ཟབ་དོན་བསྡུས་པའི་རྡོ་རྗེའི་ཐོལ་གླུ་ངེས་དོན་ཐེམ་སྐས།

🚧 This website is under continued development. We appreciate your patience!

Previous Text Back to Volume PageNext Text

Wylie title	zab don bsdus pa'i rdo rje'i thol glu nges don them skas
Location	mkhyen brtse'i bka' 'bum Volume 22, sde tshan 12, Text 88, Pages 582-585 (Folios 119b1 to 121a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. zab don bsdus pa'i rdo rje'i thol glu nges don them skas. In 'jam dbyangs mkhyen brtse'i dbang po'i bka' 'bum, Vol. 22: 582-585. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

88 582-585	ཟབ་དོན་བསྡུས་པའི་རྡོ་རྗེའི་ཐོལ་གླུ་ངེས་དོན་ཐེམ་སྐས། zab don bsdus pa'i rdo rje'i thol glu nges don them skas Vajra Songs - rdo rje'i glu	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཟབ་དོན་བསྡུས་པའི་རྡོ་རྗེའི་ཐོལ་གླུ་ངེས་དོན་ཐེམ་སྐས་ཞེས་བྱ་བ། ཨེ་མ་ཧོ། །གཟུང་འཛིན་ལས་འདས་གདོད་མའི་དེ་བཞིན་ཉིད། །སྤྲོས་པ་ཀུན་བྲལ་འོད་གསལ་གཉུག་མའི་གཤིས། །འགྱུར་མེད་བདེ་བ་ཆེན་པོས་རབ་འཁྱུད་པའི། །རྣམ་པ་ཀུན་གྱི་མཆོག་ལྡན་སྙིང་གར་རོལ། །སྦས་དོན་གསང་བའི་དེ་ཉིད་སྟོན་པ་ཡི། །གྲུབ་པའི་རིག་འཛིན་རྣམས་ཀྱི་དགོངས་པའི་བཅུད། །རབ་མཐོང་མིན་ཀྱང་གང་ཤར་རྡོ་རྗེའི་གླུས། །ཟབ་མོ་དགའ་བའི་ཆུ་རྒྱུན་དེང་འདིར་འབེབས། །རྡོ་རྗེ་ལུས་ཀྱི་གནས་ལུགས་ངེས་པའི་དོན། །ཀུན་ཏུ་རྟོགས་ནས་གནད་དུ་བསྣུན་པ་ཡིས། །བདེ་སྟོང་ཡེ་ཤེས་སྐྱེ་བར་རབ་གཟིགས་ནས། །ཐབས་ལམ་ཟབ་མོ་རྫོགས་པའི་རིམ་པ་བསྟན། །དེ་ལ་བཀོད་པ་རྩ་དང་གཡོ་བ་རླུང་། །ཐིག་ལེ་བྱང་ཆུབ་སེམས་མཆོག་རྣམ་པ་གསུམ། །ཆགས་གནས་འཇིག་གསུམ་མཛད་པ་རྫོགས་པའི་གར། །རང་བཞིན་ཡེ་ཤེས་ཆེན་པོའི་རྟེན་དུ་གནས། །རྩ་གསུམ་འཁོར་ལོ་རྣམ་པ་བཞི་ལྡན་པའི། །མདུད་པ་ཀུན་དང་ཐབས་ཤེས་མ་ནིང་གི། །ཡི་གེ་གསུམ་དང་སྲོག་རྩོལ་མཉམ་པའི་རླུང་། །དེ་བཞིན་བདེ་སྟོང་འཁྲིལ་སྦྱོར་ཐིག་ལེ་སྟེ། །གསུམ་ཚན་རིམ་པས་བདེ་གསལ་མི་རྟོག་གི། །ཆོས་ཉིད་བསྐྱེད་དང་སྐུ་གསུམ་རྟེན་འབྲེལ་འགྲུབ། །རྡོ་རྗེའི་ཆོས་དང་ལྡན་པ་རྩ་ཡི་ལམ། །གཅུན་ཅིང་འཁྲུལ་འཁོར་བྱ་བ་རྩ་ཡི་གནད། །སྲོག་རྩོལ་བུམ་པར་བསྐྱིལ་བ་རླུང་གི་ལམ། །སྦྱོར་བ་བཞི་ལྡན་རླུང་གི་གནད་མཆོག་ཡིན། །ཨ་ཧཾ་ཞུ་བདེའི་འགྲོས་འདེད་ཐིག་ལེའི་ལམ། །འཁོར་ལོ་བཞི་རུ་བཅིངས་པ་ཐིག་ལེའི་གནད། །བདེ་སྟོང་ལྷ་སྐུར་ལྟ་བ་སྒྱུ་ལུས་ལམ། །ཞེན་མེད་སྤྲུལ་པར་ལྡང་བ་སྒྱུ་ལུས་གནད། །ཉལ་ཁར་འདུན་པས་གཅུར་བ་རྨི་ལམ་ལམ། །ཉལ་སློང་སྐྱེ་མེད་ལ་གཞོལ་རྨི་ལམ་གནད། །སྣོད་བཅུད་དྭངས་མར་བསྡུ་བ་འོད་གསལ་ལམ། །རླུང་སེམས་མཉམ་པར་འཆིང་བ་འོད་གསལ་གནད། །ཆོས་ཉིད་རྣམ་གསུམ་དྲན་པ་བར་དོའི་ལམ། །རྟག་ཏུ་འཁྲུལ་པར་ལྟ་བ་བར་དོའི་གནད། །ཚངས་བུག་དྭངས་མ་འཕོ་བ་འཕོ་བའི་ལམ། །རླུང་སེམས་བསྡུ་ཞིང་བཀག་པ་འཕོ་བའི་གནད། །དེ་ལྟར་རྩ་བ་ཡན་ལག་རིམ་པ་ཡིས། །ཟབ་མོ་རྫོགས་པའི་དོན་རྣམས་བསྡུས་པ་སྟེ། །གཞན་ལས་རླུང་ལ་གནད་དུ་བསྣུན་པ་ཡིས། །གསལ་བའི་ཉམས་དང་ཐིག་ལེ་བདེ་བ་ཉིད། །འཐོབ་བྱེད་སོ་སོར་དབྱེ་བས་རབ་ཏུ་བསྟན། །མི་རྟོག་མཚན་མ་མེད་པའི་རྫོགས་རིམ་ནི། །གདོད་ནས་མ་སྐྱེས་མཁའ་འདྲའི་འོད་གསལ་དོན། །ཆོས་དང་གང་ཟག་བདག་གིས་མ་བཅིངས་པ། །སྟོང་པ་ཉིད་ཀྱི་མཆོག་ཏུ་རྣམ་པར་གནས། །དེ་ཕྱིར་ཕྱག་རྒྱ་ཆེན་པོ་བློ་ཡུལ་ལས། །འདས་པའི་ཡིད་ལ་མི་བྱེད་སྙིང་པོའི་དོན། །རབ་ཀྱིས་དམ་པས་ངོ་སྤྲད་དེ་མ་ཐག །གཅེར་མཐོང་སྐྱེས་ནས་རང་བཞིན་ངང་གིས་གྲོལ། །གཞན་དག་མྱོང་བ་གང་སྐྱེས་དེར་བསྟུན་ནས། །རླུང་སེམས་ཐིག་ལེའི་གནད་ཀྱིས་གཅུན་པ་ཡིས། །བརྟེན་པ་འོད་གསལ་བསམ་མི་ཁྱབ་པར་འཆར། །དེ་སྐད་དུ་ཡང་རྗེ་བཙུན་ཏེ་ལོ་པས། །བློ་དམན་སྐྱེ་བོ་དོན་ལ་མི་གནས་ན། །རླུང་གི་གནད་བཟུང་རིག་པ་གཅུད་ལ་བོར། །ལྟ་སྟངས་དང་ནི་སེམས་འཛིན་དུ་མ་ཡིས། །རིག་པ་ངང་ལ་མི་གནས་བར་དུ་གཅུན། །དཔེར་ན་ནམ་མཁའི་དཀྱིལ་ནི་བརྟག་བྱས་ན། །མཐའ་དང་དབུས་སུ་འཛིན་པ་འགགས་པར་འགྱུར། །དེ་བཞིན་སེམས་ཀྱིས་སེམས་ལ་བརྟག་བྱས་ན། །རྣམ་རྟོག་ཚོགས་འགགས་ཐོགས་མེད་གནས་འགྱུར་ནས། །བླ་མེད་བྱང་ཆུབ་སེམས་ཀྱི་རང་བཞིན་མཐོང་། །ཞེས་གསུངས་དེ་ཕྱིར་ཟབ་མོའི་གསང་ལམ་གྱི། །ཐབས་ལ་བརྟེན་ནས་གནད་ཀྱིས་གཅུན་པ་ཡིས། །བརྩོན་འགྲུས་དག་དང་དབང་པོའི་བགོ་སྐལ་ལས། །དུས་གསུམ་སྒྲོལ་བ་སྙིང་པོའི་དོན་མཆོག་གོ །རིག་འཛིན་ཌཱ་ཀིའི་ཞལ་ལུང་ངེས་པའི་དོན། །རང་གི་རྒྱུད་ལ་མྱོང་བ་མ་སྐྱེས་ཤིང་། །མོས་པས་སྤྱོད་པའི་གྲལ་མཐར་ལྷུང་གྱུར་ཕྱིར། །འདི་ལྟར་སྨྲ་བར་འོས་མིན་དེ་ལྟ་ནའང་། །གང་ཤར་རྡོ་རྗེའི་རོལ་མོར་འཁྲོལ་བ་ལ། །ཉེས་པའི་ཚོགས་ཀུན་རྩ་གསུམ་དཀྱིལ་འཁོར་ལ། །མི་འཆབ་མཐོལ་ཞིང་དགེ་ཚོགས་གང་མཆིས་དེས། །འགྲོ་ཀུན་ཕྱག་རྒྱ་ཆེ་ལ་གནས་པར་ཤོག། །། ༈

