དབེན་པའི་ཡོན་ཏན་ལ་བསྔགས་པའི་རྡོ་རྗེའི་ཐོལ་གླུ་ཚོགས་དྲུག་སྒྱུ་མར་ཤར་བའི་རོལ་མོ།

🚧 This website is under continued development. We appreciate your patience!

Previous Text Back to Volume PageNext Text

Wylie title	dben pa'i yon tan la bsngags pa'i rdo rje'i thol glu tshogs drug sgyu mar shar ba'i rol mo
Location	mkhyen brtse'i bka' 'bum Volume 22, sde tshan 12, Text 101, Pages 618-620 (Folios 137b5 to 138b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dben pa'i yon tan la bsngags pa'i rdo rje'i thol glu tshogs drug sgyu mar shar ba'i rol mo. In 'jam dbyangs mkhyen brtse'i dbang po'i bka' 'bum, Vol. 22: 618-620. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

101 618-620	དབེན་པའི་ཡོན་ཏན་ལ་བསྔགས་པའི་རྡོ་རྗེའི་ཐོལ་གླུ་ཚོགས་དྲུག་སྒྱུ་མར་ཤར་བའི་རོལ་མོ། dben pa'i yon tan la bsngags pa'i rdo rje'i thol glu tshogs drug sgyu mar shar ba'i rol mo Vajra Songs - rdo rje'i glu	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

