ་ལ་རྐྱེན་མེད་པ། ཁྱབ་པ་མེད་པ་ལ་རང་གདངས་ཆེན་པོ། རང་གསལ་བ་ལ་ཕྱི་ནང་དང་བཅས་པ། རྩོལ་བསྒྲུབ་མེད་པ་ལ་བབས་ཀྱིས་གྲུབ་པའོ། །ཐུགས་རྗེའི་སྣང་བ་ནི། སྟོང་པ་ལྟར་སྣང་བ་ལ་གསལ་བ་མ་འགགས་པ། སྤྲོས་པ་མེད་པ་ལ་སྤྲོས་པ་ཆེན་པོ། རང་བཞིན་མ་འགགས་པ་ལ་སྣ་ཚོགས་མ་ངེས་པ་ཆེན་པོ་གསལ་བ་ལ་མུན་པ་མེད་པ། མ་འགགས་པས་མེད་པ་ཆེན་པོ། བབས་ཀྱིས་སྟོང་པ་ལ་ཀུན་ཏུ་འཆར་བ་ཆེན་པོ། མ་འདྲེས་པ་ལ་ཡོངས་སུ་སྣང་བ་ཆེན་པོ། ཀུན་ལ་ཁྱབ་པ་ལ་གཅིག་ཏུ་འདུས་པ་ཆེན་པོ། དག་པ་ལ་འཁྲུལ་པ་མ་འགགས་པ་ཆེན་པོ། རྫོགས་པ་ལ་གཅིག་ཏུ་སྣང་བ་ཆེན་པོ། ཐུགས་རྗེ་གོ་མ་འགགས་པར་བཞུགས་སོ། །ཞེས་བཤད་པ་ལྟར། ཐོག་མ་གཞིའི་གནས་ལུགས་རྒྱ་ཆད་དང་ཕྱོགས་ལྷུང་མེད་པ། དངོས་པོ་དང་ཁ་དོག་ཏུ་མ་གྲུབ། བྱད་དང་དབྱིབས་སུ་མ་ཡིན་པའི་ངོ་བོ་སྟོང་པ་ཆོས་ཀྱི་སྐུ། ཡེ་གདངས་ཀྱི་རང་འོད་མ་འགགས་པ། རང་བཞིན་གསལ་བ་ལོངས་སྐུའི་ཆ་ལ་སྣང་བ་ཐམས་ཅད་ཀྱི་འཆར་གཞིར་གནས་ཀྱང་། རང་ངོ་ཕྱིར་གསལ་གྱི་མཚན་མ་ལས་འདས་པ། ཐུགས་རྗེ་ཁྱབ་པ་སྤྲུལ་པའི་སྐུ་ལ་ཐ་སྙད་དང་ངོས་བཟུང་བྲལ་ཞིང་འཁོར་འདས་གང་ཡང་མ་ཡིན་པའི་བདག་ཉིད་ཅན་དུ་བཞུགས་པ་སྟེ། མདོ་སྡེ་ལས་ཀྱང་། ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །འདི་ཡོད་པས་ནི་འགྲོ་བ་ཀུན། །མྱ་ངན་འདས་པ་ཐོབ་པ་ཡིན། །ཞེས་སོ། །དེ་ལྟར་ན་གྲོལ་འཁྲུལ་གཉིས་ཀའི་གཞི་མ་ཡིན་པར་དྲི་མ་མཐའ་དག་སྤངས་པའི་དབྱིངས་སམ་ཞེ་ན་མ་ཡིན་ཏེ། གོ་འབྱེད་པའི་ཆ་ནས་དབྱིངས་དང་། ངོ་བོ་དང་། མ་འཁྲུལ་པའི་ཐ་སྙད་བརྡར་བརྟགས་ཏེ། རྒྱུད་སྔ་མ་ལས། དེ་ནི་འཁོར་བ་མིན་ནོ། །མྱ་ངན་ལས་འདས་པ་མ་ཡིན་ནོ། །གཞི་མིན་ནོ། །སྣང་བ་མིན་ནོ། །མུན་པ་མིན་ནོ། །ལམ་མ་ཡིན་ནོ། །བསྒྲོད་པ་མེད་དོ། །མི་བསྒྲོད་པ་མ་ཡིན་ནོ། །འབྲས་བུ་མ་ཡིན་ནོ། །སྤངས་པ་མ་ཡིན་ནོ། །ཐོབ་པ་མ་ཡིན་ནོ། །དེ་ནི་རིག་པའི་དབྱིངས་ཆེན་མོ་ཞེས་བྱའོ། །ཞེས་བཤད་ལ། དབྱེ་ན་ངོ་བོ་རང་བཞིན་གཉིས་ཀྱི་སྟོང་ཆ་དང་། སྣང་ཆའི་ལྡོག་ཆས་རྒྱས་པར་ཕྱེ་བའི་རྣམ་གཞག་ཡོད་དེ་འདིར་དེ་ཙམ་མོ། །གཉིས་པ་སེམས་ཅན་གྱི་འཁྲུལ་ཚུལ་ནི། གཞི་དེའི་ངོ་བོ་མི་འགྱུར་བ་ལས་རང་བཞིན་མ་འགགས་པའི་རྩལ་དུ་ཤར་བ་གཞི་སྣང་ལྷུན་གྲུབ་ཆེན་པོའི་སྣང་བ་ལས་ཀུན་ཏུ་བཟང་པོས་རང་སྣང་དུ་ཤེས་ནས། སྐད་ཅིག་ལ་ལུང་མ་བསྟན་གྱི་མ་རིག་པའི་ས་བོན་དྲུངས་ནས་ཕྱུང་སྟེ། གཞི་ཐོག་མ་ཡིན་པས་ཐོག་མའི་གྲོལ་ས་ཆེན་པོ་ཞེས་དབྱིངས་ཀྱི་ཡོན་ཏན་མཐར་ཕྱིན་པའི་ཆོས་དྲུག་གིས་ཁྱད་ཆོས་ཅན་དྲི་མ་མཐའ་དག་སྤངས་པའི་མཐར་ཕྱིན་ལྷུན་གྲུབ་ཀྱི་ས་ལ་གྲོལ་བ་སྟེ། སྒྱུ་འཕྲུལ་ལས། སྐད་ཅིག་གཅིག་གིས་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱས། །ཞེས་སོ། །ཕལ་གྱིས་གྲོལ་ས་འདི་ཤེས་པ་མ་བྱུང་སྟེ་གཞི་ཐོག་ཁོ་ནར་འདོད་པས་དེ་ལྟ་ན་གཞི་དྲི་མ་ཅན་ལྡོག་པའི་གནས་མ་སྤངས། སླར་ཡང་གྲོལ་ཟིན་ལྡོག་པ་ལས་མ་འདས་སོ། །དེས་ན་གདོད་མའི་མགོན་པོ་ཀློང་ཆེན་པའི་མན་ངག་འདི་གཅིག་པུའང་བསམ་གྱིས་མི་ཁྱབ་བོ། །དེའང་རང་བྱུང་གི་ཡེ་ཤེས་ལ་དྲི་མ་དང་བཅས་དུས་གཞི། དྲི་མ་སྦྱོང་དུས་ལམ། དྲི་མ་མཐའ་དག་བྲལ་དུས་འབྲས་བུའི་གྲོལ་ས་ཡིན་ཏེ་ཕྱོགས་ག་ཤེད་ན་ཡོད་པར་མི་བལྟའོ། །དེ་ལྟ་བུའི་གཞི་སྣང་གི་རྩལ་དུ་ཤར་བ་དེ་ཁམས་གསུམ་སེམས་ཅན་གྱི་རང་སྣང་དུ་མ་ཤེས་པར་རྣམ་རྟོག་རང་ཚན་པར་གོལ་བས་འཁྲུལ་པ་སྟེ། བཀྲ་ཤིས་མཛེས་ལྡན་ལས། ཀྱེ་མ་ང་ལ་འཁྲུལ་པ་མེད་ཀྱང་ངའི་རྩལ་ལས་འཁྲུལ་པ་བྱུང་སྟེ། གཞི་མི་འགྱུར་བ་ལས། རང་བཞིན་མ་འགགས་པར་ཤར་ནས། ཐུགས་རྗེས་མ་ངེས་པ་ལས་མ་རིག་པ་རང་བྱུང་སྟེ། དཔེར་ན་ནམ་མཁའ་ལ་སྤྲིན་ཡང་དག་པར་ཡོད་པ་མ་ཡིན་ཏེ། གློ་བུར་དུ་སྤྲིན་བྱུང་བ་དང་འདྲ་བར། གཞི་ལ་མ་རིག་པ་ཡོད་པ་ཅང་མ་ཡིན་ཏེ། ཐུགས་རྗེ་ལྟར་ཤར་བ་ལས་མ་རིག་པ་བྱུང་སྟེ། གཞི་ལྷུན་གྲུབ་ཀྱི་གནས་ལུགས་ཞེས་བྱ་བ་ཆགས་སོ། །ཞེས་དང་། གསང་བའི་སྙིང་པོ་ལས། ཨེ་མ་ཧོ། བདེ་གཤེགས་སྙིང་པོ་ལས། རང་རང་རྣམ་རྟོག་ལས་ཀྱིས་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོ་སོར་འཛིན། །ཞེས་གསུངས་པ་ལྟར་གནས་ལུགས་དེ་ལྟ་བུ་མ་ཤེས་པས་འགྲོ་བ་སོ་སོའི་ཁམས་གསུམ་ལས་དབང་གིས་འཁྲུལ་ཏེ། བདེ་སྡུག་སྣ་ཚོགས་ལ་སྤྱོད་པ་འདི་ལྟ་བུའོ། །གསུམ་པ་ནི། དེ་ལྟར་འགྲོ་བ་དྲུག་གི་རྣམ་པར་འཁྲུལ་དུས། སེམས་ཅན་རྣམས་ལ་སྐུ་གསུང་ཐུགས་ཀྱི་ཡེ་ཤེས་མི་སྣང་བ་ནི་སྐུ་ལ་ལུས་ཀྱིས་བསྒྲིབས། གསུང་ལ་ངག་གིས་བསྒྲིབས། ཐུགས་ལ་ཡིད་ཀྱིས་བསྒྲིབས་པས་ཐ་མལ་དུ་གོལ་བ་ལས། མེད་པ་མ་ཡིན་ཏེ། ལུས་ལ་རྩ་བརྟེན། རྩ་ལ་རླུང་དང་ཁམས་བྱང་ཆུབ་ཀྱི་སེམས་བརྟེན། དེའི་དྭངས་མ་འཁོར་ལོ་བཞིའི་དབུས་ལས། རྟེན་སྙིང་ག་ཆོས་ཀྱི་ཕོ་བྲང་རང་བྱུང་ཡེ་ཤེས་ཀྱི་གཞལ་མེད་ཁང་ན། བརྟེན་པ་དོན་དམ་བྱང་ཆུབ་ཀྱི་སེམས་གནས་ལུགས་འོད་གསལ་བའི་ངོ་བོ་འཁོར་ཡེ་ཤེས་རྒྱ་མཚོའི་ཚོགས་དང་བཅས་པ་ཡོད་དེ། རྡོ་རྗེ་སེམས་དཔའ་སྙིང་གི་མེ་ལོང་ལས། འཇིག་རྟེན་ཁམས་ཀྱི་སེམས་ཅན་ཐམས་ཅད་ལ། དེ་བཞིན་གཤེགས་པའི་སྙིང་པོ་ཏིལ་འབྲུ་ལ་མར་གྱིས་ཁྱབ་པ་བཞིན་གནས་སོ། །ཞེས་དང་། ཕྲ་བཀོད་ལས། རང་བྱུང་ཡེ་ཤེས་ཆེན་པོ་ནི། །ཙིཏྟ་རིན་ཆེན་གཞལ་ཡས་ན། །ཞེས་སོ། །དེ་ལ་རྟེན་ལུས་ཀྱི་གྲུབ་ཚུལ་ནི། སྤྱིར་ཁམས་གསུམ་རིགས་དྲུག་གི་སེམས་ཅན་སོ་སོ་ལ་ལུས་ཀྱི་སྣང་ཚུལ་རེ་ཡོད་པ་ལས། སྐབས་འདིར་མི་རྣམས་ཀྱི་དབང་དུ་བྱས་ཏེ། སྐྱེ་གནས་རྣམ་པ་བཞི་ལས་མངལ་ནས་བཙའ་བའི་རིམ་པ་དང་སྦྱར་ནས་འཆད་པ་ནི། དང་པོར་སྐྱེད་བྱེད་ཕ་མའི་རྒྱུ་ཀུན་རྫོབ་ཀྱི་ཐིག་ལེ་དཀར་དམར་འདྲེས་པ་ལ་རླུང་སེམས་དབྱེར་མེད་དུ་གྱུར་པའི་ཐིག་ལེ་ཤིན་ཏུ་ཕྲ་བ་ཡུངས་འབྲུའི་བཅུ་ཆ་ཙམ་གྱི་མིག་ཆུང་ཤིན་ཏུ་གསལ་བ་གཉིས་ལྟེ་བའི་རྩ་མདུད་ལ་ཆགས་པ་ནས་བཟུང་། མེར་མེར་པོ་ལ་སོགས་པའི་རིམ་པ་བརྒྱད་ཀྱིས་ཟླ་དགུ་ངོ་བཅུར་རྡོ་རྗེའི་ལུས་གྲུབ་ནས་བཙའ་བ་ནི། ཉི་ཟླ་ཁ་སྦྱོར་ལས། ཕ་དང་མ་ཡི་རྒྱུ་རྐྱེན་ལས། །མེར་མེར་པོ་དང་ནུར་ནུར་པོ། །ལྟར་ལྟར་པོ་དང་གོར་གོར་པོ། །འཕྲང་འགྱུར་ཉིད་དང་ཉ་ལྟ་བུ། །རུས་སྦལ་བཞིན་དང་སྦལ་པ་བཞིན། །དེ་བཞིན་ཞག་ནི་བདུན་ཕྲག་བདུན། །ལྟེ་བ་ལས་ནི་ལུས་རྣམས་བསྐྱེད། །ཟླ་དགུ་དེ་བཞིན་ངོ་བཅུ་ན། །ལུས་རྫོགས་མ་ཡི་མངལ་ནས་ཐོན། །དེ་ལྟར་གཟུགས་ནི་ཐ་དད་དུ། །འཁོར་བ་ཉིད་ནས་འཁོར་བའོ། །ཞེས་པ་ལ་སོགས་པའི་རྣམ་གཞག་ནི་ཐེག་པའི་མཆོག་རཏྣ་ཀོ་ཥའི་རིམ་ཁང་བཅུ་གཉིས་པ་ལ་རྒྱས་པར་གཏན་ལ་དབབ་པ་ལས་ཤེས་པར་བྱ་ཞིང་། དེ་ལས་གསང་བ་བླ་ན་མེད་པ་འདིར་རང་བྱུང་གི་ཡེ་ཤེས་ཆེན་པོའི་རྟེན་གཞི་རྩ་དང་ཐིག་ལེའི་གནས་ལུགས་ལ་གཞན་དང་ཁྱད་པར་ཡོད་དེ་སྒྲོན་མ་འབར་བ་ལས། ཐོག་མར་རང་གི་ལུས་བསྐྱེད་པའི། །མ་ཡི་མངལ་དུ་ཞུགས་པའི་ཚེ། །ལུས་ཀུན་གྱི་ནི་དྭངས་མ་རུ། །ལྟེ་བའི་རྩ་མདུད་ཆེན་པོ་ལས། །དབུས་ཀྱི་འབྲུ་གསུམ་ཉིད་དུ་ཡང་། །ཕ་མའི་རྒྱུ་རྐྱེན་དྭངས་མ་ལས། །མིག་གི་འབྲས་བུ་ཉིད་དུ་ཆགས། །དེ་ཡང་ཕ་མའི་ཆ་གཉིས་ལས། །དཀར་ནག་འདྲེས་པ་ཉིད་དུའོ། །ཞེས་དང་། སེམས་ཅན་ཀུན་གྱི་ལུས་ཀྱི་དཀྱིལ། །ཙིཏྟ་རིན་ཆེན་གཞལ་ཡས་ལས། །རྩ་ནི་སྟོང་ཕྲག་གྲངས་མང་ཡང་། །ཁྱད་པར་ཆེན་པོའི་རྩ་བཞི་ལས། །ཀ་ཏི་ཤེལ་གྱི་རྩ་ཆེན་དང་། །དར་དཀར་སྣལ་མ་ལྟ་བུ་དང་། །ཕྲ་ལ་འདྲིལ་དང་ཤེལ་སྦུག་ཅན། །འདི་བཞིའི་ནང་དུ་ཁྱད་པར་དུ། །གནས་ཤིང་རླུང་གི་རྟ་ལ་ཞོན། །འབྱུང་དང་འཇུག་དང་རང་ཤར་དང་། །སྣང་བ་ཡི་ནི་བདག་ཉིད་དུ། །ཡེ་ནས་སྤྲོས་པ་མེད་པར་ཡང་། །གཞི་ཡི་ཐིག་ལེ་བཟང་པོ་དང་། །ལམ་གྱི་ཐིག་ལེ་དེ་བཞིན་བཟང་། །བཟང་པོ་རྣམས་ཀྱི་རྩེ་མོ་དང་། །བཟང་པོའི་རྒྱན་དང་ལྡན་པར་ཡང་། །རྩ་རྣམས་ཀྱི་ནི་ནང་ན་གནས། །ཞེས་པ་ལས་ངེས་པ་ཅུང་ཟད་དབྱེ་ན། ལུས་ཀྱི་དབུས་ན་རྩའི་གཙོ་བོ་གསུམ་གནས་པར་འདོད་པ་དེ་སྒལ་ཚིགས་ཀྱི་འདབ་འབྱོར་ན་ཡོད་དེ། རོ་མ། རྐྱང་མ། ཀུན་འདར་མའམ་དབུ་མ་ཞེས་བྱའོ། །དེའང་རོ་ནི་བྱ་བྱེད་ཉུང་བ་སྟེ་ཐིག་ལེའི་འཕྲུལ་ལ་བརྟེན་ནས་ཉམས་སུ་མྱོང་བ། དེ་བརྗོད་དཀའ་བས་ན་མ་ཞེས་བྱའོ། །དེའི་ནང་ནས་ཀུན་རྫོབ་ཀྱི་ཐིག་ལེ་དཀར་པོ་འགྱུ་བར་བྱེད་ལ་ཐབས་ཀྱི་རང་བཞིན་ཅན་རྩའི་ཁ་དོག་དཀར་པོ་སྟེ་འདི་སྐྱེས་པའི་གཡས་དང་བུད་མེད་ཀྱི་གཡོན་ན་ཡོད་དོ། །དེའི་བྱེད་ལས་ཀྱིས་སྐྱེས་པའི་བྱང་སེམས་སྐྱེད་པར་བྱེད་ལ། བུད་མེད་ཀྱི་བྱང་སེམས་འཐུམས་པས་འདོད་པ་ལ་ཚིམ་པ་མེད་པའོ། །རྐྱང་མ་ནི་འཁྱོག་དང་ཡལ་ག་མེད་པས་རྐྱང་པ་རེངས་བུ་ཞེས་བྱ་སྟེ་མི་འགྱུར་བའོ། །ཀུན་རྫོབ་ཀྱི་འབྱུང་བ་སྨིན་པ་དང་འབྱེད་པར་བྱེད་པ་ལ་སོགས་ཀུན་གྱི་གཞི་ཡིན་པས་མ་ཞེས་བྱའོ། །དེའི་ནང་ནས་དྭངས་མ་དམར་པོ་འགྱུ་བར་བྱེད་ཅིང་ཤེས་རབ་ཀྱི་རང་བཞིན་ཅན་རྩའི་ཁ་དོག་དམར་པོ་འདི་ཉིད་སྐྱེས་པའི་གཡོན་དང་བུད་མེད་ཀྱི་གཡས་ན་ཡོད་དོ། །དེས་སྐྱེས་པ་ལ་ཁྲག་གི་འཕེན་པའི་སྟོབས་འཛིན་ཅིང་། སྣ་ནས་ཁྲག་ཏུ་འཛག་པའི་ལས་ཀྱིས་ཡེ་ཤེས་ཀྱི་དུས་འཛིན་ལ། བུད་མེད་ལ་རིགས་ཅན་ལྔའི་རྩར་གྱེས་པ་ལས་དུག་ལྔ་རགས་པ་དང་། དེ་ལས་གཡོ་སྒྱུ་མི་འདྲ་བ་སུམ་ཅུ་རྩ་གཉིས་བྱུང་བས་ནད་ཀྱི་བྱེ་བྲག་སུམ་ཅུ་རྩ་གཉིས་ལ་སོགས་པ་བྱུང་ཞིང་། དེའི་སྟོབས་ཀྱིས་གནས་སྐབས་སུ་བུ་སྣོད་ལྷག་པ་དང་། རྩ་སྣ་འགྱུར་བ་ལས་ཁྲག་དངོས་སུ་འབབ་པ་དང་། རིགས་ཅན་ལྔས་གཏུམས་པས་ས་བོན་མི་འཛག་པ་དང་། སྲིན་བུ་མང་བ་ལ་སོགས་བྱུང་ངོ་། །རྒྱུད་གཞན་ལས་རྩ་འདི་གཉིས་ཀྱི་གནས་ཚུལ། ཕོ་མོའི་དབྱེ་བ་གོ་ལྡོག་པ་ཡོད་དེ་དགོངས་པ་གཞན་དུ་ཟད་ཅེས་ཀུན་མཁྱེན་པ་བཞེད་དོ། །ཀུན་འདར་མ་ཞེས་བྱ་བ་ནི། འདི་ལ་བརྟེན་ནས་ཐིག་ལེ་དང་། རྩའི་བདེ་བ་དང་། རླུང་གི་བདེ་བ་ཀུན་སྐྱེ་བས་ཀུན་ཞེས་བྱ་ལ། དེ་སྤྱི་ལ་ཁྱབ་པས་འདར་མ་ཞེས་བྱའོ། །འདི་གཉིས་ཀའི་གཡས་གཡོན་སོགས་མཐའ་ལ་མི་གནས་པར་དབུས་དྲང་པོར་གནས་པས་དབུ་མར་བཞག་ཅིང་ཁ་དོག་ནི་སྔོ་སྐྱའོ། །གསང་བ་ཆེན་པོ་འདིའི་སྐབས་སུ་རྩ་འདིའི་དབུས་ན་འོད་གསལ་མཆོག་ཏུ་མི་འགྱུར་བའི་རྩ་ཆེན་ཀ་ཏི་གསེར་གྱི་རྩ་ཞེས་བྱ་བ་གནས་ཤིང་། དབུས་མ་འདི་ནས་རླུང་རྒྱུ་བས་རྟོག་མེད་ཀྱི་ཆ་ཡིན་ནོ། །དེའང་རང་བཞིན་དུ་རྩ་གསུམ་ཀ་ནས་ཕོ་མོ་མ་ནིང་གི་རླུང་གསུམ་རྒྱུ་བར་བཤད་ཀྱང་། རོ་རྐྱང་གཉིས་རྟོག་མེད་མ་ནིང་གི་རླུང་དུ་ཆ་ཤས་རྒྱུ་བས་དབུས་ནས་རླུང་རྒྱུ་ཞེས་པའི་བརྡའ་ཆད་བཞག་ཅིང་། དེར་བརྟེན་པ་རླུང་དང་གནས་པ་ཐིག་ལེ་གཉིས་ཚུད་དུས། བདེ་གསལ་མི་རྟོག་པའི་ཉམས་གསུམ་དང་འོད་གསལ་གྱི་སྣང་བ་ཆེན་པོ་གསུམ་འཆར་ལ། དེ་ཡང་དྭངས་མའི་འོད་རྩ་མཆོག་ཏུ་མི་འགྱུར་བར་འདུས་པའི་ཚེ་བསམ་གྱིས་མི་ཁྱབ་པའི་འོད་གསལ་འཆར་བ་སྟེ། གནད་འདི་གསང་དོན་ཆེན་པོ་ཤིན་ཏུ་རྟོགས་པར་དཀའ་བའི་གནས་ཡིན་ཞེས་ཀུན་མཁྱེན་པས་གསུངས་སོ། །རྩ་དེ་དག་གི་ཆོས་ཉིད་སྤྱིར་བསྟན་པ་ནི། རོ་མས་ཟས་ལེན་པ་དང་དྭངས་སྙིགས་དང་འཁྲུ་བར་བྱེད་པའི་ཆོས་ཉིད་དོ། །དེའི་སྦུག་མ་ཡངས་ན་མི་ལྟོ་ཆེ། ཕྲ་ན་ལྟོ་ཆུང་། འཁྱོག་ན་རྟག་ཏུ་སྐྱུགས་ཤིང་ཟས་མི་ལེན། གློ་བུར་གྱི་ནད་སྣ་ཚོགས་པ་མང་ངོ་། །རྐྱང་མས་ལུས་ཀྱི་དྲོད་འཕར་གཤིབ་ཏུ་བྱེད། འདིའི་སྦུག་ཕྲ་ན་ལུས་རང་བཞིན་གྱིས་དྲོད་ཆེ། ཡངས་ན་ཆུང་བས་རྟག་ཏུ་གྲང་། འཁྱོག་པ་དང་འགྱུར་བ་ལ་སོགས་པས་རོ་མ་བཞིན་ནོ། །ཀུན་འདར་མས་ལུས་ཀྱི་སྐོམ་མི་སྐོམ་གྱི་ཆོས་ཉིད་སྟོན་པས་འདི་ཉིད་ཕྲ་ན་རྟག་ཏུ་མི་སྐོམ། ཡངས་ན་སྐོམ་དད་ཆེ། འཁྱོག་ན་ངེས་མེད་ཀྱི་ལས་སྣ་ཚོགས་སྟོན། ཕྲལ་དུ་ཕྲིལ་ཕྲིལ་འགྱུར་ན་ལུས་ངག་ལ་རང་དབང་མི་ཐོབ་པའི་ནད་སྣ་ཚོགས་པ་འབྱུང་ངོ་། །དེ་ཡང་རོ་མའི་གནད་ལ་མཁས་ན་ཟས་ཀྱི་ཞེན་པ་ཆོད་ཅིང་བསམ་གཏན་གྱིས་འཚོ། རྐྱང་མ་ལ་མཁས་ན་གོས་ཀྱི་ཞེན་པ་ཆོད་ཅིང་དྲོད་སྐྱེ། དབུ་མས་སྐོམ་གྱི་ཞེན་པ་ཆོད་ཅིང་རྨི་ལམ་རྒྱུན་ཆད། འོད་གསལ་གྱི་དོན་ལ་སྤྱོད་པས་འདི་གསུམ་གྱི་གནད་གལ་ཆེ་ལ། རྩ་དེ་དག་གི་ངོ་བོ་ནི་རོ་མ་བདེ་བ། རྐྱང་མ་སྟོང་པ། ཀུན་འདར་མ་བདེ་སྟོང་གཉིས་སུ་མེད་པའི་ངོ་བོ་གཟུང་འཛིན་བྱ་རྩོལ་ལས་འདས་པའི་ཡེ་ཤེས་སྟོན་པའི་ཆོས་ཉིད་ཅན་ཡིན་པའང་ཤེས་པར་བྱ་ལ། དེ་ལས་འདིའི་ཁྱད་པར་གྱི་ཆོས་ནི་དབུ་མ་དེའི་དབུས་ན་འོད་གསལ་གྱི་རྩ་ནང་ན་གཞི་ལྷུན་གྲུབ་འོད་གསལ་གྱི་ཐིག་ལེ་གནས་པའོ། །འཁོར་ལོ་བཞིའི་རྣམ་གཞག་ནི། སྤྱི་བོ་བདེ་ཆེན་གྱི་འཁོར་ལོ་ན་རྩ་འདབ་སུམ་ཅུ་རྩ་གཉིས། མགྲིན་པ་ལོངས་སྤྱོད་ཀྱི་འཁོར་ལོ་ན་རྩ་འདབ་བཅུ་དྲུག །སྙིང་ག་ཆོས་ཀྱི་འཁོར་ལོ་ལ་རྩ་འདབ་བརྒྱད། ལྟེ་བ་སྤྲུལ་པའི་འཁོར་ལོ་ན་རྩ་འདབ་དྲུག་ཅུ་རྩ་བཞིའོ། །དེ་དག་གིའང་རོ་མའི་ཆ་ལས་གྱེས་པ་ཀུན་ལ་དྭངས་མ་དཀར་པོ་དང་། རྐྱང་མའི་ཆ་ལས་གྱེས་པ་ཐམས་ཅད་ལ་དྭངས་མ་དམར་པོ་དང་ཁྲག་འབབ་ཅིང་། དབུ་མ་ལས་གྱེས་པ་ཀུན་ལ་རླུང་རྒྱུ། འོད་གསལ་ལས་གྱེས་པ་འཁོར་ལོ་བཞིའི་དབུས་ན་འོད་རྩ་ཕྲ་མོ་ལ་འོད་ཀྱི་ཐིག་ལེ་དང་ཟེར་གནས་པའོ། །དེ་དག་གི་རང་བཞིན་རྒྱས་པ་ནི་རྩ་གནས་འཁོར་ལོ་ལས་ཤེས་ཤིང་། འགྱུ་བྱེད་རླུང་ནི་བདུན་ཅུ་གཉིས། །ཞེས་པ་ལྟར་ལས་བརྟེན་པ་རླུང་གི་རྟེན་ཡལ་གའི་རྩ་ཕྲན་སྟོང་ཕྲག་བདུན་ཅུ་རྩ་གཉིས་ནི་ཐུན་མོང་གི་རྒྱུད་སྡེ་ལས་ཀྱང་། སྟོང་ཕྲག་བདུན་ཅུ་རྩ་གཉིས་ཀྱི། །རྩ་རྣམས་ཀྱི་ནི་རིགས་བཤད་དོ། །ཞེས་དང་། དེའང་འོད་གསལ་གནས་པའི་ཁྱད་པར་ཆེན་པོའི་རྩ་བཞི་ལ། ཀ་ཏི་གསེར་གྱི་རྩ་ཆེན་དབུ་མའི་དབུས་སུ་གནས་པ་དང་། དེ་ལས་སྙིང་གི་དབུས་ན་འབྲེལ་བས་ཀུན་ཏུ་བཟང་པོ་གཞིའི་ཐིག་ལེས་གང་བར་གནས་སོ། །དར་དཀར་གྱི་སྣལ་མ་ལྟ་བུ་ནི་འོད་རྩ་ལས་ཡར་བུ་ག་དགུའི་སྟེང་རོལ་སྤྱི་བོ་ཚངས་པའི་བུ་ག་ལ་བསྟན་པ་སྟེ། ཆོས་ཉིད་སྐྱེ་བ་མེད་པའི་ལམ་དུ་འཇུག་པའི་ཐིག་ལེ་རིག་པ་རྟོག་བྲལ་གྱི་སྐུ་འཆར་ཞིང་རྟེན་ལ་རྣམ་ཤེས་འཕོ་བའི་ལམ་ཡིན་པའི་ཕྱིར་རོ། །ཕྲ་ལ་འདྲིལ་བ་ནི་འཁོར་ལོ་བཞིའི་དབུས་ནས་འོད་གསལ་གྱི་རྟེན་བྱེད་དེ་བཟང་པོ་རྩེ་མོའི་ཐིག་ལེ་འོད་ལྔ་ཟེར་དང་ཐིག་ཕྲན་དུ་གནས་པའོ། །ཤེལ་བུ་ག་ཅན་ནི་སྙིང་ནས་མིག་ཏུ་འབྲེལ་ཏེ་བཟང་པོའི་རྒྱན་དང་ལྡན་པའི་ཐིག་ལེ་རྡོ་རྗེ་ལུ་གུ་རྒྱུད་ཀྱི་སྣང་བ་གྲངས་མེད་པ་འཆར་བའི་རྟེན་བྱེད་པའོ། །དེའང་མུ་ཏིག་ཕྲེང་བ་ལས། འགྲོ་བའི་ལམ་ནི་འཆར་བྱེད་སྒོ། །དེ་ཉིད་གཡས་གཉིས་གཡོན་གཉིས་དབུས། །སྒྲོན་མ་འབར་བའི་ཚུལ་དུ་གནས། །ཐིག་ལེ་སྟོང་པའི་སྒྲོན་མ་དང་། །དག་པ་དབྱིངས་ཀྱི་སྒྲོན་མ་དང་། །ཤེས་རབ་རང་བྱུང་ཉིད་དང་ནི། །རྒྱང་ཞགས་ཆུ་ཡི་སྒྲོན་མ་ནི། །མཐོང་བྱེད་ཡུལ་ལ་སྣང་བའོ། །ཞེས་གསུངས་པ་ལྟར་གྱི་སྒྲོན་མ་རྣམ་པ་བཞིས་གོ་ཕྱེད་ནས་ལྷུན་གྲུབ་ཐོད་རྒལ་གྱི་སྣང་བ་རིག་པ་རྡོ་རྗེ་ལུ་གུ་རྒྱུད་ལ་སོགས་པའི་ཆོས་ཉིད་མངོན་སུམ་པར་སྤྱོད་པ་སྟེ། འདི་དག་གི་རྟེན་དང་བརྟེན་པའི་རྣམ་གཞག་སྒྲ་ཇི་བཞིན་པ་ཡི་གེ་ཉུང་ངུས་མཚོན་པར་མི་ནུས་ཤིང་། མན་ངག་ཏུ་གྲགས་པའི་བེ་བུམ་ཕལ་ལ་གནད་ཀྱི་འཁྲུལ་གསང་ཆེན་པོའི་དྲི་མས་མ་གོས་པ་ཉིད་དུ་མཐོང་བས་དེའི་ཕྱིར་འོད་གསལ་གྱི་རྒྱུད་སྡེའི་དགོངས་པ་རང་དབང་དུ་བཀྲལ་བས་རྗོད་བྱེད་མཐའ་ཡས་ཤིང་། བརྗོད་བྱ་གནད་དུ་དྲིལ་བས་གཞན་ལས་ཁྱད་པར་དུ་འཕགས་པ་མཛོད་བདུན་སྤྱི་དང་། ཁྱད་པར་ཐེག་པའི་མཆོག་རིན་པོ་ཆེའི་རིམ་ཁང་བཅུ་བཞི་པ་ནས་བཟུང་རིམ་པར་དཔྱད་པར་བྱ་བ་ཁོ་ན་སྟེ། ཅིའི་ཕྱིར་ན་སྤྱིར་གསང་སྔགས་རྡོ་རྗེ་ཐེག་པའི་ཉེ་ལམ་ནི་རྩ་ཐིག་རླུང་གསུམ་གྱི་གནད་བསྟུན་པ་ཁོ་ན་ཡིན་ལ། དེ་ལའང་རྩོལ་བཅས་སྤྲོས་པ་ཅན་དང་། རྩོལ་མེད་སྤྲོས་པ་བྲལ་བའི་ལུགས་གཉིས་སུ་ཡོད་པའི་སྔ་མ་ནི། རྩ་རླུང་རགས་པ་འབད་རྩོལ་གྱི་ལམ་སྤྱི་དང་། ཁྱད་པར་དུ་དབང་གསུམ་པའི་ཟབ་ལམ་ཀུན་རྫོབ་ཀྱི་ཐིག་ལེ་ལམ་དུ་བྱེད་པས། རིག་མ་བཙལ་བ་དང་། འགུགས་པ་དང་། བརྟེན་པ་དང་། རྩ་བཙལ་བ་དང་། བཟུང་བ་དང་། སྦྱོར་བ་དང་། དངོས་གཞི་ཐིག་ལེ་དབབ་པ་དང་། བཟུང་བ་དང་། ལྡོག་པ་དང་། དགྲམ་པ་དང་། རླུང་དང་བསྲེ་བ་དང་། ཆོས་ཉིད་དུ་ལ་བཟླ་བ་དང་། རྗེས་ལ་ཉམས་བརྟག་པ་དང་། ལུས་སེམས་གོ་བཟློག་པའི་ཉམས་བསྟེན་པ་ལ་སོགས་པ་སྟེ། དེའི་མན་ངག་ནི་ལས་རླུང་གི་དུས་ན་ཐིག་ལེ་བཟུང་བ་དང་། ཡེ་ཤེས་ཀྱི་དུས་ན་ཐིག་ལེ་བཟློག་ཅིང་རྩལ་གདབ་པ་སྟེ་དགྲམ་པ་ཡིན་ལ། འདིར་ཕྱི་མ་སྤྲོས་པ་མེད་པའི་ལམ་ལ་ཤིན་ཏུ་ཟབ་པ་འོད་གསལ་མངོན་སུམ་གྱི་ཐིག་ལེ་ལམ་དུ་བྱེད་པས། འདུག་སྟངས་དང་། གཟིགས་སྟངས་ཀྱིས་གཅུན་ཏེ། དང་པོའི་དུས་ན་ཐིག་ལེ་སྟོང་པའི་སྒྲོན་མ་ལྟེམ་ལ་བསྒོམས་པས་འོད་གསལ་གྱི་སྣང་བ་ཉིན་མཚན་འདྲེས་པ་ལ་སྤྱོད་པ་ནས་བཟུང་རིམ་པར་རྩལ་རྫོགས་པ་ཡིན་ལ། དེ་ལྟར་རྫོགས་པ་དེ་ནང་རྡོ་རྗེའི་ལུས་ཀྱི་གནས་ལུགས་ཤེས་ནས་ཉམས་སུ་བླངས་པའི་ཡོན་ཏན་ཡིན་པའི་ཕྱིར་རོ། །དེས་ན་འདིར་སྐུ་གསུམ་གྱི་ལམ་སྣང་བ་ལ་འཆར་བའི་གཞི་སྙིང་གའི་དབུས་དྭངས་མའི་དྭངས་མ་ལ་བརྟེན་པའི་འོད་རྩ་འོད་གསལ་དང་བཅས་པ་བརྟེན་པ་ལས་རྩ་ཕྲན་ཀུན་ཏུ་འོད་ཟེར་འཕྲོ་བ་ལྟར་སྣང་བས། བདེ་གཤེགས་སྙིང་པོས་ཀུན་ལ་ཁྱབ་ཅེས་བཤད་ལ། དེ་ལྟར་ངོ་བོ་རང་བཞིན་ཐུགས་རྗེ་གསུམ་གྱི་རྣམ་རོལ་ཚད་མེད་པར་བཞུགས་ཀྱང་། ངོ་བོ་སྟོང་པའི་ཆ་ལ་ཀུན་གཞི་དང་ཚོགས་བརྒྱད་ཀྱིས་བསྒྲིབས། རང་བཞིན་འོད་ལྔར་གསལ་བ་ལ་ཤ་ཁྲག་རྡོས་པའི་ཕུང་པོས་བསྒྲིབས། ཐུགས་རྗེ་འཆར་བྱེད་དུ་གནས་པ་ལས་དང་བག་ཆགས་ཀྱིས་བསྒྲིབས་པ་སྟེ། དེ་ལྟར་བསྒྲིབས་པ་ལ་སྐྱེས་བུ་བརྩོན་པ་ཅན་གྱིས་སྣང་བ་བཞི་ཚད་དུ་གོམས་ན་ད་ལྟ་བལྟར་ཡོད་ལ། བར་དོར་རང་སྣང་དག་པ་ཇི་ལྟར་ཡོད་པ་བཞིན་རེ་ཞིག་འཆར་རོ། །ད་ལྟའི་དུས་ཁྱུང་སྒོང་རྒྱས་འཐུམས་པ་ལྟར་བཤད་མ་ཐག་པ་རྣམས་ཀྱིས་བསྒྲིབས་པ་ནི། སེང་གེ་རྩལ་རྫོགས་ལས། སེམས་ཅན་ཀུན་གྱི་རང་ལུས་ལ། །ཡེ་ཤེས་དག་པའི་སྣང་བ་གནས། །རྒྱ་ཆེ་སྣང་བར་མ་ནུས་ཏེ། །དཔེར་ན་མངལ་དང་སྒོ་ངའི་རྒྱ། །མངོན་དུ་མི་འབྱུང་བསྒྲིབས་གྱུར་ཀྱང་། །རང་རྩལ་རྫོགས་ནས་འབྱུང་བ་བཞིན། །རྣམ་རྟོག་ལུས་འདི་བོར་མ་ཐག །རང་སྣང་ཡུལ་དང་ཕྲད་པར་འགྱུར། །ཞེས་སོ། །དེའི་ཕྱིར་འཁོར་བའི་དུས་ན་བདེ་གཤེགས་སྙིང་པོ་དེ་ཉིད་ཐ་མལ་གྱི་ལུས་ཀྱིས་གཏུམས་པས་ལུས་ཅན། ཚོགས་བརྒྱད་སེམས་ཀྱི་དྲྭ་བས་གཏུམས་པས་སེམས་ཅན། ལས་དང་བག་ཆགས་ཀྱི་ཉེ་བར་ལེན་པས་གཏུམས་པས་སྒྲིབ་པ་ཅན། མ་རིག་པའི་རང་བཞིན་གྱིས་བསྒྲིབས་པས་མུན་པ་ཅན་ཞེས་པ་ལ་སོགས་པའི་མིང་གིས་བཏགས་པ་སྟེ། དེ་ལྟ་བུའི་འོད་གསལ་གྱི་གནས་ལུགས་གསང་སྔགས་འོག་མ་མཐའ་དག་ཏུ་གབ་པ་འདིར་མངོན་དུ་ཕྱུང་བའང་ཤེས་པར་བྱའོ། །བཞི་པ་ལམ་གྱི་སྒོ་ནས་ཉམས་སུ་བླང་ལུགས་ལ་གཉིས། འཇུག་པའི་སྒོ་སྨིན་བྱེད་ཀྱི་དབང་བསྟན་པ་དང་། སྙིང་པོའི་ལམ་གྲོལ་བྱེད་ཀྱི་གནད་བསྟན་པའོ། །དང་པོ་ལ་བཞི་སྟེ། དབང་བསྐུར་བ་ལ་འཇུག་པའི་གཞི། དབང་བསྐུར་བ་དངོས་ཀྱི་ལམ་མཐར་ཕྱིན་པ་འབྲས་བུའི་སྨིན་སོ། །དེ་དག་གི་དམ་ཚིག་ངེས་པའོ། །དང་པོ་ལའང་བཞི། །སྐུར་བྱེད་སློབ་དཔོན་གྱི་མཚན་ཉིད། བསྐུར་བྱ་སློབ་མའི་རང་བཞིན། ཐུན་མོང་དུ་བྱ་བའི་ཆོས་ཇི་ལྟར་བསྐུར་བ་དབང་གི་བྱ་བའོ། །དང་པོ་ནི། ཐལ་འགྱུར་ལས། བླ་མ་རྡོ་རྗེ་འཆང་ཆེན་གྱིས། །རིམ་པ་རྣམ་པར་བཤད་པར་བྱ། །མཚན་ཉིད་རྫོགས་པའི་བླ་མ་ནི། །ཡོན་ཏན་ཀུན་གྱི་འབྱུང་ཁུངས་ཞིང་། །རྫོགས་པའི་བྱང་ཆུབ་གཞི་འཛིན་པའོ། །ཞེས་བླ་མར་འོས་པའི་ཡོན་ཏན་ཐམས་ཅད་རྫོགས་ཤིང་སྐྱོན་ཐམས་ཅད་དང་བྲལ་ལ། ཁྱད་པར་མཚན་ཉིད་དྲུག་ལྡན་ཏེ་འཁོར་བའི་ཆོས་རྒྱབ་ཏུ་དོར་བ། འདོད་པ་ཆུང་ཞིང་ཆོག་ཤེས་པ། ལག་ལེན་ལ་མཁས་ཤིང་ཉམས་མྱོང་ཡོད་པ། རྒྱུད་ཀྱི་ཚིག་དོན་ལ་མཁས་ཤིང་སྒྲུབ་པ་ལ་བརྩོན་པ། ལྟ་བའི་དོན་ལ་མཁས་ཤིང་ནུས་པ་རྫོགས་པ། སྙིང་རྗེ་ཆེ་ཞིང་གཏོང་ལ་དགའ་བ་ཞིག་བྱུང་ན་དེས་ཆོག་ལ། ཐེག་མཆོག་འདི་སྟོན་ཞིང་སྒྲུབ་པའི་བོགས་འབྱིན། ས་ལམ་གྱི་གེགས་བསལ་བ་ལ་འཇིག་རྟེན་ན་རྒྱལ་པོ་ལྟར་ཆེ་བའི་ཁེངས་པས་ང་རྒྱལ་བ་དང་། རིགས་རུས་ཆོ་འབྲང་ལ་སོགས་པ་དགེ་བའི་བཤེས་གཉེན་གྱི་ཡོན་ཏན་དུ་རློམ་པའི་དམུན་པོ་དང་། ཅུང་ཟད་ཐོས་ཀྱང་ཡང་དག་པའི་དོན་རྣལ་མ་ལ་ཁ་འགྱངས་པས་གསང་སྔགས་ཟབ་མོའི་དོན་ལ་མི་དགོངས་ཤིང་། ཐམས་ཅད་ལ་བརླང་པོར་སྨྲ་བ་ལ་སོགས་ཏེ་ལོག་པའི་བཤེས་གཉེན་གྱི་ངང་ཚུལ། རང་ཉིད་སྨིན་ནས་གཞན་རྒྱུད་འགྲོལ་བའི་ནུས་པ་མེད་བཞིན་དུ། དབང་ལུང་གི་བརྡ་དང་ཕྲིན་སྐྱོལ་བ་ཙམ་ལ་གདམས་པ་ཆེ་ཞིང་། མན་ངག་གི་རྩལ་རྫོགས་པར་རློམ་པ་གང་ཞིག་གིས་སློབ་མའི་རྒྱུད་སྨིན་གྲོལ་དུ་བསྒྲུབ་མི་ནུས་པས་སྤང་བར་བྱ་བ་ནི་རང་ཤར་ལས། མི་ཤེས་ང་རྒྱལ་ཆེན་པོ་དང་། །བླུན་རྨོངས་ཚིག་ཕྱིར་འབྲེང་བ་དང་། །གསང་སྔགས་དོན་ལ་མི་དགོངས་དང་། །གཞན་གྱི་ཞེ་གཅོད་ཁེངས་ཚིག་དང་། །ལོག་པའི་ལམ་དུ་ཞུགས་པ་དང་། །དབང་གི་དཀྱིལ་འཁོར་ཞལ་མ་མཐོང་། །དམ་ཚིག་ཕྱལ་པར་གྱུར་པ་དང་། །དྲིས་པ་དག་ལ་ལན་མི་ཐེབས། །ཐོས་ཆུང་ང་རྒྱལ་ཆེ་བ་སྟེ། །སློབ་དཔོན་མ་བརྟགས་སློབ་མའི་བདུད། །གསང་སྔགས་སྟོན་པའི་སློབ་དཔོན་མིན། །རྫོགས་ཆེན་ཨ་ཏི་སྟོན་མི་ནུས། །དེ་དང་འགྲོགས་པར་མི་བྱའོ། །ཞེས་སོ། །གཉིས་པ་སློབ་མའི་མཚན་ཉིད་ནི། འཁོར་བ་ལ་ཡིད་ལྡོག་པ། བླ་མ་དང་ཆོས་ལ་མོས་གུས་ཆེ་བ། དད་པ་བརྟན་ཞིང་གཞན་གྱིས་བསྒྱུར་མི་བཏུབ་པ། གཏོང་ཕོད་དང་བརྩོན་འགྲུས་ཆེ་བ། ཞེན་ཆགས་ཆུང་ཞིང་ངང་རྒྱུད་འཇམ་པ། ཤེས་རབ་ཆེ་ཞིང་ངེས་དོན་ལ་མོས་པ། དམ་ཚིག་དང་སྡོམ་པ་ལ་གནས་པས་བླ་མའི་གསུང་ལ་ཉན་ཞིང་གསང་སྒོ་མི་འཆོལ་བ། མཆེད་གྲོགས་ལ་དུངས་པ། ཐོས་བསམ་ཆེ་ཞིང་རྒྱུད་དུལ་བ། ཁྱད་པར་དུ་བླ་མ་སངས་རྒྱས་སུ་མཐོང་བའི་མོས་གུས་ཆེ་བ་སྟེ་རང་ཤར་ལས། དད་པའི་སྟོབས་དང་བརྩོན་འགྲུས་ཆེ། །ཤེས་རབ་ཆེ་ཞིང་འཛིན་ཆགས་མེད། །ཕུ་དུད་ཆེ་ཞིང་གསང་སྔགས་སྤྱོད། །རྟོག་མེད་སེམས་ལ་ཡེང་བ་མེད། །དམ་ཚིག་ལྡན་ཞིང་སྒྲུབ་ལ་བརྩོན། །བྲེང་ངེ་དུང་ངེ་བརྩེ་དུང་ལྡན། །ལྷང་ངེ་ལྷན་ནེ་སྒོམ་ལ་སྤྱོད། །སློབ་དཔོན་གསུང་པ་ཇི་བཞིན་སྤྱོད། །དམ་ཚིག་ཕྱལ་པར་མི་གཏོང་ཞིང་། །སྤྱོད་ལམ་གཞན་དང་མཐུན་པར་སྤྱོད། །གུས་པའི་ཚུལ་གྱིས་སེམས་དུང་ཞིང་། །ཚིག་གཅིག་བསྟན་པའང་རྗེས་སུ་འཛིན། །རང་གི་དོན་ལ་དེ་བཞིན་སྤྱོད། །གསང་བ་གཉེར་གཏད་ཐུབ་པར་བྱེད། །རྡོ་རྗེའི་དོན་ལས་མི་འདའ་ཞིང་། །ཐོས་པ་ཆེ་བའི་གང་ཟག་བརྟེན། །གང་གི་དོན་ལས་འདའ་བ་མེད། །དྲེགས་པའི་ཚིག་མེད་འཇམ་པོར་སྨྲ། །ཕ་རོལ་སེམས་དང་མཐུན་བྱེད་ཅིང་། །སློབ་དཔོན་དང་ནི་དེ་བཞིན་གཤེགས། །ཁྱད་མེད་གཅིག་གི་ཚུལ་དུ་བྱེད། །དེ་ནི་སློབ་མའི་མཚན་ཉིད་དེ། །དེ་ལྟར་ལྡན་པའི་སློབ་མ་ནི། །རྫོགས་པ་ཆེན་པོའི་སྣོད་དུ་གསུངས། །ཞེས་སོ། །དེ་ལས་ལྡོག་པའི་སྣོད་ངན་བཅུད་མི་ཐུབ་པ་ནི་སྤང་བྱ་སྟེ། དེ་ཉིད་ལས། བཀུར་སྟི་ཕུ་དུད་མི་བྱེད་ཅིང་། །གསང་སྔགས་འཆོལ་བར་སྤྱོད་པ་དང་། །རིགས་རྒྱུད་མེད་ཅིང་ངང་རྒྱུད་མེད། །ཤེས་རབ་ཆུང་བར་གྱུར་པ་དང་། །བཀའ་དྲིན་ཁྱད་དུ་གསོད་པ་དང་། །རང་གི་རིགས་རྒྱུད་བརྗོད་པ་དང་། །ལུས་ལ་རྒྱན་བཟང་འདོགས་པ་དང་། །དོན་མེད་ཕྱལ་བར་གྱུར་པ་སྟེ། །སློབ་མ་མ་བརྟགས་སློབ་དཔོན་དགྲ། །ཉམས་སུ་མི་ལེན་གང་ཟག་ལ། །རྫོགས་པ་ཆེན་པོའི་དོན་མི་བཤད། །ཅེས་སོ། །གསུམ་པ་ནི། དེ་ལྟར་དཔོན་སློབ་ཀྱི་འབྲེལ་པ་བརྟག་པ་སྔོན་དུ་སོང་ནས་བླ་མས་ཀྱང་སློབ་བུ་ལ་ཐུགས་རྗེ་བྲང་ངེ་གཟིགས་ཤིང་། ཐབས་གང་གི་སྒོ་ནས་ཀྱང་ཕན་གདགས་ཤིང་། སློབ་མས་ཀྱང་བླ་མའི་ཡོན་ཏན་ལ་བསམས་ཤིང་བརྩེ་གདུང་དང་མོས་གུས་ཀྱི་སྲོག་མཁར་བཙུགས་ནས་བརྟེན་པའི་ཚུལ་རྒྱས་པ་ཁྲིད་ཡིག་ཐར་པའི་ཐེམ་སྐས་སུའང་བཤད་ཟིན་ལ། དེ་ལས་དབང་དང་གདམས་པ་ཇི་ལྟ་བུ་ཞིག་ཞུ་ཡང་གློ་བུར་དུ་མི་འཇུག་པར། ལོ་ཟླ་མང་པོའི་གོང་ནས་གསེར་ལ་སོགས་པའི་མཎྜལ་ཕུལ་ནས་སྙན་གསན་དབབ། ཐུན་འགོ་ཐམས་ཅད་དུ་བླ་མའི་རྣལ་འབྱོར་སྒོམ་ཞིང་ཉིན་མཚན་དུས་དྲུག་ཏུ་གསོལ་བ་གདབ། དེ་ལྟར་བགྱིས་པས་ཅི་འདོད་པའི་དོན་ཐམས་ཅད་ཡིད་བཞིན་གྱི་ནོར་བུ་རིན་པོ་ཆེ་ལྟར་འགྲུབ་པ་ནི། ཐལ་འགྱུར་ལས། བསྟེན་པ་དེ་ལས་ཡོན་ཏན་ནི། །དཔག་བསམ་ཤིང་དང་ཡིད་བཞིན་ནོར། །འདོད་འཇོའི་བ་དང་འདྲ་བ་ཡིས། །ཡོན་ཏན་དཔག་ཏུ་མེད་པ་ཐོབ། །དེ་ལ་དམིགས་ནས་བླ་མ་བསྟེན། །འཁོར་བའི་གཡུལ་ལས་བཟློག་ཕྱིར་རོ། །ཞེས་སོ། །བཞི་པ་ཇི་ལྟར་བསྐུར་བ་དབང་གི་བྱ་བ་ལ་ལྔ། བསྐུར་བའི་ཕན་ཡོན། མ་བསྐུར་བའི་ཉེས་དམིགས། གང་དུ་བསྐུར་བའི་གནས། དུས་ནམ་གྱི་ཚེ་དགའ་སྟོན་བྱ་བའི་རིམ་པའོ། །དང་པོ་ནི། རང་ཤར་ལས། དབང་བསྐུར་བའི་ཡོན་ཏན་ནི་འདི་ལྟ་བུ་སྟེ། བར་དོ་ལ་རང་གི་སྣང་བ་ངོ་ཤེས་པར་འགྱུར་རོ། །ངོ་ཤེས་ནས་ཀྱང་དེ་ཉིད་ལ་བརྟན་པ་ཐོབ་སྟེ། སྤྲུལ་པའི་སྐུ་ཞག་ཉི་ཤུ་རྩ་གཅིག་ན་འགྱེད་པར་ནུས་སོ། །དབང་པོ་རབ་ཀྱིས་མཐར་ཕྱིན་པ་གཅིག་ཀྱང་སྡུག་བསྔལ་ཞིང་སྡང་བ་ལ་སོགས་པ་མི་འོང་ངོ་། །ཉམས་སུ་ལེན་པའི་དུས་ནའང་ཡེ་ཤེས་ཀྱི་སྣང་བ་མ་འགགས་པར་གསལ་ལོ། །དེ་ནི་ཁྱད་པར་གྱི་ཡོན་ཏན་ཞེས་བྱའོ། །ཐུན་མོང་གི་ཡོན་ཏན་ནི་འདི་ལྟ་བུ་ཐོབ་བོ། །མཁའ་འགྲོ་མའི་སྐད་ཤེས་པ་དང་། མཁའ་འགྲོ་མའི་བྱིན་རླབས་བྱེད་པ་དང་། བྱིན་གྱིས་བརླབས་པས་མི་རྣམས་ཀྱིས་བཀུར་བའི་གནས་སུ་མཐོང་བ་དང་། འགྲོ་བ་ཐམས་ཅད་བྱམས་པ་དང་། གཟུགས་མཛེས་ཤིང་བལྟ་ན་སྡུག་པ་དང་། བསོད་ནམས་རྒྱ་ཆེན་པོ་འཕེལ་བ་དང་། ཤི་འཕོས་ནས་ཀྱང་འཁོར་ལོས་སྒྱུར་བའི་རྒྱལ་པོའི་ལུས་སུ་སྐྱེ་བ་དང་། ནོར་བུ་རིན་པོ་ཆེ་ལྟར་ཡོན་ཏན་ཆེན་པོ་འབྱུང་བ་དང་། པདྨ་ལྟ་བུར་དག་པའི་ཆོས་ལ་སྤྱོད་པ་དང་། མཆོད་རྟེན་ལྟ་བུར་ཐམས་ཅད་ཀྱིས་བསྐོར་བའི་འོས་སུ་མཐོང་བ་དང་། །གདུགས་ལྟ་བུར་འགྲོ་བ་ཕལ་པ་ཟིལ་གྱིས་ནོན་པ་དང་། མེ་དཔུང་ལྟ་བུར་ཤེས་རབ་ཀྱིས་འགྲོ་བ་སྒྲོལ་བར་ནུས་པ་དང་། རལ་གྲི་ལྟ་བུར་དོན་བྱེད་ནུས་པ་དང་། རྡོ་རྗེ་ལྕགས་ཀྱུ་ལྟ་བུར་འགྲོ་བ་ལ་ཐུགས་རྗེས་འཛིན་པར་ནུས་པ་དང་། ཆོས་ཀྱི་སྤྲིན་ལྟར་དབྱིངས་དང་ཡེ་ཤེས་འདུ་འབྲལ་མེད་པའི་དོན་རྟོགས་པའོ། །ཕྱི་ནང་གི་བྱ་བ་ཐམས་ཅད་བྱེད་པའོ། །མི་བྱ་བ་ཐམས་ཅད་མི་བྱེད་པའོ། །དེ་དག་ལ་སོགས་ཏེ་ཡོན་ཏན་བརྒྱ་རྩ་བརྒྱད་ཐོབ་པར་འགྱུར་རོ། །དེ་ནི་བྱ་བ་གང་ཅི་བྱེད་པ་ཐམས་ཅད་ཐོབ་པར་འགྱུར་རོ། །དེ་ནི་བགེགས་དང་ལོག་འདྲེན་གྱིས་ཚུགས་པར་མི་འགྱུར་རོ། །བུ་མང་ཞིང་ལོངས་སྤྱོད་ཆེ་བ་ནི་དབང་ཐོབ་པའི་རྟགས་སོ། །ཚེ་རབས་སྔ་ཕྱི་དྲན་པར་འགྱུར་རོ། །སེམས་ཅན་སྐྱེ་བ་ལེན་པ་དག་ཀྱང་མཐོང་བར་འགྱུར་རོ། །ཕ་རོལ་གྱི་སེམས་ཤེས་པར་འགྱུར་རོ། །མི་མ་ཡིན་པ་དང་འདྲེ་བར་འགྱུར་རོ། །དེ་དག་ལ་སོགས་ཏེ་ཡོན་ཏན་བརྒྱད་ཐོབ་པར་འགྱུར་རོ། །ཞེས་སོ། །གཉིས་པ་དབང་མ་བསྐུར་བའི་ཉེས་དམིགས་ནི། དཔལ་གསང་བ་སྙིང་པོ་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་ན། །ཉན་པ་ལ་སོགས་རྩོལ་བ་རྣམས། །འབྲས་བུ་མེད་ཅིང་བརླག་པར་འགྱུར། །ཞེས་དང་། དམ་པ་དང་པོའི་རྒྱུད་ལས། །དབང་བསྐུར་མེད་པར་རྒྱུད་འཆད་དང་། །ཟབ་མོའི་དེ་ཉིད་སྒོམ་བྱེད་པ། །དེ་དོན་ལེགས་པར་ཤེས་ན་ཡང་། །དམྱལ་བར་འགྱུར་གྱི་གྲོལ་བ་མེད། །ཅེས་དང་། རང་ཤར་ལས། དབང་མ་ཐོབ་ན་སངས་རྒྱས་ཀྱང་དེ་བཞིན་གཤེགས་པའི་ས་ལ་ཆོས་ཀྱི་འཁོར་ལོ་བསྐོར་བར་མི་ནུས་སོ། །འཁོར་ལོ་མ་བསྐོར་ན་ཐུགས་རྗེ་སྤྲུལ་པའི་སྐུས་འགྲོ་བའི་དོན་བྱེད་མི་ནུས་སོ། །དེའི་ཕྱིར་ན་གསང་སྔགས་སྤྱོད་པས་དབང་ཐོབ་པར་བྱའོ། །ཞེས་བཤད་དོ། །གསུམ་པ་དབང་བསྐུར་བའི་གནས་ནི། སྤྱིའི་གནས་དང་། བྱེ་བྲག་གི་གནས་གཉིས་ལས། དང་པོ་སྤྱིའི་གནས་ནི། དབེན་ཞིང་ཉམས་དགའ་ལ་བཀྲ་ཤིས་པའི་གནས། ས་དཔྱད་བཟང་ལ་ནགས་ཚལ་དང་མེ་ཏོག་གིས་གང་བ་སྟེ་རྫོགས་པ་རང་བྱུང་ལས། ཤིན་ཏུ་དབེན་ཞིང་ཉམས་དགའ་བར། །གནས་ཀྱི་མཚན་ཉིད་བརྟག་པར་བྱ། །གྲོང་རྡལ་ཟད་པའི་མཐའ་དག་དང་། །རྩི་ཤིང་ནགས་ཚལ་སྨིན་པའི་སར། །མེ་ཏོག་སྣ་ཚོགས་འཁྲུངས་པ་དང་། །ནུབ་ཕྱོགས་མཐོ་ལ་ཤར་ཉིད་གདངས། །བྱང་ཉིད་སྐྱོབ་པ་འདྲ་བ་དང་། །ལྷོ་ཕྱོགས་བརྡལ་བ་འདྲ་བའི་གནས། །བདག་ཉིད་མངོན་པའི་ཕྱོགས་དག་ནས། །གྲོག་པོ་སལ་སུལ་མེད་པ་དང་། །མདུན་ན་གཟུགས་པོ་མེད་པ་དང་། །སེམས་ཅན་འདྲ་བའི་གཟུགས་མེད་དང་། །རྒྱབ་ནི་བྲག་ལ་གཏད་པ་དང་། །ལོགས་ལ་ཤིང་ཏོག་སྣ་ཚོགས་འབར། །མདུན་ན་ན་དང་ཆུ་གཙང་འབབ། །ཡང་ན་ཚེ་ཟན་ལྟ་བུའི་གནས། །རི་རྒྱུད་རྣམས་ཀྱང་ཡོངས་མ་ཆད། །བྱ་སྐད་སྣ་ཚོགས་སྒྲོག་པའོ། །ཞེས་སོ། །བྱེ་བྲག་པ་ལས། སྤྲོས་བཅས་བུམ་དབང་གི་གནས་སློབ་མའི་ལུས་ཁམས་དང་མཐུན་པ་སྟེ། ས་ཡིན་ན་ལྷོ་གདངས་ལ་བྱང་སྐྱོབ་པ། ཆུ་ཡིན་ན་ཤར་གདངས་ལ་ནུབ་སྐྱོབ་པ། མེ་ཡིན་ན་ནུབ་གདངས་ལ་ཤར་སྐྱོབ་པ་དང་། རླུང་ཡིན་ན་བྱང་གདངས་ལ་ལྷོ་སྐྱོབ་པའོ། །དེའང་འབྱུང་རྩིས་སུ་རླུང་འདྲེན་པ་མེད་པས་ལྕགས་དང་ཤིང་གཉིས་ལ་དོད་བརྩི་བའང་ཤེས་པར་བྱའོ། །སྤྲོས་མེད་གསང་བའི་དབང་གི་གནས་ནི་ནགས་འཐུག་པོའི་དབུས་ན་རི་སུལ་སློབ་མའི་འབྱུང་བ་དང་མཐུན་པའི་དབྱིབས་དང་མཚན་མ་ལྟོ་སྦྱར་ཏེ་བྱ་བའོ། །ཤིན་ཏུ་སྤྲོས་མེད་ཤེས་རབ་ཡེ་ཤེས་ཀྱི་གནས་ལ་ལུང་གསུམ་འདུས་པའི་རིའི་ཟོམ་གྱི་རྩེ་ནི་མཆོག་ཏུ་ཤིས་སོ། །རབ་ཏུ་སྤྲོས་མེད་ཚིག་དབང་རིན་པོ་ཆེའི་གནས་ནི་རབ་ཏུ་དབེན་པའམ། དགོན་པ་སྟེ་གྲོང་ལས་གཞུ་འདོམ་ལྔ་བརྒྱས་འཕགས་པ་རྒྱང་གྲགས་གཅིག་གི་སར་བྱའོ། །དེ་དག་བཞི་ཀའི་གནས་ལ་ཐུན་མོང་དུ་ཤིས་པ་ནི་རྫོགས་པ་རང་བྱུང་ལས། དབང་བསྐུར་དམ་པ་འདི་ཉིད་བསྟན། །གྲོང་རྡལ་ཆེན་པོའི་དབུས་དག་ཏུ། །རྣལ་འབྱོར་པ་ཡི་དོན་མི་འགྲུབ། །གྲོང་དང་གྲོང་ཁྱེར་ཟད་མཐའ་དང་། །ནགས་སམ་རི་བྲག་ལུང་སྟོངས་སུ། །རྣལ་འབྱོར་དབང་གི་དོན་ལ་འཇུག །ཅེས་པས། སྒྱུ་མ་ལྟ་བུའི་བློ་དང་མི་ལྡན་པའི་སྐྱེ་བོ་ཕལ་དག་འཇིགས་པ་གཅན་གཟན་མ་རུངས་པ་དང་། སྦྲུལ་གདུག་པ་ཅན་དང་། དུར་བྱ་དང་། ཅེ་སྤྱང་ལ་སོགས་པ་དང་། མཁའ་འགྲོ་མ་ཤིན་ཏུ་མི་བསྲུན་པ་ཡོད་པའི་གནས་དུར་ཁྲོད་ཆེན་པོ་དག་ནི་ཁྱད་པར་དུ་ཤིས་པ་ཡིན་ནོ། །བཞི་པ་ནམ་ཞིག་བསྐུར་བའི་དུས་ཚོད་ལ་སྤྱི་དང་བྱེ་བྲག་པ་གཉིས་ལས། དང་པོ་ནི། དཔྱིད་ཐར་པའི་ས་བོན་འདེབས་པ་དང་། སྟོན་བྱང་ཆུབ་ཀྱི་འབྲས་བུ་སྨིན་པར་མཚོན་པའི་སྐབས་དང་། ལོ་ནི་དབང་ཆེན་སྤྲེའུ། ཡར་ངོའི་ཚེས་བརྒྱད་བཟང་ལ། གཟའ་སྐར་ནི་རྒྱལ་ཕུར་འཛོམ་པ་མཆོག་ཡིན་ལ། གཞན་དུ་ནི་འཕྲོད་སྦྱོར་བཟང་པོ་བརྩི་བའི་སྐབས་ཏེ། དེའང་བླ་མས་གནང་ནས་རྟེན་འབྲེལ་བཟང་པོ་ཚོགས་པ་ནི་དམིགས་བསལ་གྱི་དུས་ཡིན་པའང་ཤེས་པར་བྱའོ། །གཉིས་པ་རང་རང་གི་དུས་དམིགས་བསལ་པྲ་བརྟག་དང་བཅས་པ་ནི། དབང་བསྐུར་ལ་འཇུག་པའི་དུས་གནད་བསྟན་པ་ལས།། ༈ །།སྤྲོས་བཅས་དག་གི་དབང་བསྐུར་ནི། །བྱི་བ་འབྲུག་དང་རྟ་དང་ཕག །ཁྱད་པར་ལོ་ནི་བཞི་དག་ལ། །དབང་བསྐུར་ཆོ་ག་འགྲུབ་པ་ཡིན། །ཟླ་བ་ར་བ་བཞི་དག་ལ། །དུས་རྫོགས་འབྲས་བུ་འབྱིན་ཕྱིར་འགྲུབ། །ཚེས་གྲངས་ཡར་གྱི་གཅིག་ནས་ནི། །ཟླ་བ་རྒྱས་པའི་མཚམས་སུའོ། །བསྐུར་དུས་ཉིན་ཕྱེད་ནམ་གུང་ངོ་། །རྣལ་འབྱོར་ལུས་ཀྱི་བྱེ་བྲག་གི། །སོ་སོའི་འབྱུང་བའི་ལོ་ལ་སྦྱར། །དབང་བསྐུར་ཆོ་ག་ཤེས་པར་འགྱུར། །འདི་དུས་སློབ་མ་དམ་ཚིག་ཅན། །འབྱུང་བའི་ལུས་རྣམས་མཐུན་པ་ནི། །གྲངས་ལ་ཚད་དུ་བཟུང་དུ་མེད། །བརྒྱ་འམ་ལྔ་བཅུ་ལ་སོགས་པའི། །འབྱུང་ལས་མཐུན་ན་འགལ་བ་མེད། །གལ་ཏེ་ཆོ་ག་ལ་ཞུགས་ཚེ། །མར་མེ་མདངས་དང་མི་ལྡན་ན། །དམ་ཆོས་བསྐང་བའི་ཆོ་ག་བྱ། །སྨེ་བ་མེད་ན་དངོས་གྲུབ་ནི། །ཡང་ནས་ཡང་དུ་བླང་བར་བྱ། །དོན་མེད་ཤི་ན་བར་ཆད་འབྱུང་། །དབང་རྫོགས་ཛཔ་྄ལ་དྲག་ཏུ་འབད། །དེ་ཚེ་འདུས་པའི་མཆེད་ལྕམ་སུ། །ལུས་ལ་ནད་ཉིད་བྱུང་བ་ན། །ཕྱག་དང་བསྐོར་བ་དག་བྱའོ། །ངག་ལ་ཀླག་ཅོར་སུ་ལ་འབྱུང་། །བསམས་ཏེ་ཡི་གེ་བརྒྱ་པ་འདོན། །སེམས་ནི་ལོག་གམ་དྲན་ཉམས་ན། །བསྐྱེད་དང་རྫོགས་པའི་རིམ་ལ་འཇུག །གལ་ཏེ་བྱང་བའི་རྟགས་བྱུང་ན། །གདོད་ཀྱིས་དབང་བསྐུར་ཆོ་ག་འབད། །གལ་ཏེ་སྒྲུབ་པའི་རྫས་འཕེལ་ན། །དངོས་གྲུབ་རབ་མཆོག་ཐོབ་པས་ན། །མཉམ་པའི་དོན་ལ་མོས་པར་བྱ། །དབང་བསྐུར་དག་ལ་ཞུགས་གྱུར་ནས། །རྟག་ཏུ་མཚན་མ་བཟང་མཐོང་ན། །ཐུན་མོང་དངོས་གྲུབ་དེ་ཡིས་འགྲུབ། །ཉམས་དང་ཤེས་པར་ལྡན་ན་ཡང་། །འདིས་ཀྱང་དགའ་བདེ་ཉིད་ལ་སྤྱོད། །བླ་མ་ཉིད་ལ་མཆོག་ཏུ་ཡང་། །མོས་པ་བཟང་པོ་སུས་སྐྱེས་པ། །འདིས་ཀྱང་ཕྱག་རྒྱ་མཆོག་ལ་སྦྱོར། །བདག་ཉིད་ལུས་ངག་བདེ་མཐོང་ན། །འདི་ནི་སངས་རྒྱས་ཞིང་དག་གོ །སྤྲོས་བཅས་དབང་གི་དུས་དང་ཡང་། །མཚན་མ་དག་ནི་ལེགས་བཤད་དོ། །ཞེས་དང་།། ༈ །།ད་ནི་སྤྲོས་པ་མེད་པ་ཡི། །དུས་དང་མཚན་ཉིད་ཉེར་བསྟན་ཀྱང་། །འདི་ལ་ལོ་ཡི་བྱེ་བྲག་མེད། །གང་ལ་ཡང་ནི་ཤིས་པའོ། །འདི་དུས་དབྱར་དང་དགུན་ལ་བཟང་། །ཚེས་གྲངས་ཡར་གྱི་ངོ་ལའོ། །བསྐུར་དུས་ཐོ་རངས་སྒྲ་སངས་ལའོ། །འདི་ལ་དད་ལྡན་ལྔ་དང་དྲུག །བདུན་ལས་མང་ན་དོན་མི་འགྲུབ། །དེ་ལྟར་དད་དང་ལྡན་པའི་བུ། །སེམས་ཀྱིས་ལས་སུ་དགེ་ལྡན་ལ། །ངག་གིས་བླ་མའི་བསྟོད་ལྡན་པ། །དེ་ལྟ་བུ་ལ་དབང་བསྐུར་ཚེ། །ལུས་ནི་བདེ་བ་མ་ཡིན་ན། །ལུས་སྡིག་ཕྱི་ནས་བཤགས་པར་བྱ། །དེ་བཞིན་ངག་དང་སེམས་ལ་ཡང་། །སྡིག་པ་བཤགས་པའི་ལས་བརྩམ་མོ། །སྤྲོས་པ་མེད་པའི་དབང་བསྐུར་གྱི། །དུས་དང་མཚན་མ་བཤད་པའོ། །ཞེས་དང་།། ༈ །།ད་ནི་ཤིན་ཏུ་སྤྲོས་པ་མེད། །མཆོག་ཏུ་གསང་བའི་དབང་བསྐུར་གྱི། །དུས་དང་མཚན་མ་བཤད་པར་བྱ། །དེ་ཡང་ལོ་ཡི་བྱེ་བྲག་མིན། །རང་ཐད་ཉིད་དུ་བྱས་པས་འགྲུབ། །ཕྱི་དུས་ས་བོན་འཇུག་པའི་དུས། །བྱང་ཆུབ་ས་བོན་བརྟན་པའི་ཕྱིར། །འདི་ཡི་དུས་སུ་དབང་བསྐུར་ན། །རང་བྱུང་ས་བོན་འཕེལ་བར་བཤད། །འབྲུ་དང་འབྲས་བུར་སྡུད་དུས་སུ། །ཤིན་ཏུ་སྤྲོས་མེད་དབང་བསྐུར་ན། །ཡེ་ཤེས་འབྲས་བུ་རྫོགས་པའི་ཕྱིར། །སྐུ་གསུམ་ས་ལ་ངེས་པར་འགྲོ། །ནང་དུས་ཡར་ངོའི་འཕེལ་དུས་ལས། །ཚེས་གྲངས་མར་འགྲིབ་སྤངས་པ་ཡིས། །ཉམས་མྱོང་བརྟན་པར་བྱ་བའི་ཕྱིར། །ཉམས་དང་བྱིན་རླབས་གོང་དུ་འཕེལ། །བསྐུར་དུས་ཉི་མ་རྩེ་ཤར་ལ། །རང་བྱུང་ཡེ་ཤེས་ཤར་དོན་དུའོ། །ཡང་ན་མར་གྱི་ཟད་མཚམས་སུ། །རྟོག་པ་ཟད་པའི་དོན་དུ་བྱའོ། །སྐལ་ལྡན་གཅིག་གམ་ཡང་ན་གཉིས། །གསུམ་ལས་མང་ན་དོན་མི་འགྲུབ། །དེ་དུས་སོ་སོའི་ཕྱོགས་བཟུང་སྟེ། །ལུས་ཀྱི་དུས་ན་ནམ་མཁའ་ལ། །སྤྲིན་དང་ཁུ་རླངས་ཁ་ཆར་དང་། །རླུང་ལ་སོགས་པའི་སྒྲ་དག་དང་། །ཡུལ་ཉེས་དགྲ་དང་ཆོམ་རྐུན་དང་། །མི་སྡུག་པ་ཡི་གཟུགས་བྱུང་ན། །ལུས་ཀྱི་སྡིག་པ་ཆེ་བས་ན། །ཕྱི་ནས་དབང་བསྐུར་བྱས་ནས་ནི། །བླ་མའི་གདམས་པ་མ་བསྟན་པར། །བདེ་བར་གཤེགས་པའི་སྐུ་གཟུགས་སམ། །རང་གི་བླ་མའི་གཟིམ་ཁང་ལ། །བསྐོར་བ་འབུམ་ཕྲག་དྲུག་དག་གམ། །ཕྱག་ཀྱང་འབུམ་ཕྲག་གཅིག་ཏུ་བྱ། །དེ་དུས་མཚན་མའི་ཁྱད་པར་ནི། །ཐོག་མ་ཡོད་ལ་ཐ་མ་བར། །ངེས་པའི་མཚན་མའི་གཟུགས་དག་ནས། །ལུས་ཀྱི་སྤྱོད་པ་འབྱོངས་པས་ན། །ཕྱི་ནས་འབད་པ་བྱ་མི་དགོས། །གལ་ཏེ་ཐ་མ་དག་བྱུང་ན། །ལུས་ཀྱི་ཡོངས་སུ་ཚར་མ་ཆོད། །ཕྱི་ནས་བསྐྱར་ལ་སྤྱོད་པ་བརྩམ། །བསྐྱར་ཡང་སྡིག་པ་མ་དག་ན། །ལྷ་ཡི་སྐུ་ནི་སྟོང་ཕྲག་སྒོམ། །དེ་ནས་བླ་མའི་མན་ངག་གིས། །རིམ་པ་དག་ལ་བསླབ་པར་བྱ། །ངག་གི་དུས་ནའང་དེ་བཞིན་དུ། །རྣལ་འབྱོར་ལྡན་པས་ཤེས་པར་བྱ། །ཐོག་མཐའ་མེད་ལ་བར་བྱུང་ན། །ཡི་གེ་བརྒྱ་པ་འབུམ་ཕྲག་གཅིག །འབད་དང་བཅས་ཏེ་བཟླས་པར་བྱ། །གལ་ཏེ་ཐ་མར་བྱུང་བ་ན། །གསང་སྔགས་རྒྱུད་ནི་རང་ལོའི་གྲངས། །བརྒྱ་དང་རྩ་བརྒྱད་བརྗོད་པར་བྱའོ། །ཐོག་མཐའ་བར་མེད་དུས་རྣམས་སུ། །རྒྱུད་ཀློག་པ་དང་སྔགས་བཟླས་དང་། །བླ་མ་ཡི་དམ་ལྷ་དག་གི། །བསྟོད་ཚིག་སྣ་ཚོགས་བརྗོད་པ་དང་། །ཨཱ་ལི་ཀཱ་ལི་ཡི་གེའི་སྒྲ། །སོ་སོ་རྐྱང་པར་བརྗོད་པ་དང་། །ཧཱུྃ་དང་ཕཊ་དང་ཨོཾ་དང་ནི། །སྒྲིལ་མ་སྣ་ཚོགས་བརྗོད་པ་ལ། །ཟླ་བ་བདུན་དུ་འབད་པར་བྱ། །དེ་ནས་གདམས་པའི་གནས་བྱའོ། །ཡི་དམ་ལྷ་ཡི་ཏིང་ངེ་འཛིན། །ཉི་མ་གསུམ་དུ་སྒོམ་པར་བྱ། །གལ་ཏེ་བར་དུ་བྱུང་བ་ན། །སྔགས་ཀྱི་འོད་ཟེར་འཕྲོ་འདུ་ལས། །ཉི་མ་བདུན་དུ་འབད་པར་བྱའོ། །ཐ་མར་བྱུང་ན་ཡི་གེ་ཡི། །འཕྲོ་འདུ་དག་ནི་སྒོམ་པ་ལ། །ཉི་མ་བཅུ་ཡི་བར་དུ་འབད། །ཐོག་མ་བར་མཐའ་ཀུན་བྱུང་ན། །རྫོགས་པའི་རིམ་པ་སྒོམ་པའམ། །ངག་ལས་བྱུང་བའི་བསམ་གཏན་ལ། །ཟླ་བ་དྲུག་ཏུ་འབད་པར་བྱའོ། །གལ་ཏེ་ལུས་ངག་སེམས་ཀྱི་ཡང་། །སྤྱོད་པ་སོ་སོའི་དུས་རྣམས་སུ། །ནམ་མཁའ་སྔོ་སངས་སྤྲིན་དང་བྲལ། །རླུང་དང་སེར་བུའི་སྒྲ་མེད་པ། །འཇམ་ཞིང་འཇམ་པ་དག་བྱུང་ན། །སྡིག་པ་དག་ནི་སྦྱང་མི་དགོས། །གལ་ཏེ་ཐོག་མ་ཡོད་པ་ལ། །སོ་སོའི་ཐ་མར་དག་ན་ཡང་། །འདིས་ནི་སྡིག་པ་འབྱོངས་པས་ན། །བཤགས་པའི་ཆོ་ག་བྱ་མི་དགོས། །དེ་བཞིན་ལུས་ངག་སེམས་དག་གིས། །སོ་སོའི་ངོས་བཟུང་མཁས་པས་བརྟག །དེས་ནི་ཤིན་ཏུ་སྤྲོས་པ་མེད། །དབང་བསྐུར་བ་ཡི་དུས་དང་ཡང་། །མཚན་མ་བརྟག་པ་བཤད་པའོ། །རེ་ཞིག་དབང་ཐོབ་མཚན་མ་ནི། །རིག་པའི་མེ་ཏོག་གཏོར་དུས་སུ། །ལུས་ནི་གཡོ་དང་དྲག་ཏུ་འཕར། །ལུས་ལ་བྱུང་ན་ལུས་ཀྱིས་ཐོབ། །ངག་ནི་སྒྲ་སྐད་སྣ་ཚོགས་པ། །འབྱིན་ཞིང་ཆོས་རྣམས་སྨྲ་བ་དང་། །ངོ་མཚར་ཚིག་རྣམས་བརྗོད་པ་ནི། །དེ་བཞིན་དུ་ཡང་ངག་གིས་ཐོབ། །སེམས་ལ་ཏིང་འཛིན་འབབ་པ་དང་། །ཡེངས་ཤིང་དྲན་པ་ཉམས་པ་ན། །སེམས་ཀྱིས་དབང་བསྐུར་ཐོབ་པའོ། །གལ་ཏེ་ལུས་ཀྱིས་ཐོབ་ན་ནི། །སྤྲུལ་པའི་སྐུ་ཉིད་འདི་ཡིས་ཐོབ། །དེ་བཞིན་ངག་ལ་ལོངས་སྐུའོ། །སེམས་ནི་ཆོས་སྐུའི་ཞིང་དུ་འགྲོ། །ཤིན་ཏུ་སྤྲོས་མེད་དུས་མཚན་བཤད། །ཅེས་སོ།། ༈ །།རབ་ཏུ་སྤྲོས་པ་མེད་པ་ཡི། །དུས་དང་མཚན་མ་ངེས་བསྟན་བྱ། །ཕྱི་དུས་འབྲས་བུ་སྨིན་པའམ། །འབྲུ་རྣམས་བསྡུ་བའི་དུས་ལ་གཏད། །རང་སྣང་འབྲས་བུར་གྲོལ་ཕྱིར་རོ། །ནང་དུས་ཡར་ངོའི་ཚེས་གཅིག་གམ། །ཡང་ན་ཟད་པའི་མཚམས་ལ་གཏད། །ཐིག་ལེ་ཉག་གཅིག་རྟོགས་ནས་ནི། །ལས་དང་བག་ཆགས་ཟད་ཕྱིར་རོ། །སྐལ་ལྡན་གཅིག་ལས་མང་ན་ཡང་། །རྣལ་འབྱོར་པ་ཡི་དོན་མི་འགྲུབ། །དད་ལྡན་ཡིད་དུ་འོང་བའི་བུ། །སྐལ་བ་ཡོད་པ་གཅིག་ལ་བསྐུར། །གཉིས་ཀ་རྫོགས་པའི་སངས་རྒྱས་ལ། །གདོན་མི་ཟ་བར་འགྱུར་བ་ངེས། །བསྐུར་དུས་ཉི་མ་རྩེ་ཤར་ལ། །སོ་སོའི་ཚིག་གིས་ངེས་གསལ་བས། །རང་བཞིན་དག་པའི་གཞི་མཐོང་བའོ། །འདི་ལ་མཚན་མ་ཅི་བྱུང་ཡང་། །སྡིག་པ་སྦྱང་བའི་ཆོ་ག་མེད། །གོང་དུ་ཐད་ཀར་སྦྱང་བའི་ཕྱིར། །གལ་ཏེ་སྤྲིན་མེད་གནམ་དྭངས་ན། །ཆོས་ཀྱི་སྐུ་ཡི་ཞིང་ལ་སྤྱོད། །སྣ་ཚོགས་འོད་ཀྱི་གདངས་ཤར་ན། །འདི་ནི་ལོངས་སྐུའི་ཞིང་དུའོ། །སྣ་ཚོགས་སྒྲ་རྣམས་གྲག་པ་ན། །སྤྲུལ་སྐུའི་ཞིང་དུ་དབུགས་འབྱིན་ནོ། །གལ་ཏེ་སྐལ་དང་ལྡན་པ་ཞིག །འདི་དུས་ལུས་གནད་མཁས་པ་དང་། །དེ་ལས་གཡོ་བ་མེད་པས་ན། །ལོ་བདུན་གྱིས་ནི་ཟད་སར་ཕྱིན། །ངག་གི་བརྗོད་པ་སྟོང་གྱུར་ན། །འདིས་ནི་ཟླ་བ་ཉེར་གཅིག་ན། །ཆོས་ཉིད་ཟད་པའི་ས་ལ་ཕྱིན། །སེམས་ལ་མཁས་ཤིང་རླུང་སྟོངས་ན། །ཟླ་བ་བདུན་ན་སྐལ་ལྡན་འདི། །སྣང་བ་ཐམས་ཅད་ཟད་པར་འགྱུར། །གལ་ཏེ་བློ་རྩལ་རབ་རྣམས་ལ། །དང་པོ་སྤྲོས་བཅས་བརྩམས་ནས་ནི། །བར་མ་ཆད་པར་རིམ་གྱིས་ཡང་། །དབང་དག་རྫོགས་པར་བྱེད་པའི་ལུགས། །མཆོག་ཏུ་གྱུར་པ་རྣམས་ལ་སྟེ། །འདི་ནི་རབ་ཏུ་དཀོན་པས་ན། །ཞག་དང་ཟླ་བ་ལོ་ཡི་བར། །རང་གི་ཉམས་དང་སྦྱར་ནས་ནི། །དབང་བཞི་དག་ནི་རྫོགས་པར་བསྐུར། །གལ་ཏེ་དབང་བཞི་མ་རྫོགས་ན། །ཤིན་ཏུ་སྤྲོས་པ་མེད་པའི་དབང་། །ཟབ་མོའི་ཆ་ཤས་རྟོགས་ཡུལ་ཉིད། །འདི་ནི་བསྐུར་བས་དབང་ཐོབ་བོ། །སློབ་མའི་མཚན་ཉིད་རབ་བརྟགས་ལ། །གཉིས་དང་གསུམ་ལ་སོགས་པ་ནི། །སློབ་མའི་འབྱོར་པའི་ཚོད་དང་སྦྱར། །ཐ་མ་རང་གི་ཉམས་མྱོང་གིས། །ཁྱད་པར་དུས་ན་མཆོག་དེ་བཤད། །བུ་ལ་ནུས་པ་འཇུག་དོན་དུའོ། །ཞེས་པ་སྟེ། དེ་དག་གི་དུས་གནས་དང་པྲ་བརྟག་པ། སྒོ་གསུམ་གྱི་སྒྲིབ་པ་སྦྱོང་བ་སོགས་ལ་གནད་གསང་ཁྱད་པར་ཅན་ཡོད་ཅིང་། ཐུགས་རྗེའི་འཇུག་པ་ཡུལ་ལ་བསྒྱུར་བའི་ཚེ་རྩ་བ་གསུམ་གྱིས་བྱིན་གྱིས་བརླབས་པའི་མཐུ་ལས། རྟེན་ཅིང་འབྲེལ་བར་འབྱུང་བའི་སྣང་ཆའི་གཟུགས་བརྙན་ངེས་པར་འཆར་བ་ཡིན་པས་རྡོ་རྗེ་སློབ་དཔོན་གྱི་ས་ལ་བཞུགས་པ་རྣམས་ཀྱི་ཁོང་དུ་ཆུད་པར་བྱ་བའི་གནད་གལ་པོ་ཆེ་ཡིན་ནོ། །ལྔ་པ་དགའ་སྟོན་ནི། ཤིན་ཏུའང་གཅེས་པ་ཡིན་ཏེ་དབང་རྣམ་པར་ཕྱེ་བའི་ཕྲ་ཏིག་ལས། དེས་ན་དབང་བསྐུར་ཆོ་ག་ལ། །སྟོན་མོ་མེད་ན་དོན་མི་འགྲུབ། །དགའ་སྟོན་ཆེན་པོ་རབ་བྱས་ནས། །རྣལ་འབྱོར་པ་ཡི་དོན་རབ་འགྲུབ། །ཅེས་སོ། །ཇི་ལྟར་བྱ་བ་ནི་དབང་བསྐུར་རྒྱལ་པོའི་རྒྱུད་ལས། དབང་བསྐུར་སྨིན་པའི་བླ་མ་ལ། །ཡོན་གྱི་མཆོག་ནི་གསེར་དང་དངུལ། །རང་ལུས་མཉམ་པ་ཕུལ་བ་ཡིས། །སངས་རྒྱས་འབྲས་བུ་བདེ་བླག་ཏུ། །འཁོར་བ་དག་ལས་དབུགས་ཕྱུང་ནས། །ངེས་པར་ཐོབ་པར་ཐེ་ཚོམ་མེད། །ཅེས་དང་། བཀོད་པ་ཆེན་པོ་ལས། བླ་མ་ཉིད་ལ་དབང་ཐོབ་ནས། །ཟས་ནི་རྣམ་པ་སྣ་ཚོགས་དང་། །བཅོས་བུའི་རས་དང་མེན་དྲི་དང་། །ཤིང་ཐོག་ཁུར་བ་བཏུང་བ་དང་། །ཇི་ལྟར་འབྱོར་པ་སྣ་ཚོགས་པས། །ཁྱད་པར་བླ་མ་སྤུན་སྲིང་དང་། །བླ་མའི་ཉེ་གནས་ཉེ་འཁོར་དང་། །དགེ་སློང་ཁྲིམས་ལ་གནས་པ་དང་། །ཆོས་སྨྲ་ཡོན་ཏན་ལྡན་པའི་མི། །གཞན་ཡང་སྙིང་རྗེའི་ཡུལ་རྣམས་ལ། །དབང་རྫོགས་བཟའ་བཏུང་སུས་བྱིན་པ། །འདིས་ནི་བསྐལ་པ་བྱེ་བའི་བར། །ཟད་ཅིང་སྟོངས་པ་མ་ཡིན་ནོ། །རང་འདོད་འབྲས་བུ་ཁྱད་པར་དུ། །ཇི་ལྟར་བསམ་པ་འགྲུབ་པ་དང་། །སངས་རྒྱས་འབུམ་ཕྲག་གྲངས་མེད་ལ། །ཡོན་ཕུལ་བས་ནི་འདི་དོན་ཆེ། །དེ་བས་དབང་བསྐུར་སྟོན་མོ་མཆོག །ཁྱད་པར་ཡོན་ཏན་བསམ་མི་ཁྱབ། །ནད་ཞི་སྡུག་བསྔལ་བྲལ་བ་དང་། །ལོངས་སྤྱོད་ལྡན་ཞིང་ཚོགས་རྫོགས་དང་། །རྫོགས་སངས་རྒྱས་ཀྱི་ཡོན་ཏན་ཐོབ། །ཅེས་སོ། །དེའང་དུས་གཞན་དུ་བླ་མ་ལ་སོགས་པར་ཚོགས་དཔག་མེད་བསགས་པ་བས་དབང་གི་དུས་འདིར་བསགས་པ་འབུམ་འགྱུར་གྱིས་འཕེལ་ཆེ་བར་བསྟན་ཅིང་། དེ་བཞིན་དུ་བླ་མའི་ཡུམ་ལ་སོགས་ཏེ་དབང་གྲལ་དུ་འཁོད་པའི་བུད་མེད་དང་། སྐྱེས་པ་གཅིག་ལ་བྱིན་པ་དང་། གཞན་དུ་མ་མོ་མཁའ་འགྲོ་བྱེ་བ་ལ་ཚོགས་མཆོད་བྱས་པའི་བསོད་ནམས་གཉིས་འདིའི་དུས་ན་ཆེས་ལྷག་སྟེ། དུས་དེའི་ཚེ་བླ་མ་ལ་ཕྱོགས་བཅུའི་སངས་རྒྱས་ཐམས་ཅད་ཐུགས་རྗེ་གཅིག་ཏུ་འདུས་ཏེ་དབང་བསྐུར་བའི་བྱ་བ་མཛད་པ་དང་། གསང་བ་བླ་ན་མེད་པའི་ཆོས་ཀྱི་འཁོར་ལོ་བསྐོར་བ་དང་། བདག་ཐར་པ་ཆེན་པོའི་གྲོང་དུ་འཇུག་པའི་བགྱི་བ་ལ་ཞུགས་པའི་དུས་ཡིན་པས་ཀྱང་ལྷག་ལ། དེ་བཞིན་དུ་བུད་མེད་དང་སྐྱེས་པ་རྣམས་ལའང་། དཔའ་བོ་དང་དཔའ་མོ་རྣམས་རྟེན་བཅས་ཏེ་དབང་གི་གྲལ་དུ་ཐུགས་རྗེ་དང་དམ་ཚིག་གིས་འཁོད་པ་ཡིན་པའི་ཕྱིར་རོ། །དེ་སྐད་དུ་དབང་གི་ཕྲ་ཏིག་ལས། དགའ་སྟོན་ཆེན་པོའི་མཆོད་པ་ཡིས། །བླ་མ་དང་ནི་བླ་མའི་འཁོར། །ཡུམ་དང་བཅས་པ་ཐམས་ཅད་ལ། །སུ་ཡིས་སྟོན་མོ་བྱས་ན་ནི། །བསྐལ་པ་འབུམ་ཕྲག་བསམ་ཡས་སུ། །སངས་རྒྱས་ཐམས་ཅད་མཉེས་བྱས་ཀྱང་། །བསོད་ནམས་འདི་ཡི་ཆར་མི་ཕོད། །གལ་ཏེ་བླ་མའི་བ་སྤུའི་ཁུང་། །ཙན་དན་གྱིས་ནི་རེག་སྤྱོད་ན། །འདི་ལ་བསོད་ནམས་ཕ་མཐའ་ཡས། །དེ་བཞིན་རང་གི་རྡོ་རྗེའི་སྤུན། །གཅིག་དང་གཉིས་དང་གསུམ་དག་གམ། །ཡང་ན་བརྒྱ་སྟོང་གྲངས་མེད་ལ། །ཚོགས་ཀྱིས་དགའ་སྟོན་སུས་བྱས་པ། །གལ་ཏེ་དབང་བསྐུར་དུས་མིན་པར། །རང་གི་བླ་མ་མཆོད་པ་ནི། །བརྒྱ་ཕྲག་གྲངས་མེད་བྱས་པ་བས། །འདི་ལ་གཅིག་བྱས་བསོད་ནམས་ནི། །བློ་ཡིས་དཔག་པར་ནུས་མ་ཡིན། །འབྲས་ཆན་བཟའ་བཏུང་སྟོན་མོ་ཡིས། །རྣལ་འབྱོར་ཕ་རྣམས་མགུ་བྱས་ན། །ལེགས་པ་ཐམས་ཅད་འགྲུབ་པ་དང་། །ཉེས་པ་ལས་ནི་གྲོལ་བར་འགྱུར། །གལ་ཏེ་རྡོ་རྗེའི་སྲིང་མོ་འམ། །འོན་ཏེ་བླ་མའི་སློབ་མ་ནི། །རྣལ་འབྱོར་མ་ཡི་ཚོགས་རྣམས་ལ། །ཚོགས་ཀྱི་སྟོན་མོས་མགུ་བྱས་ན། །མ་མོ་བརྒྱད་དམ་ཕག་མོ་ལ། །ཚོགས་ཀྱི་མཆོད་པ་བརྒྱ་ཕྲག་དགུ། །དུས་མ་ཡིན་པར་བྱས་པ་བས། །འདི་དུས་རྣལ་འབྱོར་མ་གཅིག་ལ། །བཟའ་བའམ་ཡང་ན་བཏུང་བའམ། །གལ་ཏེ་སྐོམ་ཀྱང་ཉུང་བྱིན་ན། །བསོད་ནམས་འདི་ནི་མཉམ་པ་ཡིན། །དེས་ན་མ་མོའི་གྲོང་ཁྱེར་དུ། །ཕྱིན་ཏེ་རྣལ་འབྱོར་མ་མཉེས་བྱ། །རྣལ་འབྱོར་ཕ་དང་མ་གཉིས་ནི། །མཉམ་ཞིང་འདྲེས་པ་མཆོད་བྱས་ན། །འདི་ལ་དངོས་གྲུབ་འདི་ལྟ་བུ། །ཡ་མཚན་མཆོག་དང་ལྡན་པ་འབྱུང་། །འཇིག་རྟེན་འདི་ལ་འདོད་དོན་དང་། །ཕྱི་མ་ཡེ་ཤེས་དབྱིངས་སྤྱོད་ཕྱིར། །མཁའ་སྤྱོད་དག་གི་དངོས་གྲུབ་ནི། །སྣ་ཚོགས་བདག་པོ་སུས་བྱས་པ། །འཁོར་དང་བཅས་ཏེ་ནམ་མཁའ་ལ། །སྤྱོད་པ་དག་ཏུ་ནུས་པ་ཡིན། །ཞེས་སོ། །དེའི་ཕྱིར་འདུ་བ་ཁྱད་པར་ཅན་གྱི་དུས་འདིར་ཚོགས་བསགས་པས་དངོས་གྲུབ་ཁྱད་པར་ཅན་ཐོབ་པར་བཤད་པས་ཚོགས་རླབས་པོ་ཆེ་བསག་པ་ལ་འབད་པར་བྱའོ། །གཉིས་པ་དབང་བསྐུར་བ་དངོས་ཀྱི་ལམ་ལ་གཉིས་ལས། དཀྱིལ་འཁོར་གྱི་རྣམ་དབྱེ་དང་། ཇི་ལྟར་དབང་བསྐུར་བའི་རིམ་པའོ། །དང་པོ་ལ། ངོ་བོ། ངེས་ཚིག །སྒྲ་དོན་གསུམ་ལས། ངོ་བོ་ནི་གཙོ་བོ་རང་བྱུང་གི་ཡེ་ཤེས་ལ་ལམ་འབྲས་བུ་དང་བཅས་པའི་འཁོར་དུ་ངེས་པའོ། །ངེས་ཚིག་ནི། མཎྜ་ལ་སྟེ་དཀྱིལ་འཁོར་གཙོ་བོ་ལ་འཁོར་གྱི་རོལ་པས་མཛེས་པར་བསྐོར་བས་ན་དཀྱིལ་འཁོར་ཞེས་བྱའོ། །དབྱེ་ན། གཞི་ལྷུན་གྲུབ་རྩ་བའི་དཀྱིལ་འཁོར་ཡེ་ཤེས་འོད་གསལ་གྱི་འཁོར་ལོ། །ལམ་གཟུགས་བརྙན་ཐབས་ཀྱི་དཀྱིལ་འཁོར་བྲིས་པས་རྡུལ་ཚོན་དང་། ཐིག་ལེ་དང་། ཚོམ་བུའི་དཀྱིལ་འཁོར་ཏེ་བརྡ་ལ་བརྟེན་པ་རྣམས་དང་། འབྲས་བུ་རྣམ་དག་རང་བཞིན་གྱི་དཀྱིལ་འཁོར་ནི་བརྡའི་དཀྱིལ་འཁོར་དུ་བཞུགས་ནས། དོན་ཏིང་ངེ་འཛིན་གྱི་དཀྱིལ་འཁོར་སྤྲོས་བཅས་ཞི་ཁྲོའི་བསྐྱེད་བཟླས་དང་། སྤྲོས་མེད་རྫོགས་རིམ་ཆོས་ཉིད་མངོན་སུམ་དོན་གྱི་དཀྱིལ་འཁོར་ལ་བལྟས་པས་སྣང་བ་བཞི་པོ་ཚད་དུ་ཕྱིན་ཏེ། གཞོན་ནུ་བུམ་སྐུའི་མངོན་དུ་བསྒྲུབ་པ་སྟེ། རང་ཤར་ལས། དཀྱིལ་འཁོར་རྣམ་པ་གསུམ་དུ་འདོད། །རང་བཞིན་དཀྱིལ་འཁོར་ཆེན་པོ་དང་། །རྩ་བའི་དཀྱིལ་འཁོར་ཆེན་པོ་དང་། །གཟུགས་བརྙན་དཀྱིལ་འཁོར་གསུམ་དུ་བསྟན། །ཞེས་སོ། །གཉིས་པ་ཇི་ལྟར་བསྐུར་བ་དབང་གི་རང་བཞིན་ནི། དེའང་གདོད་ནས་འགྲོ་བའི་ཁམས་ལ་རྡོ་རྗེ་བཞིའི་རང་བཞིན་ཡེ་ཁྱབ་ཏུ་གནས་པ་ནི་རྒྱུད་ལས། དབང་མཆོག་རང་ལ་མེད་གྱུར་ན། །བསྐུར་བས་ཐོབ་པར་ག་ལ་འགྱུར། །བྲ་སྲན་འབྲས་སུ་དབང་བསྐུར་ཡང་། །དེ་ལ་འབྲས་ཀྱི་དངོས་སྣང་མེད། །ཅེས་སོ། །དེ་བླ་མའི་གདམས་ངག་བརྡ་ཐབས་རྟེན་འབྲེལ་གྱི་ཆོ་གས་སད་པར་མ་བྱས་ན་གྲོལ་བར་མི་འགྱུར་ལ། དེའི་ཕྱིར་དང་པོ་སྨིན་བྱེད་ཀྱི་དབང་བཞི་བསྐུར་བ་ནི་ལམ་གྱི་གཞི་ཡང་དག་པ་ཡིན་པས་དེའི་ངེས་པ་ནི་ཐལ་འགྱུར་ལས། དབང་བསྐུར་བ་ཡི་ཆོ་ག་བཤད། །ཕྱི་དང་ནང་དང་གསང་བ་དང་། །གསང་བ་ཡོངས་སུ་རྫོགས་པ་ཡིས། །སྡེབས་ནི་རྣམ་པ་བཞི་དག་གི །འགྲོ་བའི་ལུས་ངག་ཡིད་སེམས་བཞི། །རྣམ་པར་དག་པར་བྱ་བའི་ཕྱིར། །དབང་ནི་རྣམ་པ་བཞི་ཡིས་ཀྱང་། །སྐལ་བ་ལྡན་པ་སྨིན་པར་བྱ། །སྤྲོས་བཅས་ཉིད་དང་སྤྲོས་མེད་དང་། །ཤིན་ཏུ་སྤྲོས་པ་མེད་པ་དང་། །དེ་བཞིན་རབ་ཏུ་སྤྲོས་པ་མེད། །དབྱེ་བ་བཞི་ཡི་ཚུལ་གྱིས་ནི། །དད་ལྡན་རང་རྒྱུད་སྨིན་པར་བྱེད། །ཅེས་སོ། །དེ་ལ་དང་པོ་སྤྲོས་བཅས་ལའང་སྤྲོས་བཅས་ཆེན་པོ་དོན་ཚན་སུམ་ཅུ་རྩ་དྲུག་གི་རྣམ་པར་གཞག་པ་དང་། སྤྲོས་བཅས་འབྲིང་དེ་ལས་ཅུང་ཟད་བསྡུས་པ་མཚན་བཅས་རྒྱུ་མཚོན་དང་། མཚན་མེད་ཡེ་ཤེས་ཀྱི་དབང་གཉིས་ཀྱིས་རྩིས་མགོ་བསྡུས་པའི་རྣམ་པར་གཞག་པ་དང་། སྤྲོས་བཅས་བསྡུས་པའི་དོན་སྤྲོས་ཏེ། རིག་པའི་ཡེ་ཤེས་ལྔ་མཚོན་པ་རྡུལ་ཚོན་གྱི་དཀྱིལ་འཁོར་དུ། བདག་དང་སློབ་མ་ཞུགས་ནས། བུམ་པ་དང་། གསང་བ་དང་། ཤེས་རབ་ཡེ་ཤེས་དང་། ཚིག་དབང་རྫོགས་པ་ཆེན་པོ་བརྡ་བཞིས་བསྐུར་ནས་དབང་གི་དགའ་སྟོན་དུ་བྱེད་པའི་བར་ཏེ། འདི་དག་གི་དབྱེ་བ་རྒྱས་པ་ནི་ཐེག་པའི་མཆོག་གི་རིམ་ཁང་དྲུག་པ་ལས་ཆེས་གསལ་ཞིང་། སྤྲོས་བཅས་གོང་མ་ཆེ་འབྲིང་གཉིས་ནི་ལག་ལེན་དུ་འདེབས་པའི་རྒྱུན་བར་སྐབས་ནས་ཆད་པར་གྲགས་ཀྱང་། དོན་སྤྲོས་སམ་སྤྲོས་བཅས་བསྡུས་པ་ནི་ད་ལྟ་ལག་ལེན་དུ་འདེབས་པ་བི་མ་ལས་ལྕེ་བཙུན་ལ་དངོས་སུ་བསྐུར་བས་ད་ལྟའི་བར་དུ་ནུབ་པ་མེད་པ་ནི། ཀུན་མཁྱེན་ཆེན་པོས། འདི་ནི་བི་མ་ལས་ལྕེ་བཙུན་ལ་དངོས་སུ་བསྐུར་བའི་རིམ་པ་སྟེ། དེང་སང་ཡང་ཕྱག་ལེན་དུ་མཛད་དོ། །གཞན་གཉིས་གུ་རུ་ཇོ་བེར་ནས་ཆད་པ་ཡིན་ཞེས་ཀྱང་གྲགས་ལ། དེའི་གོང་ཙམ་ནས་བརྡ་ཙམ་ལས་ཕྱག་ལེན་དུ་མེད་དོ་ཞེས་ཀྱང་གྲགས་ཏེ། གཏེར་ནས་བྱོན་པ་ཕྱག་བཞེས་སུ་འདེབས་དཀའ་བས་མ་བཏབ་པར་མངོན་ལ། དོན་སྤྲོས་ཀྱིས་ཆོག་པ་དང་། ལག་ལེན་དུ་འདེབས་ནའང་དབང་གི་རྩ་བ་ཡོད་པས་དཀའ་བ་མེད་ལ། བཏབ་ཀྱང་འགལ་བ་མེད་དོ་ཞེས་བླ་མའི་གསུང་ངོ་། །ཞེས་ཞལ་གྱིས་འཕངས་ལ། དོན་དུ་དབང་གི་སྤྲོས་པ་མཐའ་ཡས་པ་འདི་དག་རྩ་བའི་དབང་བཞི་པོའི་རྒྱབ་བརྟེན་རྣམས་ཡལ་ག་ལྟ་བུ་ཡིན་ཕྱིར་རྡོ་རྗེ་སློབ་དཔོན་དཀྱིལ་འཁོར་གྱི་བདག་པོའི་ས་ལ་ངེས་པར་བཞུགས་པའི་སྐྱེས་བུ་དམ་པ་དགོངས་སྤྱོད་ཀྱི་ནུས་པ་ཚད་དུ་ཕྱིན་པ་ཞིག་གིས་ནི་རྩ་དབང་ཐོབ་པ་གཞིར་བཞག་ནས་ལེ་ལག་ཕྲན་བུ་ལ་སྤྲོ་བསྡུ་བྱར་ཡོད་དེ་སྤྲོས་བཅས་འབྲིང་པོའི་མཚན་མེད་ཡེ་ཤེས་ཀྱི་དབང་གི་སྐབས་སུ་རང་ཤར་ལས། རྟོགས་པའི་ཡེ་ཤེས་དབང་མཆོག་ནི། །ཅིར་སྣང་རིག་པར་ཤེས་པའོ། །རིག་པ་དགག་བསྒྲུབ་མེད་པ་ཡིས། །དབང་རྣམས་དུས་གཅིག་རྫོགས་པའོ། །དབང་རྣམས་གྲོལ་བྱེད་གདམས་ངག་གོ །དམིགས་མེད་དཀྱིལ་འཁོར་ཆེན་པོ་ཡི། །དབང་ནི་རང་ལ་ཡོད་པའོ། །དེ་ཡང་དོན་ལ་བཀྲོལ་ཏེ་གསུངས། །གཅིག་བཀྲོལ་གཉིས་བཀྲོལ་ཐམས་ཅད་བཀྲོལ། །གྲོལ་བ་རང་བྱུང་གཞན་ལས་མེད། །རང་བྱུང་དབང་ཆེན་དེ་བཞིན་ནོ། །དོན་གྱི་དབང་མཆོག་དཀྱིལ་འཁོར་ལ། །གཅིག་རྫོགས་གཉིས་རྫོགས་ཐམས་ཅད་རྫོགས། །དོན་དབང་ཡེ་ཤེས་མཚོན་པ་ལ། །གཅིག་མེད་གཉིས་མེད་ཐམས་ཅད་མེད། །རྡོ་རྗེའི་དོན་རྟོགས་དབང་ཆེན་ལས། །གཅིག་བྱུང་གཉིས་བྱུང་ཐམས་ཅད་བྱུང་། །སྟོང་པ་ཡེ་ཤེས་དབང་ཆེན་ལས། །གཅིག་སྐྱེ་གཉིས་སྐྱེ་ཐམས་ཅད་སྐྱེ། །རྟོགས་ན་དབང་མཆོག་དེ་ལྟར་བསྐུར། །ཞེས་དབང་ཐམས་ཅད་ཀྱི་རྩ་བ་རང་བྱུང་གི་ཡེ་ཤེས་མངོན་དུ་གྱུར་པ་ཁོ་ན་ཡིན་ལ། དེ་ཉིད་ཡིན་ཚུལ་ཇི་བཞིན་པ་མངོན་དུ་གྱུར་པ་ལ་དབང་ཐོབ་པའི་མཚན་ཉིད་དུ་ཁོ་བོ་ཅག་འདོད་དེ། དེ་སྐད་དུ་ཀློང་ཆེན་པས་ཀྱང་དེ་དག་གི་དོན་མངོན་པར་རྟོགས་པ་ལག་ལེན་ལ་བསྐུར་ན། བླ་མ་གྲུབ་པ་ཐོབ་པ་རྣམས་ཀྱིས་སིལ་བུ་དུམ་བུ་གང་རུང་རེས་ཀྱང་སློབ་མ་ལ་དབང་རྫོགས་པར་ཐོབ་པས་ཇི་སྐད་གསུངས་པ་དེ་འགྲུབ་ལ། གྲུབ་པ་མ་ཐོབ་པ་རྣམས་ཀྱིས་དེ་ཐམས་ཅད་དྲིལ་ནས་བསྐུར་བས་དོན་འགྲུབ་པའི་ཕྱིར་དེའི་རྣམ་པར་གཞག་པ་ལ་ཞེས་གསུངས་པའི་ཕྱིར་རོ། །དེ་ལྟ་ནའང་ཕྱི་མཐའི་དུས་འདིར་ཞྭ་དཔེ་ལྷམ་ལ་བཀབ་སྟེ། ཆོས་ལ་དབང་ཟ་བའི་གང་ཟག་མང་བས་དེ་ལྟ་བུའི་རྡོ་རྗེའི་དམྱལ་བ་བསྒྲུབ་པའི་ལས་ཡིན་པའི་ཕྱིར་སྤང་བར་བྱ་ལ། ཚུལ་འདི་ནི་གདོད་མའི་མགོན་པོ་དང་ཞལ་མི་གཉིས་པ་ཀུན་མཁྱེན་ངག་གི་དབང་པོ་ལྟ་བུའི་སྤྱོད་ཡུལ་དུ་ངེས་པས། མཆོག་གི་སྤྲུལ་པའི་སྐུ་འདིའི་དགོངས་གཏེར་མན་ངག་གི་བསྟན་བཅོས་རྣམས་སུ་རྒྱལ་བའི་གསུང་རབ་སྤྱི་དང་། ཁྱད་པར་འོད་གསལ་རྫོགས་པ་ཆེན་པོའི་དབང་ལུང་མན་ངག་གི་གནད་དོན་ཐམས་ཅད་ཆུ་བརྒྱ་ཟམ་འོག་ལྟ་བུར་འདུས་པའི་འཕྲུལ་གསང་ཆེན་པོ་ཡོད་པའི་ཕྱིར། སྙིང་ཏིག་གི་བསྟན་པའི་སྲོག་ཤིང་འདི་ཁོ་ནར་ཡོད་པས་བསྟན་པ་འདི་འཛིན་པ་རྣམས་ཀྱིས་འདི་དག་གི་དབང་ལུང་མན་ངག་གི་རྒྱུན་ལ་གཅེས་སྤྲས་སུ་མཛད་པས་དོན་གྱི་ས་ཟིན་ཉམས་པ་མེད་དོ། །འདིར་རྩ་བའི་དབང་རྣམ་པ་བཞིའི་མདོ་དོན་ནི། དང་པོར་ཕྱི་སྤྲོས་བཅས་བུམ་པའི་དབང་གིས་ལུས་ཀྱི་སྒྲིབ་པ་སྦྱོང་། སྐུའི་ནུས་པ་འཇུག །བསྐྱེད་རིམ་སྒོམ་པ་ལ་དབང་། དེ་ནས་ནང་སྤྲོས་མེད་གསང་བའི་དབང་གིས་ངག་གི་སྒྲིབ་པ་སྦྱོང་། གསུང་གི་ནུས་པ་འཇུག །རྫོགས་རིམ་གཏུམ་མོ་ཙཎྜ་ལི་དང་ཡི་གེ་འཁོར་ལོ་སྔགས་བཟླ་བ་ལ་དབང་། ཤིན་ཏུ་སྤྲོས་མེད་ཤེས་རབ་ཡེ་ཤེས་ཀྱི་དབང་གིས་ཡིད་ཀྱི་སྒྲིབ་པ་སྦྱོང་། ཐུགས་ཀྱི་ནུས་པ་འཇུག །བདེ་ཆེན་ཟུང་འཇུག་སྒོམ་པ་དང་ཀ་དག་ཆོས་ཉིད་ཀྱི་ཡེ་ཤེས་རྟོགས་པ་ལ་དབང་། རབ་ཏུ་སྤྲོས་མེད་ཚིག་དབང་རིན་པོ་ཆེས་སྒྲིབ་པ་ཐམས་ཅད་པ་ཤེས་བྱ་ལ་རྨོངས་པའི་རང་བཞིན་སྦྱོང་། རང་བྱུང་འོད་གསལ་གྱི་ནུས་པ་འཇུག །མངོན་སུམ་ལྷུན་གྲུབ་ཀྱི་དོན་ཉམས་སུ་ལེན་པ་ལ་དབང་བ་སྟེ། དེ་དག་ལ་ནང་གསེས་ཀྱི་དབྱེ་བ་ནི་དཔག་ཏུ་མེད་པར་ཡོད་ལ་རྣམ་པ་བཞིར་ངེས་པའི་འཐད་པ་ནི། སྐལ་བ་དང་ལྡན་པའི་གང་ཟག་གཅིག་ལམ་འདིར་འཇུག་པ་ལ། ཐོག་མར་ཕྱི་སྤྲོས་བཅས་ཀྱི་དབང་གིས་སྤྲོས་པ་མ་བཅད་ན་སྣང་ཤེས་ཚོགས་པའི་སྤྲོས་པ་མི་ཆོད། ནང་སྤྲོས་པ་མེད་པས་གནད་དུ་མ་བསྡུས་ན། སེམས་ལམ་དུ་མི་ཚུད། གསང་བ་ཤིན་ཏུ་སྤྲོས་པ་མེད་པས་མཐའ་མ་བཅད་ན་སྒྲོན་མ་ལམ་དུ་མི་ལང་། བླ་ན་མེད་པ་རབ་ཏུ་སྤྲོས་པ་མེད་པས་ངོ་མ་སྤྲད་ན་མཐོང་ཕྱེད་ཀྱི་ལམ་མི་གསལ། དེ་བཞིན་དུ་ཕྱིར་རླུང་སེམས་གཉིས་དང་། ཕ་མའི་རྒྱུ་རྐྱེན་གཉིས་ཏེ་བཞི་དག་པའི་ཐབས་དང་། ནང་དུ་འཁོར་ལོ་རྣམ་པ་བཞིའི་རྩའི་ཁྱད་པར་བཞི་ལ་འཇུག་པའི་ཐབས་དང་། གསང་བར་སྒྲོན་མ་བཞི། སྣང་བ་བཞི་སྟོན་པའི་ཐབས་དང་། བླ་ན་མེད་པར་རྟགས་བཞི་ངེས་པ་ལས། ཚད་བཞིའི་ངེས་པའི་འབྲས་བུ་སྐུ་བཞིར་འབྱུང་བས་ཀྱང་བཞིར་ངེས་པའོ། །གསུམ་པ་དབང་བསྐུར་མཐར་ཕྱིན་པའི་འབྲས་བུའི་ངེས་པ་ལ་གཉིས། གནས་སྐབས་དང་། མཐར་ཐུག་གོ །དང་པོ་ལ་མཚན་ཉིད་ཐེག་པ་དང་བསྟུན་ནས་ལམ་གྱི་ཆོད་ཚུལ་སྤྱིར་བསྟན་པ་དང་། རྡོ་རྗེའི་ཐེག་པ་དང་བསྟུན་ནས་རིག་འཛིན་བཞིའི་ཐོབ་ཚུལ་བྱེ་བྲག་ཏུ་བཤད་པའོ། །དང་པོ་ནི། སྤྲོས་བཅས་ཀྱིས་དྲན་པ་ཉེ་བར་བཞག་པ་བཞི་ལ་སོགས་ཏེ་ཚོགས་ལམ་བཅུ་གཉིས་ཐོབ་པའི་རྟེན་དང་། སྤྲོས་མེད་ཀྱིས་དྲོད་རྩེ་བཟོད་ཆོས་ལ་སོགས་ཏེ་དབང་པོ་ལྔ་དང་སྟོབས་ལྔའི་རང་བཞིན་སྦྱོར་ལམ་ངེས་འབྱེད་ཆ་བཞི་རྫོགས་པའི་རྟེན་བྱེད། ཤིན་ཏུ་སྤྲོས་མེད་ཀྱིས་དྲན་དང་ཆོས་རབ་རྣམ་འབྱེད་ལ་སོགས་ཏེ་བྱང་ཆུབ་ཡན་ལག་བདུན་གྱི་རང་བཞིན་མཐོང་ལམ་རྫོགས་པའི་རྟེན་བྱེད། རབ་ཏུ་སྤྲོས་མེད་ཀྱིས་ཡང་དག་པའི་ལྟ་བ་ལ་སོགས་ཏེ། འཕགས་ལམ་ཡན་ལག་བརྒྱད་ཀྱི་རང་བཞིན་སྒོམ་ལམ་ས་དགུ་རྫོགས་པའི་རྟེན་བྱེད་པའོ། །འདི་དག་གི་དབྱེ་བ་ཁོ་བོའི་མན་ངག་པདྨ་དཀར་པོ་ལའང་བྲིས་སོ། །གཉིས་པ་ནི། དབང་རྣམ་པ་བཞིའི་འཇུག་པ་རྗེས་སུ་དྲན་པ་ལས་རིག་འཛིན་གྱི་ས་བཞི་སྟེ། དེ་ཡང་སེམས་ལྷའི་སྐུར་སྨིན་ཡང་ལུས་མ་སྨིན་པ་རྣམ་པར་སྨིན་པའི་རིག་འཛིན་དང་། ཚེ་འདི་ཉིད་ལ་གྲོལ་བས་སྐྱེ་འཆི་ལ་རང་དབང་ཅན་ཚེ་དབང་གི་རིག་འཛིན་དང་། ལུས་སེམས་ལྷར་སྨིན་པ་ཕྱག་རྒྱ་ཆེན་པོའི་རིག་འཛིན་དང་། རང་གཞན་གྱི་དོན་གཉིས་ལྷུན་གྱིས་གྲུབ་པ་ལྷུན་གྲུབ་རིག་འཛིན་ཏེ་བཞི་ལས། དབང་དུ་བསྒྱུར་བ་དང་། མ་བསྒྱུར་བ་གཉིས་གཉིས་ཏེ་བརྒྱད་དུ་ངེས་པ་ལ། ཆ་ཤས་ཀྱི་དབྱེ་བས་བཞི་བཞིར་ཕྱེ་ན། དང་པོ་རྣམ་སྨིན་ནམ་རྣལ་འབྱོར་གྱི་ས་ལའང་། རྣལ་འབྱོར་དང་། བྱ་བའི་རྣལ་འབྱོར་དང་། སྤྱོད་པའི་རྣལ་འབྱོར་དང་། བསྒྱུར་བའི་རྣལ་འབྱོར་དང་བཞི། ཚེ་དབང་ངམ་རྣལ་འབྱོར་ཆེན་པོ་ལ། ཤིན་ཏུ་རྣལ་འབྱོར་གྱི་ས་དང་། རང་ས་ངེས་པའི་རྣལ་འབྱོར་གྱི་ས་དང་། སྤྲོས་པའི་རྣལ་འབྱོར་གྱི་ས་དང་། བྱ་བྲལ་རྫོགས་པའི་རྣལ་འབྱོར་གྱི་ས་སྟེ་བཞིའོ། །ཕྱག་རྒྱ་ཆེན་པོའམ་འབྱེད་པའི་རྣལ་འབྱོར་གྱི་ས་ལ། བརྡའི་ས་དང་། དོན་གྱི་ས་དང་། བརྡ་དོན་དབྱེར་མེད་ཀྱི་ས་དང་། མ་འདྲེས་པའི་ས་སྟེ་བཞིའོ། །ལྷུན་གྲུབ་བམ་རྟོགས་པའི་རྣལ་འབྱོར་གྱི་ས་ལ་རྫུ་འཕྲུལ་འཕྲུལ་པའི་ས་དང་། ཁྱད་པར་རྟོགས་པའི་ས་དང་། མངོན་པར་འབྱུང་བའི་ས་དང་། དཔའ་བོ་རིགས་འབྱེད་ཀྱི་ས་སྟེ་བཞི། སྤྱིར་བསྡོམས་པས་བཅུ་དྲུག་གོ། །དེ་ལྟར་ས་བཅུ་དྲུག་ལ་རྫུ་འཕྲུལ་བརྒྱ་ཐམ་པ་འབྱུང་བས་རིག་འཛིན་གྱི་སར་བཞག་པའི་ངེས་འབྱེད་ནི། ས་དང་པོ་ལ་རང་གི་ལུས་བརྒྱ་སྟོང་དུ་སྤྲུལ་པ་དང་། དེ་དག་ལ་ཡན་ལག་བརྒྱ་སྟོང་དུ་སྤྲུལ་པ་དང་། ལུས་གཅིག་ལ་མགོ་བརྒྱ་སྟོང་དུ་སྤྲུལ་པ་དང་། ལུས་བརྒྱ་སྟོང་ལ་མགོ་གཅིག་པར་སྤྲུལ་པ་དང་། མགོ་གཅིག་ལ་ལུས་མི་འདྲ་བ་བརྒྱ་སྟོང་སྤྲུལ་ནས་དེ་ལས་སྤྲུལ་པ་འགྱེད་པ་དང་ལྔ། ལུས་ལ་མགོ་དང་ཡན་ལག་མི་འདྲ་བ་དཔག་ཏུ་མེད་པར་སྤྲུལ་པ་དང་དྲུག །སྐྱེ་བ་སྣ་ཚོགས་པར་སྤྲུལ་པ་དང་བདུན་ནི་དབང་དུ་གྱུར་པའི་ས་རྟོགས་པ་ལས་བྱུང་ངོ་། །ས་གཉིས་པ་ལ་རང་གིས་ཁོག་པ་ཁ་ཕྱེ་ནས་གློ་སྙིང་རྣམས་གཞན་ལ་སྟོན་པར་ནུས་པ་དང་། ལུས་ཀྱི་སྟོད་ནས་མེ་འབར་བ་ལ་སྨད་ནས་ཆུ་འབྲུབ་པར་ནུས་པ་དང་། ཡན་ལག་བཅད་ནས་ཕྱོགས་བཞིར་གཏོར་ནུས་པ་དང་། མིག་ལ་སོགས་པའི་དབང་པོ་ལྔ་ཐང་ལ་ལྷུང་བར་ནུས་པ་དང་། ལུས་ཀྱི་སྟོབས་ཀྱིས་རི་བོ་འཕེན་པར་ནུས་པ་དང་། ཕྱིའི་རྒྱ་མཚོ་ཆེན་པོ་ནམ་མཁའ་ལ་སྤར་བར་ནུས་པ་དང་། གཟའ་སྐར་རྣམས་ཐང་ལ་འདྲུལ་པར་ནུས་པ་དང་བདུན་ནི་དབང་གི་དུས་སུ་ཡན་ལག་བདུན་སྔོན་དུ་སོང་བ་ལས་བྱུང་ངོ་། །ས་གསུམ་པ་ལ་རླུང་ཞགས་པར་འཆིང་ནུས་པ་དང་། འགྲོ་བའི་བསམ་པ་གཞན་དུ་བསྒྱུར་བ་དང་། འཇིག་རྟེན་སྐྱོང་བའི་ལྷའི་དབང་ཕྱུག་རྣམས་སྒྲོལ་བར་ནུས་པ་དང་། མཁའ་འགྲོ་མའི་ཡིད་འཕྲོག་པར་ནུས་པ་དང་། འགྲོ་བ་བརྒྱ་སྒྲོལ་ཞིང་བསྒྲལ་བ་རྣམས་གསོ་བར་ནུས་པ་དང་། ལྷ་དང་ཀླུ་དང་གནོད་སྦྱིན་གྱི་བུ་མོ་ལ་རོལ་པར་ནུས་པ་དང་། དབང་ཕྱུག་ཆེན་པོ་ལ་སོགས་པ་འཇིག་རྟེན་གྱི་ལྷ་ཆེན་པོ་རྣམས་ཀྱི་སྟོབས་ཉམས་པར་ནུས་པ་དང་བདུན་ནི་དབང་བསྐུར་བའི་དུས་སུ་སེམས་བསྐྱེད་པ་ལས་བྱུང་ངོ་། །ས་བཞི་པ་ལ་ནམ་མཁའ་རྡོ་རྗེར་བསྒྱུར་ནུས་པ་དང་། མེ་ཆུར་བསྒྱུར། ཆུ་མེར་བསྒྱུར། ས་མེར། ས་ཆུར། རླུང་མེར། མེ་རླུང་དུ་བསྒྱུར་བར་ནུས་པ་དང་བདུན་ནི་ཡི་གེ་སྤྲོ་བསྡུ་བསྒོམས་པ་ལས་བྱུང་ངོ་། །ས་ལྔ་པས་ནམ་མཁའ་བདུན་པ་ལ་དབང་བསྒྱུར་བར་ནུས་ཏེ་སྟོང་ཉིད་བསྒོམས་པ་ལས་བྱུང་ངོ་། །ས་དྲུག་པས་མེ་བདུན་ལ་དབང་བསྒྱུར་བ་ནི་སྔོན་དུ་དབང་གི་ཤེས་བྱེད་ལས་བྱུང་ངོ་། །ས་བདུན་པས་ས་གཅིག་ནས་གཉིས་སུ་བྱས་པའི་བདུན་ལ་དབང་བ་ནི་འབྱུང་བ་རིམ་བརྩེགས་བསྒོམས་པ་ལས་བྱུང་ངོ་། །ཡང་ཆུ་བདུན་ལ་དབང་བ་ནི་སྔོན་འགྲོ་སོང་བ་ལས་བྱུང་བའོ། །ས་བརྒྱད་པས་རླུང་བདུན་ལ་དབང་བ་ནི་འཁོར་ལོ་བཞིའི་རླུང་སྦྱངས་པ་ལས་བྱུང་ངོ་། །ས་དགུ་པས་བྱང་ཆུབ་ཀྱི་ཡན་ལག་བདུན་གྱིས་བསྐྱོད་ནུས་པ་ནི་སྦྱོར་བ་སྔོན་དུ་སོང་བ་ལས་བྱུང་བའོ། །ས་བཅུ་པས་ཆོས་སུ་བྱ་བ་བདུན་ལ་དབང་བ་ནི་ལྷ་བསྒོམས་པ་ལས་བྱུང་བའོ། །ས་བཅུ་གཅིག་པས་རྟ་སྤྲིན་གྱི་ཤུགས་ཅན་བདུན་སྤྲུལ་ནུས་པ་ནི་བརྩོན་འགྲུས་བརྩམས་པ་ལས་བྱུང་ངོ་། །ས་བཅུ་གཉིས་པས་དགེ་སློང་བསིལ་བྱེད་ཅན་བདུན་སྤྲུལ་ནུས་པ་ནི་དམ་ཚིག་དང་སྡོམ་པ་ལ་གནས་པ་ལས་བྱུང་ངོ་། །ས་བཅུ་གསུམ་པས་ལྷའི་གཞལ་མེད་ཁང་བདུན་སྤྲུལ་ནུས་པ་ནི་གཞལ་ཡས་ཁང་བསྒོམས་པ་ལས་བྱུང་བའོ། །བཅུ་བཞི་པས་འཇིག་རྟེན་གྱི་ཁམས་བདུན་སྤྲུལ་ནུས་པ་ནི་བླ་མ་མཉེས་པར་བྱས་པ་ལས་བྱུང་ངོ་། །བཅོ་ལྔ་པས་ཡི་དམ་གྱི་ལྷ་བདུན་སྤྲུལ་ནུས་པ་ནི་ཡི་དམ་བསྒོམས་པ་ལས་བྱུང་ངོ་། །བཅུ་དྲུག་པས་ལྷ་མོ་བདུན་སྤྲུལ་ཞིང་གཟུགས་སོགས་ཡུལ་དྲུག་གི་དག་བྱེད་ལ་ལོངས་སྤྱོད་ལ། འགྲོ་དྲུག་གི་སྐྱེ་གནས་སྟོན་པར་ནུས་པ་དང་བཅུ་དགུ་ནི་དབང་རྣམས་རྫོགས་པ་ལས་བྱུང་བའོ། །དེ་ལྟ་བུའི་རྫུ་འཕྲུལ་བརྒྱ་ཐམ་པའི་ལུས་མི་འདྲ་བའི་གྲངས་བཞིན་དག་བྱེད་ཀྱི་ཕྲིན་ལས་ཀྱང་དེ་ཙམ་དུ་ཡོད་དོ། །གཞན་ཡང་གནས་སྐབས་སུ་ཐོབ་པ་ནི། སྤྲོས་བཅས་ཀྱི་དབང་གིས་ལུས་ཀྱི་ཡོན་ཏན་ཚེ་རིང་བ་དང་། ནད་མེད་པ་དང་། འགྲོ་བ་བྱམས་པ་དང་། བསོད་ནམས་ལྡན་པ་དང་། རྫུ་འཕྲུལ་འགྲུབ་པ་དང་། ལུས་ཀྱི་རྡུལ་ཕྲན་མཐོང་བ་ལ་སོགས་པའོ། །སྤྲོས་མེད་ཀྱིས་ངག་གི་ཡོན་ཏན་ཆོས་ཀྱི་འཁོར་ལོ་བསྐོར་བ་དང་། བཀའ་བསྟན་བཅོས་ལ་དབང་བ་དང་། གཞན་གྱི་རྣ་བར་སྙན་པ་དང་། བསྒོ་བ་བཞིན་ཉན་པ་དང་། མི་མ་ཡིན་པའི་སྐད་ཤེས་པ་ལ་སོགས་པའོ། །ཤིན་ཏུ་སྤྲོས་མེད་ཀྱིས་ཡིད་དག་པས། ཏིང་ངེ་འཛིན་དང་། རིག་པ་དང་། གང་བསམས་ཆོས་ཉིད་དུ་འཆར་བ་དང་། དུས་བཞི་མཉམ་པ་ཉིད་དུ་རྟོགས་པ་དང་། འཆི་འཕོ་བ་དང་སྐྱེ་བ་ཤེས་པ་ལ་སོགས་པའོ། །རབ་ཏུ་སྤྲོས་མེད་ཀྱིས་སེམས་ལས་སུ་རུང་བ་དང་། མངོན་པར་ཤེས་པ་དང་། ཚེ་དཔག་ཏུ་མེད་པར་བྱིན་གྱིས་བརླབ་པ་ལ་སོགས་པའོ། །ཁྱད་པར་དུ་དབང་བཞིས་སྣང་བ་བཞིའི་ཡོན་ཏན་ཐོབ་པ་ནི། སྤྲོས་བཅས་ཀྱིས་ཆོས་ཉིད་མངོན་སུམ། སྤྲོས་མེད་ཀྱིས་ཉམས་གོང་འཕེལ། ཤིན་ཏུ་སྤྲོས་མེད་ཀྱིས་རིག་པ་ཚད་ཕེབས། རབ་ཏུ་སྤྲོས་མེད་ཀྱིས་ཆོས་ཉིད་ཟད་པ་སྟེ། དེ་དག་རེ་རེ་བཞིན་ཕྱི་སྣང་བའི་ཡོན་ཏན་རེ་དང་། ནང་ཉམས་ཏིང་ངེ་འཛིན་རེ་དང་། གསང་བ་ལྟ་དགོངས་ཁྱད་པར་ཅན་རེ་དང་། ཡོངས་རྫོགས་བསྟན་པའི་ཚད་རེ་ཐོབ་ནས་ཟག་བཅས་མི་སྣང་བར་སངས་རྒྱས་ཀྱི་ས་ལ་སྦྱོར་བའོ། །ཞེས་ཀུན་མཁྱེན་ཆེན་པོ་བཞེད་དོ། །དེས་ནི་གནས་སྐབས་ཀྱི་ཡོན་ཏན་མདོར་བསྡུས་ནས་བཤད་ཟིན་ཏོ། །གཉིས་པ་མཐར་ཐུག་གི་འབྲས་བུ་ནི། མགོན་པོ་རྡོ་རྗེ་འཆང་གི་ས་སྟེ། སྤངས་པ་དང་རྟོགས་པའི་ཡོན་ཏན་ཐམས་ཅད་མཐར་ཕྱིན་པ་ཡིན་པས་སྒྲིབ་པ་མཐའ་དག་ལས་གྲོལ་བའོ། །དེའི་ཡོན་ཏན་ནི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་རང་བཞིན་ཅན་ཏེ་བསམ་གྱིས་མི་ཁྱབ་པའི་ཆོས་ཉིད་དུ་ངེས་ནའང་རེ་ཞིག་འདིར་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་མ་ལུས་པའི་བདག་ཉིད་ཅན་དུ་བསྡུ་ན་རྒྱུད་བླ་མའི་འགྲེལ་པ་ལས། དེ་ལྟར་དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་པོ་དེ་དག་རྣམ་པ་གཅིག་ཏུ་མངོན་པར་བསྡུས་ཏེ་དྲུག་ཅུ་རྩ་བཞིར་འགྱུར་རོ། །ཞེས་པ་ལས། སྟོབས་བཅུ་ནི་རྒྱུད་བླ་མར། གནས་དང་གནས་མིན་ལས་རྣམས་ཀྱི། །རྣམ་སྨིན་དང་ནི་དབང་པོ་དང་། །ཁམས་རྣམས་དང་ནི་མོས་པ་དང་། །ཀུན་འགྲོའི་ལམ་དང་བསམ་གཏན་ཚོགས། །ཉོན་མོངས་དྲི་མ་མེད་པ་དང་། །གནས་ནི་རྗེས་སུ་དྲན་པ་དང་། །ལྷ་ཡི་མིག་དང་ཞི་བ་དག །མཁྱེན་པའི་སྟོབས་ནི་རྣམ་པ་བཅུ། །ཞེས་གནས་དང་གནས་མ་ཡིན་པ་དང་། ལས་ཀྱི་རྣམ་པར་སྨིན་པ་དང་། མོས་པ་སྣ་ཚོགས་པ་དང་། ཁམས་དུ་མ་དང་། དབང་པོ་མཆོག་དང་མཆོག་མ་ཡིན་པ་དང་། ལམ་ཐམས་ཅད་དང་ཀུན་ནས་ཉོན་མོངས་པ་དང་། ས་རྣམ་པར་བྱང་བ་དང་། སྔོན་གནས་རྗེས་སུ་དྲན་བ་དང་། འཆི་འཕོ་དང་སྐྱེ་བ་དང་། ཟག་པ་ཟད་པ་དང་མཁྱེན་པའི་སྟོབས་ཏེ་སྟོབས་བཅུ། དེ་བཞིན་དུ་མི་འཇིགས་པ་བཞི་ནི་དེ་ཉིད་ལས། ཆོས་ཀུན་རྫོགས་པར་བྱང་ཆུབ་དང་། །གེགས་ནི་འགོག་པར་བྱེད་པ་དང་། །ལམ་སྟོན་པ་དང་འགོག་སྟོན་ལ། །མི་འཇིགས་པ་ནི་རྣམ་པ་བཞི། །ཞེས་ཆོས་ཐམས་ཅད་མངོན་པར་བྱང་ཆུབ་པ་ལ་མི་འཇིགས་པ། ཟག་པ་ཐམས་ཅད་ཟད་པར་མཁྱེན་པ་ལ་མི་འཇིགས་པ། བར་དུ་གཅོད་པའི་ཆོས་རྣམས་གཞན་དུ་མི་འགྱུར་བར་ངེས་པའི་ལུང་བསྟན་ལ་མི་འཇིགས་པ། ཕུན་སུམ་ཚོགས་པ་ཐམས་ཅད་ཐོབ་པར་འགྱུར་པ་ངེས་པར་འབྱུང་བའི་ལམ་ལ་མི་འཇིགས་པ་སྟེ་རྣམ་པ་བཞི། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ནི། དེ་ཉིད་ལས། འཁྲུལ་དང་ཅ་ཅོ་མི་མངའ་སྟེ། །སྟོན་ལ་དྲན་པ་ཉམས་མི་མངའ། །ལས་རྣམས་ཡེ་ཤེས་སྔོན་འགྲོ་དང་། །དུས་ལ་ཡེ་ཤེས་བསྒྲིབ་པ་མེད། །དེ་ལྟར་བཅོ་བརྒྱད་འདི་དག་གཞན། །སྟོན་པའི་མ་འདྲེས་ཡོན་ཏན་ཡིན། །ཞེས་པ་ལྟར། དེ་བཞིན་གཤེགས་པ་ལ་འཁྲུལ་པ་མེད་པ། ཅ་ཅོ་མེད་པ། སྙེལ་བ་མེད་པ། མཉམ་པར་མ་བཞག་པ་མེད་པ། ཐ་དད་པའི་འདུ་ཤེས་མེད་པ། སོ་སོར་མ་བརྟགས་པའི་བཏང་སྙོམས་མེད་པ། འདུན་པ་ཉམས་པ་མེད་པ། བརྩོན་འགྲུས་ཉམས་པ་མེད་པ། དྲན་པ་ཉམས་པ་མེད་པ། ཏིང་ངེ་འཛིན་ཉམས་པ་མེད་པ། ཤེས་རབ་ཉམས་པ་མེད་པ། རྣམ་པར་གྲོལ་བ་ཉམས་པ་མེད་པ། ལུས་ཀྱི་ལས་ཐམས་ཅད་ཡེ་ཤེས་ཀྱི་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ། ངག་གི་ལས་ཐམས་ཅད་ཡེ་ཤེས་ཀྱི་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ། ཡིད་ཀྱི་ལས་ཐམས་ཅད་ཡེ་ཤེས་ཀྱི་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ། འདས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་ལ་འཇུག་པ། མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་ལ་འཇུག་པ། ད་ལྟའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་ལ་འཇུག་པ་སྟེ་བཅོ་བརྒྱད་དོ། །སྐྱེས་བུ་ཆེན་པོའི་མཚན་སོ་གཉིས་ནི། མངོན་རྟོགས་རྒྱན་ལས། ཕྱག་ཞབས་འཁོར་ལོས་མཚན་དང་རུས་སྦལ་ཞབས། །ཕྱག་དང་ཞབས་སོར་དྲྭ་བས་འབྲེལ་བ་དང་། །ཕྱག་དང་ཞབས་བཅས་འཇམ་ཞིང་གཞོན་ཤ་ཆགས། །འདི་ཡི་སྐུ་ནི་མདུན་དག་མཐོ་བ་དང་། །སོར་མོ་རིང་དང་རྟིང་ཡངས་སྐུ་ཆེ་དྲང་། །ཞབས་འབུར་མི་མངོན་སྤུ་ནི་གྱེན་དུ་ཕྱོགས། །བྱིན་པ་ཨེ་ནྱ་ཡ་འདྲ་ཕྱག་རིང་མཛེས། །འདོམས་ཀྱི་སྦ་བ་སྦུབས་སུ་ནུབ་པའི་མཆོག །པགས་པ་གསེར་མདོག་པགས་པ་སྲབ་པ་དང་། །སྤུ་ནི་རེ་རེ་ནས་གཡས་ལེགས་འཁྲུངས་དང་། །ཞལ་མཛོད་སྤུས་བརྒྱན་རོ་སྟོད་སེང་གེ་འདྲ། །འདི་ཡི་དཔུང་པའི་མགོ་ཟླུམ་ཐལ་གོང་རྒྱས། །འདི་ལ་རོ་མི་ཞིམ་པའང་རོ་མཆོག་སྣང་། །སྐུ་ནི་ནྱ་གྲོ་ཏཱ་ལྟར་ཆུ་ཞེང་གབ། །གཙུག་ཏོར་འབུར་ལྡན་ལྗགས་རིང་མཛེས་པ་དང་། །ཚངས་དབྱངས་འགྲམ་པ་སེང་གེ་འདྲ་དང་ཚེམས། །ཤིན་ཏུ་དཀར་དང་ཐགས་བཟང་ཚད་མཉམ་དང་། །གྲངས་ནི་བཞི་བཅུ་ཐམ་པ་ཚང་བ་དང་། །སྤྱན་ནི་མཐོན་མཐིང་སྤྱན་རྫི་བ་མཆོག་གི །འདྲ་བ་འདི་དག་སུམ་ཅུ་རྩ་གཉིས་མཚན། །ཞེས་སོ། །དེ་དག་ནི་སྤྱིར་བསྟན་པ་སྟེ། དབྱེ་ན་སྔགས་ཀྱི་ཁྱད་པར་སྐུ་དང་ཡེ་ཤེས་བསམ་གྱིས་མི་ཁྱབ་པའི་རང་བཞིན་དང་ཞིང་ཁམས། མངོན་པར་ཤེས་པ་མཐའ་ཡས་པ་ལ་དབང་བསྒྱུར་བའི་ཆོས་ཉིད་བསམ་གྱིས་མི་ཁྱབ་པ་ཡོད་དེ་སྤྲོས་པས་ཆོག་གོ། །བཞི་པ་དབང་དེའི་སྲོག་ཏུ་གྱུར་པ་དམ་ཚིག་གི་ངེས་པ་མདོར་བསྟན་པ་ནི། དེ་ཡང་རྩ་བའི་དམ་ཚིག་སྐུ་གསུང་ཐུགས་གསུམ་ལ། ཡན་ལག་ཉི་ཤུ་རྩ་ལྔ་སྟེ། ཤེས་པར་བྱ་བ་ལྔ། མི་སྤང་བ་ལྔ། དང་དུ་བླང་བ་ལྔ། སྤྱད་པར་བྱ་བ་ལྔ། བསྒྲུབ་པར་བྱ་བ་ལྔ་སྟེ་ཉི་ཤུ་རྩ་ལྔའོ། །བྱེ་བྲག་གིས་དབྱེ་ན་རང་ཤར་ལས། འབུམ་སྡེར་གསུངས་པའི་དམ་ཚིག་རྣམས། །མདོར་བསྟན་ལེགས་པར་ཡིད་ལ་བཟུང་། །དེ་ཡང་མདོར་བསྟན་འདི་ལྟ་སྟེ། །རྟོགས་བྱེད་ལྟ་བའི་དམ་ཚིག་དང་། །སྤྱོད་པ་རྒྱུན་གྱི་དམ་ཚིག་དང་། །སྒྲུབ་པ་སྤྱི་ཡི་དམ་ཚིག་ནི། །ཐུན་མོང་སྤྱི་ཡི་དམ་ཚིག་དང་། །སྐུ་གསུང་ཐུགས་ཀྱི་དམ་ཚིག་དང་། །ཡན་ལག་གྲངས་ཀྱི་དམ་ཚིག་དང་། །གལ་མདོ་ངེས་པའི་དམ་ཚིག་རྣམས། མདོ་དང་རྒྱས་པ་ཆེན་པོའོ། །ཞེས་བསམ་གྱིས་མི་ཁྱབ་པར་བཤད་པ་ནས་འདིར་བླ་ན་མེད་པའི་དམ་ཚིག་རྣམ་པ་གསུམ་གྱིས་འགག་བསྡམ་པའི་བར་ཡི་གེ་མེད་པ་ལས། དེ་དུས་བསྲུངས་མཚམས་ལས་འདས་པའི། །མེད་དང་གཅིག་པུ་ཕྱལ་པ་ཡིས། །དེ་ཡི་གྲོགས་སུ་དེ་འགྱུར་རོ། །ཞེས་རང་ངོ་ཀ་དག་ལ་ལྟོས་ནས་ཁྲེགས་ཆོད་ཀྱི་དམ་ཚིག་ཆེན་པོར་འཁོར་འདས་སྣང་སྲིད་ཐམས་ཅད་བདེ་སྡུག་སྤང་བླང་ལས་འདས་པར་ལ་ཟློས་པས། དམ་ཚིག་ལ་བསྲུང་བྱ་སྲུང་བྱེད་ཀྱིས་ཕྱོགས་འཛིན་འཇུར་པོས་མ་བཅིངས་པས་ཕྱལ་བ་རང་བཞིན་ལྷུན་གྲུབ་ལ་ལྟོས་ནས་ཐོད་རྒལ་གྱི་དམ་ཚིག་ཏུ། སངས་རྒྱས་རང་ཆས་སུ་གནས་པས་རྐྱེན་སྣང་དང་བྱུང་ཚོར་གྱི་རྣམ་རྟོག་སྣང་རིག་ཅི་ཤར་གྱི་ངོ་བོ་གཉིས་སུ་མ་ཡིན་པར་རང་གྲོལ་གཏད་མེད་དུ་ཤེས་པས་གཅིག་པུ། དེ་དག་ཀྱང་ངོ་བོ་དང་རང་བཞིན་གྱི་འཛིན་སྟངས་གཉིས་མེད་ཡེ་ཤེས་ཀྱི་རོལ་པ་སྤང་བླང་དགག་བསྒྲུབ་ལས་འདས་པར་ཡེ་ནས་བྱང་ཆུབ་པས་མེད་པ་སྟེ། ཡེ་བཞག་ཆོས་ཉིད་ཀྱི་ངོ་བོ་སངས་རྒྱས་ནས་འཁོར་འདས་རིས་མེད་དུ་སངས་པའི་བར་དུ་བསླབ་པར་བྱ་བ་སྟེ། ཕྱི་མ་བླ་ན་མེད་པའི་དམ་ཚིག་ནི་བསླབ་བྱ་མཐར་ཐུག་ནས་ལྟ་བ་འཁོར་འདས་ལྷུན་རྫོགས་ཆེན་པོར་གནས་པ་ལ་དམ་ཚིག་བསྲུང་ཉམས་ལས་འདས་པའི་ཐ་སྙད་བརྡར་བརྟགས་ལ་དམ་ཚིག་གི་མིང་དུ་བརྗོད་པ་དཔེར་ན་བསླབ་བྱ་མཐར་ཐུག་ནས་ཀྱང་ཇི་བཞིན་པའི་འབྲས་བུ་ལ་མི་སློབ་པའི་ལམ་དུ་བཞག་པ་ལྟ་བུ་སྟེ། ཚུལ་དེའི་རིགས་པས་དམ་ཚིག་དེའི་ཡིན་ལུགས་ཤེས་པ་ཙམ་གྱིས་བསྲུངས་མཚམས་ལས་འདས་པའི་སར་ཕྱིན་པ་མ་ཡིན་པས་དེ་ལྟ་བུའི་ཡིན་ཚུལ་ཇི་བཞིན་པ་མངོན་དུ་མ་གྱུར་བར་རྩ་བ་དང་། ཡན་ལག་གི་དམ་ཚིག་ཐམས་ཅད་སྐུ་གསུང་ཐུགས་སུ་བསྡུས་ནས་ལམ་སོ་སོར་ཇི་སྐད་བསྟན་པ་བཞིན་བསྲུང་དགོས་ལ། མ་བསྲུངས་ན་མནར་མེད་པའི་དམྱལ་བ་ལ་སོགས་པར་ལྟུང་བའི་ཕྱིར་ཏེ་རང་ཤར་ལས། ཉམས་ན་གཉིས་ཀ་འཚིག་པར་འགྱུར། །སྐུ་ཡི་དམ་ཚིག་ཉམས་གྱུར་ན། །རྡོ་རྗེ་དམྱལ་བ་ཆེན་པོར་འཚེད། །འོ་དོད་འབོད་པའི་གནས་སུ་སྐྱེ། །དཔོན་གྱིས་ཉམས་ན་སྦྱང་ཐབས་མེད། །གཉིས་ཀ་ངུ་འབོད་ཆེན་པོར་སྐྱེ། །སློབ་མས་ཉམས་ན་སྦྱང་ཐབས་ཡོད། །གསུང་གི་དམ་ཚིག་ཉམས་གྱུར་ན། །སྣང་བ་འགགས་པར་འགྱུར་བ་ནང་། །མུན་རྟུལ་ཆེན་པོའི་གནས་སུ་སྐྱེ། །དེ་ནས་ཐོན་པར་གྱུར་ནས་ཀྱང་། །ལྐུགས་པ་དག་ཏུ་སྐྱེ་བར་འགྱུར། །ཐུགས་ཀྱི་དམ་ཚིག་ཉམས་གྱུར་ན། །ཡིད་འཁྲུག་ཆེན་པོའི་གནས་སུ་སྐྱེ། །རྟག་ཏུ་རྩོད་པ་རྒྱུན་མི་འཆད། །འཐབ་དང་སྡུག་བསྔལ་ཆེན་པོ་དང་། །ཡང་ན་དྲན་པ་མེད་པར་འགྱུར། །ཡང་ན་དྲན་པ་རེངས་པར་འགྱུར། །སྨྱོ་འབོག་ནད་ཀྱིས་ཐེབས་པར་འགྱུར། །ཐ་མ་ངུ་འབོད་གནས་སུ་སྐྱེ། །ཞེས་དང་། ལེགས་པར་བསྲུངས་ན་ཕན་ཡོན་དཔག་ཏུ་མེད་དེ་གསང་སྙིང་ལས། རྒྱལ་བའི་རིགས་མཆོག་འཛིན་པ་དེ། །འཇིག་རྟེན་གཙོ་དང་འཁོར་གྱིས་བཀུར། །དམ་པ་མཆོག་དང་དམ་པ་ཡིས། །སྲས་དང་སྤུན་དགོངས་བྱིན་གྱིས་རློབས། །བདེ་གཤེགས་ཉིད་ཀྱི་ཡུལ་ལ་འཇུག །འཇིགས་མེད་ཀུན་ཏུ་བཟང་པོར་སྦྱོར། །ཞེས་སོ། །དེའི་ཕྱིར་རྡོ་རྗེའི་ཐེག་པའི་ལམ་ནི་ཁེ་ཉེན་ཤིན་ཏུ་ཆེ་སྟེ་གདོད་མའི་མགོན་པོས། ང་ཡི་ཆོས་ལ་སྤྱོད་པ་རྣམས། །ཚུལ་བཞིན་ཉམས་བླངས་སངས་རྒྱས་ཐོབ། །ཚུལ་མིན་སྤྱད་ན་དམྱལ་བར་སྐྱེ། །སེམས་ཅན་ཕལ་པར་སྐྱེ་མི་སྲིད། །དེ་ཕྱིར་ཁེ་ཉེན་ཤིན་ཏུ་ཆེ། །ཞེས་གསུངས་པ་ཡིན་ནོ། །གཉིས་པ་གྲོལ་བྱེད་ཀྱི་ལམ་ལ་འཇུག་པའི་རྣམ་པར་གཞག་པ་ནི། དེ་ཡང་ཐུན་མོང་གི་ལམ་ཐམས་ཅད་དུ་བསྐྱེད་རྫོགས་སྒོམ་པར་གསུངས་པ་མཐའ་དག་ཡིད་དཔྱོད་ཀྱི་རང་བཞིན་ལས་མི་འདའ་བའི་ཕྱིར་སྐབས་འདིར་དོར་བར་བྱ་སྟེ། རང་ཤར་ལས། མཚན་མ་ཚིག་གི་རྣལ་འབྱོར་ནི། །ཚིག་ལ་ཞེན་ཅིང་ཚིག་ལ་སྤྱོད། །མི་ཤེས་ཚིག་ལ་ལྟོས་བྱུང་ན། །དེ་ཉིད་གྲོལ་བར་ངས་མ་བཤད། །རྟགས་ལ་ལྟོས་པའི་རྣལ་འབྱོར་ནི། །རང་ཉིད་རྟགས་ལ་ལྟོས་གྱུར་ནས། །སྤྱོད་པས་གཞན་ལ་བརྔན་སེམས་བྱེད། །རང་གི་རྟོག་པ་ཉིད་ཀྱིས་བཅིངས། །དེ་ཡང་གྲོལ་བར་ངས་མ་བཤད། །རྗེས་སུ་འཇིག་པའི་རྣལ་འབྱོར་ནི། །གང་དག་མོས་པའི་ས་ལ་གནས། །མོས་པའི་སྤྱོད་པ་བྱེད་པ་སྟེ། །དང་པོའི་ས་ལ་རེ་བས་འཇིག །དེ་ཉིད་གྲོལ་བར་ངས་མ་བཤད། །ངང་ཉིད་ངེས་པའི་རྣལ་འབྱོར་ནི། །རྣམ་པར་མི་རྟོག་ཆིག་ཚུགས་སྒོམ། །མི་རྟོག་པ་ཡི་ངང་ཉིད་ཅན། །དེ་ཡང་གྲོལ་བར་ངས་མ་བཤད། །སྣང་བ་སེམས་ཀྱི་རྣལ་འབྱོར་ནི། །ཐམས་ཅད་ང་ཡི་སེམས་ལས་བྱུང་། །སེམས་ཉིད་རྟོགས་ན་ཅི་བྱར་ཡོད། །དེ་སྐད་ཀུན་ཏུ་རྗོད་བྱེད་པ། །ང་ཡིས་གྲོལ་བར་མ་བཤད་དོ། །འཇུག་པ་ལས་ཀྱི་རྣལ་འབྱོར་ནི། །དོན་ཉིད་བྱ་བར་འགྲུབ་པར་འདོད། །བྱ་བ་ཆེན་པོས་བཅིངས་པ་རྣམས། །དང་པོ་སེམས་བསྐྱེད་བྱ་བ་བྱེད། །དེ་ནས་བཟུང་ནས་བྱ་བ་རྣམས། །ཐམས་ཅད་བྱེད་ཅིང་བསྒྲུབ་པའོ། །དེ་ཡང་གྲོལ་བར་ངས་མ་བཤད། །བྱ་བ་རྒྱུ་ཡི་རྣལ་འབྱོར་ནི། །རྒྱུ་ཉིད་ལམ་དུ་སློང་བ་སྟེ། །རྒྱུ་ལ་རེ་ཞིང་རྒྱུ་ལ་ལྟོས། །རྒྱུ་ཉིད་མངོན་པར་སྟོན་པ་སྟེ། དེ་ཡང་གྲོལ་བར་ངས་མ་བཤད། །བྱེད་པ་རྐྱེན་གྱི་རྣལ་འབྱོར་ནི། །སྤྱོད་པས་ཡང་དག་དོན་འཚོལ་བ། །རིགས་མི་མཐུན་པའི་ཕྱོགས་འཛིན་པ། །དེ་ཡང་གྲོལ་བར་ངས་མ་བཤད། །མཐར་ཕྱིན་འབྲས་བུའི་རྣལ་འབྱོར་ནི། །རྟོགས་པ་ལམ་དུ་འཁྱེར་བ་སྟེ། །ས་དང་ལམ་ལ་མི་གནས་པར། །རང་གི་དེ་ཉིད་མཐོང་ནས་ནི། །ཡང་དག་གྲོལ་བ་ཆེན་པོར་འདོད། །ཡང་དག་དོན་གྱི་རྣལ་འབྱོར་ནི། །རང་གི་རྟོགས་པ་རྙེད་ནས་ཀྱང་། །བར་དོའི་སྣང་བ་དག་པ་ལ། །རང་གི་ཡང་དག་ཉིད་མཐོང་ན། །དེ་ནས་མཐར་ཕྱིན་གྲོལ་བར་འདོད། །མཐར་ཕྱིན་གྲོལ་བའི་རྣལ་འབྱོར་ནི། །ངེས་པ་རྙེད་པའི་ས་ཉིད་ལ། །རང་གི་དེ་ཉིད་རྙེད་མཐོང་ནས། །ཡང་དག་ས་ལ་འདའ་བར་འདོད། །བྱས་པ་རྫོགས་པའི་རྣལ་འབྱོར་ནི། །ཀ་དག་སངས་རྒྱས་ཆེན་པོ་ཡིན། །དེ་ལས་གཤེགས་སུ་མེད་པར་གསུངས། །རྣལ་འབྱོར་ཆེན་པོ་དེ་བཞིན་ལས། །ས་ལ་སྦྱང་དུ་མེད་པར་གསུངས། །ལམ་ལ་བགྲོད་དུ་མེད་པར་གསུངས། །ཞེས་སྔ་མ་བརྒྱད་ཀྱིས་བྱ་རྩོལ་དང་བཅས་པས་མི་གྲོལ་ལ། ཕྱི་མ་བཞི་ས་ལམ་ལ་འབད་རྩོལ་གྱི་སྤྲོས་པ་དོར་ནས་ཡེ་བཞག་རང་གྲོལ་གྱི་རྣལ་འབྱོར་ཆེན་པོར་གྲོལ་བར་འདོད་པའི་ཕྱིར་རོ། །ཁ་ཅིག་ཁམས་ཀྱི་དྲི་མ་བླང་དོར་གྱིས་སྦྱང་དུ་མེད་ན་དེ་ལྟའི་ལམ་གྱིས་ཅིས་གྲོལ་ཞེ་ན། རིག་པའི་གཤིས་ལུགས་གདོད་ནས་བླང་དོར་དང་བྲལ་ཞིང་ཡེ་གྲོལ་ལམ། ཅེར་གྲོལ། རང་གྲོལ། བཞག་གྲོལ། ཡོངས་གྲོལ་གྱི་ཆོས་ཉིད་ལས་མི་འདའ་བའི་ཕྱིར་ན། དེ་གློ་བུར་གྱི་དྲི་མས་སྦགས་པ་བླ་མའི་མན་ངག་གིས་བསལ་ཞིང་ཆོས་ཉིད་ཇི་བཞིན་པར་ངོ་སྤྲད་པ་ཙམ་ནས་གོམས་སུ་འཇུག་པ་ཙམ་ལས་གཞན་བཅོས་ལྷད་ཀྱིས་མི་གྲོལ་བའི་ཁར་ནོར་འཁྲུལ་གོལ་ཤོར་ལས་མ་འདས་པའི་ཕྱིར་ཏེ། དཔེར་ན་རྟ་བབས་ནས་བོང་བུ་ལ་ཞོན་པ་བཞིན་ནོ། །བློ་ཆུང་བ་གང་ཞིག་གསང་བ་བླ་ན་མེད་པའི་ཐེག་པ་འདིའི་དགོངས་པ་ལ་སྐྲག་པར་གྱུར་ན་གྲུབ་པའི་དབང་ཕྱུག་ཆེན་པོ་ས་ར་ཧ་པས་ཀྱང་། རྩ་བ་ཆོད་པའི་སེམས་ཉིད་ནམ་མཁའ་འདྲ། །བསྒོམ་དུ་མེད་པས་ཡིད་ལ་མི་བྱ་སྟེ། །ཐ་མལ་ཤེས་པ་རང་ལུགས་གཉུག་མ་ལ། །བཅོས་མའི་དམིགས་པ་དག་གིས་མི་བསླད་དེ། །རང་བཞིན་དག་པའི་སེམས་ལ་བཅོས་མི་དགོས། །མ་བཟུང་མ་བཏང་རང་ག་ཉིད་དུ་ཞོག །གལ་ཏེ་མ་རྟོགས་བློ་ལ་བསྒོམ་རྒྱུ་མེད། །རྟོགས་པ་ཅན་ལ་བསྒོམ་བྱ་སྒོམ་བྱེད་མེད། །ཇི་ལྟར་ནམ་མཁས་ནམ་མཁའ་དམིགས་སུ་མེད། །དེ་ལྟར་སྟོང་པས་སྟོང་པ་བསྒོམ་དུ་མེད། །གཉིས་མེད་ཤེས་པ་ཆུ་དང་འོ་མ་དང་། །སྣ་ཚོགས་རོ་གཅིག་བདེ་ཆེན་རྒྱུན་ཆད་མེད། །ཅེས་རིག་པ་གདོད་ནས་སྤྲོས་པ་དང་བྲལ་བར་བསྟན་ཅིང་། དེ་ལ་བསྐྱེད་རྫོགས་བཟླས་བསྒོམ་ལ་སོགས་པའི་དམིགས་པས་བཟོ་འཆོས་པ་ཡིད་དཔྱོད་ལས་མི་འདའ་ཞིང་ནོངས་པར་འགྱུར་པ་ནི་དེ་ཉིད་ཀྱིས། ཁ་ཅིག་དབང་བསྐུར་བ་ཡིས་ཡོངས་སུ་གདུངས་པར་བྱེད། །ཁ་ཅིག་ཧཱུྃ་ཕཊ་ཟེར་ཞིང་ཕྲེང་བ་ཡོངས་སུ་བགྲང་། །ཁ་ཅིག་གཤང་གཅི་ཁྲག་དང་ཁུ་བ་ཤ་རྣམས་ཟ། །ཁ་ཅིག་རྩ་དང་རླུང་གི་རྣལ་འབྱོར་སྒོམ་སྟེ་འཁྲུལ། །ཞེས་སོ། །དེའི་ཕྱིར་ཀ་དག་བསམ་ངོ་དང་བྲལ་ཞིང་བློས་བྱས་ཡིད་བྱེད་ལས་འདས་པའི་ཆོས་ཉིད་རྒྱུན་ཆད་མེད་པ་གཞིར་བཞག་ནས། ཐུན་མོང་མ་ཡིན་པའི་ལམ་འདིའི་ཁྱད་ཆོས་གནས་ལུགས་དེ་ཉིད་ཡིད་དཔྱོད་དུ་མི་གོལ་བ་མངོན་སུམ་འོད་གསལ་གྱི་ཡེ་ཤེས་ལ་བལྟ་བར་བྱེད་པའོ། །དེའང་ལམ་དུ་སྒོ་གསུམ་གྱི་དྲི་མ་དང་རྡོས་བཅས་ཀྱི་ཕུང་པོ་དང་། འགྱུ་བའི་རྟོག་པ་དང་། རགས་པའི་རླུང་སེམས་རྣམས་དག་དགོས་པས་སྣང་བ་བཞིའི་རིམ་པ་བསྟན་ཅིང་། དེ་དག་རང་དག་ལ་སོང་དུས་འོག་མའི་ས་ལམ་ཞར་ལ་རྫོགས་པའི་རྟགས་ཤར་ཏེ། གོང་མ་རྫོགས་པས་འོག་མ་ཞར་བྱུང་དུ་རྫོགས་པ་ལ་དགོངས་ནས་རྫོགས་པ་ཆེན་པོ་ས་གཅིག་པ་ལ་སྦྱང་བགྲོད་མི་དགོས་པ་ཡིན་ནོ། །ས་གཅིག་ནི་རིག་པ་ལྷུན་གྱིས་གྲུབ་པའི་ས་སྟེ་ཀུན་བྱེད་ལས། མ་བསྒྱུར་མ་སྦྱངས་རིག་པ་ལྷུན་རྫོགས་ས། །ཞེས་པ་བཞིན་ནོ། །དེའང་གང་ཟག་གཅིག་གི་ལམ་གྱི་འཇུག་པ་ལ་མཚོན་ན་དབང་རྣམས་རྫོགས་པའི་རྗེས་ཐོག་ཏུ། ཐུན་མོང་གི་སྔོན་འགྲོས་ཐེག་པ་འོག་མའི་ལམ་ལ་ཡིད་ཆེས་པར་བྱས་ཤིང་གོང་དུ་འཇུག་པའི་རྐང་སྟེགས་སུ་གྱུར་པ་ལས་ཐུན་མོང་མ་ཡིན་པའི་སྔོན་འགྲོ་རྣལ་དབབ་དང་བཅས་པ་རྫོགས་ནས་དངོས་གཞི་སེམས་དང་མ་འདྲེས་པའི་རིག་པ་དྲི་མེད་ཅེར་ཡན་ཆེན་པོར་ངོ་སྤྲོད་པ་ཡིན་ནོ། །དེ་ལ་སེམས་དང་རིག་པའི་ཁྱད་པར་ནི། རང་ཤར་ལས། སེམས་དང་རིག་པའི་དཔེ་ནི་ཆུ་དང་ལྦུ་བའི་ཚུལ། །ཞེས་པ་རིག་པ་ཆུ་དྭངས་པ་ལྟ་བུ་སྙིང་གི་དབུས་སུ་གནས་པ་ལ་དེའི་རྩལ་གདངས་སེམས་ཀྱི་མཚན་ཉིད་ཆུའི་ལྦུ་བ་ལྟ་བུ་དེ་རྩ་སྦུབས་སུ་སོང་བ་རླུང་གི་བྱེད་པས་བསྐྱེད་དེ་སྣ་ཚོགས་སུ་འཆར་བའི་ཕྱིར་རོ། །འོ་ན་ཆུ་དང་ཆུ་བུར་གཉིས་རྫས་འགལ་བ་མ་ཡིན་པས་དབྱེ་ཡང་མི་ཕྱེད་པའི་རང་བཞིན་ཅན་ནོ། །ཞེ་ན་མ་ཡིན་ཏེ། སེམས་ནི་རིག་པ་ཡོད་མེད་ཀྱི་རྗེས་སུ་བྱེད་ལ། རིག་པ་ནི་སེམས་ཡོད་མེད་ཀྱི་རྗེས་སུ་འགྲོ་ལྡོག་མི་བྱེད་པའི་ཕྱིར་སེམས་ལ་རིག་པས་ཕར་ཁྱབ་ཀྱང་། རིག་པ་ལ་སེམས་ཀྱིས་ཚུར་མ་ཁྱབ་པའི་ཕྱིར་རོ། །དེའི་ཕྱིར་སེམས་ཀྱི་དབང་དུ་རིག་པ་མ་གྱུར་ལ། རིག་པའི་དབང་དུ་སེམས་གྱུར་པ་ཡིན་ཏེ། དཔེར་ན་ཆུ་མི་གཡོ་ན་དབའ་རླབས་འབྱུང་མི་སྲིད་པ་བཞིན། རིག་པ་མི་གཡོ་ན་སེམས་རྟོག་གཡོ་མི་སྲིད་པའི་ཕྱིར་རོ། །གནད་འདི་མ་གོ་བར་སེམས་ལ་སངས་རྒྱས་འདོད་པའི་རྫོགས་ཆེན་པ་རྣམས་ཤིན་ཏུའང་རྨོངས་པ་སྟེ། ངེས་དོན་བསྡུས་པའི་རྒྱུད་ལས། ངེས་དོན་མ་མཐོང་གླེན་པ་ཀུན། །སེམས་ལས་མ་རྟོགས་ཆོས་མེད་ཟེར། །དེ་ཕྱིར་རྨོངས་པ་བློ་རེ་ནོར། །གླེན་སྒོམ་མུན་པ་སྒོམ་པས་ཕུང་། །གང་དྲན་སེམས་ཀྱི་ཆོས་འདི་ལོབ། །ཅེས་སོ། །མ་རིག་རྨོངས་པའི་གང་ཟག་ཀུན། །ཆོས་སྐུ་རང་ཡང་སེམས་ཡིན་ཟེར། །དེ་ཕྱིར་ཚིག་ལས་དོན་མ་གོ །མིང་ལས་ངེས་དོན་ཤེས་པ་དཀོན། །དེ་ཕྱིར་སེམས་ཀྱི་བྱང་མི་ཆུབ། །སེམས་ལས་སངས་རྒྱས་འདོད་པ་ནི། །མོ་གཤམ་བུ་དང་གཉེན་བྱེད་འདྲ། །ཞེས་སོ། །དེའི་ཕྱིར་ཁམས་གསུམ་པའི་སེམས་དང་སེམས་བྱུང་ལྔ་བཅུ་རྩ་གཅིག་པོ་ཐམས་ཅད་སྒྲོ་བཏགས་ཁོ་ན་ཡིན་ཏེ་བདེན་གཉིས་ལས་ཀྱང་། སེམས་དང་སེམས་བྱུང་ཁམས་གསུམ་པའི། །སྒྲོ་བཏགས་རྣམ་པ་ཅན་རྟོག་ཡིན། །ཞེས་སོ། །དེའི་ཕྱིར་མ་རིག་པ་སེམས་དང་། རིག་པ་ཡེ་ཤེས་ཀྱི་མཚན་ཉིད་ནོར་ན་མྱ་ངན་ལས་འདས་པའི་གོ་འཕང་ལ་ཐག་རིང་པོ་ཉིད་དེ། དབུ་མ་ལ་སོགས་ཏེ་སེམས་ལམ་དུ་བྱས་ནས་སངས་རྒྱས་འདོད་པའི་གཞུང་ཆེན་པོ་རྣམས་སུའང་། རང་སྟོང་གཞན་སྟོང་གི་མཚན་ཉིད་ལ། ཕྱི་སྟོང་པ་དང་། ནང་སྟོང་པ་དང་། མི་ཟེར་བར་ཕྱི་སྟོང་པ་ཉིད་དང་། ནང་སྟོང་པ་ཉིད་དང་ཞེས་ཉིད་ཡོད་མེད་ཀྱིས་ཁྱད་བཞག་པ་བཞིན་དུ། སེམས་དང་སེམས་ཉིད་གཉིས་སུ་ཕྱེ་ནས་སེམས་ཚོགས་བརྒྱད་དམ། བདུན་ནམ། དྲུག་གི་རང་བཞིན་སྤང་བྱར་བསྡུས་ནས། སེམས་ཉིད་རང་བཞིན་གྱི་རྣམ་པར་དག་པ་བླང་བྱར་རྟོགས་ནས་ལམ་སྒོམ་པའི་ཕྱིར་རོ། །འོ་ན་འདི་གཉིས་མཚུངས་སམ་ཞེ་ན། ཁྱད་པར་ཆེ་སྟེ་ཀློང་དྲུག་པ་ལས། ཀྱེ་སེམས་དཔའ་ཆེན་པོ། རིག་པ་དང་རིག་པ་ལས་བྱུང་བའི་སེམས་ཉིད་ནི་དྲི་མ་དང་རྣམ་པར་རྟོག་པ་ཐམས་ཅད་ལས་འདས་པ་སྟེ། མདོར་ན་མྱ་ངན་ལས་འདས་པའི་རྒྱུ་དང་འབྲས་བུ་ཐམས་ཅད་དེ། རིག་པ་རང་མཐོང་བའི་སྐྱེས་བུ་རྣམས་ཀྱིས་སྤྱོད་ཡུལ་ལོ། །རང་གི་མཚན་ཉིད་འཛིན་པའི་སེམས་ནི་འདི་ལྟར་བཏགས་པར་སྣང་བ་ཐམས་ཅད་དང་། ཡོད་པར་སྣང་བ་དང་། མེད་པར་སྣང་བ་ཐམས་ཅད་དང་། སྣང་བ་དང་། གྲགས་པ་དང་། ལྟ་བ་དང་། སྒོམ་པ་དང་། སྤྱོད་པར་སྣང་བ་ཐམས་ཅད་དང་། འཛིན་པ་དང་། རྟོག་པ་དང་། ཉོན་མོངས་པ་རྣམས་ཏེ་བསམ་པའི་ཡུལ་དུ་སྣང་བ་ཐམས་ཅད་ཡིན་ནོ། །མདོར་ན་འཁོར་བའི་ཆོས་ཐམས་ཅད་རང་གི་མཚན་ཉིད་འཛིན་པའི་སེམས་ཏེ། འགྲོ་བ་རིགས་དྲུག་གི་རང་ཀ་མའི་སྣང་བ་ཐམས་ཅད་དོ། །ཞེས་གསུངས་པས་སེམས་སྤང་བྱའི་རང་བཞིན་ཙམ་དུ་མཚུངས་ནའང་། རིག་པ་དང་རིག་པ་ལས་བྱུང་བའི་སེམས་ཉིད་དང་། རང་གི་མཚན་ཉིད་འཛིན་པའི་སེམས་ལ་ཆོས་ཉིད་ཐ་དད་དུ་སྣང་བའི་སྒོ་ནས་ཁྱད་པར་ཡོད་ཅིང་། བྱེ་བྲག་ཏུ་འདིར་སེམས་མ་འདྲེས་ལ་རིག་པ་མངོན་སུམ་གྱི་གནད་ཀྱིས་ཆེས་འཕགས་པ་ཡིན་ནོ། །དེ་ལྟར་ངོ་སྤྲད་པའི་རྗེས་ཐོག་ཏུ་མངོན་སུམ་འོད་གསལ་གྱི་ལམ་བསྟན་ཅིང་ཉམས་སུ་ལེན་ཚུལ་གྱི་ལེ་ལག་དང་བཅས་པ་རྫོགས་པར་བཤད་ནས། སྐལ་ལྡན་དེ་དག་ཀྱང་དུར་ཁྲོད་དང་མཚོ་གླིང་། ལུང་སྟོངས་ལ་སོགས་པའི་གནས་རབ་ཏུ་དབེན་པར་མན་ངག་སྙིང་ཐིག་གི་དོན་ལ་དཔྱད་པ་ལས། སྣང་བ་བཞི་རིམ་གྱིས་ཤར་བའམ། ཅིག་ཅར་དུ་རྫོགས་པའང་སྲིད་མཐའ་ཙམ་དུ་བཤད་ཀྱི། སྔ་མ་ལྟར་ལས་རབ་ལོ་གསུམ། འབྲིང་ལྔ། ཐ་མ་བདུན་ན་རྡོས་བཅས་སུ་སྣང་བ་འོད་གསལ་དུ་གྲོལ་ནས་རང་སྣང་དོན་གྱི་འོག་མིན་དུ་འཚང་རྒྱ་བ་སྟེ། ཞིང་ཁམས་འདི་ཕལ་གྱིས་ངོས་ཟིན་པ་མེད་པས་གྲུབ་མཐའ་རིན་པོ་ཆེར། དེའང་ཁམས་གསུམ་ལས་འདས་པའི། གནས་སྟུག་པོ་བཀོད་པ་ན་སངས་རྒྱས་སོ། །དེ་ཕྱོགས་གང་ན་ཡོད་ཅེ་ན། རྨི་ལམ་ཉིད་གང་དུ་སོང་བ་དེར་འོང་གི་འདི་ཁོ་ནར་ཡོད་དོ་ཞེས་མ་འཆད་པ་ལྟར། གང་དུ་སྒྲིབ་པ་མཐའ་དག་དང་བྲལ་ནས་དབྱིངས་དང་ཡེ་ཤེས་དབྱེར་མེད་དུ་འདྲེས་པ་དེ་ན་ཡོད་དོ། །ཞེས་གསུངས་ལ་དེའང་ཆོས་ཉིད་ནང་གསལ་གཞོན་ནུ་བུམ་པའི་སྐུ་ལ་སྐུ་དང་ཞིང་ཁམས་ཀྱིས་རིས་སུ་ཆད་པ་མེད་ལ། ཆོས་ཅན་ཕྱིར་གསལ་ལྷུན་གྲུབ་ཐུགས་རྗེའི་སྣང་ཆ་ལ་དེ་སྐད་ཅེས་བཏགས་པའང་ཤེས་པར་བྱ་སྟེ། རྒྱུད་ལས། ཐོག་མའི་སངས་རྒྱས་ཀུན་ཏུ་བཟང་། །མཚན་དང་དཔེ་བྱད་ལྡན་པར་ཡོད། །སྟོན་པ་འོད་མི་འགྱུར་བ་ནི། །སྟོང་གསལ་འོད་ཀྱི་ཕུང་པོར་བཞུགས། །ཐུགས་ཀྱི་མཁྱེན་པ་མ་འགགས་གསལ། །ཞེས་སོ། །དེའང་སྐབས་འདིར་མངོན་སུམ་འོད་གསལ་ལ་བལྟ་བའི་རིག་པ་སྐད་ཅིག་མ་དེ་ཉིད་ལ་འཁོར་བའི་སེམས་གསུམ་ཀུན་གཞིའི་ལྡོག་ཚུལ། ཡེ་ཤེས་ཀྱི་ངོ་བོ་དགོངས་པའི་ཚང་ཚུལ། འོག་མའི་སྙིང་པོ་གོང་མར་འདུས་ཚུལ་དང་གསུམ་དུ་བརྩི་བ་ནི་ཀུན་མཁྱེན་ཆེན་པོའི་བཞེད་པ་སྟེ། དང་པོ་ལ་ཐེག་པ་སྤྱི་དང་མདོ་མཐུན་པར་རང་སྡེའི་རྒྱུད་ཀྱི་ལུང་གིས་རྒྱབ་སྐྱོར་ནས་བཤད་པ་དང་། སྒྲུབ་རྒྱུད་ཀྱི་དཔེས་བརྡ་ཚིག་ལྟར་བཤད་པའོ། །སྔ་མ་ནི། དཀོན་མཆོག་བརྩེགས་པ་ལས། ཞི་བའི་བློ་གྲོས་དེ་བཞིན་གཤེགས་པའི་ཐུགས་ཀྱི་གསང་བ་ནི་སེམས་དང་ཡིད་དང་རྣམ་པར་ཤེས་པ་དང་ཡང་བྲལ་ལ། ཏིང་ངེ་འཛིན་གྱི་གནད་ཀྱང་མི་འདོར་ལ། འདི་ནི་དེ་བཞིན་གཤེགས་པའི་ཐུགས་ཀྱི་གསང་བ་བསམ་གྱིས་མི་ཁྱབ་པའོ། །ཞེས་གསུངས་པ་ལྟར། འཇིག་རྟེན་ལས་འདས་པ་ཡང་དག་པའི་ཏིང་ངེ་འཛིན་གྱི་ལམ་སྣ་ངེས་གཅིག་ལ་ཁམས་གསུམ་པའི་སེམས་དང་སེམས་བྱུང་ཀུན་གཞིའི་བག་ཆགས་དང་བཅས་ལྡོག་ཚུལ་ནི། རྟེན་ཀུན་གཞིའི་རྣམ་པར་ཤེས་པའི་སེམས་དང་། ཉོན་ཡིད་ཡིད་ཤེས་དང་། སྒོ་ལྔའི་རྣམ་ཤེས་རྣམས་མེད་པའི་ཏིང་ངེ་འཛིན་ལ་མངོན་སུམ་དུ་ལྟ་བས། ནང་ཀུན་རྟོག་འཕྲོ་འདུ་དག་སྟེ་འདོད་པའི་སེམས་ལོག །གཞན་ལྟར་གསལ་བའི་ངང་ལ་གསལ་བར་འཇོག་པའི་དེར་འཛིན་གྱི་གཉེན་པོ་མེད་པས་གཟུགས་ཀྱི་སེམས་ལོག །དྲན་བསམ་རྩེ་གཅིག་ལ་གནས་པའི་རྟོག་མེད་ལ་ཆོས་ཉིད་ཀྱི་ངང་དུ་ཞེན་པའི་བློ་མེད་པས་གཟུགས་མེད་ཀྱི་སེམས་ལོག་པས་ཁམས་གསུམ་པའི་སེམས་ཉེ་བར་ཞི་བའོ། །དེའང་ཀུན་གཞི་རྟོག་མེད་གསལ་དྭངས་མ་ཕྱེད་པའི་ལུང་མ་བསྟན་ཡིན་ལ། འདིར་གསལ་དྭངས་ཕྱེད་ཅིང་རིག་པའི་ཕྱིར་ཀུན་གཞི་ལོག །ཀུན་གཞི་རྣམ་ཤེས་གསལ་བ་ཙམ་རིས་སུ་མ་ཆད་པར་གནས་པའི་ཆ་དེ་རང་རིག་པའི་ངོ་བོར་མ་ཤེས་པ་ལས། འདིར་རང་བྱུང་གི་ཡེ་ཤེས་སུ་ཐག་ཆོད་པས་གདངས་གསལ་སྤྲོས་པ་དང་བྲལ་བས་ལོག །སྒོ་ལྔའི་རྣམ་ཤེས་ཡུལ་གྱི་རྗེས་སུ་འབྲང་བ་ལས། འདིར་འོད་གསལ་གྱི་སྣང་བས་ཡུལ་ལ་ཐ་མལ་དུ་འཛིན་པའི་གཟུགས་འཛིན་མིག་གི་རྣམ་ཤེས་ལོག །དེ་བཞིན་དུ་སྒྲ་ལ་སོགས་པ་གཞན་ལ་བརྟེན་ནས་དུག་ལྔར་ཤར་ཞིང་རྗེས་སུ་འཕྲོ་ནའང་མི་འཛིན་པའི་གནད་ཀྱིས་རྟོག་པ་དང་དཔྱོད་པ་ལ་སོགས་ཆགས་སྡང་གང་ཡང་མེད་པས་ལྡོག་ཚུལ་ནི། ཀུན་གསལ་ལས། རང་བྱུང་ཡེ་ཤེས་རང་ཡོད་ཀྱང་། །རྒྱལ་བུ་དམངས་སུ་འཁྱམས་པ་བཞིན། །རང་ངོ་རང་གིས་མ་ཤེས་པས། །གདམས་ངག་མེད་དེ་རྟོག་པ་ཤར། །ལྟ་བ་གདེང་དུ་མ་གྱུར་པས། །དུག་ལྔ་ཡུལ་ལྔར་ཤར་བའི་ཚེ། །དེ་ལ་འཛིན་ཤེས་མང་ཞུགས་པས། །སྒོ་ལྔ་དག་ལ་བརྟེན་ནས་བྱུང་། །ཞེ་སྡང་གཟུང་ཡུལ་དགྲར་སྣང་ཚེ། །འཛིན་པ་ཡིད་ཀྱི་རྣམ་རྟོག་ནི། །མིག་གི་ཡུལ་དུ་གཟུགས་སྣང་དང་། །ཞེ་སྡང་སེམས་ནི་སྐྱེ་འགྱུར་ཏེ། །རྣ་བར་ཚིག་རྩུབ་བྱུང་བ་དང་། །ཡིད་འཛིན་ཞེ་སྡང་ལྷང་གིས་སྐྱེ། །རང་སྣང་འཛིན་མེད་མི་ལྡན་བདུད། །རང་དགར་བཟུང་ན་བདུད་ཀྱི་ལས། །ཁམས་གསུམ་འཁོར་བའི་གནས་སུ་འཁྱམ། །དེ་བཞིན་ཉོན་མོངས་གཞན་ལ་ཡང་། །གཟུང་འཛིན་གྱིས་ནི་ལོག་པར་སྤྱད། །བདུད་ལས་བཟློག་ཅིང་ཉོན་མོངས་སྒྲོལ། །སྒྲ་ཉིད་རིག་པའི་རྩལ་སྣང་ལ། །རང་གི་ངོ་བོ་སྟོང་ལ་ཡང་། །སྟོང་ལ་འཛིན་པ་མ་གྲུབ་པས། །ཞེ་སྡང་འཛིན་པ་རང་སར་གྲོལ། །ཡུལ་ཉིད་ཚུལ་ལ་མངོན་ཤར་ན། །དེ་ལ་ཤེས་པ་ཕར་འཇུག་པས། །རང་སྣང་འཛིན་མེད་རང་སར་གྲོལ། །ཡུལ་སེམས་དུས་མཉམ་ཕྲད་གྱུར་ན། །རང་གསལ་ཡུལ་གསལ་འཛིན་མེད་གྲོལ། །ཆོས་སྐུ་རང་གསལ་ཆེན་པོ་ལ། །དུས་གསུམ་འཕོ་འགྱུར་མེད་པའོ། །ཞེས་སོ། །དེ་ལྟར་ཀུན་གཞི་ཚོགས་བརྒྱད་དང་བཅས་པ་ཁམས་གསུམ་པའི་སེམས་ལས་རྣམ་པར་གྲོལ་བ་ནི་སངས་རྒྱས་ཀྱི་ཡེ་ཤེས་ཉིད་ལས་གཞན་མ་ཡིན་ཏེ་སྔ་མ་ལས། ཉམས་བླངས་གོམས་ན་རྟོགས་པ་ལ། །དུས་བཞིར་འགྱུར་བ་མེད་པ་ནི། །རང་རིག་ཆོས་སྐུ་རང་གསལ་ཏེ། །དཔེར་ན་ཉི་མའི་སྙིང་པོ་དེ། །གསལ་དང་མི་འབྲལ་འགྲོགས་ནས་ཡོད། །རིག་པ་ཆོས་སྐུ་དེ་ཡིན་པས། །དུས་བཞིར་འགྱུར་མེད་གདངས་ཀྱིས་བཟུང་། །ཞེས་སོ། །གསང་སྔགས་འོག་མ་རྣམས་སུ་རོ་རྐྱང་གི་རླུང་སེམས་དབུ་མར་ཚུད་ནས་རྩ་རླུང་ཐིག་ལེ་རོ་གཅིག་ཏུ་འདྲེས་པ་ལས་རྣམ་པར་མི་རྟོག་པའི་ཡེ་ཤེས་འཆར་བར་འདོད་ཅིང་། རོ་རྐྱང་གི་རྒྱུ་བ་དབུ་མར་ཞུགས་པས་རྩ་མདུད་རེ་གྲོལ་སྟོབས་ཀྱིས་ཡོན་ཏན་རེ་འཆར་བར་འདོད་པའང་། འགྲོ་དྲུག་གི་རྩ་འདབ་དང་སྲོག་པ་རྩ་ལ་སོགས་པར་རླུང་ཞུགས་པས། འཁྲུལ་སྣང་དུ་མ་འཆར་བ་ལ་སོགས་པའི་གེགས་མང་ཞིང་། རྩ་རླུང་གི་ཡོན་ཏན་ལ་བརྟེན་ནས་ནམ་མཁའ་ལ་འཕུར་བ་ལ་སོགས་ཏེ་ཐུན་མོང་གི་གྲུབ་རྟགས་ཐོན་པ་བྱུང་ཡང་ཀུན་གཞི་ཚོགས་བརྒྱད་ལས་ལྡོག་པའི་ཡེ་ཤེས་ཀྱི་དགོངས་པ་ཚད་དུ་མ་ཕྱིན་ན་གྲངས་ཅན་པའི་གྲུབ་མཐའ་དང་ཁྱད་པར་མེད་པས་མཐར་ཐུག་གི་གྲོལ་བ་མི་འགྲུབ་པའི་ཕྱིར་རོ། །དེ་ལྟ་ནའང་དེང་སང་སོ་སོའི་སྐྱེ་བོ་རྣམས་ཀྱིས་གནད་འདི་མ་རྟོགས་པས་ཐུན་མོང་གི་གྲུབ་རྟགས་ཁོ་ན་ལ་ངོ་མཚར་དུ་འཛིན་ཏེ་ཤིན་ཏུའང་ཉོན་མོངས་སོ། །བླ་ན་མེད་པའི་ལམ་འདིར་རླུང་རྣམས་རང་ཞིར་འཇོག་པས་དབུ་མར་འཇུག་ཏུ་མེད་ལ། འབད་རྩོལ་གྱི་ཆོས་ཉིད་ལས་འདས་པའི་ཡེ་ཤེས་ཀྱི་རླུང་གིས་རྩ་འདབ་སོ་སོའི་རླུང་མཐའ་དག་ལ་དབང་བསྒྱུར་ཏེ་རང་དག་ལ་སོང་དུས། འོད་རྩའི་ཡེ་ཤེས་ཀྱི་རླུང་རང་ས་ན་རང་གསལ་བ་ལས་དག་པ་ཡེ་ཤེས་ཀྱི་སྣང་བ་སྐུ་འོད་ཞིང་ཁམས་ལ་སོགས་པ་འཆར་ཞིང་འཁྲུལ་སྣང་འཆར་བའི་ཡུལ་མེད་དོ། །ཁྱད་པར་དབུ་མའི་འོད་རྩ་འཕེལ་བས་རྩ་མདུད་ཐམས་ཅད་རིམ་གྱིས་འོད་དུ་སོང་བ་ལས་སའི་ཡོན་ཏན་རྣམས་རང་སྣང་དུ་འཆར་ཞིང་གྲོལ་བ་ཞེས་འདོད་དོ། །རྩ་མདུད་དང་པོ་གཉིས་འོད་དུ་གྲོལ་བ་ལས། ཕྱིར་སྣང་འོད་ཀྱི་ནང་དུ་སངས་རྒྱས་ཀྱི་ཞིང་ཁམས་བརྒྱ་ཕྲག་བཅུ་གཉིས་འཆར་བ་དང་། དེ་དག་ཏུ་འོད་ཟེར་འགྱེད་པ་དང་། རང་སྣང་དུ་འདུས་པས་བགྲོད་པ་དང་། ལུས་འགུལ་ན་འགུལ་བས་ཞིང་ཁམས་བརྒྱ་གཡོ་བ་དང་། གསལ་བ་དང་། ནང་དུ་ཆོས་ཉིད་རྣམ་པར་མི་རྟོག་པའི་ཏིང་ངེ་འཛིན་བརྒྱ་ལ་སྙོམས་པར་འཇུག་ཅིང་ལྡང་བ་ལ་སོགས་པར་འབྱུང་བས་ན་ཐེག་པ་འོག་མ་མཐའ་དག་གི་ས་ལས་ཆེས་ཁྱད་པར་དུ་འཕགས་པའོ། །གཉིས་པ་ནི། བླ་ན་མེད་པའི་ཐེག་པ་འདི་ལ་གྲགས་པ་མཁའ་འགྲོ་མ་རྣམས་ཀྱིས་བདག་བྱས་པས་ཤིན་ཏུ་གཉན་ཞིང་རྟོགས་པར་དཀའ་ལ། སུས་ཀྱང་བསྒྱུར་བ་དང་བསླད་དུ་མེད་པས་བྱིན་རླབས་ཀྱི་ཚན་ཁ་མཆོག་ཏུ་ཆེ་ཞིང་། རྟོགས་ན་དོན་རླབས་པོ་ཆེ་དང་ལྡན་པའི་གསང་བ་ཆེན་པོ་བརྡའི་སྒོ་ནས་སྒྲུང་རྒྱུད་ཀྱིས་མཚོན་པར་བཤད་པ་ནི། རང་ཤར་ལས། སྔོན་ཡུལ་རིན་པོ་ཆེ་སྤུངས་པ་ཞེས་བྱ་བ་ན། རྒན་མོ་ཞིག་ལ་ནོར་བུ་རིན་པོ་ཆེ་ཞིག་ཡོད་པས། རྐུན་མོ་མི་ལྔས་ཁྱེར་ནས་རྒན་མོ་སྡུག་བསྔལ་གྱིས་ཟིན་ཟེར་བ་དེ་ཡ་ཆ། དེ་ནས་རྐུན་མོ་རྗེས་བཅད་པས། ཡུལ་ཚེར་མ་ཅན་དུ་སོང་ནས། རྐུན་མོ་མི་ལྔས་བརྐུས་པས་རྒན་མོ་བརྒྱལ་ཟེར་བ་དེ་ཡ་ཆ། དེ་ནས་རྐུན་མོས་ཡུལ་ཚེར་མ་ཅན་ནས་རྗེས་ཆོད་པས། རྒན་མོ་བརྒྱལ་སངས་ཟེར་བ་དེ་ཡ་ཆ། དེ་ནས་རྒན་མོ་དེའི་བུ་ལྷ་དཀར་པོ་ཞེས་བྱ་བ་དེས་འདི་སྐད་ཅེས་ཟེར་ཏོ། །ངའི་ནོར་བུ་མ་བརླག་གམ་བྱས་པས། མི་ལྔ་པོ་ན་རེ། ནོར་བུ་མ་བརླག་གིས་ཁྱོད་རང་གི་རྒན་མོ་སོད་ཅིག །མ་རྒན་མོ་མ་གསད་ན་ནོར་བུ་མི་སྟེར་རོ་བྱས་པས། ཁོས་ཁོ་རང་གི་མ་བསད་ནས་ཤ་ཟོས། ཁྲག་འཐུངས། རུས་པ་མུར། དངོས་པོ་མེད་པར་བྱས་པས། ནོར་བུ་རྐུན་མོས་བྱིན་ཟེར་བ་དེ་ཡ་ཆ། ཞེས་པའི་བརྡ་དོན་ནི། ཡུལ་རིན་པོ་ཆེ་སྤུངས་པ་ཙིཏྟའོ། །རྒན་མོ་མ་རིག་པ། ནོར་བུ་རིག་པ། རྐུན་མོ་ལྔ་དུག་ལྔ། མྱ་ངན་གྱིས་ཟིན་པ་རིག་པ་ཆགས་སྡང་གི་དབང་དུ་སོང་བས་རང་སྡུག་རང་ལ་མྱོང་བ། རྗེས་བཅད་པས་ཡུལ་ཚེར་མ་ཅན་ནས་རྩད་ཆོད་དེ་རྒན་མོ་བརྒྱལ་བ་ནི། ཤེས་རབ་ཀྱི་རིག་པ་དང་དེའི་ལྷན་སྐྱེས་མ་རིག་པ་དུག་ལྔ་དང་བཅས་པའི་འཁྲུལ་པ་བརྟགས་ཤིང་རྩད་བཅད་པ་ལས། ད་ལྟ་འཁོར་བ་ན་འཁོར་དུས་ངོས་ཟིན་པས་མ་རིག་པ་དུག་ལྔའི་བག་ལ་ཞར་འདུག་པ་ཙམ་མོ། །དེ་ལྟར་འཁྲུལ་པའི་རྩ་བ་ཆོད་དུས་རིག་པ་རང་ངོ་ཤེས་པ་ལས། མ་རིག་པ་རང་སངས་ལ་སོང་བ་ནི་རྗེས་ཆོད་ནས་བརྒྱལ་སངས་པའོ། །བུ་ལྷ་ནི་རང་ངོ་ཤེས་པའི་ཡེ་ཤེས་སྐྱེད་པ་སྟེ། ནོར་བུ་མ་བརླག་གམ་དྲིས་པས། ལན་དུ་རྒན་མོ་སོད་དེ་ནས་སྟེར་ཟེར་བ་ལྟར་བྱིན་པ་ནི། རིག་པ་དེ་རང་ཉིད་འཁོར་བར་སོང་དུས་རང་ངོ་ངན་དུ་སོང་ངམ་བལྟས་པས་སྤུ་ཙམ་ཡང་མ་སོང་བར་སྔ་མའི་ཤེས་པ་གྲྭ་མ་ཉམས་ཟུར་མ་ཆག་པར་མཐོང་ལ། དེ་ལྟ་ནའང་ལྷན་སྐྱེས་རང་ངོ་མ་རིག་པའི་ཆ་འདི་མ་སྤངས་ན། དེ་ཙམ་གྱིས་མི་ཕན་པར་ད་དུང་འཁོར་བ་ལས་ཅུང་ཟད་ཙམ་ཡང་མི་འཕག་ཅིང་། དུག་ལྔ་རང་ལས་འཆར་བར་རྟོགས་ཏེ། ཁ་ནང་དུ་རང་ངོ་ལ་བལྟས་པས་རང་ངོ་རང་གིས་རིག་དུས་ལྷན་སྐྱེས་ཀྱི་མ་རིག་པ་སངས་ཏེ། ཀུན་རྟོག་རང་སར་གྲོལ་བས་ཤ་ཟོས། ཆགས་འཛིན་དག་པས་ཁྲག་འཐུངས། མི་ཤེས་པ་གནས་སུ་དག་པས་རུས་པ་མུར། ཉོན་མོངས་པ་ཐམས་ཅད་མ་སྤངས་གནས་སུ་དག་པས་དངོས་མེད་དུ་སོང་ནས། ནང་རིག་པའི་ཆོས་ཉིད་ལ་བལྟས་པས། རང་རིག་དུས་ཕྱི་ཡུལ་ལ་འཆར་བའི་དུག་ལྔ་ལྷན་སྐྱེས་མ་རིག་པ་དང་བཅས་པ་དག་ནས་རང་བྱུང་ཡེ་ཤེས་ཀྱི་ནོར་བུ་རང་ལས་རྙེད་པའི་དུས་སོ། །གཉིས་པ་ཡེ་ཤེས་ཀྱི་ངོ་བོ་ལ་དགོངས་པའི་ཚང་ཚུལ་ནི། བཞུགས་སྟངས་དང་གཟིགས་སྟངས་ལ་སོགས་པའི་གནད་ཀྱིས་མཐོང་བའི་རིག་པ་མངོན་སུམ་པར་ལྟ་བའི་སྐད་ཅིག་མ་ལ། དྭངས་གསལ་སྤྲོ་བསྡུ་དང་བྲལ་བའི་ཡེ་ཤེས་ནང་དུ་ཤར་བ་ནི་ཁྲེགས་ཆོད་ཀ་དག་གི་ཆོས་སྐུ་རང་ཐོག་ཏུ་ཕེབས་པ་ཡིན་ལ། ཕྱིར་སྣང་ཡུལ་གྱི་འཆར་སྒོ་འོད་གསལ་ཐོད་རྒལ་དུ་ཤར་བ་ནི་ལྷུན་གྲུབ་གཟུགས་སྐུའི་ལམ་ཁྱེར་བསྐྱེད་རིམ་ཐབས་སུ་ཤར་བའི་གནད་ལས། ནང་གསལ་སྐྱེ་མེད་སྤྲོས་ཀུན་ཞི་བའི་རྫོགས་རིམ་མུ་མཐའ་དང་བྲལ་བའི་ཤེས་རབ་མངོན་དུ་གྱུར་ཏེ། ཐབས་དང་ཤེས་རབ། བསྐྱེད་པ་དང་རྫོགས་པ། ཆོས་སྐུ་དང་གཟུགས་སྐུ། སྣང་བ་དང་སྟོང་པ། བསོད་ནམས་དང་ཡེ་ཤེས་ཀྱི་ཚོགས་ཐམས་ཅད་ཁྲེགས་ཆོད་དང་ཐོད་རྒལ་སྒོམ་པའི་སྐད་ཅིག་ལ་རྫོགས་ཤིང་སྐུ་ལྔ་ཡེ་ཤེས་དང་བཅས་པའང་ལྷུན་གྱིས་གྲུབ་པ་ནི། རྩེ་གཅིག་སྤྲོས་དང་བྲལ་བ་ཆོས་སྐུ། རང་གསལ་འཛིན་པ་དག་པ་ལོངས་སྐུ། སྣ་ཚོགས་ཡུལ་ལ་ཤར་བ་སྤྲུལ་སྐུ། ཚོགས་བརྒྱད་རྣམ་ཤེས་ལོག་པས་མངོན་པར་བྱང་ཆུབ་ཀྱི་སྐུ། དབྱིངས་ལ་འཕོ་འགྱུར་མེད་པས་མི་འགྱུར་རྡོ་རྗེའི་སྐུ་དང་། ཡེ་ཤེས་ལྔ་ལ། སྨྲ་བསམ་སྤྲོས་པ་དང་བྲལ་བས་ཆོས་དབྱིངས། གསལ་འགྲིབ་འགག་པ་མེད་པས་མེ་ལོང་། རོ་མཉམ་ངང་ལ་གནས་པས་མཉམ་ཉིད། སྣང་བ་འོད་ལྔར་གསལ་བས་སོར་རྟོག །གཟུང་འཛིན་གཉིས་ཆོས་སྤངས་པས་བྱ་གྲུབ་སྟེ་ཡེ་ཤེས་ལྔའི་བདག་ཉིད་དོ། །གསུམ་པ་འོག་མའི་སྙིང་པོ་གོང་མར་འདུས་ཚུལ་ནི། འོད་གསལ་གྱི་རིག་པ་སྐད་ཅིག་ལ་གནས་པའི་ཚེ། གང་ཟག་དང་ཆོས་ཀྱི་བདག་ཏུ་འཛིན་པའི་ཤེས་པ་སོ་སོ་བ་བཀྲག་མེད་དུ་བུན་ལང་ངེ་ཞིག་པས་ཉན་རང་བྱང་སེམས་གསུམ་གྱི་ལྟ་བའི་དགོངས་པ་ཡང་འདིར་འདུས་སོ། །ལུས་ངག་ཡིད་གསུམ་ཉོན་མོངས་པའི་དྲི་མ་ལས་འདས་པའི་གཙང་སྦྲར་སྤྱོད་པ་ཕྱི་རྒྱུད་ཀྱི་སྡེ་གསུམ་གྱི་ཡེ་ཤེས་ཀྱང་གསལ་སྟོང་མཉམ་གནས་ཆེན་པོར་འདུག་པས་འདིར་འདུས་སོ། །སྣང་རིག་གཉིས་མེད་གསུམ་གྱི་གནས་ལུགས་ཟུང་འཇུག་ཏིང་ངེ་འཛིན་ཆེན་པོའི་གྲལ་དུ་ཚུད་པ་གསང་སྔགས་ནང་པ་གསུམ་གྱི་དགོངས་པ་ཡང་ཁས་ལེན་མཐའ་དག་དང་བྲལ་བའི་ངང་ཀློང་བླ་ན་མེད་པ་འདིར་འདུས་སོ། །དེ་བཞིན་དུ་ཏིང་ངེ་འཛིན་དང་། གཟུངས། སོ་སོ་ཡང་དག་རིག་པ་བཞི་ལ་སོགས་མདོར་ན་ས་དང་ལམ་གྱི་ཆོས་ཉིད་བསམ་གྱིས་མི་ཁྱབ་པ་ཐམས་ཅད་ཀྱང་རིག་པའི་ཡེ་ཤེས་དྲི་མ་མེད་པའི་ངང་ལ་གནས་པས་ཡེ་ནས་ལྷུན་གྱིས་གྲུབ་པའི་ཚུལ་དུ་འདུས་ཤིང་སྐྱོན་གྱི་རྣམ་པ་ཐམས་ཅད་དང་བྲལ་བས་མ་འདྲེས་ཡོངས་སུ་རྫོགས་པ་ཐེག་པའི་རྒྱལ་པོ་ཞེས་བྱ་སྟེ་ཀུན་གྱི་རྩེ་མོར་ཕྱིན་པའོ། །དོན་ལྔ་པ་མཐར་ཕྱིན་པ་འབྲས་བུ་བླ་ན་མེད་པའི་གྲུབ་ལུགས་ནི། སྣང་བ་བཞིའི་ལམ་དུ་སྐུ་གསུམ་གྱི་ཡོན་ཏན་ཐམས་ཅད་མ་ཚང་བ་མེད་པར་བྱང་ཆུབ་ནས་ཆོས་དབྱིངས་གཞོན་ནུ་བུམ་པའི་སྐུ་སྤངས་རྟོགས་ཀྱི་ཡོན་ཏན་མཐའ་དག་མཐར་ཕྱིན་པ་དབྱིངས་དང་ཡེ་ཤེས་གཉིས་སུ་མེད་པའི་ཀ་དག་རིན་པོ་ཆེ་གསང་བའི་སྦུབས་ནི་མཐར་ཐུག་གི་གྲོལ་ས་སྟེ། རང་ཤར་ལས། སངས་རྒྱས་ཀུན་གྱིས་བསྐྱལ་ས་ནི། །ཀ་དག་ཆེན་པོའི་དཀྱིལ་འཁོར་རོ། །ཞེས་སོ། །ཕལ་ཆེར་གྱི་གྲོལ་ས་འདི་ཐོག་མའི་གཞི་ཐོག་ཏུ་འདོད་པ་ཡོད་དེ། དེ་ལྟ་ན་གཞི་དེ་འཁྲུལ་པ་འབྱུང་རུང་གི་ཆ་ནས་བཞག་པའི་ཕྱིར་ད་དུང་འཁྲུལ་པའི་སྐྱོན་ཡོད་པས་ནོར་ས་རྔམ་པོ་ཆེ་ཡིན་ཏེ། ཀུན་མཁྱེན་ཆེན་པོས་མཐར་ཐུག་གི་གྲོལ་ས་ཀ་དག་དང་། ངེས་མེད་གཞིའི་ལྷུན་གྲུབ་གཉིས་རིག་པའི་ཡོན་ཏན་ངོ་བོ་རང་བཞིན་ཐུགས་རྗེ་ལ་སོགས་པ་འདྲ་ཡང་། དྲི་མ་དག་མ་དག་དང་འཁྲུལ་གཞི་བྱེད་མི་བྱེད་ཀྱིས་ཁྱད་ཡོད་དོ། །རང་གི་སྡེ་པས་ཁྱད་འདི་ཤེས་པ་གལ་ཆེ་བས། འབྲས་བུ་གཞི་ཐོག་ཏུ་གྲོལ་ཟེར་ནས་རྩིང་པོར་མ་སྨྲ་ཞིག །ཅེས་གསུངས་སོ། །འོ་ན་མུ་ཏིག་ཕྲེང་བ་ལས། གྲོལ་ས་ཉིད་ནི་ཐོག་མའོ། །ཞེས་པས་བསྟན་པ་མ་ཡིན་ནམ་སྙམ་ན། དེ་ནི་ཐོག་མའི་ཀ་དག་ལ་རིག་པ་རང་ངོ་ཤེས་ནས་དག་པ་ཉིས་ལྡན་གྱི་སར་བྱང་ཆུབ་པས། ཕྱིན་ཆད་རྒྱུར་ལྡོག་པའི་འཁྲུལ་གཞི་ཟད་པས་གྲོལ་སའམ་འབྲས་བུ་ཞེས་བྱ་བར་མིང་འགྱུར་བ་ཡིན་ནོ། །གོང་དུ་གཞིའི་སྐབས་སུ་བཤད་པ་ལྟར་ཁྱད་པར་དྲི་མ་ཡོད་མེད་ཀྱིས་ཕྱེ་བ་ཤེས་པར་བྱ་བ་གནད་དམ་པའོ། །འདིའི་ཚུལ་འོག་གི་དྲི་ལན་ཉི་ཤུ་རྩ་བརྒྱད་པར་ཡང་འགོད་ཅིང་། མཁྱེན་བརྩེའི་མེ་ལོང་གི་གཞི་ལམ་འབྲས་བུའི་བཤད་པའི་སྐབས་ཀྱང་བསྟན་ཟིན་པས་འདིར་དེ་ཙམ་མོ། །དོན་གཉིས་པ་ཡང་ཟབ་མན་ངག་གི་ངེས་འབྱེད་ལ་གཉིས། རྒྱ་འགྱུར་གྱི་མན་ངག་དངོས་བསྟན་དང་། དགོངས་འགྲེལ་མན་ངག་གི་བསྟན་བཅོས་བླ་ན་མེད་པའི་རང་བཞིན་ནོ། །དང་པོ་ལ་གཉིས། ཟབ་པ་དང་རྒྱ་ཆེ་བའོ། །དང་པོ་ནི། འོད་གསལ་གྱི་རྒྱུད་སྡེ་རྣམས་ལས་དྭངས་བཅུད་ལྟ་བུར་ཕྱུང་བ་སྙིང་ཏིག་གི་སྐོར་ལ་ཟབ་པ་པུསྟ་ཀ་བཞི་ཡོད་པ་འདི་ལྟ་སྟེ། གསེར་ཡིག་ཅན། གཡུ་ཡིག་ཅན། དུང་ཡིག་ཅན་དང་གསུམ། དེའི་སྟེང་དུ་ཟངས་ཡིག་ཅན་དང་ཕྲ་ཡིག་ཅན་བསྡོམས་པས་གཅིག་སྟེ་བཞི་པོ་རྒྱལ་བློན་སྔ་དར་གྱི་དུས་སུ་རྗེ་འབངས་སུ་ལའང་མ་གནང་བར་མཆིམས་ཕུར་གཏེར་དུ་བལྟམས་པའི་རིམ་པ་ལ། གསེར་ཡིག་ཅན་ལ། བསྟན་པའི་བུ་གཅིག །མཆོད་པའི་དུས་གནད་ངེས་པ། འདས་རྗེས་བྱ་བ་དང་མ་བུ་དགུའོ། །ཟངས་ཡིག་ཅན་ལ་སྤྲོས་བཅས་དུམ་བུ་བཅུ་དྲུག །དེའི་རྒྱབ་ཡིག་གསང་བ། གནད་ཡིག་དང་མ་བུ་བཅོ་བརྒྱད་དོ། །དུང་ཡིག་ཅན་ལ་སྒྲོན་མ་སྣང་བྱེད། དེའི་རྒྱབ་ཡིག །གནད་ཡིག་དང་མ་བུ་གསུམ་མོ། །ཕྲ་ཡིག་ཅན་ནི་ཟངས་ཡིག་ཅན་གྱི་ཁོངས་སུ་གཏོགས་པའི་བུ་རྣམས་ཏེ། རླུང་གི་པྲ་ཁྲིད། ཆགས་པའི་པྲ་ཁྲིད། ཡང་གབ་སྦས་པའི་དུམ་བུ། ཚད་ཀྱི་ཡི་གེ རྟགས་ཀྱི་ཡི་གེ་དང་ལྔའོ། །གཡུ་ཡིག་ཅན་ལ། སྐབས་དོན་བཅུ་གཉིས་མ། གཅེས་པའི་སྙིང་པོ། དཔེའི་སྒྲོན་མེ། འཆི་བ་བརྟག་པ། འཆི་བ་བསླུ་བ། ལྟ་བའི་སྙིང་པོ། རིན་ཆེན་པྲ་ཁྲིད་དང་མ་བུ་བཅོ་བརྒྱད་དོ། །དེ་དག་རྣམས་གཏེར་ནས་བྱོན་པའོ། །རྒྱུད་དང་མན་ངག་གཞན་རྣམས་རྗེ་བློན་གཉིས་ལས་གཞན་སུ་ལའང་མ་གནང་ཞེས་པ་ནི་མི་རིགས་པ་སྟེ་ཀུན་མཁྱེན་གྱིས། རྒྱུད་དང་མན་ངག་གཞན་རྣམས་རྗེ་མངའ་བདག་ཁྲི་སྲོང་ལྡེའུ་བཙན་དང་། སྲས་མུ་ནེ་བཙན་པོ་གཉིས། འབངས་ཉང་ཏིང་འཛིན་བཟང་པོ། སྐ་བ་དཔལ་བརྩེགས། ཅོག་རོ་ཀླུའི་རྒྱལ་མཚན་གསུམ་སྟེ་ལྔའོ། །འདི་དག་གིས་བསྒྱུར་ཏེ་ཞྭ་ལྷ་ཁང་དུ་གཏེར་ལ་གདམས་ནས། ཉམས་སུ་བླངས་པས་ཉང་གིས་ལྷག་མེད་འགྲུབ། གཞན་གཉིས་པོས་རང་བཞིན་སྤྲུལ་པ་གྲུབ་པ་ཡིན་ནོ། །རྒྱུས་ལ་མི་མཁས་པ་དག་རྗེ་བློན་གཉིས་ལས་སུ་ལའང་མ་གནང་ཞེས་པའི་ཚིག་གིས་རྒྱལ་པོ་དང་ཉང་གཉིས་ལས་མེད་པར་འདོད་པ་ནི་ཤིན་ཏུ་མི་རིགས་ཏེ། རྒྱུད་ལུང་ཕལ་ཆེར་སྐ་ཅོག་གིས་བསྒྱུར་ཞིང་། བཅུད་དུ་མ་འཕྲུལ་དུམ་མུ་ནེ་བཙན་པོས་ཟངས་ཡག་བྲག་ལ་སྦས་པའི་ཕྱིར་སྙིང་ཏིག་མ་ཐོབ་ན་དེ་དག་ག་ལ་འོང་། ཡི་གེ་ཕལ་གྱི་མཇུག་ན་འདི་ལྟར་བཀོད་པ་ཅེ་རེ་ལོང་དུ་སོང་བ་ཡིན་མོད། ཅེས་གསུངས་པའི་ཕྱིར་རོ། །གཉིས་པ་རྒྱ་ཆེ་བ་ལ་མན་ངག་བརྒྱ་དང་བཅུ་དགུར་གྲགས་པ་སྟེ། མན་ངག་དུམ་དུམ་ཁྲིགས། པོ་ཏི་སྨུག་ཆུང་། འཁྲུལ་གཞི་གསལ་བའི་མེ་ལོང་། འབྱུང་བཞི་གནད་ཀྱི་ཡི་གེ །སྣང་བྱེད་སྒྲོན་མ། འོད་གསལ་ལྡེ་མིག །ཤེས་བྱ་བུམ་སྐོར། གསང་བའི་ཐེམ་བྱང་། སྒྲ་བརྟག་འཁོར་ལོ། །སྐུ་གསུམ་ལག་ཁྲིད། བབས་ལུགས་ལུས་སྐོར། འཁྲུལ་པའི་སྡེབ་ཡིག །གསང་ཐིག་ཆེན་པོ། གསེར་བྱང་བཀོལ་བ། ལམ་ཁྲིད་ཆེན་པོ། ཡེ་ཤེས་ལག་ཁྲིད། དཀའ་འགྲེལ་ཆེན་མོ། །གསང་བའི་མེ་ལོང་། བསམ་གཏན་རང་གནས། གསང་བ་ཉིད་ཁོལ། སྣང་བ་བསྡུས་པ། གནས་པ་བྱུང་ཁུངས། ཁྲེགས་ཆོད་བདུན་པ། ཐོད་རྒལ་དགུ་པ། ཀློང་ཆེན་དྲུག་པ། སྤྱོད་ལམ་བསྡུས་པ། ལྟ་བའི་གསེར་བཀོད། པདྨ་ཀློང་ཡངས། ལྷའི་ཕྱག་སོར། གསེར་གྱི་ཨུཏྤལ། དྲན་པ་རྒྱུན་གཅོད། རགས་པ་ལམ་སློང་། གསལ་བའི་སྒྲོན་མ། སེང་གེ་རྩལ་སྤྲུགས། ཨ་ཏི་རྣལ་འབྱོར། དགོངས་དོན་བཞི་པ། རྡོ་རྗེའི་ལམ་བསྟན། ལྷག་པའི་འཁོར་ལོ། ཁྱུང་ཆེན་མཁའ་ལྡིང་། ལྟ་བའི་དམིགས་བསལ། བླ་མའི་རིམ་པ། དྲང་བའི་ཚིག་རྒྱུན། འཁྲུལ་གཞི་རྩད་གཅོད། སེམས་ཀྱི་དམིགས་དྲུག །སྒོམ་པའི་འཁོར་ལོ། དབང་གི་ལྡེ་མིག །དབང་གི་ལས་བྱ། སྤྲོས་མེད་དབང་ཆོག །དབང་གི་རྩ་བ། དབང་གི་རིགས་འབྱེད། དབང་གི་ཕྲ་ཏིག །འཁོར་ལོ་དྲུག་པ། དམ་ཚིག་རབ་འབྱེད། དབང་བཀོད་ཆེན་མོ། དབང་སྦྱོར་པྲ་ཁྲིད། རིག་པའི་མེ་ཏོག །སེམས་ལུང་ཆེན་པོ། མན་ངག་རྩ་བ། ལུང་ཏིག་བཅོ་བརྒྱད། རིམ་པ་དྲུག་པ། སེམས་ལུང་སྒོམ་ཁྲིད། ཡང་གསང་དྲིལ་བ། སྦས་པ་ཉི་མ། ཕྲ་བཀོད་བཅུ་པ། ལུང་ཏིག་བསྡུས་པ། བདུད་རྩི་ཡང་ཞུན། ལུང་གསུམ་འདུས་པ། མན་ངག་རྒྱལ་པོ་གཡུ་ཡིག་ཅན། དུང་ཡིག་ཅན། ཟངས་ཡིག་ཅན། ཕྲ་ཡིག་ཅན། གསེར་ཡིག་ཅན། སྙིང་གཟེར་ཆེན་པོ། སྙིང་གཟེར་ཆུང་བ། བསམ་གཏན་ཉལ་བའི་འཁོར་ལོ། འཕྲུལ་ཡིག་ཆེན་པོ། འཕྲུལ་ཡིག་ཆུང་ངུ་། མཁའ་འགྲོའི་མཛོད། འཕོ་བ་ཆེན་པོ། རྩ་གནས་འཁོར་ལོ། རིག་པའི་ས་འབྱེད། ཡེ་ཤེས་སྦུབས་འཇུག །ལོ་རྒྱུས་ཆེན་པོ། གསང་བའི་ཞལ་ཆེམས། ཐེག་པའི་རུ་ཤན། གསང་བའི་སྒྲ་ཡིག །སྒྲ་བཞི་མཚམས་སྦྱོར། བསྟན་པའི་གོ་ཆ། འགྱུར་མེད་ཐིག་ལེ། དངོས་པོ་ཁ་བསྒྱུར། འབྲས་བུ་མངོན་བྱེད། ཐི་བྱ་ཚང་འཇུག གསལ་བ་རིན་ཆེན། ལྷུན་གྲུབ་ཡེ་ཤེས། ཤེས་རབ་འཁོར་ལོ། སྨྲ་བའི་མཚོན་ཆ། ཡེ་ཤེས་ལྔ་སྐོར། འོད་ཀྱི་ཚུལ་བཤད། འབྱུང་བའི་གནད་འབྱེད། སྒྲོན་མ་ཁུངས་གཅོད། ཕྱག་རྒྱ་འདུས་པ། བཀོད་པ་ལྔ་པ། རྒྱ་མཚོ་ཨར་གཏད། རླུང་གི་སྡོམ་བྱང་། ངོ་སྤྲོད་གསུམ་པ། བབས་ལུགས་བཅུ་གཅིག །རྩ་ཐིག་ཆེན་པོ། རིག་པའི་གནས་ས། མིག་གི་བསམ་གཏན་ཏེ་བརྒྱ་དང་དྲུག པདྨ་ཁ་འབྱེད་ལ་སོགས་པ་རྒྱུད་ཀྱི་དོན་གསལ་བའི་མན་ངག་ཏུ་མི་ཐེ་བ་གསུམ་དང་། བསྡོམས་པས་བརྒྱ་དང་བཅུ་དགུར་བཞུགས་སོ། །དེའང་རྒྱུད་ཀྱི་བུར་བགྲངས་ཀྱང་རྒྱུད་བཅུ་བདུན་བཀའ་སྲུང་དང་བཅོ་བརྒྱད་ལས་མེད་དེ། འོད་ཀྱི་ཡང་ཞུན་བཅུ་བདུན་བཤད། །ཅེས་པའི་སྟེང་དུ་ཁྲོས་མ་བསྣན་པའོ། །དེའང་ཀུན་མཁྱེན་གྱིས། བུར་བགྲངས་པ་དེ་དག་མན་ངག་གི་རྣམ་གྲངས་ཏེ་རྒྱུད་ཀྱི་མན་ངག་གསང་བ་ཡིན་ནོ། །ཁ་ཅིག་ཕྱིས་བི་མ་ལས་ཁ་བསྐངས་པར་འདོད་པ་ནི། རྟོག་དཔྱོད་རྩིངས་པ་ཡིན་ནོ། །འདི་དག་གིས་ནི་བསམ་གྱིས་མི་ཁྱབ་སྟེ་མཚན་ཙམ་བཀོད་པ་ལས། སོ་སོའི་དུམ་བུའི་གྲངས་ནི་མན་ངག་མ་བུ་ངེས་པའི་ཁ་བྱང་ཉིད་དུ་བལྟ་བར་བྱའོ། །དེ་ལྟ་བུའི་ཟབ་པ་དང་རྒྱ་ཆེ་བའི་མན་ངག་གི་ཡི་གེ་རྣམས་ཀྱི་དོན་ཚིག་ཉུང་ལ་གནད་འདུས་པར་བསྟན་པ་ནི་ཁོ་བོས་བསྡེབས་པའི་ཡང་ཏིག་ཡིད་བཞིན་ནོར་བུའི་ཆོས་སྡེ་ལྔ་བཅུ་རྩ་གཅིག་པར་ཤིན་ཏུ་གསལ་བར་བྱས་ཏེ་ཕྱི་རབས་ཀྱི་སྐལ་པ་དང་ལྡན་པའི་དོན་དུ་སྨོན་ལམ་གྱིས་གཏད་རྒྱ་དང་བཅས་པ་ཡིད་བཞིན་བསམ་འཕེལ་དུ་བྱས་པའོ། །ཞེས་གསུངས་པ་ལྟར་རྒྱ་ཆེན་རྒྱུད་སྡེའི་སྙིང་པོ་དང་། རྒྱུད་དེ་དག་གི་བུ་ཡང་ཟབ་མན་ངག་གི་ངེས་འབྱེད་བཤད་པ་ཐམས་ཅད་ཀྱང་གོང་དུ་མ་བུ་ངེས་པའི་ཁ་བྱང་དུ་བསྟན་པ་དང་། ཕྱི་མ་མན་ངག་བརྒྱ་དང་བཅུ་དགུ་གཉིས་ཕན་ཚུན་ལྟོ་སྦྱར་ནས་གྲངས་དང་དུམ་བུའི་རྣམ་འབྱེད་ཞིབ་ཏུ་བྱར་ཡོད་པ་ཉིད་དུ་རྟོགས་ཏེ། པདྨ་ཁ་འབྱེད་ལ་སོགས་པ་གོང་མའི་སྡེ་ཚན་དུ་སྣང་བའི་ཕྱིར་རོ། །ཁྱད་པར་དུ་དེ་དག་གི་དོན་ཡང་ཏིག་ཡིད་བཞིན་ནོར་བུ་ལ་བསྡུས་པའི་ཚུལ་དངོས་སུ་ཞལ་གྱིས་འཕངས་པ་ལྟར་གདོད་མའི་མགོན་པོ་མིའི་རྫུ་ལ་ཞུགས་པ་འདིའི་དགོངས་གཏེར་མན་ངག་གི་རིམ་པ་ཐམས་ཅད་བསྟན་བཅོས་ལྟར་སྣང་ཡང་། དོན་ལ་རྒྱ་ཆེན་རྒྱུད་དང་། ཡང་ཟབ་མན་ངག་ཐམས་ཅད་ཀྱི་སྙིང་ཕྱུང་བ་ལྟ་བུའི་ཨུ་པ་དེ་ཤ་ཉིད་དུ་ངེས་པས་རྒྱུད་དང་ཁྱད་པར་མེད་ལ། ཀུན་ཏུ་བཟང་པོ་གཉིས་པས་ཆོས་ཀྱི་འཁོར་ལོ་བསྐོར་བ་ཡིན་པས་འདིར་རྒྱ་འགྱུར་གྱི་རྗེས་སུ་དེའི་ངེས་བརྗོད་གླེང་ནས་རྣམ་གྲངས་བསྡུ་བའི་སྲོལ་བཏོད་པ་ལ་ཡིད་ཕྱོགས་པ་འདིའང་དཔལ་མགོན་བླ་མ་དེས་ཁོ་བོ་ལ་ཞལ་ལན་གསུམ་དུ་གཟིགས་ཤིང་བྱིན་གྱིས་བརླབས་པའི་ཕྲིན་ལས་ཡིན་པར་བལྟའོ། །གཉིས་པ་ནི། དཔལ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་དང་། དབྱིངས་ཕྱུག་ཡེ་ཤེས་ཀྱི་ཌཱཀྐི་མཁར་ཆེན་བཟའ་འཚོ་རྒྱལ་ལ་སོགས་པའི་རིག་འཛིན་མཁའ་འགྲོ་རྒྱ་མཚོས། འོག་མིན་དཔལ་གྱི་མཆིམས་ཕུ་ནགས་ཀྱི་དུར་ཁྲོད་ཆེན་པོ་བསིལ་བ་ཚལ་དང་དབྱེར་མི་ཕྱེད་པའི་གནས་སུ་སྐུ་དངོས་སུ་བསྟན་ནས། ངེས་གསང་རྫོགས་པ་ཆེན་པོ་སྤྱི་དང་བྱེ་བྲག་ཏུ་སྙིང་ཏིག་བླ་ན་མེད་པའི་བསྟན་པའི་བདག་པོར་དབང་བསྐུར་བའི་རིག་འཛིན་ཆེན་པོ། པཎ་ཆེན་བི་མ་ལ་དང་གཉིས་སུ་མ་ཡིན་པ་ངེས་པ་དོན་གྱིས་འབྲེལ་ཚད་དོན་དང་ལྡན་པས་གདུལ་བྱ་མང་པོ་རྣམ་བྱང་ལ་བཀྲི་བའི་བདག་ཉིད་ཆེན་པོ་སངས་རྒྱས་གཉིས་པ་ཀུན་མཁྱེན་ངག་གི་དབང་པོའམ། ཀློང་གསལ་དྲི་མེད། རྡོ་རྗེ་སེམས་དཔའ། རྡོ་རྗེ་གཟི་བརྗིད། བློ་གྲོས་མཆོག་ལྡན། ཚུལ་ཁྲིམས་བློ་གྲོས། པདྨ་ལས་གྲོལ། སྣ་ཚོགས་རང་གྲོལ། དྲི་མེད་འོད་ཟེར། ཀློང་ཆེན་རབ་འབྱམས། དཔལ་ལྡན་བསམ་ཡས་པ་ལ་སོགས་པ་མཚན་གྱི་རྣམ་གྲངས་དུ་མའི་བདག་ཉིད་ཅན་དེས། བདེ་བར་གཤེགས་པའི་གསུང་རབ་སྡེ་སྣོད་གསུམ། རྒྱུད་སྡེ་བཞིའམ་དྲུག་ལ་སོགས་ཏེ་མདོར་ན་ཆོས་ཀྱི་ཕུང་པོའི་རྣམ་གྲངས་ཀྱིས་བསྡུས་པ་ཐམས་ཅད་རང་བཞིན་རྫོགས་པ་ཆེན་པོའི་ལྟ་སྒོམ་སྤྱོད་འབྲས་ཀྱི་ངང་དུ་རྫོགས་པའི་ཚུལ་དུ་དཔལ་གྱི་མགུལ་ལས་རྡོ་རྗེའི་ཚིག་རྐང་དུ་བཀྲལ་ཏེ་གསུངས་པའི་དགོངས་གཏེར་མན་ངག་གི་བསྟན་བཅོས་ལ་ཟབ་པ་དང་རྒྱ་ཆེ་བ་གཉིས་ལས། དང་པོ་ནི། གངས་རི་ཐོད་དཀར་དུ་པཎ་ཆེན་བི་མ་ལས་ཞལ་གཟིགས་ནས། ངའི་སྙིང་ཏིག་འདི་དོན་འདུས་གོ་སླའི་ཉིང་ཁུ་ཞིག་རྩོམ། ཆོས་འདི་ཁྱོད་ལ་སྟོན་པའི་བླ་མ་ཀུ་མ་རཱ་ཛའི་སྐྱེ་བ་ད་ལྟའི་སློབ་མ་གཞོན་ནུ་སངས་རྒྱས་འདི་ལ་སྟོན། དེ་ནས་ཀྱང་སྣ་ལ་ཨ་ཡིག་གིས་མཚན་པའི་ཀུ་མའི་མིང་ཅན་བདུན་འབྱུང་བས་ཆོས་འདི་འཛིན་སྤེལ་བྱེད་པར་ལུང་བསྟན་པས་མཁའ་འགྲོ་ཡང་ཏིག་བརྩམས་པར་གྲགས་ཀྱང་། རྣམ་པར་དཔྱད་ན་བི་མ་ལའི་སྙིང་ཐིག་གི་དོན་བསྡུས་པ་ཡང་ཟབ་བླ་མའི་སྙིང་ཐིག་གི་སྐོར་ཏེ། དེ་ལ་ཟབ་པ་པོད་བཞི་དང་། མན་ངག་བརྒྱ་བཅུ་དགུ་ལ་སོགས་པའི་ལམ་གྱི་གནད་མཐའ་ཡས་པ་གཅིག་ཏུ་བསྡུས་པ་ཡང་ཏིག་ཡིད་བཞིན་ནོར་བུ་ཆོས་སྡེ་ལྔ་བཅུ་རྩ་གཅིག་པའི་བདག་ཉིད་ཅན། དེ་ནས་ཤིན་ཏུ་ཟབ་པའི་གནད་བསྡུས་པ་ཟབ་མོ་ཡང་ཏིག་ཆོས་སྡེ་སུམ་ཅུ་རྩ་ལྔ་པ་རྣམས་ནི་ཐིག་ལེ་མཆོག་གསང་རྫོགས་པ་ཆེན་པོའི་ཆོས་སྡེ་ལས་བྱིན་རླབས་བླ་མའི་སྙིང་ཏིག་ལག་ཁྲིད་ཀྱི་སྐོར་དང་། སྐྱེ་བ་སྔོན་མ་ལས་འབྲེལ་རྩལ་གྱི་དུས་རྒྱུད་སྡེའི་བཅུད་ཕུར་མཁའ་འགྲོའི་སྙིང་ཏིག་གཏེར་ནས་ཕྱུང་སྟེ་རྗོད་བྱེད་ཀྱི་ཚིག་ཙམ་ལ་དབང་བ། སྐུ་ཚེ་འདིར་ལུང་བསྟན་གྱི་བདེན་པའི་རྔ་བོ་ཆེ་བསྒྲགས་པ་ལྟར་མངོན་སུམ་འོད་གསལ་གྱི་ལམ་ནས་ལོངས་སྐུའི་ཞིང་ཁམས་ཉུལ་བའི་ཚེ། ཤིང་མོ་ཡོས་ལོར་མཆིམས་ཕུའི་རིང་མོ་ཅན་དུ་ཨོ་རྒྱན་ཡབ་ཡུམ་ཞལ་གཟིགས་ཤིང་དགོངས་གཏེར་བརྡ་བརྒྱུད་དུ་བབས་ནས་བརྗོད་བྱའི་དོན་ལ་རང་དབང་བསྒྱུར་ཞིང་། སྨོན་ལམ་ལུང་བསྟན་དང་འབྲེལ་པ་མཁའ་འགྲོའི་ཡང་ཏིག་ཏུ་གྲགས་པ་ལ། ཟབ་ཅིང་རྒྱ་ཆེ་བ་ཤོག་སྐྱ། ཡང་ཟབ་རྣམས་ཤོག་འདྲ། ཤིན་ཏུ་ཡང་ཟབ་རྣམས་ཤོག་སེར་ཏེ་སྐོར་ཚོ་གསུམ་དུ་བསྡུས་པ་ཟབ་པ་ལས་ཀྱང་ཆེས་ཟབ་པ་ལྔ་བཅུ་རྩ་ལྔ་པར་གཏན་ལ་ཕབ་པའི་ཆོས་ཀྱི་རྣམ་གྲངས་དང་། གནད་ཐོར་བུ་པའི་མན་ངག་ལ། གསེར་གྱི་སྒྲོམ་བུ། སངས་རྒྱས་མཉམ་སྦྱོར། ཁྱུང་ཆེན་གཤོག་རྫོགས། ཡིད་བཞིན་ནོར་བུ། བདུད་རྩིའི་བུམ་པ། ཡང་གསང་སྙིང་ཏིག །ཐིག་ལེ་གསང་སྐོར་གྱི་མན་ངག་རྣམས་སོ། །གཉིས་པ་རྒྱ་ཆེ་བ་དགོངས་འགྲེལ་བསྟན་བཅོས་ཀྱི་སྐོར་ལ། ཚོགས་གཉིས་ཀྱི་ལམ་ལ་གོམ་པའི་འདེགས་འཇོག་བསྒྱུར་ནས། དོན་གཉིས་ལྷུན་གྲུབ་འོད་གསལ་རྡོ་རྗེ་སྙིང་པོའི་ཁང་མཛེས་སུ་བགྲོད་པར་འདོད་པའི་སྐྱེས་བུ་སྐལ་བ་དང་ལྡན་པ་གང་ཞིག །འཁོར་བའི་རང་བཞིན་རྣམ་རྟོག་སྣ་ཚོགས་ཀྱི་སྤྲོས་པས་དུབ་ཅིང་ངལ་བའི་མཐའ་ལ་གནས་པ་འོད་གསལ་རྡོ་རྗེ་སྙིང་པོ་ཆོས་སྐུ་འདུས་མ་བྱས་པའི་ཁང་མཛེས་སུ་ངལ་བསོ་བར་བྱེད་པའི་བརྗོད་དོན་ལས་བསྙད་དེ། རྗོད་བྱེད་ཀྱི་མིང་རྩ་བའི་གཞུང་ང༷ལ་གསོ༷་སྐོ༷ར་གསུམ་དུ་གྲགས་པའི་དགོངས་གཏེར་བསྟན་བཅོས་ལ། རྒྱས་འགྲེལ་ཤིང་རྟ་རྣམ་གསུམ། བསྡུས་དོན་ཕྲེང་བ་རྣམ་གསུམ། དོན་ཁྲིད་རྣམ་གསུམ་སྟེ་ཡན་ལག་དགུ་ལས། དགེ་བ་རྣམ་གསུམ། དོན་ཚིག་བཟང་པོ། མ་འདྲེས་པ། ཡོངས་སུ་རྫོགས་པ་ལ་སོགས་ཏེ་སྟོན་པ་དྲང་སྲོང་ཆེན་པོ་ཉིད་ཀྱི་གསུང་རབ་དང་གཉིས་སུ་མེད་པའི་ཁྱད་ཆོས་ཅན། མདོ་སྔགས་ཀྱི་ཆོས་འཁོར་ཐམས་ཅད་བསྟན་པ་ཡོངས་རྫོགས་ཀྱི་ཚུལ་དུ་བཤད་པ་སེམས་ཉིད་ངལ་བསོ་རྩ་བ་ལེའུ་བཅུ་གསུམ་པ། དེའི་བསྡུས་དོན་བྱད་དང་མེ་ལོང་ཐུག་པ་ལྟར་ཕྱི་ནང་གི་གནས་ཐམས་ཅད་སྐད་ཅིག་ལ་རྟོགས་པར་བྱེད་པའི་ལྡེ་མིག་ཀུནྡའི་ཕྲེང་བ། ཚིག་དོན་འབྱམས་ཀླས་པར་སྟོན་པའི་རྒྱས་འགྲེལ་ཤིང་རྟ་ཆེན་མོ། བསྡུས་དོན་པདྨ་དཀར་པོ། དགེ་བ་གསུམ་གྱི་དོན་ཁྲིད་བྱང་ཆུབ་ལམ་བཟང་དང་བཅས་པའོ། །མདོ་ཏིང་ངེ་འཛིན་རྒྱལ་པོ་ལྟར་ཆོས་ཐམས་ཅད་སྒྱུ་མའི་དཔེ་བརྒྱད་ཀྱིས་སྟོན་པས་བདེན་ཞེན་གྱི་འཆིང་བ་གཅོད་པ་སྒྱུ་མ་ངལ་བསོ་རྩ་བ་ལེའུའམ་རིམ་པར་ཕྱེ་བ་བརྒྱད་པ། དེའི་བསྡུས་དོན་ཡུལ་ལ་མིག་ཤེས་འཇུག་པ་ལྟ་བུ་མནྡཱ་ར་བའི་ཕྲེང་བ། བློ་གྲོས་ཀྱི་སྣང་བ་ནམ་མཁའ་ལ་ཉི་མ་ཤར་བ་ལྟར་གསལ་བར་བྱེད་པའི་རྒྱས་འགྲེལ་ཤིང་རྟ་བཟང་པོ། འོད་གསལ་གྱི་དོན་གསལ་པོར་སྟོན་པའི་དོན་ཁྲིད་ཡིད་བཞིན་ནོར་བུ་བཅས་དང་། གཉུག་མ་རང་གནས་ཀྱི་བསམ་གཏན་ཡེ་ཤེས་འོད་གསལ་གྱི་ལམ་དུ་གོམས་པར་བྱེད་པའི་མྱུར་ལམ་ཟབ་མོ་བསམ་གཏན་ངལ་བསོ་རྩ་བ་རྡོ་རྗེའི་གནས་གསུམ་པ། དེའི་བསྡུས་དོན་ཚིག་ཉུང་དོན་གྱི་སྙིང་པོ་པུཎྜ་རི་ཀའི་ཕྲེང་བ། ཟབ་མོའི་གནས་ལུགས་རྒྱ་མཚོ་གསལ་བར་བྱེད་པའི་རྒྱས་འགྲེལ་ཤིང་རྟ་རྣམ་དག །འོད་གསལ་སྒོམ་པའི་དོན་ཁྲིད་སྙིང་པོ་བཅུད་བསྡུས་རྣམས་དང་། ངལ་བསོ་སྐོར་གསུམ་ཀའི་ཆོས་འབྱུང་ཤེས་རབ་གསལ་བ་ཞེས་སྤྱི་དོན་ལེགས་བཤད་རྒྱ་མཚོ། དཀར་ཆག་པདྨ་སྟོང་ལྡན་ཏེ། དེ་ལྟར་ཆོས་སྡེ་ཆེ་ཆུང་བཅོ་ལྔའམ། ཟླ་བ་ཉ་བའི་གྲངས་ཀྱི་ངལ་བསོ་སྐོར་གསུམ་གྱི་རྩ་བ་དང་ཡན་ལག་རྣམས་ཚང་བ་ཡིན་ནོ། །རིམ་དགུའི་ཐེག་པ་སྤྱིའི་རྗོད་བྱེད་ཀྱི་གོ་ཕྱེ་ནས་བརྗོད་བྱའི་སྙིང་པོ་རང་བཞིན་རྫོགས་པ་ཆེན་པོའི་ལམ་གོལ་འཕྱུགས་མེད་པར་སྟོན་པའི་མན་ངག་གི་བསྟན་བཅོས་མཛོད་ཆེན་བདུན་དུ་གྲགས་པ་ལས། ཐོག་མར་སྟོན་པ་བྱོན་ཚུལ་རགས་རིམ་གྱིས་ཁོག་དབུབ། ལོག་པར་ལྟ་བ་ཕྱི་རོལ་པའི་གྲུབ་མཐའ་མཚང་ནས་བརྒལ་ཏེ་དགག་གཞིར་བཞག །སྟོན་མཆོག་བླ་ན་མེད་པ་དེའི་བསྟན་པ་ཐུན་མོང་དང་ཐུན་མོང་མ་ཡིན་པའི་ཐེག་པའི་བྱེ་བྲག་འཕགས་ཆོས་དུ་མའི་སྒོ་ནས་བསྒྲུབས་ཏེ་དཔྱད་བཟོད་པར་འགྲེལ་པ་གྲུབ་མཐའ་རིན་པོ་ཆེའི་མཛོད་རིམ་ཁང་བརྒྱད་པ། གསང་ཆེན་ངེས་པའི་རྒྱུད་བཅུ་བདུན་རྩ་བ་མར་བཞག་པ་ལ། རིག་འཛིན་སོ་སོས་མཛད་པའི་བཤད་ཏིག་རྒྱུད་ཀྱི་བུར་བགྲངས་པ་མ་བུ་ངེས་པའི་ཁ་བྱང་དུ་གསལ་བ་དང་། མན་ངག་བརྒྱ་བཅུ་དགུའི་དོན་འགྲེལ་རྒྱ་ཆེར་བཤད་པ་ཐེག་མཆོག་མཛོད་ལེའུའམ་སྐབས་ཉི་ཤུ་རྩ་ལྔ་པའི་བདག་ཉིད་ཅན། མདོ་རྒྱུད་བསྟན་བཅོས་མན་ངག་ཀུན་གྱི་སྙིང་ཁྲག་ཕྱུང་ནས་ཤེས་རབ་གསུམ་གྱི་སྣང་ཕྱེད་གསར་པས། སྟོད་ཆར་ཐུན་མོང་གི་གཞུང་རྒྱ་ཆེར་བསྟན་པའི་ཤུགས་ཀྱིས་དྲངས་ནས། ཐེག་པ་མཆོག་གི་བཞིན་རས་ལྷག་གིས་སྟོན་པ་ཉི་ཟླ་རིན་པོ་ཆེའི་འོད་ཀྱི་སྣང་བ་ཡིད་བཞིན་རིན་པོ་ཆེའི་མཛོད་རྩ་བ་སརྒ་ཉེར་གཉིས་པ། དེའི་དགོངས་འགྲེལ་ཆེན་པོ་པདྨ་དཀར་པོ། ཁྲིད་ཡིག་ཟབ་དོན་རྡོ་རྗེའི་སྙིང་པོ་སྟེ་ལེའུ་ཚན་གསུམ། རྫོགས་པ་ཆེན་པོའི་སྦྱོར་བ་སྔོན་འགྲོ། དངོས་གཞི་ལམ་རིམ། ཐོབ་བྱ་འབྲས་བུ་དང་བཅས་པ་མདོ་རྒྱུད་ཀུན་གྱི་བཅུད་འདྲིལ་བ་ཡོན་ཏན་རིན་པོ་ཆེའི་གཏེར་མཛོད། རྗོད་བྱེད་དྲུག་ཚན་དུ་མའི་བདག་ཉིད་ཅན་གྱི་སྒོ་ནས་ཞལ་གདམས་ཀྱི་ཚུལ་དུ་སྟོན་པ་མན་ངག་རིན་པོ་ཆེའི་མཛོད། ཀློང་སྡེའི་དགོངས་པ་ཤས་ཆེ་ཡང་དོན་ལ་བརྗོད་བྱ་དང་རྗོད་བྱེད་གཉིས་ཀའི་སྒོ་ནས་སེམས་ཀློང་མན་ངག་གི་སྡེ་གསུམ་ཀ་ལྟར་བཀྲོལ་བའི་གཞི་ལམ་འབྲས་གསུམ་གྱི་རྣམ་གཞག་དོན་ཟབ་ཅིང་ཚིག་བརླིང་བའི་ཚུལ་གྱིས་བཞིན་དང་མེ་ལོང་ཐུག་པ་ལྟར་གནད་དོན་ཅར་ཕོག་ཏུ་སྟོན་པ་ཆོས་དབྱིངས་རིན་པོ་ཆེའི་མཛོད་རྩ་བ་འདབ་མ་བཅུ་གསུམ་པ། དེའི་འགྲེལ་བཤད་རྟོགས་པའི་སྣང་བ། ཆོས་དབྱིངས་གསལ་བ། ཐེག་པའི་རྒྱལ་པོ། ལུང་གི་གཏེར་མཛོད་ཅེས་མཚན་གྱི་རྣམ་གྲངས་ཐ་དད་པའི་སྒྲས་སྙན་པ། ཡོ་ག་འོག་མ་གཉིས་མན་ཆད་ཀྱི་དམ་ཚིག་གི་རྣམ་དབྱེ་བྱ་རྩོལ་བླང་དོར་གྱི་གཟེབ་ཏུ་ཆུད་པ་མཐའ་དག །རང་བཞིན་རྫོགས་པ་ཆེན་པོའི་དགོངས་པ་མཐའ་གྲོལ་ཀློང་ཡངས་ཀྱི་ངང་དུ་བག་ལ་ཞ་བས་མེད་པ། དེ་ཡང་ཡོད་མེད་བླང་དོར་གྱི་ཆོས་ལས་འདས་པའི་དགོངས་པས་ཟིལ་གྱིས་ནོན་ཅིང་རྟོག་དཔྱོད་ཀྱི་མཐའ་ལ་མ་ལྷུང་བས་ཕྱལ་བ། བསྲུང་བྱའི་དམ་ཚིག །སྲུང་བྱེད་ཀྱི་གང་ཟག །བསྲུང་ཚུལ་གྱི་རྣམ་ངེས་མ་ལུས་པ་ཀུན་བྱེད་རྒྱལ་པོ་བྱང་ཆུབ་སེམས་སུ་འདུས་པས་གཅིག་པུ། གཅིག་པུའི་བརྡར་བརྟགས་ཀྱང་ད་ལྟའི་རིག་པ་བློ་འདས་ཁ་ཡན་ཆེན་པོར་འུབ་ཀྱིས་ཆུད་པས་ལྷུན་གྲུབ་སྟེ། བཞི་པོའི་རྣམ་གྲངས་རང་བཞིན་རྫོགས་པ་ཆེན་པོའི་རྒྱུད་སྡེའི་རང་སྐད་མ་ཉམས་པས་བརྗོད་དོན་ཐ་དད་དུ་གནད་འགག་བཀྲོལ་ཞིང་ཡིན་ལུགས་གནད་ཐོག་ཏུ་ཕབ་ནས་འགག་བསྡམས། རང་གྲོལ་བསམ་ངོ་ལས་འདས་པའི་ཆིངས་སུ་བཅིངས། འབད་རྩོལ་རྒྱུ་འབྲས་ལ་མ་ལྟོས་པར་ལ་བཟླ་བ་སྟེ། རྡོ་རྗེའི་གནས་ཆེན་པོ་བཅུ་དྲུག་གིས་གསལ་བར་སྟོན་པ་གནས་ལུགས་རིན་པོ་ཆེའི་མཛོད་ལེའུའམ་མཛོད་ཁང་ལྔ་པའི་བདག་ཉིད་ཅན་འགྲེལ་ཊཱིཀ་དང་བཅས་པ། དེ་དག་ཀུན་གྱི་ནང་ནས་རྒྱུད་ལུང་མན་ངག་ཐམས་ཅད་ཀྱི་རྒྱ་ཆེར་འགྲེལ་ལྟ་བུ་ཐེག་མཆོག་མཛོད་བརྗོད་བྱ་རྒྱ་ཆེ་ཞིང་གོ་དོན་སློངས་ཆེ་བས་རིམ་པའི་ཁང་པ་དྲུག་པ་མན་ཆད་ཀྱིས་གནད་དོན་མ་ལུས་པ་ཟབ་བཅུད་ལྟར་བསྡུས་ནས། གཞིའི་གནས་ལུགས་ལ་ཞུགས་པ་ལམ་དུ་གོམས་པས་འབྲས་བུ་མངོན་གྱུར་གྱི་བར་ལམ་འཁྱེར་མན་ངག་གི་ཚུལ་དུ་བཤད་པ་ཚིག་དོན་རིན་པོ་ཆེའམ། འོད་གསལ་མཛོད་དུ་གྲགས་པ་རྡོ་རྗེའི་གནས་བཅུ་གཅིག་པ་སྟེ། དེ་དག་གིས་མཛོད་བདུན་གྱི་སྐོར་ཚོའི་ཆོས་ཀྱི་རྣམ་གྲངས་ཚང་ལ། གཞན་ཡང་སེམས་སྡེ་སྤྱིའི་དོན་བཤད་ཀུན་བྱེད་རྒྱལ་པོའི་སེམས་འགྲེལ་ཉི་མའི་འོད་ཟེར། ཁྲིད་ཡིག་ནམ་མཁའ་ཀློང་གསལ། མན་ངག་གི་དོན་འགྲེལ་རང་གྲོལ་སྐོར་གསུམ་ཞེས། རྫོགས་པ་ཆེན་པོ་སེམས་ཉིད་རང་གྲོལ། འགྲེལ་པ་འོད་ཀྱི་འཁོར་ལོ། ཁྲིད་ཡིག་ཆོས་སྐུ་རང་ཤར། རྫོགས་པ་ཆེན་པོ་ཆོས་ཉིད་རང་གྲོལ། འགྲེལ་པ་འོད་ཀྱི་སྙེ་མ། ཁྲིད་ཡིག་ཆོས་སྐུ་རང་བབས། རྫོགས་པ་ཆེན་པོ་མཉམ་ཉིད་རང་གྲོལ། འགྲེལ་པ་འོད་ཀྱི་དྲྭ་བ། ཁྲིད་ཡིག་ཆོས་སྐུ་ལྷུན་གྲུབ་རྣམས་དང་། ཀློང་སྡེ་སྤྱིའི་དོན་བཤད་ལ། ཀློང་གསུམ་སྤྱིའི་དོན་ཆིངས། ནམ་མཁའ་རབ་འབྱམས་འགྲེལ་པ་ཡངས་དོག་མེད་པའི་རྒྱ་གྲོལ། ཁྲིད་ཡིག་ཁྱབ་གདལ་ཀློང་ཡངས་རྣམས་དང་། མན་ངག་སྡེའི་སྤྱི་དོན། སྐུ་དང་ཡེ་ཤེས་རྒྱས་པ་ལྷུན་གྲུབ་སྙིང་པོ། འགྲེལ་པ་མི་ནུབ་རྒྱལ་མཚན། མཚོན་དཔེ་སྐུ་གསུམ་ལག་ཁྲིད། མན་ངག་དོན་འགྲེལ་ཀུན་འདུས་རིག་པའི་གལ་མདོ། ཀུན་གསལ་སྙིང་གི་དོན་འགྲེལ། བར་དོ་འོད་ཀྱི་སྙེ་མཚོན་ཏེ། དེ་དག་རྣམས་ནི་རང་བཞིན་རྫོགས་པ་ཆེན་པོའི་ཕྱོགས་སུ་གཏོགས་པའི་མན་ངག་གི་རིམ་པ་ཡིན་ལ། ཁྱད་པར་སྙིང་ཐིག་གསང་བའི་སྐོར་གྱི་མན་ངག་རྣམས་ལ་སྨིན་གྲོལ་ལམ་གྱི་སྲོག་མ་ལུས་པ་བཞུགས་ཤིང་། མན་ངག་ཉམས་སུ་ལེན་པའི་ལམ་གྱི་མདོ་དོན་ཡིན་ལ། ཟབ་མོའི་མཛོད་ཆེན་བདུན་ལ་སོགས་པས་གྲུབ་པའི་མཐའ་རྣམ་པར་དབྱེ་ཞིང་ལམ་གྱི་གེགས་བསལ་བའི་རྒྱབ་བརྟེན་རྨད་དུ་བྱུང་བ་ཡིན་པས་རང་བཞིན་རྫོགས་པ་ཆེན་པོའི་བསྟན་པའི་རྩ་ལག་ཆེན་པོར་བསྐལ་པའི་བར་དུ་ནུབ་པ་མེད་པའི་བདག་པོའི་རྐྱེན་བསྟན་པ་འདི་འཛིན་པ་རྣམས་ཀྱིས་གཅེས་སྤྲས་ཀྱིས་བསྐྱང་དགོས་པ་ཡིན་ཏེ། ཀུན་མཁྱེན་ཆེན་པོ་དེས་ཐེག་པའི་མཆོག་ལ་བསྔགས་པར། འཛམ་བུའི་གླིང་ན་ཕྱི་རབས་མིའི་བསྒྲུབ་རྟེན། །ཐེག་མཆོག་འདི་དང་མཚུངས་པ་གཞན་ཡོད་མིན། །དེ་ཕྱིར་དཔག་མེད་ཆོས་ཀྱི་མཛོད་འདི་ནི། །རྡོ་རྗེ་སྙིང་པོའི་བསྟན་པའི་སྲོག་ཤིང་ཡིན། །དཔལ་མགོན་བླ་མ་ཤིན་ཏུ་མཉེས་བྱས་བརྒྱུད་པའི་བྱིན་རླབས་སྤྲིན་ཕུང་ལྡན། །དབང་གི་ཆུ་བོ་རྒྱ་མཚོས་རྒྱུད་བརླན་བཤད་པའི་སྒྲོན་མེ་མ་ནུབ་ལ། །ཟབ་ཅིང་རྒྱ་ཆེའི་མན་ངག་དང་ལྡན་སྙན་བརྒྱུད་སྙིང་པོ་བདག་ལ་བབས། །དེ་ཕྱིར་སྙིང་ཏིག་བཀའ་གསང་རྒྱ་ཆེའི་བསྟན་པ་དེང་སང་ཁོ་བོས་འཛིན། །རྒྱལ་བ་རིག་འཛིན་བརྒྱུད་པ་མ་ཉམས་ལ། །སྙིང་པོའི་ལག་ལེན་མ་ནོར་མངོན་སུམ་པ། །ཇི་བཞིན་རྟོགས་པས་དེ་བཞིན་སྨྲ་བྱེད་པས། །རྒྱལ་བ་རྒྱ་མཚོ་དམ་ཅན་དགྱེས་སོ་ཀྱེ། །ཟབ་དོན་བདུད་རྩིའི་ཆུ་རྒྱུན་སྦྲེངས་པ་དང་། །མཉམ་དུ་ཉོན་མོངས་གདུང་བ་ཞི་བྱེད་པས། །འཁོར་བའི་མེ་ཚོགས་འཕངས་པའི་འགྲོ་བ་ཀུན། །ཞི་བདེ་བསིལ་བའི་ལམ་ལ་འདྲེན་པ་ལགས། །འདི་ལ་ལྷ་དང་ལྷ་མིན་མི་རྣམས་དང་། །མཁའ་འགྲོ་དམ་ཅན་རྒྱ་མཚོའི་ཚོགས་རྣམས་ཀུན། །དགྱེས་པའི་སྤྱན་འབྱེད་བཟང་པོ་མཛད་པའི་རིགས། །ཞེས་པ་ལ་དོན་དཔག་ཏུ་མེད་པ་ཡོད་དོ། །དྲིས་ལན་རིན་པོ་ཆེའི་བསྟན་བཅོས་མན་ངག་ལུང་གི་གཏེར་མཛོད་ཅེས་བྱ་བ་ལས། རང་བཞིན་རྫོགས་པ་ཆེན་པོ་སྤྱི་དང་བྱེ་བྲག་གི་གྲུབ་པའི་མཐའ་རྣམ་པར་དབྱེ་བའི་སྐབས་ཏེ་སརྒ་བཞི་པའོ།། །།སྤྱི་དོན་གསུམ་པ་དེ་ལྟ་བུའི་སངས་རྒྱས་ཀྱི་བསྟན་པ་རིན་པོ་ཆེ་ལྗོངས་འདིར་དར་ཚུལ་རགས་པར་གླེང་ན། ལྷ་མོ་དྲི་མ་མེད་པས་ཞུས་པའི་མདོ་ལས། ང་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་ན་གདོང་དམར་ཅན་གྱི་ཡུལ་དུ་དམ་པའི་ཆོས་དར་བར་འགྱུར་རོ། །ཞེས་དང་། གཞན་ཡང་ཟ་མ་ཏོག་བཀོད་པའི་མདོ། ཤེར་ཕྱིན་བརྒྱད་སྟོང་། རྡོ་རྗེ་མཁའ་འགྲོའི་རྒྱུད་ལ་སོགས་ལུང་གི་ཕྲེང་བ་མང་པོ་ནས་མངོན་པར་བསྔགས་པའི་ཡུལ་ཀཻ་ལ་ཤའི་ར་བས་ཡོངས་སུ་བསྐོར་བའི་ལྗོངས་འདི་ནི་ཐོག་མར་དག་བྱེད་ཀྱི་ཕུང་པོས་ཡོངས་སུ་གཏམས་ཤིང་བཻ་ཌཱུརྻ་སྔོན་པོའི་མཎྜལ་ཕྱིས་པ་ལྟ་བུའི་མཚོར་ཡོད་པ། རིམ་གྱིས་བྲིས་ནས་ཤུགས་པ་ལ་སོགས་པའི་རྩི་ཤིང་ནགས་ཚལ་སྟུག་པོས་ཁེངས་ནས་ཡུལ་དུ་གྱུར་པ་ནི་ཇི་སྐད་དུ་འཇམ་དཔལ་རྩ་རྒྱུད་ལེའུ་སོ་དྲུག་པའི་བདག་ཉིད་ཅན་ནས། དེ་ཡི་དུས་ནས་ལོ་བརྒྱ་ན། །ཁ་བ་ཅན་དུ་མཚོ་བྲི་ནས། །སཱ་ལའི་ནགས་ནི་འབྱུང་བར་འགྱུར། །ཅེས་སོ། །དེའི་ཚེ་དང་པོར་མི་མ་ཡིན་གྱིས་རིམ་པར་བདག་ཏུ་བཟུང་ཞིང་། དེ་ཡང་ཐོག་མར་གནོད་སྦྱིན་གྱིས་བཟུང་སྟེ་ཡུལ་མིང་བཟང་ཡུལ་རྒྱན་མེད་དང་། དེ་ནས་བདུད་ཀྱིས་བཟུང་སྟེ་བདུད་ཡུལ་ཁ་རག་མགོ་དགུ། དེ་ནས་སྲིན་པོས་བཟུང་ནས་སྲིན་པོ་ནག་པོ་དགུ་ཡུལ། དེ་ནས་ལྷས་བཟུང་སྟེ་ལྷ་ཡུལ་གུང་ཐང་། དེ་ནས་རྨུས་བཟུང་སྟེ་འཕྲང་ཅ་འཕྲང་། དེ་ནས་འདྲེས་བཟུང་སྟེ་ལང་ཐང་ལིང་ཐང་། དེ་ནས་མ་སངས་སྤུན་དགུས་བཟུང་སྟེ་བོད་ཁ་ཉ་དྲུག །དེ་ནས་ཀླུས་བཟུང་སྟེ་བོད་ཁམས་གླིང་དགུ། དེ་ནས་རྒྱལ་པོས་བཟུང་སྟེ་དམ་པོ་རྩེ། དེ་ནས་འགོང་པོ་སྤུན་དགུས་བཟུང་སྟེ་སྟོང་སྡེ་བཅོ་བརྒྱད་ཅེས་ཡུལ་མིང་ཐ་དད་དུ་གྲགས་པ་ལས། ཅི་ཞིག་ན་བདེ་བ་ཅན་དུ་སངས་རྒྱས་སྣང་བ་མཐའ་ཡས་ཀྱིས་འཕགས་པ་སྤྱན་རས་གཟིགས་ལ་བོད་གདུལ་བར་ལུང་བསྟན་པ་ལྟར་སྤྱན་རས་གཟིགས་ཀྱིས་ཕྱག་མཐིལ་གཡོན་ནས་འོད་ཟེར་སྤྲོས་པས་སྤྲེའུ་ཞིག་སྤྲུལ། དེ་ལ་ཡོངས་རྫོགས་ཀྱི་དགེ་བསྙེན་བྱིན་ཏེ་བྱིན་གྱིས་བརླབས་ནས་ཁ་བ་ཅན་གྱི་རི་ལ་སྒོམ་དུ་བཏང་བས། དེ་བྲག་ལ་སྒོམ་པའི་ཚེ་སྒྲོལ་མའི་སྤྲུལ་པ་བྲག་སྲིན་མོ་ཞིག་འོངས་ཏེ་སྤྲེའུར་ཆགས་པའི་བརྡ་ཐབས་བསྟན་པ་ན། སྤྲེའུས་འཕགས་པའི་དགེ་བསྙེན་ཡིན་གྱི་ཁྱིམ་ཐབས་བྱར་མི་རུང་བའི་ཚིག་གིས་བཀྲོལ་ཀྱང་བྲག་སྲིན་མོ་ལྡོག་ཏུ་མ་བཟོད་ནས་སྤྲེའུ་སྙིང་རྗེའི་བསམ་པས་པོ་ཊ་ལར་རྫུ་འཕྲུལ་གྱིས་བསྐྱོད་དོ། །འཕགས་པས་སྤྲེའུ་ལ་གནང་བ་བྱིན་པ་ལྟར་སྔ་མའི་གནས་སུ་འདུས་པ་ལས། ཐོག་མར་སྤྲེའུ་ཕྲུག །དེ་ནས་རིམ་གྱིས་མིར་གྱུར་པ་ལས་དེ་དག་ཆ་བཞིར་བགོས་པ། རིགས་བསེ། རྨུ། ལྡོང་། སྟོང་སྟེ་མིའུ་རིགས་བཞི་དང་། ཡང་ཁ་ཅིག་ཏུ་དབྲ་དང་འབྲུ་བསྣན་པས་དྲུག་ཏུ་གྱུར་པ་ལ་རྒྱལ་ཕྲན་བཅུ་གཉིས་དང་། སིལ་མ་བཅུ་བཞི་ལ་སོགས་པས་རིམ་གྱིས་དབང་བྱས་ཀྱང་སྤྱི་ལ་དབང་བསྒྱུར་བ་ཞིག་མ་བྱུང་ན་སངས་རྒྱས་ཀྱི་བསྟན་པ་འཕེལ་དཀའ་བར་དགོངས་ནས། སྤྲུལ་པའི་བདག་ཉིད་ལི་ཙ་བྱིའི་རིགས་ལས་ཆད་པའི་བུ་གཅིག་གྱུར་བར་གྲགས་པ་ནི། རྒྱ་གར་གྱི་རྒྱལ་པོ་དམག་བརྒྱ་པའི་སྲས་མིག་མས་འགེབས་གཡུའི་དུང་སོ་འཁོར་མ། ལག་པའི་མཐིལ་དུ་འཁོར་ལོའི་རི་མོ་ཡོད་པ་མི་ལས་འདས་པ་ཞིག་བཙས་པ། དེ་དག་གིས་ལྷ་འདྲེའི་སྤྲུལ་པ་ལྟ་བུར་དོགས་ནས་སྤྱུགས་པ་ལྷ་རི་གྱང་མཐོའི་རྩེར་བྱོན་ནས་གཟིགས་པས། ཇི་སྐད་དུ། ཁང་ས་ཞིང་ས་ས་ཡིས་དགེ །ཞེས་པ་ལྟར། དགེ་བཅུའི་མཚན་མ་ཕུན་སུམ་ཚོགས་པ་ཡུལ་ཡར་མོ་ཀླུངས། ཤམ་པོའི་གངས་རི་དཔྱད་བཟང་བར་མཁྱེན་ཅིང་ལྷ་རི་རོལ་པོའི་སྟེང་ནས་ལྷ་སྐས་བརྒྱུད་བཙན་ཐང་སྒོ་བཞིར་བྱོན་ཏོ། །དེ་ཕྱུགས་སྐྱོང་བ་དག་གིས་མཐོང་སྟེ། དངོས་ལ་ཁྱོད་སུ་ཞིག་སྨྲས་པས། བཙན་པོ་ཞེས་དང་། གང་ནས་བྱོན་དྲིས་པས་གནམ་ལ་མཛུབ་མོ་བསྒྲེངས་པས་ལྷར་ངོས་བཟུང་། འདི་ནི་ཁོ་བོ་ཅག་གི་ཇོ་བོ་བྱེད་དོ་ཞེས་གཉའ་བར་ཁྲི་བྱས་ནས་གདན་དྲངས་པས་གཉའ་ཁྲི་བཙན་པོར་གྲགས་ཏེ་རྗེ་ལ་སྔ། བོན་རྣམས་རྨུ་ཐག་ལ་འོངས་ཟེར། དེ་ནས་རྒྱལ་རབས་ཉི་ཤུ་རྩ་བདུན་འདས་པ་ན་ལྷ་ཐོ་ཐོ་རི་གཉན་བཙན་བྱོན། མཁར་ལ་སྔ་བ་ཡུམ་བུ་གླ་སྒང་བཏབ། དེའི་ཚེ་ཐམས་ཅད་མཁྱེན་པའི་ལུང་བསྟན་གྱི་བདེན་པའི་རྔ་བོ་ཆེ་སྒྲོག་པའི་དུས་ལ་བབ་ནས་རྒྱལ་པོ་ཛའི་ཁང་སྟེང་དུ་གླེགས་བམ་གྱི་ཆར་འབབ་པ་དང་དུས་མཚུངས་པར་མདོ་སྡེ་ཟ་མ་ཏོག་རླུང་གིས་ཁྱེར་བ་ནམ་མཁའ་ལ་མི་མ་ཡིན་གྱིས་བཟུང་བ་ལས། རྒྱལ་པོ་འདིའི་ཚེ་བོད་ལ་ཆོས་དར་བའི་རྟེན་འབྲེལ་གྱི་སྒོ་དང་པོར་ཕོ་བྲང་ཡུམ་བུ་གླ་སྒང་གི་རྩེར། སྤང་སྐོང་ཕྱག་བརྒྱ་པ། གསེར་གྱི་མཆོད་རྟེན། མདོ་སྡེ་ཟ་མ་ཏོག །ཙིནྡྷ་མ་ཎིའི་བརྐོས་ཕོར་རྣམས་ཕོ་བྲང་གི་ཡང་ཐོག་ཏུ་བབས་ནས་དམ་པའི་ཆོས་ཀྱི་དབུ་བརྙེས། གང་ཡིན་མ་ཤེས་ཀྱང་ངོ་མཚར་བར་བཟུང་སྟེ་གཉེན་པོ་གསང་བར་མིང་བཏགས་ནས་མཆོད་པས་མི་དབང་སླར་ཡང་གཞོན་ཤ་ཅན་དུ་གྱུར་ཏེ་ལོ་བརྒྱ་ཉི་ཤུར་སྐུ་ཚེ་བསྲིངས། དེ་ནས་རྒྱལ་རབས་ལྔ་ན་འཇམ་དཔལ་རྩ་རྒྱུད་ལས། ལྷ་ཡུལ་ལྡན་ཞེས་བྱ་བ་ཡི། །གངས་ཅན་རི་ཡི་ནང་གནས་པའི། །རྒྱལ་པོ་མི་ཡི་ལྷ་ཞེས་པ། །ལི་ཙ་བྱི་རྣམས་རིགས་སུ་འབྱུང་། །ཞེས་པ་ལྟར་འཕགས་པ་སྤྱན་རས་གཟིགས་རྒྱལ་པོའི་ཚུལ་བཟུང་བ་སྲོང་བཙན་སྒམ་པོ་འཁྲུངས། སྔ་མར། འཇིག་རྟེན་སྒྲོན་མེ་ཞེས་གྲགས་དང་། །ལྷ་མོ་གོས་དཀར་མོ་དང་ནི། །དཀར་མོ་ཆེན་མོ་གཞན་ཕན་བརྩོན། །ཞེས་པ་ལྟར་སངས་རྒྱས་དངོས་དང་མཚུངས་པའི་ཇོ་ཤཱཀ་རྣམ་གཉིས་སྤྱན་འདྲེན་ཕྱིར་འཇིག་རྟེན་མཐུན་འཇུག་གི་ཚུལ་དུ་ཁྲོ་གཉེར་ཅན་གྱི་སྤྲུལ་པ་བལ་མོ་ཁྲི་བཙུན་དང་། སྒྲོལ་མ་དང་གཉིས་སུ་མ་ཡིན་པ་རྒྱ་ནག་ཀོང་ཇོ་གཉིས་ཁབ་ཏུ་བསུས་ནས་ཇོ་ཤཱཀ་རྣམ་གཉིས་སྤྱན་དྲངས། སློབ་དཔོན་ཆེན་པོ་གཉིས་ལས། ཐུ་མི་སམྦྷོ་ཊ་རྒྱ་གར་དུ་བརྫངས་ནས་སྔར་བོད་དུ་ཡི་གེ་མེད་པས་ཡི་གེ་འདྲི་ཀློག་གི་སྲོལ་བཏོད་ཅིང་། སུམ་ཅུ་པ་ལ་སོགས་པའི་བསྟན་བཅོས་བརྩམས། བོད་སྲིན་མོ་གན་རྐྱལ་གྱི་རྣམ་པར་ཡོད་པ་ལ་རས་ས་བསྐྱལ་ཞིང་། བཟོ་ཁྱད་ལས་འཕྲུལ་ལྟ་བུར་སྣང་བས་ར་ས་འཕྲུལ་སྣང་དུ་གྲགས་པས་མཚོན་མཐའ་འདུལ་ཡང་འདུལ་གྱི་གཙུག་ལག་ཁང་རྣམས་བརྩིགས་ཤིང་ས་དགྲ་མནན། དགེ་བ་བཅུའི་ཁྲིམས་བཅས། ཀ་ཁོལ་མར། ཆོས་རྒྱལ་འདིའི་རིང་ལ་རྒྱ་གར་ནས་སློབ་དཔོན་ཀུ་ས་ར་དང་། བྲམ་ཟེ་ཤ་ཀ་ར། བལ་པོའི་སློབ་དཔོན་ཤཱི་ལ་མཉྫུ། རྒྱ་ནག་གི་སློབ་དཔོན་ཧྭ་ཤང་མ་ཧཱ་ཡཱ་ན་ལ་སོགས་པ་སྤྱན་དྲངས་ནས་སྡེ་སྣོད་གསུམ་དང་། རྒྱུད་ཀྱི་ཆ་ལག་མང་ཙམ་བསྒྱུར་ཞིང་བསྟན་པའི་སྲོལ་བཏོད། དངོས་སུ་འཆད་ཉན་མ་བྱུང་ཡང་རྒྱལ་པོ་རང་གིས་སྐལ་ལྡན་མང་པོར་ལྐོག་ཆོས་ཀྱི་ཚུལ་དུ་ཐུགས་རྗེ་ཆེན་པོ་ཞི་ཁྲོའི་གདམས་པ་ཕོག་པ་ལས། དེ་དག་གིས་ཉམས་སུ་བླངས་ཤིང་དེའི་ཚེ་ཐུགས་རྗེ་ཆེན་པོའི་རྣལ་འབྱོར་སྤྱོད་པའི་རལ་པ་ཅན་བརྒྱ་ཕྲག་ཙམ་ཉང་བྲན་ཕ་ཝང་ཁར་བྱུང་བར་བཤད། དུས་དེར་གསུངས་པ་རྣམས་ཕྱོགས་གཅིག་ཏུ་བསྡོམས་ནས་གཏེར་ཁ་གསུམ་དུ་བྱས་པ། གྲུབ་ཐོབ་དངོས་གྲུབ། མངའ་བདག་ཉང་། ཤཱཀ་འོད་གསུམ་གྱིས་གཏེར་ནས་གདན་དྲངས་པ་དེང་སང་མ་ཎི་བཀའ་འབུམ་ཞེས་གྲགས་པ་དེ་ཡིན་ལ། དེ་ནས་རྒྱལ་རབས་ལྔ་ན་སྲོང་བཙན་ཉིད་ཀྱིས་ལུང་བསྟན་ཟངས་ཀྱི་བྱང་བུ་ལ་བྲིས་པ་ལྟར་མངོན་དུ་གྱུར་ཏེ་འཇམ་པའི་དབྱངས་མིའི་རྫུ་ལ་ཞུགས་པ་ལྷ་གཅིག་ཁྲི་སྲོང་ལྡེའུ་བཙན་འཁྲུངས། སྔོན་གྱི་སྨོན་ལམ་གྱི་ཆུ་འཛིན་སྟུག་པོས་དམ་པའི་ཆོས་ཀྱི་འབྲུག་སྒྲ་སྒྲོག་པར་བསྐུལ་ཏེ་ཟ་ཧོར་གྱི་མཁན་པོ་ཤཱནྟ་རཀྵི་ཏ་སྤྱན་དྲངས། འགའ་ལ་ཡན་ལག་བརྒྱད་པའི་ཁྲིམས་ཕོག །དགེ་བ་བཅུ་དང་ཁམས་བཅོ་བརྒྱད་དང་མཐུན་པར་ཆོས་བསྟན་པས། བོད་ཀྱི་ལྷ་སྲིན་གདུག་པ་ཅན་རྣམས་ཁྲོས་ཏེ་བར་གཅོད་སྣ་ཚོགས་ཀྱི་ཐོ་འཚམས་པ་ལ་བརྟེན། སྔོན་གྱི་ཐུགས་བསྐྱེད་དང་སྨོན་ལམ་གྱིས་མཚམས་སྦྱོར་དུས་ལ་བབ་སྟེ། བདེ་བར་གཤེགས་པ་ཐམས་ཅད་ཀྱི་གསུང་གི་ངོ་བོ་སྣང་བ་མཐའ་ཡས་ཆུ་སྐྱེས་ཀྱི་རུམ་ལས་འཐོན་པ་ཨཽ་ཌི་ཡ་ནའི་སློབ་དཔོན་ཆེན་པོ་སངས་རྒྱས་ཐམས་ཅད་དང་གཉིས་སུ་མེད་པ་སྤྱན་དྲངས་ནས་སྣང་སྲིད་ཀྱི་ལྷ་འདྲེ་སྤ་བཀོང་། མཁན་ཆེན་ཐམས་ཅད་མཁྱེན་པ་ཞི་བ་འཚོས་ཡོད་སྨྲའི་དགེ་སློང་བཅུ་གཉིས་ཀྱིས་ཁ་བསྐངས་དང་བཅས་སད་མི་མི་བདུན་སོགས་རབ་ཏུ་བྱུང་ཞིང་བསྙེན་པར་རྫོགས་པ་ནས་བསྟན་རྩ་སོ་ཐར་གྱི་གཞི་བཙུགས། པཎ་ཆེན་བི་མ་ལ་མི་ཏྲས་ཐོག་དྲངས་རྒྱ་གར་མཁས་པ་མང་པོ་དང་། ལོ་ཆེན་པ་གོར་བཻ་རོ་ཙཱ་ན། འཁོན་ཀླུའི་དབང་པོ། གཙང་པ་ལེགས་གྲུབ། སྐ་ཅོག་ཞང་གསུམ་གྱིས་མཚོན་སྐད་གཉིས་སྨྲ་བ་སྟོང་དང་རྩ་བརྒྱད་ལ་སོགས་མཐའ་ཡས་པ་བསགས་ཏེ། ཉན་ཐོས་ཐེག་པ་ནས་རང་བཞིན་རྫོགས་པ་ཆེན་པོའི་བར་གྱི་ཐེག་པ་གོང་འོག་གི་ཆོས་རྣམས་བསྒྱུར་ཞིང་ཉན་བཤད་ཀྱིས་གཏན་ལ་ཕབ། དེའང་གསང་སྔགས་བླ་མེད་རྣམས་ནི་ཤིན་ཏུ་བཀའ་གཉན་ཞིང་གཞུང་གི་གསང་བ་ཡིན་པས་ཡོངས་གྲགས་སུ་མ་བསྒྱུར་བར་རྗེ་འབངས་ཉེར་ལྔ་སོགས་ལ་ལྐོག་ཆོས་སུ་བསྟན་མོད། ཕྱིས་སྒྱུ་འཕྲུལ་གསང་བ་སྙིང་པོ་ལས་བརྩམས་ཏེ། རྒྱ་གར་དུ་རྫོགས་ཆེན་ཟེར་བའི་མིང་མི་གྲག་གོ་ཞེས་ལོག་པར་སྨྲ་བའི་སྙིང་སྟོབས་ཀྱི་བདག་པོ་རྣམས་ཀྱིས་འབྱམས་ཡིག་ལ་བརྟེན། ད་ལྟའི་བར་དུ་ཡང་དག་པའི་ཆོས་ལ་ལོག་པར་རྟོག་པའི་དྲ་བས་དཀྲིགས་པ་ནི་ཐལ་འགྱུར་ལས། བསྟན་པ་འཇིག་པའི་ཉེ་རྒྱུ་ནི། །དེ་དག་སོ་སོའི་གནས་དག་ཏུ། །གང་ཟག་ལོག་སྲེད་ཅན་ཞེས་བྱ། །རེ་རེ་དག་གིས་བསྟན་པ་ཀུན། །འཇིག་པར་བྱེད་པའི་ཉེ་རྒྱུ་ཡིན། །ཞེས་པའི་ལུང་བསྟན་གྱི་བདེན་པའི་རི་མོ་བསུབ་ཏུ་མེད་པ་ཉིད་དོ། །འོ་ན་བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡིས་གུས་པས་མིན། །ཞེས་བཤད་པ་ཐོས་པ་ལ་བརྟེན་ནས་ཆོས་དང་ཆོས་མ་ཡིན་པ་དབྱེ་བ་འབྱེད་པ་མ་ཡིན་ནམ་ཞེ་ན། ངེས་པའི་ལུང་དེ་ནི་བསམ་བྱུང་གི་ཤེས་རབ་རྣམ་པར་དག་པས་གང་ཞིག་དོན་དུ་གཉེར་བྱའི་ཆོས་དེའི་ཚིག་དོན་གྱི་རིམ་པ་ལ་ནོར་མ་ནོར་གྱི་ག་དར་བྱེད་ཅིང་། ཡང་དག་པའི་དོན་ལ་གང་ཉེའི་རིག་པ་འགྲན་པ་ལ་དགོངས་ཀྱི། གཞན་རྣམ་པ་ཐམས་ཅད་དུ་ཆོས་ཀྱི་རྣམ་གྲངས་རླབས་པོ་ཆེའི་གཟུགས་ལ་བལྟ་བའི་མིག་ཅེར་ལོང་དུ་སོང་བས་གནས་སྐབས་ཀྱི་སྡང་ཞེན་ཙམ་གྱི་ངག་བརླང་པོར་སྤྱོད་པས་འདི་ནི་བཅོས་མའོ། །འདི་ནི་ལོག་པའོ། །འདི་ནི་ངན་པའོ། །འདི་ནི་རྫུན་ནོ། །ཞེས་བྱ་བར་གསུངས་པའི་ལུང་མ་ཡིན་ནོ། །ཁྱེད་ཆོས་རྗེ་ཟུར་པ་དང་འགྲས་པའི་ཉོན་མོངས་ཀྱི་མངོན་ཞེན་བརྟས་པའི་མཐུ་ལྷག་པར་ཡང་ཚད་མེད་པས་རེ་ཞིག་གསང་བའི་སྙིང་པོ་རྒྱུད་མ་ཡིན་པར་སོང་ཡང་། རིང་པོར་མ་ལོན་པར་མ་ཧཱ་པཎྜི་ཏ་ཆེན་པོ་ཤཱཀྱ་ཤྲཱི། རིག་པའི་རལ་གྲི། གཞོན་ནུ་དཔལ། ཐར་ལོ་ལ་སོགས་པས་རྒྱུད་དེ་དང་། ས་པཎ་གྱིས་ཕུར་པའི་རྒྱུད་ལ་སོགས་པ་བསམ་ཡས་ནས་རྒྱ་དཔེ་རྙེད་ནས་གསར་འགྱུར་མཛད་ཅིང་བསྔགས་བརྗོད་གནྡྷརྦའི་གླིང་བུའི་གདངས་སུ་བསྒྱུར་བ་དེ་ཆོས་ཅན། དེ་ལྟར་གསང་བའི་སྙིང་པོ་ལ་སོགས་ཚད་མར་བསྒྲུབས་པའི་ཚེ་སྔ་འགྱུར་གྱི་རྒྱུད་སྡེ་ཡོ་ག་གསུམ་གཙོ་ཆེ་ཆུང་གིས་ཁྱད་པར་བཞག་པ་ལས། རང་བཞིན་དུ་རྒྱུད་རྣམས་ལ་ཡན་མན་གཉིས་ཀར་རྟོགས་པའང་ཡོད་པས་ལྟ་སྒོམ་ཏིང་ངེ་འཛིན་གྱི་སྲོག་གཅིག་པའི་ཕྱིར་དེ་དག་ཏུ་རྫོགས་པ་ཆེན་པོ་ལ་སོགས་པའི་མིང་ཡང་ཡང་བསྒྲགས་ཤིང་དོན་ཐུན་མོང་བ་འཆད་པའི་ཕྱིར། དེ་དག་ལ་ཚད་མར་བྱེད་བཞིན་དུ་རྒྱུད་གཞན་རྣམས་ལ་ནེམ་ནུར་བྱེད་པའང་མགོ་རྨོངས། ལར་ཡང་ཧྭ་ཤང་འབར་ནའི་སྐད་དང་། ཨོ་རྒྱན་འཛང་ཀ་ར་ན། ཁ་ཆེ་དང་སིངྒ་ལ། མི་མ་ཡིན་དང་ཤ་ཟ། འགྲོ་ལྡིང་དང་མཁའ་འགྲོ་ལ་སོགས་པའི་བརྡ་སྐད་ལེགས་སྦྱར་དང་མ་མཐུན་པས་དོགས་པ་སྐྱེས་ཏེ། ཀུན་བྱེད་དང་། ཕུར་པ་གསང་རྒྱུད། དགོངས་འདུས་རྟ་མཆོག་རོལ་པ་ལ་སོགས་པ་བོད་མར་ངོས་བཟུང་ཞིང་། ཕོ་བྲང་བཙུན་པའི་བཀའ་ཤོག་ཏུ་གྲགས་པས་སྣ་དྲངས། སྡིག་པའི་ལས་རྒྱུན་སྤེལ་བ་ལ་གསེར་གྱི་ཐུར་མ་ལ་སོགས་པའི་མིང་དུ་བརྗོད་པས་མཚོན་དེ་ཐམས་ཅད་ཤེས་པ་དང་། མཁས་པའི་ངང་ཚུལ་དུ་རློམ་པ་མང་ཞིག་གིས། དངོས་ཀྱི་འབྱམས་ཡིག་དང་། བརྒྱུད་ནས་སྨད་པ་སོགས་ཇི་སྙེད་ཅིག་སྣང་སྟེ། ཨོ་རྒྱན་སངས་རྒྱས་གཉིས་པས། བསྟན་བཅོས་ཕལ་གྱིས་དུག་ལྔ་སྤེལ། །སྒོམ་ཆེན་བཤད་པའི་སྒྲ་ལ་འབྱམས། །བཤད་གྲྭ་མི་ནག་གཤགས་འདྲའི་དུས། །ཞེས་པའི་ལུང་བསྟན་གྱི་བདེན་པའི་རྔ་བོ་ཆེ་བརྡུང་བའི་དུས་སུ་སྣང་བས། དམིགས་ཀྱིས་བསལ་བའི་བརྒལ་བ་ལ། དམིགས་ཀྱིས་བསལ་བའི་ལན་གདབ་པ་ནི། སྔོན་གྱི་སྐྱེས་བུ་དམ་པ་རྣམས་ཀྱིས་མཛད་གྲུབ་པའི་ཕྱིར། བསྐྱར་ནས་བརྗོད་པ་ཉོན་མོངས་པ་འཕེལ་གྱིས་དོགས་པས་སྐྲག་སྟེ་མི་སྨྲ་བར་དམ་བཅས་སོ། །དེ་ལྟ་ནའང་ཆོས་ཀྱི་རྣམ་གྲངས་སོ་སོའི་ཐད་ཀར་རང་རང་གི་དགོས་འགྲེལ་བསྒྲུབ་ཅིང་། དོགས་པ་བསལ་བ་ཙམ་ནི་སྔར་ཡང་གླེངས་ཀྱི། ཕྱིན་ཆད་ཀྱང་གླེང་བར་འགྱུར་རོ། །དེའི་ཕྱིར་ལེགས་པར་མཐོང་བའི་བློ་མིག་མེད་བཞིན་དུ་དྲང་དོན་དང་། ཕྱོགས་འཛིན་གྱི་ཚིག་ལ་འཆེལ་ཞིང་། ཕྲག་དོག་གི་སྡང་ཞེན་མི་བཟད་པས་ཆོས་ཀྱི་རྣམ་གྲངས་མང་པོ་ལ་སྐུར་པ་བཏབ་པའི་གཏན་ཚིགས་ལ་ཡིད་ཆེས་སུ་བཟུང་ནས། ལོག་པར་ལྟ་བ་དང་། རྙེད་པ་ཙམ་གྱི་ཆེད་དུ་སྨད་པ་དག་གིས་སྒྲིབ་པའི་ཕུང་པོ་ཤིན་ཏུའང་མི་བཟད་པ་ཡིན་པས་མཁས་ཤིང་གཟུ་བོར་གནས་པ་དག་གིས་སྲོག་གི་ཕྱིར་དུའང་སྡིག་པ་དེ་ལྟ་བུ་ནི་མི་བྱ་སྟེ། མནར་མེད་པའི་དམྱལ་བ་ལས་འགྲོ་ས་གཞན་དུ་མ་ཡིན་པའི་ཕྱིར་རོ། །གལ་ཏེ་རྨོངས་པའི་དབང་གིས་མཚམས་མེད་པ་ལྔ་བྱས་པ་དེ་དག་ཟབ་མོའི་དོན་ལ་བསམས་པས་ཐར་ཞིང་། སྨོན་ལམ་ཁྱད་དུ་འཕགས་པ་དུ་མ་ལ་བརྟེན་ནས་ཀྱང་སྦྱོང་བའི་ཐབས་ཡོད་དེ། སངས་རྒྱས་ཕལ་པོ་ཆེ་ལས། མཚམས་མེད་ལྔ་པོ་དག་གི་སྡིག་པ་རྣམས། །གང་གིས་མི་ཤེས་དབང་གིས་བྱས་པ་དག །དེ་ཡི་བཟང་པོ་སྤྱོད་པ་འདི་བརྗོད་ན། །མྱུར་དུ་མ་ལུས་ཡོངས་སུ་བྱང་བར་འགྱུར། །ཞེས་བཤད་ལ། ཆོས་སྤངས་པས་དེ་ལྟ་མ་ཡིན་ཏེ། རྒྱུད་བླ་མ་ལས། བློ་དམན་ཕྱིར་དང་དཀར་པོའི་ཆོས་བྲལ་ལོག་པའི་ང་རྒྱལ་ལ་བརྟེན་ཕྱིར། །དམ་ཆོས་སྤང་བའི་སྒྲིབ་པ་དག་ཕྱིར་དྲང་དོན་དེ་ཉིད་འཛིན་པའི་ཕྱིར། །རྙེད་ལ་བརྐམ་ཕྱིར་ལྟ་བའི་དབང་ཕྱིར་ཆོས་སུན་འབྱིན་པ་བསྟེན་པའི་ཕྱིར། །ཆོས་འཛིན་བསྲིང་ཕྱིར་མོས་པ་དམན་ཕྱིར་དགྲ་བཅོམ་རྣམས་ཀྱི་ཆོས་སྤོང་བྱེད། །ཇི་ལྟར་ཟབ་མོའི་ཆོས་ཉམས་དེ་བཞིན་མཁས་པ་རྣམས་ཀྱང་མེ་དང་ནི། །མི་བཟད་སྦྲུལ་གདུག་གཤེད་མ་དང་ནི་ཐོག་ལའང་ཤིན་ཏུ་འཇིགས་མི་བྱ། །མེ་སྦྲུལ་དགྲ་དང་རྡོ་རྗེའི་མེས་ནི་སྲོག་དང་བྲལ་བ་ཙམ་བྱེད་དེ། །དེ་ལས་མནར་མེད་རྣམས་ཀྱི་འགྲོ་བ་ཤིན་ཏུ་འཇིགས་པར་འགྲོ་མི་འགྱུར། །གང་ཞིག་གང་ཡང་སྡིག་གྲོགས་བསྟེན་པས་སངས་རྒྱས་ངན་སེམས་ལྡན་གྱུར་དང་། །ཕ་མ་དགྲ་བཅོམ་གསོད་གང་བྱ་བ་མིན་བྱེད་མཆོག་ཚོགས་འབྱེད་པའི་མི། །དེ་ཡང་ཆོས་ཉིད་ངེས་པར་བསམས་པས་མྱུར་དུ་དེ་ལས་ཐར་འགྱུར་གྱིས། །གང་ཞིག་ཡིད་ནི་ཆོས་ལ་སྡང་བ་དེ་ལ་ཐར་པ་ག་ལ་ཡོད། །ཅེས་སོ། །དེའི་ཕྱིར་སེམས་ཅན་གྱི་ཁམས་དང་། མོས་པ་ཐ་དད་པ་ཙམ་དུ་འདུལ་བྱེད་ཀྱི་ཆོས་དང་། གང་ཟག་གི་རིམ་པའང་དེ་སྙེད་དུ་སྣང་བས་དོན་བྱེད་པའི་ཕྱིར། འཁོར་བ་སྤོང་ཞིང་མྱ་ངན་ལས་འདས་པའི་ལམ་གྱི་ཚུལ་ཇི་སྙེད་འདུག་པ་ཐམས་ཅད་ནང་པ་སངས་རྒྱས་པའི་ཆོས་ཏེ། དེ་ལ་མིང་དང་། ཚིག་དང་། འཇུག་སྒོ་དང་། ཐེག་པ་དང་། རང་བཞིན་གང་དུ་བཏགས་ཤིང་། ཅི་འདྲར་སྣང་ཡང་སྤང་མི་དགོས་ཏེ། ཡིད་མ་ཆེས་པ་གང་ཞིག་བཏང་སྙོམས་སུ་གཞག་པས་ཆོག་པ་ལ་མི་མཐུན་པ་མེད་པའི་ཕྱིར་རོ། །དེའི་ཚེ་གནུབས་ཆེན་གྱི་བྲུ་ཤའི་ཡུལ་ལ་སོགས་པར་བྱོན་ནས་ཞི་ཁྲོ་སྒྱུ་འཕྲུལ་དང་། གཤེད་སྐོར་རྒྱ་མཚོ། བཻ་རོས་རྫོགས་པ་ཆེན་པོ་ལ་སོགས་བྱེ་བྲག་ཏུ་བླངས་པའི་ལོ་རྒྱུས་ཆོས་འབྱུང་བདེན་པར་སྨྲ་བ་དང་། འདྲ་འབག་ཆེན་མོ་རྣམས་ལས་རྟོགས་པར་བྱ་ཞིང་། བྱེ་བྲག་ཏུ་གསང་སྔགས་ཀྱི་ཆོས་མང་དག་དཔལ་གྱི་བསམས་ཡས་མཆིམས་ཕུར་རྗེ་འབངས་ཉེར་ལྔ་ལ་སོགས་པར་གནང་བས་དེ་དག་གིས་གྲུབ་པ་ཐོབ་པ་ཡིན་ལ། དེའི་ནང་ཚན་ལས་སྒྲུབ་སྡེ་བཀའ་བརྒྱད་ཚོམ་བུ་དགུའི་དཀྱིལ་འཁོར་གྱི་རོལ་པ་གཅིག་ཏུ་བསྒྲུབ་པའི་ཐབས་བདེ་གཤེགས་འདུས་པའི་དཀྱིལ་འཁོར་ཆེན་པོ་མཆིམས་ཕུ་བྲེ་དགུ་དགེའུའི་དབེན་གནས་སུ་ཞལ་ཕྱེ་ནས་སྨིན་གྲོལ་གྱི་ཚེ་མེ་ཏོག་གསེར་སྲང་བཅུ་བོར་བ་རང་རང་གི་རིགས་ཀྱི་ཚོམ་བུ་ལ་འཕོག་པ་ལྟར་ཉམས་སུ་བླངས་པས་གྲུབ་པ་ཐོབ་པའི་གྲུབ་ཆེན་བརྒྱད་དུ་གྲགས་པ་ནི། དབུས་ཆེ་མཆོག་ལ་མངའ་བདག་རྒྱལ་པོ། ཤར་ཡང་དག་ལ་ནམ་མཁའི་སྙིང་པོ། ལྷོ་གཤིན་རྗེ་ལ་སངས་རྒྱས་ཡེ་ཤེས། ནུབ་རྟ་མགྲིན་ལ་རྒྱལ་བ་མཆོག་དབྱངས། བྱང་ཕུར་པ་ལ་ཡེ་ཤེས་འཚོ་རྒྱལ། ཤར་ལྷོ་མ་མོ་ལ་དཔལ་གྱི་ཡེ་ཤེས། ནུབ་བྱང་དྲེགས་པ་ཀུན་འདུལ་ལ་དཔལ་གྱི་སེང་གེ། བྱང་ཤར་སྟོབས་ལྡན་ནག་པོ་ལ་བཻ་རོ་ཙཱ་ན་སྟེ་གང་ཟག་སྙན་ཁུང་གི་བརྒྱུད་པར་གྲགས་སོ། །དེ་ལྟར་སངས་རྒྱས་ཀྱི་བསྟན་པ་རྒྱ་ཆེར་དར་རྒྱས་སུ་མཛད་པའི་ལྷ་གཅིག་ཁྲི་སྲོང་ལ་སྲས་གཉིས་དང་གསུམ་སོགས་གཏན་ཚིགས་རྙིང་པ་རྣམས་ཁ་མི་འཆམ་ཡང་། འཇིག་རྟེན་མིག་གྱུར་ལྔ་པ་ཆེན་པོས་དཔྱད་གསུམ་དག་པའི་སྲང་ལ་བཏེགས་ནས་སྲས་གསུམ་དུ་ཞལ་ལྕེ་བཅད་པ་ལྟར། ཁྲི་སྲོང་གཤེགས་ནས་ཐུ་བོ་མུ་ནེ་བཙན་པོས་རྒྱལ་ས་བཟུང་། ཡབ་ཀྱི་ཞལ་ཤེས་དང་མཐུན་པར་བླ་མཆོད་སྡེ་གཉིས་བཀུར་ཞིང་། ཆོས་འཁོར་སྟོད་སྨད་ཀྱི་ཞབས་ཏོག་སོགས་ཡབ་ཀྱི་རྣམ་ཐར་དང་མཐུན་པར་མཛད་ཅིང་བསམ་ཡས་སུ་དུས་མཆོད་བཞི་བཙུགས། བོད་ལྟོགས་ཕྱུག་ལན་གསུམ་སྙོམས། ཆབ་སྲིད་ལོ་གཅིག་དང་ཞག་གི་ཕུང་པོ་རི་བོའི་གྲངས་ལྡན་ལོན་ཚེ་ཡུམ་ཚེ་སྤོང་མེ་སྒྲོན་གྱིས་དུག་བཏང་ནས་བཀྲོངས། བར་མ་མུ་རུབ་བཙན་པོ་བསྐོ་བར་བརྩམས་པ་ན་དེས་སྔར་ཞང་གི་བུ་དབུ་རིང་བསད་པའི་སྙིང་ནད་ཀྱིས་སྣ་ནམ་བཟས་རྟ་གྲིར་བཀུམ། དེ་ནས་གསུམ་པ་སད་ན་ལེགས་མཇིང་ཡོན་རྒྱལ་སར་བསྐོས། ཐུགས་སྒམ་པ་ལ་སོགས་ཏེ་ལེགས་པའི་ཡོན་ཏན་ལྔ་དང་ལྡན་པས་དཀར་ཆུང་རྒྱལ་སྡེའི་ལྷ་ཁང་འགྲན་ཟླ་དང་བྲལ་བ་བཞེངས། མཚན་མུ་ཏིག་བཙན་པོར་ཡང་གྲགས་ཤིང་འདི་ལ་སྲས་ཁྲི་གཙུག་ལྡེ་བཙན། གཙང་མ། དར་མ། ལྷ་རྗེ། ལྷུན་གྲུབ་སྟེ་ལྔ་བྱུང་། ཆོས་ལྡན་གྱི་རྒྱལ་པོ་འདིའི་སྐུ་རིང་ལ་དམ་པའི་ཆོས་ཀྱི་སྲོལ་རྒྱ་ཆེར་བཏོད། ཁྱད་པར་སྐད་གཉིས་སྨྲ་བའི་དབང་ཕྱུག་བན་དེ་དཔལ་བརྩེགས་རཀྵི་ཏ་དང་། དེ་ཝེནྟྲ་དང་། དཔལ་གྱི་ལྷུན་པོ་ལ་སོགས་པས་འཕང་ཐང་ཀ་མེད་ཀྱི་གཙུག་ལག་ཁང་ན་བཞུགས་པའི་གསུང་རབ་རྣམས་ལ་ཚེག་བར་བརྒྱད་ལ་རྐང་པ་གཅིག་ཏུ་བརྩིས་པའི་རྐང་པ་བཞི་ཚོགས་པ་ལ་ཤློ་ཀ་དང་། དེ་སུམ་བརྒྱར་བམ་པོའི་ཚད་དུ་བྱས་པའི་གཞུང་ཚད་དེ་གཉིས་ཀྱིས་ལེགས་པར་གཞལ་བའི་ཐེམ་བྱང་མ་འཁྲུལ་བར་ཆོས་ཚན་འདི་དང་འདི་ལ་རྣམ་གྲངས་འདི་དང་འདི་བཀོད་པར་དཀར་ཆག་འཕང་ཐང་མར་གྲགས་ཤིང་། བོད་ལ་དམ་པའི་ཆོས་འགྱུར་རོ་ཅོག་ཕྱོགས་གཅིག་ཏུ་བསྒྲིགས་པའི་ཐོག་མ་འདི་ཡིན་ནོ། །དེའི་རྗེས་སུ་སྒྲ་བསྒྱུར་གྱི་བནྡེ་དཔལ་བརྩེགས་དང་། འཁོན་ཀླུའི་དབང་པོས་བསྲུངས་པ་ལ་སོགས་པས་སྟོང་ཐང་ལྡན་དཀར་གྱི་ཕོ་བྲང་ཆེན་པོ་ན་བཞུགས་པའི་གསུང་རབ་བསྟན་བཅོས་འགྱུར་རོ་འཚལ་སྔར་དང་ཤློ་ཀ་དང་། བམ་པོའི་གྲངས་སུ་བཀར་ནས་གཏན་ལ་ཕབ་པའི་དཀར་ཆག་ལྡན་དཀར་མར་གྲགས་པ་བྱུང་ཞིང་། འདི་གཉིས་ཀར་གསང་སྔགས་ནང་གི་རྒྱུད་རྣམས་ཆེས་ཆེར་བཀའ་གཉན་པས་འགོད་པར་མ་ནུས་ཞེས་བཤད་པ་ནི་སྔ་འགྱུར་ཡོ་ག་གསུམ་གྱི་རྒྱུད་དེ། ཀུན་མཁྱེན་ངག་དབང་བློ་བཟང་རྒྱ་མཚོས། དཀར་ཆག་འཕང་ཐང་མ་དང་ལྡན་དཀར་དུ། །གསང་སྔགས་ནང་གི་རྒྱུད་རྣམས་ཆེས་གཉན་པས། །འགོད་པར་མ་ནུས་ཞེས་པ་སྔ་འགྱུར་གྱི། །རྒྱུད་ལས་ངོས་འཛིན་གཞན་པ་བྱ་རྒྱུས་དབུལ། །ཞེས་པ་ལྟར་རོ། །དེའི་ཕྱིར་གསང་སྔགས་ནང་རྒྱུད་དམ་རྙིང་རྒྱུད་དུ་གྲགས་པ་ནི་བོད་དུ་འགྱུར་བ་ལ་ལྟོས་ན་གླེགས་བམ་བཞི་བཅུ་པ་དང་། སུམ་ཅུ་པ་དང་། ཉི་ཤུ་ལྔ་པ་ལ་སོགས་ཏེ་གཏེར་རྒྱུད་བསྣན་མིན་དང་། གླེགས་བམ་བཞུགས་ཚེགས་ཀྱི་ཁྱད་པར་ལས་མཐའ་གཅིག་ཏུ་མ་ངེས་པའོ། །ཆོས་རྒྱལ་འདིས་རྒྱལ་སྲིད་ཟླ་བའི་ཕུང་པོ་བཅུ་བདུན་གྱི་གྲངས་ངེས་པར་བསྐྱངས་དེའི་རྗེས་སུ་གང་གི་སྲས་ཀྱི་ཐུ་བོ་སྙིང་རྗེ་པད་དཀར་སོགས་ནས་ལུང་བསྟན་པའི་གསང་བདག་མིའི་ཆ་བྱད་ཅན་མངའ་བདག་ཁྲི་རལ་པ་ཅན་གྱིས་རྒྱལ་ས་བཟུང་། སྐྱིད་སྨད་འོན་ཅང་རྡོའི་ལྷ་ཁང་ཁྱད་དུ་མཚར་བ་བཞེངས། རྒྱ་གར་ནས་ཨཱ་ཙཱརྱ་ཛི་ན་མི་ཏྲ་དང་། སུ་རེནྡྲ་བོ་དྷི་ཤི་ལེནྡྲ་བོ་དྷི་སོགས་པཎྜི་ཏ་མང་པོ་སྤྱན་དྲངས། བོད་ཀྱི་མཁན་པོ་རཏྣ་རཀྵི་ཏ་དང་། དྷརྨ་ཏ་ཤཱི་ལ། ལོ་ཙཱ་བ་ཛྙཱ་ན། ཛ་ཡ་རཀྵི་ཏ་སོགས་པས་ཐེག་པ་ཆེ་ཆུང་གི་ཆོས་བསམ་གྱིས་མི་ཁྱབ་པ་བསྒྱུར་ཞིང་མིང་དུ་བཏགས་པ་རྣམས་དཀར་ཆག་ཏུ་བྲིས་ནས། ནམ་དུ་ཡང་གཞུང་ལུགས་དེ་ལས་མི་བསྒྱུར་ཞིང་ཀུན་གྱིས་སློབ་ཏུ་རུང་བར་གྱིས་ཤིག་ཅེས་བཀའ་ནན། སྔོན་ཡབ་མེས་ཀྱི་དུས་ལོ་པཎ་རྣམས་ཀྱིས་དམ་ཆོས་བསྒྱུར་བའི་ཚེ། ཆོས་ཀྱི་སྐད་བོད་སྐད་ལ་མ་གྲགས་པ་ལས་མིང་དུ་བཏགས་པའི་ནང་ནས། འགའ་ཞིག་ཆོས་ཀྱི་གཞུང་དང་། བྱཱ་ཀ་ར་ནའི་ལུང་དང་མི་མཐུན་པ་དང་པོའི་བཀས་བཅད་ཀྱིས་བསྒྱུར་བ་སངས་རྒྱས་ཕལ་པོ་ཆེ་ལ་སོགས་སྐད་གསར་བཅད་ཀྱིས་གཏན་ལ་ཕབ་ཅིང་གོ་དཀའ་བ་རྣམས་བཅོས། སྐད་ཀྱི་མིང་གཅེས་སོ་འཚལ་གྱིས་ཀྱང་བསྣན་ནས་ཐེག་པ་ཆེ་ཆུང་གི་གཞུང་དང་མཐུན་པར་འགྱུར་བཅོས་བགྱིས། ག་ནའི་མཁན་པོ་ཆེན་པོ་ནཱ་གཱརྫུ་ན་དང་། བ་སུ་བནྡྷུ་ལ་སོགས་པའི་གཞུང་དང་བྱཱ་ཀ་ར་ནའི་ལུང་ལས་ཇི་སྐད་འདྲེན་པ་དང་ཡང་བསྟུན་ཏེ། འཇལ་དཀའ་བ་རྣམས་ཚིག་ལ་སོ་སོར་ཕྲལ་ནས་གཏན་ཚིགས་བཤད་དེ་གཞུང་ལ་བཀོད། སྐད་རྐྱང་པ་བཤད་མི་འཚལ་བ་སྒྲ་བཞིན་དུ་འགྱུར་བའི་རིགས་པ་རྣམས་ཀྱང་སྒྲ་བཙན་པར་བགྱིས་ཏེ་མིང་དུ་བཏགས། སྐད་ལ་ལ་དོན་བཞིན་དུ་གདགས་པའི་རིགས་པ་རྣམས་ཀྱང་དོན་བཙན་པར་བགྱིས་ཏེ་མིང་དུ་བཏགས་ནས་རྣམ་གཞག་གཏན་ལ་ཕབ་སྟེ་བཀས་བཅད་ནས་དཀར་ཆག་གི་དཀྱུས་སུ་བསྣན་པ་ལྟར་འཕན་ཡུལ་ཀ་བ་ན་མོ་ཆེར་ཡུམ་རྒྱས་པ་ལ་འགྱུར་བཅོས་ནས་དུམ་བུ་བཅུ་དྲུག་ཏུ་མཛད། དེས་མཚོན་ནས་ཡབ་མེས་ཀྱི་དུས་སུ་བསྒྱུར་བའི་གསུང་རབ་ཕལ་ཆེར་སྐད་གསར་བཅད་ཀྱིས་གཏན་ལ་ཕབ། ཁྱད་པར་རྡོ་རྗེའི་ཐེག་པའི་རྒྱུད་རྣམས་ནི་བཀས་བཅད་པའི་སྐབས། གསང་སྔགས་ཀྱི་རྒྱུད་རྣམས་གཞུང་གིས་གསང་བར་བྱ་བ་ཡིན་ཏེ། སྣོད་དུ་མ་གྱུར་པ་རྣམས་ལ་བཤད་ཅིང་བསྟན་དུ་ཡང་མི་རུང་ལ། བར་དུ་བསྒྱུར་ཞིང་སྤྱོད་དུ་གནང་གིས་ཀྱང་། ལྡེམ་པོའི་ངག་ཏུ་བཤད་པ་མ་ཁྲོལ་ནས་སྒྲ་ཇི་བཞིན་དུ་ལོག་པར་སྤྱོད་པ་དག་ཀྱང་འབྱུང་བས། སྔགས་ཀྱི་རྒྱུད་ཀྱི་ནང་ནས་ཐུ་ཞིང་བོད་སྐད་དུ་བསྒྱུར་བ་དག་ཀྱང་འབྱུང་ཞེས་གདས་ཀྱི། ཕྱིན་ཆད་གཟུངས་སྔགས་དང་། བླ་ནས་སྩལ་ཏེ་བསྒྱུར་བཅུག་པ་མ་གཏོགས་པ་སྔགས་ཀྱི་རྒྱུད་དང་། སྔགས་ཀྱི་ཚིག་ཐུ་ནས་བསྒྱུར་དུ་མི་སྣང་ངོ་། །ཞེས་བཀའ་རྒྱས་བཏབ་ལ། བྱེ་བྲག་ཏུ་རྫོགས་པ་ཆེན་པོ་ལ་སོགས་ཏེ་ནང་རྒྱུད་ཁྱད་པར་བ་རྣམས་ནི་ཐུན་མོང་གིས་སྤྱོད་ཡུལ་དུ་མ་གྱུར་པས་ལྷ་སྲས་ཡབ་ཀྱི་དུས་ནས་གསང་བ་ཆེན་པོའི་སྦུབས་སུ་བསྐྱིལ་ཞིང་། སྔར་བཤད་པ་བཞིན་འཕགས་པའི་ཡུལ་དུའང་དྲིལ་བསྒྲགས་སུ་མ་ལགས་པས་ཕྱི་རབས་སུ་དཔྱོད་པ་ལྟར་འདུ་ཤེས་ཏེ་རྣམ་པར་རྟོག་པའི་རང་སྟོབས་ཕྱིན་ཅི་ལོག་ཏུ་དགོངས་པས་རྒྱུད་འབུམ་བཀའི་ཁྲོད་ནའང་མ་བཞུགས་པའི་རྩོད་པ་ཅན་དུ་བྱས་ཀྱང་། བསྟན་པ་ཡོངས་རྫོགས་ཀྱི་དགེ་བའི་བཤེས་གཉེན་རྣམས་དང་། གཟུ་བོར་གནས་པ་ཀུན་ལ་དེ་དེ་བཞིན་དུ་སེམས་དཔའི་འདུ་ཤེས་ལོག་པ་ནི་མེད་དོ། །ཅིའི་ཕྱིར་ན་དེ་ལྟའི་སྒྲིབ་པ་ལྷག་པར་ཡང་བཟོད་པར་དཀའ་བའི་ཕྱིར་ཏེ། དེ་སྐད་དུ་རྒྱུད་བླ་མ་ལས། འཕགས་པ་སྐུར་དང་དེས་གསུངས་ཆོས་ལ་བརྙས་པ་དང་། །དེ་ཀུན་རྨོངས་པའི་མངོན་ཞེན་བརྟས་བྱས་ཉོན་མོངས་ཡིན། །དེས་ན་ཞེན་ལྟའི་དྲི་ཅན་དེ་ལ་བློ་མི་སྦྱར། །ཞེས་སོ། །ཆོས་ལྡན་གྱི་རྒྱལ་པོ་འདིའི་སྐུ་རིང་ལ་སྔར་བོད་དམག་གིས་རྒྱ་ནག་ལ་གཟན་པས་དབོན་ཞང་འདུམས་ཏེ་ལྷ་ས་དང་། རྒྱ་བོད་ཀྱི་སོ་མཚམས། ཕོ་བྲང་བལྟ་ན་སྡུག་སོགས་སུ་རྡོ་རིང་སློང་ཞིང་ཆད་ཐོའི་ཡི་གེ་བྲིས། རབ་ཏུ་བྱུང་བ་རེ་ལ་འབངས་མི་ཁྱིམ་བདུན་བདུན་ཕུལ། རང་གི་རལ་པར་རས་ཡུག་བཏགས་ནས་དགེ་འདུན་རྣམས་བཞུགས་སུ་བཅུག་པ་སོགས་རྒྱལ་བའི་བསྟན་པ་རིན་པོ་ཆེ་དང་། དེ་འཛིན་ལ་བཀུར་སྟི་འགྲན་ཟླ་མེད་པ་ཉིད་དུ་མཛད་པ། སེམས་ཅན་གྱི་བསོད་ནམས་པདྨའི་རྣལ་མ་ལྟ་བུར་ཕྲ་བས་རྐྱེན་དེ་དག་མི་འཛའ་བའི་མགྲོན་པོ་འབོད་པའི་ཕོ་ཉར་གྱུར་ཏེ། སྡིག་བློན་རྣམས་མ་རངས་པར་ཆོས་ཁྲིམས་བཤིག་པའི་གྲོས་བརྩམས། མཆེད་གཙང་མ་སྤྱུགས། བཙུན་མོ་ངང་ཚུལ་མ་དང་བན་ཆེན་པོ་དཔལ་གྱི་ཡོན་ཏན་ནལ་བཤམས་སོ་ཞེས་ཕྲ་མ་བཅུག །བན་ཆེན་པོ་ལྔ་པར་བཏང་། བཙུན་མོ་ལྕེབས་ཏེ་གུམ། བཙན་པོ་དགུང་ལོ་སོ་དྲུག་པ་ལ་དབས་རྒྱལ་གཏོ་རེ་དང་ལེགས་སྒྲ་གཉིས་ཀྱིས་ཞལ་ལྟག་པར་བསྟན་དེ་བཀྲོངས། དགའ་རབ་དབང་ཕྱུག་མིའི་སྲིད་པར་འཕོས་ཤིང་ལོག་སྨོན་གྱི་མཐུ་བདོ་བ་གླང་དར་མ་འུ་དུམ་བཙན་ལ་རྒྱལ་སྲིད་གཏད་པས། ལོ་པཎ་རྣམས་ཆོས་བསྒྱུར་བའི་གྲྭ་བཅད། པཎྜི་ཏ་རྣམས་རང་ཡུལ་དུ་བརྫངས། རབ་ཏུ་བྱུང་བ་ཀུན་ཕབ་པས། བཙུན་པའི་རྟགས་བོར་དུ་མ་འདོད་པ་རྣམས་ལ་མདའ་གཞུ་བསྐུར་ནས་རྔོན་པ་བྱེད་དུ་བཅུག །མི་ཉན་པ་རྣམས་བསད། པོ་ཏི་ཕལ་ཆེར་ལྷ་སའི་བྲག་ལ་སྦས་པ་སོགས་བསྟན་པ་དང་དེ་འཛིན་ཐམས་ཅད་མིང་གི་ལྷག་མར་བྱས་པའི་རྒྱལ་སྲིད་མ་རུངས་པ་ལོ་བཞི་བསྐྱངས། དེའི་ཚེ་གནུབས་ཆེན་གྱིས་ཚེའི་དངོས་གྲུབ་བརྙེས་ནས་བཞུགས་པས་གླང་དར་བསྒྲལ་བའི་མཐུ་སློབ་ཏུ་རྒྱ་བལ་ལ་འབྱོན་རིང་། དཔལ་ལྷ་མོས་དུས་གསུམ་རྒྱལ་བ་མ་ལུས་པའི་མཐུ་སྟོབས་ཀྱི་ནུས་རྩལ་ཕྱུར་བུར་སྤུངས་པའི་བདག་ཉིད་ཅན་གསང་བའི་བདག་པོ་ཕྱག་ན་རྡོ་རྗེ་མིའི་རྫུ་ལ་ཞུགས་པ་ལྷ་ལུང་དཔལ་གྱི་རྡོ་རྗེ་བསྐུལ་བ་ལས། གང་གི་སྨོན་ལམ་དཀར་པོའི་ཆ་ཤས་ཀྱི་འཁོར་ལོ་ཡོངས་སུ་རྫོགས་པའི་བདེན་པའི་མཐུ་འགོག་ཏུ་མེད་པའི་དཔའ་བརྟུལ་གྱི་ཤེ་མོང་དར་དྲག་པའི་རྩལ་ཤུགས་མངོན་དུ་ཕྱུང་སྟེ་ཉག་ཕྲན་གྱི་སྦྱོར་བ་ལ་ཞུགས་ནས་ནག་པོའི་རྩ་ལག་རྒྱལ་པོ་སྡིག་ཅན་གྱི་འདུ་བྱེད་འཆི་བདག་གཤིན་རྗེའི་ཁར་བསྟབས་སོ། །དེ་ཡན་ཆོད་ལ་བསྟན་པ་སྔ་དར་གྱིས་ཐ་སྙད་བཏགས་ལ། དེ་ནས་ཡུམ་བརྟན་དང་འོད་སྲུངས་ནས་རྒྱལ་རབས་གསུམ་གྱི་བར་བགྲང་བྱའི་འཁོར་ལོ་བཅུ་ཕྲག་བདུན་དུ་བོད་ལ་རབ་བྱུང་གི་གཟུགས་བརྙན་ཙམ་མེད་ཅིང་། ཆོས་ལ་འཆད་ཉན་བྱེད་པ་ལྟ་ཞོག །ནད་པའི་རིམ་གྲོ་ལ་ཀློག་འདོན་བྱེད་པའི་ཚེ་འདི་དམར་པོ་ནག་པོ་ཟེར་བ་ཙམ་ལས་མ་བྱུང་བའི་སྐབས་སྲིད་པར་བྱས་ཤིང་། དེ་ལྟ་ནའང་གསང་སྔགས་འཆང་བ་ཁྱིམ་པའི་རྟགས་ཅན་སྦས་ཚུལ་མང་ཞིག་ཡོད་པས་རྡོ་རྗེའི་ཐེག་པ་ལ་ནུབ་པའི་སྐབས་མ་བྱུང་ངོ་། །དུས་དེའི་ཚེ་བཞད་ཀྱི་གཙང་རབ་གསལ། བོ་དོང་གཡོ་དགེ་འབྱུང་། སྨར་ཤཱཀྱ་མུ་ནེ་དང་གསུམ་ཆུ་བོ་རིར་སྒོམ་ཞིང་བཞུགས་པ་ན། བཙུན་པ་ཁྱི་ར་བ་བྱེད་པ་མཐོང་ནས་གཏམ་དྲིས་པས། རྒྱལ་པོ་སྡིག་ཅན་གྱིས་བསྟན་པ་བསྣུབས་ཚུལ་བསྙད་པ་ལྟར་ཐོས་ཏེ་སྔངས་ནས། འདུལ་མངོན་ལ་སོགས་པའི་དཔེ་ཆ་དྲེའུ་ལ་བཀལ་ནས་མངའ་རིས་སྟོད་དུ་བྲོས། གར་ལོག་ནས་ལམ་ཐོན། ཧོར་ཡུལ་ལ་ཕྱིན། སྐད་རིགས་མི་གཅིག་པའི་ཡུལ་དུ་བསྟན་པ་དར་བར་བྱའོ་སྙམ་ནའང་མ་ནུས། སླར་བྱང་ལམ་བརྒྱུད་མདོ་ཁམས་སུ་བྱོན། དགོངས་པ་རབ་གསལ་སོགས་སློབ་མ་བསྐྱངས་པས་རིམ་པར་མཆེད་དེ་བསྟན་པའི་མེ་རོ་སྨད་ནས་བསླངས་ཞེས་གྲགས། མངའ་རིས་སྟོད་ནས་གསོས་པ་ནི་མངའ་བདག་གི་གདུང་བརྒྱུད་བཙན་པོ་སྲོང་ངེས་གཅུད་ཁོ་རེ་ལ་གཏད་ནས་རབ་ཏུ་བྱུང་བས་མཚན་ལྷ་བླ་མ་ཡེ་ཤེས་འོད་ཅེས་གྲགས་ལ། དེས་བསྟན་པ་དར་བའི་ཐུགས་བསྐྱེད་ནས་ལོ་ཆེན་རིན་ཆེན་བཟང་པོ་སོགས་ཁྱེའུ་ཉེར་གཅིག་ལ་གསེར་མང་པོ་བསྐུར་ནས་ཁ་ཆེར་པཎྜི་ཏ་སྤྱན་འདྲེན་དུ་མངགས་པས། རིན་ཆེན་བཟང་པོ་དང་ལེགས་པའི་ཤེས་རབ་གཉིས་མ་གཏོགས་བཅུ་དགུ་པོ་ཁ་ཆེ་ཁྲི་བསྟན་དུ་འདས། རིན་ཆེན་བཟང་པོས་རྒྱུད་སྡེ་མང་པོ་ལ་སྒྲོ་འདོགས་བཅད་ནས་བོད་དུ་ལྡོག །དེ་ནས་མི་རིང་བར་པཎྜི་ཏ་སྒྲའི་ཚེར་མའམ་སྨྲྀ་ཏི། ལྷ་གཅིག་དཱི་པཾ་ཀ་ར། མ་བྱོན་སངས་རྒྱས་གསུམ་པར་གྲགས་པ་ཁ་ཆེ་མ་ཧཱ་པཎྜི་ཏ་ཤཱཀྱ་ཤྲཱི་ལ་སོགས་མདོར་ན་སྡེ་སྣོད་གསུམ་དང་། རྒྱུད་སྡེ་རབ་འབྱམས་ལ་མངའ་བརྙེས་པ་ཇི་སྙེད་ཅིག་བྱོན་ནས་ཆོས་ཀྱི་རྣམ་གྲངས་མང་པོ་གསར་དུ་བསྒྱུར་ཞིང་སྔར་བྱོན་པ་རྣམས་ལའང་དར་རྒྱས་སུ་མཛད་པས་ད་ལྟའི་བར་དུ་སངས་རྒྱས་ཀྱི་བསྟན་པ་དར་ཞིང་ལྗོངས་འདིར་ཡང་བསྟན་འཛིན་གྱི་སྐྱེས་བུ་དམ་པ་མང་དུ་བྱོན་པ་ཡིན་ལ་འདི་དག་ནི་ཕྱི་དར་གྱི་ཐ་སྙད་དུ་འཇོག་གོ །དེ་ལ་འདི་སྐད་དུ། གངས་རིའི་ཁྲོད་འདིར་རྒྱལ་སྲས་རིགས་གསུམ་མགོན་པོ་ཡིས། །བྱིན་གྱིས་བརླབས་པའི་སྤྲུལ་པའི་རྒྱལ་བློན་དེ་དག་གིས། །ཤཱཀྱ་སེངྒེའི་ལུང་རྟོགས་བསྟན་པ་དྲངས་པའི་ཁུར། །དབང་ཆེན་གསེར་གྱི་ས་གཞིས་བཏེག་ཀྱང་འདར་ཞིང་གཤུང་། །མེས་དབོན་གསུམ་གྱི་ཐུགས་བསྐྱེད་ཤིང་རྟའི་འཕང་པ་ལས། །རྨད་བྱུང་མཛད་ཕྲིན་ཆ་ཤས་གང་བའི་ལོ་པཎ་རྣམས། །གངས་ཅན་འཛིན་མའི་བསོད་ནམས་མཁའ་ལ་འགྲོས་འདེགས་ཚེ། །ལྔ་བདོའི་མུན་སྨག་གང་དུ་ཡིབས་སྙམ་འཕྱང་མོ་ཉུག །བྱས་པ་དྲིན་དུ་མི་གཟོའི་རྒྱུ་སྐར་དེས། །རང་འོད་ཉི་མའི་འོད་ཟེར་ལ་བཅུག་ནས། །བསྟན་ལ་བྱི་དོར་བྱས་པའི་རྣམ་པར་ཐར། །མུན་པའི་སྨག་ལ་མཛེས་ཀྱི་གཞན་དུ་མིན། །དྲིས་ལན་རིན་པོ་ཆེའི་བསྟན་བཅོས་ལུང་གི་གཏེར་མཛོད་ཅེས་བྱ་བ་ལས་བོད་དུ་མདོ་སྔགས་ཀྱི་བསྟན་པ་དར་བའི་ཚུལ་ཟུར་ཙམ་སྨོས་པའི་སྐབས་ཏེ་སརྒ་བཞི་པའོ།། །།དེ་ལྟར་མདོ་སྔགས་ཀྱི་བསྟན་པའི་རྣམ་གཞག་སྤྱིར་གླེངས་ནས། ད་ནི་དོན་གཉིས་པ་ལ་བརྒལ་བའི་ལན་བྱེ་བྲག་ཏུ་བཤད་པ་ནི། སྤྱིར་བརྒལ་བརྟག་གི་རིགས་པས་ཆོས་ཀྱི་མཚན་ཉིད་ལ་བསྙད་པ་འདིས་མཁས་བླུན་གྱི་བྱེ་བྲག་ཕྱེད་ཅིང་བརྒལ་བྱའི་ཆོས་སམ་གང་ཟག་གི་རྒྱུད་ཇི་བཞིན་མངོན་དུ་དཔོགས་པ་ཐ་སྙད་དུ་སྨྲ་བ་རྣམས་ཀྱི་ཁྱད་པར་གྱི་ཆོས་སུ་འདུག་ནའང་། གསང་སྔགས་ཀྱི་ལམ་ལ་འདི་ལྟ་བུའི་ཚིག་ཚོན་པོས་སྲང་མདོ་ཐམས་ཅད་དུ་ཁྱབ་ན་གསང་བ་སྒྲོག་པའི་ཉེས་དམིགས་ཆེ་ཞིང་བྱིན་རླབས་ཉམས་པར་འགྱུར་བས་དོན་གྱིས་མི་རིགས་པ་ཉིད་དུ་མཐོང་སྟེ། སྙིང་པོ་རྒྱན་ལས། འདུ་འཛིའི་ནང་དུ་གསང་བ་ཡིས། །ཆོས་དང་མ་རྫོགས་སེམས་ཅན་དང་། །རྡོ་རྗེའི་ཚིག་ལ་རྩོད་པ་དག །སྔགས་པ་དམ་ཚིག་ཉམས་བྱེད་པས། །འབད་དེ་ཀུན་ཏུ་མི་བྱའོ། །ཞེས་དང་། ཁྱད་པར་རྩོད་པའི་དུས་སུ་འདི་དག་ལ་བརྟེན་ནས་ཉོན་མོངས་པ་འཕེལ་ཞིང་། བསམ་གཏན་གྱི་ཚེར་མར་འགྱུར་བ་ལ་སོགས་པའི་ཉེས་པའི་ཕུང་པོ་མི་བཟད་པར་གྱུར་པ་མཐོང་བས་གཞན་རྒྱུད་ལ་བགམ་པ་དང་། ཅོ་འདྲིའི་ལན་བྱ་བར་མ་ཁོམ་པས་ལྐུགས་པའི་ངང་ཚུལ་དུ་འདུག་པ་ལ་དགའ་ནའང་། འདིར་དེ་བཞིན་གཤེགས་པས་འཕགས་པ་སྤྱན་རས་གཟིགས་དང་ཤཱ་རིའི་བུ་བྱིན་གྱིས་བརླབས་ཏེ། ཤེས་རབ་སྙིང་པོའི་མན་ངག་འདྲི་བ་དང་ལན་ལྡོན་པའི་ཚུལ་དུ་བྱུང་བ་ལྟར། དཔལ་ཨོ་རྒྱན་གྱི་སློབ་དཔོན་ཆེན་པོས་བདག་ཅག་ལ་བྱིན་རླབས་ཀྱི་རྣམ་པར་འཕྲུལ་པར་བལྟས་ཏེ་གཞུང་དོན་སྔོན་དུ་བཀོད་ནས་ནེམ་ནུར་གྱི་ཆོས་ཉིད་ལ་མཚང་རྒོལ་བས་མཐའ་གཅོད་གེགས་སེལ་གྱི་ཚུལ་དུ་ཞར་བྱུང་ལྟ་བུར་གླེང་བའི་བྱ་བ་ལ་འཇུག་པར་དམ་བཅའོ།། །།དེ་ལ་དྲི་བའི་ཐོག་མ་རུ། །ཇི་ལྟར་སྣོད་བཅུད་འཇིག་རྟེན་འདི། །དོན་དམ་མམ་ནི་ཀུན་རྫོབ་ཉིད། །དོན་དམ་ཡིན་ན་འགྱུར་བ་ཅན། །ཀུན་རྫོབ་ཡིན་ན་དང་པོ་རང་། །ཀུན་རྫོབ་བསྐྱེད་གཞི་གང་ལས་བྱུང་། །དེ་ལ་མཚན་ཉིད་མེད་ཅེ་ན། །མཚན་ཉིད་མེད་དང་ཀུན་རྫོབ་འགལ། །ཞེས་གསུངས་དེ་ཡི་ལན་བརྗོད་པ། །བརྟན་གཡོའི་རང་བཞིན་འཇིག་རྟེན་ཁམས། །རྗོད་བྱེད་ཚིག་གི་རྣམ་འགྱུར་ལ། །ཀུན་རྫོབ་དང་ནི་དོན་དམ་གཉིས། །གང་དུ་བཏགས་ཀྱང་འགལ་བ་མེད། །དང་པོ་ལྟར་ན་འདི་ལྟར་རོ། །རྟོག་པས་བཏགས་པའི་སྣང་ངོ་ལ། །ཆགས་འཇིག་གནས་སྟོངས་རྣམ་པ་བཞིའི། །འཕྲུལ་བའི་རང་གཟུགས་རྒྱུན་མི་འཆད། །བསྐྱེད་གཞི་སངས་རྒྱས་སྨོན་ལམ་དང་། །སེམས་ཅན་རྣམས་ཀྱི་ལས་ཉིད་ལས། །ཞིང་ཁམས་གྲུབ་ཚུལ་གཉིས་སུ་ཡོད། །སྒྲོན་བསྐལ་དང་ནི་མུན་བསྐལ་ལོ། །ཕྱི་མ་ལྟར་ན་གཟོད་མ་ནས། །གཞི་རྩ་བྲལ་བའི་རང་ངོ་ལ། །སྐྱེ་ཞིང་མཆེད་པའི་མིང་མེད་པས། །སྣོད་བཅུད་རང་རང་ངོ་བོས་སྟོང་། །དེ་ལ་འགྱུར་བའི་དངོས་པོ་མེད། །འགལ་གྲུབ་བརྗོད་པའི་མཁན་པོ་སུ།། །།དེ་བཞིན་དྲི་བ་གཉིས་པ་ལ། །སངས་རྒྱས་ཐོག་མཐའ་ཡོད་དམ་མེད། །ཡོད་ན་མེད་ཅེས་བཀའ་ལས་གསུངས། །མེད་ན་དཔག་མེད་འབྱོན་པ་ཅི། །ཞེས་གསུངས་དེ་ཡི་ལན་བརྗོད་པ། །འཇམ་དཔལ་སྒྱུ་འཕྲུལ་དྲྭ་བ་ལས། །སངས་རྒྱས་ཐོག་མ་ཐ་མ་མེད། །དང་པོའི་སངས་རྒྱས་རྒྱུ་མེད་པ། །ཞེས་པས་ཐོག་མཐའ་མེད་པར་བསྟན། །ཐོག་མཐའ་མེད་པར་བཤད་པ་དེ། །བསམ་གྱིས་མི་ཁྱབ་སྤྱོད་ཡུལ་ལས། །འབྱོན་པར་བཀག་པའི་དམ་བཅའ་མིན། །ཡབ་སྲས་མཇལ་བའི་མདོ་ལས་ཀྱང་། །དཔའ་བོ་ཆེན་པོ་ཐབས་མཁས་ཏེ། །སེམས་ཅན་ཡོངས་སུ་སྨིན་བྱའི་ཕྱིར། །བྱེ་བ་ཕྲག་བརྒྱར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང་། །ད་དུང་དུ་ཡང་འདྲེན་པ་ཁྱོད། །སངས་རྒྱས་མང་པོ་སྟོན་པར་མཛད། །ཅེས་གསུངས་རྣམ་པར་དཔྱོད་པའི་བློས། །དྲི་བ་འདི་ལ་ལན་གདབ་ན། །རྩོད་པའི་གཞི་རུ་འགྱུར་ན་ཡང་། །རེ་ཞིག་འདིར་ནི་བཏང་སྙོམས་བཞག། །།དེ་བཞིན་དྲི་བ་གསུམ་པ་ལ། །འགྲོ་བ་ཀུན་གྱི་སེམས་ཉིད་འདི། །གཅིག་གམ་འོན་ཏེ་ཐ་དད་ཉིད། །གཅིག་ན་རིགས་དྲུག་སོ་སོ་ཡི། །སྣང་ཚུལ་བག་ཆགས་རིགས་མི་མཐུན། །མི་གཅིག་སྐྱེ་བ་གནས་འཕོས་ཀྱང་། །ལྷ་ལའང་དམྱལ་སེམས་ཡོད་པར་འགྱུར། །ཞེས་གསུངས་དེ་ལ་ལན་གདབ་པ། །འགྲོ་བ་སེམས་ཅན་མཐའ་དག་གི །ཀུན་གཞིའི་ངོ་བོ་གཉིས་མིན་ཏེ། །འཕེན་པའི་རླུང་གིས་རྟ་བྱས་ཏེ། །ལུང་མ་བསྟན་དུ་གཡོས་པའི་སེམས། །བག་ལ་ཉལ་གྱི་རང་བཞིན་ལ། །ལས་དང་བག་ཆགས་ཐ་དད་ཆགས། །དེ་ཡིས་རིགས་དྲུག་སོ་སོར་གྲུབ། །དཔེར་ན་ནམ་མཁའ་སྟོང་པའི་ངང་། །ཁང་མཛེས་བུམ་པ་ལ་སོགས་ཀྱི། །ནང་གི་སྟོང་ཆ་གཅིག་མོད་ཀྱང་། །གུད་དུ་བཅས་པའི་རྟེན་འབྲེལ་གྱིས། །ཐ་དད་ཉིད་དུ་གྱུར་དང་མཚུངས། །དེ་ཕྱིར་ངོ་བོ་རང་བཞིན་གྱི། །རྣམ་དབྱེ་ཕྱེད་པ་གནད་དུ་ཟབ།། །།དྲི་བ་བཞི་པ་འདི་སྐད་དོ། །སེམས་ཅན་གསར་སྐྱེས་ཡོད་དམ་མེད། །ཡོད་ན་འཁོར་བ་མཐའ་ཅན་འགལ། །མེད་ན་གང་ཟག་དཔག་མེད་པ། །གྲོལ་ཙམ་སེམས་ཅན་ཉུང་འགྲོ་རིགས། །དེ་ཡི་ལན་དུ་འདི་བརྗོད་དོ། །ཇི་སྲིད་ནམ་མཁས་གར་ཁྱབ་པ། །སེམས་ཅན་རྣམས་ཀྱི་ཁམས་ཀྱིས་ཁྱབ། །དེ་སྲིད་རྒྱལ་བའི་ཐུགས་རྗེས་ཁྱབ། །འགྲོ་བས་ཁྱབ་པའི་ཡུལ་ཀུན་ཏུ། །ལས་དང་ཉོན་མོངས་སྡུག་བསྔལ་གྱིས། །རྣམ་པར་ཁྱབ་པ་འཁོར་བའི་ཆོས། །དེ་ཕྱིར་འདི་འདྲའི་དགག་བསྒྲུབ་ནི། །བྱ་ལོང་ནམ་མཁའི་མཐའ་ཚོལ་འདྲ། །རྒྱུད་རྒྱལ་གསང་བའི་སྙིང་པོ་ལས། །ཨེ་མ་ཧོ་བདེ་གཤེགས་སྙིང་པོ་ལས། །རང་རང་རྣམ་རྟོག་ལས་ཀྱིས་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོ་སོར་འཛིན། །སུས་ཀྱང་མ་བཅིངས་བཅིང་མེད་དེ། །བཅིང་བར་བྱ་བ་ཡོད་མ་ཡིན། །རྣམ་རྟོག་བདག་ཏུ་འཛིན་པ་ཡིས། །ནན་གྱིས་མཁའ་ལ་མདུད་པའོ། །བཅིང་མེད་རྣམ་པར་གྲོལ་མེད་པ། །ཞེས་གསུངས་དེ་ཕྱིར་རིག་པའི་དབྱིངས། །མཚུངས་ལྡན་ལྷན་སྐྱེས་མ་རིག་པས། །བསྒྲིབ་དང་སྒྲིབ་བྱེད་དག་པ་ལ། །རང་ངོར་འཁྲུལ་གྲོལ་ཐ་སྙད་བཏགས། །སྤྱི་ཚན་འཁོར་བ་ཐོག་མཐའི་ཚད། །རྒྱལ་བའི་ལྗགས་ཀྱིས་ཀྱང་བརྗོད་དཀའ། །སྔོན་ཚེ་ཐུབ་པའི་དབང་པོ་ལ། །འཁོར་བའི་ཐོག་མཐའ་ཞུས་པ་ན། །ཅང་མི་གསུང་པས་ལན་བཏབ་བོ། །འོན་ཀྱང་དགེ་སྡིག་ལས་འབྲས་ཀྱིས། །ཕན་གནོད་མེད་པ་མ་ཡིན་ཏེ། །ཚོགས་གཉིས་བསགས་པའི་ནུས་མཐུ་ལས། །ལས་དང་ཉོན་མོངས་ཉེར་ཟད་ཅིང་། །སྟོང་ཉིད་ཀློང་དུ་གྱུར་བའི་ཚེ། །རང་ངོར་འཁོར་བ་གཏན་སྟོངས་ཡིན། །དེ་ཕྱིར་འདི་འདྲ་ཤེས་འདོད་ན། །མང་པོ་འདི་འདྲ་མི་སྨྲ་བར། །དུས་གསུམ་རྟོག་པ་ཁ་ཡན་དུ། །གློད་དེ་འོད་གསལ་ངང་ལ་ཞོག །འཁོར་བའི་ཐོག་མཐའ་འཇིག་པ་ལ། །ཐེ་ཚོམ་མེད་པ་ཁོ་བོས་རྟོགས། །ཞེས་སོ།། །།དེ་ནས་དྲི་བ་ལྔ་པ་རུ། །ཀུན་གཞི་ཡེ་ཤེས་གཅིག་མི་གཅིག །གཅིག་ན་སངས་རྒྱས་སེམས་ཅན་འགྱུར། །དང་པོ་ཀུན་གཞིའི་རྒྱུ་ཡོད་ཕྱིར། །མི་གཅིག་འཁོར་འདས་ཀུན་གྱི་གཞིར། །བཤད་པ་དེ་ཉིད་འགལ་བར་འགྱུར། །ཞེས་བརྒལ་དེ་ལན་སྤྱི་དང་ནི། །བྱེ་བྲག་གཉིས་སུ་གདབ་པ་ལ། །ཐུན་མོང་ཁ་ཅིག་འདི་སྐད་དུ། །ཀུན་གཞི་ཀུན་གྱི་གཞི་ཡིན་ཏེ། །མྱ་ངན་འདས་པའི་གཞི་མའང་ཡིན། །ཞེས་པའི་རྗོད་བྱེད་ལ་འཁྲུལ་ནས། །ཀུན་གཞི་ཆོས་སྐུར་འདོད་ན་ཡང་། །མདོ་སྡེ་སྟུག་པོ་བཀོད་པ་ལས། །ཟླ་བའི་དཀྱིལ་འཁོར་རྣམ་དག་པ། །རྟག་ཏུ་དྲི་མེད་ཡོངས་གང་ཡང་། །ཚེས་ཀྱི་དབང་གིས་འཇིག་རྟེན་ན། །ཟླ་བ་སྐྱེ་འབྲིར་རྣམ་པར་རྟོག །དེ་བཞིན་དོན་གྱི་ཀུན་གཞི་ཡང་། །རྟག་ཏུ་བདེ་གཤེགས་སྙིང་པོ་ཅན། །སྙིང་པོ་དེ་ལ་ཀུན་གཞིའི་སྒྲས། །དེ་བཞིན་གཤེགས་པས་བསྟན་པར་མཛད། །དེ་ཉིད་མི་ཤེས་བྱིས་པ་རྣམས། །བག་ཆགས་དབང་གིས་ཀུན་གཞི་ཡང་། །བདེ་དང་སྡུག་བསྔལ་སྣ་ཚོགས་དང་། །ལས་ཞེས་ཀུན་ནས་ཉོན་མོངས་མཐོང་། །རང་བཞིན་དག་ཅིང་དྲི་མ་མེད། །ཡོན་ཏན་ཡིད་བཞིན་ནོར་བུ་འདྲ། །འཕོ་བ་མེད་ཅིང་འགྱུར་བ་མེད། །དེ་ལྟར་ཡོངས་ཤེས་རྣམ་པར་གྲོལ། །ཅེས་གསུངས་དེ་ཕྱིར་འཆིང་གྲོལ་གྱི། །རྣམ་པས་ཀུན་གཞི་གནས་འགྱུར་བ། །ཡེ་ཤེས་ཉིད་དུ་བཤད་པའི་ཕྱིར། །ཀུན་གཞི་ཆོས་སྐུར་འདོད་པ་ནི། །ལམ་དང་བྲལ་བའི་རྨོངས་པ་ཡིན། །ཐུན་མོང་མ་ཡིན་རྒྱུད་སྡེའི་སྙིང་། །རང་བཞིན་རྫོགས་པ་ཆེན་པོ་ནས། །ལན་གྱི་རིམ་པ་འདི་ལྟར་གདབ། །རིག་པ་རང་ཤར་རྒྱུད་སྡེ་ལས། །ལ་ལ་ཀུན་གཞི་ཆོས་སྐུར་འདོད། །དེ་ལ་ལན་གདབ་བསྟན་པའི་ཕྱིར། །ཀུན་གཞིའི་མཚན་ཉིད་འདི་ལྟར་ཡིན། །དེ་ནས་དེ་ཡི་ལན་སྨྲས་པ། །ཐམས་ཅད་རྫོགས་ཕྱིར་ཀུན་གཞི་ཡིན། །དེ་ནས་དྲིས་པའི་ཚིག་གིས་ལྡོག །སངས་རྒྱས་འགྱུར་བ་ཡོད་པར་རིགས། །ཀུན་གཞི་སྣ་ཚོགས་འཆར་བའི་ཕྱིར། །དེ་ལས་ཐམས་ཅད་རྫོགས་པའི་ཕྱིར། །སངས་རྒྱས་ཉིད་དུ་སེམས་ཅན་རིགས། །ཅི་ཕྱིར་ཐམས་ཅད་རྫོགས་པའི་ཕྱིར། །ཡང་ན་རེས་འཇོག་ཅན་དུ་འགྱུར། །ཞེས་སོགས་བརྒལ་ལན་ཚུལ་གྱིས་མཐར། །ཀུན་གཞི་རྣམ་རྟོག་འཛིན་པ་ལ། །སྣ་ཚོགས་འཁྲུལ་པའི་ཤེས་པས་བསླད། །ཀུན་གཞི་མ་རིག་དངོས་པོ་ཡིན། །ཞེས་པས་མ་རིག་ཀུན་གཞི་དང་། །རིག་པ་ཡེ་ཤེས་སྙིང་པོ་ཅན། །ཐ་དད་ནང་ནས་རྫས་འགལ་བར། །ལན་ཅིག་མིན་པར་བསྟན་ནས་ཀྱང་། །རྒྱ་མཚོ་དང་ནི་གྲུབ་པ་ཡིས། །དཔེར་བརྗོད་ཉིད་ཀྱིས་གསུངས་པའི་དོན། །འགྲེལ་ཚུལ་རྣམ་གྲངས་མང་ན་ཡང་། །གྲུབ་མཐའ་རྒྱ་མཚོའི་མཐར་སོན་ཞིང་། །ལུང་དང་རིགས་པའི་སྙིང་པོ་ཅན། །ཀུན་བཟང་དགོངས་པའི་རྒྱལ་སྲིད་ལ། །མངའ་དབང་བསྒྱུར་བའི་ཐམས་ཅད་མཁྱེན། །སྲིད་ན་འགྲན་གྱིས་ཟླ་བྲལ་བ། །ཀློང་ཆེན་རབ་འབྱམས་འདི་ལྟར་བཞེད། །ཆོས་སྐུ་གདོད་ནས་དག་པ་ལ། །དྲི་མ་ཡོད་དུ་མ་མྱོང་བས། །དབྱིངས་ཀྱི་རང་བཞིན་རྒྱ་མཚོ་མཚུངས། །དེ་རུ་བཙན་ས་ཟིན་གྱུར་ན། །དག་པ་ཉིས་ལྡན་སངས་རྒྱས་ཡིན། །ཀུན་གཞིའི་ཁམས་ནི་རྒྱ་མཚོའི་སྟེང་། །ཚོང་པ་གྲུ་ནང་ཞུགས་པ་ལྟར། །ཐོག་མའི་དབྱིངས་ལས་འཁྲུལ་པའི་དུས། །མ་རིག་བག་ཆགས་རྟེན་གཞི་རུ། །གནས་པ་གྲུ་བོ་དེ་ལས་ནི། །སེམས་དང་སེམས་བྱུང་ལས་བག་ཆགས། །འཁྲུལ་པ་མི་ཡིས་གང་བ་འདྲ། །དེ་དག་རྣམ་གྲངས་ཐ་དད་ཀྱང་། །ཤེས་པ་གཅིག་གི་ལྡོག་ཆ་ལས། །གཞན་དུ་མ་ཡིན་འདི་ལྟ་སྟེ། །རིག་པ་དྲི་མེད་ཆོས་སྐུ་ཡིས། །ངོ་བོ་དུས་དང་རྣམ་པ་ཀུན། །མཐར་ཐུག་གྲོལ་བའི་གཞིར་ཡོད་ལ། །གཉིད་དུ་མ་སོང་གནས་སྐབས་འདྲ། །ཀུན་གཞིའི་གནས་ལུགས་གཉིད་ལྟ་བུ། །མེད་བཞིན་སྣང་བའི་འཁྲུལ་སྣང་ཆོས། །རྨི་ལམ་སྣ་ཚོགས་འཆར་བའི་རྟེན། །ཡིན་པ་བཞིན་དུ་བཞེད་པ་ཡིན། །དབྱེ་ན་གདོད་མའི་ཀུན་གཞི་དང་། །སྦྱོར་བ་དོན་གྱི་ཀུན་གཞི་དང་། །བག་ཆགས་ལུས་ཀྱི་ཀུན་གཞི་དང་། །བག་ཆགས་སྣ་ཚོགས་ཀུན་གཞི་སྟེ། །རྣམ་པ་བཞི་རུ་བཤད་མོད་ཀྱི། །དེ་ཡི་རང་བཞིན་ཤེས་འདོད་ན། །རྫོགས་པ་ཆེན་པོའི་རྒྱུད་སྤྱི་དང་། །རིག་འཛིན་རྣམས་ཀྱི་བཤད་ཏིག་དང་། །ཀུན་གྱི་དོན་འགྲེལ་ཐེག་པའི་མཆོག །རཏྣ་ཀོ་ཤའི་རིམ་པའི་ཁང་། །བཅུ་བཞི་བ་ལ་རྟོགས་པར་བྱ།། །།དེ་བཞིན་དྲི་བ་དྲུག་པ་ལ། །རྟོགས་དང་མ་རྟོགས་ཡིན་ཞེ་ན། །རྟོགས་ཀྱང་མ་རིག་ས་བོན་ཡོད། །ས་བོན་ངོ་བོ་མི་འགྱུར་ཕྱིར། །ཞེས་འདུག་དེ་ཡི་ལན་བརྗོད་པ། །མང་པོ་མང་པོ་མི་སྨྲ་སྟེ། །ཕལ་ཆེར་གོང་གི་རིགས་པས་ཤེས། །འོན་ཀྱང་མཚུངས་པའི་དཔེ་བརྗོད་ན། །ས་བོན་ངོ་བོ་མི་འགྱུར་བས། །རྣམ་པ་འགྱུར་བར་མི་སྲིད་ན། །སོལ་བར་ཤིང་གི་མིང་ཐོགས་ལ། །ཁང་མཛེས་དག་གི་ཀ་བར་ཚུགས། །ལྕགས་རྡོར་རལ་གྲིའི་མིང་ཐོགས་ལ། །ལྗོན་ཤིང་ཆེན་པོའི་རྩ་བ་ཆོད། །རྫི་བོར་བླ་མའི་མིང་ཐོགས་ལ། །ཐོས་བསམ་སྒོམ་པའི་སྟོབས་རྩལ་ཕྱུང་། །དེ་སོགས་རིགས་པ་དཔག་མེད་པ། །བསྒྲེ་རུ་ཡོད་ཀྱང་ཤ་ཐང་ངོ་།། །།དྲི་བ་བདུན་པར་འདི་སྐད་དུ། །རྣམ་རྟོག་ཆོས་སྐུ་གཅིག་གམ་ཐ་དད། །གཅིག་ན་རྣམ་རྟོག་གློ་བུར་ཏེ། །སངས་རྒྱས་དུས་ན་རྟོག་བྲལ་ཉིད། །མི་གཅིག་འཁོར་འདས་རྒྱུ་མི་གཅིག །ཅེས་གསུངས་དེ་ཡི་ལན་བརྗོད་པ། །རྣམ་རྟོག་ཆོས་སྐུ་མ་ཡིན་པས། །རྣམ་རྟོག་ཉིད་དུ་མིང་གིས་གྲུབ། །རྣམ་རྟོག་ཆོས་སྐུ་དངོས་ཡིན་ན། །ཐ་དད་ཉིད་དུ་སུ་ཡིས་གདགས། །འོན་ཀྱང་སེམས་ཅན་བློ་མང་བ། །དེ་སྲིད་གྲུབ་མཐའ་ཆེས་མང་བས། །རྣམ་རྟོག་ཆོས་སྐུར་འདོད་པ་ཡིས། །སྡེ་ཚན་འདུག་སྟེ་ཅང་མི་སྨྲ། །རང་ལུགས་རྫོགས་པ་ཆེན་པོ་ལ། །ཐ་མལ་རྣམ་རྟོག་གཟུང་འཛིན་ཅན། །ཆོས་ཀྱི་སྐུ་རུ་མི་འདོད་དེ། །ཅི་ཕྱིར་ཀུན་བྱེད་རྒྱལ་པོ་ལས། །རང་བྱུང་ཡེ་ཤེས་ཡེ་ནས་ཤེས། །ཡུལ་ལ་རྟོག་པའི་ཡེ་ཤེས་དེ། །ཡུལ་ལས་བྱུང་བས་རང་བྱུང་མིན། །ཞེས་གསུངས་དེ་ཕྱིར་ཆོས་ཀྱི་དབྱིངས། །མཐའ་བྲལ་མེ་ལོང་ལྟ་བུའི་ངོགས། །རྣམ་རྟོག་ཡུལ་གྱི་གཟུགས་བརྙན་ཅན། །རྣམ་གྲོལ་ཐབས་ཀྱིས་མ་ཟིན་ན། །སྲིད་པར་འཇུག་པའི་རྒྱུ་ལས་ཅི། །འོན་ཀྱང་ཀུན་བརྟགས་མ་རིག་པའི། །ཉེ་བར་ལེན་པའི་མཚམས་སྦྱར་ཏེ། །ཡུལ་དང་ཡུལ་ཅན་ཕྱེ་བ་ལས། །གཞན་ནས་བྱུང་བ་མ་ཡིན་པས། །རྩལ་ལམ་རོལ་པ་ཉིད་དུ་འདོད། །དེ་སྐད་དུ་ནི་ཀུན་གསལ་ལས། །རང་རིག་རང་གསལ་མཉམ་གཞག་དུས། །དེ་ལས་ཡེངས་པ་རྗེས་ཐོབ་དུས། །དུག་ལྔ་ལངས་པ་རྣམ་རྟོག་དུས། །དེ་གསུམ་ཆོས་སྐུར་མི་འབྲལ་བ། །སྤྱོད་པའི་ལ་ཟློས་ཡིན་པར་བཤད། །ཅེས་གསུངས་དེ་ཕྱིར་རྣམ་རྟོག་གི །རང་བཞིན་ཤེས་དང་མ་ཤེས་དང་། །འཛིན་པ་དག་དང་མ་དག་གིས། །བྱེ་བྲག་ཕྱེད་པར་མ་གྱུར་ན། །བོང་བ་གསེར་དུ་འཁྲུལ་པ་ལྟར། །རྣམ་རྟོག་ཆོས་སྐུར་རེ་བས་བསླུ། །ཇི་ལྟར་བུ་རམ་ཉིད་ཀྱི་རོ། །མྱོང་བས་ཤེས་ཀྱི་བལྟས་པས་མིན། །དེ་ཕྱིར་འདི་འདྲའི་བརྗོད་དོན་ནི། །བརྗོད་བྱས་ཇི་བཞིན་མ་མཐོང་བས། །རྟོག་པས་བཏགས་པའི་གྲུབ་པའི་མཐའ། །ཇི་ཙམ་འདུག་པ་མཁྱེན་ལགས་སམ། །ཚུལ་འདིས་ལམ་གྱི་གནས་སྐབས་སུ། །སྒོམ་ཆེན་མང་པོ་བསླུས་མཐོང་ནས། །རང་གིས་རྒྱུད་ལ་མྱོང་བའི་ཚུལ། །ཚད་མའི་ལུང་གིས་རྒྱབ་སྐྱོར་ནས། །ཞིབ་མོར་བརྗོད་པའི་གཏན་ཚིགས་ནི། །དཔལ་གྱི་མཆིམས་ཕུའི་ནགས་སུ་བཀོད། །མིང་ལ་ཀུན་མཁྱེན་ཞལ་ལུང་གྲགས། །དོན་ལ་རྟོགས་པའི་འདྲ་འབག་ཡིན། །དེ་ལྟ་མོད་ཀྱི་དེང་གི་དུས། །རྒྱལ་བསྟན་ནུབ་རིའི་ཕག་ཏུ་ཡིབས། །བསྟན་པ་སྡེ་དང་སྟོབས་ལ་རེ། །བསྟན་སྙིང་ཁེ་དང་གྲགས་པར་རློམ། །དྲང་ངེས་ལྡེམ་དགོངས་མི་ཤེས་པར། །གཡོ་དང་སྒྱུ་ཡིས་འགྲོ་བ་འདུལ། །གསང་བཅུའི་དམ་ཚིག་ཁྲོམ་ལ་གྱེར། །ཐོས་བསམ་སྒོམ་པའི་བྱ་བ་དང་། །ལུང་དང་རྟོགས་པའི་ཡོན་ཏན་ལས། །ལྷ་མཐོང་འདྲེ་མཐོང་སྨྲས་ན་དགའ། །དུས་ངན་འདི་འདྲ་ཤར་བའི་ཚེ། །མཉམ་པར་གཞག་ན་མི་འཐད་དམ།། །།བརྒྱད་པར་གོང་གི་བརྗོད་འཕྲོས་སུ། །དེ་ཡང་རྟོགས་མ་རྟོགས་ཡིན་ན། །རྣམ་རྟོག་འཁྲུལ་པ་དག་པའི་ཚེ། །ཆོས་སྐུ་ཉིད་ཀྱང་མེད་དག་པས། །གཟུགས་སྐུ་ཉིད་ཀྱིས་འགྲོ་དོན་མེད། །ཅེས་དྲིས་ལན་དུ་འདི་སྐད་དོ། །རྣམ་རྟོག་འཁྲུལ་པ་དག་པའི་ཚེ། །ཆོས་སྐུ་ཉིད་ཀྱང་མེད་སྨྲ་ན། །ཡེ་ཤེས་འཆར་གཞིའང་འགག་པའི་ཕྱིར། །དེ་འདྲའི་ཆོས་སྐུ་ཉམས་རེ་མཚར། །འཇིག་ཚོགས་སུམ་བརྒྱ་དྲུག་ཅུ་སྟེ། །ཕྱིན་ཅི་ལོག་གི་ཐེག་པ་ལ། །རྟག་ཆད་གཉིས་སུ་གྲགས་པ་ཡི། །རྒྱང་འཕེན་པ་དང་ཁྱད་པར་ཅི། །དེ་དག་ད་ལྟའི་མཐོང་ཆོས་ཀྱི། །བདེ་དང་སྡུག་བསྔལ་ཙམ་མ་གཏོགས། །སྔ་ཕྱིའི་ཚེ་དང་ལས་འབྲས་ཆོས། །ཐར་པ་གྲོལ་བ་ལ་སོགས་པ། །གང་ཡང་མེད་པའི་ཕྱང་ཆད་ཡིན། །དེ་ཕྱིར་ཤེས་བྱའི་ཡེ་ཤེས་གཉིས། །སངས་རྒྱས་པ་ཡི་ཁྱད་ཆོས་ཡིན། །རྫོགས་ཆེན་རྒྱུད་ལས་འདི་སྐད་དུ། །ཤེས་བྱའི་ཡེ་ཤེས་གཉིས་མེད་ན། །བེམ་པོ་རྣམས་དང་ཁྱད་ཅི་ཡོད། །ཡང་ན་སྟོང་པ་ཕྱང་ཆད་དུ། །འདི་ཉིད་འགྱུར་བ་ཁོ་ནའོ། །ཞེས་གསུངས་དེ་ཕྱིར་རྟོག་པ་དང་། །བྲལ་ཡང་རང་བཞིན་འོད་གསལ་བའི། །ཆ་ལས་གཟུགས་སྐུའི་འགྲོ་དོན་འབྱུང་། །ཅི་ཕྱིར་ངོ་བོ་ཀ་དག་དབྱིངས། །ཡོད་མེད་མཐའ་ལས་རྣམ་གྲོལ་ཀྱང་། །དེ་ཡི་རང་བཞིན་ལྷུན་གྲུབ་ཆ། །ཡེ་ཤེས་ཆེན་པོར་རྟག་བཞུགས་པས། །ཆོས་ཀྱི་སྐུ་ལས་མ་གཡོས་པར། །འགྲོ་དོན་ཕྲིན་ལས་རྒྱུན་མི་འཆད། །དེ་ཚུལ་ཤེལ་དང་ཉི་འོད་ཀྱི། །དཔེ་ཡིས་ཤིན་ཏུ་གོ་སླ་བར། །མཛོད་ཆེན་བདུན་ནས་ལན་མང་དུ། །གསུངས་པ་ཉིད་ལ་བལྟ་བར་བྱོས།། །།དྲི་བ་དགུ་པར་འདི་སྐད་དོ། །སྐུ་གསུམ་ངོ་བོ་གཅིག་མི་གཅིག །གཅིག་ན་ཆོས་སྐུ་ལོངས་སྐུ་གཉིས། །འགྲོ་བ་ཀུན་གྱིས་མཐོང་བར་རིགས། །མི་གཅིག་སངས་རྒྱས་བཟང་ངན་འགྱུར། །ཞེས་དྲི་ལན་ནི་འདི་ལྟར་རོ། །སྐུ་གསུམ་ངོ་བོ་ཐ་དད་ན། །གཞི་དང་ལམ་དང་འབྲས་བུའི་ཆོས། །ཇི་སྙེད་བསྟན་པའང་དོན་ཡོད་མིན། །དེ་ཕྱིར་མུ་ཏིག་ཕྲེང་བ་ལས། །སྐུ་གསུམ་སངས་རྒྱས་ཉག་གཅིག་པོ། །ཡེ་ཤེས་མཚན་ཉིད་ལྔ་ལྡན་ཉིད། །འདུག་ཚུལ་ཤེས་བྱའི་བབས་ཀྱིས་གྲུབ། །ཅེས་གསུངས་དེ་ཡི་རང་བཞིན་ནི། །ནང་གསལ་འཆར་གཞི་ཆོས་ཀྱི་སྐུ། །ཕྱིར་གསལ་གདུལ་བྱའི་སྣང་ངོ་རུ། །ལོངས་སྤྲུལ་འཆར་བས་དོན་མཛད་པ། །བྱད་དང་དེ་ཡི་གཟུགས་བརྙན་བཞིན། །གདུལ་བྱ་འདུལ་ཕྱིར་སྣང་བའི་ཕྱིར། །མི་སློབ་ལམ་གྱི་སྣང་བར་འདོད། །ཀུན་ཀྱང་རྣམ་བྱང་ཆེན་པོའི་ཆོས། །རིག་པའི་རོལ་པར་རོ་གཅིག་ཀྱང་། །སྣང་ཚུལ་ངོ་བོ་ཐ་དད་པ། །གདུལ་བྱ་ཀུན་གྱི་མིག་ཤེས་ལ། །སྣང་བའི་ཡུལ་དུ་མ་གྱུར་ཏོ། །ཚུལ་འདི་ཤིན་ཏུ་གནད་ཆེ་བས། །དྲི་གཞིར་འགོད་པའང་ངོ་མཚར་གནས། །རང་བཞིན་རྒྱས་པར་ཤེས་འདོད་ན། །ཐེག་མཆོག་རཏྣ་ཀོ་ཤ་ཡི། །རིམ་ཁང་ཐ་མར་རྟོགས་པར་བྱ།། །།དེ་ནས་དྲི་བ་བཅུ་པ་རུ། །རྒྱལ་བ་དགོངས་པའི་བརྒྱུད་པ་ལ། །ཚིག་དང་ཡི་གེ་ཡོད་དམ་མེད། །མེད་ན་རྒྱུད་རྣམས་གང་ནས་བྱུང་། །ཡོད་ན་དགོངས་པའི་བརྒྱུད་དང་འགལ། །ཞེས་དྲི་ལན་དུ་འདི་ལྟར་རོ། །སྤྱིར་ནི་ཆོས་རྣམས་ཐམས་ཅད་ཀུན། །དགོངས་པའི་བརྒྱུད་ལས་ཡོངས་མི་འདའ། །སྟོན་མཆོག་རྫོགས་པའི་སངས་རྒྱས་ཀྱིས། །རིགས་ཅན་གསུམ་གྱི་རྣམ་རྟོག་ལ། །དགོངས་ནས་ཐེག་པ་གསུམ་བསྟན་ཡང་། །དོན་ལ་ཚིག་གཅིག་གསུངས་པ་མེད། །མདོ་སྡེ་ཡོན་ཏན་བཀོད་པ་ལས། །ང་ཡིས་ཅི་ཡང་མ་གསུངས་པར། །སེམས་ཅན་རྣམས་ལ་ཁྱབ་བདག་སྣང་། །ཞེས་སོ་དེ་ཡི་ངོ་བོ་ནི། །གང་གི་དགོངས་པའི་ཐུགས་རྗེའི་འོད། །ཉན་པ་པོ་ཡི་རྣམ་རིག་ལ། །བྲག་ཅ་བཞིན་དུ་གསལ་བ་ཡིན། །དེ་ཡི་རྒྱུ་མཚན་རྒྱུད་བླ་མར། །ཇི་ལྟར་སྒྲ་བརྙན་གྱིས་ནི་སྒྲ། །གཞན་གྱི་རྣམ་རིག་ལས་བྱུང་བ། །རྣམ་རྟོག་མེད་ཅིང་བཟོ་མེད་པ། །དེ་ལྟར་དེ་བཞིན་གཤེགས་པའི་གསུང་། །རྣམ་རྟོག་མེད་ཅིང་བཟོ་མེད་པ། །ཕྱི་དང་ནང་ནའང་གནས་མ་ཡིན། །ཞེས་སོ་དེ་ཕྱིར་སངས་རྒྱས་ཀྱི། །དགོངས་པས་བསྟན་པའི་ཆོས་ཡིན་ཀྱང་། །གདུལ་བྱའི་བློ་ལ་ཚིག་ཏུ་སྣང། །དེ་ཡང་གཅིག་ཏུ་མ་ངེས་ཏེ། །བསམ་གྱིས་མི་ཁྱབ་རང་བཞིན་ཅན། །དེ་ཕྱིར་གསང་སྔགས་སྔ་འགྱུར་གྱི། །དགོངས་བརྡའི་བརྒྱུད་ལ་ཡིད་གཉིས་བློས། །ཅ་ཅོ་སྒྲོག་པའི་རྟོག་ཅན་རྣམས། །ད་དུང་ཆོས་ཀྱི་མིག་བསྒྲུབ་ལ། །ངན་འགྲོའི་ལམ་ལས་མི་ལྡོག་གམ། །བྱེ་བྲག་རྒྱུད་ཀྱི་བྱུང་ཚུལ་ནི། །ཆོས་སྐུས་རང་གི་ངོ་བོས་གསུངས། །མཚོན་བྱ་དོན་གྱི་རྒྱུད་ཅེས་བྱ། །དེ་ལ་ཚིག་དང་ཡི་གེ་མེད། །དབྱེ་ན་རྣམ་པ་གཉིས་ཡིན་ཏེ། །ཐབས་ཀྱི་རྒྱུད་དང་རང་བཞིན་རྒྱུད། །དོན་ལ་གཉིས་སུ་མ་ཡིན་ཏེ། །རྒྱུད་རྒྱལ་མུ་ཏིག་ཕྲེང་བ་ལས། །གཞི་གཅིག་ངོ་བོའི་ཁྱད་པར་ལས། །ཐབས་དང་རང་བཞིན་རྒྱུད་ཅེས་ནི། །བཏགས་པ་ཙམ་དུ་དེ་སྣང་ཡང་། །ངོ་བོ་གཞི་གཅིག་རང་བཞིན་སྟོང་། །ཐ་དད་མ་ཡིན་འགྱུར་བ་མེད། །དཔེར་ན་སྐྱེས་བུ་གང་ཞིག་ལ། །མིང་ནི་མང་པོ་ཡོད་གྱུར་ན། །གང་ནས་བོས་ཀྱང་དེ་ལྟར་སྣང་། །འགྱུར་མེད་དོན་ཀྱང་དེ་བཞིན་ནོ། །ཞེས་གསུངས་དེ་ནི་འགྲོ་ཀུན་ལ། །ཁྱབ་པའི་རང་རིག་བྱང་ཆུབ་སེམས། །རྟག་པར་གནས་པས་རྒྱུད་དུ་བསྟན། །ལོངས་སྐུས་གསལ་དག་ཕྱེད་པར་གསུངས། །དེ་ཡང་ལྗགས་ལས་མ་ཡིན་ཏེ། །ཡེ་ཤེས་རང་སྣང་ཉིད་དུ་བསྟན། །སྤྲུལ་སྐུས་ཚིག་བསྡེབས་ལེགས་པར་གསུངས། །མཚོན་བྱེད་ཚིག་གི་རྒྱུད་དུ་འདུས། །རྣམ་གྲངས་བརྗོད་ན་ཐལ་འགྱུར་ལས། །འོད་ཀྱི་ཡང་ཞུན་བཅུ་བདུན་བཤད། །རང་ཤར་བ་དང་རང་གྲོལ་དང་། །རང་བྱུང་ཉིད་དང་རྩལ་རྫོགས་དང་། །མཛེས་ལྡན་དག་དང་ཕྲ་བཀོད་དང་། །མུ་ཏིག་ཕྲེང་དང་ཡི་གེ་མེད། །སྙིང་དང་ཐུགས་ཀྱི་མེ་ལོང་དང་། །ཉི་ཟླ་ཁ་སྦྱོར་ངོ་སྤྲོད་སྤྲས། །སྐུ་གདུང་འབར་དང་རིན་ཆེན་སྤུངས། །སྒྲོན་མ་འབར་དང་ཀློང་ཆེན་དྲུག །དེ་ལྟར་བཅུ་དྲུག་རིམ་པ་རྣམས། །ཐལ་འགྱུར་ལས་ནི་ངེས་འཕྲོས་ནས། །གདུལ་ཡུལ་སེམས་ཅན་རྣམས་ལ་སྣང་། །ཞེས་སོ་དེ་ལྟར་སྐུ་གསུམ་གྱི། །སྟོན་པ་ངོ་བོ་གཅིག་པའི་ཀློང་། །རང་བཞིན་སོ་སོས་གསུངས་པ་ལྟར། །སྣང་བས་དགོངས་བརྡ་སྙན་གསུམ་གྱི། །བརྗོད་བྱའི་ཐ་སྙད་ཤར་བ་ཡིན། །རིན་ཆེན་སྤུངས་པའི་རྒྱུད་ལས་ཀྱང་། །འཛིན་པ་རང་དག་ཆོས་སྐུ་ཡིས། །སྤྲོས་མེད་རང་དག་གཞལ་ཡས་སུ། །ཉིད་དང་དབྱེར་མེད་སྣང་འཁོར་ལ། །མཚན་མ་མེད་པའི་གསུང་གིས་ནི། །སྤྲོས་པ་མེད་པའི་ཆོས་རྣམས་ནི། །མི་གནས་རང་ཟད་ཐུགས་ལས་བྱུང་། །མ་གསུངས་གསུང་པ་མེད་པར་ནི། །མཉམ་པ་ཆེན་པོའི་ངང་དུ་བསྟན། །རང་གསལ་དག་པའི་ལོངས་སྐུ་ཡིས། །འོད་ལྔ་རྣམ་དག་གཞལ་ཡས་ནས། །སྤྲོས་མེད་བདེ་ཆེན་གསུང་གིས་ནི། །སྐུ་ལྔ་རིགས་ཀྱི་འཁོར་རྣམས་ལ། །དངོས་མེད་དག་པའི་ཆོས་རྣམས་ནི། །ཡེ་ཤེས་ལྔ་འདུས་ཐུགས་ནས་ཕྱུང་། །རྣམ་དག་འོད་ཟེར་ལྗགས་བཀྲམ་ནས། །རང་བྱུང་ཡི་གེ་དྲུག་ཏུ་ཡང་། །མ་གསུངས་རང་བྱུང་ཆེན་པོར་བསྟན། །སྤྲུལ་སྐུ་མངོན་ཞེན་མེད་པ་ཡིས། །ཆོས་འབྱུང་གདུལ་བྱའི་རང་གནས་ནས། །རིགས་དྲུག་ལས་སད་སྐལ་ལྡན་ལ། །སྤྲོས་བཅས་ཚིག་གི་གསུང་གིས་ནི། །དབང་པོ་གང་མོས་ཆོས་རྣམས་ཡང་། །དྲན་པ་རང་གསལ་ཐུགས་ནས་ནི། །དབང་པོ་འདོད་མེད་ལྗགས་གསལ་བཀྲམ། །ཐེག་པ་གྲངས་ཀྱི་ཆོས་སུ་བསྟན། །དེ་ལྟར་སྐུ་གསུམ་རབ་བཤད་པས། །སེམས་ཅན་བྱང་ཆུབ་སེམས་དཔའ་དང་། །སངས་རྒྱས་ཀུན་གྱི་ཐུགས་ཀྱང་ཚིམ། །དེ་བཞིན་འགྲོ་རྣམས་རེ་བ་བསྐངས། །ཞེས་གསུངས་དེ་ཕྱིར་གནས་རིགས་གསུམ། །དེ་ཡི་སྟོན་པས་ཕུན་སུམ་ཚོགས། །ལྔ་ལྡན་ངེས་པས་བསྟན་པ་ལས། །དོན་རྒྱུད་སྐྱེས་བུའི་སྙིང་ལ་བབས། །ཚིག་རྒྱུད་མིང་དང་ཡི་གེར་གྲུབ། །གལ་ཏེ་དགོངས་པས་བརྒྱུད་ཕྱིན་ཆད། །ཐོག་མ་དེ་ནས་ད་ལྟའི་བར། །ཚིག་དང་ཡི་གེར་མི་བརྟེན་པའི། །རིགས་ཆད་ཉིད་དུ་སྨྲ་བ་ན། །སྐྱེ་མེད་སེམས་ལས་འགག་མེད་རླུང་། །དེ་ལས་འགྲོ་འོང་བརྗོད་པའི་སྒྲ། །སྒྲ་ལས་མིང་ཚིག་འགྲུབ་པ་ཡིས། །རྟེན་འབྲེལ་དེ་ཡང་འགགས་འགྱུར་བས། །ཧ་ཅང་ཐལ་བ་མ་ཡིན་ནམ། །འོན་ཀྱང་དེང་སང་སྙིགས་མའི་དུས། །འདི་འདྲའི་རྣམ་དབྱེ་མ་འདོད་པར། །སྔོན་བྱུང་རྒྱུད་ཀྱི་གླེང་གཞི་རུ། །སྟོན་འཁོར་དགོངས་པ་མཉམ་པ་ཡིས། །དགོངས་བརྡས་བརྒྱུད་པའི་སྣང་ཚུལ་ལ། །བསྙད་ནས་ཚིག་བརྒྱུད་བསྟན་པ་བསྣུབས། །གླེགས་བམ་མགོ་བོར་བཞག་བྱས་ཏེ། །ཐོབ་ཤོག་གྱུར་ཤོག་བརྗོད་པ་ལ། །དབང་ལུང་ཐོབ་པའི་གོ་བཅད་ནས། །ཐོབ་ཡིག་གླེགས་བམ་བསགས་པ་མཐོང་། །ཅི་བྱར་ནམ་འཕང་གཅོད་པ་ལ། །བྱ་རྒྱལ་ཁྱུང་གི་གཤོག་རྩལ་དགོས། །རྩལ་མེད་གཡང་ལ་མཆོངས་པ་དེ། །རིན་ཆེན་སྲོག་གི་གཟུ་བར་འགྱུར། །དེ་ཕྱིར་གདོད་མའི་མགོན་པོ་དང་། །དགོངས་པ་མཉམ་པར་མ་གྱུར་བར། །དེ་འདྲའི་ལད་མོ་སུ་ཞིག་བྱེད། །ཆོས་ལ་དབང་ཟ་ཚོད་ཡོད་ཀྱི། །ལས་འདི་དམྱལ་བའི་རྒྱུར་མཐོང་ནས། །སྤྱི་མཐུན་ཉིད་དུ་དེ་སྐད་སྨྲས།། །།དེ་ནས་དྲི་བ་བཅུ་གཅིག་པར། །རིག་འཛིན་བརྡའ་ཡི་བརྒྱུད་པ་ལ། །དབང་དང་དམ་ཚིག་ཡོད་དམ་མེད། །ཡོད་ན་བརྡ་ཡི་བརྒྱུད་དང་འགལ། །མེད་ན་དགོངས་པའི་བརྒྱུད་དང་མཚུངས། །དེ་ཡི་ལན་དུ་འདི་སྐད་སྨྲ། །རིག་འཛིན་བརྡ་ཡི་བརྒྱུད་པ་ལ། །དབང་དང་དམ་ཚིག་མེད་གྱུར་ན། །བརྡ་ལ་བརྒྱུད་པ་སུ་ཞིག་བགྲང་། །དབང་ལ་ཀུན་རྫོབ་དོན་དམ་གཉིས། །དམ་ཚིག་ཉིད་ཀྱང་དེ་བཞིན་ནོ། །སྣ་ཚོགས་རྫས་དང་མཚན་མ་ལ། །བརྟེན་ནས་ཆོ་གས་བསྒྲུབ་པ་དེ། །ཀུན་རྫོབ་མཚན་མའི་དབང་ཡིན་ཏེ། །དོན་ལ་རྡོ་རྗེ་སློབ་དཔོན་ལ། །བརྒྱུད་པའི་བྱིན་རླབས་མི་ལྡན་ན། །བསྐུར་ཀྱང་མི་ཐོབ་དམྱལ་བའི་རྒྱུ། །དེ་ཕྱིར་བརྒྱུད་པའི་བྱིན་རླབས་ནི། །རྫས་ལ་མ་ཡིན་བསྐུར་བ་པོའི། །ཡེ་ཤེས་ཉིད་ལས་གཞན་དུ་མིན། །དེ་ཡིས་རྟེན་ཅིང་འབྲེལ་འབྱུང་ལས། །འགྲོ་བའི་ཁམས་ལ་རྡོ་རྗེ་བཞིས། །ཁྱབ་ཀྱང་མ་རིག་རྐྱེན་གྱིས་བསྒྲིབས། །དེ་ཉིད་བརྡ་ཐབས་རྟེན་འབྲེལ་གྱི། །ཆོ་གས་མངོན་དུ་སད་པ་ལ། །བརྟེན་ནས་གཞི་གནས་ཡེ་ཤེས་ཀྱི། །ཡོན་ཏན་མངོན་དུ་གྱུར་པ་ན། །སངས་རྒྱས་ཞེས་བྱའི་ཐ་སྙད་བཏགས། །དེ་ཕྱིར་དཀྱིལ་འཁོར་བདག་པོ་ཡིས། །དགོངས་སྤྱོད་བརྟུལ་ཞུགས་ནུས་པ་དང་། །སློབ་མའི་དབང་པོའི་བྱེ་བྲག་གིས། །དགོངས་པ་བརྡ་དང་ཆོ་ག་གསུམ། །གང་ལ་བརྟེན་ནས་དབང་བསྐུར་ཀྱང་། །ལམ་ལྔ་ས་བཅུའི་ཡོན་ཏན་ཀུན། །སྐྱེ་བའི་རྟེན་དུ་མཚུངས་པའི་ཕྱིར། །ཕྱག་རྒྱའི་བརྡ་དང་རྣམ་འགྱུར་བརྡ། །ལ་སོགས་བརྡ་ཐབས་དུ་མ་ཡིས། །བསྐུར་བས་དབང་དོན་ཡེ་ཤེས་ནི། །སློབ་མའི་རྒྱུད་ལ་བཞག་པ་ལ། །དབང་བསྐུར་ཐོབ་པ་ཞེས་སུ་གྲགས། །དེ་ལྟར་དབང་བསྐུར་ཡོད་ཕྱིན་ཆད། །དམ་ཚིག་དེ་ཡི་རྗེས་འབྲང་ཡིན། །ཡོད་མེད་རྩོད་པ་བྱ་མ་དགོས། །འོན་ཏེ་ཨ་བྷི་ཥིཉྩའི་སྒྲས། །བརྟགས་ཚད་མཚན་མའི་རྫས་ཉིད་ལ། །མ་བརྟེན་མི་འབྱུང་མི་སྲིད་ན། །དོན་དབང་སེམས་ལ་བཞུགས་པ་ཡིས། །བསྐུར་ཐོབ་འདུན་པས་བསྒྱུར་བའི་གནད། །ཕྱོགས་ཙམ་མ་གོ་མ་རིག་པར། །བེམ་པོའི་རྫས་ལ་བྱིན་རླབས་ཀྱིས། །བརྒྱུད་པ་ཡོད་དུ་རློམ་པ་འཕྲུལ། །རིག་པ་བདུན་པའི་ཏནྟྲ་ལས། །བརྡ་དང་བརྡ་མཚོན་གོ་བ་ནི། །དབང་གི་ནང་ནས་དབང་བཀའོ། །ཞེས་དང་ཟབ་མོའི་གཏེར་ལུང་ལས། །གང་ལ་བྱིན་རླབས་ཞུགས་པ་དེ། །དབང་གི་དམ་པ་མཆོག་ཏུ་དབང་། །ཞེས་སོ་འོན་ཀྱང་དགོངས་བརྡ་ཡི། །དབང་འདི་ཀུན་གྱིས་སྤྱོད་ཡུལ་མིན། །སྤྲུལ་པའི་གང་ཟག་མཁྱེན་གཉིས་ཀྱི། །དགོངས་པ་ཚད་དུ་ཕྱིན་པ་དེའི། །འོད་གསལ་དག་པའི་སྣང་ཆ་སོགས། །དམིགས་བསལ་འགའ་ལ་དེ་སྐད་གྲགས། །དེ་ཡང་ཀུན་ལ་མ་ཡིན་ཏེ། །ཅི་ཕྱིར་རྒྱུད་ལས་འདི་སྐད་དུ། །གསང་སྔགས་རང་ཉིད་ལེན་པ་ནི། །ལུས་ཅན་དམྱལ་བ་འབའ་ཞིག་རྒྱུ། །གསུངས་ཀྱང་དེ་ལ་སུ་ཡིད་གཏོད། །མི་དང་དུད་འགྲོ་ག་གེ་མོའི། །རུས་དང་སྐྱེ་བའི་སྟོང་སྒྲ་ལ། །སངས་རྒྱས་དངོས་དང་པདྨའི་ཚབ། །ལ་སོགས་བཟང་པོར་ཁུངས་ཕྱུང་ནས། །བརྒྱུད་པ་ལྡན་པའི་ཆོས་སྤོང་ཞིང་། །བརྡ་དབང་སོགས་ཀྱི་མིང་སྙན་པོས། །བརྒྱུད་འཕྲོའི་རྒྱུན་ཀྱང་གཅོད་པར་བྱེད། །ཚུལ་འདི་རང་བྱུང་པདྨ་དང་། །དེ་ཡི་གདུང་འཛིན་སྔོན་རབས་ཀྱི། །གཏེར་སྟོན་རྣམ་ལའང་མ་གྲགས་ཏེ། །མཆོག་སྤྲུལ་མངའ་རིས་པཎ་ཆེན་གྱིས། །དྲི་ལན་གསང་བའི་གཏེར་མཛོད་དུ། །འགྲོ་མགོན་མངའ་བདག་ཉང་རལ་དང་། །གུ་རུ་ཆོས་ཀྱི་དབང་ཕྱུག་དང་། །རིག་འཛིན་རྒོད་ཀྱི་ལྡེམ་འཕྲུ་ཅན། །དེ་བཞིན་རྡོ་རྗེ་གླིང་པ་དང་། །ཨུ་རྒྱན་གླིང་པ་ལ་སོགས་པས། །གཏེར་སྟོན་ཚད་ལྡན་མང་པོ་ཡིས། །དང་པོ་སྒྱུ་འཕྲུལ་ཡང་ཕུར་དང་། །མ་གཤིན་བདུད་རྩི་པདྨ་དང་། །འདུས་པ་མདོ་དང་སེམས་སྡེ་དང་། །མན་ངག་སྡེ་ཡི་སྐོར་ཞུས་ནས། །དེ་ནས་རང་གི་གཏེར་ཆོས་ཀྱི། །བྱིན་གྱིས་བརླབས་པའི་སྙན་བརྒྱུད་སྤེལ། །གཅིག་ནས་གཅིག་བརྒྱུད་དྲོད་མ་ཡལ། །སངས་རྒྱས་གདུང་འཛིན་དེ་དག་ཡིན། །ཞེས་དང་སླར་ཡང་འདི་སྐད་དུ། །དུས་གསུམ་མཁྱེན་པའི་ཨོ་རྒྱན་གྱིས། །མ་འོངས་དུས་མཐའི་སེམས་ཅན་ལ། །ཕན་པར་དགོངས་ནས་ཟབ་མོའི་གཏེར། །རྣམ་གྲངས་བྱེ་བ་ས་ཡ་སྦས། །དེ་ཉིད་འདོན་པའི་དུས་བབ་ཚེ། །ཆོས་ལ་དབང་བའི་གཏེར་སྟོན་དང་། །ལས་ལ་དབང་བའི་གཏེར་སྟོན་སོགས། །འབྱུང་བར་གསུངས་ཤིང་དེ་དུས་སུ། །གཏེར་དུ་མ་སྦས་མ་ཉམས་པའི། །བཀའ་བརྒྱུད་ཆུ་བོའི་གཞུང་བཟུང་ནས། །གཏེར་བརྒྱུད་བྱིན་རླབས་དམ་རྫས་དང་། །དཔེ་བརྒྱུད་བསྟན་པའི་རྒྱབ་བརྟེན་དུ། །འབྱུང་བ་དང་ཕྲད་མ་ནོར་བ། །ཡིན་གྱིས་དེ་ལས་ལོག་པ་ཡིས། །བཀའ་བརྒྱུད་ཆུ་བོའི་གཞུང་བཟུང་ནས། །གཏེར་བརྒྱུད་བྱིན་རླབས་དམ་རྫས་དང་། །དཔེ་བརྒྱུད་བསྟན་པའི་རྒྱབ་བརྟེན་དུ། །འབྱུང་བ་དང་ཕྲད་མ་ནོར་བ། །ཡིན་གྱིས་དེ་ལས་ལོག་པ་ཡིས། །བཀའ་བརྒྱུད་ཆུ་བོའི་རྒྱུན་ཆོད་ནས། །དཔེ་བརྒྱུད་གཏེར་གྱི་ཤོག་དྲིལ་ཙམ། །འདོན་པར་དབང་བའི་ལས་པ་ཡིས། །དབང་བསྐུར་རྒྱུད་བཤད་མན་ངག་བསྟན། །ཨུ་རྒྱན་དངོས་དང་ཞལ་མཇལ་ཞེས། །མི་ཆོས་བླ་མའི་རྫུན་ལ་བརྟེན། །གྲུབ་པའི་རྟགས་མེད་ཁ་ལྟས་བསླུས། །ཞེ་སྡང་མེ་འབར་དུག་མཚོ་ཁོལ། །འདོད་ཆགས་ཆུ་ཁོལ་སྲུང་སྡོམ་ཤོར། །འདོད་པའི་དབང་བྱས་དམ་ཆོས་འཚོང་། །གསང་བ་སྒྲོག་ཅིང་དམ་བཅའ་སྟོན། །ལ་སོགས་རྒྱ་ཆེར་གསུངས་མོད་ཀྱིས། །ཨ་ཧོ་འདི་འདྲའི་རིག་འཛིན་ནི། །མིང་ཙམ་མ་ཡིན་ངེས་པའི་དོན། །སྔ་འགྱུར་བསྟན་པའི་སྲོག་ཤིང་དུ། །རྩོད་པ་བྲལ་ཞིང་དོན་གྱིས་གྲུབ། །དེ་ཕྱིར་བསྟན་པ་འཛིན་པ་རྣམས། །རང་གཙིགས་ཞེ་འདོད་མ་ཆེ་བར། །ཚུལ་འདི་བསམ་པའང་ཤིན་ཏུ་རིགས། །དེ་ནས་དྲི་བ་བཅུ་གཉིས་པར། །གང་ཟག་སྙན་དུ་བརྒྱུད་པ་ལ། །བརྡ་དོན་རྟགས་གསུམ་ཡོད་དམ་མེད། །མེད་ན་དབང་བསྐུར་བྱིན་བརླབ་མེད། །ཡོད་ན་བརྡ་བརྒྱུད་དང་ཡང་མཚུངས། །ཞེས་དྲི་ལན་ནི་འདི་སྐད་དོ། །སྤྱིར་གྱིས་བརྡ་དོན་རྟགས་གསུམ་ལ། །བསྐྱེད་རིམ་བརྡ་དོན་རྟགས་གསུམ་དང་། །རྫོགས་རིམ་བརྡ་དོན་རྟགས་གསུམ་སོགས། །འཇུག་པའི་སྒོ་ནི་མཐའ་ཡས་ཏེ། །སྐབས་འདིར་དབང་བསྐུར་ལ་མཚོན་ན། །ཁམས་དྲུག་ལྡན་པའི་མི་ལུས་ཀྱི། །གནས་པ་རྩ་དང་གཡོ་བ་རླུང་། །བཀོད་པ་བྱང་ཆུབ་སེམས་མཆོག་སོགས། །གདོད་ནས་དབང་གི་རྟེན་གཞི་རུ། །གནས་པ་དེ་ཉིད་རྟགས་ཡིན་ཏེ། །ཚུལ་དེ་མངོན་དུ་བྱ་བའི་ཕྱིར། །མཚན་མ་རྫས་ཀྱི་དཀྱིལ་འཁོར་ལ། །བརྟེན་པ་བརྡ་ཡིས་དབང་དུ་འདོད། །དེ་ཡི་ངོ་བོ་སྣང་སྟོང་དང་། །གསལ་སྟོང་བདེ་སྟོང་གཉིས་མེད་དུ། །རྟོགས་པ་རིག་སྟོང་དོན་གྱི་དབང་། །དེ་གསུམ་རྣམ་པ་ཐ་དད་ཀྱང་། །དོན་ལ་གཉིས་སུ་མ་ཡིན་ཏེ། །སེམས་འདི་གཅིག་པུས་བཏགས་པར་ཟད། །གལ་ཏེ་གང་ཟག་སྙན་བརྒྱུད་ལ། །བརྡ་དོན་རྟགས་གསུམ་ཡོད་གྱུར་ན། །བརྡ་ཡིས་བརྒྱུད་དང་མཚུངས་སོ་ཞེས། །དམ་བཅའ་འཇོག་པ་ཧ་ཅང་ཐལ། །དེ་ལྟ་མོད་ཀྱི་འཕགས་པས་ཀྱང་། །སོ་སོ་ཡང་དག་རིག་པ་བཞིའི། །ཡོན་ཏན་མངོན་དུ་མ་གྱུར་བར། །ཆོས་ཀུན་དེ་ཉིད་ཤེས་མིན་པས། །རྩོད་པ་བྲལ་བའི་རིག་འཛིན་ལ། །སྐུར་པ་གདབ་པར་འདིར་མི་བྱེད། །ཅི་ཕྱིར་གང་ཡང་མི་ཤེས་པའི། །རྨོངས་པ་ནོར་གྱིས་ཡ་ལད་ཅན། །སངས་རྒྱས་དངོས་སུ་ཁུངས་འབྱིན་པ། །ཇི་ཙམ་འདུག་པ་གཟིགས་པའི་ཕྱིར། །སངས་རྒྱས་བསྟན་པའི་སྙིང་པོ་ནི། །ལུང་དང་རྟོགས་པ་ཁོ་ན་ཡིན། །སྡེ་དང་གྱད་ལ་མི་ཟེར་མེད། །དེ་ཚུལ་ཐོས་བསམ་སྒོམ་པ་ལ། །གལ་ཆུང་འདི་འདྲ་བྱེད་པའི་དུས། །རིག་འཛིན་རཏྣ་གླིང་པ་ཡིས། །དྲི་བ་འདི་འདྲ་མཛད་པ་ཡང་། །ངོ་མཚར་ཅན་དུ་བདག་གིར་བྱས།། །།དེ་ནས་དྲི་བ་བཅུ་གསུམ་པར། །དོན་ལ་སངས་རྒྱས་ཡོད་དམ་མེད། །ཡོད་ན་སྟོང་པ་སྐྱེ་མེད་དང་། །སྤྲོས་མེད་སྨྲ་བསམ་བརྗོད་མེད་པས། །མེད་པར་མདོ་རྒྱུད་ཀུན་ལས་གསུངས། །མེད་ན་གཟུགས་སྐུ་རྣམ་གཉིས་དང་། །འགྲོ་དོན་མཛད་ཕྲིན་འབྱུང་མི་འགྱུར། །ཞེས་དྲི་ལན་དུ་འདི་སྐད་དོ། །སྔ་རབས་ཁ་ཅིག་འདི་སྐད་ཟེར། །སྐུ་དང་ཡེ་ཤེས་དངོས་སུ་བཞུགས། །དེ་མེད་འབྲས་བུའི་ཆོས་སྐུ་དང་། །ཡེ་ཤེས་མི་ཐོབ་ཉམས་པར་ཐལ། །ལ་སོགས་གཏན་ཚིགས་འགོད་ན་ཡང་། །དངོས་པོར་སྨྲ་བའི་ཕྱོགས་ཅན་ཏེ། །ཅི་ཕྱིར་ཆོས་སྐུ་མཚན་མ་ཅན། །ཁོ་ནར་འགྱུར་ཕྱིར་རིགས་མ་ཡིན། །ཟབ་མོའི་རྒྱུད་ཀྱི་དགོངས་པ་ནི། །སྐུ་གསུམ་འོད་གསལ་སྟོང་པ་ཉིད། །རྟག་པ་མ་ཡིན་དངོས་པོར་མེད། །ཆད་པ་མ་ཡིན་འོད་གསལ་སྐུ། །ཐ་དད་མ་ཡིན་ཕྱི་ནང་མེད། །ཅེས་གསུངས་དེ་བཞིན་མདོ་ལས་ཀྱང་། །གང་དག་ང་ལ་གཟུགས་སུ་མཐོང་། །གང་དག་ང་ལ་སྒྲར་ཤེས་པ། །ལོག་པའི་ལམ་ལ་ཞུགས་པ་དེ། །སྐྱེ་བོ་དེས་ནི་ང་མི་མཐོང་། །འདྲེན་པ་རྣམས་ནི་ཆོས་ཀྱི་སྐུ། །ཆོས་ཉིད་ཤེས་བྱ་མ་ཡིན་ཏེ། །དེ་ནི་ཤེས་པར་ནུས་མ་ཡིན། །ཞེས་སོ་དེ་ཕྱིར་རྫོགས་པ་ཆེ། །རང་གིས་ལུགས་སུ་འདི་སྐད་སྨྲ། །ཀ་དག་ཆོས་སྐུའི་རང་ངོ་ལ། །ཡོད་མེད་མཐའ་ལས་འདས་པ་ཡིན། །རང་བཞིན་ཤེལ་གོང་དྲི་མེད་འདྲ། །དེ་ཡི་དབྱིངས་ལ་ཡེ་ཤེས་དང་། །གཟུགས་སྐུའི་འཆར་གཞི་གྲུབ་པའི་ཚུལ། །ཤེལ་གྱི་ནང་འོད་མངོན་སུམ་པར། །མཐོང་བའི་ཆོས་སུ་མེད་ན་ཡང་། །རྐྱེན་དང་ཕྲད་ཚེ་འཆར་གཞི་རུ། །གནས་པ་བཞིན་དུ་ཚུལ་འདི་ཡང་། །ཆོས་ཀྱི་སྐུ་ལས་མ་གཡོས་བཞིན། །ཡེ་ཤེས་རྩལ་ལས་གཟུགས་སྐུ་དང་། །ཕྲིན་ལས་གདུལ་བྱའི་ཁམས་ལ་སྣང་། །དེ་སྐད་དུ་ནི་རང་ཤར་ལས། །ཨེ་མ་ཧོ་སྣང་བ་ཆེན་པོ་གསལ་བ་ཆེ། །དག་པའི་ནམ་མཁའ་མཐའ་དང་བྲལ། །སྤྲོས་བྲལ་ཆོས་ཉིད་འགྱུར་བ་མེད། །མཐའ་དང་དབུས་མེད་ཕྱོགས་ཆ་བྲལ། །རང་སྣང་ཆོས་དབྱིངས་རྣམ་དག་ཞིང་། །དང་པོ་སངས་རྒྱས་རྒྱུ་མེད་པ། །ཐ་མ་རྐྱེན་གྱིས་བསྐྱེད་དུ་མེད། །སྟོང་པ་ཡེ་ཤེས་སྙིང་པོ་ཅན། །མཐའ་ལ་མི་གནས་རྡོ་རྗེའི་སྐུ། །སྤྲོས་པ་བྲལ་བའི་ཆོས་ཉིད་ལ། །ངོ་བོ་རང་བཞིན་ཐུགས་རྗེའི་བདག །ཡེ་ཤེས་སྐུ་གསུམ་འོད་དུ་གསལ། །མཁའ་ལ་ཉི་ཤར་མུན་པ་སེལ། །ཡེ་ཤེས་ལྔ་ཡིས་མཚན་ཉིད་གསལ། །སངས་རྒྱས་སྤྲུལ་པ་རབ་འབྱམས་འབྱུང་། །ཞེས་པས་གསལ་བར་བསྟན་ཕྱིར་རོ།། །།དེ་ནས་དྲི་བ་བཅུ་བཞི་པར། །ཡང་དག་རྫོགས་པའི་སངས་རྒྱས་ལ། །འགྲོ་ལ་སྙིང་རྗེ་ཡོད་དམ་མེད། །ཡོད་ན་གཉིས་འཛིན་སེམས་ཡོད་ཅིང་། །མེད་ན་ཐུགས་རྗེ་རྒྱུན་ཆད་འགྱུར། །ཞེས་དྲི་ལན་དུ་འདི་སྐད་དོ། །སྙིང་རྗེའི་ངོ་བོ་བྱང་ཆུབ་སེམས། །བྱང་ཆུབ་སེམས་ལ་དོན་དམ་དང་། །ཀུན་རྫོབ་གཉིས་སུ་གསུངས་པ་ཡིན། །ཡང་དག་རྫོགས་པའི་སངས་རྒྱས་དེའི། །མཉམ་གཞག་ཆོས་སྐུའི་ངོ་བོ་ལ། །རྣམ་རྟོག་ཅེས་བྱའི་སྒྲ་མི་འཇུག །རྟོག་པ་བྲལ་བའི་མཉམ་གཞག་དེ། །ངེས་པ་དོན་གྱི་བྱང་ཆུབ་སེམས། །སྒྲིབ་པ་སྤངས་པའི་སེམས་བསྐྱེད་ཡིན། །དེ་ལ་སྙིང་རྗེ་སྒོམ་ཡུལ་དང་། །བསྒོམ་བྱ་གདོད་ནས་མ་གྲུབ་ན། །སངས་རྒྱས་སེམས་ཅན་སུ་ཡིས་ཕྱེ། །རྗེས་ཐོབ་སྒྱུ་མ་ལྟ་བུ་ལ། །སྒྱུ་མ་ལྟ་བུའི་སྙིང་རྗེ་ཡིས། །སྒྱུ་མ་ལྟ་བུའི་སེམས་ཅན་འདུལ། །དེ་ལ་གཉིས་འཛིན་རགས་པ་མེད། །གནད་དོན་འདི་འདྲ་མ་གོ་བར། །དེང་སང་བྱང་ཆུབ་སེམས་སྒོམ་ཞེས། །དངོས་སྣང་མེད་པའི་ཆོས་ཉིད་ལ། །བདག་པས་གཞན་གཅེས་མི་བསམ་པའི། །བདག་འཛིན་ཅན་གྱི་རྣམ་རྟོག་སྒོམ། །དེས་ནི་རང་རྒྱུད་མ་དག་པས། །ཐུགས་རྗེ་ཡུལ་ལ་ཅི་ཕྱིར་འཇུག །དེ་ཕྱིར་རྩ་རྒྱུད་ཐལ་འགྱུར་ལས། །རང་རིག་གསལ་བའི་བདག་ཉིད་ལས། །རང་བཞིན་ཤུགས་ཀྱི་ཐུགས་རྗེ་ཉིད། །མ་འགགས་འགག་པ་མེད་པའོ། །ཞེས་པས་ཐུགས་རྗེ་རྒྱུན་ཆད་པའི། །གནས་སྐབས་སྲིད་པ་མ་ཡིན་ནོ།། །།དེ་ནས་དྲི་བ་བཅོ་ལྔ་པར། །དོན་ལ་ལྟ་བ་ཡོད་དམ་མེད། །ཡོད་ན་མཚན་མ་བཟུང་བར་ངེས། །མེད་ན་ལམ་མེད་འབྲས་བུ་མེད། །ཅེས་དྲི་ལན་དུ་འདི་སྐད་དོ། །རྗོད་བྱེད་མིང་གི་རྣམ་གྲངས་ལ། །མཐའ་བཞི་མཐའ་བརྒྱད་སྤྲོས་བྲལ་དང་། །འོད་གསལ་རྣམ་ཀུན་མཆོག་ལྡན་དང་། །རང་སྟོང་གཞན་སྟོང་ཟུང་འཇུག་དང་། །བློ་འདས་གཉུག་མ་ལ་སོགས་པ། །ལྟ་བའི་རྣམ་གྲངས་མཐའ་ཡས་ཀྱང་། །རང་བཞིན་རྫོགས་པ་ཆེན་པོ་ནས། །རིམ་བརྒྱད་བློ་ཡིས་ལྟ་བར་བཞག །དེ་ཡང་ཕྱི་ནང་གསང་གསུམ་གྱིས། །རྣམ་གྲངས་ཐལ་འགྱུར་རྒྱུད་ཆེན་ལས། །ཕྱི་ནི་ཆོས་ཅན་ལྟ་བ་ལ། །རིམ་བརྒྱད་བློ་ཡིས་འདོད་པ་སྟེ། །ཡིད་དཔྱོད་འཛིན་པ་ཉིད་དུ་འདོད། །ནང་གི་ཆོས་ཉིད་ལ་བལྟས་པས། །ངོ་བོ་རང་བཞིན་སྒྱུ་མར་མཐོང་། །གསང་བ་རང་རིག་ལ་བལྟས་པས། །ལུ་གུ་རྒྱུད་དུ་འབྲེལ་ཆགས་མཐོང་། །ཁོ་ན་ཉིད་ནི་དབྱིངས་རིག་གོ། །ཞེས་སོགས་རབ་ཏུ་དབྱེ་བ་ལྟར། །ཆོས་ཅན་ལྟ་དང་ཆོས་ཉིད་ལྟ། །དབྱིངས་རིག་གདོད་ནས་དག་པ་སོགས། །ས་མཚམས་མང་དུ་ཕྱེ་མོད་ཀྱང་། །རང་ངོ་ལྟ་བའི་ངོ་བོ་ལ། །མཚན་མ་ཅན་དུ་མ་གྲུབ་པས། །བལྟས་པས་མཐོང་བ་སུ་ཡང་མེད། །མེད་ཅེས་སྨྲ་བ་དེ་བས་བླུན། །དེ་ཕྱིར་ཡོད་དང་མེད་པ་ཡིས། །ཕྱོགས་འཛིན་ཞིག་པའི་རིག་པ་ལ། །བླ་དྭགས་ཙམ་དུ་ལྟ་བར་བཏགས། །དོན་ལ་སྣང་སྲིད་ཡེ་གྲོལ་ཏེ། །རྫོགས་པ་ཆེན་པོ་ཐལ་འགྱུར་ལས། །ལྟ་བའི་རང་བཞིན་སྣོད་བཅུད་ལ། །མ་ཁྱབ་མེད་པས་གང་ཡང་གྲོལ། །གྲོལ་བའི་ཆོས་ལ་རྣམ་སྨིན་བྲལ། །ཅིར་སྣང་རང་གི་ཆོས་ཉིད་ལས། །བཅོས་མའི་ཆོས་ཉིད་ལོགས་ན་མེད། །ཅེས་སོ་འོན་ཀྱང་ལྟ་བ་ལ། །ཡོད་དང་མེད་པའི་མཐའ་བཀག་ཅིང་། །འཐད་པ་བསྒྲུབ་པའི་གཞུང་ལུགས་དང་། །ཁྱད་པར་ཀྲྀ་ཀྲིའི་རྨི་ལྟས་ཀྱི། །ལུང་བསྟན་དུས་ལ་བབས་པའི་མཐུས། །དེང་སང་གངས་རིའི་ཁྲོད་འདི་རུ། །བདག་བསྟོད་གཞན་སྨོད་གྲུབ་པའི་མཐའ། །མང་ཞིང་ཤིན་ཏུ་རྒྱ་ཆེ་ཡང་། །ཕལ་གྱིས་རྟོག་པས་བརྟགས་པའི་མཐའ། །ཡོད་མེད་དབུ་མར་བཞག་པ་ཡིས། །དེར་འཛིན་གཉེན་པོས་བསླད་པ་ལ། །ལྟ་བའི་མཆོག་ཏུ་རློམ་བྱེད་ཅིང་། །ཟབ་མོའི་རྒྱུད་སྡེར་གཤེ་ན་ཡང་། །འགོང་པོས་བསླད་པའི་ཆད་ལྟ་ཡིན། །རྒྱ་གར་འཕགས་པའི་ཡུལ་མཆོག་ཏུ། །ཤིང་རྟ་ཆེན་པོ་ཀླུ་སྒྲུབ་དང་། །རྡོ་རྗེ་འཆང་དངོས་ས་ཧ་ར། །རིག་འཛིན་བརྒྱད་དང་པདྨ་འབྱུང་། །ལ་སོགས་པཎ་གྲུབ་ཇི་སྙེད་དང་། །བོད་དུ་མར་མི་སྒམ་སོགས་དང་། །ཏིང་འཛིན་བཟང་པོ་ལྕེ་བཙུན་ཆེ། །ཆོས་སྐུ་ཀློང་ཆེན་རབ་འབྱམས་སོགས། །དེ་དག་བརྒྱུད་འཛིན་དབང་ཁྲིད་ཀྱི། །བཤད་སྲོལ་ཐོས་ཙམ་མ་ཡིན་པར། །དབེན་པར་མོས་གུས་ལམ་ལོངས་གྱིས། །སྒྲུབ་པའི་ཕོ་ཚུགས་བཟང་པོ་ཡིས། །དོན་བརྒྱུད་རྟོགས་པའི་ཡེ་ཤེས་ཀྱི། །བྱིན་རླབས་སྙིང་ལ་ཞུགས་ངེས་པའི། །སྦས་པའི་རྣལ་འབྱོར་འགའ་ཙམ་གྱི། །རྒྱུད་ལ་ཞུགས་ཀྱིས་གཞན་དུ་མིན། །དེ་ཕྱིར་བདག་ཅག་སྒོམ་ཆེན་པ། །སྐྱབས་གནས་རང་གི་སེམས་ལ་འཚོལ། །འདུ་འབྲལ་མེད་པའི་སྐྱབས་ཡུལ་ཡིན། །ལྟ་བ་ཡོད་མེད་མཐོ་དམན་སོགས། །རྩོད་ལ་གཞུང་ལུགས་མཁྱེན་རྣམས་མཁས། །དེ་ཕྱིར་ཡོད་མེད་དགག་བསྒྲུབ་ཀྱིས། །ཚིག་འདི་ཤེས་པར་གྱུར་ན་ཡང་། །དོན་ལ་བརྗོད་དུ་མི་འདུག་པས། །མ་བཅོས་རྫོགས་པ་ཆེན་པོའི་ངང་། །མཉམ་པར་འཇོག་པ་ཨེ་མ་ཧོ།། །།དེ་ནས་དྲི་བ་བཅུ་དྲུག་པར། །དོན་ལ་སྒོམ་པ་ཡོད་དམ་མེད། །ཡོད་ན་གང་སྒོམ་ཅི་ཞིག་སྒོམ། །རྟོག་མེད་རྗེན་པར་སྒོམ་ཞེ་ན། །དེ་ཉིད་སྒོམ་འདོད་རྟོག་པ་རང་། །མ་བཅོས་རང་ངོ་ལྟ་ཞེ་ན། །བལྟས་པས་ཅི་མཐོང་སེམས་འཛིན་ཉིད། །ཅེས་བརྒལ་ལན་དུ་འདི་བརྗོད་དོ། །སྤྱིར་གྱིས་ཐུན་མོང་ཐེག་པ་ལ། །ལྷ་དང་མི་ཡི་སེམས་འཛིན་དང་། །བྱང་ཆུབ་སེམས་དཔའི་བསམ་གཏན་དང་། །ཞི་གནས་ལ་ནི་འཇོག་ཚུལ་དགུ། །ལྷག་མཐོང་གི་ནི་དཔྱད་ཚུལ་གསུམ། །ལ་སོགས་རྣམ་གྲངས་ཐ་དད་དང་། །དེ་བཞིན་གསང་སྔགས་བསྐྱེད་རྫོགས་ལ། །གཡོ་ཐོབ་གོམས་བརྟན་སྒོམ་རིམ་སོགས། །གདུལ་བར་བྱ་བའི་བློ་རིགས་ལ། །དགོངས་ཕྱིར་སྒོམ་པ་ཡོད་མེད་ཀྱི། །མཐའ་བཀག་མཐུན་འཇུག་གྲུབ་པའི་མཐའ། །གཅིག་ཏུ་སྨྲ་བར་རིགས་མིན་ཅིང་། །ཁྱད་པར་རྫོགས་པ་ཆེན་པོ་ལ། །མ་བསྒོམས་གྲོལ་བའི་ཀ་དག་དང་། །བསྒོམས་ནས་གྲོལ་བའི་ཐོད་རྒལ་ཞེས། །རྣམ་གྲངས་གཉིས་སུ་བསྟན་མོད་ཀྱི། །གཉིས་ཀའི་དགོངས་པ་ཁྱད་དུ་འཕགས། །འབྱམས་ཡིག་འདི་ཡི་ལན་ཙམ་དུ། །གསང་བ་སྒྲོགས་པ་འདིར་མི་བྱེད། །དོན་ལ་བསྒོམ་བྱ་ཡོད་དམ་མེད། །གང་ཟག་རང་གི་བློ་ནུས་གཙོ། །ཅི་ཕྱིར་དང་པོའི་ལམ་ཞུགས་ཅན། །མོས་པས་དཔྱོད་པའི་གང་ཟག་ལ། །དམིགས་བཅས་སྒོམ་རྒྱུ་མ་མཆིས་ཀྱང་། །མངོན་སུམ་རིག་པ་སྐྱོང་སྒོམ་མཐུས། །རྗེས་སུ་དཔག་པའི་དྲན་འཛིན་གྱི། །སྒོམ་པའི་ཐ་སྙད་ཙམ་མེད་ན། །ཐ་མལ་ཉིད་དང་ཅི་ཡི་ཁྱད། །སྒོམ་པའི་མིང་དེ་སུ་ཡིས་གདགས། །གནས་ལུགས་ཡིད་དཔྱོད་ཙམ་མིན་པར། །ཇི་བཞིན་མངོན་དུ་གྱུར་པ་ལས། །མ་ཡེངས་དྲན་པ་ཟད་པ་ཡིས། །དགོངས་པ་མཁའ་ལྟར་དག་པ་ལ། །སྒོམ་དང་མི་བསྒོམ་གཉིས་ཀ་ཡིས། །འདུ་ཤེས་ཡོད་པ་མི་སྲིད་པས། །ཀུན་བཟང་དགོངས་པའི་རྒྱལ་སྲིད་ལ། །མངའ་དབང་འབྱོར་པའི་ཐ་སྙད་བཏགས། །དེ་སྐད་དུ་ནི་ཀུན་གསལ་ལས། །སྒོམ་དུ་ཡོད་ན་འོག་མར་འགྱུར། །མེད་ན་རྟོག་མེད་སངས་རྒྱས་འགྱུར། །ཡང་ན་སོ་སོ་སྐྱེ་བོར་འགྱུར། །རང་བྱུང་ཡེ་ཤེས་རང་གནས་པའི། །ངོ་འཕྲོད་རང་ངོ་ཤེས་ཙམ་ན། །རང་གིས་རང་ཉིད་གསལ་བ་ལ། །བློ་ཡིས་བསྡུ་ཞིང་སྒོམ་རྒྱུ་མེད། །དབང་པོ་འབྲིང་ལ་དྲན་པ་ཙམ། །ཆོས་སྐུ་གསལ་ན་དྲན་པ་སྟོང་། །མ་བསྒོམས་རྒྱུན་དུ་འབྲལ་བ་མེད། །སྒོམ་དང་མ་བསྒོམས་དོན་ལ་མེད། །སྒོམ་པའི་ཐེ་ཚོམ་དེ་ཡིས་ཆོད། །ཅེས་གསུངས་གནད་ཀྱིས་མན་ངག་འདི། །ཀུན་གྱིས་མྱོང་ཞིང་རྟོགས་པ་དང་། །ལྟ་ཅི་གོ་བའང་ཆེར་མེད་པས། །ཡི་གེ་འདི་ལ་གཙིགས་སུ་གྱིས། །དེ་ནས་དྲི་བ་བཅུ་བདུན་པར། །བདེ་གཤེགས་སྙིང་པོ་འགྲོ་ཀུན་ལ། །ཁྱབ་ན་སྐུ་དང་ཡེ་ཤེས་ཚོགས། །སེམས་ཅན་དུས་ན་རྫོགས་པར་རིགས། །ཡོན་ཏན་མཛད་ཕྲིན་དེ་བཞིན་འོས། །རྟོགས་དང་མ་རྟོགས་ཡིན་ཞེས་ན། །རྟོགས་པས་སྙིང་པོ་ཆེར་མ་སོང་། །དུས་གསུམ་ཀུན་ཏུ་འཕེལ་འགྲིབ་མེད། །ཅེས་དྲི་ལན་དུ་འདི་སྐད་བསྒྲགས། །སེམས་ཅན་ཐམས་ཅད་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །ཞེས་གསུངས་དེ་ཕྱིར་སེམས་ཅན་ལ། །སྐུ་དང་ཡེ་ཤེས་རྫོགས་མི་རིགས། །ཅི་ཕྱིར་རྫོགས་སྨིན་སྦྱངས་གསུམ་གྱིས། །འབྲས་བུ་མངོན་དུ་མ་བྱས་ཕྱིར། །བུམ་པའི་ནང་གི་མར་མེ་ལྟར། །ནང་གསལ་འཆར་བའི་གཞིར་ཡོད་ཀྱང་། །ཕྱིར་གསལ་མངོན་དུ་གྱུར་པ་མེད། །དེ་ཡང་མ་རིག་ལས་ཉོན་དང་། །ཤེས་བྱའི་སྒྲིབ་པས་ཕྱི་ཤུན་གྱིས། །ཚུལ་དུ་གཏུམས་ཚུལ་རྒྱུད་བླ་མར། །དཔེ་དགུས་ཤིན་ཏུ་གསལ་བར་བསྟན། །དཔེར་ན་བུད་མེད་ངན་པ་ཡི། །མངལ་ན་གནས་པའི་མི་བདག་དེ། །ལུས་ཀྱི་ནུས་པ་རྫོགས་པ་དང་། །ལས་དབང་དུས་ལ་བབ་པའི་ཚེ། །ཀུན་གྱི་རྗེ་བོར་གྱུར་ན་ཡང་། །དེ་ཚེ་རྒྱལ་པོར་སུ་ཡིས་བརྗོད། །དེ་ཕྱིར་རིག་པའི་གཤིས་ལུགས་ལ། །འཁོར་འདས་གཉིས་ཀའི་སྒོ་ཡོད་ཕྱིར། །མ་རིག་ལས་དང་ཉོན་མོངས་དུས། །འགྲོ་དྲུག་སོ་སོའི་ཁམས་སུ་སྣང་། །རིག་ཅིང་ཚོགས་གཉིས་རྫོགས་པའི་ཚེ། །སངས་རྒྱས་ཉིད་ལས་གཞན་མ་ཡིན། །གལ་ཏེ་རྟོགས་དང་མ་རྟོགས་ལའང་། །འཕེལ་འགྲིབ་མེད་ཅེས་སྨྲ་བ་ན། །ལྕགས་སམ་གཙུབ་ཤིང་དག་ལས་མེ། །འབྱུང་ཕྱིར་རྒྱུ་ཉིད་མེའོ་ཞེས། །ཁྱེད་ཀྱིས་སྨྲ་བར་འགྱུར་བའི་ཕྱིར། །ཁ་དོག་དམར་དང་རེག་བྱ་ཚ། །རང་བཞིན་བསྲེགས་པའི་ནུས་པ་ཀུན། །རྫས་གཉིས་དག་ལ་རྫོགས་པ་ཡིས། །གཏན་ཚིགས་གསར་དུ་བསྒྲུབ་དགོས་སོ།། །།དེ་ནས་དྲི་བ་བཅྭོ་བརྒྱད་པར། །ཡེ་ཐོག་དང་པོའི་སངས་རྒྱས་དང་། །ཐོག་མར་བྱོན་པ་ཡོད་དམ་མེད། །མེད་ན་ཐོག་མའི་སངས་རྒྱས་འགལ། །ཡོད་ན་དེ་ལ་རྒྱུ་འབྲས་དང་། །ཚོགས་ལམ་འབྲས་བུ་སྟོན་བྱེད་ཅིང་། །དང་པོ་སེམས་བསྐྱེད་བྱེད་པ་གང་། །དེ་ཐད་ངེས་པ་མེད་ཅེ་ན། །སེམས་མ་བསྐྱེད་ཅིང་འབྲས་བུ་མེད། །ཚོགས་གཉིས་ལམ་ལ་མ་བརྟེན་པར། །དེ་འདྲའི་སངས་རྒྱས་ཅི་ལྟ་བུ། །ཞེས་དྲིས་ལན་དུ་འདི་སྐད་དོ། །ཡེ་ཐོག་དང་པོའི་སངས་རྒྱས་ནི། །གདོད་མའི་མགོན་ལས་གཞན་དུ་མིན། །དེ་ཉིད་ལམ་ལ་མ་བརྟེན་པར། །མངོན་པར་རྫོགས་ཚུལ་འོག་ཏུ་སྨྲ། །འདིར་ནི་རྫས་སྤྱིའི་དྲི་བའི་དོན། །གདོད་མའི་གཞི་ལས་གཞི་སྣང་དུ། །ཤར་བའི་རྩལ་ལས་སེམས་ཅན་ཁམས། །འཁྲུལ་རྒྱུ་མེད་བཞིན་རྨི་ལམ་ལྟར། །འཁྲུལ་པ་རྣམས་ནི་གདུལ་ཕྱིར་དུ། །རིགས་ལྔའི་རྒྱལ་བ་གང་ཆེན་མཚོ། །དེ་ཡི་ཕྱག་རྒྱའི་ཁོང་སེང་ལས། །པདྨ་འཁྲུངས་པའི་སྟེང་གི་ཆའི། །ཞིང་ཁམས་ཉི་ཤུ་རྩ་ལྔ་དང་། །སྤོས་ཆུའི་རྒྱུན་གྱི་དབྱིངས་ཀུན་ཏུ། །ཞིང་ཁམས་རྒྱ་མཚོས་ཁྱབ་པར་མཛད། །དེ་ཡང་ཐོག་མ་འདི་ཙམ་དང་། །མཐར་གྱིས་མཛད་པ་འདིའོ་ཞེས། །བློ་ཡིས་དཔག་པའི་ཡུལ་མ་ཡིན། །མི་གཡོ་ལྷུན་གྲུབ་ཆེན་པོའི་ཞིང་། །དེ་ཚེ་སྐུ་གསུམ་སྣང་བ་ལ། །ཞིང་ཁམས་རྣམ་པ་གསུམ་དུ་བཀོད། །བསམ་གྱིས་མི་ཁྱབ་ཆོས་སྐུའི་དུས། །འོད་གསལ་རྡོ་རྗེ་སྙིང་པོའི་ཞིང་། །རང་སྣང་ལོངས་སྤྱོད་རྫོགས་པའི་དུས། །ཚངས་པ་རྔ་སྒྲའི་ཞིང་དུ་གྲགས། །སྤྲུལ་སྐུའི་དུས་ན་ཚངས་ཆེན་གྱི། །བསྐལ་པ་འམ་ནི་ཞིང་ཁམས་སོ། །འདི་ཡི་གོ་ན་ཀུན་ཏུ་བཟང་། །ཉིད་ཀྱིས་སྤྲུལ་པའི་སངས་རྒྱས་དང་། །དེ་ཡིས་བྱིན་རླབས་སྟོན་མཆོག་སོགས། །སེམས་ཅན་ཁམས་ནི་ཚད་མེད་ལ། །འདུལ་བྱེད་གདུལ་བྱའི་ཚུལ་དུ་སྣང་། །མདོར་ན་ཞིང་ཁམས་རྒྱ་མཚོ་རུ། །སངས་རྒྱས་སྤྲུལ་པས་དོན་མཛད་པ། །ཐམས་ཅད་སྟོན་པ་ཀུན་བཟང་གིས། །སྤྲུལ་པས་དངོས་སུ་དོན་མཛད་ཅིང་། །ལ་ལར་རྒྱུད་གཞན་གྱིས་བསྡུས་པའི། །སངས་རྒྱས་དག་གིས་སེམས་ཅན་དོན། །མཛད་པ་ལྟ་བུར་སྣང་སྲིད་ཀྱང་། །དེ་ཀུན་ཀུན་ཏུ་བཟང་པོ་ཡིས། །ལམ་བསྟན་སེམས་ནི་བསྐྱེད་བཅུག་པ། །ཁོ་ནའི་མཐུ་ལས་བྱུང་བའི་ཕྱིར། །མངའ་དབང་རྫོགས་པའི་ཀུན་བཟང་གིས། །བརྒྱུད་ནས་སེམས་ཅན་དོན་མཛད་ཅེས། །ཀུན་མཁྱེན་དྲི་མེད་འོད་ཟེར་བཞེད། །དེ་ལས་ཞིང་འདིར་རྡོར་འཆང་གིས། །ཞི་བ་བརྙེས་པའི་ཚུལ་བརྗོད་ན། །ཁ་ཅིག་ཐོག་མའི་མགོན་པོ་ལས། །རྒྱུད་ཐ་དད་པའི་འཆིང་བ་ཅན། །སོ་སོའི་སྐྱེ་བོས་སེམས་བསྐྱེད་པར། །འདོད་པ་འདིར་ནི་རིགས་མ་ཡིན། །ཅི་ཕྱིར་སྒྱུ་འཕྲུལ་རྡོ་རྗེ་ལས། །འདི་ནི་སྟོན་པ་རྡོ་རྗེ་འཆང་། །སངས་རྒྱས་ཀུན་ལས་སྔར་སངས་རྒྱས། །ཞེས་གསུངས་ལུང་གིས་གནོད་ཕྱིར་རོ། །དེ་ནས་ཞིང་འདིའི་སེམས་ཅན་གྱི། །དོན་དུ་ཐོག་མའི་མགོན་པོ་ཡིས། །རྣམ་པར་འཕྲུལ་པའི་སོ་སྐྱེ་དེས། །སེམས་བསྐྱེད་ཞི་བ་བརྙེས་ཚུལ་བསྟན། །དེ་ཡང་བསྐལ་པ་བཟང་པོ་འདིར། །ལྟོས་ན་བསྐལ་པ་དཔག་མེད་སྔོན། །ཞིང་ཁམས་རང་བཞིན་རྣམ་བཀོད་དུ། །སངས་རྒྱས་མེ་ཏོག་མཛེས་པ་ལ། །གསེར་གྱི་རྡོ་རྗེ་གཅིག་ཕུལ་ནས། །བྱང་ཆུབ་མཆོག་ཏུ་ཐུགས་བསྐྱེད་ཅིང་། །དེ་ནས་སྐྱེ་བ་གསུམ་གྱི་བར། །ཚོགས་གཉིས་ལམ་ལ་ངེས་སྦྱངས་མཐར། །ཕུང་པོ་རྣམ་བཀོད་རི་བོའི་སྤོར། །མངོན་པར་རྫོགས་པར་སངས་རྒྱས་ཏེ། །བསྐལ་ཆེན་གཅིག་ཏུ་ཆོས་ཀྱི་སྐུའི། །དགོངས་པ་ཉིད་ལ་གཡོ་མེད་བཞུགས། །དེ་ལས་སླར་ཡང་གདུལ་བྱའི་ངོར། །ལྷུན་གྲུབ་ལོངས་སྤྱོད་རྫོགས་སྐུར་བཞེངས། །དེ་ཡི་རྩལ་ལས་ནིརྨ་ཀཱའི། །ཞིང་ཁམས་བཀོད་དེ་སྒྲོན་བསྐལ་འདིར། །ཐུན་མོང་སངས་རྒྱས་སྟོང་རྩ་དང་། །ཐུན་མིན་རྫོགས་པ་ཆེན་པོ་ཡི། །གྲགས་ཆེན་སྟོན་པ་བཅུ་གཉིས་དང་། །རིགས་དྲུག་འདུལ་ལ་ཐུབ་པ་དྲུག །ལ་སོགས་མདོ་རྒྱུད་རྒྱ་མཚོ་ཡི། །ཆོས་ཀྱི་རྣམ་གྲངས་ཇི་སྙེད་པའི། །སྟོན་པ་ཉིད་དུ་བསྟན་པའི་ཚད། །བློ་ཡིས་དཔག་པའི་ཡུལ་མ་ཡིན། །དེ་ལྟ་ན་ཡང་ཤཱཀ་ཐུབ་སོགས། །མཆོག་གི་སྤྲུལ་སྐུའི་ཐ་སྙད་ལ། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ལྷུམས་སུ་འཇུག་དང་བལྟམས་པ་དང་། །སོགས་ཀྱི་རྗོད་བྱེད་ལ་ཞེན་ནས། །ཡིད་སྲུབས་མདའ་ཡིས་སྙིང་ཕུག་པ། །འབྲི་གུང་དཔལ་འཛིན་ལ་སོགས་ཀྱིས། །མི་ལས་གཞན་པའི་འགྲོ་བ་ཡི། །ཐུབ་པ་ལྔ་པོས་མཛད་པ་བཅུ། །གང་དུ་བསྟན་ཞེས་ཟེར་བ་ནི། །མ་གོ་རང་མཐོང་ཨུ་ཚུགས་ཀྱིས། །དམྱལ་བ་བསྒྲུབ་པའི་ཅ་ཅོ་སྟེ། །ཅི་ཕྱིར་སངས་རྒྱས་ཐམས་ཅད་ནི། །མཛད་པ་མཐུན་པར་མ་ངེས་ཏེ། །བསྐལ་པ་བཟང་པོའི་མདོ་སྡེར་ལྟོས། །དཔེར་ན་མ་ཕམ་མགོན་པོ་ཡིས། །དཀའ་སྤྱད་མཛད་པ་མི་སྟོན་པར། །ཁྱིམ་ནས་མངོན་པར་འབྱུང་མ་ཐག །རྣམ་གྲོལ་ཉིད་དུ་འཚང་རྒྱ་བ། །དེ་ཡང་སངས་རྒྱས་མ་ཡིན་ནམ། །དེ་ཕྱིར་སངས་རྒྱས་ཐབས་མཁས་ཤིང་། །ཐུགས་རྗེའི་མངའ་བདག་ཉིད་ཡིན་པས། །གང་ལ་གང་འདུལ་མཛད་པ་དང་། །ཕྲིན་ལས་རྒྱ་མཚོ་ལྟ་བུའི་ཚུལ། །ཁོང་དུ་ཆུད་ནས་སྨྲ་བ་ནི། །མཁས་པའི་ལུགས་སུ་ཤེས་པར་བྱ།། །།དེ་བཞིན་དྲི་བ་བཅུ་དགུ་པར། །རྒྱལ་བ་ཀུན་ཏུ་བཟང་པོ་དེས། །ཚོགས་གཉིས་ལམ་ལ་བརྟེན་མ་བརྟེན། །བརྟེན་ན་ཚོགས་གཉིས་ཏིལ་འབྲུ་ཙམ། །མ་བསགས་གྲོལ་ཅེས་བཀའ་ལས་གསུངས། །མ་བརྟེན་ཚོགས་གཉིས་ལམ་མེད་པའི། །དེ་འདྲའི་སངས་རྒྱས་གྲོལ་ཐོབ་གང་། །རང་ངོ་རིག་པ་ཡིན་ཞེས་ན། །དེ་ཡི་རྐྱེན་ཡང་ཚོགས་གཉིས་མཐུ། །ཞེས་དྲི་ལན་དུ་འདི་སྐད་བརྗོད། །གདོད་མའི་མགོན་པོ་ཀུན་བཟང་གིས། །གཞི་ལས་འཕགས་པའི་རིག་པ་དེས། །གཞི་སྣང་མཐོང་བའི་སྐད་ཅིག་ལ། །རང་སྣང་ཡིན་པར་ཚུར་རིག་པས། །འཁྲུལ་པའི་སྣང་བ་ཁུངས་སྟོར་ཏེ། །མཐར་ཕྱིན་ལྷུན་གྲུབ་ས་ལ་གྲོལ། །དེ་ཡང་ཕལ་ཆེར་འདི་སྐད་དུ། །གཞི་ཐོག་ཉིད་དུ་གྲོལ་ཟེར་བ། །གནད་ལ་རྨོངས་པའི་རང་བཞིན་ཏེ། །ཅི་ཕྱིར་གཞི་ལས་གཞི་ཐོག་ཏུ། །གྲོལ་ན་རྫས་གཅིག་ཉིད་ཡིན་པས། །གྲོལ་དང་གྲོལ་བྱེད་གཉིས་སུ་མེད། །གཞི་ནི་འཁྲུལ་པ་འབྱུང་རུང་གི །ཆ་ནས་གཞག་ཕྱིར་སླར་ཡང་ནི། །དེ་ཉིད་ལྡོག་པར་འགྱུར་ཏ་རེ། །དགོངས་པ་བཀའ་བགྲོས་རྒྱུད་རྒྱལ་ནས། །དེ་ཚེ་ཀུན་བཟང་ཆོས་དྲུག་གིས། །གཞི་ཤེས་མ་རིག་དྲུག་བཅོམ་ནས། །ཉུག་ཙམ་ལས་ནི་ཡིད་ཙམ་སྟོངས། །རིག་ཙམ་བྱུང་བས་རིག་འགྲིབས་བརླག །སལ་གྱིས་སོང་བས་མུན་ཁོང་སངས། །ཝལ་གྱིས་བྱུང་བས་འཐིབ་པ་མེད། །སྒྲོ་སྐུར་བྲལ་བས་མ་རིག་དག །འགྱུར་བ་མེད་པས་ནམ་མཁའ་འདྲ། །ཞེས་གསུངས་དེ་ཕྱིར་ཀློང་ཆེན་པས། །ཆོས་དྲུག་དབྱེ་བ་འདི་ལྟར་ཕྱེ། །གཞི་ལས་འཕགས་དང་རང་ངོར་སྣང་། །བྱེ་བྲག་ཕྱེད་དང་ཕྱེད་ཐོག་གྲོལ། །གཞན་ལས་མ་བྱུང་རང་སར་གནས། །དེ་དག་རྣམས་ཀྱང་རྒྱུ་ལས་ནི། །མ་བྱུང་བ་ཡི་འབྲས་བུ་དང་། །སེམས་ལས་མ་བྱུང་ཡེ་སངས་རྒྱས། །ལུང་ལས་མ་བྱུང་རང་བྱུང་གི །མན་ངག་ཉིད་ལ་བརྟེན་སངས་རྒྱས། །དེ་ཕྱིར་ཚོགས་མ་བསགས་པ་ཡི། །སངས་རྒྱས་ཉིད་དུ་གྲགས་ན་ཡང་། །དཔྱད་ན་རང་ངོ་ཤེས་པ་དེ། །ཟག་མེད་རང་བྱུང་ལྷུན་གྲུབ་ཀྱི། །དགེ་བ་རྒྱ་མཚོ་ལྟ་བུ་ཡིན། །ཚོགས་ཆེན་ཡེ་ནས་རྫོགས་པ་དང་། །ལུང་མ་བསྟན་གྱི་མ་རིག་པ། །སངས་པས་སྒྲིབ་པ་ཡེ་དག་ཅེས། །ཐུན་མོང་མ་ཡིན་དགོངས་པར་བཞེད། །འོན་ཏེ་རང་ངོ་རིག་པ་ཡང་། །ཚོགས་གཉིས་ཁོ་ནའི་མཐུ་ཡིན་པ། །ལམ་ལ་ཞུགས་པའི་གང་ཟག་ལ། །བསྟན་པའི་རིག་པ་གདོད་མ་ཡི། །སངས་རྒྱས་ཉིད་ལ་བསྒྲེ་བ་ན། །འཁོར་བ་མྱང་འདས་ལྟེ་ཆད་དེ། །སྒྲ་ཚིག་རྒྱུད་ལའང་རྨོངས་འགྱུར་བས། །ཚོགས་གཉིས་ཞེས་བྱ་སུ་ཡིས་བཤད། །དེ་འདྲའི་ལམ་གྱི་སྟོན་པ་སུ། །དེས་ན་དྲང་ངེས་ལྡེམ་དགོངས་དང་། །ཇི་བཞིན་པ་དང་སྒྲ་ཇི་བཞིན། །མ་ཡིན་མཐའ་དྲུག་ཚུལ་བཞི་ཡིས། །མདོ་རྒྱུད་གསུང་རབ་རྒྱ་མཚོའི་མཐའ། །དཔྱོད་པའི་གནས་ལ་རྨོངས་གྱུར་ན། །ཐོས་བསམ་ལྟ་བ་དུག་ཅན་དང་། །རྟོག་གེའི་རིག་པས་ཚུལ་འདི་དག །དཔོགས་པའི་གནས་སྐབས་མི་སྲིད་དོ།། །།དེ་བཞིན་དྲི་བ་ཉི་ཤུ་པར། །ཆོས་སྐུ་ངོ་བོར་བཞུགས་མ་བཞུགས། །བཞུགས་ན་དམིགས་མེད་སྤྲོས་བྲལ་འགལ། །མ་བཞུགས་ལོངས་སྤྲུལ་འཆར་གཞི་གང་། །ཞེས་དྲི་ལན་དུ་འདི་སྐད་བརྗོད། །ཆོས་སྐུའི་ངོ་བོ་སྟོང་པ་ཉིད། །སྟོང་ཉིད་སྨྲ་བསམ་བརྗོད་མེད་ལ། །དམིགས་མེད་སྤྲོས་བྲལ་གང་དུ་འགལ། །ཆོས་སྐུའི་རང་བཞིན་འོད་གསལ་དང་། །འོད་གསལ་རྣམ་ཀུན་མཆོག་ལྡན་ལ། །ལོངས་སྤྲུལ་འཆར་གཞི་འགག་པ་མེད། །ཆོས་སྐུའི་ཐུགས་རྗེ་ཀུན་ལ་ཁྱབ། །ཐུགས་རྗེ་ཀུན་ཁྱབ་ཡེ་ཤེས་ལ། །མེད་ཅེས་ཆད་པར་སུ་ཞིག་སྨྲ། །དེ་ཕྱིར་ངོ་བོ་གཅིག་ཉིད་ལ། །ལྡོག་པ་གསུམ་གྱི་ཆོས་ཚང་བ། །དྷརྨ་ཀཱ་ཡའི་ཁྱད་ཆོས་ཡིན། །སྔོན་དུ་དྲི་བ་བཅུ་གསུམ་པར། །རྒྱས་པར་དྲིས་ཤིང་བཤད་པའི་ཕྱིར། །ཡང་ཡང་སྨྲས་ནས་ཅི་ཞིག་བྱ།། །།དེ་ནས་དྲི་བ་ཉེར་གཅིག་པར། །ལོངས་སྐུ་དམིགས་སུ་ཡོད་དམ་མེད། །ཡོད་ན་དག་པའི་འོད་གསལ་འགལ། །མེད་ན་ངེས་པ་ལྔ་ལྡན་ཞིང་། །ཡོད་ཅེས་བཤད་པ་ཅི་ལྟ་བུ། །ཞེས་དྲི་ལན་དུ་འདི་སྐད་བརྗོད། །ལོངས་སྐུའི་ངོ་བོ་རང་གསལ་ཆེ། །བཞུགས་ཚུལ་རང་བཞིན་མི་གཡོའི་སྐུ། །མཚན་དཔེར་གསལ་ལ་ངེས་ཚིག་ནི། །ལོངས་སྐུའི་སྣང་བ་ལ་སྤྱོད་པ། །དེ་ཡང་མཁྱེན་པ་མ་འགགས་ཤིང་། །རང་གསལ་བཀོད་པ་ཆེན་པོའོ། །དབྱེ་ན་རྣམ་པ་བཞི་ཡིན་ཏེ། །དང་པོ་འབྱུང་ཆེན་ངོ་བོའི་སྐུ། །ཆོས་ཀྱི་སྐུ་ཡི་འཆར་གཞི་ལས། །རང་ཤར་ཡེ་ཤེས་ལྔ་ལྡན་གྱི། །སྐུ་རུ་རྫོགས་པ་འབྱུང་བ་ལྔར། །ཁྱབ་པའི་བདག་ཉིད་ཅན་ཡིན་ནོ། །གཉིས་པ་གནས་པ་ཁྱབ་ཚུལ་སྐུ། །འཁོར་བ་མྱང་འདས་ཐམས་ཅད་ལ། །འོད་དང་འོད་ཁྱིམ་གྱིས་ཁྱབ་པའི། །ཆ་ཉིད་མངོན་དུ་གྱུར་པ་སྟེ། །རྫོགས་ཆེན་རིག་པ་རང་ཤར་ནས། །ཀུན་ལ་འོད་ཀྱི་སྙིང་པོར་གནས། །རྟོག་མེད་རྣམ་དག་ཆོས་ཀྱི་དབྱིངས། །འགྲན་ཟླ་མེད་པའི་ཉག་གཅིག་པོ། །དཀྱིལ་དང་འཁོར་དང་ཕོ་བྲང་དང་། །རིག་དང་སྟོང་དང་གསལ་བའོ། །ཞེས་སོ་གསུམ་པ་གཞི་དབྱིངས་ལས། །འཕགས་པའི་སྣང་བ་ལམ་གྱི་སྐུ། །གཞི་སྣང་ཆོས་ཉིད་ལོངས་སྤྱོད་རྫོགས། །བར་དོའི་སེམས་ཅན་ལ་སྣང་བ། །དེ་ཉིད་གདུལ་བྱའི་ལམ་གྱི་ཕྱིར། །ཆོས་སྐུའི་ནང་དབྱིངས་ལས་ཤར་ཏེ། །འོད་དང་ཁ་དོག་དཀྱིལ་འཁོར་དང་། །ཚོམ་བུ་སྐུ་དང་ཡེ་ཤེས་དང་། །ཡབ་ཡུམ་སྐུ་མདོག་ཕྱག་མཚན་སོགས། །འདུས་མ་བྱས་པའི་སྐུ་རུ་ཤར། །བཞི་པ་གདུལ་བྱ་སྣང་ཚུལ་སྐུ། །ལོངས་སྐུས་འདུལ་བའི་གདུལ་བྱ་ལ། །རིགས་དང་དཀྱིལ་འཁོར་ཐ་དད་པ། །རྣམ་པར་འཕྲུལ་པས་གོ་ཕྱེ་ནས། །ལོངས་སྐུའི་ཆོས་སྐུ་གང་ཆེན་མཚོ། །ལོངས་སྐུའི་ལོངས་སྐུ་རིགས་གཙོ་ལྔ། །ལོངས་སྐུའི་སྤྲུལ་སྐུ་རིགས་ལྔ་ཡིས། །སངས་རྒྱས་ཉིད་དང་སོ་སོའི་འཁོར། །སྐུ་གསུང་ཐུགས་ཡོན་ཕྲིན་ལས་ལྔའི། །བདག་ཉིད་ཅན་དུ་ལྷུན་གྲུབ་སྟེ། །འདི་སྐད་དུ་ནི་ཐལ་འགྱུར་ལས། །ལོངས་སྐུ་ལའང་སྐུ་གསུང་ཐུགས། །ཡོན་ཏན་ཕྲིན་ལས་ལྔ་ཡིན་ནོ། །སྐུ་ནི་སྣང་ལ་རང་བཞིན་མེད། །གསལ་དང་གསལ་བྱེད་རིག་པས་ཁྱབ། །གསུང་ནི་རང་བྱུང་རང་སྣང་དང་། །སྤྲོ་བསྡུའི་རྣམ་པའི་འཁོར་ལོའོ། །ཐུགས་ནི་རྒྱུན་མེད་གཟིགས་པ་དང་། །མཁྱེན་པའི་རྩལ་དང་དགོངས་པའོ། །ཡོན་ཏན་མཚན་དཔེ་རྫོགས་པ་ལ། །དགོངས་གསལ་མངོན་ཤེས་རྫོགས་པའོ། །ཕྲིན་ལས་ཆོས་ཀྱི་འཁོར་ལོ་ལས། །ཕྱི་ནང་གསང་བ་རྣམ་འཕྲོས་ཏེ། །སོ་སོའི་རིགས་ཀྱི་སངས་རྒྱས་དང་། །བྱང་ཆུབ་སེམས་དཔའ་རྣམས་ལ་ཡང་། །རང་བྱུང་ལྗགས་ལས་རྣམ་སྤྲོས་ཏེ། །འཁོར་ལ་རང་གི་ངོ་བོས་སྟོང་། །ཞེས་སོ་དེ་ཕྱིར་སར་གནས་ཀྱི། །བྱང་ཆུབ་སེམས་དཔའི་སྣང་ངོ་རུ། །ངེས་པ་ལྔ་དང་ལྡན་པའི་ཞིང་། །ནམ་མཁའ་ལས་ནི་སྤྲིན་བཞིན་དུ། །བྱད་དང་ཁ་དོག་གིས་མཚན་པར། །ཡོད་ཅེས་བཤད་པ་ལམ་སྣང་སྟེ། །དཔེར་ན་གཉིད་དུ་སོང་བ་ཡིས། །རྨི་ལམ་དམིགས་སུ་ཡོད་དམ་མེད། །ཡོད་ན་རྨི་ལམ་རྟག་པའི་ཆོས། །མེད་ན་རང་བཞིན་མེད་བཞིན་དུ། །སྣང་ཚུལ་སྣ་ཚོགས་འཆར་དེ་གང་། །དེ་ཕྱིར་དག་དང་མ་དག་དང་། །ཤིན་ཏུ་དག་པའི་སྣང་བ་ལ། །སྐུ་གསུམ་ཉིད་དུ་ཤར་བ་སྟེ། །གསང་བ་ས་བོན་རྒྱུད་ལས་ཀྱང་། །ངོ་བོ་ཉིད་ཀྱི་སྣང་བ་ལ། །ངོ་བོ་ཉིད་ཀྱི་སྐུ་ཤར་བ། །དཔེར་ན་རང་དང་གཟུགས་བརྙན་བཞིན། །སྐུ་གསུམ་འོད་གསལ་སྟོང་པ་ཉིད། །རྟག་པ་མ་ཡིན་དངོས་པོར་མེད། །ཆད་པ་མ་ཡིན་འོད་གསལ་སྐུ། །ཐ་དད་མ་ཡིན་ཕྱི་ནང་མེད། །ཅེས་པས་གསལ་བར་བསྟན་མོད་ཀྱི། །རང་བཞིན་རྒྱས་པར་ཤེས་འདོད་ན། །སོ་སོའི་བཞེད་གཞུང་མང་ན་ཡང་། །རྟོག་གེའི་རིག་པ་ཙམ་མིན་པར། །མཐའ་དྲུག་ཚུལ་བཞིའི་གནད་མཁྱེན་ཅིང་། །ཀུན་བཟང་དགོངས་པའི་རྒྱལ་ཐབས་ཅན། །ཐམས་ཅད་མཁྱེན་པ་ཀློང་ཆེན་པའི། །གྲུབ་མཐའ་རྒྱ་མཚོ་ལྟ་བུ་ལ། །ལྟ་བ་གནད་ཀྱི་མན་ངག་གོ། །།དེ་ནས་དྲི་བ་ཉེར་གཉིས་པར། །སྤྲུལ་སྐུ་སངས་རྒྱས་ཡིན་ནམ་མིན། །ཡིན་ན་ཞིང་འདིར་དཀའ་སྤྱད་ཀྱིས། །སངས་རྒྱས་མཛད་ཚུལ་ཅི་ལྟ་བུ། །མིན་ན་ཤཱཀྱ་ཐུབ་པ་སོགས། །སངས་རྒྱས་མ་ཡིན་གཞན་སུ་ཞིག །ཅེས་དྲི་ལན་དུ་འདི་སྐད་བརྗོད། །སྤྱིར་བཏང་དམིགས་བསལ་མ་ཕྱེ་བའི། །རྫས་སྤྱིའི་བརྗོད་བྱ་སྤྲུལ་སྐུའི་སྒྲ། །དབྱེ་བ་ཞིབ་མོར་ཕྱེ་བས་བརྟག །དེ་ལའང་ཐུན་མོང་ཐུན་མིན་གཉིས། །དང་པོ་ཐུན་མོང་ཐེག་པའི་ལུགས། །རྣམ་པ་གསུམ་དུ་ངེས་བྱ་སྟེ། །མདོ་སྡེ་རྒྱན་ལས་འདི་སྐད་བཤད། །བཟོ་དང་སྐྱེ་དང་བྱང་ཆུབ་ཆེ། །བྱང་ཆུབ་མཆོག་གི་སྤྲུལ་པ་སྟེ། །སངས་རྒྱས་སྤྲུལ་པའི་སྐུ་འདི་ནི། །རྣམ་པར་གྲོལ་བའི་ཐབས་ཆེན་པོ། །ཞེས་པའི་བཟོ་ཡི་སྤྲུལ་སྐུ་ནི། །རིས་སུ་བྲིས་དང་འབུར་དུ་དོད། །ལ་སོགས་རྣམ་གྲངས་ཇི་སྙེད་དང་། །སྐྱེ་བ་སྤྲུལ་སྐུ་སངས་རྒྱས་ཀྱིས། །ཇི་ལྟར་འགྲོ་བ་ཕལ་པའི་གཟུགས། །ཉ་བོ་ཆེ་དང་རྟ་ལ་སོགས། །སྣ་ཚོགས་ཉིད་དུ་སྤྲུལ་པ་དང་། །བྱང་ཆུབ་མཆོག་གི་སྤྲུལ་སྐུ་ནི། །མཛད་པ་བཅུ་གཉིས་སྟོན་པ་སྟེ། །དེ་སྐད་དུ་ནི་རྒྱུད་བླ་མར། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ལྷུམས་སུ་འཇུག་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་གྱིས་རོལ་པ་དང་། །ངེས་འབྱུང་དཀའ་བ་སྤྱད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་བཅོམ་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །ལྷ་རྣམས་ཀུན་དང་བཅས་པར་ནི། །མྱ་ངན་འདའ་བར་རྟག་སྟོན་པ། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་སོ་ཐུན་མོང་མ་ཡིན་ལུགས། །བླ་ན་མེད་པའི་ཐེག་པ་འདིར། །མ་དག་དམན་པའི་སྤྲུལ་པ་དང་། །འགྲོ་བ་འདུལ་བའི་སྤྲུལ་སྐུ་དང་། །རང་བཞིན་ཞིང་གི་སྤྲུལ་སྐུ་སྟེ། །དང་པོ་སྒྱུ་འཕྲུལ་རྡོ་རྗེ་ལས། །རྔོན་དང་སྨད་འཚོང་ལ་སོགས་པར། །སྤྲུལ་ནས་སེམས་ཅན་དོན་མཛད་དོ། །ཞེས་སོ་གཉིས་པ་གང་ལ་ནི། །གང་འདུལ་ཉིད་དུ་སྐུ་སྤྲུལ་པ། །ལྷ་མིན་འདུལ་ལ་ཐགས་བཟང་སོགས། །འགྲོ་འདུལ་ཐུབ་པ་རྣམ་དྲུག་དང་། །གསུམ་པ་རང་བཞིན་སྤྲུལ་སྐུ་ནི། །འོག་མིན་མངོན་དགའ་དགའ་ལྡན་དང་། །པད་བརྩེགས་ལས་རབ་རྫོགས་པ་ཡི། །དག་པའི་སངས་རྒྱས་ལྔར་སྣང་བའི། །ཐུགས་རྗེས་སེམས་ཅན་དོན་མཛད་ཅིང་། །དེ་ལས་དམན་པ་མ་ཡིན་པར། །མཆོག་དང་འགྲོ་འདུལ་རང་བཞིན་གྱི། །སྤྲུལ་སྐུ་སངས་རྒྱས་ཐམས་ཅད་ནི། །སྐྱབས་སུ་འཛིན་པའི་སྡོམ་རྟེན་དང་། །ཐར་པ་དང་ནི་རྣམ་མཁྱེན་གྱི། །གནས་སྐབས་ལམ་གྱི་སྟོན་པ་དང་། །མི་བཟད་སྡུག་བསྔལ་ལ་སྤྱོད་པའི། །འགྲོ་བ་འདྲེན་པའི་དེད་དཔོན་ཕྱིར། །བརྡ་ཡི་སངས་རྒྱས་ཉིད་དུ་འདོད། །དེ་ཡང་རང་ངོ་ལ་ལྟོས་ན། །བཤེས་གཉེན་དུལ་དང་ཉེར་ཞི་བ། །ཡོན་ཏན་ལྷག་བྱས་ལུང་གིས་ཕྱུག །རང་གི་སློབ་དཔོན་གྱུར་པ་དེ། །བླ་མ་མཁས་པ་ཞེས་བྱ་སྟེ། །ཚོགས་ལམ་པ་ཡི་སངས་རྒྱས་ཡིན། །དེ་བཞིན་དྲོད་རྩེ་བཟོད་ཆོས་དང་། །ཆོས་མཆོག་ཐོབ་པའི་གང་ཟག་གིས། །རང་གིས་ཉམས་མྱོང་ཡེ་ཤེས་ནི། །སངས་རྒྱས་ཉིད་དུ་རྣམ་པར་གཞག །བཏང་སྙོམས་བྱང་ཆུབ་ཡན་ལག་བདུན། །བསྒོམས་པས་མཐོང་ལམ་ལ་གནས་ཏེ། །རབ་དགའ་དང་པོའི་ས་པ་ཡིས། །སངས་རྒྱས་སྤྲུལ་སྐུའི་ཚོགས་མཐོང་ཞིང་། །ཆོས་ཀྱི་རྣམ་གྲངས་ཉན་པ་སོགས། །ཡོན་ཏན་དཔག་མེད་ཐོབ་པ་ཡང་། །དོན་ལ་རང་རིག་ཡེ་ཤེས་ཏེ། །རང་སྣང་ཉིད་ལ་རང་སྣང་སྤྱོད། །དེ་བཞིན་ས་བཅུའི་བྱང་སེམས་ཀྱིས། །རང་སྣང་ལོངས་སྤྱོད་རྫོགས་སྐུ་ལ། །སངས་རྒྱས་ཉིད་དུ་འདོད་པ་ཡིན། །དེ་ཕྱིར་བཅུ་གཅིག་ཀུན་ཏུ་འོད། །ནས་བཟུང་ཁྱད་པར་ས་མཆོག་གི །མཐའ་རུ་མ་སོན་ཕྱེད་ཡན་ལ། །གནས་པའི་སེམས་དཔའ་ཆེན་པོ་དེས། །སངས་རྒྱས་ཆོས་ཀྱི་སྐུ་ཉིད་ལ། །གཉིས་མེད་འབྲས་བུའི་ཆོས་རྣམས་དང་། །འོད་ཟེར་ཆེན་པོའི་དབང་མཆོག་ལེན། །རྩེ་མོ་ས་ཕྱེད་མཐར་སོན་ཚེ། །སྐྱབས་དང་སྐྱོབ་པ་གཉིས་མེད་པས། །སངས་རྒྱས་སྐུ་ལྔའི་བདག་ཉིད་ཡིན། །སློབ་བྱའི་ཡོན་ཏན་མཐར་ཐུག་པས། །མི་སློབ་ལམ་གྱི་སྣང་བ་སྟེ། །ངོ་བོ་སངས་རྒྱས་ཐམས་ཅད་ཀྱི། །ཡེ་ཤེས་ཆེན་པོ་ཉིད་ཡིན་པས། །དོན་གྱི་སངས་རྒྱས་ཡིན་པར་འདོད། །མིང་དུ་བརྗོད་ན་ཆོས་སྐུའམ། །དེ་བཞིན་ངོ་བོ་ཉིད་སྐུ་དང་། །མངོན་པར་བྱང་ཆུབ་སྐུ་ཞེས་བྱ། །གལ་ཏེ་ཞལ་ཕྱག་མཚན་དཔེ་དང་། །ལྡན་པ་ཁོ་ན་མཐར་ཐུག་གི །སངས་རྒྱས་ཉིད་དུ་སྨྲ་བ་ན། །གང་དག་ང་ལ་གཟུགས་སུ་མཐོང་། །གང་དག་ང་ལ་སྒྲར་ཤེས་པ། །ལོག་པའི་ལམ་དུ་ཞུགས་པ་སྟེ། །སོགས་ཀྱི་ལུང་གིས་གནོད་ཕྱིར་རོ། །དེ་ཕྱིར་གྲུབ་མཐའི་དབྱེ་བ་འདི། །ཤིན་ཏུ་ཕྲ་ཞིང་གནད་ཆེ་བས། །རང་བཞིན་རྒྱས་པར་ཤེས་འདོད་ན། །གྲུབ་མཐའ་རིན་ཆེན་མཛོད་ལས་རྟོགས།། །།དེ་བཞིན་དྲི་བ་ཉེར་གསུམ་པར། །བསྐྱེད་རིམ་ཆོས་སྐུར་མཚུངས་མི་མཚུངས། །ཡིན་ན་ཁ་དོག་མཚན་མ་ཅན། །མིན་ན་ཆོས་སྐུའི་གདངས་བྲལ་བས། །དེ་འདྲའི་ལམ་གྱི་སངས་རྒྱས་མིན། །ཞེས་དྲི་ལན་དུ་འདི་སྐད་བརྗོད། །ངོ་བོ་རང་བཞིན་ཐུགས་རྗེ་གསུམ། །བྱང་ཆུབ་སེམས་ཀྱི་བཞུགས་ཚུལ་ཡིན། །དེ་ཡི་ལྡོག་པ་རྣམ་གསུམ་གྱི། །རྣམ་དབྱེ་ཕྱེད་པར་མ་གྱུར་ན། །བསྐྱེད་དང་རྫོགས་པའི་མན་ངག་དང་། །གཞི་ལམ་འབྲས་བུའི་ཆོས་ཀུན་གྱི། །གནད་ལ་རྨོངས་པ་ར་གྱུར་ཏ་རེ། །དེ་ཕྱིར་ངོ་བོ་སྟོང་པ་ལ། །ཆོས་སྐུའི་མཚན་ཉིད་འགྱུར་བ་མེད། །རང་བཞིན་གསལ་བའི་འཆར་སྒོ་ཡིས། །འཁྲུལ་དང་གྲོལ་བའི་ལམ་བྱེད་ཕྱིར། །མྱ་ངན་འདས་པ་མ་ཡིན་པའི། །ལམ་དང་གནས་སྐབས་ཐམས་ཅད་དུ། །རྣམ་རྟོག་བཟུང་བའི་ཡུལ་ཉིད་ལ། །ཡུལ་ཅན་འཛིན་པས་བསླད་པ་ཡིས། །སྒོ་གསུམ་སྣང་གྲག་རིག་གསུམ་གྱི། །ཐ་མལ་ཞེན་པ་འགོག་པའི་ཕྱིར། །ལམ་དུས་སྣང་ཆ་ལྷ་ཡི་སྐུར། །བསྒྲུབ་པས་བསྐྱེད་རིམ་ཆོས་སྐུར་མཚུངས། །དེ་ལྟར་མཚུངས་པ་ཆོས་ཀྱི་སྐུ། །དངོས་དང་ཁ་དོག་མཚན་མ་ཅན། །དག་ཏུ་འགྱུར་བར་མི་སྲིད་དེ། །དཔེར་ན་རྟོག་བྲལ་མེ་ལོང་ལ། །གཟུགས་བརྙན་རྣམ་པ་ཅི་ཤར་ཡང་། །དེ་ཉིད་མེ་ལོང་གསལ་བའི་དབྱིངས། །ཡུལ་རྐྱེན་གསར་པས་ཤར་བ་ལས། །གཟུགས་བརྙན་མེ་ལོང་འདྲེས་པ་མེད། །དེ་ཕྱིར་མངོན་པར་བྱང་ཆུབ་ལྔ། །ཕྱག་རྒྱ་བཞི་དང་ཏིང་འཛིན་གསུམ། །སྐད་ཅིག་དྲན་རྫོགས་ལ་སོགས་པའི། །བསྐྱེད་རིམ་རྣམ་གྲངས་ཐ་དད་ཀུན། །རིག་པ་གདོད་ནས་སྤྲོས་བྲལ་གྱི། །སྣང་ཆའི་རྟེན་འབྲེལ་ཉིད་ཡིན་ལ། །དགོས་ཆེད་བསོད་ནམས་ཡེ་ཤེས་ཚོགས། །རྫོགས་ཕྱིར་ཟུང་འཇུག་ལམ་དུ་བསྟན། །རྒྱུད་རྒྱལ་སྒྱུ་འཕྲུལ་དྲ་བ་ལས། །ལྷ་ཡི་སྐུ་ཉིད་གསལ་བསྒོམས་ན། །བསོད་ནམས་ཚོགས་ཀྱང་རྫོགས་པར་འགྱུར། །དེ་ཉིད་ཆུ་ཟླའི་ཚུལ་ཤེས་ན། །ཡེ་ཤེས་ཚོགས་ཀྱང་རྫོགས་པར་འགྱུར། །ཞེས་གསུངས་མང་པོ་ཅི་ཞིག་སྨྲ། །འདི་ཡིས་བརྒལ་བའི་ཚིག་རྐང་ལ། །བསྐྱེད་རིམ་ཆོས་སྐུར་མཚུངས་མི་མཚུངས། །མཚུངས་ན་ཞེས་སོགས་དགོས་རྒྱུ་ལ། །ཡིན་ན་དང་ནི་མིན་ན་ཡིས། །རྗོད་བྱེད་དེས་ནི་བརྗོད་བྱའི་དོན། །ལུང་མ་བསྟན་དུ་མ་སོང་ངམ།། །།སླར་ཡང་དྲི་བ་ཉེར་བཞི་པར། །བསྐྱེད་རྫོགས་གཉིས་སུ་གཅིག་མི་གཅིག །གཅིག་ན་གཉིས་སུ་ཇི་ལྟར་འོང་། །མི་གཅིག་ཡ་བྲལ་ཕྱོགས་ཅན་གྱིས། །དེ་འདྲའི་གྲོལ་ལམ་ཇི་ལྟ་བུ། །ཞེས་དྲི་ལན་དུ་འདི་སྐད་དོ། །སྤྱིར་ནི་བསྐྱེད་རྫོགས་ཞེས་པའི་དོན། །གསལ་ཆ་མཚན་དཔེར་ཤར་བ་དང་། །སྟོང་ཆ་གནས་ལུགས་སྤྲོས་བྲལ་ལ། །བརྗོད་ཚུལ་གོང་དུ་བསྟན་མོད་ཀྱིས། །བྱེ་བྲག་བསྐྱེད་པའི་རིམ་པ་ལ། །སྦྱང་གཞི་སྦྱོང་བྱེད་སྦྱངས་འབྲས་དང་། །དག་རྫོགས་སྨིན་གསུམ་སྦྱོར་ཚུལ་སོགས། །རང་བཞིན་རྣམ་གྲངས་ཐ་དད་ཅིང་། །དེ་བཞིན་རྫོགས་པའི་རིམ་པ་ལ། །རྣམ་གྲངས་དབྱེ་བ་མང་ན་ཡང་། །ཟབ་པ་ཆོས་སྐུའི་རྫོགས་རིམ་དང་། །སེམས་འཛིན་རྩ་ཐིག་རླུང་གསུམ་གྱི། །རྫོགས་རིམ་དག་ཏུ་འདུ་བ་ལས། །བསྐྱེད་རིམ་གཟུགས་སྐུའི་ཉེ་ལམ་དང་། །རྫོགས་རིམ་ཆོས་སྐུའི་ཉེ་ལམ་སྟེ། །འཇུག་སྒོ་དབང་གི་རྟེན་འབྲེལ་ལ། །དགོངས་ནས་རིམ་པ་གཉིས་སུ་གསུངས། །དེ་ཡང་འདི་ལྟར་ཤེས་པར་བྱ། །བསྐྱེད་རིམ་རྣམ་དག་དྲན་པ་ལ། །སྟོང་ཉིད་ངོ་བོ་འཕོ་འགྱུར་མེད། །རྣམ་པ་གསལ་བའི་རང་གདངས་ལ། །འགག་མེད་ལྷ་སྐུའི་ཕྱག་རྒྱ་རྫོགས། །གཉིས་མེད་ང་རྒྱལ་བརྟན་པ་ཡིས། །རིག་པ་འཛིན་པའི་ས་ལ་གནས། །དེ་བཞིན་རྫོགས་པའི་རིམ་པ་ལ། །རྩ་རླུང་ཐིག་ལེ་སྣང་བའི་རྟེན། །དེ་ཉིད་གནད་ཀྱི་མན་ངག་གིས། །བྱེད་པ་བཅིངས་པའི་རྟེན་འབྲེལ་ལས། །རིག་སྟོང་ཡེ་ཤེས་རྩལ་ཆེན་རྫོགས། །དོན་ལ་སྣང་སྟོང་ཟུང་འཇུག་ཡིན། །གདོད་ནས་བསྐྱེད་རྫོགས་དབྱེར་མེད་ཀྱི། །གནད་དོན་ཚུལ་བཞིན་མ་རིག་ན། །ལོ་ཟླར་རང་ཤོང་བཙོན་ཁང་དུ། །ཀུན་འབྱུང་བསྒོམས་ཀྱང་ཨ་ཐང་ཆད། །ཀུན་བརྟགས་བསྐྱེད་རིམ་རཱུ་ཏྲའི་རྒྱུ། །དེ་ཕྱིར་བསྐྱར་ནས་དྲི་བ་འདི། །དེང་སང་སྙིགས་མ་ལྔ་བདོའི་དུས། །གསང་སྔགས་དར་ལ་མ་སྨིན་པའི། །སྣང་ཚུལ་དགོངས་པ་ཡིན་མཆི་སྟེ། །རཀྴའི་ཕྲེང་བ་ཐོགས་ཚད་ཀྱིས། །སྔགས་པ་ཡིན་པར་ཁས་ལེན་ཞིང་། །རྒྱུད་སྡེའི་དགོངས་པ་མ་ལོན་པའི། །མན་ངག་ཕྲ་མོས་ཡིད་ཚིམས་ནས། །སྡེ་དང་གྱད་དང་སྟོབས་འབྱོར་འགྲན། །ཆོས་གོས་རྣམ་གསུམ་གྱོན་ཙམ་གྱིས། །ཚུལ་ཁྲིམས་གཙང་བར་རློམ་བྱེད་ཅིང་། །སྦྱངས་པའི་ཡོན་ཏན་བཅུ་གཉིས་དང་། །ལྡན་གྲོལ་དྲི་མས་མ་གོས་བཞིན། །འདུལ་བ་འཛིན་པའི་དྲེགས་པས་འགྱིང་། །དཔུང་དང་ཟ་ཐང་ཆེ་ཚད་ལ། །སངས་རྒྱས་བྱང་ཆུབ་སེམས་དཔའ་ཡི། །རྣམ་སྤྲུལ་ཉིད་དུ་ཁས་འཆེ་ཞིང་། །འདོད་ལྷ་སྙིང་དུ་ཞུགས་པ་ཡི། །ལུང་བསྟན་མངོན་དུ་གྱུར་པའི་ཚུལ། །མདོ་ཙམ་བཤད་ན་ཀུན་གསལ་ལས། །རཱུ་ཏྲ་ལོག་པའི་སྤྱོད་པ་ཡིས། །གསང་སྔགས་སྤྱད་པས་ཕུང་འགྱུར་ཏེ། །སྔོན་བྱུང་བ་དག་འདས་པའི་དུས། །མ་ཏྲཱཾ་རཱུ་ཏྲ་སངས་རྒྱས་ཀྱིས། །བཀའ་བསྒོ་ལོག་པར་སྤྱད་པ་ལས། །འགྲོ་དྲུག་སྡུག་བསྔལ་ཉམ་ཐག་ཅིང་། །རང་གི་བྱང་ཆུབ་སྔོ་བསྐམས་འགྱུར། །དེ་ལྟར་ལྔ་བརྒྱའི་ཐ་མ་ལ། །སེམས་ཅན་ཉོན་མོངས་ལས་ངན་གྱིས། །སངས་རྒྱས་བཀའ་གཞུང་ཁུངས་མི་འཛིན། །རང་གི་ཤེས་བྱ་ལོག་སྤྱོད་བརྩོན། །ཐོས་བསམ་ཆགས་སྡང་དབང་དུ་འགྱུར། །འདུལ་ཁྲིམས་གྲགས་པ་རྙེད་ཕྱིར་སྲུང་། །སེམས་བསྐྱེད་ངོ་བསྲུང་ཕྱིར་དུ་སྒོམ། །དབང་བསྐུར་ཟས་ནོར་འདོད་པས་བྱེད། །ཆོས་སྤྱོད་ཟས་སྐོམ་ཕྱིར་དུ་བྱེད། །གདམས་ངག་ཞི་བདེ་བསྒྲུབ་ཕྱིར་སྒོམ། །ཐབས་ལམ་ནག་ཆགས་འདེད་ཕྱིར་སློབ། །དེ་དུས་བདུད་ཀྱིས་བང་ཆེན་གྱིས། །སྙིང་ལ་ལྕགས་ཀྱུས་འདེབས་ཤིང་འཛིན། །བདུད་ཞགས་ནག་པོས་སྐེ་ནས་འཆིང་། །སོགས་ཀྱིས་ལུང་དོན་ཇི་ལྟ་བ། །མངོན་དུ་གྱུར་པ་མཁྱེན་ལགས་སམ། །དེ་ཚེ་གསེར་དང་བོང་བ་མཉམ། །འོད་གསལ་བསྒོམ་ན་མི་འཐད་དམ།། །།དྲི་བ་ཉི་ཤུ་རྩ་ལྔ་པར། །རྒྱུ་འབྲས་ངོ་བོ་གཅིག་མི་གཅིག །གཅིག་ན་སངས་རྒྱས་སེམས་ཅན་གཉིས། །མཚན་ཉིད་ཡོན་ཏན་མཉམ་པར་རིགས། །མི་གཅིག་ན་ནི་སངས་རྒྱས་དང་། །སེམས་ཅན་རྒྱུ་འབྲས་མི་གཅིག་པས། །སེམས་ཅན་སངས་རྒྱས་བཏུབ་མི་འགྱུར། །ཞེས་དྲི་ལན་དུ་འདི་སྐད་དོ། །རྒྱུ་འབྲས་ངོ་བོ་མཚུངས་ན་ཡང་། །རྒྱུ་ཡི་ནུས་པ་སྨིན་མ་སྨིན། །དེ་བཞིན་རང་རྩལ་རྫོགས་མ་རྫོགས། །འབྲས་བུ་མངོན་དུ་གྱུར་མ་གྱུར། །ཆ་ནས་རྣམ་པ་ཐ་དད་གྲུབ། །དཔེར་ན་གསེར་གྱི་ཐིག་པོ་དེ། །བསྲེགས་བཅད་བརྡར་བའི་ནུས་པ་ཡིས། །སྐུ་གསུང་ཐུགས་ཀྱི་རྟེན་མཆོད་དང་། །རྒྱན་དང་མཆོད་པའི་བྱེ་བྲག་སོགས། །རྣམ་པ་གང་ལའང་འགྱུར་དང་མཚུངས། །དེ་ཀུན་རྒྱུ་ནི་གསེར་ཡིན་ལ། །འབྲས་བུ་དེ་དང་དེ་རུ་གྲུབ། །དེ་ཕྱིར་སེམས་ཅན་སངས་རྒྱས་གཉིས། །ངོ་བོའི་ཆ་ནས་མཉམ་ན་ཡང་། །རྣམ་པ་དྲི་མས་སྦགས་པ་དང་། །དག་པ་གཉིས་སུ་ལྡན་པ་གཉིས། །འཁྲུལ་གྲོལ་ཆ་ནས་ཐ་དད་གྱུར། །དེ་ལ་དགོངས་ནས་ཧེ་བཛྲར། །སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །དེ་བསལ་ན་ནི་སངས་རྒྱས་ཉིད། །ཅེས་ཀྱང་གསུངས་པ་མ་ཡིན་ནམ། །ཚུལ་འདི་དྲི་བ་བཅུ་བདུན་པར། །རྒྱས་པར་དྲིས་ཤིང་བཤད་པའི་ཕྱིར། །ཡང་ཡང་བསྐྱར་བའི་དོན་མེད་དོ།། །།དེ་ནས་དྲི་བ་ཉེར་དྲུག་པར། །རྫོགས་ཆེན་སྦྱོར་དྲུག་ལ་སོགས་ཀྱི། །འོད་གསལ་རྣམ་པ་མཆོག་ལྡན་ཉིད། །དོན་ལ་སྐུ་གསུམ་ཡིན་ནམ་མིན། །ཡིན་ན་རྣམ་བྱང་ཁ་དོག་དང་། །དབང་པོས་མངོན་སུམ་མཐོང་བ་ཡི། །སྐུ་གསུམ་ཉིད་དེ་ཇི་ལྟ་བུ། །མིན་ན་འོད་གསལ་ལ་སྦྱངས་པས། །ཕྱི་ནང་སྣོད་བཅུད་གཅིག་ཏུ་སྨིན། །ཕུང་པོ་ལྷག་མེད་འགྲུབ་པའང་མཐོང་། །ཞེས་དྲི་ལན་དུ་འདི་བརྗོད་དོ། །བརྟགས་པ་བརྡ་ཡི་སྐུ་གསུམ་དང་། །ཡིན་ཚུལ་དོན་གྱི་སྐུ་གསུམ་སྟེ། །རྣམ་གྲངས་གཉིས་སུ་དབྱེ་བ་ལས། །འདི་ནི་སྣང་མུན་འོད་གསལ་གྱི། །ཐད་ཀ་ཐད་ཀའི་ལམ་བསྒོམས་པའི། །གང་ཟག་རང་རང་སྣང་ངོ་རུ། །ཤར་བའི་འབྲས་བུ་ཡིན་པའི་ཕྱིར། །མཚོན་བྱེད་བརྡ་ཡི་སྐུ་གསུམ་སྟེ། །ཡིན་ཚུལ་དོན་གྱི་སྐུ་གསུམ་ནི། །འོད་གསལ་ལྷུན་གྲུབ་ཆེན་པོའི་སྦུབས། །ཀ་དག་བསམ་ངོ་བྲལ་བའི་དབྱིངས། །མི་སློབ་ལམ་གྱི་སྣང་བ་སྟེ། །འབྲས་བུ་བདེ་གཤེགས་སྙིང་པོར་འདོད། །དེ་ལ་སྐུ་གསུམ་ཅི་ཞེ་ན། །ངོ་བོ་རང་བཞིན་ཐུགས་རྗེ་གསུམ། །དེ་ཡི་བཞུགས་ཚུལ་ཡིན་ཕྱིར་རོ། །དེ་ལྟ་ན་ཡང་རྗོད་བྱེད་ཀྱི། །ཚིག་གི་འགྱུར་ལ་ལམ་འབྲས་བུའི། །སྐུ་གསུམ་ཆ་མཐུན་བརྗོད་ཀྱང་རུང་། །མངའ་རིས་མ་ཧཱ་པཎྜི་ཏས། །ལམ་སྣང་འབྲས་སྣང་གཞི་མཐུན་པར། །སྨྲས་ཀྱང་འགལ་བ་ཡོད་མ་ཡིན། །ཅི་ཕྱིར་སློབ་ལམ་སྣང་བ་ཀུན། །ལམ་གྱི་མཐུ་ལས་སྣང་བའི་ཕྱིར། །ལམ་སྣང་ཡིན་གྱི་དེ་དག་ཀྱང་། །ཐད་ཀ་ཐད་ཀའི་ལམ་རིམ་ལ། །རྣལ་འབྱོར་བྱས་པའི་འབྲས་བུ་ཡིན། །དམིགས་བསལ་ཕ་རོལ་ཕྱིན་པ་ལ། །བཅུ་གཅིག་ཀུན་ཏུ་འོད་ཀྱི་ས། །ཐོབ་ཚེ་འབྲས་བུའི་སྣང་བར་འདོད། །རྡོ་རྗེ་ཐེག་པའི་ལམ་ལ་ནི། །བཅུ་གསུམ་པ་དང་བཅུ་བཞི་པ། །དེ་བཞིན་བཅོ་ལྔ་བཅུ་དྲུག་དང་། །ཉེར་གཅིག་པ་རྣམས་འབྲས་སྣང་སྟེ། །ལྷག་མ་ལམ་གྱི་སྣང་བར་འདོད། །དེ་བཞིན་སྣང་བ་གསུམ་ལ་ཡང་། །དག་དང་མ་དག་དག་པ་དང་། །ཤིན་ཏུ་རྣམ་དག་གོ་རིམ་བཞིན། །སེམས་ཅན་ལས་ཀྱི་སྣང་བ་དང་། །རྣལ་འབྱོར་ལམ་གྱི་སྣང་བ་དང་། །འབྲས་བུ་བདེ་གཤེགས་སྣང་བ་དང་། །དང་པོ་རང་བཞིན་གནས་པའི་རིགས། །ལམ་ལ་ཞུགས་པ་ལམ་སྣང་གིས། །དབྱེ་བ་བྱ་རུ་མེད་པ་སྟེ། །རྣལ་འབྱོར་ཉམས་ཀྱི་སྣང་བ་ལ། །སློབ་ལམ་སྐུ་གསུམ་ལམ་སྣང་ཡིན། །མི་སློབ་ལམ་གྱི་སྣང་བ་ནི། །འབྲས་བུ་བདེ་གཤེགས་སྙིང་པོའོ། །ཞེས་གསུངས་ཤིན་ཏུ་དཔྱད་བཟོད་པའི། །བཤད་པ་ཉིད་དུ་འདི་མངོན་ཏེ། །ཅི་ཕྱིར་ཀུན་མཁྱེན་ཀློང་ཆེན་པ། །ལམ་སྣང་འབྲས་སྣང་གཉིས་ཀ་རུ། །འགལ་བ་མེད་པར་ཞལ་གྱིས་བཞེས། །དེ་ཡང་འདི་ལྟར་ཤེས་བྱ་སྟེ། །ལྷུན་གྲུབ་འདུས་མ་བྱས་པའི་སྦུབས། །སྤྲོས་ཀུན་བྲལ་བའི་ཀ་དག་དེ། །དོན་གྱི་འབྲས་བུ་ཁོ་ན་ཡིན། །དེ་ཉིད་ཁང་པ་ལྟ་བུ་ཡི། །ནང་དུ་འཇུག་དང་ཕྱི་རུ་མཆེད། །ལ་སོགས་འཇུག་ལྡོག་གང་བྱེད་ཀྱང་། །གདོད་གཞི་ཀ་དག་ཆེན་པོ་ལས། །ཕྱིར་གསལ་ཉིད་དུ་འཆར་དགོས་ལ། །འཆར་ཚུལ་སངས་རྒྱས་བསྒྲུབ་པའི་ལམ། །འབྲས་བུའི་སྔོན་རོལ་པ་རྣམས་དང་། །རང་ཉིད་སངས་རྒྱས་གྲུབ་ཟིན་ཡང་། །གདུལ་བྱ་འདྲེན་ཕྱིར་ལམ་གྱི་སྐུ། །མངོན་པར་སྣང་བས་དོན་མཛད་པའི། །ལམ་སྣང་རྣམ་པ་གཉིས་ཡིན་ནོ། །དེ་ཕྱིར་དོན་གྱི་སྐུ་གསུམ་ནི། །མི་སློབ་ལམ་གྱི་སྣང་བ་སྟེ། །དེ་ཡི་ངང་དུ་ཐམས་ཅད་མཉམ། །ཚུལ་དེས་ལམ་སྣང་འབྲས་སྣང་གཉིས། །འགལ་བ་མེད་པའི་འབྲེལ་པ་འགྲུབ། །འོན་ཀྱང་རྣམ་པར་གྲོལ་བའི་སྐུ། །ཆོས་སྐུའི་ནང་དབྱིངས་ཆེན་པོ་ལས། །ཕྱིར་གསལ་སྐུ་གསུམ་ལམ་སྣང་གི །འཆར་གཞི་སྐུ་དང་ཡེ་ཤེས་ཁམས། །འདུ་འབྲལ་མེད་པའི་བདག་ཉིད་ཅན། །རྡོ་རྗེ་སེམས་དཔའི་ཆོས་ཉིད་དང་། །དེ་ལས་ཕྱིར་གསལ་སྐུ་གསུམ་གྱི། །ལམ་གྱི་སྣང་བ་རང་སྣང་དུ། །ཤར་བ་གཉིས་པོ་རིག་པའི་ངང་། །འདྲ་བ་ལྟ་བུ་སྣང་ན་ཡང་། །ཕྱི་ནང་ཁྱད་པར་མ་ཕྱེད་ན། །རང་སྣང་གདུལ་བྱས་མི་མཐོང་ལ། །དེ་ལས་ཤར་བ་མཐོང་བའི་ཁྱད། །ཡོད་ཕྱིར་སེངྒེ་རྩལ་རྫོགས་ལས། །རྡོ་རྗེ་སེམས་དཔའི་ཆོས་ཉིད་དང་། །རང་སྣང་དཀྱིལ་འཁོར་དག་པ་གཉིས། །འདྲ་གཞི་གཅིག་ལ་གོལ་ས་ཆེ། །ཞེས་གསུངས་དེ་ཕྱིར་ནང་དབྱིངས་དང་། །ཕྱི་གསལ་ལམ་སྣང་སྐུ་གསུམ་པོ། །རིག་ངོར་ངོ་བོ་གཅིག་ན་ཡང་། །རྣམ་པར་མཚན་ཉིད་མི་གཅིག་གོ །ཁྱད་པར་འདི་ཡི་དྲི་གཞི་ལ། །རྫོགས་ཆེན་སྦྱོར་དྲུག་ལ་སོགས་ཀྱིས། །འོད་གསལ་རྣམ་པ་མཆོག་ལྡན་ཉིད། །ཅེས་པའི་ཚིག་གིས་དེ་གཉིས་ཀྱི། །ལམ་སྣང་མཚུངས་པར་དྲིས་པ་དེས། །རྫོགས་པ་ཆེན་པོའི་གྲུབ་མཐའ་རུ། །ཁས་ལེན་ཙམ་དུ་མ་ལགས་པ། །ཉམས་ལེན་རྨོངས་པར་དོགས་པ་སྐྱེས། །ཅི་ཕྱིར་འོད་གསལ་རྫོགས་ཆེན་ནི། །ཐེག་པ་ཀུན་གྱི་རྩེ་མོ་སྟེ། །དེ་ལ་ཟབ་ཁྱད་འགའ་མེད་ན། །ཐེག་རྩེར་རློམ་པ་ཕྱོགས་འཛིན་ཅན། །དེ་ཕྱིར་དེ་གཉིས་མི་མཚུངས་ཏེ། །སྦྱོར་དྲུག་རླུང་གདངས་ལ་བརྟེན་ནས། །ཤེས་ཉམས་འདག་བྱའི་རྟགས་བཅུ་ཉིད། །ལམ་གྱི་གཙོ་བོར་འདོན་པའི་ཕྱིར། །འཁྲུལ་སྣང་རིག་རྩལ་མ་དག་གདངས། །ལམ་དུ་བྱས་ཀྱང་གྲོལ་བ་དཀའ། །རྫོགས་ཆེན་རིག་གདངས་ལ་བརྟེན་ནས། །སྣང་ཉམས་མངོན་སུམ་འོད་གསལ་གྱི། །གདངས་ལ་ལམ་དུ་བྱེད་པའི་ཕྱིར། །ནོར་བུའི་འོད་དང་སྒྲོན་མའི་འོད། །འོད་ཀྱི་ངང་དུ་མཚུངས་ན་ཡང་། །བྱེད་ལས་ཆ་ནས་ཁྱད་ཡོད་ཕྱིར། །རྣམ་འགྲེལ་ལས་ཀྱང་དེ་སྐད་དུ། །ནོར་བུ་སྒྲོན་མའི་འོད་དག་ལ། །ནོར་བུའི་བློ་ནི་མངོན་རྒྱུད་པ། །ལོག་པའི་ཤེས་པར་ཁྱད་མེད་ཀྱང་། །ཇི་ལྟར་དོན་བྱེད་ལ་ཁྱད་ཡོད། །ཅེས་གསུངས་དེ་ཕྱིར་ལམ་འདི་ནི། །ཐེག་པ་གཞན་ལས་གནད་བདུན་གྱིས། །འཕགས་པར་དྲི་མེད་འོད་ཟེར་དེས། །དགོངས་གཏེར་བསྟན་བཅོས་ཀུན་ལས་བཤད། །དེ་ཕྱིར་ཀུན་རྫོབ་རྩོལ་བཅས་ལམ། །རགས་པ་རྩ་རླུང་ཐིག་ལེ་ཡི། །གནད་ལ་བརྟེན་ནས་བེམ་པོའི་ལུས། །གཟུགས་ཀྱི་ལྷ་དང་རྗེས་མཐུན་པར། །དྭངས་མའི་ཁམས་སུ་གནས་འགྱུར་ནས། །མཁའ་སྤྱོད་ལ་སོགས་དག་ཞིང་དུ། །གྲུབ་མཐའ་སྙོགས་ཏེ་ལམ་གྱི་ལྷག །བགྲོད་ལ་འཇའ་ལུས་མིང་བརྟགས་དང་། །སྙིང་ཐིག་དོན་དམ་ཡེ་ཤེས་ཀྱི། །རྩ་རླུང་འཛིན་རྩོལ་ལས་འདས་པའི། །ལམ་དུ་སྣང་གཞིའི་རྩལ་རྫོགས་ནས། །བྱས་ཆོས་བློ་དང་ཆོས་ཉིད་ཀུན། །ཟད་དེ་འབྱུང་བ་རང་དེངས་སུ། །ཕུང་པོ་ལྷག་མ་མེད་པར་སྦྱངས། །རིག་པ་སྐུ་གསུམ་ལྷུན་གྲུབ་སྦུབས། །ངོ་བོ་ཉིད་དུ་རྣམ་གྲོལ་བའི། །འཇའ་ལུས་གཉིས་ལ་ཁྱད་པར་ཆེ། །དེ་ཕྱིར་ཐེག་པའི་རྩེ་མོ་འདིར། །ལམ་མཆོག་ཐད་དྲང་བསྟན་པ་དང་། །འོག་མར་དགོངས་གཞི་རེ་རེ་ལ། །ལྟོས་ནས་རིག་པས་གཞལ་བ་གཉིས། །ཀུན་ཏུ་བཟང་པོ་ཀློང་དྲུག་པར། །རྙོག་པ་མེད་པའི་རང་སེམས་དང་། །རྟོག་པ་མེད་པའི་རང་རིག་གཉིས། །འདྲའོ་འདྲའོ་ནོར་ར་རེ། །མ་བསྒྲིབས་གཏིང་གསལ་སྣང་བ་དང་། །འགྲོ་བའི་བསམ་རྒྱུད་ཞེན་པ་གཉིས། །འདྲའོ་འདྲའོ་ནོར་ར་རེ། །མ་བསལ་གཞག་པའི་སྒོམ་པ་དང་། །རྩ་རླུང་སེམས་ཀྱི་ངལ་བསོ་གཉིས། །འདྲའོ་འདྲའོ་ནོར་ར་རེ། །དྲན་མེད་རིག་པ་ཡུལ་སྣང་དང་། །དྲན་བསམ་འགྲོ་དྲུག་འཁྲུལ་པ་གཉིས། །འདྲའོ་འདྲའོ་ནོར་ར་རེ། །ཆོས་ཉིད་དག་པའི་བར་དོ་དང་། །ཡི་དམ་ལྷ་ཡི་སྒྱུ་ལུས་གཉིས། །འདྲའོ་འདྲའོ་ནོར་ར་རེ། །རང་བཞིན་སྤྲུལ་སྐུའི་ཞིང་ཁམས་དང་། །ཐེག་པས་བགྲངས་པའི་སངས་རྒྱས་གཉིས། །འདྲའོ་འདྲའོ་ནོར་ར་རེ། །སྐུ་གསུམ་འབྲས་བུའི་མཐར་ཐུག་དང་། །སྣ་ཚོགས་མ་ངེས་ལྷུན་གྲུབ་གཉིས། །འདྲའོ་འདྲའོ་ནོར་ར་རེ། །ཐེག་པ་རྣམས་ཀྱི་ཡིད་དཔྱོད་དང་། །རིག་པ་མངོན་སུམ་ལྟ་བ་གཉིས། །ལྟ་བའི་ཕྱོགས་ནས་འདྲ་གཉིས་པས། །འདྲའོ་འདྲའོ་ནོར་ར་རེ། །རྩོལ་མེད་རིག་སྐུ་ཡུལ་སྣང་དང་། །མཚན་མ་བསྒོམས་པའི་གཟུགས་བརྙན་གཉིས། །འདྲའོ་འདྲའོ་ནོར་ར་རེ། །རིག་པའི་མཛད་སྤྱོད་རོལ་པ་དང་། །འགྲོ་དྲུག་འཁྲུལ་པའི་སྣང་བ་གཉིས། །འདྲའོ་འདྲའོ་ནོར་ར་རེ། །རང་བཞིན་རྣམ་དག་ཐིག་ལེ་དང་། །རླུང་བཟུང་མཚན་བཅས་ཐིག་ལེ་གཉིས། །འདྲའོ་འདྲའོ་ནོར་ར་རེ། །ཆོས་སྐུ་རྣམ་དག་ཡུལ་དབྱིངས་དང་། །མྱ་ངན་འདས་པའི་གྲོང་ཁྱེར་གཉིས། །འདྲའོ་འདྲའོ་ནོར་ར་རེ། །རང་རིག་བསམ་པ་བྲལ་བ་དང་། །སེམས་ཀྱི་བྱུང་ཚོར་སྣ་ཚོགས་གཉིས། །འདྲའོ་འདྲའོ་ནོར་ར་རེ། །ཤེས་རབ་རང་རྩལ་རྫོགས་པ་དང་། །ཡིད་ཀྱི་དྲན་པ་ཕྱིར་ཤོར་གཉིས། །འདྲའོ་འདྲའོ་ནོར་ར་རེ། །གསང་ཆེན་ངེས་པའི་བདེན་ཚིག་དང་། །ལྡེམ་དགོངས་གཅུད་པའི་གལ་ཚིག་གཉིས། །འདྲའོ་འདྲའོ་ནོར་ར་རེ། །ངེས་པའི་བཅུད་གསུམ་མན་ངག་དང་། །མཚོན་པ་དཔེ་ཡིས་བསླུ་བྲིད་གཉིས། །འདྲའོ་འདྲའོ་ནོར་ར་རེ། །ཞེས་སོ་དེ་ཕྱིར་རྫོགས་པ་ཆེའི། །གྲུབ་མཐའ་ཤེས་པར་རློམ་པ་རྣམས། །ཁྱད་པར་ཅན་གྱི་དབྱེ་བ་འདི། །ཁོང་དུ་ཆུད་པར་ཅིས་མི་བྱེད།། །།དྲི་བ་ཉི་ཤུ་རྩ་བདུན་པར། །རྫོགས་ཆེན་སྤྱོད་པའི་རྣལ་འབྱོར་དང་། །མངོན་སུམ་དང་ནི་ཉམས་གོང་འཕེལ། །ཚད་ཕེབས་ཟད་པའི་སྣང་བའི་བར། །འོད་གསལ་ལྷུན་གྲུབ་སྣང་བ་འདི། །ཇི་སྲིད་ཆོས་ཉིད་ཟད་པའི་དུས། །འདི་དག་དག་ཅིང་ཟད་འདོད་དམ། །འོན་ཏེ་འདི་ཀ་བཞིན་དུ་གནས། །ཞེས་དྲི་ལན་དུ་འདི་སྐད་བརྗོད། །སྤྱིར་གྱི་གསང་མཆོག་རྒྱུད་སྡེ་འདི། །གཞི་སྣང་འོད་གསལ་ལྷུན་གྲུབ་ལ། །སྣང་བ་རྣམ་གྲངས་བཞིར་བསྟན་པ། །ཡིད་དཔྱོད་ལྟ་བ་ཁུངས་རྡིབ་ཅིང་། །མངོན་སུམ་མཐོང་བའི་རིག་པ་དེ། །གོང་ནས་གོང་དུ་ན་སྤར་ནས། །གཞི་དབྱིངས་གདོད་མར་སྦྱོར་བའི་ཕྱིར། །རང་ས་རང་སར་དགོས་པའི་ཁྱད། །ཡོད་ཕྱིར་སྣང་བ་བཞི་རུ་བསྟན། །འོད་གསལ་རྒྱུད་སྡེ་ཐལ་འགྱུར་ལས། །ཆོས་ཉིད་མངོན་སུམ་སྣང་བ་ཡིས། །ཡིད་དཔྱོད་འཛིན་པའི་ལྟ་བ་བསྣུབ། །ཉམས་སྣང་གོང་དུ་འཕེལ་བ་ཡིས། །འཁྲུལ་པའི་སྣང་བ་ནུབ་པར་བྱེད། །རིག་པ་ཚད་ཕེབས་སྣང་བ་ཡིས། །སྐུ་གསུམ་རྟོགས་པའི་ལམ་སྣང་འདས། །ཆོས་ཉིད་ཟད་པའི་སྣང་བ་ཡིས། །ཁམས་གསུམ་འཁོར་བའི་རྒྱུན་ཐག་ཆད། །ཅེས་གསུངས་དེ་ཡང་ཕྱི་ནང་གི །རྟེན་ཅིང་འབྲེལ་འབྱུང་ལ་མཚོན་ན། །སྣོད་བཅུད་ཆགས་གནས་འཇིག་སྟོངས་བཞི། །ཕྱི་རུ་ནམ་ཟླ་དུས་བཞི་འཕེལ། །ཟད་དང་ནང་དུ་ལུས་ངག་ཡིད། །སེམས་བཞིའི་འཆིང་བ་གྲོལ་ཕྱིར་དང་། །གསང་བར་དབང་བཞིའི་ངེས་པ་དང་། །ཁོ་ན་ཉིད་དུ་སྒྲོན་མ་བཞིའི། །སྣང་བ་ངེས་པ་ལ་ལྟོས་ནས། །རྣམ་གྲངས་བཞི་རུ་འདི་ནི་བཤད། །དེ་ཡང་འདི་ལྟར་ཤེས་བྱ་སྟེ། །དང་པོ་ཆོས་ཉིད་མངོན་སུམ་པར། །མཐོང་བའི་ཆོས་སུ་མེད་གྱུར་ན། །ལྷག་མ་གསུམ་གྱི་འཆར་གཞི་འགགས། །དེ་ཕྱིར་རྟེན་དང་བརྟེན་པའི་ཕྱིར། །ཆོས་ཉིད་མངོན་སུམ་སྣང་བ་འཆར། །དེ་ཉིད་མཐོང་བས་རང་བྱུང་གི །ཡེ་ཤེས་རང་ལས་རྙེད་པ་ཡིན། །དེ་ཡང་ཉམས་སུ་མ་མྱོང་ན། །ཡིད་དཔྱོད་འཛིན་པའི་ལམ་པ་ལྟར། །ཚིག་གིས་རྗེས་སུ་དཔག་པ་ལས། །དོན་གྱི་འབྲས་བུ་ཐག་རིང་བས། །མྱོང་བ་མཐའ་རུ་ཕྱིན་པ་ཡིས། །གོང་འཕེལ་ཉམས་ཀྱི་སྣང་བ་འབྱུང་། །དེ་ལྟར་འཕེལ་བའི་ཉམས་སྣང་ལ། །བརྟེན་པའི་མཚན་ཉིད་མ་རྫོགས་ན། །ཆོས་ལ་ཟིན་པའི་སྐབས་མེད་ཅིང་། །སངས་ལ་རྒྱ་བའི་དུས་མེད་པས། །ཐུག་པ་མེད་པའི་རང་བཞིན་ཅན། །འགོག་ཕྱིར་ཚད་ཕེབས་སྣང་བ་འབྱུང་། །དེ་ཉིད་ཚད་ལ་ཕེབས་གྱུར་ཀྱང་། །དེ་ལས་གཞན་དུ་མི་འགྱུར་ན། །སྐུ་གསུམ་འབྲས་བུར་འདོད་པ་ཡིས། །དངོས་སྣང་མཚན་མའི་ཆོས་ཅན་ལ། །འབྲས་བུར་རེ་བའི་གྲུབ་མཐའ་ཅན། །ཐུན་མོང་རྣམས་དང་ཁྱད་ཅི་ཡོད། །དེ་ཕྱིར་ཐེག་པའི་རྩེ་མོ་འདིར། །སྣང་ཉམས་གཞི་ལ་རང་ལོག་ནས། །ཕྲ་རགས་སྣང་བ་ཀུན་ནུབ་སྟེ། །ཀ་དག་ཆོས་ཟད་ལ་སྤྱོད་པས། །ཆོས་ཉིད་ཟད་པའི་ཐ་སྙད་བརྟགས། །དེ་ཡང་སྐུ་གསུམ་ལ་སྦྱོར་ན། །མངོན་སུམ་གོང་འཕེལ་སྤྲུལ་པའི་སྐུ། །ཚད་ཕེབས་ལོངས་སྐུ་ཟད་པ་ནི། །ཆོས་སྐུའི་སྣང་བར་ལམ་བྱས་པས། །སྐུ་གསུམ་ལམ་གྱི་སྣང་བ་ཤར། །འབྲས་བུ་ཀ་དག་ཆོས་ཟད་དབྱིངས། །དག་པ་ཉིས་ལྡན་གསང་བའི་སྦུབས། །ཐུག་ཕྱིར་རང་སྣང་སྐུ་གསུམ་རྩལ། །རིག་པའི་གཞི་ལ་ཡོངས་ཐིམ་པ། །ཐེག་པའི་རྒྱལ་པོའི་དགོངས་པ་སྟེ། །ཀུན་གྱི་རྟོགས་པར་དཀའ་བའི་གནས། །མ་སྦས་མ་གབ་ཡི་གེར་བཀོད།། །།དེ་བཞིན་དྲི་བ་ཉེར་བརྒྱད་པར། །གདོད་མའི་ལྷུན་གྲུབ་སྦུབས་ཉིད་དུ། །སྐུ་དང་ཡེ་ཤེས་འཁྱིལ་བ་གང་། །དེ་ལས་དག་དང་མ་དག་གིས། །སྐུ་དང་ཡེ་ཤེས་འཆར་ཚུལ་གང་། །ཞེས་དྲི་ལན་དུ་འདི་སྐད་བརྗོད། །གསང་མཆོག་འོད་གསལ་ཐེག་པ་འདིའི། །ལྷུན་གྲུབ་སྦུབས་ལ་རྣམ་གསུམ་སྟེ། །འཁོར་འདས་ཐམས་ཅད་འཆར་བའི་གཞི། །ཀུན་གཞི་རང་མལ་གནས་པ་ལ། །ལྷུན་གྲུབ་གཞི་ཡི་སྦུབས་ཞེས་བྱ། །དེ་ལས་ཕྱིར་གསལ་གཞི་སྣང་གི །འཆར་སྒོ་བརྒྱད་ལས་འཁོར་འདས་ཆོས། །འབྱུང་བའི་གོ་ནི་མ་འགགས་པ། །འདི་ནི་ལྷུན་གྲུབ་ལམ་གྱི་སྦུབས། །གཞི་ལས་ཁྱད་ཆོས་རྣམ་དྲུག་གིས། །བྱེ་བྲག་བྱས་པའི་དབྱིངས་ལ་ནི། །མཐར་ཕྱིན་འབྲས་བུ་ལྷུན་གྲུབ་ཀྱི། །རིན་ཆེན་གསང་བའི་སྦུབས་ཞེས་བརྗོད། །དེ་ལྟར་གསུམ་དུ་ངེས་ན་ཡང་། །གདོད་མའི་ལྷུན་གྲུབ་ཞེས་པའི་སྒྲས། །རང་མལ་གཞིའམ་ཡང་ན་ནི། །རྫས་སྤྱིའི་དྲི་བ་ལས་མེད་པས། །དམིགས་ཀྱིས་བསལ་བ་དཀའ་ན་ཡང་། །དེ་ལས་དག་དང་མ་དག་གིས། །ཞེས་པའི་ཚིག་རིས་ལ་དཔགས་ནས། །གྲོལ་ནས་དབྱིངས་ལ་བཞུགས་པའི་སྦུབས། །འཆད་ན་འདི་ལྟར་ཤེས་པར་བྱ། །རྒྱུད་རྒྱལ་སྒྲོན་མ་འབར་བ་ལས། །ངོ་བོ་ཉིད་ནི་ཆོས་སྐུ་སྟེ། །ཡེ་ཤེས་ཆོས་ཀྱི་སྐུ་རུ་སྨིན། །དེ་ཡིས་ཡེ་ཤེས་རྒྱུན་མ་ཆད། །སྐུ་དང་ཡེ་ཤེས་ལྷུན་གྲུབ་གསལ། །ཞེས་གསུངས་དེ་ཡི་བཞུགས་ཚུལ་ནི། །གཞི་དང་ངོ་བོ་མཚུངས་པ་ལ། །རྣམ་པ་དྲི་མ་བྲལ་བ་ཡིས། །ཁྱད་པར་བྱས་པའི་འབྲས་བུ་དེ། །ཕྱིན་ཆད་རྒྱུ་རུ་ལྡོག་མི་སྲིད། །དེ་ཡང་ཆོས་ཉིད་ནང་གསལ་དང་། །ཆོས་ཅན་ཕྱིར་གསལ་ལ་ལྟོས་ནས། །ཐམས་ཅད་མཁྱེན་པའི་ཡེ་ཤེས་དང་། །རྣམ་པ་ཐམས་ཅད་མཁྱེན་པ་ཡི། །ཡེ་ཤེས་གཉིས་སུ་བརྗོད་པ་སྟེ། །རྒྱུད་སྡེ་ལས་ཀྱང་འདི་སྐད་དུ། །ཐོག་མའི་སངས་རྒྱས་ཀུན་ཏུ་བཟང་། །མཚན་དང་དཔེ་བྱད་ལྡན་པར་ཡོད། །སྟོན་པ་འོད་མི་འགྱུར་བ་ནི། །སྟོང་གསལ་འོད་ཀྱི་ཕུང་པོར་གནས། །ཐུགས་ཀྱི་མཁྱེན་པ་མ་འགགས་གསལ། །ཞེས་སོ་དེ་ཕྱིར་ཚུལ་འདི་ནི། །ནང་གསལ་ཆོས་ཉིད་འཆར་བའི་གཞི། །ཀ་དག་མཐའ་དབུས་མེད་པའི་དབྱིངས། །ཀློང་ཡངས་རྫོགས་པ་ཆེན་པོའི་ངང་། །འོད་གསལ་ཆོས་སྐུའི་ཕོ་བྲང་ན། །རིག་པའི་སྟོང་ཆ་ཀུན་བཟང་མོ། །སྣང་ཆ་ཀུན་ཏུ་བཟང་པོ་ཡི། །བཙུན་མོ་ཉིད་དུ་རང་གསལ་བས། །ཐབས་དང་ཤེས་རབ་ཟུང་འབྲེལ་ཞིང་། །ལྷུན་གྲུབ་ཡེ་ཤེས་སྐུ་གསུང་ཐུགས། །མི་ཟད་རྒྱན་གྱི་འཁོར་ལོ་ཡི། །འབྱུང་གནས་ཆེན་པོར་རྟག་བཞུགས་ཀྱང་། །དངོས་པོ་མཚན་མར་མ་གྲུབ་ཅིང་། །སྣང་བའི་རང་གདངས་ནུབ་པ་མེད། །སྟོང་པ་ཕྱང་ཆད་མ་ཡིན་པས། །ངོ་བོ་རང་བཞིན་ཐུགས་རྗེ་ཡི། །ཕྲིན་ལས་འཇུག་པ་རྒྱུན་མི་འཆད། །རྣམ་པར་གྲོལ་བའི་ཡེ་ཤེས་ཆོས། །སྟོབས་བཅུ་མི་འཇིགས་རྣམ་བཞི་དང་། །སོ་སོ་ཡང་རིག་མཚན་བཟང་དང་། །དཔེ་བྱད་ལ་སོགས་ཁྱད་པར་ཆོས། །ནུབ་པ་མེད་པའི་རང་བཞིན་ཅན། །ཡེ་ཤེས་དབྱིངས་སུ་ཐིམ་ན་ཡང་། །སྐུ་གསུམ་འདུ་འབྲལ་མེད་པའི་ཆོས། །ཕྲ་བའི་ཡེ་ཤེས་ནང་གསལ་དུ། །བཞུགས་པས་རྨུགས་པའི་ཡུལ་མེད་ཅིང་། །དྲི་མ་བྲལ་ཕྱིར་མདུན་རྒྱབ་དང་། །སྟེང་འོག་ཕྱོགས་མཚམས་གཉིས་མེད་པས། །གསལ་ལ་རྟོག་པ་མ་མཆིས་ཤིང་། །སེམས་དང་དབུགས་ལས་འདས་པ་ཡིས། །འཁོར་བའི་ཆོས་ཀྱིས་གོས་པ་མེད། །ཡིན་ནི་ལྟ་བ་རང་བྱུང་གི །རྒྱལ་པོ་ཡིན་ལ་བག་ཆགས་ཀྱིས། །བདག་ཏུ་འཛིན་དང་བྲལ་བའི་དངོས། །ཆོས་སྐུའི་ཀློང་ན་རིན་པོ་ཆེ། །འོད་ཟེར་འབར་བའི་སྐུ་ལྔ་ནི། །གཏིང་གསལ་ཆེན་པོར་རྟག་བཞུགས་ཀྱང་། །དེ་ལ་རྟོག་པའི་ཆོས་མེད་པས། །འཁྲུལ་པའི་གོ་ཡང་མི་འབྱེད་དོ། །དེ་ཚུལ་རིག་པ་རང་ཤར་དང་། །ཀུན་བཟང་ཐུགས་ཀྱི་མེ་ལོང་དང་། །ནོར་བུ་ཕྲ་བཀོད་ལ་སོགས་པ། །འོད་གསལ་རྒྱུད་སྡེ་རྒྱ་མཚོའི་བཅུད། །གདོད་མའི་མགོན་པོ་ཀློང་ཆེན་པས། །དཔེ་རྟགས་དོན་གྱི་འགྲེལ་བཀོད་ནས། །ཡང་ཡང་གསུངས་ལས་ལྷག་པ་ཅི། །དེ་ལས་གཞན་དོན་མཛད་ཚུལ་ནི། །གདོད་ནས་དག་པའི་ཆོས་ཀྱི་སྐུ། །ཀ་དག་དབྱིངས་ན་གཞི་འཛིན་པའི། །ཡེ་ཤེས་རྣམ་གསུམ་ཕྲ་བར་གནས། །དེ་ཡི་ཆ་ལས་མཚན་ཉིད་ནི། །འཛིན་པའི་ཡེ་ཤེས་རྣམ་ལྔ་དང་། །ཤེས་བྱ་མཁྱེན་པའི་ཡེ་ཤེས་ཀྱི། །འཆར་གཞི་དངོས་སུ་མ་ཤར་ཙམ། །ཡོད་པའི་རྩལ་གྱིས་ལྷུན་གྲུབ་སྒོར། །གདུལ་བྱའི་སྣང་ཚུལ་དང་བསྟུན་ནས། །ལོངས་སྤྱོད་རྫོགས་པའི་སྣང་བ་བཀོད། །དེ་ལས་ཚངས་ཆེན་བསྐལ་བའི་གཞི། །བཀོད་དེ་རང་བཞིན་སྤྲུལ་པ་སྐུའི། །སྣང་བ་ཉིད་དུ་བསྟན་པ་དང་། །མ་དག་འཁོར་བའི་སྒོ་ཉིད་ལས། །འགྲོ་བའི་སྣང་བ་དང་མཐུན་པའི། །སྟོན་པས་སེམས་ཅན་གནས་རིགས་ཀུན། །ཁྱབ་པར་བསྟན་ཅིང་འཁོར་བའི་མཚོ། །སྟོངས་པར་མཛད་དེ་ཐལ་འགྱུར་ལས། །དེ་ལྟར་གྲོལ་བའི་སེམས་ཉིད་ལ། །ཐུགས་རྗེ་མེད་པ་མ་ཡིན་ཏེ། །གཞི་ལ་གནས་པའི་ཡེ་ཤེས་ཀྱིས། །རང་བཞིན་ཤུགས་ཀྱི་འཆར་གཞི་བྱེད། །མཚན་ཉིད་འཛིན་པའི་ཡེ་ཤེས་ཀྱིས། །རྐྱེན་གྱིས་དག་པ་སྨིན་པར་བྱེད། །ཤེས་དང་ཤེས་བྱའི་ཡེ་ཤེས་ཀྱིས། །མོས་གུས་ཅན་ལ་དངོས་གྲུབ་སྟེར། །ཞེས་སོགས་རྒྱ་ཆེར་གསུངས་པ་ལགས།། །།དྲི་བ་ཉི་ཤུ་རྩ་དགུ་པར། །ཆོས་ཉིད་ཟད་པར་ཉེ་བ་ན། །སྐྱེ་འཇུག་གཉིས་ཀྱི་སོ་མཚམས་གང་། །འདི་དུས་འགྲོ་བ་སུམ་སྟོང་ལ། །རིག་པ་བཅུག་ཀྱང་གྲོལ་ཅེ་ན། །དེ་ཡི་ཡོན་ཏན་གྲོལ་ཚུལ་གང་། །ཞེས་དྲི་ལན་དུ་འདི་ལྟར་བརྗོད། །རང་བཞིན་མཆོག་གསང་རྫོགས་པ་ཆེའི། །སྣང་བ་བཞི་ཡི་རིམ་པ་ལས། །མངོན་སུམ་ཡར་ངོའི་ཟླ་བ་ལྟར། །གོང་འཕེལ་ལམ་དུ་བསྐྱེད་བསྲིངས་ནས། །ཚད་ཕེབས་ཟླ་བ་ཉ་གང་འདྲའི། །སྣང་བ་དབྱིངས་སུ་ཐིམ་པའི་མཚམས། །ཆོས་ཉིད་ཟད་པའི་མགོ་རྩོམ་དུས། །རྐང་ལག་བཞི་ཡི་སོར་མོའི་གདངས། །འོད་ལྔར་གསལ་བ་ཙམ་ཡོད་པའི། །སྐབས་འདིར་དབྱིངས་སུ་ཕར་འཇུག་དང་། །ཕྱིར་སྣང་ཉིད་དུ་ཚུར་ལྡོག་པའི། །ས་མཚམས་ཡིན་ལ་དེ་ཡི་ཚེ། །སྐུ་ཡི་སྣང་བ་དེ་ཉིད་ཀྱིས། །དངོས་སུ་གཞན་དོན་རྒྱ་ཆེན་པོ། །མི་འབྱུང་སྲིད་ན་སོར་མོ་ཡི། །འོད་ལ་རིག་པ་གཏད་པ་ཡིས། །ཕྱིར་སྣང་དང་ནི་རང་ལུས་ཀྱི། །འོད་གསལ་རྣམས་ཀྱང་ནང་དབྱིངས་སུ། །ཇེ་ཐིམ་ཇེ་ཐིམ་ལ་འགྲོ་ཞིང་། །ཐད་ཀའི་དངོས་སྣང་དག་པ་ལ། །ཤེལ་འོད་ནང་དུ་ཐིམ་པ་ལྟར། །ལུས་དང་སྣང་བའི་རང་གདངས་ཀུན། །ལོག་སྟེ་ནང་གསལ་ལྷུན་གྲུབ་དབྱིངས། །རིག་པ་ཆོས་སྐུར་འཚང་རྒྱའོ། །གལ་ཏེ་ཕྱིར་སྣང་ཚུར་ལོག་ན། །སྐུ་དེས་སངས་རྒྱས་མཛད་པ་དང་། །མཚུངས་པ་འགྲུབ་ཕྱིར་སྐྱེ་འཇུག་ལ། །དབང་བས་རིག་པ་སེམས་ཅན་ལ། །ཐུགས་རྗེས་གཏད་པས་ཀ་དག་གི །སྣང་བ་དེ་ཉིད་རང་ལོག་ནས། །འཁྲུལ་པའི་ཆོས་སུ་སྣང་བ་ཡི། །སྣང་བ་འདི་ཀུན་མེ་ལོང་གི །གཟུགས་བརྙན་ལྟ་བུར་སྣང་བ་དང་། །རང་གི་སྐུ་ཡང་ཆུ་ཟླའི་ཚུལ། །ཡེ་ཤེས་སྒྱུ་མའི་སྐུར་གྲུབ་པས། །འབྱུང་བའི་གནོད་པས་མི་ཤིགས་ལ། །སྣང་བ་ཟང་ཐལ་རྡོ་རྗེའི་སྐུ། །འཕོ་བ་ཆེན་པོ་ཞེས་བྱ་སྟེ། །ཨོ་རྒྱན་སངས་རྒྱས་གཉིས་པ་དང་། །སློབ་དཔོན་བི་མ་ལ་བཞིན་ནོ། །འོན་ཀྱང་གཞན་གྱི་ཆུ་བུར་མིག །མ་དག་སྣང་ངོར་རྡོས་བཅས་ལས། །ཟང་ཐལ་ཉིད་དུ་མི་མཐོང་སྟེ། །མཐོང་ལམ་མངོན་དུ་མ་བྱས་པས། །སངས་རྒྱས་མི་མཐོང་ཇི་བཞིན་ནོ། །དེ་ཚེ་སྐྱེ་དང་འཇུག་པ་ལ། །རང་དབང་ཐོབ་པའི་ནུས་པ་ཡིས། །སྐད་ཅིག་ཉིད་ལ་འཚང་རྒྱ་ཡང་། །རྒྱ་རུ་ཡོད་ལ་སེམས་ཅན་དོན། །འཁོར་བ་མ་སྟོངས་བར་དག་ཏུ། །བཞུགས་ནའང་རང་དབང་འབྱོར་བ་ཡིན། །དེ་ཡང་འདི་ལྟར་སྐྱེ་བ་ལ། །དབང་བས་ནང་དབྱིངས་འཇུག་ཁ་མར། །རིག་པ་སེམས་ཅན་སུམ་སྟོང་ལ། །བཅུག་པས་ཐམས་ཅད་དུས་གཅིག་གྲོལ། །སྲིན་བུ་རྣམས་ཀྱང་འོད་དུ་དེངས། །ཅི་ཕྱིར་སེམས་ཅན་ཐམས་ཅད་ཀུན། །རིག་པའི་དབྱིངས་སུ་མཉམ་པ་དང་། །ལས་ལ་བཟང་ངན་མེད་པའི་ཕྱིར། །སྐྱེ་བའི་དབང་གིས་ཅི་འདོད་པར། །སྤྲུལ་ནས་སེམས་ཅན་དོན་ཆེན་བྱེད། །དེ་བཞིན་འཇུག་པ་ལ་དབང་བས། །རིག་པ་བེམ་པོར་བཅུག་ན་ཡང་། །དེ་ཉིད་འགུལ་དང་སྒྲ་སྐད་འབྱིན། །པདྨ་དང་ནི་དཔག་བསམ་ཤིང་། །ནོར་བུ་ལ་སོགས་ཐམས་ཅད་ལས། །ཆོས་ཀྱི་སྒྲ་བྱུང་སེམས་ཅན་ཀུན། །སྨིན་དང་ཟས་གོས་ཆར་འབེབས་བྱེད། །གསང་བ་ས་བོན་རྒྱུད་ལས་ཀྱང་། །ནང་ལུས་ཟད་པའི་སར་ཕྱིན་ཚེ། །སོར་མོ་ལ་སོགས་དེ་བཞིན་སྣང་། །འདིར་གཏད་འབྱུང་བ་རང་དེངས་སོ། །སྐྱེ་དང་འཇུག་པའི་ཁྱད་པར་གྱི། །ཆོས་ཀུན་ཟད་པའི་རང་ས་ལ། །ཅིར་ཡང་འཛིན་པ་མེད་པར་ནི། །གནས་པ་ཡིན་ནོ་སྤྲུལ་པའི་སྐུ། །འདིས་ནི་འཇུག་པའི་ཤུགས་ཀྱིས་དབང་། །སྐྱེ་བའི་རང་དབང་སུས་ཐོབ་པ། །དེ་ཡང་དེ་ལ་གཏད་ནས་ནི། །ཡང་དུས་འདི་ལྟར་བྱས་པ་ནི། །སྣང་བའི་རང་སྒྲ་སིལ་སྐད་དེ། །མངོན་དུ་ལོག་ནས་འཁྲུལ་པར་སྣང་། །འདིས་ནི་སེམས་ཅན་དོན་ཀུན་བྱེད། །རིག་པ་མཉམ་པར་གཅིག་པའི་ཕྱིར། །སྟོང་ཕྲག་གསུམ་རྣམས་སེམས་ཅན་གྱི། །འཕོ་བ་ཆེན་པོ་འདིས་འགྲུབ་བོ། །ཞེས་གསུངས་དེ་ཕྱིར་སྐྱེ་འཇུག་གི། །སོ་མཚམས་ཆོས་ཉིད་ཟད་པའི་རྗེས། །ནང་དབྱིངས་འཇུག་ཁ་དེར་ཐོབ་པས། །འགྲོ་བའི་དོན་དུ་མི་ལྡོག་ན། །སེམས་ཅན་སུམ་སྟོང་བར་མ་དོར། །ཅིག་ཆར་གྲོལ་བར་བྱས་ནས་ནི། །ནང་དབྱིངས་གདོད་མར་ཕར་འཇུག་ལ། །བྱེད་ན་སྐྱེ་བ་ལ་དབང་བས། །ལྡོག་སྟེ་སུམ་སྟོང་རིམ་གྲོར་བྱེད། །དེ་ལྟར་སྐྱེ་འཇུག་རྣམ་གཉིས་ཀྱི། །ནུས་པས་བསྐལ་པ་རྡུལ་སྙེད་དུ། །ནོར་བུ་ས་ཡི་གཏེར་ཆེན་དང་། །ཆོས་ཀྱི་རྣམ་གྲངས་རྒྱ་མཚོ་དང་། །ཐབས་མཁས་གང་འདུལ་ཕྲིན་ལས་མཐུས། །བདག་ཅག་ཁམས་གསུམ་སེམས་ཅན་གྱི། །ཕན་པ་བསྒྲུབ་པའི་ཐབས་ཚུལ་ལ། །སྐད་ཅིག་ཉིད་ཀྱང་མི་གཡེལ་བའི། །ཐུགས་རྗེ་གཞན་ལས་རྨད་བྱུང་བ། །དུས་གསུམ་མཁྱེན་པ་པད་འབྱུང་དང་། །རིག་འཛིན་ཆེན་པོ་བི་མ་ལའི། །བཀའ་དྲིན་དྲན་པས་མཆི་མ་བཀུ། །ཀྱེ་མ་ཀྱི་ཧུད་འདྲེན་པ་གཉིས། །དེང་སང་བོད་ན་མ་བཞུགས་པས། །རྗེས་འཇུག་བུ་ཡི་སྙིང་ཁོང་གྲང་། །གདུང་བའི་ང་རོས་དེ་རིང་འབོད། །རེ་ལྟོས་གཞན་དུ་མ་མཆིས་པས། །ཐུགས་རྗེས་ཟུང་ཞིག་གུ་རུ་རྗེ། །ཞེས་ཀྱང་བར་སྐབས་ཚིགས་སུ་བཅད།། །།དྲི་བ་བཅུ་ཕྲག་གསུམ་པ་ལ། །ཉན་ཐོས་བསྐལ་པ་གྲངས་མེད་ན། །སངས་རྒྱས་ཐོབ་འདོད་དེ་ཉིད་ཀྱི། །ལྟ་སྤྱོད་ས་ལམ་ཅི་ལྟ་བུ། །ཞེས་པའི་ལན་ནི་འདི་ལྟར་རོ། །ཉན་ཐོས་ཐེག་པའི་ངོ་བོ་ནི། །ཐེག་ཆེན་བྱང་ཆུབ་སེམས་དཔའ་ལྟར། །གཞན་དོན་ལྷུར་ལེན་མི་བྱེད་པར། །རང་ཉིད་གཅིག་པུ་འཁོར་བ་ལས། །ཐར་འདོད་བློ་དེ་གང་ཟག་གིས། །བདག་མེད་རྟོགས་པའི་ཐབས་སུ་འགྱུར། །ངེས་ཚིག་རང་གི་སྟོན་པ་ལ། །ཆོས་ཉན་གཞན་ལའང་སྒྲོག་བྱེད་པས། །ཐོས་སྒྲོག་ཉན་ཐོས་ཞེས་བྱ་ལ། །དགོས་པ་འཁོར་བའི་སྡུག་བསྔལ་ལས། །ངེས་པར་འབྱིན་པའི་ཆོས་ཅན་ཏེ། །འབྲས་བུ་ལྷག་བཅས་ལྷག་མེད་ཀྱི། །དགྲ་བཅོམ་ཐོབ་པ་ཉིད་དུ་འདོད། །དབྱེ་ན་རྣམ་པ་གཉིས་ཡིན་ཏེ། །མདོ་སྡེ་པ་དང་བྱེ་བྲག་ཏུ། །སྨྲ་བ་གཉིས་ལས་ཕྱི་མ་ནི། །རགས་པ་ཀུན་རྫོབ་བདེན་པ་འདི། །གཡག་རྔ་དང་ནི་ནེའུ་གསིང་ལྟར། །ཚོགས་པ་གཅིག་ཏུ་སྣང་ན་ཡང་། །དོན་ལ་རྡུལ་ཕྲན་བསིལ་བུར་འདོད། །དེ་ཡང་གང་ཟག་གིས་ནི་བདག །མེད་པར་སྨྲ་ཡང་ཆོས་ཀྱི་བདག །རྡུལ་ཕྲན་སྐད་ཅིག་ཡོད་པ་རུ། །ཁས་ལེན་བདེན་པ་བཞིས་བསྡུས་པའི། །ཆོས་ལ་རྒྱུ་འབྲས་སྤང་བླང་དུ། །གོ་ནས་སྡུག་བསྔལ་ཤེས་བྱ་ཞིང་། །ཀུན་འབྱུང་སྤང་བྱ་ལམ་བརྟེན་བྱ། །འགོག་པ་ཐོབ་བྱའི་ཚུལ་ལ་བརྟེན། །སྤང་བྱ་བརྒྱ་ཕྲག་བཞི་དང་ནི། །བཅུ་བཞི་སྤངས་ནས་ཟད་པ་དང་། །མི་སྐྱེ་ཤེས་པའི་ཡེ་ཤེས་ནི། །མངོན་དུ་བྱས་ཏེ་གྲོལ་བར་འདོད། །མདོ་སྡེ་པ་ནི་དམིགས་བྱའི་ཡུལ། །བདེན་པ་བཞི་ལ་དམིགས་བྱེད་ཀྱིས། །ཤེས་པ་བཅུ་གཉིས་སུ་ཤེས་པས། །ཉོན་མོངས་བརྒྱད་ཅུ་རྩ་བརྒྱད་ཀུན། །སྤངས་ཏེ་ཡེ་ཤེས་རྟོགས་པར་འདོད། །དེ་ཡང་གང་ཟག་བདག་མེད་ནི། །བྱེ་བྲག་སྨྲ་དང་མཚུངས་ན་ཡང་། །ཆོས་ཁམས་ཕྱོགས་གཅིག་གིས་འཕགས་སོ། །ལམ་ལྔ་སྐྱེ་བའི་རིམ་པ་ལ། །གཉིས་ཀས་ནན་ཏན་བྱེད་པ་ན། །དུག་གསུམ་སྤྱི་ཡི་གཉེན་པོ་རུ། །བདག་མེད་པ་དང་སྒྱུ་མ་སྒོམ། །སོ་སོའི་གཉེན་པོར་འདོད་ཆགས་ལ། །མི་གཙང་བརྒྱད་དང་ཀེང་རུས་སྒོམ། །ཞེ་སྡང་ལ་ནི་བྱམས་པ་དང་། །གཏི་མུག་རྟེན་འབྲེལ་བཅུ་གཉིས་ནི། །ལུགས་འབྱུང་ལུགས་ལྡོག་ཉིད་སྒོམ་ཞིང་། །རྣམ་རྟོག་གཉེན་པོར་དབུགས་གྲངས་གཞལ། །བདག་མེད་དེ་ཡང་ཡུལ་དང་ནི། །ཡུལ་ཅན་འགག་པའི་མི་རྟོག་པ། །འགོག་པ་ཅི་ཡང་མེད་པ་སྒོམ། །ཐེག་པ་ཆེ་དང་གསང་སྔགས་སོ། །དེ་ཡི་བློ་ལ་མི་ཆུད་ཅིང་། །དཀར་པོ་རྣམ་པར་མཐོང་བ་སོགས། །དམན་པའི་ས་བརྒྱད་ལ་བརྟེན་ནས། །རྒྱུན་ཞུགས་ལན་ཅིག་ཕྱིར་འོང་དང་། །ཕྱིར་མི་འོང་བ་དགྲ་བཅོམ་སྟེ། །རེ་རེར་གནས་པ་གཉིས་གཉིས་སུ། །ཕྱེ་བས་སྐྱེས་བུ་ཆེན་པོ་ཡི། །རིམ་པ་བརྒྱད་ཅེས་ཡོངས་གྲགས་ལ། །དེ་ཕྱིར་རིག་པ་རང་ཤར་ལས། །ཉན་ཐོས་ཐེག་པ་འདི་ལྟ་སྟེ། །འཇུག་པའི་སྒོ་ནི་བདེན་པ་བཞི། །ཉན་ཐོས་སྤྱི་ཡི་འཇུག་སྒོའོ། །དབྱེ་བ་རྣམ་པ་གཉིས་འདོད་དེ། །བྱེ་བྲག་པ་དང་མདོ་སྡེ་པའོ། །བྱེ་བྲག་པ་ཡི་ལྟ་བ་ནི། །ཕུང་པོ་ཁམས་དང་སྐྱེ་མཆེད་ལ། །གཡག་རྔ་ནེའུ་གསེང་ཚུལ་དུ་འདོད། །རང་གི་བློ་ཡིས་བལྟས་གྱུར་ན། །རྡུལ་དང་རྡུལ་ཕྲན་དག་ཏུ་འདོད། །དེ་བཞིན་རྣམ་པར་གཞིགས་ནས་ནི། །སྟོང་པ་ཉིད་དུ་སྒོམ་པའོ། །མདོ་སྡེ་པ་ཡི་ལྟ་བ་ནི། །ཁ་ཏོན་བྱས་པའི་རང་བཞིན་དང་། །ཐོས་པ་བསམ་པ་སྒོམ་པ་གསུམ། །ཤེས་རབ་རྣམ་གསུམ་སྒོམ་པ་ཡིས། །ས་བཅུའི་འབྲས་བུ་ཐོབ་པར་འདོད། །ཉན་ཐོས་སྤྱི་ཡི་རྣམ་པ་ནི། །བདེན་པ་རྣམ་པ་བཞི་སྒོམ་ཞིང་། །འབྲས་བུ་རྣམ་པ་བཞིར་འདོད་དོ། །དེ་ཡང་སྒོམ་ལུགས་འདི་ལྟ་སྟེ། །འགོག་པ་སྒོམ་པར་འདོད་པ་ལ། །ཀུན་འབྱུང་སྤང་བར་འདོད་པའོ། །འགོག་པ་སྒོམ་ལུགས་འདི་ལྟ་སྟེ། །ཕྱི་ཡི་འབྱུང་བ་འདི་དག་ལ། །མི་ཆགས་གནས་སུ་ཞུགས་ནས་ནི། །དང་པོ་ཟས་ལ་སྒོམ་པར་བྱེད། །ཟས་ལ་གོམས་པར་གྱུར་པ་དང་། །བསམ་གཏན་ཏིང་འཛིན་སྒོམ་བྱེད་དོ། །བསམ་གཏན་མི་རྟོག་ཆིག་ཚུགས་སྒོམ། །རྒྱལ་བ་བྱམས་པའི་བསྟན་པ་ལ། །འབྲས་བུ་ཐོབ་པར་འདོད་པའོ། །ཀུན་འབྱུང་སྤོང་བ་འདི་ལྟ་སྟེ། །ཟས་ཀྱི་འདུ་ཤེས་བྲལ་བ་དང་། །ཀུན་འབྱུང་རྒྱུན་ཐག་ཆོད་པར་འདོད། །དེ་ཡང་ཞེ་སྡང་གཉེན་པོར་སྒོམ། །ཉོན་མོངས་ཐམས་ཅད་སྤོང་བའོ། །ས་ལམ་སྒོམ་པ་འདི་ལྟ་སྟེ། །འདོད་ཆགས་གཉེན་པོར་སྒོམ་པ་དང་། །གཏི་མུག་གཉེན་པོར་སྒོམ་པ་དང་། །དེ་བཞིན་ལམ་གྱིས་སྒོམ་པ་ནི། །སྡུག་བསྔལ་སྤོང་བར་འདོད་པའོ། །ལམ་གྱི་སྒོམ་ལུགས་འདི་ལྟ་སྟེ། །འདོད་ཆགས་དག་གི་གཉེན་པོ་རུ། །རང་གི་དཔྲལ་བའི་དཀྱིལ་འཁོར་དུ། །ཀེང་རུས་དཀར་པོ་མཐེ་བོང་ཙམ། །དཀར་པོ་འོད་ཆགས་སྒོམ་པ་ལས། །དེ་ལས་བསྐྱེད་ནས་མགོ་བོ་ཙམ། །དེ་ལས་ལུས་པོ་ཙམ་སྒོམ་སྟེ། །དེ་ནས་རང་གིས་མཐོང་ཡུལ་ཙམ། །དེ་ནས་ཅིར་སྣང་ཐམས་ཅད་སྒོམ། །དེ་ལྟར་སྟོང་གསུམ་དཀར་པོ་སྟེ། །དེ་ལྟར་དཀར་པོར་གོམས་གྱུར་ནས། །འདོད་ཆགས་སྡུག་བསྔལ་སྤོང་བའོ། །གཏི་མུག་སྡུག་བསྔལ་སྤོང་བ་ནི། །རང་གི་སྤྱི་བོའི་གཙུག་ཏུ་ཡང་། །མེ་དམར་གསལ་ལ་དྭངས་པ་གཅིག །བསྒོམས་པས་ཤེས་པ་གསལ་བ་དང་། །སེམས་ནི་སྟོང་པར་འདོད་པའོ། །དེས་ནི་གཏི་མུག་སྡུག་བསྔལ་སྤོང་། །དེ་ལྟར་རྣམ་བཞི་བསྒོམས་པ་ཡིས། །འབྲས་བུ་རྣམ་པ་བཞི་ཐོབ་བོ། །འབྲས་བུ་བཞི་པོ་གང་ཞེ་ན། །འགོག་པ་བསྒོམས་པའི་འབྲས་བུ་ནི། །རྒྱུན་དུ་ཞུགས་པ་ཐོབ་པ་སྟེ། །རབ་ཏུ་དགའ་བ་ཐོབ་པ་ནས། །དེ་བཞིན་ས་བདུན་མན་ཆད་དོ། །ཀུན་འབྱུང་བསྒོམས་པའི་རང་བཞིན་གྱིས། །ལན་ཅིག་ཕྱིར་མི་འོང་བ་ཐོབ། །ས་བརྒྱད་མན་ཆད་ཐོབ་པའོ། །ལམ་བསྒོམས་པ་ཡི་ཡོན་ཏན་གྱིས། །དགྲ་བཅོམ་འབྲས་བུ་ཐོབ་པ་ནི། །ས་བཅུའི་མཐར་ཕྱིན་ཐོབ་པའོ། །ས་དང་ལམ་ལ་གནས་པའི་ཚེ། །ཉན་ཅིང་ཐོས་པར་བྱེད་པའོ། །ས་བདུན་མན་ཆད་སེམས་དཔའ་ནི། །རང་རང་དཔོན་ལ་ཉན་པའོ། །ས་བརྒྱད་ཡན་ཆད་སེམས་དཔའ་ནི། །སྤྲུལ་པའི་སྐུ་ལ་ཉན་པར་འདོད། །དེ་ཡང་དངོས་པོར་མཐོང་མེད་དེ། །བྱིན་གྱིས་བརླབས་ཀྱིས་ཐོས་པའོ། །ཉན་ཐོས་ཐེག་པ་དེ་ལྟར་འདོད། །གསུངས་པས་ཤིན་ཏུ་གོ་སླ་མོད། །དེ་བཞིན་རང་རྒྱལ་ཐེག་པ་ཡིས། །ངོ་བོ་རང་དོན་ཕྱོགས་གཅིག་པས། །སློབ་དཔོན་ལ་ནི་མ་བརྟེན་པར། །བྱང་ཆུབ་སྲིད་མཐར་མངོན་བྱེད་ཐབས། །བདག་མེད་ཕྱེད་དང་གཉིས་རྟོགས་ཏེ། །དེ་ཡང་འདི་ལྟར་ཤེས་པར་བྱ། །ཉན་ཐོས་ཀྱི་ནི་གང་ཟག་གིས། །བདག་མེད་རྟོགས་ཀྱང་ཆོས་ཀྱི་བདག །མེད་པ་ཇི་བཞིན་མ་རྟོགས་ལ། །རང་སངས་རྒྱས་ཀྱིས་དེའི་སྟེང་དུ། །ཆོས་ཀྱི་ཕྱེད་ཆ་ཕྱི་གཟུང་བ། །མེད་པར་རྟོགས་ཀྱང་ནང་གི་ནི། །འཛིན་པ་མེད་པར་མ་རྟོགས་པས། །མངོན་རྟོགས་རྒྱན་ལས་དེ་སྐད་དུ། །གཟུང་དོན་རྟོག་པ་སྤོང་ཕྱིར་དང་། །འཛིན་པ་མི་སྤང་ཕྱིར་དང་ནི། །རྟེན་གྱི་བསེ་རུ་ལྟ་བུའི་ལམ། །ཡང་དག་བསྡུས་པས་ཤེས་པར་བྱ། །ཞེས་གསུངས་དེ་ཡི་ངེས་ཚིག་ནི། །རང་ཉིད་གཅིག་པུ་སངས་རྒྱས་སུ། །འདོད་ལ་རང་སངས་རྒྱས་སུ་བརྗོད། །དགོས་པ་འཁོར་བ་ལས་ཐར་ཕྱིར། །འབྲས་བུ་ཚོགས་དང་བསེ་རུ་ཡི། །དགྲ་བཅོམ་རྣམ་པ་གཉིས་ཡིན་ནོ། །འདི་ཡང་རིག་པ་རང་ཤར་ལས། །ཨ་ཧོ་གསང་བའི་བདག་པོ་ཉོན། །རང་རྒྱལ་མདོ་སྡེའི་ཐེག་པ་ནི། །འཇུག་པའི་སྒོ་ནི་རྟེན་འབྲེལ་བཅུ་གཉིས་སོ། །རྟོགས་པའི་ལྟ་བ་གང་ཟག་བདག་མེད་ལ། །ཆོས་ཀྱི་བདག་ཕྱེད་ཡོད་པར་ལྟ་བའོ། །བསྲུང་བའི་ཚུལ་ཁྲིམས་ཉིས་བརྒྱ་ལྔ་བཅུ་སྲུང་། །སྒོམ་པའི་རིམ་པ་མི་རྟོག་ཆོས་ཉིད་བསྒོམ། །ཕྱི་དང་ནང་གི་རྟེན་འབྲེལ་རྣམས། །གོམས་ནས་སྟོབས་སུ་གྱུར་པ་དང་། །འབྲས་བུ་མཐར་ཕྱིན་ཚད་དུ་འདོད། །དེ་ཡང་དཔེ་མཚོན་འདི་ལྟ་སྟེ། །དཔེར་ན་དུར་ཁྲོད་རོ་བཞིན་ཏེ། །དུར་ཁྲོད་དག་ཏུ་སོང་ནས་ནི། །རོ་འདི་དང་པོ་གང་ལས་བྱུང་། །ད་ལྟ་འདི་ཡི་དངོས་པོ་ཅི། །སྙམ་དུ་དཔེ་ཡིས་མཚོན་པར་བྱེད། །དེ་ཡང་མ་རིག་པ་ལས་བྱུང་། །མ་རིག་པ་ལས་འདུ་བྱེད་དོ། །འདུ་བྱེད་རྣམ་པར་ཤེས་པའོ། །རྣམ་པར་ཤེས་ལས་མིང་འབྱུང་ཞིང་། །མིང་ལས་གཟུགས་ཀྱི་རང་བཞིན་འབྱུང་། །གཟུགས་ལས་སྐྱེ་མཆེད་རྣམ་དྲུག་འབྱུང་། །སྐྱེ་མཆེད་དྲུག་ལས་རེག་པ་འབྱུང་། །རེག་ལས་ཚོར་བ་འབྱུང་བར་འགྱུར། །ཚོར་ལས་སྲེད་པ་འབྱུང་བར་འགྱུར། །སྲེད་པ་ལས་ནི་ལེན་པ་འབྱུང་། །ལེན་པ་ལས་ནི་སྲིད་པ་འབྱུང་། །སྲིད་པ་ལས་ནི་སྐྱེ་བ་འབྱུང་། །སྐྱེ་བ་ལས་ནི་རྒས་པ་འབྱུང་། །རྒས་པ་ལས་ནི་ན་བ་འབྱུང་། །ན་བ་ལས་ནི་ཤི་བ་འབྱུང་། །དེ་བཞིན་རྟེན་འབྲེལ་བཅུ་གཉིས་སྒོམ། །དེ་ལྟར་བསྒོམས་པའི་ཡོན་ཏན་གྱིས། །ས་བཅུ་གཉིས་ཀྱི་འབྲས་བུ་ཐོབ། །མི་སྡུག་རྣམ་པར་བརྒྱད་སྒོམ་སྟེ། །དུར་ཁྲོད་ཕྱོགས་སུ་ཕྱིན་ནས་ནི། །རང་གི་ལུས་ལ་འདི་ལྟར་རྟོག །དང་པོ་རྣམ་པར་སྔོ་བར་འདོད། །དེ་ནས་རྣམ་པར་དམར་བ་དང་། །རྣམ་པར་གནག་པ་དག་དང་ནི། །དེ་བཞིན་རྣམ་པར་བམ་པ་དང་། །རྣམ་པར་ཟོས་པ་དག་དང་ནི། །དེ་བཞིན་རྣམ་པར་འབུ་ཞུགས་དང་། །རྣམ་པར་འཐོར་བ་དག་ཏུ་འདོད། །དེ་བཞིན་རྣམ་པར་དཀར་བའོ། །དེ་ནི་འདོད་ཆགས་གཉེན་པོ་རུ། །མི་སྡུག་རྣམ་བརྒྱད་སྒོམ་པའོ། །ཉན་དང་ཐོས་པ་མེད་པ་སྟེ། །དེ་ཕྱིར་རང་རྒྱལ་ཐེག་པར་འདོད། །ཅེས་པས་ཤིན་ཏུ་གསལ་བར་བསྟན། །དེ་ལྟར་ཐེག་དམན་རྣམ་གཉིས་ལས། །སྟོང་པ་ཉིད་དང་སྙིང་རྗེ་སྟེ། །གཉིས་ཀའི་སྒོ་ནས་ཁྱད་པར་དུ། །འཕགས་པའི་བྱང་སེམས་སྡེ་སྣོད་ཀྱི། །རང་བཞིན་ཟུར་ཙམ་སྨོས་པ་ན། །ཐེག་ཆེན་འདི་ཡི་ངོ་བོ་ནི། །ཆོས་རྣམས་ནམ་མཁའ་ལྟར་རྟོགས་ཤིང་། །སྙིང་རྗེས་གཞན་དོན་རླབས་པོ་ཆེ། །སྤྱོད་པ་རྒྱུའམ་ཐབས་ཡིན་ལ། །ངེས་ཚིག་ཐར་པ་ཆེན་པོ་ཡི། །གྲོང་ཁྱེར་དམ་པར་ཁྲིད་པས་ན། །ཐེག་པ་ཆེན་པོ་ཞེས་བྱའོ། །དགོས་ཆེད་བློ་གྲོས་ཆེན་པོ་རྣམས། །སངས་རྒྱས་ཐོབ་པར་བྱེད་པའོ། །འབྲས་བུ་ལམ་ལྔ་མཐར་ཕྱིན་ནས། །ཀུན་ཏུ་འོད་ཀྱི་ས་ལ་གནས། །དེ་ཡང་ལམ་གྱི་ངོ་བོ་ནི། །དབང་རྣོན་སེམས་སྟོབས་ཆེན་པོ་ཡིས། །བདེན་པ་གཉིས་ཀྱི་རང་བཞིན་ནི། །ཤེས་པར་བྱས་ནས་འཇུག་པར་བྱེད། །དབྱེ་ན་གྲུབ་མཐའ་གཉིས་ཡིན་ཏེ། །སེམས་ཙམ་པ་དང་དབུ་མའོ། །དང་པོ་ལ་ཡང་ནང་གསེས་སུ། །ཕྱེ་ན་འདི་ལྟར་ཤེས་པར་བྱ། །རྣམ་བདེན་པ་དང་རྣམ་རྫུན་ལས། །སྔ་མ་སེམས་ཙམ་རྣམ་བདེན་པས། །སྣང་བ་དཀར་དམར་སྣ་ཚོགས་སུ། །སྣང་བའི་རང་བཞིན་འདི་ཐམས་ཅད། །རང་གི་ཤེས་པའི་རྣམ་པ་ནི། །ཕྱི་རོལ་ཤར་བ་ཙམ་ཡིན་ཏེ། །རྫིང་འགྲམ་ཤིང་གི་ཡལ་ག་ལ། །བཏགས་པའི་ནོར་བུ་ཀེ་ཀེ་རུའི། །གཟུགས་བརྙན་ཆུ་ནང་ཤར་བའི་ཚེ། །ནོར་བུའི་རྣམ་པ་ཕྱི་རོལ་དུ། །ཤར་བ་བཞིན་ནོ་ཞེས་འདོད་དོ། །དབྱེ་ན་རྣམ་པ་གསུམ་ཡོད་དེ། །སྐབས་འདིར་རྒྱས་པར་མ་སྤྲོས་སོ། །དེ་བཞིན་སེམས་ཙམ་རྣམ་རྫུན་པས། །ཕྱི་ཡི་སྣང་བ་སྣ་ཚོགས་ཀུན། །ཤེས་པའི་ཆ་ལ་འཁྲུལ་སྣང་དུ། །སྣང་བའི་བག་ཆགས་རྫུན་པའི་ཆོས། །ཤེས་པ་བདེན་པར་མ་ཡིན་ལ། །དེ་ཉིད་འཇལ་བྱེད་ཤེས་པ་ཡང་། །རྫུན་པས་གཞལ་གྱིས་མྱོང་བ་ཡིས། །བདེན་པས་གཞལ་བ་ནི་མེད་དེ། །ཡུལ་ཤེས་གཉིས་ཀའང་འཁྲུལ་སྣང་ཆོས། །རྫུན་པའི་རང་བཞིན་ཅན་དུ་འདོད། །དབྱེ་ན་དྲི་བཅས་དྲི་མེད་ཀྱིས། །འདོད་པ་རྣམ་གྲངས་གཉིས་ཡོད་དོ། །གཉིས་པ་དབུ་མ་ཆེན་པོ་ལ། །རང་རྒྱུད་པ་དང་ཐལ་འགྱུར་ཏེ། །རྣམ་གྲངས་གཉིས་སུ་དབྱེ་བ་ལས། །རང་རྒྱུད་པ་ཡི་དགོངས་པ་ནི། །འདི་ལྟར་སྣ་ཚོགས་སྣང་བ་ཡི། །རྣམ་པ་དང་ནི་འཇལ་བྱེད་ཀུན། །མེད་པ་གསལ་སྣང་ཙམ་དུ་ཡང་། །མ་ཟད་འདི་ནི་དོན་དམ་པར། །སོ་སོ་རང་གི་རིག་པ་ཡི། །ཡེ་ཤེས་དེ་ཡང་རང་བཞིན་གྱི། །ངོ་བོ་མེད་པ་ཉིད་དུ་འདོད། །དབྱེ་ན་རང་རྒྱུད་གོང་འོག་གི །ལྡོག་པ་ཤིན་ཏུ་ཕྲ་བར་ཡོད། །ཐལ་འགྱུར་པ་ཡི་དགོངས་པ་ནི། །དོན་དམ་ཉིད་དུ་མ་གྲུབ་དང་། །ཀུན་རྫོབ་སྣང་ཙམ་སྒྱུ་མ་རུ། །གྲུབ་པ་སོགས་ཀྱིས་གཞི་ཐམས་ཅད། །བཀག་ནས་ཡོད་མེད་མཐའ་བྲལ་ཆེའི། །རང་བཞིན་འདི་ལ་ཁས་ལེན་གྱི། །མཚན་མ་ཀུན་དང་བྲལ་བར་འདོད། །དེ་སྐད་དུ་ནི་རྩོད་བཟློག་ལས། །གལ་ཏེ་ངས་དམ་བཅས་འགའ་ཡོད། །དེ་ཚེ་ང་ལ་སྐྱོན་འདི་ཡོད། །ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་དང་སླར་ཡང་འདི་སྐད་དུ། །དགག་བྱ་ཅི་ཡང་མེད་པས་ན། །ང་ནི་ཅི་ཡང་མི་འགོག་གོ །དེ་ཕྱིར་དགག་པ་བྱེད་དོ་ཞེས། །སྐུར་པ་དེ་ནི་ཁྱོད་ཀྱིས་བཏབ། །ཅེས་གསུངས་དེ་ཕྱིར་འདི་ཉིད་ལ། །བློ་ཡིས་བཀོད་པའི་གྲུབ་པའི་མཐའ། །གང་ཡང་མེད་དེ་སྤྲོས་པ་ཀུན། །དབྱིངས་སུ་ཞི་བའི་བདག་ཉིད་ཅན། །འདི་ནི་སངས་རྒྱས་པ་རྣམས་ཀྱི། །གྲུབ་མཐའ་སྨྲ་བའི་རྩེ་མོ་ཡིན། །རང་བཞིན་རྫོགས་པ་ཆེན་པོ་ཡི། །མ་བཅོས་ལྷུག་པའི་ཀ་དག་ལ། །གསལ་འགྲིབ་མེད་པའི་རང་བཞིན་དུ། །ཡེ་ཤེས་ཆེན་པོ་འདི་བཞུགས་སོ། །ཡིད་ཀྱིས་དཔྱོད་དང་བཤད་པ་ཡི། །སྤྲོས་བྲལ་དབུ་མ་ཆེན་པོ་འདིའི། །གྲུབ་མཐའ་འཛིན་པ་ཕལ་ཆེར་ལ། །ཁས་ལེན་ཙམ་ཞིག་མ་ལགས་པ། །ཉམས་ལེན་ཡོད་པར་མ་མངོན་ནོ། །ཨེ་མ་རི་རྒྱལ་ལྷུན་པོ་ཡི། །རྩེ་ནས་རི་ཕྲན་ཐམས་ཅད་ཀུན། །ལག་པའི་མཐིལ་གྱི་སྐྱུ་རུ་ར། །བཞིན་དུ་མཐོང་བ་ངོ་མཚར་ཅན། །ཅི་ཕྱིར་ཉན་རང་བྱང་སེམས་ཀྱི། །བསྟན་པའི་སྒོ་རུ་ཞུགས་པ་ལས། །རྟོགས་པའི་རང་བཞིན་མ་སྦྱངས་ཏེ། །ཐེག་མཆོག་ངེས་གསང་ཨ་ཏི་ཡི། །དོན་བརྒྱུད་སྙིང་ལ་བབས་པ་ལས། །འོག་མ་ཀུན་གྱི་རྣམ་འབྱེད་མཐོང་། །འོན་ཏང་མང་པོ་མི་སྨྲ་བར། །ལྐུགས་པའི་ངང་ཚུལ་ལ་གནས་ཏེ། །སེམས་འདས་ཡེ་ཤེས་དབུ་མའི་ཀློང་། །རིག་པ་གདར་ཤ་གཅོད་པ་ལ། །དབེན་པར་ཡེངས་སུ་སྐད་ཅིག་ཀྱང་། །མེད་པས་སུ་ལས་འབྲེལ་པ་འདི། །གྲུབ་ཐོབ་ཀུན་གྱི་རྣམ་ཐར་ཡིན། །དེ་ཕྱིར་ཉན་ཐོས་ཐེག་པ་ཡིས། །ལྟ་སྤྱོད་དྲིས་པའི་ཞར་ཙམ་དུ། །ཤིང་རྟ་ཆེན་པོ་ཀླུ་སྒྲུབ་དང་། །དེ་དང་དབྱེར་མེད་ཀློང་ཆེན་པའི། །དགོངས་པ་གཅིག་ཏུ་དྲིལ་ནས་ཀྱང་། །དམན་པའི་གོང་མ་རྣམ་གཉིས་ཀྱང་། །མདོ་ཙམ་བཤད་དེ་དེ་ཉིད་ཀྱང་། །ལུང་གིས་སྐྱོར་ན་ཁྱད་པར་འཕགས། །དེ་ཕྱིར་རིག་པ་རང་ཤར་ལས། །བྱང་ཆུབ་སེམས་དཔའི་ཐེག་པ་ནི། །འཇུག་པའི་སྒོ་ནི་བདེན་པ་གཉིས། །དོན་དམ་དང་ནི་ཀུན་རྫོབ་བོ། །བསྲུང་བའི་ཚུལ་ཁྲིམས་ཡལ་ག་ནི། །སྡོམ་པ་བརྒྱད་ཅུ་རྩ་ལྔའོ། །ལྟ་བ་སྟོང་ཉིད་ཡེ་ཤེས་སོ། །དོན་དམ་ཀུན་རྫོབ་འདི་ལྟ་སྟེ། །ཀུན་རྫོབ་རྣམ་པ་གཉིས་སུ་འདོད། །ལོག་པ་དང་ནི་ཡང་དག་གོ །ལོག་པའི་ཀུན་རྫོབ་འདི་ལྟ་སྟེ། །བརྟག་པར་སྣང་བ་ཐམས་ཅད་ཀུན། །མཐུན་པར་སྣང་ལ་དོན་བྱེད་ནུས། །བརྟགས་ན་ངོ་བོ་ཉིད་ཀྱིས་དབེན། །དོན་ནི་མེད་པ་ལྟར་སྣང་ངོ་། །དེ་ནི་ལོག་པའི་ཀུན་རྫོབ་བོ། །ཡང་དག་ཀུན་རྫོབ་འདི་ལྟ་སྟེ། །དགེ་བ་བཅུ་ཡི་ལས་རྣམས་དང་། །དཀར་པོར་གྱུར་པའི་བསམ་པ་དང་། །མོས་པའི་བསམ་པ་ཇི་སྙེད་པ། །ཡང་དག་ཀུན་རྫོབ་ཆེན་པོར་འདོད། །སྦྱིན་པ་ལ་སོགས་ཚུལ་ཁྲིམས་དང་། །དེ་བཞིན་ཏིང་འཛིན་ལ་སོགས་རྣམས། །ཡང་དག་ཀུན་རྫོབ་ཆེན་པོའོ། །དོན་དམ་ལ་ཡང་རྣམ་པ་གཉིས། །མཚན་མ་ཚིག་གི་དོན་དམ་དང་། །ཡང་དག་སེམས་ཀྱི་དོན་དམ་མོ། །མཚན་མ་ཚིག་གི་དོན་དམ་གྱིས། །ཐམས་ཅད་སུན་འབྱིན་རྩོད་པའོ། །དེ་ཡང་ཚད་མའི་རིག་པ་ནི། །གང་དེ་ཉིད་ལ་དེ་ལྟར་སྣང་། །ཚིག་གི་སྟོང་པ་ཆེན་པོ་ལས། །དོན་ལ་སྟོང་ཞིང་མ་རྟོགས་པའོ། །མཚན་མ་ཚིག་གི་དོན་དམ་མོ། །ཡང་དག་སེམས་ཀྱི་དོན་དམ་ནི། །སྟོང་པ་ཅང་མེད་སྒོམ་པར་འདོད། །དཔེར་ན་ནམ་མཁའ་སྟོང་པ་བཞིན། །སྟོང་པའི་དོན་བཞིན་དེ་བཞིན་ཉིད། །སྟོང་ཉིད་ཕྱང་ཆད་མུ་མེད་དོ། །ཞེས་ནི་སྤྱོད་ཅིང་ཆགས་པའོ། །ལམ་ནི་འདི་ལྟར་འདོད་པའོ། །ས་ལ་སྦྱང་བར་འདོད་པའོ། །དེ་ཡང་དྲོད་སྐྱེ་བཟོད་པ་དང་། །རྩེ་མོ་འཇིག་རྟེན་ཆོས་མཆོག་གོ །དྲོད་ལ་རྣམ་པ་གསུམ་གྱིས་བསྟན། །ཕྱི་དང་ནང་དང་གཉིས་ཀའོ། །ཕྱི་ཡི་དྲོད་སྐྱེ་འདི་ལྟ་སྟེ། །གཉིས་པོ་དྲི་མ་མེད་པ་ལ། །དངོས་པོར་སྣང་བ་སྟོང་པ་སྐྱེ། །དེ་ནི་ཏིང་འཛིན་ཉམས་ལེན་ཏེ། །ས་གཉིས་དག་ལ་སྐྱེ་བར་གསུངས། །ནང་གི་དྲོད་ནི་དྲུག་པ་ལ། །སྟོང་པ་རིག་བྱེད་དག་ཏུ་རྟོགས། །གཉིས་ཀའི་དྲོད་ནི་འདི་ལྟ་སྟེ། །བདུན་པ་དག་ལས་སྐྱེ་བར་གསུངས། །བརྒྱད་པ་བཟོད་པ་ཐོབ་པ་སྟེ། །དགུ་པ་རྩེ་མོ་མཐར་ཕྱིན་ནོ། །བཅུ་པ་འཇིག་རྟེན་ཆོས་ཀྱི་མཆོག །དེ་བཞིན་ས་བཅུ་ཐོབ་པར་འདོད། །དེ་ནི་བྱང་ཆུབ་ཐེག་པ་སྟེ། །སྟོང་པའི་ཚིག་མེད་ཡི་གེ་མེད། །ཅང་མེད་སྟོང་པར་འདོད་པའོ། །ཞེས་དང་ཁྱད་པར་འདི་ཡི་གཞུང་། །དབུ་མ་རིག་པའི་ཚོགས་དྲུག་སྟེ། །རྩ་བ་ཤེས་རབ་ཐ་སྙད་དྲུག །རིག་པ་དྲུག་ཅུ་རྩོད་བཟློག་དང་། །ཞིབ་མོ་རྣམ་འཐག་སྟོང་ཉིད་ནི། །བདུན་ཅུ་པའོ་དེ་ཡང་ནི། །དཔལ་མགོན་འཕགས་པ་ཀླུ་སྒྲུབ་ཀྱིས། །རྒྱལ་བ་བུ་རམ་ཤིང་པའི་བཀའ། །དང་པོ་བདེན་བཞིའི་ཆོས་འཁོར་གྱི། །འགྲེལ་པར་གཏམ་གྱི་ཚོགས་མཛད་ལ། །བར་པ་མཚན་ཉིད་མེད་པ་ཡི། །འཁོར་ལོའི་འགྲེལ་པར་རིགས་ཚོགས་མཛད། །ཐ་མ་དོན་དམ་རྣམ་ངེས་ཀྱི། །འགྲེལ་པར་བསྟོད་པའི་ཚོགས་མཛད་པས། །འཛམ་གླིང་མཛེས་པའི་རྒྱན་གྱིས་མཆོག །དེ་ཕྱིར་འདི་ཡི་བསྟན་བཅོས་ཀྱང་། །བཀའ་དང་ཁྱད་པར་མེད་པར་བཞེད། །ཤིང་རྟ་ཆེན་པོ་འདི་ཡི་སྲོལ། །བོད་དུ་ཡིན་ཚུལ་ཇི་བཞིན་པར། །རང་དབང་བསྒྱུར་ནས་འགྲེལ་པ་ལ། །ཀུན་མཁྱེན་ངག་གི་དབང་པོ་དེར། །མཚུངས་ཟླར་འོས་པ་འགའ་ཡང་མེད། །དེ་ཚུལ་ཤིང་རྟ་ཆེན་མོ་དང་། །གྲུབ་མཐའི་མཛོད་ལ་རྟོགས་པར་བྱ།། །།དྲི་བ་སུམ་ཅུ་རྩ་གཅིག་པར། །གསང་སྔགས་ཚེ་གཅིག་གྲོལ་ཅེས་པའི། །དེ་ཡི་ལྟ་སྤྱོད་ས་ལམ་གང་། །དབང་རྣོན་ཤེས་རབ་ཆེན་པོ་ཉིད། །སྐད་ཅིག་གཅིག་གིས་གྲོལ་ཅེས་པའི། །དེ་ཡི་གནད་དོན་མཚན་ཉིད་གང་། །ཞེས་དྲི་ལན་དུ་འདི་སྐད་བརྗོད། །སྤྱིར་ནི་སྔགས་ཀྱི་ཐེག་པ་འདི། །མཚན་ཉིད་རྒྱུ་ཡི་ཐེག་པ་ལས། །ཁྱད་པར་བཞི་ཡིས་འཕགས་པ་སྟེ། །མཚན་ཉིད་རྒྱུ་ལ་འབད་རྩོལ་གྱིས། །ཚོགས་ཆེན་ཁོ་ནས་བསྒྲུབ་པ་ལས། །སྔགས་སུ་དེ་ལ་མ་ལྟོས་པར། །འབྲས་བུ་ཡོངས་སུ་སྨིན་ཟིན་པས། །འབད་རྩོལ་ཆུང་ངུས་འགྲུབ་པས་འཕགས། །རྒྱུ་ནས་ལམ་ལྔ་ས་བཅུའི་འགྲོས། །བསྐལ་པ་མང་པོར་དཀའ་ཚེགས་ཀྱིས། །སྤྱད་ནས་སངས་རྒྱས་ཐོབ་པ་དེ། །སྔགས་སུ་འདི་འམ་བར་མ་དོ། །ཐ་མའང་སྐྱེ་བ་བརྒྱུད་ནས་ནི། །མྱུར་པོར་སངས་རྒྱས་འགྲུབ་པས་འཕགས། །རྒྱུ་ནས་བདེན་པ་མཐོང་བ་ལའང་། །ཚོགས་ཆེན་དཔག་མེད་བསག་དགོས་ལ། །སྔགས་སུ་ཚོགས་ཀྱི་འཁོར་ལོ་སོགས། །ཕྲ་མོས་འགྲུབ་པས་ཁྱད་པར་འཕགས། །རྒྱུ་ནས་དྲང་དོན་ངེས་དོན་དང་། །དགོངས་ལྡེམ་རྣམ་པ་བཞིས་བསྟན་ནས། །ལམ་ལ་ཐད་དྲང་མི་སྟོན་པ། །སྔགས་སུ་ཅིག་ཆར་དྲང་ཐད་དུ། །བསྟན་པས་བར་ཆད་ཉུང་བས་འཕགས། །དེ་ཕྱིར་ཚུལ་གསུམ་སྒྲོན་མེ་ལས། །དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོས་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་གསུངས་རང་བཞིན་རྒྱས་པ་རུ། །དབྱེ་ན་རྣམ་པ་གཉིས་ཡིན་ཏེ། །རྫོགས་ཆེན་རིག་པ་རང་ཤར་ལས། །རྡོ་རྗེའི་ཐེག་པ་རྣམ་པ་གཉིས། །ཕྱི་པ་ཐུབ་པ་རྒྱུད་དང་ནི། །ནང་པ་ཐབས་ཀྱི་རྒྱུད་དུ་གསུངས། །ཞེས་སོ་དེ་ཡང་གསང་སྔགས་ལ། །རྒྱུད་དུ་འཇོག་པ་གང་ཞེ་ན། །གཙོ་བོར་རང་གི་རིག་པའི་རྒྱུད། །དབྱིངས་ཀྱི་འོད་གསལ་འཇལ་བས་ན། །རྒྱུད་ཅེས་བྱ་བའི་མིང་དུ་འགྲུབ། །དེ་ཡང་དང་པོ་ཕྱི་རྒྱུད་ལ། །རྣམ་པ་གསུམ་དུ་ཡོད་པ་ལས། །བྱ་རྒྱུད་ཀྲི་ཡའི་རྒྱུད་དེ་ནི། །དག་པ་གསུམ་དང་གཙང་སྦྲ་གསུམ། །སྤྱོད་ཅིང་བདག་དང་ལྷ་གཉིས་པོ། །རྗེ་དང་འབངས་ཀྱི་ཚུལ་དུ་བསྒྲུབ། །དབྱེ་ན་རྣམ་པ་གཉིས་ཡིན་ཏེ། །དག་པ་གཙོ་བོར་བྱེད་པ་དང་། །དམིགས་པ་གཙོ་བོར་བྱེད་པའོ། །དང་པོ་ཁྲུས་དང་གཙང་སྦྲ་ལ། །ནན་ཏན་སྒོ་ནས་ལུས་དག་པ། །ལྷ་ཡི་སྐུ་རུ་སྒོམ་པ་སྟེ། །ཁྲུས་གསུམ་བྱེད་དང་གོས་གསུམ་བརྗེ། །དཀར་གསུམ་མངར་གསུམ་བསྟེན་པའོ། །ལྟ་བ་འོག་མ་ལས་འཕགས་ཏེ། །ཀུན་རྫོབ་སྣང་བ་ཚོད་ཙམ་དུའང་། །བདེན་པར་འཇོག་པར་མི་བྱེད་ཅིང་། །དམིགས་པ་གསུམ་གྱིས་སྐུ་གསུང་ཐུགས། །ལྷ་སྐུ་ཡིག་འབྲུ་ཕྱག་མཚན་དུ། །སྒོམ་པས་ཐ་མལ་རྟོག་པ་ཀུན། །བསམ་གཏན་ཉིད་ལས་མི་འདའ་སྟེ། །དོན་གྱི་དམ་པར་ཡི་དམ་ལྷ། །ཡེ་ཤེས་སེམས་དང་བདག་ཉིད་ནི། །དམ་ཚིག་སེམས་དཔའ་རྣམ་པ་གཉིས། །རྗེ་དང་ཁོལ་གྱི་རང་བཞིན་དུ། །བལྟས་པས་བར་གཅོད་ཞི་བ་དང་། །ཐུན་མོང་དངོས་གྲུབ་ལ་བརྟེན་ནས། །ཀུན་རྫོབ་སྤོང་བར་མི་བྱེད་ལ། །མཆོག་གི་དངོས་གྲུབ་ལ་བརྟེན་ནས། །དོན་དམ་བསྒྲུབ་པར་མི་བྱེད་དོ། །དམིགས་པ་གཙོ་བོར་བྱེད་པ་ནི། །བསྐྱེད་རྫོགས་ཕྲ་མོའི་འཕྲོ་འདུ་ནི། །དམིགས་པའི་ལྷ་རུ་སྒོམ་པ་སྟེ། །གཟུགས་དང་སྒྲ་དང་རྣམ་རྟོག་གསུམ། །སྐུ་གསུང་ཐུགས་སུ་དམིགས་པའོ། །དག་པས་ལུས་ངག་གཙང་སྒྲ་གཙོར། །བྱེད་ཅིང་དམིགས་པ་སེམས་ཀྱིས་ནི། །སྒོམ་པ་གཙོར་བྱེད་རང་ཤར་ལས། །འཇུག་པའི་སྒོ་ནི་དག་པ་གསུམ། །སྐུ་གསུང་ཐུགས་སུ་དམིགས་པའོ། །དག་པས་ལུས་ངག་གཙང་སྒྲ་གཙོར། །བྱེད་ཅིང་དམིགས་པ་སེམས་ཀྱིས་ནི། །སྒོམ་པ་གཙོར་བྱེད་རང་ཤར་ལས། །འཇུག་པའི་སྒོ་ནི་དག་པ་གསུམ། །ཁྲུས་དང་གཙང་སྦྲས་འཇུག་པའོ། །བསྲུང་བའི་དམ་ཚིག་འདི་ལྟ་སྟེ། །ལུང་ཅིག་ཆུ་ལ་མི་བཏུང་ཞིང་། །མ་ཡེངས་རང་ལ་སྤྱོད་པའོ། །བྱ་བ་དག་པ་རྣམ་གསུམ་བྱེད། །དག་པ་རྣམ་གསུམ་གང་ཞེ་ན། །ལྷ་དང་དཀྱིལ་འཁོར་དག་པ་དང་། །རྫས་དང་ལོངས་སྤྱོད་དག་པ་དང་། །སྔགས་དང་ཏིང་འཛིན་དག་པའོ། །རྟོགས་པའི་ལྟ་བ་འདི་ལྟ་སྟེ། །ལྷ་དང་རྣལ་འབྱོར་དག་པ་གཉིས། །རྗེ་དང་འབངས་ཀྱི་ཚུལ་དུ་བལྟ། །སྤང་བའི་རིམ་པ་འདི་ལྟ་སྟེ། །ཤ་དང་ཉ་དང་སྒོག་པ་དང་། །དེ་བཞིན་ཆང་ལ་སོགས་པ་སྤོང་། །ཏིང་ངེ་འཛིན་ལ་ཞེན་པའོ། །ཀྲི་ཡའི་ཐེག་པ་དེ་བཞིན་ནོ། །ཞེས་སོ་སྤྱོད་རྒྱུད་ཨུ་པ་ནི། །སྤྱོད་པ་ཀྲི་ཡ་ལྟར་བྱེད་ལ། །ལྟ་བ་ཡོ་ག་བཞིན་འདོད་པས། །མ་ནིང་གི་ནི་ཐེག་པར་གྲགས། །དེ་ཡང་ཁྲུས་དང་གཙང་སྦྲ་ལ། །གནས་ཏེ་སྒོ་གསུམ་དག་པར་བྱས། །མངོན་བྱང་ལྔ་ཡི་དམིགས་པ་ཡིས། །དཀྱིལ་འཁོར་རྒྱལ་མཆོག་ལ་སོགས་བསྒྲུབ། །དེ་སྐད་དུ་ནི་རང་ཤར་ལས། །ཨུ་པ་ཡ་ནི་འདི་ལྟ་སྟེ། །ལྟ་བ་ཡོ་གར་ལྟ་བ་ལ། །སྤྱོད་པ་ཀྲི་ཡར་སྤྱོད་པའོ། །དེ་ཕྱིར་གཉིས་ཀའི་རྒྱུད་ཅེས་གྲགས། །ཞེས་སོ་ཡོ་ག་རྣལ་འབྱོར་ནི། །མངོན་བྱང་ལྔ་ཡི་སྒོ་ནས་ནི། །བདག་དང་ལྷ་གཉིས་སྤུན་གྲོགས་ལྟར། །ལྟ་བས་དམ་ཚིག་གཙང་སྦྲ་སྤྱོད། །འབྲས་བུ་འཁོར་ལོ་ཚོགས་ཆེན་གྱི། །ས་ཆེན་ཐོབ་བོ་དབྱེ་ན་ནི། །ལས་དང་ཏིང་འཛིན་རྣམ་པ་གཉིས། །སོ་སོ་གཙོ་བོར་བྱེད་པ་ལས། །དང་པོའི་ཆོ་ག་ལས་རྒྱལ་མཆོག །དཀྱིལ་འཁོར་རྒྱལ་མཆོག་རྣམ་གཉིས་ལས། །ལས་ལ་ཐོར་བུ་པ་དང་ནི། །རྒྱལ་མཆོག་གཉིས་ལས་ཐོར་བུ་ནི། །ཆོ་གའི་ཡན་ལག་གང་རུང་ལ། །བརྟེན་ནས་བྱང་ཆུབ་འདོད་པ་སྟེ། །མཆོད་དང་གཏོར་མ་སྦྱིན་སྲེག་སོགས། །བསྙེན་པ་ལྟ་བུར་འབད་པའོ། །ཕྱི་མ་ལས་ཀྱི་རྒྱལ་མཆོག་ནི། །དཀྱིལ་འཁོར་བསྒྲུབ་པའི་ཡན་ལག་ཏུ། །དེ་དག་ཐམས་ཅད་ཉམས་སུ་ལེན། །གཏོར་མ་དང་ནི་སྦྱིན་སྲེག་སོགས། །ལྔའམ་དྲུག་གིས་བྱང་ཆུབ་འདོད། །དཀྱིལ་འཁོར་རྒྱལ་མཆོག་ས་ཆོག་ནས། །དབང་བསྐུར་ཡན་ཆོད་ལ་བརྟེན་ནས། །གང་ཟག་གཅིག་གི་ལམ་དུ་འདོད། །ཏིང་འཛིན་གཙོ་བོར་བྱེད་པ་ནི། །སྦྱོར་བ་དང་པོའི་ཏིང་འཛིན་དང་། །ཡོངས་སུ་དག་པའི་ཏིང་འཛིན་ལ། །བརྟེན་ནས་ལྷ་གཅིག་སྒོམ་ཡང་རུང་། །ཡོངས་སུ་རྫོགས་པ་སྒོམ་ཡང་རུང་། །མངོན་བྱང་ལྔ་ཡིས་བསྐྱེད་ཚུལ་ནི། །ཉི་མ་ཟླ་བའི་གདན་དག་ལ། །བརྟེན་ནས་ཐབས་དང་ཤེས་རབ་ནི། །མངོན་བྱང་ཆུབ་པའི་པདྨའི་སྟེང་། །བརྩེགས་མར་བསྒོམས་ལས་བྱུང་བ་དང་། །སྐུ་ནི་ཡོངས་སུ་རྫོགས་པ་ལ། །རྒྱན་ཆའི་སྒོ་ནས་སྐྱེ་མཆེད་ཀུན། །རྣམ་པར་དག་པའི་མངོན་བྱང་དང་། །གསུང་ནི་ཨཱ་ལི་ཀཱ་ལི་ཡི། །ཡིག་འབྲུའི་འཁོར་ལོ་ལ་བརྟེན་ནས། །སྒྲ་ཚིག་མིང་གི་རྣམ་པ་རྣམས། །མངོན་པར་བྱང་ནི་ཆུབ་པ་དང་། །ཐུགས་ནི་ཕྱག་མཚན་རྡོ་རྗེ་དང་། །འཁོར་ལོ་རིན་ཆེན་ལ་སོགས་པའི། །སྒོ་ནས་སོ་སོའི་རིགས་ཀྱི་ནི། །སངས་རྒྱས་ཉིད་དུ་མངོན་བྱང་ཆུབ། །རྣམ་དག་ཡེ་ཤེས་སེམས་དཔའ་ཡི། །སྒོ་ནས་ཆོས་ཉིད་རྣམ་དག་པར། །མངོན་བྱང་ཆུབ་དང་ལྔ་བསྒོམས་པས། །ཕྱི་རུ་ཕུང་པོ་ལྔ་དང་ནི། །འབྱུང་ལྔ་རྣམ་པར་དག་པ་དང་། །ནང་དུ་ལས་དང་ཉོན་མོངས་ཀུན། །རྣམ་དག་གསང་བར་ཡུལ་དང་ནི། །དབང་ལྔ་རྣམ་པར་དག་གྱུར་ནས། །རིགས་ལྔའི་སངས་རྒྱས་ཉིད་དུ་ནི། །བདག་ཉིད་གྱུར་པའང་ཡི་དམ་གྱི། །ལྷ་དང་བདག་གཉིས་རིགས་གཅིག་གིས། །བསྡུས་པའི་སྤུན་གྲོགས་ལྟར་བསྒོམས་པས། །ལྷ་ལ་བཟང་རྒྱུ་མེད་པར་ཤེས། །དངོས་གྲུབ་རང་ལས་བྱུང་བ་དང་། །བདག་ལ་ངན་རྒྱུ་མེད་པར་རྟོགས། །ད་ལྟ་ཉིད་དུ་སྒྱུ་མའི་ལུས། །ལྷ་སྐུར་གསལ་བ་ནུས་པ་དེས། །འོག་མ་ལས་ཀྱང་ཁྱད་པར་དུ། །འཕགས་ཤིང་དེ་ཡང་བསྐྱེད་རྒྱུའི་ལྷ། །དེ་དང་བདག་ཉིད་གཉིས་མེད་དུ། །རྟོགས་པས་ཀུན་རྫོབ་དོན་དམ་གྱི། །མིང་ཡང་མེད་དོ་རང་ཤར་ལས། །ཡོ་གའི་གྲུབ་མཐའ་འདི་ལྟ་སྟེ། །འཇུག་པའི་སྒོ་ནི་མངོན་པར་བྱང་ཆུབ་ལྔ། །རྟོགས་པའི་ལྟ་བ་ལྷ་དང་གྲོགས་པོའི་ཚུལ། །སྲུང་བའི་དམ་ཚིག་མ་ཁྲེལ་རྣམ་གསུམ་བསྲུང་། །སྤྱོད་པ་དག་ནི་དགག་བསྒྲུབ་མེད་པའོ། །བྱང་ཆུབ་ལྔ་པོ་འདི་ལྟ་སྟེ། །གདན་གྱི་སྒོ་ནས་བྱང་ཆུབ་དང་། །སྐུ་ཡི་སྒོ་ནས་བྱང་ཆུབ་དང་། །ཕྱག་མཚན་སྒོ་ནས་བྱང་ཆུབ་དང་། །བསྐྱེད་པའི་སྒོ་ནས་བྱང་ཆུབ་དང་། །ཡིག་འབྲུའི་སྒོ་ནས་བྱང་ཆུབ་བོ། །དེ་ལྟར་བྱང་ཆུབ་ལྔ་པོ་སྤྱོད། །མ་ཁྲེལ་གསུམ་པོ་གང་ཞེ་ན། །ཡི་དམ་ལྷ་ཡིས་མ་ཁྲེལ་དང་། །དཔོན་སློབ་མཆེད་ཀྱིས་མ་ཁྲེལ་དང་། །རང་གི་སེམས་ཀྱིས་མ་ཁྲེལ་བའོ། །ལྷ་དང་རྣལ་འབྱོར་བདག་ཉིད་ཀྱང་། །སྤུན་དང་གྲོགས་པོའི་ཚུལ་དུ་འདོད། །ལྷ་ཡི་དཀྱིལ་འཁོར་བདག་དང་གཉིས་མེད་སྒོམ། །ལྷ་ཡང་བདག་ལས་བྱུང་ཞིང་ཐིམ་པར་འདོད། །བདག་དང་ལྷ་ཡི་འཕྲོ་འདུ་འདོད་པའོ། །ཞེས་སོ་གཉིས་པ་རྣལ་འབྱོར་ཆེ། །གསང་སྔགས་ནང་པར་འཇོག་པ་དང་། །ཕྱི་རྒྱུད་སྡེ་གསུམ་ལས་འཕགས་ཚུལ། །ངེས་པ་འདི་ནི་ཤེས་པར་བྱ། །ཕྱི་པ་གསུམ་གྱིས་དཀར་གསུམ་སོགས། །བསྟེན་ཞིང་ཁྲུས་དང་གཙང་སྦྲ་ལ། །སྤྱོད་དང་སྨྱུང་བར་གནས་པ་སོགས། །གདུང་བ་དུ་མས་ལམ་བགྲོད་ལ། །ནང་པ་དེ་ལྟ་མ་ཡིན་ཏེ། །ཤ་ལྔ་བདུད་རྩི་ལྔ་སྤྱོད་ཅིང་། །རིག་མ་བསྟེན་པ་ལ་སོགས་པ། །གཙང་དམེ་བླང་དོར་མེད་པས་འཕགས། །འོག་མས་ལྷ་ཡང་ཐབས་ཤེས་སུ། །སྒོམ་པར་མི་ནུས་བློ་ཆུང་བ། །ནང་པས་ནུས་པས་ཁྱད་པར་འཕགས། །ཕྱི་པས་ལྟ་བ་བདེན་གཉིས་ཀྱི། །རང་བཞིན་དབྱེར་མེད་མ་རྟོགས་པ། །ནང་པས་རྟོགས་པས་ཆོས་འཕགས་སོ། །དེ་ཡང་ངོ་བོ་ངེས་ཚིག་དང་། །དགོས་པ་འབྲས་བུ་བཞིས་བརྗོད་ན། །ངོ་བོ་བདེན་པ་དབྱེར་མེད་ཀྱི། །ཡེ་ཤེས་རོལ་པས་ཚེ་གཅིག་ལ། །གྲོལ་བ་ཐོབ་པའི་རང་བཞིན་ནོ། །ངེས་ཚིག་ཚེགས་ནི་ཆུང་ངུ་ཡིས། །ཐབས་ཀྱིས་དོན་ཆེན་འགྲུབ་པའི་ཕྱིར། །ནང་པ་ཐབས་ཀྱི་ཐེག་པའོ། །དགོས་པ་ཚེ་གཅིག་ལུས་གཅིག་ལ། །དངོས་གྲུབ་རྣམ་གཉིས་ཐོབ་པ་དང་། །འབྲས་བུ་རྡོ་རྗེ་འཆང་གི་སར། །འདི་ཉིད་བགྲོད་པ་ཁོ་ནའོ། །དབྱེ་ན་རྣམ་པ་གསུམ་ཡིན་ཏེ། །རང་ཤར་ལས་ཀྱང་དེ་སྐད་དུ། །ནང་པ་ལ་ནི་གསུམ་དུ་འདོད། །མ་ཧཱ་ཨ་ནུ་ཨ་ཏིའོ། །ཞེས་སོ་དེ་དག་རྣམ་གསུམ་དང་། །ཁྱད་པར་དབང་རྣོན་ཤེས་རབ་ཅན། །སྐད་ཅིག་ཉིད་ལ་གྲོལ་ནུས་པ། །མན་ངག་སྡེ་ཡི་ཁྱད་པར་ཆོས། །གོང་དུ་གྲུབ་པའི་མཐའ་བསླངས་ནས། །རྒྱས་པར་བརྗོད་ཅིང་གླེང་ཟིན་ཏོ། །དེ་ལྟར་རྣམ་གྲངས་མཐའ་ཡས་པའི། །ཆོས་ཀྱི་རང་བཞིན་བསྟན་པ་ཡང་། །སངས་རྒྱས་ཐུགས་རྗེ་ཅན་རྣམས་ཀྱིས། །སོ་སོ་ཡང་དག་རིག་པ་བཞིའི། །རྩལ་གྱིས་འགྲོ་བ་དཔག་མེད་པའི། །དབང་པོ་ཁམས་ཀྱི་ནུས་པ་དང་། །སྦྱར་ཏེ་གསུངས་པ་ཁོ་ན་ལས། །དེ་དག་ལྟ་སྤྱོད་ས་ལམ་གྱི། །རང་བཞིན་ཐ་དད་གྱུར་པ་བཞིན། །ཐོབ་བྱའི་དོན་ལ་གཉིས་སུ་མིན། །ཁྱད་པར་རྫོགས་པ་ཆེན་པོ་དང་། །དེ་ཡི་ཡང་བཅུད་སྙིང་ཏིག་སྐོར། །ལྟ་སྤྱོད་ས་ལམ་འབྲས་བུ་ཡིས། །ཕན་གནོད་སྤངས་ཐོབ་བྲལ་བ་སྟེ། །གདོད་ནས་རང་རིག་སངས་རྒྱས་སུ། །ཅིག་ཆར་གྲོལ་བའི་ལམ་ཡིན་པས། །སྐལ་ལྡན་འགའ་ཡི་སྤྱོད་ཡུལ་ལས། །གཞན་དུ་སྣང་བ་མ་ཡིན་ཏེ། །རང་ཤར་ལས་ཀྱང་དེ་བཞིན་དུ། །ཐམས་ཅད་སྐད་ནི་ཤེས་པ་སྟེ། །གང་གི་སྐད་ལ་དེ་སྟོན་པའོ། །མཐུན་པས་མཐུན་པར་འདུལ་བ་ལ། །ལ་ལར་ཚིག་གི་སྒོ་ནས་སྟོན། །ལ་ལར་རྟེན་འབྲེལ་སྒོ་ནས་སྟོན། །ལ་ལར་སྨོན་འཇུག་སྒོ་ནས་སྟོན། །ལ་ལར་བསྐྱེད་པའི་སྒོ་ནས་སྟོན། །ལ་ལར་གཉིས་ཀའི་སྒོ་ནས་སྟོན། །ལ་ལར་བྱང་ཆུབ་ལྔ་ཡིས་སྟོན། །ལ་ལར་ཏིང་འཛིན་གསུམ་གྱིས་སྟོན། །ལ་ལར་དབྱིངས་དང་ཡེ་ཤེས་སྟོན། །རྫོགས་ཆེན་དོན་ནི་འགའ་ལས་མིན། །གང་ཟག་ལས་ཅན་འགའ་ལ་སྣང་། །དེ་ཡང་སྟོན་ལུགས་འདི་ལྟ་སྟེ། །ལ་ལར་རིག་པ་སྟོང་པར་སྟོན། །ལ་ལར་རིག་མེད་སྟོང་པར་སྟོན། །ལ་ལར་རིག་མེད་བེམ་པོར་སྟོན། །ལ་ལར་རིག་པ་རྐྱང་པར་སྟོན། །ལ་ལར་ཀུན་གཞི་ཆོས་སྐུར་སྟོན། །ལ་ལར་དགེ་མེད་སྡིག་མེད་སྟོན། །ལ་ལར་སྒོམ་པ་ཅན་དུ་སྟོན། །ལ་ལར་སྒོམ་པ་མེད་པར་སྟོན། །དེ་ལྟར་སྟོན་བྱེད་སྤྲུལ་པའི་སྐུས། །གསང་སྔགས་བླ་ན་མེད་པ་ཡི། །དོན་ནི་འགའ་ལས་མ་གསུངས་སོ། །མ་གསུངས་གསུང་བར་མི་འགྱུར་རོ། །སྐབས་སུ་གསུང་བར་འགྱུར་ན་ཡང་། །དགྲ་བཅོམ་རང་རྒྱལ་མདོ་སྡེ་དང་། །ཐེག་དམན་མིང་ཡང་མེད་ནང་དུ། །བླ་མེད་ཐེག་པ་སྒྲོག་པར་འགྱུར། །དེས་ན་བློ་དམན་གཞན་ལ་གསང་། །ཞེས་པ་ལྟ་སྤྱོད་ས་ལམ་གྱི། །གནས་ལའང་གཅིག་ཏུ་མི་འཛིན་པར། །དབྱེ་བསྡུའི་རྣམ་གྲངས་དཔག་མེད་པའི། །གནད་དོན་ཁོང་དུ་ཆུད་པ་གཅེས།། །།དེ་ནས་དྲི་བ་སོ་གཉིས་པར། །བདེ་བ་ཅན་དང་མངོན་དགའ་སོགས། །ཞིང་ཁམས་མཚན་མར་གྲུབ་མ་གྲུབ། །མ་གྲུབ་ན་ནི་རྟ་གླང་པོ། །བྱ་དང་མཚོ་གླིང་པདྨའི་ཚལ། །ས་དང་ལམ་ལ་གནས་པ་ཡི། །བྱང་ཆུབ་སེམས་དཔའི་རིགས་ཡོད་ཅིང་། །པདྨ་དག་ལས་སྐྱེ་བ་ཡོད་པར་བཤད། །གྲུབ་ན་མཚན་མ་དང་བྲལ་བའི། །བདེ་ཆེན་དག་པའི་ཞིང་དང་འགལ། །ཞེས་སོ་དེ་ཡི་ལན་བརྗོད་པ། །དངོས་མཚན་རང་གར་མ་གྲུབ་པས། །བདེ་ཆེན་དག་པའི་ཐ་སྙད་བརྗོད། །དེ་དག་རྡོས་བཅས་ཉིད་ཡིན་ན། །དག་པའི་ཞིང་དུ་ཅི་ཕྱིར་གདགས། །མཚོ་གླིང་པད་ཚལ་རྟ་གླང་བྱ། །སར་གནས་བྱང་ཆུབ་སེམས་དཔའི་རིགས། །ཡོད་པ་ཙམ་གྱིས་དེ་ཡི་གཤིས། །རྡོས་བཅས་ཉིད་དུ་ཁས་ལེན་ན། །གཉིད་དུ་སོང་བའི་རྨི་ལམ་ལ། །ཡུལ་གྱི་སྣང་ཆ་ཐ་དད་པར། །ཤར་བ་དེ་ཡང་སད་པའི་ཚེ། །དེ་བཞིན་གྲུབ་པར་ཁས་ལེན་ནམ། །དེ་ཕྱིར་རང་སྣང་དག་པའི་ངོར། །དྭངས་པའི་ཆུ་ལ་ཆུ་བུར་རམ། །ནམ་མཁའ་ལས་ནི་སྤྲིན་བཞིན་དུ། །དག་ཞིང་མིག་འཕྲུལ་ལྟ་བུར་ཤར། །དེ་ཡང་མངོན་པར་དགའ་བ་སོགས། །རང་བཞིན་སྤྲུལ་པའི་ཞིང་རྣམས་ཀྱི། །རྟ་གླང་རྨ་བྱ་ཤང་ཤང་དང་། །བུང་བའི་ཚུལ་གྱི་སྲོག་ཆགས་ཀྱང་། །རྣམ་པར་དུད་འགྲོའི་གཟུགས་བརྙན་ལས། །དོན་ལ་ཐ་མལ་མ་ཡིན་ཏེ། །ས་ལ་གནས་པའི་བྱང་སེམས་རིགས། །རང་གི་གཙོ་ལ་ཆོས་ཉན་ཅིང་། །བརྡ་དང་རྣམ་འགྱུར་ལ་སོགས་པས། །ཐེག་ཆེན་ཆོས་ཀྱི་ང་རོ་སྒྲོག །དེ་ཡང་ཐུན་མོང་དག་པའི་ཞིང་། །བདེ་བ་ཅན་ལ་དཔེར་མཚོན་ན། །ཡོན་ཏན་བསམ་གྱིས་མི་ཁྱབ་ཅིང་། །རྫུ་འཕྲུལ་བཀོད་པ་ཚད་མེད་ཀྱང་། །རང་སྣང་ཉིད་ལ་རང་གིས་སྤྱོད། །དེ་རུ་ཟས་གོས་སྨན་སོགས་ཀྱང་། །བསམས་པ་ཙམ་གྱིས་འབྱུང་བ་དང་། །པདྨར་རྫུས་ཏེ་སྐྱེ་བ་སོགས། །སྤྱོད་ཡུལ་བསམ་མི་ཁྱབ་པ་ནི། །རྔ་སྒྲའི་མདོ་ལས་འདི་སྐད་དུ། །བདེ་བ་ཅན་གྱི་འཇིག་རྟེན་ཁམས། །དེ་ན་རྫོགས་པའི་སངས་རྒྱས་བཞུགས། །དེ་བཞིན་གཤེགས་པ་ཚེ་དཔག་མེད། །སུ་ཞིག་དེ་ཡི་མཚན་བརྗོད་ན། །དེ་ནི་དེ་རུ་སྐྱེ་བར་འགྱུར། །འཆི་བའི་དུས་སུ་སྟོན་པ་ནི། །དགེ་སློང་དགེ་འདུན་བཅས་ཏེ་མཐོང་། །དེ་ན་བུད་མེད་ཡོད་པ་མིན། །མངལ་ན་གནས་པ་ཡོད་མ་ཡིན། །རིན་ཆེན་རྣམས་ཀྱི་པདྨོ་ལས། །རྫུ་འཕྲུལ་ཆེན་པོ་འབྱུང་བར་འགྱུར། །ཟས་དང་གོས་དང་སྨན་རྣམས་དང་། །ཆོས་གོས་མལ་ཆ་ལྷུང་བཟེད་རྣམས། །སེམས་ཀྱིས་བསམས་མ་ཐག་ཏུ་ནི། །དེ་དག་མོད་ལ་འབྱུང་བར་འགྱུར། །ཕྱོགས་བཅུར་བཞུགས་པའི་སངས་རྒྱས་རྣམས། །བདེ་བ་ཅན་གྱི་བསྔགས་པ་བརྗོད། །ཅེས་སོ།། །།དེ་ནས་དྲི་བ་སོ་གསུམ་པར། །མཉམ་གཞག་རྗེས་ཐོབ་གཅིག་མི་གཅིག །གཅིག་ན་གཉིས་སུ་ཕྱེ་བ་འགལ། །མི་གཅིག་དེ་ཉིད་རང་ས་ཡི། །རིག་པ་སོ་སོ་གཉིས་སུ་ཐལ། །ཞེས་དྲི་ལན་དུ་འདི་སྐད་དོ། །མཉམ་པར་བཞག་པའི་ངོ་བོ་ཡི། །ཆོས་རྣམས་ནམ་མཁའ་ལྟ་བུར་མཁྱེན། །རྗེས་ལ་ཐོབ་པའི་ཡེ་ཤེས་ཀྱིས། །ཆོས་རྣམས་མ་འདྲེས་སོ་སོར་བྱེད། །མདོ་སྡེ་ཤེར་ཕྱིན་དགོངས་པ་ཡིན། །ཁྱད་པར་རང་ལུགས་རྫོགས་ཆེན་ལ། །སྣང་གྲག་རྣམ་པར་རྟོག་པའི་རྩལ། །ཇི་ལྟར་གཡོ་ཡང་དབྱིངས་ཀྱི་ངང་། །རིག་སྟོང་མཉམ་རྫོགས་ཆེན་པོ་རུ། །འུབ་ཀྱིས་ཆུད་ལ་མཉམ་གཞག་དང་། །དེ་ལས་སྤྲུལ་བསྒྱུར་ཐུགས་རྗེའི་ཆ། །ཆེད་དུ་བཀོད་ནས་དེ་དང་དེའི། །རང་བཞིན་སྟོང་པར་རྟོགས་པ་ལ། །རྗེས་ཐོབ་ཅེས་བྱའི་ཐ་སྙད་བཏགས། །དོན་ལ་གཉིས་སུ་མ་ཡིན་ཏེ། །ཉི་མ་དང་ནི་རང་གི་འོད། །ཆུ་དང་དེ་ཡི་རང་བཞིན་བསིལ། །མེ་དང་དེ་ཡི་རེག་བྱ་ཚ། །ལྟ་བུར་ངོ་བོ་རང་བཞིན་གྱི། །ཆ་ནས་གཉིས་སུ་ཕྱེ་བ་ལས། །དེ་དག་རྫས་འགལ་མ་ཡིན་ཀྱང་། །ལག་པ་གཅིག་ལ་ལྟོ་རྒྱབ་ཀྱི། །མིང་དུ་གྲུབ་པ་ཇི་བཞིན་དུ། །བྱེད་ལས་ཆ་ནས་དེ་སྐད་བཏགས། །དོན་ལ་གཅིག་མིན་གཉིས་ཀྱང་མིན། །མཐའ་གྲོལ་ཀློང་ཡངས་ཆེན་པོའི་དབྱིངས། །དགོངས་པའི་བཙན་ས་ཟིན་པའི་ཚེ། །མཉམ་རྗེས་གདོད་ནས་དག་པ་ལ། །མིང་འདོགས་སོ་སོར་བྱ་རུ་མེད། །ཐ་མལ་རིག་སྟོང་རྗེན་པ་ལ། །ལྟ་སྒོམ་སྤྱོད་པའི་མིང་མེད་པས། །མཉམ་གཞག་རྗེས་ཐོབ་གང་ནས་འཚོལ། །སྒོམ་རྒྱུ་མེད་དེ་སུ་ལ་བྲེལ། །ལྟ་བ་མེད་དེ་གནས་ལུགས་རྟོགས། །རྟོགས་རྒྱུ་མེད་དེ་ངོས་བཟུང་བྲལ། །ཀློང་ཆེན་མཁྱེན་བརྩེའི་འོད་ཟེར་ལ། །ལྷ་འདྲེས་བྱིན་གྱིས་བརླབས་པ་ཡི། །མཚན་མའི་གྲུབ་རྟགས་མི་འདུག་སྟེ། །ཇི་ལྟ་བ་དང་ཇི་སྙེད་ཀྱི། །མཁྱེན་པའི་ནུས་པ་མངོན་གྱུར་ནས། །ནང་དུ་བརྗོད་མེད་ཉམས་ཤར་བས། །ཕྱི་རུ་ཟབ་མོའི་ཆོས་མཛོད་རྡོལ། །ཚིག་རྗེས་རྟོག་པས་དཔགས་པ་ཡི། །ཐ་སྙད་གཞུང་ལུགས་འདི་མ་ཡིན། །རང་བཞིན་དབྱིངས་ནས་གཞལ་བ་ཡི། །དགོངས་གཏེར་ཟབ་མོའི་བསྟན་བཅོས་ཡིན། །ཡིན་མིན་གྲུབ་ཐོབ་རྣམས་ལ་དྲིས། །ཕྱི་མཐའི་སྐྱེ་བོ་ཐམས་ཅད་ཀྱིས། །རང་གི་དགོངས་པ་མ་ལོན་པས། །རང་ཉིད་གཅིག་པུར་གད་མོ་འཆོར། །དེ་ནི་ཨུ་ཚུགས་རང་མཐོང་གིས། །དྲེགས་པས་རྒྱགས་པའི་གཏམ་མ་ཡིན། །ཉམས་རྟོགས་ཁོག་ནས་ལུད་པའི་གཤིས། །སྦ་གསང་མ་ཐུབ་ཐལ་ལེར་སོང་། །དོན་ལ་རེ་དོགས་གང་ཡང་མེད། །ཐམས་ཅད་ཆོས་དབྱིངས་ཀློང་དུ་ཕཊ།། །།དེ་ནས་དྲི་བ་སོ་བཞི་པར། །དབང་བཞི་ལམ་འཁྱེར་ཡོངས་རྫོགས་ནས། །ལུས་ངག་ཡིད་གསུམ་སྨིན་གྱུར་པས། །སྐུ་བཞིའི་འབྲས་བུ་ཐོབ་ཅེས་གསུངས། །དེ་ཡི་རིག་པ་འཐད་ཅེས་གང་། །སྨིན་ཞིང་འབྲས་བུ་ཐོབ་གྱུར་ན། །གྲོལ་བྱེད་གདམས་པ་ཐོབ་པ་འགལ། །ཞེས་དྲི་ལན་དུ་འདི་སྐད་བརྗོད། །འབྲས་བུ་སྐུ་གསུང་ཐུགས་དང་ནི། །དབྱེར་མེད་ངོ་བོ་ཉིད་ཡིན་ལ། །དེ་ཉིད་མངོན་དུ་བྱ་ཚུལ་ནི། །མཚན་ཉིད་ལྡན་པའི་སློབ་དཔོན་གྱིས། །བསྙེན་པ་དང་ནི་ས་ཆོག་དང་། །སྟ་གོན་བྱས་ཏེ་དཀྱིལ་འཁོར་བྲིས། །སྒྲུབ་མཆོད་རྗེས་ལ་བདག་འཇུག་བླངས། །སློབ་མ་བཅུག་ནས་དམ་ཚིག་དང་། །སྡོམ་པ་ཕོག་པའི་རྗེས་ཉིད་ལ། །ཡེ་ཤེས་མངོན་དུ་ཕབ་པ་ནི། །ཐུགས་ནི་མངོན་དུ་བྱས་པའོ། །མེ་ཏོག་དོར་ཞིང་གདོང་གཡོགས་བཀྲོལ། །དེ་ནས་དཀྱིལ་འཁོར་བསྟན་པ་ནི། །སྐུ་ཉིད་མངོན་དུ་བྱས་པའོ། །དེ་ཚེ་སྔགས་དང་ཕྱག་རྒྱ་ཡི། །རྗེས་སུ་གནང་བ་སྦྱིན་པ་ནི། །གསུང་ནི་མངོན་དུ་བྱས་པ་དང་། །ཁྱད་པར་ལུས་ངག་ཡིད་གསུམ་ལ། །དབང་བཞི་བསྐུར་བས་དྲི་མ་ཀུན། །དག་ནས་འགྲོ་བའི་ཁམས་ཉིད་ལ། །རྡོ་རྗེ་བཞི་ཡི་ཆོས་གནས་པ། །ཆོ་གས་མངོན་དུ་སད་པའི་མཐུས། །སྐུ་གསུམ་ངོ་བོ་ཉིད་སྐུ་ཡི། །འབྲས་བུ་ཐོབ་པའི་སྐལ་པ་ནི། །རྒྱུད་ལ་བཞག་པ་ལ་སྙད་དེ། །ཐོབ་ཅེས་བྱ་བའི་མིང་དུ་བཏགས། །དོན་དུ་ཞིང་ས་གཤིན་པོ་ལ། །ས་བོན་བཏབ་པ་ཉིད་དང་མཚུངས། །དབང་གི་ཆུ་བོ་བཞི་འདུས་པས། །དག་དང་སྨིན་དང་རྒྱུད་སྦྱངས་དང་། །ཡེ་ཤེས་གཞུག་པར་བྱ་བ་དང་། །བཅུ་གསུམ་རྡོ་རྗེའི་ས་ཐོབ་པའི། །འབྲས་བུ་རྒྱུད་ལ་གཞག་པ་ཡིན། །ཞེས་པའི་ལུང་གིས་གསལ་བར་བསྟན། །དེ་ཉིད་གྲོལ་བྱེད་ལ་བརྟེན་ནས། །སྐུ་གསུམ་ཡེ་ཤེས་ལྔ་ལྡན་གྱི། །འབྲས་བུ་མངོན་དུ་བྱེད་པའི་ཕྱིར། །ས་བོན་བཏབ་པའི་ཞིང་ས་ལ། །ཆུ་དང་ཡུར་མའི་བྱ་བ་སོགས། །སྣ་ཚོགས་ཐབས་ཀྱིས་འཁྲུལ་འཁོར་ལ། །བརྟེན་ནས་འབྲས་བུ་གཡུར་ཟའི་བར། །བྱ་བྱེད་མང་པོས་བྲེལ་བ་བཞིན། །བརྡ་ཐབས་རྟེན་འབྲེལ་དུ་མ་ཡི། །དབང་བཞིའི་ལམ་དང་རྗེས་མཐུན་པའི། །གྲོལ་བྱེད་ལམ་འཁྱེར་ཐ་དད་པའི། །གདམས་པས་ཉམས་སུ་ལེན་པ་ཡིན། །དེ་ཕྱིར་སྨིན་གྲོལ་གཉིས་ཀྱི་ལམ། །མཁའ་ལ་འཕུར་བའི་འདབ་ཆགས་ལ། །གཤོག་པ་གཉིས་ཀྱིས་བྱེད་ལས་བཞིན། །ཐ་དད་མ་ཡིན་ཟུང་འབྲེལ་ཏེ། །གལ་ཏེ་སྨིན་པའི་མིང་ཐོབ་ནས། །གྲོལ་ཅེས་ཤེས་བྱར་མི་སྲིད་ན། །ནས་འབྲས་ལ་སོགས་སྨིན་པ་དེར། །ནས་ཉིད་ས་ཏུར་བསྒྲུབ་པ་དང་། །འབྲས་ལ་གཡོས་ཀྱི་སྦྱོར་བ་སོགས། །མི་རུང་རྗེན་ཟས་བྱར་འདོད་དམ། །དེ་ཕྱིར་དབང་བཞིའི་བྱེད་ལས་ནི། །འབྲས་བུ་སྨིན་པ་ཉིད་དང་མཚུངས། །དེ་ཉིད་རྔོད་བཏགས་གཡོས་སྦྱར་བས། །ཟས་ཀྱི་ངོ་བོར་འགྲུབ་པ་ལྟར། །གྲོལ་བྱེད་གདམས་པ་ལ་བརྟེན་ནས། །དོན་གྱི་འབྲས་བུ་རྣལ་མར་སྦྱོར།། །།དྲི་བ་སུམ་ཅུ་རྩ་ལྔ་པར། །ས་ལམ་གཉིས་སུ་ལེན་དགོས་ན། །དབང་བཞི་རྫོགས་ནས་རྩལ་དབང་ཐོབ། །བཅུ་གསུམ་རྡོ་རྗེ་འཛིན་པའི་ས་ཐོབ་ཅེས། །གསུངས་པའི་དོན་དེ་གང་དུ་འདོད། །ཅེས་དྲི་ལན་དུ་འདི་སྐད་བརྗོད། །དབང་དང་ས་ཡི་དག་སྦྱོར་ལ། །རྣམ་གྲངས་བསམ་གྱིས་མི་ཁྱབ་པས། །མཚོན་དཔེ་གཅིག་ལ་གཞི་བླངས་པའི། །ཐེར་ཟུག་སྨྲ་བར་མི་རིགས་ཀྱང་། །རྒྱུད་སྡེ་ཆེན་པོའི་དགོངས་པ་ཡིས། །ཡིན་ཚུལ་སྔོན་དུ་བརྗོད་ཟིན་ལ། །འོན་ཀྱང་སྨིན་བྱེད་ལམ་རྫོགས་པའི། །ནུས་པས་མངོན་དུ་བསྐྱེད་བྱས་ཤིང་། །བསྐྱེད་རྫོགས་ཟབ་མོའི་ཆོས་ཉིད་ཀྱི། །རྟེན་ཅིང་འབྲེལ་འབྱུང་ནུས་པའི་གཟུགས། །ས་ཡི་ངོ་བོར་རྫོགས་ཚུལ་ནི། །བཀའ་བརྒྱད་ཡོངས་རྫོགས་འདུས་པ་ལས། །དེ་ཡང་དབང་བསྐུར་ཐོབ་པ་ནས། །མ་ཉམས་འཛིན་པ་ས་དང་པོ། །ཐུན་མོང་དཀོན་མཆོག་ལྷ་ཉིད་ལ། །སེམས་འཛིན་ཐོབ་པ་ས་གཉིས་པ། །དཀྱིལ་འཁོར་ལྷ་ཡི་གཙོ་བོ་ལ། །སེམས་འཛིན་ཐོབ་པ་ས་གསུམ་པ། །དཀྱིལ་འཁོར་མ་ལུས་རྫོགས་པ་ལ། །སེམས་འཛིན་ཐོབ་པ་ས་བཞི་པ། །དཀྱིལ་འཁོར་འཁོར་ལོ་གསལ་བར་ཟིན། །དེ་ནི་ས་རབ་ལྔ་པ་ཉིད། །དེ་ལས་ཕྲ་བའི་རྡུལ་ཕྲན་དུ། །དཀྱིལ་འཁོར་གསལ་བར་སེམས་ཟིན་པ། །དྲུག་པ་ཞེས་སུ་བརྗོད་པའི་ས། །ཕྱི་ནང་སྣོད་བཅུད་ཐམས་ཅད་ཀུན། །རླུང་སེམས་གཉིས་མེད་སེམས་ཟིན་ནས། །རྡོ་རྗེའི་བཟླས་པས་དུས་འདའ་བ། །བདུན་པ་ཡི་ནི་ས་ཡིན་ནོ། །དེ་མན་ས་ཡི་ལྷག་མ་རྣམས། །ཀུན་ཏུ་བཟང་པོའི་སྤྱོད་པ་ལ། །ཁ་ན་མ་ཐོ་མེད་པ་ལྔ། །དེ་དང་ལྡན་པར་སྤྱོད་པས་ཏེ། །གནས་དག་པ་ཉིད་དགོན་པ་དང་། །འཚོ་བ་དག་པ་ཆོས་མཐུན་ཟས། །གྲོགས་དག་བླ་མ་ཚངས་པ་དང་། །མཚུངས་པར་ལྡན་ལ་ཕྱག་འཚལ་ཏེ། །སྡོམ་པ་དག་པ་སོ་ཐར་དང་། །བྱང་སེམས་གསང་སྔགས་ཉེས་སྐྱོན་བྲལ། །ཆོས་དག་བསྐྱེད་དང་རྫོགས་པ་ལྔ། །ས་བདུན་མན་ཆད་དེ་ལྔ་དང་། །གཙོ་བོར་ལྷ་ཉིད་ལམ་འཁྱེར་རོ། །བདུན་པ་མཐར་ཕྱིན་དེ་ནས་ནི། །འབྲས་བུ་གོང་དུ་འཕོ་བ་ཡིས། །རིག་པ་འཛིན་པ་བསྒྲུབ་ནུས་སོ། །དེ་ནས་བརྟན་པ་ཐོབ་གྱུར་ནས། །མ་ཧཱ་ཡོ་ག་ཕ་ཡི་རྒྱུད། །སེམས་ལ་དམིགས་པའི་ཡེ་ཤེས་ཀྱི། །ཕྱག་རྒྱ་དག་ལ་བརྟེན་པའམ། །ཨ་ནུ་མ་རྒྱུད་ལས་རྒྱ་ལ། །བརྟེན་ནས་རྡོ་རྗེ་བྷ་གར་བཅུག །དེ་ཚེ་བདེ་བ་ཇི་ཙམ་དུ། །འདོད་པ་དེ་ཉིད་འཛིན་ནུས་ཤིང་། །ཚེ་ནི་ཉི་ཟླ་དང་མཉམ་ལ། །ལུས་ནི་རྡོ་རྗེ་ལྟར་སྲ་བ། །དེ་ནི་ས་བརྒྱད་པ་ཉིད་དོ། །དེ་དུས་རིག་པ་བརྟུལ་ཞུགས་ཀྱི། །སྔགས་ཀྱི་སྤྱོད་པ་ཉིད་དང་འབྲེལ། །ལས་ཀྱི་ཕྱག་རྒྱ་ལ་བརྟེན་ནས། །དབང་དོན་གསུམ་པ་ལ་དམིགས་ནས། །མཚོན་བྱ་ཆོས་ཉིད་མཚོན་པ་སྟེ། །ལམ་གྱི་ཡེ་ཤེས་དགའ་བ་བཞི། །ཕྱི་རུ་མ་ཡིན་ནང་དུ་འཆར། །ལམ་གྱི་ཡོན་ཏན་སྒྱུ་མ་ལྟར། །རྡོ་རྗེ་རྣལ་འབྱོར་མ་ཞལ་མཐོང་། །རིག་པ་བརྟུལ་ཞུགས་སྤྱོད་པ་ལ། །བརྟེན་ནས་འབྲས་བུ་འོད་གསལ་དུ། །འཇུག་པའི་རིག་འཛིན་བསྒྲུབ་པར་ནུས། །ས་དགུ་པ་དང་ས་བཅུ་ནི། །ཕྱི་རོལ་དམིགས་པ་ལ་བརྟེན་ནས། །ལམ་གྱི་ཡེ་ཤེས་དགའ་བ་བཞི། །ཕྱི་རོལ་ཉིད་དུ་འཆར་བར་ནུས། །ལམ་གྱི་ཡོན་ཏན་དངོས་ཉིད་དུ། །རྡོ་རྗེ་རྣལ་འབྱོར་མ་ཞལ་མཐོང་། །ཕྱག་རྒྱ་ཕོ་མོ་ལ་བརྟེན་ནས། །མགོན་པོ་ཀུན་ཏུ་སྤྱོད་པ་ཡིས། །འོད་གསལ་ཟུང་འཇུག་འབྲས་བུ་ཐོབ། །བཅུ་གཅིག་པ་དང་བཅུ་གཉིས་པར། །མི་སློབ་ཟུང་འཇུག་ལམ་འཁྱེར་ཏེ། །ཕྱག་རྒྱ་ཆེན་པོ་བསམ་མི་ཁྱབ། །སྤྱོད་པ་མཉམ་གཞག་ཆེན་པོར་སྤྱོད། །བླང་དོར་མེད་པ་ལ་གནས་པས། །གནས་སྐབས་དག་གི་འབྲས་བུ་ནི། །དེ་ཁོ་ན་ཉིད་རྟོགས་པའི་ཚུལ། །རིག་པ་འཛིན་པ་བསྒྲུབ་པར་ནུས། །དེ་ལ་བརྟེན་ནས་མི་སློབ་པའི། །ཟུང་འཇུག་རྡོ་རྗེ་འཆང་གི་ས། །བཅུ་གསུམ་ལ་སོགས་ཐོབ་པར་འགྱུར། །ཞེས་པས་གསལ་བར་བསྟན་ཕྱིར་རོ། །རང་རིག་རྩལ་གྱི་དབང་ཆེན་ནི། །གཉིས་སུ་མེད་པའི་ཡེ་ཤེས་ཏེ། །དེ་ལ་ས་དང་ལམ་གྱི་ཆོས། །ཡོངས་སུ་དག་པའི་བདག་ཉིད་ཅན། །གདོད་ནས་ལྷུན་གྲུབ་ཆེན་པོའི་གཤིས། །ཡིན་ཚུལ་མངོན་དུ་གྱུར་པ་ལ། །རྩལ་དབང་ཐོབ་པའི་ཐ་སྙད་བཏགས། །དོན་ལ་ཐོབ་བྱ་འཐོབ་བྱེད་མེད། །གཞི་གནས་ཆེན་པོའི་ཡེ་ཤེས་སོ།། །།དྲི་བ་སུམ་ཅུ་རྩ་དྲུག་པར། །སྣང་བ་བདེན་མེད་སྒོམ་པའི་ཚེ། །སྣང་ཡུལ་ཁ་དོག་སྣ་ཚོགས་རིག །སྣང་ངོར་ཁྱད་པར་ཡོད་དམ་མེད། །ཡོད་ན་གང་སྣང་བདེན་མེད་དང་། །མཚན་མེད་སྟོང་པར་འདོད་པ་འགལ། །མེད་ན་སྦྱོར་རྫོགས་ལ་སོགས་ནས། །འོད་གསལ་རྣམ་པ་མཆོག་ལྡན་གྱི། །ཡོན་ཏན་དཔག་མེད་གསུངས་པ་འགལ། །ཞེས་དྲི་ལན་དུ་འདི་སྐད་བརྗོད། །སྤྱིར་ནི་ཉན་ཐོས་ཐེག་པ་སོགས། །ཐུན་མོང་དག་གི་སྡེ་སྣོད་ནས། །སྣང་བ་རྡུལ་ཕྲན་ཆ་མེད་སོགས། །བེམ་སྟོང་དག་ཏུ་འདོད་པ་དང་། །ཁྱད་པར་རྡོ་རྗེ་ཐེག་པ་ནས། །སྣང་ཞེན་ལྷ་སྐུར་ལྟ་བ་དང་། །རང་བཞིན་རྫོགས་པ་ཆེན་པོ་ནས། །སྐུ་དང་ཐིག་ལེར་ལྟ་བ་སོགས། །ལམ་གྱི་བློ་ནུས་ཆེ་ཆུང་གིས། །རང་བཞིན་ཐ་དད་ལྟར་སྣང་ཡང་། །དོན་དམ་གནས་ལུགས་སྤྲོས་བྲལ་གྱི། །དགོངས་པའི་རྩལ་གྱིས་ཡས་གཞལ་ན། །སྣང་ཡུལ་ཁ་དོག་སྣ་ཚོགས་ཀྱི། །མཚན་ཉིད་སྟོང་པས་རྒྱས་བཏབ་པས། །སྣང་ཆ་འགགས་པའི་མི་རྟོག་པ། །ཕྱོགས་གཅིག་ཁོ་ནར་ལྟུང་བ་ཡི། །འགོག་པ་སྲིད་རྩེའི་སྙོམས་འཇུག་ལྟའི། །བློས་བྱས་གྲུབ་མཐའ་ཙམ་མིན་པར། །ཡེ་གཞག་སྟོང་ཉིད་བརྗོད་བྲལ་གྱི། །ངོ་བོ་གསལ་རིག་ཟུང་འཇུག་ལ། །སྣང་ཡུལ་ཁ་དོག་སྣ་ཚོགས་ཀྱི། །རང་བཞིན་གསལ་ལ་མ་འདྲེས་པར། །སྣང་ཡང་དེ་ལ་དེར་འཛིན་གྱི། །འཛིན་པའི་ཆོས་ཉིད་ལས་གྲོལ་བས། །སྣང་དང་མི་སྣང་གཉིས་ཀ་མེད། །ཅི་ཕྱིར་ཞེ་ན་འདི་ལྟ་སྟེ། །རིག་པའི་ངོ་བོ་སྟོང་ཉིད་ལ། །སྣང་བས་ཡེ་ནས་གོས་མ་མྱོང་། །སྣང་མཁན་གཟུང་བའི་ཡུལ་ཉིད་ལ། །འཛིན་པས་གློ་བུར་བཅིངས་པས་ལེན། །མི་སྣང་རྨུགས་པའང་དེ་མ་ཡིན། །རིག་པའི་རང་བཞིན་འགག་མེད་ལ། །མེ་ལོང་ངོས་ཀྱི་གཟུགས་བརྙན་བཞིན། །སྣང་ཆའི་རྟེན་འབྲེལ་མཐའ་ཡས་པ། །གོས་པ་མེད་བཞིན་སོ་སོར་གསལ། །དཔེར་ན་ཆུ་ནང་ཟླ་བ་ལ། །ཟླ་བའི་བྱད་དབྱིབས་ཚང་ན་ཡང་། །ཆུ་ལ་ཟླ་བས་མ་གོས་ཤིང་། །དེ་ལྟར་སྣང་བའི་གཟུགས་བརྙན་ལ། །འོད་དང་བསིལ་བའི་རེག་བྱ་སོགས། །ཟླ་བའི་ཡོན་ཏན་རྡུལ་ཙམ་མེད། །དེ་ཕྱིར་དག་དང་མ་དག་གིས། །སྣང་ཆའི་རྟེན་འབྲེལ་ཅིར་ཤར་ཡང་། །འཛིན་པ་གྲོལ་བའི་ཁྱད་པར་ཆོས། །ནང་གསལ་སྤྲོས་པ་ཉེར་བཞི་བའི། །རིག་པའི་ཆ་ནས་དེ་ལྟར་རོ། །དེ་ཡང་གཞི་སྣང་ཕྱིར་གསལ་གྱིས། །སྣང་བའི་ཆ་ནས་འཁྲུལ་སྣང་དང་། །དག་སྣང་གཉིས་སུ་ཤར་བའི་ཚེ། །འཁྲུལ་སྣང་མ་དག་འཁོར་བའི་སྒོ། །ཇི་ལྟར་སྣང་བཞིན་མ་རིག་པའི། །ས་བོན་ཉིད་ལས་ཡོང་མི་འདའ། །དག་སྣང་རྣམ་གྲོལ་ལམ་གྱི་སྒོ། །ངོ་བོའི་ཆ་ནས་འཁྲུལ་པ་ལྟར། །སྣང་ཡང་བྱེད་ལས་ཆ་ནས་དེས། །རྣམ་པར་གྲོལ་བའི་ཁྱད་ཡོད་ཕྱིར། །འོད་གསལ་སྒྱུ་མའི་སྣང་བ་ལ། །ཡོན་ཏན་དཔག་ཏུ་མེད་པ་གསུངས། །དཔེ་ནི་ནོར་བུ་སྒྲོན་མེའི་འོད། །འོད་ཀྱི་ངང་དུ་མཚུངས་ན་ཡང་། །ནོར་བུས་མུན་པ་མི་སེལ་ལ། །སྒྲོན་མེས་མུན་པ་སེལ་བ་བཞིན། །ཤེས་པར་བྱ་ཕྱིར་རྣམ་འགྲེལ་ལས། །ནོར་བུ་སྒྲོན་མེའི་འོད་དག་ལ། །ནོར་བུའི་བློ་ཡིས་མངོན་རྒྱུག་པ། །ལོག་པའི་ཤེས་པར་ཁྱད་མེད་ཀྱང་། །ཇི་ལྟར་དོན་བྱེད་ལ་ཁྱད་ཡོད། །ཅེས་སོ་དོན་ལ་འདི་དག་ནི། །རིག་པས་དབྱིངས་ལ་འཇལ་བའི་ཚུལ། །ཡིན་ཕྱིར་རྟོག་གེའི་རིག་པ་ཡིས། །བརྒལ་བརྟག་མཚོན་པའི་གནས་མ་ཡིན། །ཡང་དག་མཐོང་བའི་བློ་མིག་གིས། །ངོ་བོ་དང་ནི་རང་བཞིན་གྱི། །ལྡོག་པའི་ཆ་ནི་རྣམ་དབྱེ་ནས། །རྟོགས་པར་བྱ་བ་ཁོ་ནའོ།། །།དྲི་བ་སུམ་ཅུ་རྩ་བདུན་པར། །སྲིད་ཞི་གཉིས་པོ་གང་ཞིག་སྔ། །སེམས་ཅན་སྔ་ན་དང་པོ་རང་། །སེམས་ཅན་དེ་ཉིད་གང་ནས་བྱུང་། །མ་རིག་པ་ལས་བྱུང་ཞེ་ན། །དང་པོ་སྟོང་པ་རིས་མེད་ལ། །མ་རིག་པ་ཞེས་གང་གིས་གྲུབ། །དེ་ཡི་བྱུང་ས་བྱུང་དུས་གང་། །འོན་ཏེ་སངས་རྒྱས་སྔ་ཞེས་ན། །དང་པོ་སེམས་ཅན་མ་ཡིན་ཞིང་། །འཁྲུལ་གྲོལ་སེམས་ལ་མ་བརྟེན་པའི། །དེ་འདྲའི་སངས་རྒྱས་ཉམས་དགའི་གནས། །ཞེས་དྲི་ལན་དུ་འདི་ལྟར་བརྗོད། །སྲིད་ཞིར་སྣང་བའི་ཆོས་ཉིད་ཀྱི། །ངོ་བོ་རིག་དང་མ་རིག་སྟེ། །དཔེར་ན་ལག་པའི་མདུན་རྒྱབ་འདྲ། །གཞི་གཅིག་རང་བཞིན་གཉིས་སུ་གྲུབ། །དེ་ལ་སྔ་ཕྱིའི་དུས་ཚོད་དང་། །མཚན་ཉིད་གཞག་ཏུ་མེད་པ་སྟེ། །འོན་ཀྱང་གདུལ་བྱ་འདུལ་བྱེད་ལ། །ལྟོས་ནས་གདོད་མའི་མགོན་པོ་ཡིས། །བདེ་གཤེགས་སྙིང་པོའི་གཞི་ཐོག་ནས། །ཞི་བ་བརྙེས་པའི་ཚུལ་བསྟན་ཅིང་། །དེ་ལས་ཞིང་ཁམས་ཉེར་བཀོད་དེ། །སྣོད་བཅུད་རིམ་པར་ཆགས་པའི་ཚུལ། །འཆད་པའི་རྒྱུ་མཚན་ལ་བརྟེན་ནས། །ཐོག་མའི་སངས་རྒྱས་ཞེས་སུ་གྲགས། །དེ་ལྟར་བཀོད་པའི་སྤྲུལ་སྐུའི་ཞིང་། །མི་མཇེད་འདི་ཡི་སྣོད་བཅུད་ཀྱི། །རྟེན་འབྲེལ་ཆགས་པ་ལ་ལྟོས་ན། །རླུང་གི་ལྷ་མོ་བཞི་ལ་སོགས། །སྲིད་པ་ལས་ཀྱི་འགྲོ་བའི་རིགས། །འཇིག་རྟེན་ཆགས་དང་དུས་མཉམ་པར། །ལས་ལས་སྐྱེས་ཤིང་འཇིག་པ་དང་། དུས་མཉམ་ཚེ་ཡི་ཚད་རྫོགས་པའི། །སྤྱི་མཐུན་ལས་ཀྱིས་འགྲོ་བ་དེའི། །ཡིད་ཞུགས་པ་ལས་རྣམ་ཤེས་ཀྱི། །གཟུང་ཆའི་ས་བོན་བག་ལ་ཉལ། །མངོན་གྱུར་སད་པའི་ཏིང་འཛིན་ལུས། །ཡོད་མིན་མེད་མིན་ལ་སོགས་ཏེ། །གཟུགས་མེད་སྐྱེ་མཆེད་མུ་བཞི་ནས། །ཡས་མར་རིམ་གྱིས་ཆགས་པའི་ཚུལ། །གཞན་དུའང་རྒྱ་ཆེར་བསྟན་མོད་ཀྱི། །འཆད་ཚུལ་ཐུན་མོང་ལས་འཕགས་པའི། །གྲུབ་མཐའི་རྣམ་པར་གཞག་པ་ནི། །ཐེག་པའི་མཆོག་གི་ཀོ་ཤ་ཡི། །རིམ་ཁང་དང་པོ་གཉིས་པར་གསལ། །དོན་ལ་རང་ངོའི་གཞི་གཅིག་ལས། །རིག་དང་མ་རིག་ཆོ་འཕྲུལ་གྱིས། །སྲིད་ཞི་གཉིས་སུ་བྱེར་བ་ལས། །སྤྱི་ཚན་འཁོར་བའི་ཐོག་མཐའ་དང་། །དེ་བཞིན་མྱང་འདས་ཐོག་མཐའི་ཚད། །འདི་ཞེས་རྒྱལ་བས་སྔར་མ་གསུངས། །མི་གསུང་གསུང་བར་མི་འགྱུར་རོ། །ཅི་ཕྱིར་གསང་བའི་སྙིང་པོ་ལས། །ཨེ་མ་ཧོ་བདེ་གཤེགས་སྙིང་པོ་ལས། །རང་རང་རྣམ་རྟོག་ལས་ཀྱིས་སྤྲུལ། །ཞེས་པའི་ལུང་གིས་བསྟན་པ་དང་། །འཁོར་འདས་གཉིས་ཀའི་སྤྱི་གཞི་ལས། །མ་རིག་རྐྱེན་གྱིས་མཚམས་སྦྱར་ཏེ། །གློ་བུར་གཟུང་བའི་རྣམ་རྟོག་ལ། །བརྟེན་ནས་སེམས་ཅན་རྣམས་ཀྱི་ཁམས། །ཐོག་མཐའ་མེད་པར་སྣང་མོད་ཀྱིས། །དེ་ལ་རིས་སུ་ཆད་པ་དང་། །འདི་ཞེས་མིང་དུ་སུ་ཞིག་སྒྲོག །དེ་ཡང་སྟོང་པ་རིས་མེད་ལ། །མ་རིག་གྲུབ་པ་མེད་པའི་ཚུལ། །སྨྲ་བ་འདི་ནི་རིགས་མིན་ཏེ། །གཞི་ཁམས་བདེ་གཤེགས་སྙིང་པོ་ལས། །རིག་དང་མ་རིག་རྣམ་གཉིས་ཀྱིས། །འཁྲུལ་གྲོལ་བྱེད་པའི་མཚན་ཉིད་ཀྱང་། །མེད་པའི་སྟོང་པ་རིས་མེད་དུ། །འདོད་པ་ཐ་ཆད་རྒྱང་འཕེན་པའི། །གྲུབ་མཐའ་ཉིད་དང་ཅི་ཡིས་ཁྱད། །དེ་ཕྱིར་རིག་པའི་གཤིས་ལུགས་ལ། །འཁོར་འདས་གཉིས་ཀའི་སྒོ་ཡོད་པ། །ནང་པ་སངས་རྒྱས་པ་རྣམས་སྨྲ། །དེ་བཞིན་གསང་བའི་སྙིང་པོ་ལས། །སེམས་ཉིད་རྫོགས་པའི་སངས་རྒྱས་ཡིན། །སངས་རྒྱས་གཞན་ནས་མ་འཚོལ་ཞིག །ཅེས་པའི་དོན་ལྟར་གང་དུ་ན། །སྒྲིབ་པ་ཐམས་ཅད་རྣམ་སྤངས་ཤིང་། །ཡོན་ཏན་མངོན་དུ་བྱེད་པའི་ཚེ། །རང་སེམས་ཁོ་ན་སངས་རྒྱས་ཕྱིར། །དེ་ལས་གཞན་དུ་ག་ཤེད་ནས། །དངོས་པོར་རང་ཚན་ཅན་ཉིད་ཀྱི། །སངས་རྒྱས་ལོགས་སུ་མ་ཡིན་ནོ། །དེ་ལ་སྔ་ཕྱི་སུ་ཡིས་འཇོག །འོན་ཀྱང་རྫོགས་སྨིན་སྦྱངས་གསུམ་གྱི། །ཚུལ་བསྟན་རྟགས་ཀྱི་སངས་རྒྱས་ལ། །ཐོག་མཐའ་སྔ་ཕྱིའི་ཆོས་བཤད་པ། །དེ་ནི་ཐུན་མོང་དྲང་བའི་དོན། །ཡིན་གྱིས་ངེས་པའི་དོན་མ་ཡིན། །དེ་ཡི་ངེས་ཚིག་སྔར་བཤད་པས། །ཡང་ཡང་སྨྲ་བར་མི་བྱའོ། །འོན་ཏེ་འོད་གསལ་དབྱིངས་ཀྱི་ངང་། །བཅིངས་གྲོལ་མེད་པའི་ཆོས་ཉིད་ལ། །གྲོལ་ཏེ་དོན་གྱིས་སངས་རྒྱས་ཆེ། །རང་རིག་འཕོ་འགྱུར་མེད་པ་ལ། །རྣལ་མའི་དགོངས་པར་མི་འཛིན་པར། །སྔ་ཕྱི་རྟགས་ཀྱི་སངས་རྒྱས་ལ། །གུད་དུ་བཟུང་ནས་ཐོབ་བྱར་སེམས། །དེ་ལ་རྣམ་གྲོལ་ལམ་མེད་དེ། །ཅི་ཕྱིར་མདོ་རྒྱུད་རྒྱ་མཚོ་ནས། །རང་སེམས་རྟོགས་པ་སངས་རྒྱས་སུ། །བཤད་པའི་ཆོས་དང་འགལ་བ་ཅན། །འདི་ནི་ཡང་དག་ངེས་པའི་ལུང་། །དེ་ཕྱིར་འཁོར་འདས་གང་དུ་ཡང་། །འབྱེད་པ་མེད་པའི་གཞི་ཐོག་ནས། །ཀུན་ཏུ་བཟང་པོས་རང་གི་ཆོས། །རང་ངོ་ཤེས་ནས་གྲོལ་བ་དང་། །སེམས་ཅན་རྣམས་ཀྱིས་རང་གིས་རང་། །མ་རིག་རྒྱུ་ལས་འཁྲུལ་པའི་ཚུལ། །གཉིད་དང་མངོན་སུམ་ལྟ་བུ་སྟེ། །དེ་ལ་རྫས་གཉིས་ཡོད་མིན་པའི། །རང་བཞིན་ཤེས་པར་བྱ་བའོ།། །།དྲི་བ་སུམ་ཅུ་རྩ་བརྒྱད་པར། །སེམས་ཞེས་དྲན་བསམ་རིག་པའི་རྩལ། །སྣ་ཚོགས་འཆར་གཞིར་གྱུར་པ་འདི། །དང་པོ་སེམས་ཅན་སངས་རྒྱས་ཞེས། །འཁོར་འདས་ལམ་གསུམ་མ་གྲུབ་པའི། །ཡེ་ཐོག་དང་པོའི་གནས་ལུགས་རང་། །གནས་ཡུལ་མཚན་ཉིད་ཇི་ལྟར་གནས། །ཞེས་དྲི་ལན་དུ་འདི་སྐད་བརྗོད། །འཁོར་འདས་ལམ་གསུམ་མ་གྲུབ་པའི། །ཡེ་ཐོག་དང་པོའི་གནས་ལུགས་ལ། །ཀུན་གཞི་འདུས་མ་བྱས་སུ་འདོད། །དེ་ཡང་རྫོགས་པ་ཆེན་པོ་ནས། །མཐར་འཛིན་གུད་དུ་བཅད་པའི་གཞི། །བདུན་གྱི་རང་བཞིན་ལོང་བ་ཡིས། །གླང་པོའི་གནས་ལུགས་བཤད་པ་ལྟར། །སྐྱོན་ཅན་ཉིད་དུ་རྣམ་གཞག་ནས། །རང་ལུགས་བླ་ན་མེད་པའི་གཞི། །བྱེ་བྲག་ཉིད་དུ་འདོད་པ་ནི། །ངོ་བོ་རང་བཞིན་ཐུགས་རྗེ་ཞེས། །གཞི་གཅིག་ལ་ནི་ལྡོག་པའི་ཆོས། །རྣམ་པ་གསུམ་དུ་བཀོད་བྱས་པའི། །གནས་ཚུལ་བརྗོད་པ་འདི་ལྟ་སྟེ། །དེ་ཡང་ངོ་བོ་ཀ་དག་གི །ཆ་ནས་དངོས་པོར་མ་གྲུབ་ལ། །རང་བཞིན་ལྷུན་གྲུབ་ཆེན་པོའི་གདངས། །ཞལ་ཕྱག་མཚན་མར་མ་གྱུར་ཀྱང་། །གཏིང་གསལ་འཆར་བའི་གཞིར་བཞུགས་པས། །ཡེ་གདངས་སྣང་བའི་ངོ་མ་དོར། །ཐུགས་རྗེའི་ཆ་ནས་ཡེ་ཤེས་ཀྱི། །མཁྱེན་པའི་འཆར་གཞི་མ་འགགས་པའི། །བདག་ཉིད་ཆེན་པོར་བཞུགས་པ་དེའི། །རྩལ་ཉིད་ཡུལ་ལ་མངོན་ཤར་ཚེ། །རིག་པ་ལུང་མ་བསྟན་གྱི་ཆ། །བཅོམ་ནས་གྲོལ་བའི་ཆོས་ཐོབ་ལ། །འཁྲུལ་ན་ཡུལ་གྱི་རྗེས་འབྲངས་ཏེ། །མ་དག་འཁོར་བའི་སྒོ་འབྱེད་ཕྱིར། །འཁོར་འདས་གཉིས་ཀའི་གཞི་རུ་གྲགས། །དེ་སྐད་དུ་ནི་ཐལ་འགྱུར་ལས། །ཐོག་མའི་ངོ་བོ་རང་བཞིན་དང་། །ཐུགས་རྗེ་རྣམ་པ་གསུམ་དུ་གནས། །དེ་ཡང་ངོ་བོ་སྐུར་གནས་པས། །ཆོས་དང་ལོངས་སྤྱོད་སྤྲུལ་པའི་ཆར། །མ་ཕྱེ་འབྱེད་པ་མེད་པའི་གནས། །ཁམས་ལས་གྲུབ་པ་ཉིད་ལ་ཡང་། །སྐུ་མདོག་ལ་སོགས་བློ་ཡུལ་མེད། །རང་བཞིན་འཆར་བྱེད་འོད་ཀྱི་ཚུལ། །དཀར་དམར་སེར་དང་ལྗང་མཐིང་ནི། །མཚན་མ་རིས་ཅན་མ་ཡིན་པར། །རིས་མེད་ཤེས་བྱའི་བབས་ལས་གྲུབ། །ཐུགས་རྗེ་འཆར་བ་སྣ་ཚོགས་ལས། །འདི་འདྲ་གཅིག་ཏུ་ངེས་མེད་པས། །སྣ་ཚོགས་སྣང་ཕྱིར་གཞི་ཞེས་བྱ། །ཞེས་སོ་དབྱེ་ན་སྟོང་པའི་ཆ། །ངོ་བོའི་སྒོ་ནས་བཤད་པ་དང་། །དེ་ཡི་རང་བཞིན་གསལ་བའི་ཆ། །ཐབས་ཀྱི་སྒོ་ནས་བཤད་པ་སྟེ། །ལྡོག་པ་གཉིས་ཀྱི་བྱེ་བྲག་ལས། །དང་པོ་ལྟར་ན་འདི་ལྟ་སྟེ། །རྒྱུད་རྒྱལ་ཡི་གེ་མེད་པ་ལས། །ང་ལ་སྐྱེ་དང་འཆི་མེད་པས། །འགག་མེད་ཆོས་ནི་ཡོངས་སུ་རྫོགས། །ང་ལ་ཕྱི་དང་ནང་མེད་པས། །གསལ་བའི་ཆོས་ནི་ཡོངས་སུ་རྫོགས། །ང་ལ་སྟོང་དང་དངོས་མེད་པས། །སྣང་བའི་ཆོས་ནི་ཡོངས་སུ་རྫོགས། །ང་ལ་དམིགས་པའི་ཡུལ་མེད་པས། །མཐོང་བའི་ཆོས་ནི་ཡོངས་སུ་རྫོགས། །ང་ལ་ལུས་དང་སེམས་མེད་པས། །རང་སྣང་ཆོས་ནི་ཡོངས་སུ་རྫོགས། །ང་ལ་བདག་དང་གཞན་མེད་པས། །རིག་པའི་ཆོས་ལྔ་ཡོངས་སུ་རྫོགས། །ང་ལ་བྱེད་པའི་རྒྱུ་མེད་པས། །བསམ་གཏན་ཆེན་པོ་ཡོངས་སུ་རྫོགས། །ང་ལ་ཕྱོགས་དང་རིས་མེད་པས། །གསང་བའི་ཡེ་ཤེས་ཡོངས་སུ་རྫོགས། །ང་ལ་སྣང་བ་འགག་མེད་པས། །དབྱིངས་ཀྱི་ཆོས་གསུམ་ཡོངས་སུ་རྫོགས། །ཞེས་པས་རང་ངོས་སྟོངས་པར་བསྟན། །གཉིས་པ་ལྟར་ན་འདི་ལྟ་སྟེ། །རྫོགས་པ་ཆེན་པོ་ཀློང་དྲུག་ལས། །རང་བཞིན་ཉིད་ཀྱི་སྣང་བ་ལ། །མཚན་མར་འཛིན་པ་ཡེ་མེད་དེ། །ཁ་དོག་མ་ཡིན་རང་གསལ་བས། །ཤེས་ཤིང་རིག་པའི་ཆ་རྣམ་ཙམ། །འཛིན་པའི་གཟུང་ཡུལ་གང་མེད་ཕྱིར། །རྣམ་པར་རྟོག་པའི་འཛིན་ཆ་མེད། །འོད་ལས་འདས་པའི་ཡེ་གདངས་སུ། །ཡེ་ཉིད་ནས་ནི་ཁྱབ་པར་གནས། །སྐུ་ལས་འདས་པའི་རང་གདངས་སུ། །རྣམ་དག་ཕྱག་རྒྱ་ཆེན་པོར་གནས། །འོན་ཏེ་རང་བཞིན་སྣང་བ་ལ། །མཚན་མར་དམིགས་པ་ཡེ་མེད་དོ། །ཞེས་སོ་གཉིས་ཀའི་དོན་བསྡུ་ན། །གཞི་དོན་ཀ་དག་ལྷུན་གྲུབ་ཀྱི། །གནས་ལུགས་དབྱེར་མེད་ཆེན་པོའི་ངང་། །སྐུ་དང་ཡེ་ཤེས་འདུ་འབྲལ་མེད། །ཐོག་མ་མེད་པའི་དེ་བཞིན་ཉིད། །འགྲན་ཟླ་བྲལ་བའི་རང་བྱུང་གི །ཡེ་ཤེས་ཆེན་པོ་གདོད་མའི་གཤིས། །འཁོར་འདས་གང་དུའང་མ་ཕྱེ་ལ། །འཁོར་འདས་ཀུན་གྱི་འཕྲོ་གཞི་ཅན། །འདི་ནི་གུད་ན་ཡོད་མིན་ཏེ། །སྲིད་ཞིར་སྣང་བའི་ཆོས་ཉིད་ལ། །གཞི་རྫོགས་འཕོ་མེད་ཆེན་པོར་གནས། །དེ་ཕྱིར་བརྗོད་མེད་གཞི་དོན་གྱི། །གནས་ལུགས་རིག་ནས་སེམས་ཅན་ཀུན། །གཞི་སྣང་མཐོང་བའི་སྐད་ཅིག་ལ། །གཞི་ལས་འཕགས་པའི་ཁྱད་ཆོས་ཅན། །དྲི་མ་མཐའ་དག་ཡོངས་སྤངས་པའི། །ཆོས་སྐུའི་རང་ས་ཟིན་གྱུར་ཅིག །ཅེས་སོ།། །།དེ་ལྟར་དྲི་བའི་རིམ་པ་བཅུ་ཕྲག་གསུམ་དང་ཉག་མ་བརྒྱད་ཀྱིས་ཡོངས་སུ་རྫོགས་ནས་དྲི་བ་མཐར་ཐུག་པའི་ཚེ། དེ་སོགས་དྲི་བ་དཔག་མེད་པ། །མང་དུ་སྤྲོས་ན་ཡོད་མོད་ཀྱི། །འོན་ཀྱང་གཅེས་པ་མདོར་བསྡུས་ནས། །ཆེ་ལོང་ཙམ་ཞིག་བཀོད་དེ་ཡིས། །ལམ་གྱི་རིམ་པ་གང་ཐོབ་པ། །རྟོགས་ཤིང་ཇི་ལྟར་དགོངས་པའི་ཚུལ། །བཤེས་གཉེན་རྣམས་ཀྱིས་སྣང་བར་མཛོད། །ཅེས་པ་འདི་བླ་མ་བཤེས་གཉེན་དམ་པ་རྣམས་ལ་ཚིག་དྲི་བར་བྱས་པ་རྣམ་པར་རྒྱལ་བའི་ཁང་བཟང་ཞེས་བྱ་བ། ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱི་སློབ་མ། གཙང་གནུབས་ཡུལ་རོང་གི་ལོ་ཙཱ་བ་ལང་གྲོའི་བག་ཆགས་སད་པ་ཟབ་མོ་གཏེར་ལ་མང་དུ་སྤྱོད་པའི་རང་བཞིན་རྫོགས་པ་ཆེན་པོའི་རྣལ་འབྱོར་པ་གཏེར་སྟོན་རཏྣ་གླིང་པས་འབྲུག་གི་ལོ་ཡོས་ཟླ་བའི་ཉེར་གསུམ་ལ་ཚ་ལུང་ཐང་དཀར་ཞེས་བྱ་བའི་ཁང་བཟང་དུ་སྦྱར་བ་དགེའོ།། །།ཞེས་པ་ནི་སླར་ཡང་གཞན་དག་ལ་དྲི་བ་འདི་བཏང་སྙོམས་སུ་མི་འཇོག་པར་ལན་གདབ་པར་བསྐུལ་བ་དང་། རང་གི་མཚན་བཤད་ནས་སྦྱར་བྱང་གིས་མཇུག་བསྡུས་པའོ། །དྲིས་ལན་རིན་པོ་ཆེའི་བསྟན་བཅོས་མན་ངག་ལུང་གི་གཏེར་མཛོད་ཅེས་བྱ་བ་ལས། བརྒལ་ལན་བྱེ་བྲག་ཏུ་བཤད་པའི་སྐབས་ཏེ་སརྒ་ལྔ་པའོ།། །།སྤྱི་དོན་གསུམ་པ་བསྟན་བཅོས་ཀྱི་ལུས་ཡོངས་སུ་རྫོགས་པའི་གནས་སྐབས་ན། ཐུན་མོང་མ་ཡིན་པའི་གྲུབ་མཐའ་གསང་བར་གདམས་པ་དང་། དགེ་བ་བྱང་ཆུབ་ཏུ་བསྔོ་ཞིང་སྨོན་ལམ་གྱིས་རྒྱས་གདབ་པ་གཉིས་ལས། དང་པོ་ནི། །ཀྱེ་ཧོ། གསང་བའི་མཚན་གྱིས་རབ་སྦས་པའི། །གསང་ཆེན་འོད་གསལ་རྡོ་རྗེའི་ཐེག་པ་ལ། །གསང་བ་སྒྲོག་པའི་འབྱམས་ཡིག་མི་རིགས་ཏེ། །གསང་བའི་ཚིག་གིས་སྲང་མདོ་ཁྱབ་ཀྱིས་དོགས། ༡ །ཅི་ཕྱིར་ཡོངས་སུ་མ་སྨིན་སེམས་ཅན་དང་། །བློ་ཆུང་ཐེག་པ་དམན་པའི་རིགས་ཅན་གྱིས། །ལོག་པར་ལྟ་བའི་འདུ་ཤེས་མི་བཟད་པས། །སེམས་ཅན་དམྱལ་བའི་ལམ་ལ་འཕྱན་ན་ཅི། ༢ །དེ་ལ་དེ་སྐྱོན་མངའ་བ་ཙམ་གྱིས་ཀྱང་། །གསང་བ་སྒྲོག་པའི་ཉེས་པ་ཟད་མིན་ཏེ། །གབ་པ་མངོན་དུ་ཕྱུང་བའི་རྩ་ལྟུང་དང་། །ཆབས་གཅིག་བྱིན་རླབས་ཉམས་པའི་ཉེས་པ་ལྕི། ༣ །དེ་ཚུལ་ཐུན་མོང་ཐེག་པ་དག་ལ་ཡང་། །བུད་མེད་རབ་ཏུ་བྱུང་བས་སངས་རྒྱས་ཀྱི། །བསྟན་པ་ལྔ་བརྒྱ་ཕྲག་གཅིག་ཉམས་པའི་ཚུལ། །གྲགས་ན་གསང་ཆེན་ཐེག་པ་ཅིས་མི་གསང་། ༤ །ཁྱད་པར་རྒྱ་གར་འཕགས་ཡུལ་ཆོས་གྲྭ་རུ། །དགེ་སློང་ཀུན་དགའ་མོ་དང་བཅས་པ་ཡིས། །མན་ངག་རྫོགས་པ་ཆེན་པོ་ལས་བརྩམས་ཏེ། །རྩོད་པ་བྱས་པས་སྣོད་བཅུད་པྲ་རྟགས་ལོག ༥ །དེ་ཕྱིར་འཆད་རྩོད་རྩོམ་པའི་རང་བཞིན་ལ། །ཞུམ་བཅས་བསྙེངས་པའི་བརྟུལ་ཞུགས་སྤངས་ན་ཡང་། །གསང་བ་ཁྲོམ་དུ་གྱེར་བའི་བབ་ཅོལ་གླུ། །ངས་ནི་ནམ་ཡང་བླང་བར་མ་བགྱིས་སོ། ༦ །ཅི་ཕྱིར་དམ་མེད་དམ་ལས་འདས་པའི་སར། །གསང་བཅུའི་དམ་ཚིག་ཕྱལ་བར་ཤོར་གྱིས་དོགས། །དུས་གསུམ་མཁྱེན་པའི་སློབ་དཔོན་པདྨས་ཀྱང་། །གདམས་མཐའ་རྒྱ་ཡིས་བཏབ་པ་མ་ལགས་སམ། ༧ །འདིར་ནི་གདོད་མའི་མགོན་པོ་ཀློང་ཆེན་ཡང་། །ཐུན་མོང་མ་ཡིན་གྲུབ་མཐའ་གང་ཡིན་པ། །དེ་ཀུན་ཚོགས་སུ་མ་གླེང་དམ་དུ་སྦོས། །གསུང་ཞིང་ཁྲོམ་ལ་སྒྲོག་པར་མི་བཞེད་དོ། ༨ །དེ་ལྟ་མོད་ཀྱི་ད་དུས་གསང་སྔགས་ཀྱི། །དཀྱིལ་འཁོར་ར་ཁྱིའི་ཚང་དུའང་བཞེངས་བྱས་ཤིང་། །འབག་འཆམས་གླུ་ཤོན་རྩེ་དང་ཆབས་གཅིག་པར། །ཁྲོམ་ལ་དབང་བསྐུར་བྱེད་པའི་དུས་ངན་ཤར། ༩ །དེ་ཡིས་ཆོས་ཀྱི་རོ་ཉམས་ནུས་པ་ཡལ། །བསྒྲུབས་ཀྱང་འབྲས་བུ་འབྱིན་པའི་ཟབ་ཁྱད་བུལ། །རྒྱལ་དང་དེ་སྲས་ཐུགས་དགོངས་དབྱུང་བའི་ལས། །ཡིན་ཕྱིར་དམ་ཚིག་ལྡན་པས་སྤང་བར་བྱ། ༡༠ །ཞེས་གདམས་སོ། །གཉིས་པ་བརྩམས་པ་དོན་ལྡན་དུ་བྱ་ཕྱིར་བསྔོ་བ་དང་སྨོན་ལམ་གྱིས་མཐའ་བསྡུ་བ་ནི། དེ་ལྟར་ཆོས་ཚུལ་ཚངས་པའི་རྔ་ཆེན་ཕྱོགས་ཀྱི་བུ་མོའི་འགྲམ་པ་ལ། །བརྡུངས་པའི་རང་བཞིན་གྱི་ནས་མ་ཡིན་མཁྱེན་པ་གཉིས་ཀྱི་ཐུགས་རྗེའི་ཤུགས། །ཇི་བཞིན་མངོན་དུ་གསལ་བའི་རྟེན་འབྲེལ་མིང་ཚིག་ཡི་གེའི་སྒྲར་གྲུབ་པའི། །བསྟན་བཅོས་འདིས་ནི་རྡོ་རྗེ་སྙིང་པོའི་བསྟན་པ་གསལ་བའི་ཉིན་མོར་བྱེད། ༡ །ཐ་སྙད་གཞུང་ལ་རྟོག་པས་སྒྲོ་བཏགས་བག་ཆགས་བརྟས་པའི་མངོན་ཞེན་མཐུ། །མངོན་པའི་ང་རྒྱལ་དྲི་ཡི་བཞོན་ལྡན་གླིང་བུའི་སྒྲའམ་ཅ་ཅོས་མིན། །ཐོལ་བྱུང་དགོངས་པའི་རྩལ་དུ་རང་ཤར་ནམ་མཁའ་མཛོད་ཀྱི་ཀློང་ཆེན་ནས། །འཛད་པ་མེད་པ་མན་ངག་བདུད་རྩིའི་གཏེར་མཛོད་རྡོལ་འདི་པདྨའི་དྲིན། ༢ །ཤིན་ཏུ་རྟོགས་དཀའི་མན་ངག་གནད་རྣམས་གཅུས་དཀྲུགས་གབ་པའི་ཆུ་འཛིན་གྱིས། །རྣམ་གཡོགས་སྟུག་པོ་བདག་བློའི་རྣམ་དཔྱོད་དྲི་ཡིས་བཞོན་པས་མཐར་བསྐྲད་ལས། །དབྱིངས་དང་ཡེ་ཤེས་གཉིས་སུ་མེད་གང་མ་ནོར་དོན་གྱི་ནམ་མཁའི་བྱད། །བདག་རྗེས་ཞུགས་དང་འདི་དོན་རྟོགས་པས་ཇི་བཞིན་མཐོང་ལ་ནེམ་ནུར་སྤངས། ༣ །མཁྱེན་སྟོབས་ཆེན་པོའི་གླང་ཆེན་གཟིམས་པས་གཞུང་ལུགས་བལྟ་བའི་མིག་ཟུམ་ལ། །གཅིག་པུར་བསྒྲུབ་པའི་གོམ་ཚུགས་འཁྱོར་བས་ཡང་དག་དོན་གྱི་ས་ཟིན་མེད། །སྣང་ཆའི་རྟེན་འབྲེལ་ཆོས་སུ་སྒྲོག་པའི་འོད་གསལ་གྲུབ་པའི་མདངས་ཉམས་ཚེ། །རྫོགས་ཆེན་བསྟན་པའི་མེ་རོ་སློང་འདི་དོན་རྒྱུད་བྱིན་རླབས་བབས་པའི་མཐུ། ༤ །རྒྱུ་འབྲས་ཐེག་པའི་ཆོས་འབྱུང་ཡངས་པའི་ས་གཞི་ལ། །རིམ་དགུའི་ངེས་འབྱེད་རྨད་དུ་བྱུང་བའི་བང་རིམ་མཛེས། །སེ༷མས་ཀློ༷ང་མ༷ན་ངག༷་ཆོས་ཀྱི་འཁོར་ལོའི་རྣམ་འབྱེད་ཅན། །དེ་འདྲའི་མཆོད་རྟེན་སྒྱུ་མའི་རྣལ་འབྱོར་དེ་ཡིས་བཞེངས། ༥ །ཚིག་དོན་དཔེ་མཁྱུད་མེད་པར་ཡང་སྦྱི༷ན་ཞིང་། །ཐར་འདོད་རྣ་བའི་དཔྱིད་དུ་རྣམ་པར་སྙ༷ན། །དབྱིངས་ཀྱི་དོ༷ན་ལ་སྤྱ༷ད་ཅིང་དོ༷ན་མཐུ༷ན་པའི། །བསྡུ་བའི་དངོས་པོ་རྣམ་བཞིའི་དྲིལ་ཆུང་འཁྲོལ། ༦ །བསྟན་དང་འགྲོ་ལ་སྨན་པ་རྡོ་རྗེའི་སེམས། །སྤྲོས་བྲལ་ཀློང་ནས་ཟབ་མོའི་བསྟན་བཅོས་ཤར། །བྱང་ཆུབ་ལམ་ལ་བསྒྱུར་བའི་འཁྲུལ་འཁོར་ཅན། །འདི་ནི་ཐོག་མཐའ་བར་གསུམ་དགེ་བའི་ཆོས། ༧ །རྣམ་མང་ལུང༷་གི༷་ཆུ་གཏེར་དབྱིངས་ཆེ་ལ། །རྣམ་དག་རྟོགས་པའི་རིན་ཆེན་གཏེ༷ར་མཛོ༷ད་ཅན། །རྣམ་གྲོལ་དོན་དུ་གཉེར་བའི་དེད་དཔོན་གྱིས། །རྣམ་དག་ལམ་བཟང་ཡིན་ནོ་གུས་པས་ལོངས། ༨ །འདི་ལ་རྩ་གསུམ་དམ་ཅན་རྒྱ་མཚོ་དང་། །ལྷ་དང་ལྷ་མིན་གནོད་སྦྱིན་མིའམ་ཅི། །དཀར་ཕྱོགས་སྐྱོང་བ་རྣམས་ཀྱང་དགྱེས་པའི་སྤྱན། །གཡོ་བའི་དགའ་སྟོན་གྲུབ་ལ་ཐེ་ཚོམ་བྲལ། ༩ །ཅི་ཕྱིར་ཟབ་དང་རྒྱ་ཆེའི་ཆོས་ཚུལ་གྱི། །སྙིང་པོའི་གནད་འགག་མ་ནོར་མངོན་སུམ་པ། །ཇི་བཞིན་རྟོགས་ནས་དེ་བཞིན་སྨྲ་བ་དེ། །སྤྱོད་ཡུལ་ཀུན་ཏུ་བཟང་པོའི་ཆོ་ག་མཁན། ༡༠ །འདིས་མཚོན་རྣམ་དཀར་དགེ་ཚོགས་འབབ་ལྡན་ཀླུང་། །ཀུན་ཏུ་བཟང་དང་འཇམ་དཔལ་གཞོན་ནུ་ཡིས། །ཡོངས་སུ་བསྔོ་བ་ཇི་བཞིན་སེམས་ཅན་ཁམས། །རྣམ་མཁྱེན་རྒྱ་མཚོར་འཁོར་གསུམ་ཡོངས་དག་སྨོན། ༡༡ །གང་ན་འཇིག་རྟེན་གནས་པའི་སྐྱེ་དགུ་ལ། །བདེ་སྐྱིད་ལྷ་ཡི་དཔལ་འབྱོར་ཡོངས་འདུའི་ཤིང་། །རྩོལ་བ་མེད་པར་རྒྱས་པའི་རྩེ་མོ་ནས། །ཟབ་དོན་འབྲས་བུའི་དགའ་སྟོན་སྦྱིན་གྱུར་ཅིག ༡༢ །མཐོ་རིས་སྐྱེད་ཚལ་ཀུན་ནས་ལྷུན་སྟུག་པར། །ཚོགས་གཉིས་དགའ་མའི་སྒྱུ་རྩལ་ལ་རྩེ་བས། །སྨིན་བྱེད་དབང་བཞིའི་བདུད་རྩི་འཐུང་བ་དང་། །ཆབས་གཅིག་བསྐྱེད་རྫོགས་རྒྱང་གླུ་ལེན་པར་ཤོག ༡༣ །དེ་མཐུས་ཤིན་ཏུ་བརྒལ་དཀའ་སྲིད་པའི་མཚོ། །མིག་འཕྲུལ་ལྟ་བུའི་ཆོས་ཉིད་ལ་གཞལ་ནས། །འབད་པ་མེད་པར་གྲོལ་བའི་མྱང་འདས་གྲོང་། །སེམས་ཅན་ཀུན་གྱི་རྣམ་ཤེས་འཇུག་པར་ཤོག ༡༤ །འདི་ནི་བརྟགས་ན་བརྗོད་བྲལ་ངོས་བཟུང་མེད། །ཤིན་ཏུ་བརྟགས་ན་ཡོད་མེད་མཐའ་ལས་འདས། །རང་སར་བཞག་ན་སྤྲོས་ཀུན་ཉེར་ཞི་བའི། །ཟབ་མོའི་གནས་ལུགས་ཇི་བཞིན་རྟོགས་པར་ཤོག ༡༥ །སྨིག་རྒྱུའི་ཆུ་ཡིས་རི་དྭགས་བསླུས་པ་བཞིན། །མེད་ལ་ཡོད་པར་འཛིན་པའི་ཀུན་རྟོག་དང་། །ཡོད་བཞིན་ཆད་པར་ལྟ་བའི་ཡིད་བྱེད་ཀུན། །བློ་འདས་གཉུག་མའི་གཤིས་སུ་དག་པར་ཤོག ༡༦ །རང་བཞིན་འོད་གསལ་རྫོགས་པ་ཆེན་པོའི་དོན། །གདོད་ནས་མངོན་སངས་རྒྱས་པའི་ཆོས་ཉིད་དེ། །ཡེ་ནས་དག་ལ་བཅོས་མས་མི་འགེགས་པར། །སྤྲོས་བྲལ་ཡིན་ལུགས་བཟོ་མེད་སྐྱོང་བར་ཤོག ༡༧ །ལྟ་བ་མེད་ལ་བལྟས་པས་ཅི་ཞིག་བྱ། །སྒོམ་པས་སྟོངས་ལ་སེམས་འཛིན་ཀུན་འབྱུང་ཡིད། །རང་བབས་སྤྱོད་ལ་གཏད་སོས་མི་འཆིང་བར། །བྱར་མེད་ལྷུག་པའི་རྒྱལ་ས་ཟིན་པར་ཤོག ༡༨ །རྩ་ནང་རླུང་སེམས་འདུས་པའི་རྟེན་འབྲེལ་རྩལ། །སྣང་ཆའི་འཁོར་ལོར་ཤར་བའི་སྟོང་གཟུགས་དང་། །ཤེས་ཉམས་རྟགས་ལ་མཚར་དུ་མི་འཛིན་པར། །དྲི་མེད་རིག་པའི་གནས་ལུགས་སྐྱོང་བར་ཤོག ༡༩ །འགྲོ་འོང་འཕེལ་འགྲིབ་འདས་པའི་བྱང་ཆུབ་སེམས། །ཀུན་གཞིའི་ཁམས་ལས་རྣམ་གྲོལ་ཆོས་སྐུའི་ཞལ། །མ་བསྒྲིབས་གཏིང་གསལ་ཆེན་པོའི་རང་བཞིན་ལ། །གཡོ་མེད་གཉུག་མའི་གཏན་སྲིད་ཟིན་པར་ཤོག ༢༠ །ནམ་མཁའི་དབྱིངས་ལ་སྟོང་གསལ་ཇི་བཞིན་འགྲོ་ཁམས་བདེ་གཤེགས་སྙིང་པོའི་གཞིར། །གདོད་ནས་ལྷུན་གྲུབ་འདུས་མ་བྱས་པའི་ཁམས་ཀྱི་དྲི་མ་ཡོངས་དག་ནས། །རྡོ་རྗེ་བཞི་ཡི་རང་བཞིན་མངོན་གྱུར་སྐུ་དང་ཡེ་ཤེས་གཉིས་མེད་ཀྱི། །གནས་ལུགས་ཆེན་པོ་གཞོན་ནུ་བུམ་སྐུའི་བཞུགས་ཚུལ་ཇི་བཞིན་མཐོང་བར་ཤོག ༢༡ །དེ་ཡང་གཟོད་ནས་མྱ་ངན་འདས་པའི་དབྱིངས། །སྣང་དང་སྟོང་པ་གཉིས་མེད་ཀུན་ཏུ་བཟང་། །ནང་གསལ་ཐིམ་ལ་མ་རྨུགས་ངོ་བོ་ཉིད། །མི་འགྱུར་རྡོ་རྗེའི་སྐུ་ལ་དབང་བསྒྱུར་ཤོག ༢༢ །དེ་ལས་ཐམས་ཅད་མཁྱེན་པའི་ཡེ་ཤེས་རྩལ། །ཤིན་ཏུ་ཕྲ་བའི་ཡུལ་ལ་མངོན་ཤར་ནས། །སྟོབས་བཅུ་མ་འདྲེས་ཆོས་སོགས་མཐའ་ཡས་པས། །གཞན་དོན་བསྒྲུབ་ལ་སྙེལ་བ་མེད་པར་ཤོག ༢༣ །འདི་ནི་ཁྲི་སྲོང་གསུང་སྤྲུལ་མངའ་བདག་ཉང་། །ཉི་མ་འོད་ཟེར་གདུང་རིགས་པྲ་ཧི་པ། །རྡོ་རྗེའི་རིགས་འཛིན་ཀརྨ་བཛྲ་དེས། །ཤར་ཕྱོགས་ཀོང་ཡུལ་ལྗོན་པའི་ནགས་ཀླུང་ནས། ༢༤ །དཔལ་ལྡན་དཎྜིའི་གཞུང་ལུགས་རྒྱུད་མངས་སྒྲ། །ངོ་མཚར་གཏམ་དུ་གླེང་བའི་ཕོ་ཉ་ལ། །ཡང་ཏིག་ཡིད་བཞིན་ནོར་བུའི་སྐྱེས་བསྐུར་ནས། །བསྐུལ་དུ་བསྔགས་པའི་ནན་ངོ་བཞིན་དུ་བྲིས། ༢༥ །གཞན་དུ་ཐོས་བསམ་སྒོམ་པའི་སྙིང་པོ་ནི། །ནང་དུ་ཡང་དག་འཇོག་ལས་འགའ་མིན་ཕྱིར། །རྟག་ཏུ་མཉམ་པར་འཇོག་ལ་དགའ་བ་འདི། །བྱ་བྲལ་ཁོ་བོའི་རྣམ་ཐར་ཡིན་དུ་སེམས། ༢༦ །དེ་ལྟ་ན་ཡང་མཚན་མོའི་ནམ་མཁའ་ལ། །ཆ་ཤས་གང་བའི་ཟླ་གཞོན་ཤར་བ་བཞིན། །རྡོ་རྗེའི་སྙིང་པོའི་ལམ་བཟང་སྣང་བྱེད་འདི། །མཁྱེན་བརྩེའི་འོད་ཟེར་ལུང་རྟོགས་འདྲ་འབག་ཡིན། ༢༧ །དེ་ཡང་སྦྱངས་སྟོབས་ནུས་པ་མ་ལགས་ཏེ། །རང་བྱུང་པདྨའི་ཐུགས་རྗེ་ཚད་མེད་པས། །ཀློང་ཆེན་དགོངས་པའི་གསང་མཛོད་བརྟོལ་བའི་ཚེ། །པདྨ་འོད་གླིང་སིནྡྷུའི་དྭངས་མཚོར་བཀོད། ༢༨ །ཚུལ་འདི་དཔལ་མགོན་བདུན་ཅུ་རྩ་ལྔ་དང་། །སྙིང་ཏིག་གཉན་པོའི་བཀའ་སྲུང་རྣམས་ལ་གཉེར། །དམ་ཉམས་བཀའ་རྐུན་ལོག་སྲེད་ཅན་རྣམས་ལ། །དམ་དུ་སྦོས་ལ་སྐལ་ལྡན་ལག་ཏུ་གཏོད། ༢༩ །ལྷུན་པོའི་དཔལ་དང་ཉི་ཟླའི་གཟི་བྱིན་གྱིས། །ཇི་སྲིད་ཁྱབ་པར་ཀློང་ཆེན་དགོངས་གཏེར་ཆེའི། །ཡང་མཛོད་དབྱེ་བའི་ལྡེ་མིག་འདིས་ཁྱབ་ནས། །སྔ་འགྱུར་བསྟན་པ་ཡུན་དུ་གནས་པར་ཤོག ༣༠ །ཟབ་དང་རྒྱ་ཆེན་ནམ་མཁའི་དབྱིངས་ལ་བྱིན་རླབས་ཆུ་འཛིན་བླ་རེ་བྲེས། །དཔལ་བཅུའི་གཟི་བྱིན་མངོན་དུ་སྣང་བའི་གློག་ཕྲེང་གསར་པའི་དོ་ཤལ་ཅན། །ཕྱོགས་རྣམས་ཀུན་ཏུ་བཀྲ་ཤིས་དགེ་བའི་དབྱར་གྱི་རྔ་ཆེན་བརྡུངས་པ་དེས། །སྐྱེ་དགུ་ཀུན་ལ་ཕན་དང་བདེ་བའི་དགའ་སྟོན་གསར་པ་སྦྱིན་གྱུར་ཅིག། ༣༡ །།དྲིས་ལན་རིན་པོ་ཆེའི་བསྟན་བཅོས། མན་ངག་ལུང་གི་གཏེར་མཛོད་ཅེས་བྱ་བ། ཟབ་པ་དང་རྒྱ་ཆེ་བའི་གནད་རྣམ་པར་ཕྱེ་བའི་ལྡེ་མིག་ལྟ་བུར་གྱུར་པ་འདི་ནི་འགྲོ་བའི་བླ་མ་ཤཱཀྱ་སེང་གེས་ཤིང་རྟ་ས་གས་ཉ་བའི་ཐོ་རེངས་བདུད་སྡེ་བཅོམ་ནས་མངོན་པར་བྱང་ཆུབ་ཅིང་། ལོ་དེའི་ཆུ་སྟོད་ཟླ་བའི་ཚེས་བཞི་ལ་དཔལ་གྱི་མགུར་ལས་བདེན་བཞིའི་ཆོས་འཁོར་དང་པོར་བསྒྲགས་ནས་ཉིས་སྟོང་དྲུག་བརྒྱ་བརྒྱད་ཅུ་རྩ་དགུ། ཉི་སྒྲོལ་ཞེས་པ་ཤིང་ཕོ་སྤྲེའུ་ལོར་སངས་རྒྱས་ཐམས་ཅད་དང་གཉིས་སུ་མེད་པའི་ཡེ་ཤེས་ཀྱི་སྐུ་ཅན་དུས་གསུམ་མཁྱེན་པ་ཨོ་རྒྱན་ཆེན་པོ་སིནྡྷུའི་དྭངས་མཚོར་མཚན་དཔེའི་ཉིན་བྱེད་འདབ་སྟོང་གི་དབུས་ན་ལྷན་ནེར་འབར་ནས་ཉིས་སྟོང་དྲུག་བརྒྱ་སུམ་ཅུ་སོ་དགུ། ཕུར་བུ་ས་སྤྲེར་དམ་པའི་རིགས་ཅན་དྲ་མ་ལྔ་ལ་གསང་བའི་བདག་པོས་ཆོས་འཁོར་བསྐོར་ཞིང་ཟ་ཧོར་རྒྱལ་པོ་ལུང་བསྟན་རྡོ་རྗེའི་ཕོ་བྲང་གི་ཡང་ཐོག་ཏནྟྲ་བཅོ་བརྒྱད་ཀྱི་ཆོས་ཆར་བབ་ནས་ཉིས་སྟོང་དྲུག་བརྒྱ་ཚེས་ཀྱི་གྲངས་ལྡན། ཁྲོོ་བོ་ཤིང་གླང་རྡོ་རྗེ་སེམས་དངོས་སེམས་ལྷག་ཅན་མིའི་ཟློས་གར་བསྒྱུར་བ་དགའ་རབ་རྡོ་རྗེ་མཚན་དཔེར་འབར་ནས་ཉིས་སྟོང་ཉིས་བརྒྱ་དགུ་བཅུ་རྩ་བརྒྱད། རྣམ་གནོན་ལྕགས་འབྲུག་འཇའ་ལུས་སྐུ་བརྙེས་འོད་གསལ་གྲུབ་པའི་ཤིང་རྟ་ཆེན་པོ་ལྔ་བརྒྱའི་གཙུག་ནོར་པཎ་ཆེན་བི་མ་ལ་འཁྲུངས་ནས་ཆིག་སྟོང་བདུན་བརྒྱ་བཞི་བཅུ་ཞེ་གསུམ། སྣ་ཚོགས་ཆུ་རྟར་འཇམ་པའི་རྡོ་རྗེ་ཁྲི་སྲོང་ལྡེའུ་བཙན་ཁ་བ་ཅན་པའི་བསོད་ནམས་ཀྱི་མགྲོན་པོར་ཁུག་ནས་དགུ་བརྒྱ་དྲུག་ཅུ་རྩ་གཅིག །དགེ་བྱེད་ཆུ་སྟག་གང་གི་མོས་གུས་རླུང་གི་ཤིང་རྟས་སངས་རྒྱས་གཉིས་པ་ཨོ་རྒྱན་ཆེན་པོ་བོད་ཁམས་ཕན་བདེའི་རྩ་ལག་ཏུ་སྤྱན་དྲངས་ཏེ་ལྷ་སྲིན་གདུག་པའི་ཁེངས་པ་བསྙིལ་ཞིང་དཔལ་གྱི་བསམ་ཡས་བཞེངས་ནས་དགུ་བརྒྱ་བཞི་བཅུ་རྩ་གཅིག །སྤྲེའུ་མེ་ལུག་དབུ་མ་རང་རྒྱུད་དུ་སྨྲ་བའི་སློབ་དཔོན་གཞི་ཐམས་ཅད་ཡོད་སྨྲའི་བཙུན་པ་ཟ་ཧོར་གྱི་མཁན་པོ་ཞི་བ་འཚོ་ལ་འདུལ་འཛིན་ཇི་བཞིན་པའི་བཙུན་པ་བོད་ལ་བཏུབ་བམ་མི་བཏུབ་ཉམས་སད་པའི་ཕྱིར་རྒན་གསུམ། གཞོན་གསུམ། བར་མ་གཅིག་སྟེ་བོད་མི་བདུན་རབ་ཏུ་བྱུང་བས་སད་མི་མི་བདུན་དུ་གྲགས་པ་རབ་བྱུང་གི་དངོས་པོར་བསྒྲུབས་ནས་དགུ་བརྒྱ་སུམ་ཅུ་སོ་དྲུག །ཁྲོ་མོ་ཤིང་འབྲུག་ཡུལ་སྣང་ཆོས་སྐུར་ཤར་བའི་གྲོང་ཁྱེར་ནས་མཚོན་བྱེད་དཔེའི་ཟབ་རྒྱ་སྤྱན་དྲངས་ཤིང་བླ་ན་མེད་པའི་ཐུགས་རྗེ་དང་རྫུ་འཕྲུལ་གྱིས་ལོག་སྲེད་ཅན་ཡང་སྤ་བཀོང་བའི་གཏེར་ཆེན་ཆོས་ཀྱི་རྒྱལ་པོ་མངའ་བདག་ཉང་ཉི་མ་འོད་ཟེར་འཁྲུངས་ནས་དྲུག་བརྒྱ་སུམ་ཅུ་སོ་དགུ། ཕུར་བུ་ས་སྤྲེར་ངེས་པ་དོན་གྱི་ཐམས་ཅད་མཁྱེན་པ་མདོ་སྔགས་བསྟན་པའི་སྣང་བྱེད་ཆེན་པོ་དཔལ་བསམ་ཡས་པ་ཚུལ་ཁྲིམས་བློ་གྲོས་འཁྲུངས་ནས་ལྔ་བརྒྱ་དང་ལྔ། རིང་མོའི་མཐར་ཡང་དྲང་སྲོང་གི་སྨོན་པ་ལྟར་ནུས་པ་འགོག་ཏུ་མེད་པའི་བདེན་པའི་རྔ་བོ་ཆེས་བསྟན་བཅོས་འདི་ཉིད་བཞེངས་པར་བསྐུལ་བའི་བདག་པོའི་རྐྱེན་དུ་གྱུར་པ་རྩོད་བྲལ་དུས་བབས་ཀྱི་གཏེར་སྟོན་རིག་འཛིན་རཏྣ་གླིང་པ་འཁྲུངས་ནས་སུམ་བརྒྱ་དྲུག་ཅུ་ཐམ་པ་རྣམས་སྔོན་དུ་སོང་བའི་དུས་ཀྱི་གནས་སྐབས་ཏེ། འཕགས་ཡུལ་ལེགས་སྦྱར་གྱི་སྐད་དུ་བྷ་ནུ་ཞེས། བདེ་མཆོག་སྟོད་འགྲེལ་ལས་བོད་སྐད་དུ་ཉི་མ། ཤར་ཕྱོགས་ཙི་ནའི་རྒྱལ་ཁབ་ཏུ་གུའི་ཝུའི་ཞེས་འབོད་ཅིང་། ལྗོངས་འདིར་དབང་ཐང་དང་བསྟུན་ནས་ཆུ་མོ་ལུག་ཏུ་བརྗོད་པ། སྲོག་གི་བཞིན་རས་ལ་བཙོ་སྦྱངས་འཛམ་བུ་ཆུ་བོའི་ཐིག་ལེས་བསྐུས་པའི་འོད་སྲུང་བྱིན་གྱི་རང་མདོག་རྔོམ་པ། མརྒད་ཞུན་མའི་ཁུ་བས་ལན་བརྒྱར་བྱུགས་པའི་ལུས་ཀྱི་ལྗོན་པ་བལྟ་ན་སྡུག་པའི་ལང་ཚོར། མཐོང་ན་མངོན་པར་དགའ་བའི་དབང་ཐང་ནམ་མཁའ་བཞུ་བའི་རྡུལ་གྱིས་བཙོས་པའི་ལྷབ་ལྷུབ་གོས་ཀྱི་རེག་བྱས་བཀླུབས་ཤིང་། པད་རག་ལྷུན་པོའི་མདངས་ཀྱང་མོག་པོར་བཏང་བའི་ཀླུང་རྟ་རྟ་གདོང་རྒོད་མའི་ཞུགས་ཀྱི་སྐ་རགས་འཆིང་བ། དྲང་སྲོང་བདེ་འབྱུང་གཙུག་རྒྱན་གྱི་ཀླུངས་སུ་ཞུགས་པའི་བཞི་ལྡན་འབྱུང་བའི་ལང་ཚོ་མངོན་པར་བདོ་བའི་ཁ་རལ་གྱི་འགྲོ་འོང་། རྫོགས་ལྡན་མགྲོན་པོར་འབོད་པའི་དགེ་མཚན་གྱིས་ཡོངས་སུ་བསྲུངས་པའི་ཕུན་སུམ་ཚོགས་པའི་དུས་ཚོད་དེའི། མེ་ཏོག་ཅན་གྱི་ཟླ་བའི་ཡར་ངོ་ནས་དབུ་བརྩམས་ཏེ་ཐུན་མཚམས་སུ་བྲིས་པ་ལས། འདོར་བྱེད་དེ་ཉིད་ནམ་མཁའ་སྤྲིན་ཅན་ནམ། གྲོ་བཞིན་གྱི་ཉ་བའི་ཉིན་ཞག་ཚོགས་པའི་དུས་སྐབས་ན། རྟ་བདུན་དབང་པོ་སྡེར་ཆགས་རྒྱལ་པོ་ནམ་མཁའ་གནོན་གྱི་ཁྱིམ་ལ་བདག་གིར་བྱེད་པའི་དབང་ཕྱོགས་ཀྱི་རྒྱལ་བ་དང་པོའི་རེས་གཟའ་སྙན་དངགས་མཁན། རེས་འགྲོགས་ཀྱི་ཟླ་སྐར་པུརྦ་བྷཱ་དྲ་པཱ་ད་སྟེ་ཁྲུམས་སྟོད་ཀྱི་དགའ་མ་དང་དགའ་མགུར་སྤྱོད་པའི་འཕྲོད་སྦྱོར་ཕུན་སུམ་ཚོགས་པའི་ཉིན། ནམ་མཁའི་དབྱིངས་ལ་གནམ་རུའི་ཏཱརྐ་ལ་འཆར་བའི་ཚེ། ཡུལ་དབུས་གཙང་རུ་བཞིར་གྲགས་པའི་གཡོ་རུའི་ཆ་ལས། ཆོས་ཀྱི་རྒྱལ་པོ་སྲོང་བཙན་སྒམ་པོ་ལ་སོགས་ཏེ་སྤྲུལ་པའི་མི་བདག་རྣམས་ཀྱི་རྨུ་ལུགས་བང་སོའི་སྐུ་མཁར་བརྩིགས་པའི་དབང་ཕྱོགས་ཀྱི་སའི་བ་གམ། གྲུབ་པའི་བསྟི་གནས་ཚེ་རིང་ལྗོངས་སུ་གྲགས་པའི་དབེན་གནས་ཀྱི་འོད་གསལ་གཉུག་མའི་ཕོ་བྲང་པདྨ་འོད་གླིང་ཞེས་བྱ་བར་དཔལ་ཨོ་རྒྱན་ཡབ་ཡུམ་གྱིས་རྗེས་སུ་བཟུང་བའི་རྫོགས་ཆེན་པ་མཁྱེན་བརྩེའི་འོད་ཟེར་རམ་མིང་གཞན་ཀློང་ཆེན་ནམ་མཁའི་རྣལ་འབྱོར་གྱིས་བཀོད་པ་རྫོགས་སོ།། །།དགེའོ། །དགེའོ། །དགེའོ།། །། ༈ འདིའི་ལེའུ་བཞི་པ་བསྐྱར་བལྡབ་ཏུ་མཆིས་པ་ཕྱུང་ན་སརྒ་དྲུག་གི་བདག་ཉིད་དུ་གྱུར་མོད་ཀྱང་རྡོ་རྗེའི་གསུང་བཅོས་བསྒྱུར་མ་བྱས་པར་རང་སོར་བཞག་གོ། །།