[edit]

zab don bsdus pa'i rdo rje'i thol glu nges don them skas/__ zab don bsdus pa'i rdo rje'i thol glu nges don them skas zhes bya ba/__e ma ho/__/gzung 'dzin las 'das gdod ma'i de bzhin nyid/__/spros pa kun bral 'od gsal gnyug ma'i gshis/__/'gyur med bde ba chen pos rab 'khyud pa'i/__/rnam pa kun gyi mchog ldan snying gar rol/__/sbas don gsang ba'i de nyid ston pa yi/__/grub pa'i rig 'dzin rnams kyi dgongs pa'i bcud/__/rab mthong min kyang gang shar rdo rje'i glus/__/zab mo dga' ba'i chu rgyun deng 'dir 'bebs/__/rdo rje lus kyi gnas lugs nges pa'i don/__/kun tu rtogs nas gnad du bsnun pa yis/__/bde stong ye shes skye bar rab gzigs nas/__/thabs lam zab mo rdzogs pa'i rim pa bstan/__/de la bkod pa rtsa dang g.yo ba rlung /__/thig le byang chub sems mchog rnam pa gsum/__/chags gnas 'jig gsum mdzad pa rdzogs pa'i gar/__/rang bzhin ye shes chen po'i rten du gnas/__/rtsa gsum 'khor lo rnam pa bzhi ldan pa'i/__/mdud pa kun dang thabs shes ma ning gi/__/yi ge gsum dang srog rtsol mnyam pa'i rlung /__/de bzhin bde stong 'khril sbyor thig le ste/__/gsum tshan rim pas bde gsal mi rtog gi/__/chos nyid bskyed dang sku gsum rten 'brel 'grub/__/rdo rje'i chos dang ldan pa rtsa yi lam/__/gcun cing 'khrul 'khor bya ba rtsa yi gnad/__/srog rtsol bum par bskyil ba rlung gi lam/__/sbyor ba bzhi ldan rlung gi gnad mchog yin/__/a haM zhu bde'i 'gros 'ded thig le'i lam/__/'khor lo bzhi ru bcings pa thig le'i gnad/__/bde stong lha skur lta ba sgyu lus lam/__/zhen med sprul par ldang ba sgyu lus gnad/__/nyal khar 'dun pas gcur ba rmi lam lam/__/nyal slong skye med la gzhol rmi lam gnad/__/snod bcud dwangs mar bsdu ba 'od gsal lam/__/rlung sems mnyam par 'ching ba 'od gsal gnad/__/chos nyid rnam gsum dran pa bar do'i lam/__/rtag tu 'khrul par lta ba bar do'i gnad/__/tshangs bug dwangs ma 'pho ba 'pho ba'i lam/__/rlung sems bsdu zhing bkag pa 'pho ba'i gnad/__/de ltar rtsa ba yan lag rim pa yis/__/zab mo rdzogs pa'i don rnams bsdus pa ste/__/gzhan las rlung la gnad du bsnun pa yis/__/gsal ba'i nyams dang thig le bde ba nyid/__/'thob byed so sor dbye bas rab tu bstan/__/mi rtog mtshan ma med pa'i rdzogs rim ni/__/gdod nas ma skyes mkha' 'dra'i 'od gsal don/__/chos dang gang zag bdag gis ma bcings pa/__/stong pa nyid kyi mchog tu rnam par gnas/__/de phyir phyag rgya chen po blo yul las/__/'das pa'i yid la mi byed snying po'i don/__/rab kyis dam pas ngo sprad de ma thag__/gcer mthong skyes nas rang bzhin ngang gis grol/__/gzhan dag myong ba gang skyes der bstun nas/__/rlung sems thig le'i gnad kyis gcun pa yis/__/brten pa 'od gsal bsam mi khyab par 'char/__/de skad du yang rje btsun te lo pas/__/blo dman skye bo don la mi gnas na/__/rlung gi gnad bzung rig pa gcud la bor/__/lta stangs dang ni sems 'dzin du ma yis/__/rig pa ngang la mi gnas bar du gcun/__/dper na nam mkha'i dkyil ni brtag byas na/__/mtha' dang dbus su 'dzin pa 'gags par 'gyur/__/de bzhin sems kyis sems la brtag byas na/__/rnam rtog tshogs 'gags thogs med gnas 'gyur nas/__/bla med byang chub sems kyi rang bzhin mthong /__/zhes gsungs de phyir zab mo'i gsang lam gyi/__/thabs la brten nas gnad kyis gcun pa yis/__/brtson 'grus dag dang dbang po'i bgo skal las/__/dus gsum sgrol ba snying po'i don mchog go__/rig 'dzin DA ki'i zhal lung nges pa'i don/__/rang gi rgyud la myong ba ma skyes shing /__/mos pas spyod pa'i gral mthar lhung gyur phyir/__/'di ltar smra bar 'os min de lta na'ang /__/gang shar rdo rje'i rol mor 'khrol ba la/__/nyes pa'i tshogs kun rtsa gsum dkyil 'khor la/__/mi 'chab mthol zhing dge tshogs gang mchis des/__/'gro kun phyag rgya che la gnas par shog/__//__!_