དབེན་པའི་ཡོན་ཏན་ལ་བསྔགས་བའི་རྡོ་རྗེའི་ཐོལ་གླུ་ཚོགས་དྲུག་སྒྱུ་མར་ཤར་བའི་རོལ་མོ་ཞེས་བྱ་བ། ཨ་ཧོ། ཆོས་ཉིད་སྤྲོས་བྲལ་གཞོན་ནུ་བུམ་སྐུ་ཡི་སྦུབས་ནས། །འོད་གསལ་རྡོ་རྗེའི་རིག་པ་ཅོག་གཞག་གི་ངོ་བོ། །ཁྱད་ཆོས་དྲུག་ལྡན་གཞོན་ནུ་བུམ་སྐུ་ལ་འདུད་དོ། །སྐུ་གསུམ་ལྷུན་གྲུབ་ཆེན་པོར་བྱིན་གྱིས་རང་རློབས་ཤིག །ཕྱི་ལྟར་ཚོགས་དྲུག་བདེན་ཞེན་གཟུང་འཛིན་གྱིས་མ་བཅིངས། །ནང་ལྟར་རིག་པ་བཅོས་བསྒྱུར་སྤང་གཉེན་དང་བྲལ་ཞིང་། །གསང་བ་གློ་བུར་འཁྲུལ་རྟོག་ཆོས་དབྱིངས་སུ་ཞི་བའི། །ཟུང་འཇུག་ཀུན་ཁྱབ་གདོད་མའི་དབེན་གནས་ལ་སྤྲོའོ། །ཡུལ་སྣང་ཉམས་དགའི་བྲག་སྐྱིབས་འདུ་འཛི་དང་བྲལ་ཞིང་། །ཡུལ་ཅན་རིག་སྟོང་རྗེན་པའི་མཛའ་གྲོགས་དང་འཕྲད་པས། །བརྩོན་པ་དོན་ལྡན་ལས་ཀྱི་འཕེན་པ་ཡིས་བསྐྱེད་ནས། །སྨོན་ལམ་རྣམ་པར་དག་པའི་ཞིང་མཆོག་ལ་དེངས་ཤིག །དེ་ན་བསྔགས་པར་འོས་པའི་ཡོན་ཏན་གྱི་རོལ་པ། །སྲ་མཁྲེགས་རྡོ་རྗེའི་བ་གམ་ཁང་བཟང་དུ་གྲུབ་པར། །སྣང་སྟོང་ལྗོན་ཤིང་ཕྲེང་པའི་ཡལ་འདབ་ཀྱིས་དུད་པས། །གདན་གསུམ་ཞི་ཁྲོའི་ཚོམ་བུ་རང་བྱུང་དུ་ཤར་རོ། །ཐོས་ན་མི་མཐུན་བྲལ་བའི་འབབ་ཆུ་ཡི་སྒྲ་སྐད། །གྲགས་སྟོང་བདེན་པ་གཉིས་ཀྱི་རོལ་མོ་རུ་འཁྲོལ་བས། །ལུང་རྟོགས་ཤེས་རབ་པདྨོ་རང་གྲོལ་དུ་བཞད་དེ། །སྣ་ཚོགས་སྤོབས་པའི་གཏེར་མཛོད་ཆོས་ཉིད་དུ་གྲོལ་ལོ། །མར་གད་ཞུན་མའི་མདོག་ལྡན་སྤང་ལྗོངས་ཀྱི་དོར་ར། །ལྷོ་རླུང་དལ་བུར་རྒྱུ་བའི་ཕོ་ཉ་ཡིས་བསྐྱོད་ནས། །ཚོར་སྟོང་ཆོས་སྤྲིན་འཁྲིགས་པས་ཐ་མལ་གྱི་རིག་པ། །ཟུང་འཇུག་ཕྱག་རྒྱ་ཆེན་པོའི་ངལ་བསོ་ལ་སྦྱར་རོ། །ལོ་འདབ་ལང་ཚོས་བཀྲ་བའི་འཁྲི་ཤིང་གི་ངོས་སུ། །རོ་བརྒྱའི་དཔལ་ལ་འགོངས་པའི་འབྲས་བུ་ཡིས་སྤུད་པས། །གསལ་སྟོང་གཞོམ་བྲལ་བདེ་བའི་དགའ་སྟོན་ལ་སྦྱོར་ཞིང་། །འཆི་མེད་བློ་བྲལ་གཉུག་མའི་བཅུད་ལེན་རང་སྦྱིན་ནོ། །སྲབ་འཇམ་ལྕིད་ཀྱིས་སྤངས་པའི་ལྗོན་པ་ཡི་ཡལ་འདབ། །ཚ་གྲང་གདུང་བ་སྐྱོབ་པའི་གདུགས་དཀར་དུ་གྱུར་པས། །རིག་སྟོང་ཕུང་ཁམས་སྐྱེ་མཆེད་གདན་གསུམ་གྱི་གྲོང་དུ། །འོད་གསལ་ཕྱག་རྒྱ་རྣམ་བཞིའི་ངལ་བསོ་རང་བསྟེན་ནོ། །སྙིང་ལ་འབབ་པར་སྨྲ་བའི་གྲགས་སྟོང་གི་འདབ་ཆགས། །ཡིད་འོང་གླུ་དབྱངས་བསྒྱུར་བའི་བདེ་སྟོང་གི་བུང་བ། །གཏད་མེད་གར་ལ་རོལ་པའི་རིག་སྟོང་གི་རི་དྭགས། །རྣམ་གསུམ་སྐྱོ་གྲོགས་ཡུལ་སྣང་གཉུག་མ་རུ་ཕེབས་སོ། །ཀུན་རྫོབ་འཁྲུལ་པའི་ཆོས་ཀུན་སྒྱུ་མ་རུ་ཤར་ཤིང་། །དོན་དམ་ནང་གི་རྩ་མདུད་དྷཱུ་ཏི་རུ་གྲོལ་བའི། །ཡོངས་གྲུབ་རྣལ་འབྱོར་ཚོགས་ཀྱི་བཞུགས་གནས་ལ་བསྔགས་པ། །ངེས་པ་དོན་གྱི་རྡོ་རྗེའི་ཐོལ་གླུ་རུ་བླངས་སོ། །དགེ་བ་དེ་ཡིས་བླ་མེད་བྱང་ཆུབ་ཀྱི་ས་རུ། །མངོན་པར་རྫོགས་སངས་རྒྱས་པ་མ་ཐོབ་ཀྱི་བར་དུ། །ཤིན་ཏུ་དབེན་པའི་གནས་སུ་བག་ཡོད་ཀྱི་བསླབ་པས། །སྒོ་གསུམ་རྒྱུད་སྡོམ་རྣལ་འབྱོར་བརྙེས་པ་རུ་ཤོག་ཅིག ། ༈

