བྱང་ཆུབ་སྤྱོད་པའི་སྨོན་ལམ་ཕན་བདེའི་ལྗོན་པའི་ཊཱི་ཀ་རྒྱལ་བའི་གཞུང་ལམ།

Previous Text Back to Volume Page Next Text

Wylie title	byang chub spyod pa'i smon lam phan bde'i ljon pa'i TI ka rgyal ba'i gzhung lam
Location	'jigs gling bka' 'bum Volume 5, Text 2, Pages 597-682 (Folios 1a1 to 43b5)
Author	འཇིགས་མེད་གླིང་པ་
Less details More details
Citation	'jigs med gling pa. Byang chub spyod pa'i smon lam phan bde'i ljon pa'i TI ka rgyal ba'i gzhung lam. In Kun mkhyen rig 'dzin 'jigs med gling pa'i gsung 'bum, Vol. 5: 597-682. New Delhi: Shechen Publications, 2025.
Genre	Commentaries - 'grel pa · Prayers - smon lam
Colophon	འདི་ནི་ངེས་པ་དོན་གྱི་སྤྲུལ་པའི་སྐུ། །ཤཱནྟ་པུ་རིར་གཤེགས་ནས་ཁྱིམ་ལག་ལོར། །རང་བྱུང་རྡོ་རྗེ་འཇིགས་མེད་གླིང་པས་བཀོད། །དགེ་བས་འགྲོ་ཀུན་རྣམ་མཁྱེན་ཐོབ་པར་ཤོག །གཞུང་རྩ་བར་ངག་རྒྱུན་མ་དག་པ་ཡི་གེར་འཕེལ་བ་རེ་མང་ལས་དཔྱད་ཞུས་ཡང་དག་བགྱིས་པ་ཡིན་པས་འབྲུ་ལེན་གྱིས་བཤུ་བ་གལ་ཆེའོ།། །།དགེའོ།། དགེའོ།། དགེའོ།།
Colophon	'di ni nges pa don gyi sprul pa'i sku/_/shAn+ta pu rir gshegs nas khyim lag lor/_/rang byung rdo rje 'jigs med gling pas bkod/_/dge bas 'gro kun rnam mkhyen thob par shog_/gzhung rtsa bar ngag rgyun ma dag pa yi ger 'phel ba re mang las dpyad zhus yang dag bgyis pa yin pas 'bru len gyis bshu ba gal che'o//__//dge'o//_dge'o//_dge'o//

[edit]

༄༅། །བྱང་ཆུབ་སྤྱོད་པའི་སྨོན་ལམ་ཕན་བདེའི་ལྗོན་པའི་ཊཱི་ཀ་རྒྱལ་བའི་གཞུང་ལམ་ཞེས་བྱ་བ་བཞུགས། །

༄༅། བྱང་ཆུབ་སྤྱོད་པའི་སྨོན་ལམ་ཕན་བདེའི་ལྗོན་པའི་ཊཱི་ཀ་རྒྱལ་བའི་གཞུང་ལམ་ཞེས་བྱ་བ། ཇི་སྙེད་ཤེས་བྱ་གཟིགས་དེའི་མཁྱེན་རབ་ནི། །འཇིག་ཚོགས་ལ་སྡང་ཇི་ལྟའི་འོད་ཟེར་ཅན། །ཤར་བའི་མོད་ལ་སེམས་བྱུང་སྣ་ཚོགས་ཀུན། །རང་བཞིན་མེད་པར་གྲོལ་འདི་བླ་མའོ། །འདི་ལ་སྤྱི་དོན་རྣམ་པ་གསུམ། ཀླད་ཀྱི་དོན། གཞུང་གི་དོན། མཇུག་བསྡུ་བའོ། །དང་པོ་ནི། སྨོན་ལམ་ལ་འཇུག་པའི་སྒོ་ཡན་ལག་བདུན་པ་འབུལ་བ་ནི། བཟང་སྐྱོང་གིས་ཞུས་པ་ལས་དགེ་བའི་ཆོས་སྡུད་པའི་ཡན་ལག་བདུན་བཀའ་སྩལ་པ་ལྟར། དང་པོ་དཀོན་མཆོག་གསུམ་ལ་ཕྱག་བྱ་བའི་ཡན་ལག་ནི། རང་དོན་དུ་སྤངས་རྟོགས་མཐར་ཕྱིན་ཀྱང་ཞི་བདེའི་ངང་དུ་མི་བཞུགས་པར་གཞན་དོན་ལ་ཐུགས་རྗེས་རྒྱུན་ཆད་མེད་པས་དོན་གཉིས་ལྷུན་གྲུབ་ཏུ་འབྱུང་བ་སྟོན་པ་རྫོགས་པའི་སངས་རྒྱས་དང་། དེའི་ཞལ་སྒོ་ལས་གསུངས་པ་འདུས་བྱས་ལ་བརྟེན་པའི་ལུས་ངག་ཡིད་གསུམ་གྱི་དགེ་བ་ཐམས་ཅད་ཀུན་རྫོབ་བདེན་པ་དང་། དམིགས་བསམ་སྤྲོས་པ་ལས་འདས་པ་དོན་དམ་བདེན་པ་སྟེ། བདེན་པ་གཉིས་ཀྱི་ངོ་བོ་ནི་བསྟན་པ་དམ་པའི་ཆོས་ཡིན་ལ། དེ་འཛིན་བྱེད་རྟོགས་བྱ་ཇི་ལྟ་བ་རིག་པ། ཇི་སྙེད་པར་རིག་པ། ཡེ་ཤེས་གཟིགས་པ་སྟེ་རིག་པའི་ཡོན་ཏན་གསུམ། སྤང་བྱ་ཆགས་སྒྲིབ་ལས་གྲོལ་བ། ཐོགས་སྒྲིབ་ལས་གྲོལ་བ། དམན་སྒྲིབ་ལས་གྲོལ་བ་སྟེ། གྲོལ་བའི་ཡོན་ཏན་གསུམ་སྟེ་རིག་གྲོལ་གཉིས་ལྡན་ནི་འཕགས་པའི་དགེ་འདུན་ཡིན་པས་ཡུལ་དེ་གསུམ་ལ། བསོད་ནམས་དང་ཡེ་ཤེས་ཏེ་ཚོགས་གཉིས་དམ་པའི་དཔལ་གྱི་གུས་པས་ཕྱག་འཚལ་ལོ་ཞེས་པའོ། །གཉིས་པ་མཆོད་པའི་ཡན་ལག་ནི། རབ་འབྱམས་ཞེས་བློས་དཔག་ཏུ་མེད་པའི་ཞིང་གི་ཁམས་ན་ཡོད་པའི་ལྷ་དང་མིའི་ལོངས་སྤྱོད་ཇི་སྙེད་ཡོད་པ་དང་། རབ་ཏུ་དང་བའི་ཡིད་ཀྱིས་རྣམ་པར་སྤྲུལ་པ་བྱང་ཆུབ་སེམས་དཔའ་ཀུན་ཏུ་བཟང་པོའི་ཏིང་འཛིན་གྱི་མཆོད་སྤྲིན་ལྟ་བུ་ནི། ཞིང་གི་རབ་དང་མཆོག་དང་ཕུལ་དུ་གྱུར་པ་རྒྱལ་བ་སྟེ་སངས་རྒྱས་དང་། སྲས་ཏེ་བྱང་ཆུབ་སེམས་དཔའ་དང་བཅས་པའི་ཚོགས་ལ་འབུལ་ན། བདག་ཅག་ལ་རབ་ཏུ་བརྩེ་བའི་ཐུགས་ཀྱིས་དགོངས་ནས་བཞེས་སུ་གསོལ་ཞེས་པའོ། །གསུམ་པ་བཤགས་པའི་ཡན་ལག་ནི། བདག་གིས་ཞེས་རང་གི་ངོ་བོ་སྨོས་ཏེ་འདི་ཙམ་ནས་ཞེས་ཐོག་མ་མེད་པའི་དུས་རིང་མོ་ཞིག་ནས་སྲིད་པའི་བཙོན་རར་ཡང་ནས་ཡང་དུ་འཁོར་བ་ན། ད་ལ་ཐུག་གི་བར་ང་དང་ང་ཡི་བའི་སེམས་ཀྱིས་གང་ཟག་གི་བདག་ལ། བདག་ཏུ་འཛིན་པའི་འཆིང་བ་དམ་པོས་བཅིངས་པས། བདག་མེད་པའི་ཆོས་ལ་དངོས་པོ་དང་མཚན་མ་ཅན་དུ་བཟུང་བ་ཆོས་ཀྱི་བདག་མེད་མ་རྟོགས་པ་ལས་བྱུང་བའི་སྡིག་པ་མཐའ་དག །ད་ནི་བདག་ཉིད་གནོང་ཞིང་འགྱོད་པས་སོ་སོར་བཤགས་སོ་ཞེས་པའོ། །བཞི་པ་རྗེས་སུ་ཡི་རང་བའི་ཡན་ལག་ནི། སྲས་བཅས་རྒྱལ་བའི་ཞེས་པས་བྱང་ཆུབ་སེམས་དཔའི་འཁོར་གྱི་དབུས་ན་མཛེས་པའི་རྒྱལ་བ་སྲས་དང་བཅས་པ་རྣམས་ཀྱི་བསོད་ནམས་ཀྱི་ཚོགས་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་ལྔ་དང་། ཡེ་ཤེས་ཀྱི་ཚོགས་ཤེས་རབ་སྟེ་ཚོགས་གཉིས་ཟབ་མོ་དང་། དེ་དག་གི་གཤེགས་ཤུལ་ཚོགས་སྦྱོར་མཐོང་སྒོམ་བཞིའི་ལམ་བདེན་བསླབ་པ་དང་། བསླབ་བྱ་མཐར་ཐུག་ནས་མི་སློབ་སྟེ་སངས་རྒྱས་ཀྱི་ས་དང་དམན་ལམ་ལ་ཞུགས་པའི་ཉན་ཐོས་དང་། རང་རྒྱལ་དང་། འཆིང་བ་མཐའ་དག་གིས་བཅིངས་པ་སོ་སོ་སྐྱེ་བོ་རྣམས་ཀྱིས་འདས་པ་དང་། མ་འོངས་པ་དང་། ད་ལྟ་སྟེ་དུས་གསུམ་དུ་བསགས་པའི་དགེ་བ་ཐམས་ཅད་ལ། དགའ་ཞིང་སྤྲོ་བའི་སེམས་ཀྱི་བཏང་སྙོམས་དང་། ཇི་མི་སྙམ་པའི་སེམས་གཟེངས་བསྟོད་དེ་རྗེས་སུ་ཡི་རང་བའོ། །ལྔ་པ་ཆོས་འཁོར་བསྐུལ་བའི་ཡན་ལག་ནི། ཕྱོགས་བཞི་མཚམས་བཞི་སྟེང་འོག་དང་བཅས་པ་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་ན་བཞུགས་པའི་རྒྱལ་བ་ཡིས། འགྲོ་བའི་ཁམས་རྣམ་པ་སྣ་ཚོགས་དང་། དབང་པོ་རྣོ་རྟུལ་ཇི་བཞིན་དུ། ཟབ་པ་སྟེ་ལྟ་བའི་ཕྱོགས་དང་། རྒྱ་ཆེ་བ་སྟེ་སྤྱོད་པའི་ཕྱོགས་དང་། གཉིས་ཀའི་དོན་ཚང་ཞིང་ཐབས་ལ་མཁས་པ་ཐེག་མཆོག་སྟེ་གསང་སྔགས་དམ་པའི་ཆོས་ཀྱི་འཁོར་ལོ་རྟག་པ་རྒྱུན་དུ་བསྐོར་བར་ཡང་ནས་ཡང་དུ་གསོལ་བ་འདེབས་པའི་དོན་ཏོ། །དྲུག་པ་མྱ་ངན་ལས་མི་འདའ་བར་གསོལ་བའི་ཡན་ལག་ནི། མཚན་བརྗོད་པར་དཀའ་བ་ནས་གང་དང་ཞེས་སངས་རྒྱས་ལ་བོས་ནས། ཁྱོད་དང་མཉམ་པ་འགའ་ཡང་མེད་ཅིང་འཇིག་རྟེན་གྱི་འདྲེན་པ་བླ་ན་མེད་པའི་ཆོས་ཀྱི་རྗེ། མཛད་པ་བཅུ་གཅིག་མཐར་ཕྱིན་ནས་ཐ་མའི་མཛད་པ་མྱ་ངན་ལས་འདའ་བར་བཞེད་པ་རྣམས། འཁོར་བ་ཇི་སྲིད་གནས་ཀྱི་བར་དུ་གཞན་དོན་ལ་དགོངས་ཏེ་མྱ་ངན་ལས་མི་འདའ་བར་ཡུན་དུ་བཞུགས་པར་གསོལ་བ་འདེབས་པའོ། །བདུན་པ་བསྔོ་བའི་ཡན་ལག་ནི། འདིར་འབད་དེ་དུས་ད་ལྟ་བའི་དགེ་བས་མཚོན་ནས་དུས་གསུམ་གྱི་དགེ་ཚོགས་མཐའ་དག་གཅིག་ཏུ་བསྡོམས་ནས་སེམས་ཅན་ཐམས་ཅད་སངས་རྒྱས་ཐོབ་པའི་རྒྱུར་བསྔོས་པའི་མཐུས། བདག་ཉིད་གཅིག་པུ་མ་ཡིན་པར་ནམ་མཁའ་དང་མཉམ་པའི་འགྲོ་བའི་ཚོགས་དང་ལྷན་ཅིག་ཏུ་ཀུན་མཁྱེན་རྒྱལ་བའི་གོ་འཕང་ཐོབ་པར་ཤོག་ཅེས་བསྔོ་སྨོན་སྟབས་གཅིག་ཏུ་བྱེད་པའོ། །གཉིས་པ་གཞུང་གི་དོན་ལ་སུམ་ཅུ་རྩ་གཉིས་ལས་དང་པོ་དལ་འབྱོར་རྙེད་དཀའ་དྲན་པར་སྨོན་པ་ནི། དེ་མ་ཐོབ་པའི་ཚེ་རབས་ཐམས་ཅད་དུ། དལ་འབྱོར་ལུས་ལྡན་ཞེས་པས་དེ་གཉིས་ཚང་བའི་མི་ལུས་རིན་ཆེན་ཉིན་མོའི་སྐར་མ་ལས་ཀྱང་དཀོན་ན། ཐོབ་བྱ་དེ་ལྡན་ལ་སྨོན་པ་སྟེ། ཇི་ལྟར་དཀོན་ན། དལ་བ་ཞེས་བྱ་བ་ནི་མི་ཁོམ་པའི་གནས་སྐབས་བརྒྱད་ཐར་བ་སྟེ། འདི་ལྟར་དམྱལ་བ། ཡི་དྭགས། དུད་འགྲོ་སྟེ་ངན་སོང་གསུམ། བདེ་འགྲོར་སྐྱེས་ཀྱང་། ལྷ་ནི་འདོད་ཡོན་དང་བག་མེད་ལ་གཡེངས། ཀླ་ཀློ་ནི་དགེ་སྡིག་མི་ཤེས་པས་མཐོང་ཚད་གསོད་ཅིང་བྱེད་ཚད་ངན་སོང་དུ་བསྒྲུབ། ལོག་ལྟ་ཅན་ནི་བླ་མ་དང་སངས་རྒྱས་ལའང་ངན་སེམས་བསྐྱེད། སངས་རྒྱས་མ་བྱོན་པའི་མུན་བསྐལ་ལ་སྐྱེས་ན་ལམ་དང་ལམ་མིན་ངོ་མི་ཤེས་པས་ཀླ་ཀློ་དང་འདྲ། ལྐུགས་པ་ནི་རྣམ་ཤེས་ལས་སུ་མི་རུང་བས་ཆོས་བསྟན་ཀྱང་བརྡ་མི་འཕྲོད། དེ་ལྟར་བརྒྱད་དུ་མ་སྐྱེས་ན་ཆོས་བསྒྲུབ་པར་ཁོམ་པས་དལ་བ་ཞེས་བྱའོ། །འབྱོར་པ་ལ་རང་འབྱོར་ལྔ་ནི། མི་ལུས་ཐོབ་པ། དེ་ཡང་ཡུལ་དབུས་ཞེས་བྱ་སྟེ་ཆོས་དར་སར་སྐྱེས་པ། དབང་པོ་ཚང་བ། མི་དགེའི་ལས་ལ་མི་སྤྲོ་བས་ལས་མཐའ་མ་ལོག་པའོ། །གཞན་འབྱོར་ལྔ་ནི། སྐྱེ་བའི་དུས་ཚོད་མ་ལོག་པ་སངས་རྒྱས་འཇིག་རྟེན་དུ་བྱོན་པ། ཆོས་གསུངས་པ། བསྟན་པ་མ་ནུབ་པ། བསྟན་པ་ལ་ཞུགས་པ། བླ་མ་དང་དགེ་བའི་གྲོགས་ཀྱི་སྙིང་བརྩེ་བ་སྟེ་དལ་འབྱོར་བཅོ་བརྒྱད་ཚང་བའི་མི་ལུས་རིན་པོ་ཆེ་ཡིན་པས་དེ་མི་སྲིད་པ་ལྟ་བུའོ། །དེ་ཙམ་གྱིས་ཀྱང་མི་ཆོག་པར་ལམ་གྱི་རྩ་བ་དགེ་བའི་བཤེས་གཉེན་མཆོག་སྟེ་མཚན་ཉིད་དང་ལྡན་པ་མིག་བཞིན་དུ་བསྟེན་ནས་ཐུགས་དང་མི་འགལ་བ་བྱེད་ཅིང་། མཉེས་པ་དུ་མའི་སྒོ་ནས་ཆོས་འབའ་ཞིག་ཉན་པ་ནི་ཐོས་པ་དང་། ཚིག་དོན་ལ་གོ་བས་དཔྱོད་ཅིང་གཞིག་འགྲེལ་བྱེད་པ་ནི་བསམ་པ། དེ་དག་གི་དོན་ཡིད་ལ་སྒོམ་པ་གསུམ་ལ་རྟག་པར་བརྩོན་པས་རང་དོན་ཚགས་སུ་ཚུད་པ་དང་། ཕྱི་ནས་རྒྱལ་བའི་བསྟན་པ་ལའང་བྱ་བ་བྱེད་ནུས་པར་ཤོག་ཅེས་པའོ། །གཉིས་པ་མི་རྟག་པ་རྒྱུད་ལ་སྐྱེ་བར་སྨོན་པ་ནི། དེ་ལྟ་བུའི་དལ་འབྱོར་རྙེད་ཀྱང་། དེའི་སྲོག་ཏུ་གྱུར་པའི་ཚེ་ནི་རྩ་ཁའི་ཟིལ་ཐིགས་ལྟར་རིང་དུ་མི་གནས་པ། དོ་ནུབ་བམ་སང་གི་ཉིན་མོ་ཙམ་ཡང་བློ་གཏད་མི་ཐུབ་པ་གཤིན་རྗེའི་སྐྱེས་བུས་སྐད་ཅིག་ལ་བཅོམ་ནས་འགྱུར་བའི་ཚུལ་རིག་པ་ལ་འཇིགས་པར་བྱས་ནས། ཚེ་འདི་བསྒྲུབ་པའི་བསམ་པ་དགྲ་འདུལ་གཉེན་སྐྱོང་སྔར་འདི་བྱས་དང་ཕྱིས་འདི་བྱེད། སྦྱོར་བ་ཚོང་སོ་ནམ། འདུ་འཛི་སྙན་གྲགས་ལོངས་སྤྱོད་སྤེལ་བ་མཐའ་དག་རྒྱང་བསྲིངས་ནས། འདུས་པ་འབྲལ་བའི་ཆོས་ཅན་ལ་བསམ་སྟེ་གཉེན་བཤེས་ཡུལ་འཁོར་ནོར་རྫས་རྣམས་ལྟ་ཅི་སྨོས། རང་གི་མལ་སྟན་དང་བཟའ་བཏུང་དང་གོས་གྱོན་འཕྲོ་ཡན་ཆད་ཀྱིས་བདག་འདོར། བདག་གིས་ཀྱང་དེ་དག་འདོར་བས་གང་ལའང་སྙིང་པོ་མེད་པ་མི་རྟག་པ། ཉེ་འབྲེལ་གྱིས་མཐའ་བསྐོར་ནས་སྨྲེ་སྔགས་འདོན་ཞིང་ཁ་སེ་ཐང་ངེ་འཆི་བ་དེ་དོ་ནུབ་ཙམ་ཡང་མི་ཡོང་བའི་གདེང་མེད་པ་རྗེས་སུ་དྲན་པར་ཤོག་ཅིག་ཅེས་པའོ། །གསུམ་པ་རྒྱུ་འབྲས་ལ་ཡིད་ཆེས་པར་སྨོན་པ་ནི། ཚེ་འཕོས་ནས་ཀྱང་ཐོག་མེད་འཁོར་བ་ནས། །བསགས་པའི་ལས་ཀྱི་སྡུག་བསྔལ་མྱོང་གྱུར་ཞིང་། །ཞེས་རང་གིས་བསགས་པའི་ལས་གཞན་ལ་མི་འཕོ། བར་མ་དོར་ཆུད་མི་ཟ། ཚོགས་ཤིང་དུས་ལ་བབས་པའི་ཚེ་རང་ཐོག་འབའ་ཞིག་ཏུ་མྱོང་འགྱུར་ཡིན་ལ། དེ་ལྟར་ལུས་ཀྱི་སྒོ་ནས་སྲོག་གཅོད་པ། མ་བྱིན་པ་ལེན་པ། འདོད་ལོག་སྤྱོད་པ་གསུམ། ངག་གི་སྒོ་ནས་རྫུན། ཕྲ་མ། ཚིག་རྩུབ། ངག་འཁྱལ། ཡིད་ཀྱི་སྒོ་ནས་བརྣབ་སེམས། གནོད་སེམས། ལོག་ལྟ་སྟེ། དེ་ལྟར་མི་དགེ་བ་བཅུ་པོ་དང་ནི་དུས་དང་རྣམ་པ་ཐམས་ཅད་དུ་འབྲེལ་ཆེ་ལ། དེ་ལའང་གཞི་བསམ་པ། སྦྱོར་བ། མཐར་ཐུག་བཞི་ཚང་དགོས་མི་དགོས་མཛོད་འགྲེལ་ལས་ཤེས་ཤིང་། ལས་དེའི་འབྲས་བུ་ཡང་རྣམ་སྨིན། རྒྱུ་མཐུན། དབང་། སྐྱེས་བུ་བྱེད་པ་སྟེ་བཞི་བཞིར་མྱོང་ཞིང་། དེ་ཡང་རྣམ་སྨིན་ནི་བསམ་པ་ཉོན་མོངས་པའི་ཁྱད་པར་ཞེ་སྡང་གིས་བྱས་ནས་དམྱལ་བ། འདོད་ཆགས་ཀྱིས་ཡི་དྭགས། གཏི་མུག་གིས་དུད་འགྲོར་སྐྱེ། རྒྱུ་མཐུན་ནི་སྲོག་གཅོད་ཀྱིས་ཚེ་ཐུང་། མ་བྱིན་ལེན་གྱིས་དབུལ་པོར་འགྱུར། འདོད་ལོག་གིས་ཆུང་མ་མི་ཉན། རྫུན་གྱིས་སྐུར་པ་མང་། ཕྲ་མས་ཉེ་འཁོར་དང་མི་མཐུན། ཚིག་རྩུབ་ཀྱིས་མི་སྙན་པ་མང་དུ་ཐོས། ངག་འཁྱལ་གྱིས་ཚིག་མི་བཙུན། བརྣབ་སེམས་ཀྱིས་རེ་བ་མི་འགྲུབ། གནོད་སེམས་ཀྱིས་རང་ལ་གནོད་བྱེད་མང་། ལོག་ལྟས་ལྟ་བ་ངན་པ་ལ་གནས། དེ་བཞིན་དུ་དབང་འབྲས་ནི་ཡུལ་ལ་སྨིན་པས། སྲོག་གཅོད་ཀྱིས་ཡུལ་གནོད་པ་ཅན་དུ་སྐྱེ། མ་བྱིན་བླངས་པས་ལོ་ཏོག་ལ་སད་སེར་སྡང་། འདོད་ལོག་གིས་གནས་མི་གཙང་། རྫུན་གྱིས་གཞན་བསླུ་མང་། ཕྲ་མས་ས་ཕྱོགས་ངམ་གྲོག་དང་ཐག་ཐུག་ཅན་དུ་སྐྱེ། ཚིག་རྩུབ་ཀྱིས་ཡུལ་ཉམས་མི་དགའ། ངག་འཁྱལ་གྱིས་ལོ་ཏོག་ཉམས། བརྣབ་སེམས་ཀྱིས་ལོ་འབྲས་ངན། གནོད་སེམས་ཀྱིས་ཆོམ་རྐུན་དང་སྦྲུལ་ལ་སོགས་ཀྱིས་འཚེ། ལོག་ལྟས་མགོན་སྐྱབས་མེད་སར་སྐྱེ། སྐྱེས་བུ་བྱེད་པའི་འབྲས་བུ་ནི་བྱེད་ལས་དང་མཐུན་པར་མྱོང་བའོ། །དེ་ལྟ་བུའི་མི་དགེ་བཅུ་ནི་སྲོག་དང་བསྡོས་ནས་སྤང་། དེའི་ལྡོག་ཕྱོགས་དགེ་བའི་ལས་ལམ་བཅུ་འཛིན་པ་ཡིན་ཏེ། འདི་ལྟར་བདག་གིས་ཀྱང་སྲོག་མི་གཅོད་པར་དམ་བཅའ་ལ། གཞན་ཡང་སྲོག་གཅོད་དུ་མི་འཇུག་པ་སོགས་མི་དགེ་བཅུ་ཅར་སྤོང་སེམས་ཀྱིས་དམ་བཅའ་འཛིན་ཅིང་གཞན་ཡང་བྱེད་མི་འཇུག་ལ། འཇིག་རྟེན་བདེ་སྡུག་ལས་འབྲས་ཀྱི་མཐུར་སྙིང་ནས་ཡིད་ཆེས་པ་ནི་འཇིག་རྟེན་པའི་ཡང་དག་པའི་ལྟ་བ་ཞེས་བྱ་སྟེ། ལས་འབྲས་བསླུ་བ་མེད་པར་ཡིད་ཆེས་ནས། །དགེ་སྡིག་ལས་ལ་འཇུག་ལྡོག་བྱེད་པར་ཤོག །ཅེས་པའི་དོན་ནོ། །བཞི་པ་འཁོར་བའི་ཉེས་དམིགས་དྲན་པར་སྨོན་པ་ནི། ༈ གང་དུ་སྐྱེས་ཀྱང་བདེ་བའི་སྐབས་མེད་ཅིང་། །གང་ལ་བསམས་ཀྱང་འཇིག་པའི་ངང་ཚུལ་ཅན། །ཞེས་པས། དེ་ལ་འགྲོ་བ་རིགས་དྲུག་པོ་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་མེའི་འོབས་ལྟ་བུ། ཆུ་སྲིན་གྱི་གྲེ་བར་ཚུད་པ་ལྟ་བུ་བདེ་བའི་གོ་སྐབས་མེད་པ་ལ་སྐྱོ་བར་བྱ་སྟེ། དེ་ཡང་དམྱལ་བར་སྐྱེས་ན་ཚ་དམྱལ་བརྒྱད། གྲང་དམྱལ་བརྒྱད། ཉི་ཚེ་ཉེ་འཁོར་བ་དང་བཅོ་བརྒྱད་ཡོད་པའི་ལྕགས་བསྲེགས་ཀྱིས་གཞི་ནི་ཚ་དམྱལ་ཐུན་མོང་གི་གནས་ཡིན་པས། དེའི་ནང་དུ་ཚུད་པ་ཙམ་གྱིས་སྡུག་བསྔལ་ཡང་བཟོད་པར་དཀའ་བ། ཁྱད་པར་ཡང་སོས་ནི། ཕན་ཚུན་ཁོང་ཁྲོས་གདུངས་ནས། མཚོན་རྡེག་རེས་བྱེད་ཅིང་ཤི་བ་ན། ནམ་མཁའ་ནས་ཡང་སོས་པར་ཤོག་ཅིག་ཅེས་པའི་སྒྲ་བྱུང་ནས་ཡང་སོས་པས་སྡུག་བསྔལ་ལོ། །ཐིག་ནག་ནི། གཤེད་མ་འཇིགས་སུ་རུང་བས་ལུས་ལ་ཐིག་མང་པོ་འདེབས་ཤིང་སོག་ལེས་གཤོག་པ་དེ་ཡང་འགྲིག་ཅིང་གཤོག་གོ །བསྡུས་འཇོམས་ནི། ལྕགས་བསྲེགས་ཀྱི་རི་སྣ་དུད་འགྲོའི་མགོ་བརྙན་ཅན་གྱི་བར་དུ་བརྡུང་ཞིང་བཅར་བའོ། །ངུ་འབོད་ནི། ལྕགས་ཞུན་བཀོལ་བར་འཚོད་པའོ། །ངུ་འབོད་ཆེན་པོ་ནི། ལྕགས་ཁྱིམ་མེ་འབར་བར་ཚུད་ནས་སྒོ་འགྲིག་ཅིང་འཐུམས་ལ་ངུ་སྐད་ལྷང་ལྷང་འབོད་པའོ། །ཚ་བ་ནི། གསལ་ཤིང་མེ་འབར་བས་ལུས་ཀྱི་གཞུང་འབིགས་པའོ། །རབ་ཏུ་ཚ་བ་ནི། གསལ་ཤིང་རྩེ་གསུམ་པས་འབིགས་ཤིང་ཕྱི་ནས་ལྕགས་བསྲེགས་ལེབ་མོས་དཀྲི་བ་དང་ཁྲོ་ཆུ་ཁོལ་མར་འཚོད་དོ། །མནར་མེད་པ་ནི། དེའི་མེ་ཚ་བའི་མཐར་ཐུག་པས་རང་ལུས་དང་མེ་དབྱེར་མི་ཕྱེད་པར་བསྲེག་ཅིང་། ཕྱི་ནས་མདའ་མདུང་ལ་སོགས་པ་མཚོན་ཆའི་ཆར་འབབ་པ་ལ་བར་སེང་ཅུང་ཟད་ཀྱང་མེད་པར་ཤིན་ཏུ་སྡུག་བསྔལ་ཞིང་ཚེ་ཡང་བར་བསྐལ་ཐུབ་པའོ། །གྲང་དམྱལ་བརྒྱད་ནི། སའི་རྣམ་པ་ཅུང་ཟད་ཀྱང་མི་མངོན་པའི་གངས་ཁྲོད་བུ་ཡུག་སྦྲེབས་པའི་གནས་སུ་ལུས་འཁུམས་ཤིང་གྲང་ཟུག་ཆེ་དྲག་པས་ལུས་ལ་ཆུ་བུར་གྲངས་མེད་འབྱུང་བས་ཆུ་བུར་ཅན་དང་། ཆུ་བུར་བརྡོལ་བ་དང་། ཨ་ཆུའི་སྒྲ་རྒྱུན་མི་འཆད་པ་དང་། ཀྱི་ཧུད་དང་། སོ་ཐམ་ཐམ་དང་། པགས་པ་ཨུཏྤལ་ལྟར་དྲུག་ཚལ་དུ་གས་པ། པདྨ་ལྟར་བརྒྱད་ཚལ་དུ་གས་པ། པདྨ་ལྟར་ཆེར་གས་པ་སྟེ་བརྒྱད་ཀྱིས་སྡུག་བསྔལ་ལོ། །ཉི་ཚེ་བ་ནི། རང་གི་ལུས་ལ་ཀ་བ་དང་། ཐག་པ་དང་། སྒོ་དང་། ཕྱགས་མ་སོགས་ཀྱི་སྣང་བ་ཤར་ནས་བཀོལ་བ་དང་། བྲག་གི་དབར། རྡོའི་མཁྲེགས། ཤིང་གི་སྦུབས་སོགས་སུ་འཐུམས་ཤིང་འབྱུང་བཞིའི་གནོད་པས་མནར་བ་ལ་སོགས་རྣམ་གྲངས་ཤིན་ཏུ་མང་ལ། ཉེ་འཁོར་བ་ནི། སྤུ་གྲིའི་ཐང་། རལ་གྲིའི་ནགས་ཚལ། ཐལ་ཚན་གྱི་རབས། རོ་མྱགས་ཀྱི་འདམ། ལྕགས་ཀྱི་ཤལ་མ་ལི་སོགས་ལ་མནར་སྤྱོད་ཤིན་ཏུ་མི་བཟོད་པ་མྱོང་ངོ་། །དེ་བཞིན་དུ་ཡི་དྭགས་ལའང་ཕྱིའི་སྒྲིབ་པ་ཅན། ནང་གི་སྒྲིབ་པ་ཅན། སྒོས་ཁུར་གྱི་སྒྲིབ་པ་ཅན་ཏེ་ཐམས་ཅད་ཀྱང་ཟས་སྐོམ་ལོ་ཟླར་མི་རྙེད་པས་བཤང་གཅི་ཟ་ཞིང་། ལུས་དཔག་ཚད་ཙམ་མི་ཁེངས་པས་སྡུག་བསྔལ་བཟོད་བླག་མེད་པའོ། །དུད་འགྲོ་ལ་བཀོལ་སྤྱོད་ཀྱི་སྡུག་བསྔལ་མཐོང་ཆོས་ཅན་དང་། དེའི་ནང་ནས་ཀྱང་བྱིངས་ན་གནས་པ་རྣམས་ནི་མུན་པ་མུན་ནག་གི་གནས་སུ་གཅིག་ལ་གཅིག་ཟ་ཞིང་གཙེར་བའོ། །དེ་བཞིན་དུ་ལྷ་རྣམས་ལའང་འཆི་བའི་ལྟས་ལྔ་ཤར་བས་འཕོ་ཞིང་གནས་རིགས་འོག་མར་ལྟུང་བའི་སྡུག་བསྔལ་དང་། མི་ལ་སྐྱེ་རྒ་ན་འཆིའི་སྡུག་བསྔལ་གྱི་སྟེང་། འགྱུར་བའི་སྡུག་བསྔལ་དང་། སྔ་མ་མ་སངས་བར་གསར་དུ་བརྩེགས་པ་སྡུག་བསྔལ་གྱི་སྡུག་བསྔལ་བལྟར་མི་མངོན་པ། དགྲ་དང་ཕྲད་པ། གཉེན་དང་བྲལ་བ། འདོད་པ་ཐོག་ཏུ་མ་ཁེལ་བ། ཉེར་ལེན་གྱི་ཕུང་པོ་ལྔ་པོ་འཚེ་བ་སྣ་ཚོགས་ཀྱི་སྣོད་ལྟར་ཡོད་པས་སྡུག་བསྔལ་གྱི་འཕྲང་ལས་མི་ཐར་པ། ལུས་ངག་རྡུལ་ཕྲན་དུ་ཞིག་ཞིག་འབད་ཀྱང་བདེ་བ་ལ་ཐོབ་དུས་མེད་པ། བྱ་བ་མང་བ། འབྲས་བུ་ཉུང་བ། རེ་དོགས་ཐམས་ཅད་བསླུ་བའི་ཆོས་ཅན། ཕུན་སུམ་ཚོགས་ན་ཇི་ཙམ་ཚོགས་པ་དེ་དག་ཀྱང་ཚེ་ཕྱི་མ་སྡུག་བསྔལ་བསྒྲུབ་པའི་རྒྱུར་འགྲོ་བས་ན། ༈ གང་ཞིག་བསྒྲུབ་ཀྱང་སྙིང་པོ་མེད་པའི་ཆོས། །གང་ཡིན་ཤེས་ནས་ཡིད་ནི་འབྱུང་བར་ཤོག །ཅེས་སྨོན་ནོ། །ལྔ་པ་ཐར་ལམ་ལ་བར་ཆད་མེད་པར་སྨོན་པ་ནི། ༈ བྱང་ཆུབ་བསྒྲུབ་ལ་བར་དུ་གཅོད་པའི་རྐྱེན། །མི་མཐུན་བདུད་ཀྱི་དབང་དུ་མི་འགྱུར་ཞིང་། །གནས་དང་ཡོ་བྱད་གྲོགས་སོགས་མཐུན་པའི་རྐྱེན། །བསམ་པ་བཞིན་དུ་ལྷུན་གྱིས་འགྲུབ་པར་ཤོག །དེ་ལ་ཐར་ལམ་བྱང་ཆུབ་སྒྲུབ་པ་ལ་མི་མཐུན་ཕྱོགས་ཀྱི་བདུད་རྣམ་པ་བཞི་ཡོད་དེ། རང་རྒྱུད་དང་ལྷན་ཅིག་པ་ཉོན་མོངས་པའི་བདུད་ཀྱིས་དང་པོར་ངེས་འབྱུང་མི་སྐྱེ་བར་ཆོས་དང་བླ་མ་ལ་དད་དུ་མི་འཇུག །བར་དུ་དགེ་བའི་བཤེས་གཉེན་གྱིས་སུན་ནས་བག་མེད་ཀྱི་དབང་དུ་འཆོར། ཐ་མར་ཆོས་ལྟར་བཅོས་པའི་ཞི་བདེས་འཆི་ཁར་ལག་སྟོང་དུ་འགྲོ། ཕུང་པོའི་བདུད་ཀྱིས་ལམ་བདེན་ལ་དངོས་པོར་ཞེན་ནས་གཟུགས་དང་། འདུ་ཤེས་དང་། འདུ་བྱེད། རྣམ་ཤེས་ཀྱི་ཕྱོགས་མ་དག་པ་འཛིན་ཅིང་ཆོས་ཉིད་ཀྱི་གནས་ལུགས་ལ་སྒྲིབ། ལྷའི་བུའི་བདུད་ཀྱིས་གཉེན་བཤེས་ལ་ཆགས་ཤིང་ལོག་འཚོ་དང་འདོད་པའི་ཡོན་ཏན་ལ་གཡེངས་སུ་འཇུག །འཆི་བདག་གི་བདུད་ཀྱིས་དལ་འབྱོར་གྱི་ཚོགས་པ་འདྲལ་ཞིང་ལམ་ལ་བར་དུ་གཅོད་པས་ན། དེའི་གཞན་དབང་དུ་མི་འགྲོ་ཞིང་། གནས་དག་པ་བས་མཐའ་འདུ་འཛིས་དབེན་པ་དང་། འཚོ་བ་དང་ཡོ་བྱད་དག་པ་བསོད་སྙོམས་དང་ཆོག་ཤེས། གྲོགས་དག་པ་ཤེས་རྒྱུད་ངེས་འབྱུང་ཆེ་ཞིང་ཐོས་པ་དང་ལྡན་པའི་ཚངས་པར་མཚུངས་སྤྱོད། སྡོམ་པ་དག་པ། སོ་བྱང་སྔགས་གསུམ་ལ་ཉེས་པས་མ་གོས་པ། ཆོས་དག་པ་སྨོན་པ་བྱང་ཆུབ་ཀྱི་སེམས་དང་འཇུག་པ་ཕྱིན་དྲུག་དང་བསྐྱེད་རྫོགས་ཏེ་ཀུན་ཏུ་བཟང་པོའི་སྤྱོད་པ་ཁྲེལ་བག་ཡོད་པའི་གེགས་སུ་མི་འགྱུར་བར་སྨོན་པའོ། །དྲུག་པ་སྐྱབས་སུ་འགྲོ་བར་སྨོན་པ་ནི། ༈ རང་གཞན་འཁོར་བའི་སྡུག་བསྔལ་གྱིས་སྐྲག་ནས། །བསླུ་མེད་སྐྱབས་གནས་དཀོན་མཆོག་གསུམ་པོ་ལ། །དད་དང་གུས་པའི་བསམ་པ་རྩེ་གཅིག་གིས། །སྐྱབས་སུ་འགྲོ་བའི་སྡོམ་པ་ནོད་པར་ཤོག །དེ་ཡང་སྐྱབས་འགྲོ་ཙམ་པོ་བ་ལྷ་མིའི་བདེ་འབྲས་ཙམ་ལ་དམིགས་པ་མ་ཡིན་ཞིང་། རང་དོན་ཡིད་བྱེད་ཀྱི་ཞི་བདེའི་བསམ་པས་ཀྱང་མ་ཡིན་པར་སེམས་ཅན་ཐམས་ཅད་ཀྱི་དོན་དུ་དམིགས་པས་གཞན་སྒྲ་ཞུགས་ལ། དེ་ཡང་འཁོར་བའི་སྡུག་བསྔལ་ལ་སྙིང་ཐག་པ་ནས་སྐྲག་ཅིང་། དེ་ལས་ངེས་པར་སྐྱོབ་ཅིང་བསླུ་བ་མེད་པ་ནི་དཀོན་མཆོག་གསུམ་མ་གཏོགས་གཞན་སུ་ཡང་མེད་པས། དེ་ལ་ཆོས་སྣང་བའི་སྒོ་དད་གུས་ཀྱི་བསམ་པ་རྩེ་གཅིག་པས་བྱང་ཆུབ་མ་ཐོབ་ཀྱི་བར་སྐྱབས་སུ་འགྲོ་བ་ནི་སྡོམ་པ་ཐམས་ཅད་ཀྱི་གཞི་རྟེན་ནོ། །བདུན་པ་བྱང་ཆུབ་ཏུ་སེམས་བསྐྱེད་པར་སྨོན་པ་ལ། སྨོན་སེམས་ནི། ༈ ཐོག་མེད་དུས་ནས་དྲིན་ཅན་ཕ་མ་རྣམས། །རིགས་དྲུག་གནས་སུ་སྡུག་བསྔལ་མྱོང་རྣམས་ལ། །བཟོད་བླག་མེད་པའི་སྙིང་རྗེ་དང་བཅས་པའི། །རླབས་ཆེན་བྱང་ཆུབ་སེམས་མཆོག་བསྐྱེད་པར་ཤོག །དེ་ལ་འཁོར་བ་ལ་ཐོག་མ་མེད་པའི་རྒྱུས་སེམས་ཅན་ཐམས་ཅད་ཕ་མར་མ་གྱུར་པ་གཅིག་ཀྱང་མེད་པ་འདི་ལ་ངེས་ཤེས་མ་སྐྱེས་ཚེ་སེམས་བསྐྱེད་ཚད་ལྡན་ཡང་མི་ཤེས་ལ། ངེས་ཤེས་བསྐྱེད་ན་ད་ལྟ་རང་གི་ཕ་མའམ་ཡིད་གཅུགས་པ་ཞིག་བཙོན་དོང་དུ་ཆུད་ན་དེ་ལ་སྡུག་བསྔལ་དྲག་པོ་སྐྱེ་ཞིང་གདོན་པའི་ཐབས་ལ་བརྩོན་པ་ལྟར། ཚེ་རབས་སྔ་མའམ་ད་ལྟར་གྱི་ཕ་མའང་རུང་སྟེ། དེ་དག་འགྲོ་བ་རིགས་དྲུག་གི་གནས་བཙོན་པ་ཁྲི་མུན་དུ་བཅུག་པ་ལྟ་བུའི་ནང་དུ་སྡུག་བསྔལ་མྱོང་བཞིན་པ་ལ་བཟོད་བླག་མེད་པའི་སྙིང་རྗེ་སྐྱེ་བས་དེ་དག་དེ་ལས་ད་ལྟ་ཉིད་དུ་མྱུར་བ་ཉིད་དུ་ཐར་བར་ཤོག་ཅིག་པ་དུང་དུང་དང་། བདག་གིས་འབད་པ་ཐམས་ཅད་ཀྱང་དེ་དག་ཐར་བའི་ཐབས་སུ་ཤོག་ཅིག་སྙམ་པའི་སྙིང་རྗེའི་བསམ་པ་རླབས་པོ་ཆེ་བསྐྱེད་པ་ནི་བྱང་ཆུབ་ཀྱི་སེམས་དམ་པའི་ངོ་བོ་ཉིད་ཡིན་པས་དེར་སྨོན་པའོ། །བརྒྱད་པ་འཇུག་སེམས་ནི། ༈ གཞན་གྱི་དོན་དུ་སངས་རྒྱས་བསྒྲུབ་པའི་བློས། །འགྲོ་ལ་ཕན་ཕྱིར་ལྷག་བསམ་གོ་གྱོན་ཏེ། །ཕར་ཕྱིན་དྲུག་ལ་ཚུལ་བཞིན་བསླབ་པ་ཡི། །རྒྱལ་བའི་སྲས་ཀྱི་སྤྱོད་ལ་འཇུག་པར་ཤོག །འདི་ལྟར་ཉན་རང་ལྟར་རང་དོན་ཞི་བདེ་ལ་དམིགས་པའི་བསམ་པ་ཅན་མ་ཡིན་པར། ལམ་བདེན་གྱི་སྨོན་པ་ཐམས་ཅད་གཞན་དོན་དུ་སངས་རྒྱས་ཐོབ་པ་ལ་དམིགས་ཤིང་། དེའང་བཟང་བརྫུའི་གཡོ་དང་གྲགས་འདོད་ཙམ་གྱི་རྒྱུས་མ་ཡིན་པར་ལྷག་བསམ་དྲི་མ་མེད་པའི་སྙིང་སྟོབས་ཀྱི་གོ་ཆ་བགོས་ནས་ཕ་རོལ་ཏུ་ཕྱིན་པ་དྲུག་ལ་ཚུལ་བཞིན་དུ་བསླབ་པ་ནི་རྒྱལ་བའི་སྲས་ཀྱི་སྤྱོད་པ་ལ་འཇུག་པ་ཡིན་པས་དེ་ལྟར་ཐོབ་པར་སྨོན་པའོ། །དགུ་པ་སྨོན་འཇུག་སོ་སོའི་སྤྱི་དོན་ལ་སྨོན་པ་ནི། ༈ བྱམས་དང་སྙིང་རྗེ་དགའ་དང་བཏང་སྙོམས་དང་། །བསམ་པ་བཟང་པོ་ཚད་མེད་བཞི་ལྡན་ཞིང་། །སྦྱིན་དང་སྙན་སྨྲ་དོན་སྤྱོད་དོན་མཐུན་པ། །སྦྱོར་བ་བསྡུ་དངོས་བཞི་ལ་བརྩོན་པར་ཤོག །དེ་ལ་སྨོན་པ་འགྲུབ་པའི་རྒྱུ་ཚད་མེད་བཞི་ཡིན་ཏེ། སེམས་ཅན་ཐམས་ཅད་ལ་ཁོང་ཁྲོ་བ་མེད་པའི་བྱམས་པས་ཕན་འདོགས་པའི་ཐབས་བསམ་པ་དང་། དེ་དག་རང་རང་གིས་སྔར་བསགས་པའི་སྡུག་བསྔལ་གྱི་འབྲས་བུར་སྤྱོད་པ་ལ་ངན་སོང་གསུམ་མམ། བདེ་འགྲོ་ཡིན་ཡང་ལྟོ་གོས་ཀྱི་ཉམས་ཐག་པ་དང་། སྨྱོ་བརྗེད་ལ་སོགས་པའི་གདོན་དང་། མཛེ་ཕོལ་དང་། འབྲུམ་ནད་ལ་སོགས་པས་སྡུག་བསྔལ་བ་དང་། རྒྱལ་པོའི་དཔྱ་ཁྲལ་དང་ཆད་ལས་ཀྱིས་མནར་བ་སོགས་ལ་སྙིང་རྗེ་དྲག་པོ་བསྐྱེད་ཅིང་། འདི་ལས་ད་ལྟ་ཉིད་དུ་ཐར་ན་བསམ་པ་དང་། གཞན་གྱི་ཕུན་ཚོགས་ལ་ཕྲག་དོག་མི་བྱེད་པར་དགའ་བ་བསྒོམ་ཞིང་། འགྲོ་བ་གཞན་དག་ཀྱང་འདི་ལྟ་བུར་གྱུར་ན་ང་རེ་དགའ་སྙམ་པ་དང་། རང་ཕྱོགས་ལ་ཆགས་པ་གཞན་ཕྱོགས་ལ་སྡང་བའི་ཆགས་སྡང་མགོ་སྙོམས་ནས་ཉེ་རིང་མེད་པའི་བཏང་སྙོམས་ལ་སློབ་པ་ནི་སྨོན་སེམས་ཀྱི་སྲོག་ཤིང་ལྟ་བུ་ཡིན་ལ། དེ་བཞིན་དུ་འཇུག་པ་ལ། བསྡུ་བའི་དངོས་པོ་བཞིས་སེམས་ཅན་བསྡུ་བའི་བརྩོན་འགྲུས་རྒྱུན་མི་ཆད་པར་བྱ་ཞིང་། དེ་ལ་སྦྱིན་པ་ནི་སེམས་ཅན་བསྡུ་བའི་སྒོ་དང་པོ་ཡིན་ཏེ། སྦྱིན་པ་ལ་མི་དགའ་བ་སུ་ཡང་མེད་པས། ཐོག་མར་ཟང་ཟིང་གི་སྦྱིན་པས་སེམས་ཅན་བསྡུ་བར་བྱའོ། །དེ་བཞིན་དུ་ཚིག་རྩུབ་མོ་ལ་སུ་ཡང་མི་དགའ་ན་སྙན་པར་སྨྲ་བས་གཞན་དགའ་བར་བྱ་བ་དང་། དེ་ནས་དོན་སྤྱོད་པ་སྟེ་གཞན་དོན་ལ་སྐྱོ་དུབ་ཀྱི་སེམས་སྤངས་ནས་སློབ་པའི་ལམ་གང་ཡིན་པ་ལ་འཇུག་པ་དང་། དོན་མཐུན་པ་ནི་གཞན་ལ་ཇི་ལྟར་འདོམས་པ་ལྟར་རང་ཡང་ཆོས་བཞིན་དུ་བྱ་དགོས་ཏེ། བཅོམ་ལྡན་འདས་ཞི་བ། འཁོར་ཡང་ཞི་བ། བཅོམ་ལྡན་འདས་དུལ་བ། འཁོར་ཡང་དུལ་བ་ལྟ་བུ་སྟེ། རང་རྒྱུད་མ་རུངས་ཤིང་མ་གྲོལ་བས་སེམས་ཅན་གཞན་ལ་ཕན་པར་དཀའ་བའི་ཕྱིར་ཚད་མེད་བཞི་ནི་བྱང་ཆུབ་ཀྱི་སེམས་འགྲུབ་པའི་བསམ་པ་མ་ནོར་བ་དང་། བསྡུ་བའི་དངོས་པོ་བཞི་ནི། གཞན་དོན་ལ་འཇུག་པའི་སྦྱོར་བ་མ་ནོར་བ་ཡིན་པས་ཐེག་པ་ཆེན་པོའི་ལམ་གྱི་སྲོག་ཤིང་དུ་གཟུང་བར་བྱའོ། །བཅུ་པ་ནས་བཟུང་འཇུག་པའི་བསླབ་བྱ་རྐང་པ་དྲུག་ལས། སྦྱིན་པའི་ཕར་ཕྱིར་གསུམ་ལ་སྨོན་པ། ༈ གང་ལ་ཅི་འདོད་ཟང་ཟིང་སྦྱིན་པ་དང་། །ཆོས་དོན་གཉེར་ལ་ལེགས་པར་བཤད་པ་དང་། །སྣ་ཚོགས་འཇིག་པའི་གནས་ལ་སྐྱོབ་པ་ཡི། །སྦྱིན་པ་རྣམ་གསུམ་རྟག་ཏུ་གཏང་བར་ཤོག །ཅེས་པས། ནང་གསེས་ཟང་ཟིང་གི་སྦྱིན་པ་ལའང་གཏོང་བ་དང་། གཏོང་བ་ཆེན་པོ་དང་། ཤིན་ཏུ་གཏོང་བ་གསུམ་ལས། དང་པོ་ནི་བརྐམ་ཆགས་འཇིག་པའི་ཐབས་ལ་ཆ་ཕྲ་མོ་ནས་བསླབ་ཅིང་ཇེ་ཆེར་སྤེལ་བའོ། །དེ་ཡང་འདི་ལྟར་ཕྱེ་ཕུལ་ཐག་གང་ལའང་འཇུངས་པ་སྐྱེས་པའི་ཚེ་རང་གིས་རང་ལ་ཞེ་ཁྲེལ་བདས་ནས། ཁྱོད་སྔར་ཡང་སེར་སྣ་ལ་གོམས་པས་འབྱོར་པ་ཅན་དུ་མ་སྐྱེས་ལ་ད་དུང་ཡི་དྭགས་ཀྱི་རྒྱུ་མཐུན་སྔུན་བསུར་སླེབས་འདུག་པ་འདི་ཡི་རེ་མུག །གང་ཡོད་ཤུལ་ན་བཞག་ནས་འཆི་ཁར་ལག་སྟོང་དུ་འགྲོ་བ་འདི་གླེན་པ་ཅང་ཤེས་སུ་རྫུ་བར་འདུག་སྙམ་དུ་བསམས་ནས་བྲེ་གང་གཏོང་བ་ལ་འཇུངས་པའི་ཚེ་ཁལ་གཅིག་གཏོང་བ་སྙིང་སྟོབས་བསྐྱེད་པས་རྣམ་རྟོག་ནི་འདུས་བྱས་ཡིན་པའི་ཕྱིར་སེར་སྣ་ཇེ་ཆུང་དུ་སོང་ནས། གཏོང་བ་ཆེན་པོ་བུ་དང་བུ་མོ་ཡང་གཏང་ནུས་པར་གདོན་མི་ཟ་ལ། མཐར་གྱི་ཤིན་ཏུ་གཏོང་བ་མགོ་དང་ཡན་ལག་གཏང་ནུས་པ་ལ་བསླབ་པའོ། །དེའང་སེར་སྣ་འཇིག་པ་ལ་བསླབས་པས་གཏོང་སེམས་གོམས་པར་འགྱུར་ལ། གཏོང་སེམས་གོམས་ན་སྦྱིན་པའི་ཕ་རོལ་ཏུ་ཕྱིན་པ་རྫོགས་པ་ཡིན་ནོ། །དེ་བཞིན་དུ་གཞན་རྒྱུད་ལམ་བདེན་ལ་སྦྱོར་བའི་ཆོས་ཀྱི་སྦྱིན་པ་ནི་དོན་དང་ལྡན་པ་ཡིན་ན་ལོག་སྒྲུབ་དང་སྐྱོ་ངལ་མཐའ་དག་ལ་བཟོད་པར་བྱ། གནས་སྐབས་རྒྱལ་པོའི་ཆད་པ་དང་། མེ་ཆུ་གཅན་གཟན་དང་ཆོམ་རྐུན་སོགས་ཀྱི་འཇིགས་པ་འདི་ཡང་དབལ་ཚ་བ་ཡིན་པས་མི་འཇིགས་པ་སྐྱབས་ཀྱི་སྦྱིན་པ་ལ་ཡང་ཆེ་ཐང་དུ་བྱའོ། །བཅུ་གཅིག་པ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གསུམ་ལ་སྨོན་པ་ནི། ༈ མི་དགེའི་ལས་ལམ་མཐའ་དག་སྤོང་བ་དང་། །རྒྱ་ཆེན་དགེ་བའི་ལས་ལ་འཇུག་པ་དང་། །དེ་དག་གཞན་ལ་ཕན་ཕྱིར་བསྒྲུབ་པ་ཡིས། །ཚུལ་ཁྲིམས་རྣམ་པར་དག་པར་བསྲུང་བར་ཤོག །དེ་ལ་མི་དགེ་བའི་ལས་ལམ་བཅུ་སྤོང་བ་ནི་ཚུལ་ཁྲིམས་ཀྱི་ཕྱི་མོ་ཡིན་པས་ཕན་ཡོན་ཚད་མེད་པའི་ཕྱིར། ཁྱིམ་པ་རྣམས་ཀྱིས་ཀྱང་དང་དུ་བླང་བ་ནི་དལ་བ་ཕུན་སུམ་ཚོགས་པའི་དགོས་པ་ཡིན་ལ། ཁྱད་པར་མངོན་པར་མཐོ་བའི་རྟེན་དུ་ཁྲིམས་ཡན་ལག་བརྒྱད་པ་ཉ་སྟོང་བརྒྱད་གསུམ་གྱིས་མཚོན་དུས་ཆེན་བཞི་ལ་སོགས་པར་བསྲུང་ཞིང་། དེའི་བླང་འདས་ཀྱང་སྲོག་གཅོད། མ་བྱིན་བླང་། མི་ཚངས་སྤྱོད། བརྫུན་ཏེ་རྩ་བ་བཞི་པོ་སྤངས་བའི་སྟེང་། ཆང་མི་འཐུང་བ། གར་དང་ཕྲེང་རྒྱན། མལ་སྟན་མཐོ་བ། ཕྱི་དྲོའི་ཁ་ཟས་སྤོང་བ་སྟེ་བརྒྱད་དོ། །ཁྱད་པར་ཡོན་ཏན་གྱི་རྟེན་དུ་གྱུར་པ་གཏན་ཁྲིམས་ནི། དགེ་སློང་ཕ་མ་གཉིས། དགེ་ཚུལ་ཕ་མ་གཉིས། དགེ་སློབ་མ། དགེ་བསྙེན་ཕ་མ་གཉིས་ཏེ་སོ་ཐར་རིགས་བདུན་གྱི་སྡོམ་པས་ཇི་སྲིད་འཚོ་བའི་བར་དུ་རྒྱུད་སྡོམ་པ་ནི་ཉེས་སྤྱོད་སྡོམ་པའི་ཚུལ་ཁྲིམས་དངོས་བསྟན་ཡིན་ལ། དེའང་བསམ་པའི་ཆ་ནས་རྒྱལ་པོའི་ཆད་པ་དང་དཔྱ་ཁྲལ་སོགས་ལས་སྐྱོབ་པའི་ཕྱིར་བསླབ་པ་བླངས་ན་འཇིགས་སྐྱོབ་དང་། ད་ལྟའི་ཕལ་མོ་ཆེ་ལྟར་འཚོ་བ་དང་ཞི་བདེའི་སླད་དུ་བསླབ་པ་བླངས་བ་ནི་ལེགས་སྨོན་ཞེས་བྱ་སྟེ་ཐར་པའི་རྒྱུར་མི་འགྲོ་ལ། འོན་ཀྱང་སེམས་རྒྱུད་ལ་ངེས་འབྱུང་ནམ་སྐྱེས་པ་ན་སྡོམ་པ་གནས་འགྱུར་ཞེས་བྱ་སྟེ་ཐར་པའི་རྒྱུར་འགྲོ་བས་རྣམ་པ་ཐམས་ཅད་དུ་འཁོར་བའི་སྡུག་བསྔལ་ལ་སྐྱོ་བའི་སེམས་བསྐྱེད་པར་བྱའོ། །དེའི་སྟེང་དུ་བྱང་ཆུབ་སེམས་དཔའི་ཚུལ་ཁྲིམས་གཉིས་ལས། དགེ་བའི་ཆོས་སྡུད་ནི་བསྡུ་བའི་དངོས་པོ་བཞི་དང་ཕྱིན་དྲུག་གི་ཕྱོགས་སྒོ་ཐམས་ཅད་ནས་སྡུད་པར་བྱ་ཞིང་། དེའི་མཐུན་ཕྱོགས་སྲོག་བསླུ། ཕྱག་བསྐོར་དང་། མཆོད་སྦྱིན། ཆབ་གཏོར། འཕྲོག་མ་སོགས་འབྱུང་པོ་ལ་བརྔན་སྦྱིན་བསང་གསུར། ཡིག་བརྒྱ་སོགས་གཟུངས་སྔགས་ཁྱད་པར་ཅན་དང་། ལྟུང་བཤགས། ཡན་ལག་བདུན་པ་བཟང་སྤྱོད་ལ་སོགས་ཁ་ཏོན་དང་། གསུང་རབ་ཀློག་པ་སོགས་ཆོས་སྤྱོད་བཅུ་དང་། རྒྱལ་པོ་ལ་སོགས་འབྱོར་ལྡན་ཡིན་ན་སེམས་ཅན་ལ་ཐོ་མ་འཕོག་པའི་བསམ་པ་བཟང་པོས་སྐུ་གསུང་ཐུགས་རྟེན་བཞེང་པ་དང་། ཞིག་གསོ། གྲུ་ཟམ་དང་ལམ་འཕྲང་འཆོས་ཤིང་རི་རྒྱ་དང་། ཆུ་རྒྱ་སྡོམ་པ་སོགས་ལ་འབད་པར་བྱ་ཞིང་། དེ་ཐམས་ཅད་ཀྱང་དངོས་དང་བརྒྱུད་ནས་གཞན་དོན་འབའ་ཞིག་ལ་འགྲོ་བར་བྱ་ཞིང་། བསྔོ་བས་རྒྱས་འདེབས་པ་ནི་སེམས་ཅན་དོན་བྱེད་ཀྱི་ཚུལ་ཁྲིམས་ཡིན་ནོ། །བཅུ་གཉིས་པ་བཟོད་པའི་ཕ་རོལ་ཏུ་ཕྱིན་པ་གསུམ་ལ་སྨོན་པ་ནི། ༈ གནོད་བྱེད་རྣམས་ལ་སྙིང་རྗེ་བསྐྱེད་པ་དང་། །ཆོས་ཕྱིར་དཀའ་སྤྱད་དང་དུ་ལེན་པ་དང་། །ཆོས་ཉིད་ཟབ་མོའི་དོན་ལ་མི་སྐྲག་པའི། །རླབས་ཆེན་བཟོད་པ་སྒོམ་པའི་མཐུ་ལྡན་ཤོག །དེ་ལ་ཞེ་སྡང་དང་ཁོང་ཁྲོ་ལྟ་བུའི་སྡིག་པ་མེད་པས་བཟོད་པ་ལ་བསླབ་པར་བྱ་སྟེ། སེམས་ཅན་གྱི་ཁམས་ནི་ཤིན་ཏུ་མི་བསྲུན་པའི་ཕྱིར། འབྱོར་ན་ནི་ཕྲག་དོག །རྒུད་ན་ནི་བརྙས་སེམས། མཉམ་ན་ནི་མཐོ་གནོན་གྱི་སེམས་ཡིད་ལ་བཞག་ནས། བརྡེག་པ་དང་། འཚོག་པ་དང་། མཚང་འདྲུ་བ་དང་། བརྐུ་ཞིང་འཕྲོག་པ་ལ་སོགས་གནོད་པ་འབའ་ཞིག་གི་བསམ་སྦྱོར་ཅན་ཡོད་དེ། དེ་ལ་གནོད་ལན་བཅལ་ན་རང་ཡང་ཁྲོ་ཞིང་འཚིག་པར་འགྱུར་བས་བསྐལ་པར་བསགས་པའི་དགེ་བ་ཡུད་ཙམ་ལ་འཇོམས་པར་བྱེད་པས་རང་ལའང་གནོད་པ་ཆེན་པོ་ཡིན་ལ། གཅིག་ཏུ་ན་ཁོ་རང་ཡང་ཉོན་མོངས་པའི་གདོན་གྱིས་བཏབ་པ་ཡིན་ཏེ་གཞན་ལ་གནོད་པ་བྱས་ན། ཕྱི་མའི་ལས་འབྲས་ཕར་བཞག་ནས་རང་ལའང་མཐོང་ཆོས་སུ་གནོད་ལན་འདུ་བྱེད་པ་དེ། ཁོང་གིས་མ་རིག་པའི་ཕྱིར་ཡང་དེ་ལ་དམིགས་པའི་སྙིང་རྗེ་བསྐྱེད་ནས་བཟོད་པ་བསྒོམ་དགོས་ཏེ། འདི་ལྟར་བཟོད་པ་ནི་དཀའ་ཐུབ་ཀྱི་ནང་ནས་མཆོག་ཏུ་གྱུར་པ་ཡིན་པས་སྦྱིན་པ་དང་ཚུལ་ཁྲིམས་གཉིས་ཀྱིའང་གོང་དུ་ཁྱད་ཞུགས་པར་གསུངས་ལ། དེ་བས་ན་འདོད་པ་མ་སྤངས་བཞིན་དུ་ཆུ་དང་རྡེའུ་ཟ་བ་དང་། དབང་པོ་ཚར་བཅད་པའི་དཀའ་ཐུབ་ཀྱིས་དལ་རྟེན་ཆུད་འཛའ་བ་ལས་མེད་པས་དཀའ་ཐུབ་ཀྱི་མཆོག་བཟོད་པ་ཡིན་པ་ལ་ཆེ་ཐང་དུ་སེམས་བསྐྱེད་པར་བྱའོ། །དེ་བཞིན་དུ་ཆོས་ཕྱིར་དཀའ་སྤྱད་བཟོད་པའི་བཟོད་པ་ནི། རྙེད་པར་དཀའ་བའི་དལ་འབྱོར་འདི་ལྟ་བུ་རྙེད་ནས། ཆོས་བསྒྲུབ་པའི་རྒྱུ་རྐྱེན་ཐམས་ཅད་ཚོགས་དུས་འདིར། ཟབ་པ་དང་རྒྱ་ཆེ་བའི་ཆོས་ཇི་ལྟ་བུ་བསྒྲུབས་ཀྱང་འགྲུབ་པའི་སྐབས་ཡིན་པ་ལ། རང་གིས་རང་བརྙས་ནས་ཆོས་ལ་ཚོད་ཡོད་བྱེད་ཅིང་། གོང་མའི་དཀའ་སྤྱད་དང་རྣམ་ཐར་ལ་ཞུམ་པ་སྐྱེ། གཉིད་དང་སྙོམ་ལས་དང་འདུ་འཛི་ལ་སྲེད་ཅིང་། སྦྱིན་པ་བསྲུང་། ཚུལ་ཁྲིམས་གཏང་། སྙིང་སྟོབས་བཅོམ་པའི་སེམས་ཀྱིས་བསླད་ནས་དགེ་སྦྱོར་ཅུང་ཟད་བྱས་ཀྱང་འདུག་འཕྲལ་ལངས་དྲན་པ། ལྡངས་འཕྲལ་ལ་གཉིད་བྲོ་བ། བཟས་འཕྲལ་ལ་འཐུང་རན་པ། དགེ་སྦྱོར་གྱིས་སུན་ཏེ་ཐུན་ཚུགས་འཕྲལ་ལ་གྲོལ་རན་པའི་བསམ་པས་གནད་དུ་འགྲོ་བ་ལས་མགྱོགས་པར་འདམ་པ་དེ་ཆོས་ཕྱིར་དཀའ་སྤྱད་མི་བཟོད་པ་ཡིན་པས་སྙིང་རུས་དང་བརྟུན་པ་བསྐྱེད་དེ་དཀའ་བ་དང་དུ་ལེན་པ་ལ་འབད་པ་དང་། དེ་བཞིན་དུ་ཟབ་མོའི་དོན་ལ་སྐྲག་པའི་དྲང་ངེས་ལྡེམ་དགོངས་ཤན་མི་ཕྱེད་པས་ཚིག་སྐམ་ལ་གོ་བ་ལེན་པ་དང་། སྟོང་པ་ཉིད་ཀྱི་དོན་ལ་སྐྲག་ནས་ཆོས་ཅན་སྣང་ཚོད་ཀྱི་ཕྱོགས་འཛིན་པ་དང་། རང་ཉིད་རྨོངས་པས་བསྒྲིབས་བཞིན་དུ་ཆོས་དང་གང་ཟག་གི་ཚད་བཟུང་པ་སོགས་སྤངས་ནས་བཟང་ངན་གང་ཡང་ཁུར་དུ་བཟོད་པ་ཐེག་པ་ཆེན་པོའི་བློས་བཟོད་པ་རླབས་པོ་ཆེ་བསྒོམ་ནུས་པར་སྨོན་པའོ། །བཅུ་གསུམ་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་གསུམ་ལ་སྨོན་པ་ནི། ༈ རྒྱ་ཆེན་དགེ་ལ་སྤྲོ་བའི་གོ་ཆ་དང་། །དེ་བཞིན་སྦྱོར་བ་བསམ་པས་འཇུག་པ་དང་། །མ་ཞུམ་མི་འཁྲུགས་ཆོག་ཤེས་མེད་པ་ཡིས། །ཉིན་མཚན་དགེ་བའི་བརྩོན་འགྲུས་བརྩམ་པར་ཤོག །དེ་ལ་དགེ་བའི་ལས་ལམ་ཕྲ་མོ་ཙམ་གྱིས་ཆོག་ཤེས་པར་མི་བྱ་སྟེ་ཤིན་ཏུ་བྱ་དཀའ་བའི་གནས་བློའི་ཡུལ་ལ་མི་ཤོང་བ་དག་ལའང་། འདི་ལྟ་བུ་ལ་སྒྱིད་ལུག་པ་ནི་བདག་གིས་ཚེ་རབས་ཐམས་ཅད་དུ་སྙིང་སྟོབས་བཅོམ་ཞིང་ལེ་ལོ་ལ་བརྟེན་གོམས་བྱས་པའི་མཐུ་བརྟས་པར་གདོན་མི་ཟ་སྟེ། འདི་ལྟར་དེད་དཔོན་བློ་ལྡན་གྱི་རིན་པོ་ཆེའི་གླིང་ནས་ནོར་བུ་དཀའ་བ་ཆེན་པོས་བླངས་པས་གྲུ་གཟིངས་ཞིག་པས་རྒྱ་མཚོར་ལྷུང་བའི་ཚེ་ཁྱོར་པ་གཡས་གཡོན་གྱིས་ཆུ་དོར་ནས་རྒྱ་མཚོ་སྐེམ་འདོད་པ་ལ་ཞུམ་པ་མ་སྐྱེས་ན། བདག་གིས་ཆོས་ཀྱི་བྱ་བ་ཅུང་ཟད་ལའང་བསྲན་མི་བཟོད་པ། ལོག་ལམ་ལ་བརྩོན་ཞིང་འགྲུས་པ་འདི་ལས་ངན་གྱི་མཐུས་བྱས་པར་འདུག་པས་མི་ནུས་སྙམ་པའི་ཕྱོགས་ཐམས་ཅད་ལ་སྙིང་སྟོབས་ཀྱི་གོ་ཆ་བགོ་བ་དང་། དེ་ལྟར་བགོས་པ་དེ་ཡང་སྦྱོར་བ་དང་བསམ་པས་ཉིན་མི་དལ་མཚན་མི་ཉལ་ད་ལྟ་ཉིད་ནས་དང་དུ་མ་བླངས་ན། ལེ་ལོ་ནི་སེར་བ་དང་འདྲ་སྟེ་དགེ་བའི་ལོ་ཏོག་འཇོམས་པ། ཆང་དང་འདྲ་སྟེ་སྙོམ་ལས་ཀྱི་ངང་དུ་མྱོས་པར་བྱེད་པས་ན་མགོ་ལ་མེ་ལྕེ་རེག་པ་བཟློག་པ་ལ་བརྩོན་པ་ལྟར་དགེ་བ་ལ་འབད་པར་བྱ་ཞིང་། དེ་ལྟར་རེ་ཞིག་འབད་ཀྱང་བདུད་སྡིག་ཅན་ནི་རང་གི་མངའ་རིས་ལས་བྲི་ཡི་དོགས་ནས་སྒོ་དུ་མ་ནས་བར་དུ་གཅོད་པའི་ཕྱིར་རྐྱེན་ཅུང་ཟད་ལ་བརྟེན་ནས་སེམས་ཞུམ་ཞིང་འཁྲུགས་པ་དང་། བྱིས་པ་དང་སྡིག་པའི་གྲོགས་པོ་ལ་དཔགས་ནས་དགེ་སྦྱོར་ལ་ཆོག་ཤེས་སྐྱེ་བ་ཡོད་དེ། དེའི་ཚེ་འདོད་པ་ལ་ཆོག་ཤེས་མེད་པའི་རྣམ་རྟོག་དེ་དགེ་སྦྱོར་གྱི་ཕྱོགས་སུ་སྤྲོས་ནས་བརྩོན་འགྲུས་ལ་འབད་པར་བྱ་ཞིང་། འདི་ལྟར་མ་འབད་ན་ཕ་རོལ་ཏུ་ཕྱིན་པ་གཞན་ལྔ་པོའང་གནས་མིན་དུ་འཁྱམ་པ་ཡིན་པས་འདི་ལ་ནི་ཆེ་ཐང་དུ་བྱ་དགོས་པར་སྨོན་པའོ། །བཅུ་བཞི་པ་བསམ་གཏན་གྱི་ཕ་རོལ་ཏུ་ཕྱིན་པར་སྨོན་པ་ལ་གསུམ་ལས། ༈ མཐོང་ཆོས་ཚེ་འདིར་བདེ་བར་གནས་པ་དང་། །ཡོན་ཏན་ཁྱད་འཕགས་རིམ་གྱིས་བགྲོད་པ་དང་། །མངོན་ཤེས་ལ་བརྟེན་གཞན་དོན་བསྒྲུབ་པ་ཡིས། །བསམ་གཏན་དོན་ལ་མཉམ་པར་འཇོག་པར་ཤོག །དེ་ལ་རྐང་པ་དང་པོས་ནི་བྱིས་པ་ཉེར་སྤྱོད་ཀྱི་བསམ་གཏན་བསྟན་པ་སྟེ། འདི་ལྟར་བསམ་གཏན་བཞི་དང་། གཟུགས་མེད་བཞི་དང་ལམ་ལ་མ་ཞུགས་པའི་རྒྱུད་ལའང་ཡོད་པའི་བསམ་གཏན་རྣམས་དང་། དེ་དག་གི་སེམས་ཐོབ་པའི་སྒོམ་ཆེན་པ་འགའ་ཞིག་ཡོད་དུ་ཟིན་ཀྱང་རྣམ་རྟོག་གྱ་གྱུའི་གཟེབ་ལས་གྲོལ་བས་མཐོང་ཆོས་སུ་བདེ་བར་གནས་ཤིང་དེ་ཚོགས་གཉིས་ཀྱིས་འཕེན་པས་ཟིན་ན་འཕགས་པའི་ལམ་གྱི་རྟེན་གཞིར་ཡང་འགྱུར་བས་དོན་མེད་པ་མ་ཡིན་ལ། ཆོས་ཅན་གྱི་སྤྲོས་པ་དབྱིངས་སུ་ནུབ་ཀྱང་སྣང་ཡུལ་མ་འགགས་ཤིང་དེར་འཛིན་མེད་པ་ནི་མཉམ་གཞག་དང་། དེ་དང་ངོ་བོ་ཐ་མི་དད་པའི་སོ་སོར་རྟོག་པ་ནི་ལྷག་མཐོང་སྟེ། དེ་ལྟའི་ཞི་ལྷག་ཟུང་འབྲེལ་ཕོ་ཚོད་ཀྱི་བློས་བཅོས་པ་ཙམ་མ་ཡིན་པར་རྒྱུད་ལ་སྐྱེས་པའི་ཚོགས་དང་སྦྱོར་བའི་ལམ་གྱི་ཡོན་ཏན་ཁྱད་པར་ཅན་རྣམས་རིམ་གྱིས་ཐོབ་ཅིང་མངོན་ཤེས་ཕྲ་མོས་གཞན་དོན་ཀྱང་འགྲུབ་པས་དོན་རབ་འབྱེད་པའི་བསམ་གཏན་ཞེས་བྱ་ལ། མཐོང་ལམ་ས་དང་པོ་ནས་སེམས་ཟག་པ་ལས་གྲོལ་བས་དེ་བཞིན་གཤེགས་དགེའི་བསམ་གཏན་ཡིན་པས་དེའི་ངང་དུ་མཉམ་པར་འཇོག་པ་ལ་སྨོན་པའོ། །བཅོ་ལྔ་པ་ཤེས་རབ་ཀྱི་ཕ་རོལ་ཏུ་ཕྱིན་པ་གསུམ་ནི། ༈ ཀུན་རྫོབ་སྒྱུ་མ་ལྟ་བུར་ཤེས་པ་དང་། །དོན་དམ་སྤྲོས་བྲལ་མཁའ་ལྟར་རྟོགས་པ་དང་། །ཁྱད་པར་གཞན་དོན་བསྒྲུབ་ཚུལ་མཁས་པ་ཡིས། །ཐོས་བསམ་སྒོམ་པའི་ཤེས་རབ་ལྡན་པར་ཤོག །དེ་ལ་ལམ་བདེན་ཀུན་རྫོབ་པ་ཐམས་ཅད་བརྟགས་ཡོད་ཀྱི་ཆ་ནས་རྨི་ལམ་དང་སྒྱུ་མ་ལྟ་བུར་ཤེས་པ་དང་། འགོག་བདེན་དོན་དམ་པའི་ངོ་བོ་རྫས་ཡོད་སྤྲོས་པ་དང་བྲལ་བར་ཤེས་པ་ནི་ཤེས་རབ་ཀྱི་ངོ་བོ་ཡིན་ལ། དེ་ཡང་ཐོས་པའི་ཤེས་རབ་ཀྱིས་ཆོས་དང་ཆོས་མ་ཡིན་པ་འབྱེད་ཅིང་། ལམ་བདེན་གྱི་མངོན་རྟོགས་ཐམས་ཅད་ཤེས་པར་མ་བྱས་ན། བསམ་པ་དང་སྒོམ་པའི་ཡོན་ཏན་གནས་མ་ཡིན་པར་འཁྱམ་པས་ན་ཐོག་མར་ཐོས་པའི་ཤེས་རབ་གལ་ཆེ་ལ། དེ་ལ་གང་ཟག་དབང་རྟུལ་དང་ཀུ་སུ་ལུ་པ་གང་དག་སྐྲག་མི་དགོས་ཏེ། རང་གི་བློ་ཉམས་དང་སྦྱོར་བའི་ཆོས་གང་ཉམས་སུ་ལེན་པ་དེའི་དོན་ལ་བླ་མ་བཟང་པོ་བསྟེན་ཏེ་ཐོས་པ་བྱས་པས་འགྲུབ་སྟེ། ཅིའི་ཕྱིར་ན་དེ་ལམ་དུ་སོང་ན་གདོད་སྒོམ་བྱུང་གི་ཤེས་རབ་ནང་ནས་སྐྱེ་བ་ཆོས་ཉིད་ཡིན་པས་སོ། །དེ་ནས་བསམ་པའི་ཤེས་རབ་ཀྱིས་དྲང་ངེས་ལྡེམ་དགོངས་སོ་སོའི་དོན་གཞལ་ན་དེའི་ངོ་བོའི་འཁྲུལ་མ་འཁྲུལ་དགེ་བའི་བཤེས་གཉེན་ཚད་ལྡན་གྱི་ས་མཁན་ལ་བརྟེན་ནས་ཉམས་འོག་ཏུ་ཆུད་པར་བྱ་ཞིང་། དེ་ནས་ནགས་ཁྲོད་དང་འབྲོག་དགོན་དབེན་པ་བསམ་གཏན་གྱི་ཚེར་མ་དང་། སྡིག་པའི་གྲོགས་པོ་མེད་པའི་གནས་སུ་སྒོམ་པའི་ཤེས་རབ་ལ་རྩེ་གཅིག་ཏུ་གཞོལ་བས་འཆད་མ་ཐག་པའི་མཐོང་ལམ་ནས་བཟུང་ལམ་ལྔའི་ཡོན་ཏན་ཐམས་ཅད་ཀྱང་སྒོམ་པའི་ཤེས་རབ་ལ་བརྟེན་ནས་སྐྱེ་བ་ཡིན་ནོ། །བཅུ་དྲུག་པ་སྨོན་འཇུག་གི་རང་འབྲས་ས་བཅུ་ལམ་ལྔའི་ཡོན་ཏན་སྤྱིར་སྨོན་པ་ནི། ༈ བསམ་པ་བྱང་ཆུབ་སེམས་ཀྱིས་ཀུན་བླངས་ནས། །སྦྱོར་བ་ཕ་རོལ་ཕྱིན་པ་དྲུག་ལྡན་པ། །དུས་དང་གནས་སྐབས་ཀུན་ཏུ་བརྩོན་པ་ཡིས། །ལམ་ལྔ་ས་བཅུ་རིམ་གྱིས་བགྲོད་པར་ཤོག །དེའང་སེམས་ཅན་གྱི་ཁམས་རྒྱ་མཚོ་ལྟ་བུ་ལ་དམིགས་པའི་བསམ་པ་བྱང་ཆུབ་ཀྱི་སེམས་དམ་པས་ཀུན་ནས་མ་བླངས་ན། སྦྱོར་བ་ཕ་རོལ་ཏུ་ཕྱིན་པ་དྲུག་པོའང་རྣམ་པ་ཐམས་ཅད་མཁྱེན་པའི་ལམ་དུ་མི་རུང་སྟེ། དེའི་ཕྱིར་བསམ་སྦྱོར་དེ་ལྡན་གྱི་སྒོ་ནས་ཕ་རོལ་ཏུ་ཕྱིན་པའི་གཞུང་ལམ་ལ་དུས་དང་གནས་སྐབས་ཀུན་ཏུ་བརྩོན་པ་ལ་རྟེན་ལམ་ལྔ་དང་། བརྟེན་པ་ས་བཅུའི་ངོ་བོ་རིམ་པ་བཞིན་དུ་བགྲོད་པར་ཤོག་ཅིག །ཅེས་སྨོན་པའོ། །བཅུ་བདུན་པ་ཚོགས་ལམ་ལ་སྨོན་པ་ནི། ༈ དེ་ཡང་དྲན་པ་ཉེར་གཞག་ཤེས་རབ་དང་། །ཡང་དག་སྤོང་བཞིའི་བརྩོན་འགྲུས་རྩོམ་པ་དང་། །རྫུ་འཕྲུལ་རྐང་པའི་ཏིང་འཛིན་ལ་གནས་པས། །དང་པོ་ཚོགས་ཀྱི་ལམ་ལ་འཇུག་པར་ཤོག །དེ་ལ་ཚོགས་ལམ་ཆུང་ངུར་ལུས་དྲན་པ་ཉེ་བར་གཞག་པ་བཞི་ནི། མཉམ་གཞག་ཏུ་ནམ་མཁའ་ལྟར་བསྒོམ་ཞིང་། རྗེས་ཐོབ་ཏུ་མི་གཙང་བ་དང་སྒྱུ་མ་ལྟ་བུར་བསྒོམ་པའོ། །ཚོར་བ་དྲན་པ་ཉེར་གཞག་ནི། མཉམ་གཞག་ཏུ་མ་སྐྱེས་པ་དང་། རྗེས་ཐོབ་ཏུ་ཚོར་བ་མཐའ་དག་སྡུག་བསྔལ་དང་སྙིང་པོ་མེད་པར་མཐོང་བའོ། །སེམས་དྲན་པ་ཉེར་གཞག་ནི། མཉམ་གཞག་ཏུ་རང་བཞིན་གྱིས་སྟོང་པ་དང་། རྗེས་ཐོབ་ཏུ་མི་དགག་ཅིང་མི་གནས་པ་སྒོམ་མོ། །ཆོས་དྲན་པ་ཉེར་གཞག་བཞི་པོ་བསྒོམས་པས་མཐོང་ལམ་གྱི་བདེན་བཞི་ལ་འཇུག་ཚུལ་ཡང་། དང་པོར་ལུས་སྡུག་བསྔལ་དུ་ཤེས། གཉིས་པར་ཚོར་བ་སྡུག་བསྔལ་དུ་ཤེས་ནས་ཀུན་འབྱུང་སྤོང་། གསུམ་པས་སེམས་ཀྱི་རྟག་འཛིན་འགོག །བཞི་པས་ཆོས་ལ་བདག་ཏུ་ཞེན་པ་འགོག་པའོ། །ཚོགས་ལམ་འབྲིང་པོར་མི་དགེ་བའི་ཆོས་མ་སྐྱེས་པ་རྣམས་བསྐྱེད་དུ་མི་འཇུག །སྐྱེས་པ་རྒྱུན་གཅོད། དགེ་བའི་ཆོས་མ་སྐྱེས་པ་བསྐྱེད། སྐྱེས་པ་གོང་དུ་སྤེལ་བའོ། །ཚོགས་ལམ་ཆེན་པོར་རྫུ་འཕྲུལ་གྱི་རྐང་པ་བཞི་ནི། བསམ་གཏན་གྱིས་སེམས་ལས་སུ་རུང་སྟོབས་ལས་འདུན་པའི་རྫུ་འཕྲུལ་གྱི་རྐང་པ་དང་། དེ་བཞིན་དུ་བརྩོན་འགྲུས་དང་། སེམས་དང་། སྤྱོད་པའི་རྫུ་འཕྲུལ་གྱི་རྐང་པ་སྟེ་བཞིའོ། །བཅོ་བརྒྱད་པ་སྦྱོར་ལམ་ལ་སྨོན་པ་ནི། ༈ དྲོད་དང་རྩེ་མོ་བཟོད་དང་ཆོས་མཆོག་ཏུ། །དད་བརྩོན་དྲན་པ་ཏིང་འཛིན་ཤེས་རབ་དང་། །དབང་པོ་ལྔ་དང་སྟོབས་ལྔའི་རང་བཞིན་ཅན། །ཐེག་ཆེན་སྦྱོར་བའི་ལམ་ལ་གནས་པར་ཤོག །དེ་ལ་དྲོད་དང་རྩེ་མོ་དང་བཟོད་པ་དང་། ཆོས་མཆོག་བཞི་ལས། དྲོད་རྩེ་གཉིས་སུ་དབང་པོ་ལྔ་བསྒོམ་པ་ནི། དད་པའི་དབང་པོ་དང་། དེ་བཞིན་དུ་བརྩོན་འགྲུས། དྲན་པའི། ཏིང་འཛིན་གྱི། ཤེས་རབ་ཀྱི་དབང་པོ་ལྔས་རྣམ་བྱང་བསྐྱེད་པས་གཟུགས་ཅན་མ་ཡིན་པའི་དབང་པོ་ལྔའོ། །སྟོབས་ལྔ་ནི། དད་པའི་སྟོབས་དང་། བརྩོན་འགྲུས་ཀྱི་སྟོབས་ལ་སོགས་སྔ་མ་བཞིན་ཏེ་མི་མཐུན་ཕྱོགས་འཇོམས་པས་སྟོབས་ལྔ་ཞེས་བྱའོ། །དེ་ལྟར་སྦྱོར་ལམ་ཆ་བཞི་པོའི་ཡེ་ཤེས་ལ་ཆུང་འབྲིང་ཆེན་པོའི་རྣམ་དབྱེ་སོ་སོར་ཡོད་དོ། །བཅུ་དགུ་པ་མཐོང་ལམ་ལ་སྨོན་པ་ནི། ༈ དྲན་དང་ཆོས་རབ་རྣམ་འབྱེད་བརྩོན་འགྲུས་དང་། །དགའ་དང་ཤིན་ཏུ་སྦྱངས་དང་ཏིང་ངེ་འཛིན། །བཏང་སྙོམས་བྱང་ཆུབ་ཡན་ལག་བདུན་བསྒོམས་ནས། །མཐོང་ལམ་ལ་གནས་རབ་དགའི་ས་ཐོབ་ཤོག །དེའང་དྲན་པ་ནི་དམིགས་པ་མ་བརྗེད་པའོ། །ཆོས་རབ་འབྱེད་པ་ནི་ཐེག་ཆེན་གྱི་ཆོས་བཟོད། ཆོས་ཤེས། རྗེས་བཟོད། རྗེས་ཤེས་འཁོར་དང་བཅས་པའོ། །བརྩོན་འགྲུས་ནི་དེའི་རང་བཞིན་ལ་སྤྲོ་བའོ། །དགའ་བ་ནི་དམིགས་པ་དེ་ཉིད་ལ་སྤྲོ་བའོ། །ཤིན་ཏུ་སྦྱངས་པ་ནི་ལུས་སེམས་ལས་སུ་རུང་བའོ། །ཏིང་ངེ་འཛིན་ནི་སེམས་རྩེ་གཅིག་པའོ། །བཏང་སྙོམས་ནི་སེམས་དང་སེམས་བྱུང་རྣམས་རྣལ་དུ་འདུག་པ་སྟེ་བདུན་པོ་འདི་དག་ནི་ཟག་པ་མེད་པས་མཐོང་བའི་ལམ་བྱང་ཆུབ་ཀྱི་ཡན་ལག་བདུན་ཏེ། དེའང་ཉོན་སྒྲིབ་ཀུན་བརྟགས་རྣམས་ནི་མཐོང་སྤངས་དང་། ལྷན་སྐྱེས་ནི་སྒོམ་སྤངས་ཡིན་ལ། དེ་བཞིན་དུ་ཤེས་སྒྲིབ་གཟུང་འཛིན་གྱི་རྟོག་པ་རགས་པ་མཐོང་སྤངས། ཕྲ་བ་སྒོམ་སྤངས་ཡིན་ཏེ། སྤང་བྱ་དེ་དག་སྤངས་ནས་མཐོང་ལམ་ས་དང་པོ་རབ་དགའི་གནས་ཐོབ་པའོ། །ཉི་ཤུ་པ་སྒོམ་ལམ་ལ་སྨོན་པ་ནི། ༈ ལྟ་དང་རྟོག་དང་ངག་དང་ལས་མཐའ་དང་། །འཚོ་དང་རྩོལ་དང་དྲན་དང་ཏིང་ངེ་འཛིན། །འཕགས་པའི་ལམ་གྱི་ཡན་ལག་བརྒྱད་བསྒོམས་ནས། །སྒོམ་པའི་ལམ་དུ་ས་བཅུ་བགྲོད་པར་ཤོག །དེ་ལ་ཡང་དག་པའི་ལྟ་བ་ནི་ཟག་པ་མེད་པའི་ཤེས་རབ་བོ། །ཡང་དག་པའི་རྟོག་པ་ནི་གནོད་སེམས་མེད་པ་དང་། ངེས་འབྱུང་དང་། དགེ་བའི་རྟོག་པ་རྣམ་པ་དུ་མའོ། །ཡང་དག་པའི་ངག་ནི་ངག་ལ་བརྟེན་པའི་ངག་གི་དགེ་བའི་ལས་ལམ་བཞིའོ། །ཡང་དག་པའི་ལས་མཐའ་ནི་ལུས་ཀྱི་མི་དགེ་བའི་ལས་ལམ་གསུམ་སྤང་བའོ། །ཡང་དག་པའི་འཚོ་བ་ནི་ཁ་གསག་དང་ལོག་འཚོས་མ་བསླད་པའོ། །ཡང་དག་པའི་རྩོལ་བ་ནི་བརྩོན་འགྲུས། ཡང་དག་པའི་དྲན་པ་ནི་དམིགས་པ་མ་བརྗེད་པའོ། །ཡང་དག་པའི་ཏིང་ངེ་འཛིན་ནི་བསམ་གཏན་བཞི་པའོ། །དེ་ལྟར་འཕགས་པའི་ལམ་ཡན་ལག་བརྒྱད་པོ་ནི། ཞི་བའི་གནས་ཏེ་མྱ་ངན་ལས་འདས་པ་ཐོབ་པར་བྱ་བའི་ཕྱིར་སྒོམ་པ་ལ་སྨོན་པ་ནི། དེ་ལྟར་སྒོམ་པའི་ལམ་དུ་ས་བཅུ་བགྲོད་ཚུལ་ཡང་། ཕ་རོལ་ཏུ་ཕྱིན་པ་བཅུའི་མི་མཐུན་ཕྱོགས་སེར་སྣ་དང་། འཆལ་བའི་ཚུལ་ཁྲིམས་དང་། ཁོང་ཁྲོ་དང་། ལེ་ལོ་དང་། རྣམ་གཡེང་དང་། རྨོངས་པ་དང་། ཐབས་ལ་མི་མཁས་པ་དང་། སྟོབས་ལ་སྒྲིབ་པ་དང་། སྨོན་པའི་དོན་མི་འགྲུབ་པ་དང་། ཤེས་བྱའི་སྒྲིབ་པ་སྟེ་བཅུ་སྤངས་པ་གང་ཞིག་ས་བཅུའི་ངོ་བོ་ཉིད་ཡིན་ནོ། །ཉེར་གཅིག་པ་དེ་དག་ཐོབ་པར་སྨོན་པ་ནི། ༈ དེ་ཡང་དྲི་མེད་འོད་བྱེད་འོད་འཕྲོ་དང་། །སྦྱང་དཀའ་མངོན་གྱུར་རིང་སོང་མི་གཡོ་བ། །ལེགས་པའི་བློ་གྲོས་ཆོས་ཀྱི་སྤྲིན་ཐོབ་ནས། །མཐར་ཕྱིན་ཀུན་ཏུ་འོད་ལ་གནས་པར་ཤོག །དེ་ལས་དང་པོས་མངོན་རྟོགས་མཐོང་ལམ་དུ་སྦྱར་ནས། འདིར་སྒོམ་ལམ་ཆེ་འབྲིང་ཆུང་གསུམ་གྱི་ངོ་སྐལ་ལ་ས་གཉིས་པ་དྲི་མ་མེད་པ་དང་། གསུམ་པ་འོད་བྱེད། བཞི་པ་འོད་འཕྲོ། ལྔ་པ་སྦྱང་དཀའ་བ། དྲུག་པ་མངོན་གྱུར་དང་། བདུན་པ་རིང་དུ་སོང་བ་དང་། བརྒྱད་པ་མི་གཡོ་བ་དང་། དགུ་པ་ལེགས་པའི་བློ་གྲོས་དང་། བཅུ་པ་ཆོས་ཀྱི་སྤྲིན་དང་། མཐར་ཕྱིན་ཀུན་ཏུ་འོད་དེ་ངེས་ཚིག་ནི་བདེན་གཉིས་ཤིང་རྟར་བཤད་ཟིན་ཏོ། །ཉེར་གཉིས་པ་འབྲས་བུ་ལ་སྨོན་པ་ནི། ༈ དེ་ལྟར་ལམ་ལྔ་ས་བཅུ་ཡོངས་རྫོགས་ནས། །སྐུ་གསུམ་ཡེ་ཤེས་ལྔ་དང་ཡོན་ཏན་ཚོགས། །ཕྲིན་ལས་མཐའ་དག་འབད་མེད་ལྷུན་གྲུབ་སྟེ། །རབ་འབྱམས་ཞིང་གི་འགྲོ་བ་འདྲེན་པར་ཤོག །རང་དོན་དུ་ལམ་ལྔ་ས་བཅུའི་སྤངས་རྟོགས་ཡོངས་སུ་རྫོགས་ནས། དོན་དམ་པའི་སངས་རྒྱས་ཆོས་ཀྱི་སྐུ་སྤྲོས་པ་ཐམས་ཅད་དང་བྲལ་བ་དང་། ལོངས་སྤྱོད་རྫོགས་པའི་སྐུ་སྣང་ལ་རང་བཞིན་མེད་པ། སྤྲུལ་པའི་སྐུ་རྣམ་པ་སྣ་ཚོགས་སུ་སྟོན་པ་སྟེ་རྟེན་སྐུ་གསུམ། བརྟེན་པ་ཡེ་ཤེས་ལྔ། མཁྱེན་ཆ་ཡོན་ཏན་དང་། ཐུགས་རྗེའི་ཕྲིན་ལས་མཐའ་དག་འབད་པ་མེད་པར་གྲུབ་ནས། རབ་ཏུའང་འབྱམ་ཀླས་པའི་ཞིང་གི་འགྲོ་བ་མཐའ་དག་དྲན་པར་ཤོག་ཅིག་ཅེས་པའོ། །དེ་བཞིན་དུ། ༈ དུས་གསུམ་རྒྱལ་བའི་ཞིང་གི་བཀོད་པ་དང་། །འཁོར་དང་སྐུ་ཚེའི་ཚད་དང་ཞིང་ཁམས་དང་། །ཕན་བདེ་བསྟན་པའི་སྒྱུ་་་་སྒྱུ་ལུས་ཟེར་བ་ཡིག་སྐྱོན་ནོར་བའོ།་་་འཕྲུལ་ཅི་འདྲ་བ། །དེ་འདྲ་ཁོ་ནར་བདག་ཀྱང་འགྱུར་བར་ཤོག །ཅེས་པ་རིགས་ལྔ་གང་ཆེན་མཚོའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ལས་རྡུལ་གཅིག་གི་སྟེང་ན་རྡུལ་སྙེད་དུ་ཤར་བའི་དུས་གསུམ་དུ་གཤེགས་ཤིང་བཞུགས་པའི་རྒྱལ་བ་རྣམས་ཀྱི་རང་རང་གི་ཞིང་གི་བཀོད་པ་དང་། འཁོར་དང་། སྐུ་ཚེ་དང་། མཛད་པ་དང་། ཞིང་ཁམས་སོགས་སེམས་ཅན་གྱི་ཁམས་ཐམས་ཅད་ལ་གནས་སྐབས་ཀྱི་ཕན་པ་དང་། མཐར་ཐུག་གི་བདེ་བ་བསྒྲུབ་པའི་ཕྱིར་དུ་བསྟན་པའི་སྒྱུ་འཕྲུལ་ཅི་འདྲ་བ་དེ་འདྲར་སྨོན་པའོ། །ཉེར་གསུམ་པ་དམིགས་བསལ་ལ་ཆོས་སྐུ་ཐོབ་པར་སྨོན་པ་ནི། ༈ རང་བཞིན་རྣམ་དག་དོན་དམ་ཆོས་ཀྱི་དབྱིངས། །སྒྲིབ་གཉིས་དྲི་མའི་ཚོགས་ལས་རྣམ་གྲོལ་བ། །དག་པ་གཉིས་ལྡན་མངོན་དུ་འགྱུར་བ་དང་། །རང་དོན་མཐར་ཕྱིན་ཆོས་སྐུ་ཐོབ་པར་ཤོག །དེ་ལ་ཡེ་ནས་རང་བཞིན་གྱི་རྣམ་པར་དག་པ་དོན་དམ་པའི་ཆོས་ཀྱི་སྐུ་དང་། གློ་བུར་ཉོན་ཤེས་ཀྱི་སྒྲིབ་པ་གཉིས་ལས་གྲོལ་བ་ནི་རྟོགས་པ་ཡེ་ཤེས་ཀྱི་ཆོས་སྐུ་སྟེ་དག་པ་གཉིས་ལྡན་མངོན་དུ་གྱུར་པས་རང་དོན་མཐར་ཕྱིན་པའི་ཆོས་སྐུ་ཐོབ་པའོ། །ཉེར་བཞི་པ་ལོངས་སྤྱོད་རྫོགས་སྐུ་ལ་སྨོན་པ་ནི། ༈ འོག་མིན་ཆེན་པོར་མཚན་དཔེ་འབར་བའི་སྐུ། །དག་པའི་གདུལ་བྱ་ས་བཅུའི་སེམས་དཔའ་ལ། །རྒྱུན་མི་འཆད་པ་ཐེག་མཆོག་ཟབ་མོའི་ཆོས། །སྟོན་མཛད་ལོངས་སྤྱོད་རྫོགས་སྐུ་མངོན་གྱུར་ཤོག །དེ་ལ་གནས་ངེས་པ་ཁམས་གསུམ་ལས་འདས་པའི་འོག་མིན་སྟུག་པོ་བཀོད་པར། སྟོན་པ་ངེས་པ་རིགས་ལྔའི་སངས་རྒྱས། འཁོར་ངེས་པ་ས་བཅུའི་སེམས་དཔའ། ཆོས་ངེས་པ་ཐེག་པ་ཆེན་པོ། དུས་ངེས་པ་རྟག་པ་རྒྱུན་གྱི་འཁོར་ལོར་ཉེ་བར་ལོངས་སྤྱོད་རྫོགས་པའོ། །ཉེར་ལྔ་པ་སྤྲུལ་པའི་སྐུ་འགྱེད་པ་ལ་སྨོན་པ་ནི། ༈ གང་གི་སྲིད་པ་ཇི་སྲིད་གནས་ཀྱི་བར། །གང་ལ་གང་འོས་འགྲོ་ལ་ཐེག་པའི་ཚུལ། །གང་འོས་སྟོན་པ་སྣ་ཚོགས་སྤྲུལ་པའི་སྐུ། །གང་དེ་ཐོབ་ནས་གཞན་དོན་ལྷུན་གྲུབ་ཤོག །ཆོས་སྐུའི་གདངས་ལོངས་སྐུའི་རྣམ་པར་རོལ་པ་ལས་སྤྲུལ་པའི་སྐུ་འགྱེད་པ་ན་གང་གི་སྲིད་པ་ཇི་སྲིད་ཞེས་མཚམས་སྦྱར་ལ། དེ་ཡང་གང་ལ་གང་འོས་ཀྱི་འགྲོ་བ་དེ་དག་འདུལ་བྱེད་ཀྱི་ཚུལ་ཡང་རྣམ་པ་སྣ་ཚོགས་སུ་སྟོན་བྱེད་ཀྱི་སྤྲུལ་པའི་སྐུ་གང་དེ་བདག་གིས་ཐོབ་པར་ཤོག་ཅིག་པའོ། །ཉེར་དྲུག་པ་ཡེ་ཤེས་ལྔ་ཐོབ་པར་སྨོན་པ། དེ་ལྟར་བཤད་མ་ཐག་པའི་རྟེན་སྐུ་གསུམ་པོ་དེའི་བརྟེན་པ་ཡེ་ཤེས་ལྔ་ཡིན་པས་ན། ༈ ཆོས་ཀྱི་དབྱིངས་དང་མེ་ལོང་ལྟ་བུ་དང་། །མཉམ་པ་ཉིད་དང་སོ་སོར་ཀུན་ཏུ་རྟོག །འབད་རྩོལ་མེད་པར་བྱ་བ་ཀུན་འགྲུབ་ནས། །ཡེ་ཤེས་ལྔ་ལ་དབང་འབྱོར་ཐོབ་པར་ཤོག །དེ་ལ་ཀུན་གཞི་དབྱིངས་སུ་ནུབ་པས་ཆོས་དབྱིངས་ཡེ་ཤེས། ཀུན་གཞིའི་རྣམ་ཤེས་དབྱིངས་སུ་ནུབ་པས་མེ་ལོང་ལྟ་བུའི་ཡེ་ཤེས། ཡིད་ཤེས་དབྱིངས་སུ་ནུབ་པས་མཉམ་ཉིད་ཡེ་ཤེས། ཉོན་ཡིད་དབྱིངས་སུ་ནུབ་པས་སོ་སོར་རྟོག་པའི་ཡེ་ཤེས། སྒོ་ལྔའི་རྣམ་ཤེས་དབྱིངས་སུ་ནུབ་པས་བྱ་བ་གྲུབ་པའི་ཡེ་ཤེས་ཏེ་ལྔ་ལ་དབང་འབྱོར་ཐོབ་པར་སྨོན་པའོ། །ཉེར་བདུན་པ་སྟོབས་བཅུ་ཐོབ་པར་སྨོན་པ། ༈ གནས་དང་གནས་མིན་རྣམ་སྨིན་དབང་པོ་དང་། །ཁམས་དང་མོས་པ་སྣ་ཚོགས་ཀུན་འགྲོའི་ལམ། །བསམ་གཏན་སྔོན་གནས་རྗེས་དྲན་ལྷ་ཡི་མིག །ཟག་ཟད་མཁྱེན་པའི་སྟོབས་བཅུ་དང་ལྡན་ཤོག །དེ་ལ་གནས་དང་གནས་མ་ཡིན་པ་མཁྱེན་པའི་སྟོབས། ལས་ཀྱི་རྣམ་པར་སྨིན་པ་མཁྱེན་པའི་སྟོབས། དབང་པོ་མཆོག་དང་མཆོག་མ་ཡིན་པ་མཁྱེན་པའི་སྟོབས། འཇིག་རྟེན་གྱི་ཁམས་དུ་མ་མཁྱེན་པའི་སྟོབས། མོས་པ་སྣ་ཚོགས་མཁྱེན་པའི་སྟོབས། ཀུན་ཏུ་འགྲོ་བའི་ལམ་མཁྱེན་པའི་སྟོབས། ཀུན་ནས་ཉོན་མོངས་པ་རྣམ་བྱང་མཁྱེན་པའི་སྟོབས། སྔོན་གནས་རྗེས་དྲན་མཁྱེན་པའི་སྟོབས། འཆི་འཕོ་དང་སྐྱེ་བ་མཁྱེན་པའི་སྟོབས། ཟག་པ་ཟད་པ་མཁྱེན་པའི་སྟོབས་དང་བཅུའོ། ༈ །ཉེར་བརྒྱད་པ་མི་འཇིགས་པ་བཞི་ཐོབ་པར་སྨོན་པ། ༈ རང་དོན་ཆོས་སྐུ་རྫོགས་པར་བྱང་ཆུབ་ནས། །ཟག་པ་བག་ཆགས་བཅས་པ་ཀུན་སྤངས་ཏེ། །གཞན་གྱི་དོན་དུ་ལམ་དང་འགོག་བདེན་ལ། །མི་འཇིགས་ཡོན་ཏན་བཞི་དང་ལྡན་པར་ཤོག །རང་དོན་ཆོས་ཀྱི་སྐུ་སྤྲོས་པ་དང་བྲལ་བའི་དབྱིངས་ལ་བྱང་ཆུབ་ནས། འཁོར་གསུམ་ལ་བདེན་ཞེན་གྱི་ཟག་པ་དང་། ལས་སྔ་མས་བཞག་པའི་བག་ཆགས་ཤིན་ཏུ་ཕྲ་བའང་སྤངས་ནས། གཞན་དོན་ལ་འཇུག་པའི་ཚེ་འདི་ནི་ལམ་མོ། །འདི་ནི་ལམ་གྱི་གེགས་སོ་ཞེས་བྱ་བ་དང་། འགོག་བདེན་གྱི་ཆ་ནས་ང་ནི་སངས་རྒྱས་སོ། །ང་ནི་ཟག་པ་ཟད་པའོ། །ཞེས་ཞལ་གྱིས་བཞེས་པ་ལ་ཆོས་མཐུན་གྱི་རྒོལ་བ་མི་འཇུག་པས་མི་འཇིགས་པ་བཞིའོ། །ཉེར་དགུ་པ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་པ་ལ་སྨོན་པ། ༈ འཁྲུལ་དང་ཅ་ཅོ་མི་མངའ་སྤྱོད་པ་དང་། །འདུན་སོགས་ཉམས་པ་མེད་པར་རྟོག་པ་དང་། །ཡེ་ཤེས་ཕྲིན་ལས་འགྲན་ཟླ་མེད་པ་ཡི། །མ་འདྲེས་སངས་རྒྱས་ཆོས་རྣམས་ཐོབ་པར་ཤོག །དེ་ལ་སེམས་ཅན་གྱི་ཁམས་དང་མ་འདྲེས་པའི་ཆོས་བཅོ་བརྒྱད་ནི། སྤྱོད་ལམ་མ་འདྲེས་པ་དྲུག །རྟོག་པ་མ་འདྲེས་པ་དྲུག །ཕྲིན་ལས་མ་འདྲེས་པ་གསུམ། ཡེ་ཤེས་མ་འདྲེས་པ་གསུམ་ལས། དང་པོ་ནི། སྤྲེའུ་ལྟར་ག་ཞ་མི་མཛད་པས་སྐུ་མ་འཁྲུལ་པ། ཅ་ཅོ་མི་མཛད་པས་གསུང་། དྲན་པ་མ་ཉམས་པས་ཐུགས་མ་འཁྲུལ་པ། དེ་བཞིན་དུ་མཉམ་པར་མ་གཞག་པ་མ་ཡིན་པ། འཁོར་འདས་སུ་འཛིན་པ་མེད་པ། གདུལ་བྱ་ཡལ་བར་འདོར་བའི་བཏང་སྙོམས་མེད་པ་དང་དྲུག་གོ །རྟོག་པ་དྲུག་ནི། ཆོས་སྟོན་པའི་འདུན་པ། གཞན་དོན་བསྒྲུབ་པའི་བརྩོན་འགྲུས། བསམ་མི་དགོས་པའི་དྲན་པ། ཆོས་ཉིད་ཀྱི་ཏིང་ངེ་འཛིན། ཡེ་ཤེས་དཔག་ཏུ་མེད་པ། སྤང་བྱ་ལས་རྣམ་པར་གྲོལ་བས་ཉམས་པ་མི་མངའ་བ་དང་དྲུག་གོ །ཡེ་ཤེས་མ་འདྲེས་པ་གསུམ་ནི། དུས་གསུམ་གྱི་ཆོས་ཆགས་ཐོགས་མེད་པར་གཟིགས་པའོ། །ཕྲིན་ལས་མ་འདྲེས་པ་གསུམ་ནི། སྐུའི་ཆ་བྱད་དང་སྤྱོད་ལམ་གྱིས་སེམས་ཅན་འདུལ་བ་དང་། གསུང་རྣམ་པ་ཐམས་ཅད་པས་ཆོས་སྟོན་པ། ཐུགས་རྗེའི་ཡེ་ཤེས་སེམས་ཅན་གྱི་རྗེས་སུ་འགྲོ་བ་སྟེ་བཅོ་བརྒྱད་དོ། །སུམ་ཅུ་པ་མཚན་དཔེ་ཐོབ་པར་སྨོན་པ། ༈ ལྟ་བས་མི་ངོམས་མཚུངས་པ་མེད་པའི་སྐུ། །སུམ་ཅུ་རྩ་གཉིས་མཚན་གྱིས་རབ་བརྒྱན་ཏེ། །དཔེ་བྱད་བཟང་པོ་བརྒྱད་ཅུས་རབ་མཛེས་པས། །སྣ་ཚོགས་གདུལ་བྱའི་རེ་འདོད་བསྐོང་བར་ཤོག །དེ་ལ་འཁོར་ལོས་སྒྱུར་རྒྱལ་དང་ཐུན་མོང་བའི་མཚན་སོ་གཉིས། སངས་རྒྱས་ཉིད་ཀྱི་ཁྱད་ཆོས་དཔེ་བྱད་བརྒྱད་ཅུ་ནི་ཤེས་སླའོ། །སོ་གཅིག་པ་ཟག་མེད་ཀྱི་ཕུང་པོ་ལྔ་ཐོབ་པར་སྨོན་པ། ༈ ཚུལ་ཁྲིམས་ཕུང་པོ་དེ་བཞིན་ཏིང་ངེ་འཛིན། །ཤེས་རབ་དང་ནི་རྣམ་པར་གྲོལ་བ་དང་། །རྣམ་པར་གྲོལ་བའི་ཡེ་ཤེས་གཟིགས་པ་ཡིས། །ཟག་མེད་ཕུང་པོ་ལྔ་ནི་ཡོངས་རྫོགས་ཤོག །དེ་ལ་ཚུལ་ཁྲིམས་ཀྱི་ཕུང་པོ། དེ་བཞིན་དུ་ཏིང་ངེ་འཛིན་གྱི། ཤེས་རབ་ཀྱི། རྣམ་པར་གྲོལ་བའི། རྣམ་གྲོལ་གྱི་ཡེ་ཤེས་གཟིགས་པ་སྟེ་རྣམ་བྱང་བསྐྱེད་པའི་ཕུང་པོ་ལྔའོ། །སོ་གཉིས་པ་སྤྱན་ལྔ་སོགས་ལ་སྨོན་པ། ༈ སྤྱན་དང་མངོན་ཤེས་སོ་སོ་རིག་པ་དང་། །གཟུངས་དང་ཟད་པར་ཟིལ་གནོན་ཐུགས་རྗེ་ཅན། །ཉོན་མོངས་མེད་དང་སྨོན་མཁྱེན་དབང་བཅུ་སོགས། །ཡོན་ཏན་མཐའ་དག་མངོན་དུ་འགྱུར་བར་ཤོག །དེ་ལ་སྤྱན་ལྔ་ནི། སངས་རྒྱས་ཀྱི་སའི་རྣམ་པ་ཐམས་ཅད་གཟིགས་པའི་སྤྱན་དང་། ཆོས་ཀྱི་སྤྱན་གྱིས་འཕགས་པའི་གང་ཟག་དབང་པོ་རྣོ་རྟུལ་ཐམས་ཅད་མངོན་སུམ་དུ་རྟོགས་པ་དང་། ཤེས་རབ་ཀྱི་སྤྱན་གྱིས་ཆོས་ཐམས་ཅད་ཀྱི་རང་གི་ངོ་བོ་ཉིད་གཟིགས་པ་དང་། ལྷའི་སྤྱན་གྱིས་འགྲོ་བའི་འཆི་འཕོ་དང་སྐྱེ་བ་ཇི་ལྟ་བ་བཞིན་དུ་ཤེས་པ། ཤའི་སྤྱན་གྱིས་འཇིག་རྟེན་དུས་གཅིག་ཏུ་གཟིགས་པ་དང་། རྫུ་འཕྲུལ་གྱི་མངོན་ཤེས་ཀྱིས་ས་གཡོ་བ་དང་གཅིག་ཏུ་བསྒྱུར་ཞིང་དུ་མར་སྤྲུལ་པ་ལ་སོགས་སོ། །ལྷའི་རྣ་བའི་མངོན་ཤེས་ཀྱིས་འཇིག་རྟེན་གྱི་ཁམས་ཐམས་ཅད་ཀྱི་སྒྲ་ཆེ་ཆུང་མཐའ་དག་ཇི་ལྟ་བ་བཞིན་དུ་རྟོགས་པའོ། །གཞན་སེམས་ཤེས་པའི་མངོན་ཤེས་ཀྱིས་གཞན་རྒྱུད་ཉོན་མོངས་པ་དང་བྲལ་མ་བྲལ་སོགས་མངོན་སུམ་དུ་གཏན་ལ་ཕེབས་པ་དང་། སྔོན་གནས་རྗེས་དྲན་གྱི་མངོན་ཤེས་ཀྱིས་གཞན་གྱི་ཚེ་རབས་སྔ་མ་བརྒྱ་སྟོང་ལ་སོགས་པའི་བར་ཤེས་པ་དང་། ལྷའི་མིག་གི་མངོན་ཤེས་ཀྱིས་བསྐལ་པ་དང་མ་བསྐལ་པའི་གཟུགས་ཕྲ་རགས་ཐམས་ཅད་མངོན་སུམ་དུ་རྟོགས་པའོ། །ཟག་པ་ཟད་པའི་མངོན་ཤེས་ཀྱིས་སྒྲིབ་གཉིས་སྤོང་བའི་ཐབས་དང་། སྤངས་པའི་བྲལ་བ་མངོན་དུ་ཤེས་པའོ། །སོ་སོའི་རིག་པ་ནི་ཟག་པ་མེད་པའི་ཤེས་རབ་ཐམས་ཅད་དོ། །གཟུངས་ནི་དྲན་པ་མ་ཉམས་པ་ལ་སོགས་སོ། །ཟད་པ་ནི་འབྱུང་བ་ལྔའི་སྐྱེ་མཆེད་བསྒྲུབ་ནུས་པའོ། །དེ་བཞིན་དུ་འཁོར་འདས་ཐམས་ཅད་ཟིལ་གྱིས་གནོན་པ་དང་། ཐུགས་རྗེ་ཆེན་པོ་བསམ་གྱིས་མི་ཁྱབ་པ་དང་། ཉོན་མོངས་པའི་ཆ་ཙམ་མི་མངའ་བ་དང་། སྨོན་གནས་མཁྱེན་པ་ལ་ཆགས་པ་མེད་པ། ཐོགས་པ་མེད་པ། ལྷུན་གྱིས་གྲུབ་པ། དྲི་མ་ཀུན་ལས་འདས་པ་སྟེ་བཞིའོ། །དབང་བཅུ་ནི། ཚེ་ལ་དབང་བ། ཡོ་བྱད་ལ་དབང་བ། སེམས་ལ་དབང་བ། ལས་ལ་དབང་བ། སྐྱེ་བ་ལ་དབང་བ། མོས་པ་ལ་དབང་བ། སྨོན་ལམ་ལ་དབང་བ། རྫུ་འཕྲུལ་ལ་དབང་བ། ཆོས་ལ་དབང་བ། ཡེ་ཤེས་ལ་དབང་བ་སྟེ། དེ་དག་སོ་སོའི་རྣམ་དབྱེ་ཞིབ་པ་བདེན་གཉིས་ཤིང་རྟར་བཤད་ཟིན་ཏོ། །གསུམ་པ་རྗེས་ཀྱི་རིམ་པ་གཞན་དོན་དུ་སྨོན་པ་ལ་སྤྱི་དང་བྱེ་བྲག་གཉིས་ལས་དང་པོ་ནི། ༈ དེ་ལྟར་རྒྱལ་བའི་སྐུ་གསུམ་ཡེ་ཤེས་ལྔ། །ཡོན་ཏན་ཕྲིན་ལས་སོགས་ལ་དབང་འབྱོར་ནས། །རབ་འབྱམས་ཞིང་དུ་དཔག་ཡས་མཛད་པ་ཡིས། །མཐའ་ཡས་འགྲོ་ལ་ཕན་བདེ་འགྲུབ་པར་ཤོག །ཅེས་སངས་རྒྱས་པའི་དགོས་པ་སེམས་ཅན་ལ་ཕན་པ་བསྒྲུབ་པ་ཐེག་པ་ཆེན་པོའི་ཁྱད་ཆོས་ཡིན་ཞིང་། དེ་ཡང་ཞིང་དང་། མཛད་པ་དང་། གཞན་དོན་བསྒྲུབ་པའི་ཡུལ་ལ་ཕྱོགས་དང་རིས་སུ་ཆད་པ་མེད་པས་རབ་འབྱམས་དང་། དཔག་ཡས་དང་མཐའ་ཡས་སོགས་ཀྱི་མཐའ་དང་ཚིག་མཇུག་མི་མངོན་པར་བྱས་པའོ། །གཉིས་པ་གཞན་དོན་བྱེད་ཚུལ་གྱི་ཁྱད་པར་ལ་སྨོན་པའི་ཤློ་ཀ་བདུན་གྱི་ཤིས་བརྗོད་དང་བཅས་པས་མདོ་སྡུད་པ་སྟེ། ༈ མཁྱེན་རབ་འཇམ་དཔལ་དབྱངས་ལྟར་ཚད་མེད་ཅིང་། །ཐུགས་རྗེ་སྤྱན་རས་གཟིགས་དང་མཚུངས་པ་དང་། །མཐུ་སྟོབས་གསང་བའི་བདག་པོ་ཇི་བཞིན་དུ། །གྲངས་མེད་བསྐལ་པར་འགྲོ་དོན་བྱེད་པར་ཤོག །གང་གིས་བདག་ནི་མཐོང་དང་ཐོས་པ་དང་། །རྗེས་སུ་དྲན་ནམ་རེག་གམ་གཏམ་དུ་བརྗོད། །བདག་ལ་ལེགས་བཤད་ཐོས་པ་དེ་དག་ཀྱང་། །རིང་པོར་མི་ཐོགས་རྒྱལ་བའི་དབང་པོར་ཤོག །བདག་ནི་གྲང་བས་ཉེན་ལ་མེ་ཆེན་དང་། །ཚ་བས་གདུངས་ལ་བསིལ་བའི་འབབ་ཆུ་དང་། །བརྒལ་འདོད་རྣམས་ཀྱི་གྲུ་དང་ཟམ་པ་དང་། །མུན་པར་ཚུད་ལ་སྣང་བ་དམ་པར་ཤོག །ཕོངས་པ་རྣམས་ལ་འདོད་དགུའི་འབྱུང་གནས་དང་། །ནད་ཀྱིས་ཟིན་ལ་ཕན་བྱེད་སྨན་གྱི་མཆོག །འཆི་བས་ཉེན་ལ་འཚོ་བའི་བདུད་རྩི་དང་། །ལས་ཀྱིས་དུབ་པའི་བསྟི་གནས་བཟང་པོར་ཤོག །བདག་ནི་གནས་མེད་རྣམས་ཀྱི་ཁང་བཟང་དང་། །བཀྲེས་པས་གདུངས་ལ་རོ་ལྡན་བཟའ་བ་དང་། །སྐོམ་པ་རྣམས་ལ་བཏུང་བའི་མཆོག་དང་ནི། །གང་ལ་གང་འོས་འདོད་དགུར་འབྱུང་བར་ཤོག །མདོར་ན་བདག་གི་སྒོ་གསུམ་སྤྱོད་པ་ཀུན། །བུམ་པ་བཟང་དང་ཡིད་བཞིན་ནོར་བུ་དང་། །འདོད་འཇོའི་བ་དང་དཔག་བསམ་ཤིང་ལྟ་བུར། །འགྲོ་བའི་དོན་དུ་འབད་མེད་ལྷུན་གྲུབ་ཤོག །སྐྱབས་གསུམ་བཀའ་སྡོད་བདེན་པའི་བྱིན་རླབས་དང་། །ཆོས་དབྱིངས་རྣམ་དག་བསམ་མི་ཁྱབ་པའི་མཐུས། །བདག་གི་ལྷག་བསམ་དག་པས་གཞན་དོན་དུ། །སྨོན་པ་འདི་དག་ཡིད་བཞིན་འགྲུབ་གྱུར་ཅིག །སྟོན་པ་མཉམ་མེད་རྫོགས་པའི་སངས་རྒྱས་དང་། །སྐྱོབ་པ་མཚུངས་མེད་བསྟན་པ་དམ་པའི་ཆོས། །འདྲེན་པ་མཚུངས་མེད་འཕགས་པའི་དགེ་འདུན་ཏེ། །དཀོན་མཆོག་བླ་མེད་གསུམ་གྱི་བཀྲ་ཤིས་ཤོག །ཅེས་སོ། །དེ་ལྟ་བུའི་སྨོན་ལམ་ནི་བྱང་ཆུབ་སེམས་དཔའ་རྣམས་ཀྱི་རྗེས་ཐོབ་ཀྱི་ཚོགས་བླ་ན་མེད་པ་ཡིན་པས་ན་དུས་དང་རྣམ་པ་ཐམས་ཅད་དུ་གདབ་པར་བྱ་སྟེ། ཕལ་པོ་ཆེ་ལས། སྤྱོད་པ་དག་དང་སྨོན་ལམ་གཅིག་ཏུ་སྤྱད། །ཅེས་པ་ལ་སོགས་རྒྱ་ཆེར་ཡོད་དོ། །དེས་ནི་སེམས་ཅན་གྱི་ཁམས་ཚད་མེད་པ་ལ་སྨོན་པས་བསོད་ནམས་ཀྱང་དེ་སྙེད་ཐོབ་པ་ཡིན་ནོ།། ༈ །།གསང་བ་སྔགས་ཀྱི་སྨོན་ལམ་འདོད་འཇོའི་དགའ་སྟོན་གྱི་འགྲེལ་པ་རིག་འཛིན་ལམ་བཟང་ཞེས་བྱ་བ་བཞུགས། གསང་བ་སྔགས་ཀྱི་སྨོན་ལམ་འདོད་འཇོའི་དགའ་སྟོན་གྱི་འགྲེལ་པ་རིག་འཛིན་ལམ་བཟང་ཞེས་བྱ་བ། ཤཱནྟ་པུ་རི་ཞི་བའི་གྲོང་ཁྱེར་ན། །རིག་འཛིན་མི་ཡི་ཐོད་པ་འགྲོ་འདུལ་གླིང་། །རིག་པ་བདེ་གཤེགས་སྙིང་པོའི་ཆོས་ཉིད་དང་། །རོ་གཅིག་ལྟ་བ་མཇལ་བའི་ཕྱག་གིས་བཏུད། །དེ་ལ་ཀླད་ཀྱི་དོན་རང་ངོའི་མཆོད་བརྗོད་ནི། དུས་གསུམ་རྒྱལ་བ་སྲས་བཅས་མ་ལུས་དང་། །འགྲོ་བའི་སྐྱབས་གྱུར་པདྨ་སམ་བྷ་ཝ། །སྲིད་ཞིའི་རྒུད་པ་ཀུན་སེལ་རཏྣའི་ཞབས། །མི་འབྲལ་སྙིང་ནས་གུས་པས་ཕྱག་བགྱིའོ། །གཉིས་པ་གཞུང་གི་དོན་རྣམ་གྲངས་བཅུ་བདུན་ལས། དང་པོ་ཅིས་ཀྱང་དགོས་མེད་ཀྱིས་བློ་ལྡོག་པ་ནི། ༈ ཚེ་འདིའི་ལོངས་སྤྱོད་རྨི་ལམ་དགའ་སྟོན་བཞིན། །ལང་ཚོའི་དཔལ་ཡང་འཇའ་ཚོན་ལྟ་བུ་སྟེ། །ཚེ་སྲོག་མི་རྟག་གློག་གི་ཟློས་གར་བཞིན། །འཇིག་རྟེན་ཕུན་ཚོགས་ཀུན་ལ་དབང་སྒྱུར་ཀྱང་། །སྟོན་དུས་མཛེས་པའི་སྤྲིན་དཀར་ཕུང་པོ་བཞིན། །སྐད་ཅིག་མི་རྟག་འཇིག་པའི་ཆོས་ཅན་དུ། །མཐོང་ནས་སྲིད་པར་ཡིད་ནི་འབྱུང་བར་ཤོག །དེ་ལ་ཚེ་འདི་སྣང་གི་ལོངས་སྤྱོད་དང་། གནས་གྲོགས་དང་། ཁང་ཁྱིམ་ལ་སོགས་པ་ནི་མདང་གི་རྨི་ལམ་ལ་སྐྱེད་མོས་ཚལ་ཞིག་ཏུ་མགྲོན་པོར་ཕྱིན་པའི་དགའ་སྟོན་ལྟ་བུ། སད་པའི་ཚེ་དེ་དག་གང་ཡང་མེད་པས་སྐྱེངས་ཤུ་རེ་བ། དེ་བཞིན་དུ་གཞོན་ནུ་དར་ལ་བབས་པའི་ལང་ཚོའི་དཔལ་ལ་ཆགས་ནས་བྱི་དོར་བྱས། རྒྱན་གོས་ཀྱིས་བཀླུབས། རེ་ཞིག་སྡོད་སྡོད་འདྲ་བ་བྱས་ཀྱང་། འགྱུར་བའི་སྡུག་བསྔལ་ནི། ཆུ་སྐྱར་ཉ་ལ་འཇབས་པ་ལྟ་བུར་ཡོད་པས། རང་དབང་མེད་པར་ནད་དང་། གདོན་དང་། མེ་ཆུ་ལ་སོགས་པའི་རྐྱེན་གློ་བུར་བ་མང་པོས་འཇའ་ཚོན་ད་ལྟ་ཡོད་འཕྲོ་ལ་ཡལ་བ་བཞིན་རྟག་མི་ཐུབ། ཚེ་ནི་རླུང་གསེབ་ཀྱི་མར་མེ་ལྟ་བུ། སྲོག་ནི་ནམ་མཁའ་ལ་གློག་འཁྱུག་པ་བཞིན་ཡིན་ངེས་ན། འཁོར་ལོས་སྒྱུར་བའི་རྒྱལ་པོའམ། ཁམས་ཀྱི་རྒྱལ་ཕྲན་ལ་སོགས་པ་འཇིག་རྟེན་གྱི་ཁམས་ཚོགས་རྒྱ་ཆེན་པོ་ལ་དབང་སྒྱུར་བ་ཞིག་ཡིན་ཡང་། སྟོན་ཀའི་དུས་ན་ཤིང་བལ་ལྟར་མཛེས་པའི་སྤྲིན་དཀར་གྱི་ཕུང་པོ་གླང་པོ་ཆེའམ། ཤིང་རྟའམ་རྨ་བྱ་ལྟར་མཛེས་པ་ཞིག་བྱུང་བ་དེ་ད་ལྟ་རང་ཡོད་འཕྲོ་ལ་མེད་པ་ལྟར་མི་འཆི་བསམ་པའི་ལྷོད་ལྷོད་ཀྱི་ངང་ལ་གཤིན་རྗེའི་ཕོ་ཉས་བཅོམ། ལུས་སེམས་གཉིས་པོ་སོ་སོར་འབྲལ། མི་འདོད་བཞིན་དུ་ཐ་གུས་བསྡམ། ཡོལ་བས་བསྒྲིབ། དུར་ཁྲོད་དུ་ཀེང་རུས་སྐྱ་ཟིང་འགྲོ་བ་དེ་དོ་ནུབ་ཙམ་ཡང་མི་འོང་བའི་ཁག་མི་ཐེག་པ་འདི་དྲན་པར་བྱས་ནས་སྲིད་པའི་རང་བཞིན་ལ་ཡིད་འབྱུང་ཆེན་པོ་སྐྱེ་བར་སྨོན་པའོ། །གཉིས་པ་བཤེས་གཉེན་དམ་པ་ཚུལ་བཞིན་བསྟེན་པར་སྨོན་པ། ༈ བདེ་ལེགས་དངོས་གྲུབ་ཀུན་གྱི་འབྱུང་གནས་ནི། །མཚན་ཉིད་ཀུན་ལྡན་ཐེག་མཆོག་བཤེས་གཉེན་ཏེ། །དྲན་པ་ཡིས་ཀྱང་སྲིད་ཞིའི་འཇིགས་འཕྲོག་ཅིང་། །མི་ཕྱེད་དད་པས་ཚུལ་བཞིན་བསྟེན་པར་ཤོག །དེ་ལ་གྲུ་ཟམ་མེད་ན་ཆུ་ཆེན་མི་བགྲོད་པ་ལྟར་གནས་སྐབས་སུ་མངོན་མཐོའི་བདེ་བ་དང་། མཐར་ཐུག་ངེས་ལེགས་ཀྱི་འབྲས་བུའམ། དངོས་གྲུབ་དམ་པའི་འབྱུང་གནས་ནི་མདོ་རྒྱུད་ནས་གསུངས་པའི་མཚན་ཉིད་ཀུན་ལྡན་གྱི་བླ་མ་ཐེག་པ་མཆོག་གི་དགེ་བའི་བཤེས་གཉེན་རྙེད་ན་དེ་ནི་དྲན་པ་ཙམ་གྱིས་ཀྱང་སྲིད་ཞིའི་འཇིགས་པ་འཕྲོག་ལ། མིན་ནའང་སྙིང་རྗེ་ཆེ་བ། རང་དོན་དུ་སྟོང་ཉིད་གཟིགས་པ་འབྲིང་། ཐ་ནའང་གང་འཆད་བྱའི་ཆོས་ཀྱི་མངོན་རྟོགས་ལ་འདྲིས་པ། གཞན་དོན་ལ་སྐྱོ་ངལ་མེད་ཅིང་རྙེད་པ་ལ་མི་གཟིགས་པ་ཞིག་གུས་པས་བསྟེན་ནས་ཐུགས་ཡིད་འདྲེས་པར་བྱེད་དགོས་ཏེ། མདོ་རྒྱུད་ཐམས་ཅད་ནས་འདི་ཕྱིའི་ལམ་སྟོན་བླ་མ་ལ་རེ་དགོས་པར་གསུངས་པའི་ཕྱིར་རོ། །གསུམ་པ་དཀོན་མཆོག་ལ་སྐྱབས་སུ་འགྲོ་ཞིང་སེམས་བསྐྱེད་པ། ༈ དེ་ལྟར་དགེ་བའི་བཤེས་ལས་རྙེད་པའི་དོན། །གཏན་གྱི་སྐྱབས་གྱུར་བླ་མ་དཀོན་མཆོག་གསུམ། །ཡིད་ལ་འབྲལ་མེད་གདུངས་པས་གསོལ་འདེབས་ཤིང་། །འགྲོ་ཀུན་ཕ་མར་ཤེས་པའི་སྙིང་རྗེ་ཡིས། །ཀུན་གྱི་སྡུག་བསྔལ་རང་གི་ལེན་པ་དང་། །བདག་གི་བདེ་བ་མ་ལུས་གཞན་ལ་གཏང་། །བླ་མེད་བདེ་ལ་བདག་གིས་དགོད་བྱ་ཞེས། །སེམས་ནི་བྱང་ཆུབ་དམ་པར་བསྐྱེད་བྱས་ནས། །ཕྱིན་དྲུག་སྤྱོད་པས་ཉིན་མཚན་འདའ་བར་ཤོག །དེ་ལྟར་བཤེས་གཉེན་བསྟེན་ནས་ཐོག་མར་དེ་ལས་རྙེད་པའི་དོན་ཞི་བདེ་དོན་གཉེར་ཙམ་མ་ཡིན་པ་སྐྱེས་བུ་ཆེན་པོའི་སྐྱབས་འགྲོའི་གནད་མ་འཁྲུལ་བར་ཤེས་པར་བྱས་ཏེ། གནས་སྐབས་ཙམ་མ་ཡིན་པའི་གཏན་གྱི་སྐྱབས་གནས་སུ་འོས་པ། བླ་མ་དང་དཀོན་མཆོག་གསུམ་ལ་སྙིང་ཐག་པ་ནས་སྐྱབས་སུ་འགྲོ་ཞིང་། དེ་ནས་ཐེག་པ་ཆེན་པོའི་ལམ་གྱི་རྩ་བ་སེམས་ཅན་ཐམས་ཅད་ཕ་མར་ཤེས་པར་བྱ་སྟེ། དེ་ལྟར་ཤེས་ན་ཕ་མ་ལ་ལ་དམྱལ་བ། ལ་ལ་ཡི་དྭགས། ལ་ལ་དུད་འགྲོ། ལ་ལ་མི་དབང་ཐང་ཆུང་ངུ་སོགས་སྡུག་བསྔལ་གྱིས་མནར་བ་ལ་སྙིང་རྗེ་མི་སྐྱེ་བའི་དབང་མེད་ཅིང་། དེའི་ཚེ་དབུགས་ནང་དུ་སྡུད་དུས་ཁོང་གི་སྡུག་བསྔལ་རང་གིས་ལེན་པ་དང་། ཕར་གཏོང་དུས་བདག་གི་བདེ་བ་དང་དགེ་ཚོགས་ཁོང་ལ་གཏོང་བའི་སྨོན་སེམས་ལ་སྦྱངས་ནས་དེ་དག་བདེ་བ་ལ་འགོད་པའི་བྱང་ཆུབ་ཏུ་སེམས་བསྐྱེད་ཅིང་། འཇུག་པའི་སྤྱོད་པ་ཕ་རོལ་ཏུ་ཕྱིན་པ་དྲུག་ལ་ཉིན་མཚན་དུས་འདའ་བར་སྨོན་པའོ། །བཞི་པ་སྐྱེས་བུ་ཆུང་འབྲིང་གི་ལམ་ལ་བློ་སྦྱང་བར་སྨོན་པ་ནི། ༈ མངོན་མཐོ་སྒྲུབ་བྱེད་རྒྱལ་བའི་གསུང་རབ་ཀུན། །དོན་རྣམས་སྐྱེས་བུ་ཆུང་ངུའི་ལམ་དང་ནི། །ཐར་པ་བསྒྲུབ་པའི་ཐབས་ལ་བརྩོན་པ་ཡི། །ཆོས་ཀྱི་རྣམ་གྲངས་ཀུན་གྱི་བརྗོད་བྱའི་དོན། །སྐྱེས་བུ་འབྲིང་གི་ལམ་གྱི་རིམ་པ་སྟེ། །ངེས་པར་འབྱུང་བས་སྲིད་ལས་གྲོལ་བར་ཤོག །དེ་ལ་ཕྱི་མ་མངོན་པར་མཐོ་བའི་རྒྱུ་མི་དགེ་སྤང་ཞིང་དགེ་བ་བཅུའི་ལས་ལམ་བསྒྲུབ་པ་དང་། བསྙེན་གནས་ཡན་ལག་བརྒྱད་པ་སོགས་གཙོ་བོར་སྟོན་པའི་གསུང་རབ་རྣམས་ནི་སྐྱེས་བུ་ཆུང་ངུའི་ལམ་དང་། རང་དོན་ཞི་བདེ་ཙམ་ལ་དམིགས་ནས་ཐར་པའི་གོ་འཕང་གཉེར་བ་དམ་པའི་ཆོས་འདུལ་བའི་སྡེ་སྣོད་ལ་སོགས་པ་ནི་སྐྱེས་བུ་འབྲིང་གི་ལམ་སྟེ། གཉིས་ཀའང་ཐེག་པ་ཆེན་པོའི་ལམ་སྟེགས་ཡིན་པས་དེ་དག་ལ་བརྟེན་ནས་ངེས་འབྱུང་གི་བློ་ཁྱད་པར་ཅན་བསྐྱེད་ཅིང་སྲིད་པའི་སྡུག་བསྔལ་བཙོན་དོང་ལྟ་བུ་ལས་གྲོལ་བར་སྨོན་པའང་ལས་དང་པོ་པའི་ལམ་གྱི་འཇུག་ངོགས་ཁྱད་པར་ཅན་ཡིན་ནོ། །ལྔ་པ་སྐྱེས་བུ་ཆེན་པོའི་ལམ་ལ་སྨོན་པ་ནི། ༈ རྣམ་མཁྱེན་གོ་འཕང་མྱུར་དུ་བསྒྲུབ་པའི་ཐབས། །རྒྱུ་དང་འབྲས་བུའི་ཐེག་ཆེན་རྣམ་གཉིས་ལས། །ཇི་བཞིན་གསུངས་པའི་གསང་བ་མ་ལུས་པ། །སྐྱེས་བུ་ཆེན་པོའི་ལམ་གྱི་རིམ་པ་སྟེ། །བདག་གིས་མ་ལུས་ཉེ་བར་བླངས་པ་ལས། །ཆོས་རྣམས་ཐམས་ཅད་རྨི་ལམ་སྣང་བ་བཞིན། །སྣང་ཙམ་དེ་ལས་ཡུལ་གྱི་སྟེང་ཉིད་དུ། །གྲུབ་པའི་ངོ་བོར་རྡུལ་ཙམ་མ་མཆིས་ཀྱང་། །ལས་འབྲས་བསླུ་བ་མེད་པར་ངེས་རྙེད་ནས། །བདེན་གཉིས་ཟབ་མོའི་གནད་ལ་གོམས་པར་ཤོག །དེ་ལ་གཞན་དོན་དུ་རྣམ་པ་ཐམས་ཅད་མཁྱེན་པའི་གོ་འཕང་བསྒྲུབ་པར་སྟོན་པ་རྣམས་ནི། རྒྱུ་ཕ་རོལ་ཏུ་ཕྱིན་པ་དང་། འབྲས་བུ་གསང་སྔགས་རྡོ་རྗེའི་ཐེག་པ་ཆེན་པོ་གཉིས་ཡིན་ལ། དེ་གཉིས་ལས་གསུངས་པའི་སྤྱོད་པ་རྒྱ་ཆེ་བ་དང་། དོན་ཟབ་པའི་གསང་བ་མ་ལུས་པ་སྐྱེས་བུ་ཆེན་པོའི་ལམ་གྱི་རིམ་པ་སྟེ། དེ་ཉམས་སུ་བླངས་པས་མཉམ་གཞག་གི་དོན་ཆོས་ཐམས་ཅད་རྨི་ལམ་གྱི་སྣང་བ་ལྟར་སྣང་ཙམ་ཉིད་ནས་ཡུལ་རང་ངོ་ནས་བདེན་པར་གྲུབ་པ་རྡུལ་ཙམ་ཡང་མེད་པ་རྟོགས་ཀྱང་། རྗེས་ཐོབ་ཀྱི་ཆ་ནས་ལས་འབྲས་བསླུ་བ་མེད་པར་ངེས་པ་རྙེད་ནས་བདེན་པ་གཉིས་ཐ་དད་དུ་མི་འཛིན་པའི་ལམ་ཟབ་མོ་ལ་གོམས་པར་སྨོན་པའོ། །དྲུག་པ་སྡེ་སྣོད་གསུམ་ལ་བསླབ་པར་སྨོན་པ་ལ། ནང་གསེས་འདུལ་བའི་སྡེ་སྣོད་ནི། ༈ ཉིས་བརྒྱ་ལྔ་བཅུ་སྤོང་བའི་ཚུལ་ཁྲིམས་དང་། །བཅུ་བདུན་བླང་བྱ་འཇུག་པའི་ཚུལ་ཁྲིམས་ཏེ། །ཀུན་གྱི་རྩ་བ་འགྲམ་གཞི་བརྟན་པོ་ནི། །ལྷག་པའི་ཚུལ་ཁྲིམས་འདུལ་སྡེ་ལ་གནས་ཤིང་། །དེ་ལ་འཁོར་ལོ་དང་པོ་འདུལ་བའི་སྡེ་སྣོད་ལ། དགེ་ཚུལ་མན་ཆད་ནི་བསྟན་པ་ལ་ཞུགས་ཀྱང་མ་རྫོགས་པ་ཡིན་པས་བླང་འདས་ཀྱང་མང་ཉུང་ཐ་དད་པ་ཡོད་དོ། །ཞུགས་ལ་རྫོགས་པ་ནི་དགེ་སློང་ཡིན་པས་དེ་ལ་སྤོང་བའི་ཁྲིམས་ནི་རྩ་བ་བཞི། ལྷག་མ་བཅུ་གསུམ། སྤང་ལྟུང་སུམ་ཅུ། ལྟུང་བྱེད་འབའ་ཞིག་དགུ་བཅུ་ཐམ་པ། སོར་བཤགས་སྡེ་བཞི། ཉེས་བྱས་བརྒྱ་དང་བཅུ་གཉིས་ཏེ། ཉིས་བརྒྱ་ལྔ་བཅུ་རྩ་གསུམ་དང་། གཞི་གསུམ་ཆོ་གས་མཚོན་ཏེ་བླང་བྱ་འཇུག་པའི་ཁྲིམས་བཅུ་བདུན་གྱིས་རང་རྒྱུད་བསྡམས་པ་ནི་ཡོན་ཏན་ཀུན་གྱི་རྟེན་རྩིག་པའི་འགྲམ་གཞི་འདིངས་བ་ལྟར་བསྟན་པའི་གཞི་མ་དམ་པའི་ཆོས་འདུལ་བ་ཡིན་ལ། ཚུལ་དེ་ལྟ་བུ་ལ་གནས་ནས་བདེན་པ་བཞི་ལ་ཐོས་བསམ་གྱིས་སྡུག་བསྔལ་ཤེས་པར་བྱ་ཞིང་། དེའི་རྒྱུ་ཀུན་འབྱུང་སྤོང་། སྒོམ་པས་ལམ་རྒྱུད་ལ་བརྟེན་ནས་འགོག་པ་མངོན་དུ་བྱས་པ་ནི་འབྲས་བུ་སྟེ། མངོན་རྟོགས་དེ་ལྟ་བུ་ལ་གནས་པ་ནི་ལྷག་པའི་ཚུལ་ཁྲིམས་ཀྱི་བསླབ་པ་ཡིན་ནོ། །མདོ་སྡེའི་སྡེ་སྣོད་ནི། ༈ བྱིང་རྒོད་དྲི་ཡི་བཞོན་པས་མི་གཡོ་བའི། །མངོན་རྟོགས་རིན་ཆེན་རྣམ་བཞིའི་རང་བཞིན་ཅན། །ཏིང་འཛིན་འཆི་མེད་རི་བོར་གནས་པའི་གཞི། །ཟབ་ཡངས་མདོ་སྡེའི་གནས་ལ་འཇོག་པ་དང་། །ཞེས་པས། དེ་ལ་འཁོར་ལོ་བར་པའི་ངེས་བརྗོད་རྣམ་པར་ཐར་པའི་སྒོ་གསུམ་ནི་ལམ་གྱི་ངོ་བོ་ཡིན་ལ། དེའི་རང་བཞིན་བྱིང་རྒོད་ཀྱི་རླུང་གིས་མི་གཡོ་བའི་བསམ་གཏན་གྱི་མངོན་རྟོགས་ནི་རིན་ཆེན་བཞི་ལས་གྲུབ་པའི་རི་དབང་གི་སྟེང་ན་འཆི་མེད་ཀྱི་གྲོང་ཁྱེར་ལྟར་བརྟན་པའི་ཏིང་ངེ་འཛིན་གྱི་ཆོས་ཉིད་ནི་གཏིང་དཔག་དཀའ་བས་ཟབ་པ། རྒྱ་ཆེ་བས་ཡངས་པའི་དོན་ལ་མཉམ་པར་འཇོག་ཅིང་། རྗེས་ཐོབ་ལ་ཕ་རོལ་ཏུ་ཕྱིན་པ་དྲུག་དང་མི་འགལ་བར་སྤྱོད་པ་ནི་ལྷག་པ་ཏིང་ངེ་འཛིན་གྱི་བསླབ་པ་ཡིན་ནོ། །མངོན་པའི་སྡེ་སྣོད་ནི། ༈ ཆོས་མངོན་གསལ་བའི་རྣམ་དབྱེ་མིག་སྟོང་ལྡན། །གནས་ལུགས་རྟོགས་པའི་ཡེ་ཤེས་ལག་ཉལ་གྱི། །མཐར་ལྟའི་རྨིག་པ་འདུལ་བྱེད་ལྷ་ཡི་དབང་། །ཆོས་མངོན་བལྟ་ན་སྡུག་པའི་གྲོང་ཁྱེར་དུ། །སྡེ་སྣོད་གསུམ་གྱི་རྗོད་བྱེད་ཚིག་རྣམས་དང་། །བརྗོད་བྱ་བསླབ་པ་རྣམ་གསུམ་མངོན་གྱུར་ཤོག །དེ་ལ་འཁོར་ལོ་ཐ་མ་ཆོས་མངོན་པའི་སྡེ་སྣོད་ལ་ཀུན་བརྟགས་གཞན་དབང་ཡོངས་གྲུབ་གསུམ་གྱི་རྣམ་དབྱེ་ཤིན་ཏུ་མང་ཞིང་གསལ་བས་མིག་སྟོང་པའི་ཐ་སྙད་སྦྱར་ཞིང་། དེས་ལྷག་པ་ཤེས་རབ་ཀྱི་བསླབ་པའི་དེ་ཁོ་ན་ཉིད་ཀྱི་དངོས་པོའི་གནས་ལུགས་མངོན་པར་རྟོགས་པས་ན། དེའི་ཡེ་ཤེས་ལ་དབང་པོའི་ལག་ན་ཉལ་བ་དྲང་སྲོང་ཞོ་འཐུང་གི་རུས་པ་ཕ་ལམ་གྱི་རང་བཞིན་ལས་གྲུབ་པའི་རྡོ་རྗེ་ཁྱད་ཆོས་གསུམ་ལྡན་གྱི་མངོན་བརྗོད་སྦྱར་ནས་དེས་རིན་པོ་ཆེ་གཞན་ཐམས་ཅད་འབིགས་ཤིང་གཅོད་པ་ལྟར། རྡོ་རྗེའི་ཆོས་བདུན་དང་ལྡན་པའི་ཡེ་ཤེས་དེས་ཀྱང་ཡོད་མེད་རྟག་ཆད་ཀྱི་མཐར་ལྟའི་རྨིག་པ་སྟེ་འཇིག་ཚོགས་ལ་བལྟ་བའི་རི་བོ་ཉི་ཤུའི་རྐང་པ་འཇོམས་ཤིང་འདུལ་བར་བྱེད་པས་ན་ལྷའི་དབང་པོའི་རྟེན་དང་བརྟེན་པ་རིགས་བྱེད་ཀྱི་གཏམ་རྒྱུད་དང་གཟུགས་ཅན་གྱི་རྒྱན་དུ་སྦྱར་ཏེ། རྗོད་བྱེད་སྡེ་སྣོད་གསུམ་དང་། བརྗོད་བྱ་བསླབ་པ་གསུམ་གྱི་དོན་སྒྲ་ཇི་བཞིན་པར་རྟོགས་པ་ལ་སྨོན་པའོ། །འདི་དག་གི་རང་བཞིན་རྒྱས་པ་ནི་བདེན་གཉིས་ཤིང་རྟ་ལས་ཤེས་པར་བྱའོ། །བདུན་པ་སྔགས་ལམ་ལ་འཇུག་པའི་ཐོག་མར་དེ་སྟོན་བྱེད་ཀྱི་རྡོ་རྗེ་སློབ་དཔོན་ངོས་བཟུང་བ་ནི། ༈ དེ་ལྟར་རྒྱུ་ཡི་ཐེག་པས་རྒྱུད་སྦྱངས་ནས། །འབྲས་བུ་སྨིན་གྲོལ་རྡོ་རྗེ་ཐེག་པའི་ལམ། །ཉམས་ལེན་དྲོད་རྟགས་སྣང་བཞི་མངོན་གྱུར་ནས། །དམ་ཚིག་དབང་གི་ཤེས་རབ་རྒྱུད་འཆད་ཅིང་། །མན་ངག་ལུང་སྦྱིན་ཉམས་ཆག་སྐོང་མཛད་པའི། །མཐོང་ཐོས་དྲན་རེག་སློབ་དཔོན་རྣམ་བཞི་ལས། །དེ་ལ་ཐར་པ་དང་རྣམ་མཁྱེན་གྱི་ལམ་མཁན་ནི་བླ་མ་འབའ་ཞིག་ལ་རག་ལུས་པས་རང་ཉིད་ཀྱིས་རང་དགར་ཕྱིན་པ་གཅིག་ཀྱང་མེད་ཕྱིར་མདོ་རྒྱུད་ཐམས་ཅད་ནས་ལམ་གྱི་རྩ་བ་བླ་མ་བསྟེན་པར་གསུངས་ཤིང་། བླ་མ་དེ་ཡང་རྡོ་རྗེའི་ཐེག་པའི་སྨིན་གྲོལ་གྱི་ལམ་ལ་ཉམས་ལེན་མཐར་ཕྱིན་ནས་རང་དོན་དུ་དྲོད་རྟགས་ཐོབ་པ། ཁྱད་པར་དུ་ཐེག་པ་མཆོག་གི་སྣང་བཞིའི་ལམ་རྟགས་མངོན་དུ་གྱུར་པ་ཞིག་བསྟེན་ལ། དེ་ལ་དམ་ཚིག་གི་གནང་བཀག་དང་འབྲེལ་བ་དབང་། ཐོས་བསམ་གྱི་ཤེས་རབ་དང་འབྲེལ་བ་རྒྱུད། མན་ངག་གི་གོམས་པ་དང་འབྲེལ་བའི་ལུང་། འགལ་རྐྱེན་དང་ཉམས་ཆག་བསྐང་བ་བཞིར་སྟོན་པའང་དང་པོས་ལྷ་དང་གཞལ་ཡས་ཁང་ལ་སོགས་པའི་དེ་ཁོ་ན་ཉིད་མངོན་གསུམ་དུ་སྟོན་པས་ན་མཐོང་བ་དང་། གཉིས་པས་གཞི་ལམ་འབྲས་གསུམ་གྱི་རྒྱུད་དོན་དབང་ཤེས་ལ་སྦྱོར་བས་ཐོས་པ་དང་། གསུམ་པས་དེ་ཁོ་ན་ཉིད་ཀྱི་གནས་ལུགས་རང་ལ་གནས་པ་ངོ་སྤྲོད་ཅིང་ལམ་གྱི་ངོ་བོར་དྲན་པ་ལ་སྦྱོར། བཞི་པས་ཉམས་ན་བཤགས་ཐབས་སྟོན་ཅིང་དག་ཚངས་ལ་རེག་ཏུ་འཇུག་པས་རྣམ་གྲངས་བཞིར་བསྟན་ཀྱང་རྫས་སུ་གཅིག་གིས་ཆོག་པའོ། །དེ་ལྟ་བུའི་རྩ་བའི་བླ་མ་ལས་ཇི་ལྟར་ཉམས་སུ་བླང་བྱའི་རྣམ་གཞག་སྤྱིར་སྟོན་པའི་ཕྱིར། ༈ རྒྱུད་སྡེ་བཞི་དང་རྫོགས་པ་ཆེན་པོའི་ལམ། །ལེགས་པར་བཤད་པའི་སྨིན་གྲོལ་ལམ་གྱི་གནད། །ཅེས་པས་བྱ་སྤྱོད་རྣལ་འབྱོར་བླ་མེད་བཞི་དང་། ཐེག་པའི་རྩེ་མོ་རྫོགས་པ་ཆེན་པོའི་སྨིན་གྲོལ་གཉིས་ཀྱི་ལམ་གནད་རིམ་པར་ནོད་ནས་བསྟེན་གོམས་བྱ་བ་ལས། བརྒྱད་པ་ནང་གསེས་བྱ་སྤྱོད་གཉིས་ལ་སྨོན་པ་ནི། ༈ ཆུ་དབང་སོགས་ཀྱིས་རང་རྒྱུད་སྨིན་བྱས་ནས། །མདུན་བསྐྱེད་ཐུགས་ཀར་ཡིག་འབྲུའི་ས་བོན་བཀོད། །ཕྱི་ཡི་སྤྱོད་ལམ་དྲང་སྲོང་རྗེས་མཐུན་ཞིང་། །ནང་གི་ཉི་མ་རྣལ་འབྱོར་སྙིང་ལ་ཤར། །ལྷ་མོ་རྣམས་དང་ཕན་ཚུན་བལྟས་པ་ལས། །བྱུང་བའི་བདེ་བ་ལམ་བྱེད་ཀྲི་ཡའི་རྒྱུད། །རྗེ་དཔོན་ལྟ་བུ་དངོས་གྲུབ་ལེན་པ་དང་། །རྡོ་རྗེ་དྲིལ་བུའི་དབང་གིས་སྨིན་བྱས་ནས། །བདག་མདུན་གཉིས་ཀའི་ཐུགས་ཀར་ཡིག་འབྲུ་བཀོད། །ཕྱི་རོལ་བྱ་བའི་ཐབས་དང་ནང་གི་ནི། །ཟབ་མོའི་རྣལ་འབྱོར་ཆ་ལ་མཉམ་པར་སྤྱོད། །འཛུམ་ཞིང་དགོད་པའི་བདེ་བས་རྣམ་རོལ་པ། །ཡན་ལག་བཞི་ལ་གཞོལ་བ་ཨུ་པའི་རྒྱུད། །གྲོགས་པོ་ལྟ་བུར་དངོས་གྲུབ་ལེན་པར་བྱེད། །བྱ་སྤྱོད་གནས་ལ་ཚུལ་བཞིན་སྤྱོད་པར་ཤོག །དེ་ལ་སྔགས་ཀྱི་ལམ་སྟེགས་སུ་བྱང་སྡོམ་ནི་ངེས་པར་དགོས་ལ། དེའི་སྟེང་དུ་སྔགས་ཕྱི་ནང་སོ་སོའི་དམ་ཚིག་དང་སྡོམ་པའི་གནང་བཀག་དང་མི་འགལ་བས་ཆུ་དང་ཅོད་པན་གྱི་དབང་གིས་སྨིན་པར་བྱས་ནས། མདུན་བསྐྱེད་ཀྱི་ཐུགས་ཀར་ཡིག་འབྲུ་དང་བཅས་པའི་ལྷའི་རྣལ་འབྱོར་བསྒོམ་པ་དང་། ཕྱིའི་སྤྱོད་ལམ་ནི་ཁྲུས་དང་། གཙང་སྦྲ་ལྔ་དང་། དཀར་གསུམ་བཟའ་བ་དང་། སྨྱུང་བར་གནས་པའི་སྒོ་ནས་རྫོགས་ལྡན་གྱི་འདོད་པའི་ཀུན་སྤྱོད་ལྷ་མོ་དང་ཕན་ཚུན་བལྟས་པ་ཙམ་གྱིས་བདེ་བ་ལམ་དུ་བྱེད་ཅིང་། མདུན་བསྐྱེད་ལས་རྗེ་དཔོན་གྱི་ཚུལ་དུ་དངོས་གྲུབ་ལེན་པའོ། །སྤྱོད་རྒྱུད་ནི་དེའི་སྟེང་དུ་རྡོ་རྗེ་དང་། དྲིལ་བུ་དང་། མིང་དབང་གིས་སྨིན་པར་བྱས་ནས། བདག་མདུན་གཉིས་ཀ་ལྷའི་རྣམ་རོལ་དུ་གསལ་བའི་བཟླས་སྒོམ་དང་། ཕྱིའི་སྤྱོད་ལམ་བྱ་རྒྱུད་དང་མཐུན་ཞིང་ནང་གི་རྣལ་འབྱོར་ཡོ་ག་ལྟར་སྒོམས་ལ་འདོད་པའི་ཀུན་སྤྱོད་གསུམ་ལྡན་དང་མཚུངས་པར་ལྷ་མོ་དང་ཕན་ཚུན་འཛུམ་ཞིང་དགོད་པ་ཙམ་གྱིས་བདེ་བ་ལམ་དུ་བྱེད་པ་ལ། དེ་ལའང་མཚན་མ་ཡོད་མེད་ཀྱི་རྣལ་འབྱོར་གཉིས་ཤེས་པར་བྱས་ནས་ཕྱིའི་ཡན་ལག་བཞི་དང་། ནང་གི་ཡན་ལག་བཞིའི་བཟླས་བརྗོད་དང་འབྲེལ་བར་མདུན་བསྐྱེད་ལས་གྲོགས་པོ་ལྟ་བུ་དངོས་གྲུབ་ལེན་པའོ། །དགུ་པ་རྣལ་འབྱོར་རྒྱུད་ལ་སྨོན་པ་ནི། ༈ སློབ་དཔོན་དབང་བསྐུར་རང་རྒྱུད་སྨིན་བྱས་ནས། །བདག་མདུན་གཉིས་ཀ་དག་པའི་སྐུ་རུ་བསྐྱེད། །ཡེ་ཤེས་སྤྱན་དྲངས་དེ་སྲིད་ང་རྒྱལ་བཟུང་། །ཕྱག་རྒྱ་བཞི་ཡི་རྒྱ་ལས་མི་འདའ་ཞིང་། །ཏིང་འཛིན་གསུམ་གྱི་ལང་ཚོས་སྙིང་ལ་འགྲོགས། །ལག་པའི་པདྨོ་འབྲེལ་བའི་བདེ་བས་ཚིམས། །ནང་གི་རྣལ་འབྱོར་གཙོ་བོར་གྱུར་པ་ཡི། །ཡོ་གའི་ལམ་གྱི་གཞི་ལ་རྣམ་གྲོལ་ཤོག །དེ་ལ་སྔ་མའི་སྟེང་རྡོ་རྗེ་སློབ་དཔོན་གྱི་དབང་གིས་སྨིན་པར་བྱས་ནས། །ཐབས་ཤེས་རིམ་ཅན་དུ་སྒོམ་པའི་བསྐྱེད་རྫོགས་སོ་སོ་བ་ལས་བདག་མདུན་གཉིས་ཀ་ལྷར་བསྐྱེད་ནས་ཡེ་ཤེས་པ་དགུག་ཅིང་གཞུག །ལྷར་སྣང་ལ་ང་རྒྱལ་བཟུང་ནས་དམ་ཚིག་གི་ཕྱག་རྒྱ་དང་། ཆོས་རྒྱ། ལས་རྒྱ། ཕྱག་རྒྱ་ཆེན་པོ་བཞིས་བཅིང་ཞིང་གདུལ་བྱའི་ཉོན་མོངས་པ་གཏི་མུག་དང་། ཞེ་སྡང་། འདོད་ཆགས། སེར་སྣ་བཞི་འདུལ་ཕྱིར་དུམ་བུ་བཞི་པའི་ཐ་སྙད་ཀྱི་སྨོན་པའི་ལྷར་སྣང་གི་དུམ་བུ་རེ་རེ་ལའང་རྒྱས་འབྲིང་བསྡུས་གསུམ་གྱི་ཏིང་འཛིན་གསུམ་གྱི་ལང་ཚོས་སྙིང་ལ་འགྲོགས་ནས་འདོད་པའི་ཀུན་སྤྱོད་ཀྱང་གཉིས་ལྡན་དང་མཚུངས་པ་ལག་བཅངས་ཀྱི་རྣམ་པ་ལམ་དུ་བྱེད་ལ། ཕྱིའི་སྤྱོད་པ་གྲོགས་ཙམ་དུ་བསྟེན་པ་ལས། གཙོ་བོར་ནང་གི་རྣལ་འབྱོར་ལ་བརྩོན་པ་སྟེ། དེ་ལྟར་གསུམ་ནི་གསང་སྔགས་ཕྱི་པ་གསུམ་མོ། །བཅུ་པ་ནང་པ་ཐབས་ཀྱི་རྒྱུད་གསང་སྔགས་བླ་མེད་ཀྱི་དོན་ལ་སྨོན་པ་ནི། ༈ རྒྱུ་དབང་བསྐུར་ནས་རགས་པའི་ཕུང་སོགས་རྣམས། །ཕྱི་ནང་སྣོད་བཅུད་གཞལ་ཡས་ལྷ་རྣམས་སུ། །དག་པའི་སྐུ་དང་མཆོག་དབང་གསུམ་བསྐུར་ནས། །བསྐྱེད་རིམ་ཚོགས་ཞིང་སྲུང་འཁོར་སྔོན་འགྲོ་བས། །རིམ་པ་ལྔ་དང་རྗེས་མཐུན་ལམ་གྱི་འགྲོས། །དེ་ལ་ས་ཆོག་དང་། སྟ་གོན་དང་། རྡུལ་ཚོན་གྱི་བྱ་བ་དང་། ཆོ་གའི་ལས་རིམ་ལ་སོགས་སྐྱེད་བྱེད་འགྲུབ་པའི་རྒྱུ་ཚོགས་མང་པོ་ལ་བརྟེན་དགོས་པས་ན་བུམ་དབང་རྗེས་འབྲང་རིག་པའི་དབང་བ་དང་བཅས་པ་ལ་རྒྱུ་དབང་དུ་གཞག་ལ། དག་བྱེད་དེ་རྣམས་ཀྱིས་དག་བྱ་སློབ་མའི་རྒྱུད་ཀྱི་རགས་པའི་ཕུང་པོ་ལྔ་ནི་གཤེགས་པ་ལྔ། འབྱུང་བ་ལྔ་ནི་ཡུམ་ལྔ། དབང་ཡུལ་སེམས་དཔའ་སེམས་མ། མུ་བཞི་ལ་སོགས་པ་སྒོ་བ་ཡབ་ཡུམ་དུ་གནས་དག་པར་བྱེད་ཅིང་། དེ་བཞིན་དུ་ཕྱི་སྣོད་གཞལ་ཡས་ཁང་དང་། ནང་བཅུད་ལྷ་དང་ལྷ་མོའི་རང་བཞིན་དུ་རྣམ་པར་དག་པར་བྱེད་ལ། དེའི་སྟེང་དུ་མཆོག་དབང་གོང་མ་གསུམ་ལས་གསང་དབང་གིས་ངག་དང་རླུང་། ཤེར་དབང་གིས་ཡིད་དང་ཐིག་ལེ། བཞི་པས་ཤེས་བྱའི་སྒྲིབ་པ་དག་སྟེ་རྒྱུད་སྨིན་ཞིང་སྐུ་བཞིའི་ས་བོན་ཐེབས། དེ་ནས་རིམ་པ་དང་པོ་བསྐྱེད་རིམ་ལ་ཚོགས་ཞིང་ལ་བརྟེན་ནས་ཚོགས་བསགས་པ་དང་། སྲུང་འཁོར་སྒོམ་པ་སྔོན་དུ་འགྲོ་བས། དངོས་གཞི་ལ་ལུས་ལྷ། ངག་སྔགས། སེམས་དེ་ཁོ་ན་ཉིད་ལ་གཞོལ་བས་སྒོ་གསུམ་རྡོ་རྗེ་གསུམ་དང་ཀུན་རྫོབ་བདེན་པ་སྒྱུ་ལུས། དོན་དམ་བདེན་པ་འོད་གསལ་ཏེ། ཕ་རྒྱུད་གསང་བ་འདུས་པའི་རིམ་པ་ལྔ་དང་རྗེས་སུ་མཐུན་པ་ཞེས་པས་ལམ་གྱི་འགྲོས་འདྲ་མཚུངས་སུ་ཡོད་ཀྱང་དངོས་བསྟན་མ་ཡིན་ལ། དེ་ལ་འཆི་སྲིད་ཆོས་སྐུར་སྦྱོང་བ། བར་སྲིད་ལོངས་སྐུར་སྦྱོང་བ། སྐྱེ་སྲིད་སྤྲུལ་སྐུར་སྦྱོང་བ་གསུམ་གྱི་དང་པོ་ནི། ༈ ཁམས་དྲུག་ལྡན་པའི་མི་རྣམས་ཕུང་ཁམས་སོགས། །རིམ་གྱིས་ཐིམ་ནས་འཆི་བའི་རིམ་པ་འམ། །ཇི་ལྟར་མཚན་མོ་གཉིད་དུ་སོང་བའི་ཚེ། །ཡུལ་ལྔའི་ཤེས་པ་རིམ་གྱིས་ཡིད་དུ་ཐིམ། །དེ་ཡང་ཀུན་གཞིར་ཐིམ་པས་མི་རྟོག་པ། །རྩེ་གཅིག་སྣང་ཡུལ་མེད་པའི་ངང་དེ་ཉིད། །ཆོས་དབྱིངས་ཐིམ་པས་རང་བཞིན་སྤྲོས་དང་བྲལ། །ཐུན་བར་ལྷག་མོས་འོད་གསལ་དུ་འཇུག་པའི། །བར་འདིར་ཆོས་སྐུའི་རྣལ་འབྱོར་ལ་གནས་ཤིང་། །ཞེས་པས་འབྱུང་བ་ལྔ་དང་དྲི་བཅས་ཡེ་ཤེས་ཏེ་ཁམས་དྲུག་ལྡན་གྱི་མི་རྣམས་ཕུང་ཁམས་ཀྱི་ཚོགས་པ་གྱེས་ཤིང་ཐིམ་རིམ་ཉམས་སུ་མྱོང་བའམ། དེའི་འདྲ་འབག་མཚན་མོ་གཉིད་དུ་ཕྱོགས་པའི་ཚེ་མཐོང་ཡུལ་གཟུགས་ལ་སོགས་པའི་དབང་པོའི་ཤེས་པ་ལྔ་རིམ་གྱིས་ནུབ་ནས་ཡིད་ཀྱི་རྣམ་པར་ཤེས་པ་ལ་ཐིམ། དེ་ཡང་ཀུན་གཞི་ལུང་མ་བསྟན་སེམས་མེད་པའི་གནས་སྐབས་ལྔའི་ཅིག་ཤོས་ལ་ཐིམ་པས་གཉིད་འཐུག་གང་དུའང་མི་རྟོག་པའི་ངང་དུ་ཐིམ། ཐིམ་པ་དེ་ཉིད་སླར་གཟུང་འཛིན་གྱི་ཆར་ཤར་བ་མ་ཡིན་ཡང་གོ་འབྱེད་པའི་ཆ་ནས་རླུང་སེམས་ཀྱིས་མ་བསླད་པའི་རིམ་པ་ནང་གསལ་ལྷུན་གྲུབ་ཆེན་པོར་ཤར་བ་ལ་ཆོས་དབྱིངས་སུ་ཐིམ་པའི་བརྡར་བཏགས་པ་སྟེ། རང་བཞིན་གྱི་སྤྲོས་པ་དང་བྲལ་བ་ནི། ཐུན་བར་ལྷག་མོས་འོད་གསལ་དུ་འཇུག་པའི་དུས་ཏེ་འཆི་བ་ཆོས་སྐུའི་རྣལ་འབྱོར་ཞེས་བྱའོ། །གཉིས་པ་ནི་དེ་རང་ས་མ་ཟིན་པ་ལ་གནས་སྐབས་པ་གཉིད་དམ། མཐར་ཐུག་པ་འཆི་བ་གང་ཡིན་ཡང་མཚུངས་ཏེ་རང་བཞིན་གྱི་འོད་གསལ་དེ་སྔར་གྱི་ཀུན་གཞིའི་ངང་དུ་རྨུགས་པ་དེ་ཕྱིར་གསལ་དུ་མཆེད་པས་སྲོག་གི་རླུང་ཤིན་ཏུ་ཕྲ་བ་དང་ལྷན་ཅིག་པའི་ཀུན་གཞིའི་རྣམ་ཤེས་ལས་ཡིད་ཉིད་གཅིག་པུར་ལངས་པས་རྨི་ལམ་གྱི་ལུས་གྲུབ་པ་ཡིན་ཏེ། མིང་བཞི་འདུས་པའི་ཕུང་པོ་ཅན་བར་དོ་དང་ཆོས་མཚུངས་པས་ན། ༈ གཉིད་དམ་འཆི་བའི་འོད་གསལ་ལུགས་ལྡོག་ཏུ། །སླར་ཡང་མཆེད་པས་ཀུན་གཞིའི་རྣམ་ཤེས་ལས། །ཡིད་ཉིད་གཅིག་པུ་ལངས་པས་རྨི་ལམ་སེམས། །དབང་པོ་ཀུན་ཚང་ཡིད་ཀྱི་ལུས་གྲུབ་པ། །ཞེས་སོ། །དེ་སྦྱང་ཕྱིར་བར་དོ་སྒྱུ་ལུས་ལོངས་སྐུར་ལྡང་བའི་མན་ངག་ལ་སྨོན་པ་ནི། ༈ དེ་མཚུངས་སྐད་ཅིག་མངོན་བྱང་ལྔ་ལས་ནི། །དང་པོའི་མགོན་པོ་ལེགས་པར་བསྐྱེད་པའི་ཚུལ། །བར་དོ་སྒྱུ་ལུས་ལོངས་སྐུར་ལྡང་བར་ཤོག །ཅེས་པས། དེ་དང་མཚུངས་ལྡན་རྣམ་བྱང་བསྐྱེད་པའི་རིམ་པ་གདན་པདྨ་ལས་མངོན་པར་བྱང་ཆུབ་པ། གསུང་ཡིག་འབྲུ་ལས། ཐུགས་ཕྱག་མཚན་ལས། སྐུ་ཡོངས་སུ་རྫོགས་པ་ལས། ངོ་བོ་ཉིད་ཡེ་ཤེས་སེམས་དཔའ་ལས་མངོན་པར་བྱང་ཆུབ་པའི་དང་པོའི་མགོན་པོ་རིགས་ཐམས་ཅད་པའི་བདག་ཉིད་ཅན་དུ་ལྡང་བ་ནི་བར་དོ་སྒྱུ་ལུས་ལོངས་སྐུར་ལྡང་བའི་ཚུལ་ལོ། །གསུམ་པ་ནི། ༈ སླར་ཡང་སད་པའི་གནས་སྐབས་ཉིན་སྣང་དུ། །གདན་གསུམ་ལྷ་ཡི་སྐུ་རུ་ངེས་བྱས་ནས། །བར་དོའི་ལུས་དེ་མ་ཡི་མངལ་དུ་ནི། །ཞུགས་ཚུལ་དང་པོ་མགོན་པོ་མི་བསྐྱོད་པའི། །སྐུ་ལས་ཞུགས་པས་རྡོ་རྗེའི་སེམས་བསྐྱེད་ཅིང་། །དེ་ལས་ལུས་དཀྱིལ་བཀོད་ཅིང་སྒོ་གསུམ་དག །བྱིན་གྱིས་བརླབ་ཅིང་སེམས་དཔའ་སུམ་བརྩེགས་སུ། །བྱས་ནས་རིག་མའི་འདོད་ཡོན་རྣམ་རོལ་བས། །ཉིན་སྣང་སྐྱེ་ཤི་བར་དོ་གོམས་འདྲིས་ཀྱིས། །སྐྱེ་བ་སྤྲུལ་སྐུའི་རྣལ་འབྱོར་ལམ་བྱེད་ཤོག །ཅེས་པས་སད་པའི་གནས་སྐབས་དང་ཉིན་མོའི་སྣང་བ་ཐམས་ཅད་དུ་ནི་བར་སྲིད་ཀྱི་ལུས་མའི་མངལ་དུ་ཉིང་མཚམས་སྦྱོར་བའི་བག་ཆགས་སྦྱོང་ཕྱིར་འཁོར་བའི་འདྲ་འབག་དང་མཐུན་པའི་བསྐྱེད་རིམ་སྒོམ་ཚུལ་འོག་མིན་བགྲོད་པའི་ཐེམ་སྐས་སུ་གོ་བདེ་བར་བཤད་པ་ལ་བལྟ་ཞིང་། དེ་ཡང་འཆད་བྱའི་དངོས་བསྟན་ནི་ཕུང་ཁམས་གཉིས་གཤེགས་པ་གཤེགས་མ། སྐྱེ་མཆེད་སེམས་དཔའ་སེམས་མ། ཡན་ལག་ཁྲོ་བོ་ཁྲོ་མོའི་གདན་ཏེ་གདན་གསུམ་ཚང་བའི་སྐུར་ངེས་པར་བྱས་ནས་མངལ་དུ་འཇུག་ཀའི་སྲིད་བཅས་ཀྱི་ཤེས་པ་དེ་ཉིད་མགོན་པོ་མི་བསྐྱོད་པ་ལ་སོགས་པའི་བསྐྱེད་རིམ་སྒྱུ་མ་ལྟ་བུའི་ལྷ་སྐུར་ལྡང་བའི་སྔོན་དུ་གཞུང་ལྟར་རྡོ་རྗེའི་རྣལ་འབྱོར་དུ་སེམས་བསྐྱེད་ཅིང་། དེ་ལ་ལུས་དཀྱིལ་བཀོད་ཚུལ་སོ་སོའི་རང་ལུགས་ལྟར་རམ། ཡང་ན་དོན་གྱི་དག་དྲན་གདོད་ནས་གྲུབ་པའི་ལུས་དཀྱིལ་གྲོལ་ཐིག་གི། ཕུང་པོ་དག་པ་རིགས་ཀྱི་སངས་རྒྱས་ལྔ་། །ཞེས་པ་ལ་སོགས་པ་ལྟར་དང་། སྐུ་གསུང་ཐུགས་ནི་རྡོ་རྗེ་གསུམ་དུ་གནས། །རང་དབང་རང་ཐོབ་རིགས་ལྔས་དབུ་ལ་རྒྱན། །ཞེས་པ་ལྟར་སྒོ་གསུམ་བྱིན་གྱིས་བརླབ། དམ་ཡེ་ཏིང་ངེ་འཛིན་ཏེ་སེམས་དཔའ་སུམ་བརྩེགས་ཀྱི་བསྐྱེད་རིམ་ལ་གནས་པས་ཤེར་དབང་ལྷར་རིག་མའི་འདོད་ཡོན་ལ་རྣམ་པར་རོལ་ནས་ཕ་མའི་འདུ་འཕྲོད་ལ་ཆགས་སྡང་སྤང་ཞིང་། དེ་ཡང་བར་དོར་ཚུལ་དེ་ལྟ་བུ་གྲུབ་པ་ལ་ད་ལྟའི་ཉིན་སྣང་ཐམས་ཅད་སྐྱེ་ཤི་བར་དོ་གསུམ་གང་རུང་དུ་གྲོལ་བྱེད་ཀྱི་གོམས་འདྲིས་ལ་སློབ་པ་ནི། སྐྱེ་བ་སྤྲུལ་སྐུའི་རྣལ་འབྱོར་ལམ་དུ་བྱེད་པ་ལ་སྨོན་པའོ། །བཅུ་གཅིག་པ་བདེ་སྟོང་གི་ལྷ་སྐུ་ལ་སྨོན་པ་ནི། ༈ དེ་ལྟར་རིམ་པ་དང་པོ་མཐར་ཕྱིན་ནས། །གསང་བའི་སྣ་རྩེར་ཨ་ཝ་དྷཱུ་ཏིའི་ནང་། །དྭངས་མའི་ཐིག་ལེ་རང་སེམས་དབྱེར་མེད་དུ། །བཟུང་བས་མཉམ་གཞག་དགའ་བཞིའི་ཏིང་འཛིན་དང་། །རྗེས་ཐོབ་རིགས་བརྒྱ་རིགས་ལྔ་རིགས་གསུམ་སོགས། །བདེ་སྟོང་དབྱེར་མེད་ལྷ་ཡི་རྣམ་རོལ་བསྒོམ། །དེ་ལ་རིམ་པ་དང་པོ་བསྐྱེད་རིམ་གྱི་ལམ་ནས་ཕྱི་དོན་སྣང་བའི་བདེན་ཞེན་འགོག་པ་མཐར་ཕྱིན་ནས། ནང་དོན་བདེ་སྟོང་གི་ལྷ་སྐུ་བསྒྲུབ་ཕྱིར་རང་རྡོ་རྗེ་འཆང་ཡབ་ཡུམ་དུ་གསལ་བའི་དབུས་དྲང་པོར་དབུ་མའི་ཡར་སྣ་སྨིན་མཚམས་དང་། མར་སྣ་གསང་གནས་རྩེར་ཟུག་པའི་སྣར་འབར་འཛག་ཞུ་བདེའི་རྐྱེན་གྱིས་དྲངས་པའི་དྭངས་མའི་ཐིག་ལེ་འཕོ་ལ་ཁད་ཁད་དང་རང་སེམས་དབྱེར་མེད་དུ་བཟུང་བའི་མཉམ་གཞག་ཏུ་དགའ་བ་དང་། མཆོག་དགའ་དང་། ཁྱད་དགའ་དང་། ལྷན་སྐྱེས་ཏེ་དགའ་བ་བཞིའི་ཏིང་འཛིན་བསྒོམ་ཞིང་། དེའི་རྗེས་ཐོབ་ཏུ་མས་བརྟན་ལུགས་ལས་ལྡོག་པའི་ཐིག་ལེ་སྙིང་གར་དྲངས་པ་རྣམ་བྱང་གི་སྐུར་སྨིན་པ་ཞི་བ་བཞི་བཅུ་རྩ་གཉིས་དང་། དེའི་གདངས་དུང་ཁང་དུ་ཁྲག་འཐུང་ལྔ་བཅུ་རྩ་བརྒྱད་དུ་ཤར་བའི་རིགས་བརྒྱའམ། ཡང་ན་འཁོར་ལོ་ལྔར་རིགས་ལྔའམ། སྐུ་གསུང་ཐུགས་ཀྱི་གནས་གསུམ་དུ། རིགས་གསུམ་སོགས་སུ་གསལ་བའི་བདེ་སྟོང་དབྱེར་མེད་ཀྱི་ལྷར་སྣང་བསྒོམ་པ་ནི་གཞུང་གི་ངོ་བོས་བཤད་པའི་དོན་ཡིན་ལ། ཞར་བསྟན་འདུས་པ་འཕགས་ལུགས་ཀྱི་རིམ་པ་ལྔ་ནི། ༈ སླར་ཡང་དབེན་པ་གསུམ་གྱི་རིམ་པ་དང་། །ཀུན་རྫོབ་སྒྱུ་མ་དོན་དམ་འོད་གསལ་ཉིད། །བདེན་གཉིས་དབྱེར་མེད་ཟུང་འཇུག་ཉམས་ལེན་རྣམས། །གསང་བ་སྙིང་པོ་དཔལ་ལྡན་འདུས་པ་དང་། །བསྐྱེད་པ་མ་ཧཱ་ཡོ་ག་ཇི་བཞིན་དུ། །བསྐྱེད་རྫོགས་ཟབ་མོའི་དོན་རྣམས་མངོན་གྱུར་ཤོག །དེ་ལ་ལུས་དབེན་སྐུ་རྡོ་རྗེ། ངག་དབེན་གསུང་རྡོ་རྗེ། སེམས་དབེན་ཐུགས་རྡོ་རྗེ་གསུམ་གྱི་རྣལ་འབྱོར་ཕྲ་ཏིག་གི་བར་བསྒོམས་པའི་རྗེས་ལ་རྩ་གསུམ་འཁོར་ལོ་དྲུག་གི་བྱེད་པ་བཅིངས་པའི་དྷཱུ་ཏིའི་མར་སྣར་ཉི་གདན་ལ་རང་སེམས་ཐིག་ལེ་སྔོན་པོའི་རྣམ་པར་འབབ་ལ་རླུང་སེམས་དབྱེར་མེད་དུ་དྲིལ་བས་དམིགས་པའི་རིམ་པ་ལ་བསླབ་པས་དབུ་མར་རླུང་ཞུགས་གནས་ཐིམ་གསུམ་གྱི་རྟགས་དང་། དེ་བཞིན་དུ་སྣང་མཆེད་ཐོབ་གསུམ། སྟོང་པ་བཞིའི་འོད་གསལ་དང་བཅས་པ་ངོས་བཟུང་ནས་ཆོས་ལོངས་སྤྲུལ་གསུམ་གྱི་བསྲེ་བ་གསུམ་ལ་བསླབ་པ་ནི་རང་ངོའི་མཉམ་གཞག་དང་དབང་པོ་ཡུལ་ལ་འཇུག་དུས་གང་སྣང་སྟོང་པ་བདེ་བའི་ལྷ་སྐུར་འཆར་བ་ནི་རྗེས་ཐོབ་རྐྱང་པ་ཡིན་ནོ། །རྗེས་ལ་བསྒྲུབ་བྱ་བདེན་པ་གཉིས་ཀྱི་རྫོགས་རིམ་ལས་དང་པོ་ཀུན་རྫོབ་སྒྱུ་མ་ནི་འོད་གསལ་གྱི་བཞོན་པར་གྱུར་པའི་རླུང་གི་ཉེར་ལེན་དང་། རང་སེམས་ལྷན་ཅིག་སྐྱེས་པའི་རྐྱེན་ལས་རླུང་སེམས་ཙམ་ལས་གྲུབ་པའི་རྡོ་རྗེ་འཆང་གི་སྐུ་རྣམ་སྨིན་གྱི་ལུས་རྟེན་འདི་ལས་གོ་ས་གཞན་པ་ཞིག་ལྡང་བ་སྟེ། དེ་ནི་ལོངས་སྐུ་ལྟ་བུའི་བཞིན་ལག་གི་རྣམ་པ་ཅན་ཡིན་ཡང་རྣམ་འཕྲུལ་དུ་མར་སྟོན་ནུས་ཤིང་། དེའི་བསྒྲུབ་གཞིའང་གཉིད་ཀྱི་འོད་གསལ་ལས་བྱུང་ཞིང་། རྨི་ལམ་གྱི་ལུས་ལྟར་ད་ལྟ་རྣམ་སྨིན་གྱི་ལུས་འདི་དང་འབྲེལ་པ་ཅན་ཡིན་ལ། སླད་ཀྱི་བར་དོ་ལོངས་སྐུར་འགྲུབ་པའི་ཉེར་ལེན་དུ་འགྱུར་བས་ན་སྒྱུ་མའི་སྐུ་ཞེས་བརྗོད་ཀྱིས། ལམ་གྱི་གནས་སྐབས་ན་སེམས་བསྐྱེད་ཀྱི་འཕེན་པས་སེམས་ཅན་ཐམས་ཅད་ཀྱི་སྒོ་གསུམ་དང་། སྒྱུ་ལུས་པའི་སྐུ་རྡོ་རྗེ་རྣམ་པར་སྣང་མཛད། །གསུང་རྡོ་རྗེ་འོད་དཔག་མེད། ཐུགས་རྡོ་རྗེ་མི་བསྐྱོད་པར་གསལ་བའི་དམ་ཚིག་སེམས་དཔའ་ལ། སོ་སོའི་ཐུགས་ཀར་རིམ་བཞིན་སྐུ་གསུང་ཐུགས་ཀྱི་ཡི་གེ་གསུམ་གསལ་བ་ལ་ཡེ་ཤེས་སེམས་དཔའ་སོ་སོའི་མགོར་ཐིག་ལེ་ནཱ་ད་དང་བཅས་པའི་ཏིང་འཛིན་སེམས་དཔའ་སྟེ་སེམས་དཔའ་གསུམ་བརྩེགས་གསལ་ཞིང་སོ་སོའི་ཏིང་འཛིན་སེམས་དཔའ་ལས་འོད་ཟེར་འཕྲོས་པས་སྣོད་བཅུད་ཐམས་ཅད་འོད་དུ་ཞུ་བ་དམ་ཚིག་སེམས་དཔའ་དང་། དེ་འོད་དུ་ཞུ་བ་ཡེ་ཤེས་སེམས་དཔའ་ལ། དེ་འོད་དུ་ཞུ་བ་ཏིང་འཛིན་སེམས་དཔའ་ལ་ཐིམ་པའི་ངང་དུ་མཉམ་པར་གཞག་པས་ཞུགས་གནས་ཐིམ་གསུམ་གྱི་རྟགས་སྣང་སྨིག་རྒྱུ་དུ་བ་ལ་སོགས་པ་དང་སྣང་མཆེད་ཐོབ་གསུམ་དང་སྟོང་པ་བཞི་འཆར་བའི་ཐམས་ཅད་སྟོང་པ་འོད་གསལ་ལ་མཉམ་པར་འཇོག །དེ་ལས་ལྡང་བ་ན་མ་དག་པའི་སྒྱུ་ལུས་དག་པའི་སྒྱུ་ལུས་སུ་བསྒོམ་པའོ། །གཉིས་པ་དོན་དམ་འོད་གསལ་ནི། སྒྱུ་ལུས་ཀྱི་སེམས་དཔའ་གསུམ་བརྩེགས། དེ་སྡུད་རིམ་གཉིད་ཀྱི་འོད་གསལ་དུ་བཅུག་པའི་སྟོང་ཉིད་ལ་མཉམ་པར་གཞག་པས་ཞུགས་གནས་ཐིམ་གསུམ་དང་། སྣང་མཆེད་ཐོབ་གསུམ་གྱི་རྗེས་སྟོང་བཞིའི་འོད་གསལ་ལྷན་སྐྱེས་ཀྱི་བདེ་བས་ཐབས་བྱས་ཏེ་དངོས་པོའི་གནས་ལུགས་མ་ནོར་བར་རྟོགས་པས་རང་རྒྱུད་ལྡན་གྱི་གང་ཟག་འཕགས་པར་སོང་། བར་ཆད་མེད་ལམ་རྒྱུད་ལ་སྐྱེས་ནས་བདེན་གཉིས་ཟུང་དུ་འཇུག་པའི་རྣལ་འབྱོར་མངོན་དུ་བྱེད་པ་འདུས་པའི་དགོངས་པ་ཡིན་ལ། དེ་ཡང་འདུས་པའི་རྒྱུད་སྔ་མ་སྔ་འགྱུར་ཡིན་པས་དཔལ་གསང་བའི་སྙིང་པོའི་སྟེང་སྒོ་རྣམ་གྲོལ་དང་། འོག་སྒོ་ནམ་མཁའི་རྡོ་རྗེའི་རྫོགས་རིམ་དང་སྡེ་ཚན་གཅིག་པར་བསྡུས་ནས་བསྐྱེད་པ་མ་ཧཱ་ཡོ་གའི་བསྐྱེད་རྫོགས་ཟབ་མོའི་དོན་ལ་སྨོན་པ་ཡིན་ནོ། །བཅུ་གཉིས་པ་རྗེས་སུ་རྣལ་འབྱོར་ལ་སྨོན་པ་ནི། ༈ མཚན་ཉིད་ཀུན་ལྡན་བླ་མ་ཡབ་ཡུམ་ལས། །ལམ་དབང་ཟབ་མོས་ལེགས་པར་སྨིན་བྱས་ནས། །རྣམ་དག་དབང་ལྔའི་ཆུ་བོས་སྒྲིབ་གཉིས་ཀྱི། །དྲི་མ་ཀུན་བཀྲུས་སྐུ་བཞིའི་ས་བོན་བཞག །དམ་ཚིག་སྡོམ་པ་ཚུལ་བཞིན་བསྲུངས་པ་ལས། །ཟབ་མོའི་ལམ་བཟང་སྐྱེ་བའི་སྣོད་གྱུར་པས། །མ་དག་སྐྱེ་ཤི་བར་དོའི་སྣང་ཞེན་རྣམས། །ཡིད་ངོར་སྦྱངས་ནས་སྐུ་གསུམ་ལམ་འཁྱེར་བ། །སྦྱང་གཞི་སྦྱོང་བྱེད་ཚང་བའི་བསྐྱེད་རིམ་གྱིས། །རིམ་པ་དང་པོའི་ལམ་ལ་མངོན་འགྱུར་ཤོག །དེ་ལ་གཞི་ལམ་འབྲས་གསུམ་གྱི་རྒྱུད་དོན་ལ་དབང་འབྱོར་པའི་མཚན་ཉིད་ཀུན་ལྡན་གྱི་བླ་མ་ཡབ་ཡུམ་ཟུང་དུ་འཇུག་པའི་གདན་གསུམ་ལུས་ཀྱི་དཀྱིལ་འཁོར་ལས། སྐྱེ་བོ་ཐ་མལ་དང་ཐེག་པ་དམན་པས་ཐོས་སུའང་མི་རུང་བའི་ལམ་དུས་ཀྱི་གསང་བའི་དབང་ཟབ་མོས་སྨིན་པར་བྱས་ཤིང་། རྒྱུ་དབང་སྔོན་སོང་ལམ་དབང་དགའ་བཞིའི་ཡེ་ཤེས་དང་འཇུག་པ་གཅིག་པར་གནས་འགྱུར་བའི་རྣམ་དག་དབང་ལྔའི་ཆུ་བོས་ཉོན་ཤེས་སྒྲིབ་གཉིས་ཀྱི་དྲི་མ་ཐམས་ཅད་བཀྲུས། སྐུ་གསུམ་ངོ་བོ་ཉིད་སྐུ་དང་བཅས་པའི་ས་བོན་རྒྱུད་ལ་བཞག །དེ་དག་གི་དུས་སུ་ཁས་བླངས་པའི་དམ་ཚིག་དང་སྡོམ་པའི་གནས་ཚུལ་བཞིན་དུ་བསྲུངས་པ་གང་ཞིག་ལམ་བདེན་རྒྱུད་ལ་སྐྱེ་བའི་སྣོད་དམ་རྟེན་དུ་གྱུར་བས། མ་དག་པ་འཁོར་བའི་གནས་སྐབས་ཀྱི་སྐྱེ་ཤི་བར་དོའི་སྣང་ཞེན་རང་རྒྱུད་པ་རྣམས། དག་པའི་ཡིད་ངོར་སྦྱང་ཚུལ་ཉིན་སྣང་སད་དུས་ཀྱི་བསྐྱེད་རིམ་སྐྱེ་བ་སྤྲུལ་སྐུ། གཉིད་དུས་ཀྱི་སྡུད་རིམ་འཆི་བ་འོད་གསལ་ཆོས་སྐུ། བར་སྲིད་ཀྱི་ཡིད་ལུས་སྒྱུ་ལུས་ལོངས་སྐུ་སྟེ་སྐུ་གསུམ་ལམ་འཁྱེར་ནི། སྐྱེ་གནས་རྣམ་པ་བཞི་དང་མཐུན་པའི་འཁོར་བའི་འདྲ་འབག་ཁུ་རྡུལ་རླུང་གསུམ་དང་བཅས་པ་སྦྱང་གཞིར་བྱས་ནས། སྦྱོང་བྱེད་རྡོ་རྗེའི་ཆོ་ག་གསུམ་དང་ཐུན་མོང་མ་ཡིན་པའི་མངོན་བྱང་ལྔ་ཚང་བས་རྣམ་བྱང་བསྐྱེད་པའི་རིམ་པ་དང་མཐུན་ཞིང་། བུམ་དབང་གི་ལམ་རྫོགས་རིམ་གྱི་སྨིན་བྱེད་ཡིན་པས། རིམ་པ་དང་པོའི་ལམ་མངོན་དུ་གྱུར་པར་སྨོན་པའོ། །བཅུ་གསུམ་པ་ཨ་ནུའི་རྫོགས་རིམ་ལ་སྨོན་པ་ནི། ༈ ཕྱི་ནང་རང་ལུས་དཀྱིལ་འཁོར་ལྷ་ཡི་ཚོགས། །རྩ་ཡིག་བདུད་རྩི་དཔའ་བོ་རྣལ་འབྱོར་མ། །ཐིམ་ལུགས་བཞི་བསྒོམ་ཡེ་ཤེས་སྐྱེད་བྱེད་ཅིང་། །རྫོགས་རིམ་རྟོག་པ་འདྲེན་པའི་རྒྱུད་སྨིན་བྱས། །ཉི་ཟླའི་ལམ་ནས་དཀྱིལ་འཁོར་བཅུ་ཡི་རླུང་། །སྒྲ་གཅན་ལམ་དུ་འགོག་པའི་ཐབས་མཁས་ཀྱི། །མུན་པའི་ལམ་ནས་འབར་བའི་ཙནྜ་ལིས། །ཧཾ་ཡིག་རི་བོང་འཛིན་པ་ཞུ་བ་ལས། །ལྷན་སྐྱེས་བདེ་བས་མཉམ་གཞག་དྲངས་པ་ཡིས། །འཁོར་འདས་ཆོས་རྣམས་ཀུན་གྱི་གནས་ལུགས་དང་། །དབྱེར་མེད་གྱུར་པ་དཔེ་ཡི་ཡེ་ཤེས་ཉིད། །སྒྱུ་འཕྲུལ་དྲྭ་བའི་སྐུ་རུ་ལངས་པ་ལས། །མ་དག་སྐྱེ་ཤིའི་འཕྲང་ལས་གྲོལ་བ་ཡི། །རྫོགས་རི་མ་ཨ་ནུའི་ལམ་དུ་འཇུག་པར་ཤོག །དེ་ལ་ཕྱི་དོན་སྣང་སྲིད་སྣོད་བཅུད་འཛིན་པ་དང་། ནང་རང་ལུས་ཕུང་ཁམས་སྐྱེ་མཆེད་དུ་ཞེན་པའི་འཁྲུལ་རྟོག་ཐམས་ཅད་དབྱིངས་ནས་རང་བཞིན་གྱིས་སངས་རྒྱས་པའི་གཙོ་བོ་ནི་དཀྱིལ། ཅིག་ཤོས་ནི་འཁོར་དུ་དག་པའི་ལྷ་ཚོགས་དང་། གཞན་རྡོ་རྗེའི་ལུས་ཀྱི་དངོས་པོ་རྩ་དང་ཡི་གེ་དཔའ་བོ། ཁམས་བདུད་རྩི་རྣལ་འབྱོར་མ་སྟེ། དེ་གཉིས་ཀྱི་འཁྲིལ་སྦྱོར་གྱི་ཚུལ་ལས་བདེ་སྟོང་གི་མཆོད་པ་ལེན་པ་ལ་གཞན་ལུས་དང་སྙོམས་འཇུག་གི་ཞུ་བདེས་མཆོད་པའི་རྐྱེན་ལས་རླུང་དབུ་མར་ཞུགས་གནས་ཐིམ་གསུམ་འབྱུང་ཞིང་། དེ་ཡང་ཞུགས་པའི་རྟགས་སུ་སྣ་སྒོར་མཉམ་རྒྱུ། གནས་པའི་རྟགས་སུ་རྒྱུ་བ་རང་འགགས། ཐིམ་པའི་རྟགས་སུ་མཁའ་སྣང་། ས་ཆུ་མེ་རླུང་སྟེ་འབྱུང་བ་བཞི་པོ་གཅིག་ལ་ཅིག་ཤོས་ཐིམ་པའི་རྟགས་རིམ་པ་བཞིན། སྨིག་རྒྱུ། དུ་བ། མཁའ་སྣང་དང་རླུང་སྣང་བ་ལ་ཐིམ་དུ་ཉེ་བ་ན་མར་མེ་ཐིམ་པ་དངོས་ལྟར་དཀར་ལམ། སྣང་བ་མཆེད་པ་ལ་ཐིམ་པས་དམར་ལམ། མཆེད་པ་ཉེར་ཐོབ་ལ་ཐིམ་པས་ནག་ལམ། ཉེར་ཐོབ་འོད་གསལ་ལ་ཐིམ་པས་སྟོན་གནམ་གཡའ་དག་པ་ལྟ་བུ་སྟེ། ཕྱི་མ་བཞི་ནི་ཐིམ་ལུགས་བཞི་དང་། དཔེ་དོན་གྱི་འོད་གསལ་ལ་ངེས་པ་འདྲེན་པས་ཡེ་ཤེས་བསྐྱེད་ཅིང་བསྒོམ་པ་ནི་རྫོགས་རིམ་གྱི་རྟོག་པ་འདྲེན་པའི་རྒྱུད་སྨིན་བྱེད་ཡིན་ལ། དེའི་ཐབས་སུ་གྱུར་པ་ནི་ཉི་ཟླའི་ལམ་སྟེ། རོ་རྐྱང་གཉིས་ནས་རྒྱུ་བ་བསྐྱེད་སྡུད་ཀྱི་རྣམ་པས་ཕྱེ་བའི་ས་ལ་སོགས་པ་ཡན་ལག་གི་རླུང་བཅུ་བསྡོམས་པས་དཀྱིལ་འཁོར་བཅུའི་རླུང་དབུ་མ་སྒྲ་གཅན་གྱི་ལམ་དུ་འགོག་པའི་ཐབས་ལ་མཁས་པ་དང་། དེ་ཡང་མུན་པའི་ལམ་སྟེ་དབུ་མའི་མར་སྣེ་ནས་འབར་བའི་ཙནྜ་ལིའམ། གཏུམ་མོའི་མེས་ཡར་སྣེའི་ཧཾ་ཡིག་རི་བོང་འཛིན་པ་སྟེ་ཟླ་བའི་རང་བཞིན་གྱི་ཁམས་ཞུ་བ་ལས། རིམ་བཞིན་ཡས་བབས་མས་བརྟན་གྱི་དགའ་བ་བཞི་དང་ཁྱད་པར་ལྷན་ཅིག་སྐྱེས་པའི་བདེ་བ་ཆེན་པོས་མཉམ་གཞག་དྲངས་པ་དེའི་ངང་དུ་འཁོར་འདས་ཀྱི་ཆོས་ཐམས་ཅད་ཀྱི་རྫུན་ཕུག་རྡིབ་ཅིང་། ཀུན་གྱི་གནས་ལུགས་གཅིག་དང་ཐ་དད་དབྱེར་མེད་དུ་གྱུར་པ་འདི་ནི་ངོ་བོ་ཉིད་ཀྱི་ཡེ་ཤེས་ཡིན་ལ། དེ་ཉིད་ལས་གདུལ་བྱ་གང་ཡོད་ཀྱི་སར་སྤྲུལ་པའི་སྐུ་ཅིག་ཅར་དུ་སྟོན་པའི་ཕྱིར་སྒྱུ་མ་ཡབ། འཕྲུལ་པ་ཡུམ། དྲྭ་བ་འབྲེལ་པ་སྟེ་རླུང་སེམས་ཙམ་ལས་གྲུབ་པའི་སྒྱུ་མའི་སྐུར་ལངས་ནས། མ་དག་པའི་གནས་སྐབས་ཀྱི་སྐྱེ་ཤིའི་འཕྲང་ལས་གྲོལ་བའི་མན་ངག་རྫོགས་རིམ་ཐམས་ཅད་ཀྱི་དོན་པོར་ཨ་ནུ་ཡོ་གའི་ལམ་ལ་འཇུག་པར་སྨོན་པའོ། །བཅུ་བཞི་པ་ཨ་ཏི་ཡོ་ག་ལ་ནང་གསེས་སེམས་སྡེ་ཀློང་སྡེ་མན་ངག་གི་སྡེ་གསུམ་ལས། དང་པོ་སེམས་སྡེ་ལ་སྨོན་པ། ༈ དོན་གྱི་ལྷན་ཅིག་སྐྱེས་པའི་ཡེ་ཤེས་ནི། །ཨ་ཏི་ཡེ་དག་རོ་མཉམ་ཆེན་པོ་ཉིད། །ཡོད་མིན་མེད་མིན་སྟོང་མིན་མི་སྟོང་མིན། །རང་བཞིན་གཤིས་ལ་གཞལ་ན་ཐམས་ཅད་མིན། །མེད་པ་མ་ཡིན་གཉིས་མེད་ཟུང་འཇུག་སྟེ། །རྟག་མིན་ཆད་མིན་སྨྲ་བསམ་བརྗོད་ལས་འདས། །རང་གནས་ཡེ་གནས་རྫོགས་པ་ཆེན་པོ་ནི། །ཀུན་མིན་ཕྱོགས་ཙམ་གཞལ་ན་ཐམས་ཅད་མིན། །བློ་ཡིས་བཀོད་ན་དྲན་བསམ་བརྗོད་ལས་འདས། །རྣལ་མའི་དོན་ལ་ཀུན་མིང་བརྟགས་པ་ཙམ། །ཇི་ལྟར་སྣང་བ་དེ་ཡང་ཝལ་ལེ་བ། །ཚིག་གིས་མ་བསྐྱེད་ལྷ་སྔགས་ལྷུན་གྱིས་གྲུབ། །གང་ལྟར་བསམ་བརྗོད་འདས་པའི་རང་བཞིན་ཏེ། །ཨ་ཏིའི་དགོངས་དོན་ཚུལ་བཞིན་རྟོགས་པར་ཤོག །དེ་ཡང་དབང་གསུམ་པའི་དཔེས་ངོ་སྤྲོད་པའི་བཞི་པའི་དོན་གྱི་ལྷན་ཅིག་སྐྱེས་པའི་ཡེ་ཤེས་ནི། ཨ་ཏིའི་སྒྲ་ལས་ཕུལ་བྱུང་སྟེ་རྒྱུ་ལམ་དུ་བྱས་ནས་འབྲས་བུར་གདོད་ཀྱིས་གྲོལ་མི་དགོས་པར་ཡེ་ནས་བྱ་རྩོལ་དང་བྲལ་ཞིང་རང་ངོ་རྣམ་པར་དག་པས་འཁོར་འདས་རོ་མཉམ་ཆེན་པོ་རྣམ་བཅས་སུ་མ་གྲུབ་པས་ཡོད་པ་མ་ཡིན། རང་བཞིན་གྱི་འོད་གསལ་བས་མེད་པ་མ་ཡིན། བློས་མེད་པར་བརྟགས་པའི་སྟོང་པ་མ་ཡིན། གོ་མྱོང་གིས་ཡོད་པར་བསྒྲུབ་པའི་མི་སྟོང་པ་མ་ཡིན། རང་བཞིན་གྱི་གཤིས་ལ་བློས་ངོས་ནས་གཞལ་ན་ཐམས་ཅད་མིན་པར་འགྲོ་བ་མེད་དོ་སྙམ་པའི་མེད་དགག་ཀྱང་མ་ཡིན་པ་རིག་སྟོང་གཉིས་སུ་མེད་པའི་ཟུང་འཇུག་ཆེན་པོ། དངོས་པོ་མེད་པས་རྟག་པ་མ་ཡིན། རིག་ཆར་ཡོད་པས་ཆད་པ་མ་ཡིན། ཚིག་ཏུ་སྨྲ་བའི་སྒོས་མི་ཐུག་ཅིང་བློ་དང་སྙམ་བྱེད་ཀྱི་བསམ་ངོ་ལས་འདས་པ། རྒྱུ་ཡིས་མ་བསྐྱེད་པས་ངང་ལ་གནས་པ། རྐྱེན་ལས་མ་བྱུང་བས་ཡེ་གནས་ཡོངས་གྲུབ་རང་བཞིན་རྫོགས་པ་ཆེན་པོའི་ལྟ་བ་ནི་སློབ་དཔོན་ཀླུ་སྒྲུབ་ཀྱི་དབུ་མ་ལྟར། དགག་ཕྱོགས་ནས་གཞལ་ཀྱང་། ཁས་ལེན་ཐམས་ཅད་དང་བྲལ་བས་ངོ་བོ་ཉིད་མེད་ཕྱིར་ཀུན་མིན་པ་དང་། བྲམ་ཟེ་ཆེན་པོའི་དོ་ཧ་ལྟར་བསྒྲུབ་ཕྱོགས་ནས་གཞལ་ཡང་ཐ་སྙད་ཀྱིས་མི་ཐུག་པས་ཐམས་ཅད་མིན་པའི་ཕྱིར། རྟོག་གེའི་དཔྱད་བཟོད་དང་། རྟོག་དཔྱོད་ཀྱི་བློ་རྣམ་པ་སྣ་ཚོགས་སུ་བཀོད་ཅིང་བརྟགས་ནའང་། མཐར་ཐུག་དྲན་པ་དང་བསམ་བརྗོད་མེད་པའི་ངང་དུ་དེངས་འགྲོ་བས། རྣལ་མ་སྟེ་མ་བཅོས་པའི་དོན་ལ་ཆོས་ཉིད་ཀུན་ཏུ་འགྲོ་བའི་མིང་སྣ་ཚོགས་བཏགས་པ་ཙམ་ཞིག་སྟེ། ཇི་ལྟར་སྣང་བ་ཐམས་ཅད་འཛིན་མེད་དུ་ཝལ་ལེ། བརྗོད་མེད་དུ་ཕྱལ་ལེར་ཡོད་པས་བདག་སྲས་གཞན་སྲས་ལ་སོགས་པའི་དམིགས་བསམ་གྱི་སྤྲོས་པས་མ་བསྐྱེད་ཀྱང་སྙིང་པོ་དྲན་པ་ཙམ་ལ་ཡོངས་གྲུབ་ཀྱི་ལྷ་སྔགས་ལྷུན་གྱིས་གྲུབ་ཅིང་། དེའི་ངོ་བོ་བསམ་བརྗོད་སྤྲོས་པ་དང་བྲལ་བའི་རང་བཞིན་ལ་སྨོན་པའོ། །གཉིས་པ་ནང་ཀློང་སྡེའི་དོན་ལ་སྨོན་པ་ནི། ༈ ཁྱད་པར་འོད་གསལ་རྡོ་རྗེ་སྙིང་པོའི་དོན། །རང་བཞིན་བབས་ཡིན་སྟོང་པས་ཕན་ཅི་ཡོད། །སོ་མ་ངང་བཞག་མ་བཅོས་རང་ག་མ། །ཐ་མལ་ཤེས་པ་རང་གྲོལ་རྒྱལ་བའི་ལམ། །རང་གིས་རང་གྲོལ་གཉེན་པོས་བཅོས་མ་དགོས། །ཡེ་གྲོལ་བསྐྱར་གཞི་མེད་དེ་གདོད་མའི་ངང་། །ཅེར་གྲོལ་ངོ་བོ་མེད་དེ་བདེན་པས་སྟོང་། །རང་གྲོལ་སྙིང་པོ་མེད་དེ་རང་བཞག་ཉིད། །འགྱུ་གྲོལ་རང་སར་དག་སྟེ་སྐད་ཅིག་མ། །ཤར་གྲོལ་དུས་མཉམ་ཡིན་ཏེ་སྔ་ཕྱི་མེད། །མ་བཅོས་རང་བཞག་རང་བབས་ཀ་དག་ཀློང་། །ངོ་བོ་རང་བཞིན་ཐུགས་རྗེའི་དོན་རྟོགས་ཤོག །ཁྱད་པར་འོད་གསལ་སོགས་ཀྱིས་རང་གི་ངོ་བོ་སྨོས་ཏེ་འཁོར་འདས་ཀྱི་ཆོས་ཐམས་ཅད་ཀུན་ཏུ་བཟང་མོའི་མཁའ་ཀློང་རྣམ་ཐར་གསུམ་ལྡན་གྱི་དབྱིངས་ནས་སངས་རྒྱས་པའི་དོན་ཁོང་དུ་ཆུད་ནས། དེ་གའི་ངང་ལ་རང་བཞིན་གྱིས་གནས་པའི་རང་བབས་ཡིན་ན། བློས་གསར་བྱུང་དུ་བསྒྲུབ་པའི་སྟོང་པས་ཕན་པ་ཅི་ཞིག་ཡོད། སོ་མ་ངང་བཞག །མ་བཅོས། རང་ག་མ་སྟེ། སེམས་ལ་བཅོས་བསླད་མེད་པའི་དོན་བཞི་ལ་ཐ་མལ་གྱི་ཤེས་པའི་སྒྲར་བཏགས་ཏེ། རང་གིས་རང་གྲོལ་བ་སྦྲུལ་གྱི་མདུད་པ་ལྟ་བུ་དེ་ནི་རྒྱལ་བ་ཐམས་ཅད་ཀྱི་ཤུལ་ལམ་ཡིན་པས་རྟོག་དཔྱོད་སྣ་ཚོགས་དང་། སྒྲིམ་གློད་ལ་སོགས་པའི་གཉེན་པོས་བཅོས་མི་དགོས། ཡེ་ནས་གྲོལ་ཚར་བས་བསྐྱར་བའི་གཞི་མེད། ལྟ་སྟངས་གཅིག་གི་ངང་ན་ཅེར་གྱིས་གྲོལ་བས་ངོ་བོ་ཉིད་མེད་དེ་བདེན་པ་ཀུན་རྫོབ་པས་སྟོང་། རང་གྲོལ་ལ་གཉེན་པོ་གཞན་མེད་པས་རང་གར་གཞག །འགྱུ་བ་ངོ་ཤེས་ཙམ་ལ་གྲོལ་བས་རང་དག་སྐད་ཅིག་མ། ཤར་ཙམ་ཉིད་ནས་རང་ངོ་ཤེས་པས་ཆུ་ལ་རི་མོ་བྲིས་པ་ལྟར་ཤར་གྲོལ་དུས་མཉམ་སྔ་ཕྱི་མེད། བློས་སྤུ་ཙམ་མ་བཅོས་པའི་རང་བཞག །རང་བབས་ཀ་ནས་དག་པ་ཞེས་བྱ་སྟེ། ཐོག་མ་ནས་རྣམ་པར་དག་པའི་བྱ་བྲལ་ཀློང་གི་སྡེ་ཆེན་པོ་དེ་ནི། ངོ་བོ་སྟོང་པ། རང་བཞིན་གསལ་བ། ཐུགས་རྗེ་ཀུན་ཁྱབ་སྟེ་ཚོགས་པ་གཅིག་པ་རྣམ་དབྱེ་གསུམ་དུ་དབྱེ་བའི་དོན་རྟོགས་པར་སྨོན་པའོ། །གསུམ་པ་གསང་བ་མན་ངག་གི་སྡེ་ལ་སྨོན་པ་ནི། ༈ ཤེས་རབ་རང་བྱུང་སྒྲོན་མའི་དབྱིངས་རུམ་ནང་། །རྒྱང་ཞགས་སྒྲོན་མས་རིག་གདངས་སྒོ་ཕྱེས་ནས། །དག་དབྱིངས་སྒྲོན་མས་སྣ་ཚོགས་རྒྱན་བཀྲམ་སྟེ། །ཐིག་ལེ་སྟོང་སྒྲོན་ཞི་ཁྲོའི་དཀྱིལ་འཁོར་རྫོགས། །དང་པོ་རྒྱུ་ཡིས་མ་བསྐྱེད་དབྱིངས་ལྔ་ཤར། །བར་དུ་རྐྱེན་གྱིས་མ་བསྐྱེད་ཚོམ་བུར་གྲུབ། །ཐ་མར་ལྟ་བའི་གནས་དག་དབྱིངས་རིག་འདྲེས། །ཡིད་དཔྱོད་དང་བྲལ་མངོན་སུམ་མཐར་ཕྱིན་ཤོག །དེ་ལ་ཤེས་རབ་རང་བྱུང་གི་སྒྲོན་མ་ནི་སོ་སོར་རྟོག་པའི་ཤེས་རབ་ཡིན་ལ། རྒྱང་ཞགས་ཆུའི་སྒྲོན་མ་ནི་འཆར་བའི་སྒོ་མིག་གི་དབང་པོ། དག་པ་དབྱིངས་ཀྱི་སྒྲོན་མ་ནི་འཆང་བའི་ཡུལ་ནམ་མཁའ་རྐྱེན་བྲལ། ཐིག་ལེ་སྟོང་པའི་སྒྲོན་མ་ནི་འཇའ་འོད་ཟླུམ་པོར་འཁྱིལ་བ་སྟེ། དེའི་ནང་དུ་རིག་པ་རྡོ་རྗེ་ལུ་གུ་རྒྱུད་བཅིངས་པས་རིམ་བཞིན་རིག་པ་དེ་བཅུད་དུ་སྨིན་ནས་སྐུ་ཕྱེད་པ་དང་། རྐྱང་པ་དང་མཐར་གྱི་ཞི་ཁྲོའི་སྐུ་ཡོངས་སུ་རྫོགས་པ་སྟེ། དེ་དག་ཀྱང་སྦྱོར་དྲུག་དང་ཕྲ་ཏིག་ལྟར་རླུང་སྦྱོར་ལ་སོགས་པའི་རྒྱུས་མ་བསྐྱེད། མུན་ཁང་དང་བཅུད་ལེན་ལ་སོགས་པའི་རྐྱེན་གྱིས་མ་བསྐྱེད་པར་ཆོས་ཉིད་མངོན་སུམ། ཉམས་གོང་འཕེལ། རིག་པ་ཚད་ཕེབས་ཀྱི་ཚོམ་བུའི་བར་གྲུབ་ནས་མཐར་གྱི་བལྟ་བྱ་ལྟ་བྱེད་ལས་བྱུང་བའི་ཆོས་ཉིད་ཀྱང་ཟད་ནས་དབྱིངས་རིག་འདྲེས་པའི་དགོངས་པ་ལ་སྦྱོར་བ་ཡིད་དཔྱོད་དང་བྲལ་བའི་དོན་ལ་སྨོན་པའོ། །བཅོ་ལྔ་པ་དེ་གསུམ་པོའི་དོན་བསྡུ་བ་ལ་སྨོན་པ་ནི། ༈ ཁྲེགས་ཆོད་ལྟ་བས་སྲིད་ཁུངས་གདར་ཤ་བཅད། །ཐོད་རྒལ་བསྒོམས་པས་སྐུ་གསུམ་རྩལ་རྫོགས་ཏེ། །གདོད་ནས་རྣམ་དག་དང་པོའི་སངས་རྒྱས་ཉིད། །དབྱེར་མེད་ཐིག་ལེའི་གཟུགས་སུ་གང་སྣང་བ། །དེ་ལས་སྤྲོས་ཚེ་སྐུ་གསུམ་སྣོད་བཅུད་དང་། །བསྡུས་ཚེ་སྟོང་ཉིད་སྙིང་རྗེ་ཆོས་ཀྱི་སྐུ། །ཐིག་ལེ་ཉག་གཅིག་ཡིད་ལ་གཡོ་མེད་ཤོག །དེ་ཡང་གཞི་ཀ་དག་ཁྲེགས་ཆོད་ཀྱི་ལྟ་བས་འཁྲུལ་སྣང་སྲིད་པའི་བྱུང་ཁུངས་གདར་ཤ་བཅད། ལམ་ཐོད་རྒལ་བསྒོམས་པས་གདོད་ཀྱི་ཡིད་དཔྱོད་ལ་མ་ལྟོས་པར་སྐུ་གསུམ་ལམ་སྣང་དུ་རྩལ་རྫོགས། གདོད་ནས་རྣམ་པར་དག་པའི་དང་པོའི་སངས་རྒྱས་ཀྱི་ངོ་བོ་ཉིད། ཆོས་ཟད་བློ་འདས་ཆེན་པོའི་རྟོགས་པ་དང་རྣམ་དབྱེར་མེད་པའི་ཐིག་ལེ་ཆེན་པོའི་སྟོང་གཟུགས་སུ་རང་སྣང་ཞིང་། དེའི་ཚེ་སྐྱེ་བ་དང་འཇུག་པའི་ཆོས་གཉིས་ལ་དབང་ཐོབ་པས་ན། སྤྲོས་ཏེ་འཕོ་བ་ཆེན་པོའི་སྐུར་བཞེང་ན་སྐུ་གསུམ་རང་རིག་ལ་རྫོགས་པའི་འོད་ལུས་ཀྱི་ངང་དེ་ཉིད་ལས་སྣང་བ་ཕྱིར་གསལ་དུ་མཆེད་དེ་སྣོད་བཅུད་ཀྱི་རྟེན་དང་བརྟེན་པ་ཆུ་ཟླ་དང་རྨི་ལམ་ལྟ་བུར་གཟིགས་ནས་གཞན་དོན་མཛད་ལ། འཇུག་པའི་ངང་དུ་བསྡུ་ན་འོད་ལུས་དེ་ཉིད་ནམ་མཁའ་ལ་སྤྲིན་དེངས་པ་བཞིན་སོང་ནས་སྟོང་ཉིད་སྙིང་རྗེ་གཉིས་སུ་མེད་པའི་ཆོས་ཀྱི་སྐུ་ཐིག་ལེ་ཉག་གཅིག་གི་ངང་དུ་མི་གཡོ་བའི་དོན་ལ་སྨོན་པའོ། །དེ་ལྟར་ཆོས་ཟད་ཀྱི་རྟོགས་པ་ཀློང་དུ་གྱུར་ནས་ཆོས་ཅན་ཐམས་ཅད་གཞི་ལ་ཐིམ་སྟེ་ལམ་བདེན་མཐའ་དག་སྤངས་ཀྱང་ཉན་རང་གི་བྱང་ཆུབ་ལྟར་ཞི་བ་ཕྱོགས་གཅིག་པ་མ་ཡིན་པས། འབྲས་བུའི་གོ་འཕང་ལ་སྦྱོར་ཚུལ་སྔགས་སྤྱིའི་འགྲོས་ལྟར་བཤད་པའི་ཕྱིར། ༈ སླར་ཡང་རྡོ་རྗེ་ལྟ་བུའི་ཏིང་འཛིན་གྱིས། །གཉིས་སྣང་འཁྲུལ་པའི་བག་ཆགས་ཀུན་བཅོམ་ནས། །རིམ་པ་བཞི་པའི་དོན་གྱི་འོད་གསལ་དང་། །དབྱེར་མེད་ལྷན་ཅིག་སྐྱེས་པ་བདེ་བའི་དངོས། །བདེན་གཉིས་ཟུང་དུ་འཇུག་པའི་ཧེ་རུ་ཀ །མཁའ་དབྱིངས་ཤར་བའི་དབང་པོའི་གཞུ་བཞིན་དུ། །གསལ་མདངས་འོད་ཟེར་ལྔ་ཡི་དྲ་བ་ཅན། །སྟོབས་བཅུ་མི་འཇིགས་བཞི་དང་སོ་སོར་རིག །མ་འདྲེས་བཅོ་བརྒྱད་རྫོགས་པའི་སངས་རྒྱས་དང་། །བླ་མེད་ཡོན་ཏན་རང་བཞིན་གཞལ་མེད་ལས། །རྣམ་ཀུན་མཆོག་ལྡན་ངོ་བོ་ཆོས་ཀྱི་སྐུ། །རྣམ་པ་ལོངས་སྤྱོད་རྫོགས་སྐུ་གྲངས་མེད་ཀྱི། །སྤྲུལ་པའི་སྤྲིན་འཕྲོ་སྐུ་གསུམ་དབྱེར་མེད་ཤོག །དེ་ཡང་འཇུག་པ་ལ་དབང་ཐོབ་ནས་གདོད་མའི་ནང་དབྱིངས་སུ་འཇུག་ཁ་མ་དེར། སླར་ཡང་རྡོ་རྗེ་ལྟ་བུའི་ཏིང་འཛིན་གཞུ་བདུངས་པ་ལྟ་བུས་གཉིས་སུ་སྣང་བ་དང་དེ་ལས་བྱུང་བའི་འཁྲུལ་པའི་བག་ཆགས་ཀྱི་ལྷག་མར་གྱུར་པ་གནས་ངན་ལེན་གྱི་ཤེས་སྒྲིབ་ཕྲ་མོ་ཡན་ཆད་བཅོམ་སྟེ། རིམ་པ་བཞི་པའི་དོན་གྱི་འོད་གསལ་དེ་ཉིད་སློབ་པའི་ཟུང་འཇུག་གི་བསྒྲུབ་གཞི་ཡིན་པས་ངོ་བོ་གཅིག་པའི་ཆ་ནས་དབྱེར་མེད་ལྷན་ཅིག་སྐྱེས་པའི་བདེ་བའི་དངོས་གཞིར་བཤད་ལ། དེ་ཉིད་ལས་མི་སློབ་པའི་ཟུང་འཇུག་ཁ་སྦྱོར་ཡན་ལག་བདུན་ལྡན་གྱི་སྐུར་བཞེངས་པ་ལ་མཁའ་དབྱིངས་ཤར་བའི་དབང་པོའི་གཞུ་སྟེ་ནམ་མཁའ་ལ་འཇའ་ཚོན་ཤར་བའི་དཔེས་མཚོན་ནས་ཆོས་སྐུའི་གདངས་ལོངས་སྤྲུལ་གྱི་རྣམ་པའི་གཟུགས་སྐུ་གཉིས་སུ་གྲུབ་པ་ལ་སྟོབས་བཅུ་དང་། མི་འཇིགས་པ་བཞི་ལ་སོགས་ཡོན་ཏན་མཐའ་དག་རྫོགས་པའི་སངས་རྒྱས་དང་། དེའི་བླ་ན་མེད་པའི་ཡོན་ཏན་གྱི་རང་བཞིན་གཞལ་དུ་མེད་པ་ཉིད་ལས། གཞོན་ནུ་མ་ལ་པྲ་བབ་པའི་སྣང་བ་ལྟར་རྣམ་པ་ཐམས་ཅད་པའི་མཆོག་དང་ལྡན་པའི་ཆོས་ཀྱི་སྐུ་དང་། དེའི་གདངས་རིགས་ལྔ་གང་ཆེན་མཚོ་བཞིན་ལག་གི་རྣམ་པ་ཅན་གྱི་ལོངས་སྤྱོད་རྫོགས་པའི་སྐུ་གྲངས་མེད་པར་ཤར་བ་དང་། དེ་ལས་སྤྲུལ་པའི་སྐུ་བསམ་གྱིས་མི་ཁྱབ་པའི་སྤྲིན་འཕྲོ་བ་ཅན་གྱི་སྐུ་གསུམ་ངོ་བོ་དབྱེར་མེད་ཐོབ་པར་སྨོན་པའོ། །བཅུ་དྲུག་པ་ཕྲིན་ལས་ཀྱི་འཇུག་པ་ལ་སྨོན་པ་ནི། ༈ མཁའ་ཁྱབ་གཟུགས་བཟུང་བགྲང་ཡས་སེམས་ཅན་ལ། །ཇི་སྙེད་ཁམས་དང་བསམ་པའི་དབྱེ་བ་བཞིན། །རང་རང་སྐད་དུ་རྒྱུ་དང་འབྲས་བུ་ཡི། །ཐེག་པ་གཉིས་ལས་བརྩམས་པའི་ཆོས་ཀྱི་ཚུལ། །ལེགས་པར་སྟོན་ལ་སྐྱོ་ངལ་མེད་པར་ཤོག །དེ་ལྟར་རང་དོན་དུ་སྤངས་རྟོགས་མཐར་ཕྱིན་པའི་སངས་རྒྱས་སྐུ་གསུམ་གྱི་བདག་ཉིད་ཅན་དུ་གྲུབ་ནས། ནམ་མཁས་གར་ཁྱབ་ཏུ་རྣམ་སྨིན་གྱི་གཟུགས་སམ་ལུས་བཟུང་བའི་བགྲང་བ་ལས་འདས་པའི་སེམས་ཅན་གྱི་ཁམས་རྒྱ་མཚོ་ལྟ་བུ་ལ་ཇི་སྙེད་དེ་མང་པོའི་སྒྲས་དེ་སྙེད་སོ་སོའི་ཁམས་དང་བསམ་པའི་དབྱེ་བ་ཐ་དད་པ་བཞིན་རང་རང་སོ་སོའི་སྐད་དུ་རྒྱུ་དང་འབྲས་བུའི་ཐེག་པ་གཉིས་ལས་བརྩམས་པའི་ཆོས་ཀྱི་ཚུལ་རྒྱ་མཚོ་ལྟ་བུ་ལེགས་པར་འཆད་ཅིང་ལེགས་པར་སྟོན་པ་ལ་སྐྱོ་དུབ་དང་ངལ་བའི་གནས་མཐའ་དག་བཟོད་པར་ཤོག་ཅིག་པའོ། །བཅུ་བདུན་པ་འདའ་ཁ་མའི་དོན་ལ་སྨོན་པ། ༈ འདི་དང་བར་དོར་མཆོག་གི་གོ་འཕང་ནི། །ངེས་པར་འགྲུབ་པའི་ལམ་བཟང་མ་རྙེད་ན། །ཟབ་ལམ་འཕོ་བའི་རྣལ་འབྱོར་ལ་གོམས་པས། །རྣམ་ཤེས་མཁའ་སྤྱོད་གནས་སུ་འཕོ་བྱས་ཏེ། །བསྐྱེད་རྫོགས་ལམ་གྱི་རིམ་པ་འཕྲོ་འཐུད་ཤོག །དེ་ལ་བསྐྱེད་རིམ་གྱི་སྒོ་ནས་རིག་འཛིན་བཞིའི་ལམ། རྫོགས་རིམ་གྱི་སྒོ་ནས། རྨི་ལམ། སྒྱུ་ལུས། བར་དོ། འོད་གསལ་སོགས་ཀྱི་གདམས་པ་ཉམས་འོག་ཏུ་ཆུད་ནས་ཚེ་འདི་འམ་བར་དོར་མཆོག་གི་གོ་འཕང་བགྲོད་པའི་ལམ་བཟང་གི་དངོས་གྲུབ་མ་བརྙེས་ན། མ་བསྒོམས་པར་འཚང་རྒྱ་བའི་ཟབ་ལམ་འཕོ་བའི་རྣལ་འབྱོར་ལས་འཁོར་བ་དང་འབྲེལ་བའི་སྒོ་བརྒྱད་ཡིག་འབྲུས་བཀག་ལ། གཙུག་ཏོར་རླུང་གི་འཁོར་ལོའི་སྒོ་ཕྱེ་ནས་རྣམ་པར་ཤེས་པ་ཨ་ཡིག་ལ་སོགས་པའི་རྣམ་པས་དག་པ་མཁའ་སྤྱོད་དང་། བདེ་བ་ཅན་དང་། མངོན་པར་དགའ་བ་ལ་སོགས་རང་བཞིན་སྤྲུལ་པའི་ཞིང་དུ་འཕོས་ནས་བསྐྱེད་རྫོགས་ལམ་གྱི་རིམ་པ་འཕྲོ་འཐུད་པར་སྨོན་པའོ། །གསུམ་པ་རྗེས་ཀྱི་རིམ་པ་ལ་གཉིས་ལས། དང་པོ་སྨོན་ལམ་གྱི་གཞུང་དོན་འབྱེད་པའི་བློ་གྲོས་ཐོབ་པར་སྨོན་པ་ནི། ༈ དེ་ལྟར་རྒྱུ་ལམ་འབྲས་བུའི་ཁྱད་པར་ལས། །སྐུ་དང་ཞིང་ཁམས་འཁོར་དང་མཛད་པ་ནི། །ཡོངས་སུ་དག་པའི་ཡེ་ཤེས་ལམ་ཉིད་དུ། །བྱེད་དང་མི་བྱེད་སྔགས་དང་ཕ་རོལ་ཕྱིན། །སོ་སོར་འབྱེད་པའི་བློ་གྲོས་དང་ལྡན་ཤོག །དེ་ལ་གཞུང་འདིའི་ས་བཅད་དྲུག་པ་ཡན་གྱི་རྒྱུ་ལ་ལམ་དུ་བྱས་ནས་འབྲས་བུ་ཕྱི་དུས་ན་སྨིན་པ་སྡེ་སྣོད་གསུམ་གྱི་ལམ་དང་། དེ་མན་ཆད་ཀྱི་འབྲས་བུ་ལ་ལམ་དུ་བྱེད་པ་དཔེར་ན་རང་གི་ལུས་ངག་ཡིད་གསུམ་ལྷའི་སྐུ་གསུང་ཐུགས་ཀྱི་རྣམ་པ་ལམ་བྱེད་དང་། དེ་བཞིན་དུ་ཞིང་ཁམས་ནི་སྣོད་གཞལ་ཡས་ཁང་གི་ལམ་འཁྱེར་དང་། བཅུད་ཀྱི་སེམས་ཅན་ལྷ་དང་ལྷ་མོའི་རང་བཞིན་དུ་སྦྱོར་བ་དག་པའི་སྣོད་བཅུད་དང་། འོད་ཟེར་སྤྲོ་བསྡུས་སངས་རྒྱས་ཀྱི་ཕྲིན་ལས་རྣམ་པ་བཞིའི་མཛད་པ་ལམ་དུ་བྱེད་པ་སྟེ། དེ་བས་ན་སངས་རྒྱས་ཀྱི་སྐུ་དང་ཡེ་ཤེས་ཀྱི་ཁམས་ལ་ད་ལྟ་ནས་ཡོངས་སུ་དག་པའི་ཡེ་ཤེས་ཀྱི་ལམ་དུ་བྱེད་ནུས་པས་ནི་འབྲས་བུ་སྔགས་ཀྱི་ཐེག་པ་དང་། དེ་ལྟར་བྱེད་མི་ནུས་པ་ནི་ཕ་རོལ་ཏུ་ཕྱིན་པ་སྟེ། དེ་གཉིས་སོ་སོར་འབྱེད་ནུས་པའི་བློ་གྲོས་ཀྱི་སྤོབས་པ་ཁྱད་པར་ཅན་ཐོབ་པར་སྨོན་པའོ། །གཉིས་པ་ནི། དམ་པའི་ཆོས་ཀྱི་མཚན་ཉིད་ནི་ཐོག་མཐའ་བར་གསུམ་དུ་དགེ་བ་ཞིག་ཡིན་ལ། དེ་ལྟར་དགེ་བར་བྱེད་པ་བླ་མ་དམ་པ་དགེ་བའི་བཤེས་གཉེན་གཅིག་པུ་ལ་རག་ལས་ན་དུས་འདི་ནས་བཟུང་སྟེ་ཚེ་རབས་ཐམས་ཅད་དུ་བླ་མ་དང་མཇལ་བའི་རྒྱུ་རྐྱེན་རྟེན་འབྲེལ་ཚོགས་པ་དང་། མཇལ་ནས་སྐད་ཅིག་ཀྱང་མི་འབྲལ་བར་ལུས་ངག་གི་ཞབས་ཏོག་དང་། ཟང་ཟིང་གི་འབུལ་བ་དང་། སྒྲུབ་པའི་རྒྱལ་མཚན་འཛུགས་པ་སྟེ་མཉེས་པ་གསུམ་གྱིས་བསྟེན་ནས་ཅི་གསུང་གི་བཀའ་བསྒྲུབ་ཅིང་། ཁྱད་པར་གསུང་གི་བདུད་རྩི་དམ་པའི་ཆོས་ཀྱི་རོ་མྱངས་ནས་དེའི་སྒྲུབ་པ་ལ་ཞུམ་པ་མེད་པའི་སྙིང་སྟོབས་བསྐྱེད་པས་འདི་ཕྱི་གང་རུང་དུ་དངོས་གྲུབ་རྣམ་གཉིས་ཐོབ་ཅིང་། གལ་ཏེ་ཅུང་ཟད་ཁ་འགྱངས་ནའང་བྱེད་པ་རྒྱུ་མཐུན་གྱི་འབྲས་བུ་ལས་སྐྱེ་བ་ཕྱི་མར་ཡང་བླ་མ་མཚན་ལྡན་དང་མཇལ་ནས་རྗེས་སུ་འཛིན་པར་ཡིན་པས་ན། ༈ བདག་ཀྱང་འདི་ནས་ཚེ་རབས་ཐམས་ཅད་དུ། །རྗེ་བཙུན་བླ་མ་མཆོག་དང་མི་འབྲལ་ཞིང་། །དེས་གསུངས་གསུང་གི་བདུད་རྩི་མྱོང་བ་དང་། །དེ་དོན་བསྒྲུབ་ལ་ཞུམ་པ་མེད་པ་ཡི། །ཚེ་རབས་ཀུན་ཏུ་ཡོངས་འཛིན་དམ་པ་དང་། །ནམ་ཡང་འབྲལ་མེད་རྗེས་སུ་འཛིན་གྱུར་ཅིག །ཅེས་སོ། །མདོ་སྔགས་ཐེག་པ་བསམ་ཡས་མཆོག་གི་སྒོ། །ལུང་དང་རྟོགས་པའི་དམ་ཆོས་ལ་འདུ་བས། །འདི་ནི་བསྟན་པ་ཡོངས་རྫོགས་མཛོད་ཁང་ཕྱིར། །འགྲེལ་པ་ཉུང་ངུས་དོན་མཐའ་དཔོགས་པ་མིན། །དེ་ལྟ་ན་ཡང་འདི་ཉིད་ཁ་ཏོན་དུ། །བགྱིད་རྣམས་དོན་ལ་དོགས་པ་འཕྲོ་བའི་ཕྱིར། །ཡི་གེའི་ཕྱི་མོར་དབྱངས་གསལ་བསླབས་པ་བཞིན། །འདི་ཉིད་རིག་པས་དོན་གྱི་ཕྱོགས་མཐོང་འགྱུར། །དེ་ལས་དཔྱིས་ཕྱིན་ཤེས་པར་འདོད་པ་རྣམས། །བདེན་རྣམ་གཉིས་་་་བདེན་གཉིས་ཤིང་རྟ་དང་། རྣམ་མཁྱེན་ཤིང་རྟ།་་་ཀྱི་ཤིང་རྟར་བརྟེན་བྱས་ན། །དེ་གཉིས་འདི་ཡི་འགྲེལ་པར་ཡང་འགྱུར་ལ། །འདི་ཉིད་དེ་ཡི་རྩ་་མདོ་སྔགས་སྨོན་ལམ།་་་བར་ཡང་འགྱུར་རོ། །འདི་ནི་ངེས་པ་དོན་གྱི་སྤྲུལ་པའི་སྐུ། །ཤཱནྟ་པུ་རིར་གཤེགས་ནས་ཁྱིམ་ལག་ལོར། །རང་བྱུང་རྡོ་རྗེ་འཇིགས་མེད་གླིང་པས་བཀོད། །དགེ་བས་འགྲོ་ཀུན་རྣམ་མཁྱེན་ཐོབ་པར་ཤོག །གཞུང་རྩ་བར་ངག་རྒྱུན་མ་དག་པ་ཡི་གེར་འཕེལ་བ་རེ་མང་ལས་དཔྱད་ཞུས་ཡང་དག་བགྱིས་པ་ཡིན་པས་འབྲུ་ལེན་གྱིས་བཤུ་བ་གལ་ཆེའོ།། །།དགེའོ།། དགེའོ།། དགེའོ།། །།