[edit]

dben pa'i yon tan la bsngags pa'i rdo rje'i thol glu tshogs drug sgyu mar shar ba'i rol mo/__ dben pa'i yon tan la bsngags ba'i rdo rje'i thol glu tshogs drug sgyu mar shar ba'i rol mo zhes bya ba/__a ho/__chos nyid spros bral gzhon nu bum sku yi sbubs nas/__/'od gsal rdo rje'i rig pa cog gzhag gi ngo bo/__/khyad chos drug ldan gzhon nu bum sku la 'dud do/__/sku gsum lhun grub chen por byin gyis rang rlobs shig__/phyi ltar tshogs drug bden zhen gzung 'dzin gyis ma bcings/__/nang ltar rig pa bcos bsgyur spang gnyen dang bral zhing /__/gsang ba glo bur 'khrul rtog chos dbyings su zhi ba'i/__/zung 'jug kun khyab gdod ma'i dben gnas la spro'o/__/yul snang nyams dga'i brag skyibs 'du 'dzi dang bral zhing /__/yul can rig stong rjen pa'i mdza' grogs dang 'phrad pas/__/brtson pa don ldan las kyi 'phen pa yis bskyed nas/__/smon lam rnam par dag pa'i zhing mchog la dengs shig__/de na bsngags par 'os pa'i yon tan gyi rol pa/__/sra mkhregs rdo rje'i ba gam khang bzang du grub par/__/snang stong ljon shing phreng pa'i yal 'dab kyis dud pas/__/gdan gsum zhi khro'i tshom bu rang byung du shar ro/__/thos na mi mthun bral ba'i 'bab chu yi sgra skad/__/grags stong bden pa gnyis kyi rol mo ru 'khrol bas/__/lung rtogs shes rab pad+mo rang grol du bzhad de/__/sna tshogs spobs pa'i gter mdzod chos nyid du grol lo/__/mar gad zhun ma'i mdog ldan spang ljongs kyi dor ra/__/lho rlung dal bur rgyu ba'i pho nya yis bskyod nas/__/tshor stong chos sprin 'khrigs pas tha mal gyi rig pa/__/zung 'jug phyag rgya chen po'i ngal bso la sbyar ro/__/lo 'dab lang tshos bkra ba'i 'khri shing gi ngos su/__/ro brgya'i dpal la 'gongs pa'i 'bras bu yis spud pas/__/gsal stong gzhom bral bde ba'i dga' ston la sbyor zhing /__/'chi med blo bral gnyug ma'i bcud len rang sbyin no/__/srab 'jam lcid kyis spangs pa'i ljon pa yi yal 'dab/__/tsha grang gdung ba skyob pa'i gdugs dkar du gyur pas/__/rig stong phung khams skye mched gdan gsum gyi grong du/_/'od gsal phyag rgya rnam bzhi'i ngal bso rang bsten no/__/snying la 'bab par smra ba'i grags stong gi 'dab chags/__/yid 'ong glu dbyangs bsgyur ba'i bde stong gi bung ba/__/gtad med gar la rol pa'i rig stong gi ri dwags/__/rnam gsum skyo grogs yul snang gnyug ma ru phebs so/__/kun rdzob 'khrul pa'i chos kun sgyu ma ru shar shing /__/don dam nang gi rtsa mdud d+hU ti ru grol ba'i/__/yongs grub rnal 'byor tshogs kyi bzhugs gnas la bsngags pa/__/nges pa don gyi rdo rje'i thol glu ru blangs so/__/dge ba de yis bla med byang chub kyi sa ru/__/mngon par rdzogs sangs rgyas pa ma thob kyi bar du/__/shin tu dben pa'i gnas su bag yod kyi bslab pas/__/sgo gsum rgyud sdom rnal 'byor brnyes pa ru shog cig__/__!_